ᠦᠷ ᠦᠨ ᠲᠤᠶᠠᠭᠠ III – ᠪ᠂ ᠷᠢᠨᠴᠢᠨ - ᠭᠤᠷᠪᠠᠳᠤᠭᠠᠷ ᠲᠡᠪᠲᠡᠷ <ᠪᠠᠢᠯᠳᠤᠵᠤ ᠣᠯᠣᠭᠰᠠᠨ ᠡᠬᠡ ᠣᠷᠣᠨ>- ᠬᠣᠷᠢᠨ ᠭᠤᠷᠪᠠ(1) Үүрийн туяа III – Б ᠂ Ренчин Гуравдугаар дэвтэр "Баялдаж олсон эх орон"-23~(1)
140ᠬᠣᠷᠢᠨ ᠭᠤᠷᠪᠠ
ᠲᠥᠷᠥ ᠳ᠋ᠡᠭᠡᠨ ᠨᠡᠷᠡᠲᠡᠨ ᠨᠦᠭᠦᠳ ᠲᠦᠮᠡᠨ ᠳ᠋ᠡᠭᠡᠨ ᠬᠠᠢᠷᠠᠲᠠᠨ ᠨᠤᠭᠤᠳ – 1
ᠲᠦᠮᠡᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠬᠠᠢᠷᠠᠲᠠᠨ ᠨᠤᠭᠤᠳ
Иван Вазов*
Поприща за славен труд·
Да работим! Имаме широки
ᠠᠢᠮᠠᠭ ᠠ᠋ᠴᠠ ᠬᠣᠲᠠ ᠣᠷᠣᠬᠤ ᠵᠠᠮ ᠳ᠋ᠤ᠌᠂ ᠴᠠᠭᠠᠰᠢ ᠨᠠᠭᠠᠰᠢ ᠣᠯᠠᠨ ᠮᠠᠰᠢᠨᠡ ᠴᠤᠪᠤᠭᠰᠠᠨ᠂ ᠬᠥᠯ ᠶᠡᠬᠡᠲᠡᠢ ᠵᠠᠰᠠᠮᠠᠯ ᠵᠠᠮ ᠲᠠᠢ ᠨᠡᠢᠯᠡᠵᠡᠢ᠃ ᠬᠣᠯᠪᠣᠭᠠᠲᠤ ᠤᠯᠤᠰ ᠲᠠᠢ ᠵᠠᠬᠠ ᠨᠡᠢᠯᠡᠭᠰᠡᠨ ᠰᠦᠬᠡᠪᠠᠭᠠᠲᠤᠷ ᠬᠣᠲᠠ ᠠ᠋ᠴᠠ ᠤᠯᠠᠭᠠᠪᠠᠭᠠᠲᠤᠷ ᠣᠷᠣᠵᠤ ᠶᠠᠪᠤᠭᠠ᠂ ᠡᠯᠳᠡᠪ ᠪᠠᠷᠠᠭᠠ ᠠᠴᠢᠭᠰᠠᠨ ᠮᠠᠰᠢᠨᠡ ᠲᠡᠷᠭᠡ ᠭᠦᠢᠴᠡᠵᠦ᠂ ᠤᠷᠲᠤ ᠨᠢ ᠣᠷᠣᠭᠰᠠᠭᠠᠷ ᠶᠠᠪᠤᠭᠰᠠᠨ ᠵᠢᠯᠣᠭᠣᠴᠢ᠂ ᠳᠡᠷᠭᠡᠳᠡ ᠪᠡᠨ ᠺᠠᠪᠢᠨ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠰᠠᠭᠤᠵᠤ ᠶᠠᠪᠤᠭᠰᠠᠨ ᠰᠢᠷᠴᠢᠨ ᠳ᠋ᠦ᠍᠂
— ᠡᠨᠡ ᠵᠠᠰᠠᠮᠠᠯ ᠵᠠᠮ ᠡᠳᠦᠷ ᠰᠥᠨᠢ ᠶ᠋ᠢᠨ ᠳᠥᠷᠪᠡᠨ ᠴᠠᠭ ᠲᠤ᠌ ᠮᠠᠰᠢᠨᠡ ᠲᠠᠰᠤᠷᠠᠳᠠᠭ ᠦᠭᠡᠢ ᠶᠡᠬᠡ ᠬᠥᠯ ᠲᠡᠢ ᠵᠠᠮ ᠰᠢᠦ᠃ ᠲᠠ ᠬᠠᠷᠠᠬᠤ ᠦᠭᠡᠢ ᠤᠤ? ᠬᠡᠴᠢᠨᠡᠨ ᠣᠯᠠᠨ ᠮᠠᠰᠢᠨᠡ ᠬᠣᠲᠠ ᠣᠷᠣᠵᠤ ᠶᠠᠪᠤᠨᠠ᠃ ᠴᠥᠮ ᠬᠣᠯᠪᠣᠭᠠᠲᠤ ᠤᠯᠤᠰ ᠠ᠋ᠴᠠ ᠢᠷᠡᠭᠦᠯᠦᠭᠰᠡᠨ ᠪᠠᠷᠠᠭᠠ ᠠᠴᠢᠭᠠᠰᠤᠲᠠᠢ᠃ ᠲᠡᠢᠨ ᠬᠢᠵᠦ ᠪᠠᠢᠭᠠ ᠴᠠᠭ ᠪᠣᠯᠪᠠᠴᠤ᠂ ᠬᠣᠯᠪᠣᠭᠠᠲᠤ ᠤᠯᠤᠰ᠂ ᠪᠢᠳᠡᠨ ᠢ᠋ ᠮᠥᠨ ᠪᠠᠷᠠᠭᠠ ᠪᠠᠷ ᠲᠠᠰᠤᠷᠠᠯ ᠦᠭᠡᠢ ᠬᠠᠩᠭᠠᠭᠰᠠᠭᠠᠷ ᠪᠠᠢᠭᠠ ᠨᠢ᠂ ᠠᠤᠭᠠ ᠴᠢᠳᠠᠯ ᠲᠠᠢ ᠤᠯᠤᠰ ᠶᠤᠮ ᠳᠠ ᠭᠡᠵᠦ ᠪᠠᠬᠠᠳᠤᠨ ᠬᠡᠯᠡᠵᠡᠢ᠃
ᠴᠠᠭᠠᠨ ᠡᠷᠭᠢ ᠡᠴᠡ ᠴᠤᠪᠤᠵᠤ ᠶᠠᠪᠤᠭᠠ ᠮᠠᠰᠢᠨᠡ ᠶ᠋ᠢᠨ ᠥᠭᠡᠳᠡ ᠡᠴᠡ ᠪᠠᠭᠯᠠᠭᠠ ᠲᠠᠢ ᠨᠣᠣᠰᠣ᠂ ᠠᠷᠠᠰᠤ ᠰᠢᠷᠢ᠂ ᠵᠡᠭᠡᠷᠡ ᠭᠠᠬᠠᠢ ᠶ᠋ᠢᠨ ᠮᠢᠬᠠ᠂ ᠪᠠᠰᠠ ᠪᠷᠸᠽᠸᠨᠳᠡᠨ ᠪᠦᠲᠡᠭᠡᠯᠭᠡ ᠶ᠋ᠢᠨ ᠳᠣᠣᠷᠠ ᠴᠣᠬᠣᠮ ᠶᠠᠭᠤ ᠪᠠᠢᠭᠠ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ᠂ ᠶᠡᠬᠡ ᠶᠠᠭᠤᠮᠠ ᠠᠴᠢᠭᠰᠠᠨ ᠭᠤᠷᠪᠠᠨ ᠲᠤᠨ᠂ ᠲᠠᠪᠤᠨ ᠲᠤᠨ ᠤ᠋ ᠠᠴᠢᠶᠠᠨ ᠤ᠋ ᠮᠠᠰᠢᠨᠡ ᠴᠤᠪᠤᠵᠤ ᠶᠠᠪᠤᠭᠠ ᠶ᠋ᠢ ᠰᠢᠷᠴᠢᠨ ᠦ᠌ ᠵᠢᠯᠣᠭᠣᠴᠢ᠄
— ᠡᠨᠡ ᠪᠣᠯ ᠮᠠᠨ ᠤ᠋ ᠤᠯᠤᠰ ᠠ᠋ᠴᠠ ᠵᠥᠪᠯᠡᠯᠲᠦ ᠤᠯᠤᠰ ᠲᠤ᠌ ᠨᠡᠢᠯᠡᠭᠦᠯᠵᠦ ᠪᠠᠢᠭᠠ ᠵᠦᠢᠯ᠃ ᠡᠭᠦᠨ ᠦ᠌ ᠳᠣᠲᠣᠷᠠ᠂ ᠮᠠᠨ ᠤ᠋ ᠠᠷᠠᠳ ᠲᠦᠮᠡᠨ ᠡᠴᠡ ᠹᠷᠣᠨᠲ ᠤ᠋ᠨ ᠬᠢᠨ ᠳ᠋ᠦ᠍ ᠪᠡᠯᠡᠭᠯᠡᠭᠰᠡᠨ ᠪᠡᠯᠡᠭ ᠦ᠋ᠨ ᠵᠦᠢᠯ ᠪᠠᠰᠠ ᠶᠠᠪᠤᠵᠤ ᠪᠠᠢᠭᠠ ᠳᠠ ᠭᠡᠵᠦ ᠬᠡᠯᠡᠭᠡᠳ ᠪᠠᠬᠠᠨ ᠶᠠᠪᠤᠰᠬᠢᠭᠡᠳ᠂ ᠵᠠ᠂ ᠣᠳᠣ ᠪᠢᠳᠡ ᠪᠠᠭᠠᠲᠤᠷ ᠬᠣᠲᠠ ᠳ᠋ᠤ᠌ ᠬᠦᠷᠦᠯᠡ ᠳᠡ᠃ ᠬᠠᠭᠤᠴᠢᠨ ᠬᠦᠷᠢᠶᠡ ᠭᠡᠳᠡᠭ ᠴᠣᠬᠣᠮ ᠶᠠᠮᠠᠷ ᠪᠠᠢᠭᠰᠠᠨ ᠢ᠋ ᠪᠤᠤ ᠮᠡᠳᠡ᠃ ᠤᠯᠠᠭᠠᠨᠪᠠᠭᠠᠲᠤᠷ ᠯᠠ ᠪᠣᠯᠪᠠᠯ᠂ ᠮᠢᠨᠦ ᠨᠢᠳᠦᠨ ᠦ᠌ ᠡᠮᠦᠨᠡ ᠵᠢᠯ ᠢᠷᠡᠬᠦ ᠳᠣᠳᠣᠮ ᠦᠰᠦᠨ ᠬᠥᠭᠵᠢᠵᠦ᠂ ᠶᠡᠬᠡ ᠯᠡ ᠰᠠᠢᠬᠠᠨ ᠬᠣᠲᠠ ᠪᠣᠯᠵᠤ ᠪᠠᠢᠭᠠ ᠶᠤᠮ ᠰᠢᠦ᠃ ᠮᠢᠨᠦ ᠪᠣᠳᠣᠬᠤ ᠳ᠋ᠤ᠌ ᠲᠠ᠂ ᠬᠦᠷᠢᠶᠡ ᠪᠠᠢᠬᠤ ᠴᠠᠭ ᠠ᠋ᠴᠠ ᠨᠢ ᠬᠣᠢᠰᠢ ᠬᠣᠲᠠ ᠣᠷᠣᠵᠤ ᠦᠵᠡᠭᠡ ᠦᠭᠡᠢ ᠪᠣᠯᠪᠠᠯ ᠯᠠᠪ ᠬᠣᠲᠠ ᠶ᠋ᠢ ᠲᠠᠨᠢᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠬᠠ ᠭᠡᠵᠦ ᠬᠡᠯᠡᠵᠡᠢ᠃
ᠰᠢᠷᠴᠢᠨ ᠦ᠌ ᠰᠡᠳᠬᠢᠯ ᠨᠢ ᠶᠡᠬᠡ ᠯᠡ ᠬᠥᠳᠡᠯᠵᠦ᠂ ᠭᠠᠵᠠᠷ ᠤ᠋ᠨ ᠲᠣᠢᠮᠣ ᠪᠠᠢᠳᠠᠯ ᠢ᠋ ᠲᠠᠨᠢᠬᠤ ᠮᠥᠷᠲᠡᠭᠡᠨ᠂ ᠪᠠᠷᠢᠯᠭᠠ ᠪᠠᠢᠰᠢᠩ ᠪᠣᠰᠴᠤ ᠲᠠᠨᠢᠭᠳᠠᠰᠢ ᠦᠭᠡᠢ ᠪᠣᠯᠤᠭᠰᠠᠨ ᠭᠠᠵᠠᠷ ᠢ᠋ ᠶᠡᠬᠡ ᠯᠡ ᠰᠣᠨᠢᠷᠬᠠᠨ ᠬᠠᠷᠠᠵᠤ᠂ ᠵᠠ᠂ ᠣᠯᠠᠨᠠ ᠶ᠋ᠢᠨ ᠬᠣᠶᠠᠳᠤᠭᠠᠷ ᠣᠨ ᠤ᠋ ᠵᠤᠨ ᠤ᠋ ᠡᠬᠢᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠠᠢ᠍ᠮᠠᠨ ᠤ᠋ ᠴᠠᠭᠠᠨ ᠡᠳᠦᠷ᠂ ᠡᠨᠡ ᠳᠡᠨᠵᠢ ᠶ᠋ᠢᠨ ᠡᠮᠦᠨᠡᠭᠦᠷ ᠪᠢᠳᠡᠨ ᠢ᠋ ᠬᠣᠪᠲᠣ ᠬᠣᠲᠠ ᠶ᠋ᠢ ᠪᠠᠢᠯᠳᠤᠬᠤ ᠭᠡᠵᠦ ᠳᠠᠮᠳᠢᠨᠰᠦ᠋ᠷᠦᠩ᠂ ᠮᠠᠭᠰᠤᠷᠵᠠᠪ ᠬᠣᠶᠠᠷ ᠵᠠᠩᠵᠤᠨ ᠲᠠᠢ ᠶᠠᠪᠤᠬᠤ ᠳ᠋ᠤ᠌᠂ ᠳᠡᠨᠵᠢ ᠳᠡᠭᠡᠷᠡ ᠭᠠᠭᠴᠠ ᠭᠡᠷ ᠪᠠᠢᠭᠰᠠᠨ ᠠ᠋ᠴᠠ ᠨᠢᠭᠡ ᠡᠮᠡᠭᠡᠨ ᠭᠠᠷᠴᠤ᠂ ᠪᠢᠳᠡᠨ ᠦ᠌ ᠴᠡᠷᠢᠭ ᠦ᠋ᠨ ᠬᠣᠢᠨᠠᠴᠠ ᠰᠦ ᠰᠠᠴᠤᠵᠤ ᠪᠠᠢᠭᠰᠠᠨ ᠪᠢᠯᠡ᠃ ᠣᠳᠣ ᠲᠡᠷᠡ ᠳᠡᠨᠵᠢ ᠳᠡᠭᠡᠷᠡ ᠬᠠᠰᠢᠶᠠ ᠪᠠᠢᠰᠢᠩ ᠪᠣᠰᠴᠤ᠂ ᠤᠷᠢᠳᠠᠭᠤᠷ ᠨᠢ ᠲᠡᠷᠡ ᠴᠠᠭ ᠲᠤ᠌ ᠪᠠᠢᠭᠠ ᠦᠭᠡᠢ ᠨᠢᠭᠡ ᠭᠤᠳᠤᠮᠵᠢ ᠪᠣᠢ ᠪᠣᠯᠴᠢᠵᠠᠢ( ᠪᠣᠯᠴᠢᠬᠠᠵᠠᠢ)᠃ ᠪᠣᠭᠳᠠ ᠶ᠋ᠢᠨ ᠭᠣᠣᠯ ᠳᠡᠭᠡᠷᠡᠬᠢ ᠨᠣᠭᠣᠭᠠᠨ ᠣᠷᠳᠣᠨ᠂ ᠲᠡᠷᠡ ᠬᠠᠪᠢ ᠶ᠋ᠢᠨ ᠪᠠᠢᠰᠢᠩ ᠪᠠᠷᠢᠯᠭᠠ ᠳ᠋ᠤ᠌ ᠰᠦᠷ ᠨᠢ ᠳᠠᠷᠤᠭᠳᠠᠵᠤ᠂ ᠪᠠᠷᠤᠭ ᠮᠡᠳᠡᠭᠳᠡᠬᠦ ᠪᠡᠨ ᠪᠠᠢᠵᠠᠢ᠃ ᠮᠠᠨ ᠤ᠋ ᠲᠣᠷᠭᠠᠨ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠪᠠᠢᠭᠰᠠᠨ ᠭᠠᠵᠠᠷ ᠴᠤ᠌ ᠥᠭᠡᠷᠡ ᠵᠦᠢᠯ ᠦ᠋ᠨ ᠪᠠᠷᠢᠯᠭᠠ ᠪᠣᠰᠴᠢᠬᠠᠭᠰᠠᠨ ᠶᠤᠮ ᠤᠤ ᠳᠠ? ᠦᠭᠡᠢ ᠶᠡᠷᠦ ᠬᠣᠲᠠ ᠶ᠋ᠢ ᠲᠠᠨᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠵᠠᠢ᠃ ᠶᠡᠬᠡᠯᠡ ᠬᠥᠭᠵᠢᠵᠦ ᠣᠨᠳᠣᠣ ᠪᠣᠯᠤᠭᠰᠠᠨ ᠶᠤᠮ ᠪᠠᠢᠨᠠ ᠭᠡᠵᠦ ᠭᠠᠢᠬᠠᠨ ᠶᠠᠪᠤᠭᠰᠠᠭᠠᠷ᠂ ᠠᠰᠠᠷ ᠲᠠᠢ ᠬᠠᠭᠠᠯᠭᠠ ᠲᠠᠢ᠂ ᠥᠨᠳᠥᠷ ᠬᠠᠰᠢᠶᠠ ᠲᠠᠢ᠂ ᠳᠣᠲᠣᠷᠠ ᠪᠠᠨ ᠬᠡᠳᠦᠨ ᠰᠢᠪᠠᠷ ᠪᠠᠢᠰᠢᠩ ᠲᠠᠢ᠂ ᠳᠠᠷᠬᠠᠨ ᠸᠠᠩ ᠤ᠋ᠨ ᠬᠠᠰᠢᠶᠠ ᠪᠠᠢᠭᠰᠠᠨ ᠭᠠᠵᠠᠷ ᠠᠷᠪᠠᠨ ᠵᠢᠯ ᠦ᠋ᠨ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠠᠭᠤᠯᠠ ᠰᠢᠭ᠋ ᠥᠨᠳᠥᠷ ᠰᠦᠷᠲᠡᠢ ᠪᠠᠢᠰᠢᠩ ᠰᠦᠨᠳᠡᠷᠯᠡᠨ ᠪᠣᠰᠤᠭᠰᠠᠨ ᠢ᠋ ᠭᠠᠢᠬᠠᠨ ᠬᠠᠷᠠᠵᠤ᠂ ᠳᠡᠷᠭᠡᠳᠡ ᠨᠢ ᠴᠡᠴᠡᠷᠯᠢᠭ ᠲᠡᠢ ᠪᠠᠰᠠ ᠨᠢᠭᠡ ᠰᠠᠢᠬᠠᠨ ᠪᠠᠢᠰᠢᠩ ᠪᠣᠰᠴᠤ᠂ ᠤᠷᠢᠳᠤ ᠡᠮᠦᠨᠡ ᠣᠭᠲᠣ ᠪᠠᠢᠭᠠ ᠦᠭᠡᠢ ᠪᠠᠰᠠ ᠨᠢᠭᠡ ᠭᠤᠳᠤᠮᠵᠢ ᠶ᠋ᠢᠨ ᠠᠮᠠᠨ ᠳᠡᠭᠡᠷᠡ ᠭᠤᠷᠪᠠᠨ ᠳᠠᠪᠬᠤᠷ ᠰᠠᠢᠬᠠᠨ ᠪᠠᠢᠰᠢᠩ ᠪᠣᠰᠤᠭᠰᠠᠨ ᠶᠤᠮ ᠪᠠᠢᠨᠠ ᠭᠡᠵᠦ ᠶᠡᠬᠡᠯᠡ ᠰᠣᠨᠢᠷᠬᠠᠨ ᠬᠠᠷᠠᠵᠤ ᠶᠠᠪᠤᠪᠠ᠃
ᠯᠠᠮᠠ ᠨᠣᠶᠠᠳ᠂ ᠬᠤᠳᠠᠯᠳᠤᠭᠠᠴᠢᠨ᠂ ᠭᠤᠢᠯᠭᠠᠴᠢᠨ᠂ ᠵᠣᠯᠪᠢᠨ (ᠵᠣᠯᠪᠢᠩ) ᠨᠣᠬᠠᠢ ᠶ᠋ᠢᠨ ᠬᠣᠲᠠ ᠪᠠᠢᠭᠰᠠᠨ ᠬᠡᠰᠡᠭ ᠬᠡᠰᠡᠭ ᠲᠠᠰᠤᠷᠬᠠᠢ ᠪᠥᠭᠡᠳ ᠰᠢᠷᠴᠢᠨ ᠦ᠌ ᠮᠡᠳᠡᠳᠡᠭ ᠬᠠᠭᠤᠴᠢᠨ ᠬᠦᠷᠢᠶᠡ ᠣᠭᠲᠣ ᠲᠠᠨᠢᠭᠳᠠᠬᠤ ᠪᠠᠨ ᠪᠠᠢᠵᠤ᠂ ᠬᠠᠷᠢᠨ ᠬᠢᠲᠠᠳ ᠳᠠᠯᠪᠠᠭᠴᠢ ᠲᠠᠢ* ᠬᠥᠯᠥᠰᠥᠨ ᠦ᠌ ᠮᠣᠷᠢᠨ ᠲᠡᠷᠭᠡ ᠳᠠᠭᠠᠷᠢᠯᠳᠤᠭᠰᠠᠨ(ᠲᠠᠭᠠᠷᠠᠯᠳᠤᠭᠰᠠᠨ) ᠨᠢ᠂ ᠬᠦᠷᠢᠶᠡᠨ ᠦ᠌ ᠨᠣᠶᠠᠳ ᠤ᠋ᠨ ᠰᠠᠭᠤᠵᠤ ᠶᠠᠪᠤᠳᠠᠭ ᠰᠡᠦᠬᠡ ᠲᠡᠷᠭᠡ ᠪᠠᠢᠵᠤ᠂ ᠲᠡᠭᠦᠪᠡᠷ ᠯᠡ ᠬᠠᠭᠤᠴᠢᠨ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠪᠠᠢᠳᠠᠯ ᠥᠴᠦᠬᠡᠨ ᠴᠤᠬᠤᠰᠬᠢᠭᠰᠡᠨ ᠪᠣᠯᠪᠠᠴᠤ᠂ ᠲᠡᠷᠡ ᠰᠡᠦᠬᠡ ᠲᠡᠷᠭᠡᠨ ᠳ᠋ᠦ᠍ ᠰᠠᠭᠤᠵᠤ ᠶᠠᠪᠤᠭᠠ ᠬᠥᠮᠦᠨ ᠨᠣᠶᠠᠨ ᠪᠢᠰᠢ᠂ ᠬᠤᠷᠠᠭᠠᠨ ᠳᠣᠲᠣᠷ ᠲᠠᠢ ᠳᠡᠪᠡᠯ ᠲᠡᠢ᠂ ᠬᠥᠭᠡᠷᠦᠬᠦᠨ ᠴᠢᠷᠠᠢ ᠲᠠᠢ ᠵᠠᠯᠠᠭᠤ ᠬᠡᠦᠬᠡᠨ᠂ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠬᠥᠭᠵᠢᠯ ᠲᠡᠢ ᠵᠠᠯᠠᠭᠤ ᠴᠡᠷᠢᠭ ᠦ᠋ᠨ ᠬᠥᠮᠦᠨ᠂ ᠦᠨᠡᠭᠡᠨ ᠯᠣᠪᠤᠤᠵᠠ ᠲᠡᠢ ᠡᠮᠡᠭᠡᠨ ᠡᠢᠮᠦ ᠭᠤᠷᠪᠠᠨ ᠬᠥᠮᠦᠨ ᠶᠠᠪᠤᠭᠰᠠᠨ ᠢ᠋ ᠬᠠᠷᠠᠭᠠᠳ ᠰᠢᠷᠴᠢᠨ ᠢᠨᠢᠶᠡᠮᠰᠦᠭᠯᠡᠵᠦ᠄
— ᠡᠵᠡᠷᠬᠡᠭ ᠦ᠋ᠨ ᠴᠠᠭ ᠲᠤ᠌ ᠡᠢᠮᠦ ᠰᠡᠦᠬᠡ ᠲᠡᠷᠭᠡᠨ ᠳ᠋ᠦ᠍ ᠴᠡᠷᠢᠭ ᠡᠷᠡ ᠬᠠᠷᠠᠴᠤ ᠠᠷᠠᠳ ᠶᠡᠷᠦ ᠰᠠᠭᠤᠬᠤ ᠡᠷᠬᠡ ᠦᠭᠡᠢ ᠪᠠᠢᠵᠤ ᠪᠢᠯᠡ᠃ ᠪᠢ ᠲᠡᠷᠡ ᠴᠠᠭ ᠲᠤ᠌᠂ ᠡᠢᠮᠦ ᠰᠡᠦᠬᠡ ᠲᠡᠷᠭᠡᠨ ᠳ᠋ᠦ᠍ ᠢᠩᠭᠢᠵᠦ ᠰᠠᠭᠤᠭᠠᠳ ᠶᠠᠪᠤᠨᠠ ᠭᠡᠬᠦ ᠪᠠᠢᠲᠤᠭᠠᠢ᠂ ᠳᠡᠷᠭᠡᠳᠡ ᠨᠢ ᠣᠢᠷᠠᠲᠤᠨ ᠪᠠᠷᠢᠵᠤ ᠦᠵᠡᠨᠡ ᠴᠦ᠍ ᠭᠡᠵᠦ ᠰᠠᠨᠠᠬᠤ ᠦᠭᠡᠢ ᠬᠡᠷᠡᠭ ᠪᠠᠢᠭᠰᠠᠨ ᠬᠡᠮᠡᠪᠡ᠃ ᠵᠢᠯᠣᠭᠣᠴᠢ ᠲᠡᠷᠡ ᠦᠭᠡ ᠰᠣᠨᠣᠰᠤᠭᠠᠳ᠂
— ᠣᠳᠣ ᠲᠡᠷᠡ ᠰᠡᠦᠬᠡ ᠲᠡᠷᠭᠡ ᠪᠡᠷ ᠡᠩ ᠦ᠋ᠨ ᠡᠮᠡᠭᠲᠡᠢᠴᠦᠳ ᠵᠠᠬᠠ ᠣᠷᠣᠵᠤ ᠠᠷᠰᠠᠷ ᠶᠠᠭᠤᠮᠠ ᠠᠪᠤᠭᠠᠳ᠂ ᠪᠤᠴᠠᠬᠤ ᠳ᠋ᠠᠭᠠᠨ ᠰᠠᠭᠤᠳᠠᠭ ᠪᠣᠯᠤᠭᠰᠠᠨ ᠲᠡᠷᠭᠡ ᠳᠡ᠃ ᠹᠧᠣᠳᠠᠯ ᠨᠣᠶᠠᠳ ᠭᠡᠪᠡᠯ᠂ ᠪᠢ ᠲᠢᠶᠠᠲ᠋ᠷ ᠤ᠋ᠨ ᠲᠠᠢᠵᠠᠨ ᠳᠡᠭᠡᠷᠡ ᠦᠵᠡᠬᠦ ᠡᠴᠡ ᠪᠢᠰᠢ᠂ ᠶᠡᠷᠦ ᠠᠮᠢᠳᠤ ᠹᠧᠣᠳᠠᠯ ᠢ᠋ ᠦᠵᠡᠭᠡ ᠦᠭᠡᠢ ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠨ᠂ ᠬᠡᠳᠦᠨ ᠭᠤᠳᠤᠮᠵᠢ ᠥᠩᠭᠡᠷᠡᠨ ᠭᠠᠷᠴᠤ᠂ ᠭᠤᠳᠤᠮᠵᠢᠯᠠᠨ ᠪᠠᠷᠢᠭᠰᠠᠨ ᠣᠯᠠᠨ ᠴᠠᠭᠠᠨ ᠭᠡᠷ ᠦ᠋ᠨ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠡᠪᠡ᠃
ᠮᠠᠰᠢᠨᠠ ᠢᠷᠡᠬᠦ ᠴᠢᠮᠡᠭᠡ ᠪᠡᠷ ᠬᠡᠳᠦᠨ ᠬᠥᠮᠦᠨ᠂ ᠤᠯᠤᠰ ᠤ᠋ᠨ ᠰᠠᠢᠨ ᠮᠠᠯᠴᠢᠨ ᠤ᠋ ᠠᠩᠬᠠᠳᠤᠭᠠᠷ ᠵᠥᠪᠯᠡᠯᠭᠡᠨ ᠳ᠋ᠦ᠍ ᠢᠷᠡᠬᠦ ᠵᠣᠴᠢᠳ ᠢ᠋ ᠦᠢᠯᠡᠴᠢᠯᠡᠬᠦ ᠭᠡᠷ ᠡᠴᠡ ᠶᠠᠭᠠᠷᠠᠨ ᠭᠠᠷᠴᠤ ᠢᠷᠡᠭᠡᠳ ᠵᠣᠴᠢᠳ ᠢ᠋ ᠤᠭᠲᠤᠵᠤ᠂ ᠠᠮᠤᠷ ᠮᠡᠨᠳᠦ ᠶ᠋ᠢ ᠠᠶᠠᠲᠠᠢ ᠰᠠᠢᠬᠠᠨ ᠢ᠋ᠶ᠋ᠠᠷ ᠠᠰᠠᠭᠤᠵᠤ᠂ ᠵᠣᠴᠢᠳ ᠤ᠋ᠨ ᠪᠠᠭᠤᠬᠤ ᠭᠡᠷ ᠲᠦ᠍ ᠤᠳᠤᠷᠢᠳᠤᠨ ᠣᠷᠣᠭᠤᠯᠤᠭᠠᠳ᠂ ᠰᠡᠪᠬᠢᠨ ᠳᠡᠪᠡᠯ ᠲᠡᠢ ᠨᠢᠭᠡ ᠬᠥᠮᠦᠨ᠂
— ᠲᠠ᠂ ᠨᠤᠲᠤᠭ ᠤᠰᠤᠨ ᠤ᠋ ᠪᠠᠨ ᠬᠥᠮᠦᠨ ᠳᠡᠭᠡᠷᠡ ᠣᠷᠣᠨᠠ ᠭᠡᠬᠦ ᠤᠤ? ᠬᠠᠮᠢᠶᠠ ᠦᠭᠡᠢ ᠤᠤ? ᠭᠡᠵᠦ ᠰᠢᠷᠴᠢᠨ ᠡᠴᠡ ᠠᠰᠠᠭᠤᠵᠠᠢ᠃
— ᠪᠢᠳᠡᠨ ᠦ᠌ ᠣᠯᠠᠨ ᠮᠠᠯᠴᠢᠨ ᠴᠥᠮ ᠤᠰᠤ ᠨᠤᠲᠤᠭ ᠨᠢᠭᠡᠲᠡᠢ ᠰᠢᠦ ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠴᠢᠩᠭᠢᠪᠡᠯ ᠮᠠᠰᠢ ᠰᠠᠢᠨ ᠪᠠᠢᠨᠠ! ᠡᠷᠬᠢᠮ ᠵᠣᠴᠢᠨ ᠲᠠᠨ ᠢ᠋ ᠪᠢᠳᠡ ᠡᠨᠡ ᠭᠡᠷ ᠲᠦ᠍ ᠪᠠᠢᠯᠭᠠᠪᠠᠯ ᠶᠠᠮᠠᠷ ᠪᠣᠢ? ᠭᠡᠵᠦ ᠨᠢᠭᠡ ᠭᠡᠷ ᠵᠢᠭᠠᠵᠤ᠂ ᠡᠨᠡ ᠭᠡᠷ ᠲᠦ᠍ ᠲᠠᠪᠤᠨ ᠬᠥᠮᠦᠨ ᠪᠣᠢ᠂ ᠲᠠᠨ ᠲᠠᠢ ᠵᠢᠷᠭᠤᠭᠠ ᠪᠣᠯᠵᠤ᠂ ᠣᠷᠣᠨ ᠲᠣᠭᠠ ᠨᠢ ᠭᠦᠢᠴᠡᠨᠡ ᠭᠡᠵᠦ ᠰᠢᠷᠴᠢᠨ ᠢ᠋ ᠨᠢᠭᠡ ᠭᠡᠷ ᠲᠤ ᠣᠷᠣᠭᠤᠯᠵᠠᠢ᠃
ᠳᠤᠮᠳᠠ ᠪᠠᠨ ᠲᠡᠮᠦᠷ ᠵᠤᠤᠬᠠ ᠲᠠᠢ᠂ ᠲᠣᠭᠣᠷᠢᠭᠠᠳ ᠣᠷᠣ ᠲᠠᠯᠪᠢᠭᠰᠠᠨ ᠲᠡᠷᠡ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠭᠣᠶᠣ ᠭᠡᠷ ᠲᠦ᠍ ᠶᠡᠬᠡᠯᠡ(ᠶᠡᠬᠡ ᠯᠡ) ᠳᠤᠯᠠᠭᠠᠨ᠃ ᠤᠯᠠᠭᠠᠨ ᠲᠣᠷᠭᠠᠨ ᠡᠮᠵᠢᠶᠡᠷᠢ ᠲᠡᠢ᠂ ᠰᠠᠭᠠᠷᠠᠯ ᠰᠢᠷᠠ ᠲᠣᠷᠭᠠᠨ ᠬᠥᠰᠢᠭᠡ ᠲᠡᠢ ᠲᠡᠷᠡ ᠭᠡᠷ ᠲᠦ᠍ ᠲᠠᠯᠪᠢᠭᠰᠠᠨ ᠣᠷᠣᠨ ᠤ᠋ ᠲᠤᠰᠢᠶᠠ ᠪᠦᠷᠢ ᠪᠢᠴᠢᠬᠠᠨ ᠰᠢᠷᠡᠭᠡ᠂ ᠢᠰᠡᠷᠢ ᠭᠡᠳᠡᠭ ᠮᠤᠬᠤᠷ ᠰᠠᠨᠳᠠᠯᠢ ᠲᠠᠯᠪᠢᠵᠠᠢ᠃ ᠬᠣᠶᠠᠷ ᠡᠪᠦᠭᠡᠵᠢᠶᠡᠷ ᠵᠡᠷᠭᠡᠴᠡᠨ ᠰᠠᠭᠤᠵᠤ ᠦᠭᠡ ᠬᠡᠯᠡᠯᠴᠡᠨ᠂ ᠪᠠᠰᠠ ᠬᠣᠶᠠᠷ ᠬᠥᠮᠦᠨ ᠰᠢᠳᠡᠷᠡ ᠲᠠᠯᠪᠢᠵᠤ᠂ ᠬᠤᠪᠴᠠᠰᠤ ᠶ᠋ᠢ ᠬᠠᠷᠠᠪᠠᠯ ᠳᠣᠲᠣᠷᠠ ᠬᠥᠮᠦᠨ ᠪᠣᠯᠤᠯᠲᠠᠢ ᠨᠢᠭᠡ ᠨᠠᠰᠤᠲᠠᠢᠪᠲᠤᠷ ᠬᠥᠮᠦᠨ ᠰᠢᠲᠠᠷᠠᠴᠢᠨ ᠤ᠋ ᠳᠡᠷᠭᠡᠳᠡ ᠵᠣᠭᠰᠣᠭᠠᠳ᠂ ᠨᠢᠭᠡᠨ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠢᠩᠭᠢᠪᠡᠯ ᠳᠡᠭᠡᠷᠡ ᠭᠡᠵᠦ ᠨᠡᠭᠦᠳᠡᠯ ᠵᠢᠭᠠᠵᠤ ᠪᠠᠢᠭᠠ ᠪᠣᠯᠤᠯᠲᠠᠢ᠃
— ᠵᠠ᠂ ᠪᠦᠭᠦᠳᠡ ᠠᠮᠤᠷᠬᠠᠨ ᠪᠠᠢᠨᠠ ᠤᠤ? ᠭᠡᠵᠦ ᠰᠢᠷᠴᠢᠨ ᠭᠠᠳᠠᠨᠠ ᠠ᠋ᠴᠠ ᠣᠷᠣᠵᠤ ᠢᠷᠡᠭᠡᠳ᠂ ᠲᠡᠷᠡ ᠬᠡᠳᠦᠨ ᠬᠥᠮᠦᠨ ᠦ᠌ ᠠᠮᠤᠷ ᠮᠡᠨᠳᠦ ᠶ᠋ᠢ ᠠᠰᠠᠭᠤᠵᠠᠢ᠃
— ᠮᠡᠨᠳᠦ ᠪᠠᠢᠨᠠ᠃ ᠲᠠ ᠰᠠᠢᠨ ᠶᠠᠪᠤᠵᠤ ᠢᠷᠡᠪᠡ ᠤᠤ? ᠭᠡᠵᠦ ᠭᠡᠷ ᠲᠦ᠍ ᠪᠠᠢᠷᠢᠯᠠᠵᠤ ᠪᠠᠢᠭᠰᠠᠨ ᠮᠠᠯᠴᠢᠨ ᠡᠪᠦᠭᠡᠳ ᠬᠠᠷᠢᠭᠤ ᠮᠡᠨᠳᠦ ᠠᠰᠠᠭᠤᠪᠠᠰᠤ᠂ ᠵᠢᠵᠢᠭᠦᠷ ᠰᠢᠷᠴᠢᠨ ᠳ᠋ᠦ᠍ ᠤᠴᠢᠷ ᠪᠠᠢᠳᠠᠯ ᠢ᠋ ᠲᠠᠢᠯᠪᠤᠷᠢᠯᠠᠵᠤ᠂
— ᠲᠠᠨ ᠤ᠋ ᠡᠨᠡ ᠪᠠᠭᠤᠭᠰᠠᠨ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠲᠠᠢ᠂ ᠨᠢᠭᠤᠷ ᠭᠠᠷ ᠤᠬᠢᠶᠠᠬᠤ ᠭᠡᠷ ᠪᠣᠢ᠃ ᠲᠠ ᠵᠠᠮ ᠤ᠋ᠨ ᠲᠣᠭᠣᠰᠣ ᠰᠢᠷᠣᠢ ᠠ᠋ᠴᠠ ᠰᠠᠯᠵᠤ᠂ ᠨᠢᠭᠤᠷ ᠭᠠᠷ ᠢ᠋ᠶ᠋ᠠᠨ ᠤᠬᠢᠶᠠᠶᠠ ᠭᠡᠪᠡᠯ᠂ ᠲᠡᠷᠡ ᠭᠡᠷ ᠲᠦ᠍ ᠣᠷᠣᠵᠤ ᠤᠬᠢᠶᠠᠬᠤ ᠳ᠋ᠤ᠌ ᠪᠣᠯᠤᠨᠠ᠃ ᠨᠢᠭᠤᠷ ᠭᠠᠷ ᠤ᠋ᠨ ᠰᠠᠪᠤᠩ ᠠᠯᠴᠢᠭᠤᠷ ᠬᠣᠶᠠᠷ᠂ ᠲᠠᠨ ᠤ᠋ ᠣᠷᠣᠨ ᠤ᠋ ᠳᠡᠷᠭᠡᠳᠡ ᠪᠠᠢᠭᠠ ᠰᠢᠷᠡᠭᠡᠨ ᠦ᠌ ᠰᠢᠷᠭᠤᠭᠤᠯᠭᠠᠨ ᠳᠣᠲᠣᠷᠠ ᠪᠣᠢ᠃ ᠣᠳᠣ ᠮᠥᠳᠳᠥ ᠲᠠᠨ ᠳ᠋ᠤ᠌ ᠬᠠᠯᠠᠭᠤᠨ ᠴᠠᠢ ᠢᠳᠡᠭᠡ ᠠᠪᠴᠢᠷᠠᠨᠠ ᠭᠡᠵᠦ ᠬᠡᠯᠡᠭᠡᠳ ᠭᠠᠷᠴᠤ ᠣᠳᠪᠠ᠃
ᠲᠡᠷᠡ ᠭᠡᠷ ᠲᠦ᠍ ᠪᠠᠢᠭᠰᠠᠨ ᠮᠠᠯᠴᠢᠨ ᠨᠥᠬᠥᠳ ᠲᠡᠢ ᠬᠡᠳᠦᠨ ᠦᠭᠡ ᠬᠡᠯᠡᠯᠴᠡᠵᠦ᠂ ᠨᠡᠷᠡ ᠤᠰᠤ ᠶ᠋ᠢ ᠮᠡᠳᠡᠯᠴᠡᠨ ᠲᠠᠨᠢᠯᠴᠠᠭᠠᠳ᠂ ᠰᠢᠷᠴᠢᠨ ᠨᠢᠭᠤᠷ ᠭᠠᠷ ᠤ᠋ᠨ ᠠᠯᠴᠢᠭᠤᠷ ᠰᠠᠪᠤᠩ ᠠᠪᠴᠤ᠂ ᠥᠨᠥᠬᠢ ᠭᠠᠷ ᠨᠢᠭᠤᠷ ᠤᠬᠢᠶᠠᠬᠤ ᠭᠡᠷ ᠲᠦ᠍ ᠣᠴᠢᠵᠤ᠂ ᠵᠠᠮ ᠤ᠋ᠨ ᠨᠠᠷᠢᠨ ᠲᠣᠭᠣᠰᠣ ᠰᠢᠷᠣᠢ ᠶ᠋ᠢ ᠤᠨᠠᠭᠠᠭᠠᠳ ᠡᠭᠡᠵᠦ ᠢᠷᠠᠪᠠᠰᠤ᠂ ᠵᠣᠴᠢᠳ ᠢ᠋ ᠦᠢᠯᠡᠴᠢᠯᠡᠵᠦ ᠪᠠᠢᠭᠰᠠᠨ ᠡᠪᠦᠭᠡᠨ ᠭᠠᠯᠴᠢ᠂ ᠰᠢᠨᠡ ᠢᠷᠡᠭᠰᠡᠨ ᠵᠣᠴᠢᠨ ᠤ᠋ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠪᠠᠭ ᠲᠠᠢ ᠪᠣᠣᠪᠣ ᠪᠣᠭᠣᠷᠰᠣᠭ ᠲᠠᠯᠪᠢᠵᠤ᠂ ᠱᠠᠵᠠᠩ ᠠᠶᠠᠭᠠᠨ ᠳ᠋ᠤ᠌ ᠰᠠᠢᠬᠠᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠶᠡᠬᠡᠯᠡ ᠰᠠᠢᠬᠠᠨ ᠰᠦ ᠲᠡᠢ ᠬᠠᠯᠠᠭᠤᠨ ᠴᠠᠢ ᠬᠢᠵᠦ ᠵᠣᠴᠢᠯᠠᠬᠤ ᠶ᠋ᠢᠨ ᠬᠠᠮᠲᠤ᠄
— ᠣᠳᠣ ᠤᠳᠠᠬᠤ ᠦᠭᠡᠢ ᠠᠦ᠋ᠲ᠋ᠣᠪᠦ᠋ᠰ ᠭᠡᠳᠡᠭ ᠲᠡᠷᠭᠡ ᠬᠦᠷᠴᠦ ᠢᠷᠡᠭᠡᠳ ᠲᠠᠨ ᠤ᠋ ᠴᠣᠭ ᠢᠷᠡᠭᠰᠡᠨ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠬᠣᠭᠣᠯᠠᠨ ᠤ᠋ ᠭᠤᠸᠠᠩᠵᠠᠨ ᠳ᠋ᠤ᠌ ᠠᠪᠠᠴᠢᠵᠤ ᠬᠣᠭᠣᠯᠠ ᠢᠳᠡᠭᠦᠯᠦᠨᠡ᠃ ᠣᠷᠣᠢ ᠶ᠋ᠢᠨ ᠨᠠᠢ᠍ᠮᠠᠨ ᠴᠠᠭ ᠲᠤ᠌ ᠣᠷᠣᠢ ᠶ᠋ᠢᠨ ᠬᠣᠭᠣᠯᠠ ᠢᠳᠡᠬᠦ ᠭᠡᠵᠦ ᠪᠠᠰᠠ ᠭᠤᠸᠠᠩᠵᠠᠯᠠᠳᠠᠭ ᠡᠢᠮᠦ ᠲᠤᠷᠢᠮ ᠶᠣᠰᠣ ᠲᠠᠢ ᠶᠤᠮ ᠳᠠ ᠭᠡᠵᠦ ᠬᠡᠯᠡᠵᠦ ᠥᠭᠪᠡ᠃
ᠰᠢᠷᠴᠢᠨ ᠦ᠌ ᠪᠠᠭᠤᠭᠰᠠᠨ ᠭᠡᠷ ᠲᠦ᠍ ᠬᠠᠮᠤᠭ ᠤ᠋ᠨ ᠠᠬᠠᠮᠠᠳ ᠨᠠᠰᠤᠲᠠᠢ ᠨᠢ ᠬᠣᠪᠲᠣ ᠠᠢᠮᠠᠭ ᠤ᠋ᠨ ᠪᠤᠯᠠᠭᠠᠨ ᠰᠤᠮᠤ ᠶ᠋ᠢᠨ ᠲᠠᠪᠤᠳᠤᠭᠠᠷ ᠪᠠᠭ ᠤ᠋ᠨ ᠳᠠᠯᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ ᠵᠠᠮᠰᠤ ᠭᠡᠳᠡᠭ ᠡᠪᠦᠭᠡᠨ ᠲᠣᠷᠭᠤᠳ ᠮᠠᠯᠴᠢᠨ ᠪᠠᠢᠵᠠᠢ᠃ ᠲᠡᠷᠡ ᠬᠥᠮᠦᠨ ᠡᠳᠦᠢ ᠶᠡᠬᠡ ᠨᠠᠰᠤᠯᠠᠪᠠᠴᠤ ᠬᠠᠭᠤᠴᠢᠨ ᠬᠦᠷᠢᠶᠡ ᠴᠦ᠍ ᠦᠵᠡᠭᠡ ᠦᠭᠡᠢ᠂ ᠤᠯᠠᠭᠠᠨᠪᠠᠭᠠᠲᠤᠷ ᠲᠤ᠌ ᠴᠤ᠌ ᠤᠷᠢᠳᠤ ᠡᠮᠦᠨᠡ ᠢᠷᠡᠵᠦ ᠦᠵᠡᠭᠡ ᠦᠭᠡᠢ ᠬᠥᠮᠦᠨ ᠠᠵᠢ᠃ ᠲᠡᠷᠡ ᠡᠪᠦᠭᠡᠨ᠂ ᠵᠣᠴᠢᠳ ᠤ᠋ᠨ ᠭᠣᠶᠣ ᠭᠡᠷ ᠦ᠋ᠨ ᠰᠠᠭᠠᠷᠠᠯ ᠰᠢᠷᠠ ᠲᠣᠷᠭᠠᠨ ᠬᠥᠰᠢᠭᠡ ᠶ᠋ᠢ ᠠᠶᠠᠷᠬᠠᠨ ᠢᠯᠢᠵᠦ ᠥᠭᠦᠯᠡᠷᠦᠨ᠄
— ᠠᠮᠢᠳᠤ ᠶᠠᠪᠤᠬᠤᠯᠠ ᠠᠯᠲᠠᠨ ᠠᠶᠠᠭᠠ ᠪᠠᠷ ᠤᠮᠳᠠᠯᠠᠨᠠ ᠭᠡᠵᠦ ᠲᠦᠮᠡᠨ ᠦᠨᠡᠨ ᠦᠭᠡ ᠪᠠᠢᠨᠠ᠃ ᠡᠭᠡᠯ ᠵᠢᠷ ᠦ᠋ᠨ ᠮᠠᠯᠴᠢᠨ ᠬᠠᠷᠠᠴᠤ ᠠᠷᠠᠳ ᠪᠢᠳᠡ᠂ ᠣᠳᠣ ᠤᠯᠤᠰ ᠲᠥᠷᠥ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠺᠦᠨᠳᠦ ᠲᠡᠢ᠂ ᠣᠯᠠᠨ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠠᠯᠳᠠᠷ ᠲᠠᠢ ᠰᠠᠢᠴᠤᠤᠯ ᠪᠣᠯᠵᠤ ᠣᠷᠺᠢᠯᠠ᠃ ᠪᠢᠳᠡᠨ ᠳ᠋ᠦ᠍ ᠠᠷᠠᠳ ᠤ᠋ᠨ ᠮᠠᠨᠢ ᠵᠠᠰᠠᠭ ᠠ᠋ᠴᠠ ᠪᠠᠷᠢᠵᠤ ᠥᠭᠭᠦᠭᠰᠡᠨ ᠡᠨᠡ ᠭᠡᠷ ᠲᠡᠢ ᠠᠳᠠᠯᠢ ᠡᠢᠮᠦ ᠰᠠᠢᠬᠠᠨ ᠭᠡᠷ᠂ ᠬᠠᠷᠠ— ᠰᠢᠷᠠ ᠶ᠋ᠢᠨ ᠲᠣᠷᠭᠤᠳ ᠬᠠᠭᠠᠨ ᠤ᠋ ᠳ᠋ᠤ᠌ ᠴᠤ᠌ ᠪᠠᠢᠬᠤ ᠦᠭᠡᠢ ᠭᠡᠳ ᠰᠢᠷᠴᠢᠨ ᠦ᠌ ᠵᠦᠭ ᠰᠢᠷᠲᠡᠨ᠂ ᠵᠠ ᠰᠢᠷᠴᠢᠨ ᠮᠢᠨᠢ᠂ ᠤᠳᠠ ᠶᠠᠭᠠᠳᠠᠭ ᠪᠢᠯᠡ? ᠰᠡᠳᠺᠢᠯ ᠮᠢᠨᠢ ᠺᠦᠳᠡᠯᠦᠭᠡᠳ ᠪᠣᠯᠳᠠᠭ ᠪᠢᠰᠢ᠃ ᠮᠠᠩᠭᠠᠳᠤᠷ ᠠᠷᠪᠠᠨ ᠨᠢᠭᠡᠨ ᠴᠠᠭ ᠲᠤ᠌ ᠬᠤᠷᠠᠯ ᠡᠺᠢᠯᠡᠬᠦ ᠶᠦᠮ ᠭᠡᠨᠡ᠃ ᠪᠢ ᠴᠦ᠍ ᠪᠠᠰᠠ ᠣᠯᠠᠨ ᠨᠥᠺᠥᠳ ᠦ᠋ᠨ ᠠᠳᠠᠯᠢ ᠦᠭᠡ ᠺᠡᠯᠡᠵᠦ᠂ ᠶᠠᠭᠠᠵᠤ ᠮᠠᠯ ᠢ᠋ᠶ᠋ᠠᠨ ᠥᠰᠬᠡᠵᠦ ᠴᠢᠳᠠᠭᠰᠠᠨ ᠲᠤᠷᠰᠢᠯᠭᠠ ᠪᠠᠨ ᠶᠠᠷᠢᠵᠤ ᠥᠭᠬᠦ ᠶᠣᠰᠣᠲᠠᠢ ᠪᠣᠯᠤᠨᠠ᠃ ᠢᠯᠠᠩᠭᠤᠶᠠ ᠪᠢᠳᠡᠨ ᠦ᠌ ᠡᠭᠡᠯ ᠵᠢᠷ ᠦ᠋ᠨ ᠮᠠᠯᠴᠢᠨ ᠠᠷᠠᠳ ᠲᠤ᠌ ᠶᠡᠺᠡ ᠲᠤᠰᠠᠯᠠᠮᠵᠢ ᠦᠵᠡᠭᠦᠯᠦᠭᠰᠡᠨ ᠠᠴᠢᠲᠠᠢ ᠨᠠᠮ ᠵᠠᠰᠠᠭ᠂ ᠶᠡᠺᠡ ᠬᠣᠯᠪᠣᠭᠠᠲᠤ ᠤᠯᠤᠰ ᠤ᠋ᠨ ᠠᠴᠢ ᠶ᠋ᠢ ᠶᠠᠭᠤ ᠪᠠᠷ ᠬᠠᠷᠢᠭᠤᠯᠳᠠᠭ ᠢ᠋ᠶ᠋ᠠᠨ ᠺᠡᠯᠡᠬᠦ ᠶᠣᠰᠣᠲᠠᠢ ᠪᠣᠯᠤᠭᠠᠳ ᠪᠠᠢᠨᠠ ᠯᠠ ᠪᠢ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠡᠪᠦᠭᠡᠨ ᠠᠬᠠ ᠮᠢᠨᠢ᠂ ᠪᠢ ᠴᠦ᠍ ᠪᠠᠰᠠ ᠮᠥᠨ ᠲᠡᠭᠡᠵᠦ ᠪᠣᠳᠣᠭᠠᠳ ᠰᠡᠳᠬᠢᠯ ᠬᠥᠳᠡᠯᠵᠦ ᠪᠠᠢᠨᠠ ᠰᠢᠦ ᠭᠡᠵᠦ ᠰᠢᠷᠴᠢᠨ ᠦ᠌ ᠬᠠᠷᠢᠭᠤᠯᠬᠤ ᠳ᠋ᠤ᠌᠂ ᠳᠣᠷᠣᠨᠠᠲᠤ ᠠᠢᠮᠠᠭ ᠤ᠋ᠨ ᠪᠠᠶᠠᠨᠳᠣᠨ ᠰᠤᠮᠤ ᠶ᠋ᠢᠨ ᠡᠪᠦᠭᠡᠨ ᠮᠠᠯᠴᠢᠨ ᠳᠠᠮᠳᠢᠨ᠂
— ᠮᠠᠷᠱᠠᠯ ᠮᠠᠷᠭᠠᠰᠢ ᠢᠯᠡᠳᠬᠡᠯ ᠬᠢᠨᠡ᠃ ᠲᠡᠷᠡ ᠢᠯᠡᠳᠬᠡᠯ ᠢ᠋ ᠰᠠᠢᠬᠠᠨ ᠰᠣᠨᠣᠰᠪᠠᠯ᠂ ᠮᠠᠨ ᠤ᠋ ᠨᠠᠮ ᠵᠠᠰᠠᠭ᠂ ᠠᠷᠠᠳ ᠣᠯᠠᠨ ᠤ᠋ ᠪᠠᠨ ᠡᠮᠦᠨᠡ ᠱᠤᠬᠤᠮ ᠶᠠᠮᠠᠷ ᠪᠣᠳᠣᠯᠭᠠ ᠵᠣᠷᠢᠯᠭᠠ ᠳᠡᠯᠪᠢᠲᠦ᠂ ᠮᠠᠯᠰᠢᠨ ᠠᠷᠠᠳ ᠪᠢᠳᠡ ᠱᠤᠬᠤᠮ ᠶᠠᠭᠤ ᠶᠠᠭᠤ ᠬᠢᠪᠡᠯ ᠵᠣᠬᠢᠬᠤ ᠨᠢ ᠮᠠᠰᠢ ᠲᠣᠳᠣᠷᠬᠠᠢ ᠲᠣᠮᠣᠷᠠᠭᠤᠨ ᠪᠣᠯᠵᠤ ᠥᠭᠬᠦ ᠪᠣᠢ᠃ ᠲᠡᠷᠡ ᠢᠯᠡᠳᠬᠡᠯ ᠢ᠋ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠶᠠᠮᠤᠨ ᠤ᠋ ᠵᠢᠩᠬᠢᠨᠢ ᠰᠠᠢᠳ ᠨᠢ ᠬᠢᠬᠦ ᠦᠭᠡᠢ᠂ ᠮᠠᠷᠱᠠᠯ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠢᠯᠡᠳᠬᠡᠬᠦ ᠭᠡᠵᠦ ᠪᠠᠢᠭᠠ ᠶ᠋ᠢ ᠦᠵᠡᠬᠦ ᠳ᠋ᠦ᠍᠂ ᠮᠠᠨ ᠤ᠋ ᠨᠠᠮ ᠵᠠᠰᠠᠭ᠂ ᠮᠠᠯ ᠠᠵᠤ ᠠᠬᠤᠢ ᠶ᠋ᠢ ᠬᠥᠭᠵᠢᠭᠦᠯᠬᠦ ᠶᠠᠪᠤᠳᠠᠯ ᠢ᠋ ᠣᠨᠰᠠ ᠱᠤᠬᠤᠯᠠ ᠦᠵᠡᠵᠦ ᠪᠠᠢᠭᠠ ᠨᠢ ᠢᠯᠡᠷᠬᠡᠢ ᠭᠡᠵᠦ ᠬᠡᠯᠡᠵᠡᠢ᠃
ᠠᠷᠪᠠᠨ ᠴᠠᠭ ᠬᠠᠭᠠᠰ ᠲᠤ᠌ ᠬᠤᠷᠠᠯ ᠤ᠋ᠨ ᠲᠥᠯᠥᠭᠡᠯᠡᠭᠴᠢ ᠪᠠᠭᠤᠭᠰᠠᠨ ᠣᠯᠠᠨ ᠴᠠᠭᠠᠨ ᠭᠡᠷ ᠦ᠋ᠨ ᠡᠮᠦᠨᠡ ᠰᠢᠪ ᠰᠢᠨᠡᠬᠡᠨ ᠭᠣᠶᠣ ᠠᠦ᠋ᠲ᠋ᠣᠪᠦ᠋ᠰ ᠲᠡᠷᠭᠡ ᠬᠦᠷᠦᠯᠴᠡᠨ ᠢᠷᠡᠵᠦ᠂ ᠲᠣᠷᠭᠤᠳ ᠡᠪᠦᠭᠡᠨ᠂ ᠰᠢᠷᠴᠢᠨ ᠦ᠌ ᠵᠦᠭ ᠢᠨᠢᠶᠡᠮᠰᠦᠭᠯᠡᠨ᠂
— ᠰᠢᠯᠦᠨ ᠪᠠᠢᠰᠢᠩ ᠺᠧᠪᠲᠡᠶ ᠡᠢᠮᠦ ᠰᠠᠢᠬᠠᠨ ᠮᠠᠰᠢᠨ᠂ ᠲᠣᠷᠭᠤᠳ ᠬᠠᠷᠠ— ᠰᠢᠷᠠ ᠶ᠋ᠢᠨ ᠬᠠᠭᠠᠨ ᠤ᠋ ᠵᠡᠭᠦᠳᠦ ᠵᠦᠩ ᠳ᠋ᠦ᠍ ᠤᠷᠠᠭᠠᠳ ᠦᠭᠡᠢ ᠪᠠᠢᠲᠠᠯᠠ᠂ ᠥᠲᠡᠯᠡ ᠡᠪᠦᠭᠡᠨ ᠮᠠᠯᠴᠢᠨ ᠨᠠᠳᠠ ᠳ᠋ᠤ᠌ ᠡᠢᠮᠦ ᠲᠡᠷᠭᠡ ᠺᠦᠷᠴᠦ ᠢᠷᠡᠵᠦ ᠪᠠᠢᠬᠤ ᠮᠥᠨ ᠰᠠᠢᠬᠠᠨᠠ! ᠺᠥᠳᠡᠯᠮᠦᠷᠢᠴᠢᠨ ᠠᠷᠠᠳ ᠡᠷᠺᠡ ᠲᠡᠢ ᠪᠣᠯᠤᠭᠠᠳ᠂ ᠤᠯᠤᠰ ᠤ᠋ᠨ ᠡᠵᠡᠨ ᠪᠣᠯᠳᠠᠭ ᠰᠠᠢᠬᠠᠨᠠ! ᠭᠡᠵᠦ ᠰᠢᠷᠴᠢᠨ ᠳ᠋ᠦ᠍ ᠢᠨᠢᠶᠡᠮᠰᠦᠭᠯᠡᠨ ᠬᠡᠯᠡᠵᠡᠢ᠃ ᠰᠠᠢᠨ ᠮᠠᠯᠴᠢᠨ ᠨᠤᠭᠤᠳ ᠠᠦ᠋ᠲ᠋ᠣᠪᠦ᠋ᠰ ᠲᠦ᠍ ᠰᠠᠭᠤᠵᠠᠭᠠᠭᠠᠳ᠂ ᠴᠣᠩᠬᠣ ᠪᠠᠷ ᠨᠢ ᠶᠡᠬᠡ ᠯᠡ ᠰᠣᠨᠢᠷᠬᠠᠨ ᠬᠠᠷᠠᠵᠠᠭᠠᠵᠤ᠂ ᠭᠤᠳᠤᠮᠵᠢ ᠪᠠᠷ ᠵᠣᠷᠴᠢᠨ ᠶᠠᠪᠤᠬᠤ ᠮᠠᠰᠢᠨ᠂ ᠮᠣᠷᠢ ᠲᠠᠢ ᠶᠠᠪᠠᠭᠠᠨ ᠬᠥᠮᠦᠨ ᠦ᠌ ᠣᠯᠠᠨ ᠢ᠋ ᠭᠠᠢᠬᠠᠯᠳᠤᠨ᠂ ᠡᠪᠦᠭᠡᠨ ᠲᠣᠷᠭᠤᠳ ᠵᠠᠮᠰᠤ᠄
— ᠡᠨᠳᠡ ᠨᠢᠭᠡ ᠡᠳᠦᠷ ᠶᠠᠪᠤᠳᠠᠭ ᠺᠦᠮᠦᠨ ᠠᠮᠢᠲᠠᠨ ᠢ᠋᠂ ᠮᠠᠨᠠᠢ( ᠮᠠᠨ ᠤ᠋) ᠺᠦᠳᠡᠭᠡ ᠨᠤᠲᠤᠭ ᠲᠤ᠌ ᠨᠢᠭᠡ ᠰᠠᠷᠠ ᠳ᠋ᠤ᠌ ᠴᠤ᠌ ᠣᠯᠵᠤ ᠦᠵᠡᠰᠢ ᠤᠭᠠ᠃ ᠲᠠ ᠬᠠᠷᠠᠺᠳᠤᠨ᠂ ᠡᠨᠡ ᠪᠥᠮᠪᠥᠭᠡᠷ ᠤᠷᠠᠢ ᠲᠠᠢ ᠶᠠᠭᠠᠭᠰᠠᠨ ᠲᠣᠮᠣ ᠪᠠᠢᠰᠢᠩ ᠪᠣᠢ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠤᠷᠢᠳᠤ ᠬᠣᠲᠠ ᠳ᠋ᠤ᠌ ᠬᠡᠳᠦᠨ ᠤᠳᠠᠭᠠ ᠢᠷᠡᠵᠦ ᠦᠵᠡᠭᠰᠡᠨ ᠡᠪᠦᠭᠡᠨ ᠳᠠᠮᠳᠢᠨ᠂
— ᠡᠨᠡ ᠲᠢᠶᠠᠲ᠋ᠷ ᠭᠡᠭᠴᠢ᠂ ᠪᠢᠳᠡᠨ ᠦ᠌ ᠣᠰᠢᠵᠤ ᠶᠠᠪᠤᠭᠠ ᠭᠠᠵᠠᠷ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠡᠪᠦᠭᠡᠨ ᠵᠠᠮᠰᠤ᠄
— ᠠᠭᠤᠯᠠ ᠲᠣᠯᠣᠭᠠᠢ ᠶ᠋ᠢᠨ ᠴᠢᠨᠡᠭᠡᠨ ᠶᠦᠮ ᠠ᠋! ᠭᠡᠵᠦ ᠭᠠᠢᠬᠠᠵᠠᠢ᠃ ᠤᠯᠤᠰ ᠤ᠋ᠨ ᠰᠠᠢᠨ ᠮᠠᠯᠴᠢᠨ ᠤ᠋ ᠠᠩᠬᠠᠳᠤᠭᠠᠷ ᠬᠤᠷᠠᠯ ᠳ᠋ᠤ᠌ ᠵᠣᠷᠢᠭᠤᠯᠤᠭᠰᠠᠨ ᠤᠷᠢᠶᠠ ᠪᠢᠴᠢᠭᠡᠰᠦᠲᠡᠢ ᠤᠯᠠᠭᠠᠨ ᠳᠠᠪᠤᠤ ᠪᠠᠷ ᠴᠢᠮᠡᠭᠰᠡᠨ ᠲᠢᠶᠠᠲ᠋ᠷ ᠤ᠋ᠨ ᠪᠠᠢᠰᠢᠩ ᠤ᠋ᠨ ᠳᠡᠷᠭᠡᠳᠡ ᠬᠦᠷᠦᠭᠡᠳ᠂ ᠠᠦ᠋ᠲ᠋ᠣᠪᠦ᠋ᠰ ᠮᠠᠰᠢᠨ ᠵᠣᠭᠰᠣᠵᠤ᠂ ᠲᠥᠯᠥᠭᠡᠯᠡᠭᠴᠢ ᠪᠠᠭᠤᠵᠠᠭᠠᠵᠠᠢ᠃ ᠨᠢᠭᠡ ᠡᠪᠦᠭᠡᠨ ᠲᠥᠯᠥᠭᠡᠯᠡᠭᠴᠢ ᠮᠠᠰᠢᠨ ᠠ᠋ᠴᠠ ᠪᠠᠭᠤᠭᠠᠳ ᠢᠨᠢᠶᠡᠮᠰᠦᠭᠯᠡᠨ᠂
— ᠪᠢ ᠬᠣᠲᠠ ᠤᠷᠤᠭᠤ ᠨᠠᠭᠠᠰᠢ ᠪᠠᠨ ᠢᠷᠡᠵᠦ ᠶᠠᠪᠤᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠵᠠᠮ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠨᠢᠭᠡ ᠬᠠᠴᠢᠨ ᠦᠭᠡ ᠲᠤᠭᠤᠯᠤᠭᠰᠠᠨ ᠪᠢᠯᠡ᠃ ᠡᠨᠡ ᠲᠢᠶᠠᠲ᠋ᠷ ᠤ᠋ᠨ ᠭᠣᠣᠯ ᠬᠠᠭᠠᠯᠭᠠ ᠪᠠᠷ ᠨᠢ ᠣᠷᠣᠭᠠᠳ ᠬᠣᠶᠠᠷ ᠭᠤᠷᠪᠠ ᠠᠯᠬᠤᠬᠤ ᠳ᠋ᠤ᠌᠂ ᠬᠥᠮᠦᠨ ᠵᠠᠪᠠᠯ ᠲᠡᠷᠡ ᠲᠤᠰᠢᠶᠠ ᠨᠢ ᠭᠠᠵᠠᠷ ᠪᠤᠯᠠᠭᠰᠠᠨ ᠲᠣᠭᠰᠢᠨ ᠰᠠᠬᠢᠭᠤᠯᠰᠤᠨ ᠤ᠋ ᠲᠡᠷᠢᠭᠦᠨ ᠳᠡᠭᠡᠷᠡ ᠭᠢᠰᠬᠢᠳᠡᠭ ᠶᠦᠮ ᠭᠡᠵᠦ ᠶᠠᠷᠢᠬᠤ ᠶ᠋ᠢ ᠳᠤᠭᠤᠯᠤᠯᠠ᠃ ᠲᠢᠶᠠᠲ᠋ᠷ ᠤ᠋ᠨ ᠰᠠᠭᠤᠷᠢ ᠶ᠋ᠢ ᠲᠠᠯᠪᠢᠬᠤ ᠳ᠋ᠤ᠌᠂ ᠬᠥᠮᠦᠨ ᠠᠮᠢᠲᠠᠨ ᠲᠡᠷᠡ ᠳᠣᠭᠰᠢᠨ ᠰᠠᠬᠢᠭᠤᠯᠰᠤᠨ ᠤ᠋ ᠳᠡᠭᠡᠭᠦᠷ ᠭᠢᠰᠬᠢᠨ᠂ ᠱᠠᠰᠢᠨ ᠨᠣᠮ ᠢ᠋ ᠳᠠᠷᠤᠯᠠᠨ ᠲᠣᠷᠣᠮᠵᠢᠯᠠᠭ ᠭᠡᠵᠦ ᠬᠢᠭᠰᠡᠨ ᠶᠦᠮ ᠭᠡᠳᠡᠭ ᠢ᠋ ᠰᠣᠨᠣᠰᠤᠯᠠ᠃ ᠮᠢᠨᠦ ᠰᠠᠨᠠᠪᠠᠰᠤ᠂ ᠯᠠᠪ ᠡᠨᠡ ᠴᠤᠤᠷᠬᠠᠯ ᠦᠭᠡ ᠯᠠᠮᠠ ᠨᠠᠷ ᠤ᠋ᠨ ᠠᠮᠠ ᠠ᠋ᠴᠠ ᠭᠠᠷᠤᠭᠰᠠᠨ ᠪᠠᠢᠬᠤ᠃ ᠨᠠᠰᠤᠲᠠᠢᠴᠤᠳ ᠡᠨᠡ ᠲᠢᠶᠠᠲ᠋ᠷ ᠲᠤ᠌ ᠣᠷᠣᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠭᠣᠣᠯ ᠬᠠᠭᠠᠯᠭᠠ ᠪᠠᠷ ᠨᠢ ᠣᠷᠣᠭᠰᠠᠨ ᠴᠤ᠌ ᠰᠠᠬᠢᠭᠤᠯᠰᠤᠨ ᠤ᠋ ᠬᠢᠯᠢᠩ ᠡᠴᠡ ᠠᠶᠤᠵᠤ᠂ ᠬᠣᠶᠠᠷ ᠬᠠᠲᠠᠪᠴᠢ ᠶ᠋ᠢ ᠳᠠᠭᠠᠵᠤ ᠶᠠᠪᠤᠬᠤ ᠠ᠋ᠴᠠ ᠭᠣᠣᠯ ᠢ᠋ᠶ᠋ᠠᠷ ᠨᠢ ᠭᠢᠰᠬᠢᠳᠡᠭ ᠦᠭᠡᠢ ᠶᠦᠮ ᠭᠡᠯᠴᠡᠬᠦ ᠶ᠋ᠢ ᠳᠤᠭᠤᠯᠤᠯᠠ ᠬᠡᠮᠡᠪᠡᠰᠦ᠂ ᠡᠪᠦᠭᠡᠨ ᠲᠣᠷᠭᠤᠳ ᠵᠠᠮᠰᠤ᠄
— ᠲᠠ ᠲᠡᠷᠡ ᠰᠠᠺᠢᠭᠤᠯᠰᠠᠨ ᠤ᠋ ᠵᠤᠯᠠᠢ ᠳᠡᠭᠡᠷᠡ ᠭᠢᠰᠬᠢᠬᠦ ᠡᠴᠡ ᠠᠶᠤᠭᠠᠳ ᠪᠠᠢᠨᠠᠤ( ᠪᠠᠢᠨᠠ ᠤᠤ)? ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠨ ᠠᠰᠠᠭᠤᠵᠠᠢ᠃
— ᠠ᠋᠂ ᠪᠢ ᠴᠢᠨᠢ ᠲᠠᠷᠢᠶᠠᠲᠤ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠲᠡᠨᠳᠡᠬᠢ ᠬᠥᠮᠦᠨ ᠰᠢᠦ᠂ ᠯᠠᠮᠠ ᠨᠠᠷ ᠤ᠋ᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠮᠡᠬᠡ ᠪᠠᠴᠢ ᠦᠵᠡᠵᠦ᠂ ᠡᠰᠡᠷᠭᠦᠦ ᠪᠣᠰᠤᠯᠭᠠ ᠭᠠᠷᠭᠠᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠬᠦᠷᠲᠡᠯᠡ ᠲᠡᠳᠡᠨ ᠲᠡᠢ ᠲᠤᠯᠵᠤ ᠪᠠᠢᠭᠰᠠᠨ ᠪᠢᠯᠡ᠃ ᠡᠨᠡ ᠲᠡᠮᠳᠡᠭ ᠬᠠᠷᠠᠪᠠ ᠤᠤ? ᠲᠠᠷᠢᠶᠠᠲᠤ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠲᠣᠭᠰᠢᠨ ᠭᠡᠰᠡᠷ ᠬᠠᠭᠠᠨ ᠤ᠋ ᠳᠠᠴᠠᠩ ᠳ᠋ᠤ᠌᠂ ᠳᠠᠴᠠᠩ ᠤ᠋ᠨ ᠵᠠᠩᠰᠠᠭ ᠤ᠋ᠨ ᠰᠡᠯᠡᠮᠡ ᠳ᠋ᠦ᠍ ᠴᠠᠪᠴᠢᠭᠤᠯᠤᠭᠠᠳ ᠵᠠᠶᠠᠭᠠᠲᠠᠢ ᠫᠤᠤ ᠶ᠋ᠢᠨ ᠢ᠋ᠶ᠋ᠡᠨ ᠪᠥᠭᠰᠡ ᠪᠡᠷ ᠴᠣᠬᠢᠵᠤ ᠵᠠᠢᠯᠠᠭᠤᠯᠤᠭᠰᠠᠨ ᠳ᠋ᠠᠭᠠᠨ ( ᠳ᠋ᠤ᠌ ᠪᠠᠨ)᠂ ᠲᠠ ᠨᠠᠷ ᠲᠠᠢ ᠣᠳᠣ ᠢᠩᠭᠢᠵᠦ ᠠᠭᠤᠯᠵᠠᠨ ᠶᠠᠷᠢᠵᠤ ᠶᠠᠪᠤᠭᠠ ᠬᠥᠮᠦᠨ ᠰᠢᠦ ᠭᠡᠲᠡᠯᠡ ᠨᠢ ᠡᠪᠦᠭᠡᠨ ᠳᠠᠮᠳᠢᠨ ᠨᠥᠬᠥᠳ ᠢ᠋ᠶ᠋ᠡᠨ ᠰᠢᠪᠠᠳᠠᠨ᠂
— ᠵᠠ ᠳᠣᠲᠣᠭᠰᠢ ᠪᠠᠨ ᠤᠷᠤᠰᠤᠭᠠᠶᠡ᠂ ᠬᠤᠷᠠᠯ ᠶᠠᠭ ᠠᠷᠪᠠᠨ ᠨᠢᠭᠡ ᠳ᠋ᠦ᠍ ᠪᠣᠯᠤᠨᠠ᠃ ᠰᠠᠭᠤᠳᠠᠯ ᠢ᠋ᠶ᠋ᠠᠨ ᠣᠯᠵᠤ ᠠᠪᠤᠶᠠ ᠭᠡᠵᠡᠢ᠃ ᠲᠢᠶᠠᠲ᠋ᠷ ᠲᠤ᠌ ᠣᠷᠣᠭᠠᠳ᠂ ᠲᠥᠯᠥᠭᠡᠯᠡᠭᠴᠢᠳ ᠬᠤᠷᠠᠯ ᠤ᠋ᠨ ᠲᠠᠩᠬᠢᠮ ᠳ᠋ᠤ᠌ ᠰᠠᠭᠤᠳᠠᠯ ᠢ᠋ᠶ᠋ᠠᠨ ᠶᠠᠭᠠᠷᠠᠯ ᠦᠭᠡᠢ ᠲᠣᠮᠣᠭᠠᠲᠠᠢ ᠪᠠᠷ ᠡᠵᠡᠯᠡᠵᠦ᠂ ᠵᠠᠷᠢᠮ ᠨᠢ ᠠᠩᠬᠠ ᠤᠳᠠᠭᠠ ᠲᠢᠶᠠᠲ᠋ᠷ ᠲᠤ᠌ ᠣᠷᠣᠵᠤ ᠪᠠᠢᠭᠠ ᠲᠤᠯᠠ᠂ ᠲᠥᠭᠥᠷᠢᠭ ᠲᠣᠮᠣ ᠲᠠᠩᠬᠢᠮ᠂ ᠭᠸᠨ᠋ᠸᠷᠡᠯᠢᠰᠰᠢᠮ ᠰᠲ᠋ᠠᠯᠢᠨ ᠤ᠋ ᠲᠣᠮᠣ ᠵᠢᠷᠤᠭ ᠲᠠᠢ ᠦᠵᠡᠮᠵᠢ ᠲᠡᠢ ᠴᠢᠮᠡᠭᠯᠡᠭᠰᠡᠨ ᠲᠡᠢᠵᠠᠨ(ᠲᠠᠢᠰᠠᠨ) ᠤ᠋ ᠵᠠᠰᠠᠯ ᠴᠢᠮᠡᠭ ᠢ᠋ ᠰᠣᠨᠢᠷᠬᠠᠨ ᠬᠠᠷᠠᠵᠤ ᠪᠢᠯᠡ᠃
ᠶᠠᠭ ᠠᠷᠪᠠᠨ ᠨᠢᠭᠡᠨ ᠴᠠᠭ ᠲᠤ᠌ ᠬᠤᠷᠠᠯ ᠤ᠋ᠨ ᠲᠡᠷᠢᠭᠦᠯᠡᠭᠴᠢᠳ ᠦ᠋ᠨ ᠪᠠᠢᠷᠢ ᠳ᠋ᠤ᠌ ᠮᠠᠷᠱᠠᠯ ᠴᠣᠢᠪᠠᠯᠰᠠᠩ ᠲᠡᠷᠢᠭᠦᠲᠡᠢ ᠨᠠᠮ ᠵᠠᠰᠠᠭ ᠤ᠋ᠨ ᠤᠳᠤᠷᠢᠳᠤᠭᠴᠢᠳ ᠢ᠋ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍᠂ ᠬᠤᠷᠠᠯ ᠤ᠋ᠨ ᠲᠠᠩᠬᠢᠮ ᠤ᠋ᠨ ᠬᠢᠨ ᠠᠯᠠᠭᠠ ᠲᠠᠰᠢᠨ᠂
— ᠮᠠᠷᠱᠠᠯ ᠴᠣᠢᠪᠠᠯᠰᠠᠩ ᠮᠠᠨᠳᠤᠲᠤᠭᠠᠢ! ᠮᠣᠩᠭᠣᠯ ᠰ ᠰ ᠰ ᠷ ᠬᠣᠶᠠᠷ ᠤᠯᠤᠰ ᠤ᠋ᠨ ᠠᠷᠠᠳ ᠲᠦᠮᠡᠨ ᠦ᠌ ᠨᠠᠢᠷᠠᠮᠳᠠᠯ ᠮᠠᠨᠳᠤᠲᠤᠭᠠᠢ! ᠭᠡᠵᠦ ᠪᠠᠶᠠᠷ ᠤ᠋ᠨ ᠤᠷᠢᠶᠠ ᠴᠤᠤᠷᠢᠶᠠᠳᠠᠭᠤᠯᠪᠠ(ᠴᠤᠤᠷᠢᠶᠠᠲᠤᠭᠤᠯᠪᠠ)᠃
ᠤᠷᠲᠤ ᠨᠢᠭᠤᠷᠤᠨ ᠳ᠋ᠤ᠌( ᠨᠢᠭᠤᠷ ᠲᠤ᠌) ᠰᠠᠭᠤᠵᠤ ᠪᠠᠢᠭᠰᠠᠨ ᠰᠢᠷᠴᠢᠨ᠂ ᠨᠠᠮ ᠵᠠᠰᠠᠭ ᠤ᠋ᠨ ᠤᠳᠤᠷᠢᠳᠤᠭᠴᠢᠳ ᠰᠠᠭᠤᠵᠤ ᠪᠠᠢᠭᠰᠠᠨ ᠲᠡᠷᠢᠭᠦᠯᠡᠭᠴᠢᠳ ᠦ᠋ᠨ ᠰᠢᠷᠡᠭᠡᠨ ᠦ᠌ ᠵᠦᠭ ᠨᠢᠳᠦ ᠰᠠᠯᠭᠠᠯ ᠦᠭᠡᠢ ᠬᠠᠷᠠᠵᠤ᠂ ᠤᠷᠢᠳᠤ ᠭᠡᠷᠡᠯ ᠵᠢᠷᠤᠭ ᠳᠡᠭᠡᠷᠡ ᠦᠵᠡᠵᠦ ᠲᠠᠨᠢᠳᠠᠭ ᠵᠢᠰᠦ ᠴᠢᠷᠠᠢ ᠶ᠋ᠢ ᠨᠢ ᠬᠠᠷᠠᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)᠂ ᠣᠯᠠᠨ ᠵᠢᠯ ᠦ᠋ᠨ ᠡᠮᠦᠨᠡ᠂ ᠠᠷᠠᠳ ᠤ᠋ᠨ ᠳᠠᠢᠰᠤᠨ ᠳ᠋ᠡᠨᠽᠠᠩ( ᠳᠠᠨᠽᠠᠨ) ᠰᠠᠢᠳ ᠤ᠋ᠨ ᠲᠤᠰᠢᠶᠠᠯ ᠢ᠋ᠶ᠋ᠠᠷ ᠨᠣᠶᠠᠨ ᠤ᠋ ᠥᠷᠢ ᠰᠢᠷᠢ ᠶ᠋ᠢ ᠮᠥᠩᠭᠥ ᠬᠦᠦᠯᠡᠳᠡᠭ ᠫᠦᠰᠡᠨ ᠳ᠋ᠦ᠍ ᠲᠥᠯᠥᠬᠦ ᠭᠡᠵᠦ ᠬᠡᠳᠦᠨ ᠢᠷᠭᠡ ᠪᠡᠨ ᠲᠠᠭᠤᠵᠤ ᠶᠠᠪᠤᠭᠰᠠᠭᠠᠷ ᠬᠡᠭᠡᠷᠡ ᠠᠭᠤᠯᠵᠠᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠭᠠᠳ᠂ ᠮᠠᠷᠱᠠᠯ ᠤ᠋ᠨ ᠴᠢᠷᠠᠢ ᠶ᠋ᠢ ᠶᠡᠬᠡᠯᠡ( ᠶᠡᠬᠡ ᠯᠡ) ᠠᠵᠢᠭᠯᠠᠨ ᠬᠠᠷᠠᠵᠤ᠂
— ᠨᠠᠮᠠᠶ᠋ᠢ(ᠨᠠᠮᠠ ᠶ᠋ᠢ) ᠮᠠᠷᠱᠠᠯ ᠲᠠᠨᠢᠬᠤ ᠪᠣᠯᠪᠠ ᠤᠤ? ᠪᠢ ᠡᠨᠡ ᠵᠠᠪᠰᠠᠷ ᠶᠡᠬᠡᠯᠡ(ᠶᠡᠬᠡ ᠯᠡ) ᠥᠲᠡᠯᠵᠦ ᠣᠨᠳᠣᠣ ᠪᠣᠯᠤᠭᠰᠠᠨ ᠪᠠᠢᠬᠤ ᠭᠡᠵᠦ ᠪᠣᠳᠣᠯᠠ᠃
ᠬᠤᠷᠠᠯᠳᠤᠭᠰᠠᠳ᠂ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠲᠦᠮᠡᠨ ᠦ᠌ ᠦᠯᠡᠮᠵᠢ ᠶ᠋ᠢᠨ ᠰᠠᠳᠤᠨ ᠨᠥᠬᠥᠷ᠂ ᠡᠴᠢᠭᠡ ᠮᠡᠷᠭᠡᠨ ᠰᠲ᠋ᠠᠯᠢᠨ ᠳ᠋ᠤ᠌ ᠪᠠᠶᠠᠷ ᠤ᠋ᠨ ᠤᠲᠠᠰᠤ ᠶᠠᠪᠤᠭᠤᠯᠬᠤ ᠰᠠᠨᠠᠯ ᠢ᠋ ᠮᠠᠰᠢ ᠬᠥᠭᠵᠢᠯ ᠲᠡᠢ ᠬᠦᠯᠢᠶᠡᠨ ᠠᠪᠴᠤ᠂ ᠳᠠᠷᠠᠭᠠ ᠪᠠᠷ ᠨᠢ ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠤᠯᠤᠰ ᠤ᠋ᠨ ᠰᠠᠢᠨ ᠮᠠᠯᠴᠢᠨ ᠤ᠋ ᠬᠤᠷᠠᠯ ᠳ᠋ᠤ᠌ ᠪᠠᠶᠠᠷ ᠬᠦᠷᠭᠡᠬᠦ ᠭᠡᠵᠦ ᠬᠤᠷᠠᠯ ᠤ᠋ᠨ ᠶᠡᠨᠳᠡᠷ ᠳᠡᠭᠡᠷᠡ ᠡᠩᠭᠡᠷ ᠲᠡᠭᠡᠨ( ᠲᠤ ᠪᠡᠨ) ᠴᠢᠰᠤᠨ ᠭᠠᠪᠢᠶᠠᠨ ᠤ᠋ ᠣᠳᠣᠨ ᠲᠠᠢ ᠨᠢᠭᠡ ᠵᠠᠯᠠᠭᠤ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠭᠠᠷᠴᠤ ᠢᠷᠡᠯᠡ᠃ ᠰᠢᠷᠴᠢᠨ᠂ ᠲᠡᠭᠦᠨ ᠢ᠋ ᠨᠠᠰᠤ ᠪᠠᠭᠠ ᠠᠲᠠᠯᠠ ᠡᠢᠮᠦ ᠭᠠᠪᠢᠶᠠ ᠲᠠᠢ᠂ ᠰᠦᠷᠡᠬᠡᠢ ᠵᠠᠯᠠᠭᠤ ᠶᠠ ᠭᠡᠵᠦ ᠳᠣᠲᠣᠷᠠ ᠪᠠᠨ ᠶᠡᠬᠡᠳᠡ ᠣᠢᠰᠢᠶᠠᠨ᠂ ᠲᠡᠭᠦᠨ ᠦ᠌ ᠦᠭᠡ ᠰᠣᠨᠣᠰᠬᠤ ᠶ᠋ᠢᠨ ᠢᠯᠳᠠᠷ᠂ ᠬᠤᠷᠠᠯ ᠤ᠋ᠨ ᠲᠡᠷᠢᠭᠦᠯᠡᠭᠴᠢᠳ ᠦ᠋ᠨ ᠰᠢᠷᠡᠭᠡᠨᠡ ᠰᠠᠭᠤᠵᠤ ᠪᠠᠢᠭᠠ ᠰᠠᠢᠳ ᠤ᠋ᠳ ᠢ᠋ ᠬᠠᠷᠠᠭᠰᠠᠭᠠᠷ᠂ ᠤᠷᠢᠳᠤ ᠬᠤᠪᠢᠰᠬᠠᠯ ᠤ᠋ᠨ ᠡᠬᠢᠨ ᠦ᠌ ᠦᠶᠡ ᠪᠡᠷ᠂ ᠬᠣᠰᠢᠭᠤ ᠨᠤᠲᠤᠭ ᠲᠠᠭᠠᠨ( ᠲᠤ ᠪᠠᠨ)᠂ ᠠᠩᠬᠠ ᠪᠠᠭᠠ ᠰᠤᠷᠭᠠᠭᠤᠯᠢ ᠲᠡᠭᠦᠰᠬᠡᠭᠰᠡᠨ ᠰᠤᠷᠤᠭᠴᠢᠳ ᠤ᠋ᠨ ᠪᠠᠶᠠᠷ ᠤ᠋ᠨ ᠬᠤᠷᠠᠯ ᠳᠡᠭᠡᠷᠡ ᠲᠡᠷᠡ ᠦᠶᠡ ᠶ᠋ᠢᠨ ᠰᠠᠢᠳ ᠤ᠋ᠳ ᠠ᠋ᠴᠠ ᠭᠡᠭᠡᠷᠡᠭᠦᠯᠬᠦ ᠶ᠋ᠢᠨ ᠰᠠᠢᠳ ᠢ᠋ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠰᠠᠨᠠᠵᠠᠢ᠃ ᠲᠡᠷᠡ ᠭᠡᠭᠡᠷᠡᠭᠦᠯᠬᠦ ᠶ᠋ᠢᠨ ᠰᠠᠢᠳ ᠶᠡᠷᠦ ᠡᠭᠡᠯ ᠬᠠᠷᠠᠴᠤ ᠬᠥᠮᠦᠨ ᠢ᠋ ᠲᠣᠭᠣᠵᠤ ᠬᠠᠷᠠᠳᠠᠭ ᠦᠭᠡᠢ ᠰᠦᠷᠡᠬᠡᠢ ᠠᠮᠢᠲᠠᠨ ᠪᠠᠢᠭᠰᠠᠨ ᠢ᠋ ᠰᠠᠨᠠᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)᠂ ᠣᠯᠠᠨᠠ ᠡᠷᠭᠦᠭᠳᠡᠭᠰᠡᠨ ᠦ᠌ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠤ᠋ᠨ ᠹᠧᠣᠳᠠᠯ ᠰᠠᠢᠳ ᠤ᠋ᠳ ᠤ᠋ᠨ ᠵᠠᠩ ᠠᠭᠠᠰᠢ ᠲᠠᠢ ᠶᠠᠮᠠᠷ ᠲᠥᠰᠲᠡᠢ ᠰᠠᠢᠳ ᠪᠠᠢᠵᠤ ᠪᠣᠢ? ᠵᠠᠩ ᠪᠠᠢᠳᠠᠯ ᠤ᠋ᠨ ᠮᠠᠶᠢᠭ ᠲᠠᠢ ᠶ᠋ᠢ ᠨᠢ ᠪᠣᠳᠣᠬᠤ ᠳ᠋ᠤ᠌ ᠰᠠᠢᠳ ᠪᠢᠰᠢ᠂ ᠵᠦᠴᠦᠭᠡᠴᠢᠨ ᠬᠥᠮᠦᠨ ᠭᠡᠮᠡᠷ ᠪᠠᠢᠭᠰᠠᠨ ᠪᠢᠯᠡ᠃ ᠪᠠᠢᠵᠠ ᠤᠤ᠂ ᠲᠡᠷᠡ ᠰᠠᠢᠳ ᠪᠥᠯᠥᠭᠡ ᠬᠥᠮᠦᠨ ᠢ᠋ ᠬᠣᠵᠢᠮ《ᠠᠯᠮᠠᠰ ᠤ᠋ᠨ ᠬᠠᠪᠴᠢᠯ》 ᠭᠡᠳᠡᠭ ᠨᠢᠭᠡ ᠺᠢᠨᠣ᠋ ᠳ᠋ᠤ᠌ ᠨᠢᠭᠡ ᠬᠠᠷᠠᠪᠠ ᠤᠤ ᠶᠠᠭᠠᠬᠢᠯᠠ ᠪᠢ? ᠭᠡᠵᠦ ᠪᠣᠳᠣᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠲᠡᠷᠡ ᠰᠠᠢᠳ ᠪᠥᠯᠥᠭᠡ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠨᠢ ᠬᠠᠨᠴᠢᠬᠠᠭᠰᠠᠨ ᠭᠠᠪᠵᠤ ᠶ᠋ᠢᠨ ᠳᠤᠭᠤᠢ ᠰᠢᠭ᠋ ᠲᠣᠭᠣᠷᠢᠭ ᠲᠠᠷᠭᠤᠨ ᠴᠢᠷᠠᠢ ᠰᠡᠳᠬᠢᠯ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠤᠷᠭᠤᠵᠤ᠂ ᠨᠥᠭᠴᠢᠭᠰᠡᠨ ᠪᠠᠲᠤᠪᠠᠶᠠᠷ ᠡᠪᠦᠭᠡ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠶᠡᠬᠡᠯᠡ( ᠶᠡᠬᠡ ᠯᠡ)ᠳᠠᠭᠠ ᠦᠭᠡᠢ ᠪᠠᠢᠳᠠᠭ ᠬᠠᠭᠤᠷᠮᠠᠴᠢ ᠪᠢᠯᠳᠠᠤᠴᠢ ᠢᠨᠢᠶᠡᠬᠦ ᠨᠢ ᠴᠢᠬᠢᠨ ᠳ᠋ᠦ᠍ ᠰᠣᠨᠣᠰᠳᠠᠭᠰᠠᠨ ᠰᠢᠭ᠋ ᠪᠣᠯᠵᠠᠢ᠃ ᠡᠪᠦᠭᠡᠨ ᠪᠠᠲᠤᠪᠠᠶᠠᠷ ᠭᠤᠸᠠᠢ ᠬᠣᠵᠢᠮ ᠬᠡᠯᠡᠬᠦ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ)᠂ ᠳᠡᠭᠡᠭᠦᠷ ᠨᠢᠭᠤᠷ ᠲᠠᠯᠠ ᠦᠭᠡᠢ ᠬᠥᠮᠦᠨ᠂ ᠲᠡᠷᠡ ᠰᠠᠢᠳ ᠠᠪᠤᠭᠠᠢ ᠳ᠋ᠤ᠌ ᠪᠠᠷᠠᠭᠠᠯᠬᠠᠬᠤ ᠳ᠋ᠤ᠌ ᠬᠡᠴᠡᠭᠦᠦ ᠪᠠᠢᠬᠠ ᠭᠡᠵᠦ ᠬᠡᠯᠡᠭᠰᠡᠨ ᠨᠢ ᠰᠢᠷᠴᠢᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠣᠷᠣᠭᠠᠳ᠂ ᠵᠢᠩᠬᠢᠨᠢ ᠬᠥᠳᠡᠯᠮᠦᠷᠢᠴᠢᠨ ᠠᠷᠠᠳ ᠣᠯᠠᠨ ᠤ᠋ ᠠᠰᠢᠭ ᠲᠤᠰᠠ ᠶ᠋ᠢ ᠡᠷᠬᠢᠮ ᠪᠣᠯᠭᠠᠬᠤ ᠵᠠᠰᠭ ᠲᠥᠷᠥ ᠶ᠋ᠢᠨ ᠠᠫᠠᠫᠠᠷᠠᠲ᠋ ᠢ᠋ ᠪᠣᠢ ᠪᠣᠯᠭᠠᠬᠤ ᠳ᠋ᠤ᠌ ᠶᠠᠭᠤᠲᠠᠢ ᠶᠡᠬᠡ ᠬᠦᠴᠦ ᠴᠢᠳᠠᠯ ᠣᠷᠣᠭᠰᠠᠨ ᠪᠣᠢ ᠭᠡᠵᠦ ᠪᠣᠳᠣᠭᠠᠳ ᠲᠤᠰ ᠵᠥᠪᠯᠡᠯᠭᠡᠨ ᠳ᠋ᠦ᠍ ᠪᠠᠶᠠᠷ ᠬᠦᠷᠭᠡᠵᠦ ᠪᠠᠢᠭᠠ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠴᠡᠷᠢᠭ ᠦ᠋ᠨ ᠱᠠᠪ ᠬᠢᠭᠰᠡᠨ ᠰᠡᠷᠭᠦᠯᠡᠩ ᠴᠢᠯᠭᠡᠷ ᠳᠠᠷᠤᠭᠠ ᠳ᠋ᠤ᠌ ᠠᠯᠠᠭᠠ ᠲᠡᠰᠢᠨ ᠪᠠᠶᠠᠷ ᠬᠦᠷᠭᠡᠵᠦ ᠪᠠᠢᠭᠰᠠᠨ ᠮᠠᠷᠱᠠᠯ ᠢ᠋ ᠲᠡᠰᠬᠡᠯ ᠦᠭᠡᠢ ᠪᠠᠬᠠᠳᠤᠵᠤ ᠮᠠᠰᠢᠳᠠ ᠪᠢᠰᠢᠷᠡᠨ ᠬᠠᠷᠠᠵᠠᠢ᠃
— ᠣᠳᠣ᠂ ᠲᠤᠰ ᠤᠯᠤᠰ ᠲᠤ᠌ ᠮᠠᠯ ᠠᠵᠤ ᠠᠬᠤᠢ ᠶ᠋ᠢ ᠬᠥᠭᠵᠢᠭᠦᠯᠦᠭᠰᠡᠭᠡᠷ ᠢᠷᠡᠭᠰᠡᠨ ᠪᠠᠢᠳᠠᠯ᠂ ᠲᠡᠭᠦᠨ ᠲᠡᠢ ᠬᠣᠯᠪᠣᠭᠳᠠᠭᠰᠠᠨ ᠴᠢᠨᠠᠭᠰᠢᠳᠠ ᠲᠠᠯᠪᠢᠬᠤ ᠵᠣᠷᠢᠯᠲᠠ ᠶ᠋ᠢᠨ ᠤᠴᠢᠷ᠂ ᠮᠣᠩᠭᠣᠯ ᠠᠷᠠᠳ ᠤᠯᠤᠰ ᠤ᠋ᠨ ᠶᠡᠷᠦᠩᠬᠡᠢ ᠰᠠᠢᠳ᠂ ᠰᠢᠯᠭᠠᠷᠠᠭᠰᠠᠨ ᠪᠠᠭᠠᠲᠤᠷ ᠮᠠᠷᠱᠠᠯ ᠴᠣᠢᠪᠠᠯᠰᠠᠩ ᠢᠯᠡᠳᠬᠡᠯ ᠬᠢᠨᠡ ᠭᠡᠵᠦ ᠬᠤᠷᠠᠯ ᠤ᠋ᠨ ᠳᠠᠷᠤᠭᠠ᠂ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠴᠡᠷᠢᠭ ᠦ᠋ᠨ ᠲᠥᠯᠥᠭᠡᠯᠡᠭᠴᠢ ᠶ᠋ᠢᠨ ᠪᠠᠶᠠᠷ ᠬᠦᠷᠭᠡᠭᠰᠡᠨ ᠦᠭᠡᠨ ᠳ᠋ᠦ᠍ ᠠᠯᠠᠭᠠ ᠲᠠᠰᠢᠬᠤ ᠴᠢᠮᠡᠭᠡ ᠨᠠᠮᠳᠠᠮᠠᠭᠴᠠ ᠬᠡᠯᠡᠵᠦ᠂ ᠬᠤᠷᠠᠯᠳᠤᠭᠰᠠᠳ ᠳᠠᠬᠢᠨ ᠲᠠᠩᠬᠢᠮ ᠳᠦᠭᠦᠷᠡᠩ ᠨᠢᠵᠢᠭᠢᠨᠡᠲᠡᠯᠡ ᠠᠯᠠᠭᠠ ᠲᠠᠰᠢᠵᠠᠭᠠᠯᠠ᠃
— — — —
* ᠠᠵᠢᠯ ᠢ᠋ᠶ᠋ᠠᠨ ᠰᠢᠮᠳᠠᠨ ᠬᠢᠶᠡ! ᠠᠯᠳᠠᠷᠲᠠᠢ ᠬᠥᠳᠡᠯᠮᠦᠷᠢ ᠬᠢᠬᠦ ᠳ᠋ᠦ᠍ ᠤᠷᠮᠠᠳᠠᠶᠠ᠃ ᠢᠸᠠᠨ ᠸᠠᠽᠤᠸ( ᠪᠣᠯᠭᠠᠷᠢ ᠶ᠋ᠢᠨ ᠠᠯᠳᠠᠷᠲᠤ ᠵᠣᠬᠢᠶᠠᠯᠴᠢ)
* ᠳᠡᠯᠪᠡᠭ ᠭᠡᠵᠦ ᠮᠣᠷᠢᠨ ᠲᠡᠷᠭᠡᠨ ᠦ᠌ ᠤᠷᠲᠤ ᠵᠢᠯᠤᠭᠤᠨ ᠤ᠋ ᠮᠣᠩᠭᠣᠯ ᠨᠡᠷᠡ᠂ ᠳᠠᠯᠪᠠᠭᠴᠢ ᠭᠡᠵᠦ ᠮᠣᠷᠢᠨ ᠲᠡᠷᠭᠡᠨ ᠦ᠌ ᠵᠢᠯᠣᠭᠣ ᠪᠠᠷᠢᠳᠠᠭ ᠬᠥᠮᠦᠨ ᠢ᠋ ᠬᠡᠯᠡᠳᠡᠭ ᠶᠦᠮ᠃
ᠰᠢᠷᠴᠢᠨ᠂ ᠮᠠᠷᠱᠠᠯ ᠤ᠋ᠨ ᠢᠯᠡᠳᠬᠡᠯ ᠢ᠋ ᠶᠡᠬᠡᠯᠡ(ᠶᠡᠬᠡ ᠯᠡ) ᠬᠢᠴᠢᠶᠡᠩᠭᠦᠢᠯᠡᠨ ᠰᠣᠨᠣᠰᠴᠤ ᠰᠠᠭᠤᠯᠠ᠃ ᠮᠠᠷᠱᠠᠯ ᠴᠣᠢᠪᠠᠯᠰᠠᠩ ᠢᠯᠡᠳᠬᠡᠯ ᠬᠢᠬᠦ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ)᠂ ᠬᠥᠮᠦᠨ ᠦ᠌ ᠤᠬᠠᠬᠤ ᠳ᠋ᠤ᠌ ᠬᠢᠯᠪᠠᠷ ᠴᠠᠭᠠᠨ ᠥᠩᠭᠡ ᠪᠡᠷ ᠢᠯᠡᠳᠬᠡᠨ᠂ ᠤᠯᠤᠰ ᠤ᠋ᠨ ᠰᠠᠢᠨ ᠮᠠᠯᠴᠢᠨ ᠨᠤᠭᠤᠳ ᠤ᠋ᠨ ᠠᠵᠢᠯᠯᠠᠭᠠᠨ ᠤ᠋ ᠲᠤᠷᠰᠢᠯᠭᠠ ᠠ᠋ᠴᠠ ᠡᠰᠢ ᠲᠠᠲᠠᠵᠤ᠂ ᠦᠯᠢᠭᠡᠷ ᠵᠢᠱ᠌ᠢᠶᠡ ᠪᠣᠯᠭᠠᠨ ᠶᠠᠷᠢᠭᠠᠳ᠂ ᠵᠠᠷᠢᠮ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠲᠠᠩᠬᠢᠮ ᠳ᠋ᠤ᠌ ᠪᠠᠢᠭᠰᠠᠨ ᠰᠠᠢᠨ ᠮᠠᠯᠴᠢᠨ ᠠ᠋ᠴᠠ ᠦᠭᠡ ᠠᠰᠠᠭᠤᠬᠤ ᠵᠡᠷᠭᠡ ᠪᠡᠷ ᠬᠠᠷᠢᠯᠴᠠᠨ ᠦᠭᠡ ᠬᠡᠯᠡᠯᠴᠡᠬᠦ ᠮᠡᠲᠦ ᠰᠠᠨᠠᠯ ᠰᠣᠯᠢᠯᠴᠠᠨ᠂ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯ ᠤ᠋ᠨ ᠦᠶᠡᠰ ᠲᠤᠰ ᠤᠯᠤᠰ ᠲᠤ᠌ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠬᠡᠷᠬᠢᠨ ᠬᠥᠭᠵᠢᠭᠰᠡᠭᠡᠷ ᠢᠷᠡᠭᠰᠡᠨ ᠦ᠌ ᠳ᠋ᠦᠩ ᠲᠣᠢᠮᠣ ᠶ᠋ᠢ ᠢᠷᠠᠭᠤ ᠲᠣᠳᠣᠷᠬᠠᠢ ᠪᠠᠷ ᠶᠠᠷᠢᠵᠤ ᠥᠭᠪᠡ᠃
ᠥᠩᠭᠡᠷᠡᠭᠴᠢ ᠬᠠᠪᠤᠷ᠂ ᠤᠩᠭᠠᠰᠤ ᠨᠣᠣᠰᠣ ᠶ᠋ᠢ ᠭᠠᠷᠤᠵᠠᠳᠠᠯ ᠦᠭᠡᠢ ᠬᠢᠷᠭᠠᠵᠤ ᠠᠪᠬᠤ ᠲᠤᠬᠠᠢ ᠺᠣᠮᠫᠠᠨᠢ ᠶ᠋ᠢᠨ ᠠᠵᠢᠯ ᠶᠠᠪᠤᠭᠤᠯᠬᠤ ᠦᠶᠡᠰ ᠭᠠᠷᠤᠭᠰᠠᠨ ᠳᠤᠲᠠᠭᠳᠠᠯ ᠢ᠋ ᠳᠤᠷᠠᠳᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)᠂ ᠮᠠᠷᠱᠠᠯ ᠡᠮᠦᠨᠡ ᠭᠣᠪᠢ ᠠᠢᠮᠠᠭ ᠤ᠋ᠨ ᠮᠠᠯᠴᠢᠨ ᠠᠪᠢᠷᠮᠢᠳ ᠢ᠋ ᠬᠠᠷᠢᠯᠴᠠᠨ ᠦᠭᠡ ᠶᠠᠷᠢᠵᠤ ᠪᠠᠢᠭᠰᠠᠨ ᠶᠤᠮ ᠰᠢᠭ᠋᠂ ᠤᠷᠲᠤ ᠶ᠋ᠢᠨ ᠨᠣᠣᠰᠣ ᠬᠢᠷᠭᠠᠬᠤ ᠦᠶᠡ ᠪᠡᠷ ᠲᠠᠨ ᠤ᠋ ᠠᠢᠮᠠᠭ ᠲᠤ᠌ ᠶᠠᠮᠠᠷ ᠳᠤᠲᠠᠭᠳᠠᠯ ᠭᠠᠷᠤᠭᠰᠠᠨ ᠢ᠋ ᠶᠠᠷᠢᠵᠤ ᠥᠭᠭᠦᠨᠡ ᠤᠤ? ᠭᠡᠪᠡᠯ᠂ ᠲᠡᠷᠡ ᠮᠠᠯᠴᠢᠨ ᠬᠠᠷᠢᠭᠤ ᠥᠭᠦᠯᠡᠷᠦᠨ᠂
— ᠮᠠᠨ ᠤ᠋ ᠠᠢᠮᠠᠭ ᠲᠤ᠌ ᠲᠡᠮᠡᠭᠡ ᠶ᠋ᠢ ᠳᠡᠩᠳᠡᠭᠦᠦ ᠡᠷᠲᠡ ᠬᠢᠷᠭᠠᠭᠰᠠᠨ ᠤᠴᠢᠷ᠂ ᠬᠦᠢᠲᠡᠨ ᠪᠣᠷᠣᠭᠠᠨ ᠳ᠋ᠤ᠌ ᠨᠡᠯᠢᠶᠡᠳ ᠣᠯᠠᠨ ᠲᠡᠮᠡᠭᠡ ᠣᠰᠤᠭᠤᠵᠤ ᠦᠬᠦᠭᠰᠡᠨ ᠪᠢᠯᠡ᠃ ᠪᠠᠰᠠ ᠨᠣᠣᠰᠣ ᠬᠢᠷᠭᠠᠬᠤ ᠪᠷᠢᠭᠠᠳ᠋(ᠪᠠᠷᠢᠭᠠᠳᠠ) ᠤ᠋ᠨ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ ᠮᠠᠰᠢ ᠮᠠᠭᠤ ᠪᠠᠢᠭᠰᠠᠨ ᠤᠴᠢᠷ᠂ ᠦᠷᠡ ᠪᠦᠲᠦᠭᠡᠯ ᠪᠠᠭᠠ ᠲᠠᠢ ᠶ᠋ᠢᠨ ᠳᠡᠭᠡᠷᠡ ᠡᠳᠦᠢ ᠲᠡᠳᠦᠢ ᠬᠥᠮᠦᠨ ᠦ᠌ ᠠᠵᠢᠯ ᠢ᠋ ᠠᠯᠳᠠᠭᠳᠠᠭᠤᠯᠤᠭᠰᠠᠨ ᠪᠢᠯᠡ᠃ ᠵᠠᠷᠢᠮ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠨᠢᠭᠡ ᠠᠢᠯ ᠳᠡᠭᠡᠷᠡ ᠬᠡᠳᠦ ᠬᠡᠳᠦᠨ ᠪᠠᠷᠢᠭᠠᠳ᠋(ᠪᠠᠷᠢᠭᠠᠳᠠ)᠂ ᠠᠯᠢ ᠬᠡᠳᠦᠢᠨ ᠦ᠌ ᠰᠠᠮᠨᠠᠵᠤ ᠭᠦᠢᠴᠡᠭᠰᠡᠨ ᠢᠮᠠᠭᠠ ᠰᠠᠮᠨᠠᠬᠤ ᠭᠡᠵᠦ ᠳᠡᠭᠡᠷᠡ ᠳᠡᠭᠡᠷᠡ ᠪᠡᠨ ᠬᠦᠷᠴᠦ ᠢᠷᠡᠵᠦ ᠪᠠᠢᠭᠰᠠᠨ ᠤᠳᠠᠭᠠ ᠴᠤ᠌ ᠪᠣᠢ᠃ ᠢᠮᠠᠭᠠ ᠰᠠᠮᠨᠠᠬᠤ᠂ ᠬᠣᠨᠢ ᠲᠡᠮᠡᠭᠡ ᠬᠢᠷᠭᠠᠬᠤ ᠪᠠᠷᠢᠭᠠᠳ᠋ ᠲᠤ᠌ ᠳᠠᠢᠴᠢᠯᠠᠭᠳᠠᠨ ᠶᠠᠪᠤᠭᠰᠠᠨ ᠬᠥᠮᠦᠨ ᠦ᠌ ᠠᠷᠤ ᠭᠡᠷ ᠲᠦ᠍ ᠮᠠᠯ ᠬᠠᠷᠠᠬᠤ ᠬᠥᠮᠦᠨ ᠪᠦᠯᠢ ᠦᠭᠡᠢ ᠪᠣᠯᠤᠭᠰᠠᠨ ᠤᠴᠢᠷ ᠠ᠋ᠴᠠ᠂ ᠮᠠᠯ ᠠᠯᠳᠠᠬᠤ ᠶᠠᠪᠤᠳᠠᠯ ᠭᠠᠷᠴᠤ᠂ ᠠᠯᠳᠠᠭᠰᠠᠨ ᠮᠠᠯ ᠢ᠋ᠶ᠋ᠠᠨ ᠡᠷᠢᠬᠦ ᠠᠵᠢᠯ ᠭᠠᠷᠴᠤ ᠪᠠᠢᠭᠰᠠᠨ ᠵᠦᠢᠯ ᠪᠣᠢ᠃ ᠡᠨᠡ ᠲᠤᠷᠰᠢᠯᠭᠠ ᠶ᠋ᠢ ᠦᠵᠡᠬᠦ ᠳ᠋ᠦ᠍᠂ ᠨᠣᠣᠰᠣ ᠬᠢᠷᠭᠠᠬᠤ ᠠᠵᠢᠯ ᠢ᠋ ᠠᠷᠠᠢ ᠥᠮᠨᠥᠭᠡ ᠪᠡᠷ ᠵᠣᠬᠢᠶᠠᠨ ᠪᠠᠢᠭᠤᠯᠬᠤ ᠨᠢ ᠵᠦᠢᠲᠡᠢ ᠭᠡᠵᠦ ᠪᠢ ᠪᠣᠳᠣᠵᠤ ᠪᠠᠢᠨᠠ ᠭᠡᠵᠦ ᠮᠠᠷᠱᠠᠯ ᠤ᠋ᠨ ᠠᠰᠠᠭᠤᠭᠰᠠᠨ ᠦᠭᠡᠨ ᠳ᠋ᠦ᠍ ᠲᠡᠷᠡ ᠮᠠᠯᠴᠢᠨ ᠬᠠᠷᠢᠭᠤᠯᠵᠤ ᠪᠢᠯᠡ᠃
ᠮᠠᠷᠱᠠᠯ ᠲᠡᠷᠡ ᠦᠭᠡ ᠰᠣᠨᠣᠰᠤᠭᠠᠳ᠂ ᠳᠣᠷᠣᠨᠠᠲᠤ ᠠᠢᠮᠠᠭ ᠤ᠋ᠨ ᠮᠠᠯᠴᠢᠨ ᠨᠡᠩᠵᠢᠮᠡ ᠶ᠋ᠢ᠂
— ᠲᠠ᠂ ᠮᠠᠯ ᠢ᠋ᠶ᠋ᠠᠨ ᠶᠠᠭᠠᠬᠢᠵᠤ ᠥᠰᠬᠡᠭᠰᠡᠨ ᠢ᠋ᠶ᠋ᠡᠨ ᠶᠠᠷᠢᠵᠤ ᠥᠭᠭᠦᠨᠡᠦ(ᠥᠭᠭᠦᠨᠡ ᠤᠤ) ᠭᠡᠪᠡᠯ᠂
— ᠮᠣᠩᠭᠣᠯ ᠤᠯᠤᠰ ᠠᠷᠪᠠᠨ ᠨᠢᠭᠡᠨ ᠣᠨ ᠳ᠋ᠤ᠌ ᠳᠡᠭᠦᠦ ᠪᠢᠳᠡ ᠬᠣᠶᠠᠷ ᠳᠥᠩᠭᠡᠵᠢ(ᠳᠥᠩᠭᠡᠵᠦ) ᠠᠷᠪᠠᠨ ᠬᠣᠶᠠᠷ ᠮᠠᠯ ᠲᠠᠢ ᠪᠠᠢᠵᠤ ᠪᠢᠯᠡ᠃ ᠨᠢᠭᠡ ᠫᠤᠤ ᠬᠤᠳᠠᠯᠳᠤᠵᠤ ᠠᠪᠤᠭᠠᠳ᠂ ᠲᠡᠷᠡ ᠵᠢᠯ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠬᠣᠶᠠᠷ ᠵᠠᠭᠤᠨ ᠭᠥᠷᠥᠭᠡᠰᠦ ᠠᠯᠠᠵᠤ᠂ ᠬᠣᠷᠰᠢᠶᠠ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠲᠠᠪᠤ ᠲᠠᠪᠤᠨ ᠲᠥᠭᠥᠷᠢᠭ ᠢ᠋ᠶ᠋ᠡᠷ ᠲᠤᠰᠢᠶᠠᠭᠠᠳ᠂ ᠲᠡᠷᠡ ᠮᠥᠩᠭᠥ ᠪᠡᠷ ᠮᠠᠯ ᠬᠤᠳᠠᠯᠳᠤᠨ ᠠᠪᠴᠤ ᠬᠥᠯᠵᠢᠭᠡᠳ᠂ ᠣᠳᠣ ᠭᠠᠭᠴᠠ ᠪᠢ ᠬᠣᠶᠠᠷ ᠵᠠᠭᠤᠭᠠᠳ ᠮᠠᠯ ᠲᠠᠢ ᠪᠣᠯᠤᠭᠠᠳ ᠪᠠᠢᠨᠠ᠃ ᠪᠢ ᠪᠠᠰᠠ ᠬᠣᠷᠰᠢᠶᠠᠨ ᠤ᠋ ᠠᠭᠧᠨᠲ ᠬᠢᠵᠦ᠂ ᠲᠦᠭᠦᠬᠡᠢ ᠡᠳ᠋ ᠪᠡᠯᠡᠳᠬᠡᠬᠦ ᠲᠥᠯᠥᠪᠯᠡᠭᠡ ᠪᠡᠨ206 ᠬᠤᠪᠢ ᠪᠠᠷ ᠳᠠᠪᠠᠭᠤᠯᠤᠭᠰᠠᠨ᠃ ᠮᠥᠨ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠪᠦᠬᠦ ᠤᠩᠭᠠᠰᠤ ᠨᠣᠣᠰᠣ ᠬᠣᠷᠰᠢᠶᠠᠨ ᠳ᠋ᠠᠭᠠᠨ ( ᠳ᠋ᠤ᠌ ᠪᠠᠨ) ᠲᠤᠰᠢᠶᠠᠭᠰᠠᠨ ᠭᠡᠵᠦ ᠨᠡᠩᠵᠢᠮᠡ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍᠂ ᠲᠥᠪ ᠠᠢᠮᠠᠭ ᠤ᠋ᠨ ᠳᠡᠯᠭᠡᠷᠴᠣᠭᠲᠤ ᠰᠤᠮᠤ ᠶ᠋ᠢᠨ ᠮᠠᠯᠴᠢᠨ ᠫᠤᠩᠰᠤᠭ ᠰᠠᠭᠤᠳᠠᠯ ᠠ᠋ᠴᠠ ᠪᠠᠨ ᠪᠣᠰᠴᠤ᠂
— ᠪᠢ ᠴᠦ᠍ ᠪᠠᠰᠠ ᠤᠩᠭᠠᠰᠤ ᠨᠣᠣᠰᠣ ᠪᠠᠨ ᠬᠣᠷᠰᠢᠶᠠᠨ ᠳ᠋ᠤ᠌ ᠪᠦᠷᠢᠨ ᠲᠤᠰᠢᠶᠠᠭᠰᠠᠨ᠃ 21 ᠲᠡᠮᠡᠭᠡᠨ ᠡᠴᠡ143 ᠺᠢᠯᠣ᠌ ᠤᠩᠭᠠᠰᠤ᠂12 ᠢᠮᠠᠭᠠᠨ ᠠ᠋ᠴᠠ6 ᠺᠢᠯᠣ᠌᠊ ᠨᠣᠣᠯᠣᠭᠤᠷ ᠠᠪᠤᠭᠰᠠᠨ ᠭᠡᠪᠡᠯ᠂ ᠲᠥᠪ ᠠᠢᠮᠠᠭ ᠤ᠋ᠨ ᠡᠪᠦᠭᠡᠨ ᠳᠤᠭᠠᠷᠵᠠᠪ ᠪᠣᠰᠴᠤ᠂
— ᠪᠢ ᠵᠢᠷᠭᠤᠭᠠᠨ ᠢᠮᠠᠭᠠᠨ ᠠ᠋ᠴᠠ ᠪᠠᠨ7 ᠺᠢᠯᠣ᠊ ᠨᠣᠣᠯᠣᠭᠤᠷ ᠰᠠᠮᠨᠠᠵᠤ ᠠᠪᠤᠭᠰᠠᠨ ᠰᠢᠦ᠃ ᠬᠥᠮᠦᠨ ᠪᠠᠷᠤᠭ ᠦᠨᠡᠮᠰᠢᠬᠦ ᠦᠭᠡᠢ ᠪᠠᠢᠵᠤ ᠪᠢᠯᠡ᠃ ᠪᠢ ᠠᠷᠪᠠᠨ ᠭᠡᠷ ᠦ᠋ᠨ ᠤᠬᠠᠭᠤᠯᠤᠭᠴᠢ ᠬᠥᠮᠦᠨ ᠶᠦᠮ᠂ ᠲᠡᠭᠡᠭᠡᠳ᠂ ᠳᠠᠬᠢᠨ ᠳᠠᠬᠢᠨ ᠰᠠᠢᠨ ᠰᠠᠮᠨᠠᠪᠠᠯ᠂ ᠥᠴᠢᠨᠡᠨ (ᠡᠴᠢᠨᠡᠭᠡᠨ) ᠶᠡᠬᠡ ᠨᠣᠣᠯᠣᠭᠤᠷ ᠰᠠᠮᠨᠠᠵᠤ ᠪᠣᠯᠳᠠᠭ ᠶᠤᠮ ᠪᠠᠢᠨᠠ ᠭᠡᠵᠦ ᠲᠡᠷᠡ ᠰᠠᠮᠨᠠᠭᠰᠠᠨ ᠨᠣᠣᠯᠣᠭᠤᠷ ᠢ᠋ᠶ᠋ᠠᠨ ᠭᠠᠨᠵᠤᠭᠠᠯᠠᠭᠠᠳ᠂ ᠠᠷᠪᠠᠨ ᠭᠡᠷ ᠦ᠋ᠨ ᠠᠢᠯ ᠠᠬᠠ ᠳᠡᠭᠦᠦ ᠨᠠᠷ ᠲᠤ᠌ ᠵᠣᠷᠢᠭᠤᠳᠠ ᠦᠵᠡᠭᠦᠯᠵᠦ ᠶᠠᠪᠤᠭᠰᠠᠨ ᠪᠢᠯᠡ ᠬᠡᠮᠡᠵᠡᠢ᠃
ᠮᠠᠷᠱᠠᠯ ᠴᠢᠩᠭᠢᠵᠦ ᠬᠡᠳᠦᠨ ᠮᠠᠯᠴᠢᠨ ᠠ᠋ᠴᠠ ᠶᠠᠭᠤᠮᠠ ᠠᠰᠠᠭᠤᠵᠤ ᠬᠠᠷᠢᠭᠤ ᠰᠣᠨᠣᠰᠤᠭᠠᠳ᠂ ᠣᠯᠠᠨ ᠠᠢᠮᠠᠭ ᠤ᠋ᠨ ᠭᠠᠷᠮᠠᠭᠠᠢ ᠠᠵᠢᠯᠯᠠᠭᠠ ᠲᠠᠢ ᠮᠠᠯᠴᠢᠨ ᠤ᠋ ᠠᠵᠢᠯ ᠪᠠᠢᠳᠠᠯ ᠠ᠋ᠴᠠ ᠡᠰᠢ ᠲᠠᠲᠠᠵᠤ᠂ ᠤᠯᠤᠰ ᠨᠡᠢᠭᠡᠮ ᠢ᠋ᠶ᠋ᠡᠷ ᠮᠠᠯ ᠠᠵᠤ ᠠᠬᠤᠢ ᠶ᠋ᠢ ᠬᠥᠭᠵᠢᠭᠦᠯᠦᠨ᠂ ᠮᠠᠯ ᠢ᠋ᠶ᠋ᠠᠨ ᠥᠰᠬᠡᠨ ᠣᠯᠠᠰᠢᠷᠠᠭᠤᠯᠵᠤ ᠪᠠᠢᠭᠠ ᠶ᠋ᠢ ᠬᠡᠯᠡᠭᠡᠳ᠂ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯ ᠤ᠋ᠨ ᠬᠣᠷᠢᠨ ᠵᠢᠯ ᠦ᠋ᠨ ᠲᠤᠤᠱᠲᠠ(ᠲᠤᠭᠤᠰᠢᠳᠠ) ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠲᠦᠮᠡᠨ ᠦ᠌ ᠶᠡᠬᠡ ᠤᠷᠤᠭᠰᠢᠲᠠᠢ ᠪᠦᠲᠦᠭᠡᠯ ᠰᠠᠢᠬᠠᠨ ᠠᠮᠵᠢᠯᠲᠠ ᠣᠯᠤᠭᠰᠠᠨ ᠨᠢ᠂ ᠰᠲ᠋ᠠᠯᠢᠨ ᠤ᠋ ᠬᠠᠯᠠᠭᠤᠨ ᠲᠤᠰᠠᠯᠠᠮᠵᠢ ᠶ᠋ᠢᠨ ᠠᠴᠢ ᠭᠡᠵᠦ ᠲᠤᠰᠬᠠᠢᠯᠠᠨ ᠲᠡᠮᠳᠡᠭᠯᠡᠭᠡᠳ᠂
— ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠠᠷᠪᠠᠨ ᠨᠢᠭᠡᠨ ᠣᠨ ᠠ᠋ᠴᠠ ᠥᠨᠥᠳᠥᠷ ᠬᠦᠷᠲᠡᠯᠡ ᠵᠥᠪᠯᠡᠯ ᠦ᠋ᠨ ᠵᠠᠰᠠᠭᠲᠤ ᠬᠣᠯᠪᠣᠭᠠᠲᠤ ᠤᠯᠤᠰ ᠮᠠᠨ ᠤ᠋ ᠲᠤᠰᠠᠭᠠᠷ ᠲᠣᠭᠲᠠᠨᠢᠭᠰᠠᠨ ᠠᠷᠠᠳ ᠤᠯᠤᠰ ᠤ᠋ᠨ ᠲᠥᠷᠥ ᠶ᠋ᠢᠨ ᠪᠦᠬᠦ ᠪᠦᠲᠦᠭᠡᠨ ᠪᠤᠰᠬᠠᠬᠤ ᠦᠢᠯᠡᠰ ᠲᠦ᠍ ᠲᠤᠰᠠᠯᠠᠮᠵᠢ ᠦᠵᠡᠭᠦᠯᠦᠭᠰᠡᠭᠡᠷ ᠢᠷᠡᠯᠡ᠃ ᠡᠭᠦᠨ ᠳ᠋ᠦ᠍ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠲᠦᠮᠡᠨ ᠦ᠌ ᠲᠥᠯᠥᠭᠡ ᠬᠠᠯᠠᠮᠵᠢᠲᠤ ᠰᠠᠨᠠᠭᠠ ᠲᠠᠯᠪᠢᠵᠤ ᠪᠠᠢᠭᠠ ᠮᠠᠨ ᠤ᠋ ᠪᠠᠭᠰᠢ᠂ ᠬᠠᠨᠢ ᠨᠥᠬᠥᠷ ᠶᠡᠬᠡ ᠰᠲ᠋ᠠᠯᠢᠨ ᠳ᠋ᠤ᠌ ᠠᠷᠠᠳ ᠨᠡᠢᠭᠡᠮ ᠦ᠋ᠨ ᠡᠮᠦᠨᠡ ᠡᠴᠡ ᠪᠠᠶᠠᠷ ᠬᠦᠷᠭᠡᠶᠡ! ᠭᠡᠵᠦ ᠮᠠᠷᠱᠠᠯ ᠤ᠋ᠨ ᠬᠡᠯᠡᠬᠦ ᠳ᠋ᠦ᠍ ᠬᠤᠷᠠᠯᠳᠤᠭᠰᠠᠳ ᠶᠡᠬᠡ ᠰᠲ᠋ᠠᠯᠢᠨ ᠢ᠋ ᠢᠷᠥᠭᠡᠨ ᠲᠠᠩᠬᠢᠮ ᠢ᠋ᠶ᠋ᠠᠷ ᠨᠢᠵᠢᠭᠢᠨᠡᠲᠡᠯᠡ ᠠᠯᠠᠭᠠ ᠲᠠᠰᠢᠵᠠᠭᠠᠨ ᠪᠠᠶᠠᠷᠯᠠᠪᠠ᠃
ᠮᠣᠩᠭᠣᠯ ᠠᠷᠠᠳ ᠤᠯᠤᠰ ᠤ᠋ᠨ ᠲᠤᠯᠭᠠᠭᠤᠷᠢ ᠲᠥᠷᠥ ᠪᠠᠢᠭᠤᠯᠤᠭᠰᠠᠨ ᠴᠠᠭ ᠠ᠋ᠴᠠ ᠨᠠᠭᠠᠰᠢ ᠵᠥᠪᠯᠡᠯ ᠦ᠋ᠨ ᠵᠠᠰᠠᠭᠲᠤ ᠬᠣᠯᠪᠣᠭᠠᠲᠤ ᠤᠯᠤᠰ᠂ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠲᠦᠮᠡᠨ ᠦ᠌ ᠲᠥᠷᠥ ᠶ᠋ᠢᠨ ᠲᠤᠰᠠᠭᠠᠷ ᠲᠣᠭᠲᠠᠨᠢᠬᠤ ᠪᠠᠢᠳᠠᠯ ᠢ᠋ ᠡᠵᠡᠷᠬᠡᠭ ᠲᠦᠷᠢᠮᠡᠬᠡᠢ ᠶ᠋ᠢᠨ ᠥᠩᠭᠡᠯᠵᠡᠨ ᠬᠠᠯᠳᠠᠬᠤ ᠠ᠋ᠴᠠ ᠬᠡᠷᠬᠢᠨ ᠬᠠᠮᠠᠭᠠᠯᠠᠨ ᠲᠤᠰᠠᠯᠠᠵᠤ᠂ ᠪᠠᠲᠤᠳᠬᠠᠨ ᠪᠡᠬᠢᠵᠢᠭᠦᠯᠦᠭᠰᠡᠭᠡᠷ ᠢᠷᠡᠭᠰᠡᠨ᠂ ᠮᠥᠨ ᠵᠥᠪᠯᠡᠯᠲᠦ ᠶ᠋ᠢᠨ ᠮᠡᠷᠭᠡᠵᠢᠯᠲᠡᠨ ᠬᠡᠷᠬᠢᠨ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠲᠦᠮᠡᠨ ᠳ᠋ᠦ᠍ ᠤᠯᠤᠰ ᠠᠷᠠᠳ ᠤ᠋ᠨ ᠠᠵᠤ ᠠᠬᠤᠢ᠂ ᠰᠣᠶᠣᠯ ᠪᠣᠯᠪᠠᠰᠤᠷᠠᠯ ᠢ᠋ ᠬᠥᠭᠵᠢᠭᠦᠯᠬᠦ᠂ ᠪᠣᠯᠪᠠᠰᠤᠨ ᠬᠦᠴᠦᠨ ᠲᠡᠢ ᠪᠣᠯᠬᠤ ᠶᠠᠪᠤᠳᠠᠯ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠵᠦᠢᠯ ᠵᠦᠢᠯ ᠢ᠋ᠶ᠋ᠡᠷ ᠲᠤᠰᠠᠯᠠᠯᠴᠠᠨ ᠵᠢᠳᠬᠦᠭᠰᠡᠭᠡᠷ ᠢᠷᠡᠭᠰᠡᠨ ᠢ᠋ ᠲᠣᠳᠣᠷᠬᠠᠢ ᠲᠣᠮᠣᠷᠠᠭᠤᠨ ᠢ᠋ᠶ᠋ᠠᠷ ᠡᠰᠢ ᠦᠯᠢᠭᠡᠷ ᠲᠡᠳᠡᠨ ᠶᠠᠷᠢᠵᠠᠢ᠃ ᠴᠢᠩᠭᠢᠭᠡᠳ᠂
— ᠵᠥᠪᠯᠡᠯ ᠦ᠋ᠨ ᠵᠠᠰᠠᠭᠲᠤ ᠬᠣᠯᠪᠣᠭᠠᠲᠤ ᠤᠯᠤᠰ ᠠ᠋ᠴᠠ ᠲᠤᠰ ᠤᠯᠤᠰ ᠲᠤ᠌ ᠰᠠᠭᠤᠭᠠ ᠣᠨᠴᠠ ᠪᠥᠭᠡᠳ ᠪᠦᠷᠢᠨ ᠡᠷᠬᠡ ᠪᠠᠷᠢᠬᠤ ᠡᠯᠴᠢᠨ ᠢᠸᠠᠨᠤᠸ ᠲᠤ᠌ ᠲᠤᠰ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠰᠠᠢᠨ ᠮᠠᠯᠴᠢᠨ ᠤ᠋ ᠮᠠᠨᠠᠢ ᠡᠨᠡ ᠵᠥᠪᠯᠡᠯᠭᠡᠨ ᠦ᠌ ᠡᠮᠦᠨᠡ ᠡᠴᠡ ᠲᠤᠰᠬᠠᠢᠯᠠᠨ ᠪᠠᠶᠠᠷ ᠬᠦᠷᠭᠡᠵᠦ᠂ ᠮᠠᠨ ᠤ᠋ ᠠᠷᠠᠳ ᠲᠦᠮᠡᠨ ᠦ᠌ ᠪᠦᠬᠦᠢᠯᠡ ᠬᠦᠰᠡᠯ ᠡᠷᠡᠮᠡᠯᠵᠡᠯᠡᠯ᠂ ᠡᠷᠢᠯ ᠬᠡᠷᠡᠭᠴᠡᠭᠡᠨ ᠦ᠌ ᠵᠦᠢᠯ ᠵᠦᠢᠯ ᠢ᠋ᠶ᠋ᠡᠷ ᠲᠤᠰᠠᠯᠠᠨ ᠨᠡᠢᠯᠡᠭᠦᠯᠬᠦ ᠶ᠋ᠢ ᠬᠢᠴᠢᠶᠡᠵᠦ᠂ ᠬᠠᠯᠠᠭᠤᠨ ᠰᠠᠨᠠᠭᠠ ᠲᠠᠯᠪᠢᠵᠤ ᠪᠠᠢᠭᠠ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠲᠠᠯᠠᠷᠬᠠᠬᠤ ᠶ᠋ᠢ ᠬᠦᠰᠡᠨᠡ ᠭᠡᠵᠦ ᠳᠣᠲᠣᠨᠣ ᠡᠯᠢᠭᠡᠰᠡᠭ ᠢ᠋ᠶ᠋ᠡᠷ ᠬᠡᠯᠡᠵᠦ ᠠᠯᠠᠭᠠ ᠲᠠᠰᠢᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ)᠂ ᠤᠯᠤᠰ ᠤ᠋ᠨ ᠰᠠᠢᠨ ᠮᠠᠯᠴᠢᠨ ᠨᠤᠭᠤᠳ ᠤᠳᠠᠲᠠᠯᠠ ᠠᠯᠠᠭᠠ ᠲᠠᠰᠢᠵᠠᠭᠠᠵᠤ᠂ ᠵᠥᠪᠯᠡᠯ ᠦ᠋ᠨ ᠵᠠᠰᠠᠭᠲᠤ ᠬᠣᠯᠪᠣᠭᠠᠲᠤ ᠤᠯᠤᠰ ᠤ᠋ᠨ ᠵᠠᠰᠠᠭ ᠤ᠋ᠨ ᠲᠥᠯᠥᠭᠡᠯᠡᠭᠴᠢ ᠡᠯᠴᠢᠨ ᠳ᠋ᠦ᠍ ᠴᠢᠩ ᠬᠦ᠌ ᠪᠠᠶᠠᠷ ᠲᠠᠯᠠᠷᠬᠠᠯ ᠤ᠋ᠨ ᠰᠡᠳᠬᠢᠯ ᠢ᠋ ᠢᠯᠡᠷᠬᠡᠢᠯᠡᠵᠡᠢ᠃
ᠰᠢᠷᠴᠢᠨ ᠠᠯᠠᠭᠠ ᠲᠠᠰᠢᠵᠤ ᠪᠠᠢᠬᠤ ᠳ᠋ᠠᠭᠠᠨ᠂ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠲᠦᠮᠡᠨ ᠦ᠌ ᠡᠷᠬᠡ ᠴᠢᠯᠥᠭᠡ᠂ ᠲᠤᠰᠠᠭᠠᠷ ᠲᠣᠭᠲᠠᠨᠢᠬᠤ ᠪᠠᠢᠳᠠᠯ ᠢ᠋ ᠳᠡᠯᠡᠬᠡᠢ ᠳ᠋ᠠᠬᠢᠨᠠ ᠡᠩ ᠲᠡᠷᠢᠭᠦᠨ ᠵᠥᠪᠰᠢᠶᠡᠷᠡᠨ ᠬᠦᠯᠢᠶᠡᠵᠦ ᠬᠦᠨᠳᠦᠳᠬᠡᠨ ᠦᠵᠡᠭᠰᠡᠨ ᠨᠡᠢᠭᠡᠮ ᠵᠢᠷᠤᠮᠲᠤ ᠶᠡᠬᠡ ᠤᠯᠤᠰ ᠤ᠋ᠨ ᠲᠥᠯᠥᠭᠡᠯᠡᠭᠴᠢ᠂ ᠵᠥᠪᠯᠡᠯᠲᠦ ᠶ᠋ᠢᠨ ᠡᠯᠴᠢᠨ ᠢ᠋ ᠪᠠᠶᠠᠰᠬᠤᠯᠠᠩᠲᠤ ᠨᠢᠳᠦ ᠪᠡᠷ ᠦᠵᠡᠵᠦ᠂ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠲᠦᠮᠡᠨ ᠦ᠌ ᠲᠥᠷᠥ ᠶ᠋ᠢᠨ ᠰᠠᠢᠬᠠᠨ ᠪᠦᠲᠦᠭᠡᠯ ᠠᠮᠵᠢᠯᠲᠠ ᠨᠢ ᠡᠨᠡ ᠵᠥᠪᠯᠡᠯᠲᠦ ᠤᠯᠤᠰ ᠤ᠋ᠨ ᠠᠴᠢ ᠭᠠᠪᠢᠶᠠ ᠳᠠ ᠭᠡᠵᠦ ᠪᠠᠬᠠᠷᠬᠠᠯᠠ᠃
— ᠶᠠᠭᠤᠲᠠᠢ ᠰᠢᠳᠤᠷᠭᠤ ᠦᠨᠡᠨᠴᠢ᠂ ᠰᠢᠯᠤᠭᠤᠨ ᠴᠢᠬᠡᠴᠢ ᠬᠥᠮᠦᠨ ᠦ᠌ ᠰᠠᠢᠬᠠᠨ ᠴᠢᠷᠠᠢ ᠲᠠᠢ ᠬᠥᠮᠦᠨ ᠪᠢᠯᠡ ᠭᠡᠵᠦ ᠡᠪᠦᠭᠡᠨ ᠮᠠᠯᠴᠢᠨ ᠵᠥᠪᠯᠡᠯᠲᠦ ᠶ᠋ᠢᠨ ᠡᠯᠴᠢᠨ ᠢ᠋ ᠪᠠᠬᠠᠳᠤᠨ ᠠᠯᠠᠭᠠ ᠲᠠᠰᠢᠵᠤ ᠪᠠᠢᠭᠠ ᠳ᠋ᠤ᠌᠂ ᠠᠦ᠋ᠲ᠋ᠣᠨᠣᠮᠢ ᠶ᠋ᠢᠨ ᠡᠬᠢ ᠪᠡᠷ ᠨᠢ ᠶᠡᠬᠡ ᠬᠦᠷᠢᠶᠡᠨ ᠳ᠋ᠦ᠍ ᠠᠩᠬᠠ ᠴᠠᠭᠠᠨ ᠬᠠᠭᠠᠨ ᠤ᠋ ᠳ᠋ᠢᠫᠯᠣᠮᠠᠲ ᠺᠤᠷᠤᠰᠲ᠋ᠤᠸᠸᠼ ᠢ᠋ ᠦᠵᠡᠭᠰᠡᠨ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠵᠤ᠂ ᠶᠠᠩᠪᠠᠷᠬᠠᠭ ᠡᠵᠡᠷᠬᠡᠭ ᠴᠢᠷᠠᠢ ᠨᠢ ᠰᠡᠳᠬᠢᠯ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠤᠷᠭᠤᠭᠰᠠᠨ ᠪᠢᠯᠡ᠃
ᠴᠠᠭᠠᠨ ᠬᠠᠭᠠᠨ ᠤ᠋ ᠲᠡᠷᠡ ᠳ᠋ᠢᠫᠯᠣᠮᠠᠲ ᠠᠯᠲᠠᠨ ᠬᠠᠳᠬᠤᠮᠠᠯ ᠶᠣᠰᠣᠯᠠᠯ ᠤ᠋ᠨ ᠭᠣᠶᠣ ᠳᠡᠪᠡᠯ ᠬᠤᠪᠴᠠᠰᠤ ᠲᠠᠢ᠂ ᠭᠤᠷᠪᠠᠯᠵᠢᠨ ᠬᠡᠯᠪᠡᠷᠢ ᠲᠡᠢ ᠮᠠᠯᠠᠭᠠᠢ ᠲᠠᠢ᠂ ᠶᠡᠬᠡ ᠰᠦᠷ ᠪᠠᠳᠠᠷᠠᠭᠤᠯᠤᠨ᠂ ᠪᠣᠭᠳᠠ ᠬᠠᠭᠠᠨ ᠳ᠋ᠤ᠌ ᠪᠠᠷᠠᠭᠠᠯᠬᠠᠬᠤ ᠭᠡᠵᠦ ᠶᠠᠪᠤᠭᠰᠠᠨ ᠲᠠᠢ ᠨᠢ ᠰᠢᠷᠴᠢᠨ ᠠᠦᠢ᠍ᠲ᠋ᠦᠨᠦᠮᠢᠲ᠋ ᠦ᠋ᠨ ᠲᠡᠷᠡ ᠵᠢᠯ ᠳᠠᠭᠠᠷᠢᠯᠳᠤᠭᠰᠠᠨ ᠪᠠᠢᠵᠠᠢ᠃ ᠬᠠᠭᠠᠨ ᠬᠥᠮᠦᠨ ᠦ᠌ ᠰᠠᠭᠤᠬᠤ ᠰᠡᠦᠬᠡᠨ ᠳ᠋ᠦ᠍ ᠭᠣᠶᠣ ᠳᠡᠪᠡᠯ ᠲᠡᠢ ᠨᠠᠢ᠍ᠮᠠᠨ ᠬᠢᠶᠡ ᠪᠡᠷ ᠳᠠᠮᠨᠠᠭᠤᠯᠤᠨ᠂ ᠬᠣᠶᠠᠷ ᠬᠠᠵᠠᠭᠤ ᠪᠠᠷ ᠬᠠᠨ ᠸᠠᠩ᠂ ᠪᠡᠢᠯᠡ ᠪᠡᠢᠰᠡ ᠳᠠᠭᠠᠯᠳᠤᠨ ᠶᠠᠪᠤᠵᠤ᠂ ᠴᠠᠭᠠᠨ ᠬᠠᠭᠠᠨ ᠤ᠋ ᠲᠡᠷᠡ ᠳ᠋ᠢᠫᠯᠣᠮᠠᠲ᠂ ᠰᠢᠷᠴᠢᠨ ᠦ᠌ ᠤᠷᠢᠳᠤ ᠡᠮᠦᠨᠡ ᠦᠵᠡᠭᠡ ᠦᠭᠡᠢ ᠬᠠᠴᠢᠨ ᠰᠢᠯ ᠬᠠᠮᠠᠷ ᠳᠡᠭᠡᠷᠡ ᠪᠡᠨ ᠬᠠᠪᠴᠢᠨ ᠲᠣᠭᠲᠠᠭᠠᠭᠠᠳ᠂ ᠪᠠᠢᠳᠠᠯ ᠮᠠᠰᠢ ᠶᠡᠬᠡ ᠵᠠᠩ ᠲᠠᠢ᠂ ᠰᠡᠦᠬᠡ ᠶ᠋ᠢᠨ ᠬᠣᠶᠠᠷ ᠬᠠᠵᠠᠭᠤ ᠪᠠᠷ ᠵᠢᠰᠤᠷᠳᠠᠨ ᠳᠠᠭᠠᠵᠤ ᠶᠠᠪᠤᠭᠰᠠᠨ ᠪᠢᠯᠳᠠᠤᠴᠢ ᠬᠠᠨ ᠸᠠᠩ ᠤ᠋ᠳ ᠢ᠋ ᠮᠠᠰᠢ ᠲᠣᠭᠣᠮᠰᠠᠷᠯᠠᠬᠤ ᠦᠭᠡᠢ ᠪᠠᠢᠳᠠᠯ ᠢ᠋ᠶ᠋ᠠᠷ ᠰᠢᠯᠦᠭᠦᠰᠦᠨ ᠦ᠌ ᠨᠢᠳᠦ ᠶ᠋ᠢ ᠠᠨᠢᠰᠭᠢᠨ ᠬᠠᠷᠠᠵᠤ ᠶᠠᠪᠤᠭᠰᠠᠨ ᠪᠢᠯᠡ!
ᠬᠦᠷᠢᠶᠡ ᠶ᠋ᠢᠨ ᠬᠢᠨ ᠬᠡᠯᠡᠯᠴᠡᠬᠦ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ)᠂ ᠲᠡᠷᠡ ᠺᠤᠷᠤᠰᠲ᠋ᠤᠸᠸᠼ ᠢ᠋ ᠮᠣᠩᠭᠣᠯ ᠨᠣᠶᠠᠳ ᠤ᠋ᠨ ᠪᠢᠴᠢᠭ ᠢ᠋ ᠱᠠᠯᠠ ᠳᠡᠭᠡᠷᠡ ᠬᠠᠶᠠᠵᠤ ᠭᠢᠰᠬᠢᠭᠡᠳ᠂ ᠵᠦᠢᠯ ᠵᠦᠢᠯ ᠢ᠋ᠶ᠋ᠡᠷ ᠬᠢᠬᠠᠨ ᠲᠤᠯᠭᠠᠬᠤ ᠬᠠᠷᠭᠢᠰ ᠭᠡᠷᠡ ᠪᠢᠴᠢᠭ ᠢ᠋ ᠬᠠᠪᠴᠢᠨ ᠵᠥᠪᠰᠢᠶᠡᠷᠡᠭᠦᠯᠦᠭᠰᠡᠨ ᠬᠥᠮᠦᠨ ᠭᠡᠵᠦ ᠬᠡᠯᠡᠯᠴᠡᠳᠡᠭ ᠪᠠᠢᠵᠠᠢ᠃ ᠴᠢᠩᠭᠢᠭᠡᠳ ᠠᠷᠠᠳ ᠣᠯᠠᠨ᠂ ᠲᠡᠷᠡ ᠬᠠᠷᠭᠢᠰ ᠭᠡᠷᠡ ᠶ᠋ᠢ ᠶᠡᠬᠡᠯᠡ( ᠶᠡᠬᠡ ᠯᠡ) ᠬᠣᠷᠣᠰᠤᠨ ᠡᠰᠡᠷᠭᠦᠴᠡᠵᠦ᠂ ᠬᠦᠷᠢᠶᠡᠨ ᠦ᠌ ᠬᠤᠳᠠᠯᠳᠤᠭᠠ ᠬᠢᠬᠦ ᠶᠡᠬᠡ ᠴᠢᠯᠥᠭᠡᠨ ᠳ᠋ᠦ᠍ ᠬᠠᠷᠭᠢᠰ ᠺᠣᠷᠣᠰᠲ᠋ᠣᠸᠸᠼ᠂ ᠤᠯᠤᠰ ᠢ᠋ᠶ᠋ᠠᠨ ᠬᠤᠳᠠᠯᠳᠤᠭᠴᠢ ᠠᠶᠤᠮᠠᠬᠠᠢ ᠵᠢᠰᠤᠷ ᠨᠣᠶᠠᠳ ᠢ᠋ ᠰᠦᠷᠡᠯ ᠡᠪᠡᠰᠦ ᠪᠡᠷ ᠳᠦᠷᠰᠦᠯᠡᠨ ᠬᠢᠭᠡᠳ ᠬᠡᠩᠭᠡᠷᠭᠡ ᠴᠣᠬᠢᠯᠠᠨ ᠪᠥᠵᠢᠵᠦ᠂ ᠭᠠᠯᠳᠠᠨ ᠰᠢᠲᠠᠭᠠᠵᠤ ᠣᠷᠬᠢᠭᠰᠠᠨ ᠪᠢᠯᠡ᠃
ᠡᠭᠡᠯ ᠵᠢᠷ ᠦ᠋ᠨ ᠬᠥᠮᠦᠨ ᠦ᠌ ᠡᠮᠦᠨᠡ ᠮᠠᠰᠢ ᠶᠡᠬᠡ ᠵᠠᠩ ᠲᠠᠢ ᠪᠥᠭᠡᠳ ᠬᠥᠮᠦᠨ ᠠᠷᠠᠳ ᠤ᠋ᠨ ᠵᠣᠪᠠᠯᠠᠩ ᠭᠠᠴᠢᠭᠳᠠᠯ ᠢ᠋ ᠣᠭᠲᠣ ᠬᠡᠷᠡᠭᠰᠡᠬᠦ ᠦᠭᠡᠢ ᠬᠠᠲᠠᠭᠤ ᠬᠠᠷᠠ ᠰᠡᠳᠬᠢᠯ ᠲᠡᠢ᠂ ᠳᠡᠭᠡᠭᠦᠷ ᠵᠠᠩ ᠲᠠᠢ ᠮᠥᠷᠲᠡᠭᠡᠨ ᠳᠡᠭᠡᠳᠦᠰ ᠦ᠋ᠨ ᠡᠮᠦᠨᠡ᠂ ᠡᠷᠬᠡᠲᠡᠨ ᠳᠠᠷᠬᠠᠲᠠᠨ ᠤ᠋ ᠡᠮᠦᠨᠡ ᠲᠤᠢᠯ ᠤ᠋ᠨ ᠵᠢᠰᠤᠷ ᠪᠢᠯᠳᠠᠤᠴᠢ ᠪᠥᠭᠡᠳ ᠠᠶᠠᠰ ᠲᠤᠨᠢ( ᠳ᠋ᠤ᠌ ᠨᠢ) ᠨᠡᠢᠯᠡᠭᠦᠯᠵᠦ᠂ ᠲᠦᠮᠡᠨ ᠵᠦᠢᠯ ᠢ᠋ᠶ᠋ᠡᠷ ᠠᠷᠭᠠᠳᠠᠵᠤ ᠨᠢᠭᠤᠷ ᠲᠠᠢ ᠪᠣᠯᠬᠤ ᠶ᠋ᠢ ᠬᠢᠴᠢᠶᠡᠵᠡᠭᠡᠨ᠂ ᠪᠡᠶᠡ ᠪᠡᠶᠡ ᠶ᠋ᠢᠨ ᠤᠯᠠ ᠱᠠᠭᠠᠢᠵᠤ᠂ ᠭᠡᠳᠡᠰᠦᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠬᠥᠯ ᠢ᠋ᠶ᠋ᠡᠨ ᠴᠢᠬᠢᠯᠴᠡᠬᠦ ᠭᠡᠵᠦ ᠶᠠᠪᠤᠳᠠᠭ ᠠᠦ᠋ᠲ᠋ᠣᠨᠣᠮᠢᠲ ᠵᠠᠰᠠᠭ ᠤ᠋ᠨ ᠰᠠᠢᠳ ᠤ᠋ᠳ᠂ ᠬᠦᠴᠦᠲᠡᠨ ᠨᠢ ᠬᠦᠴᠦ ᠦᠭᠡᠢ ᠪᠡᠨ ᠢᠳᠡᠵᠦ᠂ ᠡᠷᠬᠡ ᠪᠠᠷᠢᠭᠰᠠᠨ ᠨᠢ ᠡᠷᠬᠡ ᠳᠠᠷᠬᠠ ᠦᠭᠡᠢ ᠪᠡᠨ ᠳᠠᠷᠤᠯᠠᠳᠠᠭ᠂ ᠡᠭᠦᠷᠢᠳᠡ ᠪᠤᠴᠠᠯᠲᠠ ᠦᠭᠡᠢ ᠰᠥᠨᠥᠭᠰᠡᠨ ᠪᠤᠷᠤᠩᠬᠤᠢ ᠬᠠᠷᠭᠢᠰ ᠶᠣᠰᠣᠨ ᠤ᠋ ᠬᠥᠮᠦᠰ᠂ ᠡᠪᠦᠭᠡᠨ ᠮᠠᠯᠴᠢᠨ ᠤ᠋ ᠰᠡᠳᠬᠢᠯ ᠳ᠋ᠦ᠍ ᠬᠣᠷᠣᠮᠬᠠᠨ ᠲᠡᠳᠦᠢ ᠤᠷᠭᠤᠨ ᠣᠷᠣᠵᠠᠢ᠃ ᠠᠷᠠᠳ ᠤ᠋ᠨ ᠵᠠᠰᠠᠭ ᠮᠠᠨᠳᠤᠭᠠᠳ ᠬᠣᠷᠢᠬᠠᠨ ᠵᠢᠯ ᠪᠣᠯᠤᠭᠰᠠᠨ ᠮᠥᠷᠲᠡᠭᠡᠨ᠂ ᠲᠤᠰ ᠤᠯᠤᠰ ᠲᠤ᠌ ᠶᠠᠭᠤᠲᠠᠢ ᠶᠡᠬᠡ ᠥᠭᠡᠷᠡᠴᠢᠯᠡᠯᠲᠡ ᠭᠠᠷᠪᠠ᠃ ᠰᠠᠶᠢ ᠪᠢᠳᠡᠨ ᠳ᠋ᠦ᠍ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠪᠠᠶᠠᠷ ᠬᠦᠷᠭᠡᠵᠦ ᠪᠠᠢᠭᠰᠠᠨ ᠲᠡᠷᠡ ᠵᠠᠯᠠᠭᠤ ᠳᠠᠷᠤᠭᠠ᠂ ᠰᠢᠷᠴᠢᠨ ᠨᠠᠮᠠᠶ᠋ᠢ( ᠨᠠᠮᠠ ᠶ᠋ᠢ) ᠮᠣᠩᠭᠣᠯ ᠬᠠᠭᠠᠨ ᠤ᠋ ᠴᠡᠷᠢᠭ ᠲᠦ᠍ ᠪᠠᠢᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠡᠯᠵᠢᠭᠡᠨ ᠦ᠌ ᠮᠢᠬᠠᠨ ᠬᠣᠭᠣᠯᠠ ᠲᠠᠢ᠂ ᠰᠠᠷᠠ ᠶ᠋ᠢᠨ ᠭᠤᠷᠪᠠᠨ ᠤᠯᠠᠭᠠᠨ ᠮᠥᠩᠭᠥᠨ ᠦ᠌ ᠴᠠᠯᠢᠩ ᠲᠠᠢ ᠪᠠᠢᠭᠰᠠᠨ ᠭᠡᠳᠡᠭ ᠢ᠋ ᠰᠣᠨᠣᠰᠪᠠᠯ᠂ ᠪᠠᠷᠤᠭ ᠢᠲᠡᠭᠡᠬᠦ ᠦᠭᠡᠢ ᠠᠭᠰᠠᠨ ᠪᠠᠢᠬᠤ᠃
ᠡᠨᠡ ᠰᠠᠢᠬᠠᠨ ᠲᠠᠩᠬᠢᠮ ᠳ᠋ᠤ᠌ ᠬᠤᠷᠠᠨ ᠴᠤᠭᠯᠠᠭᠰᠠᠨ ᠮᠠᠯᠴᠢᠨ ᠠᠷᠠᠳ᠂ ᠰᠢᠷᠭᠠᠭᠤ ᠶᠡᠬᠡ ᠬᠥᠳᠡᠯᠮᠦᠷᠢ ᠶ᠋ᠢᠨ ᠬᠥᠮᠦᠰ᠂ ᠬᠣᠷᠢᠬᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠴᠢᠯᠥᠭᠡ ᠤᠴᠠᠷᠠᠯ ᠦᠭᠡᠢ ᠪᠣᠭᠣᠯ ᠬᠠᠮᠵᠢᠯᠭᠠ ᠶᠠᠪᠤᠵᠤ᠂ ᠨᠣᠶᠠᠨ ᠤ᠋ ᠥᠷᠭᠥᠭᠡ ᠶ᠋ᠢᠨ ᠡᠮᠦᠨᠡ ᠮᠣᠷᠢ ᠲᠠᠢ ᠭᠠᠷᠬᠤ ᠡᠷᠬᠡ ᠦᠭᠡᠢ ᠤᠯᠤᠰ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂ ᠣᠳᠣ ᠮᠠᠩᠨᠠᠢ ᠲᠡᠨᠢᠢᠵᠦ᠂ ᠶᠠᠭᠤᠲᠠᠢ ᠣᠨᠳᠣᠣ ᠪᠣᠯᠪᠠ᠃ ᠮᠠᠷᠱᠠᠯ ᠤ᠋ᠨ ᠶᠡᠬᠡ ᠲᠣᠳᠣᠷᠬᠠᠢ᠂ ᠢᠷᠠᠭᠤ ᠰᠠᠢᠬᠠᠨ ᠢ᠋ᠶ᠋ᠠᠷ ᠬᠡᠯᠡᠵᠦ ᠥᠭᠭᠦᠭᠰᠡᠨ ᠲᠡᠷᠡ ᠶᠡᠬᠡ ᠲᠤᠰᠠᠯᠠᠮᠵᠢ ᠶ᠋ᠢ ᠪᠢᠳᠡᠨ ᠳ᠋ᠦ᠍ ᠦᠵᠡᠭᠦᠯᠦᠭᠰᠡᠨ ᠵᠥᠪᠯᠡᠯ ᠦ᠋ᠨ ᠵᠠᠰᠠᠭᠲᠤ ᠬᠣᠯᠪᠣᠭᠠᠲᠤ ᠤᠯᠤᠰ ᠤ᠋ᠨ ᠲᠦᠮᠡᠨ ᠠᠷᠠᠳ᠂ ᠬᠣᠯᠪᠣᠭᠠᠲᠤ ᠤᠯᠤᠰ ᠤ᠋ᠨ ᠡᠯᠴᠢᠨ ᠰᠠᠢᠳ ᠲᠤ᠌ ᠬᠤᠪᠢ ᠶ᠋ᠢᠨ ᠵᠦᠭ ᠡᠴᠡ ᠪᠠᠶᠠᠷᠯᠠᠨ ᠲᠠᠯᠠᠷᠬᠠᠪᠠᠴᠤ ᠦᠨᠡᠬᠡᠷ ᠪᠠᠷᠠᠰᠢ ᠦᠭᠡᠢ ᠶᠠ ᠭᠡᠵᠦ ᠰᠢᠷᠴᠢᠨ ᠪᠣᠳᠣᠵᠤ ᠪᠠᠢᠪᠠ᠃
ᠴᠢᠩᠭᠢᠲᠡᠯᠡ᠂ ᠵᠥᠪᠯᠡᠯᠲᠦ ᠶ᠋ᠢᠨ ᠡᠯᠴᠢᠨ ᠳ᠋ᠦ᠍ ᠪᠠᠶᠠᠷ ᠲᠠᠯᠠᠷᠬᠠᠯ ᠢ᠋ᠶ᠋ᠠᠨ ᠢᠯᠡᠷᠬᠡᠢᠯᠡᠵᠦ᠂ ᠮᠠᠰᠢ ᠤᠳᠠᠲᠠᠯᠠ ᠠᠯᠠᠭᠠ ᠲᠠᠰᠢᠵᠠᠭᠠᠵᠤ ᠪᠠᠢᠭᠰᠠᠨ ᠨᠢ ᠨᠠᠮᠲᠠᠨ ᠵᠣᠭᠰᠣᠵᠤ᠂ ᠮᠠᠷᠱᠠᠯ ᠤᠭ ᠢᠯᠡᠳᠬᠡᠯ ᠢ᠋ᠶ᠋ᠡᠨ ᠦᠷᠭᠦᠯᠵᠢᠯᠡᠨ᠂ ᠮᠠᠯ ᠢ᠋ᠶ᠋ᠠᠨ ᠥᠰᠬᠡᠬᠦ ᠲᠠᠯᠠ ᠪᠠᠷ ᠨᠡᠢᠭᠡᠮ ᠣᠯᠠᠨ ᠠᠷᠠᠳ ᠤ᠋ᠨ ᠡᠮᠦᠨᠡ ᠶᠠᠮᠠᠷ ᠵᠣᠷᠢᠯᠲᠠ ᠲᠤᠯᠭᠠᠷᠠᠵᠤ ᠪᠠᠢᠭᠠ ᠶ᠋ᠢ ᠲᠣᠳᠣᠴᠢᠯᠠᠨ ᠬᠡᠯᠡᠬᠦ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ)᠂ ᠾᠧᠲ᠋ᠯᠧᠷ ᠦ᠋ᠨ ᠲᠦᠷᠢᠮᠡᠬᠡᠢ ᠪᠠᠯᠠᠮᠠᠳ ᠴᠡᠷᠢᠭ ᠦ᠋ᠨ ᠬᠠᠯᠳᠠᠨ ᠳᠣᠪᠲᠣᠯᠬᠤ ᠶ᠋ᠢ ᠡᠰᠡᠷᠭᠦᠴᠡᠨ ᠪᠠᠢᠯᠳᠤᠵᠤ᠂ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠲᠦᠮᠡᠨ ᠦ᠌ ᠡᠷᠬᠡ ᠴᠢᠯᠥᠭᠡ᠂ ᠡᠩᠬᠡ ᠬᠥᠳᠡᠯᠮᠦᠷᠢ᠂ ᠲᠤᠰᠠᠭᠠᠷ ᠲᠣᠭᠲᠠᠨᠢᠭᠰᠠᠨ ᠪᠠᠢᠳᠠᠯ ᠢ᠋ ᠬᠠᠮᠠᠭᠠᠯᠠᠯᠴᠠᠵᠤ ᠪᠠᠢᠭᠠ ᠵᠥᠪᠯᠡᠯᠲᠦ ᠶ᠋ᠢᠨ ᠠᠷᠠᠳ ᠲᠦᠮᠡᠨ᠂ ᠲᠡᠭᠦᠨ ᠦ᠌ ᠤᠯᠠᠭᠠᠨ ᠴᠡᠷᠢᠭ ᠲᠤᠨᠢ( ᠲᠤ ᠨᠢ) ᠵᠦᠢᠯ ᠵᠦᠢᠯ ᠢ᠋ᠶ᠋ᠡᠷ ᠲᠤᠰᠠᠯᠠᠬᠤ ᠶᠠᠪᠤᠳᠠᠯ ᠳᠠᠷᠤᠢ ᠮᠠᠨ ᠤ᠋ ᠬᠠᠮᠤᠭ ᠤ᠋ᠨ ᠴᠢᠬᠤᠯᠠ ᠵᠣᠷᠢᠯᠲᠠ ᠶ᠋ᠢᠨ ᠨᠢᠭᠡ ᠨᠢ ᠮᠥᠨ ᠭᠡᠵᠦ ᠵᠢᠭᠠᠨ ᠥᠭᠦᠯᠡᠵᠡᠢ᠃
ᠮᠠᠷᠱᠠᠯ ᠤ᠋ᠨ ᠨᠠᠷᠢᠨ ᠲᠣᠳᠣᠷᠬᠠᠢ᠂ ᠮᠠᠰᠢ ᠢᠷᠠᠭᠤ ᠳᠡᠯᠭᠡᠷ ᠢᠯᠡᠳᠬᠡᠯ᠂ ᠥᠷᠯᠥᠭᠡᠨ ᠦ᠌ ᠬᠤᠷᠠᠯ ᠵᠠᠪᠰᠠᠷᠯᠠᠭᠠᠳ᠂ ᠣᠷᠣᠢ ᠶ᠋ᠢᠨ ᠬᠤᠷᠠᠯ ᠳ᠋ᠤ᠌ ᠦᠷᠭᠦᠯᠵᠢᠯᠡᠪᠡ᠃ ᠬᠣᠢᠲᠤ ᠡᠳᠦᠷ ᠨᠢ ᠬᠤᠷᠠᠯ ᠤ᠋ᠨ ᠰᠢᠭᠦᠮᠵᠢᠯᠡᠯ ᠡᠬᠢᠯᠡᠪᠡ᠃ ᠵᠠᠪᠰᠠᠷ ᠲᠤᠨᠢ ( ᠲᠤ ᠨᠢ)ᠨᠡᠢᠰᠯᠡᠯ ᠦ᠋ᠨ ᠬᠥᠳᠡᠯᠮᠦᠷᠢᠴᠢᠨ ᠣᠯᠠᠨ ᠤ᠋ ᠲᠥᠯᠥᠭᠡᠯᠡᠭᠴᠢ᠂ ᠬᠣᠲᠠ ᠶ᠋ᠢᠨ ᠣᠯᠠᠨ ᠦᠢᠯᠡᠳᠪᠦᠷᠢ ᠶ᠋ᠢᠨ ᠭᠠᠵᠠᠷ᠂ ᠰᠤᠷᠭᠠᠭᠤᠯᠢ ᠶ᠋ᠢᠨ ᠫᠢᠣᠨᠧᠷ ᠦ᠋ᠳ ᠦ᠋ᠨ ᠲᠥᠯᠥᠭᠡᠯᠡᠭᠴᠢ ᠨᠠᠷ ᠪᠠᠶᠠᠷ ᠬᠦᠷᠭᠡᠬᠦ ᠭᠡᠵᠦ ᠢᠷᠡᠵᠡᠭᠡᠨ᠂ ᠲᠤᠰ ᠤᠯᠤᠰ ᠤ᠋ᠨ ᠵᠦᠭ ᠵᠣᠪᠬᠢᠰ ᠪᠦᠬᠦᠨ ᠡᠴᠡ ᠣᠯᠠᠨ ᠨᠡᠢᠲᠡ ᠶ᠋ᠢᠨ ᠪᠠᠢᠭᠤᠯᠤᠯᠭᠠ(ᠪᠠᠢᠭᠤᠯᠭᠠ)᠂ ᠠᠢᠮᠠᠭ ᠰᠤᠮᠤᠨ ᠤ᠋ ᠵᠠᠬᠢᠷᠭᠠᠨ ᠠ᠋ᠴᠠ ᠪᠠᠶᠠᠷ ᠤ᠋ᠨ ᠤᠲᠠᠰᠤ ᠢᠷᠡᠵᠡᠭᠡᠭᠰᠡᠨ ᠢ᠋ ᠤᠩᠰᠢᠨ ᠰᠣᠨᠣᠰᠬᠠᠬᠤ ᠳ᠋ᠤ᠌ ᠤᠯᠤᠰ ᠤ᠋ᠨ ᠰᠠᠢᠨ ᠮᠠᠯᠴᠢᠨ ᠤ᠋ ᠵᠥᠪᠯᠡᠯᠭᠡᠨ ᠳ᠋ᠦ᠍ ᠰᠠᠭᠤᠯᠴᠠᠭᠰᠠᠨ ᠮᠠᠯᠴᠢᠨ ᠪᠦᠬᠦᠨ ᠲᠡᠷᠡ ᠵᠥᠪᠯᠡᠯᠭᠡᠨ ᠢ᠋ ᠶᠡᠷᠦ ᠶ᠋ᠢᠨ ᠨᠢᠭᠡᠨ ᠬᠤᠷᠠᠯ ᠵᠥᠪᠯᠡᠯᠭᠡᠨ ᠪᠢᠰᠢ᠂ ᠤᠯᠤᠰ ᠳᠠᠶᠠᠭᠠᠷ ᠮᠠᠰᠢ ᠡᠷᠬᠢᠮ ᠴᠢᠬᠤᠯᠠ ᠬᠤᠷᠠᠯ ᠭᠡᠵᠦ ᠦᠵᠡᠵᠦ ᠪᠠᠢᠭᠠ ᠶ᠋ᠢ ᠲᠤᠢᠯ ᠤ᠋ᠨ ᠲᠣᠳᠣᠷᠬᠠᠢ ᠪᠠᠷ ᠣᠢᠯᠠᠭᠠᠨ ᠮᠡᠳᠡᠪᠡ᠃
ᠬᠤᠷᠠᠯ ᠳ᠋ᠤ᠌ ᠰᠠᠨᠠᠯ ᠰᠢᠭᠦᠮᠵᠢᠯᠡᠯ ᠲᠠᠯᠪᠢᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)᠂ ᠮᠠᠯᠴᠢᠨ ᠨᠤᠭᠤᠳ ᠠᠵᠢᠯ ᠪᠠᠢᠳᠠᠯ ᠢ᠋ᠶ᠋ᠠᠨ ᠶᠠᠷᠢᠵᠤ᠂ ᠶᠠᠭᠠᠬᠢᠵᠤ ᠮᠠᠯ ᠢ᠋ᠶ᠋ᠠᠨ ᠥᠰᠬᠡᠵᠦ ᠤᠷᠤᠭᠰᠢᠲᠠᠢ ᠠᠮᠵᠢᠯᠲᠠ ᠣᠯᠤᠭᠰᠠᠨ᠂ ᠶᠠᠭᠠᠬᠢᠵᠤ ᠤᠷᠢᠳᠤ ᠡᠳᠦᠭᠡ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠥᠭᠦᠯᠡᠵᠦ᠂ ᠲᠤᠷᠰᠢᠯᠭᠠ ᠪᠠᠨ ᠰᠣᠯᠢᠯᠴᠠᠨ᠂ ᠣᠷᠣᠨ ᠨᠤᠲᠤᠭ ᠤ᠋ᠨ ᠵᠠᠰᠠᠭ ᠵᠠᠬᠢᠷᠭᠠ᠂ ᠬᠤᠷᠰᠢᠶᠠ ᠬᠤᠳᠠᠯᠳᠤᠭᠠᠨ ᠤ᠋ ᠭᠠᠵᠠᠷ ᠤ᠋ᠨ ᠠᠵᠢᠯ ᠤ᠋ᠨ ᠳᠤᠲᠠᠭᠳᠠᠯ ᠢ᠋ ᠰᠢᠭᠦᠮᠵᠢᠯᠡᠨ᠂ ᠮᠢᠬᠠ ᠢᠳᠡᠬᠦ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠳᠤᠷᠠᠲᠠᠢ ᠮᠥᠷᠲᠡᠭᠡᠨ ᠮᠠᠯ ᠢ᠋ᠶ᠋ᠠᠨ ᠥᠰᠬᠡᠬᠦ ᠳᠤᠷᠠ ᠦᠭᠡᠢ ᠵᠠᠯᠬᠠᠭᠤ ᠬᠣᠢᠷᠭᠣ ᠮᠠᠭᠤ ᠮᠠᠯᠴᠢᠨ ᠢ᠋ ᠪᠤᠷᠤᠭᠤᠰᠢᠶᠠᠨ᠂ ᠠᠵᠢᠯ ᠬᠢᠳᠡᠭ ᠦᠭᠡᠢ᠂ ᠳᠡᠮᠡᠢ ᠵᠠᠪᠬᠠᠢᠷᠠᠨ ᠬᠡᠰᠦᠵᠦ ᠶᠠᠪᠤᠳᠠᠭ ᠡᠲᠡᠭᠡᠳ ᠢ᠋ ᠵᠢᠭᠰᠢᠨ ᠰᠢᠭᠦᠮᠵᠢᠯᠡᠪᠡ᠃
ᠤᠯᠤᠰ ᠤ᠋ᠨ ᠰᠠᠩ ᠤ᠋ᠨ ᠠᠵᠤ ᠠᠬᠤᠢ᠂ ᠬᠠᠳᠤᠯᠠᠩ ᠤ᠋ᠨ ᠰᠲ᠋ᠠᠨᠼᠢ᠂ ᠠᠷᠲ᠋ᠧᠯ ᠨᠢᠭᠡᠳᠦᠯ᠂ ᠨᠥᠬᠥᠷᠯᠡᠯ ᠦ᠋ᠨ ᠠᠵᠢᠯᠲᠠᠨ᠂ ᠥᠪᠡᠷ ᠥᠪᠡᠷ ᠦ᠋ᠨ ᠠᠮᠵᠢᠯᠲᠠ ᠶ᠋ᠢ ᠶᠠᠷᠢᠵᠤ᠂ ᠳᠣᠣᠷᠠ ᠳᠣᠣᠷᠠ ᠪᠠᠨ ᠬᠠᠷᠠ ᠠᠮᠢ ᠪᠠᠨ ᠬᠠᠷᠠᠵᠤ ᠠᠵᠢᠯᠯᠠᠭᠰᠠᠨ ᠠ᠋ᠴᠠ ᠨᠢᠭᠡᠳᠦᠯ ᠨᠥᠬᠥᠷᠯᠡᠯ ᠪᠠᠢᠭᠤᠯᠵᠤ᠂ ᠬᠠᠮᠲᠤ ᠶ᠋ᠢᠨ ᠬᠦᠴᠦᠨ ᠢ᠋ᠶ᠋ᠡᠷ ᠠᠵᠢᠯᠯᠠᠭᠰᠠᠨ ᠤ᠋ ᠠᠰᠢᠭ ᠲᠠᠢ ᠶ᠋ᠢ ᠶᠠᠷᠢᠵᠤ ᠥᠭᠪᠡ᠃
ᠵᠠᠮᠲᠤ ᠶ᠋ᠢᠨ ᠠᠷᠠᠳ ᠤ᠋ᠨ ᠨᠢᠭᠡᠳᠦᠯ ᠦ᠋ᠨ ᠲᠥᠯᠥᠭᠡᠯᠡᠭᠴᠢ᠂ ᠲᠤᠰ ᠨᠥᠬᠥᠷᠯᠡᠯ ᠦ᠋ᠨ ᠠᠵᠢᠯ ᠢ᠋ ᠲᠣᠪᠴᠢ ᠪᠠᠷ ᠶᠠᠷᠢᠵᠤ ᠢᠯᠡᠳᠬᠡᠪᠡ᠃ ᠶᠡᠨᠳᠡᠷ ᠳᠡᠭᠡᠷᠡ ᠭᠠᠷᠤᠭᠠᠳ ᠮᠡᠬᠦᠢᠰᠬᠢᠨ ᠶᠣᠰᠣᠯᠠᠭᠠᠳ᠂ ᠳᠠᠳᠤᠭᠰᠠᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠯᠢᠮᠠᠭ ᠦᠰᠦ ᠪᠡᠨ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠰᠠᠮᠨᠠᠨ ᠵᠠᠰᠠᠭᠠᠳ᠂ ᠬᠡᠯᠡᠬᠦ ᠦᠭᠡ ᠪᠡᠨ ᠲᠡᠮᠳᠡᠭᠯᠡᠭᠰᠡᠨ ᠨᠣᠣᠷᠠᠭ ᠬᠠᠭᠤᠳᠠᠰᠤ ᠪᠠᠨ ᠳᠡᠯᠭᠡᠵᠦ ᠲᠠᠯᠪᠢᠭᠠᠳ᠂ ᠪᠠᠬᠠᠨ ᠠᠯᠪᠠᠨ ᠪᠢᠴᠢᠭ ᠦ᠋ᠨ ᠦᠭᠡ ᠲᠡᠢ ᠰᠢᠭᠦᠮᠵᠢᠯᠡᠯ ᠢ᠋ᠶ᠋ᠡᠨ ᠰᠥᠭᠡᠩᠭᠢ ᠬᠣᠭᠣᠯᠠᠢ ᠪᠠᠷ ᠬᠡᠯᠡᠵᠦ ᠡᠬᠢᠯᠡᠭᠰᠡᠨ ᠨᠢ᠄
— ᠲᠤᠰ ᠪᠦᠭᠦᠳᠡ ᠨᠠᠢᠷᠠᠮᠳᠠᠬᠤ ᠤᠯᠤᠰ ᠤ᠋ᠨ ᠲᠡᠷᠢᠭᠦᠨ ᠦ᠌ ᠰᠠᠢᠨ ᠮᠠᠯᠴᠢᠳ ᠤ᠋ᠨ ᠵᠥᠪᠯᠡᠯᠭᠡᠨ ᠦ᠌ ᠬᠤᠷᠠᠯ ᠳᠡᠭᠡᠷᠡ ᠬᠦᠨᠳᠦᠲᠦ ᠨᠥᠬᠥᠳ ᠦ᠋ᠨ ᠬᠢᠭᠰᠡᠨ ᠢᠯᠡᠳᠬᠡᠯ ᠢ᠋ ᠰᠣᠨᠣᠰᠤᠭᠠᠳ ᠳᠣᠣᠷᠠ ᠳᠤᠷᠠᠳᠤᠭᠰᠠᠨ ᠵᠦᠢᠯ ᠢ᠋ ᠬᠡᠯᠡᠬᠦ ᠶ᠋ᠢ ᠬᠦᠰᠡᠬᠦ ᠨᠢ᠂
ᠨᠥᠬᠥᠳ ᠦ᠋ᠳ ᠠ᠋! ᠵᠠᠮᠲᠤ ᠶ᠋ᠢᠨ ᠠᠷᠠᠳ ᠤ᠋ᠨ ᠨᠢᠭᠡᠳᠦᠯ ᠢ᠋1938 ᠣᠨ ᠳ᠋ᠤ᠌ ᠠᠩᠬᠠ ᠪᠠᠢᠭᠤᠯᠵᠤ᠂ ᠠᠷᠪᠠᠨ ᠨᠢᠭᠡᠨ ᠭᠡᠰᠢᠭᠦᠨ ᠲᠡᠢ ᠪᠠᠢᠭᠰᠠᠨ ᠪᠠᠢᠨᠠ᠃ ᠲᠤᠰ ᠨᠢᠭᠡᠳᠦᠯ ᠳ᠋ᠦ᠍ ᠬᠠᠮᠲᠤᠷᠠᠭᠤᠯᠤᠭᠰᠠᠨ ᠮᠠᠯ᠂1940 ᠣᠨ ᠳ᠋ᠤ᠌ ᠠᠳᠤᠭᠤ391 ᠪᠠᠢᠭᠰᠠᠨ ᠪᠣᠯ1941 ᠣᠨ ᠳ᠋ᠤ᠌ 783 ᠪᠣᠯᠤᠭᠰᠠᠨ ᠪᠠᠢᠨᠠ᠃
ᠦᠬᠡᠷ165 ᠪᠠᠢᠭᠰᠠᠨ ᠨᠢ520 ᠪᠣᠯᠤᠭᠰᠠᠨ᠃ ᠦᠨᠢᠶᠡ138 ᠠ᠋ᠴᠠ ᠲᠤᠭᠤᠯ128 ᠶ᠋ᠢ ᠪᠣᠢᠵᠢᠭᠤᠯᠤᠭᠰᠠᠨ ᠨᠢ ᠳᠠᠷᠤᠢ ᠲᠥᠯ ᠦ᠋ᠨ92.7 ᠬᠤᠪᠢ ᠶ᠋ᠢ ᠪᠣᠢᠵᠢᠭᠤᠯᠵᠠᠢ᠃40 ᠣᠨ ᠳ᠋ᠤ᠌ ᠬᠣᠨᠢ917 ᠪᠠᠢᠭᠰᠠᠨ᠂ ᠣᠳᠣ1429 ᠪᠣᠯᠤᠭᠰᠠᠨ᠂451 ᠡᠮᠡ ᠬᠣᠨᠢ ᠠ᠋ᠴᠠ ᠬᠤᠷᠠᠭᠠ404 ᠶ᠋ᠢ ᠪᠣᠢᠵᠢᠭᠤᠯᠤᠭᠰᠠᠨ ᠪᠤᠶᠤ ᠬᠣᠨᠢᠨ ᠤ᠋ ᠲᠥᠯ ᠦ᠋ᠨ89.5 ᠬᠤᠪᠢ ᠶ᠋ᠢ ᠪᠣᠢᠵᠢᠭᠤᠯᠤᠭᠰᠠᠨ ᠪᠣᠯᠤᠨᠠ᠃ᠢᠮᠠᠭᠠ 27 ᠠ᠋ᠴᠠ ᠡᠮᠡ ᠢᠮᠠᠭᠠ14 ᠪᠠᠢᠭᠰᠠᠨ᠂ ᠲᠡᠭᠦᠨ ᠦ᠌ ᠲᠥᠯ12 ᠢ᠋ ᠪᠣᠢᠵᠢᠭᠤᠯᠤᠭᠰᠠᠨ ᠨᠢ᠂ ᠢᠮᠠᠭᠠᠨ ᠤ᠋ ᠲᠥᠯ ᠦ᠋ᠨ ᠪᠣᠢᠵᠢᠯᠲᠠ85 ᠬᠤᠪᠢ ᠪᠣᠯᠪᠠ᠃ ᠪᠦᠬᠦ ᠮᠠᠯ ᠤ᠋ᠨ ᠥᠰᠦᠯᠲᠡ80.4 ᠬᠤᠪᠢ ᠪᠣᠯᠵᠠᠢ᠃
ᠣᠳᠣ ᠪᠢᠳᠡ ᠪᠦᠬᠦ ᠮᠠᠯ ᠢ᠋ᠶ᠋ᠠᠨ ᠳᠥᠷᠪᠡᠨ ᠰᠠᠭᠤᠷᠢ ᠬᠣᠨᠢ᠂ ᠵᠢᠷᠭᠤᠭᠠᠨ ᠰᠠᠭᠤᠷᠢ ᠦᠬᠡᠷ᠂ ᠬᠣᠶᠠᠷ ᠰᠠᠭᠤᠷᠢ ᠠᠳᠤᠭᠤ ᠪᠣᠯᠭᠠᠭᠰᠠᠨ᠂ ᠮᠠᠯ ᠲᠥᠯᠯᠡᠯᠲᠡ ᠶ᠋ᠢᠨ ᠴᠠᠭ ᠢ᠋ᠶ᠋ᠠᠷ ᠲᠤᠰᠬᠠᠢ ᠵᠢᠵᠢᠭᠦᠷ ᠭᠠᠷᠭᠠᠳᠠᠭ᠃
ᠢᠩᠭᠢᠵᠦ ᠬᠠᠮᠲᠤ ᠶ᠋ᠢᠨ ᠬᠦᠴᠦ ᠪᠡᠷ ᠮᠠᠯ ᠮᠠᠯᠯᠠᠬᠤ ᠳ᠋ᠤ᠌᠂ ᠬᠦᠴᠦ ᠪᠦᠯᠢ ᠠᠷᠪᠢᠯᠠᠬᠤ ᠲᠠᠯᠠ ᠪᠠᠷ ᠶᠡᠬᠡ ᠠᠰᠢᠭᠲᠠᠢ ᠪᠠᠢᠨᠠ᠃ ᠮᠠᠨ ᠤ᠋ ᠨᠢᠭᠡᠳᠦᠯ ᠳ᠋ᠦ᠍ ᠠᠷᠪᠠᠨ ᠠᠢᠯ᠂ ᠤᠷᠢᠳ ᠠᠮᠢ ᠠᠮᠢᠨ ᠳ᠋ᠠᠭᠠᠨ ᠮᠠᠯ ᠲᠠᠢ ᠲᠠᠪᠢᠨ ᠠᠢᠯ ᠤ᠋ᠨ ᠳ᠋ᠠᠢᠲ᠋ᠠᠢ ᠮᠠᠯ ᠮᠠᠯᠯᠠᠳᠠᠭ ᠪᠠᠢᠨᠠ᠃ ᠡᠢᠮᠦ ᠳᠡᠭᠡᠷᠡ ᠡᠴᠡ ᠪᠢᠳᠡ᠂ ᠠᠵᠢᠯᠴᠢᠨ ᠢ᠋ ᠥᠭᠡᠷᠡ ᠠᠵᠢᠯ ᠳ᠋ᠤ᠌ ᠪᠠᠰᠠ ᠬᠡᠷᠡᠭᠯᠡᠬᠦ ᠪᠣᠯᠤᠯᠴᠠᠭᠠ ᠲᠠᠢ ᠪᠣᠯᠤᠯᠠ᠃ ᠤᠯᠤᠰ ᠠ᠋ᠴᠠ ᠪᠣᠭᠣᠨᠢ ᠬᠤᠭᠤᠴᠠᠭᠠᠨ ᠤ᠋ ᠵᠢᠭᠡᠯᠡ ᠥᠭᠭᠦᠭᠰᠡᠨ ᠢ᠋ ᠪᠢᠳᠡ ᠪᠦᠷᠢᠨ ᠲᠥᠯᠥᠵᠦ ᠳᠠᠭᠤᠰᠬᠠᠭᠰᠠᠨ᠃ ᠲᠡᠷᠡ ᠮᠥᠩᠭᠥ ᠪᠡᠷ ᠮᠠᠯ ᠤ᠋ᠨ ᠳᠤᠯᠠᠭᠠᠨ ᠬᠠᠰᠢᠶᠠ ᠰᠠᠷᠠᠪᠴᠢ ᠲᠤᠰ ᠨᠢᠭᠡᠳᠦᠯ ᠦ᠋ᠨ ᠮᠠᠯ ᠳ᠋ᠤ᠌ ᠪᠠᠷᠢᠵᠤ᠂ ᠮᠠᠯ ᠬᠤᠳᠠᠯᠳᠤᠨ ᠠᠪᠤᠭᠰᠠᠨ᠃ ᠣᠳᠣ ᠪᠦᠬᠦ ᠮᠠᠯ2756 ᠪᠣᠯᠪᠠ᠃
ᠡᠨᠡ ᠵᠢᠯ80 ᠭᠠᠷᠤᠢ ᠮᠣᠷᠢ ᠲᠡᠷᠭᠡᠨ ᠳ᠋ᠦ᠍ ᠰᠤᠷᠭᠠᠵᠤ᠂ ᠮᠣᠷᠢᠨ ᠲᠡᠷᠭᠡ ᠪᠡᠷ3255 ᠫᠦ ᠵᠢᠩ ᠲᠡᠭᠡᠭᠡᠭᠰᠡᠨ᠂ ᠲᠡᠷᠡ ᠪᠣᠯᠪᠠᠯ ᠶᠡᠬᠡ ᠠᠰᠢᠭᠲᠠᠢ ᠪᠠᠢᠵᠠᠢ᠃ ᠲᠡᠷᠭᠡᠨ ᠳ᠋ᠦ᠍ ᠣᠷᠣᠭᠤᠯᠤᠭᠰᠠᠨ ᠮᠣᠷᠢ᠂ ᠨᠢᠷᠤᠭᠤ ᠠᠴᠢᠶᠠᠨ ᠠ᠋ᠴᠠ ᠬᠡᠳᠦᠨ ᠳᠠᠪᠬᠤᠷ ᠶᠡᠬᠡ ᠶᠠᠭᠤᠮᠠ ᠠᠴᠢᠳᠠᠭ ᠶᠤᠮ ᠪᠠᠢᠨᠠ᠃
ᠠᠵᠢᠯ ᠬᠢᠬᠦ ᠳ᠋ᠡᠭᠡᠨ ᠪᠢᠳᠡ ᠪᠠᠷᠢᠭᠠᠳᠠᠯᠠᠨ ᠠᠵᠢᠯᠯᠠᠵᠤ᠂ ᠵᠢᠱ᠌ᠢᠶᠡ ᠨᠢ ᠲᠠᠷᠢᠶᠠ ᠲᠠᠷᠢᠬᠤ ᠪᠷᠢᠭᠠᠳ᠋᠂ ᠨᠣᠣᠰᠣ ᠬᠢᠷᠭᠠᠬᠤ ᠪᠷᠢᠭᠠᠳ᠋᠂ ᠡᠪᠡᠰᠦ ᠬᠠᠳᠤᠬᠤ ᠪᠷᠢᠭᠠᠳ᠋᠂ ᠵᠢᠩ ᠲᠡᠭᠡᠭᠡᠬᠦ ᠪᠷᠢᠭᠠᠳ᠋᠂ ᠬᠣᠨᠢᠨ ᠤ᠋ ᠪᠷᠢᠭᠠᠳ᠋᠂ ᠮᠤᠵᠢᠶᠠᠩ ᠤ᠋ᠨ ᠪᠷᠢᠭᠠᠳ᠋ ᠭᠡᠬᠦ ᠵᠡᠷᠭᠡ ᠪᠷᠢᠭᠠᠳ᠋ ᠪᠠᠢᠭᠤᠯᠵᠤ ᠠᠵᠢᠯᠯᠠᠳᠠᠭ᠃
ᠡᠨᠡ ᠵᠢᠯ ᠬᠣᠨᠢᠨ ᠠ᠋ᠴᠠ1597 ᠺᠢᠯᠣ᠋ ᠨᠣᠣᠰᠣ ᠠᠪᠤᠯᠠ᠃ ᠲᠠᠷᠢᠶᠠ ᠰᠠᠢᠨ ᠤᠷᠭᠤᠵᠤ᠂ ᠲᠥᠯᠥᠪᠯᠡᠭᠡ ᠶ᠋ᠢ194.2% ᠢ᠋ᠶ᠋ᠠᠷ ᠪᠡᠶᠡᠯᠡᠭᠦᠯᠪᠡ᠃ ᠨᠣᠭᠣᠭᠠᠨ ᠤ᠋ ᠭᠠᠵᠠᠷ ᠤ᠋ᠨ ᠨᠣᠭᠣᠭᠠ ᠶ᠋ᠢ ᠬᠣᠲᠠ ᠶ᠋ᠢᠨ ᠠᠯᠪᠠᠨ ᠪᠠᠢᠭᠤᠯᠤᠯᠭᠠ ᠳ᠋ᠤ᠌ ᠭᠡᠷᠡ ᠪᠡᠷ ᠲᠤᠰᠢᠶᠠᠵᠤ᠂ 80000 ᠲᠥᠭᠥᠷᠢᠭ ᠤᠨ ᠴᠡᠪᠡᠷ ᠠᠰᠢᠭ ᠣᠯᠤᠭᠰᠠᠨ ᠠ᠋ᠴᠠ ᠭᠠᠳᠠᠨᠠ᠂ ᠱᠧᠹ ᠪᠣᠯᠤᠭᠰᠠᠨ ᠰᠢᠨᠡ ᠬᠦᠴᠦᠨ ᠦ᠌ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠵᠢᠯ ᠦ᠋ᠨ ᠬᠡᠷᠡᠭᠴᠡᠭᠡᠨ ᠦ᠌ ᠨᠣᠭᠣᠭᠠ ᠦᠨᠡ ᠥᠷᠲᠡᠭ ᠦᠭᠡᠢ ᠥᠭᠭᠦᠭᠰᠡᠨ᠃ ᠡᠪᠡᠰᠦ ᠬᠠᠳᠤᠬᠤ ᠲᠥᠯᠥᠪᠯᠡᠭᠡ162% ᠢ᠋ᠶ᠋ᠠᠷ ᠪᠡᠶᠡᠯᠡᠭᠳᠡᠭᠰᠡᠨ᠃ ᠰᠦᠨ ᠦ᠌ ᠹᠧᠷᠮᠠ ᠠ᠋ᠴᠠ ᠡᠨᠡ ᠵᠢᠯ ᠴᠡᠪᠡᠷ ᠠᠰᠢᠭ2517 ᠲᠥᠭᠥᠷᠢᠭ ᠣᠯᠤᠭᠰᠠᠨ᠃ ᠲᠤᠰ ᠹᠧᠷᠮᠠ ᠶ᠋ᠢᠨ ᠬᠣᠨᠢᠴᠢᠨ ᠨᠠᠩᠵᠢᠳ ᠬᠣᠶᠠᠷ ᠵᠢᠯ ᠦ᠋ᠨ ᠡᠮᠦᠨᠡ ᠣᠭᠲᠣ ᠮᠠᠯ ᠦᠭᠡᠢ ᠬᠥᠮᠦᠨ ᠪᠠᠢᠭᠰᠠᠨ᠃ ᠣᠳᠣ᠂ ᠲᠤᠰ ᠨᠢᠭᠡᠳᠦᠯ ᠦ᠋ᠨ ᠠᠵᠢᠯ ᠬᠢᠵᠦ ᠬᠣᠪᠢᠨ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)30 ᠭᠠᠷᠤᠢ ᠮᠠᠯ ᠲᠠᠢ ᠪᠣᠯᠤᠭᠰᠠᠨ ᠪᠠᠢᠨᠠ᠃
ᠲᠤᠰ ᠨᠢᠭᠡᠳᠦᠯ ᠪᠠᠰᠠ ᠦᠬᠡᠷ ᠮᠣᠷᠢᠨ ᠲᠡᠷᠭᠡ᠂ ᠲᠡᠮᠡᠭᠡᠨ ᠦ᠌ ᠬᠣᠮ᠂ ᠮᠠᠯ ᠤᠰᠤᠯᠠᠬᠤ ᠣᠩᠭᠣᠴᠠ ᠵᠡᠷᠭᠡ ᠠᠷᠠᠳ ᠤ᠋ᠨ ᠬᠡᠷᠡᠭᠴᠡᠭᠡᠲᠦ ᠶᠠᠭᠤᠮᠠ ᠬᠢᠳᠡᠭ᠃ ᠲᠤᠰ ᠨᠢᠭᠡᠳᠦᠯ ᠳ᠋ᠦ᠍ ᠬᠥᠮᠦᠨ ᠮᠠᠯ ᠤ᠋ᠨ ᠪᠠᠭᠠ ᠡᠮᠴᠢ ᠶ᠋ᠢᠨ ᠰᠤᠷᠭᠠᠭᠤᠯᠢ ᠪᠣᠢ᠃ ᠪᠢᠳᠡ ᠬᠠᠮᠲᠤᠷᠠᠨ ᠠᠵᠢᠯᠯᠠᠬᠤ ᠨᠢ ᠳᠣᠣᠷᠠ ᠳᠣᠣᠷᠠ ᠪᠠᠨ ᠲᠠᠪᠤ ᠠᠷᠪᠠᠨ ᠮᠠᠯ ᠲᠠᠢ ᠨᠣᠴᠣᠯᠳᠤᠬᠤ ᠠ᠋ᠴᠠ ᠢᠯᠡᠭᠦᠦ ᠠᠰᠢᠭᠲᠠᠢ ᠪᠠᠢᠭᠠ ᠶ᠋ᠢ ᠲᠤᠷᠰᠢᠯᠭᠠ ᠪᠠᠷ ᠮᠡᠳᠡᠵᠦ ᠠᠪᠤᠭᠰᠠᠨ᠃ ᠪᠢ ᠶᠠᠭᠤᠮᠠ ᠰᠠᠢᠨ ᠶᠠᠷᠢᠵᠤ ᠴᠢᠳᠠᠳᠠᠭ ᠦᠭᠡᠢ ᠠᠮᠢᠲᠠᠨ ᠶᠤᠮ ᠳᠠ᠃ ᠲᠠ ᠨᠠᠷ ᠲᠤ᠌ ᠲᠡᠷᠡ ᠪᠦᠭᠦᠳᠡ ᠶ᠋ᠢ ᠨᠠᠷᠢᠨ ᠰᠠᠢᠨ ᠢ᠋ᠶ᠋ᠠᠷ ᠬᠡᠯᠡᠵᠦ᠂ ᠲᠣᠳᠣᠷᠬᠠᠢ ᠲᠣᠮᠣᠷᠠᠭᠤᠨ ᠢ᠋ᠶ᠋ᠠᠷ ᠶᠠᠷᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠪᠣᠯᠪᠠ ᠤᠤ ᠳᠠ᠃
ᠭᠡᠪᠡᠴᠦ ᠮᠢᠨᠦ ᠬᠡᠯᠡᠭᠰᠡᠨ ᠡᠨᠡ ᠬᠡᠳᠦᠨ ᠦᠭᠡᠨ ᠡᠴᠡ ᠴᠦ᠍ ᠭᠡᠰᠡᠨ᠂ ᠲᠠ ᠪᠦᠬᠦᠨ ᠮᠠᠨ ᠤ᠋ ᠨᠢᠭᠡᠳᠦᠯ ᠦ᠋ᠨ ᠬᠥᠯ ᠳᠡᠭᠡᠷᠡ ᠪᠡᠨ ᠲᠣᠭᠲᠠᠵᠤ ᠴᠢᠳᠠᠭᠰᠠᠨ ᠢ᠋ ᠮᠡᠳᠡᠵᠦ ᠪᠣᠯᠬᠤ ᠪᠢᠵᠡ᠃ ᠲᠠ ᠪᠦᠬᠦᠨ᠂ ᠮᠠᠨ ᠤ᠋ ᠨᠢᠭᠡᠳᠦᠯ ᠳᠡᠭᠡᠷᠡ ᠬᠦᠷᠴᠦ ᠢᠷᠡᠭᠡᠳ ᠦᠵᠡᠭᠡᠷᠡᠢ᠃ ᠲᠡᠭᠡᠪᠡᠯ᠂ ᠪᠢᠳᠡ ᠶᠠᠭᠠᠬᠢᠵᠤ ᠠᠵᠢᠯ ᠬᠢᠵᠦ᠂ ᠶᠠᠭᠠᠬᠢᠵᠤ ᠠᠮᠠᠷᠠᠵᠤ ᠪᠠᠢᠳᠠᠭ ᠢ᠋ᠶ᠋ᠠᠨ ᠦᠵᠡᠭᠦᠯᠦᠨᠡ᠃ ᠲᠡᠭᠡᠭᠡᠳ᠂ ᠲᠠ ᠪᠦᠬᠦᠨ ᠠᠮᠢ ᠠᠮᠢᠨ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠳᠣᠣᠷᠠ ᠳᠣᠣᠷᠠ ᠪᠠᠨ ᠬᠡᠳᠦᠨ ᠮᠠᠯ ᠲᠠᠢ ᠨᠣᠴᠣᠯᠳᠤᠵᠤ ᠪᠠᠢᠭᠰᠠᠨ ᠠ᠋ᠴᠠ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠬᠦᠴᠦ ᠪᠦᠯᠢ ᠨᠡᠢᠯᠡᠵᠦ᠂ ᠬᠠᠮᠲᠤᠷᠠᠨ ᠨᠢᠭᠡᠳᠴᠦ ᠠᠵᠢᠯᠯᠠᠭᠰᠠᠨ ᠤ᠋ ᠠᠰᠢᠭ ᠲᠠᠢ ᠶ᠋ᠢ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠦᠵᠡᠵᠦ ᠪᠣᠯᠤᠨᠠ᠃ ᠨᠥᠬᠥᠳ᠂ ᠮᠠᠨ ᠤ᠋ ᠨᠢᠭᠡᠳᠦᠯ ᠳ᠋ᠦ᠍ ᠵᠣᠴᠢᠯᠠᠨ ᠣᠴᠢᠵᠤ᠂ ᠪᠠᠢᠳᠠᠯ ᠲᠠᠢ ᠲᠠᠨᠢᠯᠴᠠᠭᠠᠷᠠᠢ! ᠭᠡᠵᠦ ᠰᠠᠨᠠᠯ ᠢ᠋ᠶ᠋ᠠᠨ ᠬᠡᠯᠡᠵᠦ ᠭᠦᠢᠴᠡᠳᠬᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)ᠣᠯᠠᠨ ᠮᠠᠯᠴᠢᠳ ᠨᠢᠵᠢᠭᠢᠨᠡᠲᠡᠯᠡ ᠠᠯᠠᠭᠠ ᠲᠠᠰᠢᠵᠠᠭᠠᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠴᠤᠯᠮᠤᠨᠭᠡᠷᠡᠯ᠂ ᠴᠡᠩᠬᠡᠯᠴᠡᠴᠡᠭ᠂ ᠪᠠᠯ᠂ ᠰᠠᠷᠠᠨᠲᠤᠶᠠᠭᠠ᠂ ᠤᠢᠭᠤᠷᠵᠢᠨ·ᠣᠳᠬᠣᠨᠪᠠᠪᠠ᠂ ᠪᠠᠳᠮᠠᠰᠡᠴᠡᠨ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠤᠢᠭᠤᠷᠵᠢᠨ·ᠣᠳᠬᠣᠨᠪᠠᠪᠠ᠂ ᠴᠤᠯᠮᠤᠨᠭᠡᠷᠡᠯ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ