ᠦᠷ ᠦᠨ ᠲᠤᠶᠠᠭᠠ III – ᠪ᠂ ᠷᠢᠨᠴᠢᠨ - ᠭᠤᠷᠪᠠᠳᠤᠭᠠᠷ ᠲᠡᠪᠲᠡᠷ <ᠪᠠᠢᠯᠳᠤᠵᠤ ᠣᠯᠣᠭᠰᠠᠨ ᠡᠬᠡ ᠣᠷᠣᠨ>- ᠬᠣᠷᠢᠨ ᠬᠣᠶᠠᠷ Үүрийн туяа III – Б ᠂ Ренчин Гуравдугаар дэвтэр "Баялдаж олсон эх орон"-22
232ᠬᠣᠷᠢᠨ ᠬᠣᠶᠠᠷ᠂ ᠪᠡᠷᠬᠡ ᠳᠠᠪᠠᠭᠠ ᠳᠠᠪᠠᠬᠤ ᠪᠡᠯᠡᠨ ᠵᠣᠷᠢᠭ ᠲᠠᠢ
ᠤᠯᠤᠰ ᠲᠦᠮᠡᠨ ᠦ᠌ ᠠᠷᠢᠭᠤᠨ ᠨᠠᠢᠷᠠᠮᠳᠠᠯ ᠪᠠᠲᠤ᠃
ᠬᠠᠰᠠᠭ ᠤ᠋ᠨ ᠶᠡᠬᠡ ᠢᠷᠠᠭᠤ ᠨᠠᠢᠷᠠᠭᠴᠢ ᠵᠠᠮᠪᠠᠯ
ᠰᠢᠷᠴᠢᠨ ᠢ᠋ ᠰᠤᠮᠤ ᠶ᠋ᠢᠨ ᠬᠣᠷᠰᠢᠶᠠᠨ ᠳ᠋ᠤ᠌ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍ ᠨᠠᠷᠠ ᠪᠠᠷᠠᠭᠤᠨᠠ ᠬᠡᠯᠪᠡᠢᠵᠦ ᠪᠢᠯᠡ᠃ ᠬᠣᠷᠰᠢᠶᠠᠨ ᠤ᠋ ᠮᠣᠷᠢᠨ ᠤ᠋ ᠤᠶᠠᠭᠠᠨ ᠦ᠌ ᠲᠡᠨᠳᠡ ᠨᠢᠬᠡᠴᠦ(ᠨᠢᠭᠡ ᠴᠦ᠍) ᠮᠣᠷᠢ ᠦᠭᠡᠢ ᠶ᠋ᠢ ᠦᠵᠡᠭᠡᠳ᠂ ᠡᠪᠦᠭᠡᠨ ᠪᠠᠬᠠᠨ ᠭᠠᠢᠬᠠᠵᠤ ᠡᠨᠡ ᠶᠠᠭᠠᠬᠢᠭᠠᠳ ᠡᠢᠮᠦ ᠪᠠᠢᠨᠠ? ᠨᠠᠭᠠᠳᠤᠮ ᠤ᠋ᠨ ᠡᠮᠦᠨᠡ ᠡᠳᠦᠢ ᠳ᠋ᠦ᠍ ᠬᠥᠮᠦᠨ ᠠᠮᠢᠲᠠᠨ ᠬᠣᠷᠰᠢᠶᠠ ᠠ᠋ᠴᠠ ᠶᠠᠭᠤᠮᠠ ᠠᠪᠬᠤ ᠭᠡᠵᠦ ᠶᠡᠬᠡ ᠬᠥᠯ ᠲᠡᠢ ᠪᠠᠢᠳᠠᠭ ᠪᠢᠰᠢ ᠰᠠᠨ ᠪᠢᠯᠢᠤ(ᠪᠢᠯᠡ ᠤᠤ)? ᠭᠡᠵᠦ ᠮᠣᠷᠢ ᠪᠠᠨ ᠤᠶᠠᠭᠠ ᠠ᠋ᠴᠠ ᠤᠶᠠᠭᠠᠳ᠂ ᠤᠩᠭᠠᠰᠤ ᠨᠣᠣᠰᠣ ᠲᠡᠩᠨᠡᠵᠦ ᠠᠴᠢᠭᠰᠠᠨ ᠮᠣᠷᠢ ᠪᠠᠨ ᠬᠣᠷᠰᠢᠶᠠᠨ ᠤ᠋ ᠬᠠᠰᠢᠶᠠᠨ ᠳ᠋ᠤ᠌ ᠬᠥᠲᠥᠯᠵᠦ ᠣᠷᠣᠲᠠᠯᠠ᠂ ᠲᠦᠭᠦᠬᠡᠢ ᠡᠳ᠋ ᠦ᠋ᠨ ᠨᠢᠷᠪᠠ ᠷᠠᠪᠳᠠᠨᠳᠣᠷᠵᠢ ᠭᠡᠳᠡᠭ ᠬᠠᠯᠵᠠᠨ ᠪᠣᠯᠵᠤ ᠶᠠᠪᠤᠭᠠ ᠬᠥᠬᠡ ᠴᠢᠷᠠᠢᠲᠠᠢ ᠨᠢᠭᠡᠨ ᠬᠥᠮᠦᠨ᠂
— ᠰᠢᠷᠴᠢᠨ ᠭᠤᠸᠠᠢ᠂ ᠰᠠᠢᠨ ᠪᠠᠢᠨᠠᠤ(ᠪᠠᠢᠨᠠ ᠤᠤ)? ᠤᠩᠭᠠᠰᠤ ᠲᠤᠰᠢᠶᠠᠬᠤ ᠭᠡᠵᠦ ᠢᠷᠡᠪᠡᠦ(ᠢᠷᠡᠪᠡ ᠤᠤ)? ᠲᠡᠢᠨ ᠡᠬᠢᠯᠡᠵᠦ᠂ ᠭᠧᠷᠮᠠᠨ ᠤ᠋ ᠹᠠᠱ᠌ᠢᠰᠲ ᠤ᠋ᠳ ᠬᠣᠯᠪᠣᠭᠠᠲᠤ ᠤᠯᠤᠰ ᠲᠤ᠌ ᠬᠠᠯᠳᠠᠭᠰᠠᠨ ᠢ᠋ ᠲᠠ ᠰᠣᠨᠣᠰᠪᠠᠤ(ᠰᠣᠨᠣᠰᠪᠠ ᠤᠤ)? ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠰᠢᠷᠴᠢᠨ᠂ ᠪᠢ ᠪᠤᠷᠤᠭᠤ ᠲᠤᠭᠤᠯᠪᠠᠤ(ᠳᠤᠭᠤᠯᠪᠠ ᠤᠤ)? ᠭᠧᠷᠮᠠᠨ ᠰ ᠰ ᠰ ᠷ ᠬᠣᠶᠠᠷ ᠬᠠᠷᠢᠯᠴᠠᠨ ᠦᠯᠦ ᠬᠠᠯᠳᠠᠨ ᠪᠠᠢᠯᠳᠤᠬᠤ ᠭᠡᠷᠡ ᠲᠡᠢ ᠪᠢᠰᠢ ᠰᠠᠨ ᠪᠢᠯᠢᠤ(ᠪᠢᠯᠡ ᠤᠤ)? ᠭᠡᠵᠦ ᠳᠣᠲᠣᠷᠠ ᠪᠠᠨ ᠭᠠᠢᠬᠠᠲᠠᠯᠠ᠂ ᠷᠠᠪᠳᠠᠨᠳᠣᠷᠵᠢ᠄
— ᠵᠢᠷᠭᠤᠳᠤᠭᠠᠷ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠬᠣᠶᠠᠷ ᠲᠤ᠌ ᠮᠣᠰᠺᠸᠠ ᠳ᠋ᠤ᠌ ᠨᠥᠬᠥᠷ ᠮᠣᠯᠣᠲ᠋ᠣᠸ ᠤ᠋ᠨ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠤᠯᠠᠭᠠᠨᠪᠠᠭᠠᠲᠤᠷ ᠠ᠋ᠴᠠ ᠷᠠᠳᠢᠣ᠋ ᠪᠠᠷ ᠮᠣᠩᠭᠣᠯ ᠦᠭᠡ ᠪᠡᠷ ᠨᠡᠪᠲᠡᠷᠡᠭᠦᠯᠵᠡᠢ᠃ ᠰ ᠰ ᠰ ᠷ᠂ ᠭᠧᠷᠮᠠᠨ ᠬᠣᠶᠠᠷ ᠤᠯᠤᠰ᠂ ᠬᠠᠷᠢᠯᠴᠠᠨ ᠳᠣᠪᠲᠣᠯᠬᠤ ᠦᠭᠡᠢ ᠭᠡᠷᠡ ᠲᠡᠢ ᠪᠣᠯᠪᠠᠴᠤ᠂ ᠵᠢᠷᠭᠤᠳᠤᠭᠠᠷ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠬᠣᠶᠠᠷ ᠤ᠋ᠨ ᠥᠷᠯᠥᠭᠡ ᠶ᠋ᠢᠨ ᠳᠥᠷᠪᠡᠨ ᠴᠠᠭ ᠠ᠋ᠴᠠ ᠭᠧᠷᠮᠠᠨ ᠴᠡᠷᠢᠭ ᠲᠡᠢᠨ ᠵᠠᠷᠯᠠᠯ ᠦᠭᠡᠢ ᠭᠡᠨᠡᠳᠲᠡ ᠬᠣᠯᠪᠣᠭᠠᠲᠤ ᠤᠯᠤᠰ ᠲᠤ᠌ ᠬᠠᠯᠳᠠᠨ ᠣᠷᠣᠵᠤ᠂ ᠺᠢᠶᠧᠸ᠂ ᠰᠧᠸᠠᠰᠲ᠋ᠣᠫᠣᠯ᠂ ᠺᠠᠦ᠋ᠨᠠᠰ ᠵᠡᠷᠭᠡ ᠬᠣᠲᠠ ᠶ᠋ᠢ ᠪᠥᠮᠪᠥᠭᠡᠳᠡᠵᠡᠢ᠃ ᠪᠠᠭᠠᠲᠤᠷ ᠬᠣᠲᠠ ᠶ᠋ᠢᠨ ᠷᠠᠳᠢᠣ᠋᠂ ᠠᠲᠠᠭᠠᠲᠠᠨ ᠳᠠᠢᠰᠤᠨ ᠢ᠋ ᠳᠠᠷᠤᠨ ᠰᠥᠨᠥᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠬᠣᠯᠪᠣᠭᠠᠲᠤ ᠤᠯᠤᠰ ᠤ᠋ᠨ ᠢ᠋ᠶ᠋ᠠᠨ ᠤᠯᠠᠭᠠᠨ ᠴᠡᠷᠢᠭ ᠲᠦ᠍ ᠶᠠᠭᠤ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠤᠰᠠᠯᠠᠬᠤ ᠬᠡᠷᠡᠭᠲᠡᠢ ᠪᠣᠯᠤᠯᠠ᠃ ᠬᠣᠯᠪᠣᠭᠠᠲᠤ ᠤᠯᠤᠰ᠂ ᠾᠢᠲ᠋ᠯᠧᠷ ᠦ᠋ᠨ ᠬᠠᠷᠭᠢᠰ ᠶᠣᠰᠣ ᠶ᠋ᠢ ᠡᠰᠡᠷᠭᠦᠴᠡᠭᠰᠡᠨ ᠰᠢᠳᠤᠷᠭᠤ ᠲᠡᠢᠨ ᠳ᠋ᠦ᠍ ᠢᠯᠠᠵᠤ᠂ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠹᠠᠱ᠌ᠢᠰᠲ ᠤ᠋ᠨ ᠠᠶᠤᠯᠲᠤ ᠳᠠᠷᠤᠯᠠᠯ ᠠ᠋ᠴᠠ ᠰᠤᠯᠠᠯᠠᠨᠠ ᠭᠡᠵᠦ ᠮᠠᠷᠱᠠᠯ ᠤ᠋ᠨ ᠬᠡᠯᠡᠭᠰᠡᠨ ᠢ᠋ ᠨᠡᠪᠲᠡᠷᠡᠭᠦᠯᠦᠯᠡ᠃ ᠮᠠᠨ ᠤ᠋ ᠰᠤᠮᠤ ᠶ᠋ᠢᠨ ᠲᠥᠪ ᠲᠦ᠍ ᠴᠤᠭᠯᠠᠭᠠᠨ ᠪᠣᠯᠵᠤ᠂ ᠨᠠᠮ ᠤ᠋ᠨ ᠡᠭᠦᠷ ᠦ᠋ᠨ ᠳᠠᠷᠤᠭᠠ᠂ ᠨᠥᠬᠥᠷ ᠮᠣᠯᠣᠲ᠋ᠣᠸ ᠤ᠋ᠨ ᠦᠭᠡ᠂ ᠮᠠᠷᠱᠠᠯ ᠤ᠋ᠨ ᠤᠷᠢᠶᠠ ᠶ᠋ᠢ ᠠᠮᠢᠲᠠᠨ ᠣᠯᠠᠨ ᠳ᠋ᠤ᠌ ᠬᠡᠯᠡᠵᠦ ᠥᠭᠭᠦᠯᠡ᠃ ᠬᠤᠷᠠᠯᠳᠤᠭᠰᠠᠳ ᠤᠯᠠᠭᠠᠨ ᠴᠡᠷᠢᠭ ᠲᠦ᠍ ᠲᠤᠰᠠᠯᠠᠮᠵᠢ ᠬᠤᠷᠠᠯᠳᠤᠭᠤᠯᠬᠤ ᠪᠠᠷ ᠲᠣᠭᠲᠠᠵᠠᠢ᠃ ᠰᠤᠮᠤ ᠶ᠋ᠢᠨ ᠨᠠᠮ ᠤ᠋ᠨ ᠡᠭᠦᠷ᠂ ᠵᠠᠬᠢᠷᠭᠠᠨ ᠤ᠋ ᠳᠠᠷᠤᠭᠠ ᠨᠠᠷ ᠴᠥᠮ ᠪᠠᠭ ᠢ᠋ᠶ᠋ᠠᠷ ᠶᠠᠪᠤᠵᠤ᠂ ᠮᠠᠷᠱᠠᠯ ᠤ᠋ᠨ ᠤᠷᠢᠶᠠ ᠶ᠋ᠢ ᠲᠠᠨᠢᠭᠤᠯᠬᠤ ᠪᠠᠷ ᠮᠣᠷᠳᠠᠯᠠ᠃ ᠣᠳᠣ ᠲᠠᠪᠤᠨ ᠴᠠᠭ ᠲᠤ᠌ ᠤᠯᠠᠭᠠᠨᠪᠠᠭᠠᠲᠤᠷ ᠤ᠋ᠨ ᠷᠠᠳᠢᠣ᠋ ᠪᠠᠷ ᠰᠡᠭᠦᠯᠴᠢ ᠶ᠋ᠢᠨ ᠮᠡᠳᠡᠭᠡ ᠨᠡᠪᠲᠡᠷᠡᠭᠦᠯᠬᠦ᠂ ᠲᠡᠷᠡ ᠬᠦᠷᠲᠡᠯᠡ ᠤᠩᠭᠠᠰᠤ ᠨᠣᠣᠰᠣ ᠪᠠᠨ ᠲᠦᠷᠭᠡᠬᠡᠨ ᠰᠢᠭ ᠹᠦᠯᠡᠭᠡᠳ᠂ ᠬᠡᠷᠡᠭᠯᠡᠬᠦ ᠶᠠᠭᠤᠮᠠ ᠪᠠᠨ ᠬᠣᠷᠰᠢᠶᠠ ᠠ᠋ᠴᠠ ᠠᠪᠴᠤ᠂ ᠮᠠᠨᠠᠢᠳᠤ(ᠮᠠᠨ ᠤ᠋ ᠳ᠋ᠤ᠌) ᠣᠴᠢᠵᠤ ᠷᠠᠳᠢᠣ᠋ ᠰᠣᠨᠣᠰᠤᠶᠠ ᠭᠡᠵᠡᠢ᠃
ᠡᠪᠦᠭᠡᠨ ᠶᠠᠭᠠᠷᠠᠨ ᠤᠩᠭᠠᠰᠤ ᠨᠣᠣᠰᠣ ᠪᠠᠨ ᠲᠤᠰᠢᠶᠠᠭᠠᠳ᠂ ᠠᠬᠠᠷ ᠱᠠᠬᠠᠷ ᠶᠠᠭᠤᠮᠠ ᠠᠪᠤᠭᠠᠳ᠂ ᠷᠠᠪᠳᠠᠨᠳᠣᠷᠵᠢ ᠶ᠋ᠢ ᠳᠠᠭᠠᠵᠤ ᠭᠡᠷ ᠲᠦ᠋ᠨᠢ( ᠲᠤ ᠨᠢ) ᠣᠴᠢᠲᠠᠯᠠ ᠲᠡᠷᠡ ᠬᠠᠪᠢ ᠶ᠋ᠢᠨ ᠠᠮᠢᠲᠠᠨ ᠭᠡᠷ ᠳᠦᠭᠦᠷᠡᠩ ᠴᠤᠭᠯᠠᠵᠤ᠂ ᠴᠠᠭ ᠲᠠᠪᠤ ᠪᠣᠯᠵᠤ᠂ ᠥᠨᠳᠥᠷ ᠳᠠᠭᠤ ᠪᠠᠷ ᠨᠢᠭᠡ ᠡᠮᠡᠭᠲᠡᠢ ᠬᠥᠮᠦᠨ᠂ ᠠᠩᠬᠠᠷᠤᠭᠠᠷᠠᠢ᠂ ᠤᠯᠠᠭᠠᠨᠪᠠᠭᠠᠲᠤᠷ ᠠ᠋ᠴᠠ ᠶᠠᠷᠢᠵᠤ ᠪᠠᠢᠨᠠ᠃ ᠤᠯᠠᠭᠠᠨ ᠠᠷᠮᠢ ᠶ᠋ᠢᠨ ᠶᠡᠷᠦᠩᠬᠡᠢ ᠺᠣᠮᠠᠨᠲᠠᠯᠠᠯ ᠤ᠋ᠨ ᠭᠠᠵᠠᠷ ᠤ᠋ᠨ1941 ᠣᠨ ᠤ᠋ ᠵᠢᠷᠭᠤᠳᠤᠭᠠᠷ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠬᠣᠶᠠᠷ ᠤ᠋ᠨ ᠮᠡᠳᠡᠭᠡ ᠶ᠋ᠢ ᠰᠣᠨᠣᠰᠤᠨᠠᠤ᠃
《1941 ᠣᠨ ᠤ᠋ ᠵᠢᠷᠭᠤᠳᠤᠭᠠᠷ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠬᠣᠶᠠᠷ ᠤ᠋ᠨ ᠦᠷ ᠢ᠋ᠶ᠋ᠡᠷ ᠭᠧᠷᠮᠠᠨ ᠤ᠋ ᠠᠷᠮᠢ ᠶ᠋ᠢᠨ ᠵᠢᠩᠬᠢᠨᠢ ᠴᠡᠷᠢᠭ᠂ ᠪᠡᠯᠲ ᠦ᠋ᠨ ᠲᠠᠩᠭᠢᠰ ᠠ᠋ᠴᠠ ᠬᠠᠷᠠ ᠲᠠᠩᠭᠢᠰ ᠬᠦᠷᠲᠡᠯᠡᠬᠢ ᠹᠷᠣᠨᠲ ᠲᠤ᠌ ᠮᠠᠨ ᠤ᠋ ᠬᠢᠵᠠᠭᠠᠷ ᠤ᠋ᠨ ᠠᠩᠭᠢ ᠳ᠋ᠤ᠌ ᠬᠠᠯᠳᠠᠨ ᠳᠣᠪᠲᠣᠯᠤᠭᠰᠠᠨ ᠢ᠋ ᠲᠡᠳᠡᠭᠡᠷ ᠠᠩᠭᠢ ᠦᠳᠡ ᠬᠦᠷᠲᠡᠯᠡ ᠨᠢᠴᠤᠭᠠᠨ ᠲᠣᠭᠲᠠᠭᠠᠵᠤ ᠪᠠᠢᠯᠠ᠃ ᠳᠠᠢᠰᠤᠨ ᠶᠡᠬᠡ ᠰᠢᠷᠦᠭᠦᠨ ᠲᠤᠯᠤᠯᠳᠤᠭᠠᠨ ᠤ᠋ ᠡᠴᠦᠰ ᠲᠦ᠍ ᠮᠠᠰᠢ ᠶᠡᠬᠡ ᠬᠣᠬᠢᠷᠠᠯ ᠦᠵᠡᠵᠦ ᠨᠢᠴᠤᠭᠠᠭᠳᠠᠪᠠ᠃ ᠭᠠᠭᠴᠠᠬᠦ ᠭᠷᠤᠳ᠋ᠨᠤ᠂ ᠺᠷᠢᠰᠲ᠋ᠢᠨᠤᠫᠣᠯ ᠤ᠋ᠨ ᠵᠦᠭ ᠲᠦ᠍ ᠳᠠᠢᠰᠤᠨ ᠪᠠᠭᠠ ᠰᠠᠭᠠ ᠲᠠᠺᠲ᠋ᠢᠭ ᠤ᠋ᠨ ᠠᠮᠵᠢᠯᠲᠠ ᠣᠯᠵᠤ᠂ ᠺᠠᠯᠸᠠᠷᠢ᠂ ᠰᠲ᠋ᠤᠹᠨᠤᠸ᠂ ᠼᠧᠬᠠᠨᠤᠸᠶᠧᠼ ᠦ᠋ᠨ ᠰᠠᠭᠤᠷᠢᠨ ᠭᠠᠵᠠᠷ ᠢ᠋ ᠡᠵᠡᠯᠡᠪᠡ(ᠡᠭᠦᠨ ᠳ᠋ᠦ᠍ ᠲᠦᠷᠦᠭᠦᠴᠢ ᠶ᠋ᠢᠨ ᠬᠣᠶᠠᠷ ᠭᠠᠵᠠᠷ᠂ ᠬᠢᠯᠢ ᠡᠴᠡ ᠠᠷᠪᠠᠨ ᠲᠠᠪᠤᠨ ᠺᠢᠯᠣᠮᠧᠲ᠋ᠷ᠂ ᠰᠡᠭᠦᠯᠴᠢ ᠶ᠋ᠢᠨ ᠬᠢᠨᠢ ᠠᠷᠪᠠᠨ ᠺᠢᠯᠣᠮᠧᠲ᠋ᠷ ᠳᠣᠲᠣᠭᠰᠢ ᠪᠢᠯᠡ)᠃ ᠳᠠᠢᠰᠤᠨ ᠤ᠋ ᠨᠢᠰᠬᠦ ᠣᠩᠭᠣᠴᠠ᠂ ᠮᠠᠨ ᠤ᠋ ᠨᠢᠰᠬᠦ ᠣᠩᠭᠣᠴᠠᠨ ᠤ᠋ ᠬᠡᠳᠦᠨ ᠪᠠᠭᠤᠳᠠᠯ᠂ ᠰᠠᠭᠤᠷᠢᠨ ᠭᠠᠵᠠᠷ ᠵᠡᠷᠭᠡ ᠶ᠋ᠢ ᠳᠠᠭᠠᠷᠢᠨ ᠳᠣᠪᠲᠣᠯᠤᠭᠠᠳ᠂ ᠮᠠᠨ ᠤ᠋ ᠰᠥᠨᠥᠭᠡᠭᠴᠢ ᠣᠩᠭᠣᠴᠠ᠂ ᠽᠧᠨᠢᠲ ᠦ᠋ᠨ ᠶᠡᠬᠡ ᠫᠤᠤ᠂ ᠳᠠᠢᠰᠤᠨ ᠳ᠋ᠤ᠌ ᠦᠯᠡᠮᠵᠢᠬᠡᠨ ᠬᠣᠬᠢᠷᠠᠯ ᠤᠴᠠᠷᠠᠭᠤᠯᠵᠤ᠂ ᠡᠷᠡᠰ ᠡᠰᠡᠷᠭᠦᠴᠡᠯ ᠲᠠᠯᠪᠢᠵᠤ᠂ ᠮᠠᠨᠠᠢᠬᠢᠨ᠂ ᠳᠠᠢᠰᠤᠨ ᠤ᠋ ᠵᠢᠷᠠᠨ ᠲᠠᠪᠤᠨ ᠨᠢᠰᠬᠦ ᠣᠩᠭᠣᠴᠠ ᠤᠨᠠᠭᠠᠪᠠ᠁》 ᠭᠡᠬᠦ ᠵᠡᠷᠭᠡ ᠪᠡᠷ ᠤᠩᠰᠢᠨ ᠰᠣᠨᠣᠰᠬᠠᠵᠠᠢ᠃
ᠴᠢᠩᠭᠢᠭᠡᠳ᠂ ᠷᠠᠳᠢᠣ᠋ ᠪᠠᠷ ᠤᠩᠰᠢᠭᠴᠢ ᠨᠢ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠶ᠋ᠢᠨ ᠣᠯᠠᠨ ᠦᠢᠯᠡᠳᠪᠦᠷᠢ᠂ ᠠᠯᠪᠠᠨ ᠭᠠᠵᠠᠷ᠂ ᠬᠥᠳᠡᠯᠮᠦᠷᠢᠴᠢᠨ ᠣᠯᠠᠨ ᠤ᠋ ᠬᠤᠷᠠᠯ ᠪᠣᠯᠵᠤ᠂ ᠨᠡᠢᠭᠡᠮ ᠵᠢᠷᠤᠮ ᠤ᠋ᠨ ᠣᠷᠣᠨ ᠳ᠋ᠤ᠌ ᠵᠦᠢ ᠪᠤᠰᠤ ᠪᠠᠷ ᠬᠠᠯᠳᠠᠨ ᠳᠣᠪᠲᠣᠯᠤᠭᠰᠠᠨ ᠭᠧᠷᠮᠠᠨ ᠤ᠋ ᠹᠠᠱ᠌ᠢᠰᠲ ᠤ᠋ᠳ ᠢ᠋ ᠵᠢᠭᠰᠢᠨ ᠪᠤᠷᠤᠭᠤᠰᠢᠶᠠᠵᠤ᠂ ᠪᠦᠬᠦ ᠳᠠᠪᠰᠢᠯᠲᠤ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠦᠰᠲᠡᠨ ᠳᠠᠢᠰᠤᠨ ᠭᠧᠷᠮᠠᠨ ᠤ᠋ ᠹᠠᠱ᠌ᠢᠰᠮ ᠲᠠᠢ ᠪᠠᠭᠠᠲᠤᠷᠯᠢᠭ ᠢ᠋ᠶ᠋ᠠᠷ ᠲᠡᠮᠡᠴᠡᠵᠦ ᠪᠠᠢᠭᠠ ᠬᠣᠯᠪᠣᠭᠠᠲᠤ ᠤᠯᠤᠰ ᠤ᠋ᠨ ᠤᠯᠠᠭᠠᠨ ᠠᠷᠮᠢ ᠳ᠋ᠤ᠌ ᠵᠦᠢᠯ ᠪᠦᠷᠢ ᠪᠡᠷ ᠲᠤᠰᠠᠯᠠᠬᠤ ᠶ᠋ᠢ ᠤᠷᠢᠶᠠᠯᠠᠭᠰᠠᠨ ᠮᠠᠷᠱᠠᠯ ᠴᠣᠢᠪᠠᠯᠰᠠᠩ᠂ ᠨᠠᠮ ᠵᠠᠰᠠᠭ ᠤ᠋ᠨ ᠤᠷᠢᠶᠠ ᠶ᠋ᠢ ᠶᠡᠬᠡᠯᠡ(ᠶᠡᠬᠡ ᠯᠡ) ᠬᠠᠯᠠᠭᠤᠨ ᠢ᠋ᠶ᠋ᠠᠷ ᠳᠠᠮᠵᠢᠨ ᠲᠤᠰᠤᠭᠰᠠᠨ ᠢ᠋ ᠵᠠᠷᠯᠠᠨ ᠰᠣᠨᠣᠰᠬᠠᠵᠠᠢ᠃
ᠷᠠᠪᠳᠠᠨᠳᠣᠷᠵᠢ ᠶ᠋ᠢᠨ ᠭᠡᠷ ᠲᠦ᠍ ᠴᠤᠭᠯᠠᠨ ᠬᠤᠷᠠᠯᠳᠤᠭᠰᠠᠳ᠂ ᠬᠣᠲᠠ ᠠ᠋ᠴᠠ ᠨᠡᠪᠲᠡᠷᠡᠭᠦᠯᠦᠭᠰᠡᠨ ᠲᠡᠷᠡ ᠠᠭᠠᠷ ᠤ᠋ᠨ ᠮᠡᠳᠡᠭᠡ ᠶ᠋ᠢ ᠶᠡᠬᠡᠯᠡ( ᠶᠡᠬᠡ ᠯᠡ) ᠠᠩᠬᠠᠷᠤᠯ ᠲᠠᠢ ᠪᠠᠷ ᠰᠣᠨᠣᠰᠴᠠᠭᠠᠨ ᠮᠥᠩᠭᠥᠨ ᠰᠤᠷ ᠲᠠᠢ ᠶᠤᠮ ᠰᠢᠭ᠋ ᠭᠢᠯᠠᠯᠵᠠᠭᠰᠠᠨ ᠴᠡᠯ ᠪᠤᠭᠤᠷᠤᠯ ᠦᠰᠦᠲᠡᠢ ᠨᠢᠭᠡ ᠴᠢᠪᠠᠭᠠᠨᠴᠠ ᠷᠠᠳᠢᠣ᠋ ᠨᠡᠪᠲᠡᠷᠡᠭᠦᠯᠦᠭᠴᠢ ᠶ᠋ᠢᠨ ᠦᠭᠡ ᠶ᠋ᠢ ᠨᠢᠳᠦ ᠪᠡᠨ ᠠᠨᠢᠰᠬᠢᠨ ᠴᠢᠩᠨᠠᠵᠤ᠂ ᠰᠠᠭᠤᠷᠢᠨ ᠭᠠᠵᠠᠷ ᠤ᠋ᠨ ᠨᠡᠷᠡ ᠶ᠋ᠢ ᠬᠡᠯᠡ ᠡᠭᠡᠳᠡᠷᠡᠨ ᠲᠣᠭᠲᠠᠭᠠᠬᠤ ᠭᠡᠵᠦ ᠠᠮᠠᠨ ᠳᠣᠲᠣᠷᠠ ᠪᠠᠨ ᠰᠢᠪᠡᠨᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠷᠠᠪᠳᠠᠨᠳᠣᠷᠵᠢ ᠠ᠋ᠴᠠ᠂
— ᠬᠢᠯᠢ ᠡᠴᠡ ᠳᠣᠲᠣᠭᠰᠢ ᠠᠷᠪᠠᠨ ᠲᠠᠪᠤᠨ ᠺᠢᠯᠣᠮᠧᠲ᠋ᠷ ᠭᠡᠵᠦ ᠮᠠᠨᠠᠢᠬᠢ(ᠮᠠᠨ ᠤ᠋ ᠬᠢ) ᠪᠡᠷ ᠬᠡᠴᠢᠨᠡᠭᠡᠨ ᠦ᠌ ᠭᠠᠵᠠᠷ ᠪᠣᠯᠬᠤ ᠪᠣᠢ? ᠬᠡᠮᠡᠪᠡᠰᠦ᠂
— ᠭᠤᠴᠢᠨ ᠭᠠᠵᠠᠷ ᠪᠤᠶᠤ ᠬᠠᠭᠠᠰ ᠥᠷᠲᠡᠭᠡ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠤᠤᠬᠠᠯᠠᠢ᠂ ᠲᠡᠷᠡ ᠪᠠᠯᠲ᠋ ᠤ᠋ᠨ ᠲᠠᠩᠭᠢᠰ ᠠ᠋ᠴᠠ ᠬᠠᠷᠠ ᠲᠠᠩᠭᠢᠰ ᠬᠦᠷᠲᠡᠯᠡ ᠬᠡᠳᠦᠨ ᠦ᠌ ᠭᠠᠵᠠᠷ ᠪᠣᠯᠵᠤ᠂ ᠮᠠᠨ ᠤ᠋ ᠡᠨᠳᠡ ᠡᠴᠡ ᠠᠯᠢ ᠬᠢᠷᠢ ᠬᠣᠯᠠ ᠶᠤᠮ ᠪᠣᠢ? ᠪᠢᠴᠢᠭ ᠮᠡᠳᠡᠬᠦ ᠦᠭᠡᠢ ᠮᠢᠨᠢ ᠢᠩᠭᠢᠭᠡᠳ ᠢᠷᠡᠬᠦ ᠳ᠋ᠦ᠍ ᠲᠤᠰᠠ ᠦᠭᠡᠢ ᠶᠠ᠃ ᠬᠡᠦᠬᠡ᠂ ᠴᠢ ᠨᠠᠳᠠᠳᠤ(ᠨᠠᠳᠠ ᠳ᠋ᠤ᠌) ᠵᠢᠷᠤᠭ ᠳᠡᠭᠡᠷᠡ ᠦᠵᠡᠭᠦᠯᠦᠭᠡᠳ ᠥᠭᠬᠦ ᠦᠭᠡᠢ ᠤᠤ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂ ᠷᠠᠪᠳᠠᠨᠳᠣᠷᠵᠢ ᠰᠤᠷᠭᠠᠭᠤᠯᠢ ᠶ᠋ᠢᠨ ᠮᠣᠩᠭᠣᠯ ᠦᠰᠦᠭ ᠦ᠋ᠨ ᠭᠠᠵᠠᠷ ᠵᠦᠢ ᠶ᠋ᠢᠨ ᠠᠲ᠋ᠯᠠᠰ ᠳᠡᠯᠭᠡᠭᠡᠳ᠂ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠵᠢᠭᠠᠵᠤ ᠡᠨᠡ ᠪᠠᠢᠨᠠ ᠥᠨᠥᠬᠢ ᠬᠣᠶᠠᠷ ᠲᠠᠩᠭᠢᠰ ᠨᠢ᠂ ᠡᠨᠡ ᠮᠠᠨ ᠤ᠋ ᠬᠣᠯᠪᠣᠭᠠᠲᠤ ᠤᠯᠤᠰ᠂ ᠡᠨᠡ ᠮᠠᠨ ᠤ᠋ ᠮᠣᠩᠭᠣᠯ ᠤᠯᠤᠰ᠂ ᠡᠨᠡ ᠭᠧᠷᠮᠠᠨ ᠤᠯᠤᠰ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠴᠤᠭᠯᠠᠭᠰᠠᠨ ᠠᠮᠢᠲᠠᠨ ᠲᠡᠷᠡ ᠵᠢᠷᠤᠭ ᠬᠠᠷᠠᠬᠤ ᠭᠡᠵᠦ ᠰᠢᠪᠠᠯᠳᠤᠵᠤ᠂ ᠥᠨᠥᠬᠢ ᠡᠮᠡᠭᠡᠨ ᠲᠡᠷᠡ ᠵᠢᠷᠤᠭ ᠢ᠋ ᠬᠠᠷᠠᠵᠤ ᠬᠠᠷᠠᠵᠤ᠂
— ᠬᠣᠯᠪᠣᠭᠠᠲᠤ ᠤᠯᠤᠰ ᠭᠡᠵᠦ ᠮᠥᠨ ᠴᠦ᠍ ᠶᠡᠬᠡ ᠤᠯᠤᠰ ᠶᠤᠮᠠ ᠳᠠ᠃ ᠠᠷᠠᠳ ᠣᠯᠠᠨ ᠨᠢ ᠭᠠᠵᠠᠷ ᠣᠷᠣᠨ ᠤ᠋ ᠪᠠᠨ ᠡᠵᠡᠨ ᠪᠣᠯᠤᠭᠰᠠᠨ ᠬᠣᠢᠨᠠ᠂ ᠶᠠᠮᠠᠷ ᠴᠤ᠌ ᠳᠠᠢᠰᠤᠨ ᠶᠠᠭᠠᠬᠢᠭᠰᠠᠨ ᠴᠤ᠌ ᠢᠯᠠᠬᠤ ᠦᠭᠡᠢ ᠳᠡ᠃ ᠥᠪᠡᠷ ᠢ᠋ᠶ᠋ᠡᠨ ᠡᠷᠬᠡ ᠴᠢᠯᠥᠭᠡ ᠪᠡᠨ ᠣᠯᠤᠭᠠᠳ ᠪᠤᠰᠤᠳ ᠤᠯᠤᠰ ᠤ᠋ᠨ ᠥᠨᠳᠡᠢᠵᠦ ᠪᠣᠰᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠲᠤᠰᠠᠯᠠᠳᠠᠭ ᠲᠡᠢᠮᠦ ᠤᠯᠤᠰ ᠢ᠋ ᠳᠡᠢᠯᠬᠦ ᠲᠡᠦᠬᠡ ᠦᠭᠡᠢ ᠶᠦᠮ ᠰᠢᠦ᠂ ᠬᠡᠦᠬᠡᠳ ᠮᠢᠨᠢ ᠭᠡᠵᠦ ᠦᠨᠡᠨ ᠭᠣᠣᠯ ᠠ᠋ᠴᠠ ᠰᠠᠨᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠵᠡᠢ᠃
— ᠲᠡᠷᠡ ᠦᠭᠡ ᠵᠥᠪ ᠠ᠋᠃ ᠬᠣᠯᠪᠣᠭᠠᠲᠤ ᠤᠯᠤᠰ᠂ ᠳᠡᠢᠯᠳᠡᠰᠢ ᠦᠭᠡᠢ ᠪᠠᠲᠤ ᠤᠯᠤᠰ᠃ ᠪᠢᠳᠡ ᠮᠣᠩᠭᠣᠯᠴᠤᠳ᠂ ᠠᠬᠠ ᠳᠡᠭᠦᠦ ᠬᠣᠯᠪᠣᠭᠠᠲᠤ ᠤᠯᠤᠰ ᠲᠠᠭᠠᠨ( ᠲᠤ ᠪᠠᠨ) ᠬᠠᠷᠭᠢᠰ ᠳᠠᠢᠰᠤᠨ ᠢ᠋ᠶ᠋ᠠᠨ ᠲᠦᠷᠭᠡᠨ ᠳᠠᠷᠤᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠲᠤᠰᠠᠯᠠᠬᠤ ᠶᠣᠰᠣᠲᠠᠢ ᠭᠡᠵᠦ ᠬᠡᠯᠡᠭᠡᠳ ᠰᠢᠷᠴᠢᠨ ᠪᠣᠰᠴᠤ ᠭᠠᠷᠬᠤ ᠶ᠋ᠢ ᠵᠠᠪᠳᠤᠪᠠᠰᠤ᠂
— ᠰᠢᠷᠴᠢᠨ ᠭᠤᠸᠠᠢ᠂ ᠲᠠ ᠬᠠᠮᠢᠭᠠ ᠣᠴᠢᠬᠤ ᠨᠢ ᠪᠣᠢ? ᠶᠠᠪᠤᠬᠤ ᠨᠢ ᠤᠤ? ᠭᠡᠵᠦ ᠷᠠᠪᠳᠠᠨᠳᠣᠷᠵᠢ ᠠᠰᠠᠭᠤᠵᠠᠢ᠃
ᠭᠡᠷ ᠲᠡᠭᠡᠨ( ᠲᠤ ᠪᠡᠨ) ᠪᠤᠰᠢᠭᠤᠬᠠᠨ ᠬᠠᠷᠢᠶᠠ ᠭᠡᠳ ᠡᠪᠦᠭᠡᠨ᠂ ᠮᠣᠷᠢᠨ ᠤ᠋ ᠤᠶᠠᠭᠠᠨ ᠳᠡᠭᠡᠷᠡ ᠣᠴᠢᠵᠤ ᠡᠮᠡᠭᠡᠯ ᠦ᠋ᠨ ᠢ᠋ᠶ᠋ᠡᠨ ᠣᠯᠣᠩ ᠴᠢᠩᠭᠠᠯᠠᠭᠠᠳ ᠪᠣᠭᠴᠣ ᠪᠠᠨ ᠭᠠᠨᠵᠤᠭᠠᠯᠠᠭᠠᠳ᠂ ᠤᠩᠭᠠᠰᠤ ᠲᠠᠩᠨᠠᠨ ᠢᠷᠡᠭᠰᠡᠨ ᠮᠣᠷᠢ ᠪᠠᠨ ᠬᠥᠲᠥᠯᠵᠦ ᠭᠡᠷ ᠦ᠋ᠨ ᠵᠦᠭ ᠬᠠᠲᠠᠷᠢᠭᠤᠯᠵᠠᠢ᠃
ᠡᠳᠦᠷ ᠦ᠋ᠨ ᠬᠠᠯᠠᠭᠤᠨ ᠪᠠᠭᠤᠷᠠᠵᠤ ᠦᠳᠡᠰᠢ ᠶ᠋ᠢᠨ ᠰᠡᠷᠢᠭᠦᠨ ᠲᠠᠲᠠᠪᠠ᠃ ᠠᠯᠲᠠᠨ ᠬᠠᠷᠢᠶᠠᠴᠠᠢ ᠳᠠᠯᠠᠪᠴᠢ ᠪᠠᠨ ᠳᠡᠷᠪᠡᠯᠵᠡᠨ᠂ ᠳᠠᠪᠬᠢᠵᠤ ᠶᠠᠪᠤᠭᠠ ᠮᠣᠷᠢᠨ ᠤ᠋ ᠤᠷᠢᠳᠤᠭᠤᠷ ᠨᠢᠰᠴᠦ᠂ ᠡᠪᠡᠰᠦ ᠨᠣᠭᠣᠭᠠ ᠠ᠋ᠴᠠ ᠮᠣᠷᠢᠨ ᠤ᠋ ᠬᠥᠯ ᠳ᠋ᠦ᠍ ᠦᠷᠭᠦᠭᠰᠡᠨ ᠢᠯᠠᠭᠠ ᠰᠢᠮᠠᠭᠤᠯ ᠰᠢᠬᠦᠷᠦᠯᠳᠦᠨ ᠨᠢᠰᠴᠡᠭᠡᠵᠡᠢ᠃ ᠰᠢᠷᠴᠢᠨ ᠨᠢᠭᠡ ᠬᠡᠰᠡᠭ ᠳᠠᠪᠬᠢᠭᠰᠠᠨ ᠢ᠋ᠶ᠋ᠠᠨ᠂ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠲᠠᠲᠠᠵᠤ ᠬᠠᠲᠠᠷᠢᠭᠤᠯᠤᠭᠰᠠᠭᠠᠷ ᠠᠯᠬᠤᠯᠠᠭᠤᠯᠵᠤ ᠠᠮᠢᠰᠬᠤᠭᠠ ᠶ᠋ᠢ ᠨᠢ ᠳᠠᠷᠤᠵᠤ ᠶᠠᠪᠤᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)᠂ ᠭᠡᠨᠡᠳᠲᠡ ᠲᠡᠢᠨ ᠪᠣᠯᠤᠭᠰᠠᠨ ᠢ᠋ ᠪᠣᠳᠣᠵᠤ᠂ ᠣᠳᠣ ᠭᠠᠢᠲᠠᠢ ᠶᠠᠫᠣᠨ ᠤ᠋ ᠡᠵᠡᠷᠬᠡᠭ ᠲᠦᠷᠢᠮᠡᠬᠡᠢ ᠶᠠᠭᠠᠬᠢᠳᠠᠭ ᠪᠣᠯ? ᠵᠡᠭᠦᠨ ᠵᠦᠭ ᠲᠤ ᠳᠠᠬᠢᠨ ᠬᠥᠳᠡᠯᠵᠦ ᠭᠠᠷᠳᠠᠭ ᠪᠣᠯᠪᠠᠤ(ᠪᠣᠯᠪᠠ ᠤᠤ)᠂ ᠴᠠᠭᠠᠰᠢ ᠪᠠᠨ ᠶᠠᠭᠤ ᠪᠣᠯᠳᠠᠭ ᠪᠣᠯ ᠭᠡᠵᠦ ᠬᠦᠯᠢᠶᠡᠳᠡᠭ ᠪᠣᠯᠪᠠᠤ(ᠪᠣᠯᠪᠠ ᠤᠤ)? ᠾᠢᠲ᠋ᠯᠸᠷ ᠦ᠋ᠨ ᠲᠡᠷᠡ ᠲᠦᠷᠢᠮᠡᠬᠡᠢ ᠴᠡᠷᠢᠭ ᠦ᠋ᠨ ᠵᠠᠷ ᠵᠡᠪᠰᠡᠭ ᠢ᠋ ᠭᠧᠷᠮᠠᠨ ᠴᠡᠷᠢᠭ ᠲᠦ᠍ ᠠᠪᠲᠠᠭᠳᠠᠭᠰᠠᠨ ᠪᠦᠬᠦ ᠪᠠᠷᠠᠭᠤᠨ ᠧᠦ᠋ᠷᠣᠫᠠ ᠶ᠋ᠢᠨ ᠣᠯᠠᠨ ᠤᠯᠤᠰ ᠤ᠋ᠨ ᠦᠢᠯᠡᠳᠪᠦᠷᠢ ᠨᠡᠢᠯᠡᠭᠦᠯᠵᠦ ᠪᠠᠢᠭᠠ ᠰᠢᠦ ᠳᠡ᠃ ᠡᠨᠡ ᠲᠡᠢᠨ ᠳᠠᠭᠤᠰᠬᠤ ᠠ᠋ᠴᠠ ᠨᠠᠭᠠᠰᠢ ᠬᠣᠶᠠᠷ ᠬᠦᠦ ᠪᠡᠨ ᠴᠡᠷᠢᠭ ᠡᠴᠡ ᠪᠤᠴᠠᠵᠤ ᠢᠷᠡᠨᠡ ᠭᠡᠵᠦ ᠪᠣᠳᠣᠭᠰᠠᠨ ᠤ᠋ ᠬᠡᠷᠡᠭ ᠠᠯᠠᠭᠠ᠃ ᠬᠥᠭᠰᠢᠳ ᠪᠢᠳᠡ᠂ ᠲᠡᠳᠡᠨ ᠦ᠌ ᠪᠡᠨ ᠴᠦ᠍ ᠲᠥᠯᠥᠭᠡ᠂ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠴᠦ᠍ ᠲᠥᠯᠥᠭᠡ ᠤᠯᠠᠮ ᠰᠢᠷᠭᠠᠭᠤ ᠠᠵᠢᠯᠯᠠᠵᠤ᠂ ᠬᠣᠯᠪᠣᠭᠠᠲᠤ ᠤᠯᠤᠰ ᠲᠠᠭᠠᠨ( ᠲᠤ ᠪᠠᠨ) ᠠᠯᠢ ᠪᠣᠯᠬᠤ ᠶᠡᠬᠡᠪᠡᠷ(ᠶᠡᠬᠡ ᠪᠡᠷ) ᠲᠤᠰᠠᠯᠠᠬᠤ ᠨᠢ ᠴᠢᠬᠤᠯᠠ ᠪᠣᠯᠤᠯᠠ ᠭᠡᠵᠦ ᠪᠣᠳᠣᠭᠰᠠᠭᠠᠷ ᠮᠣᠷᠢ ᠪᠠᠨ ᠰᠢᠪᠠᠳᠠᠨ ᠶᠠᠪᠤᠭᠤᠯᠤᠯᠠ᠃
ᠨᠠᠷᠠ ᠵᠢᠷᠭᠠᠬᠤ ᠠᠯᠲᠠ ᠳ᠋ᠤ᠌ ᠵᠡᠭᠦᠨ ᠡᠮᠡᠭᠡᠨ ᠦ᠌ ᠭᠠᠳᠠᠭᠠ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂ ᠨᠣᠬᠠᠢ ᠤᠷᠲᠤ ᠠ᠋ᠴᠠ ᠨᠢ ᠬᠤᠴᠠᠨ ᠳᠠᠪᠬᠢᠵᠤ᠂ ᠬᠣᠲᠠ ᠠ᠋ᠴᠠ ᠪᠠᠨ ᠭᠡᠷ ᠤᠷᠤᠭᠤ ᠪᠠᠨ ᠣᠴᠢᠵᠤ ᠶᠠᠪᠤᠭᠰᠠᠨ ᠡᠮᠡᠭᠡᠨ᠂ ᠰᠢᠷᠴᠢᠨ ᠢ᠋ ᠦᠵᠡᠭᠡᠳ᠂ ᠳᠡᠷᠭᠡᠳᠡ ᠨᠢ ᠬᠦᠷᠴᠦ ᠢᠷᠡᠭᠡᠳ᠂
— ᠵᠠ ᠬᠦᠦ ᠮᠢᠨᠢ᠂ ᠰᠣᠨᠢᠨ ᠰᠠᠢᠬᠠᠨ ᠶᠠᠭᠤ ᠪᠠᠢᠨᠠ ᠳᠠ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠲᠡᠢᠨ ᠡᠬᠢᠯᠡᠴᠢᠬᠡᠵᠦ᠂ ᠡᠮᠡᠭᠡ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠶᠠᠭᠠᠬᠢᠨᠠ ᠭᠡᠨᠡ ᠠ᠋? ᠬᠡᠨ ᠲᠡᠢ ᠬᠠᠮᠢᠭᠠ ᠲᠡᠢᠨ ᠡᠬᠢᠯᠡᠵᠦ ᠪᠣᠢ? ᠥᠨᠥᠬᠢ ᠭᠠᠢᠲᠠᠢ(ᠭᠠᠢ ᠲᠠᠢ) ᠶᠠᠫᠣᠨ ᠳᠠᠬᠢᠭᠠᠳ ᠬᠠᠯᠳᠠᠪᠠᠤ(ᠬᠠᠯᠳᠠᠪᠠ ᠤᠤ)? ᠭᠡᠵᠦ ᠰᠠᠨᠳᠤᠷᠴᠠᠢ᠃
ᠭᠧᠷᠮᠠᠨ ᠹᠠᠱ᠌ᠢᠰᠲ᠂ ᠬᠣᠯᠪᠣᠭᠠᠲᠤ ᠤᠯᠤᠰ ᠲᠤ᠌ ᠬᠠᠯᠲᠠᠯᠠ ᠭᠡᠵᠦ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠯ ᠦᠭᠡᠢ ᠠᠶᠠᠷᠬᠠᠨ ᠬᠡᠯᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠪᠤᠶᠠᠨ ᠢ᠋ᠶ᠋ᠠᠨ ᠪᠠᠷᠠᠭᠰᠠᠨ ᠹᠠᠱ᠌ᠢᠰᠲ ᠤ᠋ᠳ᠂ ᠬᠣᠯᠪᠣᠭᠠᠲᠤ ᠶᠡᠬᠡ ᠤᠯᠤᠰ ᠮᠠᠨᠢ ᠬᠡᠨ ᠳ᠋ᠦ᠍ ᠴᠦ᠍ ᠳᠠᠪᠠᠭᠳᠠᠬᠤ ᠦᠭᠡᠢ ᠤᠯᠤᠰ! ᠬᠠᠷᠠ ᠲᠣᠯᠣᠭᠠᠢ ᠪᠠᠨ ᠢᠳᠡᠬᠦ ᠭᠡᠵᠦ ᠳᠡ᠂ ᠮᠠᠭᠤ ᠹᠠᠱ᠌ᠢᠰᠲ ᠤ᠋ᠳ᠃ ᠬᠡᠴᠢᠨᠡᠨ ᠠᠮᠢᠲᠠᠨ ᠲᠡᠳᠡᠨ ᠡᠴᠡ ᠪᠣᠯᠵᠤ ᠠᠮᠢ ᠦᠷᠡᠭᠳᠡᠬᠦ ᠨᠢ᠂ ᠪᠢᠳᠡᠨ ᠦ᠌ ᠮᠣᠩᠭᠣᠯᠴᠤᠳ ᠶᠠᠭᠤ ᠬᠢᠵᠦ᠂ ᠶᠠᠭᠠᠬᠢᠵᠤ ᠬᠣᠯᠪᠣᠭᠠᠲᠤ ᠤᠯᠤᠰ ᠲᠠᠭᠠᠨ( ᠲᠤ ᠪᠠᠨ) ᠲᠤᠰᠠᠯᠠᠳᠠᠭ ᠪᠢᠯᠡ? ᠰᠤᠮᠤ ᠶ᠋ᠢᠨ ᠬᠢᠨ ᠶᠠᠭᠤ ᠭᠡᠵᠦ ᠬᠡᠯᠡᠯᠴᠡᠵᠦ ᠪᠠᠢᠨᠠ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠮᠠᠷᠱᠠᠯ᠂ ᠠᠷᠠᠳ ᠲᠦᠮᠡᠨ ᠢ᠋ᠶ᠋ᠡᠨ ᠬᠣᠯᠪᠣᠭᠠᠲᠤ ᠤᠯᠤᠰ ᠲᠤ᠌ ᠠᠯᠢ ᠪᠠᠢᠳᠠᠭ ᠴᠢᠳᠠᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠤᠰᠠᠯᠠᠬᠤ ᠨᠢ ᠴᠢᠬᠤᠯᠠ ᠭᠡᠵᠦ ᠤᠷᠢᠶᠠᠯᠠᠭᠰᠠᠨ ᠪᠠᠢᠨᠠ ᠭᠡᠳ ᠰᠢᠷᠴᠢᠨ᠂ ᠷᠠᠳᠢᠣ᠋ ᠪᠠᠷ ᠲᠤᠭᠤᠯᠤᠭᠰᠠᠨ ᠢ᠋ ᠬᠡᠯᠡᠵᠦ ᠥᠭᠭᠦᠯᠡ᠃
— ᠮᠠᠷᠱᠠᠯ ᠤ᠋ᠨ ᠲᠡᠷᠡ ᠤᠷᠢᠶᠠ ᠨᠢ ᠲᠦᠮᠡᠨ ᠵᠥᠪ ᠠ᠋᠂ ᠪᠢᠳᠡ ᠪᠦᠬᠦᠨ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠤᠰᠠᠯᠠᠬᠤ ᠶᠣᠰᠣᠲᠠᠢ᠃ ᠶᠡᠬᠡ ᠰᠲ᠋ᠠᠯᠢᠨ ᠤ᠋ ᠬᠠᠢᠷᠠ ᠬᠠᠯᠠᠮᠵᠢ᠂ ᠭᠡᠭᠡᠨ ᠵᠠᠰᠠᠭ ᠤ᠋ᠨ ᠠᠴᠢ ᠪᠠᠷ ᠪᠢᠳᠡ ᠡᠯᠪᠡᠭ ᠳᠡᠯᠪᠡᠭ ᠠᠵᠤ ᠲᠥᠷᠥᠵᠦ᠂ ᠮᠠᠯ ᠰᠦᠷᠦᠭ ᠲᠠᠷᠭᠤᠨ᠂ ᠵᠥᠪᠯᠡᠯᠲᠦ ᠶ᠋ᠢᠨ ᠢ᠋ᠶ᠋ᠡᠨ ᠠᠷᠠᠳ ᠲᠦᠮᠡᠨ ᠳ᠋ᠦ᠍ ᠲᠤᠰᠠᠯᠠᠬᠤ ᠴᠢᠳᠠᠯ ᠲᠠᠢ ᠲᠡᠩᠬᠡᠭᠡ ᠲᠡᠢ ᠪᠠᠢᠨᠠ᠃ ᠰᠲ᠋ᠠᠯᠢᠨ ᠪᠠᠭᠰᠢ ᠳ᠋ᠤ᠌ ᠣᠳᠣ ᠠᠮᠤᠷ ᠦᠭᠡᠢ ᠶᠡᠬᠡ ᠠᠵᠢᠯ ᠨᠡᠮᠡᠭᠳᠡᠵᠦ ᠳᠡ᠃ ᠯᠠᠭᠱᠠᠨ ᠨᠢ ᠲᠤᠩᠭᠠᠯᠠᠭ᠂ ᠭᠡᠭᠡᠨ ᠰᠡᠴᠡᠨ ᠤᠬᠠᠭᠠᠨ ᠨᠢ ᠰᠠᠷᠠᠭᠤᠯ ᠪᠣᠯᠲᠤᠭᠠᠢ! ᠪᠢᠳᠡ᠂ ᠬᠡᠳᠦᠢ ᠲᠦᠮᠡᠨ ᠦ᠌ ᠭᠠᠵᠠᠷ ᠬᠣᠯᠠ ᠪᠠᠢᠭᠠ ᠪᠣᠯᠪᠠᠴᠤ᠂ ᠡᠨᠡ ᠲᠡᠢᠨ ᠪᠣᠯ ᠳᠠᠶᠠᠩ ᠳᠡᠭᠡᠷᠡ ᠪᠣᠯᠵᠤ ᠪᠠᠢᠭᠠ ᠲᠡᠢᠨ ᠭᠡᠵᠦ ᠡᠮᠡᠭᠡᠨ ᠦ᠌ ᠬᠡᠯᠡᠲᠡᠯᠡ᠂ ᠪᠡᠷᠢᠶᠡᠳ ᠠᠴᠢ ᠨᠠᠷ ᠨᠢ ᠡᠮᠡᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠴᠤᠭᠯᠠᠭᠠᠳ᠂ ᠰᠠᠨᠠᠮᠰᠠᠷ ᠦᠭᠡᠢ ᠲᠡᠷᠡ ᠮᠡᠳᠡᠭᠡ ᠶ᠋ᠢ ᠰᠣᠴᠢᠨ ᠰᠣᠨᠣᠰᠴᠠᠭᠠᠪᠠ᠃
ᠤᠯᠠᠭᠠᠨ ᠴᠡᠷᠢᠭ ᠲᠦ᠍ ᠪᠠᠢᠳᠠᠭ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠤᠰᠠᠯᠠᠬᠤ ᠭᠡᠵᠦ ᠠᠵᠢᠯ ᠢ᠋ᠶ᠋ᠠᠨ ᠤᠯᠠᠮ ᠰᠠᠢᠨ ᠬᠢᠬᠦ ᠴᠠᠭ ᠪᠣᠯᠤᠯᠠ᠃ ᠵᠠ᠂ ᠴᠢ ᠶᠠᠪᠤ ᠳᠠ᠂ ᠣᠷᠣᠢ ᠪᠣᠯᠴᠢᠬᠠᠬᠤ ᠨᠢ᠂ ᠭᠡᠷ ᠲᠡᠭᠡᠨ( ᠲᠤ ᠪᠡᠨ) ᠬᠠᠷᠢᠲᠠᠯᠠ ᠴᠢᠨᠢ ᠭᠡᠵᠦ ᠡᠮᠡᠭᠡᠨ ᠳᠤᠤᠭᠠᠷᠲᠠᠯᠠ᠂ ᠪᠡᠷᠢᠶᠡᠳ ᠠᠴᠢ ᠨᠠᠷ ᠨᠢ ᠲᠡᠢᠨ ᠪᠣᠯᠤᠭᠰᠠᠨ ᠲᠡᠷᠡ ᠰᠠᠨᠠᠮᠰᠠᠷ ᠦᠭᠡᠢ ᠮᠡᠳᠡᠭᠡ ᠶ᠋ᠢ ᠴᠣᠴᠢᠷᠳᠠᠨ ᠰᠣᠨᠣᠰᠴᠤ᠂ ᠡᠮᠡᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠣᠪᠣᠭᠠᠷᠠᠯᠳᠤᠵᠠᠢ᠃
ᠰᠢᠷᠴᠢᠨ ᠮᠣᠷᠢ ᠪᠠᠨ ᠠᠯᠬᠤᠭᠤᠯᠵᠤ᠂ ᠡᠮᠡᠭᠡᠨ ᠦ᠌ ᠬᠢ ᠡᠴᠡ ᠪᠠᠬᠠᠨ ᠬᠣᠯᠠᠳᠠᠮᠠᠭᠴᠠ ᠥᠨᠳᠡᠢᠨ ᠪᠣᠰᠴᠤ ᠬᠠᠲᠠᠷᠢᠭᠤᠯᠪᠠ᠃ ᠲᠡᠷᠡ ᠵᠠᠪᠰᠠᠷ ᠨᠠᠷᠠ ᠨᠢᠭᠡᠨᠲᠡ ᠥᠷᠥᠨᠡ ᠵᠦᠭ ᠬᠥᠬᠡᠷᠡᠨ ᠬᠠᠷᠠᠭᠳᠠᠭᠴᠢ ᠠᠭᠤᠯᠠᠰ ᠤ᠋ᠨ ᠴᠠᠭᠠᠨᠠ ᠣᠷᠣᠭᠠᠳ ᠪᠦᠷᠦᠩᠬᠦᠢ ᠪᠣᠯᠵᠤ᠂ ᠥᠷᠭᠡᠨ ᠲᠠᠯᠠ ᠬᠠᠷᠠᠯᠠᠨ᠂ ᠬᠣᠩᠬᠣᠷ ᠬᠣᠲᠣᠭᠣᠷ ᠭᠠᠵᠠᠷ ᠲᠦᠨᠡᠷᠲᠦᠨ ᠬᠠᠷᠠᠭᠳᠠᠵᠤ᠂ ᠰᠡᠮᠡᠵᠡᠨ ᠴᠠᠭᠠᠨ ᠡᠭᠦᠯᠡ ᠳᠣᠣᠷᠠ ᠠ᠋ᠴᠠ ᠪᠠᠨ ᠤᠯᠠᠪᠤᠷ ᠶᠠᠭᠠᠨ ᠳᠡᠭᠡᠷᠡ ᠡᠴᠡ ᠪᠡᠨ ᠬᠥᠬᠡ ᠶᠠᠭᠠᠨ ᠲᠤᠶᠠᠭᠠ ᠲᠠᠲᠠᠵᠠᠢ᠃ ᠴᠢᠮᠡᠭᠡ ᠦᠭᠡᠢ ᠨᠠᠮ ᠭᠦᠮ ᠲᠠᠯᠠ ᠭᠠᠵᠠᠷ ᠡᠨᠳᠡ ᠲᠡᠨᠳᠡ ᠣᠭᠣᠲᠣᠨᠠ ᠴᠠᠰ ᠴᠠᠰ ᠳᠤᠤᠭᠠᠷᠴᠤ᠂ ᠮᠣᠷᠢᠲᠠᠢ ᠬᠥᠮᠦᠨ ᠠᠢᠰᠤᠢ ᠶ᠋ᠢ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠮᠡᠳᠡᠭᠳᠡᠨ ᠠᠪᠠᠢ᠃ ᠡᠪᠡᠰᠦ ᠨᠣᠭᠣᠭᠠ ᠶ᠋ᠢᠨ ᠰᠠᠢᠬᠠᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠠᠭᠠᠷ ᠤ᠋ᠨ ᠬᠠᠭᠤᠷᠠᠢ ᠬᠡᠢ ᠰᠡᠷᠢᠭᠦᠦ ᠲᠠᠲᠠᠵᠤ᠂ ᠬᠠᠷᠠ ᠬᠥᠬᠡ ᠣᠭᠲᠠᠷᠭᠤᠢ ᠳ᠋ᠤ᠌ ᠣᠳᠣᠨ ᠵᠢᠷᠠᠪ ᠵᠠᠷᠠᠪ ᠬᠢᠵᠡᠢ᠃ ᠪᠦᠷᠦᠩᠬᠦᠢ ᠪᠡᠷ ᠭᠡᠷ ᠲᠡᠭᠡᠨ( ᠲᠤ ᠪᠡᠨ) ᠣᠢᠷᠠᠳᠲᠠᠯᠠ ᠨᠢ ᠯᠡ ᠪᠠᠷᠢᠭᠰᠠᠨ ᠭᠡᠷᠡᠯ ᠬᠠᠶᠠᠭᠠ ᠪᠠᠷ ᠨᠢ ᠦᠵᠡᠭᠳᠡᠯᠡ᠃ ᠰᠣᠯᠣᠩᠭᠠ ᠮᠡᠲᠦ ᠰᠣᠨᠣᠷ ᠴᠡᠷᠡᠨ᠂ ᠮᠣᠷᠢᠨ ᠤ᠋ ᠲᠦᠪᠦᠷᠭᠡᠨ ᠢ᠋ᠶ᠋ᠡᠷ ᠪᠣᠰᠴᠤ᠂ ᠯᠠ ᠪᠠᠷᠢᠭᠰᠠᠨ ᠪᠠᠢᠵᠠᠢ᠃
ᠬᠣᠭᠤᠯᠠ ᠪᠠᠨ ᠢᠳᠡᠬᠦ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠰᠢᠷᠴᠢᠨ᠂ ᠲᠡᠢᠨ ᠪᠣᠯᠵᠤ᠂ ᠾᠢᠲ᠋ᠯᠸᠷ ᠦ᠋ᠨ ᠭᠧᠷᠮᠠᠨ᠂ ᠬᠣᠯᠪᠣᠭᠠᠲᠤ ᠤᠯᠤᠰ ᠲᠤ᠌ ᠵᠦᠢ ᠪᠤᠰᠤ ᠪᠠᠷ ᠬᠠᠯᠳᠠᠨ ᠪᠠᠢᠯᠳᠤᠭᠰᠠᠨ ᠢ᠋ ᠶᠠᠷᠢᠵᠤ᠂ ᠴᠡᠷᠡᠨ ᠰᠡᠳᠬᠢᠯ ᠳᠣᠭᠳᠣᠯᠤᠨ ᠬᠥᠳᠡᠯᠵᠦ᠂ ᠤᠯᠠᠭᠠᠨ ᠴᠡᠷᠢᠭ ᠲᠦ᠍ ᠲᠤᠰᠠᠯᠠᠵᠤ᠂ ᠦᠨᠡ ᠲᠡᠢ ᠴᠠᠨᠠ ᠲᠠᠢ ᠶᠠᠭᠤᠮᠠ ᠠ᠋ᠴᠠ ᠪᠠᠨ ᠥᠭᠭᠦᠶᠡ᠃ ᠦᠰᠦᠨ ᠦ᠌ ᠪᠡᠨ ᠮᠥᠩᠭᠥᠨ ᠬᠡᠷᠡᠭᠯᠡᠯ ᠴᠢᠮᠡᠭ᠂ ᠠᠯᠲᠠᠨ ᠠᠶᠠᠭᠠ᠂ ᠠᠷᠪᠠᠨ ᠮᠥᠩᠭᠥᠨ ᠶᠤᠸᠠᠨᠱ᠍ᠬᠠᠢᠲᠤ᠂ ᠯᠸᠨᠢᠨᠮᠡ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠭᠡᠵᠦ ᠬᠠᠳᠠᠭᠠᠯᠠᠵᠤ ᠪᠠᠢᠭᠰᠠᠨ ᠠᠯᠲᠠᠨ ᠪᠦᠯᠡᠵᠡᠭ ᠪᠡᠯᠡᠭ ᠪᠣᠯᠭᠠᠨ ᠥᠭᠪᠡᠯ ᠶᠠᠭᠠᠬᠢᠨᠠ᠂ ᠪᠢᠳᠡ ᠪᠦᠭᠦᠳᠡ ᠶ᠋ᠢᠨ ᠡᠮᠦᠨᠡ ᠡᠴᠡ? ᠪᠠᠰᠠ ᠬᠠᠯᠠᠭᠤᠨ ᠬᠣᠰᠢᠭᠤᠲᠤ ᠮᠠᠯ ᠠ᠋ᠴᠠ ᠪᠠᠨ ᠪᠡᠯᠡᠭᠯᠡᠭᠦᠰᠢᠲᠡᠢ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠴᠢᠨᠦ ᠡᠨᠡ ᠦᠭᠡ ᠮᠢᠨᠦ ᠰᠠᠨᠠᠭᠠ ᠲᠠᠢ ᠶᠠᠪ ᠴᠠᠪ ᠨᠡᠢᠯᠡᠯᠴᠡᠭᠰᠡᠨ ᠳ᠋ᠦ᠍ ᠪᠢ ᠶᠡᠬᠡᠯᠡ(ᠶᠡᠬᠡ ᠯᠡ) ᠪᠠᠶᠠᠷᠯᠠᠵᠤ ᠪᠠᠢᠨᠠ᠃ ᠴᠢᠮᠠᠶ᠋ᠢ(ᠴᠢᠮᠠ ᠶ᠋ᠢ) ᠡᠢᠮᠦ ᠯᠡ ᠰᠠᠢᠬᠠᠨ ᠦᠭᠡ ᠬᠡᠯᠡᠬᠦ ᠪᠠᠢᠬᠤ ᠭᠡᠵᠦ ᠪᠢ ᠪᠣᠳᠣᠵᠤ ᠪᠠᠢᠭᠰᠠᠨ ᠶᠣᠮᠠ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠴᠡᠷᠡᠨ᠂
— ᠪᠢ ᠴᠦ᠍ ᠭᠡᠰᠡᠨ᠂ ᠬᠡᠨ ᠴᠦ᠍ ᠭᠡᠰᠡᠨ᠂ ᠲᠡᠭᠡᠵᠦ ᠬᠡᠯᠡᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ? ᠨᠠᠭᠤᠷ ᠠᠮᠤᠷ ᠪᠣᠯ ᠨᠤᠭᠤᠰᠤ ᠠᠮᠤᠷ ᠭᠡᠳᠡᠭ ᠰᠢᠦ ᠳᠡ᠃ ᠪᠢᠳᠡ ᠬᠣᠯᠪᠣᠭᠠᠲᠤ ᠶᠡᠬᠡ ᠤᠯᠤᠰ ᠤ᠋ᠨ ᠥᠨᠳᠥᠷ ᠶᠡᠬᠡ ᠵᠠᠶᠠᠭᠠ᠂ ᠥᠷᠭᠡᠨ ᠶᠡᠬᠡ ᠰᠤᠭᠤᠨ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠲᠦᠰᠢᠭᠰᠡᠨ ᠤᠯᠤᠰ᠂ ᠵᠣᠪᠠᠯᠠᠩ ᠵᠢᠷᠭᠠᠯ ᠬᠠᠮᠲᠤ ᠪᠠᠢᠬᠤ ᠨᠢ ᠲᠦᠮᠡᠨ ᠵᠦᠢ ᠭᠡᠵᠦ ᠪᠢᠯᠡ᠃
ᠵᠥᠪᠯᠡᠯᠲᠦ ᠶ᠋ᠢᠨ ᠴᠡᠷᠢᠭ ᠲᠦ᠍ ᠲᠤᠰᠠᠯᠠᠬᠤ ᠤᠯᠤᠰ ᠨᠡᠢᠭᠡᠮ ᠦ᠋ᠨ ᠶᠡᠬᠡ ᠬᠥᠳᠡᠯᠭᠡᠭᠡᠨ ᠳᠠᠶᠠᠭᠠᠷ ᠲᠤ᠌ ᠥᠷᠨᠢᠵᠦ᠂ ᠤᠯᠠᠭᠠᠨ ᠴᠡᠷᠢᠭ ᠦ᠋ᠨ ᠡᠷᠡᠴᠦᠳ ᠲᠦ᠍ ᠳᠤᠯᠠᠭᠠᠨ ᠴᠠᠮᠴᠠ᠂ ᠣᠢᠮᠣᠰᠤ ᠰᠦᠯᠵᠢᠵᠦ ᠰᠤᠷᠬᠤ ᠭᠡᠵᠦ ᠥᠴᠢᠨᠡᠨ ᠲᠥᠴᠢᠨᠡᠨ ᠡᠮᠡᠭᠲᠡᠢᠴᠦᠳ ᠰᠦᠯᠵᠢᠮᠡᠯ ᠦ᠋ᠨ ᠳᠤᠭᠤᠢᠯᠠᠩ ᠳ᠋ᠤ᠌ ᠣᠷᠣᠵᠠᠭᠠᠵᠤ ᠪᠢᠯᠡ᠃ ᠨᠠᠮᠤᠷ ᠠᠬᠠᠷ ᠤ᠋ᠨ ᠨᠣᠣᠰᠣ ᠬᠢᠷᠭᠠᠬᠤ ᠳ᠋ᠤ᠌ ᠠᠷᠠᠳ ᠤ᠋ᠳ ᠤᠳᠤᠷᠢᠳᠤᠭᠴᠢ ᠪᠠᠭᠰᠢ ᠮᠠᠷᠱᠠᠯ ᠴᠣᠢᠪᠠᠯᠰᠠᠩ ᠤ᠋ᠨ ᠢ᠋ᠶ᠋ᠠᠨ ᠰᠤᠷᠭᠠᠯ ᠢ᠋ ᠴᠢᠩᠳᠠᠯᠠᠨ ᠳᠠᠭᠠᠵᠤ᠂ ᠨᠢᠭᠡᠴᠦ ᠴᠢᠮᠬᠢ ᠤᠩᠭᠠᠰᠤ ᠦᠷᠡᠭᠳᠡᠭᠦᠯᠬᠦ ᠦᠭᠡᠢ ᠲᠡᠭᠦᠵᠦ᠂ ᠹᠷᠣᠨᠲ ᠲᠤ᠌ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠤᠰᠠᠯᠠᠬᠤ᠂ ᠤᠯᠠᠭᠠᠨ ᠴᠡᠷᠢᠭ ᠦ᠋ᠨ ᠢᠯᠠᠬᠤ ᠳ᠋ᠤ᠌ ᠬᠠᠮᠤᠭ ᠢ᠋ᠶ᠋ᠠᠨ ᠵᠣᠷᠢᠭᠤᠯᠬᠤ᠂ ᠤᠩᠭᠠᠰᠤ ᠨᠣᠣᠰᠣ ᠪᠠᠨ ᠦᠷᠡᠭᠳᠡᠭᠦᠯᠦᠯ ᠦᠭᠡᠢ ᠵᠢᠷᠭᠠᠵᠤ ᠤᠯᠤᠰ ᠲᠠᠭᠠᠨ( ᠲᠤ ᠪᠠᠨ) ᠲᠤᠰᠢᠶᠠᠬᠤ ᠭᠡᠵᠦ ᠪᠦᠭᠦᠳᠡᠭᠡᠷ ᠮᠡᠷᠡᠢᠵᠡᠢ᠃ ᠠᠷᠢᠭᠤᠨ ᠰᠡᠳᠬᠢᠯᠲᠦ ᠠᠷᠠᠳ ᠲᠦᠮᠡᠨ ᠮᠠᠨᠢ ᠹᠷᠣᠨᠲ ᠢ᠋ ᠡᠷᠬᠢᠮ ᠪᠣᠯᠭᠠᠵᠤ᠂ ᠲᠦᠮᠡᠨ ᠤᠯᠤᠰ ᠤ᠋ᠨ ᠡᠩᠬᠡ ᠵᠢᠷᠭᠠᠯ ᠢ᠋᠂ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠬᠡᠳᠦ ᠶ᠋ᠢᠨ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠪᠤᠷᠤᠩᠬᠤᠢ ᠹᠠᠱ᠌ᠢᠰᠲ《ᠰᠢᠨᠡ ᠳᠢᠭᠯᠢᠮ ᠦ᠋ᠨ》 ᠠᠶᠤᠯ ᠵᠣᠪᠠᠯᠠᠩ ᠠ᠋ᠴᠠ ᠬᠠᠮᠠᠭᠠᠯᠠᠵᠤ᠂ ᠠᠤᠭᠠ ᠶᠡᠬᠡ ᠲᠤᠯᠤᠯᠳᠤᠭᠠᠨ ᠤ᠋ ᠭᠠᠵᠠᠷ ᠠᠶᠤᠯᠲᠤ ᠳᠠᠢᠰᠤᠨ ᠲᠠᠢ ᠦᠵᠡᠯᠴᠡᠵᠦ ᠪᠠᠢᠭᠠ ᠵᠥᠪᠯᠡᠯᠲᠦ ᠶ᠋ᠢᠨ ᠤᠯᠠᠭᠠᠨ ᠴᠡᠷᠢᠭ ᠢ᠋ ᠭᠡᠭᠡᠨ ᠡᠳᠦᠷ ᠴᠡᠭᠡᠵᠢᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠬᠠᠷᠠᠩᠭᠤᠢ ᠰᠥᠨᠢ ᠵᠡᠭᠦᠳᠦᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠪᠣᠳᠣᠵᠤ ᠪᠠᠢᠯᠠ᠃ ᠠᠮᠢᠲᠠᠨ᠂ ᠵᠥᠪᠯᠡᠯᠲᠦ ᠶ᠋ᠢᠨ ᠶᠡᠷᠦᠩᠬᠡᠢ ᠺᠣᠮᠠᠨᠲᠠᠯᠠᠯ ᠤ᠋ᠨ ᠰᠢᠭᠤᠷᠬᠠᠢ ᠮᠡᠳᠡᠭᠡ ᠶ᠋ᠢ ᠡᠳᠦᠷ ᠪᠦᠷᠢ ᠰᠤᠷᠠᠭᠯᠠᠨ ᠴᠢᠬᠢ ᠲᠠᠯᠪᠢᠵᠤ᠂ ᠮᠠᠯᠴᠢᠨ ᠪᠦᠷᠢ᠂ ᠵᠥᠪᠯᠡᠯᠲᠦ ᠶ᠋ᠢᠨ ᠠᠷᠠᠳ ᠲᠦᠮᠡᠨ᠂ ᠲᠡᠭᠦᠨ ᠦ᠌ ᠪᠠᠭᠠᠲᠤᠷ ᠴᠡᠷᠢᠭ ᠨᠢ ᠰᠢᠳᠤᠷᠭᠤ ᠵᠢᠷᠤᠮ᠂ ᠡᠨᠡᠷᠢᠩᠭᠦᠢ ᠶ᠋ᠢᠨ ᠡᠷᠬᠢᠮ ᠶᠣᠰᠣ᠂ ᠬᠥᠮᠦᠨ ᠦ᠌ ᠡᠷᠬᠢᠮ ᠳᠡᠭᠡᠳᠦ ᠵᠦᠢ᠂ ᠤᠯᠤᠰ ᠲᠦᠮᠡᠨ ᠦ᠌ ᠡᠩᠬᠡ ᠰᠣᠶᠣᠯ᠂ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠡᠷᠬᠡ ᠴᠢᠯᠥᠭᠡᠲᠡᠢ ᠲᠤᠰᠠᠭᠠᠷ ᠲᠣᠭᠲᠠᠨᠢᠭᠰᠠᠨ ᠪᠠᠢᠳᠠᠯ ᠢ᠋ ᠬᠠᠮᠠᠭᠠᠯᠠᠨ ᠲᠤᠯᠵᠤ ᠪᠠᠢᠭᠠ ᠶᠤᠮ ᠭᠡᠵᠦ ᠠᠨᠳᠤᠬᠤ ᠦᠭᠡᠢ ᠪᠠᠢᠯᠠ᠃ ᠲᠡᠢᠨ ᠦ᠌ ᠭᠠᠵᠠᠷ ᠤ᠋ᠨ ᠮᠡᠳᠡᠭᠡ ᠰᠣᠨᠣᠰᠬᠤ ᠭᠡᠵᠦ ᠥᠷᠲᠡᠭᠡ ᠭᠠᠵᠠᠷ ᠠ᠋ᠴᠠ ᠴᠤ᠌ ᠭᠡᠰᠡᠨ ᠤᠯᠤᠰ ᠠᠮᠢᠲᠠᠨ ᠤᠲᠠᠰᠤᠨ ᠤ᠋ ᠭᠠᠵᠠᠷ ᠬᠦᠷᠴᠦ ᠢᠷᠡᠳᠡᠭ ᠪᠠᠢᠵᠠᠢ᠃ ᠰᠣᠨᠢᠨ ᠪᠢᠴᠢᠭ᠂ ᠠᠭᠠᠷ ᠤ᠋ᠨ ᠬᠡᠢ ᠶ᠋ᠢᠨ ᠠᠳᠠᠯᠢ ᠴᠢᠬᠤᠯᠠ ᠪᠣᠯᠵᠤ᠂ ᠵᠥᠪᠯᠡᠯᠲᠦ ᠶ᠋ᠢᠨ ᠮᠡᠳᠡᠭᠡᠯᠡᠬᠦ ᠲᠣᠪᠴᠢᠶᠠᠨ ᠤ᠋ ᠮᠡᠳᠡᠭᠡ᠂ ᠤᠯᠠᠭᠠᠨ ᠴᠡᠷᠢᠭ ᠦ᠋ᠨ ᠪᠠᠭᠠᠲᠤᠷ ᠡᠷᠡᠰ ᠦ᠋ᠨ ᠡᠷᠡᠮᠡᠬᠡᠢ ᠲᠤᠯᠤᠯᠳᠤᠭᠠᠨ ᠤ᠋ ᠮᠡᠳᠡᠭᠡ ᠶ᠋ᠢ ᠴᠠᠭᠠᠰᠤ ᠶ᠋ᠢ ᠨᠢ ᠴᠤᠭᠤᠷᠳᠠᠯᠠ ᠣᠯᠠᠨ ᠭᠠᠷ ᠳᠡᠮᠵᠢᠵᠦ ᠦᠵᠡᠳᠡᠭ ᠪᠠᠢᠯᠠ᠃
ᠨᠠᠮᠤᠷ᠂ ᠤᠯᠤᠰ ᠳᠠᠶᠠᠭᠠᠷ ᠲᠤ᠌ ᠮᠠᠯᠴᠢᠨ ᠤ᠋ ᠬᠤᠷᠠᠯ ᠪᠠᠭ ᠰᠤᠮᠤ ᠪᠦᠬᠦᠨ ᠳ᠋ᠦ᠍ ᠪᠣᠯᠵᠤ᠂ ᠠᠷᠠᠳ ᠤ᠋ᠳ ᠬᠡᠨ ᠢ᠋ ᠪᠡᠨ ᠪᠠᠭ᠂ ᠰᠤᠮᠤ᠂ ᠠᠢᠮᠠᠭ ᠤ᠋ᠨ ᠰᠠᠢᠨ ᠮᠠᠯᠴᠢᠨ ᠭᠡᠵᠦ ᠦᠵᠡᠬᠦ ᠶ᠋ᠢ ᠶᠡᠬᠡᠯᠡ(ᠶᠡᠬᠡ ᠯᠡ) ᠨᠢᠮᠪᠠᠢᠯᠠᠨ ᠬᠡᠯᠡᠯᠴᠡᠯᠡ᠃
ᠰᠢᠷᠴᠢᠨ ᠦ᠌ ᠪᠠᠭ ᠤ᠋ᠨ ᠬᠢᠨ ᠵᠡᠭᠦᠨ ᠡᠮᠡᠭᠡᠨ ᠦ᠌ ᠲᠡᠨᠳᠡ ᠬᠤᠷᠠᠯᠳᠤᠵᠤ᠂ ᠴᠡᠯᠮᠡᠭ ᠰᠠᠢᠬᠠᠨ ᠡᠳᠦᠷ ᠭᠠᠳᠠᠭᠠ ᠳᠤᠭᠤᠢᠯᠠᠨ ᠳᠡᠪᠢᠰᠦᠭᠰᠡᠨ ᠢᠰᠡᠭᠡᠢ ᠳᠡᠭᠡᠷᠡ ᠲᠣᠭᠣᠷᠢᠨ ᠰᠠᠭᠤᠵᠠᠭᠠᠵᠤ᠂ ᠬᠣᠢᠮᠣᠷ ᠲᠠᠯᠠ ᠳ᠋ᠤ᠌ ᠪᠠᠭ ᠤ᠋ᠨ ᠳᠠᠷᠤᠭᠠ ᠡᠪᠦᠭᠡᠨ ᠰᠢᠷᠠᠪ᠂ ᠡᠪᠦᠭᠡᠨ ᠫᠠᠷᠲ᠋ᠢᠽᠠᠨ ᠰᠠᠮᠪᠤᠤ ᠬᠣᠶᠠᠷ ᠰᠡᠢᠯᠦᠮᠡᠯ ᠪᠢᠴᠢᠬᠠᠨ ᠰᠢᠷᠡᠭᠡᠨ ᠦ᠌ ᠡᠮᠦᠨᠡ ᠰᠠᠭᠤᠭᠠᠳ᠂ ᠰᠠᠮᠪᠤᠤ ᠡᠪᠦᠭᠡᠨ ᠦ᠌ ᠤᠷᠲᠤ ᠭᠡᠭᠴᠢ ᠶ᠋ᠢᠨ ᠰᠡᠷᠪᠡᠢᠭᠰᠡᠨ ᠰᠠᠬᠠᠯ᠂ ᠥᠳᠬᠡᠨ ᠬᠥᠮᠥᠰᠬᠡ᠂ ᠪᠣᠭᠣᠨᠢᠬᠠᠨ ᠪᠤᠭᠤᠷᠤᠯ ᠦᠰᠦ ᠨᠢ ᠰᠠᠢᠬᠠᠨ ᠴᠢᠷᠠᠢᠲᠤ ᠡᠪᠦᠭᠡᠨ ᠦ᠌ ᠬᠦᠷᠡᠩ ᠤᠯᠠᠭᠠᠨ ᠴᠢᠷᠠᠢ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠤᠯᠠᠮ ᠴᠤ᠌ ᠭᠢᠯᠠᠯᠵᠠᠭᠰᠠᠨ ᠴᠠᠭᠠᠨ ᠪᠤᠭᠤᠷᠤᠯ ᠮᠡᠲᠦ ᠦᠵᠡᠭᠳᠡᠬᠦ ᠠᠵᠢ᠃ ᠵᠡᠭᠦᠨ ᠲᠠᠯᠠ ᠪᠠᠷ ᠡᠮᠡᠭᠲᠡᠢᠴᠦᠳ᠂ ᠪᠠᠷᠠᠭᠤᠨ ᠢ᠋ᠶ᠋ᠠᠷ ᠡᠷᠡᠭᠲᠡᠢᠴᠦᠳ ᠰᠠᠭᠤᠵᠤ᠂ ᠴᠥᠮ ᠪᠡᠶᠡ ᠪᠡᠶᠡ ᠪᠡᠨ ᠰᠠᠢᠨ ᠲᠠᠨᠢᠬᠤ᠂ ᠬᠡᠨ ᠶᠠᠭᠤ ᠬᠢᠵᠦ᠂ ᠶᠠᠮᠠᠷ ᠠᠵᠢᠯ ᠲᠠᠢ ᠪᠠᠢᠳᠠᠭ ᠢ᠋ ᠨᠢᠭᠡᠳ ᠨᠢᠭᠡ ᠦᠭᠡᠢ ᠮᠡᠳᠡᠬᠦ ᠠᠵᠢ᠃ ᠲᠡᠢᠨ ᠬᠡᠮᠡᠭᠴᠢ᠂ ᠬᠥᠮᠦᠨ ᠪᠦᠷᠢ ᠶ᠋ᠢᠨ ᠴᠢᠩ ᠰᠢᠳᠤᠷᠭᠤ ᠶ᠋ᠢᠨ ᠨᠢᠭᠡ ᠶᠣᠰᠣᠨ ᠤ᠋ ᠲᠤᠯᠭᠠᠭᠤᠷᠢ ᠪᠣᠯᠵᠤ᠂ ᠲᠡᠢᠨ ᠦ᠌ ᠲᠡᠷᠡ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠳᠣᠲᠣᠷᠠ ᠤᠯᠤᠰ ᠨᠡᠢᠭᠡᠮ ᠢ᠋ᠶ᠋ᠡᠷ ᠮᠠᠰᠢ ᠥᠭᠡᠷᠡᠳᠡᠵᠦ᠂ ᠦᠵᠡᠯ ᠴᠢᠩ᠂ ᠵᠣᠷᠢᠭ ᠪᠠᠲᠤ᠂ ᠶᠡᠷᠦ᠂ ᠤᠷᠢᠳᠤ ᠠᠩᠵᠠᠭᠠᠷᠠᠯ ᠦᠭᠡᠢ ᠰᠢᠭ ᠥᠩᠭᠡᠷᠡᠳᠡᠭ ᠶᠠᠭᠤᠮᠠ ᠪᠠᠨ ᠶᠡᠬᠡᠯᠡ(ᠶᠡᠬᠡ ᠯᠡ) ᠨᠠᠷᠢᠨ ᠨᠢᠮᠪᠠᠢ ᠦᠵᠡᠬᠦ ᠰᠦᠷᠡᠬᠡᠢ ᠪᠣᠯᠵᠠᠢ᠃ ᠠᠵᠢᠯᠯᠠᠭᠠ ᠬᠠᠢᠩᠭᠤ ᠵᠠᠯᠬᠠᠭᠤ ᠬᠣᠢᠷᠭᠣ ᠡᠲᠡᠭᠡᠳ᠂ ᠮᠠᠯ ᠢ᠋ᠶ᠋ᠠᠨ ᠮᠠᠯᠯᠠᠬᠤ ᠶ᠋ᠢ ᠵᠠᠯᠬᠠᠭᠤᠷᠠᠵᠤ ᠵᠠᠢᠮᠤᠷᠠᠳᠠᠭ ᠮᠠᠯᠴᠢᠨ ᠢ᠋ ᠤᠯᠤᠰ ᠶᠡᠬᠡᠯᠡ( ᠶᠡᠬᠡ ᠯᠡ) ᠰᠢᠭᠦᠮᠵᠢᠯᠡᠵᠡᠢ᠃ ᠭᠡᠪᠡᠴᠦ ᠲᠡᠢᠮᠦ ᠬᠣᠢᠷᠭᠣ ᠮᠠᠭᠤ ᠮᠠᠯᠴᠢᠨ ᠲᠡᠷᠡ ᠪᠠᠭ ᠲᠤ᠌ ᠨᠢᠭᠡ ᠣᠯᠠᠨ ᠦᠭᠡᠢ ᠭᠠᠭᠴᠠ ᠬᠣᠶᠠᠷ ᠤ᠋ᠨ ᠲᠡᠳᠦᠢ ᠪᠠᠢᠭᠰᠠᠨ ᠨᠢ ᠣᠯᠠᠨ ᠤ᠋ ᠰᠢᠭᠦᠮᠵᠢᠯᠡᠯ ᠳ᠋ᠦ᠍ ᠴᠣᠷᠭᠢᠭᠤᠯᠤᠨ ᠲᠥᠭᠡᠨᠡᠭᠦᠯᠵᠦ ᠨᠢᠭᠤᠷ ᠢ᠋ᠶ᠋ᠠᠨ ᠬᠢᠬᠦ ᠭᠠᠵᠠᠷ ᠣᠯᠵᠤ ᠶᠠᠳᠠᠨ ᠪᠠᠢᠯᠠ᠃
ᠪᠠᠭ ᠤ᠋ᠨ ᠳᠠᠷᠤᠭᠠ ᠶ᠋ᠢᠨ ᠢᠯᠡᠳᠬᠡᠯ ᠳ᠋ᠦ᠍ ᠰᠢᠭᠦᠮᠵᠢᠯᠡᠯ ᠲᠠᠯᠪᠢᠬᠤ ᠳ᠋ᠤ᠌᠂ ᠵᠡᠭᠦᠨ ᠡᠮᠡᠭᠡᠨ ᠬᠠᠮᠤᠭ ᠤ᠋ᠨ ᠲᠡᠷᠢᠭᠦᠨ ᠳ᠋ᠦ᠍ ᠦᠭᠡ ᠬᠡᠯᠡᠬᠦ ᠵᠥᠪᠰᠢᠶᠡᠷᠡᠯ ᠠᠪᠴᠤ᠂ ᠲᠣᠭᠣᠷᠢᠨ ᠰᠠᠭᠤᠭᠰᠠᠨ ᠣᠯᠠᠨ ᠢ᠋ ᠡᠷᠭᠢᠭᠦᠯᠦᠨ ᠬᠠᠷᠠᠭᠠᠳ᠂ ᠳ᠋ᠤᠢᠩᠬᠤᠷ ᠳᠡᠭᠡᠷᠡ ᠨᠢᠳᠦ ᠪᠡᠨ ᠲᠣᠭᠲᠠᠭᠠᠨ ᠰᠢᠷᠲᠡᠵᠦ᠂
— ᠲᠥᠷᠥ᠂ ᠲᠡᠮᠦᠷ ᠨᠢᠭᠤᠷ ᠲᠠᠢ ᠭᠡᠳᠡᠭ ᠪᠢᠯᠡ᠃ ᠲᠠ ᠪᠦᠭᠦᠳᠡ ᠶ᠋ᠢᠨ ᠬᠠᠯᠠᠭᠤᠨ ᠨᠢᠭᠤᠷ ᠤ᠋ᠨ ᠡᠮᠦᠨᠡ ᠪᠢ ᠳ᠋ᠤᠢᠩᠬᠤᠷ ᠲᠤ᠌ ᠬᠡᠳᠦᠨ ᠭᠠᠰᠢᠭᠤᠨ ᠦᠭᠡ ᠬᠡᠯᠡᠬᠦ ᠰᠠᠨᠠᠭᠠ ᠪᠠᠢᠨᠠ᠃ ᠠᠮᠠ ᠶ᠋ᠢ ᠨᠢ ᠰᠣᠨᠣᠰᠪᠠᠯ᠂ ᠽᠠᠮᠪᠤᠯᠢᠩ ᠳ᠋ᠤ᠌ ᠳ᠋ᠤᠢᠩᠬᠤᠷ ᠰᠢᠭ᠋ ᠭᠠᠯ ᠤᠯᠠᠭᠠᠨ ᠬᠤᠪᠢᠰᠬᠠᠯᠴᠢ ᠪᠠᠢᠮᠠᠷ ᠦᠭᠡᠢ ᠮᠡᠲᠦ᠃ ᠠᠮᠠ ᠠᠵᠢᠯ ᠬᠣᠶᠠᠷ ᠢ᠋ ᠨᠢ ᠠᠵᠢᠭᠯᠠᠨ ᠦᠵᠡᠪᠡᠯ ᠠᠷᠤ ᠪᠠᠷ ᠢ᠋ᠶ᠋ᠠᠨ ᠨᠡᠢᠯᠡᠭᠰᠡᠨ ᠨᠢ ᠠᠮᠢᠲᠠᠨ ᠣᠯᠠᠨ ᠭᠠᠢᠬᠠᠮᠠᠷ᠃ ᠤᠯᠤᠰ ᠲᠠᠭᠠᠨ( ᠲᠤ ᠪᠠᠨ) ᠨᠡᠢᠯᠡᠭᠦᠯᠬᠦ ᠵᠦᠢᠯ ᠢ᠋ ᠭᠦᠢᠴᠡᠭᠡᠭᠰᠡᠨ ᠦᠭᠡᠢ ᠮᠥᠷᠲᠡᠭᠡᠨ ᠮᠠᠯ ᠤ᠋ᠨ ᠫᠠᠨᠽᠠ ᠬᠢᠵᠦ᠂ ᠬᠣᠲᠠ ᠤᠷᠤᠭᠤ ᠮᠠᠯ ᠲᠠᠭᠤᠵᠤ᠂ ᠲᠡᠢᠨ ᠦ᠌ ᠳᠡᠯᠢᠮ ᠢ᠋ᠶ᠋ᠡᠷ ᠣᠯᠠᠨ ᠢ᠋ ᠮᠥᠯᠵᠢᠵᠦ ᠵᠠᠪᠰᠢᠬᠤ ᠭᠡᠵᠦ ᠪᠠᠢᠳᠠᠭ ᠢ᠋ ᠨᠢ ᠬᠠᠷᠠᠪᠠ ᠤᠤ᠂ ᠲᠠ ᠮᠢᠨᠢ! ᠳᠤᠭᠤᠯᠤᠭᠠᠳ ᠪᠠᠢᠪᠠᠯ᠂ ᠠᠮᠢᠲᠠᠨ ᠣᠯᠠᠨ᠂ ᠠᠬᠠ ᠳᠡᠭᠦᠦ ᠲᠠ ᠪᠦᠭᠦᠳᠡ ᠶ᠋ᠢ ᠠᠭᠲᠠ ᠠᠳᠤᠭᠤ ᠪᠠᠨ ᠲᠠᠭᠤᠵᠤ᠂ ᠤᠯᠠᠭᠠᠨ ᠴᠡᠷᠢᠭ ᠲᠦ᠍ ᠠᠭᠲᠠ ᠠᠪᠬᠤ ᠺᠣᠮᠢᠰ ᠲᠤ᠌ ᠦᠵᠡᠭᠦᠯᠵᠦ ᠪᠠᠢᠬᠤ ᠦᠶᠡ ᠪᠡᠷ ᠡᠨᠡ ᠭᠠᠢᠬᠠᠯ ᠳ᠋ᠣᠢᠩᠬᠣᠷ ᠤᠯᠠᠭᠠᠨ ᠴᠡᠷᠢᠭ ᠲᠦ᠍ ᠹᠷᠣᠨᠲ ᠤᠷᠤᠭᠤ ᠮᠣᠷᠢ ᠠ᠋ᠴᠠ ᠪᠠᠨ ᠥᠭᠴᠦ ᠶᠠᠪᠤᠭᠤᠯᠤᠭᠰᠠᠨ ᠠ᠋ᠴᠠ ᠴᠢᠨᠣᠠ ᠳ᠋ᠤ᠌ ᠢᠳᠡᠭᠦᠯᠦᠭᠰᠡᠨ ᠳᠡᠭᠡᠷᠡ ᠭᠡᠵᠦ ᠪᠠᠢᠭᠰᠠᠨ ᠶᠤᠮ ᠭᠡᠨᠡ ᠯᠡ᠃ ᠳ᠋ᠣᠢᠩᠬᠣᠷ ᠴᠢ ᠲᠡᠢᠮᠦ ᠶᠣᠰᠣ ᠪᠤᠰᠤ ᠪᠤᠵᠠᠷ ᠦᠭᠡ ᠬᠡᠯᠡᠵᠦ ᠪᠠᠢᠭᠰᠠᠨ ᠤᠤ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂ ᠳ᠋ᠣᠢᠩᠬᠣᠷ ᠰᠠᠨᠳᠤᠷᠴᠤ ᠨᠢᠭᠤᠷ ᠨᠢ ᠴᠢᠰ ᠤᠯᠠᠭᠠᠨ ᠪᠣᠯᠤᠭᠠᠳ᠂
— ᠠ᠂ ᠪᠢ ᠠᠷᠢᠬᠢᠨ ᠳ᠋ᠤ᠌ ᠰᠣᠭᠲᠣᠭᠠᠳ᠂ ᠲᠡᠭᠡᠭᠡᠳ ᠲᠣᠬᠢᠶᠠᠯᠳᠤᠯ ᠢ᠋ᠶ᠋ᠠᠷ ᠬᠡᠯᠡᠭᠰᠡᠨ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠡᠮᠡᠭᠡ ᠪᠤᠷᠤᠭᠤᠰᠢᠶᠠᠨ᠂
— ᠡᠷᠡᠭᠦᠯ ᠬᠥᠮᠦᠨ ᠦ᠌ ᠴᠡᠭᠡᠵᠢᠨ ᠳ᠋ᠦ᠍ ᠶᠠᠪᠤᠳᠠᠭ ᠶᠠᠭᠤᠮᠠ ᠨᠢ᠂ ᠰᠣᠭᠲᠣᠭᠤ ᠬᠥᠮᠦᠨ ᠦ᠌ ᠠᠮᠠᠨ ᠠ᠋ᠴᠠ ᠭᠠᠷᠳᠠᠭ ᠶᠤᠮ ᠪᠢᠰᠢ ᠤᠤ? ᠡᠨᠡ ᠳ᠋ᠣᠢᠩᠬᠣᠷ᠂ ᠮᠠᠨ ᠤ᠋ ᠪᠦᠬᠦ ᠪᠠᠭ ᠢ᠋ ᠬᠥᠳᠡᠵᠦ ᠪᠠᠢᠭᠠ ᠬᠥᠮᠦᠨ ᠰᠢᠦ᠂ ᠡᠨᠡᠲᠡᠢ(ᠡᠨᠡᠭᠦᠨ ᠦ᠌) ᠬᠠᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠳᠣᠩᠭᠣᠰᠳᠠᠭ ᠠ᠋ᠴᠠ ᠪᠣᠯᠵᠤ᠂ ᠪᠢᠳᠡ ᠨᠡᠷᠡ ᠪᠡᠨ ᠬᠤᠭᠤᠷᠠᠵᠤ ᠪᠠᠢᠬᠤ ᠶᠤᠮ ᠤᠤ᠂ ᠡᠨᠡᠲᠡᠢ(ᠡᠨᠡᠭᠦᠨ ᠦ᠌) ᠵᠣᠷᠢᠭ ᠢ᠋ᠶ᠋ᠠᠷ ᠪᠣᠯᠬᠤ ᠦᠭᠡᠢ᠂ ᠬᠣᠢᠰᠢᠳᠠ ᠪᠢᠳᠡ ᠲᠡᠭᠡᠭᠦᠯᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠵᠦ ᠪᠠᠭ ᠣᠯᠠᠨ ᠢ᠋ᠶ᠋ᠠᠷ ᠴᠤᠭᠯᠠᠭᠰᠠᠨ ᠡᠨᠡ ᠬᠤᠷᠠᠯ ᠴᠤᠭᠯᠠᠭᠠᠨ ᠳᠡᠭᠡᠷᠡ ᠡᠨᠡᠦᠬᠡᠨ ᠳ᠋ᠦ᠍ ᠬᠠᠲᠠᠭᠤᠬᠠᠨ ᠬᠡᠯᠡᠪᠡᠯ ᠶᠠᠭᠠᠬᠢᠨᠠ? ᠪᠢᠳᠡᠨ ᠲᠠᠢ ᠯᠠ ᠰᠠᠨᠠᠭᠠ ᠵᠣᠷᠢᠭ ᠡᠰᠡ ᠨᠡᠢᠯᠡᠪᠡᠯ᠂ ᠪᠢᠳᠡᠨ ᠦ᠌ ᠡᠰᠡᠷᠭᠦ ᠭᠡᠵᠦ ᠪᠢᠳᠡ ᠪᠦᠭᠦᠳᠡᠭᠡᠷ ᠦᠵᠡᠬᠦ ᠳ᠋ᠦ᠍ ᠬᠦᠷᠦᠨᠡ ᠭᠡᠳᠡᠭ ᠢ᠋ᠶ᠋ᠡᠨ ᠡᠷᠡᠰ ᠬᠡᠯᠡᠬᠦ ᠴᠠᠭ ᠪᠣᠯᠤᠭᠰᠠᠨ ᠪᠠᠢᠭᠠ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠡᠪᠦᠭᠡᠨ ᠰᠠᠮᠪᠤᠤ ᠪᠤᠭᠤᠷᠤᠯ ᠰᠠᠬᠠᠯ ᠢ᠋ᠶ᠋ᠠᠨ ᠰᠢᠪᠲᠤᠷᠠᠭᠠᠳ᠂
— ᠲᠣᠭᠲᠠᠭᠠᠯ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠳ᠋ᠣᠢᠩᠬᠣᠷ ᠮᠡᠲᠦ ᠶ᠋ᠢᠨ ᠥᠭᠡᠳᠡ ᠦᠭᠡᠢ ᠬᠣᠢᠷᠭᠣ ᠡᠲᠡᠭᠡᠳ ᠢ᠋ ᠬᠠᠲᠠᠭᠤ ᠰᠠᠨᠠᠭᠤᠯᠤᠨ ᠳᠣᠩᠭᠣᠳᠪᠠᠯ ᠵᠣᠬᠢᠮᠤᠢ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠤᠯᠤᠰ᠂
— ᠵᠦᠢᠲᠡᠢ᠂ ᠵᠦᠢᠲᠡᠢ! ᠲᠡᠭᠡᠭᠡᠳ ᠲᠣᠭᠲᠠᠭᠠᠯ ᠤᠩᠰᠢᠬᠤ ᠦᠶᠡ ᠪᠡᠷ ᠪᠣᠰᠬᠠᠨ᠂ ᠨᠣᠮᠣᠬᠠᠨ ᠵᠣᠭᠰᠣᠭᠠᠵᠤ ᠪᠠᠢᠭᠠᠳ ᠤᠩᠰᠢᠪᠠᠯ ᠵᠣᠬᠢᠬᠤ ᠬᠡᠮᠡᠪᠡᠰᠦ᠂ ᠳ᠋ᠣᠢᠩᠬᠣᠷ ᠥᠨᠳᠡᠢᠰᠬᠢᠵᠦ᠂
— ᠵᠠ! ᠭᠡᠳ ᠪᠣᠰᠬᠤ ᠭᠡᠲᠡᠯᠡ ᠨᠢ᠂
— ᠪᠣᠯᠤᠭᠠ ᠦᠭᠡᠢ᠂ ᠣᠳᠣᠬᠠᠨ ᠳᠡᠭᠡᠷᠡ ᠪᠡᠨ ᠰᠠᠭᠤᠵᠤ ᠪᠠᠢ᠃ ᠲᠣᠭᠲᠠᠭᠠᠯ ᠤᠩᠰᠢᠬᠤ ᠴᠠᠭ ᠡᠳᠦᠢ᠂ ᠬᠠᠷᠢᠨ ᠡᠮᠡᠭᠡ ᠶ᠋ᠢᠨ ᠲᠡᠷᠡ ᠰᠢᠭᠦᠮᠵᠢᠯᠡᠭᠰᠡᠨ ᠦᠭᠡ ᠲᠦᠮᠡᠨ ᠵᠥᠪ ᠦᠭᠡ ᠭᠡᠳᠡᠭ ᠢ᠋ ᠪᠣᠳᠣᠵᠤ ᠰᠠᠭᠤ ᠭᠡᠵᠦ ᠳ᠋ᠣᠢᠩᠬᠣᠷ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠵᠤ ᠪᠠᠢᠭᠰᠠᠨ ᠡᠪᠦᠭᠡᠨ ᠶᠣᠨᠳᠣᠨ ᠬᠡᠯᠡᠵᠦ ᠪᠢᠯᠡ᠃
— ᠪᠢ ᠴᠦ᠍ ᠭᠡᠰᠡᠨ ᠨᠢᠭᠡ ᠦᠭᠡ ᠠᠢᠯᠠᠳᠬᠠᠪᠠᠯ ᠶᠠᠭᠠᠬᠢᠨᠠ ᠭᠡᠵᠦ ᠪᠠᠵᠠᠢ ᠡᠮᠡᠭᠡᠨ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠵᠦ᠂ ᠡᠪᠦᠭᠡᠨ ᠰᠢᠷᠠᠪ ᠳᠠᠷᠤᠭᠠ᠄
— ᠵᠠ ᠭᠡᠵᠦ ᠵᠥᠪᠰᠢᠶᠡᠷᠡᠯ ᠣᠯᠭᠤᠵᠠᠢ᠃ ᠲᠡᠭᠡᠬᠦ ᠳ᠋ᠦ᠍ᠨᠢ ( ᠳ᠋ᠦ᠍ ᠨᠢ)᠂
— ᠦᠷᠡᠲᠦ ᠬᠥᠮᠦᠨ ᠬᠥᠮᠦᠨ ᠦ᠌ ᠦᠷᠡ ᠶ᠋ᠢ ᠪᠦᠦ ᠮᠠᠭᠤ ᠬᠡᠯᠡ ᠭᠡᠳᠡᠭ ᠪᠣᠯᠪᠠᠴᠤ ᠨᠤᠲᠤᠭ ᠤᠰᠤᠨ ᠤ᠋ ᠠᠬᠠ ᠳᠡᠭᠦᠦ ᠰᠠᠳᠤᠨ ᠣᠯᠠᠨ ᠤ᠋ ᠡᠮᠦᠨᠡ ᠮᠠᠨ ᠤ᠋ ᠰᠠᠭᠠᠬᠠᠯᠲᠠ ᠶ᠋ᠢᠨ ᠬᠠᠯᠲᠠᠷ ᠡᠮᠡᠭᠡᠨ ᠦ᠌ ᠬᠦᠦ ᠮᠠᠨᠳᠤᠪᠠᠢ ᠶ᠋ᠢ ᠵᠢᠭᠠᠯᠬᠠᠨ ᠵᠢᠮᠡᠯᠡᠨ ᠳᠣᠩᠭᠣᠳᠤᠮᠠᠷ ᠪᠠᠢᠨᠠ᠃ ᠡᠴᠢᠭᠡ ᠨᠢ ᠳᠠᠯᠠᠢᠭᠠᠳ ᠣᠢ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠬᠦᠷᠦᠭᠡ ᠦᠭᠡᠢ ᠪᠠᠢᠲᠠᠯᠠ᠂ ᠠᠳᠤᠭᠤᠨ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠪᠦᠲᠦᠨ ᠨᠢᠷᠤᠭᠤ ᠲᠠᠢ ᠮᠣᠷᠢ ᠨᠢᠭᠡ ᠴᠦ᠍ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ ᠲᠠ ᠨᠠᠷ ᠦᠵᠡᠪᠡ ᠤᠤ? ᠬᠠᠯᠲᠠᠷ ᠭᠤᠸᠠᠢ ᠤᠯᠠᠭᠠᠨ ᠴᠡᠷᠢᠭ ᠲᠦ᠍ ᠮᠣᠷᠢ ᠪᠡᠯᠡᠭᠯᠡᠬᠦ ᠭᠡᠳ ᠴᠢᠳᠠᠭᠰᠠᠨ ᠦᠭᠡᠢ᠂ ᠨᠢᠷᠤᠭᠤ ᠲᠤᠭᠤᠷᠠᠢ ᠦᠭᠡᠢ ᠠᠳᠤᠭᠤ ᠨᠢ ᠰᠢᠭᠠᠷᠤᠯᠠᠭᠳᠠᠵᠤ ᠪᠢᠯᠡ᠃ ᠨᠠᠮᠤᠷ ᠪᠢᠳᠡᠨ ᠦ᠌ ᠬᠠᠯᠲᠠᠷ ᠭᠤᠸᠠᠢ ᠶ᠋ᠢᠨ ᠬᠣᠨᠢᠨ ᠠ᠋ᠴᠠ ᠬᠢᠷᠭᠠᠯᠴᠠᠵᠤ ᠥᠭᠬᠦ ᠳ᠋ᠦ᠍᠂ ᠮᠠᠨᠳᠤᠪᠠᠢ ᠶᠡᠷᠦ ᠭᠡᠷ ᠲᠡᠭᠡᠨ( ᠲᠤ ᠪᠡᠨ) ᠦᠵᠡᠭᠳᠡᠭᠰᠡᠨ ᠦᠭᠡᠢ ᠠᠯᠠᠭᠠ ᠪᠣᠯᠤᠭᠠᠳ ᠥᠭᠭᠦᠭᠰᠡᠨ ᠮᠥᠷᠲᠡᠭᠡᠨ ᠬᠢᠷᠭᠠᠵᠤ ᠭᠦᠢᠴᠡᠮᠡᠭᠴᠡ ᠬᠦᠷᠴᠦ ᠢᠷᠡᠭᠡᠳ᠂ ᠬᠠᠮᠤᠭ ᠤᠩᠭᠠᠰᠤ ᠶ᠋ᠢ ᠨᠢ ᠬᠠᠮᠤᠵᠤ ᠠᠪᠤᠭᠠᠳ᠂ ᠬᠣᠷᠰᠢᠶᠠᠨ ᠳ᠋ᠤ᠌ ᠲᠤᠰᠢᠶᠠᠵᠤ᠂ ᠮᠥᠩᠭᠥ ᠪᠡᠷ ᠨᠢ ᠠᠷᠢᠬᠢ ᠠᠪᠴᠤ ᠨᠠᠷᠭᠢᠵᠠᠢ᠃ ᠪᠠᠰᠠ ᠲᠤᠭᠤᠯᠪᠠᠯ᠂ ᠡᠬᠡ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠮᠡᠳᠡᠭᠳᠡᠯ ᠦᠭᠡᠢ ᠪᠡᠯᠴᠢᠭᠡᠷ ᠡᠴᠡ ᠬᠣᠨᠢ ᠪᠠᠨ ᠬᠤᠯᠠᠭᠠᠢᠯᠠᠵᠤ᠂ ᠠᠷᠢᠬᠢ᠂ ᠮᠥᠷᠥᠢ ᠲᠡᠢ ᠲᠣᠭᠯᠠᠭᠠᠮ ᠤ᠋ᠨ ᠥᠷᠢ ᠲᠥᠯᠥᠳᠡᠭ ᠪᠣᠯᠵᠤ ᠭᠡᠨᠡ᠃ ᠢᠩᠭᠢᠵᠦ ᠵᠠᠮ ᠢ᠋ᠶ᠋ᠠᠨ ᠠᠯᠳᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂ ᠪᠢᠳᠡ ᠴᠢᠮᠡᠭᠡ ᠦᠭᠡᠢ ᠬᠠᠷᠠᠭᠠᠳ ᠪᠠᠢᠬᠤ ᠨᠢ ᠵᠦᠢ ᠤᠤ? ᠣᠳᠣ ᠠᠷᠢᠬᠢ ᠳᠠᠷᠠᠰᠤ᠂ ᠮᠥᠷᠥᠢ ᠲᠡᠢ ᠲᠣᠭᠯᠠᠭᠠᠮ ᠬᠢᠵᠦ ᠰᠠᠭᠤᠳᠠᠭ ᠴᠠᠭ ᠤᠤ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠤᠯᠤᠰ᠂
— ᠵᠥᠪ ᠦᠭᠡ ᠠ᠋! ᠨᠠᠰᠤ ᠠᠬᠠᠮᠠᠳ ᠬᠥᠮᠦᠨ ᠪᠤᠷᠤᠭᠤ ᠶ᠋ᠢ ᠨᠢ ᠵᠠᠯᠠᠵᠤ ᠰᠤᠷᠭᠠᠨ ᠰᠡᠩᠬᠡᠷᠡᠭᠦᠯᠵᠦ ᠪᠠᠢᠬᠤ ᠳ᠋ᠤ᠌᠂ ᠮᠠᠨᠳᠤᠪᠠᠢ ᠨᠣᠮᠣᠬᠠᠨ ᠵᠣᠭᠰᠣᠵᠤ ᠲᠤᠭᠤᠯᠵᠤ ᠪᠠᠢ! ᠭᠡᠵᠡᠭᠡᠵᠦ ᠮᠠᠨᠳᠤᠪᠠᠢ ᠶ᠋ᠢᠨ ᠴᠢᠷᠠᠢ ᠤᠯᠠᠢᠵᠤ᠂ ᠲᠣᠯᠣᠭᠠᠢ ᠪᠠᠨ ᠪᠥᠬᠥᠢᠯᠭᠡᠨ ᠨᠣᠮᠣᠬᠠᠨ ᠵᠣᠭᠰᠣᠯᠠ᠃ ᠪᠠᠵᠠᠢ ᠡᠮᠡᠭᠡᠨ ᠦᠭᠡ ᠪᠡᠨ ᠦᠷᠭᠦᠯᠵᠢᠯᠡᠵᠦ᠂
— ᠬᠠᠯᠠᠰᠢᠷᠬᠠᠢ᠂ ᠵᠥᠭᠡᠯᠡᠨ ᠰᠡᠳᠬᠢᠯ ᠲᠡᠢ ᠬᠥᠮᠦᠨ ᠲᠡᠭᠡᠭᠡᠳ ᠮᠠᠨᠳᠤᠪᠠᠢ ᠵᠠᠬᠢᠷᠭᠠ ᠪᠠᠨ ᠠᠯᠳᠠᠵᠤ᠂ ᠡᠴᠢᠭᠡ ᠦᠭᠡᠢ ᠬᠥᠮᠦᠨ ᠡᠯᠳᠡᠩ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠭᠡᠭᠴᠢ ᠪᠡᠷ ᠪᠣᠯᠵᠠᠢ᠂ ᠮᠠᠨᠳᠤᠪᠠᠢ ᠶ᠋ᠢ ᠵᠠᠮᠰᠦ᠋ᠷᠦᠩᠵᠠᠪ ᠲᠠᠢᠵᠢ ᠶ᠋ᠢᠨ ᠵᠠᠯᠠᠭᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠨᠠᠷᠭᠢᠵᠤ ᠳᠦᠷᠰᠦ ᠦᠭᠡᠢᠳᠡᠳᠡᠭ ᠰᠢᠭ ᠳᠡᠩᠳᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠪᠢᠳᠡ ᠲᠡᠭᠦᠨ ᠦ᠌ ᠬᠠᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠪᠣᠯᠭᠠᠵᠤ ᠪᠠᠢᠬᠤ ᠨᠢ ᠠᠷᠠᠢ ᠬᠠᠮᠢᠭᠠᠰᠢ ᠪᠠᠨ ᠶᠤᠮ ᠪᠣᠯ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠪᠢ ᠣᠳᠣ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠵᠠᠰᠠᠶᠠ ᠭᠡᠵᠦ ᠮᠠᠨᠳᠤᠪᠠᠢ ᠠᠶᠠᠷᠬᠠᠨ ᠳᠤᠤᠭᠠᠷᠴᠤ ᠪᠢᠯᠡ᠃
— ᠮᠠᠨ ᠤ᠋ ᠪᠠᠭ ᠲᠤ᠌ ᠡᠪᠯᠡᠯ ᠦ᠋ᠨ ᠡᠭᠦᠷ ᠦᠭᠡᠢ ᠪᠣᠯᠪᠠᠴᠤ ᠭᠡᠰᠢᠭᠦᠳ ᠨᠢ ᠪᠣᠢ ᠰᠢᠦ ᠳᠡ᠃ ᠮᠠᠨᠳᠤᠪᠠᠢ ᠶ᠋ᠢ ᠥᠭᠡᠳᠡ ᠨᠢ ᠲᠠᠲᠠᠵᠤ᠂ ᠰᠠᠢᠨ ᠮᠠᠯᠴᠢᠨ ᠪᠣᠯᠬᠤ ᠳ᠋ᠤ᠌ ᠨᠢ ᠡᠪᠯᠡᠯ ᠦ᠋ᠨ ᠭᠡᠰᠢᠭᠦᠳ ᠲᠤᠰᠠᠯᠠᠬᠤ ᠴᠤ᠌ ᠶᠣᠰᠣᠲᠠᠢ ᠪᠠᠢᠨᠠ᠂ ᠲᠤᠰᠠᠯᠠᠬᠤ ᠴᠤ᠌ ᠪᠠᠢᠬᠤ ᠭᠡᠵᠦ ᠪᠢ ᠪᠣᠳᠣᠵᠤ ᠪᠠᠢᠨᠠ᠃
ᠲᠡᠭᠡᠭᠡᠳ ᠮᠠᠨᠳᠤᠪᠠᠢ᠂ ᠬᠡᠳᠦᠢ ᠲᠤᠰᠠ ᠦᠭᠡᠢ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠲᠠᠲᠠᠨᠠ ᠭᠡᠵᠦ ᠪᠠᠢᠭᠠ ᠪᠣᠯᠪᠠᠴᠤ᠂ ᠬᠤᠷᠠᠯ ᠠ᠋ᠴᠠ ᠳᠣᠩᠭᠣᠳᠬᠤ ᠨᠢ ᠵᠦᠢᠲᠡᠢ᠃ ᠡᠴᠢᠭᠡ ᠦᠭᠡᠢ ᠪᠣᠯᠪᠠᠴᠤ ᠨᠤᠲᠤᠭ ᠤᠰᠤᠨ ᠤ᠋ ᠬᠢᠨᠢ ᠠᠬᠠ ᠵᠠᠬᠠ ᠬᠡᠯᠡᠬᠦ ᠬᠣᠷᠢᠬᠤ ᠬᠥᠮᠦᠨ ᠪᠣᠢ ᠶᠤᠮ ᠪᠠᠢᠨᠠ ᠭᠡᠵᠦ ᠮᠡᠳᠡᠭ ᠭᠡᠮᠡᠨ ᠪᠠᠵᠠᠢ ᠶ᠋ᠢᠨ ᠦᠭᠡ ᠪᠡᠨ ᠲᠡᠭᠦᠰᠬᠦ ᠳ᠋ᠦ᠍ ᠡᠪᠦᠭᠡᠨ ᠰᠢᠷᠠᠪ ᠣᠢᠰᠢᠶᠠᠵᠤ᠄
— ᠶᠣᠰᠣᠲᠠᠢ ᠵᠥᠪ ᠦᠭᠡ ᠬᠡᠯᠡᠯᠡ ᠳᠡ᠃ ᠵᠠ᠂ ᠪᠠᠰᠠ ᠦᠭᠡ ᠬᠡᠯᠡᠬᠦ ᠬᠥᠮᠦᠨ ᠪᠠᠢᠨᠠ ᠤᠤ? ᠭᠡᠵᠡᠢ᠃
ᠬᠤᠷᠠᠯ ᠳᠡᠭᠡᠷᠡ ᠪᠠᠰᠠ ᠭᠠᠭᠴᠠ ᠨᠢᠭᠡᠨ ᠬᠥᠮᠦᠨ ᠦᠭᠡ ᠬᠡᠯᠡᠵᠦ᠂ ᠳ᠋ᠣᠢᠩᠬᠣᠷ ᠮᠠᠨᠳᠤᠪᠠᠢ ᠬᠣᠶᠠᠷ ᠤ᠋ᠨ ᠵᠠᠯᠬᠠᠭᠤ ᠬᠣᠢᠷᠭᠣ᠂ ᠥᠭᠡᠳᠡ ᠦᠭᠡᠢ ᠪᠠᠢᠳᠠᠯ ᠢ᠋ ᠰᠢᠭᠦᠮᠵᠢᠯᠡᠵᠦ ᠳᠠᠭᠠᠷᠢ ᠳᠡᠭᠡᠷᠡ ᠨᠢ ᠳᠠᠪᠤᠰᠤ ᠬᠢᠵᠦ ᠨᠡᠯᠢᠶᠡᠳ ᠰᠠᠨᠳᠤᠷᠭᠠᠵᠠᠢ᠃ ᠲᠡᠭᠡᠭᠡᠳ ᠪᠠᠭ ᠤ᠋ᠨ ᠢ᠋ᠶ᠋ᠠᠨ ᠰᠠᠢᠨ ᠮᠠᠯᠴᠢᠨ ᠢ᠋ ᠰᠣᠩᠭᠣᠨ ᠬᠡᠯᠡᠯᠴᠡᠵᠦ ᠨᠡᠷᠡ ᠳᠡᠪᠰᠢᠭᠦᠯᠦᠭᠰᠡᠨ ᠬᠥᠮᠦᠨ ᠪᠦᠭᠦᠳᠡ ᠶ᠋ᠢ ᠶᠡᠬᠡᠯᠡ(ᠶᠡᠬᠡ ᠯᠡ) ᠨᠠᠷᠢᠨ ᠬᠡᠯᠡᠯᠴᠡᠵᠡᠢ᠃ ᠰᠢᠷᠴᠢᠨ ᠴᠡᠷᠡᠨ ᠬᠣᠶᠠᠷ ᠢ᠋ ᠣᠯᠠᠨ ᠴᠥᠮ ᠨᠢᠭᠡᠨ ᠰᠠᠨᠠᠯ ᠢ᠋ᠶ᠋ᠠᠷ ᠪᠠᠭ ᠤ᠋ᠨ ᠲᠡᠷᠢᠭᠦᠨ ᠵᠡᠷᠭᠡ ᠶ᠋ᠢᠨ ᠰᠠᠢᠨ ᠮᠠᠯᠴᠢᠨ ᠭᠡᠵᠦ ᠪᠠᠲᠤᠯᠠᠵᠠᠢ᠃ ᠴᠢᠩᠭᠢᠭᠡᠳ᠂ ᠰᠤᠮᠤ ᠶ᠋ᠢᠨ ᠰᠠᠢᠨ ᠮᠠᠯᠴᠢᠨ ᠤ᠋ ᠬᠤᠷᠠᠯ ᠳ᠋ᠤ᠌ ᠴᠣᠬᠣᠮ ᠬᠡᠨ ᠢ᠋ᠶ᠋ᠡᠨ ᠶᠠᠪᠤᠭᠤᠯᠬᠤ ᠶ᠋ᠢ ᠬᠡᠯᠡᠯᠴᠡᠭᠡᠳ᠂ ᠪᠠᠭ ᠠ᠋ᠴᠠ ᠣᠲᠣᠭᠤᠯᠬᠤ ᠭᠤᠷᠪᠠᠨ ᠲᠥᠯᠥᠭᠡᠯᠡᠭᠴᠢ ᠶ᠋ᠢᠨ ᠨᠢᠭᠡᠨ ᠳ᠋ᠦ᠍ ᠰᠢᠷᠴᠢᠨ ᠢ᠋ ᠰᠣᠩᠭᠣᠵᠠᠢ᠃
ᠡᠪᠦᠭᠡᠨ ᠪᠣᠰᠴᠤ ᠬᠤᠷᠠᠯ ᠤ᠋ᠨ ᠣᠯᠠᠨ ᠳ᠋ᠤ᠌ ᠲᠠᠯᠠ ᠥᠭᠴᠦ᠂ ᠰᠡᠳᠬᠢᠯ ᠬᠥᠳᠡᠯᠦᠨ ᠬᠡᠯᠡᠭᠰᠡᠨ ᠨᠢ᠄
— ᠰᠤᠮᠤᠨ ᠤ᠋ ᠰᠠᠢᠨ ᠮᠠᠯᠴᠢᠨ ᠤ᠋ ᠬᠤᠷᠠᠯ ᠳ᠋ᠤ᠌ ᠨᠠᠮᠠᠶ᠋ᠢ(ᠨᠠᠮᠠ ᠶ᠋ᠢ) ᠶᠠᠪᠤᠭᠤᠯᠬᠤ ᠪᠠᠷ ᠲᠣᠭᠲᠠᠭᠰᠠᠨ ᠳ᠋ᠤ᠌ ᠲᠠᠨᠢ ᠴᠢᠩ ᠰᠡᠳᠬᠢᠯ ᠡᠴᠡ ᠪᠠᠶᠠᠷᠯᠠᠯᠠ᠃ ᠨᠠᠮᠠᠶ᠋ᠢ(ᠨᠠᠮᠠ ᠶ᠋ᠢ) ᠢᠩᠭᠢᠵᠦ ᠲᠣᠭᠣᠭᠰᠠᠨ ᠳ᠋ᠤ᠌ ᠪᠢ ᠶᠡᠬᠡᠯᠡ(ᠶᠡᠬᠡ ᠯᠡ) ᠤᠷᠮᠠ ᠲᠠᠢ ᠪᠠᠢᠨᠠ᠃ ᠪᠢᠳᠡᠨ ᠦ᠌ ᠠᠵᠢᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠯᠭᠠᠷᠠᠵᠤ ᠪᠠᠢᠭᠠ ᠮᠠᠨᠢ ᠦᠨᠡᠨ ᠬᠡᠷᠡᠭ ᠲᠡᠭᠡᠨ( ᠲᠤ ᠪᠡᠨ) ᠪᠢᠳᠡᠨ ᠦ᠌ ᠠᠷᠤ ᠭᠡᠷ ᠦ᠋ᠨ ᠡᠬᠡᠨᠡᠷ᠂ ᠡᠭᠡᠴᠢ ᠳᠡᠭᠦᠦ᠂ ᠥᠬᠢᠳ ᠡᠮᠡᠭᠲᠡᠢᠴᠦᠳ ᠦ᠋ᠨ ᠶᠡᠬᠡ ᠵᠢᠳᠬᠦᠯ ᠮᠡᠷᠡᠢᠯᠲᠡ ᠦᠭᠡᠢ ᠪᠡᠷ ᠡᠢᠮᠦ ᠪᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠬᠡᠷᠡᠭ ᠰᠢᠦ ᠳᠡ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠤᠯᠤᠰ᠂
— ᠲᠡᠷᠡ ᠴᠣᠬᠣᠮ ᠠ᠋! ᠡᠮᠡᠭᠲᠡᠢᠴᠦᠳ ᠭᠡᠵᠦ ᠯᠤᠲᠤ ᠶᠡᠬᠡ ᠬᠦᠴᠦ ᠪᠠᠢᠭᠠ ᠶᠤᠮ ᠰᠢᠦ! ᠭᠡᠵᠡᠭᠡᠯᠡ᠃
ᠬᠡᠳᠦ ᠬᠣᠨᠣᠭᠠᠳ᠂ ᠰᠢᠷᠴᠢᠨ ᠥᠨᠥᠬᠢ ᠰᠤᠮᠤ ᠶ᠋ᠢᠨ ᠰᠠᠢᠨ ᠮᠠᠯᠴᠢᠨ ᠤ᠋ ᠬᠤᠷᠠᠯ ᠳ᠋ᠤ᠌ ᠣᠴᠢᠵᠠᠢ᠃ ᠪᠠᠭ ᠪᠦᠭᠦᠳᠡ ᠡᠴᠡ ᠬᠦᠷᠦᠯᠴᠡᠨ ᠢᠷᠡᠭᠰᠡᠨ ᠲᠥᠯᠥᠭᠡᠯᠡᠭᠴᠢᠳ᠂ ᠤᠷᠢᠳᠤ ᠡᠪᠦᠭᠡᠨ ᠢᠸᠠᠨ ᠭᠤᠸᠠᠢ ᠶ᠋ᠢᠨ ᠪᠠᠷᠢᠯᠴᠠᠵᠤ ᠥᠭᠭᠦᠭᠰᠡᠨ ᠰᠤᠮᠤ ᠶ᠋ᠢᠨ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠺᠯᠦ᠋ᠪ ᠲᠦ᠍ ᠬᠤᠷᠠᠯᠳᠤᠵᠤ ᠪᠢᠯᠡ᠃ ᠰᠤᠮᠤ ᠶ᠋ᠢᠨ ᠳᠠᠷᠤᠭᠠ᠂ ᠳᠠᠭᠤ ᠪᠠᠨ ᠥᠨᠳᠥᠷ ᠨᠠᠮ ᠦᠭᠡᠢ ᠨᠢᠭᠡ ᠬᠡᠪ ᠢ᠋ᠶ᠋ᠡᠷ ᠦᠷᠭᠦᠯᠵᠢᠯᠡᠨ ᠢᠯᠡᠳᠬᠡᠯ ᠬᠢᠭᠰᠡᠨ ᠨᠢ᠂ ᠲᠣᠭᠠ ᠳᠠᠩᠴᠢ ᠣᠯᠠᠨ᠂ ᠦᠭᠡ ᠪᠠᠬᠠᠨ ᠨᠤᠷᠱᠤᠭᠰᠠᠨ(ᠨᠤᠷᠰᠢᠭᠰᠠᠨ) ᠲᠤᠯᠠ᠂ ᠰᠢᠷᠴᠢᠨ ᠤᠳᠠᠯ ᠦᠭᠡᠢ ᠰᠡᠳᠬᠢᠯ ᠪᠡᠯᠴᠢᠵᠦ᠂ ᠲᠡᠷᠡ ᠠᠭᠤᠳᠠᠮ ᠰᠠᠷᠠᠭᠤᠯ ᠺᠯᠦ᠋ᠪ ᠦ᠋ᠨ ᠳᠣᠲᠣᠭᠠᠳᠤ ᠪᠦᠬᠦᠨ ᠢ᠋ ᠦᠵᠡᠬᠦᠯᠡ᠂ ᠱᠠᠯᠠ ᠶ᠋ᠢᠨ ᠪᠠᠩᠵᠠ ᠳᠣᠳᠣᠮ ᠢ᠋ ᠬᠦᠷᠲᠡᠯᠡ ᠨᠢᠳᠦᠯᠡᠵᠦ ᠬᠡᠳᠦᠢᠨ ᠲᠠᠨᠢᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠪᠠᠷᠢᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠮᠣᠳᠣ ᠵᠥᠭᠡᠭᠡᠵᠦ ᠭᠠᠷ ᠪᠡᠶᠡ ᠣᠷᠣᠯᠴᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠯᠠ᠃ ᠲᠡᠭᠡᠭᠡᠳ ᠬᠤᠲᠤᠭ— ᠥᠨᠳᠥᠷ ᠠᠭᠤᠯᠠ ᠶ᠋ᠢᠨ ᠬᠣᠰᠢᠭᠤ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢ ᠠᠩᠬᠠ ᠲᠡᠭᠦᠰᠬᠡᠬᠦ ᠳ᠋ᠦ᠍᠂ ᠶᠣᠰᠣᠯᠠᠯ ᠤ᠋ᠨ ᠬᠤᠷᠠᠯ ᠳ᠋ᠤ᠌ ᠤᠤᠭᠠᠨ ᠬᠦᠦ ᠪᠡᠨ ᠮᠠᠩᠨᠠᠢ ᠨᠢ ᠲᠡᠨᠢᠢᠨ ᠪᠠᠶᠠᠷᠯᠠᠵᠤ᠂ ᠣᠳᠣ ᠢᠯᠡᠳᠬᠡᠭᠴᠢ ᠶ᠋ᠢᠨ ᠰᠠᠭᠤᠵᠤ ᠪᠠᠢᠭᠠ ᠭᠠᠵᠠᠷ᠂ ᠪᠠᠲᠤᠪᠠᠶᠠᠷ ᠭᠤᠸᠠᠢ ᠶ᠋ᠢᠨ ᠭᠠᠷ ᠠ᠋ᠴᠠ ᠬᠣᠰᠢᠭᠤ ᠲᠠᠮᠠᠭᠠ ᠶ᠋ᠢᠨ ᠱᠠᠩᠨᠠᠯ ᠠᠪᠴᠤ ᠪᠠᠢᠭᠰᠠᠨ ᠢ᠋ ᠬᠠᠷᠠᠵᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠭᠠᠳ᠂ ᠣᠳᠣ ᠰᠤᠮᠤ ᠶ᠋ᠢᠨ ᠳᠠᠷᠤᠭᠠ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠵᠤ ᠪᠠᠢᠭᠠ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠵᠠᠬᠢᠷᠤᠯ᠂ ᠰᠤᠮᠤ ᠶ᠋ᠢᠨ ᠨᠠᠮ ᠤ᠋ᠨ ᠡᠭᠦᠷ ᠦ᠋ᠨ ᠳᠠᠷᠤᠭᠠ ᠲᠠᠪᠬᠠᠢ᠂ ᠲᠡᠷᠡ ᠦᠶᠡ ᠳ᠋ᠦ᠍ ᠲᠣᠩ ᠴᠤ᠌ ᠵᠠᠯᠠᠭᠤᠬᠠᠨ᠂ ᠬᠤᠪᠢᠰᠬᠠᠯᠲᠤ ᠵᠠᠯᠠᠭᠤᠴᠤᠳ ᠤ᠋ᠨ ᠡᠪᠯᠡᠯ ᠦ᠋ᠨ ᠭᠡᠰᠢᠭᠦᠨ ᠪᠠᠢᠭᠰᠠᠨ ᠢ᠋ ᠰᠠᠨᠠᠭᠠᠳ᠂ ᠣᠳᠣ ᠬᠢᠵᠢᠶᠡᠯ ᠨᠠᠰᠤᠨ ᠤ᠋ ᠬᠥᠮᠦᠨ ᠪᠣᠯᠴᠢᠬᠠᠭᠠᠳ᠂ ᠬᠡᠦᠬᠡᠳ ᠨᠢ ᠡᠨᠡ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠤᠷᠤᠯᠴᠠᠵᠤ ᠪᠠᠢᠭᠠ ᠶ᠋ᠢ ᠪᠣᠳᠣᠬᠤ ᠳ᠋ᠤ᠌ ᠰᠣᠨᠢᠬᠠᠨ ᠰᠠᠨᠠᠭᠳᠠᠵᠤ ᠪᠠᠢᠯᠠ᠃ ᠲᠡᠭᠡᠭᠡᠳ᠂ ᠲᠤᠭᠤᠷᠭᠠᠨᠠ ᠬᠣᠯᠪᠣᠭᠠᠲᠤ ᠤᠯᠤᠰ ᠤ᠋ᠨ ᠭᠠᠵᠠᠷ ᠤ᠋ᠨ ᠲᠣᠮᠣ ᠵᠢᠷᠤᠭ ᠪᠠᠢᠭᠰᠠᠨ ᠢ᠋ ᠬᠠᠷᠠᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠪᠢᠴᠢᠬᠠᠨ ᠪᠢᠴᠢᠬᠠᠨ ᠳᠠᠷᠴᠠᠭ (ᠲᠠᠷᠴᠤᠭ) ᠲᠤ᠌ ᠵᠡᠭᠦᠦ ᠬᠠᠳᠬᠤᠵᠤ᠂ ᠪᠠᠢᠳᠠᠯ ᠨᠢ ᠭᠠᠵᠠᠷ ᠤ᠋ᠨ ᠵᠠᠭᠠᠭ ᠢ᠋ ᠲᠡᠮᠳᠡᠭᠡᠯᠡᠭᠰᠡᠨ ᠢ᠋ ᠦᠵᠡᠪᠡᠯ᠂ ᠾᠢᠲ᠋ᠯᠧᠷ ᠦ᠋ᠨ ᠪᠠᠯᠠᠮᠠᠳ ᠴᠡᠷᠢᠭ ᠬᠣᠯᠪᠣᠭᠠᠲᠤ ᠤᠯᠤᠰ ᠤ᠋ᠨ ᠨᠤᠲᠤᠭ ᠲᠤ᠌ ᠶᠠᠭᠤᠲᠠᠢ ᠳᠣᠲᠣᠭᠰᠢᠯᠠᠨ ᠣᠷᠣᠵᠤ᠂ ᠵᠢᠷᠤᠭ ᠳᠡᠭᠡᠷᠡ ᠠᠯᠤᠬᠠ ᠬᠠᠳᠤᠭᠤᠷ ᠲᠠᠢ ᠲᠣᠮᠣᠬᠠᠨ ᠰᠢᠭ᠋ ᠳᠠᠷᠴᠠᠭ (ᠲᠠᠷᠴᠤᠭ) ᠢ᠋ᠶ᠋ᠠᠷ ᠬᠢᠴᠢᠶᠡᠵᠦ ᠲᠡᠮᠳᠡᠭᠡᠯᠡᠭᠰᠡᠨ ᠮᠣᠰᠺᠸᠠ ᠳ᠋ᠤ᠌ ᠬᠠᠷᠢᠭᠤ ᠦᠭᠡᠢ ᠳᠥᠲᠡᠯᠡᠭᠰᠡᠨ ᠪᠠᠢᠳᠠᠯ ᠢ᠋ ᠦᠵᠡᠬᠦ ᠳ᠋ᠦ᠍ ᠶᠡᠬᠡ ᠤᠯᠤᠰ ᠤ᠋ᠨ ᠨᠡᠢᠰᠯᠡᠯ ᠳ᠋ᠦ᠍ ᠮᠥᠨ ᠴᠦ᠍ ᠠᠶᠤᠯ ᠲᠠᠢ ᠮᠡᠲᠦ ᠠᠵᠢ᠃ ᠭᠡᠪᠡᠴᠦ ᠰᠲ᠋ᠠᠯᠢᠨ ᠺᠷᠧᠮᠯᠢ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠠᠭᠰᠠᠭᠠᠷ ᠲᠥᠷᠥ ᠶ᠋ᠢᠨ ᠶᠡᠬᠡ ᠵᠢᠳᠬᠦᠯᠲᠡᠨ ᠲᠡᠭᠦᠨ ᠦ᠌ ᠲᠡᠷᠡ ᠭᠠᠢᠬᠠᠮᠰᠢᠭᠲᠤ ᠰᠠᠮᠪᠠᠭᠠ ᠲᠠᠢ᠂ ᠲᠡᠪᠴᠢᠶᠡᠷᠢ ᠶᠡᠬᠡ ᠬᠠᠲᠠᠭᠤᠵᠢᠯᠲᠠᠢ ᠪᠠᠢᠭᠠ ᠶ᠋ᠢ ᠦᠵᠡᠵᠦ ᠪᠠᠢᠭᠠ ᠵᠥᠪᠯᠡᠯᠲᠦ ᠶ᠋ᠢᠨ ᠲᠦᠮᠡᠨ ᠠᠷᠠᠳ ᠳᠠᠶᠠᠭᠠᠷ᠂ ᠲᠡᠭᠦᠨ ᠳ᠋ᠦ᠍ ᠳᠣᠲᠣᠨᠣ ᠡᠯᠢᠭᠡᠨ ᠳᠡᠯᠡᠬᠡᠢ ᠶ᠋ᠢᠨ ᠰᠢᠳᠤᠷᠭᠤᠴᠤᠳ ᠴᠥᠮ ᠡᠴᠦᠰ ᠲᠡᠭᠡᠨ( ᠲᠤ ᠪᠡᠨ)ᠢᠯᠠᠬᠤ ᠶ᠋ᠢᠨ ᠵᠣᠷᠢᠭ ᠤᠷᠮᠠ ᠲᠥᠷᠥᠵᠦ ᠪᠠᠢᠭᠰᠠᠨ ᠪᠢᠯᠡ᠃ ᠬᠥᠭᠡᠷᠭᠡᠨ ᠰᠠᠭᠰᠠᠭᠤ ᠰᠢᠲᠠᠷᠠᠴᠢᠨ ᠬᠥᠮᠦᠨ ᠢ᠋᠂ ᠭᠠᠭᠴᠠ ᠨᠢᠭᠡ ᠪᠤᠲᠠ ᠢᠳᠡᠭᠰᠡᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠡᠷᠳᠦᠵᠦ᠂ ᠬᠣᠶᠠᠷ ᠨᠢᠭᠡ ᠨᠡᠭᠦᠳᠡᠯ ᠡᠴᠡ ᠴᠠᠭᠠᠰᠢ ᠬᠠᠷᠠᠳᠠᠭ ᠦᠭᠡᠢ ᠪᠡᠨ ᠮᠡᠳᠡᠬᠦ ᠦᠭᠡᠢ ᠨᠢᠳᠦ ᠪᠠᠯᠠᠢ ᠨᠡᠭᠦᠵᠦ ᠶᠠᠪᠤᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠠᠪᠤᠷᠭᠤ ᠶᠡᠬᠡ ᠴᠢᠳᠠᠯᠲᠠᠢ ᠰᠢᠲᠠᠷᠠᠴᠢᠨ ᠬᠥᠮᠦᠨ ᠰᠠᠭᠰᠠᠭᠤ ᠲᠡᠭᠦᠨ ᠢ᠋ ᠣᠯᠠᠨ ᠨᠡᠭᠦᠳᠡᠯ ᠦ᠋ᠨ ᠴᠠᠭᠠᠨᠠ ᠭᠠᠷᠴᠠᠭᠠ ᠦᠭᠡᠢ ᠮᠠᠳᠯᠠᠬᠤ ᠶ᠋ᠢ ᠪᠡᠨ ᠨᠡᠪᠲᠡᠷᠬᠡᠢ ᠬᠠᠷᠠᠨ ᠮᠡᠳᠡᠵᠦ ᠰᠠᠮᠪᠠᠭᠠ ᠲᠠᠢ ᠪᠠᠷ ᠢᠯᠠᠯᠲᠠ ᠪᠠᠨ ᠵᠣᠬᠢᠶᠠᠵᠤ ᠪᠠᠢᠳᠠᠭᠴᠢᠯᠠᠨ ᠰᠲ᠋ᠠᠯᠢᠨ ᠤ᠋ ᠰᠣᠳᠣ ᠮᠡᠷᠭᠡᠨ ᠣᠶᠤᠨ ᠪᠢᠯᠢᠭ ᠨᠢ ᠬᠡᠳᠦ ᠶ᠋ᠢᠨ ᠢᠯᠠᠨ ᠳᠡᠢᠯᠬᠦ ᠶ᠋ᠢ ᠨᠡᠪᠲᠡᠷᠬᠡᠢ ᠲᠣᠯᠢᠳᠠᠨ ᠬᠠᠷᠠᠵᠤ᠂ ᠢᠯᠠᠯᠲᠠ ᠪᠠᠨ ᠪᠦᠲᠦᠭᠡᠵᠦ ᠪᠠᠢᠭᠠ ᠪᠢᠵᠡ᠃ ᠭᠠᠷ ᠤ᠋ᠨ ᠪᠥᠬᠡ ᠭᠠᠭᠴᠠ ᠬᠥᠮᠦᠨ ᠳ᠋ᠦ᠍᠂ ᠴᠡᠭᠡᠵᠢ ᠶ᠋ᠢᠨ ᠪᠥᠬᠡ ᠴᠡᠷᠢᠭ ᠬᠥᠮᠦᠨ ᠳ᠋ᠦ᠍ ᠭᠡᠵᠦ ᠡᠷᠲᠡᠨ ᠦ᠌ ᠰᠡᠴᠡᠨ ᠦᠭᠡ ᠪᠡᠷ ᠪᠣᠳᠣᠭᠰᠠᠭᠠᠷ ᠰᠢᠷᠴᠢᠨ ᠨᠢᠭᠡ ᠮᠡᠳᠡᠬᠦ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ)ᠰᠤᠮᠤ ᠶ᠋ᠢᠨ ᠳᠠᠷᠤᠭᠠ ᠶ᠋ᠢᠨ ᠰᠦᠷᠡᠬᠡᠢ ᠰᠢᠷᠲᠡᠨ ᠬᠠᠷᠠᠵᠤ ᠪᠠᠢᠭᠠ ᠶ᠋ᠢ ᠦᠵᠡᠵᠦ ᠣᠷᠬᠢᠭᠠᠳ᠂ ᠨᠠᠮᠠᠶ᠋ᠢ(ᠨᠠᠮᠠ ᠶ᠋ᠢ) ᠠᠯᠮᠠᠢᠷᠠᠨ ᠰᠠᠭᠤᠵᠤ ᠪᠠᠢᠨᠠ ᠭᠡᠵᠦ ᠬᠠᠷᠠᠭᠰᠠᠨ ᠪᠣᠯᠪᠠ ᠤᠤ? ᠭᠡᠵᠦ ᠰᠡᠳᠬᠢᠯ ᠵᠣᠪᠠᠰᠬᠢᠵᠦ᠂ ᠢᠯᠡᠳᠬᠡᠯ ᠢ᠋ ᠨᠢ ᠴᠢᠩᠨᠠᠵᠤ ᠡᠬᠢᠯᠡᠪᠡ᠃ ᠭᠡᠲᠡᠯᠡ ᠰᠤᠮᠤ ᠶ᠋ᠢᠨ ᠳᠠᠷᠤᠭᠠ ᠲᠡᠭᠡᠵᠦ ᠴᠦ᠍ ᠪᠣᠳᠣᠵᠤ ᠰᠢᠷᠴᠢᠨ ᠤᠷᠤᠭᠤ ᠬᠠᠷᠠᠭᠰᠠᠨ ᠬᠡᠷᠡᠭ ᠪᠢᠰᠢ᠂ ᠢᠯᠡᠳᠬᠡᠯ ᠦ᠋ᠨ ᠢ᠋ᠶ᠋ᠡᠨ ᠲᠡᠭᠦᠰᠬᠡᠯ ᠳ᠋ᠦ᠍ ᠤᠯᠤᠰ ᠤ᠋ᠨ ᠰᠠᠢᠨ ᠮᠠᠯᠴᠢᠨ ᠤ᠋ ᠠᠩᠬᠠᠳᠤᠭᠠᠷ ᠬᠤᠷᠠᠯ ᠳ᠋ᠤ᠌ ᠲᠥᠯᠥᠭᠡᠯᠡᠭᠴᠢ ᠪᠡᠷ ᠶᠠᠪᠤᠭᠤᠯᠬᠤ ᠬᠥᠮᠦᠨ ᠢ᠋ᠶ᠋ᠡᠨ ᠠᠢᠮᠠᠭ ᠤ᠋ᠨ ᠵᠠᠬᠢᠷᠭᠠᠨ ᠳ᠋ᠤ᠌ ᠳᠡᠪᠰᠢᠭᠦᠯᠦᠨ ᠪᠠᠲᠤᠯᠠᠭᠤᠯᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠬᠡᠯᠡᠬᠦ ᠳ᠋ᠡᠭᠡᠨ ( ᠳ᠋ᠦ᠍ ᠪᠡᠨ)᠂ ᠰᠠᠨᠠᠮᠰᠠᠷ ᠦᠭᠡᠢ ᠰᠢᠷᠴᠢᠨ ᠤᠷᠤᠭᠤ ᠰᠢᠷᠲᠡᠨ ᠬᠡᠯᠡᠭᠰᠡᠨ ᠬᠥᠮᠦᠨ ᠪᠠᠢᠵᠠᠢ᠃ ᠢᠯᠡᠳᠬᠡᠯ ᠢ᠋ᠶ᠋ᠡᠨ ᠲᠡᠭᠦᠰᠬᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)ᠤᠯᠤᠰ᠂
— ᠰᠢᠷᠴᠢᠨ ᠭᠤᠸᠠᠢ ᠪᠠᠨ ᠰᠣᠩᠭᠣᠶᠠ᠂ ᠰᠢᠷᠴᠢᠨ ᠭᠤᠸᠠᠢ ᠪᠠᠨ ᠰᠣᠩᠭᠣᠶᠠ! ᠵᠦᠢᠲᠡᠢ᠂ ᠵᠦᠢᠲᠡᠢ! ᠭᠡᠵᠦ ᠳᠤᠤᠭᠠᠷᠴᠠᠭᠠᠵᠢ᠃
ᠰᠤᠮᠤ ᠶ᠋ᠢᠨ ᠬᠤᠷᠠᠯ ᠠ᠋ᠴᠠ ᠡᠪᠦᠭᠡᠨ ᠮᠠᠯᠴᠢᠨ ᠶᠡᠬᠡᠯᠡ(ᠶᠡᠬᠡ ᠯᠡ) ᠪᠠᠶᠠᠷᠲᠠᠢ ᠬᠠᠷᠢᠵᠤ᠂ ᠮᠠᠯᠴᠢᠨ ᠬᠥᠮᠦᠨ ᠦ᠌ ᠬᠥᠳᠡᠯᠮᠦᠷᠢ ᠶ᠋ᠢ ᠬᠦᠨᠳᠦᠲᠡᠢ ᠰᠠᠢᠬᠠᠨ ᠪᠣᠯᠤᠭᠰᠠᠨ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠰᠡᠳᠬᠢᠯ ᠳᠦᠭᠦᠷᠡᠩ ᠪᠠᠬᠠᠳᠤᠵᠤ᠂ ᠶᠡᠬᠡ ᠬᠦᠷᠢᠶᠡ ᠶ᠋ᠢ ᠤᠯᠠᠭᠠᠨᠪᠠᠭᠠᠲᠤᠷ ᠭᠡᠳᠡᠭ ᠪᠣᠯᠤᠭᠰᠠᠨ ᠴᠠᠭ ᠠ᠋ᠴᠠ ᠦᠵᠡᠭᠡ ᠦᠭᠡᠢ ᠪᠢᠯᠡ᠃ ᠣᠳᠣ ᠠᠯᠤᠰ ᠬᠣᠯᠠ ᠶ᠋ᠢᠨ ᠲᠡᠷᠡ ᠪᠠᠭᠠᠲᠤᠷ ᠬᠣᠲᠠ ᠶ᠋ᠢ ᠨᠢᠭᠡ ᠦᠵᠡᠬᠦ ᠵᠠᠪᠰᠢᠶᠠᠨ ᠲᠣᠬᠢᠶᠠᠯᠳᠤᠪᠠᠯ ᠶᠠᠭᠤᠲᠠᠢ ᠰᠠᠢᠬᠠᠨ ᠪᠢᠯᠡ ᠭᠡᠵᠦ ᠪᠣᠳᠣᠵᠤ᠂ ᠪᠠᠰᠠ ᠰᠤᠮᠤᠨ ᠠ᠋ᠴᠠ ᠳᠡᠪᠰᠢᠭᠦᠯᠦᠭᠰᠡᠨ ᠰᠠᠢᠨ ᠮᠠᠯᠴᠢᠨ ᠤ᠋ ᠨᠡᠷᠡᠰ ᠢ᠋ ᠠᠢᠮᠠᠭ ᠤ᠋ᠨ ᠶᠠᠮᠤᠨ᠂ ᠠᠢᠮᠠᠭ ᠤ᠋ᠨ ᠨᠠᠮ ᠤ᠋ᠨ ᠬᠣᠷᠢᠶᠠᠨ ᠠ᠋ᠴᠠ ᠦᠵᠡᠵᠦ᠂ ᠤᠯᠠᠮ ᠢ᠋ᠶ᠋ᠠᠷ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠶᠠᠪᠤᠭᠤᠯᠬᠤ ᠶᠤᠮ ᠭᠡᠨᠡ ᠪᠢᠯᠡ᠃ ᠮᠢᠨᠦ ᠪᠡᠶᠡ ᠪᠠᠭ ᠳᠣᠲᠣᠷᠠ ᠪᠠᠨ ᠰᠠᠢᠨ ᠮᠠᠯᠴᠢᠨ ᠪᠣᠯᠤᠭᠠᠳ᠂ ᠰᠤᠮᠤ ᠶ᠋ᠢᠨ ᠬᠡᠮᠵᠢᠶᠡ ᠪᠡᠷ ᠰᠠᠢᠨ ᠮᠠᠯᠴᠢᠨ ᠤ᠋ ᠲᠣᠭᠠᠨ ᠳ᠋ᠤ᠌ ᠣᠷᠣᠪᠠᠴᠤ᠂ ᠠᠢᠮᠠᠭ ᠤ᠋ᠨ ᠬᠡᠮᠵᠢᠶᠡ ᠪᠡᠷ ᠴᠣᠬᠣᠮ ᠶᠠᠭᠠᠬᠢᠳᠠᠭ ᠪᠢᠯᠡ᠃ ᠪᠦᠬᠦ ᠤᠯᠤᠰ ᠤ᠋ᠨ ᠬᠡᠮᠵᠢᠶᠡ ᠪᠡᠷ ᠲᠡᠷᠢᠭᠦᠨ ᠦ᠌ ᠰᠠᠢᠨ ᠮᠠᠯᠴᠢᠨ ᠢ᠋ ᠠᠢᠮᠠᠭ ᠠᠢᠮᠠᠭ ᠠ᠋ᠴᠠ ᠰᠢᠯᠭᠠᠷᠠᠭᠤᠯᠬᠤ ᠳ᠋ᠤ᠌᠂ ᠪᠢ ᠲᠡᠷᠡ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠵᠦᠭᠦᠦ ᠳᠤᠲᠠᠳᠠᠭ ᠪᠣᠯᠪᠠ ᠤᠤ ᠶᠠᠭᠠᠬᠢᠳᠠᠭ ᠪᠣᠯ? ᠶᠠᠭᠤ ᠴᠤ᠌ ᠪᠣᠯᠤᠭᠰᠠᠨ ᠭᠡᠷ ᠲᠡᠭᠡᠨ( ᠲᠤ ᠪᠡᠨ) ᠬᠠᠷᠢᠭᠠᠳ᠂ ᠰᠤᠮᠤ ᠶ᠋ᠢᠨ ᠰᠠᠢᠨ ᠮᠠᠯᠴᠢᠨ ᠪᠣᠯᠵᠤ ᠠᠢᠮᠠᠭ ᠲᠤ᠌ ᠰᠢᠯᠭᠠᠭᠤᠯᠬᠤ ᠪᠣᠯᠤᠯᠠ ᠭᠡᠳᠡᠭ ᠢ᠋ᠶ᠋ᠡᠨ ᠶᠠᠭᠤᠮᠠᠨ ᠤ᠋ ᠲᠦᠷᠦᠭᠦᠨ ᠳ᠋ᠦ᠍ ᠬᠡᠯᠡᠭᠡᠳ ᠶᠠᠭᠠᠬᠢᠬᠤ ᠪᠣᠢ ᠭᠡᠵᠦ ᠪᠣᠳᠣᠵᠠᠢ᠃
ᠴᠢᠩᠭᠢᠭᠰᠡᠭᠡᠷ ᠠᠷᠪᠠᠳᠤᠭᠠᠷ ᠰᠠᠷᠠ ᠥᠩᠭᠡᠷᠡᠵᠦ᠂ ᠲᠥᠪ ᠡᠴᠡ ᠬᠠᠷᠢᠭᠤ ᠴᠢᠮᠡᠭᠡ ᠦᠭᠡᠢ ᠮᠡᠲᠦ᠃ ᠰᠢᠷᠴᠢᠨ ᠡᠳᠦᠷ ᠪᠦᠷᠢ ᠮᠠᠯ ᠢ᠋ᠶ᠋ᠠᠨ ᠮᠠᠯᠯᠠᠵᠤ᠂ ᠠᠷᠪᠠᠨ ᠭᠡᠷ ᠦ᠋ᠨ ᠤᠬᠠᠭᠤᠯᠤᠭᠴᠢ ᠶ᠋ᠢᠨ ᠬᠤᠪᠢ ᠪᠠᠷ ᠶᠠᠷᠢᠶᠠ ᠬᠢᠵᠦ᠂ ᠠᠢᠯ ᠢ᠋ᠶ᠋ᠠᠷ ᠲᠠᠨᠢᠭᠤᠯᠭᠠ ᠬᠢᠭᠰᠡᠭᠡᠷ ᠴᠠᠭ ᠥᠩᠭᠡᠷᠡᠵᠦ᠂ ᠠᠷᠪᠠᠨ ᠨᠢᠭᠡᠨ ᠰᠠᠷᠠ ᠭᠠᠷᠴᠠᠢ᠃ ᠨᠠᠮᠤᠷᠵᠢᠶᠠᠨ ᠠ᠋ᠴᠠ ᠡᠪᠦᠯᠵᠢᠶᠡᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠣᠢᠷᠠᠲᠤᠨ ᠳᠥᠭᠥᠬᠦ ᠴᠠᠭ ᠪᠣᠯᠵᠤ᠂ ᠨᠡᠭᠦᠳᠡᠯ ᠬᠢᠭᠰᠡᠭᠡᠷ ᠡᠪᠦᠯᠵᠢᠶᠡᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠪᠠᠭᠤᠵᠠᠢ᠃ ᠤᠷᠢᠳᠤ ᠡᠳᠦᠷ ᠨᠢ ᠨᠡᠭᠦᠵᠦ ᠢᠷᠡᠭᠰᠡᠨ ᠠᠳᠢᠶᠠ ᠶ᠋ᠢᠨ ᠬᠢ ᠬᠡᠳᠦᠢᠨ ᠲᠥᠪᠬᠢᠨᠡᠵᠦ ᠠᠪᠤᠭᠰᠠᠨ ᠪᠠᠢᠵᠠᠢ᠃ ᠰᠢᠷᠴᠢᠨ ᠦ᠌ ᠨᠡᠭᠦᠵᠦ ᠢᠷᠡᠭᠰᠡᠨ ᠦ᠌ ᠬᠣᠢᠲᠤ ᠡᠳᠦᠷ ᠰᠠᠯᠬᠢ ᠬᠥᠳᠡᠯᠵᠦ᠂ ᠶᠠᠪᠠᠭᠠᠨ ᠰᠢᠭᠤᠷᠭᠠ ᠥᠷᠭᠡᠨ ᠲᠠᠯᠠ ᠪᠠᠷ ᠴᠠᠰᠤᠨ ᠮᠠᠨᠠᠨ ᠲᠠᠲᠠᠭᠤᠯᠤᠯᠠ᠃ ᠰᠢᠷᠴᠢᠨ ᠦ᠌ ᠲᠡᠷᠡ ᠡᠪᠦᠯᠵᠢᠶᠡᠨ ᠦ᠌ ᠬᠣᠶᠠᠷ ᠠᠢᠯ ᠤ᠋ᠨ ᠬᠢᠨ᠂ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠦᠰᠡᠯᠡᠭᠦᠷ ᠴᠢᠩᠭᠠᠯᠠᠵᠤ ᠶᠠᠭᠤᠮᠠ ᠪᠠᠷ ᠳᠠᠷᠤᠭᠤᠯᠤᠭᠠᠳ᠂ ᠭᠠᠯ ᠢ᠋ᠶ᠋ᠠᠨ ᠮᠠᠨᠠᠭᠠᠳ᠂ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠢ᠋ᠶ᠋ᠠᠨ ᠰᠠᠯᠬᠢ ᠰᠢᠭᠤᠷᠭᠠᠨ ᠳ᠋ᠤ᠌ ᠡᠪᠦᠯᠵᠢᠶᠡ ᠨᠥᠮᠥᠷᠢ ᠭᠠᠵᠠᠷ ᠳᠥᠭᠥᠭᠦᠯᠬᠦ ᠭᠡᠵᠦ ᠵᠦᠭ ᠵᠦᠭ ᠮᠣᠷᠳᠠᠵᠠᠢ᠃ ᠨᠢᠭᠡ ᠨᠢ ᠠᠳᠤᠭᠤ ᠪᠠᠨ ᠨᠥᠮᠥᠷᠢ ᠭᠠᠵᠠᠷ ᠲᠠᠭᠤᠵᠤ᠂ ᠰᠠᠯᠬᠢ ᠰᠢᠭᠤᠷᠭᠠᠨ ᠳ᠋ᠤ᠌ ᠠᠯᠳᠠᠬᠤ ᠦᠭᠡᠢ ᠶ᠋ᠢ ᠪᠣᠳᠣᠵᠠᠢ᠃ ᠨᠢᠭᠡ ᠨᠢ ᠬᠣᠨᠢᠨ ᠳ᠋ᠠᠭᠠᠨ ( ᠳ᠋ᠤ᠌ ᠪᠠᠨ)᠂ ᠨᠢᠭᠡ ᠨᠢ ᠦᠬᠡᠷ ᠲᠡᠭᠡᠨ( ᠲᠤ ᠪᠡᠨ)᠂ ᠨᠢᠭᠡ ᠨᠢ ᠲᠡᠮᠡᠭᠡᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ)ᠮᠣᠷᠳᠠᠵᠠᠢ᠃
ᠰᠠᠯᠬᠢ ᠰᠢᠭᠤᠷᠭᠠᠨ ᠶᠡᠬᠡᠰᠦᠭᠰᠡᠭᠡᠷ ᠴᠠᠰᠤ ᠪᠤᠷᠭᠢᠨᠠᠵᠤ ᠲᠩᠷᠢ ᠭᠠᠵᠠᠷ ᠬᠣᠶᠠᠷ ᠨᠡᠢᠯᠡᠭᠡᠳ᠂ ᠶᠠᠭᠤᠮᠠ ᠬᠠᠷᠠᠭᠳᠠᠬᠤ ᠦᠭᠡᠢ ᠦᠷᠭᠦᠯᠵᠢᠯᠡᠵᠡᠭᠡᠨ᠂ ᠰᠠᠯᠬᠢ ᠴᠠᠰᠤ ᠱᠤᠤᠬᠢᠨᠠᠭᠰᠠᠨ ᠨᠢᠭᠡ ᠶᠠᠭᠤᠮᠠ ᠪᠣᠯᠤᠯᠠ᠃ ᠣᠷᠣᠢ ᠲᠠᠢᠰᠢ ᠪᠠᠨ ᠰᠢᠭᠤᠷᠭᠠ ᠬᠡᠴᠡ ᠪᠡᠨ ᠪᠠᠷᠢᠭᠠᠳ ᠰᠢᠭᠤᠷᠴᠢᠬᠠᠵᠠᠢ᠃ ᠬᠦᠢ ᠬᠦᠢ ᠰᠦᠷᠡᠬᠡᠢ ᠰᠠᠯᠬᠢᠯᠠᠬᠤ ᠳ᠋ᠤ᠌᠂ ᠬᠣᠨᠢ ᠭᠠᠳᠠᠭᠠ ᠪᠠᠨ ᠲᠣᠭᠲᠠᠵᠤ ᠥᠭᠭᠦᠭᠰᠡᠨ ᠦᠭᠡᠢ ᠰᠠᠯᠬᠢᠨ ᠳ᠋ᠤ᠌ ᠤᠷᠤᠭᠤᠳᠠᠵᠤ ᠡᠬᠢᠯᠡᠭᠰᠡᠨ ᠳ᠋ᠦ᠍᠂ ᠬᠣᠶᠠᠷ ᠠᠢᠯ ᠤ᠋ᠨ ᠬᠢᠨ᠂ ᠨᠢᠳᠦ ᠦᠭᠡᠢ ᠶᠡᠬᠡ ᠰᠠᠯᠬᠢᠨ ᠰᠢᠭᠤᠷᠭᠠᠨ ᠳ᠋ᠤ᠌ ᠨᠠᠢᠭᠤᠨ ᠰᠢᠷᠪᠠᠵᠤ᠂ ᠴᠠᠰᠤ ᠰᠢᠪᠠᠭᠤᠯᠤᠨ᠂ ᠬᠡᠳᠦᠨ ᠬᠣᠨᠢ ᠪᠠᠨ ᠲᠣᠭᠲᠠᠭᠠᠬᠤ ᠭᠡᠵᠦ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠷᠣᠯᠳᠣᠯᠠ᠃ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠰᠢᠬᠠᠴᠠᠯᠳᠤᠭᠰᠠᠨ ᠬᠣᠨᠢ ᠲᠣᠭᠲᠠᠭᠠᠵᠤ ᠶᠠᠳᠠᠨ ᠨᠣᠴᠣᠯᠳᠤᠵᠤ ᠪᠠᠢᠭᠠ ᠬᠥᠮᠦᠨ ᠢ᠋ ᠳᠦᠷᠢ ᠲᠦᠷᠢᠭᠰᠡᠭᠡᠷ ᠭᠠᠳᠠᠭᠠ ᠠ᠋ᠴᠠ ᠪᠠᠨ ᠬᠣᠯᠠᠳᠴᠤ᠂ ᠰᠥᠨᠢ ᠴᠠᠰᠤ ᠣᠷᠣᠬᠤ ᠨᠢ ᠪᠦᠷ ᠴᠦ᠍ ᠰᠢᠷᠦᠭᠦᠰᠬᠦ ᠪᠣᠯᠵᠠᠢ᠃ ᠨᠢᠭᠡ ᠮᠥᠴᠡ ᠲᠡᠳᠦᠢ(ᠮᠥᠴᠡ ᠭᠡᠵᠦ ᠨᠢᠭᠡ ᠴᠠᠭ ᠢ᠋ ᠳᠥᠷᠪᠡ ᠬᠤᠪᠢᠶᠠᠭᠰᠠᠨ ᠤ᠋ ᠨᠢᠭᠡ ᠨᠢ ᠠᠵᠢ) ᠵᠣᠭᠰᠣᠲᠠᠯᠠ᠂ ᠡᠪᠦᠳᠦᠭ ᠴᠢᠨᠡᠭᠡᠨ ᠴᠠᠰᠤᠨ ᠳ᠋ᠤ᠌ ᠰᠢᠭᠢᠳᠳᠡᠭ ᠪᠠᠢᠵᠤ᠂ ᠰᠢᠭᠤᠷᠭᠠᠨ ᠳ᠋ᠤ᠌ ᠲᠠᠭᠤᠭᠳᠠᠭᠰᠠᠨ ᠬᠣᠨᠢ ᠰᠦᠷᠦᠭ ᠡᠴᠡ ᠪᠡᠨ ᠬᠡᠰᠡᠭ ᠬᠡᠰᠡᠭ ᠢ᠋ᠶ᠋ᠡᠷ ᠲᠠᠰᠤᠷᠠᠨ ᠰᠠᠯᠬᠢᠨ ᠳ᠋ᠤ᠌ ᠬᠥᠭᠡᠭᠡᠭᠳᠡᠵᠦ᠂ ᠶᠡᠷᠦ ᠲᠣᠭᠲᠠᠭᠠᠵᠤ ᠠᠪᠬᠤ ᠨᠢ ᠶᠡᠬᠡ ᠬᠡᠴᠡᠭᠦᠦ ᠪᠣᠯᠤᠭᠠᠳ᠂ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ᠂ ᠰᠠᠯᠬᠢᠨ ᠤ᠋ ᠱᠤᠤᠬᠢᠨᠠᠬᠤ ᠴᠢᠮᠡᠭᠡᠨ ᠳᠤᠮᠳᠠᠭᠤᠷ ᠬᠣᠨᠢ ᠪᠠᠷ ᠨᠣᠴᠣᠯᠳᠤᠭᠰᠠᠨ ᠤᠯᠤᠰ᠂ ᠪᠡᠶᠡ ᠪᠡᠶᠡ ᠪᠠᠨ ᠣᠯᠬᠤ ᠪᠠᠨ ᠪᠠᠢᠵᠠᠢ᠃ ᠰᠢᠷᠴᠢᠨ ᠬᠣᠨᠢ ᠪᠠᠨ ᠲᠣᠭᠲᠠᠭᠠᠬᠤ ᠭᠡᠵᠦ ᠤᠷᠤᠯᠳᠤᠵᠤ ᠶᠠᠳᠠᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠬᠣᠨᠢ᠂ ᠬᠥᠯ ᠳᠣᠣᠷᠠ ᠨᠢ ᠪᠠᠢᠨ ᠪᠠᠢᠨ ᠳᠠᠭᠠᠷᠢᠯᠳᠤᠵᠤ᠂ ᠨᠢᠭᠡ ᠮᠡᠳᠡᠬᠦᠨᠡ ᠭᠤᠶᠠ ᠶ᠋ᠢ ᠨᠢ ᠬᠦᠢᠲᠡᠨ ᠲᠡᠮᠦᠷ ᠢ᠋ᠶ᠋ᠡᠷ ᠬᠠᠭᠠᠷᠢᠭᠰᠠᠨ ᠰᠢᠭ᠋ ᠪᠣᠯᠬᠤ ᠳ᠋ᠤ᠌᠂ ᠦᠰᠦᠲᠡᠢ ᠥᠮᠥᠳᠥ ᠪᠡᠨ ᠨᠣᠢᠲᠠᠨ ᠴᠠᠰᠤᠨ ᠳ᠋ᠤ᠌ ᠨᠢᠯᠴᠠᠢᠨ ᠨᠣᠷᠤᠭᠰᠠᠨ ᠢ᠋ ᠰᠠᠢ᠍ᠢ(ᠰᠠᠶᠢ) ᠮᠡᠳᠡᠵᠡᠢ᠃
ᠵᠠ᠂ ᠣᠳᠣ ᠡᠨᠡ ᠰᠢᠭᠤᠷᠭᠠ ᠡᠰᠡ ᠵᠣᠭᠰᠣᠪᠠᠯ᠂ ᠬᠣᠨᠢ ᠴᠤ᠌ ᠦᠬᠦᠵᠦ᠂ ᠪᠢ ᠴᠦ᠍ ᠦᠬᠦᠨᠡ ᠪᠠᠢᠬᠤ ᠭᠡᠵᠦ ᠪᠣᠳᠣᠭᠰᠠᠭᠠᠷ᠂ ᠵᠤᠵᠠᠭᠠᠨ ᠴᠠᠰᠤᠨ ᠳᠤᠮᠳᠠ᠂ ᠨᠣᠢᠲᠠᠨ ᠥᠮᠥᠳᠥᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠬᠠᠭᠠᠷᠢᠭᠤᠯᠤᠨ ᠬᠠᠭᠠᠷᠢᠭᠤᠯᠤᠨ᠂ ᠠᠷᠠᠢ ᠴᠢᠮᠠᠢ ᠭᠡᠵᠦ ᠬᠥᠳᠡᠯᠵᠦ ᠪᠠᠢᠯᠠ᠃ ᠦᠷ ᠦ᠋ᠨ ᠰᠥᠨᠢ ᠪᠡᠷ ᠬᠦᠢᠲᠡᠷᠡᠵᠦ᠂ ᠡᠪᠦᠭᠡᠨ ᠦ᠌ ᠨᠣᠢᠲᠠᠨ ᠦᠰᠦᠲᠡᠢ ᠥᠮᠥᠳᠥ ᠨᠢ ᠮᠣᠳᠣᠨ ᠥᠮᠥᠳᠥ ᠡᠮᠦᠰᠦᠭᠰᠡᠨ ᠰᠢᠭ᠂ ᠡᠪᠦᠳᠦᠭ ᠨᠢ ᠨᠤᠭᠤᠷᠠᠬᠤ ᠪᠠᠨ ᠪᠠᠢᠵᠠᠢ᠃ ᠲᠡᠭᠡ ᠲᠡᠭᠡᠭᠰᠡᠭᠡᠷ᠂ ᠰᠢᠭᠤᠷᠭᠠ ᠪᠠᠬᠠᠨ ᠨᠠᠮᠳᠠᠬᠤ ᠰᠢᠭ᠋ ᠪᠣᠯᠵᠤ ᠦᠷ ᠮᠠᠩᠬᠠᠢᠨ ᠴᠠᠢᠬᠤ ᠦᠶᠡᠰ ᠡᠪᠦᠭᠡᠨ ᠦ᠌ ᠠᠵᠢᠭᠯᠠᠪᠠᠰᠤ᠂ ᠭᠡᠷ ᠦ᠋ᠨ ᠪᠠᠷᠠ ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠬᠣᠶᠠᠷ ᠪᠣᠯᠳᠣᠭ ᠲᠤᠯᠤᠭᠠᠳ ᠮᠡᠲᠦ ᠦᠵᠡᠭᠳᠡᠵᠦ᠂ ᠡᠪᠦᠳᠦᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠤᠭᠤᠷᠠᠵᠤ ᠥᠭᠬᠦ ᠦᠭᠡᠢ ᠥᠮᠥᠳᠥ ᠲᠡᠢ ᠬᠥᠯ ᠢ᠋ᠶ᠋ᠡᠨ ᠳᠠᠭᠠᠭᠠᠵᠤ ᠶᠠᠳᠠᠨ ᠭᠡᠷ ᠲᠡᠭᠡᠨ( ᠲᠤ ᠪᠡᠨ) ᠳᠥᠭᠥᠬᠦ ᠭᠡᠵᠦ ᠥᠨᠥᠬᠢ ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠬᠣᠨᠢᠨ ᠤ᠋ ᠪᠠᠨ ᠵᠠᠬᠠ ᠪᠠᠷ ᠨᠢ ᠵᠤᠵᠠᠭᠠᠨ ᠴᠠᠰᠤᠨ ᠳᠤᠮᠳᠠᠭᠤᠷ ᠲᠣᠭᠣᠷᠢᠵᠤ᠂ ᠭᠡᠷ ᠲᠡᠭᠡᠨ( ᠲᠤ ᠪᠡᠨ) ᠬᠦᠷᠬᠦᠢᠴᠡ ᠪᠡᠨ ᠪᠣᠯᠤᠯᠠ᠃
ᠲᠡᠩᠬᠡᠭᠡ ᠲᠠᠮᠢᠷ ᠢ᠋ᠶ᠋ᠠᠨ ᠪᠠᠷᠠᠭᠰᠠᠨ ᠴᠡᠷᠡᠨ ᠲᠦᠷᠦᠭᠦᠬᠡᠨ ᠬᠦᠷᠴᠦ ᠢᠷᠡᠭᠡᠳ᠂ ᠨᠣᠢᠲᠠᠨ ᠬᠤᠪᠴᠠᠰᠤ ᠪᠠᠨ ᠰᠣᠯᠢᠵᠤ᠂ ᠭᠠᠯ ᠲᠦᠯᠡᠭᠡᠳ ᠴᠠᠢ ᠪᠠᠨ ᠴᠢᠨᠠᠵᠤ ᠰᠠᠭᠤᠬᠤ ᠠᠵᠢ᠃
ᠨᠥᠬᠥᠷ ᠢ᠋ᠶ᠋ᠡᠨ ᠳᠡᠷᠳᠡᠢᠵᠦ ᠬᠥᠯᠳᠡᠭᠰᠡᠨ ᠳᠡᠪᠡᠯ ᠲᠡᠢ᠂ ᠨᠤᠭᠤᠷᠠᠬᠤ ᠪᠠᠨ ᠪᠠᠢᠭᠰᠠᠨ ᠥᠮᠥᠳᠥ ᠲᠡᠢ᠂ ᠠᠷᠠᠢ ᠴᠢᠮᠠᠢ ᠭᠡᠵᠦ ᠣᠷᠣᠵᠤ ᠢᠷᠡᠬᠦ ᠶ᠋ᠢ ᠬᠠᠷᠠᠭᠠᠳ ᠬᠠᠭᠤᠷᠠᠢ ᠳᠤᠯᠠᠭᠠᠨ ᠦᠰᠦᠲᠡᠢ ᠥᠮᠥᠳᠥ᠂ ᠬᠠᠭᠤᠷᠠᠢ ᠣᠢᠮᠣᠰᠤ᠂ ᠳᠡᠪᠡᠯ ᠵᠡᠬᠡᠭᠡᠳ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠥᠭᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)ᠥᠪᠡᠷ ᠢ᠋ᠶ᠋ᠡᠨ ᠶᠠᠳᠠᠷᠠᠭᠰᠠᠨ ᠮᠥᠷᠲᠡᠭᠡᠨ ᠢᠩᠭᠢᠵᠦ ᠬᠣᠢᠨᠠ ᠠ᠋ᠴᠠ ᠨᠢ ᠰᠢᠨᠠᠭᠠ ᠵᠣᠪᠠᠵᠤ᠂ ᠳᠤᠯᠠᠭᠠᠨ ᠳᠡᠪᠡᠯ ᠬᠤᠪᠴᠠᠰᠤ ᠪᠡᠯᠡᠳᠦᠭᠰᠡᠨ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠡᠪᠦᠭᠡᠨ ᠳᠣᠲᠣᠷᠠ ᠪᠠᠨ ᠶᠡᠬᠡᠯᠡ( ᠶᠡᠬᠡ ᠯᠡ)ᠪᠠᠶᠠᠷᠯᠠᠵᠤ᠂ ᠥᠨᠥᠬᠢ ᠳᠡᠪᠡᠯ ᠬᠤᠪᠴᠠᠰᠤ ᠶ᠋ᠢ ᠨᠢ ᠠᠪᠤᠭᠠᠳ᠂ ᠶᠠᠭᠠᠷᠠᠨ ᠡᠮᠦᠰᠴᠦ ᠬᠡᠳᠦᠨ ᠦᠭᠡ ᠬᠡᠯᠡᠯᠴᠡᠵᠦ ᠬᠣᠢᠮᠣᠷ ᠲᠠᠭᠠᠨ( ᠲᠤ ᠪᠠᠨ) ᠰᠠᠭᠤᠳᠠᠭ ᠪᠠᠶ᠋ᠢᠷᠢᠨ ᠳ᠋ᠠᠭᠠᠨ( ᠳᠤ ᠪᠠᠨ) ᠶᠡᠬᠡᠯᠡ(ᠶᠡᠬᠡ ᠯᠡ) ᠠᠮᠠᠷᠠᠵᠤ ᠵᠢᠷᠭᠠᠭᠰᠠᠨ ᠪᠠᠶ᠋ᠢᠳᠠᠯ ᠲᠠᠢ ᠰᠠᠭᠤᠯᠠ᠃ ᠲᠡᠷᠡ ᠡᠪᠦᠯᠵᠢᠶᠡ ᠶᠢᠨ ᠬᠢᠨ ᠬᠠᠯᠠᠭᠤᠨ ᠰᠠᠶ᠋ᠢᠬᠠᠨ ᠴᠠᠢ ᠤᠤᠭᠤᠵᠤ᠂ ᠲᠦᠷ ᠠᠮᠤᠰᠬᠢᠨ ᠳᠣᠲᠣᠷᠠ ᠲᠠᠯᠪᠢᠭᠤᠨ ᠪᠣᠯᠤᠭᠠᠳ ᠳᠠᠬᠢᠨ ᠭᠠᠳᠠᠭᠠ ᠭᠠᠷᠴᠤ᠂ ᠥᠨᠥᠬᠢ ᠴᠠᠰᠤᠨ ᠳᠤ ᠳᠠᠷᠤᠭᠳᠠᠭᠰᠠᠨ ᠬᠣᠨᠢ ᠪᠠᠨ ᠤᠬᠤᠵᠤ᠂ ᠨᠢᠳᠦ ᠠᠮᠠ᠂ ᠰᠢᠭᠢᠷᠠ ᠲᠤᠭᠤᠷᠠᠢ ᠶᠢᠨ ᠬᠢᠨᠢ ᠴᠠᠰᠤ ᠮᠥᠰᠥ ᠶᠢ ᠠᠷᠢᠯᠭᠠᠵᠤ ᠨᠣᠴᠣᠯᠳᠤᠭᠰᠠᠭᠠᠷ ᠨᠠᠷᠠ ᠭᠠᠷᠤᠯᠠ᠃ ᠴᠠᠰᠤᠨ ᠳᠣᠣᠷᠠ ᠠᠴᠠ ᠤᠬᠤ ᠤᠬᠤᠭᠰᠠᠭᠠᠷ ᠬᠣᠨᠢᠨ ᠤ ᠪᠠᠨ ᠶᠡᠬᠡ ᠲᠥᠯᠥᠪ ᠢ ᠤᠬᠤᠵᠤ ᠭᠠᠷᠭᠠᠭᠠᠳ᠂ ᠰᠢᠷᠴᠢᠨ᠂ ᠴᠡᠷᠡᠨ ᠳ᠋ᠡᠭᠡᠨ( ᠳᠦ ᠪᠡᠨ)᠄
— ᠠᠳᠢᠶᠠ ᠪᠢᠳᠡ ᠬᠣᠶᠠᠷ ᠦᠯᠡᠳᠡᠭᠰᠡᠨ ᠭᠠᠭᠴᠠ ᠨᠢᠭᠡ ᠬᠣᠨᠢ ᠪᠠᠨ ᠤᠬᠤᠵᠤ ᠪᠠᠶ᠋ᠢᠶᠠ᠃ ᠲᠠ ᠨᠠᠷ ᠮᠠᠯ ᠢᠶᠠᠨ ᠪᠡᠯᠴᠢᠭᠡᠵᠦ ᠦᠵᠡ᠃ ᠤᠷᠢᠳ ᠢᠶᠠᠷ ᠲᠡᠮᠡᠭᠡ᠂ ᠦᠬᠡᠷ ᠢᠶᠡᠨ ᠶᠠᠪᠤᠭᠤᠯᠵᠤ᠂ ᠬᠣᠶ᠋ᠢᠨᠠ ᠠᠴᠠ ᠨᠢ ᠬᠣᠨᠢ ᠪᠠᠨ ᠪᠡᠯᠴᠢᠭᠡᠪᠡᠯ ᠳᠡᠭᠡᠷᠡ ᠪᠢᠵᠡ ᠭᠡᠵᠦ᠂ ᠲᠡᠷᠡ ᠬᠣᠲᠠ ᠠᠶ᠋ᠢᠯ ᠤᠨ ᠬᠢᠨ ᠮᠠᠯ ᠳ᠋ᠠᠭᠠᠨ( ᠳᠤ ᠪᠠᠨ) ᠭᠠᠷᠬᠤ ᠨᠢ ᠭᠠᠷᠴᠤ᠂ ᠭᠠᠭᠴᠠ ᠨᠢᠭᠡᠨ ᠬᠣᠨᠢ ᠪᠠᠨ ᠴᠠᠰᠤᠨ ᠳᠣᠣᠷᠠ ᠠᠴᠠ ᠤᠬᠤᠬᠤ ᠨᠢ ᠤᠬᠤᠵᠤ ᠪᠢᠯᠡ᠃
ᠲᠡᠷᠡ ᠰᠢᠭᠤᠷᠭᠠᠨ ᠳᠤ ᠨᠣᠴᠣᠯᠳᠤᠬᠤ ᠶᠢᠨ ᠬᠦᠴᠦ ᠪᠡᠷ ᠮᠠᠯ ᠢᠶᠠᠨ ᠣᠭᠲᠣ ᠭᠠᠷᠤᠵᠠᠳᠠᠭᠰᠠᠨ ᠦᠭᠡᠢ ᠪᠦᠲᠦᠨ ᠭᠠᠷᠴᠠᠢ᠃ ᠭᠠᠭᠴᠠ ᠬᠦ᠌ ᠰᠢᠷᠴᠢᠨ ᠦ ᠬᠥᠯ ᠤᠨ ᠰᠢᠷᠪᠥᠰᠥ ᠲᠠᠲᠠᠵᠤ᠂ ᠥᠨᠥᠬᠢ ᠰᠢᠭᠤᠷᠭᠠᠲᠤ ᠰᠥᠨᠢ ᠶᠢᠨ ᠲᠤᠷᠰᠢ ᠪᠦᠰᠡ ᠪᠡᠷ ᠢᠶᠡᠨ ᠲᠠᠲᠠᠭᠤᠯᠤᠭᠰᠠᠨ ᠴᠠᠰᠤᠨ ᠳᠤᠮᠳᠠᠭᠤᠷ ᠨᠣᠶ᠋ᠢᠲᠠᠨ ᠦᠰᠦᠲᠡᠢ ᠥᠮᠥᠳᠦᠨ ᠳᠦ ᠬᠠᠭᠠᠷᠢᠭᠤᠯᠵᠤ ᠶᠠᠪᠤᠭᠰᠠᠨ ᠤ ᠭᠡᠮ ᠤᠷᠰᠢᠭ ᠨᠢ ᠴᠤᠬᠤᠶ᠋ᠢᠵᠠᠢ᠃ ᠲᠡᠭᠦᠨ ᠡᠴᠡ ᠪᠣᠯᠵᠤ ᠬᠣᠰᠢᠶᠠᠳ ᠡᠳᠦᠷ ᠬᠡᠪᠲᠡᠭᠡᠳ᠂ ᠵᠢᠭᠠᠯ ᠭᠠᠶ᠋ᠢᠭᠤᠢ ᠪᠣᠯᠬᠤ ᠳ᠋ᠤᠨᠢ( ᠳᠤ ᠨᠢ) ᠬᠣᠨᠢᠨ ᠳ᠋ᠠᠭᠠᠨ( ᠳᠤ ᠪᠠᠨ) ᠭᠠᠷᠴᠤ᠂ ᠭᠡᠷ ᠡᠴᠡ ᠪᠡᠨ ᠨᠢᠭᠡ ᠶᠡᠬᠡ ᠬᠣᠯᠠᠳᠠᠭᠠ ᠦᠭᠡᠢ ᠶᠠᠪᠤᠲᠠᠯᠠ ᠨᠢ ᠨᠢᠭᠡ ᠮᠣᠷᠢ ᠲᠠᠢ ᠬᠥᠮᠦᠨ ᠥᠭᠡᠳᠡ ᠡᠴᠡ ᠨᠢ ᠠᠶ᠋ᠢᠰᠤᠢ᠃ ᠮᠠᠨ ᠤ ᠰᠤᠮᠤ ᠶᠢᠨ ᠵᠠᠬᠢᠷᠭᠠᠨ ᠤ ᠲᠠᠬᠠᠷ ᠭᠡᠵᠦ ᠲᠠᠨᠢᠭᠠᠳ᠂ ᠵᠠ᠂ ᠨᠠᠳᠠ ᠲᠠᠢ ᠯᠠ ᠬᠡᠷᠡᠭ ᠲᠡᠢ ᠶᠠᠪᠤᠵᠤ ᠶᠠᠪᠤᠭᠠ ᠰᠢᠨᠵᠢᠲᠡᠢ ᠬᠥᠮᠦᠨ ᠪᠠᠶ᠋ᠢᠨᠠ ᠳ᠋ᠠ᠂ ᠶᠠᠮᠠᠷ ᠬᠡᠷᠡᠭ ᠭᠠᠷᠴᠤ ᠲᠠᠬᠠᠷ ᠢᠶᠠᠨ ᠶᠠᠪᠤᠭᠤᠯᠳᠠᠭ ᠪᠢᠯᠡ? ᠨᠠᠮᠠᠶ᠋ᠢ(ᠨᠠᠮᠠ ᠶ᠋ᠢ)ᠬᠣᠲᠠ ᠳᠤ ᠪᠣᠯᠬᠤ ᠣᠯᠠᠩᠬᠢ ᠰᠠᠶ᠋ᠢᠨ ᠮᠠᠯᠴᠢᠨ ᠤ ᠬᠤᠷᠠᠯ ᠤᠨ ᠲᠥᠯᠥᠭᠡᠯᠡᠭᠴᠢ ᠪᠡᠷ ᠪᠠᠲᠤᠯᠠᠭᠰᠠᠨ ᠪᠢᠰᠢ ᠪᠠᠶ᠋ᠢᠭᠠ ᠳ᠋ᠠ? ᠭᠡᠵᠦ ᠪᠣᠳᠣᠭᠠᠳ ᠲᠡᠮᠡᠭᠡ ᠪᠡᠨ ᠲᠠᠬᠠᠷ ᠤᠨ ᠵᠦᠭ ᠵᠠᠯᠠᠵᠠᠢ᠃
— ᠵᠠ᠂ ᠭᠣᠮᠪᠣ ᠭᠤᠸᠠᠢ᠂ ᠰᠠᠶ᠋ᠢᠨ ᠶᠠᠪᠤᠵᠤ ᠪᠠᠶ᠋ᠢᠨᠠᠤ (ᠪᠠᠶ᠋ᠢᠨᠠ ᠤᠤ)? ᠬᠠᠮᠢᠭᠠ ᠬᠦᠷᠬᠦ ᠨᠢ ᠪᠤᠢ? ᠭᠡᠬᠦ ᠳᠤᠨᠢ ( ᠲᠤ ᠨᠢ)᠂
— ᠰᠠᠶ᠋ᠢᠨ ᠶᠠᠪᠤᠵᠤ ᠪᠠᠶ᠋ᠢᠨᠠ᠂ ᠬᠡᠷᠡᠭ ᠵᠣᠷᠢᠭ ᠲᠠᠨᠠᠶ᠋ᠢᠳᠤ(ᠲᠠᠨ ᠤ ᠳᠤ) ᠠ᠋᠃ ᠰᠢᠷᠠᠪ ᠭᠤᠸᠠᠢ ᠲᠠᠨ ᠢ ᠰᠤᠮᠤ ᠶᠢᠨ ᠵᠠᠬᠢᠷᠭᠠᠨ ᠳᠡᠭᠡᠷᠡ ᠶᠠᠭᠠᠷᠠᠪᠴᠢᠯᠠᠨ ᠬᠦᠷᠦᠭᠡᠳ ᠢᠷᠡᠨᠡ ᠦᠦ ᠭᠡᠵᠦ ᠵᠠᠬᠢᠵᠠᠢ ᠭᠡᠬᠦ ᠳ᠋ᠤᠨᠢ( ᠳᠦ ᠨᠢ)᠂
— ᠶᠠᠮᠠᠷ ᠬᠡᠷᠡᠭ ᠤᠨ ᠤᠴᠢᠷ ᠶᠤᠮ ᠪᠣᠯ ᠳ᠋ᠠ? ᠭᠡᠵᠦ ᠠᠰᠠᠭᠤᠲᠠᠯᠠ᠂
— ᠠ ᠪᠦᠦ ᠮᠡᠳᠡ᠂ ᠲᠠᠨ ᠢ ᠢᠷᠡᠭᠦᠯᠬᠦ ᠶᠤᠮ ᠰᠠᠨ ᠭᠡᠵᠦ ᠥᠴᠥᠭᠡᠳᠦᠷ ᠵᠠᠬᠢᠵᠤ ᠪᠠᠶ᠋ᠢᠬᠰᠠᠨ᠂ ᠲᠡᠭᠡᠭᠡᠳ ᠪᠢ ᠨᠠᠷᠠ ᠪᠢᠲᠡᠭᠦᠦ ᠪᠡᠷ ᠮᠣᠷᠳᠠᠯᠠ ᠰᠢᠦ ᠭᠡᠵᠡᠢ᠃
— ᠲᠡᠭᠡᠪᠡᠯ᠂ ᠭᠡᠷ ᠶ᠋ᠢᠡᠷ ᠢᠶᠡᠨ ᠳᠠᠭᠠᠷᠢᠭᠠᠳ ᠶᠠᠪᠤᠶᠠ ᠭᠡᠲᠡᠯᠡ ᠨᠢ᠂
— ᠴᠠᠭ ᠭᠠᠷᠤᠵᠠᠳᠠᠭᠠᠳ ᠶᠠᠭᠠᠬᠢᠬᠤ ᠨᠢ ᠪᠤᠢ? ᠡᠨᠳᠡ ᠡᠴᠡ ᠪᠡᠨ ᠯᠡ ᠲᠠ ᠶᠠᠪᠤ᠂ ᠤᠭ ᠨᠢ ᠶᠠᠭᠠᠷᠠᠯᠲᠠᠢ ᠬᠡᠷᠡᠭ ᠪᠠᠶ᠋ᠢᠬᠤ᠃ ᠬᠠᠷᠢᠨ᠂ ᠪᠢ ᠲᠠᠨᠠᠶ᠋ᠢᠬᠢ(ᠲᠠᠨ ᠤ ᠬᠢ )ᠪᠠᠷ ᠳᠠᠭᠠᠷᠢᠵᠤ ᠳᠤᠯᠠᠭᠠᠴᠠᠭᠠᠳ᠂ ᠲᠠᠨ ᠢ ᠰᠤᠮᠤᠨ ᠵᠠᠬᠢᠷᠭᠠ ᠣᠷᠣᠭᠰᠠᠨ ᠭᠡᠵᠦ ᠬᠡᠯᠡᠮ ᠵ᠋ᠠ ᠭᠡᠬᠦ ᠳ᠋ᠤᠨᠢ( ᠳᠦ ᠨᠢ)᠂ ᠰᠢᠷᠴᠢᠨ ᠶᠠᠮᠠᠷᠬᠠᠨ ᠬᠡᠷᠡᠭ ᠭᠠᠷᠴᠤ᠂ ᠢᠩᠭᠢᠵᠦ ᠳᠠᠭᠤᠳᠠᠭᠤᠯᠪᠠ? ᠭᠡᠵᠦ ᠳᠣᠲᠣᠷᠠ ᠪᠠᠨ ᠤᠴᠢᠷ ᠢ ᠨᠢ ᠣᠯᠵᠤ ᠶᠠᠳᠠᠭᠰᠠᠭᠠᠷ ᠰᠤᠮᠤ ᠤᠷᠤᠭᠤ ᠴᠢᠭᠯᠡᠲᠡᠯᠡ᠂ ᠲᠡᠳᠦᠬᠡᠨ ᠥᠨᠥᠬᠢ ᠭᠣᠮᠪᠣ ᠲᠠᠬᠠᠷ ᠬᠣᠶ᠋ᠢᠨᠠ ᠠᠴᠠ ᠨᠢ ᠭᠦᠢᠴᠡᠭᠡᠳ ᠢᠷᠡᠵᠡᠢ᠃
ᠶᠠᠮᠠᠷ ᠲᠤᠬᠠᠢ ᠳᠠᠭᠤᠳᠠᠭᠤᠯᠤᠭᠰᠠᠨ ᠤᠴᠢᠷ ᠢ ᠭᠣᠮᠪᠣ ᠠᠴᠠ ᠮᠡᠳᠡᠬᠦ ᠭᠡᠵᠦ ᠰᠢᠬᠠᠵᠤ ᠱᠠᠯᠠᠭᠰᠠᠭᠠᠷ᠂ ᠶᠡᠷᠦ ᠶᠠᠭᠤᠮᠠ ᠣᠯᠵᠤ ᠮᠡᠳᠡᠭᠰᠡᠨ ᠦᠭᠡᠢ᠂ ᠡᠪᠦᠭᠡᠨ ᠰᠢᠷᠠᠪ ᠭᠤᠸᠠᠢ᠂ ᠡᠷᠬᠡᠪᠰᠢ ᠨᠢᠭᠡ ᠯᠡ ᠴᠢᠬᠤᠯᠠ ᠬᠡᠷᠡᠭ ᠭᠠᠷᠤᠭᠰᠠᠨ ᠢᠶᠠᠷ ᠳᠠᠭᠤᠳᠠᠭᠤᠯᠵᠤ ᠳ᠋ᠠ ᠭᠡᠵᠦ ᠳᠡᠮᠡᠢ ᠯᠡ ᠭᠠᠶ᠋ᠢᠬᠠᠨ ᠪᠣᠳᠣᠵᠠᠢ᠃
ᠰᠤᠮᠤ ᠶᠢᠨ ᠵᠠᠬᠢᠷᠭᠠᠨ ᠳᠤ ᠬᠦᠷᠴᠦ ᠢᠷᠡᠪᠡᠯ᠂ ᠪᠤᠭᠤᠷᠤᠯ ᠰᠠᠬᠠᠯᠲᠤ ᠡᠪᠦᠭᠡᠨ ᠳᠠᠷᠤᠭᠠ᠂ ᠰᠢᠷᠴᠢᠨ ᠭᠣᠮᠪᠣ ᠬᠣᠶᠠᠷ ᠢ ᠬᠠᠷᠠᠭᠠᠳ᠂ ᠠᠮᠠ ᠪᠠᠨ ᠪᠠᠷᠢᠵᠤ ᠭᠣᠮᠪᠣ ᠶ᠋ᠢ᠄
— ᠴᠢ ᠶᠠᠭᠠᠬᠢᠬᠰᠠᠨ ᠬᠥᠮᠦᠨ ᠪᠤᠢ? ᠪᠢ ᠴᠢᠮᠠ ᠪᠠᠷ ᠰᠢᠷᠴᠢᠨ ᠭᠤᠸᠠᠢ ᠳᠤ ᠵᠠᠬᠢᠶᠠ ᠶᠠᠪᠤᠭᠤᠯᠬᠤ ᠭᠡᠵᠦ ᠪᠠᠶ᠋ᠢᠲᠠᠯᠠ᠂ ᠴᠢ ᠬᠠᠷᠢᠨ ᠦᠵᠡᠭᠳᠡᠵᠦ ᠬᠡᠯᠡᠯ ᠦᠭᠡᠢ ᠳᠠᠪᠬᠢᠳᠠᠭ ᠴᠢᠨᠢ ᠶᠠᠭᠤ ᠪᠢᠯᠡ? ᠭᠡᠵᠦ ᠵᠢᠮᠡᠯᠡᠵᠡᠢ᠃
— ᠪᠢ ᠲᠠᠨ ᠢ ᠵᠠᠬᠢᠶᠠ ᠵᠠᠨᠠᠭᠠ ᠥᠭᠬᠦ ᠶᠤᠮ ᠭᠡᠵᠦ ᠮᠡᠳᠡᠯ ᠦᠭᠡᠢ᠂ ᠥᠴᠥᠭᠡᠳᠦᠷ ᠣᠷᠣᠢ ᠲᠠᠨ ᠢ ᠰᠢᠷᠴᠢᠨ ᠭᠤᠸᠠᠢ ᠶᠢ ᠳᠠᠭᠤᠳᠠᠭᠤᠯᠬᠤ ᠶᠤᠮᠰᠠᠨ ᠭᠡᠬᠦᠯᠡᠷ ᠯᠡ᠂ ᠰᠡᠩᠳᠡᠨ ᠮᠡᠩᠳᠡᠨ ᠦᠷ ᠶ᠋ᠢᠡᠷ ᠳᠠᠪᠬᠢᠵᠤ᠂ ᠳᠠᠭᠤᠳᠠᠨ ᠢᠷᠡᠵᠦ ᠪᠠᠶ᠋ᠢᠭᠠ ᠮᠢᠨᠢ ᠡᠨᠡ ᠭᠡᠬᠦ ᠳ᠋ᠤᠨᠢ( ᠳᠤ ᠨᠢ) ᠰᠢᠷᠠᠪ ᠭᠤᠸᠠᠢ ᠢᠨᠢᠶᠡᠮᠰᠦᠭᠯᠡᠵᠦ᠄
— ᠪᠤᠰᠢᠭᠤ ᠲᠠᠤᠯᠠᠢ ᠪᠣᠷᠪᠢ ᠳᠠᠭᠠᠨ ᠪᠠᠭᠠᠰᠤ ᠲᠠᠢ ᠭᠡᠵᠦ ᠡᠶ᠋ᠢᠮᠦ ᠯᠡ ᠬᠥᠮᠦᠨ ᠢ ᠬᠡᠯᠡᠳᠡᠭ ᠪᠠᠶ᠋ᠢᠵᠤ ᠳ᠋ᠠ᠃ ᠵᠠ ᠶᠠᠭᠠᠬᠢᠶᠠ ᠭᠡᠬᠦ ᠪᠤᠢ᠂ ᠬᠡᠷᠡᠭ ᠨᠢᠭᠡᠨᠲᠡ ᠡᠶ᠋ᠢᠮᠦ ᠪᠣᠯᠵᠤ᠂ ᠪᠢ ᠬᠦᠯᠢᠴᠡᠯ ᠥᠴᠢᠭᠡᠳ᠂ ᠭᠣᠮᠪᠣ ᠪᠢᠳᠡ ᠬᠣᠶᠠᠷ ᠤᠨ ᠢᠩᠭᠢᠵᠦ ᠮᠣᠩᠭᠢᠨᠠᠵᠤ᠂ ᠲᠠᠨ ᠳᠤ ᠲᠦᠪᠡᠭ ᠲᠠᠲᠠᠭᠰᠠᠨ ᠤ ᠪᠤᠷᠤᠭᠤ ᠬᠦᠯᠢᠶᠡᠬᠦ ᠶᠢᠨ ᠢᠯᠳᠠᠷ ᠪᠠᠶᠠᠷ ᠤᠨ ᠮᠡᠳᠡᠭᠡ ᠤᠯᠠᠮᠵᠢᠯᠠᠶᠠ᠃ ᠤᠯᠤᠰ ᠤᠨ ᠰᠠᠶ᠋ᠢᠨ ᠮᠠᠯᠴᠢᠨ ᠤ ᠬᠤᠷᠠᠯ ᠳᠤ ᠰᠠᠭᠤᠬᠤ ᠰᠠᠶ᠋ᠢᠴᠤᠤᠯ ᠤᠨ ᠨᠡᠷᠡ ᠤᠰᠤ ᠵᠠᠰᠠᠭ ᠤᠨ ᠣᠷᠳᠣᠨ ᠳᠤ ᠪᠠᠲᠤᠯᠠᠵᠤ᠂ ᠲᠠᠨ ᠤ ᠪᠡᠶᠡ ᠬᠤᠷᠠᠯ ᠤᠨ ᠲᠥᠯᠥᠭᠡᠯᠡᠭᠴᠢ ᠪᠣᠯᠵᠠᠢ᠃ ᠣᠳᠣ ᠲᠠ ᠲᠥᠷᠥ ᠶᠢᠨ ᠡᠷᠡ᠂ ᠤᠯᠤᠰ ᠤᠨ ᠰᠠᠶ᠋ᠢᠨ ᠮᠠᠯᠴᠢᠨ ᠪᠣᠯᠤᠯᠠ᠃ ᠮᠠᠰᠢ ᠶᠡᠬᠡ ᠪᠠᠶᠠᠷ ᠬᠦᠷᠭᠡᠶᠡ ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠨ ᠶᠣᠰᠣ ᠬᠢᠭᠡᠳ᠂ ᠣᠯᠠᠨ ᠠᠶ᠋ᠢᠮᠠᠭ ᠤᠨ ᠮᠠᠯᠴᠢᠨ ᠰᠠᠶ᠋ᠢᠴᠤᠤᠯ ᠴᠣᠬᠣᠮ ᠶᠠᠭᠤ ᠶᠠᠭᠤ ᠬᠤᠷᠠᠯ ᠳᠡᠭᠡᠷᠡ ᠬᠡᠯᠡᠬᠦ ᠶᠢ ᠲᠠ ᠰᠠᠶ᠋ᠢᠨ ᠠᠩᠵᠠᠭᠠᠷᠠᠵᠤ᠂ ᠪᠢᠳᠡᠨ ᠳᠡᠭᠡᠨ ᠢᠷᠡᠭᠰᠡᠨ ᠬᠣᠶ᠋ᠢᠨᠠ ᠪᠠᠨ ᠬᠡᠯᠡᠵᠦ ᠥᠭᠭᠦᠨᠡ ᠰᠢᠦ ᠳ᠋ᠠ᠂ ᠥᠪᠡᠷ ᠢᠶᠡᠨ ᠴᠦ᠍ ᠪᠠᠰᠠ ᠬᠤᠷᠠᠯ ᠳᠡᠭᠡᠷᠡ ᠦᠭᠡ ᠬᠡᠯᠡᠵᠦ᠂ ᠲᠤᠷᠰᠢᠯᠭᠠ ᠪᠠᠨ ᠲᠦᠮᠡᠨ ᠳᠦ ᠳᠡᠯᠭᠡᠷᠡᠭᠦᠯᠬᠦ ᠶᠢ ᠬᠡᠯᠡᠭᠡᠳ ᠶᠠᠭᠠᠬᠢᠮ᠃ ᠪᠣᠳᠣᠪᠠᠰᠤ ᠬᠡᠯᠡᠬᠦ ᠶᠠᠭᠤᠮᠠ ᠴᠤ᠌ ᠴᠡᠭᠡᠵᠢᠨ ᠡᠴᠡ ᠲᠠᠨᠢ ᠬᠠᠰᠠᠭ ᠲᠡᠷᠭᠡ ᠪᠡᠷ ᠭᠠᠷᠬᠤ ᠶᠤᠮ ᠪᠠᠶ᠋ᠢᠯ ᠦᠭᠡᠢ ᠳ᠋ᠡ ᠭᠡᠬᠦ ᠳ᠋ᠤᠨᠢ( ᠳᠤ ᠨᠢ) ᠰᠢᠷᠴᠢᠨ ᠲᠡᠷᠡ ᠪᠠᠶᠠᠷ ᠤᠨ ᠮᠡᠳᠡᠭᠡ ᠰᠣᠨᠣᠰᠴᠤ ᠰᠡᠳᠬᠢᠯ ᠬᠥᠳᠡᠯᠵᠦ᠂ ᠶᠠᠭᠠᠷᠠᠨ ᠡᠪᠦᠭᠡᠨ ᠳᠠᠷᠤᠭᠠ ᠲᠠᠢ ᠰᠠᠯᠬᠤ ᠶᠣᠰᠣ ᠬᠢᠭᠡᠳ᠂ ᠬᠤᠷᠳᠤᠨ ᠠᠲᠠᠨ ᠤ ᠪᠠᠨ ᠵᠦᠭ ᠬᠥᠯ ᠬᠥᠩᠭᠡᠨ ᠪᠣᠯᠵᠤ ᠭᠦᠶᠦᠨ ᠣᠳᠪᠠ᠃
ᠦᠳᠡᠰᠢ ᠶᠢᠨ ᠪᠦᠷᠦᠢ ᠪᠡᠷ ᠭᠡᠷ ᠲᠡᠭᠡᠨ( ᠲᠤ ᠪᠡᠨ) ᠬᠦᠷᠴᠦ ᠢᠷᠡᠬᠦ ᠳ᠋ᠤᠨᠢ( ᠳᠤ ᠨᠢ) ᠡᠮᠡᠭᠲᠡᠶ᠋ᠢᠴᠦᠳ ᠦᠨᠢᠶᠡ ᠪᠡᠨ ᠰᠠᠭᠠᠵᠤ ᠪᠠᠶ᠋ᠢᠬᠰᠠᠨ ᠶ᠋ᠢᠠᠨ᠂ ᠰᠢᠷᠴᠢᠨ ᠢ ᠶᠠᠭᠠᠷᠠᠨ ᠤᠭᠲᠤᠵᠤ᠂ ᠴᠡᠷᠡᠨ ᠨᠥᠬᠥᠷ ᠢᠶᠡᠨ ᠭᠡᠨᠡᠳᠲᠡ ᠠᠯᠪᠠᠨ ᠭᠠᠵᠠᠷ ᠠᠴᠠ ᠳᠠᠭᠤᠳᠠᠭᠰᠠᠨ ᠳᠤ᠂ ᠶᠠᠮᠠᠷ ᠬᠡᠷᠡᠭ ᠭᠠᠷᠤᠭᠰᠠᠨ ᠶᠤᠮ ᠪᠣᠯ ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠢᠲᠡᠭᠦᠦ ᠵᠣᠪᠠᠵᠤ ᠪᠠᠶ᠋ᠢᠬᠰᠠᠨ ᠶ᠋ᠢᠠᠨ᠂ ᠮᠠᠩᠨᠠᠢ ᠨᠢ ᠲᠡᠨᠢᠢᠵᠦ ᠢᠷᠡᠭᠰᠡᠨ ᠨᠥᠬᠥᠷ ᠢᠶᠡᠨ ᠬᠠᠷᠠᠭᠠᠳ ᠳᠣᠲᠣᠷᠠ ᠨᠢ ᠣᠩᠭᠣᠶ᠋ᠢᠵᠠᠢ᠃
— ᠨᠠᠮᠠᠶ᠋ᠢ ᠪᠠᠭᠠᠲᠤᠷ ᠬᠣᠲᠠᠨ ᠳ᠋ᠤ᠌ ᠲᠥᠯᠥᠭᠡᠯᠡᠭᠴᠢ ᠪᠡᠷ ᠶᠠᠪᠤᠭᠤᠯᠬᠤ ᠪᠣᠯᠤᠯᠠ! ᠤᠯᠤᠰ ᠤ᠋ᠨ ᠰᠠᠢᠨ ᠮᠠᠯᠴᠢᠨ ᠤ᠋ ᠬᠤᠷᠠᠯ ᠳ᠋ᠤ᠌! ᠭᠡᠵᠦ ᠬᠡᠯᠡᠭᠡᠳ ᠡᠪᠦᠭᠡᠨ᠂ ᠵᠠᠯᠠᠭᠤ ᠶ᠋ᠢᠨ ᠢ᠋ᠶ᠋ᠡᠨ ᠴᠠᠭ ᠲᠠᠢ ᠠᠳᠠᠯᠢ ᠬᠥᠩᠭᠡᠨ ᠭᠠᠪᠰᠢᠭᠠᠢ ᠪᠠᠷ ᠥᠨᠳᠥᠷ ᠴᠢᠭᠢᠷᠠᠭ ᠠᠲᠠᠨ ᠲᠡᠮᠡᠭᠡᠨ ᠦ᠌ ᠨᠢᠷᠤᠭᠤᠨ ᠳᠡᠭᠡᠷᠡ ᠡᠴᠡ ᠭᠤᠯᠭᠤᠵᠤ ᠪᠠᠭᠤᠭᠠᠳ᠂ ᠪᠢ ᠣᠳᠣ ᠤᠯᠤᠰ ᠤ᠋ᠨ ᠰᠠᠢᠨ ᠮᠠᠯᠴᠢᠨ ᠪᠣᠯᠴᠢᠬᠠᠯᠠ! ᠭᠡᠬᠦ ᠳ᠋ᠦ᠍ᠨᠢ᠂ ᠡᠮᠡᠭᠲᠡᠢᠴᠦᠳ ᠪᠠᠶᠠᠷᠯᠠᠨ ᠳᠤᠤᠭᠠᠷᠴᠠᠭᠠᠵᠤ᠂ ᠰᠢᠷᠴᠢᠨ ᠳ᠋ᠦ᠍ ᠪᠠᠶᠠᠷ ᠬᠦᠷᠭᠡᠵᠢ᠃ ᠴᠠᠷᠠᠨ ᠨᠥᠬᠥᠷ ᠡᠴᠡ ᠪᠡᠨ᠄
— ᠬᠤᠷᠠᠯ ᠳ᠋ᠤ᠌ ᠶᠠᠪᠤᠭᠤᠯᠬᠤ ᠭᠡᠵᠦ ᠪᠠᠢᠭᠠ ᠶ᠋ᠢ ᠤᠷᠢᠳᠤ ᠨᠢ ᠨᠠᠳᠠᠳᠤ ᠬᠡᠯᠡᠬᠦ ᠶ᠋ᠢ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠢᠯᠡ? ᠪᠢ ᠪᠠᠰᠠ ᠶᠠᠭᠤᠮᠠ ᠬᠡᠦᠮᠡ ᠪᠡᠯᠡᠳᠴᠦ ᠪᠠᠢᠬᠤ ᠶᠤᠮᠰᠠᠨ᠃ ᠬᠤᠷᠠᠯ ᠳ᠋ᠤ᠌ ᠶᠠᠪᠤᠬᠤ ᠪᠠᠨ ᠮᠡᠳᠡᠭᠡ ᠦᠭᠡᠢ ᠶᠦᠮ ᠤᠤ ᠲᠠ? ᠭᠡᠵᠡᠢ᠃
— ᠮᠡᠳᠡᠬᠦ ᠶ᠋ᠢ ᠴᠦ᠍ ᠮᠡᠳᠡᠵᠦ ᠪᠠᠢᠭᠰᠠᠨ ᠯᠠ ᠳᠠ᠃ ᠭᠠᠭᠴᠠᠬᠠᠨ ᠬᠠᠮᠢᠭᠠ ᠠ᠋ᠴᠠ ᠨᠠᠮᠠᠶ᠋ᠢ ᠲᠡᠭᠡᠨᠡ ᠭᠡᠵᠦ ᠳᠡ ᠭᠡᠳ ᠪᠠᠬᠠᠨ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠭᠰᠠᠨ ᠶᠤᠮ ᠳᠠ ᠭᠡᠬᠦ ᠳ᠋ᠦ᠍ᠨᠢ᠂
— ᠬᠡᠵᠢᠶᠡ ᠶᠠᠪᠤᠬᠤ ᠶᠤᠮ ᠪᠣᠢ᠂ ᠲᠡᠭᠡᠭᠡᠳ? ᠭᠡᠪᠡᠯ᠂
— ᠮᠠᠷᠭᠠᠰᠢ! ᠭᠡᠵᠢ᠃
— ᠮᠠᠷᠭᠠᠰᠢ? ᠦᠭᠡᠢ ᠡᠨᠡ ᠴᠢᠨᠢ᠂ ᠡᠮᠦᠰᠬᠦ ᠬᠤᠪᠴᠠᠰᠤ ᠬᠤᠨᠠᠷ ᠦᠭᠡᠢ ᠶᠠᠭᠠᠬᠢᠵᠤ ᠶᠠᠪᠤᠳᠠᠭ ᠶᠤᠮ ᠪᠢᠯᠡ ᠳᠠ? ᠶᠠᠮᠠᠷ᠂ ᠬᠣᠨᠢ ᠬᠠᠷᠢᠭᠤᠯᠬᠤ ᠭᠡᠵᠦ ᠮᠣᠷᠳᠠᠬᠤ ᠶᠤᠮ ᠪᠢᠰᠢ᠂ ᠤᠯᠤᠰ ᠤ᠋ᠨ ᠰᠠᠢᠨ ᠮᠠᠯᠴᠢᠨ ᠤ᠋ ᠬᠤᠷᠠᠯ ᠳ᠋ᠤ᠌ ᠰᠠᠭᠤᠯᠴᠠᠬᠤ ᠪᠠᠷ ᠮᠣᠷᠳᠠᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠪᠢᠰᠢᠦ? ᠶᠠᠭᠠᠬᠢᠳᠠᠭ ᠪᠢᠯᠡ? ᠭᠡᠵᠦ ᠴᠠᠷᠠᠨ ᠤ᠋ ᠰᠠᠭᠠᠭᠠ ᠵᠣᠪᠠᠵᠤ ᠰᠠᠨᠳᠤᠷᠲᠠᠯᠠ ᠠᠳᠢᠶᠠ᠄
— ᠪᠢᠳᠡ ᠰᠥᠨᠢᠵᠢᠨ ᠰᠠᠭᠤᠯᠴᠠᠵᠤ᠂ ᠡᠮᠦᠰᠬᠦ ᠰᠢᠨᠡ ᠳᠡᠪᠡᠯ ᠣᠶᠣᠵᠤ ᠥᠭᠭᠦᠶᠡ ᠭᠡᠵᠦ ᠰᠠᠨᠠᠯ ᠭᠠᠷᠭᠠᠵᠠᠢ᠃
ᠣᠷᠣᠢ᠂ ᠬᠣᠭᠣᠯᠠᠨ ᠤ᠋ ᠰᠡᠭᠦᠯᠡᠷ ᠡᠮᠡᠭᠲᠡᠢᠴᠦᠳ ᠳ᠋ᠧᠩ ᠪᠠᠷᠢᠵᠤ᠂ ᠳᠡᠪᠡᠯ ᠡᠰᠬᠡᠵᠦ ᠭᠠᠷᠤᠯᠠ᠃ ᠰᠢᠷᠴᠢᠨ ᠬᠣᠲᠠ ᠣᠷᠣᠨᠠ ᠭᠡᠵᠦ ᠪᠠᠶᠠᠷᠯᠠᠭᠰᠠᠨ ᠳ᠋ᠠᠭᠠᠨ ᠨᠣᠢᠷ ᠬᠦᠷᠴᠦ ᠥᠭᠭᠦᠭᠰᠡᠨ ᠦᠭᠡᠢ᠂ ᠰᠥᠨᠢᠵᠢᠨ ᠢ᠋ᠶ᠋ᠡᠨ ᠤᠷᠪᠠᠵᠤ ᠬᠥᠷᠪᠡᠭᠰᠡᠭᠡᠷ ᠥᠷᠯᠥᠭᠡ ᠪᠣᠯᠭᠠᠵᠤ ᠪᠢᠯᠡ᠃
ᠦᠷ ᠢ᠋ᠶ᠋ᠡᠷ ᠲᠡᠷᠡ ᠬᠡᠳᠦᠨ ᠦᠢᠯᠡᠴᠢ ᠡᠮᠡᠭᠲᠡᠢᠴᠦᠳ ᠰᠢᠨᠡ ᠳᠡᠪᠡᠯ ᠢ᠋ ᠨᠢ ᠭᠦᠢᠴᠡᠭᠡᠭᠡᠳ᠂ ᠴᠠᠷᠠᠨ ᠠᠪᠳᠠᠷᠠ ᠶ᠋ᠢᠨ ᠢ᠋ᠶ᠋ᠡᠨ ᠢᠷᠣᠭᠠᠷ ᠠᠴᠠ ᠯᠸᠨᠢᠨᠮᠠ ᠶ᠋ᠢᠨ ᠳᠠᠬᠤ ᠶ᠋ᠢ ᠠᠪᠬᠤ ᠳ᠋ᠤ᠌ ᠡᠪᠦᠭᠡᠨ ᠳᠠᠷᠬᠠᠨ ᠶᠡᠷᠡᠨᠲᠡᠢ ᠶ᠋ᠢᠨ ᠪᠡᠯᠡᠭᠯᠡᠭᠰᠡᠨ ᠲᠠᠯᠪᠢᠮᠠᠯ ᠮᠥᠩᠭᠥᠨ ᠲᠣᠪᠴᠢ ᠭᠠᠷᠭᠠᠵᠤ᠂ ᠰᠢᠷᠴᠢᠨ ᠦ᠌ ᠰᠢᠨᠡ ᠳᠡᠪᠡᠯ ᠳ᠋ᠦ᠍ ᠬᠠᠳᠠᠵᠠᠢ᠃
ᠨᠠᠷᠠᠨ ᠢ᠋ᠶ᠋ᠠᠷ ᠰᠢᠷᠴᠢᠨ ᠴᠠᠢ ᠪᠠᠨ ᠤᠤᠭᠤᠭᠠᠳ᠂ ᠠᠯᠤᠰ ᠤ᠋ᠨ ᠵᠠᠮ ᠳ᠋ᠤ᠌ ᠮᠣᠷᠳᠠᠬᠤ ᠭᠡᠵᠦ ᠬᠤᠪᠴᠠᠰᠤᠯᠠᠵᠤ ᠭᠠᠷᠤᠯᠠ᠃ ᠬᠠᠷᠠ ᠬᠡᠯᠢᠩ ᠬᠢᠶᠠᠵᠠ ᠲᠠᠢ ᠰᠡᠭᠰᠡᠭᠡᠷ ᠳᠤᠯᠠᠭᠠᠬᠠᠨ ᠦᠰᠦᠲᠡᠢ᠂ ᠠᠷᠭᠠᠯ ᠤ᠋ᠨ ᠤᠲᠤᠭᠠ ᠶ᠋ᠢᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠭᠣᠶᠣ ᠰᠢᠨᠡ ᠳᠡᠪᠡᠯ ᠢ᠋ᠶ᠋ᠡᠨ ᠡᠮᠦᠰᠦᠭᠡᠳ᠂ ᠴᠠᠭᠠᠨ ᠰᠠᠷᠠ ᠪᠠᠶᠠᠷ ᠨᠠᠭᠠᠳᠤᠮ ᠢ᠋ᠶ᠋ᠠᠷ ᠡᠮᠦᠰᠳᠡᠭ ᠤᠭᠠᠯᠵᠠᠲᠠᠢ᠂ ᠵᠠᠩᠵᠢᠬᠦᠦ ᠬᠢᠴᠡᠲᠡᠢ ᠭᠤᠲᠤᠯ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠡᠮᠦᠰᠦᠯᠡ᠃ ᠡᠬᠡᠨᠡᠷ ᠨᠢ ᠬᠥᠬᠡ ᠲᠣᠷᠭᠠᠨ ᠣᠷᠣᠢ ᠲᠠᠢ ᠦᠨᠡᠭᠡᠨ ᠮᠠᠯᠠᠭᠠᠢ᠂ ᠭᠣᠶᠣᠯ ᠤ᠋ᠨ ᠴᠢᠨᠣᠠ ᠶ᠋ᠢᠨ ᠳᠠᠬᠤ ᠶ᠋ᠢ ᠨᠢ ᠭᠠᠷᠭᠠᠵᠤ ᠡᠮᠦᠰᠦᠭᠦᠯᠵᠡᠢ᠃
ᠭᠡᠷᠭᠡᠢ᠂ ᠠᠢᠯ ᠠᠬᠠ ᠳᠡᠭᠦᠦ ᠲᠡᠢ ᠪᠡᠨ ᠰᠠᠯᠬᠤ ᠶᠣᠰᠣ ᠬᠢᠭᠡᠳ᠂ ᠰᠢᠷᠴᠢᠨ ᠬᠠᠢᠷᠠᠲᠠᠢ ᠡᠨᠳᠡ ᠪᠡᠨ ᠰᠥᠭᠦᠳᠦᠭᠦᠯᠵᠦ᠂ ᠠᠯᠢ ᠬᠡᠳᠦᠢᠨ ᠬᠣᠪᠲᠣ ᠬᠣᠲᠠ ᠶ᠋ᠢ ᠪᠠᠢᠯᠳᠤᠬᠤ ᠦᠶᠡ ᠶ᠋ᠢᠨ ᠭᠣᠶᠣᠯ ᠤ᠋ᠨ ᠢ᠋ᠶ᠋ᠠᠨ ᠬᠡᠪᠢᠰᠦᠨ ᠰᠤᠮᠠᠯ ᠪᠣᠭᠴᠣ ᠲᠣᠬᠣᠰᠢᠨ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠭᠠᠳ ᠲᠡᠮᠡᠭᠡᠨ ᠳ᠋ᠡᠭᠡᠨ ᠮᠣᠷᠳᠠᠵᠠᠢ᠃ ᠠᠷᠤ ᠮᠣᠩᠭᠣᠯ ᠤ᠋ᠨ ᠵᠠᠭᠠᠨ ᠪᠣᠯᠤᠭᠰᠠᠨ ᠠᠪᠤᠷᠭᠤ ᠲᠣᠮᠣ ᠡᠨᠳᠡ ᠨᠢ ᠡᠵᠡᠨ ᠦ᠌ ᠪᠡᠨ ᠭᠠᠷ ᠤ᠋ᠨ ᠠᠶᠠ ᠳᠠᠭᠠᠵᠤ᠂ ᠮᠠᠰᠢ ᠲᠤᠭᠤᠯᠪᠤᠷᠢᠲᠡᠢ ᠪᠡᠷ ᠪᠣᠰᠴᠤ᠂ ᠰᠢᠷᠴᠢᠨ ᠢ᠋ ᠠᠯᠤᠰ ᠤ᠋ᠨ ᠵᠠᠮ ᠳ᠋ᠤ᠌ ᠵᠦᠢᠳᠡᠯᠡ᠂ ᠴᠷᠴᠠᠨ ᠬᠣᠢᠨᠠ ᠠ᠋ᠴᠠ ᠨᠢ ᠢᠷᠥᠭᠡᠵᠦ ᠰᠦ ᠡᠷᠭᠦᠭᠡᠳ ᠪᠠᠷᠠ ᠶ᠋ᠢ ᠨᠢ ᠤᠳᠠᠲᠠᠯᠠ ᠬᠠᠷᠠᠭᠰᠠᠭᠠᠷ ᠵᠣᠭᠰᠣᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠶ᠋ᠢᠭᠣᠷᠵᠢᠨ· ᠣᠳᠬᠣᠨᠪᠠᠪᠠ᠂ ᠴᠤᠯᠮᠤᠨᠭᠡᠷᠡᠯ᠂ ᠪᠠᠯ᠂ ᠰᠠᠷᠠᠨᠲᠤᠶᠠᠭᠠ᠂ ᠪᠠᠳᠮᠠᠰᠡᠴᠡᠨ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠴᠤᠯᠮᠤᠨᠭᠡᠷᠡᠯ᠂ ᠤᠢᠭᠤᠷᠵᠢᠨ· ᠣᠳᠬᠣᠨᠪᠠᠪᠠ᠂ ᠴᠡᠩᠬᠡᠯᠴᠡᠴᠡᠭ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ