ᠦᠷ ᠦᠨ ᠲᠤᠶᠠᠭᠠ III – ᠪ᠂ ᠷᠢᠨᠴᠢᠨ - ᠭᠤᠷᠪᠠᠳᠤᠭᠠᠷ ᠲᠡᠪᠲᠡᠷ <ᠪᠠᠢᠯᠳᠤᠵᠤ ᠣᠯᠣᠭᠰᠠᠨ ᠡᠬᠡ ᠣᠷᠣᠨ>- ᠬᠣᠷᠢᠨ ᠨᠢᠭᠡ Үүрийн туяа III – Б ᠂ Ренчин Гуравдугаар дэвтэр "Баялдаж олсон эх орон"-21
290ᠬᠣᠷᠢᠨ ᠨᠢᠭᠡ᠂ ᠡᠪᠦᠭᠡᠳ ᠤᠨ ᠬᠦᠰᠡᠯ ᠰᠠᠨᠠᠭᠠ
ᠡᠪ ᠬᠠᠮᠲᠤ ᠶᠣᠰᠣ᠂ ᠡᠩᠬᠡ ᠵᠢᠷᠭᠠᠯ ᠪᠣᠢ ᠪᠣᠯᠤᠮᠤᠢ ᠊ᠶᠠ
ᠪᠣᠯᠭᠠᠷᠢ ᠵᠣᠬᠢᠶᠠᠯᠴᠢ ᠺᠠᠲ᠋ᠢᠨ ᠬᠧᠦᠷᠬᠢᠶᠧᠸᠡ
ᠰᠢᠷᠴᠢᠨ ᠰᠡᠷᠢᠭᠡᠳ᠂ ᠴᠡᠷᠡᠨ ᠦ᠌ ᠤᠨᠲᠠᠵᠤ ᠲᠡᠭᠰᠢᠬᠡᠨ ᠰᠠᠢᠬᠠᠨ ᠠᠮᠢᠰᠬᠤᠯᠵᠤ ᠪᠠᠢᠭᠠ ᠶ᠋ᠢ ᠨᠢ ᠭᠡᠷ ᠦ᠋ᠨ ᠴᠢᠮᠡᠭᠡ ᠦᠭᠡᠢ ᠨᠠᠮ ᠭᠦᠮ ᠳ᠋ᠦ᠍ ᠴᠢᠩᠨᠠᠵᠤ ᠬᠡᠪᠲᠡᠯᠡ᠃ ᠶᠠᠳᠠᠷᠠᠵᠤ ᠳᠠ᠂ ᠬᠥᠭᠡᠷᠦᠬᠦᠢ ᠮᠢᠨᠢ ᠭᠡᠵᠦ ᠪᠣᠳᠣᠭᠠᠳ ᠡᠪᠦᠭᠡᠨ᠂ ᠡᠬᠡᠨᠡᠷ ᠢ᠋ᠶ᠋ᠡᠨ ᠰᠡᠷᠢᠭᠡᠬᠦ ᠦᠭᠡᠢ ᠭᠡᠵᠦ ᠠᠶᠠᠷᠬᠠᠨ ᠭᠡᠭᠴᠢ ᠪᠡᠷ ᠡᠷᠭᠢᠵᠦ ᠴᠢᠩᠨᠠᠩᠬᠠᠨ ᠬᠡᠪᠲᠡᠪᠡᠰᠦ᠂ ᠭᠡᠷ ᠲᠦ᠋ᠨᠢ( ᠲᠤ ᠨᠢ) ᠬᠦᠢᠲᠡᠨ᠃ ᠭᠡᠷ ᠦ᠋ᠨ ᠬᠠᠮᠤᠭ ᠵᠠᠢ ᠡᠵᠡᠯᠡᠭᠰᠡᠨ᠂ ᠬᠤᠷᠠᠭᠠ ᠢᠰᠢᠭᠡ ᠶ᠋ᠢᠨ ᠰᠢᠭᠡᠰᠦ ᠪᠠᠬᠠᠨ ᠦᠨᠦᠷᠳᠡᠵᠦ᠂ ᠰᠦᠨ ᠦ᠌ ᠦᠨᠦᠷ ᠭᠠᠷᠴᠤ᠂ ᠦᠰᠦᠲᠡᠢ ᠬᠥᠨᠵᠢᠯᠡ ᠡᠴᠡ ᠨᠢ ᠣᠳᠤᠭᠰᠠᠨ ᠠᠷᠠᠰᠤᠨ ᠤ᠋ ᠦᠨᠦᠷ ᠬᠠᠩᠬᠤᠯᠵᠤ ᠪᠠᠢᠭᠠ ᠨᠢ᠂ ᠴᠥᠮ ᠬᠥᠮᠦᠨ ᠦ᠌ ᠭᠡᠷ ᠣᠷᠣᠨ ᠤ᠋ ᠠᠯᠢ ᠬᠡᠳᠦᠢᠨᠡᠢ ᠳᠠᠳᠤᠭᠰᠠᠨ ᠦᠨᠦᠷ ᠠᠵᠢ᠃ ᠡᠪᠦᠭᠡᠨ ᠦ᠌ ᠳᠡᠷᠡ ᠶ᠋ᠢᠨ ᠲᠤᠰᠢᠶᠠ᠂ ᠬᠦᠦ ᠶ᠋ᠢᠨ ᠪᠡᠯᠡᠭᠯᠡᠭᠰᠡᠨ ᠴᠠᠭ ᠨᠢ ᠴᠠᠭ ᠴᠠᠭ ᠳᠤᠤᠭᠠᠷᠴᠤ ᠪᠠᠢᠯᠠ᠃
ᠥᠴᠥᠭᠡᠳᠦᠷ ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠬᠣᠨᠢ᠂ ᠢᠬᠡᠷᠡ ᠬᠤᠷᠠᠭᠠ ᠭᠠᠷᠭᠠᠵᠤ᠂ ᠣᠳᠣ ᠬᠤᠷᠠᠭᠠᠯᠠᠬᠤ ᠬᠣᠨᠢ ᠭᠦᠢᠴᠡᠯᠡ᠃ ᠡᠨᠡ ᠬᠠᠷᠠ ᠮᠣᠷᠢᠨ ᠵᠢᠯ ᠬᠣᠶᠠᠷ ᠵᠠᠭᠤᠨ ᠳᠠᠯᠠᠨ ᠬᠣᠨᠢ ᠬᠤᠷᠠᠭᠠᠯᠠᠵᠤ᠂ ᠨᠢᠳᠤᠨᠤᠨ ᠵᠢᠯ ᠦ᠋ᠨ ᠬᠢ ᠡᠴᠡ ᠪᠦᠷ ᠶᠡᠬᠡ ᠠᠵᠢᠯ ᠲᠠᠢ ᠪᠣᠯᠤᠯᠠ᠃ ᠬᠥᠭᠡᠷᠦᠬᠦᠢ ᠴᠡᠷᠡᠨ᠂ ᠬᠤᠷᠠᠭᠠ ᠪᠠᠨ ᠠᠪᠬᠤ ᠭᠡᠵᠦ ᠣᠯᠠᠨ ᠴᠤ᠌ ᠰᠥᠨᠢ ᠪᠢᠳᠡ ᠬᠣᠶᠠᠷ ᠨᠣᠢᠷ ᠠᠯᠳᠠᠯᠠ ᠳᠠ᠂ ᠡᠨᠡ ᠰᠠᠷᠠ ᠳ᠋ᠤ᠌ ᠶᠡᠬᠡᠯᠡ( ᠶᠡᠬᠡ ᠯᠡ) ᠡᠴᠡᠵᠦ ᠶᠠᠳᠠᠷᠠᠭᠰᠠᠨ ᠰᠢᠦ᠂ ᠬᠥᠭᠡᠷᠦᠬᠦᠢ ᠮᠢᠨᠢ᠃ ᠠᠭᠤᠯᠠ ᠶ᠋ᠢ ᠴᠠᠰᠤ ᠳᠠᠷᠤᠵᠤ᠂ ᠴᠡᠷᠡᠨ ᠪᠢᠳᠡ ᠬᠣᠶᠠᠷ ᠢ᠋ ᠨᠠᠰᠤ ᠳᠠᠷᠤᠵᠠᠢ ᠳᠠ᠂ ᠬᠣᠶᠠᠷ ᠶᠡᠬᠡ ᠬᠦᠦ ᠮᠠᠨᠢ ᠡᠷᠬᠡᠲᠡᠢ ᠵᠠᠰᠠᠭ ᠤ᠋ᠨ ᠲᠦᠮᠡᠨ ᠴᠡᠷᠢᠭ ᠦ᠋ᠨ ᠳᠤᠮᠳᠠ᠂ ᠣᠳᠬᠣᠨ ᠥᠬᠢᠨ ᠯᠧᠨᠢᠨᠮᠠ ᠮᠢᠨᠢ ᠰᠤᠷᠭᠠᠭᠤᠯᠢ ᠳ᠋ᠤ᠌᠂ ᠭᠡᠷ ᠲᠡᠭᠡᠨ ( ᠲᠤ ᠪᠡᠨ)ᠠᠵᠢᠯ ᠬᠢᠳᠡᠭ ᠨᠢ ᠴᠡᠷᠡᠨ ᠪᠢᠳᠡ ᠬᠣᠶᠠᠷ ᠪᠣᠯᠴᠢᠬᠠᠭᠠᠳ᠂ ᠪᠦᠯᠢ ᠮᠠᠭᠤᠲᠠᠢ ᠬᠡᠴᠡᠭᠦᠬᠡᠨ ᠪᠣᠯᠵᠤ ᠪᠠᠢᠬᠤ ᠰᠢᠪ ᠳᠡ᠂ ᠡᠷᠡ ᠬᠦᠢᠰᠦᠲᠦ ᠪᠢ ᠴᠦ᠍ ᠪᠠᠰᠠ ᠶᠠᠭᠠᠮᠠᠢ᠃ ᠬᠣᠨᠢ ᠰᠠᠭᠠᠬᠤ᠂ ᠴᠠᠢ ᠬᠣᠭᠣᠯᠠ ᠴᠢᠨᠠᠬᠤ᠂ ᠶᠠᠭᠤᠮᠠ ᠬᠡᠦᠮᠡ ᠣᠶᠣᠬᠤ᠂ ᠭᠡᠷ ᠦ᠋ᠨ ᠬᠠᠮᠤᠭ ᠠᠵᠢᠯ ᠬᠢᠬᠦ ᠨᠢ ᠴᠡᠷᠡᠨ ᠰᠢᠦ ᠳᠡ᠃ ᠲᠡᠷᠡ ᠭᠠᠢᠲᠠᠢ ᠳᠦᠢᠲᠡᠢ ᠶᠠᠫᠣᠨ ᠤ᠋ ᠡᠵᠡᠷᠬᠡᠭ ᠲᠦᠷᠢᠮᠡᠬᠡᠢ ᠡᠴᠡ ᠯᠡ ᠪᠣᠯᠵᠤ ᠪᠠᠢᠨᠠ᠃ ᠲᠡᠳᠡ ᠨᠦ᠍ᠭᠦᠳ ᠦᠭᠡᠢ ᠪᠣᠯ᠂ ᠮᠢᠨᠦ ᠬᠣᠶᠠᠷ ᠬᠦᠦ ᠶ᠋ᠢᠨ ᠨᠢᠭᠡ ᠨᠢ ᠴᠦ᠍ ᠭᠡᠰᠡᠨ ᠭᠡᠷ ᠲᠡᠭᠡᠨ ( ᠲᠤ ᠪᠡᠨ)ᠪᠠᠢᠵᠤ᠂ ᠡᠴᠢᠭᠡ ᠡᠬᠡ ᠪᠢᠳᠡ ᠬᠣᠶᠠᠷ ᠲᠠᠭᠠᠨ( ᠲᠤ ᠪᠠᠨ) ᠲᠤᠰᠠ ᠪᠣᠯᠵᠤ ᠪᠠᠢᠬᠤ ᠰᠠᠨ᠃ ᠭᠠᠢᠲᠠᠢ ᠯᠠᠢᠲᠠᠢ ᠰᠠᠮᠤᠷᠠᠢ ᠠ᠋ᠴᠠ ᠪᠣᠯᠵᠤ᠂ ᠬᠡᠴᠢᠨᠡᠨ ᠣᠯᠠᠨ ᠢᠳᠡᠷᠴᠦᠳ ᠫᠤᠤ ᠪᠠᠷᠢᠵᠤ᠂ ᠬᠢᠯᠢ ᠳᠡᠭᠡᠷᠡ ᠵᠣᠭᠰᠣᠵᠤ ᠪᠠᠢᠨᠠ ᠳᠠ᠃ ᠥᠷᠭᠡᠨ ᠶᠡᠬᠡ ᠴᠡᠭᠡᠵᠢᠨ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂ ᠥᠨᠳᠥᠷ ᠶᠡᠬᠡ ᠰᠤᠭᠤᠨ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠲᠦᠰᠢᠬᠦ ᠠᠬᠠ ᠶᠡᠬᠡ ᠬᠣᠯᠪᠣᠭᠠᠲᠤ ᠤᠯᠤᠰ ᠲᠠᠢ ᠪᠠᠢᠭᠠ ᠮᠠᠨᠢ ᠶᠠᠭᠤᠲᠠᠢ ᠵᠠᠪᠰᠢᠶᠠᠨ᠃ ᠤᠷᠲᠤ ᠳᠣᠲᠣᠷᠠ ᠭᠠᠵᠠᠷ ᠴᠤ᠌ ᠭᠡᠰᠡᠨ ᠲᠦᠮᠡᠨ ᠢᠷᠭᠡᠨ᠂ ᠶᠠᠫᠣᠨ ᠲᠠᠢ ᠲᠤᠯᠤᠯᠳᠤᠵᠤ ᠪᠠᠢᠨᠠ ᠰᠢᠦ ᠳᠡ ᠭᠡᠳ ᠡᠪᠦᠭᠡᠨ᠂ ᠨᠠᠮ ᠤ᠋ᠨ ᠡᠭᠦᠷ ᠦ᠋ᠨ ᠤᠬᠠᠭᠤᠯᠤᠭᠴᠢ ᠫᠠᠷᠲ᠋ᠢᠽᠠᠨ ᠰᠠᠮᠪᠤᠤ ᠭᠤᠸᠠᠢ ᠶ᠋ᠢᠨ ᠮᠠᠤ ᠽᠧ ᠳ᠋ᠦᠩ᠂ ᠵᠣ᠌ ᠳᠧ ᠬᠣᠶᠠᠷ ᠤ᠋ᠨ ᠲᠤᠬᠠᠢ ᠶᠠᠷᠢᠵᠤ᠂ ᠬᠣᠯᠪᠣᠭᠠᠲᠤ ᠤᠯᠤᠰ ᠤ᠋ᠨ ᠰᠡᠳᠬᠦᠯ ᠳ᠋ᠦ᠍ ᠬᠡᠪᠯᠡᠭᠰᠡᠨ ᠲᠡᠳᠡᠨ ᠦ᠌ ᠵᠢᠷᠤᠭ ᠢ᠋ ᠦᠵᠡᠭᠦᠯᠵᠦ ᠪᠠᠢᠭᠰᠠᠨ ᠢ᠋ ᠪᠣᠳᠣᠭᠠᠳ᠂ ᠮᠠᠤ ᠽᠧ ᠳ᠋ᠦᠩ ᠦ᠋ᠨ ᠴᠢᠷᠠᠢ ᠶ᠋ᠢ ᠬᠠᠷᠠᠪᠠᠯ᠂ ᠶᠡᠬᠡᠯᠡ(ᠶᠡᠬᠡ ᠯᠡ) ᠰᠠᠢᠬᠠᠨ ᠰᠡᠳᠬᠢᠯ ᠲᠡᠢ᠂ ᠰᠠᠷᠠᠭᠤᠯ ᠤᠬᠠᠭᠠᠨ ᠲᠠᠢ ᠬᠥᠮᠦᠨ ᠪᠣᠯᠤᠯᠲᠠᠢ᠃ ᠵᠣ᠌ ᠳᠧ ᠵᠠᠩᠵᠤᠨ ᠤ᠋ ᠴᠢᠷᠠᠢ ᠶ᠋ᠢ ᠬᠠᠷᠠᠪᠠᠯ᠂ ᠲᠦᠮᠡ ᠠᠭᠤᠯᠵᠠᠵᠤ ᠪᠠᠢᠭᠰᠠᠨ ᠬᠥᠮᠦᠨ ᠰᠢᠭ ᠶᠡᠬᠡᠯᠡ( ᠶᠡᠬᠡ ᠯᠡ) ᠲᠠᠨᠢᠭᠰᠠᠨ᠂ ᠨᠢᠳᠦᠨ ᠳ᠋ᠦ᠍ ᠳᠤᠯᠠᠭᠠᠨ ᠴᠢᠷᠠᠢ ᠲᠠᠢ ᠬᠥᠮᠦᠨ ᠪᠢᠯᠡ ᠭᠡᠵᠦ ᠪᠣᠳᠣᠭᠠᠳ ᠢᠨᠢᠶᠡᠮᠰᠦᠭᠯᠡᠵᠦ᠂ ᠮᠣᠩᠭᠣᠯ ᠤ᠋ᠨ ᠲᠦᠭ ᠲᠦᠮᠡᠨ ᠮᠠᠯᠴᠢᠨ ᠤ᠋ ᠨᠢᠭᠡ ᠨᠢ ᠪᠣᠯᠤᠭᠰᠠᠨ ᠮᠠᠭᠤ ᠡᠪᠦᠭᠡᠨ ᠪᠢ ᠬᠦᠷᠲᠡᠯᠡ᠂ ᠦᠷ ᠦ᠋ᠨ ᠰᠥᠨᠢ ᠪᠡᠷ ᠲᠡᠳᠡᠨ ᠢ᠋ ᠣᠭᠲᠣ ᠲᠠᠨᠢᠬᠤ ᠦᠭᠡᠢ᠂ ᠵᠢᠰᠦ ᠦᠵᠡᠭᠡ ᠦᠭᠡᠢ ᠮᠥᠷᠲᠡᠭᠡᠨ ᠪᠣᠳᠣᠵᠤ ᠬᠡᠪᠲᠡᠬᠦ᠂ ᠮᠥᠨ ᠴᠦ᠍ ᠰᠣᠨᠢᠨ ᠶᠤᠮ ᠠ᠋ ᠳᠠ᠃ ᠡᠷᠬᠡ ᠴᠢᠯᠥᠭᠡ ᠪᠡᠨ ᠣᠯᠵᠤ᠂ ᠠᠮᠤᠷ ᠰᠠᠢᠬᠠᠨ ᠠᠵᠤ ᠲᠥᠷᠥᠯ ᠢ᠋ᠶ᠋ᠡᠨ ᠵᠣᠬᠢᠶᠠᠬᠤ ᠶ᠋ᠢᠨ ᠲᠥᠯᠥᠭᠡ ᠲᠡᠮᠡᠴᠡᠵᠦ ᠪᠠᠢᠭᠠ᠂ ᠰᠢᠷᠭᠤᠯᠵᠢ ᠰᠢᠭ᠋ ᠣᠯᠠᠨ ᠬᠥᠮᠦᠨ ᠲᠡᠢ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠲᠦᠭ ᠲᠦᠮᠡᠨ ᠣᠯᠠᠨ ᠢ᠋ ᠣᠷᠣᠢᠯᠠᠨ ᠤᠳᠤᠷᠢᠳᠴᠤ ᠶᠠᠪᠤᠭᠠ ᠲᠡᠷᠡ ᠬᠣᠶᠠᠷ ᠶᠡᠬᠡ ᠬᠥᠮᠦᠨ᠂ ᠡᠨᠳᠡ ᠡᠴᠡ ᠲᠦᠮᠡᠨ ᠦ᠌ ᠭᠠᠵᠠᠷ ᠪᠠᠢᠭᠠ ᠪᠣᠯᠪᠠᠴᠤ᠂ ᠮᠢᠨᠦ ᠰᠡᠳᠬᠢᠯ ᠳ᠋ᠦ᠍ ᠶᠠᠭᠤ ᠲᠠᠢ ᠳᠣᠲᠣᠨᠣ ᠡᠯᠢᠭᠡᠰᠡᠭ ᠪᠢᠯᠡ ᠭᠡᠵᠦ ᠪᠣᠳᠣᠭᠠᠳ᠂ ᠭᠠᠷ ᠢ᠋ᠶ᠋ᠠᠨ ᠠᠶᠠᠷᠬᠠᠨ ᠰᠠᠷᠪᠠᠢᠵᠤ ᠴᠠᠭ ᠢ᠋ᠶ᠋ᠠᠨ ᠠᠪᠤᠭᠠᠳ᠂ ᠬᠠᠷᠠᠩᠭᠤᠢ ᠳ᠋ᠤ᠌ ᠰᠢᠷᠠ ᠨᠣᠭᠣᠭᠠᠨ ᠭᠡᠷᠡᠯ ᠰᠦᠮᠡᠯᠵᠡᠭᠰᠡᠨ ᠵᠡᠭᠦᠦ᠂ ᠲᠣᠭᠠ ᠶ᠋ᠢ ᠨᠢ ᠬᠠᠷᠠᠵᠤ᠂ ᠮᠥᠳᠳᠥ ᠳᠥᠷᠪᠡᠨ ᠴᠠᠭ ᠪᠣᠯᠬᠤ ᠨᠢ᠂ ᠮᠣᠰᠺᠸᠠ ᠳ᠋ᠤ᠌ ᠰᠥᠨᠢ ᠶ᠋ᠢᠨ ᠠᠷᠪᠠᠨ ᠨᠢᠭᠡᠨ ᠴᠠᠭ ᠪᠠᠢᠭᠠ ᠶᠤᠮ ᠪᠠᠢᠨᠠ᠃ ᠰᠲ᠋ᠠᠯᠢᠨ ᠪᠠᠭᠰᠢ ᠨᠣᠢᠷᠰᠤᠭᠠ ᠦᠭᠡᠢ᠂ ᠺᠷᠸᠮᠯᠢ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠠᠵᠢᠯ ᠢ᠋ᠶ᠋ᠠᠨ ᠬᠢᠵᠦ ᠪᠠᠢᠭᠠ ᠪᠠᠢᠬᠤ ᠭᠡᠵᠦ ᠪᠣᠳᠣᠭᠠᠳ᠂ ᠰᠢᠷᠴᠢᠨ ᠦ᠌ ᠶᠡᠬᠡ ᠳᠤᠷᠠ ᠲᠠᠢ ᠳᠠᠬᠢᠨ ᠳᠠᠬᠢᠨ ᠤᠩᠰᠢᠵᠤ ᠪᠠᠢᠳᠠᠭ ᠠᠨᠷᠢ ᠪᠠᠷᠪᠢᠤᠰᠰ ᠤ᠋ᠨ ᠨᠣᠮ ᠳ᠋ᠤ᠌ ᠰᠲ᠋ᠠᠯᠢᠨ ᠤ᠋ ᠲᠤᠬᠠᠢ ᠬᠡᠯᠡᠭᠰᠡᠨ ᠦᠭᠡ ᠨᠢ ᠰᠠᠨᠠᠭᠳᠠᠵᠤ᠂ ᠴᠡᠭᠡᠵᠢᠨ ᠳ᠋ᠦ᠍ ᠣᠷᠣᠵᠤ ᠢᠷᠡᠭᠰᠡᠨ ᠨᠢ᠄
《ᠰᠥᠨᠢ ᠶ᠋ᠢᠨ ᠴᠠᠭ ᠲᠤᠷ ᠤᠯᠠᠭᠠᠨ ᠲᠠᠯᠠᠪᠠᠢ ᠶ᠋ᠢ ᠥᠩᠭᠡᠷᠡᠨ ᠭᠠᠷᠬᠤᠢ ᠳ᠋ᠤᠷ ᠲᠡᠭᠦᠨ ᠦ᠌ ᠠᠭᠤᠳᠠᠮ ᠦᠵᠡᠯᠲᠦ ᠫᠠᠨᠤᠷᠠᠮ ᠬᠣᠶᠠᠷᠳᠠᠨ ᠦᠵᠡᠭᠳᠡᠬᠦ ᠠᠳᠠᠯᠢ᠄ ᠨᠢᠭᠡᠨ ᠢᠨᠦ ᠳᠡᠯᠡᠬᠡᠢ ᠶ᠋ᠢᠨ ᠪᠥᠮᠪᠥᠷᠴᠡᠭ ᠳᠠᠬᠢ ᠬᠥᠮᠦᠨ ᠦ᠌ ᠰᠠᠢᠬᠠᠨ ᠰᠤᠳᠤᠴᠤᠤᠯ ᠤ᠋ᠨ ᠡᠬᠡ ᠨᠤᠲᠤᠭ ᠪᠣᠯᠤᠭᠰᠠᠨ᠂ ᠣᠳᠣ ᠪᠣᠢ ᠵᠦᠢᠯ᠃ ᠨᠥᠭᠦᠭᠡ ᠢᠨᠦ1917 ᠣᠨ ᠬᠦᠷᠲᠡᠯᠡ ᠠᠭᠰᠠᠨ ᠡᠷᠲᠡᠰ ᠬᠠᠭᠤᠴᠢᠨ ᠤ᠋ ᠵᠦᠢᠯ ᠠᠵᠢᠶᠠᠮᠤ᠃ ᠴᠢᠩᠭᠢᠭᠡᠳ᠂ ᠬᠥᠮᠦᠨ ᠦᠭᠡᠢ ᠰᠥᠨᠢ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠠᠬᠢ ᠣᠷᠣᠰᠢᠯ ᠳ᠋ᠤᠷ ᠬᠡᠪᠲᠡᠭᠴᠢ ᠲᠡᠷᠡ᠂ ᠳᠡᠯᠡᠬᠡᠢ ᠶᠢᠷᠲᠢᠨᠴᠦ ᠳ᠋ᠦ᠍ᠷ ᠤᠨᠲᠠᠭᠠ ᠦᠭᠡᠢ ᠭᠠᠭᠴᠠ ᠬᠥᠮᠦᠨ ᠪᠠᠢᠨᠠᠮ᠃ ᠲᠡᠷᠡ ᠪᠣᠯᠪᠠᠰᠤ ᠣᠷᠴᠢᠨ ᠲᠣᠭᠣᠷᠢᠨ ᠳ᠋ᠤᠷ ᠪᠦᠬᠦᠢ ᠬᠣᠲᠠ ᠪᠠᠯᠭᠠᠳ᠂ ᠰᠠᠭᠤᠷᠢᠨ ᠲᠣᠰᠬᠣᠨ ᠪᠦᠬᠦᠨ ᠦ᠌ ᠳᠡᠭᠡᠷᠡ ᠨᠣᠢᠷ ᠦᠭᠡᠢ ᠰᠡᠷᠭᠦᠭ(ᠰᠡᠷᠭᠡᠭ) ᠰᠡᠷᠭᠦᠯᠡᠩ ᠪᠠᠢᠨᠠᠮ ᠪᠣᠯᠪᠠ ᠤᠤ ᠭᠡᠮᠡᠨ ᠰᠠᠨᠠᠭᠳᠠᠬᠤ ᠠᠵᠢᠶᠠᠮᠤ᠃ ᠲᠡᠷᠡ ᠪᠣᠯᠪᠠᠰᠤ ᠣᠯᠠᠨ ᠠᠵᠢᠯᠴᠢᠨ ᠪᠠᠶᠠᠷᠯᠠᠨ ᠢᠨᠢᠶᠡᠮᠰᠦᠭᠯᠡᠵᠦ᠂ ᠮᠠᠨ ᠤ᠋ ᠪᠠᠭᠰᠢ ᠪᠥᠭᠡᠳ ᠨᠥᠬᠥᠷ ᠭᠡᠮᠡᠨ ᠨᠢᠭᠡᠨ ᠳ᠋ᠦ᠍ᠷ ᠳᠠᠭᠤᠳᠠᠭᠴᠢ ᠦᠨᠡᠬᠡᠷ ᠬᠠᠮᠤᠭ ᠪᠦᠬᠦᠨ ᠢ᠋ ᠡᠩᠬᠦᠷᠡᠢᠯᠡᠨ ᠪᠥᠬᠥᠢᠵᠦ ᠦᠵᠡᠭᠴᠢ ᠡᠴᠢᠭᠡ ᠪᠥᠭᠡᠳ ᠠᠬᠠ᠂ ᠪᠣᠳᠠᠲᠠᠢ ᠤᠳᠤᠷᠢᠳᠤᠭᠴᠢ ᠠᠨᠤ ᠪᠤᠶᠤ! ᠲᠠ ᠲᠡᠭᠦᠨ ᠢ᠋ ᠮᠡᠳᠡᠭᠡ ᠦᠭᠡᠢ ᠠᠲᠠᠯᠠ᠂ ᠲᠡᠷᠡ ᠲᠠᠨ ᠢ᠋ ᠮᠡᠳᠡᠵᠦ᠂ ᠲᠠᠨ ᠤ᠋ ᠲᠥᠯᠥᠭᠡᠨᠡ ᠰᠠᠨᠠᠭᠠ ᠲᠠᠯᠪᠢᠭᠰᠠᠨ ᠪᠠᠢᠨᠠᠮ᠃ ᠲᠠ ᠬᠡᠨ ᠠᠲᠤᠭᠠᠢ ᠴᠤ᠌ ᠲᠠᠨ ᠤ᠋ ᠬᠤᠪᠢ ᠵᠣᠬᠢᠶᠠᠯ ᠤ᠋ᠨ ᠦᠪᠡᠳᠡᠭᠰᠢ ᠰᠠᠢᠨ ᠠᠨᠤ᠂ ᠡᠷᠳᠡᠮᠲᠡᠨ ᠦ᠌ ᠲᠡᠷᠢᠭᠦᠦ ᠲᠡᠢ᠂ ᠠᠵᠢᠯᠴᠢᠨ ᠤ᠋ ᠴᠢᠷᠠᠢ ᠲᠠᠢ᠂ ᠡᠩ ᠦ᠋ᠨ ᠴᠡᠷᠢᠭ ᠡᠷᠡ ᠶ᠋ᠢᠨ ᠬᠤᠪᠴᠠᠰᠤ ᠲᠠᠢ ᠪᠥᠭᠡᠳ ᠬᠠᠮᠤᠭ ᠪᠦᠭᠦᠳᠡ ᠶ᠋ᠢᠨ ᠲᠥᠯᠥᠭᠡ ᠮᠥᠨ ᠨᠣᠢᠷ ᠦᠭᠡᠢ ᠰᠡᠷᠭᠡᠭ ᠰᠡᠷᠭᠦᠯᠡᠩ ᠠᠵᠤ᠂ ᠵᠢᠳᠬᠦᠨ ᠬᠥᠳᠡᠯᠦᠭᠴᠢ ᠨᠥᠭᠦᠭᠡ ᠨᠢᠭᠡᠨ ᠬᠥᠮᠦᠨ ᠦ᠌ ᠭᠠᠷ ᠲᠤᠷ ᠪᠠᠢᠨᠠᠮ ᠪᠤᠶᠤ》 ᠭᠡᠳᠡᠭ ᠦᠭᠡ ᠰᠠᠨᠠᠭᠠᠨ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠣᠷᠣᠵᠤ᠂ ᠰᠲ᠋ᠠᠯᠢᠨ ᠪᠢᠳᠡ ᠪᠦᠭᠦᠳᠡ ᠶ᠋ᠢᠨ ᠡᠩᠬᠡ ᠵᠢᠷᠭᠠᠯ ᠤ᠋ᠨ ᠲᠥᠯᠥᠭᠡ ᠰᠣᠨᠣᠷ ᠰᠡᠷᠭᠡᠭ ᠠᠵᠢᠯᠯᠠᠵᠤ᠂ ᠣᠳᠣ ᠨᠣᠢᠷᠰᠤᠭᠠ ᠦᠭᠡᠢ ᠪᠠᠢᠭᠠ ᠳᠠ᠃ ᠮᠠᠭᠤ ᠡᠪᠦᠭᠡᠨ ᠮᠠᠯᠴᠢᠨ ᠨᠠᠮᠠᠶ᠋ᠢ(ᠨᠠᠮᠠ ᠶ᠋ᠢ) ᠮᠡᠳᠡᠭᠡ ᠦᠭᠡᠢ ᠪᠣᠯᠪᠠᠴᠤ ᠪᠢᠳᠡ ᠪᠦᠭᠦᠳᠡ ᠶ᠋ᠢᠨ ᠲᠥᠯᠥᠭᠡ᠂ ᠰᠢᠷᠴᠢᠨ ᠮᠢᠨᠦ ᠴᠦ᠍ ᠲᠥᠯᠥᠭᠡ᠂ ᠮᠢᠨᠦ ᠦᠷᠡ ᠬᠡᠦᠬᠡᠳ ᠦ᠋ᠨ ᠴᠦ᠍ ᠲᠥᠯᠥᠭᠡ ᠬᠠᠯᠠᠭᠤᠨ ᠬᠠᠯᠠᠮᠵᠢᠲᠤ ᠰᠠᠨᠠᠭᠠ ᠲᠠᠯᠪᠢᠵᠤ᠂ ᠨᠣᠢᠷᠰᠤᠭᠠ ᠦᠭᠡᠢ ᠠᠵᠢᠯᠯᠠᠵᠤ ᠪᠠᠢᠭᠠ ᠯᠠ ᠳᠠ ᠭᠡᠵᠦ ᠪᠤᠳᠤᠲᠠᠯᠠ ᠨᠢ ᠲᠡᠷᠡ ᠡᠪᠦᠭᠡᠨ ᠹᠷᠠᠨᠼᠢ ᠵᠣᠬᠢᠶᠠᠯᠴᠢ ᠶ᠋ᠢᠨ ᠰᠲ᠋ᠠᠯᠢᠨ ᠤ᠋ ᠲᠤᠬᠠᠢ ᠬᠡᠯᠡᠭᠰᠡᠨ᠄《 ᠲᠡᠷᠡ ᠬᠥᠮᠦᠨ ᠪᠣᠯᠪᠠᠯ᠂ ᠶᠠᠭᠤᠮᠠ ᠪᠦᠭᠦᠳᠡ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠬᠥᠮᠦᠨ ᠪᠦᠭᠦᠳᠡ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠬᠠᠯᠠᠮᠵᠢᠲᠤ ᠰᠠᠨᠠᠭᠠ ᠲᠠᠯᠪᠢᠵᠤ᠂ ᠣᠳᠣ ᠪᠠᠢᠭᠠ ᠶᠠᠭᠤᠮᠠ ᠶ᠋ᠢ ᠪᠦᠲᠦᠭᠡᠭᠡᠳ᠂ ᠢᠷᠡᠭᠡᠳᠦᠢ ᠳ᠋ᠦ᠍ ᠪᠣᠢ ᠪᠣᠯᠬᠤ ᠶᠠᠭᠤᠮᠠ ᠶ᠋ᠢ ᠪᠦᠲᠦᠭᠡᠵᠦ ᠪᠠᠢᠭᠠ ᠬᠥᠮᠦᠨ᠃ ᠲᠡᠷᠡ ᠬᠥᠮᠦᠨ ᠬᠡᠵᠢᠶᠡ ᠴᠦ᠍ ᠠᠪᠤᠷᠠᠨᠠ》 ᠭᠡᠰᠡᠨ ᠦᠭᠡ ᠰᠢᠷᠴᠢᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠤᠷᠭᠤᠵᠤ᠂ ᠲᠡᠷᠡ ᠡᠪᠦᠭᠡᠨ ᠹᠷᠠᠨᠼᠢ ᠬᠥᠮᠦᠨ᠂ ᠶᠠᠭᠠᠬᠢᠭᠰᠠᠨ ᠮᠡᠷᠭᠡᠨ ᠦᠭᠡ ᠬᠡᠯᠡᠭᠰᠡᠨ ᠶᠦᠮ ᠪᠣᠢ? ᠶᠠᠭ ᠯᠠ ᠮᠢᠨᠦ ᠰᠡᠳᠬᠢᠯ ᠤᠬᠠᠭᠠᠨ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠪᠣᠳᠣᠵᠤ ᠪᠠᠢᠭᠰᠠᠨ ᠦᠭᠡ ᠶ᠋ᠢ᠂ ᠮᠢᠨᠦᠬᠢ ᠪᠡᠷ ᠴᠦ᠍ ᠪᠠᠷᠠᠬᠤ ᠦᠭᠡᠢ᠂ ᠽᠠᠮᠪᠤᠲᠢᠪ ᠤ᠋ᠨ ᠠᠷᠢᠭᠤᠨ ᠰᠡᠳᠬᠢᠯᠲᠦ ᠴᠢᠩ ᠰᠢᠳᠤᠷᠭᠤ ᠬᠥᠮᠦᠨ ᠪᠦᠭᠦᠳᠡ ᠶ᠋ᠢᠨ ᠦᠭᠡ ᠶ᠋ᠢ ᠰᠡᠳᠬᠢᠯ ᠵᠢᠷᠦᠬᠡᠨ ᠦ᠌ ᠤᠭ ᠠ᠋ᠴᠠ ᠨᠢ ᠴᠢᠩᠨᠠᠵᠤ ᠮᠡᠳᠡᠭᠰᠡᠨ ᠶᠦᠮ ᠰᠢᠭ ᠰᠦᠷᠡᠬᠡᠢ ᠬᠡᠯᠡᠵᠡᠢ ᠳᠡ ᠭᠡᠵᠦ ᠪᠣᠳᠣᠭᠠᠳ ᠡᠪᠦᠭᠡᠨ ᠳᠠᠬᠢᠨ ᠥᠨᠥᠬᠢ ᠬᠠᠢᠷᠠᠲᠠᠢ ᠴᠠᠭ ᠢ᠋ᠶ᠋ᠠᠨ ᠠᠪᠴᠤ᠂ ᠭᠡᠷᠡᠯᠲᠦ ᠲᠣᠭᠠ ᠶ᠋ᠢ ᠨᠢ ᠬᠠᠷᠠᠭᠠᠳ ᠪᠣᠰᠳᠠᠭ ᠴᠤ᠌ ᠶᠤᠮ ᠪᠢᠯᠡ ᠤᠤ ᠳᠠ᠃ ᠨᠠᠷᠠ ᠪᠢᠲᠡᠭᠦᠦ᠂ ᠦᠷ ᠦ᠋ᠨ ᠬᠢᠷᠠᠭᠠ ᠲᠤᠰᠬᠤ ᠶ᠋ᠢᠨ ᠡᠮᠦᠨᠡᠬᠢ ᠴᠢᠪ ᠴᠢᠮᠡᠭᠡ ᠦᠭᠡᠢ ᠳ᠋ᠦ᠍ ᠶᠠᠭᠤᠮᠠ ᠪᠣᠳᠣᠬᠤ ᠳ᠋ᠤ᠌ ᠴᠡᠭᠡᠵᠢ ᠰᠠᠷᠠᠭᠤᠯ᠂ ᠤᠬᠠᠭᠠᠨ ᠲᠤᠩᠭᠠᠯᠠᠭ ᠶᠠᠭᠤᠲᠠᠢ ᠰᠠᠢᠬᠠᠨ ᠠᠵᠢ᠃ ᠣᠳᠣ ᠠᠵᠢᠯ ᠢ᠋ᠶ᠋ᠠᠨ ᠬᠢᠳᠡᠭ᠂ ᠪᠣᠰᠳᠠᠭ ᠴᠠᠭ ᠳᠥᠭᠥᠵᠡᠢ ᠭᠡᠵᠦ ᠪᠣᠳᠣᠭᠠᠳ᠂ ᠡᠬᠡᠨᠡᠷ ᠢ᠋ᠶ᠋ᠡᠨ ᠰᠡᠷᠡᠭᠡᠬᠦ ᠦᠭᠡᠢ ᠶᠦᠮ ᠰᠠᠨ ᠭᠡᠵᠦ ᠠᠶᠠᠷᠬᠠᠨ ᠭᠡᠭᠴᠢ ᠪᠡᠷ ᠪᠣᠰᠴᠤ ᠭᠤᠲᠤᠯ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠭᠡᠳ ᠭᠡᠷ ᠡᠴᠡ ᠪᠡᠨ ᠴᠢᠮᠡᠭᠡ ᠦᠭᠡᠢ ᠭᠠᠷᠴᠠᠢ᠃
ᠦᠷ ᠦ᠋ᠨ ᠬᠠᠷᠠᠩᠭᠤᠢ ᠪᠠᠷ ᠬᠣᠲᠠᠯᠠᠭᠰᠠᠨ ᠬᠣᠨᠢ ᠮᠠᠯ᠂ ᠦᠬᠡᠷ ᠲᠡᠮᠡᠭᠡ᠂ ᠤᠷᠭᠤᠭᠠ ᠴᠢᠯᠠᠭᠤ ᠰᠢᠭ᠋ ᠦᠵᠡᠭᠳᠡᠨ᠂ ᠬᠣᠲᠠᠴᠢ ᠨᠣᠬᠠᠢ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠠᠵᠤ᠂ ᠰᠢᠷᠴᠢᠨ ᠦ᠌ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠡᠭᠡᠳ᠂ ᠬᠣᠰᠢᠭᠤ ᠪᠠᠷ ᠢ᠋ᠶ᠋ᠠᠨ ᠭᠠᠷ ᠢ᠋ ᠨᠢ ᠲᠦᠯᠬᠢᠨ ᠡᠷᠬᠡᠯᠡᠵᠡᠢ᠃ ᠨᠣᠬᠠᠢ ᠪᠠᠨ ᠢᠯᠢᠵᠦ ᠡᠷᠬᠡᠯᠡᠭᠦᠯᠦᠭᠡᠳ ᠭᠡᠷ ᠲᠡᠢᠰᠢ ᠪᠡᠨ ᠡᠷᠭᠢᠵᠦ᠂ ᠡᠷᠦᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠣᠭᠣᠰᠣᠷ ᠢ᠋ ᠲᠠᠢᠯᠵᠤ᠂ ᠡᠷᠦᠬᠡ ᠪᠡᠨ ᠰᠡᠭᠦᠵᠡᠢ᠃ ᠴᠡᠷᠡᠨ ᠲᠡᠷᠡ ᠵᠠᠪᠰᠠᠷ᠂ ᠬᠡᠳᠦᠢᠨ ᠪᠣᠰᠴᠤ᠂ ᠡᠪᠦᠭᠡᠨ ᠦ᠌ ᠪᠡᠨ ᠥᠭᠡᠳᠡ ᠡᠴᠡ ᠭᠠᠷᠴᠤ ᠢᠷᠡᠭᠡᠳ᠂
— ᠪᠢ ᠲᠠᠨ ᠤ᠋ ᠪᠣᠰᠤᠭᠰᠠᠨ ᠢ᠋ ᠮᠡᠳᠡᠭᠰᠡᠨ ᠦᠭᠡᠢ᠃ ᠡᠨᠡ ᠬᠡᠳᠦᠨ ᠬᠣᠨᠣᠭ ᠶᠡᠬᠡ ᠶᠠᠳᠠᠷᠠᠭᠠᠳ᠂ ᠶᠡᠷᠦ ᠰᠡᠷᠡᠬᠦ ᠪᠡᠨ ᠪᠠᠢᠵᠠᠢ ᠭᠡᠵᠦ ᠬᠦᠯᠢᠴᠡᠯ ᠥᠴᠢᠬᠦ ᠮᠡᠲᠦ ᠳᠤᠤᠭᠠᠷᠴᠤ᠂ ᠲᠠ ᠨᠠᠮᠠᠶ᠋ᠢ(ᠨᠠᠮᠠ ᠶ᠋ᠢ) ᠰᠡᠷᠡᠭᠡᠬᠦ ᠦᠭᠡᠢ ᠶᠠᠭᠠᠬᠢᠭᠠ ᠪᠣᠢ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠶᠡᠬᠡ ᠰᠠᠢᠬᠠᠨ ᠤᠨᠲᠠᠵᠤ ᠪᠠᠢᠬᠤ ᠳ᠋ᠤ᠌ ᠴᠢᠨᠢ᠂ ᠪᠢ ᠰᠡᠷᠡᠭᠡᠬᠦ ᠶ᠋ᠢ ᠪᠡᠨ ᠬᠠᠢᠷᠠᠯᠠᠭᠰᠠᠨ ᠭᠡᠵᠡᠢ᠃
ᠴᠡᠷᠡᠨ ᠮᠠᠰᠢ ᠰᠤᠷᠮᠠᠭᠠᠢ ᠪᠠᠷ ᠭᠠᠯ ᠢ᠋ᠶ᠋ᠠᠨ ᠲᠦᠯᠡᠵᠦ᠂ ᠰᠢᠷᠡᠮᠦᠨ ᠲᠣᠭᠣᠭᠠ ᠪᠠᠨ ᠵᠤᠤᠬᠠᠨ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠭᠠᠳ᠂ ᠴᠠᠰᠤ ᠬᠠᠢᠯᠤᠭᠤᠯᠵᠤ᠂ ᠨᠢᠭᠤᠷ ᠭᠠᠷ ᠤᠬᠢᠶᠠᠬᠤ ᠤᠰᠤ ᠵᠡᠰ ᠭᠦᠴᠡ ᠳ᠋ᠦ᠍ ᠬᠢᠭᠡᠳ ᠲᠦᠮᠫᠡᠨ ᠲᠡᠢ ᠬᠠᠮᠲᠤ ᠰᠢᠷᠴᠢᠨ ᠳ᠋ᠦ᠍ ᠲᠠᠯᠪᠢᠵᠤ ᠥᠭᠭᠦᠯᠡ᠃ ᠲᠡᠮᠦᠷ ᠵᠤᠤᠬᠠ ᠶ᠋ᠢᠨ ᠠᠮᠠᠰᠠᠷ ᠤ᠋ᠨ ᠬᠠᠭᠠᠯᠲᠠᠨ ᠤ᠋ ᠨᠦᠬᠡ ᠪᠡᠷ ᠭᠡᠷ ᠦ᠋ᠨ ᠬᠠᠨᠠᠨ ᠳ᠋ᠤ᠌ ᠤᠯᠠᠪᠤᠷ ᠲᠤᠶᠠᠭᠠ ᠲᠣᠰᠴᠤ᠂ ᠭᠡᠷ ᠲᠦ᠍ ᠶᠡᠬᠡᠯᠡ(ᠶᠡᠬᠡ ᠯᠡ) ᠳᠤᠯᠠᠭᠠᠬᠠᠨ ᠰᠠᠢᠬᠠᠨ ᠪᠣᠯᠤᠭᠠᠳ ᠢᠷᠡᠵᠡᠢ᠃ ᠰᠢᠷᠴᠢᠨ᠂ ᠯᠡ ᠪᠠᠷᠢᠭᠠᠳ ᠬᠣᠢᠮᠣᠷ ᠲᠠᠭᠠᠨ ( ᠲᠤ ᠪᠠᠨ) ᠰᠠᠭᠤᠳᠠᠭ ᠪᠠᠢᠷᠢᠨ ᠳ᠋ᠠᠭᠠᠨ ( ᠳ᠋ᠤ᠌ ᠪᠠᠨ) ᠡᠵᠡᠨ ᠬᠥᠮᠦᠨ ᠰᠢᠭ ᠵᠠᠪᠢᠯᠠᠩᠬᠠᠨ ᠰᠠᠭᠤᠭᠠᠳ᠂ ᠤᠷᠢᠳᠤ ᠴᠠᠭ ᠲᠤ᠌ ᠰᠣᠨᠣᠮ ᠵᠠᠩᠭᠢ ᠶ᠋ᠢᠨ ᠳ᠋ᠦ᠍ ᠵᠠᠷᠤᠭᠳᠠᠵᠤ ᠪᠠᠢᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠬᠡᠵᠢᠶᠡ ᠨᠢᠭᠡ ᠬᠣᠢᠮᠣᠷ ᠲᠠᠭᠠᠨ( ᠲᠤ ᠪᠠᠨ) ᠣᠷᠣᠭᠰᠢ ᠪᠠᠨ ᠬᠠᠷᠠᠵᠤ ᠰᠠᠭᠤᠳᠠᠭ ᠴᠠᠭ ᠢ᠋ᠶ᠋ᠠᠨ ᠦᠵᠡᠬᠦ ᠪᠢᠯᠡ? ᠭᠡᠵᠦ ᠪᠣᠳᠣᠳᠠᠭ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠭᠠᠳ᠂ ᠣᠳᠣ ᠲᠡᠷᠡ ᠴᠠᠭ ᠢᠷᠡᠵᠦ᠂ ᠴᠡᠷᠡᠨ ᠲᠡᠢ ᠪᠡᠨ ᠬᠣᠶᠠᠭᠤᠯᠠ ᠪᠠᠨ ᠠᠵᠤ ᠲᠥᠷᠥᠨ ᠠᠮᠢ ᠵᠢᠭᠤᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠵᠡᠨ ᠪᠣᠯᠳᠠᠭ ᠴᠠᠭ ᠢᠷᠡᠭᠡᠳ᠂ ᠦᠷᠡ ᠬᠡᠦᠬᠡᠳ ᠮᠠᠨᠢ ᠨᠠᠮ ᠵᠠᠰᠠᠭ ᠤ᠋ᠨ ᠢ᠋ᠶ᠋ᠠᠨ ᠠᠴᠢ ᠪᠠᠷ ᠡᠷᠬᠡ ᠵᠢᠷᠭᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠥᠰᠴᠦ᠂ ᠴᠡᠷᠡᠨ ᠪᠢᠳᠡ ᠬᠣᠶᠠᠷ ᠰᠢᠭ᠋ ᠪᠠᠭᠠ ᠨᠠᠰᠤᠨ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠬᠥᠮᠦᠨ ᠳ᠋ᠦ᠍ ᠵᠠᠷᠤᠭᠳᠠᠬᠤ ᠶ᠋ᠢᠨ ᠵᠣᠪᠠᠯᠠᠩ ᠢ᠋ ᠬᠡᠵᠢᠶᠡ ᠴᠦ᠍ ᠦᠵᠡᠬᠦ ᠦᠭᠡᠢ ᠪᠣᠯᠵᠠᠢ ᠭᠡᠵᠦ ᠪᠠᠶᠠᠷᠯᠠᠨ ᠪᠣᠳᠣᠯᠠ᠃
— ᠪᠢ ᠰᠲ᠋ᠠᠯᠢᠨ ᠢ᠋ ᠵᠡᠭᠦᠳᠦᠯᠡᠭᠰᠡᠨ ᠰᠢᠦ᠃ ᠮᠠᠨ ᠤ᠋ ᠳ᠋ᠤ᠌ ᠣᠷᠣᠭᠠᠳ ᠢᠷᠡᠵᠦ᠂ ᠶᠠᠭ ᠯᠠ ᠮᠠᠨ ᠤ᠋ ᠳ᠋ᠤ᠌ ᠪᠠᠢᠳᠠᠭ ᠵᠢᠷᠤᠭ ᠲᠠᠢ ᠪᠠᠨ ᠠᠪ ᠠᠳᠠᠯᠢᠬᠠᠨ ᠪᠠᠢᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠪᠢ ᠳᠣᠣᠷᠠ ᠪᠠᠨ ᠲᠠᠨᠢᠭᠠᠳ᠂ ᠪᠠᠶᠠᠷᠯᠠᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠬᠦ ᠤᠤ? ᠪᠠᠰᠠ ᠰᠠᠨᠠᠭᠠ ᠵᠣᠪᠠᠵᠤ᠂ ᠲᠡᠷᠡ ᠶᠡᠬᠡ ᠬᠥᠮᠦᠨ ᠢ᠋ ᠮᠠᠭᠤ ᠭᠡᠷ ᠲᠡᠭᠡᠨ( ᠲᠤ ᠪᠡᠨ)ᠬᠠᠮᠢᠭᠠ ᠪᠠᠨ ᠴᠤ᠌ ᠰᠠᠭᠤᠯᠭᠠᠵᠤ᠂ ᠶᠠᠭᠤ ᠪᠠᠷ ᠢ᠋ᠶ᠋ᠠᠨ ᠴᠤ᠌ ᠬᠦᠨᠳᠦᠯᠡᠬᠦ ᠪᠡᠨ ᠣᠯᠵᠤ ᠶᠠᠳᠠᠨ ᠰᠠᠨᠳᠤᠷᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠠᠪᠳᠠᠷᠠ ᠪᠠᠨ ᠠᠭᠤᠳᠠᠯᠵᠤ᠂ ᠲᠠᠨ ᠤ᠋ ᠬᠠᠢᠷᠠᠲᠤ ᠮᠥᠩᠭᠥᠨ ᠠᠶᠠᠭᠠ ᠭᠠᠷᠭᠠᠭᠠᠳ ᠬᠠᠳᠠᠭ ᠢ᠋ᠶ᠋ᠠᠷ ᠠᠷᠴᠢᠵᠤ ᠰᠦ ᠪᠠᠷᠢᠭᠠᠳ᠂ ᠡᠯᠢᠭᠡ ᠪᠦᠲᠦᠨ᠂ ᠰᠠᠨᠠᠭᠠ ᠠᠮᠤᠷ᠂ ᠰᠠᠪᠠ ᠳᠦᠭᠦᠷᠡᠩ ᠵᠢᠷᠭᠠᠯ ᠲᠠᠢ ᠰᠠᠭᠤᠵᠤ᠂ ᠦᠷᠡ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠡᠩᠬᠡ ᠵᠢᠷᠭᠠᠯ ᠲᠠᠢ᠂ ᠡᠷᠳᠡᠮ ᠨᠣᠮ ᠲᠠᠢ ᠪᠣᠯᠵᠤ ᠶᠠᠪᠤᠭᠠ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠦᠨᠡᠨ ᠰᠡᠳᠬᠢᠯ ᠡᠴᠡ ᠪᠡᠨ ᠪᠠᠶᠠᠷ ᠬᠦᠷᠭᠡᠵᠦ ᠲᠠᠯᠠ ᠥᠭᠬᠦ ᠭᠡᠳ ᠰᠦᠷᠳᠡᠨ ᠡᠮᠢᠶᠡᠵᠦ᠂ ᠬᠡᠯᠡᠬᠦ ᠭᠡᠰᠡᠨ ᠦᠭᠡ ᠪᠡᠨ ᠬᠡᠯᠡᠵᠦ ᠴᠢᠳᠠᠯ ᠦᠭᠡᠢ ᠪᠠᠢᠲᠠᠯᠠ᠂ ᠭᠠᠳᠠᠭᠠ ᠲᠠᠨ ᠤ᠋ ᠠᠯᠬᠤᠬᠤ ᠴᠢᠮᠡᠭᠡ ᠪᠡᠷ ᠰᠡᠷᠢᠴᠢᠯᠡ(ᠰᠡᠷᠡᠴᠢᠬᠡᠯᠡ) ᠭᠡᠵᠦ ᠴᠡᠷᠡᠨ ᠦ᠌ ᠪᠠᠶᠠᠷᠯᠠᠨ ᠢᠨᠢᠶᠡᠮᠰᠦᠭᠯᠡᠵᠦ ᠬᠡᠯᠡᠬᠦ ᠳ᠋ᠦ᠍᠂
— ᠪᠢ ᠴᠦ᠍ ᠪᠠᠰᠠ ᠰᠡᠷᠢᠭᠡᠳ(ᠰᠡᠷᠡᠭᠡᠳ) ᠲᠡᠷᠡ ᠶᠡᠬᠡ ᠬᠥᠮᠦᠨ ᠢ᠋ ᠰᠡᠳᠬᠢᠨ ᠪᠣᠳᠣᠭᠰᠠᠨ ᠪᠢᠯᠡ᠃ ᠽᠠᠮᠪᠤᠲᠢᠪ ᠤ᠋ᠨ ᠰᠢᠳᠤᠷᠭᠤ ᠬᠥᠮᠦᠨ ᠪᠦᠬᠦᠨ ᠭᠡᠭᠡᠨ ᠡᠳᠦᠷ ᠴᠡᠭᠡᠵᠢᠨ ᠳ᠋ᠡᠭᠡᠨ ( ᠳ᠋ᠦ᠍ ᠪᠡᠨ)᠂ ᠬᠠᠷᠠᠩᠭᠤᠢ ᠰᠥᠨᠢ ᠵᠡᠭᠦᠳᠦᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠲᠡᠷᠡ ᠶᠡᠬᠡ ᠠᠴᠢᠲᠠᠨ ᠬᠥᠮᠦᠨ ᠢ᠋ ᠰᠡᠳᠬᠢᠨ ᠰᠠᠨᠠᠵᠤ ᠶᠠᠪᠤᠳᠠᠭ ᠰᠢᠦ ᠳᠡ᠃ ᠲᠠ ᠰᠠᠢᠬᠠᠨ ᠵᠡᠭᠦᠳᠦ ᠵᠡᠭᠦᠳᠦᠯᠡᠵᠡᠢ᠃ ᠡᠩᠬᠡ ᠲᠥᠷᠥ ᠶ᠋ᠢᠨ ᠡᠭᠡᠯ ᠵᠢᠷ ᠦ᠋ᠨ ᠪᠢᠳᠡ ᠴᠡᠭᠡᠵᠢ ᠲᠡᠨᠢᠭᠡᠷ ᠪᠣᠯᠬᠤ ᠳᠤᠰᠤᠮᠠ(ᠲᠣᠰᠤᠮ ᠢ᠋ᠶ᠋ᠠᠨ)᠂ ᠪᠣᠳᠣᠬᠤ ᠪᠣᠳᠣᠯ᠂ ᠵᠡᠭᠦᠳᠦᠯᠡᠬᠦ ᠵᠡᠭᠦᠳᠦ ᠬᠦᠷᠲᠡᠯᠡ ᠪᠡᠨ ᠣᠨᠳᠣᠣ ᠪᠣᠯᠳᠠᠭ ᠶᠤᠮ ᠪᠠᠢᠨᠠ ᠰᠢᠦ ᠳᠡ ᠭᠡᠵᠡᠢ᠃
ᠴᠡᠷᠡᠨ ᠴᠠᠢ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠲᠣᠰᠣ ᠬᠢᠭᠡᠳ ᠬᠡᠳᠦ ᠰᠠᠮᠤᠷᠴᠤ᠂ ᠲᠣᠰᠣ ᠲᠠᠢ ᠬᠢᠴᠡ ᠲᠡᠢ ᠰᠠᠢᠬᠠᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠴᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠭᠡᠵᠢ ᠶ᠋ᠢ ᠤᠮᠠᠷᠠ ᠵᠦᠭ ᠰᠲ᠋ᠠᠯᠢᠨ ᠳ᠋ᠤ᠌ ᠡᠷᠭᠦᠬᠦ ᠭᠡᠵᠦ ᠭᠠᠳᠠᠭᠠ ᠭᠠᠷᠴᠠᠢ᠃ ᠭᠡᠰᠡᠷ ᠲᠠᠪᠤᠨ ᠬᠠᠭᠠᠨ ᠢ᠋ᠶ᠋ᠠᠨ ᠵᠤᠤᠬᠠᠨ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠰᠢᠲᠠᠭᠠᠭᠰᠠᠨ ᠠ᠋ᠴᠠ ᠬᠣᠢᠰᠢ᠂ ᠥᠷᠯᠥᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠴᠠᠢ ᠶ᠋ᠢᠨ ᠳᠡᠭᠡᠵᠢ ᠶ᠋ᠢ ᠤᠯᠤᠰ ᠮᠣᠩᠭᠣᠯ ᠤ᠋ᠨ ᠡᠩᠬᠡ ᠵᠢᠷᠭᠠᠯ ᠢ᠋ ᠵᠣᠬᠢᠶᠠᠨ ᠥᠭᠭᠦᠭᠰᠡᠨ ᠲᠡᠷᠡ ᠡᠷᠬᠢᠮ ᠬᠥᠮᠦᠨ ᠳ᠋ᠦ᠍ ᠤᠮᠠᠷᠠ ᠲᠡᠰᠢ(ᠲᠠᠢᠰᠢ) ᠠᠯᠤᠰ ᠮᠣᠰᠺᠸᠠ ᠶ᠋ᠢᠨ ᠵᠦᠭ᠂ ᠪᠠᠰᠠ ᠰᠲ᠋ᠠᠯᠢᠨ ᠤ᠋ ᠠᠤᠭᠠ ᠶᠡᠬᠡ ᠤᠯᠤᠰ ᠲᠠᠢ ᠤᠯᠤᠰ ᠲᠦᠮᠡᠨ ᠦ᠌ ᠪᠡᠨ ᠬᠤᠪᠢ ᠵᠣᠬᠢᠶᠠᠯ ᠢ᠋ ᠡᠭᠦᠷᠢᠳᠡ ᠬᠣᠯᠪᠣᠵᠤ ᠥᠭᠭᠦᠭᠰᠡᠨ ᠮᠠᠷᠱᠠᠯ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠭᠡᠵᠦ ᠵᠡᠭᠦᠨ ᠵᠦᠭ ᠪᠠᠭᠠᠲᠤᠷ ᠬᠣᠲᠠ ᠶ᠋ᠢᠨ ᠳᠠᠰᠢ(ᠲᠡᠢᠰᠢ) ᠡᠷᠭᠦᠵᠦ ᠰᠠᠴᠤᠳᠠᠭ ᠪᠠᠢᠵᠠᠢ᠃ ᠭᠡᠷ ᠲᠡᠭᠡᠨ( ᠲᠤ ᠪᠡᠨ) ᠣᠷᠣᠭᠠᠳ᠂
— ᠰᠠᠢᠬᠠᠨ ᠴᠡᠯᠮᠡᠭ ᠡᠳᠦᠷ ᠪᠣᠯᠬᠤ ᠨᠢ ᠳᠡ ᠥᠨᠥᠳᠥᠷ ᠭᠡᠵᠦ ᠴᠠᠢ᠂ ᠦᠳᠡᠰᠢ ᠶ᠋ᠢᠨ ᠦᠯᠡᠳᠡᠭᠰᠡᠨ ᠮᠢᠬᠠ ᠲᠠᠢ ᠲᠠᠪᠠᠭ᠂ ᠠᠭᠠᠷᠤᠤᠯ ᠬᠤᠷᠤᠳ᠂ ᠪᠠᠰᠠ ᠠᠷᠭᠠᠯ ᠤ᠋ᠨ ᠤᠲᠤᠭᠠ ᠶ᠋ᠢᠨ ᠠᠶᠠᠲᠠᠢᠬᠠᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ᠂ ᠬᠥᠯᠳᠡᠭᠦᠦ ᠰᠠᠢᠬᠠᠨ ᠰᠢᠷᠠ ᠲᠣᠰᠣ ᠬᠠᠭᠠᠯᠵᠤ ᠲᠠᠯᠪᠢᠭᠰᠠᠨ ᠲᠠᠪᠠᠭ ᠳᠥᠬᠥᠭᠦᠯᠵᠡᠢ᠃
ᠠᠮᠲᠠᠲᠠᠢ ᠭᠡᠭᠴᠢ ᠶ᠋ᠢᠨ ᠲᠡᠷᠡ ᠬᠥᠯᠳᠡᠭᠦᠦ ᠲᠣᠰᠣ ᠠ᠋ᠴᠠ ᠨᠢ ᠳᠡᠰ ᠳᠡᠰ ᠬᠢᠲᠡᠯᠡ ᠵᠠᠵᠢᠯᠵᠤ ᠢᠳᠡᠬᠦ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ)᠂ ᠰᠢᠷᠴᠢᠨ᠂
— ᠯᠸᠨᠢᠨᠮᠠ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠲᠣᠰᠣ ᠶᠠᠪᠤᠭᠤᠯᠬᠤ ᠶᠤᠮᠰᠠᠨ᠃ ᠣᠳᠣ ᠲᠣᠰᠣ ᠨᠢ ᠳᠠᠭᠤᠰᠴᠤ ᠪᠠᠢᠭᠠ ᠪᠠᠢᠬᠤ᠃ ᠬᠠᠭᠤᠴᠢᠨ ᠤ᠋ ᠤᠯᠤᠰ᠂ ᠡᠳᠦᠷ ᠪᠦᠷᠢ ᠨᠢᠭᠡ ᠯᠠᠩ ᠲᠣᠰᠣ ᠢᠳᠡᠵᠦ ᠪᠠᠢᠪᠠᠯ ᠪᠡᠶᠡ ᠳ᠋ᠦ᠍ ᠰᠠᠢᠨ᠂ ᠤᠬᠠᠭᠠᠨ ᠰᠠᠷᠠᠭᠤᠯ ᠪᠣᠯᠳᠠᠭ ᠭᠡᠵᠦ ᠤᠴᠢᠷ ᠲᠠᠢ ᠦᠭᠡ ᠳᠠᠭ ᠰᠢᠦ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠪᠢ ᠤᠳᠬᠤᠨ ᠵᠢᠭᠠᠯ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠶᠠᠪᠤᠭᠤᠯᠬᠤ ᠶᠠᠭᠤᠮᠠ ᠪᠠᠨ ᠬᠡᠳᠦᠢᠨ ᠪᠡᠯᠡᠳᠦᠭᠰᠡᠨ᠂ ᠠᠳᠢᠶᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠪᠠᠢᠭᠠ ᠵᠢᠭᠠᠯ ᠥᠬᠢᠨ ᠢ᠋ᠶ᠋ᠡᠨ ᠡᠷᠭᠢᠬᠦ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠥᠨᠥᠳᠥᠷ ᠮᠠᠨᠠᠢᠬᠢ ᠪᠠᠷ ᠳᠠᠭᠠᠷᠢᠵᠤ᠂ ᠯᠸᠨᠢᠨᠮᠠ ᠳ᠋ᠤ᠌ ᠶᠠᠪᠤᠭᠤᠯᠬᠤ ᠶᠠᠭᠤᠮᠠ ᠠᠪᠤᠭᠠᠳ ᠶᠠᠪᠤᠨᠠ ᠭᠡᠰᠡᠨ ᠭᠡᠵᠦ ᠦᠭᠡ ᠬᠡᠯᠡᠯᠴᠡᠨ ᠴᠠᠢ ᠪᠠᠨ ᠤᠤᠭᠤᠭᠠᠳ᠂ ᠴᠡᠷᠡᠨ ᠰᠠᠭᠠᠯᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠤᠪᠢᠩ ᠠᠪᠴᠤ ᠦᠨᠢᠶᠡ ᠪᠡᠨ ᠰᠠᠭᠠᠬᠤ ᠪᠠᠷ ᠭᠠᠷᠴᠠᠢ᠃ ᠰᠢᠷᠴᠢᠨ᠂ ᠴᠡᠷᠡᠨ ᠢ᠋ ᠦᠨᠢᠶᠡ ᠪᠡᠨ ᠰᠠᠭᠠᠬᠤ᠂ ᠢᠪᠢᠯᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂ ᠲᠤᠭᠤᠯ ᠢ᠋ ᠨᠢ ᠭᠡᠷ ᠡᠴᠡ ᠭᠠᠷᠭᠠᠬᠤ᠂ ᠪᠠᠷᠢᠬᠤ ᠵᠡᠷᠭᠡ ᠪᠡᠷ ᠲᠤᠰᠠᠯᠠᠯᠴᠠᠵᠤ᠂ ᠦᠨᠢᠶᠡ ᠰᠠᠭᠠᠵᠤ ᠭᠦᠢᠴᠡᠮᠡᠭᠴᠡ᠂ ᠬᠤᠷᠠᠭᠠ ᠪᠠᠨ ᠫᠧᠩ ᠡᠴᠡ ᠪᠡᠨ᠂ ᠪᠠᠰᠠ ᠫᠧᠩ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠪᠠᠭᠲᠠᠬᠤ ᠦᠭᠡᠢ ᠳ᠋ᠦ᠍ ᠪᠠᠷᠢᠭᠰᠠᠨ ᠬᠤᠷᠠᠭᠠ ᠶ᠋ᠢᠨ ᠭᠡᠷ ᠡᠴᠡ ᠬᠤᠷᠠᠭᠠ ᠢᠰᠢᠭᠡ ᠪᠡᠨ ᠭᠠᠷᠭᠠᠵᠤ ᠬᠥᠬᠥᠭᠦᠯᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂ ᠬᠣᠨᠢ ᠢᠮᠠᠭᠠ᠂ ᠬᠤᠷᠠᠭᠠ ᠢᠰᠢᠭᠡ ᠥᠷᠯᠥᠭᠡ ᠶ᠋ᠢᠨ ᠲᠤᠩᠭᠠᠯᠠᠭ ᠠᠭᠠᠷ ᠲᠤ᠌ ᠱᠤᠤᠭᠢᠨ ᠮᠠᠢᠯᠠᠯᠳᠤᠵᠤ᠂ ᠬᠤᠷᠠᠭᠠ ᠢᠰᠢᠭᠡ ᠨᠢ ᠡᠬᠡ ᠪᠡᠨ ᠡᠷᠢᠵᠦ ᠭᠦᠶᠦᠯᠳᠦᠯᠡ᠃ ᠬᠣᠶᠠᠷ ᠬᠥᠭᠰᠢᠨ᠂ ᠮᠠᠯᠴᠢ ᠨᠢᠳᠦ ᠲᠡᠢ ᠲᠤᠯᠠ ᠬᠣᠨᠢ ᠢᠮᠠᠭᠠ᠂ ᠢᠰᠢᠭᠡ ᠬᠤᠷᠠᠭᠠ ᠪᠠᠨ ᠶᠡᠷᠦ ᠠᠨᠳᠤᠬᠤ ᠦᠭᠡᠢ ᠡᠬᠡ ᠶ᠋ᠢ ᠨᠢ ᠣᠯᠭᠣᠭᠤᠯᠵᠤ ᠪᠠᠢᠯᠠ᠃ ᠭᠠᠳᠠᠭᠠ ᠮᠠᠢᠯᠠᠯᠳᠤᠬᠤ ᠴᠢᠮᠡᠭᠡ ᠪᠡᠷ ᠭᠡᠷ ᠲᠦ᠋ᠨᠢ( ᠲᠤ ᠨᠢ) ᠪᠠᠢᠭᠰᠠᠨ ᠬᠤᠷᠠᠭᠠ ᠢᠰᠢᠭᠡ ᠮᠠᠢᠯᠠᠯᠳᠤᠨ᠂ ᠭᠠᠳᠠᠭᠰᠢ ᠭᠠᠷᠭᠠᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠡᠬᠡ ᠶ᠋ᠢ ᠪᠡᠨ ᠬᠥᠬᠥᠵᠦ᠂ ᠰᠠᠨᠠᠭᠠ ᠪᠠᠨ ᠠᠮᠤᠷᠴᠠᠭᠠᠵᠠᠢ᠃ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠠᠯᠠᠩ ᠢ᠋ ᠦᠶᠡ ᠦᠶᠡ ᠶᠣᠪᠣᠷᠤᠩᠬᠠᠨ ᠬᠥᠬᠥᠵᠦ ᠪᠠᠢᠬᠤ ᠲᠡᠷᠡ ᠰᠠᠮᠪᠠᠭᠠᠨ ᠳ᠋ᠤᠨᠢ( ᠳ᠋ᠤ᠌ ᠨᠢ)᠂ ᠬᠣᠶᠠᠷ ᠬᠥᠭᠰᠢᠨ᠂ ᠬᠤᠷᠠᠭᠠ ᠶ᠋ᠢᠨ ᠫᠦᠨᠽ( ᠫᠦᠨᠵᠡ)᠂ ᠭᠡᠷ ᠳᠣᠲᠣᠷᠠ ᠨᠢ ᠴᠡᠪᠡᠷᠯᠡᠨ᠂ ᠬᠣᠭ ᠰᠡᠭ ᠲᠠᠲᠠᠯᠠᠵᠤ᠂ ᠳᠡᠪᠢᠰᠬᠦ ᠪᠠᠭᠤᠴᠠ ᠶ᠋ᠢ ᠨᠢ ᠰᠣᠯᠢᠭᠠᠳ᠂ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠡᠷ ᠳᠣᠲᠣᠷᠠ ᠲᠠᠲᠠᠯᠠᠵᠠᠢ᠃ ᠲᠡᠭᠡᠭᠡᠳ᠂ ᠬᠥᠬᠥᠵᠦ ᠴᠠᠳᠤᠭᠰᠠᠨ ᠬᠤᠷᠠᠭᠠ ᠢᠰᠢᠭᠡ ᠪᠡᠨ ᠪᠠᠷᠢᠵᠤ᠂ ᠫᠧᠩ ᠲᠡᠢ ᠬᠠᠰᠢᠶᠠᠨ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠣᠷᠣᠭᠤᠯᠤᠭᠠᠳ᠂ ᠰᠢᠷᠡᠭᠡ ᠪᠥᠬᠦᠲᠡᠢ ᠲᠣᠮᠣ ᠭᠡᠭᠴᠢ ᠬᠠᠢᠷᠠᠲᠠᠢ ᠠᠳᠠ ᠪᠠᠨ ᠵᠡᠯᠡ ᠡᠴᠡ ᠲᠠᠢᠯᠵᠤ ᠤᠨᠤᠭᠠᠳ ᠡᠪᠦᠭᠡᠨ᠂ ᠲᠡᠮᠡᠭᠡ ᠦᠬᠡᠷ ᠢ᠋ᠶ᠋ᠡᠨ ᠲᠤᠯᠤᠭᠠᠳ ᠤ᠋ᠨ ᠵᠦᠭ ᠪᠡᠯᠴᠢᠭᠡᠬᠦ ᠪᠡᠷ ᠭᠠᠷᠪᠠ᠃ ᠣᠷᠴᠢᠨ ᠲᠣᠭᠣᠷᠢᠨ ᠨᠢᠳᠦ ᠬᠦᠷᠬᠦ ᠭᠠᠵᠠᠷ ᠡᠨᠳᠡ ᠲᠡᠨᠳᠡ ᠭᠠᠵᠠᠷ ᠨᠢ ᠬᠠᠷᠠᠯᠠᠨ ᠴᠤᠬᠤᠢᠭᠰᠠᠨ ᠲᠤᠯᠤᠭᠠᠳ ᠪᠣᠯᠤᠭᠰᠠᠨ ᠠᠭᠤᠵᠢᠮ ᠲᠠᠯᠠ ᠦᠵᠡᠭᠳᠡᠵᠦ᠂ ᠴᠠᠭᠠᠯᠵᠢ ᠬᠠᠭᠳᠠ ᠴᠠᠰᠤᠨ ᠳᠣᠣᠷᠠ ᠠ᠋ᠴᠠ ᠴᠤᠬᠤᠢᠵᠤ᠂ ᠥᠳᠬᠡᠨ ᠤᠷᠭᠤᠭᠰᠠᠨ ᠭᠠᠵᠠᠷ ᠲᠠᠭᠠᠨ( ᠲᠤ ᠪᠠᠨ) ᠶᠠᠮᠠᠷᠬᠠᠨ ᠨᠢᠭᠡᠨ ᠲᠣᠮᠣ ᠠᠷᠢᠶᠠᠲᠠᠨ ᠤ᠋ ᠦᠰᠦ ᠰᠢᠭ ᠰᠢᠷᠠᠯᠠᠨ ᠬᠠᠯᠢᠭᠤᠷᠠᠵᠤ ᠦᠵᠡᠭᠳᠡᠬᠦ ᠠᠵᠢ᠃ ᠨᠢᠭᠡᠨ ᠰᠦᠷᠦᠭ ᠣᠯᠠᠨ ᠵᠡᠭᠡᠷᠡ ᠣᠢᠷᠠ ᠶ᠋ᠢᠨ ᠬᠥᠲᠥᠯ ᠳᠡᠭᠡᠷᠡ ᠭᠠᠷᠤᠭᠠᠳ᠂ ᠥᠷᠯᠥᠭᠡ ᠶ᠋ᠢᠨ ᠨᠠᠷᠠᠨ ᠤ᠋ ᠭᠡᠷᠡᠯ ᠰᠠᠴᠤᠷᠠᠭ ᠲᠤ᠌ ᠰᠢᠷᠭᠠᠯᠲᠤᠨ ᠬᠠᠷᠠᠭᠳᠠᠵᠠᠢ᠃
ᠵᠢᠬᠡᠭᠦᠨ ᠠᠭᠠᠷ ᠤ᠋ᠨ ᠬᠦᠢᠲᠡᠨ ᠬᠡᠢ ᠶ᠋ᠢ ᠵᠢᠭᠦᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠱᠤᠤᠭᠢᠭᠤᠯᠤᠨ ᠬᠠᠭᠠᠯᠵᠤ᠂ ᠲᠣᠮᠣᠬᠠᠨ ᠬᠡᠷᠢᠶᠡ ᠥᠷᠥᠨᠡ ᠵᠦᠭ ᠨᠢᠰᠦᠨ ᠥᠩᠭᠡᠷᠡᠵᠡᠢ᠃ ᠰᠢᠷᠴᠢᠨ ᠦ᠌ ᠬᠤᠷᠴᠠ ᠨᠢᠳᠦ ᠨᠢ ᠨᠢᠭᠡ ᠲᠣᠯᠣᠭᠠᠢ ᠶ᠋ᠢᠨ ᠬᠣᠷᠮᠣᠢ ᠳ᠋ᠤ᠌ ᠤᠯᠠᠭᠠᠨ ᠦᠨᠡᠭᠡᠨ ᠦ᠌ ᠪᠠᠷᠠ ᠬᠡᠳᠦᠢᠨ ᠠᠵᠢᠭᠯᠠᠨ ᠬᠠᠷᠠᠵᠤ᠂ ᠡᠵᠡᠭᠦᠢ ᠴᠢᠮᠡᠭᠡ ᠦᠭᠡᠢ ᠬᠡᠭᠡᠷᠡ ᠭᠠᠵᠠᠷ᠂ ᠶᠡᠷᠦ ᠠᠵᠢᠭᠯᠠᠪᠠᠯ ᠠᠮᠢᠲᠠᠨ ᠳᠦᠭᠦᠷᠡᠩ ᠠᠵᠢᠶᠠᠮᠤ᠃
ᠨᠢᠭᠡ ᠬᠥᠲᠥᠯ ᠦ᠋ᠨ ᠨᠥᠮᠥᠷᠢ ᠳ᠋ᠦ᠍ ᠦᠬᠡᠷ ᠢ᠋ᠶ᠋ᠡᠨ ᠦᠯᠡᠳᠡᠭᠡᠵᠦ ᠲᠣᠭᠲᠠᠭᠠᠭᠠᠳ ᠡᠪᠦᠭᠡᠨ᠂ ᠲᠡᠮᠡᠭᠡ ᠪᠡᠨ ᠠᠭᠢ᠂ ᠶᠥᠷᠬᠥᠭ᠂ ᠳᠠᠷᠠᠰᠤ ᠡᠯᠪᠡᠭᠲᠡᠢ ᠭᠠᠵᠠᠷ ᠬᠦᠷᠭᠡᠵᠦ ᠰᠠᠯᠬᠢ ᠰᠥᠷᠦᠭᠦᠯᠦᠨ ᠲᠣᠭᠲᠠᠭᠠᠭᠠᠳ ᠭᠡᠷ ᠲᠡᠭᠡᠨ( ᠲᠤ ᠪᠡᠨ) ᠬᠠᠷᠢᠵᠠᠢ᠃ ᠭᠠᠳᠠᠭᠠ ᠪᠠᠨ ᠳᠥᠭᠥᠵᠦ ᠶᠠᠪᠤᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠡᠮᠡᠭᠡᠨ ᠨᠢ ᠠᠷᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠴᠠᠰᠤ ᠲᠠᠢ ᠠᠷᠤᠭ ᠡᠭᠦᠷᠦᠭᠡᠳ᠂ ᠬᠥᠲᠥᠯ ᠤᠷᠤᠭᠤ ᠪᠠᠭᠤᠵᠤ ᠠᠢᠰᠤᠢ ᠠᠵᠢ᠃ ᠲᠡᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠡᠪᠦᠭᠡᠨ᠂ ᠭᠣᠣᠯ ᠠ᠋ᠴᠠ ᠠᠪᠴᠢᠷᠠᠭᠰᠠᠨ ᠮᠥᠰᠥ ᠳᠦᠭᠦᠷᠦᠭᠰᠡᠨ ᠢ᠋ᠶ᠋ᠡᠨ ᠰᠠᠨᠠᠵᠤ᠂ ᠥᠴᠥᠭᠡᠳᠦᠷ ᠮᠥᠰᠥᠨ ᠳ᠋ᠦ᠍ ᠶᠠᠪᠤᠭᠠᠳ ᠢᠷᠡᠳᠡᠭ ᠶᠦᠮ ᠰᠠᠨ ᠪᠠᠢᠵᠤ ᠯᠠ ᠳᠠ᠂ ᠬᠥᠲᠥᠯ ᠦ᠋ᠨ ᠠᠷᠤ ᠠ᠋ᠴᠠ ᠴᠠᠰᠤ ᠡᠭᠦᠷᠴᠦ ᠶᠠᠪᠤᠬᠤ ᠠ᠋ᠴᠠ ᠭᠡᠵᠦ ᠪᠣᠳᠣᠵᠠᠢ᠃ ᠴᠡᠷᠡᠨ ᠭᠠᠳᠠᠭᠠ ᠪᠠᠨ ᠬᠦᠷᠴᠦ ᠢᠷᠡᠭᠡᠳ᠂ ᠭᠡᠷ ᠦ᠋ᠨ ᠬᠠᠶᠠᠭᠠᠨ ᠳ᠋ᠤ᠌ ᠴᠠᠰᠤ ᠲᠠᠢ ᠠᠷᠤᠭ ᠢ᠋ᠶ᠋ᠠᠨ ᠪᠠᠭᠤᠯᠭᠠᠭᠠᠳ᠂
— ᠥᠨᠥᠳᠥᠷ ᠰᠠᠢᠬᠠᠨ ᠡᠳᠦᠷ ᠪᠣᠯᠬᠤ ᠨᠢ ᠠ᠋᠃ ᠪᠢ ᠬᠣᠨᠢ ᠪᠠᠨ ᠠᠷᠤ ᠲᠡᠢᠰᠢ ᠪᠡᠯᠴᠢᠭᠡᠯᠡ ᠭᠡᠳ ᠬᠣᠶᠠᠷ ᠬᠥᠭᠰᠢᠨ᠂ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠡᠪᠲᠡᠰᠢ ᠲᠡᠢ ᠨᠣᠢᠲᠠᠨ ᠪᠠᠭᠠᠰᠤ ᠬᠦᠢᠳᠡᠰᠦ ᠠᠷᠢᠯᠭᠠᠵᠤ ᠡᠬᠢᠯᠡᠯᠡ᠃ ᠲᠡᠭᠡᠭᠡᠳ ᠪᠠᠬᠠᠨ ᠡᠴᠡᠵᠦ ᠴᠤᠴᠠᠭᠠᠳ᠂ ᠬᠣᠶᠠᠭᠤᠯᠠ ᠪᠠᠨ ᠵᠡᠷᠭᠡᠴᠡᠨ ᠰᠠᠭᠤᠵᠤ᠂ ᠰᠢᠷᠴᠢᠨ ᠲᠦᠷᠡᠢ ᠡᠴᠡ ᠪᠡᠨ ᠭᠠᠩᠰᠠ ᠪᠠᠨ ᠭᠠᠷᠭᠠᠵᠤ᠂ ᠶᠡᠨᠯᠢᠶᠤᠤ ᠬᠣᠯᠢᠭᠰᠠᠨ ᠰᠠᠢᠬᠠᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠳ᠋ᠦᠩᠰᠸᠩ(ᠳᠦᠩᠰᠡᠨ) ᠲᠠᠮᠠᠬᠢ ᠨᠡᠷᠡᠵᠦ ᠬᠡᠳᠦ ᠰᠣᠷᠣᠲᠠᠯᠠ᠂ ᠴᠡᠷᠡᠨ ᠢᠨᠢᠶᠡᠮᠰᠦᠭᠯᠡᠵᠦ᠂
— ᠪᠢᠳᠡ ᠬᠣᠶᠠᠷ ᠥᠲᠡᠯᠵᠦ᠂ ᠭᠣᠷᠢ ᠦᠭᠡᠢ ᠪᠣᠯᠵᠤ ᠶᠠᠪᠤᠨᠠ ᠳᠠ᠃ ᠤᠷᠢᠳᠤ ᠵᠠᠯᠠᠭᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠰᠣᠨᠣᠮ ᠵᠠᠩᠭᠢ ᠶ᠋ᠢᠨ ᠳ᠋ᠦ᠍ ᠵᠠᠷᠤᠭᠳᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)᠂ ᠪᠢᠳᠡ ᠬᠣᠶᠠᠷ ᠮᠠᠯ ᠤ᠋ᠨ ᠬᠦᠢᠳᠡᠰᠦ ᠥᠷᠯᠥᠭᠡ ᠠᠷᠢᠯᠭᠠᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)᠂ ᠬᠡᠵᠢᠶᠡ ᠠᠮᠠᠷᠠᠵᠤ ᠰᠠᠭᠤᠳᠠᠭ ᠰᠠᠨ ᠪᠢᠯᠡ? ᠣᠳᠣ ᠪᠠᠰᠠ ᠤᠳᠠᠬᠤ ᠦᠭᠡᠢ ᠤᠯᠠᠮ ᠶᠡᠬᠡ ᠠᠵᠢᠯ ᠨᠡᠮᠡᠭᠳᠡᠵᠦ᠂ ᠢᠮᠠᠭᠠᠨ ᠤ᠋ ᠨᠣᠯᠤᠤᠷ᠂ ᠠᠳᠤᠭᠤ ᠦᠬᠡᠷ ᠦ᠋ᠨ ᠬᠥᠭᠡᠪᠦᠷ ᠰᠠᠮᠨᠠᠬᠤ᠂ ᠲᠡᠭᠡᠭᠡᠳ ᠪᠠᠰᠠ ᠬᠣᠨᠢ ᠪᠠᠨ ᠬᠢᠷᠭᠠᠬᠤ ᠴᠠᠭ ᠢᠷᠡᠬᠦ ᠨᠢ ᠳᠡ᠃ ᠴᠢᠮᠬᠢ ᠴᠦ᠍ ᠨᠣᠣᠰᠣ ᠨᠣᠯᠤᠤᠷ ᠬᠠᠶᠠᠬᠤ ᠦᠭᠡᠢ᠂ ᠴᠥᠮ ᠢ᠋ ᠨᠢ ᠬᠢᠷᠭᠠᠵᠤ ᠰᠠᠮᠨᠠᠵᠤ ᠠᠪᠬᠤ ᠶᠤᠮ ᠰᠠᠨ᠃ ᠨᠢᠳᠤᠨᠤᠨ ᠪᠢᠳᠡ ᠲᠤᠷᠰᠢᠯᠭᠠ ᠪᠠᠭᠠᠳᠤᠭᠠᠳ ᠢᠮᠠᠭᠠ ᠪᠠᠨ ᠰᠠᠢᠨ ᠰᠠᠮᠨᠠᠵᠤ᠂ ᠬᠥᠭᠡᠪᠦᠷ ᠢ᠋ᠶ᠋ᠡᠨ ᠭᠦᠢᠴᠡᠳ ᠠᠪᠴᠤ ᠴᠢᠳᠠᠭᠰᠠᠨ ᠦᠭᠡᠢ᠂ ᠦᠨᠡ ᠲᠡᠢ ᠲᠦᠭᠦᠬᠡᠢ ᠡᠳ᠋ ᠢ᠋ᠶ᠋ᠡᠨ ᠰᠠᠯᠬᠢᠨ ᠳ᠋ᠤ᠌ ᠬᠡᠢᠰᠬᠡᠵᠦ᠂ ᠡᠪᠦᠭᠡᠨ ᠰᠠᠮᠪᠤᠤ ᠭᠤᠸᠠᠢ ᠶ᠋ᠢᠨ ᠬᠡᠯᠡᠳᠡᠭ ᠢ᠋ᠶ᠋ᠡᠷ ᠤᠯᠤᠰ ᠲᠤ᠌ ᠬᠣᠬᠢᠷᠠᠯ ᠤᠴᠠᠷᠠᠭᠤᠯᠤᠯᠠ᠃ ᠮᠠᠷᠱᠠᠯ᠂ ᠮᠠᠯᠴᠢᠨ ᠪᠢᠳᠡᠨ ᠳ᠋ᠦ᠍ ᠰᠤᠷᠭᠠᠨ ᠬᠡᠯᠡᠬᠦ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ)᠂ ᠤᠩᠭᠠᠰᠤ ᠨᠣᠣᠰᠣ ᠪᠠᠨ ᠭᠠᠭᠴᠠ ᠴᠦ᠍ ᠭᠷᠠᠮ ᠬᠠᠶᠠᠯ ᠦᠭᠡᠢ᠂ ᠴᠥᠮ ᠢ᠋ ᠨᠢ ᠠᠰᠢᠭᠯᠠ ᠭᠡᠰᠡᠨ ᠪᠢᠯᠡ ᠯᠠ᠂ ᠪᠢᠳᠡ ᠠᠷᠠᠢ ᠯᠠ ᠪᠦᠯᠢ ᠥᠬᠡᠢᠳᠡᠭᠡᠳ᠂ ᠳᠦᠢᠭᠦᠢᠳᠡᠵᠦ ᠳᠡ᠃
— ᠭᠠᠢᠭᠤᠢ᠂ ᠡᠨᠡ ᠵᠢᠯ ᠨᠢᠳᠤᠨᠤᠨ ᠤ᠋ ᠬᠢ ᠡᠴᠡ ᠳᠡᠭᠡᠷᠡ ᠪᠣᠯᠤᠨᠠ᠃ ᠳᠥᠩᠭᠡᠴᠢᠬᠡᠨᠡ ᠪᠠᠢᠬᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃ ᠬᠡᠷᠪᠡ ᠪᠦᠯᠢ ᠦᠭᠡᠢᠳᠡᠬᠦ ᠳ᠋ᠦ᠍ ᠬᠦᠷᠪᠡᠯ᠂ ᠵᠠᠯᠠᠭᠤᠴᠤᠳ ᠤ᠋ᠨ ᠡᠭᠦᠷ ᠡᠴᠡ ᠲᠤᠰᠠᠯᠠᠮᠵᠢ ᠭᠤᠶᠤᠨᠠ ᠳᠠ᠃ ᠴᠡᠷᠢᠭ ᠦ᠋ᠨ ᠠᠷᠤ ᠭᠡᠷ ᠦ᠋ᠨ ᠬᠤᠪᠢ ᠪᠠᠷ ᠵᠠᠯᠠᠭᠤᠴᠤᠳ᠂ ᠡᠪᠯᠡᠯ ᠦ᠋ᠨ ᠭᠡᠰᠢᠭᠦᠳ— ᠢᠳᠡᠷᠬᠡᠭ ᠰᠦᠷᠡᠬᠡᠢ ᠤᠯᠤᠰ ᠲᠤᠰᠠᠯᠠᠭᠠᠳ ᠥᠭᠭᠦᠨᠡ ᠰᠢᠦ ᠭᠡᠵᠦ ᠰᠢᠷᠴᠢᠨ ᠦ᠌ ᠬᠡᠯᠡᠬᠦ ᠳ᠋ᠦ᠍᠂ ᠴᠡᠷᠡᠨ ᠪᠣᠳᠣᠯᠭᠠ ᠪᠣᠯᠵᠤ᠂
— ᠪᠢᠳᠡ ᠬᠣᠶᠠᠷ ᠥᠲᠡᠯᠬᠦ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠶᠡᠬᠡᠯᠡ (ᠶᠡᠬᠡ ᠯᠡ)ᠣᠨᠳᠣᠣ ᠪᠣᠯᠵᠤ ᠶᠠᠪᠤᠨᠠ ᠰᠢᠦ ᠬᠡᠮᠡᠪᠡᠰᠦ᠂
— ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ ᠳᠠ᠂ ᠨᠠᠰᠤ ᠶᠠᠪᠤᠵᠤ ᠴᠢᠳᠠᠯ ᠲᠡᠩᠬᠡᠭᠡ ᠳᠣᠷᠣᠢᠲᠠᠵᠤ ᠶᠠᠪᠤᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠴᠡᠷᠡᠨ᠂
— ᠦᠭᠡᠢ᠂ ᠪᠢ ᠲᠡᠷᠡ ᠶ᠋ᠢ ᠬᠡᠯᠡᠭᠡ ᠦᠭᠡᠢ ᠭᠡᠬᠦ ᠳ᠋ᠦ᠍ᠨᠢ ( ᠳ᠋ᠦ᠍ ᠨᠢ)᠂ ᠰᠢᠷᠴᠢᠨ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠥᠭᠡᠳᠡ ᠡᠴᠡ ᠭᠠᠢᠬᠠᠰᠬᠢᠨ ᠬᠠᠷᠠᠭᠠᠳ᠂ ᠦᠭᠡ ᠶ᠋ᠢᠨ ᠤᠷᠭᠠ ᠪᠠᠷ ᠰᠠᠨᠠᠭᠠ ᠶ᠋ᠢᠨ ᠮᠣᠷᠢ ᠶ᠋ᠢ ᠪᠠᠷᠢᠬᠤ ᠭᠡᠵᠦ ᠨᠢᠳᠦ ᠪᠡᠨ ᠠᠨᠢᠰᠬᠢᠨ ᠪᠣᠳᠣᠯᠭᠠ ᠪᠣᠯᠤᠭᠰᠠᠨ ᠴᠢᠷᠠᠢ ᠶ᠋ᠢ ᠨᠢ ᠠᠵᠢᠭᠯᠠᠨ ᠮᠦᠰᠢᠶᠡᠪᠡᠰᠦ ᠴᠡᠷᠡᠨ᠂
— ᠮᠢᠨᠦ ᠪᠣᠳᠣᠬᠤ ᠳ᠋ᠤ᠌᠂ ᠭᠠᠭᠴᠠ ᠪᠢᠳᠡ ᠬᠣᠶᠠᠷ ᠴᠤ᠌ ᠪᠢᠰᠢ᠂ ᠪᠢᠳᠡᠨ ᠦ᠌ ᠣᠷᠴᠢᠨ ᠲᠣᠭᠣᠷᠢᠨ ᠪᠠᠢᠭᠠ ᠪᠠᠷᠤᠭ ᠬᠥᠮᠦᠨ ᠪᠦᠬᠦᠨ᠂ ᠮᠠᠨ ᠤ᠋ ᠬᠥᠮᠦᠨ ᠠᠷᠠᠳ ᠤ᠋ᠨ ᠣᠯᠠᠩᠬᠢ ᠨᠢ ᠣᠷᠴᠢᠨ ᠲᠣᠭᠣᠷᠢᠨ ᠤ᠋ ᠲᠦᠮᠡᠨ ᠪᠣᠳᠠᠰ ᠢ᠋ ᠱᠠᠯ ᠥᠮᠨᠥᠭᠡ ᠨᠢᠳᠦ ᠪᠡᠷ ᠦᠵᠡᠳᠡᠭ ᠪᠣᠯᠤᠭᠰᠠᠨ ᠪᠣᠯᠤᠯᠲᠠᠢ᠃ ᠬᠡᠦᠬᠡᠳ ᠰᠢᠤᠬᠠᠳ᠂ ᠡᠪᠦᠭᠡᠳ ᠡᠮᠡᠭᠡᠳ ᠴᠦ᠍ ᠭᠡᠰᠡᠨ᠂ ᠪᠢᠳᠡᠨ ᠦ᠌ ᠪᠠᠭᠠ ᠶ᠋ᠢᠨ ᠮᠡᠳᠡᠳᠡᠭ ᠬᠡᠦᠬᠡᠳ ᠰᠢᠤᠬᠠᠳ᠂ ᠡᠪᠦᠭᠡᠳ ᠡᠮᠡᠭᠡᠳ ᠪᠢᠰᠢ ᠪᠣᠯᠵᠠᠢ᠂ ᠵᠠ᠂ ᠬᠡᠦᠬᠡᠳ ᠰᠢᠤᠬᠠᠳ ᠴᠤ᠌ ᠶᠠᠭᠠᠮᠠᠢ᠂ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠶᠠᠪᠤᠳᠠᠭ ᠤᠯᠤᠰ ᠭᠡᠯᠡ᠃ ᠭᠡᠲᠡᠯᠡ ᠥᠲᠡᠯᠦᠭᠰᠡᠨ ᠪᠢᠳᠡ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠶᠠᠪᠤᠳᠠᠭ ᠦᠭᠡᠢ ᠮᠥᠷᠲᠡᠭᠡᠨ ᠣᠨᠳᠣᠣ ᠪᠣᠯᠵᠤ ᠶᠠᠪᠤᠨᠠ ᠰᠢᠦ ᠳᠡ ᠭᠡᠬᠦ ᠳ᠋ᠦ᠍ᠨᠢ ( ᠳ᠋ᠦ᠍ ᠨᠢ) ᠰᠢᠷᠴᠢᠨ᠂
— ᠨᠠᠮ᠂ ᠪᠢᠳᠡᠨ ᠢ᠋ ᠪᠠᠰᠠ ᠰᠤᠷᠭᠠᠵᠤ᠂ ᠨᠢᠳᠦ ᠶ᠋ᠢ ᠮᠠᠨᠢ ᠨᠡᠭᠡᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠦ ᠳᠡ᠃ ᠲᠡᠭᠡᠭᠡᠳ ᠪᠢᠳᠡ ᠪᠦᠭᠦᠳᠡ᠂ ᠬᠥᠮᠦᠨ ᠠᠷᠠᠳ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠴᠡᠴᠡᠭ ᠮᠣᠳᠣ ᠤᠷᠭᠤᠵᠤ ᠥᠰᠴᠦ ᠲᠣᠮᠣ ᠪᠣᠯᠵᠤ ᠣᠨᠳᠣᠣ ᠪᠣᠯᠵᠤ ᠪᠠᠢᠭᠠ ᠨᠢ ᠨᠢᠳᠦᠨ ᠳ᠋ᠦ᠍ ᠮᠡᠳᠡᠭᠳᠡᠬᠦᠢᠴᠡ ᠪᠠᠢᠳᠠᠭ ᠲᠠᠢ ᠠᠳᠠᠯᠢ᠂ ᠪᠢᠳᠡ ᠪᠦᠭᠦᠳᠡ ᠮᠥᠨ ᠥᠰᠴᠦ ᠬᠥᠮᠦᠵᠢᠵᠦ ᠣᠨᠳᠣᠣ ᠪᠣᠯᠵᠤ ᠶᠠᠪᠤᠭᠠ ᠶᠤᠮ ᠰᠢᠦ ᠳᠡ᠃ ᠮᠠᠨ ᠤ᠋ ᠨᠠᠮ ᠮᠠᠨᠢ ᠨᠡᠢᠲᠡ ᠣᠯᠠᠨ ᠠᠷᠠᠳ ᠤ᠋ᠨ ᠠᠰᠢᠭ ᠢ᠋ ᠪᠣᠳᠣᠬᠤ ᠠ᠋ᠴᠠ ᠥᠭᠡᠷᠡ ᠠᠰᠢᠭ ᠪᠣᠳᠣᠳᠠᠭ ᠦᠭᠡᠢ ᠪᠡᠷ ᠢ᠋ᠶ᠋ᠡᠨ ᠪᠢᠳᠡᠨ ᠢ᠋ᠶ᠋ᠡᠨ ᠬᠥᠮᠦᠵᠢᠭᠦᠯᠵᠦ ᠪᠠᠢᠭᠠ ᠶᠤᠮ ᠰᠢᠦ ᠳᠡ᠃ ᠴᠢ ᠪᠣᠳᠣᠭᠠᠳ ᠦᠵᠡᠯ ᠳᠡ᠃ ᠨᠠᠰᠤᠨ ᠠ᠋ᠴᠠ ᠨᠥᠭᠴᠢᠭᠰᠡᠨ ᠡᠪᠦᠭᠡᠨ ᠪᠠᠲᠤᠪᠠᠶᠠᠷ ᠭᠤᠸᠠᠢ ᠶ᠋ᠢ᠂ ᠮᠠᠨ ᠤ᠋ ᠦᠷᠡ ᠬᠡᠦᠬᠡᠳ ᠦ᠋ᠨ ᠠᠴᠢᠲᠤ ᠪᠠᠭᠰᠢ ᠨᠢ ᠪᠣᠯᠤᠭᠰᠠᠨ ᠨᠠᠰᠤᠨᠪᠠᠲᠤ ᠭᠤᠸᠠᠢ ᠶ᠋ᠢ᠂ ᠲᠡᠭᠦᠨ ᠦ᠌ ᠥᠬᠢᠨ᠂ ᠡᠰᠡᠷᠭᠦᠦ ᠬᠠᠷᠭᠢᠰ ᠯᠠᠮᠠ ᠨᠠᠷ ᠤ᠋ᠨ ᠭᠠᠷ ᠲᠤ᠌ ᠠᠮᠢ ᠦᠷᠡᠭᠳᠡᠭᠰᠡᠨ ᠡᠮᠡᠭᠲᠡᠢ ᠡᠮᠴᠢ ᠶ᠋ᠢ ᠪᠣᠳᠣᠭᠠᠴᠢ! ᠡᠪᠦᠭᠡᠨ ᠫᠠᠷᠲ᠋ᠢᠽᠠᠨ ᠰᠠᠮᠪᠤᠤ ᠶ᠋ᠢᠨ ᠵᠡᠷᠭᠡ ᠪᠢᠳᠡᠨ ᠦ᠌ ᠨᠤᠲᠤᠭ ᠤᠰᠤᠨ ᠤ᠋ ᠨᠠᠮ ᠤ᠋ᠨ ᠭᠡᠰᠢᠭᠦᠳ ᠢ᠋ ᠪᠣᠳᠣᠭᠠᠳ ᠦᠵᠡᠭᠡᠴᠢ! ᠰᠤᠮᠤ ᠶ᠋ᠢᠨ ᠨᠠᠮ ᠤ᠋ᠨ ᠡᠭᠦᠷ ᠦ᠋ᠨ ᠤᠬᠠᠭᠤᠯᠤᠭᠴᠢ ᠨᠠᠷ ᠢ᠋ ᠪᠣᠳᠣ ᠯᠠ ᠳᠠ᠂ ᠲᠡᠳᠡᠨ ᠦ᠌ ᠳᠤᠮᠳᠠ ᠭᠡᠰᠢᠭᠦᠨ ᠪᠤᠰᠤ ᠢᠳᠡᠪᠬᠢᠲᠡᠨ ᠴᠦ᠍ ᠣᠯᠠᠨ ᠪᠣᠢ᠂ ᠨᠠᠭᠠᠳᠤ ᠵᠠᠬᠠ ᠨᠢ ᠪᠢ ᠪᠠᠢᠨᠠ ᠰᠢᠦ ᠳᠡ ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠭᠡᠳ᠂ ᠪᠢᠳᠡ ᠴᠦ᠍ ᠣᠳᠣ ᠡᠬᠡ ᠣᠷᠣᠨ ᠤ᠋ ᠪᠠᠨ ᠲᠤᠰᠠ ᠶ᠋ᠢᠨ ᠲᠤᠯᠠᠳᠠ ᠠᠵᠢᠯ ᠬᠢᠵᠦ ᠵᠢᠳᠬᠦᠬᠦ ᠬᠡᠷᠡᠭᠲᠡᠢ ᠶᠦᠮ ᠭᠡᠵᠦ ᠪᠤᠰᠤᠳ ᠲᠤ᠌ ᠤᠬᠠᠭᠤᠯᠤᠨ᠂ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠴᠦ᠍ ᠲᠡᠷᠡ ᠦᠵᠡᠯ ᠢ᠋ᠶ᠋ᠡᠷ ᠬᠥᠮᠦᠵᠢᠵᠦ ᠪᠠᠢᠭᠠ ᠶᠤᠮ ᠪᠢᠰᠢ ᠤᠤ? ᠪᠢᠳᠡᠨ ᠦ᠌ ᠨᠢᠳᠦᠨ ᠦ᠌ ᠡᠮᠦᠨᠡ᠂ ᠬᠣᠯᠪᠣᠭᠠᠲᠤ ᠶᠡᠬᠡ ᠤᠯᠤᠰ ᠤ᠋ᠨ ᠦᠯᠢᠭᠡᠷ ᠵᠢᠱ᠌ᠢᠶᠡ ᠲᠣᠪ ᠲᠣᠳᠣᠷᠬᠠᠢ ᠦᠵᠡᠭᠳᠡᠵᠦ᠂ ᠲᠡᠷᠡ ᠤᠯᠤᠰ ᠢ᠋ ᠪᠣᠳᠣᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)ᠪᠢᠳᠡ᠂ ᠢᠷᠡᠭᠡᠳᠦᠢ ᠳ᠋ᠦ᠍ ᠮᠥᠨ ᠡᠢᠮᠦ ᠯᠡ ᠪᠣᠯᠬᠤ ᠶᠤᠮ ᠭᠡᠵᠦ ᠪᠠᠬᠠᠳᠤᠨ ᠵᠣᠷᠢᠭ ᠪᠠᠳᠠᠷᠠᠳᠠᠭ ᠪᠢᠰᠢ ᠤᠤ? ᠲᠡᠷᠡ ᠬᠣᠯᠪᠣᠭᠠᠲᠤ ᠤᠯᠤᠰ ᠤ᠋ᠨ ᠰᠠᠢᠬᠠᠨ ᠦᠯᠢᠭᠡᠷ ᠵᠢᠱ᠌ᠢᠶᠡ ᠨᠢ᠂ ᠮᠠᠨ ᠤ᠋ ᠪᠠᠭᠠ ᠤᠯᠤᠰ ᠤ᠋ᠨ ᠬᠥᠮᠦᠨ ᠠᠷᠠᠳ ᠪᠢᠳᠡ ᠪᠦᠬᠦᠨ ᠳ᠋ᠦ᠍᠂ ᠪᠠᠬᠠᠲᠠᠢ ᠰᠠᠢᠬᠠᠨ ᠲᠡᠷᠡ ᠢᠷᠡᠭᠡᠳᠦᠢ ᠪᠡᠨ ᠪᠦᠲᠦᠭᠡᠨ ᠪᠣᠰᠬᠠᠬᠤ ᠳ᠋ᠤ᠌ ᠤᠷᠮᠠ ᠵᠣᠷᠢᠭ ᠢ᠋ ᠮᠠᠨᠢ ᠲᠥᠷᠥᠭᠦᠯᠳᠡᠭ ᠶᠦᠮ ᠪᠢᠰᠢ ᠤᠤ? ᠭᠡᠳ ᠪᠣᠰᠴᠤ᠂ ᠬᠣᠶᠠᠷ ᠬᠥᠭᠰᠢᠨ ᠮᠠᠰᠢ ᠳᠠᠳᠮᠠᠭᠠᠢ ᠪᠠᠷ ᠬᠥᠳᠡᠯᠵᠦ᠂ ᠮᠠᠯᠴᠢᠨ ᠠᠵᠢᠯᠴᠢ ᠬᠥᠮᠦᠨ ᠦ᠌ ᠡᠪᠦᠯ ᠬᠠᠪᠤᠷ ᠡᠳᠦᠷ ᠪᠦᠷᠢ ᠬᠢᠳᠡᠭ ᠠᠵᠢᠯ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠦᠷᠭᠦᠯᠵᠢᠯᠡᠨ ᠣᠷᠣᠵᠤ᠂ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠡᠪᠲᠡᠳᠡᠭ ᠭᠠᠵᠠᠷ ᠢ᠋ ᠣᠷᠣᠢ ᠪᠡᠯᠴᠢᠭᠡᠷ ᠡᠴᠡ ᠪᠡᠨ ᠣᠷᠣᠵᠤ ᠬᠥᠯ ᠢ᠋ᠶ᠋ᠡᠨ ᠳᠤᠯᠠᠭᠠᠴᠠᠭᠤᠯᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠪᠡᠯᠡᠨ ᠪᠣᠯᠭᠠᠬᠤ ᠭᠡᠵᠦ ᠣᠷᠣᠯᠳᠣᠵᠠᠢ᠃ ᠠᠵᠢᠯᠴᠢ ᠨᠢᠮᠪᠠᠢ ᠮᠠᠯᠴᠢᠨ ᠬᠥᠮᠦᠨ᠂ ᠮᠠᠯ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠳᠡᠪᠢᠰᠴᠦ ᠥᠭᠭᠦᠭᠰᠡᠨ ᠵᠥᠭᠡᠯᠡᠨ ᠬᠠᠭᠤᠷᠠᠢ ᠪᠠᠭᠤᠴᠠ ᠶ᠋ᠢ ᠡᠳᠦᠷ ᠮᠠᠯ ᠢ᠋ᠶ᠋ᠠᠨ ᠪᠡᠯᠴᠢᠬᠦ ᠳ᠋ᠦ᠍ ᠣᠪᠣᠭᠠᠯᠠᠵᠤ᠂ ᠳᠣᠣᠷᠠᠬᠢ ᠭᠠᠵᠠᠷ ᠢ᠋ ᠨᠢ ᠨᠠᠷᠠ᠂ ᠰᠠᠯᠬᠢᠨ ᠳ᠋ᠤ᠌ ᠬᠠᠲᠠᠭᠠᠳᠠᠭ ᠤᠴᠢᠷ ᠨᠢ ᠲᠡᠭᠡᠵᠦ ᠨᠠᠷᠠ ᠰᠠᠯᠬᠢ ᠦᠵᠡᠳᠡᠭ ᠭᠠᠵᠠᠷ ᠮᠠᠯ ᠶᠡᠷᠦ ᠡᠷᠡᠭᠦᠯ ᠴᠢᠬᠢᠷᠡᠭ᠂ ᠡᠪᠡᠳᠬᠦ ᠨᠢ ᠪᠠᠭᠠ ᠪᠠᠢᠳᠠᠭ ᠢ᠋ ᠣᠯᠠᠨ ᠵᠠᠭᠤᠨ ᠵᠢᠯ ᠦ᠋ᠨ ᠲᠤᠷᠰᠢᠯᠭᠠ ᠪᠠᠷ ᠮᠡᠳᠡᠭᠰᠡᠨ ᠬᠡᠷᠡᠭ ᠠᠵᠢ᠃ ᠣᠷᠣᠢ ᠮᠠᠯ ᠢ᠋ᠶ᠋ᠠᠨ ᠪᠡᠯᠴᠢᠭᠡᠷ ᠡᠴᠡ ᠢᠷᠡᠬᠦ ᠶ᠋ᠢᠨ ᠡᠮᠦᠨᠡ᠂ ᠲᠡᠷᠡ ᠣᠪᠣᠭᠠᠯᠠᠵᠤ ᠡᠪᠡᠷᠡᠭᠡᠭᠰᠡᠨ ᠪᠠᠭᠤᠴᠠ ᠪᠠᠨ ᠬᠡᠪᠲᠡᠬᠦ ᠭᠠᠵᠠᠷ ᠨᠢ ᠵᠤᠵᠠᠭᠠᠨ ᠲᠡᠭᠰᠢᠯᠡᠵᠦ᠂ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠥᠯ ᠢ᠋ ᠳᠤᠯᠠᠭᠠᠴᠠᠭᠤᠯᠳᠠᠭ ᠠᠵᠢ᠃ ᠡᠨᠡ ᠪᠣᠯ ᠲᠩᠷᠢ ᠮᠠᠭᠤᠬᠠᠢ᠂ ᠰᠠᠯᠬᠢᠨ ᠶᠠᠮᠠᠷ ᠴᠤ᠌ ᠪᠠᠢᠭᠰᠠᠨ ᠴᠠᠭ ᠲᠤ᠌᠂ ᠵᠢᠯ ᠦ᠋ᠨ ᠳᠥᠷᠪᠡᠨ ᠤᠯᠠᠷᠢᠯ ᠳ᠋ᠤ᠌ ᠦᠷᠭᠦᠯᠵᠢ ᠵᠠᠳᠠᠭᠠᠢ ᠭᠠᠵᠠᠷ ᠪᠠᠢᠳᠠᠭ ᠮᠠᠯ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠨᠡᠭᠦᠳᠡᠯᠴᠢᠨ ᠬᠥᠮᠦᠨ ᠦ᠌ ᠭᠠᠭᠴᠠ ᠳᠣᠬᠢ ᠲᠠᠢ ᠠᠷᠭᠠ ᠨᠢ ᠠᠵᠢ᠃ ᠲᠡᠷᠡ ᠵᠥᠭᠡᠯᠡᠨ ᠬᠠᠭᠤᠷᠠᠢ ᠳᠡᠪᠢᠰᠬᠡᠷ ᠪᠠᠭᠤᠴᠠᠨ ᠳ᠋ᠤ᠌ ᠮᠠᠯ ᠨᠢ ᠳᠤᠷᠠᠲᠠᠢ ᠲᠤᠯᠠ᠂ ᠲᠡᠢᠮᠦ ᠪᠠᠭᠤᠴᠠ ᠳᠡᠪᠢᠰᠦᠭᠰᠡᠨ ᠭᠠᠵᠠᠷ ᠪᠠᠢᠬᠤ ᠳ᠋ᠤ᠌᠂ ᠨᠢᠭᠡ ᠴᠦ᠍ ᠬᠣᠨᠢ ᠦᠬᠡᠷ ᠶᠡᠷᠦ ᠲᠡᠷᠡ ᠡᠴᠡ ᠬᠣᠯᠠᠳᠠᠵᠤ ᠴᠢᠯᠠᠭᠤ ᠰᠢᠭ᠋ ᠳᠠᠩᠭᠢᠨᠠᠭᠰᠠᠨ ᠬᠦᠢᠲᠡᠨ ᠬᠥᠯᠳᠡᠭᠦᠦ ᠭᠠᠵᠠᠷ ᠬᠡᠪᠲᠡᠬᠦ ᠦᠭᠡᠢ ᠠᠵᠢ᠃
— ᠶᠣᠬᠣ᠂ ᠶᠠᠳᠠᠷᠠᠴᠢᠬᠠᠯᠠ᠂ ᠥᠷᠯᠥᠭᠡ ᠢᠩᠭᠢᠵᠦ ᠪᠠᠢᠭᠠ ᠬᠥᠮᠦᠨ᠂ ᠡᠳᠦᠷ ᠦ᠋ᠨ ᠢ᠋ᠶ᠋ᠡᠨ ᠠᠵᠢᠯ ᠢ᠋ ᠶᠠᠭᠠᠬᠢᠵᠤ ᠪᠠᠷᠠᠨᠠ ᠳᠠ᠃ ᠡᠨᠡ ᠬᠠᠪᠤᠷ ᠤ᠋ᠨ ᠬᠢ ᠲᠡᠢ ᠠᠳᠠᠯᠢ ᠶᠡᠷᠦ ᠤᠷᠢᠳᠤ ᠡᠮᠦᠨᠡ ᠢᠩᠭᠢᠵᠦ ᠶᠠᠳᠠᠷᠠᠵᠤ ᠦᠵᠡᠭᠡ ᠦᠭᠡᠢ ᠪᠢᠯᠡ ᠭᠡᠳ ᠴᠡᠷᠡᠨ ᠳᠣᠭᠣᠭᠰᠢ ᠪᠠᠨ ᠰᠠᠭᠤᠯᠠ᠃
— ᠬᠣᠨᠢ ᠬᠤᠷᠠᠭᠠᠯᠠᠭᠰᠠᠭᠠᠷ ᠪᠠᠷᠤᠭ ᠨᠢᠭᠡ ᠰᠠᠷᠠ ᠴᠤᠪᠤᠯᠠ᠃ ᠲᠡᠭᠡᠬᠦ ᠳ᠋ᠦ᠍ ᠬᠥᠮᠦᠨ ᠶᠠᠳᠠᠷᠠᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ? ᠮᠠᠯ ᠥᠰᠦᠭᠰᠡᠭᠡᠷ ᠪᠠᠢᠬᠤ ᠳ᠋ᠤ᠌᠂ ᠪᠦᠯᠢ ᠨᠡᠮᠡᠭᠳᠡᠬᠦ ᠦᠭᠡᠢ ᠪᠠᠢᠨᠠ ᠰᠢᠦ ᠳᠡ᠂ ᠬᠣᠶᠠᠷ ᠬᠦᠦ ᠮᠠᠨᠢ ᠴᠡᠷᠢᠭ ᠡᠴᠡ ᠪᠠᠭᠤᠵᠤ ᠢᠷᠡᠪᠡᠯ᠂ ᠪᠢᠳᠡ ᠬᠣᠶᠠᠷ ᠲᠤ᠌ ᠵᠢᠭᠲᠡᠢ ᠰᠠᠢᠬᠠᠨ ᠨᠡᠮᠡᠷᠢ ᠪᠣᠯᠤᠨᠠ ᠳᠠ ᠭᠡᠵᠦ ᠰᠢᠷᠴᠢᠨ᠂ ᠴᠡᠷᠡᠨ ᠦ᠌ ᠰᠠᠯᠬᠢᠨ ᠳ᠋ᠤ᠌ ᠭᠠᠩᠳᠠᠭᠰᠠᠨ᠂ ᠡᠴᠡᠵᠦ ᠲᠤᠷᠠᠭᠰᠠᠨ ᠬᠦᠷᠡᠩ ᠴᠢᠷᠠᠢ ᠶ᠋ᠢ ᠦᠷᠦ ᠡᠪᠡᠳᠦᠨ ᠬᠠᠷᠠᠵᠤ ᠬᠡᠯᠡᠯᠡ᠃
— ᠪᠤᠰᠢᠭᠤᠬᠠᠨ ᠢᠷᠡᠳᠡᠭ ᠪᠣᠯ ᠶᠠᠭᠤᠲᠠᠢ ᠪᠢᠯᠡ᠂ ᠬᠡᠦᠬᠡᠳ ᠮᠠᠨᠢ ᠣᠯᠠᠨ ᠵᠢᠯ ᠠᠭᠤᠯᠵᠠᠭᠠ ᠦᠭᠡᠢ ᠪᠣᠯᠤᠭᠠᠳ ᠶᠡᠬᠡᠯᠡ( ᠶᠡᠬᠡ ᠯᠡ) ᠰᠠᠨᠠᠵᠤ ᠪᠠᠢᠨᠠ᠃ ᠬᠠᠯᠬᠠ ᠭᠣᠣᠯ ᠤ᠋ᠨ ᠲᠡᠢᠨ ᠦ᠌ ᠦᠶᠡ ᠳ᠋ᠦ᠍ ᠶᠡᠷᠦ ᠰᠥᠨᠢ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠤᠨᠲᠠᠵᠤ ᠴᠢᠳᠠᠳᠠᠭ ᠦᠭᠡᠢ ᠪᠠᠢᠯᠠ᠃ ᠪᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠤᠮ ᠪᠢᠰᠢ᠂ ᠲᠡᠢᠨ ᠪᠣᠯ ᠳᠠᠶᠠᠩ ᠳᠡᠭᠡᠷᠡ ᠭᠡᠵᠦ ᠲᠦᠮᠡᠨ ᠡᠬᠡ ᠮᠢᠨᠦ ᠠᠳᠠᠯᠢ᠂ ᠦᠷᠡ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠰᠡᠳᠬᠢᠯ ᠵᠣᠪᠠᠵᠤ ᠪᠠᠢᠭᠠ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠮᠠᠨ ᠤ᠋ ᠨᠤᠲᠤᠭ ᠠ᠋ᠴᠠ ᠠᠯᠤᠰᠯᠠᠭᠰᠠᠨ ᠣᠷᠣᠰ ᠭᠠᠵᠠᠷ ᠬᠡᠴᠢᠨᠡᠨ ᠣᠯᠠᠨ ᠡᠬᠡ ᠬᠥᠮᠦᠨ᠂ ᠲᠥᠷᠥᠭᠰᠡᠨ ᠨᠤᠲᠤᠭ ᠠ᠋ᠴᠠ ᠪᠠᠨ ᠲᠦᠮᠡᠨ ᠦ᠌ ᠭᠠᠵᠠᠷ ᠬᠠᠯᠬᠠ ᠭᠣᠣᠯ ᠳ᠋ᠤ᠌ ᠢᠷᠡᠵᠦ᠂ ᠮᠠᠨ ᠤ᠋ ᠡᠩᠬᠡ ᠲᠠᠢᠪᠤᠩ ᠠᠵᠤ ᠪᠠᠢᠳᠠᠯ ᠢ᠋ ᠬᠠᠮᠠᠭᠠᠯᠠᠬᠤ ᠭᠡᠵᠦ ᠳᠠᠢᠰᠤᠨ ᠲᠠᠢ ᠪᠠᠢᠯᠳᠤᠵᠤ ᠪᠠᠢᠭᠠ ᠦᠷᠡ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠰᠡᠳᠬᠢᠯ ᠵᠣᠪᠠᠵᠤ ᠪᠠᠢᠭᠠ ᠪᠢᠯᠡ? ᠬᠠᠯᠬᠠ ᠭᠣᠣᠯ ᠤ᠋ᠨ ᠲᠡᠷᠡ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠢᠳᠡᠷ ᠵᠠᠯᠠᠭᠤ᠂ ᠡᠷᠡᠭᠦᠯ ᠴᠢᠬᠢᠷᠡᠭ ᠬᠡᠴᠢᠨᠡᠨ ᠣᠷᠣᠰ ᠴᠡᠷᠢᠭ ᠠᠮᠢ ᠦᠷᠡᠭᠳᠡᠭᠰᠡᠨ ᠪᠣᠢ? ᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠪᠢ ᠥᠷᠯᠥᠭᠡ ᠪᠦᠷᠢ ᠴᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠭᠡᠵᠢ ᠶ᠋ᠢ ᠬᠣᠢᠲᠤ ᠵᠦᠭ ᠣᠷᠣᠰ ᠤ᠋ᠨ ᠶᠡᠬᠡ ᠠᠷᠠᠳ ᠲᠦᠮᠡᠨ ᠳ᠋ᠦ᠍ ᠡᠷᠭᠦᠵᠦ᠂ ᠲᠡᠭᠦᠪᠡᠷ ᠢ᠋ᠶ᠋ᠡᠨ ᠣᠷᠣᠰ ᠤ᠋ᠨ ᠠᠷᠠᠳ ᠲᠦᠮᠡᠨ ᠳ᠋ᠦ᠍᠂ ᠦᠯᠡᠮᠵᠢ ᠮᠡᠷᠭᠡᠨ ᠰᠲ᠋ᠠᠯᠢᠨ ᠳ᠋ᠤ᠌ ᠲᠠᠯᠠᠷᠬᠠᠬᠤ ᠴᠢᠩ ᠰᠡᠳᠬᠢᠯ ᠢ᠋ᠶ᠋ᠡᠨ ᠢᠯᠡᠷᠬᠡᠢᠯᠡᠳᠡᠭ ᠪᠢᠯᠡ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂ ᠰᠢᠷᠴᠢᠨ ᠠᠭᠤᠳᠠᠮ ᠲᠠᠯᠠ ᠶ᠋ᠢ ᠪᠣᠳᠣᠯᠭᠠ ᠪᠣᠯᠤᠨ ᠰᠢᠷᠲᠡᠭᠡᠳ᠂ ᠨᠠᠮ ᠳᠠᠭᠤ ᠪᠠᠷ᠂
— ᠲᠡᠷᠡ ᠵᠥᠪᠯᠡᠯᠲᠦ ᠶᠡᠬᠡ ᠤᠯᠤᠰ ᠲᠤ᠌ ᠨᠢᠭᠡ ᠶᠠᠪᠤᠭᠠᠳ ᠢᠷᠡᠵᠦ᠂ ᠵᠥᠪᠯᠡᠯᠲᠦ ᠶ᠋ᠢᠨ ᠠᠷᠠᠳ ᠲᠦᠮᠡᠨ ᠶᠠᠭᠠᠬᠢᠵᠤ ᠠᠵᠤ ᠠᠮᠢᠳᠤᠷᠠᠳᠠᠭ ᠢ᠋ ᠨᠢ ᠦᠵᠡᠭᠡᠳ᠂ ᠠᠵᠢᠯ ᠰᠠᠢᠨ ᠬᠢᠬᠦ ᠠᠷᠭᠠ ᠲᠤᠷᠰᠢᠯᠭᠠ ᠠ᠋ᠴᠠ ᠨᠢ ᠰᠤᠷᠤᠭᠠᠳ ᠢᠷᠡᠳᠡᠭ ᠴᠦ᠍ ᠪᠣᠯᠤᠭᠠᠰᠠᠢ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠪᠢᠳᠡ ᠲᠡᠭᠡᠵᠦ ᠶᠠᠪᠤᠵᠤ ᠪᠠᠢᠬᠤ ᠰᠠᠢᠳ ᠤ᠋ᠳ ᠪᠣᠯᠤᠭᠰᠠᠨ ᠶᠤᠮ ᠤᠤ? ᠭᠡᠵᠦ ᠴᠡᠷᠡᠨ ᠦ᠌ ᠭᠠᠢᠬᠠᠬᠤ ᠳ᠋ᠤ᠌᠂
— ᠭᠠᠭᠴᠠ ᠰᠠᠢᠳ ᠤ᠋ᠳ ᠯᠠ ᠶᠠᠪᠤᠳᠠᠭ ᠶᠤᠮ ᠭᠡᠵᠢ ᠤᠤ? ᠮᠠᠨ ᠤ᠋ ᠬᠡᠦᠬᠡᠳ ᠬᠦᠷᠲᠡᠯᠡ᠂ ᠵᠥᠪᠯᠡᠯᠲᠦ ᠤᠯᠤᠰ ᠲᠤ᠌ ᠰᠤᠷᠭᠠᠭᠤᠯᠢ ᠬᠢᠭᠰᠡᠨ ᠰᠢᠦ ᠳᠡ ᠭᠡᠵᠦ ᠰᠢᠷᠴᠢᠨ ᠦ᠌ ᠬᠡᠯᠡᠭᠰᠡᠨ ᠳ᠋ᠦ᠍᠂
— ᠲᠡᠳᠡ ᠮᠠᠨᠢ ᠭᠡᠷ ᠲᠡᠭᠡᠨ( ᠲᠤ ᠪᠡᠨ )ᠬᠦᠷᠴᠦ ᠢᠷᠡᠭᠡᠳ᠂ ᠳᠠᠩᠴᠤ ᠲᠤᠰᠠ ᠦᠭᠡᠢ ᠰᠠᠨᠠᠭᠳᠠᠬᠤ ᠪᠣᠯᠪᠠ ᠤᠤ᠂ ᠪᠢᠳᠡᠨ ᠦ᠌ ᠮᠠᠭᠤ ᠪᠣᠷᠣ ᠭᠡᠷ ᠮᠠᠨᠢ? ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠨᠠᠷ ᠮᠠᠰᠢᠨ ᠢ᠋ᠶ᠋ᠠᠷ ᠶᠠᠪᠤᠵᠤ᠂ ᠶᠠᠩᠪᠠ(ᠶᠠᠮᠪᠠ) ᠲᠠᠢ ᠰᠠᠭᠤᠵᠤ ᠰᠤᠷᠴᠢᠬᠠᠭᠰᠠᠨ ᠤᠯᠤᠰ᠂ ᠭᠡᠷ ᠲᠡᠭᠡᠨ( ᠲᠤ ᠪᠡᠨ) ᠬᠦᠷᠴᠦ ᠢᠷᠡᠭᠡᠳ᠂ ᠡᠳᠦᠷ ᠪᠦᠬᠦᠨ ᠮᠠᠯ ᠢ᠋ᠶ᠋ᠠᠷ ᠨᠣᠴᠣᠯᠳᠤᠬᠤ᠂ ᠰᠥᠨᠢ ᠭᠦᠢᠴᠡᠳ ᠤᠨᠲᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠡᠪᠦᠯ ᠬᠦᠢᠲᠡᠨ ᠳ᠋ᠦ᠍ ᠲᠠᠭᠠᠷᠠᠬᠤ᠂ ᠵᠤᠨ ᠬᠠᠯᠠᠭᠤᠨ ᠨᠠᠷᠠᠨ ᠳ᠋ᠤ᠌ ᠰᠢᠷᠠᠭᠳᠠᠵᠤ ᠶᠠᠪᠤᠬᠤ ᠪᠠᠨ ᠵᠢᠷᠦᠬᠡ ᠠᠯᠳᠠᠬᠤ ᠪᠣᠯᠪᠠ ᠤᠤ? ᠭᠡᠵᠦ ᠴᠡᠷᠡᠨ ᠦ᠌ ᠰᠡᠭᠦᠷᠡᠰᠦ ᠠᠯᠳᠠᠬᠤ ᠳ᠋ᠤ᠌᠂ ᠰᠢᠷᠴᠢᠨ ᠢᠨᠢᠶᠡᠮᠰᠦᠭᠯᠡᠨ᠂
— ᠲᠡᠷᠡ ᠪᠠᠭᠠ ᠬᠡᠷᠡᠭ᠃ ᠰᠤᠷᠤᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ? ᠬᠠᠭᠤᠴᠢᠨ ᠤ᠋ ᠦᠭᠡᠨ ᠳ᠋ᠦ᠍ ᠡᠷᠬᠡ ᠶ᠋ᠢ ᠰᠤᠷᠬᠤ ᠪᠠᠷ ᠪᠡᠷᠬᠡ ᠶ᠋ᠢ ᠰᠤᠷ ᠭᠡᠳᠡᠭ ᠰᠢᠦ ᠳᠡ᠃᠂ ᠪᠢᠳᠡᠨ ᠦ᠌ ᠤᠯᠤᠰ ᠲᠠᠭᠠᠨ ( ᠲᠤ ᠪᠠᠨ) ᠥᠰᠬᠡᠭᠰᠡᠨ ᠮᠠᠯ ᠢ᠋ ᠦᠷᠡ ᠬᠡᠦᠬᠡᠳ ᠮᠠᠨᠢ ᠡᠰᠡ ᠮᠠᠯᠯᠠᠪᠠᠯ᠂ ᠬᠡᠨ ᠮᠠᠯᠯᠠᠵᠤ ᠥᠭᠬᠦ ᠶᠦᠮ ᠪᠣᠢ? ᠪᠢᠳᠡ ᠬᠣᠶᠠᠷ ᠭᠡᠷᠯᠡᠭᠡᠳ ᠬᠡᠳᠦᠨ ᠮᠠᠯ ᠲᠠᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠵᠤ ᠪᠠᠢᠨᠠ ᠤᠤ? ᠭᠤᠷᠪᠠᠨ ᠬᠥᠬᠥ ᠲᠡᠢ ᠨᠢᠭᠡ ᠬᠥᠭᠰᠢᠨ ᠦᠨᠢᠶᠡ᠂ ᠬᠣᠨᠢᠨ ᠤ᠋ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠵᠠᠩᠲᠠᠢ ᠶ᠋ᠢᠨ ᠬᠠᠮᠤᠭ ᠤ᠋ᠨ ᠵᠠᠭᠠᠵᠠᠯᠠᠵᠤ ᠥᠭᠭᠦᠭᠰᠡᠨ ᠬᠣᠷᠢᠨ ᠳᠣᠯᠣᠭᠠᠨ ᠬᠣᠨᠢ ᠢᠮᠠᠭᠠ ᠶ᠋ᠢ ᠰᠠᠨᠠᠵᠤ ᠪᠠᠢᠨᠠ ᠤᠤ? ᠴᠢ ᠮᠠᠯ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠭᠠᠷᠤᠭᠠᠳ ᠬᠡᠭᠡᠷᠡ ᠭᠣᠮᠣᠳᠠᠵᠤ ᠤᠬᠢᠯᠠᠵᠤ ᠪᠠᠢᠭᠰᠠᠨ ᠰᠢᠦ ᠳᠡ᠃ ᠣᠳᠣ ᠪᠣᠳᠣᠭᠠᠳ ᠦᠵᠡᠭᠡᠴᠢ᠂ ᠴᠢ ᠪᠢᠳᠡ ᠬᠣᠶᠠᠷ ᠬᠠᠯᠠᠭᠤᠨ ᠬᠦᠢᠲᠡᠨ᠂ ᠰᠠᠯᠬᠢ ᠰᠢᠭᠤᠷᠭᠠᠨ ᠠ᠋ᠴᠠ ᠬᠠᠯᠠᠰᠢᠷᠠᠬᠤ ᠦᠭᠡᠢ ᠵᠢᠳᠬᠦᠭᠰᠡᠭᠡᠷ ᠬᠡᠴᠢᠨᠡᠨ ᠮᠠᠯ ᠲᠠᠢ ᠪᠣᠯᠤᠯᠠ ᠳᠠ? ᠮᠥᠳᠳᠥ ᠴᠢ ᠪᠢᠳᠡ ᠬᠣᠶᠠᠷ ᠮᠠᠯᠯᠠᠵᠤ ᠬᠦᠴᠦ ᠬᠦᠷᠬᠦ ᠦᠭᠡᠢ ᠪᠣᠯᠬᠤ ᠨᠢ ᠠ᠋᠃ ᠮᠠᠨ ᠤ᠋ ᠡᠨᠡ ᠬᠠᠪᠢ ᠳ᠋ᠤ᠌ ᠠᠷᠠᠳ ᠤ᠋ᠨ ᠠᠷᠲ᠋ᠧᠯ ᠨᠢᠭᠡᠳᠦᠯ ᠪᠠᠢᠳᠠᠭ ᠪᠣᠯ ᠶᠠᠭᠤᠲᠠᠢ ᠪᠢᠯᠡ᠃ ᠴᠢ ᠪᠢᠳᠡ ᠬᠣᠶᠠᠷ᠂ ᠡᠴᠢᠭᠡ ᠡᠪᠦᠭᠡᠳ ᠦ᠋ᠨ ᠢ᠋ᠶ᠋ᠡᠨ ᠬᠠᠭᠤᠴᠢᠨ ᠠᠷᠭᠠ ᠪᠠᠷ ᠮᠠᠯ ᠢ᠋ᠶ᠋ᠠᠨ ᠮᠠᠯᠯᠠᠵᠤ ᠪᠠᠢᠨᠠ᠃ ᠪᠢᠳᠡᠨ ᠦ᠌ ᠦᠷᠡ ᠬᠡᠦᠬᠡᠳ ᠮᠠᠨᠢ ᠨᠥᠬᠥᠳ ᠦᠶᠡᠳᠡᠨ ᠲᠡᠢ ᠪᠡᠨ ᠱᠠᠯ ᠥᠮᠨᠥᠭᠡ ᠪᠡᠷ ᠠᠵᠢᠯᠯᠠᠬᠤ ᠪᠣᠯᠤᠨᠠ ᠳᠠ᠃ ᠨᠢᠰᠦᠭᠴᠢ᠂ ᠶᠡᠬᠡ ᠫᠤᠤᠴᠢ᠂ ᠶᠡᠬᠡ ᠡᠮᠴᠢ᠂ ᠮᠠᠯ ᠤ᠋ᠨ ᠡᠮᠴᠢ᠂ ᠰᠤᠷᠭᠠᠭᠤᠯᠢ ᠰᠤᠳᠤᠷ ᠲᠠᠢ ᠵᠠᠯᠠᠭᠤᠴᠤᠳ᠂ ᠲᠡᠳᠡ ᠴᠢᠨᠢ ᠪᠢᠳᠡᠨ ᠦ᠌ ᠵᠡᠭᠦᠳᠦᠨ ᠳ᠋ᠦ᠍ ᠣᠷᠣᠭᠠ ᠦᠭᠡᠢ ᠶᠠᠭᠤᠮᠠ ᠬᠢᠬᠦ ᠤᠯᠤᠰ᠃ ᠡᠪᠦᠭᠡᠨ ᠰᠠᠮᠪᠤᠤ ᠭᠤᠸᠠᠢ ᠳᠣᠷᠣᠨᠠᠲᠤ ᠬᠢᠵᠠᠭᠠᠷ ᠤ᠋ᠨ ᠴᠡᠷᠢᠭ ᠦ᠋ᠨ ᠠᠩᠭᠢ ᠳ᠋ᠤ᠌ ᠯᠤᠲᠤ ᠮᠤᠨᠳᠠᠭ ᠠᠵᠤ ᠠᠬᠤᠢ ᠶ᠋ᠢ ᠦᠵᠡᠭᠰᠡᠨ ᠭᠡᠵᠦ ᠶᠠᠷᠢᠵᠤ ᠪᠠᠢᠭᠰᠠᠨ ᠰᠢᠦ ᠳᠡ᠃ ᠮᠠᠯ ᠥᠰᠬᠡᠵᠦ᠂ ᠡᠪᠡᠰᠦ ᠬᠠᠳᠤᠵᠤ᠂ ᠭᠠᠵᠠᠷ ᠬᠠᠭᠠᠯᠠᠵᠤ ᠲᠠᠷᠢᠶᠠ ᠨᠣᠭᠣᠭᠠ ᠲᠠᠷᠢᠳᠠᠭ ᠶᠤᠮ᠃ ᠲᠷᠠᠺᠲ᠋ᠣᠷ ᠲᠠᠢ ᠶᠤᠮ᠃ ᠪᠠᠰᠠ ᠺᠣᠮᠪᠠᠢᠨ ᠲᠠᠢ ᠭᠡᠯᠡ ᠤᠤ᠂ ᠶᠠᠭᠤ ᠭᠡᠯᠡ ᠳᠡ᠂ ᠲᠠᠷᠢᠶᠠ ᠪᠠᠨ ᠬᠠᠳᠤᠭᠠᠳ ᠴᠠᠢᠯᠭᠠᠳᠠᠭ ᠮᠠᠰᠢᠨᠠ᠂ ᠶᠠᠩᠵᠤ ᠶᠠᠩᠵᠤ ᠶ᠋ᠢᠨ ᠮᠠᠰᠢᠨᠠ ᠲᠧᠭᠨᠢᠭ ᠲᠡᠢ ᠶᠦᠮ ᠭᠡᠰᠡᠨ ᠰᠢᠦ ᠳᠡ᠃ ᠠᠯᠪᠠᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠢᠷᠡᠪᠡᠯ᠂ ᠨᠠᠮ ᠵᠠᠰᠠᠭ ᠤ᠋ᠨ ᠢ᠋ᠶ᠋ᠠᠨ ᠲᠤᠰᠠᠯᠠᠮᠵᠢ ᠪᠠᠷ ᠵᠢᠭᠲᠡᠢᠬᠡᠨ ᠰᠠᠢᠬᠠᠨ ᠠᠵᠢᠯ ᠬᠢᠬᠦ ᠪᠣᠯᠤᠨᠠ ᠳᠠ᠃ ᠪᠢᠳᠡ ᠴᠢᠨᠢ ᠭᠠᠭᠴᠠᠬᠠᠨ ᠭᠢᠯᠠᠢᠬᠤ ᠪᠣᠢ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠳ᠋ᠣᠢᠩᠬᠣᠷ ᠤ᠋ᠨ ᠠᠴᠢ ᠬᠦᠦ ᠨᠢ ᠨᠢᠳᠤᠨᠤᠨ ᠵᠢᠯ ᠴᠡᠷᠢᠭ ᠡᠴᠡ ᠬᠠᠯᠠᠭᠳᠠᠵᠤ ᠢᠷᠡᠭᠡᠳ᠂ ᠳᠣᠯᠣᠭᠠ ᠬᠣᠨᠣᠪᠠᠤ ᠦᠭᠡᠢ ᠤᠤ᠂ ᠳᠠᠬᠢᠨ ᠬᠣᠲᠠ ᠣᠷᠣᠴᠢᠬᠠᠭᠰᠠᠨ ᠰᠢᠦ ᠳᠡ᠂ ᠣᠳᠣ ᠲᠤᠭᠤᠯᠬᠤ ᠳ᠋ᠤ᠌᠂ ᠬᠣᠲᠠ ᠳ᠋ᠤ᠌ ᠬᠦᠷᠭᠡᠨ ᠣᠷᠣᠭᠠᠳ᠂ ᠫᠠᠨᠽᠠ ᠬᠢᠵᠦ ᠪᠠᠢᠭᠠ ᠰᠤᠷᠠᠭ ᠲᠠᠢ᠂ ᠳ᠋ᠣᠢᠩᠬᠣᠷ ᠴᠤ᠌ ᠨᠠᠮᠤᠷ ᠳᠠᠰᠢ ᠪᠠᠨ ᠠᠴᠢ ᠬᠦᠦ ᠳᠡᠭᠡᠷᠡ ᠪᠡᠨ ᠣᠴᠢᠨᠠ ᠭᠡᠵᠦ ᠪᠠᠢᠭᠠ ᠶᠤᠮ ᠭᠡᠨᠡ ᠯᠡ ᠭᠡᠵᠦ ᠴᠡᠷᠡᠨ ᠦ᠌ ᠬᠡᠯᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠲᠡᠷᠡ ᠳ᠋ᠣᠢᠩᠬᠣᠷ ᠤ᠋ᠨ ᠠᠴᠢ ᠬᠦᠦ ᠰᠢᠭ ᠬᠠᠮᠢᠭᠠ ᠠ᠋ᠴᠠ ᠲᠡᠢᠮᠦ ᠪᠣᠯᠬᠤ ᠪᠣᠢ? ᠡᠬᠡ ᠨᠢ ᠬᠡᠭᠡᠷ ᠠᠯᠠᠭ ᠪᠣᠯ ᠬᠦᠦ ᠨᠢ ᠰᠢᠭᠢᠷᠡ ᠠᠯᠠᠭ ᠭᠡᠵᠦ᠂ ᠲᠡᠷᠡ ᠯᠠ ᠬᠠᠷᠢᠨ᠂ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠠᠯᠢ ᠯᠠ ᠮᠠᠭᠤ ᠶ᠋ᠢ ᠨᠢ ᠠᠪᠤᠭᠰᠠᠨ ᠪᠠᠢᠬᠤ ᠦᠭᠡᠢ ᠤᠤ? ᠮᠠᠨ ᠤ᠋ ᠬᠣᠶᠠᠷ ᠬᠦᠦ ᠣᠨᠳᠣᠣ ᠤᠯᠤᠰ᠂ ᠨᠠᠮ ᠤ᠋ᠨ ᠬᠥᠮᠦᠨ ᠶᠦᠮ ᠰᠢᠦ? ᠬᠣᠯᠪᠣᠭᠠᠲᠤ ᠤᠯᠤᠰ ᠲᠤ᠌ ᠰᠤᠷᠭᠠᠭᠤᠯᠢ ᠰᠤᠳᠤᠷ ᠬᠢᠵᠦ᠂ ᠨᠠᠮ ᠢ᠋ᠶ᠋ᠠᠷ ᠬᠥᠮᠦᠵᠢᠭᠰᠡᠨ ᠤᠯᠤᠰ᠂ ᠶᠠᠭᠠᠬᠢᠯᠠ ᠭᠡᠵᠦ ᠠᠵᠢᠯ ᠬᠢᠬᠦ ᠡᠴᠡ ᠬᠣᠢᠰᠢ ᠰᠠᠭᠤᠬᠤ ᠪᠣᠢ? ᠳ᠋ᠣᠢᠩᠬᠣᠷ ᠤ᠋ᠨ ᠲᠡᠷᠡ ᠠᠴᠢ ᠬᠦᠦ ᠨᠢ ᠠᠵᠢᠯ ᠠᠩᠭᠢ ᠳ᠋ᠤ᠌ ᠠᠯᠪᠠ ᠬᠠᠰᠢᠵᠤ᠂ ᠡᠮᠨᠡᠯᠭᠡ ᠶ᠋ᠢᠨ ᠭᠠᠵᠠᠷ ᠬᠣᠭᠣᠯᠠ ᠮᠣᠭᠣᠯ ᠵᠥᠭᠡᠭᠡᠳᠡᠭ᠂ ᠬᠣᠭ ᠰᠡᠭ ᠠᠷᠴᠢᠵᠤ ᠠᠷᠢᠯᠭᠠᠳᠠᠭ ᠬᠥᠮᠦᠨ ᠪᠠᠢᠭᠰᠠᠨ ᠶᠤᠮ ᠭᠡᠨᠡ ᠯᠡ᠃ ᠲᠡᠷᠡ ᠡᠮᠨᠡᠯᠭᠡ ᠶ᠋ᠢᠨ ᠭᠠᠵᠠᠷ ᠡᠪᠡᠳᠴᠢᠲᠡᠨ ᠴᠥᠭᠡᠬᠡᠨ᠂ ᠶᠡᠷᠦ ᠡᠴᠡ ᠴᠡᠷᠢᠭ ᠦ᠋ᠨ ᠭᠠᠵᠠᠷ ᠳᠠᠩ ᠢᠳᠡᠷ ᠵᠠᠯᠠᠭᠤ᠂ ᠡᠷᠡᠭᠦᠯ ᠴᠢᠬᠢᠷᠡᠭ ᠤᠯᠤᠰ ᠪᠠᠢᠳᠠᠭ ᠬᠣᠢᠨᠠ᠃ ᠲᠡᠭᠡᠭᠡᠳ ᠳ᠋ᠤᠢᠩᠬᠤᠷ ᠤ᠋ᠨ ᠠᠴᠢ ᠬᠦᠦ ᠨᠢ ᠬᠢᠬᠦ ᠣᠨᠴᠠ ᠠᠵᠢᠯ ᠦᠭᠡᠢ᠂ ᠰᠠᠩ ᠤ᠋ᠨ ᠬᠣᠭᠣᠯᠠ ᠳᠡᠮᠡᠢ ᠢᠳᠡᠵᠦ ᠵᠠᠯᠬᠠᠭᠤᠷᠠᠵᠤ ᠬᠡᠪᠲᠡᠭᠰᠡᠭᠡᠷ᠂ ᠶᠠᠭᠤᠮᠠ ᠬᠢᠵᠦ ᠰᠤᠷᠤᠭᠰᠠᠨ ᠦᠭᠡᠢ᠂ ᠡᠮᠨᠡᠯᠭᠡ ᠶ᠋ᠢᠨ ᠭᠠᠵᠠᠷ ᠠᠯᠪᠠ ᠬᠠᠰᠢᠵᠤ ᠪᠠᠢᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)ᠬᠣᠲᠠ ᠳ᠋ᠤ᠌ ᠫᠠᠨᠽᠠᠴᠢᠨ ᠨᠤᠭᠤᠳ ᠲᠠᠢ ᠨᠡᠢᠯᠡᠭᠡᠳ᠂ ᠲᠤᠭᠤᠯᠬᠤ ᠳ᠋ᠤ᠌᠂ ᠨᠢᠭᠡ ᠪᠠᠶᠠᠨ ᠫᠠᠨᠽᠠᠴᠢᠨ ᠳ᠋ᠤ᠌ ᠬᠦᠷᠭᠡᠨ ᠣᠷᠣᠭᠰᠠᠨ ᠶᠤᠮ ᠭᠡᠨᠡ ᠪᠢᠯᠡ᠃ ᠲᠡᠭᠡᠭᠡᠳ ᠬᠠᠳᠠᠮ ᠡᠴᠢᠭᠡ ᠳ᠋ᠡᠭᠡᠨ ( ᠳ᠋ᠦ᠍ ᠪᠡᠨ) ᠲᠤᠰᠠᠯᠠᠵᠤ᠂ ᠬᠥᠳᠡᠭᠡ ᠶ᠋ᠢᠨ ᠮᠠᠯᠴᠢᠨ ᠠᠷᠠᠳ ᠢ᠋ ᠮᠡᠬᠡᠯᠡᠨ ᠮᠥᠯᠵᠢᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠲᠤᠰᠠᠯᠠᠳᠠᠭ ᠪᠣᠯᠤᠭᠰᠠᠨ ᠶᠤᠮ ᠭᠡᠨᠡ ᠪᠢᠯᠡ᠃ ᠬᠣᠲᠠ ᠣᠷᠣᠵᠤ ᠮᠠᠯ ᠬᠤᠳᠠᠯᠳᠤᠬᠤ ᠬᠥᠮᠦᠨ ᠢ᠋ ᠠᠮᠠᠳᠠᠵᠤ ᠲᠣᠰᠤᠭᠠᠳ᠂ ᠠᠷᠢᠬᠢ ᠲᠠᠢ ᠳᠠᠷᠠᠰᠤ ᠲᠠᠢ ᠤᠭᠲᠤᠭᠠᠳ᠂ ᠬᠥᠳᠡᠭᠡ ᠶ᠋ᠢᠨ ᠬᠣᠩᠭᠣᠷ ᠴᠠᠭᠠᠨ ᠰᠠᠨᠠᠭᠠ ᠲᠠᠢ ᠮᠠᠯᠴᠢᠨ ᠰᠢᠳᠤᠷᠭᠤ ᠠᠷᠠᠳ ᠤ᠋ᠳ ᠲᠡᠷᠡ ᠵᠠᠯᠢᠬᠠᠢ ᠮᠠᠭᠤ ᠠᠷᠭᠠ ᠶ᠋ᠢ ᠮᠡᠳᠡᠬᠦ ᠦᠭᠡᠢ᠂ ᠵᠣᠴᠢᠷᠬᠠᠭ ᠰᠠᠢᠬᠠᠨ ᠬᠥᠮᠦᠨ ᠪᠠᠢᠨᠠ ᠭᠡᠵᠦ ᠠᠷᠢᠬᠢ ᠳᠡᠷᠡᠰᠦᠨ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠪᠣᠯᠵᠤ᠂ ᠠᠷᠪᠠ ᠲᠠᠪᠤᠨ ᠮᠠᠯ ᠢ᠋ᠶ᠋ᠠᠨ ᠰᠤᠯᠠ ᠬᠢᠮᠳᠠ ᠪᠠᠷ ᠥᠭᠴᠦ ᠣᠷᠬᠢᠳᠠᠭ ᠶᠤᠮ ᠭᠡᠨᠡ ᠪᠢᠯᠡ᠃ ᠫᠠᠨᠽᠠᠴᠢᠨ ᠨᠤᠭᠤᠳ ᠲᠡᠭᠡᠵᠦ ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠨ ᠢ᠋ ᠮᠡᠬᠡᠯᠡᠳᠡᠭ ᠶᠦᠮ ᠭᠡᠨᠡ ᠯᠡ ᠳᠡ᠃ ᠶᠣᠰᠣ ᠲᠠᠢ ᠬᠥᠮᠦᠨ ᠬᠠᠮᠢᠭᠠ ᠠ᠋ᠴᠠ ᠲᠡᠢᠮᠦ ᠪᠠᠢᠬᠤ ᠪᠣᠢ? ᠴᠢ ᠪᠢᠳᠡ ᠬᠣᠶᠠᠷ ᠤ᠋ᠨ ᠦᠷᠡ ᠬᠡᠦᠬᠡᠳ ᠶᠠᠭᠠᠬᠢᠯᠠ ᠭᠡᠵᠦ ᠲᠡᠷᠡ ᠰᠣᠯᠣᠭᠠᠢ ᠵᠠᠮ ᠢ᠋ᠶ᠋ᠠᠷ ᠣᠷᠣᠬᠤ ᠪᠢᠯᠡ? ᠲᠡᠭᠡᠪᠡᠯ ᠲᠡᠮᠡᠭᠡᠨ ᠦ᠌ ᠰᠡᠭᠦᠯ ᠭᠠᠵᠠᠷ ᠲᠤᠯᠵᠤ᠂ ᠲᠡᠭᠡ ᠶ᠋ᠢᠨ ᠡᠪᠡᠷ ᠲᠩᠷᠢ ᠳ᠋ᠦ᠍ ᠲᠤᠯᠬᠤ ᠪᠠᠢᠬᠠ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠮᠠᠨ ᠤ᠋ ᠬᠣᠶᠠᠷ ᠬᠦᠦ ᠮᠠᠨᠢ ᠲᠦᠮᠡᠨ ᠤᠯᠤᠰ ᠤ᠋ᠨ ᠶᠡᠬᠡ ᠪᠠᠭᠰᠢ ᠰᠲ᠋ᠠᠯᠢᠨ ᠤ᠋ ᠰᠤᠷᠭᠠᠯ ᠢ᠋ᠶ᠋ᠠᠷ ᠵᠠᠮᠨᠠᠵᠤ᠂ ᠰᠢᠨᠡ ᠰᠠᠢᠬᠠᠨ ᠪᠠᠢᠳᠠᠯ ᠢ᠋ ᠪᠦᠲᠦᠭᠡᠨ ᠪᠣᠰᠬᠠᠬᠤ ᠤᠯᠤᠰ ᠪᠣᠯᠲᠤᠭᠠᠢ᠃ ᠥᠲᠡᠯᠦᠭᠰᠡᠨ ᠪᠢᠳᠡ ᠬᠣᠶᠠᠷ ᠦᠷᠡ ᠬᠡᠦᠬᠡᠳ ᠢ᠋ᠶ᠋ᠡᠨ ᠢᠴᠢᠭᠡᠬᠦ ᠦᠭᠡᠢ ᠰᠠᠢᠨ ᠠᠵᠢᠯᠯᠠᠵᠤ ᠦᠵᠡᠨᠡ ᠳᠡ ᠭᠡᠵᠦ ᠴᠡᠷᠡᠨ ᠦ᠌ ᠬᠡᠯᠡᠬᠦ ᠳ᠋ᠦ᠍᠂ ᠰᠢᠷᠴᠢᠨ᠂
— ᠴᠢ ᠮᠢᠨᠢ ᠲᠠᠭᠠᠲᠠᠢ ᠰᠠᠢᠨ ᠬᠥᠮᠦᠨ ᠶᠣᠮᠠ ᠳᠠ ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠵᠡᠢ᠃
ᠴᠡᠷᠡᠨ ᠢᠴᠢᠩᠭᠦᠷᠡᠰᠬᠢᠵᠦ᠂ ᠪᠡᠷᠢᠯᠬᠡᠬᠦ ᠠᠳᠠᠯᠢ ᠴᠠᠰᠢ(ᠴᠠᠭᠠᠰᠢ) ᠪᠠᠨ ᠬᠠᠷᠠᠭᠠᠳ᠂
— ᠥᠲᠡᠯᠦᠭᠰᠡᠨ ᠬᠣᠢᠨᠠ ᠪᠠᠨ ᠪᠡᠶᠡ ᠪᠠᠶᠠᠨ ᠳ᠋ᠠᠭᠠᠨ ( ᠳ᠋ᠤ᠌ ᠪᠠᠨ) ᠠᠮᠠᠷᠠᠭ ᠤ᠋ᠨ ᠡᠢᠮᠦ ᠦᠭᠡ ᠬᠡᠯᠡᠭᠡᠳ ᠶᠠᠭᠠᠬᠢᠬᠤ ᠶᠤᠮ ᠪᠣᠢ? ᠬᠡᠮᠡᠪᠡᠰᠦ᠂
— ᠥᠲᠡᠯᠦᠭᠰᠡᠨ ᠬᠠᠮᠢᠶᠠᠲᠠᠢ ᠤᠤ? ᠨᠥᠬᠥᠷ ᠬᠠᠨᠢ ᠪᠣᠯᠤᠭᠰᠠᠨ ᠬᠥᠮᠦᠨ᠂ ᠴᠢ ᠪᠢᠳᠡ ᠬᠣᠶᠠᠷ ᠰᠢᠭ᠋ ᠨᠢᠭᠡ ᠨᠠᠰᠤ ᠪᠠᠷ ᠡᠢᠮᠦ ᠡᠪᠲᠡᠢ ᠰᠠᠢᠬᠠᠨ ᠰᠠᠭᠤᠪᠠᠯ ᠰᠠᠢᠬᠠᠨ ᠶᠤᠮ ᠪᠢᠰᠢᠦ(ᠪᠢᠰᠢ ᠤᠤ)? ᠦᠷᠡ ᠬᠡᠦᠬᠡᠳ ᠢ᠋ ᠮᠠᠨᠢ ᠴᠤ᠌ ᠲᠥᠷᠥ ᠶ᠋ᠢᠨ ᠰᠦᠯᠳᠡ ᠲᠡᠳᠬᠦᠵᠦ ᠬᠡᠢ ᠮᠣᠷᠢ ᠲᠠᠢ ᠰᠠᠢᠬᠠᠨ ᠶᠠᠪᠤᠵᠤ ᠪᠠᠢᠭᠠ ᠶᠤᠮ ᠪᠢᠰᠢᠦ(ᠪᠢᠰᠢ ᠤᠤ)᠃ ᠥᠲᠡᠯᠦᠭᠰᠡᠨ ᠬᠣᠢᠨᠠ ᠪᠠᠨ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠠᠮᠠᠷᠠᠭ ᠬᠠᠢᠷᠠᠲᠠᠢ ᠶ᠋ᠢᠨ ᠰᠠᠢᠬᠠᠨ ᠦᠭᠡ ᠬᠡᠯᠡᠬᠦ ᠳ᠋ᠦ᠍ ᠶᠠᠭᠠᠬᠢᠳᠠᠭ ᠶᠤᠮ ᠪᠣᠢ? ᠭᠡᠵᠡᠢ᠃ ᠲᠡᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠴᠡᠷᠡᠨ ᠨᠥᠬᠥᠷ ᠥᠭᠡᠳᠡ ᠪᠡᠨ ᠳᠣᠲᠣᠨᠣᠯᠠᠨ ᠲᠠᠯᠠᠷᠬᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠬᠠᠷᠠᠭᠠᠳ ᠠᠷᠢᠭᠤᠨ ᠰᠠᠢᠬᠠᠨ ᠰᠡᠳᠬᠢᠯᠲᠦ ᠠᠵᠢᠯᠴᠢ ᠡᠮᠡᠭᠲᠡᠢ ᠶ᠋ᠢᠨ ᠠᠯᠵᠢᠶᠠᠭᠰᠠᠨ ᠴᠢᠷᠠᠢ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠪᠠᠶᠠᠷ ᠤ᠋ᠨ ᠮᠦᠰᠢᠶᠡᠯ ᠲᠣᠳᠣᠷᠠᠩᠬᠠᠨ ᠬᠠᠷᠠᠭᠳᠠᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠴᠤᠯᠮᠤᠨᠭᠡᠷᠡᠯ᠂ ᠪᠠᠯ᠂ ᠣᠶᠤᠨᠪᠠᠲᠤ᠂ ᠤᠢᠭᠤᠷᠵᠢᠨ·ᠣᠳᠬᠣᠨᠪᠠᠪᠠ᠂ ᠪᠠᠳᠮᠠᠰᠡᠴᠡᠨ
ᠬᠢᠨᠠᠭᠴᠢ᠄ ᠴᠤᠯᠮᠤᠨᠭᠡᠷᠡᠯ᠂ ᠣᠳᠬᠣᠨᠴᠡᠴᠡᠭ᠂ ᠣᠶ᠋ᠢᠭᠣᠷᠵᠢᠨ·ᠣᠳᠬᠣᠨᠪᠠᠪᠠ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ