ᠦᠷ ᠦᠨ ᠲᠤᠶᠠᠭᠠ III – ᠪ᠂ ᠷᠢᠨᠴᠢᠨ - ᠭᠤᠷᠪᠠᠳᠤᠭᠠᠷ ᠲᠡᠪᠲᠡᠷ <ᠪᠠᠢᠯᠳᠤᠵᠤ ᠣᠯᠣᠭᠰᠠᠨ ᠡᠬᠡ ᠣᠷᠣᠨ>- ᠠᠷᠪᠠ ᠶᠢᠰᠦ Үүрийн туяа III – Б ᠂ Ренчин Гуравдугаар дэвтэр "Баялдаж олсон эх орон"-19
207ᠠᠷᠪᠠ ᠶᠢᠰᠦ᠂ ᠮᠠᠨ ᠤ᠋ ᠬᠤᠲᠤᠭᠲᠤ ᠬᠤᠪᠢᠯᠭᠠᠨ ᠶᠠᠮᠠᠷ ᠪᠠᠢᠵᠤ ᠪᠣᠢ?
ᠴᠡᠴᠡᠷᠯᠢᠭ ᠦ᠋ᠨ ᠠᠷᠤ ᠪᠤᠯᠤᠩ ᠳ᠋ᠤ᠌᠂
ᠲᠩᠷᠢ ᠨᠠᠷᠠ ᠶ᠋ᠢᠨ ᠰᠡᠭᠦᠯᠴᠢ᠂
ᠪᠦᠳᠦᠭᠦᠯᠢᠭ ᠬᠢᠴᠡᠲᠡᠢ ᠪᠢ ᠪᠠᠢᠯᠠ᠂
ᠮᠠᠭᠤ ᠶ᠋ᠢ ᠮᠢᠨᠢ ᠦᠵᠡᠭᠦᠯᠵᠦ ᠳᠡ᠂ ᠡᠷᠡᠩ(ᠡᠷᠢᠨ) ᠴᠠᠭ᠃
ᠭᠦᠲ᠋ᠧ᠂ ᠷᠣᠮ ᠤ᠋ᠨ ᠭᠤᠨᠢᠭ ᠰᠢᠯᠦᠭ
ᠵᠦᠭ ᠵᠦᠭ ᠨᠢᠳᠦ ᠠᠯᠳᠠᠮᠠ ᠠᠭᠤᠳᠠᠮ ᠲᠠᠯᠠ᠂ ᠦᠳᠡ ᠶ᠋ᠢᠨ ᠫᠦ ᠬᠠᠯᠠᠭᠤᠨ ᠳ᠋ᠤ᠌ ᠲᠡᠰᠬᠡᠯ ᠦᠭᠡᠢ ᠬᠠᠯᠠᠭᠤᠨ ᠠᠮᠢᠰᠬᠤᠭᠠ ᠣᠷᠭᠢᠯᠬᠤ ᠠᠵᠢ᠃ ᠲᠩᠷᠢ ᠶ᠋ᠢᠨ ᠬᠣᠷᠮᠣᠢ ᠳ᠋ᠤ᠌ ᠵᠡᠷᠭᠡᠯᠭᠡ ᠮᠢᠷᠠᠯᠵᠠᠵᠤ᠂ ᠵᠡᠭᠡᠷᠡ ᠶ᠋ᠢᠨ ᠰᠦᠷᠦᠭ ᠦᠵᠡᠭᠳᠡᠮᠦᠢ*᠃ ᠦᠷ ᠲᠣᠭᠲᠠᠵᠤ ᠡᠬᠢᠯᠡᠭᠰᠡᠨ ᠲᠦᠷᠦᠭᠦᠦ ᠲᠡᠢ ᠶᠡᠷᠦᠬᠡᠭ(ᠶᠥᠷᠬᠥᠭ) ᠦ᠋ᠨ ᠬᠠᠪᠴᠢᠭ ᠲᠣᠯᠣᠭᠠᠢ ᠨᠢ ᠨᠠᠷᠠᠨ ᠵᠦᠭ ᠥᠨᠳᠡᠢᠨ ᠲᠡᠮᠡᠦᠯᠵᠦ᠂ ᠬᠠᠷᠠ ᠬᠥᠬᠡ ᠥᠩᠭᠡᠲᠡᠢ ᠬᠢᠶᠠᠭ ᠡᠨᠳᠡ ᠲᠡᠨᠳᠡ ᠦᠭᠡᠢ ᠥᠳᠬᠡᠨ ᠬᠥᠬᠡ ᠥᠩᠭᠡ ᠪᠡᠷ ᠢ᠋ᠶ᠋ᠡᠨ ᠢᠯᠭᠠᠷᠠᠨ᠂ ᠰᠢᠪᠡᠭᠡ ᠬᠢᠯᠠᠭᠠᠨᠠ(ᠭᠢᠯᠭᠠᠨᠠ) ᠶ᠋ᠢᠨ ᠲᠣᠯᠣᠭᠠᠢ ᠴᠠᠴᠤᠭ ᠮᠡᠲᠦ ᠰᠠᠭᠰᠠᠢᠨ᠂ ᠬᠡᠭᠡᠷᠡ ᠶ᠋ᠢᠨ ᠡᠪᠡᠰᠦ ᠨᠣᠭᠣᠭᠠ ᠶ᠋ᠢᠨ ᠬᠠᠨᠳᠠᠯᠠᠭᠰᠠᠨ ᠮᠡᠲᠦ ᠴᠢᠳᠠᠯ ᠲᠠᠢ ᠰᠠᠢᠬᠠᠨ ᠦᠨᠦᠷ ᠲᠦ᠍ ᠦᠶᠡ ᠦᠶᠡ ᠠᠭᠢ ᠭᠠᠩᠭᠠ ᠶ᠋ᠢᠨ ᠬᠦᠵᠢᠰ ᠦ᠋ᠨ ᠦᠨᠦᠷ ᠬᠠᠩᠬᠤᠯᠤᠨ ᠦᠨᠦᠷᠲᠦᠮᠦᠢ᠃ ᠥᠨᠳᠥᠷ ᠣᠭᠲᠠᠷᠭᠤᠢ ᠳ᠋ᠤ᠌ ᠡᠯᠢᠶᠡ ᠰᠢᠪᠠᠭᠤ ᠵᠢᠭᠦᠷ ᠢ᠋ᠶ᠋ᠡᠨ ᠳᠡᠯᠭᠡᠩᠭᠡᠨ ᠬᠠᠯᠢᠵᠤ᠂ ᠤᠯᠠᠭᠠᠨ ᠬᠣᠰᠢᠭᠤᠲᠤ ᠬᠠᠷᠠ ᠦᠷᠡᠪᠳᠡᠰ(ᠥᠷᠥᠪ ᠲᠠᠰ) ᠤᠷᠲᠤ ᠭᠡᠭᠴᠢ ᠶ᠋ᠢᠨ ᠬᠦᠵᠦᠭᠦᠦ ᠬᠥᠯ ᠬᠣᠶᠠᠷ ᠢ᠋ᠶ᠋ᠠᠨ ᠰᠤᠩᠭᠠᠩᠬᠠᠨ᠂ ᠬᠠᠮᠢᠭᠠᠰᠢ ᠪᠠᠨ ᠴᠤ᠌ ᠣᠴᠢᠵᠤ ᠶᠠᠪᠤᠭᠠ ᠶ᠋ᠢ ᠨᠢ ᠪᠤᠤ ᠮᠡᠳᠡ ᠬᠤᠷᠳᠤᠯᠠᠨ ᠨᠢᠰᠦᠮᠦᠢ᠃ ᠴᠡᠷᠡᠨ ᠢ᠋ ᠬᠠᠯᠠᠭᠤᠨ ᠳ᠋ᠤ᠌ ᠲᠡᠩᠬᠡᠭᠡ ᠲᠠᠰᠤᠷᠠᠵᠤ᠂ ᠬᠥᠲᠥᠯ ᠥᠭᠡᠳᠡ ᠳᠠᠪᠠᠵᠤ ᠶᠠᠪᠤᠲᠠᠯᠠ᠂ ᠳᠡᠪᠡᠯ ᠦ᠋ᠨ ᠢ᠋ᠶ᠋ᠡᠨ ᠪᠠᠷᠠᠭᠤᠨ ᠬᠠᠨᠴᠤᠢ ᠶ᠋ᠢ ᠰᠤᠭᠤᠯᠳᠤᠷᠭᠠᠯᠠᠭᠰᠠᠨ ᠨᠢᠭᠡ ᠬᠥᠮᠦᠨ ᠬᠥᠲᠥᠯ ᠦ᠋ᠨ ᠴᠠᠭᠠᠨᠠ ᠠ᠋ᠴᠠ ᠭᠠᠷᠴᠤ ᠢᠷᠡᠵᠡᠢ᠃
— ᠳ᠋ᠤᠢᠩᠬᠤᠷ ᠭᠡᠵᠦ ᠬᠣᠯᠠ ᠠ᠋ᠴᠠ ᠲᠠᠨᠢᠭᠠᠳ᠂ ᠲᠡᠷᠡ ᠵᠢᠯ ᠰᠢᠷᠴᠢᠨ ᠢ᠋ ᠵᠢᠷᠣᠭᠠ ᠮᠣᠷᠢ ᠪᠠᠨ ᠥᠭ ᠭᠡᠵᠦ ᠬᠠᠪᠴᠢᠨ ᠰᠢᠬᠠᠵᠤ ᠪᠠᠢᠭᠰᠠᠨ ᠨᠢ ᠴᠡᠷᠡᠨ ᠦ᠌ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠵᠤ᠂ ᠲᠡᠷᠡ ᠴᠠᠭ ᠠ᠋ᠴᠠ ᠬᠣᠢᠰᠢ ᠨᠡᠯᠢᠶᠡᠳ ᠬᠡᠳᠦᠨ ᠵᠢᠯ ᠥᠩᠭᠡᠷᠡᠵᠦ᠂ ᠶᠡᠬᠡ ᠴᠦ᠍ ᠶᠠᠪᠤᠳᠠᠯ ᠥᠭᠡᠷᠡᠴᠢᠯᠡᠯᠲᠡ ᠡᠷᠭᠢᠯᠲᠡ ᠭᠠᠷᠤᠭᠰᠠᠨ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠯᠠ᠃ ᠠᠷᠠᠳ ᠤ᠋ᠨ ᠵᠠᠰᠠᠭ ᠢ᠋ ᠡᠰᠡᠷᠭᠦᠴᠡᠵᠦ᠂ ᠯᠠᠮᠠ ᠨᠠᠷ ᠪᠣᠰᠤᠯᠭᠠ ᠭᠠᠷᠭᠠᠭᠠᠳ᠂ ᠳ᠋ᠤᠢᠩᠬᠤᠷ ᠤ᠋ᠨ ᠲᠦᠰᠢᠭ ᠪᠣᠯᠤᠭᠰᠠᠨ ᠠᠢᠮᠠᠭ ᠬᠣᠲᠠ ᠶ᠋ᠢᠨ ᠵᠠᠷᠢᠮ ᠡᠪᠡᠷᠲᠡᠨ ᠰᠡᠭᠦᠯᠲᠡᠨ ᠨᠦ᠍ᠭᠦᠳ ᠨᠢ ᠲᠡᠷᠡ ᠡᠰᠡᠷᠭᠦᠦ ᠪᠣᠰᠤᠯᠭᠠᠨ ᠳ᠋ᠤ᠌ ᠬᠣᠯᠪᠣᠭᠳᠠᠵᠤ᠂ ᠪᠠᠭ ᠤ᠋ᠨ ᠳᠠᠷᠤᠭᠠ ᠭᠡᠵᠦ ᠪᠠᠢᠭᠰᠠᠨ ᠳ᠋ᠤᠢᠩᠬᠤᠷ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠭᠡᠰᠡᠨ ᠪᠠᠰᠠ ᠯᠠ ᠤᠴᠢᠷ ᠲᠠᠢ ᠪᠣᠯᠵᠤ᠂ ᠨᠤᠲᠤᠭ ᠤ᠋ᠨ ᠮᠠᠯᠴᠢᠨ ᠤ᠋ ᠬᠣᠱᠣᠩᠨᠠᠵᠤ ᠬᠡᠯᠡᠳᠡᠭ ᠢ᠋ᠶ᠋ᠡᠷ《ᠬᠥᠮᠦᠵᠢᠬᠦ》 ᠭᠡᠵᠦ ᠲᠠᠪᠤᠭᠠᠳ ᠵᠢᠯ ᠳᠠᠯᠳᠠ ᠣᠷᠣᠭᠠᠳ ᠰᠠᠶᠢ ᠬᠠᠪᠤᠷ᠂ ᠣᠪᠣᠷ ᠪᠠᠢᠳᠠᠯ ᠨᠡᠯᠢᠶᠡᠳ ᠥᠲᠡᠯᠵᠦ ᠡᠴᠡᠭᠰᠡᠨ ᠰᠢᠨᠵᠢ ᠲᠡᠢ᠂ ᠭᠡᠷ ᠲᠡᠭᠡᠨ( ᠲᠤ ᠪᠡᠨ) ᠪᠤᠴᠠᠵᠤ ᠢᠷᠡᠭᠡᠳ ᠤᠷᠢᠳᠤ ᠪᠠᠭ ᠤ᠋ᠨ ᠳᠠᠷᠤᠭᠠ ᠶᠠᠪᠤᠬᠤ ᠳ᠋ᠠᠭᠠᠨ(ᠳ᠋ᠤ᠌ ᠪᠠᠨ) ᠬᠠᠪᠴᠢᠵᠤ ᠬᠠᠢᠷᠴᠤ ᠪᠠᠢᠭᠰᠠᠨ ᠤᠯᠤᠰ ᠢ᠋ᠶ᠋ᠠᠨ ᠶᠡᠬᠡᠯᠡ(ᠶᠡᠬᠡ ᠯᠡ) ᠵᠢᠰᠤᠷᠳᠠᠨ ᠨᠢᠯᠪᠠᠭᠠᠨᠠᠳᠠᠭ ᠪᠣᠯᠤᠭᠰᠠᠨ ᠪᠢᠯᠡ᠃ ᠲᠡᠷᠡ ᠶ᠋ᠢ ᠨᠢ ᠰᠠᠨᠠᠭᠠᠳ᠂ ᠴᠡᠷᠡᠨ ᠣᠳᠣ ᠪᠠᠰᠠ ᠪᠢᠯᠳᠠᠤᠴᠢ ᠨᠢᠯᠤᠭᠤᠨ ᠵᠠᠩ ᠢ᠋ᠶ᠋ᠠᠨ ᠭᠠᠷᠭᠠᠬᠤ ᠨᠢ ᠳᠡ ᠭᠡᠵᠦ ᠳᠣᠲᠣᠷᠠ ᠪᠠᠨ ᠳᠤᠷᠠ ᠦᠭᠡᠢᠴᠡᠨ ᠪᠣᠳᠣᠲᠠᠯᠠ ᠨᠢ ᠴᠠᠭᠠᠳᠤᠬᠢ ᠨᠢ ᠦᠨᠡᠷᠡᠨ ᠴᠦ᠍᠂ ᠲᠡᠷᠲᠡᠭᠡ ᠬᠣᠯᠠ ᠠ᠋ᠴᠠ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠨ ᠢᠨᠢᠶᠡᠮᠰᠦᠷᠦᠨ ᠮᠠᠭᠠᠰᠠᠭᠠᠨᠠᠭᠰᠠᠭᠠᠷ ᠴᠡᠷᠡᠨ ᠦ᠌ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠡᠩᠭᠦᠲᠡ᠂ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠲᠠᠲᠠᠵᠤ᠂ ᠲᠡᠰᠬᠡᠯ ᠦᠭᠡᠢ ᠪᠢᠯᠳᠠᠤᠷᠬᠠᠨ᠂
— ᠰᠢᠷᠴᠢᠨ ᠭᠤᠸᠠᠢ ᠶᠠᠭᠤ ᠬᠢᠵᠦ ᠪᠠᠢᠨᠠ? ᠲᠠᠨ ᠤ᠋ ᠪᠡᠶᠡ ᠰᠠᠢᠨ ᠯᠠ ᠪᠢᠵᠡ ᠳᠡ? ᠰᠣᠨᠢᠨ ᠰᠠᠢᠬᠠᠨ ᠶᠠᠭᠤ ᠪᠠᠢᠨᠠ? ᠮᠠᠯ ᠰᠦᠷᠦᠭ ᠰᠠᠢᠬᠠᠨ ᠵᠤᠨᠰᠢᠵᠤ ᠪᠠᠢᠨᠠ ᠤᠤ? ᠭᠡᠵᠦ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠨᠢᠯᠤᠭᠤᠨ ᠵᠠᠩ ᠭᠠᠷᠭᠠᠵᠤ᠂ ᠨᠠᠷᠠᠨ ᠳ᠋ᠤ᠌ ᠭᠠᠩᠳᠠᠭᠰᠠᠨ ᠶᠤᠮ ᠰᠢᠭ᠋ ᠥᠩᠭᠡ ᠠᠯᠳᠠᠭᠰᠠᠨ ᠰᠣᠬᠣᠭᠣᠷ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠴᠡᠷᠡᠨ ᠥᠭᠡᠳᠡ ᠬᠠᠷᠠᠵᠤ᠂ ᠴᠢᠪᠠᠭᠠᠨᠴᠠ ᠴᠢᠷᠠᠢᠯᠠᠭᠰᠠᠨ ᠦᠷᠴᠢᠬᠡᠷ ᠨᠢᠭᠤᠷ ᠲᠠᠭᠠᠨ( ᠲᠤ ᠪᠠᠨ) ᠢᠨᠢᠶᠡᠮᠰᠦᠭᠯᠡᠬᠦ ᠳᠦᠷᠢᠮ ᠦᠵᠡᠭᠦᠯᠵᠡᠢ᠃ ᠨᠠᠷᠠᠨ ᠳ᠋ᠤ᠌ ᠪᠣᠷᠣᠯᠠᠵᠤ ᠬᠥᠯᠥᠰᠥᠨ ᠳ᠋ᠦ᠍ᠨᠢ (ᠳ᠋ᠦ᠍ ᠨᠢ) ᠬᠤᠵᠢᠷ ᠤᠷᠭᠤᠭᠰᠠᠨ ᠢᠰᠡᠭᠡᠢ ᠪᠦᠷᠬᠦ ᠮᠠᠯᠠᠭᠠᠢ ᠨᠢ ᠰᠢᠯᠢ ᠶ᠋ᠢᠨ ᠬᠦᠵᠦᠭᠦᠦ ᠳᠡᠭᠡᠷᠡ ᠨᠢ ᠪᠠᠭᠤᠵᠤ᠂ ᠬᠣᠵᠢᠭᠡᠷ ᠪᠣᠯᠵᠤ ᠶᠠᠪᠤᠭᠠ ᠪᠤᠯᠳᠤᠷᠤᠤ ᠲᠠᠢ ᠳᠤᠬᠤ ᠵᠤᠯᠠᠢ ᠳ᠋ᠤᠨᠢ(ᠳ᠋ᠤ᠌ ᠨᠢ) ᠬᠥᠯᠥᠰᠥ ᠪᠤᠷᠵᠠᠢᠵᠠᠢ᠃
— ᠰᠢᠷᠴᠢᠨ ᠠᠳᠤᠭᠤᠨ ᠳᠡᠭᠡᠷᠡ ᠪᠡᠨ ᠪᠠᠢᠭᠠ᠂ ᠮᠢᠨᠦ ᠪᠡᠶᠡ ᠰᠠᠢᠨ᠃ ᠰᠣᠨᠢᠨ ᠶᠠᠭᠤᠮᠠ ᠠᠯᠠᠭᠠ᠃ ᠮᠠᠯ ᠰᠠᠢᠬᠠᠨ ᠵᠤᠨᠰᠢᠵᠤ ᠪᠠᠢᠨᠠ ᠭᠡᠵᠦ ᠬᠠᠷᠢᠭᠤᠯᠤᠭᠠᠳ᠂ ᠰᠠᠯᠬᠢᠨ ᠤ᠋ ᠨᠢ ᠳᠣᠣᠷᠠ ᠠ᠋ᠴᠠ ᠵᠠᠢᠯᠠᠵᠤ᠂ ᠬᠣᠭᠣᠷᠣᠨᠳᠣ ᠪᠠᠷ ᠢ᠋ᠶ᠋ᠠᠨ ᠰᠠᠯᠬᠢ ᠴᠣᠬᠢᠬᠤ ᠪᠠᠷ ᠲᠠᠭᠠᠷᠠᠭᠤᠯᠤᠨ ᠮᠣᠷᠢ ᠪᠠᠨ ᠵᠣᠭᠰᠣᠭᠠᠭᠰᠠᠨ ᠤᠴᠢᠷ ᠨᠢ᠂ ᠳ᠋ᠤᠢᠩᠬᠤᠷ ᠠ᠋ᠴᠠ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠦᠮᠡᠬᠡᠢ ᠰᠢᠪᠡᠷᠢ ᠶ᠋ᠢᠨ ᠦᠨᠦᠷ ᠬᠠᠩᠬᠤᠯᠵᠤ ᠣᠢ ᠭᠣᠳᠣᠮᠠᠷ ᠮᠠᠭᠤᠬᠠᠢ ᠪᠥᠭᠡᠳ ᠬᠠᠷᠠᠪᠠᠯ ᠠᠵᠢᠯ ᠤ᠋ᠨ ᠬᠠᠷᠠ ᠭᠤᠲᠤᠯ ᠤ᠋ᠨ ᠵᠤᠯᠤᠭ ᠰᠢᠪᠡᠷᠢ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ) ᠨᠣᠢᠲᠠᠨ ᠦᠵᠡᠭᠳᠡᠵᠡᠢ᠃
— ᠣᠳᠣ ᠪᠢᠳᠡ᠂ ᠪᠠᠷᠤᠭ ᠲᠠᠨ ᠤ᠋ ᠬᠠᠶᠠᠭᠠᠨ ᠳ᠋ᠤ᠌ ᠭᠡᠮᠡᠷ ᠪᠠᠭᠤᠭᠰᠠᠨ ᠰᠢᠦ᠃ ᠮᠠᠨ ᠤ᠋ ᠲᠡᠷᠡ ᠬᠠᠪᠢ ᠪᠠᠷ ᠶᠠᠪᠤᠬᠤ ᠳ᠋ᠠᠭᠠᠨ ᠵᠠᠪᠠᠯ ᠮᠠᠨᠠᠢᠬᠢ(ᠮᠠᠨ ᠤ᠋ ᠬᠢ) ᠪᠡᠷ ᠣᠷᠣᠭᠠᠷᠠᠢ᠃ ᠮᠠᠨ ᠤ᠋ ᠡᠬᠡᠨᠡᠷ ᠲᠠᠨ ᠢ᠋ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍ ᠶᠡᠬᠡ ᠪᠠᠶᠠᠷᠯᠠᠨᠠ᠃ ᠠᠢᠯ ᠬᠥᠮᠦᠨ ᠠᠮᠢ ᠨᠢᠭᠡᠲᠡᠢ ᠭᠡᠳᠡᠭ ᠰᠢᠦ ᠳᠡ᠂ ᠵᠠᠪᠠᠯ ᠣᠴᠢᠭᠠᠷᠠᠢ᠃
ᠪᠢ ᠲᠠᠨ ᠢ᠋ ᠮᠠᠨᠠᠢᠳᠤ(ᠮᠠᠨ ᠤ᠋ ᠳ᠋ᠤ᠌) ᠮᠣᠷᠢᠯᠠᠭᠠᠷᠠᠢ ᠭᠡᠬᠦ ᠰᠠᠨ᠂ ᠮᠣᠷᠢᠯᠠᠬᠤ ᠭᠡᠳᠡᠭ ᠮᠠᠨᠢ ᠹᠧᠣᠳᠠᠯ ᠤ᠋ᠨ ᠦᠭᠡ ᠰᠢᠦ ᠳᠡ᠃ ᠵᠠ ᠪᠢ ᠹᠧᠣᠳᠠᠯ ᠠᠩᠭᠢ ᠶ᠋ᠢᠨ ᠬᠡᠯᠡ ᠪᠡᠷ ᠶᠠᠷᠢᠬᠤ ᠳᠤᠷᠠ ᠦᠭᠡᠢ ᠬᠥᠮᠦᠨ ᠰᠢᠦ ᠬᠢ ᠬᠢ ᠬᠢ ᠭᠡᠵᠦ ᠨᠢᠯᠪᠠᠭᠠᠨᠠᠨ ᠢᠨᠢᠶᠡᠬᠦ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ)᠂
— ᠲᠡᠭᠡᠲᠡᠯᠡ ᠪᠡᠨ᠂ ᠲᠠ ᠨᠢᠳᠤᠷᠭᠠᠨ ᠪᠠᠶᠠᠨ᠂ ᠹᠧᠣᠳᠠᠯ ᠲᠦᠰᠢᠮᠡᠯ ᠬᠥᠮᠦᠨ ᠲᠡᠢ ᠬᠡᠯᠬᠢᠶᠡ ᠬᠣᠯᠪᠣᠭᠠᠲᠠᠢ ᠪᠣᠯᠬᠤ ᠠ᠋ᠴᠠ ᠪᠠᠨ ᠠᠶᠤᠬᠤ ᠦᠭᠡᠢ ᠶᠦᠮ ᠤᠤ? ᠭᠡᠵᠦ ᠴᠡᠷᠡᠨ ᠢᠨᠢᠶᠡᠮᠰᠦᠭᠯᠡᠵᠡᠢ᠃ ᠲᠡᠭᠡᠬᠦ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ)᠂
— ᠠ᠋᠂ ᠴᠡᠷᠡᠨ ᠭᠤᠸᠠᠢ ᠮᠢᠨᠢ᠂ ᠪᠢ ᠣᠳᠣ ᠶᠠᠭᠠᠬᠢᠯᠠ ᠭᠡᠵᠦ ᠲᠡᠭᠡᠬᠦ ᠪᠣᠢ? ᠤᠷᠢᠳᠤ ᠪᠢ ᠵᠡᠭᠦᠨ ᠦ᠌ ᠨᠤᠭᠤᠯᠤᠭᠠᠲᠠᠨ ᠤ᠋ ᠦᠭᠡᠨ ᠳ᠋ᠦ᠍ ᠣᠷᠣᠭᠰᠠᠨ ᠪᠠ ᠲᠡᠳᠡ ᠨᠦ᠍ᠭᠦᠳ ᠦ᠋ᠨ ᠱᠤᠭᠤᠮ ᠦᠨᠳᠦᠰᠦᠯᠡᠨ ᠪᠠᠷᠢᠮᠲᠠᠯᠠᠭᠰᠠᠨ᠂ ᠢ ᠲᠡᠭᠦᠨᠴᠢᠯᠡᠨ ᠲᠣᠯᠣᠭᠠᠢ ᠡᠷᠭᠢᠭᠰᠡᠨ ᠬᠡᠷᠡᠭ ᠪᠣᠯᠤᠨᠠ᠃ ᠠ ᠪᠢ ᠪᠠᠭ ᠤ᠋ᠨ ᠳᠠᠷᠤᠭᠠ ᠶ᠋ᠢᠨ ᠬᠤᠪᠢ ᠪᠠᠷ ᠲᠡᠳᠡ ᠨᠦ᠍ᠭᠦᠳ ᠦ᠋ᠨ ᠲᠤᠰᠢᠶᠠᠯ ᠤ᠋ᠳ ᠢ᠋ ᠪᠠ ᠵᠢᠭᠠᠪᠤᠷᠢ ᠨᠤᠭᠤᠳ ᠢ᠋ ᠪᠡᠶᠡᠯᠡᠭᠦᠯᠵᠦ ᠶᠠᠪᠤᠭᠰᠠᠨ ᠪᠠ ᠶᠠᠭᠤᠮᠠ ᠮᠡᠳᠡᠬᠦ ᠦᠭᠡᠢ ᠢ ᠲᠠᠺᠴᠢᠭ ᠦᠭᠡᠢ ᠬᠥᠮᠦᠨ ᠪᠠᠢᠭᠰᠠᠨ ᠶᠤᠮ᠃ ᠠ ᠣᠳᠣ ᠮᠠᠷᠱᠠᠯ ᠲᠡᠳᠡ ᠪᠦᠭᠦᠳᠡ ᠶ᠋ᠢᠨ ᠫᠧᠯᠧᠰᠣᠫᠢ ᠶ᠋ᠢ ᠪᠠ ᠲᠠᠺᠴᠢᠭ ᠢ᠋ ᠢᠯᠡᠷᠡᠭᠦᠯᠬᠦ ᠢ ᠲᠡᠭᠦᠨᠴᠢᠯᠡᠨ ᠪᠢᠳᠡᠨ ᠦ᠌ ᠨᠢᠳᠦ ᠨᠦ᠍ᠭᠦᠳ ᠢ᠋ ᠨᠡᠭᠡᠭᠡᠭᠰᠡᠨ ᠠᠰᠠᠭᠤᠯᠲᠠ ᠶ᠋ᠢᠨ ᠳᠡᠭᠡᠷᠡ ᠡᠴᠡ ᠪᠢ ᠶᠡᠷᠦᠩᠬᠡᠢ ᠳ᠋ᠡᠭᠡᠨ(ᠳ᠋ᠦ᠍ ᠪᠡᠨ)ᠤᠬᠠᠮᠰᠠᠷᠲᠠᠢ ᠪᠣᠯᠤᠭᠰᠠᠨ ᠪᠣᠯᠤᠨᠠ ᠭᠡᠵᠦ ᠶᠡᠬᠡ ᠰᠦᠷᠡᠬᠡᠢ ᠨᠠᠷᠢᠨ《ᠬᠣᠲᠠ ᠶᠠᠩᠵᠤ ᠶ᠋ᠢᠨ》 ᠦᠭᠡ ᠪᠡᠷ ᠶᠠᠷᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂ ᠴᠡᠷᠡᠨ ᠦ᠌ ᠴᠢᠷᠠᠢ ᠳ᠋ᠤ᠌ ᠦᠯᠦ ᠣᠢᠰᠢᠶᠠᠬᠤ ᠪᠠᠢᠳᠠᠯ ᠪᠠᠢᠭᠠ ᠶ᠋ᠢ ᠠᠵᠢᠭᠯᠠᠭᠠᠳ᠂ ᠲᠠ ᠮᠠᠨᠠᠢᠬᠢ(ᠮᠠᠨ ᠤ᠋ ᠬᠢ ) ᠪᠡᠷ ᠵᠠᠪᠠᠯ ᠣᠷᠣᠭᠠᠷᠠᠢ᠃ ᠣᠳᠣ ᠣᠷᠣᠪᠠᠯ᠂ ᠪᠢ ᠪᠤᠴᠠᠵᠤ ᠭᠠᠵᠠᠷᠴᠢᠯᠠᠶᠠ ᠭᠡᠬᠦ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ)᠂
— ᠵᠠ᠂ ᠪᠢ ᠬᠣᠵᠢᠮ ᠨᠢᠭᠡ ᠵᠠᠪ ᠲᠠᠭᠠᠨ( ᠲᠤ ᠪᠠᠨ) ᠣᠷᠣᠮ ᠵᠠ᠂ ᠣᠳᠣ ᠭᠡᠷ ᠲᠡᠭᠡᠨ( ᠲᠤ ᠪᠡᠨ)ᠬᠠᠷᠢᠬᠤ ᠭᠡᠵᠦ ᠪᠠᠬᠠᠨ ᠶᠠᠭᠠᠷᠠᠵᠤ ᠶᠠᠪᠤᠨᠠ᠃ ᠭᠡᠷ ᠲᠦ᠍ ᠬᠥᠮᠦᠨ ᠪᠠᠢᠬᠤ ᠦᠭᠡᠢ᠂ ᠭᠠᠭᠴᠠ ᠵᠢᠭᠠᠯ ᠥᠬᠢᠨ ᠮᠠᠨᠢ ᠦᠯᠡᠳᠡᠭᠰᠡᠨ ᠶᠤᠮᠰᠠᠨ ᠭᠡᠳ ᠵᠢᠯᠣᠭᠣ ᠪᠠᠨ ᠵᠠᠯᠠᠵᠤ ᠬᠥᠳᠡᠯᠬᠦ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ) ᠳ᠋ᠣᠢᠩᠬᠣᠷ ᠭᠠᠷ ᠢ᠋ᠶ᠋ᠠᠨ ᠴᠢᠮᠠᠷᠬᠠᠢ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠡᠷᠭᠦᠨ ᠴᠡᠷᠢᠭ ᠶᠣᠰᠣ ᠪᠠᠷ ᠶᠣᠰᠣᠯᠠᠭᠠᠳ᠂ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠮᠣᠷᠢ ᠪᠠᠨ ᠳᠡᠰ ᠬᠢᠲᠡᠯᠡ ᠭᠤᠶᠠᠳᠠᠨ᠂ ᠭᠠᠵᠠᠷ ᠤ᠋ᠨ ᠤᠷᠤᠭᠤ ᠭᠥᠯᠢᠮ ᠢ᠋ᠶ᠋ᠡᠨ ᠫᠡᠷ ᠫᠡᠷ ᠳᠠᠪᠢᠷᠠᠨ ᠬᠠᠲᠠᠷᠢᠭᠤᠯᠵᠠᠢ᠃
— ᠡᠨᠡ ᠶᠠᠮᠠᠷ ᠵᠢᠭᠲᠡᠢ ᠬᠥᠮᠦᠨ ᠪᠣᠢ? ᠭᠡᠵᠦ ᠴᠡᠷᠡᠨ ᠳᠣᠲᠣᠷᠠ ᠪᠠᠨ ᠳ᠋ᠣᠢᠩᠬᠣᠷ ᠢ᠋ ᠭᠠᠢᠬᠠᠨ ᠶᠠᠪᠤᠵᠠᠢ᠃ ᠹᠧᠣᠳᠠᠯ ᠠᠩᠭᠢ ᠶ᠋ᠢᠨ ᠬᠡᠯᠡ ᠭᠡᠬᠦ ᠵᠡᠷᠭᠡ ᠤᠬᠠᠭᠠᠨ ᠳ᠋ᠤ᠌ ᠣᠷᠣᠮᠠ ᠦᠭᠡᠢ ᠡᠯᠳᠡᠪ ᠶᠠᠭᠤᠮᠠ ᠶᠠᠷᠢᠵᠤ᠂ ᠡᠭᠡᠯ ᠵᠢᠷ ᠦ᠋ᠨ ᠠᠷᠠᠳ ᠪᠢᠳᠡᠨ ᠦ᠌ ᠡᠮᠦᠨᠡ ᠰᠦᠷ ᠪᠠᠳᠠᠷᠠᠭᠤᠯᠳᠠᠭ ᠡᠢᠮᠦ ᠤᠯᠤᠰ ᠮᠠᠨᠠᠢ(ᠮᠠᠨ ᠤ᠋) ᠭᠠᠭᠴᠠ ᠳ᠋ᠣᠢᠩᠬᠣᠷ ᠪᠢᠰᠢ᠂ ᠨᠥᠬᠥᠷ ᠰᠡᠭᠦᠳᠡᠷ ᠨᠢ ᠨᠡᠯᠢᠶᠡᠳ ᠪᠣᠢ ᠪᠣᠯᠵᠠᠢ᠃ ᠭᠠᠵᠠᠷ ᠤ᠋ᠨ ᠬᠠᠮᠢᠭᠠ ᠠ᠋ᠴᠠ ᠭᠠᠷᠳᠠᠭ ᠶᠤᠮ ᠪᠣᠢ ᠡᠢᠮᠦ ᠤᠯᠤᠰ? ᠹᠧᠣᠳᠠᠯ ᠢ᠋ ᠠᠷᠠᠳ ᠪᠢᠳᠡᠨ ᠲᠡᠢ ᠬᠡᠯᠡᠮᠦᠷᠴᠢ ᠬᠡᠷᠡᠭᠯᠡᠵᠦ ᠶᠠᠷᠢᠬᠤ ᠶ᠋ᠢ ᠪᠢ ᠤᠷᠢᠳᠤ ᠶᠡᠷᠦ ᠲᠣᠭᠣᠯᠤᠭᠠ ᠯᠠ ᠦᠭᠡᠢ ᠶᠦᠮ ᠰᠠᠨ᠃ ᠶᠠᠭᠤ ᠪᠠᠨ ᠳ᠋ᠦᠶ᠋ᠢᠩᠬᠤᠷ ᠳᠣᠩᠭᠣᠰᠴᠤ ᠶᠠᠪᠤᠭᠠ ᠶᠤᠮ ᠪᠣᠯ? ᠭᠡᠵᠦ ᠪᠣᠳᠣᠭᠰᠠᠭᠠᠷ ᠴᠡᠷᠡᠨ ᠬᠥᠲᠥᠯ ᠳᠡᠭᠡᠷᠡ ᠭᠠᠷᠤᠭᠠᠳ ᠵᠠᠮ ᠤ᠋ᠨ ᠤᠯᠤᠰ ᠴᠢᠯᠠᠭᠤ ᠣᠪᠣᠭᠠᠯᠠᠵᠤ ᠵᠣᠭᠣᠰ ᠡᠷᠭᠦᠳᠡᠭ᠂ ᠤᠷᠢᠳᠤ ᠬᠢᠷᠭᠢᠰ ᠬᠡᠭᠦᠷ ᠪᠠᠢᠭᠰᠠᠨ ᠤᠪᠤ ᠶ᠋ᠢᠨ ᠳᠡᠷᠭᠡᠳᠡ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠬᠥᠯᠥᠰᠥ ᠶ᠋ᠢ ᠨᠢ ᠬᠠᠲᠠᠭᠠᠵᠤ᠂ ᠰᠠᠯᠬᠢᠨ ᠳ᠋ᠤ᠌ ᠪᠠᠬᠠᠨ ᠰᠠᠭᠤᠲᠠᠯᠠ ᠬᠥᠲᠥᠯ ᠦ᠋ᠨ ᠴᠠᠭᠠᠨᠠ ᠠ᠋ᠴᠠ ᠨᠢᠭᠡ ᠮᠣᠷᠢ ᠲᠠᠢ ᠬᠥᠮᠦᠨ ᠭᠠᠷᠴᠤ ᠢᠷᠡᠯᠡ᠃ ᠦᠵᠡᠪᠡᠰᠦ ᠰᠢᠷᠠᠪ ᠡᠪᠦᠭᠡᠨ ᠭᠤᠸᠠᠢ ᠠᠵᠢ᠃ ᠴᠡᠷᠡᠨ ᠦ᠌ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠡᠭᠡᠳ᠂ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠠᠮᠤᠷ ᠮᠡᠨᠳᠦ ᠪᠡᠨ ᠮᠡᠳᠡᠯᠴᠡᠭᠡᠳ᠂
— ᠵᠠ᠂ ᠬᠡᠦᠬᠡ ᠬᠠᠮᠢᠭᠠ ᠬᠦᠷᠦᠭᠡᠳ ᠪᠤᠴᠠᠵᠤ ᠶᠠᠪᠤᠭᠠ ᠪᠢᠯᠡ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠬᠣᠷᠰᠢᠶᠠᠨ ᠠ᠋ᠴᠠ ᠠᠬᠠᠷ ᠱᠠᠬᠠᠷ ᠶᠠᠭᠤᠮᠠ ᠠᠪᠤᠭᠠᠳ ᠪᠤᠴᠠᠵᠤ ᠶᠠᠪᠤᠨᠠ᠃ ᠲᠠ ᠬᠠᠮᠢᠭᠠ ᠬᠦᠷᠬᠦ ᠨᠢ ᠪᠣᠢ? ᠭᠡᠬᠦ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ)᠂
— ᠮᠠᠨᠠᠢ(ᠮᠠᠨ ᠤ᠋) ᠬᠣᠲᠠ᠂ ᠬᠡᠭᠡᠷᠡ ᠶ᠋ᠢᠨ ᠨᠣᠬᠠᠢ ᠶ᠋ᠢᠨ ᠡᠭᠦᠷ ᠣᠯᠵᠤ ᠭᠡᠨᠡ᠃ ᠲᠡᠭᠡᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠮᠠᠷᠭᠠᠰᠢ ᠲᠡᠷᠡ ᠤᠷᠤᠭᠤ ᠨᠢ ᠬᠦᠷᠬᠦ ᠰᠠᠨᠠᠭᠠ ᠲᠠᠢ ᠳᠥᠭᠥᠵᠦ ᠶᠠᠪᠤᠨᠠ ᠳᠠ᠂ ᠴᠣᠬᠣᠮ ᠬᠦᠦ ᠮᠢᠨᠢ ᠥᠴᠥᠭᠡᠳᠦᠷ ᠢᠷᠡᠭᠡᠳ ᠥᠨᠥ ᠥᠷᠯᠥᠭᠡ ᠪᠤᠴᠠᠭᠰᠠᠨ᠃ ᠡᠨᠡ ᠵᠢᠯ ᠨᠡᠯᠢᠶᠡᠳ ᠶᠡᠬᠡ ᠡᠪᠡᠰᠦ ᠬᠠᠳᠤᠬᠤ ᠲᠥᠯᠥᠪᠯᠡᠭᠡ ᠲᠡᠢ ᠶᠦᠮ ᠭᠡᠨᠡ ᠯᠡ᠃ ᠤᠷᠢᠳᠤ ᠶ᠋ᠢᠨ ᠬᠢ ᠶ᠋ᠢ ᠪᠣᠳᠣᠪᠠᠯ᠂ ᠤᠯᠤᠰ ᠠᠮᠢᠲᠠᠨ ᠣᠳᠣ ᠲᠤᠩ ᠶᠡᠬᠡ ᠶᠠᠭᠤᠮᠠ ᠬᠢᠳᠡᠭ ᠪᠣᠯᠵᠠᠢ᠃ ᠰᠠᠢᠬᠠᠨ ᠮᠠᠰᠢᠨ ᠮᠠᠨ ᠤ᠋ ᠬᠢᠨ ᠳ᠋ᠦ᠍ ᠰ ᠰ ᠰ ᠊ᠷ ᠶᠠᠪᠤᠭᠤᠯᠵᠤ᠂ ᠰᠦᠷᠡᠬᠡᠢ ᠴᠦ᠍ ᠮᠡᠷᠭᠡᠵᠢᠯᠲᠡᠨ ᠨᠦ᠍ᠭᠦᠳ ᠨᠢ ᠣᠷᠣᠵᠤ ᠡᠪᠡᠰᠦ ᠬᠠᠳᠤᠬᠤ ᠨᠢᠷᠤᠭᠤᠯᠳᠠᠬᠤ ᠶ᠋ᠢ ᠰᠤᠷᠭᠠᠵᠠᠢ᠃ ᠤᠷᠢᠳᠤ ᠯᠠᠮᠠ ᠨᠠᠷ ᠡᠪᠡᠰᠦ ᠬᠠᠳᠤᠬᠤ ᠭᠠᠵᠠᠷ ᠬᠠᠭᠠᠯᠬᠤ ᠬᠡᠷᠡᠭ ᠦᠭᠡᠢ᠂ ᠯᠤᠤᠰ ᠰᠠᠪᠳᠠᠭ ᠬᠢᠯᠢᠩᠨᠡᠨᠡ ᠭᠡᠳᠡᠭ ᠪᠠᠢᠵᠤ ᠪᠢᠯᠡ᠃ ᠮᠥᠨ ᠴᠦ᠍ ᠪᠠᠯᠠᠷ ᠪᠦᠳᠦᠭᠦᠯᠢᠭ ᠴᠠᠭ ᠪᠠᠢᠵᠢ ᠳᠠ ᠭᠡᠳ ᠡᠪᠦᠭᠡᠨ ᠭᠠᠩᠰᠠ ᠪᠠᠨ ᠭᠠᠷᠭᠠᠵᠤ ᠲᠠᠮᠠᠬᠢ ᠪᠠᠨ ᠨᠡᠷᠡᠭᠡᠳ᠂ ᠬᠠᠭᠤᠴᠢᠨ ᠤ᠋ ᠪᠠᠯᠠᠷ ᠶᠠᠭᠤᠮᠠ ᠤᠯᠠ ᠪᠣᠯᠵᠤ᠂ ᠰᠢᠨᠡ ᠰᠠᠢᠬᠠᠨ ᠶᠠᠭᠤᠮᠠ ᠵᠤᠯᠠ ᠪᠣᠯᠤᠯᠠ ᠭᠡᠳ ᠲᠠᠮᠠᠬᠢᠨ ᠤ᠋ ᠪᠠᠨ ᠤᠲᠤᠭᠠ ᠶ᠋ᠢ ᠨᠢ ᠭᠠᠭᠴᠠ ᠨᠢᠭᠡ ᠰᠤᠷᠤᠭᠠᠳ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠭᠤᠮᠠ ᠪᠣᠳᠣᠵᠤ᠂ ᠶᠠᠷᠢᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠨᠠᠮ ᠳᠠᠭᠤ ᠪᠠᠷ ᠥᠭᠦᠯᠡᠷᠦᠨ— ᠤᠯᠤᠰ ᠠᠮᠢᠲᠠᠨ ᠣᠳᠣ ᠤᠷᠢᠳᠤ ᠶ᠋ᠢᠨ ᠬᠢ ᠲᠡᠢ ᠠᠳᠠᠯᠢ ᠦᠭᠡᠢ᠂ ᠰᠦᠷᠡᠬᠡᠢ ᠬᠥᠭᠵᠢᠭᠰᠡᠨ ᠰᠢᠦ᠃ ᠨᠠᠮ ᠮᠠᠨᠢ᠂ ᠠᠷᠠᠳ ᠪᠢᠳᠡᠨ ᠦ᠌ ᠪᠡᠨ ᠨᠢᠳᠦ ᠨᠡᠭᠡᠭᠡᠵᠦ ᠥᠭᠭᠦᠯᠡ ᠳᠡ ᠬᠥᠭᠡᠷᠦᠬᠦᠢ᠃ ᠲᠡᠭᠡᠭᠡᠳ᠂ ᠬᠠᠷᠭᠢᠰ ᠯᠠᠮᠠ ᠨᠠᠷ ᠬᠠᠭᠤᠴᠢᠨ ᠢ᠋ᠶ᠋ᠠᠨ ᠪᠤᠰᠬᠠᠬᠤ ᠭᠡᠳ ᠲᠡᠷᠡ ᠨᠢ ᠪᠦᠲᠦᠵᠦ ᠥᠭᠭᠦᠭᠰᠡᠨ ᠦᠭᠡᠢ᠂ ᠠᠷᠠᠳ ᠤ᠋ᠨ ᠬᠥᠭᠵᠢᠵᠦ᠂ ᠤᠴᠢᠷ ᠢᠶᠠᠨ ᠮᠡᠳᠡᠳᠡᠭ᠂ ᠵᠠᠰᠠᠭ ᠲᠠᠭᠠᠨ( ᠲᠤ ᠪᠠᠨ) ᠬᠠᠢᠷᠠᠲᠠᠢ᠂ ᠨᠠᠮ ᠳ᠋ᠠᠭᠠᠨ(ᠳ᠋ᠤ᠌ ᠪᠠᠨ) ᠢᠲᠡᠭᠡᠯᠲᠡᠢ ᠶ᠋ᠢ ᠨᠢ ᠳᠠᠢᠰᠤᠨ ᠤᠬᠠᠭᠠᠷᠠᠭᠰᠠᠨ ᠦᠭᠡᠢ᠂ ᠶᠣᠨᠵᠣᠩ ᠬᠠᠮᠪᠤ ᠶ᠋ᠢᠨ ᠬᠡᠷᠡᠭ ᠲᠠᠰᠤᠯᠤᠭᠰᠠᠨ ᠠ᠋ᠴᠠ ᠬᠣᠢᠰᠢ᠂ ᠪᠡᠶᠡ ᠪᠡᠨ ᠲᠡᠭᠦᠨ ᠦ᠌ ᠱᠠᠪᠢ ᠭᠡᠵᠦ ᠶᠠᠪᠤᠭᠰᠠᠨ ᠰᠦᠰᠦᠭᠲᠡᠨ ᠴᠦ᠍ ᠭᠡᠰᠡᠨ ᠮᠠᠨᠠᠢ(ᠮᠠᠨ ᠤ᠋) ᠯᠠᠮᠠ ᠪᠠᠭᠰᠢ᠂ ᠬᠤᠲᠤᠭᠲᠤ ᠬᠤᠪᠢᠯᠭᠠᠨ᠂ ᠠᠷᠤ ᠮᠣᠩᠭᠣᠯ ᠤ᠋ᠨ ᠨᠠᠶᠠᠨ ᠨᠢᠭᠡᠨ ᠰᠢᠳᠢᠲᠡᠨ ᠭᠡᠵᠦ ᠪᠠᠢᠭᠰᠠᠨ ᠠᠮᠢᠳᠤ ᠪᠤᠷᠠᠬᠠᠴᠤᠤᠯ ᠮᠠᠨᠢ ᠴᠣᠬᠣᠮ ᠳᠡᠭᠡᠷᠡ ᠪᠡᠨ ᠠᠷᠠᠳ ᠢ᠋ ᠮᠥᠯᠵᠢᠨ ᠮᠤᠩᠬᠠᠷᠠᠭᠤᠯᠵᠤ ᠪᠠᠢᠭᠠᠳ᠂ ᠬᠤᠪᠢᠰᠬᠠᠯ ᠤ᠋ᠨ ᠠᠴᠢ ᠪᠠᠷ ᠲᠦᠮᠡᠨ ᠠᠷᠠᠳ ᠲᠡᠳᠡᠨ ᠦ᠌ ᠲᠠᠯᠬᠢᠨ ᠳᠣᠣᠷᠠ ᠠ᠋ᠴᠠ ᠰᠤᠭᠤ ᠦᠰᠦᠷᠦᠮᠡᠭᠴᠡ᠂ ᠶᠣᠰᠣᠲᠠᠢ ᠬᠠᠷᠭᠢᠰ ᠴᠢᠨᠠᠷ ᠢ᠋ᠶ᠋ᠠᠨ ᠬᠠᠷᠠᠭᠤᠯᠵᠤ᠂ ᠡᠰᠡᠷᠭᠦᠦ ᠳᠣᠲᠣᠷᠠ ᠪᠠᠨ ᠦᠵᠡᠭᠦᠯᠦᠭᠰᠡᠨ ᠪᠢᠯᠡ᠃ ᠠᠴᠢᠲᠤ ᠮᠠᠷᠱᠠᠯ ᠮᠠᠨᠢ᠂ ᠰᠠᠵᠢ ᠯᠠᠮᠠ ᠠ᠋ᠴᠠ ᠡᠬᠢᠯᠡᠨ ᠶᠣᠨᠵᠣᠩ ᠬᠠᠮᠪᠤ ᠲᠡᠷᠢᠭᠦᠲᠡᠨ ᠰᠢᠷᠠ ᠬᠠᠷᠭᠢᠰ ᠪᠣᠳᠤᠠ ᠳ᠋ᠠᠨᠽᠠᠩ ᠠ᠋ᠴᠠ ᠡᠬᠢᠯᠡᠨ ᠬᠡᠨᠳᠡᠨ ᠲᠠᠮᠢᠳ ᠤ᠋ᠨ ᠵᠡᠷᠭᠡ ᠵᠡᠭᠦᠨ ᠪᠠᠷᠠᠭᠤᠨ ᠡᠰᠡᠷᠭᠦᠦ ᠨᠠᠷ ᠢ᠋ ᠦᠨᠳᠦᠰᠦ ᠶ᠋ᠢ ᠨᠢ ᠲᠠᠰᠤᠯᠵᠤ᠂ ᠪᠤᠵᠠᠷ ᠪᠣᠯᠠᠢ ᠶ᠋ᠢ ᠨᠢ ᠠᠷᠢᠭᠤᠳᠬᠠᠨ ᠠᠷᠢᠯᠭᠠᠵᠠᠢ᠃ ᠪᠢ ᠴᠦ᠍ ᠭᠡᠰᠡᠨ ᠳᠡᠭᠡᠷᠡ ᠴᠠᠭ ᠲᠤ᠌ ᠪᠣᠭᠳᠠ ᠭᠡᠭᠡᠨ᠂ ᠶᠣᠨᠵᠣᠩ ᠬᠠᠮᠪᠤ ᠨᠠᠷ ᠲᠤ᠌ ᠪᠢᠰᠢᠷᠡᠨ ᠮᠥᠷᠭᠥᠵᠦ ᠶᠠᠪᠤᠭᠰᠠᠨ ᠲᠠᠷᠢᠬᠢ ᠳᠠ᠃ ᠪᠤᠷᠬᠠᠨ ᠤ᠋ ᠬᠤᠪᠢᠯᠭᠠᠨ ᠶᠤᠮ ᠭᠡᠵᠦ ᠵᠠᠯᠠᠭᠤ ᠳ᠋ᠠᠭᠠᠨ(ᠳ᠋ᠤ᠌ ᠪᠠᠨ) ᠪᠣᠳᠣᠵᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ᠂ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯ ᠮᠠᠨᠳᠤᠬᠤ ᠠ᠋ᠴᠠ ᠠᠯᠢ ᠲᠦᠷᠦᠭᠦᠨ ᠰᠦᠰᠦᠭ ᠢ᠋ᠶ᠋ᠡᠨ ᠠᠯᠳᠠᠭᠰᠠᠨ ᠬᠥᠮᠦᠨ ᠰᠢᠦ᠃ ᠴᠢ ᠲᠡᠭᠡᠬᠦ ᠳ᠋ᠦ᠍ ᠵᠢᠭᠠᠯᠬᠠᠨ ᠬᠡᠦᠬᠡᠳ ᠪᠠᠢᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ ᠭᠡᠵᠦ ᠰᠢᠷᠠᠪ ᠭᠤᠸᠠᠢ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍᠂ ᠬᠥᠬᠡ ᠨᠠᠭᠤᠷ᠂ ᠪᠡᠭᠡᠵᠢᠩ ᠬᠦᠷᠲᠡᠯᠡ ᠠᠶᠠᠨ ᠵᠢᠩ ᠬᠢᠵᠦ ᠶᠡᠬᠡ ᠶᠠᠪᠤᠵᠤ ᠶᠡᠬᠡ ᠶᠠᠭᠤᠮᠠ ᠦᠵᠡᠭᠰᠡᠨ ᠲᠡᠷᠡ ᠬᠠᠰᠢᠷ ᠡᠪᠦᠭᠡᠨ ᠦ᠌ ᠰᠣᠨᠢᠨ ᠦᠭᠡ ᠰᠣᠨᠣᠰᠬᠤ ᠳᠤᠷᠠᠲᠠᠢ ᠴᠡᠷᠡᠨ ᠰᠢᠷᠠᠪ ᠭᠤᠸᠠᠢ ᠶ᠋ᠢ᠂
— ᠲᠠ ᠨᠠᠳᠠᠳᠤ(ᠨᠠᠳᠠ ᠳ᠋ᠤ᠌) ᠲᠡᠭᠦᠨ ᠢ᠋ᠶ᠋ᠡᠨ ᠶᠠᠷᠢᠵᠤ ᠥᠭᠭᠦᠨᠡᠦ(ᠥᠭᠭᠦᠨᠡ ᠤᠤ) ? ᠭᠡᠵᠡᠢ᠃
— ᠵᠠ ᠲᠡᠭᠡᠶᠡ᠂ ᠤᠯᠤᠰ ᠤᠷᠢᠳᠤ ᠴᠠᠭ ᠲᠤ᠌ ᠴᠤ᠌ ᠭᠡᠰᠡᠨ ᠬᠠᠷᠠ ᠤᠬᠠᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠰᠠ ᠶᠠᠭᠤᠮᠠᠨ ᠤ᠋ ᠤᠴᠢᠷ ᠢ᠋ ᠮᠥᠨ ᠣᠯᠳᠠᠭ ᠯᠠ ᠪᠠᠢᠵᠠᠢ᠃ ᠲᠡᠷᠡ ᠨᠢ ᠠᠷᠭᠠ ᠴᠤ᠌ ᠦᠭᠡᠢ ᠶᠦᠮ ᠪᠢᠵᠡ ᠳᠡ᠃ ᠠᠵᠤ ᠲᠥᠷᠥᠬᠦ᠂ ᠠᠮᠢ ᠵᠢᠭᠤᠬᠤ ᠪᠠᠢᠳᠠᠯ ᠨᠢ ᠰᠢᠬᠠᠭᠰᠠᠭᠠᠷ ᠬᠥᠮᠦᠨ ᠶᠠᠭᠤᠮᠠ ᠪᠣᠳᠣᠳᠠᠭ ᠠᠵᠢᠭᠯᠠᠳᠠᠭ ᠪᠣᠯᠬᠤ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠲᠡᠭᠡᠬᠦ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠬᠠᠷᠢᠨ ᠲᠡᠷᠡ ᠪᠦᠷ ᠤᠬᠠᠭᠠᠨ ᠢ᠋ ᠨᠢ ᠣᠯᠬᠤ ᠦᠭᠡᠢ ᠪᠠᠢᠳᠠᠭ ᠶᠠᠭᠤᠮᠠ ᠴᠤ᠌ ᠪᠢᠰᠢᠭᠦᠢ ᠪᠠᠢᠭᠰᠠᠨ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠮᠠᠨᠠᠢ ᠠᠪᠤ᠂ ᠨᠤᠲᠤᠭ ᠤᠰᠤᠨ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠨᠡᠷᠡᠲᠡᠢ ᠭᠦᠷᠦᠭᠡᠴᠢ ᠬᠥᠮᠦᠨ᠂ ᠶᠡᠷᠦ ᠯᠠᠮᠠ ᠪᠠᠭᠰᠢ ᠭᠡᠵᠦ ᠨᠢᠭᠡ ᠶᠡᠬᠡ ᠰᠦᠢᠳ ᠪᠣᠯᠵᠤ ᠪᠠᠢᠳᠠᠭ ᠦᠭᠡᠢ ᠬᠥᠮᠦᠨ ᠪᠠᠢᠵᠤ ᠪᠢᠯᠡ᠃ ᠮᠠᠨ ᠤ᠋ ᠡᠨᠡ ᠬᠠᠪᠢ ᠶ᠋ᠢᠨ ᠬᠤᠲᠤᠭᠲᠤ ᠬᠤᠪᠢᠯᠭᠠᠨ᠂ ᠶᠡᠬᠡᠰ ᠯᠠᠮᠠ ᠨᠠᠷ ᠤ᠋ᠨ ᠱᠠᠯᠢᠭ ᠰᠠᠮᠠᠭᠤᠨ ᠪᠠᠢᠳᠠᠯ ᠢ᠋ ᠴᠦ᠍ ᠦᠵᠡᠭᠰᠡᠭᠡᠷ ᠮᠡᠳᠡᠭᠰᠡᠭᠡᠷ ᠢᠷᠡᠭᠰᠡᠨ ᠬᠥᠮᠦᠨ ᠪᠠᠢᠵᠤ ᠯᠠ ᠳᠠ᠃ ᠬᠤᠲᠤᠭᠲᠤ ᠨᠠᠷ ᠤ᠋ᠨ ᠳᠤᠮᠳᠠ ᠠ᠋ᠴᠠ ᠨᠠᠷᠠ ᠪᠠᠨᠴᠢᠨ ᠬᠤᠲᠤᠭᠲᠤ ᠶ᠋ᠢ ᠯᠡ ᠪᠦᠷ ᠴᠦ᠍ ᠨᠢᠳᠦᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠦᠵᠡᠳᠡᠭ ᠦᠭᠡᠢ᠃ ᠬᠡᠭᠡᠷᠡ ᠵᠠᠮ ᠳ᠋ᠤ᠌ ᠲᠡᠭᠦᠨ ᠦ᠌ ᠣᠯᠠᠨ ᠱᠠᠪᠢ ᠨᠠᠷ ᠲᠠᠢᠭᠠᠨ ᠶᠠᠪᠤᠵᠤ ᠪᠠᠢᠭᠠ ᠪᠠᠷᠠ ᠶ᠋ᠢ ᠨᠢ ᠬᠠᠷᠠᠪᠠᠯ᠂ ᠰᠠᠯᠬᠢᠨ ᠤ᠋ ᠨᠢ ᠳᠡᠭᠡᠭᠦᠷ ᠲᠣᠭᠣᠷᠢᠵᠤ ᠭᠠᠷᠳᠠᠭ ᠪᠠᠢᠭᠰᠠᠨ ᠬᠥᠮᠦᠨ ᠳᠡ᠃ ᠬᠣᠵᠢᠮ ᠬᠣᠢᠨᠠ ᠨᠠᠳᠠᠳᠤ(ᠨᠠᠳᠠ ᠳ᠋ᠤ᠌) ᠨᠢᠭᠡ ᠶᠠᠷᠢᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠮᠠᠨᠵᠤ ᠪᠠᠳᠠᠷᠠᠯᠲᠤ ᠲᠥᠷᠥ ᠶ᠋ᠢᠨ ᠦᠶᠡᠰ ᠲᠦ᠍ ᠤᠯᠢᠶᠠᠰᠤᠲᠠᠢ ᠳ᠋ᠤ᠌ ᠨᠠᠷᠠ ᠪᠠᠨᠴᠢᠨ ᠲᠠᠢ ᠨᠢᠭᠡ ᠳᠠᠭᠠᠷᠢᠯᠳᠤᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢᠵᠤ ᠪᠢᠯᠡ᠃ ᠵᠢᠷᠠᠨ ᠢᠮᠠᠭᠠᠨ ᠤ᠋ ᠤᠬᠤᠨᠠ ᠰᠢᠭ᠋ ᠬᠠᠯᠲᠠᠷ ᠪᠣᠯᠴᠢᠬᠠᠭᠰᠠᠨ ᠱᠠᠯ ᠰᠣᠭᠲᠣᠭᠤ ᠲᠡᠷᠡ ᠬᠤᠲᠤᠭᠲᠤ ᠤᠯᠢᠶᠠᠰᠤᠲᠠᠢ ᠶ᠋ᠢᠨ ᠨᠢᠭᠡ ᠶᠠᠩᠬᠠᠨ ᠢ᠋ ᠲᠡᠪᠡᠷᠢᠭᠡᠳ ᠰᠡᠦᠬᠡ ᠲᠡᠷᠭᠡ ᠪᠡᠷ ᠶᠠᠪᠤᠵᠤ ᠪᠠᠢᠵᠤ ᠯᠠ ᠳᠠ᠃ ᠲᠡᠷᠡ ᠲᠡᠷᠭᠡ ᠶ᠋ᠢ ᠨᠢ ᠤᠯᠪᠤᠰᠤ ᠪᠣᠯᠲᠠᠯᠠ ᠰᠣᠭᠲᠣᠭᠰᠠᠨ᠂ ᠤᠯᠠᠭᠠᠨ ᠨᠢᠴᠦᠭᠦᠨ ᠲᠠᠪᠤᠨ ᠶᠠᠩᠬᠠᠨ ᠡᠮᠡ ᠴᠢᠷᠴᠦ ᠶᠠᠪᠤᠭᠰᠠᠨ ᠪᠢᠯᠡ᠃
ᠮᠠᠨᠵᠤ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠤ᠋ᠨ ᠰᠠᠢᠳ᠂ ᠤᠯᠢᠶᠠᠰᠤᠲᠠᠢ ᠶ᠋ᠢᠨ ᠠᠮᠪᠠᠨ ᠬᠦᠷᠲᠡᠯᠡ ᠲᠡᠭᠦᠨ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠢᠴᠢᠵᠦ ᠰᠠᠨᠳᠤᠷᠤᠭᠰᠠᠨ ᠶᠤᠮ ᠭᠡᠨᠡ ᠪᠢᠯᠡ᠃ ᠯᠠᠮᠠ ᠨᠠᠷ ᠲᠡᠭᠡᠬᠦ ᠳ᠋ᠦ᠍ ᠴᠤᠤ ᠳᠠᠮ ᠦᠭᠡ ᠲᠠᠷᠬᠠᠭᠠᠵᠤ᠂ ᠨᠠᠷᠠ ᠪᠠᠨᠴᠢᠨ ᠬᠤᠲᠤᠭᠲᠤ ᠶ᠋ᠢ ᠲᠡᠷᠡ ᠰᠠᠮᠠᠭᠤᠨ ᠳᠦᠷᠢ ᠪᠡᠷ ᠦᠵᠡᠭᠳᠡᠭᠰᠡᠨ ᠤᠴᠢᠷ ᠤᠳᠬᠠ ᠶ᠋ᠢ ᠶᠡᠬᠡ ᠨᠠᠷᠢᠨ ᠨᠢᠭᠤᠴᠠ ᠬᠡᠷᠡᠭ᠃ ᠤᠰᠤᠨ ᠨᠢᠳᠦᠲᠦ᠂ ᠴᠢᠰᠤᠨ ᠵᠢᠷᠦᠬᠡᠲᠦ ᠬᠢᠯᠢᠩᠴᠡᠲᠡᠨ ᠠᠮᠢᠲᠠᠨ ᠪᠤᠷᠤᠭᠤ ᠪᠠᠷ ᠦᠵᠡᠭᠰᠡᠨ ᠪᠣᠯᠬᠤ ᠠ᠋ᠴᠠ᠂ ᠲᠡᠷᠡ ᠬᠤᠲᠤᠭᠲᠤ ᠱᠠᠰᠢᠨ ᠠᠮᠢᠲᠠᠨ ᠤ᠋ ᠲᠤᠰᠠ ᠶ᠋ᠢᠨ ᠲᠤᠯᠠᠳᠠ ᠲᠡᠢᠮᠦ ᠳᠦᠷᠢ ᠪᠡᠷ ᠠᠵᠢᠷᠠᠭᠰᠠᠨ ᠬᠡᠷᠡᠭ ᠭᠡᠵᠦ ᠪᠢᠯᠡ᠃ ᠠᠪᠤ ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠲᠦᠢ ᠭᠡᠵᠦ ᠨᠤᠯᠮᠤᠵᠤ ᠶᠡᠷᠦ ᠠᠩ ᠬᠦᠷᠦᠭᠡ ᠬᠢᠬᠦ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠤᠰᠤᠨ ᠨᠢᠳᠦ ᠲᠡᠢ ᠪᠢᠯᠡ ᠭᠡᠵᠦ ᠶᠠᠭᠤᠮᠠ ᠪᠤᠷᠤᠭᠤ ᠪᠠᠷ ᠬᠠᠷᠠᠵᠤ ᠪᠠᠢᠭᠰᠠᠨ ᠵᠦᠢᠯ ᠦᠭᠡᠢ᠃ ᠡᠵᠡᠭᠦᠢ ᠬᠡᠭᠡᠷᠡ ᠶᠠᠪᠤᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)᠂ ᠠᠩ ᠠᠷᠢᠶᠠᠲᠠᠨ᠂ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠮᠥᠷ ᠢ᠋ᠶ᠋ᠡᠷ ᠬᠡᠨ ᠶᠠᠭᠤ ᠶᠠᠪᠤᠭᠰᠠᠨ᠂ ᠶᠠᠭᠠᠬᠢᠭᠰᠠᠨ ᠡᠢᠭᠰᠡᠨ ᠢ᠋ ᠠᠨᠳᠤᠳᠠᠭ ᠦᠭᠡᠢ᠂ ᠵᠢᠷᠤᠬᠠᠢᠴᠢ ᠬᠥᠮᠦᠨ ᠦ᠌ ᠵᠢᠷᠤᠬᠠᠢ ᠪᠠᠨ ᠵᠢᠷᠤᠭᠰᠠᠨ ᠠ᠋ᠴᠠ ᠢᠯᠡᠭᠦᠦ ᠨᠠᠷᠢᠨ ᠢ᠋ᠶ᠋ᠠᠷ ᠬᠠᠮᠤᠭ ᠤᠴᠢᠷ ᠢ᠋ ᠮᠡᠳᠡᠵᠦ ᠬᠠᠷᠠᠬᠤ ᠨᠢᠳᠦ ᠲᠡᠢ ᠪᠠᠢᠲᠠᠯᠠ ᠪᠠᠨ ᠨᠢᠳᠦᠨ ᠳ᠋ᠦ᠍ ᠴᠢᠨᠢ ᠣᠨᠳᠣᠣ ᠶᠠᠭᠤᠮᠠ ᠦᠵᠡᠭᠳᠡᠭᠰᠡᠨ ᠭᠡᠬᠦ ᠳ᠋ᠦ᠍ ᠵᠢᠪᠡᠭᠦᠦ ᠨᠢ ᠬᠦᠷᠦᠭᠰᠡᠨ ᠪᠠᠢᠵᠠᠢ᠃
ᠠᠷᠤ ᠮᠣᠩᠭᠣᠯ ᠳ᠋ᠤ᠌ ᠮᠢᠨᠦ ᠰᠦᠰᠦᠭᠯᠡᠳᠡᠭ ᠨᠠᠢ᠍ᠮᠠᠳᠤᠭᠠᠷ ᠪᠣᠭᠳᠠ᠂ ᠪᠣᠭᠳᠠ ᠶ᠋ᠢᠨ ᠪᠠᠭᠰᠢ ᠶᠣᠨᠵᠣᠩ ᠬᠠᠮᠪᠤ ᠡᠨᠡ ᠬᠣᠶᠠᠷ ᠯᠠ ᠪᠣᠢ ᠭᠡᠳᠡᠭ ᠪᠠᠢᠵᠠᠢ᠃ ᠲᠡᠭᠡᠭᠡᠳ ᠮᠠᠨᠠᠢ(ᠮᠠᠨ ᠤ᠋) ᠨᠤᠲᠤᠭ ᠤᠰᠤᠨ ᠤ᠋ ᠬᠢᠨ ᠢ᠋ ᠬᠦᠷᠢᠶᠡ ᠣᠷᠣᠵᠤ ᠨᠠᠢ᠍ᠮᠠᠳᠤᠭᠠᠷ ᠪᠣᠭᠳᠠ ᠳ᠋ᠤ᠌ ᠮᠥᠷᠭᠥᠨᠡ ᠭᠡᠬᠦ ᠳ᠋ᠦ᠍᠂ ᠮᠠᠨᠠᠢ(ᠮᠠᠨ ᠤ᠋) ᠠᠪᠤ᠂ ᠪᠢ ᠴᠦ᠍ ᠭᠡᠰᠡᠨ ᠪᠣᠭᠳᠠ ᠳ᠋ᠤ᠌ ᠮᠥᠷᠭᠥᠭᠡᠳ ᠢᠷᠡᠶᠡ ᠭᠡᠵᠦ ᠮᠢᠨᠦ ᠮᠠᠭᠤ ᠬᠦᠦ ᠴᠦ᠍ ᠭᠡᠰᠡᠨ ᠶᠣᠰᠣᠲᠠᠢ ᠪᠤᠷᠬᠠᠨ ᠤ᠋ ᠬᠤᠪᠢᠯᠭᠠᠨ ᠯᠠᠮᠠ ᠳ᠋ᠤ᠌ ᠮᠥᠷᠭᠥᠭᠡᠳ ᠢᠷᠡᠭ ᠭᠡᠵᠦ ᠨᠠᠮᠠᠶ᠋ᠢ (ᠨᠠᠮᠠ ᠶ᠋ᠢ) ᠳᠠᠭᠠᠭᠤᠯᠵᠤ ᠮᠣᠷᠳᠠᠭᠰᠠᠨ ᠪᠢᠯᠡ᠃
ᠬᠦᠷᠢᠶᠡᠨ ᠳ᠋ᠦ᠍ ᠬᠦᠷᠴᠦ ᠢᠷᠡᠭᠡᠳ᠂ ᠬᠣᠰᠢᠭᠤ ᠶ᠋ᠢᠨ ᠬᠢᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠪᠠᠭᠤᠵᠤ᠂ ᠬᠦᠷᠢᠶᠡ ᠣᠯᠠᠨ ᠠᠢᠮᠠᠭ ᠢ᠋ᠶ᠋ᠠᠷ ᠮᠥᠷᠭᠥᠯ ᠬᠢᠵᠦ᠂ ᠫᠦᠰᠡ ᠪᠡᠷ ᠪᠠᠬᠠᠨ ᠬᠡᠰᠦᠳᠡᠭ ᠪᠠᠢᠯᠠ᠃ ᠬᠦᠷᠢᠶᠡᠨ ᠦ᠌ ᠬᠢᠲᠠᠳ ᠫᠦᠰᠡ ᠶ᠋ᠢᠨ ᠬᠢᠨ ᠠᠶᠠᠲᠠᠢᠬᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠣᠯᠵᠤ ᠪᠠᠭᠤᠷᠢᠯᠠᠭᠰᠠᠨ ᠪᠠᠢᠯᠠ ᠰᠢᠦ᠃ ᠭᠠᠨᠳᠠᠩ ᠥᠭᠡᠳᠡ ᠭᠠᠷᠤᠶᠠ ᠭᠡᠳ ᠶᠠᠪᠤᠲᠠᠯᠠ᠂ ᠶᠠᠭ ᠵᠠᠮ ᠳᠡᠭᠡᠷᠡ ᠴᠢᠨᠢ ᠥᠨᠥᠬᠢ ᠣᠯᠠᠨ ᠫᠦᠰᠡ— ᠳᠤᠷᠠᠲᠠᠢ ᠳᠤᠷᠠ ᠦᠭᠡᠢ ᠴᠦ᠍ ᠭᠡᠰᠡᠨ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠯᠡ ᠫᠦᠰᠡᠨ ᠳ᠋ᠦ᠍ ᠣᠷᠣᠴᠢᠬᠠᠭᠰᠠᠨ ᠪᠠᠢᠳᠠᠭ᠃ ᠭᠠᠨᠳᠠᠩ ᠠ᠋ᠴᠠ ᠪᠠᠭᠤᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠵᠠᠮ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠥᠨᠥᠬᠢ ᠫᠦᠰᠡ ᠪᠡᠷ ᠳᠠᠬᠢᠨ ᠳᠠᠬᠢᠨ ᠳᠠᠭᠠᠷᠢᠵᠤ᠂ ᠶᠠᠳᠠᠷᠠᠭᠰᠠᠨ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠦᠨᠡ ᠥᠷᠲᠡᠭ ᠦᠭᠡᠢ ᠬᠠᠷᠠ ᠴᠠᠢ ᠶ᠋ᠢ ᠨᠢ ᠤᠤᠭᠤᠵᠤ᠂ ᠮᠥᠰᠥᠨ ᠰᠢᠬᠢᠷ ᠡᠴᠡ ᠨᠢ ᠬᠦᠯᠬᠦᠵᠦ᠂ ᠤᠯᠠᠭᠠᠨ ᠴᠢᠪᠠᠭᠠ ᠠ᠋ᠴᠠ ᠨᠢ ᠭᠠᠭᠴᠠ ᠨᠢᠭᠡ ᠶ᠋ᠢ ᠢᠳᠡᠬᠦ ᠳ᠋ᠦ᠍ ᠠᠶᠠᠲᠠᠢ ᠪᠠᠢᠳᠠᠭ ᠰᠠᠨ᠃ ᠲᠡᠭᠡᠲᠡᠯᠡ ᠨᠢᠭᠡ ᠮᠡᠳᠡᠬᠦᠨᠡ ᠬᠠᠷᠠ ᠴᠠᠢ ᠶ᠋ᠢ ᠨᠢ ᠣᠭᠣᠴᠢᠵᠤ᠂ ᠬᠠᠲᠠᠭᠰᠠᠨ ᠴᠢᠪᠠᠭᠠ ᠶ᠋ᠢ ᠨᠢ ᠵᠠᠵᠢᠯᠤᠭᠰᠠᠭᠠᠷ ᠫᠦᠰᠡᠨ ᠦ᠌ ᠪᠢᠴᠢᠭᠡᠴᠢ ᠨᠠᠷ ᠤ᠋ᠨ ᠦᠭᠡᠨ ᠳ᠋ᠦ᠍ ᠣᠷᠣᠵᠤ᠂ ᠶᠠᠭᠤᠮᠠ ᠠᠪᠴᠢᠬᠠᠭᠰᠠᠨ ᠪᠠᠢᠳᠠᠭ ᠪᠢᠯᠡ᠃ ᠫᠦᠰᠡᠨ ᠡᠴᠡ ᠭᠠᠷᠲᠠᠯᠠ᠂ ᠴᠠᠭᠠᠨᠠ ᠨᠢ ᠵᠡᠭᠦᠨ ᠬᠦᠷᠢᠶᠡ ᠭᠡᠵᠦ᠂ ᠲᠡᠷᠡ ᠨᠠᠢ᠍ᠮᠠ ᠶᠢᠰᠦᠨ ᠭᠤᠳᠤᠮᠵᠢ ᠶ᠋ᠢᠨ ᠳᠡᠷᠭᠡᠳᠡ ᠨᠢ ᠰᠢᠬᠠᠭᠤ ᠪᠦᠷᠢᠶᠡ ᠪᠢᠰᠬᠢᠭᠦᠷ ᠲᠠᠲᠠᠬᠤ᠂ ᠴᠠᠩ ᠬᠡᠩᠭᠡᠷᠭᠡ ᠴᠣᠬᠢᠬᠤ ᠨᠢ ᠲᠣᠪ ᠲᠣᠳᠣᠬᠠᠨ ᠰᠣᠨᠣᠰᠤᠭᠳᠠᠳᠠᠭ ᠰᠠᠨ᠃ ᠲᠡᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂ ᠮᠥᠷᠭᠥᠯᠴᠢᠨ ᠬᠣᠢᠨᠠ ᠵᠡᠭᠦᠨ ᠬᠦᠷᠢᠶᠡ ᠪᠡᠷ ᠨᠢᠭᠡ ᠣᠷᠣᠵᠤ ᠮᠥᠷᠭᠥᠶᠡ ᠭᠡᠲᠡᠯᠡ᠂ ᠵᠡᠭᠦᠨ ᠬᠦᠷᠢᠶᠡ ᠶ᠋ᠢᠨ ᠴᠠᠭᠠᠨᠠ ᠮᠠᠢᠮᠠᠢ ᠬᠣᠲᠠ ᠭᠡᠵᠦ ᠬᠠᠵᠠᠭᠤ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠪᠠᠢᠭᠠ ᠶᠤᠮ ᠰᠢᠭ᠋ ᠪᠠᠢᠳᠠᠭ᠃ ᠲᠡᠭᠡᠭᠡᠳ ᠯᠡ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠭᠠᠨᠳᠠᠩ ᠬᠦᠷᠢᠶᠡ ᠡᠷᠭᠢᠭᠰᠡᠭᠡᠷ᠂ ᠡᠷᠭᠦᠯ ᠮᠥᠷᠭᠥᠯ ᠭᠡᠵᠦ ᠵᠠᠪᠰᠠᠷ ᠵᠠᠭᠠᠭ ᠲᠤᠨᠢ( ᠳ᠋ᠤ᠌ ᠨᠢ) ᠳᠠᠩᠵᠢᠶᠠᠳ ᠨᠠᠷ ᠤ᠋ᠨ ᠴᠠᠢ ᠴᠢᠪᠠᠭᠠ ᠶ᠋ᠢᠨ ᠬᠢᠨᠢ ᠠᠮᠲᠠ ᠪᠠᠷ᠂ ᠡᠪᠦᠷ ᠲᠡᠭᠡᠨ( ᠲᠤ ᠪᠡᠨ) ᠠᠪᠴᠤ ᠶᠠᠪᠤᠭᠰᠠᠨ ᠮᠥᠩᠭᠥ ᠪᠡᠨ ᠪᠠᠢᠳᠠᠭ ᠢ᠋ ᠨᠢ ᠯᠠᠮᠠ ᠳᠠᠩᠵᠢᠶᠠᠳ ᠬᠣᠶᠠᠷ ᠲᠤ᠌ ᠪᠠᠷᠢᠴᠢᠬᠠᠳᠠᠭ ᠪᠠᠢᠯᠠ᠃
ᠬᠦᠷᠢᠶᠡ ᠪᠡᠷ ᠡᠷᠭᠢᠯ ᠮᠥᠷᠭᠥᠯ᠂ ᠮᠠᠢᠮᠠᠢ ᠱᠠᠢᠮᠠᠢ ᠬᠢᠵᠦ ᠨᠢᠭᠡ ᠡᠳᠦᠷ ᠥᠩᠭᠡᠷᠡᠯᠡ᠃ ᠬᠣᠢᠲᠤ ᠡᠳᠦᠷ ᠨᠢ ᠥᠩᠭᠡᠷᠡᠯᠡ᠂ ᠴᠠᠭᠠᠳᠤᠬᠢ ᠡᠳᠦᠷ ᠨᠢ ᠥᠩᠭᠡᠷᠡᠯᠡ᠂ ᠲᠡᠭᠡᠭᠰᠡᠭᠡᠷ ᠬᠦᠷᠢᠶᠡ ᠪᠣᠭᠳᠠ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠮᠥᠷᠭᠥᠶᠡ ᠭᠡᠵᠦ ᠬᠡᠯᠡᠯᠴᠡᠭᠡᠳ᠂ ᠠᠪᠤ ᠶ᠋ᠢ ᠠᠬᠠ ᠵᠠᠬᠠ ᠬᠠᠰᠢᠷ ᠬᠥᠮᠦᠨ ᠭᠡᠵᠦ᠂ ᠳᠡᠭᠡᠷᠡᠬᠢ ᠶ᠋ᠢᠨ ᠭᠡᠭᠡᠨ ᠳ᠋ᠦ᠍ ᠶᠠᠭᠠᠬᠢᠵᠤ ᠪᠠᠷᠠᠭᠠᠯᠠᠬᠤ(ᠪᠠᠷᠠᠯᠬᠠᠬᠤ)᠂ ᠮᠣᠳᠣᠷ ᠠ᠋ᠴᠠ ᠨᠢ ᠠᠳᠢᠰ ᠬᠦᠷᠲᠡᠬᠦ ᠤᠴᠢᠷ ᠪᠠᠢᠳᠠᠯ ᠢ᠋ ᠳᠡᠷᠭᠡᠳᠡ ᠶ᠋ᠢᠨ ᠯᠠᠮᠠ ᠬᠠᠭᠠᠯᠭᠠᠴᠢ ᠨᠠᠷ ᠠ᠋ᠴᠠ ᠠᠰᠠᠭᠤᠯᠭᠠᠬᠤ ᠪᠠᠷ ᠪᠣᠯᠤᠯᠠ᠃
ᠠᠪᠤ ᠮᠢᠨᠢ ᠨᠠᠷᠠ ᠪᠢᠲᠡᠭᠦᠦ ᠪᠡᠷ ᠰᠢᠬᠠᠭᠤ ᠮᠣᠷᠢ ᠪᠠᠨ ᠡᠮᠡᠭᠡᠯᠯᠡᠵᠦ ᠲᠤᠤᠯᠠ ᠶ᠋ᠢᠨ ᠨᠣᠭᠣᠭᠠᠨ ᠣᠷᠳᠣᠨ ᠤ᠋ ᠵᠦᠭ ᠮᠣᠷᠳᠠᠵᠤ ᠪᠢᠯᠡ᠃ ᠲᠡᠭᠡᠭᠡᠳ ᠤᠳᠠᠭᠠ ᠴᠤ᠌ ᠦᠭᠡᠢ ᠪᠤᠴᠠᠭᠠᠳ ᠢᠷᠡᠵᠡᠢ᠃ ᠴᠢᠷᠠᠢ ᠨᠢ ᠶᠡᠬᠡᠯᠡ(ᠶᠡᠬᠡ ᠯᠡ) ᠪᠠᠷᠤᠭᠠᠷ᠃ ᠵᠠ᠂ ᠶᠠᠭᠠᠬᠢᠬᠤ ᠪᠠᠷ ᠪᠣᠯᠪᠠ? ᠭᠡᠵᠦ ᠮᠠᠨᠠᠢᠬᠢᠨ(ᠮᠠᠨ ᠤ᠋ ᠬᠢᠨ) ᠠᠰᠠᠭᠤᠪᠠ᠃ ᠲᠡᠭᠡᠬᠦ ᠳ᠋ᠦ᠍ ᠠᠪᠤ ᠬᠠᠨᠴᠤᠢ ᠪᠠᠨ ᠭᠦᠪᠢᠭᠡᠳ᠂ ᠬᠡᠷᠡᠭ ᠪᠦᠲᠦᠭᠰᠡᠨ ᠦᠭᠡᠢ ᠭᠡᠳ ᠶᠠᠭᠤᠮᠠ ᠳᠤᠤᠭᠠᠷᠴᠤ ᠥᠭᠭᠦᠭᠰᠡᠨ ᠦᠭᠡᠢ᠃ ᠡᠰᠡ ᠪᠦᠲᠦᠭᠰᠡᠨ ᠪᠣᠯ ᠶᠠᠭᠠᠬᠢᠬᠤ ᠪᠣᠢ ᠳᠠ ᠮᠠᠷᠭᠠᠰᠢ ᠪᠦᠲᠦᠬᠦ ᠶᠦᠮ ᠪᠠᠢᠯ ᠦᠭᠡᠢ ᠳᠡ ᠭᠡᠬᠦ ᠳ᠋ᠦ᠍᠂ ᠮᠠᠷᠭᠠᠰᠢ ᠪᠢ ᠲᠡᠷᠡ ᠤᠷᠤᠭᠤ ᠵᠦᠭᠯᠡᠬᠦ ᠦᠭᠡᠢ᠃ ᠲᠠ ᠨᠠᠷ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠣᠴᠢᠪᠠᠯ ᠣᠴᠢᠭᠠᠷᠠᠢ ᠭᠡᠵᠡᠢ᠃ ᠮᠠᠨᠠᠢᠬᠢᠨ(ᠮᠠᠨ ᠤ᠋ ᠬᠢᠨ) ᠪᠣᠭᠳᠠ ᠶ᠋ᠢᠨ ᠬᠠᠭᠠᠯᠭᠠᠴᠢᠨ ᠨᠤᠭᠤᠳ ᠲᠠᠢ ᠮᠠᠭᠤᠳᠠᠯᠴᠠᠭᠠᠳ ᠢᠷᠡᠭᠰᠡᠨ ᠪᠠᠢᠯ ᠦᠭᠡᠢ ᠳᠡ ᠭᠡᠵᠦ ᠪᠣᠳᠣᠭᠠᠳ᠂ ᠴᠢᠨᠠᠭᠰᠢ ᠨᠢ ᠠᠰᠠᠭᠤᠬᠤ ᠪᠠᠨ ᠴᠤ᠌ ᠪᠠᠢᠵᠤ᠂ ᠵᠠᠩ ᠢ᠋ ᠨᠢ ᠮᠡᠳᠡᠳᠡᠭ ᠪᠠᠢᠵᠤ ᠯᠠ ᠳᠠ᠃ ᠪᠠᠰᠠ ᠳᠡᠷᠭᠡᠳᠡ ᠶ᠋ᠢᠨ ᠬᠠᠭᠠᠯᠭᠠᠴᠢ ᠨᠠᠷ ᠤ᠋ᠨ ᠠᠭᠠᠰᠢ ᠮᠠᠭᠤ ᠲᠠᠢ᠂ ᠶᠡᠷᠦ ᠬᠠᠷᠠᠴᠤ ᠬᠥᠮᠦᠨ ᠢ᠋ ᠳᠠᠷᠤᠯᠠᠳᠠᠭ ᠭᠡᠵᠦ ᠲᠤᠭᠤᠯᠤᠭᠰᠠᠨ ᠲᠤᠯᠠ᠂ ᠲᠡᠳᠡᠨᠦᠰ ᠯᠠ ᠠᠪᠤ ᠶ᠋ᠢᠨ ᠭᠡᠵᠢᠭᠡ(ᠭᠡᠳᠡᠭᠡ) ᠬᠦᠷᠭᠡᠴᠢᠵᠡᠢ(ᠬᠦᠷᠭᠡᠴᠢᠬᠡᠵᠡᠢ) ᠳᠡ᠂ ᠣᠳᠣ ᠡᠨᠡ ᠬᠥᠮᠦᠨ ᠪᠣᠭᠳᠠ ᠳ᠋ᠤ᠌ ᠮᠥᠷᠭᠥᠬᠦ ᠭᠡᠵᠦ ᠲᠡᠷᠡ ᠤᠷᠤᠭᠤ ᠵᠢᠳᠬᠦᠬᠦ ᠪᠡᠨ ᠪᠠᠢᠵᠤ ᠭᠡᠵᠦ ᠪᠤᠳᠤᠵᠠᠭᠠᠵᠠᠢ᠃ ᠨᠠᠮᠠᠶ᠋ᠢ(ᠨᠠᠮᠠ ᠶ᠋ᠢ)ᠴᠦ᠍ ᠶᠠᠪᠤᠭᠤᠯᠤᠭᠰᠠᠨ ᠦᠭᠡᠢ᠂ ᠬᠦᠷᠢᠶᠡ ᠪᠣᠭᠳᠠ ᠳ᠋ᠤ᠌ ᠮᠥᠷᠭᠥᠬᠦ ᠭᠡᠵᠦ ᠢᠷᠡᠯᠴᠡᠭᠰᠡᠨ ᠪᠢ᠂ ᠠᠪᠤ ᠲᠠᠢ ᠪᠠᠨ ᠬᠣᠶᠠᠭᠤᠯᠠ ᠪᠠᠨ ᠪᠣᠭᠳᠠ ᠳ᠋ᠤ᠌ ᠮᠥᠷᠭᠥᠯ ᠦᠭᠡᠢ ᠪᠡᠷ ᠪᠤᠴᠠᠵᠤ ᠪᠢᠯᠡ᠃ ᠬᠣᠵᠢᠮ ᠬᠣᠢᠨᠠ ᠠᠪᠤ ᠨᠠᠳᠠᠳᠤ(ᠨᠠᠳᠠ ᠳ᠋ᠤ᠌) ᠲᠡᠷᠡ ᠡᠳᠦᠷ ᠦ᠋ᠨ ᠢ᠋ᠶ᠋ᠡᠨ ᠤᠴᠢᠷ ᠢ᠋ ᠬᠡᠯᠡᠵᠦ ᠪᠢᠯᠡ᠂ ᠬᠥᠭᠡᠷᠦᠬᠦᠢ ᠭᠡᠳ ᠡᠪᠦᠭᠡᠨ ᠰᠢᠷᠠᠪ ᠭᠠᠩᠰᠠ ᠪᠠᠨ ᠨᠡᠷᠡᠭᠡᠳ ᠤᠲᠤᠭᠠ ᠶ᠋ᠢ ᠨᠢ ᠶᠡᠬᠡᠯᠡ(ᠶᠡᠬᠡ ᠯᠡ) ᠲᠠᠭᠠᠲᠠᠢ ᠰᠤᠷᠤᠭᠠᠳ᠂ ᠤᠷᠢᠳᠠᠬᠢ ᠦᠭᠡ ᠪᠡᠨ ᠦᠷᠭᠦᠯᠵᠢᠯᠡᠵᠦ ᠶᠠᠷᠢᠭᠰᠠᠨ ᠨᠢ᠂
— ᠲᠡᠷᠡ ᠥᠷᠯᠥᠭᠡ᠂ ᠠᠪᠤ ᠶ᠋ᠢ ᠨᠣᠭᠣᠭᠠᠨ ᠣᠷᠳᠣᠨ ᠤ᠋ ᠵᠦᠭ ᠮᠣᠷᠳᠠᠬᠤ ᠳ᠋ᠤ᠌᠂ ᠬᠦᠷᠢᠶᠡ ᠶ᠋ᠢᠨ ᠬᠢᠨ ᠪᠣᠰᠤᠭᠠ ᠦᠭᠡᠢ ᠰᠠᠶᠢ ᠯᠠ ᠦᠷ ᠦ᠋ᠨ ᠭᠡᠭᠡ ᠰᠢᠷᠠᠯᠠᠵᠤ ᠪᠠᠢᠯᠠ᠃ ᠣᠷᠳᠣᠨ ᠤ᠋ ᠵᠦᠭ ᠳᠥᠭᠥᠵᠦ ᠶᠠᠪᠤᠲᠠᠯᠠ ᠨᠢᠭᠡ ᠮᠣᠷᠢ ᠲᠠᠢ ᠯᠠᠮᠠ ᠤᠷᠲᠤ ᠪᠠᠨ ᠨᠢᠭᠡ ᠶᠠᠭᠤᠮᠠ ᠳᠦᠭᠦᠷᠦᠭᠡᠳ ᠬᠠᠭᠠᠯᠭᠠ ᠪᠠᠷ ᠭᠠᠷᠴᠤ ᠢᠷᠡᠵᠡᠢ᠃ ᠲᠡᠭᠡᠭᠡᠳ ᠣᠷᠴᠢᠨ ᠲᠣᠭᠣᠷᠢᠨ ᠲᠠᠢᠰᠢ ᠪᠠᠨ ᠬᠤᠯᠠᠭᠠᠢ ᠶ᠋ᠢᠨ ᠨᠢᠳᠦ ᠪᠡᠷ ᠬᠠᠷᠠᠵᠤ ᠦᠵᠡᠭᠡᠳ᠂ ᠶᠠᠭᠠᠷᠠᠨ ᠲᠤᠤᠯᠠ ᠶ᠋ᠢᠨ ᠵᠦᠭ ᠴᠢᠭᠯᠡᠵᠦ ᠭᠡᠨᠡ᠃ ᠲᠡᠨᠳᠡ ᠤᠰᠤ ᠶᠡᠬᠡ ᠭᠦᠨᠵᠡᠭᠡᠢ ᠡᠷᠭᠢᠭᠦᠯᠭᠡᠲᠡᠢ ᠭᠡᠵᠦ ᠬᠡᠯᠡᠯᠴᠡᠳᠡᠭ ᠭᠠᠵᠠᠷ ᠪᠠᠢᠵᠤ᠂ ᠣᠳᠣ ᠲᠡᠷᠡ ᠭᠠᠵᠠᠷ ᠢ᠋ ᠤᠮᠠᠬᠤᠮ ᠭᠡᠳᠡᠭ᠃ ᠥᠨᠥᠬᠢ ᠯᠠᠮᠠ ᠶᠠᠭ ᠲᠡᠷᠡ ᠤᠷᠤᠭᠤ ᠯᠠ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠢᠯᠤᠭᠤᠬᠠᠨ ᠶᠠᠪᠤᠭᠠᠳ ᠥᠭᠴᠦ ᠭᠡᠨᠡ᠃ ᠠᠪᠤ ᠭᠠᠢᠬᠠᠵᠤ ᠳᠠ᠂ ᠬᠠᠷᠠ ᠦᠷ ᠢ᠋ᠶ᠋ᠡᠷ ᠲᠡᠷᠡ ᠤᠷᠤᠭᠤ ᠴᠢᠭᠯᠡᠳᠡᠭ ᠶᠠᠮᠠᠷ ᠯᠠᠮᠠ ᠪᠢᠯᠡ ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠭᠰᠠᠭᠠᠷ ᠣᠷᠳᠣᠨ ᠤ᠋ ᠣᠢᠷᠠ ᠣᠴᠢᠭᠠᠳ᠂ ᠬᠠᠷᠠᠴᠤ ᠬᠥᠮᠦᠨ ᠦ᠌ ᠮᠣᠷᠢ ᠠ᠋ᠴᠠ ᠪᠠᠭᠤᠳᠠᠭ ᠭᠠᠵᠠᠷ ᠬᠦᠷᠦᠭᠡᠳ ᠮᠣᠷᠢ ᠪᠠᠨ ᠬᠠᠨᠲᠠᠢᠷᠠᠨ ᠲᠤᠱᠠᠵᠤ ᠬᠠᠭᠠᠯᠭᠠᠨ ᠳ᠋ᠤ᠌ ᠳᠥᠭᠥᠲᠡᠯᠡ᠂ ᠶᠡᠷᠦ ᠬᠥᠮᠦᠨ ᠠᠮᠢᠲᠠᠨ ᠪᠣᠰᠤᠭᠰᠠᠨ ᠴᠢᠮᠡᠭᠡ ᠰᠢᠨᠵᠢ ᠠᠯᠠᠭᠠ᠂ ᠬᠠᠭᠠᠯᠭᠠ ᠶ᠋ᠢᠨ ᠮᠠᠨᠠᠭᠠᠴᠢ ᠦᠵᠡᠭᠳᠡᠬᠦ ᠦᠭᠡᠢ ᠰᠢᠭ᠂ ᠲᠡᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂ ᠨᠣᠶᠠᠳ ᠢᠵᠠᠭᠤᠷᠲᠠᠨ ᠬᠦᠷᠲᠡᠯᠡ ᠪᠣᠭᠳᠠ ᠳ᠋ᠤ᠌ ᠪᠠᠷᠠᠭᠠᠯᠬᠠᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠡᠮᠢᠶᠡᠨ ᠣᠷᠣᠳᠠᠭ ᠲᠡᠷᠡ ᠬᠠᠭᠠᠯᠭᠠ ᠠᠶᠤᠮᠰᠢᠭ ᠦᠭᠡᠢ ᠲᠣᠭᠰᠢᠬᠤ ᠵᠢᠷᠦᠬᠡ ᠬᠦᠷᠦᠭᠰᠡᠨ ᠦᠭᠡᠢ᠃ ᠬᠥᠮᠦᠨ ᠭᠠᠷᠬᠤ ᠶ᠋ᠢ ᠬᠦᠯᠢᠶᠡᠶᠡ ᠭᠡᠵᠦ ᠪᠣᠳᠣᠵᠤ ᠪᠠᠢᠲᠠᠯᠠ ᠨᠢ ᠥᠨᠥᠬᠢ ᠡᠮᠦᠨᠡ ᠪᠡᠨ ᠶᠠᠭᠤᠮᠠ ᠳᠦᠭᠦᠷᠦᠭᠰᠡᠨ ᠯᠠᠮᠠ ᠲᠤᠤᠯᠠ ᠶ᠋ᠢᠨ ᠡᠷᠭᠢ ᠬᠦᠷᠦᠭᠡᠳ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠭᠠᠳ᠂ ᠤᠷᠲᠤ ᠪᠠᠨ ᠳᠦᠭᠦᠷᠦᠭᠰᠡᠨ ᠶᠠᠭᠤᠮᠠ ᠶ᠋ᠢ ᠭᠠᠨᠵᠤᠭᠠ ᠪᠠᠷ ᠢ᠋ᠶ᠋ᠠᠨ ᠳᠠᠷᠤᠭᠤᠯᠵᠤ ᠵᠠᠰᠠᠭᠠᠳ᠂ ᠭᠤᠲᠤᠯ ᠢ᠋ᠶ᠋ᠠᠨ ᠲᠠᠢᠯᠵᠤ ᠬᠣᠷᠮᠣᠢ ᠪᠠᠨ ᠳᠡᠭᠡᠭᠰᠢ ᠨᠢ ᠲᠠᠲᠠᠭᠠᠳ᠂ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ ᠤᠰᠤ ᠤᠷᠤᠭᠤ ᠣᠷᠣᠪᠠ ᠭᠡᠨᠡ᠃ ᠡᠨᠡ ᠯᠠᠮᠠ᠂ ᠡᠷᠭᠢᠭᠦᠯᠭᠡ ᠤᠷᠤᠭᠤ ᠴᠢᠭᠯᠡᠵᠦ ᠣᠷᠣᠳᠠᠭ ᠶᠠᠮᠠᠷ ᠵᠢᠭᠲᠡᠢ ᠶᠦᠮ ᠪᠣᠢ? ᠭᠡᠵᠦ ᠭᠠᠢᠬᠠᠭᠠᠳ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ ᠂ ᠥᠨᠥᠬᠢ ᠯᠠᠮᠠ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠴᠣᠭᠭᠢᠭᠠᠳ ᠣᠴᠢᠵᠤ ᠭᠡᠨᠡ᠃ ᠲᠡᠭᠡᠲᠡᠯᠡ᠂ ᠲᠡᠷᠡ ᠯᠠᠮᠠ ᠭᠣᠣᠯ ᠤ᠋ᠨ ᠳᠤᠮᠳᠠ ᠨᠢ ᠰᠢᠬᠠᠭᠤ ᠬᠦᠷᠦᠭᠡᠳ᠂ ᠤᠰᠤ᠂ ᠮᠣᠷᠢᠨ ᠤ᠋ ᠲᠠᠮᠠᠭᠠ ᠬᠦᠷᠴᠦ ᠭᠡᠨᠡ᠃ ᠲᠡᠭᠡᠬᠦ ᠳ᠋ᠦ᠍᠂ ᠮᠣᠷᠢ ᠪᠠᠨ ᠤᠷᠤᠰᠬᠠᠯ ᠳᠠᠭᠠᠤ ᠶᠠᠪᠤᠭᠤᠯᠤᠭᠠᠳ ᠭᠠᠨᠵᠤᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠰᠤᠷ ᠢ᠋ᠶ᠋ᠠᠷ ᠤᠷᠲᠤ ᠪᠠᠨ ᠳᠠᠷᠤᠭᠤᠯᠤᠭᠰᠠᠨ᠂ ᠥᠨᠥᠬᠢ ᠳᠦᠭᠦᠷᠴᠦ ᠶᠠᠪᠤᠭᠰᠠᠨ ᠶᠠᠭᠤᠮᠠ ᠪᠠᠨ ᠤᠰᠤ ᠤᠷᠤᠭᠤ ᠲᠦᠯᠬᠢᠴᠢᠬᠡᠭᠡᠳ᠂ ᠰᠡᠩᠳᠡᠨ ᠮᠡᠩᠳᠡᠨ ᠡᠷᠭᠢ ᠤᠷᠤᠭᠤ ᠵᠢᠳᠬᠦᠭᠦᠯᠵᠦ ᠭᠡᠨᠡ᠃ ᠥᠨᠥᠬᠢ ᠳᠦᠭᠦᠷᠴᠦ ᠶᠠᠪᠤᠭᠰᠠᠨ ᠶᠠᠭᠤᠮᠠ ᠨᠢ ᠨᠡᠯᠢᠶᠡᠳ ᠬᠦᠨᠳᠦ ᠶᠠᠭᠤᠮᠠ ᠪᠣᠯᠤᠯᠲᠠᠢ᠂ ᠤᠰᠤ ᠤᠷᠤᠭᠤ ᠴᠦᠯᠭᠢᠭᠡᠳ ᠣᠷᠣᠴᠢᠬᠠᠵᠤ ᠭᠡᠨᠡ᠃ ᠠᠪᠤ᠂ ᠲᠡᠷᠡ ᠯᠠᠮᠠ ᠶ᠋ᠢᠨ ᠤᠷᠲᠤ ᠠ᠋ᠴᠠ ᠲᠣᠰᠣᠨ ᠣᠴᠢᠵᠤ ᠦᠵᠡᠪᠡᠯ᠂ ᠤᠷᠢᠳᠤ ᠬᠣᠰᠢᠭᠤ ᠬᠡᠢᠳ ᠲᠦ᠍ ᠵᠢᠰᠦ ᠦᠵᠡᠭᠰᠡᠨ ᠯᠠᠮᠠ ᠪᠠᠢᠵᠠᠢ᠃ ᠴᠢᠷᠠᠢ ᠵᠢᠰᠦ ᠨᠢ ᠲᠤᠩ ᠰᠠᠨᠳᠤᠷᠴᠢᠬᠠᠭᠰᠠᠨ᠂ ᠤᠷᠤᠭᠤᠯ ᠠᠮᠠ ᠨᠢ ᠴᠡᠴᠡᠷᠡᠵᠦ ᠲᠠᠲᠠᠯᠳᠤᠭᠰᠠᠨ ᠲᠡᠢᠮᠦ ᠠᠮᠢᠲᠠᠨ ᠡᠷᠭᠢ ᠥᠭᠡᠳᠡ ᠭᠠᠷᠴᠤ ᠢᠷᠡᠭᠡᠳ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ᠂ ᠥᠨᠥᠬᠢ ᠲᠠᠢᠯᠤᠭᠠᠳ ᠣᠷᠬᠢᠭᠰᠠᠨ ᠭᠤᠲᠤᠯ ᠢ᠋ᠶ᠋ᠠᠨ ᠡᠮᠦᠰᠬᠦ ᠭᠡᠳ ᠭᠠᠷ ᠬᠥᠯ ᠨᠢ ᠴᠡᠴᠡᠷᠡᠵᠦ᠂ ᠲᠦᠷᠡᠢ ᠪᠡᠨ ᠣᠯᠳᠠᠭ ᠦᠭᠡᠢ ᠭᠡᠨᠡ᠃ ᠠᠪᠤ ᠶ᠋ᠢ ᠭᠡᠨᠡᠳᠲᠡ ᠬᠠᠷᠠᠴᠢᠬᠠᠭᠠᠳ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠠᠯᠠᠯᠵᠤ ᠳᠠᠭᠤᠳᠠᠭᠰᠠᠨ ᠰᠢᠭ᠋ ᠪᠣᠯᠵᠤ ᠭᠡᠨᠡ᠃ ᠲᠡᠭᠡᠬᠦ ᠳ᠋ᠦ᠍ᠨᠢ ᠠᠪᠤ ᠳᠡᠷᠭᠡᠳᠡ ᠨᠢ ᠣᠴᠢᠬᠤ ᠳ᠋ᠤ᠌ ᠥᠨᠥᠬᠢ ᠯᠠᠮᠠ᠂ ᠠᠪᠤ ᠳ᠋ᠤ᠌ ᠰᠢᠪᠡᠨᠡᠵᠦ᠂
— ᠴᠢ ᠠᠮᠢᠳᠤ ᠶᠠᠪᠤᠶᠠ ᠭᠡᠪᠡᠯ᠂ ᠰᠠᠢ᠍ᠢ ᠶ᠋ᠢᠨ ᠢ᠋ᠶ᠋ᠡᠨ ᠦᠵᠡᠭᠰᠡᠨ ᠬᠠᠷᠠᠭᠰᠠᠨ ᠢ᠋ ᠴᠢᠬᠢᠲᠦ ᠠᠮᠢᠲᠠᠨ ᠳ᠋ᠤ᠌ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ ᠰᠢᠦ᠃ ᠬᠥᠮᠦᠨ ᠦ᠌ ᠠᠮᠢᠨ ᠤ᠋ ᠬᠡᠷᠡᠭ ᠭᠠᠷᠤᠭᠰᠠᠨ᠂ ᠮᠡᠳᠡᠪᠡ ᠤᠤ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂ ᠠᠪᠤ ᠶᠡᠬᠡᠯᠡ(ᠶᠡᠬᠡ ᠯᠡ) ᠵᠢᠪᠡᠭᠦᠷᠬᠡᠨ ᠰᠣᠴᠢᠵᠤ᠂ ᠠᠮᠢᠳᠤ ᠪᠤᠷᠬᠠᠨ ᠪᠣᠭᠳᠠ ᠭᠡᠭᠡᠨ ᠦ᠌ ᠠᠷᠢᠯᠤᠭᠰᠠᠨ ᠲᠤᠩᠭᠠᠯᠠᠭ ᠣᠷᠣᠨ ᠯᠠᠪᠷᠠᠩ ᠳ᠋ᠤ᠌ ᠬᠥᠮᠦᠨ ᠦ᠌ ᠠᠮᠢᠨ ᠤ᠋ ᠬᠡᠷᠡᠭ ᠭᠡᠵᠦ ᠶᠠᠭᠤ ᠪᠠᠨ ᠬᠡᠯᠡᠭᠡᠳ ᠪᠠᠢᠨᠠ ᠳᠠ? ᠭᠡᠵᠦ ᠵᠢᠭ ᠪᠣᠯᠵᠠᠢ᠃ ᠲᠡᠭᠡᠬᠦ ᠳ᠋ᠦ᠍ ᠲᠡᠷᠡ ᠯᠠᠮᠠ᠂ ᠳᠡᠷᠭᠡᠳᠡ ᠶ᠋ᠢᠨ ᠬᠠᠭᠠᠯᠭᠠᠴᠢ ᠪᠠᠢᠵᠤ ᠯᠠ ᠳᠠ᠃ ᠠᠪᠤ ᠳ᠋ᠤ᠌ ᠤᠴᠢᠷ ᠤᠳᠬᠠ ᠶ᠋ᠢ ᠨᠢ ᠬᠡᠯᠡᠵᠦ ᠥᠭᠬᠦ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠥᠴᠥᠭᠡᠳᠦᠷ ᠳᠡᠭᠡᠷᠡᠬᠢ ᠶ᠋ᠢᠨ ᠭᠡᠭᠡᠨ ᠮᠠᠢᠮᠠᠢ ᠬᠣᠲᠠ ᠠ᠋ᠴᠠ ᠬᠥᠯᠴᠥᠭᠦᠦ ᠰᠢᠭ ᠵᠠᠯᠠᠷᠠᠵᠤ ᠶᠠᠪᠤᠭᠠᠳ᠂ ᠣᠷᠳᠣᠨ ᠤ᠋ ᠬᠠᠭᠠᠯᠭᠠᠨ ᠲᠤᠰᠢᠶᠠ ᠰᠡᠴᠡᠨ ᠬᠠᠨ ᠠᠢᠮᠠᠭ ᠤ᠋ᠨ ᠨᠢᠭᠡ ᠡᠬᠡᠨᠡᠷ᠂ ᠪᠣᠭᠳᠠ ᠳ᠋ᠤ᠌ ᠮᠥᠷᠭᠥᠬᠦ ᠭᠡᠵᠦ ᠵᠢᠭᠠᠯ ᠥᠬᠢᠨ ᠢ᠋ᠶ᠋ᠡᠨ ᠳᠠᠭᠠᠭᠤᠯᠵᠤ ᠢᠷᠡᠭᠰᠡᠨ ᠲᠡᠢ ᠶᠠᠭ ᠳᠠᠭᠠᠷᠢᠯᠳᠤᠳᠠᠭ ᠪᠠᠢᠵᠠᠢ᠃ ᠲᠡᠷᠡ ᠥᠬᠢᠨ ᠨᠢ ᠨᠡᠷᠡᠲᠦ ᠶᠢᠷᠲᠢᠨᠴᠦ ᠳ᠋ᠦ᠍ ᠬᠣᠣᠰ ᠦᠭᠡᠢ ᠰᠠᠢᠬᠠᠨ ᠬᠥᠮᠦᠨ ᠪᠠᠢᠵᠤ᠂ ᠪᠣᠭᠳᠠ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠲᠤᠩ ᠴᠤ᠌ ᠲᠠᠭᠠᠲᠠᠢ ᠦᠵᠡᠭᠳᠡᠵᠦ ᠯᠡ ᠳᠡ᠃ ᠲᠡᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠲᠡᠷᠡ ᠳᠣᠣᠷᠠ ᠪᠠᠨ ᠮᠣᠳᠣᠷ ᠤ᠋ᠨ ᠢ᠋ᠶ᠋ᠠᠨ ᠠᠳᠢᠰ ᠲᠠᠯᠪᠢᠭᠠᠳ᠂ ᠥᠬᠢᠨ ᠢ᠋ ᠨᠢ ᠣᠷᠳᠣᠨ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠦᠯᠡᠳᠡᠭᠡᠵᠦ᠂ ᠨᠣᠮ ᠬᠦᠷᠲᠡᠭᠡᠨᠡ ᠭᠡᠵᠦ ᠭᠡᠨᠡ᠃ ᠡᠬᠡ ᠨᠢ ᠮᠠᠩᠨᠠᠢ ᠪᠠᠨ ᠬᠠᠭᠠᠷᠠᠲᠠᠯᠠ ᠪᠠᠶᠠᠷᠯᠠᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠪᠣᠭᠳᠠ ᠭᠡᠭᠡᠨ ᠦ᠌ ᠮᠣᠳᠣᠷ ᠤ᠋ᠨ ᠠᠳᠢᠰ ᠬᠦᠷᠲᠡᠭᠡᠳ᠂ ᠥᠬᠢᠨ ᠢ᠋ᠶ᠋ᠡᠨ ᠨᠣᠮ ᠠᠪᠢᠰᠢᠭ ᠬᠦᠷᠲᠡᠬᠦ ᠨᠢ ᠭᠡᠵᠦ ᠰᠡᠳᠬᠢᠯ ᠨᠢ ᠬᠥᠭᠡᠷᠴᠦ ᠪᠠᠶᠠᠷᠯᠠᠨ ᠬᠢᠯᠠᠢᠵᠤ ᠯᠠ ᠳᠠ᠃ ᠲᠡᠭᠡᠲᠡᠯᠡ᠂ ᠥᠨᠥᠬᠢ ᠰᠣᠭᠲᠣᠭᠤ ᠪᠣᠭᠳᠠ᠂ ᠲᠡᠷᠡ ᠵᠢᠭᠠᠯ ᠥᠬᠢᠨ ᠢ᠋ ᠬᠦᠴᠦᠷᠬᠡᠭᠡᠳ᠂ ᠨᠠᠰᠤ ᠪᠡᠶᠡ ᠭᠦᠢᠴᠡᠭᠡ ᠦᠭᠡᠢ ᠬᠥᠭᠡᠷᠦᠬᠦᠢ ᠲᠡᠷᠡ ᠵᠢᠭᠠᠯ ᠢ᠋ ᠭᠡᠮᠲᠦᠭᠡᠴᠢᠬᠡᠵᠡᠢ᠂ ᠴᠢᠰᠤ ᠨᠢ ᠲᠣᠭᠲᠠᠳᠠᠭ ᠦᠭᠡᠢ ᠰᠠᠨᠳᠤᠷᠭᠠᠵᠤ᠂ ᠳᠡᠷᠭᠡᠳᠡ ᠶ᠋ᠢᠨ ᠡᠮᠴᠢ ᠣᠲᠠᠴᠢ ᠨᠠᠷ ᠲᠣᠭᠲᠠᠭᠠᠵᠤ ᠶᠠᠳᠠᠵᠤ ᠠᠷᠭᠠ ᠪᠠᠨ ᠪᠠᠷᠠᠵᠤ ᠭᠡᠨᠡ ᠳᠡ᠃
ᠠᠪᠤ ᠳ᠋ᠤ᠌ ᠲᠡᠷᠡ ᠶᠠᠪᠤᠳᠠᠯ ᠢ᠋ ᠶᠠᠷᠢᠭᠰᠠᠨ ᠥᠨᠥᠬᠢ ᠯᠠᠮᠠ ᠬᠡᠯᠡᠬᠦ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠮᠢᠨᠦ ᠪᠡᠶᠡ᠂ ᠳᠡᠭᠡᠷᠡᠬᠢ ᠶ᠋ᠢᠨ ᠳᠡᠷᠭᠡᠳᠡ ᠪᠠᠢᠵᠤ᠂ ᠡᠯᠳᠡᠪ ᠦ᠋ᠨ ᠶᠠᠭᠤᠮᠠ ᠦᠵᠡᠵᠦ ᠳᠠᠰᠤᠭᠰᠠᠨ ᠪᠣᠯᠪᠠᠴᠤ᠂ ᠲᠡᠷᠡ ᠬᠥᠭᠡᠷᠦᠬᠦᠢ ᠵᠢᠭᠠᠯ ᠤ᠋ᠨ ᠲᠠᠮᠤ ᠪᠠᠨ ᠡᠳ᠋ᠯᠡᠨ ᠲᠠᠷᠴᠢᠯᠠᠵᠤ᠂ ᠡᠵᠢ ᠶ᠋ᠢ ᠪᠡᠨ ᠳᠠᠭᠤᠳᠠᠨ ᠤᠬᠢᠯᠠᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ ᠡᠯᠢᠭᠡ ᠡᠮᠲᠡᠷᠡᠵᠦ ᠲᠤᠩ ᠴᠤ᠌ ᠬᠡᠴᠡᠭᠦᠦ ᠪᠠᠢᠯᠠ᠃ ᠪᠣᠭᠳᠠ ᠬᠦᠷᠲᠡᠯᠡ᠂ ᠲᠡᠷᠡ ᠵᠢᠭᠠᠯ ᠤ᠋ᠨ ᠵᠣᠪᠠᠵᠤ ᠪᠠᠢᠭᠠ ᠶ᠋ᠢ ᠬᠠᠷᠠᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠠᠷᠢᠬᠢᠨ ᠤ᠋ ᠬᠢᠨᠢ ᠬᠥᠯᠴᠥᠭᠦᠦ ᠭᠠᠷᠴᠤ᠂ ᠶᠣᠨᠵᠣᠩ ᠪᠠᠭᠰᠢ ᠶ᠋ᠢ ᠳᠠᠭᠤᠳᠠᠵᠤ ᠠᠷᠭᠠᠯᠠᠭᠤᠯᠤᠶᠠ᠃ ᠠᠷᠭᠠ ᠤᠬᠠᠭᠠᠨ ᠣᠯᠤᠶᠠ ᠭᠡᠵᠦ ᠬᠠᠭᠠᠯᠭᠠᠴᠢ ᠪᠠᠨ ᠳᠠᠪᠬᠢᠭᠤᠯᠵᠤ ᠭᠡᠨᠡ᠃ ᠶᠣᠨᠵᠣᠩ ᠬᠠᠮᠪᠤ ᠬᠦᠷᠴᠦ ᠢᠷᠡᠭᠡᠳ᠂ ᠲᠡᠷᠡ ᠵᠢᠭᠠᠯ ᠥᠬᠢᠨ ᠢ᠋ ᠰᠢᠭᠤᠳᠠᠢ ᠳ᠋ᠤ᠌ ᠬᠢᠵᠦ᠂ ᠴᠢᠯᠠᠭᠤ ᠴᠢᠬᠢᠯᠴᠡᠭᠡᠳ ᠤᠰᠤ ᠤᠷᠤᠭᠤ ᠬᠠᠶᠠᠵᠤ᠂ ᠰᠡᠭ ᠰᠡᠪᠡᠰᠦ ᠦᠭᠡᠢ ᠠᠯᠠᠭᠠ ᠪᠣᠯᠭᠠ ᠭᠡᠵᠦ ᠠᠷᠭᠠ ᠵᠢᠭᠠᠵᠠᠢ᠃ ᠪᠢ ᠥᠴᠦᠬᠡᠨ ᠪᠠᠭᠠ ᠬᠥᠮᠦᠨ᠂ ᠶᠠᠭᠤ ᠯᠠ ᠬᠢ ᠭᠡᠪᠡᠯ᠂ ᠵᠠᠷᠯᠢᠭ ᠲᠤᠰᠢᠶᠠᠯ ᠳᠠᠭᠠᠵᠤ ᠭᠦᠢᠴᠡᠳᠬᠡᠬᠦ ᠡᠴᠡ ᠥᠭᠡᠷᠡ ᠨᠠᠳᠠᠳᠤ(ᠨᠠᠳᠠ ᠳ᠋ᠤ᠌) ᠡᠷᠬᠡ ᠮᠠᠲᠠᠯ ᠪᠠᠢᠬᠤ ᠦᠭᠡᠢ᠃ ᠲᠡᠭᠡᠭᠡᠳ᠂ ᠲᠡᠷᠡ ᠬᠥᠭᠡᠷᠦᠬᠦᠢ ᠵᠢᠭᠠᠯ ᠥᠬᠢᠨ ᠢ᠋ ᠠᠮᠢᠳᠤ ᠪᠠᠷ ᠨᠢ ᠤᠰᠤᠨ ᠳ᠋ᠤ᠌ ᠬᠠᠶᠠᠵᠤ ᠠᠯᠠᠪᠠ ᠰᠢᠦ᠃ ᠨᠠᠮᠠᠶ᠋ᠢ(ᠨᠠᠮᠠ ᠶ᠋ᠢ) ᠤᠰᠤ ᠤᠷᠤᠭᠤ ᠲᠡᠷᠡ ᠰᠢᠭᠤᠳᠠᠢ ᠶ᠋ᠢ ᠲᠦᠯᠬᠢᠨ ᠬᠠᠶᠠᠬᠤ ᠳ᠋ᠤ᠌᠂ ᠰᠢᠭᠤᠳᠠᠢ ᠳᠣᠲᠣᠷᠠ ᠪᠠᠨ ᠶᠣᠣᠯᠠᠵᠤ ᠪᠢᠯᠡ ᠭᠡᠵᠦ ᠬᠡᠯᠡᠭᠡᠳ ᠲᠡᠷᠡ ᠯᠠᠮᠠ ᠪᠦᠬᠦ ᠪᠡᠶᠡ ᠨᠢ ᠴᠡᠴᠡᠷᠡᠨ ᠳᠠᠭᠵᠢᠵᠤ᠂ ᠠᠮᠢᠳᠤ ᠬᠥᠮᠦᠨ ᠢ᠋ ᠤᠰᠤᠨ ᠳ᠋ᠤ᠌ ᠬᠠᠶᠠᠬᠤ᠂ ᠪᠠᠰᠠ ᠯᠤᠤᠰ ᠰᠠᠪᠳᠠᠭ ᠢ᠋ ᠡᠮᠡ ᠬᠥᠮᠦᠨ ᠦ᠌ ᠴᠢᠰᠤ ᠪᠠᠷ ᠪᠤᠵᠠᠷᠯᠠᠬᠤ ᠡᠢᠮᠦ ᠦᠢᠯᠡ ᠲᠡᠢ ᠯᠠᠢᠲᠠᠢ ᠠᠮᠢᠲᠠᠨ ᠳᠠ ᠪᠢ᠃ ᠯᠤᠤᠰ ᠰᠠᠪᠳᠠᠭ ᠢ᠋ ᠬᠢᠯᠢᠩᠯᠡᠬᠦ ᠡᠴᠡ ᠠᠶᠤᠳᠠᠭ ᠪᠣᠯᠪᠠᠴᠤ᠂ ᠪᠣᠭᠳᠠ ᠶ᠋ᠢᠨ ᠬᠠᠲᠠᠭᠤ ᠵᠠᠷᠯᠢᠭ ᠢ᠋ ᠪᠢ ᠶᠠᠭᠠᠬᠢᠵᠤ ᠳᠠᠪᠠᠬᠤ ᠪᠢᠯᠡ᠃ ᠠᠷᠭᠠ ᠦᠭᠡᠢ᠂ ᠠᠮᠢᠲᠠᠨ ᠤ᠋ ᠠᠮᠢ ᠲᠠᠰᠤᠯᠤᠯᠠ᠃ ᠮᠠᠨ ᠤ᠋ ᠨᠣᠭᠣᠭᠠᠨ ᠣᠷᠳᠣᠨ ᠳ᠋ᠤ᠌ ᠡᠢᠮᠦᠷᠬᠦᠦ ᠬᠡᠷᠡᠭ ᠭᠠᠷᠳᠠᠭ ᠶᠤᠮ ᠰᠢᠦ᠃ ᠪᠢ ᠦᠵᠡᠭᠰᠡᠨ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠨ ᠶᠡᠷᠦ ᠬᠥᠮᠦᠨ ᠠᠮᠢᠲᠠᠨ ᠳ᠋ᠤ᠌ ᠬᠡᠯᠡᠳᠡᠭ ᠦᠭᠡᠢ ᠶᠦᠮ ᠰᠢᠦ! ᠤᠷᠭᠠ ᠠᠯᠳᠠᠪᠠᠯ ᠪᠠᠷᠢᠵᠤ ᠪᠣᠯᠳᠠᠭ᠂ ᠦᠭᠡ ᠠᠯᠳᠠᠪᠠᠯ ᠪᠠᠷᠢᠵᠤ ᠪᠣᠯᠳᠠᠭ ᠦᠭᠡᠢ ᠭᠡᠳᠡᠭ ᠪᠢᠰᠢ ᠪᠢᠯᠡ ᠤᠤ? ᠣᠷᠳᠣᠨ ᠤ᠋ ᠬᠢᠨ ᠮᠡᠳᠡᠪᠡᠯ᠂ ᠪᠢ ᠴᠦ᠍ ᠰᠠᠢᠨ ᠢ᠋ᠶ᠋ᠠᠨ ᠦᠵᠡᠬᠦ ᠦᠭᠡᠢ᠂ ᠴᠢ ᠴᠦ᠍ ᠪᠥᠨᠲᠥᠭᠡᠷ ᠡᠴᠡ ᠪᠡᠨ ᠰᠠᠯᠤᠨᠠ ᠭᠡᠵᠦ ᠮᠡᠳᠡᠭᠡᠷᠡᠢ ᠭᠡᠵᠦ ᠭᠡᠨᠡ᠃
ᠣᠳᠣ ᠮᠦᠽᠧᠢ ᠪᠠᠢᠳᠠᠭ ᠨᠣᠭᠣᠭᠠᠨ ᠣᠷᠳᠣᠨ ᠳ᠋ᠤ᠌ ᠡᠢᠮᠦᠷᠬᠦ ᠬᠡᠷᠡᠭ ᠭᠠᠷᠴᠤ ᠪᠠᠢᠭᠰᠠᠨ ᠭᠠᠵᠠᠷ ᠳᠠ᠃ ᠪᠣᠭᠳᠠ ᠭᠡᠭᠡᠨ ᠲᠡᠭᠦᠨ ᠡᠴᠡ ᠬᠣᠢᠰᠢ᠂ ᠬᠦᠷᠢᠶᠡ ᠶ᠋ᠢᠨ ᠯᠠᠮᠠ ᠨᠠᠷ ᠢ᠋ ᠵᠢᠯ ᠪᠦᠷᠢ ᠲᠤᠤᠯᠠ ᠶ᠋ᠢᠨ ᠤᠰᠤ ᠷᠠᠰᠢᠶᠠᠯᠠᠵᠤ᠂ ᠲᠦᠢ ᠡᠷᠭᠦᠵᠦ ᠪᠠᠢ ᠭᠡᠵᠦ ᠯᠦᠨᠳᠦᠩᠨᠡᠵᠤ᠂ ᠲᠤᠤᠯᠠ ᠶ᠋ᠢᠨ ᠯᠤᠤᠰ ᠰᠠᠪᠳᠠᠭ ᠢ᠋ ᠰᠠᠨᠳᠤᠷᠤᠭᠰᠠᠨ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠳᠠᠬᠢᠭᠤᠯᠬᠤ ᠪᠣᠯᠵᠤ᠂ ᠥᠨᠥᠬᠢ ᠬᠥᠭᠡᠷᠦᠬᠦᠢ ᠵᠢᠭᠠᠯ ᠥᠬᠢᠨ ᠢ᠋ ᠤᠰᠤᠨ ᠳ᠋ᠤ᠌ ᠠᠮᠢᠳᠤ ᠪᠠᠷ ᠨᠢ ᠬᠠᠶᠠᠭᠤᠯᠤᠭᠰᠠᠨ ᠭᠠᠵᠠᠷ ᠤ᠋ᠨ ᠢ᠋ᠶ᠋ᠠᠨ ᠲᠤᠰᠢᠶᠠ ᠠᠭᠤᠯᠠᠨ ᠳ᠋ᠤ᠌ ᠤᠮᠠᠬᠤᠮ ᠭᠡᠵᠦ ᠲᠠᠷᠨᠢ ᠶ᠋ᠢᠨ ᠦᠰᠦᠭ ᠴᠢᠯᠠᠭᠤ ᠪᠠᠷ ᠦᠷᠦᠭᠦᠯᠵᠦ᠂ ᠲᠡᠭᠦᠨ ᠡᠴᠡ ᠬᠣᠢᠰᠢ ᠲᠡᠷᠡ ᠭᠠᠵᠠᠷ ᠤᠮᠠᠬᠤᠮ ᠭᠡᠵᠦ ᠨᠡᠷᠡ ᠲᠡᠢ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠴᠣᠬᠣᠮ ᠶᠠᠭᠠᠬᠢᠭᠠᠳ ᠲᠡᠭᠡᠳᠡᠭ ᠪᠣᠯᠤᠭᠰᠠᠨ ᠢ᠋ ᠨᠢ ᠮᠡᠳᠡᠳᠡᠭ ᠬᠥᠮᠦᠨ ᠲᠤᠩ ᠴᠥᠭᠡᠨ ᠳᠠᠭ*᠃ ᠬᠡᠨᠲᠡᠢ ᠳ᠋ᠦ᠍ ᠣᠳᠣ ᠴᠤ᠌ ᠭᠡᠰᠡᠨ᠂ ᠪᠣᠭᠳᠠ ᠳ᠋ᠤ᠌ ᠠᠮᠢ ᠪᠠᠨ ᠬᠣᠣᠷᠯᠠᠭᠤᠯᠤᠭᠰᠠᠨ ᠲᠡᠷᠡ ᠬᠥᠭᠡᠷᠦᠬᠦᠢ ᠥᠬᠢᠨ ᠦ᠌ ᠬᠠᠮᠢᠶᠠᠲᠠᠨ ᠲᠥᠷᠥᠯ ᠰᠠᠳᠤᠨ ᠤ᠋ ᠤᠯᠤᠰ ᠵᠢᠷᠭᠠᠯᠳᠤᠬᠠᠨ ᠰᠤᠮᠤᠨ ᠳ᠋ᠤ᠌ ᠪᠣᠢ ᠭᠡᠳᠡᠭ᠃
ᠠᠮᠢᠳᠤ ᠪᠤᠷᠬᠠᠨ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠨᠠᠢ᠍ᠮᠠᠳᠤᠭᠠᠷ ᠵᠢᠪᠽᠥ᠋ᠨᠳᠠᠮᠪᠠ ᠬᠤᠲᠤᠭᠲᠤ᠂ ᠲᠡᠭᠦᠨ ᠦ᠌ ᠪᠠᠭᠰᠢ ᠶᠣᠨᠵᠣᠩ ᠬᠠᠮᠪᠤ ᠬᠣᠶᠠᠷ ᠲᠤ᠌ ᠰᠦᠰᠦᠭ ᠠᠯᠳᠠᠷᠠᠭᠰᠠᠨ ᠲᠡᠷᠡ ᠤᠴᠢᠷ ᠢ᠋ᠶ᠋ᠠᠨ ᠠᠪᠤ ᠨᠠᠳᠠᠳᠤ(ᠨᠠᠳᠠ ᠳ᠋ᠤ᠌) ᠶᠠᠷᠢᠭᠠᠳ᠂ ᠡᠨᠡ ᠳᠡᠯᠡᠬᠡᠢ ᠳᠡᠭᠡᠷᠡ ᠪᠣᠭᠳᠠ ᠬᠤᠪᠢᠯᠭᠠᠨ ᠭᠡᠵᠦ ᠬᠤᠳᠠᠯ ᠶᠤᠮ ᠰᠢᠦ᠃ ᠠᠮᠢᠳᠤ ᠪᠤᠷᠬᠠᠨ ᠭᠡᠵᠦ ᠠᠮᠢᠲᠠᠨ ᠤ᠋ ᠮᠤᠩᠬᠠᠭ ᠰᠡᠳᠬᠢᠯ ᠦ᠋ᠨ ᠡᠭᠦᠳᠡᠨ ᠡᠴᠡ ᠪᠢᠰᠢᠷᠡᠨ ᠳᠠᠬᠢᠳᠠᠭ ᠯᠠᠮᠠ ᠪᠠᠭᠰᠢ᠂ ᠬᠤᠲᠤᠭᠲᠤ ᠬᠤᠪᠢᠯᠭᠠᠨ ᠨᠢ ᠡᠢᠮᠦ ᠪᠤᠵᠠᠷ ᠬᠡᠷᠡᠭ ᠡᠳᠦᠭᠦᠯᠵᠦ ᠪᠠᠢᠬᠤ ᠳ᠋ᠤ᠌᠂ ᠳᠡᠭᠡᠷᠡ ᠲᠩᠷᠢ ᠨᠠᠷᠠ ᠪᠠᠢᠳᠠᠭ ᠭᠡᠵᠦ ᠭᠣᠷᠢᠳᠠᠭᠰᠠᠨ ᠬᠡᠷᠡᠭ ᠪᠦᠷ ᠴᠦ᠍ ᠠᠯᠠᠭᠠ ᠭᠡᠵᠦ ᠠᠪᠤ ᠨᠠᠳᠠᠳᠤ(ᠨᠠᠳᠠ ᠳ᠋ᠤ᠌) ᠵᠠᠬᠢᠵᠤ ᠪᠢᠯᠡ᠃ ᠲᠡᠭᠡᠭᠡᠨ ᠪᠢ ᠵᠠᠯᠠᠭᠤ ᠠ᠋ᠴᠠ ᠪᠠᠨ ᠪᠤᠷᠬᠠᠨ᠂ ᠪᠣᠭᠳᠠ ᠭᠡᠬᠦ ᠪᠡᠨ ᠪᠠᠢᠭᠰᠠᠨ ᠬᠥᠮᠦᠨ᠃ ᠠᠮᠢᠲᠠᠨ ᠤ᠋ ᠵᠣᠪᠠᠯᠠᠩ ᠳᠠᠯᠢᠮᠳᠠᠭᠤᠯᠵᠤ᠂ ᠲᠦᠮᠡᠨ ᠢ᠋ ᠮᠡᠬᠡᠯᠡᠵᠦ ᠣᠯᠤᠭᠰᠠᠨ ᠡᠳ᠋ ᠠᠭᠤᠷᠠᠰᠤ ᠠᠳᠠᠯ ᠮᠠᠯ ᠢ᠋ ᠨᠢ ᠣᠯᠠᠨ ᠬᠤᠲᠤᠭᠲᠤ ᠬᠤᠪᠢᠯᠭᠠᠨ ᠠ᠋ᠴᠠ ᠬᠤᠷᠢᠶᠠᠵᠤ᠂ ᠡᠷᠬᠡ ᠶᠠᠩᠪᠠ ᠶ᠋ᠢ ᠨᠢ ᠬᠠᠰᠤᠵᠤ ᠪᠠᠢᠭᠠ ᠮᠠᠨᠠᠢ(ᠮᠠᠨ ᠤ᠋) ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠪᠣᠳᠣᠯᠭᠠ ᠲᠦᠮᠡᠨ ᠵᠦᠢᠲᠡᠢ ᠶᠦᠮ ᠰᠢᠦ ᠭᠡᠵᠦ ᠡᠪᠦᠭᠡᠨ ᠰᠢᠷᠠᠪ ᠤ᠋ᠨ ᠶᠠᠷᠢᠵᠤ ᠭᠦᠢᠴᠡᠬᠦ ᠳ᠋ᠦ᠍᠂ ᠲᠡᠷᠡ ᠰᠣᠨᠣᠰᠤᠭᠰᠠᠨ ᠦᠭᠡ ᠶᠠᠷᠢᠶᠠᠨ ᠳ᠋ᠤ᠌ ᠴᠡᠷᠡᠨ ᠶᠡᠬᠡ ᠭᠠᠢᠬᠠᠭᠰᠠᠨ ᠳ᠋ᠠᠭᠠᠨ ᠪᠣᠯᠵᠤ᠂ ᠨᠢᠭᠡ ᠰᠢᠷᠬᠡᠭ ᠳᠠᠭᠠᠨᠠ ᠰᠠᠨᠠᠮᠰᠠᠷ ᠦᠭᠡᠢ ᠰᠤᠭᠤᠯᠤᠨ ᠵᠠᠵᠢᠯᠵᠤ ᠪᠠᠢᠭᠰᠠᠨ ᠤ᠋ ᠪᠠᠨ ᠠᠭᠠ ᠶ᠋ᠢ ᠨᠢ ᠴᠦ᠍ ᠮᠡᠳᠡᠬᠦ ᠪᠡᠨ ᠪᠠᠢᠵᠤ᠂ ᠳᠡᠮᠡᠢᠯᠡ ᠵᠠᠵᠢᠯᠵᠤ ᠳᠠᠭᠤ ᠦᠭᠡᠢ ᠰᠠᠭᠤᠲᠠᠯᠠ ᠨᠢ ᠡᠪᠦᠭᠡᠨ᠂
— ᠲᠡᠷᠡ ᠵᠢᠯ᠂ ᠶᠠᠭ ᠴᠢ ᠪᠢᠳᠡ ᠬᠣᠶᠠᠷ ᠤ᠋ᠨ ᠡᠨᠡ ᠰᠠᠭᠤᠵᠤ ᠪᠠᠢᠭᠠ ᠭᠠᠵᠠᠷ ᠪᠢ ᠬᠥᠭᠡᠷᠦᠬᠦᠢ ᠴᠡᠴᠡᠭ ᠡᠮᠴᠢ ᠶ᠋ᠢ ᠵᠠᠨᠰᠠᠩ ᠲᠠᠢ ᠲᠡᠳᠡᠨᠡᠢᠳᠦ ᠣᠴᠢᠬᠤ ᠭᠡᠵᠦ ᠶᠠᠪᠤᠬᠤ ᠳ᠋ᠤᠨᠢ ᠳᠠᠭᠠᠷᠢᠯᠳᠤᠭᠰᠠᠨ ᠪᠢᠯᠡ᠃ ᠡᠬᠡᠨᠡᠷ ᠢ᠋ ᠨᠢ ᠬᠥᠩᠭᠡᠵᠢᠬᠦ ᠳ᠋ᠦ᠍ᠨᠢ ᠡᠬᠡ ᠪᠠᠷᠢᠬᠤ ᠭᠡᠵᠦ ᠶᠠᠪᠤᠭᠰᠠᠨ ᠪᠠᠢᠵᠠᠢ᠃ ᠲᠡᠭᠡᠬᠦ ᠳ᠋ᠦ᠍ᠨᠢ᠂ ᠲᠡᠳᠡᠨ ᠢ᠋ ᠭᠡᠰᠡᠷ ᠳᠠᠬᠢᠳᠠᠭ ᠬᠠᠷᠭᠢᠰ ᠯᠠᠮᠠ ᠶ᠋ᠢᠨ ᠭᠠᠷ ᠲᠤ᠌ ᠦᠬᠦᠯ ᠦ᠋ᠨ ᠮᠠᠭᠤ ᠪᠠᠷ ᠦᠬᠦᠬᠦ ᠭᠡᠵᠦ ᠶᠠᠪᠤᠭᠰᠠᠨ ᠢ᠋ ᠨᠢ ᠪᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ ᠳᠠ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ᠂ ᠭᠡᠰᠡᠷ ᠬᠠᠭᠠᠨ ᠭᠡᠬᠦ ᠳ᠋ᠦ᠍ ᠴᠦ᠍ ᠮᠢᠨᠦ ᠦᠰᠦᠲᠦ ᠲᠣᠯᠣᠭᠠᠢ ᠠᠷᠵᠠᠢᠳᠠᠭ ᠪᠣᠯᠵᠤ᠂ ᠭᠡᠰᠡᠷ ᠦ᠋ᠨ ᠲᠣᠭᠣᠵᠢ ᠮᠤᠭᠤᠵᠢ ᠴᠢᠬᠢᠨ ᠳ᠋ᠡᠭᠡᠨ ᠲᠤᠭᠤᠯᠬᠤ ᠴᠤ᠌ ᠳᠤᠷᠠ ᠦᠭᠡᠢ᠃ ᠭᠡᠰᠡᠷ ᠭᠡᠬᠦ ᠳ᠋ᠦ᠍ ᠯᠡ ᠬᠥᠭᠡᠷᠦᠬᠦᠢ ᠴᠡᠴᠡᠭ ᠰᠠᠨᠠᠭᠠᠨ ᠳ᠋ᠤ᠌ ᠮᠢᠨᠢ ᠣᠷᠣᠳᠠᠭ᠃ ᠡᠰᠡᠷᠭᠦᠦ ᠨᠠᠷ ᠭᠡᠰᠡᠷ ᠢ᠋ ᠰᠢᠷᠠ ᠶ᠋ᠢᠨ ᠱᠠᠰᠢᠨ᠂ ᠬᠠᠭᠠᠨ ᠲᠥᠷᠥ ᠶ᠋ᠢᠨ ᠳᠠᠢᠰᠤᠨ ᠲᠠᠢ ᠥᠰᠢᠨ ᠪᠠᠢᠯᠳᠤᠬᠤ ᠭᠡᠵᠦ ᠰᠡᠯᠡᠮᠡ ᠪᠡᠨ ᠪᠢᠯᠡᠭᠦᠳᠡᠳᠡᠭ ᠡᠳᠦᠷ ᠨᠢ ᠬᠥᠳᠡᠯᠬᠦ ᠭᠡᠵᠦ ᠪᠠᠢᠭᠰᠠᠨ ᠶᠤᠮ ᠭᠡᠵᠦ ᠪᠢ ᠬᠣᠵᠢᠮ ᠲᠤᠭᠤᠯᠤᠭᠰᠠᠨ᠂ ᠲᠡᠭᠡᠭᠡᠳ᠂ ᠬᠠᠷᠠ ᠰᠢᠷᠠ ᠹᠧᠣᠳᠠᠯ ᠤ᠋ᠳ ᠢ᠋ ᠭᠡᠰᠡᠷ ᠬᠠᠭᠠᠨ ᠤ᠋ ᠪᠠᠨ ᠠᠷᠪᠠᠨ ᠵᠦᠭ ᠦ᠋ᠨ ᠠᠷᠪᠠᠨ ᠬᠠᠷᠠ ᠬᠣᠣᠷ ᠤ᠋ᠨ ᠵᠦᠭ ᠡᠴᠡ ᠬᠠᠮᠠᠭᠠᠯᠠᠭᠴᠢ᠂ ᠪᠣᠭᠳᠠ ᠬᠥᠮᠦᠨ᠂ ᠠᠷᠠᠳ ᠤ᠋ᠨ ᠶᠡᠬᠡ ᠪᠠᠭᠠᠲᠤᠷ ᠪᠣᠯᠭᠠᠳᠠᠭ ᠲᠤᠨᠢ ᠮᠢᠨᠦ ᠵᠢᠪᠡᠭᠦᠦ ᠬᠦᠷᠳᠡᠭ ᠪᠣᠯᠵᠠᠢ᠃ ᠰᠢᠷᠠ ᠶ᠋ᠢᠨ ᠱᠠᠰᠢᠨ᠂ ᠬᠠᠭᠠᠨ ᠲᠥᠷᠥ ᠶ᠋ᠢ ᠡᠰᠡᠷᠭᠦᠴᠡᠭᠴᠢ ᠨᠠᠷ ᠤ᠋ᠨ ᠥᠭᠡᠳᠡ ᠡᠴᠡ᠂ ᠭᠡᠰᠡᠷ ᠬᠠᠭᠠᠨ ᠤ᠋ ᠰᠡᠯᠡᠮᠡ ᠪᠡᠨ ᠪᠢᠯᠡᠭᠦᠳᠡᠳᠡᠭ ᠡᠳᠦᠷ ᠨᠢ᠂ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠡᠰᠡᠷᠭᠦ ᠪᠣᠰᠤᠯᠭᠠ ᠭᠠᠷᠭᠠᠬᠤ ᠭᠡᠵᠦ ᠪᠤᠵᠢᠭᠢᠨᠠᠭᠰᠠᠨ ᠡᠰᠡᠷᠭᠦᠦ ᠬᠠᠷᠠ ᠰᠢᠷᠠ ᠹᠧᠣᠳᠠᠯ ᠤ᠋ᠳ᠂ ᠴᠢᠰᠤ ᠲᠠᠢ ᠪᠠᠷᠤᠨ ᠦᠩᠭᠧᠷᠡᠨ ᠢ᠋ ᠬᠦᠷᠲᠡᠯᠡ᠂ ᠭᠡᠰᠡᠷ ᠬᠠᠭᠠᠨ ᠤ᠋ ᠬᠤᠪᠢᠯᠭᠠᠨ ᠭᠡᠵᠦ ᠪᠠᠢᠭᠰᠠᠨ ᠨᠢ ᠭᠡᠰᠡᠷ ᠢ᠋ ᠪᠡᠨ ᠲᠡᠢᠮᠦ ᠯᠡ ᠪᠠᠭᠠᠲᠤᠷ ᠪᠠᠢᠭᠰᠠᠨ ᠳᠡᠭᠡᠷᠡ ᠡᠴᠡ ᠲᠡᠭᠡᠵᠦ ᠪᠠᠢᠭᠰᠠᠨ ᠪᠠᠢᠵᠢ ᠯᠠ ᠳᠠ᠃ ᠠᠮᠢᠳᠤ ᠪᠤᠷᠬᠠᠨ ᠭᠡᠵᠦ ᠳᠠᠬᠢᠳᠠᠭ ᠬᠤᠲᠤᠭᠲᠤ ᠬᠤᠪᠢᠯᠭᠠᠨ ᠮᠠᠨᠢ ᠡᠢᠮᠦᠷᠬᠦ ᠪᠠᠢᠵᠠᠢ ᠭᠡᠳ ᠡᠪᠦᠭᠡᠨ ᠵᠢᠪᠡᠭᠦᠦ ᠨᠢ ᠬᠥᠳᠡᠯᠦᠭᠰᠡᠨ ᠮᠡᠲᠦ ᠤᠬᠤᠰᠬᠢᠨ ᠪᠣᠰᠤᠭᠠᠳ ᠡᠮᠡᠭᠡᠯ ᠦ᠋ᠨ ᠢ᠋ᠶ᠋ᠡᠨ ᠣᠯᠣᠩ ᠢ᠋ ᠴᠢᠩᠭᠠᠯᠠᠭᠠᠳ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠯᠠ᠃
ᠴᠡᠷᠡᠨ᠂ ᠡᠪᠦᠭᠡᠨ ᠰᠢᠷᠠᠪ ᠭᠤᠸᠠᠢ ᠶ᠋ᠢᠨ ᠲᠡᠷᠡ ᠶᠠᠷᠢᠭᠰᠠᠨ ᠶᠠᠭᠤᠮᠠᠨ ᠳ᠋ᠤ᠌ ᠰᠡᠳᠬᠢᠯ ᠨᠢ ᠬᠥᠳᠡᠯᠵᠦ᠂ ᠡᠪᠦᠭᠡᠨ ᠭᠤᠸᠠᠢ ᠲᠠᠢ ᠰᠠᠯᠤᠨ ᠣᠳᠬᠤ ᠶᠣᠰᠣ ᠬᠢᠭᠡᠳ᠂ ᠮᠣᠷᠢᠨ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠭᠠᠪᠰᠢᠭᠠᠢᠯᠠᠨ ᠮᠣᠷᠳᠠᠵᠤ᠂ ᠬᠥᠲᠥᠯ ᠤᠷᠤᠭᠤ ᠤᠷᠤᠭᠤᠳᠠᠨ ᠶᠠᠪᠤᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠪᠣᠭᠳᠠ ᠶ᠋ᠢᠨ ᠲᠠᠴᠢᠶᠠᠩᠭᠤᠢ ᠠ᠋ᠴᠠ ᠪᠣᠯᠵᠤ᠂ ᠣᠯᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠠᠮᠢ ᠬᠣᠬᠢᠷᠠᠭᠰᠠᠨ ᠲᠡᠷᠡ ᠬᠥᠭᠡᠷᠦᠬᠦᠢ ᠵᠢᠭᠠᠯ ᠥᠬᠢᠨ᠂ ᠨᠠᠰᠤ ᠨᠥᠭᠴᠢᠭᠰᠡᠨ ᠪᠠᠲᠤᠪᠠᠶᠠᠷ ᠡᠪᠦᠭᠡ ᠶ᠋ᠢᠨ ᠥᠬᠢᠨ᠂ ᠥᠨᠥᠬᠢ ᠭᠡᠰᠡᠷ ᠬᠠᠭᠠᠨ ᠢ᠋ ᠳᠠᠬᠢᠳᠠᠭ ᠡᠰᠡᠷᠭᠦᠦ ᠯᠠᠮᠠ ᠨᠠᠷ ᠤ᠋ᠨ ᠭᠠᠷ ᠲᠤ᠌ ᠲᠠᠮᠤᠯᠠᠭᠳᠠᠨ ᠦᠬᠦᠭᠰᠡᠨ ᠴᠡᠴᠡᠭ ᠬᠡᠦᠬᠡᠨ ᠴᠡᠷᠡᠨ ᠦ᠌ ᠰᠡᠳᠬᠢᠯ ᠡᠴᠡ ᠭᠠᠷᠴᠤ ᠥᠭᠬᠦ ᠦᠭᠡᠢ᠂ ᠲᠡᠳᠡᠨ ᠢ᠋ ᠪᠣᠳᠣᠭᠰᠠᠭᠠᠷ᠂ ᠬᠥᠭᠡᠷᠦᠬᠦᠢ ᠴᠡᠴᠡᠭ ᠦ᠋ᠨ ᠡᠮᠡᠭᠡᠨ ᠡᠵᠢ ᠵᠠᠩ ᠱᠢ᠂ ᠬᠠᠢᠷᠠᠲᠤ ᠥᠬᠢᠨ ᠢ᠋ᠶ᠋ᠡᠨ ᠭᠡᠰᠡᠷ ᠳᠠᠴᠠᠩ ᠤ᠋ᠨ ᠯᠠᠮᠠ ᠨᠠᠷ ᠤ᠋ᠨ ᠭᠠᠷ ᠲᠤ᠌ ᠠᠮᠢ ᠦᠷᠡᠭᠳᠡᠭᠰᠡᠨ ᠢ᠋ ᠰᠣᠨᠣᠰᠤᠭᠠᠳ ᠦᠩᠬᠦᠯᠴᠡᠭ ᠨᠢ ᠬᠠᠭᠠᠷᠠᠵᠤ ᠦᠬᠦᠭᠰᠡᠨ᠂ ᠪᠠᠰᠠ ᠨᠠᠰᠤᠨᠪᠠᠲᠤ ᠪᠢᠲᠡᠭᠦᠯᠢᠭ ᠢ᠋ᠶ᠋ᠡᠷ ᠨᠠᠰᠤ ᠪᠠᠷᠠᠭᠰᠠᠨ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠵᠤ᠂ ᠮᠠᠨᠠᠢ(ᠮᠠᠨ ᠤ᠋) ᠭᠦᠩᠭᠠᠷᠠᠪᠠ ᠳ᠋ᠤ᠌ ᠰᠤᠨᠤᠮ ᠵᠠᠩᠭᠢ ᠶ᠋ᠢᠨ ᠪᠢᠴᠢᠭᠰᠡᠨ ᠬᠠᠭᠤᠴᠢᠨ ᠰᠤᠳᠤᠷ᠂ ᠲᠣᠭᠰᠢᠨ ᠭᠡᠰᠡᠷ ᠬᠠᠭᠠᠨ ᠤ᠋ ᠮᠠᠭᠲᠠᠭᠠᠯ ᠪᠠᠢᠳᠠᠭ ᠪᠢᠯᠡ ᠯᠠ᠃ ᠲᠡᠭᠦᠨ ᠢ᠋ ᠰᠢᠲᠠᠭᠠᠵᠤ ᠣᠷᠬᠢᠬᠤ ᠶᠣᠰᠣᠲᠠᠢ ᠶᠤᠮ ᠪᠠᠢᠨᠠ᠃ ᠮᠢᠨᠦ᠂ ᠲᠡᠭᠦᠨ ᠢ᠋ ᠬᠠᠳᠠᠭᠠᠯᠠᠨ ᠲᠠᠬᠢᠵᠤ ᠪᠠᠢᠳᠠᠭ ᠮᠢᠨᠢ ᠬᠠᠷᠢᠨ ᠴᠤ᠌ ᠴᠡᠴᠡᠭ᠂ ᠵᠠᠩ ᠱᠢ ᠶ᠋ᠢ ᠬᠣᠣᠷᠯᠠᠭᠰᠠᠨ ᠲᠡᠳᠡᠨᠦᠰ ᠢ᠋ ᠲᠠᠬᠢᠬᠰᠠᠨ ᠰᠢᠭ᠋ ᠪᠣᠯᠵᠤ ᠪᠠᠢᠭᠠ ᠶᠤᠮ ᠪᠠᠢᠨᠠ ᠭᠡᠵᠦ ᠪᠣᠳᠣᠵᠠᠢ᠃
ᠭᠡᠷ ᠲᠡᠭᠡᠨ( ᠲᠤ ᠪᠡᠨ) ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠯᠧᠨᠢᠨᠮᠠ᠂ ᠮᠣᠷᠢᠨ ᠤ᠋ ᠤᠶᠠᠭᠠᠨ ᠤ᠋ ᠲᠡᠨᠳᠡ ᠡᠵᠢ ᠪᠡᠨ ᠲᠣᠰᠴᠤ ᠤᠷᠲᠤ ᠠ᠋ᠴᠠ ᠨᠢ ᠤᠭᠲᠤᠨ ᠲᠡᠪᠡᠷᠢᠵᠦ᠂
— ᠡᠵᠢ ᠮᠢᠨᠢ ᠢᠷᠡᠵᠦ᠂ ᠡᠵᠢ ᠮᠢᠨᠢ ᠢᠷᠡᠵᠦ! ᠪᠢ ᠲᠠᠨ ᠢ᠋ ᠶᠡᠬᠡ ᠰᠠᠨᠠᠯᠠ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠴᠡᠷᠡᠨ ᠣᠳᠬᠣᠨ ᠵᠢᠭᠠᠯ ᠢ᠋ᠶ᠋ᠠᠨ ᠡᠯᠢᠭᠡᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠲᠡᠪᠡᠷᠢᠵᠦ ᠳᠠᠭᠠᠯᠠᠭᠠᠳ᠂ ᠪᠣᠭᠴᠣ ᠪᠠᠨ ᠠᠪᠴᠤ ᠭᠡᠷ ᠲᠡᠭᠡᠨ( ᠲᠤ ᠪᠡᠨ) ᠣᠷᠣᠯᠠ᠃
— ᠡᠵᠢ᠂ ᠪᠢ ᠲᠠᠨ ᠢ᠋ ᠬᠣᠯᠠ ᠠ᠋ᠴᠠ ᠬᠠᠷᠠᠭᠠᠳ᠂ ᠶᠠᠭᠠᠷᠠᠨ ᠭᠠᠯ ᠢ᠋ᠶ᠋ᠠᠨ ᠲᠦᠯᠡᠵᠦ ᠴᠠᠢ ᠪᠠᠨ ᠲᠠᠯᠪᠢᠯᠠ᠃ ᠡᠵᠢ ᠲᠠ ᠬᠣᠷᠰᠢᠶᠠ ᠠ᠋ᠴᠠ ᠶᠠᠭᠤ ᠠᠪᠤᠭᠰᠠᠨ ᠪᠣᠢ? ᠭᠡᠵᠦ ᠬᠣᠩᠭᠣᠷ ᠵᠢᠭᠠᠯ ᠯᠧᠨᠢᠨᠮᠠ ᠶ᠋ᠢ ᠠᠯᠲᠠᠨ ᠬᠠᠷᠢᠶᠠᠴᠠᠢ ᠰᠢᠭ᠋ ᠵᠢᠷᠭᠢᠨ ᠳᠣᠩᠭᠣᠳᠬᠤ ᠳ᠋ᠤ᠌ ᠴᠡᠷᠡᠨ ᠪᠣᠭᠴᠣ ᠠ᠋ᠴᠠ ᠪᠠᠨ ᠴᠠᠢ᠂ ᠶᠣᠣᠲᠠᠩ᠂ ᠦᠵᠦᠮ᠂ ᠴᠠᠭᠠᠰᠤ ᠲᠠᠢ ᠰᠢᠬᠢᠷ ᠭᠠᠷᠭᠠᠭᠠᠳ᠂ ᠬᠠᠭᠤᠴᠢᠨ ᠰᠤᠷᠤᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠠᠨᠠᠮᠰᠠᠷ ᠦᠭᠡᠢ ᠨᠢᠭᠡ ᠬᠡᠳᠦᠨ ᠰᠢᠬᠢᠷ ᠠᠪᠴᠤ ᠪᠤᠷᠬᠠᠨ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠲᠠᠯᠪᠢᠬᠤ ᠭᠡᠵᠦ ᠰᠠᠷᠪᠠᠢᠲᠠᠯᠠ ᠪᠠᠨ ᠪᠠᠢᠵᠤ᠂ ᠭᠦᠩᠭᠠᠷᠠᠪᠠ ᠪᠠᠨ ᠠᠭᠤᠳᠠᠯᠵᠤ ᠭᠠᠷᠭᠠᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ)᠂ ᠣᠳᠬᠣᠨ ᠵᠢᠭᠠᠯ ᠥᠬᠢᠨ ᠨᠢ ᠶᠡᠬᠡᠯᠡ( ᠶᠡᠬᠡ ᠯᠡ) ᠭᠠᠢᠬᠠᠨ ᠡᠵᠢ ᠪᠡᠨ ᠬᠠᠷᠠᠵᠠᠢ᠃ ᠣᠨ ᠤᠳᠠᠨ ᠤᠲᠤᠭᠠ ᠢᠰᠦᠨ ᠳ᠋ᠦ᠍ ᠰᠢᠷᠠᠯᠠᠵᠤ ᠬᠠᠷᠠᠯᠠᠭᠰᠠᠨ《ᠳᠣᠭᠰᠢᠨ ᠭᠡᠰᠡᠷ ᠬᠠᠭᠠᠨ ᠤ᠋ ᠰᠠᠩ ᠲᠠᠬᠢᠯ᠂ ᠵᠢᠪᠽᠥ᠋ᠨᠳᠠᠮᠪᠠ ᠬᠤᠲᠤᠭᠲᠤ ᠶ᠋ᠢᠨ ᠲᠠᠪᠤᠳᠤᠭᠠᠷ ᠳᠦᠷᠢ ᠶ᠋ᠢᠨ ᠭᠡᠭᠡᠨ ᠦ᠌ ᠵᠣᠬᠢᠶᠠᠭᠰᠠᠨ᠂ ᠭᠡᠰᠡᠷ ᠬᠠᠭᠠᠨ ᠤ᠋ ᠮᠠᠭᠲᠠᠭᠠᠯ ᠣᠷᠣᠰᠢᠪᠠᠢ》 ᠭᠡᠳᠡᠭ ᠰᠤᠳᠤᠷ ᠭᠠᠷᠭᠠᠭᠠᠳ᠂ ᠬᠡᠪᠡᠷᠡᠭ ᠪᠣᠯᠤᠭᠰᠠᠨ ᠬᠠᠭᠤᠴᠢᠨ ᠰᠤᠳᠤᠷ ᠤ᠋ᠨ ᠬᠠᠭᠤᠳᠠᠰᠤ ᠶ᠋ᠢ ᠪᠠᠵᠠᠯᠠᠭᠠᠳ᠂ ᠭᠠᠯ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠬᠢᠵᠡᠢ᠃
— ᠪᠠᠭᠰᠢ ᠪᠢᠳᠡᠨ ᠳ᠋ᠦ᠍ ᠵᠢᠭᠠᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)᠂ ᠲᠩᠷᠢ ᠪᠤᠷᠬᠠᠨ᠂ ᠴᠢᠳᠬᠥᠷ ᠪᠤᠭ ᠭᠡᠵᠦ ᠬᠣᠴᠣᠷᠤᠭᠳᠠᠭᠰᠠᠨ ᠪᠦᠳᠦᠭᠦᠯᠢᠭ ᠤᠯᠤᠰ ᠰᠦᠰᠦᠭᠯᠡᠨ ᠢᠲᠡᠭᠡᠳᠡᠭ ᠶᠦᠮ ᠭᠡᠵᠦ ᠵᠢᠭᠠᠳᠠᠭ᠃ ᠣᠳᠣ ᠡᠵᠢ᠂ ᠲᠩᠷᠢ ᠪᠤᠷᠬᠠᠨ ᠭᠡᠬᠦ ᠪᠡᠨ ᠪᠠᠢᠵᠠᠢ᠃ ᠡᠵᠢ ᠣᠳᠣ ᠬᠣᠴᠣᠷᠤᠭᠳᠠᠭᠰᠠᠨ ᠪᠦᠳᠦᠭᠦᠯᠢᠭ ᠢ᠋ᠶ᠋ᠡᠨ ᠪᠠᠢᠵᠠᠢ ᠭᠡᠵᠦ ᠯᠸᠨᠢᠨᠮᠡ ᠭᠡᠰᠡᠷ ᠦ᠋ᠨ ᠮᠠᠭᠲᠠᠭᠠᠯ ᠰᠠᠩ ᠤ᠋ᠨ ᠰᠤᠳᠤᠷ ᠭᠠᠯ ᠳ᠋ᠤ᠌ ᠳᠦᠷᠡᠯᠵᠡᠨ ᠠᠰᠠᠬᠤ ᠶ᠋ᠢ ᠬᠠᠷᠠᠭᠠᠳ ᠪᠠᠶᠠᠷᠯᠠᠨ ᠠᠯᠠᠭᠠ ᠪᠠᠨ ᠲᠡᠰᠢᠵᠦ᠂ ᠡᠵᠢ ᠲᠠ ᠣᠳᠣ ᠡᠨᠡ ᠮᠠᠭᠤᠬᠠᠢ ᠵᠢᠷᠤᠮᠠᠯ ᠪᠠᠷᠢᠮᠠᠯ ᠪᠤᠷᠬᠠᠨ ᠢ᠋ᠶ᠋ᠠᠨ ᠪᠠᠰᠠ ᠭᠠᠯ ᠳ᠋ᠤ᠌ ᠬᠢᠬᠦ ᠤᠤ? ᠭᠡᠵᠡᠢ᠃
ᠭᠦᠩᠭᠠᠷᠠᠪᠠ ᠳ᠋ᠠᠬᠢ ᠪᠤᠷᠬᠠᠨ ᠦᠨᠡᠷᠡᠨ ᠴᠦ᠍ ᠲᠤᠩ ᠦᠵᠡᠮᠵᠢ ᠮᠠᠭᠤ ᠲᠠᠢ ᠠᠵᠢ᠃ ᠬᠦᠷᠢᠶᠡᠨ ᠦ᠌ ᠬᠢᠲᠠᠳ ᠬᠤᠸᠠᠵᠢᠶᠠᠩ ᠤ᠋ᠨ ᠬᠠᠰᠢ ᠬᠡᠷᠡᠭ ᠵᠢᠷᠤᠭᠰᠠᠨ ᠲᠤᠩ ᠪᠦᠳᠦᠭᠦᠨ ᠬᠢᠴᠢᠲᠡᠢ ᠡᠳ᠋ ᠬᠡᠰᠢᠭ ᠦ᠋ᠨ ᠡᠵᠡᠨ᠂ ᠲᠠᠪᠤᠨ ᠬᠠᠭᠠᠨ ᠤᠯᠠᠭᠠᠨ ᠨᠢᠭᠤᠷ ᠲᠠᠢ ᠲᠣᠭᠰᠢᠨ ᠭᠡᠰᠡᠷ ᠬᠠᠭᠠᠨ᠂ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠪᠣᠳᠣᠭ ᠢ᠋ᠶ᠋ᠠᠷ ᠤᠷᠠ ᠮᠠᠭᠤ ᠲᠠᠢ ᠪᠣᠳᠣᠭᠰᠠᠨ᠂ ᠰᠢᠪᠡᠷ ᠢ᠋ᠶ᠋ᠡᠷ ᠬᠡᠪᠯᠡᠭᠰᠡᠨ ᠲᠠᠪᠤᠳᠤᠭᠠᠷ ᠪᠣᠭᠳᠠ᠂
— ᠡᠢᠮᠦ ᠶᠠᠭᠤᠮᠠ ᠳᠠᠬᠢᠵᠤ ᠪᠠᠢᠭᠰᠠᠨ ᠠᠵᠢ᠃ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠶᠠᠭᠠᠬᠢᠶᠠ ᠳᠠ ᠭᠡᠵᠦ ᠡᠷᠡᠭᠡᠯᠵᠡᠨ ᠲᠦᠳᠡᠭᠡᠯᠵᠡᠰᠭᠢᠳᠡᠯᠡ ᠭᠡᠨᠡᠳᠲᠡ ᠵᠣᠷᠢᠮᠠᠭ᠂ ᠭᠡᠰᠡᠷ ᠬᠠᠭᠠᠨ ᠤ᠋ ᠬᠥᠷᠥᠭ ᠢ᠋ ᠰᠢᠭᠦᠷᠦᠭᠡᠳ ᠭᠠᠯ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠬᠢᠩᠭᠦᠲᠡ᠂ ᠬᠥᠭᠡᠷᠦᠬᠦᠢ ᠴᠡᠴᠡᠭ ᠦ᠋ᠨ ᠬᠠᠷᠢᠭᠤ! ᠭᠡᠳ ᠭᠠᠯ ᠤ᠋ᠨ ᠳᠥᠯᠥᠨ ᠳ᠋ᠦ᠍ ᠵᠢᠷᠤᠮᠠᠯ ᠪᠤᠷᠬᠠᠨ ᠤ᠋ ᠳᠠᠪᠤᠤ ᠬᠣᠮᠣᠢᠯᠳᠤᠨ᠂ ᠪᠣᠳᠣᠭ ᠨᠢ ᠴᠦᠪᠦᠷᠢᠭᠦᠲᠦᠨ᠂ ᠤᠯᠠᠭᠠᠨ ᠨᠢᠭᠤᠷᠲᠤ ᠭᠡᠰᠡᠷ ᠬᠦᠷᠡᠩ ᠪᠣᠯᠤᠭᠰᠠᠭᠠᠷ ᠭᠠᠯ ᠳ᠋ᠤ᠌ ᠲᠠᠷᠴᠢᠯᠠᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠠᠲᠤᠭᠠᠨᠠᠨ ᠰᠢᠳᠡᠵᠦ ᠪᠠᠢᠭᠠ ᠶ᠋ᠢ ᠬᠠᠷᠠᠵᠤ ᠪᠠᠢᠯᠠ᠃
ᠠᠯᠠᠭᠯᠠᠨ ᠪᠣᠳᠣᠭᠰᠠᠨ ᠲᠠᠪᠤᠳᠤᠭᠠᠷ ᠵᠢᠪᠽᠥ᠋ᠨᠳᠠᠮᠪᠠ ᠬᠤᠲᠤᠭᠲᠤ᠂ ᠭᠡᠰᠡᠷ ᠬᠠᠭᠠᠨ ᠤ᠋ ᠦᠨᠡᠰᠦᠨ ᠳᠡᠭᠡᠷᠡ ᠫᠠᠯ ᠬᠢᠵᠦ ᠣᠢᠴᠢᠭᠠᠳ᠂ ᠪᠣᠳᠣᠭ ᠨᠢ ᠬᠠᠷᠠᠯᠠᠭᠠᠳ ᠢᠷᠡᠬᠦ ᠳ᠋ᠦ᠍ ᠲᠠᠪᠤᠳᠤᠭᠠᠷ ᠵᠢᠪᠽᠥ᠋ᠨᠳᠠᠮᠪᠠ᠂ ᠭᠡᠰᠡᠷ ᠦ᠋ᠨ ᠮᠠᠭᠲᠠᠭᠠᠯ ᠵᠣᠬᠢᠶᠠᠵᠤ ᠪᠢᠯᠡ᠃ ᠨᠠᠢ᠍ᠮᠠᠳᠤᠭᠠᠷ ᠵᠢᠪᠽᠥ᠋ᠨᠳᠠᠮᠪᠠ ᠨᠢ ᠲᠡᠷᠡ ᠬᠥᠭᠡᠷᠦᠬᠦᠢ ᠵᠢᠭᠠᠯ ᠥᠬᠢᠨ ᠢ᠋ ᠬᠣᠷᠣᠭᠠᠭᠰᠠᠨ ᠪᠢᠯᠡ ᠭᠡᠵᠦ ᠪᠣᠳᠣᠭᠠᠳ ᠴᠡᠷᠡᠨ᠂ ᠲᠠᠪᠤᠨ ᠬᠠᠭᠠᠨ ᠢ᠋ᠶ᠋ᠠᠨ ᠤᠨᠲᠤᠭᠤᠴᠠᠨ ᠰᠢᠭᠦᠷᠴᠤ᠂ ᠲᠠᠪᠤᠨ ᠬᠠᠭᠠᠨ ᠪᠠᠢᠲᠤᠭᠠᠢ᠂ ᠲᠠᠪᠤᠨ ᠵᠠᠭᠤᠨ ᠬᠠᠭᠠᠨ ᠴᠤ᠌ ᠪᠠᠢᠭᠰᠠᠨ ᠰᠥᠨᠥᠲᠦᠭᠡᠢ! ᠭᠡᠳ ᠭᠠᠯ ᠤᠷᠤᠭᠤ ᠪᠠᠨ ᠬᠢᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠳᠥᠯᠥ ᠳᠦᠷᠡᠯᠵᠡᠨ ᠪᠠᠳᠠᠷᠠᠵᠤ᠂ ᠴᠠᠢ ᠪᠤᠴᠠᠯᠤᠭᠠᠳ ᠣᠷᠬᠢᠵᠠᠢ᠃
— ᠣᠳᠣ ᠡᠨᠡ ᠠᠭᠤᠷ ᠲᠠᠢ ᠲᠣᠭᠣᠰᠣ ᠲᠠᠢ ᠮᠠᠭᠤᠬᠠᠢ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠪᠢᠳᠡ ᠶᠠᠭᠤ ᠬᠢᠬᠦ ᠪᠣᠢ? ᠭᠡᠵᠦ ᠯᠸᠨᠢᠨᠮᠡ ᠶ᠋ᠢᠨ ᠠᠰᠠᠭᠤᠬᠤ ᠳ᠋ᠤ᠌᠂
— ᠯᠧᠨᠢᠨ᠂ ᠰᠲ᠋ᠠᠯᠢᠨ᠂ ᠰᠦᠬᠡᠪᠠᠭᠠᠲᠤᠷ᠂ ᠴᠣᠢᠪᠠᠯᠰᠠᠩ ᠤ᠋ᠨ ᠵᠢᠷᠤᠭ ᠣᠳᠣ ᠲᠠᠯᠪᠢᠨᠠ᠃ ᠪᠢᠳᠡᠨ ᠦ᠌ ᠵᠢᠷᠭᠠᠯ ᠤ᠋ᠨ ᠵᠠᠮ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠠᠴᠢᠲᠠᠨ ᠲᠡᠳᠡᠨ ᠢ᠋ᠶ᠋ᠡᠨ ᠲᠠᠯᠪᠢᠯ ᠦᠭᠡᠢ ᠬᠡᠨ ᠢ᠋ᠶ᠋ᠡᠨ ᠲᠠᠯᠪᠢᠬᠤ ᠪᠣᠢ? ᠭᠡᠳ ᠬᠣᠩᠭᠣᠷ ᠵᠢᠭᠠᠯ ᠯᠸᠨᠢᠨᠮᠡ ᠪᠡᠨ ᠡᠯᠢᠭᠡᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠲᠡᠪᠡᠷᠢᠵᠡᠢ᠃
— — — —
* — ᠊ᠮᠦᠢ ᠭᠡᠳᠡᠭ ᠳᠠᠭᠠᠪᠤᠷᠢ ᠪᠣᠢ ᠭᠡᠳᠡᠭ ᠦᠭᠡ ᠡᠴᠡ ᠭᠠᠷᠤᠭᠰᠠᠨ ᠤᠴᠢᠷ᠂ ᠲᠤᠬᠠᠢ ᠶ᠋ᠢᠨ ᠪᠠᠢᠳᠠᠯ ᠪᠣᠢ ᠶ᠋ᠢ ᠦᠵᠡᠭᠦᠯᠬᠦ ᠠᠵᠢ᠃ ᠲᠡᠭᠦᠪᠡᠷ (ᠲᠡᠭᠦᠨ ᠢ᠋ᠶ᠋ᠡᠷ) ᠢ᠋ᠶ᠋ᠡᠨ— ᠨᠠᠮ— ᠊ᠨᠠ ᠭᠡᠵᠦ ᠦᠵᠡᠭᠳᠡᠨᠡ ᠭᠡᠬᠦ ᠮᠡᠲᠦ ᠪᠡᠷ ᠪᠣᠯᠤᠭᠠ ᠦᠭᠡᠢ ᠢᠷᠡᠭᠡᠳᠦᠢ ᠶ᠋ᠢ ᠦᠵᠡᠭᠦᠯᠦᠭᠰᠡᠨ ᠦᠭᠡ ᠡᠴᠡ ᠢᠯᠭᠠᠭᠠ ᠲᠠᠢ ᠶ᠋ᠢ ᠠᠩᠬᠠᠷᠤᠭᠠᠷᠠᠢ!
*— ᠣᠳᠣ ᠤᠮᠠᠬᠤᠮ ᠭᠡᠳᠡᠭ ᠲᠥᠪᠡᠳ ᠦᠰᠦᠭ ᠦ᠋ᠨ ᠲᠡᠷᠡ ᠲᠠᠷᠨᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠰᠢᠨᠡ ᠦᠰᠦᠭ ᠢ᠋ᠶ᠋ᠡᠷ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠮᠠᠨᠳᠤᠲᠤᠭᠠᠢ ᠭᠡᠰᠡᠨ ᠤᠷᠢᠶᠠ ᠥᠷᠥᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠴᠤᠯᠮᠤᠨᠭᠡᠷᠡᠯ᠂ ᠪᠠᠯ᠂ ᠤᠢᠭᠤᠷᠵᠢᠨ·ᠣᠳᠬᠣᠨᠪᠠᠪᠠ᠂ ᠣᠶᠤᠨᠪᠠᠲᠤ᠂ ᠪᠠᠳᠮᠠᠰᠡᠴᠡᠨ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠤᠢᠭᠤᠷᠵᠢᠨ·ᠣᠳᠬᠣᠨᠪᠠᠪᠠ᠂ ᠴᠤᠯᠮᠤᠨᠭᠡᠷᠡᠯ᠂ ᠲ·ᠬᠦᠮᠦᠵᠢᠯᠲᠦ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ