ᠦᠷ ᠦᠨ ᠲᠤᠶᠠᠭᠠ III – ᠪ᠂ ᠷᠢᠨᠴᠢᠨ - ᠭᠤᠷᠪᠠᠳᠤᠭᠠᠷ ᠲᠡᠪᠲᠡᠷ <ᠪᠠᠢᠯᠳᠤᠵᠤ ᠣᠯᠣᠭᠰᠠᠨ ᠡᠬᠡ ᠣᠷᠣᠨ>- ᠠᠷᠪᠠᠨ ᠳᠥᠷᠪᠡ Үүрийн туяа III – Б ᠂ Ренчин Гуравдугаар дэвтэр "Баялдаж олсон эх орон"-14
183ᠠᠷᠪᠠᠨ ᠳᠥᠷᠪᠡ ᠂ ᠡᠯᠢᠭᠡ ᠪᠦᠲᠦᠨ ᠠᠢᠯ
ᠤᠷᠢ ᠵᠠᠯᠠᠭᠤ ᠶ᠋ᠢᠨ ᠳᠠᠯᠠᠢ ᠴᠠᠯᠭᠢᠯᠠᠵᠤ ᠪᠠᠢᠬᠤ ᠳ᠋ᠤ᠌
ᠥᠲᠡᠯᠦᠨᠡ ᠭᠡᠵᠦ ᠪᠢᠳᠡ ᠠᠶᠤᠬᠤ ᠤᠤ ᠳᠠ? ᠁
ᠨ· ᠲᠢᠬᠤᠨᠤᠸ
— ᠡᠢᠮᠦ ᠬᠥᠮᠦᠨ ᠶᠦᠮ ᠪᠣᠢ ᠪᠢ? ᠭᠡᠵᠦ ᠴᠡᠷᠡᠨ ᠵᠤᠤᠪᠠᠩ ᠲᠣᠯᠢᠨ ᠳ᠋ᠤ᠌ ᠴᠢᠷᠠᠢ ᠪᠠᠨ ᠬᠠᠷᠠᠵᠤ ᠯᠠ ᠨᠠᠮ ᠳᠠᠭᠤ ᠪᠠᠷ ᠬᠡᠯᠡᠭᠡᠳ᠂ ᠲᠣᠯᠢ ᠤᠷᠤᠭᠤ ᠪᠠᠨ ᠬᠠᠷᠠᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ)᠂ ᠥᠭᠡᠳᠡ ᠡᠴᠡ ᠨᠢ ᠦᠷᠴᠢᠢᠯᠭᠡ ᠣᠷᠣᠬᠤ ᠰᠢᠨᠵᠢᠲᠡᠢ᠂ ᠥᠨᠳᠥᠷ ᠮᠠᠩᠨᠠᠢ ᠲᠠᠢ᠂ ᠨᠠᠷᠢᠨ ᠬᠠᠷᠠ ᠬᠥᠮᠥᠰᠬᠡ ᠲᠡᠢ᠂ ᠪᠤᠷᠭᠠᠰᠤᠨ ᠤ᠋ ᠨᠠᠪᠴᠢ ᠮᠡᠲᠦ ᠤᠷᠲᠤᠯᠢᠭ ᠰᠡᠷᠭᠦᠯᠡᠩ ᠨᠢᠳᠦ ᠲᠡᠢ᠂ ᠮᠣᠩᠬᠣᠷ ᠬᠠᠮᠠᠷ ᠲᠠᠢ᠂ ᠬᠥᠷᠥᠰᠥᠯᠢᠭ ᠬᠦᠷᠡᠩ ᠴᠢᠷᠠᠢ ᠲᠠᠢ ᠠᠶᠠᠲᠠᠢᠬᠠᠨ ᠡᠮᠡᠭᠲᠡᠢ ᠬᠥᠮᠦᠨ ᠲᠣᠯᠢᠨ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠬᠠᠷᠠᠭᠳᠠᠭᠰᠠᠨ ᠳ᠋ᠤ᠌ ᠬᠣᠷᠢᠭᠠᠳ ᠵᠢᠯ ᠦ᠋ᠨ ᠡᠮᠦᠨᠡ ᠪᠢ ᠵᠥᠪ ᠵᠦᠭᠡᠷ ᠪᠠᠢᠵᠠᠢ ᠳᠠ ᠭᠡᠵᠦ ᠪᠣᠳᠣᠲᠠᠯᠠ ᠪᠠᠨ ᠭᠡᠨᠡᠳᠲᠡ ᠢᠴᠢᠩᠭᠦᠷᠡᠰᠬᠢᠵᠦ ᠲᠣᠯᠢ ᠪᠠᠨ ᠨᠡᠭᠡᠭᠡᠯᠲᠡ ᠲᠡᠢ ᠠᠪᠳᠠᠷᠠ ᠤᠷᠤᠭᠤ ᠪᠠᠨ ᠶᠠᠭᠠᠷᠠᠨ ᠬᠢᠴᠢᠵᠡᠢ(ᠬᠢᠴᠢᠬᠡᠵᠡᠢ)᠃ ᠲᠡᠭᠡᠭᠡᠳ᠂ ᠭᠡᠷ ᠲᠦ᠍ ᠬᠥᠮᠦᠨ ᠬᠠᠷᠠ ᠦᠭᠡᠢ ᠪᠠᠢᠭᠠ ᠨᠢ ᠶᠠᠭᠠᠮᠠᠢ᠃ ᠬᠠᠷᠠᠪᠠᠯ ᠠᠮᠢᠲᠠᠨ ᠱᠣᠣᠯᠠᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠡᠬᠡᠨᠡᠷ ᠬᠥᠮᠦᠨ᠂ ᠬᠥᠭᠰᠢᠨ ᠬᠥᠮᠦᠨ ᠮᠥᠷᠲᠡᠭᠡᠨ ᠲᠣᠯᠢᠨ ᠤ᠋ ᠡᠮᠦᠨᠡ ᠢᠩᠭᠢᠵᠦ ᠰᠠᠪᠠᠭᠠ ᠦᠭᠡᠢᠳᠡᠬᠦ ᠭᠡᠵᠦ ᠮᠠᠭᠤ ᠬᠡᠯᠡᠨᠡ ᠰᠢᠦ ᠳᠡ ᠭᠡᠵᠦ ᠪᠣᠳᠣᠭᠠᠳ ᠠᠪᠳᠠᠷᠠ ᠠ᠋ᠴᠠ ᠪᠠᠨ ᠳᠡᠪᠡᠯ ᠦ᠋ᠨ ᠬᠠᠷᠠ ᠬᠥᠬᠡ ᠫᠦᠦᠰᠦᠦ᠂ ᠬᠦᠷᠡᠩ ᠳᠤᠷᠳᠤᠩ ᠬᠣᠶᠠᠷ ᠢ᠋ ᠳᠠᠬᠢᠨ ᠭᠠᠷᠭᠠᠵᠤ ᠳᠡᠯᠭᠡᠭᠡᠳ ᠦᠵᠡᠵᠡᠢ᠃ ᠲᠣᠯᠢ᠂ ᠲᠣᠷᠭᠠ ᠳᠤᠷᠳᠤᠩ ᠨᠢ ᠴᠥᠮ ᠠᠪᠤ ᠡᠵᠢ ᠬᠣᠶᠠᠷ ᠲᠠᠭᠠᠨ( ᠲᠤ ᠪᠠᠨ) ᠠᠶᠠᠨᠴᠢᠨ ᠢ᠋ᠶ᠋ᠠᠷ ᠬᠣᠲᠠ ᠠ᠋ᠴᠠ ᠲᠡᠮᠦᠷ ᠬᠦᠦ ᠶ᠋ᠢᠨ ᠶᠠᠪᠤᠭᠤᠯᠤᠭᠰᠠᠨ ᠪᠡᠯᠡᠭ ᠪᠠᠢᠵᠠᠢ᠃ ᠠᠵᠢᠯ ᠬᠢᠵᠦ ᠰᠠᠭᠠᠷᠢᠲᠤᠭᠰᠠᠨ ᠰᠢᠷᠦᠭᠦᠨ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠪᠡᠯᠡᠭ ᠢ᠋ ᠢᠯᠢᠭᠡᠳ ᠳᠠᠬᠢᠨ ᠠᠪᠳᠠᠷᠠ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠠᠶᠠᠲᠠᠢᠬᠠᠨ ᠭᠡᠭᠴᠢ ᠪᠡᠷ ᠬᠢᠵᠦ ᠪᠣᠳᠣᠯᠭᠠ ᠪᠣᠳᠣᠵᠠᠢ᠃
ᠲᠡᠮᠦᠷ ᠬᠦᠦ ᠨᠢ ᠪᠠᠭᠠᠲᠤᠷ ᠤ᠋ᠨ ᠬᠣᠲᠠ ᠳ᠋ᠤ᠌ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠷᠣᠭᠰᠠᠭᠠᠷ ᠭᠤᠷᠪᠠᠨ ᠵᠢᠯ ᠦ᠋ᠨ ᠨᠢᠭᠤᠷ ᠦᠵᠡᠵᠡᠢ᠃ ᠠᠩᠬᠠᠨ ᠤ᠋ ᠵᠢᠯ ᠳ᠋ᠦ᠍ ᠬᠦᠦ ᠪᠡᠨ ᠶᠡᠬᠡᠯᠡ( ᠶᠡᠬᠡ ᠯᠡ) ᠰᠠᠨᠠᠳᠠᠭ ᠪᠠᠢᠯᠠ᠃ ᠰᠥᠨᠢ ᠰᠡᠷᠢᠭᠡᠳ᠂ ᠳᠡᠷᠡ ᠶ᠋ᠢᠨ ᠳᠣᠣᠷᠠ ᠠ᠋ᠴᠠ ᠪᠠᠨ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠦᠨᠦᠷ ᠨᠢ ᠰᠠᠯᠤᠭᠠ ᠦᠭᠡᠢ ᠴᠠᠮᠴᠠ ᠶ᠋ᠢ ᠭᠠᠷᠭᠠᠵᠤ᠂ ᠲᠦᠮᠡᠨ ᠬᠥᠮᠦᠨ ᠦ᠌ ᠳᠤᠮᠳᠠ ᠠ᠋ᠴᠠ ᠠᠨᠳᠤᠰᠢ ᠦᠭᠡᠢ ᠲᠠᠨᠢᠬᠤ ᠲᠡᠷᠡ ᠰᠠᠢᠬᠠᠨ ᠦᠨᠦᠷ ᠢ᠋ ᠨᠢ ᠰᠢᠩᠰᠢᠳᠡᠭ ᠪᠠᠢᠯᠠ᠃
ᠲᠡᠭᠡᠭᠡᠳ ᠬᠣᠢᠲᠤᠨ ᠬᠠᠪᠤᠷ ᠨᠢ ᠥᠷᠲᠡᠭᠡ ᠪᠡᠷ ᠤᠯᠠᠭᠠᠴᠢ ᠳᠠᠭᠠᠭᠤᠯᠤᠨ᠂ ᠠᠯᠪᠠᠨ ᠤ᠋ ᠡᠯᠴᠢ ᠰᠢᠭ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠪᠠᠶᠠᠷᠯᠠᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠭᠡᠳ ᠪᠠᠷᠠᠬᠤ ᠤᠤ? ᠲᠣᠮᠣ ᠪᠣᠯᠴᠢᠬᠰᠠᠨ( ᠪᠣᠯᠴᠢᠬᠠᠭᠰᠠᠨ) ᠢ᠋ ᠨᠢ ᠭᠠᠢᠬᠠᠭᠠᠳ ᠪᠠᠷᠠᠬᠤ ᠤᠤ? ᠥᠨᠳᠥᠷ ᠴᠢᠯᠭᠡᠷ ᠪᠡᠶᠡ ᠲᠡᠢ ᠪᠠᠷᠤᠭ ᠨᠢᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠡᠴᠢᠭᠡ ᠡᠴᠡ ᠪᠡᠨ ᠳᠤᠲᠠᠭᠤ ᠦᠭᠡᠢ᠂ ᠣᠳᠣ ᠯᠠᠪ ᠡᠬᠡ ᠡᠴᠡ ᠪᠡᠨ ᠥᠨᠳᠥᠷ ᠪᠣᠯᠤᠭᠰᠠᠨ ᠪᠣᠢ᠃ ᠰᠠᠨᠠᠬᠤ ᠳ᠋ᠤ᠌ ᠰᠠᠶᠢᠬᠠᠨ ᠯᠠ ᠬᠥᠬᠥ ᠪᠡᠨ ᠬᠥᠬᠥᠭᠦᠯᠵᠦ ᠪᠦᠪᠡᠢᠯᠡᠵᠦ᠂ ᠬᠠᠮᠢᠶᠠ ᠦᠭᠡᠢ ᠬᠥᠮᠦᠨ ᠡᠴᠡ ᠬᠥᠯ ᠬᠣᠷᠢᠵᠤ ᠪᠠᠢᠭᠰᠠᠨ ᠰᠢᠦ ᠳᠡ᠃ ᠴᠠᠭ ᠶᠠᠪᠤᠬᠤ ᠨᠢ ᠮᠥᠨ ᠴᠦ᠍ ᠲᠦᠷᠭᠡᠨ ᠶᠦᠮ ᠳᠠᠭ ᠠ᠋᠃
ᠠᠢᠯ ᠤ᠋ᠨ ᠡᠮᠡᠭᠡᠨ᠂ ᠬᠦᠦ ᠶ᠋ᠢ ᠠᠶᠤᠵᠤ ᠰᠣᠴᠢᠨ ᠤᠬᠢᠯᠠᠪᠠᠯ ᠬᠡᠷᠡᠭᠯᠡᠭᠡᠷᠡᠢ ᠭᠡᠵᠦ ᠬᠠᠷᠠ ᠲᠣᠮ ᠵᠢᠭᠠᠵᠤ ᠪᠠᠢᠭᠰᠠᠨ ᠢ᠋ ᠰᠠᠨᠠᠭᠠᠳ ᠴᠡᠷᠡᠨ ᠦ᠌ ᠢᠨᠢᠶᠡᠳᠦ ᠨᠢ ᠬᠦᠷᠴᠡᠢ᠃ ᠣᠷᠣᠨ ᠳᠣᠣᠷᠠ ᠠ᠋ᠴᠠ ᠪᠠᠨ ᠨᠢᠭᠡ ᠴᠢᠮᠬᠢ ᠰᠢᠷᠣᠢ᠂ ᠲᠤᠯᠭᠠᠨ ᠤ᠋ ᠳᠥᠷᠪᠡᠨ ᠲᠠᠯᠠ ᠠ᠋ᠴᠠ ᠨᠢᠭᠡ ᠨᠢᠭᠡ ᠴᠢᠮᠬᠢ ᠰᠢᠷᠣᠢ᠂ ᠪᠣᠱᠣᠭᠠᠨ ᠤ᠋ ᠲᠡᠨᠳᠡ ᠡᠴᠡ ᠨᠢᠭᠡ ᠴᠢᠮᠬᠢ ᠰᠢᠷᠣᠢ ᠲᠤᠰ ᠲᠤᠰ ᠠᠪᠤᠭᠠᠳ ᠤᠰᠤ ᠲᠠᠢ ᠱᠠᠵᠠᠩ( ᠱᠠᠭᠠᠵᠠᠩ) ᠠᠶᠠᠭᠠᠨ ᠳ᠋ᠤ᠌ ᠬᠢᠭᠡᠳ᠂ ᠭᠠᠳᠠᠭᠠ ᠭᠠᠷᠭᠠᠵᠤ ᠤᠰᠤ ᠶ᠋ᠢ ᠨᠢ ᠰᠠᠴᠤᠭᠠᠳ᠂ ᠠᠶᠠᠭᠠ ᠪᠠᠨ ᠪᠠᠷᠠᠭᠤᠨ ᠡᠮᠦᠨᠡ ᠵᠠᠪᠠᠭ ᠲᠤ᠌ ᠬᠥᠮᠥᠷᠢᠭᠦᠯᠦᠨ ᠬᠢᠭᠡᠷᠡᠢ ᠭᠡᠵᠦ ᠵᠢᠭᠠᠭᠰᠠᠨ ᠪᠢᠯᠡ᠃ ᠲᠡᠮᠦᠷ ᠢ᠋ ᠭᠡᠨᠡᠳᠲᠡ ᠤᠬᠢᠯᠠᠬᠤ ᠳ᠋ᠤ᠌᠂ ᠲᠡᠷᠡ ᠲᠣᠮ ᠢ᠋ ᠰᠡᠮᠡᠬᠡᠨ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠲᠣᠭᠠᠯᠠᠪᠠᠯ ᠨᠡᠯᠢᠶᠡᠳ ᠣᠯᠠᠨ ᠤᠳᠠᠭᠠ ᠦᠵᠡᠭᠰᠡᠨ ᠪᠠᠢᠬᠤ᠃ ᠰᠠᠨᠠᠭᠠ ᠳᠠᠭᠠᠳᠠᠭ ᠴᠤ᠌ ᠶᠤᠮ ᠤᠤ ᠪᠤᠤ ᠮᠡᠳᠡ᠂ ᠤᠬᠢᠯᠠᠬᠤ ᠪᠠᠨ ᠵᠣᠭᠰᠣᠳᠠᠭ ᠰᠢᠭ᠋ ᠰᠠᠨᠠᠭᠳᠠᠳᠠᠭ ᠰᠠᠨ᠃ ᠣᠳᠣ ᠲᠡᠮᠦᠷ ᠲᠣᠮᠣ ᠪᠣᠯᠴᠢᠭᠠᠳ( ᠪᠣᠯᠴᠢᠬᠠᠭᠠᠳ) ᠠᠪᠤ ᠠ᠋ᠴᠠ ᠪᠠᠨ ᠢᠯᠡᠭᠦᠦ ᠶᠠᠭᠤᠮᠠ ᠮᠡᠳᠡᠳᠡᠭ ᠪᠣᠯᠵᠠᠢ᠃ ᠨᠢᠳᠤᠨᠤᠨ ᠵᠤᠨ᠂ ᠠᠢᠯ ᠠᠬᠠ ᠳᠡᠭᠦᠦ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠤᠭᠯᠠᠵᠤ᠂ ᠲᠡᠮᠦᠷ ᠢ᠋ ᠰᠢᠯ ᠲᠡᠢ ᠤᠰᠤᠨ ᠠ᠋ᠴᠠ ᠨᠢᠭᠡ ᠰᠢᠯ ᠠᠶᠠᠭᠠᠨ ᠳ᠋ᠤ᠌ ᠬᠢᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠭᠡᠨᠡᠳᠲᠡ ᠲᠡᠷᠡ ᠤᠰᠤ ᠨᠢ ᠶᠠᠭᠠᠨ ᠤᠯᠠᠭᠠᠨ ᠪᠣᠯᠴᠢᠳᠠᠭ( ᠪᠣᠯᠴᠢᠬᠠᠳᠠᠭ) ᠶᠢᠯᠸᠢ ᠰᠢᠭ ᠰᠣᠨᠢᠨ ᠶᠠᠭᠤᠮᠠ ᠶ᠋ᠢ ᠶᠡᠬᠡ ᠰᠣᠨᠢᠷᠬᠠᠵᠤ ᠪᠢᠯᠡ᠃ ᠨᠢᠭᠡ ᠡᠳᠦᠷ ᠡᠪᠦᠭᠡᠨ ᠢ᠋᠂ ᠲᠠ ᠪᠦᠭᠦᠳᠡ ᠶ᠋ᠢᠨ ᠭᠠᠩᠰᠠᠨ ᠤ᠋ ᠤᠲᠤᠭᠠ ᠶ᠋ᠢ ᠪᠢ ᠡᠨᠡ ᠳ᠋ᠢᠽᠢ ᠪᠡᠷ ᠪᠥᠭᠯᠡᠭᠡᠰᠦᠲᠡᠢ ᠰᠢᠯ ᠠᠶᠠᠭᠠᠨ ᠳ᠋ᠤ᠌ ᠲᠡᠳᠡᠨ ᠬᠤᠷᠢᠶᠠᠨᠠ ᠭᠡᠵᠦ ᠭᠠᠢᠬᠠᠭᠤᠯᠤᠭᠠᠳ ᠣᠯᠠᠨ ᠢ᠋ ᠬᠠᠷᠠᠭᠰᠠᠭᠠᠷ ᠪᠠᠢᠲᠠᠯᠠ᠂ ᠳ᠋ᠢᠽᠢ ᠪᠡᠨ ᠡᠷᠭᠢᠭᠦᠯᠦᠭᠡᠳ ᠢᠷᠣᠭᠠᠷ ᠢ᠋ᠶ᠋ᠠᠷ ᠨᠢ ᠰᠢᠯ ᠠᠶᠠᠭᠠ ᠪᠠᠨ ᠪᠦᠲᠡᠭᠡᠮᠡᠭᠴᠡ ᠴᠠᠭᠠᠨ ᠤᠲᠤᠭᠠ ᠳᠣᠲᠣᠭᠰᠢ ᠨᠢ ᠰᠣᠷᠣᠨ ᠲᠠᠲᠠᠭᠰᠠᠨ ᠶᠤᠮ ᠰᠢᠭ᠋ ᠲᠡᠷᠡ ᠰᠢᠯ ᠠᠶᠠᠭᠠᠨ ᠤ᠋ ᠢᠷᠣᠭᠠᠷ ᠤᠷᠤᠭᠤ ᠬᠠᠷᠪᠤᠨ ᠣᠷᠣᠵᠤ ᠪᠢᠯᠡ᠃ ᠲᠡᠭᠡᠭᠡᠳ ᠬᠤᠪᠢᠯᠬᠤᠢ ᠤᠬᠠᠭᠠᠨ ᠭᠡᠵᠦ ᠰᠣᠨᠢᠨ ᠰᠠᠢᠬᠠᠨ ᠤᠬᠠᠭᠠᠨ ᠪᠠᠢᠳᠠᠭ ᠶᠤᠮ ᠭᠡᠵᠦ ᠲᠡᠷᠡ ᠶᠢᠯᠸᠢ ᠰᠢᠭ ᠶᠠᠭᠤᠮᠠ ᠶ᠋ᠢᠨ ᠢ᠋ᠶ᠋ᠡᠨ ᠤᠴᠢᠷ ᠢ᠋ ᠲᠠᠢᠯᠪᠤᠷᠢᠯᠠᠨ ᠬᠡᠯᠡᠵᠦ ᠪᠢᠯᠡ᠃ ᠡᠪᠦᠭᠡᠳ ᠭᠠᠢᠬᠠᠨ ᠰᠣᠨᠣᠰᠤᠭᠠᠳ᠂ ᠤᠷᠢᠳᠤ ᠬᠥᠬᠡ ᠰᠠᠷᠯᠤᠭᠲᠤ ᠪᠠᠳᠢᠷᠴᠢᠨ ᠭᠡᠵᠦ ᠨᠢᠭᠡ ᠬᠥᠮᠦᠨ ᠶᠠᠪᠤᠳᠠᠭ ᠰᠠᠨ᠃ ᠬᠣᠵᠢᠮ ᡀᠠ ᠪᠡᠢᠯᠡ ᠳ᠋ᠦ᠍ ᠬᠣᠣᠷᠯᠠᠭᠤᠯᠵᠤ ᠦᠬᠦᠭᠰᠡᠨ᠃ ᠲᠡᠷᠡ ᠪᠠᠳᠢᠷᠴᠢᠨ ᠢ᠋ ᠲᠦᠩᠫᠸᠡ ᠲᠡᠢ ᠤᠰᠤᠨ ᠳ᠋ᠤ᠌ ᠲᠤᠭᠤᠯᠭᠠ ᠬᠠᠶᠠᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ)᠂ ᠬᠤᠷᠴᠠ ᠴᠠᠭᠠᠨ ᠭᠠᠯ ᠪᠠᠳᠠᠷᠠᠨ ᠤᠰᠤᠨ ᠳᠡᠭᠡᠭᠦᠷ ᠳᠠᠪᠬᠢᠨ ᠰᠢᠲᠠᠳᠠᠭ ᠰᠣᠨᠢᠨ ᠶᠢᠯᠸᠢ ᠰᠢᠭ ᠶᠠᠭᠤᠮᠠ ᠦᠵᠡᠭᠦᠯᠵᠦ ᠮᠡᠷᠭᠡᠯᠡᠳᠡᠭ ᠰᠠᠨ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠲᠡᠮᠦᠷ ᠰᠣᠨᠣᠰᠤᠭᠠᠳ ᠢᠨᠢᠶᠡᠵᠦ᠂ ᠮᠠᠨ ᠤ᠋ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠬᠢᠴᠢᠶᠡᠯ ᠳᠡᠭᠡᠷᠡ ᠲᠡᠷᠡ ᠲᠤᠷᠰᠢᠯᠭᠠ ᠦᠵᠡᠭᠦᠯᠳᠡᠭ ᠶᠦᠮ ᠳᠡ ᠭᠡᠬᠦ ᠳ᠋ᠦ᠍ ᠲᠡᠷᠡ ᠲᠠᠨᠢ ᠲᠤᠭᠤᠯᠭᠠ ᠪᠢᠰᠢ ᠨᠠᠲ᠋᠂᠂᠂ ᠨᠠᠲ᠂᠂᠂ ᠶᠠᠭᠤ ᠭᠡᠵᠦ ᠬᠡᠯᠡᠯᠡ ᠳᠡ᠂ ᠬᠡᠯᠡᠨ ᠳ᠋ᠦ᠍ ᠣᠷᠣᠵᠤ ᠥᠭᠬᠦ ᠦᠭᠡᠢ ᠨᠢᠭᠡ ᠨᠡᠷᠡ ᠬᠡᠯᠡᠭᠰᠡᠨ ᠪᠢᠯᠡ᠃ ᠲᠡᠭᠡᠭᠡᠳ ᠲᠡᠷᠡ ᠪᠠᠳᠢᠷᠴᠢᠨ ᠢ᠋ ᠰᠢᠳᠢ ᠲᠡᠢ ᠬᠥᠮᠦᠨ ᠪᠢᠰᠢ᠂ ᠣᠯᠠᠨ ᠤ᠋ ᠬᠠᠷᠠᠩᠭᠤᠢ ᠪᠦᠳᠦᠭᠦᠯᠢᠭ ᠢ᠋ ᠠᠰᠢᠭᠯᠠᠨ ᠵᠠᠪᠰᠢᠵᠤ᠂ ᠬᠥᠮᠦᠨ ᠠᠮᠢᠲᠠᠨ ᠢ᠋ ᠮᠡᠬᠡᠯᠡᠵᠦ ᠶᠠᠪᠤᠭᠰᠠᠨ ᠬᠥᠮᠦᠨ ᠪᠠᠢᠵᠠᠢ ᠭᠡᠵᠦ ᠲᠠᠢᠯᠪᠤᠷᠢᠯᠠᠵᠤ ᠬᠡᠯᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠡᠪᠦᠭᠡᠳ ᠨᠡᠭᠡᠷᠡᠨ ᠯᠡ ᠲᠡᠢᠮᠦ ᠪᠠᠢᠵᠤ ᠯᠠ ᠳᠠ ᠭᠡᠵᠦ ᠢᠲᠡᠭᠡᠭᠰᠡᠨ ᠪᠢᠯᠡ᠃ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠲᠡᠭᠡᠵᠦ ᠶᠠᠷᠢᠵᠤ ᠪᠠᠢᠬᠤ ᠳ᠋ᠤ᠌ ᠶᠠᠭᠤᠲᠠᠢ ᠪᠠᠬᠠᠳᠤᠨ ᠰᠣᠨᠣᠰᠳᠠᠭ ᠪᠠᠢᠯᠠ᠃ ᠣᠳᠣ ᠤᠤᠭᠠᠨ ᠬᠦᠦ ᠮᠢᠨᠢ ᠠᠯᠤᠰ ᠬᠣᠯᠠ ᠶ᠋ᠢᠨ ᠮᠣᠰᠺᠸᠠ ᠣᠷᠣᠬᠤ ᠭᠡᠵᠦ ᠪᠠᠢᠨᠠ ᠰᠢᠦ᠃ ᠪᠠᠭᠠ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠪᠢ ᠮᠣᠰᠺᠸᠠ ᠣᠷᠣᠵᠤ ᠰᠤᠷᠭᠠᠭᠤᠯᠢ ᠬᠢᠨᠡ ᠭᠡᠵᠦ ᠪᠠᠢᠳᠠᠭ ᠨᠢ᠂ ᠣᠳᠣ ᠲᠡᠷᠡ ᠪᠠᠭᠠ ᠶ᠋ᠢᠨ ᠬᠦᠰᠡᠯ ᠶᠣᠰᠣᠭᠠᠷ ᠪᠣᠯᠵᠠᠢ ᠭᠡᠵᠦ ᠪᠣᠳᠣᠵᠤ ᠪᠠᠢᠲᠠᠯᠠ ᠪᠠᠨ᠂ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠠᠩᠬᠠ ᠮᠣᠰᠺᠸᠠ ᠳ᠋ᠤ᠌ ᠰᠤᠷᠭᠠᠭᠤᠯᠢ ᠬᠢᠯᠭᠡᠬᠦ ᠭᠡᠵᠦ ᠬᠡᠳᠦᠨ ᠬᠥᠮᠦᠨ ᠶᠠᠪᠤᠭᠤᠯᠬᠤ ᠳ᠋ᠤ᠌᠂ ᠨᠣᠶᠠᠳ ᠯᠠᠮᠠ ᠨᠠᠷ ᠰᠦᠷᠲᠡᠢ ᠴᠤᠤ ᠦᠭᠡ ᠲᠠᠷᠬᠠᠭᠠᠨ ᠬᠡᠯᠡᠯᠴᠡᠵᠦ ᠪᠠᠢᠭᠰᠠᠨ ᠨᠢ ᠰᠠᠨᠠᠭᠠᠨ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠣᠷᠣᠵᠠᠢ᠃ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠷᠣᠭᠤᠯᠤᠨᠠ ᠭᠡᠵᠦ ᠰᠤᠷᠤᠭᠴᠢᠳ ᠢ᠋ ᠮᠡᠬᠡᠯᠡᠵᠦ ᠠᠪᠠᠴᠢᠭᠠᠳ᠂ ᠤᠯᠠᠭᠠᠨ ᠣᠷᠣᠰ ᠤ᠋ᠨ ᠰᠦᠯᠳᠡ ᠲᠠᠬᠢᠬᠰᠠᠨ ᠶᠤᠮ ᠠ᠋᠃ ᠣᠳᠣ ᠲᠡᠷᠡ ᠰᠤᠷᠤᠭᠴᠢᠳ ᠠ᠋ᠴᠠ ᠠᠮᠢᠳᠤ ᠦᠯᠡᠳᠡᠭᠰᠡᠨ ᠬᠥᠮᠦᠨ ᠨᠢᠭᠡ ᠴᠦ᠍ ᠠᠯᠠᠭᠠ ᠭᠡᠵᠦ ᠬᠡᠯᠡᠯᠴᠡᠳᠡᠭ ᠪᠠᠢᠵᠤ ᠪᠢᠯᠡ᠃
ᠦᠨᠡᠨ ᠬᠤᠳᠠᠯ ᠢ᠋ ᠨᠢ ᠭᠠᠢᠬᠠᠵᠤ ᠪᠠᠲᠤᠪᠠᠶᠠᠷ ᠡᠪᠦᠭᠡᠨ ᠡᠴᠡ ᠴᠣᠬᠣᠮ ᠤᠴᠢᠷ ᠢ᠋ ᠠᠰᠠᠭᠤᠬᠤ ᠭᠡᠵᠦ ᠣᠴᠢᠭᠰᠠᠨ ᠢ᠋ᠶ᠋ᠠᠨ ᠴᠡᠷᠡᠨ ᠰᠠᠨᠠᠵᠠᠢ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠪᠠᠲᠤᠪᠠᠶᠠᠷ ᠡᠪᠦᠭᠡ ᠶ᠋ᠢᠨ ᠳ᠋ᠦ᠍ ᠢᠸᠠᠨ ᠡᠪᠦᠭᠡᠨ ᠭᠤᠸᠠᠢ ᠠᠢᠯᠴᠢᠯᠠᠵᠤ ᠪᠠᠢᠭᠰᠠᠨ ᠪᠢᠯᠡ᠃
ᠬᠣᠶᠠᠷ ᠡᠪᠦᠭᠡᠳ᠂ ᠴᠡᠷᠡᠨ ᠦ᠌ ᠲᠡᠷᠡ ᠴᠤᠤᠷᠬᠠᠯ ᠦᠭᠡ ᠶ᠋ᠢ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠨ ᠰᠠᠨᠳᠤᠷᠤᠨ ᠬᠡᠯᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠰᠣᠨᠣᠰᠤᠭᠠᠳ᠂ ᠨᠢᠳᠦᠨ ᠡᠴᠡ ᠪᠡᠨ ᠨᠢᠯᠪᠤᠰᠤ ᠭᠠᠷᠲᠠᠯᠠ ᠪᠠᠨ ᠢᠨᠢᠶᠡᠭᠰᠡᠨ ᠨᠢ ᠰᠠᠨᠠᠭᠠᠨ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠣᠷᠣᠵᠤ ᠢᠨᠢᠶᠡᠮᠰᠦᠭᠯᠡᠯᠡ᠃ ᠲᠡᠭᠡᠭᠡᠳ ᠢᠨᠢᠶᠡᠵᠦ ᠢᠨᠢᠶᠡᠵᠦ᠂ ᠬᠣᠶᠠᠷ ᠡᠪᠦᠭᠡᠳ ᠦ᠋ᠨ ᠲᠠᠢᠯᠪᠤᠷᠢᠯᠠᠵᠤ ᠬᠡᠯᠡᠭᠰᠡᠨ ᠨᠢ᠂ ᠤᠯᠠᠭᠠᠨ ᠣᠷᠣᠰ ᠤ᠋ᠨ ᠶᠣᠰᠣᠨ ᠳ᠋ᠤ᠌ ᠲᠡᠢᠮᠦ ᠵᠡᠷᠯᠢᠭ ᠮᠠᠭᠤᠬᠠᠢ ᠶᠣᠰᠣ ᠪᠠᠢᠳᠠᠭ ᠦᠭᠡᠢ ᠶᠦᠮ᠃ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯ ᠳ᠋ᠤ᠌ ᠳᠤᠷᠠ ᠦᠭᠡᠢ ᠤᠯᠤᠰ ᠲᠡᠭᠡᠵᠦ ᠬᠤᠳᠠᠯ ᠴᠤᠤ ᠦᠭᠡ ᠵᠣᠬᠢᠶᠠᠵᠤ᠂ ᠣᠯᠠᠨ ᠤ᠋ ᠰᠡᠳᠬᠢᠯ ᠦᠢᠮᠡᠭᠦᠯᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠭᠡᠵᠦ ᠬᠡᠯᠡᠭᠰᠡᠨ ᠨᠢ ᠰᠠᠨᠠᠭᠳᠠᠵᠤ᠂ ᠴᠡᠷᠡᠨ ᠭᠠᠢᠬᠠᠨ ᠪᠣᠳᠣᠯᠭᠠ ᠪᠣᠯᠵᠠᠢ᠃ ᠮᠥᠨ ᠴᠦ᠍ ᠰᠣᠨᠢᠨ ᠴᠠᠭ ᠪᠣᠯᠵᠤ ᠪᠠᠢᠭᠠ ᠶᠤᠮ ᠠ᠋ ᠳᠠ᠃ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠯᠠᠮᠠ ᠨᠠᠷ ᠢ᠋ ᠠᠮᠢᠲᠠᠨ ᠴᠥᠮ ᠪᠠᠭᠰᠢ ᠭᠡᠵᠦ ᠰᠢᠲᠦᠨ᠂ ᠲᠡᠳᠡᠨ ᠦ᠌ ᠬᠡᠯᠡᠵᠦ ᠵᠢᠭᠠᠭᠰᠠᠨ ᠢ᠋ ᠳᠠᠭᠠᠵᠤ᠂ ᠦᠭᠡ ᠪᠦᠷᠢ ᠶ᠋ᠢ ᠨᠢ ᠦᠨᠡᠮᠰᠢᠨ ᠢᠲᠡᠭᠡᠵᠦ ᠪᠠᠢᠳᠠᠭ ᠰᠠᠨ᠃ ᠣᠳᠣ ᠪᠣᠯᠲᠠᠯᠠ ᠯᠠᠮᠠ ᠪᠠᠭᠰᠢ ᠶ᠋ᠢᠨ ᠦᠭᠡ ᠭᠡᠳᠡᠭ ᠢ᠋ ᠢᠲᠡᠭᠡᠬᠦ ᠳ᠋ᠦ᠍ ᠬᠡᠴᠡᠭᠦᠦ᠂ ᠦᠨᠡᠨ ᠬᠤᠳᠠᠯ ᠢ᠋ ᠨᠢ ᠡᠰᠡ ᠮᠠᠭᠠᠳᠯᠠᠪᠠᠯ ᠭᠣᠷᠢ ᠦᠭᠡᠢ ᠪᠣᠯᠴᠢᠬᠠᠵᠠᠢ ᠭᠡᠵᠦ ᠪᠣᠳᠣᠵᠤ ᠰᠠᠭᠤᠲᠠᠯᠠ ᠨᠢ ᠭᠡᠷ ᠦ᠋ᠨ ᠭᠠᠳᠠᠭᠠ ᠬᠥᠮᠦᠨ ᠦ᠌ ᠠᠯᠬᠤᠬᠤ ᠴᠢᠮᠡᠭᠡ ᠰᠣᠨᠣᠰᠳᠠᠵᠤ᠂ ᠠᠢᠯ ᠤ᠋ᠨ ᠬᠢᠨᠢ ᠬᠥᠮᠦᠨ᠂ ᠴᠠᠭᠠᠨ ᠮᠥᠭᠥ ᠰᠢᠭ ᠴᠢᠭᠢᠷᠠᠭ ᠴᠢᠩᠭᠠ ᠪᠡᠶᠡ ᠲᠡᠢ᠂ ᠠᠷᠪᠠᠨ ᠲᠠᠪᠤᠨ ᠤ᠋ ᠰᠠᠷᠠ ᠰᠢᠭ᠋ ᠲᠣᠪ ᠲᠣᠭᠣᠷᠢᠭ ᠴᠢᠷᠠᠢ ᠲᠠᠢ᠂ ᠨᠠᠷᠠᠨ ᠳ᠋ᠤ᠌ ᠭᠠᠩᠳᠠᠭᠰᠠᠨ ᠬᠥᠷᠥᠰᠥᠯᠢᠭ ᠬᠦᠷᠡᠩ ᠨᠢᠭᠤᠷ ᠤ᠋ᠨ ᠬᠣᠶᠠᠷ ᠬᠠᠴᠠᠷ ᠤᠪ ᠤᠯᠠᠭᠠᠨ᠂ ᠠᠳᠢᠶᠠ ᠭᠡᠳᠡᠭ ᠡᠷᠡᠭᠦᠯ ᠰᠠᠢᠬᠠᠨ ᠵᠠᠯᠠᠭᠤ ᠡᠬᠡᠨᠡᠷ ᠣᠷᠣᠵᠤ ᠢᠷᠡᠯᠡ᠃ ᠲᠡᠷᠡ ᠵᠠᠯᠠᠭᠤ ᠡᠮᠡᠭᠲᠡᠢ ᠶ᠋ᠢᠨ ᠥᠳᠬᠡᠨ ᠭᠡᠭᠴᠢ ᠶ᠋ᠢᠨ ᠬᠥᠮᠥᠰᠬᠡ ᠨᠢ ᠤᠷᠲᠤᠯᠢᠭ ᠲᠣᠷᠮᠣᠭᠣᠷ ᠨᠢᠳᠦ ᠶ᠋ᠢ ᠨᠢ ᠤᠯᠠᠮ ᠭᠠᠯ ᠲᠠᠢ ᠰᠦᠷᠲᠡᠢ ᠪᠣᠯᠭᠠᠵᠤ᠂ ᠴᠢᠪᠠᠭᠠ ᠤᠯᠠᠭᠠᠨ ᠤᠷᠤᠭᠤᠯ ᠤ᠋ᠨ ᠴᠠᠭᠠᠨᠠ ᠠ᠋ᠴᠠ ᠰᠢᠳᠦ ᠮᠠᠭᠤᠲᠠᠢ ᠬᠣᠲᠠ ᠶ᠋ᠢᠨ ᠬᠥᠮᠦᠨ ᠦ᠌ ᠬᠣᠷᠣᠬᠠᠢ ᠬᠦᠷᠦᠮᠡᠷ ᠭᠢᠯᠠᠯᠵᠠᠭᠰᠠᠨ ᠰᠠᠢᠬᠠᠨ ᠲᠤᠩ ᠴᠠᠭᠠᠨ ᠰᠢᠳᠦ ᠦᠵᠡᠭᠳᠡᠬᠦ ᠠᠵᠢ᠃
ᠮᠠᠨ ᠤ᠋ ᠲᠠᠷᠠᠭ ᠪᠦᠷᠢᠯᠳᠦᠵᠦ ᠥᠭᠬᠦ ᠦᠭᠡᠢ ᠪᠠᠢᠨᠠ᠃ ᠲᠠᠷᠠᠭ ᠤ᠋ᠨ ᠢ᠋ᠶ᠋ᠠᠨ ᠬᠥᠷᠥᠩᠭᠡ ᠡᠴᠡ ᠥᠭᠭᠦᠨᠡ ᠤᠤ? ᠦᠬᠡᠷ ᠦ᠋ᠨ ᠨᠣᠢᠲᠠᠨ ᠪᠠᠭᠠᠰᠤ ᠪᠡᠷ ᠴᠦ᠍ ᠲᠠᠷᠠᠭ ᠪᠦᠷᠢᠵᠦ ᠶᠠᠳᠠᠯᠠ᠃ ᠶᠡᠷᠦ ᠪᠣᠯᠬᠤ ᠪᠠᠨ ᠪᠠᠢᠵᠠᠢ᠂ ᠯᠠᠮᠠ ᠵᠠᠯᠠᠵᠤ ᠠᠯᠲᠠᠨᠭᠡᠷᠡᠯ ᠦ᠋ᠨ ᠰᠤᠳᠤᠷ ᠤᠩᠰᠢᠭᠤᠯᠤᠮᠠᠷ ᠪᠣᠯᠤᠭᠠᠳ ᠪᠠᠢᠨᠠ ᠰᠢᠦ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠲᠠᠷᠠᠭ ᠪᠦᠷᠢᠳᠡᠭ ᠰᠠᠪᠠ ᠪᠠᠨ ᠰᠠᠢᠨ ᠤᠬᠢᠶᠠᠵᠤ ᠴᠡᠪᠡᠷᠯᠡ᠃ ᠨᠢᠳᠤᠨᠤᠨ ᠵᠢᠯ ᠮᠠᠨ ᠤ᠋ ᠲᠠᠷᠠᠭ ᠪᠠᠰᠠ ᠪᠦᠷᠢᠯᠳᠦᠬᠦ ᠪᠡᠨ ᠪᠠᠢᠭᠠᠳ᠂ ᠭᠠᠢᠬᠠᠰᠢ ᠪᠠᠨ ᠪᠠᠷᠠᠵᠤ ᠪᠠᠢᠬᠤ ᠳ᠋ᠤ᠌᠂ ᠲᠡᠮᠦᠷ᠂ ᠰᠠᠪᠠ ᠪᠠᠨ ᠰᠠᠢᠨ ᠴᠡᠪᠡᠷᠯᠡ᠂ ᠰᠠᠪᠠ ᠮᠠᠭᠤᠬᠠᠢ ᠪᠣᠯᠤᠭᠠᠳ ᠢᠷᠡᠪᠡᠯ ᠬᠣᠣᠷᠲᠠᠢ ᠪᠠᠺᠲ᠋ᠧᠷᠢ ᠪᠣᠢ ᠪᠣᠯᠵᠤ ᠲᠠᠷᠠᠭ ᠪᠦᠷᠢᠯᠳᠦᠳᠡᠭ ᠦᠭᠡᠢ ᠶᠦᠮ ᠭᠡᠵᠦ ᠬᠡᠯᠡᠵᠦ ᠥᠭᠭᠦᠭᠰᠡᠨ ᠪᠢᠯᠡ᠃ ᠨᠠᠮᠠ ᠶ᠋ᠢ ᠢᠲᠡᠭᠡᠬᠦ ᠦᠭᠡᠢ ᠳ᠋ᠦ᠍᠂ ᠥᠪᠡᠷ ᠢ᠋ᠶ᠋ᠡᠨ ᠲᠡᠷᠡ ᠰᠠᠪᠠ ᠶ᠋ᠢ ᠲᠠᠰᠤ ᠤᠬᠢᠶᠠᠵᠤ᠂ ᠪᠤᠴᠠᠯᠤᠭᠰᠠᠨ ᠤᠰᠤ ᠪᠠᠷ ᠰᠢᠯᠵᠠᠯᠤᠭᠠᠳ ᠥᠭᠭᠦᠭᠰᠡᠨ ᠨᠢ ᠲᠠᠷᠠᠭ ᠪᠦᠷᠢᠭᠡᠳ ᠦᠵᠡᠪᠡᠯ᠂ ᠵᠢᠭᠲᠡᠢᠬᠡᠨ ᠰᠠᠢᠬᠠᠨ ᠲᠠᠷᠠᠭ ᠪᠣᠯᠵᠤ ᠪᠢᠯᠡ᠃ ᠤᠷᠢᠳᠤ ᠶ᠋ᠢᠨ ᠤᠯᠤᠰ᠂ ᠮᠠᠭᠤ ᠵᠦᠭ ᠦ᠋ᠨ ᠶᠠᠭᠤᠮᠠ ᠰᠠᠪᠠ ᠪᠤᠵᠠᠷᠯᠠᠭᠠᠳ ᠲᠠᠷᠠᠭ ᠪᠦᠷᠢᠯᠳᠦᠵᠦ ᠥᠭᠳᠡᠭ ᠦᠭᠡᠢ ᠭᠡᠵᠦ ᠬᠡᠯᠡᠯᠴᠡᠳᠡᠭ ᠪᠠᠢᠭᠰᠠᠨ ᠰᠢᠦ ᠳᠡ᠃ ᠲᠡᠷᠡ ᠱᠠᠯ ᠬᠤᠳᠠᠯ ᠪᠠᠢᠵᠠᠢ ᠭᠡᠵᠦ ᠴᠡᠷᠡᠨ᠂ ᠠᠳᠢᠶᠠ ᠶ᠋ᠢᠨ ᠢᠷᠡᠬᠦ ᠶ᠋ᠢᠨ ᠡᠮᠦᠨᠡ ᠪᠣᠳᠣᠵᠤ ᠪᠠᠢᠭᠰᠠᠨ ᠪᠣᠳᠣᠯᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠰᠡᠳᠬᠢᠭᠳᠡᠯ ᠢ᠋ᠶ᠋ᠡᠷ ᠶᠠᠷᠢᠵᠠᠢ᠃
ᠴᠡᠷᠡᠨ ᠦ᠌ ᠴᠡᠪᠡᠷᠬᠡᠨ ᠭᠡᠭᠴᠢ ᠶ᠋ᠢᠨ ᠤᠬᠢᠶᠠᠭᠰᠠᠨ ᠮᠣᠳᠣᠨ ᠪᠣᠷᠲᠣᠭᠣ ᠠ᠋ᠴᠠ ᠲᠠᠷᠠᠭ ᠬᠢᠵᠦ ᠥᠭᠬᠦ ᠳ᠋ᠦ᠍᠂ ᠠᠳᠢᠶᠠ ᠰᠠᠪᠠ ᠲᠣᠰᠤᠭᠠᠳ᠂
— ᠯᠠᠮᠠ ᠨᠠᠷ᠂ ᠰᠠᠪᠠ ᠪᠠᠨ ᠤᠬᠢᠶᠠᠪᠠᠯ ᠪᠤᠶᠠᠨ ᠬᠡᠰᠢᠭ ᠢ᠋ᠶ᠋ᠡᠨ ᠤᠬᠢᠶᠠᠴᠢᠬᠠᠨᠠ ᠭᠡᠳᠡᠭ ᠪᠢᠯᠡ ᠯᠠ ᠬᠡᠮᠡᠪᠡᠰᠦ᠂
— ᠶᠠᠳᠠᠭᠤ ᠬᠥᠮᠦᠨ ᠰᠠᠪᠠ ᠪᠠᠨ ᠤᠬᠢᠶᠠᠬᠤ ᠦᠭᠡᠢ ᠡᠴᠡ ᠪᠣᠯᠵᠤ ᠪᠤᠶᠠᠨ ᠬᠡᠰᠢᠭ ᠨᠢ ᠨᠡᠮᠡᠭᠳᠡᠭᠰᠡᠨ ᠢ᠋ ᠶᠡᠷᠦ ᠬᠥᠮᠦᠨ ᠠᠮᠢᠲᠠᠨ ᠲᠣᠭᠣᠯᠤᠭᠠ ᠦᠭᠡᠢ ᠪᠠᠢᠬᠤ᠃ ᠬᠠᠷᠠ ᠪᠤᠷᠲᠠᠭ ᠠ᠋ᠴᠠ ᠬᠥᠮᠦᠨ ᠡᠪᠡᠳᠴᠢᠨ ᠣᠯᠵᠤ᠂ ᠲᠠᠷᠠᠭ ᠬᠦᠷᠲᠡᠯᠡ ᠪᠦᠷᠢᠯᠳᠦᠳᠡᠭ ᠦᠭᠡᠢ ᠶᠦᠮ ᠭᠡᠵᠦ ᠬᠦᠦ ᠮᠢᠨᠢ ᠨᠠᠳᠠ ᠳ᠋ᠤ᠌ ᠬᠡᠯᠡᠵᠦ ᠥᠭᠭᠦᠭᠰᠡᠨ᠃ ᠲᠡᠭᠦᠨ ᠢ᠋ ᠬᠦᠦ ᠳ᠋ᠦ᠍ ᠮᠢᠨᠢ ᠡᠷᠳᠡᠮ ᠲᠡᠢ ᠤᠯᠤᠰ᠂ ᠪᠠᠭᠰᠢ ᠨᠠᠷ ᠨᠢ ᠬᠡᠯᠡᠵᠦ ᠥᠭᠭᠦᠭᠰᠡᠨ ᠪᠢᠯᠡ ᠭᠡᠲᠡᠯᠡ ᠨᠢ᠂
— ᠮᠠᠨ ᠤ᠋ ᠡᠮᠡᠭᠡ᠂ ᠰᠠᠪᠠ ᠰᠠᠭᠠᠯᠢ ᠪᠠᠨ ᠤᠬᠢᠶᠠᠬᠤ ᠲᠤᠩ ᠴᠤ᠌ ᠳᠤᠷᠠ ᠦᠭᠡᠢ ᠪᠠᠢᠳᠠᠭ ᠶᠤᠮ ᠳᠠ ᠭᠡᠵᠦ ᠠᠳᠢᠶᠠ ᠰᠠᠨᠠᠭᠠ ᠠᠯᠳᠠᠭᠠᠳ᠂ ᠡᠮᠡᠭᠡ ᠮᠠᠨᠢ ᠢᠷᠡᠵᠦ ᠶᠠᠪᠤᠬᠤ ᠰᠢᠪ ᠳᠡ ᠭᠡᠵᠡᠢ᠃
ᠬᠥᠯ ᠢ᠋ᠶ᠋ᠡᠨ ᠴᠢᠷᠦᠭᠰᠡᠭᠡᠷ᠂ ᠠᠯᠲᠠᠨ ᠯᠤᠤ ᠰᠡᠢᠯᠦᠮᠡᠯ ᠪᠠᠷᠢᠭᠤᠯᠲᠠᠢ ᠵᠢᠷᠭᠤᠭᠠᠲᠠᠢ ᠲᠠᠶᠠᠭ ᠲᠤᠯᠤᠭᠰᠠᠨ᠂ ᠮᠠᠰᠢ ᠥᠲᠡᠯᠦᠭᠰᠡᠨ ᠡᠮᠡᠭᠡᠨ ᠣᠷᠣᠵᠤ ᠢᠷᠡᠮᠡᠭᠴᠡ ᠠᠳᠢᠶᠠ᠂ ᠡᠮᠡᠭᠡ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠴᠡᠷᠡᠨ ᠦ᠌ ᠣᠷᠣ ᠶ᠋ᠢᠨ ᠵᠦᠭ ᠵᠠᠮ ᠲᠠᠯᠪᠢᠵᠤ ᠥᠭᠭᠦᠭᠡᠳ ᠭᠠᠳᠠᠭᠰᠢ ᠪᠠᠨ ᠭᠠᠷᠴᠠᠢ᠃ ᠡᠮᠡᠭᠡᠨ ᠶᠣᠣᠯᠠᠭᠰᠠᠭᠠᠷ ᠣᠷᠣ ᠳᠡᠭᠡᠷᠡ ᠰᠠᠭᠤᠭᠠᠳ ᠰᠣᠬᠣᠭᠤᠷ ᠨᠢᠳᠦ ᠪᠡᠨ ᠠᠨᠢᠪ ᠠᠨᠢᠪ ᠬᠢᠭᠰᠡᠭᠡᠷ ᠴᠡᠷᠡᠨ ᠡᠴᠡ᠂
— ᠬᠡᠦᠬᠡ ᠠ᠋᠂ ᠫᠠᠭᠮᠠ ᠴᠢᠮᠠ ᠠ᠋ᠴᠠ ᠨᠢᠭᠡ ᠶᠠᠭᠤᠮᠠ ᠣᠯᠵᠤ ᠥᠭᠭᠦᠭᠡᠴᠢ ᠭᠡᠵᠦ ᠨᠠᠳᠠ ᠳ᠋ᠤ᠌ ᠵᠠᠬᠢᠭᠰᠠᠨ ᠪᠢᠯᠡ᠃ ᠠᠴᠢ ᠲᠠᠢ ᠪᠣᠯᠬᠤ ᠭᠣᠷᠢᠳᠠᠯᠭᠠ ᠲᠠᠢ ᠪᠣᠯᠤᠭᠠᠳ᠂ ᠡᠯᠢᠭᠡ ᠪᠦᠲᠦᠨ ᠠᠢᠯ ᠠ᠋ᠴᠠ ᠬᠡᠦᠬᠡᠳ ᠦ᠋ᠨ ᠬᠤᠪᠴᠠᠰᠤ ᠣᠯᠵᠤ ᠥᠭᠭᠦᠨᠡ ᠤᠤ ᠭᠡᠵᠦ ᠨᠠᠳᠠ ᠳ᠋ᠤ᠌ ᠠᠯᠢ ᠬᠡᠳᠦᠢᠨ ᠵᠠᠬᠢᠭᠰᠠᠨ ᠶᠤᠮᠰᠠᠨ( ᠶᠤᠮ ᠰᠠᠨ) ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂ ᠴᠡᠷᠡᠨ ᠨᠤᠲᠤᠭ ᠤᠰᠤᠨ ᠤ᠋ ᠠᠬᠠ ᠳᠡᠭᠦᠦ ᠨᠠᠷ ᠲᠤ᠌《 ᠡᠯᠢᠭᠡ ᠪᠦᠲᠦᠨ ᠠᠢᠯ》 ᠭᠡᠵᠦ ᠬᠡᠯᠡᠯᠴᠡᠭᠦᠯᠵᠦ ᠪᠠᠢᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠳᠣᠲᠣᠷᠠ ᠨᠢ ᠰᠠᠢᠬᠠᠨ ᠮᠡᠲᠦ ᠰᠠᠨᠠᠭᠳᠠᠪᠠᠴᠤ᠂ ᠪᠠᠰᠠ ᠲᠡᠭᠡᠵᠦ ᠬᠡᠯᠡᠯᠴᠡᠳᠡᠭ ᠡᠴᠡ ᠪᠠᠬᠠᠨ ᠡᠮᠢᠶᠡᠬᠦ ᠰᠡᠳᠬᠢᠯ ᠬᠠᠮᠲᠤ ᠲᠥᠷᠥᠯᠴᠡᠨ᠂ ᠨᠢᠭᠡᠨᠲᠡ ᠬᠥᠮᠦᠨ ᠭᠤᠶᠤᠵᠤ ᠪᠠᠢᠭᠠ ᠠ᠋ᠴᠠ ᠬᠣᠢᠰᠢ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ ᠭᠡᠵᠦ ᠪᠣᠳᠣᠭᠠᠳ ᠠᠪᠳᠠᠷᠠ ᠪᠠᠨ ᠠᠭᠤᠳᠠᠯᠵᠤ᠂ ᠲᠡᠮᠦᠷ ᠦ᠋ᠨ ᠪᠠᠭᠠ ᠶ᠋ᠢᠨ ᠥᠮᠥᠳᠥ ᠭᠠᠷᠭᠠᠭᠠᠳ ᠥᠭᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠠ᠋᠂ ᠶᠠᠭᠠᠬᠢᠭᠰᠠᠨ ᠰᠠᠢᠨ ᠶᠤᠮ ᠪᠣᠢ? ᠤᠷᠲᠤ ᠨᠠᠰᠤᠲᠠᠢ ᠤᠳᠠᠭᠠᠨ ᠵᠢᠷᠭᠠᠯᠲᠠᠢ ᠪᠣᠯᠤᠭᠠᠷᠠᠢ! ᠫᠠᠭᠮᠠ ᠶᠡᠬᠡᠯᠡ (ᠶᠡᠬᠡ ᠯᠡ) ᠪᠠᠶᠠᠷᠯᠠᠨᠠ ᠳᠡ᠃ ᠶᠣᠬᠣ ᠳᠠ᠂ ᠬᠥᠯ ᠶᠠᠩᠭᠢᠨᠠᠵᠤ ᠪᠠᠢᠨᠠ᠃ ᠲᠩᠷᠢ ᠮᠠᠭᠤᠬᠠᠢ ᠪᠣᠯᠬᠤ ᠨᠢ ᠤᠤ ᠳᠠ ᠭᠡᠳ ᠡᠯᠡᠩᠬᠡᠢ ᠬᠠᠭᠤᠴᠢᠨ ᠭᠤᠲᠤᠯ ᠲᠠᠢ ᠬᠥᠯ ᠢ᠋ᠶ᠋ᠡᠨ ᠴᠢᠷᠦᠭᠰᠡᠭᠡᠷ ᠡᠭᠦᠳᠡᠨ ᠦ᠌ ᠵᠦᠭ ᠬᠠᠨᠳᠤᠲᠠᠯᠠ᠂ ᠭᠠᠳᠠᠨᠠ ᠠ᠋ᠴᠠ ᠠᠳᠢᠶᠠ ᠳᠤᠤᠭᠠᠷᠴᠤ᠂
— ᠰᠢᠷᠴᠢᠨ ᠭᠤᠸᠠᠢ ᠢᠷᠡᠵᠦ ᠶᠠᠪᠤᠨᠠ! ᠪᠢ ᠬᠠᠯᠠᠭᠤᠨ ᠴᠠᠢ ᠠᠪᠴᠢᠷᠠᠶᠠ᠃ ᠮᠠᠨ ᠤ᠋ ᠴᠠᠢ ᠰᠡᠪ ᠰᠠᠶᠢᠬᠠᠨ ᠪᠤᠴᠠᠯᠤᠭᠰᠠᠨ ᠭᠡᠵᠡᠢ᠃
ᠴᠡᠷᠡᠨ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠥᠭᠡᠳᠡ ᠡᠴᠡ ᠤᠭᠲᠤᠷᠠ ᠭᠠᠷᠪᠠᠰᠤ᠂ ᠰᠢᠷᠴᠢᠨ ᠶᠡᠬᠡᠯᠡ( ᠶᠡᠬᠡ ᠯᠡ) ᠪᠠᠶᠠᠷᠲᠠᠢ ᠬᠥᠭᠵᠢᠯᠲᠡᠢ ᠪᠡᠷ ᠠᠢᠯ ᠭᠡᠷ ᠦ᠋ᠨ ᠬᠢᠨ ᠦ᠌ ᠪᠡᠨ ᠮᠡᠨᠳᠦ ᠶ᠋ᠢ ᠮᠡᠳᠡᠭᠡᠳ᠂
— ᠮᠠᠨᠠᠢᠬᠢᠨ (ᠮᠠᠨ ᠤ᠋ ᠬᠢᠨ) ᠢ᠋ᠶ᠋ᠡᠷ ᠳᠠᠭᠠᠷᠢᠭᠠᠳ ᠭᠠᠷᠤᠭᠰᠠᠨ ᠠᠶᠠᠨᠴᠢᠨ ᠲᠠᠢ ᠵᠠᠮ ᠳ᠋ᠠᠭᠠᠨ ( ᠳ᠋ᠤ᠌ ᠪᠠᠨ) ᠠᠭᠤᠯᠵᠠᠯᠠ᠃ ᠬᠦᠦ ᠪᠡᠨ ᠬᠣᠢᠰᠢ ᠪᠠᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠶᠠᠪᠤᠬᠤ ᠨᠢ ᠭᠡᠵᠦ ᠳᠤᠭᠤᠯᠤᠭᠠᠳ ᠶᠡᠬᠡ ᠪᠠᠶᠠᠷᠯᠠᠯᠠ᠃ ᠥᠴᠥᠭᠡᠳᠦᠷ ᠥᠷᠲᠡᠭᠡᠨ ᠦ᠌ ᠪᠡᠨ ᠠᠯᠪᠠ ᠬᠠᠭᠠᠬᠤ ᠬᠤᠭᠤᠴᠠᠭᠠ ᠶ᠋ᠢ ᠭᠦᠢᠴᠡᠭᠡᠳ ᠠᠭᠲᠠ ᠪᠠᠨ ᠠᠳᠤᠭᠤᠨ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠨᠡᠢᠯᠡᠭᠦᠯᠦᠭᠡᠳ᠂ ᠰᠤᠷᠭᠠᠭᠤᠯᠢ ᠪᠠᠷ ᠳᠠᠭᠠᠷᠢᠭᠠᠳ᠂ ᠵᠢᠷᠭᠠᠯ ᠬᠦᠦ ᠲᠡᠢ ᠪᠡᠨ ᠠᠭᠤᠯᠵᠠᠭᠠᠳ ᠢᠷᠡᠯᠡ᠃ ᠪᠡᠶᠡ ᠰᠠᠢᠨ᠂ ᠨᠣᠮ ᠢ᠋ᠶ᠋ᠠᠨ ᠰᠠᠢᠨ ᠦᠵᠡᠵᠦ ᠪᠠᠢᠨᠠ᠃
ᠠᠳᠢᠶᠠ ᠠᠭᠤᠷ ᠰᠠᠪᠰᠠᠭᠰᠠᠨ ᠳᠣᠩᠪᠣ ᠲᠠᠢ ᠬᠠᠯᠠᠭᠤᠨ ᠴᠠᠢ ᠠᠪᠴᠢᠷᠠᠭᠠᠳ ᠵᠢᠭᠠᠯᠬᠠᠨ ᠰᠠᠭᠤᠵᠤ ᠪᠠᠢᠭᠠᠳ ᠭᠠᠷᠴᠤ ᠣᠳᠤᠯᠠ᠃ ᠴᠡᠷᠡᠨ᠂ ᠲᠡᠮᠦᠷ ᠦ᠋ᠨ ᠪᠢᠴᠢᠭ ᠭᠠᠷᠭᠠᠭᠠᠳ ᠰᠢᠷᠴᠢᠨ ᠳ᠋ᠦ᠍ ᠦᠭᠪᠡᠰᠦ᠂ ᠲᠣᠭᠳᠣᠢ ᠶ᠋ᠢ ᠨᠢ ᠵᠠᠳᠠᠯᠵᠤ ᠤᠩᠰᠢᠭᠰᠠᠨ ᠨᠢ᠂
ᠬᠦᠦ ᠲᠡᠮᠦᠷ ᠬᠢᠴᠢᠶᠡᠩᠭᠦᠢᠯᠡᠨ᠂
ᠠᠴᠢᠲᠤ ᠠᠪᠤ ᠡᠵᠢ᠂ ᠳᠡᠭᠦᠦ ᠵᠢᠷᠭᠠᠯ ᠤ᠋ᠨ ᠠᠮᠤᠷ ᠢ᠋ ᠡᠷᠢᠮᠦᠢ᠃ ᠠᠪᠤ ᠡᠵᠢ᠂ ᠳᠡᠭᠦᠦ ᠴᠥᠮ ᠮᠡᠨᠳᠦ ᠪᠣᠢ ᠵᠠ᠃ ᠪᠢ ᠡᠨᠳᠡ ᠮᠡᠨᠳᠦ ᠪᠠᠢᠨᠠ᠃ ᠨᠠᠮᠠᠶ᠋ᠢ( ᠨᠠᠮᠠ ᠶ᠋ᠢ )ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠪᠠᠷ ᠬᠣᠯᠪᠣᠭᠠᠲᠤ ᠤᠯᠤᠰ ᠤ᠋ᠨ ᠨᠡᠢᠰᠯᠡᠯ ᠮᠣᠰᠺᠸᠠ ᠶᠠᠪᠤᠭᠤᠯᠬᠤ ᠪᠣᠯᠵᠤ᠂ ᠮᠢᠨᠦ ᠬᠡᠳᠦ ᠶ᠋ᠢᠨ ᠬᠦᠰᠡᠯ ᠰᠡᠳᠬᠢᠯᠴᠢᠯᠡᠨ ᠪᠦᠲᠦᠵᠡᠢ᠃ ᠡᠮᠴᠢ᠂ ᠪᠢᠳᠡ ᠪᠦᠭᠦᠳᠡ ᠶ᠋ᠢ ᠦᠵᠡᠭᠡᠳ᠂ ᠶᠠᠪᠤᠵᠤ ᠪᠣᠯᠤᠨᠠ ᠬᠡᠮᠡᠵᠡᠢ᠃ ᠪᠢᠳᠡᠨ ᠳ᠋ᠦ᠍ ᠪᠡᠶᠡ ᠬᠠᠮᠠᠭᠠᠯᠠᠬᠤ ᠪᠢᠴᠢᠭ᠂ ᠵᠠᠮ ᠤ᠋ᠨ ᠵᠠᠷᠤᠳᠠᠯ᠂ ᠬᠤᠪᠴᠠᠰᠤ ᠬᠤᠨᠠᠷ ᠠᠪᠬᠤ ᠮᠥᠩᠭᠥ ᠲᠠᠯᠪᠢᠨ ᠣᠯᠭᠣᠵᠤ᠂ ᠮᠠᠷᠭᠠᠰᠢ ᠮᠠᠰᠢᠨ ᠢ᠋ᠶ᠋ᠠᠷ ᠠᠷᠤ ᠬᠢᠶᠠᠭᠲᠤ ᠬᠡᠮᠡᠬᠦ ᠬᠣᠲᠠ ᠣᠷᠣᠬᠤ ᠪᠣᠯᠤᠯᠠ᠃ ᠲᠡᠨᠳᠡ ᠠ᠋ᠴᠠ ᠳᠡᠭᠡᠳᠦ — ᠡᠭᠦᠳᠡ ᠬᠣᠲᠠ ᠬᠦᠷᠲᠡᠯᠡ ᠶᠠᠪᠤᠳᠠᠭ ᠭᠠᠯᠲᠤ ᠣᠩᠭᠣᠴᠠᠨ ᠳ᠋ᠤ᠌ ᠰᠠᠭᠤᠵᠤ᠂ ᠳᠡᠭᠡᠳᠦ — ᠡᠭᠦᠳᠡ ᠡᠴᠡ ᠭᠠᠯᠲᠤ ᠲᠡᠷᠭᠡ ᠪᠡᠷ ᠶᠠᠪᠤᠬᠤ ᠪᠣᠯᠤᠨᠠ᠃ ᠬᠣᠯᠠ ᠭᠠᠵᠠᠷ ᠶᠠᠪᠤᠵᠤ᠂ ᠰᠣᠨᠢᠨ ᠰᠠᠢᠬᠠᠨ ᠶᠠᠭᠤᠮᠠ ᠦᠵᠡᠨᠡ ᠭᠡᠵᠦ ᠪᠢᠳᠡ ᠪᠦᠭᠦᠳᠡ ᠮᠠᠰᠢ ᠪᠠᠶᠠᠷᠯᠠᠵᠤ ᠪᠠᠢᠨᠠ᠃
ᠶᠠᠪᠤᠬᠤ ᠰᠢᠢᠳ ᠭᠠᠷᠬᠤ ᠶ᠋ᠢᠨ ᠡᠮᠦᠨᠡ᠂ ᠪᠢ ᠬᠡᠪᠯᠡᠬᠦ ᠶ᠋ᠢ ᠵᠠᠪᠳᠤᠨ ᠪᠣᠢ ᠬᠡᠳᠦᠨ ᠰᠤᠷᠬᠤ ᠪᠢᠴᠢᠭ ᠨᠣᠣᠷᠠᠭ ᠠ᠋ᠴᠠ ᠨᠢ ᠰᠡᠢᠷᠡᠭᠦᠯᠦᠨ ᠪᠢᠴᠢᠵᠦ᠂ ᠣᠯᠤᠭᠰᠠᠨ ᠮᠥᠩᠭᠥ ᠪᠡᠷ ᠢ᠋ᠶ᠋ᠡᠨ ᠲᠠ ᠪᠦᠬᠦᠨ ᠳ᠋ᠦ᠍ ᠥᠴᠦᠬᠡᠨ ᠪᠡᠯᠡᠭ ᠪᠣᠯᠭᠠᠵᠤ᠂ ᠠᠪᠤ ᠳ᠋ᠤ᠌ ᠳᠤᠷᠳᠤᠩ ᠪᠦᠰᠡ᠂ ᠡᠵᠢ ᠳ᠋ᠦ᠍ ᠲᠣᠯᠢ᠂ ᠳᠡᠪᠡᠯ ᠦ᠋ᠨ ᠫᠦᠦᠰᠦᠦ᠂ ᠳᠡᠭᠦᠦ ᠳ᠋ᠦ᠍ ᠴᠢᠪᠠᠭᠠ᠂ ᠪᠢᠴᠢᠭ ᠦ᠋ᠨ ᠰᠠᠪᠠ ᠶᠠᠪᠤᠭᠤᠯᠤᠯᠠ᠃ ᠠᠴᠢᠲᠤ ᠠᠪᠤ ᠡᠵᠢ ᠮᠢᠨᠢ ᠠ᠋! ᠮᠢᠨᠦ ᠬᠣᠢᠨᠠ ᠠ᠋ᠴᠠ ᠰᠡᠳᠬᠢᠯ ᠰᠠᠨᠠᠭᠠ ᠪᠠᠨ ᠪᠢᠲᠡᠭᠡᠢ ᠵᠣᠪᠠᠭᠠᠷᠠᠢ᠃ ᠪᠢ ᠣᠨᠴᠠ ᠰᠠᠢᠨ ᠰᠤᠷᠤᠭᠠᠳ᠂ ᠬᠠᠪᠤᠷ ᠰᠤᠷᠭᠠᠭᠤᠯᠢ ᠶ᠋ᠢᠨ ᠴᠢᠯᠥᠭᠡ ᠪᠡᠷ ᠭᠡᠷ ᠲᠡᠭᠡᠨ( ᠲᠤ ᠪᠡᠨ) ᠬᠠᠷᠢᠨᠠ᠃ ᠮᠣᠰᠺᠸᠠ ᠬᠦᠷᠦᠭᠡᠳ᠂ ᠴᠣᠬᠣᠮ ᠬᠠᠮᠢᠭᠠ ᠪᠠᠭᠤᠵᠤ ᠪᠠᠢᠷᠢᠯᠠᠭᠰᠠᠨ ᠢ᠋ᠶ᠋ᠠᠨ ᠲᠣᠳᠣᠷᠬᠠᠢ ᠪᠢᠴᠢᠨᠡ᠃
ᠬᠢᠴᠢᠶᠡᠩᠭᠦᠢᠯᠡᠨ ᠶᠣᠰᠣᠯᠠᠭᠴᠢ ᠬᠦᠦ ᠲᠡᠮᠦᠷ ᠦᠨᠡᠨ
ᠭᠡᠵᠦ ᠪᠢᠴᠢᠭᠰᠡᠨ ᠢ᠋ ᠨᠢ ᠤᠩᠰᠢᠭᠠᠳ᠂ ᠵᠠᠬᠢᠶᠠ ᠶ᠋ᠢ ᠨᠢ ᠲᠣᠭᠳᠣᠢ ᠳ᠋ᠤ᠌ ᠠᠶᠠᠲᠠᠢᠬᠠᠨ ᠡᠪᠬᠡᠵᠦ ᠬᠢᠭᠡᠳ᠂ ᠳᠡᠷᠡ ᠶ᠋ᠢᠨ ᠲᠤᠰᠢᠶᠠ ᠪᠠᠨ ᠣᠨᠢᠨ ᠠ᠋ᠴᠠ ᠬᠠᠪᠴᠢᠭᠤᠯᠤᠨ᠂ ᠭᠡᠭᠡᠨ ᠵᠠᠰᠠᠭ ᠤ᠋ᠨ ᠮᠠᠨᠢ ᠠᠴᠢ ᠳᠠ ᠭᠡᠵᠦ ᠠᠶᠠᠷᠬᠠᠨ ᠬᠡᠯᠡᠭᠡᠳ᠂ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠳᠣᠭᠣᠯᠠᠩ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠵᠠᠢ᠃
ᠴᠡᠷᠡᠨ᠂ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠪᠤᠭᠤᠯᠤᠭᠰᠠᠨ ᠳᠤᠷᠳᠤᠩ ᠪᠦᠰᠡ ᠰᠢᠷᠴᠢᠨ ᠳ᠋ᠦ᠍ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠷᠢᠵᠤ᠂ ᠰᠢᠷᠴᠢᠨ ᠳᠤᠷᠳᠤᠩ ᠢ᠋ ᠳᠡᠯᠭᠡᠭᠡᠳ ᠥᠯᠵᠡᠢ ᠤᠲᠠᠰᠤ ᠨᠡᠬᠡᠭᠰᠡᠨ ᠬᠡ ᠶ᠋ᠢ ᠨᠢ ᠲᠠᠭᠠᠰᠢᠶᠠᠨ᠂ ᠣᠷᠣ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠡ ᠳᠡᠭᠡᠷᠡ ᠲᠠᠯᠪᠢᠨ᠂ ᠲᠡᠮᠦᠷ ᠦ᠋ᠨ ᠡᠵᠢ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠭᠡᠵᠦ ᠶᠠᠪᠤᠭᠤᠯᠤᠭᠰᠠᠨ ᠴᠢᠯᠭᠡᠷ ᠬᠥᠬᠡ ᠫᠦᠦᠰᠦᠦ ᠶ᠋ᠢ ᠢᠯᠢᠭᠡᠳ᠂
— ᠴᠢ ᠪᠢᠳᠡ ᠬᠣᠶᠠᠷ᠂ ᠤᠤᠭᠠᠨ ᠬᠦᠦ ᠪᠡᠨ ᠲᠦᠮᠡᠨ ᠦ᠌ ᠭᠠᠵᠠᠷ ᠡᠷᠳᠡᠮ ᠨᠣᠮ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠶᠠᠪᠤᠨᠠ᠂ ᠶᠠᠪᠤᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠪᠠᠰᠠ ᠮᠠᠰᠢᠨᠠ᠂ ᠭᠠᠯᠲᠤ ᠣᠩᠭᠣᠴᠠ᠂ ᠭᠠᠯᠲᠤ ᠲᠡᠷᠭᠡ ᠪᠡᠷ ᠶᠠᠪᠤᠨᠠ ᠭᠡᠵᠦ ᠶᠡᠷᠦ ᠵᠡᠭᠦᠳᠦᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠴᠦ᠍ ᠵᠡᠭᠦᠳᠦᠯᠡᠵᠦ ᠦᠵᠡᠭᠡ ᠦᠭᠡᠢ ᠪᠢᠯᠡ᠃ ᠣᠳᠣ ᠠᠶᠠᠭᠦᠢᠳᠡᠪᠡᠯ ᠮᠣᠰᠺᠸᠠ ᠠ᠋ᠴᠠ ᠣᠩᠭᠣᠴᠠ ᠪᠠᠷ ᠨᠠᠭᠠᠰᠢ ᠪᠠᠨ ᠬᠥᠮᠦᠨ ᠨᠢᠰᠬᠦ ᠪᠣᠯᠵᠤ ᠮᠠᠭᠠᠳ ᠦᠭᠡᠢ ᠪᠠᠢᠬᠠ᠂ ᠰᠣᠨᠣᠰᠪᠠᠯ᠂ ᠳᠡᠭᠡᠳᠦ — ᠡᠭᠦᠳᠡ ᠬᠣᠲᠠ ᠠ᠋ᠴᠠ ᠪᠠᠭᠠᠲᠤᠷ ᠤ᠋ᠨ ᠬᠣᠲᠠ ᠬᠦᠷᠲᠡᠯᠡ ᠣᠩᠭᠣᠴᠠ ᠪᠠᠷ ᠨᠢᠰᠬᠦ ᠪᠣᠯᠤᠭᠰᠠᠨ ᠭᠡᠨᠡ ᠪᠢᠯᠡ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂ ᠴᠡᠷᠡᠨ ᠦ᠌ ᠰᠡᠳᠬᠢᠯ ᠤᠶᠠᠷᠠᠵᠤ᠂
— ᠬᠡᠦᠬᠡᠳ ᠦ᠋ᠨ ᠮᠠᠨᠢ ᠵᠢᠷᠭᠠᠯ ᠤ᠋ᠨ ᠵᠠᠮ ᠨᠡᠭᠡᠭᠡᠭᠳᠡᠵᠦ ᠳᠡ᠃ ᠪᠢᠳᠡᠨ ᠢ᠋ ᠪᠡᠨ ᠪᠣᠳᠣᠪᠠᠯ᠂ ᠱᠠᠯ ᠥᠮᠨᠥᠭᠡ ᠤᠯᠤᠰ ᠪᠣᠯᠤᠨᠠ ᠳᠠ᠃ ᠠᠷᠪᠠᠭᠠᠳ ᠵᠢᠯ ᠦ᠋ᠨ ᠡᠮᠦᠨᠡ ᠪᠢ ᠶᠡᠷᠦ ᠳᠡᠯᠡᠬᠡᠢ ᠳᠡᠭᠡᠷᠡ ᠮᠣᠰᠺᠸᠠ ᠭᠡᠳᠡᠭ ᠬᠣᠲᠠ ᠪᠠᠢᠳᠠᠭ ᠢ᠋ ᠣᠭᠲᠣ ᠮᠡᠳᠡᠳᠡᠭ ᠦᠭᠡᠢ ᠰᠠᠨ᠃ ᠣᠳᠣ ᠬᠦᠦ ᠪᠡᠨ ᠮᠣᠰᠺᠸᠠ ᠳ᠋ᠤ᠌ ᠰᠤᠷᠭᠠᠭᠤᠯᠢ ᠬᠢᠨᠡ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌᠂ ᠮᠢᠨᠦ ᠰᠡᠳᠬᠢᠯ ᠳ᠋ᠦ᠍ ᠶᠡᠬᠡᠯᠡ(ᠶᠡᠬᠡ ᠯᠡ) ᠳᠣᠲᠣᠨᠣ ᠰᠠᠢᠬᠠᠨ ᠬᠣᠲᠠ ᠰᠢᠭ᠋ ᠰᠠᠨᠠᠭᠳᠠᠵᠤ ᠪᠠᠢᠨᠠ᠃ ᠪᠢ ᠨᠢᠭᠡ ᠶᠠᠭᠤᠮᠠ ᠲᠠᠨ ᠠ᠋ᠴᠠ ᠭᠤᠶᠤᠶᠠ᠃ ᠤᠯᠤᠰ ᠪᠢᠳᠡ ᠪᠦᠬᠦᠨ ᠦ᠌ ᠰᠠᠢᠬᠠᠨ ᠵᠢᠷᠭᠠᠯᠠᠩᠲᠤ ᠵᠠᠮ ᠢ᠋ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠯᠧᠨᠢᠨ᠂ ᠰᠲ᠋ᠠᠯᠢᠨ ᠬᠣᠶᠠᠷ ᠤ᠋ᠨ ᠵᠢᠷᠤᠭ ᠢ᠋ ᠨᠠᠳᠠᠳᠤ(ᠨᠠᠳᠠ ᠳ᠋ᠤ᠌) ᠣᠯᠵᠤ ᠥᠭᠭᠦᠨᠡ ᠤᠤ? ᠪᠢ ᠭᠦᠩᠭᠠᠷᠠᠪᠠ ᠶ᠋ᠢᠨ ᠢ᠋ᠶ᠋ᠡᠨ ᠲᠡᠨᠳᠡ ᠲᠠᠯᠪᠢᠶᠠ ᠭᠡᠳ ᠰᠢᠷᠴᠢᠨ ᠦ᠌ ᠪᠡᠨ ᠥᠭᠡᠳᠡ ᠡᠴᠡ ᠬᠦᠰᠡᠨ ᠬᠠᠷᠠᠭᠠᠳ᠂ ᠲᠡᠳᠡᠨ ᠦ᠌ ᠠᠴᠢ ᠪᠠᠷ ᠮᠠᠨ ᠤ᠋ ᠡᠷᠦᠬᠡ ᠭᠡᠷ ᠭᠡᠢᠵᠦ᠂ ᠦᠷᠡ ᠬᠡᠦᠬᠡᠳ ᠮᠠᠨᠢ ᠰᠠᠢᠬᠠᠨ ᠡᠷᠳᠡᠮ ᠰᠤᠷᠴᠤ ᠪᠠᠢᠨᠠ ᠯᠠ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠲᠡᠷᠡ ᠴᠢᠨᠢ ᠵᠥᠪ ᠵᠦᠢᠲᠡᠢ ᠰᠠᠨᠠᠯ ᠪᠠᠢᠨᠠ᠃ ᠦᠭᠡᠢ ᠶᠡᠷᠦᠨᠢ ᠬᠦᠦ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ) ᠮᠣᠰᠺᠸᠠ ᠤᠷᠤᠭᠤ ᠪᠢᠴᠢᠭ ᠢ᠋ᠶ᠋ᠡᠷ ᠵᠠᠬᠢᠵᠤ᠂ ᠬᠠᠮᠤᠭ ᠤ᠋ᠨ ᠰᠠᠢᠬᠠᠨ ᠵᠢᠷᠤᠭ ᠣᠯᠵᠤ ᠶᠠᠪᠤᠭᠤᠯᠤᠭ ᠭᠡᠵᠦ ᠪᠢᠴᠢᠪᠡᠯ ᠶᠠᠭᠠᠬᠢᠨᠠ ᠳᠠ? ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠪᠤᠭᠤᠯᠤᠭᠰᠠᠨ ᠵᠢᠷᠤᠭ ᠢ᠋ ᠬᠠᠷᠠᠵᠤ ᠰᠠᠭᠤᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)᠂ ᠯᠧᠨᠢᠨ ᠦ᠌ ᠰᠠᠭᠤᠵᠤ ᠪᠠᠢᠭᠰᠠᠨ᠂ ᠣᠳᠣ ᠰᠲ᠋ᠠᠯᠢᠨ ᠤ᠋ ᠲᠥᠷᠥ ᠶ᠋ᠢᠨ ᠢ᠋ᠶ᠋ᠡᠨ ᠵᠢᠯᠣᠭᠣ ᠪᠠᠷᠢᠨ ᠰᠠᠭᠤᠳᠠᠭ ᠬᠣᠲᠠ ᠳ᠋ᠤ᠌ ᠬᠦᠦ ᠮᠠᠨᠢ ᠰᠠᠭᠤᠵᠤ ᠪᠠᠢᠭᠠ ᠶᠤᠮ ᠭᠡᠵᠦ ᠪᠣᠳᠣᠵᠤ ᠰᠠᠭᠤᠬᠤ ᠳ᠋ᠤ᠌ ᠰᠠᠢᠬᠠᠨ ᠪᠠᠢᠬᠤ ᠪᠢᠰᠢᠦ( ᠪᠢᠰᠢ ᠤᠤ)? ᠭᠡᠳ᠂ ᠠᠯᠢ ᠠ᠋᠂ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠪᠤᠭᠤᠯᠤᠭᠰᠠᠨ ᠲᠣᠯᠢᠨ ᠳ᠋ᠤ᠌ ᠨᠢᠭᠡ ᠬᠠᠷᠠᠶᠠ ᠭᠡᠵᠦ᠂ ᠲᠣᠯᠢ ᠠᠪᠴᠤ ᠬᠠᠷᠠᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)᠂ ᠲᠡᠮᠦᠷ ᠦ᠋ᠨ ᠠᠪᠤ ᠭᠡᠳᠡᠭ ᠨᠢ ᠡᠢᠮᠦ ᠬᠥᠮᠦᠨ ᠪᠠᠢᠭᠠ ᠶᠤᠮ ᠪᠣᠢ? ᠠᠩᠬᠠ ᠯᠠ ᠪᠡᠶᠡ ᠪᠡᠨ ᠲᠣᠯᠢᠨ ᠳ᠋ᠤ᠌ ᠬᠠᠷᠠᠵᠤ ᠪᠠᠢᠨᠠ ᠰᠢᠦ᠃ ᠨᠢᠭᠡ ᠶᠡᠬᠡ ᠰᠠᠢᠬᠠᠨ ᠬᠥᠮᠦᠨ ᠭᠡᠬᠦ ᠳ᠋ᠦ᠍ ᠬᠠᠮᠢᠭᠠᠰᠢ ᠪᠠᠨ ᠶᠤᠮ ᠪᠣᠢ᠂ ᠪᠠᠰᠠ ᠮᠤᠤᠬᠠᠢ( ᠮᠠᠭᠤᠬᠠᠢ)ᠴᠤ᠌ ᠭᠡᠬᠦ ᠳ᠋ᠦ᠍ ᠬᠠᠮᠢᠭᠠᠰᠢ ᠪᠠᠨ ᠶᠤᠮ ᠪᠣᠢ᠂ ᠠᠷᠠᠢ ᠴᠤ᠌ ᠲᠡᠢᠮᠦ ᠮᠠᠭᠤᠬᠠᠢ ᠠᠪᠤ ᠲᠠᠢ ᠪᠢᠰᠢ ᠶᠦᠮ ᠪᠣᠯᠤᠯᠲᠠᠢ᠂ ᠬᠦᠦ ᠮᠢᠨᠢ ᠭᠡᠵᠦ ᠢᠨᠢᠶᠡᠵᠡᠢ᠃
— ᠪᠢ ᠴᠦ᠍ ᠪᠠᠰᠠ ᠬᠥᠮᠦᠨ ᠪᠣᠯᠤᠭᠰᠠᠭᠠᠷ ᠰᠠᠢ᠍ᠢ( ᠰᠠᠶᠢ) ᠴᠢᠷᠠᠢ ᠪᠠᠨ ᠲᠣᠯᠢᠨ ᠳ᠋ᠤ᠌ ᠬᠠᠷᠠᠵᠤ ᠦᠵᠡᠯᠡ ᠭᠡᠵᠦ ᠴᠡᠷᠡᠨ ᠦ᠌ ᠬᠡᠯᠡᠬᠦ ᠳ᠋ᠦ᠍᠂
— ᠴᠢ ᠪᠢᠳᠡ ᠬᠣᠶᠠᠷ᠂ ᠬᠡᠦᠬᠡᠳ ᠰᠢᠭ ᠲᠣᠯᠢᠨ ᠳ᠋ᠤ᠌ ᠪᠡᠶᠡ ᠪᠡᠨ ᠦᠵᠡᠨ ᠲᠣᠭᠯᠠᠵᠤ ᠪᠠᠢᠨᠠᠤ( ᠪᠠᠢᠨᠠ ᠤᠤ) ᠳᠠ? ᠠᠢᠯ ᠤ᠋ᠨ ᠬᠥᠮᠦᠨ ᠬᠠᠷᠠᠪᠠᠯ᠂ ᠥᠲᠡᠯᠦᠭᠰᠡᠨ ᠡᠨᠡ ᠬᠣᠶᠠᠷ ᠵᠥᠨᠥᠭᠯᠡᠪᠡᠦ᠂ ᠶᠠᠭᠠᠬᠢᠪᠠ? ᠭᠡᠬᠦ ᠪᠠᠢᠬᠤ ᠭᠡᠵᠦ ᠮᠠᠰᠢ ᠵᠢᠷᠭᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠪᠠᠷ ᠢᠨᠢᠶᠡᠭᠡᠳ᠂ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠷ ᠢᠯᠢᠵᠦ᠂
— ᠨᠠᠮᠠᠶ᠋ᠢ( ᠨᠠᠮᠠ ᠶ᠋ᠢ) ᠲᠡᠷᠡ ᠵᠢᠯ ᠴᠡᠷᠢᠭ ᠲᠦ᠍ ᠮᠣᠷᠳᠠᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠵᠤ ᠪᠠᠢᠨᠠᠤ( ᠪᠠᠢᠨᠠ ᠤᠤ)?ᠴᠢ ᠪᠢᠳᠡ ᠬᠣᠶᠠᠷ ᠰᠤᠨᠤᠮ ᠵᠠᠩᠭᠢ ᠶ᠋ᠢᠨ ᠲᠡᠮᠡᠭᠡ ᠪᠡᠷ ᠶᠠᠪᠤᠵᠤ᠂ ᠪᠢ ᠴᠢᠨᠦ ᠳᠤᠯᠠᠭᠠᠬᠠᠨ ᠭᠠᠷ ᠢ᠋ ᠢᠯᠢᠵᠦ ᠶᠠᠪᠤᠭᠰᠠᠨ ᠪᠢᠯᠡ᠃ ᠵᠠᠯᠠᠭᠤ ᠴᠤ᠌ ᠪᠠᠢᠵᠠᠢ ᠳᠠ ᠴᠢ ᠪᠢᠳᠡ ᠬᠣᠶᠠᠷ ᠲᠡᠭᠡᠬᠦ ᠳ᠋ᠦ᠍᠂ ᠲᠡᠭᠡᠵᠦ ᠶᠠᠪᠤᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠠᠮᠢᠳᠤ ᠶ᠋ᠢᠨ ᠵᠢᠷᠭᠠᠯ ᠭᠡᠵᠦ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠴᠢ ᠰᠠᠨᠠᠵᠤ ᠪᠠᠢᠨᠠᠤ(ᠪᠠᠢᠨᠠ ᠤᠤ) ? ᠡᠷᠭᠢᠴᠡᠭᠦᠯᠵᠦ ᠪᠣᠳᠣᠪᠠᠯ᠂ ᠣᠳᠣ ᠯᠠ ᠴᠢ ᠪᠢᠳᠡ ᠬᠣᠶᠠᠷ ᠰᠠᠢ᠍ᠢ(ᠰᠠᠶᠢ) ᠶᠣᠰᠣᠲᠠᠢ ᠵᠢᠷᠭᠠᠯ ᠢ᠋ᠶ᠋ᠠᠨ ᠡᠳ᠋ᠯᠡᠵᠦ ᠪᠠᠢᠭᠠ ᠶᠤᠮ ᠪᠠᠢᠨᠠ ᠰᠢᠦ ᠳᠡ ᠭᠡᠵᠦ ᠠᠶᠠᠷᠬᠠᠨ ᠳᠤᠤᠭᠠᠷᠤᠭᠠᠳ᠂ ᠠᠵᠢᠯ ᠬᠥᠳᠡᠯᠮᠦᠷᠢ ᠶᠡᠬᠡ ᠬᠢᠭᠰᠡᠨ ᠴᠢᠩᠭᠠ ᠪᠢᠴᠢᠬᠠᠨ ᠭᠠᠷ ᠢ᠋ ᠨᠢ ᠠᠳᠬᠤᠵᠤ᠂ ᠪᠢ ᠴᠢᠮᠠ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠲᠡᠷᠡ ᠦᠶᠡ ᠶ᠋ᠢᠨ ᠬᠢ ᠰᠢᠭ ᠢ᠋ᠶ᠋ᠡᠨ ᠯᠡ ᠬᠠᠢᠷᠠᠲᠠᠢ᠂ ᠲᠡᠷᠡ ᠦᠶᠡ ᠶ᠋ᠢᠨ ᠬᠢ ᠡᠴᠡ ᠴᠦ᠍ ᠪᠦᠷ ᠢᠯᠡᠭᠦᠦ ᠬᠠᠢᠷᠠᠲᠠᠢ᠃ ᠬᠣᠩᠭᠣᠷ ᠦᠷᠡ ᠶ᠋ᠢᠨ ᠮᠢᠨᠢ ᠡᠬᠡ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠤᠯᠠᠮ ᠤᠯᠠᠮ ᠬᠠᠢᠷᠠᠲᠠᠢ ᠳᠠ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠪᠢ ᠲᠡᠷᠡ ᠵᠢᠯ ᠲᠡᠭᠡᠵᠦ ᠶᠠᠪᠤᠭᠰᠠᠨ ᠪᠦᠭᠦᠳᠡ ᠶ᠋ᠢ ᠰᠠᠨᠠᠵᠤ ᠪᠠᠢᠨᠠ ᠭᠡᠵᠦ ᠴᠡᠷᠡᠨ— ᠬᠠᠴᠠᠷ ᠨᠢ ᠴᠢᠰ ᠤᠯᠠᠭᠠᠨ ᠪᠣᠯᠵᠤ᠂ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠷ ᠢ᠋ ᠠᠶᠠᠷᠬᠠᠨ ᠠᠳᠬᠤᠭᠠᠳ᠂ ᠪᠢ ᠴᠦ᠍ ᠪᠠᠰᠠ ᠤᠷᠢᠳᠤ ᠤᠷᠢᠳᠤ ᠶ᠋ᠢᠨ ᠬᠢ ᠡᠴᠡ ᠪᠡᠨ ᠤᠯᠠᠮ ᠬᠠᠢᠷᠠᠲᠠᠢ ᠪᠣᠯᠴᠢᠬᠰᠠᠨ(ᠪᠣᠯᠴᠢᠬᠠᠭᠰᠠᠨ) ᠭᠡᠳ ᠲᠣᠯᠣᠭᠠᠢ ᠪᠠᠨ ᠳᠠᠷᠤᠵᠤ᠂ ᠠᠶᠠᠷᠬᠠᠨ ᠭᠡᠭᠴᠢ ᠪᠡᠷ ᠰᠢᠪᠡᠨᠡᠨ᠂ ᠪᠢ ᠪᠠᠰᠠᠯᠠ᠁ ᠬᠡᠦᠬᠡᠳ ᠲᠡᠢ ᠪᠣᠯᠴᠢᠯᠠ( ᠪᠣᠯᠴᠢᠬᠠᠯᠠ) ᠰᠢᠦ᠃ ᠲᠡᠭᠡᠭᠡᠳ᠁ ᠲᠡᠭᠡᠭᠡᠳ ᠣᠳᠣ ᠡᠨᠡ ᠤᠳᠠᠭᠠ᠁ ᠥᠬᠢᠨ ᠭᠠᠷᠤᠭᠠᠰᠠᠢ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ)᠂
— ᠪᠢ ᠴᠦ᠍ ᠪᠠᠰᠠ ᠥᠬᠢᠨ ᠭᠠᠷᠬᠤ ᠳ᠋ᠤ᠌ ᠳᠤᠷᠠᠲᠠᠢ ᠯᠠ ᠪᠠᠢᠨᠠ ᠳᠠ ᠭᠡᠵᠦ ᠬᠡᠯᠡᠭᠡᠳ᠂ ᠰᠢᠷᠴᠢᠨ ᠭᠠᠷ ᠢ᠋ ᠨᠢ ᠠᠶᠠᠷᠬᠠᠨ ᠢᠯᠢᠵᠡᠢ᠃
ᠴᠡᠷᠡᠨ ᠲᠣᠯᠣᠭᠠᠢ ᠪᠠᠨ ᠥᠨᠳᠡᠢᠯᠭᠡᠭᠡᠳ᠂ ᠨᠥᠬᠥᠷ ᠥᠭᠡᠳᠡ ᠡᠴᠡ ᠪᠡᠨ ᠮᠠᠰᠢ ᠢᠨᠠᠭ ᠬᠠᠢᠷᠠᠲᠠᠢ ᠬᠠᠷᠠᠴᠠ ᠪᠠᠷ ᠬᠠᠷᠠᠭᠠᠳ᠂
— ᠲᠡᠭᠡᠪᠡᠯ᠂ ᠯᠧᠨᠢᠨᠮᠠ ᠭᠡᠵᠦ ᠨᠡᠷᠡ ᠥᠭᠬᠦ ᠤᠤ? ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠰᠢᠷᠴᠢᠨ᠂
— ᠯᠧᠨᠢᠨᠮᠠ ᠭᠡᠵᠦ ᠰᠢᠪᠡᠨᠡᠭᠡᠳ ᠰᠡᠳᠬᠢᠯ ᠳᠦᠭᠦᠷᠡᠩ ᠡᠯᠢᠭᠡ ᠪᠦᠷᠢᠨ ᠠᠢᠯ ᠤ᠋ᠨ ᠲᠡᠷᠡ ᠬᠣᠶᠠᠷ ᠬᠥᠮᠦᠨ ᠴᠢᠮᠡᠭᠡ ᠦᠭᠡᠢ ᠭᠠᠷ ᠭᠠᠷ ᠢ᠋ᠶ᠋ᠠᠨ ᠪᠠᠷᠢᠯᠴᠠᠨ ᠰᠠᠭᠤᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠢᠭᠤᠷᠵᠢᠨ·ᠣᠳᠬᠣᠨᠪᠠᠪᠠ᠂ ᠪᠠᠯ᠂ ᠪᠠᠳᠮᠠᠰᠡᠴᠡᠨ
ᠬᠢᠨᠠᠭᠴᠢ᠄ ᠲ·ᠬᠦᠮᠦᠵᠢᠯᠲᠦ᠂ ᠣᠳᠬᠣᠨᠴᠡᠴᠡᠭ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ