ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠦᠲᠦᠭᠡᠷ ᠪᠣᠲᠢ – ᠬᠣᠶᠠᠳᠤᠭᠠᠷ ᠪᠦᠯᠦᠭ <ᠳᠣᠯᠣᠭᠠ> Хан мунын сүүрс < доорд > – Мөнх зохиоов ᠂Дөдгөөр бодь – Хоёрдугаар бүлэг <7>
ᠲᠦᠲᠦᠭᠡᠷ ᠪᠣᠲᠢ – ᠬᠣᠶᠠᠳᠤᠭᠠᠷ ᠪᠦᠯᠦᠭ <ᠳᠣᠯᠣᠭᠠ>
ᠳᠣᠯᠣᠭᠠ
ᠪᠣᠯᠵᠣᠭᠠᠨ ᠠ᠋ᠴᠠ ᠪᠠᠨ ᠪᠠᠰᠠ ᠳᠣᠯᠣᠭᠠ ᠬᠣᠨᠣᠭ ᠬᠡᠲᠦᠷᠡᠭᠦᠯᠵᠦ ᠠᠷᠪᠠᠨ ᠳᠥᠷᠪᠡᠳᠦᠭᠡᠷ ᠡᠳᠦᠷ ᠦ᠋ᠨ ᠣᠷᠣᠢ ᠬᠦᠯᠢᠶᠡᠵᠦ ᠶᠠᠳᠠᠭᠰᠠᠨ ᠠᠩᠴᠢᠨᠵᠠᠪ ᠵᠠᠩᠴᠢᠬᠦᠦ ᠶ᠋ᠢᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠲᠡᠮᠦᠷᠰᠥ᠋ᠬᠡ ᠶ᠋ᠢᠨ ᠭᠠᠨᠵᠤᠭᠠᠯᠠᠵᠤ ᠢᠷᠡᠭᠰᠡᠨ《ᠪᠠᠭᠠ ᠬᠠᠲᠤᠨ ᠬᠣᠣᠷᠯᠠᠭᠳᠠᠪᠠ》 ᠭᠡᠰᠡᠨ ᠭᠠᠰᠢᠭᠤᠨ ᠴᠢᠮᠡᠭᠡ ᠶ᠋ᠢ ᠳᠤᠰᠴᠤ ᠰᠦᠷᠡᠬᠡᠢ ᠡᠮᠬᠢᠨᠡᠪᠡ᠁
ᠠᠩᠴᠢᠨᠵᠠᠪ ᠡᠩᠭᠡᠷ ᠦ᠋ᠨ ᠲᠣᠪᠴᠢ ᠪᠠᠨ ᠠᠯᠳᠠᠷᠠᠭᠠᠵᠤ ᠪᠦᠰᠡ ᠪᠡᠨ ᠲᠠᠢᠯᠤᠭᠠᠳ ᠵᠢᠯᠢᠢᠭᠴᠢ ᠰᠡᠷᠭᠦᠮᠡ ᠳ᠋ᠦ᠍ ᠭᠠᠰᠢᠭᠤᠳᠠᠵᠤ᠂ ᠰᠠᠯᠠᠭᠠ ᠵᠠᠮ ᠤ᠋ᠨ ᠠᠭᠤᠯᠵᠠᠷ ᠳᠡᠭᠡᠷᠡ ᠨᠤᠲᠤᠭ ᠤ᠋ᠨ ᠵᠦᠭ ᠬᠠᠷᠠᠵᠤ ᠤᠳᠠᠲᠠᠯᠠ ᠮᠡᠯᠡᠷᠡᠨ ᠵᠣᠭᠰᠣᠪᠠ᠃
᠁ ᠣᠳᠣᠳ ᠠᠨᠢᠪᠠᠯᠵᠠᠨ ᠵᠢᠷᠢᠯᠵᠡᠵᠦ᠂ ᠠᠯᠢ ᠭᠡᠷᠡᠯ ᠲᠡᠢ ᠨᠢᠭᠡ ᠣᠳᠣ ᠨᠢ ᠰᠣᠯᠢᠷ ᠪᠣᠯᠤᠨ ᠤᠨᠠᠭᠰᠠᠨ ᠨᠢ ᠠᠮᠠᠷᠠᠭ ᠰᠡᠷᠭᠦᠮᠡ ᠶ᠋ᠢᠨ ᠠᠮᠢᠨ ᠣᠳᠣ ᠨᠢ ᠤᠨᠠᠵᠤ ᠬᠠᠯᠢᠭᠰᠠᠨ ᠰᠢᠭ᠋ ᠲᠡᠭᠦᠨ ᠳ᠋ᠦ᠍ ᠰᠠᠨᠠᠭᠳᠠᠵᠠᠢ᠃ ᠲᠡᠷᠡ ᠣᠳᠣᠳ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠮᠥᠩᠭᠥ ᠱ᠌ᠢᠷᠦᠨ ᠤᠨᠵᠢᠯᠭᠠ ᠲᠠᠢ ᠲᠣᠯᠣᠭᠠᠢ ᠶ᠋ᠢᠨ ᠵᠢᠮᠰᠡᠭ ᠦ᠋ᠨ ᠵᠠᠰᠠᠯ ᠲᠠᠢ ᠰᠡᠷᠭᠦᠮᠡ ᠰᠤᠭᠤᠷᠠᠵᠤ ᠢᠰᠪᠡᠯᠵᠡᠨ ᠢᠨᠢᠶᠡᠭᠡᠳ ᠢᠷᠡᠬᠦ ᠰᠢᠭ᠁ ᠥᠪᠴᠢ ᠴᠡᠷᠢᠭ ᠬᠤᠪᠴᠠᠰᠤ ᠲᠠᠢ ᠰᠧᠯᠢᠩ ᠬᠠᠲᠤᠨ ᠬᠤᠪᠢᠯᠤᠨ ᠲᠡᠭᠦᠨ ᠢ᠋ ᠲᠣᠰᠤᠭᠠᠳ ᠠᠢᠰᠤᠢ᠁ ᠲᠡᠭᠦᠨ ᠦ᠌ ᠬᠦᠵᠦᠭᠦᠦ ᠶ᠋ᠢ ᠲᠡᠪᠡᠷᠢᠭᠡᠳ ᠰᠠᠬᠠᠯᠲᠠᠢ ᠤᠷᠤᠭᠤᠯ ᠢ᠋ ᠨᠢ ᠬᠠᠵᠠᠨ ᠬᠠᠵᠠᠨ ᠦᠨᠦᠰᠬᠦ ᠰᠢᠭ᠁ ᠠᠩᠴᠢᠨᠵᠠᠪ ᠬᠡᠴᠢᠨᠡᠭᠡᠨ ᠤᠳᠠᠭᠠᠨ ᠪᠣᠳᠣᠯᠭᠠ ᠪᠣᠯᠵᠤ ᠵᠣᠪᠠᠭᠤᠷᠢᠯᠠᠨ ᠬᠡᠪᠲᠡᠭᠰᠡᠨ ᠢ᠋ ᠪᠤᠤ ᠮᠡᠳᠡ᠂ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠪᠡᠶᠡ ᠨᠢ ᠳᠠᠭᠠᠷᠠᠳᠠᠰᠤ ᠭᠦᠷᠦᠨ ᠵᠢᠭᠡᠭᠦᠰᠪᠡ᠃
ᠦᠦᠷ ᠬᠠᠶᠠᠭᠠᠷᠠᠵᠤ ᠪᠠᠢᠯᠠ᠃
ᠲᠡᠷᠲᠡᠭᠡ ᠴᠢᠳᠥᠷ ᠲᠡᠢ ᠮᠣᠷᠢᠳ ᠡᠪᠡᠰᠦ ᠬᠠᠵᠠᠯᠠᠬᠤ ᠴᠢᠮᠡᠭᠡ ᠭᠠᠷᠤᠨᠠ᠃ ᠲᠣᠬᠣᠮ ᠢ᠋ᠶ᠋ᠠᠨ ᠳᠡᠪᠢᠰᠴᠦ ᠡᠮᠡᠭᠡᠯ ᠢ᠋ᠶ᠋ᠡᠨ ᠳᠡᠷᠡᠯᠡᠨ ᠪᠦᠬᠦᠯᠢ ᠪᠡᠷ ᠢ᠋ᠶ᠋ᠡᠨ ᠨᠤᠭᠳᠤᠢᠨ ᠬᠡᠪᠲᠡᠭᠰᠡᠨ ᠲᠡᠮᠦᠷᠰᠥ᠋ᠬᠡ ᠶ᠋ᠢ ᠬᠠᠷᠠᠭᠠᠳ ᠠᠩᠴᠢᠨᠵᠠᠪ ᠦᠷᠦ ᠡᠪᠡᠳᠴᠦ᠄
一 ᠬᠥᠭᠡᠷᠦᠬᠦᠢ ᠳᠡ᠂ ᠨᠠᠮᠠᠶ᠋ᠢ ᠳᠠᠭᠠᠵᠤ ᠦᠢᠯᠡ ᠲᠠᠮᠤ ᠪᠠᠨ ᠦᠵᠡᠯᠡ ᠭᠡᠳ ᠳᠡᠭᠡᠷᠡ ᠨᠢ ᠬᠤᠴᠢᠯᠭᠠ ᠶ᠋ᠢ ᠨᠢ ᠳᠠᠪᠬᠤᠷᠯᠠᠨ ᠨᠥᠮᠥᠷᠢᠭᠦᠯᠪᠡ᠃
ᠨᠠᠷᠠ ᠰᠤᠪᠤᠷᠠᠬᠤ ᠳ᠋ᠤ᠌ ᠬᠥᠲᠥᠯᠦᠭᠡ ᠮᠣᠷᠢ ᠲᠠᠢ ᠬᠣᠶᠠᠷ ᠬᠥᠮᠦᠨ ᠳᠣᠪᠲᠣᠯᠭᠠᠵᠤ ᠶᠠᠪᠤᠨᠠ᠃
ᠠᠩᠴᠢᠨᠵᠠᠪ᠂ ᠰᠡᠷᠭᠦᠮᠡ ᠲᠡᠢ ᠪᠡᠨ ᠠᠭᠤᠯᠵᠠᠭᠰᠠᠨ ᠪᠣᠯ ᠠᠷᠤ ᠲᠠᠢᠰᠢ ᠪᠠᠨ ᠭᠤᠨᠠᠨ ᠪᠠᠨᠲᠠᠢ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠬᠣᠯᠠ ᠶᠠᠪᠤᠮᠠᠷ ᠵᠢᠱ᠌ᠢᠵᠦ ᠪᠠᠢᠯᠠ᠃ ᠲᠡᠭᠡᠬᠦ ᠳ᠋ᠦ᠍ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠶᠠᠪᠤᠳᠠᠯ ᠪᠣᠯᠵᠤ ᠲᠡᠭᠦᠨ ᠦ᠌ ᠬᠣᠢᠰᠢᠯᠠᠬᠤ ᠵᠣᠷᠢᠯᠭᠠ ᠶ᠋ᠢ ᠪᠤᠴᠠᠭᠠᠵᠤ ᠤᠷᠠᠳ ᠨᠤᠲᠤᠭ ᠲᠠᠭᠠᠨ ᠦᠳᠲᠡᠷ ᠬᠦᠷᠬᠦ ᠭᠡᠵᠦ ᠶᠠᠭᠠᠷᠠᠪᠴᠢᠯᠠᠨ ᠶᠠᠪᠤᠭᠠ ᠨᠢ ᠡᠨᠡ ᠠᠵᠤᠭᠤ᠃
ᠠᠩᠴᠢᠨᠵᠠᠪ ᠲᠡᠮᠦᠷᠰᠥ᠋ᠬᠡ ᠬᠣᠶᠠᠷ ᠠᠷᠤ ᠵᠠᠮ ᠢ᠋ ᠪᠠᠷᠢᠵᠤ ᠶᠠᠪᠤᠪᠠ᠃ ᠴᠠᠬᠠᠷ ᠬᠣᠰᠢᠭᠤ᠂ ᠳᠥᠷᠪᠡᠳ᠂ ᠮᠢᠩᠭᠠᠨ ᠤ᠋ ᠲᠠᠯᠠ ᠶ᠋ᠢ ᠲᠤᠭᠤᠯᠤᠨ ᠰᠢᠲᠦᠭᠡᠨ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠲᠡᠬᠢ ᠨᠢᠭᠡ ᠮᠣᠩᠭᠣᠯ ᠠᠢᠯ ᠳ᠋ᠤ᠌ ᠪᠠᠭᠤᠵᠤ ᠲᠡᠨᠳᠡ ᠨᠢᠭᠡ ᠡᠳᠦᠷ ᠠᠮᠠᠷᠠᠨ ᠮᠣᠷᠢᠳ ᠤ᠋ᠨ ᠢ᠋ᠶ᠋ᠠᠨ ᠨᠢᠷᠤᠭᠤ ᠶ᠋ᠢ ᠰᠡᠯᠭᠦᠭᠡᠵᠡᠢ᠃
ᠮᠠᠷᠭᠠᠲᠤᠷ ᠨᠢ ᠲᠡᠨᠳᠡ ᠡᠴᠡ ᠬᠣᠶᠠᠭᠤᠯᠠ ᠰᠠᠯᠵᠤ ᠲᠡᠮᠦᠷᠰᠥ᠋ᠬᠡ ᠡᠮᠦᠨᠡᠰᠢᠯᠡᠵᠦ ᠵᠠᠩᠴᠣᠪ ᠲᠤ᠌ ᠬᠡᠯᠡ ᠬᠦᠷᠭᠡᠨ ᠳᠠᠷᠠᠭᠠ ᠥᠷᠯᠥᠭᠡ ᠡᠷᠲᠡ ᠪᠡᠷ ᠤᠯᠠᠭᠠᠨ ᠡᠷᠭᠢ ᠶ᠋ᠢᠨ ᠣᠭᠣᠷᠴᠣᠭ ᠤ᠋ᠨ ᠣᠪᠣᠭᠠᠨ ᠳᠡᠭᠡᠷᠡ ᠠᠭᠤᠯᠵᠠᠬᠤ ᠪᠠᠷ ᠪᠣᠯᠪᠠ᠃
ᠠᠩᠴᠢᠨᠵᠠᠪ ᠰᠢᠲᠦᠭᠡᠨ ᠠᠭᠤᠯᠠ ᠶ᠋ᠢᠨ ᠪᠠᠯ ᠳᠠᠭᠠᠵᠤ ᠰᠢᠭᠤᠳ ᠪᠠᠷᠠᠭᠤᠨᠰᠢᠯᠠᠨ ᠳᠤᠭᠠᠷᠵᠠᠪ᠂ ᠨᠠᠢᠮᠠᠨᠵᠢᠩ ᠨᠠᠷ ᠤ᠋ᠨ ᠭᠡᠷ ᠢ᠋ᠶ᠋ᠡᠷ ᠳᠠᠭᠠᠷᠢᠵᠤ ᠲᠡᠳᠡᠨᠦᠰ ᠲᠡᠢ ᠬᠣᠯᠪᠣᠭᠠ ᠪᠠᠷᠢᠬᠤ ᠪᠠᠷ ᠲᠦᠷᠭᠡᠯᠡᠪᠡ᠃ ᠬᠡᠨ ᠲᠡᠢ ᠴᠦ᠍ ᠠᠭᠤᠯᠵᠠᠵᠤ ᠬᠡᠯᠡ ᠬᠣᠯᠪᠣᠭᠠ ᠠᠪᠴᠤ ᠴᠢᠳᠠᠭᠰᠠᠨ ᠦᠭᠡᠢ᠂ ᠵᠥᠪᠬᠡᠨ《ᠪᠣᠯᠤᠮᠵᠢ ᠪᠠᠢᠪᠠᠯ ᠮᠠᠷᠭᠠᠲᠤᠷ ᠡᠷᠲᠡ ᠣᠭᠣᠷᠴᠣᠭ ᠤ᠋ᠨ ᠣᠪᠣᠭᠠᠨ ᠳᠡᠭᠡᠷᠡ ᠠᠭᠤᠯᠵᠠᠶᠠ》 ᠭᠡᠵᠦ ᠭᠡᠷ ᠦ᠋ᠨ ᠬᠥᠮᠦᠰ ᠲᠦ᠋ᠨᠢ ᠬᠡᠯᠡ ᠦᠯᠡᠳᠡᠭᠡᠪᠡ᠃
ᠠᠩᠴᠢᠨᠵᠠᠪ᠂ ᠵᠠᠩᠴᠣᠪ ᠪᠣᠯᠵᠣᠭᠰᠠᠨ ᠴᠠᠭ ᠲᠠᠭᠠᠨ ᠤᠯᠠᠭᠠᠨ ᠡᠷᠭᠢ ᠶ᠋ᠢᠨ ᠣᠭᠣᠷᠴᠣᠭ ᠤ᠋ᠨ ᠣᠪᠣᠭᠠᠨ ᠳᠡᠭᠡᠷᠡ ᠠᠭᠤᠯᠵᠠᠪᠠ᠃
ᠨᠠᠷᠠ ᠦᠨᠦᠷᠲᠦᠭᠰᠡᠨ ᠨᠠᠮᠤᠷ ᠤ᠋ᠨ ᠴᠡᠯᠮᠡᠭ ᠰᠠᠢᠬᠠᠨ ᠡᠳᠦᠷ ᠪᠠᠢᠯᠠ᠃ ᠬᠠᠶᠠ ᠬᠠᠶᠠ ᠬᠠᠴᠠᠷ ᠦᠨᠦᠰᠦᠨ ᠢᠯᠪᠢᠬᠦ ᠬᠣᠩᠭᠣᠷ ᠰᠠᠯᠬᠢᠨ ᠡᠪᠡᠰᠦᠨ ᠦ᠌ ᠲᠣᠯᠣᠭᠠᠢ᠂ ᠮᠠᠯ ᠤ᠋ᠨ ᠥᠩᠭᠡᠨ ᠳ᠋ᠦ᠍ ᠲᠣᠰᠣ ᠴᠠᠷᠳᠠᠬᠤ ᠰᠢᠭ᠋ ᠨᠣᠵᠣᠭᠣᠷᠠᠬᠤ ᠨᠢ ᠰᠡᠳᠬᠢᠯ ᠳ᠋ᠦ᠍ ᠨᠢᠭᠡ ᠥᠶᠥᠭ᠃ ᠲᠣᠰᠣᠨ ᠲᠠᠷᠭᠤ ᠶ᠋ᠢᠨ ᠰᠣᠢᠯᠭᠠ ᠠᠪᠤᠭᠰᠠᠨ ᠬᠣᠨᠢᠳ ᠪᠡᠯᠴᠢᠭᠡᠷ ᠰᠠᠯᠬᠢᠳᠠᠵᠤ ᠴᠠᠢᠷᠠᠬᠤ ᠨᠢ ᠰᠤᠪᠤᠳ ᠰᠠᠴᠤᠭᠰᠠᠨ ᠮᠡᠲᠦ᠃ ᠭᠡᠨᠡᠳᠲᠡ ᠮᠣᠷᠢᠳ ᠤ᠋ᠨ ᠲᠤᠷᠭᠢᠬᠤ ᠴᠢᠮᠡᠭᠡ ᠪᠡᠷ ᠬᠣᠨᠢᠳ ᠦᠷᠭᠦᠵᠦ ᠬᠠᠪᠬᠠᠭᠠᠰᠤ ᠪᠦᠳᠦᠭᠦᠨ ᠰᠡᠭᠦᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠥᠭᠰᠡ ᠠᠯᠠᠭᠠᠳᠠᠵᠤ ᠭᠦᠶᠦᠯᠳᠦᠨᠡ᠃ ᠡᠨᠳᠡ ᠲᠡᠨᠳᠡ ᠨᠢᠭᠡ ᠴᠢᠳᠥᠷ ᠲᠡᠢ ᠮᠣᠷᠢ ᠴᠠᠳᠬᠤᠯᠳᠠᠵᠤ ᠤᠩᠭᠤᠰᠤ ᠠᠯᠳᠠᠴᠢᠬᠠᠭᠠᠳ《ᠶᠠᠭᠤ ᠪᠣᠯᠴᠢᠬᠠᠪᠠ?》 ᠭᠡᠰᠡᠨ ᠰᠢᠦᠬᠡᠨ ᠪᠡᠶᠡ ᠡᠴᠡ ᠪᠡᠨ ᠨᠠᠳᠬᠤᠵᠤ ᠦᠷᠭᠦᠬᠦ ᠶ᠋ᠢ ᠬᠠᠷᠠᠪᠠᠯ ᠢᠨᠢᠶᠡᠳᠦ ᠬᠦᠷᠦᠮᠡ ᠠᠵᠢ᠃ ᠤᠷᠠᠳ ᠤ᠋ᠨ ᠲᠠᠯᠠ ᠨᠠᠯᠠᠭᠠᠷᠬᠠᠨ ᠨᠠᠮᠤᠷᠵᠢᠵᠤ ᠪᠠᠢᠯᠠ᠃
ᠤᠷᠠᠳ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠡᠢᠮᠦ ᠰᠠᠢᠬᠠᠨ ᠪᠡᠯᠴᠢᠭᠡᠷ ᠡᠪᠡᠰᠦ᠂ ᠥᠩᠭᠡ ᠦᠵᠡᠮᠵᠢ ᠶ᠋ᠢ ᠬᠠᠷᠠᠭᠠᠳ ᠠᠩᠴᠢᠨᠵᠠᠪ ᠰᠡᠳᠬᠢᠯ ᠪᠠᠬᠠᠳᠤᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠤᠯᠠᠭᠠᠨ ᠡᠷᠭᠢ ᠶ᠋ᠢᠨ ᠡᠮᠦᠨᠡ ᠵᠠᠬᠠ ᠠ᠋ᠴᠠ ᠬᠠᠷᠠ ᠴᠡᠷᠢᠭ ᠦ᠋ᠳ ᠠᠨᠵᠢᠰᠤᠨ ᠤ᠋ ᠬᠣᠰᠢᠭᠤ ᠪᠠᠷ ᠰᠠᠨᠳᠠᠯᠠᠵᠤ ᠭᠠᠵᠠᠷ ᠨᠤᠲᠤᠭ ᠶᠡᠬᠡ ᠪᠡᠷ ᠡᠪᠳᠡᠭᠰᠡᠨ ᠢ᠋ ᠦᠵᠡᠭᠡᠳ ᠠᠭᠤᠷ ᠨᠢ ᠬᠦᠷᠴᠦ ᠠᠮᠢᠰᠬᠤᠭᠠ ᠨᠢ ᠳᠠᠪᠬᠤᠴᠠᠨᠠ᠃
一 ᠵᠠᠩᠴᠣᠪ ᠠᠬᠠ ᠲᠠ ᠰᠡᠷᠭᠦᠮᠡ ᠶ᠋ᠢᠨ ᠬᠣᠣᠷᠯᠠᠭᠳᠠᠭᠰᠠᠨ ᠢ᠋ ᠳᠤᠭᠤᠯᠪᠠ ᠊ᠤᠤ?
一 ᠲᠤᠭᠤᠯᠤᠭᠰᠠᠨ ᠠ᠋᠃
一 ᠴᠣᠭᠪᠠᠭᠠᠲᠤᠷ᠂ ᠡᠯᠳᠡᠩᠭᠡ ᠨᠠᠷ ᠶᠠᠮᠠᠷ ᠬᠠᠷᠠ ᠬᠣᠷᠣᠲᠠᠢ ᠤᠯᠤᠰ ᠪᠣᠢ⁈ ᠳᠣᠲᠣᠷᠠ ᠪᠠᠨ ᠠᠪᠤᠯᠴᠠᠬᠤ ᠠ᠋ᠴᠠ ᠪᠢᠰᠢ ᠭᠠᠳᠠᠨᠠ ᠠ᠋ᠴᠠ ᠥᠩᠭᠡᠯᠵᠡᠭᠰᠡᠨ ᠢ᠋ ᠲᠤᠯᠵᠤ ᠡᠰᠡᠷᠭᠦᠴᠡᠳᠡᠭ ᠦᠭᠡᠢ ᠮᠥᠨ ᠰᠣᠨᠢᠨ ᠤᠯᠤᠰ ᠠ᠋!
一 ᠡᠷᠬᠡ ᠠᠰᠢᠭ ᠬᠣᠶᠠᠷ ᠯᠠ ᠲᠣᠯᠣᠭᠠᠢ ᠶ᠋ᠢ ᠨᠢ ᠡᠷᠭᠢᠯᠳᠦᠭᠦᠯᠵᠦ ᠪᠠᠢᠨᠠ᠃ ᠴᠣᠭᠪᠠᠭᠠᠲᠤᠷ ᠪᠦᠲᠦᠯ ᠦᠭᠡᠢ ᠲᠣᠯᠣᠭᠠᠢ! ᠲᠡᠭᠦᠨ ᠢ᠋᠁ ᠭᠡᠵᠦ ᠬᠡᠯᠡᠲᠡᠯᠡ ᠠᠩᠴᠢᠨᠵᠠᠪ ᠲᠣᠰᠴᠤ᠄
一 ᠠᠬᠠ ᠳᠡᠭᠦᠦ ᠨᠠᠷ ᠬᠣᠷᠰᠢᠵᠤ ᠴᠣᠭᠪᠠᠭᠠᠲᠤᠷ ᠢ᠋ ᠠᠮᠢᠳᠤ ᠪᠠᠷ ᠨᠢ ᠪᠠᠷᠢᠵᠤ ᠠᠪᠤᠭᠠᠳ ᠤᠴᠢᠷ ᠢ᠋ᠶ᠋ᠠᠨ ᠣᠯᠤᠯᠴᠠᠶᠠ᠃ ᠤᠷᠢᠳ ᠢ᠋ᠶ᠋ᠠᠷ ᠲᠡᠭᠦᠨ ᠦ᠌ ᠡᠷᠬᠡ ᠬᠦᠴᠦ ᠶ᠋ᠢ ᠠᠰᠢᠭᠯᠠᠵᠤ ᠬᠠᠮᠤᠭ ᠬᠣᠣᠷ ᠤ᠋ᠨ ᠦᠨᠳᠦᠰᠦ ᠬᠠᠷᠠ ᠴᠡᠷᠢᠭ ᠦ᠋ᠨ ᠲᠦᠷᠦᠭᠦᠦ ᠸᠠᠩ ᠰᠣᠬᠣᠷ ᠢ᠋ ᠨᠢᠭᠡ ᠤᠬᠠᠭᠠᠨ ᠬᠢᠶᠡ ᠭᠡᠰᠡᠨ ᠳ᠋ᠦ᠍ ᠵᠠᠩᠴᠣᠪ ᠲᠡᠭᠦᠨ ᠦ᠌ ᠰᠠᠨᠠᠯ ᠢ᠋ ᠳᠠᠭᠠᠪᠠ᠃
ᠤᠯᠠᠭᠠᠨ ᠡᠷᠭᠢ ᠶ᠋ᠢᠨ ᠵᠡᠭᠦᠨ ᠰᠤᠭᠤ ᠪᠠᠷ ᠮᠡᠯᠮᠡᠯᠵᠡᠨ ᠤᠷᠤᠰᠤᠭᠰᠠᠨ ᠰᠣᠯᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠵᠦᠯᠭᠡᠲᠦ ᠳᠡᠨᠵᠢᠨ ᠳᠡᠭᠡᠷᠡ ᠬᠣᠶᠠᠷ ᠡᠷᠡ ᠵᠠᠪᠢᠯᠠᠵᠤ ᠰᠠᠭᠤᠨ ᠳᠦᠩᠭᠢᠨᠡᠲᠡᠯᠡ ᠶᠠᠷᠢᠯᠴᠠᠨᠠ᠃ ᠲᠡᠳᠡ ᠬᠣᠶᠠᠷ ᠠ᠋ᠴᠠ ᠤᠷᠭᠠ ᠰᠢᠭᠦᠷᠡᠮᠡ ᠵᠠᠢᠰᠬᠠᠨ ᠰᠣᠯᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠲᠤᠩᠭᠠᠯᠠᠭ ᠤᠰᠤᠨ ᠳ᠋ᠤ᠌ ᠪᠡᠶᠡ ᠶ᠋ᠢ ᠨᠢ ᠲᠣᠯᠢᠳᠠᠨ ᠲᠣᠩᠭᠣᠷᠠᠵᠤ ᠬᠠᠷᠠᠭᠳᠠᠭᠰᠠᠨ ᠥᠨᠳᠥᠷ ᠴᠡᠭᠡᠵᠢ᠂ ᠤᠷᠲᠤ ᠵᠣ ᠲᠠᠢ ᠬᠡᠭᠡᠷ ᠮᠣᠷᠢ ᠮᠤᠨᠳᠠᠭᠠ ᠪᠠᠨ ᠴᠡᠴᠡᠷᠡᠭᠦᠯᠵᠦ ᠬᠠᠶᠠ ᠴᠢᠬᠢ ᠬᠠᠢᠴᠢᠯᠠᠨ ᠠᠯᠤᠰ ᠢ᠋ ᠪᠠᠷᠠᠯᠠᠬᠤ ᠨᠢ ᠬᠣᠯᠠ ᠭᠦᠶᠦᠭᠴᠢ ᠬᠠᠲᠠᠭᠤ ᠰᠢᠨᠳᠠᠰᠤ ᠲᠠᠢ ᠭᠡᠳᠡᠭ ᠢ᠋ᠶ᠋ᠡᠨ ᠬᠥᠮᠦᠨ ᠠᠮᠢᠲᠠᠨ ᠳ᠋ᠤ᠌ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠲᠠᠨᠢᠭᠤᠯᠤᠨᠠ᠃
ᠡᠨᠡ ᠬᠡᠭᠡᠷ ᠢ᠋ ᠰᠥᠨᠢ ᠴᠢᠳᠥᠷᠯᠡᠭᠡᠳ ᠲᠠᠯᠪᠢᠪᠠᠯ ᠥᠷᠯᠥᠭᠡ ᠠᠯᠠᠭᠠ ᠪᠣᠯᠴᠢᠬᠠᠳᠠᠭ ᠵᠢᠭᠲᠡᠢ ᠠᠮᠢᠲᠠᠨ! ᠭᠡᠵᠦ ᠵᠠᠩᠴᠣᠪ ᠬᠡᠯᠡᠬᠦ ᠳ᠋ᠦ᠍ ᠠᠩᠴᠢᠨᠵᠠᠪ᠄
一 ᠬᠣᠯᠠ ᠤᠳᠤᠮ ᠲᠠᠢ ᠬᠦᠯᠦᠭ ᠶᠦᠮ ᠠ᠋᠂ ᠨᠤᠲᠤᠭ ᠥᠭᠡᠷᠡᠯᠬᠡᠵᠦ ᠰᠠᠯᠬᠢᠳᠠᠵᠤ ᠪᠠᠢᠯᠭᠦᠢ ᠳᠡ! ᠠᠷᠭᠠ ᠴᠤ᠌ ᠦᠭᠡᠢ᠂ ᠮᠣᠷᠢ ᠭᠡᠳᠡᠭ ᠠᠮᠢᠲᠠᠨ ᠬᠥᠮᠦᠨ ᠳᠣᠲᠣᠷᠠ ᠲᠠᠢ ᠠᠳᠤᠭᠤᠰᠤ ᠶᠤᠮ᠃
一 ᠬᠠᠷᠢᠨ ᠭᠡᠮ᠂ ᠨᠠᠮᠤᠷ ᠠᠨᠢᠷᠲᠤᠭᠰᠠᠭᠠᠷ ᠨᠤᠲᠤᠭ ᠥᠭᠡᠷᠡᠯᠬᠡᠭᠡᠳ ᠬᠣᠢᠰᠢ ᠶᠠᠪᠤᠬᠤ ᠭᠡᠳ ᠪᠠᠢᠬᠤ ᠶᠤᠮ ᠭᠡᠬᠦ ᠳ᠋ᠦ᠍ ᠬᠡᠭᠡᠷ ᠮᠣᠷᠢ ᠴᠤ᠌ ᠡᠵᠡᠨ ᠦ᠌ ᠪᠡᠨ ᠬᠡᠯᠡᠭᠰᠡᠨ ᠢ᠋ ᠣᠢᠯᠠᠭᠠᠭᠰᠠᠨ ᠰᠢᠭ᠋ ᠲᠡᠷᠡ ᠠᠯᠤᠰ ᠤ᠋ᠨ ᠪᠠᠷᠠ ᠶ᠋ᠢ ᠰᠢᠷᠲᠡᠭᠡᠳ ᠬᠠᠩᠭᠢᠨᠠᠲᠠᠯᠠ ᠦᠦᠷᠰᠡᠪᠡ᠃
ᠶᠠᠭ ᠪᠣᠯᠬᠤ ᠦᠭᠡᠢ ᠪᠣᠯ ᠰᠣᠷᠮᠤᠤᠰᠤ ᠶ᠋ᠢ ᠨᠢ ᠬᠠᠢᠴᠢᠯᠠᠴᠢᠬᠠ! ᠲᠡᠭᠡᠪᠡᠯ ᠬᠣᠯᠠᠳᠴᠤ ᠴᠢᠳᠠᠬᠤ ᠦᠭᠡᠢ᠃
一 ᠶᠠᠭᠠᠬᠢᠬᠤ ᠪᠣᠢ ᠳᠠ᠂ ᠪᠠᠢᠵᠤ ᠯᠠ ᠪᠠᠢᠭ! ᠬᠡᠭᠡᠷ ᠮᠣᠷᠢᠨ ᠤ᠋ ᠪᠠᠨ ᠬᠥᠯᠥᠰᠥ ᠶ᠋ᠢ ᠨᠢ ᠬᠠᠰᠠᠷ ᠤᠨᠠᠭᠠᠬᠤ ᠠ᠋ᠴᠠ ᠬᠠᠷᠠᠮᠨᠠᠬᠤ ᠶᠤᠮ ᠠ᠋ ᠰᠣᠷᠮᠤᠤᠰᠤ ᠶ᠋ᠢ ᠨᠢ ᠬᠠᠢᠴᠢᠯᠠᠴᠢᠬᠠᠪᠠᠯ ᠰᠥᠨᠢ ᠶᠠᠪᠤᠬᠤ ᠳ᠋ᠤ᠌ ᠴᠦᠮᠴᠦᠷᠡᠭᠡᠳ ᠭᠠᠵᠠᠷ ᠳᠥᠭᠥᠬᠦ ᠦᠭᠡᠢ ᠪᠣᠯᠤᠨᠠ᠃ ᠬᠥᠭᠡᠷᠦᠬᠦᠢ ᠳᠡ᠂ ᠰᠠᠢᠨ ᠠᠭᠲᠠ ᠰᠠᠢᠨ ᠡᠷᠡ ᠬᠣᠶᠠᠷ ᠯᠠ ᠨᠢᠳᠦᠨ ᠦ᠌ ᠴᠢᠮᠡᠭ ᠰᠡᠳᠬᠢᠯ ᠦ᠋ᠨ ᠣᠮᠣᠭ ᠶᠤᠮ ᠠ᠋! ᠰᠠᠯᠬᠢ ᠰᠢᠭ᠋ ᠬᠤᠷᠳᠤᠨ ᠭᠦᠶᠦᠳᠡᠯ ᠲᠡᠢ ᠡᠨᠡ ᠬᠡᠭᠡᠷ ᠮᠣᠷᠢᠨ ᠤ᠋ ᠨᠢᠷᠤᠭᠤᠨ ᠳᠡᠭᠡᠷᠡ ᠭᠠᠷᠤᠭᠠᠳ ᠰᠠᠭᠤᠴᠢᠬᠠᠬᠤ ᠳ᠋ᠤ᠌ ᠨᠢᠭᠡ ᠮᠡᠳᠡᠬᠦᠯᠡ ᠵᠣᠷᠢᠭᠰᠠᠨ ᠭᠠᠵᠠᠷ ᠲᠠᠭᠠᠨ ᠬᠦᠷᠴᠢᠬᠡᠭᠰᠡᠨ ᠯᠡ ᠪᠠᠢᠳᠠᠭ ᠰᠠᠨ᠃
一 ᠢᠵᠢᠯᠢ ᠵᠢᠰᠦᠮ ᠦ᠋ᠨ ᠬᠣᠶᠠᠷ ᠬᠡᠭᠡᠷ ᠦ᠋ᠨ ᠨᠢᠭᠡ ᠶ᠋ᠢ ᠨᠢ ᠮᠠᠨᠴᠤᠷᠭᠠ ᠳ᠋ᠤ᠌ ᠥᠭᠬᠦ ᠭᠡᠵᠦ ᠲᠡᠷᠡ ᠵᠢᠯ ᠬᠠᠷᠠ ᠳᠠᠪᠠᠭᠠᠨ ᠳᠡᠭᠡᠷᠡ ᠮᠠᠭᠤ ᠭᠠᠷᠯᠢᠭ ᠬᠠᠷᠠ ᠨᠢᠳᠦᠲᠦ ᠶ᠋ᠢᠨ ᠲᠤᠨᠤᠭᠠᠨ ᠳ᠋ᠤ᠌ ᠶᠡᠭᠦᠯᠡᠵᠦ ᠣᠷᠬᠢᠭᠠᠳ᠁ ᠲᠡᠭᠡᠭᠡᠳ ᠣᠳᠣ ᠢᠵᠢᠯᠢ ᠬᠡᠭᠡᠷ ᠦ᠋ᠨ ᠨᠥᠭᠦᠭᠡ ᠥᠷᠥᠭᠡᠰᠦᠨ ᠨᠢ ᠴᠣᠬᠣᠮ ᠬᠠᠮᠢᠭᠠ ᠪᠠᠢᠳᠠᠭ ᠰᠠᠨ ᠪᠣᠯ⁈ ᠬᠠᠢᠷᠠᠨ ᠡᠷᠡ ᠬᠠᠢᠷᠠᠨ ᠮᠣᠷᠢ᠁
一 ᠦᠨᠡᠬᠡᠷ ᠮᠠᠨᠴᠤᠷᠭᠠ ᠬᠠᠢᠷᠠᠨ ᠡᠷᠡ ᠰᠢᠦ! ᠬᠠᠷᠠ ᠨᠢᠳᠦᠲᠦ ᠳ᠋ᠦ᠍ ᠴᠢᠳᠠᠭᠳᠠᠭᠰᠠᠨ᠁ ᠬᠥᠭᠡᠷᠦᠬᠦᠢ ᠳᠡ! ᠬᠡᠯᠡᠬᠦ ᠡᠴᠡ ᠲᠡᠢᠮᠦ ᠯᠡ ᠣᠬᠣᠷ ᠨᠠᠰᠤ ᠲᠠᠢ ᠬᠥᠮᠦᠨ ᠪᠠᠢᠭᠰᠠᠨ ᠪᠠᠢᠵᠢ ᠳᠠ!
一 ᠣᠬᠣᠷ ᠨᠠᠰᠤ ᠲᠠᠢ ᠭᠡᠵᠦ ᠶᠠᠭᠤ ᠪᠠᠢᠨᠠ ᠳᠠ? ᠬᠠᠯᠠᠭᠤᠨ ᠡᠯᠢᠭᠡ ᠲᠡᠢ ᠵᠢᠷᠤᠮ ᠤ᠋ᠨ ᠠᠬᠠ ᠳᠡᠭᠦᠦᠰ ᠢ᠋ᠶ᠋ᠡᠨ ᠴᠦ᠍ ᠬᠠᠢᠷᠠ ᠨᠠᠢᠷ ᠦᠭᠡᠢ ᠬᠠᠳᠤᠷᠳᠠᠭ ᠬᠦᠢᠲᠡᠨ ᠴᠢᠰᠤ ᠲᠠᠢ ᠬᠠᠷᠠ ᠨᠢᠳᠦᠲᠦ ᠶ᠋ᠢᠨ ᠴᠢᠨᠠᠷ ᠢ᠋ ᠲᠠᠨᠢᠬᠤ ᠦᠭᠡᠢ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠴᠠᠭᠠᠨ ᠰᠠᠨᠠᠭᠠᠨ ᠠ᠋ᠴᠠ ᠪᠣᠯᠤᠭᠰᠠᠨ ᠪᠠᠢᠬᠤ ᠦᠭᠡᠢ ᠊ᠦᠦ⁈
一 ᠡᠷᠭᠢᠭᠦᠦ ᠰᠢᠳᠠᠮ ᠡᠵᠡᠨ ᠳ᠋ᠡᠭᠡᠨ ᠭᠡᠳᠡᠭ ᠪᠢᠰᠢ ᠊ᠦᠦ! ᠮᠠᠭᠤ ᠨᠢᠭᠦᠯ ᠦ᠋ᠨ ᠲᠤᠯᠤᠮ ᠬᠠᠷᠠ ᠨᠢᠳᠦᠲᠦ ᠶ᠋ᠢ ᠴᠢ ᠬᠠᠷᠢᠨ ᠵᠦᠭ ᠢ᠋ ᠨᠢ ᠵᠢᠭᠠᠵᠤ ᠬᠣᠷᠣᠰᠤᠯ ᠳᠡᠢᠯᠦᠯᠡ᠃ ᠁ ᠦᠭᠡᠢ ᠴᠦ᠍ ᠪᠣᠯ ᠪᠠᠰᠠ ᠶᠠᠮᠠᠷ ᠨᠢ ᠲᠡᠭᠦᠨ ᠦ᠌ ᠭᠠᠢ ᠳ᠋ᠤ᠌᠁ ᠭᠡᠵᠦ ᠵᠠᠩᠴᠣᠪ ᠬᠡᠯᠡᠲᠡᠯᠡ ᠠᠩᠴᠢᠨᠵᠠᠪ ᠲᠣᠰᠴᠤ᠄
一 ᠬᠣᠣᠷ ᠤ᠋ᠨ ᠬᠢᠨᠢ ᠦᠨᠳᠦᠰᠦ ᠬᠠᠷᠠ ᠨᠢᠳᠦᠲᠦ ᠪᠠᠢᠬᠤ ᠪᠢᠰᠢ᠃ ᠡᠨᠡ ᠮᠠᠭᠤ ᠭᠠᠷᠯᠢᠭ ᠮᠥᠩᠭᠥᠨ ᠳ᠋ᠦ᠍ ᠰᠢᠨᠤᠵᠤ ᠳᠠᠯᠳᠠ ᠶ᠋ᠢᠨ ᠲᠣᠬᠢᠯᠲᠠ ᠪᠠᠷ ᠮᠠᠭᠤ ᠢᠷᠣᠠ ᠦᠢᠯᠡᠳᠴᠦ ᠪᠠᠢᠬᠤ ᠠ᠋ᠴᠠ ᠳᠠ᠁ ᠨᠣᠶᠠᠨ ᠰᠠᠩ ᠳ᠋ᠤ᠌ ᠥᠯᠵᠡᠢᠰᠠᠩ ᠭᠡᠳᠡᠭ ᠢᠮᠠᠭᠠᠨ ᠳᠠᠭᠤ ᠲᠠᠢ ᠬᠥᠮᠦᠨ ᠪᠠᠢᠭᠰᠠᠨ ᠢ᠋ ᠲᠠ ᠮᠡᠳᠡᠵᠦ ᠪᠠᠢᠨᠠ ᠊ᠤᠤ?
一 ᠮᠡᠳᠡᠨᠡ᠂ ᠮᠡᠳᠡᠨᠡ᠃ ᠶᠣᠰᠣᠲᠠᠢ ᠨᠢᠭᠡ ᠦᠯᠪᠡᠭᠡᠷ ᠴᠢᠷᠠᠢ ᠲᠠᠢ ᠥᠯᠥᠨ ᠨᠢᠳᠦ ᠲᠡᠢ ᠠᠮᠢᠲᠠᠨ ᠪᠠᠢᠭᠰᠠᠨ ᠶᠤᠮ!
一 ᠵᠠ᠂ ᠶᠠᠭ ᠲᠡᠷᠡ ᠬᠥᠮᠦᠨ ᠮᠠᠨᠴᠤᠷᠭᠠ ᠶ᠋ᠢ ᠦᠰ ᠪᠣᠳᠣᠵᠤ ᠬᠢᠭᠰᠡᠨ ᠶᠦᠮ!᠂ ᠵᠠ ᠪᠠᠢᠵᠠ! ᠡᠨᠡ ᠮᠠᠭᠤ ᠬᠣᠣᠷ ᠤ᠋ᠨ ᠦᠨᠳᠦᠰᠦ ᠥᠯᠵᠡᠢᠰᠠᠩ ᠢ᠋ ᠬᠡᠵᠢᠶᠡ ᠨᠢᠭᠡ ᠡᠳᠦᠷ ᠮᠥᠨ ᠥᠯᠥᠩᠲᠦ ᠶ᠋ᠢᠨ ᠡᠬᠢᠨ ᠳ᠋ᠦ᠍ ᠠᠪᠠᠴᠢᠵᠤ ᠡᠯᠭᠦᠵᠦ ᠬᠠᠶᠠᠬᠤ ᠶᠤᠮᠰᠠᠨ᠁ ᠴᠢᠨᠣᠠ ᠶ᠋ᠢᠨ ᠬᠣᠭᠣᠯᠠ ᠪᠣᠯᠤᠭ ᠭᠡᠵᠦ ᠬᠡᠯᠡᠬᠦ ᠳ᠋ᠡᠭᠡᠨ ᠠᠩᠴᠢᠨᠵᠠᠪ ᠤ᠋ᠨ ᠨᠢᠳᠦᠨ ᠳ᠋ᠦ᠍ ᠬᠣᠷᠣᠰᠤᠯ ᠤ᠋ᠨ ᠣᠴᠢ ᠭᠢᠯᠠᠯᠵᠠᠪᠠ᠃
ᠠᠩᠴᠢᠨᠵᠠᠪ ᠤ᠋ᠨ ᠰᠢᠵᠠᠭᠤᠷ ᠴᠢᠩᠭᠠ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠨᠢᠮᠪᠠᠢ ᠴᠢᠩᠨᠠᠵᠤ ᠰᠠᠭᠤᠭᠰᠠᠨ ᠵᠠᠩᠴᠣᠪ ᠳᠣᠲᠣᠷᠠ ᠪᠠᠨ《ᠵᠥᠪ᠂ ᠵᠥᠪ!》 ᠭᠡᠵᠦ ᠵᠥᠪᠲᠦᠭᠡᠨ ᠲᠣᠯᠣᠭᠠᠢ ᠪᠠᠨ ᠪᠠᠢᠨ ᠪᠠᠢᠨ ᠳᠣᠬᠢᠵᠤ ᠬᠦᠷᠡᠩ ᠴᠣᠬᠣᠷ ᠶᠠᠰᠢᠯ ᠴᠢᠮᠥᠭᠡ ᠲᠡᠢ ᠭᠠᠤᠯᠢᠨ ᠭᠠᠩᠰᠠ ᠪᠠᠨ ᠬᠣᠷᠣᠰᠤᠯᠲᠠᠢᠬᠠᠨ ᠰᠣᠷᠣᠵᠤ ᠤᠲᠤᠭᠠ ᠪᠠᠭᠠᠭᠢᠭᠤᠯᠤᠨᠠ᠃
ᠠᠩᠴᠢᠨᠵᠠᠪ᠂ ᠵᠠᠩᠴᠣᠪ ᠨᠤᠲᠤᠭ ᠪᠡᠯᠴᠢᠭᠡᠷ᠂ ᠰᠠᠢᠨ ᠡᠷᠡ ᠰᠠᠢᠨ ᠬᠦᠯᠦᠭ ᠦ᠋ᠨ ᠲᠤᠬᠠᠢ ᠵᠣᠭᠣᠭ ᠳᠡᠯᠭᠡᠵᠦ ᠰᠠᠭᠤᠲᠠᠯᠠ ᠬᠡᠭᠡᠷ ᠮᠣᠷᠢ ᠬᠤᠤᠬᠢᠨᠠᠨ ᠦᠦᠷᠰᠡᠪᠡ᠃ ᠴᠠᠭᠠᠳᠤ ᠨᠠᠮᠬᠠᠨ ᠳᠣᠪᠣᠴᠠᠭ ᠤ᠋ᠨ ᠵᠤᠯᠠᠢ ᠶ᠋ᠢ ᠱᠣᠷᠣᠯᠠᠵᠤ ᠬᠡᠳᠦᠨ ᠮᠣᠷᠢᠲᠠᠨ ᠲᠣᠭᠣᠰᠣ ᠮᠠᠨᠠᠷᠠᠭᠠᠨ ᠠᠢᠰᠤᠢ᠃《ᠬᠡᠨ ᠪᠣᠯᠴᠢᠬᠠᠪᠠ? ᠶᠠᠭᠤᠨ ᠤ᠋ ᠤᠯᠤᠰ ᠢᠩᠭᠢᠵᠦ ᠠᠰ ᠴᠢᠭᠯᠡᠨ ᠶᠠᠭᠠᠷᠠᠵᠤ ᠳᠠᠪᠬᠢᠭᠠ ᠪᠣᠯ?》 ᠭᠡᠵᠦ ᠪᠣᠳᠣᠨ ᠮᠣᠷᠢᠨ ᠤ᠋ ᠬᠢᠨᠢ ᠵᠢᠰᠦᠮ ᠢ᠋ ᠴᠦ᠍ ᠵᠢᠰᠦᠯᠡᠵᠦ ᠵᠠᠪᠳᠤᠭᠠ ᠦᠭᠡᠢ ᠪᠠᠢᠲᠠᠯᠠ ᠮᠣᠷᠢᠲᠠᠳ ᠲᠡᠷᠡ ᠬᠣᠶᠠᠷ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠶᠠᠭᠤ ᠬᠠᠢ ᠦᠭᠡᠢ ᠪᠠᠭᠤᠪᠠ᠃ ᠮᠣᠷᠢᠳ ᠤ᠋ᠨ ᠬᠥᠯᠥᠰᠥ᠂ ᠢᠰᠡᠭᠡᠢ ᠲᠣᠬᠣᠮ ᠤ᠋ᠨ ᠵᠤᠩᠭᠠᠭ᠂ ᠪᠤᠯᠢᠭᠠᠷᠢ ᠭᠥᠯᠢᠮ ᠦ᠋ᠨ ᠬᠣᠯᠢᠶᠠ ᠲᠠᠢ ᠦᠨᠦᠷ ᠰᠡᠩᠬᠢ ᠲᠡᠳᠡᠨ ᠦᠨᠦᠷᠲᠦᠬᠦ ᠳ᠋ᠦ᠍ ᠲᠡᠳᠡ ᠬᠣᠶᠠᠷ ᠲᠤ᠌ ᠲᠠᠭᠠᠲᠠᠢ ᠰᠠᠨᠠᠭᠳᠠᠵᠤ ᠪᠠᠢᠯᠠ᠃ ᠨᠢᠷᠤᠭᠤ ᠪᠠᠨ ᠬᠥᠩᠭᠡᠯᠡᠭᠰᠡᠨ ᠮᠣᠷᠢᠳ ᠲᠣᠯᠣᠭᠠᠢ ᠪᠠᠨ ᠬᠠᠶᠠᠯᠠᠨ ᠨᠠᠭᠠᠳᠬᠤ ᠳ᠋ᠤ᠌ ᠬᠠᠵᠠᠭᠠᠷ ᠤ᠋ᠨ ᠠᠮᠠᠭᠠᠢ ᠨᠢ ᠬᠠᠩᠭᠢᠨᠠᠨ ᠳᠤᠤᠭᠠᠷᠴᠤ᠂ ᠡᠮᠡᠭᠡᠯ ᠢ᠋ᠶ᠋ᠡᠨ ᠰᠢᠯᠭᠡᠭᠡᠵᠦ ᠭᠠᠵᠠᠷ ᠮᠠᠯᠲᠠᠬᠤ ᠨᠢ ᠮᠣᠩᠭᠣᠯ ᠡᠷᠡ ᠶ᠋ᠢᠨ ᠭᠠᠢᠬᠠᠮᠰᠢᠭ ᠢ᠋ ᠲᠣᠭᠠᠴᠢᠭᠠ ᠰᠢᠭ᠋ ᠠᠶᠠᠲᠠᠢᠬᠠᠨ ᠬᠠᠷᠠᠭᠳᠠᠨᠠ᠃
ᠳᠤᠭᠠᠷᠵᠠᠪ᠂ ᠨᠠᠢᠮᠠᠨᠵᠢᠩ᠂ ᠳᠠᠯᠠᠨᠲᠠᠢ᠂ ᠲᠣᠭᠲᠠᠭᠤᠨᠪᠢᠯᠢᠭ᠌ ᠬᠡᠳᠦᠭᠦᠯᠡ ᠠᠩᠴᠢᠨᠵᠠᠪ ᠵᠠᠩᠴᠣᠪ ᠲᠠᠢ ᠠᠮᠤᠷ ᠮᠡᠨᠳᠦᠯᠡᠵᠦ ᠪᠠᠢᠯᠠ᠃ ᠡᠨᠡ ᠬᠡᠳᠦᠭᠦᠯᠡ ᠤᠤᠯ ᠨᠢ ᠠᠩᠴᠢᠨᠵᠠᠪ ᠤ᠋ᠨ ᠴᠡᠷᠢᠭ ᠲᠦ᠍ ᠪᠠᠢᠭᠰᠠᠨ ᠨᠤᠲᠤᠭ ᠤ᠋ᠨ ᠬᠢᠨᠢ ᠰᠠᠢᠨ ᠠᠬᠠ ᠳᠡᠭᠦᠦᠰ ᠮᠥᠨ᠃
ᠡᠳᠡᠨᠥᠰ ᠪᠤᠭᠤᠲᠤ ᠶ᠋ᠢᠨ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠮᠠᠢᠮᠠᠢᠴᠢᠨ ᠢ᠋ ᠬᠠᠮᠠᠭᠠᠯᠠᠵᠤ ᠪᠤᠭᠤᠲᠤ ᠶ᠋ᠢᠨ ᠬᠠᠷᠠ ᠳᠠᠪᠠᠭᠠ ᠳᠠᠪᠠᠭᠤᠯᠵᠤ ᠬᠣᠢᠰᠢ ᠵᠠᠮ ᠳᠥᠭᠥᠭᠦᠯᠴᠢᠬᠡᠭᠡᠳ ᠪᠤᠴᠠᠯᠭᠠᠨ ᠳ᠋ᠠᠭᠠᠨ ᠭᠡᠷ ᠭᠡᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠣᠷᠣᠭᠰᠠᠨ ᠪᠠᠢᠵᠠᠢ᠃ ᠲᠡᠭᠡᠬᠦ ᠳ᠋ᠦ᠍ ᠠᠷᠤ ᠭᠡᠷ ᠲᠦ᠋ᠨᠢ ᠠᠩᠴᠢᠨᠵᠠᠪ ᠤ᠋ᠨ ᠳᠠᠭᠤᠳᠠᠯᠭᠠ ᠪᠠᠢᠭᠰᠠᠨ ᠳ᠋ᠤ᠌ ᠪᠠᠶᠠᠷᠯᠠᠵᠤ᠂ ᠡᠨᠳᠡ ᠢᠷᠡᠯᠴᠡᠪᠡ᠃ ᠲᠡᠷᠡ ᠦᠶᠡ ᠶ᠋ᠢᠨ ᠬᠣᠰᠢᠭᠤ ᠨᠤᠲᠤᠭ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠳᠠᠭ ᠴᠡᠷᠢᠭ ᠠᠯᠪᠠᠲᠤ ᠶ᠋ᠢᠨ ᠣᠯᠠᠩᠬᠢ ᠨᠢ ᠴᠠᠯᠢᠩ ᠬᠥᠯᠥᠰᠥ ᠭᠡᠵᠦ ᠪᠠᠢᠬᠤ ᠦᠭᠡᠢ ᠡᠩ ᠦ᠋ᠨ ᠴᠡᠷᠢᠭ ᠦ᠋ᠳ ᠠ᠋᠂ ᠠᠳᠠᠭ ᠨᠢ ᠬᠤᠪᠴᠠᠰᠤ ᠬᠤᠨᠠᠷ ᠲᠠᠭᠠᠨ ᠴᠤ᠌ ᠵᠥᠪ ᠦᠭᠡᠢ᠃ ᠪᠤᠭᠤᠲᠤ ᠠ᠋ᠴᠠ ᠠᠷᠤ ᠲᠡᠢᠰᠢ ᠬᠠᠯᠬᠠ ᠤᠷᠤᠭᠤ ᠬᠥᠭᠯᠡᠷᠡᠬᠦ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠮᠠᠢᠮᠠᠢᠴᠢᠨ ᠢ᠋ ᠬᠠᠮᠠᠭᠠᠯᠠᠵᠤ᠂ ᠬᠠᠷᠠ ᠳᠠᠪᠠᠭᠠ ᠶ᠋ᠢ ᠲᠤᠭᠤᠯᠤᠭᠤᠯᠬᠤ ᠠᠵᠠ ᠲᠣᠬᠢᠶᠠᠯ ᠠᠮᠠᠷᠬᠠᠨ ᠣᠯᠳᠠᠳᠠᠭ ᠪᠢᠰᠢ᠃ ᠲᠠᠩᠳᠠ ᠴᠣᠭᠪᠠᠭᠠᠲᠤᠷ ᠰᠧᠯᠢᠩ ᠦ᠋ᠨ ᠨᠢᠭᠤᠷ ᠲᠠᠯᠠ ᠲᠠᠢ ᠰᠢᠳᠠᠷ ᠴᠡᠷᠢᠭ ᠦ᠋ᠳ ᠡᠢᠮᠦ ᠬᠣᠨᠵᠢᠶᠠ ᠲᠠᠢ ᠮᠠᠢᠮᠠᠢ ᠳ᠋ᠤ᠌ ᠶᠠᠪᠤᠯᠴᠠᠬᠤ ᠠ᠋ᠴᠠ ᠪᠢᠰᠢ ᠡᠳᠡᠨᠥᠰ ᠲᠦ᠍ ᠬᠦᠷᠲᠡᠭᠳᠡᠭ ᠦᠭᠡᠢ᠃ ᠡᠨᠡ ᠤᠳᠠᠭᠠ ᠥᠨᠥᠬᠢ ᠨᠢᠭᠤᠷ ᠲᠠᠯᠠ ᠲᠠᠢ ᠰᠢᠳᠠᠷ ᠴᠡᠷᠢᠭ ᠦ᠋ᠳ ᠥᠭᠡᠷᠡ ᠲᠠᠢᠰᠢ ᠳᠣᠲᠣᠷᠠ ᠭᠠᠵᠠᠷ ᠤ᠋ᠨ ᠣᠯᠵᠠ ᠰᠠᠢᠲᠠᠢ ᠤᠯᠠᠭᠠ ᠳ᠋ᠤ᠌ ᠶᠠᠪᠤᠭᠰᠠᠨ ᠠ᠋ᠴᠠ ᠡᠨᠡ ᠬᠡᠳᠦᠭᠦᠯᠡ ᠳ᠋ᠦ᠍ ᠰᠣᠬᠣᠷ ᠮᠤᠤᠷ ᠲᠤ᠌ ᠦᠬᠦᠭᠰᠡᠨ ᠬᠤᠯᠤᠭᠠᠨᠠ ᠲᠣᠬᠢᠶᠠᠪᠠ ᠭᠡᠳᠡᠭ ᠢ᠋ᠶ᠋ᠡᠷ ᠵᠣᠯ ᠲᠠᠭᠠᠷᠠᠵᠤ ᠬᠡᠳᠦᠨ ᠮᠥᠩᠭᠥ ᠡᠪᠦᠷᠲᠦᠯᠡᠵᠦ᠂ ᠪᠦᠰᠡᠭᠦᠢ ᠬᠡᠦᠬᠡᠳ ᠲᠡᠭᠡᠨ ᠲᠠᠭᠠᠯᠠᠪᠤᠷᠢᠲᠠᠢ ᠶᠠᠭᠤᠮᠠ ᠠᠪᠴᠤ ᠬᠥᠭᠰᠡᠵᠦ ᠶᠠᠪᠤᠭᠠ᠁
ᠠᠩᠴᠢᠨᠵᠠᠪ ᠸᠠᠩ ᠰᠣᠬᠣᠷ ᠤ᠋ᠨ ᠬᠠᠷᠠ ᠴᠡᠷᠢᠭ ᠲᠦ᠍ ᠪᠠᠷᠢᠭᠳᠠᠵᠤ ᠭᠢᠨᠳᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠠ᠋ᠴᠠ ᠬᠣᠢᠰᠢ ᠲᠡᠭᠦᠨ ᠬᠠᠷᠢᠶᠠᠨ ᠳ᠋ᠠᠬᠢ ᠴᠡᠷᠢᠭ ᠢ᠋ ᠴᠡᠭᠴᠡᠯᠡᠵᠦ ᠬᠤᠷᠢᠶᠠᠭᠠᠳ ᠬᠥᠩᠬᠥᠷ ᠵᠠᠮᠪᠠᠯ ᠭᠡᠳᠡᠭ ᠯᠢᠶᠠᠨᠵᠠᠩ ᠤ᠋ᠨ ᠨᠣᠶᠠᠯᠠᠯ ᠳᠣᠣᠷᠠ ᠴᠡᠷᠢᠭ ᠦ᠋ᠨ ᠠᠯᠪᠠ ᠬᠠᠭᠠᠯᠭᠠᠪᠠ᠃ ᠡᠨᠡ ᠬᠥᠩᠬᠥᠷ ᠵᠠᠮᠪᠠᠯ ᠭᠡᠭᠴᠢ ᠮᠥᠨ ᠳᠡᠭᠡᠷᠡᠬᠢ ᠪᠡᠨ ᠪᠢᠯᠳᠠᠤᠴᠢᠯᠠᠵᠤ ᠳᠣᠣᠷᠠᠬᠢ ᠪᠠᠨ ᠬᠢᠬᠠᠳᠠᠭ ᠬᠠᠷᠭᠢᠰ ᠲᠣᠯᠣᠭᠠᠢ᠃ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠭᠠᠳᠠᠭᠤᠷᠴᠢᠯᠠᠵᠤ ᠬᠡᠳᠦᠨ ᠬᠢᠲᠠᠳ ᠴᠡᠷᠢᠭ ᠢ᠋ᠶ᠋ᠡᠨ ᠳᠣᠲᠣᠨᠣᠴᠢᠯᠠᠳᠠᠭ ᠠ᠋ᠴᠠ ᠡᠨᠡ ᠬᠡᠳᠦᠭᠦᠯᠡ ᠥᠨᠥᠬᠢ ᠬᠥᠩᠬᠥᠷ ᠲᠣᠯᠣᠭᠠᠢᠲᠤ ᠶ᠋ᠢ ᠬᠠᠭᠠ ᠴᠣᠬᠢᠴᠢᠬᠠᠶᠠ ᠭᠡᠵᠦ ᠮᠠᠰᠢ ᠵᠠᠨᠤᠳᠠᠭ ᠪᠣᠯᠪᠠ᠃ ᠬᠥᠩᠬᠥᠷ ᠵᠠᠮᠪᠠᠯ ᠴᠣᠭᠪᠠᠭᠠᠲᠤᠷ ᠰᠧᠯᠢᠩ ᠦ᠋ᠨ ᠨᠥᠮᠥᠷᠢ ᠳ᠋ᠦ᠍ ᠡᠷᠳᠦᠵᠦ ᠤᠤᠯ ᠠᠩᠴᠢᠨᠵᠠᠪ ᠤ᠋ᠨ ᠴᠡᠷᠢᠭ ᠡᠴᠡ ᠲᠡᠭᠦᠨ ᠦ᠌ ᠳᠣᠣᠷᠠ ᠴᠡᠭᠴᠡᠯᠡᠭᠳᠡᠭᠰᠡᠨ ᠬᠡᠳᠦᠨ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠠᠳᠠ ᠦᠵᠡᠳᠡᠭ ᠨᠢ ᠵᠢᠭᠲᠡᠢ᠃ ᠴᠡᠷᠢᠭ ᠦ᠋ᠨ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ ᠤᠯᠠᠷᠢᠯ ᠳᠠᠭᠠᠵᠤ ᠰᠣᠯᠢᠵᠤ ᠥᠭᠬᠦ ᠶ᠋ᠢ ᠮᠡᠳᠡᠬᠦ ᠦᠭᠡᠢ᠃ ᠵᠠᠷᠢᠮ ᠳ᠋ᠠᠭᠠᠨ ᠡᠪᠦᠯ ᠦ᠋ᠨ ᠨᠡᠬᠡᠢ ᠬᠤᠪᠴᠠᠰᠤ ᠪᠠᠨ ᠬᠥᠷᠥᠰᠥ ᠶ᠋ᠢ ᠨᠢ ᠡᠷᠭᠢᠭᠦᠯᠬᠦ ᠪᠤᠶᠤ ᠬᠥᠪᠥᠩ ᠢ᠋ ᠨᠢ ᠬᠠᠭᠤᠯᠵᠤ ᠵᠤᠨ ᠨᠠᠮᠤᠷ ᠢ᠋ ᠠᠷᠭᠠᠴᠠᠭᠠᠬᠤ ᠳ᠋ᠠᠭᠠᠨ ᠪᠥᠭᠡᠰᠦ ᠬᠢᠭᠤᠷᠰᠤᠨ ᠳ᠋ᠤ᠌ ᠪᠠᠷᠢᠭᠳᠠᠵᠤ ᠦᠢᠯᠡ ᠪᠡᠨ ᠦᠵᠡᠬᠦ ᠶ᠋ᠢ ᠬᠡᠯᠡᠬᠦ ᠦᠭᠡᠢ᠂ ᠬᠠᠯᠠᠭᠤᠨ ᠵᠤᠨ ᠤ᠋ ᠳᠠᠩ ᠲᠡᠷᠯᠢᠭ ᠢ᠋ᠶ᠋ᠡᠷ ᠴᠦᠷᠳᠡᠢᠯᠭᠡᠭᠡᠳ ᠡᠪᠦᠯ ᠬᠠᠪᠤᠷ ᠢ᠋ ᠭᠠᠲᠤᠯᠳᠠᠭ ᠤᠳᠠᠭᠠ ᠴᠤ᠌ ᠪᠠᠢᠭᠰᠠᠨ᠁ ᠴᠡᠷᠢᠭ ᠦ᠋ᠨ ᠬᠣᠭᠣᠯᠠ ᠬᠣᠰᠢ ᠨᠢ ᠬᠠᠷᠠᠰᠤ ᠪᠣᠷᠣᠰᠤ᠂ ᠱᠥᠯᠥ ᠲᠣᠰᠣᠨ ᠤ᠋ ᠶᠠᠭᠤᠮᠠ ᠭᠡᠵᠦ ᠪᠠᠷᠤᠭ ᠪᠠᠢᠳᠠᠭ ᠦᠭᠡᠢ᠃ ᠬᠠᠶᠠ ᠨᠤᠲᠤᠭ ᠢ᠋ᠶ᠋ᠠᠨ ᠰᠠᠨᠠᠵᠤ ᠬᠡᠦᠬᠡᠳ ᠪᠦᠰᠡᠭᠦᠢ᠂ ᠭᠡᠷ ᠲᠡᠷᠭᠡ ᠪᠡᠨ ᠡᠷᠭᠢᠬᠦ ᠪᠡᠷ ᠬᠠᠷᠢᠶᠠ ᠭᠡᠬᠦ ᠳ᠋ᠦ᠍ ᠴᠢᠯᠥᠭᠡ ᠥᠭᠬᠦ ᠦᠭᠡᠢ ᠵᠣᠪᠠᠭᠠᠳᠠᠭ ᠵᠡᠷᠭᠡ ᠭᠠᠴᠢᠯᠠᠯ ᠢ᠋ ᠲᠠᠩᠳᠠ ᠮᠣᠩᠭᠣᠯ ᠴᠡᠷᠢᠭ ᠦ᠋ᠳ ᠲᠦ᠍ ᠣᠨᠣᠭᠠᠵᠤ ᠭᠡᠨᠡᠨ ᠠᠶᠤᠮᠰᠢᠭ ᠲᠠᠢ ᠲᠡᠢᠨ ᠳᠣᠯᠣᠭᠠᠨ ᠳ᠋ᠤ᠌ ᠡᠳᠡᠨᠥᠰ ᠢ᠋ ᠡᠮᠦᠨᠡ ᠪᠡᠨ ᠲᠠᠭᠤᠵᠤ ᠬᠥᠭᠡᠭᠡᠳᠡᠭ ᠨᠢ ᠵᠤᠷᠰᠢᠯ᠃ ᠡᠢᠨ ᠬᠦ ᠡᠨᠡ ᠬᠡᠳᠦᠭᠦᠯᠡ ᠤᠤᠯ ᠤ᠋ᠨ ᠳᠠᠷᠤᠭᠠᠯᠠᠵᠤ ᠪᠠᠢᠭᠰᠠᠨ ᠠᠩᠴᠢᠨᠵᠠᠪ ᠲᠠᠢ ᠪᠠᠨ ᠠᠭᠤᠯᠵᠠᠵᠤ᠂ ᠲᠡᠭᠦᠨ ᠢ᠋ᠶ᠋ᠡᠷ ᠥᠮᠥᠭ ᠪᠠᠷᠢᠵᠤ ᠴᠣᠭᠪᠠᠭᠠᠲᠤᠷ᠂ ᠬᠥᠩᠬᠥᠷ ᠵᠠᠮᠪᠠᠯ ᠨᠠᠷ ᠲᠤ᠌ ᠰᠠᠢᠨ ᠦᠭᠡ ᠬᠡᠯᠡᠭᠦᠯᠵᠦ ᠴᠡᠷᠢᠭ ᠲᠡᠢᠨ ᠦ᠌ ᠵᠠᠷ ᠵᠡᠪᠰᠡᠭ ᠬᠤᠪᠴᠠᠰᠤ ᠬᠤᠨᠠᠷ᠂ ᠢᠳᠡᠰᠢ ᠤᠤᠭᠤᠰᠢ ᠶ᠋ᠢᠨ ᠲᠠᠯᠠ ᠪᠠᠷ ᠪᠠᠭᠠ ᠰᠠᠭᠠ ᠴᠤ᠌ ᠭᠡᠰᠡᠨ ᠬᠠᠷᠠᠭᠠᠯᠵᠠᠯ ᠲᠠᠢ ᠪᠣᠯᠬᠤ ᠪᠢᠯᠡ ᠊ᠤᠤ ᠭᠡᠵᠦ ᠬᠥᠭᠰᠡᠵᠦ ᠶᠠᠪᠤᠭᠠ ᠨᠢ ᠡᠨᠡ᠃
一 ᠠᠩᠴᠢᠨᠵᠠᠪ ᠠᠬᠠ ᠠ᠋᠂ ᠲᠠ ᠴᠡᠷᠢᠭ ᠲᠡᠭᠡᠨ ᠪᠤᠴᠠᠴᠢᠬᠠ ᠳᠠ ᠨᠣᠶᠠᠯᠠᠯ ᠳᠣᠣᠷᠠ ᠪᠢᠳᠡᠨᠦᠰ ᠴᠦ᠍ ᠬᠥᠮᠦᠨ ᠲᠡᠢ ᠠᠳᠠᠯᠢᠬᠠᠨ ᠮᠥᠷᠥ ᠪᠦᠲᠦᠨ ᠭᠡᠳᠡᠰᠦ ᠴᠠᠳᠬᠤᠯᠠᠩ ᠶᠠᠪᠤᠬᠤ ᠦᠭᠡᠢ ᠊ᠦᠦ ᠳᠡ! ᠭᠡᠵᠦ ᠳᠤᠭᠠᠷᠵᠠᠪ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠨᠠᠢᠮᠠᠨᠵᠢᠩ ᠦᠭᠡ ᠡᠯᠭᠦᠨ᠄
一 ᠲᠠ ᠴᠣᠭᠪᠠᠭᠠᠲᠤᠷ ᠨᠣᠶᠠᠨ ᠳ᠋ᠤ᠌ ᠰᠠᠢᠨ ᠦᠭᠡ ᠬᠡᠯᠡᠵᠦ ᠪᠢᠳᠡᠨᠦᠰ ᠢ᠋ ᠨᠢᠭᠡ ᠠᠰ ᠨᠢᠳᠦ ᠪᠡᠷ ᠬᠠᠷᠠᠬᠤ ᠪᠣᠯᠪᠠ ᠊ᠤᠤ? ᠭᠡᠵᠦ ᠭᠤᠶᠤᠵᠤ ᠬᠡᠯᠡᠨᠡ᠃
一 ᠬᠥᠩᠬᠥᠷ ᠵᠠᠮᠪᠠᠯ ᠭᠡᠵᠦ ᠬᠦᠢᠲᠡᠨ ᠴᠢᠷᠠᠢᠲᠤ ᠠᠮᠢᠲᠠᠨ! ᠮᠠᠨᠤᠰ ᠢ᠋ ᠪᠤᠷᠤᠭᠤ ᠨᠢᠳᠦ ᠪᠡᠷ ᠬᠠᠷᠠᠵᠤ ᠬᠣᠢᠲᠤ ᠡᠬᠡ ᠶ᠋ᠢᠨ ᠬᠡᠦᠬᠡᠳ ᠰᠢᠭ ᠮᠠᠭᠤ ᠦᠵᠡᠨᠡ᠃
— ᠲᠡᠳᠡᠨᠦᠰ ᠤ᠋ᠨ ᠰᠢᠳᠠᠷ ᠴᠡᠷᠢᠭ ᠦ᠋ᠳ ᠨᠢ ᠵᠠᠷ ᠵᠡᠪᠰᠡᠭ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ᠶ᠋ᠠᠷ ᠰᠠᠢᠨ᠃ ᠮᠠᠨᠤᠰ ᠢ᠋ ᠦᠵᠡᠬᠦ ᠦᠭᠡᠢ ᠊ᠦᠦ? ᠬᠣᠩᠬᠢᠶᠠ ᠬᠥᠨᠳᠡᠯᠡᠨ ᠲᠡᠮᠦᠷ ᠡᠭᠦᠷᠦᠭᠰᠡᠨ ᠭᠤᠢᠷᠠᠨᠴᠢ ᠯᠠ ᠭᠡᠰᠡᠨ ᠦᠭᠡ᠁ ᠭᠡᠵᠦ ᠲᠠᠯᠠ ᠲᠠᠯᠠ ᠠ᠋ᠴᠠ ᠨᠢ ᠦᠭᠡ ᠬᠠᠪᠴᠢᠭᠤᠯᠵᠤ ᠠᠩᠴᠢᠨᠵᠠᠪ ᠢ᠋ ᠦᠭᠡ ᠬᠡᠯᠡᠬᠦ ᠵᠠᠪ ᠣᠯᠭᠣᠬᠤ ᠦᠭᠡᠢ ᠪᠠᠢᠯᠠ᠃
一 ᠬᠥᠩᠬᠥᠷ ᠵᠠᠮᠪᠠᠯ ᠶᠠᠭᠤ ᠪᠣᠢ? ᠶᠠᠭᠤ ᠴᠤ᠌ ᠪᠢᠰᠢ! ᠴᠠᠭᠠᠳᠤᠭᠤᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠤᠷᠤᠭᠤ ᠬᠢᠮᠤᠰᠤ ᠯᠠ ᠰᠢᠦ ᠳᠡ! ᠭᠣᠣᠯ ᠤᠴᠢᠷ ᠲᠡᠨᠳᠡ ᠪᠠᠢᠭᠠ ᠪᠢᠰᠢ ᠠ᠋! ᠴᠣᠭᠪᠠᠭᠠᠲᠤᠷ ᠨᠠᠳᠠ ᠳ᠋ᠤ᠌ ᠥᠰᠢᠶᠡᠷᠬᠡᠵᠦ ᠲᠠᠨᠤᠰ ᠲᠤ᠌ ᠡᠢᠨ ᠬᠦ᠌ ᠬᠠᠯᠠ ᠦᠵᠡᠭᠦᠯᠵᠦ ᠪᠠᠢᠭᠠ ᠬᠡᠷᠡᠭ!
一 ᠶᠠᠭ ᠳᠠ! ᠭᠡᠵᠦ ᠳᠤᠭᠠᠷᠵᠠᠪ ᠵᠥᠪᠰᠢᠶᠡᠷᠡᠨᠡ᠃
一 ᠲᠡᠭᠡᠪᠡᠯ ᠲᠠ ᠴᠣᠭᠪᠠᠭᠠᠲᠤᠷ ᠰᠧᠯᠢᠩ ᠳ᠋ᠦ᠍ ᠰᠠᠢᠨ ᠦᠭᠡ ᠬᠡᠯᠡᠵᠦ ᠭᠤᠶᠤᠵᠤ ᠪᠠᠢᠭᠠᠳ ᠴᠤ᠌ ᠴᠡᠷᠢᠭ ᠳᠡᠭᠡᠷᠡ ᠪᠡᠨ ᠪᠤᠴᠠᠴᠢᠬᠠ ᠳᠠ! ᠦᠨᠡᠬᠡᠷ ᠰᠢᠦ! ᠲᠡᠭᠡᠪᠡᠯ ᠮᠠᠨᠤᠰ ᠲᠠᠭᠠᠨ ᠲᠦᠰᠢᠭ ᠲᠡᠢ ᠪᠢᠰᠢ ᠊ᠦᠦ! ᠭᠡᠵᠦ ᠨᠠᠢᠮᠠᠨᠵᠢᠩ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠠᠩᠴᠢᠨᠵᠠᠪ ᠤ᠋ᠨ ᠨᠢᠳᠦᠨ ᠳ᠋ᠦ᠍ ᠬᠢᠯᠢᠩ ᠦ᠋ᠨ ᠣᠴᠢ ᠭᠢᠯᠠᠯᠵᠠᠨ ᠥᠳᠬᠡᠨ ᠬᠠᠷᠠ ᠬᠥᠮᠥᠰᠬᠡ ᠨᠢ ᠠᠲᠤᠷᠢᠨ᠄
一 ᠲᠡᠭᠦᠨ ᠢ᠋ ᠭᠤᠶᠤᠬᠤ ᠭᠡᠵᠢ ᠊ᠦᠦ? ᠪᠠᠢᠴᠢᠬᠠ! ᠠᠩᠴᠢᠨᠵᠠᠪ ᠪᠢ ᠴᠣᠭᠪᠠᠭᠠᠲᠤᠷ ᠤ᠋ᠨ ᠰᠢᠨᠠᠭᠠᠨ ᠤ᠋ ᠳᠣᠣᠷᠠ ᠠᠶᠠᠭᠠ ᠲᠣᠰᠳᠠᠭ ᠬᠥᠮᠦᠨ ᠮᠥᠨ ᠊ᠦᠦ⁈ ᠭᠡᠪᠡ᠃
一 ᠲᠡᠭᠡᠭᠡᠳ ᠶᠠᠭᠠᠬᠢᠨᠠ ᠪᠣᠢ?
一 ᠠᠬᠠ ᠲᠠ ᠨᠢᠭᠡ ᠠᠷᠭᠠ ᠭᠠᠷᠭᠠᠬᠤ ᠦᠭᠡᠢ ᠊ᠦᠦ?
一 ᠶᠠᠭᠠᠬᠢᠬᠤ ᠪᠣᠢ ᠳᠠ! ᠤᠴᠢᠷ ᠶᠠᠪᠤᠳᠠᠯ ᠨᠢᠭᠡᠨᠲᠡ ᠡᠢᠮᠦ ᠪᠣᠯᠴᠢᠬᠠᠭᠰᠠᠨ ᠬᠣᠢᠨᠠ ᠤᠷᠢᠳ ᠢ᠋ᠶ᠋ᠠᠷ ᠵᠥᠭᠡᠯᠡᠨ ᠢ᠋ᠶ᠋ᠡᠷ ᠣᠷᠣᠵᠤ ᠠᠭᠠᠵᠢᠮ ᠢ᠋ᠶ᠋ᠠᠷ ᠡᠪ ᠢ᠋ ᠨᠢ ᠦᠵᠡᠬᠦ ᠦᠭᠡᠢ ᠊ᠦᠦ ᠳᠡ! ᠭᠡᠵᠦ ᠳᠠᠯᠠᠨᠲᠠᠢ ᠬᠡᠯᠡᠭᠰᠡᠨ ᠳ᠋ᠦ᠍ ᠠᠩᠴᠢᠨᠵᠠᠪ᠄
一 ᠬᠡᠩ! ᠴᠣᠭᠪᠠᠭᠠᠲᠤᠷ ᠴᠢᠨᠦ ᠵᠥᠭᠡᠯᠡᠨ ᠦᠭᠡᠨ ᠦ᠌ ᠲᠡᠢᠮᠦ ᠠᠮᠠᠷᠬᠠᠨ ᠣᠷᠣᠴᠢᠬᠠᠨᠠ ᠊ᠤᠤ⁈ ᠭᠡᠪᠡ᠃
一 ᠪᠢ ᠭᠡᠳᠡᠷᠭᠦ ᠪᠡᠨ ᠴᠡᠷᠢᠭ ᠲᠡᠭᠡᠨ ᠣᠴᠢᠶᠠ᠂ ᠨᠠᠳᠠ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠵᠡᠷᠭᠡ ᠶ᠋ᠢ ᠮᠢᠨᠢ ᠰᠡᠷᠭᠦᠭᠡᠭᠡᠳ ᠠᠯᠢ ᠭᠡᠬᠦ ᠳ᠋ᠦ᠍ ᠴᠣᠭᠪᠠᠭᠠᠲᠤᠷ《 ᠪᠣᠯᠤᠨᠠ᠂ ᠴᠢ ᠢᠷᠡ! ᠮᠠᠢ ᠴᠢᠮᠠ ᠳ᠋ᠤ᠌ ᠵᠡᠷᠭᠡ ᠥᠭᠭᠦᠶᠡ!》 ᠭᠡᠳ ᠬᠡᠦᠬᠡᠳ ᠦ᠋ᠨ ᠨᠠᠭᠠᠳᠤᠮ ᠰᠢᠭ᠋ ᠰᠢᠤᠬᠠᠨ ᠶᠠᠭᠤᠮᠠ ᠠᠢᠯᠠᠳᠳᠠᠭ ᠬᠥᠮᠦᠨ ᠦ᠌ ᠨᠢᠭᠡ ᠭᠡᠵᠦ ᠬᠢᠯᠪᠠᠷ ᠢ᠋ᠶ᠋ᠠᠷ ᠪᠣᠳᠣᠵᠤ ᠪᠣᠯᠬᠤ ᠦᠭᠡᠢ! ᠲᠠᠨᠤᠰ ᠲᠠᠩᠳᠠ ᠲᠣᠭᠯᠠᠭᠠᠮ ᠨᠠᠭᠠᠳᠤᠮ ᠰᠢᠭ᠋ ᠶᠠᠭᠤᠮᠠ ᠶᠠᠷᠢᠬᠤ ᠶᠤᠮ᠃
一 ᠲᠡᠭᠡᠭᠡᠳ ᠣᠳᠣ ᠶᠠᠭᠠᠬᠢᠨᠠ ᠪᠣᠢ? ᠠᠩᠴᠢᠨᠵᠠᠪ ᠠᠬᠠ ᠲᠠ ᠬᠡᠯᠡ! ᠲᠠ ᠮᠠᠨᠤᠰ ᠲᠤ᠌ ᠨᠢᠭᠡ ᠠᠷᠭᠠ ᠤᠬᠠᠭᠠᠨ ᠭᠠᠷᠭᠠᠵᠤ ᠥᠭ! ᠲᠠ ᠶᠠᠭᠤ ᠯᠠ ᠭᠡᠪᠡᠯ ᠪᠢᠳᠡ ᠲᠡᠭᠦᠨ ᠡᠴᠡ ᠴᠢᠨᠢ ᠪᠤᠴᠠᠬᠤ ᠦᠭᠡᠢ᠁ ᠭᠡᠵᠦ ᠡᠨᠡ ᠬᠡᠳᠦᠭᠦᠯᠡ ᠪᠠᠷᠤᠭ ᠵᠡᠷᠭᠡ ᠪᠡᠷ ᠳᠤᠤᠭᠠᠷᠪᠠ᠃
一 ᠲᠠ ᠨᠠᠷ ᠦᠨᠡᠬᠡᠷ ᠬᠠᠯᠠ ᠵᠣᠪᠠᠯᠠᠩ ᠠᠮᠰᠠᠭᠰᠠᠨ ᠪᠠᠢᠳᠠᠯ ᠲᠠᠢ᠃ ᠲᠠᠨᠤᠰ ᠤ᠋ᠨ ᠲᠥᠯᠥᠭᠡ ᠮᠢᠨᠦ ᠳᠣᠲᠣᠷᠠ ᠴᠤ᠌ ᠡᠪ ᠦᠭᠡᠢ ᠯᠡ ᠪᠠᠢᠨᠠ᠃
一 ᠠᠩᠴᠢᠨᠵᠠᠪ ᠳᠠᠷᠤᠭᠠ ᠠ᠋!
一 ᠠᠩᠴᠢᠨᠵᠠᠪ ᠭᠤᠸᠠᠢ ᠠ᠋!
一 ᠠᠩᠴᠢᠨᠵᠠᠪ ᠠᠬᠠ ᠠ᠋! ᠭᠡᠵᠦ ᠨᠥᠭᠦᠭᠡ ᠬᠡᠳᠦᠭᠦᠯᠡ ᠵᠦᠭ ᠵᠦᠭ ᠡᠴᠡ ᠠᠩᠴᠢᠨᠵᠠᠪ ᠢ᠋ ᠬᠦᠷᠢᠶᠡᠯᠡᠨ᠂ ᠠᠷᠢᠶᠠᠪᠠᠯᠤ ᠪᠤᠷᠬᠠᠨ ᠠ᠋ᠴᠠ ᠠᠪᠤᠷᠠᠯ ᠭᠤᠶᠤᠬᠤ ᠰᠢᠭ᠋ ᠰᠥᠭᠥᠳᠦᠨ ᠮᠥᠷᠭᠥᠪᠡ᠃
一 ᠪᠣᠰᠴᠠᠭᠠ! ᠶᠠᠭᠠᠬᠢᠵᠤ ᠪᠠᠢᠬᠤ ᠨᠢ ᠡᠨᠡ ᠪᠣᠢ? ᠲᠠ ᠨᠠᠷ ᠲᠤ᠌ ᠴᠡᠷᠢᠭ ᠬᠥᠮᠦᠨ ᠦ᠌ ᠮᠠᠶᠢᠭ ᠪᠠᠢᠨᠠ ᠊ᠤᠤ? ᠭᠡᠰᠡᠨ ᠳ᠋ᠦ᠍ ᠨᠥᠭᠦᠭᠡ ᠬᠡᠳᠦᠭᠦᠯᠡ ᠲᠡᠭ ᠭᠡᠲᠡᠯᠡ ᠵᠣᠭᠰᠣᠭᠠᠳ᠄
一 ᠪᠢᠳᠡ ᠲᠠᠨ ᠤ᠋ ᠦᠭᠡ ᠶ᠋ᠢ ᠯᠡ ᠰᠣᠨᠣᠰᠤᠨᠠ! ᠭᠡᠪᠡ᠃
ᠡᠨᠡ ᠬᠡᠳᠦᠭᠦᠯᠡ ᠶ᠋ᠢᠨ ᠢᠢᠨ ᠬᠦ᠌ ᠬᠥᠭᠡᠷᠦᠬᠦᠢᠯᠡᠯᠲᠡᠢ ᠳᠦᠷᠢ ᠶ᠋ᠢ ᠬᠠᠷᠠᠭᠠᠳ ᠠᠩᠴᠢᠨᠵᠠᠪ ᠤ᠋ᠨ ᠰᠡᠳᠬᠢᠯ ᠵᠥᠭᠡᠯᠡᠷᠡᠨ᠄
一 ᠲᠠ ᠨᠠᠷ ᠵᠠᠪᠠᠯ ᠨᠠᠳᠠ ᠪᠠᠷ ᠠᠷᠭᠠ ᠤᠬᠠᠭᠠᠨ ᠭᠠᠷᠭᠠᠭᠤᠯᠤᠨᠠ ᠭᠡᠪᠡᠯ ᠮᠢᠨᠦ ᠭᠠᠭᠴᠠᠬᠠᠨ ᠬᠦᠰᠡᠯ ᠢ᠋ ᠬᠦᠯᠢᠶᠡᠵᠦ ᠴᠤᠴᠠᠯ ᠦᠭᠡᠢ ᠪᠡᠶᠡᠯᠡᠭᠦᠯᠬᠦ ᠬᠡᠷᠡᠭᠲᠡᠢ᠃ ᠡᠰᠡ ᠲᠡᠢᠮᠦ ᠪᠣᠯ ᠪᠢ ᠵᠥᠩᠳᠡᠭᠡᠨ ᠵᠦᠯᠴᠢᠢᠵᠦ ᠶᠠᠪᠤᠭᠰᠠᠨ ᠨᠢ ᠳᠡᠭᠡᠷᠡ᠁ ᠭᠡᠵᠦ ᠬᠡᠯᠡᠵᠦ ᠪᠠᠷᠠᠬᠤ ᠠ᠋ᠴᠠ ᠡᠮᠦᠨᠡ ᠳᠤᠭᠠᠷᠵᠠᠪ᠂ ᠨᠠᠢ᠍᠊ᠮᠠᠨᠵᠢᠩ᠂ ᠲᠣᠭᠲᠠᠭᠤᠨᠪᠢᠯᠢᠭ᠌ ᠨᠠᠷ᠄
一 ᠠᠩᠴᠢᠨᠵᠠᠪ ᠠᠬᠠ ᠲᠠ ᠬᠡᠯᠡᠭᠡᠴᠢ! ᠭᠠᠯᠪᠠ ᠶᠡᠭᠦᠷᠡᠪᠡᠴᠦ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠤᠯᠤᠭᠠᠳ ᠠᠪᠤᠨᠠ᠂ ᠲᠩᠷᠢ ᠨᠤᠷᠠᠪᠠᠴᠤ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠲᠤᠯᠵᠤ ᠵᠣᠭᠰᠣᠨᠠ ᠪᠢᠳᠡ! ᠭᠡᠵᠦ ᠵᠣᠷᠢᠭ ᠬᠠᠲᠠᠭᠤᠬᠠᠨ ᠳᠤᠤᠭᠠᠷᠬᠤ ᠳ᠋ᠤ᠌ ᠲᠡᠷᠡ ᠳᠣᠲᠣᠷᠠ ᠪᠠᠨ《ᠴᠣᠭᠪᠠᠭᠠᠲᠤᠷ ᠨᠠᠷ ᠬᠠᠲᠤᠨ ᠰᠧᠯᠢᠩ ᠢ᠋ ᠠᠯᠠᠵᠤ ᠪᠣᠯᠤᠭᠰᠠᠨ ᠪᠠᠢᠬᠤ ᠳ᠋ᠤ᠌ ᠪᠢ ᠲᠡᠳᠡᠨᠦᠰ ᠢ᠋ ᠤᠬᠠᠭᠠᠯᠠᠵᠤ ᠦᠵᠡᠬᠦ ᠳ᠋ᠦ᠍ ᠶᠠᠭᠠᠬᠢᠳᠠᠭ ᠶᠤᠮ》 ᠭᠡᠵᠦ ᠰᠢᠢᠳᠦᠨ᠄
一 ᠲᠠᠨᠤᠰ ᠨᠠᠳᠠ ᠴᠣᠭᠪᠠᠭᠠᠲᠤᠷ ᠢ᠋ ᠠᠮᠢᠳᠤ ᠪᠠᠷ ᠨᠢ ᠪᠠᠷᠢᠵᠤ ᠠᠪᠴᠢᠷᠠᠬᠤ ᠵᠣᠷᠢᠭ ᠪᠠᠢᠪᠠᠯ ᠪᠢ ᠲᠠᠨᠤᠰ ᠲᠤ᠌ ᠠᠷᠭᠠ ᠤᠬᠠᠭᠠᠨ ᠵᠢᠭᠠᠵᠤ ᠥᠭᠭᠦᠶᠡ! ᠭᠡᠰᠡᠨ ᠳ᠋ᠦ᠍ ᠨᠠᠢᠮᠠᠨᠵᠢᠩ᠄
— ᠴᠣᠭᠪᠠᠭᠠᠲᠤᠷ ᠢ᠋ ᠪᠠᠷᠢᠬᠤ ᠳ᠋ᠤ᠌ ᠠᠮᠠᠷᠬᠠᠨ! ᠲᠤᠩ ᠪᠣᠯᠬᠤ ᠦᠭᠡᠢ ᠪᠣᠯ ᠳᠣᠯᠢᠶᠠᠪᠤᠷ ᠬᠤᠷᠤᠭᠤ ᠳᠣᠬᠢᠰᠬᠢᠬᠦ ᠳ᠋ᠦ᠍ ᠲᠣᠬᠢᠷ ① ᠲᠣᠯᠣᠭᠠᠢ ᠨᠢ ᠤᠨᠠᠨᠠ ᠭᠡᠪᠡ᠃
一 ᠬᠡᠩ᠂ ᠠᠮᠠ ᠳᠠᠪᠠᠬᠤ ᠦᠭᠡᠢ ᠦᠭᠡ ᠪᠢᠲᠡᠭᠡᠢ ᠶᠠᠷᠢ! ᠲᠡᠢᠮᠦ ᠬᠢᠯᠪᠠᠷᠬᠠᠨ ᠶᠠᠪᠤᠳᠠᠯ ᠪᠢᠰᠢ᠃ ᠴᠣᠭᠪᠠᠭᠠᠲᠤᠷ ᠢ᠋ ᠠᠮᠢᠳᠤ ᠪᠠᠷ ᠨᠢ ᠪᠠᠷᠢᠬᠤ ᠠ᠋ᠴᠠ ᠪᠢᠰᠢ ᠠᠯᠠᠵᠤ ᠪᠣᠯᠬᠤ ᠦᠭᠡᠢ᠁ ᠭᠡᠰᠡᠨ ᠳ᠋ᠦ᠍ ᠳᠠᠯᠠᠨᠲᠠᠢ ᠲᠣᠰᠴᠤ᠄
一 ᠶᠠᠭᠠᠬᠢᠭᠠᠳ? ᠴᠣᠭᠪᠠᠭᠠᠲᠤᠷ ᠨᠠᠷ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠢ᠋ ᠠᠯᠠᠵᠤ ᠪᠣᠯᠤᠭᠰᠠᠨ ᠪᠠᠢᠬᠤ ᠳ᠋ᠤ᠌ ᠪᠢᠳᠡ ᠲᠡᠭᠦᠨ ᠢ᠋ ᠠᠯᠠᠬᠤ ᠳ᠋ᠤ᠌ ᠶᠠᠭᠠᠬᠢᠳᠠᠭ ᠶᠤᠮ⁈ ᠨᠢᠭᠡ ᠯᠡ ᠰᠤᠮᠤᠨ ᠳ᠋ᠤ᠌ ᠴᠠᠭᠠᠰᠢ ᠨᠢ ᠬᠠᠨᠳᠤᠭᠤᠯᠴᠢᠬᠠᠪᠠᠯ ᠳᠡᠭᠡᠷᠡ ᠶᠦᠮ ᠭᠡᠵᠦ ᠬᠣᠷᠣᠰᠤᠯᠲᠠᠢ ᠶᠠᠷᠢᠨᠠ᠃
一 ᠲᠠ ᠨᠠᠷ ᠴᠣᠭᠪᠠᠭᠠᠲᠤᠷ ᠢ᠋ ᠠᠮᠢᠳᠤ ᠪᠠᠷ ᠪᠠᠷᠢᠬᠤ ᠶ᠋ᠢ ᠪᠣᠳᠣ! ᠲᠡᠭᠦᠨ ᠢ ᠤᠰᠠᠳᠬᠠᠪᠠᠯ ᠪᠦᠬᠦ ᠶᠠᠭᠤᠮᠠ ᠪᠠᠰᠠ ᠪᠤᠷᠤᠭᠤ ᠪᠠᠷ ᠡᠷᠭᠢᠨᠡ᠁ ᠪᠤᠴᠠᠭᠠᠵᠤ ᠬᠡᠯᠡᠬᠦ ᠳ᠋ᠦ᠍ ᠨᠢᠭᠡ ᠯᠡ ᠰᠤᠮᠤᠨ ᠳ᠋ᠤ᠌ ᠲᠣᠩᠭᠣᠷᠠᠭᠤᠯᠴᠢᠬᠠᠪᠠᠯ ᠴᠤ᠌ ᠶᠠᠭᠠᠬᠢᠬᠤ ᠪᠣᠢ! ᠲᠡᠢᠮᠦ ᠪᠢᠰᠢ ᠪᠣᠯ ᠴᠢ ᠪᠢᠳᠡᠨ ᠦ᠌ ᠪᠥᠨᠲᠥᠭᠡᠷ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠲᠣᠭᠲᠠᠬᠤ ᠦᠭᠡᠢ ᠮᠥᠷᠲᠡᠭᠡᠨ ᠠᠷᠤ ᠭᠡᠷ ᠲᠡᠬᠢ ᠠᠪᠠᠭᠠᠢ ᠬᠡᠦᠬᠡᠳ ᠴᠦ᠍ ᠬᠦᠢᠰᠦ ᠲᠡᠮᠲᠡᠷᠢᠭᠦᠯᠬᠦ ᠪᠣᠯᠤᠨᠠ᠃
一 ᠁
ᠴᠠᠭᠠᠳᠤᠬᠢ ᠨᠤᠭᠤᠳ ᠨᠢ ᠦᠭᠡ ᠳᠠᠭᠤᠨ ᠦᠭᠡᠢ ᠬᠡᠰᠡᠭ ᠮᠡᠯᠡᠷᠡᠵᠦ《ᠲᠠ ᠰᠠᠨᠠᠭᠠ ᠠᠮᠤᠷ ᠪᠠᠢ》 ᠭᠡᠰᠡᠨ ᠰᠢᠭ ᠲᠣᠯᠣᠭᠠᠢ ᠳᠣᠬᠢᠵᠠᠭᠠᠨᠠ᠃
ᠠᠩᠴᠢᠨᠵᠠᠪ᠂ ᠲᠠ ᠨᠠᠷ ᠤᠬᠠᠭᠠᠨᠲᠠᠢ ᠣᠷᠣᠵᠤ ᠴᠣᠭᠪᠠᠭᠠᠲᠤᠷ ᠢ᠋ ᠡᠨᠳᠡ ᠪᠠᠷᠢᠵᠤ ᠠᠪᠴᠢᠷᠠ᠂ ᠡᠪᠲᠡᠢ ᠰᠠᠢᠬᠠᠨ ᠬᠡᠯᠡᠯᠴᠡᠭᠡᠷ ᠬᠢᠵᠦ ᠲᠡᠭᠦᠨ ᠢ᠋ᠶ᠋ᠡᠷ ᠶᠡᠬᠡ ᠴᠡᠷᠢᠭ ᠬᠥᠳᠡᠯᠭᠡᠵᠦ ᠤᠯᠠᠭᠠᠨ ᠡᠷᠭᠢ ᠶ᠋ᠢᠨ ᠪᠡᠯᠴᠢᠭᠡᠷ ᠨᠤᠲᠤᠭ ᠢ᠋ ᠬᠠᠭᠠᠯᠪᠤᠷᠢᠯᠠᠨ ᠲᠠᠯᠬᠢᠳᠠᠵᠤ ᠪᠠᠢᠭᠠ ᠸᠠᠩ ᠰᠣᠬᠣᠷ ᠤ᠋ᠨ ᠬᠠᠷᠠ ᠴᠡᠷᠢᠭ ᠢ᠋ ᠬᠥᠭᠡᠭᠡᠵᠦ ᠶᠠᠪᠤᠭᠤᠯᠤᠶᠠ᠃ ᠨᠤᠲᠤᠭ ᠪᠡᠯᠴᠢᠭᠡᠷ ᠢ᠋ᠶ᠋ᠡᠨ ᠬᠠᠮᠠᠭᠠᠯᠠᠨ ᠸᠠᠩ ᠰᠣᠬᠣᠷ ᠢ᠋ ᠬᠠᠰᠢᠷᠠᠲᠠᠯᠠ ᠨᠣᠮᠯᠠᠶᠠ ᠭᠡᠵᠦ ᠲᠡᠷᠲᠡᠭᠡ ᠲᠣᠭᠣᠰᠣ ᠮᠠᠨᠠᠨ ᠲᠠᠲᠠᠭᠰᠠᠨ ᠤᠯᠠᠭᠠᠨ ᠡᠷᠭᠢ ᠶ᠋ᠢᠨ ᠡᠮᠦᠨᠡ ᠵᠠᠬᠠ ᠶ᠋ᠢ ᠪᠠᠷᠠᠯᠠᠵᠤ ᠶᠠᠷᠢᠭᠰᠠᠨ ᠳ᠋ᠤ᠌ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ《ᠵᠠ᠂ ᠲᠡᠭᠡᠶᠡ》 ᠭᠡᠵᠡᠭᠡᠨ ᠬᠥᠳᠡᠯᠪᠡ᠃
ᠡᠳᠡᠨᠥᠰ ᠭᠤᠷᠪᠠᠳᠠᠬᠢ ᠡᠳᠦᠷ ᠦ᠋ᠨ ᠨᠠᠷᠠ ᠭᠠᠷᠬᠤ ᠳ᠋ᠤ᠌ ᠠᠷᠤ ᠰᠢᠲᠦᠭᠡᠨ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠲᠦ᠍ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠪᠠᠨ ᠬᠥᠬᠡ ᠲᠤᠭ ᠬᠤᠷᠤᠢᠯᠠᠯᠴᠠᠨ ᠠᠭᠤᠯᠵᠠᠬᠤ ᠪᠠᠷ ᠪᠣᠯᠵᠣᠪᠠ᠃
— — — —
① ᠥᠨᠳᠥᠷ ᠪᠡᠶᠡ ᠲᠡᠢ ᠭᠡᠰᠡᠨ ᠨᠤᠲᠤᠭ ᠤ᠋ᠨ ᠬᠡᠯᠡᠯᠭᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠣᠳᠣᠨᠬᠤᠸᠠᠷ
