ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠦᠲᠦᠭᠡᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠠᠷᠪᠠ> Хан мунын сүүрс < доорд > – Мөнх зохиоов ᠂Дөдгөөр бодь – Нэгдүгээр бүлэг <10>
213ᠲᠦᠲᠦᠭᠡᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠠᠷᠪᠠ>
ᠤᠨᠢᠶᠠᠷ ᠬᠦᠳᠡᠩ ᠡᠴᠡ ᠠᠭᠠᠵᠢᠮᠬᠠᠨ ᠰᠤᠭᠤᠷᠠᠭᠰᠠᠨ ᠨᠠᠷᠠ ᠠᠭᠤᠯᠠ ᠶ᠋ᠢᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠭᠠᠷᠬᠤ ᠳ᠋ᠤ᠌ ᠮᠤᠨᠠ ᠶ᠋ᠢᠨ ᠠᠭᠤᠯᠠᠨ ᠤ᠋ ᠱᠢᠷᠤᠨ ᠬᠠᠳᠠ ᠶ᠋ᠢ ᠴᠢᠮᠡᠭᠰᠠᠨ ᠴᠣᠬᠣᠷ ᠴᠠᠰᠤ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠭᠢᠯᠠᠰᠴᠤ ᠬᠠᠷᠬᠠᠭᠳᠠᠬᠤ ᠨᠢ ᠣᠨᠴᠠ ᠰᠠᠢᠬᠠᠨ᠃ ᠠᠭᠤᠯᠠ ᠶ᠋ᠢᠨ ᠪᠠᠯ᠂ ᠡᠩᠭᠡᠷ ᠬᠠᠵᠠᠭᠤ ᠪᠠᠷ ᠴᠠᠰᠤ ᠨᠢᠮᠭᠡᠷᠡᠭᠰᠡᠨ ᠪᠣᠯᠪᠠᠴᠤ ᠨᠤᠭᠤ ᠰᠤᠵᠠᠭ ᠢ᠋ᠶ᠋ᠠᠷ ᠰᠥᠬᠥ ᠴᠠᠰᠤ ᠨᠠᠯᠤᠢᠵᠤ ᠬᠠᠷᠠᠭᠳᠠᠨᠠ᠃
ᠤᠷᠭᠤᠬᠤ ᠨᠠᠷᠠᠨ ᠤ᠋ ᠪᠦᠯᠢᠶᠡᠨ ᠲᠤᠶᠠᠭᠠ ᠶ᠋ᠢ ᠨᠥᠮᠥᠷᠴᠦ ᠵᠤᠳᠪᠠ ᠮᠡᠢᠷᠡᠨ ᠠᠭᠠᠷᠤᠲᠠᠢ ᠶ᠋ᠢᠨ ᠡᠩᠭᠡᠷ ᠢ᠋ ᠵᠣᠷᠢᠨ ᠮᠣᠷᠳᠠᠪᠠ᠃
ᠬᠤᠯᠤᠰᠤᠲᠠᠢ ᠶ᠋ᠢᠨ ᠠᠮᠠ ᠠ᠋ᠴᠠ ᠠᠭᠠᠷᠤᠲᠠᠢ ᠶ᠋ᠢᠨ ᠡᠩᠭᠡᠷ ᠬᠦᠷᠬᠦ ᠨᠢᠭᠡ ᠯᠨ ᠥᠨᠳᠡᠢᠯᠭᠡᠨ ᠦ᠌ ᠵᠠᠢᠲᠠᠢ ᠭᠠᠵᠠᠷ ᠪᠣᠯᠬᠣᠷ ᠵᠤᠳᠪᠠ ᠮᠡᠢᠷᠡᠨ ᠰᠥᠬᠥ ᠴᠠᠰᠤ ᠲᠠᠢ ᠵᠠᠮ ᠢ᠋ᠶ᠋ᠠᠷ ᠮᠣᠷᠢᠨ ᠤ᠋ ᠬᠤᠷᠳᠤ ᠶ᠋ᠢ ᠠᠪᠬᠤ ᠭᠡᠵᠦ ᠶᠠᠭᠠᠷᠠᠭᠰᠠᠨ ᠦᠭᠡᠢ ᠤᠨᠤᠭᠠᠨ ᠤ᠋ ᠪᠠᠨ ᠲᠠᠪᠠ ᠪᠠᠷ ᠬᠠᠵᠠᠭᠠᠷ ᠬᠠᠩᠭᠢᠨᠠᠭᠤᠯᠤᠨ ᠭᠠᠯᠭᠢᠭᠤᠯᠵᠤ ᠶᠠᠪᠤᠯᠠ᠃
ᠬᠣᠨᠢᠨ ᠤ᠋ ᠡᠪᠦᠭᠡᠨ ᠦ᠌ ᠨᠡᠬᠡᠢ ᠳᠡᠪᠡᠯ ᠢ᠋ ᠡᠩᠭᠡᠷ ᠵᠤᠵᠠᠭᠠᠯᠠᠨ ᠨᠥᠮᠥᠷᠦᠭᠰᠡᠨ ᠤᠯᠠᠭᠠᠨ ᠬᠠᠳᠠ ᠲᠠᠢ ᠠᠭᠠᠷᠤᠲᠠᠢ ᠶ᠋ᠢᠨ ᠡᠩᠭᠡᠷ ᠶᠠᠭ ᠯᠠ ᠬᠥᠮᠥᠰᠬᠡ ᠰᠠᠬᠠᠯ ᠨᠢ ᠴᠠᠩᠲᠤᠵᠤ ᠬᠦᠢᠲᠡᠨ ᠳ᠋ᠦ᠍ ᠪᠡᠭᠡᠷᠡᠭᠰᠡᠨ ᠮᠠᠨᠠᠭᠠᠨ ᠤ᠋ ᠡᠪᠦᠭᠡᠨ ᠰᠢᠭ ᠪᠡᠭᠡᠪᠡᠢᠭᠡᠳ ᠭᠡᠷᠡᠯ ᠦᠭᠡᠢ ᠤᠯᠴᠠᠭᠠᠷ ᠨᠠᠷᠠᠨ ᠤ᠋ ᠲᠤᠶᠠᠭᠠᠨ ᠳ᠋ᠤ᠌ ᠪᠡᠶᠡ ᠪᠡᠨ ᠡᠭᠡᠭᠡᠵᠦ ᠨᠣᠢᠷᠮᠤᠭᠯᠠᠨᠠ᠃
ᠮᠡᠯᠴᠡᠢᠭᠰᠡᠨ ᠴᠠᠰᠤ ᠲᠠᠢ ᠠᠭᠤᠳᠠᠮ ᠬᠥᠪᠴᠢ ᠶ᠋ᠢ ᠲᠤᠭᠤᠯᠵᠤ᠂ ᠡᠮᠡᠭᠡᠯ ᠬᠥᠲᠥᠯ ᠢ᠋ ᠳᠠᠪᠠᠵᠤ ᠭᠠᠷᠪᠠᠯ ᠴᠠᠰᠤᠨ ᠤ᠋ ᠬᠠᠷᠠᠤ ᠭᠠᠷᠭᠠᠵᠤ ᠱᠦᠭᠦᠷᠳᠡᠭᠰᠡᠨ ᠪᠥᠭᠡᠷᠡᠩᠬᠡᠢ ᠬᠠᠷᠠ ᠭᠠᠵᠠᠷ ᠦᠵᠡᠭᠳᠡᠨᠡ᠃ ᠲᠡᠷᠡ ᠨᠢ ᠮᠠᠨᠤᠨᠪᠠᠳᠮᠡ ᠶ᠋ᠢᠨ ᠬᠢ ᠮᠥᠨ᠃ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠠᠭᠠᠷᠤᠨ ᠬᠣᠵᠤᠤᠯᠠ᠂ ᠬᠠᠢᠯᠠᠰᠤᠨ ᠲᠦᠯᠡᠭᠡ ᠲᠠᠢᠯᠳᠡᠭᠦᠦ ᠭᠠᠯᠲᠤᠰᠤ ᠤᠯᠢᠶᠠᠰᠤ ᠶ᠋ᠢᠨ ᠲᠦᠯᠡᠭᠡᠨ ᠦ᠌ ᠬᠤᠷᠢᠶᠠᠯᠲᠠ ᠶ᠋ᠢᠨ ᠨᠥᠮᠥᠷᠢ ᠪᠠᠢᠵᠤ ᠭᠤᠷᠪᠠ ᠳᠥᠷᠪᠡᠨ ᠮᠤᠩᠭᠤᠯ ᠭᠡᠷ ᠡᠭᠨᠡᠷᠠᠵᠤ ᠬᠡᠳᠦ ᠬᠡᠳᠦᠨ ᠲᠠᠰᠤᠯᠭᠠ ᠰᠢᠯ ᠴᠣᠩᠬᠣ ᠲᠠᠢ ᠰᠢᠪᠠᠷ ᠪᠠᠢᠰᠢᠩ ᠵᠢᠭᠳᠡᠷᠠᠵᠤ ᠰᠠᠭᠤᠷᠢᠰᠢᠭᠰᠠᠨ ᠨᠢ ᠴᠠᠷᠢᠭᠤᠨ ᠠᠮᠢᠰᠠᠬᠤᠭᠠ ᠲᠠᠢ ᠠᠢᠯ ᠭᠡᠭᠴᠢ ᠪᠣᠯᠬᠤ ᠨᠢ ᠬᠣᠯᠠ ᠠ᠋ᠴᠠ ᠬᠠᠷᠠᠮᠠᠭᠴᠠ ᠲᠠᠨᠢᠭᠳᠠᠨᠠ᠃
ᠡᠮᠡᠭᠡᠯ ᠬᠥᠲᠥᠯ ᠦ᠋ᠨ ᠳᠣᠪᠣᠷᠴᠠᠭ ᠢ᠋ ᠳᠠᠪᠠᠵᠤ ᠴᠠᠰᠤᠨ ᠵᠥᠷᠢᠭ ᠢ᠋ᠶ᠋ᠡᠷ ᠨᠢᠭᠡ ᠮᠣᠷᠢᠲᠠᠨ ᠱᠣᠪᠤᠯᠵᠠᠵᠤ ᠢᠷᠡᠬᠦ ᠶ᠋ᠢ ᠲᠡᠷᠡ ᠤᠯᠠᠭᠠᠨ ᠬᠠᠲᠠᠲᠠᠢ ᠠᠭᠠᠷᠤᠲᠠᠢ ᠱᠤᠷᠤᠩ ᠣᠷᠣᠢ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠵᠣᠭᠰᠣᠭᠰᠠᠨ ᠮᠠᠨᠠᠭᠠᠨ ᠤ᠋ ᠴᠡᠷᠢᠭ ᠳᠤᠷᠠᠨᠳᠠᠵᠤ ᠠᠪᠤᠭᠠᠳ 《ᠬᠥᠮᠦᠨ ᠢᠷᠡᠯᠡ》 ᠭᠡᠰᠡᠨ ᠴᠢᠮᠡᠭᠡ ᠶ᠋ᠢ ᠡᠭᠦᠷᠴᠦ ᠬᠣᠩᠭᠢᠯ ① ᠰᠢᠷᠭᠤᠨ ᠭᠦᠶᠦᠪᠡ᠃
ᠵᠤᠳᠪᠠ ᠮᠡᠢᠷᠡᠨ ᠢ᠋ ᠤᠶᠠᠭᠠᠨ ᠳᠡᠭᠡᠷᠡ ᠨᠣᠬᠠᠢ ᠱᠤᠤᠬᠢᠭᠤᠯᠵᠤ ᠪᠠᠭᠤᠬᠤ ᠳ᠋ᠤ᠌ ᠬᠡᠳᠦ ᠬᠡᠳᠦᠨ ᠫᠤᠤ ᠠᠭᠰᠠᠭᠰᠠᠨ ᠴᠡᠷᠢᠭ ᠬᠦᠷᠢᠶᠡᠨ ᠦ᠌ ᠠᠮᠠ ᠶ᠋ᠢ ᠰᠠᠬᠢᠵᠤ ᠵᠣᠭᠰᠣᠭᠰᠠᠨ ᠪᠠᠢᠯᠠ᠃
ᠵᠤᠳᠪᠠ ᠮᠡᠢᠷᠡᠨ ᠦ᠌ ᠢᠷᠡᠵᠦ ᠶᠠᠪᠤᠭᠠ ᠶ᠋ᠢ ᠲᠠᠨᠢᠭᠰᠠᠨ ᠥᠨᠥᠬᠢ ᠴᠡᠷᠢᠭ ᠦᠳ ᠫᠤᠤ ᠪᠠᠨ ᠬᠤᠷᠢᠶᠠᠵᠤ ᠲᠡᠭᠦᠨ ᠲᠡᠢ ᠮᠡᠲᠦ ᠮᠡᠳᠡᠪᠠ᠃
ᠵᠤᠳᠪᠠ ᠮᠡᠢᠷᠡᠨ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠲᠡᠢ ᠴᠠᠭᠠᠯᠠᠬᠤ ᠪᠠᠷ ᠶᠠᠪᠤᠭᠠ ᠨᠢ ᠡᠨᠡ ᠠᠵᠢ᠃
— ᠵᠠ ᠠᠮᠤᠭᠤᠯᠠᠩ ?
— ᠠᠮᠤᠭᠤᠯᠠᠩ !
— ᠠᠮᠤᠭᠤᠯᠠᠩ ᠰᠠᠢᠬᠠᠨ ᠴᠠᠭᠠᠯᠠᠵᠤ ᠪᠠᠢᠨᠠ ᠤᠤ?
— ᠵᠠ᠂ ᠲᠠ ᠰᠠᠢᠨ ᠤᠤ ? ᠰᠠᠢᠨ ᠰᠢᠨᠠᠯᠠᠪᠠ ᠤᠤ? ᠵᠠᠮ ᠳ᠋ᠠᠭᠠᠨ ᠵᠦᠳᠡᠷᠡᠪᠡ ᠤᠤ ?
— ᠭᠠᠢᠭᠤᠢ᠂ ᠭᠠᠢᠭᠤᠢ᠂ ᠡᠨᠡᠭᠦᠬᠡᠨ ᠬᠣᠭᠣᠷᠣᠨᠳᠣ ᠭᠡᠵᠦ ᠵᠤᠳᠪᠠ ᠲᠡᠭᠦᠨ ᠢ᠋ ᠡᠭᠦᠳᠡᠨ ᠳᠡᠭᠡᠷᠡ ᠲᠣᠰᠴᠤ ᠭᠠᠷᠤᠭᠰᠠᠨ ᠬᠥᠮᠦᠰ ᠲᠡᠢ ᠠᠮᠤᠷ ᠮᠡᠨᠳᠣ ᠮᠡᠳᠡᠯᠴᠡᠨ ᠭᠣᠣᠯ ᠭᠡᠷ ᠲᠦ᠍ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠲᠡᠢ ᠵᠣᠯᠭᠠᠬᠤ ᠪᠠᠷ ᠣᠷᠣᠯᠠ᠃ ᠵᠤᠳᠪᠠ ᠭᠡᠷ ᠲᠦ᠍ ᠣᠷᠣᠮᠠᠭᠴᠠ ᠬᠠᠨᠵᠤᠨ ᠤ᠋ ᠬᠣᠢᠮᠤᠷ ᠵᠢᠱᠢᠭᠦᠯᠳᠡᠵᠤ ᠴᠤᠮᠴᠤᠢᠭᠰᠠᠨ ᠵᠣᠭᠣᠰᠤᠨ ᠬᠡ ᠲᠡᠢ ᠬᠥᠬᠡ ᠬᠣᠷᠭᠣᠢ ᠲᠡᠷᠯᠢᠭ ᠲᠡᠢ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠲᠡᠢ ᠬᠥᠬᠦᠦᠷ ᠬᠠᠳᠠᠭ ᠪᠠᠷᠢᠨ ᠵᠣᠯᠭᠠᠨ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠮᠡᠨᠳᠦ ᠪᠠᠷᠢᠪᠠ᠃
— ᠵᠠ᠂ ᠨᠠᠰᠤᠲᠠᠢ ᠪᠡᠷᠭᠡᠨ ᠦ᠌ ᠪᠡᠶᠡ ᠯᠠᠭᠱᠠᠨ ᠲᠤᠩᠭᠠᠯᠠᠭ ?
— ᠶᠠᠭᠠᠬᠢᠬᠤ ᠪᠣᠢ ? ᠪᠦᠷ ᠰᠠᠢᠨ ? ᠵᠠᠮ ᠳ᠋ᠠᠭᠠᠨ ᠴᠢᠯᠡᠪᠡ ᠤᠤ? ᠭᠠᠢᠭᠤᠢ ᠤᠤ ?
— ᠭᠠᠢᠭᠤᠢ ᠭᠠᠢᠭᠤᠢ᠂ ᠵᠢᠯ ᠦ᠋ᠨ ᠥᠩᠭᠡ ᠰᠠᠢᠨ ? ᠬᠡᠷ ᠬᠣᠲᠠᠯᠠᠭᠠᠷ ᠢ᠋ᠶ᠋ᠠᠨ ᠰᠠᠢᠨ ᠰᠠᠢᠬᠠᠨ ᠤᠤ ?
— ᠪᠦᠷ ᠰᠠᠢᠨ᠂ ᠪᠦᠷ ᠰᠠᠢᠨ ? ᠡᠢᠰᠢ ᠪᠡᠨ ᠴᠠᠰᠤ ᠵᠤᠵᠠᠭᠠᠨ? ᠮᠠᠯ ᠤ᠋ᠨ ᠬᠦᠴᠦ ᠲᠠᠷᠭᠤ ᠴᠤ᠌ ᠰᠠᠢᠨ ?
— ᠭᠠᠢᠭᠤᠢ ᠳᠠ᠂ ᠬᠥᠭᠡᠷᠦᠬᠦᠢ! ᠡᠨᠡ ᠴᠠᠰᠳ ᠳᠤ ᠮᠠᠯ ᠤ᠋ᠨ ᠬᠦᠴᠦ ᠲᠠᠷᠭᠤ ᠴᠤ᠌ ᠮᠥᠨ ᠥᠶᠥᠭ ᠯᠡ ᠪᠠᠢᠨᠠ᠃ ᠵᠠ ᠬᠠᠯᠠᠭᠤᠨ ᠴᠠᠢ ᠤᠤᠭᠤ! ᠭᠠᠳᠠᠨᠠ ᠴᠠᠰᠤᠨ ᠤ᠋ ᠵᠢᠩ ᠳ᠋ᠦ᠍ ᠲᠡᠭᠷᠢ ᠳᠠᠩᠬᠢᠨᠠᠭᠤᠨ ᠪᠠᠢᠬᠠ ᠠ᠋ ! ᠲᠠᠭᠠᠷᠠᠭᠰᠠᠨ ᠪᠠᠢᠯᠭᠦᠢ ! ᠭᠡᠵᠤ ᠮᠠᠨᠤᠨᠪᠠᠳᠮᠠ ᠵᠤᠳᠪᠠ ᠶ᠋ᠢ 《ᠢᠳᠡ ᠤᠤᠭᠤ!》 ᠭᠡᠵᠦ ᠭᠡᠢᠴᠢᠨ ᠦ᠌ ᠰᠢᠷᠡᠭᠡᠨ ᠳ᠋ᠦ᠍ ᠦᠷᠥᠭᠰᠡᠨ ᠲᠠᠩᠰᠤᠭ ᠢᠳᠡᠭᠡᠨ ᠢ᠋ ᠵᠢᠭᠠᠨᠠ᠃
ᠭᠡᠢᠴᠢᠨ ᠦ᠌ ᠪᠣᠭᠣᠷᠰᠣᠭ ᠭᠡᠵᠦ ᠰᠢᠷᠡᠭᠡᠨ ᠳᠡᠭᠡᠷᠡ ᠵᠢᠩᠰᠡ ᠰᠡᠲᠡᠷ ᠲᠡᠢ ᠣᠪᠣᠭᠠ ᠰᠢᠭ᠋ ᠶᠡᠭᠡᠭᠡᠨ ᠲᠠᠪᠠᠭ ᠲᠤ᠌ ᠪᠣᠭᠣᠷᠰᠣᠭ ᠢ᠋ ᠤᠷᠠᠯᠠᠵᠤ ᠣᠪᠣᠭᠠ ᠰᠢᠭ᠋ ᠪᠤᠮᠪᠠᠯᠠᠨ ᠥᠷᠥᠵᠦ ᠳᠡᠭᠡᠭᠦᠷ ᠨᠢ ᠰᠢᠬᠢᠷ᠂ ᠴᠢᠪᠠᠭᠠ᠂ ᠬᠠᠲᠠᠭᠠᠭᠰᠠᠨ ᠥᠷᠥᠮᠡ᠂ ᠬᠤᠷᠤᠳ ᠵᠡᠷᠭᠡ ᠶ᠋ᠢ ᠵᠢᠮᠰᠡᠭᠯᠡᠭᠦᠯᠦᠨ ᠵᠡᠷᠭᠡᠯᠡᠵᠦ᠂ ᠬᠠᠮᠤᠭ ᠤ᠋ᠨ ᠭᠣᠣᠯ ᠳ᠋ᠤᠨᠢ ᠨᠢᠳᠤᠷᠭᠠᠨ ᠴᠢᠨᠡᠭᠡ ᠰᠢᠷᠠ ᠮᠥᠰᠥᠨ ᠰᠢᠬᠢᠷ ᠢ᠋ ᠵᠢᠩᠰᠠᠯᠠᠵᠤ ᠲᠠᠯᠪᠢᠭᠰᠠᠨ ᠨᠢ ᠳᠠᠷᠤᠢ ᠡᠨᠡ ᠭᠡᠷ ᠦ᠋ᠨ ᠵᠢᠯ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠥᠩᠭᠡ ᠵᠢᠰᠦ ᠶ᠋ᠢ ᠬᠤᠷᠢᠶᠠᠩᠭᠤᠢᠯᠠᠭᠰᠠᠨ ᠵᠠᠭᠪᠤᠷ ᠰᠢᠭ᠋ ᠬᠥᠮᠦᠰ ᠲᠦ᠍ ᠰᠠᠨᠠᠭᠳᠠᠭᠤᠯᠤᠨᠠ᠃ ᠲᠡᠷᠡ《ᠵᠢᠩᠰᠡᠲᠦ ᠣᠪᠣᠭᠠᠨ》 ᠤ᠋ ᠬᠠᠵᠠᠭᠤ ᠪᠠᠷ ᠠᠯᠲᠠᠨ ᠬᠡ ᠲᠡᠢ ᠮᠤᠳᠤᠨ ᠪᠠᠭᠪᠤᠷ ᠲᠤ᠌ ᠬᠠᠭᠤᠷᠤᠭᠰᠠᠨ ᠪᠤᠳᠠᠭᠠ᠂ ᠪᠠᠰᠠ ᠰᠤᠯᠠ ᠦᠷᠦᠭᠰᠡᠨ ᠨᠢᠩ ᠪᠣᠭᠣᠷᠰᠣᠭ᠂ ᠵᠢᠵᠢᠭ ᠲᠠᠪᠠᠭ ᠲᠤ᠌ ᠰᠢᠷᠠ ᠲᠣᠰᠣ᠂ ᠥᠷᠥᠮᠡ᠂ ᠪᠤᠷᠠᠮ ᠱᠠᠲᠠᠩ᠂ ᠠᠭᠠᠷᠤᠤᠯ ᠬᠤᠷᠤᠳ᠂ ᠪᠠᠰᠠ ᠭᠠᠯ ᠤ᠋ᠨ ᠬᠡᠰᠢᠭ ② ᠂ ᠰᠢᠬᠢᠷ ᠴᠢᠪᠠᠭᠠ᠂ ᠬᠣᠷᠭᠣᠯ ᠪᠣᠭᠣᠷᠰᠣᠭ ᠵᠡᠷᠭᠡ ᠢᠳᠡᠭᠡᠨ ᠦ᠌ ᠵᠦᠢᠯ ᠦ᠋ᠨ ᠪᠠᠶᠠᠨ ᠲᠠᠷᠭᠤᠨ ᠠᠭᠰᠠᠨ ᠢ᠋ ᠰᠢᠨᠡ ᠶ᠋ᠢᠨ ᠭᠡᠢᠴᠢᠳ ᠦᠵᠡᠭᠡᠳ ᠨᠢᠳᠦ ᠪᠡᠶᠡᠰᠴᠦ ᠬᠠᠷᠠᠭᠠᠳ ᠰᠡᠳᠬᠢᠯ ᠴᠠᠳᠳᠠᠭ ᠠᠵᠢ᠃ ᠥᠯᠥᠰᠬᠦᠯᠡᠩ ᠦ᠋ᠨ ᠲᠠᠮᠤ ᠶ᠋ᠢ ᠶᠡᠷᠦ ᠡᠴᠡ ᠠᠮᠲᠠᠯᠠᠵᠤ ᠦᠵᠡᠭᠡ ᠦᠭᠡᠢ ᠵᠤᠳᠪᠠ ᠳ᠋ᠤ᠌ ᠡᠨᠡ ᠪᠦᠬᠦᠨ ᠨᠢ ᠪᠦᠷ ᠢᠯᠡᠭᠦᠴᠡ ᠶᠠᠭᠤᠮᠠ ᠰᠢᠭ᠋ ᠰᠠᠨᠠᠭᠳᠠᠵᠤ ᠭᠡᠷ ᠦ᠋ᠨ ᠡᠵᠡᠨ ᠦ᠌ ᠬᠢᠨᠢ ᠰᠠᠢᠷᠬᠠᠬᠤ ᠰᠡᠳᠬᠢᠯ ᠢ᠋ ᠬᠣᠨᠵᠢᠬᠤ ᠨᠢ ᠶᠠᠭᠤᠨ ᠠ᠋ᠴᠠ ᠴᠤ᠌ ᠢᠯᠡᠭᠦᠦ ᠮᠡᠲᠦ ᠪᠣᠳᠣᠭᠳᠠᠨᠠ᠃
ᠰᠢᠨᠡ ᠶ᠋ᠢᠨ ᠴᠠᠢ ᠠᠮᠰᠠᠭᠠᠳ ᠵᠤᠳᠪᠠ᠄
— ᠪᠡᠷᠭᠡᠨ ᠠ᠋᠂ ᠰᠠᠪᠠ ᠭᠡᠳ ᠱᠤᠤᠮᠠᠰᠠ ᠪᠠᠨ ᠣᠩᠭᠣᠢᠯᠭᠠᠨ ᠰᠠᠪᠠ ᠪᠠᠨ ᠲᠠᠯᠪᠢᠬᠤ ᠪᠠᠷ ᠵᠦᠭᠯᠡᠭᠦᠯᠦᠨᠠ᠃
— ᠠᠢ ᠳᠠ᠂ ᠶᠠᠭᠤ ᠬᠢᠬᠦ ᠪᠣᠢ ᠳᠠ ! ᠭᠡᠳ ᠴᠠᠭᠠᠰᠢ 《ᠬᠡᠦᠬᠡ ᠠ᠋ ! ᠰᠠᠪᠠ 》 ᠭᠡᠵᠦ ᠠᠷᠢᠬᠢ ᠬᠤᠨᠳᠠᠭᠠᠯᠠᠭᠰᠠᠨ ᠵᠠᠷᠤᠴᠠ ᠥᠬᠢᠨ ᠢ᠋ ᠲᠣᠬᠢᠪᠠᠯ ᠲᠡᠷᠡ ᠥᠬᠢᠨ ᠠᠯᠲᠠᠨ ᠬᠡ ᠲᠡᠢ ᠮᠣᠳᠣᠨ ᠫᠢᠯᠠ ᠳᠣᠲᠣᠷᠠ ᠰᠢᠬᠢᠷ ᠴᠢᠪᠠᠭᠠᠨ ᠤ᠋ ᠵᠦᠢᠯ ᠢ᠋ ᠲᠣᠰᠣᠭᠠᠨ ᠵᠤᠳᠪᠠ ᠶ᠋ᠢᠨ ᠡᠮᠦᠨᠡ ᠲᠠᠯᠪᠢᠵᠤ ᠥᠭᠪᠡ᠃
ᠳᠥᠷᠪᠡᠨ ᠳᠤᠭᠤᠢ ᠪᠣᠭᠣᠷᠰᠣᠭ᠂ ᠳᠡᠭᠡᠷᠡ ᠨᠢ ᠤᠯᠠᠭᠠᠨ ᠵᠢᠩᠰᠠ ᠲᠠᠢ ᠪᠣᠭᠣᠳᠠᠯ᠂ ᠴᠠᠢ ᠶ᠋ᠢᠨ ᠰᠢᠭᠦᠰᠦ ᠶ᠋ᠢ ᠮᠣᠳᠣᠨ ᠫᠢᠯᠠ ᠳᠡᠭᠡᠷᠡ ᠳᠦᠷᠢᠮᠯᠡᠨ ᠲᠠᠯᠪᠢᠵᠤ ᠵᠡᠰ ᠱᠠᠬᠤᠤ ᠲᠠᠢ ᠴᠠᠢ ᠠ᠋ᠴᠠ ᠰᠠᠪᠠ ᠳᠡᠭᠡᠷᠡ ᠪᠡᠨ ᠶᠠᠯᠢ ᠦᠭᠡᠢ ᠲᠣᠰᠣᠭᠠᠨ ᠲᠥᠰᠦᠷᠭᠡᠭᠡᠳ ᠰᠢᠬᠢᠷ ᠴᠢᠪᠠᠭᠠ ᠶ᠋ᠢᠨ ᠵᠦᠢᠯ ᠢ᠋ ᠳᠡᠭᠡᠷᠡ ᠨᠢ ᠶᠠᠩᠵᠤᠯᠠᠭᠠᠳ ᠬᠣᠶᠠᠷ ᠭᠠᠯᠠᠭᠤᠨ ᠬᠦᠵᠦᠭᠦᠲᠦ ᠰᠤᠨᠳᠠᠯᠠᠭᠤᠯᠤᠨ 《ᠵᠠ᠂ ᠪᠡᠷᠭᠡᠨ ᠠ᠋ ! 》 ᠭᠡᠵᠦ ᠳᠡᠪᠰᠢᠭᠦᠯᠦᠨ ᠡᠷᠭᠦᠭᠰᠡᠨ ᠢ᠋ᠶ᠋ᠡᠨ ᠥᠪᠡᠷ ᠲᠦ᠋ᠨᠢ 《ᠨᠠᠨᠵᠢᠩ ᠲᠣᠷᠭᠠ》 ᠭᠡᠵᠦ ᠳᠡᠪᠡᠯ ᠦ᠋ᠨ ᠲᠣᠷᠭᠠ ᠪᠠᠷᠢᠭᠰᠠᠨ ᠢ᠋ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠲᠣᠰᠴᠤ ᠠᠪᠤᠯᠠ᠃
ᠰᠢᠨᠡ ᠶ᠋ᠢᠨ ᠠᠷᠢᠬᠢ ᠭᠡᠵᠦ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠭᠤᠷᠪᠠ ᠵᠠᠰᠠᠭᠳᠠᠵᠤ᠂ ᠮᠥᠩᠭᠥᠨ ᠬᠢᠷᠠ ᠲᠠᠢ ᠭᠠᠤᠯᠢᠨ ᠲᠠᠪᠠᠭ ᠲᠤ᠌ ᠵᠡᠷᠭᠡᠯᠡᠭᠰᠡᠨ 《ᠪᠣᠯᠵᠤᠮᠤᠷ ᠪᠤᠤᠰᠠ》③ ᠶ᠋ᠢ ᠠᠭᠤᠷ ᠰᠠᠪᠰᠠᠭᠤᠯᠤᠭᠰᠠᠭᠠᠷ ᠵᠤᠳᠪᠠ ᠶ᠋ᠢᠨ ᠡᠮᠦᠨᠡ ᠲᠠᠯᠪᠢᠪᠠ᠃ ᠰᠢᠨᠡ ᠶ᠋ᠢᠨ ᠬᠣᠭᠣᠯᠠ ᠠᠮᠰᠠᠵᠤ ᠵᠠᠪᠳᠤᠪᠠ ᠤᠤ ᠦᠭᠡᠢ ᠤᠤ ᠴᠤᠭᠪᠠᠭᠠᠲᠤᠷ ᠣᠷᠣᠵᠤ ᠢᠷᠡᠪᠡ᠃ ᠥᠴᠥᠭᠡᠳᠦᠷ ᠦ᠋ᠨ ᠦᠭᠡᠢ ᠪᠤᠭᠤᠲᠤ ᠣᠷᠣᠵᠤ ᠠᠲᠠᠷ ᠬᠠᠭᠠᠯᠪᠤᠷᠢᠯᠠᠳᠠᠭ ᠸᠠᠩ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠳ᠋ᠤ᠌ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠮᠡᠨᠳᠦ ᠪᠠᠷᠢᠴᠢᠬᠠᠭᠠᠳ ᠵᠠᠮ ᠳ᠋ᠠᠭᠠᠨ ᠤᠯᠠᠭᠠᠨ ᠬᠤᠳᠳᠤᠭ ᠲᠤ᠌ ᠪᠠᠢᠳᠠᠭ ᠨᠠᠰᠤᠨᠴᠠᠴᠡᠭ ᠦ᠋ᠨ ᠬᠢ ᠪᠡᠷ ᠬᠣᠨᠣᠭᠠᠳ ᠪᠤᠴᠠᠵᠤ ᠢᠷᠡᠭᠡ ᠨᠢ ᠡᠨᠡ᠃
ᠴᠤᠬᠪᠠᠭᠠᠲᠤᠷ ᠬᠠᠷᠢᠵᠤ ᠢᠷᠡᠭᠰᠡᠨ ᠪᠣᠯᠬᠣᠷ ᠵᠤᠳᠪᠠ ᠮᠡᠢᠷᠡᠨ ᠢ᠋ ᠵᠦᠭᠡᠷ ᠲᠠᠯᠪᠢᠨᠠ ᠤᠤ ᠳᠡ ! ᠠᠷᠢᠬᠢᠨ ᠤ᠋ ᠵᠠᠭᠤᠰᠢ ᠡᠨᠡ ᠲᠡᠷᠡ᠂ ᠬᠠᠭᠤᠷᠤᠯᠭᠠ ᠬᠠᠭᠠᠷᠢᠯᠭᠠ ᠭᠡᠳ ᠬᠡᠩᠰᠢᠭᠦᠦ ᠬᠢᠷᠪᠤᠰᠤ ᠦᠨᠦᠷᠲᠦᠭᠦᠯᠦᠨ ᠭᠠᠯ ᠲᠣᠭᠣᠭᠠᠨ ᠤ᠋ ᠬᠥᠮᠦᠰ ᠢ᠋ ᠪᠤᠵᠢᠭᠢᠨᠠᠭᠤᠯᠪᠠ᠃ ᠭᠡᠢᠴᠢᠨ ᠦ᠌ 《ᠵᠢᠩᠰᠡᠲᠦ ᠣᠪᠣᠭᠠ》 ᠪᠣᠭᠣᠷᠰᠣᠭ ᠵᠡᠷᠭᠡ ᠶ᠋ᠢ ᠰᠢᠷᠡᠭᠡᠨ ᠡᠴᠡ ᠲᠠᠷᠬᠠᠭᠯᠠᠵᠤ ᠪᠤᠷᠬᠠᠨ ᠤ᠋ ᠡᠮᠦᠨᠡ ᠶᠠᠩᠵᠤᠯᠠᠵᠤ ᠲᠠᠯᠪᠢᠪᠠ᠃ ᠠᠷᠢᠬᠢᠨ ᠤ᠋ ᠰᠢᠷᠡᠭᠡ ᠰᠢᠨᠡ ᠪᠡᠷ ᠵᠠᠰᠠᠭᠳᠠᠵᠤ ᠴᠤᠭᠪᠠᠭᠠᠲᠤᠷ ᠨᠣᠶᠠᠨ ᠳ᠋ᠤ᠌ ᠴᠠᠭᠠᠯᠠᠬᠤ ᠪᠠᠷ ᠢᠷᠡᠭᠰᠡᠨ ᠬᠥᠩᠬᠥᠷ ᠵᠠᠮᠪᠠᠯ᠂ ᠰᠤᠯᠤᠭᠠᠢ ᠨᠠᠮᠵᠢᠯ᠂ ᠵᠢᠭᠠᠬᠠᠨ ᠠᠶᠤᠷ᠂ ᠪᠠᠰᠠ ᠬᠡᠳᠦ ᠬᠡᠳᠦᠨ ᠴᠡᠷᠢᠭ ᠦ᠋ᠨ ᠲᠦᠷᠦᠭᠦᠴᠦᠳ ᠴᠦ᠍ ᠳᠠᠢᠯᠠᠯᠭᠠ ᠳ᠋ᠤ᠌ ᠰᠠᠭᠤᠵᠤ ᠨᠢᠭᠡ ᠨᠢᠭᠡᠨ ᠢ᠋ᠶ᠋ᠡᠨ ᠡᠷᠭᠦᠨ ᠮᠠᠭᠲᠠᠵᠤ ᠨᠠᠷᠠ ᠬᠡᠯᠪᠡᠢᠲᠡᠯᠡ ᠵᠠᠭᠤᠷᠠᠯᠳᠤᠪᠠ᠃ ᠸᠠᠩ ᠰᠣᠬᠣᠷ ᠠ᠋ᠴᠠ ᠱᠤᠮᠠᠭᠰᠠᠨ ④ ᠨᠣᠶᠠᠨ ᠰᠢᠰᠢ ᠶ᠋ᠢᠨ ᠨᠡᠷᠡᠮᠡᠯ ᠠᠷᠢᠬᠢ ᠭᠡᠭᠴᠢ ᠪᠠᠰᠠ ᠠᠷᠭᠠ ᠦᠭᠡᠢ ᠬᠠᠲᠠᠭᠤ ᠡᠳ᠋ ! ᠲᠠᠭ ᠢ᠋ ᠨᠢ ᠵᠠᠳᠠᠯᠬᠤ ᠲᠠᠢ ᠵᠡᠷᠭᠡ ᠰᠠᠩ ᠬᠢᠲᠡᠯᠡ ᠬᠠᠮᠠᠷ ᠴᠣᠷᠭᠢᠵᠤ᠂ ᠣᠭᠣᠴᠢᠬᠤ ᠳ᠋ᠤ᠌ ᠲᠠᠩᠨᠠᠢ ᠬᠠᠭᠠᠷᠢᠮᠠ ᠰᠢᠷᠦᠭᠦᠨ ᠬᠠᠷᠠᠭᠤᠨ᠃ ᠤᠤᠭᠤᠭᠰᠠᠨ ᠬᠣᠢᠨᠠ ᠪᠠᠨ ᠤᠳᠠᠬᠤ ᠦᠭᠡᠢ ᠶᠠᠰᠤᠨ ᠠ᠋ᠴᠠ ᠬᠥᠯᠥᠰᠥ ᠴᠢᠬᠠᠷᠠᠵᠤ ᠪᠡᠶᠡ ᠲᠠᠯᠪᠢᠭᠤᠷᠠᠳᠠᠭ᠃ ᠬᠦᠢᠲᠡᠨ ᠦ᠌ ᠴᠠᠭ ᠲᠤ᠌ ᠡᠳ᠋ᠯᠡᠵᠦ ᠰᠠᠭᠤᠬᠤ ᠳ᠋ᠤ᠌ ᠪᠠᠰᠠ ᠳᠣᠷᠢᠭᠤᠨ ᠶᠤᠮ ᠠ᠋! ᠡᠢᠨ ᠬᠦ᠌ ᠭᠠᠯᠠᠭᠤᠨ ᠬᠦᠵᠦᠭᠦᠳᠡᠢ ᠭᠠᠰᠢᠭᠤᠨ ᠬᠠᠷᠠ ᠲᠠᠢ ᠲᠠᠰᠤᠯᠴᠡᠬᠦ ᠡᠷᠡ ᠬᠡᠳᠦ ᠪᠠᠢᠨᠠ ᠪᠣᠢ ? ᠤᠳᠠᠭᠰᠠᠨ ᠦᠭᠡᠢ ᠵᠠᠷᠢᠮ ᠨᠢ ᠬᠡᠯᠡ ᠠᠮᠠ ᠨᠢ ᠮᠤᠷᠤᠯᠵᠠᠬᠤ ᠪᠣᠯᠪᠠᠴᠤ ᠬᠡᠯᠡᠮᠡᠭᠡᠢ ᠪᠡᠷᠬᠢᠷᠡᠮᠡᠳᠠᠭᠠᠢ ᠪᠣᠯᠤᠭᠰᠠᠨ ᠢ᠋ ᠬᠡᠯᠡᠬᠦ ᠦᠭᠡᠢ᠂ ᠬᠡᠯᠲᠡᠭᠡᠢ ᠬᠠᠵᠠᠭᠠᠢ ᠭᠢᠰᠬᠢᠵᠦ ᠬᠡᠪ ᠶᠠᠩᠵᠤ ᠪᠠᠨ ᠠᠯᠳᠠᠵᠤ ᠨᠣᠤᠷᠠᠯᠳᠤᠭᠰᠠᠭᠠᠷ ᠪᠠᠢᠵᠤ ᠲᠠᠷᠬᠠᠪᠠ᠃
ᠠᠷᠢᠬᠢᠨ ᠳ᠋ᠤ᠌ ᠬᠡᠳᠦᠢ ᠳᠤᠷᠠ ᠲᠠᠢ ᠪᠣᠯᠪᠠᠴᠤ ᠬᠡᠮᠵᠢᠶᠡ ᠯᠠᠮᠵᠢᠶᠠ ᠪᠠᠨ ᠠᠯᠳᠠᠳᠠᠭ ᠦᠭᠡᠢ ᠬᠢᠷᠢᠳᠡᠢᠭᠡᠨ ᠡᠵᠡᠮᠳᠡᠵᠦ ᠴᠢᠳᠠᠳᠠᠭ ᠵᠤᠳᠪᠠ ᠶᠠᠭᠤᠨ ᠳ᠋ᠤ᠌ ᠰᠣᠭᠲᠣᠵᠤ ᠡᠳᠠᠨᠤᠰ ᠰᠢᠭ ᠫᠡᠯᠠᠷᠠᠩ ᠢ᠋ᠶ᠋ᠠᠨ ᠬᠠᠶᠠᠵᠤ ᠶᠠᠪᠤᠬᠤ ᠪᠣᠢ᠃ ᠬᠥᠮᠦᠰ ᠦ᠋ᠨ ᠬᠡᠯᠡ ᠤᠯᠠ ᠠ᠋ᠴᠠ ᠵᠠᠢᠯᠠᠵᠤ ᠴᠤᠬᠪᠠᠭᠠᠲᠤᠷ ᠤ᠋ᠨ ᠬᠤᠨᠤᠳᠠᠭ ᠥᠷᠥᠭᠡᠨ ᠳ᠋ᠦ᠍ ᠰᠢᠷᠭᠤᠵᠤ ᠬᠣᠶᠠᠭᠤᠯᠠ ᠳᠡᠷᠡ ᠶ᠋ᠢᠨ ᠱᠠᠲᠤ ⑤ ᠲᠡᠪᠡᠷᠢᠨ ᠬᠠᠵᠠᠭᠤᠯᠠᠪᠠ᠃
ᠵᠤᠳᠪᠠ ᠤᠷᠲᠤ ᠭᠠᠩᠰᠠ ᠵᠠᠭᠤᠵᠤ᠄
— ᠵᠠ᠂ ᠴᠤᠭᠪᠠᠭᠠᠲᠤᠷ ᠨᠣᠶᠠᠨ ᠤ᠋ ᠣᠬᠢ ᠰᠠᠢᠨ ᠬᠠᠷᠠ ᠲᠠᠮᠠᠬᠢᠨ ᠠ᠋ᠴᠠ ᠠᠮᠰᠠᠶᠠ ᠬᠦ ! ᠮᠠᠭᠤ ᠰᠠᠢᠨ ᠰᠢᠭᠠᠷᠤ ᠬᠣᠰᠤᠮ ᠰᠢᠭ᠋ ᠬᠡᠦᠷᠰᠢᠭᠰᠡᠨ ᠠᠮᠲᠠ ᠲᠠᠢ ᠶᠠᠭᠤᠮᠠ ᠶ᠋ᠢ ᠴᠦ᠍ ᠪᠣᠯ ᠦᠨᠦᠷᠯᠡᠬᠦ ᠦᠭᠡᠢ ᠠ᠋ ! ᠭᠡᠵᠦ ᠨᠠᠩᠴᠢᠳ ᠤ᠋ᠨ ᠬᠠᠯᠠᠰᠠᠭᠤᠨ ᠳ᠋ᠠᠭᠠᠨ ᠵᠢᠷᠦᠬᠡᠯᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠦᠨᠡᠨ ᠢ᠋ᠶ᠋ᠡᠷ ᠨᠢ ᠲᠠᠯᠪᠢᠪᠠ᠃ ᠡᠳᠡᠨ ᠦ᠌ ᠳ᠋ᠦ᠍ ᠴᠠᠭᠠᠨ ᠮᠥᠩᠬᠦ ᠬᠠᠷᠠ ᠲᠠᠮᠠᠬᠢ ᠬᠣᠶᠠᠷ ᠠ᠋ᠴᠠ ᠥᠭᠡᠷᠡ ᠳᠤᠲᠠᠬᠤ ᠶᠠᠭᠤᠮᠠ ᠠᠯᠠᠭᠠ᠃ ᠬᠠᠷᠢᠨ ᠵᠡᠭᠡᠭᠡᠭᠰᠡᠨ ᠭᠡᠮᠡᠷ ᠬᠣᠶᠠᠷ ᠪᠣᠭᠣᠳᠠᠯ ᠬᠠᠷᠠ ᠲᠠᠮᠠᠬᠢ ᠪᠠᠢᠭᠰᠠᠨ ᠢ᠋ ᠴᠤᠭᠪᠠᠭᠠᠲᠤᠷ ᠨᠢᠮᠪᠠᠢᠯᠠᠵᠤ ᠠᠪᠤᠭᠠᠳ ᠸᠠᠩ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠳ᠋ᠤ᠌ ᠵᠣᠰᠤᠬᠤᠷᠲᠠᠨ 《ᠪᠢᠯᠲᠠᠤᠴᠢᠯᠠᠨ》 ᠪᠡᠯᠡᠭ ᠪᠠᠷᠢᠴᠢᠬᠠᠭᠰᠠᠨ ᠪᠣᠯᠬᠣᠷ ᠴᠤᠭᠪᠠᠭᠠᠲᠤᠷ ᠤ᠋ᠨ ᠨᠢᠭᠤᠷ ᠲᠤ᠌ ᠲᠤᠯᠵᠤ᠄
— ᠨᠠᠳᠠ ᠰᠢᠭ᠋ ᠠᠷᠠᠳ ᠢ᠋ᠶ᠋ᠠᠷ ᠲᠡᠵᠢᠭᠡᠯᠭᠡᠭᠰᠡᠨ ᠴᠠᠯᠢᠩ ᠬᠥᠯᠥᠰᠥ ᠴᠦ᠍ ᠦᠭᠡᠢ ᠶᠠᠳᠠᠭᠤ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠳ᠋ᠦ᠍ ᠬᠠᠮᠢᠭᠠ ᠠ᠋ᠴᠠ ᠣᠬᠢ ᠰᠠᠢᠨ ᠬᠠᠷᠠ ᠲᠠᠮᠠᠬᠢ ᠣᠯᠳᠠᠬᠤ ᠪᠣᠢ ? ᠮᠠᠭᠤ ᠨᠢ ᠴᠦ᠍ ᠣᠯᠳᠠᠬᠤ ᠳ᠋ᠤ᠌ ᠪᠡᠷᠬᠡ ᠪᠠᠢᠨᠠ᠃ ᠮᠡᠢᠷᠡᠨ ᠭᠤᠸᠠᠢ ᠨᠡᠭᠡᠷᠡᠨ ᠬᠥᠮᠦᠨ ᠢ᠋ ᠬᠣᠱᠳᠩᠨᠠᠵᠤ ᠴᠢᠳᠠᠨᠠ ? ᠭᠡᠳ ᠪᠣᠰᠴᠤ ᠨᠠᠰᠤᠲᠠᠨ ᠤ᠋ ᠠᠪᠳᠠᠷᠠ ᠠ᠋ᠴᠠ ᠵᠢᠭᠠᠯ ᠵᠢᠭᠤᠯ ᠶᠠᠭᠤᠮᠠ ᠬᠢᠮᠤᠰᠤᠯᠠᠬᠤ ᠪᠠᠷ ᠭᠠᠷᠬᠤ ᠭᠡᠪᠡᠯ ᠵᠤᠳᠪᠠ᠄
— ᠪᠠᠢᠵᠠ᠂ ᠴᠢ ᠳᠡ᠂ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠭᠡᠵᠦ ᠪᠠᠢᠭᠠᠳ ᠦᠨᠡᠬᠡᠷ ᠳᠣᠷᠣᠢ ᠪᠠᠢᠨᠠ ᠳᠠ ! ᠪᠠᠷᠠᠭᠤᠨ ᠬᠦᠩ ᠪᠤᠶᠠᠨ ᠢ᠋ᠶ᠋ᠠᠷ ᠳᠤᠲᠠᠬᠤ ᠪᠢᠰᠢ ᠭᠠᠭᠴᠠ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠳᠣᠷᠣᠢ ᠳ᠋ᠠᠭᠠᠨ ᠬᠡᠩᠰᠢᠭᠦᠦ ᠦᠨᠦᠷᠲᠦᠭᠦᠯᠬᠦ ᠬᠠᠷᠠ ᠲᠠᠮᠠᠬᠢ ᠴᠤ᠌ ᠦᠭᠡᠢ ᠶᠠᠪᠤᠵᠤ ᠪᠠᠢᠨᠠ᠃ ᠴᠢᠨᠦ ᠲᠡᠷᠡ ᠳᠤᠸᠠᠨᠵᠠᠩ ᠡᠷᠬᠡ ᠶ᠋ᠢ ᠨᠠᠳᠠ ᠦᠭᠭᠦᠰᠡᠨ ᠪᠣᠯ ᠤᠤ᠂ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠪᠠᠢᠳᠠᠭ ᠡᠷᠬᠡ ᠶ᠋ᠢ ᠲᠡᠷᠡ 《ᠮᠤᠬᠤᠷ ᠵᠠᠰᠠᠭ》 ᠢ᠋ᠶ᠋ᠠᠷ ᠨᠣᠶᠠᠯᠠᠭᠤᠯᠵᠤ᠂ ᠠᠪᠤ ᠳᠡᠭᠡᠳᠦ ᠶ᠋ᠢᠨ ᠪᠤᠶᠠᠨ ᠢ᠋ ᠲᠠᠲᠠᠨᠤᠰ ᠢ᠋ᠶ᠋ᠠᠷ ᠲᠠᠯᠬᠢᠳᠠᠭᠤᠯᠬᠤ ᠦᠭᠡᠢ ᠠ᠋ ! ᠳᠠᠬᠢᠪᠠᠯ ᠣᠳᠣ ᠵᠠᠰᠠᠭ ᠤ᠋ᠨ ᠨᠡᠷᠡ ᠵᠢᠭᠠᠭᠰᠠᠨ ᠵᠢᠭᠠᠯ ᠬᠦᠦ ᠨᠢ ᠴᠦ᠍ ᠪᠤᠭᠤᠲᠤ ᠶ᠋ᠢᠨ ᠬᠢᠲᠠᠳ ᠤ᠋ᠨ ᠬᠡᠦᠬᠡᠳ ᠭᠡᠨᠡ ᠰᠢᠦ ! ᠡᠭᠦᠨ ᠢ᠋ ᠥᠭᠡᠷᠡ ᠬᠥᠮᠦᠨ ᠮᠡᠳᠡᠬᠦ ᠦᠭᠡᠢ ᠴᠦ᠍ ᠴᠢᠨᠦ ᠡᠵᠢ ᠮᠠᠨᠤᠨᠪᠠᠳᠮᠡ ᠮᠡᠳᠡᠬᠦ ᠦᠭᠡᠢ ᠭᠡᠵᠢ ᠤᠤ ? ᠮᠠᠨ ᠤ᠋ ᠪᠠᠷᠠᠭᠤᠨ ᠬᠦᠩ ᠡᠢᠨ ᠬᠦ᠌ ᠤᠷᠤᠭᠤᠳᠠᠵᠤ ᠳᠣᠷᠣᠢᠳᠠᠳᠠᠭ ᠨᠢ ᠶᠠᠭᠤᠨ ᠠ᠋ᠴᠠ ᠪᠣᠢ ? ᠶᠠᠪᠤᠵᠤ ᠶᠠᠪᠤᠵᠤ ᠵᠤᠯᠪᠢᠩ ᠡᠮᠡ ᠪᠡᠷ ᠴᠡᠷᠢᠭ ᠵᠠᠰᠠᠭ ᠤ᠋ᠨ ᠡᠷᠬᠡ ᠪᠠᠢᠭᠤᠯᠵᠤ᠂ ᠬᠠᠷᠠ ᠵᠠᠨᠠᠭ ᠤ᠋ᠨ ᠵᠤᠯᠵᠠᠭᠠ ᠪᠠᠷ ᠵᠠᠰᠠᠭ ᠵᠠᠯᠭᠠᠮᠵᠢᠯᠠᠭᠤᠯᠬᠤ ᠳᠡᠭᠡᠷᠡ ᠲᠤᠯᠴᠢᠬᠠᠭᠰᠠᠨ ᠶᠤᠮ ᠴᠢᠨᠢ ᠳᠣᠷᠣᠢᠲᠠᠬᠤ ᠨᠢ ᠵᠦᠢ᠃ ᠡᠨᠡ ᠨᠢ ᠮᠠᠨ ᠤ᠋ ᠡᠨᠡ ᠨᠢᠭᠡ ᠦᠶᠡ ᠶ᠋ᠢᠨ ᠬᠥᠮᠦᠰ ᠦ᠋ᠨ ᠳᠣᠷᠣᠢ ᠲᠥᠷᠥᠵᠦ᠂ ᠳᠤᠯᠤᠭᠠᠨ ᠪᠤᠯᠴᠢᠷᠬᠠᠢ ᠪᠠᠨ ᠥᠷᠥᠭᠡᠯ ᠪᠤᠰᠤᠳ ᠢ᠋ᠶ᠋ᠠᠷ ᠲᠣᠭᠠᠯᠠᠭᠤᠯᠳᠠᠭ ᠤ᠋ᠨ ᠢᠷᠣᠠ᠃ ᠴᠢ ᠬᠡᠯᠡ ᠯᠡ ᠳᠡ᠂ ᠮᠢᠨᠦ ᠬᠡᠯᠡᠵᠦ ᠪᠠᠢᠬᠤ ᠲᠠᠭᠠᠷᠠᠨᠠ ᠤᠤ ᠦᠭᠡᠢ ᠤᠤ ? ᠪᠢ ᠠᠷᠢᠬᠢ ᠤᠤᠭᠤᠴᠢᠬᠠᠭᠠᠳ ᠴᠢᠮᠠ ᠳ᠋ᠤ᠌ ᠢᠩᠭᠢᠵᠦ ᠪᠠᠢᠭᠠ ᠪᠢᠰᠢ᠂ ᠶᠠᠭ ᠦᠨᠡᠨ ᠭᠣᠣᠯ ᠢ᠋ᠶ᠋ᠠᠷ ᠨᠢ ᠶᠠᠷᠢᠵᠤ ᠪᠠᠢᠨᠠ ᠰᠢᠦ! ᠭᠡᠬᠦ ᠳ᠋ᠦ᠍ ᠴᠤᠭᠪᠠᠭᠠᠲᠤᠷ ᠳᠤᠷᠠ ᠦᠭᠡᠢᠴᠡᠬᠦ ᠪᠣᠯᠪᠠᠴᠤ ᠵᠤᠳᠪᠠ ᠮᠡᠢᠷᠡᠨ ᠦ᠌ ᠨᠢᠭᠤᠷ ᠳᠡᠭᠡᠷᠡ᠄
— ᠮᠡᠢᠷᠡᠨ ᠦ᠌ ᠬᠡᠯᠡᠬᠦ ᠵᠥᠪ ᠂ ᠲᠠᠭᠠᠷᠠᠵᠤ ᠪᠠᠢᠨᠠ ᠭᠡᠰᠡᠨ ᠴᠦ᠍ ᠵᠤᠳᠪᠠ ᠪᠠᠷ 《ᠴᠢᠳᠠᠯ ᠦᠭᠡᠢ ᠲᠤᠷᠤᠢ ᠳ᠋ᠠᠭᠠᠨ ᠁》 ᠭᠡᠵᠦ ᠬᠤᠱᠣᠩᠨᠠᠭᠤᠯᠤᠭᠰᠠᠨ ᠳ᠋ᠠᠭᠠᠨ ᠶᠠᠷᠠ ᠪᠠᠨ ᠮᠠᠯᠲᠠᠭᠤᠯᠤᠭᠰᠠᠨ ᠰᠢᠭ᠋ ᠪᠣᠯᠵᠤ᠂ 《ᠲᠡᠷᠡ ᠮᠠᠭᠤ ᠪᠠᠭᠠ ᠬᠠᠲᠤᠨ ᠢ᠋ ᠮᠤᠬᠤᠷ ᠵᠠᠰᠠᠭ ᠮᠠᠰᠠᠭ ᠭᠡᠬᠦ ᠨᠢ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ᠂ ᠡᠴᠢᠭᠡ ᠶ᠋ᠢᠨ ᠴᠢᠨᠢ ᠲᠣᠯᠣᠭᠠᠢ ᠶᠠᠭᠤᠨ ᠤ᠋ ᠬᠢᠨᠢ ᠬᠢᠲᠠᠳ ᠤ᠋ᠨ ᠬᠦᠦ᠂ ᠵᠠᠨᠠᠭ ᠤ᠋ᠨ ᠵᠤᠯᠵᠠᠭᠠ ᠁ ᠪᠠᠯᠲᠠᠭᠠ ᠴᠤ᠌ ᠮᠡᠳᠡᠬᠦ ᠦᠭᠡᠢ ᠪᠠᠢᠵᠤ ᠪᠠᠢᠭᠠᠳ ᠮᠢᠨᠦ ᠡᠮᠦᠨᠡ ᠢᠩᠭᠢᠵᠦ ᠬᠠᠪᠬᠠᠭᠠᠰᠤ ᠦᠭᠡᠢ ᠣᠷᠬᠢᠳᠠᠭ ᠲᠠᠭᠠᠨ ᠃ ᠲᠡᠷᠡ ᠴᠢᠨᠢ ᠮᠢᠨᠦ ᠬᠦᠦ ᠰᠢᠦ ᠳᠡ ! ᠣᠳᠣ ᠮᠢᠩᠭᠠᠨᠪᠤᠤ ᠶ᠋ᠢᠨ ᠤᠭᠰᠠᠭᠠ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠠᠰᠠᠭ ᠪᠠᠷᠢᠳᠠᠭ ᠴᠠᠭ ᠪᠣᠯᠴᠢᠬᠠᠵᠠᠢ ᠠ᠋ ! 》 ᠭᠡᠵᠦ ᠳᠤᠳᠤᠷᠠ ᠪᠠᠨ ᠪᠢᠲᠡᠭᠦᠬᠡᠨ ᠪᠣᠳᠣᠪᠠᠴᠤ ᠰᠢᠭᠤᠳ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ ᠳ᠋ᠡᠭᠡᠨ ᠪᠡᠶᠡ ᠪᠡᠨ ᠪᠠᠷᠢᠵᠤ᠄
— ᠲᠡᠭᠡᠭᠡᠳ ᠣᠳᠣ ᠶᠠᠭᠠᠬᠢᠨᠠ ᠪᠣᠢ ? ᠮᠡᠢᠷᠡᠨ ᠵᠠᠩᠭᠢ ᠭᠤᠸᠠᠢ ᠠ᠋ ? ᠭᠡᠵᠦ ᠴᠤᠭᠪᠠᠭᠠᠲᠤᠷ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠵᠤᠳᠪᠠ᠄
— ᠢᠷᠡ ᠢᠷᠡ ! ᠨᠠᠭᠠᠰᠢ ᠪᠠᠨ ᠭᠡᠳ ᠡᠪᠦᠷ ᠡᠴᠡ ᠪᠡᠨ ᠨᠢᠭᠡ ᠪᠠᠭᠯᠠᠭᠠ ᠣᠬᠢ ᠰᠠᠢᠨ ᠲᠣᠰᠣ ᠵᠤᠩᠭᠠᠭᠲᠤᠭᠰᠠᠨ ᠬᠠᠷᠠ ᠲᠠᠮᠠᠬᠢ᠂ ᠴᠣᠬᠣᠷ ᠶᠤᠸᠠᠮᠪᠤᠤ ᠢᠬᠡᠷᠡ ᠶ᠋ᠢ ᠭᠠᠷᠭᠠᠵᠤ ᠲᠡᠭᠦᠨ ᠳ᠋ᠦ᠍ ᠥᠭᠬᠦ ᠳ᠋ᠦ᠍ ᠴᠤᠭᠪᠠᠭᠠᠲᠤᠷ᠄
— ᠶᠠᠭᠠᠬᠢᠵᠤ ᠪᠠᠢᠭᠠ ᠨᠢ ᠡᠨᠡ ᠪᠣᠢ ? ᠶᠠᠭᠤ ᠬᠢᠬᠦ ᠪᠣᠢ? ᠭᠡᠵᠦ ᠭᠠᠷ ᠨᠢ 《ᠠᠪᠬᠤ ᠦᠭᠡᠢ》 ᠭᠡᠵᠦ ᠴᠠᠭᠠᠰᠢ ᠨᠢ ᠲᠦᠯᠬᠢᠭᠰᠡᠨ ᠪᠣᠯᠪᠠᠴᠤ ᠬᠣᠮᠣᠬᠠᠢ ᠨᠢᠳᠦ ᠨᠢ ᠴᠤᠬᠤᠷ ᠶᠤᠸᠠᠮᠪᠤᠤ ᠳᠡᠭᠡᠷᠠ ᠰᠢᠭᠡᠳᠴᠢᠭᠡᠭᠰᠡᠨ ᠰᠢᠭ ᠪᠠᠢᠯᠠ ᠁
— ᠬᠠᠷᠠ ᠲᠠᠮᠠᠬᠢ ᠨᠢ ᠴᠦ᠍ ᠪᠣᠯ ᠮᠢᠨᠦᠬᠢ ᠵᠢᠭᠠᠬᠠᠨ ᠰᠠᠨᠠᠭᠠ ᠶᠤᠮ ᠠ᠋᠂ ᠭᠠᠵᠠᠷᠳᠠᠬᠤ ᠦᠭᠡᠢ ᠪᠢᠵᠡ ! ᠡᠨᠡ ᠢᠭᠡᠷᠡ ᠶᠤᠸᠠᠮᠪᠤᠤ ᠪᠣᠯ ᠬᠠᠷᠢᠨ 《ᠲᠤᠰᠠᠯᠠᠭᠴᠢ ᠡᠪᠦᠭᠡ》 ᠶ᠋ᠢᠨ ᠴᠢᠨᠢ ᠢᠷᠡᠭᠡᠳᠦᠢ ᠶ᠋ᠢᠨ ᠠᠴᠢ ᠬᠦᠷᠭᠡᠨ ᠳ᠋ᠡᠭᠡᠨ ᠥᠭᠴᠦ ᠶᠠᠪᠤᠭᠤᠯᠤᠭᠰᠠᠨ ᠡᠳ᠋ ᠶᠦ᠍ᠮ ᠠ᠋᠂ ᠴᠠᠭᠠᠨᠠ ᠪᠠᠨ ᠨᠢᠭᠡ ᠯᠡ ᠤᠳᠬᠠ ᠲᠠᠢ ᠶᠤᠮ ᠪᠠᠢᠯᠭᠦᠢ ᠭᠡᠳ ᠵᠤᠳᠪᠠ ᠬᠥᠭ ᠬᠥᠭ ᠢᠨᠢᠶᠡᠪᠡ᠃
— ᠁
ᠴᠤᠭᠪᠠᠭᠠᠲᠤᠷ ᠪᠡᠯᠡᠭ ᠢ᠋ ᠲᠣᠰᠤᠭᠠᠳ ᠶᠠᠭᠤ ᠬᠡᠯᠡᠬᠦ ᠪᠡᠨ ᠣᠯᠤᠭᠰᠠᠨ ᠦᠭᠡᠢ᠃
— ᠲᠤᠰᠠᠯᠠᠭᠴᠢ ᠶ᠋ᠢᠨ ᠰᠠᠨᠠᠭᠠ ᠪᠣᠯ 《ᠢᠮᠠᠭᠠᠨ ᠤ᠋ ᠮᠢᠬᠠ ᠬᠠᠯᠠᠭᠤᠨ ᠳᠡᠭᠡᠷᠡ ᠪᠡᠨ》 ᠭᠡᠨᠡ ᠰᠢᠦ ! ᠲᠡᠭᠡᠭᠡᠳ ᠢᠬᠡᠷᠡ ᠶᠤᠸᠠᠮᠪᠤᠤ ᠥᠭᠴᠦ ᠪᠠᠢᠭᠠ ᠨᠢ ᠡᠨᠡ ! ᠭᠡᠳ ᠳᠠᠭᠤ ᠪᠠᠨ ᠨᠠᠮ ᠪᠣᠯᠭᠠᠨ ᠴᠤᠭᠪᠠᠭᠠᠲᠤᠷ ᠤ᠋ᠨ ᠴᠢᠬᠢᠨ ᠳ᠋ᠦ᠍ 《ᠪᠠᠭᠠ ᠬᠠᠲᠤᠨ ᠢ᠋ ᠤᠬᠠᠭᠠᠨ ᠬᠢᠴᠢᠬᠡᠪᠡᠯ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠠᠰᠠᠭ ᠴᠡᠷᠢᠭ ᠦ᠋ᠨ ᠶᠡᠬᠡ ᠡᠷᠬᠡ ᠪᠦᠷ ᠴᠢᠨᠦ ᠭᠠᠷ ᠲᠤ᠌ ᠣᠷᠣᠴᠢᠬᠠᠨᠠ ! ᠲᠡᠷᠡ ᠦᠶᠡ ᠳ᠋ᠦ᠍ ᠴᠢᠮᠠ ᠳ᠋ᠤ᠌ ᠶᠠᠭᠤ ᠳᠤᠲᠠᠨᠠ ᠪᠣᠢ ? ᠣᠳᠣ ᠴᠢᠨᠢ〈ᠡᠷᠬᠡ ᠲᠡᠢ ᠪᠣᠯ ᠡᠷᠢᠶᠡᠨ ᠶᠢᠷᠲᠢᠨᠴᠤ ᠂ ᠡᠷᠬᠡ ᠦᠭᠡᠢ ᠪᠣᠯ ᠡᠷᠭᠢᠭᠦᠦ ᠶᠢᠷᠲᠢᠨᠴᠤ〉 ᠶ᠋ᠢᠨ ᠴᠠᠭ ᠰᠢᠦ》 ᠭᠡᠰᠡᠨ ᠳ᠋ᠦ᠍ ᠴᠤᠬᠪᠠᠭᠠᠲᠤᠷ ᠬᠢᠷᠳ᠋ᠬᠢᠵᠦ᠄
— ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠢ᠋ ᠱᠤᠳᠤᠷᠴᠢᠬᠠᠪᠠᠯ ᠲᠡᠭᠷᠢ ᠶ᠋ᠢᠨ ᠪᠤᠬᠤᠷ ᠲᠤ᠌ ᠲᠦᠢᠮᠡᠷ ᠲᠠᠯᠪᠢᠴᠢᠬᠠᠬᠤ ᠪᠢᠰᠢ ᠦᠤ ! ᠪᠠᠷᠠᠭᠤᠨ ᠬᠦᠩ ᠳᠠᠶᠠᠭᠠᠷ ᠨᠠᠮᠠᠶ᠋ᠢ ᠬᠦᠯᠢᠶᠡᠨᠡ ᠤᠤ ᠳᠡ ! ᠠᠶᠠ᠂ ᠲᠠ ᠴᠢᠨᠢ ᠳᠠᠩᠴᠤ ᠨᠢᠭᠡ ᠴᠢᠬᠢ ᠳᠠᠯᠠᠰᠦᠭᠰᠡᠨ ᠭᠡᠨᠡᠨ ᠶᠠᠭᠤᠮᠠ ᠶᠠᠷᠢᠬᠤ ᠶᠤᠮ ᠠ᠋! ᠭᠡᠯᠡ᠃
— ᠬᠠᠢ! ᠴᠢᠮᠠᠶ᠋ᠢ ᠦᠷᠠᠳ ᠤ᠋ᠨ ᠬᠠᠩᠭᠢ ᠰᠦᠰᠦᠲᠠᠢ ᠡᠷᠡ ᠶᠦ᠍ᠮ ᠪᠠᠢᠬᠤ ᠴᠢᠷᠠᠢ ᠭᠡᠵᠦ ᠵᠡᠭᠦᠨ ᠲᠤᠰᠠᠯᠠᠭᠴᠢ ᠪᠢᠳᠡ ᠬᠣᠶᠠᠷ ᠲᠣᠭᠣᠵᠤ ᠪᠠᠢᠯᠠ᠃ ᠲᠡᠭᠡᠭᠡᠳ ᠪᠢ ᠥᠨᠥᠳᠥᠷ ᠴᠢᠮᠠ ᠳ᠋ᠤ᠌ ᠦᠨᠡᠨ ᠦᠭᠡ ᠪᠡᠨ ᠠᠭᠤᠳᠠᠯᠵᠤ ᠬᠡᠯᠡᠭᠰᠡᠨ ᠶᠦ᠍ᠮ ᠰᠢᠦ ! ᠠ᠋ ᠳᠠ᠂ ᠬᠠᠷᠠᠭᠠᠳ ᠪᠠᠢᠬᠤ ᠳ᠋ᠤ᠌ ᠲᠤᠰᠠ ᠦᠭᠡᠢ ᠶᠠᠭᠤᠮᠠ ᠪᠠᠢᠨᠠ᠃ ᠬᠤᠷᠠᠭᠠ ᠴᠢᠮᠬᠢᠬᠦ ᠵᠣᠷᠢᠭ ᠦᠭᠡᠢ ᠡᠷᠡ ᠬᠣᠵᠢᠮ ᠶᠠᠭᠠᠬᠢᠵᠤ ᠵᠠᠰᠠᠭ ᠴᠡᠷᠢᠭ ᠦ᠋ᠨ ᠶᠡᠬᠡ ᠡᠷᠬᠡ ᠶ᠋ᠢ ᠪᠠᠢᠬᠤ ᠶᠤᠮ ᠪᠣᠢ ? ᠭᠡᠳ ᠵᠤᠳᠪᠠ ᠮᠡᠢᠷᠡᠨ ᠪᠣᠰᠴᠤ ᠰᠠᠭᠤᠭᠰᠠᠨ ᠳ᠋ᠤ᠌ ᠴᠤᠭᠪᠠᠭᠠᠲᠤᠷ ᠰᠠᠨᠳᠤᠷᠴᠤ᠄
— ᠦᠭᠡᠢ ᠦᠭᠡᠢ ! ᠶᠠᠷᠦ ᠨᠢ ᠡᠨᠡ ᠪᠠᠭᠠ ᠬᠠᠲᠤᠨ ᠢ᠋ ᠤᠬᠠᠭᠠᠨ ᠬᠢᠨᠡ ᠭᠡᠭᠴᠢ ᠬᠤᠷᠠᠭᠠ ᠢᠰᠢᠭᠡ ᠴᠢᠮᠬᠢᠬᠦ ᠰᠢᠭ ᠬᠢᠯᠪᠠᠷᠬᠠᠨ ᠶᠠᠭᠤᠮᠠ ᠪᠢᠰᠢ ᠰᠢᠦ ! ᠭᠡᠪᠡ᠃
— ᠤᠬᠠᠭᠠᠨ ᠰᠠᠮᠪᠠᠭᠠ ᠳ᠋ᠠᠭᠠᠨ ᠪᠠᠭᠲᠠᠵᠤ ᠵᠣᠷᠢᠭ ᠵᠣᠯᠪᠣᠭᠠ ᠲᠠᠢ ᠤᠬᠠᠭᠠᠯᠠᠬᠤ ᠶᠤᠮ ᠪᠣᠯ ᠲᠡᠷᠡ ᠶᠠᠭᠤ ᠪᠠᠢᠬᠤ ᠪᠣᠢ ? ᠬᠤᠷᠠᠭᠠ ᠴᠢᠮᠬᠢᠬᠦ ᠡᠴᠡ ᠴᠦ᠍ ᠬᠢᠯᠪᠠᠷᠬᠠᠨ ! ᠠ ᠬᠠᠷᠢᠨ ᠵᠤᠷᠠᠮᠠ ᠰᠢᠭ᠋ ᠨᠦᠬᠡᠨ ᠡᠴᠡ ᠪᠡᠨ ᠪᠤᠯᠲᠠᠢᠬᠤ ᠠ᠋ᠴᠠ ᠠᠶᠤᠭᠠᠳ ᠪᠠᠢᠬᠤ ᠶᠤᠮ ᠪᠣᠯ ᠶᠠᠭᠤ ᠪᠦᠲᠦᠬᠦ ᠪᠣᠢ ? ᠵᠥᠪᠡᠬᠡᠨ ᠬᠥᠮᠦᠨ ᠦ᠌ ᠵᠢᠯᠤᠭᠤᠨ ᠳ᠋ᠤ᠌ ᠬᠠᠮᠢᠭᠠᠰᠢ ᠪᠠᠨ ᠭᠡᠪᠡᠯ ᠲᠠᠢᠰᠢ ᠪᠠᠨ ᠵᠣᠷᠢᠯᠭᠠ ᠦᠭᠡᠢ ᠵᠢᠷᠣᠭᠠᠯᠠᠬᠤ ᠶ᠋ᠢᠨ ᠨᠡᠮᠡᠷᠢ ! ᠭᠡᠰᠡᠨ ᠳ᠋ᠦ᠍ ᠴᠤᠭᠪᠠᠭᠠᠲᠤᠷ᠄
— ᠵᠣᠷᠢᠭᠯᠠᠵᠤ ᠪᠠᠢᠭᠠᠳ ᠤᠬᠠᠭᠠᠯᠠᠬᠤ ᠪᠠᠷ ᠪᠣᠳᠣᠬᠤ ᠳ᠋ᠤ᠌ ᠥᠨᠥᠬᠢ ᠨᠥᠮᠥᠷᠢ ᠨᠢ ᠪᠣᠯᠤᠭᠰᠠᠨ ᠡᠵᠡᠨ ᠨᠣᠶᠠᠨ ᠨᠢ ᠬᠠᠷᠠ ᠴᠡᠷᠢᠭ ᠢᠷᠡᠭᠦᠯᠵᠦ ᠶᠠᠯᠠ ᠠᠰᠠᠭᠤᠪᠠᠯ ᠪᠠᠰᠠ ᠴᠤ᠌ ᠠᠮᠠᠷ ᠦᠭᠡᠢ ! ᠭᠡᠪᠡ᠃
— ᠲᠡᠭᠦᠨ ᠡᠴᠡ ᠠᠶᠤᠬᠤ ᠶᠠᠭᠤ ᠪᠠᠢᠬᠤ ᠪᠣᠢ ? ᠲᠡᠷᠡ ᠬᠠᠷᠠ ᠴᠡᠷᠢᠭ ᠂ ᠪᠣᠷᠣ ᠴᠡᠷᠢᠭ ᠭᠡᠬᠦ ᠬᠣᠵᠢᠮ ᠤ᠋ᠨ ᠤᠴᠢᠷ ᠢ᠋ ᠵᠡᠭᠦᠨ ᠲᠤᠰᠠᠯᠠᠭᠴᠢ ᠪᠢᠳᠡ ᠬᠣᠶᠠᠷ ᠡᠵᠡᠨ ᠮᠡᠳᠡᠶᠡ ! ᠴᠢ ᠮᠥᠨ ᠵᠣᠪᠠᠬᠤ ᠦᠭᠡᠢ ᠶᠠᠭᠤᠮᠠᠨ ᠳ᠋ᠤ᠌ ᠵᠣᠪᠠᠳᠠᠭ ᠬᠥᠮᠦᠨ ᠶᠦ᠍ᠮ ᠠ᠋ ! ᠭᠡᠵᠦ ᠵᠤᠳᠪᠠ ᠮᠡᠢᠷᠡᠨ ᠴᠤᠭᠪᠠᠭᠠᠲᠤᠷ ᠤ᠋ᠨ ᠬᠣᠷᠣ ᠶ᠋ᠢ ᠮᠠᠯᠲᠠᠬᠤ ᠰᠢᠭ᠋ ᠬᠣᠮᠣᠬᠠᠢ ᠶ᠋ᠢ ᠨᠢ ᠬᠥᠳᠡᠯᠭᠡᠬᠦ ᠰᠢᠭ ᠬᠡᠯᠡᠪᠡᠯ ᠨᠡᠷᠡᠯᠬᠡᠦ ᠳᠡᠭᠡᠷᠡ ᠪᠡᠨ ᠳᠡᠭᠡᠷᠡᠯᠬᠡᠦ ᠵᠠᠩ ᠲᠠᠢ ᠴᠤᠭᠪᠠᠭᠠᠲᠤᠷ ᠬᠡᠢᠷᠬᠡᠵᠦ᠄
— ᠵᠠ᠂ ᠲᠡᠭᠡᠳᠡᠭ ᠴᠦ᠍ ᠶᠦ᠍ᠮ ᠤᠤ ? ᠬᠡᠯᠡᠪᠡᠯ ᠴᠦ᠍ ᠲᠡᠷᠡ ᠮᠠᠭᠤ ᠵᠠᠢᠳᠠᠩ ᠡᠮᠡ ᠶ᠋ᠢ ᠤᠬᠠᠭᠠᠯᠠᠬᠤ ᠶᠠᠭᠤ ᠪᠠᠢᠬᠤ ᠪᠣᠢ ! ᠭᠡᠰᠡᠨ ᠳ᠋ᠦ᠍ ᠵᠤᠳᠪᠠ ᠮᠡᠢᠷᠡᠨ ᠥᠨᠳᠡᠢᠨ ᠪᠣᠰᠴᠤ ᠴᠤᠭ᠋ᠪᠠᠭᠠᠲᠤᠷ ᠤ᠋ᠨ ᠮᠥ᠋ᠷᠤ ᠶ᠋ᠢ ᠲᠡᠪᠰᠢᠨ᠄
— ᠵᠣᠷᠢᠭ ᠲᠠᠢ ᠪᠣᠯ ᠵᠣᠭᠣᠰ ᠲᠠᠢ ᠭᠡᠳᠡᠭ ᠰᠢᠦ ᠳᠡ ! ᠲᠡᠷᠡ ᠡᠮᠡ ᠶ᠋ᠢ ᠤᠬᠠᠭᠠᠨ ᠬᠢᠴᠢᠬᠡᠪᠡᠯ᠂ ᠵᠠᠰᠠᠭ ᠲᠠᠮᠠᠭᠠ ᠴᠢᠨᠦ ᠭᠠᠷ ᠲᠤ᠌ ᠭᠡᠳᠡᠭ ᠢ᠋ ᠪᠢᠲᠡᠭᠡᠢ ᠮᠠᠷᠲᠠ! ᠭᠡᠳ ᠬᠤᠸᠠᠰ ᠬᠤᠸᠠᠰ ᠢᠨᠢᠶᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠠᠯᠲᠠᠨ ᠰᠣᠶᠣᠭᠠ ᠰᠢᠲᠦ ᠨᠢ ᠭᠢᠯᠠᠯᠵᠠᠨᠠ᠃
— ᠡᠵᠢ ᠶ᠋ᠢᠨ ᠰᠠᠨᠠᠭᠠ ᠴᠣᠬᠣᠮ ᠶᠠᠭᠤ ᠭᠡᠳᠡᠭ ᠪᠣᠯ ? ᠡᠵᠢ ᠶ᠋ᠢᠨ ᠴᠢᠷᠠᠢ ᠥᠭᠡᠳᠡ ᠦᠶᠡ ᠳ᠋ᠦ᠍ ᠨᠢᠭᠡ ᠶᠠᠭᠤᠮᠠ ᠰᠣᠨᠣᠰᠬᠠᠵᠤ ᠰᠠᠨᠠᠭᠠ ᠶ᠋ᠢ ᠨᠢ ᠲᠡᠩᠰᠡᠵᠦ ᠦᠵᠡᠶᠡ᠃ ᠲᠡᠭᠡᠭᠡᠳ ᠳᠠᠷᠠᠭᠠ ᠨᠢ ᠶᠠᠭᠠᠬᠢᠬᠤ ᠪᠠᠨ ᠲᠣᠭᠲᠠᠶᠠ !
— ᠲᠡᠭᠡ᠂ ᠲᠡᠭᠡ ! ᠮᠠᠨ ᠤ᠋ ᠮᠠᠨᠤᠨᠪᠠᠳᠮᠠ ᠪᠡᠷᠬᠡᠨ ᠦ᠌ ᠤᠬᠠᠭᠠᠨ ᠭᠡᠭᠴᠢ ᠤᠰᠤᠨ ᠠ᠋ᠴᠠ ᠲᠤᠩᠭᠠᠯᠠᠭ ᠶᠤᠮ ᠭᠠᠵᠠᠷ ᠳᠠ! ᠦᠭᠡ ᠴᠤᠬᠤᠢᠯᠭᠠᠬᠤ ᠲᠠᠢ ᠵᠡᠷᠭᠡ ᠴᠠᠭᠠᠨᠠ ᠤᠬᠠᠭᠠᠨ ᠢ᠋ ᠴᠢᠨᠢ ᠭᠤᠷᠪᠠ ᠨᠤᠭᠤᠯᠤᠭᠠᠳ ᠲᠤᠩᠭᠠᠵᠤ ᠤᠷᠬᠢᠨᠠ᠃ ᠤᠴᠢᠷ ᠶᠠᠪᠤᠳᠠᠯ ᠤ᠋ᠨ ᠣᠨᠢ ᠶ᠋ᠢ ᠵᠥᠪ ᠰᠦᠪᠡᠯᠡᠵᠦ ᠴᠢᠳᠠᠳᠠᠭ ᠳ᠋ᠠᠭᠠᠨ ᠴᠢ ᠪᠢᠳᠠᠨ ᠤ᠋ ᠰᠠᠨᠠᠭᠠ ᠶ᠋ᠢ ᠭᠠᠵᠠᠷ ᠲᠤᠰᠤᠭᠠᠬᠤ ᠦᠭᠡᠢ ᠨᠢ ᠯᠠᠪ ! ᠭᠡᠵᠦ ᠵᠤᠳᠪᠠ ᠮᠡᠢᠷᠡᠨ ᠢᠲᠡᠭᠡᠯᠲᠡᠢ ᠢᠨᠢᠶᠡᠨ ᠰᠢᠷᠵᠢᠭᠢᠨᠡᠨ ᠪᠤᠴᠠᠯᠤᠭᠰᠠᠨ ᠲᠠᠮᠠᠬᠢᠨ ᠤ᠋ ᠲᠣᠭᠣᠭᠠ ᠠ᠋ᠴᠠ ᠰᠢᠨᠤᠯᠳᠠᠢᠬᠠᠨ ᠰᠣᠷᠣᠬᠤ ᠳ᠋ᠤ᠌ ᠬᠠᠮᠠᠷ ᠠ᠋ᠴᠠ ᠨᠢ ᠰᠢᠷᠠᠩᠭᠤᠢ ᠬᠥᠬᠡ ᠤᠲᠤᠭᠠ ᠪᠠᠭᠠᠭᠢᠨᠠ ᠁
— — — —
① ᠬᠣᠩᠭᠢᠯ ᠭᠡᠳᠡᠭ ᠨᠢ ᠲᠡᠷᠡ ᠤᠯᠠᠭᠠᠨ ᠬᠠᠲᠠᠲᠠᠢ ᠠᠭᠠᠷᠤᠲᠠᠢ ᠱᠣᠷᠤᠩ ᠲᠣᠯᠤᠭᠠᠢ ᠠ᠋ᠴᠠ ᠴᠤᠬᠪᠠᠭᠠᠲᠤᠷ ᠤᠨ ᠭᠡᠷ ᠲᠦ᠍ ᠬᠦᠷᠭᠦ ᠬᠥᠨᠲᠡᠢ ᠬᠣᠩᠭᠢᠯ ᠤ᠋ᠨ ᠨᠦᠬᠡ ᠪᠠᠢᠳᠠᠭ᠃
② ᠭᠠᠯ ᠤᠨ ᠬᠣᠷᠢᠨ ᠭᠤᠷᠪᠠᠨ ᠳᠤ ᠴᠢᠨᠠᠭᠰᠠᠨ ᠡᠪᠴᠢᠭᠦᠨ ᠦ ᠬᠣᠷᠮᠣᠢ ᠶᠢᠨ ᠮᠢᠬᠠ᠂ ᠰᠢᠬᠢᠷ ᠵᠡᠷᠭᠡ ᠶᠢ ᠭᠠᠯ ᠤᠨ ᠭᠡᠰᠢᠭ ᠭᠡᠳᠡᠭ᠃
③ ᠪᠣᠯᠵᠣᠮᠣᠷ ᠰᠢᠭ᠋ ᠱᠣᠷᠣᠨ ᠦᠵᠦᠭᠦᠷ ᠲᠠᠢ ᠪᠣᠨᠳᠣᠭᠣᠷ ᠪᠥᠭ᠍ᠰᠡ ᠲᠠᠢ ᠪᠤᠤᠵᠠ᠃
④ ᠨᠤᠲᠤᠭ ᠤᠨ ᠬᠡᠯᠡᠯᠭᠡ᠂ ᠱᠤᠮᠠᠭᠰᠠᠨ ᠭᠡᠵᠦ ᠬᠤᠯᠠᠭᠠᠢᠯᠠᠬᠤ ᠪᠤᠶᠤ ᠮᠡᠬᠡᠯᠡᠵᠦ ᠳᠡᠭᠡᠷᠡᠮᠳᠡᠭ᠍ᠰᠡᠨ ᠢ ᠬᠡᠯᠡᠨᠡ᠃
⑤ ᠤᠷᠠᠳ ᠤᠳ ᠰᠢᠷᠡᠭᠡ ᠶᠢ ᠪᠠᠰᠠ ᠱᠠᠲᠤ ᠭᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠤᠭᠴᠢ ᠰᠠᠷᠠᠨᠠ