ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠦᠲᠦᠭᠡᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠶᠢᠰᠦ> Хан мунын сүүрс < доорд > – Мөнх зохиоов ᠂Дөдгөөр бодь – Нэгдүгээр бүлэг <9>
292ᠲᠦᠲᠦᠭᠡᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠶᠢᠰᠦ>
ᠶᠢᠰᠦ
ᠨᠠᠢᠷ ᠰᠢᠪᠲᠤᠷᠷᠠᠬᠤ ᠡᠳᠦᠷ ᠪᠥᠬᠡ ᠶ᠋ᠢᠨ ᠳᠡᠳ᠋ ᠲᠡᠷᠢᠭᠦᠨ ᠰᠢᠯᠭᠠᠷᠠᠬᠤ ᠳᠡᠪᠵᠢᠶᠡᠨ ᠪᠣᠯᠵᠤ ᠪᠥᠬᠡ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠤ᠌ ᠭᠦᠦᠷ ᠨᠠᠢᠷ ᠪᠢᠯᠬᠠᠨᠠ᠃
《ᠪᠥᠬᠡ ᠪᠡᠨ ᠳᠡᠯᠪᠢ ᠁ 》 ᠭᠡᠵᠦ ᠵᠡᠭᠦᠨ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠪᠤᠭᠤᠷᠤᠯ ᠡᠪᠦᠭᠡᠳ ᠦ᠋ᠨ ᠪᠥᠬᠡ ᠶ᠋ᠢᠨ ᠣᠷᠢᠶᠠᠨ ᠳ᠋ᠤ᠌ ᠵᠡᠭᠦᠨ ᠭᠠᠷ ᠤ᠋ᠨ ᠲᠠᠯᠠ ᠳ᠋ᠤ᠌ ᠮᠢᠩᠭᠠᠨ ᠬᠤᠰᠢᠭᠤᠨ ᠤ᠋ ᠠᠪᠤᠷᠭᠤ ᠪᠥᠬᠡ ᠲᠡᠮᠤᠷᠳᠦ᠋ᠰᠢ ᠭᠠᠤᠯᠢᠨ ᠲᠣᠪᠣᠷᠤᠤ ᠲᠠᠢ ᠰᠢᠷᠢᠨ ᠵᠣᠳᠣᠭ ᠢ᠋ᠶ᠋ᠠᠨ ᠰᠢᠯᠭᠡᠭᠡᠨ ᠳᠣᠣᠷᠠ ᠪᠠᠨ ᠴᠣᠪᠬᠣᠴᠢᠨ ᠳᠡᠪᠬᠡᠷᠴᠦ᠂ ᠬᠦᠵᠦᠭᠦᠨ ᠳ᠋ᠡᠬᠢ ᠰᠣᠯᠣᠩᠭᠠᠨ ᠵᠠᠩᠭᠢᠶᠠ ᠨᠢ ᠲᠡᠭᠦᠨ ᠦ᠌ ᠬᠥᠳᠡᠯᠭᠡᠭᠡᠨ ᠦ᠌ ᠠᠶᠠ ᠪᠠᠷ ᠠᠷᠰᠯᠠᠨ ᠤ᠋ ᠵᠣᠭᠳᠣᠷ ᠰᠢᠭ᠋ ᠰᠠᠭᠰᠠᠯᠵᠠᠨᠠ᠃ ᠲᠡᠷᠡ ᠪᠡᠷ ᠪᠥᠬᠡ ᠣᠷᠢᠶᠠᠯᠠᠭᠰᠠᠨ ᠪᠤᠭᠤᠷᠤᠯ ᠡᠪᠦᠭᠡᠨ ᠢ᠋ ᠱᠣᠩᠳᠠᠵᠤ ᠵᠥᠪ ᠪᠤᠷᠤᠭᠤ ᠠᠷᠤ ᠥᠪᠥᠷ ᠲᠠᠯᠠ ᠪᠠᠷ ᠨᠢ ᠡᠷᠭᠢᠯᠳᠦᠨ ᠤᠶᠠᠭᠠᠲᠠᠢ ᠨᠣᠬᠠᠢ ᠠᠭᠰᠤᠷᠬᠤ ᠮᠡᠲᠦ ᠪᠥᠬᠡ ᠶ᠋ᠢᠨ ᠲᠠᠯᠠᠪᠠᠢ ᠤᠷᠤᠭᠤ ᠵᠢᠳᠬᠦᠯᠡᠬᠦ ᠨᠢ ᠦᠨᠡᠬᠡᠷ ᠣᠮᠣᠭᠯᠠᠩ ᠳᠦᠷᠢ ᠲᠡᠢ ᠠᠵᠤᠭᠤ᠃ ᠪᠥᠬᠡ ᠶ᠋ᠢᠨ ᠮᠥᠷᠥᠢ᠂ ᠡᠷᠡ ᠶ᠋ᠢᠨ ᠲᠡᠩᠴᠡᠭᠡ ᠳ᠋ᠦ᠍ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠳᠣᠷᠣᠭᠰᠠᠨ ᠡᠷᠡ ᠭᠡᠵᠦ ᠠᠯᠠᠭᠠ᠃ ᠲᠠᠪᠤᠨ ᠵᠠᠭᠤ ᠠᠷᠪᠠᠨ ᠬᠣᠶᠠᠷ ᠪᠥᠬᠡ ᠶ᠋ᠢᠨ ᠳᠤᠮᠳᠠ ᠵᠣᠭᠰᠣᠭᠠ ᠪᠠᠷ ᠢ᠋ᠶ᠋ᠠᠨ ᠬᠣᠰᠢᠭᠤᠷᠠᠭᠰᠠᠨ ᠳ᠋ᠠᠭᠠᠨ ᠪᠠᠷᠳᠠᠮᠨᠠᠵᠤ ᠪᠥᠬᠡ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠤ᠌ 《ᠪᠢ ᠳᠡᠯᠡᠬᠡᠢ᠂ ᠴᠢ ᠮᠡᠯᠡᠬᠡᠢ 》 ᠭᠡᠰᠠᠨ ᠰᠢᠨᠵᠢ ᠲᠡᠢ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠢᠷᠣᠭᠠ ᠬᠠᠯᠢᠭᠤᠨ ᠮᠣᠷᠢ ᠶ᠋ᠢ ᠬᠥᠲᠥᠯᠦᠨᠡ ᠳᠡ ᠭᠡᠬᠦ ᠰᠢᠨᠤᠯ ᠳ᠋ᠠᠭᠠᠨ ᠰᠢᠲᠠᠵᠤ ᠪᠠᠢᠪᠠ᠃
《ᠪᠥᠬᠡ ᠪᠡᠨ ᠳᠡᠯᠪᠢ᠂ ᠳᠡᠯᠪᠢ! 》 ᠭᠡᠬᠦ ᠳ᠋ᠦ᠍ ᠲᠡᠮᠤᠷᠳᠦ᠋ᠰᠢ ᠭᠢᠨᠵᠢᠲᠦ ᠤᠶᠠᠭᠠᠨ ᠠ᠋ᠴᠠ ᠪᠠᠨ ᠭᠡᠨᠡᠳᠲᠡ ᠠᠯᠳᠠᠷᠠᠭᠰᠠᠨ ᠨᠣᠬᠠᠢ ᠰᠢᠭ᠋ ᠲᠠᠯᠠᠪᠠᠢ ᠤᠷᠤᠭᠤ ᠰᠠᠢᠪᠤᠷᠯᠠᠨ ᠱᠣᠭᠰᠢᠵᠤ ᠪᠠᠷᠢᠯᠳᠤᠭᠠᠨ ᠤ᠋ ᠲᠠᠯᠠᠪᠠᠢ ᠶ᠋ᠢᠨ ᠲᠥᠪ ᠳᠤᠮᠳᠠ ᠬᠦᠷᠦᠭᠡᠳ ᠠᠷᠰᠯᠠᠨ ᠤ᠋ ᠰᠦᠷ ᠢ᠋ᠶ᠋ᠡᠷ ᠮᠠᠭᠰᠢᠪᠠ᠃
ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠪᠥᠬᠡ ᠠᠭᠤᠯᠠᠨᠭᠦᠦ ᠥᠰᠥᠭᠡᠢ ᠪᠡᠷ ᠢ᠋ᠶ᠋ᠡᠨ ᠬᠥᠰᠡᠷ ᠨᠦᠳᠦᠵᠦ ᠲᠠᠢᠪᠤᠭᠤᠬᠠᠨ ᠠᠯᠬᠤᠵᠤ ᠶᠠᠪᠤᠨ ᠬᠠᠳᠠᠨ ᠳᠡᠭᠡᠷᠡ ᠡᠴᠡ ᠡᠮᠦᠨᠡᠰᠢ ᠱᠤᠩᠭᠤᠯᠠᠨ ᠳᠡᠭᠦᠯᠢᠬᠦ ᠭᠡᠵᠦ ᠪᠠᠢᠭᠠ ᠪᠦᠷᠭᠦᠳ ᠰᠢᠭ ᠲᠦᠷᠦᠭᠦᠰᠢ ᠪᠡᠨ ᠬᠡᠳᠦᠬᠡᠨ ᠳᠡᠪᠢᠵᠦ ᠠᠪᠤᠭᠠᠳ ᠯᠠᠭ ᠬᠢᠲᠡᠯᠡ ᠲᠠᠯᠠᠪᠠᠢ ᠲᠤᠷᠭᠢᠭᠤᠯᠤᠨ ᠵᠣᠭᠰᠣᠪᠠ᠃ ᠪᠥᠬᠡ ᠶ᠋ᠢᠨ ᠰᠣᠷᠢᠶᠠᠨ ᠳ᠋ᠤ᠌ ᠳᠡᠮᠡᠢ ᠬᠡᠳᠦ ᠣᠷᠣᠭᠠ ᠦᠭᠡᠢ ᠠᠭᠤᠯᠠᠨᠭᠦᠦ ᠶ᠋ᠢᠨ ᠬᠢᠳᠡᠯ ᠪᠠᠷᠢᠳᠠᠯ ᠨᠢ ᠦᠵᠡᠭᠴᠢᠳ ᠲᠦ᠍ ᠳᠠᠩᠴᠤ ᠨᠢᠭᠡ ᠰᠢᠭᠦᠷᠭᠡᠢ ᠬᠠᠷᠠᠭᠳᠠᠬᠤ ᠠᠵᠢ᠃ ᠢᠩᠭᠢᠬᠦ ᠪᠣᠯᠭᠠᠨ ᠨᠥᠭᠦᠭᠡ ᠬᠠᠰᠢᠷ ᠪᠥᠬᠡ ᠲᠡᠮᠤᠷᠳᠦ᠋ᠰᠢ ᠶ᠋ᠢᠨ ᠣᠮᠣᠭ ᠢ᠋ ᠬᠥᠭᠵᠢᠭᠡᠵᠦ ᠭᠠᠵᠠᠷ ᠪᠠᠭᠲᠠᠬᠤ ᠦᠭᠡᠢ ᠪᠣᠯᠭᠠᠵᠠᠢ᠃ ᠲᠡᠮᠤᠷᠳᠦ᠋ᠰᠢ ᠴᠦᠳᠡᠩ ᠦ᠋ᠨ ᠲᠣᠯᠣᠭᠠᠢ ᠰᠢᠭ᠋ ᠢᠪᠡᠯᠴᠡᠨ ᠪᠥᠨᠲᠥᠯᠵᠡᠬᠦ ᠬᠥᠮᠦᠰ ᠦ᠋ᠨ ᠲᠣᠯᠣᠭᠠᠢ ᠶ᠋ᠢᠨ ᠣᠷᠣᠢ ᠪᠠᠷ ᠬᠠᠷᠠᠴᠠ ᠭᠦᠶᠦᠯᠭᠡᠨ ᠳᠡᠭᠡᠭᠦᠷ ᠬᠠᠷᠠᠵᠤ ᠨᠠᠭᠠᠰᠢ ᠴᠠᠭᠠᠰᠢ ᠮᠢᠳᠠᠯᠵᠠᠨ ᠠᠯᠬᠤᠯᠠᠵᠤ᠂ 《ᠠᠮᠠᠨ ᠤ᠋ ᠰᠢᠷᠠ ᠨᠢ ᠬᠠᠲᠠᠭᠠᠳᠤᠢ ᠵᠣᠯᠳᠣᠷᠣᠢ ᠬᠦᠦ ᠶ᠋ᠢ ᠪᠠᠢᠵᠠ ᠴᠢᠮᠠᠶ᠋ᠢ᠂ ᠬᠠᠮᠢᠭᠠᠰᠢ ᠪᠠᠨ ᠬᠠᠨᠳᠤᠵᠤ᠂ ᠶᠠᠭᠠᠬᠢᠵᠤ ᠰᠢᠷᠦᠢᠳᠤᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠳᠡᠭ ᠴᠦ᠍ ᠪᠣᠯ ᠶᠠᠭᠠᠬᠢᠬᠤ ᠪᠣᠢ? ᠬᠣᠵᠢᠮ ᠨᠢᠭᠡ ᠬᠠᠩᠭᠢ ᠪᠥᠬᠡ ᠪᠣᠯᠵᠤ ᠮᠠᠭᠠᠳ ᠦᠭᠡᠢ᠃ ᠲᠡᠢᠮᠦ ᠪᠢᠰᠢ ᠪᠣᠯ ᠳᠠ ? 》 ᠭᠡᠵᠦ ᠦᠯᠦ ᠲᠣᠭᠣᠮᠰᠠᠷᠯᠠᠨᠠ᠃ ᠨᠠᠷᠡ ᠲᠡᠢ ᠨᠡᠷᠡ ᠦᠭᠡᠢ ᠬᠣᠶᠠᠷ ᠪᠥᠬᠡ ᠬᠡᠷᠡᠭᠰᠡᠨ ᠪᠤᠬᠠ ᠰᠢᠭ᠋ ᠬᠢᠷᠠ ᠬᠢᠷᠠ ᠪᠠᠷ ᠢ᠋ᠶ᠋ᠠᠨ ᠬᠠᠷᠠᠵᠤ ᠭᠥᠯᠢᠯᠵᠡᠨ ᠵᠣᠭᠰᠣᠨᠠ ᠃ ᠨᠢᠭᠡ ᠨᠢ ᠣᠮᠣᠷᠤᠤ ᠨᠢ ᠤᠭᠠᠯᠵᠠᠯᠠᠨ ᠣᠨᠵᠢᠢᠭᠰᠠᠨ ᠤᠪᠤᠷᠵᠢᠭᠤᠨ ᠪᠤᠬᠠ ᠰᠢᠭ᠋ ᠬᠡᠷᠰᠡᠦ ᠰᠦᠷᠯᠢᠭ ᠬᠠᠷᠠᠭᠳᠠᠬᠤ ᠳᠤ ᠨᠥᠭᠦᠭᠡ ᠨᠢ ᠬᠠᠷᠢᠨ ᠡᠪᠡᠷ ᠦ᠋ᠨ ᠬᠢᠨᠢ ᠨᠢᠯᠬᠠ ᠰᠠᠷᠢᠰᠤ ᠨᠢ ᠭᠦᠢᠴᠡᠳ ᠬᠣᠯᠲᠣᠷᠠᠭᠠᠳᠤᠢ ᠪᠢᠷᠠᠭᠤᠨ ᠪᠤᠬᠠᠨᠲᠠᠢ ᠰᠢᠭ᠋ ᠶᠠᠭᠠᠬᠢᠬᠤ ᠠ᠋ᠴᠠ ᠴᠤ᠌ ᠪᠤᠴᠠᠬᠤ ᠦᠭᠡᠢ ᠣᠮᠣᠭᠯᠠᠩ ᠪᠠᠢᠪᠠ᠃
ᠭᠣᠣᠯ ᠲᠠᠭᠲᠤ ᠶ᠋ᠢᠨ ᠨᠣᠶᠠᠨ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠭᠤᠭᠰᠠᠨ ᠪᠠᠭᠠ ᠵᠠᠰᠠᠭ ᠠᠯᠳᠠᠨᠸᠴᠢᠷ ᠬᠣᠶᠠᠷ ᠪᠥᠬᠡ ᠶ᠋ᠢᠨ ᠪᠠᠷᠢᠴᠠ ᠪᠤᠯᠢᠶᠠᠯᠴᠠᠬᠤ ᠶ᠋ᠢ ᠬᠠᠷᠠᠭᠠᠳ ᠲᠠᠪᠲᠤᠷ ᠠᠯᠲᠠᠨ ᠪᠠᠢᠨ ᠪᠠᠢᠨ ᠪᠣᠰᠴᠤ᠄
— ᠠᠭᠤᠯᠠᠨᠭᠦᠦ ᠠ᠋ ᠁ ᠰᠠᠪᠠ ! ᠨᠠᠭᠠᠳᠤᠬᠢ ᠪᠠᠨ ᠰᠠᠪᠠᠵᠤ ᠤᠨᠠᠭᠠ ᠭᠡᠵᠦ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠭᠡᠨᠡᠳᠲᠡ ᠬᠠᠰᠬᠢᠷᠤᠭᠰᠠᠨ ᠳ᠋ᠤ᠌ ᠪᠠᠭᠠ ᠬᠠᠲᠤᠨ ᠰᠠᠨᠳᠤᠷᠴᠤ᠄
— ᠪᠠᠭᠠ ᠵᠠᠰᠠᠭ ᠠ᠋ ! ᠮᠢᠨᠦ ᠬᠦᠦ ᠰᠠᠭᠤ᠂ ᠰᠠᠭᠤ ! ᠣᠷᠣᠨ ᠳ᠋ᠠᠭᠠᠨ ᠲᠣᠮᠣᠭᠠᠲᠠᠢ ᠰᠠᠭᠤᠭᠠᠴᠢ ! ᠲᠠ ᠴᠢᠨᠢ ᠵᠠᠰᠠᠭ ᠬᠦᠩ ᠨᠣᠶᠠᠨ ᠬᠥᠮᠦᠨ ᠰᠢᠦ ᠳᠡ᠂ ᠲᠡᠭᠡᠵᠦ ᠪᠣᠯᠳᠠᠭ ᠦᠭᠡᠢ ᠶᠦ᠍ᠮ ᠠ᠋! ᠭᠡᠵᠦ ᠪᠠᠭᠠ ᠵᠠᠰᠠᠭ ᠠᠯᠳᠠᠨᠸᠴᠢᠷ ᠢ᠋ ᠠᠷᠭᠠᠳᠠᠵᠤ ᠰᠠᠭᠤᠯᠭᠠᠨᠠ᠃
ᠷᠠᠰᠢ ᠵᠠᠬᠢᠷᠤᠭᠴᠢ᠂ ᠪᠠᠭᠠ ᠵᠠᠰᠠᠭ ᠤ᠋ᠨ ᠪᠥᠭᠰᠡᠨ ᠳ᠋ᠦ᠍ᠨᠢ ᠥᠷᠭᠡᠰᠦ ᠣᠷᠣᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠰᠠᠭᠤᠷᠢ ᠠᠯᠲᠠᠨ ᠣᠪᠣᠭᠣᠨᠠᠬᠤ ᠶ᠋ᠢ ᠬᠠᠷᠠᠭᠠᠳ ᠲᠡᠭᠦᠨ ᠳ᠋ᠦ᠍ ᠣᠷᠣᠰ ᠬᠢᠴᠡᠲᠠᠢ ᠥᠷᠥᠭᠡᠰᠦᠨ ᠨᠢᠳᠦ ᠲᠡᠢ ᠳᠤᠷᠠᠨ ᠥᠭᠴᠦ ᠰᠠᠭᠠᠳᠠᠭᠤᠯᠪᠠ ᠃ ᠪᠠᠭᠠ ᠵᠠᠰᠠᠭ ᠠᠯᠳᠠᠨᠸᠴᠢᠷ ᠳᠣᠷᠢᠭᠤᠨ ᠨᠢᠭᠡ ᠨᠠᠭᠠᠳᠤᠮ ᠤ᠋ᠨ ᠡᠳ᠋ ᠣᠯᠵᠤ ᠡᠢᠰᠢ ᠲᠡᠢᠰᠢ ᠳᠤᠷᠠᠨᠳᠠᠵᠤ ᠰᠠᠨᠠᠭᠠ ᠪᠠᠨ ᠬᠠᠭᠤᠷᠤᠨᠠ᠃
ᠨᠠᠭᠠᠳᠤᠮ ᠬᠠᠷᠠᠭᠰᠠᠨ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠮᠠᠰᠢ ᠥᠶᠥᠭ ᠪᠠᠢᠨᠠ᠃ ᠭᠡᠲᠡᠯᠡ ᠨᠠᠭᠠᠳᠤᠮ ᠤ᠋ᠨ ᠪᠠᠶᠠᠷ ᠨᠠᠢᠷ ᠲᠤ᠌ ᠰᠡᠳᠬᠢᠯ ᠢ᠋ᠶ᠋ᠡᠨ ᠰᠦᠯᠡᠵᠦ ᠪᠠᠶᠠᠰᠤᠭᠰᠠᠨ ᠤ᠋ ᠴᠠᠭᠠᠭᠤᠷ ᠳᠠᠯᠳᠠᠬᠠᠨ ᠣᠮᠣᠭᠰᠢᠭᠰᠠᠨ ᠨᠢᠭᠡ ᠬᠥᠮᠦᠨ ᠪᠠᠢᠨ ᠪᠠᠢᠨ ᠨᠢᠯᠪᠤᠰᠤ ᠪᠠᠨ ᠵᠦᠯᠭᠦᠵᠦ ᠪᠠᠢᠯᠠ᠃ ᠡᠨᠡ ᠪᠣᠯ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠪᠣᠯᠤᠨᠠ᠃ ᠭᠣᠣᠯ ᠲᠠᠭᠲᠤ ᠶ᠋ᠢᠨ ᠡᠷᠬᠡ ᠰᠦᠷᠲᠡᠢ ᠵᠢᠩᠰᠠᠲᠠᠨ ᠤᠲᠤᠭᠠᠲᠠᠳ ᠤ᠋ᠨ ᠰᠠᠭᠤᠳᠠᠯ ᠳ᠋ᠤ᠌ ᠵᠠᠢ ᠡᠵᠡᠯᠡᠨ ᠰᠠᠭᠤᠭᠰᠠᠳ ᠳᠣᠲᠣᠷᠠ ᠲᠡᠭᠦᠨ ᠦ᠌ ᠬᠦᠦ ᠪᠠ ᠠᠴᠢ① ᠨᠢ ᠰᠠᠭᠠᠲᠠᠵᠤ ᠪᠠᠢᠬᠤ ᠶ᠋ᠢ ᠪᠣᠳᠣᠨ ᠪᠣᠳᠣᠨ ᠪᠠᠶᠠᠷ ᠤ᠋ᠨ ᠨᠢᠯᠪᠤᠰᠤ ᠬᠡᠯᠬᠢᠶᠡ ᠨᠢ ᠲᠠᠰᠤᠷᠠᠭᠰᠠᠨ ᠰᠤᠪᠤᠳ ᠰᠢᠭ᠋ ᠠᠷᠴᠢᠵᠤ ᠵᠠᠪᠳᠤᠬᠤ ᠦᠭᠡᠢ ᠴᠤᠪᠤᠷᠠᠨᠠ᠃ ᠡᠨᠡ ᠤᠴᠢᠷ ᠨᠢ ᠲᠡᠭᠦᠨ ᠦ᠌ ᠡᠳᠦᠷ ᠦ᠋ᠨ ᠪᠣᠳᠣᠯ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦᠨ ᠳ᠋ᠦ᠍ᠨᠢ ᠬᠣᠨᠣᠭᠰᠢᠭᠰᠠᠭᠠᠷ ᠢᠷᠡᠵᠠᠢ᠃ ᠡᠨᠡ ᠬᠦ᠌ ᠬᠦᠰᠡᠯ ᠨᠢ ᠥᠨᠥᠳᠥᠷ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠪᠡᠶᠡᠯᠡᠵᠦ ᠪᠠᠢᠭᠠ ᠳ᠋ᠤ᠌ ᠲᠡᠷᠡ ᠪᠠᠶᠠᠷᠯᠠᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ᠃ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠬᠦᠩ ᠨᠣᠶᠠᠨ ᠤ᠋ ᠰᠠᠭᠤᠷᠢ ᠶ᠋ᠢ ᠵᠠᠯᠭᠠᠬᠤ ᠭᠡᠵᠦ ᠬᠡᠴᠢᠨᠡᠭᠡᠨ ᠡᠷᠡ ᠶ᠋ᠢᠨ ᠰᠢᠨᠳᠠᠰᠤ ᠶ᠋ᠢ ᠪᠠᠷᠠᠵᠤ᠂ ᠳᠣᠲᠣᠷᠠ ᠵᠠᠭᠤᠷᠠ ᠪᠠᠨ ᠠᠯᠠᠯᠳᠤᠭᠠᠨ ᠬᠦᠪᠰᠢᠯᠳᠤᠭᠡᠨ ᠪᠣᠯᠵᠤ ᠢᠷᠡᠭᠰᠡᠨ ᠪᠠᠷᠲᠠᠭᠠᠲᠤ ᠮᠥᠷ ᠢ᠋ ᠡᠷᠭᠢᠴᠡᠭᠦᠯᠬᠦ ᠡᠴᠡ ᠪᠡᠨ ᠵᠢᠷᠦᠬᠡ ᠰᠢᠮᠰᠢᠷᠡᠨᠡ᠃ ᠥᠪᠡᠷ ᠦ᠋ᠨ ᠬᠢᠨᠢ ᠤᠷᠠᠨ ᠬᠣᠩᠰᠢᠶᠠᠷ ᠤᠬᠠᠭᠠᠨ ᠰᠠᠮᠪᠠᠭᠠ ᠳ᠋ᠤ᠌ ᠡᠢᠨ ᠬᠦ᠌ ᠦᠨᠡᠨ ᠦ᠌ ᠬᠠᠷᠢᠭᠤ ᠰᠡᠪ ᠰᠡᠮᠡᠬᠡᠷ ᠠᠯᠤᠰ ᠲᠡᠷᠲᠡᠭᠡ ᠡᠴᠡ ᠠᠢᠰᠤᠢ ᠪᠠᠢᠵᠤ ᠨᠢᠳᠦᠨ ᠦ᠌ ᠬᠢᠨᠢ ᠡᠮᠦᠨᠡ ᠲᠤᠯᠵᠤ ᠢᠷᠡᠪᠡ᠃ ᠲᠡᠭᠦᠨ ᠦ᠌ ᠰᠠᠮᠠᠭᠠᠨ ᠪᠤᠭᠤᠷᠤᠯ ᠪᠣᠳᠣᠯ ᠳ᠋ᠤᠨᠢ ᠳᠣᠯᠭᠢᠶᠠ ᠡᠭᠦᠰᠴᠦ᠂ ᠪᠣᠯᠳᠠᠭ ᠴᠤ᠌ ᠪᠣᠯᠤᠭᠠᠰᠠᠢ ᠳᠠ! ᠪᠠᠭᠠ ᠵᠠᠰᠠᠭ ᠠᠴᠢ ᠠᠯᠳᠠᠨᠸᠴᠢᠷ ᠤ᠋ᠨ ᠢ᠋ᠶ᠋ᠠᠨ ᠬᠥᠭᠡᠷᠦᠬᠦᠨ ᠬᠠᠴᠠᠷ ᠢ᠋ ᠦᠨᠦᠰᠦᠨ᠂ ᠪᠠᠳᠮᠠᠷᠠᠭᠠ ᠬᠦᠷᠡᠩ ᠵᠢᠩᠰᠡᠲᠦ ᠮᠠᠯᠠᠭᠠᠢ ᠶ᠋ᠢ ᠨᠢ ᠢᠯᠪᠢᠨ ᠥᠬᠥᠭᠡᠷᠳᠡᠬᠦ ᠶᠤᠮᠰᠠᠨ! ᠭᠡᠪᠡᠴᠦ ᠢᠩᠭᠢᠵᠦ ᠪᠣᠯᠬᠤ ᠦᠭᠡᠢ ᠬᠣᠢᠨᠠ ᠳᠠ! ᠵᠥᠪᠬᠡᠨ ᠨᠢᠯᠪᠤᠰᠤ ᠠᠰᠬᠠᠷᠠᠭᠤᠯᠤᠭᠰᠠᠭᠠᠷ ᠲᠣᠪ ᠳᠤᠭᠤᠢ ᠲᠣᠮᠪᠣᠢᠵᠤ ᠰᠠᠭᠤᠨᠠ᠃ ᠰᠣᠭᠲᠣᠭᠤ ᠬᠥᠮᠦᠨ ᠢ᠋ ᠠᠷᠢᠬᠢᠨ ᠠ᠋ᠴᠠ ᠨᠢ ᠲᠠᠢᠯᠵᠤ᠂ ᠦᠬᠦᠭᠰᠡᠨ ᠬᠥᠮᠦᠨ ᠦ᠌ ᠠᠨᠢᠰᠬᠠ ᠶ᠋ᠢ ᠨᠡᠭᠡᠭᠡᠯᠭᠡᠴᠢᠭᠡᠮᠡᠷ ᠬᠤᠷᠴᠠ ᠬᠣᠩᠰᠢᠶᠠᠷ ᠲᠠᠢ ᠬᠡᠯᠡᠮᠡᠭᠡᠢ ᠨᠠᠰᠤᠲᠠᠨ ᠤ᠋ ᠳᠣᠲᠣᠷᠠ ᠢᠩᠭᠢᠵᠦ ᠪᠠᠴᠢᠮᠳᠠᠵᠤ᠄ 《ᠠᠯᠳᠠᠨᠸᠴᠢᠷ ᠠ᠋! ᠮᠢᠨᠦ ᠮᠠᠭᠤ ᠠᠴᠢ ᠬᠦᠦ ᠠ᠋! ᠨᠠᠭᠠᠰᠢ ᠪᠠᠨ ᠡᠮᠡᠭᠡ ᠳ᠋ᠡᠭᠡᠨ ᠨᠢᠭᠡ ᠢᠷᠡᠵᠦ ᠦᠨᠦᠰᠦᠭᠦᠯᠦᠭᠡᠴᠢ! 》 ᠭᠡᠵᠦ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠬᠠᠰᠬᠢᠷᠴᠢᠬᠠᠮᠠᠷᠬᠠᠨ ᠰᠠᠨᠠᠭᠳᠠᠪᠠᠴᠤ ᠪᠣᠯᠳᠠᠭ ᠦᠭᠡᠢ ᠤᠴᠢᠷ ᠵᠣᠪᠠᠨᠢᠭᠰᠠᠨ ᠢ᠋ ᠠᠳᠠ ᠥᠭᠦᠯᠡᠵᠦ ᠡᠰᠡ ᠲᠠᠢᠯᠤᠨᠠ᠃
— ᠦ᠂ ᠬᠥᠭᠡᠷᠦᠬᠦᠢ! ᠲᠠᠯᠢᠢᠭᠴᠢ ᠡᠪᠦᠭᠡᠨ ᠮᠢᠨᠢ ᠪᠠᠢᠭᠰᠠᠨ ᠪᠣᠯ ᠳᠠ! ᠡᠨᠡ ᠡᠨᠡ ᠶ᠋ᠢ ᠬᠠᠷᠠᠭᠠᠳ᠁ ᠪᠠᠭᠠ ᠵᠠᠰᠠᠭ ᠤ᠋ᠨ᠁ ᠭᠡᠳ ᠮᠥᠨ ᠨᠢᠯᠪᠤᠰᠤ ᠪᠠᠨ ᠵᠦᠯᠭᠦᠵᠦ ᠡᠪᠦᠭᠡᠨ ᠦ᠌ ᠪᠡᠨ ᠬᠣᠢᠨᠠ ᠠ᠋ᠴᠠ ᠪᠠᠶᠠᠷᠯᠠᠬᠤ ᠬᠠᠷᠠᠮᠰᠠᠬᠤ ᠶ᠋ᠢᠨ ᠠᠯᠢᠨ ᠳ᠋ᠤ᠌ ᠴᠤ᠌ ᠦᠭᠡᠢ ᠪᠣᠯᠵᠤ ᠮᠡᠭᠰᠢᠬᠦ ᠰᠢᠤᠭᠡᠨ ᠳᠠᠭᠤ ᠲᠠᠯᠪᠢᠪᠠ᠃
— ᠲᠠ ᠶᠠᠭᠠᠬᠢᠴᠢᠬᠠᠭᠠ ᠪᠣᠢ ᠳᠠ ? ᠶᠠᠭᠤᠨ ᠳ᠋ᠠᠭᠠᠨ ᠣᠬᠢᠯᠠᠭᠠ ᠪᠣᠢ ? ᠲᠡᠷᠡ ᠬᠢᠲᠠᠳ ᠤ᠋ᠨ ᠵᠤᠯᠵᠠᠭᠠ ᠪᠠᠷ ᠵᠠᠰᠠᠭ ᠪᠠᠷᠢᠭᠤᠯᠤᠯᠠ ᠭᠡᠵᠦ ᠭᠠᠰᠢᠭᠤᠳᠠᠵᠤ ᠣᠬᠢᠯᠠᠭᠠ ᠤᠤ ᠳᠠ? ᠭᠡᠵᠦ ᠬᠡᠨ ᠨᠢᠭᠡ ᠨᠢ ᠲᠡᠭᠦᠨ ᠢ᠋ ᠵᠣᠷᠢᠭᠤᠳᠠ ᠬᠠᠳᠬᠤᠭᠠ ᠶᠤᠮ ᠰᠢᠭ᠋ ᠶᠣᠪᠣᠷᠤᠭᠠᠳ ᠠᠪᠤᠪᠠ᠃
— ᠠ! ᠁ ᠦᠭᠡᠢ᠂ ᠰᠠᠶᠢ ᠴᠢ ᠶᠠᠭᠤ ᠶᠠᠷᠢᠪᠠ ⁈ ᠭᠡᠵᠦ ᠴᠤᠪᠤᠷᠠᠭᠰᠠᠨ ᠨᠢᠯᠪᠤᠰᠤ ᠪᠠᠨ ᠱᠠᠯᠠᠪ ᠠᠷᠴᠢᠵᠤ ᠤᠬᠢᠯᠠᠭᠰᠠᠨ ᠶᠠᠩᠵᠤ ᠦᠭᠡᠢ《ᠠᠮᠠ ᠪᠠᠨ ᠣᠯᠵᠤ ᠳᠣᠩᠭᠣᠰᠤᠭᠠᠴᠢ 》 ᠭᠡᠰᠡᠨ ᠲᠥᠯᠥᠪ ᠦ᠋ᠨ ᠴᠢᠷᠠᠢ ᠦᠵᠡᠭᠦᠯᠵᠦ᠄
— ᠠ ! ᠲᠡᠢᠮᠦ ᠂ ᠲᠡᠢᠮᠦ ! ᠭᠡᠵᠦ ᠨᠥᠭᠦᠭᠡ ᠬᠥᠮᠦᠨ ᠦ᠌ ᠠᠮᠠ ᠳᠠᠭᠠᠭᠤᠯᠵᠤ ᠬᠡᠯᠡᠪᠡ᠃
ᠴᠣᠭᠪᠠᠭᠠᠲᠤᠷ ᠤ᠋ᠨ ᠬᠤᠪᠢ ᠳ᠋ᠤ᠌ ᠲᠡᠷᠡ ᠪᠠᠭᠠ ᠵᠠᠰᠠᠭ ᠠᠯᠳᠠᠨᠸᠴᠢᠷ ᠪᠣᠯ ᠲᠡᠭᠦᠨ ᠦ᠌ ᠨᠡᠢᠯᠡᠭᠰᠡᠨ ᠡᠮᠡ ᠶ᠋ᠢᠨ ᠬᠢᠨᠢ ᠬᠦᠦ ᠪᠣᠯᠬᠤ ᠶ᠋ᠢ ᠮᠡᠳᠡᠪᠡᠴᠦ᠂ ᠲᠡᠷᠡ ᠰᠠᠮᠠᠭᠤᠨ ᠡᠮᠡ ᠶ᠋ᠢᠨ ᠰᠠᠳᠤᠷ ᠰᠠᠪᠠᠨ ᠳ᠋ᠤ᠌ ᠬᠡᠨ ᠦ᠌ ᠬᠢᠨᠢ ᠰᠢᠭᠡᠰᠦ ᠲᠣᠭᠲᠠᠭᠰᠠᠨ ᠢ᠋ ᠬᠡᠯᠡᠵᠦ ᠮᠡᠳᠡᠬᠦ ᠦᠭᠡᠢ ᠭᠡᠳᠡᠭ ᠰᠡᠵᠢᠭ ᠳᠠᠭᠠᠪᠤᠷᠢ ᠲᠡᠭᠦᠨ ᠦ᠌ ᠪᠣᠳᠣᠯ ᠢ᠋ ᠡᠵᠡᠮᠳᠡᠭᠰᠡᠨ ᠡᠴᠡ ᠪᠠᠭᠠ ᠵᠠᠰᠠᠭ ᠠᠯᠳᠠᠨᠸᠴᠢᠷ ᠥᠨᠥᠳᠥᠷ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠵᠠᠰᠠᠭ ᠤ᠋ᠨ ᠲᠠᠮᠠᠭᠠ ᠵᠠᠯᠭᠠᠮᠵᠢᠯᠠᠵᠤ ᠪᠠᠢᠭᠠ ᠳ᠋ᠤ᠌ ᠳᠡᠮᠡᠢ ᠳᠠᠭᠠ ᠦᠭᠡᠢ ᠠᠵᠢ᠃ ᠬᠡᠳᠦᠢ ᠵᠢᠰᠦ ᠲᠥᠯᠥᠪ᠂ ᠪᠡᠶᠡ ᠭᠠᠯᠪᠢᠷ ᠨᠢ ᠲᠡᠭᠦᠨ ᠲᠡᠢ ᠮᠠᠰᠢᠳᠠ ᠲᠥᠰᠦᠷᠬᠡᠦ᠂ ᠡᠴᠡᠩᠬᠢᠪᠳᠤᠷ ᠥᠨᠳᠥᠷ ᠬᠦᠵᠦᠭᠦᠦ ᠲᠡᠢ ᠪᠡᠶᠡᠷᠬᠡᠭ ᠲᠦᠷᠥᠭᠰᠡᠨ ᠠᠪᠠᠴᠤ ᠬᠡᠦᠬᠡᠳ ᠬᠥᠮᠦᠨ ᠨᠡᠷᠡ ᠵᠢᠭᠠᠵᠤ ᠵᠠᠰᠠᠭ ᠪᠠᠷᠢᠬᠤ ᠭᠡᠭᠴᠢ ᠬᠥᠮᠦᠨ ᠦ᠌ ᠵᠢᠯᠣᠭᠣ ᠳ᠋ᠤ᠌ ᠱᠣᠭᠰᠢᠵᠤ ᠭᠦᠶᠦᠬᠦ ᠶ᠋ᠢᠨ ᠨᠡᠮᠡᠷᠢ᠂ ᠬᠠᠷᠠᠨᠤᠳ ᠮᠢᠩᠭᠠᠨᠪᠤᠤ ᠶ᠋ᠢᠨ ᠤᠳᠤᠮ ᠵᠠᠯᠭᠠᠵᠤ ᠠᠪᠤᠯᠠ ᠴᠤ᠌ ᠭᠡᠰᠡᠨ ᠲᠡᠭᠦᠨ ᠦ᠌ ᠨᠥᠮᠥᠷᠢ ᠳ᠋ᠦ᠍ ᠬᠡᠰᠢᠭ ᠬᠦᠷᠲᠡᠨᠡ ᠭᠡᠳᠡᠭ ᠲᠡᠷᠡ ᠬᠣᠯᠠ ᠲᠡᠭᠷᠢ ᠣᠢᠷᠠ ᠭᠡᠵᠦ ᠰᠠᠨᠠᠨ ᠶᠠᠭᠠᠬᠢᠵᠤ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠤ᠋ ᠡᠷᠬᠡ ᠶ᠋ᠢ ᠡᠵᠡᠮᠳᠡᠬᠦ ᠬᠣᠯᠠ ᠶ᠋ᠢᠨ ᠶᠠᠭᠤᠮᠠ ᠪᠣᠳᠣᠵᠤ ᠰᠠᠭᠤᠪᠠ᠃
ᠷᠠᠰᠢ ᠵᠠᠬᠢᠷᠤᠭᠴᠢ ᠪᠠᠭᠠ ᠬᠠᠲᠤᠨ ᠤ᠋ ᠴᠢᠬᠢᠨ ᠳ᠋ᠦ᠍《ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠪᠥᠬᠡ ᠶ᠋ᠢᠨ ᠲᠡᠷᠢᠭᠦᠨ ᠢ᠋ᠶ᠋ᠡᠨ ᠮᠢᠩᠭᠠᠨ ᠬᠤᠰᠢᠭᠤᠨ ᠤ᠋ ᠠᠪᠤᠷᠭᠤ ᠳ᠋ᠤ᠌ ᠠᠯᠳᠠᠬᠤ ᠨᠢ ᠠ᠋ ! ᠡᠨᠡ ᠲᠡᠮᠤᠷᠳᠦ᠋ᠰᠢ ᠶ᠋ᠢ ᠡᠯᠳᠡᠩᠭᠡ ᠤᠷᠢᠵᠤ ᠢᠷᠡᠭᠰᠡᠨ ᠪᠣᠯᠤᠯᠲᠠᠢ᠃ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠪᠥᠬᠡ ᠶ᠋ᠢᠨ ᠲᠡᠷᠢᠭᠦᠨ ᠢ᠋ᠶ᠋ᠡᠨ ᠬᠠᠷᠢ ᠬᠤᠰᠢᠭᠤᠨ ᠳ᠋ᠤ᠌ ᠠᠯᠳᠠᠵᠤ ᠣᠷᠬᠢᠪᠠᠯ ᠪᠠᠭᠠ ᠬᠠᠲᠤᠨ ᠲᠠᠨ ᠤ᠋ ᠨᠡᠷᠡ ᠨᠢᠭᠤᠷ ᠲᠤ᠌ ᠰᠢᠪᠰᠢᠭ ! 》 ᠭᠡᠵᠦ ᠨᠢᠭᠡ ᠶᠠᠭᠤᠮᠠ ᠶᠠᠩᠰᠢᠪᠠᠯ ᠪᠠᠭᠠ ᠬᠠᠲᠤᠨ ᠳᠤᠷᠠ ᠦᠭᠡᠢᠴᠡᠵᠦ᠄
— ᠲᠠ ᠪᠢᠲᠡᠭᠡᠢ ᠨᠢᠭᠡ ᠴᠢᠬᠢᠨ ᠦ᠌ ᠬᠤᠯᠤᠭᠤ ᠳᠡᠯᠡᠳᠦᠭᠰᠡᠨ ᠶᠠᠭᠤᠮᠠ ᠪᠤᠪᠠᠲᠤᠨᠠᠭᠠᠳ ᠪᠠᠢ ! ᠶᠠᠭᠤᠨ ᠳ᠋ᠠᠭᠠᠨ ᠶᠠᠭᠤᠮᠠ ᠪᠦᠬᠦᠨ ᠳ᠋ᠦ᠍ ᠡᠯᠳᠡᠩᠭᠡ᠂ ᠡᠯᠳᠡᠩᠭᠡ ᠭᠡᠳ ᠪᠠᠢᠨᠠ ? ᠡᠷᠡ ᠶ᠋ᠢᠨ ᠭᠤᠷᠪᠠᠨ ᠨᠠᠭᠠᠳᠤᠮ ᠳ᠋ᠤ᠌ ᠡᠷᠡ ᠲᠤᠷᠪᠢ ᠪᠠᠷ ᠢ᠋ᠶ᠋ᠠᠨ ᠰᠢᠯᠭᠠᠷᠠᠳᠠᠭ ᠨᠢ ᠮᠣᠩᠭᠣᠯ ᠤ᠋ᠨ ᠬᠡᠵᠢᠶᠡ ᠶᠠᠵᠢᠶᠠᠨ ᠤ᠋ ᠤᠳᠤᠮᠰᠢᠯᠲᠤ ᠶᠣᠰᠣ ᠪᠣᠯᠬᠤ ᠡᠴᠡ᠂ ᠶᠠᠮᠠᠷ ᠬᠡᠨ ᠠᠯᠢᠨ ᠤ᠋ ᠬᠤᠪᠢ ᠶ᠋ᠢᠨ ᠦᠰ ᠵᠠᠩᠭᠢᠳᠤᠭᠠ ᠪᠠᠷ ᠰᠢᠢᠳᠪᠦᠷᠢᠯᠡᠭᠳᠡᠳᠡᠭ ᠶᠠᠭᠤᠮᠠ ᠪᠢᠰᠢ! ᠵᠠᠶᠠᠭᠠ ᠨᠢ ᠮᠡᠳᠡᠲᠦᠭᠡᠢ! ᠪᠠᠷᠠᠭᠤᠨ ᠬᠦᠩ ᠰᠠᠢᠨ ᠪᠥᠬᠡ ᠪᠠᠢᠬᠤ ᠦᠭᠡᠢ ᠳ᠋ᠡᠭᠡᠨ ᠪᠥᠬᠡ ᠶ᠋ᠢᠨ ᠲᠦᠷᠦᠭᠦᠦ ᠪᠡᠨ ᠠᠯᠳᠠᠵᠤ ᠣᠷᠬᠢᠪᠠᠯ ᠱᠣᠷᠣ ᠨᠢ ᠲᠡᠷᠡ ! ᠭᠡᠰᠡᠨ ᠳ᠋ᠦ᠍ ᠷᠠᠰᠢ ᠵᠠᠬᠢᠷᠤᠭᠴᠢ ᠪᠠᠰᠠ ᠨᠢᠭᠡ ᠶᠠᠭᠤᠮᠠ ᠬᠡᠯᠡᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠪᠣᠯᠢᠵᠤ ᠬᠤᠯᠮᠠᠢᠭᠰᠠᠭᠠᠷ ᠵᠠᠢᠯᠠᠪᠠ᠃
— ᠪᠠᠭᠠ ᠬᠠᠲᠤᠨ ᠲᠠ ᠰᠠᠨᠠᠭᠠ ᠠᠮᠤᠷ ᠰᠠᠭᠤᠵᠤ ᠯᠠ ᠪᠠᠢ᠃ ᠡᠨᠡ ᠬᠦᠦ ᠮᠤᠨᠳᠠᠭ ᠴᠢᠳᠠᠯ ᠲᠠᠢ᠃ ᠪᠠᠭᠠ ᠠ᠋ᠴᠠ ᠪᠠᠨ ᠢᠨᠵᠠᠭᠠ᠂ ᠲᠤᠭᠤᠯ ᠲᠡᠪᠡᠷᠢᠵᠦ ᠦᠰᠦᠨ ᠡᠳᠦᠷ ᠪᠣᠯᠭᠠᠨ ᠡᠷᠭᠦᠨ ᠨᠣᠴᠣᠯᠳᠤᠭᠰᠠᠭᠠᠷ ᠪᠠᠢᠵᠤ ᠨᠥᠭᠦᠭᠡ ᠲᠤᠭᠤᠯ ᠢ᠋ ᠪᠢᠷᠠᠭᠤᠨ ᠪᠤᠬᠠ ᠪᠣᠯᠲᠠᠯᠠ ᠲᠡᠪᠡᠷᠢᠵᠦ ᠳᠠᠭᠠᠭᠠᠳᠠᠭ ᠤᠨᠠᠭᠠᠨ ᠠ᠋ᠴᠠ ᠪᠠᠨ ᠴᠢᠮᠦᠭᠡᠰᠢᠭᠰᠡᠨ ᠲᠡᠩᠬᠡᠭᠡ ᠲᠡᠢ ᠶᠦᠮ ᠠ᠋᠃ ᠨᠥᠭᠦᠭᠡ ᠰᠣᠷᠲᠣᠭᠣ ᠶᠡᠬᠡᠲᠡᠢ ᠮᠢᠩᠭᠠᠨ ᠬᠤᠰᠢᠭᠤᠨ ᠤ᠋ ᠠᠪᠤᠷᠭᠤ ᠲᠡᠮᠤᠷᠳᠦ᠋ᠰᠢ ᠲᠡᠭᠦᠨ ᠳ᠋ᠦ᠍ ᠶᠠᠭᠤ ᠴᠤ᠌ ᠪᠢᠰᠢ! ᠲᠡᠷᠡ ᠣᠷᠣᠭᠠ ᠵᠡᠷᠯᠢᠭ ᠬᠠᠷᠠ ᠪᠤᠬᠠ ᠶ᠋ᠢ ᠶᠠᠭᠠᠬᠢᠵᠤ ᠨᠤᠮᠣᠬᠠᠳᠬᠠᠭᠰᠠᠨ ᠪᠢᠯᠡ⁈ ᠬᠠᠷᠠᠭᠰᠠᠨ ᠦᠭᠡᠢ ᠤᠤ ᠲᠠ ? ᠭᠡᠵᠦ ᠪᠠᠶᠠᠨ ᠰᠤᠩᠷᠠᠢ ᠪᠠᠭᠠ ᠬᠠᠲᠤᠨ ᠤ᠋ ᠠᠷᠤ ᠠ᠋ᠴᠠ ᠬᠡᠯᠡᠨᠡ᠃
— ᠲᠡᠢᠮᠦ ᠠ᠋! ᠲᠡᠷᠡ ᠬᠠᠷᠠ ᠪᠤᠬᠠ ᠭᠡᠭᠴᠢ ᠤᠬᠠᠭᠠᠨ ᠮᠠᠲᠠᠯ ᠦᠭᠡᠢ ᠠᠳᠤᠭᠤᠰᠤ ᠶ᠋ᠢᠨ ᠠᠮᠢᠲᠠᠨ᠃ ᠡᠨᠡ ᠲᠡᠮᠦᠷᠳᠦ᠋ᠰᠢ ᠭᠡᠭᠴᠢ ᠪᠥᠬᠡ ᠶ᠋ᠢᠨ ᠮᠡᠬᠡ ᠳ᠋ᠦ᠍ ᠴᠠᠭᠠᠷᠠᠭᠰᠠᠨ ᠡᠷᠡ ᠭᠡᠨᠡ ᠪᠢᠯᠡ ! ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠢᠷᠣᠭᠠ ᠬᠠᠯᠢᠭᠤᠨ ᠮᠣᠷᠢ ᠶ᠋ᠢ ᠬᠥᠲᠥᠯᠦᠨᠡ ᠭᠡᠵᠦ ᠨᠠᠭᠠᠳᠤᠮ ᠴᠤᠤᠷᠬᠠᠭᠳᠠᠯᠠ ᠳᠣᠷᠭᠢᠵᠤ ᠪᠠᠢᠭᠰᠠᠨ ᠯᠠ ᠭᠡᠬᠦ ᠶᠦ᠍ᠮ !
— ᠶᠡᠬᠡ ᠰᠠᠨᠠᠭᠰᠠᠨ ᠭᠠᠵᠠᠷ ᠶᠢᠰᠦ ᠬᠣᠨᠣᠭ ᠬᠣᠭᠣᠰᠣᠨ ᠭᠡᠳᠡᠭ ᠦᠭᠡ ᠪᠠᠢᠳᠠᠭ ᠰᠢᠳᠡ᠃ ᠪᠠᠭᠠ ᠬᠠᠲᠤᠨ ᠲᠠ ᠬᠠᠷᠠᠵᠤ ᠯᠠ ᠪᠠᠢ ᠳᠠ!
— ᠲᠠ ᠡᠨᠡ ᠬᠦᠦ ᠶ᠋ᠢ ᠲᠠᠨᠢᠬᠤ ᠤᠤ ?
ᠭᠡᠰᠡᠨ ᠳ᠋ᠦ᠍ ᠲᠡᠭᠦᠨ ᠦ᠌ ᠴᠢᠷᠠᠢ ᠨᠢᠯ ᠬᠢᠨ ᠨᠢᠯᠴᠢᠭᠢᠨᠡᠵᠦ ᠬᠦᠵᠦᠭᠦᠦ ᠤᠷᠤᠭᠤ ᠨᠢ ᠬᠠᠯᠠᠭᠤ ᠠᠰᠠᠪᠠ᠃
ᠪᠥᠬᠡ ᠰᠣᠨᠢᠷᠬᠠᠭᠴᠢᠳ ᠭᠠᠳᠠᠨᠠ ᠠ᠋ᠴᠠ《ᠢᠩᠭᠢ᠂ ᠴᠢᠩᠭᠢ! 》《ᠬᠡᠷᠰᠡᠦᠯᠠ ᠠ᠋᠂ ᠠᠭᠤᠯᠠᠨᠭᠦᠦ! 》 ᠭᠡᠵᠦ ᠬᠠᠰᠬᠢᠷᠤᠯᠳᠤᠬᠤ ᠶ᠋ᠢ ᠰᠣᠨᠣᠰᠬᠤ ᠠᠩᠬᠠᠷᠤᠯ ᠲᠡᠭᠦᠨ ᠳ᠋ᠦ᠍ ᠪᠠᠢᠭᠰᠠᠨ ᠦᠭᠡᠢ᠃ ᠲᠡᠭᠡᠬᠦ ᠳ᠋ᠦ᠍ ᠮᠠᠨᠤᠬᠤᠸᠠᠷ ᠤ᠋ᠨ 《ᠵᠢᠰ ᠵᠢᠰ》 ᠬᠠᠰᠬᠢᠷᠬᠤ ᠳᠠᠭᠤᠨ ᠲᠡᠭᠦᠨ ᠦ᠌ ᠴᠢᠬᠢᠨ ᠳ᠋ᠦ᠍ ᠮᠥᠩᠭᠥᠨ ᠬᠣᠩᠬᠣ ᠰᠢᠭ᠋ ᠵᠢᠩᠭᠢᠨᠡᠨ ᠰᠣᠨᠣᠰᠳᠠᠬᠤ ᠳ᠋ᠤ᠌ ᠭᠡᠨᠡᠠᠳᠳᠡ ᠶᠠᠭᠤ ᠪᠣᠳᠣᠭᠳᠠᠵᠤ ᠬᠠᠮᠢᠭᠠ ᠠ᠋ᠴᠠ ᠢᠳᠡ ᠲᠠᠮᠢᠷ ᠡᠭᠦᠰᠦᠭᠰᠡᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠪᠦᠬᠦ ᠪᠡᠶᠡ ᠳ᠋ᠦ᠍ᠨᠢ ᠪᠠᠷᠠᠭᠳᠠᠰᠢ ᠦᠭᠡᠢ ᠬᠦᠴᠦ ᠴᠢᠳᠠᠯ ᠡᠷᠴᠢᠯᠡᠭᠳᠡᠭᠰᠡᠨ ᠮᠡᠲᠦ ᠰᠠᠨᠠᠭᠳᠠᠪᠠ᠃ ᠠᠭᠤᠯᠠᠨᠭᠦᠦ ᠳᠣᠲᠣᠷᠠ ᠪᠠᠨ 《ᠰᠠᠨᠠᠭᠠ ᠠᠮᠤᠷ ᠪᠠᠢ᠂ ᠪᠢ ᠡᠨᠡ ᠡᠷᠡ ᠶ᠋ᠢ ᠮᠥᠨ ᠢᠩᠭᠢᠭᠡᠳ ᠳᠠᠷᠤᠴᠢᠬᠠᠶᠠ》 ᠭᠡᠵᠦ ᠪᠣᠳᠣᠨ ᠡᠪᠴᠢᠭᠦᠨ ᠳᠣᠣᠷᠠ ᠨᠢ ᠲᠣᠩᠭᠣᠷᠠᠬᠤ ᠪᠠᠷ ᠪᠦᠭᠴᠥᠢᠭᠰᠡᠨ ᠳᠡᠮᠤᠷᠳᠦ᠋ᠰᠢ ᠶ᠋ᠢ ᠳᠣᠷᠣᠭᠰᠢ ᠪᠠᠨ ᠭᠠᠵᠠᠷ ᠨᠠᠭᠠᠯᠳᠤᠲᠠᠯᠠ ᠳᠠᠷᠤᠬᠤ ᠭᠡᠲᠡᠯᠠ ᠬᠠᠰᠢᠷ ᠪᠥᠬᠡ ᠲᠡᠮᠤᠷᠳᠦ᠋ᠰᠢ ᠬᠡᠳ᠋ᠦ᠋ᠢᠨ ᠠᠵᠢᠭ ᠮᠡᠳᠡᠵᠦ ᠪᠠᠷᠢᠴᠠ ᠪᠠᠨ ᠠᠯᠳᠠᠷᠠᠭᠠᠨ ᠪᠤᠯᠲᠠᠰᠬᠢᠨ ᠵᠠᠢᠯᠠᠪᠠ᠃
ᠬᠥᠮᠦᠰ ᠦ᠋ᠨ ᠴᠡᠭᠡᠵᠢᠨ ᠳ᠋ᠦ᠍ ᠳᠡᠭᠦᠵᠢᠯᠡᠭᠳᠡᠭᠰᠡᠨ ᠴᠢᠯᠠᠭᠤ ᠠᠯᠳᠠᠷᠠᠨ ᠤᠨᠠᠵᠤ᠂ ᠴᠡᠭᠡᠵᠢ ᠪᠡᠨ ᠣᠩᠭᠣᠢᠲᠠᠯᠠ ᠠᠭᠤᠵᠢᠷᠠᠨ ᠠᠮᠢᠰᠬᠤᠨᠠ᠃
ᠵᠢᠷᠣᠭᠠ ᠬᠠᠯᠢᠭᠤᠨ ᠮᠣᠷᠢ ᠬᠥᠲᠥᠯᠦᠨᠡ ᠭᠡᠵᠦ ᠡᠷᠲᠡ ᠡᠴᠡ ᠪᠠᠷᠳᠠᠮ ᠦᠭᠡ ᠰᠠᠴᠤᠵᠤ ᠶᠠᠪᠤᠭᠰᠠᠨ ᠲᠡᠮᠦᠷᠳᠦ᠋ᠰᠢ ᠣᠳᠣ ᠬᠠᠷᠢᠨ ᠰᠠᠨᠳᠤᠷᠴᠤ 《ᠰᠢᠳᠢ ᠪᠡᠨ ᠦᠵᠡᠭᠦᠯᠨᠡ ᠭᠡᠳ ᠰᠢᠪᠰᠢᠭ ᠢ᠋ᠶ᠋ᠡᠨ ᠦᠵᠡᠭᠦᠯᠴᠢᠬᠡᠪᠡᠯ ᠬᠠᠷᠢᠨ ᠮᠠᠭᠤᠬᠠᠢ ᠪᠣᠯᠤᠨᠠ ᠳᠠ》 ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠮᠠᠩᠨᠠᠢ ᠳ᠋ᠤᠨᠢ ᠬᠦᠢᠲᠡᠨ ᠬᠥᠯᠥᠰᠥ ᠴᠢᠬᠠᠷᠠᠪᠠ᠃ ᠳᠤᠮᠳᠠᠲᠤ ᠬᠦᠩ ᠦ᠋ᠨ ᠠᠪᠤᠷᠭᠤ ᠵᠠᠨᠠ ᠡᠨᠡ ᠴᠢᠯᠳᠡᠩ ᠬᠦᠦ ᠳ᠋ᠦ᠍ ᠬᠤᠰᠤᠮ ᠦᠭᠡᠢ ᠬᠤᠰᠤᠭᠤᠯᠳᠠᠭ ᠨᠢ ᠴᠠᠭᠠᠨᠠ ᠪᠠᠨ ᠤᠴᠢᠷ ᠲᠠᠢ ᠪᠠᠢᠵᠢ ᠳᠠ ! ᠠᠮᠠᠨ ᠤ᠋ ᠬᠢᠨᠢ ᠰᠢᠷᠠ ᠨᠢ ᠬᠠᠲᠠᠭᠠᠳᠤᠢ ᠮᠠᠭᠤ ᠵᠣᠯᠳᠣᠷᠣᠢ ᠭᠡᠵᠦ ᠪᠣᠳᠣᠭᠰᠠᠨ ᠴᠢᠨᠢ ᠶᠣᠰᠣᠲᠠᠢ ᠯᠠ ᠪᠠᠰᠤᠭᠰᠠᠨ ᠡᠪᠡᠰᠦ ᠪᠦᠭᠰᠡ ᠬᠠᠳᠬᠤᠪᠠ ᠭᠡᠭᠴᠢ ᠪᠣᠯᠵᠤ ᠠᠩᠬᠠ ᠪᠠᠷᠢᠴᠠ ᠪᠤᠯᠢᠶᠠᠬᠤ ᠳ᠋ᠤ᠌ ᠭᠠᠷ ᠢ᠋ᠶ᠋ᠠᠨ ᠶᠠᠩᠭᠢᠨᠠᠲᠠᠯᠠ ᠴᠣᠬᠢᠭᠤᠯᠵᠤ᠂ ᠤᠳᠬᠤᠵᠤ ᠪᠠᠢᠭᠠᠳ ᠭᠤᠳᠤᠷᠠᠭᠤᠯᠤᠨ ᠬᠥᠨᠲᠥᠷᠦᠶᠡ ᠭᠡᠰᠡᠨ ᠮᠢᠨᠢ ᠡᠰᠡ ᠯᠡ ᠬᠢᠭᠳᠡᠴᠢᠬᠡᠬᠦ ᠰᠢᠬᠠᠯᠠ ᠁ ᠬᠠᠰᠢᠷ ᠰᠠᠭᠤᠭᠠᠳᠤᠢ ᠬᠡᠤᠬᠡᠳᠯᠢᠭ ᠪᠥᠬᠡ ᠬᠣᠢᠨᠠ ᠳᠠ᠂ ᠮᠡᠬᠡ ᠲᠡᠩᠬᠡᠭᠡ ᠲᠡᠩᠴᠡᠭᠰᠡᠨ ᠡᠷᠡ ᠢᠩᠭᠢᠵᠦ ᠨᠠᠳᠠ ᠲᠠᠭᠠᠷᠠᠭᠰᠠᠨ ᠪᠣᠯ ᠨᠠᠮᠠᠶ᠋ᠢ ᠬᠡᠳᠤᠢᠨ ᠰᠢᠷᠤᠢᠳᠤᠭᠤᠯᠴᠢᠬᠠᠭᠰᠠᠨ ᠪᠠᠢᠭᠠ ᠁ ᠠ ᠳᠠ᠂ ᠨᠠᠰᠤ ᠪᠠᠭᠠ ᠴᠤ᠌ ᠭᠡᠰᠡᠨ ᠦᠬᠡᠷ ᠴᠢᠳᠠᠯ ᠲᠠᠢ᠂ ᠮᠤᠨᠳᠠᠭ ᠡᠷᠡ ᠶ᠋ᠢᠨ ᠨᠢᠭᠡ ᠶᠦ᠍ᠮ ᠠ᠋! ᠬᠣᠶᠠᠷ ᠬᠥᠯ ᠨᠢ ᠵᠠᠭᠠᠨ ᠤ᠋ ᠬᠥᠯ ᠯᠡ ᠭᠡᠵᠦ ᠮᠡᠳᠡ ! ᠡᠭᠦᠨ ᠲᠡᠢ ᠢᠩᠭᠢᠵᠦ ᠪᠠᠷᠢᠴᠠ ᠪᠠᠨ ᠥᠭᠴᠦ ᠬᠥᠰᠢᠭᠦᠨ ᠣᠷᠣᠭᠠᠳ ᠪᠣᠯᠬᠤ ᠦᠭᠡᠢ ᠶᠦ᠍ᠮ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠠᠳ ᠵᠣᠳᠣᠭ ᠪᠠᠷᠢᠯᠴᠠᠬᠤ ᠭᠡᠵᠦ ᠬᠠᠭᠤᠷᠮᠠᠭ ᠨᠥᠷᠢᠯᠲᠡ ᠦᠵᠡᠭᠦᠯᠦᠨ ᠭᠠᠷ ᠤ᠋ᠨ ᠦᠵᠦᠭᠦᠷ ᠢ᠋ ᠨᠢ ᠶᠠᠯᠢᠮ ᠦᠭᠡᠢ ᠰᠢᠭᠦᠷᠡᠨ ᠭᠤᠲᠤᠯ ᠤ᠋ᠨ ᠬᠢᠨᠢ ᠵᠤᠯᠤᠭ ᠳᠠᠭᠠᠭᠤᠯᠤᠨ ᠳᠡᠩᠳᠡᠭᠦᠯᠦᠨ ᠬᠠᠪᠰᠤᠷᠪᠠ᠃ ᠰᠦᠷᠡᠬᠡᠢ ᠬᠦᠴᠦᠲᠡᠢ ᠴᠣᠬᠢᠭᠰᠠᠨ ᠠ᠋ᠴᠠ ᠠᠭᠤᠯᠠᠨᠭᠦᠦ ᠶ᠋ᠢᠨ ᠪᠤᠷᠤᠭᠤ ᠲᠠᠯᠠ ᠶ᠋ᠢᠨ ᠪᠤᠯᠢᠭᠠᠷᠢ ᠭᠤᠲᠤᠯ ᠤ᠋ᠨ ᠬᠢᠨᠢ ᠤᠯᠠ ᠨᠢ ᠬᠠᠭᠵᠠᠷᠠᠭᠰᠠᠨ ᠳ᠋ᠤ᠌ ᠲᠡᠮᠤᠷᠳᠦ᠋ᠰᠢ ᠬᠦᠴᠦᠨ ᠳ᠋ᠡᠭᠡᠨ ᠲᠠᠢᠯᠳᠠᠨ ᠲᠠᠯᠲᠢᠷᠠᠨᠠ᠃ ᠡᠨᠡ ᠳᠡᠯᠢᠮ ᠳ᠋ᠦ᠍ ᠠᠭᠤᠯᠠᠨᠭᠦᠦ ᠲᠡᠮᠦᠷᠳᠦ᠋ᠰᠢ ᠶ᠋ᠢᠨ ᠴᠠᠷᠪᠠᠭᠤ ᠠ᠋ᠴᠠ ᠴᠢᠩᠭᠠ ᠵᠠᠭᠤᠷᠠᠨ ᠪᠡᠶᠡ ᠤᠷᠤᠭᠤ ᠪᠠᠨ ᠲᠠᠲᠠᠰᠬᠢᠨ ᠰᠤᠭᠰᠤᠷᠴᠤ ᠬᠠᠷᠠ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠴᠣᠴᠢᠮᠠᠭ ᠲᠦᠯᠬᠢᠭᠰᠡᠨ ᠳᠤ ᠠᠪᠤᠷᠭᠤ ᠪᠥᠬᠡ ᠲᠡᠮᠤᠷᠳᠦ᠋ᠰᠢ ᠠᠷᠤᠨᠰᠢ ᠪᠠᠨ ᠬᠡᠯᠲᠦᠷᠢᠵᠦ ᠥᠰᠥᠭᠡᠢ ᠳᠡᠭᠡᠷᠡ ᠪᠡᠨ ᠪᠡᠶᠡ ᠪᠡᠨ ᠲᠣᠭᠲᠠᠭᠠᠵᠤ ᠴᠢᠳᠠᠯ ᠦᠭᠡᠢ ᠬᠡᠢᠳᠡᠵᠦ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠰᠠᠷᠪᠠᠭᠠᠨᠠᠭᠤᠯᠤᠨ ᠭᠠᠵᠠᠷ ᠲᠤᠯᠵᠤ ᠠᠯᠴᠠᠢᠨ ᠰᠠᠭᠤᠪᠠ᠃
ᠪᠥᠬᠡ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠤ᠌ ᠨᠦᠷ ᠬᠢᠨ ᠱᠤᠤᠭᠢᠯᠳᠤᠵᠤ᠂ 《ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠢᠷᠣᠭᠠ ᠬᠠᠯᠢᠭᠤᠨ ᠮᠣᠷᠢ ᠶ᠋ᠢ ᠬᠥᠲᠥᠯᠦᠨᠡ ᠭᠡᠰᠡᠨ ᠪᠠᠷᠳᠠᠮ ᠠᠮᠠᠲᠤ ᠶᠣᠰᠣᠲᠠᠢ ᠬᠣᠬᠢ ᠨᠢ ᠲᠡᠷᠡ》᠂《ᠭᠦᠰᠢ᠂ ᠭᠠᠨᠵᠤᠭᠠᠯᠠᠵᠤ ᠢᠷᠡᠭᠰᠡᠨ ᠬᠢᠯᠭᠠᠰᠤᠨ ᠨᠣᠭᠲᠣ ᠪᠠᠷ ᠪᠢᠲᠡᠭᠡᠢ ᠯᠡ ᠬᠥ᠋ᠵᠦᠭᠦᠦ ᠪᠡᠨ ᠪᠣᠭᠣᠴᠢᠬᠠ ᠳᠠ! ᠬᠦᠵᠦᠭᠦᠨ ᠦ᠌ ᠨᠢᠮᠭᠡᠨ ᠠᠷᠠᠰᠤ ᠶ᠋ᠢ ᠴᠢᠨᠢ ᠬᠢᠯᠭᠠᠰᠤ ᠬᠠᠳᠬᠤᠬᠤ ᠪᠣᠢ!》 ᠭᠡᠵᠦ ᠱᠣᠣᠯᠠᠨ 《ᠢᠩᠭᠢᠵᠦ ᠯᠡ ᠪᠠᠷᠳᠠᠮ ᠠᠮᠠ ᠶ᠋ᠢ ᠴᠢᠨᠢ ᠬᠠᠭᠠᠬᠤ ᠳ᠋ᠠᠭᠠᠨ ᠲᠠᠭᠠᠷᠠᠨᠠ 》 ᠭᠡᠯᠴᠡᠪᠡ᠃
ᠴᠠᠭᠠᠳᠤ ᠰᠢᠷᠤᠢᠳᠤᠭᠰᠠᠨ ᠲᠡᠮᠤᠷᠳᠦ᠋ᠰᠢ ᠶᠠᠭ ᠯᠠ ᠳᠤᠨᠳᠠᠭᠤᠷ ᠠᠭᠤᠯᠤᠭᠰᠠᠨ ᠭᠦᠵᠡᠭᠡ ᠲᠡᠢ ᠰᠢᠷᠠ ᠲᠣᠰᠣ ᠰᠢᠭ᠋ ᠱᠠᠯᠴᠢᠵᠤ ᠬᠣᠷᠣᠰᠤᠯ ᠳ᠋ᠠᠭᠠᠨ 《ᠮᠠᠭᠤ ᠵᠣᠯᠳᠣᠷᠣᠢ ᠶ᠋ᠢ ᠰᠢᠷᠭᠤᠵᠤ ᠣᠷᠣᠭᠠᠳ ᠭᠠᠨᠵᠤᠭᠠᠯᠠᠳᠠᠭ ᠪᠠᠢᠵᠠᠢ! ᠠ᠂ ᠪᠠᠢᠵᠠ ᠮᠠᠭᠤ ᠳᠠᠮᠰᠢᠭ ᠢ᠋ ᠁ 》 ᠭᠡᠵᠦ ᠪᠣᠰᠬᠤ ᠳ᠋ᠤᠨᠢ ᠨᠢᠭᠡ ᠲᠣᠮᠣ ᠭᠠᠷ ᠲᠡᠭᠦᠨ ᠢ᠋ ᠲᠡᠳᠬᠦᠨ ᠡᠷᠭᠦᠵᠦ ᠵᠣᠳᠣᠭ ᠤ᠋ᠨ ᠬᠢᠨᠢ ᠲᠣᠭᠣᠰᠣ ᠶ᠋ᠢ ᠬᠥᠪᠢᠯᠭᠢᠯᠡᠨ᠄
— ᠪᠥᠬᠡ ᠬᠥᠮᠦᠨ ᠪᠦᠳᠦᠭᠦᠨ ᠡᠪᠡᠰᠦᠨ ᠳ᠋ᠦ᠍ ᠪᠦᠳᠦᠷᠢᠨᠡ ᠭᠡᠳᠡᠭ᠃ ᠴᠢ ᠠᠩᠬᠠ ᠤᠳᠬᠤᠵᠤ ᠠᠬᠢᠭᠠᠳ ᠲᠣᠩᠭᠣᠷᠠᠬᠤ ᠳ᠋ᠠᠭᠠᠨ ᠪᠤᠰᠢᠭᠤᠬᠠᠨ ᠬᠥᠨᠲᠥᠷᠦᠭᠰᠡᠨ ᠪᠣᠯ ᠬᠠᠷᠢᠨ ᠲᠠᠭᠠᠷᠠᠬᠤ ᠪᠠᠢᠭᠰᠠᠨ ᠠ᠋ ᠭᠡᠵᠦ ᠵᠠᠨᠠ ᠬᠡᠯᠡᠭᠰᠡᠨ ᠨᠢ 《ᠴᠢᠮᠠ ᠳ᠋ᠤ᠌ ᠪᠠᠰᠠ ᠰᠢᠷᠤᠢᠳᠤᠳᠠᠭ ᠴᠠᠭ ᠪᠠᠢᠵᠢ ᠤᠣ ? 》 ᠭᠡᠵᠦ ᠲᠡᠭᠦᠨ ᠢ᠋ ᠲᠠᠪᠠᠯᠠᠭᠰᠠᠨ ᠰᠢᠭ᠋ ᠲᠠᠮᠤᠷᠳᠦ᠋ᠰᠢ ᠳ᠋ᠦ᠍ ᠬᠠᠷᠠ ᠬᠣᠷᠣᠲᠠᠢ ᠰᠠᠨᠠᠭᠳᠠᠵᠤ ᠳᠣᠲᠣᠷᠠ ᠨᠢ ᠠᠲᠠᠭᠠ ᠶ᠋ᠢᠨ ᠮᠠᠨᠠᠨ ᠲᠠᠲᠠᠪᠠ᠃
ᠲᠡᠮᠤᠷᠳᠦ᠋ᠰᠢ᠂ ᠠᠪᠤᠷᠭᠤ ᠵᠠᠨᠠ ᠶ᠋ᠢᠨ ᠥᠭᠡᠳᠡ ᠡᠴᠡ ᠶᠠᠭᠤ ᠴᠤ᠌ ᠬᠡᠯᠡᠭᠰᠡᠨ ᠦᠭᠡᠢ ᠳ᠋ᠦ᠍᠂ ᠵᠠᠨᠠ ᠬᠠᠷᠢᠨ ᠳᠣᠲᠣᠷᠠ ᠪᠠᠨ 《ᠴᠢ ᠪᠢᠳᠡ ᠬᠣᠶᠠᠷ ᠠᠮᠠ ᠪᠠᠷᠳᠠᠮ ᠠᠯᠠ ᠱᠠᠯᠳᠠᠩ ᠪᠣᠯᠵᠤ ᠲᠡᠮᠡᠭᠡᠨ ᠳ᠋ᠦ᠍ ᠠᠴᠢᠭᠰᠠᠨ ᠴᠤ᠌ ᠳᠠᠩ ᠰᠠᠴᠠᠭᠤ᠂ ᠢᠮᠠᠭᠠᠨ ᠳ᠋ᠤ᠌ ᠠᠴᠢᠭᠰᠠᠨ ᠴᠤ᠌ ᠶᠠᠭ ᠰᠠᠴᠠᠭᠤ ᠪᠣᠯᠵᠠᠢ ! ᠨᠢᠭᠡ ᠮᠠᠭᠤ ᠬᠡᠦᠬᠡᠳ ᠲᠦ᠍ ᠬᠠᠶᠠᠭᠳᠠᠬᠤ ᠳ᠋ᠠᠭᠠᠨ ᠁ ᠡᠮᠦᠨᠡ ᠭᠠᠷᠤᠭᠰᠠᠨ ᠴᠢᠬᠢ ᠡᠴᠡ ᠬᠣᠢᠨᠠ ᠭᠠᠷᠤᠭᠰᠠᠨ ᠡᠪᠡᠷ ᠭᠡᠭᠴᠢ ᠡᠨᠡ ᠳ᠋ᠨ !》 ᠭᠡᠵᠦ ᠵᠠᠨᠠ ᠲᠡᠮᠦᠷᠳᠦ᠋ᠰᠢ ᠶ᠋ᠢᠨ ᠮᠥᠷᠥ ᠶ᠋ᠢ ᠬᠦᠴᠦᠲᠡᠢ ᠠᠯᠠᠭᠠᠳᠠᠭᠠᠳ ᠴᠠᠭᠠᠰᠢ ᠡᠷᠭᠢᠵᠦ ᠶᠠᠪᠤᠪᠠ᠃
ᠨᠠᠭᠠᠳᠤᠮᠴᠢ ᠣᠯᠠᠨ ᠤ᠋ ᠬᠠᠢᠷᠠ ᠬᠦᠨᠳᠦᠲᠡᠢ ᠨᠢᠳᠦᠨ ᠦ᠌ ᠬᠠᠯᠠᠭᠤᠨ ᠴᠣᠭ ᠠᠭᠤᠯᠠᠡᠭᠦᠦ ᠶ᠋ᠢ ᠪᠦᠪᠡᠢᠯᠡᠨ ᠰᠢᠷᠲᠡᠵᠦ ᠪᠠᠢᠯᠠ᠃
ᠲᠡᠨᠳᠡ ᠪᠠᠭᠠ ᠵᠠᠰᠠᠭ ᠠᠯᠳᠠᠨᠸᠴᠢᠷ ᠲᠦᠮᠡᠨ ᠣᠯᠠᠨ ᠤ᠋ ᠱᠠᠭᠰᠢᠯ ᠮᠠᠭᠲᠠᠭᠠᠯ ᠳᠤᠮᠳᠠ ᠵᠢᠷᠣᠭᠠ ᠬᠠᠯᠢᠭᠤᠨ ᠮᠣᠷᠢᠨ ᠤ᠋ ᠴᠤᠯᠪᠤᠭᠤᠷ ᠢ᠋ ᠪᠥᠬᠡ ᠶ᠋ᠢᠨ ᠲᠡᠷᠢᠭᠦᠨ ᠠᠭᠤᠯᠠᠨᠭᠦᠦ ᠳ᠋ᠦ᠍ ᠪᠠᠷᠢᠭᠤᠯᠤᠭᠰᠠᠨ ᠳ᠋ᠤ᠌᠂ ᠨᠠᠢᠷ ᠤ᠋ᠨ ᠮᠠᠭᠲᠠᠭᠠᠯᠴᠢ ᠠ᠋ᠴᠠ ᠠᠭᠤᠯᠠᠨᠭᠦᠦ ᠪᠣᠯᠤᠨ ᠵᠢᠷᠣᠭᠠ ᠬᠠᠯᠢᠭᠤᠨ ᠮᠣᠷᠢᠨ ᠤ᠋ ᠮᠠᠩᠨᠠᠢ ᠳ᠋ᠤ᠌ ᠰᠢᠷᠠ ᠲᠣᠰᠣ ᠳᠦᠷᠭᠢᠨ ᠮᠢᠯᠢᠶᠠᠵᠤ᠂ ᠠᠭᠤᠯᠡᠨᠭᠦᠦ ᠶ᠋ᠢ ᠦᠨᠦᠰᠦᠭᠡᠳ᠄
᠁
ᠨᠠᠷᠭᠢᠶᠠᠨᠲᠤ ᠶᠡᠬᠡ ᠨᠠᠭᠠᠳᠤᠮ ᠳ᠋ᠤ᠌
ᠨᠠᠢᠷᠰᠠᠭ ᠶᠣᠰᠣ ᠪᠠᠷ ᠪᠠᠷᠢᠯᠳᠤᠳᠠᠭ
ᠪᠠᠷᠰ ᠤ᠋ᠨ ᠶᠡᠬᠡ ᠬᠦᠴᠦ ᠪᠡᠷ
ᠪᠠᠷᠠᠭᠤᠨ ᠬᠦᠩ ᠳ᠋ᠡᠭᠡᠨ ᠲᠡᠷᠢᠭᠦᠯᠡᠵᠦ
ᠠᠷᠰᠯᠠᠨ ᠤ᠋ ᠶᠡᠬᠡ ᠰᠦᠷ ᠢ᠋ᠶ᠋ᠡᠷ
ᠠᠪᠤᠷᠭᠤ ᠴᠣᠯᠠ ᠪᠠᠨ ᠬᠠᠮᠠᠭᠠᠯᠠᠭᠰᠠᠨ ᠢ᠋
ᠠᠷᠠᠳ ᠣᠯᠠᠨ ᠳ᠋ᠠᠭᠠᠨ ᠳᠠᠭᠤᠷᠢᠰᠤᠭᠤᠯᠵᠤ
ᠠᠰᠢᠳᠠ ᠤᠯᠠᠮᠵᠢᠯᠠᠪᠠᠯ ᠵᠦᠢᠲᠡᠢ
ᠠᠷᠪᠠᠨ ᠬᠠᠳᠠᠭ ᠤ᠋ᠨ ᠵᠠᠩᠭᠢᠯᠠᠭᠠᠨ ᠢ᠋
ᠠᠪᠤᠷᠭᠤ ᠭᠠᠷᠭᠠᠨ ᠰᠢᠭᠯᠠᠵᠤ
ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠳᠤᠷᠳᠤᠮ ᠢ᠋
ᠲᠠᠩᠨᠠᠢ ᠭᠠᠷᠭᠠᠨ ᠵᠠᠩᠭᠢᠶᠠᠯᠠᠵᠤ
ᠭᠤᠨᠠᠨ ᠠᠷᠠᠰᠤᠨ ᠰᠤᠷ ᠢ᠋
ᠭᠣᠣᠯ ᠴᠢᠮᠥᠭᠡᠯᠡᠨ ᠪᠦᠰᠡᠯᠡᠵᠦ
ᠲᠤᠳᠬᠣᠤ ᠥᠷᠭᠡᠨ ᠭᠤᠶᠠᠪᠴᠢ ᠨᠢ
ᠳᠣᠪᠤᠷᠤᠲᠤ ᠵᠣᠳᠣᠭ ᠲᠠᠭᠠᠨ ᠵᠣᠬᠢᠷᠠᠵᠠᠢ
ᠪᠤᠬᠠᠨ ᠤ᠋ ᠪᠥᠬᠡ ᠰᠢᠷᠢ ᠪᠡᠷ
ᠪᠤᠯᠢᠭᠠᠷᠢ ᠭᠤᠲᠤᠯ ᠬᠢᠵᠦ
ᠥᠯᠮᠡᠢ ᠪᠣᠯᠤᠨ ᠥᠰᠥᠭᠡᠢ ᠶ᠋ᠢ ᠨᠢ
ᠦᠬᠡᠷ ᠦ᠋ᠨ ᠰᠤᠷ ᠢ᠋ᠶ᠋ᠠᠷ ᠨᠣᠭᠲᠣᠯᠠᠵᠠᠢ
ᠵᠣᠳᠣᠭ ᠱᠠᠮᠪᠠ ᠶ᠋ᠢᠨ ᠴᠢᠮᠡᠭ ᠢ᠋ᠶ᠋ᠡᠷ
ᠵᠢᠪᠬᠤᠯᠠᠩᠲᠤ ᠰᠦᠷ ᠪᠠᠳᠠᠷᠠᠭᠤᠯᠤᠭᠰᠠᠨ
ᠠᠷᠰᠯᠠᠨ ᠬᠦᠴᠦᠲᠦ ᠲᠤᠷᠪᠢ ᠴᠢᠨᠢ
ᠠᠯᠳᠠᠷ ᠨᠡᠷᠡ ᠶ᠋ᠢ ᠴᠢᠨᠢ ᠱᠤᠭᠤᠨᠠᠮ
ᠭᠠᠷᠤᠳᠢ ᠬᠦᠴᠦᠲᠦ ᠭᠠᠯᠪᠢᠷ ᠴᠢᠨᠢ
ᠭᠠᠪᠢᠶᠠ ᠮᠢᠨᠳᠠᠭ ᠢ᠋ ᠴᠢᠨᠢ ᠮᠠᠨᠳᠤᠭᠤᠯᠤᠠᠮ
ᠵᠠᠭᠠᠨ ᠬᠦᠴᠦᠲᠦ ᠵᠣᠯᠪᠣᠭᠠ ᠴᠢᠨᠢ
ᠵᠠᠯᠢ ᠬᠡᠢ ᠮᠣᠷᠢ ᠶ᠋ᠢ ᠴᠢᠨᠢ ᠰᠡᠷᠭᠦᠭᠡᠨᠡᠮ
ᠵᠠ ᠣᠸᠮ ᠰᠠᠢᠨ ᠠᠮᠤᠭᠤᠯᠠᠩᠳᠠᠨ ᠪᠣᠯᠲᠤᠭᠠᠢ!
ᠬᠠᠨ ᠮᠤᠨᠠ ᠶ᠋ᠢᠨ ᠰᠢᠳᠢ ᠢᠪᠡᠭᠡᠭ
ᠬᠠᠪᠤᠲᠤ ᠬᠠᠰᠠᠷ ᠤ᠋ᠨ ᠢᠳᠡ ᠣᠷᠣᠰᠢᠭ ᠁ ᠭᠡᠵᠦ ᠡᠩᠬᠦᠷᠡᠢᠯᠡᠨ ᠢᠷᠦᠭᠡᠭᠰᠡᠨ ᠳ᠋ᠦ᠍ ᠠᠭᠤᠯᠠᠨᠭᠦᠦ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠪᠠᠶᠠᠰᠤᠯ ᠤ᠋ᠨ ᠣᠴᠢ ᠭᠢᠯᠠᠯᠵᠠᠨᠠ᠃
ᠳᠡᠭᠡᠷᠡ ᠨᠠᠢ᠍ᠮᠠ ᠳ᠋ᠤ᠌ ᠰᠢᠯᠭᠠᠷᠠᠭᠰᠠᠨ ᠠᠯᠲᠠ ᠮᠥᠩᠭᠥᠨ ᠲᠣᠪᠣᠷᠤᠤ ᠲᠠᠢ ᠠᠷᠰᠯᠠᠨ ᠪᠠᠷᠰ ᠰᠢᠭ᠋ ᠪᠥᠬᠡᠴᠦᠳ ᠣᠯᠠᠨ ᠤ᠋ ᠬᠠᠢᠷᠠ ᠪᠢᠰᠢᠷᠡᠯ ᠦ᠋ᠨ ᠬᠠᠷᠠᠴᠠᠨ ᠳ᠋ᠤ᠌ ᠢᠪᠡᠭᠡᠭᠳᠡᠵᠦ ᠬᠦᠷᠡᠯ ᠮᠠᠬᠠᠪᠣᠳ ᠨᠢ ᠤᠯᠠᠮ ᠴᠤ᠌ ᠰᠦᠷᠲᠡᠢ ᠬᠠᠷᠠᠭᠳᠠᠨᠠ᠃
ᠱᠠᠩ ᠤ᠋ᠨ ᠬᠡᠰᠢᠭ ᠭᠡᠵᠦ ᠢᠪᠡᠭᠡᠭᠳᠡᠭᠰᠡᠨ ᠵᠢᠷᠣᠭᠠ ᠬᠠᠯᠢᠭᠤᠨ ᠤ᠋ ᠴᠤᠯᠪᠤᠭᠤᠷ ᠢ᠋ ᠪᠠᠷᠢᠵᠤ ᠵᠣᠭᠰᠣᠭᠰᠠᠨ ᠠᠭᠤᠯᠠᠡᠭᠦᠦ ᠶ᠋ᠢ ᠨᠠᠭᠠᠳᠤᠮᠴᠢᠳ ᠰᠢᠬᠠᠨ ᠬᠦᠷᠢᠶᠡᠯᠡᠵᠦ ᠵᠢᠪᠠᠷ ᠨᠡᠪᠲᠡᠷᠡᠮᠡ ᠦᠭᠡᠢ ᠪᠣᠯᠭᠠᠪᠠ᠃
ᠪᠣᠮᠠᠨ ᠠᠮᠢᠲᠠᠨ ᠪᠤᠵᠢᠭᠢᠨᠠᠯᠳᠤᠭᠰᠠᠨ ᠨᠠᠭᠠᠳᠤᠮᠴᠢᠳ ᠤ᠋ᠨ ᠳᠤᠮᠳᠠ ᠠ᠋ᠴᠠ ᠮᠠᠨᠤᠬᠤᠸᠠᠷ ᠤ᠋ᠨ ᠰᠡᠳᠬᠢᠯ ᠣᠪᠣᠯᠵᠠᠵᠤ ᠠᠭᠤᠯᠠᠨᠭᠦᠤ ᠶ᠋ᠢᠨ ᠵᠢᠪᠬᠤᠭᠠᠲᠤ ᠴᠢᠷᠠᠢ ᠶ᠋ᠢ ᠰᠢᠷᠳᠡᠵᠦ ᠵᠣᠭᠰᠣᠬᠤ ᠳ᠋ᠠᠭᠠᠨ 《ᠮᠤᠨᠠ ᠬᠠᠨ ᠲᠡᠭᠷᠢ ᠮᠢᠨᠢ᠂ ᠨᠠᠮᠠᠶ᠋ᠢ ᠡᠨᠡ ᠬᠠᠷᠠ ᠬᠦᠦ ᠶ᠋ᠢᠨ ᠡᠯᠢᠭᠡᠨ ᠳ᠋ᠦ᠍ ᠲᠡᠪᠡᠷᠢᠭᠦᠯᠬᠦ ᠪᠣᠯᠲᠤᠭᠠᠢ》 ᠭᠡᠵᠦ ᠨᠠᠮᠠᠨᠴᠢᠯᠠᠬᠤ ᠳ᠋ᠠᠭᠠᠨ ᠬᠠᠴᠠᠷ ᠨᠢ ᠤᠯᠠᠢᠪᠠ᠃
ᠡᠨᠡ ᠵᠠᠭᠤᠷᠠ ᠵᠤᠳᠪᠠ ᠮᠡᠢᠷᠡᠨ ᠣᠯᠠᠨ ᠤ᠋ ᠡᠮᠦᠨᠡ ᠭᠠᠷᠴᠤ᠄
ᠤᠸᠮ ᠰᠠᠢᠨ ᠠᠮᠤᠭᠤᠯᠠᠩᠳᠠᠨ ᠪᠣᠯᠲᠤᠭᠠᠢ
ᠠᠷᠠᠳ ᠣᠯᠠᠨ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ
ᠠᠦᠬᠠ ᠴᠡᠩᠭᠡᠯᠲᠦ ᠨᠠᠭᠠᠳᠤᠮ ᠴᠢᠭᠤᠯᠵᠤ ᠁
ᠠᠯᠳᠠᠨᠸᠴᠢᠷ ᠪᠠᠭᠠ ᠵᠠᠰᠠᠭ ᠬᠦᠩ ᠨᠣᠶᠠᠨᠲᠠᠨ ᠲᠦᠷᠦᠭᠦᠯᠡᠨ
ᠠᠯᠲᠠᠨ ᠲᠠᠮᠠᠭᠠᠨ ᠤ᠋ ᠲᠤᠰᠠᠯᠠᠭᠴᠢ ᠰᠠᠢᠳ ᠳᠠᠷᠠᠭᠠᠯᠠᠨ
ᠠᠮᠪᠠᠰ ᠣᠯᠠᠨ ᠨᠣᠶᠠᠳ ᠲᠦᠰᠢᠮᠡᠳ ᠳᠠᠭᠠᠯᠳᠤᠨ
ᠠᠯᠳᠠᠷ ᠬᠦᠨᠳᠦᠲᠦ ᠭᠡᠭᠡᠨ ᠬᠤᠪᠢᠯᠭᠠᠨ ᠯᠠᠮᠠ ᠨᠠᠷ ᠲᠠᠨ
ᠡᠷᠬᠢᠮᠰᠦᠭ ᠬᠡᠭᠡᠨᠴᠢᠷ ᠡᠷᠬᠡ ᠵᠢᠷᠭᠠᠯᠲᠤ ᠬᠠᠲᠤᠳ ᠠᠪᠠᠭᠠᠢ
ᠡᠩᠬᠦᠷᠡᠢ ᠠᠷᠳᠠᠭ ᠡᠬᠡ ᠠᠪᠠᠬᠠᠢ ᠭᠦᠩᠵᠦ ᠨᠠᠷ ᠲᠠᠨ
ᠬᠠᠩᠬᠠᠢ ᠠᠭᠤᠵᠢᠭᠤ ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠤ᠋ᠨ
ᠬᠠᠮᠤᠭ ᠣᠯᠠᠨ ᠠᠷᠠᠳ ᠬᠤᠶᠠᠭ ᠪᠦᠭᠦᠳᠡᠭᠡᠷ ᠬᠤᠷᠠᠨ ᠴᠤᠭᠯᠠᠷᠠᠵᠤ
ᠠᠯᠲᠠᠨ ᠨᠠᠮᠰᠠᠷᠠᠢ ᠠᠢᠮᠠᠭ ᠶᠢᠰᠦᠨ ᠲᠡᠭᠷᠢ ᠪᠡᠨ ᠳᠠᠬᠢᠵᠤ
ᠠᠷᠪᠠᠨ ᠵᠦᠭ ᠲᠦ᠍ᠷ ᠪᠤᠶᠠᠨ ᠬᠡᠰᠢᠭ ᠢ᠋ᠶ᠋ᠡᠨ ᠳᠠᠯᠠᠯᠵᠤ
ᠬᠣᠩᠭᠤᠷ ᠴᠠᠰᠤᠲᠤ ᠮᠤᠨᠠ ᠶ᠋ᠢᠨ ᠰᠢᠷᠠ ᠣᠷᠣᠢ ᠳ᠋ᠠᠭᠠᠨ ᠮᠥᠷᠭᠥᠨ
ᠬᠣᠰᠢᠭᠤ ᠣᠩᠭᠣᠨ ᠣᠪᠣᠭᠠ ᠪᠠᠨ ᠠᠷᠭᠠᠳᠠᠨ ᠳᠠᠬᠢᠵᠤ
ᠬᠣᠯᠠ ᠮᠣᠷᠢᠲᠠᠢ ᠮᠤᠨᠠ ᠬᠠᠨ ᠢ᠋ᠶ᠋ᠠᠷ ᠬᠡᠢ ᠮᠣᠷᠢ ᠪᠠᠨ ᠮᠢᠯᠢᠶᠠᠯᠭᠠᠵᠤ
ᠬᠣᠲᠠᠯᠠ ᠳᠠᠶᠠᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠥᠯᠵᠡᠢ ᠬᠡᠰᠢᠭ ᠢ᠋
ᠬᠤᠷᠠ ᠶ᠋ᠢᠨ ᠤᠰᠤ ᠮᠡᠲᠦ ᠡᠯᠪᠡᠭ ᠶᠡᠬᠡ ᠬᠤᠷᠣᠢᠯᠠᠨ
ᠬᠤᠲᠤᠭ ᠥᠯᠵᠡᠢ ᠶ᠋ᠢ ᠮᠥᠩᠬᠡ ᠣᠷᠣᠰᠢᠭᠤᠯᠤᠨ ᠲᠣᠭᠲᠠᠭᠠᠭᠰᠠᠨ
ᠬᠣᠰᠢᠭᠤ ᠨᠡᠢᠳᠡ ᠪᠠᠶᠠᠷ ᠴᠡᠩᠭᠡᠯ ᠦ᠋ᠨ ᠡᠨᠡ ᠶᠡᠬᠡ ᠨᠠᠢᠷ ᠲᠤ᠌
ᠠᠭᠤᠵᠢᠮ ᠲᠡᠷᠭᠡᠯ ᠰᠠᠷᠠᠭᠤᠯᠬᠠᠨ ᠨᠣᠭᠣᠭᠠᠨ ᠳᠡᠨᠵᠢᠨ ᠳᠡᠭᠡᠷᠡ
ᠠᠰᠠᠷ ᠮᠡᠲᠦ ᠥᠨᠳᠥᠷᠬᠡᠨ ᠡᠭᠦᠯᠡᠨ ᠭᠡᠷ ᠢ᠋ᠶ᠋ᠡᠨ ᠪᠠᠢᠭᠤᠯᠵᠤ
ᠠᠰ ᠭᠣᠣᠯ ᠳ᠋ᠤᠨᠢ ᠴᠣᠭᠴᠠᠯᠠᠭᠰᠠᠨ ᠲᠠᠭᠲᠤ ᠲᠠᠪᠴᠠᠩ ᠤ᠋ᠨ
ᠠᠯᠲᠠᠨ ᠯᠤᠤᠲᠤ ᠥᠷᠭᠡᠨ ᠶᠡᠬᠡ ᠰᠢᠷᠡᠭᠡᠨ ᠳᠡᠭᠡᠷᠡ
ᠠᠯᠳᠠᠷ ᠬᠦᠨᠳᠦᠲᠦ ᠨᠣᠶᠠᠳ ᠭᠡᠭᠡᠨ ᠯᠠᠮᠠᠲᠠᠳ ᠢ᠋ᠶ᠋ᠠᠨ ᠰᠠᠭᠠᠲᠠᠭᠤᠯᠵᠤ
ᠠᠢᠮᠠᠭ ᠴᠠᠭᠠᠨ ᠭᠡᠭᠦᠦ ᠶ᠋ᠢᠨ ᠰᠢᠮᠡ ᠪᠡᠷ ᠢᠰᠬᠡᠨ ᠪᠦᠲᠦᠭᠡᠭᠰᠡᠨ
ᠠᠷᠢᠭᠤᠨ ᠴᠠᠭᠠᠨ ᠤᠮᠳᠠᠭᠠᠨ ᠠᠢᠷᠠᠭ ᠴᠡᠭᠡ ᠶ᠋ᠢᠨ ᠳᠡᠭᠡᠵᠢ ᠶ᠋ᠢ
ᠠᠯᠲᠠ ᠮᠥᠩᠭᠥᠨ ᠴᠥᠭᠦᠴᠡᠨ ᠳ᠋ᠦ᠍ ᠮᠠᠯᠮᠠᠩ ᠳᠦᠭᠦᠷᠡᠩ ᠵᠠᠰᠠᠭᠠᠳ
ᠠᠯᠲᠠᠨ ᠮᠣᠳᠣᠷ ᠤ᠋ᠨ ᠲᠥᠪ ᠳᠤᠮᠳᠠ ᠬᠢᠴᠢᠶᠡᠩᠭᠦᠢᠯᠡᠨ ᠡᠷᠭᠦᠵᠦ
ᠲᠦᠮᠡᠨ ᠣᠯᠠᠨ ᠪᠦᠭᠦᠳᠡᠭᠡᠷ ᠦ᠋ᠨ ᠲᠡᠭ ᠳᠤᠮᠳᠠ ᠨᠢ
ᠲᠦᠪᠰᠢᠨ ᠪᠠᠶᠠᠷ ᠤ᠋ᠨ ᠬᠤᠨᠳᠠᠭᠠ ᠶ᠋ᠢ ᠮᠡᠯᠮᠡᠯᠵᠡᠭᠦᠯᠦᠨ ᠪᠠᠷᠢᠵᠤ
ᠠᠮᠠᠨ ᠤ᠋ ᠪᠡᠯᠭᠡ ᠲᠡᠢ ᠦᠭᠡᠰ ᠢ᠋ ᠤᠷᠤᠰᠤᠭᠤᠯᠤᠨ ᠤᠩᠰᠢᠵᠤ
ᠠᠰᠢᠳᠠ ᠶ᠋ᠢᠨ ᠵᠢᠷᠭᠠᠯ ᠲᠠᠢ ᠢᠷᠦᠭᠡᠯ ᠢ᠋ ᠠᠢᠯᠠᠳᠬᠠᠨ ᠤᠶᠠᠩᠭᠠᠯᠠᠵᠤ
ᠠᠷᠰᠯᠠᠨ ᠵᠠᠭᠠᠨ ᠮᠡᠲᠦ ᠬᠦᠴᠦᠲᠦ ᠪᠥᠬᠡᠴᠦᠳ ᠢ᠋ᠶ᠋ᠡᠨ ᠪᠠᠷᠢᠯᠳᠤᠭᠤᠯᠵᠤ
ᠠᠵᠢᠨᠠᠢ ᠬᠦᠯᠦᠭ ᠡᠷᠳᠡᠨᠢᠲᠦ ᠰᠦᠷᠦᠭ ᠦ᠋ᠨ ᠮᠠᠩᠯᠠᠢ ᠪᠣᠯᠤᠭᠰᠠᠨ
ᠠᠳᠤᠭᠤᠨ ᠰᠦᠷᠦᠭ ᠡᠴᠡ ᠪᠡᠨ ᠬᠤᠷᠳᠤᠨ ᠮᠣᠷᠢᠳ ᠢ᠋ ᠰᠢᠯᠢᠵᠦ
ᠠᠯᠤᠰ ᠬᠣᠯᠠ ᠭᠠᠵᠠᠷ ᠠ᠋ᠴᠠ ᠱᠤᠩᠭᠤᠨ ᠣᠷᠣᠯᠳᠣᠭᠤᠯᠤᠭᠰᠠᠨ ᠳ᠋ᠤ᠌
ᠠᠩᠬᠠ ᠲᠦᠷᠦᠭᠦᠨ ᠳ᠋ᠦ᠍ᠨᠢ ᠳᠠᠪᠬᠢᠵᠤ ᠢᠷᠡᠭᠰᠡᠨ ᠡᠨᠡ ᠮᠣᠷᠢ ᠪᠣᠯ᠄
ᠴᠢᠨᠣᠠ ᠶ᠋ᠢᠨ ᠬᠣᠶᠠᠷ ᠴᠢᠬᠢ ᠲᠡᠢ
ᠴᠣᠯᠮᠤᠨ ᠬᠣᠣᠰ ᠨᠢᠳᠦ ᠲᠡᠢ
ᠬᠠᠰ ᠡᠷᠳᠡᠨᠢ ᠶ᠋ᠢᠨ ᠲᠣᠯᠣᠭᠠᠢ ᠲᠠᠢ
ᠬᠠᠨᠠᠭᠠᠷ ᠰᠠᠢᠬᠠᠨ ᠬᠦᠵᠦᠭᠦᠦ ᠲᠡᠢ
ᠬᠢᠩᠭᠠᠨ ᠥᠨᠳᠥᠷ ᠴᠡᠭᠡᠵᠢ ᠲᠡᠢ
ᠬᠢᠷᠭᠠᠮᠠᠯ ᠲᠡᠭᠰᠢᠬᠡᠨ ᠳᠡᠯ ᠲᠡᠢ
ᠥᠷᠭᠡᠨ ᠰᠠᠢᠬᠠᠨ ᠡᠭᠡᠮ ᠲᠡᠢ
ᠤᠷᠲᠤ ᠰᠠᠢᠬᠠᠨ ᠵᠣ᠌ ᠲᠠᠢ
ᠠᠭᠤᠵᠢᠮ ᠰᠠᠢᠬᠠᠨ ᠲᠠᠰᠢᠶᠠ ᠲᠠᠢ
ᠲᠤᠭ ᠰᠠᠢᠬᠠᠨ ᠰᠡᠭᠦᠯ ᠲᠡᠢ
ᠲᠤᠷᠤᠭ ᠰᠠᠢᠬᠠᠨ ᠪᠡᠶᠡ ᠲᠡᠢ
ᠵᠠᠭᠠᠨ ᠤ᠋ ᠯᠠᠪᠠᠢ ᠰᠢᠳᠦ ᠲᠡᠢ
ᠽᠠᠨᠳᠠᠨ ᠬᠦᠷᠡᠩ ᠬᠡᠯᠡ ᠲᠡᠢ
ᠴᠣᠮᠪᠣᠩ ᠳᠥᠷᠪᠡᠨ ᠲᠤᠭᠤᠷᠠᠢ ᠲᠠᠢ
ᠴᠣᠩᠬᠢᠶᠠ ᠬᠠᠷᠠ ᠠᠯᠬᠤᠭᠠ ᠲᠠᠢ
ᠥᠭᠡᠳᠡᠩ ᠭᠢᠯᠠᠭᠠᠷ ᠦᠰᠦ ᠲᠡᠢ
ᠥᠨᠢᠷ ᠰᠦᠷᠦᠭ ᠦ᠋ᠨ ᠮᠠᠩᠯᠠᠢ ᠪᠣᠯᠤᠭᠰᠠᠨ
ᠥᠨᠳᠥᠷ ᠬᠥᠯᠥᠭ ᠮᠣᠷᠢ ᠭᠡᠨᠡ᠃
ᠵᠠ᠂ ᠡᠨᠡ ᠮᠣᠷᠢᠨ ᠤ ᠵᠠᠰᠠᠯ ᠴᠢᠮᠡᠭ ᠢ ᠬᠡᠯᠡᠪᠡᠯ᠄
ᠲᠣᠯᠢ ᠮᠥᠩᠭᠥᠨ ᠬᠠᠵᠠᠭᠠᠷ ᠢ᠋
ᠲᠣᠯᠣᠭᠠᠢ ᠳ᠋ᠤᠨᠢ ᠳᠣᠬᠢᠶᠠᠭᠰᠠᠨ
ᠲᠣᠪᠣᠷᠤᠤ ᠮᠥᠩᠭᠥᠨ ᠬᠤᠳᠠᠷᠭᠠ ᠶ᠋ᠢ
ᠬᠣᠨᠳᠣᠯᠠᠢ ᠳ᠋ᠤᠨᠢ ᠲᠣᠬᠢᠶᠠᠭᠰᠠᠨ
ᠽᠠᠨᠳᠠᠨ ᠮᠣᠳᠣᠨ ᠪᠦᠭᠦᠷᠭᠡ ᠲᠡᠢ
ᠰᠢᠨᠳᠠᠨ ᠮᠣᠳᠣᠨ ᠬᠠᠪᠲᠠᠰᠤ ᠲᠠᠢ
ᠨᠠᠷᠠᠨ ᠰᠠᠷᠠᠨ ᠭᠡᠷᠡᠯ ᠲᠡᠢ
ᠨᠠᠢ᠍ᠮᠠᠨ ᠮᠥᠩᠭᠥᠨ ᠳᠠᠷᠤᠭᠤᠯᠭᠠ ᠲᠠᠢ
ᠰᠢᠵᠢᠷ ᠠᠯᠲᠠᠨ ᠳᠥᠷᠥᠭᠡ ᠲᠡᠢ
ᠰᠢᠨᠡ ᠰᠠᠩᠬᠠᠶᠤᠤ ᠭᠥᠯᠢᠮ ᠲᠡᠢ
ᠰᠢᠨᠵᠢᠨ ᠢᠰᠡᠭᠡᠢ ᠲᠣᠬᠣᠮ ᠲᠠᠢ
ᠤᠷᠲᠤ ᠬᠣᠶᠠᠷ ᠣᠯᠣᠩ ᠲᠠᠢ
ᠥᠷᠭᠡᠨ ᠬᠣᠶᠠᠷ ᠵᠢᠷᠢᠮ ᠲᠡᠢ
ᠵᠠᠰᠠᠯ ᠰᠠᠢᠲᠠᠢ ᠡᠮᠡᠭᠡᠯ ᠢ᠋
ᠵᠣ᠌ ᠨᠢᠷᠤᠭᠤᠨ ᠳ᠋ᠤᠨᠢ ᠲᠣᠬᠢᠶᠠᠵᠠᠢ᠃
ᠨᠣᠭᠣᠭᠠᠨ ᠤᠯᠠᠭᠠᠨ ᠳᠤᠷᠳᠤᠩ ᠢ᠋ᠶ᠋ᠠᠷ
ᠨᠣᠭᠲᠣ ᠬᠠᠵᠠᠭᠠᠷ ᠢ᠋ ᠨᠢ ᠴᠢᠮᠡᠭᠯᠡᠵᠡᠢ
ᠴᠡᠩᠬᠡᠷ ᠰᠢᠷᠠ ᠳᠤᠷᠳᠤᠩ ᠢ᠋ᠶ᠋ᠠᠷ
ᠴᠤᠯᠪᠤᠭᠤᠷ ᠵᠢᠯᠣᠭᠣ ᠶ᠋ᠢ ᠨᠢ ᠴᠢᠮᠡᠭᠯᠡᠵᠡᠢ
ᠬᠠᠳᠬᠤᠮᠠᠯ ᠴᠡᠴᠡᠭ ᠲᠡᠢ ᠰᠠᠩᠱᠠᠢᠪᠴᠢ ᠶ᠋ᠢ
ᠮᠠᠩᠨᠠᠢ ᠳᠠᠷᠤᠨ ᠴᠢᠮᠡᠭᠯᠡᠵᠡᠢ
ᠬᠠᠩᠬᠠ ᠳᠤᠷᠳᠤᠩ ᠠᠯᠴᠢᠭᠤᠷ ᠢ᠋ᠶ᠋ᠠᠷ
ᠰᠡᠭᠦᠯ ᠢ᠋ ᠨᠢ ᠵᠠᠰᠠᠨ ᠴᠢᠮᠡᠭᠯᠡᠵᠡᠢ᠃
ᠡᠨᠡ ᠮᠣᠷᠢᠨ ᠤ᠋ ᠡᠷᠳᠡᠮ ᠴᠢᠳᠠᠯ ᠪᠣᠯ᠄
ᠤᠨᠠᠭᠠᠨ ᠠ᠋ᠴᠠ ᠨᠢ ᠰᠢᠨᠵᠢᠭᠰᠡᠨ ᠡᠴᠡ
ᠳᠠᠭᠠ ᠠ᠋ᠴᠠ ᠨᠢ ᠳᠠᠪᠲᠠᠭᠰᠠᠨ ᠠ᠋ᠴᠠ
ᠬᠢᠵᠠᠭᠠᠯᠠᠩ ᠳ᠋ᠤᠨᠢ ᠬᠢᠨᠠᠭᠰᠠᠨ ᠠ᠋ᠴᠠ
ᠰᠣᠶᠣᠭᠠᠯᠠᠩ ᠳ᠋ᠤᠨᠢ ᠰᠣᠢᠭᠰᠠᠨ ᠠ᠋ᠴᠠ
ᠬᠠᠵᠠᠭᠠᠷ ᠢ᠋ᠶ᠋ᠠᠨ ᠬᠠᠪᠢᠷᠤᠨ ᠭᠦᠶᠦᠳᠡᠭ
ᠬᠠᠪᠢ ᠶ᠋ᠢᠨ ᠭᠠᠵᠠᠷ ᠢ᠋ ᠲᠣᠪᠴᠢᠯᠠᠨ ᠭᠦᠶᠦᠳᠡᠭ
ᠵᠤᠤᠵᠠᠢ ᠪᠠᠨ ᠵᠤᠯᠠᠷᠠᠨ ᠭᠦᠶᠦᠳᠡᠭ
ᠵᠠᠭᠤᠷᠠ ᠶ᠋ᠢᠨ ᠭᠠᠵᠠᠷ ᠢ᠋ ᠲᠣᠪᠴᠢᠯᠠᠨ ᠭᠦᠶᠦᠳᠡᠭ
ᠮᠢᠩᠭᠠᠨ ᠠᠭᠲᠠ ᠶ᠋ᠢᠨ ᠳᠤᠮᠲᠠ ᠠ᠋ᠴᠠ ᠮᠠᠩᠯᠠᠢᠯᠠᠨ ᠭᠦᠶᠦᠳᠡᠭ
ᠲᠦᠮᠡᠨ ᠬᠦᠯᠦᠭ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠲᠦᠷᠦᠭᠦᠯᠡᠨ ᠭᠦᠶᠦᠳᠡᠭ
ᠮᠢᠨᠳᠠᠰᠤᠨ ᠵᠢᠯᠣᠭᠣ ᠶ᠋ᠢ ᠳᠠᠷᠤᠯᠠᠨ ᠭᠦᠶᠦᠳᠡᠭ
ᠲᠡᠮᠦᠷ ᠵᠤᠤᠵᠠᠢ ᠵᠢ ᠳᠤᠭᠲᠤᠷᠤᠨ ᠭᠦᠶᠦᠳᠡᠭ
ᠠᠰᠬᠠᠲᠣ ᠠᠭᠤᠯᠠ ᠶᠢ ᠬᠢᠷᠠᠯᠠᠨ ᠬᠦᠶᠦᠳᠡᠭ
ᠠᠩᠭᠢᠷ ᠴᠠᠭᠠᠨ ᠬᠥᠭᠡᠰᠦ ᠪᠡᠨ ᠪᠠᠭᠠᠬᠢᠭᠤᠯᠤᠨ ᠬᠦᠶᠦᠳᠡᠭ
ᠠᠰᠤᠷᠤ ᠶᠡᠬᠡ ᠴᠢᠳᠠᠯ ᠢ᠋ᠶ᠋ᠠᠷ ᠪᠤᠯᠢᠶᠠᠯᠳᠤᠨ ᠭᠦᠶᠦᠳᠡᠭ
ᠪᠥᠮᠪᠥᠷᠢᠭᠡᠨ ᠴᠢᠯᠠᠭᠤᠨ ᠳ᠋ᠤ᠌ ᠪᠦᠳᠦᠷᠢᠬᠦ ᠦᠭᠡᠢ ᠭᠦᠶᠦᠳᠡᠭ
ᠬᠠᠪᠲᠠᠭᠠᠢ ᠴᠢᠯᠠᠭᠤᠨ ᠳ᠋ᠤ᠌ ᠬᠠᠯᠲᠤᠷᠢᠬᠤ ᠦᠭᠡᠢ ᠭᠦᠶᠦᠳᠡᠭ
ᠬᠠᠩᠭᠠᠢ ᠭᠣᠪᠢ ᠪᠠᠷ ᠬᠤᠯᠠᠨ ᠰᠢᠭ᠋ ᠭᠦᠶᠦᠳᠡᠭ
ᠬᠠᠷᠠᠩᠭᠤᠢ ᠰᠥᠨᠢ ᠪᠡᠷ ᠭᠢᠯᠪᠠᠭᠠᠨ ᠰᠢᠭ᠋ ᠭᠦᠶᠦᠳᠡᠭ ᠁
ᠵᠠ ! ᠡᠨᠡ ᠬᠦ᠌
ᠰᠠᠢᠨ ᠡᠷᠡ ᠶ᠋ᠢᠨ ᠰᠤᠮᠤ ᠰᠢᠭ᠋ ᠲᠦᠷᠭᠡᠨ
ᠰᠠᠷᠠᠭᠤᠯ ᠲᠠᠯᠠ ᠶ᠋ᠢᠨ ᠰᠠᠯᠬᠢ ᠰᠢᠭ᠋ ᠬᠤᠷᠳᠤᠨ
ᠮᠢᠩᠭᠠᠨ ᠠᠭᠲᠠ ᠶ᠋ᠢᠨ ᠮᠠᠩᠯᠠᠢ ᠪᠣᠯᠤᠭᠰᠠᠨ
ᠮᠠᠨ ᠤ᠋ ᠨᠠᠢᠷ ᠤ᠋ᠨ ᠴᠢᠮᠡᠭ ᠪᠣᠯᠤᠭᠰᠠᠨ
ᠲᠦᠮᠡᠨ ᠮᠠᠭᠲᠠ ᠶ᠋ᠢᠨ ᠲᠡᠷᠢᠭᠦᠨ ᠪᠣᠯᠤᠭᠰᠠᠨ
ᠲᠡᠭᠦᠰ ᠨᠠᠢᠷ ᠤ᠋ᠨ ᠴᠢᠮᠡᠭ ᠪᠣᠯᠤᠭᠰᠠᠨ
ᠶᠡᠷᠡ ᠶᠢᠰᠦᠨ ᠬᠦᠯᠦᠭ ᠦ᠋ᠨ ᠬᠢᠨᠢ ᠡᠬᠡ ᠪᠣᠯᠣᠭᠰᠠᠨ
ᠢᠷᠪᠢᠰ ᠦ᠋ᠨ ᠴᠣᠬᠣᠷ ᠭᠡᠭᠦᠦ ᠡᠴᠡ ᠨᠢ ᠭᠠᠷᠤᠭᠰᠠᠨ
ᠤᠨᠠᠭᠠ ᠪᠠᠢᠵᠢ ᠪᠢᠯᠡ ᠁ ᠭᠡᠵᠦ ᠲᠡᠷᠢᠭᠦᠨ ᠮᠣᠷᠢ ᠶ᠋ᠢ ᠮᠢᠯᠢᠶᠠᠨ ᠢᠷᠦᠭᠡᠬᠦ ᠤᠶᠠᠩᠭᠠ ᠠᠢᠵᠠᠮ ᠬᠣᠰᠢᠭᠤ ᠣᠪᠣᠭᠠᠨ ᠤ᠋ ᠨᠠᠭᠠᠳᠤᠮ ᠥᠨᠳᠥᠷᠯᠡᠵᠦ ᠪᠠᠢᠯᠠ ᠁
— — — —
① ᠠᠳᠠ ᠪᠠᠭᠠ ᠵᠠᠰᠠᠭ ᠠᠯᠲᠠᠨᠸᠴᠢᠷ ᠢ᠋ ᠵᠢᠭᠠᠵᠤ ᠪᠣᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠤᠭᠴᠢ ᠰᠠᠷᠠᠨᠠ