ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠦᠲᠦᠭᠡᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠳᠣᠯᠣᠭᠠ> Хан мунын сүүрс < доорд > – Мөнх зохиоов ᠂Дөдгөөр бодь – Нэгдүгээр бүлэг <7>
249ᠲᠦᠲᠦᠭᠡᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠳᠣᠯᠣᠭᠠ>
ᠣᠩᠭᠣᠨ ᠬᠠᠷᠠ ᠪᠤᠬᠠ ᠪᠠᠷ ᠬᠣᠰᠢᠭᠤ ᠣᠪᠣᠭᠠ ᠪᠠᠨ ᠰᠦᠵᠢᠭᠯᠡᠨ ᠳᠠᠬᠢᠬᠰᠠᠨ ᠠ᠋ᠴᠠ ᠬᠠᠨ ᠮᠤᠨᠠ ᠶ᠋ᠢᠨ ᠰᠠᠬᠢᠭᠤᠰᠤ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠦ᠌ ᠨᠠᠢᠷ ᠨᠠᠭᠠᠳᠤᠮ ᠢ᠋ ᠢᠪᠡᠭᠡᠭᠰᠡᠨ ᠭᠡᠮᠡᠷ ᠡᠭᠦᠯᠡ ᠨᠢ ᠴᠡᠩᠬᠡᠷ᠂ ᠣᠭᠲᠠᠷᠭᠤᠢ ᠨᠢ ᠴᠡᠯᠮᠡᠭ᠂ ᠬᠤᠷᠠᠭᠰᠠᠨ ᠨᠠᠭᠠᠳᠤᠮᠴᠢᠳ ᠤ᠋ᠨ ᠰᠡᠳᠬᠢᠯ ᠲᠡᠨᠢᠭᠡᠷ ᠪᠠᠢᠯᠠ᠃
ᠲᠠᠬᠢᠯᠭᠠ ᠶ᠋ᠢᠨ ᠳᠠᠷᠠᠭᠠ ᠡᠳᠦᠷ ᠲᠦ᠋ᠨᠢ ᠵᠦᠯᠭᠡ ᠨᠣᠭᠣᠭᠠ ᠶ᠋ᠢ ᠰᠡᠷᠪᠡᠯᠵᠡᠭᠦᠯᠦᠮᠡ ᠰᠠᠢᠬᠠᠨ ᠵᠦᠰᠡᠷ ᠪᠣᠷᠣᠭᠠᠨ ᠰᠢᠪᠡᠷᠡᠪᠡ᠃ ᠡᠨᠡ ᠨᠠᠭᠠᠳᠤᠮ ᠨᠠᠢᠷ ᠲᠤ ᠨᠢᠭᠡ ᠯᠡ ᠰᠠᠭᠠᠳ ᠬᠠᠷᠰᠢ ᠪᠣᠯᠤᠭᠠ ᠦᠭᠡᠢ᠃ ᠬᠠᠷᠢᠨ ᠬᠥᠮᠦᠨ ᠦ᠌ ᠬᠥᠯ ᠳ᠋ᠦ᠍ ᠪᠣᠰᠤᠭᠰᠠᠨ ᠥᠯᠥᠨ ᠲᠣᠭᠣᠰᠣ ᠶ᠋ᠢ ᠳᠠᠷᠤᠵᠤ᠂ ᠨᠠᠭᠠᠳᠤᠮ ᠤ᠋ᠨ ᠲᠠᠯᠠᠪᠤᠷ ᠢ᠋ ᠲᠣᠷᠭᠠᠨ ᠲᠤᠩᠭᠠᠯᠠᠭ ᠪᠣᠯᠭᠠᠭᠰᠠᠨ ᠰᠢᠭ᠋ ᠰᠡᠳᠬᠢᠯ ᠳ᠋ᠦ᠍ ᠨᠢᠭᠡ ᠯᠡ ᠲᠠᠭᠠᠲᠠᠢ᠃
ᠣᠪᠣᠭᠠ ᠣᠩᠭᠣᠳ ᠲᠠᠭᠠᠨ ᠰᠠᠢᠨ ᠰᠠᠢᠬᠠᠨ ᠪᠦᠬᠦᠨ ᠢ᠋ᠶ᠋ᠡᠨ ᠳᠠᠭᠠᠳᠬᠠᠵᠤ ᠮᠥᠷᠭᠥᠭᠰᠡᠨ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠰᠠᠨᠠᠭᠠ ᠰᠡᠷᠭᠦᠵᠦ᠂ ᠵᠠᠷᠢᠮ ᠨᠢ ᠬᠠᠷᠠ ᠡᠷᠲᠡ ᠪᠡᠷ ᠪᠥᠬᠡ ᠶ᠋ᠢᠨ ᠰᠣᠷᠢᠶᠠ ᠪᠠ ᠰᠣᠢᠯᠭᠠ ᠶ᠋ᠢᠨ ᠮᠣᠷᠢᠳ ᠳᠠᠪᠬᠢᠯᠳᠤᠬᠤ ᠶ᠋ᠢ ᠰᠣᠨᠢᠷᠬᠠᠵᠤ ᠳᠡᠪᠵᠢᠶᠡᠷᠡᠨᠡ᠁ ᠣᠪᠣᠭᠠ ᠨᠠᠢᠷ ᠤ᠋ᠨ ᠪᠥᠬᠡ ᠶ᠋ᠢᠨ ᠮᠥᠷᠥᠢᠴᠡᠭᠡᠨ ᠰᠢᠷᠦᠭᠦᠨ ᠶᠠᠪᠤᠭᠳᠠᠵᠠᠢ᠃ ᠭᠤᠷᠪᠠᠨ ᠤᠷᠠᠳ ᠤ᠋ᠨ ᠪᠥᠬᠡ ᠪᠠ ᠬᠠᠷᠢ ᠬᠥᠨᠳᠡᠯᠡᠨ ᠬᠤᠰᠢᠭᠤᠨ ᠤ᠋ ᠰᠠᠢᠨ ᠰᠠᠢᠨ ᠪᠥᠬᠡᠴᠦᠳ ᠵᠦᠭ ᠵᠦᠭ ᠡᠴᠡ ᠬᠤᠷᠠᠨ ᠴᠤᠭᠯᠠᠷᠠᠵᠠᠢ᠃ ᠡᠭᠦᠨ ᠳ᠋ᠦ᠍ ᠳᠤᠮᠳᠠᠳᠤ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠤ᠋ ᠠᠪᠤᠷᠭᠤ ᠵᠠᠨᠠ ᠭᠡᠭᠴᠢ ᠲᠤᠷᠠᠩᠬᠠᠢ ᠰᠢᠷᠠ ᠡᠷᠡ᠂ ᠶᠠᠯᠢᠮ ᠦᠭᠡᠢ ᠮᠣᠢᠩᠭᠤᠵᠢᠭᠤ ᠬᠥᠯ ᠲᠡᠢ ᠴᠤ᠌ ᠲᠠᠭᠠᠷᠠᠤᠬᠠᠨ ᠪᠥᠬᠡ ᠶ᠋ᠢ ᠪᠠᠷᠢᠴᠠ ᠦᠭᠡᠢ ᠴᠣᠬᠢᠶᠠ ᠬᠢᠵᠦ ᠬᠠᠶᠠᠴᠢᠬᠠᠭᠠᠳ ᠴᠠᠭᠠᠰᠢ ᠳᠡᠪᠢᠴᠢᠬᠡᠳᠡᠭ ᠰᠦᠷᠡᠬᠡᠢ ᠪᠠᠷᠢᠯᠳᠤᠳᠠᠭ ᠰᠢᠷᠦᠭᠦᠨ ᠪᠥᠬᠡ ᠶ᠋ᠢᠨ ᠨᠢᠭᠡ᠃ ᠲᠡᠭᠦᠨ ᠦ᠌ ᠳᠠᠩ ᠵᠣᠪᠬᠢ ᠲᠠᠢ ᠣᠭᠣᠯᠢ ᠶ᠋ᠢᠨ ᠰᠢᠷᠠ ᠨᠢᠳᠦ ᠨᠢ ᠪᠥᠬᠡ ᠶ᠋ᠢ ᠬᠠᠷᠠᠮᠠᠭᠴᠠ ᠲᠠᠷ ᠢ᠋ ᠨᠢ ᠲᠠᠨᠢᠴᠢᠬᠠᠳᠠᠭ ᠣᠪᠢᠳᠢᠰ ᠲᠠᠢ ᠭᠡᠮᠡᠷ ᠣᠴᠢ ᠬᠠᠷᠪᠤᠨ ᠬᠡᠷᠡᠯᠳᠦᠵᠦ ᠪᠠᠢᠳᠠᠭ᠃ ᠮᠢᠩᠭᠠᠨ ᠸᠠᠩ ᠤ᠋ᠨ ᠳᠠᠷᠬᠠᠨ ᠴᠣᠯᠠ ᠲᠠᠢ ᠪᠥᠬᠡ ᠲᠡᠮᠦᠷᠳ᠋ᠦ᠋ᠰᠢ ᠭᠡᠭᠴᠢ ᠶᠣᠰᠣᠲᠠᠢ ᠨᠡᠷᠡ ᠳ᠋ᠡᠭᠡᠨ ᠵᠣᠬᠢᠴᠠᠭᠰᠠᠨ ᠪᠡᠶᠡ ᠬᠠᠳᠠ ᠨᠢ ᠴᠢᠳᠬᠤᠮᠠᠯ ᠬᠦᠷᠡᠯ ᠰᠢᠭ᠂ ᠴᠣᠯ ᠪᠤᠯᠴᠢᠩ ᠲᠠᠢ᠂ ᠭᠤᠶᠠ ᠬᠠᠰᠠ ᠨᠢ ᠵᠠᠭᠠᠨ ᠤ᠋ ᠬᠥᠯ ᠰᠢᠭ᠂ ᠬᠦᠷᠡᠩ ᠬᠠᠷᠠᠪᠲᠤᠷ ᠴᠢᠷᠠᠢ ᠳ᠋ᠤᠨᠢ ᠪᠡᠶᠡ ᠡᠴᠡ ᠪᠡᠨ ᠪᠤᠰᠤᠳ ᠢ᠋ ᠪᠠᠰᠤᠭᠰᠠᠨ ᠣᠮᠣᠷᠬᠠᠭ ᠠᠪᠤᠷᠢ ᠲᠠᠨᠢᠭᠳᠠᠵᠤ᠂ ᠪᠤᠬᠠᠨ ᠠᠯᠠᠭ ᠨᠢᠳᠦ ᠨᠢ ᠰᠦᠷᠯᠢᠭᠦᠨ ᠭᠥᠯᠢᠯᠵᠡᠬᠦ ᠡᠴᠡ ᠬᠠᠰᠢᠷ ᠰᠠᠭᠤᠭᠠ ᠦᠭᠡᠢ ᠪᠥᠬᠡ ᠪᠣᠯ ᠬᠠᠷᠠᠩᠭᠤᠲᠠ ᠠᠢᠳᠠᠰ ᠲᠥᠷᠥᠵᠦ ᠪᠠᠷᠢᠴᠠ ᠠᠯᠳᠠᠬᠤ ᠳ᠋ᠤ᠌ ᠣᠢᠷᠠ ᠪᠠᠢᠳᠠᠭ ᠰᠠᠨᠵᠠᠢ᠃ ᠡᠨᠡ ᠮᠡᠲᠦ ᠪᠡᠷ ᠰᠠᠢᠨ ᠡᠷᠡ ᠰᠢᠯᠢᠳᠡᠭ ᠪᠥᠬᠡ ᠨᠠᠢᠷ ᠲᠤ ᠮᠤᠩ ᠦᠭᠡᠢ ᠠᠷᠪᠢᠨ ᠢᠷᠡᠵᠡᠢ᠃ ᠳᠡᠯᠡᠳ ᠦ᠋ᠨ ᠲᠡᠮᠡᠭᠡ ᠴᠣᠭᠳᠣᠨ᠂ ᠦᠦᠰᠢᠨ ᠦ᠌ ᠬᠣᠮᠨᠣᠭᠠ ᠰᠢᠷᠠ᠂《ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠶ᠋ᠢᠨ ᠰᠢᠷᠡᠭᠡ ᠪᠠᠭᠰᠢ ᠶ᠋ᠢᠨ ᠬᠠᠪᠰᠤᠷᠤᠭᠠ ᠪᠠᠷ᠂ ᠭᠡᠭᠡᠨ ᠰᠠᠩ ᠤ᠋ᠨ ᠭᠠᠳᠠᠰᠤ ᠪᠠᠳᠠᠢ᠁ ᠵᠡᠷᠭᠡ ᠴᠤᠤᠲᠤ ᠪᠥᠬᠡ ᠨᠦ᠍ᠭᠦᠳ ᠨᠠᠭᠠᠳᠤᠮᠴᠢᠳ ᠤ᠋ᠨ ᠨᠢᠳᠦ ᠰᠡᠳᠬᠢᠯ ᠳ᠋ᠦ᠍ ᠲᠠᠭᠠᠯᠠᠭᠳᠠᠵᠤ ᠪᠠᠢᠪᠠ᠃ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠪᠠᠷᠢᠯᠳᠤᠭᠠᠨ ᠳ᠋ᠤ᠌ ᠮᠣᠩᠭᠣᠯ ᠡᠷᠡᠰ ᠦ᠋ᠨ ᠪᠡᠶᠡ ᠪᠢᠯᠳᠠᠷ᠂ ᠪᠢᠷᠠ ᠲᠡᠩᠬᠡᠭᠡ᠂ ᠤᠬᠠᠭᠠᠨ ᠰᠠᠮᠪᠠᠭᠠ ᠪᠠᠷ ᠴᠣᠯᠭᠣᠷᠠᠵᠤ ᠣᠯᠠᠨᠠ ᠱᠠᠭᠰᠢᠭᠳᠠᠬᠤ ᠶ᠋ᠢ ᠶᠠᠭᠤᠨ ᠦᠭᠦᠯᠡᠬᠦ᠃
ᠳᠤᠮᠳᠠᠳᠤ ᠬᠦᠩ ᠦ᠋ᠨ ᠠᠪᠤᠷᠭᠤ ᠵᠠᠨᠠ ᠮᠢᠩᠭᠠᠨ ᠸᠠᠩ ᠤ᠋ᠨ ᠲᠡᠮᠦᠷᠳ᠋ᠦ᠋ᠰᠢ ᠬᠣᠶᠠᠷ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠤᠳᠤᠮ ᠰᠠᠢᠲᠠᠢ ᠵᠢᠷᠣᠭᠠ ᠬᠠᠯᠢᠭᠤᠨ ᠢ᠋ ᠬᠥᠲᠥᠯᠦᠨᠡ ᠭᠡᠵᠦ ᠬᠣᠭᠣᠷᠣᠨᠳᠣ ᠪᠠᠨ ᠬᠣᠷᠣ ᠠᠲᠠᠭᠠ ᠪᠣᠯᠵᠤ᠂ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠪᠥᠬᠡ ᠶ᠋ᠢ ᠶᠡᠬᠡ ᠯᠡ ᠪᠠᠰᠤᠵᠤ᠂ ᠪᠠᠷᠳᠠᠮ ᠦᠭᠡ ᠲᠠᠯᠪᠢᠨ ᠨᠢᠭᠡ ᠨᠢ ᠰᠤᠷ ᠨᠣᠭᠲᠣ ᠪᠦᠰᠡᠯᠡᠵᠦ᠂ ᠨᠥᠭᠦᠭᠡ ᠨᠢ ᠬᠢᠯᠭᠠᠰᠤᠨ ᠨᠣᠭᠲᠣ ᠭᠠᠨᠵᠤᠭᠠᠯᠠᠵᠤ ᠢᠷᠡᠭᠰᠡᠨ ᠬᠡᠴᠡᠬᠡᠨᠡ᠃
ᠳᠤᠮᠳᠠᠳᠤ ᠬᠦᠩ ᠦ᠋ᠨ ᠪᠣᠰᠤᠭᠠ ᠠᠪᠤᠷᠭᠤ ᠵᠠᠨᠠ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠠᠷᠪᠠᠨ ᠳᠣᠯᠣᠭᠠᠲᠠᠢ ᠠᠭᠤᠯᠠᠨᠬᠦᠦ ᠳ᠋ᠦ᠍ ᠵᠢᠷᠠᠨ ᠳᠥᠷᠪᠡ ᠶ᠋ᠢᠨ ᠨᠤᠭᠤᠯᠤᠭᠠ ᠳ᠋ᠤ᠌ ᠬᠤᠰᠤᠮ ᠦᠭᠡᠢ ᠬᠤᠰᠤᠭᠳᠠᠭᠰᠠᠨ ᠳ᠋ᠠᠭᠠᠨ ᠬᠣᠷᠣ ᠨᠢ ᠬᠥᠳᠡᠯᠵᠦ ᠬᠣᠶᠠᠷ ᠡᠳᠦᠷ ᠬᠣᠭᠣᠯᠠ ᠬᠣᠰᠢ ᠦᠭᠡᠢ ᠨᠠᠪᠲᠠᠢᠵᠤ ᠭᠡᠨᠡ᠃ ᠬᠠᠷᠢᠨ ᠰᠡᠭᠦᠯ ᠳ᠋ᠡᠭᠡᠨ《ᠵᠠ᠂ ᠪᠠᠢᠵᠠ! ᠡᠨᠡ ᠬᠦᠦ ᠰᠦᠷᠡᠬᠡᠢ ᠴᠠᠷᠢᠭᠤᠨ ᠡᠷᠡ ᠭᠠᠷᠬᠤ ᠶᠤᠮ ᠪᠠᠢᠨᠠ᠃ ᠴᠠᠭᠠᠳᠤᠬᠢ ᠲᠡᠮᠦᠷᠳ᠋ᠦ᠋ᠰᠢ ᠶ᠋ᠢ ᠰᠢᠷᠣᠢ ᠡᠮᠬᠦᠭᠦᠯᠦᠭᠡᠳ ᠬᠠᠶᠠᠴᠢᠬᠠᠪᠠᠯ ᠴᠤ᠌ ᠶᠠᠭᠠᠮᠠᠢ ᠳᠠ! ᠲᠡᠷᠡ ᠪᠢᠳᠡ ᠬᠣᠶᠠᠷ ᠬᠡᠨ ᠬᠡᠨ ᠦ᠌ ᠪᠡᠨ ᠬᠢᠷᠢ ᠶ᠋ᠢ ᠦᠵᠡᠬᠦ ᠪᠣᠢ? ᠲᠡᠮᠡᠭᠡᠨ ᠳ᠋ᠦ᠍ ᠲᠡᠩᠨᠡᠪᠡᠴᠦ ᠳᠠᠩ ᠴᠢᠴᠠᠤ》 ᠭᠡᠵᠦ ᠪᠡᠶᠡ ᠪᠡᠨ ᠰᠠᠭᠠᠲᠠᠭᠤᠯᠵᠤ ᠠᠭᠣᠯᠠᠨᠬᠦᠦ ᠳ᠋ᠦ᠍ ᠵᠣᠷᠢᠭᠤᠳᠠ ᠬᠠᠪᠢᠳᠠᠵᠤ《ᠢᠩᠭᠢ ᠴᠢᠩᠭᠢ》 ᠭᠡᠵᠦ《ᠲᠡᠭᠦᠨ ᠦ᠌ ᠲᠣᠩᠭᠣᠷᠬᠤ ᠶ᠋ᠢ ᠬᠢᠴᠢᠶᠡ᠂ ᠲᠣᠩᠭᠣᠷᠬᠤ ᠲᠠᠢ ᠵᠡᠷᠭᠡ ᠪᠠᠷᠢᠴᠠ ᠪᠠᠨ ᠡᠪᠬᠡᠵᠦ ᠲᠠᠬᠢᠮ ᠳᠡᠭᠡᠭᠡ ᠬᠢ! ᠪᠤᠰᠢᠭᠤ ᠣᠷᠣ᠁ ᠭᠡᠬᠦᠴᠢᠯᠡᠨ ᠠᠭᠤᠯᠠᠨᠬᠦᠦ ᠳ᠋ᠦ᠍ ᠵᠢᠭᠠᠵᠤ ᠲᠣᠬᠢᠨᠠ᠃ ᠲᠡᠭᠡᠬᠦ ᠳ᠋ᠦ᠍ ᠮᠢᠩᠭᠠᠨ ᠸᠠᠩ ᠤ᠋ᠨ ᠲᠡᠮᠦᠷᠳ᠋ᠦ᠋ᠰᠢ ᠬᠠᠷᠢᠨ ᠠᠪᠤᠷᠭᠤ ᠵᠠᠨᠠ ᠶ᠋ᠢ《ᠶᠠᠯᠢᠮ ᠦᠭᠡᠢ ᠮᠠᠭᠤ ᠪᠢᠷᠠᠭᠤᠨ ᠳ᠋ᠤ᠌ ᠰᠡᠵᠢᠭᠳᠡᠴᠢᠬᠡᠯᠡ᠁ ᠦᠭᠡᠢ ᠰᠠᠨ ᠪᠣᠯ ᠡᠨᠡ ᠨᠠᠭᠠᠳᠤᠮ ᠳ᠋ᠤ᠌ ᠲᠡᠭᠦᠨ ᠲᠡᠢ ᠶᠣᠰᠣᠲᠠᠢ ᠨᠢᠭᠡ ᠡᠷᠡ ᠪᠢᠷᠠ ᠪᠠᠨ ᠰᠢᠯᠭᠠᠯᠴᠠᠬᠤ ᠪᠠᠢᠭᠰᠠᠨ ᠶᠤᠮ᠃ ᠬᠠᠷᠢᠨ ᠣᠳᠣ ᠡᠨᠡ ᠠᠮᠠᠨ ᠤ᠋ ᠬᠢᠨᠢ ᠰᠢᠷᠠ ᠠᠷᠢᠯᠤᠭᠠᠳᠤᠢ ᠬᠡᠦᠬᠡᠳ ᠢ᠋ ᠬᠠᠶᠠᠴᠢᠬᠠᠯᠠ ᠭᠡᠳ ᠪᠢ ᠴᠦ᠍ ᠭᠠᠢᠬᠠᠮᠰᠢᠭ ᠪᠢᠰᠢ ᠠ᠋!》 ᠭᠡᠵᠦ ᠠᠪᠤᠷᠭᠤ ᠵᠠᠨᠠ ᠶ᠋ᠢ ᠬᠠᠶᠠᠭᠰᠠᠨ ᠠᠷᠪᠠᠨ ᠳᠣᠯᠣᠭᠠᠲᠠᠢ ᠬᠦᠦ ᠶ᠋ᠢ ᠮᠠᠰᠢᠳᠠ ᠪᠠᠰᠤᠵᠤ《ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠪᠥᠬᠡ ᠶ᠋ᠢᠨ ᠦᠵᠦ ᠶ᠋ᠢ ᠰᠤᠭᠤᠯᠵᠤ᠂ ᠵᠢᠷᠣᠭᠠ ᠬᠠᠯᠢᠭᠤᠨ ᠦᠷᠢᠶᠡ ᠶ᠋ᠢ ᠲᠡᠮᠦᠷᠳ᠋ᠦ᠋ᠰᠢ ᠨᠣᠭᠲᠣᠯᠠᠬᠤ ᠠ᠋ᠴᠠ ᠪᠢᠰᠢ ᠥᠭᠡᠷᠡ ᠨᠠᠳᠠ ᠲᠠᠢ ᠲᠡᠩᠴᠡᠬᠦ ᠰᠥᠰᠥ ᠲᠡᠩᠬᠡᠭᠡ ᠲᠡᠢ ᠡᠷᠡ ᠬᠡᠨ ᠪᠠᠢᠨᠠ!》 ᠭᠡᠵᠦ ᠪᠠᠷᠳᠠᠮ ᠦᠭᠡ ᠬᠠᠶᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠡᠭᠦᠯ ᠰᠡᠭᠦᠯ ᠳ᠋ᠡᠭᠡᠨ ᠪᠦᠷ ᠴᠦ᠍ ᠠᠭᠰᠤᠮᠨᠠᠵᠤ ᠡᠬᠢᠯᠡᠪᠡ᠃ ᠪᠥᠬᠡ ᠳ᠋ᠦ᠍ ᠬᠣᠷᠣᠬᠠᠢ ᠲᠠᠢ ᠬᠥᠮᠦᠰ ᠦ᠋ᠨ ᠵᠠᠷᠢᠮ ᠨᠢ ᠮᠢᠩᠭᠠᠨ ᠸᠠᠩ ᠤ᠋ᠨ ᠠᠪᠤᠷᠭᠤ ᠶ᠋ᠢᠨ ᠬᠡ ᠲᠡᠮᠦᠷᠳ᠋ᠦ᠋ᠰᠢ ᠶᠢᠨ ᠠᠮᠠ ᠶ᠋ᠢ ᠬᠠᠷᠠᠵᠤ ᠪᠣᠷᠪᠢᠳᠠᠨ ᠳᠠᠭᠠᠨᠠ᠃
ᠬᠣᠰᠢᠭᠤ ᠨᠠᠭᠠᠳᠤᠮ ᠤ᠋ᠨ ᠨᠠᠢᠷ ᠬᠡᠳᠦᠨ ᠡᠳᠦᠷ ᠦᠷᠭᠦᠯᠵᠢᠯᠡᠨ ᠨᠣᠵᠣᠭᠣᠷᠠᠵᠤ ᠪᠠᠢᠯᠠ᠃
ᠡᠳᠦᠷ ᠦ᠋ᠨ ᠬᠤᠪᠢ ᠳ᠋ᠤ᠌ ᠨᠠᠭᠠᠳᠤᠮᠴᠢᠳ ᠮᠣᠷᠢ ᠲᠠᠯᠪᠢᠬᠤ᠂ ᠪᠥᠬᠡ ᠰᠣᠨᠢᠷᠬᠠᠬᠤ᠂ ᠰᠤᠷ ᠬᠠᠷᠪᠤᠬᠤ ᠶ᠋ᠢ ᠦᠵᠡᠬᠦ᠂ ᠮᠠᠢᠮᠠᠢ ᠱᠣᠣᠮᠠᠢ ᠳᠡᠭᠡᠷᠡ ᠵᠥᠩᠳᠡᠭᠡᠨ ᠪᠤᠵᠢᠭᠢᠨᠠᠯᠳᠤᠵᠤ᠂ ᠣᠷᠣᠢ ᠪᠦᠷᠦᠢ ᠪᠣᠯᠣᠮᠠᠭᠴᠠ《ᠭᠠᠯᠠᠭᠤᠨ ᠬᠦᠵᠦᠭᠦᠦ》 ᠮᠤᠰᠬᠢᠵᠦ ᠭᠠᠰᠢᠭᠤᠨ ᠤᠰᠤ ᠵᠠᠯᠭᠢᠯᠠᠭᠠᠳ ᠡᠨᠳᠡ ᠨᠢᠭᠡ ᠭᠠᠯ ᠲᠡᠨᠳᠡ ᠨᠢᠭᠡ ᠪᠥᠭᠡᠮ᠂ ᠮᠠᠢᠬᠠᠨ ᠴᠠᠴᠠᠷ ᠤ᠋ᠨ ᠥᠷᠥᠭᠡ ᠳᠣᠲᠣᠷᠠ ᠠ᠋ᠴᠠ ᠠᠷᠢᠬᠢ ᠳᠠᠷᠠᠰᠤ᠂ ᠥᠭᠡᠬᠦ ᠲᠣᠰᠣ᠂ ᠬᠡᠩᠰᠢᠭᠦᠦ ᠬᠢᠷᠪᠤᠰᠤ ᠡᠯᠳᠡᠪ ᠦᠨᠦᠷ ᠬᠠᠩᠬᠤᠯᠤᠨᠠ᠃ ᠬᠠᠶᠠ ᠮᠣᠩᠭᠣᠯ ᠭᠡᠷ ᠦ᠋ᠨ ᠬᠠᠶᠠᠭᠠᠨ ᠳ᠋ᠤ᠌ ᠠᠷᠢᠬᠢᠨ ᠳ᠋ᠠᠭᠠᠨ ᠮᠠᠭᠤ ᠵᠠᠩ ᠲᠠᠢ ᠰᠣᠭᠲᠣᠭᠤ ᠨᠤᠭᠤᠳ ᠤ᠋ᠨ ᠳᠡᠭᠡᠷᠡ ᠳᠣᠣᠷᠠ ᠳᠠᠭᠤᠨ ᠳᠤᠭᠤᠯᠳᠠᠨᠠ᠃ ᠲᠡᠭᠡᠬᠦ ᠳ᠋ᠦ᠍ ᠰᠣᠭᠲᠣᠭᠤ ᠳᠠᠸᠠᠨᠢᠮᠠ ᠯᠠ ᠠᠷᠢᠬᠢᠨ ᠳ᠋ᠤ᠌ ᠰᠢᠯᠲᠠᠵᠤ ᠰᠦᠷᠡᠬᠡᠢ ᠬᠣᠣᠷᠲᠠᠢ ᠭᠠᠰᠢᠭᠤᠨ ᠦᠭᠡ ᠴᠠᠴᠤᠵᠤ ᠪᠠᠢᠨᠠ᠃
《᠁ ᠡᠬᠡ ᠶ᠋ᠢ ᠶᠣᠬᠣᠭᠰᠠᠨ ᠢ᠋᠁ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠦᠷᠡ ᠦᠨᠳᠦᠰᠦ ᠨᠢ ᠲᠠᠰᠤᠷᠠᠵᠤ ᠦᠬᠦᠭᠡᠳ ᠪᠠᠷᠠᠴᠢᠬᠠᠵᠠᠢ ᠠ᠋᠂ ᠮᠠᠭᠤ ᠬᠢᠲᠠᠳ ᠤ᠋ᠨ ᠵᠤᠯᠵᠠᠭᠠ ᠶ᠋ᠢ ᠶᠡᠬᠡ ᠡᠷᠳᠡᠨᠢ ᠪᠣᠯᠭᠠᠵᠤ ᠣᠷᠣᠢ ᠳᠡᠭᠡᠷᠡ ᠪᠡᠨ ᠰᠢᠲᠦᠭᠡᠳ᠁ ᠴᠢᠭᠢᠶᠡᠲᠦᠷᠦᠦ! ᠣᠳᠣᠢ ᠶ᠋ᠢᠨ ᠴᠢᠨᠡᠭᠡᠨ ᠶᠠᠭᠤᠮᠠ ᠪᠠᠰᠠ ᠣᠷᠣᠢ ᠳᠡᠭᠡᠷᠡ ᠪᠡᠨ ᠤᠲᠤᠭᠠ ᠵᠢᠩᠰᠡ ᠭᠢᠯᠠᠯᠵᠠᠭᠤᠯᠤᠭᠰᠠᠨ ᠰᠦᠷᠡᠬᠡᠢ ᠶᠠᠭᠤᠮᠠ ᠪᠣᠯᠴᠢᠬᠠᠵᠠᠢ᠃ ᠬᠡᠩ! ᠭᠣᠷᠢ ᠪᠠᠨ ᠲᠡᠳᠡ! ᠪᠢᠳᠡᠨᠦᠰ ᠴᠢᠨᠢ ᠶᠠᠭᠤ ᠬᠢᠭᠰᠡᠨ ᠬᠥᠮᠦᠨ ᠪᠣᠢ? ᠪᠠᠭᠠ ᠬᠠᠲᠤᠨ ᠭᠡᠭᠴᠢ ᠡᠷᠭᠢᠭᠦᠳᠡᠭᠰᠡᠨ ᠲᠣᠯᠣᠭᠠᠢ! ᠸᠠᠩ ᠰᠣᠬᠣᠷ ᠤ᠋ᠨ ᠠᠷᠭᠠᠨ ᠳ᠋ᠤ᠌ ᠤᠨᠠᠭᠰᠠᠨ ᠮᠠᠭᠤ ᠥᠯᠥᠭᠴᠢᠨ ᠢ᠋᠁ ᠵᠠ᠂ ᠪᠠᠢᠵᠠ ᠳᠠ! ᠲᠡᠷᠡ ᠴᠤ᠌ ᠲᠡᠭᠦᠨ ᠦ᠌ ᠭᠠᠢ ᠪᠢᠰᠢ! ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠣᠣ ᠶ᠋ᠢᠨ ᠰᠠᠮᠠᠭᠠᠨ ᠮᠠᠨᠣᠨᠪᠠᠳᠮᠠ ᠶ᠋ᠢᠨ ᠤᠰᠤᠨ ᠭᠤᠯᠭᠤᠭᠤᠷ᠂ ᠲᠣᠰᠣᠨ ᠵᠦᠯᠭᠦᠭᠦᠷ ᠰᠢᠭ ᠤᠷᠠᠨ ᠬᠣᠩᠰᠢᠶᠠᠷ ᠲᠤ ᠬᠠᠭᠤᠷᠲᠠᠭᠰᠠᠨ ᠪᠠᠢᠯᠭᠦᠢ! ᠪᠠᠷᠤᠭ ᠤ᠋ᠨ ᠬᠥᠮᠦᠨ ᠦ᠌ ᠬᠡᠯᠡ ᠠᠮᠠ ᠲᠡᠭᠦᠨ ᠦ᠌ ᠴᠠᠭᠠᠲᠠᠢ ᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠶᠦᠮ ᠠ᠋! ᠵᠠ( ᠬᠡᠭᠡᠷ ᠮᠣᠷᠢ ᠽᠣᠤ ᠯᠢᠦ ᠮᠠ①᠂ ᠬᠡᠯᠡᠯᠴᠡᠭᠡᠳ ᠰᠠᠭᠤᠮᠠᠷ ᠮᠠᠨᠤᠨᠪᠠᠳᠮᠠ)》 ᠭᠡᠳ ᠠᠶᠠ ᠳᠠᠭᠤᠤ ᠬᠡᠩᠰᠢᠵᠦ ᠡᠷᠦᠢ ᠬᠤᠷᠤᠢ ᠦᠭᠡᠢ ᠶᠠᠭᠤᠮᠠ ᠱᠠᠯᠴᠢᠷᠠᠨ ᠡᠨᠳᠡ ᠲᠡᠨᠳᠡ ᠠᠯᠬᠤᠵᠤ ᠬᠠᠮᠢᠭᠠ ᠠᠷᠢᠬᠢ ᠤᠤᠭᠤᠭᠰᠠᠨ ᠭᠠᠵᠠᠷ ᠬᠣᠰᠢᠭᠤ ᠲᠥᠷᠥᠬᠦ ᠰᠠᠨᠠᠭᠠ ᠲᠠᠢ ᠨᠠᠢᠭᠤᠵᠤ ᠶᠠᠪᠤᠨᠠ᠃
— ᠴᠣᠭᠪᠠᠭᠠᠲᠦᠷ ᠠ᠋! ᠠ ᠪᠢᠰᠢ᠂ ᠨᠣᠶᠠᠨ ᠭᠤᠸᠠᠢ ᠠ᠋! ᠲᠠ ᠨᠢᠭᠡ ᠬᠡᠯᠡᠭᠡᠴᠢ ᠳᠡ? ᠲᠡᠢᠮᠦ ᠤᠤ? ᠦᠭᠡᠢ ᠤᠤ? ᠮᠠᠨ ᠤ᠋ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠲᠠᠢᠵᠢ ᠢᠵᠠᠭᠤᠷᠲᠠᠳ ᠦᠬᠦᠭᠡᠳ ᠪᠠᠷᠠᠴᠢᠬᠠᠵᠠᠢ᠁ ᠭᠡᠳ ᠳᠠᠸᠠᠨᠢᠮᠠ ᠴᠣᠭᠪᠠᠭᠠᠲᠦᠷ ᠦ᠋ᠨ ᠠᠷᠢᠬᠢᠳᠠᠵᠤ ᠪᠠᠢᠭᠠ ᠮᠣᠩᠭᠣᠯ ᠭᠡᠷ ᠲᠦ᠍ ᠣᠷᠣᠵᠤ ᠣᠴᠢᠨ ᠨᠣᠣᠷᠠᠯᠳᠤᠬᠤ ᠭᠡᠬᠦ ᠳ᠋ᠦ᠍᠄
— ᠡᠨᠡ ᠮᠠᠭᠤ ᠶ᠋ᠢ ᠠᠪᠠᠴᠢᠵᠤ ᠢᠰᠡᠭᠡᠢ ᠳ᠋ᠦ᠍ ᠪᠣᠭᠣᠵᠤ ᠬᠠᠶᠠ! ᠴᠢᠭᠢᠶᠡᠲᠦᠷᠦᠦ᠂ ᠳᠠᠸᠠᠨᠢᠮᠠ ᠴᠢ ᠠᠮᠠ ᠪᠠᠨ ᠣᠯᠵᠤ ᠬᠤᠴᠠᠭᠠᠷᠠᠢ! ᠭᠡᠰᠡᠨ ᠳ᠋ᠦ᠍ ᠬᠡᠳᠦᠨ ᠡᠷᠡ ᠲᠡᠭᠦᠨ ᠢ᠋ ᠢᠰᠡᠭᠡᠢ ᠳ᠋ᠦ᠍ ᠪᠣᠭᠣᠵᠤ ᠣᠷᠬᠢᠪᠠ᠃ ᠢᠰᠡᠭᠡᠢ ᠳ᠋ᠦ᠍ ᠪᠣᠭᠣᠭᠳᠠᠭᠰᠠᠨ ᠰᠣᠭᠲᠣᠭᠤ ᠳᠠᠸᠠᠨᠢᠮᠠ ᠪᠢᠲᠡᠭᠦᠬᠡᠨ ᠬᠠᠷᠢᠶᠠᠯ ᠲᠠᠯᠪᠢᠭᠰᠠᠭᠠᠷ ᠪᠥᠮᠪᠥᠷᠢᠨᠡ᠁
ᠬᠠᠷᠠ ᠬᠢᠯᠭᠠᠰᠤ ᠪᠠᠷ ᠬᠡ ᠤᠭᠠᠯᠵᠠ ᠭᠠᠷᠭᠠᠭᠰᠠᠨ ᠬᠥᠯᠲᠥᠷᠭᠡ ᠲᠡᠢ ᠨᠠᠢ᠍ᠮᠠᠨ ᠬᠠᠨᠠ ᠲᠠᠢ ᠬᠡᠭᠡᠨᠴᠢᠷ ᠮᠣᠩᠭᠣᠯ ᠭᠡᠷ ᠡᠴᠡ《ᠭᠤᠷᠪᠠᠨ ᠰᠠᠢᠬᠠᠨ ᠬᠡᠭᠡᠷ》 ᠭᠡᠬᠦ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠤᠶᠠᠩᠭᠠᠷᠠᠵᠤ ᠠᠶᠠᠲᠠᠢᠬᠠᠨ ᠰᠣᠨᠣᠰᠳᠠᠬᠤ ᠪᠠᠷ ᠨᠥᠭᠦᠭᠡ ᠬᠠᠪᠢᠷᠭᠠ ᠶ᠋ᠢᠨ ᠭᠡᠷ ᠡᠴᠡ ᠬᠥᠯᠴᠥᠭᠦᠦ ᠡᠷᠡᠰ ᠦ᠋ᠳ ᠦ᠋ᠨ ᠬᠤᠷᠤᠭᠤ ᠵᠢᠮᠡᠯᠴᠡᠬᠦ ᠳᠠᠭᠤᠨ ᠴᠢᠩᠭᠠᠷᠠᠬᠤ ᠳ᠋ᠤ᠌ ᠠ᠋ᠴᠠ ᠴᠣᠭᠪᠠᠭᠠᠲᠦᠷ ᠦ᠋ᠨ ᠳᠠᠭᠤᠨ ᠨᠣᠶᠠᠯᠠᠵᠤ᠄
《ᠪᠠᠷᠠᠭᠤᠨ ᠬᠣᠰᠢᠭᠤ ᠣᠪᠣᠭᠠᠨ ᠳᠡᠭᠡᠷᠡ
(ᠪᠠᠶᠠᠨ ᠰᠦᠮᠪᠦᠷ ᠦ᠋ᠨ ᠡᠭᠦᠳᠡᠨ ᠳᠡᠭᠡᠷᠡ)②
ᠪᠠᠶᠠᠷ ᠤ᠋ᠨ ᠨᠠᠭᠠᠳᠤᠮ ᠳᠡᠯᠭᠡᠵᠦ ᠭᠡᠨᠡ
ᠪᠠᠰᠠ ᠲᠡᠭᠦᠨ ᠢ᠋ ᠳᠠᠷᠠᠭᠠᠯᠠᠭᠠᠳ
ᠪᠠᠭᠠᠲᠤᠷ ᠵᠠᠩᠵᠤᠨ ᠰᠢᠯᠭᠠᠷᠠᠵᠤ ᠭᠡᠨᠡ
ᠳᠡᠭᠡᠭᠦᠷ ᠰᠠᠭᠠᠲᠠᠭᠰᠠᠨ ᠵᠠᠩᠵᠤᠨ ᠨᠢ
ᠳᠡᠪᠡᠯ ᠦ᠋ᠨ ᠲᠣᠷᠭᠠ ᠪᠠᠷ ᠱᠠᠩᠨᠠᠭᠤᠯᠵᠤ ᠪᠠᠢᠨᠠ
ᠳᠣᠣᠭᠤᠷ ᠰᠠᠭᠤᠭᠰᠠᠨ ᠠᠮᠪᠠᠰ ᠨᠢ
ᠳᠣᠯᠣᠭᠠᠨ ᠯᠠᠩ ᠢ᠋ᠶ᠋ᠠᠷ ᠮᠢᠯᠢᠶᠠᠯᠭᠠᠵᠤ ᠪᠠᠢᠨᠠ ᠭᠡᠳ ᠵᠢᠮᠡᠯᠴᠡᠬᠦ③ ᠣᠷᠣᠰᠢᠯ ᠤ᠋ᠨ ᠠᠶᠠ ᠡᠯᠭᠦᠭᠡᠳ ᠬᠣᠶᠠᠷ ᠡᠲᠡᠭᠡᠳ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠵᠡᠷᠭᠡ ᠪᠡᠷ᠄
ᠠ( ᠴᠣᠭᠪᠠᠭᠠᠲᠦᠷ)᠄ ᠳ᠋ᠠᠮᠪᠠᠨ ᠳᠣᠯᠣᠭᠠ(ᠲᠠᠪᠤᠨ ᠬᠤᠷᠤᠭᠤ ᠭᠠᠷᠭᠠᠵᠤ)
ᠬᠡᠨ ᠬᠡᠨ ᠳ᠋ᠡᠭᠡᠨ ᠬᠣᠨᠵᠢᠭᠳᠠᠭᠰᠠᠨ ᠦᠭᠡᠢ ᠪᠣᠯᠬᠣᠷ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠭᠠᠷᠭᠠᠭᠰᠠᠨ ᠬᠤᠷᠤᠭᠤᠨ ᠤ᠋ ᠨᠡᠢᠯᠡᠪᠦᠷᠢ ᠲᠣᠭᠠ ᠶ᠋ᠢ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠬᠢᠨ ᠵᠡᠷᠭᠡ ᠪᠡᠷ《ᠨᠠᠢ᠍ᠮᠠᠬᠠᠨ ᠪᠠᠢᠨᠠ》 ᠭᠡᠵᠦ ᠡᠪᠰᠡᠨᠡ᠃ ᠳᠠᠬᠢᠭᠠᠳ ᠪᠠᠰᠠ᠄
ᠠ᠄ ᠳᠡᠯᠭᠡᠭᠡᠳ ᠠᠷᠪᠠ(ᠲᠠᠪᠤᠨ ᠬᠤᠷᠤᠭᠤ)
ᠠ᠋᠄ ᠳᠡᠯᠭᠡᠭᠡᠳ ᠠᠷᠪᠠ(ᠭᠤᠷᠪᠠᠨ ᠬᠤᠷᠤᠭᠤ) ＞ ᠳᠤᠮᠳᠠ ᠪᠠᠨ ᠪᠠᠢᠨᠠ
ᠠ᠄ ᠳ᠋ᠠᠨᠠᠭᠠᠷ ᠵᠢᠷᠭᠤᠭᠠ(ᠭᠤᠷᠪᠠᠨ ᠬᠤᠷᠤᠭᠤ)
ᠠ᠋᠄ ᠬᠣᠣᠮᠠᠢ ᠬᠣᠶᠠᠷ(ᠬᠣᠶᠠᠷ ᠬᠤᠷᠤᠭᠤ) ＞ ᠲᠠᠪᠤᠬᠠᠨ ᠪᠠᠢᠨᠠ
ᠠ᠄ ᠭᠠᠷ ᠤ᠋ᠨ ᠭᠠᠭᠴᠠ(ᠭᠠᠭᠴᠠ ᠡᠷᠡᠬᠡᠢ)
ᠠ᠋᠄ ᠰᠡᠢᠯᠢᠭ ᠳᠥᠷᠪᠡ(ᠬᠣᠶᠠᠷ ᠬᠤᠷᠤᠭᠤ) ＞ ᠭᠤᠷᠪᠠᠬᠠᠨ ᠪᠠᠢᠨᠠ
ᠠ᠄ ᠳᠡᠭᠡᠭᠡ ᠶᠢᠰᠦ(ᠳᠥᠷᠪᠡᠨ ᠬᠤᠷᠤᠭᠤ)
ᠠ᠋᠄ ᠳ᠋ᠡᠮᠪᠡᠨ ᠳᠣᠯᠣᠭᠠ(ᠬᠣᠶᠠᠷ ᠬᠤᠷᠤᠭᠤ) ＞ ᠵᠢᠷᠭᠤᠭᠠᠬᠠᠨ ᠪᠠᠢᠨᠠ
ᠠ᠄ ᠦᠭᠡᠢ ᠪᠢᠲᠡᠭᠦᠦ(ᠬᠣᠭᠣᠰᠣᠨ ᠨᠢᠳᠤᠷᠭᠠ)
ᠠ᠋᠄ ᠭᠠᠷ ᠤ᠋ᠨ ᠭᠠᠭᠴᠠ(ᠬᠣᠭᠣᠰᠣᠨ ᠨᠢᠳᠤᠷᠭᠠ) ＞ ᠭᠡᠬᠦ ᠳ᠋ᠦ᠍ ᠴᠣᠭᠪᠠᠭᠠᠲᠦᠷ(ᠠ) ᠰᠣᠯᠣᠭᠠᠢ ᠨᠠᠮᠵᠢᠯ(ᠠ᠋) ᠶ᠋ᠢ ᠢᠯᠠᠭᠰᠠᠨ ᠳ᠋ᠠᠭᠠᠨ《ᠦᠭᠡᠢ ᠪᠢᠲᠡᠭᠦᠦ ᠲᠠᠨ ᠳᠡᠭᠡᠷᠡ ᠪᠠᠢᠨᠠ!》 ᠭᠡᠵᠦ ᠱᠦᠭᠦᠭᠴᠢ ᠶ᠋ᠢᠨ ᠬᠠᠬᠢᠷ ᠳᠠᠭᠤᠨ ᠢ᠋ᠶ᠋ᠠᠷ ᠨᠥᠭᠦᠭᠡ ᠱᠦᠭᠦᠭᠳᠡᠭᠴᠢ ᠰᠣᠯᠣᠭᠠᠢ ᠨᠠᠮᠵᠢᠯ ᠢ᠋《ᠤᠤᠭᠤ᠂ ᠤᠤᠭᠤ! ᠨᠢᠭᠡ ᠡᠪᠡᠷ④ ᠤᠤᠭᠤ!》 ᠭᠡᠵᠦ ᠠᠷᠢᠬᠢ ᠪᠠᠷ ᠱᠠᠯᠠᠨᠠ᠃
ᠨᠠᠰᠤᠨᠴᠡᠴᠡᠭ ᠮᠠᠨᠤᠬᠤᠸᠠᠷ ᠡᠭᠡᠴᠢ ᠳᠡᠭᠦᠦ ᠬᠣᠶᠠᠷ ᠴᠤ᠌ ᠴᠣᠭᠪᠠᠭᠠᠲᠦᠷ ᠦ᠋ᠨ ᠱᠦᠭᠦᠭᠰᠡᠨ ᠳ᠋ᠦ᠍《ᠨᠠᠮᠵᠢᠯ ᠭᠤᠸᠠᠢ ᠲᠠ ᠤᠤᠭᠤᠭᠠᠴᠢ ᠳᠠ!》 ᠭᠡᠵᠦ ᠬᠣᠰᠢᠭᠤ ᠨᠡᠮᠡᠷᠢᠯᠡᠨ ᠬᠢᠳ ᠬᠢᠳ᠂ ᠬᠠᠳ ᠬᠠᠳ ᠬᠠᠳᠠᠭᠠᠨᠠᠨᠠ᠃ ᠬᠡᠯᠡᠬᠦ ᠡᠴᠡ ᠮᠠᠨᠤᠬᠤᠸᠠᠷ ᠤ᠋ᠨ ᠨᠢᠳᠦ ᠬᠡᠰᠡᠭ ᠲᠡᠭᠡᠨ ᠲᠣᠭᠲᠠᠨ ᠰᠡᠳᠬᠢᠯ ᠣᠲᠣᠷᠯᠠᠵᠤ᠂ ᠰᠢᠷᠡᠭᠡᠨ ᠦ᠌ ᠨᠠᠢᠷ ᠤ᠋ᠨ ᠠᠯᠢᠨ ᠪᠣᠯᠭᠠᠨ ᠡᠭᠦᠰᠬᠦ ᠤᠳᠬᠠ ᠨᠠᠮᠪᠠᠭᠠ ᠳ᠋ᠤ᠌ ᠢᠳᠡᠪᠬᠢ ᠪᠤᠰᠤ ᠮᠥᠷᠲᠡᠭᠡᠨ ᠪᠦᠷ ᠴᠤ᠌ ᠬᠣᠢᠷᠭᠣᠰᠢᠭᠰᠠᠨ ᠢ᠋ ᠴᠣᠭᠪᠠᠭᠠᠲᠦᠷ ᠠᠵᠢᠵᠤ ᠮᠡᠳᠡᠭᠡᠳ᠄
— ᠮᠠᠨᠤᠨ ᠠ᠋! ᠶᠠᠭᠠᠬᠢᠴᠢᠬᠠᠪᠠ? ᠨᠠᠭᠠᠳᠤᠮ ᠳ᠋ᠤ᠌ ᠢᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠨᠢᠭᠡ ᠯᠡ ᠣᠨᠳᠣᠣ ᠪᠣᠯᠴᠢᠬᠠᠳᠠᠭ ᠴᠢᠨᠢ? ᠬᠠᠢᠷᠠ ᠶ᠋ᠢ ᠴᠢᠨᠢ ᠭᠡᠵᠢᠭᠡᠯᠡᠭᠰᠡᠨ ᠡᠷᠡ ᠬᠥᠮᠦᠨ ᠬᠠᠷᠠᠭᠳᠠᠭᠠ ᠤᠤ ᠴᠢᠮᠠ ᠳ᠋ᠤ᠌? ᠭᠡᠪᠡᠯ
— ᠠ! ᠠ᠁ ᠦᠭᠡᠢ ᠰᠢᠦ! ᠭᠡᠵᠦ ᠪᠠᠯᠠᠳᠠᠨ ᠴᠣᠭᠪᠠᠭᠠᠲᠦᠷ ᠢ᠋ ᠠᠯᠪᠠ ᠪᠠᠷ ᠨᠠᠯᠠᠨᠠ᠃ ᠴᠠᠭᠠᠳᠤ ᠡᠳᠦᠷ ᠦ᠋ᠨ ᠪᠤᠬᠠ ᠨᠣᠮᠣᠬᠠᠳᠬᠠᠭᠰᠠᠨ ᠪᠠ ᠪᠥᠬᠡ ᠶ᠋ᠢᠨ ᠰᠣᠷᠢᠶᠠᠨ ᠳ᠋ᠤ᠌ ᠲᠦᠷᠦᠭᠦᠦ ᠨᠠᠢ᠍ᠮᠠ ᠳ᠋ᠤ᠌ ᠣᠷᠣᠭᠰᠠᠨ ᠨᠠᠰᠤ ᠬᠤᠷᠠᠭ ᠤ᠋ᠨ ᠪᠣᠷᠣ ᠬᠦᠦ ᠶ᠋ᠢ ᠬᠠᠷᠠᠭᠠᠳ ᠬᠠᠢᠷᠠᠯᠠᠬᠤ ᠰᠡᠳᠬᠢᠯ ᠲᠥᠷᠥᠭᠳᠡᠵᠦ《ᠡᠨᠡ ᠬᠦ᠌ ᠴᠡᠪᠡᠷ ᠴᠤᠯᠭᠤᠢ ᠬᠦᠦ ᠳ᠋ᠦ᠍ ᠬᠠᠢᠷᠠᠯᠠᠭᠳᠠᠵᠤ ᠶᠠᠪᠤᠬᠤ ᠰᠢᠭ᠋ ᠵᠢᠷᠭᠠᠯ ᠥᠭᠡᠷᠡ ᠪᠠᠢᠬᠤ ᠦᠭᠡᠢ》 ᠭᠡᠵᠦ ᠰᠠᠨᠠᠭᠳᠠᠬᠤ ᠶ᠋ᠢ ᠶᠠᠭᠠᠬᠢᠨᠠ⁈ ᠪᠣᠯᠳᠠᠭ ᠰᠠᠨ ᠪᠣᠯ ᠲᠡᠷᠡ ᠪᠣᠷᠣ ᠬᠦᠦ ᠶ᠋ᠢ ᠬᠠᠷᠠᠭᠠᠳ ᠪᠠᠢᠮᠠᠷ ᠴᠤ᠌ ᠰᠢᠭ᠋ ᠲᠡᠭᠦᠨ ᠦ᠌ ᠬᠥᠯᠥᠰᠥ ᠳᠠᠭᠠᠭᠠᠪᠤᠷᠢᠯᠠᠭᠰᠠᠨ ᠭᠡᠵᠢᠭᠡᠨ ᠦ᠌ ᠬᠢᠨᠢ ᠵᠤᠩᠭᠠᠭ ᠢ᠋ ᠴᠦ᠍ ᠥᠬᠥᠭᠡᠷᠳᠡᠨ ᠪᠠᠢᠮᠠᠷ ᠪᠣᠳᠣᠭᠳᠠᠨᠠ᠃ ᠶᠠᠷᠢᠶᠠᠨ ᠦᠭᠡᠢ ᠴᠣᠭᠪᠠᠭᠠᠲᠦᠷ ᠲᠦ᠍ ᠲᠣᠨᠢᠷᠬᠠᠵᠤ ᠲᠠᠩᠳᠠ ᠡᠭᠡᠴᠢ ᠳ᠋ᠦ᠍ᠨᠢ ᠬᠠᠢᠷᠠ ᠶᠡᠭᠦᠯᠡᠭᠡᠳ ᠲᠡᠭᠦᠨ ᠢ᠋ ᠬᠠᠰᠢᠷᠠᠭᠠᠳᠠᠭ ᠲᠤᠨᠢ ᠦᠨᠡᠷᠬᠡᠭᠰᠡᠨ ᠤᠳᠬᠠ ᠴᠤ᠌ ᠪᠣᠢ᠃ ᠡᠭᠡᠴᠢ ᠥᠬᠢᠨ ᠳᠡᠭᠦᠦ ᠬᠣᠶᠠᠭᠤᠯᠠ ᠪᠠᠨ ᠨᠢᠭᠡ ᠮᠣᠳᠣᠨ ᠠ᠋ᠴᠠ ᠳᠡᠭᠦᠵᠢᠯᠡᠯᠲᠡᠢ ᠪᠢᠰᠢ᠃ ᠲᠡᠷᠡᠴᠢᠯᠡᠨ ᠴᠣᠭᠪᠠᠭᠠᠲᠦᠷ ᠠᠪᠠᠯᠢ ᠡᠬᠡᠨᠡᠷ ᠲᠡᠢ ᠳ᠋ᠡᠭᠡᠨ ᠡᠷᠬᠡ ᠰᠦᠷ ᠦ᠋ᠨ ᠬᠦᠴᠦ ᠪᠡᠷ ᠰᠤᠯᠠ ᠡᠮᠡᠰ ᠥᠬᠢᠳ ᠢ᠋ ᠱᠠᠯᠢᠨ ᠡᠵᠡᠷᠬᠡᠵᠦ ᠶᠠᠪᠤᠭᠠ ᠭᠡᠰᠡᠨ ᠢ᠋ ᠮᠠᠨᠤᠬᠤᠸᠠᠷ ᠠᠯᠢ ᠤᠵᠠᠭᠤᠷ ᠤ᠋ᠨ ᠦᠭᠡᠢ ᠮᠡᠳᠡᠭᠰᠡᠨ ᠶᠦᠮ᠃ ᠦᠨᠡᠬᠡᠷ ᠲᠠᠲᠠᠪᠤᠷᠢ ᠡᠮᠡ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠶᠠᠪᠤᠪᠠᠴᠤ ᠥᠪᠡᠷ ᠦ᠋ᠨ ᠬᠢᠨᠢ ᠪᠡᠶᠡ ᠳᠡᠭᠡᠷᠡ ᠣᠨᠣᠭᠳᠠᠬᠤ ᠦᠭᠡᠢ ᠬᠠᠶᠠᠭᠳᠠᠬᠤ ᠨᠢ ᠭᠠᠷᠴᠠᠭᠠ ᠦᠭᠡᠢ᠃ ᠵᠥᠪᠬᠡᠨ ᠪᠣᠭᠲᠣᠯᠠᠬᠤ ᠠ᠋ᠴᠠ ᠡᠮᠦᠨᠡ ᠴᠠᠭ ᠵᠠᠭᠤᠷᠠ ᠶ᠋ᠢᠨ ᠬᠠᠨᠤᠭᠠ ᠲᠠᠢᠯᠬᠤ ᠳ᠋ᠤ᠌ ᠰᠡᠳᠬᠢᠯ ᠦ᠋ᠨ ᠵᠤᠭᠠ ᠪᠣᠯᠵᠤ ᠦᠷᠡᠭᠳᠡᠭᠰᠡᠨ ᠲᠣᠭᠯᠠᠭᠠᠮ ᠲᠡᠳᠦᠢ ᠡᠴᠡ ᠳᠤᠲᠠᠭᠤᠳᠠᠬᠤ ᠶᠠᠭᠤᠮᠠ ᠦᠭᠡᠢ᠃ ᠠᠷᠭᠠ ᠴᠤ᠌ ᠦᠭᠡᠢ ᠡᠪᠦᠭᠡ ᠡᠴᠢᠭᠡ᠂ ᠡᠬᠡ ᠶ᠋ᠢᠨ ᠳᠤᠷᠠ ᠰᠣᠨᠢᠷᠬᠠᠯ ᠳ᠋ᠤ᠌ ᠵᠣᠬᠢᠴᠠᠭᠤᠯᠬᠤ ᠶ᠋ᠢ ᠰᠠᠨᠠᠵᠤ ᠴᠣᠭᠪᠠᠭᠠᠲᠦᠷ ᠦ᠋ᠨ ᠰᠠᠢᠨ ᠳᠤᠷᠠ ᠶ᠋ᠢᠨ ᠱᠠᠯᠢᠶᠠ ᠪᠣᠯᠵᠤ ᠶᠠᠪᠤᠭᠠ ᠨᠢ ᠡᠨᠡ᠃ ᠲᠡᠷᠡ ᠴᠠᠭ ᠦᠶᠡ ᠶ᠋ᠢᠨ ᠪᠣᠭᠣᠮᠠ ᠳ᠋ᠤ᠌ ᠲᠡᠭᠦᠨ ᠦ᠌ ᠠᠷᠭᠠᠨ ᠳ᠋ᠤ᠌ ᠠᠷᠭᠠᠮᠵᠢᠭᠳᠠᠭᠰᠠᠨ ᠪᠠᠢᠳᠠᠰᠤ ᠰᠢᠭ᠋ ᠢᠵᠢᠯᠢ ᠰᠦᠷᠦᠭ ᠲᠡᠭᠡᠨ ᠢᠵᠢᠯᠢᠰᠢᠨ ᠬᠣᠯᠠᠳᠴᠤ ᠴᠤ᠌ ᠳᠡᠢᠯᠬᠦ ᠦᠭᠡᠢ᠂ ᠥᠪᠡᠷ ᠦ᠋ᠨ ᠬᠢᠨᠢ ᠪᠡᠶᠡ ᠳ᠋ᠦ᠍ ᠠᠮᠠᠷᠠᠭᠯᠠᠨ ᠣᠢᠷᠠᠳᠵᠤ ᠴᠤ᠌ ᠴᠢᠳᠠᠬᠤ ᠦᠭᠡᠢ ᠪᠠᠷᠠᠳᠠᠳᠠᠭ ᠬᠣᠢᠨᠠ ᠳᠠ!
— ᠵᠠ ᠬᠦ᠂ ᠮᠢᠨᠦ ᠮᠠᠨᠤᠨ ᠨᠢᠭᠡ ᠳᠠᠭᠤᠯᠠᠭᠠᠴᠢ ᠳᠠ! ᠰᠠᠢᠬᠠᠨ ᠳᠠᠭᠤᠯᠠᠨᠠ ᠰᠢᠦ! ᠭᠡᠬᠦ ᠳ᠋ᠦ᠍ ᠮᠠᠨᠤᠬᠤᠸᠠᠷ ᠪᠢᠰᠢᠭᠦᠷᠬᠡᠨ ᠴᠢᠷᠠᠢ ᠨᠢ ᠤᠯᠠᠢᠨ᠂ ᠳᠤᠷᠠ ᠦᠭᠡᠢ ᠪᠣᠯᠪᠠᠴᠤ ᠳᠠᠭᠤᠯᠠᠬᠤ ᠶᠤᠮ ᠪᠣᠯᠪᠠ᠃ ᠡᠨᠡ ᠡᠷᠡ ᠶ᠋ᠢᠨ ᠰᠠᠨᠠᠭᠠ ᠪᠠᠷ ᠶᠠᠪᠤᠬᠤ ᠦᠭᠡᠢ ᠪᠣᠯ ᠬᠦᠯᠴᠦᠭᠦᠷᠡᠮᠡᠭ ᠲᠡᠭᠡᠨ ᠰᠢᠯᠲᠠᠵᠤ ᠠᠬᠤᠷ ᠫᠤᠤ ᠪᠠᠨ ᠰᠤᠭᠤᠯᠬᠤ ᠳ᠋ᠤ᠌ ᠴᠤ᠌ ᠪᠡᠯᠡᠬᠡᠨ ᠪᠠᠢᠳᠠᠭ ᠵᠠᠩ ᠢ᠋ ᠰᠠᠢᠨ ᠮᠡᠳᠡᠳᠡᠭ ᠦ᠋ᠨ ᠬᠤᠪᠢ ᠳ᠋ᠤ᠌ ᠮᠠᠨᠤᠬᠤᠸᠠᠷ ᠠᠶᠠ ᠡᠯᠭᠦᠨ᠄
ᠠᠭᠠᠷᠤ ᠨᠢ ᠬᠠᠮᠢᠭᠠ ᠪᠠᠨ ᠪᠠᠢᠪᠠᠯ
ᠠᠷᠴᠠ ᠨᠢ ᠲᠡᠭᠦᠨ ᠳᠡᠭᠡᠷᠡ ᠪᠡᠨ
ᠠᠮᠠᠷᠠᠭ ᠨᠢ ᠬᠠᠮᠢᠭᠠ ᠪᠠᠨ ᠪᠠᠢᠪᠠᠯ
ᠰᠡᠳᠬᠢᠯ ᠨᠢ ᠲᠡᠭᠦᠨ ᠳᠡᠭᠡᠷᠡ ᠪᠡᠨ
ᠬᠠᠳᠠ ᠨᠢ ᠬᠠᠮᠢᠭᠠ ᠪᠠᠨ ᠪᠠᠢᠪᠠᠯ
ᠬᠠᠢᠯᠠᠰᠤ ᠨᠢ ᠲᠡᠭᠦᠨ ᠳᠡᠭᠡᠷᠡ ᠪᠡᠨ
ᠬᠠᠢᠷᠠᠲᠤ ᠨᠢ ᠬᠠᠮᠢᠭᠠ ᠪᠠᠨ ᠪᠠᠢᠪᠠᠯ
ᠬᠠᠢᠷᠠ ᠨᠢ ᠲᠡᠭᠦᠨ ᠳᠡᠭᠡᠷᠡ ᠪᠡᠨ ᠁
ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠬᠠᠯᠢᠭᠠᠳ ᠨᠢᠰᠬᠦ
ᠵᠢᠭᠦᠷ ᠲᠡᠢ ᠴᠤ᠌ ᠪᠣᠯᠤᠶᠠ ᠳᠠ
ᠳᠡᠷᠭᠡᠳᠡ ᠴᠢᠨᠢ ᠰᠠᠭᠤᠭᠠᠳ ᠪᠠᠢᠬᠤ
ᠢᠷᠦᠭᠡᠯ ᠲᠡᠢ ᠴᠤ᠌ ᠪᠣᠯᠤᠶᠠ ᠳᠠ ᠭᠡᠵᠦ ᠤᠶᠠᠬᠠᠨ ᠠᠪᠢᠶᠠᠰᠯᠢᠭ ᠳᠠᠭᠤᠯᠠᠬᠤ ᠨᠢ ᠪᠦᠭᠦᠳᠡ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠲᠠᠭᠠᠯᠠᠭᠳᠠᠵᠤ ᠪᠠᠢᠯᠠ᠃
ᠳᠠᠬᠢᠭᠠᠳ ᠨᠢᠭᠡ ᠨᠢ《ᠪᠣᠷᠣᠩ ᠬᠠᠨ ᠤ᠋ ᠪᠤᠷᠭᠠᠰᠤ》 ᠶ᠋ᠢ ᠰᠢᠷᠤᠩᠬᠠᠢᠯᠠᠨ ᠡᠯᠭᠦᠵᠦ ᠠᠪᠤᠯᠠ᠃
ᠨᠠᠩᠴᠢᠳ ᠲᠤ ᠬᠥᠯᠴᠥᠭᠦᠷᠡᠭᠰᠡᠨ ᠬᠥᠮᠦᠰ ᠦ᠋ᠨ ᠨᠢᠭᠡ ᠨᠢ ᠳᠠᠭᠤᠤ ᠡᠬᠢᠯᠡᠭᠦᠯᠪᠡᠯ ᠵᠠᠬᠠᠯᠠᠭᠤᠯᠤᠭᠠᠳ ᠠᠶᠠ ᠲᠦᠷᠡᠵᠦ ᠪᠠᠢᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ