ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠦᠲᠦᠭᠡᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠲᠠᠪᠤ> Хан мунын сүүрс < доорд > – Мөнх зохиоов ᠂Дөдгөөр бодь – Нэгдүгээр бүлэг <5>
212ᠲᠦᠲᠦᠭᠡᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠲᠠᠪᠤ>
ᠲᠠᠪᠤ
ᠤᠷᠠᠳ ᠨᠤᠲᠤᠭ ᠤ᠋ᠨ ᠡᠪᠦᠯ ᠰᠦᠷᠡᠬᠡᠢ ᠬᠠᠬᠢᠷ ᠴᠡᠪᠳᠡᠭ ᠪᠣᠯᠪᠠᠴᠤ ᠦᠭᠦᠴᠡ ᠢᠳᠡᠰᠢ ᠪᠡᠨ ᠪᠠᠭᠤᠯᠭᠠᠭᠰᠠᠨ ᠠᠢᠯ ᠤ᠋ᠨ ᠬᠠᠶᠠᠭᠠ ᠨᠦᠮᠵᠦᠭ ᠲᠠᠷᠭᠤᠨ᠂ ᠠᠭᠠᠷᠤᠨ ᠬᠣᠵᠤᠤᠯᠠ ᠪᠠ ᠰᠢᠷᠠ ᠬᠠᠢᠯᠠᠰᠤᠨ ᠤ᠋ ᠴᠤᠯᠭᠤᠢ ᠦᠨᠦᠷ ᠲᠦ᠍ ᠱᠥᠯᠥ ᠲᠣᠰᠣᠨ ᠤ᠋ ᠬᠠᠨᠳᠠ ᠦᠨᠦᠷ ᠨᠠᠢᠷᠠᠮᠵᠢ ᠲᠠᠢ ᠨᠡᠢᠯᠡᠵᠦ ᠡᠲᠡᠭᠡᠳ ᠬᠠᠩᠬᠤᠯᠤᠭᠤᠨ ᠳᠤᠯᠠᠭᠠᠨ ᠠᠵᠢ᠃ ᠰᠤᠪᠤᠷᠭᠠᠨ ᠣᠷᠣᠢ ᠲᠠᠢ ᠱᠣᠪᠣᠭᠣᠷ ᠱᠣᠪᠣᠭᠣᠷ ᠠᠷᠴᠠ ᠮᠣᠳᠣᠳ ᠴᠠᠰᠤᠨ ᠳ᠋ᠤ᠌ ᠬᠤᠴᠢᠭᠳᠠᠵᠤ ᠭᠡᠨᠡᠠᠳᠲᠠ ᠬᠠᠷᠠᠬᠤᠯᠠ ᠴᠠᠭᠠᠨ ᠬᠤᠷᠠᠭᠠᠨ ᠮᠠᠯᠠᠭᠠᠢ ᠲᠠᠢ ᠬᠡᠦᠬᠡᠨ ᠰᠢᠭ ᠮᠢᠰᠢᠶᠡᠩᠬᠡᠨ ᠨᠠᠢᠭᠤᠬᠤ ᠮᠡᠲᠦ᠃
ᠡᠨᠡ ᠡᠳᠦᠷ ᠲᠡᠭᠷᠢ ᠶ᠋ᠢᠨ ᠴᠢᠷᠠᠢ ᠨᠡᠳᠦᠢᠨ ᠪᠠᠷᠤᠢᠵᠤ ᠡᠭᠦᠯᠡ ᠠᠭᠤᠯᠠ ᠶ᠋ᠢᠨ ᠲᠤᠯᠤᠭᠠᠳ ᠢ᠋ ᠪᠣᠭᠣᠭᠠᠳ ᠦᠳᠡ ᠬᠡᠯᠪᠡᠢᠪᠡ ᠤᠣ ᠦᠭᠡᠢ ᠤᠤ ᠬᠣᠢᠨᠠ ᠠ᠋ᠴᠠ ᠪᠤᠳᠠᠭᠠᠨ ᠴᠠᠰᠤ ᠬᠠᠶᠠᠯᠠᠪᠠ᠃
ᠡᠨᠡ ᠬᠦ᠌ ᠪᠤᠳᠠᠩ ᠲᠠᠢ ᠡᠳᠦᠷ ᠦ᠋ᠨ ᠪᠤᠳᠠᠭᠠᠨ ᠴᠠᠰᠤ ᠨᠥᠮᠥᠷᠦᠭᠰᠡᠭᠡᠷ ᠬᠡᠳᠦᠨ ᠪᠠᠷᠠᠭᠠᠨ ᠮᠣᠷᠢ ᠲᠠᠢ ᠬᠥᠮᠦᠨ ᠡᠯᠳᠡᠩᠭᠡ ᠶ᠋ᠢᠨ ᠤᠶᠠᠭᠠᠨ ᠳᠡᠭᠡᠷᠡ ᠪᠠᠭᠤᠪᠠ᠃ ᠢᠷᠡᠭᠰᠡᠨ ᠬᠥᠮᠦᠰ ᠪᠣᠯ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ᠂ ᠬᠦᠦ ᠨᠢ ᠴᠤᠬᠠᠪᠠᠭᠠᠲᠤᠷ᠂ ᠬᠥᠩᠬᠥᠷ ᠵᠠᠮᠪᠠᠯ᠂ ᠰᠣᠯᠣᠭᠠᠢ ᠨᠠᠮᠵᠢᠯ ᠵᠡᠷᠭᠡ ᠪᠠᠢᠯᠠ ᠁
— ᠲᠠ ᠰᠠᠢᠨ ᠪᠠᠢᠨᠠ ᠦᠤ ? ᠰᠠᠢᠬᠠᠨ ᠥᠶᠥᠭ ᠡᠪᠦᠯᠵᠢᠵᠦ ᠪᠠᠢᠨᠠ ᠦᠤ ? ᠭᠡᠵᠦ ᠮᠠᠨᠤᠨᠪᠡᠳᠮᠡ ᠰᠥᠬᠥᠷᠡᠩᠬᠡᠨ ᠮᠡᠨᠳᠦ ᠪᠠᠷᠢᠪᠠᠯ ᠡᠯᠳᠡᠩᠭᠡ ᠰᠠᠨᠳᠤᠷᠴᠤ ᠲᠡᠭᠦᠨ ᠢ ᠳᠥᠰᠢᠨ᠄
— ᠰᠠᠢᠨ᠂ ᠰᠠᠢᠨ ! ᠲᠠ ᠨᠠᠷ ᠠᠶᠠᠨ ᠵᠠᠮ ᠳ᠋ᠠᠭᠠᠨ ᠮᠡᠨᠳᠦ ᠰᠠᠢᠨ ᠶᠠᠪᠤᠵᠤ ᠢᠷᠡᠪᠡ ᠤᠤ ? ᠭᠡᠯᠡ᠃
— ᠶᠠᠭᠠᠬᠢᠬᠤ ᠪᠣᠢ᠂ ᠶᠠᠭᠠᠬᠢᠬᠤ ᠪᠣᠢ! ᠳᠠᠩ ᠳ᠋ᠤᠩ ᠲᠠᠢ ᠶᠠᠪᠤᠭᠠ ᠁
— ᠵᠠᠮ ᠳ᠋ᠠᠭᠠᠨ ᠵᠦᠳᠡᠷᠡᠪᠡ ᠤᠤ ? ᠭᠠᠢᠭᠤᠢ᠂ ᠭᠠᠢᠭᠤᠢ ! ᠭᠡᠵᠦ ᠮᠣᠩᠭᠣᠯ ᠶᠣᠰᠣ ᠪᠠᠷ ᠮᠡᠨᠳᠦ ᠰᠠᠢᠨ ᠢ᠋ᠶ᠋ᠠᠨ ᠠᠰᠠᠭᠤᠯᠴᠠᠵᠤ᠂ ᠮᠠᠯᠠᠭᠠᠢ᠂ ᠲᠡᠷᠯᠢᠭ ᠦ᠋ᠨ ᠮᠥᠷᠦᠨ ᠳᠡᠭᠡᠷᠡᠬᠢ ᠴᠠᠰᠤ ᠪᠠᠨ ᠭᠦᠪᠢᠵᠦ᠂ ᠬᠥᠯ ᠢ᠋ᠶ᠋ᠡᠨ ᠳᠡᠪᠰᠡᠨ ᠭᠤᠲᠤᠯ ᠤ᠋ᠨ ᠤᠯᠠ ᠳ᠋ᠤ᠌ ᠨᠠᠭᠠᠯᠳᠤᠭᠰᠠᠨ ᠴᠠᠰᠤ ᠯᠠᠭ ᠢ᠋ᠶ᠋ᠠᠨ ᠴᠡᠪᠡᠷᠯᠡᠬᠦᠢᠴᠡ ᠪᠣᠯᠤᠭᠠᠳ ᠭᠡᠷ ᠲᠦ᠍ ᠣᠷᠣᠵᠠᠭᠠᠪᠠ᠃
ᠡᠯᠳᠡᠩᠭᠡ ᠶ᠋ᠢᠨ ᠠᠵᠢᠭᠴᠢ ᠨᠢᠳᠦ ᠮᠠᠨᠤᠨᠪᠠᠳᠮᠡ ᠶ᠋ᠢᠨ ᠴᠢᠷᠠᠢ ᠨᠢ ᠥᠭᠡᠳᠡ ᠦᠭᠡᠢ᠂ ᠭᠡᠷᠡᠯ ᠨᠢ ᠬᠠᠷᠢᠭᠠ ᠨᠢᠳᠦᠨ ᠦ᠌ ᠬᠢᠨᠢ ᠬᠠᠷᠠᠴᠠᠨ ᠳ᠋ᠤ᠌ ᠶᠠᠮᠠᠷ ᠨᠢᠭᠡᠨ ᠭᠣᠮᠣᠳᠠᠯ ᠬᠠᠷᠠᠰᠠᠯ ᠨᠢᠭᠤᠭᠳᠠᠨ ᠪᠠᠢᠭᠠ ᠶ᠋ᠢ ᠣᠯᠵᠤ ᠬᠠᠷᠠᠭᠰᠠᠨ ᠳ᠋ᠠᠭᠠᠨ 《ᠢᠷᠡᠭᠰᠡᠨ ᠬᠥᠮᠦᠨ ᠤᠴᠢᠷ ᠲᠠᠢ᠂ ᠢᠨᠢᠶᠡᠭᠰᠡᠨ ᠬᠥᠮᠦᠨ ᠬᠡᠮ ᠲᠡᠢ》 ᠭᠡᠳᠡᠭ ᠢ᠋ᠶ᠋ᠡᠷ ᠵᠠᠯᠠᠭᠠᠳ ᠣᠯᠳᠠᠳᠠᠭ ᠦᠭᠡᠢ ᠵᠣᠴᠢᠨ ᠵᠠᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠠᠯᠠᠷᠠᠭᠠᠳ ᠢᠷᠡᠳᠡᠭ ᠨᠢ ᠯᠠᠪ ᠯᠠ ᠨᠢᠭᠡ ᠴᠢᠬᠤᠯᠠ ᠤᠴᠢᠷ ᠪᠣᠢ ᠭᠡᠵᠦ ᠪᠣᠳᠣᠨ ᠭᠡᠷ ᠦ᠋ᠨ ᠵᠠᠷᠤᠴᠠ ᠬᠥᠮᠦᠰ ᠲᠡᠭᠡᠨ《ᠲᠠ ᠨᠠᠷ ᠪᠤᠰᠢᠭᠤᠬᠠᠨ ᠴᠠᠢ ᠴᠤᠤ ᠠᠶᠠᠭᠠᠯᠠᠨ᠂ ᠪᠤᠳᠠᠭᠠ ᠲᠠᠷᠢᠶᠠ ᠪᠡᠯᠡᠳᠭᠡ》 ᠭᠡᠵᠦ ᠵᠠᠬᠢᠬᠤ ᠶ᠋ᠢᠨ ᠳᠠᠭᠠᠤ ᠭᠠᠯ ᠲᠣᠭᠣᠭᠠᠨ ᠤ᠋ ᠬᠥᠮᠦᠨ ᠳ᠋ᠡᠭᠡᠨ《ᠣᠷᠣᠢ ᠨᠠᠢᠷ ᠲᠠᠯᠪᠢᠨᠠ᠂ ᠤᠭᠤᠴᠠ ᠪᠣᠷᠣᠯᠠᠭᠤᠯᠵᠤ ᠪᠠᠢᠭᠠᠷᠠᠢ》 ᠭᠡᠴᠢᠬᠡᠭᠡᠳ ᠬᠤᠯᠤᠰᠤᠲᠠᠢ ᠤᠷᠤᠭᠤ ᠬᠥᠮᠦᠨ ᠭᠦᠶᠦᠯᠭᠡᠵᠦ ᠵᠤᠳᠪᠠ ᠶ᠋ᠢ ᠳᠠᠭᠤᠳᠠᠭᠤᠯᠪᠠ᠃
ᠮᠠᠨᠤᠨᠪᠠᠳᠮᠡ ᠬᠥᠭᠰᠢᠨ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠪᠣᠱᠣᠭᠠ ᠶ᠋ᠢ ᠠᠯᠬᠤᠨ ᠪᠠᠭᠠ ᠬᠠᠲᠤᠨ ᠲᠠᠢ ᠠᠭᠤᠯᠵᠠᠷᠠ ᠣᠴᠢᠭᠠᠳ ᠰᠠᠨᠠᠭᠠᠨ ᠳ᠋ᠠᠭᠠᠨ ᠬᠦᠷᠦᠭᠰᠡᠨ ᠦᠭᠡᠢ ᠳ᠋ᠡᠭᠡᠨ ᠤᠴᠠᠭᠠᠷ ᠭᠣᠮᠣᠳᠠᠯ ᠭᠠᠨᠵᠤᠭᠠᠯᠠᠵᠤ ᠶᠠᠪᠤᠭᠠ ᠨᠢ ᠡᠨᠡ ᠪᠠᠢᠵᠠᠢ᠃
ᠤᠤᠯ ᠨᠢ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠮᠠᠨᠤᠨᠪᠡᠳᠮᠠ ᠶ᠋ᠢᠨ ᠠᠮᠠ ᠶ᠋ᠢ ᠪᠥᠭᠯᠡᠨ ᠰᠠᠨᠠᠭᠠ ᠶ᠋ᠢ ᠨᠢ ᠬᠠᠭᠤᠷᠴᠤ 《ᠠᠭᠠᠵᠢᠮ ᠳ᠋ᠠᠭᠠᠨ ᠪᠣᠯᠤᠶᠠ ᠪᠢᠲᠡᠭᠡᠢ ᠰᠠᠨᠳᠤᠷ!》 ᠭᠡᠳ ᠶᠠᠪᠤᠳᠠᠯ ᠤᠴᠢᠷ ᠣᠷᠣᠭᠰᠢ ᠦᠭᠡᠢ ᠪᠠᠢᠭᠠ ᠳ᠋ᠤ᠌ ᠨᠢᠭᠡ ᠲᠠᠯᠠ ᠪᠠᠷ ᠬᠦᠦ ᠴᠣᠭᠪᠠᠭᠠᠲᠤᠷ ᠤ᠋ᠨ ᠢ᠋ᠶ᠋ᠠᠨ ᠭᠤᠩᠰᠢᠯᠲᠠ ᠶ᠋ᠢ ᠬᠦᠯᠢᠴᠡᠵᠦ ᠴᠢᠳᠠᠬᠤ ᠦᠭᠡᠢ᠂ ᠪᠠᠭᠠ ᠬᠠᠲᠤᠨ ᠳ᠋ᠤ᠌ ᠪᠡᠯᠡᠭ ᠪᠠᠷᠢᠴᠠ ᠡᠷᠭᠦᠬᠦ ᠦᠭᠡᠢ ᠪᠣᠯ 《ᠪᠤᠷᠬᠠᠨ ᠰᠡᠳᠬᠢᠯ》ᠢ᠋ᠶ᠋ᠡᠨ ᠪᠠᠭᠤᠯᠭᠠᠬᠤ ᠦᠭᠡᠢ ᠶᠦ᠍ᠮ ᠪᠠᠢᠨᠠ ᠭᠡᠵᠦ ᠲᠠᠪᠢᠨ ᠯᠠᠩ ᠤ᠋ᠨ ᠶᠤᠸᠠᠮᠪᠤᠤ᠂ ᠡᠳᠦᠢ ᠲᠡᠳᠦᠢ ᠴᠠᠭᠠᠨ ᠵᠣᠭᠣᠰ᠂ ᠲᠦᠭᠦᠬᠡᠢ ᠬᠠᠷᠠ ᠲᠠᠮᠠᠬᠢ᠂ ᠬᠣᠶᠠᠷ ᠰᠠᠢᠨ ᠵᠢᠷᠣᠭᠠ ᠮᠣᠷᠢ᠂ ᠲᠤᠭᠤᠯ ᠲᠠᠢ ᠦᠨᠢᠶᠡ᠂ ᠪᠠᠰᠠ ᠲᠦᠰᠢᠯᠭᠡ ᠶ᠋ᠢᠨ ᠬᠡᠪᠢᠰ᠂ ᠬᠤᠪᠴᠠᠰᠤᠨ ᠤ᠋ ᠪᠥᠰ ᠲᠣᠷᠭᠠ᠂ ᠪᠤᠭᠤᠲᠤ ᠶ᠋ᠢᠨ ᠨᠠᠷᠢᠨ ᠪᠣᠭᠣᠷᠰᠣᠭ᠂ ᠬᠡᠪ ᠦ᠋ᠨ ᠴᠠᠢ ᠵᠡᠷᠭᠡ ᠠᠮᠲᠠᠲᠤ ᠢᠳᠡᠭᠡᠨ ᠦ᠌ ᠵᠦᠢᠯ ᠠᠪᠴᠤ ᠬᠦᠩ ᠦ᠋ᠨ ᠶᠠᠮᠤᠨ ᠤ᠋ ᠡᠭᠦᠳᠡ ᠪᠡᠷ ᠵᠣᠷᠢᠭᠲᠠᠢᠬᠠᠨ ᠣᠷᠣᠵᠤ ᠣᠴᠢᠨ ᠲᠡᠭᠦᠨ ᠳ᠋ᠦ᠍ ᠠᠪᠠᠴᠢᠭᠰᠠᠨ ᠪᠡᠯᠡᠭ ᠢ᠋ᠶ᠋ᠡᠨ ᠬᠦᠷᠭᠡᠪᠡ᠃
ᠢᠩᠭᠢᠳᠡᠭ ᠦ᠋ᠨ ᠵᠣᠷᠢᠯᠭᠠ ᠨᠢ ᠭᠠᠭᠴᠠᠬᠠᠨ᠂ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠦ᠋ᠨ ᠪᠡᠶᠡ ᠰᠡᠳᠬᠢᠯ ᠢ᠋ ᠲᠣᠬᠣᠨᠢᠭᠤᠯᠬᠤ ᠶ᠋ᠢᠨ ᠬᠠᠮᠲᠤ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠴᠠᠭᠠᠯᠠᠬᠤ ᠡᠳ᠋ ᠪᠠᠷᠠᠭᠠ ᠶ᠋ᠢ ᠥᠩᠭᠡᠯᠡᠨ ᠨᠡᠮᠡᠷᠢᠯᠡᠭᠰᠡᠨ ᠲᠡᠳᠦᠢ ᠭᠡᠵᠦ ᠨᠡᠷᠡ ᠵᠢᠭᠠᠭᠠᠳ᠂ ᠪᠠᠭᠠ ᠬᠠᠲᠤᠨ ᠤ᠋ ᠰᠠᠢᠷᠬᠠᠯ ᠢ᠋ ᠣᠯᠵᠤ᠂ ᠴᠣᠭᠪᠠᠭᠠᠲᠤᠷ ᠪᠣᠷᠣ ᠴᠡᠷᠢᠭ ᠲᠡᠢ ᠲᠤᠯᠤᠯᠳᠤᠬᠤ ᠠ᠋ᠴᠠ ᠡᠮᠢᠶᠡᠵᠦ ᠲᠡᠢᠨ ᠦ᠌ ᠲᠠᠯᠠᠪᠤᠷ ᠠ᠋ᠴᠠ ᠵᠢᠭᠤᠲᠠᠨ᠂ ᠵᠠᠮ ᠳ᠋ᠠᠭᠠᠨ ᠪᠠᠰᠠ ᠬᠠᠷᠠ ᠴᠡᠷᠢᠭ ᠦ᠋ᠨ ᠫᠤᠤ ᠵᠡᠪᠰᠡᠭ ᠢ᠋ ᠮᠤᠰᠬᠢᠯᠡ ᠭᠡᠰᠡᠨ ᠬᠢᠯᠢᠰ ᠠᠨᠳᠠᠭᠤᠷᠠᠯ ᠢ᠋ ᠠᠯᠳᠠᠷᠠᠭᠠᠵᠤ᠂ ᠬᠥᠪᠡᠭᠦᠨ ᠢ᠋ ᠪᠡᠨ ᠴᠠᠭᠠᠳᠬᠠᠵᠤ᠂ ᠬᠥᠨᠳᠦᠯᠡᠨ ᠬᠡᠷᠡᠭᠯᠡᠬᠦ ᠪᠣᠯᠪᠠ ᠤᠤ ᠭᠡᠵᠦ ᠴᠢᠷᠠᠢᠴᠢᠯᠠᠨ ᠥᠴᠢᠪᠡ᠃ ᠡᠭᠦᠨ ᠦ᠌ ᠳᠠᠭᠠᠤ ᠳ᠋ᠠᠭᠠᠨ ᠴᠣᠭᠪᠠᠭᠠᠲᠤᠷ ᠴᠤ᠌ ᠭᠠᠪᠢᠶᠠᠲᠤ ᠡᠬᠡ ᠶ᠋ᠢᠨ ᠶᠡᠬᠡ ᠨᠥᠮᠥᠷᠢ ᠳ᠋ᠦ᠍ ᠪᠡᠷᠲᠡᠵᠦ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠳ᠋ᠦ᠍ ᠬᠡᠰᠢᠭᠲᠡᠢ ᠶ᠋ᠢᠨ ᠴᠡᠷᠢᠭ ᠪᠣᠷᠣ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠲᠤᠯᠵᠤ ᠪᠠᠢᠯᠳᠤᠭᠰᠠᠨ ᠦᠭᠡᠢ ᠮᠥᠷᠲᠡᠭᠡᠨ ᠲᠡᠢᠨ ᠦ᠌ ᠲᠠᠯᠠᠪᠤᠷ ᠠ᠋ᠴᠠ ᠤᠷᠭᠤᠵᠤ ᠠᠭᠤᠯᠠ ᠶ᠋ᠢᠨ ᠠᠷᠤ ᠪᠠᠷ ᠡᠢᠨ ᠲᠡᠢᠨ ᠬᠡᠷᠡᠭ ᠦᠢᠯᠡᠳᠴᠡᠢ ᠭᠡᠵᠦ ᠬᠡᠰᠢᠭᠲᠡᠢ ᠳ᠋ᠦ᠍ ᠶᠠᠯᠠ ᠨᠥᠮᠥᠷᠭᠡᠨ ᠬᠡᠯᠡᠪᠡ ᠁
ᠴᠣᠭᠪᠠᠭᠠᠲᠤᠷ ᠪᠣᠳᠣᠭᠰᠠᠨ ᠰᠠᠨᠠᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡ ᠯᠡ ᠠᠮᠢᠰᠬᠤᠭᠠ ᠪᠠᠷ ᠭᠦᠪᠢᠴᠢᠬᠡᠭᠡᠳ ᠳᠣᠲᠣᠷᠠ ᠨᠢ ᠠᠭᠤᠵᠢᠷᠠᠨ ᠰᠡᠭᠰᠡᠯᠵᠡᠵᠦ᠂ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠦ᠋ᠨ ᠠᠮᠠᠨ ᠠ᠋ᠴᠠ 《ᠤᠤᠬᠠᠢ ᠳᠠ᠂ ᠡᠨᠡ ᠰᠠᠶᠢ ᠬᠡᠯᠡᠭᠰᠡᠨ ᠳ᠋ᠡᠭᠡᠨ ᠬᠦᠷᠳᠡᠭ ᠡᠷᠡ ᠬᠥᠮᠦᠨ ᠪᠠᠢᠨᠠ᠃ ᠵᠠ᠂ ᠴᠢᠮᠠ ᠳ᠋ᠤ᠌ ᠪᠠᠰᠠ ᠨᠢᠭᠡ ᠳᠡᠰ ᠵᠡᠷᠭᠡ ᠥᠰᠬᠡᠶᠡ !》ᠭᠡᠬᠦ ᠡᠨᠡᠷᠢᠭᠰᠡᠨ ᠦᠭᠡ ᠱᠠᠩᠨᠠᠬᠤ ᠶ᠋ᠢ ᠬᠦᠯᠢᠶᠡᠵᠦ ᠰᠠᠭᠤᠭᠰᠠᠨ ᠨᠢ ᠱᠠᠯ ᠪᠤᠷᠤᠭᠤ ᠪᠣᠳᠣᠵᠠᠢ᠃
ᠪᠠᠭᠠ ᠬᠠᠲᠤᠨ ᠴᠣᠭᠪᠠᠭᠠᠲᠤᠷ ᠤ᠋ᠨ ᠠᠮᠠᠨ ᠠ᠋ᠴᠠ ᠠᠩᠴᠢᠨᠵᠠᠪ ᠢ᠋ ᠨᠢ ᠮᠠᠭᠤᠯᠠᠵᠤ ᠨᠢᠭᠡ ᠶ᠋ᠢ ᠪᠡᠨ ᠶᠡᠭᠦᠳᠬᠡᠵᠦ ᠮᠥᠷᠦᠨ ᠳᠡᠭᠡᠷᠡ ᠨᠢ ᠭᠢᠰᠬᠢᠭᠡᠳ ᠳᠡᠭᠡᠭᠰᠢ ᠮᠠᠴᠤᠬᠤ ᠭᠡᠰᠡᠨ ᠵᠠᠯᠢᠲᠠᠢ ᠤᠬᠠᠭᠠᠨ ᠢ᠋ ᠨᠢ ᠨᠡᠪᠲᠡ ᠦᠵᠡᠵᠦ ᠭᠠᠷᠤᠨ ᠳᠣᠲᠣᠷᠠ ᠪᠠᠨ ᠡᠭᠳᠡᠭᠦᠦ ᠨᠢ ᠬᠦᠷᠴᠦ᠄
— ᠦᠷᠢᠰᠤᠭᠡᠨ ᠦ᠌ ᠨᠢᠭᠡ ᠰᠠᠢᠨ ᠡᠷᠡ ᠶ᠋ᠢ ᠭᠠᠳᠠᠭᠤᠷᠴᠢᠯᠠᠵᠤ ᠦᠭᠡᠢ ᠬᠢᠬᠦ ᠳ᠋ᠡᠭᠡᠨ ᠴᠢᠨᠦ ᠲᠠᠪᠠ ᠴᠢᠨᠢ ᠬᠠᠨᠵᠤ ᠪᠠᠬᠠ ᠴᠢᠨᠢ ᠣᠩᠭᠣᠢᠭᠰᠠᠨ ᠪᠠᠢᠬᠠ ᠳᠠ ! ᠬᠥᠯ ᠳᠦ ᠴᠢᠨᠢ ᠬᠥᠨᠳᠡᠯᠡᠨ ᠬᠥᠰᠢᠶᠡᠰᠦ ᠪᠣᠯᠵᠤ ᠪᠠᠢᠪᠠᠯ ᠨᠢᠭᠡ ᠲᠠᠢᠰᠢ ᠨᠢ ᠬᠠᠨᠳᠤᠭᠤᠯᠴᠢᠬᠠᠪᠠᠯ ᠴᠢᠨᠦ ᠳᠡᠭᠡᠭᠰᠢ ᠮᠠᠨᠳᠤᠬᠤ ᠵᠠᠮ ᠰᠢᠯᠤᠭᠤᠬᠠᠨ ᠪᠣᠯᠬᠤ ᠪᠠᠢᠯᠭᠦᠢ ! ᠭᠡᠵᠦ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠬᠦᠨᠳᠦ ᠲᠤᠰᠤᠯᠲᠠ ᠲᠠᠢ ᠦᠭᠡ ᠤᠨᠠᠭᠠᠭᠰᠠᠨ ᠳ᠋ᠤ᠌ ᠴᠤᠭᠪᠠᠭᠠᠲᠤᠷ ᠤ᠋ᠨ ᠳᠣᠲᠣᠷᠠ ᠫᠠᠯ ᠬᠢᠪᠡ᠃
ᠴᠣᠭᠪᠠᠭᠠᠲᠤᠷ ᠲᠦᠭᠳᠡᠷᠡᠵᠦ ᠠᠪᠤᠨ ᠠᠷᠭᠠ ᠠᠭᠠᠰᠢ ᠪᠠᠨ ᠪᠠᠷᠠᠭᠰᠠᠨ ᠪᠣᠯᠪᠠᠴᠤ᠂ ᠲᠡᠭᠦᠨ ᠦ᠌ ᠡᠮᠦᠨᠡ ᠡᠴᠡ ᠠᠶᠠᠰ ᠦᠭᠡ ᠣᠯᠵᠤ ᠬᠡᠯᠡᠭᠰᠡᠨ ᠦᠭᠡᠢ᠃ 《ᠬᠡᠰᠢᠭᠲᠡᠢ ᠪᠡᠷ ᠵᠠᠢᠳᠠᠯᠠᠭᠤᠯᠤᠭᠠᠳ ᠳᠠᠭᠠᠷᠢᠲᠤ ᠵᠠᠭᠠᠲᠤᠨᠠᠭᠠ ᠪᠠᠨ ᠭᠣᠪᠣᠭᠣᠨᠠᠭᠤᠯᠵᠤ ᠪᠠᠢᠭᠰᠠᠨ ᠮᠠᠭᠤ ᠬᠠᠩᠭᠠᠯ ᠪᠠᠢᠳᠠᠰᠤ ᠶ᠋ᠢ ᠬᠣᠬᠣᠢ᠂ ᠶᠡᠷᠦ ᠨᠢ ᠴᠢᠨᠦ ᠵᠠᠪᠠᠵᠢ ᠲᠡᠭᠦᠨ ᠦ᠌ ᠵᠠᠶᠠᠭᠠ ᠲᠠᠪᠢᠯᠠᠩ ᠲᠠᠢᠰᠢ ᠬᠠᠵᠠᠢᠬᠤ ᠨᠢ ᠠᠷᠭᠠ ᠦᠭᠡᠢ᠃ ᠮᠠᠭᠤ ᠥᠯᠥᠭᠴᠢᠨ ᠢ ᠁》ᠭᠡᠵᠦ ᠳᠣᠲᠣᠷᠠ ᠪᠠᠨ ᠬᠠᠷᠢᠶᠠᠨᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠳᠣᠲᠣᠷᠠ ᠥᠷᠥᠭᠡᠨ ᠦ᠌ ᠬᠠᠭᠠᠯᠭᠠ ᠨᠡᠭᠡᠭᠡᠭᠳᠡᠵᠦ ᠠᠷᠪᠠᠭᠠᠳ ᠨᠠᠰᠤᠨ ᠤ᠋ ᠬᠡᠦᠬᠡᠳ ᠴᠦᠯᠲᠦ ᠮᠥᠯᠲᠥ ᠭᠠᠷᠴᠤ ᠢᠷᠡᠪᠡ᠃ ᠡᠨᠡ ᠬᠦᠦ ᠪᠣᠯ ᠠᠯᠳᠠᠨᠸᠠᠴᠢᠷ ᠪᠠᠭᠠ ᠵᠠᠰᠠᠭ ᠪᠠᠢᠯᠠ᠃
— ᠮᠥᠮᠥ ᠠ᠋ ! ᠵᠢᠩᠰᠡ ᠤᠲᠤᠭᠠ ᠶ᠋ᠢᠨ ᠤᠲᠤᠭᠠ ᠶ᠋ᠢ ᠶᠠᠭᠠᠬᠢᠵᠤ ᠪᠢᠴᠢᠳᠡᠭ ᠶᠦ᠍ᠮ ? ᠭᠡᠬᠦ ᠳ᠋ᠦ᠍ ᠪᠠᠭᠠ ᠬᠠᠲᠤᠨ ᠢᠩᠭᠢᠵᠦ ᠪᠢᠴᠢᠳᠡᠭ ᠶᠦ᠍ᠮ ᠭᠡᠵᠦ ᠳᠦᠷᠢᠮᠯᠡᠨ ᠵᠢᠭᠠᠵᠤ ᠥᠭᠭᠦᠭᠡᠳ᠄
— ᠬᠡᠦᠬᠡ ᠠ᠋ ! ᠮᠢᠨᠦ ᠬᠦᠦ ᠡᠨᠡ ᠨᠠᠭᠠ ᠡᠵᠢ① ᠳ᠋ᠡᠭᠡᠨ ᠬᠠᠳᠠᠭ ᠪᠠᠷᠢᠵᠤ ᠠᠮᠤᠷ ᠠᠰᠠᠭᠤ! ᠭᠡᠵᠦ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠢ᠋ ᠵᠢᠭᠠᠭᠠᠳ 《ᠡᠨᠡ ᠬᠥᠮᠦᠨ ᠴᠢᠨᠦ ᠭᠠᠷ ᠢ᠋ ᠭᠠᠨᠵᠤᠭᠠᠨ ᠳ᠋ᠤ᠌᠂ ᠬᠥᠯ ᠢ᠋ ᠳᠥᠷᠦᠭᠡᠨ ᠳ᠋ᠦ᠍ ᠭᠥᠷᠦᠭᠦᠯᠬᠦ ᠳᠤ ᠦᠯᠡᠮᠵᠢ ᠭᠠᠪᠢᠶᠠ ᠵᠢᠳᠬᠦᠯ ᠦᠵᠡᠭᠦᠯᠦᠭᠰᠡᠨ ᠬᠥᠮᠦᠨ ᠰᠢᠦ !》ᠭᠡᠪᠡ᠃
— ᠨᠠᠭᠠ ᠡᠵᠢ ᠠ᠋ ⁈
— ᠲᠡᠢᠮᠦ ᠠ᠋ !᠂ ᠨᠠᠭᠠ ᠡᠵᠢ ᠭᠡᠵᠦ ᠳᠠᠭᠤᠳᠠ ᠭᠡᠳ ᠳᠣᠲᠣᠷᠠ ᠥᠷᠥᠭᠡᠨ ᠦ᠌ ᠱᠦᠭᠦᠢ ᠶ᠋ᠢᠨ ᠨᠢᠳᠦᠨ ᠡᠴᠡ ᠬᠥᠬᠡ ᠬᠠᠳᠠᠭ ᠠᠪᠴᠤ ᠬᠦᠦ ᠳ᠋ᠡᠭᠡᠨ ᠭᠠᠷᠳᠠᠭᠤᠯᠪᠠ᠃
ᠴᠣᠭᠪᠠᠭᠠᠲᠤᠷ ᠲᠠᠢ ᠬᠠᠷᠠ ᠪᠤᠷᠴᠠᠭ ᠢ᠋ ᠬᠠᠭᠠᠯᠤᠭᠰᠠᠨ ᠰᠢᠭ᠋ ᠠᠳᠠᠯᠢᠬᠠᠨ ᠲᠥᠷᠥᠭᠰᠡᠨ ᠵᠢᠭᠠᠯ ᠬᠦᠦ ᠶ᠋ᠢ ᠬᠠᠷᠠᠭᠠᠳ ᠮᠠᠨᠤᠨᠪᠠᠳᠮᠠ 《ᠮᠢᠨᠦ ᠮᠠᠭᠤ ᠠᠴᠢ ᠬᠡᠵᠢᠶᠡ ᠨᠢᠭᠡ ᠡᠷᠡ ᠶ᠋ᠢᠨ ᠵᠡᠷᠭᠡ ᠳ᠋ᠦ᠍ ᠬᠦᠷᠴᠦ ᠥᠪᠡᠷ ᠦ᠋ᠨ ᠮᠠᠲᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠵᠠᠰᠠᠭ ᠤ᠋ᠨ ᠵᠢᠯᠣᠭᠣ ᠶ᠋ᠢ ᠪᠠᠷᠢᠳᠠᠭ ᠪᠣᠯ ᠳᠠ? ᠡᠮᠡᠭᠡ ᠡᠵᠢ ᠳ᠋ᠡᠭᠡᠨ ᠡᠷᠡ ᠶ᠋ᠢᠨ ᠰᠠᠢᠨ ᠤ᠋ ᠰᠢᠨᠳᠠᠰᠤ ᠪᠠᠨ ᠦᠵᠡᠭᠦᠯᠳᠡᠭ ᠴᠦ᠍ ᠪᠣᠯᠤᠭᠠᠰᠠᠢ ᠳᠠ! ᠨᠠᠳᠠ ᠳ᠋ᠤ᠌ ᠲᠡᠢᠮᠦ ᠢᠷᠦᠭᠡᠯ ᠪᠠᠢᠳᠠᠭ ᠪᠣᠯ ᠤᠤ ? ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠮᠢᠬᠠ ᠴᠢᠰᠤᠨ ᠤ᠋ ᠲᠠᠰᠤᠷᠬᠠᠢ ᠮᠥᠨ ᠪᠠᠢᠲᠠᠯᠠ ᠪᠠᠨ <ᠮᠢᠨᠦ ᠠᠴᠢ ᠁ > ᠭᠡᠵᠦ ᠵᠣᠷᠢᠭᠲᠠᠢ ᠳᠠᠭᠤᠳᠠᠵᠤ ᠥᠬᠥᠭᠡᠷᠳᠡᠨ ᠦᠨᠦᠰᠴᠦ ᠪᠣᠯᠳᠠᠭ ᠦᠭᠡᠢ ᠨᠢ ᠶᠠᠮᠠᠷ ᠬᠠᠮᠢᠭᠠᠰᠢ ᠪᠠᠨ ᠵᠣᠪᠠᠯᠠᠩᠲᠠᠢ ᠦᠢᠯᠡ ᠦᠷᠡ⁈ 》 ᠭᠡᠳ ᠬᠠᠳᠠᠭ ᠡᠷᠭᠦᠨ ᠠᠮᠤᠷ ᠠᠢᠯᠠᠳᠬᠠᠭᠰᠠᠨ ᠵᠢᠭᠠᠯ ᠬᠦᠦ ᠶ᠋ᠢᠨ ᠮᠠᠩᠨᠠᠢ ᠶ᠋ᠢ ᠨᠢ ᠦᠨᠦᠰᠳ᠄
— ᠪᠠᠭᠠ ᠵᠠᠰᠠᠭ ᠠ᠋ ! ᠲᠠ ᠰᠠᠭᠤ ! ᠲᠠ ᠰᠠᠭᠠᠳᠠ ᠳᠠ ! ᠭᠡᠵᠦ ᠥᠪᠡᠷ ᠢ᠋ᠶ᠋ᠡᠨ ᠬᠥᠰᠡᠷ ᠰᠥᠭᠥᠳᠪᠡ᠃ ᠪᠠᠭᠠ ᠬᠠᠲᠤᠨ ᠰᠠᠨᠳᠤᠷᠴᠤ᠄
— ᠲᠠ ᠪᠣᠰ! ᠪᠣᠰᠤᠭᠠᠴᠢ ! ᠨᠠᠰᠤᠲᠠᠢ ᠬᠥᠮᠦᠨ ᠪᠠᠢᠭᠠᠳ ᠁ ᠭᠡᠪᠡ᠃
— ᠪᠣᠯᠬᠤ ᠦᠭᠡᠢ ᠠ᠋ ! ᠨᠣᠶᠠᠨᠲᠠᠨ᠂ ᠬᠡᠰᠢᠭᠲᠡᠨ᠂ ᠬᠠᠭᠠᠨ ᠬᠥᠮᠦᠨ ᠬᠡᠵᠢᠶᠡᠳᠡ ᠪᠡᠨ ᠡᠭᠡᠯᠴᠤᠳ ᠤ᠋ᠨ ᠳᠡᠭᠡᠭᠦᠷ ᠰᠠᠭᠠᠲᠠᠬᠤ ᠨᠢ ᠵᠥᠪ ᠠ᠋ ! ᠭᠡᠳ ᠮᠠᠨᠤᠨᠪᠠᠳᠮᠠ ᠶ᠋ᠢᠨ ᠠᠲᠤᠷᠢᠶᠠᠲᠤ ᠴᠢᠷᠠᠢ ᠳ᠋ᠤ᠌ ᠨᠠᠷᠠ ᠲᠤᠰᠤᠭᠰᠠᠨ ᠰᠢᠭ᠋ ᠪᠠᠭᠠ ᠵᠠᠰᠠᠭ ᠠᠯᠳᠠᠨᠸᠠᠴᠢᠷ ᠢ᠋ ᠬᠠᠷᠠᠭᠠᠳ ᠢᠨᠢᠶᠡᠮᠰᠦᠭᠯᠡᠪᠡ᠃
ᠪᠠᠭᠠ ᠵᠠᠰᠠᠭ ᠠᠯᠳᠠᠨᠸᠠᠴᠢᠷ᠂ ᠳᠣᠲᠣᠷᠠ ᠥᠷᠥᠭᠡᠨ ᠡᠴᠡ ᠭᠠᠷᠴᠤ ᠢᠷᠡᠭᠡᠳ ᠭᠡᠷ ᠳᠣᠲᠣᠷᠠᠬᠢ ᠠᠭᠤᠷ ᠠᠮᠢᠰᠬᠤᠯ ᠢ᠋ ᠡᠶᠡᠷᠡᠭᠦᠯᠬᠦ ᠲᠠᠢᠰᠢ ᠬᠠᠨᠳᠤᠭᠤᠯᠵᠤ ᠬᠥᠮᠦᠰ ᠦ᠋ᠨ ᠴᠢᠷᠠᠢ ᠴᠤ᠌ ᠦᠯᠦ ᠮᠡᠳᠡᠭ ᠥᠭᠡᠳᠡ ᠪᠣᠯᠪᠠ᠃
ᠶᠠᠭᠤᠮᠠᠨ ᠤ᠋ ᠵᠠᠪᠰᠠᠷ ᠵᠠᠢ ᠶ᠋ᠢ ᠠᠯᠳᠠᠳᠠᠭ ᠦᠭᠡᠢ ᠮᠠᠨᠤᠨᠪᠠᠳᠮᠡ ᠬᠥᠭᠰᠢᠨ ᠪᠠᠭᠠ ᠬᠠᠲᠤᠨ ᠤ᠋ ᠴᠢᠷᠠᠢ ᠥᠭᠡᠳᠡ ᠪᠠᠢᠭᠠ ᠶ᠋ᠢᠨ ᠳᠡᠯᠢᠮ ᠢ᠋ᠶ᠋ᠡᠷ ᠵᠣᠷᠢᠵᠤ ᠢᠷᠡᠭᠰᠡᠨ ᠵᠣᠷᠢᠯᠭᠠ ᠰᠠᠨᠠᠭᠠ ᠪᠠᠨ ᠨᠢᠭᠤᠯ ᠦᠭᠡᠢ ᠤᠷᠠᠯᠠᠨ ᠲᠣᠭᠠᠴᠢᠪᠠ᠃
— ᠪᠠᠭᠠ ᠬᠠᠲᠤᠨ ᠮᠢᠨᠢ᠂ ᠮᠢᠨᠦ ᠴᠣᠷ ᠤ᠋ᠨ ᠭᠠᠭᠴᠠ ᠬᠦᠦ ᠶ᠋ᠢ ᠮᠢᠨᠢ ᠥᠭᠡᠳᠡ ᠲᠠᠲᠠᠵᠤ᠂ ᠪᠣᠳᠣᠯ ᠳ᠋ᠠᠭᠠᠨ ᠪᠠᠭᠲᠠᠭᠠᠵᠤ ᠶᠠᠪᠤᠭᠠᠷᠠᠢ! ᠲᠠᠪᠢ ᠬᠦᠷᠪᠡᠯ ᠬᠡᠳᠦᠢ ᠶᠠᠪᠤᠬᠤ ᠪᠣᠢ᠂ ᠲᠠᠬᠢᠶᠠ ᠳᠤᠤᠭᠠᠷᠪᠠᠯ ᠬᠡᠳᠤᠢᠬᠡᠨ ᠤᠨᠲᠠᠬᠤ ᠪᠣᠢ ᠭᠡᠳᠡᠭ ᠢ᠋ᠶ᠋ᠡᠷ ᠪᠢ ᠴᠦ᠍ ᠣᠳᠣ ᠡᠷᠪᠢ ᠡᠪᠦᠳᠦᠭ ᠨᠡᠢᠯᠡᠬᠦ ᠳᠥᠭᠥᠯᠡ᠃ ᠦᠵᠡᠭᠰᠡᠭᠡᠷ ᠬᠠᠷᠠᠭᠰᠠᠭᠠᠷ ᠠ᠋! ᠲᠠ ᠨᠠᠷ ᠤ᠋ᠨ ᠰᠠᠢᠨ ᠢ᠋᠁ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠪᠠᠭᠠ ᠬᠠᠲᠤᠨ᠄
— ᠡᠷᠭᠦᠭᠰᠡᠭᠡᠷ ᠯᠡ ᠢᠷᠡᠭᠰᠡᠨ ᠰᠢᠳᠡ᠂ ᠲᠥᠷᠥ ᠵᠠᠰᠠᠭ᠂ ᠴᠡᠷᠢᠭ ᠬᠠᠤᠯᠢ ᠶ᠋ᠢᠨ ᠤᠴᠢᠷ ᠭᠡᠭᠴᠢ ᠲᠥᠷᠥᠯ ᠳᠣᠲᠣᠷᠠ ᠪᠠᠨ ᠭᠡᠷ ᠵᠠᠭᠤᠷᠠ ᠶ᠋ᠢᠨ ᠶᠠᠪᠤᠳᠠᠯ ᠲᠠᠢ ᠠᠳᠠᠯᠢᠬᠠᠨ ᠶᠠᠭᠤᠮᠠ ᠪᠣᠯᠭᠠᠨ ᠳᠡᠭᠡᠷᠡ ᠨᠠᠢᠷ ᠲᠠᠯᠠ ᠲᠠᠯᠪᠢᠵᠤ ᠪᠤᠯᠬᠤ ᠦᠭᠡᠢ ᠨᠢ ᠬᠡᠴᠡᠭᠦᠦ ᠰᠢᠦ ᠳᠡ! ᠭᠡᠯᠡ᠃
— ᠲᠡᠷᠡ ᠴᠦ᠍ ᠲᠡᠢᠮᠦ ᠠ᠋! ᠴᠢ ᠶᠠᠮᠠᠷ ᠴᠣᠭᠪᠠᠭᠠᠲᠤᠷ ᠢ᠋ ᠮᠡᠳᠡᠬᠦ ᠦᠭᠡᠢ ᠴᠦ᠍ ᠪᠢᠰᠢ᠃ ᠪᠠᠯᠠᠮᠠᠳ ᠳᠡᠭᠡᠷᠡᠩᠭᠦᠢ ᠵᠠᠩ ᠲᠠᠢ ᠪᠣᠯᠪᠠᠴᠤ ᠪᠠᠲᠠᠭᠠᠨᠠ ᠠᠯᠠᠬᠤ ᠵᠣᠷᠢᠭ ᠦᠭᠡᠢ ᠡᠷᠡ ᠶᠦᠮ ᠠ᠋!
ᠪᠠᠭᠠ ᠬᠠᠲᠤᠨ᠂ ᠮᠠᠨᠤᠨᠪᠠᠳᠮᠡ ᠬᠥᠭᠰᠢᠨ ᠦ᠌ ᠬᠦᠦ ᠪᠡᠨ ᠢᠩᠭᠢᠵᠦ ᠤᠷᠠᠯᠠᠵᠤ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰᠤᠭᠠᠳ ᠢᠨᠢᠶᠡᠳᠦ ᠨᠢ ᠬᠦᠷᠴᠦ ᠶᠠᠭᠤ ᠬᠡᠯᠡᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠪᠣᠯᠢᠵᠤ᠂《ᠡᠨᠡ ᠬᠥᠭᠰᠢᠨ ᠦ᠌ ᠬᠣᠰᠢᠭᠤ ᠪᠠᠷ ᠭᠠᠷᠤᠭᠰᠠᠨ ᠦᠭᠡ ᠪᠦᠬᠦᠨ ᠪᠥᠮᠪᠥᠷᠢᠭᠡᠨ᠂ ᠶᠠᠭᠤᠮᠠᠨ ᠪᠦᠬᠦᠨ ᠬᠠᠪᠲᠠᠭᠠᠢ》 ᠭᠡᠳᠡᠭ ᠢ᠋ ᠮᠡᠳᠡᠳᠡᠭ ᠲᠡᠭᠡᠨ᠄
— ᠪᠢ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ ᠳᠠ! ᠴᠠᠭᠠᠳᠤ ᠵᠠᠩᠵᠤᠨ ᠶᠠᠮᠤᠨ ᠤ᠋ ᠨᠣᠶᠠᠳ ᠤ᠋ᠨ ᠠᠮᠠ ᠬᠠᠵᠡᠢᠬᠰᠠᠨ ᠢ᠋ ᠶᠠᠭᠠᠬᠢᠯᠲᠠᠢ ᠪᠣᠢ! ᠲᠠ ᠬᠦᠦ ᠡᠴᠡ ᠪᠡᠨ ᠠᠰᠠᠭᠤ! ᠭᠡᠳ ᠳᠣᠲᠣᠷᠠ ᠥᠷᠥᠭᠡᠨ ᠳ᠋ᠡᠭᠡᠨ ᠣᠷᠣᠭᠠᠳ ᠳᠠᠬᠢᠵᠤ ᠭᠠᠷᠴᠤ ᠢᠷᠡᠭᠰᠡᠨ ᠦᠭᠡᠢ᠃
ᠨᠢᠭᠡ ᠬᠡᠰᠡᠭ ᠤᠳᠠᠭᠠᠳ ᠵᠢᠰᠢᠶᠡᠨ ᠦ᠌ ᠴᠡᠷᠢᠭ ᠣᠷᠣᠵᠤ ᠢᠷᠡᠨ《ᠲᠠ ᠨᠠᠷ ᠣᠳᠣ ᠶᠠᠪᠤᠵᠤ ᠪᠣᠯᠤᠨᠠ᠃ ᠰᠸᠯᠢᠩ ᠬᠠᠲᠤᠨ ᠪᠡᠶᠡ ᠴᠢᠯᠡᠭᠰᠡᠨ ᠤᠴᠢᠷ ᠠᠮᠠᠷᠠᠬᠤ ᠴᠢᠬᠤᠯᠠᠲᠠᠢ》 ᠬᠡᠵᠦ ᠬᠡᠯᠡᠭᠰᠡᠨ ᠨᠢ ᠦᠭᠡᠨ ᠦ᠌ ᠥᠭᠡᠳᠡ ᠤᠷᠤᠭᠤ ᠶ᠋ᠢ ᠣᠯᠳᠠᠭ ᠦᠭᠡᠢ ᠬᠥᠮᠦᠰ ᠲᠡᠢ ᠬᠡᠯᠡᠯᠴᠡᠬᠦ ᠭᠡᠭᠴᠢ ᠬᠡᠯᠡ ᠠᠮᠠᠨ ᠤ᠋ ᠵᠣᠪᠠᠯᠠᠩ! ᠣᠳᠣ ᠪᠣᠷᠣ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠤᠴᠠᠭᠠᠳ ᠲᠣᠨᠢᠯ ᠭᠡᠰᠡᠨ ᠤᠤᠬᠠᠡ ᠲᠡᠢ ᠦᠭᠡ ᠪᠣᠯᠵᠤ ᠰᠣᠨᠣᠰᠳᠠᠵᠤ᠂ ᠶᠡᠬᠡ ᠶ᠋ᠢ ᠭᠣᠷᠢᠳᠠᠵᠤ ᠢᠷᠡᠭᠰᠡᠨ ᠡᠬᠡ ᠬᠥᠪᠡᠭᠦᠨ ᠬᠣᠶᠠᠷ ᠤ᠋ᠨ ᠨᠡᠷᠡ ᠨᠢᠭᠤᠷ ᠲᠤᠨᠢ ᠬᠦᠷᠴᠦ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠵᠢᠭᠰᠢᠵᠡᠢ᠃
ᠡᠨᠡ ᠣᠷᠴᠢᠮ ᠪᠠᠭᠠ ᠬᠠᠲᠤᠨ ᠨᠡᠭᠡᠷᠡᠨ ᠪᠡᠶᠡ ᠰᠡᠳᠬᠡᠯ ᠴᠢᠯᠡᠷᠡᠵᠤ ᠪᠠᠢᠭᠠ ᠰᠠᠨ᠃ ᠲᠡᠷᠡ ᠶᠠᠭᠤᠨ ᠤ᠋ ᠴᠣᠭᠪᠠᠭᠠᠲᠤᠷ ᠤ᠋ᠨ ᠶᠠᠯᠠ ᠭᠠᠪᠢᠶᠠ ᠶ᠋ᠢ ᠲᠤᠩᠭᠠᠵᠤ ᠵᠡᠷᠭᠡ ᠵᠢᠩᠰᠡ ᠶ᠋ᠢ ᠪᠣᠳᠣᠬᠤ ᠠᠵᠢ ᠠ᠋! ᠠᠩᠴᠢᠨᠵᠠᠪ ᠤ᠋ᠨ ᠡᠪᠦᠷ ᠳᠤ ᠪᠦᠪᠡᠢᠯᠠᠭᠲᠡᠨ ᠬᠡᠴᠢᠨᠡᠭᠡᠨ ᠵᠢᠯ ᠦ᠋ᠨ ᠬᠤᠰᠠᠷᠠᠭᠰᠠᠨ ᠲᠠᠴᠢᠶᠠᠯ ᠳ᠋ᠠᠭᠠᠨ ᠰᠢᠳᠡᠵᠦ ᠡᠭᠡᠭᠡ ᠯᠡ ᠤᠰᠤ ᠴᠢᠭᠢᠭ ᠦ᠋ᠨ ᠪᠠᠷᠠ ᠣᠯᠵᠤ ᠦᠵᠡᠬᠦ ᠦᠭᠡᠢ ᠨᠠᠷᠠ ᠰᠠᠯᠬᠢᠨ ᠳ᠋ᠤ᠌ ᠬᠠᠭᠰᠠᠵᠤ ᠠᠩᠭᠠᠭᠰᠠᠨ ᠠᠭᠠᠷᠤᠨ ᠰᠠᠭᠤᠯᠠᠭᠠ ᠰᠢᠭ᠋ ᠠᠩ ᠴᠠᠪᠠ ᠭᠠᠷᠴᠤ ᠰᠢᠩᠭᠡᠨ ᠶᠠᠭᠤᠮᠠ ᠠᠭᠤᠯᠵᠤ ᠳᠡᠢᠯᠦᠮᠡ ᠦᠭᠡᠢ ᠪᠣᠯᠤᠭᠠᠳ ᠴᠢᠭᠢᠭ ᠨᠣᠢᠲᠠᠨ᠂ ᠪᠣᠷᠣᠭᠠᠨ ᠬᠤᠷᠠ ᠳ᠋ᠤ᠌ ᠬᠠᠨᠲᠠᠯᠠ ᠪᠠᠨ ᠤᠮᠳᠠᠯᠠᠭᠤᠯᠬᠤ ᠵᠢᠷᠭᠠᠯ ᠴᠡᠩᠭᠡᠯ ᠦ᠋ᠨ ᠬᠢᠨᠢ ᠰᠤᠷᠪᠤᠯᠵᠢ ᠶ᠋ᠢ ᠲᠠᠰᠤᠯᠵᠤ ᠬᠠᠶᠠᠭᠰᠠᠨ ᠳ᠋ᠤ᠌ ᠡᠨᠡ ᠬᠣᠷᠸᠠ ᠳ᠋ᠤ᠌ ᠶᠠᠭᠤᠮᠠ ᠪᠦᠬᠦᠨ ᠲᠦᠭᠦᠬᠡᠢ ᠰᠣᠯᠣᠭᠠᠢ ᠬᠠᠷᠠᠭᠳᠠᠵᠤ᠂ ᠰᠡᠳᠬᠢᠯ ᠭᠠᠩᠰᠠᠷᠠᠨ ᠵᠣᠪᠠᠨᠢᠭᠰᠠᠨ ᠢ᠋ ᠬᠡᠨ ᠬᠥᠮᠦᠨ ᠣᠢᠯᠠᠭᠠᠬᠤ ᠪᠢᠯᠡ⁈
ᠮᠠᠨᠤᠨᠪᠠᠳᠮᠡ ᠬᠥᠭᠰᠢᠨ ᠲᠡᠨᠳᠡ ᠡᠴᠡ ᠭᠠᠷᠬᠤ ᠳ᠋ᠠᠭᠠᠨ ᠠᠭᠤᠷᠯᠠᠵᠤ ᠤᠷᠤᠭᠤᠯ ᠨᠢ ᠲᠠᠲᠠᠪᠠᠯᠵᠠᠨ ᠴᠡᠴᠡᠷᠡᠭᠡᠳ᠄
— ᠠᠴᠢ ᠭᠠᠪᠢᠶᠠ ᠶ᠋ᠢ ᠤᠮᠠᠷᠲᠠᠵᠤ᠂ ᠵᠢᠷᠤᠮᠲᠤ ᠰᠡᠳᠬᠡᠯ ᠢ᠋ ᠦᠲᠡᠭᠡᠷᠬᠡᠭᠰᠡᠨ ᠬᠣᠢᠲᠤ ᠮᠥᠷ ᠦᠭᠡᠢ ᠬᠥᠮᠦᠨ ᠶᠦᠮ ᠪᠠᠢᠨᠠ! ᠡᠬᠡ ᠶ᠋ᠢᠨ ᠶᠠᠬᠠᠭᠰᠠᠨ᠂ ᠴᠡᠴᠡᠭ ᠬᠠᠲᠤᠨ ᠤ᠋《ᠠᠢᠷᠠᠭ ᠤ᠋ᠨ ᠬᠤᠯᠤ》 ᠶ᠋ᠢ ᠲᠡᠪᠡᠷᠢᠴᠢᠬᠡᠭᠡᠳ ᠤᠰᠤᠨ ᠨᠢᠳᠦᠯᠡᠵᠦ ᠰᠢᠷᠠᠪ ᠨᠣᠶᠠᠨ ᠤ᠋ ᠭᠣᠯᠣᠭᠳᠠᠮᠠᠯ ᠭᠤᠨᠵᠢ ᠪᠡᠠᠢᠬᠰᠠᠨ ᠢ᠋ᠶ᠋ᠠᠨ ᠮᠡᠳᠡᠬᠦ ᠦᠭᠡᠢ᠁ ᠥᠨᠥᠳᠥᠷ ᠬᠠᠷᠢᠨ ᠭᠣᠪᠢᠯ ᠣᠷᠣᠲᠠᠯᠠ ᠲᠠᠷᠭᠤᠯᠠᠭᠠᠳ ᠬᠥᠮᠦᠨ ᠲᠡᠢᠷᠬᠦ ᠲᠡᠢ ᠪᠣᠯᠴᠢᠬᠠᠵᠠᠢ! ᠪᠠᠰᠠ ᠬᠠᠮᠢᠭᠠᠬᠢ ᠶ᠋ᠢᠨ ᠨᠢᠭᠡ ᠲᠡᠨᠦᠮᠡᠯ ᠡᠷᠡ ᠣᠯᠵᠤ ᠲᠡᠪᠡᠷᠢᠭᠡᠳ ᠨᠡᠷᠡ ᠨᠠᠰᠤ ᠪᠠᠨ ᠮᠡᠳᠡᠬᠦ ᠪᠡᠨ ᠪᠣᠯᠢᠴᠢᠬᠠᠪᠠ⁈ ᠭᠡᠵᠦ ᠳᠣᠲᠣᠷᠠ ᠪᠠᠨ ᠬᠠᠷᠢᠶᠠᠭᠠᠳ ᠬᠠᠭᠠᠯᠭᠠ ᠰᠠᠪᠠᠨ ᠭᠠᠷᠴᠤ ᠶᠠᠪᠤᠪᠠ᠃
ᠡᠯᠳᠡᠩᠭᠡ ᠶᠡᠷᠦ ᠨᠢ ᠶᠡᠬᠡᠷᠬᠡᠭ ᠵᠠᠩ ᠪᠠᠢᠳᠠᠭ ᠦᠭᠡᠢ ᠪᠣᠷᠣᠭᠵᠢᠭᠤᠨ ᠰᠤᠷᠲᠠᠯ ᠲᠠᠢ ᠬᠥᠮᠦᠨ ᠲᠤᠯᠠ ᠡᠨᠡ ᠡᠬᠡ ᠬᠥᠪᠡᠭᠦᠨ ᠬᠣᠶᠠᠷ ᠢ᠋ ᠭᠡᠷ ᠲᠦ᠋ᠨᠢ ᠮᠣᠷᠢᠯᠠᠨ ᠪᠠᠭᠤᠭᠰᠠᠨ ᠳ᠋ᠤ᠌ ᠰᠠᠭᠤᠵᠤ ᠲᠣᠭᠲᠠᠯ ᠦᠭᠡᠢ ᠭᠠᠳᠠᠨᠠ ᠳᠣᠲᠣᠨᠠ ᠡᠨᠡ ᠲᠡᠷᠡ ᠠᠵᠢᠯ ᠳ᠋ᠤ᠌ ᠬᠣᠰᠢᠭᠤ ᠲᠥᠷᠥᠵᠦ ᠬᠠᠩᠭᠢ ᠰᠢᠭ᠋ ᠳᠡᠢᠯᠠᠯᠠᠭᠠ ᠬᠢᠬᠦ ᠶ᠋ᠢ ᠪᠣᠳᠣᠵᠤ ᠠᠯᠢ ᠠᠯᠢᠨ ᠳ᠋ᠤ᠌ ᠴᠦ᠍ ᠪᠦᠷ ᠵᠠᠪᠳᠤᠭᠤᠯᠵᠤ ᠪᠠᠢᠯᠠ᠃ ᠴᠤᠭᠪᠠᠭᠠᠲᠤᠷ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ ᠪᠣᠰᠤᠨ ᠪᠣᠰᠤᠨ ᠪᠣᠷᠣ ᠳᠠᠭᠠ ᠪᠠᠨ ᠵᠠᠢᠳᠠᠯᠠᠪᠠ ᠭᠡᠭᠴᠢ ᠡᠨᠡ ᠠᠢᠯ ᠤ᠋ᠨ ᠪᠠᠢᠩᠭᠤ ᠭᠡᠢᠴᠢᠨ ᠪᠣᠯᠬᠣᠷ ᠡᠷᠡᠭᠡ ᠵᠢᠷᠣᠭᠠ ᠦᠭᠡᠢ᠃ ᠶᠡᠬᠡ ᠶ᠋ᠢ ᠦᠵᠡᠭᠰᠡᠨ ᠮᠠᠨᠤᠨᠪᠠᠳᠮᠡ ᠬᠥᠭᠰᠢᠨ ᠬᠠᠷᠢᠨ ᠠᠩᠬᠠ ᠪᠣᠱᠣᠭᠠ ᠠᠯᠬᠤᠵᠤ ᠪᠠᠢᠭᠠ ᠪᠣᠯᠬᠣᠷ ᠡᠯᠳᠡᠩᠭᠡ ᠶ᠋ᠢᠨ ᠡᠢᠩᠬᠢᠵᠤ ᠮᠤᠩᠭᠠᠨᠢᠳᠠᠭ ᠨᠢ ᠭᠠᠢᠬᠠᠯᠲᠠᠢ ᠪᠢᠰᠢ ᠠ᠋! ᠲᠡᠷᠡ ᠪᠡᠷ ᠲᠡᠳᠡᠨ ᠦ᠌ ᠡᠭᠦᠳᠡᠨ ᠳ᠋ᠦ᠍ᠨᠢ ᠭᠤᠢᠷᠠᠨᠴᠢ ᠲᠡᠨᠦᠭᠦᠯᠴᠢ ᠬᠦᠷᠦᠭᠡᠳ ᠢᠷᠡᠬᠦ ᠳ᠋ᠦ᠍ ᠴᠦ᠍ ᠨᠢᠭᠡ ᠴᠠᠭ ᠤ᠋ᠨ ᠬᠠᠯᠠᠭᠤᠨ ᠪᠦᠯᠢᠶᠡᠨ ᠬᠣᠭᠣᠯᠠ ᠥᠭᠴᠦ ᠬᠦᠨᠡᠰᠦ ᠡᠪᠦᠷᠲᠦᠯᠡᠭᠦᠯᠦᠭᠡᠳ ᠶᠠᠪᠤᠭᠤᠯᠴᠢᠬᠠᠳᠠᠭ᠃ ᠶᠡᠬᠡ ᠭᠡᠷ ᠦ᠋ᠨ ᠵᠠᠷᠤᠴᠠ ᠠᠮᠢ ᠵᠢᠭᠤᠯᠭᠠ ᠶ᠋ᠢᠨ ᠬᠥᠮᠦᠨ ᠦ᠌ ᠪᠡᠨ ᠭᠡᠳᠡᠰᠦ ᠶ᠋ᠢ ᠬᠡᠷᠡᠵᠦ ᠬᠡᠮᠵᠢᠬᠦ ᠦᠭᠡᠢ ᠬᠥᠯᠥᠰᠥ ᠮᠥᠩᠭᠥ ᠶ᠋ᠢ ᠨᠢ ᠴᠦ᠍ ᠳᠤᠲᠠᠭᠤᠯᠠᠬᠤ ᠦᠭᠡᠢ ᠲᠣᠭᠠᠴᠠᠳᠠᠭ ᠲᠤᠨᠢ ᠡᠭᠡᠯ ᠬᠠᠷᠠᠴᠤᠤᠯ ᠡᠯᠳᠡᠩᠭᠡ ᠶ᠋ᠢᠨ ᠳ᠋ᠦ᠍ ᠵᠠᠷᠤᠭᠳᠠᠬᠤ ᠳᠤᠷᠠᠲᠠᠢ ᠪᠠᠢᠳᠠᠭ᠃ ᠲᠡᠢᠨ ᠬᠦ᠌ ᠡᠨᠡ ᠢᠷᠡᠭᠰᠡᠨ ᠬᠦᠨᠳᠦᠲᠦ ᠵᠣᠴᠢᠨ ᠳ᠋ᠠᠭᠠᠨ ᠦᠳᠡ ᠳ᠋ᠦ᠍ ᠥᠶᠥᠭ ᠲᠠᠷᠭᠤᠨ ᠴᠠᠢ ᠬᠣᠭᠣᠯᠠ ᠵᠣᠭᠣᠭᠯᠠᠭᠤᠯᠴᠢᠬᠠᠭᠠᠳ ᠴᠢᠨᠠᠷᠯᠢᠭ ᠬᠠᠷᠠ ᠲᠠᠮᠠᠬᠢ ᠭᠠᠷᠭᠠᠵᠤ ᠡᠬᠡ ᠬᠦᠦ ᠪᠣᠯᠤᠨ ᠳᠠᠭᠠᠭᠰᠠᠳ ᠲᠤ ᠠᠳᠠᠯᠢᠬᠠᠨ ᠬᠦᠷᠲᠡᠭᠡᠯ ᠲᠡᠢ ᠬᠥᠯ ᠢ᠋ ᠨᠢ ᠠᠮᠠᠷᠠᠭᠠᠪᠠ᠃ ᠢᠳᠡᠵᠦ ᠤᠤᠭᠤᠵᠤ ᠴᠠᠳᠤᠭᠰᠠᠨ ᠬᠥᠮᠦᠰ ᠦ᠋ᠨ ᠴᠢᠷᠠᠢ ᠳ᠋ᠤ᠌ ᠮᠠᠩᠰᠢᠭᠤᠷᠠᠯ ᠤ᠋ᠨ ᠮᠠᠨᠠᠨ ᠪᠦᠷᠬᠦᠵᠦ᠂ ᠵᠢᠷᠣᠭᠠ ᠶ᠋ᠢᠨ ᠵᠢᠷᠣᠭᠠ ᠪᠠᠷ ᠢ᠋ᠶ᠋ᠠᠨ᠂ ᠣᠷᠣᠭᠠ ᠶ᠋ᠢᠨ ᠣᠷᠣᠭᠠ ᠪᠠᠷ ᠢ᠋ᠶ᠋ᠠᠨ ᠭᠡᠳᠡᠭ ᠢ᠋ᠶ᠋ᠡᠷ ᠲᠤᠰ ᠲᠤᠰ ᠤ᠋ᠨ ᠳᠤᠷᠠ ᠰᠣᠨᠢᠷᠬᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠤᠯᠵᠠᠭᠠᠪᠠ᠃ ᠴᠤᠭᠪᠠᠭᠠᠲᠤᠷ ᠴᠦ᠍ ᠶᠠᠷᠢᠶᠠᠨ ᠦᠭᠡᠢ ᠡᠯᠳᠡᠩᠭᠡ ᠶ᠋ᠢᠨ ᠠᠴᠢ ᠥᠬᠢᠨ ᠮᠠᠨᠤᠬᠤᠸᠠᠷ ᠤ᠋ᠨ ᠥᠷᠥᠭᠡᠨ ᠳ᠋ᠦ᠍ ᠰᠢᠷᠭᠤᠵᠤ ᠣᠷᠣᠪᠠ᠃ ᠳᠤᠷᠠ ᠳᠤᠷᠠ ᠶ᠋ᠢᠨ ᠢ᠋ᠶ᠋ᠡᠨ ᠰᠢᠯᠲᠠᠭ ᠲᠤ ᠳᠤᠷᠠᠲᠠᠢ ᠶᠠᠭᠤᠮᠠᠨ ᠳ᠋ᠠᠭᠠᠨ ᠨᠠᠭᠠᠯᠳᠤᠵᠤ ᠰᠣᠯᠣᠭᠠᠢ ᠨᠠᠮᠵᠢᠯ᠂ ᠬᠥᠩᠬᠥᠷ ᠵᠠᠮᠪᠠᠯ᠂ ᠡᠯᠳᠡᠩᠭᠡ ᠶᠢᠨ ᠣᠳᠬᠣᠨ ᠬᠦᠦ ᠪᠠᠳᠠᠷᠠ ᠨᠠᠷ ᠬᠠᠷᠠ ᠲᠠᠮᠠᠬᠢ ᠮᠠᠨᠠᠷᠠᠭᠤᠯᠵᠤ ᠠᠪᠤᠭᠠᠳ ᠮᠥᠷᠥᠢ ᠲᠡᠢ ᠶᠠᠰᠤᠨ ᠫᠠᠢ ᠥᠷᠥᠵᠦ ᠬᠠᠷᠴᠢᠭᠢᠨᠠᠭᠤᠯᠤᠨᠠ᠃ ᠮᠠᠨᠣᠠᠪᠠᠳᠮᠡ ᠬᠦᠬᠰᠢᠠ ᠬᠠᠷᠠ ᠲᠠᠮᠠᠬᠢᠨ ᠤ᠋ ᠬᠡᠩᠰᠢᠭᠦᠦ ᠪᠡᠷ ᠰᠠᠮᠰᠠ ᠪᠠᠨ ᠤᠲᠤᠵᠤ ᠬᠡᠰᠡᠭ ᠬᠠᠵᠠᠭᠣᠯᠣᠰᠬᠢᠭᠡᠳ ᠪᠡᠶᠡ ᠠᠮᠠᠷᠠᠵᠤ ᠬᠠᠩᠭᠢ ᠵᠢᠪᠬᠤᠭᠠᠵᠢᠭᠰᠠᠨ ᠪᠣᠯᠣᠯᠳᠠᠢ ᠪᠣᠰᠴᠤ ᠡᠯᠳᠡᠩᠭᠡ ᠲᠡᠢ ᠡᠷᠲᠡ ᠡᠳᠦᠭᠡ᠂ ᠤᠯᠤᠰ ᠭᠦᠷᠦᠨ ᠡᠴᠡ ᠲᠣᠭᠣᠷᠢᠭᠠᠳ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠶ᠋ᠢ ᠡᠯᠡᠲᠡᠯᠡ ᠵᠣᠭᠣᠭᠳᠠᠵᠤ᠂ ᠲᠤᠰ ᠲᠤᠰ ᠤ᠋ᠨ ᠵᠣᠪᠠᠨᠢᠯ ᠭᠤᠲᠤᠷᠠᠯ ᠢᠶᠡᠨ ᠲᠣᠭᠠᠴᠢᠨ ᠨᠢᠭᠡ ᠨᠢᠭᠡᠨ ᠦ᠌ ᠪᠡᠨ ᠤᠬᠠᠭᠠ ᠪᠣᠳᠣᠯ ᠢ᠋ ᠲᠡᠩᠰᠡᠵᠦ ᠮᠡᠷᠭᠡᠯᠡᠨᠡ᠃ ᠳᠣᠲᠣᠷᠠ ᠲᠠᠮᠢᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠡᠨ ᠬᠡᠨ ᠳ᠋ᠡᠭᠡᠨ ᠠᠪᠲᠠᠬᠤ ᠦᠭᠡᠢ ᠮᠡᠷᠭᠡᠴᠢ ᠬᠣᠶᠠᠷ ᠥᠲᠡᠭᠦᠰ ᠢᠩᠭᠢᠵᠦ ᠲᠡᠦᠬᠡᠨ ᠳ᠋ᠦ᠍ ᠦᠭᠡᠢ ᠦᠭᠡ ᠲᠠᠭᠠᠷᠠᠵᠤ ᠶᠠᠷᠢᠵᠤ ᠰᠠᠭᠤᠪᠠ᠃
ᠵᠠᠷᠤᠴᠠ ᠠᠮᠢ ᠵᠢᠭᠤᠯᠭᠠ ᠶᠢᠨ ᠬᠥᠮᠦᠰ ᠡᠯᠳᠡᠩᠭᠡ ᠶᠢᠨ ᠵᠠᠬᠢᠶᠠ ᠪᠠᠷ ᠭᠡᠢᠴᠢᠨ ᠵᠣᠴᠢᠨ ᠤ᠋ ᠮᠣᠷᠢ ᠤᠨᠤᠭᠠ ᠳ᠋ᠤ᠌ ᠤᠯᠠᠭᠠᠨ ᠰᠢᠰᠢ ᠨᠣᠭᠣᠭᠠᠨ ᠪᠤᠷᠴᠠᠭ ᠬᠣᠯᠢᠭᠰᠠᠨ ᠲᠡᠵᠢᠭᠡᠯ ᠥᠭᠴᠦ᠂ ᠨᠠᠷᠢᠮᠤ ᠶ᠋ᠢᠨ ᠰᠦᠷᠡᠯ ᠢ᠋ ᠴᠦᠳᠡᠩ ᠦ᠋ᠨ ᠮᠣᠳᠣ ᠬᠢᠷᠢ ᠠᠬᠤᠷᠯᠠᠨ ᠬᠡᠷᠴᠢᠵᠦ ᠣᠩᠭᠣᠰᠤ ᠠᠯᠳᠠᠲᠠᠯᠠ ᠲᠡᠵᠢᠭᠡᠪᠡ᠃
ᠢᠯᠴᠢ ᠪᠡᠨ ᠬᠠᠷᠠᠮᠨᠠᠭᠰᠠᠨ ᠪᠡᠭᠡᠷᠡᠩᠬᠡᠢ ᠡᠮᠡᠭᠡᠨ ᠨᠠᠷᠠ ᠮᠣᠯᠴᠣᠭᠲᠤ ᠶᠢᠨ ᠮᠤᠬᠤᠷ ᠲᠣᠯᠣᠭᠠᠢ ᠶ᠋ᠢ ᠲᠡᠮᠳᠡᠷᠢᠭᠰᠡᠭᠡᠷ ᠲᠠᠯᠳᠠᠷᠠᠪᠠ᠃ ᠡᠯᠳᠡᠩᠭᠡ ᠶᠢᠨ ᠳ᠋ᠤ᠌ ᠨᠢᠵᠢᠭᠡᠷ ᠨᠠᠢᠷ ᠪᠣᠯᠪᠠ᠃
ᠵᠣᠴᠢᠯᠠᠯ ᠤ᠋ᠨ ᠶᠡᠬᠡ ᠭᠡᠷ ᠦ᠋ᠨ ᠲᠡᠮᠦᠷ ᠵᠤᠤᠬᠠᠨ ᠳ᠋ᠤ᠌ ᠰᠢᠲᠠᠭᠰᠠᠨ ᠰᠢᠷᠠ ᠠᠭᠠᠷᠤᠨ ᠬᠣᠵᠤᠤᠯᠠ ᠶᠢᠨ ᠨᠢᠩᠬᠠᠷ ᠦᠨᠦᠷ ᠬᠠᠮᠠᠷ ᠰᠡᠩᠭᠢᠨᠡᠭᠦᠯᠦᠨ ᠰᠠᠢᠬᠠᠨ ᠦᠨᠦᠷᠳᠦᠵᠦ᠂ ᠰᠢᠷᠠ ᠲᠣᠰᠣ ᠰᠢᠷᠭᠠᠯᠲᠤᠭᠰᠠᠨ ᠰᠦ ᠲᠡᠢ ᠴᠠᠢ ᠠᠭᠤᠷ ᠰᠠᠪᠰᠠᠯᠠᠨ ᠯᠤᠤ ᠶᠢᠨ ᠬᠡ ᠲᠡᠢ ᠨᠠᠷᠢᠨ ᠱᠠᠭᠠᠵᠠᠩ ᠤ᠋ᠨ ᠢᠷᠮᠡᠭ ᠡᠮᠬᠦᠵᠦ ᠲᠠᠮᠰᠢᠶᠠᠯᠠᠬᠤ ᠪᠠᠰᠠ ᠨᠢᠭᠡ ᠵᠦᠢᠯ ᠦ᠋ᠨ ᠵᠢᠷᠭᠠᠯ ᠪᠤᠶᠤ᠃ ᠪᠤᠮᠪᠠ ᠬᠡᠯᠪᠡᠷᠢ ᠲᠡᠢ ᠠᠯᠲᠠᠨ ᠭᠡᠭᠡᠳᠣ ᠪᠠᠭᠪᠤᠷ ᠳᠤ ᠬᠠᠭᠤᠷᠤᠭᠰᠠᠨ ᠪᠤᠳᠠᠭᠠ᠂ ᠠᠭᠠᠷᠤᠤᠯ᠂ ᠥᠷᠥᠮᠡ ᠲᠣᠰᠣ ᠡᠯᠳᠡᠪ ᠠᠮᠲᠠᠲᠠᠨ ᠰᠢᠷᠡᠭᠡ ᠳᠦᠭᠦᠷᠡᠩ ᠦᠷᠦᠭᠳᠡᠬᠦ ᠶ᠋ᠢ ᠬᠠᠷᠠᠭᠰᠠᠨ ᠬᠥᠮᠦᠨ ᠦ᠌ ᠬᠣᠳᠣᠭᠠᠳᠣ ᠠᠭᠰᠢᠵᠤ ᠴᠠᠳᠬᠣᠯᠳᠣᠮᠠᠷ ᠪᠠᠶᠠᠨ ᠴᠠᠳᠬᠤᠯᠠᠩ᠃ ᠴᠠᠢ ᠶᠢᠨ ᠳᠠᠷᠠᠭᠠ ᠬᠡᠳᠦᠨ ᠶᠠᠩᠵᠤ ᠶ᠋ᠢᠨ ᠬᠢᠲᠠᠳ ᠠᠷᠢᠬᠢᠨ ᠤ᠋ ᠵᠠᠭᠤᠰᠢ ᠨᠠᠨ ᠲᠡᠷᠡ ᠶᠠᠩᠵᠤᠯᠠᠭᠳᠠᠵᠤ᠂ ᠪᠣᠯᠣᠷ ᠬᠤᠨᠳᠠᠭᠠᠨ ᠳ᠋ᠤ᠌ ᠬᠠᠷᠠ ᠠᠷᠢᠬᠢ ᠮᠡᠯᠮᠡᠯᠵᠡᠪᠡ᠃ ᠲᠣᠣᠷ ᠵᠠᠰᠠᠯ ᠲᠠᠢ ᠡᠬᠡᠮᠦᠭ ᠵᠡᠭᠦᠭ᠍ᠰᠡᠨ ᠢᠨᠵᠢ ᠬᠡᠦᠬᠡᠨ ᠬᠣᠣᠰ ᠬᠣᠣᠰ ᠢᠶᠠᠷ ᠢᠷᠡᠵᠦ ᠵᠣᠴᠢᠨ ᠳᠤ ᠠᠷᠢᠬᠢ ᠪᠠᠷᠢᠨᠠ᠃ ᠤᠷᠠᠳ ᠶᠣᠰᠣ ᠪᠠᠷ ᠭᠤᠷᠪᠠᠨ ᠲᠤᠭᠤᠷᠠ ᠠᠷᠢᠬᠢ ᠵᠠᠰᠠᠭᠳᠠᠬᠤ ᠳᠤ ᠢᠬᠢᠷᠡ ᠲᠥᠷᠥᠯᠡ ᠬᠡᠮᠡᠷ ᠠᠪ ᠠᠳᠠᠯᠢᠬᠠᠨ ᠬᠣᠶᠠᠷ ᠮᠥᠩᠭᠦ ᠱᠢᠷᠦ ᠶᠢᠨ ᠲᠣᠯᠣᠭᠠᠢ ᠶᠢᠨ ᠵᠢᠮᠰᠡᠭ ᠲᠠᠢ ᠴᠢᠷᠠᠢᠯᠢᠭ ᠪᠦᠰᠡᠭᠦᠢ ᠠᠶᠠ ᠪᠠᠷᠢᠵᠤ ᠴᠣᠭᠴᠠᠯᠠᠭᠰᠠᠨ ᠪᠤᠶᠠᠨ ᠡᠷᠲᠡ ᠶᠢᠨ ᠢᠷᠦᠭᠡᠯ ᠪᠤᠶᠠᠨ ᠦᠯᠡᠮᠵᠢ ᠶᠢᠨ ᠪᠤᠶᠠᠨ ᠭᠡᠬᠦ ᠭᠤᠷᠪᠠᠨ ᠪᠤᠶᠠᠨ ᠤ ᠬᠦᠷᠦ ᠳᠠᠭᠤᠤ ᠡᠷᠭᠦᠬᠦ ᠳᠦ ᠣᠯᠠᠨ ᠢᠶᠡᠷ ᠢᠶᠡᠨ ᠠᠶᠠ ᠬᠠᠮᠰᠠᠨ ᠳᠠᠭᠤᠯᠠᠵᠠᠭᠠᠪᠠ᠃ ᠨᠠᠢᠢᠷ ᠢᠩᠬᠢᠵᠦ ᠬᠥᠭ᠍ᠲᠡᠢ ᠶᠠᠪᠤᠭᠳᠠᠵᠣ ᠪᠠᠢᠭᠠ ᠳᠤ ᠴᠣᠯ ᠪᠦᠲᠦᠨ ᠠᠭᠠᠷᠦ ᠶᠢ ᠰᠡᠢᠯᠵᠦ ᠤᠷᠠᠯᠠᠭᠰᠠᠨ ᠨᠠᠢ᠍ᠮᠠᠨ ᠲᠠᠬᠢᠯ ᠤᠨ ᠰᠡᠢᠯᠪᠤᠷᠢ ᠵᠢᠷᠤᠭ ᠲᠠᠢ ᠤᠷᠲᠤᠯᠵᠢᠨ ᠠᠭᠠᠷᠤᠨ ᠴᠠᠷᠠ ᠳᠤ ᠪᠠᠷᠤᠭ ᠯᠠ ᠦᠵᠡᠭᠡᠳ ᠴᠠᠳᠴᠢᠬᠠᠬᠤ ᠤᠭᠤᠴᠠ ᠣᠷᠣᠵᠤ ᠢᠷᠡᠪᠡ᠃
ᠵᠤᠳᠪᠠ ᠮᠡᠢᠷᠡᠨ ᠬᠠᠳᠠᠭ ᠳᠡᠯᠭᠡᠨ᠄
ᠣᠮ ᠰᠠᠢᠨ ᠠᠮᠤᠭᠤᠯᠠᠩᠳᠠᠨ ᠪᠣᠯᠲᠤᠭᠠᠢ !
ᠡᠩᠬᠡ ᠰᠠᠢᠨ ᠵᠢᠷᠭᠠᠯᠡᠩᠳᠡᠨ ᠪᠣᠯᠲᠤᠭᠠᠢ !
ᠠᠷᠪᠠᠨ ᠵᠦᠭ ᠢ᠋ ᠲᠤᠭᠤᠯᠤᠭᠰᠠᠨ ᠪᠤᠷᠠᠬᠤᠨ ᠤ᠋
ᠷᠠᠰᠢᠶᠠᠨ ᠬᠦᠴᠦᠨ ᠲᠡᠭᠦᠰᠦᠭᠰᠡᠨ ᠢᠳᠡᠭᠡᠨ ᠦ᠌ ᠳᠡᠭᠡᠵᠢ
ᠰᠢᠳ᠋ᠲᠦᠯᠡᠩ ᠬᠣᠨᠢ ᠪᠠᠷ
ᠰᠢᠭᠦᠰᠦ ᠪᠣᠯᠭᠠᠨ ᠲᠠᠯᠪᠢᠭᠰᠠᠨ
ᠰᠢᠲᠦᠭᠡᠨ ᠪᠤᠷᠬᠠᠨ ᠳ᠋ᠤ᠌
ᠨᠢᠨᠳᠠᠷ ᠪᠣᠯᠭᠠᠨ ᠲᠠᠯᠪᠢᠭᠰᠠᠨ
ᠬᠤᠷᠠᠭᠠᠨ ᠬᠣᠨᠢ ᠪᠠᠷ
ᠰᠢᠭᠦᠰᠦ ᠪᠣᠯᠭᠠᠨ ᠲᠠᠯᠪᠢᠭᠰᠠᠨ
ᠬᠤᠷᠠᠭᠰᠠᠨ ᠪᠦᠬᠦᠨ ᠳ᠋ᠦ᠍
ᠢᠳᠡᠭᠡᠨ ᠪᠣᠯᠭᠠᠨ ᠲᠠᠯᠪᠢᠭᠰᠠᠨ
ᠲᠣᠭᠣᠷᠤᠤ ᠡᠪᠡᠷ ᠲᠡᠢ
ᠲᠥᠭᠥᠷᠢᠭ ᠰᠡᠭᠦᠯ ᠲᠡᠢ
ᠬᠠᠨᠠ ᠶ᠋ᠢᠨ ᠴᠢᠨᠡᠭᠡᠨ ᠪᠡᠶᠡ ᠲᠡᠢ
ᠬᠠᠪᠠᠭᠠᠰᠤ ᠶ᠋ᠢᠨ ᠴᠢᠨᠡᠭᠡᠨ ᠰᠡᠭᠦᠯ ᠲᠡᠢ
ᠠᠴᠠ ᠳᠥᠷᠪᠡᠨ ᠲᠤᠭᠤᠷᠠᠢ ᠲᠠᠢ
ᠠᠬᠤᠷ ᠵᠢᠶᠢᠭᠤᠭᠠᠨ ᠬᠦᠵᠦᠭᠦᠦ ᠲᠡᠢ
ᠠᠷᠪᠠᠨ ᠬᠣᠶᠠᠷ ᠰᠡᠭᠡᠷ ᠲᠡᠢ
ᠬᠣᠷᠢᠨ ᠳᠥᠷᠪᠡᠨ ᠬᠠᠪᠢᠷᠭᠠ ᠲᠠᠢ
ᠬᠣᠲᠣᠭᠣᠷ ᠨᠠᠢ᠍ᠮᠠᠨ ᠨᠢᠷᠤᠭᠤ ᠲᠠᠢ
ᠠᠬᠤᠷ ᠳᠥᠷᠪᠡᠨ ᠰᠦᠪᠡᠷᠭᠡ ᠲᠡᠢ
ᠮᠠᠩᠬᠠᠨ ᠴᠠᠭᠠᠨ ᠬᠣᠨᠢ ᠪᠠᠨ
ᠮᠠᠩᠨᠠᠢ ᠴᠠᠭᠠᠨ ᠵᠤᠮᠠ ᠪᠣᠯᠭᠠᠵᠤ
ᠠᠷᠪᠠᠨ ᠵᠦᠭ ᠡᠴᠡ ᠵᠠᠯᠠᠷᠠᠵᠤ ᠢᠷᠡᠭᠰᠡᠨ
ᠠᠬᠠ ᠳᠡᠭᠦᠦ ᠲᠠᠨ ᠳ᠋ᠠᠭᠠᠨ
ᠠᠭᠤᠷᠲᠠᠢ ᠶ᠋ᠢᠨ ᠡᠩᠭᠡᠷ ᠡᠴᠡ
ᠠᠰᠯᠠᠨ ᠴᠢᠭᠯᠡᠨ ᠢᠷᠡᠭᠰᠡᠨ
ᠤᠯᠠᠯᠵᠢ ᠶ᠋ᠢᠨ ᠵᠣ ᠠ᠋ᠴᠠ
ᠣᠨᠴᠠᠭᠠᠢᠯᠠᠨ ᠢᠷᠡᠭᠰᠡᠨ
ᠤᠬᠠᠭᠠᠨ ᠴᠢᠳᠠᠯ ᠲᠡᠩᠴᠡᠭᠰᠡᠨ
ᠤᠷᠠᠨ ᠰᠠᠮᠪᠠᠭᠠ ᠬᠣᠣᠰᠯᠠᠭᠰᠠᠨ
ᠤᠷᠠᠳ ᠣᠯᠠᠨ ᠳ᠋ᠠᠭᠠᠨ ᠠᠯᠳᠠᠷᠲᠠᠢ
ᠤᠯᠠᠮ ᠪᠢᠳᠡᠨᠦᠰ ᠲᠡᠭᠡᠨ ᠬᠦᠨᠳᠦᠲᠡᠢ
ᠮᠠᠨ ᠤ᠋ ᠬᠤᠰᠢᠭᠤᠨ ᠳ᠋ᠠᠭᠠᠨ ᠴᠤᠤᠲᠠᠢ
ᠮᠠᠨᠤᠨᠪᠠᠳᠮᠡ ᠨᠠᠰᠤᠲᠠᠨ ᠲᠦᠷᠦᠭᠦᠲᠡᠢ ᠲᠠ ᠪᠦᠭᠦᠳᠡ ᠳ᠋ᠦ᠍
ᠢᠳᠡᠭᠡᠨ ᠦ᠌ ᠳᠡᠭᠡᠵᠢ ᠪᠣᠯᠭᠠᠨ
ᠡᠷᠭᠦᠨ ᠳᠡᠪᠰᠢᠭᠦᠯᠦᠶᠡ! ᠭᠡᠵᠦ ᠢᠷᠦᠭᠡᠯ ᠤᠩᠰᠢᠪᠠ᠃ ᠲᠡᠭᠡᠭᠡᠳ ᠨᠢᠭᠡ ᠡᠷᠡ ᠬᠠᠨᠴᠤᠢ ᠰᠢᠮᠠᠯᠠᠨ ᠵᠠᠭᠠᠨ ᠤ᠋ ᠶᠠᠰᠤᠨ ᠪᠠᠷᠢᠭᠤᠯ ᠲᠠᠢ ᠮᠣᠩᠭᠣᠯ ᠬᠢᠲᠤᠭᠠ ᠪᠦᠵᠢᠭᠯᠡᠭᠦᠯᠵᠦ ᠤᠭᠤᠴᠠ ᠬᠥᠨᠳᠡᠨ ᠪᠦᠭᠦᠳᠡ ᠣᠯᠠᠨ ᠤ᠋ ᠰᠡᠳᠬᠢᠯ ᠢ᠋ ᠰᠡᠷᠭᠦᠭᠡᠨ ᠬᠥᠮᠦᠰ ᠲᠦ᠍ ᠶᠣᠰᠣᠲᠠᠢ ᠯᠠ᠂ ᠳᠠᠷᠬᠠᠨ ᠮᠣᠩᠭᠣᠯ ᠨᠤᠲᠤᠭ ᠲᠠᠭᠠᠨ ᠵᠠᠶᠠᠭᠠᠵᠤ ᠬᠤᠨᠳᠠᠭᠠ ᠰᠡᠯᠭᠦᠯ ᠦᠭᠡᠢ ᠠᠷᠢᠬᠢ ᠤᠤᠭᠤᠵᠤ ᠬᠢᠲᠤᠭᠠ ᠲᠠᠯᠪᠢᠯ ᠦᠭᠡᠢ ᠮᠢᠬᠠ ᠢᠳᠡᠬᠦ ᠶ᠋ᠢᠨ ᠵᠢᠷᠭᠠᠯ ᠢ᠋ ᠡᠳ᠋ᠯᠡᠬᠦ ᠰᠢᠭ ᠰᠠᠢᠬᠠᠨ ᠶᠠᠭᠤᠮᠠ ᠠᠯᠠᠭᠠ ᠭᠡᠳᠡᠭ ᠲᠥᠷᠥᠭᠳᠡᠯ ᠥᠭᠭᠦᠨᠡ᠃
ᠡᠯᠳᠡᠩᠭᠡ ᠶ᠋ᠢᠨ ᠲᠠᠯᠠ ᠶ᠋ᠢᠨ ᠴᠡᠴᠡᠭ ᠰᠢᠭ ᠰᠠᠢᠬᠠᠨ ᠲᠥᠷᠥᠭᠰᠡᠨ ᠠᠴᠢ ᠥᠬᠢᠨ ᠮᠠᠨᠤᠬᠤᠸᠠᠷ ᠮᠥᠩᠭᠥᠨ ᠴᠥᠭᠦᠴᠡᠨ ᠳ᠋ᠦ᠍ ᠠᠷᠢᠬᠢ ᠭᠡᠮᠨᠡᠨ ᠡᠯᠳᠡᠩᠭᠡ ᠮᠠᠨᠤᠪᠠᠳᠮᠡ ᠬᠣᠶᠠᠷ ᠨᠠᠰᠤᠲᠠᠨ ᠠ᠋ᠴᠠ ᠡᠬᠢᠯᠡᠵᠦ ᠠᠷᠢᠬᠢ ᠪᠠᠷᠢᠪᠠ᠃ ᠨᠥᠭᠦᠭᠡ ᠰᠠᠭᠠᠲᠠᠭᠰᠠᠨ ᠭᠡᠢᠴᠢᠳ ᠲᠡᠭᠡᠨ ᠳᠠᠭᠤᠤ ᠡᠷᠭᠦᠵᠦ᠄
ᠬᠤᠨᠳᠠᠭᠠᠨ ᠳ᠋ᠠᠭᠠᠨ ᠬᠡᠮᠨᠡᠭᠡᠳ ᠥᠭᠭᠦᠭᠰᠡᠨ
ᠬᠣᠣᠷᠠᠵᠠ ᠯᠠ ᠪᠠᠢᠨᠠ ᠠ᠋ ᠳᠠᠩᠵᠢᠶᠠᠳᠤᠨ ᠠ᠋ ᠬᠦ
ᠬᠤᠷᠢᠮ ᠢ᠋ᠶ᠋ᠠᠷ ᠰᠠᠭᠠᠲᠠᠭᠰᠠᠨ ᠬᠦᠨᠳᠦᠲᠦ ᠲᠠᠨ ᠳ᠋ᠠᠭᠠᠨ
ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠷᠢᠵᠤ ᠪᠠᠢᠨᠠ ᠠ᠋ ᠬᠦ
ᠪᠠᠩᠵᠠᠨ ᠳ᠋ᠠᠭᠠᠨ ᠵᠠᠰᠠᠭᠠᠳ ᠥᠭᠭᠦᠭᠰᠡᠨ
ᠪᠠᠷᠠᠵᠠ ᠯᠠ ᠶᠤᠮ ᠠ᠋ ᠳᠠᠩᠵᠢᠶᠠᠳᠤᠨ ᠠ᠋ ᠬᠦ
ᠪᠠᠶᠠᠷ ᠢ᠋ᠶ᠋ᠠᠷ ᠢᠷᠡᠭᠰᠡᠨ ᠴᠣᠭᠪᠠᠭᠠᠲᠤᠷ ᠲᠠᠨ ᠳ᠋ᠠᠭᠠᠨ
ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠷᠢᠵᠤ ᠪᠠᠢᠨᠠ ᠬᠦ
ᠵᠦᠩᠰᠡᠨ ᠳ᠋ᠡᠭᠡᠨ ᠬᠢᠭᠡᠳ ᠥᠭᠭᠦᠭᠰᠡᠨ
ᠵᠦᠷᠡᠵᠡ ᠯᠡ ᠶᠦᠮ ᠠ᠋ ᠳᠠᠩᠵᠢᠶᠠᠳᠤᠨ ᠬᠦ ᠁ ᠭᠡᠵᠦ ᠨᠠᠬᠢᠰ ᠨᠣᠬᠠᠰ ᠬᠢᠨ ᠭᠡᠢᠴᠢᠨ ᠵᠣᠴᠢᠨ ᠳ᠋ᠠᠭᠠᠨ ᠳᠠᠭᠤᠤ ᠲᠠᠢ ᠠᠷᠢᠬᠢ ᠪᠠᠷᠢᠬᠤ ᠳ᠋ᠤᠨᠢ ᠴᠣᠭᠪᠠᠭᠠᠲᠤᠷ ᠨᠠᠮᠵᠢᠯ ᠨᠠᠷ《ᠠᠶᠠ᠂ ᠶᠠᠮᠠᠷ ᠭᠣᠶᠣ ᠬᠡᠦᠬᠡᠨ ᠪᠣᠢ᠂ ᠶᠠᠭᠠᠬᠢᠭᠰᠠᠨ ᠰᠠᠢᠬᠠᠨ ᠳᠠᠭᠤᠤ ᠪᠣᠢ》 ᠭᠡᠬᠦ ᠰᠢᠭ ᠪᠠᠷᠢᠭᠰᠠᠨ ᠪᠠᠷᠢᠭᠠ ᠦᠭᠡᠢ ᠠᠷᠢᠬᠢ ᠶ᠋ᠢ ᠤᠰᠤ ᠰᠢᠭ᠋ ᠤᠤᠭᠤᠵᠤ ᠪᠠᠢᠯᠠ᠃
ᠨᠠᠢᠷ ᠰᠠᠢᠬᠠᠨ ᠶᠠᠪᠤᠭᠳᠠᠵᠤ ᠨᠠᠢᠷᠴᠢᠳ ᠨᠠᠭᠠᠰᠢ ᠴᠠᠭᠠᠰᠢ ᠨᠠᠢᠭᠤᠵᠤ ᠡᠬᠢᠯᠡᠯᠡ᠃ ᠨᠠᠩᠴᠢᠳ ᠳᠡᠮᠡᠢ ᠳᠠᠭᠠᠭᠠᠳᠠᠭ ᠦᠭᠡᠢ ᠨᠠᠮᠵᠢᠯ ᠤ᠋ᠨ ᠨᠢᠳᠦ ᠨᠢ ᠲᠣᠭᠲᠠᠵᠤ ᠨᠥᠭᠦᠭᠡ ᠡᠲᠡᠭᠡᠳ ᠨᠢ ᠨᠢᠳᠦᠨ ᠳ᠋ᠤᠨᠢ ᠭᠤᠷᠪᠠ ᠪᠣᠯᠵᠤ ᠬᠠᠷᠠᠭᠳᠠᠭᠠᠳ ᠦᠭᠡ ᠪᠡᠨ ᠴᠦ᠍ ᠬᠡᠯᠡᠵᠦ ᠭᠠᠷᠬᠤ ᠦᠭᠡᠢ ᠠᠮᠠ ᠨᠢ ᠮᠤᠷᠤᠯᠵᠠᠪᠠᠴᠤ᠄ 《ᠪᠢ ᠰᠣᠭᠲᠣᠭᠠ ᠦᠭᠡᠢ ᠡ! ᠰᠣᠯᠣᠭᠠᠢ ᠨᠠᠮᠵᠢᠯ ᠨᠠᠮᠠᠶ᠋ᠢ ᠲᠠ ᠨᠠᠷ ᠮᠡᠳᠡᠬᠦ ᠦᠭᠡᠢ ᠴᠦ᠍ ᠪᠢᠰᠢ ᠳ᠋ᠠ! ᠪᠠᠷᠠᠭᠤᠨ ᠬᠣᠰᠢᠭᠤ ᠪᠠᠷᠤᠭᠯᠠᠵᠤ᠂ ᠳᠤᠮᠳᠠᠳᠤ ᠬᠣᠰᠢᠭᠤ ᠲᠤᠨᠲᠠᠷᠠᠭᠤᠯᠳᠠᠭ ᠰᠢᠦ ᠳᠡ! ᠲᠡᠢᠮᠦ ᠤᠤ᠂ ᠬᠡᠩ ᠁ ᠪᠠᠷᠠᠭᠤᠨ ᠬᠣᠰᠢᠭᠤ ᠲᠠᠢᠵᠢ ᠤᠳᠤᠮ ᠲᠠᠰᠤᠷᠠᠭᠠ ᠦᠭᠡᠢ ᠪᠢᠵᠡ? ᠬᠡᠩ! ᠮᠠᠭᠤ ᠪᠠᠷᠯᠤᠭ ᠤ᠋ᠨ ᠁ ᠦᠯᠥᠭᠴᠢᠨ ᠡᠮᠡ ᠪᠡᠷ ᠮᠤᠬᠤᠷ ᠵᠠᠰᠬᠠᠯᠠᠭᠤᠯᠳᠠᠭ ᠨᠢ ᠬᠣᠬᠢᠨ ᠳ᠋ᠠᠭᠠᠨ ᠁ 》 ᠭᠡᠵᠦ ᠳᠡᠭᠡᠷᠡ ᠳᠣᠣᠷᠠ ᠣᠷᠢᠯᠠᠨ ᠣᠷᠣᠨ ᠳ᠋ᠠᠭᠠᠨ ᠲᠥᠪ ᠰᠠᠭᠤᠵᠤ ᠴᠢᠳᠠᠯ ᠦᠭᠡᠢ᠂ ᠪᠦᠭᠰᠡ ᠨᠢ ᠥᠲᠥᠴᠢᠬᠡᠭᠰᠡᠨ ᠰᠢᠭ ᠪᠠᠢᠪᠠ᠃
ᠵᠤᠳᠪᠠ ᠭᠤᠸᠠᠢ ᠴᠣᠬᠪᠠᠭᠠᠲᠤᠷ ᠤ᠋ᠨ ᠡᠪᠦᠳᠦᠭ ᠢ᠋ ᠢᠯᠪᠢᠵᠦ᠄
— ᠡᠨᠡ ᠥᠬᠢᠨ〈ᠮᠠᠨᠤᠬᠤᠸᠠᠷ〉ᠶᠠᠮᠠᠷ ᠪᠣᠢ? ᠴᠢᠮᠠ ᠳ᠋ᠤ᠌ ᠰᠠᠨᠠᠭᠠ ᠲᠠᠢ ᠪᠣᠯᠴᠢᠬᠠᠭᠰᠠᠨ ᠪᠢᠰᠢ ᠪᠢᠵᠡ ! ᠴᠢ ᠮᠢᠨᠢ ᠁ ᠭᠡᠬᠦ ᠳ᠋ᠦ᠍ ᠴᠤᠭᠪᠠᠭᠠᠲᠤᠷ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠲᠠᠰᠤᠯᠵᠤ᠄
— ᠠ᠂ ᠬᠠᠮᠢᠶᠠ ᠦᠭᠡᠢ᠂ ᠬᠠᠮᠢᠶᠠ ᠦᠭᠡᠢ ᠭᠡᠳ ᠴᠣᠭᠪᠠᠭᠠᠲᠤᠷ᠂ ᠡᠯᠳᠡᠩᠭᠡ ᠪᠣᠯᠤᠨ ᠡᠬᠡ ᠬᠣᠶᠠᠷ ᠢ᠋ ᠪᠡᠨ ᠰᠣᠨᠣᠰᠤᠭᠤᠵᠠᠢ ᠭᠡᠵᠦ ᠨᠢᠭᠡ ᠨᠢᠳᠦ ᠪᠡᠨ ᠠᠨᠢᠰᠬᠢᠨ ᠵᠤᠳᠪᠠ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍《 ᠪᠠᠢᠵᠠ᠂ ᠪᠠᠢᠵᠠ ᠬᠣᠶᠠᠷ ᠨᠠᠰᠤᠲᠠᠨ ᠬᠠᠷᠠᠵᠤ ᠪᠠᠢᠬᠤ ᠳ᠋ᠤ᠌᠂ ᠲᠠ ᠵᠦᠭᠡᠷ ᠁ 》 ᠭᠡᠬᠦ ᠪᠡᠷ ᠵᠤᠳᠪᠠ《ᠮᠡᠳᠡᠯᠡ》 ᠭᠡᠰᠡᠨ ᠰᠢᠤᠬᠡᠨ ᠳᠠᠬᠢᠭᠠᠳ ᠴᠣᠭ᠋ᠠᠪᠠᠭᠠᠲᠤᠷ ᠤ᠋ᠨ ᠴᠢᠬᠢᠨ ᠳ᠋ᠦ᠍ ᠤᠷᠤᠭᠤᠯ ᠢ᠋ᠶ᠋ᠠᠨ ᠨᠠᠭᠠᠵᠤ ᠨᠢᠭᠡ ᠶᠠᠭᠤᠮᠠ ᠰᠢᠪᠡᠨᠡᠨᠡ᠃ ᠳᠠᠷᠠᠭᠠ ᠨᠢ ᠬᠣᠶᠠᠭᠤᠯᠠ ᠨᠢᠭᠡ ᠨᠢᠭᠡᠨ ᠢ᠋ᠶ᠋ᠡᠨ ᠬᠠᠷᠠᠭᠠᠳ ᠶᠡᠬᠡᠳᠡ ᠰᠠᠨᠠᠭᠠ ᠨᠢ ᠲᠠᠯᠪᠢᠭᠤᠷᠠᠨ ᠬᠥᠬᠥᠷᠡᠯᠳᠦᠨᠡ᠃
ᠬᠠᠯᠠᠮᠰᠠᠭᠰᠠᠨ ᠬᠥᠮᠦᠰ ᠰᠠᠨᠠᠭᠠ ᠤᠶᠠᠰᠴᠤ᠂ ᠦᠬᠡᠷ ᠲᠠᠭᠤᠭᠰᠠᠨ ᠬᠥᠮᠦᠨ ᠰᠢᠭ ᠳᠠᠭᠤ ᠨᠢ ᠥᠨᠳᠥᠷᠵᠢᠵᠦ ᠢᠷᠡᠪᠡ᠃ ᠨᠠᠢᠷ ᠤ᠋ᠨ ᠵᠠᠮᠪᠠᠷᠠᠭᠠ ᠰᠤᠯᠠᠷᠠᠵᠤ ᠢᠷᠡᠬᠦ ᠳ᠋ᠦ᠍ ᠵᠤᠳᠪᠠ ᠭᠤᠸᠠᠢ ᠴᠤ᠌ ᠨᠡᠯᠢᠶᠡᠳ ᠬᠠᠯᠠᠮᠰᠠᠵᠤ᠂ ᠬᠦᠷᠡᠩ ᠪᠣᠷᠣ ᠴᠢᠷᠠᠢ ᠨᠢ ᠴᠢᠰ ᠤᠯᠠᠢᠵᠤ ᠠᠪᠢᠶᠠᠰ ᠨᠢ ᠢᠪᠢᠯᠦᠭᠡ ᠪᠣᠯᠤᠯᠲᠠᠢ᠄
— ᠲᠤᠰᠠᠯᠠᠭᠴᠢ ᠨᠣᠶᠠᠨ ᠠ᠋᠂ ᠠᠮᠪᠠᠨ ᠨᠠᠷ ᠠ᠋! ᠠᠩᠬᠠᠷᠴᠤ ᠰᠣᠨᠣᠰᠤᠨᠠ ᠤᠤ ᠲᠠ ᠨᠠᠷ᠂ ᠪᠢ ᠡᠷᠭᠢᠨ ᠣᠯᠠᠨ ᠠᠬᠠ ᠳᠡᠭᠦᠦ ᠨᠠᠷ ᠲᠠᠭᠡᠨ ᠥᠪᠡᠷ ᠢ᠋ᠶ᠋ᠡᠨ ᠵᠣᠬᠢᠶᠠᠭᠰᠠᠨ ᠨᠢᠭᠡ ᠳᠠᠭᠤᠤ ᠪᠠᠨ ᠡᠷᠭᠦᠶᠡ ᠭᠡᠬᠦ ᠳ᠋ᠦ᠍ ᠨᠠᠢᠷ ᠤ᠋ᠨ ᠬᠥᠮᠦᠰ ᠲᠡᠷᠡ ᠵᠦᠭ ᠲᠦ᠍ ᠬᠠᠷᠠᠭᠠ ᠰᠢᠯᠵᠢᠭᠦᠯᠪᠡᠯ᠂
ᠭᠦᠶᠦᠳᠡᠯ ᠵᠢᠷᠣᠭᠠ ᠮᠣᠷᠢ ᠪᠠᠢᠨᠠ
ᠭᠦᠷᠦᠨ ᠳ᠋ᠡᠭᠡᠨ ᠠᠯᠳᠠᠷᠲᠠᠢ ᠴᠤᠭᠪᠠᠭᠠᠲᠤᠷ ᠪᠠᠢᠨᠠ
ᠭᠦᠢᠴᠡᠳ ᠴᠡᠷᠢᠭ ᠢ᠋ᠶ᠋ᠡᠨ ᠵᠠᠬᠢᠷᠳᠠᠭ ᠳᠠ
ᠬᠦᠩ ᠦ᠋ᠨ ᠬᠤᠪᠢᠶᠠᠷᠢ ᠶ᠋ᠢ ᠣᠯᠤᠭ ᠳᠠ
ᠳᠡᠯᠡᠬᠡᠢ ᠶ᠋ᠢᠨ ᠨᠠᠷᠠ ᠶ᠋ᠢ ᠪᠠᠢᠬᠤ ᠳ᠋ᠤ᠌
ᠳ᠋ᠧᠩ ᠦ᠋ᠨ ᠭᠡᠷᠡᠯ ᠢ᠋ᠶ᠋ᠡᠷ ᠶᠠᠭᠤ ᠬᠢᠬᠦ ᠪᠣᠢ
ᠳᠡᠮᠡᠢ ᠬᠡᠦᠬᠡᠳ ᠢ᠋ ᠡᠷᠭᠦᠭᠡᠳ
ᠳᠡᠭᠡᠳᠦ ᠨᠣᠶᠠᠳ ᠢ᠋ ᠬᠠᠭᠤᠷᠪᠠ ᠁ ᠭᠡᠬᠦ ᠳ᠋ᠦ᠍ ᠪᠦᠭᠦᠳᠡ ᠣᠯᠠᠨ ᠴᠤᠭᠪᠠᠭᠠᠲᠤᠷ ᠢ᠋ ᠰᠢᠷᠳᠡᠵᠦ《ᠵᠠ᠂ ᠮᠥᠨ ᠪᠠᠢᠨᠠ》 ᠭᠡᠰᠡᠨ ᠰᠢᠭ ᠱᠤᠤᠭᠢᠯᠳᠤᠪᠠ᠃ ᠡᠨᠡ ᠬᠣᠭᠣᠷᠣᠨᠳᠣ ᠮᠠᠨᠤᠬᠤᠸᠠᠷ ᠴᠤᠭᠪᠠᠭᠠᠲᠤᠷ ᠤ᠋ᠨ ᠬᠣᠨᠳᠠᠭᠠᠨ ᠳ᠋ᠤ᠌ ᠠᠷᠢᠬᠢ ᠵᠠᠰᠠᠩᠭᠠᠨ᠄
ᠯᠣᠩᠬᠣᠨ ᠳᠣᠲᠣᠷᠠ ᠪᠠᠨ ᠪᠠᠢᠬᠤᠢ ᠳ᠋ᠤᠷ
ᠨᠣᠮᠣᠬᠠᠨ ᠬᠠᠷᠠ ᠠᠷᠠᠵᠠ ᠯᠠ ᠪᠠᠢᠨᠠ
ᠨᠣᠶᠠᠨ ᠲᠠᠨ ᠳ᠋ᠠᠭᠠᠨ ᠪᠠᠷᠢᠬᠤᠢ ᠳ᠋ᠤᠷ
ᠳᠣᠭᠰᠢᠨ ᠬᠠᠷᠠ ᠠᠷᠢᠬᠢ ᠯᠠ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠪᠦᠭᠦᠳᠡᠭᠡᠷ ᠠᠶᠠ ᠲᠦᠷᠡᠨ᠄
ᠠᠶᠠᠰ ᠮᠠᠨ ᠳ᠋ᠠᠭᠠᠨ ᠰᠠᠢᠨ
ᠦᠢᠯᠡᠰ ᠲᠠᠨ ᠳ᠋ᠠᠭᠠᠨ ᠰᠠᠢᠨ
ᠠᠢᠯᠠᠳᠬᠠᠵᠤ ᠪᠠᠷᠢᠶᠠ ᠬᠦ ᠭᠡᠵᠦ ᠠᠶᠠ ᠳᠠᠭᠤᠰᠬᠤ ᠠ᠋ᠴᠠ ᠡᠮᠦᠨᠡ ᠳᠠᠭᠤᠴᠢᠨ ᠥᠬᠢᠨ ᠠᠶᠠ ᠲᠣᠰᠴᠤ᠄
ᠪᠣᠳᠣᠩ ᠳᠣᠲᠣᠷᠠ ᠪᠠᠨ ᠪᠠᠢᠬᠤᠢ ᠳ᠋ᠤᠷ
ᠪᠦᠯᠢᠶᠡᠨ ᠬᠠᠯᠠᠭᠤᠨ ᠠᠷᠠᠵᠠ ᠯᠠ ᠪᠠᠢᠨᠠ
ᠪᠦᠭᠦᠳᠡᠭᠡᠷ ᠲᠠᠨ ᠳ᠋ᠠᠭᠠᠨ ᠪᠠᠷᠢᠬᠤᠢ ᠳ᠋ᠤᠷ
ᠭᠠᠯᠵᠠᠭᠤ ᠬᠠᠷᠠ ᠠᠷᠢᠬᠢ ᠯᠠ ᠪᠠᠢᠨᠠ
ᠠᠶᠠᠰ ᠮᠠᠨ ᠳ᠋ᠠᠭᠠᠨ ᠰᠠᠢᠨ
ᠦᠢᠯᠡᠰ ᠲᠠᠨ ᠳ᠋ᠠᠭᠠᠨ ᠰᠠᠢᠨ
ᠠᠢᠯᠠᠳᠬᠠᠵᠤ ᠪᠠᠷᠢᠶᠠ ᠬᠥ᠋ ᠁ ᠭᠡᠵᠦ ᠨᠠᠷᠭᠢᠯᠳᠤᠬᠤ ᠨᠠᠢᠷ ᠤ᠋ᠨ ᠬᠥᠭ ᠳᠠᠭᠤᠤ ᠰᠥᠨᠢ ᠶ᠋ᠢᠨ ᠨᠠᠮᠵᠢᠭᠤᠨ ᠢ᠋ ᠡᠪᠳᠡᠵᠦ ᠰᠣᠨᠵᠢᠷᠠᠩᠬᠠᠢ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠪᠠᠢᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ <ᠬᠡᠯᠡ ᠪᠢᠴᠢᠭ> ᠬᠣᠯᠪᠣᠭᠠ