ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠦᠲᠦᠭᠡᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠳᠥᠷᠪᠡ> Хан мунын сүүрс < доорд > – Мөнх зохиоов ᠂Дөдгөөр бодь – Нэгдүгээр бүлэг <4>
347ᠲᠦᠲᠦᠭᠡᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠳᠥᠷᠪᠡ>
ᠳᠥᠷᠪᠡ
ᠳᠠᠷᠢ ᠶ᠋ᠢᠨ ᠤᠲᠤᠭᠠᠨ ᠳ᠋ᠤ᠌ ᠬᠠᠬᠠᠭᠰᠠᠨ ᠤᠷᠠᠳ ᠨᠤᠲᠤᠭ ᠲᠤ᠌ ᠨᠠᠮᠤᠷ ᠡᠷᠲᠡ ᠰᠠᠭᠠᠳᠠᠵᠠᠢ᠃ ᠡᠪᠡᠰᠦᠨ ᠦ᠌ ᠲᠣᠯᠣᠭᠠᠢ ᠪᠤᠭᠤᠷᠤᠯᠲᠤᠨ ᠥᠷᠯᠥᠭᠡ ᠦᠳᠡᠰᠢ ᠵᠢᠪᠡᠭᠦᠨ ᠪᠠᠢᠯᠠ᠃
ᠠᠩᠴᠢᠨᠵᠠᠪ ᠤ᠋ᠨ ᠴᠡᠷᠢᠭ ᠮᠢᠩᠭᠠᠨ ᠤ᠋ ᠲᠠᠯᠠ᠂ ᠰᠠᠭᠠᠳᠠᠭ ᠤ᠋ᠨ ᠬᠠᠪᠢ ᠪᠠᠷ ᠥᠪᠥᠷ ᠲᠠᠯᠠ ᠶ᠋ᠢᠨ ᠰᠤᠷᠠᠭ ᠴᠢᠮᠡᠭᠡ ᠶ᠋ᠢ ᠰᠣᠨᠣᠰᠤᠨ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠵᠤ ᠪᠠᠢᠪᠠ᠃ ᠡᠳᠡᠭᠡᠷ ᠲᠣᠯᠣᠭᠠᠢ ᠦᠭᠡᠢ ᠣᠷᠭᠣᠳᠠᠭᠤᠯ ᠤ᠋ᠨ ᠬᠠᠷᠠ ᠴᠡᠷᠢᠭ ᠦ᠋ᠳ ᠠᠶᠠᠨᠳᠠᠭᠠᠨ ᠳᠡᠭᠡᠷᠡᠮ ᠲᠤᠨᠤᠭᠠ ᠪᠣᠯᠵᠤ ᠨᠣᠮᠣᠬᠠᠨ ᠶᠠᠳᠠᠭᠤ ᠮᠠᠯᠴᠢᠨ ᠠᠷᠠᠳ ᠤ᠋ᠨ ᠮᠠᠯ ᠤᠨᠤᠭᠠ ᠶ᠋ᠢ ᠲᠣᠨᠣᠵᠤ ᠳᠡᠭᠡᠷᠡᠮᠳᠡᠬᠦ ᠶ᠋ᠢ ᠦᠵᠡᠭᠡᠳ ᠲᠡᠳᠡᠭᠡᠷ ᠳᠡᠭᠡᠷᠡᠮ ᠦ᠋ᠨ ᠴᠡᠷᠢᠭ ᠦ᠋ᠨ ᠫᠤᠤ ᠰᠤᠮᠤ ᠶ᠋ᠢ ᠬᠤᠷᠢᠶᠠᠵᠤ᠂ ᠵᠠᠷᠢᠮ ᠢ᠋ ᠨᠢ ᠰᠢᠭᠤᠳ ᠤᠰᠠᠳᠬᠠᠵᠤ ᠵᠠᠯᠬᠠᠭᠠᠯ ᠦᠵᠡᠭᠦᠯᠪᠡ᠃
ᠨᠢᠭᠡ ᠡᠳᠦᠷ ᠠᠩᠴᠢᠨᠵᠠᠪ ᠤ᠋ᠨ ᠴᠡᠷᠢᠭ ᠨᠢᠭᠡ ᠲᠠᠷᠢᠶᠠᠴᠢᠨ ᠲᠣᠰᠬᠣᠨ ᠢ᠋ᠶ᠋ᠠᠷ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠨᠢᠭᠡᠨ ᠲᠠᠷᠢᠶᠠᠴᠢᠨ ᠡᠪᠦᠭᠡᠨ ᠠᠩᠴᠢᠨᠵᠠᠪ ᠤ᠋ᠨ ᠮᠣᠷᠢᠨ ᠤ᠋ ᠡᠮᠦᠨᠡ ᠢᠷᠡᠵᠦ ᠰᠥᠭᠥᠳᠦᠭᠡᠳ᠄
一 ᠮᠣᠩᠭᠣᠯ ᠡᠪᠦᠭᠡ ᠮᠢᠨᠢ ᠠ᠋! ᠠᠮᠢ ᠠᠪᠤᠷᠠᠭᠠᠴᠢ ᠠ᠋!《ᠬᠠᠷᠠ ᠨᠣᠬᠠᠢ》 ᠨᠤᠭᠤᠳ ᠪᠡᠷᠢ ᠶ᠋ᠢ ᠮᠢᠨᠢ ᠱᠠᠯᠳᠠᠩᠨᠠᠭᠤᠯᠤᠭᠠᠳ᠁ ᠪᠤᠤ ᠦᠵᠡᠭᠳᠡᠭᠰᠡᠨ ᠠᠳᠤᠭᠤᠰᠤ᠁ ᠭᠡᠵᠦ ᠡᠭᠡᠷᠡᠨ ᠤᠬᠢᠯᠠᠪᠠ᠃
— ᠵᠠ᠂ ᠲᠠ ᠪᠣᠰ! ᠪᠣᠰ! ᠬᠠᠮᠢᠭᠠ ᠪᠣᠢ? ᠭᠡᠵᠦ ᠡᠪᠦᠭᠡᠨ ᠢ᠋ᠶ᠋ᠡᠷ ᠵᠠᠮᠴᠢᠯᠠᠭᠤᠯᠤᠨ ᠲᠣᠰᠬᠣᠨ ᠳ᠋ᠤ᠌ ᠣᠷᠣᠪᠠ᠃ ᠲᠡᠷᠡ ᠪᠠᠭᠤᠷᠠᠢᠬᠠᠨ ᠲᠠᠷᠢᠶᠠᠴᠢᠨ ᠠᠢᠯ ᠤ᠋ᠨ ᠨᠣᠣᠷᠬᠠᠢ ᠴᠠᠮᠪᠠᠨ ᠬᠡᠷᠡᠮ ᠢ᠋ ᠲᠣᠭᠣᠷᠢᠭᠤᠯᠤᠭᠠᠳ ᠬᠠᠷᠠ ᠢᠰᠡᠭᠡᠢ ᠲᠣᠬᠣᠮ ᠪᠤᠶᠤ ᠬᠥᠨᠵᠢᠯᠡ ᠶ᠋ᠢᠨ ᠲᠠᠰᠤᠷᠬᠠᠢ ᠪᠥᠰ ᠳᠤᠬᠤᠭᠠᠰᠤᠲᠠᠢ᠂ ᠵᠠᠳᠠᠭᠠᠢ ᠣᠯᠣᠰᠣᠨ ᠨᠣᠭᠲᠣ ᠲᠠᠢ ᠡᠯᠵᠢᠭᠡ ᠮᠣᠷᠢ ᠤᠶᠠᠭᠠᠰᠤᠲᠠᠢ ᠬᠠᠷᠠᠭᠳᠠᠨᠠ᠃ ᠬᠦᠷᠢᠶᠡᠨ ᠳ᠋ᠦ᠍ᠨᠢ ᠨᠢᠭᠡ ᠪᠦᠯᠦᠭ ᠳᠡᠭᠡᠷᠡᠮ ᠴᠡᠷᠢᠭ ᠦ᠋ᠳ ᠠᠨᠵᠢᠰᠤᠨ ᠤ᠋ ᠬᠢᠨᠢ ᠱᠠᠷ ᠢ᠋ ᠨᠤᠭᠤᠰᠤᠯᠴᠢᠬᠠᠭᠠᠳ ᠪᠤᠵᠢᠭᠢᠨᠠᠯᠳᠤᠵᠤ ᠪᠠᠢᠪᠠ᠃ ᠭᠡᠷ ᠳᠣᠲᠣᠷᠠ ᠨᠢ ᠪᠦᠰᠡᠭᠦᠢ ᠬᠥᠮᠦᠨ ᠦ᠌ ᠮᠠ ᠮᠠ ᠶᠠ! ᠳᠠ ᠳᠠ ᠶᠠ(ᠮᠥᠮᠥ ᠠ᠋᠂ ᠠᠪᠤ ᠠ᠋)! ᠭᠡᠵᠦ ᠴᠢᠬᠠᠷᠠᠨ ᠣᠷᠢᠯᠠᠬᠤ ᠳᠠᠭᠤᠨ ᠴᠢᠬᠢ ᠬᠠᠳᠠᠨ ᠳᠤᠭᠤᠯᠳᠠᠨᠠ᠁ ᠡᠳᠡᠭᠡᠷ ᠴᠡᠷᠢᠭ ᠦ᠋ᠨ ᠫᠤᠤ ᠵᠡᠪᠰᠡᠭ ᠢ᠋ ᠬᠤᠷᠢᠶᠠᠵᠤ ᠬᠡᠷᠡᠮ ᠦ᠋ᠨ ᠪᠤᠯᠤᠩ ᠳ᠋ᠤ᠌ ᠴᠠᠭᠠᠰᠢ ᠨᠢ ᠬᠠᠷᠠᠭᠤᠯᠤᠨ ᠲᠣᠩᠭᠣᠢᠯᠭᠠᠴᠢᠬᠠᠭᠠᠳ ᠭᠡᠷ ᠲᠦ᠍ ᠣᠷᠣᠵᠤ ᠣᠴᠢᠪᠠᠯ᠂ ᠯᠠᠮᠠ ᠭᠤᠷᠪᠠᠨ ᠡᠷᠳᠡᠨᠢ ᠠ᠋! ᠪᠤᠤ ᠦᠵᠡᠭᠳᠡ᠂ ᠨᠢᠭᠡ ᠡᠷᠡ ᠵᠠᠯᠠᠭᠤ ᠡᠬᠡᠨᠡᠷ ᠦ᠋ᠨ ᠬᠥᠬᠥ ᠳᠠᠯᠠᠩ ᠢ᠋ ᠨᠢ ᠰᠠᠷᠪᠠᠢᠯᠭᠠᠨ ᠱᠠᠯᠳᠠᠩᠨᠠᠭᠤᠯᠴᠢᠬᠠᠭᠠᠳ ᠨᠤᠬᠤᠵᠤ ᠪᠠᠢᠪᠠ᠃ ᠬᠥᠭᠡᠷᠦᠬᠦᠢ ᠬᠡᠦᠬᠡᠳ ᠬᠥᠭᠰᠢᠨ ᠨᠢ ᠪᠦᠯᠲᠡᠩ ᠪᠦᠯᠲᠡᠩ ᠭᠡᠳ ᠬᠠᠨᠵᠤᠨ ᠤ᠋ ᠮᠤᠬᠤᠷ ᠲᠤ᠌ ᠪᠡᠮᠪᠡᠭᠡᠨᠡᠨᠡ᠁
ᠬᠠᠵᠠᠭᠤ ᠠ᠋ᠴᠠ ᠳᠠᠷᠠᠭᠠ ᠵᠢᠰᠢᠶᠡᠨ ᠦ᠌ ᠡᠭᠡᠯᠵᠢ ᠶ᠋ᠢ ᠬᠦᠯᠢᠶᠡᠵᠦ ᠳᠡᠢᠯᠬᠦ ᠦᠭᠡᠢ ᠲᠠᠴᠢᠶᠠᠯ ᠤ᠋ᠨ ᠭᠠᠯ ᠳ᠋ᠤ᠌ ᠰᠢᠲᠠᠭᠰᠠᠨ ᠥᠭᠡᠷᠡ ᠨᠢᠭᠡ ᠬᠠᠷᠠ ᠴᠡᠷᠢᠭ ᠳᠡᠪᠬᠡᠴᠡᠨ ᠰᠠᠨᠳᠤᠷᠴᠤ《ᠬᠠ ᠬᠠ᠁》 ᠭᠡᠵᠦ ᠰᠢᠯᠦᠰᠦ ᠪᠡᠨ ᠥᠰᠥᠷᠬᠡᠨ ᠢᠨᠢᠶᠡᠨᠡ᠃ ᠪᠠᠬᠠ ᠨᠢ ᠬᠠᠨᠤᠭᠰᠠᠨ ᠢᠨᠢᠶᠡᠳᠦ᠂ ᠢᠴᠢᠭᠦᠷᠢ ᠶ᠋ᠢᠨ ᠲᠤᠢᠯ ᠳ᠋ᠤ᠌ ᠲᠤᠯᠤᠭᠰᠠᠨ ᠭᠤᠲᠤᠭᠠᠯ᠂ ᠡᠮᠭᠡᠨᠢᠯ ᠢ᠋ᠶ᠋ᠡᠨ ᠲᠣᠭᠠᠴᠢᠭᠰᠠ ᠮᠡᠭᠰᠢᠯ᠁ ᠡᠨᠡ ᠰᠢᠪᠡᠷ ᠪᠠᠢᠰᠢᠩ ᠳ᠋ᠤ᠌ ᠵᠣᠬᠢᠴᠠᠯ ᠠᠯᠳᠠᠭᠰᠠᠨ ᠭᠤᠨᠢᠭᠲᠤ ᠵᠦᠴᠦᠭᠡ ᠶ᠋ᠢ ᠬᠠᠷᠠᠭᠠᠳ ᠨᠢᠳᠦ ᠬᠠᠯᠢᠷᠠᠪᠠ᠃ ᠠᠩᠴᠢᠨᠵᠠᠪ ᠥᠨᠥᠬᠢ ᠱᠠᠯᠳᠠᠩ ᠡᠮᠡ ᠶ᠋ᠢᠨ ᠭᠡᠳᠡᠰᠦᠨ ᠳᠡᠭᠡᠷᠡ ᠲᠡᠢᠴᠢᠭᠢᠨᠡᠭᠡ ᠪᠣᠯᠬᠢ ᠡᠷᠡ ᠶ᠋ᠢ ᠦᠰᠦᠳᠡᠵᠦ ᠠᠪᠤᠭᠠᠳ ᠠᠭᠤᠷᠯᠠᠭᠰᠠᠨ ᠳ᠋ᠠᠭᠠᠨ ᠮᠠᠩᠨᠠᠢ ᠳᠤᠮᠳᠠ ᠨᠢ ᠰᠤᠮᠤ ᠱᠠᠩᠨᠠᠪᠠ᠁
ᠡᠨᠡ ᠦᠶᠡ ᠳ᠋ᠦ᠍ ᠴᠣᠭᠪᠠᠭᠠᠲᠤᠷ ᠴᠡᠷᠢᠭ ᠢ᠋ᠶ᠋ᠡᠨ ᠴᠤᠭᠯᠠᠭᠠᠵᠤ᠂ ᠬᠥᠩᠬᠥᠷ ᠵᠠᠮᠪᠠᠯ ᠢ᠋ᠶ᠋ᠠᠷ ᠬᠡᠰᠢᠭᠲᠡᠢ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠪᠠᠢᠳᠠᠯ ᠢ᠋ ᠰᠤᠷᠠᠭᠯᠠᠭᠤᠯᠤᠭᠰᠠᠨ ᠳ᠋ᠤ᠌ ᠰᠢᠭᠤᠢᠲᠤ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠴᠢᠳᠬᠥᠷ ᠴᠦ᠍ ᠪᠠᠢᠳᠠᠭ ᠦᠭᠡᠢ᠃ ᠠᠯᠢ ᠤᠵᠠᠭᠤᠷ ᠤ᠋ᠨ ᠦᠭᠡᠢ ᠴᠡᠷᠢᠭ ᠮᠣᠷᠢ ᠪᠠᠨ ᠲᠠᠲᠠᠵᠤ ᠪᠠᠷᠠ ᠰᠤᠷᠠᠭ ᠦᠭᠡᠢ ᠭᠣᠳᠣᠢᠴᠢᠬᠠᠯᠠ ᠭᠡᠰᠡᠨ ᠴᠢᠮᠡᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠳᠡᠪᠡᠯ ᠳ᠋ᠡᠭᠡᠨ ᠪᠠᠭᠲᠠᠬᠤ ᠦᠭᠡᠢ ᠠᠭᠤᠷᠯᠠᠨ᠄《ᠮᠠᠭᠤ ᠬᠡᠰᠢᠭᠲᠡᠢ ᠴᠢ᠂ ᠴᠡᠷᠢᠭ ᠦ᠋ᠨ ᠵᠠᠷᠯᠢᠭ ᠳᠠᠭᠠᠬᠤ ᠦᠭᠡᠢ᠂ ᠡᠨᠡ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠵᠥᠪᠰᠢᠶᠡᠷᠡᠯ ᠦᠭᠡᠢ ᠪᠡᠷ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠣᠩᠭᠣᠢᠴᠢᠬᠠᠳᠠᠭ ᠰᠠᠢᠨ ᠡᠷᠡ ᠪᠠᠢᠵᠠᠢ ᠴᠢ! ᠮᠠᠭᠤ ᠴᠢᠰᠤ ᠶ᠋ᠢ ᠬᠤᠢ!》 ᠭᠡᠵᠦ ᠬᠠᠷᠢᠶᠠᠯ ᠲᠠᠯᠪᠢᠵᠤ ᠪᠠᠢᠲᠠᠯᠠ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠡᠴᠡ ᠴᠣᠭᠪᠠᠭᠠᠲᠤᠷ ᠢ᠋ ᠦᠳᠲᠡᠷ ᠲᠦᠷᠭᠡᠨ ᠬᠦᠩ ᠦ᠋ᠨ ᠶᠠᠮᠤᠨ ᠳ᠋ᠤ᠌ ᠢᠷᠡ ᠭᠡᠰᠡᠨ ᠳᠠᠯᠠᠪᠴᠢ ᠲᠠᠢ ᠲᠠᠬᠠᠷ ᠢᠷᠡᠭᠦᠯᠪᠡ᠃
ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠲᠡᠷᠡ ᠡᠳᠦᠷ ᠵᠠᠩᠵᠤᠨ ᠶᠠᠮᠤᠨ ᠤ᠋ ᠴᠡᠷᠢᠭ ᠦ᠋ᠨ ᠯᠢᠦ ᠹᠦᠭᠤᠸᠠᠨ ᠤ᠋ ᠵᠢᠮᠡᠯᠡᠨ ᠳᠣᠩᠭᠣᠳᠤᠭᠰᠠᠨ ᠴᠠᠬᠢᠯᠭᠠᠨ ᠮᠡᠳᠡᠭᠡ ᠶ᠋ᠢ ᠭᠠᠷᠳᠠᠵᠤ ᠠᠪᠤᠭᠠᠳ ᠤᠴᠠᠭᠠᠷᠳᠠᠨ《ᠴᠣᠭᠪᠠᠭᠠᠲᠤᠷ ᠠ᠋᠂ ᠴᠣᠭᠪᠠᠭᠠᠲᠤᠷ᠂ ᠴᠢ ᠬᠡᠵᠢᠶᠡ ᠲᠡᠷᠡ ᠳᠡᠭᠡᠷᠡᠮ ᠦ᠋ᠨ ᠵᠠᠩ ᠢ᠋ᠶ᠋ᠠᠨ ᠬᠠᠯᠠᠵᠤ ᠬᠥᠮᠦᠨ ᠪᠣᠯᠳᠠᠭ ᠪᠢᠯᠡ⁈》 ᠭᠡᠵᠦ ᠲᠡᠭᠦᠨ ᠢ᠋ ᠳᠠᠭᠤᠳᠠᠭᠤᠯᠤᠭᠰᠠᠨ ᠪᠠᠢᠨᠠ᠃
ᠵᠠᠩ ᠠᠷᠠᠨᠰᠢᠨ ᠤ᠋ ᠬᠤᠪᠢ ᠳ᠋ᠤ᠌ ᠴᠣᠭᠪᠠᠭᠠᠲᠤᠷ ᠪᠠᠭᠠ ᠬᠠᠲᠤᠨ ᠤ᠋ ᠪᠠᠴᠢᠮ ᠳᠠᠭᠤᠳᠠᠯᠭᠠ ᠪᠠᠷ ᠲᠡᠷᠡ ᠳᠣᠣᠷᠠ ᠪᠠᠨ ᠳᠠᠪᠬᠢᠭᠠᠳ ᠬᠦᠷᠴᠦ ᠵᠠᠬᠢᠶᠠ ᠵᠠᠷᠯᠢᠭ ᠢ᠋ ᠮᠡᠬᠦᠢᠨ ᠬᠦᠯᠢᠶᠡᠳᠡᠭ ᠬᠥᠮᠦᠨ ᠪᠢᠰᠢ ᠪᠠᠢᠪᠠ᠃ ᠲᠡᠭᠦᠨ ᠳ᠋ᠦ᠍ ᠴᠡᠷᠢᠭ ᠦ᠋ᠨ ᠶᠣᠰᠣ ᠳᠢᠭᠯᠢᠮ ᠡᠨᠡ ᠲᠡᠷᠡ ᠭᠡᠬᠦ ᠴᠡᠭᠡᠷ ᠭᠣᠷᠢᠮ ᠶᠡᠷᠦ ᠡᠴᠡ ᠠᠯᠠᠭᠠ᠃ ᠨᠡᠩ ᠴᠦ᠍ ᠪᠠᠭᠠ ᠬᠠᠲᠤᠨ ᠢ᠋ ᠬᠡᠵᠢᠶᠡᠳᠡ ᠦᠯᠦ ᠲᠣᠭᠣᠮᠰᠠᠷᠯᠠᠬᠤ ᠤᠴᠢᠷ᠂ ᠡᠨᠡ ᠬᠦ᠌ ᠡᠮᠡᠭᠲᠡᠢ ᠰᠧᠯᠢᠩ ᠦ᠋ᠨ ᠵᠠᠷᠯᠢᠭ ᠢ ᠶᠠᠭᠠᠬᠢᠨ ᠲᠥᠪ ᠵᠣᠭᠰᠣᠨ ᠬᠦᠯᠢᠶᠡᠬᠦ ᠠᠵᠢ⁈ ᠲᠡᠷᠡ ᠪᠡᠷ ᠪᠠᠭᠠ ᠬᠠᠲᠤᠨ ᠢ ᠰᠧᠯᠢᠩ ᠢ ᠳᠠᠭᠤᠳᠠᠵᠤ ᠢᠷᠡᠭᠦᠯᠦᠨ ᠡᠮᠦᠨᠡ ᠪᠡᠨ ᠨᠣᠮᠣᠬᠠᠨ ᠵᠣᠭᠰᠣᠭᠠᠨ ᠬᠠᠷᠢᠶᠠᠬᠤ ᠯᠠ ᠳᠤᠲᠠᠨᠠ᠃ ᠴᠣᠭᠪᠠᠭᠠᠲᠤᠷ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠢ ᠬᠦᠨᠳᠦᠳᠬᠡᠶᠡ ᠭᠡᠳᠡᠭ ᠪᠣᠳᠣᠯ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠳᠥᠷᠥᠭᠡ ᠦᠭᠡᠢ ᠪᠣᠯᠬᠣᠷ᠂ ᠠᠳᠠᠭ ᠨᠢ ᠥᠩᠭᠡᠨ ᠳᠡᠭᠡᠷᠡ ᠪᠡᠨ ᠴᠦ᠍ ᠡᠮᠦᠨᠡ ᠨᠢ ᠮᠡᠬᠦᠢᠨ ᠰᠢᠷᠪᠠᠯᠵᠠᠬᠤ ᠶ᠋ᠢ ᠭᠦᠢᠴᠡᠳᠬᠡᠵᠦ ᠦᠯᠦ ᠴᠢᠳᠠᠨᠠ᠃ ᠭᠠᠭᠴᠠ ᠲᠡᠭᠦᠨ ᠦ᠌ ᠠᠷᠤ ᠳ᠋ᠤᠨᠢ ᠲᠦᠰᠢᠯᠭᠡ ᠪᠣᠯᠤᠭᠰᠠᠨ ᠸᠠᠩ ᠰᠣᠬᠣᠷ ᠤ᠋ᠨ ᠴᠡᠷᠢᠭ ᠦ᠋ᠨ ᠣᠳᠣ ᠲᠦᠭᠡᠭᠡᠳᠡᠭ《ᠠᠳᠢᠰ》 ᠢ ᠰᠢᠲᠦᠳᠡᠭ ᠡᠴᠡ ᠠᠷᠭᠠ ᠪᠤᠶᠤ ᠪᠠᠷᠰ ᠤ᠋ᠨ ᠰᠦᠷ ᠲᠦ᠍ ᠥᠮᠥᠭ ᠪᠠᠷᠢᠭᠰᠠᠨ ᠦᠨᠡᠭᠡᠨ ᠦ᠌ ᠡᠮᠦᠨᠡ ᠡᠴᠡ ᠴᠢᠬᠢ ᠬᠤᠯᠮᠠᠢᠬᠤ ᠦᠭᠡᠢ ᠪᠠᠢᠵᠤ ᠪᠣᠯᠬᠤ ᠦᠭᠡᠢ ᠳ᠋ᠡᠭᠡᠨ ᠥᠨᠥᠳᠥᠷ ᠴᠣᠭᠪᠠᠭᠠᠲᠤᠷ᠂ ᠪᠠᠭᠠ ᠬᠠᠲᠤᠨ ᠤ᠋ ᠭᠦᠶᠦᠯᠭᠡᠭᠰᠡᠨ ᠲᠠᠬᠠᠷ ᠤ᠋ᠨ ᠪᠠᠴᠢᠮ ᠳᠠᠭᠤᠳᠠᠯᠭᠠ ᠳ᠋ᠤ᠌ ᠬᠥᠲᠥᠯᠦᠭᠳᠡᠨ ᠬᠣᠰᠢᠭᠤ ᠬᠦᠩ ᠵᠦᠭ ᠱᠠᠯᠠᠪᠳᠠᠨ ᠮᠣᠷᠳᠠᠪᠠ᠃
ᠮᠡᠳᠡᠳᠡᠭ ᠦᠭᠡᠢ ᠶ᠋ᠢᠨ ᠨᠠᠭᠠᠨᠠ ᠮᠡᠨᠡᠭ ᠭᠡᠭᠴᠢ ᠪᠡᠶᠡ ᠪᠡᠨ ᠰᠡᠴᠡᠯᠡᠭᠰᠡᠨ ᠴᠣᠭᠪᠠᠭᠠᠲᠤᠷ ᠳᠣᠲᠣᠷᠠ ᠪᠠᠨ《ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠮᠢᠨᠢ᠂ ᠨᠠᠮᠠᠶ᠋ᠢ ᠪᠣᠷᠣ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠱᠠᠯᠠᠮᠠᠭᠠᠢ ᠲᠤᠯᠵᠤ ᠶᠠᠪᠤᠯᠠ ᠭᠡᠵᠦ ᠭᠠᠪᠢᠶᠠ ᠳᠤᠷᠠᠳᠬᠤ ᠭᠡᠪᠡ ᠤᠤ ᠳᠠ? ᠡᠨᠡ ᠬᠦ᠌ ᠮᠠᠭᠤ＜ᠮᠤᠬᠤᠷ ᠵᠠᠰᠠᠭ＞ ᠤ᠋ᠨ ᠠᠮᠠᠨ ᠵᠠᠪᠠᠵᠢ ᠶ᠋ᠢᠨ ᠬᠣᠲᠣᠯᠵᠠᠭᠤᠯᠤᠭᠰᠠᠭᠠᠷ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠶᠠᠮᠤᠨ ᠤ᠋ ᠡᠭᠦᠳᠡᠨ ᠳ᠋ᠦ᠍ ᠰᠣᠷᠲᠣᠭᠣᠲᠠᠢ ᠪᠠᠭᠤᠪᠠ᠃
ᠬᠦᠩ ᠦ᠋ᠨ ᠶᠠᠮᠤᠨ ᠤ᠋ ᠭᠠᠤᠯᠢᠨ ᠲᠣᠪᠣᠷᠤᠤ ᠲᠣᠭᠰᠢᠨ ᠠᠷᠰᠯᠠᠨ ᠤ᠋ ᠰᠣᠶᠣᠭᠠᠨ ᠳ᠋ᠠᠭᠠᠨ ᠵᠡᠰ ᠭᠠᠷᠠᠬᠠ ᠡᠮᠬᠦᠭᠰᠡᠨ ᠬᠣᠣᠰ ᠪᠠᠷᠢᠭᠤᠯᠲᠤ ᠬᠦᠷᠡᠩ ᠤᠯᠠᠭᠠᠨ ᠪᠠᠨᠰᠠᠨ ᠬᠠᠭᠠᠯᠭᠠ ᠣᠩᠭᠣᠢᠲᠠᠯᠠ ᠢᠷᠠᠭᠳᠠᠭᠰᠠᠨ ᠨᠢ ᠶᠠᠭ ᠯᠠ ᠲᠡᠭᠦᠨ ᠦ᠌ ᠬᠦᠷᠴᠦ ᠢᠷᠡᠬᠦ ᠶ᠋ᠢ ᠤᠭᠲᠤᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠪᠠᠢᠯᠠ᠃
一 ᠵᠠ᠂ ᠰᠠᠢᠨ ᠤᠤ? ᠪᠠᠭᠠ ᠬᠠᠲᠤᠨ ᠤ᠋ ᠪᠡᠶᠡ ᠯᠠᠭᠱᠠᠨ ᠲᠤᠩᠭᠠᠯᠠᠭ⁈ ᠭᠡᠵᠦ ᠴᠣᠭᠪᠠᠭᠠᠲᠤᠷ ᠮᠡᠨᠳᠦ ᠪᠠᠷᠢᠪᠠᠯ᠂
一 ᠰᠠᠢᠨ᠂ ᠰᠠᠢᠨ! ᠴᠣᠭᠪᠠᠭᠠᠲᠤᠷ ᠴᠢ ᠶᠡᠬᠡᠳᠡ ᠣᠯᠵᠠ ᠣᠮᠣᠭ ᠲᠠᠢ ᠭᠠᠨᠵᠤᠭᠠ ᠳᠡᠭᠡᠭᠦᠷ ᠶᠠᠪᠤᠭᠠ ᠪᠢᠵᠡ! ᠭᠡᠵᠦ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠲᠡᠭᠦᠨ ᠦ᠌ ᠡᠮᠦᠨᠡ ᠡᠴᠡ ᠦᠨᠡᠨ ᠴᠦ᠍ ᠪᠢᠰᠢ ᠬᠥᠢᠲᠡᠮᠰᠦᠭ ᠴᠢᠷᠠᠢ ᠲᠠᠢ ᠦᠭᠡ ᠠᠮᠰᠠᠭᠤᠯᠤᠭᠰᠠᠨ ᠳ᠋ᠤ᠌ ᠴᠣᠭᠪᠠᠭᠠᠲᠤᠷ ᠭᠠᠢᠬᠠᠵᠤ᠄
一 ᠬᠠᠲᠤᠨ ᠰᠧᠯᠢᠩ ᠲᠠ᠁ ᠭᠡᠵᠦ ᠲᠡᠭᠦᠨ ᠡᠴᠡ ᠯᠠᠪᠯᠠᠶᠠ ᠭᠡᠲᠡᠯᠡ ᠪᠠᠭᠠ ᠬᠠᠲᠤᠨ ᠴᠠᠭᠠᠰᠢ ᠡᠷᠭᠢᠵᠦ ᠳᠠᠯᠤ ᠮᠥᠷᠥ ᠪᠡᠨ ᠰᠢᠯᠭᠡᠭᠡᠨ ᠳᠤᠷᠠ ᠦᠭᠡᠢᠴᠡᠨ᠄
一 ᠮᠢᠨᠦ ᠨᠢᠭᠤᠷ ᠳᠡᠭᠡᠷᠡ ᠨᠠᠮᠠᠶ᠋ᠢ ᠰᠧᠯᠢᠩ ᠭᠡᠵᠦ ᠥᠩᠭᠡᠯᠡᠨ ᠳᠠᠭᠤᠳᠠᠬᠤ ᠶᠠᠭᠤ ᠪᠠᠢᠬᠤ ᠪᠣᠢ? ᠠᠷᠤ ᠬᠣᠢᠭᠤᠷ ᠴᠢ ᠮᠢᠨᠦ ᠰᠧᠯᠢᠩ ᠡᠴᠡ ᠪᠦᠳᠦᠭᠦᠨ ᠠᠮᠢᠰᠬᠤᠯ ᠲᠠᠢ ᠦᠭᠡ ᠫᠤᠤᠳᠠᠵᠤ᠂ ᠨᠠᠳᠠ ᠠ᠋ᠴᠠ ᠳᠡᠭᠡᠭᠦᠷ ᠣᠨᠴᠠᠭᠠᠢ ᠡᠷᠬᠡ ᠶᠠᠪᠤᠭᠤᠯᠳᠠᠭ ᠪᠣᠯᠵᠠᠢ ᠠ᠋! ᠳᠠᠩᠴᠤ ᠡᠷᠲᠡᠳᠴᠦ ᠪᠠᠢᠬᠤ ᠪᠢᠰᠢ ᠤᠤ? ᠭᠡᠵᠦ ᠤᠬᠠᠭᠠᠨ ᠨᠢ ᠣᠯᠳᠠᠬᠤ ᠦᠭᠡᠢ ᠶᠠᠭᠤᠮᠠ ᠶᠠᠷᠢᠵᠤ ᠴᠣᠭᠪᠠᠭᠠᠲᠤᠷ ᠢ ᠪᠦᠷ ᠴᠦ᠍ ᠮᠡᠨᠡᠭᠷᠡᠭᠦᠯᠪᠡ᠃
一 ᠬᠠᠲᠤᠨ ᠲᠠ ᠶᠠᠭᠠᠬᠢᠯᠠ ᠭᠡᠵᠦ ᠢᠢᠨ ᠬᠦ᠌ ᠶᠡᠬᠡ ᠠᠭᠤᠷᠯᠠᠳᠠᠭ ᠪᠠᠢᠨᠠ?
一 ᠶᠠᠭᠠᠬᠢᠭᠰᠠᠨ ᠢ᠋ᠶ᠋ᠠᠨ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ ᠤᠤ? ᠭᠡᠵᠦ ᠪᠠᠭᠠ ᠬᠠᠲᠤᠨ ᠡᠷᠭᠢᠵᠦ ᠬᠠᠷᠠᠨ ᠰᠢᠷᠡᠭᠡ ᠠᠯᠠᠭᠠᠳᠠᠵᠤ᠂ ᠥᠨᠥᠬᠢ ᠴᠠᠬᠢᠯᠭᠠᠨ ᠮᠡᠳᠡᠭᠡ ᠶ᠋ᠢ ᠳᠣᠯᠣᠪᠣᠷ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠳᠣᠶᠢᠵᠤ《ᠴᠢ ᠦᠵᠡ᠂ ᠴᠢᠮᠠ ᠳ᠋ᠤ᠌ ᠲᠡᠭᠦᠨ ᠢ ᠳᠠᠭᠤᠳᠠᠴᠢᠬᠠᠮᠠᠷ ᠰᠢᠳᠢ ᠶ᠋ᠢᠨ ᠨᠢᠳᠦ ᠪᠠᠢᠳᠠᠭ ᠤᠤ?》 ᠭᠡᠰᠡᠨ ᠨᠢ ᠲᠡᠭᠦᠨ ᠢ《ᠪᠢᠴᠢᠭ ᠮᠡᠳᠡᠬᠦ ᠦᠭᠡᠢ ᠮᠥᠷᠲᠡᠭᠡᠨ ᠪᠡᠶᠡ ᠪᠡᠨ ᠭᠠᠢᠬᠠᠭᠤᠯᠤᠮᠠᠷ ᠶᠠᠭᠤ ᠪᠣᠢ?》 ᠭᠡᠵᠦ ᠮᠠᠰᠢᠳᠠ ᠳᠣᠷᠣᠮᠵᠢᠯᠠᠭᠰᠠᠨ ᠰᠢᠭ᠋ ᠪᠣᠯᠪᠠᠯ ᠴᠣᠭᠪᠠᠭᠠᠲᠤᠷ ᠪᠡᠶᠡ ᠪᠡᠨ ᠪᠠᠷᠢᠵᠤ ᠳᠡᠢᠯᠬᠦ ᠦᠭᠡᠢ ᠠᠭᠤᠷᠯᠠᠨ᠄
一 ᠬᠠᠲᠤᠨ ᠲᠠ ᠪᠠᠷᠤᠭᠲᠠᠢᠬᠠᠨ ᠬᠥᠮᠦᠨ ᠮᠠᠭᠤᠴᠢᠯᠠ! ᠶᠠᠭᠤ ᠪᠠᠢᠪᠠᠯ ᠶᠠᠭᠤ ᠪᠠᠨ ᠨᠠᠳᠠ ᠰᠢᠭᠤᠳ ᠶᠠᠷᠢᠴᠢᠬᠠ! ᠪᠢᠲᠡᠭᠡᠢ ᠲᠣᠭᠰᠢᠭᠠᠳ ᠪᠢᠳᠠᠭᠤ ᠨᠠᠮᠠᠶ᠋ᠢ ᠤᠯᠠᠮ ᠮᠤᠩᠬᠠᠷᠠᠭᠤᠯᠤᠭᠠᠳ ᠪᠠᠢ! ᠭᠡᠵᠦ ᠪᠠᠭᠠ ᠬᠠᠲᠤᠨ ᠤ᠋ ᠡᠮᠦᠨᠡ ᠡᠴᠡ ᠢᠯᠳᠠᠷ ᠦᠭᠡᠢ ᠰᠢᠷᠦᠭᠦᠨ ᠳᠤᠤᠭᠠᠷᠪᠠ᠃
一 ᠴᠢ ᠪᠡᠶᠡ ᠪᠡᠨ ᠪᠢᠳᠠᠭᠤ ᠭᠡᠪᠡ ᠤᠤ? ᠪᠢ ᠪᠣᠳᠣᠪᠠᠯ ᠴᠢᠨᠦ ᠤᠬᠠᠭᠠᠨ ᠴᠢᠨᠢ ᠬᠡᠲᠦᠷᠡᠭᠡᠳ ᠪᠠᠢᠭᠠ ᠶᠤᠮ ᠪᠢᠰᠢ ᠤᠤ⁈ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠨᠤᠲᠤᠭ ᠳᠡᠭᠡᠷᠡ ᠪᠠᠭᠲᠠ ᠶᠠᠳᠠᠵᠤ ᠵᠠᠩᠵᠤᠨ ᠶᠠᠮᠤᠨ ᠤ᠋ ᠬᠠᠷᠠ ᠴᠡᠷᠢᠭ ᠦ᠋ᠨ ᠫᠤᠤ ᠵᠡᠪᠰᠡᠭ ᠢ ᠮᠤᠰᠬᠢᠨ ᠬᠥᠭᠡᠭᠡᠵᠦ ᠲᠠᠭᠤᠳᠠᠭ ᠨᠢ ᠶᠠᠭᠤ ᠪᠣᠯᠪᠠ?
一 ᠦᠭᠡᠢ᠂ ᠬᠥᠶᠢ! ᠪᠢ ᠬᠡᠳᠦᠨ ᠲᠣᠯᠣᠭᠠᠢ ᠲᠠᠢ ᠳ᠋ᠠᠭᠠᠨ ᠵᠠᠩᠵᠤᠨ ᠶᠠᠮᠤᠨ ᠤ᠋ ᠴᠡᠷᠢᠭ ᠲᠡᠢ ᠬᠠᠯᠳᠠᠨᠠ ᠪᠣᠢ⁈ ᠬᠠᠲᠤᠨ ᠲᠠ ᠪᠤᠷᠤᠭᠤ᠁ ᠭᠡᠵᠦ ᠦᠭᠡ ᠪᠡᠨ ᠬᠡᠯᠡᠵᠦ ᠳᠠᠭᠤᠰᠬᠤ ᠠ᠋ᠴᠠ ᠡᠮᠦᠨᠡ ᠪᠠᠭᠠ ᠬᠠᠲᠤᠨ ᠲᠣᠰᠴᠤ᠄
— ᠡᠷᠡ ᠬᠥᠮᠦᠨ ᠪᠠᠢᠵᠤ ᠪᠠᠢᠭᠠᠳ ᠬᠡᠷᠡᠭ ᠢ᠋ᠶ᠋ᠡᠨ ᠬᠢᠴᠢᠬᠡᠭᠡᠳ《ᠦᠭᠡᠢ》 ᠭᠡᠵᠦ ᠮᠡᠯᠵᠢᠳᠡᠭ ᠴᠢᠨᠢ ᠶᠠᠭᠤ ᠪᠣᠢ⁈ ᠡᠨᠡ ᠴᠠᠬᠢᠯᠭᠠᠨ ᠳ᠋ᠤ᠌ ᠰᠠᠭᠠᠳᠠᠭ᠂ ᠮᠢᠩᠭᠠᠨ ᠤ᠋ ᠲᠠᠯᠠ ᠳ᠋ᠤ᠌ ᠮᠣᠩᠭᠣᠯ ᠮᠣᠷᠢᠨ ᠴᠡᠷᠢᠭ ᠵᠠᠩᠵᠤᠨ ᠶᠠᠮᠤᠨ ᠤ᠋ ᠤᠬᠤᠷᠢᠵᠤ ᠶᠠᠪᠤᠭᠠ ᠴᠡᠷᠢᠭ ᠦ᠋ᠨ ᠫᠤᠤ ᠵᠡᠪᠰᠡᠭ ᠢ ᠬᠤᠷᠢᠶᠠᠵᠤ᠂ ᠠᠯᠠᠵᠤ ᠳᠠᠭᠤᠨ ᠴᠡᠷᠢᠭ ᠦ᠋ᠨ ᠰᠡᠳᠬᠢᠯ ᠢ ᠶᠡᠬᠡᠳᠡ ᠦᠢᠮᠡᠭᠦᠯᠦᠭᠰᠡᠨ᠁ ᠭᠡᠵᠦ ᠪᠠᠢᠨᠠ᠃ ᠪᠠᠰᠠ ᠮᠠᠨ ᠤ᠋ ᠬᠤᠰᠢᠭᠤᠨ ᠤ᠋ ᠠᠮᠤᠷ ᠢ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠵᠡᠭᠦᠨ ᠡᠴᠡ ᠴᠥᠮᠥᠷᠡᠨ ᠣᠷᠣᠭᠰᠠᠨ ᠪᠣᠷᠣ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠡᠷᠡᠯᠬᠡᠭᠯᠡᠨ ᠲᠤᠯᠬᠤ ᠦᠭᠡᠢ ᠭᠡᠳᠡᠷᠭᠦ ᠳᠤᠲᠠᠭᠠᠵᠤ᠂ ᠵᠠᠩᠵᠤᠨ ᠶᠠᠮᠤᠨ ᠤ᠋ ᠴᠡᠷᠢᠭ ᠦ᠋ᠨ ᠪᠠᠷᠠᠭᠤᠨᠰᠢᠯᠠᠨ ᠤᠬᠤᠷᠢᠬᠤ ᠳ᠋ᠤ᠌ ᠶᠡᠬᠡᠳᠡ ᠬᠣᠬᠢᠷᠠᠯ ᠤᠴᠠᠷᠠᠭᠤᠯᠤᠭᠰᠠᠨ ᠲᠤᠯᠠᠳᠠ ᠠᠭᠤᠴᠢᠯᠠᠰᠢ ᠦᠭᠡᠢ᠃ ᠴᠡᠷᠢᠭ ᠦ᠋ᠨ ᠰᠠᠬᠢᠯᠭᠠ ᠪᠠᠷ ᠬᠠᠷᠢᠭᠤᠴᠠᠯᠭᠠ ᠨᠡᠬᠡᠮᠵᠢᠯᠡᠬᠦ ᠬᠡᠷᠡᠭᠲᠡᠢ᠃ ᠡᠰᠡ ᠲᠡᠢᠮᠦ ᠪᠣᠯ ᠲᠠᠨ ᠤ᠋ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠴᠡᠷᠢᠭ ᠳᠣᠲᠣᠷᠠ ᠪᠣᠷᠣ ᠴᠡᠷᠢᠭ ᠲᠡᠢ ᠰᠦᠯᠪᠡᠭᠡ ᠲᠡᠢ ᠬᠥᠮᠦᠨ ᠪᠠᠢᠵᠤ ᠮᠡᠳᠡᠨᠡ᠃ ᠦᠨᠡᠨ ᠪᠣᠯ ᠴᠠᠭᠠᠵᠠ ᠪᠠᠷ ᠰᠢᠳᠬᠡᠨᠡ ᠭᠡᠰᠡᠨ ᠪᠠᠢᠨᠠ ᠭᠡᠪᠡ᠃
ᠴᠣᠭᠪᠠᠭᠠᠲᠤᠷ᠂ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠦ᠋ᠨ ᠢᠩᠭᠢᠵᠦ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰᠤᠭᠠᠳ ᠰᠠᠶᠢ ᠤᠴᠢᠷ ᠤᠬᠠᠭᠠᠨ ᠢ ᠨᠢ ᠭᠠᠳᠠᠷᠯᠠᠵᠤ᠂《ᠡᠨᠡ ᠪᠦᠷ ᠬᠡᠰᠢᠭᠲᠡᠢ ᠶ᠋ᠢᠨ ᠬᠢᠭᠰᠡᠨ ᠭᠠᠢ》 ᠭᠡᠵᠦ ᠮᠠᠭᠠᠳᠯᠠᠭᠠᠳ᠄
一 ᠬᠠᠲᠤᠨ ᠰᠧᠯᠢᠩ ᠠ᠋᠂ ᠡᠨᠡ ᠶᠠᠯᠠ ᠶ᠋ᠢ ᠨᠠᠳᠠ ᠨᠥᠮᠥᠷᠦᠭᠦᠯᠬᠦ ᠬᠡᠷᠡᠭ ᠦᠭᠡᠢ᠃ ᠡᠨᠡ ᠪᠦᠬᠦᠨ ᠪᠦᠷ ᠲᠠᠨ ᠤ᠋ ᠢᠲᠡᠭᠡᠯᠲᠦ ᠬᠥᠮᠦᠨ ᠬᠡᠰᠢᠭᠲᠡᠢ ᠶ᠋ᠢᠨ ᠤᠴᠢᠷ ᠭᠡᠵᠦ ᠪᠣᠷᠣ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠲᠤᠯᠵᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠨᠠᠷᠢᠨ ᠲᠣᠭᠠᠴᠢᠵᠤ ᠬᠡᠳᠦᠢ ᠬᠡᠳᠦᠢ ᠴᠡᠷᠢᠭ ᠮᠣᠷᠢ ᠪᠠᠨ ᠰᠦᠢᠳᠬᠡᠵᠦ ᠶᠠᠭᠠᠬᠢᠵᠤ ᠢᠢᠵᠦ ᠠᠮᠢ ᠵᠤᠯᠪᠠᠭᠰᠠᠨ ᠪᠠ ᠬᠡᠰᠢᠭᠲᠡᠢ ᠶ᠋ᠢᠨ ᠴᠡᠷᠢᠭ ᠲᠡᠭᠦᠨ ᠦ᠌ ᠵᠥᠪᠰᠢᠶᠡᠷᠡᠯ ᠦᠭᠡᠢ ᠪᠡᠷ ᠭᠡᠳᠡᠷᠭᠦ ᠳᠤᠲᠠᠭᠠᠵᠤ᠂ ᠠᠭᠤᠯᠠ ᠶ᠋ᠢᠨ ᠠᠷᠤ ᠲᠡᠢᠰᠢ ᠭᠠᠷᠤᠭᠠᠳ ᠢᠩᠭᠢᠵᠦ ᠴᠢᠩᠭᠢᠵᠦ ᠬᠢᠭᠰᠡᠨ ᠪᠠᠢᠨᠠ ᠭᠡᠵᠦ ᠨᠠᠷᠢᠨ ᠲᠣᠭᠠᠴᠢᠯᠠ᠃
ᠪᠠᠭᠠ ᠬᠠᠲᠤᠨ ᠰᠧᠯᠢᠩ᠂ ᠴᠣᠭᠪᠠᠭᠠᠲᠤᠷ ᠤ᠋ᠨ ᠢᠩᠭᠢᠵᠦ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰᠤᠭᠠᠳ ᠳᠣᠲᠣᠷᠠ ᠪᠠᠨ《ᠡᠨᠡ ᠤᠳᠠᠭᠠ ᠬᠠᠷᠠ ᠮᠤᠨᠳᠠᠭᠤᠨ ᠢ᠋ᠶ᠋ᠠᠷ ᠲᠡᠭᠦᠨ ᠳ᠋ᠦ᠍ ᠬᠢᠯᠢᠰ ᠨᠥᠮᠥᠷᠦᠭᠦᠯᠪᠡ ᠪᠣᠯᠤᠯᠲᠠᠢ》 ᠭᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠤᠬᠠᠭᠠᠷᠠᠵᠤ᠄
一 ᠬᠡᠰᠢᠭᠲᠡᠢ ᠬᠡᠨ ᠦ᠌ ᠵᠠᠷᠯᠢᠭ ᠢ᠋ᠶ᠋ᠠᠷ ᠵᠡᠭᠦᠨᠰᠢ ᠶᠠᠪᠤᠵᠤ ᠬᠡᠨ ᠦ᠌ ᠵᠠᠬᠢᠷᠤᠯ ᠤ᠋ᠨ ᠳᠣᠣᠷᠠ ᠴᠡᠷᠢᠭ ᠬᠥᠳᠡᠯᠭᠡᠭᠰᠡᠨ ᠪᠣᠢ? ᠴᠢᠮᠠ ᠳ᠋ᠤ᠌ ᠬᠠᠷᠢᠭᠤᠴᠠᠯᠭᠠ ᠦᠭᠡᠢ ᠭᠡᠵᠢ ᠤᠤ ᠳᠠ? ᠴᠢ ᠲᠡᠭᠦᠨ ᠦ᠌ ᠰᠢᠭᠤᠳ ᠵᠠᠬᠢᠷᠤᠭᠴᠢ ᠲᠤᠸᠠᠨᠵᠠᠩ ᠮᠥᠨ ᠭᠡᠳᠡᠭ ᠢ᠋ᠶ᠋ᠡᠨ ᠮᠠᠷᠲᠠᠭᠠ ᠦᠭᠡᠢ ᠪᠣᠯ ᠪᠢ ᠴᠡᠷᠢᠭ ᠶᠣᠰᠣ ᠪᠠᠷ ᠴᠢᠮᠠ ᠲᠠᠢ ᠬᠡᠯᠡᠯᠴᠡᠬᠦ ᠡᠴᠡ ᠪᠢᠰᠢ ᠬᠡᠰᠢᠭᠲᠡᠢ ᠲᠡᠢ ᠬᠡᠯᠡᠯᠴᠡᠬᠦ ᠦᠭᠡᠢ ᠰᠢᠦ! ᠮᠡᠳᠡᠪᠡ ᠤᠤ? ᠭᠡᠵᠦ ᠣᠪᠣᠷ ᠪᠠᠢᠳᠠᠯ ᠢ᠋ᠶ᠋ᠠᠨ ᠡᠶᠡᠷᠡᠭᠦᠨ ᠪᠣᠯᠭᠠᠪᠠ᠃ ᠲᠡᠭᠡᠬᠦ ᠳ᠋ᠦ᠍ ᠴᠣᠭᠪᠠᠭᠠᠲᠤᠷ᠄
一 ᠬᠡᠰᠢᠭᠲᠡᠢ ᠲᠠᠨ ᠳ᠋ᠤ᠌ ᠶᠡᠬᠡ ᠡᠭᠡᠯᠢᠲᠡᠢ ᠪᠠᠢᠳᠠᠭ ᠰᠢᠲᠠ᠂ ᠶᠠᠭᠠᠬᠢᠬᠤ ᠳ᠋ᠠᠭᠠᠨ ᠲᠠᠨ ᠤ᠋ ᠨᠡᠷᠡ ᠨᠢᠭᠤᠷ ᠲᠤ᠌ ᠢᠩᠭᠢᠵᠦ ᠬᠠᠷᠰᠢᠲᠠᠢ ᠶᠠᠭᠤᠮᠠ ᠬᠢᠪᠡ? ᠭᠡᠵᠦ ᠳᠠᠪᠠᠯᠠᠨ ᠠᠰᠠᠭᠤᠭᠰᠠᠨ ᠨᠢ ᠨᠣᠬᠠᠢ ᠳ᠋ᠠᠭᠠᠨ ᠢᠲᠡᠭᠡᠵᠦ ᠭᠡᠷ ᠲᠡᠭᠡᠨ ᠪᠠᠭᠠᠪᠠ ᠭᠡᠰᠡᠨ ᠰᠢᠦᠬᠡᠨ ᠤᠳᠬᠠ ᠪᠠᠷ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠦ᠋ᠨ ᠬᠤᠯᠤᠭᠤ ᠶ᠋ᠢ ᠬᠠᠳᠬᠤᠪᠠ᠃
— ᠴᠣᠭᠪᠠᠭᠠᠲᠤᠷ ᠠ᠋᠂ ᠴᠢ ᠪᠠᠰᠠ ᠡᠳᠦᠷᠵᠢᠨ ᠵᠡᠷᠭᠡ ᠵᠢᠩᠰᠡ ᠨᠡᠮᠡᠷᠢᠯᠡᠬᠦ ᠰᠠᠨᠠᠭᠠᠲᠠᠢ ᠤᠤ? ᠣᠳᠣ ᠶᠠᠭᠠᠬᠢᠨᠠ ᠪᠣᠢ? ᠴᠠᠭᠠᠳᠤ ᠸᠠᠩ ᠰᠣᠬᠣᠷ ᠤ᠋ᠨ ᠴᠢᠬᠢᠨ ᠳ᠋ᠦ᠍ ᠢᠩᠭᠢᠵᠦ ᠮᠠᠭᠤ ᠪᠠᠷ ᠡᠷᠭᠢᠭᠰᠡᠨ ᠶᠠᠭᠤᠮᠠ ᠰᠣᠨᠣᠰᠬᠠᠭᠰᠠᠨ ᠳ᠋ᠠᠭᠠᠨ ᠣᠳᠣ ᠴᠢ ᠶᠠᠭᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ? ᠭᠡᠵᠦ ᠪᠠᠭᠠ ᠬᠠᠲᠤᠨ ᠴᠣᠭᠪᠠᠭᠠᠲᠤᠷ ᠤ᠋ᠨ ᠬᠥᠮᠦᠨ ᠲᠠᠪᠠᠯᠠᠬᠤ ᠰᠠᠨᠠᠭᠠᠲᠠᠢ ᠦᠭᠡᠨ ᠦ᠌ ᠬᠠᠷᠢᠭᠤ ᠳ᠋ᠤ᠌ ᠢᠩᠭᠢᠵᠦ ᠬᠡᠯᠡᠭᠰᠡᠨ ᠨᠢ ᠶᠣᠰᠣᠲᠠᠢ ᠯᠠ ᠳᠠᠭᠠᠷᠢ ᠳᠡᠭᠡᠷᠡ ᠨᠢ ᠳᠠᠪᠤᠰᠤ ᠬᠢᠭᠰᠡᠨ ᠪᠣᠯᠪᠠ᠃
ᠶᠠᠷᠠ ᠪᠠᠨ ᠮᠠᠯᠲᠠᠭᠤᠯᠤᠭᠰᠠᠨ ᠴᠣᠭᠪᠠᠭᠠᠲᠤᠷ ᠲᠠᠬᠢᠵᠤ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠦ᠋ᠨ ᠡᠮᠦᠨᠡ ᠡᠴᠡ ᠣᠯᠢᠭᠲᠠᠢ ᠦᠭᠡ ᠣᠯᠵᠤ ᠬᠡᠯᠡᠭᠰᠡᠨ ᠦᠭᠡᠢ《ᠮᠠᠭᠤ ᠴᠢᠰᠤ ᠶ᠋ᠢ ᠪᠠᠢᠵᠠ᠂ ᠴᠢᠮᠠᠶ᠋ᠢ》 ᠭᠡᠵᠦ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠢ ᠤᠤ ᠬᠡᠰᠢᠭᠲᠡᠢ ᠶ᠋ᠢ ᠤᠤ ᠪᠤᠤ ᠮᠡᠳᠡ ᠳᠠᠮ ᠳᠠᠮ ᠳᠠᠭᠠᠷᠠᠭᠤᠯᠤᠭᠰᠠᠨ ᠥᠷᠭᠡᠰᠦ ᠲᠡᠢ ᠦᠭᠡ ᠤᠨᠠᠭᠠᠵᠤ ᠡᠭᠦᠳᠡ ᠰᠠᠪᠠᠨ ᠭᠠᠷᠴᠤ ᠣᠳᠪᠠ᠃
ᠠᠩᠴᠢᠨᠵᠠᠪ ᠠᠭᠤᠯᠠ ᠶ᠋ᠢᠨ ᠠᠷᠤ ᠪᠠᠷ ᠴᠡᠷᠢᠭ ᠮᠣᠷᠢ ᠪᠠᠨ ᠴᠡᠭᠴᠡᠯᠡᠨ ᠠᠪᠤᠭᠠᠳ ᠬᠠᠷᠠ ᠴᠡᠷᠢᠭ ᠦ᠋ᠨ ᠣᠷᠭᠣᠳᠠᠭᠤᠯ ᠤ᠋ᠳ ᠤ᠋ᠨ ᠫᠤᠤ ᠵᠡᠪᠰᠡᠭ ᠢ ᠮᠤᠰᠬᠢᠵᠦ᠂ ᠥᠪᠡᠷ ᠦ᠋ᠨ ᠨᠤᠲᠤᠭ ᠤ᠋ᠨ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠲᠠᠮᠢᠷ ᠢ ᠨᠢ ᠴᠢᠩᠭᠠᠯᠠᠵᠤ ᠶᠠᠪᠤᠲᠠᠯᠠ ᠥᠨᠥᠬᠢ ᠪᠣᠷᠣ ᠴᠡᠷᠢᠭ ᠦ᠋ᠳ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠭᠠᠵᠠᠷ ᠬᠦᠷᠲᠡᠯᠡ ᠱᠦᠭᠦᠷᠳᠡᠯᠲᠡ ᠬᠢᠭᠡᠳ ᠭᠡᠨᠡᠳᠲᠡ ᠨᠠᠮ ᠵᠢᠮ ᠪᠣᠯᠴᠢᠬᠠᠯᠠ ᠭᠡᠰᠡᠨ ᠴᠢᠮᠡᠭᠡ ᠶ᠋ᠢ ᠣᠯᠵᠤ ᠰᠣᠨᠣᠰᠪᠠ᠃ ᠡᠨᠡ ᠬᠦ᠌ ᠴᠢᠮᠡᠭᠡ ᠴᠢᠬᠢᠨ ᠳ᠋ᠦ᠍ ᠡᠯᠭᠦᠭᠳᠡᠵᠦ ᠵᠠᠪᠳᠤᠭᠠᠳᠤᠢ ᠠᠲᠠᠯᠠ ᠪᠠᠷᠠᠭᠤᠨᠰᠢᠯᠠᠭᠰᠠᠨ ᠬᠠᠷᠠ ᠴᠡᠷᠢᠭ ᠦ᠋ᠳ ᠪᠣᠷᠣ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠤᠴᠠᠭᠠᠳ ᠢᠷᠡᠯᠡ ᠭᠡᠵᠡᠢ᠃
ᠴᠠᠭ ᠲᠥᠷᠥ ᠶ᠋ᠢᠨ ᠪᠠᠢᠳᠠᠯ ᠪᠤᠷᠤᠭᠤ ᠪᠠᠷ ᠡᠷᠭᠢᠵᠦ ᠲᠥᠷᠥ ᠭᠦᠷᠦᠨ ᠦ᠌ ᠲᠣᠮᠣᠴᠤᠤᠯ ᠳᠣᠲᠣᠷᠠ ᠪᠠᠨ ᠬᠠᠪᠢᠷᠤᠯᠳᠤᠵᠤ ᠬᠠᠷᠠ ᠪᠣᠷᠣ ᠴᠡᠷᠢᠭ ᠬᠣᠭᠣᠷᠣᠨᠳᠣ ᠪᠠᠨ ᠳᠠᠢᠳᠤᠵᠤ᠂ ᠦᠢᠮᠡᠭᠡᠨ ᠳᠡᠭᠳᠡᠭᠰᠡᠨ ᠢ ᠮᠡᠳᠡᠭᠰᠡᠨ ᠠᠩᠴᠢᠨᠵᠠᠪ ᠤ᠋ᠨ ᠳᠣᠲᠣᠷᠠ ᠴᠤ᠌ ᠲᠣᠭᠲᠠᠪᠤᠷᠢ ᠠᠯᠳᠠᠪᠠ᠃ ᠤᠤᠯ ᠨᠢ ᠶᠡᠬᠡ ᠴᠡᠷᠢᠭ ᠦ᠋ᠨ ᠰᠦᠷ ᠬᠦᠴᠦᠨ ᠳ᠋ᠦ᠍ ᠬᠠᠷᠠ ᠴᠡᠷᠢᠭ ᠣᠮ ᠬᠣᠮ ᠦᠭᠡᠢ ᠠᠶᠤᠨ ᠳᠤᠲᠠᠭᠠᠭᠰᠠᠨ ᠳ᠋ᠤ᠌ ᠠᠩᠴᠢᠨᠵᠠᠪ ᠴᠤ᠌ ᠵᠣᠷᠢᠭ ᠣᠷᠣᠵᠤ ᠳᠡᠭᠡᠷᠡᠮ ᠬᠢᠭᠰᠡᠨ ᠬᠠᠷᠠ ᠴᠡᠷᠢᠭ ᠦ᠋ᠨ ᠣᠷᠭᠣᠳᠠᠭᠤᠯ ᠤ᠋ᠳ ᠤ᠋ᠨ ᠫᠤᠤ ᠵᠡᠪᠰᠡᠭ ᠢ ᠮᠤᠰᠬᠢᠭᠰᠠᠨ ᠳ᠋ᠠᠭᠠᠨ ᠣᠮᠣᠭᠰᠢᠵᠤ ᠪᠠᠢᠭᠰᠠᠨ ᠪᠣᠯ᠂ ᠣᠳᠣ ᠬᠠᠷᠢᠨ ᠡᠷᠭᠢᠭᠡᠳ ᠠᠢᠳᠠᠰ ᠲᠥᠷᠥᠪᠡ᠃ ᠢᠢᠨ ᠬᠦ᠌ ᠠᠩᠴᠢᠨᠵᠠᠪ ᠴᠡᠷᠢᠭ ᠮᠣᠷᠢ ᠪᠠᠨ ᠠᠪᠴᠤ ᠬᠣᠢᠰᠢ ᠪᠠᠨ ᠳᠡᠯ ᠠᠭᠤᠯᠠ ᠶ᠋ᠢᠨ ᠪᠠᠯ ᠳ᠋ᠤ᠌ ᠪᠠᠭᠤᠵᠤ ᠠᠨᠢᠷ ᠴᠢᠩᠨᠠᠨ ᠪᠠᠢᠯᠠ᠃
ᠭᠡᠨᠡᠳᠲᠡ ᠨᠢᠭᠡ ᠡᠳᠦᠷ ᠴᠣᠭᠪᠠᠭᠠᠲᠤᠷ ᠨᠣᠶᠠᠨ ᠲᠠᠬᠠᠷ ᠢᠷᠡᠭᠦᠯᠦᠨ《ᠡᠯᠡ ᠴᠡᠷᠢᠭ ᠦ᠋ᠨ ᠬᠢᠨ ᠦᠳᠲᠡᠷ ᠲᠦᠷᠭᠡᠨ ᠰᠢᠷᠡᠭᠡ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠪᠤᠯᠤᠩ ᠳ᠋ᠤ᠌ ᠴᠤᠭᠯᠠᠷᠠᠵᠤ ᠴᠡᠷᠢᠭ ᠦ᠋ᠨ ᠲᠣᠭᠠ ᠪᠠᠨ ᠪᠦᠷᠢᠳᠬᠡᠭᠦᠯ!》 ᠭᠡᠰᠡᠨ ᠪᠠᠴᠢᠮ ᠵᠠᠷᠯᠢᠭ ᠪᠣᠯᠪᠠ᠃
ᠮᠠᠭᠤ ᠢᠷᠣᠠ ᠶ᠋ᠢᠨ ᠮᠤᠰᠢᠭᠠᠢ ᠴᠢᠮᠡᠭᠡ ᠢᠩᠭᠢᠵᠦ ᠮᠣᠳᠣᠨ ᠬᠤᠳᠠᠷᠭᠠ ᠢᠷᠡᠨᠡ ᠭᠡᠳᠡᠭ ᠢ ᠠᠩᠴᠢᠨᠵᠠᠪ ᠠᠷᠠᠢ ᠪᠣᠳᠣᠵᠤ ᠠᠮᠵᠢᠭᠠ ᠦᠭᠡᠢ ᠪᠣᠯᠪᠠᠴᠤ ᠴᠠᠭᠠᠨᠠ ᠠ᠋ᠴᠠ ᠨᠢᠭᠡ ᠯᠡ ᠶᠣᠣᠵᠠ ᠦᠭᠡᠢ ᠰᠤᠪᠢᠨ ᠮᠡᠳᠡᠭᠳᠡᠭᠰᠡᠨ ᠪᠠᠢᠵᠠᠢ᠃
《ᠣᠳᠣ ᠴᠤ᠌ ᠳᠦᠭᠦᠷᠦᠭᠰᠡᠨ ᠬᠡᠷᠡᠭ ᠠ᠋᠂ ᠴᠣᠭᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠪᠦᠷᠢᠳᠬᠡᠨᠡ ᠭᠡᠳᠡᠭ ᠬᠤᠳᠠᠯ᠂ ᠨᠠᠳᠠ ᠶᠠᠯᠠ ᠨᠡᠬᠡᠮᠵᠢᠯᠡᠬᠦ ᠭᠡᠳᠡᠭ ᠨᠢ ᠦᠨᠡᠨ ᠪᠠᠢᠬᠠ》 ᠭᠡᠵᠦ ᠪᠣᠳᠣᠭᠠᠳ ᠳᠣᠣᠷᠠᠬᠢ ᠬᠡᠳᠦᠨ ᠯᠢᠶᠠᠨᠵᠠᠩ ᠢ᠋ᠶ᠋ᠠᠨ ᠴᠤᠭᠯᠠᠭᠠᠭᠠᠳ᠄
一 ᠲᠠ ᠨᠠᠷ ᠪᠣᠳᠣᠵᠤ ᠦᠵᠡ!᠂ ᠣᠳᠣ ᠶᠠᠭᠠᠬᠢᠨᠠ ᠪᠣᠢ? ᠴᠣᠭᠪᠠᠭᠠᠲᠤᠷ ᠲᠤᠸᠠᠨᠵᠠᠩ ᠤ᠋ᠨ ᠴᠡᠷᠢᠭ ᠪᠦᠷᠢᠳᠬᠡᠬᠦ ᠭᠡᠳᠡᠭ ᠨᠢ ᠬᠤᠳᠠᠯ᠂ ᠪᠢᠳᠡᠨᠦᠰ ᠢ ᠴᠣᠭᠪᠠᠭᠠᠲᠤᠷ ᠠ᠋ᠴᠠ ᠵᠢᠭᠠᠪᠤᠷᠢ ᠠᠪᠬᠤ ᠦᠭᠡᠢ ᠳᠤᠷᠠ ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠲᠡᠢᠨ ᠦ᠌ ᠲᠠᠯᠠᠪᠤᠷ ᠠ᠋ᠴᠠ ᠵᠢᠭᠤᠲᠠᠯᠠ ᠭᠡᠰᠡᠨ ᠶᠠᠯᠠ ᠨᠥᠮᠥᠷᠦᠭᠦᠯᠬᠦ ᠨᠢ ᠦᠨᠡᠨ᠃ ᠲᠡᠭᠡᠪᠡᠯ ᠴᠢᠨᠢ ᠪᠠᠰᠠ ᠣᠷᠭᠣᠳᠠᠭᠤᠯ ᠤ᠋ᠨ ᠬᠠᠷᠠ ᠴᠡᠷᠢᠭ ᠦ᠋ᠨ ᠫᠤᠤ ᠵᠡᠪᠰᠡᠭ ᠢ ᠮᠤᠰᠬᠢᠭᠰᠠᠨ ᠪᠣᠯᠬᠣᠷ ᠣᠳᠣ ᠶᠠᠯᠠ ᠳᠡᠭᠡᠷᠡ ᠶᠠᠯᠠ᠃ ᠠᠬᠠ ᠳᠡᠭᠦᠦ ᠨᠠᠷ ᠠ᠋ ᠣᠳᠣ ᠪᠢᠳᠡ ᠶᠠᠭᠠᠬᠢᠪᠠᠯ ᠲᠠᠭᠠᠷᠠᠨᠠ ᠪᠣᠢ? ᠭᠡᠰᠡᠨ ᠳ᠋ᠦ᠍ ᠬᠡᠳᠦᠨ ᠯᠢᠶᠠᠨᠵᠠᠩ ᠨᠢ᠄
一 ᠲᠠᠨ ᠤ᠋ ᠪᠣᠳᠣᠬᠤ ᠪᠠᠷ ᠶᠠᠭᠠᠬᠢᠯᠲᠠᠢ ᠪᠣᠢ? ᠭᠡᠵᠦ ᠭᠡᠳᠡᠷᠭᠦ ᠠᠰᠠᠭᠤᠪᠠ᠃ ᠠᠩᠴᠢᠨᠵᠠᠪ ᠬᠡᠰᠡᠭ ᠳᠠᠭᠤᠨ ᠦᠭᠡᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ
一 ᠮᠢᠨᠦ ᠦᠵᠡᠬᠦ ᠪᠡᠷ ᠡᠨᠳᠡ ᠡᠴᠡ ᠵᠠᠢᠳᠠᠵᠤ ᠶᠠᠪᠤᠵᠠᠭᠠᠶᠠ᠃ ᠬᠠᠷᠠ ᠪᠣᠷᠣ ᠴᠡᠷᠢᠭ ᠦ᠋ᠨ ᠳᠤᠮᠳᠠ ᠬᠠᠪᠴᠢᠭᠳᠠᠭᠠᠳ᠁ ᠣᠳᠣ ᠡᠢᠮᠦ ᠯᠡ ᠭᠠᠭᠴᠠᠬᠠᠨ ᠵᠠᠮ ᠪᠠᠢᠨᠠ᠃ ᠡᠰᠡ ᠲᠡᠢᠮᠦ ᠪᠣᠯ ᠪᠢᠳᠡ ᠰᠠᠢᠨ ᠢ᠋ᠶ᠋ᠠᠨ ᠣᠯᠵᠤ ᠦᠵᠡᠬᠦ ᠦᠭᠡᠢ ᠠ᠋! ᠭᠡᠵᠦ ᠡᠷᠡᠰ ᠲᠠᠰᠤᠷᠬᠠᠢ ᠬᠡᠯᠡᠪᠡᠯ ᠨᠥᠭᠦᠭᠡ ᠬᠡᠳᠦᠨ ᠯᠢᠶᠠᠨᠵᠠᠩ ᠨᠢ᠄
一 ᠵᠠᠢᠯᠠᠭᠠᠳ ᠬᠠᠮᠢᠭᠠ ᠶᠠᠪᠤᠬᠤ ᠪᠣᠢ ? ᠥᠨᠥᠳᠥᠷ ᠬᠠᠷᠠ ᠴᠡᠷᠢᠭ ᠰᠢᠷᠠ ᠴᠡᠷᠢᠭ᠂ ᠮᠠᠷᠭᠠᠲᠤᠷ ᠪᠣᠷᠣ ᠴᠡᠷᠢᠭ ᠮᠣᠷᠣ ᠴᠡᠷᠢᠭ ᠭᠡᠳ᠁
一 ᠪᠢᠳᠡ ᠴᠢᠨᠢ ᠪᠦᠷ ᠠᠷᠤ ᠭᠡᠷ ᠲᠡᠭᠡᠨ ᠠᠪᠤ ᠡᠵᠢ ᠠᠪᠠᠭᠠᠢ ᠬᠡᠦᠬᠡᠳ ᠭᠡᠳ ᠴᠢᠷᠦᠭᠳᠡᠯ ᠲᠡᠢ ᠬᠥᠮᠦᠰ ᠰᠢᠦ᠃ ᠭᠡᠷ ᠲᠡᠷᠭᠡ ᠮᠠᠯ ᠬᠤᠢ ᠠ᠋ᠴᠠ ᠪᠠᠨ ᠶᠠᠭᠠᠬᠢᠵᠤ ᠰᠠᠯᠬᠤ ᠪᠣᠢ?
一 ᠴᠣᠭᠪᠠᠭᠠᠲᠤᠷ ᠲᠤᠸᠠᠨᠵᠠᠩ ᠶᠠᠭᠠᠬᠢᠯᠠ ᠭᠡᠵᠦ ᠪᠢᠳᠡᠨᠦᠰ ᠲᠦ᠍ ᠶᠠᠯᠠ ᠲᠤᠯᠭᠠᠬᠤ ᠶᠤᠮ⁈ ᠪᠢᠳᠡ ᠨᠤᠲᠤᠭ ᠤ᠋ᠨ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠬᠦᠴᠦ ᠶ᠋ᠢ ᠬᠠᠮᠠᠭᠠᠯᠠᠬᠤ ᠭᠡᠵᠦ ᠲᠡᠢᠨ ᠦ᠌ ᠲᠠᠯᠠᠪᠤᠷ ᠠ᠋ᠴᠠ ᠰᠠᠯᠤᠭᠰᠠᠨ ᠠ᠋ᠴᠠ ᠪᠢᠰᠢ᠂ ᠶᠠᠮᠠᠷ ᠬᠤᠯᠠᠭᠠᠢ ᠳᠡᠭᠡᠷᠡᠮ ᠬᠢᠭᠰᠡᠨ ᠴᠦ᠍ ᠪᠢᠰᠢ ᠳᠡ!
一 ᠬᠠᠷᠠ ᠴᠡᠷᠢᠭ ᠦ᠋ᠨ ᠫᠤᠤ ᠵᠡᠪᠰᠡᠭ ᠢ ᠮᠤᠰᠬᠢᠭᠰᠠᠨ ᠨᠢ ᠴᠦ᠍ ᠪᠢᠳᠡ ᠴᠡᠷᠢᠭ ᠦ᠋ᠨ ᠬᠦᠴᠦ ᠲᠠᠮᠢᠷ ᠢ᠋ᠶ᠋ᠠᠨ ᠴᠢᠩᠭᠠᠳᠬᠠᠭᠰᠠᠨ ᠪᠣᠯᠬᠣᠷ ᠪᠤᠷᠤᠭᠤ ᠦᠭᠡᠢ᠃ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠳ᠋ᠦ᠍ ᠬᠠᠷᠢᠨ ᠦᠨᠡᠨ ᠴᠠᠭᠠᠨ ᠢ᠋ᠶ᠋ᠠᠨ ᠬᠡᠯᠡᠪᠡᠯ ᠡᠭᠦᠨ ᠢ ᠶᠠᠯᠠ ᠬᠡᠯᠡᠯᠴᠡᠬᠦ ᠦᠭᠡᠢ ᠶᠦᠮ ᠪᠠᠢᠯᠭᠦᠢ ᠭᠡᠵᠡᠭᠡᠪᠡ᠃
一 ᠥᠨᠥᠳᠥᠷ ᠪᠢᠳᠡᠨᠦᠰ ᠢ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠳᠠᠭᠤᠳᠠᠵᠤ ᠪᠠᠢᠭᠠ ᠪᠢᠰᠢ ᠰᠢᠦ ᠳᠡ! ᠬᠠᠷᠢᠨ ᠴᠣᠭᠪᠠᠭᠠᠲᠤᠷ ᠳᠠᠭᠤᠳᠠᠵᠤ ᠪᠠᠢᠨᠠ᠃ ᠮᠡᠳᠡᠪᠡ ᠤᠤ?
一 ᠬᠡᠨ ᠲᠠᠭᠤᠲᠠᠯᠠ ᠴᠤ᠌ ᠭᠡᠰᠡᠨ ᠪᠢᠳᠡ ᠣᠴᠢᠵᠤ ᠪᠠᠢᠭᠠᠳ ᠦᠨᠡᠨ ᠴᠠᠭᠠᠨ ᠢ᠋ᠶ᠋ᠠᠨ ᠬᠡᠯᠡᠬᠦ ᠡᠴᠡ ᠪᠢᠰᠢ ᠵᠠᠢᠯᠠᠵᠤ ᠶᠠᠪᠤᠭᠠᠳ ᠣᠷᠭᠣᠳᠠᠭᠤᠯ ᠪᠣᠯᠬᠤ ᠦᠭᠡᠢ ᠭᠡᠪᠡ᠃
一 ᠵᠠ᠂ ᠪᠣᠯᠢ! ᠲᠠ ᠨᠠᠷ ᠮᠢᠨᠦ ᠰᠠᠨᠠᠯ ᠢ᠋ᠶ᠋ᠠᠷ ᠶᠠᠪᠤᠬᠤ ᠦᠭᠡᠢ ᠪᠣᠯ ᠪᠠᠢᠭ᠂ ᠬᠣᠵᠢᠮ ᠴᠣᠭᠪᠠᠭᠠᠲᠤᠷ ᠶᠠᠯᠠ ᠨᠡᠬᠡᠮᠵᠢᠯᠡᠪᠡᠯ ᠪᠢ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠳᠠᠭᠠᠭᠠᠶᠠ! ᠭᠡᠵᠦ ᠮᠠᠰᠢᠳᠠ ᠤᠨᠲᠤᠭᠤᠴᠠᠨ ᠴᠡᠷᠢᠭ ᠮᠣᠷᠢ ᠪᠠᠨ ᠴᠤᠭᠯᠠᠭᠤᠯᠵᠤ ᠰᠢᠷᠡᠭᠡ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠪᠤᠯᠤᠩ ᠤᠷᠤᠭᠤ ᠲᠣᠭᠣᠰᠣ ᠮᠠᠨᠠᠷᠠᠭᠤᠯᠤᠨ ᠳᠣᠪᠲᠣᠯᠪᠠ᠃
ᠠᠩᠴᠢᠨᠵᠠᠪ ᠰᠢᠷᠡᠭᠡ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠪᠤᠯᠤᠩ ᠳ᠋ᠤ᠌ ᠬᠦᠷᠴᠦ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠪᠠᠯ ᠬᠣᠶᠠᠷ ᠮᠥᠷᠯᠡᠨ ᠵᠢᠭᠰᠠᠭᠰᠠᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠰᠦᠷ ᠵᠢᠪᠬᠤᠭᠠ ᠡᠲᠡᠭᠡᠳ ᠠᠲᠠᠯᠠ ᠰᠣᠨᠢᠨ ᠬᠥᠩᠭᠡᠮᠰᠦᠭ ᠰᠠᠨᠠᠭᠳᠠᠵᠠᠢ᠃ ᠲᠡᠭᠡᠲᠡᠯᠡ ᠳᠠᠷᠤᠭᠠ ᠶ᠋ᠢᠨ ᠳᠠᠭᠠᠯᠲᠠ ᠴᠡᠷᠢᠭ ᠡᠴᠡ ᠨᠢᠭᠡ ᠨᠢ ᠠᠩᠴᠢᠨᠵᠠᠪ ᠤ᠋ᠨ ᠳᠡᠷᠭᠡᠳᠡ ᠢᠷᠡᠵᠦ᠄
一 ᠬᠡᠰᠢᠭᠲᠡᠢ ᠭᠤᠸᠠᠢ ᠠ᠋! ᠴᠣ ᠲᠤᠸᠠᠨᠵᠠᠩ ᠲᠠᠨ ᠢ ᠬᠣᠢᠲᠤ ᠭᠡᠷ ᠲᠦ᠍ ᠳᠠᠭᠤᠳᠠᠵᠤ ᠪᠣᠢ᠃ ᠲᠠ ᠮᠣᠷᠢᠯᠠᠨ ᠰᠠᠭᠠᠲᠠᠬᠤ ᠪᠣᠯᠪᠠ ᠤᠤ? ᠭᠡᠳ ᠲᠡᠭᠦᠨ ᠳ᠋ᠦ᠍ ᠵᠠᠮᠴᠢᠯᠠᠨ ᠶᠠᠪᠤᠪᠠ᠃ ᠠᠩᠴᠢᠨᠵᠠᠪ ᠤ᠋ᠨ ᠳᠣᠲᠣᠷᠠ ᠪᠠᠢᠳᠠᠯ ᠮᠠᠭᠤ ᠪᠣᠯᠤᠭᠰᠠᠨ ᠭᠡᠳᠡᠭ ᠢ ᠮᠡᠳᠡᠭᠰᠡᠨ ᠪᠣᠯᠪᠠᠴᠤ ᠥᠴᠦᠬᠡᠨ ᠴᠦ᠍ ᠰᠦᠷᠳᠡᠨ ᠪᠠᠯᠠᠮᠠᠭᠳᠠᠭᠰᠠᠨ ᠦᠭᠡᠢ ᠴᠡᠷᠢᠭ ᠬᠥᠮᠦᠨ ᠦ᠌ ᠡᠷᠡᠰ ᠠᠯᠬᠤᠭᠠ ᠪᠠᠷ ᠠᠯᠬᠤᠵᠤ ᠬᠣᠢᠲᠤ ᠭᠡᠷ ᠲᠦ᠋ᠨᠢ ᠣᠷᠣᠵᠤ ᠣᠴᠢᠬᠤᠯᠠ᠂ ᠨᠢᠭᠡ ᠴᠦ᠍ ᠬᠥᠮᠦᠨ ᠬᠠᠷᠠ ᠦᠭᠡᠢ ᠬᠣᠭᠣᠰᠣᠨ ᠭᠡᠷ ᠪᠠᠢᠯᠠ᠃ ᠠᠩᠴᠢᠨᠵᠠᠪ᠄
一 ᠴᠣ ᠲᠤᠸᠠᠨᠵᠠᠩ ᠬᠠᠮᠢᠭᠠ ᠪᠠᠢᠨᠠ? ᠭᠡᠵᠦ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠬᠠᠰᠬᠢᠷᠪᠠᠯ《ᠡᠨᠳᠡ ᠪᠠᠢᠨᠠ》 ᠭᠡᠵᠦ ᠬᠠᠷᠢᠭᠤ ᠳᠠᠭᠤᠨ ᠭᠠᠷᠬᠤ ᠰᠢᠭ᠋ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠮᠠᠩᠨᠠᠢ ᠶ᠋ᠢᠨ ᠭᠣᠣᠯ᠂ ᠬᠣᠶᠠᠷ ᠴᠢᠮᠠᠯᠠᠬᠠᠢ ᠳ᠋ᠤ᠌ ᠬᠦᠢᠲᠡᠨ ᠫᠤᠤ ᠲᠤᠯᠭᠠᠵᠤ《ᠪᠤᠤ ᠬᠥᠳᠡᠯ》᠂《ᠠᠬᠤᠷ ᠫᠤᠤ ᠪᠠᠨ ᠲᠤᠰᠢᠶᠠ!》 ᠭᠡᠵᠦ ᠵᠠᠩᠳᠤᠷᠪᠠ᠃ ᠠᠩᠴᠢᠨᠵᠠᠪ ᠮᠠᠰᠢ ᠰᠤᠷᠮᠠᠭᠠᠢ ᠪᠠᠷ ᠪᠥᠰᠡᠨ ᠳ᠋ᠡᠬᠢ ᠠᠬᠤᠷ ᠫᠤᠤ ᠪᠠᠨ ᠰᠤᠭᠤᠯᠤᠨ ᠠᠪᠴᠤ ᠫᠠᠳ ᠬᠢᠲᠡᠯᠡ ᠴᠣᠬᠢᠵᠤ ᠥᠭᠪᠡ᠃
ᠠᠩᠴᠢᠨᠵᠠᠪ ᠮᠥᠨ ᠲᠡᠷᠡ ᠬᠣᠭᠣᠰᠣᠨ ᠭᠡᠷ ᠲᠦ᠍ ᠬᠣᠷᠢᠭᠳᠠᠵᠤ᠂ ᠡᠭᠦᠳᠡᠨ ᠳᠡᠭᠡᠷᠡ ᠨᠢ ᠬᠣᠶᠠᠷ ᠬᠣᠶᠠᠷ ᠴᠡᠷᠢᠭ ᠮᠠᠨᠠᠭᠠ ᠡᠭᠡᠯᠵᠢᠯᠡᠨ ᠵᠣᠭᠰᠣᠳᠠᠭ ᠪᠣᠯᠪᠠ᠃
ᠠᠩᠴᠢᠨᠵᠠᠪ ᠬᠣᠷᠢᠭᠤᠯ ᠤ᠋ᠨ ᠭᠡᠷ ᠳᠣᠲᠣᠷᠠ ᠠ᠋ᠴᠠ ᠭᠠᠳᠠᠨᠠ ᠲᠡᠭᠦᠨ ᠦ᠌ ᠴᠡᠷᠢᠭ ᠦ᠋ᠨ ᠫᠤᠤ ᠵᠡᠪᠰᠡᠭ ᠢ ᠬᠤᠷᠢᠶᠠᠮᠵᠢᠯᠠᠵᠤ ᠪᠠᠢᠬᠤ ᠳᠠᠭᠤ ᠴᠢᠮᠡᠭᠡ ᠶ᠋ᠢ ᠲᠣᠪ ᠲᠣᠳᠣᠬᠠᠨ ᠣᠯᠵᠤ ᠰᠣᠨᠣᠰᠪᠠ᠃《ᠠᠪᠠᠭᠠᠢ ᠬᠡᠦᠬᠡᠳ ᠰᠢᠭ ᠠᠷᠭᠠᠯ ᠲᠦᠯᠡᠰᠢᠨ ᠡᠴᠡ ᠴᠠᠭᠠᠰᠢ ᠠᠯᠤᠰ ᠢ ᠪᠣᠳᠣᠵᠤ ᠴᠢᠳᠠᠳᠠᠭ ᠦᠭᠡᠢ ᠮᠠᠨ ᠤ᠋ ᠮᠣᠩᠭᠣᠯᠴᠤᠳ ᠳᠠᠩᠴᠤ ᠬᠥᠭᠡᠷᠦᠬᠦᠢ! ᠬᠡᠵᠢᠶᠡ ᠬᠠᠮᠠᠷ ᠲᠤᠨᠢ ᠤᠲᠤᠭᠠ ᠣᠷᠣᠵᠤ ᠤᠬᠠᠭᠠᠨ ᠣᠷᠣᠳᠠᠭ ᠪᠣᠯ⁈》 ᠭᠡᠵᠦ ᠨᠥᠭᠦᠭᠡ ᠬᠡᠳᠦᠨ ᠯᠢᠶᠠᠨᠵᠠᠩ ᠤ᠋ᠨ ᠣᠬᠣᠷ ᠪᠣᠳᠣᠯ ᠢ ᠰᠠᠨᠠᠵᠤ᠂ ᠵᠣᠷᠢᠭᠯᠠᠵᠤ ᠪᠠᠢᠭᠠᠳ ᠵᠠᠮ ᠪᠤᠷᠤᠭᠤᠯᠠᠴᠢᠬᠠᠭᠰᠠᠨ ᠪᠣᠯ ᠲᠠᠭᠠᠷᠠᠬᠤ ᠪᠠᠢᠭᠰᠠᠨ ᠶᠤᠮ᠃ ᠶᠠᠭᠠᠬᠢᠯᠠ ᠭᠡᠵᠦ ᠡᠨᠡ ᠪᠤᠷᠤᠭᠤ ᠨᠣᠮᠲᠠᠨ ᠤ᠋ ᠭᠠᠷ ᠲᠤ᠌ ᠣᠷᠣᠵᠤ ᠮᠠᠭᠤ ᠪᠠᠨ ᠦᠵᠡᠬᠦ ᠪᠢᠯᠡ⁈ ᠡᠭᠦᠨ ᠦ᠌ ᠭᠠᠷ ᠠ᠋ᠴᠠ ᠵᠦᠭᠡᠷ ᠮᠤᠯᠲᠤᠷᠠᠨᠠ ᠭᠡᠵᠦ ᠪᠠᠢᠳᠠᠭ ᠦᠭᠡᠢ ᠬᠡᠷᠡᠭ ᠭᠡᠵᠦ ᠪᠣᠳᠣᠬᠤ ᠲᠠᠢ ᠵᠡᠷᠭᠡ《ᠦᠬᠦᠯ》 ᠭᠡᠳᠡᠭ ᠭᠠᠭᠴᠠᠬᠠᠨ ᠬᠠᠷᠠᠩᠭᠤᠢ ᠰᠡᠭᠦᠳᠡᠷ ᠨᠡᠲᠦᠪᠡᠯᠵᠡᠵᠦ ᠬᠠᠷᠠᠭᠳᠠᠬᠤ ᠰᠢᠭ᠋ ᠪᠣᠯᠪᠠ᠃
《ᠪᠠᠭᠠ ᠬᠠᠲᠤᠨ ᠠ᠋ᠴᠠ ᠥᠭᠡᠷᠡ ᠬᠥᠮᠦᠨ ᠢ ᠨᠢᠳᠦᠨ ᠳ᠋ᠡᠭᠡᠨ ᠡᠯᠭᠦᠳᠡᠭ ᠦᠭᠡᠢ ᠣᠮᠣᠭ ᠰᠦᠷ ᠴᠢᠨᠢ ᠶᠠᠭᠠᠬᠢᠪᠠ? ᠴᠢᠭᠢᠶᠡᠲᠦᠷᠦᠦ!》 ᠭᠡᠵᠦ ᠪᠣᠳᠣᠭᠰᠠᠨ ᠴᠣᠭᠪᠠᠭᠠᠲᠤᠷ᠄
一 ᠬᠡᠰᠢᠭᠲᠡᠢ ᠴᠢ ᠶᠠᠮᠠᠷ ᠰᠦᠷᠡᠬᠡᠢ ᠪᠦᠳᠦᠭᠦᠨ ᠵᠢᠷᠦᠬᠡ ᠲᠡᠢ ᠡᠷᠡ ᠪᠣᠢ! ᠶᠠᠭᠤ ᠪᠣᠳᠣᠵᠤ ᠵᠠᠩᠵᠤᠨ ᠶᠠᠮᠤᠨ ᠤ᠋ ᠮᠣᠬᠣᠭᠰᠠᠨ ᠴᠡᠷᠢᠭ ᠦ᠋ᠨ ᠫᠤᠤ ᠵᠡᠪᠰᠡᠭ ᠢ ᠮᠤᠰᠬᠢᠪᠡ⁈ ᠭᠡᠬᠦ ᠳ᠋ᠦ᠍ ᠠᠩᠴᠢᠨᠵᠠᠪ ᠴᠣᠭᠪᠠᠭᠠᠲᠤᠷ ᠢ ᠭᠥᠯᠢᠢᠵᠦ ᠬᠠᠷᠠᠨ ᠦᠭᠡ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃
一 ᠠᠢ᠂ ᠶᠠᠭᠠᠬᠢᠭᠠᠳ ᠦᠭᠡ ᠳᠤᠤᠭᠠᠷᠬᠤ ᠦᠭᠡᠢ ᠪᠠᠢᠨᠠ? ᠬᠡᠢ ᠭᠠᠵᠠᠷ ᠣᠮᠣᠭᠳᠠᠵᠤ ᠬᠥᠮᠦᠨ ᠦ᠌ ᠭᠠᠨᠵᠤᠭᠠ ᠪᠠᠭᠤᠯᠭᠠᠳᠠᠭ ᠪᠦᠳᠦᠭᠦᠨ ᠵᠢᠷᠦᠬᠡ ᠴᠢᠨᠢ ᠶᠠᠭᠠᠬᠢᠪᠠ? ᠣᠳᠣ ᠠᠮᠢᠨ ᠳ᠋ᠤ᠌ ᠴᠢᠨᠢ ᠣᠷᠣᠬᠤ ᠳ᠋ᠤ᠌ ᠠᠶᠤᠳᠠᠭ ᠪᠣᠯᠪᠠ ᠤᠤ?
一 ᠠᠶᠤᠬᠤ ᠶᠠᠭᠤ ᠪᠠᠢᠬᠤ ᠪᠣᠢ! ᠠᠶᠤᠪᠠᠯ ᠪᠤᠤ ᠬᠢ᠂ ᠬᠢᠪᠡᠯ ᠪᠤᠤ ᠠᠶᠤ ᠭᠡᠳᠡᠭ᠃ ᠮᠠᠭᠤ ᠰᠠᠢᠨ ᠬᠠᠷᠠ ᠴᠡᠷᠢᠭ ᠦ᠋ᠨ ᠳᠡᠭᠡᠷᠡᠮ ᠦ᠋ᠳ ᠢ ᠲᠣᠨᠢᠯᠭᠠᠵᠤ ᠪᠠᠷᠠᠬᠤ ᠦᠭᠡᠢ ᠪᠣᠯ ᠮᠠᠨ ᠤ᠋ ᠨᠤᠲᠤᠭ ᠶᠡᠷᠦ ᠨᠢ ᠠᠮᠤᠷ ᠵᠠᠶᠠᠭᠠ ᠦᠵᠡᠬᠦ ᠦᠭᠡᠢ ᠠ᠋!
一 ᠡᠨᠡ ᠣᠮᠣᠭ ᠰᠦᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠣᠷᠣ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠡᠷᠡᠮᠡᠬᠡᠢ ᠲᠤᠯᠵᠤ ᠪᠠᠢᠯᠳᠤᠳᠠᠭ ᠦᠭᠡᠢ᠃ ᠶᠠᠭᠤᠨ ᠳ᠋ᠤ᠌ ᠳᠤᠲᠠᠭᠠᠪᠠ? ᠳᠤᠲᠠᠭᠠᠬᠤ ᠳ᠋ᠠᠭᠠᠨ ᠪᠠᠰᠠ ᠵᠦᠭᠡᠷ ᠪᠠᠢᠬᠤ ᠦᠭᠡᠢ ᠮᠣᠬᠣᠭᠰᠠᠨ ᠴᠡᠷᠢᠭ ᠦ᠋ᠨ ᠫᠤᠤ ᠵᠡᠪᠰᠡᠭ ᠢ ᠮᠤᠰᠬᠢᠵᠦ ᠶᠠᠪᠤᠨᠠ ᠭᠡᠳᠡᠭ ᠴᠢᠨᠢ᠁ ᠣᠳᠣ ᠴᠠᠭᠠᠨᠠ ᠴᠢᠨᠢ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠬᠡᠰᠢᠭᠲᠡᠢ ᠴᠢ ᠮᠡᠳᠡᠵᠦ ᠪᠠᠢᠨᠠ ᠤᠤ?
一 ᠮᠡᠳᠡᠬᠦ ᠦᠭᠡᠢ᠃
一 ᠪᠢ ᠴᠢᠮᠠᠶ᠋ᠢ ᠴᠠᠭᠠᠵᠠᠯᠠᠬᠤ ᠴᠤ᠌ ᠭᠠᠢᠭᠤᠢ ᠬᠡᠷᠡᠭ᠃ ᠵᠠᠩᠵᠤᠨ ᠶᠠᠮᠤᠨ ᠤ᠋ ᠬᠢᠨ ᠴᠢᠮᠠᠶ᠋ᠢ ᠴᠣᠬᠣᠮ ᠶᠠᠭᠠᠬᠢᠳᠠᠭ ᠪᠣᠯ? ᠴᠢ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡ! ᠡᠨᠡ ᠶᠠᠪᠤᠳᠠᠯ ᠳ᠋ᠤ᠌ ᠴᠠᠭᠠᠳᠤ ᠮᠤᠬᠤᠷ ᠵᠠᠰᠠᠭ ᠴᠢᠨᠢ ᠰᠦᠷᠡᠬᠡᠢ ᠠᠭᠤᠷᠯᠠᠵᠤ ᠪᠠᠢᠨᠠ᠃
一 ᠵᠠ᠂ ᠶᠠᠭᠠᠬᠢᠪᠠᠯ ᠶᠠᠭᠠᠬᠢᠭ ᠴᠠᠭᠠᠰᠢ! ᠴᠣᠭᠪᠠᠭᠠᠲᠤᠷ ᠴᠢ ᠥᠨᠥᠳᠥᠷ ᠨᠠᠮᠠᠶ᠋ᠢ ᠣᠮᠣᠭᠳᠠᠵᠤ ᠣᠯᠠᠨ ᠶᠠᠭᠤᠮᠠ ᠶᠠᠩᠰᠢᠵᠤ ᠠᠰᠠᠭᠤᠬᠤ ᠬᠡᠷᠡᠭ ᠦᠭᠡᠢ᠃ ᠪᠠᠨᠰᠠᠳᠠᠬᠤ ᠳ᠋ᠤ᠌ ᠪᠤᠬᠤᠷ ᠪᠡᠯᠡᠨ᠂ ᠫᠤᠤᠳᠠᠬᠤ ᠳ᠋ᠤ᠌ ᠠᠮᠢ ᠪᠡᠯᠡᠨ ᠭᠡᠳ ᠠᠩᠴᠢᠨᠵᠠᠪ ᠴᠣᠭᠪᠠᠭᠠᠲᠤᠷ ᠢ ᠱᠠᠯ ᠲᠣᠭᠣᠬᠤ ᠦᠭᠡᠢ ᠶᠠᠭᠤᠮᠠ ᠶᠠᠷᠢᠵᠤ ᠠᠵᠢᠭ ᠴᠤ᠌ ᠦᠭᠡᠢ ᠵᠣᠭᠰᠣᠨᠠ᠃
ᠴᠣᠭᠪᠠᠭᠠᠲᠤᠷ ᠬᠡᠰᠢᠭᠲᠡᠢ ᠶ᠋ᠢ ᠥᠴᠢᠭᠯᠡᠨ ᠰᠢᠭᠦᠭᠰᠡᠨ ᠪᠣᠯᠪᠠᠴᠤ ᠲᠠᠩᠳᠠ ᠳᠠᠷᠢ ᠡᠮᠬᠦᠭᠰᠡᠨ ᠬᠡᠷᠡᠭᠦᠯ ᠦ᠋ᠨ ᠰᠢᠷᠦᠭᠦᠨ ᠦᠭᠡ ᠪᠡᠷ ᠲᠡᠭᠦᠰᠳᠡᠭ ᠲᠦ᠍ ᠴᠣᠭᠪᠠᠭᠠᠲᠤᠷ ᠬᠡᠰᠢᠭᠲᠡᠢ ᠳ᠋ᠦ᠍ ᠭᠤᠷᠪᠠᠨ ᠶᠠᠯᠠ ᠳᠤᠬᠤᠪᠠ᠃ ᠲᠡᠷᠡ ᠨᠢ ᠨᠢᠭᠡ ᠳ᠋ᠦ᠍᠂ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠦ᠌ ᠬᠤᠪᠢ ᠳ᠋ᠤ᠌ ᠵᠠᠷᠯᠢᠭ ᠵᠢᠭᠠᠪᠤᠷᠢ ᠳᠠᠭᠠᠬᠤ ᠦᠭᠡᠢ ᠪᠡᠷ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠲᠡᠢᠨ ᠦ᠌ ᠲᠠᠯᠠᠪᠤᠷ ᠠ᠋ᠴᠠ ᠵᠢᠭᠤᠲᠠᠵᠤ ᠳᠤᠲᠠᠭᠠᠭᠰᠠᠨ ᠶᠠᠯᠠ᠃ ᠬᠣᠶᠠᠷ ᠲᠤ᠌᠂ ᠪᠣᠷᠣ ᠴᠡᠷᠢᠭ ᠲᠦ᠍ ᠴᠣᠬᠢᠭᠳᠠᠨ ᠪᠤᠲᠠᠷᠠᠭᠰᠠᠨ ᠵᠠᠩᠵᠤᠨ ᠶᠠᠮᠤᠨ ᠤ᠋ ᠬᠠᠷᠠ ᠴᠡᠷᠢᠭ ᠦ᠋ᠨ ᠵᠡᠪᠰᠡᠭᠲᠦ ᠠᠷᠮᠢ ᠶ᠋ᠢᠨ ᠬᠡᠰᠡᠭ ᠴᠡᠷᠢᠭ ᠦ᠋ᠨ ᠫᠤᠤ ᠵᠡᠪᠰᠡᠭ ᠢ ᠮᠤᠰᠬᠢᠵᠦ ᠴᠥᠭᠡᠪᠦᠷ ᠲᠣᠭᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠢ ᠠᠯᠠᠭᠰᠠᠨ ᠶᠠᠯᠠ᠃ ᠭᠤᠷᠪᠠ ᠳ᠋ᠤ᠌᠂ ᠪᠣᠷᠣ ᠴᠡᠷᠢᠭ ᠲᠡᠢ ᠴᠠᠭᠠᠭᠤᠷ ᠢ᠋ᠶ᠋ᠠᠨ ᠰᠦᠯᠪᠡᠭᠡ ᠲᠡᠢ ᠭᠡᠪᠡ᠃ ᠢᠩᠭᠢᠭᠡᠳ ᠠᠩᠴᠢᠨᠵᠠᠪ ᠢ ᠬᠦᠢᠲᠡᠨ ᠭᠡᠷ ᠲᠦ᠍ ᠳᠠᠷᠤᠵᠤ ᠳᠠᠪᠬᠤᠷ ᠳᠠᠪᠬᠤᠷ ᠮᠠᠨᠠᠭᠠ ᠲᠠᠯᠪᠢᠪᠠ᠃
ᠰᠦᠮᠡ ᠶ᠋ᠢᠨ ᠡᠮᠦᠨᠡ ᠬᠦᠷᠢᠶᠡᠨ ᠳ᠋ᠦ᠍ ᠰᠥᠨᠢᠵᠢᠨ ᠠᠷᠢᠬᠢᠳᠠᠵᠤ ᠬᠣᠨᠣᠭᠰᠠᠨ ᠴᠣᠭᠪᠠᠭᠠᠲᠤᠷ ᠨᠠᠷ ᠤ᠋ᠨ ᠦᠢᠮᠡᠯᠳᠦᠬᠦ ᠴᠢᠮᠡᠭᠡ ᠶ᠋ᠢ ᠴᠢᠩᠨᠠᠵᠤ ᠬᠡᠪᠲᠡᠭᠰᠡᠨ ᠠᠩᠴᠢᠨᠵᠠᠪ《ᠪᠢ ᠶᠠᠭᠤ ᠪᠣᠳᠣᠵᠤ ᠪᠡᠶᠡ ᠪᠡᠨ ᠵᠥᠪ ᠵᠦᠭᠡᠷ ᠡᠨᠡ ᠬᠣᠭᠣᠰᠣᠨ ᠲᠣᠯᠣᠭᠠᠢᠲᠤ ᠴᠣᠭᠪᠠᠭᠠᠲᠤᠷ ᠲᠤ᠌ ᠬᠦᠷᠭᠡᠵᠦ ᠢᠷᠡᠪᠡ? ᠫᠤᠤ ᠵᠡᠪᠰᠡᠭ᠂ ᠴᠡᠷᠢᠭ ᠮᠣᠷᠢ ᠪᠠᠨ ᠬᠤᠷᠢᠶᠠᠯᠭᠠᠵᠤ ᠬᠦᠢᠲᠡᠨ ᠭᠡᠷ ᠲᠦ᠍ ᠬᠣᠷᠢᠭᠳᠠᠬᠤ ᠮᠢᠨᠢ᠁》 ᠭᠡᠵᠦ ᠪᠣᠳᠣᠭᠠᠳ ᠡᠪᠦᠷ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠱ᠌ᠢᠷᠦᠨ ᠵᠢᠩᠰᠡ ᠮᠠᠨᠤᠬᠤᠨ ᠬᠥᠬᠦᠦᠷ ᠢ᠋ᠶ᠋ᠡᠨ ᠭᠠᠷᠭᠠᠵᠤ《ᠡᠴᠢᠭᠡ ᠳᠡᠭᠡᠳᠦᠰ ᠦ᠋ᠨ ᠮᠢᠨᠢ ᠦᠯᠡᠳᠡᠭᠡᠵᠦ ᠥᠭᠭᠦᠭᠰᠡᠨ ᠡᠳ᠋ ᠶᠦᠮ ᠠ᠋ ᠬᠥᠭᠡᠷᠦᠬᠦᠢ! ᠴᠣᠭᠪᠠᠭᠠᠲᠤᠷ ᠴᠢ ᠦᠨᠡᠬᠡᠷ ᠨᠠᠮᠠᠶ᠋ᠢ ᠲᠠᠨᠢᠬᠤ ᠦᠭᠡᠢ ᠭᠡᠵᠢ ᠤᠤ? ᠴᠢ ᠪᠢᠳᠡ ᠬᠣᠶᠠᠷ ᠴᠥᠮ ᠮᠢᠩᠭᠠᠨᠪᠤᠤ ᠲᠤᠰᠠᠯᠠᠭᠴᠢ ᠶ᠋ᠢᠨ ᠬᠦᠦ ᠰᠢᠦ ᠳᠡ!᠁》 ᠭᠡᠵᠦ ᠰᠢᠪᠡᠨᠡᠨ ᠪᠡᠶᠡ ᠡᠷᠭᠢᠲᠡᠯᠡ ᠭᠠᠳᠠᠨᠠ ᠡᠭᠦᠳᠡᠨ ᠦ᠌ ᠲᠡᠮᠦᠷ ᠭᠢᠨᠵᠢᠲᠦ ᠳᠡᠪᠬᠡ ᠬᠠᠷᠴᠢᠭᠢᠨᠠᠨ ᠳᠤᠤᠭᠠᠷᠴᠤ ᠨᠢᠭᠡ ᠬᠥᠮᠦᠨ ᠴᠢᠮᠡᠭᠡ ᠦᠭᠡᠢ ᠣᠷᠣᠵᠤ ᠢᠷᠡᠪᠡ᠃ ᠠᠩᠴᠢᠨᠵᠠᠪ ᠬᠢᠷᠳ᠋ᠬᠢᠨ ᠰᠣᠴᠢᠵᠤ《ᠬᠡᠨ ᠪᠣᠢ?》 ᠭᠡᠵᠦ ᠠᠰᠠᠭᠤᠵᠤ ᠠᠮᠵᠢᠯ ᠦᠭᠡᠢ ᠨᠥᠭᠦᠭᠡ ᠣᠷᠣᠵᠤ ᠢᠷᠡᠭᠰᠡᠨ ᠬᠥᠮᠦᠨ᠄
一 ᠠᠩᠴᠢᠨᠵᠠᠪ ᠠ᠋! ᠪᠣᠰᠢᠭᠣ ᠬᠥᠳᠡᠯ! ᠶᠠᠪᠤᠵᠠᠭᠠᠶᠠ! ᠭᠡᠰᠡᠨ ᠳᠠᠭᠤ ᠪᠠᠷ ᠨᠢ ᠵᠠᠩᠴᠣᠪ ᠪᠣᠯᠬᠤ ᠶ᠋ᠢ ᠲᠠᠨᠢᠵᠤ ᠬᠣᠶᠠᠭᠤᠯᠠ ᠲᠡᠨᠳᠡ ᠡᠴᠡ ᠱᠠᠯᠠᠪ ᠬᠥᠳᠡᠯᠪᠡ᠃
ᠵᠠᠩᠴᠣᠪ᠂ ᠲᠡᠮᠦᠷᠰᠦᠬᠡ ᠬᠡᠳᠦᠭᠦᠯᠡ ᠨᠠᠢᠮᠠᠨᠵᠢᠩ᠂ ᠳᠤᠭᠠᠷᠵᠠᠪ ᠨᠠᠷ ᠤ᠋ᠨ ᠴᠡᠷᠢᠭ ᠳᠣᠲᠣᠷᠠ ᠠ᠋ᠴᠠ ᠲᠤᠰᠠᠯᠠᠮᠵᠢ ᠦᠵᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠷ ᠠᠩᠴᠢᠨᠵᠠᠪ ᠤ᠋ᠨ ᠬᠣᠷᠢᠭᠤᠯ ᠤ᠋ᠨ ᠡᠭᠦᠳᠡᠨ ᠦ᠌ ᠮᠠᠨᠠᠭᠠ ᠶ᠋ᠢ ᠰᠡᠮᠡᠬᠡᠷ ᠤᠬᠠᠭᠠᠨ ᠬᠢᠵᠦ ᠲᠡᠭᠦᠨ ᠢ ᠭᠠᠷᠭᠠᠵᠤ ᠠᠪᠤᠭᠰᠠᠨ ᠨᠢ ᠡᠨᠡ ᠪᠠᠢᠵᠠᠢ᠃
ᠡᠨᠡ ᠬᠡᠳᠦᠭᠦᠯᠡ ᠰᠢᠷᠡᠭᠡ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠪᠤᠯᠤᠩ ᠠ᠋ᠴᠠ ᠮᠣᠷᠳᠠᠵᠤ ᠳᠡᠮᠡᠢ ᠶᠠᠪᠤᠭᠰᠠᠨ ᠦᠭᠡᠢ ᠶᠠᠭᠤᠨ ᠤ᠋ ᠴᠡᠷᠢᠭ ᠪᠣᠯᠬᠤ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ ᠪᠦᠯᠦᠭ ᠴᠡᠷᠢᠭ ᠲᠦ᠍ ᠪᠦᠰᠡᠯᠡᠭᠳᠡᠪᠡ᠃ ᠬᠠᠷᠠᠩᠭᠤᠢ ᠰᠥᠨᠢ ᠪᠣᠯᠬᠣᠷ ᠶᠠᠭᠤ ᠴᠤ᠌ ᠦᠵᠡᠭᠳᠡᠬᠦ ᠦᠭᠡᠢ᠂ ᠵᠥᠪᠬᠡᠨ ᠬᠡᠳᠦᠨ ᠵᠦᠭ ᠡᠴᠡ ᠫᠤᠤ ᠲᠠᠴᠢᠭᠢᠨᠠᠵᠤ《ᠠᠮᠢᠳᠤ ᠪᠠᠷ ᠨᠢ ᠪᠡᠷᠢ!》 ᠭᠡᠰᠡᠨ ᠴᠡᠷᠢᠭ ᠦ᠋ᠳ ᠵᠦᠭ ᠵᠦᠭ ᠡᠴᠡ ᠣᠷᠢᠯᠠᠯᠳᠤᠨᠠ᠃
ᠠᠩᠴᠢᠨᠵᠠᠪ ᠠᠵᠠ ᠶ᠋ᠢᠨ ᠲᠩᠷᠢ ᠳ᠋ᠦ᠍ ᠲᠦᠰᠢᠵᠦ ᠠᠮᠢ ᠪᠠᠷ ᠢ᠋ᠶ᠋ᠠᠨ ᠮᠥᠷᠥᠢ ᠲᠠᠯᠪᠢᠨ ᠨᠢᠳᠦ ᠪᠡᠨ ᠠᠨᠢᠭᠠᠳ ᠨᠢᠭᠡ ᠲᠠᠢᠰᠢ ᠮᠣᠷᠢᠨ ᠤ᠋ ᠪᠠᠨ ᠬᠤᠷᠳᠤ ᠳ᠋ᠤ᠌ ᠪᠦᠰᠡᠯᠡᠯᠲᠡ ᠶ᠋ᠢ ᠰᠢᠪᠲᠤᠯᠤᠨ ᠳᠤᠲᠠᠭᠠᠬᠤ ᠳ᠋ᠤ᠌ ᠪᠣᠯᠣᠮᠵᠢᠲᠠᠢ ᠰᠠᠨᠠᠭᠳᠠᠪᠠᠴᠤ ᠰᠥᠨᠢ ᠬᠠᠷᠠᠩᠭᠤᠢ ᠳ᠋ᠤ᠌ ᠵᠡᠷᠯᠢᠭ ᠬᠡᠢᠰᠦᠭᠰᠡᠨ ᠰᠣᠬᠣᠷ ᠰᠤᠮᠤᠨ ᠳ᠋ᠤ᠌ ᠶᠠᠮᠠᠷ ᠴᠤ᠌ ᠤᠳᠬᠠ ᠠᠭᠤᠯᠭᠠ ᠦᠭᠡᠢ ᠪᠡᠶᠡ ᠪᠡᠨ ᠦᠷᠡᠭᠳᠡᠭᠦᠯᠬᠦ ᠡᠴᠡ ᠪᠣᠯᠭᠣᠮᠵᠢᠯᠠᠨ ᠳᠤᠲᠠᠭᠠᠬᠤ ᠵᠠᠮ ᠢ ᠰᠣᠩᠭᠣᠭᠰᠠᠨ ᠦᠭᠡᠢ᠂《ᠴᠣᠭᠪᠠᠭᠠᠲᠤᠷ ᠴᠢ ᠦᠨᠡᠬᠡᠷ ᠬᠠᠷᠠ ᠲᠠᠢ ᠬᠡᠴᠡᠭᠦᠦ ᠡᠷᠡ ᠪᠠᠢᠨᠠ᠁ ᠵᠠ᠂ ᠶᠠᠭᠠᠬᠢᠪᠠᠯ ᠶᠠᠭᠠᠬᠢᠭ ᠴᠠᠭᠠᠰᠢ!》 ᠭᠡᠰᠡᠨ ᠲᠥᠯᠥᠪᠲᠡᠢ ᠣᠷᠣᠨ ᠳ᠋ᠠᠭᠠᠨ ᠬᠥᠳᠡᠯᠦᠯ ᠦᠭᠡᠢ ᠵᠣᠭᠰᠣᠭᠠᠳ ᠪᠠᠢᠪᠠ᠃
ᠬᠡᠳᠦᠨ ᠲᠠᠯᠠ ᠠ᠋ᠴᠠ ᠪᠠᠷᠤᠭ ᠵᠠᠪᠰᠠᠷ ᠦᠭᠡᠢ ᠰᠢᠬᠠᠵᠤ ᠢᠷᠡᠭᠰᠡᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠡᠨᠳᠡ ᠲᠡᠨᠳᠡ ᠡᠴᠡ ᠭᠡᠷᠡᠯ ᠭᠢᠯᠠᠯᠵᠠᠭᠤᠯᠤᠨ《ᠠᠮᠢᠳᠤ ᠪᠠᠷ ᠨᠢ᠁ ᠠᠮᠢᠳᠤ ᠪᠠᠷ ᠨᠢ᠁》 ᠭᠡᠵᠦ ᠣᠷᠢᠯᠠᠯᠳᠤᠭᠰᠠᠭᠠᠷ ᠲᠡᠭᠦᠨ ᠵᠦᠭ ᠣᠢᠷᠠᠲᠤᠨᠠ᠃ ᠠᠩᠴᠢᠨᠵᠠᠪ᠂ ᠵᠠᠩᠴᠣᠪ ᠤ᠋ᠨ ᠮᠣᠷᠢᠳ ᠡᠨᠡ ᠬᠦ᠌ ᠠᠢᠩᠭᠤᠷᠢᠲᠦ ᠭᠡᠷᠡᠯ ᠬᠠᠷᠪᠤᠭᠰᠠᠨ ᠦᠢᠮᠡᠭᠡᠨ ᠡᠴᠡ ᠦᠷᠭᠦᠨ ᠨᠠᠳᠬᠤᠵᠤ ᠳᠡᠪᠬᠡᠴᠡᠨᠡ᠁
ᠠᠩᠴᠢᠨᠵᠠᠪ ᠤ᠋ᠨ ᠨᠢᠳᠦ ᠶ᠋ᠢ ᠨᠢ ᠳᠠᠷᠤᠵᠤ ᠬᠦᠯᠢᠭᠡᠳ ᠨᠢᠭᠡ ᠮᠠᠭᠤᠬᠠᠨ ᠪᠠᠮᠪᠠᠷᠴᠠᠭ ᠰᠡᠦᠬᠡ ᠲᠡᠷᠭᠡᠨ ᠳ᠋ᠦ᠍ ᠴᠢᠬᠢᠵᠦ ᠬᠠᠮᠢᠭᠠ ᠨᠢᠭᠡ ᠵᠦᠭ ᠶᠥᠩᠬᠥᠷ ᠶᠥᠩᠬᠥᠷ ᠬᠥᠳᠡᠯᠪᠡ᠃
ᠵᠣᠭᠰᠣᠭᠠ ᠦᠭᠡᠢ ᠬᠠᠢᠪᠠᠭᠴᠠᠨ ᠶᠠᠪᠤᠭᠰᠠᠨ ᠪᠠᠮᠪᠠᠷᠴᠠᠭ ᠲᠡᠷᠭᠡ ᠮᠠᠷᠭᠠᠲᠤᠷ ᠤ᠋ᠨ ᠬᠢᠨᠢ ᠦᠳᠡ ᠪᠣᠯᠬᠤ ᠳ᠋ᠤ᠌ ᠨᠢᠭᠡ ᠭᠠᠵᠠᠷ ᠣᠴᠢᠵᠤ ᠪᠠᠭᠤᠪᠠ᠃
ᠬᠣᠶᠠᠷ ᠮᠠᠢᠵᠢᠭᠢ ᠰᠠᠨᠳᠠᠯᠢ ᠲᠠᠢ ᠳᠥᠷᠪᠡᠯᠵᠢᠨ ᠰᠢᠷᠡᠭᠡ ᠲᠠᠯᠪᠢᠭᠰᠠᠨ ᠵᠢᠵᠢᠭᠬᠡᠨ ᠬᠣᠣᠰ ᠰᠢᠯ ᠴᠣᠩᠬᠣ ᠲᠠᠢ ᠰᠢᠪᠠᠷ ᠪᠠᠢᠰᠢᠩ ᠳ᠋ᠤ᠌ ᠠᠩᠴᠢᠨᠵᠠᠪ ᠢ ᠬᠣᠷᠢᠪᠠ᠃
ᠣᠷᠣᠢ ᠨᠢ ᠸᠠᠩ ᠰᠣᠬᠣᠷ ᠬᠡᠳᠦᠨ ᠳᠠᠭᠠᠯᠲᠠ ᠲᠠᠢ ᠣᠷᠣᠵᠤ ᠢᠷᠡᠨ᠄
一 ᠣ᠂ ᠡᠨᠡ ᠴᠢᠨᠢ ᠠᠵᠢᠷᠭᠠᠨ ᠬᠠᠷᠠ ᠪᠠᠢᠨᠠ ᠰᠢᠲᠠ! ᠭᠡᠰᠡᠨ ᠳ᠋ᠦ᠍ ᠨᠥᠭᠦᠭᠡ ᠳᠠᠭᠠᠯᠲᠠ ᠶ᠋ᠢᠨ ᠬᠢᠨᠢ ᠳᠣᠲᠣᠷᠠ ᠠ᠋ᠴᠠ᠄
— ᠸᠠᠩ ᠵᠠᠩᠭᠤᠢᠳᠠ ᠲᠠ ᠡᠨᠡ ᠬᠥᠮᠥᠨ ᠢ ᠲᠠᠨᠢᠳᠠᠭ ᠶᠤᠮ ᠤᠤ? ᠭᠡᠰᠡᠨ ᠢᠮᠠᠭᠠᠨ ᠳᠠᠭᠤ ᠭᠠᠷᠬᠤ ᠳᠤ ᠠᠩᠴᠢᠨᠵᠠᠪ ᠲᠡᠭᠦᠨ ᠢ ᠦᠯᠵᠡᠢᠰᠠᠩ ᠮᠥᠨ ᠭᠡᠳᠡᠭ ᠢ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠲᠠᠨᠢᠪᠠ᠃
ᠠᠩᠴᠢᠨᠵᠠᠪ᠂ ᠥᠯᠵᠡᠢᠰᠠᠩ ᠢ ᠬᠢᠯᠠᠮᠬᠢᠵᠤ《ᠡᠨᠡ ᠮᠠᠭᠤ ᠤᠬᠢᠶᠠᠳᠠᠰᠤ ᠳᠣᠯᠢᠶᠠᠭᠰᠠᠨ ᠵᠣᠯᠪᠢᠩ! ᠬᠠᠮᠢᠭᠠ ᠠᠰᠢᠭ ᠤ᠋ᠨ ᠥᠭᠶᠥᠭᠡ ᠴᠤᠬᠤᠢᠭᠰᠠᠨ ᠭᠠᠵᠠᠷ ᠴᠢ ᠥᠨᠳᠡᠯᠵᠡᠵᠦ ᠪᠠᠢᠳᠠᠭ᠃ ᠠᠯᠢ ᠵᠠᠪ ᠲᠤᠨᠢ ᠴᠢ ᠪᠠᠰᠠ ᠸᠠᠩ ᠰᠣᠬᠣᠷ ᠤᠨ ᠪᠥᠭᠰᠡ ᠶᠢ ᠳᠣᠯᠢᠶᠠᠭᠠᠳ ᠵᠠᠪᠳᠤᠪᠠ⁈》ᠭᠡᠵᠦ ᠲᠣᠲᠣᠷᠠ ᠪᠠᠨ ᠵᠠᠨᠤᠪᠠ᠃
— ᠡᠨᠡ ᠠᠵᠢᠷᠭᠠᠨ ᠬᠠᠷᠠ ᠭᠡᠳᠡᠭ ᠴᠢᠨᠢ ᠰᠠᠢᠨ ᠡᠷᠡ ᠰᠢᠦ! ᠲᠡᠭᠦᠨ ᠦ᠌ ᠭᠠᠷ ᠤ᠋ᠨ ᠬᠦᠯᠢᠶᠡᠰᠦ ᠶ᠋ᠢ ᠠᠯᠳᠠᠷᠠᠭᠠ! ᠭᠡᠵᠦ ᠸᠠᠩ ᠰᠣᠬᠣᠷ ᠨᠥᠭᠦᠭᠡ ᠬᠡᠳᠦᠨ ᠳᠠᠭᠠᠯᠲᠠ ᠵᠦᠭ ᠢ᠋ᠶ᠋ᠡᠨ ᠳᠣᠬᠢᠭᠰᠠᠨ ᠳ᠋ᠤ᠌ ᠥᠯᠵᠡᠢᠰᠠᠩ ᠶᠠᠭᠤᠨ ᠠ᠋ᠴᠠ ᠡᠮᠦᠨᠡ ᠠᠩᠴᠢᠨᠵᠠᠪ ᠤ᠋ᠨ ᠳᠡᠷᠭᠡᠳᠡ ᠣᠴᠢᠨ᠄
一 ᠪᠠᠢᠵᠠ᠂ ᠸᠠᠩ ᠵᠠᠩᠭᠤᠢᠳᠠ ᠠ᠋! ᠡᠨᠡ ᠬᠥᠮᠦᠨ ᠦ᠌ ᠬᠦᠯᠢᠶᠡᠰᠦ ᠶ᠋ᠢ ᠠᠯᠳᠠᠷᠠᠭᠠᠭᠰᠠᠭᠠᠷ ᠨᠢᠭᠡ ᠶᠠᠭᠤᠮᠠ ᠪᠣᠯᠤᠨᠠ ᠰᠢᠦ! ᠭᠡᠰᠡᠨ ᠳ᠋ᠦ᠍ ᠠᠩᠴᠢᠨᠵᠠᠪ᠄
— ᠵᠠᠢᠯᠠ᠂ ᠴᠠᠭᠠᠰᠢ ᠪᠠᠨ! ᠮᠠᠭᠤ ᠵᠣᠯᠪᠢᠩ! ᠭᠡᠵᠦ ᠵᠠᠩᠳᠤᠷᠤᠭᠰᠠᠨ ᠳ᠋ᠤ᠌ ᠥᠯᠵᠡᠢᠰᠠᠩ ᠴᠣᠴᠢᠰᠬᠢᠨ ᠳᠠᠯᠳᠢᠷᠠᠵᠤ᠄
一 ᠣ! ᠬᠢᠷᠢ ᠪᠡᠨ ᠮᠡᠳᠡᠬᠦ ᠦᠭᠡᠢ ᠠᠮᠢᠲᠠᠨ ᠪᠠᠢᠨᠠ ᠳᠠ ᠴᠢ! ᠪᠠᠰᠠ ᠬᠥᠮᠦᠨ ᠦ᠌ ᠤᠷᠲᠤ ᠠ᠋ᠴᠠ ᠴᠣᠪ ᠴᠣᠪ ᠭᠡᠬᠦ ᠲᠡᠢ᠁ ᠴᠢᠮᠠ ᠳ᠋ᠤ᠌ ᠢᠩᠭᠢᠳᠡᠭ ᠡᠳᠦᠷ ᠪᠠᠢᠵᠢ ᠤᠤ? ᠭᠡᠰᠡᠨ ᠪᠠᠰᠤᠩᠭᠤᠢ ᠦᠭᠡ ᠤᠨᠠᠭᠠᠵᠤ᠂ ᠸᠠᠩ ᠰᠣᠬᠣᠷ ᠤ᠋ᠨ ᠴᠢᠬᠢᠨ ᠳ᠋ᠦ᠍ ᠨᠢᠭᠡ ᠶᠠᠭᠤᠮᠠ ᠰᠢᠪᠡᠨᠡᠪᠡ᠃
᠁ ᠮᠥᠨ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠠᠩᠴᠢᠨᠵᠠᠪ ᠢ ᠳᠠᠷᠤᠵᠤ ᠠᠪᠤᠨ ᠵᠡᠬᠦᠨᠰᠢᠯᠡᠭᠡᠳ ᠪᠤᠭᠤᠲᠤ ᠤᠷᠤᠭᠤ ᠠᠪᠠᠴᠢᠪᠠ᠃
ᠠᠩᠴᠢᠨᠵᠠᠪ ᠪᠤᠭᠤᠲᠤ ᠶ᠋ᠢᠨ ᠬᠠᠷᠠ ᠴᠡᠷᠢᠭ ᠦ᠋ᠨ ᠭᠢᠨᠳᠠᠨ ᠳ᠋ᠤ᠌ ᠬᠣᠷᠢᠭᠳᠠᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠣᠳᠣᠨᠬᠤᠸᠠᠷ