ᠵᠠᠮᠤᠬᠠ-ᠪᠢ ᠦᠬᠦᠬᠦ ᠪᠡᠷ ᠴᠢ ᠦᠬᠦ-ᠴᠢᠩᠭᠢᠰ ᠬᠠᠭᠠᠨ ᠊ᠤ᠌ ᠨᠢᠭᠤᠴᠠ ᠲᠡᠦᠬᠡ05Жамух-Би үххээр чи үх-Чингис хаан оо нууц түүх
911ᠵᠠᠮᠤᠬᠠ-ᠪᠢ ᠦᠬᠦᠬᠦ ᠪᠡᠷ ᠴᠢ ᠦᠬᠦ
ᠨᠠᠬᠤ ᠪᠠᠶᠠᠨ ᠤ᠋ ᠬᠥᠨᠳᠡᠢ ᠶ᠋ᠢ ᠤᠷᠤᠭᠤᠳᠠᠨ ᠲᠡᠮᠦᠵᠢᠨ ᠦ᠌ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠤᠷᠤᠭᠤ ᠣᠢᠷᠠᠲᠤᠬᠤ ᠪᠦᠷᠢ ᠬᠠᠨᠲᠡᠮᠦᠷ ᠦ᠋ᠨ ᠰᠡᠳᠬᠢᠯ ᠲᠦᠭᠰᠢᠬᠦ ᠨᠢ ᠨᠡᠮᠡᠭᠳᠡᠭᠰᠡᠭᠡᠷ ᠪᠠᠢᠪᠠ᠃ ᠲᠡᠮᠦᠵᠢᠨ ᠲᠡᠭᠦᠨ ᠢ᠋ ᠬᠡᠷᠬᠢᠨ ᠤᠭᠲᠤᠬᠤ ᠪᠣᠯ? ᠡᠵᠡᠨ ᠦ᠌ ᠬᠢᠨᠢ ᠦᠭᠡ ᠶ᠋ᠢ ᠬᠡᠷᠬᠢᠨ ᠬᠦᠯᠢᠶᠡᠵᠦ ᠠᠪᠬᠤ ᠪᠣᠯ ᠭᠡᠬᠦ ᠡᠴᠡ ᠲᠡᠷᠡ ᠶᠤᠮ᠃ ᠵᠠᠮᠤᠬᠠ ᠶ᠋ᠢᠨ ᠠᠭᠠᠰᠢ ᠵᠠᠩ᠂ ᠰᠢᠢᠳᠪᠦᠷᠢ ᠨᠢ ᠲᠡᠭᠦᠨ ᠳ᠋ᠦ᠍ ᠰᠠᠢᠨ ᠣᠢᠯᠠᠭᠠᠭᠳᠠᠬᠤ ᠦᠭᠡᠢ ᠪᠦᠷ ᠠᠷᠭᠠ ᠪᠠᠨ ᠪᠠᠷᠠᠵᠤ ᠮᠤᠬᠤᠷᠳᠠᠭᠰᠠᠨ ᠬᠥᠮᠦᠨ ᠦ᠌ ᠦᠢᠯᠡ ᠰᠢᠭ ᠯᠡ ᠰᠠᠨᠠᠭᠳᠠᠨᠠ᠃ ᠵᠠᠮᠤᠬᠠ ᠬᠠᠷᠠᠬᠤ ᠳ᠋ᠤ᠌ ᠳᠣᠭᠰᠢᠨ ᠰᠦᠷᠯᠢᠭ ᠴᠦ᠍ ᠰᠡᠳᠬᠢᠯ ᠦ᠋ᠨ ᠴᠠᠭᠠᠳᠤ ᠦᠵᠦᠭᠦᠷ ᠨᠢ ᠤᠶᠠᠷᠠᠭᠤ ᠵᠥᠭᠡᠯᠡᠨ ᠭᠡᠳᠡᠭ ᠢ᠋ ᠬᠠᠨᠲᠡᠮᠦᠷ ᠰᠠᠢᠨ ᠮᠡᠳᠡᠨᠡ᠃ ᠬᠣᠷᠢᠭᠠᠳ ᠵᠢᠯ ᠲᠡᠮᠦᠵᠢᠨ ᠲᠡᠢ ᠠᠮᠢ ᠥᠷᠢᠰᠦᠨ ᠲᠤᠯᠤᠯᠳᠤᠵᠤ ᠳᠠᠢᠰᠤᠩᠨᠠᠭᠰᠠᠨ ᠮᠥᠷᠲᠡᠭᠡᠨ ᠡᠴᠦᠰ ᠢ᠋ ᠬᠦᠷᠲᠡᠯᠡ ᠦᠵᠡᠯᠴᠡᠬᠦ ᠡᠴᠡ ᠵᠠᠢᠯᠠᠰᠬᠢᠨ ᠰᠡᠭᠦᠯᠴᠢ ᠶ᠋ᠢᠨ ᠬᠣᠯᠪᠣᠭᠠᠲᠠᠨ ᠨᠠᠢ᠍ᠮᠠᠨ ᠤ᠋ ᠲᠠᠶᠠᠨ ᠬᠠᠨ ᠠ᠋ᠴᠠ ᠰᠠᠯᠬᠤ ᠪᠠᠷ ᠰᠢᠢᠳᠦᠭᠰᠡᠨ ᠢ᠋ ᠪᠦᠷ ᠣᠢᠯᠠᠭᠠᠵᠤ ᠶᠠᠳᠠᠪᠠ᠃ ᠲᠡᠭᠦᠨ ᠡᠴᠡ ᠰᠠᠯᠤᠭᠠᠳ ᠬᠠᠮᠢᠭᠠ ᠣᠴᠢᠬᠤ ᠶᠤᠮ ᠪᠣᠯ? ᠬᠠᠨᠲᠡᠮᠦᠷ ᠥᠪᠡᠷ ᠡᠴᠡ ᠪᠡᠨ ᠢᠩᠭᠢᠵᠦ ᠠᠰᠠᠭᠤᠪᠠᠴᠤ ᠬᠠᠷᠢᠭᠤ ᠦᠯᠦ ᠣᠯᠳᠠᠨᠠ᠃ ᠡᠨᠡ ᠠᠰᠠᠭᠤᠯᠲᠠ ᠶ᠋ᠢᠨ ᠬᠠᠷᠢᠭᠤ ᠶ᠋ᠢ ᠵᠠᠮᠤᠬᠠ ᠡᠵᠡᠨ ᠨᠢ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠭᠠ ᠶ᠋ᠢ ᠬᠠᠨᠲᠡᠮᠦᠷ ᠭᠠᠳᠠᠷᠯᠠᠭᠰᠠᠨ ᠦᠭᠡᠢ᠃
ᠲᠣᠯᠣᠭᠠᠢ ᠶ᠋ᠢᠨ ᠬᠠᠷᠠᠭᠤᠯ ᠤ᠋ᠨ ᠳᠡᠷᠭᠡᠳᠡ ᠣᠴᠢᠭᠠᠳ ᠯᠠ ᠲᠡᠮᠦᠵᠢᠨ ᠶᠠᠮᠠᠷ ᠵᠠᠩ ᠪᠠᠢᠭᠠ ᠶ᠋ᠢ᠂ ᠲᠠᠶᠠᠨ ᠬᠠᠨ ᠶᠠᠭᠤᠨ ᠠ᠋ᠴᠠ ᠠᠶᠤᠵᠤ ᠰᠦᠷᠳᠡᠭᠰᠡᠨ ᠢ᠋ ᠬᠠᠨᠲᠡᠮᠦᠷ ᠮᠡᠳᠡᠯᠡ᠃ ᠲᠡᠮᠦᠵᠢᠨ ᠦ᠌ ᠴᠡᠷᠢᠭ ᠬᠥᠮᠦᠨ ᠡᠴᠡ ᠪᠡᠨ ᠣᠯᠠᠨ ᠲᠦᠳᠡᠭ ᠢ᠋ ᠬᠥᠨᠳᠡᠢ ᠳᠦᠭᠦᠷᠲᠡᠯᠡ ᠠᠰᠠᠭᠠᠭᠰᠠᠨ ᠨᠢ ᠲᠠᠶᠠᠨ ᠬᠠᠨ ᠢ᠋ ᠲᠡᠭᠡᠵᠦ ᠠᠶᠤᠨ ᠰᠦᠷᠳᠡᠬᠦ ᠳ᠋ᠦ᠍ ᠬᠦᠷᠭᠡᠵᠡᠢ᠃《ᠵᠠᠮᠤᠬᠠ ᠶ᠋ᠢᠨ ᠡᠯᠴᠢ》 ᠭᠡᠰᠡᠨ ᠦᠭᠡ ᠶ᠋ᠢ ᠬᠠᠷᠠᠭᠤᠯ ᠤ᠋ᠳ ᠦᠭᠡ ᠳᠠᠭᠤ ᠦᠭᠡᠢ ᠰᠣᠨᠣᠰᠤᠭᠠᠳ ᠲᠣᠯᠣᠭᠠᠢ ᠳ᠋ᠤᠨᠢ ᠤᠭᠤᠲᠠ ᠤᠭᠯᠠᠵᠤ ᠬᠠᠮᠢᠭᠠᠰᠢ ᠪᠠᠨ ᠴᠤ᠌ ᠶᠤᠮ ᠬᠥᠲᠥᠯᠦᠨ ᠶᠠᠪᠤᠪᠠ᠃ ᠮᠣᠷᠢᠨ ᠤ᠋ ᠶᠠᠪᠤᠳᠠᠯ ᠢ᠋ᠶ᠋ᠠᠷ ᠲᠡᠳᠡ ᠠᠭᠤᠯᠠ ᠥᠭᠰᠥᠵᠦ ᠪᠠᠢᠭᠠ ᠨᠢ ᠮᠡᠳᠡᠭᠳᠡᠨᠡ᠃ ᠶᠠᠪᠤᠵᠤ ᠶᠠᠪᠤᠵᠤ ᠮᠣᠷᠢᠨ ᠠ᠋ᠴᠠ ᠪᠠᠭᠤᠯᠭᠠᠭᠠᠳ ᠤᠭᠤᠲᠠ ᠪᠠᠨ ᠠᠪᠤᠯᠠ᠃ ᠮᠣᠳᠣ ᠲᠠᠢ ᠵᠢᠵᠢᠭ ᠲᠣᠯᠣᠭᠠᠢ ᠶ᠋ᠢᠨ ᠥᠪᠥᠷ ᠲᠦ᠍ ᠪᠠᠷᠢᠭᠰᠠᠨ ᠠᠰᠠᠷ ᠤ᠋ᠨ ᠡᠭᠦᠳᠡᠨ ᠳ᠋ᠦ᠍ ᠢᠷᠡᠵᠢ᠃ ᠡᠨᠡ ᠯᠠᠪᠲᠠᠢ ᠲᠡᠮᠦᠵᠢᠨ ᠦ᠌ ᠠᠰᠠᠷ ᠪᠣᠢ ᠵᠠ᠃ ᠠᠰᠠᠷ ᠢ᠋ ᠲᠣᠷᠭᠠᠨ ᠴᠡᠷᠢᠭ ᠦ᠋ᠳ ᠰᠢᠪᠡᠭᠡᠯᠡᠨ ᠲᠣᠭᠣᠷᠢᠵᠤ ᠵᠣᠭᠰᠣᠵᠠᠢ᠃ ᠲᠡᠳᠡ ᠯᠠᠪᠰᠠᠨ ᠣᠷᠣᠬᠤ ᠴᠠᠰᠤᠨ ᠳᠣᠣᠷᠠ ᠣᠭᠲᠣ ᠬᠥᠳᠡᠯᠬᠦ ᠦᠭᠡᠢ ᠵᠣᠭᠰᠣᠬᠤ ᠨᠢ ᠣᠯᠠᠨ ᠬᠥᠮᠦᠨ ᠴᠢᠯᠠᠭᠤ ᠡᠩᠨᠡᠭᠦᠯᠦᠨ ᠲᠠᠯᠪᠢᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠪᠠ᠃ ᠠᠰᠠᠷ ᠤ᠋ᠨ ᠣᠩᠭᠣᠷᠬᠠᠢ ᠡᠭᠦᠳᠡ ᠪᠡᠷ ᠭᠠᠯ ᠤ᠋ᠨ ᠭᠡᠷᠡᠯ ᠤᠯᠠᠯᠵᠠᠨᠠ᠃ ᠬᠠᠨᠲᠡᠮᠦᠷ ᠢ᠋ ᠬᠡᠰᠡᠭ ᠬᠦᠯᠢᠶᠡᠯᠭᠡᠭᠡᠳ ᠪᠤᠴᠠᠨ ᠭᠠᠷᠴᠤ ᠢᠷᠡᠭᠰᠡᠨ ᠬᠥᠮᠦᠨ ᠰᠡᠯᠡᠮᠡ ᠶ᠋ᠢ ᠨᠢ ᠮᠤᠯᠲᠤᠯᠤᠨ ᠠᠪᠴᠤ ᠠᠷᠤ ᠠ᠋ᠴᠠ ᠲᠦᠯᠬᠢᠭᠰᠡᠨ ᠨᠢ ᠣᠷᠣ ᠭᠡᠰᠡᠨ ᠦᠭᠡ ᠪᠣᠯᠤᠯᠲᠠᠢ᠃
ᠠᠰᠠᠷ ᠲᠤ᠌ ᠳᠤᠯᠠᠭᠠᠨ ᠭᠡᠷᠡᠯ ᠲᠡᠢ ᠠᠵᠢ᠃ ᠠᠰᠠᠷ ᠤ᠋ᠨ ᠬᠣᠢᠮᠣᠷ ᠲᠤ᠌ ᠲᠡᠮᠦᠵᠢᠨ ᠬᠣᠭᠣᠯᠠ ᠢᠳᠡᠵᠦ ᠰᠠᠭᠤᠨᠠ᠃ ᠠᠷᠠᠭᠠᠨ ᠤ᠋ ᠰᠢᠯᠦᠰᠦ ᠠᠰᠬᠠᠷᠠᠵᠤ ᠠᠮᠠᠨ ᠳ᠋ᠤᠨᠢ ᠳᠦᠭᠦᠷᠬᠦ ᠳ᠋ᠦ᠍ ᠥᠨᠥᠳᠥᠷ ᠣᠯᠢᠭ ᠲᠠᠢ ᠬᠣᠭᠣᠯᠠ ᠢᠳᠡᠭᠡ ᠦᠭᠡᠢ ᠨᠢ ᠪᠣᠳᠣᠭᠳᠠᠪᠠ᠃ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠬᠤᠶᠠᠭ ᠳᠤᠭᠤᠯᠠᠭᠠ ᠲᠠᠢ᠂ ᠬᠠᠳᠠ ᠴᠢᠯᠠᠭᠤ ᠰᠢᠭ᠋ ᠡᠷᠡ ᠬᠥᠷᠯᠥᠢᠨ ᠬᠠᠷᠠᠭᠳᠠᠬᠤ ᠨᠢ ᠬᠠᠰᠠᠷ ᠮᠥᠨ ᠭᠡᠳᠡᠭ ᠢ᠋ ᠲᠡᠷᠡ ᠲᠠᠨᠢᠨᠠ᠃ ᠬᠠᠷᠢᠨ ᠵᠡᠭᠦᠨ ᠲᠠᠯᠠ ᠳ᠋ᠤᠨᠢ ᠬᠣᠷᠢᠨ ᠬᠡᠳᠦ ᠲᠡᠢ᠂ ᠡᠮᠡᠭᠲᠡᠢ ᠬᠥᠮᠦᠨ ᠰᠢᠭ ᠦᠵᠡᠰᠬᠦᠯᠡᠩᠲᠡᠢ ᠴᠢᠷᠠᠢ ᠲᠠᠢ᠂ ᠥᠨᠳᠥᠷ ᠭᠤᠸᠠᠯᠢᠭ ᠪᠡᠶᠡ ᠲᠡᠢ ᠵᠥᠴᠢ ᠵᠣᠭᠰᠣᠵᠤ ᠪᠠᠢᠬᠤ ᠠᠵᠢ᠃ ᠲᠡᠮᠦᠵᠢᠨ ᠬᠠᠨᠲᠡᠮᠦᠷ ᠢ᠋ ᠬᠠᠷᠠᠭᠰᠠᠨ ᠴᠤ᠌ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠬᠥᠯ ᠬᠦᠨᠳᠦ ᠲᠡᠢ ᠪᠥᠷᠲᠡ ᠶ᠋ᠢ ᠮᠡᠷᠭᠢᠳ ᠡᠴᠡ ᠪᠤᠴᠠᠭᠠᠵᠤ ᠪᠤᠯᠢᠶᠠᠨ ᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠲᠡᠮᠦᠵᠢᠨ᠂ ᠵᠠᠮᠤᠬᠠ ᠨᠠᠷ ᠵᠢᠯ ᠬᠠᠭᠠᠰ ᠴᠣᠭ ᠠᠮᠢᠳᠤᠷᠠᠭᠰᠠᠨ ᠲᠤᠯᠠ ᠬᠠᠨᠲᠡᠮᠦᠷ ᠲᠡᠢ ᠪᠦᠭᠦᠳᠡ ᠰᠠᠢᠨ ᠲᠠᠨᠢᠯ᠃ ᠪᠠᠰᠠ ᠵᠠᠮᠤᠬᠠ ᠶ᠋ᠢᠨ ᠰᠢᠳᠠᠷ ᠤ᠋ᠨ ᠬᠤᠪᠢ ᠳ᠋ᠤ᠌ ᠬᠦᠨᠳᠦᠳᠬᠡᠯ ᠲᠡᠢ ᠬᠠᠨᠳᠤᠵᠤ ᠪᠠᠢᠭᠰᠠᠨ ᠪᠢᠯᠡ᠃ ᠲᠡᠢᠮᠦ ᠴᠦ᠍ ᠤᠴᠢᠷ ᠠ᠋ᠴᠠ ᠵᠠᠮᠤᠬᠠ ᠶ᠋ᠢᠨ ᠡᠯᠴᠢ ᠭᠡᠵᠦ ᠲᠡᠭᠦᠨ ᠢ᠋ ᠢᠲᠡᠭᠡᠵᠦ ᠪᠠᠢᠯᠠ᠃
— ᠵᠠᠮᠤᠬᠠ ᠡᠵᠡᠨ ᠲᠠᠨ ᠳ᠋ᠤ᠌ ᠰᠢᠯᠦᠭ ᠵᠠᠷᠤᠵᠤ ᠨᠠᠮᠠᠶ᠋ᠢ ᠢᠯᠡᠭᠡᠪᠡ ᠭᠡᠳ ᠬᠠᠨᠲᠡᠮᠦᠷ ᠶᠣᠰᠣ ᠪᠠᠨ ᠳᠠᠭᠠᠨ ᠰᠥᠬᠥᠷᠡᠬᠦ ᠳ᠋ᠦ᠍ ᠬᠤᠶᠠᠭ ᠳᠤᠭᠤᠯᠠᠭᠠ ᠨᠢ ᠬᠠᠩᠭᠢᠨᠠᠵᠤ ᠡᠪᠦᠳᠦᠭ ᠳᠣᠣᠷᠠ ᠨᠢ ᠭᠠᠵᠠᠷ ᠲᠤᠷᠭᠢᠬᠤ ᠰᠢᠭ᠋ ᠪᠣᠯᠵᠠᠢ᠃ ᠬᠠᠨᠲᠡᠮᠦᠷ ᠪᠣᠯ ᠰᠠᠢᠨ ᠳᠣᠯᠣᠭᠠᠨ ᠲᠣᠬᠣᠢ ᠥᠨᠳᠥᠷ ᠨᠢᠷᠤᠭᠤ ᠲᠠᠢ ᠬᠦᠳᠡᠷ ᠡᠷᠡ ᠪᠢᠯᠡ᠃ ᠬᠠᠨᠲᠡᠮᠦᠷ ᠤᠭ ᠨᠢ《ᠬᠥᠷ ᠬᠠᠭᠠᠨ ᠵᠠᠮᠤᠬᠠ》 ᠭᠡᠵᠦ ᠬᠡᠯᠡᠬᠦ ᠪᠡᠷ ᠠᠮᠠᠨ ᠳᠡᠭᠡᠷᠡ ᠨᠢ ᠭᠠᠷᠴᠤ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠲᠡᠮᠦᠵᠢᠨ ᠦ᠌ ᠳᠤᠷᠠ ᠦᠭᠡᠢᠴᠡᠯ ᠵᠢᠪᠡᠭᠦᠴᠡᠯ ᠢ᠋ ᠲᠥᠷᠥᠭᠦᠯᠬᠦ ᠪᠣᠢ ᠭᠡᠵᠦ ᠡᠮᠢᠶᠡᠬᠦ ᠤᠴᠢᠷ ᠢᠩᠭᠢᠵᠦ ᠲᠦᠪᠡᠭᠳᠡᠭᠰᠡᠨ ᠦᠭᠡᠢ᠃ ᠪᠠᠰᠠ《ᠴᠢᠩᠭᠢᠰ ᠬᠠᠭᠠᠨ》 ᠭᠡᠵᠦ ᠴᠦ᠍ ᠬᠡᠯᠡᠭᠰᠡᠨ ᠦᠭᠡᠢ᠃
ᠵᠠᠮᠤᠬᠠ ᠶ᠋ᠢᠨ ᠴᠡᠭᠡᠵᠢᠯᠡᠭᠦᠯᠦᠭᠰᠡᠨ ᠰᠢᠯᠦᠭ ᠢ᠋ ᠲᠡᠮᠦᠵᠢᠨ ᠰᠣᠨᠣᠰᠤᠭᠠᠳ ᠦᠭᠡ ᠬᠡᠯᠡᠭᠰᠡᠨ ᠦᠭᠡᠢ᠃ ᠭᠠᠷ ᠤ᠋ᠨ ᠲᠣᠰᠣ ᠶ᠋ᠢ ᠳᠣᠲᠣᠭᠤᠷ ᠬᠣᠷᠮᠣᠢ ᠳ᠋ᠤ᠌ ᠠᠷᠴᠢᠨ ᠪᠣᠳᠣᠯ ᠪᠣᠯᠵᠤ ᠰᠢᠭᠡᠵᠡᠢ ᠬᠤᠷᠤᠭᠤ ᠪᠠᠷ ᠰᠢᠲᠦ ᠪᠡᠨ ᠰᠢᠭᠡᠵᠡᠢᠯᠡᠨᠡ
— ᠴᠢ ᠳᠠᠬᠢᠭᠠᠳ ᠬᠡᠯᠡ᠃ ᠴᠢᠩᠭᠢᠰ ᠬᠠᠭᠠᠨ ᠰᠣᠨᠣᠰᠴᠤ ᠪᠠᠢᠨᠠ ᠭᠡᠵᠦ ᠲᠡᠮᠦᠵᠢᠨ ᠢ᠋ ᠲᠥᠯᠥᠭᠡᠯᠡᠨ ᠳᠤᠤᠭᠠᠷᠤᠭᠰᠠᠨ ᠨᠢ ᠲᠡᠭᠦᠨ ᠦ᠌ ᠡᠷᠬᠡ ᠮᠠᠲᠠᠯ ᠢ᠋ ᠢᠯᠡᠳᠬᠡᠨᠡ᠃ ᠬᠠᠰᠠᠷ ᠤ᠋ᠨ ᠦᠭᠡ ᠬᠡᠯᠡᠬᠦ᠂ ᠲᠡᠮᠦᠵᠢᠨ ᠳ᠋ᠦ᠍ ᠬᠠᠨᠳᠤᠵᠤ ᠪᠣᠢ ᠶᠣᠰᠣᠷᠬᠠᠭ ᠪᠠᠢᠳᠠᠯ ᠵᠡᠷᠭᠡ ᠨᠢ ᠴᠣᠭ ᠠᠮᠢᠳᠤᠷᠠᠭᠰᠠᠨ ᠦᠶᠡ ᠡᠴᠡ ᠡᠷᠡᠰ ᠥᠭᠡᠷᠡᠴᠢᠯᠡᠭᠳᠡᠭᠰᠡᠨ ᠢ᠋ ᠬᠠᠨᠲᠡᠮᠦᠷ ᠰᠠᠶᠢ ᠯᠠ ᠠᠩᠵᠠᠭᠠᠷᠠᠯᠠ᠃ ᠥᠪᠡᠷ ᠢ᠋ᠶ᠋ᠡᠨ ᠶᠠᠭᠠᠬᠢᠬᠤ ᠶᠣᠰᠣᠲᠠᠢ ᠪᠠᠨ ᠴᠤ᠌ ᠤᠬᠠᠭᠠᠷᠠᠪᠠ᠃ ᠲᠡᠭᠡᠭᠡᠳ ᠡᠪᠦᠳᠦᠭ ᠢ᠋ᠶ᠋ᠡᠷ ᠶᠠᠪᠤᠵᠤ ᠵᠢᠭᠠᠬᠠᠨ ᠤᠷᠤᠭᠰᠢᠯᠠᠨ ᠲᠡᠮᠦᠵᠢᠨ ᠳ᠋ᠦ᠍ ᠣᠢᠷᠠᠲᠤᠵᠤ ᠠᠩᠬᠠᠷᠤᠯ ᠢ᠋ ᠨᠢ ᠥᠪᠡᠷ ᠲᠡᠭᠡᠨ ᠲᠠᠲᠠᠬᠤ ᠶ᠋ᠢ ᠬᠢᠴᠢᠶᠡᠪᠡ᠃ ᠬᠠᠷᠢᠨ ᠵᠥᠴᠢ ᠲᠡᠭᠦᠨ ᠢ᠋ ᠢᠩᠭᠢᠬᠦ ᠳ᠋ᠦ᠍ ᠰᠡᠯᠡᠮᠡ ᠪᠡᠨ ᠰᠤᠭᠤᠯᠤᠨ ᠡᠮᠦᠨᠡ ᠪᠡᠨ ᠪᠠᠷᠢᠪᠠ᠃ ᠮᠡᠷᠭᠢᠳ ᠦ᠋ᠨ ᠡᠨᠡ ᠬᠥᠪᠡᠭᠦᠨ ᠲᠡᠮᠦᠵᠢᠨ ᠦ᠌ ᠦᠨᠡᠨᠴᠢ ᠢᠲᠡᠭᠡᠯᠲᠡᠢ ᠰᠢᠳᠠᠷ ᠪᠣᠯᠤᠭᠰᠠᠨ ᠨᠢ ᠢᠯᠡᠳᠲᠡ ᠠᠵᠢ᠃ ᠬᠠᠷᠢᠨ ᠲᠡᠮᠦᠵᠢᠨ ᠬᠠᠨᠲᠡᠮᠦᠷ ᠢ᠋ ᠬᠥᠮᠦᠨ ᠴᠢᠨᠡᠭᠡ ᠰᠠᠨᠠᠵᠤ ᠳᠠᠬᠢᠨ ᠬᠠᠷᠠᠴᠠ ᠲᠤᠰᠬᠠᠭᠰᠠᠨ ᠦᠭᠡᠢ᠃
— ᠴᠢᠩᠭᠢᠰ ᠬᠠᠭᠠᠨ᠃ ᠵᠠᠮᠤᠬᠠ ᠡᠵᠡᠨ ᠲᠠᠨ ᠳ᠋ᠤ᠌ ᠡᠢᠨ ᠬᠡᠯᠡᠭᠦᠯᠪᠡ᠃
ᠲᠡᠷᠡ ᠵᠠᠮᠤᠬᠠ ᠶ᠋ᠢᠨ ᠴᠡᠭᠡᠵᠢᠯᠡᠭᠦᠯᠦᠭᠰᠡᠨ ᠰᠢᠯᠦᠭ ᠢ᠋ ᠲᠣᠳᠣ ᠪᠠᠷ ᠳᠠᠪᠲᠠᠨ ᠬᠡᠯᠡᠭᠡᠳ ᠬᠠᠷᠢᠭᠤ ᠬᠦᠯᠢᠶᠡᠨ ᠲᠣᠩᠭᠣᠢᠪᠠ᠃ ᠨᠠᠮ ᠭᠦᠮ ᠪᠣᠯᠤᠯᠠ᠃ ᠵᠥᠪᠬᠡᠨ ᠭᠠᠯ ᠠᠰᠠᠵᠤ ᠳᠥᠯᠥ ᠨᠢ ᠳᠦᠷᠡᠯᠵᠡᠬᠦ ᠲᠡᠳᠦᠢ ᠴᠢᠮᠡᠭᠡ ᠯᠡ ᠰᠣᠨᠣᠰᠤᠭᠳᠠᠨᠠ᠃
— ᠴᠢ ᠳᠠᠬᠢᠭᠠᠳ ᠬᠡᠯᠡ ᠭᠡᠵᠦ ᠲᠡᠮᠦᠵᠢᠨ ᠶᠠᠭ ᠰᠠᠭᠤᠭᠰᠠᠨ ᠴᠢᠭ ᠢ᠋ᠶ᠋ᠡᠷ ᠭᠡᠨᠡᠳᠲᠡ ᠬᠡᠯᠡᠬᠦ ᠳ᠋ᠦ᠍ ᠬᠠᠨᠲᠡᠮᠦᠷ ᠰᠣᠴᠢᠵᠠᠢ᠃ ᠲᠡᠮᠦᠵᠢᠨ ᠢ᠋ ᠡᠢᠮᠦ ᠲᠣᠳᠣ ᠭᠡᠷᠡᠯᠲᠡᠢ ᠰᠢᠷᠠ ᠨᠢᠳᠦᠲᠡᠢ ᠭᠡᠳᠡᠭ ᠢ᠋ ᠲᠡᠷᠡ ᠶᠡᠷᠦ ᠡᠴᠡ ᠠᠩᠵᠠᠭᠠᠷᠠᠭᠠ ᠦᠭᠡᠢ ᠪᠢᠯᠡ᠃ ᠲᠡᠮᠦᠵᠢᠨ ᠦ᠌ ᠬᠣᠭᠣᠯᠠᠢ ᠰᠥᠭᠡᠵᠦ ᠳᠠᠭᠤ ᠨᠢ ᠲᠠᠨᠢᠭᠳᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠵᠠᠢ᠃ ᠲᠡᠮᠦᠵᠢᠨ ᠲᠡᠭᠦᠨ ᠢ᠋ ᠬᠠᠷᠠᠨᠠ᠃ ᠲᠡᠮᠦᠵᠢᠨ ᠦ᠌ ᠡᠨᠡ ᠠᠶᠤᠮᠰᠢᠭᠲᠤ ᠬᠠᠷᠠᠴᠠ ᠨᠢᠳᠦ ᠶ᠋ᠢ ᠨᠢ ᠰᠣᠬᠣᠯᠬᠤ ᠰᠢᠭ᠋ ᠪᠣᠯᠬᠤ ᠳ᠋ᠤ᠌ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠠᠷᠠᠴᠠ ᠳᠠᠯᠳᠢᠷᠠᠪᠠ᠃
— ᠳᠠᠶᠠᠨ ᠬᠠᠨ ᠴᠢᠮᠠ ᠠ᠋ᠴᠠ ᠠᠶᠤᠵᠤ
ᠲᠠᠢᠭᠠ ᠠᠭᠤᠯᠠᠨ ᠳ᠋ᠤ᠌ ᠰᠢᠷᠭᠤᠵᠤ ᠣᠷᠣᠪᠠ᠁
ᠬᠠᠨᠲᠡᠮᠥᠷ ᠡᠨᠡ ᠤᠳᠠᠭᠠ ᠡᠬᠢᠨ ᠦ᠌ ᠬᠢ ᠰᠢᠭ ᠴᠢᠩᠭᠠ ᠪᠢᠰᠢ᠂ ᠬᠠᠷᠢᠨ ᠠᠭᠠᠵᠢᠭᠤᠬᠠᠨ ᠪᠥᠭᠡᠳ ᠲᠣᠭᠲᠠᠭᠤᠨ ᠲᠣᠳᠣ ᠳᠠᠭᠤ ᠪᠠᠷ ᠨᠢᠭᠡ ᠴᠦ᠍ ᠬᠡᠭᠡᠯ ᠦᠭᠡᠢ ᠳᠠᠭᠤᠰᠲᠠᠯᠠ ᠨᠢ ᠤᠩᠰᠢᠬᠤ ᠳ᠋ᠠᠭᠠᠨ ᠡᠨᠡ ᠰᠢᠯᠦᠭ ᠦ᠋ᠨ ᠴᠠᠭᠠᠨᠠ ᠨᠢᠭᠤᠭᠳᠠᠬᠤ ᠤᠴᠢᠷ ᠢ᠋ ᠣᠢᠯᠠᠭᠠᠬᠤ ᠭᠡᠵᠦ ᠬᠢᠴᠢᠶᠡᠵᠦ ᠪᠣᠢ ᠲᠡᠮᠦᠵᠢᠨ ᠳ᠋ᠦ᠍ ᠲᠤᠰᠠ ᠪᠣᠯᠬᠤ ᠪᠠᠷ ᠠᠶᠠᠳᠠᠭᠤ ᠤᠶᠠᠩᠭᠠᠯᠢᠭ ᠢ᠋ᠶ᠋ᠠᠷ ᠳᠠᠪᠲᠠᠪᠠ᠃ ᠲᠡᠭᠦᠨ ᠢ᠋ ᠤᠩᠰᠢᠵᠤ ᠪᠠᠢᠬᠤ ᠳ᠋ᠤ᠌《ᠬᠥᠷ ᠬᠠᠭᠠᠨ》 ᠭᠡᠬᠦ ᠦᠭᠡ ᠰᠣᠨᠣᠰᠤᠭᠠᠳ ᠲᠡᠮᠦᠵᠢᠨ ᠦ᠌ ᠬᠠᠷᠠᠭᠠ ᠤᠯᠠᠮ ᠬᠤᠷᠴᠠ ᠪᠣᠯᠬᠤ ᠰᠢᠭ᠋ ᠪᠣᠯᠤᠭᠰᠠᠨ ᠤ᠋ ᠵᠡᠷᠭᠡᠴᠡᠭᠡ《ᠤᠷᠠᠯᠴᠠᠬᠤ ᠴᠠᠭ ᠴᠤ᠌ ᠲᠣᠬᠢᠶᠠᠨᠠ ᠪᠢᠵᠡ》 ᠭᠡᠮᠡᠨ ᠳᠠᠭᠤᠰᠬᠤ ᠦᠶᠡ ᠳ᠋ᠦ᠍ ᠰᠢᠨᠠ ᠶ᠋ᠢᠨ ᠬᠢᠨᠢ ᠪᠤᠯᠴᠢᠩ ᠭᠦᠷᠡᠯᠵᠡᠨ ᠵᠠᠩᠭᠢᠷᠴᠤ ᠰᠢᠲᠦ ᠵᠠᠭᠤᠬᠤ ᠨᠢ ᠠᠩᠵᠠᠭᠠᠷᠠᠳᠠᠭᠰᠠᠨ ᠲᠤᠯᠠ ᠬᠠᠨᠳᠡᠮᠥᠷ ᠪᠠᠭᠠ ᠦᠭᠡᠢ ᠡᠮᠢᠶᠡᠵᠡᠢ᠃
— ᠥᠭᠡᠷᠡ ᠶᠠᠭᠤ ᠭᠡᠵᠦ ᠬᠡᠯᠡᠭᠦᠯᠪᠡ? ᠭᠡᠵᠦ ᠲᠡᠮᠦᠵᠢᠨ ᠠᠰᠠᠭᠤᠭᠰᠠᠨ ᠨᠢ ᠵᠠᠮᠤᠬᠠ ᠶ᠋ᠢᠨ ᠰᠠᠯᠬᠤ ᠳ᠋ᠠᠭᠠᠨ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠮᠡᠳᠡᠵᠦ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠭᠠᠳ ᠬᠠᠨᠲᠡᠮᠥᠷ ᠡᠷᠡᠭᠡᠯᠵᠡᠵᠦ ᠡᠬᠢᠯᠡᠪᠡ᠃ ᠲᠡᠮᠦᠵᠢᠨ ᠳ᠋ᠦ᠍ ᠶᠠᠭᠤ ᠴᠤ᠌ ᠨᠢᠭᠤᠬᠤ ᠬᠡᠷᠡᠭ ᠦᠭᠡᠢ ᠭᠡᠵᠦ ᠲᠡᠷᠡ ᠬᠣᠷᠣᠮ ᠤ᠋ᠨ ᠳᠣᠲᠣᠷᠠ ᠰᠢᠢᠳᠦᠯᠡ᠃ ᠤᠴᠢᠷ ᠨᠢ ᠲᠡᠮᠦᠵᠢᠨ ᠦᠨᠡᠨᠴᠢ ᠬᠥᠮᠦᠨ ᠳ᠋ᠦ᠍ ᠳᠤᠷᠠᠲᠠᠢ ᠭᠡᠳᠡᠭ ᠢ᠋ ᠣᠯᠠᠨ ᠤᠳᠠᠭᠠ ᠰᠣᠨᠣᠰᠤᠭᠰᠠᠨ ᠪᠢᠯᠡ᠃ ᠬᠠᠷᠢᠨ ᠲᠡᠮᠦᠵᠢᠨ ᠲᠡᠳᠡᠨ ᠦ᠌ ᠨᠢᠭᠤᠴᠠ ᠶᠠᠷᠢᠶᠠ ᠶ᠋ᠢ ᠮᠡᠳᠡᠭᠰᠡᠨ ᠳ᠋ᠡᠭᠡᠨ ᠴᠦ᠍ ᠪᠢᠰᠢ᠂ ᠵᠠᠮᠤᠬᠠ ᠶ᠋ᠢᠨ ᠬᠡᠯᠡᠭᠦᠯᠦᠭᠰᠡᠨ ᠢ᠋ ᠰᠠᠢᠲᠤᠷ ᠣᠢᠯᠠᠭᠠᠵᠤ ᠶᠠᠮᠠᠷ ᠬᠠᠷᠢᠭᠤ ᠥᠭᠬᠦ ᠪᠣᠢ ᠭᠡᠳᠡᠭ ᠢ᠋ᠶ᠋ᠡᠨ ᠰᠡᠳᠬᠢᠵᠦ ᠠᠮᠵᠢᠬᠤ ᠦᠭᠡᠢ ᠲᠤᠯᠠ ᠴᠠᠭ ᠬᠣᠵᠢᠬᠤ ᠭᠡᠵᠦ ᠯᠡ ᠵᠦᠭᠡᠷ ᠨᠢᠭᠡ ᠠᠰᠠᠭᠤᠭᠰᠠᠨ ᠨᠢ ᠲᠡᠷᠡ ᠪᠠᠢᠯᠠ᠃
— ᠬᠡᠷᠪᠡ ᠲᠡᠮᠦᠵᠢᠨ ᠢ᠋ ᠬᠦᠰᠡᠪᠡᠯ ᠴᠢ ᠨᠠᠮᠠᠶ᠋ᠢ ᠣᠷᠬᠢᠵᠤ ᠲᠡᠭᠦᠨ ᠦ᠌ ᠥᠨᠳᠥᠷ ᠪᠣᠱᠣᠭᠠ ᠶ᠋ᠢ ᠪᠡᠬᠢᠯᠡᠵᠦ᠂ ᠥᠷᠭᠡᠨ ᠬᠠᠲᠠᠪᠴᠢ ᠶ᠋ᠢ ᠨᠢ ᠬᠠᠰᠢᠵᠤ ᠰᠠᠭᠤ ᠭᠡᠵᠦ ᠢᠯᠡᠭᠡᠪᠡ᠃
ᠢᠩᠭᠢᠵᠦ ᠬᠡᠯᠡᠭᠡᠳ ᠬᠠᠨᠲᠡᠮᠥᠷ ᠦ᠋ᠨ ᠰᠡᠳᠬᠢᠯ ᠨᠢᠭᠡᠮᠦᠰᠦᠨ ᠴᠡᠯᠮᠡᠨ ᠠᠮᠠᠷᠠᠪᠠ᠃
— ᠬᠠᠷᠢᠨ ᠴᠢ ᠶᠠᠭᠤ ᠭᠡᠵᠦ ᠪᠣᠳᠣᠨᠠ?
ᠲᠡᠮᠦᠵᠢᠨ ᠡᠴᠡ ᠡᠢᠮᠦ ᠦᠭᠡ ᠰᠣᠨᠣᠰᠬᠤ ᠨᠢ ᠶᠠᠭᠤ ᠶᠠᠭᠤᠨ ᠠ᠋ᠴᠠ ᠢᠯᠡᠭᠦᠦ ᠲᠣᠳᠣᠷᠬᠠᠢ ᠪᠠᠢᠭᠰᠠᠨ ᠲᠤᠯᠠ ᠵᠠᠮ ᠵᠠᠭᠤᠷᠠ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠦᠭᠡ ᠪᠡᠨ ᠡᠷᠡᠮᠡᠬᠡᠢ ᠠᠭᠠᠳ ᠪᠠᠬᠠᠷᠬᠠᠯ ᠳᠦᠭᠦᠷᠡᠩ ᠰᠡᠳᠬᠢᠯ ᠢ᠋ᠶ᠋ᠡᠷ
— ᠪᠢ ᠵᠠᠮᠤᠬᠠ ᠡᠵᠡᠨ ᠢ᠋ᠶ᠋ᠡᠨ ᠠᠭᠤᠯᠠ ᠶ᠋ᠢᠨ ᠮᠤᠬᠤᠷ᠂ ᠤᠰᠤᠨ ᠤ᠋ ᠴᠢᠨᠠᠳᠤ ᠭᠠᠭᠴᠠᠭᠠᠷ ᠶᠠᠭᠠᠬᠢᠵᠤ ᠣᠷᠬᠢᠨᠠ ᠭᠡᠵᠦ ᠲᠣᠳᠣ ᠬᠡᠯᠡᠪᠡ᠃ ᠲᠡᠮᠦᠵᠢᠨ᠂ ᠬᠠᠰᠠᠷ ᠬᠣᠶᠠᠷ ᠳᠤᠤᠭᠠᠷᠤᠭᠠ ᠦᠭᠡᠢ ᠴᠦ᠍ ᠲᠡᠭᠦᠨ ᠦ᠌ ᠦᠭᠡ ᠲᠡᠳᠡᠨ ᠳ᠋ᠦ᠍ ᠲᠠᠭᠠᠯᠠᠭᠳᠠᠭᠰᠠᠨ ᠨᠢ ᠢᠯᠡᠳᠲᠡ ᠪᠠᠢᠯᠠ᠃
— ᠬᠠᠷᠢᠨ ᠪᠢ ᠭᠡᠳᠡᠷᠭᠦ ᠬᠤᠷᠳᠤᠨ ᠪᠤᠴᠠᠬᠤ ᠦᠭᠡᠢ ᠪᠣᠯ ᠵᠠᠮᠤᠬᠠ ᠡᠵᠡᠨ ᠮᠢᠨᠢ ᠨᠠᠮᠠᠶ᠋ᠢ ᠡᠨᠳᠡ ᠦᠯᠡᠳᠡᠪᠡ ᠭᠡᠮᠡᠨ ᠰᠠᠨᠠᠭᠠᠳ ᠣᠷᠬᠢᠨ ᠣᠳᠬᠤ ᠪᠣᠢ ᠭᠡᠵᠦ ᠡᠮᠢᠶᠡᠵᠦ ᠪᠠᠢᠨᠠ᠃
ᠬᠠᠨᠲᠡᠮᠥᠷ ᠦᠨᠡᠬᠡᠷ ᠢᠩᠭᠢᠵᠦ ᠠᠶᠤᠵᠤ ᠪᠠᠢᠯᠠ᠃
— ᠲᠡᠭᠡᠪᠡᠯ ᠴᠢ ᠦᠳᠲᠡᠷ ᠪᠤᠴᠠ᠃ ᠣᠴᠢᠭᠠᠳ ᠵᠠᠮᠤᠬᠠ ᠠᠨᠳᠠ ᠳ᠋ᠤ᠌ ᠢᠩᠭᠢᠵᠦ ᠬᠡᠯᠡᠭᠲᠦᠨ ᠭᠡᠵᠦ ᠲᠡᠮᠦᠵᠢᠨ ᠰᠥᠭᠡᠩᠭᠢ ᠳᠠᠭᠤ ᠪᠠᠷ ᠰᠢᠪᠡᠨᠡᠪᠡ᠃《ᠠᠨᠳᠠ》 ᠭᠡᠵᠦ ᠳᠠᠭᠤᠳᠠᠭᠰᠠᠨ ᠨᠢ ᠲᠡᠮᠦᠵᠢᠨ ᠦ᠌ ᠨᠠᠢᠷᠲᠠᠢ ᠰᠡᠳᠬᠢᠯ ᠦ᠋ᠨ ᠢᠯᠡᠷᠡᠯ ᠶᠤᠮ᠃ ᠪᠦᠭᠦᠳᠡ ᠠᠩᠬᠠᠷᠤᠨ ᠬᠦᠯᠢᠶᠡᠯᠡ᠃ ᠲᠡᠮᠦᠵᠢᠨ ᠴᠦ᠍ ᠰᠢᠢᠳᠦᠭᠰᠡᠨ ᠴᠢᠷᠠᠢᠲᠠᠢ ᠪᠣᠯᠵᠠᠢ᠃
— ᠵᠠᠮᠤᠬᠠ ᠠᠨᠳᠠ ᠴᠢᠨᠦ ᠰᠢᠯᠦᠭ ᠢ᠋ ᠰᠣᠨᠣᠰᠪᠠ᠃
ᠨᠠᠷᠠᠨ ᠤ᠋ ᠳᠣᠣᠷᠠ ᠭᠠᠵᠠᠷ ᠤ᠋ᠨ ᠳᠡᠭᠡᠷᠡ
ᠨᠠᠳᠠ ᠠ᠋ᠴᠠ ᠴᠢ ᠬᠠᠮᠢᠭᠠ ᠵᠠᠢᠯᠠᠨᠠ
ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠠ᠋ᠴᠠ ᠭᠠᠵᠢᠵᠤ
ᠮᠡᠬᠦᠰ ᠴᠢ ᠬᠠᠮᠢᠭᠠ ᠬᠣᠯᠠᠳᠤᠨᠠ
ᠭᠡᠮ ᠦᠭᠡᠢ ᠴᠡᠷᠢᠭ ᠦ᠋ᠨ ᠠᠮᠢ ᠶ᠋ᠢ
ᠭᠡᠰᠬᠡᠭᠡᠵᠦ ᠪᠦᠦ ᠵᠣᠯᠢᠭᠲᠤᠨ
ᠳᠠᠢᠰᠤᠨ ᠤ᠋ ᠬᠦᠷᠢᠶᠡᠨ ᠳ᠋ᠦ᠍ ᠰᠠᠭᠤᠬᠤ ᠪᠠᠷ
ᠳᠠᠷᠤᠢ ᠢᠷᠡᠵᠦ ᠰᠢᠳᠠᠷᠯᠠᠭᠲᠤᠨ
ᠤᠬᠠᠭᠠᠨ ᠵᠣᠷᠢᠭ ᠭᠠᠷᠭᠠᠵᠤ
ᠤᠷᠢᠵᠤ ᠵᠠᠯᠠᠭᠤᠯᠤᠯ ᠦᠭᠡᠢ ᠢᠷᠡᠪᠡᠰᠦ
ᠤᠷᠢᠳ ᠤ᠋ᠨ ᠶᠠᠪᠤᠳᠠᠯ ᠢ᠋ ᠴᠢᠨᠢ ᠮᠠᠷᠲᠠᠵᠤ
ᠪᠠᠭᠠ ᠶ᠋ᠢᠨ ᠠᠨᠳᠠ ᠶ᠋ᠢᠨ ᠶᠣᠰᠣ ᠪᠠᠷ
ᠪᠠᠲᠤ ᠨᠠᠢᠷᠰᠠᠨ ᠰᠠᠭᠤᠶᠠ᠁
ᠲᠡᠮᠦᠵᠢᠨ ᠬᠡᠳᠦᠢ ᠪᠡᠷ ᠵᠠᠮᠤᠬᠠ ᠲᠠᠢ ᠠᠳᠠᠯᠢ ᠤᠷᠠᠨ ᠴᠡᠴᠡᠨ ᠦᠭᠡᠰ ᠢ᠋ ᠤᠷᠤᠰᠬᠠᠨ ᠰᠢᠯᠦᠭᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠴᠦ᠍ ᠬᠠᠨᠲᠡᠮᠦᠷ ᠲᠦ᠍ ᠴᠡᠭᠡᠵᠢᠯᠡᠬᠦ ᠳ᠋ᠦ᠍ᠨᠢ ᠠᠮᠠᠷ ᠢ᠋ ᠪᠣᠳᠣᠵᠤ ᠳᠡᠭᠡᠷᠡᠬᠢ ᠦᠭᠡᠰ ᠢ᠋ ᠠᠢᠵᠠᠮ ᠬᠣᠯᠪᠣᠨ ᠬᠡᠯᠡᠵᠡᠢ᠃ ᠬᠠᠨᠲᠡᠮᠦᠷ ᠲᠡᠮᠦᠵᠢᠨ ᠦ᠌ ᠬᠡᠯᠡᠭᠰᠡᠨ ᠢ᠋ ᠳᠠᠪᠲᠠᠨ ᠬᠡᠯᠡᠵᠦ ᠲᠡᠭᠦᠨ ᠦ᠌ ᠲᠣᠯᠣᠭᠠᠢ ᠲᠣᠬᠢᠬᠤ ᠶ᠋ᠢ ᠦᠵᠡᠭᠡᠳ ᠪᠣᠰᠤᠯᠠ᠃ ᠬᠡᠨ ᠴᠦ᠍ ᠳᠠᠬᠢᠨ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠲᠤᠯᠠ ᠭᠠᠷᠬᠤ ᠶ᠋ᠢᠨ ᠡᠮᠦᠨᠡ ᠡᠷᠭᠢᠵᠦ ᠬᠠᠷᠠᠨ ᠬᠠᠰᠠᠷ ᠲᠤ᠌ ᠬᠠᠨᠳᠤᠵᠤ
— ᠳᠠᠶᠠᠨ ᠬᠠᠨ ᠪᠥᠬᠡ ᠠᠪᠴᠢᠷᠠᠵᠤ ᠲᠩᠷᠢ ᠵᠡᠳᠯᠡᠨ ᠲᠠ ᠨᠠᠷ ᠤ᠋ᠨ ᠳᠡᠭᠡᠷᠡ ᠡᠴᠡ ᠴᠠᠰᠤ ᠮᠥᠨᠳᠥᠷ ᠣᠷᠣᠭᠤᠯᠬᠤ ᠭᠡᠵᠦ ᠪᠠᠢᠨᠠ᠃ ᠡᠭᠦᠨ ᠢ᠋ ᠪᠣᠯᠭᠣᠭᠠᠭᠲᠤᠨ ᠭᠡᠳ ᠭᠠᠷᠪᠠ᠃ ᠵᠠᠮᠤᠬᠠ ᠶ᠋ᠢᠨ ᠰᠢᠯᠦᠭ ᠲᠦ᠍ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠪᠠᠢᠳᠠᠯ ᠢ᠋ ᠲᠣᠳᠣᠷᠠᠭᠤᠯᠤᠭᠰᠠᠨ ᠲᠤᠯᠠ ᠪᠠᠢᠯᠳᠤᠬᠤ ᠠᠷᠭᠠ ᠪᠠᠨ ᠶᠠᠭᠠᠷᠠᠯᠲᠠᠢ ᠪᠣᠯᠪᠠᠰᠤᠷᠠᠭᠤᠯᠬᠤ ᠬᠡᠷᠡᠭᠲᠡᠢ ᠪᠠᠢᠯᠠ᠃ ᠡᠯᠴᠢ ᠢᠷᠡᠭᠦᠯᠦᠭᠰᠡᠨ ᠨᠢ ᠵᠠᠮᠤᠬᠠ ᠶ᠋ᠢᠨ ᠲᠡᠮᠦᠵᠢᠨ ᠳ᠋ᠦ᠍ ᠦᠵᠡᠭᠦᠯᠦᠭᠰᠡᠨ ᠰᠡᠭᠦᠯᠴᠢ ᠶ᠋ᠢᠨ ᠲᠤᠰᠠ ᠪᠢᠵᠡ ᠠ᠋᠃ ᠴᠣᠬᠣᠮ ᠶᠠᠭᠠᠬᠢᠬᠤ ᠭᠡᠵᠦ ᠢᠩᠭᠢᠪᠡ ᠭᠡᠳᠡᠭ ᠦ᠋ᠨ ᠤᠴᠢᠷ ᠢ᠋ ᠲᠡᠮᠦᠵᠢᠨ ᠣᠢᠯᠠᠭᠠᠭᠰᠠᠨ ᠦᠭᠡᠢ᠃ ᠲᠣᠭᠣᠷᠢᠯ᠂ ᠰᠡᠩᠭᠦᠮ ᠬᠣᠶᠠᠷ ᠲᠠᠢ ᠨᠡᠢᠯᠡᠵᠦ ᠲᠡᠭᠦᠨ ᠢ᠋ ᠳᠣᠪᠲᠣᠯᠬᠤ ᠳ᠋ᠠᠭᠠᠨ ᠪᠠᠰᠠ ᠯᠠ ᠢᠩᠭᠢᠵᠦ ᠨᠢᠭᠤᠴᠠ ᠡᠯᠴᠢ ᠢᠷᠡᠭᠦᠯᠵᠦ ᠲᠣᠭᠣᠷᠢᠯ ᠤ᠋ᠨ ᠴᠡᠷᠢᠭ ᠦ᠋ᠨ ᠪᠠᠢᠳᠠᠯ ᠢ᠋ ᠬᠡᠯᠡᠭᠦᠯᠦᠭᠰᠡᠨ ᠪᠢᠯᠡ᠃ ᠬᠠᠷᠢᠨ ᠬᠠᠨᠲᠡᠮᠦᠷ ᠦ᠋ᠨ ᠬᠡᠯᠡᠭᠰᠡᠨᠴᠢᠯᠡᠨ ᠳᠠᠶᠠᠨ ᠬᠠᠨ ᠪᠥᠬᠡ ᠶ᠋ᠢᠨ ᠬᠦᠴᠦ ᠪᠡᠷ ᠲᠩᠷᠢ ᠵᠠᠳᠯᠠᠭᠰᠠᠨ ᠪᠣᠯᠤᠯᠲᠠᠢ᠃ ᠰᠠᠯᠬᠢ ᠤᠯᠠᠮ ᠰᠢᠷᠦᠭᠦᠰᠴᠦ ᠴᠠᠰᠤᠨ ᠰᠢᠭᠤᠷᠭᠠ ᠲᠠᠯᠪᠢᠵᠤ ᠡᠬᠢᠯᠡᠯᠡ᠃ ᠬᠠᠨᠲᠡᠮᠦᠷ ᠢ᠋ ᠬᠠᠰᠠᠷ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠭᠠᠷᠭᠠᠵᠤ ᠥᠭᠭᠦᠭᠰᠡᠨ ᠨᠢ ᠵᠠᠮᠤᠬᠠ ᠶ᠋ᠢ ᠬᠦᠨᠳᠦᠳᠬᠡᠭᠰᠡᠨ ᠬᠡᠷᠡᠭ ᠪᠠᠢᠪᠠ᠃ ᠬᠠᠰᠠᠷ ᠴᠤ᠌ ᠬᠠᠨᠳᠠᠮᠤᠷ ᠴᠤ᠌ ᠶᠠᠭᠤᠮᠠ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠲᠡᠳᠡᠨ ᠡᠴᠡ ᠬᠣᠯᠠ ᠦᠭᠡᠢ ᠥᠨᠥᠬᠢ ᠵᠢᠭᠠᠰᠤᠨ ᠨᠢᠳᠦᠲᠦ ᠲᠡᠳᠦ ᠵᠥᠴᠢ ᠶ᠋ᠢᠨ ᠮᠣᠷᠢ ᠶ᠋ᠢ ᠪᠠᠷᠢᠵᠤ ᠵᠣᠭᠰᠣᠨᠠ᠃ ᠲᠡᠳᠦ ᠶ᠋ᠢ ᠬᠠᠷᠠᠮᠠᠭᠴᠠ ᠡᠳᠦᠷ ᠵᠠᠮᠤᠬᠠ ᠶ᠋ᠢᠨ ᠬᠡᠯᠡᠭᠰᠡᠨ ᠰᠠᠨᠠᠭᠳᠠᠵᠠᠢ᠃《ᠨᠡᠭᠡᠷᠡᠨ ᠮᠠᠷᠲᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠬᠠᠴᠢᠨ ᠨᠢᠳᠦ ᠲᠡᠢ ᠵᠣᠯᠢᠭ ᠶᠤᠮ》 ᠭᠡᠵᠦ ᠬᠠᠨᠳᠠᠮᠤᠷ ᠪᠣᠳᠣᠭᠠᠳ ᠮᠣᠷᠳᠠᠯᠠ᠃ ᠤᠨᠤᠨ ᠤ᠋ ᠵᠡᠭᠡᠷᠡᠨ ᠬᠠᠪᠴᠢᠯ ᠤ᠋ᠨ ᠳᠡᠷᠭᠡᠳᠡ ᠲᠡᠷᠡ ᠨᠢᠭᠡᠨ ᠰᠥᠨᠢ ᠡᠨᠡ ᠲᠡᠳᠦ ᠲᠡᠭᠦᠨ ᠦ᠌ ᠲᠤᠭ ᠬᠢᠬᠦ ᠶ᠋ᠢ ᠠᠨᠠᠵᠤ ᠪᠠᠢᠭᠠᠳ ᠵᠥᠴᠢ ᠴᠠᠭᠠᠲᠠᠢ ᠬᠣᠶᠠᠷ ᠢ ᠠᠪᠴᠤ ᠵᠢᠭᠤᠲᠠᠭᠰᠠᠨ ᠢ᠋ ᠬᠠᠨᠳᠠᠮᠤᠷ ᠮᠠᠷᠲᠠᠭᠠ ᠦᠭᠡᠢ ᠪᠠᠢᠪᠠ᠃ ᠵᠠᠮᠤᠬᠠ ᠲᠡᠭᠡᠬᠦ ᠳ᠋ᠦ᠍ ᠬᠢᠯᠢᠩᠨᠡᠭᠡ ᠦᠭᠡᠢ ᠨᠢ ᠠᠵᠠ ᠪᠣᠯᠤᠭᠰᠠᠨ ᠪᠢᠯᠡ᠃ ᠭᠡᠪᠡᠴᠦ ᠬᠠᠨᠳᠠᠮᠤᠷ ᠣᠳᠣ ᠲᠡᠷᠡ ᠶ᠋ᠢ ᠰᠠᠨᠠᠵᠤ ᠲᠡᠳᠦ ᠲᠡᠢ ᠲᠣᠭᠠᠴᠠᠭᠠ ᠪᠣᠳᠣᠬᠤ ᠲᠠᠢ ᠮᠠᠨᠠ ᠲᠠᠢ᠃ ᠳᠠᠷᠤᠢ ᠭᠡᠳᠡᠷᠭᠦ ᠳᠣᠪᠲᠣᠯᠤᠨ ᠵᠠᠮᠤᠬᠠ ᠡᠵᠡᠨ ᠳ᠋ᠡᠭᠡᠨ ᠬᠤᠷᠳᠤᠨ ᠣᠴᠢᠬᠤ ᠶ᠋ᠢ ᠲᠡᠷᠡ ᠬᠦᠰᠡᠵᠦ ᠪᠠᠢᠯᠠ᠃ ᠢᠩᠭᠢᠭᠡᠳ ᠳᠥᠩᠭᠡᠵᠢ ᠰᠠᠢᠬᠠᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠥᠴᠦᠬᠡᠨ ᠲᠡᠳᠦᠢ ᠳᠣᠬᠢᠶᠠ ᠵᠠᠩᠭᠠᠨ ᠤ᠋ ᠦᠵᠦᠭᠦᠷ ᠲᠦ᠍ ᠪᠠᠢᠭᠰᠠᠨ ᠲᠡᠭᠦᠨ ᠦ᠌ ᠠᠮᠢ ᠨᠠᠰᠤ ᠵᠠᠮᠤᠬᠠ ᠶ᠋ᠢᠨ ᠭᠠᠷ ᠲᠤ᠌ ᠪᠤᠴᠠᠨ ᠣᠴᠢᠪᠠ᠃ ᠰᠢᠷᠦᠭᠦᠰᠴᠦ ᠪᠣᠢ ᠰᠠᠯᠬᠢ ᠶ᠋ᠢ ᠰᠥᠷᠦᠨ ᠬᠠᠨᠳᠠᠮᠤᠷ ᠮᠣᠷᠢᠨ ᠤ᠋ ᠠᠮᠠ ᠲᠠᠲᠠᠬᠤ ᠦᠭᠡᠢ ᠳᠠᠪᠬᠢᠭᠰᠠᠭᠠᠷ ᠲᠣᠷᠴᠤ ᠰᠠᠭᠠᠲᠠᠯ ᠦᠭᠡᠢ ᠪᠤᠴᠠᠨ ᠢᠷᠡᠪᠡᠯ ᠵᠠᠮᠤᠬᠠ ᠤᠨᠲᠠᠵᠤ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠣᠯᠠᠨ ᠬᠣᠨᠣᠭ ᠨᠣᠢᠷ ᠦᠭᠡᠢ ᠶᠠᠪᠤᠭᠰᠠᠨ ᠢ᠋ ᠪᠣᠳᠣᠨ ᠬᠡᠰᠡᠭ ᠵᠠᠭᠤᠷᠠ ᠰᠡᠷᠡᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠬᠦᠯᠢᠶᠡᠵᠡᠢ᠃ ᠭᠡᠪᠡᠴᠦ ᠲᠡᠮᠦᠵᠢᠨ ᠦ᠌ ᠦᠭᠡ ᠶ᠋ᠢᠨ ᠴᠢᠬᠤᠯᠠ ᠶ᠋ᠢ ᠰᠠᠨᠠᠪᠠᠯ ᠦᠷ ᠴᠠᠢᠵᠤ ᠭᠡᠭᠡ ᠣᠷᠣᠬᠤ ᠠ᠋ᠴᠠ ᠡᠮᠦᠨᠡ ᠬᠥᠳᠡᠯᠬᠦ ᠶᠣᠰᠣᠲᠠᠢ ᠲᠤᠯᠠ ᠠᠷᠭᠠ ᠦᠭᠡᠢᠳᠡᠨ ᠲᠡᠭᠦᠨ ᠢ᠋ ᠰᠡᠷᠡᠭᠡᠪᠡ᠃ ᠲᠡᠮᠦᠵᠢᠨ ᠦ᠌ ᠦᠭᠡ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠵᠠᠮᠤᠬᠠ ᠦᠰᠦᠷᠦᠨ ᠪᠣᠰᠪᠠ᠃ ᠬᠣᠷᠣ ᠰᠢᠷᠠ᠂ ᠠᠭᠤᠷ ᠬᠢᠯᠢᠩ ᠨᠢ ᠪᠠᠳᠠᠷᠠᠵᠠᠢ᠃ ᠪᠥᠷᠲᠡ ᠵᠡᠭᠦᠳᠦᠨ ᠳ᠋ᠦ᠍ᠨᠢ ᠣᠷᠣᠬᠤ ᠳ᠋ᠠᠭᠠᠨ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠣᠳᠣ ᠲᠡᠭᠦᠨ ᠳ᠋ᠦ᠍ ᠲᠡᠮᠦᠵᠢᠨ ᠬᠡᠯᠡᠭᠦᠯᠵᠡᠢ᠃ ᠳᠣᠲᠣᠷᠠ ᠰᠡᠳᠬᠢᠯ ᠳ᠋ᠡᠭᠡᠨ ᠥᠪᠡᠷ ᠡᠴᠡ ᠪᠡᠨ ᠴᠦ᠍ ᠪᠣᠯᠪᠠ ᠨᠢᠭᠤᠵᠤ ᠪᠠᠢᠭᠰᠠᠨ ᠳᠠᠯᠳᠠ ᠬᠦᠰᠡᠯ ᠢ᠋ ᠨᠢ ᠲᠡᠮᠦᠵᠢᠨ ᠳᠠᠭᠠᠵᠤ ᠮᠡᠳᠡᠭᠡᠳ ᠣᠳᠣ ᠪᠠᠭᠤᠵᠤ ᠥᠭᠭᠦᠨ ᠭᠤᠲᠤᠮᠰᠢᠭᠲᠠᠢ ᠪᠠᠷ ᠳᠠᠭᠠᠵᠤ ᠢᠷᠡᠬᠦ ᠶ᠋ᠢ ᠱᠠᠭᠠᠷᠳᠠᠵᠠᠢ᠃ ᠵᠠᠮᠤᠬᠠ ᠶ᠋ᠢ ᠪᠠᠭᠤᠯᠭᠠᠨ ᠠᠪᠬᠤ ᠨᠢ ᠲᠡᠭᠦᠨ ᠢ᠋ ᠠᠯᠠᠭᠰᠠᠨ ᠠ᠋ᠴᠠ ᠠᠮᠲᠠᠲᠠᠢ ᠪᠠᠢᠬᠤ ᠨᠢ ᠮᠡᠳᠡᠭᠡᠵᠢ᠃ ᠢᠩᠭᠢᠵᠦ ᠪᠣᠳᠣᠭᠰᠠᠨ ᠠ᠋ᠴᠠ ᠵᠠᠮᠤᠬᠠ ᠶ᠋ᠢᠨ ᠠᠭᠤᠷ ᠬᠢᠯᠢᠩ᠂ ᠬᠣᠷᠣ ᠰᠢᠷᠠ ᠣᠪᠣᠯᠵᠠᠵᠠᠢ᠃
ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠪᠤᠰᠬᠠ᠃ ᠮᠣᠷᠳᠠᠶᠠ᠃
ᠬᠠᠨᠳᠠᠮᠤᠷ ᠡᠵᠡᠨ ᠦ᠌ ᠪᠡᠨ ᠦᠭᠡ ᠶ᠋ᠢ ᠳᠠᠭᠠᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠪᠠᠢᠭᠰᠠᠨ ᠦᠭᠡᠢ ᠲᠤᠯᠠ ᠪᠤᠴᠠᠵᠤ ᠭᠦᠶᠦᠯᠡ᠃ ᠤᠳᠠᠬᠤ ᠦᠭᠡᠢ ᠵᠠᠮᠤᠬᠠ ᠶ᠋ᠢᠨ ᠴᠥᠭᠡᠨ ᠴᠡᠷᠢᠭ ᠳᠠᠶᠠᠨ ᠬᠠᠨ ᠤ᠋ ᠬᠦᠷᠢᠶᠡᠨ ᠡᠴᠡ ᠰᠠᠮ ᠭᠠᠷᠴᠤ ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠢ᠋ ᠴᠢᠭᠯᠡᠨ ᠴᠢᠮᠡᠭᠡ ᠦᠭᠡᠢ ᠭᠤᠯᠠᠰᠬᠤ ᠮᠣᠭᠠᠢ ᠮᠡᠲᠦ ᠬᠣᠯᠠᠳᠤᠨ ᠬᠣᠯᠠᠳᠤᠭᠰᠠᠭᠠᠷ ᠬᠠᠷᠠᠩᠭᠤᠢ ᠳ᠋ᠤ᠌ ᠠᠭᠤᠰᠤᠨ ᠠᠯᠠᠭᠠ ᠪᠣᠯᠵᠠᠢ᠃ ᠵᠠᠮᠤᠬᠠ ᠨᠢᠭᠡ ᠴᠦ᠍ ᠦᠭᠡ ᠳᠤᠤᠭᠠᠷᠬᠤ ᠦᠭᠡᠢ ᠭᠦᠷᠯᠢᠭᠡᠷ ᠴᠢᠷᠠᠢᠯᠠᠨ ᠴᠡᠷᠢᠭ ᠦ᠋ᠨ ᠮᠠᠩᠯᠠᠢ ᠳ᠋ᠤ᠌ ᠮᠣᠷᠢᠨ ᠳᠡᠭᠡᠷᠡ ᠪᠡᠨ ᠤᠨᠲᠠᠭᠰᠠᠨ ᠮᠡᠲᠦ ᠶᠠᠪᠤᠨᠠ᠃ ᠴᠡᠷᠢᠭ ᠦ᠋ᠳ ᠵᠡᠭᠦᠦ ᠳᠠᠭᠠᠬᠤ ᠤᠲᠠᠰᠤ ᠰᠢᠭ᠋ ᠬᠣᠢᠨᠠ ᠠ᠋ᠴᠠ ᠨᠢ ᠲᠤᠪᠳᠤᠯᠠᠭᠠᠨᠠ᠃ ᠲᠡᠳᠡ ᠪᠣᠯ ᠵᠠᠮᠤᠬᠠ ᠶ᠋ᠢᠨ ᠲᠥᠯᠥᠭᠡ ᠠᠮᠢ ᠪᠠᠨ ᠥᠭᠬᠦ ᠦᠢᠯᠡ ᠲᠡᠢ ᠦᠨᠡᠨᠴᠢ ᠨᠥᠬᠥᠳ ᠨᠢ ᠶᠤᠮ᠃ ᠣᠳᠣ ᠶᠠᠭᠤ ᠪᠣᠯᠵᠤ ᠬᠡᠷᠬᠢᠬᠦ ᠶ᠋ᠢ ᠬᠡᠨ ᠴᠦ᠍ ᠦᠯᠦ ᠳᠠᠭᠠᠪᠤᠷᠢᠯᠠᠨᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠪᠣᠷᠣ ᠵᠤᠩᠲᠤ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠲᠦ᠍ ᠲᠡᠮᠦᠵᠢᠨ ᠦ᠌ ᠠᠰᠠᠷ ᠤ᠋ᠨ ᠭᠠᠳᠠᠭᠠ ᠠᠰᠠᠭᠠᠭᠰᠠᠨ ᠶᠡᠬᠡ ᠲᠦᠳᠡᠭ ᠦ᠋ᠨ ᠳᠡᠷᠭᠡᠳᠡ ᠳᠠᠪ ᠲᠡᠭᠷᠢ ᠪᠥᠬᠡᠯᠡᠵᠦ᠂ ᠳᠠᠶᠠᠨ ᠬᠠᠨ ᠤ᠋ ᠪᠥᠬᠡ ᠶ᠋ᠢᠨ ᠢᠷᠡᠭᠦᠯᠦᠭᠰᠡᠨ ᠴᠠᠰᠤ ᠰᠢᠭᠤᠷᠭᠠ ᠶ᠋ᠢ ᠬᠠᠷᠢᠭᠤᠯᠬᠤ ᠵᠠᠰᠠᠯ ᠬᠢᠵᠦ ᠬᠡᠩᠭᠡᠷᠭᠡ ᠨᠢ ᠨᠢᠵᠢᠭᠢᠨᠡᠵᠦ᠂ ᠲᠡᠭᠦᠨ ᠡᠴᠡ ᠬᠣᠯᠠ ᠦᠭᠡᠢ ᠲᠡᠮᠦᠵᠢᠨ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠪᠦᠰᠡ ᠪᠡᠨ ᠬᠦᠵᠦᠭᠦᠨ ᠳ᠋ᠡᠭᠡᠨ ᠲᠣᠬᠣᠭᠠᠳ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠲᠩᠷᠢ ᠳ᠋ᠦ᠍ ᠰᠤᠩᠭᠠᠨ ᠳᠡᠭᠡᠭᠰᠢ ᠬᠠᠷᠠᠨ ᠮᠥᠷᠭᠥᠵᠦ ᠰᠠᠭᠤᠵᠠᠢ᠃ ᠳᠠᠪ ᠲᠡᠭᠷᠢ ᠪᠥᠬᠡ ᠭᠠᠭᠴᠠᠬᠠᠨ ᠥᠪᠡᠷ ᠢ᠋ᠶ᠋ᠡᠨ ᠯᠡ ᠣᠢᠯᠠᠭᠠᠳᠠᠭ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠲᠩᠷᠢ ᠲᠡᠢ ᠶᠠᠷᠢᠵᠤ᠂ ᠪᠠᠰᠠ ᠠᠶᠠᠯᠤᠭᠤᠯᠤᠨ ᠳᠠᠭᠤᠯᠠᠵᠤ ᠠᠷᠭᠠᠳᠠᠨ ᠭᠤᠶᠤᠬᠤ ᠠᠵᠢ᠃ ᠳᠠᠪ ᠲᠩᠷᠢ ᠶ᠋ᠢᠨ ᠭᠠᠢᠬᠠᠯᠲᠠᠢ ᠴᠡᠭᠡᠯ ᠬᠣᠭᠣᠯᠠᠢ ᠬᠠᠷᠠᠩᠭᠤᠢ ᠲᠩᠷᠢ ᠶ᠋ᠢᠨ ᠭᠦᠨ ᠳ᠋ᠦ᠍ ᠳᠡᠭᠡᠭᠰᠢ ᠰᠠᠴᠤᠷᠠᠨ ᠰᠢᠩᠭᠡᠵᠦ ᠪᠠᠢᠪᠠ᠃
ᠤᠳᠠᠯ ᠦᠭᠡᠢ ᠰᠠᠯᠬᠢ ᠲᠣᠭᠲᠠᠪᠠ᠃ ᠳᠠᠪ ᠲᠩᠷᠢ ᠲᠦᠳᠡᠭ ᠦ᠋ᠨ ᠳᠡᠷᠭᠡᠳᠡ ᠮᠠᠭᠤᠵᠢᠷᠠᠨ ᠤᠨᠠᠵᠠᠢ᠃ ᠲᠡᠭᠦᠨ ᠳ᠋ᠦ᠍ ᠬᠡᠨ ᠴᠦ᠍ ᠦᠯᠦ ᠣᠢᠷᠠᠲᠤᠨᠠ᠃ ᠲᠡᠮᠦᠵᠢᠨ ᠴᠦ᠍ ᠪᠠᠰᠠ ᠬᠥᠳᠡᠯᠦᠭᠰᠡᠨ ᠦᠭᠡᠢ᠂ ᠥᠨᠥ ᠯᠡ ᠭᠠᠷ ᠢ᠋ᠶ᠋ᠠᠨ ᠲᠩᠷᠢ ᠥᠭᠡᠳᠡ ᠰᠤᠩᠭᠠᠭᠰᠠᠨ ᠴᠢᠭ ᠢ᠋ᠶ᠋ᠡᠷ ᠰᠠᠭᠤᠭᠰᠠᠭᠠᠷ᠃ ᠰᠠᠯᠬᠢ ᠵᠦᠭ ᠢ᠋ᠶ᠋ᠡᠨ ᠥᠭᠡᠷᠡᠴᠢᠯᠡᠨ ᠬᠥᠨᠳᠡᠢ ᠡᠴᠡ ᠠᠭᠤᠯᠠ ᠤᠷᠤᠭᠤ ᠪᠠᠨ ᠰᠡᠪ ᠰᠡᠪ ᠦᠯᠢᠶᠡᠵᠦ ᠡᠬᠢᠯᠡᠭᠰᠡᠨ ᠢ᠋ᠶ᠋ᠡᠨ ᠬᠣᠷᠣᠮ ᠤ᠋ᠨ ᠳᠣᠲᠣᠷᠠ ᠰᠢᠷᠦᠭᠦᠰᠦᠨ ᠴᠠᠰᠤ ᠬᠠᠶᠠᠯᠠᠵᠤ ᠡᠬᠢᠯᠡᠪᠡ᠃ ᠳᠠᠪ ᠲᠩᠷᠢ ᠶ᠋ᠢᠨ ᠦᠭᠡ ᠶ᠋ᠢ ᠰᠠᠯᠬᠢ ᠰᠣᠨᠣᠰᠴᠠᠢ᠃ ᠳᠠᠪ ᠲᠩᠷᠢ ᠰᠡᠷᠭᠦᠮᠡᠭᠴᠡ ᠪᠡᠨ ᠤᠬᠤᠰᠬᠢᠨ ᠥᠨᠳᠡᠢᠵᠦ ᠬᠡᠩᠭᠡᠷᠭᠡ ᠪᠡᠨ ᠰᠢᠭᠦᠷᠦᠨ ᠠᠪᠤᠭᠠᠳ ᠴᠢᠩᠭᠠ ᠴᠢᠩᠭᠠ ᠳᠡᠯᠡᠳᠴᠦ ᠲᠦᠳᠡᠭ ᠲᠣᠭᠣᠷᠢᠨ ᠳᠡᠪᠬᠡᠴᠡᠵᠦ ᠪᠥᠵᠢᠪᠡ᠃ ᠲᠡᠷᠡ ᠣᠳᠣ ᠨᠢᠭᠡᠨᠲᠡ ᠡᠬᠢᠯᠡᠭᠰᠡᠨ ᠴᠠᠰᠤ ᠰᠢᠭᠤᠷᠭᠠ ᠶ᠋ᠢ ᠬᠥᠭᠡᠷᠭᠡᠳᠡᠨ ᠦᠯᠢᠶᠡᠵᠦ ᠪᠠᠢᠭᠠ ᠨᠢ ᠡᠨᠡ᠃ ᠲᠡᠮᠦᠵᠢᠨ ᠳᠠᠪ ᠲᠩᠷᠢ ᠶ᠋ᠢᠨ ᠬᠦᠴᠦᠨ ᠳ᠋ᠦ᠍ ᠢᠲᠡᠭᠡᠨᠡ᠃ ᠦᠨᠡᠬᠡᠷ ᠠᠰᠤᠷᠤ ᠬᠦᠴᠦᠲᠡᠢ ᠰᠠᠯᠬᠢᠨ ᠳ᠋ᠤ᠌ ᠦᠯᠢᠶᠡᠭᠳᠡᠭᠰᠡᠨ ᠴᠠᠰᠤ ᠠᠭᠤᠯᠠ ᠶ᠋ᠢᠨ ᠣᠷᠣᠢ᠂ ᠬᠢᠰᠠᠭᠠᠨ ᠳᠡᠭᠡᠷᠡ ᠬᠣᠷᠭᠣᠳᠠᠭᠰᠠᠨ ᠳᠠᠶᠠᠨ ᠬᠠᠨ ᠤ᠋ ᠴᠡᠷᠢᠭ ᠦ᠋ᠨ ᠳᠡᠭᠡᠷᠡ ᠡᠴᠡ ᠰᠢᠭᠤᠷᠭᠠᠯᠠᠨ ᠪᠠᠭᠤᠵᠤ᠂ ᠴᠡᠷᠢᠭ ᠦ᠋ᠳ ᠨᠢ ᠠᠶᠤᠵᠤ ᠣᠷᠢᠯᠠᠯᠳᠤᠨ ᠬᠠᠪᠴᠢᠯ ᠤᠷᠤᠭᠤ ᠨᠤᠷᠠᠵᠤ ᠭᠤᠯᠠᠰᠤᠨ᠂ ᠨᠢᠰᠴᠦ ᠦᠬᠦᠵᠡᠭᠡᠵᠦ ᠡᠬᠢᠯᠡᠪᠡ᠃ ᠳᠠᠶᠠᠨ ᠬᠠᠨ ᠬᠦᠴᠦᠲᠦ ᠰᠠᠯᠬᠢᠨ ᠳ᠋ᠤ᠌ ᠬᠡᠢᠰᠴᠦ ᠤᠨᠠᠭᠰᠠᠨ ᠠᠰᠠᠷ ᠲᠠᠭᠠᠨ ᠳᠠᠷᠤᠭᠳᠠᠭᠠᠳ
— ᠵᠠᠮᠤᠬᠠ ᠃ ᠵᠠᠮᠤᠬᠠ ᠶ᠋ᠢ ᠳᠠᠭᠤᠳᠠ᠃ ᠴᠡᠷᠢᠭ ᠢ᠋ᠶ᠋ᠡᠨ ᠵᠠᠰᠠᠭ ᠭᠡᠵᠦ ᠠᠮᠢ ᠲᠠᠯᠪᠢᠬᠤ ᠭᠡᠵᠦ ᠪᠣᠢ ᠮᠡᠲᠦ ᠪᠠᠴᠢᠮᠳᠠᠨ ᠣᠷᠢᠯᠠᠨᠠ᠃ ᠭᠡᠪᠡᠴᠦ ᠵᠠᠮᠤᠬᠠ ᠲᠡᠭᠦᠨ ᠦ᠌ ᠳᠠᠭᠤ ᠶ᠋ᠢ ᠰᠣᠨᠣᠰᠬᠤ ᠠ᠋ᠴᠠ ᠨᠢᠭᠡᠨᠲᠡ ᠥᠩᠭᠡᠷᠡᠵᠡᠢ᠃ ᠴᠠᠰᠤᠨ ᠰᠢᠭᠤᠷᠭᠠ ᠳ᠋ᠤ᠌ ᠬᠡᠢᠰᠦᠭᠰᠡᠨ ᠴᠡᠷᠢᠭ ᠦ᠋ᠳ ᠪᠡᠶᠡ ᠪᠡᠶᠡ ᠪᠡᠨ ᠳᠠᠷᠤᠵᠤ ᠲᠡᠳᠡᠨ ᠦ᠌ ᠠᠶᠤᠮᠰᠢᠭᠲᠠᠢ ᠶᠡᠬᠡ ᠬᠠᠰᠬᠢᠷᠤᠯᠳᠤᠭᠠᠨ ᠤᠯᠢᠨ ᠢᠰᠬᠡᠷᠬᠦ ᠬᠦᠴᠦᠲᠦ ᠰᠢᠭᠤᠷᠭᠠ ᠲᠠᠢ ᠵᠡᠷᠭᠡᠴᠡᠨ ᠰᠦᠨᠡᠰᠦ ᠵᠠᠢᠯᠠᠮᠠᠷ ᠴᠤᠤᠷᠠᠢᠯᠠᠬᠤ ᠠᠵᠢ᠃ ᠬᠠᠷᠢᠨ ᠡᠨᠡ ᠰᠠᠯᠬᠢᠨ ᠤ᠋ ᠢᠰᠬᠡᠷᠭᠡᠨ᠂ ᠦᠬᠦᠵᠦ ᠪᠣᠢ ᠴᠡᠷᠢᠭ ᠦ᠋ᠨ ᠣᠷᠢᠯᠠᠯᠳᠤᠭᠠᠨ ᠢ᠋ ᠵᠠᠮᠤᠬᠠ ᠰᠣᠨᠣᠰᠪᠠ᠃ ᠭᠡᠬᠦ ᠳ᠋ᠡᠭᠡᠨ ᠲᠡᠷᠡ ᠴᠢᠬᠢᠨ ᠳ᠋ᠡᠭᠡᠨ ᠪᠢᠰᠢ ᠵᠢᠷᠦᠬᠡ ᠰᠡᠳᠬᠢᠯ ᠳ᠋ᠡᠭᠡᠨ ᠰᠣᠨᠣᠰᠴᠠᠢ᠃ ᠬᠣᠯᠠ ᠶ᠋ᠢᠨ ᠬᠣᠯᠠ᠂ ᠬᠠᠷᠠᠩᠭᠤᠢ ᠰᠢᠭᠤᠷᠭᠠᠨ ᠳᠤᠮᠳᠠ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠦ᠋ᠳ ᠦᠬᠦᠵᠦ᠂ ᠰᠦᠢᠷᠡᠵᠦ ᠪᠠᠢᠯᠠ᠃
— ᠬᠤᠷᠳᠤᠯᠠ᠃ ᠮᠣᠷᠢ ᠪᠠᠨ ᠭᠤᠶᠠᠳᠠᠵᠠᠭᠠ ᠭᠡᠵᠦ ᠲᠠᠭ ᠳᠠᠭᠤ ᠦᠭᠡᠢ ᠶᠠᠪᠤᠭᠰᠠᠨ ᠵᠠᠮᠤᠬᠠ ᠭᠡᠨᠡᠳᠲᠡ ᠪᠦᠭᠦᠳᠡ ᠶ᠋ᠢ ᠴᠣᠴᠢᠲᠠᠯᠠ ᠬᠠᠰᠬᠢᠷᠤᠯᠠ᠃ ᠵᠠᠮᠤᠬᠠ ᠶ᠋ᠢᠨ ᠰᠡᠳᠬᠢᠯ ᠲᠦᠭᠰᠢᠭᠦᠷᠢ ᠪᠡᠷ ᠳᠦᠭᠦᠷᠴᠡᠢ᠃ ᠤᠴᠢᠷ ᠨᠢ ᠳᠠᠶᠠᠨ ᠬᠠᠨ ᠰᠤᠢᠷᠠᠯᠠ ᠴᠦ᠍ ᠲᠡᠮᠦᠵᠢᠨ ᠲᠡᠭᠦᠨ ᠢ᠋ ᠵᠦᠩ ᠳ᠋ᠦ᠍ᠨᠢ ᠣᠷᠬᠢᠬᠤ ᠦᠭᠡᠢ ᠪᠢᠯᠡ᠃ ᠲᠡᠭᠦᠨ ᠦ᠌ ᠪᠣᠳᠣᠭᠰᠠᠨ ᠦᠨᠡᠬᠡᠷ ᠵᠥᠪ ᠪᠠᠢᠯᠠ᠃ ᠳᠠᠪ ᠲᠩᠷᠢ ᠶ᠋ᠢᠨ ᠢᠳᠢ ᠰᠢᠳᠢ ᠪᠡᠷ ᠡᠷᠭᠢᠭᠦᠯᠦᠭᠰᠡᠨ ᠴᠠᠰᠤᠨ ᠰᠢᠭᠤᠷᠭᠠ ᠳᠠᠶᠠᠨ ᠬᠠᠨ ᠤ᠋ ᠴᠡᠷᠢᠭ ᠦ᠋ᠨ ᠳᠡᠭᠡᠷᠡ ᠡᠴᠡ ᠪᠠᠭᠤᠵᠤ᠂ ᠰᠠᠨᠳᠤᠷᠴᠤ ᠲᠡᠪᠡᠳᠡᠭᠰᠡᠨ ᠲᠡᠳᠡᠨ ᠦ᠌ ᠦᠯᠡᠳᠡᠭᠳᠡᠯ ᠢ᠋ ᠥᠷᠯᠥᠭᠡ ᠪᠣᠯᠣᠮᠠᠭᠴᠠ ᠬᠠᠰᠠᠷ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠬᠢᠳᠤᠵᠤ ᠳᠠᠭᠤᠰᠬᠠᠨᠠ᠃
ᠬᠠᠷᠢᠨ ᠵᠠᠮᠤᠬᠠ ᠶ᠋ᠢᠨ ᠮᠥᠷ ᠢ᠋ᠶ᠋ᠡᠷ ᠲᠡᠮᠦᠵᠢᠨ ᠦ᠌ ᠦᠨᠡᠨᠴᠢ ᠨᠣᠬᠠᠢ ᠪᠤᠭᠤᠷᠴᠢ ᠰᠢᠯᠢᠳᠡᠭ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠮᠠᠩᠯᠠᠢᠯᠠᠨ ᠭᠡᠵᠢᠭᠡ ᠳᠠᠷᠤᠨ ᠳᠣᠪᠲᠣᠯᠭᠠᠵᠤ ᠶᠠᠪᠤᠭᠠ ᠶ᠋ᠢ ᠵᠠᠮᠤᠬᠠ ᠦᠵᠡᠭᠰᠡᠨ ᠦᠭᠡᠢ᠃ ᠭᠡᠪᠡᠴᠦ ᠥᠪᠡᠷ ᠢ᠋ ᠪᠡᠨ ᠠᠪᠤᠷᠠᠬᠤ ᠳᠠᠳᠤᠯ᠂ ᠠᠮᠢᠳᠤ ᠦᠯᠡᠳᠡᠬᠦ ᠶᠡᠬᠡ ᠬᠦᠰᠡᠯ ᠨᠢ ᠲᠡᠭᠦᠨ ᠡᠴᠡ ᠭᠠᠪᠰᠢᠭᠠᠢᠯᠠᠨ ᠬᠤᠷᠳᠤᠯᠠᠬᠤ ᠶ᠋ᠢ ᠱᠠᠭᠠᠷᠳᠠᠭᠰᠠᠨ ᠠᠵᠢ᠃ ᠪᠤᠭᠤᠷᠴᠢ ᠠᠮᠠ ᠪᠠᠨ ᠠᠩᠭᠠᠢᠵᠤ ᠣᠯᠠᠨ ᠮᠣᠷᠢᠳ ᠤ᠋ᠨ ᠬᠥᠯᠥᠰᠥᠨ ᠦ᠌ ᠦᠨᠦᠷ ᠢ᠋ᠶ᠋ᠡᠷ ᠪᠠᠷᠢᠮᠵᠢᠶᠠᠯᠠᠨ ᠮᠥᠷᠳᠡᠵᠦ ᠶᠠᠪᠤᠯᠠ᠃ ᠵᠠᠮᠤᠬᠠ ᠶ᠋ᠢ ᠠᠮᠢᠳᠤ ᠪᠠᠷ ᠪᠠᠷᠢᠵᠤ ᠠᠪᠴᠢᠷᠠᠬᠤ ᠶ᠋ᠢ ᠲᠡᠮᠦᠵᠢᠨ ᠲᠡᠭᠦᠨ ᠳ᠋ᠦ᠍ ᠲᠤᠰᠢᠶᠠᠭᠰᠠᠨ ᠲᠤᠯᠠ ᠳᠠᠶᠠᠨ ᠬᠠᠨ ᠤ᠋ ᠴᠡᠷᠢᠭ ᠢ᠋ ᠴᠣᠬᠢᠬᠤ ᠴᠤ᠌ ᠵᠠᠪ ᠦᠭᠡᠢ ᠵᠠᠮᠤᠬᠠ ᠶ᠋ᠢ ᠮᠥᠰᠬᠢᠭᠰᠡᠨ ᠪᠢᠯᠡ᠃ ᠣᠳᠣ ᠲᠡᠳᠡᠨ ᠦ᠌ ᠬᠣᠭᠣᠷᠣᠨᠳᠣᠬᠢ ᠵᠠᠢ ᠠᠯᠬᠤᠮ ᠠᠯᠬᠤᠮ ᠢ᠋ᠶ᠋ᠠᠷ ᠣᠢᠷᠠᠲᠤᠵᠤ ᠪᠠᠢᠪᠠ ᠃ ᠵᠠᠮᠤᠬᠠ ᠶ᠋ᠢᠨ ᠦᠬᠦᠯ ᠪᠤᠭᠤᠷᠴᠢ ᠶ᠋ᠢᠨ ᠳᠦᠷᠢ ᠳ᠋ᠦ᠍ ᠬᠤᠪᠢᠯᠤᠭᠠᠳ ᠲᠡᠭᠦᠨ ᠢ᠋ ᠨᠡᠬᠡᠵᠦ ᠶᠠᠪᠤᠪᠠ᠃ ᠭᠤᠷᠪᠠ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠭᠡᠬᠦ ᠳ᠋ᠦ᠍ ᠪᠤᠭᠤᠷᠴᠢ ᠵᠠᠮᠤᠬᠠ ᠶ᠋ᠢ ᠨᠡᠬᠡᠨ ᠭᠦᠢᠴᠡᠵᠦ ᠳᠣᠯᠣᠭᠠᠨ ᠡᠬᠢᠯᠡᠭᠰᠡᠨ ᠴᠦ᠍ ᠵᠠᠮᠤᠬᠠ ᠡᠨᠡ ᠤᠳᠠᠭᠠ ᠳ᠋ᠤ᠌ ᠦᠬᠦᠯ ᠡᠴᠡ ᠮᠤᠯᠲᠤᠷᠠᠨ ᠭᠠᠷᠴᠠᠢ᠃ ᠰᠠᠷᠠ ᠰᠢᠬᠠᠮ ᠮᠤᠤᠷ ᠬᠤᠯᠤᠭᠠᠨᠠ ᠰᠢᠭ᠋ ᠬᠥᠭᠡᠭᠡᠴᠡᠯᠳᠦᠨ ᠨᠡᠬᠡᠭᠰᠡᠨ ᠦ᠌ ᠡᠴᠦᠰ ᠲᠦ᠍ ᠵᠠᠮᠤᠬᠠ ᠬᠡᠳᠦᠬᠡᠨ ᠲᠣᠭᠠᠨ ᠤ᠋ ᠴᠡᠷᠢᠭ ᠲᠡᠢ ᠪᠡᠨ ᠭᠠᠵᠠᠷ ᠤ᠋ᠨ ᠭᠠᠪ ᠢ᠋ᠶ᠋ᠠᠷ ᠣᠷᠣᠭᠰᠠᠨ ᠮᠡᠲᠦ ᠠᠯᠠᠭᠠ ᠪᠣᠯᠬᠤ ᠳ᠋ᠤ᠌ ᠬᠡᠳᠦᠢ ᠪᠡᠷ ᠭᠡᠮᠰᠢᠵᠦ᠂ ᠲᠡᠮᠦᠵᠢᠨ ᠦ᠌ ᠵᠠᠷᠯᠢᠭ ᠢ᠋ ᠪᠡᠶᠡᠯᠡᠭᠦᠯᠵᠦ ᠴᠢᠳᠠᠭᠠ ᠦᠭᠡᠢ ᠳ᠋ᠡᠭᠡᠨ ᠲᠦᠭᠰᠢᠵᠦ ᠪᠠᠢᠭᠰᠠᠨ ᠴᠤ᠌ ᠦᠯᠡᠳᠡᠭᠰᠡᠨ ᠴᠡᠷᠢᠭ ᠨᠢ ᠡᠴᠡᠵᠦ ᠶᠠᠳᠠᠷᠠᠬᠤ ᠶ᠋ᠢᠨ ᠲᠤᠢᠯ ᠳ᠋ᠤ᠌ ᠬᠦᠷᠦᠭᠰᠡᠨ ᠲᠤᠯᠠ ᠪᠤᠭᠤᠷᠴᠢ ᠠᠷᠭᠠ ᠦᠭᠡᠢᠳᠡᠨ ᠪᠤᠴᠠᠬᠤ ᠪᠠᠷ ᠰᠢᠢᠳᠪᠡ ᠃
ᠲᠡᠮᠦᠵᠢᠨ ᠡᠨᠡ ᠦᠶᠡ ᠳ᠋ᠦ᠍ ᠳᠠᠶᠠᠨ ᠬᠠᠨ ᠢ᠋ ᠦᠬᠦᠭᠦᠯᠵᠦ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠢᠷᠭᠡᠳ᠂ ᠡᠳ᠋ ᠬᠥᠷᠥᠩᠭᠡ ᠶ᠋ᠢ ᠬᠣᠷᠢᠶᠠᠨ ᠠᠪᠤᠭᠠᠳ ᠠᠯᠲᠠᠢ ᠶ᠋ᠢᠨ ᠨᠢᠷᠤᠭᠤᠨ ᠤ᠋ ᠥᠪᠥᠷ ᠲᠦ᠍ ᠨᠤᠲᠤᠭᠯᠠᠵᠤ ᠪᠠᠢᠪᠠ᠃ ᠲᠡᠮᠦᠵᠢᠨ ᠲᠠᠶᠠᠨ ᠬᠠᠨ ᠤ᠋ ᠡᠬᠡ ᠶᠡᠬᠡ ᠦᠭᠡᠲᠦ ᠬᠦᠷᠪᠡᠰᠦ ᠬᠠᠲᠤᠨ ᠢ᠋ ᠪᠠᠷᠢᠵᠤ ᠠᠪᠴᠢᠷᠠᠨ ᠪᠠᠢᠴᠠᠭᠠᠵᠤ ᠣᠯᠠᠨ ᠰᠠᠷᠠ ᠳᠣᠲᠣᠷᠠ ᠪᠠᠨ ᠬᠠᠳᠠᠭᠠᠯᠠᠵᠤ ᠶᠠᠪᠤᠭᠰᠠᠨ ᠬᠣᠷᠣᠰᠤᠯ ᠢ᠋ᠶ᠋ᠠᠨ ᠳᠡᠢᠯᠵᠡᠢ᠃
ᠨᠠᠢ᠍ᠮᠠᠨ ᠠᠢᠮᠠᠭ ᠲᠤ᠌ ᠪᠠᠢᠭᠰᠠᠨ ᠲᠡᠮᠦᠵᠢᠨ ᠦ᠌ ᠲᠤᠷᠰᠢᠭᠤᠯ ᠤᠲᠠᠢ ᠭᠡᠭᠴᠢ ᠡᠷᠡ ᠳᠠᠶᠠᠨ ᠬᠠᠨ ᠤ᠋ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠲᠤ ᠬᠡᠯᠡᠯᠴᠡᠵᠦ ᠪᠠᠢᠭᠰᠠᠨ ᠦᠭᠡ ᠶ᠋ᠢ ᠡᠮᠦᠨᠡ ᠨᠢ ᠬᠡᠯᠡᠭᠰᠡᠨ ᠲᠤᠯᠠ ᠲᠡᠮᠦᠵᠢᠨ ᠡᠨᠡ ᠶᠡᠬᠡ ᠦᠭᠡ ᠲᠡᠢ ᠠᠪᠠᠭᠠᠢ ᠳ᠋ᠤ᠌ ᠬᠣᠷᠣᠰᠤᠨ ᠪᠤᠬᠢᠨᠢᠳᠤᠭᠰᠠᠭᠠᠷ ᠪᠠᠢᠭᠰᠠᠨ ᠪᠢᠯᠡ ᠃ ᠲᠡᠮᠦᠵᠢᠨ ᠢ᠋ ᠪᠣᠷᠵᠢᠭᠢᠨ ᠠᠢᠮᠠᠭ ᠤ᠋ᠨ ᠬᠠᠨ ᠪᠣᠯᠵᠤ ᠬᠡᠷᠡᠢᠳ ᠠᠢᠮᠠᠭ ᠢ᠋ ᠮᠥᠬᠥᠭᠡᠭᠰᠡᠨ ᠢ᠋ ᠲᠤᠭᠤᠯᠤᠭᠰᠠᠨ ᠨᠠᠢ᠍ᠮᠠᠨ ᠤ᠋ ᠳᠠᠶᠠᠨ ᠬᠠᠨ
—ᠣᠮᠣᠭ ᠶᠡᠬᠡᠲᠡᠢ ᠪᠣᠯᠤᠭᠰᠠᠨ ᠴᠥᠭᠡᠨ ᠮᠣᠩᠭᠣᠯᠴᠤᠳ ᠢ᠋ ᠳᠠᠷᠤᠢ ᠨᠣᠮᠣᠬᠠᠷᠠᠭᠤᠯᠤᠶᠠ᠃ ᠲᠡᠳᠡ ᠡᠷᠲᠡᠨ ᠦ᠌ ᠰᠤᠷᠪᠤᠯᠵᠢᠲᠤ ᠬᠠᠨ ᠲᠤᠭᠤᠷᠢᠯ ᠢ᠋ ᠳᠤᠲᠠᠭᠠᠯᠭᠠᠨ ᠦᠬᠦᠭᠦᠯᠪᠡ᠃ ᠲᠩᠷᠢ ᠳ᠋ᠦ᠍ ᠵᠥᠪᠬᠡᠨ ᠨᠠᠷᠠ ᠰᠠᠷᠠ ᠬᠣᠶᠠᠷ ᠪᠠᠢᠳᠠᠭ ᠪᠢᠵᠡ᠃ ᠭᠡᠲᠡᠯᠡ ᠭᠠᠵᠠᠷ ᠳᠡᠭᠡᠷᠡ ᠬᠣᠶᠠᠷ ᠬᠠᠨ ᠪᠠᠢᠵᠤ ᠶᠠᠭᠠᠬᠢᠵᠤ ᠪᠣᠯᠤᠨᠠ ᠃ ᠣᠳᠣ ᠪᠢᠳᠡ ᠲᠡᠷᠡ ᠮᠣᠩᠭᠣᠯᠴᠤᠳ ᠢ᠋ ᠡᠵᠡᠯᠡᠵᠦ ᠠᠪᠴᠢᠷᠠᠶᠠ ᠭᠡᠵᠦ ᠶᠡᠬᠡᠷᠬᠡᠵᠡᠢ᠃ ᠲᠡᠭᠡᠲᠡᠯᠡ ᠬᠦᠷᠪᠡᠰᠦ ᠬᠠᠲᠤᠨ ᠡᠬᠡ ᠨᠢ
— ᠲᠡᠷᠡ ᠮᠣᠩᠭᠣᠯᠴᠤᠳ ᠴᠢᠨᠢ ᠬᠠᠷᠠ ᠮᠠᠭᠤᠬᠠᠢ ᠬᠤᠪᠴᠠᠰᠤ ᠲᠠᠢ᠂ ᠬᠠᠩᠬᠤᠯᠬᠤ ᠮᠠᠭᠤ ᠦᠨᠦᠷ ᠲᠡᠢ ᠲᠤᠯᠠ ᠠᠪᠴᠢᠷᠠᠵᠤ ᠶᠠᠭᠤ ᠬᠢᠨᠡ᠃ ᠬᠣᠯᠠᠬᠠᠨ ᠲᠡᠨᠳᠡ ᠨᠢ ᠪᠠᠢᠯᠭᠠ᠃ ᠭᠠᠭᠴᠠ ᠬᠦ᠌ ᠰᠢᠯᠢᠳᠡᠭ ᠴᠡᠪᠡᠷ ᠥᠬᠢᠳ᠂ ᠪᠡᠷᠢ ᠨᠦ᠍ᠭᠦᠳ ᠢ᠋ ᠨᠢ ᠠᠪᠴᠢᠷᠠᠵᠤ ᠭᠠᠷ ᠬᠥᠯ ᠢ᠋ ᠨᠢ ᠤᠬᠢᠶᠠᠯᠭᠠᠵᠤ ᠪᠠᠢᠭᠠᠳ ᠦᠨᠢᠶᠡ᠂ ᠬᠣᠨᠢ ᠰᠠᠭᠠᠯᠭᠠᠪᠠᠯ ᠶᠠᠭᠠᠬᠢᠳᠠᠭ ᠶᠤᠮ ᠭᠡᠬᠦ ᠡᠴᠡ᠂ ᠪᠤᠰᠤᠳ ᠢ᠋ ᠨᠢ ᠬᠠᠷᠠ ᠭᠡᠷ ᠲᠦ᠋ᠨᠢ ᠨᠤᠲᠤᠭ ᠲᠤᠨᠢ ᠦᠬᠦᠭᠦᠯᠪᠡᠯ ᠲᠠᠭᠠᠷᠠᠨᠠ ᠭᠡᠵᠡᠢ᠃ ᠬᠠᠷᠢᠨ ᠳᠠᠶᠠᠨ ᠬᠠᠨ
—ᠵᠠ ᠶᠠᠭᠤ ᠪᠣᠯᠪᠠᠴᠤ ᠪᠢᠳᠡ ᠮᠣᠩᠭᠣᠯᠴᠤᠳ ᠤ᠋ᠨ ᠬᠣᠷᠣᠮᠰᠠᠭᠠ ᠂ ᠰᠠᠭᠠᠳᠠᠭ ᠢ᠋ ᠨᠢ ᠬᠣᠷᠢᠶᠠᠨ ᠠᠪᠴᠢᠷᠠᠵᠤ ᠲᠡᠷᠡ ᠲᠡᠮᠦᠵᠢᠨ ᠳ᠋ᠦ᠍ ᠬᠠᠷᠠ ᠨᠠᠪᠲᠠᠰᠤ ᠨᠥᠮᠥᠷᠢᠭᠦᠯᠵᠦ ᠬᠠᠮᠤᠭ ᠣᠯᠠᠨ ᠤ᠋ ᠡᠮᠦᠨᠡ ᠬᠠᠰᠢᠷᠠᠭᠠᠨ ᠵᠠᠯᠬᠠᠭᠠᠶᠠ ᠭᠡᠰᠡᠨ ᠪᠠᠢᠪᠠ᠃ ᠳᠡᠷᠭᠡᠳᠡ ᠨᠢ ᠪᠠᠢᠭᠰᠠᠨ ᠨᠠᠢ᠍ᠮᠠᠨ ᠤ᠋ ᠬᠥᠭᠰᠡᠭᠥᠤ ᠰᠠᠪᠷᠠᠭ᠋ ᠪᠠᠭᠠᠲᠤᠷ
— ᠲᠡᠮᠦᠵᠢᠨ ᠢ᠋ ᠶᠠᠭᠠᠬᠢᠵᠤ ᠪᠠᠰᠤᠮᠵᠢᠯᠠᠵᠤ ᠪᠣᠯᠬᠤ ᠪᠣᠢ? ᠲᠠ ᠬᠡᠲᠦᠷᠬᠡᠢ ᠶᠡᠬᠡ ᠦᠭᠡ ᠬᠡᠯᠡᠵᠦ ᠪᠠᠢᠨᠠ᠃ ᠬᠠᠩᠭᠠᠢ ᠶ᠋ᠢᠨ ᠨᠢᠷᠤᠭᠤᠨ ᠤ᠋ ᠤᠯᠠᠭᠠᠨ ᠬᠤᠰᠤ ᠭᠡᠳᠡᠭ ᠭᠠᠵᠠᠷ ᠨᠠᠢ᠍ᠮᠠᠨ ᠢ᠋ ᠲᠡᠮᠦᠵᠢᠨ ᠳ᠋ᠦ᠍ ᠶᠠᠭᠠᠬᠢᠵᠤ ᠴᠣᠬᠢᠭᠳᠠᠭᠰᠠᠨ ᠢ᠋ ᠬᠠᠨ ᠲᠠ ᠮᠠᠷᠲᠠᠪᠠ ᠤᠤ? ᠭᠡᠵᠦ ᠮᠠᠩᠨᠠᠢ ᠶ᠋ᠢᠨ ᠬᠥᠯᠥᠰᠥ ᠪᠡᠨ ᠴᠢᠬᠠᠷᠠᠲᠠᠯᠠ ᠰᠠᠨᠠᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠮᠣᠩᠭᠣᠯ ᠤ᠋ᠨ ᠨᠡᠷᠡᠲᠡᠢ ᠠᠢᠮᠠᠭ ᠤ᠋ᠨ ᠵᠠᠮᠤᠬᠠ ᠣᠯᠠᠨ ᠢᠷᠭᠡᠳ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠲᠡᠭᠦᠨ ᠲᠡᠢ ᠨᠡᠢᠯᠡᠨᠡ ᠭᠡᠰᠡᠨ ᠳ᠋ᠦ᠍ ᠵᠣᠷᠢᠭᠵᠢᠭᠰᠠᠨ ᠳᠠᠶᠠᠨ ᠬᠠᠨ ᠥᠪᠡᠷ ᠦ᠋ᠨ ᠪᠣᠯᠴᠢᠮ ᠦᠭᠡᠢ ᠦᠭᠡᠨ ᠡᠴᠡ ᠪᠤᠴᠠᠯ ᠦᠭᠡᠢ ᠴᠡᠷᠢᠭ ᠢ᠋ᠶ᠋ᠡᠨ ᠠᠯᠲᠠᠢ ᠶ᠋ᠢᠨ ᠨᠢᠷᠤᠭᠤ ᠳᠠᠪᠠᠭᠤᠯᠤᠨ ᠬᠥᠳᠡᠯᠭᠡᠵᠦ ᠣᠷᠬᠣᠨ ᠤ᠋ ᠬᠥᠨᠳᠡᠢ ᠬᠦᠷᠲᠡᠯᠡ ᠳᠣᠪᠲᠣᠯᠤᠨ ᠢᠷᠡᠭᠰᠡᠨ ᠨᠢ ᠡᠢᠨ ᠬᠦ᠌ ᠦᠬᠦᠯ ᠰᠦᠢᠷᠡᠯ ᠢ᠋ᠶ᠋ᠡᠷ ᠳᠠᠭᠤᠰᠴᠤ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠣᠯᠤᠭᠠᠳ ᠣᠯᠠᠨ ᠴᠡᠷᠢᠭ ᠦ᠋ᠨ ᠠᠮᠢ ᠶ᠋ᠢ ᠦᠷᠡᠵᠦ ᠨᠠᠢ᠍ᠮᠠᠨ ᠠᠢᠮᠠᠭ ᠢ᠋ᠶ᠋ᠠᠨ ᠮᠥᠬᠥᠯ ᠦ᠋ᠨ ᠵᠠᠮ ᠳ᠋ᠤ᠌ ᠬᠥᠲᠥᠯᠵᠡᠢ᠃ ᠣᠷᠬᠣᠨ ᠤ᠋ ᠬᠥᠨᠳᠡᠢ ᠡᠴᠡ ᠠᠯᠲᠠᠢ ᠶ᠋ᠢᠨ ᠨᠢᠷᠤᠭᠤ ᠳᠠᠪᠠᠲᠠᠯᠠ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠡᠭᠦᠷ ᠬᠥᠯ ᠢ᠋ᠶ᠋ᠡᠷ ᠬᠥᠭᠯᠡᠷᠡᠵᠦ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠤᠯᠠᠭᠠᠨ ᠥᠩᠭᠡᠲᠡᠢ ᠪᠣᠯᠵᠠᠢ᠃ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠪᠦᠬᠦ ᠢᠷᠭᠡᠳ᠂ ᠬᠥᠷᠥᠩᠭᠡ ᠶ᠋ᠢ ᠬᠣᠷᠢᠶᠠᠨ ᠠᠪᠴᠤ ᠲᠡᠮᠦᠵᠢᠨ ᠲᠡᠷᠡ ᠶᠡᠬᠡ ᠦᠭᠡᠲᠦ ᠬᠠᠲᠤᠨ ᠬᠦᠷᠪᠡᠰᠦ ᠶ᠋ᠢ ᠪᠠᠷᠢᠨ ᠠᠪᠴᠢᠷᠠᠵᠤ ᠬᠡᠭᠡᠷᠡ ᠶ᠋ᠢᠨ ᠦᠷᠭᠦᠭᠡᠨ ᠳ᠋ᠡᠭᠡᠨ ᠢᠷᠡᠭᠦᠯᠪᠡ᠃ ᠲᠡᠷᠡ ᠬᠦᠷᠪᠡᠰᠦ ᠨᠠᠰᠤ ᠲᠣᠭᠲᠠᠭᠰᠠᠨ ᠴᠤ᠌ ᠵᠢᠪᠬᠤᠭᠠ ᠦᠵᠡᠰᠬᠦᠯᠡᠩ ᠪᠠᠭᠤᠷᠠᠭᠠ ᠦᠭᠡᠢ ᠨᠢ ᠨᠢᠳᠦᠨ ᠳ᠋ᠦ᠍ ᠤᠨᠠᠨᠠ᠃
— ᠴᠢ ᠮᠣᠩᠭᠣᠯᠴᠤᠳ ᠢ᠋ ᠮᠠᠭᠤᠬᠠᠢ ᠦᠨᠦᠷ ᠲᠡᠢ ᠭᠡᠳᠡᠭ ᠪᠢᠯᠡ ᠤᠤ? ᠴᠢ ᠣᠳᠣ ᠶᠠᠭᠤᠨ ᠳ᠋ᠤ᠌ ᠡᠨᠳᠡ ᠢᠷᠡᠪᠡ? ᠭᠡᠵᠦ ᠲᠡᠮᠦᠵᠢᠨ ᠬᠥᠭᠡᠷᠴᠦ ᠲᠡᠭᠦᠨ ᠳ᠋ᠦ᠍ ᠣᠢᠷᠠᠲᠤᠨ ᠲᠠᠷᠭᠤᠨ ᠡᠷᠡᠦ ᠳᠡᠭᠡᠷᠡ ᠡᠴᠡ ᠨᠢ ᠲᠠᠲᠠᠵᠤ ᠦᠵᠡᠪᠡ᠃
— ᠪᠢ ᠴᠢᠮᠠᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠠᠪᠤᠨᠠ᠃
ᠬᠦᠷᠪᠡᠰᠦ ᠬᠠᠲᠤᠨ ᠶᠡᠬᠡ ᠦᠭᠡ ᠲᠡᠢ ᠶ᠋ᠢᠨ ᠠᠳᠠᠯᠢ ᠪᠠᠷ ᠪᠠᠰᠠ ᠡᠮᠡ ᠬᠥᠮᠦᠨ ᠭᠡᠬᠦ ᠳ᠋ᠦ᠍ ᠰᠥᠰᠥ ᠶᠡᠬᠡᠲᠡᠢ ᠤᠴᠢᠷ ᠣᠭᠲᠣ ᠰᠠᠨᠳᠤᠷᠴᠤ ᠢᠴᠢᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠴᠤ᠌ ᠵᠣᠷᠢᠭ ᠲᠡᠭᠦᠰ ᠶᠡᠬᠡᠮᠰᠦᠭ ᠵᠣᠭᠰᠣᠭᠠᠳ
— ᠲᠡᠮᠦᠵᠢᠨ᠂ ᠪᠢ ᠴᠢᠮᠠᠶ᠋ᠢ ᠡᠴᠢᠭᠡ ᠦᠭᠡᠢ ᠵᠣᠯᠪᠢᠩ᠂ ᠢᠵᠢᠯᠢ ᠦᠭᠡᠢ ᠥᠨᠥᠴᠢᠨ ᠭᠡᠵᠦ ᠰᠣᠨᠣᠰᠤᠭᠰᠠᠨ᠃ ᠴᠢ ᠡᠷᠲᠡᠨ ᠦ᠌ ᠰᠤᠷᠪᠤᠯᠵᠢᠲᠤ ᠲᠤᠭᠤᠷᠢᠯ ᠬᠠᠨ ᠢ᠋ ᠳᠠᠷᠤᠵᠤ ᠪᠠᠶᠠᠨ ᠬᠦᠴᠦᠷᠬᠡᠭ᠂ ᠪᠢᠴᠢᠭ ᠰᠣᠶᠣᠯ ᠲᠠᠢ ᠮᠠᠨ ᠤ᠋ ᠨᠠᠢ᠍ᠮᠠᠨ ᠠᠢᠮᠠᠭ ᠢ᠋ ᠮᠥᠬᠥᠭᠡᠭᠰᠡᠨ ᠨᠢ ᠨᠢᠭᠡ ᠴᠠᠭ ᠤ᠋ᠨ ᠲᠣᠬᠢᠶᠠᠯ ᠪᠣᠯᠬᠤ ᠠ᠋ᠴᠠ ᠲᠩᠷᠢ ᠮᠡᠲᠦ ᠡᠭᠦᠷᠢᠳᠡ ᠶ᠋ᠢᠨ ᠬᠢ ᠭᠡᠵᠦ ᠪᠤᠤ ᠡᠨᠳᠡᠭᠦᠷᠡ᠃ ᠨᠠᠢ᠍ᠮᠠᠨ ᠠᠢᠮᠠᠭ ᠴᠢᠮᠠ ᠳ᠋ᠤ᠌ ᠳᠡᠢᠯᠦᠭᠳᠡᠭᠰᠡᠨ ᠨᠢ ᠴᠢᠨᠦ ᠭᠠᠷᠮᠠᠭᠠᠢ ᠶ᠋ᠢᠨ ᠬᠢ ᠪᠢᠰᠢ᠃ ᠮᠠᠨ ᠤ᠋ ᠳᠠᠶᠠᠨ ᠬᠠᠨ ᠤ᠋ ᠪᠣᠯᠴᠢᠮ ᠦᠭᠡᠢ᠂ ᠴᠢᠳᠠᠪᠤᠷᠢ ᠦᠭᠡᠢ ᠶ᠋ᠢᠨ ᠬᠢ ᠪᠣᠯᠪᠠ᠃ ᠪᠠᠰᠠ ᠴᠢᠨᠦ ᠬᠠᠭᠤᠴᠢᠨ ᠠᠨᠳᠠ ᠵᠠᠮᠤᠬᠠ ᠶ᠋ᠢᠨ ᠤᠭ ᠤ᠋ᠨ ᠬᠤᠩᠰᠢ ᠦᠭᠡᠢ᠂ ᠤᠷᠪᠠᠭᠠᠴᠢ ᠰᠢᠷᠪᠠᠭᠠᠴᠢ ᠵᠠᠩ᠂ ᠨᠡᠮᠡᠷᠢ ᠦᠭᠡᠢ ᠡᠴᠡ ᠪᠣᠯᠪᠠ᠃ ᠴᠢᠨᠦ ᠢᠩᠭᠢᠵᠦ ᠲᠦᠷ ᠵᠠᠭᠤᠷᠠ ᠶ᠋ᠢᠨ ᠢᠯᠠᠯᠲᠠ ᠳ᠋ᠠᠭᠠᠨ ᠬᠥᠭᠡᠷᠴᠦ᠂ ᠣᠷᠢᠯᠠᠵᠤ ᠭᠤᠸᠠᠭᠴᠢᠬᠤ ᠴᠢᠨᠢ ᠬᠡᠭᠡᠷᠡ ᠶ᠋ᠢᠨ ᠵᠡᠷᠯᠢᠭ ᠬᠥᠮᠦᠨ ᠭᠥᠷᠥᠭᠡᠰᠦ ᠬᠣᠭᠣᠯᠠ ᠣᠯᠤᠭᠠᠳ ᠪᠠᠶᠠᠰᠬᠤ ᠲᠠᠢ ᠠᠳᠠᠯᠢ ᠪᠠᠢᠨᠠ᠃ ᠪᠢ ᠴᠢᠮᠠᠶ᠋ᠢ ᠡᠵᠡᠨ ᠦᠭᠡᠢ ᠭᠥᠯᠥᠭᠡ ᠲᠡᠢ ᠠᠳᠠᠯᠢ ᠦᠵᠡᠨ ᠦᠯᠦ ᠲᠣᠭᠣᠨᠠ ᠭᠡᠵᠦ ᠪᠠᠰᠤᠵᠤ ᠳᠣᠷᠣᠮᠵᠢᠯᠠᠬᠤ ᠶᠡᠬᠡ ᠦᠭᠡ ᠬᠡᠯᠡᠭᠰᠡᠨ ᠳ᠋ᠦ᠍ ᠲᠡᠮᠦᠵᠢᠨ ᠦ᠌ ᠲᠡᠪᠴᠢᠶᠡᠷᠢ ᠠᠯᠳᠠᠷᠠᠵᠤ ᠴᠡᠷᠢᠭ ᠳᠠᠭᠤᠳᠠᠨ ᠲᠡᠭᠦᠨ ᠦ᠌ ᠲᠠᠷᠭᠤᠨ ᠰᠠᠯᠬᠤᠭᠠᠷ ᠪᠡᠶᠡ ᠶ᠋ᠢ ᠴᠢᠷᠠᠮᠠ ᠨᠢᠴᠦᠭᠦᠯᠡᠭᠦᠯᠦᠨ ᠬᠦᠴᠦ ᠪᠡᠷ ᠡᠳ᠋ᠯᠡᠨ ᠪᠠᠬᠠ ᠲᠠᠪᠠ ᠪᠠᠨ ᠬᠠᠩᠭᠠᠭᠠᠳ ᠴᠢᠷᠴᠦ ᠭᠠᠷᠭᠠᠨ ᠴᠡᠷᠢᠭ ᠦ᠋ᠳ ᠲᠡᠭᠡᠨ ᠬᠠᠶᠠᠵᠤ ᠥᠭᠴᠡᠢ᠃ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠣᠯᠵᠠᠨ ᠤ᠋ ᠬᠥᠮᠦᠰ ᠦ᠋ᠨ ᠨᠢᠭᠡ ᠲᠠᠲᠠᠲᠤᠩᠭᠠ ᠭᠡᠭᠴᠢ ᠨᠢᠭᠡᠨ ᠲᠠᠮᠠᠭᠠ ᠡᠪᠦᠷᠲᠦᠯᠡᠵᠦ ᠶᠠᠪᠤᠭᠰᠠᠨ ᠢ᠋ ᠬᠠᠰᠠᠷ ᠣᠯᠵᠤ ᠲᠡᠮᠦᠵᠢᠨ ᠳ᠋ᠦ᠍ ᠠᠪᠴᠢᠷᠠᠨ ᠤᠴᠢᠷ ᠢ᠋ ᠬᠡᠯᠡᠭᠦᠯᠪᠡ᠃ ᠬᠡᠷᠡᠭ ᠬᠥᠲᠥᠯᠵᠦ ᠶᠠᠪᠤᠭᠤᠯᠬᠤ ᠳ᠋ᠤ᠌ ᠡᠨᠡ ᠲᠠᠮᠠᠭᠠ ᠶ᠋ᠢ ᠬᠡᠷᠡᠭᠯᠡᠬᠦ᠂ ᠮᠥᠨ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠪᠢᠴᠢᠭ ᠰᠤᠷᠬᠤ ᠨᠢ ᠬᠡᠷᠡᠭᠲᠡᠢ ᠴᠢᠬᠤᠯᠠ ᠪᠣᠯᠬᠤ ᠶ᠋ᠢ ᠬᠠᠰᠠᠷ ᠰᠠᠢᠰᠢᠶᠠᠨ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ ᠲᠡᠮᠦᠵᠢᠨ ᠳᠡᠮᠵᠢᠵᠦ ᠲᠡᠷᠡ ᠳᠣᠣᠷᠠ ᠪᠠᠨ ᠬᠥᠮᠦᠨ ᠲᠣᠮᠢᠯᠠᠵᠤ ᠬᠠᠰᠠᠷ ᠢ᠋ᠶ᠋ᠠᠷ ᠲᠣᠯᠣᠭᠠᠢᠯᠠᠭᠤᠯᠤᠨ ᠪᠢᠴᠢᠭ ᠦᠰᠦᠭ ᠵᠢᠭᠠᠯᠭᠠᠬᠤ ᠪᠤᠯᠵᠠᠭᠠᠵᠤ ᠲᠦᠪᠡᠭ ᠦᠭᠡᠢ ᠰᠤᠷᠴᠠᠭᠠᠭᠰᠠᠨ ᠪᠢᠯᠡ᠃ ᠨᠠᠢ᠍ᠮᠠᠨ ᠢ᠋ ᠳᠠᠭᠠᠭᠤᠯᠤᠭᠰᠠᠨ ᠤ᠋ ᠬᠠᠮᠤᠭ ᠤ᠋ᠨ ᠲᠣᠮᠣ ᠣᠯᠵᠠ ᠨᠢ ᠮᠣᠩᠭᠣᠯᠴᠤᠳ ᠤᠢᠭᠤᠷ ᠤ᠋ᠨ ᠪᠢᠴᠢᠭ ᠦᠰᠦᠭ ᠬᠡᠷᠡᠭᠯᠡᠬᠦ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠶᠤᠮ᠃ ᠨᠠᠢ᠍ᠮᠠᠨ ᠢ᠋ ᠳᠠᠷᠤᠭᠰᠠᠨ ᠤ᠋ ᠳᠠᠷᠠᠭᠠ ᠲᠡᠮᠦᠵᠢᠨ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠠᠯᠲᠠᠢ ᠶ᠋ᠢᠨ ᠨᠢᠷᠤᠭᠤᠨ ᠤ᠋ ᠥᠪᠥᠷ ᠲᠦ᠍ ᠡᠪᠦᠯᠵᠢᠵᠦ ᠪᠠᠢᠲᠠᠯᠠ ᠡᠨᠡ ᠮᠡᠲᠦ ᠶᠠᠪᠤᠳᠠᠯ ᠪᠣᠯᠵᠠᠢ᠃
ᠵᠠᠮᠤᠬᠠ ᠲᠠᠢ ᠬᠥᠭᠡᠭᠡᠴᠡᠯᠳᠦᠭᠰᠡᠭᠡᠷ ᠴᠡᠷᠢᠭ ᠢ᠋ᠶ᠋ᠡᠨ ᠶᠠᠳᠠᠷᠠᠭᠠᠵᠤ᠂ ᠮᠣᠷᠢᠳ ᠢ᠋ᠶ᠋ᠠᠨ ᠡᠴᠡᠭᠡᠭᠰᠡᠨ ᠪᠤᠭᠤᠷᠴᠢ ᠶ᠋ᠢ ᠭᠤᠷᠠᠩᠬᠤᠯᠠᠭᠰᠠᠨ ᠨᠣᠬᠠᠢ ᠰᠢᠭ᠋ ᠦᠯᠭᠡ ᠰᠠᠯᠭᠠᠨ ᠢᠷᠡᠬᠦ ᠳ᠋ᠦ᠍ ᠲᠡᠮᠦᠵᠢᠨ ᠣᠭᠲᠣ ᠠᠭᠤᠷᠯᠠᠵᠤ ᠬᠢᠯᠢᠩᠨᠡᠭᠰᠡᠨ ᠦᠭᠡᠢ ᠪᠡᠷ ᠪᠠᠷᠠᠬᠤ ᠦᠭᠡᠢ ᠲᠡᠭᠦᠨ ᠳ᠋ᠦ᠍ ᠨᠠᠢ᠍ᠮᠠᠨ ᠤ᠋ ᠢᠷᠭᠡᠳ ᠡᠴᠡ ᠮᠠᠰᠢ ᠣᠯᠠᠨ ᠢ᠋ ᠱᠠᠩᠨᠠᠨ ᠥᠭᠪᠡ᠃ ᠣᠳᠣ ᠵᠠᠮᠤᠬᠠ ᠨᠦᠬᠡᠨ ᠦ᠌ ᠣᠭᠣᠲᠣᠨᠠ ᠰᠢᠭ᠋ ᠠᠶᠤᠯ ᠦᠭᠡᠢ ᠪᠣᠯᠵᠤ ᠲᠡᠭᠦᠨ ᠦ᠌ ᠲᠣᠯᠣᠭᠠᠢ ᠬᠣᠷᠭᠣᠳᠠᠵᠤ ᠪᠠᠢᠭᠰᠠᠨ ᠨᠠᠢ᠍ᠮᠠᠨ ᠠᠢᠮᠠᠭ ᠨᠢᠭᠡᠨᠲᠡ ᠰᠥᠨᠥᠭᠰᠡᠨ ᠲᠤᠯᠠ ᠲᠡᠮᠦᠵᠢᠨ ᠲᠡᠢᠨ ᠰᠡᠳᠬᠢᠯ ᠥᠭᠡᠳᠡᠷᠡᠭ ᠪᠠᠢᠯᠠ᠃ ᠶᠡᠷᠦ ᠨᠢ ᠲᠡᠷᠡ ᠪᠤᠭᠤᠷᠴᠢ ᠳ᠋ᠤ᠌ ᠵᠢᠮᠡᠯᠡᠵᠦ ᠬᠢᠯᠢᠩᠨᠡᠭᠰᠡᠨ ᠬᠠᠲᠠᠭᠤ ᠦᠭᠡ ᠬᠡᠯᠡᠭᠰᠡᠨ ᠨᠢ ᠲᠣᠭᠠ ᠲᠠᠢ᠃ ᠲᠡᠭᠡᠵᠦ ᠬᠡᠯᠡᠯᠡ ᠴᠦ᠍ ᠡᠨᠡ ᠨᠢ ᠵᠥᠪᠬᠡᠨ ᠪᠤᠰᠤᠳ ᠨᠥᠬᠥᠳ ᠲᠦ᠍ ᠠᠩᠬᠠᠷᠤᠭᠤᠯᠵᠤ᠂ ᠤᠬᠠᠭᠠᠷᠠᠭᠤᠯᠬᠤ ᠶ᠋ᠢᠨ ᠲᠤᠯᠠᠳᠠ ᠬᠡᠯᠡᠳᠡᠭ ᠪᠠᠢᠪᠠ᠃ ᠡᠭᠦᠨ ᠢ᠋ ᠪᠤᠭᠤᠷᠴᠢ ᠮᠡᠳᠡᠬᠦ ᠲᠤᠯᠠ ᠰᠡᠳᠬᠢᠯ ᠬᠠᠩᠬᠤᠯᠤᠭᠤᠨ ᠪᠠᠢᠬᠤ ᠪᠥᠯᠥᠭᠡ᠃ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠳᠠᠶᠠᠨ ᠬᠠᠨ ᠤ᠋ ᠳᠣᠪᠲᠣᠯᠬᠤ ᠮᠠᠭᠤ ᠰᠠᠨᠠᠭᠠ ᠶ᠋ᠢ ᠬᠡᠯᠡᠵᠦ ᠢᠷᠡᠭᠰᠡᠨ ᠲᠡᠷᠡ ᠣᠳᠣᠢ ᠭᠡᠭᠴᠢ ᠶ᠋ᠢ ᠲᠡᠮᠦᠵᠢᠨ ᠰᠠᠢᠰᠢᠶᠠᠵᠤ ᠬᠠᠭᠤᠴᠢᠨ ᠳᠠᠶᠠᠨ ᠬᠠᠨ ᠤ᠋ ᠡᠳ᠋ᠯᠡᠵᠦ ᠪᠠᠢᠭᠰᠠᠨ ᠥᠷᠭᠥᠭᠡ ᠭᠡᠷ᠂ ᠲᠣᠭᠣᠭᠠᠴᠢ᠂ ᠰᠢᠪᠡᠭᠴᠢᠳ ᠢ᠋ ᠱᠠᠩᠨᠠᠨ ᠣᠯᠭᠣᠪᠠ᠃ ᠲᠡᠮᠦᠵᠢᠨ ᠥᠪᠡᠷ ᠲᠦ᠋ᠨᠢ ᠬᠡᠷᠡᠭᠲᠡᠢ ᠴᠢᠬᠤᠯᠠ ᠬᠣᠪ ᠮᠡᠳᠡᠭᠡ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠬᠡᠨ ᠢ᠋ ᠴᠦ᠍ ᠪᠣᠯᠪᠠ ᠥᠭᠭᠢᠶᠡᠮᠦᠷ ᠰᠡᠳᠬᠢᠯ ᠢ᠋ᠶ᠋ᠡᠷ ᠱᠠᠩᠨᠠᠨ ᠤᠷᠮᠠᠰᠢᠭᠤᠯᠳᠠᠭ ᠢ᠋ ᠨᠢ ᠮᠣᠩᠭᠣᠯ ᠤ᠋ᠨ ᠲᠠᠯᠠ ᠳᠠᠶᠠᠭᠠᠷ ᠰᠠᠢᠨ ᠮᠡᠳᠡᠬᠦ ᠪᠣᠯᠤᠭᠰᠠᠨ ᠲᠤᠯᠠ ᠥᠷᠢᠰᠦᠯᠳᠦᠭᠴᠢ ᠠᠢᠮᠠᠭ ᠤ᠋ᠳ ᠠ᠋ᠴᠠ ᠲᠤᠷᠰᠢᠭᠤᠯ ᠲᠠᠩᠨᠠᠭᠤᠯ ᠣᠯᠬᠤ ᠨᠢ ᠲᠤᠢᠯ ᠤ᠋ᠨ ᠠᠮᠠᠷ ᠬᠢᠯᠪᠠᠷ ᠪᠣᠯᠤᠭᠰᠠᠨ ᠪᠢᠯᠡ᠃ ᠡᠨᠡ ᠠᠷᠭᠠ ᠪᠠᠨ ᠲᠡᠷᠡ ᠣᠯᠠᠨᠲᠠ ᠬᠡᠷᠡᠭᠯᠡᠵᠦ ᠲᠤᠷᠰᠢᠭᠰᠠᠭᠠᠷ ᠪᠦᠷ ᠪᠠᠢᠩᠭᠤ ᠶ᠋ᠢᠨ ᠲᠠᠩᠨᠠᠨ ᠲᠤᠷᠰᠢᠬᠤ ᠠᠯᠪᠠ ᠶ᠋ᠢ ᠤᠬᠤᠨᠠ ᠪᠠᠷ ᠲᠣᠯᠣᠭᠠᠢᠯᠠᠭᠤᠯᠤᠨ ᠪᠠᠢᠭᠤᠯᠵᠠᠢ᠃ ᠬᠣᠵᠢᠮ ᠨᠢ ᠡᠨᠡ ᠠᠯᠪᠠ ᠮᠣᠩᠭᠣᠯᠴᠤᠳ ᠤ᠋ᠨ ᠶᠡᠬᠡ ᠠᠶᠠᠨ ᠲᠡᠢᠨ ᠦ᠌ ᠪᠡᠯᠡᠳᠬᠡᠯ ᠢ᠋ ᠬᠠᠩᠭᠠᠬᠤ᠂ ᠳᠠᠢᠰᠤᠨ ᠤ᠋ ᠳᠤᠮᠳᠠ ᠥᠪᠡᠷ ᠦ᠋ᠨ ᠬᠥᠮᠦᠰ ᠢ᠋ᠶ᠋ᠡᠨ ᠣᠷᠣᠭᠤᠯᠵᠤ ᠪᠠᠢᠯᠳᠤᠭᠠᠨ ᠤ᠋ ᠭᠠᠷᠤᠵᠠ ᠬᠣᠬᠢᠷᠠᠯ ᠢ᠋ ᠪᠠᠭᠠᠰᠬᠠᠬᠤ᠂ ᠢᠯᠠᠭᠳᠠᠯ ᠢ᠋ ᠲᠦᠷᠭᠡᠰᠬᠡᠬᠦ᠂ ᠳᠠᠢᠰᠤᠨ ᠢ᠋ᠶ᠋ᠠᠨ ᠶᠠᠮᠠᠷ ᠴᠤ᠌ ᠬᠣᠬᠢᠷᠠᠯ ᠲᠡᠮᠡᠴᠡᠯ ᠦᠭᠡᠢ ᠪᠡᠷ ᠪᠠᠭᠤᠯᠭᠠᠨ ᠠᠪᠬᠤ ᠳ᠋ᠤ᠌ ᠴᠢᠭᠯᠡᠭᠰᠡᠨ ᠡᠯᠳᠡᠪ ᠨᠢᠭᠤᠴᠠ ᠠᠵᠢᠯ ᠶᠠᠪᠤᠭᠤᠯᠭᠠ ᠬᠢᠬᠦ ᠵᠡᠷᠭᠡ ᠪᠡᠷ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠪᠣᠯᠤᠨ ᠲᠡᠭᠦᠨ ᠦ᠌ ᠵᠠᠯᠭᠠᠮᠵᠢᠯᠠᠭᠴᠢᠳ ᠤ᠋ᠨ ᠶᠡᠬᠡ ᠦᠢᠯᠡᠰ ᠲᠦ᠍ ᠨᠡᠩ ᠴᠢᠬᠤᠯᠠ ᠡᠭᠦᠷᠭᠡ ᠭᠦᠢᠴᠡᠳᠬᠡᠭᠰᠡᠨ ᠪᠢᠯᠡ᠃
ᠮᠣᠩᠭᠣᠯ ᠠᠢᠮᠠᠭ ᠤ᠋ᠳ ᠤ᠋ᠨ ᠬᠠᠮᠤᠭ ᠤ᠋ᠨ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠣᠷᠣᠰᠢᠬᠤ ᠨᠠᠢ᠍ᠮᠠᠨ ᠪᠣᠯ ᠪᠤᠰᠤᠳ ᠠᠢᠮᠠᠭ ᠤ᠋ᠳ ᠠ᠋ᠴᠠ ᠰᠣᠶᠣᠯ ᠠᠬᠤᠢ ᠨᠢ ᠲᠦᠯᠬᠢᠭᠦᠦ ᠬᠥᠭᠵᠢᠭᠰᠡᠨ᠂ ᠢᠯᠡᠭᠦᠦ ᠪᠠᠶᠠᠨ ᠴᠢᠨᠡᠭᠡᠯᠢᠭ᠂ ᠪᠦᠷ ᠥᠪᠡᠷ ᠦ᠋ᠨ ᠪᠢᠴᠢᠭ ᠦᠰᠦᠭ ᠲᠡᠢ ᠪᠠᠢᠭᠰᠠᠨ ᠨᠢ ᠲᠡᠮᠦᠵᠢᠨ ᠳ᠋ᠦ᠍ ᠶᠡᠬᠡ ᠶ᠋ᠢ ᠪᠣᠳᠣᠭᠳᠠᠭᠤᠯᠵᠤ ᠨᠠᠢ᠍ᠮᠠᠨ ᠠ᠋ᠴᠠ ᠪᠠᠷᠠᠭᠤᠨ ᠲᠠᠢᠰᠢ ᠪᠠᠢᠬᠤ ᠤᠯᠤᠰ ᠤ᠋ᠳ ᠢ᠋ ᠶᠡᠬᠡᠳᠡ ᠰᠣᠨᠢᠷᠬᠠᠬᠤ ᠪᠣᠯᠤᠭᠰᠠᠨ ᠪᠥᠭᠡᠳ ᠤᠯᠠᠮ ᠢ᠋ᠶ᠋ᠠᠷ ᠯᠠᠯᠤ ᠶ᠋ᠢᠨ ᠮᠥᠷᠭᠥᠯᠲᠡᠨ ᠨᠦ᠍ᠭᠦᠳ ᠦ᠋ᠨ ᠠᠮᠢᠳᠤᠷᠠᠯ᠂ ᠬᠡᠯᠡ ᠶ᠋ᠢ ᠮᠡᠳᠡᠬᠦ ᠥᠪᠡᠷ ᠦ᠋ᠨ ᠰᠢᠳᠠᠷ ᠤᠬᠤᠨᠠ ᠶ᠋ᠢ ᠬᠤᠳᠠᠯᠳᠤᠭᠠ ᠬᠢᠬᠦ ᠨᠡᠷᠡ ᠪᠡᠷ ᠲᠠᠩᠨᠠᠭᠤᠯ ᠳ᠋ᠤ᠌ ᠶᠠᠪᠤᠭᠤᠯᠵᠠᠢ᠃ ᠬᠠᠷᠢᠨ ᠣᠳᠣ ᠴᠡᠷᠢᠭ ᠢ᠋ᠶ᠋ᠡᠨ ᠠᠮᠠᠷᠠᠵᠤ ᠳᠠᠭᠤᠰᠤᠮᠠᠭᠴᠠ ᠬᠡᠳᠦᠨ ᠭᠣᠣᠯ ᠳᠠᠮᠵᠢᠨ ᠵᠢᠭᠤᠲᠠᠭᠰᠠᠭᠠᠷ ᠪᠠᠢᠭᠠ ᠥᠰᠲᠦ ᠮᠡᠷᠭᠢᠳ ᠦ᠋ᠨ ᠦᠯᠡᠳᠡᠭᠳᠡᠯ ᠢ᠋ ᠦᠷᠡ ᠦᠨᠳᠦᠰᠦ ᠦᠭᠡᠢ ᠪᠣᠯᠲᠠᠯᠠ ᠨᠢ ᠤᠰᠠᠳᠬᠠᠨ ᠰᠥᠨᠥᠭᠡᠬᠦ ᠬᠡᠷᠡᠭ ᠲᠤᠯᠭᠠᠷᠠᠭᠠᠳ ᠪᠠᠢᠪᠠ᠃ ᠲᠡᠳᠡᠨ ᠢ᠋ ᠦᠭᠡᠢ ᠬᠢᠪᠡᠯ ᠮᠣᠩᠭᠣᠯ ᠠᠢᠮᠠᠭ ᠤ᠋ᠳ ᠪᠦᠭᠦᠳᠡ ᠲᠡᠭᠦᠨ ᠳ᠋ᠦ᠍ ᠡᠵᠡᠯᠡᠭᠳᠡᠨ ᠵᠠᠬᠢᠷᠤᠭᠳᠠᠬᠤ ᠪᠥᠯᠥᠭᠡ᠃
ᠵᠠᠮᠤᠬᠠ ᠪᠤᠭᠤᠷᠴᠢ ᠠ᠋ᠴᠠ ᠠᠵᠠ ᠪᠠᠷ ᠠᠮᠢ ᠮᠤᠯᠲᠤᠷᠠᠨ ᠭᠠᠷᠴᠤ ᠪᠦᠷ ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠨᠢᠭᠤᠷ ᠪᠤᠷᠤᠭᠤᠯᠠᠨ ᠵᠢᠭᠤᠲᠠᠭᠰᠠᠭᠠᠷ ᠲᠠᠩᠨᠤ ᠠᠭᠤᠯᠠᠨ ᠳ᠋ᠤ᠌ ᠬᠦᠷᠴᠦ ᠰᠠᠶᠢ ᠨᠢᠭᠡ ᠠᠮᠤᠰᠬᠢᠨ ᠬᠡᠳᠦᠨ ᠰᠠᠷᠠ ᠶ᠋ᠢ ᠦᠳᠡᠵᠡᠢ᠃ ᠬᠣᠭᠣᠯᠠ ᠬᠦᠨᠡᠰᠦ ᠦᠭᠡᠢ ᠥᠯᠥᠰᠴᠦ ᠴᠠᠩᠭᠠᠵᠤ ᠣᠯᠠᠨ ᠴᠤ᠌ ᠬᠣᠨᠣᠭ ᠬᠡᠪᠲᠡᠪᠡ᠃ ᠣᠳᠣ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠬᠠᠨᠳᠡᠮᠦᠷ ᠲᠡᠢ ᠨᠡᠢᠯᠡᠭᠡᠳ ᠲᠠᠪᠤᠨ ᠴᠡᠷᠢᠭ ᠯᠡ ᠦᠯᠡᠳᠡᠭᠰᠡᠨ ᠪᠠᠢᠪᠠ᠃ ᠰᠡᠭᠦᠯ ᠳ᠋ᠡᠭᠡᠨ ᠠᠮᠢ ᠵᠢᠭᠤᠬᠤ ᠶ᠋ᠢᠨ ᠲᠤᠯᠠᠳᠠ ᠨᠤᠲᠤᠭ ᠤ᠋ᠨ ᠠᠢᠯ ᠠᠮᠢᠲᠠᠨ ᠢ᠋ ᠳᠡᠭᠡᠷᠡᠮᠳᠡᠬᠦ ᠴᠦ᠍ ᠵᠢᠷ ᠦ᠋ᠨ ᠶᠠᠪᠤᠳᠠᠯ ᠪᠣᠯᠵᠠᠢ᠃ ᠡᠪᠦᠯ ᠥᠩᠭᠡᠷᠡᠵᠦ ᠬᠠᠪᠤᠷ᠂ ᠪᠦᠷ ᠵᠤᠨ ᠪᠣᠯᠪᠠ᠃ ᠠᠭᠤᠯᠠᠨ ᠳ᠋ᠤ᠌ ᠬᠥᠬᠥᠭᠡ ᠳᠣᠩᠭᠣᠳᠴᠤ᠂ ᠤᠰᠤᠨ ᠳ᠋ᠤ᠌ ᠬᠤᠨ ᠭᠠᠯᠠᠭᠤ ᠢᠷᠡᠨ ᠴᠡᠩᠭᠡᠵᠦ ᠤᠷᠠᠨ ᠪᠠᠢᠭᠠᠯᠢ ᠪᠦᠬᠦᠢ ᠯᠡ ᠥᠩᠭᠡ ᠪᠡᠷ ᠢ᠋ᠶ᠋ᠡᠨ ᠳᠡᠯᠭᠡᠷᠡᠨ ᠭᠠᠵᠠᠷ ᠳᠡᠯᠡᠬᠡᠢ ᠳᠡᠭᠡᠷᠡ ᠦᠬᠦᠯ ᠵᠣᠪᠠᠯᠠᠩ᠂ ᠦᠭᠡᠢᠷᠡᠯ ᠬᠣᠭᠣᠰᠣᠷᠠᠯ ᠢᠷᠡᠬᠦ ᠦᠭᠡᠢ ᠮᠡᠲᠦ ᠪᠠᠶᠠᠨ ᠦᠵᠡᠰᠬᠦᠯᠡᠩᠲᠡᠢ ᠵᠤᠨ ᠪᠣᠯᠤᠯᠠ᠃
ᠲᠤᠷᠠᠩᠬᠠᠢ ᠴᠤ᠌ ᠭᠡᠯᠡ ᠠᠷᠭᠠᠯᠢ ᠠᠯᠠᠵᠤ ᠰᠢᠷᠠᠵᠤ ᠢᠳᠡᠭᠰᠡᠨ ᠲᠡᠷᠡ ᠡᠳᠦᠷ ᠵᠠᠮᠤᠬᠠ ᠡᠴᠦᠰ ᠦ᠋ᠨ ᠦᠭᠡ ᠪᠡᠨ ᠬᠠᠨᠲᠡᠮᠦᠷ ᠲᠦ᠍ ᠬᠡᠯᠡᠵᠦ ᠡᠨᠡ ᠭᠤᠨᠢᠭᠲᠤ ᠲᠡᠦᠬᠡ ᠪᠡᠨ ᠲᠡᠭᠦᠰᠬᠡᠯ ᠪᠣᠯᠭᠠᠬᠤ ᠪᠠᠷ ᠰᠢᠢᠳᠴᠡᠢ᠃ ᠰᠢᠷᠠᠭᠰᠠᠨ ᠮᠢᠬᠠ ᠢᠳᠡᠵᠦ᠂ ᠭᠡᠳᠡᠰᠦ ᠭᠠᠷᠤᠭᠰᠠᠨ ᠴᠡᠷᠢᠭ ᠦ᠋ᠳ ᠲᠣᠷᠭᠠᠨ ᠵᠦᠯᠭᠡᠨ ᠳᠡᠭᠡᠷᠡ ᠤᠨᠳᠤᠢ ᠰᠤᠨᠳᠤᠢ ᠲᠡᠷᠡᠢᠨ ᠤᠨᠠᠭᠠᠳ ᠬᠠᠮᠠᠷ ᠢ᠋ᠶ᠋ᠠᠨ ᠰᠡᠳᠡᠷᠡᠲᠡᠯᠡ ᠬᠤᠷᠬᠢᠷᠠᠨ ᠤᠨᠲᠠᠨᠠ᠃ ᠭᠠᠭᠴᠠᠬᠠᠨ ᠬᠠᠨᠲᠡᠮᠦᠷ ᠯᠡ ᠡᠵᠡᠨ ᠳ᠋ᠡᠭᠡᠨ ᠮᠢᠬᠠ ᠰᠢᠷᠠᠵᠤ ᠥᠭᠬᠦ ᠭᠡᠵᠦ ᠲᠦᠳᠡᠭ ᠦ᠋ᠨ ᠳᠡᠷᠭᠡᠳᠡ ᠪᠥᠷᠲᠥᠢᠨᠡ᠃ ᠤᠭ ᠨᠢ ᠠᠷᠭᠠᠯᠢ ᠶ᠋ᠢᠨ ᠮᠢᠬᠠ ᠶ᠋ᠢ ᠬᠠᠷᠠᠴᠤ ᠪᠣᠭᠣᠯ ᠬᠥᠮᠦᠨ ᠢᠳᠡᠬᠦ ᠶᠣᠰᠣ ᠦᠭᠡᠢ ᠶᠤᠮ᠃ ᠭᠡᠪᠡᠴᠦ ᠡᠢᠮᠦ ᠦᠶᠡ ᠳ᠋ᠦ᠍ ᠬᠡᠨ ᠬᠠᠭᠠᠨ ᠡᠵᠡᠨ᠂ ᠬᠠᠷᠠᠴᠤ ᠪᠣᠭᠣᠯ ᠭᠡᠵᠦ ᠢᠯᠭᠠᠬᠤ ᠪᠢᠯᠡ᠃ ᠥᠯᠥᠰᠦᠭᠰᠡᠨ ᠬᠣᠳᠣᠭᠣᠳᠣ ᠬᠥᠮᠦᠨ ᠪᠦᠷᠢ ᠳ᠋ᠦ᠍ ᠠᠳᠠᠯᠢᠬᠠᠨ ᠲᠤᠯᠠ ᠲᠦᠭᠦᠬᠡᠢ ᠮᠢᠬᠠ ᠶ᠋ᠢ ᠥᠩᠭᠡ ᠬᠤᠪᠢᠷᠠᠭᠠᠭᠰᠠᠨ ᠲᠡᠳᠦᠢ ᠪᠣᠯᠣᠮᠠᠭᠴᠠ ᠤᠯᠠᠭᠠᠨ ᠰᠢᠭᠦᠰᠦ ᠶ᠋ᠢ ᠨᠢ ᠡᠷᠡᠦ ᠵᠠᠪᠠᠵᠢ ᠪᠠᠷ ᠰᠠᠪᠢᠷᠠᠭᠤᠯᠤᠨ ᠴᠢᠨᠣᠠ ᠰᠢᠭ᠋ ᠠᠷᠬᠢᠷᠠᠬᠤ ᠨᠢ ᠬᠣᠯᠠ ᠦᠭᠡᠢ ᠤᠷᠤᠯᠳᠤᠨ ᠢᠳᠡᠵᠡᠭᠡᠵᠡᠢ᠃ ᠬᠠᠷᠢᠨ ᠵᠠᠮᠤᠬᠠ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠴᠠᠳᠬᠤ ᠶ᠋ᠢ ᠲᠡᠪᠴᠢᠶᠡᠷᠢ ᠲᠡᠢ ᠬᠦᠯᠢᠶᠡᠨ ᠬᠣᠭᠣᠰᠣᠨ ᠬᠣᠳᠣᠭᠣᠳᠣ ᠪᠠᠨ ᠬᠤᠷᠴᠢᠭᠢᠨᠠᠨ ᠳᠤᠤᠭᠠᠷᠬᠤ ᠶ᠋ᠢ ᠰᠣᠨᠣᠰᠤᠨ ᠰᠠᠭᠤᠪᠠ᠃ ᠬᠠᠨᠲᠡᠮᠦᠷ ᠥᠷᠥᠴᠡ ᠨᠢ ᠨᠢᠷᠤᠭᠤᠨ ᠳ᠋ᠠᠭᠠᠨ ᠨᠠᠭᠠᠯᠳᠤᠲᠠᠯᠠ ᠪᠠᠨ ᠥᠯᠥᠰᠦᠭᠰᠡᠨ ᠴᠡᠷᠢᠭ ᠦ᠋ᠳ ᠡᠴᠡ ᠥᠷᠢᠰᠦᠨ ᠰᠠᠯᠭᠠᠵᠤ ᠠᠪᠤᠭᠰᠠᠨ ᠠᠷᠭᠠᠯᠢ ᠶ᠋ᠢᠨ ᠭᠤᠶᠠ ᠪᠠᠨ ᠲᠤᠬᠠᠲᠠᠢᠬᠠᠨ ᠰᠢᠷᠠᠵᠤ ᠪᠠᠢᠯᠠ᠃ ᠰᠠᠢᠲᠤᠷ ᠪᠣᠯᠬᠤ ᠶ᠋ᠢ ᠬᠦᠯᠢᠶᠡᠨ ᠪᠠᠢᠨ ᠪᠠᠢᠨ ᠡᠷᠭᠢᠭᠦᠯᠵᠦ ᠲᠣᠭᠣᠷᠢᠭᠤᠯᠤᠨ ᠰᠢᠷᠠᠨᠠ᠃ ᠵᠠᠮᠤᠬᠠ ᠡᠵᠡᠨ ᠦᠭᠡᠢ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠨ ᠲᠦᠳᠡᠭ ᠦ᠋ᠨ ᠭᠠᠯ ᠰᠢᠷᠲᠡᠨ ᠰᠠᠭᠤᠪᠠ᠃ ᠦᠵᠡᠰᠬᠦᠯᠡᠩᠲᠦ ᠪᠠᠢᠭᠠᠯᠢ᠂ ᠰᠢᠪᠠᠭᠤᠳ ᠤ᠋ᠨ ᠵᠢᠷᠭᠢᠭᠡᠨ ᠳᠤᠮᠳᠠ ᠰᠢᠷᠠᠭᠰᠠᠨ ᠮᠢᠬᠠᠨ ᠤ᠋ ᠰᠠᠢᠬᠠᠨ ᠦᠨᠦᠷ ᠬᠠᠩᠬᠤᠯᠬᠤ ᠨᠢ ᠶᠡᠷᠦ ᠳ᠋ᠧᠪᠠᠵᠠᠨ ᠮᠡᠲᠦ᠃ ᠬᠠᠨᠲᠡᠮᠦᠷ ᠬᠣᠷᠣᠮ ᠪᠣᠯᠪᠠᠴᠤ ᠲᠤᠢᠯ ᠤ᠋ᠨ ᠵᠢᠷᠭᠠᠯᠲᠠᠢ ᠪᠠᠢᠯᠠ᠃
— ᠬᠥᠷ ᠬᠠᠭᠠᠨ ᠲᠠ ᠰᠢᠷᠠᠭᠰᠠᠨ ᠮᠢᠬᠠ ᠪᠠᠨ ᠵᠣᠭᠣᠭᠯᠠ᠃
ᠬᠠᠨᠲᠡᠮᠦᠷ ᠦ᠋ᠨ ᠬᠡᠯᠡᠭᠰᠡᠨ ᠬᠣᠭᠣᠰᠣᠨ ᠬᠦᠨᠳᠦᠯᠡᠯ ᠦ᠋ᠨ ᠦᠭᠡ ᠣᠳᠣ ᠲᠣᠮᠣᠳᠠᠭᠰᠠᠨ ᠬᠤᠪᠴᠠᠰᠤ ᠮᠡᠲᠦ ᠲᠡᠭᠡᠭᠡᠷᠡ ᠲᠡᠢ ᠰᠠᠨᠠᠭᠳᠠᠪᠠᠴᠤ ᠵᠠᠮᠤᠬᠠ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠪᠥᠰᠡᠨ ᠡᠴᠡ ᠪᠡᠨ ᠬᠢᠲᠤᠭᠠ ᠪᠠᠨ ᠰᠤᠭᠤᠯᠤᠨ ᠠᠪᠴᠤ ᠰᠢᠷᠠᠭᠰᠠᠨ ᠮᠢᠬᠠ ᠤᠷᠤᠭᠤ ᠳᠠᠭᠠᠷᠢᠨ ᠣᠷᠣᠪᠠ᠃ ᠪᠦᠲᠦᠨ ᠭᠤᠶᠠᠨ ᠤ᠋ ᠮᠢᠬᠠ ᠢᠳᠡᠵᠦ ᠪᠤᠯᠠᠭ ᠤ᠋ᠨ ᠬᠦᠢᠲᠡᠨ ᠤᠰᠤ ᠤᠤᠭᠤᠭᠠᠳ ᠰᠠᠶᠢ ᠨᠢᠭᠡ ᠴᠠᠳᠤᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠵᠦ ᠵᠥᠭᠡᠯᠡᠨ ᠨᠣᠭᠣᠭᠠᠨ ᠳᠡᠭᠡᠷᠡ ᠬᠡᠪᠲᠡᠮᠡᠭᠴᠡ ᠨᠣᠢᠷ ᠨᠢ ᠬᠦᠷᠴᠦ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠨᠢᠳᠦ ᠠᠨᠢᠯᠳᠤᠨᠠ᠃ ᠵᠠᠮᠤᠬᠠ ᠤᠨᠲᠠᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠰᠠᠨᠠᠭᠠᠳ ᠥᠨᠳᠡᠢᠬᠦ ᠳ᠋ᠦ᠍ ᠡᠵᠡᠨ ᠨᠢ ᠨᠢᠭᠡ ᠶᠠᠭᠤᠮᠠ ᠬᠡᠯᠡᠬᠦ ᠭᠡᠳ ᠪᠠᠢᠭᠠ ᠶ᠋ᠢ ᠴᠢᠷᠠᠢ ᠪᠠᠷ ᠨᠢ ᠭᠠᠳᠠᠷᠯᠠᠭᠰᠠᠨ ᠬᠠᠨᠲᠡᠮᠦᠷ ᠲᠡᠭᠦᠨ ᠳ᠋ᠦ᠍ ᠣᠢᠷᠠᠲᠤᠨ ᠰᠠᠭᠤᠪᠠ᠃ ᠠᠮᠢ ᠥᠷᠢᠰᠦᠭᠰᠡᠨ ᠳᠣᠯᠣᠭᠠᠨ᠂ ᠦᠬᠦᠯ ᠴᠢᠰᠤ ᠪᠦᠭᠦᠳᠡ ᠠᠷᠤ ᠳ᠋ᠤ᠌ ᠦᠯᠡᠳᠡᠭᠡᠳ ᠡᠨᠳᠡ ᠮᠣᠳᠣᠳ ᠤ᠋ᠨ ᠳᠤᠮᠳᠠ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤ᠌ ᠰᠢᠷᠠᠭᠰᠠᠨ ᠮᠢᠬᠠᠨ ᠤ᠋ ᠦᠨᠦᠷ ᠬᠠᠩᠬᠤᠯᠤᠨ ᠨᠡᠩ ᠲᠠᠭᠠᠲᠠᠢ᠂ ᠬᠡᠨ ᠪᠣᠯᠪᠠᠴᠤ ᠲᠠᠢᠪᠤᠰᠢᠷᠠᠨ ᠨᠠᠮ ᠤᠨᠲᠠᠮᠠᠷ ᠠᠵᠢ᠃
ᠬᠠᠨᠲᠡᠮᠦᠷ ᠠ᠋᠃ ᠴᠢᠮᠠ ᠳ᠋ᠤ᠌ ᠶᠡᠷᠦ ᠨᠢ ᠦᠬᠦᠬᠦ ᠳ᠋ᠦ᠍ ᠬᠠᠷᠠᠮᠰᠠᠬᠤ ᠵᠦᠢᠯ ᠪᠣᠢ ᠤᠤ? ᠭᠡᠵᠦ ᠵᠠᠮᠤᠬᠠ ᠭᠡᠨᠡᠳᠲᠡ ᠠᠰᠠᠭᠤᠪᠠ᠃ ᠬᠠᠨᠲᠡᠮᠦᠷ ᠶᠠᠭᠤ ᠭᠡᠵᠦ ᠬᠠᠷᠢᠭᠤ ᠬᠡᠯᠡᠬᠦ ᠪᠡᠨ ᠲᠡᠷᠡ ᠳᠣᠣᠷᠠ ᠪᠠᠨ ᠪᠣᠳᠣᠵᠤ ᠣᠯᠤᠭᠰᠠᠨ ᠦᠭᠡᠢ᠃ ᠡᠨᠡ ᠦᠭᠡ ᠠᠮᠢ ᠪᠠᠨ ᠬᠣᠣᠷᠯᠠᠵᠤ ᠦᠬᠦᠶᠡ ᠭᠡᠰᠡᠨ ᠲᠡᠢ ᠠᠳᠠᠯᠢ ᠰᠣᠨᠣᠰᠳᠠᠭᠠᠳ ᠪᠠᠢᠪᠠ᠃ ᠠᠮᠠ ᠨᠡᠭᠡᠭᠡᠬᠦ ᠡᠴᠡ ᠡᠮᠦᠨᠡ ᠡᠵᠡᠨ ᠦ᠌ ᠪᠡᠨ ᠥᠨᠥᠴᠢᠷᠡᠭᠰᠡᠨ ᠰᠡᠳᠬᠢᠯ ᠢ᠋ ᠲᠠᠢᠳᠬᠤᠷᠠᠭᠤᠯᠵᠤ ᠦᠬᠦᠯ ᠦ᠋ᠨ ᠲᠤᠬᠠᠢ ᠪᠣᠳᠣᠯ ᠠ᠋ᠴᠠ ᠰᠠᠯᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠲᠠᠭᠠᠷᠠᠬᠤ ᠠᠶᠠᠲᠠᠢ ᠦᠭᠡ ᠣᠯᠬᠤ ᠭᠡᠵᠦ ᠬᠡᠰᠡᠭ ᠪᠣᠳᠣᠪᠠ᠃
— ᠬᠥᠷ ᠬᠠᠭᠠᠨ᠃ ᠪᠢ ᠲᠠᠨ ᠢ᠋ ᠦᠭᠡᠢ ᠪᠣᠯᠪᠠᠯ ᠠᠮᠢᠳᠤ ᠶᠠᠪᠤᠭᠠᠳ ᠶᠠᠭᠤ ᠬᠢᠨᠡ᠃ ᠦᠬᠦᠬᠦ ᠳ᠋ᠦ᠍ ᠬᠦᠨᠳᠦ ᠲᠡᠢ ᠰᠢᠯᠲᠠᠭᠠᠨ ᠬᠡᠷᠡᠭᠲᠡᠢ ᠪᠢᠵᠡ᠃ ᠬᠡᠷᠪᠡ ᠲᠠ ᠨᠢᠭᠡᠨᠲᠡ ᠠᠮᠢ ᠪᠠᠨ ᠦᠷᠡᠬᠦ ᠪᠡᠷ ᠰᠢᠢᠳᠦᠭᠰᠡᠨ ᠪᠣᠯ ᠡᠬᠢᠯᠡᠭᠡᠳ ᠨᠠᠮᠠᠶ᠋ᠢ ᠬᠣᠷᠣᠭᠠᠭᠲᠤᠨ᠃
ᠡᠢᠮᠦ ᠦᠭᠡ ᠰᠣᠨᠣᠰᠤᠭᠠᠳ ᠡᠵᠡᠨ ᠨᠢ ᠤᠬᠠᠭᠠᠷᠠᠵᠤ ᠤᠶᠠᠷᠠᠨᠠ ᠭᠡᠵᠦ ᠬᠠᠡᠲᠡᠮᠥᠷ ᠢᠲᠡᠭᠡᠵᠡᠢ᠃
—ᠲᠡᠢᠮᠦ ᠠ᠋ ᠃ ᠬᠠᠡᠲᠡᠮᠥᠷ ᠴᠢ ᠵᠥᠪ ᠦᠭᠡ ᠶ᠋ᠢ ᠣᠯᠵᠤ ᠬᠡᠯᠡᠪᠡ᠃ ᠵᠠᠮᠤᠬᠠ ᠨᠠᠳᠠᠳᠤ ᠠᠮᠢ ᠪᠠᠨ ᠦᠷᠡᠬᠦ ᠣᠯᠠᠨ ᠲᠦᠮᠡᠨ ᠰᠢᠯᠲᠠᠭ ᠪᠣᠢ᠃
ᠰᠠᠭᠠᠷ ᠬᠥᠮᠦᠨ ᠦ᠌ ᠦᠭᠡ ᠪᠡᠷ
ᠰᠠᠢᠨ ᠨᠥᠬᠥᠷ ᠡᠴᠡ ᠤᠷᠪᠠᠪᠠ ᠪᠢ
ᠰᠠᠭᠠᠳᠠᠭ ᠨᠣᠮᠣᠨ ᠠ᠋ᠴᠠ ᠬᠠᠭᠠᠴᠠᠵᠤ
ᠰᠠᠷᠨᠢᠬᠤ ᠮᠢᠨᠢ ᠪᠣᠯᠪᠠ ᠪᠢ
ᠤᠨᠤᠨ ᠤ᠋ ᠡᠷᠭᠢ ᠳ᠋ᠦ᠍ ᠡᠷᠭᠦᠭᠰᠡᠨ
ᠤᠨᠤᠭᠠ ᠲᠠᠩᠭᠠᠷᠢᠭ ᠡᠪᠳᠡᠪᠡ ᠪᠢ
ᠣᠨᠴᠠᠯᠠᠭᠰᠠᠨ ᠨᠥᠬᠥᠷ ᠡᠴᠡ ᠤᠷᠪᠠᠵᠤ
ᠣᠰᠣᠯ ᠶᠠᠯᠠ ᠳ᠋ᠤ᠌ ᠤᠨᠠᠪᠠ ᠪᠢ
ᠠᠲᠠᠭᠠᠲᠤ ᠡᠮᠡᠰ ᠦ᠋ᠨ ᠦᠭᠡ ᠪᠡᠷ
ᠠᠨᠳᠠ ᠠ᠋ᠴᠠ ᠰᠠᠯᠵᠤ ᠬᠠᠭᠠᠴᠠᠪᠠ ᠪᠢ
ᠠᠰᠠᠷᠠᠬᠤ ᠨᠥᠬᠥᠷ ᠦᠭᠡᠢ ᠬᠣᠴᠣᠷᠤᠭᠠᠳ
ᠠᠯᠵᠢᠶᠠᠨ ᠵᠦᠳᠡᠷᠡᠵᠦ ᠵᠣᠪᠠᠪᠠ ᠪᠢ
ᠬᠤᠷᠢᠶᠠᠭᠰᠠᠨ ᠤᠯᠤᠰ ᠢ᠋ᠶ᠋ᠠᠨ ᠰᠠᠨᠳᠤᠷᠭᠠᠵᠤ
ᠬᠤᠮᠠᠬᠢ ᠶ᠋ᠢᠨ ᠲᠣᠭᠣᠰᠣ ᠪᠣᠯᠭᠠᠪᠠ ᠪᠢ
ᠴᠤᠭᠯᠠᠭᠤᠯᠤᠭᠰᠠᠨ ᠤᠯᠤᠰ ᠢ᠋ᠶ᠋ᠠᠨ ᠪᠤᠲᠠᠷᠭᠠᠵᠤ
ᠴᠣᠭ ᠢ᠋ ᠦᠬᠦᠳᠡᠯ ᠪᠣᠯᠭᠠᠪᠠ ᠪᠢ
ᠵᠠᠮᠤᠬᠠ ᠭᠦᠨᠵᠡᠭᠡᠢ ᠭᠤᠨᠢᠭ ᠬᠠᠷᠠᠭᠤᠰᠤᠯ ᠳᠦᠭᠦᠷᠡᠩ ᠳᠠᠭᠤ ᠪᠠᠷ ᠢᠩᠭᠢᠵᠦ ᠰᠢᠯᠦᠭᠯᠡᠨ ᠬᠡᠯᠡᠪᠡ᠃ ᠪᠠᠰᠠ ᠵᠡᠭᠦᠨ ᠨᠢᠳᠦᠨ ᠡᠴᠡ ᠨᠢ ᠭᠠᠭᠴᠠ ᠳᠤᠰᠤᠯ ᠨᠢᠯᠪᠤᠰᠤ ᠲᠠᠰᠤᠷᠠᠨ ᠬᠠᠴᠠᠷ ᠢ᠋ ᠵᠦᠰᠦᠨ ᠳᠣᠭᠣᠭᠰᠢᠯᠠᠬᠤ ᠶ᠋ᠢ ᠬᠠᠡᠲᠡᠮᠥᠷ ᠵᠢᠷᠦᠬᠡ ᠪᠡᠨ ᠱᠠᠷᠬᠢᠷᠠᠭᠤᠯᠤᠨ ᠬᠠᠷᠠᠵᠤ ᠪᠠᠢᠯᠠ᠃ ᠬᠦᠴᠦᠷᠬᠡᠭ ᠵᠠᠳᠠᠷᠠᠨ ᠠᠢᠮᠠᠭ ᠢ᠋ᠶ᠋ᠠᠨ ᠮᠠᠩᠯᠠᠢᠯᠠᠨ ᠣᠯᠠᠨ ᠢ᠋ ᠪᠢᠰᠢᠷᠡᠭᠦᠯᠵᠦ ᠶᠠᠪᠤᠭᠰᠠᠨ ᠵᠢᠰᠦ ᠭᠤᠸᠠ᠂ ᠪᠡᠶᠡ ᠥᠨᠳᠥᠷ᠂ ᠵᠣᠷᠢᠭ ᠶᠡᠬᠡ ᠡᠨᠡ ᠡᠷᠡ ᠣᠳᠣ ᠠᠳᠠᠭ ᠤ᠋ᠨ ᠬᠤᠯᠠᠭᠠᠢᠴᠢ᠂ ᠠᠯᠳᠠᠭᠤᠯ ᠪᠣᠰᠬᠠᠭᠤᠯ ᠰᠢᠭ᠋ ᠬᠡᠭᠡᠷᠡ ᠪᠡᠷ ᠭᠡᠷ ᠬᠢᠵᠦ᠂ ᠬᠡᠴᠡ ᠪᠡᠷ ᠳᠡᠷᠡ ᠬᠢᠵᠦ ᠪᠥᠭᠡᠰᠦ ᠬᠢᠭᠤᠷᠰᠤᠨ ᠳ᠋ᠤ᠌ ᠪᠠᠷᠢᠭᠳᠠᠭᠠᠳ ᠪᠦᠯᠡᠬᠡ ᠰᠢᠷᠪᠥᠰᠥ ᠵᠠᠵᠢᠯᠵᠤ ᠶᠠᠪᠤᠬᠤ ᠶ᠋ᠢ ᠦᠵᠡᠬᠦ ᠨᠡᠩ ᠬᠠᠷᠠᠭᠤᠰᠤᠯ ᠡᠮᠭᠡᠨᠢᠯᠲᠡᠢ ᠠᠵᠢ᠃ ᠲᠡᠭᠦᠨ ᠦ᠌ ᠨᠢᠳᠦᠨ ᠡᠴᠡ ᠴᠢᠰᠤ ᠰᠢᠭ᠋ ᠳᠤᠰᠤᠯ ᠨᠢᠯᠪᠤᠰᠤ ᠭᠠᠷᠤᠭᠰᠠᠨ ᠨᠢ ᠠᠷᠭᠠ ᠪᠠᠨ ᠪᠠᠷᠠᠭᠰᠠᠨ ᠤ᠋᠂ ᠪᠠᠰᠠ ᠠᠮᠢ ᠪᠠᠨ ᠦᠷᠡᠬᠦ ᠶ᠋ᠢᠨ ᠡᠷᠭᠢᠰᠢ ᠦᠭᠡᠢ ᠲᠡᠮᠳᠡᠭ ᠭᠡᠵᠦ ᠬᠠᠨᠳᠡᠮᠥᠷ ᠲᠦᠭᠰᠢᠪᠡ᠃
— ᠬᠥᠷ ᠬᠠᠭᠠᠨᠲᠠᠨ᠃ ᠡᠨᠡ ᠡᠵᠡᠭᠦᠢ ᠠᠭᠤᠯᠠᠨ ᠳ᠋ᠤ᠌ ᠡᠯᠡᠰᠦ ᠮᠡᠲᠦ ᠳᠠᠷᠤᠭᠳᠠᠵᠤ᠂ ᠡᠷᠭᠢ ᠮᠡᠲᠦ ᠨᠤᠷᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠳᠠᠷᠤᠢ ᠲᠡᠮᠡᠴᠡᠨ ᠶᠠᠪᠤᠵᠤ ᠠᠯᠲᠠᠨ ᠤᠯᠤᠰ ᠲᠤ᠌ ᠣᠴᠢᠪᠠᠯ ᠳᠡᠭᠡᠷᠡ ᠪᠢᠰᠢ ᠦᠦ? ᠡᠰᠡᠪᠡᠯ ᠪᠠᠷᠠᠭᠤᠨ ᠳᠠᠢᠰᠢ ᠤᠢᠭᠤᠷ᠂ ᠪᠦᠷ ᠪᠣᠯᠬᠤ ᠦᠭᠡᠢ ᠪᠣᠯ ᠲᠠᠩᠭᠤᠳ᠂ ᠬᠠᠷᠠᠯᠠᠭ ᠤᠯᠤᠰ ᠲᠤ᠌ ᠴᠤ᠌ ᠲᠠᠨ ᠢ᠋ ᠪᠠᠶᠠᠷᠯᠠᠨ ᠤᠭᠲᠤᠬᠤ ᠪᠢᠰᠢ ᠦᠦ?
— ᠬᠠᠨᠲᠡᠮᠥᠷ ᠦ᠋ᠨ ᠵᠣᠷᠢᠭᠯᠠᠨ ᠬᠡᠯᠡᠭᠰᠡᠨ ᠡᠨᠡ ᠦᠭᠡ ᠦᠨᠡᠨ ᠲᠤᠯᠠ ᠵᠠᠮᠤᠬᠠ ᠡᠰᠡᠷᠭᠦᠴᠡᠨ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠳ᠋ᠦ᠍ ᠲᠡᠷᠡ ᠪᠡᠷ ᠤᠯᠠᠮ ᠵᠣᠷᠢᠭᠵᠢᠨ ᠦᠭᠡ ᠪᠡᠨ ᠦᠷᠭᠦᠯᠵᠢᠯᠡᠭᠦᠯᠵᠦ ᠪᠦᠷ ᠳᠡᠷᠭᠡᠳᠡ ᠣᠴᠢᠭᠠᠳ ᠲᠤᠯᠵᠤ ᠰᠠᠭᠤᠪᠠ᠃ ᠣᠳᠣ ᠲᠡᠳᠡ ᠬᠠᠭᠠᠨ ᠡᠵᠡᠨ᠂ ᠠᠯᠪᠠᠲᠤ ᠪᠣᠭᠣᠯ ᠪᠢᠰᠢ ᠬᠠᠯᠠᠭᠤᠨ ᠠᠮᠢ ᠨᠢᠭᠡᠲᠡᠢ ᠬᠠᠢᠷᠠᠲᠠᠢ ᠨᠥᠬᠥᠳ ᠦ᠋ᠨ ᠶᠣᠰᠣ ᠪᠠᠷ ᠠᠮᠢᠰᠬᠤᠭᠠ ᠨᠡᠢᠯᠡᠭᠦᠯᠦᠨ ᠰᠠᠭᠤᠵᠠᠢ᠃ ᠳᠥᠴᠢᠨ ᠵᠢᠯ ᠳᠥᠷᠥᠭᠡ ᠮᠣᠯᠲᠤᠯᠠᠯ ᠦᠭᠡᠢ ᠳᠠᠭᠠᠵᠤ᠂ ᠭᠤᠴᠢᠨ ᠵᠢᠯ ᠭᠤᠲᠤᠯ ᠲᠠᠢᠯᠤᠯ ᠦᠭᠡᠢ ᠵᠢᠳᠬᠦᠭᠰᠡᠨ ᠡᠵᠡᠨ ᠳ᠋ᠡᠭᠡᠨ ᠬᠠᠮᠤᠭ ᠤ᠋ᠨ ᠣᠢᠷᠠᠬᠠᠨ ᠰᠠᠭᠤᠭᠰᠠᠨ ᠨᠢ ᠡᠨᠡ ᠪᠢᠯᠡ᠃ ᠲᠡᠳᠡᠨ ᠦ᠌ ᠬᠣᠭᠣᠷᠣᠨᠳᠣ ᠳ᠋ᠤ᠌ ᠣᠳᠣ ᠬᠤᠷᠤᠭᠤ ᠲᠡᠳᠦᠢ ᠵᠠᠢ ᠦᠯᠡᠳᠡᠭᠡᠳ ᠪᠠᠷᠤᠭ ᠬᠠᠮᠠᠷ ᠤ᠋ᠨ ᠦᠵᠦᠭᠦᠷ ᠱᠦᠷᠭᠦᠬᠦ ᠠᠵᠢ᠃
— ᠬᠥᠷ ᠬᠠᠭᠠᠨ᠃
ᠢᠩᠭᠢᠵᠦ ᠬᠦᠨᠳᠦᠳᠬᠡᠯ ᠳᠦᠭᠦᠷᠡᠩ ᠬᠡᠯᠡᠭᠰᠡᠨ ᠨᠢ ᠡᠵᠡᠨ ᠢ᠋ᠶ᠋ᠡᠨ ᠰᠡᠷᠭᠦᠭᠡᠬᠦ᠂ ᠬᠠᠭᠤᠴᠢᠨ ᠵᠣᠯᠪᠣᠭᠠᠲᠤ ᠦᠶᠡ ᠶ᠋ᠢ ᠨᠢ ᠰᠠᠨᠠᠭᠳᠠᠭᠤᠯᠬᠤ᠂ ᠰᠡᠳᠬᠢᠯ ᠰᠠᠨᠠᠭᠠ ᠶ᠋ᠢ ᠨᠢ ᠡᠷᠭᠦᠬᠦ ᠭᠡᠰᠡᠨ ᠲᠡᠭᠦᠨ ᠦ᠌ ᠠᠷᠭᠠ ᠪᠠᠨ ᠣᠯᠵᠤ ᠶᠠᠳᠠᠭᠰᠠᠨ ᠪᠢᠴᠢᠬᠠᠨ ᠵᠠᠯᠢ ᠲᠡᠳᠦᠢ ᠶᠤᠮ᠃
— ᠬᠥᠷ ᠬᠠᠭᠠᠨ᠃ ᠠᠯᠲᠠᠨ ᠤᠯᠤᠰ ᠲᠡᠮᠦᠵᠢᠨ ᠦ᠌ ᠬᠦᠴᠦᠷᠬᠡᠭᠵᠢᠬᠦ ᠶ᠋ᠢ ᠬᠡᠵᠢᠶᠡ ᠴᠦ᠍ ᠦᠯᠦ ᠲᠠᠭᠠᠰᠢᠶᠠᠬᠤ ᠲᠤᠯᠠ ᠲᠠᠨ ᠢ᠋ ᠲᠠᠯᠠᠷᠬᠠᠨ ᠤᠭᠲᠤᠭᠠᠳ ᠵᠣᠭᠰᠣᠬᠤ ᠦᠭᠡᠢ ᠴᠡᠷᠢᠭ ᠬᠥᠳᠡᠯᠭᠡᠨ ᠲᠤᠰᠠᠯᠠᠵᠤ ᠴᠤ᠌ ᠮᠡᠳᠡᠨᠡ᠃ ᠲᠡᠭᠡᠪᠡᠯ ᠲᠠᠨ ᠳ᠋ᠤ᠌ ᠤᠯᠤᠰ ᠠᠢᠮᠠᠭ ᠢ᠋ᠶ᠋ᠠᠨ ᠪᠤᠴᠠᠭᠠᠨ ᠠᠪᠬᠤ ᠰᠠᠢᠬᠠᠨ ᠪᠣᠯᠤᠮᠵᠢ ᠳᠠᠬᠢᠨ ᠢᠷᠡᠬᠦ ᠪᠢᠰᠢ ᠦᠦ? ᠤᠷᠤᠭᠰᠢ ᠶᠠᠪᠤᠵᠤ ᠲᠠᠩᠭᠤᠳ ᠤᠯᠤᠰ ᠢ᠋ᠶ᠋ᠠᠷ ᠳᠠᠮᠵᠢᠨ ᠠᠯᠲᠠᠨ ᠤᠯᠤᠰ ᠲᠤ᠌ ᠣᠴᠢᠪᠠᠯ ᠪᠣᠯᠬᠤ ᠦᠭᠡᠢ ᠭᠡᠬᠦ ᠭᠠᠵᠠᠷ ᠦᠭᠡᠢ᠃ ᠪᠢᠳᠡᠨ ᠳ᠋ᠦ᠍ ᠬᠡᠳᠦᠨ ᠰᠠᠢᠨ ᠮᠣᠷᠢᠳ ᠪᠠᠢᠬᠤ ᠳ᠋ᠤ᠌ ᠯᠠ ᠪᠣᠯᠤᠨᠠ᠃
ᠬᠠᠨᠳᠡᠮᠥᠷ ᠡᠵᠡᠨ ᠢ᠋ᠶ᠋ᠡᠨ ᠳᠠᠬᠢᠨ ᠰᠡᠭᠡᠭᠡᠰᠡᠢ᠂ ᠬᠦᠴᠦᠷᠬᠡᠭᠵᠢᠨ ᠮᠠᠨᠳᠤᠰᠤᠭᠠᠢ ᠭᠡᠵᠦ ᠦᠨᠡᠨ ᠰᠡᠳᠬᠢᠯ ᠡᠴᠡ ᠬᠦᠰᠡᠬᠦ ᠲᠤᠯᠠ ᠡᠢᠨ ᠬᠡᠯᠡᠪᠡ᠃
ᠪᠠᠰᠠ ᠵᠠᠮᠤᠬᠠ ᠲᠡᠭᠦᠨ ᠦ᠌ ᠡᠨᠡ ᠦᠨᠡᠨ ᠦᠭᠡ ᠶ᠋ᠢ ᠨᠢ ᠳᠠᠭᠠᠨ ᠠᠯᠲᠠᠨ ᠤᠯᠤᠰ ᠲᠤ᠌ ᠣᠳᠤᠨᠠ ᠭᠡᠵᠦ ᠢᠲᠡᠭᠡᠨᠡ᠃ ᠵᠠᠮᠤᠬᠠ ᠲᠡᠭᠦᠨ ᠦ᠌ ᠬᠡᠯᠡᠭᠰᠡᠨ ᠢ᠋ ᠰᠣᠨᠣᠰᠤᠭᠠ ᠦᠭᠡᠢ ᠮᠡᠲᠦ ᠲᠠᠭ ᠳᠠᠭᠤ ᠦᠭᠡᠢ ᠭᠥᠯᠢᠷᠡᠨ ᠰᠠᠭᠤᠪᠠ᠃ ᠭᠡᠲᠡᠯᠡ ᠲᠡᠷᠡ ᠰᠢᠳᠠᠷ ᠤ᠋ᠨ ᠢ᠋ᠶ᠋ᠠᠨ ᠦᠭᠡ ᠶ᠋ᠢ ᠰᠣᠨᠣᠰᠬᠤ ᠶ᠋ᠢᠨ ᠰᠠᠢᠨ ᠢ᠋ᠶ᠋ᠠᠷ ᠰᠣᠨᠣᠰᠴᠤ ᠰᠢᠷᠠ ᠬᠣᠷᠣ ᠨᠢ ᠪᠤᠴᠠᠯᠪᠠ᠃
— ᠬᠠᠨᠳᠡᠮᠥᠷ ᠴᠢ ᠰᠣᠨᠣᠰ᠃ ᠴᠢᠨᠦ ᠬᠡᠯᠡᠭᠰᠡᠨ ᠦᠨᠡᠨ ᠴᠦ᠍ ᠪᠠᠢᠵᠤ ᠮᠡᠳᠡᠨᠡ᠃ ᠠᠯᠲᠠᠨ ᠬᠠᠭᠠᠨ ᠨᠠᠳᠠᠳᠤ ᠴᠡᠷᠢᠭ ᠥᠭᠴᠦ ᠲᠡᠮᠦᠵᠢᠨ ᠦ᠌ ᠡᠰᠡᠷᠭᠦ ᠶᠠᠪᠤᠭᠤᠯᠵᠤ ᠴᠤ᠌ ᠮᠡᠳᠡᠨᠡ᠃ ᠲᠡᠮᠦᠵᠢᠨ ᠢ᠋ ᠳᠠᠷᠤᠬᠤ ᠰᠠᠨ ᠭᠡᠵᠦ ᠠᠯᠲᠠᠨ ᠤᠯᠤᠰ ᠬᠦᠰᠡᠬᠦ ᠨᠢ ᠯᠠᠪᠲᠠᠢ᠃ ᠭᠡᠪᠡᠴᠦ ᠴᠢ ᠮᠠᠭᠤ ᠮᠣᠳᠣᠨ ᠲᠣᠯᠣᠭᠠᠢ᠂ ᠳᠦᠯᠡᠢ ᠭᠣᠳᠣᠯᠢ ᠮᠢᠨᠢ ᠨᠢᠳᠦ ᠪᠡᠨ ᠨᠡᠬᠡᠭᠡ᠃ ᠴᠢ ᠶᠠᠭᠤ ᠦᠵᠡᠨᠡ? ᠭᠡᠵᠦ ᠵᠠᠮᠤᠬᠠ ᠣᠭᠲᠣ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠪᠠᠢᠲᠠᠯᠠ ᠰᠢᠯᠦᠰᠦ ᠪᠡᠨ ᠦᠰᠦᠴᠢᠭᠦᠯᠦᠨ ᠬᠣᠷᠣᠰᠤᠨ ᠰᠢᠪᠡᠨᠡᠪᠡ᠃ ᠡᠭᠦᠨ ᠢ᠋ ᠦᠵᠡᠪᠡᠯ ᠡᠵᠡᠨ ᠨᠢ ᠯᠠᠪ ᠤᠬᠠᠭᠠᠨ ᠰᠠᠮᠠᠭᠤᠷᠠᠵᠤ ᠪᠣᠳᠣᠯ ᠡᠭᠡᠳᠡᠪᠡ ᠦᠦ ᠭᠡᠯᠲᠡᠢ᠃ ᠵᠠᠮᠤᠬᠠ ᠶ᠋ᠢᠨ ᠨᠢᠳᠦᠨ ᠡᠴᠡ ᠬᠣᠷᠣᠰᠤᠯ ᠵᠠᠨᠤᠯ ᠨᠢ ᠪᠠᠷᠤᠭ ᠨᠢᠯᠪᠤᠰᠤ ᠠᠳᠠᠯᠢ ᠲᠤᠰᠬᠤ ᠨᠢ ᠴᠦ᠍ ᠭᠡᠮᠡᠷ ᠳᠦᠷᠡᠯᠵᠡᠪᠡ᠃
— ᠪᠢ ᠶᠠᠭᠤ ᠦᠵᠡᠬᠦ ᠶᠣᠰᠣᠲᠠᠢ ᠭᠡᠵᠢ᠃ ᠪᠢ ᠣᠳᠣ ᠬᠥᠷ ᠬᠠᠭᠠᠨ ᠲᠠᠨ ᠤ᠋ ᠭᠠᠷᠠᠬᠠᠯᠠᠭᠰᠠᠨ ᠨᠢᠳᠦ᠂ ᠰᠠᠭᠠᠷᠢᠲᠤᠭᠰᠠᠨ ᠨᠢᠭᠤᠷ ᠢ᠋ ᠬᠠᠷᠠᠵᠤ ᠪᠠᠢᠨᠠ᠃ ᠪᠢ ᠥᠭᠡᠷᠡ ᠶᠠᠭᠤ ᠦᠵᠡᠨᠡ? ᠪᠢ ᠲᠠᠨ ᠤ᠋ ᠬᠣᠷᠣᠰᠤᠯ ᠵᠠᠨᠤᠯ ᠳ᠋ᠠᠭᠠᠨ ᠰᠢᠲᠠᠵᠤ ᠰᠣᠯᠢᠶᠠᠷᠠᠬᠤ ᠶ᠋ᠢ ᠬᠠᠷᠠᠵᠤ ᠪᠠᠢᠨᠠ ᠭᠡᠵᠦ ᠬᠠᠨᠲᠡᠮᠦᠷ ᠪᠠᠰᠠ ᠯᠠ ᠥᠪᠡᠷ ᠦ᠋ᠨ ᠮᠠᠲᠠᠯ ᠦᠭᠡᠢ ᠬᠣᠷᠣᠰᠤᠨ ᠰᠢᠪᠡᠨᠡᠪᠡ᠃
— ᠠᠯᠲᠠᠢ ᠶ᠋ᠢᠨ ᠨᠢᠷᠤᠭᠤᠨ ᠠ᠋ᠴᠠ᠂ ᠬᠢᠩᠭᠠᠨ ᠤ᠋ ᠨᠢᠷᠤᠭᠤ ᠬᠦᠷᠲᠡᠯᠡ ᠣᠯᠠᠨ ᠭᠣᠣᠯ ᠤ᠋ᠨ ᠮᠣᠩᠭᠣᠯ ᠠᠢᠮᠠᠭ ᠪᠦᠭᠦᠳᠡ ᠶ᠋ᠢ ᠲᠡᠮᠦᠵᠢᠨ ᠬᠤᠷᠢᠶᠠᠵᠤ ᠳᠠᠭᠤᠰᠪᠠ᠃ ᠪᠢ ᠮᠥᠨ ᠢᠩᠭᠢᠵᠦ ᠬᠦᠰᠡᠭᠡ ᠦᠭᠡᠢ ᠭᠡᠵᠢ ᠦᠦ? ᠣᠳᠣ ᠪᠦᠬᠦ ᠮᠣᠩᠭᠣᠯ ᠠᠢᠮᠠᠭ ᠲᠡᠮᠦᠵᠢᠨ ᠦ᠌ ᠭᠠᠷ ᠳᠣᠣᠷᠠ ᠴᠤᠭᠯᠠᠪᠠ᠃ ᠪᠢ ᠲᠡᠮᠦᠵᠢᠨ ᠦ᠌ ᠳᠠᠢᠰᠤᠨ ᠪᠣᠯᠬᠤ ᠠ᠋ᠴᠠ ᠪᠢᠰᠢ ᠮᠣᠩᠭᠣᠯ ᠤ᠋ᠨ ᠳᠠᠢᠰᠤᠨ ᠪᠢᠰᠢ ᠲᠤᠯᠠ ᠶᠠᠭᠠᠬᠢᠨ ᠠᠯᠲᠠᠨ ᠤᠯᠤᠰ ᠲᠤ᠌ ᠣᠴᠢᠵᠤ ᠪᠣᠯᠤᠨᠠ᠃ ᠴᠢ ᠡᠢᠮᠦ ᠵᠠᠪᠬᠠᠢ ᠮᠠᠭᠤ ᠦᠭᠡ ᠨᠠᠳᠠᠳᠤ ᠳᠠᠬᠢᠨ ᠪᠦᠦ ᠬᠡᠯᠡ᠃ ᠬᠠᠷᠢᠨ ᠣᠳᠣ ᠴᠢ ᠴᠢᠬᠢ ᠪᠡᠨ ᠣᠩᠭᠣᠢᠯᠭᠠᠵᠤ ᠮᠢᠨᠦ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰ᠃ ᠪᠢ ᠴᠢᠮᠠ ᠳ᠋ᠤ᠌ ᠡᠴᠦᠰ ᠦ᠋ᠨ ᠵᠠᠷᠯᠢᠭ ᠪᠠᠭᠤᠯᠭᠠᠶᠠ᠃ ᠡᠭᠦᠨ ᠢ᠋ ᠬᠥᠷ ᠬᠠᠭᠠᠨ ᠵᠠᠮᠤᠬᠠ ᠪᠢ ᠴᠢᠮᠠ ᠳ᠋ᠤ᠌ ᠬᠡᠯᠡᠵᠦ ᠪᠠᠢᠨᠠ᠃
ᠰᠣᠨᠣᠰᠬᠤ ᠠ᠋ᠴᠠ ᠴᠤ᠌ ᠳᠤᠷᠠ ᠦᠭᠡᠢᠴᠡᠳᠡᠭ《ᠬᠥᠷ ᠬᠠᠭᠠᠨ》 ᠭᠡᠳᠡᠭ ᠦᠭᠡ ᠶ᠋ᠢ ᠵᠠᠮᠤᠬᠠ ᠡᠵᠡᠨ ᠨᠢ ᠶᠠᠭᠤᠨ ᠤ᠋ ᠤᠴᠢᠷ ᠬᠡᠯᠡᠭᠰᠡᠨ ᠢ᠋ ᠬᠠᠨᠲᠡᠮᠦᠷ ᠲᠡᠷᠡ ᠳᠣᠣᠷᠠ ᠨᠢ ᠣᠢᠯᠠᠭᠠᠭᠰᠠᠨ ᠦᠭᠡᠢ᠃ ᠵᠠᠮᠤᠬᠠ ᠶ᠋ᠢᠨ ᠬᠡᠯᠡᠵᠦ ᠶᠠᠷᠢᠬᠤ ᠨᠢ ᠲᠣᠭᠰᠢᠨ ᠰᠦᠷᠯᠢᠭ ᠪᠣᠯᠤᠭᠰᠠᠨ ᠲᠤᠯᠠ ᠬᠠᠨᠲᠡᠮᠦᠷ ᠠᠶᠤᠵᠤ ᠬᠣᠢᠰᠢ ᠠᠯᠬᠤᠮ ᠤᠬᠤᠷᠢᠪᠠ᠃ ᠬᠠᠷᠢᠨ ᠵᠠᠮᠤᠬᠠ ᠲᠡᠭᠦᠨ ᠳ᠋ᠦ᠍ ᠰᠢᠬᠠᠨ ᠢᠷᠡᠵᠦ ᠵᠣᠭᠰᠣᠯᠠ᠃ ᠨᠠᠮ ᠤᠨᠲᠠᠭᠰᠠᠨ ᠳᠥᠷᠪᠡᠨ ᠨᠥᠬᠥᠳ ᠢ᠋ᠶ᠋ᠡᠨ ᠬᠢᠯᠠᠮᠬᠢᠨ ᠬᠠᠷᠠᠪᠠᠯ ᠲᠡᠷᠡ ᠶᠠᠭ ᠯᠠ ᠦᠬᠦᠭᠰᠡᠨ ᠮᠡᠲᠦ ᠭᠤᠯᠳᠤᠢᠨ ᠬᠤᠷᠬᠢᠷᠠᠬᠤ ᠠᠵᠢ᠃ ᠬᠠᠨᠲᠡᠮᠦᠷ ᠲᠦ᠍ ᠲᠡᠳᠡᠨ ᠦ᠌ ᠠᠳᠠᠯᠢ ᠨᠠᠮ ᠤᠨᠲᠠᠬᠤ ᠬᠦᠰᠡᠯ ᠢ᠋ ᠰᠢᠷᠠᠭᠰᠠᠨ ᠮᠢᠬᠠ ᠳᠦᠭᠦᠷᠲᠡᠯᠡ ᠴᠢᠭᠢᠭᠰᠡ ᠬᠣᠳᠣᠭᠣᠳᠣ ᠨᠢ ᠰᠠᠨᠠᠭᠤᠯᠤᠨᠠ᠃ ᠭᠡᠪᠡᠴᠦ ᠲᠡᠭᠦᠨ ᠳ᠋ᠦ᠍ ᠤᠨᠲᠠᠬᠤ ᠵᠠᠪ ᠣᠯᠳᠠᠬᠤ ᠦᠭᠡᠢ ᠪᠠᠢᠪᠠ᠃
— ᠬᠠᠨᠲᠡᠮᠦᠷ ᠴᠢ ᠰᠠᠢᠨ ᠰᠣᠨᠣᠰ᠂ ᠪᠦᠦ ᠳᠤᠤᠭᠠᠷ!
ᠵᠠᠮᠤᠬᠠ ᠶ᠋ᠢᠨ ᠨᠢᠳᠦ ᠵᠢᠭᠠᠰᠤᠨ ᠤ᠋ ᠬᠢ ᠠᠳᠠᠯᠢ ᠲᠥᠭᠥᠷᠢᠭ ᠪᠣᠯᠤᠭᠰᠠᠨ ᠨᠢ ᠬᠡᠴᠢᠨᠡᠨ ᠴᠢᠬᠤᠯᠠ ᠶᠠᠭᠤᠮᠠ ᠬᠡᠯᠡᠬᠦ ᠭᠡᠵᠦ ᠪᠠᠢᠬᠤ ᠶ᠋ᠢ ᠭᠡᠷᠡᠴᠢᠯᠡᠨᠡ᠃
ᠲᠡᠢᠮᠦ ᠠ᠋᠃ ᠪᠢ ᠲᠡᠮᠦᠵᠢᠨ ᠳ᠋ᠦ᠍ ᠳᠡᠢᠯᠦᠭᠳᠡᠭᠡ ᠦᠭᠡᠢ ᠪᠣᠯ ᠪᠠᠰᠠ ᠯᠠ ᠮᠣᠩᠭᠣᠯ ᠠᠢᠮᠠᠭ ᠤ᠋ᠳ ᠢ᠋ ᠨᠢᠭᠡᠳᠬᠡᠬᠦ ᠶ᠋ᠢ ᠬᠦᠰᠡᠭᠰᠡᠨ᠂ ᠭᠡᠪᠡᠴᠦ ᠮᠢᠨᠦ ᠬᠢᠵᠦ ᠴᠢᠳᠠᠭᠠ ᠦᠭᠡᠢ ᠶ᠋ᠢ ᠲᠡᠮᠦᠵᠢᠨ ᠬᠢᠪᠡ᠃ ᠣᠳᠣ ᠴᠢ ᠪᠢᠳᠡ ᠬᠣᠶᠠᠷ ᠥᠩᠭᠡᠷᠡᠭᠰᠡᠨ ᠢ᠋ ᠪᠢᠰᠢ ᠴᠥᠭᠡᠬᠡᠨ ᠴᠦ᠍ ᠭᠡᠯᠡ ᠦᠯᠡᠳᠡᠭᠰᠡᠨ ᠮᠠᠷᠭᠠᠰᠢ ᠡᠳᠦᠷ ᠢ᠋ ᠪᠣᠳᠣᠶᠠ᠃ ᠴᠢ ᠨᠠᠮᠠᠶ᠋ᠢ ᠪᠠᠷᠢᠵᠤ ᠬᠦᠯᠢᠭᠡᠳ ᠲᠡᠮᠦᠵᠢᠨ ᠳ᠋ᠦ᠍ ᠠᠪᠠᠴᠢᠵᠤ ᠲᠤᠰᠢᠶᠠ᠃
— ᠬᠥᠷ ᠬᠠᠭᠠᠨ ᠭᠡᠵᠦ ᠬᠠᠨᠳᠡᠮᠦᠷ ᠰᠣᠨᠣᠰᠤᠭᠰᠠᠨ ᠦᠭᠡᠨ ᠳ᠋ᠡᠭᠡᠨ ᠰᠣᠴᠢᠨ ᠬᠠᠰᠬᠢᠷᠪᠠ᠃
— ᠪᠢ ᠴᠢᠮᠠᠶ᠋ᠢ ᠪᠤᠤ ᠳᠤᠤᠭᠠᠷ ᠭᠡᠰᠡᠨ ᠪᠢᠰᠢ ᠦᠦ? ᠴᠢ ᠮᠢᠨᠦ ᠦᠭᠡ ᠶ᠋ᠢ ᠪᠦᠦ ᠳᠠᠰᠤᠯ! ᠴᠢ ᠶᠠᠭᠤ ᠴᠤ᠌ ᠪᠣᠳᠣᠵᠤ ᠰᠡᠳᠦᠬᠦ ᠶᠣᠰᠣ ᠦᠭᠡᠢ᠃ ᠭᠠᠭᠴᠠᠬᠠᠨ ᠮᠢᠨᠦ ᠬᠡᠯᠡᠭᠰᠡᠨ ᠢ᠋ ᠬᠢ᠃ ᠪᠢ ᠲᠡᠮᠦᠵᠢᠨ ᠳ᠋ᠦ᠍ ᠣᠴᠢᠬᠤ ᠪᠠᠷ ᠰᠢᠢᠳᠦᠯᠡ᠃ ᠭᠡᠬᠦ ᠳ᠋ᠡᠭᠡᠨ ᠪᠢ ᠳᠠᠷᠤᠭᠳᠠᠭᠰᠠᠨ ᠳᠠᠢᠰᠤᠨ ᠮᠡᠲᠦ ᠬᠠᠷᠠᠴᠠ ᠪᠠᠭᠤᠯᠭᠠᠵᠤ᠂ ᠬᠣᠷᠮᠣᠢ ᠤᠨᠵᠢᠭᠤᠯᠵᠤ᠂ ᠠᠪᠤᠷᠠᠯ ᠡᠷᠢᠵᠦ ᠣᠴᠢᠬᠤ ᠶ᠋ᠢ ᠦᠯᠦ ᠬᠦᠰᠡᠨᠡ᠃ ᠬᠠᠷᠢᠨ ᠴᠢ ᠨᠠᠳᠠ ᠠ᠋ᠴᠠ ᠤᠷᠪᠠᠵᠤ ᠨᠠᠮᠠᠶ᠋ᠢ ᠬᠦᠯᠢᠵᠦ ᠲᠡᠮᠦᠵᠢᠨ ᠳ᠋ᠦ᠍ ᠠᠪᠠᠴᠢᠵᠤ ᠲᠤᠰᠢᠶᠠᠭᠲᠤᠨ᠃ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠢᠩᠭᠢᠵᠦ ᠢᠳᠬᠠ᠃ ᠪᠢ ᠡᠵᠡᠭᠦᠢ ᠬᠡᠭᠡᠷᠡ ᠰᠢᠷᠠᠭᠳᠤᠭᠰᠠᠨ ᠴᠢᠨᠣᠠ ᠰᠢᠭ᠋ ᠵᠢᠯᠠᠭᠠ ᠶ᠋ᠢᠨ ᠮᠤᠬᠤᠷ ᠲᠤ᠌ ᠦᠬᠦᠮᠡᠷ ᠦᠭᠡᠢ ᠪᠠᠢᠨᠠ᠃ ᠪᠢ ᠦᠬᠦᠪᠡᠯ ᠲᠡᠮᠦᠵᠢᠨ ᠦ᠌ ᠭᠠᠷ ᠲᠤ᠌ ᠦᠬᠦᠶᠡ᠃ᠭᠡᠬᠦ ᠳ᠋ᠡᠭᠡᠨ ᠬᠦᠴᠦᠨ ᠳ᠋ᠦ᠍ ᠠᠪᠲᠠᠨ ᠣᠴᠢᠬᠤ ᠨᠢ ᠨᠡᠷᠡ ᠳ᠋ᠦ᠍ ᠴᠡᠪᠡᠷ ᠪᠠᠢᠬᠤ ᠪᠣᠯᠤᠨᠠ᠃ ᠴᠢ ᠡᠭᠦᠨ ᠢ᠋ ᠬᠢᠬᠦ ᠭᠡᠵᠦ ᠨᠠᠳᠠᠳᠤ ᠰᠢᠳᠠᠷᠯᠠᠭᠰᠠᠨ ᠪᠢᠰᠢ ᠦᠦ?
ᠵᠠᠮᠤᠬᠠ ᠶ᠋ᠢᠨ ᠡᠨᠡ ᠠᠶᠤᠮᠰᠢᠭᠲᠤ ᠦᠭᠡᠰ ᠡᠷᠡᠰ ᠰᠢᠢᠳᠦᠮᠡᠭ᠂ ᠡᠷᠭᠢᠯᠲᠡ ᠪᠤᠴᠠᠯᠲᠠ ᠦᠭᠡᠢ ᠨᠢ ᠲᠣᠳᠣᠷᠬᠠᠢ ᠲᠤᠯᠠ ᠬᠠᠨᠳᠡᠮᠦᠷ ᠳᠠᠭᠤ ᠦᠭᠡᠢ ᠰᠥᠬᠥᠷᠡᠨ ᠤᠨᠠᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠣᠯᠳᠠᠭᠰᠠᠨ ᠦᠭᠡᠢ᠃ ᠡᠨᠡ ᠪᠣᠯ ᠮᠢᠨᠦ ᠲᠥᠯᠥᠭᠡ ᠴᠢ ᠦᠬᠦ ᠭᠡᠰᠡᠨ ᠦᠭᠡ ᠶᠤᠮ᠃ ᠡᠵᠡᠨ ᠳ᠋ᠡᠭᠡᠨ ᠢᠩᠭᠢᠵᠦ ᠨᠣᠬᠠᠢ ᠮᠡᠲᠦ ᠦᠨᠡᠨᠴᠢ ᠵᠢᠳᠬᠦᠭᠰᠡᠨ ᠦ᠌ ᠡᠴᠦᠰ ᠦ᠋ᠨ ᠱᠠᠩᠨᠠᠯ ᠨᠢ ᠲᠡᠭᠦᠨ ᠦ᠌ ᠨᠡᠷᠡ ᠬᠦᠨᠳᠦ ᠶ᠋ᠢ ᠠᠮᠢ ᠪᠠᠷ ᠢ᠋ᠶ᠋ᠠᠨ ᠠᠪᠤᠷᠠᠬᠤ ᠶᠣᠰᠣᠲᠠᠢ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠬᠠᠨᠳᠡᠮᠦᠷ ᠣᠢᠯᠠᠭᠠᠪᠠ᠃ ᠵᠠᠮᠤᠬᠠ ᠡᠵᠡᠨ ᠨᠢ ᠭᠠᠭᠴᠠ ᠵᠥᠪ ᠵᠠᠮ ᠰᠣᠩᠭᠣᠭᠰᠠᠨ ᠢ᠋ ᠮᠡᠳᠡᠯᠡ᠃ ᠲᠡᠮᠦᠵᠢᠨ ᠵᠠᠮᠤᠬᠠ ᠶ᠋ᠢ ᠥᠷᠥᠰᠢᠶᠡᠬᠦ ᠨᠢ ᠯᠠᠪᠲᠠᠢ᠃ ᠬᠠᠷᠢᠨ ᠬᠠᠭᠠᠨ ᠡᠵᠡᠨ ᠳ᠋ᠡᠭᠡᠨ ᠬᠠᠯᠳᠠᠭᠰᠠᠨ ᠪᠣᠭᠣᠯ ᠤ᠋ᠨ ᠶᠣᠰᠣᠭᠠᠷ ᠲᠡᠭᠦᠨ ᠢ᠋ ᠲᠡᠮᠦᠵᠢᠨ ᠴᠠᠪᠴᠢᠨ ᠠᠯᠠᠬᠤ ᠨᠢ ᠮᠠᠭᠠᠳ᠃ ᠡᠨᠡ ᠪᠣᠯ ᠣᠳᠣ ᠲᠣᠯᠣᠭᠠᠢ ᠬᠠᠯᠠᠭᠠᠵᠤ ᠪᠣᠢ ᠨᠠᠷᠠ ᠲᠠᠢ ᠠᠳᠠᠯᠢ ᠦᠨᠡᠨ ᠲᠣᠳᠣ ᠬᠡᠷᠡᠭ ᠶᠤᠮ᠃ ᠵᠠᠮᠤᠬᠠ ᠴᠤ᠌ ᠡᠭᠦᠨ ᠢ᠋ ᠣᠢᠯᠠᠭᠠᠵᠤ ᠪᠠᠢᠪᠠ᠃ ᠡᠵᠡᠨ ᠳ᠋ᠡᠭᠡᠨ ᠦᠨᠡᠨᠴᠢ ᠵᠢᠳᠬᠦᠵᠦ ᠥᠭᠡᠳᠡ ᠡᠴᠡ ᠨᠢ ᠠᠮᠢ ᠥᠷᠢᠰᠦᠨ ᠲᠡᠮᠡᠴᠡᠭᠰᠡᠨ ᠣᠯᠠᠨ ᠳᠠᠢᠰᠤᠨ ᠢ᠋ᠶ᠋ᠠᠨ ᠲᠡᠮᠦᠵᠢᠨ ᠰᠠᠢᠰᠢᠶᠠᠨ ᠦᠨᠡᠯᠡᠵᠦ᠂ ᠰᠢᠳᠠᠷ ᠢ᠋ᠶ᠋ᠠᠨ ᠪᠣᠯᠭᠠᠭᠰᠠᠨ ᠢ᠋ ᠮᠡᠳᠡᠨᠡ᠃ ᠪᠠᠰᠠ ᠡᠵᠡᠨ ᠡᠴᠡ ᠪᠡᠨ ᠤᠷᠪᠠᠭᠰᠠᠨ ᠪᠠᠷᠢᠵᠤ ᠠᠪᠠᠴᠢᠵᠤ ᠥᠭᠭᠦᠭᠰᠡᠨ ᠬᠡᠨ ᠢ᠋ ᠴᠦ᠍ ᠪᠣᠯᠪᠠ ᠥᠴᠢᠯ ᠦᠭᠡᠢ ᠴᠠᠭᠠᠵᠠᠯᠠᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠯᠳᠠᠷᠲᠠᠢ᠃ ᠥᠪᠡᠷ ᠦ᠋ᠨ ᠡᠵᠡᠨ ᠳ᠋ᠡᠭᠡᠨ ᠦᠨᠡᠨᠴᠢ ᠪᠠᠢᠵᠤ ᠴᠢᠳᠠᠭᠠ ᠦᠭᠡᠢ ᠪᠣᠯ ᠬᠡᠨ ᠢ᠋ ᠴᠦ᠍ ᠪᠠᠢ ᠲᠡᠮᠦᠵᠢᠨ ᠢᠳᠡᠭᠡᠨ ᠨᠥᠬᠥᠷᠯᠡᠳᠡᠭ ᠦᠭᠡᠢ ᠶ᠋ᠢ ᠮᠡᠳᠡᠬᠦ ᠪᠢᠯᠡ᠃ ᠲᠡᠢᠮᠦ ᠪᠣᠯᠬᠣᠷ ᠵᠠᠮᠤᠬᠠ ᠶ᠋ᠢᠨ ᠰᠠᠶᠢ ᠬᠡᠯᠡᠭᠰᠡᠨ ᠦᠭᠡ ᠬᠠᠨᠲᠡᠮᠦᠷ ᠦ᠋ᠨ ᠬᠤᠪᠢ ᠳ᠋ᠤ᠌ ᠴᠠᠭᠠᠵᠠᠯᠠᠭᠤᠯᠤᠭᠰᠠᠨ ᠲᠠᠢ ᠠᠳᠠᠯᠢ ᠬᠡᠷᠡᠭ ᠪᠠᠢᠪᠠ᠃ ᠦᠬᠦᠬᠦ ᠨᠢ ᠬᠠᠨᠲᠡᠮᠦᠷ ᠦ᠋ᠨ ᠬᠤᠪᠢ ᠳ᠋ᠤ᠌ ᠳᠡᠩᠳᠡᠭᠦᠦ ᠭᠠᠰᠠᠯᠠᠩᠲᠠᠢ᠂ ᠶᠠᠭᠠᠬᠢᠪᠠᠴᠤ ᠵᠥᠪᠰᠢᠶᠡᠷᠵᠦ ᠪᠣᠯᠬᠤ ᠦᠭᠡᠢ ᠬᠡᠷᠡᠭ ᠶᠤᠮ᠃
— ᠬᠥᠷ ᠬᠠᠭᠠᠨ᠃ ᠲᠠ ᠶᠠᠭᠠᠬᠢᠭᠰᠠᠨ ᠭᠡᠵᠦ ᠶᠠᠭᠤᠨ ᠳ᠋ᠤ᠌ ᠣᠰᠣᠯᠳᠠᠭᠰᠠᠨ ᠭᠡᠵᠦ ᠨᠠᠮᠠᠶ᠋ᠢ ᠢᠩᠭᠢᠵᠦ ᠵᠠᠯᠬᠠᠭᠠᠨᠠ ᠪᠣᠢ? ᠪᠢ ᠲᠠᠨ ᠳ᠋ᠤ᠌ ᠣᠰᠣᠯᠳᠠᠵᠤ ᠪᠤᠷᠤᠭᠤᠳᠠᠭᠰᠠᠨ ᠤᠳᠠᠭᠠ ᠪᠣᠢ ᠤᠤ? ᠪᠢ ᠲᠡᠵᠢᠭᠡᠭᠰᠡᠨ ᠨᠣᠬᠠᠢ ᠰᠢᠭ᠋ ᠲᠠᠯᠪᠢᠭᠰᠠᠨ ᠰᠤᠮᠤ ᠰᠢᠭ᠋ ᠯᠡ ᠵᠢᠳᠬᠦᠪᠡ᠃ ᠲᠠ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠨᠡ ᠪᠣᠢ? ᠲᠠ ᠨᠠᠮᠠᠶ᠋ᠢ ᠣᠳᠣ ᠯᠠ ᠲᠠᠰᠤ ᠴᠠᠪᠴᠢᠵᠤ ᠣᠷᠭᠢ᠃ ᠪᠢ ᠬᠠᠭᠠᠨ ᠡᠵᠡᠨ ᠳ᠋ᠡᠭᠡᠨ ᠬᠠᠯᠳᠠᠵᠤ ᠶᠠᠭᠠᠬᠢᠵᠤ ᠲᠠᠨ ᠢ᠋ ᠲᠡᠮᠦᠵᠢᠨ ᠳ᠋ᠦ᠍ ᠬᠦᠷᠭᠡᠵᠦ ᠥᠭᠴᠦ ᠴᠢᠳᠠᠬᠤ ᠪᠣᠢ? ᠲᠡᠭᠦᠨ ᠳ᠋ᠦ᠍ ᠣᠷᠣᠪᠠᠯ ᠪᠢ ᠡᠨᠳᠡ ᠪᠡᠨ ᠦᠬᠦᠶᠡ᠃ ᠦᠭᠡᠢ ᠪᠣᠯ ᠲᠠ ᠨᠠᠮᠠᠶ᠋ᠢ ᠵᠦᠭᠡᠷ ᠯᠡ ᠬᠥᠭᠡᠭᠡᠵᠦ ᠣᠷᠬᠢᠭᠠᠴᠢ᠃ ᠪᠢ ᠣᠯᠳᠠᠭᠰᠠᠨ ᠵᠠᠶᠠᠭᠠ ᠪᠠᠨ ᠳᠠᠭᠠᠭᠠᠳ ᠬᠠᠮᠢᠭᠠ ᠨᠢᠭᠡ ᠭᠠᠵᠠᠷ ᠤ᠋ᠨ ᠮᠤᠬᠤᠷ ᠲᠤ᠌ ᠬᠥᠮᠦᠨ ᠰᠢᠭ ᠠᠮᠢᠳᠤᠷᠠᠶᠠ᠃ ᠨᠠᠳᠠᠳᠤ ᠪᠠᠰᠠ᠁
ᠭᠡᠪᠡᠴᠦ ᠬᠠᠨᠲᠡᠮᠦᠷ ᠰᠡᠭᠦᠯᠴᠢ ᠶ᠋ᠢᠨ ᠦᠭᠡ ᠪᠡᠨ ᠬᠡᠯᠡᠵᠦ ᠳᠠᠭᠤᠰᠬᠠᠯ ᠦᠭᠡᠢ ᠲᠠᠭ ᠭᠥᠯᠢᠷᠡᠪᠡ᠃ ᠲᠡᠷᠡ ᠠᠶᠤᠭᠰᠠᠨ᠂ ᠰᠡᠳᠬᠢᠯ ᠬᠥᠳᠡᠯᠦᠭᠰᠡᠨ ᠳ᠋ᠡᠭᠡᠨ ᠳᠡᠮᠡᠢ ᠣᠯᠠᠨ ᠢ᠋ ᠴᠠᠯᠴᠢᠭᠰᠠᠨ ᠢ᠋ᠶ᠋ᠠᠨ ᠤᠬᠠᠭᠠᠷᠠᠭᠰᠠᠨ ᠴᠤ᠌ ᠨᠢᠭᠡᠨᠲᠡ ᠣᠷᠣᠢᠲᠠᠵᠠᠢ᠃ ᠬᠠᠨᠲᠡᠮᠦᠷ ᠦᠬᠦᠵᠦ ᠪᠣᠯᠬᠤ ᠦᠭᠡᠢ ᠰᠢᠯᠲᠠᠭᠠᠨ ᠪᠠᠢᠭᠠ ᠶ᠋ᠢ ᠣᠢᠯᠠᠭᠠᠮᠠᠭᠴᠠ ᠵᠠᠮᠤᠬᠠ ᠲᠡᠭᠦᠨ ᠦ᠌ ᠴᠡᠭᠡᠵᠢᠨ ᠳ᠋ᠡᠭᠡᠨ ᠦᠯᠡᠳᠡᠭᠡᠭᠰᠡᠨ ᠦᠭᠡ ᠶ᠋ᠢ ᠨᠡᠬᠡᠨ ᠱᠠᠭᠠᠷᠳᠠᠪᠠ᠃
— ᠴᠢᠮᠠ ᠳ᠋ᠤ᠌ ᠪᠠᠰᠠ ᠶᠠᠭᠤ ᠪᠣᠢ ᠭᠡᠨᠡ? ᠲᠡᠭᠦᠨ ᠢ᠋ ᠪᠡᠨ ᠬᠡᠯᠡᠭᠲᠦᠨ᠃ ᠪᠦᠦ ᠨᠢᠭᠤ᠃ ᠬᠡᠯᠡᠬᠦ ᠦᠭᠡᠢ ᠶᠠᠪᠤᠪᠠᠯ ᠡᠴᠦᠰ ᠲᠦ᠋ᠨᠢ ᠬᠠᠷᠠᠮᠰᠠᠬᠤ ᠴᠤ᠌ ᠶᠤᠮ ᠪᠢᠯᠡ ᠤᠤ?
ᠬᠠᠨᠲᠡᠮᠦᠷ ᠭᠠᠵᠠᠷ ᠳᠡᠷᠡᠯᠡᠨ ᠬᠡᠰᠡᠭ ᠬᠡᠪᠲᠡᠭᠡᠳ ᠥᠨᠳᠡᠢᠪᠡ᠃ ᠦᠬᠦᠬᠦ ᠶ᠋ᠢᠨ ᠡᠮᠦᠨᠡ ᠬᠡᠨ ᠡᠴᠡ ᠶᠠᠭᠤ ᠪᠠᠨ ᠴᠤ᠌ ᠨᠢᠭᠤᠬᠤ ᠪᠢᠯᠡ᠃
— ᠨᠠᠳᠠᠳᠤ ᠨᠢᠭᠡ ᠪᠦᠰᠡᠭᠦᠢ ᠪᠣᠢ ᠶᠤᠮ᠃ ᠲᠡᠷᠡ ᠨᠠᠮᠠᠶ᠋ᠢ ᠬᠦᠯᠢᠶᠡᠵᠦ ᠪᠣᠢ ᠭᠡᠵᠦ ᠡᠴᠢᠭᠡ ᠳ᠋ᠡᠭᠡᠨ ᠵᠣᠳᠣᠭᠤᠯᠬᠤ ᠠ᠋ᠴᠠ ᠠᠶᠤᠭᠰᠠᠨ ᠬᠥᠪᠡᠭᠦᠨ ᠰᠢᠭ ᠲᠡᠯᠳᠡᠴᠢᠵᠦ ᠰᠢᠯᠢ ᠪᠡᠨ ᠮᠠᠭᠠᠵᠢᠨ ᠬᠡᠯᠡᠪᠡ᠃
— ᠪᠦᠰᠡᠭᠦᠢ ᠭᠡᠨᠡ? ᠭᠡᠵᠦ ᠵᠠᠮᠤᠬᠠ ᠭᠡᠨᠡᠳᠲᠡ ᠵᠤᠭᠠᠲᠠᠢ ᠪᠣᠯᠵᠤ ᠳᠡᠰ ᠳᠡᠰ ᠬᠥᠬᠥᠷᠡᠪᠡ᠃ ᠲᠡᠭᠦᠨ ᠦ᠌ ᠴᠠᠩᠭᠢᠨᠠᠭᠰᠠᠨ ᠢᠨᠢᠶᠡᠳᠦ ᠠᠭᠤᠯᠠᠨ ᠳ᠋ᠤ᠌ ᠴᠤᠤᠷᠢᠶᠠᠲᠤᠵᠤ᠂ ᠡᠷᠲᠡᠨ ᠦ᠌ ᠵᠢᠷᠭᠠᠯᠲᠠᠢ ᠰᠠᠢᠬᠠᠨ ᠦᠶᠡ ᠶ᠋ᠢ ᠡᠷᠬᠡ ᠦᠭᠡᠢ ᠰᠠᠨᠠᠭᠳᠠᠭᠤᠯᠤᠨᠠ᠃
— ᠦᠭᠡᠢ ᠶᠡᠷᠦ᠃ ᠬᠠᠳᠠ ᠴᠢᠯᠠᠭᠤ ᠰᠢᠭ᠋ ᠬᠥᠯᠳᠡᠭᠦᠦ ᠮᠥᠰᠥ ᠰᠢᠭ ᠴᠢᠮᠠ ᠳ᠋ᠤ᠌ ᠪᠠᠰᠠ ᠳᠠᠰᠤᠭᠰᠠᠨ ᠪᠦᠰᠡᠭᠦᠢ ᠪᠣᠢ ᠭᠡᠨᠡ ᠠ᠋? ᠬᠡᠯᠡᠭᠡᠴᠢ ᠬᠡᠨ ᠶᠤᠮ ᠪᠣᠢ? ᠪᠢ ᠯᠠᠪ ᠲᠠᠨᠢᠬᠤ ᠪᠢᠵᠡ?
— ᠲᠠᠢᠴᠢᠭᠤᠳ ᠠ᠋ᠴᠠ ᠠᠪᠤᠭᠰᠠᠨ ᠨᠢᠭᠡ ᠬᠡᠦᠬᠡᠨ ᠶᠤᠮ᠃ ᠣᠳᠣ ᠬᠠᠮᠢᠭᠠ ᠶᠠᠪᠤᠭᠠ ᠶ᠋ᠢ ᠴᠦ᠍ ᠪᠦᠦ ᠮᠡᠳᠡ᠃ ᠪᠠᠰᠠ᠁ ᠬᠡᠦᠬᠡᠳ ᠲᠥᠷᠥᠭᠰᠡᠨ ᠪᠣᠯ᠁ ᠬᠥᠪᠡᠭᠦᠨ ᠦᠦ ᠥᠬᠢᠨ ᠦᠦ ᠪᠦᠦ ᠮᠡᠳᠡ᠃
ᠵᠠᠮᠤᠬᠠ ᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠪᠦᠷ ᠴᠦ᠍ ᠪᠡᠶᠡᠰᠪᠡ᠃
— ᠬᠡᠦᠬᠡᠳ ᠠ᠋᠁ ᠴᠢ ᠪᠠᠰᠠ ᠰᠦᠷᠡᠬᠡᠢ ᠡᠷᠡ ᠶᠤᠮ᠁ ᠪᠢ ᠴᠢᠮᠠᠶ᠋ᠢ ᠳᠤᠲᠠᠭᠤ ᠣᠢᠯᠠᠭᠠᠵᠠᠢ᠃ ᠴᠢ ᠮᠢᠨᠦ ᠰᠠᠨᠠᠭᠰᠠᠨ ᠰᠢᠭ᠋ ᠲᠡᠨᠡᠭ ᠲᠣᠯᠣᠭᠠᠢ ᠪᠢᠰᠢ ᠶᠤᠮ ᠭᠡᠵᠦ ᠵᠠᠮᠤᠬᠠ ᠦᠨᠡᠨ ᠡᠴᠡ ᠪᠡᠨ ᠬᠡᠯᠡᠵᠡᠢ᠃
— ᠲᠡᠢᠮᠦ ᠠ᠋᠃ ᠲᠡᠭᠦᠨ ᠡᠴᠡ ᠬᠥᠪᠡᠭᠦᠨ ᠲᠥᠷᠥᠭᠰᠡᠨ ᠪᠠᠢᠭᠠᠰᠠᠢ ᠭᠡᠵᠦ ᠪᠢ ᠶᠡᠬᠡ ᠬᠦᠰᠡᠨᠡ᠃ ᠪᠦᠷ ᠥᠷᠯᠥᠭᠡ ᠪᠣᠯᠭᠠᠨ ᠴᠢᠯᠠᠭᠤ ᠲᠠᠰᠤᠯᠵᠤ ᠮᠡᠷᠭᠡᠯᠡᠳᠡᠭ ᠭᠡᠭᠴᠢ᠃
— ᠲᠡᠭᠡᠭᠡᠳ ᠬᠥᠪᠡᠭᠦᠨ ᠦᠦ?
— ᠵᠠᠷᠢᠮ ᠳ᠋ᠠᠭᠠᠨ ᠬᠥᠪᠡᠭᠦᠨ᠂ ᠵᠠᠷᠢᠮ ᠳ᠋ᠠᠭᠠᠨ ᠥᠬᠢᠨ ᠭᠡᠵᠦ ᠪᠠᠭᠤᠭᠠᠳ ᠲᠣᠯᠣᠭᠠᠢ ᠡᠷᠭᠢᠵᠦ ᠭᠦᠢᠴᠡᠭᠡᠳ ᠰᠡᠭᠦᠯ ᠳ᠋ᠡᠭᠡᠨ ᠲᠡᠮᠦᠵᠢᠨ ᠦ᠌ ᠴᠡᠷᠢᠭ ᠠᠯᠠᠵᠤ ᠣᠷᠬᠢᠭᠠ ᠦᠭᠡᠢ ᠪᠣᠯ ᠬᠥᠪᠡᠭᠦᠨ ᠥᠬᠢᠨ ᠠᠯᠢ ᠨᠢ ᠴᠦ᠍ ᠪᠠᠢᠭᠰᠠᠨ ᠬᠠᠮᠢᠶᠠ ᠶᠠᠭᠤ ᠪᠣᠢ ᠭᠡᠵᠦ ᠪᠣᠳᠣᠬᠤ ᠪᠣᠯᠤᠯᠠ ᠭᠡᠵᠦ ᠬᠠᠨᠲᠡᠮᠦᠷ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠪᠡ᠃
ᠬᠠᠷᠠᠴᠤ ᠵᠠᠷᠤᠴᠠ ᠶᠤᠮ ᠪᠣᠯ ᠲᠡᠮᠦᠵᠢᠨ ᠶᠠᠭᠠᠬᠢᠪᠠ ᠯᠠ ᠭᠡᠵᠦ᠂ ᠲᠠᠢᠴᠢᠭᠤᠳ ᠪᠦᠭᠦᠳᠡ ᠲᠡᠮᠦᠵᠢᠨ ᠳ᠋ᠦ᠍ ᠳᠠᠭᠠᠵᠤ ᠣᠴᠢᠭᠰᠠᠨ᠃ ᠰᠠᠨᠠᠭᠠ ᠪᠦᠦ ᠵᠣᠪᠠ᠃ ᠬᠡᠷᠡᠭ ᠨᠢᠭᠡᠨᠲᠡ ᠡᠢᠮᠦ ᠪᠣᠯ ᠪᠢ ᠴᠢᠮᠠᠶ᠋ᠢ ᠦᠬᠦᠭᠦᠯᠬᠦ ᠦᠭᠡᠢ ᠪᠠᠢᠬᠤ ᠶ᠋ᠢ ᠲᠡᠮᠦᠵᠢᠨ ᠡᠴᠡ ᠭᠤᠶᠤᠨᠠ᠃ ᠪᠦᠷ ᠴᠢᠮᠠᠶ᠋ᠢ ᠰᠤᠯᠠ ᠠᠷᠠᠳ ᠤ᠋ᠨ ᠠᠳᠠᠯᠢ ᠳᠠᠷᠬᠠᠯᠠᠨ ᠲᠠᠯᠪᠢᠵᠤ ᠶᠠᠪᠤᠭᠤᠯ ᠭᠡᠵᠦ ᠬᠦᠰᠡᠨᠡ᠃ ᠴᠢ ᠲᠡᠭᠡᠭᠡᠳ ᠬᠥᠮᠦᠨ ᠰᠢᠭ ᠠᠮᠢᠳᠤᠷᠠᠭᠲᠤᠨ᠃ ᠪᠢ ᠠᠮᠠᠯᠠᠵᠤ ᠪᠠᠢᠨᠠ᠃ ᠴᠢᠮᠠᠶ᠋ᠢ ᠬᠥᠪᠡᠭᠦᠨ ᠲᠡᠢ ᠪᠣᠯᠪᠠ ᠭᠡᠰᠡᠨ ᠴᠢᠨᠢ ᠰᠡᠳᠬᠢᠯ ᠤᠶᠠᠷᠠᠵᠤ ᠳᠣᠭᠳᠣᠯᠤᠯᠠ ᠭᠡᠵᠦ ᠵᠠᠮᠤᠬᠠ ᠲᠠᠢᠪᠤᠰᠢᠷᠠᠨ ᠢᠨᠢᠶᠡᠮᠰᠦᠭᠯᠡᠵᠦ ᠰᠠᠭᠤᠪᠠ᠃
ᠬᠠᠨᠲᠡᠮᠦᠷ ᠬᠡᠳᠦᠢ ᠣᠯᠠᠨ ᠦᠭᠡ ᠬᠡᠯᠡᠵᠦ ᠪᠦᠬᠦ ᠨᠢᠭᠤᠴᠠ ᠪᠠᠨ ᠳᠡᠯᠭᠡᠭᠰᠡᠨ ᠮᠡᠲᠦ ᠪᠠᠢᠪᠠᠴᠤ ᠵᠠᠮᠤᠬᠠ ᠳ᠋ᠤ᠌ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ ᠶᠠᠭᠤᠮᠠ ᠪᠠᠰᠠ ᠦᠯᠡᠳᠡᠵᠡᠢ᠃ ᠬᠠᠨᠲᠡᠮᠦᠷ ᠦ᠋ᠨ ᠡᠨᠡ ᠪᠦᠰᠡᠭᠦᠢ ᠪᠣᠯ ᠵᠠᠮᠤᠬᠠ ᠶ᠋ᠢᠨ ᠰᠡᠩᠭᠦᠮ ᠳ᠋ᠦ᠍ ᠪᠡᠯᠡᠭᠯᠡᠨ ᠣᠷᠬᠢᠭᠰᠠᠨ ᠭᠦᠷᠪᠡᠯᠵᠢᠨ ᠭᠤᠸᠠ ᠪᠢᠯᠡ᠃ ᠰᠡᠩᠭᠦᠮ ᠳ᠋ᠦ᠍ ᠣᠴᠢᠵᠤ ᠬᠡᠳᠦᠨ ᠵᠢᠯ ᠪᠣᠯᠤᠭᠰᠠᠨ ᠤ᠋ ᠬᠣᠢᠨᠠ ᠬᠤᠪᠴᠠᠰᠤ ᠪᠠᠨ ᠰᠣᠯᠢᠵᠤ ᠬᠠᠷᠠᠴᠤ ᠶ᠋ᠢᠨ ᠳᠠᠷᠤᠤ ᠪᠦᠰᠡᠭᠦᠢ ᠶ᠋ᠢᠨ ᠳᠦᠷᠢ ᠳ᠋ᠦ᠍ ᠬᠤᠪᠢᠯᠤᠭᠰᠠᠨ ᠭᠦᠷᠪᠡᠯᠵᠢᠨ ᠭᠤᠸᠠ ᠨᠢᠭᠡ ᠯᠡ ᠦᠳᠡᠰᠢ ᠬᠡᠪ ᠭᠡᠨᠡᠳᠲᠡ ᠲᠩᠷᠢ ᠡᠴᠡ ᠪᠠᠭᠤᠭᠰᠠᠨ ᠮᠡᠲᠦ ᠬᠠᠨᠲᠡᠮᠦᠷ ᠦ᠋ᠨ ᠠᠰᠠᠷ ᠲᠤ᠌ ᠬᠦᠷᠴᠦ ᠢᠷᠡᠵᠡᠢ᠃ ᠰᠡᠩᠭᠦᠮ ᠦ᠋ᠨ ᠳᠡᠷᠭᠡᠳᠡ ᠪᠠᠢᠬᠤ ᠨᠢ ᠦᠬᠦᠯ ᠢ᠋ᠶ᠋ᠡᠨ ᠳᠠᠭᠤᠳᠠᠭᠰᠠᠨ ᠬᠡᠷᠡᠭ ᠭᠡᠳᠡᠭ ᠢ᠋ ᠣᠢᠯᠠᠭᠠᠭᠰᠠᠨ ᠭᠦᠷᠪᠡᠯᠵᠢᠨ ᠭᠤᠸᠠ ᠪᠦᠬᠦ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠵᠦ ᠦᠨᠡᠨᠴᠢ ᠪᠠᠢᠬᠤ ᠪᠠᠨ ᠠᠮᠠᠯᠠᠨ ᠳᠡᠷᠭᠡᠳᠡ ᠪᠡᠨ ᠨᠢᠭᠤᠨ ᠠᠪᠬᠤ ᠶ᠋ᠢ ᠬᠦᠰᠡᠵᠦ ᠰᠥᠬᠥᠷᠡᠬᠦ ᠳ᠋ᠦ᠍ ᠬᠠᠡᠲᠡᠮᠥᠷ ᠤᠭ ᠠ᠋ᠴᠠ ᠲᠡᠭᠦᠨ ᠳ᠋ᠦ᠍ ᠲᠠᠯᠠ ᠲᠠᠢ ᠤᠴᠢᠷ ᠦᠭᠡ ᠳᠠᠭᠤ ᠦᠭᠡᠢ ᠵᠥᠪᠰᠢᠶᠡᠷᠡᠵᠦ ᠪᠦᠰᠡᠭᠦᠢ ᠶ᠋ᠢ ᠥᠪᠡᠷ ᠦ᠋ᠨ ᠢᠲᠡᠭᠡᠯᠲᠡᠢ ᠠᠢᠯ ᠳ᠋ᠤ᠌ ᠨᠢᠭᠤᠴᠠ ᠪᠠᠷ ᠠᠪᠠᠴᠢᠵᠤ ᠰᠠᠭᠤᠯᠭᠠᠭᠰᠠᠨ ᠪᠢᠯᠡ᠃ ᠲᠡᠮᠦᠵᠢᠨ ᠦ᠌ ᠴᠡᠷᠢᠭ ᠲᠦ᠍ ᠬᠥᠭᠡᠭᠡᠭᠳᠡᠬᠦ ᠬᠦᠷᠲᠡᠯᠡ ᠬᠠᠨᠲᠡᠮᠥᠷ ᠰᠥᠨᠢ ᠪᠦᠷᠢ ᠳᠠᠢᠰᠢ ᠳᠠᠪᠬᠢᠵᠤ ᠭᠦᠷᠪᠡᠯᠵᠢᠨ ᠭᠤᠸᠠ ᠲᠠᠢ ᠢᠨᠠᠭᠯᠠᠨ ᠳᠠᠰᠤᠭᠰᠠᠨ ᠶᠤᠮ᠃ ᠬᠠᠷᠢᠨ ᠣᠳᠣ ᠠ᠋ᠴᠠ ᠵᠢᠯ ᠦ᠋ᠨ ᠡᠮᠦᠨᠡ ᠰᠡᠭᠦᠯᠴᠢ ᠶ᠋ᠢᠨ ᠤᠳᠠᠭᠠ ᠠᠭᠤᠯᠵᠠᠬᠤ ᠳ᠋ᠠᠭᠠᠨ ᠪᠡᠶᠡ ᠰᠢᠯᠲᠠᠭᠠᠨ ᠲᠠᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠭᠰᠡᠨ ᠪᠢᠯᠡ᠃ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠬᠠᠨᠲᠡᠮᠥᠷ ᠦ᠋ᠨ ᠰᠡᠳᠬᠢᠯ ᠰᠠᠨᠠᠭᠠᠨ ᠳ᠋ᠤ᠌ ᠣᠭᠵᠣᠮ ᠥᠭᠡᠷᠡᠴᠢᠯᠡᠯᠲᠡ ᠭᠠᠷᠴᠤ ᠭᠦᠷᠪᠡᠯᠵᠢᠨ ᠭᠤᠸᠠ ᠶ᠋ᠢ ᠦᠷᠭᠦᠯᠵᠢ ᠳᠤᠷᠠᠰᠤᠨ ᠬᠦᠰᠡᠮᠵᠢᠯᠡᠬᠦ ᠪᠣᠯᠵᠤ ᠪᠦᠷ ᠵᠠᠷᠢᠮ ᠰᠥᠨᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠲᠡᠪᠡᠷᠢᠨ ᠲᠣᠭᠯᠠᠵᠤ ᠡᠷᠬᠡᠯᠡᠭᠦᠯᠵᠦ ᠪᠠᠢᠨᠠ ᠭᠡᠵᠦ ᠵᠡᠭᠦᠳᠦᠯᠡᠵᠦ᠂ ᠴᠣᠴᠢᠨ ᠰᠡᠷᠡᠭᠡᠳ ᠬᠦᠢᠲᠡᠨ ᠨᠣᠢᠲᠠᠨ ᠲᠡᠭᠷᠢ ᠶ᠋ᠢᠨ ᠳᠣᠣᠷᠠ ᠣᠯᠠᠨᠲᠠ ᠤᠬᠢᠯᠠᠭᠰᠠᠨ ᠪᠢᠯᠡ᠃ ᠲᠡᠭᠦᠨ ᠳ᠋ᠦ᠍ ᠣᠳᠣ ᠦᠷᠡ ᠪᠡᠨ ᠦᠵᠡᠵᠦ ᠦᠵᠡᠰᠬᠦᠯᠡᠩᠲᠦ ᠭᠦᠷᠪᠡᠯᠵᠢᠨ ᠭᠤᠸᠠ ᠪᠠᠨ ᠣᠯᠬᠤ ᠠ᠋ᠴᠠ ᠥᠭᠡᠷᠡ ᠬᠦᠰᠡᠯ ᠦᠭᠡᠢ ᠶᠤᠮ᠃ ᠲᠡᠢᠮᠦ ᠪᠣᠯᠬᠣᠷ ᠵᠠᠮᠤᠬᠠ ᠶ᠋ᠢ ᠲᠡᠮᠦᠵᠢᠨ ᠳ᠋ᠦ᠍ ᠪᠠᠭᠤᠵᠤ ᠥᠭᠭᠥᠭᠡᠰᠠᠢ᠂ ᠡᠰᠡᠪᠡᠯ ᠦᠬᠦᠭᠡᠰᠡᠢ ᠭᠡᠵᠦ ᠳᠣᠲᠣᠷᠠ ᠪᠠᠨ ᠰᠢᠨᠠᠯᠤᠨ ᠬᠦᠰᠡᠭᠰᠡᠭᠡᠷ ᠪᠠᠢᠭᠰᠠᠨ ᠪᠢᠯᠡ᠃ ᠭᠡᠲᠡᠯᠡ ᠣᠳᠣ ᠪᠦᠬᠦ ᠶᠠᠭᠤᠮᠠ ᠲᠡᠭᠦᠨ ᠦ᠌ ᠬᠦᠰᠡᠭᠰᠡᠨ ᠢ᠋ᠶ᠋ᠡᠷ ᠪᠣᠯᠵᠤ ᠵᠠᠮᠤᠬᠠ ᠲᠡᠮᠦᠵᠢᠨ ᠦ᠌ ᠳᠡᠷᠭᠡᠳᠡ ᠣᠴᠢᠬᠤ ᠪᠠᠷ ᠪᠣᠯᠤᠭᠰᠠᠨ ᠴᠤ᠌ ᠥᠷᠥᠰᠢᠶᠡᠯ ᠡᠨᠡᠷᠢᠯ ᠦᠭᠡᠢ ᠲᠡᠮᠦᠵᠢᠨ᠂ ᠬᠠᠭᠠᠨ ᠡᠵᠡᠨ ᠳ᠋ᠡᠭᠡᠨ ᠬᠠᠯᠳᠠᠭᠰᠠᠨ ᠲᠡᠭᠦᠨ ᠢ᠋ ᠲᠡᠷᠡ ᠳᠣᠣᠷᠠ ᠨᠢ ᠴᠠᠪᠴᠢᠨ ᠠᠯᠠᠬᠤ ᠪᠢᠵᠡ᠃ ᠵᠠᠮᠤᠬᠠ ᠶ᠋ᠢᠨ ᠡᠨᠡ ᠵᠠᠷᠯᠢᠭ 《ᠪᠢ ᠦᠬᠦᠬᠦ ᠪᠡᠷ ᠴᠢ ᠦᠬᠦ 》ᠭᠡᠰᠡᠨ ᠲᠡᠢ ᠤᠳᠬᠠ ᠨᠢᠭᠡ ᠶᠦ᠍ᠮ ᠃ ᠪᠣᠭᠣᠯ ᠬᠠᠷᠠᠴᠤ ᠶ᠋ᠢᠨ ᠠᠮᠢ ᠨᠠᠰᠤ ᠬᠠᠭᠠᠨ ᠡᠵᠡᠨ ᠦ᠌ ᠬᠦᠰᠡᠯ᠂ ᠭᠠᠷ ᠬᠣᠶᠠᠷ ᠲᠤ᠌ ᠶᠠᠪᠤᠳᠠᠭ ᠴᠠᠭ ᠬᠣᠢᠨᠠ ᠶᠠᠭᠠᠬᠢᠯᠲᠠᠢ ᠪᠢᠯᠡ ᠃
ᠣᠭᠲᠣ ᠰᠠᠨᠠᠮᠰᠠᠷ ᠦᠭᠡᠢ ᠡᠭᠦᠰᠦᠭᠰᠡᠨ ᠬᠡᠦᠬᠡᠳ ᠦ᠋ᠨ ᠲᠤᠬᠠᠢ ᠶᠠᠷᠢᠶᠠ ᠵᠠᠮᠤᠬᠠ ᠶ᠋ᠢᠨ ᠰᠡᠳᠬᠢᠯ ᠢ᠋ ᠳᠣᠩᠰᠣᠯᠭᠠᠯᠠ᠃ ᠡᠨᠡ ᠪᠣᠯ ᠲᠡᠭᠦᠨ ᠦ᠌ ᠬᠠᠮᠤᠭ ᠤ᠋ᠨ ᠡᠮᠵᠡᠭ ᠰᠢᠨᠠᠯᠤᠯ᠂ ᠦᠷᠭᠦᠯᠵᠢ ᠨᠢᠭᠤᠵᠤ ᠶᠠᠪᠤᠳᠠᠭ ᠭᠤᠨᠢᠭ ᠨᠢ ᠶᠦ᠍ᠮ᠃ ᠭᠠᠵᠠᠷ ᠳᠡᠭᠡᠷᠡ ᠲᠥᠷᠥᠭᠰᠡᠨ ᠭᠠᠭᠴᠠ ᠬᠥᠪᠡᠭᠦᠨ ᠨᠢ ᠡᠩ ᠦ᠋ᠨ ᠭᠡᠮ ᠦᠭᠡᠢ ᠠᠩ ᠤ᠋ᠨ ᠦᠶᠡ ᠪᠡᠷ ᠮᠣᠷᠢᠨ ᠠ᠋ᠴᠠ ᠤᠨᠠᠵᠤ ᠣᠰᠣᠯᠳᠠᠭᠰᠠᠨ ᠨᠢ ᠲᠡᠭᠦᠨ ᠦ᠌ ᠦᠵᠡᠭᠰᠡᠨ ᠬᠠᠮᠤᠭ ᠤ᠋ᠨ ᠠᠶᠤᠮᠰᠢᠭᠲᠤ ᠶᠠᠪᠤᠳᠠᠯ ᠪᠠᠢᠭᠰᠠᠨ ᠶᠤᠮ᠃ ᠲᠡᠷᠡ ᠬᠥᠪᠡᠭᠦᠨ ᠬᠥᠮᠦᠨ ᠬᠥᠮᠦᠨ ᠡᠴᠡ ᠣᠨᠴᠠᠭᠠᠢ ᠰᠡᠷᠭᠦᠯᠡᠩ ᠭᠠᠪᠰᠢᠭᠠᠢ ᠪᠠᠢᠭᠰᠠᠨ ᠨᠢ ᠮᠠᠭᠲᠠᠭᠠᠯ ᠂ ᠴᠠᠭᠠᠨ ᠬᠡᠯᠡ ᠠᠮᠠᠨ ᠳ᠋ᠤ᠌ ᠢᠳᠡᠭᠳᠡᠬᠦ ᠳ᠋ᠦ᠍ ᠬᠦᠷᠴᠦ᠂ ᠵᠠᠮᠤᠬᠠ ᠲᠡᠭᠦᠨ ᠢ᠋ ᠪᠡᠨ ᠬᠠᠮᠠᠭᠠᠯᠠᠵᠤ ᠴᠢᠳᠠᠯ ᠦᠭᠡᠢ ᠠᠯᠳᠠᠭᠰᠠᠨ ᠪᠢᠯᠡ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠲᠩᠷᠢ ᠲᠡᠭᠦᠨ ᠢ᠋ ᠴᠡᠭᠡᠷᠯᠡᠭᠦᠯᠵᠦ ᠬᠠᠲᠤᠳ ᠡᠮᠡᠰ ᠡᠴᠡ ᠨᠢ ᠬᠦᠦ ᠲᠥᠷᠥᠭᠰᠡᠨ ᠦᠭᠡᠢ ᠬᠦᠰᠡᠬᠦ ᠳ᠋ᠦ᠍ ᠬᠢᠰᠠᠨᠠ ᠭᠡᠳᠡᠭ ᠪᠣᠯᠵᠠᠢ᠃ ᠵᠠᠮᠤᠬᠠ ᠂ ᠡᠮᠡᠰ ᠢ᠋ ᠤᠭ ᠠ᠋ᠴᠠ ᠬᠥᠮᠦᠨ ᠭᠡᠵᠦ ᠦᠯᠦ ᠲᠣᠭᠣᠬᠤ ᠲᠤᠯᠠ ᠲᠩᠷᠢ ᠴᠡᠭᠡᠷᠯᠡᠭᠦᠯᠵᠦ ᠭᠠᠭᠴᠠ ᠬᠥᠪᠡᠭᠦᠨ ᠢ᠋ ᠨᠢ ᠠᠪᠴᠤ ᠣᠳᠤᠭᠰᠠᠨ ᠢ᠋ ᠲᠡᠷᠡ ᠭᠠᠳᠠᠷᠯᠠᠳᠠᠭ ᠦᠭᠡᠢ ᠴᠦ᠍ ᠬᠦᠰᠡᠭᠰᠡᠨ ᠬᠦᠰᠡᠭᠡ ᠦᠭᠡᠢ ᠯᠡ ᠡᠨᠡ ᠭᠠᠵᠠᠷ ᠳᠡᠭᠡᠷᠡ ᠵᠠᠮᠤᠬᠠ ᠶ᠋ᠢᠨ ᠦᠷᠡ ᠤᠳᠤᠮ ᠲᠠᠰᠤᠷᠠᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠷᠡᠨ ᠪᠡᠷᠬᠡ ᠶᠡᠬᠡ ᠪᠡᠷ ᠭᠤᠨᠢᠭᠯᠠᠳᠠᠭ ᠶᠤᠮ ᠃ ᠭᠡᠪᠡᠴᠦ ᠲᠠᠭᠠᠯᠠᠵᠤ ᠬᠠᠪᠢᠳᠠᠭᠰᠠᠨ᠂ ᠬᠦᠴᠦᠷᠬᠡᠢᠯᠡᠨ ᠣᠯᠠᠨ ᠡᠮᠡᠰ ᠦ᠋ᠨ ᠬᠡᠨ ᠨᠢᠭᠡ ᠨᠢ ᠲᠣᠬᠢᠶᠠᠯᠳᠤᠯ ᠢ᠋ᠶ᠋ᠠᠷ ᠬᠥᠪᠡᠭᠦᠨ ᠲᠥᠷᠥᠭᠦᠯᠦᠭᠰᠡᠨ ᠪᠠᠢᠬᠤ ᠶ᠋ᠢ ᠲᠡᠷᠡ ᠪᠠᠰᠠ ᠦᠭᠡᠢᠰᠬᠡᠵᠦ ᠦᠯᠦ ᠴᠢᠳᠠᠨᠠ᠃ ᠲᠡᠭᠡᠪᠡᠯ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ? ᠲᠡᠭᠦᠨ ᠦ᠌ ᠴᠢᠰᠤᠲᠠᠢ᠂ ᠠᠮᠢ ᠪᠠᠶᠠᠨ ᠤ᠋ ᠬᠢᠨᠢ ᠲᠠᠰᠤᠷᠬᠠᠢ ᠪᠣᠯᠤᠭᠰᠠᠨ ᠬᠥᠪᠡᠭᠦᠨ ᠬᠡᠨ ᠨᠢᠭᠡᠨ ᠦ᠌ ᠪᠦᠯᠢ ᠳ᠋ᠦ᠍ ᠠᠮᠢᠳᠤᠷᠠᠵᠤ ᠬᠣᠷᠸᠠ ᠶ᠋ᠢᠨ ᠲᠣᠭᠣᠰᠣ ᠬᠥᠳᠡᠯᠭᠡᠵᠦ ᠶᠠᠪᠤᠭᠠ ᠪᠢᠵᠡ ᠭᠡᠵᠦ ᠲᠠᠢᠪᠤᠰᠢᠷᠠᠬᠤ ᠴᠤ᠌ ᠪᠣᠢ᠃ ᠤᠭ ᠠ᠋ᠴᠠ ᠡᠷᠡ ᠬᠥᠮᠦᠨ ᠳ᠋ᠦ᠍ ᠦᠷᠡ ᠤᠳᠤᠮ ᠢ᠋ᠶ᠋ᠠᠨ ᠦᠯᠡᠳᠡᠭᠡᠬᠦ ᠭᠡᠵᠦ ᠨᠡᠩ ᠵᠣᠪᠠᠯᠠᠩᠲᠤ ᠦᠢᠯᠡ ᠪᠠᠢᠳᠠᠭ ᠢ᠋ ᠲᠡᠷᠡ ᠮᠡᠳᠡᠳᠡᠭ ᠦᠭᠡᠢ ᠪᠢᠰᠢ ᠮᠡᠳᠡᠵᠦ᠂ ᠤᠬᠠᠭᠠᠷᠠᠬᠤ ᠶ᠋ᠢᠨ ᠳᠡᠭᠡᠳᠦ ᠪᠡᠷ ᠤᠬᠠᠭᠠᠷᠠᠬᠤ ᠲᠤᠯᠠ ᠬᠠᠷᠠᠮᠰᠠᠨ ᠭᠠᠰᠢᠭᠤᠳᠠᠳᠠᠭ ᠨᠢ ᠨᠡᠩ ᠶᠡᠬᠡ ᠠᠵᠢ᠃ ᠭᠡᠪᠡᠴᠦ ᠳᠡᠭᠡᠳᠦ ᠲᠡᠭᠷᠢ ᠬᠢᠯᠢᠩᠨᠡᠵᠦ ᠲᠡᠭᠦᠨ ᠳ᠋ᠦ᠍ ᠡᠢᠨ ᠬᠦ᠌ ᠬᠥᠪᠡᠭᠦᠨ ᠦ᠌ ᠡᠴᠢᠭᠡ ᠪᠠᠢᠬᠤ ᠬᠤᠪᠢ ᠵᠠᠶᠠᠭᠠ ᠬᠠᠢᠷᠠᠯᠠᠭᠰᠠᠨ ᠦᠭᠡᠢ ᠃ ᠬᠠᠷᠢᠨ ᠥᠴᠦᠬᠡᠨ ᠮᠠᠭᠤ ᠲᠡᠨᠡᠭ ᠪᠣᠭᠣᠯ ᠬᠠᠡᠲᠡᠮᠥᠷ ᠲᠦ᠍ ᠡᠢᠮᠦ ᠳᠡᠭᠡᠳᠦ ᠰᠣᠶᠣᠷᠬᠠᠯ ᠬᠦᠷᠲᠡᠭᠡᠭᠰᠡᠨ ᠢ᠋ ᠰᠣᠨᠣᠰᠤᠭᠠᠳ ᠠᠭᠤᠷ ᠤᠴᠠᠭᠠᠷ ᠪᠤᠴᠠᠯᠪᠠᠴᠤ ᠪᠡᠶᠡ ᠪᠡᠨ ᠪᠠᠷᠢᠪᠠ᠃ ᠣᠳᠣ ᠨᠡᠷᠡ ᠲᠥᠷᠥ ᠲᠡᠢ᠂ ᠣᠮᠣᠭ ᠪᠠᠷᠳᠠᠮ ᠦᠬᠦᠯ ᠯᠡ ᠲᠡᠭᠦᠨ ᠦ᠌ ᠪᠦᠬᠦ ᠭᠣᠮᠣᠳᠠᠯ ᠬᠠᠷᠠᠭᠤᠰᠤᠯ ᠢ᠋ ᠣᠷᠣᠯᠠᠨᠠ ᠭᠡᠵᠦ ᠪᠣᠳᠣᠪᠠ᠃ ᠲᠡᠢᠮᠦ ᠤᠴᠢᠷ ᠠ᠋ᠴᠠ ᠬᠠᠨᠲᠡᠮᠦᠷ ᠦ᠋ᠨ ᠰᠡᠳᠬᠢᠯ ᠡᠷᠭᠢᠵᠦ ᠬᠤᠪᠢᠷᠠᠬᠤ ᠠ᠋ᠴᠠ ᠰᠡᠷᠭᠡᠢᠯᠡᠵᠦ
— ᠴᠢ ᠪᠦᠦ ᠰᠠᠨᠠᠭᠠ ᠵᠣᠪᠠ᠃ ᠪᠢ ᠴᠢᠮᠠᠶ᠋ᠢ ᠦᠬᠦᠭᠦᠯᠬᠦ ᠦᠭᠡᠢ᠃ ᠴᠢ ᠤᠳᠠᠬᠤ ᠦᠭᠡᠢ ᠲᠡᠷᠡ ᠪᠦᠰᠡᠭᠦᠢ ᠲᠡᠢ ᠪᠡᠨ᠂ ᠪᠠᠰᠠ ᠬᠥᠪᠡᠭᠦᠨ ᠲᠡᠢ ᠪᠡᠨ ᠠᠭᠤᠯᠵᠠᠨᠠ ᠭᠡᠵᠦ ᠳᠠᠪᠲᠠᠨ ᠬᠡᠯᠡᠪᠡ᠃ ᠥᠭᠡᠷᠡ ᠵᠠᠮ ᠪᠠᠢᠬᠤ ᠦᠭᠡᠢ ᠡᠴᠡ ᠬᠣᠢᠰᠢ ᠬᠠᠨᠲᠡᠮᠦᠷ ᠡᠵᠡᠨ ᠦ᠌ ᠪᠡᠨ ᠬᠦᠰᠡᠯ ᠢ᠋ ᠪᠡᠶᠡᠯᠡᠭᠦᠯᠬᠦ ᠯᠡ ᠦᠯᠡᠳᠡᠵᠡᠢ᠃
ᠵᠠᠮᠤᠬᠠ ᠤᠨᠲᠠᠬᠤ ᠪᠠᠷ ᠬᠡᠪᠲᠡᠪᠡ᠃ ᠬᠠᠷᠢᠨ ᠬᠠᠨᠲᠡᠮᠦᠷ ᠤᠨᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠨᠣᠢᠷ ᠨᠢ ᠬᠤᠯᠵᠢᠵᠤ ᠡᠯᠳᠡᠪ ᠪᠤᠰᠤ ᠶ᠋ᠢᠨ ᠪᠣᠳᠣᠯ ᠲᠠᠷᠢᠬᠢ ᠲᠣᠯᠣᠭᠠᠢ ᠳ᠋ᠤᠨᠢ ᠡᠷᠭᠢᠯᠳᠦᠨᠡ᠃ ᠲᠡᠭᠦᠨ ᠦ᠌ ᠠᠮᠢᠳᠤᠷᠠᠯ ᠴᠣᠬᠣᠮ ᠶᠠᠭᠤᠨ ᠤ᠋ ᠤᠴᠢᠷ ᠦᠷᠡᠭᠳᠡᠵᠦ ᠥᠩᠭᠡᠷᠡᠭᠰᠡᠨ ᠢ᠋ ᠣᠢᠯᠠᠭᠠᠬᠤ ᠭᠡᠵᠦ ᠣᠷᠣᠯᠳᠣᠵᠠᠢ᠃ ᠣᠳᠣ ᠤᠨᠲᠠᠵᠤ ᠬᠡᠪᠲᠡᠭᠡ ᠵᠠᠮᠤᠬᠠ ᠶ᠋ᠢ ᠬᠣᠷᠣᠭᠠᠵᠤ ᠣᠷᠬᠢᠭᠠᠳ ᠭᠦᠷᠪᠡᠯᠵᠢᠨ ᠭᠤᠸᠠ ᠶ᠋ᠢ᠂ ᠪᠠᠰᠠ ᠦᠵᠡᠭᠡ ᠦᠭᠡᠢ ᠮᠥᠷᠲᠡᠭᠡᠨ ᠰᠡᠳᠬᠢᠯ ᠵᠢᠷᠦᠬᠡᠨ ᠳ᠋ᠦ᠍ ᠪᠦᠯᠢᠶᠡᠨ ᠳᠤᠯᠠᠭᠠᠨ ᠢᠯᠴᠢ ᠲᠦᠭᠡᠭᠡᠵᠦ ᠬᠠᠢᠷᠠ ᠬᠦᠷᠭᠡᠬᠦ ᠪᠢᠴᠢᠬᠠᠨ ᠦᠷᠡ ᠪᠡᠨ ᠡᠷᠢᠵᠦ ᠣᠳᠬᠤ ᠰᠠᠨ ᠭᠡᠰᠡᠨ ᠬᠢᠵᠠᠭᠠᠷ ᠦᠭᠡᠢ ᠶᠡᠬᠡ ᠬᠦᠰᠡᠯ ᠣᠷᠭᠢᠯᠤᠨᠠ᠃ ᠡᠨᠡ ᠪᠣᠯ ᠬᠢᠯᠪᠠᠷᠬᠠᠨ ᠵᠦᠢᠯ ᠶᠤᠮ᠃ ᠭᠡᠪᠡᠴᠦ ᠲᠡᠷᠡ ᠢᠩᠭᠢᠵᠦ ᠶᠠᠭᠠᠬᠢᠵᠤ ᠴᠢᠳᠠᠨᠠ᠃ ᠪᠠᠰᠠ ᠵᠠᠮᠤᠬᠠ ᠤᠨᠲᠠᠭᠠ ᠦᠭᠡᠢ᠂ ᠨᠢᠳᠦᠨ ᠦ᠌ ᠪᠤᠯᠤᠩ ᠢ᠋ᠶ᠋ᠠᠷ ᠬᠢᠯᠠᠮᠬᠢᠨ ᠬᠡᠪᠲᠡᠭᠡ ᠶ᠋ᠢ᠂ ᠪᠠᠷᠠᠭᠤᠨ ᠭᠠᠷ ᠨᠢ ᠬᠢᠲᠤᠭᠠ ᠪᠠᠨ ᠠᠳᠬᠤᠭᠠᠰᠤᠲᠠᠢ ᠪᠠᠢᠭᠠ ᠶ᠋ᠢ ᠴᠦ᠍ ᠭᠠᠳᠠᠷᠯᠠᠵᠤ ᠪᠠᠢᠪᠠ᠃ ᠣᠳᠣ ᠭᠠᠭᠴᠠᠬᠠᠨ ᠵᠠᠮᠤᠬᠠ ᠡᠵᠡᠨ ᠦ᠌ ᠪᠡᠨ ᠦᠭᠡᠨ ᠳ᠋ᠦ᠍ ᠢᠲᠡᠭᠡᠬᠦ ᠯᠡ ᠦᠯᠡᠳᠡᠵᠡᠢ᠃ ᠦᠬᠦᠳᠡᠭ ᠪᠠᠢᠯᠠ ᠴᠤ᠌ ᠢᠩᠭᠢᠵᠦ ᠬᠢᠬᠦ ᠪᠡᠷ ᠰᠢᠢᠳᠪᠡ᠃ ᠠᠮᠢ ᠪᠠᠨ ᠠᠪᠤᠷᠠᠬᠤ ᠣᠯᠠᠨ ᠪᠣᠯᠤᠮᠵᠢ ᠲᠡᠭᠦᠨ ᠳ᠋ᠦ᠍ ᠪᠠᠢᠭᠰᠠᠨ ᠴᠤ᠌ ᠬᠠᠨᠲᠡᠮᠦᠷ ᠦᠢᠯᠡ ᠪᠡᠨ ᠳᠠᠭᠠᠵᠤ᠂ ᠡᠮᠵᠡᠭ ᠵᠠᠯᠠᠭᠤ ᠨᠠᠰᠤᠨ ᠠ᠋ᠴᠠ ᠡᠷᠭᠢᠯᠲᠡ ᠦᠭᠡᠢ ᠵᠢᠳᠬᠦᠭᠰᠡᠨ ᠡᠵᠡᠨ ᠳ᠋ᠡᠭᠡᠨ ᠦᠨᠡᠨᠴᠢ ᠦᠯᠡᠳᠡᠬᠦ ᠪᠡᠷ ᠰᠢᠢᠳᠴᠡᠢ᠃ ᠥᠰᠬᠦ ᠡᠴᠡ ᠡᠪᠦᠭᠡᠷᠡᠬᠦ ᠬᠦᠷᠲᠡᠯᠡ ᠪᠡᠨ ᠵᠢᠳᠬᠦᠭᠰᠡᠨ᠂ ᠬᠠᠪᠢᠷᠭᠠ ᠨᠢᠮᠭᠡᠨ ᠨᠠᠰᠤᠨ ᠠ᠋ᠴᠠ ᠬᠠᠭᠠᠨ ᠪᠣᠯᠲᠠᠯᠠ ᠨᠢ ᠬᠠᠮᠲᠤᠷᠠᠭᠰᠠᠨ ᠡᠵᠡᠨ ᠢ᠋ᠶ᠋ᠡᠨ ᠣᠷᠬᠢᠵᠤ ᠠᠮᠢ ᠪᠠᠨ ᠪᠣᠳᠣᠬᠤ ᠨᠢ ᠶᠠᠭᠠᠬᠢᠪᠠᠴᠤ ᠡᠷᠡ ᠶ᠋ᠢᠨ ᠰᠢᠭᠢᠷᠡ ᠦᠭᠡᠢ ᠬᠡᠷᠡᠭ ᠭᠡᠵᠦ ᠲᠡᠷᠡ ᠦᠵᠡᠵᠡᠢ᠃ ᠬᠡᠷᠪᠡ ᠲᠩᠷᠢ ᠢᠪᠡᠭᠡᠵᠦ ᠠᠮᠢᠳᠤ ᠦᠯᠡᠳᠡᠬᠦ ᠠᠪᠠᠰᠤ ᠡᠵᠡᠨ ᠦ᠌ ᠪᠡᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠠᠮᠢᠳᠤᠷᠠᠶᠠ ᠭᠡᠵᠦ ᠰᠠᠨᠠᠪᠠ᠃ ᠢᠩᠭᠢᠵᠦ ᠡᠷᠭᠢᠯᠲᠡ ᠦᠭᠡᠢ ᠰᠢᠢᠳᠦᠭᠰᠡᠨ ᠲᠤᠯᠠ ᠳᠠᠰᠤᠯ ᠦᠭᠡᠢ ᠥᠨᠳᠡᠢᠨ ᠵᠠᠮᠤᠬᠠ ᠶ᠋ᠢ ᠬᠠᠷᠠᠪᠠ᠃ ᠵᠠᠮᠤᠬᠠ ᠤᠨᠲᠠᠬᠤ ᠮᠡᠲᠦ ᠬᠡᠪᠲᠡᠭᠰᠡᠨ ᠴᠦ᠍ ᠬᠠᠨᠲᠡᠮᠦᠷ ᠦ᠋ᠨ ᠢᠩᠭᠢᠵᠦ ᠰᠢᠷᠲᠡᠵᠦ ᠰᠠᠭᠤᠲᠠᠯᠠ ᠭᠡᠨᠡᠳᠲᠡ
— ᠴᠢ ᠶᠠᠭᠤᠨ ᠳ᠋ᠤ᠌ ᠨᠠᠮᠠᠶ᠋ᠢ ᠢᠩᠭᠢᠵᠦ ᠰᠢᠷᠳᠡᠨᠡ ᠪᠣᠢ? ᠭᠡᠵᠦ ᠭᠡᠨᠡᠳᠲᠡᠬᠡᠨ ᠠᠰᠠᠭᠤᠵᠠᠢ᠃
ᠬᠠᠨᠲᠡᠮᠦᠷ ᠦᠭᠡ ᠳᠠᠭᠤ ᠦᠭᠡᠢ ᠮᠥᠯᠬᠥᠵᠦ ᠵᠠᠮ ᠳ᠋ᠠᠭᠠᠨ ᠬᠣᠶᠠᠷ ᠡᠪᠡᠰᠦ ᠲᠠᠰᠤᠯᠤᠨ ᠠᠳᠬᠤᠭᠠᠳ ᠳᠡᠷᠭᠡᠳᠡ ᠨᠢ ᠣᠴᠢᠪᠠ᠃
— ᠴᠢ ᠶᠠᠭᠠᠬᠢᠪᠠ? ᠭᠡᠵᠦ ᠵᠠᠮᠤᠬᠠ ᠬᠠᠷᠠᠲᠠᠢ ᠪᠠᠷ ᠠᠰᠠᠭᠤᠬᠤ ᠳ᠋ᠤ᠌ ᠭᠠᠷ ᠲᠤᠨᠢ ᠬᠢᠲᠤᠭᠠ ᠬᠢᠯᠠᠰᠬᠢᠪᠡ᠃
— ᠬᠥᠷ ᠬᠠᠭᠠᠨ ᠲᠠ ᠡᠨᠡ ᠡᠪᠡᠰᠦᠨ ᠦ᠌ ᠨᠢᠭᠡ ᠶ᠋ᠢ ᠰᠤᠭᠤᠯ᠃
— ᠶᠠᠭᠤ ᠶᠤᠮ ᠪᠣᠢ? ᠭᠡᠬᠦ ᠳ᠋ᠡᠭᠡᠨ ᠴᠦ᠍ ᠬᠢᠲᠤᠭᠠ ᠪᠠᠨ ᠲᠠᠯᠪᠢᠭᠰᠠᠨ ᠦᠭᠡᠢ᠃
— ᠬᠡᠷᠪᠡ ᠤᠷᠲᠤ ᠡᠪᠡᠰᠦ ᠰᠤᠭᠤᠯᠪᠠᠯ ᠬᠥᠪᠡᠭᠦᠨ ᠲᠥᠷᠥᠭᠰᠡᠨ ᠪᠠᠢᠭᠠ᠃ ᠲᠠ ᠨᠠᠳᠠᠳᠤ ᠨᠢᠭᠡ ᠦᠵᠡᠵᠦ ᠥᠭ᠃
ᠵᠠᠮᠤᠬᠠ ᠡᠨᠡ ᠭᠡᠨᠡᠨ ᠲᠡᠨᠡᠭ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠢᠨᠢᠶᠡᠳᠦ ᠠᠯᠳᠠᠪᠠ᠃ ᠰᠤᠭᠤᠯᠤᠭᠰᠠᠨ ᠡᠪᠡᠰᠦ ᠨᠢ ᠤᠷᠲᠤ ᠪᠠᠢᠭᠰᠠᠨ ᠨᠢ ᠬᠠᠨᠲᠡᠮᠦᠷ ᠢ᠋ ᠲᠡᠭᠡᠵᠦ ᠪᠠᠶᠠᠷᠯᠠᠭᠤᠯᠬᠤ ᠶᠤᠮ ᠭᠡᠵᠦ ᠰᠠᠨᠠᠭᠰᠠᠨ ᠦᠭᠡᠢ᠃
— ᠬᠥᠷ ᠬᠠᠭᠠᠨ ᠲᠠ ᠬᠠᠷᠠᠭᠠᠴᠢ᠃ ᠬᠥᠪᠡᠭᠦᠨ ᠪᠠᠢᠨᠠ᠃ ᠪᠢ ᠪᠦᠷ ᠲᠡᠭᠡᠨᠡ ᠭᠡᠵᠦ ᠢᠲᠡᠭᠡᠭᠡᠳ ᠪᠠᠢᠭᠰᠠᠨ ᠶᠤᠮ ᠠ᠋᠃ ᠨᠢᠭᠡᠨᠲᠡ ᠬᠥᠷ ᠬᠠᠭᠠᠨ ᠲᠠ ᠮᠡᠷᠭᠡᠯᠡᠭᠰᠡᠨ ᠶᠤᠮ ᠴᠢᠨᠢ ᠪᠢ ᠬᠥᠪᠡᠭᠦᠨ ᠲᠡᠢ ᠪᠣᠯᠵᠠᠢ ᠭᠡᠵᠦ ᠬᠠᠨᠲᠡᠮᠦᠷ ᠪᠦᠷ ᠪᠣᠰᠤᠨ ᠬᠠᠷᠠᠢᠵᠤ ᠪᠠᠶᠠᠷᠯᠠᠪᠠ᠃ ᠲᠡᠭᠦᠨ ᠦ᠌ ᠪᠠᠶᠠᠷ ᠬᠥᠷ ᠬᠢᠵᠠᠭᠠᠷ ᠦᠭᠡᠢ ᠠᠵᠢ᠃ ᠬᠠᠨᠲᠡᠮᠦᠷ ᠢ᠋ ᠬᠡᠵᠢᠶᠡ᠂ ᠬᠠᠮᠢᠭᠠ ᠢᠩᠭᠢᠵᠦ ᠪᠠᠶᠠᠷᠯᠠᠵᠤ ᠪᠠᠢᠭᠰᠠᠨ ᠢ᠋ ᠵᠠᠮᠤᠬᠠ ᠰᠠᠨᠠᠭᠰᠠᠨ ᠦᠭᠡᠢ᠃
— ᠬᠥᠷ ᠬᠠᠭᠠᠨ᠃ ᠪᠢ ᠥᠨᠥ ᠰᠥᠨᠢ ᠨᠥᠬᠥᠳ ᠢ᠋ᠶ᠋ᠡᠨ ᠪᠣᠰᠬᠠᠵᠤ ᠲᠠᠨ ᠢ᠋ ᠪᠠᠷᠢᠵᠤ ᠠᠪᠠᠴᠢᠨᠠ᠃ ᠲᠠ ᠨᠢᠭᠡ ᠴᠦ᠍ ᠦᠭᠡ ᠪᠦᠦ ᠳᠤᠤᠭᠠᠷ᠃ ᠬᠠᠷᠢᠨ ᠲᠡᠮᠦᠵᠢᠨ ᠳ᠋ᠦ᠍ ᠣᠴᠢᠭᠰᠠᠨ ᠬᠣᠢᠨᠠ ᠮᠢᠨᠦ ᠠᠮᠢ ᠶ᠋ᠢ ᠪᠦᠦ ᠬᠣᠷᠣᠭᠠᠯᠭᠠ᠃ ᠪᠢ ᠭᠤᠶᠤᠶᠠ᠃ ᠪᠢ ᠬᠥᠪᠡᠭᠦᠨ ᠲᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠦᠬᠦᠵᠦ ᠶᠠᠭᠠᠬᠢᠵᠤ ᠪᠣᠯᠤᠨᠠ ᠭᠡᠵᠦ ᠬᠠᠨᠲᠡᠮᠦᠷ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠦᠵᠡᠭᠰᠡᠨ ᠮᠡᠲᠦ ᠪᠡᠶᠡᠰᠦᠨ ᠰᠢᠪᠡᠨᠡᠪᠡ᠃
— ᠴᠢ ᠪᠦᠦ ᠠᠶᠤ᠃ ᠲᠡᠮᠦᠵᠢᠨ ᠮᠢᠨᠦ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠬᠢᠬᠦ ᠪᠣᠯᠤᠨᠠ᠃ ᠴᠢ ᠲᠡᠭᠡᠭᠡᠳ ᠮᠢᠨᠦ ᠨᠢᠳᠦᠨ ᠳ᠋ᠦ᠍ ᠥᠷᠲᠥᠬᠦ ᠦᠭᠡᠢ ᠠᠯᠠᠭᠠ ᠪᠣᠯᠵᠤ ᠦᠵᠡ᠃ ᠲᠡᠷᠡ ᠡᠮᠡ ᠴᠢᠨᠢ ᠠᠮᠢᠳᠤ ᠪᠠᠢᠪᠠᠯ ᠣᠯᠵᠤ ᠠᠪᠤᠭᠠᠳ ᠭᠠᠵᠠᠷ ᠤ᠋ᠨ ᠮᠤᠬᠤᠷ ᠲᠤ᠌ ᠣᠴᠢᠵᠤ ᠠᠮᠢᠳᠤᠷᠠ᠃ ᠴᠢ ᠲᠡᠭᠡᠬᠦ ᠶ᠋ᠢ ᠬᠦᠰᠡᠭᠰᠡᠨ ᠪᠢᠰᠢ ᠦᠦ?
ᠢᠩᠭᠢᠵᠦ ᠬᠡᠯᠡᠬᠦ ᠳ᠋ᠡᠭᠡᠨ ᠵᠠᠮᠤᠬᠠ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠬᠠᠨᠲᠡᠮᠦᠷ ᠢ᠋ ᠬᠥᠪᠡᠭᠦᠨ ᠲᠡᠢ ᠪᠣᠯᠤᠭᠰᠠᠨ ᠳ᠋ᠤ᠌ ᠢᠲᠡᠭᠡᠬᠦ ᠰᠢᠭ ᠪᠣᠯᠵᠠᠢ᠃
— ᠲᠡᠢᠮᠦ ᠠ᠋᠃ ᠪᠢ ᠦᠬᠦᠬᠦ ᠦᠭᠡᠢ ᠠᠪᠠᠰᠤ ᠶᠠᠭ ᠲᠠᠨ ᠤ᠋ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠬᠢᠬᠦ ᠪᠣᠯᠤᠨᠠ᠃ ᠪᠢ ᠲᠠᠨ ᠳ᠋ᠤ᠌ ᠳᠠᠬᠢᠨ ᠭᠠᠢ ᠪᠣᠯᠬᠤ ᠦᠭᠡᠢ ᠭᠠᠵᠠᠷ ᠤ᠋ᠨ ᠭᠠᠪᠠ ᠪᠠᠷ ᠣᠷᠣᠭᠰᠠᠨ ᠮᠡᠲᠦ᠂ ᠭᠠᠯ ᠳ᠋ᠤ᠌ ᠰᠢᠲᠠᠵᠤ᠂ ᠰᠠᠯᠬᠢᠨ ᠳ᠋ᠤ᠌ ᠬᠡᠢᠰᠦᠭᠰᠡᠨ ᠮᠡᠲᠦ ᠦᠭᠡᠢ ᠪᠣᠯᠤᠨᠠ᠃ ᠬᠣᠵᠢᠮ ᠬᠣᠢᠨᠠ ᠬᠠᠭᠠᠨ ᠲᠠᠨ ᠤ᠋ ᠶᠡᠬᠡ ᠪᠡᠶᠡ ᠡᠪᠳᠡᠷᠡᠵᠦ᠂ ᠡᠷᠭᠢ ᠮᠡᠲᠦ ᠨᠤᠷᠠᠵᠤ ᠤᠨᠠᠪᠠᠰᠤ ᠪᠢ ᠬᠥᠪᠡᠭᠦᠳ ᠦᠷᠡ ᠰᠡᠳᠦ ᠪᠡᠨ ᠳᠠᠭᠠᠭᠤᠯᠤᠨ ᠢᠷᠡᠵᠦ ᠮᠥᠷᠭᠥᠭᠦᠯᠦᠭᠡᠳ ᠲᠠᠨ ᠤ᠋ ᠬᠡᠨ ᠪᠠᠢᠭᠰᠠᠨ ᠢ᠋᠂ ᠬᠠᠨᠲᠡᠮᠦᠷ ᠭᠡᠭᠴᠢ ᠶᠠᠳᠠᠭᠤ ᠡᠷᠡ ᠶᠠᠮᠠᠷ ᠭᠡᠭᠴᠢ ᠶᠡᠬᠡ ᠬᠥᠮᠦᠨ ᠦ᠌ ᠰᠢᠳᠠᠷ ᠶᠠᠪᠤᠭᠰᠠᠨ ᠢ᠋ ᠬᠡᠯᠡᠬᠦ ᠪᠣᠯᠤᠨᠠ᠃ ᠲᠡᠷᠡ ᠪᠣᠯᠲᠠᠯᠠ ᠪᠢ ᠲᠠᠨ ᠤ᠋ ᠳᠡᠷᠭᠡᠳᠡ ᠢᠷᠡᠬᠦ ᠦᠭᠡᠢ᠃ ᠲᠠ ᠢᠩᠭᠢᠪᠡ ᠭᠡᠵᠦ ᠨᠠᠳᠠᠳᠤ ᠪᠦᠦ ᠭᠣᠮᠣᠳᠠᠯ ᠰᠠᠨᠠᠯ ᠬᠡᠯᠡᠭᠲᠦᠨ᠃ ᠪᠢ ᠦᠭᠡ ᠪᠡᠨ ᠳᠠᠭᠤᠰᠴᠤ᠂ ᠦᠰᠦ ᠪᠡᠨ ᠵᠤᠯᠭᠠᠷᠠᠲᠠᠯᠠ ᠨᠢᠭᠡᠨ ᠴᠢᠭ ᠲᠦ᠍ ᠰᠡᠳᠬᠢᠯ ᠢ᠋ᠶ᠋ᠡᠷ ᠵᠢᠳᠬᠦᠪᠡ᠃ ᠪᠢ ᠲᠠᠨ ᠳ᠋ᠤ᠌ ᠣᠰᠣᠯᠳᠠᠭᠰᠠᠨ ᠤᠳᠠᠭᠠ ᠪᠠᠢᠪᠠᠯ ᠣᠳᠣ ᠬᠡᠯᠡᠵᠦ ᠵᠢᠮᠡᠯᠡᠵᠦ ᠵᠥᠭᠡᠭᠲᠦᠨ᠃ ᠪᠢ ᠲᠠᠨ ᠤ᠋ ᠦᠭᠡ ᠶ᠋ᠢ ᠨᠠᠰᠤᠨ ᠳ᠋ᠠᠭᠠᠨ ᠮᠠᠷᠲᠠᠬᠤ ᠦᠭᠡᠢ ᠰᠠᠨᠠᠵᠤ᠂ ᠶᠠᠰᠤᠨ ᠳ᠋ᠠᠭᠠᠨ ᠰᠠᠯᠭᠠᠬᠤ ᠦᠭᠡᠢ ᠬᠠᠲᠠᠵᠤ ᠠᠪᠤᠶᠠ᠃
ᠡᠢᠮᠦ ᠦᠨᠡᠨᠴᠢ ᠰᠠᠢᠬᠠᠨ ᠰᠡᠳᠬᠢᠯ ᠦ᠋ᠨ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠦᠭᠡ ᠰᠣᠨᠣᠰᠤᠭᠰᠠᠨ ᠵᠠᠮᠤᠬᠠ ᠶ᠋ᠢᠨ ᠰᠡᠳᠬᠢᠯ ᠳᠣᠭᠳᠣᠯᠤᠨ ᠳᠣᠩᠰᠣᠯᠪᠠ᠃
ᠬᠠᠮᠤᠭ ᠠ᠋ᠴᠠ ᠦᠨᠡᠨᠴᠢ
ᠬᠠᠨᠲᠡᠮᠦᠷ ᠮᠢᠨᠢ
ᠬᠠᠷᠠ ᠨᠢᠳᠦ ᠪᠡᠨ ᠨᠡᠭᠡᠭᠡᠬᠦ ᠳ᠋ᠦ᠍
ᠬᠠᠵᠠᠭᠤ ᠳ᠋ᠤ᠌ ᠵᠣᠭᠰᠣᠭᠴᠢ ᠬᠠᠨᠢ ᠮᠢᠨᠢ
ᠬᠠᠯᠠᠭᠤᠨ ᠨᠠᠷᠠ᠂ ᠬᠦᠢᠲᠡᠨ ᠰᠠᠯᠬᠢᠨ ᠠ᠋ᠴᠠ
ᠬᠠᠭᠠᠴᠠᠢᠯᠠᠵᠤ ᠬᠠᠯᠬᠠᠯᠠᠭᠴᠢ ᠨᠥᠬᠥᠷ ᠮᠢᠨᠢ᠂
ᠬᠠᠳᠠᠨ ᠰᠡᠯᠡᠮᠡ᠂ ᠬᠠᠷᠪᠤᠬᠤ ᠰᠤᠮᠤ ᠠ᠋ᠴᠠ
ᠬᠠᠮᠠᠭᠠᠯᠠᠭᠴᠢ ᠪᠠᠮᠪᠠᠢ ᠮᠢᠨᠢ᠃
ᠬᠠᠯᠠᠭᠠᠨ ᠳᠤᠯᠠᠭᠠᠴᠠᠭᠤᠯᠤᠭᠴᠢ ᠭᠠᠯ ᠮᠢᠨᠢ
ᠬᠠᠯᠠᠭᠤᠨ ᠠᠮᠢ ᠪᠦᠯᠢᠶᠡᠨ ᠰᠡᠳᠬᠢᠯ ᠢ᠋ᠶ᠋ᠡᠨ
ᠬᠠᠷᠠᠮ ᠦᠭᠡᠢ ᠬᠤᠪᠢᠶᠠᠭᠴᠢ ᠠᠨᠳᠠ ᠮᠢᠨᠢ᠁
ᠵᠠᠮᠤᠬᠠ ᠰᠡᠳᠬᠢᠯ ᠬᠥᠳᠡᠯᠦᠨ ᠰᠢᠯᠦᠭᠯᠡᠨ ᠤᠷᠤᠰᠬᠠᠵᠤ ᠬᠡᠯᠡᠯᠡ᠃ ᠲᠡᠭᠦᠨ ᠦ᠌ ᠴᠡᠴᠡᠨ ᠴᠡᠯᠮᠡᠭ ᠤᠷᠠᠨ ᠦᠭᠡᠰ ᠢ᠋ ᠰᠣᠨᠣᠰᠬᠤ ᠳ᠋ᠤ᠌ ᠠᠭᠤᠯᠠ ᠶ᠋ᠢᠨ ᠲᠠᠭᠲᠤ ᠳ᠋ᠤ᠌ ᠬᠥᠬᠥᠭᠡ ᠰᠢᠪᠠᠭᠤ ᠳᠣᠩᠭᠣᠳᠬᠤ ᠮᠡᠲᠦ ᠢᠷᠠᠭᠤ ᠪᠢᠯᠡ᠃
—ᠬᠠᠷᠠ ᠬᠠᠲᠠᠭᠠᠨ ᠡᠴᠢᠭᠡ ᠶ᠋ᠢᠨ
ᠬᠤᠪᠢᠶᠠᠵᠤ ᠥᠭᠭᠦᠭᠰᠡᠨ ᠨᠥᠬᠥᠷ
ᠤᠬᠠᠭᠠᠨᠲᠤ ᠬᠣᠢᠯᠠᠷ ᠡᠴᠢᠭᠡ ᠶ᠋ᠢᠨ
ᠤᠤᠭᠠᠨ ᠬᠥᠪᠡᠭᠦᠨ ᠮᠢᠨᠢ ᠠ᠋᠃
ᠵᠠᠳᠠᠷᠠᠨ ᠠᠢᠮᠠᠭ ᠢ᠋
ᠪᠦᠲᠦᠨ ᠠᠬᠤᠢ ᠳ᠋ᠤ᠌
ᠢᠵᠢᠯᠢᠳᠪᠡ᠂ ᠪᠢᠳᠡ
ᠵᠢᠯᠠᠭᠠ ᠶ᠋ᠢᠨ ᠮᠤᠬᠤᠷ ᠲᠤ᠌
ᠬᠣᠶᠠᠭᠤᠯᠠ ᠦᠯᠡᠳᠡᠲᠡᠯᠡ ᠵᠢᠳᠬᠦᠪᠡ᠂ ᠴᠢ
ᠵᠣᠷᠢᠭ ᠬᠤᠷᠴᠠᠯᠠᠬᠤ ᠠᠨᠳᠠ
ᠵᠣᠪᠠᠯᠠᠩ ᠨᠢᠮᠭᠡᠯᠡᠬᠦ ᠨᠥᠬᠥᠷ
ᠵᠣᠷᠢᠭ ᠢ᠋ᠶ᠋ᠠᠷ ᠶᠠᠪᠤᠬᠤ ᠳ᠋ᠤ᠌ ᠳᠠᠭᠠᠭᠤᠯ
ᠵᠣᠵᠢᠭᠷᠠᠵᠤ ᠭᠠᠭᠴᠠᠭᠠᠷᠳᠠᠬᠤ ᠳ᠋ᠤ᠌ ᠲᠦᠰᠢᠭ
ᠬᠠᠲᠠᠭᠤ ᠶ᠋ᠢ ᠵᠥᠭᠡᠯᠡᠯᠴᠡᠵᠦ
ᠬᠠᠳᠬᠤᠯᠳᠤᠬᠤ ᠳ᠋ᠤ᠌ ᠬᠠᠮᠵᠢᠯᠴᠠᠵᠤ
ᠬᠠᠮᠤᠭ ᠪᠦᠬᠦᠨ ᠢ᠋ᠶ᠋ᠡᠨ ᠬᠤᠪᠢᠶᠠᠯᠴᠠᠭᠰᠠᠨ
ᠬᠠᠨᠳᠠᠮᠤᠷ ᠴᠢᠮᠠᠶ᠋ᠢ ᠪᠢ
ᠵᠠᠩᠨᠠᠵᠤ ᠵᠢᠮᠡᠯᠡᠶᠡ ᠭᠡᠪᠡᠴᠦ
ᠦᠭᠡ ᠦᠯᠦ ᠣᠯᠳᠠᠨᠠ᠃
ᠵᠠᠰᠠᠵᠤ ᠰᠤᠷᠭᠠᠶᠠ ᠭᠡᠪᠡᠴᠦ
ᠠᠯᠳᠠᠭᠠ ᠦᠯᠦ ᠣᠯᠳᠠᠨᠠ
ᠵᠦᠢ ᠦᠭᠡᠢ ᠮᠤᠩᠬᠠᠭ ᠪᠢ
ᠵᠥᠪ ᠢ᠋ ᠵᠠᠰᠠᠵᠤ ᠦᠯᠦ ᠴᠢᠳᠠᠪᠠ᠃
ᠵᠢᠳᠬᠦᠭᠰᠡᠨ ᠴᠢᠨᠦ ᠬᠦᠴᠦ ᠶ᠋ᠢ
ᠵᠦᠭ ᠦ᠋ᠨ ᠰᠠᠯᠬᠢᠨ ᠳ᠋ᠤ᠌ ᠬᠡᠢᠰᠬᠡᠪᠡ᠃
ᠣᠳᠣ ᠪᠢ ᠴᠢᠮᠠ ᠳ᠋ᠤ᠌
ᠣᠯᠠᠨ ᠦᠭᠡ ᠶ᠋ᠢ ᠶᠠᠭᠠᠬᠢᠨ ᠬᠡᠯᠡᠨᠡ᠃
ᠣᠨᠴᠠᠭᠠᠢ ᠨᠥᠬᠥᠷ ᠴᠢᠮᠠ ᠳ᠋ᠤ᠌
ᠣᠨᠣᠪᠴᠢᠲᠠᠢ ᠵᠥᠪ ᠢ᠋ ᠶᠠᠭᠠᠬᠢᠨ ᠵᠢᠭᠠᠨᠠ
ᠦᠨᠡᠨᠴᠢ ᠵᠢᠳᠬᠦᠭᠰᠡᠨ ᠰᠡᠳᠬᠢᠯ ᠦ᠋ᠨ ᠴᠢᠨᠢ ᠬᠠᠷᠢᠭᠤ ᠳ᠋ᠤ᠌
ᠦᠭᠡᠨ ᠡᠴᠡ ᠥᠭᠡᠷᠡ ᠱᠠᠩᠨᠠᠯ ᠠᠯᠠᠭᠠ
ᠪᠦᠬᠦᠨᠡ ᠵᠣᠷᠢᠭᠤᠯᠤᠭᠰᠠᠨ ᠢᠲᠡᠭᠡᠯ ᠦ᠋ᠨ ᠴᠢᠨᠢ ᠬᠠᠷᠢᠭᠤ ᠳ᠋ᠤ᠌
ᠪᠥᠰᠡᠨ ᠡᠴᠡ ᠥᠭᠡᠷᠡ ᠪᠡᠯᠡᠭ ᠠᠯᠠᠭᠠ ᠭᠡᠵᠦ ᠠᠶᠠᠯᠭᠤᠯᠤᠨ ᠰᠢᠯᠦᠭᠯᠡᠭᠡᠳ ᠵᠠᠮᠤᠬᠠ ᠠᠯᠲᠠᠨ ᠪᠦᠰᠡ ᠪᠡᠨ ᠲᠠᠢᠯᠵᠤ ᠥᠭᠪᠡ᠃
ᠬᠥᠷ ᠬᠠᠭᠠᠨ ᠲᠠ ᠶᠠᠭᠠᠬᠢᠨ ᠢᠩᠭᠢᠵᠦ ᠪᠣᠯᠬᠤ ᠪᠣᠢ? ᠪᠣᠭᠣᠯ ᠪᠢ ᠠᠯᠲᠠᠨ ᠪᠦᠰᠡ ᠪᠦᠰᠡᠯᠡᠪᠡᠯ ᠠᠢᠯ ᠤ᠋ᠨ ᠨᠣᠬᠠᠢ ᠠᠷᠰᠯᠠᠨ ᠤ᠋ ᠳᠦᠷᠢ ᠳ᠋ᠦ᠍ ᠬᠤᠪᠢᠯᠬᠤ ᠮᠡᠲᠦ ᠲᠤᠯᠠ ᠠᠯᠳᠠᠰᠢ ᠪᠣᠯᠵᠤ ᠲᠩᠷᠢ ᠬᠢᠯᠢᠩᠨᠡᠬᠦ ᠪᠢᠵᠡ ᠭᠡᠵᠦ ᠬᠠᠨᠳᠠᠮᠤᠷ ᠰᠢᠭᠤᠳ ᠡᠰᠡᠷᠭᠦᠴᠡᠪᠡ᠃
ᠣᠯᠠᠨ ᠦᠭᠡ ᠪᠤᠤ ᠶᠠᠷᠢ᠃ ᠬᠡᠨ ᠴᠢᠮᠠᠶ᠋ᠢ ᠣᠳᠣ ᠪᠣᠭᠣᠯ ᠭᠡᠨᠡ᠃ ᠬᠥᠪᠡᠭᠦᠨ ᠴᠢᠨᠢ ᠴᠢᠮᠠᠶ᠋ᠢ ᠳᠠᠪᠠᠵᠤ ᠪᠠᠭᠠᠲᠤᠷ ᠰᠠᠢᠨ ᠡᠷᠡ ᠪᠣᠯᠬᠤ ᠪᠢᠵᠡ᠃ ᠬᠥᠪᠡᠭᠦᠨ ᠳ᠋ᠡᠭᠡᠨ ᠨᠠᠮᠠᠶ᠋ᠢ ᠥᠭᠪᠡ ᠭᠡᠳ ᠡᠷᠡ ᠪᠣᠯᠬᠤ ᠳ᠋ᠤᠨᠢ ᠵᠡᠭᠦᠵᠦ ᠥᠭ᠃ ᠬᠥᠷ ᠬᠠᠭᠠᠨ ᠵᠠᠮᠤᠬᠠ ᠶ᠋ᠢ ᠰᠠᠢᠨ ᠢ᠋ᠶ᠋ᠠᠷ ᠳᠤᠷᠠᠰᠴᠤ ᠶᠠᠪᠤᠭ᠃
ᠵᠠᠮᠤᠬᠠ ᠶ᠋ᠢᠨ ᠡᠨᠡ ᠦᠭᠡ ᠦᠨᠡᠨ ᠲᠤᠯᠠ ᠬᠠᠨᠳᠡᠮᠦᠷ ᠰᠠᠶᠢ ᠡᠷᠡᠭᠡᠯᠵᠡᠯ ᠦᠭᠡᠢ ᠠᠪᠴᠤ ᠪᠦᠰᠡᠯᠡᠪᠡ᠃ ᠬᠠᠷᠢᠨ ᠴᠤ᠌ ᠬᠥᠪᠡᠭᠦᠨ ᠮᠢᠨᠢ ᠥᠰᠬᠦ ᠳ᠋ᠦ᠍ ᠪᠡᠯᠭᠡ ᠳᠡᠮᠪᠡᠷᠢᠯ ᠲᠡᠢ ᠶᠠᠭᠤᠮᠠ ᠪᠣᠯᠪᠠ ᠭᠡᠵᠦ ᠬᠥᠭᠡᠷᠦᠨ ᠪᠣᠳᠣᠵᠠᠢ᠃
— ᠡᠭᠦᠨ ᠡᠴᠡ ᠬᠣᠢᠰᠢ ᠴᠢ ᠥᠪᠡᠷ ᠢ᠋ ᠪᠡᠨ ᠪᠣᠭᠣᠯ ᠭᠡᠵᠦ ᠪᠤᠤ ᠬᠡᠯᠡᠭᠲᠦᠨ᠃ ᠴᠢᠯᠥᠭᠡᠲᠦ ᠰᠤᠯᠠ ᠢᠷᠭᠡᠨ ᠪᠣᠯᠪᠠ ᠭᠡᠵᠦ ᠰᠠᠨᠠ᠃ ᠪᠢ ᠢᠩᠭᠢᠵᠦ ᠲᠤᠰᠢᠶᠠᠶᠠ᠃
ᠵᠠ᠂ ᠪᠢ ᠲᠠᠨ ᠤ᠋ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠶᠠᠪᠤᠶᠠ᠃ ᠲᠠ ᠣᠳᠣ ᠲᠠᠢᠪᠤᠩ ᠰᠠᠢᠬᠠᠨ ᠤᠨᠲᠠᠭᠲᠤᠨ᠃ ᠰᠥᠨᠢ ᠳᠦᠯᠢ ᠪᠡᠷ ᠪᠢ ᠪᠦᠭᠦᠳᠡ ᠶ᠋ᠢ ᠲᠠᠨ ᠤ᠋ ᠬᠦᠰᠡᠭᠰᠡᠨ ᠢ᠋ᠶ᠋ᠡᠷ ᠬᠢᠵᠦ ᠣᠳᠤᠨᠠ᠃
— ᠵᠠ ᠲᠡᠭᠡᠪᠡᠯ ᠰᠠᠢᠨ ᠪᠣᠯᠪᠠ᠃ ᠣᠳᠣ ᠬᠣᠶᠠᠭᠤᠯᠠ ᠨᠥᠬᠥᠷ ᠦ᠋ᠨ ᠶᠣᠰᠣ ᠪᠠᠷ ᠰᠠᠯᠤᠶᠠ᠃
ᠲᠡᠳᠡ ᠳᠤᠬᠤ ᠪᠠᠨ ᠨᠡᠢᠯᠡᠭᠦᠯᠦᠨ ᠤᠳᠠᠭᠠᠨ ᠵᠣᠭᠰᠣᠪᠠ᠃ ᠡᠭᠦᠨ ᠦ᠌ ᠬᠣᠢᠨᠠ ᠵᠠᠮᠤᠬᠠ ᠭᠠᠵᠠᠷ ᠬᠡᠪᠲᠡᠭᠡᠳ ᠨᠠᠮ ᠤᠨᠲᠠᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠭᠡᠷᠡᠯ᠂ ᠬᠡᠷᠡᠶ᠋ᠢᠳ ᠮᠥᠩᠬᠡᠨᠠᠰᠤᠨ᠂ ᠬᠡᠯᠡᠰᠣᠶᠤᠯ᠂ ( ᠪᠤᠤ ᠸᠸᠨ ᠬᠤᠸᠠ)᠂ ᠱᠠᠭᠰᠠᠯ᠂
ᠠᠯᠲᠠᠨᠴᠡᠴᠡᠭ᠂ ᠨᠠᠷᠠᠨᠲᠤᠶᠠᠭᠠ᠂ ᠰᠡᠴᠡᠨᠴᠢᠮᠡᠭ᠂ ᠵᠢᠩᠯᠢᠬᠤᠸᠠᠷ᠂ ᠡᠩᠬᠡᠪᠠᠲᠤ᠂ ᠠᠷᠢᠭᠤᠨ᠂
ᠮᠥᠩᠭᠥᠨ᠂ ᠴᠡᠴᠡᠭ᠂ ᠪᠠᠶᠠᠨᠰᠡᠷᠡᠩ᠂ ᠣᠶᠤᠨᠪᠢᠯᠢᠭ᠌᠂ ᠳᠡᠭᠦᠵᠠᠶᠠᠭᠠ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠰᠡᠬᠡᠭᠡᠷᠡᠯ᠂ ᠮᠣᠩᠭᠣᠯ ᠰᠦᠨᠡᠰᠦ᠂ ᠠᠷᠢᠭᠤᠨ ᠂ ᠭᠠᠷᠮᠠ᠂ ᠨᠠᠷᠠᠨ᠂
ᠰᠡᠴᠡᠨᠴᠢᠮᠡᠭ᠂ ᠲ·ᠬᠦᠮᠦᠵᠢᠯᠲᠦ᠂ ᠱᠠᠭᠰᠠᠯ᠂ ᠪᠠᠶᠠᠨᠴᠡᠴᠡᠭ᠂ ᠬᠡᠯᠡᠰᠣᠶᠤᠯ᠂ ᠬᠠᠢ ᠵᠢᠶᠦ᠋ᠨ