ᠵᠠᠮᠤᠬᠠ-ᠬᠠᠴᠢᠷᠬᠠᠯᠲᠠᠢ ᠵᠡᠭᠦᠳᠦ ᠶᠢᠨ ᠲᠠᠢᠯᠤᠯ - ᠴᠢᠩᠭᠢᠰ ᠬᠠᠭᠠᠨ ᠊ᠤ᠌ ᠨᠢᠭᠤᠴᠠ ᠲᠡᠦᠬᠡ06 Хачирхалтай зүүдийн тайлал - Чингис хаан оо нууц түүх 06
760ᠬᠠᠴᠢᠷᠬᠠᠯᠲᠠᠢ ᠵᠡᠭᠦᠳᠦ ᠶᠢᠨ ᠲᠠᠢᠯᠤᠯ
ᠣᠯᠠᠨ ᠰᠠᠷᠠ ᠠᠭᠤᠯᠠᠨ ᠳ᠋ᠤ᠌ ᠪᠦᠭᠭᠦᠵᠦ ᠵᠡᠷᠯᠢᠭᠰᠢᠭᠰᠡᠨ ᠬᠠᠨᠲᠡᠮᠦᠷ ᠲᠦ᠍ ᠶᠡᠬᠡ ᠣᠷᠳᠣᠨ ᠤ᠋ ᠡᠨᠡ ᠨᠦᠰᠡᠷ ᠶᠡᠬᠡᠮᠰᠦᠭ ᠠᠭᠠᠳ ᠰᠦᠷᠯᠢᠭ ᠳᠦᠷᠢ ᠪᠠᠢᠳᠠᠯ ᠲᠤᠢᠯ ᠤ᠋ᠨ ᠰᠣᠨᠢᠨ ᠪᠠᠢᠵᠠᠢ᠃ ᠬᠠᠨᠲᠡᠮᠦᠷ᠂ ᠡᠵᠡᠨ ᠦ᠌ ᠪᠡᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠲᠡᠭᠦᠨ ᠢ᠋ ᠲᠡᠮᠦᠵᠢᠨ ᠦ᠌ ᠣᠷᠳᠣᠨ ᠤ᠋ ᠬᠠᠰᠢᠶᠠᠨ ᠤ᠋ ᠭᠠᠳᠠᠨᠠ ᠬᠠᠷᠠᠭᠤᠯ ᠳ᠋ᠤ᠌ ᠲᠤᠰᠢᠶᠠᠨ ᠥᠭᠭᠦᠭᠡᠳ ᠨᠠᠮ ᠴᠢᠮᠡᠭᠡ ᠦᠭᠡᠢ ᠬᠦᠯᠢᠶᠡᠨ ᠵᠣᠭᠰᠣᠪᠠ᠃《ᠬᠥᠷ ᠬᠠᠭᠠᠨ ᠵᠠᠮᠤᠬᠠ ᠶ᠋ᠢ ᠲᠡᠮᠦᠵᠢᠨ ᠳ᠋ᠦ᠍ ᠬᠦᠷᠭᠡᠵᠦ ᠶᠠᠪᠤᠨᠠ》ᠭᠡᠰᠡᠨ ᠦᠭᠡ ᠲᠡᠳᠡᠨ ᠢ᠋ ᠮᠣᠩᠭᠣᠯ ᠤ᠋ᠨ ᠠᠭᠤᠳᠠᠮ ᠨᠤᠲᠤᠭ ᠢ᠋ᠶ᠋ᠠᠷ ᠰᠠᠭᠠᠳ ᠦᠭᠡᠢ ᠨᠡᠪᠲᠡᠷᠡᠭᠦᠯᠵᠦ ᠡᠨᠳᠡ ᠠᠪᠴᠢᠷᠠᠭᠰᠠᠨ ᠨᠢ ᠵᠠᠮᠤᠬᠠ ᠶ᠋ᠢᠨ ᠨᠡᠷᠡ ᠰᠦᠷ ᠢ᠋ ᠪᠢᠰᠢ᠂ ᠬᠠᠷᠢᠨ ᠲᠡᠮᠦᠵᠢᠨ ᠬᠡᠷᠬᠢᠨ ᠬᠦᠴᠦᠷᠬᠡᠭᠵᠢᠵᠦ ᠠᠯᠳᠠᠷᠰᠢᠭᠰᠠᠨ ᠢ᠋ ᠪᠠᠲᠤᠯᠠᠬᠤ ᠠᠵᠢ᠃ ᠵᠠᠮᠤᠬᠠ ᠡᠵᠡᠨ ᠨᠢ ᠬᠡᠯᠡᠭᠰᠡᠨ ᠳ᠋ᠡᠭᠡᠨ ᠬᠦᠷᠴᠦ ᠵᠠᠮ ᠵᠠᠭᠤᠷᠠ ᠨᠢᠭᠡ ᠴᠦ᠍ ᠦᠭᠡ ᠠᠮᠠᠨ ᠠ᠋ᠴᠠ ᠤᠨᠠᠭᠠᠭᠰᠠᠨ ᠦᠭᠡᠢ᠃ ᠪᠦᠲᠦᠨ ᠰᠠᠷᠠ ᠶ᠋ᠢᠨ ᠲᠤᠷᠰᠢ ᠢᠩᠭᠢᠵᠦ ᠵᠢᠭᠠᠰᠤ ᠰᠢᠭ᠋ ᠲᠠᠭ ᠳᠠᠭᠤ ᠦᠭᠡᠢ ᠪᠠᠢᠵᠤ ᠠᠭᠤᠷ ᠴᠢᠬᠤᠯ᠂ᠤᠢᠳᠬᠠᠷ ᠭᠤᠨᠢᠭ ᠬᠢᠭᠡᠳ ᠬᠢᠯᠢᠩ ᠬᠣᠷᠣᠰᠤᠯ ᠢ᠋ᠶ᠋ᠠᠨ ᠳᠣᠲᠣᠷᠠ ᠪᠠᠨ ᠲᠦᠭᠵᠢᠵᠦ ᠴᠢᠳᠠᠭᠰᠠᠨ ᠳ᠋ᠤ᠌ ᠬᠠᠨᠲᠡᠮᠦᠷ ᠦᠨᠡᠬᠡᠷ ᠭᠠᠢᠬᠠᠭᠠᠳ ᠪᠠᠷᠠᠭᠰᠠᠨ ᠦᠭᠡᠢ᠃ ᠲᠡᠷᠡ ᠤᠷᠢᠳ ᠨᠢ ᠵᠠᠮᠤᠬᠠ ᠡᠵᠡᠨ ᠢ᠋ ᠪᠡᠨ ᠬᠠᠮᠤᠭ ᠤ᠋ᠨ ᠲᠡᠪᠴᠢᠶᠡᠷᠢ ᠦᠭᠡᠢ ᠬᠥᠮᠦᠨ ᠭᠡᠵᠦ ᠲᠣᠭᠠᠴᠠᠳᠠᠭ ᠪᠠᠢᠵᠠᠢ᠃ ᠭᠡᠲᠡᠯᠡ ᠣᠭᠲᠣ ᠲᠡᠢᠮᠦ ᠪᠢᠰᠢ ᠠᠵᠢ᠃
ᠵᠠᠮᠤᠬᠠ ᠶ᠋ᠢ ᠬᠠᠰᠢᠶᠠᠨ ᠳᠣᠲᠣᠷᠠᠬᠢ ᠭᠡᠷ ᠦ᠋ᠳ ᠦ᠋ᠨ ᠵᠦᠭ ᠠᠪᠴᠤ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠲᠡᠭᠦᠨ ᠢ᠋ ᠪᠠᠷᠢᠵᠤ ᠢᠷᠡᠭᠰᠡᠨ ᠴᠡᠷᠢᠭ ᠦ᠋ᠳ ᠢ᠋ ᠨᠢ ᠳᠣᠲᠣᠭᠰᠢ ᠣᠷᠣᠭᠤᠯᠤᠭᠰᠠᠨ ᠦᠭᠡᠢ ᠲᠤᠯᠠ ᠲᠡᠳᠡ ᠬᠠᠰᠢᠶᠠᠨ ᠤ᠋ ᠰᠡᠭᠦᠳᠡᠷ ᠲᠦ᠍ ᠬᠣᠴᠣᠷᠴᠠᠢ᠃ ᠲᠡᠳᠡᠨ ᠦ᠌ ᠵᠡᠪᠰᠡᠭ ᠢ᠋ ᠬᠤᠷᠢᠶᠠᠵᠤ ᠳᠡᠷᠭᠡᠳᠡ ᠨᠢ ᠬᠠᠷᠠᠭᠤᠯ ᠲᠠᠯᠪᠢᠭᠰᠠᠨ ᠰᠦᠷᠯᠢᠭ ᠡᠷᠡ ᠪᠣᠯ ᠲᠡᠮᠦᠵᠢᠨ ᠦ᠌ ᠡᠷᠭᠦᠮᠡᠯ ᠳᠡᠭᠦᠦ ᠪᠣᠷᠣᠬᠤᠯ ᠪᠠᠢᠪᠠ᠃ ᠪᠣᠷᠣᠬᠤᠯ ᠥᠨᠥᠳᠥᠷ ᠦ᠋ᠨ ᠬᠠᠷᠠᠭᠤᠯ ᠤ᠋ᠨ ᠠᠯᠪᠠ ᠶ᠋ᠢ ᠠᠬᠠᠯᠠᠵᠤ ᠪᠠᠢᠵᠠᠢ᠃ ᠬᠠᠨᠲᠡᠮᠦᠷ ᠬᠡᠳᠦᠢ ᠪᠡᠷ ᠪᠣᠷᠣᠬᠤᠯ ᠢ᠋ ᠲᠠᠨᠢᠬᠤ ᠴᠤ᠌ ᠠᠮᠢᠲᠠᠨ ᠬᠥᠮᠦᠨ ᠲᠡᠢ ᠶᠠᠷᠢᠵᠤ ᠬᠥᠭᠡᠷᠬᠦ ᠴᠦ᠍ ᠬᠦᠰᠡᠯ ᠦᠭᠡᠢ ᠪᠠᠢᠪᠠ᠃ ᠲᠡᠭᠦᠨ ᠦ᠌ ᠠᠮᠢ ᠨᠠᠰᠤ᠂ ᠠᠮᠢᠳᠤᠷᠠᠬᠤ ᠦᠬᠦᠬᠦ ᠨᠢ ᠣᠳᠣ ᠵᠠᠮᠤᠬᠠ ᠶ᠋ᠢᠨ ᠬᠡᠯᠡᠬᠦ ᠦᠭᠡ᠂ ᠲᠡᠮᠦᠵᠢᠨ ᠦ᠌ ᠵᠠᠷᠯᠢᠭ ᠬᠣᠶᠠᠷ ᠤ᠋ᠨ ᠳᠠᠩᠰᠠᠨ ᠳᠡᠭᠡᠷᠡ ᠪᠠᠢᠯᠠ᠃ ᠰᠤᠯᠠ ᠢᠷᠭᠡᠨ ᠪᠣᠯᠵᠤ ᠭᠦᠷᠪᠡᠯᠵᠢᠨ ᠭᠤᠸᠠ ᠪᠠᠨ ᠡᠷᠢᠵᠦ ᠣᠳᠬᠤ ᠰᠠᠨ ᠭᠡᠬᠦ ᠡᠴᠡ ᠲᠡᠷᠡ ᠠᠷᠭᠠ ᠪᠠᠨ ᠪᠠᠷᠠᠨ ᠵᠠᠮᠤᠬᠠ ᠡᠵᠡᠨ ᠨᠢ ᠰᠤᠷᠠᠭ ᠦᠭᠡᠢ ᠤᠳᠠᠬᠤ ᠳ᠋ᠤ᠌ ᠰᠡᠳᠬᠢᠯ ᠲᠦᠭᠰᠢᠨ ᠲᠡᠪᠴᠢᠵᠦ ᠶᠠᠳᠠᠨᠠ᠃ ᠮᠥᠴᠡ ᠬᠣᠷᠣᠮ ᠭᠡᠭᠴᠢ ᠬᠡᠴᠢᠨᠡᠨ ᠤᠳᠠᠭᠠᠨ ᠥᠩᠭᠡᠷᠡᠳᠡᠭ ᠢ᠋ ᠲᠡᠷᠡ ᠣᠳᠣ ᠯᠠ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠦᠵᠡᠵᠦ ᠭᠠᠢᠬᠠᠰᠢ ᠲᠠᠰᠤᠷᠠᠨ ᠬᠦᠯᠢᠶᠡᠭᠰᠡᠭᠡᠷ᠁
ᠡᠵᠡᠨ ᠦ᠌ ᠪᠡᠨ ᠡᠴᠦᠰ ᠦ᠋ᠨ ᠵᠠᠷᠯᠢᠭ ᠢ᠋ ᠪᠡᠶᠡᠯᠡᠭᠦᠯᠦᠭᠰᠡᠨ ᠲᠤᠯᠠ ᠬᠠᠨᠳᠠᠮᠤᠷ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠡᠷᠬᠡ ᠴᠢᠯᠥᠭᠡᠲᠡᠢ ᠠᠮᠢᠳᠤᠷᠠᠬᠤ ᠶ᠋ᠢ ᠲᠡᠰᠴᠦ ᠶᠠᠳᠠᠨ ᠬᠦᠰᠡᠵᠦ᠂ ᠰᠢᠨᠡ ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠶᠠᠭᠠᠷᠠᠨ ᠲᠡᠮᠡᠦᠯᠵᠦ ᠪᠠᠢᠯᠠ᠃ ᠦᠨᠡᠨᠴᠢ ᠵᠢᠳᠬᠦᠯ ᠢ᠋ᠶ᠋ᠡᠷ ᠣᠯᠤᠭᠰᠠᠨ ᠨᠢᠭᠤᠷ ᠪᠠᠷᠳᠠᠮ᠂ ᠠᠵᠠ ᠵᠢᠷᠭᠠᠯᠲᠠᠢ ᠠᠮᠢᠳᠤᠷᠠᠯ ᠡᠬᠢᠯᠡᠨᠡ ᠭᠡᠵᠦ ᠰᠠᠨᠠᠬᠤ ᠳ᠋ᠤ᠌ ᠦᠨᠡᠬᠡᠷ ᠰᠠᠢᠬᠠᠨ ᠠᠵᠢ᠃ ᠲᠡᠷᠡ ᠬᠡᠵᠢᠶᠡ ᠴᠦ᠍ ᠡᠢᠮᠦ ᠠᠵᠠ ᠵᠢᠷᠭᠠᠯᠲᠠᠢ ᠪᠠᠢᠭᠰᠠᠨ ᠦᠭᠡᠢ᠃ ᠪᠠᠰᠠ ᠠᠮᠢᠳᠤᠷᠠᠯ ᠳ᠋ᠤ᠌ ᠢᠩᠭᠢᠲᠡᠯᠡ ᠪᠡᠨ ᠰᠢᠨᠤᠨ ᠳᠤᠷᠠᠯᠠᠵᠤ᠂ ᠦᠨᠡ ᠴᠠᠨᠠ ᠶ᠋ᠢ ᠨᠢ ᠤᠬᠠᠭᠠᠷᠠᠨ ᠣᠢᠯᠠᠭᠠᠵᠤ ᠶᠠᠪᠤᠭᠰᠠᠨ ᠦᠭᠡᠢ᠃ ᠪᠤᠰᠤᠳ ᠤ᠋ᠨ ᠠᠮᠢ ᠠᠮᠢᠳᠤᠷᠠᠯ ᠴᠤ᠌ ᠥᠪᠡᠷ ᠦ᠋ᠨ ᠬᠢ ᠲᠡᠢ ᠨᠢ ᠯᠡ ᠠᠳᠠᠯᠢ ᠦᠨᠡᠲᠡᠢ ᠰᠠᠨ ᠪᠢᠰᠢ ᠤᠤ ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠲᠡᠭᠦᠨ ᠦ᠌ ᠰᠡᠯᠡᠮᠡᠨ ᠦ᠌ ᠢᠷ᠂ ᠰᠤᠮᠤᠨ ᠤ᠋ ᠦᠵᠦᠭᠦᠷ ᠲᠦ᠍ ᠬᠡᠴᠢᠨᠡᠨ ᠬᠥᠮᠦᠨ ᠦ᠌ ᠠᠵᠠ ᠵᠢᠷᠭᠠᠯ᠂ ᠬᠦᠰᠡᠯ ᠮᠥᠷᠥᠭᠡᠳᠦᠯ᠂ ᠬᠤᠪᠢ ᠲᠠᠪᠢᠯᠠᠩ ᠭᠡᠨᠡᠳᠲᠡ ᠶ᠋ᠢᠨ ᠰᠠᠯᠬᠢᠨ ᠳ᠋ᠤ᠌ ᠦᠯᠢᠶᠡᠭᠳᠡᠨ ᠤᠨᠲᠠᠷᠠᠬᠤ ᠵᠤᠯᠠ ᠮᠡᠲᠦ ᠪᠥᠬᠥᠭᠰᠡᠨ ᠢ᠋ ᠪᠣᠳᠣᠭᠠᠳ ᠳᠣᠲᠣᠷᠠ ᠨᠢ ᠬᠠᠷᠠᠩᠭᠤᠢᠯᠠᠬᠤ ᠰᠢᠭ᠋ ᠪᠣᠯᠤᠭᠰᠠᠨ ᠪᠢᠯᠡ᠃
ᠠᠯᠪᠠᠲᠤ ᠪᠣᠭᠣᠯ ᠳ᠋ᠠᠭᠠᠨ ᠪᠠᠷᠢᠭᠳᠠᠵᠤ ᠢᠷᠡᠭᠰᠡᠨ ᠵᠠᠮᠤᠬᠠ ᠶ᠋ᠢ ᠬᠠᠮᠤᠭ ᠤ᠋ᠨ ᠵᠠᠬᠠ ᠶ᠋ᠢᠨ ᠭᠡᠷ ᠲᠦ᠍ ᠠᠪᠠᠴᠢᠵᠠᠢ᠃ ᠪᠣᠷᠣᠬᠤᠯ ᠵᠠᠮᠤᠬᠠ ᠶ᠋ᠢᠨ ᠬᠦᠯᠢᠭ ᠢ᠋ ᠲᠠᠢᠯᠬᠤ ᠶ᠋ᠢ ᠲᠤᠰᠢᠶᠠᠪᠠ᠃ ᠭᠡᠲᠡᠯᠡ ᠵᠠᠮᠤᠬᠠ ᠡᠭᠦᠨ ᠢ᠋ ᠵᠥᠪᠰᠢᠶᠡᠷᠡᠭᠰᠡᠨ ᠦᠭᠡᠢ᠃
| ᠬᠠᠷᠠ ᠬᠡᠷᠢᠶᠡ ᠬᠠᠯᠲᠠᠷ ᠨᠤᠭᠤᠰᠤ ᠶ᠋ᠢ ᠪᠠᠷᠢᠬᠤ ᠪᠣᠯᠪᠠ᠃
ᠬᠠᠷᠠᠴᠤ ᠪᠣᠭᠣᠯ ᠬᠠᠭᠠᠨ ᠡᠵᠡᠨ ᠳ᠋ᠡᠭᠡᠨ ᠬᠠᠯᠳᠠᠪᠠ᠃
ᠪᠣᠷᠣ ᠡᠯᠢᠶᠡ ᠪᠣᠷᠣᠯᠠᠭ ᠨᠤᠭᠤᠰᠤ ᠶ᠋ᠢ ᠪᠠᠷᠢᠬᠤ ᠪᠣᠯᠪᠠ᠃
ᠪᠣᠭᠣᠯ ᠵᠠᠷᠤᠴᠠ ᠪᠣᠳᠠᠲᠤ ᠡᠵᠡᠨ ᠳ᠋ᠡᠭᠡᠨ ᠬᠠᠯᠳᠠᠪᠠ ᠭᠡᠵᠦ ᠠᠭᠤᠷ ᠬᠢᠯᠢᠩ ᠢ᠋ᠶ᠋ᠡᠨ ᠪᠠᠳᠠᠷᠠᠭᠤᠯᠤᠨ᠂ ᠠᠭᠤᠰᠬᠢ ᠵᠢᠷᠦᠬᠡ ᠪᠡᠨ ᠪᠤᠯᠲᠠᠯᠵᠠᠭᠤᠯᠤᠨ ᠬᠠᠰᠬᠢᠷᠴᠤ
| ᠪᠣᠷᠣᠬᠤᠯ᠂ ᠴᠢ ᠲᠡᠮᠦᠵᠢᠨ ᠠᠨᠳᠠ ᠶ᠋ᠢᠨ ᠬᠠᠢᠷᠠᠲᠠᠢ ᠳᠡᠭᠦᠦ ᠪᠢᠵᠡ᠃ ᠲᠡᠮᠦᠵᠢᠨ ᠠᠨᠳᠠ ᠬᠠᠭᠠᠨ ᠡᠵᠡᠨ ᠳ᠋ᠡᠭᠡᠨ ᠬᠠᠯᠳᠠᠭᠰᠠᠨ ᠪᠣᠭᠣᠯ ᠢ᠋ ᠬᠡᠷᠬᠢᠳᠡᠭ ᠢ᠋ ᠴᠢ ᠨᠠᠳᠠ ᠪᠠᠷ ᠬᠡᠯᠡᠭᠦᠯᠬᠦ ᠦᠭᠡᠢ᠃ ᠴᠢ ᠨᠠᠳᠠᠳᠤ ᠬᠠᠯᠳᠠᠭᠰᠠᠨ ᠡᠳᠡᠭᠡᠷ ᠪᠣᠭᠣᠯ ᠢ᠋ ᠣᠳᠣᠬᠠᠨ ᠮᠢᠨᠦ ᠨᠢᠳᠦᠨ ᠳᠡᠭᠡᠷᠡ ᠠᠯᠠᠭᠲᠤᠨ᠃ ᠬᠣᠵᠢᠮ ᠬᠣᠢᠴᠢ ᠳ᠋ᠤ᠌ ᠰᠤᠷᠭᠠᠮᠵᠢ ᠪᠣᠯᠤᠭ᠃ ᠲᠡᠭᠦᠨ ᠦ᠌ ᠳᠠᠷᠠᠭᠠ ᠴᠢ ᠨᠠᠮᠠᠶ᠋ᠢ ᠲᠡᠮᠦᠵᠢᠨ ᠠᠨᠳᠠ ᠳ᠋ᠤ᠌ ᠮᠢᠨᠢ ᠲᠤᠰᠢᠶᠠᠭᠲᠤᠨ᠃ ᠲᠠᠩᠭᠠᠷᠢᠭ ᠢ᠋ᠶ᠋ᠠᠨ ᠨᠢᠴᠤᠭᠰᠠᠨ ᠪᠣᠭᠣᠯ ᠢ᠋ ᠬᠠᠷᠠᠵᠤ ᠪᠠᠢᠬᠤ ᠳ᠋ᠤ᠌ ᠮᠢᠨᠢ ᠦᠬᠦᠭᠦᠯᠪᠡᠯ ᠪᠢ ᠦᠬᠦᠬᠦ ᠳ᠋ᠦ᠍ ᠬᠠᠷᠠᠮᠰᠠᠬᠤ ᠵᠦᠢᠯ ᠦᠭᠡᠢ ᠭᠡᠵᠦ ᠲᠤᠢᠯ ᠦᠭᠡᠢ ᠬᠣᠷᠣᠰᠴᠤ ᠵᠢᠭᠰᠢᠭᠰᠡᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠱᠠᠭᠠᠷᠳᠠᠵᠤ ᠲᠤᠯᠭᠠᠭᠠᠳ ᠬᠦᠯᠢᠭ ᠢ᠋ᠶ᠋ᠡᠨ ᠲᠠᠢᠯᠤᠭᠤᠯᠤᠭᠰᠠᠨ ᠦᠭᠡᠢ᠃ ᠵᠠᠮᠤᠬᠠ ᠶ᠋ᠢᠨ ᠡᠨᠡ ᠦᠭᠡ ᠪᠣᠷᠣᠬᠤᠯ ᠢ᠋ ᠪᠢᠰᠢᠷᠡᠭᠦᠯᠵᠡᠢ᠃
| ᠬᠠᠭᠠᠨ ᠡᠵᠡᠨ ᠳ᠋ᠡᠭᠡᠨ ᠬᠠᠯᠳᠠᠭᠰᠠᠨ ᠬᠥᠮᠦᠨ ᠦ᠌ ᠤᠷᠤᠭ ᠲᠥᠷᠥᠯ ᠢ᠋ ᠨᠢ ᠬᠦᠷᠲᠡᠯᠡ ᠤᠰᠠᠳᠬᠠᠵᠤ ᠪᠠᠢ ᠭᠡᠵᠦ ᠴᠢᠩᠭᠢᠰ ᠬᠠᠭᠠᠨ ᠰᠤᠷᠭᠠᠳᠠᠭ ᠶᠤᠮ᠃ ᠪᠢ ᠣᠳᠣᠬᠠᠨ ᠲᠠᠨ ᠤ᠋ ᠬᠦᠰᠡᠯ ᠢ᠋ ᠪᠡᠶᠡᠯᠡᠭᠦᠯᠦᠨᠡ ᠭᠡᠵᠦ ᠪᠣᠷᠣᠬᠤᠯ ᠬᠡᠯᠡᠭᠡᠳ ᠭᠠᠷᠪᠠ᠃ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠬᠦᠷᠭᠡᠭᠳᠡᠨ ᠣᠴᠢᠮᠠᠭᠴᠠ ᠪᠠᠨ ᠶᠠᠭ ᠢᠩᠭᠢᠵᠦ ᠬᠡᠯᠡᠬᠦ ᠪᠡᠷ ᠵᠠᠮᠤᠬᠠ ᠣᠯᠠᠨ ᠬᠣᠨᠣᠭ ᠪᠣᠳᠣᠭᠰᠠᠨ ᠤ᠋ ᠡᠴᠦᠰ ᠲᠦ᠍ ᠰᠢᠢᠳᠦᠭᠰᠡᠨ ᠪᠢᠯᠡ᠃ ᠪᠦᠬᠦ ᠵᠦᠢᠯ ᠰᠠᠨᠠᠭᠰᠠᠨ ᠢ᠋ᠶ᠋ᠠᠷ ᠪᠣᠯᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠪᠡᠷ ᠲᠦᠷ ᠵᠠᠭᠤᠷᠠ ᠲᠠᠢᠪᠤᠰᠢᠷᠠᠪᠠ᠃
ᠵᠠᠮᠤᠬᠠ ᠥᠪᠡᠷ ᠦ᠋ᠨ ᠴᠡᠷᠢᠭ ᠲᠦ᠍ ᠪᠠᠷᠢᠭᠳᠠᠨ ᠢᠷᠡᠭᠰᠡᠨ ᠮᠡᠳᠡᠭᠡ ᠲᠡᠮᠦᠵᠢᠨ ᠦ᠌ ᠶᠡᠬᠡ ᠬᠦᠷᠢᠶᠡ ᠪᠡᠷ ᠰᠠᠯᠬᠢ ᠮᠡᠲᠦ ᠲᠠᠷᠬᠠᠵᠤ ᠵᠢᠵᠢᠭ ᠲᠣᠮᠣ ᠪᠦᠬᠦ ᠬᠥᠮᠦᠨ ᠢ᠋ ᠭᠡᠷ ᠡᠴᠡ ᠭᠠᠷᠭᠠᠵᠠᠢ᠃ ᠵᠠᠮᠤᠬᠠ ᠪᠣᠯ ᠲᠡᠮᠦᠵᠢᠨ ᠦ᠌ ᠬᠠᠮᠤᠭ ᠤ᠋ᠨ ᠥᠰᠲᠦ ᠳᠠᠢᠰᠤᠨ ᠭᠡᠳᠡᠭ ᠢ᠋ ᠡᠨᠳᠡ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠨ ᠦᠭᠡᠢ ᠪᠢᠯᠡ᠃ ᠥᠰᠲᠦ ᠳᠠᠢᠰᠤᠨ ᠢ᠋ᠶ᠋ᠠᠨ ᠬᠡᠷᠬᠢᠨ ᠴᠠᠭᠠᠵᠠᠯᠠᠬᠤ ᠪᠣᠯ ᠭᠡᠵᠦ ᠣᠯᠠᠨ ᠬᠥᠮᠦᠨ ᠪᠡᠶᠡᠰᠦᠨ ᠬᠦᠯᠢᠶᠡᠵᠦ ᠪᠠᠢᠪᠠ᠃ ᠬᠠᠷᠢᠨ ᠵᠠᠮᠤᠬᠠ ᠶ᠋ᠢ ᠪᠠᠷᠢᠵᠤ ᠠᠪᠴᠢᠷᠠᠭᠰᠠᠨ ᠬᠡᠳᠦᠨ ᠴᠡᠷᠢᠭ ᠦ᠋ᠨ ᠬᠤᠪᠢ ᠵᠠᠶᠠᠭᠠ ᠬᠡᠨ ᠳ᠋ᠦ᠍ ᠴᠦ᠍ ᠰᠣᠨᠢᠨ ᠪᠢᠰᠢ ᠲᠤᠯᠠ ᠵᠠᠮᠤᠬᠠ ᠲᠡᠳᠡᠨ ᠢ᠋ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠳ᠋ᠦ᠍ ᠴᠠᠭᠠᠵᠠᠯᠠᠬᠤ ᠶ᠋ᠢ ᠬᠢᠯᠢᠩᠨᠡᠨ ᠱᠠᠭᠠᠷᠳᠠᠭᠰᠠᠨ ᠢ᠋ ᠰᠣᠨᠣᠰᠤᠭᠠᠳ ᠣᠯᠠᠨ ᠪᠦᠭᠦᠳᠡᠭᠡᠷ ᠰᠠᠢᠰᠢᠶᠠᠨ ᠪᠠᠬᠠᠷᠬᠠᠵᠠᠢ᠃ ᠵᠠᠮᠤᠬᠠ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠢ᠋ ᠴᠠᠭᠠᠵᠠᠯᠠᠬᠤ ᠬᠡᠷᠡᠭ ᠢ᠋ ᠵᠠᠯᠠᠭᠤ ᠬᠥᠪᠡᠭᠦᠳ ᠲᠦ᠍ ᠳᠠᠰᠬᠠᠯ ᠰᠤᠷᠭᠠᠭᠤᠯᠢ ᠪᠣᠯᠤᠭ ᠭᠡᠰᠡᠨ ᠤᠤ᠂ ᠡᠰᠡᠪᠡᠯ ᠡᠵᠡᠨ ᠡᠴᠡ ᠪᠡᠨ ᠤᠷᠪᠠᠭᠰᠠᠨ ᠢ᠋ ᠵᠢᠭᠰᠢᠨ ᠦᠵᠡᠵᠦ ᠵᠣᠷᠢᠭ ᠵᠢᠷᠦᠬᠡ ᠪᠡᠨ ᠬᠤᠷᠴᠠᠯᠠᠭ ᠭᠡᠵᠦ ᠪᠣᠳᠣᠭᠰᠠᠨ ᠤᠤ᠂ ᠶᠠᠮᠠᠷ ᠲᠠᠢ ᠴᠤ᠌ ᠵᠥᠴᠢ᠂ ᠴᠠᠭᠠᠲᠠᠢ ᠬᠣᠶᠠᠷ ᠲᠤ᠌ ᠳᠠᠭᠠᠭᠠᠯᠭᠠᠭᠰᠠᠨ ᠪᠢᠯᠡ᠃ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠵᠠᠷᠯᠢᠭ ᠢ᠋ ᠭᠦᠢᠴᠡᠳᠬᠡᠬᠦ ᠪᠡᠷ ᠲᠡᠳᠡ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠲᠡᠷᠡ ᠳᠠᠷᠤᠢ ᠭᠦᠶᠦᠯᠳᠦᠨ ᠭᠠᠷᠴᠠᠢ᠃ ᠡᠵᠡᠨ ᠳ᠋ᠡᠭᠡᠨ ᠬᠠᠯᠳᠠᠭᠰᠠᠨ ᠪᠣᠭᠣᠯ ᠢ᠋ ᠵᠥᠴᠢ᠂ ᠴᠠᠭᠠᠲᠠᠢ ᠨᠠᠷ ᠢ᠋ᠶ᠋ᠠᠷ ᠴᠠᠭᠠᠵᠠᠯᠠᠭᠤᠯᠤᠭᠰᠠᠨ ᠨᠢ ᠠᠩᠬᠠᠨ ᠤ᠋ ᠬᠢ ᠪᠣᠯᠬᠣᠷ ᠲᠡᠳᠡ ᠲᠤᠢᠯ ᠤ᠋ᠨ ᠶᠡᠬᠡ ᠬᠥᠭᠡᠷᠴᠡᠢ᠃
ᠲᠡᠳᠡᠨ ᠦ᠌ ᠰᠤᠭᠤᠯᠤᠭᠰᠠᠨ ᠰᠡᠯᠡᠮᠡ᠂ ᠰᠤᠭᠤᠯᠳᠤᠷᠭᠠᠯᠠᠭᠰᠠᠨ ᠬᠠᠨᠴᠤᠢ ᠶ᠋ᠢ ᠬᠠᠷᠠᠮᠠᠭᠴᠠ ᠲᠡᠮᠦᠵᠢᠨ ᠶᠠᠭᠤ ᠭᠡᠵᠦ ᠰᠢᠢᠳᠦᠭᠰᠡᠨ ᠢ᠋ ᠬᠠᠨᠳᠡᠮᠦᠷ ᠲᠦᠪᠡᠭ ᠦᠭᠡᠢ ᠣᠢᠯᠠᠭᠠᠵᠤ ᠴᠢᠷᠠᠢ ᠨᠢ ᠬᠤᠪᠠᠬᠠᠢ ᠴᠠᠢᠯᠠ᠃ ᠬᠡᠷᠡᠭ ᠶᠠᠪᠤᠳᠠᠯ ᠬᠠᠨᠲᠡᠮᠦᠷ ᠦ᠋ᠨ ᠰᠠᠨᠠᠭᠰᠠᠨ ᠠ᠋ᠴᠠ ᠳᠠᠩᠴᠤ ᠳᠡᠩᠳᠡᠭᠦᠦ ᠬᠤᠷᠳᠤᠨ ᠪᠣᠯᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠶᠠᠭᠤ ᠴᠤ᠌ ᠬᠡᠯᠡᠵᠦ᠂ ᠠᠰᠠᠭᠤᠵᠤ ᠠᠮᠵᠢᠭᠰᠠᠨ ᠦᠭᠡᠢ᠃ ᠵᠥᠴᠢ ᠶ᠋ᠢᠨ ᠬᠤᠷᠴᠠ ᠰᠡᠯᠡᠮᠡ ᠠᠭᠠᠷ ᠲᠤ᠌ ᠭᠢᠯᠠᠰᠬᠢᠨ ᠳᠠᠭᠤᠲᠤ ᠰᠤᠮᠤ ᠮᠡᠲᠦ ᠱᠦᠩᠭᠢᠨᠡᠨ ᠳᠤᠤᠭᠠᠷᠬᠤ ᠶ᠋ᠢ ᠯᠡ ᠰᠣᠨᠣᠰᠴᠤ ᠠᠮᠵᠢᠵᠠᠢ᠃ ᠣᠯᠠᠨ ᠮᠣᠷᠢᠳ ᠤ᠋ᠨ ᠬᠥᠯᠥᠰᠥ ᠰᠢᠩᠭᠡᠭᠰᠡᠨ ᠲᠤᠭᠤᠷᠠᠢ ᠶ᠋ᠢᠨ ᠲᠠᠮᠠᠭᠠ ᠲᠠᠢ ᠭᠠᠵᠠᠷ ᠢ᠋ ᠮᠥᠷᠭᠥᠨ ᠤᠨᠠᠬᠤ ᠳ᠋ᠠᠭᠠᠨ《ᠬᠥᠪᠡᠭᠦᠨ ᠪᠣᠯᠪᠠ ᠤᠤ᠂ ᠥᠬᠢᠨ ᠪᠣᠯᠪᠠ ᠤᠤ》 ᠭᠡᠵᠦ ᠦᠬᠦᠯ ᠡᠴᠡ ᠥᠷᠢᠰᠦᠨ ᠭᠢᠯᠠᠰᠬᠢᠨ ᠪᠣᠳᠣᠵᠤ ᠠᠮᠵᠢᠭᠰᠠᠨ ᠨᠢ ᠬᠠᠨᠳᠡᠮᠦᠷ ᠦ᠋ᠨ ᠡᠴᠦᠰ ᠦ᠋ᠨ ᠪᠣᠳᠣᠯ ᠨᠢ ᠪᠠᠢᠪᠠ᠃ ᠪᠠᠰᠠ ᠵᠥᠴᠢ ᠶ᠋ᠢᠨ ᠳᠠᠭᠠᠭᠤᠯ ᠥᠨᠥᠬᠢ ᠵᠢᠭᠠᠰᠤᠨ ᠨᠢᠳᠦᠲᠦ ᠲᠡᠳᠦ ᠶ᠋ᠢ ᠭᠠᠢᠬᠠᠬᠤ ᠮᠡᠲᠦ ᠰᠢᠷᠳᠡᠭᠰᠡᠭᠡᠷ ᠬᠠᠷᠠᠴᠠ ᠨᠢ ᠠᠯᠭᠤᠷ ᠤᠨᠲᠠᠷᠠᠬᠤ ᠳ᠋ᠤ᠌ ᠲᠡᠳᠦ
| ᠡᠨᠡ ᠬᠠᠨᠲᠡᠮᠦᠷ ᠨᠠᠳᠠᠳᠤ ᠨᠢᠭᠡ ᠶᠠᠭᠤᠮᠠ ᠵᠠᠬᠢᠬᠤ ᠭᠡᠵᠦ ᠬᠦᠰᠡᠵᠡᠢ᠃ ᠭᠡᠲᠡᠯᠡ ᠵᠥᠴᠢ ᠡᠵᠡᠨ ᠲᠠ ᠬᠥᠶᠢ ᠭᠡᠬᠦ ᠶ᠋ᠢᠨ ᠵᠠᠪ ᠦᠭᠡᠢ ᠠᠯᠠᠴᠢᠬᠠᠯᠠ ᠳᠠ ᠭᠡᠵᠦ ᠬᠠᠷᠠᠮᠰᠠᠨ ᠰᠢᠪᠡᠨᠡᠪᠡ᠃
| ᠣᠳᠣ ᠠᠰᠠᠭᠤ᠃ ᠶᠠᠭᠤᠨ ᠳ᠋ᠤ᠌ ᠣᠷᠣᠢᠲᠠᠬᠤ ᠪᠣᠢ? ᠭᠡᠵᠦ ᠪᠠᠬᠠ ᠲᠠᠪᠠ ᠨᠢ ᠬᠠᠨᠤᠭᠰᠠᠨ ᠵᠥᠴᠢ ᠢᠨᠢᠶᠡᠭᠡᠳ ᠰᠡᠯᠡᠮᠡ ᠶ᠋ᠢᠨ ᠢ᠋ᠶ᠋ᠡᠨ ᠴᠢᠰᠤ ᠶ᠋ᠢ ᠨᠣᠭᠣᠭᠠᠨ ᠳ᠋ᠤ᠌ ᠠᠷᠴᠢᠨᠠ᠃ᠦᠨᠡᠬᠡᠷ ᠬᠠᠨᠳᠡᠮᠦᠷ ᠲᠦ᠍ ᠲᠡᠳᠦ ᠡᠴᠡ ᠠᠰᠠᠭᠤᠬᠤ ᠶᠠᠭᠤᠮᠠ ᠪᠠᠢᠭᠰᠠᠨ ᠪᠢᠯᠡ᠃ ᠰᠤᠯᠠᠯᠠᠭᠳᠠᠮᠠᠭᠴᠠ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠲᠡᠳᠦ ᠲᠡᠢ ᠠᠭᠤᠯᠵᠠᠵᠤ ᠭᠦᠷᠪᠡᠯᠵᠢᠨ ᠭᠤᠸᠠ ᠶ᠋ᠢᠨ ᠢ᠋ᠶ᠋ᠡᠨ ᠰᠤᠷᠠᠭ ᠢ᠋ ᠭᠠᠷᠭᠠᠨᠠ ᠭᠡᠵᠦ ᠰᠠᠨᠠᠭᠰᠠᠨ ᠪᠠᠢᠪᠠ᠃ ᠭᠡᠪᠡᠴᠦ ᠪᠦᠬᠦ ᠬᠡᠷᠡᠭ ᠥᠩᠭᠡᠷᠡᠵᠦ ᠬᠠᠨᠳᠡᠮᠦᠷ ᠭᠡᠭᠴᠢ ᠡᠨᠡ ᠵᠣᠪᠠᠯᠠᠩᠲᠤ ᠡᠷᠡ ᠭᠠᠵᠠᠷ ᠳᠡᠭᠡᠷᠡ ᠦᠯᠡᠳᠡᠭᠰᠡᠨ ᠭᠠᠭᠴᠠ ᠦᠷᠡ ᠪᠡᠨ ᠬᠥᠪᠡᠭᠦᠨ᠂ ᠥᠬᠢᠨ ᠠᠯᠢ ᠨᠢ ᠪᠣᠯᠬᠤ ᠶ᠋ᠢ ᠴᠦ᠍ ᠮᠡᠳᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠬᠣᠷᠸᠠ ᠶ᠋ᠢ ᠣᠷᠬᠢᠪᠠ᠃ ᠬᠥᠭᠡᠷᠦᠬᠦᠢ ᠲᠡᠭᠦᠨ ᠦ᠌ ᠪᠠᠶᠠᠨ ᠠ᠋ᠴᠠ ᠲᠡᠷᠡ ᠳᠠᠷᠤᠢ ᠰᠦᠨᠡᠰᠦ ᠨᠢ ᠵᠠᠢᠯᠠᠨ ᠬᠠᠮᠢᠭᠠ ᠨᠢᠭᠡ ᠲᠡᠢ ᠪᠠᠢᠭᠠ ᠭᠦᠷᠪᠡᠯᠵᠢᠨ ᠭᠤᠸᠠ ᠪᠠᠨ ᠬᠠᠢᠨ ᠣᠳᠪᠠ᠃ ᠵᠠᠮᠤᠬᠠ ᠶ᠋ᠢᠨ ᠲᠠᠪᠤᠨ ᠴᠡᠷᠢᠭ ᠢ᠋ ᠴᠠᠪᠴᠢᠨ ᠠᠯᠠᠵᠤ ᠬᠡᠭᠦᠷ ᠢ᠋ ᠨᠢ ᠬᠣᠯᠠ ᠡᠷᠭᠢᠨ ᠳ᠋ᠦ᠍ ᠪᠤᠯᠠᠵᠤ ᠣᠷᠬᠢᠭᠠᠳ ᠵᠥᠴᠢ᠂ ᠴᠠᠭᠠᠲᠠᠢ ᠬᠣᠶᠠᠷ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠪᠤᠴᠠᠵᠤ ᠡᠴᠢᠭᠡ ᠳ᠋ᠡᠭᠡᠨ ᠡᠨᠡ ᠲᠤᠬᠠᠢ ᠢᠯᠡᠳᠬᠡᠪᠡ᠃ ᠬᠠᠷᠢᠨ ᠵᠠᠮᠤᠬᠠ ᠥᠪᠡᠷ ᠦ᠋ᠨ ᠰᠠᠨᠠᠭᠰᠠᠨ ᠢ᠋ᠶ᠋ᠠᠷ ᠲᠡᠮᠦᠵᠢᠨ ᠦ᠌ ᠳᠡᠷᠭᠡᠳᠡ ᠨᠡᠷᠡ ᠪᠦᠲᠦᠨ᠂ ᠪᠠᠰᠠ ᠲᠡᠭᠦᠨ ᠦ᠌ ᠵᠠᠨᠤᠯᠲᠤ ᠳᠠᠢᠰᠤᠨ ᠬᠡᠪ ᠢ᠋ᠶ᠋ᠡᠷ ᠬᠦᠴᠦᠨ ᠳ᠋ᠦ᠍ ᠠᠪᠲᠠᠭᠰᠠᠨ ᠮᠡᠲᠦ ᠣᠴᠢᠨᠠ ᠭᠡᠰᠡᠨ ᠵᠣᠷᠢᠯᠭᠠ ᠪᠠᠨ ᠦᠨᠡᠨᠴᠢ ᠪᠣᠭᠣᠯ ᠬᠠᠨᠲᠡᠮᠦᠷ ᠦ᠋ᠨ ᠢ᠋ᠶ᠋ᠡᠨ ᠠᠮᠢ ᠪᠠᠷ ᠦᠷᠡᠨ ᠪᠠᠢᠵᠤ ᠪᠡᠶᠡᠯᠡᠭᠦᠯᠵᠦ ᠴᠢᠳᠠᠵᠠᠢ᠃ ᠦᠨᠡᠨ ᠦᠭᠡ ᠪᠡᠷ ᠮᠠᠭᠲᠠᠵᠤ ᠪᠠᠢᠭᠰᠠᠨ ᠦᠨᠡᠨᠴᠢ ᠪᠣᠭᠣᠯ ᠨᠢ ᠨᠢᠭᠡᠨᠲᠡ ᠦᠭᠡᠢ ᠪᠣᠯᠬᠤ ᠶ᠋ᠢ ᠲᠡᠷᠡ ᠲᠡᠭᠦᠨ ᠦ᠌ ᠡᠴᠦᠰ ᠦ᠋ᠨ ᠤᠳᠠᠭᠠ ᠬᠠᠰᠬᠢᠷᠬᠤ ᠳᠠᠭᠤ ᠪᠠᠷ ᠨᠢ ᠮᠡᠳᠡᠭᠰᠡᠨ ᠪᠠᠢᠪᠠ᠃ ᠬᠠᠷᠢᠨ ᠬᠥᠭᠡᠷᠦᠬᠦᠢ ᠲᠡᠭᠦᠨ ᠢ᠋ ᠠᠮᠢ ᠲᠠᠯᠪᠢᠬᠤ ᠳ᠋ᠠᠭᠠᠨ ᠡᠴᠦᠰ ᠦ᠋ᠨ ᠤᠳᠠᠭᠠ ᠴᠣᠬᠣᠮ ᠶᠠᠭᠤ ᠭᠡᠵᠦ ᠬᠠᠰᠬᠢᠷᠤᠭᠰᠠᠨ ᠢ᠋ ᠵᠠᠮᠤᠬᠠ ᠣᠢᠯᠠᠭᠠᠭᠰᠠᠨ ᠦᠭᠡᠢ᠃ ᠭᠡᠪᠡᠴᠦ ᠲᠡᠭᠦᠨ ᠦ᠌ ᠡᠨᠡ ᠳᠠᠭᠤ ᠳᠡᠩᠳᠡᠭᠦᠦ ᠭᠠᠰᠢᠭᠤᠨ ᠡᠮᠭᠡᠨᠢᠯᠲᠡᠢ᠂ ᠬᠣᠷᠣᠰᠤᠯ ᠵᠠᠨᠤᠯ ᠳᠦᠭᠦᠷᠡᠩ ᠪᠠᠢᠭᠰᠠᠨ ᠢ᠋ ᠵᠠᠮᠤᠬᠠ ᠠ᠋ᠴᠠ ᠭᠠᠳᠠᠨᠠ ᠲᠡᠳᠦ ᠣᠢᠯᠠᠭᠠᠵᠠᠢ᠃
《ᠬᠠᠨᠲᠡᠮᠦᠷ ᠴᠢ ᠲᠡᠪᠴᠢ᠃ ᠪᠦᠬᠦ ᠶᠠᠭᠤᠮᠠ ᠤᠳᠠᠬᠤ ᠦᠭᠡᠢ ᠲᠡᠭᠦᠰᠦᠨᠡ᠃ ᠴᠢ ᠲᠩᠷᠢ ᠳ᠋ᠦ᠍ ᠭᠠᠷᠤᠭᠠᠳ ᠨᠠᠮᠠᠶ᠋ᠢ ᠬᠦᠯᠢᠶᠡᠵᠦ ᠪᠠᠢ》 ᠭᠡᠵᠦ ᠵᠠᠮᠤᠬᠠ ᠰᠢᠪᠡᠨᠡᠪᠡ᠃ ᠬᠠᠨᠲᠡᠮᠦᠷ ᠦ᠋ᠨ ᠦᠢᠯᠡᠲᠦ ᠦᠬᠦᠯ ᠢ᠋ ᠵᠠᠮᠤᠬᠠ ᠡᠷᠲᠡᠨ ᠡᠴᠡ ᠲᠥᠯᠥᠪᠯᠡᠭᠰᠡᠨ ᠲᠤᠯᠠ ᠰᠡᠳᠬᠢᠯ ᠣᠨᠴᠠ ᠶᠡᠬᠡ ᠪᠡᠷ ᠬᠠᠷᠠᠭᠤᠰᠤᠭᠰᠠᠨ ᠦᠭᠡᠢ᠃ ᠭᠡᠪᠡᠴᠦ ᠭᠡᠮᠰᠢᠪᠡ ᠭᠡᠳ ᠶᠠᠭᠠᠬᠢᠬᠤ ᠪᠢᠯᠡ᠃ ᠨᠢᠭᠡᠨᠲᠡ ᠰᠢᠢᠳᠦᠭᠰᠡᠨ ᠵᠠᠮ ᠲᠤᠯᠠ ᠡᠴᠦᠰ ᠢ᠋ᠶ᠋ᠡᠨ ᠬᠦᠷᠲᠡᠯᠡ ᠶᠠᠪᠤᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ᠃ ᠣᠳᠣ ᠵᠠᠮᠤᠬᠠ ᠳ᠋ᠤ᠌ ᠣᠯᠠᠨ ᠬᠣᠨᠣᠭ᠂ ᠪᠦᠷ ᠰᠡᠭᠦᠯ ᠦ᠋ᠨ ᠵᠢᠯ ᠭᠠᠷᠤᠢ ᠶ᠋ᠢᠨ ᠣᠷᠭᠤᠳᠤᠤᠯ ᠳᠡᠭᠡᠷᠡᠮᠴᠢᠨ ᠰᠢᠭ ᠠᠮᠢᠳᠤᠷᠠᠭᠴᠢ ᠪᠠᠨ ᠠᠶᠠᠳᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠡᠳᠦᠷ ᠥᠨᠵᠢᠯ ᠦᠭᠡᠢ᠂ ᠰᠥᠨᠢ ᠠᠯᠭᠠᠰᠠᠯ ᠦᠭᠡᠢ ᠲᠣᠪ ᠲᠣᠳᠣ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠭᠰᠠᠭᠠᠷ ᠪᠠᠢᠵᠤ ᠰᠢᠢᠳᠦᠭᠰᠡᠨ ᠡᠴᠦᠰ ᠦ᠋ᠨ ᠬᠦᠰᠡᠯ ᠢ᠋ᠶ᠋ᠡᠨ ᠪᠡᠶᠡᠯᠡᠭᠦᠯᠬᠦ ᠯᠡ ᠦᠯᠡᠳᠡᠪᠡ᠃
ᠲᠡᠭᠦᠨ ᠢ᠋ ᠲᠠᠩᠰᠤᠭ ᠲᠣᠬᠢᠲᠠᠢ ᠭᠡᠷ ᠲᠦ᠍ ᠣᠷᠣᠭᠤᠯᠵᠤ ᠲᠠᠷᠠᠭ ᠠᠢᠷᠠᠭ ᠰᠥᠩᠨᠡᠨ ᠢᠳᠡᠭᠡᠯᠡᠵᠦ ᠪᠤᠳᠠᠭᠠᠯᠠᠵᠤ ᠠᠰᠠᠷᠠᠭᠰᠠᠨ ᠠᠲᠠᠯᠠ ᠭᠠᠭᠴᠠ ᠬᠦ᠌ ᠲᠡᠮᠦᠵᠢᠨ ᠢᠷᠡᠭᠰᠡᠨ ᠦᠭᠡᠢ᠃ ᠢᠩᠭᠢᠵᠦ ᠬᠥᠮᠦᠨ ᠢᠷᠡᠵᠦ᠂ ᠨᠣᠬᠠᠢ ᠬᠤᠴᠠᠯᠠ ᠴᠤ᠌ ᠭᠡᠵᠦ ᠦᠵᠡᠬᠦ ᠦᠭᠡᠢ ᠪᠠᠢᠭᠠ ᠨᠢ ᠵᠠᠮᠤᠬᠠ ᠶ᠋ᠢ ᠪᠠᠢᠵᠤ ᠰᠠᠭᠤᠬᠤ ᠠᠷᠭᠠ ᠦᠭᠡᠢ ᠪᠣᠯᠭᠠᠵᠤ ᠪᠠᠢᠯᠠ᠃ ᠭᠤᠷᠪᠠ ᠬᠣᠨᠣᠭ ᠬᠦᠯᠢᠶᠡᠭᠰᠡᠨ ᠦ᠌ ᠡᠴᠦᠰ ᠲᠦ᠍ ᠭᠡᠨᠡᠳᠲᠡ ᠪᠤᠭᠤᠷᠴᠢ ᠣᠷᠣᠵᠤ ᠢᠷᠡᠪᠡ᠃ ᠵᠡᠭᠦᠨ ᠴᠢᠬᠢᠨ ᠦ᠌ ᠪᠡᠨ ᠣᠮᠣᠭ ᠠ᠋ᠴᠠ ᠪᠠᠨ ᠪᠠᠷᠠᠭᠤᠨ ᠡᠭᠡᠮ ᠢ᠋ᠶ᠋ᠡᠨ ᠬᠦᠷᠲᠡᠯᠡ᠂《ᠶᠠᠭᠠᠬᠢᠵᠤ ᠠᠮᠢᠳᠤ ᠦᠯᠡᠳᠡᠪᠡ》 ᠭᠡᠮᠡᠷ ᠭᠦᠨᠵᠡᠭᠡᠢ ᠤᠷᠲᠤ ᠰᠣᠷᠪᠢ ᠲᠠᠢ ᠪᠤᠭᠤᠷᠴᠢ ᠬᠡᠮᠡᠬᠦ ᠲᠡᠷᠡ ᠬᠦ᠌ ᠨᠠᠮᠬᠠᠨ ᠪᠠᠯᠲᠠᠭᠠᠷ ᠪᠡᠶᠡ ᠲᠡᠢ᠂ ᠱᠠᠭᠠᠨᠲᠠᠭ ᠰᠢᠭ᠋ ᠳᠥᠷᠪᠡᠯᠵᠢᠨ ᠡᠷᠡ ᠢᠯᠡᠭᠦᠦ ᠳᠤᠲᠠᠭᠤ ᠴᠢᠮᠡᠭ ᠦᠭᠡᠢ ᠪᠡᠷ ᠲᠡᠮᠦᠵᠢᠨ ᠦ᠌ ᠦᠭᠡ ᠶ᠋ᠢ ᠤᠯᠠᠮᠵᠢᠯᠠᠪᠠ᠃ ᠪᠤᠭᠤᠷᠴᠢ᠂ ᠲᠡᠮᠦᠵᠢᠨ ᠦ᠌ ᠬᠡᠯᠡᠭᠦᠯᠦᠭᠰᠡᠨ ᠦᠭᠡ ᠶ᠋ᠢ ᠰᠢᠯᠦᠭ ᠪᠣᠯᠭᠠᠨ ᠵᠣᠬᠢᠶᠠᠭᠰᠠᠨ ᠪᠢᠯᠡ᠃
|ᠣᠯᠠᠨ ᠵᠢᠯ ᠪᠢᠳᠡ
ᠣᠢᠷᠠ ᠨᠥᠬᠥᠷ ᠶᠠᠪᠤᠭᠰᠠᠨ ᠪᠢᠯᠡ᠃
ᠣᠰᠣᠯ ᠴᠠᠯᠠᠭᠠᠢ ᠴᠢ
ᠣᠯᠠᠨ ᠰᠠᠨᠠᠭᠠᠨ ᠳ᠋ᠤ᠌ ᠬᠥᠲᠥᠯᠦᠭᠳᠡᠵᠦ
ᠤᠷᠤᠭ ᠪᠣᠣᠬᠠᠢ ᠰᠢᠭ᠋ ᠵᠣᠢᠭᠣᠵᠤ ①
ᠣᠯᠣᠢᠷᠲᠤ ᠠᠳᠤᠭᠤᠰᠤ ᠰᠢᠭ᠋ ᠴᠠᠩᠬᠠᠯᠠᠵᠤ
ᠲᠠᠩᠬᠢᠯ ᠪᠠᠯᠴᠢᠷ ᠨᠠᠰᠤᠨ ᠤ᠋
ᠲᠠᠩᠭᠠᠷᠢᠭ ᠦᠭᠡᠨ ᠡᠴᠡ ᠨᠢᠴᠤᠵᠤ
ᠬᠠᠮᠬᠤᠤᠯ ᠮᠡᠲᠦ ᠬᠡᠢᠰᠦᠨ
ᠬᠠᠷᠠᠬᠤ ᠪᠠᠷᠠ ᠦᠭᠡᠢ ᠣᠳᠤᠭᠰᠠᠨ ᠪᠤᠰᠤ ᠤᠤ?
ᠥᠨᠥ ᠪᠣᠯᠬᠤ ᠳ᠋ᠤ᠌ ᠴᠢ
ᠥᠩᠬᠥᠷᠢᠬᠦ ᠮᠣᠳᠣᠨ ᠲᠡᠷᠭᠡᠨ ᠦ᠌
ᠥᠷᠥᠭᠡᠰᠦᠨ ᠠᠷᠠᠯ ᠪᠣᠯᠤᠭᠠᠳ
ᠥᠭᠡᠳᠡ ᠦᠭᠡᠢ ᠮᠠᠭᠤ ᠪᠣᠭᠣᠯ ᠤ᠋ᠨ ᠢ᠋ᠶ᠋ᠠᠨ
ᠥᠭᠡᠰᠢ ᠢᠳᠡᠰᠢ ᠪᠣᠯᠵᠤ
ᠥᠪᠡᠷ ᠦ᠋ᠨ ᠳᠤᠷᠠ ᠪᠠᠷ ᠢᠷᠡᠭᠡ ᠦᠭᠡᠢ ᠲᠤᠯᠠ
ᠥᠨᠥ ᠪᠠᠭᠠ ᠶ᠋ᠢᠨ ᠠᠨᠳᠠ ᠳ᠋ᠠᠭᠠᠨ
ᠥᠰᠲᠦ ᠰᠠᠨᠠᠭᠠ ᠠᠭᠤᠯᠬᠤ ᠦᠭᠡᠢ ᠪᠢᠵᠡ
ᠥᠩᠭᠡᠷᠡᠭᠰᠡᠨ ᠢ᠋ ᠮᠠᠷᠲᠠᠵᠤ
ᠥᠰᠢᠶᠡ ᠬᠣᠷᠣᠰᠤᠯ ᠢ᠋ᠶ᠋ᠠᠨ ᠲᠠᠢᠯᠵᠤ
ᠬᠠᠮᠲᠤ ᠬᠣᠶᠠᠭᠤᠯᠠ ᠨᠡᠢᠯᠡᠵᠦ
ᠬᠠᠷᠢᠯᠴᠠᠨ ᠨᠠᠢᠷᠠᠮᠳᠠᠵᠤ
ᠤᠮᠠᠷᠲᠠᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠭᠤᠯᠵᠤ
ᠤᠨᠲᠠᠭᠰᠠᠨ ᠢ᠋ᠶ᠋ᠠᠨ ᠰᠡᠷᠡᠭᠡᠵᠦ ᠶᠠᠪᠤᠶᠠ
ᠥᠷᠭᠡᠰᠦ ᠮᠡᠲᠦ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ
ᠥᠯᠵᠡᠢᠲᠦ ᠰᠠᠢᠨ ᠨᠥᠬᠥᠷ ᠮᠢᠨᠢ ᠪᠢᠯᠡ᠂ ᠴᠢ
ᠥᠰᠢᠯᠳᠦᠨ ᠪᠠᠢᠯᠳᠤᠬᠤ ᠶ᠋ᠢᠨ ᠴᠠᠭ ᠲᠤ᠌
ᠦᠷᠦ ᠵᠢᠷᠦᠬᠡ ᠪᠡᠨ ᠡᠪᠡᠳᠬᠡᠳᠡᠭ ᠪᠢᠯᠡ᠂ ᠴᠢ
ᠠᠩᠭᠢᠳᠠ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ
ᠠᠨᠳᠠ ᠰᠠᠢᠨ ᠨᠥᠬᠥᠷ ᠮᠢᠨᠢ ᠪᠢᠯᠡ᠂ ᠴᠢ
ᠤᠯᠠᠢᠷᠠᠨ ᠪᠠᠢᠯᠳᠤᠬᠤ ᠶ᠋ᠢᠨ ᠴᠠᠭ ᠲᠤ᠌ ᠴᠤ᠌
ᠠᠭᠤᠰᠬᠢ ᠵᠢᠷᠦᠬᠡ ᠪᠡᠨ ᠡᠪᠡᠳᠬᠡᠳᠡᠭ ᠪᠢᠯᠡ᠂ ᠴᠢ
ᠬᠠᠭᠤᠷᠮᠠᠭ ᠦᠭᠡ ᠶ᠋ᠢ ᠬᠡᠯᠡᠭᠰᠡᠨ ᠦᠭᠡᠢ᠂ ᠪᠢ
ᠬᠠᠭᠤᠴᠢᠨ ᠨᠥᠬᠥᠷᠯᠡᠯ ᠢ᠋ᠶ᠋ᠡᠨ ᠳᠤᠷᠠᠳᠪᠠ᠂ ᠪᠢ
ᠬᠡᠷᠡᠢᠳ ᠦ᠋ᠨ ᠬᠠᠨ ᠲᠣᠭᠣᠷᠢᠯ ᠲᠠᠢ
ᠬᠡᠨ ᠨᠢ ᠳᠡᠢᠯᠬᠦ ᠪᠡᠨ ᠦᠵᠡᠯᠴᠡᠵᠦ
ᠬᠡᠩᠬᠦᠳᠡᠭ ᠴᠡᠭᠡᠵᠢ ᠪᠡᠨ ᠤᠷᠠᠯᠴᠠᠵᠤ
ᠬᠡᠢᠰᠬᠦ ᠦᠰᠦ ᠪᠡᠨ ᠵᠣᠯᠭᠠᠴᠠᠬᠤ ᠭᠡᠵᠦ
ᠬᠠᠷᠠ ᠬᠠᠯᠵᠠᠨ ᠡᠯᠢᠶᠡᠲᠦ ᠳ᠋ᠦ᠍
ᠬᠠᠳᠬᠤᠯᠳᠤᠬᠤ ᠴᠠᠭ ᠪᠣᠯᠬᠤ ᠳ᠋ᠤ᠌
ᠲᠣᠭᠣᠷᠢᠯ ᠬᠠᠨ ᠤ᠋ ᠰᠠᠨᠠᠭᠠ ᠶ᠋ᠢ
ᠲᠣᠪ ᠲᠠᠢ ᠬᠡᠯᠡᠵᠦ ᠲᠤᠰᠠᠯᠠᠭᠰᠠᠨ ᠪᠢᠯᠡ᠂ ᠴᠢ
ᠣᠪᠯᠢᠭᠠ ᠦᠭᠡᠢ ᠨᠠᠢ᠍ᠮᠠᠨ ᠢ᠋ ᠴᠣᠬᠢᠬᠤ ᠳ᠋ᠤ᠌
ᠣᠨᠣᠴᠢᠲᠤ ᠦᠭᠡ ᠪᠡᠷ ᠵᠥᠪᠯᠡᠵᠦ
ᠤᠪ ᠤᠬᠠᠭᠠᠨ ᠢ᠋ᠶ᠋ᠠᠷ ᠮᠤᠬᠤᠷᠳᠠᠭᠤᠯᠵᠤ
ᠦᠭᠡ ᠪᠡᠷ ᠢ᠋ᠶ᠋ᠡᠨ ᠦᠬᠦᠲᠡᠯᠡ ᠰᠦᠷᠳᠡᠭᠦᠯᠵᠦ
ᠠᠮᠠ ᠪᠠᠷ ᠢ᠋ᠶ᠋ᠠᠨ ᠠᠶᠤᠲᠠᠯᠠ ᠰᠠᠨᠳᠤᠷᠭᠠᠵᠤ
ᠠᠯᠢᠪᠠ ᠪᠠᠢᠳᠠᠯ ᠢ᠋ ᠨᠢ ᠮᠡᠳᠡᠭᠡᠯᠡᠵᠦ
ᠠᠴᠢ ᠲᠤᠰᠠ ᠬᠦᠷᠭᠡᠭᠰᠡᠨ ᠪᠢᠯᠡ᠂ ᠴᠢ
ᠠᠨᠳᠠ ᠶ᠋ᠢᠨ ᠲᠠᠩᠭᠠᠷᠢᠭ ᠢ᠋ᠶ᠋ᠠᠨ ᠰᠡᠷᠭᠦᠭᠡᠶᠡ
ᠠᠴᠢ ᠲᠤᠰᠠ ᠪᠠᠨ ᠥᠭᠭᠦᠯᠴᠡᠶᠡ
ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠬᠦᠴᠦᠨ ᠳᠣᠣᠷᠠ
ᠮᠥᠷᠥ ᠵᠡᠷᠭᠡᠴᠡᠨ ᠶᠠᠪᠤᠶᠠ
ᠵᠠᠩᠭᠢᠳᠤᠭᠰᠠᠨ ᠭᠠᠷ ᠢ᠋ᠶ᠋ᠠᠨ ᠲᠡᠨᠢᠢᠯᠴᠡᠵᠦ
ᠵᠠᠩᠭᠢᠷᠠᠭᠰᠠᠨ ᠬᠦᠴᠦ ᠪᠡᠨ ᠨᠢᠭᠡᠳᠬᠡᠵᠦ
ᠨᠢᠭᠡᠨ ᠲᠤᠭ ᠤ᠋ᠨ ᠳᠣᠣᠷᠠ
ᠨᠢᠭᠡᠳᠴᠦ ᠬᠣᠶᠠᠭᠤᠯᠠ ᠶᠠᠪᠤᠰᠤᠭᠠᠢ ᠭᠡᠵᠦ ᠲᠡᠮᠦᠵᠢᠨ ᠦ᠌ ᠬᠡᠯᠡᠭᠦᠯᠦᠭᠰᠡᠨ ᠢ᠋ ᠰᠣᠨᠣᠰᠤᠭᠠᠳ ᠵᠠᠮᠤᠬᠠ ᠣᠭᠲᠣ ᠪᠠᠶᠠᠷᠯᠠᠵᠤ ᠬᠥᠭᠡᠷᠦᠭᠡ ᠦᠭᠡᠢ ᠨᠢ ᠪᠤᠭᠤᠷᠴᠢ ᠶ᠋ᠢ ᠶᠡᠬᠡᠳᠡ ᠭᠠᠢᠬᠠᠰᠢᠷᠠᠭᠤᠯᠵᠠᠢ᠃ ᠵᠠᠮᠤᠬᠠ ᠪᠣᠳᠣᠯ ᠪᠣᠯᠤᠨ ᠵᠣᠭᠰᠣᠭᠰᠠᠭᠠᠷ ᠪᠠᠢᠪᠠ᠃ ᠲᠡᠮᠦᠵᠢᠨ ᠲᠡᠭᠦᠨ ᠢ᠋ ᠥᠷᠥᠰᠢᠶᠡᠭᠰᠡᠨ ᠨᠢ ᠶᠡᠷᠦ ᠭᠠᠢᠬᠠᠬᠤ ᠵᠦᠢᠯ ᠪᠢᠰᠢ ᠶᠦᠮ᠃ ᠡᠨᠡ ᠪᠣᠯ ᠲᠡᠮᠦᠵᠢᠨ ᠦ᠌ ᠬᠤᠪᠢ ᠳ᠋ᠤ᠌ ᠵᠠᠮᠤᠬᠠ ᠶᠠᠳᠠᠵᠤ ᠡᠩ ᠳ᠋ᠥ᠋ᠢᠴᠡᠬᠦ ᠳᠠᠢᠰᠤᠨ ᠨᠢ ᠴᠦ᠍ ᠪᠢᠰᠢ᠂ ᠶᠡᠷᠦ ᠬᠡᠨ ᠴᠦ᠍ ᠪᠢᠰᠢ ᠪᠣᠯᠤᠭᠰᠠᠨ ᠤ᠋ ᠭᠡᠷᠡᠴᠢ ᠪᠠᠢᠯᠠ᠃ ᠦᠭᠡᠢ ᠰᠠᠨ ᠪᠣᠯ ᠶᠠᠳᠠᠵᠤ ᠥᠪᠡᠷ ᠢ᠋ᠶ᠋ᠡᠨ ᠢᠷᠡᠵᠦ ᠡᠭᠦᠨ ᠢ᠋ ᠪᠡᠨ ᠬᠡᠯᠡᠬᠦ ᠨᠢ ᠶᠠᠭᠠᠬᠢᠪᠠ᠃ ᠲᠡᠮᠦᠵᠢᠨ ᠢᠩᠭᠢᠵᠦ ᠬᠠᠭᠤᠴᠢᠨ ᠠᠨᠳᠠ ᠶ᠋ᠢᠨ ᠶᠣᠰᠣᠭᠠᠷ ᠬᠦᠷᠭᠡᠭᠰᠡᠨ ᠲᠤᠰᠠ ᠶ᠋ᠢ ᠳᠤᠷᠠᠳᠤᠨ ᠬᠡᠯᠡᠭᠦᠯᠦᠭᠰᠡᠨ ᠨᠢ ᠠᠴᠢ ᠶ᠋ᠢ ᠰᠠᠨᠠᠭᠰᠠᠨ ᠮᠡᠲᠦ ᠪᠣᠯᠵᠤ ᠵᠥᠪᠬᠡᠨ ᠥᠪᠡᠷ ᠦ᠋ᠨ ᠨᠡᠷᠡ ᠨᠢᠭᠤᠷ ᠢ᠋ ᠪᠣᠳᠣᠭᠰᠠᠨ ᠠ᠋ᠴᠠ ᠴᠠᠭᠠᠰᠢ ᠦᠭᠡᠢ ᠬᠡᠷᠡᠭ ᠭᠡᠵᠦ ᠤᠬᠠᠭᠠᠷᠠᠭᠠᠳ ᠪᠤᠬᠢᠨᠢᠳᠤᠪᠠ᠃ ᠲᠡᠷᠡ ᠭᠠᠭᠴᠠᠬᠠᠨ ᠲᠡᠮᠦᠵᠢᠨ ᠲᠡᠢ ᠨᠢᠭᠤᠷ ᠲᠤᠯᠤᠨ ᠠᠭᠤᠯᠵᠠᠬᠤ ᠶ᠋ᠢ ᠬᠦᠰᠡᠵᠦ ᠪᠠᠢᠪᠠ᠃ ᠬᠠᠷᠢᠨ ᠲᠡᠭᠦᠨ ᠢ᠋ ᠥᠳᠥᠭᠡᠨ ᠢᠷᠡᠭᠦᠯᠬᠦ ᠠᠷᠭᠠ ᠮᠤᠬᠤᠷᠳᠠᠵᠤ ᠪᠠᠢᠯᠠ᠃
| ᠪᠤᠭᠤᠷᠴᠢ ᠴᠢ ᠰᠠᠢᠨ ᠰᠣᠨᠣᠰ᠃
ᠪᠢ ᠬᠠᠭᠤᠴᠢᠨ ᠠᠨᠳᠠ ᠲᠡᠮᠦᠵᠢᠨ ᠦ᠌
ᠬᠠᠯᠠᠭᠤᠨ ᠨᠢᠭᠤᠷ ᠢ᠋ ᠬᠠᠷᠠᠵᠤ
ᠬᠠᠲᠠᠭᠤ ᠦᠭᠡ ᠶ᠋ᠢ ᠰᠣᠨᠣᠰᠤᠶᠠ᠃
ᠲᠡᠭᠦᠨ ᠦ᠌ ᠡᠴᠦᠰ ᠲᠦ᠍ ᠨᠠᠮᠠᠶ᠋ᠢ ᠦᠬᠦᠭᠦᠯᠦᠭᠲᠦᠨ ᠭᠡᠵᠦ ᠴᠢᠩᠭᠢᠰ ᠬᠠᠭᠠᠨ ᠳ᠋ᠠᠭᠠᠨ ᠠᠢᠯᠠᠳᠬᠠ ᠭᠡᠵᠦ ᠵᠠᠮᠤᠬᠠ ᠤᠷᠢᠳ ᠪᠣᠷᠣᠬᠤᠯ ᠳ᠋ᠤ᠌ ᠬᠡᠯᠡᠭᠰᠡᠨ ᠡᠴᠡ ᠪᠡᠨ ᠤᠬᠤᠷᠢᠭᠰᠠᠨ ᠦᠭᠡᠢ᠃
| ᠵᠠᠮᠤᠬᠠ ᠴᠢ ᠣᠯᠠᠨ ᠦᠭᠡ ᠪᠦᠦ ᠶᠠᠷᠢ᠃ ᠴᠢᠩᠭᠢᠰ ᠬᠠᠭᠠᠨ ᠴᠢᠮᠠᠶ᠋ᠢ ᠡᠨᠡᠷᠢᠵᠦ ᠥᠷᠥᠰᠢᠶᠡᠪᠡ᠃ ᠴᠢ ᠬᠦᠰᠡᠪᠡᠯ ᠣᠳᠣ ᠳᠤᠷᠠᠲᠠᠢ ᠵᠦᠭ ᠲᠡᠭᠡᠨ ᠭᠠᠷᠴᠤ ᠣᠳᠤᠭᠲᠤᠨ᠃ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠵᠢᠳᠬᠦᠪᠡᠯ ᠪᠢ ᠴᠢᠮᠠ ᠳ᠋ᠤ᠌ ᠲᠤᠰᠠᠯᠠᠶᠠ᠃ ᠡᠰᠡᠪᠡᠯ ᠴᠢ ᠵᠦᠭᠡᠷ ᠥᠪᠡᠷ ᠦ᠋ᠨ ᠲᠠᠪᠠ ᠪᠠᠷ ᠡᠨᠳᠡ ᠰᠠᠭᠤᠨᠠ ᠤᠤ? ᠡᠨᠡ ᠭᠡᠷ ᠴᠢᠨᠦᠬᠢ᠃ ᠬᠠᠷᠢᠨ ᠶᠡᠬᠡ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠣᠯᠠᠨ ᠦᠭᠡ ᠬᠡᠯᠡᠵᠦ ᠲᠡᠭᠦᠨ ᠢ᠋ ᠪᠦᠦ ᠪᠤᠬᠢᠨᠢᠳᠤᠭᠤᠯ᠃ ᠢᠩᠭᠢᠬᠦ ᠨᠢ ᠴᠢᠮᠠ ᠳ᠋ᠤ᠌ ᠣᠰᠣᠯ ᠲᠠᠢ ᠴᠤ᠌ ᠪᠠᠢᠵᠤ ᠮᠡᠳᠡᠨᠡ ᠭᠡᠵᠦ ᠪᠤᠭᠤᠷᠴᠢ ᠲᠡᠭᠦᠨ ᠳ᠋ᠦ᠍ ᠵᠥᠪᠯᠡᠵᠡᠢ᠃
| ᠴᠢ ᠮᠢᠨᠦ ᠶᠠᠭᠤ ᠬᠢᠬᠦ᠂ ᠶᠠᠭᠤ ᠬᠡᠯᠡᠬᠦ ᠶ᠋ᠢ ᠵᠢᠭᠠᠬᠤ ᠤᠤ? ᠬᠢᠷᠢ ᠪᠡᠨ ᠮᠡᠳᠡ᠃ ᠭᠠᠷ ᠭᠠᠪᠠ ᠲᠠᠢ᠂ ᠬᠥᠯ ᠬᠦᠯᠢᠭ ᠲᠡᠢ ᠭᠡᠵᠦ ᠴᠢ ᠪᠦᠦ ᠪᠠᠰᠤ᠃ ᠵᠠᠳᠠᠷᠠᠨ ᠤ᠋ ᠵᠠᠮᠤᠬᠠ᠂ ᠬᠥᠷ ᠬᠠᠭᠠᠨ ᠪᠢ ᠴᠢᠮᠠ ᠪᠠᠷ ᠬᠡᠯᠡᠬᠦ ᠦᠭᠡ ᠬᠢᠬᠦ ᠦᠢᠯᠡ ᠪᠡᠨ ᠵᠢᠭᠠᠯᠭᠠᠬᠤ ᠦᠭᠡᠢ᠃ ᠴᠢ ᠲᠡᠷᠡ ᠲᠡᠮᠦᠵᠢᠨ ᠳ᠋ᠦ᠍ ᠣᠴᠢᠵᠤ ᠬᠡᠯᠡ᠃ ᠨᠠᠮᠠᠶ᠋ᠢ ᠦᠳᠲᠡᠷ ᠲᠦᠷᠭᠡᠨ ᠦᠬᠦᠭᠦᠯᠦᠭᠲᠦᠨ᠃ ᠪᠢ ᠬᠠᠭᠠᠨ ᠬᠥᠮᠦᠨ᠃ ᠭᠠᠭᠴᠠᠬᠠᠨ ᠴᠢᠩᠭᠢᠰ ᠬᠠᠭᠠᠨ ᠲᠠᠢ ᠯᠠ ᠠᠭᠤᠯᠵᠠᠵᠤ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠰᠣᠨᠣᠰᠤᠨᠠ᠃
| ᠪᠤᠭᠤᠷᠴᠢ ᠴᠢᠮᠠᠶ᠋ᠢ ᠦᠭᠡᠢ ᠪᠠᠢᠬᠤ ᠳ᠋ᠤ᠌
ᠪᠣᠯᠤᠭᠰᠠᠨ ᠬᠣᠭᠣᠯᠠ ᠪᠠᠨ ᠬᠤᠪᠢᠶᠠᠵᠤ
ᠪᠣᠯᠵᠣᠭ ᠵᠤᠷᠠᠮᠠ ᠠᠩᠨᠠᠵᠤ ᠶᠠᠪᠤᠯᠠ᠂ ᠪᠢᠳᠡ
ᠬᠠᠨ ᠲᠤᠭᠤᠷᠢᠯ ᠤ᠋ᠨ ᠲᠣᠭᠣᠭᠠ ᠶ᠋ᠢ ᠥᠩᠭᠡᠢᠵᠦ
ᠬᠠᠷᠪᠤᠬᠤ ᠨᠠᠮᠨᠠᠬᠤ ᠰᠤᠷᠭᠠᠭᠤᠯᠢ ᠬᠢᠵᠦ
ᠬᠠᠨᠢᠯᠠᠵᠤ ᠨᠥᠬᠥᠷᠯᠡᠵᠦ ᠶᠠᠪᠤᠯᠠ᠂ ᠪᠢᠳᠡ
ᠬᠥᠨᠳᠡᠯᠡᠨ ᠦ᠌ ᠬᠥᠮᠦᠨ ᠳ᠋ᠦ᠍ ᠦᠭᠡ ᠲᠠᠢᠵᠤ
ᠬᠥᠨᠳᠡᠢ ᠴᠢᠷᠠᠢᠯᠠᠭᠰᠠᠨ ᠲᠡᠭᠦᠨ ᠲᠡᠢ
ᠤᠯᠠᠭᠠᠨ ᠨᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠭᠤᠯᠵᠠᠵᠤ
ᠤᠴᠢᠷ ᠨᠠᠴᠢᠷ ᠢ᠋ᠶ᠋ᠠᠨ ᠬᠡᠯᠡᠯᠴᠡᠨᠡ᠂ ᠪᠢ
ᠡᠢᠮᠦ ᠠᠲᠠᠯᠠ ᠴᠢ ᠨᠠᠳᠠᠳᠤ
ᠶᠡᠬᠡ ᠦᠭᠡ ᠶ᠋ᠢ ᠬᠡᠯᠡᠬᠦ ᠪᠤᠶᠤ ᠭᠡᠵᠦ ᠵᠠᠮᠤᠬᠠ ᠠᠭᠤᠷᠰᠠᠨ ᠬᠠᠰᠬᠢᠷᠪᠠ᠃ ᠪᠤᠭᠤᠷᠴᠢ ᠶ᠋ᠢ ᠵᠠᠷᠤᠨ ᠢᠷᠡᠭᠦᠯᠵᠦ ᠲᠡᠭᠦᠨ ᠢ᠋ ᠬᠠᠷᠠᠴᠤ ᠵᠠᠷᠤᠴᠠ ᠶ᠋ᠢᠨ ᠬᠡᠮᠵᠢᠶᠡᠨ ᠳ᠋ᠦ᠍ ᠦᠵᠡᠭᠰᠡᠨ ᠳ᠋ᠦ᠍ ᠵᠠᠮᠤᠬᠠ ᠪᠤᠬᠢᠨᠢᠳᠤᠨ ᠡᠭᠳᠡᠭᠦᠴᠡᠵᠡᠢ᠃ ᠥᠪᠡᠷ ᠦ᠋ᠨ ᠬᠢᠨᠢ ᠣᠢᠷᠠ ᠰᠢᠳᠠᠷ ᠤ᠋ᠳ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠤᠷᠠᠨ ᠴᠡᠴᠡᠨ ᠦᠭᠡ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠵᠠᠮᠤᠬᠠ ᠲᠠᠢ ᠥᠷᠢᠰᠦᠯᠳᠦᠵᠦ ᠴᠢᠳᠠᠬᠤ ᠨᠢ ᠪᠤᠭᠤᠷᠴᠢ ᠪᠠᠢᠭᠰᠠᠨ ᠲᠤᠯᠠ ᠲᠡᠮᠦᠵᠢᠨ ᠵᠥᠪᠬᠡᠨ ᠡᠢᠮᠦ ᠬᠡᠷᠡᠭ ᠦ᠋ᠨ ᠤᠴᠢᠷ ᠲᠡᠭᠦᠨ ᠢ᠋ ᠢᠯᠡᠭᠡᠭᠰᠡᠨ ᠢ᠋ ᠵᠠᠮᠤᠬᠠ ᠤᠬᠠᠭᠠᠷᠠᠭᠰᠠᠨ ᠦᠭᠡᠢ ᠳᠣᠣᠷᠠ ᠳ᠋ᠤ᠌ ᠦᠵᠡᠪᠡ ᠭᠡᠮᠡᠨ ᠳᠡᠮᠡᠢ ᠬᠠᠷᠠᠳᠠᠵᠠᠢ᠃ ᠬᠠᠷᠢᠨ ᠪᠤᠭᠤᠷᠴᠢ ᠵᠠᠮᠤᠬᠠ ᠶ᠋ᠢᠨ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰᠤᠭᠠᠳ
— ᠵᠠᠮᠤᠬᠠ ᠴᠢᠨᠦ ᠬᠠᠮᠢᠭᠠ ᠶᠠᠭᠤ ᠬᠢᠵᠦ ᠶᠠᠪᠤᠭᠰᠠᠨ ᠢ᠋ ᠪᠢ ᠪᠠᠰᠠ ᠮᠡᠳᠡᠬᠦ ᠶᠦᠮ᠂ ᠴᠢ ᠬᠡᠯᠡᠬᠦ ᠦᠭᠡ ᠪᠠᠢᠪᠠᠯ ᠬᠡᠯᠡᠰᠦᠭᠡᠢ᠃ ᠪᠢ ᠪᠦᠭᠦᠳᠡ ᠶ᠋ᠢ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠤᠯᠠᠮᠵᠢᠯᠠᠶᠠ᠃ ᠡᠭᠦᠨ ᠢ᠋ ᠴᠢ ᠮᠢᠨᠦ ᠲᠤᠰᠠ ᠭᠡᠵᠦ ᠪᠣᠳᠣᠭᠳᠠᠨ ᠭᠡᠪᠡ᠃ ᠣᠳᠣ ᠲᠡᠭᠦᠨ ᠦ᠌ ᠬᠡᠯᠡᠬᠦ ᠦᠭᠡᠨ ᠡᠴᠡ ᠲᠡᠮᠦᠵᠢᠨ ᠲᠡᠭᠦᠨ ᠳ᠋ᠦ᠍ ᠶᠠᠭᠠᠬᠢᠵᠤ ᠬᠠᠨᠳᠤᠬᠤ ᠨᠢ ᠬᠠᠮᠢᠶᠠᠷᠬᠤ ᠲᠤᠯᠠ ᠰᠡᠳᠬᠢᠯ ᠢ᠋ ᠨᠢ ᠤᠶᠠᠷᠠᠭᠠᠬᠤ ᠪᠠᠷ ᠲᠡᠢᠮᠦ ᠰᠠᠢᠬᠠᠨ ᠦᠭᠡ ᠶ᠋ᠢ ᠣᠯᠵᠤ ᠬᠡᠯᠡᠬᠦ ᠶᠣᠰᠣᠲᠠᠢ ᠪᠠᠨ ᠵᠠᠮᠤᠬᠠ ᠰᠠᠶᠢ ᠯᠠ ᠣᠢᠯᠠᠭᠠᠯᠠ᠃ ᠵᠠᠮᠤᠬᠠ ᠶ᠋ᠢᠨ ᠰᠠᠨᠠᠭᠠᠨ ᠳ᠋ᠤ᠌ ᠲᠡᠮᠦᠵᠢᠨ ᠳ᠋ᠦ᠍ ᠢᠯᠡᠭᠡᠬᠦ ᠰᠢᠯᠦᠭ ᠤᠷᠤᠰᠤᠨ ᠣᠷᠣᠵᠤ ᠢᠷᠡᠪᠡ᠃ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠳᠣᠭᠳᠣᠯᠤᠨ ᠬᠥᠳᠡᠯᠵᠡᠢ᠃ ᠲᠡᠷᠡ ᠬᠡᠵᠢᠶᠡ ᠴᠦ᠍ ᠢᠩᠭᠢᠵᠦ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠰᠢᠯᠦᠭ ᠵᠣᠬᠢᠶᠠᠵᠤ ᠪᠠᠢᠭᠠ ᠦᠭᠡᠢ ᠮᠡᠲᠦ ᠰᠠᠨᠠᠭᠳᠠᠪᠠ᠃ ᠥᠩᠭᠡᠷᠡᠭᠦᠯᠦᠭᠰᠡᠨ ᠠᠮᠢᠳᠤᠷᠠᠯ᠂ ᠥᠨᠥ ᠡᠷᠲᠡᠨ ᠦ᠌ ᠶᠠᠪᠤᠳᠠᠯ ᠨᠢᠳᠦᠨ ᠦ᠌ ᠬᠢᠨᠢ ᠡᠮᠦᠨᠡ ᠵᠢᠷᠡᠯᠵᠡᠨ ᠦᠵᠡᠭᠳᠡᠬᠦᠢ ᠳ᠋ᠦ᠍ ᠲᠡᠷᠡ ᠪᠡᠷ
ᠡᠩᠬᠦᠷᠡᠢ ᠪᠠᠭᠠ ᠨᠠᠰᠤᠨ ᠳ᠋ᠤ᠌
ᠡᠷᠲᠡᠨ ᠦ᠌ ᠵᠠᠶᠠᠭᠠ ᠪᠠᠷ ᠤᠴᠠᠷᠠᠵᠤ
ᠬᠣᠷᠬᠣᠨᠠᠭ ᠵᠤᠪᠤᠷ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍
ᠬᠣᠣᠰ ᠦᠭᠡᠢ ᠨᠥᠬᠥᠳ ᠪᠣᠯᠤᠯᠴᠠᠵᠤ
ᠡᠷᠡᠬᠡᠢ ᠬᠤᠷᠤᠭᠤ ᠪᠠᠨ ᠡᠰᠬᠡᠯᠴᠡᠨ
ᠡᠷᠬᠢᠮ ᠲᠠᠩᠭᠠᠷᠢᠭ ᠲᠠᠯᠪᠢᠯᠴᠠᠨ
ᠬᠠᠭᠠᠨ ᠵᠠᠶᠠᠭᠠᠲᠤ ᠴᠢᠮᠠ ᠲᠠᠢ
ᠬᠠᠯᠠᠭᠤᠨ ᠠᠨᠳᠠ ᠪᠣᠯᠤᠭᠰᠠᠨ ᠪᠢᠯᠡ ᠯᠠ᠃
ᠦᠯᠦ ᠰᠢᠩᠭᠡᠬᠦ ᠢᠳᠡᠭᠡ ᠢᠳᠡᠯᠴᠡᠵᠦ
ᠦᠯᠦ ᠮᠠᠷᠲᠠᠬᠤ ᠦᠭᠡ ᠬᠡᠯᠡᠯᠴᠡᠵᠦ
ᠨᠢᠭᠡ ᠬᠥᠨᠵᠢᠯᠡ ᠨᠥᠮᠥᠷᠴᠦ
ᠨᠢᠭᠡ ᠰᠠᠨᠠᠭᠠ ᠶ᠋ᠢ ᠰᠠᠨᠠᠵᠤ ᠶᠠᠪᠤᠯᠠ
ᠬᠥᠨᠳᠡᠯᠡᠨ ᠦ᠌ ᠬᠥᠮᠦᠨ ᠳ᠋ᠦ᠍ ᠭᠦᠳᠦᠭᠳᠡᠵᠦ ②
ᠬᠥᠨᠥᠭᠡᠬᠦ ᠦᠭᠡᠨ ᠳ᠋ᠦ᠍ ᠠᠪᠲᠠᠭᠳᠠᠵᠤ
ᠬᠠᠵᠠᠭᠤ ᠶ᠋ᠢᠨ ᠬᠥᠮᠦᠨ ᠳ᠋ᠦ᠍ ᠬᠠᠳᠬᠤᠭᠳᠠᠵᠤ
ᠬᠠᠷᠠᠳᠠᠬᠤ ᠦᠭᠡᠨ ᠳ᠋ᠦ᠍ ᠠᠪᠲᠠᠭᠳᠠᠵᠤ
ᠬᠠᠭᠠᠨ ᠠᠨᠳᠠ ᠴᠢᠮᠠ ᠠ᠋ᠴᠠ
ᠬᠠᠭᠠᠴᠠᠨ ᠰᠠᠯᠤᠭᠰᠠᠨ ᠠ᠋ᠴᠠ ᠬᠣᠢᠰᠢ
ᠬᠠᠯᠠᠭᠤᠨ ᠨᠢᠭᠤᠷ ᠤ᠋ᠨ ᠢ᠋ᠶ᠋ᠠᠨ ᠠᠷᠠᠰᠤ ᠶ᠋ᠢ
ᠬᠠᠯᠴᠠᠯᠠᠵᠤ ᠬᠠᠭᠤᠯᠤᠭᠰᠠᠨ ᠤ᠋ ᠠᠳᠠᠯᠢ
ᠬᠠᠭᠠᠨ ᠠᠨᠳᠠ ᠴᠢᠨᠦ
ᠬᠠᠲᠠᠭᠤ ᠴᠢᠷᠠᠢ ᠶ᠋ᠢ ᠬᠠᠷᠠᠬᠤ ᠠ᠋ᠴᠠ
ᠬᠠᠯᠠᠰᠢᠷᠠᠨ ᠵᠣᠪᠠᠵᠤ ᠶᠠᠪᠤᠪᠠ᠃
ᠤᠮᠠᠷᠲᠠᠰᠢ ᠦᠭᠡᠢ ᠬᠡᠯᠡᠯᠴᠡᠭᠰᠡᠨ
ᠤᠷᠢᠳ ᠤ᠋ᠨ ᠦᠭᠡ ᠶ᠋ᠢ ᠰᠠᠨᠠᠵᠤ
ᠤᠯᠠᠭᠠᠨ ᠨᠢᠭᠤᠷ ᠤ᠋ᠨ ᠢ᠋ᠶ᠋ᠠᠨ ᠠᠷᠠᠰᠤ ᠶ᠋ᠢ
ᠤᠷᠠᠭᠤᠯᠵᠤ ᠥᠪᠴᠢᠭᠦᠯᠦᠭᠰᠡᠨ ᠦ᠌ ᠠᠳᠠᠯᠢ
ᠠᠭᠤᠵᠢᠮ ᠰᠡᠳᠬᠢᠯᠲᠦ ᠠᠨᠳᠠ ᠶ᠋ᠢᠨ ᠢ᠋ᠶ᠋ᠡᠨ
ᠤᠬᠠᠭᠠᠨᠲᠤ ᠴᠢᠷᠠᠢ ᠶ᠋ᠢ ᠬᠠᠷᠠᠬᠤ ᠠ᠋ᠴᠠ
ᠤᠬᠤᠷᠢᠨ ᠵᠣᠪᠠᠵᠤ ᠶᠠᠪᠤᠪᠠ᠃
ᠬᠠᠭᠠᠨ ᠠᠨᠳᠠ ᠨᠠᠮᠠᠶ᠋ᠢ
ᠬᠠᠢᠷᠠᠯᠠᠨ ᠰᠣᠶᠣᠷᠬᠠᠵᠤ
ᠬᠠᠮᠲᠤᠷᠠᠨ ᠨᠥᠬᠥᠷᠯᠡᠶᠡ ᠭᠡᠵᠡᠢ᠃
ᠨᠥᠬᠥᠷᠯᠡᠬᠦ ᠴᠠᠭ ᠲᠤ᠌
ᠨᠥᠬᠥᠷᠯᠡᠭᠰᠡᠨ ᠦᠭᠡᠢ ᠪᠢ
ᠨᠥᠭᠴᠢᠬᠦ ᠶ᠋ᠢᠨ ᠡᠮᠦᠨᠡ
ᠨᠥᠬᠥᠷᠯᠡᠭᠡᠳ ᠶᠠᠭᠠᠬᠢᠬᠤ ᠪᠣᠢ
ᠦᠶᠡᠷᠬᠡᠬᠦ ᠶ᠋ᠢᠨ ᠴᠠᠭ ᠲᠤ᠌
ᠳᠠᠢᠵᠢᠭᠰᠠᠨ ᠪᠢ
ᠦᠬᠦᠬᠦ ᠶ᠋ᠢᠨ ᠴᠠᠭ ᠲᠤ᠌
ᠳᠠᠢᠭᠳᠠᠭᠠᠳ ᠶᠠᠭᠠᠬᠢᠬᠤ ᠪᠣᠢ
ᠲᠩᠷᠢ ᠵᠠᠶᠠᠭᠠᠲᠤ
ᠲᠡᠮᠦᠵᠢᠨ ᠴᠢ
ᠡᠵᠡᠨ ᠵᠠᠶᠠᠭᠠᠲᠤ
ᠶᠡᠬᠡ ᠬᠠᠭᠠᠨ ᠲᠠ
ᠲᠦᠮᠡᠨ ᠤᠯᠤᠰ ᠢ᠋
ᠲᠦᠪᠰᠢᠨ ᠪᠣᠯᠭᠠᠵᠤ
ᠬᠠᠷᠢ ᠤᠯᠤᠰ ᠢ᠋
ᠬᠠᠮᠲᠤᠳᠬᠠᠨ ᠵᠠᠬᠢᠷᠴᠤ
ᠬᠠᠮᠤᠭ ᠢ᠋ ᠡᠵᠡᠯᠡᠭᠰᠡᠨ
ᠬᠠᠭᠠᠨ ᠪᠣᠯᠤᠭᠠᠳ
ᠳᠡᠯᠡᠬᠡᠢ ᠳ᠋ᠠᠬᠢᠨ
ᠥᠯᠮᠡᠢ ᠳ᠋ᠦ᠍ ᠲᠠᠨᠢ ᠪᠠᠢᠬᠤ ᠳ᠋ᠤ᠌
ᠳᠡᠮᠡᠢ ᠨᠠᠳᠠ ᠪᠠᠷ
ᠶᠠᠭᠤ ᠪᠠᠨ ᠬᠢᠬᠦ ᠪᠣᠢ
ᠬᠠᠷᠠᠩᠭᠤᠢ ᠰᠥᠨᠢ ᠶ᠋ᠢᠨ
ᠵᠡᠭᠦᠳᠦ ᠪᠣᠯᠵᠤ
ᠭᠡᠭᠡᠨ ᠡᠳᠦᠷ ᠦ᠋ᠨ
ᠭᠡᠮᠲᠡᠨ ᠪᠣᠯᠵᠤ
ᠬᠠᠭᠠᠨ ᠠᠨᠳᠠ ᠶ᠋ᠢ
ᠵᠣᠪᠠᠭᠠᠨᠠ ᠪᠢ
ᠡᠩᠭᠡᠷ ᠦ᠋ᠨ ᠴᠢᠨᠢ ᠪᠥᠭᠡᠰᠦ
ᠡᠭᠡᠮ ᠦ᠋ᠨ ᠴᠢᠨᠢ ᠥᠷᠭᠡᠰᠦ
ᠥᠯᠮᠡᠢ ᠳ᠋ᠦ᠍ ᠴᠢᠨᠢ ᠪᠠᠷᠲᠠᠭᠠ
ᠮᠡᠯᠮᠡᠢ ᠳ᠋ᠦ᠍ ᠴᠢᠨᠢ ᠰᠢᠷᠣᠢ ᠪᠣᠯᠬᠤ ᠪᠢᠵᠡ ᠪᠢ᠃
ᠠᠲᠠᠭᠠᠲᠤ ᠡᠮᠡ ᠶ᠋ᠢᠨ ᠦᠭᠡ ᠪᠡᠷ
ᠠᠨᠳᠠ ᠠ᠋ᠴᠠ ᠰᠠᠯᠤᠭᠠᠳ
ᠠᠯᠵᠢᠶᠠᠨ ᠵᠣᠪᠠᠵᠤ
ᠠᠷᠭᠠ ᠪᠠᠨ ᠪᠠᠷᠠᠪᠠ ᠪᠢ
ᠡᠨᠡ ᠨᠠᠰᠤ ᠶ᠋ᠢ ᠡᠯᠡᠲᠡᠯᠡ
ᠡᠴᠦᠰ ᠦ᠋ᠨ ᠠᠮᠢᠰᠬᠤᠭᠠ ᠲᠠᠰᠤᠷᠠᠲᠠᠯᠠ
ᠡᠷᠬᠢᠮ ᠲᠠᠩᠭᠠᠷᠢᠭ ᠢ᠋ᠶ᠋ᠠᠨ ᠰᠠᠨᠠᠵᠤ
ᠡᠩᠬᠦᠷᠡᠢ ᠲᠠᠩᠬᠢᠯ ᠨᠠᠰᠤᠨ ᠤ᠋
ᠡᠨᠳᠡᠭᠦᠦ ᠦᠭᠡᠢ ᠦᠭᠡ ᠪᠡᠨ ᠪᠣᠳᠣᠵᠤ
ᠬᠠᠷᠠ ᠨᠢᠳᠦ ᠪᠡᠨ ᠠᠨᠢᠵᠤ
ᠬᠠᠯᠠᠭᠤᠨ ᠠᠮᠢᠰᠬᠤᠭᠠ ᠬᠤᠷᠢᠶᠠᠪᠠᠯ
ᠬᠠᠷᠢᠨ ᠮᠢᠨᠦ ᠵᠢᠷᠭᠠᠯ ᠪᠢᠵᠡ᠃
ᠤᠷᠢᠳ ᠤ᠋ᠨ ᠠᠨᠳᠠ ᠲᠡᠮᠦᠵᠢᠨ ᠴᠢ
ᠤᠷᠭᠤᠬᠤ ᠨᠠᠷᠠᠨ ᠠ᠋ᠴᠠ ᠠᠪᠤᠭᠠᠳ
ᠰᠢᠩᠭᠡᠬᠦ ᠨᠠᠷᠠᠨ ᠬᠦᠷᠲᠡᠯᠡᠬᠢ
ᠠᠭᠤᠵᠢᠮ ᠳᠡᠯᠭᠡᠷ ᠨᠤᠲᠤᠭ ᠲᠠᠢ
ᠤᠯᠤᠰ ᠳᠠᠶᠠᠭᠠᠷ ᠲᠤ᠌ ᠠᠯᠳᠠᠷᠰᠢᠵᠤ
ᠲᠣᠯᠣᠭᠠᠢᠲᠠᠨ ᠢ᠋ ᠪᠥᠬᠥᠢᠯᠭᠡᠵᠦ
ᠲᠣᠢᠭᠲᠠᠨ ᠢ᠋ ᠰᠥᠭᠦᠳᠦᠭᠦᠯᠪᠡ᠃
ᠰᠡᠷᠭᠦᠯᠡᠩ ᠪᠠᠭᠠᠲᠤᠷ ᠴᠢᠮᠠ ᠳ᠋ᠤ᠌
ᠰᠡᠴᠡᠨ ᠡᠬᠡ ᠵᠠᠶᠠᠭᠠᠵᠠᠢ᠃
ᠡᠷᠡᠯᠬᠡᠭ ᠪᠠᠭᠠᠲᠤᠷ ᠠᠨᠳᠠ ᠳ᠋ᠤ᠌
ᠡᠷᠳᠡᠮᠲᠦ ᠳᠡᠭᠦᠦ ᠨᠠᠷ ᠲᠥᠷᠥᠵᠡᠢ᠃
ᠳᠠᠯᠠᠨ ᠭᠤᠷᠪᠠᠨ ᠬᠦᠯᠦᠭ ᠲᠡᠢ
ᠳᠠᠢᠴᠢᠨ ᠥᠷᠯᠥᠭ ᠨᠥᠬᠥᠳ ᠲᠡᠢ
ᠳᠠᠷᠬᠠᠨ ᠪᠠᠭᠠᠲᠤᠷ ᠠᠯᠳᠠᠷ ᠲᠠᠢ
ᠳᠠᠯᠠᠢ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌
ᠳᠠᠷᠤᠭᠳᠠᠵᠤ ᠮᠥᠬᠥᠪᠡ᠂ ᠪᠢ᠃
ᠥᠵᠢ ᠶ᠋ᠢᠨ ᠪᠠᠭᠠ ᠨᠠᠰᠤᠨ ᠳ᠋ᠠᠭᠠᠨ
ᠥᠨᠥᠴᠢᠨ ᠪᠡᠶᠡ ᠬᠣᠴᠣᠷᠤᠭᠠᠳ
ᠢᠲᠡᠭᠡᠬᠦ ᠰᠠᠢᠨ ᠨᠥᠬᠥᠷ ᠦᠭᠡᠢ
ᠢᠳᠡ ᠲᠡᠢ ᠰᠠᠢᠨ ᠳᠡᠭᠦᠦ ᠦᠭᠡᠢ
ᠢᠯᠡᠭᠦᠦ ᠳᠤᠲᠠᠭᠤ ᠦᠭᠡ ᠲᠡᠢ
ᠶᠡᠬᠡ ᠲᠣᠮᠣᠭᠴᠢ ᠡᠬᠡᠨᠡᠷ ᠲᠡᠢ
ᠡᠢᠮᠦ ᠯᠡ ᠲᠠᠪᠢᠯᠠᠩ ᠲᠠᠢ ᠶᠠᠪᠤᠭᠰᠠᠨ ᠠ᠋ᠴᠠ
ᠲᠩᠷᠢ ᠡᠴᠢᠭᠡ ᠡᠴᠡ ᠵᠠᠶᠠᠭᠠᠲᠠᠢ
ᠲᠡᠮᠦᠵᠢᠨ ᠴᠢᠮᠠ ᠳ᠋ᠤ᠌ ᠳᠡᠢᠯᠦᠭᠳᠡᠪᠡ ᠪᠢ᠃
ᠬᠠᠭᠠᠨ ᠲᠠ ᠰᠣᠶᠣᠷᠬᠠᠵᠤ
ᠬᠠᠯᠠᠭᠤᠨ ᠠᠮᠢ ᠶ᠋ᠢ ᠮᠢᠨᠢ ᠲᠠᠰᠤᠯᠪᠠᠯ
ᠠᠷᠢᠭᠤᠨ ᠵᠢᠷᠦᠬᠡ ᠴᠢᠨᠢ ᠠᠮᠠᠷᠠᠵᠤ
ᠠᠮᠤᠭᠤᠯᠠᠩ ᠵᠢᠷᠭᠠᠬᠤ ᠪᠣᠯᠤᠨᠠ
ᠠᠨᠳᠠ ᠴᠢ ᠰᠣᠶᠣᠷᠬᠠᠵᠤ
ᠠᠰᠬᠠᠷᠠᠬᠤ ᠴᠢᠰᠤ ᠶ᠋ᠢ ᠮᠢᠨᠢ ᠭᠠᠷᠭᠠᠯ ᠦᠭᠡᠢ
ᠠᠷᠢᠭᠤᠨ ᠶᠣᠰᠣ ᠶ᠋ᠢ ᠰᠠᠬᠢᠨ
ᠠᠯᠠᠵᠤ ᠥᠷᠥᠰᠢᠶᠡ ᠨᠠᠮᠠᠶ᠋ᠢ
ᠦᠬᠦᠵᠦ ᠦᠷᠡᠭᠳᠡᠬᠦ ᠪᠡᠶᠡ ᠮᠢᠨᠢ
ᠦᠢᠷᠡᠵᠦ ᠪᠤᠲᠠᠷᠠᠬᠤ ᠶᠠᠰᠤ ᠮᠢᠨᠢ
ᠦᠷᠭᠦᠯᠵᠢᠳᠡ ᠭᠠᠵᠠᠷ ᠰᠢᠩᠭᠡᠵᠦ
ᠡᠭᠦᠷᠢᠳᠡ ᠣᠷᠣᠰᠢᠬᠤ ᠪᠣᠯᠲᠤᠭᠠᠢ
ᠦᠳᠲᠡᠷ ᠲᠠᠰᠤᠷᠠᠬᠤ ᠠᠮᠢ ᠮᠢᠨᠢ
ᠦᠬᠦᠲᠡᠯᠡ ᠰᠢᠮᠰᠢᠷᠡᠬᠦ ᠵᠢᠷᠦᠬᠡ ᠮᠢᠨᠢ
ᠢᠲᠡᠭᠡᠯᠲᠦ ᠠᠨᠳᠠ ᠶ᠋ᠢᠨ ᠤᠷᠤᠭ ᠢ᠋
ᠢᠪᠡᠭᠡᠵᠦ ᠲᠡᠳᠬᠦᠬᠦ ᠪᠣᠯᠲᠤᠭᠠᠢ᠁
ᠢᠯᠡᠭᠦᠦ ᠳᠤᠲᠠᠭᠤ ᠶ᠋ᠢ ᠪᠣᠳᠣᠯ ᠦᠭᠡᠢ
ᠡᠢᠮᠦ ᠢᠷᠦᠭᠡᠯ ᠢ᠋ ᠲᠠᠯᠪᠢᠶᠠ
ᠥᠨᠥᠴᠢᠨ ᠵᠠᠶᠠᠭᠠᠲᠤ ᠪᠢ ᠴᠢᠨᠢ
ᠥᠨᠳᠥᠷ ᠲᠥᠷᠥᠯᠲᠦ ᠠᠨᠳᠠ ᠶ᠋ᠢᠨ
ᠥᠮᠥᠭ ᠰᠦᠯᠲᠠᠨ ᠳ᠋ᠤ᠌ ᠳᠠᠷᠤᠭᠳᠠᠪᠠ᠃
ᠥᠪᠡᠷ ᠦ᠋ᠨ ᠬᠦᠰᠡᠯ ᠢ᠋ᠶ᠋ᠡᠷ ᠦᠬᠦᠶᠡ
ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠮᠢᠨᠢ ᠪᠦᠦ ᠮᠠᠷᠲᠠᠲᠤᠭᠠᠢ
ᠬᠡᠵᠢᠶᠡ ᠢᠮᠠᠭᠲᠠ ᠳᠤᠷᠠᠳᠴᠤ ᠶᠠᠪᠤᠲᠤᠭᠠᠢ᠁ ᠭᠡᠵᠦ ᠤᠶᠠᠩᠭᠠᠯᠠᠭᠤᠯᠤᠨ ᠬᠠᠢᠯᠠᠪᠠ᠃ ᠵᠠᠮᠤᠬᠠ ᠴᠡᠴᠡᠨ ᠦ᠌ ᠪᠢᠯᠢᠭ ᠲᠠᠩᠬᠠᠢ ᠰᠢᠯᠦᠭ ᠢ᠋ ᠳᠤᠲᠠᠭᠤ ᠴᠡᠭᠡᠵᠢᠯᠡᠵᠦ ᠦᠭᠡ᠂ ᠰᠠᠨᠠᠭᠠ ᠣᠷᠬᠢᠭᠳᠠᠭᠤᠯᠬᠤ ᠪᠣᠢ ᠭᠡᠵᠦ ᠪᠦᠷ ᠠᠩᠬᠠᠨ ᠠ᠋ᠴᠠ ᠪᠠᠨ ᠪᠣᠳᠣᠭᠰᠠᠨ ᠪᠤᠭᠤᠷᠴᠢ ᠬᠡᠳᠦᠢᠨᠡ ᠠᠷᠭᠠ ᠰᠡᠳᠦᠵᠦ ᠰᠢᠭᠢᠬᠤᠲᠤᠭ ᠢ᠋ ᠳᠠᠭᠤᠳᠠᠨ ᠠᠪᠴᠢᠷᠠᠭᠠᠳ ᠪᠠᠢᠭᠰᠠᠨ ᠲᠤᠯᠠ ᠵᠠᠮᠤᠬᠠ ᠶ᠋ᠢᠨ ᠡᠨᠡ ᠤᠷᠲᠤ ᠰᠢᠯᠦᠭ ᠢ᠋ ᠨᠢᠭᠡᠳ ᠨᠢᠭᠡᠨ ᠦᠭᠡᠢ ᠪᠢᠴᠢᠭᠦᠯᠦᠭᠡᠳ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠤᠩᠰᠢᠭᠤᠯᠵᠤ ᠰᠣᠨᠣᠰᠬᠠᠪᠠ᠃
ᠴᠢᠩᠭᠢᠰ ᠬᠠᠭᠠᠨ ᠵᠠᠮᠤᠬᠠ ᠶ᠋ᠢᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠤᠳᠠᠭᠠᠨ ᠪᠣᠳᠣᠯ ᠪᠣᠯᠤᠨ ᠰᠠᠭᠤᠵᠠᠢ᠃ ᠵᠠᠮᠤᠬᠠ ᠶ᠋ᠢᠨ ᠡᠨᠡ ᠬᠦ᠌ ᠴᠢᠩ ᠰᠡᠳᠬᠢᠯ ᠦ᠋ᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠬᠡᠨ ᠦ᠌ ᠴᠦ᠍ ᠪᠣᠯᠪᠠ ᠵᠢᠷᠦᠬᠡ ᠳᠣᠭᠳᠣᠯᠵᠤ ᠰᠠᠮᠰᠠ ᠱᠠᠷᠬᠢᠷᠠᠬᠤ ᠠᠵᠢ᠃ ᠲᠡᠮᠦᠵᠢᠨ ᠲᠡᠭᠡᠨᠡᠭᠡᠯᠵᠡᠨ ᠡᠷᠡᠭᠡᠯᠵᠡᠵᠦ ᠡᠬᠢᠯᠡᠪᠡ᠃ ᠲᠡᠷᠡ ᠪᠡᠷ ᠵᠠᠮᠤᠬᠠ ᠲᠠᠢ ᠠᠭᠤᠯᠵᠠᠬᠤ ᠦᠭᠡᠢ ᠭᠡᠵᠦ ᠨᠢᠭᠡᠨᠲᠡ ᠰᠢᠢᠳᠦᠭᠰᠡᠨ ᠪᠠᠢᠯᠠ᠃ ᠵᠠᠮᠤᠬᠠ ᠶ᠋ᠢᠨ ᠦᠭᠡ ᠶ᠋ᠢ ᠳᠠᠭᠠᠵᠤ ᠨᠢᠭᠤᠷ ᠲᠤᠯᠤᠨ ᠠᠭᠤᠯᠵᠠᠬᠤ ᠨᠢ ᠥᠪᠡᠷ ᠦ᠋ᠨ ᠳᠠᠢᠰᠤᠨ ᠢ᠋ ᠬᠡᠲᠦᠷᠬᠡᠢ ᠬᠦᠨᠳᠦᠳᠬᠡᠨ ᠦᠵᠡᠭᠰᠡᠨ ᠪᠣᠯᠬᠤ ᠶᠤᠮ᠃ ᠬᠠᠷᠢᠨ ᠵᠠᠮᠤᠬᠠ ᠶ᠋ᠢ ᠪᠠᠭᠤᠯᠭᠠᠨ ᠠᠪᠴᠤ ᠥᠪᠡᠷ ᠲᠡᠭᠡᠨ ᠵᠢᠳᠬᠦᠭᠦᠯᠪᠡᠯ ᠣᠯᠠᠨ ᠤ᠋ ᠨᠢᠳᠦᠨ ᠳ᠋ᠦ᠍ ᠢᠯᠠᠯᠲᠠ ᠶ᠋ᠢᠨ ᠳᠡᠭᠡᠳᠦ ᠢᠯᠠᠯᠲᠠ᠂ ᠪᠠᠬᠠᠳᠤᠯ ᠤ᠋ᠨ ᠳᠡᠭᠡᠳᠦ ᠪᠠᠬᠠᠳᠤᠯ ᠪᠣᠯᠬᠤ ᠪᠢᠯᠡ᠃ ᠥᠪᠡᠷ ᠦ᠋ᠨ ᠴᠡᠷᠢᠭ ᠦ᠋ᠳ ᠲᠦ᠍ ᠪᠠᠷᠢᠭᠳᠠᠨ ᠢᠷᠡᠬᠦ ᠰᠢᠭ ᠭᠤᠲᠤᠮᠰᠢᠭᠲᠤ ᠢᠯᠠᠭᠳᠠᠯ ᠬᠠᠮᠢᠭᠠ ᠴᠤ᠌ ᠪᠠᠢᠬᠤ ᠦᠭᠡᠢ ᠭᠡᠵᠦ ᠲᠡᠮᠦᠵᠢᠨ ᠰᠡᠳᠬᠢᠬᠦ ᠲᠤᠯᠠ ᠣᠳᠣ ᠨᠢᠭᠡᠨᠲᠡ ᠬᠣᠷᠣᠬᠠᠢ ᠳ᠋ᠤ᠌ ᠬᠣᠣᠷ ᠦᠭᠡᠢ ᠪᠣᠯᠤᠭᠰᠠᠨ ᠵᠠᠮᠤᠬᠠ ᠶ᠋ᠢ ᠥᠷᠥᠰᠢᠶᠡᠬᠦ ᠪᠡᠷ ᠰᠢᠢᠳᠦᠭᠰᠡᠨ ᠪᠠᠢᠵᠠᠢ᠃ ᠭᠡᠲᠡᠯᠡ ᠲᠠᠩᠳᠠ ᠣᠨᠢᠰᠣᠭᠠ ᠮᠡᠲᠦ ᠠᠭᠠᠰᠢ ᠭᠠᠷᠭᠠᠳᠠᠭ ᠵᠠᠮᠤᠬᠠ ᠳᠠᠬᠢᠭᠠᠳ ᠯᠠ ᠭᠠᠢᠬᠠᠰᠢᠷᠠᠭᠤᠯᠪᠠ᠃ ᠮᠠᠭᠠᠳ ᠦᠭᠡᠢ ᠲᠡᠷᠡ ᠥᠪᠡᠷ ᠦ᠋ᠨ ᠬᠠᠷᠢᠶᠠᠲᠤ᠂ ᠲᠡᠭᠡᠬᠦ ᠲᠣᠰᠤᠮ ᠢ᠋ᠶ᠋ᠠᠨ ᠬᠠᠮᠤᠭ ᠤ᠋ᠨ ᠢᠲᠡᠭᠡᠯᠲᠦ ᠰᠢᠳᠠᠷ ᠲᠠᠭᠠᠨ ᠪᠠᠷᠢᠭᠳᠠᠨ ᠠᠭᠲᠠ ᠮᠣᠷᠢᠨ ᠤ᠋ ᠠᠴᠢᠶᠠ᠂ ᠠᠵᠢᠭᠰᠠᠨ ᠬᠥᠮᠦᠨ ᠦ᠌ ᠲᠣᠬᠣᠭᠤ ᠪᠣᠯᠤᠨ ᠬᠥᠯ ᠭᠠᠷ ᠬᠦᠯᠢᠭ ᠲᠡᠢ ᠬᠥᠮᠦᠨ ᠦ᠌ ᠡᠷᠬᠡᠨ ᠳ᠋ᠦ᠍ ᠢᠷᠡᠭᠰᠡᠨ ᠳ᠋ᠡᠭᠡᠨ ᠢᠴᠢᠭᠡᠳ ᠢᠩᠭᠢᠵᠦ ᠠᠮᠢᠳᠤ ᠶᠠᠪᠤᠭᠰᠠᠨ ᠠ᠋ᠴᠠ ᠦᠬᠦᠭᠰᠡᠨ ᠳᠡᠭᠡᠷᠡ ᠭᠡᠵᠦ ᠰᠢᠢᠳᠦᠭᠰᠡᠨ ᠪᠠᠢᠵᠤ ᠪᠣᠯᠬᠤ ᠶᠤᠮ᠃ ᠭᠡᠲᠡᠯᠡ ᠪᠣᠳᠣᠭᠠᠳ ᠪᠠᠢᠬᠤ ᠳ᠋ᠤ᠌ ᠬᠠᠨᠲᠡᠮᠦᠷ ᠡᠵᠡᠨ ᠢ᠋ᠶ᠋ᠡᠨ ᠪᠠᠷᠢᠵᠤ ᠥᠭᠬᠦ ᠬᠥᠮᠦᠨ ᠪᠢᠰᠢ ᠭᠡᠵᠦ ᠰᠠᠨᠠᠭᠳᠠᠭᠠᠳ ᠪᠣᠯᠤᠭᠰᠠᠨ ᠦᠭᠡᠢ᠃《ᠵᠠᠯᠢᠲᠤ ᠵᠠᠮᠤᠬᠠ ᠶᠠᠭᠤ ᠰᠠᠲᠤᠪᠠ》 ᠭᠡᠵᠦ ᠲᠡᠮᠦᠵᠢᠨ ᠪᠣᠳᠣᠭᠠᠳ ᠪᠣᠳᠣᠭᠠᠳ ᠤᠴᠢᠷ ᠢ᠋ ᠣᠯᠤᠭᠠ ᠦᠭᠡᠢ ᠲᠤᠯᠠ ᠰᠤᠷᠤᠭᠰᠠᠨ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠠᠪ ᠲᠩᠷᠢ ᠶ᠋ᠢ ᠳᠠᠭᠤᠳᠠᠭᠤᠯᠪᠠ᠃ ᠳᠠᠪ ᠲᠩᠷᠢ ᠥᠪᠡᠷ ᠦ᠋ᠨ ᠬᠦᠷᠢᠶᠡᠨ ᠡᠴᠡ ᠢᠷᠡᠲᠡᠯᠡ ᠬᠣᠨᠣᠭ ᠤ᠋ᠨ ᠵᠠᠢᠲᠠᠢ ᠲᠤᠯᠠ ᠲᠡᠭᠦᠨ ᠳ᠋ᠦ᠍ ᠪᠣᠳᠣᠬᠤ ᠴᠠᠭ ᠬᠠᠩᠭᠠᠯᠲᠠᠲᠠᠢ ᠪᠠᠢᠯᠠ᠃ ᠶᠡᠷᠦ ᠨᠢ ᠵᠠᠮᠤᠬᠠ ᠶ᠋ᠢᠨ ᠦᠭᠡ᠂ ᠦᠢᠯᠡᠳᠦᠯ ᠢ᠋ ᠰᠢᠯᠤᠭᠤᠨ ᠬᠢᠯᠪᠠᠷ ᠢ᠋ᠶ᠋ᠠᠷ ᠣᠢᠯᠠᠭᠠᠬᠤ ᠳ᠋ᠤ᠌ ᠬᠡᠵᠢᠶᠡᠳᠡ ᠲᠦᠪᠡᠭ ᠲᠡᠢ ᠪᠠᠢᠳᠠᠭ ᠪᠢᠯᠡ᠃ ᠲᠡᠢᠮᠦ ᠡᠴᠡ ᠴᠦ᠍ ᠵᠠᠮᠤᠬᠠ ᠶ᠋ᠢᠨ ᠡᠨᠡ ᠠᠭᠠᠰᠢᠨ ᠠ᠋ᠴᠠ ᠲᠡᠮᠦᠵᠢᠨ ᠦᠷᠭᠦᠯᠵᠢ ᠵᠢᠪᠡᠭᠦᠴᠡᠨ ᠪᠣᠯᠭᠣᠮᠵᠢᠯᠠᠳᠠᠭ ᠶᠤᠮ᠃
ᠲᠡᠮᠦᠵᠢᠨ ᠬᠠᠷᠢᠭᠤ ᠦᠭᠡ ᠬᠡᠯᠡᠯ ᠦᠭᠡᠢ ᠲᠠᠭ ᠴᠢᠭ ᠪᠣᠯᠤᠭᠰᠠᠨ ᠳ᠋ᠤ᠌ ᠵᠠᠮᠤᠬᠠ ᠬᠠᠷᠢᠨ ᠴᠤ᠌ ᠪᠠᠶᠠᠷᠲᠠᠢ ᠪᠣᠯᠵᠠᠢ᠃ ᠲᠡᠮᠦᠵᠢᠨ ᠢ᠋ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠠᠢᠭᠠ ᠡᠨᠡ ᠭᠡᠷ ᠲᠦ᠍ ᠢᠷᠡᠭᠦᠯᠬᠦ ᠶ᠋ᠢᠨ ᠲᠤᠯᠠᠳᠠ ᠲᠡᠷᠡ ᠪᠡᠷ ᠰᠠᠢᠨ ᠰᠠᠢᠬᠠᠨ ᠦᠭᠡ ᠬᠠᠢᠷᠠᠯᠠᠯ ᠦᠭᠡᠢ ᠵᠠᠷᠤᠭᠰᠠᠨ ᠪᠢᠯᠡ᠃ ᠡᠭᠦᠨ ᠡᠴᠡ ᠡᠮᠦᠨᠡ ᠲᠡᠭᠦᠨ ᠢ᠋ ᠬᠡᠨ ᠴᠦ᠍ ᠢᠩᠭᠢᠵᠦ ᠦᠭᠡ ᠬᠠᠢᠷᠠᠯᠠᠯ ᠦᠭᠡᠢ ᠮᠠᠭᠲᠠᠭᠠ ᠦᠭᠡᠢ ᠪᠢᠵᠡ ᠭᠡᠵᠦ ᠪᠣᠳᠣᠪᠠ᠃ ᠲᠡᠮᠦᠵᠢᠨ ᠪᠠᠭᠠ ᠠ᠋ᠴᠠ ᠮᠠᠭᠲᠠᠭᠠᠯ ᠳ᠋ᠤ᠌ ᠳᠤᠷᠠᠲᠠᠢ ᠬᠡᠦᠬᠡᠳ ᠪᠠᠢᠭᠰᠠᠨ ᠢ᠋ ᠲᠡᠷᠡ ᠶᠠᠭᠠᠬᠢᠵᠤ ᠮᠠᠷᠲᠠᠬᠤ ᠪᠣᠢ᠃ ᠭᠡᠷ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠬᠠᠷᠠᠭᠤᠯ ᠮᠠᠨᠠᠭᠠ ᠪᠠᠢᠬᠤ ᠦᠭᠡᠢ ᠶ᠋ᠢ ᠦᠵᠡᠪᠡᠯ 《ᠳᠤᠷᠠᠲᠠᠢ ᠪᠣᠯ ᠬᠠᠮᠢᠭᠠᠰᠢ ᠪᠠᠨ ᠴᠤ᠌ ᠶᠠᠪᠤᠵᠤ ᠪᠣᠯᠤᠨᠠ》ᠭᠡᠵᠦ ᠪᠤᠭᠤᠷᠴᠢ ᠶ᠋ᠢᠨ ᠬᠡᠯᠡᠭᠰᠡᠨ ᠦᠨᠡᠨ ᠪᠣᠯᠤᠯᠲᠠᠢ᠃ ᠭᠠᠷᠴᠤ ᠵᠣᠭᠰᠣᠪᠠᠯ ᠣᠢᠷᠠᠯᠴᠠᠭᠠᠬᠢ ᠭᠡᠷ ᠦ᠋ᠳ ᠦ᠋ᠨ ᠡᠭᠦᠳᠡ ᠪᠡᠷ ᠰᠣᠨᠢᠭᠤᠴᠢ ᠬᠥᠮᠦᠰ ᠳᠦᠭᠦᠷᠡᠩ ᠬᠠᠷᠠᠭᠳᠠᠭᠰᠠᠨ ᠳ᠋ᠤ᠌ ᠪᠤᠰᠢᠭᠤᠬᠠᠨ ᠣᠷᠣᠵᠠᠢ᠃ ᠲᠡᠭᠦᠨ ᠢ᠋ ᠢᠩᠭᠢᠵᠦ ᠣᠭᠲᠣ ᠬᠠᠢᠬᠤᠷᠬᠤ ᠦᠭᠡᠢ ᠮᠡᠲᠦ ᠣᠷᠬᠢᠭᠰᠠᠨ ᠨᠢ ᠲᠡᠮᠦᠵᠢᠨ ᠦ᠌ ᠬᠣᠷᠣᠨ ᠰᠠᠨᠠᠭᠠ ᠭᠡᠳᠡᠭ ᠢ᠋ ᠵᠠᠮᠤᠬᠠ ᠳᠠᠭᠠᠵᠤ ᠪᠠᠢᠪᠠ᠃ ᠰᠠᠨᠠᠭᠰᠠᠨ ᠳ᠋ᠠᠭᠠᠨ ᠬᠦᠷᠬᠦ ᠶ᠋ᠢᠨ ᠲᠤᠯᠠᠳᠠ ᠲᠡᠪᠴᠢᠶᠡᠷᠢ ᠲᠡᠢ ᠪᠠᠢᠬᠤ ᠶᠣᠰᠣᠲᠠᠢ᠃ ᠢᠩᠭᠢᠵᠦ ᠴᠢᠳᠠᠮᠠᠨᠵᠢᠨ ᠲᠡᠮᠦᠵᠢᠨ ᠳᠠᠰᠤᠯ ᠦᠭᠡᠢ ᠢᠷᠡᠬᠦ ᠪᠣᠯᠤᠨᠠ᠃ ᠲᠡᠭᠦᠨ ᠦ᠌ ᠬᠡᠯᠡᠭᠦᠯᠦᠭᠰᠡᠨ ᠰᠢᠯᠦᠭ ᠢ᠋ ᠰᠣᠨᠣᠰᠤᠭᠠᠳ ᠤᠶᠠᠷᠠᠬᠤ ᠦᠭᠡᠢ ᠪᠠᠢᠨᠠ ᠭᠡᠵᠦ ᠦᠭᠡᠢ ᠭᠡᠮᠡᠨ ᠵᠠᠮᠤᠬᠠ ᠲᠣᠭᠠᠴᠠᠭᠠᠯᠠᠵᠤ ᠪᠠᠢᠯᠠ᠃ ᠵᠠᠮᠤᠬᠠ ᠶ᠋ᠢᠨ ᠬᠣᠷᠢᠭᠳᠠᠵᠤ ᠪᠣᠢ ᠭᠡᠷ ᠲᠦ᠍ ᠲᠡᠮᠦᠵᠢᠨ ᠥᠪᠡᠷ ᠢ᠋ᠶ᠋ᠡᠨ ᠢᠷᠡᠬᠦ ᠶᠦ᠍ᠮ ᠤᠤ ᠂ ᠡᠰᠡᠪᠡᠯ ᠦᠷᠭᠦᠭᠡᠨ ᠳ᠋ᠡᠭᠡᠨ ᠠᠪᠠᠴᠢᠬᠤ ᠠᠪᠠᠰᠤ ᠰᠠᠶᠢ ᠵᠠᠮᠤᠬᠠ ᠶ᠋ᠢᠨ ᠰᠠᠨᠠᠭᠰᠠᠨ ᠢ᠋ᠶ᠋ᠠᠷ ᠪᠣᠯᠬᠤ ᠪᠢᠯᠡ᠃ ᠢᠩᠭᠢᠪᠡᠯ ᠵᠠᠳᠠᠷᠠᠨ ᠤ᠋ ᠵᠠᠮᠤᠬᠠ ᠭᠡᠵᠦ ᠬᠡᠨ ᠪᠣᠯᠬᠤ ᠶ᠋ᠢ ᠣᠯᠠᠨ ᠪᠦᠭᠦᠳᠡᠭᠡᠷ ᠬᠠᠷᠠᠬᠤ ᠪᠣᠯᠤᠨᠠ᠃ ᠲᠡᠭᠡᠭᠡᠳ ᠳᠠᠷᠠᠭᠠ ᠨᠢ᠁ ᠭᠡᠵᠦ ᠵᠠᠮᠤᠬᠠ ᠰᠡᠳᠬᠢᠯ ᠬᠥᠳᠡᠯᠦᠨ ᠭᠠᠭᠴᠠᠭᠠᠷ ᠶᠠᠷᠢᠵᠤ ᠭᠡᠷ ᠳᠣᠲᠣᠷᠠ ᠪᠠᠨ ᠬᠣᠯᠬᠢᠨᠠ᠃《 ᠣᠳᠣᠬᠠᠨ᠃ ᠬᠠᠨᠲᠡᠮᠥᠷ ᠴᠢ ᠬᠦᠯᠢᠶᠡᠵᠦ ᠪᠠᠢ᠃ ᠴᠢ ᠨᠠᠮᠠᠶ᠋ᠢ ᠶᠠᠭᠤ ᠬᠢᠵᠦ ᠴᠢᠳᠠᠳᠠᠭ ᠢ᠋ ᠦᠵᠡᠬᠦ ᠪᠣᠯᠤᠨᠠ 》ᠭᠡᠵᠦ ᠲᠡᠷᠡ ᠲᠩᠷᠢ ᠳ᠋ᠦ᠍ ᠬᠠᠨᠳᠤᠨ ᠰᠢᠪᠡᠭᠡᠨᠡᠵᠦ ᠪᠠᠢᠪᠠ᠃ ᠦᠨᠡᠬᠡᠷ ᠲᠡᠭᠦᠨ ᠦ᠌ ᠰᠠᠨᠠᠭᠰᠠᠨ ᠢ᠋ᠶ᠋ᠠᠷ ᠪᠣᠯᠤᠨᠠ ᠭᠡᠵᠦ ᠢᠲᠡᠭᠡᠭᠰᠡᠭᠡᠷ ᠠᠵᠢ᠃
ᠳᠠᠪ ᠲᠡᠭᠷᠢ ᠪᠥᠬᠡ ᠢᠷᠡᠵᠦ ᠲᠡᠮᠦᠵᠢᠨ ᠦ᠌ ᠬᠡᠯᠡᠬᠦ ᠶ᠋ᠢ ᠳᠠᠭᠤ ᠦᠭᠡᠢ ᠰᠣᠨᠣᠰᠪᠠ᠃ ᠲᠡᠭᠦᠨ ᠦ᠌ ᠨᠢᠭᠡ ᠨᠢᠳᠦ ᠲᠣᠭᠣᠨᠣ ᠥᠭᠡᠳᠡ᠂ ᠬᠠᠷᠢᠨ ᠨᠥᠭᠦᠭᠡ ᠨᠢᠭᠡ ᠨᠢᠳᠦ ᠨᠢ ᠵᠠᠮᠤᠬᠠ ᠶ᠋ᠢᠨ ᠪᠠᠢᠭᠠ ᠭᠡᠷ ᠦ᠋ᠨ ᠵᠦᠭ ᠬᠠᠷᠠᠵᠤ ᠪᠠᠢᠪᠠ᠃
| ᠬᠥᠭᠡᠴᠦ ᠴᠢ ᠦᠵᠡ᠃ ᠮᠢᠨᠦ ᠰᠠᠨᠠᠬᠤ ᠳ᠋ᠤ᠌ ᠵᠠᠮᠤᠬᠠ ᠦᠬᠦᠬᠦ ᠶ᠋ᠢ ᠬᠦᠰᠡᠬᠦ ᠤᠴᠢᠷ ᠦᠭᠡᠢ ᠶᠦ᠍ᠮ᠃ ᠲᠡᠷᠡ ᠶᠠᠮᠠᠷ ᠵᠠᠯᠢ ᠵᠣᠬᠢᠶᠠᠵᠤ᠂ ᠴᠣᠬᠣᠮ ᠶᠠᠭᠠᠬᠢᠬᠤ ᠰᠠᠨᠠᠭᠠᠲᠠᠢ ᠪᠠᠢᠭᠠ ᠶ᠋ᠢ ᠪᠢ ᠮᠠᠲᠠᠮᠠᠷ ᠪᠠᠢᠨᠠ ᠭᠡᠵᠦ ᠲᠡᠮᠦᠵᠢᠨ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠬᠥᠭᠡᠴᠦ ᠡᠪᠦᠷ ᠡᠴᠡ ᠵᠡᠰ ᠲᠣᠯᠢ ᠭᠠᠷᠭᠠᠵᠤ ᠰᠢᠪᠰᠢᠨ ᠣᠩᠭᠣᠳ ᠢ᠋ᠶ᠋ᠠᠨ ᠳᠠᠭᠤᠳᠠᠵᠤ ᠡᠬᠢᠯᠡᠪᠡ᠃ ᠢᠩᠭᠢᠬᠦ ᠳ᠋ᠦ᠍ᠨᠢ ᠶᠡᠬᠡ ᠦᠰᠦ ᠨᠢ ᠨᠢᠭᠤᠷ ᠤᠷᠤᠭᠤ ᠨᠢ ᠪᠦᠷᠬᠦᠵᠦ ᠲᠠᠯᠠ ᠬᠡᠩᠭᠡᠷᠭᠡ ᠶ᠋ᠢᠨ ᠳᠠᠭᠤ ᠨᠢᠵᠢᠭᠢᠨᠡᠨᠡ᠃ ᠬᠥᠭᠡᠴᠦ ᠪᠣᠰᠴᠤ ᠡᠷᠭᠢᠯᠳᠦᠨ ᠦᠰᠦᠷᠴᠦ ᠭᠡᠷ ᠦ᠋ᠨ ᠣᠨᠢ ᠳᠠᠮᠵᠢᠨ ᠲᠣᠯᠣᠭᠠᠢ ᠪᠠᠨ ᠳᠣᠭᠣᠭᠰᠢ ᠬᠠᠷᠠᠭᠤᠯᠤᠨ ᠭᠦᠶᠦᠪᠡ᠃ ᠲᠡᠭᠡᠭᠡᠳ ᠭᠠᠵᠠᠷ ᠠ᠋ᠴᠠ ᠠᠯᠲᠠ ᠥᠨᠳᠥᠷ ᠲᠦ᠍᠂ ᠬᠡᠢ ᠠᠭᠠᠷ ᠲᠤ᠌ ᠵᠠᠪᠢᠯᠠᠨ ᠰᠠᠭᠤᠵᠤ ᠲᠠᠭ ᠪᠣᠯᠪᠠ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠰᠢᠷᠢᠳᠡᠭ ᠳᠡᠭᠡᠷᠡ ᠠᠯᠭᠤᠷ ᠳᠣᠭᠣᠭᠰᠢᠯᠠᠨ ᠪᠠᠭᠤᠭᠠᠳ ᠵᠡᠰ ᠲᠣᠯᠢ ᠪᠠᠨ ᠭᠥᠯᠢᠷᠡᠨ ᠰᠠᠭᠤᠪᠠ᠃
| ᠴᠢᠩᠭᠢᠰ ᠬᠠᠭᠠᠨ ᠲᠠ ᠰᠣᠨᠣᠰ᠃ ᠲᠩᠷᠢ ᠢᠩᠭᠢᠵᠦ ᠬᠡᠯᠡᠪᠡ ᠃ ᠴᠢᠨᠦ ᠠᠨᠳᠠ ᠵᠠᠮᠤᠬᠠ ᠴᠢᠮᠠ ᠳ᠋ᠤ᠌ ᠦᠨᠡᠨ ᠰᠡᠳᠬᠢᠯ ᠦ᠋ᠨ ᠦᠭᠡ ᠪᠡᠨ ᠬᠡᠯᠡᠵᠡᠢ᠃ ᠭᠡᠪᠡᠴᠦ ᠲᠡᠷᠡ ᠴᠢᠮᠠ ᠲᠠᠢ ᠠᠭᠤᠯᠵᠠᠬᠤ ᠶ᠋ᠢ ᠬᠦᠰᠡᠵᠦ ᠪᠠᠢᠨᠠ ᠃ ᠲᠡᠭᠦᠨ ᠳ᠋ᠦ᠍ ᠪᠠᠰᠠ ᠴᠢᠮᠠ ᠳ᠋ᠤ᠌ ᠬᠡᠯᠡᠭᠡ ᠦᠭᠡᠢ ᠦᠭᠡ ᠦᠯᠡᠳᠡᠵᠡᠢ ᠃
| ᠵᠠᠮᠤᠬᠠ ᠶ᠋ᠢᠨ ᠦᠬᠦᠬᠦ ᠴᠠᠭ ᠪᠣᠯᠵᠠᠢ ᠤᠤ?
| ᠪᠣᠯᠤᠭᠠ ᠦᠭᠡᠢ ᠪᠠᠢᠨᠠ ᠭᠡᠵᠦ ᠲᠩᠷᠢ ᠨᠠᠳᠠ ᠳ᠋ᠤ᠌ ᠬᠡᠯᠡᠯᠡ ᠭᠡᠵᠦ ᠬᠥᠭᠡᠴᠦ ᠰᠢᠪᠡᠨᠡᠪᠡ᠃ ᠲᠡᠭᠦᠨ ᠦ᠌ ᠡᠨᠡ ᠦᠭᠡ ᠶ᠋ᠢ ᠲᠡᠮᠦᠵᠢᠨ ᠡᠴᠡ ᠥᠭᠡᠷᠡ ᠬᠡᠨ ᠴᠦ᠍ ᠰᠣᠨᠣᠰᠤᠭᠰᠠᠨ ᠦᠭᠡᠢ᠃ ᠳᠠᠪ ᠲᠩᠷᠢ ᠪᠥᠬᠡ ᠶ᠋ᠢ ᠶᠠᠪᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠲᠡᠮᠦᠵᠢᠨ ᠭᠠᠭᠴᠠᠭᠠᠷ ᠤᠳᠠᠭᠠᠨ ᠰᠠᠭᠤᠵᠤ ᠰᠠᠭᠤᠵᠤ ᠡᠴᠦᠰ ᠲᠦ᠋ᠨᠢ ᠬᠡᠨ ᠳ᠋ᠦ᠍ ᠴᠦ᠍ ᠮᠡᠳᠡᠭᠳᠡᠯ ᠦᠭᠡᠢ ᠰᠥᠨᠢ ᠪᠡᠷ ᠰᠠᠮ ᠣᠴᠢᠵᠤ ᠵᠠᠮᠤᠬᠠ ᠶ᠋ᠢᠨ ᠦᠭᠡ ᠶ᠋ᠢ ᠰᠣᠨᠣᠰᠬᠤ ᠨᠢ ᠵᠥᠪ ᠭᠡᠵᠦ ᠰᠢᠢᠳᠪᠡ᠃
ᠲᠡᠳᠡᠨ ᠢ᠋ ᠠᠭᠤᠯᠵᠠᠬᠤ ᠳ᠋ᠤ᠌ ᠭᠠᠭᠴᠠᠬᠠᠨ ᠪᠤᠭᠤᠷᠴᠢ ᠯᠠ ᠬᠠᠮᠲᠤ ᠪᠠᠢᠵᠠᠢ᠃ ᠪᠠᠰᠠ ᠵᠠᠮᠤᠬᠠ ᠶᠠᠭᠠᠬᠢᠵᠤ ᠴᠤ᠌ ᠮᠡᠳᠡᠬᠦ ᠠᠭᠠᠰᠢ ᠵᠠᠩ ᠲᠠᠢ ᠲᠤᠯᠠ ᠡᠯᠳᠡᠪ ᠡᠴᠡ ᠰᠡᠷᠭᠡᠢᠯᠡᠨ ᠬᠠᠲᠠᠪᠴᠢᠨ ᠳ᠋ᠤ᠌ ᠵᠣᠭᠰᠣᠭᠠᠳ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠ ᠪᠣᠯᠪᠠᠯ ᠳᠣᠪᠲᠣᠯᠤᠨ ᠣᠷᠣᠬᠤ ᠳ᠋ᠤ᠌ ᠪᠡᠯᠡᠨ ᠪᠠᠢᠯᠠ᠃ ᠴᠠᠭᠠᠨ ᠢᠰᠡᠭᠡᠢ ᠰᠢᠷᠢᠳᠡᠭ ᠳᠡᠭᠡᠷᠡ ᠲᠡᠷᠡᠢᠵᠦ ᠬᠡᠪᠲᠡᠭᠰᠡᠨ ᠵᠠᠮᠤᠬᠠ ᠬᠠᠷᠠᠩᠭᠤᠢ ᠳ᠋ᠤ᠌ ᠣᠷᠣᠵᠤ ᠢᠷᠡᠭᠰᠡᠨ ᠬᠥᠮᠦᠨ ᠢ᠋ ᠣᠭᠲᠣ ᠲᠣᠭᠣᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠥᠨᠥᠬᠢ ᠬᠥᠮᠦᠨ ᠪᠠᠮᠪᠠᠷ ᠢ᠋ᠶ᠋ᠠᠨ ᠳᠡᠭᠡᠭᠰᠢ ᠡᠷᠭᠦᠬᠦ ᠳ᠋ᠦ᠍ ᠯᠡ ᠰᠠᠶᠢ ᠥᠨᠳᠡᠢᠵᠡᠢ᠃
| ᠪᠢ ᠲᠡᠮᠦᠵᠢᠨ ᠢ᠋ ᠥᠪᠡᠷ ᠢ᠋ᠶ᠋ᠡᠨ ᠢᠷᠡᠬᠦ ᠡᠴᠡ ᠨᠠᠭᠠᠰᠢ ᠬᠡᠨ ᠲᠡᠢ ᠴᠦ᠍ ᠠᠭᠤᠯᠵᠠᠵᠤ ᠶᠠᠷᠢᠬᠤ ᠦᠭᠡᠢ ᠭᠡᠰᠡᠨ ᠪᠢᠰᠢ ᠤᠤ? ᠭᠡᠵᠦ ᠵᠠᠮᠤᠬᠠ ᠬᠠᠰᠬᠢᠷᠪᠠ᠃
| ᠪᠢ ᠴᠢᠨᠦ ᠶᠠᠭᠤ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰᠤᠶᠠ ᠭᠡᠰᠡᠨ ᠬᠠᠷᠢᠭᠤ ᠰᠣᠨᠣᠰᠤᠭᠠᠳ ᠵᠠᠮᠤᠬᠠ ᠪᠣᠰᠤᠨ ᠬᠠᠷᠠᠢᠵᠠᠢ᠃ ᠲᠡᠭᠦᠨ ᠦ᠌ ᠰᠠᠨᠠᠭᠰᠠᠨ ᠢ᠋ᠶ᠋ᠠᠷ ᠪᠣᠯᠪᠠ᠃ ᠭᠡᠪᠡᠴᠦ ᠲᠡᠮᠦᠵᠢᠨ ᠬᠠᠷᠠ ᠰᠠᠨᠠᠭᠠᠯᠠᠨ ᠬᠡᠨ ᠳ᠋ᠦ᠍ ᠴᠦ᠍ ᠮᠡᠳᠡᠭᠳᠡᠬᠦ ᠦᠭᠡᠢ ᠭᠡᠵᠦ ᠳ᠋ᠦᠩ ᠰᠥᠨᠢ ᠪᠡᠷ ᠢᠷᠡᠭᠰᠡᠨ ᠨᠢ ᠵᠠᠮᠤᠬᠠ ᠶ᠋ᠢ ᠭᠣᠩᠰᠣᠢᠯᠭᠠᠪᠠ᠃ ᠲᠡᠷᠲᠡᠭᠡ ᠬᠣᠷᠢᠨ ᠵᠢᠯ ᠦ᠋ᠨ ᠡᠮᠦᠨᠡ ᠰᠠᠯᠵᠤ ᠣᠳᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠳᠠᠢᠰᠤᠩᠨᠠᠯᠴᠠᠵᠤ ᠶᠠᠪᠤᠭᠰᠠᠨ ᠬᠣᠶᠠᠷ ᠨᠥᠬᠥᠷ ᠡᠢᠨ ᠬᠦ᠌ ᠬᠤᠪᠢ ᠵᠠᠶᠠᠭᠠᠨ ᠤ᠋ ᠠᠭᠤᠯᠵᠠᠪᠤᠷᠢ ᠳ᠋ᠤ᠌ ᠨᠢᠭᠤᠷ ᠲᠤᠯᠬᠤ ᠨᠢ ᠡᠨᠡ ᠠᠵᠢ᠃ ᠡᠨᠡ ᠠᠭᠤᠯᠵᠠᠯᠲᠠ ᠳ᠋ᠤ᠌ ᠬᠣᠶᠠᠭᠤᠯᠠ ᠰᠡᠳᠬᠢᠯ ᠰᠠᠨᠠᠭᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠪᠡᠯᠡᠳᠬᠡᠯ ᠲᠡᠢ᠂ ᠪᠦᠷ ᠬᠡᠯᠡᠵᠦ ᠶᠠᠷᠢᠬᠤ ᠪᠠᠨ ᠲᠥᠯᠥᠪᠯᠡᠭᠰᠡᠨ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠬᠡᠨ ᠬᠡᠨ ᠨᠢ ᠲᠤᠯᠭᠠᠮᠳᠠᠭᠠᠳ ᠠᠮᠠ ᠨᠡᠭᠡᠭᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠭᠡᠪᠡᠴᠦ ᠲᠡᠮᠦᠵᠢᠨ ᠲᠦᠷᠦᠭᠦᠯᠡᠨ ᠳᠤᠤᠭᠠᠷᠪᠠ᠃
| ᠵᠠᠮᠤᠬᠠ᠃ ᠪᠢ ᠴᠢᠮᠠᠶ᠋ᠢ ᠥᠷᠥᠰᠢᠶᠡᠵᠦ ᠳᠠᠬᠢᠨ ᠰᠢᠳᠠᠷᠯᠠᠨ ᠶᠠᠪᠤᠶᠠ ᠭᠡᠪᠡ᠃ ᠭᠡᠲᠡᠯᠡ ᠴᠢ ᠵᠥᠪᠰᠢᠶᠡᠷᠡᠭᠰᠡᠨ ᠦᠭᠡᠢ ᠭᠡᠨᠡ᠃ ᠪᠠᠰᠠ ᠨᠠᠳᠠ ᠲᠠᠢ ᠠᠭᠤᠯᠵᠠᠬᠤ ᠶ᠋ᠢᠨ ᠤᠴᠢᠷ ᠶᠠᠭᠤ ᠪᠣᠢ? ᠪᠢ ᠴᠢᠨᠦ ᠨᠠᠳᠠᠳᠤ ᠬᠦᠷᠭᠡᠭᠰᠡᠨ ᠲᠤᠰᠠ ᠶ᠋ᠢ ᠴᠢᠨᠢ ᠪᠣᠳᠣᠵᠤ ᠴᠢᠮᠠ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠢᠷᠡᠯᠡ᠃ ᠬᠠᠷᠢᠨ ᠣᠳᠣ ᠴᠢ ᠥᠭᠡᠷᠡ ᠶᠠᠭᠤ ᠬᠦᠰᠡᠪᠡ? ᠦᠬᠦᠬᠦ ᠶ᠋ᠢ ᠬᠦᠰᠡᠨᠡ ᠭᠡᠪᠡ ᠤᠤ? ᠡᠰᠡᠪᠡᠯ ᠪᠢ ᠪᠤᠷᠤᠭᠤ ᠳᠤᠭᠤᠯᠪᠠ ᠤᠤ?
ᠲᠡᠭᠦᠨ ᠦ᠌ ᠬᠣᠭᠣᠯᠠᠢ ᠶ᠋ᠢᠨ ᠥᠩᠭᠡ ᠣᠭᠲᠣ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠨ ᠦ᠌ ᠬᠢ ᠰᠢᠭ ᠥᠭᠡᠷᠡᠴᠢᠯᠡᠭᠳᠡᠵᠦ ᠬᠤᠪᠢᠷᠠᠵᠠᠢ᠃ ᠶᠡᠷᠦ ᠨᠢ ᠤᠷᠢᠳ ᠤ᠋ᠨ ᠵᠠᠯᠠᠭᠤ ᠲᠡᠮᠦᠵᠢᠨ ᠦ᠌ ᠲᠠᠨᠢᠯ ᠲᠥᠷᠬᠦ ᠪᠦᠭᠦᠳᠡ ᠦᠭᠡᠢ ᠪᠣᠯᠵᠠᠢ᠃ ᠭᠠᠭᠴᠠᠬᠠᠨ ᠨᠢᠷᠤᠭᠤ ᠨᠢ ᠥᠰᠦᠭᠡ ᠦᠭᠡᠢ ᠵᠠᠮᠤᠬᠠ ᠠ᠋ᠴᠠ ᠲᠣᠯᠣᠭᠠᠢ ᠨᠠᠮᠬᠠᠨ ᠬᠡᠪ ᠢ᠋ᠶ᠋ᠡᠷ ᠬᠣᠴᠣᠷᠴᠠᠢ᠃ ᠲᠡᠢᠮᠦ ᠬᠡᠳᠦᠢ ᠴᠦ᠍ ᠲᠡᠷᠡ ᠪᠡᠷ ᠴᠠᠭᠠᠨᠠ ᠪᠠᠨ ᠯᠠ ᠨᠢᠭᠡ ᠰᠦᠷᠳᠡᠵᠦ ᠪᠢᠰᠢᠭᠦᠷᠬᠡᠮᠡ ᠵᠢᠪᠬᠤᠭᠠ ᠬᠡᠢ ᠮᠣᠷᠢ ᠲᠠᠢ ᠦᠵᠡᠭᠳᠡᠨᠡ᠃
| ᠴᠢ ᠮᠢᠨᠦ ᠭᠠᠪᠢᠶᠠ ᠶ᠋ᠢ ᠭᠡᠵᠦ ᠪᠦᠦ ᠳᠤᠷᠠᠰ᠃ ᠪᠢ ᠴᠢᠨᠦ ᠡᠮᠦᠨᠡ ᠭᠡᠮ ᠦᠢᠯᠡᠳᠦᠭᠰᠡᠨ ᠤᠤ ᠭᠡᠬᠦ ᠡᠴᠡ ᠥᠭᠡᠷᠡ ᠶ᠋ᠢ ᠶᠠᠭᠤ ᠬᠢᠪᠡ? ᠭᠡᠭᠡᠨ ᠴᠢᠷᠠᠢ ᠶ᠋ᠢ ᠴᠢᠨᠢ ᠬᠠᠷᠠᠵᠤ ᠭᠡᠮ ᠦᠭᠡᠢ ᠦᠭᠡ ᠶ᠋ᠢ ᠴᠢᠨᠢ ᠰᠣᠨᠣᠰᠤᠶᠠ ᠭᠡᠰᠡᠨ ᠶᠦᠮ᠃ ᠣᠳᠣ ᠮᠢᠨᠦ ᠰᠡᠳᠬᠢᠯ ᠬᠠᠨᠤᠯᠠ᠃ ᠵᠠᠮᠤᠬᠠ ᠶ᠋ᠢᠨ ᠬᠡᠯᠡᠶᠡ ᠭᠡᠵᠦ ᠬᠡᠯᠡᠭᠰᠡᠨ ᠡᠨᠡ ᠦᠭᠡ ᠶ᠋ᠢ ᠲᠡᠮᠦᠵᠢᠨ ᠴᠢᠷᠠᠢ ᠪᠠᠨ ᠣᠭᠲᠣ ᠬᠤᠪᠢᠷᠠᠭᠠᠬᠤ ᠦᠭᠡᠢ ᠪᠡᠷ ᠰᠣᠨᠣᠰᠬᠤ ᠨᠢ ᠴᠢᠬᠢᠨ ᠦ᠌ ᠪᠡᠨ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠭᠡᠵᠦ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠨᠠ᠃
| ᠪᠢ ᠴᠢᠨᠦ ᠠᠳᠠᠯᠢ ᠮᠣᠩᠭᠣᠯ ᠠᠢᠮᠠᠭ ᠤ᠋ᠳ ᠢ᠋ ᠨᠢᠭᠡᠳᠬᠡᠬᠦ ᠶ᠋ᠢᠨ ᠲᠥᠯᠥᠭᠡ ᠪᠠᠢᠭᠰᠠᠨ ᠶᠤᠮ᠃ ᠭᠡᠪᠡᠴᠦ ᠡᠨᠡ ᠴᠠᠭ ᠤ᠋ᠨ ᠡᠷᠬᠡᠨ ᠳ᠋ᠦ᠍ ᠠᠨᠳᠠ ᠴᠢᠮᠠ ᠳ᠋ᠤ᠌ ᠳᠠᠷᠤᠭᠳᠠᠯᠠ᠃ ᠣᠳᠣ ᠪᠢ ᠠᠮᠢᠳᠤ ᠶᠠᠪᠤᠬᠤ ᠶ᠋ᠢᠨ ᠬᠡᠷᠡᠭ ᠨᠢᠭᠡᠨᠲᠡ ᠦᠭᠡᠢ ᠪᠣᠯᠵᠠᠢ᠃ ᠴᠢ ᠨᠠᠢ᠍ᠮᠠᠨ ᠤ᠋ ᠳᠠᠶᠠᠨ ᠬᠠᠨ ᠤ᠋ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠ ᠪᠢᠵᠡ᠃ ᠡᠨᠡ ᠭᠠᠵᠠᠷ ᠳᠡᠭᠡᠷᠡ ᠬᠣᠶᠠᠷ ᠬᠠᠭᠠᠨ ᠪᠠᠢᠵᠤ ᠶᠠᠭᠠᠬᠢᠵᠤ ᠪᠣᠯᠤᠨᠠ ᠭᠡᠰᠡᠨ ᠪᠢᠰᠢ ᠤᠤ? ᠠᠨᠳᠠ ᠴᠢᠮᠠ ᠲᠠᠢ ᠡᠪᠳᠡᠷᠡᠯᠴᠡᠵᠦ᠂ ᠠᠮᠢ ᠰᠥᠷᠦᠨ ᠲᠡᠮᠡᠴᠡᠭᠰᠡᠨ ᠨᠢ ᠵᠥᠪᠬᠡᠨ ᠡᠮᠡᠰ ᠥᠬᠢᠳ᠂ ᠡᠳ᠋ ᠮᠠᠯ ᠤ᠋ᠨ ᠲᠥᠯᠥᠭᠡ ᠪᠢᠰᠢ ᠶᠦᠮ᠃ᠠᠨᠳᠠ ᠴᠢ ᠲᠩᠷᠢ ᠶ᠋ᠢᠨ ᠢᠪᠡᠭᠡᠯ ᠳ᠋ᠦ᠍ ᠪᠠᠭᠲᠠᠵᠤ᠂ ᠲᠣᠮᠣ ᠵᠢᠵᠢᠭ ᠠᠢᠮᠠᠭ ᠢ᠋ ᠰᠥᠬᠥᠷᠡᠭᠦᠯᠦᠨ ᠠᠪᠴᠠᠢ᠃ ᠣᠳᠣ ᠴᠢ ᠨᠠᠮᠠᠶ᠋ᠢ ᠦᠬᠦᠭᠦᠯ᠃ ᠪᠢ ᠴᠢᠨᠦ ᠬᠠᠮᠤᠭ ᠤ᠋ᠨ ᠥᠰᠲᠦ ᠳᠠᠢᠰᠤᠨ ᠬᠡᠪ ᠢ᠋ᠶ᠋ᠡᠷ ᠦᠯᠡᠳᠡᠮᠡᠷ ᠪᠠᠢᠨᠠ᠃ ᠲᠡᠭᠡᠬᠦ ᠴᠦ᠍ ᠪᠣᠯᠤᠨᠠ᠃ ᠦᠷᠡ ᠤᠳᠤᠮ ᠴᠢᠨᠢ ᠵᠠᠳᠠᠷᠠᠨ ᠤ᠋ ᠵᠠᠮᠤᠬᠠ ᠪᠣᠯ ᠶᠢᠰᠦᠭᠡᠢ ᠶ᠋ᠢᠨ ᠲᠡᠮᠦᠵᠢᠨ ᠦ᠌ ᠬᠠᠮᠤᠭ ᠤ᠋ᠨ ᠵᠠᠨᠤᠯᠲᠤ ᠳᠠᠢᠰᠤᠨ ᠪᠠᠢᠪᠠ ᠭᠡᠵᠦ ᠬᠠᠷᠢᠶᠠᠨ ᠵᠥᠭᠡᠵᠦ ᠪᠠᠢᠭ᠃ ᠴᠢ ᠨᠠᠮᠠᠶ᠋ᠢ ᠬᠠᠮᠤᠭ ᠤ᠋ᠨ ᠠᠶᠤᠮᠰᠢᠭᠲᠠᠢ ᠪᠠᠷ ᠣᠯᠠᠨ ᠤ᠋ ᠡᠮᠦᠨᠡ ᠲᠡᠮᠦᠯᠡᠨ ᠬᠣᠷᠣᠭᠠᠵᠤ᠂ ᠬᠡᠭᠦᠷ ᠢ᠋ ᠮᠢᠨᠢ ᠲᠠᠯᠠ ᠪᠠᠷ ᠨᠢᠭᠡ ᠲᠠᠷᠬᠠᠭᠠᠨ ᠴᠠᠴᠤᠭᠲᠤᠨ᠃ ᠪᠢ ᠡᠯᠡᠰᠦ ᠰᠢᠷᠣᠢ᠂ ᠰᠠᠯᠬᠢ ᠪᠣᠷᠣᠭᠠᠨ ᠳ᠋ᠤ᠌ ᠬᠤᠪᠢᠯᠤᠶᠠ᠃ ᠬᠡᠮᠵᠢᠶᠡ ᠦᠭᠡᠢ ᠡᠨᠡ ᠣᠷᠴᠢᠯᠠᠩ ᠳ᠋ᠤ᠌ ᠬᠤᠮᠠᠬᠢ ᠶ᠋ᠢᠨ ᠲᠣᠭᠣᠰᠣ ᠪᠣᠯᠤᠶᠠ᠃
ᠵᠠᠮᠤᠬᠠ ᠶ᠋ᠢᠨ ᠡᠨᠡ ᠰᠣᠨᠣᠰᠬᠤᠯᠠᠩ ᠦᠭᠡᠢ ᠠᠶᠤᠮᠰᠢᠭᠲᠤ ᠦᠭᠡᠰ ᠲᠡᠮᠦᠵᠢᠨ ᠢ᠋ ᠴᠣᠴᠢᠭᠠᠪᠠ᠃ ᠲᠡᠷᠡ ᠢᠩᠭᠢᠵᠦ ᠬᠡᠯᠡᠨᠡ ᠭᠡᠵᠦ ᠰᠠᠨᠠᠭᠰᠠᠨ ᠦᠭᠡᠢ᠃ ᠤᠷᠢᠳᠴᠢᠯᠠᠨ ᠳᠠᠭᠠᠬᠤ ᠳ᠋ᠤ᠌ ᠪᠡᠷᠬᠡᠲᠡᠢ ᠵᠠᠮᠤᠬᠠ ᠳᠠᠬᠢᠭᠠᠳ ᠯᠠ ᠳᠠᠭᠠᠬᠤ ᠳ᠋ᠤ᠌ ᠪᠡᠷᠬᠡ ᠣᠨᠢᠰᠣᠭᠠ ᠰᠢᠭ᠋ ᠦᠭᠡ ᠬᠡᠯᠡᠪᠡ᠃ ᠳᠡᠢᠯᠦᠭᠳᠡᠨ ᠮᠥᠬᠥᠭᠰᠡᠨ ᠴᠦ᠍ ᠵᠠᠮᠤᠬᠠ ᠣᠭᠲᠣ ᠬᠤᠪᠢᠷᠠᠵᠤ ᠥᠭᠡᠷᠡᠴᠢᠯᠡᠭᠳᠡᠭᠰᠡᠨ ᠦᠭᠡᠢ᠃
ᠠᠮᠠ ᠨᠡᠭᠡᠭᠡᠬᠦ ᠶ᠋ᠢᠨ ᠡᠮᠦᠨᠡ ᠲᠡᠮᠦᠵᠢᠨ ᠦᠭᠡ ᠪᠡᠨ ᠰᠠᠢᠲᠤᠷ ᠲᠤᠩᠭᠠᠨ ᠪᠣᠳᠣᠪᠠ᠃ ᠬᠥᠮᠦᠨ ᠪᠦᠷᠢ ᠠᠮᠢᠳᠤ ᠶᠠᠪᠤᠬᠤ ᠶ᠋ᠢᠨ ᠲᠥᠯᠥᠭᠡ ᠦᠬᠦᠨ ᠬᠠᠳᠠᠨ ᠲᠡᠮᠡᠴᠡᠵᠦ ᠪᠠᠢᠬᠤ ᠳ᠋ᠤ᠌ ᠨᠡᠷᠡ ᠠᠯᠳᠠᠷ ᠲᠡᠭᠦᠰ ᠵᠠᠮᠤᠬᠠ ᠶᠠᠭᠠᠬᠢᠭᠠᠳ ᠦᠬᠦᠯ ᠦ᠋ᠨ ᠮᠠᠭᠤ ᠶ᠋ᠢ ᠰᠣᠩᠭᠣᠬᠤ ᠭᠡᠵᠦ ᠬᠦᠰᠡᠪᠡ᠃ ᠵᠠᠮᠤᠬᠠ ᠶᠠᠮᠠᠷ ᠵᠠᠯᠢ ᠭᠠᠷᠭᠠᠬᠤ ᠭᠡᠵᠦ ᠪᠣᠢ ᠶ᠋ᠢ ᠳᠠᠭᠠᠬᠤ ᠳ᠋ᠤ᠌ ᠪᠡᠷᠬᠡ ᠶᠦᠮ᠃ ᠦᠢᠯᠡᠳᠦᠭᠰᠡᠨ ᠭᠡᠮ ᠶᠠᠯᠠ ᠶ᠋ᠢ ᠲᠣᠭᠠᠴᠠᠪᠠᠯ ᠵᠠᠮᠤᠬᠠ ᠶ᠋ᠢ ᠥᠴᠢᠭ ᠦᠭᠡᠢ ᠴᠠᠭᠠᠵᠠᠯᠠᠬᠤ ᠶᠣᠰᠣᠲᠠᠢ ᠶᠤᠮ᠃ ᠭᠡᠲᠡᠯᠡ ᠵᠠᠮᠤᠬᠠ ᠪᠣᠯ ᠲᠡᠭᠦᠨ ᠦ᠌ ᠪᠠᠭᠠ ᠶ᠋ᠢᠨ ᠠᠨᠳᠠ᠂ ᠪᠠᠰᠠ ᠴᠤ᠌ ᠭᠡᠵᠦ ᠲᠡᠷᠡ ᠠᠨᠳᠠᠭᠠᠢ ᠲᠠᠩᠭᠠᠷᠢᠭ ᠢ᠋ᠶ᠋ᠠᠨ ᠮᠠᠷᠲᠠᠳᠠᠭ ᠦᠭᠡᠢ ᠨᠥᠬᠥᠷ ᠪᠠᠢᠪᠠ᠃ ᠵᠠᠮᠤᠬᠠ ᠪᠣᠯ ᠲᠡᠮᠦᠵᠢᠨ ᠦ᠌ ᠬᠤᠪᠢ ᠳ᠋ᠤ᠌ ᠳᠠᠢᠰᠤᠨ ᠮᠡᠲᠦ ᠨᠥᠬᠥᠷ᠂ ᠨᠥᠬᠥᠷ ᠮᠡᠲᠦ ᠳᠠᠢᠰᠤᠨ ᠪᠠᠢᠪᠠ᠃
ᠲᠡᠷᠡ ᠡᠨᠡ ᠦᠭᠡ ᠶ᠋ᠢ ᠵᠠᠮᠤᠬᠠ ᠶ᠋ᠢᠨ ᠪᠠᠷᠢᠭᠳᠠᠨ ᠢᠷᠡᠭᠰᠡᠨ ᠢ᠋ ᠰᠣᠨᠣᠰᠤᠭᠠᠳ ᠪᠤᠭᠤᠷᠴᠢ ᠳ᠋ᠤ᠌ ᠬᠡᠯᠡᠭᠰᠡᠨ ᠪᠢᠯᠡ᠃ ᠵᠠᠮᠤᠬᠠ ᠪᠣᠯ ᠮᠡᠷᠭᠢᠳ ᠰᠢᠭ᠂ ᠨᠠᠢ᠍ᠮᠠᠨ ᠤ᠋ ᠲᠠᠶᠠᠨ ᠰᠢᠭ᠋᠂ ᠲᠠᠲ᠋ᠠᠷ ᠰᠢᠭ᠋ ᠨᠢᠭᠡ ᠴᠢᠭ ᠢ᠋ ᠪᠠᠷᠢᠭᠰᠠᠨ ᠵᠠᠨᠤᠯᠲᠤ ᠳᠠᠢᠰᠤᠨ ᠪᠢᠰᠢ ᠶᠦᠮ᠃ ᠲᠡᠮᠦᠵᠢᠨ ᠢ᠋ ᠦᠬᠦᠭᠦᠯᠵᠦ ᠪᠣᠯᠬᠤ᠂ ᠪᠠᠰᠠ ᠰᠥᠨᠥᠭᠡᠨ ᠳᠠᠷᠤᠵᠤ ᠪᠣᠯᠬᠤ ᠪᠣᠯᠤᠮᠵᠢ ᠰᠢᠯᠲᠠᠭ ᠵᠠᠮᠤᠬᠠ ᠳ᠋ᠤ᠌ ᠣᠯᠠᠨ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠳᠡᠭᠡᠭᠡ ᠦᠭᠡᠢ᠃ ᠭᠡᠪᠡᠴᠦ ᠦᠷᠭᠦᠯᠵᠢ ᠲᠡᠭᠦᠨ ᠢ᠋ ᠥᠳᠥᠭᠡᠨ ᠳᠠᠭᠠᠷᠢᠵᠤ᠂ ᠨᠥᠬᠥᠷ ᠢ᠋ ᠨᠢ ᠳᠠᠢᠰᠤᠨ ᠪᠣᠯᠭᠠᠨ ᠨᠢᠭᠡ ᠮᠥᠴᠡ ᠴᠦ᠍ ᠲᠠᠢᠪᠤᠩ ᠰᠠᠭᠤᠯᠭᠠᠭᠠ ᠦᠭᠡᠢ ᠪᠢᠯᠡ᠃ ᠵᠠᠮᠤᠬᠠ ᠶ᠋ᠢᠨ ᠶᠠᠭᠤ ᠬᠢᠵᠦ᠂ ᠬᠠᠮᠢᠭᠠ ᠠ᠋ᠴᠠ ᠬᠡᠨ ᠲᠡᠢ ᠨᠡᠢᠯᠡᠵᠦ ᠳᠣᠪᠲᠣᠯᠬᠤ ᠶ᠋ᠢ ᠳᠠᠭᠠᠬᠤ ᠳ᠋ᠤ᠌ ᠪᠡᠷᠬᠡ᠃ ᠡᠨᠡ ᠨᠢ ᠲᠡᠮᠦᠵᠢᠨ ᠢ᠋ ᠪᠠᠢᠩᠭᠤ ᠬᠤᠷᠴᠠᠯᠠᠵᠤ ᠴᠠᠭ ᠢᠮᠠᠭᠲᠠ ᠰᠣᠨᠣᠷ ᠰᠡᠷᠡᠮᠵᠢᠲᠡᠢ᠂ ᠤᠬᠠᠭᠠᠨ ᠰᠡᠷᠭᠡᠭ᠂ ᠤᠪ ᠵᠠᠯᠢᠲᠠᠢ ᠪᠠᠢᠬᠤ ᠶ᠋ᠢ ᠰᠤᠷᠭᠠᠭᠰᠠᠨ ᠴᠤ᠌ ᠪᠠᠢᠵᠤ ᠮᠡᠳᠡᠨᠡ᠃ ᠤᠭ ᠨᠢ ᠵᠠᠮᠤᠬᠠ ᠰᠢᠭ᠋ ᠬᠦᠴᠦᠲᠡᠢ᠂ ᠨᠡᠷᠡ ᠲᠥᠷᠥ ᠲᠡᠢ᠂ ᠤᠬᠠᠭᠠᠨ ᠲᠠᠢ ᠨᠥᠬᠥᠷ ᠳᠡᠷᠭᠡᠳᠡ ᠨᠢ ᠪᠠᠢᠪᠠᠯ ᠣᠯᠠᠨ ᠲᠠᠯᠠ ᠶ᠋ᠢᠨ ᠲᠤᠰᠠᠲᠠᠢ ᠭᠡᠵᠦ ᠲᠡᠮᠦᠵᠢᠨ ᠪᠣᠳᠣᠭᠰᠠᠨ ᠤ᠋ ᠤᠴᠢᠷ ᠲᠡᠭᠦᠨ ᠢ᠋ ᠬᠠᠭᠤᠴᠢᠨ ᠤ᠋ ᠠᠨᠳᠠ ᠶ᠋ᠢᠨ ᠶᠣᠰᠣᠭᠠᠷ ᠨᠥᠬᠥᠷᠯᠡᠵᠦ ᠶᠠᠪᠤᠶᠠ ᠭᠡᠰᠡᠨ ᠪᠢᠯᠡ᠃ ᠭᠡᠲᠡᠯᠡ ᠲᠡᠷᠡ ᠵᠥᠪᠰᠢᠶᠡᠷᠡᠭᠰᠡᠨ ᠦᠭᠡᠢ᠃ ᠨᠢᠭᠡᠨᠲᠡ ᠠᠢᠮᠠᠭ ᠢᠷᠭᠡᠳ ᠢ᠋ᠶ᠋ᠡᠨ ᠠᠯᠳᠠᠵᠤ ᠤᠷᠭᠤᠭᠤᠯ ᠪᠣᠰᠬᠠᠭᠤᠯ ᠬᠤᠯᠠᠭᠠᠢᠴᠢ ᠰᠢᠭ᠋᠂ ᠠᠯᠳᠠᠭᠤᠯ ᠭᠦᠶᠦᠬᠦᠯ ᠮᠣᠷᠢ ᠰᠢᠭ᠋ ᠪᠣᠯᠵᠤ ᠥᠨᠥᠴᠢᠷᠡᠵᠦ ᠭᠠᠭᠴᠠᠭᠠᠷᠳᠠᠭᠰᠠᠨ ᠲᠡᠭᠦᠨ ᠢ᠋ ᠠᠯᠠᠬᠤ ᠨᠢ ᠣᠭᠲᠣ ᠠᠰᠢᠭ ᠦᠭᠡᠢ ᠪᠥᠭᠡᠳ ᠤᠳᠬᠠ ᠦᠭᠡᠢ ᠵᠦᠢᠯ ᠪᠣᠯᠪᠠ᠃ ᠡᠨᠡ ᠪᠦᠬᠦᠨ ᠯᠡ ᠲᠡᠮᠦᠵᠢᠨ ᠢ᠋ ᠪᠣᠳᠣᠯ ᠳ᠋ᠤ᠌ ᠤᠨᠠᠭᠠᠪᠠ᠃ ᠵᠠᠮᠤᠬᠠ ᠲᠡᠭᠦᠨ ᠦ᠌ ᠢᠪᠡᠭᠡᠯ ᠳ᠋ᠦ᠍ ᠥᠪᠡᠷ ᠢ᠋ᠶ᠋ᠡᠨ ᠭᠤᠶᠤᠨ ᠪᠠᠭᠲᠠᠵᠤ ᠣᠷᠣᠪᠠᠯ ᠲᠡᠷᠡ ᠶᠡᠬᠡ ᠣᠯᠵᠠ᠂ ᠪᠦᠷᠢᠨ ᠢᠯᠠᠯᠲᠠ ᠪᠣᠯᠬᠤ ᠪᠢᠯᠡ᠃ ᠭᠡᠲᠡᠯᠡ ᠵᠠᠮᠤᠬᠠ ᠲᠡᠭᠦᠨ ᠳ᠋ᠦ᠍ ᠪᠠᠭᠤᠵᠤ ᠥᠭᠴᠦ᠂ ᠳᠠᠭᠠᠷᠠ ᠣᠷᠣᠬᠤ ᠦᠭᠡᠢ ᠭᠡᠵᠦ ᠨᠢᠭᠡᠨᠲᠡ ᠰᠢᠢᠳᠦᠭᠰᠡᠨ ᠨᠢ ᠢᠯᠡᠳᠲᠡ ᠪᠠᠢᠯᠠ᠃ ᠭᠡᠪᠡᠴᠦ ᠲᠡᠮᠦᠵᠢᠨ ᠵᠠᠮᠤᠬᠠ ᠶ᠋ᠢ ᠪᠠᠭᠤᠯᠭᠠᠨ ᠠᠪᠬᠤ ᠶ᠋ᠢ ᠬᠦᠰᠡᠭᠰᠡᠭᠡᠷ ᠠᠵᠢ᠃
| ᠲᠡᠮᠦᠵᠢᠨ ᠴᠢ ᠣᠳᠣ ᠨᠢᠭᠡᠨᠲᠡ ᠴᠢᠩᠭᠢᠰ ᠬᠠᠭᠠᠨ ᠪᠣᠯᠵᠠᠢ᠃ ᠭᠡᠲᠡᠯᠡ ᠪᠢ ᠬᠥᠷ ᠬᠠᠭᠠᠨ᠃ ᠡᠬᠡ ᠭᠠᠵᠠᠷ᠂ ᠡᠵᠡᠨ ᠲᠩᠷᠢ ᠶ᠋ᠢᠨ ᠳᠣᠣᠷᠠ ᠬᠣᠶᠠᠷ ᠬᠠᠭᠠᠨ ᠪᠠᠢᠵᠤ ᠪᠣᠯᠬᠤ ᠦᠭᠡᠢ᠃
ᠵᠠᠮᠤᠬᠠ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠰᠡᠳᠬᠢᠯ ᠳᠣᠲᠣᠷᠠᠬᠢ ᠡᠷᠡᠭᠡᠯᠵᠡᠭᠡ ᠶ᠋ᠢ ᠲᠠᠢᠯᠬᠤ ᠭᠡᠵᠦ ᠡᠢᠨ ᠬᠡᠯᠡᠭᠰᠡᠨ ᠨᠢ ᠲᠡᠭᠦᠨ ᠡᠴᠡ ᠡᠴᠦᠰ ᠦ᠋ᠨ ᠦᠭᠡ ᠪᠡᠨ ᠬᠡᠯᠡᠬᠦ ᠶ᠋ᠢ ᠱᠠᠭᠠᠷᠳᠠᠭᠰᠠᠨ ᠬᠡᠷᠡᠭ ᠪᠠᠢᠪᠠ᠃
| ᠵᠠᠮᠤᠬᠠ ᠴᠢ ᠰᠣᠨᠣᠰ᠃ ᠨᠠᠳᠠᠳᠤ ᠲᠤᠰᠠᠯᠠᠬᠤ ᠰᠠᠢᠨ ᠨᠥᠬᠥᠳ᠂ ᠲᠦᠰᠢᠬᠦ ᠰᠠᠢᠨ ᠳᠡᠭᠦᠦ ᠨᠠᠷ ᠪᠣᠢ ᠨᠢ ᠦᠨᠡᠨ᠃ ᠭᠡᠲᠡᠯᠡ ᠰᠠᠢᠨ ᠨᠥᠬᠥᠷ ᠣᠯᠳᠠᠨᠠ ᠭᠡᠳᠡᠭ ᠬᠣᠪᠣᠷ ᠴᠢᠬᠤᠯᠠ᠃ ᠪᠢ ᠪᠠᠭᠠ ᠶ᠋ᠢᠨ ᠲᠠᠯᠪᠢᠭᠰᠠᠨ ᠠᠨᠳᠠᠭᠠᠢ ᠪᠠᠨ ᠰᠠᠨᠠᠵᠤ᠂ ᠪᠡᠶᠡ ᠪᠡᠷ ᠦᠢᠯᠡᠳᠦᠭᠰᠡᠨ ᠲᠤᠰᠠ ᠶ᠋ᠢ ᠴᠢᠨᠢ ᠦᠨᠡᠯᠡᠵᠦ ᠴᠢᠮᠠᠶ᠋ᠢ ᠨᠠᠢᠷᠰᠠᠨ ᠶᠠᠪᠤᠶᠠ ᠭᠡᠲᠡᠯᠡ ᠴᠢ ᠦᠯᠦ ᠵᠥᠪᠰᠢᠶᠡᠷᠡᠪᠡ᠃ ᠭᠡᠪᠡᠴᠦ ᠪᠢ ᠴᠢᠮᠠᠶ᠋ᠢ ᠦᠬᠦᠭᠦᠯᠬᠦ ᠳ᠋ᠦ᠍ ᠬᠦᠨᠳᠦᠲᠡᠢ ᠰᠢᠯᠲᠠᠭ ᠬᠡᠷᠡᠭᠲᠡᠢ᠃ ᠠᠩᠬᠠ ᠴᠢ ᠠᠳᠤᠭᠤᠨ ᠤ᠋ ᠬᠤᠯᠠᠭᠠᠢ ᠶ᠋ᠢᠨ ᠶᠠᠯᠢᠮ ᠦᠭᠡᠢ ᠰᠢᠯᠲᠠᠭᠠᠨ ᠢ᠋ᠶ᠋ᠠᠷ ᠴᠡᠷᠢᠭᠯᠡᠨ ᠳᠣᠪᠲᠣᠯᠵᠤ ᠨᠠᠮᠠᠶ᠋ᠢ ᠰᠠᠨᠳᠤᠷᠭᠠᠭᠰᠠᠨ ᠤ᠋ ᠴᠢᠨᠢ ᠲᠥᠯᠥᠭᠡ᠂ ᠪᠠᠰᠠ ᠣᠳᠣ ᠨᠥᠬᠥᠷᠯᠡᠶᠡ ᠭᠡᠪᠡᠴᠦ ᠵᠥᠪᠰᠢᠶᠡᠷᠡᠭᠡ ᠦᠭᠡᠢ ᠲᠤᠯᠠ ᠪᠢ ᠴᠢᠮᠠᠶ᠋ᠢ ᠬᠦᠰᠡᠯ ᠢ᠋ᠶ᠋ᠡᠷ ᠴᠢᠨᠢ ᠪᠣᠯᠭᠠᠵᠤ ᠬᠠᠭᠠᠨ ᠬᠥᠮᠦᠨ ᠦ᠌ ᠶᠣᠰᠣ ᠪᠠᠷ ᠴᠢᠰᠤ ᠦᠭᠡᠢ ᠦᠬᠦᠭᠦᠯᠵᠦ ᠬᠠᠮᠤᠭ ᠤ᠋ᠨ ᠳᠡᠭᠡᠷᠡ ᠣᠷᠣᠰᠢᠭᠤᠯᠤᠶᠠ᠃
ᠲᠡᠮᠦᠵᠢᠨ ᠡᠨᠡ ᠦᠭᠡᠰ ᠢ᠋ᠶ᠋ᠡᠨ ᠲᠠᠢᠪᠤᠩ᠂ ᠶᠡᠷᠦ ᠬᠢᠯᠢᠩᠨᠡᠵᠦ ᠪᠤᠬᠢᠨᠢᠳᠤᠭᠰᠠᠨ ᠵᠦᠢᠯ ᠦᠭᠡᠢ ᠬᠡᠯᠡᠭᠡᠳ ᠭᠠᠷᠬᠤ ᠭᠡᠪᠡ᠃ ᠵᠠᠮᠤᠬᠠ ᠪᠠᠰᠠ ᠯᠠ ᠲᠠᠢᠪᠤᠰᠢᠷᠠᠵᠤ ᠬᠠᠩᠬᠤ ᠪᠣᠯᠤᠭᠠ ᠦᠭᠡᠢ ᠪᠠᠢᠵᠠᠢ᠃
| ᠪᠠᠢᠵᠠ᠂ ᠬᠦᠯᠢᠶᠡ᠃ ᠮᠢᠨᠦ ᠦᠭᠡ ᠳᠠᠭᠤᠰᠤᠭᠠ ᠦᠭᠡᠢ ᠪᠠᠢᠨᠠ᠁
ᠵᠠᠮᠤᠬᠠ ᠢᠩᠭᠢᠵᠦ ᠬᠠᠰᠬᠢᠷᠤᠭᠰᠠᠨ ᠨᠢ ᠲᠡᠮᠦᠵᠢᠨ ᠢ᠋ ᠪᠤᠤ ᠬᠡᠯᠡ ᠭᠠᠳᠠᠭᠠ ᠬᠠᠲᠠᠪᠴᠢᠨ ᠳ᠋ᠤ᠌ ᠵᠣᠭᠰᠣᠭᠰᠠᠨ ᠪᠣᠭᠤᠷᠴᠢ ᠶ᠋ᠢ ᠴᠣᠴᠢᠭᠠᠵᠤ ᠰᠡᠯᠡᠮᠡ ᠪᠡᠨ ᠰᠢᠭᠦᠷᠬᠦ ᠳ᠋ᠦ᠍ ᠬᠦᠷᠭᠡᠪᠡ᠃ ᠵᠠᠮᠤᠬᠠ ᠲᠡᠭᠦᠨ ᠳ᠋ᠦ᠍ ᠣᠢᠷᠠᠲᠤᠨ ᠢᠷᠡᠵᠦ ᠨᠢᠭᠤᠷ ᠲᠤᠯᠤᠨ ᠵᠣᠭᠰᠣᠪᠠ᠃ ᠲᠡᠮᠦᠵᠢᠨ ᠬᠣᠷᠮᠣᠢ ᠶ᠋ᠢᠨ ᠴᠠᠭᠠᠨᠠ ᠨᠢᠭᠤᠭᠰᠠᠨ ᠬᠢᠲᠤᠭᠠ ᠪᠠᠨ ᠲᠡᠮᠲᠡᠷᠢᠨᠡ᠃
| ᠲᠡᠮᠦᠵᠢᠨ᠃ ᠶᠢᠰᠦᠭᠡᠢ ᠶ᠋ᠢᠨ ᠲᠡᠮᠦᠵᠢᠨ ᠴᠢ ᠰᠣᠨᠣᠰ᠃ ᠴᠢ ᠨᠠᠮᠠᠶ᠋ᠢ ᠬᠡᠨ ᠭᠡᠵᠦ ᠰᠠᠨᠠᠪᠠ? ᠴᠢ᠁ ᠴᠢ᠁ ᠬᠠᠢᠷᠠᠲᠠᠢ ᠪᠥᠷᠲᠡ ᠶ᠋ᠢ ᠪᠡᠨ ᠮᠡᠷᠭᠢᠳ ᠲᠦ᠍ ᠠᠯᠳᠠᠭᠠᠳ ᠬᠣᠵᠢᠮ ᠨᠢ ᠮᠡᠷᠭᠢᠳ ᠦ᠋ᠨ ᠭᠥᠯᠥᠭᠡ ᠶ᠋ᠢ ᠡᠪᠦᠷ ᠲᠡᠭᠡᠨ ᠥᠰᠬᠡᠭᠰᠡᠨ ᠢ᠋ᠶ᠋ᠡᠨ ᠰᠠᠨᠠ᠃ ᠡᠭᠦᠨ ᠢ᠋ ᠴᠢ ᠮᠡᠷᠭᠢᠳ ᠦ᠋ᠨ ᠮᠣᠯᠬᠢ ᠪᠣᠯᠬᠢ ᠲᠣᠭᠲᠠᠭᠠ ᠪᠡᠬᠢ ᠬᠢᠭᠰᠡᠨ ᠭᠡᠵᠦ ᠰᠠᠨᠠᠪᠠ ᠤᠤ? ᠴᠢ ᠡᠨᠳᠡᠭᠦᠷᠡᠵᠡᠢ᠃ ᠪᠢ ᠲᠡᠭᠦᠨ ᠢ᠋ ᠬᠠᠳᠬᠤᠵᠤ ᠶᠠᠪᠤᠭᠤᠯᠤᠭᠰᠠᠨ ᠶᠤᠮ᠃ ᠪᠢ ᠥᠭᠡᠯᠦᠨ ᠡᠵᠢ ᠶ᠋ᠢ ᠴᠢᠨᠢ ᠪᠤᠯᠢᠶᠠᠨ ᠠᠪᠤᠭᠰᠠᠨ ᠡᠷᠲᠡᠨ ᠦ᠌ ᠦᠰ ᠢ᠋ ᠮᠡᠷᠭᠢᠳ ᠦ᠋ᠳ ᠲᠦ᠍ ᠰᠠᠨᠠᠭᠤᠯᠵᠤ ᠪᠥᠷᠲᠡ ᠶ᠋ᠢ ᠪᠤᠯᠢᠶᠠᠯᠭᠠᠭᠰᠠᠨ ᠢ᠋ ᠴᠢ ᠮᠡᠳᠡᠬᠦ ᠦᠭᠡᠢ ᠪᠢᠵᠡ᠃ ᠵᠥᠴᠢ ᠪᠣᠯ ᠮᠢᠨᠦ ᠴᠢᠮᠠ ᠳ᠋ᠤ᠌ ᠵᠣᠷᠢᠭᠤᠯᠤᠭᠰᠠᠨ ᠪᠡᠯᠡᠭ ᠶᠦᠮ᠃
ᠵᠠᠮᠤᠬᠠ ᠢᠩᠭᠢᠵᠦ ᠬᠠᠰᠬᠢᠷᠤᠭᠠᠳ ᠭᠠᠯᠵᠠᠭᠤᠷᠠᠭᠰᠠᠨ ᠮᠡᠲᠦ ᠲᠠᠴᠢᠭᠢᠨᠠᠲᠠᠯᠠ ᠬᠥᠬᠥᠷᠡᠪᠡ᠃
| ᠪᠢ ᠴᠢᠨᠦ ᠰᠡᠳᠬᠢᠯ ᠦ᠋ᠨ ᠳᠣᠲᠣᠷᠠᠬᠢ ᠠᠷᠢᠭᠤᠨ ᠰᠢᠲᠦᠭᠡᠨ ᠢ᠋ ᠴᠢᠨᠢ ᠪᠤᠯᠢᠶᠠᠨ ᠠᠪᠤᠭᠰᠠᠨ ᠶᠤᠮ᠃ ᠴᠢ ᠨᠠᠮᠠᠶ᠋ᠢ ᠦᠵᠡᠨ ᠶᠠᠳᠠᠬᠤ ᠦᠭᠡᠢ ᠪᠠᠢᠨᠠ ᠭᠡᠵᠢ ᠤᠤ? ᠴᠢᠮᠠ ᠳ᠋ᠤ᠌ ᠦᠷᠦ ᠡᠪᠡᠳᠴᠦ ᠬᠠᠢᠷᠠᠯᠠᠬᠤ ᠰᠡᠳᠬᠢᠯ ᠠᠯᠠᠭᠠ ᠭᠡᠵᠢ ᠤᠤ? ᠴᠢᠨᠦ ᠵᠢᠷᠦᠬᠡ ᠰᠡᠳᠬᠢᠯ ᠡᠪᠡᠳᠴᠦ ᠰᠢᠨᠠᠯᠬᠤ ᠦᠭᠡᠢ ᠪᠠᠢᠨᠠ ᠤᠤ? ᠴᠢᠮᠠ ᠳ᠋ᠤ᠌ ᠵᠢᠷᠦᠬᠡ ᠰᠡᠳᠬᠢᠯ ᠭᠡᠵᠦ ᠶᠡᠷᠦ ᠨᠢ ᠪᠠᠢᠨᠠ ᠤᠤ? ᠭᠡᠵᠦ ᠵᠠᠮᠤᠬᠠ ᠬᠣᠷᠣᠰᠤᠨ ᠬᠠᠰᠬᠢᠷᠤᠭᠠᠳ ᠦᠭᠡ ᠳᠠᠭᠤ ᠦᠭᠡᠢ ᠲᠠᠭ ᠭᠥᠯᠢᠷᠡᠨ ᠵᠣᠭᠰᠣᠬᠤ ᠲᠡᠮᠦᠵᠢᠨ ᠢ᠋ ᠬᠠᠷᠠᠵᠤ ᠤᠯᠠᠮ ᠪᠠᠴᠢᠮᠳᠠᠨ ᠶᠡᠬᠡ ᠳᠠᠭᠤ ᠪᠠᠷ ᠣᠷᠢᠯᠠᠪᠠ᠃ ᠲᠡᠮᠦᠵᠢᠨ ᠦ᠌ ᠠᠭᠤᠷ ᠣᠮᠣᠭ ᠢ᠋ ᠪᠠᠳᠠᠷᠠᠭᠠᠵᠤ᠂ ᠬᠡᠷᠴᠡᠭᠡᠢ ᠲᠣᠭᠰᠢᠨ ᠵᠠᠩ ᠢ᠋ ᠨᠢ ᠬᠥᠳᠡᠯᠭᠡᠬᠦ ᠭᠡᠵᠦ ᠵᠠᠮᠤᠬᠠ ᠴᠢᠷᠮᠠᠢᠨ ᠤᠷᠤᠯᠳᠤᠵᠤ ᠪᠠᠢᠪᠠ᠃ ᠡᠨᠡ ᠪᠣᠯ ᠵᠠᠮᠤᠬᠠ ᠶ᠋ᠢᠨ ᠡᠴᠦᠰ ᠦ᠋ᠨ ᠭᠠᠭᠴᠠ ᠬᠦᠰᠡᠯ ᠪᠠᠢᠯᠠ᠃
| ᠴᠢ᠁ ᠴᠢ᠁ ᠪᠥᠷᠲᠡ ᠶ᠋ᠢ ᠮᠡᠷᠭᠢᠳ ᠦ᠋ᠨ ᠴᠢᠯᠭᠡᠷ ᠪᠥᠬᠡ ᠡᠴᠡ ᠬᠥᠯ ᠬᠦᠨᠳᠦ ᠲᠡᠢ ᠪᠣᠯᠤᠭᠰᠠᠨ ᠳ᠋ᠤ᠌ ᠦᠰ ᠰᠠᠨᠠᠵᠤ ᠬᠠᠨᠴᠤᠢ ᠪᠠᠨ ᠰᠠᠯᠵᠤ᠂ ᠬᠠ ᠪᠠᠨ ᠬᠠᠨᠵᠠᠷᠠᠲᠠᠯᠠ ᠮᠡᠷᠭᠢᠳ ᠦ᠋ᠨ ᠲᠣᠯᠣᠭᠠᠢ ᠶ᠋ᠢ ᠴᠠᠪᠴᠢᠭᠰᠠᠨ ᠢ᠋ ᠴᠢᠨᠢ ᠪᠢ ᠲᠣᠳᠣ ᠰᠠᠨᠠᠵᠤ ᠪᠠᠢᠨᠠ᠃ ᠣᠳᠣ ᠴᠢ ᠨᠠᠮᠠᠶ᠋ᠢ ᠦᠬᠦᠯ ᠦ᠋ᠨ ᠮᠠᠭᠤ ᠪᠠᠷ ᠦᠬᠦᠭᠦᠯᠵᠦ ᠥᠰᠢᠶᠡ ᠪᠡᠨ ᠠᠪᠤᠭᠲᠤᠨ᠃ ᠴᠢᠮᠠᠶ᠋ᠢ ᠠᠮᠢᠳᠤ ᠶ᠋ᠢᠨ ᠲᠠᠮᠤ᠂ ᠠᠷᠢᠯᠵᠤ ᠤᠨᠲᠠᠷᠠᠬᠤ ᠦᠭᠡᠢ ᠰᠡᠳᠬᠢᠯ ᠦ᠋ᠨ ᠵᠣᠪᠠᠯᠠᠩ ᠰᠢᠨᠠᠯᠤᠯ ᠳ᠋ᠤ᠌ ᠤᠨᠠᠭᠠᠭᠰᠠᠨ ᠳᠠᠢᠰᠤᠨ ᠴᠢᠨᠢ ᠪᠢ ᠪᠠᠢᠨᠠ᠃ ᠨᠠᠮᠠᠶ᠋ᠢ ᠳᠠᠯᠠᠨ ᠠᠭᠲᠠᠨ ᠤ᠋ ᠳᠡᠯ ᠰᠡᠭᠦᠯ ᠡᠴᠡ ᠵᠡᠭᠦᠵᠦ ᠡᠯᠢᠭᠡ ᠪᠥᠭᠡᠷᠡ ᠶ᠋ᠢ ᠮᠢᠨᠢ ᠭᠠᠵᠠᠷ ᠢ᠋ᠶ᠋ᠠᠷ ᠨᠢᠭᠡ ᠲᠠᠷᠬᠠᠭᠠᠵᠤ ᠬᠠᠶᠠᠭᠠᠴᠢ᠃ ᠪᠢ ᠡᠭᠦᠨ ᠢ᠋ ᠬᠦᠰᠡᠵᠦ ᠪᠠᠢᠨᠠ᠃ ᠮᠢᠨᠦ ᠠᠶᠤᠮᠰᠢᠭᠲᠤ ᠦᠬᠦᠯ ᠢ᠋ ᠪᠦᠭᠦᠳᠡ ᠳ᠋ᠦ᠍ ᠦᠵᠡᠭᠦᠯᠦᠭᠡᠴᠢ᠂ ᠵᠠᠯᠠᠭᠤᠰ ᠬᠥᠪᠡᠭᠦᠳ ᠲᠦ᠍ ᠰᠤᠷᠭᠠᠮᠵᠢ ᠪᠣᠯᠤᠭ ᠭᠡᠵᠦ ᠴᠢᠯᠠᠭᠤᠨ ᠬᠥᠰᠢᠶᠡ ᠰᠢᠭ ᠭᠦᠷᠯᠦᠢᠨ ᠵᠣᠭᠰᠣᠬᠤ ᠲᠡᠮᠦᠵᠢᠨ ᠢ᠋ ᠲᠣᠭᠣᠷᠢᠵᠤ ᠬᠠᠰᠬᠢᠴᠢᠨᠠ᠃
ᠲᠡᠮᠦᠵᠢᠨ ᠦ᠌ ᠳᠣᠲᠣᠷᠠ ᠭᠠᠰᠢᠭᠤᠨ ᠣᠷᠬᠢᠨ ᠬᠠᠭᠤᠴᠢᠨ ᠡᠮᠵᠡᠭ ᠰᠢᠷᠬᠠ ᠨᠢ ᠬᠥᠨᠳᠡᠭᠳᠡᠭᠡᠳ ᠠᠭᠤᠷ ᠬᠢᠯᠢᠩ ᠨᠢ ᠪᠤᠴᠠᠯᠤᠭᠰᠠᠨ ᠴᠤ᠌ ᠵᠠᠮᠤᠬᠠ ᠶ᠋ᠢᠨ ᠬᠦᠰᠡᠭᠰᠡᠨ ᠢ᠋ᠶ᠋ᠡᠷ ᠬᠢᠵᠦ ᠶᠠᠭᠠᠬᠢᠪᠠᠴᠤ ᠪᠣᠯᠬᠤ ᠦᠭᠡᠢ ᠶ᠋ᠢ ᠨᠡᠪᠲᠡ ᠮᠡᠳᠡᠵᠦ ᠪᠠᠢᠭᠰᠠᠨ ᠲᠤᠯᠠ ᠲᠡᠪᠴᠢᠭᠰᠡᠭᠡᠷ ᠪᠠᠢᠪᠠ᠃ ᠵᠠᠮᠤᠬᠠ ᠥᠪᠡᠷ ᠦ᠋ᠨ ᠠᠯᠳᠠᠭᠳᠠᠭᠰᠠᠨ ᠨᠡᠷᠡ ᠲᠥᠷᠥ ᠶ᠋ᠢ ᠠᠶᠤᠮᠰᠢᠭᠲᠤ ᠦᠬᠦᠯ ᠢ᠋ᠶ᠋ᠡᠷ ᠠᠪᠤᠷᠠᠬᠤ ᠪᠠᠷ ᠲᠣᠭᠠᠴᠠᠵᠠᠢ᠃ ᠲᠡᠮᠦᠵᠢᠨ ᠥᠪᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠢ᠋ ᠰᠦᠷ ᠳᠤᠤᠯᠢᠶᠠᠨ ᠲᠠᠢ᠂ ᠬᠠᠲᠠᠭᠤ ᠬᠡᠷᠴᠡᠭᠡᠢ ᠪᠡᠷ ᠴᠠᠭᠠᠵᠠᠯᠠᠬᠤ ᠠᠪᠠᠰᠤ ᠵᠠᠮᠤᠬᠠ ᠲᠡᠮᠦᠵᠢᠨ ᠲᠡᠢ ᠠᠳᠠᠯᠢ ᠵᠢᠩᠳᠠᠭᠠᠨ ᠤ᠋ ᠬᠥᠮᠦᠨ ᠳ᠋ᠦ᠍ ᠲᠣᠭᠠᠴᠠᠭᠳᠠᠨ ᠦᠬᠦᠭᠰᠡᠨ ᠴᠦ᠍ ᠨᠡᠷᠡ ᠰᠦᠷ ᠨᠢ ᠨᠡᠮᠡᠭᠳᠡᠬᠦ ᠪᠢᠯᠡ᠃ ᠵᠠᠮᠤᠬᠠ ᠶ᠋ᠢᠨ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠬᠤ ᠭᠡᠵᠦ ᠣᠯᠠᠨ ᠰᠠᠢᠬᠠᠨ ᠦᠭᠡ ᠪᠤᠭᠤᠷᠴᠢ ᠪᠠᠷ ᠲᠠᠢᠭᠰᠠᠨ ᠤ᠋ ᠤᠴᠢᠷ ᠡᠨᠡ ᠠᠵᠢ᠃ ᠬᠦᠴᠦᠷᠬᠡᠭ ᠳᠠᠢᠰᠤᠨ ᠢ᠋ᠶ᠋ᠠᠨ ᠬᠣᠷᠣᠰᠤᠯᠲᠠᠢ ᠪᠠᠷ ᠬᠣᠷᠣᠭᠠᠬᠤ ᠨᠢ ᠳᠠᠢᠰᠤᠨ ᠤ᠋ ᠪᠠᠨ ᠰᠦᠷ ᠬᠦᠴᠦ ᠶ᠋ᠢ ᠨᠡᠮᠡᠬᠦ ᠡᠴᠡ ᠴᠠᠭᠠᠰᠢ ᠦᠭᠡᠢ ᠲᠤᠯᠠ ᠣᠳᠣ ᠵᠠᠮᠤᠬᠠ ᠶ᠋ᠢᠨ ᠮᠡᠬᠡᠨ ᠳ᠋ᠦ᠍ ᠤᠨᠠᠬᠤ ᠦᠭᠡᠢ ᠲᠡᠪᠴᠢᠬᠦ ᠶᠣᠰᠣᠲᠠᠢ ᠪᠠᠢᠯᠠ᠃ ᠵᠠᠮᠤᠬᠠ ᠦᠬᠦᠬᠦ ᠳ᠋ᠡᠭᠡᠨ ᠴᠦ᠍ ᠲᠡᠭᠦᠨ ᠢ᠋ ᠬᠠᠭᠤᠷᠬᠤ ᠪᠠᠷ ᠰᠢᠢᠳᠦᠭᠰᠡᠨ ᠢ᠋ ᠣᠢᠯᠠᠭᠠᠪᠠ᠃ ᠰᠢᠳᠠᠷ ᠴᠡᠷᠢᠭ ᠦ᠋ᠳ ᠲᠡᠭᠡᠨ ᠪᠠᠷᠢᠭᠳᠠᠨ ᠢᠷᠡᠭᠰᠡᠨ ᠨᠢ ᠴᠦ᠍ ᠲᠡᠭᠦᠨ ᠦ᠌ ᠵᠠᠯᠢ ᠪᠣᠯᠬᠤ ᠶ᠋ᠢ ᠲᠡᠮᠦᠵᠢᠨ ᠲᠠᠭᠠᠮᠠᠭᠯᠠᠪᠠ᠃ ᠲᠡᠭᠡᠮᠡᠭᠴᠡ ᠣᠷᠭᠢᠯᠤᠨ ᠣᠪᠣᠯᠵᠠᠬᠤ ᠠᠭᠤᠷ ᠬᠢᠯᠢᠩ ᠢ᠋ᠶ᠋ᠡᠨ ᠠᠷᠠᠢᠬᠠᠨ ᠲᠡᠪᠴᠢᠨ ᠪᠠᠷᠢᠵᠤ
| ᠵᠠᠮᠤᠬᠠ ᠴᠢ ᠰᠣᠨᠣᠰ᠃ ᠴᠢ ᠥᠪᠡᠷ ᠦ᠋ᠨ ᠦᠢᠯᠡᠳᠦᠭᠰᠡᠨ ᠮᠠᠭᠤ ᠤᠢᠯᠠᠨ ᠤ᠋ ᠪᠠᠨ ᠲᠥᠯᠥᠭᠡ ᠨᠢᠭᠡᠨᠲᠡ ᠬᠦᠰᠡᠭᠰᠡᠨ ᠦᠬᠦᠯ ᠢ᠋ᠶ᠋ᠡᠨ ᠴᠦ᠍ ᠰᠣᠩᠭᠣᠬᠤ ᠬᠤᠪᠢ ᠦᠭᠡᠢ ᠪᠣᠯᠵᠠᠢ᠃ ᠣᠳᠣ ᠪᠢ ᠴᠢᠨᠦ ᠦᠬᠦᠯ ᠢ᠋ ᠰᠣᠩᠭᠣᠨᠠ ᠭᠡᠵᠦ ᠵᠠᠨᠤᠯᠲᠠᠢ ᠬᠡᠯᠡᠭᠡᠳ ᠭᠠᠷᠴᠤ ᠶᠠᠪᠤᠯᠠ᠃ ᠡᠨᠡ ᠭᠡᠷ ᠲᠦ᠍ ᠵᠠᠮᠤᠬᠠ ᠶ᠋ᠢᠨ ᠳᠡᠷᠭᠡᠳᠡ ᠨᠢᠭᠡ ᠮᠥᠴᠡ ᠴᠦ᠍ ᠲᠡᠪᠴᠢᠨ ᠪᠠᠢᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠠᠢ᠃ ᠵᠠᠮᠤᠬᠠ ᠲᠡᠭᠦᠨ ᠢ᠋ ᠭᠠᠷᠤᠭᠰᠠᠨ ᠬᠣᠢᠨᠠ ᠰᠥᠬᠥᠷᠡᠨ ᠤᠨᠠᠪᠠ᠃
| ᠲᠡᠮᠦᠵᠢᠨ ᠪᠢ ᠴᠢᠮᠠᠶ᠋ᠢ ᠲᠠᠨᠢᠭᠰᠠᠨ ᠦᠭᠡᠢ᠃ ᠪᠢ ᠴᠢᠮᠠᠶ᠋ᠢ ᠬᠥᠮᠦᠨ ᠭᠡᠵᠦ ᠢᠲᠡᠭᠡᠵᠦ ᠶᠠᠪᠤᠯᠠ᠃ ᠭᠡᠲᠡᠯᠡ ᠴᠢ ᠬᠥᠮᠦᠨ ᠪᠢᠰᠢ ᠪᠠᠢᠵᠤ᠁ ᠭᠡᠮᠡᠨ ᠵᠠᠮᠤᠬᠠ ᠲᠤᠢᠯ ᠤ᠋ᠨ ᠭᠠᠰᠢᠭᠤᠳᠠᠯᠲᠠᠢ ᠪᠠᠷ᠂ ᠭᠠᠵᠠᠷ ᠰᠢᠭᠠᠨ᠂ ᠦᠰᠦ ᠪᠡᠨ ᠦᠭᠲᠡᠭᠡᠨ ᠪᠠᠢᠵᠤ ᠭᠠᠰᠢᠭᠤᠨ ᠢ᠋ᠶ᠋ᠠᠷ ᠮᠡᠭᠰᠢᠨ ᠤᠬᠢᠯᠠᠪᠠ᠃ ᠵᠠᠮᠤᠬᠠ ᠭᠡᠷ ᠡᠴᠡ ᠭᠦᠶᠦᠨ ᠭᠠᠷᠴᠤ
| ᠲᠡᠮᠦᠵᠢᠨ᠃ ᠴᠢᠮᠠᠶ᠋ᠢ ᠲᠩᠷᠢ ᠭᠡᠰᠬᠡᠭᠡᠵᠦ ᠴᠢ ᠨᠢᠭᠡ ᠯᠡ ᠡᠳᠦᠷ ᠶᠠᠭ ᠨᠠᠳᠠ ᠰᠢᠭ᠋ ᠥᠪᠡᠷ ᠦ᠋ᠨ ᠦᠬᠦᠯ ᠢ᠋ ᠰᠣᠩᠭᠣᠬᠤ ᠴᠤ᠌ ᠡᠷᠬᠡ ᠦᠭᠡᠢ ᠪᠣᠯᠤᠨᠠ᠃ ᠲᠡᠷᠡ ᠴᠠᠭ ᠲᠤ᠌ ᠴᠢ ᠵᠠᠮᠤᠬᠠ ᠨᠠᠮᠠᠶ᠋ᠢ ᠰᠠᠨᠠᠨᠠ᠃ ᠪᠢ ᠴᠢᠨᠦ ᠬᠦᠰᠡᠭᠰᠡᠨ ᠢ᠋ᠶ᠋ᠡᠷ ᠦᠬᠦᠪᠡᠴᠦ ᠰᠦᠨᠡᠰᠦ ᠮᠢᠨᠢ ᠴᠢᠮᠠ ᠠ᠋ᠴᠠ ᠰᠠᠯᠬᠤ ᠦᠭᠡᠢ ᠭᠡᠵᠦ ᠮᠡᠳᠡᠭᠡᠷᠡᠢ ᠭᠡᠮᠡᠨ ᠰᠢᠷᠬᠠᠳᠤᠭᠰᠠᠨ ᠠᠷᠢᠶᠠᠲᠠᠨ ᠰᠢᠭ᠋ ᠪᠠᠷᠬᠢᠷᠠᠭᠰᠠᠭᠠᠷ ᠪᠠᠢᠯᠠ᠃
ᠭᠡᠷ ᠡᠴᠡ ᠬᠣᠯᠠᠳᠤᠨ ᠶᠠᠪᠤᠵᠤ ᠪᠠᠢᠬᠤ ᠳ᠋ᠠᠭᠠᠨ ᠵᠠᠮᠤᠬᠠ ᠶ᠋ᠢᠨ ᠡᠨᠡ ᠭᠠᠰᠢᠭᠤᠳᠠᠯᠲᠤ ᠳᠠᠭᠤ ᠶ᠋ᠢ ᠲᠡᠮᠦᠵᠢᠨ ᠪᠤᠭᠤᠷᠴᠢ ᠬᠣᠶᠠᠭᠤᠯᠠ ᠰᠣᠨᠣᠰᠤᠭᠰᠠᠨ ᠠᠲᠠᠯᠠ ᠬᠡᠨ ᠴᠦ᠍᠂ ᠶᠠᠭᠤ ᠴᠤ᠌ ᠬᠡᠯᠡᠭᠰᠡᠨ ᠦᠭᠡᠢ᠃ ᠬᠡᠷᠪᠡ ᠵᠠᠮᠤᠬᠠ ᠬᠣᠢᠨᠠ ᠠ᠋ᠴᠠ ᠨᠢ ᠭᠦᠶᠦᠨ ᠢᠷᠡᠪᠡᠯ ᠲᠡᠭᠦᠨ ᠢ᠋ ᠴᠠᠪᠴᠢᠨ ᠠᠯᠠᠬᠤ ᠪᠠᠷ ᠪᠤᠭᠤᠷᠴᠢ ᠰᠡᠯᠡᠮᠡ ᠪᠡᠨ ᠪᠡᠯᠡᠨ ᠪᠠᠷᠢᠵᠤ ᠶᠠᠪᠤᠵᠠᠢ᠃ ᠬᠠᠷᠢᠨ ᠵᠠᠮᠤᠬᠠ ᠠᠮᠢᠳᠤ ᠪᠠᠷ ᠢ᠋ᠶ᠋ᠠᠨ ᠵᠢᠷᠦᠬᠡ ᠪᠡᠨ ᠰᠤᠭᠤᠯᠠᠭᠤᠯᠵᠤ ᠪᠣᠢ ᠮᠡᠲᠦ ᠣᠷᠢᠯᠠᠭᠰᠠᠭᠠᠷ ᠪᠠᠢᠭᠰᠠᠨ ᠴᠤ᠌ ᠭᠡᠷ ᠦ᠋ᠨ ᠡᠭᠦᠳᠡᠨ ᠡᠴᠡ ᠥᠨᠳᠡᠢᠭᠰᠡᠨ ᠦᠭᠡᠢ᠃ ᠲᠡᠭᠦᠨ ᠳ᠋ᠦ᠍ ᠲᠡᠢᠮᠦ ᠴᠢᠳᠠᠯ ᠴᠤ᠌ ᠦᠭᠡᠢ ᠪᠣᠯᠵᠠᠢ᠃ ᠵᠠᠮᠤᠬᠠ ᠶ᠋ᠢᠨ ᠡᠨᠡ ᠠᠶᠤᠮᠰᠢᠭᠲᠤ ᠳᠠᠭᠤᠨ ᠳ᠋ᠤ᠌ ᠲᠡᠮᠦᠵᠢᠨ ᠦ᠌ ᠶᠡᠬᠡ ᠬᠦᠷᠢᠶᠡᠨ ᠳ᠋ᠦ᠍ ᠤᠨᠲᠠᠵᠤ ᠪᠠᠢᠭᠰᠠᠨ ᠪᠦᠬᠦ ᠬᠥᠮᠦᠨ ᠰᠣᠴᠢᠨ ᠰᠡᠷᠡᠵᠡᠢ᠃ ᠵᠠᠮᠤᠬᠠ ᠶ᠋ᠢᠨ ᠭᠦᠨ ᠭᠠᠰᠢᠭᠤᠳᠠᠯᠲᠤ ᠳᠠᠭᠤ ᠶᠠᠭ ᠰᠢᠷᠬᠠᠲᠤᠭᠰᠠᠨ ᠬᠥᠮᠦᠨ ᠭᠥᠷᠥᠭᠡᠰᠦ ᠣᠷᠢᠯᠠᠬᠤ ᠰᠢᠭ᠋ ᠰᠣᠨᠣᠰᠤᠭᠳᠠᠭᠰᠠᠭᠠᠷ ᠪᠠᠢᠪᠠ᠃
ᠮᠠᠷᠭᠠᠰᠢ ᠨᠢ ᠵᠠᠮᠤᠬᠠ ᠶ᠋ᠢᠨ ᠦᠬᠦᠯ ᠢ᠋ ᠨᠢᠳᠦ ᠪᠡᠷ ᠦᠵᠡᠬᠦ ᠦᠭᠡᠢ ᠭᠡᠵᠦ ᠲᠡᠮᠦᠵᠢᠨ ᠬᠡᠭᠡᠷᠡ ᠲᠠᠯᠠ ᠤᠷᠤᠭᠤ ᠳᠠᠪᠬᠢᠨ ᠣᠳᠪᠠ᠃ ᠲᠡᠭᠦᠨ ᠢ᠋ ᠶᠠᠪᠤᠭᠰᠠᠨ ᠬᠣᠢᠨᠠ ᠪᠤᠭᠤᠷᠴᠢ ᠶ᠋ᠢᠨ ᠵᠢᠭᠠᠪᠤᠷᠢ ᠪᠠᠷ ᠵᠥᠴᠢ ᠵᠠᠮᠤᠬᠠ ᠶ᠋ᠢ ᠴᠢᠷᠴᠦ ᠢᠷᠡᠪᠡ᠃ ᠠᠷᠠᠳ ᠣᠯᠠᠨ ᠤ᠋ ᠨᠢᠳᠦᠨ ᠳᠡᠭᠡᠷᠡ ᠠᠶᠤᠮᠰᠢᠭᠲᠤ ᠴᠠᠭᠠᠵᠠ ᠪᠠᠷ ᠬᠣᠷᠣᠭᠠᠯᠭᠠᠵᠤ ᠨᠡᠷᠡ ᠲᠥᠷᠥ ᠲᠡᠢ ᠦᠬᠦᠬᠦ ᠳᠠᠯᠳᠠ ᠬᠦᠰᠡᠯ ᠨᠢ ᠡᠢᠨ ᠬᠦ᠌ ᠲᠠᠯᠠᠭᠠᠷ ᠪᠣᠯᠵᠤ ᠮᠠᠭᠤᠯᠠᠬᠤ ᠭᠡᠵᠦ ᠪᠣᠢ ᠮᠠᠯ ᠠᠳᠠᠯᠢ ᠲᠡᠭᠦᠨ ᠢ᠋ ᠴᠢᠷᠴᠦ ᠢᠷᠡᠭᠡᠳ ᠬᠡᠳᠦᠬᠡᠨ ᠬᠥᠮᠦᠨ ᠪᠠᠢᠯᠴᠠᠭᠤᠯᠤᠨ ᠦᠬᠦᠭᠦᠯᠬᠦ ᠪᠡᠷ ᠪᠣᠯᠤᠭᠰᠠᠨ ᠳ᠋ᠤ᠌ ᠵᠠᠮᠤᠬᠠ ᠠᠶᠤᠭᠰᠠᠨ ᠳ᠋ᠠᠭᠠᠨ ᠪᠤᠰᠤ ᠠᠭᠤᠷᠰᠠᠨ ᠬᠢᠯᠢᠩᠨᠡᠭᠰᠡᠨ ᠳ᠋ᠡᠭᠡᠨ ᠪᠠᠷᠤᠭ ᠠᠮᠢ ᠪᠠᠨ ᠲᠠᠯᠪᠢᠬᠤ ᠰᠢᠬᠠᠵᠤ ᠪᠠᠢᠪᠠ᠃
ᠲᠡᠮᠦᠵᠢᠨ ᠦ᠌ ᠵᠠᠷᠯᠢᠭ ᠪᠣᠯᠭᠠᠭᠰᠠᠨ ᠢ᠋ᠶ᠋ᠠᠷ ᠵᠠᠮᠤᠬᠠ ᠶ᠋ᠢ ᠰᠢᠷᠢᠨ ᠲᠤᠯᠤᠮ ᠳ᠋ᠤ᠌ ᠬᠢᠵᠦ ᠪᠦᠲᠡᠭᠡᠵᠦ ᠠᠯᠠᠬᠤ ᠪᠣᠯᠵᠠᠢ᠃ ᠡᠨᠡ ᠪᠣᠯ ᠢᠵᠠᠭᠤᠷᠲᠠᠨ ᠶᠡᠬᠡᠰ ᠲᠦ᠍ ᠣᠨᠣᠭᠳᠠᠳᠠᠭ ᠬᠦᠨᠳᠦᠳᠬᠡᠯ ᠲᠡᠢ ᠦᠬᠦᠯ ᠶᠦᠮ᠃ ᠲᠡᠭᠦᠨ ᠦ᠌ ᠪᠡᠶᠡ ᠠᠮᠢᠰᠬᠤᠯ ᠳᠠᠪᠬᠤᠴᠠᠨ ᠲᠡᠯᠴᠢᠯᠡᠵᠦ᠂ ᠣᠷᠢᠯᠠᠬᠤ ᠶ᠋ᠢ ᠵᠥᠪᠬᠡᠨ ᠶᠡᠬᠡ ᠬᠠᠭᠠᠨ ᠤ᠋ ᠨᠥᠬᠥᠳ᠂ ᠬᠥᠪᠡᠭᠦᠳ ᠯᠡ ᠬᠠᠷᠠᠬᠤ ᠶᠣᠰᠣᠲᠠᠢ ᠪᠠᠢᠪᠠ᠃ ᠲᠡᠮᠦᠵᠢᠨ ᠦ᠌ ᠬᠣᠷᠣ ᠰᠢᠷᠠ ᠶ᠋ᠢ ᠪᠠᠢᠳᠠᠭ ᠢ᠋ᠶ᠋ᠠᠷ ᠨᠢ ᠮᠠᠯᠲᠠᠵᠤ᠂ ᠬᠠᠮᠤᠭ ᠡᠮᠵᠡᠭ ᠬᠦᠨᠳᠡᠭᠦᠷᠢ ᠪᠣᠯᠭᠠᠨ ᠢ᠋ ᠨᠢ ᠦᠭᠡ ᠶ᠋ᠢᠨ ᠬᠣᠣᠷᠲᠤ ᠵᠢᠳᠠ ᠪᠠᠷ ᠳᠦᠩᠭᠦᠨ ᠬᠢᠯᠢᠩᠨᠡᠭᠦᠯᠦᠭᠡᠳ ᠥᠪᠡᠷ ᠢ᠋ ᠪᠡᠨ ᠠᠶᠤᠮᠰᠢᠭᠲᠠᠢ ᠪᠠᠷ ᠴᠠᠭᠠᠵᠠᠯᠠᠭᠤᠯᠬᠤ ᠭᠡᠰᠡᠨ ᠵᠠᠮᠤᠬᠠ ᠶ᠋ᠢᠨ ᠡᠴᠦᠰ ᠦ᠋ᠨ ᠬᠦᠰᠡᠯ ᠡᠢᠨ ᠬᠦ᠌ ᠲᠠᠯᠠᠭᠠᠷ ᠪᠣᠯᠪᠠ᠃ ᠰᠠᠯᠬᠢ ᠮᠡᠲᠦ ᠶᠠᠪᠤᠭᠰᠠᠨ ᠵᠠᠮᠤᠬᠠ ᠶ᠋ᠢᠨ ᠠᠮᠢᠳᠤᠷᠠᠯ ᠢ᠋ ᠵᠥᠴᠢ ᠶ᠋ᠢᠨ ᠭᠠᠷ ᠢ᠋ᠶ᠋ᠠᠷ ᠳᠠᠭᠤᠰᠬᠠᠬᠤ ᠭᠡᠵᠦ ᠲᠡᠮᠦᠵᠢᠨ ᠰᠢᠢᠳᠴᠡᠢ᠃ ᠡᠨᠡ ᠪᠣᠯ ᠵᠠᠮᠤᠬᠠ ᠶ᠋ᠢᠨ ᠭᠠᠰᠢᠭᠤᠨ ᠦᠭᠡᠨ ᠦ᠌ ᠰᠠᠨᠠᠭᠠ ᠲᠠᠢ᠂ ᠤᠬᠠᠭᠠᠨ ᠲᠠᠢ ᠬᠠᠷᠢᠭᠤ ᠪᠣᠯᠬᠤ ᠶ᠋ᠢ ᠵᠠᠮᠤᠬᠠ ᠬᠠᠷᠠᠭᠠᠳ ᠣᠢᠯᠠᠭᠠᠵᠠᠢ᠃ ᠡᠴᠢᠭᠡ ᠶ᠋ᠢᠨ ᠵᠠᠷᠯᠢᠭ ᠢ᠋ ᠵᠥᠴᠢ ᠪᠠᠶᠠᠷᠲᠠᠢ ᠪᠠᠷ ᠭᠦᠢᠴᠡᠳᠬᠡᠵᠦ ᠵᠠᠮᠤᠬᠠ ᠶ᠋ᠢ ᠲᠤᠯᠤᠮ ᠳ᠋ᠤ᠌ ᠴᠢᠬᠢᠨ ᠣᠷᠣᠭᠤᠯᠤᠭᠠᠳ ᠥᠪᠡᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠠᠮᠠ ᠶ᠋ᠢ ᠨᠢ ᠪᠣᠭᠣᠵᠠᠢ᠃ ᠵᠠᠮᠤᠬᠠ ᠵᠥᠴᠢ ᠳ᠋ᠦ᠍ ᠶᠠᠮᠠᠷ ᠨᠢᠭᠡᠨ ᠬᠣᠷᠣᠨ ᠦᠭᠡ ᠬᠡᠯᠡᠮᠡᠷ ᠪᠠᠢᠭᠰᠠᠨ ᠴᠤ᠌ ᠶᠠᠭᠠᠬᠢᠭᠠᠳ ᠴᠤ᠌ ᠲᠡᠢᠮᠦ ᠦᠭᠡ ᠲᠦᠷᠭᠡᠨ ᠵᠠᠭᠤᠷᠠ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠭᠰᠠᠨ ᠦᠭᠡᠢ᠃ ᠠᠩᠬᠠ ᠤᠳᠠᠭᠠ ᠢᠩᠭᠢᠵᠦ ᠬᠡᠯᠡ ᠡᠭᠡᠳᠡᠷᠡᠵᠦ᠂ ᠦᠭᠡ ᠭᠠᠴᠢᠬᠤ ᠶ᠋ᠢ ᠵᠠᠮᠤᠬᠠ ᠦᠵᠡᠵᠡᠢ᠃ ᠤᠳᠠᠯ ᠦᠭᠡᠢ ᠵᠠᠮᠤᠬᠠ ᠦᠬᠦᠵᠦ᠂ ᠰᠦᠨᠡᠰᠦ ᠨᠢ ᠪᠠᠶᠠᠨ ᠠ᠋ᠴᠠ ᠬᠠᠭᠠᠴᠠᠭᠰᠠᠨ ᠴᠤ᠌ ᠶᠠᠪᠤᠭᠰᠠᠨ ᠦᠭᠡᠢ ᠡᠷᠭᠢᠯᠳᠦᠭᠰᠡᠭᠡᠷ ᠪᠠᠢᠯᠠ᠃ ᠵᠠᠮᠤᠬᠠ ᠠᠮᠢ ᠲᠠᠰᠤᠷᠠᠬᠤ ᠳ᠋ᠠᠭᠠᠨ ᠠᠶᠤᠮᠰᠢᠭᠲᠠᠢ ᠪᠠᠷ ᠬᠠᠰᠬᠢᠷᠤᠭᠰᠠᠨ ᠪᠥᠭᠡᠳ ᠡᠨᠡ ᠳᠠᠭᠤᠨ ᠳ᠋ᠤ᠌ ᠮᠠᠭᠤ ᠬᠥᠮᠦᠨ ᠦ᠌ ᠰᠦᠨᠡᠰᠦ ᠵᠠᠢᠯᠠᠵᠤ ᠮᠣᠷᠢᠳ ᠰᠢᠭᠡᠰᠦ ᠠᠯᠳᠠᠵᠤ ᠪᠠᠢᠪᠠ᠃ ᠬᠠᠷᠢᠨ ᠵᠥᠴᠢ ᠶ᠋ᠢᠨ ᠰᠢᠳᠠᠷ ᠤ᠋ᠳ ᠤ᠋ᠨ ᠨᠢᠭᠡᠨ ᠳ᠋ᠦ᠍ ᠣᠯᠵᠠᠯᠠᠭᠳᠠᠨ ᠣᠴᠢᠭᠰᠠᠨ ᠵᠠᠮᠤᠬᠠ ᠶ᠋ᠢᠨ ᠪᠠᠭᠠ ᠬᠠᠲᠤᠨ ᠰᠦᠨ ᠭᠡᠭᠡᠨ ᠦ᠌ ᠲᠥᠷᠥᠭᠦᠯᠦᠭᠰᠡᠨ ᠬᠥᠪᠡᠭᠦᠨ ᠬᠡᠵᠢᠶᠡ ᠴᠦ᠍ ᠥᠪᠡᠷ ᠦ᠋ᠨ ᠡᠴᠢᠭᠡ ᠶ᠋ᠢ ᠮᠡᠳᠡᠬᠦ ᠬᠤᠪᠢ ᠵᠠᠶᠠᠭᠠ ᠦᠭᠡᠢ ᠪᠠᠢᠵᠠᠢ᠃
ᠬᠥᠭᠡᠷᠦᠬᠦᠢ ᠲᠡᠷᠡ ᠪᠦᠰᠡᠭᠦᠢ ᠬᠡᠪᠡᠯᠢ ᠳ᠋ᠡᠬᠢ ᠦᠷᠡ ᠡᠴᠡ ᠪᠡᠨ ᠪᠡᠶᠡ ᠲᠠᠰᠤᠷᠠᠮᠠᠭᠴᠠ ᠠᠮᠢᠰᠬᠤᠭᠠ ᠬᠤᠷᠢᠶᠠᠵᠠᠢ᠃ ᠵᠠᠮᠤᠬᠠ ᠴᠤ᠌ ᠬᠦᠰᠡᠯᠡᠩ ᠪᠣᠯᠤᠭᠰᠠᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠲᠥᠷᠥᠭᠰᠡᠨ ᠢ᠋ ᠮᠡᠳᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠬᠡᠷᠪᠡ ᠲᠡᠷᠡ ᠡᠭᠦᠨ ᠢ᠋ ᠮᠡᠳᠡᠭᠰᠡᠨ ᠪᠣᠯ ᠬᠡᠵᠢᠶᠡ ᠴᠦ᠍ ᠦᠬᠦᠬᠦ ᠶ᠋ᠢ ᠬᠦᠰᠡᠬᠦ ᠦᠭᠡᠢ ᠪᠠᠢᠪᠠ᠃ ᠭᠡᠪᠡᠴᠦ ᠡᠨᠡ ᠪᠦᠬᠦ ᠭᠠᠴᠢᠯᠠᠩᠲᠤ ᠨᠢᠭᠤᠴᠠ ᠶ᠋ᠢ ᠲᠩᠷᠢ ᠯᠡ ᠮᠡᠳᠡᠬᠦ ᠪᠢᠯᠡ᠃ ᠵᠠᠮᠤᠬᠠ ᠶ᠋ᠢ ᠦᠬᠦᠭᠰᠡᠨ ᠦ᠌ ᠬᠣᠢᠨᠠ ᠡᠩᠭᠡᠷ ᠭᠠᠵᠠᠷ ᠲᠤ᠌ ᠬᠦᠨᠳᠦᠳᠬᠡᠯ ᠲᠡᠢ ᠪᠡᠷ ᠣᠷᠣᠰᠢᠭᠤᠯᠪᠠ᠃ ᠬᠠᠷᠢᠨ ᠣᠷᠣᠰᠢᠭᠤᠯᠬᠤ ᠶ᠋ᠢ ᠨᠢ ᠲᠡᠮᠦᠵᠢᠨ ᠰᠢᠳᠠᠷ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠬᠠᠷᠠᠵᠤ ᠵᠣᠭᠰᠣᠯᠠ᠃ ᠲᠡᠳᠡᠨ ᠦ᠌ ᠬᠡᠨ ᠨᠢ ᠴᠦ᠍ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠲᠡᠮᠦᠵᠢᠨ ᠤᠷᠢᠳ ᠡᠮᠦᠨᠡ ᠬᠡᠨ ᠨᠢᠭᠡᠨ ᠢ᠋ ᠦᠬᠦᠬᠦ ᠳ᠋ᠦ᠍ ᠢᠩᠭᠢᠵᠦ ᠬᠠᠷᠠᠭᠤᠰᠤᠨ ᠭᠠᠰᠢᠭᠤᠳᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠬᠤ ᠦᠭᠡᠢ ᠪᠠᠢᠪᠠ᠃ ᠳᠠᠢᠰᠤᠨ ᠢ᠋ᠶ᠋ᠠᠨ ᠦᠬᠦᠬᠦ ᠳ᠋ᠦ᠍ ᠭᠦᠨ ᠬᠠᠷᠠᠮᠰᠠᠯ ᠲᠥᠷᠥᠬᠦ ᠶ᠋ᠢ ᠲᠡᠷᠡ ᠠᠩᠬᠠ ᠤᠳᠠᠭᠠ ᠮᠡᠳᠡᠷᠡᠪᠡ᠃
ᠣᠳᠣ ᠵᠠᠮᠤᠬᠠ ᠭᠡᠭᠴᠢ ᠲᠡᠷᠡ ᠴᠡᠴᠡᠨ ᠴᠡᠯᠮᠡᠭ ᠦᠭᠡ ᠲᠡᠢ᠂ ᠬᠤᠪᠢᠷᠠᠮᠠᠲᠠᠭᠠᠢ ᠣᠯᠠᠨ ᠠᠭᠠᠰᠢ ᠲᠠᠢ ᠬᠥᠮᠦᠨ ᠦᠭᠡᠢ ᠪᠣᠯᠵᠤ ᠣᠷᠣᠨ ᠳ᠋ᠤᠨᠢ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠴᠢᠯᠠᠭᠤ ᠯᠠ ᠭᠠᠵᠠᠷ ᠳᠡᠭᠡᠷᠡ ᠬᠣᠴᠣᠷᠪᠠ᠃ ᠲᠡᠮᠦᠵᠢᠨ ᠦ᠌ ᠬᠤᠪᠢ ᠳ᠋ᠤ᠌ ᠵᠠᠮᠤᠬᠠ ᠣᠳᠣ ᠴᠤ᠌ ᠦᠬᠦᠭᠡ ᠦᠭᠡᠢ ᠬᠠᠮᠢᠭᠠ ᠨᠢᠭᠡᠨᠲᠡ ᠠᠮᠢᠳᠤ ᠶᠠᠪᠤᠭᠠ ᠮᠡᠲᠦ ᠰᠠᠨᠠᠭᠳᠠᠨᠠ᠃ ᠢᠩᠭᠢᠵᠦ ᠪᠣᠳᠣᠭᠳᠠᠭᠰᠠᠨ ᠤ᠋ ᠤᠴᠢᠷ ᠨᠢ ᠵᠠᠮᠤᠬᠠ ᠶ᠋ᠢᠨ ᠰᠦᠨᠡᠰᠦ ᠲᠡᠭᠦᠨ ᠦ᠌ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠨᠢ ᠡᠷᠭᠢᠯᠳᠦᠵᠦ ᠪᠠᠢᠭᠠ ᠶ᠋ᠢᠨ ᠬᠢ ᠶᠦᠮ᠃ ᠭᠡᠲᠡᠯᠡ ᠲᠡᠮᠦᠵᠢᠨ ᠡᠭᠦᠨ ᠢ᠋ ᠦᠵᠡᠬᠦ ᠦᠭᠡᠢ ᠠᠵᠢ᠃ ᠲᠡᠷᠡ ᠪᠡᠷ ᠵᠠᠮᠤᠬᠠ ᠶ᠋ᠢᠨ ᠲᠤᠬᠠᠢ ᠭᠠᠰᠢᠭᠤᠳᠠᠨ ᠪᠣᠳᠣᠵᠤ ᠵᠣᠭᠰᠣᠪᠠ᠃ ᠵᠠᠮᠤᠬᠠ ᠪᠣᠯ ᠳᠡᠩᠳᠡᠭᠦᠦ ᠬᠦᠴᠦᠲᠡᠢ᠂ ᠳᠡᠩᠳᠡᠭᠦᠦ ᠤᠬᠠᠭᠠᠨ ᠲᠠᠢ ᠳᠠᠢᠰᠤᠨ ᠪᠠᠢᠯᠠ᠃ ᠵᠠᠮᠤᠬᠠ ᠶ᠋ᠢᠨ ᠳᠠᠢᠰᠤᠩᠨᠠᠬᠤ᠂ ᠨᠥᠬᠥᠷᠯᠡᠬᠦ ᠶ᠋ᠢ ᠢᠯᠭᠠᠬᠤ ᠭᠡᠵᠦ ᠲᠡᠮᠦᠵᠢᠨ ᠣᠯᠠᠨ ᠵᠢᠯ ᠤᠬᠠᠭᠠᠨ ᠢ᠋ᠶ᠋ᠠᠨ ᠣᠬᠣᠭᠰᠠᠨ ᠪᠢᠯᠡ᠃ ᠵᠠᠮᠤᠬᠠ ᠬᠠᠷᠢᠨ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠠᠨᠳᠠᠭᠠᠢ ᠳ᠋ᠤ᠌ ᠦᠨᠡᠨᠴᠢ ᠶᠠᠪᠤᠭᠰᠠᠨ ᠶᠤᠮ᠃ ᠲᠡᠭᠦᠨ ᠦ᠌ ᠡᠨᠡ ᠡᠷᠡᠭᠡᠯᠵᠡᠭᠡ ᠲᠡᠢ᠂ ᠵᠥᠭᠡᠯᠡᠨ᠂ ᠦᠨᠡᠨᠴᠢ ᠰᠡᠳᠬᠢᠯ ᠢ᠋ ᠲᠡᠮᠦᠵᠢᠨ ᠲᠠᠩᠳᠠ ᠪᠠᠨ ᠮᠡᠳᠡᠷᠡᠳᠡᠭ ᠪᠠᠢᠪᠠ᠃ ᠵᠠᠮᠤᠬᠠ ᠪᠣᠯ ᠬᠣᠣᠷᠲᠠᠢ᠂ ᠠᠶᠤᠯᠲᠠᠢ᠂ ᠬᠦᠴᠦᠲᠡᠢ ᠳᠠᠢᠰᠤᠨ ᠪᠠᠢᠭᠰᠠᠨ ᠴᠤ᠌ ᠲᠡᠭᠦᠨ ᠳ᠋ᠦ᠍ ᠬᠡᠵᠢᠶᠡ ᠴᠦ᠍ ᠡᠷᠭᠢᠯᠲᠡ ᠪᠤᠴᠠᠯᠲᠠ ᠦᠭᠡᠢ ᠪᠡᠷ ᠳᠠᠢᠰᠤᠩᠨᠠᠭᠠ ᠦᠭᠡᠢ ᠪᠢᠯᠡ᠃ ᠠᠨᠳᠠ ᠶ᠋ᠢᠨ ᠦᠨᠡᠨᠴᠢ ᠠᠨᠳᠠᠭᠠᠢ ᠪᠠᠨ ᠮᠠᠷᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠵᠥᠭᠡᠯᠡᠨ ᠬᠠᠯᠢᠷᠠᠮᠠᠳᠠᠭᠠᠢ ᠰᠡᠳᠬᠢᠯ ᠦ᠋ᠨ ᠢ᠋ᠶ᠋ᠡᠨ ᠵᠣᠯᠢᠶᠠᠰᠤ ᠪᠣᠯᠵᠤ ᠵᠠᠮᠤᠬᠠ ᠢᠯᠠᠭᠳᠠᠪᠠ᠃
ᠬᠠᠭᠠᠨ ᠪᠣᠯᠬᠤ ᠳ᠋ᠤ᠌ ᠬᠠᠲᠠᠭᠤ ᠰᠡᠳᠬᠢᠯ᠂ ᠬᠠᠳᠠᠨ ᠰᠡᠯᠡᠮᠡ ᠬᠣᠶᠠᠷ ᠠ᠋ᠴᠠ ᠥᠭᠡᠷᠡ ᠨᠥᠬᠥᠷ ᠦᠭᠡᠢ ᠭᠡᠳᠡᠭ ᠢ᠋ ᠲᠡᠮᠦᠵᠢᠨ ᠡᠨᠡ ᠣᠯᠠᠨ ᠣᠨ ᠵᠢᠯ ᠦ᠋ᠳ ᠲᠦ᠍ ᠪᠠᠲᠤ ᠣᠢᠯᠠᠭᠠᠵᠤ ᠠᠪᠤᠭᠰᠠᠨ ᠪᠢᠯᠡ᠃ ᠬᠥᠮᠦᠨ ᠢ᠋᠂ ᠶᠡᠷᠦ ᠬᠡᠨ ᠴᠦ᠍ ᠪᠠᠢᠭᠰᠠᠨ ᠦᠷᠦ ᠡᠪᠡᠳᠴᠦ ᠬᠠᠢᠷᠠᠯᠠᠵᠤ᠂ ᠢᠲᠡᠭᠡᠬᠦ ᠯᠡ ᠶᠦᠮ ᠪᠣᠯ ᠥᠪᠡᠷ ᠢ᠋ᠶ᠋ᠡᠨ ᠨᠢᠭᠡ ᠡᠳᠦᠷ ᠬᠣᠣᠷᠯᠠᠭᠳᠠᠨ ᠵᠠᠮᠤᠬᠠ ᠶ᠋ᠢᠨ ᠠᠳᠠᠯᠢ ᠪᠣᠯᠬᠤ ᠶ᠋ᠢ ᠲᠡᠷᠡ ᠪᠡᠷ ᠪᠣᠳᠣᠵᠤ ᠵᠣᠭᠰᠣᠪᠠ᠃ ᠥᠪᠡᠷ ᠡᠴᠡ ᠪᠡᠨ ᠥᠭᠡᠷᠡ ᠬᠡᠨ ᠳ᠋ᠦ᠍ ᠴᠦ᠍ ᠬᠠᠲᠠᠭᠤ ᠪᠠᠲᠤ ᠪᠠᠷ ᠢᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ᠃ᠬᠠᠭᠠᠨ ᠪᠣᠯᠬᠤ ᠬᠦᠰᠡᠯ᠂ ᠬᠦᠴᠦᠷᠬᠡᠭ ᠪᠠᠢᠬᠤ ᠮᠥᠷᠥᠭᠡᠳᠦᠯ ᠬᠥᠮᠦᠨ ᠪᠦᠷᠢ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠶᠠᠪᠤᠳᠠᠭ ᠲᠤᠯᠠ ᠬᠡᠨ ᠢ᠋ ᠴᠦ᠍ ᠪᠠᠰᠤᠵᠤ᠂ ᠪᠠᠭᠠ ᠪᠠᠷ ᠦᠵᠡᠵᠦ ᠪᠣᠯᠬᠤ ᠦᠭᠡᠢ᠃ ᠬᠥᠨᠳᠡᠯᠡᠨ ᠡᠴᠡ ᠦᠵᠡᠪᠡᠯ ᠵᠠᠮᠤᠬᠠ ᠶ᠋ᠢ ᠥᠷᠥᠰᠢᠶᠡᠵᠦ᠂ ᠡᠴᠦᠰ ᠲᠦ᠋ᠨᠢ ᠲᠡᠭᠦᠨ ᠦ᠌ ᠬᠦᠰᠡᠯ ᠢ᠋ᠶ᠋ᠡᠷ ᠦᠬᠦᠭᠦᠯᠵᠦ ᠬᠦᠨᠳᠦᠲᠡᠢ ᠣᠷᠣᠰᠢᠭᠤᠯᠤᠭᠰᠠᠨ ᠭᠡᠵᠦ ᠲᠡᠮᠦᠵᠢᠨ ᠢ᠋ ᠵᠢᠷᠤᠮ ᠲᠠᠢ ᠬᠥᠮᠦᠨ ᠦ᠌ ᠶᠣᠰᠣ ᠪᠠᠷ ᠮᠠᠭᠲᠠᠵᠤ᠂ ᠪᠠᠬᠠᠳᠤᠬᠤ ᠶ᠋ᠢ ᠲᠡᠷᠡ ᠰᠠᠢᠨ ᠮᠡᠳᠡᠵᠦ ᠪᠠᠢᠪᠠ᠃ ᠬᠠᠷᠢᠨ ᠨᠢᠭᠡ ᠨᠠᠰᠤ ᠪᠠᠷ ᠲᠡᠭᠦᠨ ᠲᠡᠢ ᠬᠡᠨ ᠨᠢ ᠢᠯᠡᠭᠦᠦ ᠪᠡᠨ ᠦᠵᠡᠬᠦ ᠭᠡᠵᠦ ᠥᠷᠢᠰᠦᠯᠳᠦᠵᠦ ᠲᠡᠮᠡᠴᠡᠵᠦ᠂ ᠲᠡᠮᠦᠵᠢᠨ ᠢ᠋ ᠪᠠᠭᠠ ᠪᠠᠯᠴᠢᠷ ᠠ᠋ᠴᠠ ᠠᠪᠤᠭᠠᠳ ᠡᠳᠦᠢ ᠬᠦᠷᠲᠡᠯᠡ ᠢᠷᠯᠡᠵᠦ ᠬᠤᠷᠴᠠᠯᠠᠵᠤ ᠶᠠᠪᠤᠭᠰᠠᠨ ᠡᠷᠡᠯᠬᠡᠭ ᠳᠠᠢᠴᠢᠨ ᠵᠠᠮᠤᠬᠠ ᠦᠭᠡᠢ ᠪᠣᠯᠵᠤ ᠲᠡᠭᠦᠨ ᠦ᠌ ᠵᠠᠢ ᠡᠨᠡ ᠭᠠᠵᠠᠷ ᠳᠡᠭᠡᠷᠡ ᠪᠣᠯᠤᠭᠠᠳ ᠲᠡᠮᠦᠵᠢᠨ ᠦ᠌ ᠠᠮᠢᠳᠤᠷᠠᠯ ᠰᠡᠳᠬᠢᠯ ᠳ᠋ᠦ᠍ ᠬᠠᠷᠠᠯᠠᠨ ᠣᠩᠭᠣᠢᠵᠤ ᠬᠣᠴᠣᠷᠪᠠ᠃ ᠡᠭᠦᠨ ᠢ᠋ ᠬᠡᠨ ᠴᠦ᠍᠂ ᠶᠠᠭᠤ ᠴᠤ᠌᠂ ᠬᠡᠵᠢᠶᠡ ᠴᠦ᠍ ᠨᠥᠬᠥᠵᠦ ᠴᠢᠳᠠᠬᠤ ᠦᠭᠡᠢ ᠪᠢᠵᠡ ᠠ᠋᠃ ᠣᠳᠣ ᠡᠨᠡ ᠭᠠᠢᠬᠠᠯᠲᠠᠢ ᠣᠨᠢᠰᠣᠭᠠ ᠮᠡᠲᠦ ᠬᠥᠮᠦᠨ ᠦ᠌ ᠰᠦᠨᠡᠰᠦ ᠯᠡ ᠲᠡᠭᠷᠢ ᠳ᠋ᠦ᠍ ᠭᠣᠮᠣᠳᠠᠯᠲᠠᠢ ᠪᠠᠷ ᠬᠣᠷᠭᠣᠳᠠᠨ ᠡᠷᠭᠢᠯᠳᠦᠵᠦ ᠡᠨᠡ ᠡᠵᠡᠭᠦᠢ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠲᠦ᠍ ᠵᠠᠮᠤᠬᠠ ᠶ᠋ᠢ ᠣᠷᠣᠯᠠᠭᠰᠠᠨ ᠰᠦᠷᠯᠢᠭ ᠲᠣᠮᠣ ᠴᠢᠯᠠᠭᠤ ᠴᠢᠪ ᠴᠢᠮᠡᠭᠡ ᠦᠭᠡᠢ ᠬᠣᠴᠣᠷᠪᠠ᠃ ᠭᠡᠪᠡᠴᠦ ᠡᠨᠡ ᠴᠢᠯᠠᠭᠤ ᠲᠡᠮᠦᠵᠢᠨ ᠦ᠌ ᠢᠯᠠᠯᠲᠠ ᠶ᠋ᠢᠨ ᠪᠡᠯᠭᠡ ᠲᠡᠮᠳᠡᠭ ᠪᠢᠰᠢ ᠭᠡᠳᠡᠭ ᠢ᠋ ᠲᠡᠷᠡ ᠣᠢᠯᠠᠭᠠᠵᠤ ᠪᠠᠢᠪᠠ᠃ ᠬᠠᠷᠢᠨ ᠬᠥᠮᠦᠨ ᠳ᠋ᠦ᠍ ᠥᠪᠡᠷ ᠡᠴᠡ ᠨᠢ ᠢᠯᠡᠭᠦᠦ ᠠᠶᠤᠯ ᠲᠠᠢ ᠳᠠᠢᠰᠤᠨ ᠪᠠᠢᠳᠠᠭ ᠦᠭᠡᠢ ᠶ᠋ᠢ ᠲᠡᠮᠦᠵᠢᠨ ᠣᠢᠯᠠᠭᠠᠨ ᠪᠣᠳᠣᠵᠤ ᠪᠠᠢᠯᠠ᠃ ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠵᠠᠮᠤᠬᠠ ᠶ᠋ᠢᠨ ᠰᠦᠨᠡᠰᠦ ᠶ᠋ᠢ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠬᠤ ᠭᠡᠵᠦ ᠳᠠᠪ ᠲᠡᠭᠷᠢ ᠬᠡᠩᠭᠡᠷᠭᠡ ᠪᠡᠨ ᠳᠡᠯᠡᠳᠴᠦ ᠡᠬᠢᠯᠡᠬᠦ ᠳ᠋ᠦ᠍ ᠪᠦᠭᠦᠳᠡ ᠬᠣᠯᠠᠳᠤᠨ ᠶᠠᠪᠤᠵᠠᠭᠠᠪᠠ᠃
— — — —
① ᠬᠥᠮᠦᠨ ᠳ᠋ᠦ᠍ ᠲᠠᠯᠠ ᠵᠠᠰᠠᠭᠴᠢ᠂ ᠪᠢᠯᠳᠠᠤᠴᠢᠯᠠᠳᠠᠭ᠂ ᠲᠣᠯᠢᠬᠨᠠᠭᠤᠷ ᠵᠠᠩ ᠲᠠᠢ ᠬᠥᠮᠦᠨ᠃
② ᠬᠦ᠌ ᠳᠦᠷᠭᠢᠭᠦᠯᠬᠦ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠭᠡᠷᠡᠯ᠂ ᠬᠡᠷᠡᠶ᠋ᠢᠳ ᠮᠥᠩᠬᠡᠨᠠᠰᠤᠨ᠂ ᠬᠡᠯᠡᠰᠣᠶᠤᠯ᠂ ( ᠪᠤᠤ ᠸᠸᠨ ᠬᠤᠸᠠ)᠂ ᠱᠠᠭᠰᠠᠯ᠂
ᠠᠯᠲᠠᠨᠴᠡᠴᠡᠭ᠂ ᠨᠠᠷᠠᠨᠲᠤᠶᠠᠭᠠ᠂ ᠰᠡᠴᠡᠨᠴᠢᠮᠡᠭ᠂ ᠵᠢᠩᠯᠢᠬᠤᠸᠠᠷ᠂ ᠡᠩᠬᠡᠪᠠᠲᠤ᠂ ᠠᠷᠢᠭᠤᠨ᠂
ᠮᠥᠩᠭᠥᠨ᠂ ᠴᠡᠴᠡᠭ᠂ ᠪᠠᠶᠠᠨᠰᠡᠷᠡᠩ᠂ ᠣᠶᠤᠨᠪᠢᠯᠢᠭ᠌᠂ ᠳᠡᠭᠦᠵᠠᠶᠠᠭᠠ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠰᠡᠬᠡᠭᠡᠷᠡᠯ᠂ ᠮᠣᠩᠭᠣᠯ ᠰᠦᠨᠡᠰᠦ᠂ ᠠᠷᠢᠭᠤᠨ᠂ ᠭᠠᠷᠮᠠ᠂ ᠨᠠᠷᠠᠨ᠂
ᠰᠡᠴᠡᠨᠴᠢᠮᠡᠭ᠂ ᠲ·ᠬᠦᠮᠦᠵᠢᠯᠲᠦ᠂ ᠱᠠᠭᠰᠠᠯ᠂ ᠪᠠᠶᠠᠨᠴᠡᠴᠡᠭ᠂ ᠬᠡᠯᠡᠰᠣᠶᠤᠯ᠂ ᠬᠠᠢ ᠵᠢᠶᠦ᠋ᠨ