ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠦᠲᠦᠭᠡᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠭᠤᠷᠪᠠ> Хан мунын сүүрс < доорд > – Мөнх зохиоов ᠂Дөдгөөр бодь – Нэгдүгээр бүлэг <3>
257ᠲᠦᠲᠦᠭᠡᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠭᠤᠷᠪᠠ>
ᠭᠤᠷᠪᠠ
ᠤᠯᠠᠭᠠᠨ ᠬᠠᠲᠤᠨ ᠤ᠋ ᠴᠠᠭᠠᠭᠤᠷ ᠪᠣᠷᠣ ᠰᠠᠭᠠᠷᠠᠯ ᠬᠦᠷᠮᠡ ᠲᠡᠢ ᠪᠠᠰᠠ ᠨᠢᠭᠡ ᠪᠦᠯᠦᠭ ᠰᠦᠷᠡᠬᠡᠢ ᠬᠦᠴᠦᠨ ᠪᠦᠷᠢᠯᠳᠦᠵᠦ ᠴᠡᠷᠢᠭᠴᠢᠯᠡᠭᠡᠳ ᠪᠠᠢᠨ ᠪᠠᠢᠨ ᠬᠠᠲᠤᠨ ᠭᠠᠲᠤᠯᠵᠤ ᠨᠠᠭᠠᠰᠢ ᠨᠤᠲᠤᠭ ᠥᠨᠳᠡᠯᠵᠡᠬᠦ ᠪᠠᠢᠳᠠᠯ ᠲᠠᠢ ᠭᠡᠰᠡᠨ ᠴᠢᠮᠡᠭᠡ ᠬᠠ ᠶᠠ ᠦᠭᠡᠢ ᠳᠤᠭᠤᠯᠳᠠᠨᠠ᠁
ᠶᠡᠬᠡ ᠡᠷᠲᠡ ᠤᠯᠠᠭᠠᠨ ᠮᠠᠯᠠᠭᠠᠢᠲᠤ ᠂ ᠰᠢᠷᠠ ᠠᠯᠴᠢᠭᠤᠷᠲᠤ ᠴᠡᠷᠢᠭ ᠮᠣᠩᠭᠣᠯ ᠨᠤᠲᠤᠭ ᠲᠤ ᠶᠡᠬᠡᠳᠡ ᠰᠠᠮᠠᠭᠤᠷᠠᠵᠤ ᠪᠠᠢᠯᠠ ᠭᠡᠳᠡᠭ᠃ ᠰᠡᠭᠦᠯᠴᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠥᠷᠭᠡᠨ ᠴᠠᠭᠠᠨ ᠵᠠᠬᠠ ᠲᠠᠢ ᠬᠠᠷᠠ ᠥᠮᠥᠳᠥᠨ ᠦ᠌ ᠪᠡᠨ ᠰᠢᠷᠬᠤᠨᠠᠭ ᠢ᠋ ᠵᠣᠮᠪᠣᠢᠲᠠᠯᠠ ᠪᠣᠭᠣᠭᠰᠠᠨ ᠭᠦᠵᠡᠭᠡᠨ ᠠᠯᠴᠢᠭᠤᠷᠲᠤ ᠣᠷᠣᠵᠤ ᠢᠷᠡᠭᠰᠡᠨ ᠢ᠋ ᠬᠥᠮᠦᠰ《ᠴᠠᠭᠠᠨ ᠠᠯᠴᠢᠭᠤᠷᠲᠤ》 ᠴᠡᠷᠢᠭ ᠭᠡᠵᠦ ᠨᠡᠷᠡᠯᠡᠳᠡᠭ ᠦᠭᠡᠢ ᠨᠢ ᠪᠠᠰᠠ ᠰᠣᠨᠢᠨ! ᠬᠠᠷᠢᠨ《ᠬᠠᠷᠠ ᠴᠡᠷᠢᠭ》 ᠭᠡᠵᠦ ᠨᠡᠷᠡᠯᠡᠭᠰᠡᠨ ᠨᠢ ᠪᠣᠳᠣᠬᠤ ᠳ᠋ᠤ᠌ ᠴᠠᠭᠠᠨᠠ ᠪᠠᠨ ᠤᠬᠠᠭᠠᠨ ᠲᠠᠢ ᠪᠠᠢᠭᠰᠠᠨ ᠪᠢᠵᠡ᠃ ᠲᠡᠭᠡᠭᠡᠳ ᠪᠠᠰᠠ ᠥᠷᠭᠡᠨ ᠭᠤᠶᠠᠪᠴᠢ᠂ ᠰᠢᠷᠢᠨ ᠱᠠᠬᠠᠢ᠂ ᠰᠢᠷᠠ ᠬᠦᠷᠮᠡᠲᠦ ᠴᠡᠷᠢᠭ ᠨᠤᠲᠤᠭ ᠳᠠᠭᠠᠷᠢᠭᠰᠠᠨ ᠳ᠋ᠤ᠌ ᠬᠥᠮᠦᠰ ᠲᠡᠭᠦᠨ ᠢ᠋《ᠰᠢᠷᠠ ᠴᠡᠷᠢᠭ》 ᠭᠡᠳᠡᠭ᠃ ᠡᠨᠡ ᠪᠣᠷᠣ ᠰᠠᠭᠠᠷᠠᠯ ᠬᠦᠷᠮᠡ ᠲᠡᠢ ᠴᠡᠷᠢᠭ ᠦ᠋ᠳ ᠪᠠᠰᠠ ᠰᠣᠨᠢᠨ! ᠡᠪᠦᠳᠦᠭ ᠡᠴᠡ ᠪᠡᠨ ᠳᠣᠷᠣᠭᠰᠢ ᠲᠠᠬᠢᠮ ᠢ᠋ᠶ᠋ᠠᠨ ᠱᠠᠭᠠᠨᠲᠤ ᠳ᠋ᠠᠭᠠᠨ ᠬᠦᠷᠲᠡᠯᠡ ᠶᠠᠭᠵᠠᠢᠲᠠᠯᠠ ᠪᠣᠭᠣᠴᠢᠬᠠᠨᠠ᠃ ᠬᠥᠮᠦᠰ ᠡᠨᠡ ᠴᠡᠷᠢᠭ ᠢ᠋《ᠨᠠᠷᠢᠨ ᠰᠢᠯᠪᠢᠲᠦ ᠪᠣᠷᠣ ᠴᠡᠷᠢᠭ》 ᠭᠡᠳᠡᠭ ᠪᠠᠢᠨᠠ᠃
ᠡᠨᠡ ᠬᠣᠷᠸᠠ ᠶᠠᠭᠠᠬᠢᠬᠤ ᠳ᠋ᠠᠭᠠᠨ ᠲᠡᠢᠨ ᠳᠠᠵᠢᠨ ᠲᠠᠰᠤᠷᠠᠳᠠᠭ ᠦᠭᠡᠢ᠂ ᠶᠠᠭᠤᠨ ᠤ᠋ ᠰᠢᠷᠠ ᠠᠯᠴᠢᠭᠤᠷᠲᠤ᠂ ᠤᠯᠠᠭᠠᠨ ᠮᠠᠯᠠᠭᠠᠢᠲᠤ᠂ ᠬᠠᠷᠠ᠂ ᠰᠢᠷᠠ ᠴᠡᠷᠢᠭ᠁ ᠪᠠᠰᠠ ᠪᠣᠷᠣ ᠴᠡᠷᠢᠭ ᠦ᠋ᠳ ᠭᠡᠳ ᠴᠥᠮ ᠬᠣᠭᠣᠷᠣᠨᠳᠣ ᠪᠠᠨ ᠲᠤᠯᠤᠯᠳᠤᠵᠤ ᠨᠢᠭᠡ ᠨᠢᠭᠡᠨ ᠢ᠋ᠶ᠋ᠡᠨ ᠠᠯᠠᠵᠤ ᠪᠤᠯᠠᠨ ᠬᠣᠨᠵᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠬᠠ ᠪᠠᠨ ᠬᠠᠩᠭᠠᠳᠠᠭ ᠢ᠋ ᠨᠢ ᠪᠦᠦ ᠮᠡᠳᠡ᠃
ᠡᠭᠡᠯ ᠪᠣᠷᠣᠴᠤᠤᠯ ᠡᠨᠡ ᠬᠠᠷᠠ ᠰᠢᠷᠠ ᠪᠣᠷᠣ ᠶᠠᠩᠵᠤ ᠶ᠋ᠢᠨ ᠪᠣᠯᠭᠠᠨ ᠤ᠋ ᠴᠡᠷᠢᠭ ᠦ᠋ᠨ ᠲᠡᠢᠨ ᠦ᠌ ᠬᠥᠯ ᠳ᠋ᠦ᠍ ᠰᠦᠨᠡᠰᠦ ᠦᠭᠡᠢ ᠲᠥᠭᠡᠷᠢᠬᠦ ᠳ᠋ᠡᠭᠡᠨ ᠤᠬᠠᠭᠠᠨ ᠲᠥᠬᠥᠭᠡ ᠶ᠋ᠢ ᠨᠢ ᠣᠯᠳᠠᠭ ᠦᠭᠡᠢ ᠬᠤᠪᠢ ᠵᠠᠶᠠᠭᠠ ᠪᠠᠨ ᠳᠡᠭᠡᠰᠦᠨ ᠳᠥᠷᠦᠭᠡᠨ ᠳ᠋ᠦ᠍ ᠳᠡᠭᠦᠵᠢᠩᠨᠡᠵᠦ ᠳᠠᠩ ᠳ᠋ᠤᠩ ᠶᠠᠪᠤᠨᠠ᠁
ᠰᠣᠨᠣᠰᠬᠤᠯᠠ ᠡᠨᠡ ᠪᠣᠷᠣ ᠴᠡᠷᠢᠭ ᠦ᠋ᠳ ᠪᠣᠷᠣᠲᠣᠬᠣᠢ ᠶ᠋ᠢᠨ ᠬᠠᠷᠠ ᠴᠡᠷᠢᠭ ᠦ᠋ᠳ ᠲᠡᠢ ᠬᠦᠴᠦᠨ ᠬᠠᠮᠰᠠᠵᠤ ᠰᠢᠷᠠ ᠴᠡᠷᠢᠭ ᠢ᠋ ᠰᠢᠪᠬᠠᠷᠠᠵᠤ ᠳᠠᠭᠠᠷᠢᠭᠰᠠᠨ ᠠ᠋ᠴᠠ ᠰᠢᠷᠠ ᠴᠡᠷᠢᠭ ᠦ᠋ᠨ ᠣᠮᠣᠭ ᠰᠦᠷ ᠨᠢ ᠪᠠᠭᠤᠷᠠᠵᠤ᠂ ᠬᠦᠴᠦᠨ ᠨᠢ ᠰᠢᠮᠠᠷᠠᠭᠠᠳ ᠨᠢᠭᠡᠬᠡᠨ ᠰᠥᠨᠢ ᠶ᠋ᠢᠨ ᠬᠣᠭᠣᠷᠣᠨᠳᠣ ᠪᠠᠷᠠ ᠰᠤᠷᠠᠭ ᠦᠭᠡᠢ ᠪᠣᠯᠪᠠ ᠭᠡᠨᠡ᠃
ᠤᠯᠠᠭᠠᠨ ᠨᠣᠬᠠᠢ ᠵᠢᠯ ᠦ᠋ᠨ ᠵᠤᠨ ᠤ᠋ ᠰᠡᠭᠦᠯᠴᠢ ᠪᠡᠷ ᠯᠠ ᠶᠤᠮᠰᠠᠨ᠃
ᠬᠠᠷᠭᠤᠨᠠ ᠬᠠᠨ ᠤ᠋ ᠡᠩᠭᠡᠷ᠂ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠵᠡᠭᠦᠨ ᠠᠮᠠ᠂ ᠬᠠᠳᠤᠮᠠᠯ ᠠ᠋ᠴᠠ ᠵᠡᠭᠦᠨᠰᠢ ᠪᠡᠨ ᠪᠤᠭᠤᠲᠤ ᠶ᠋ᠢᠨ ᠣᠷᠴᠢᠮ ᠪᠣᠷᠣ ᠴᠡᠷᠢᠭ ᠦ᠋ᠳ ᠪᠤᠵᠢᠭᠢᠨᠠᠵᠤ ᠡᠬᠢᠯᠡᠪᠡ᠃ ᠪᠤᠭᠤᠲᠤ ᠳ᠋ᠠᠬᠢ ᠬᠠᠷᠠ ᠴᠡᠷᠢᠭ ᠦ᠋ᠳ ᠡᠮᠦᠨᠡ ᠡᠴᠡ ᠨᠢ ᠳᠠᠩᠴᠤ ᠨᠢᠭᠡ ᠲᠤᠯᠵᠤ ᠳᠡᠢᠯᠬᠦ ᠦᠭᠡᠢ ᠪᠡᠨ ᠪᠠᠷᠤᠭᠯᠠᠵᠤ ᠪᠠᠰᠠ ᠯᠠ ᠪᠣᠷᠣᠲᠣᠬᠣᠢ ᠤᠷᠤᠭᠤ ᠵᠢᠭᠤᠲᠠᠬᠤ ᠳ᠋ᠠᠭᠠᠨ ᠪᠥᠭᠰᠡᠨ ᠬᠣᠢᠨᠠ ᠠ᠋ᠴᠠ ᠪᠠᠨ ᠭᠠᠯᠯᠠᠭᠤᠯᠬᠤ ᠠ᠋ᠴᠠ ᠠᠶᠤᠵᠤ᠂ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠴᠡᠷᠢᠭ ᠲᠦ᠍ ᠵᠠᠷᠯᠢᠭ ᠥᠭᠴᠦ《ᠪᠠᠷᠠᠭᠤᠨᠰᠢ ᠴᠥᠮᠥᠷᠡᠬᠦ ᠪᠣᠷᠣ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ＜ᠴᠢᠩᠭᠢᠰ ᠦ᠋ᠨ ᠬᠦᠴᠦᠲᠦ ᠵᠣᠷᠢᠭ ᠢ᠋ᠶ᠋ᠠᠷ ᠲᠤᠯᠤᠨ ᠪᠠᠢᠯᠳᠤᠭᠠᠷᠠᠢ!＞ ᠭᠡᠵᠦ ᠮᠠᠯᠠᠭᠠᠢᠳᠠᠭᠰᠠᠨ ᠪᠠᠢᠪᠠ᠃ ᠡᠨᠡ ᠬᠠᠲᠠᠭᠤ ᠵᠠᠷᠯᠢᠭ ᠴᠣᠭᠪᠠᠭᠠᠲᠤᠷ ᠤ᠋ᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠲᠤᠯᠵᠤ ᠢᠷᠡᠪᠡ᠃
《ᠵᠠ᠂ ᠡᠨᠡ ᠴᠦ᠍ ᠨᠢᠭᠡ ᠠᠶᠤᠯ ᠶᠤᠮ ᠳᠠ! ᠬᠠᠲᠠᠭᠤ ᠨᠢ ᠴᠦ᠍ ᠬᠠᠲᠠᠭᠤ ᠨᠠᠭᠠᠳᠤᠮ ᠪᠣᠯᠪᠠᠴᠤ ᠬᠠᠯᠲᠤᠰᠬᠢᠪᠡᠯ ᠬᠦᠨᠡᠰᠦᠨ ᠦ᠌ ᠰᠠᠪᠠ ᠪᠠᠨ ᠭᠡᠭᠡᠵᠦ᠂ ᠳᠣᠯᠣᠭᠠᠨ ᠰᠦᠪᠡ ᠲᠡᠢ ᠪᠥᠨᠲᠥᠭᠡᠷ ᠢ᠋ᠶ᠋ᠡᠨ ᠤᠨᠠᠭᠠᠬᠤ ᠠᠶᠤᠯ ᠲᠠᠢ᠃ ᠮᠤᠰᠢᠭᠠᠢ ᠨᠢ ᠲᠠᠭᠠᠷᠠᠪᠠᠯ ᠴᠦ᠍ ᠪᠠᠰᠠ ᠬᠡᠢ ᠮᠣᠷᠢ ᠮᠠᠨᠳᠤᠵᠤ᠂ ᠬᠡᠨ ᠡᠴᠡ ᠴᠦ᠍ ᠳᠡᠭᠡᠭᠦᠷ ᠰᠡᠭᠰᠡᠯᠵᠡᠬᠦ ᠠᠵᠠ ᠵᠠᠪᠰᠢᠶᠠᠨ!》 ᠭᠡᠵᠦ ᠴᠣᠭᠪᠠᠭᠠᠲᠤᠷ ᠪᠣᠳᠣᠭᠠᠳ ᠬᠡᠰᠢᠭᠲᠡᠢ ᠶ᠋ᠢ ᠵᠠᠷᠯᠢᠭᠳᠠᠨ ᠪᠤᠭᠤᠲᠤ ᠶ᠋ᠢᠨ ᠠᠷᠤ ᠪᠠᠷ ᠰᠤᠨᠳᠠᠯᠠᠵᠤ ᠰᠢᠭᠤᠢᠲᠤ ᠶ᠋ᠢᠨ ᠠᠮᠠ ᠶ᠋ᠢ ᠰᠠᠬᠢᠨ ᠪᠣᠷᠣ ᠴᠡᠷᠢᠭ ᠦ᠋ᠨ ᠪᠠᠷᠠᠭᠤᠨᠰᠢᠯᠠᠬᠤ ᠶ᠋ᠢ ᠲᠤᠯᠤᠭᠠᠷᠠᠢ! ᠭᠡᠵᠦ ᠲᠤᠰᠢᠶᠠᠪᠠ᠃《ᠪᠠᠭᠠ ᠬᠠᠲᠤᠨ ᠤ᠋ ᠪᠠᠬᠠᠳᠤᠯ ᠢ᠋ ᠣᠯᠵᠤ ᠯᠢᠶᠠᠨᠵᠠᠩ ᠤ᠋ᠨ ᠲᠤᠰᠢᠶᠠᠯ ᠢ᠋ ᠬᠤᠷᠤᠭᠤ ᠢᠨᠴᠢᠳᠬᠦ ᠰᠢᠭ ᠠᠮᠠᠷᠬᠠᠨ ᠠᠪᠴᠢᠬᠠᠳᠠᠭ ᠮᠥᠨ ᠴᠦ᠍ ᠠᠵᠠ ᠲᠠᠢ ᠡᠷᠡ ᠶᠦᠮ ᠳᠡ! ᠣᠳᠣ ᠡᠷᠡ ᠰᠢᠨᠳᠠᠰᠤ ᠶ᠋ᠢ ᠴᠢᠨᠢ ᠰᠣᠷᠢᠳᠠᠭ ᠴᠠᠭ ᠪᠣᠯᠤᠭᠰᠠᠨ᠃ ᠭᠡᠳᠡᠢᠵᠦ ᠵᠣᠭᠰᠣᠴᠢᠬᠠᠭᠠᠳ ᠰᠢᠭᠡᠳᠡᠭ ᠡᠷᠡ ᠤᠤ? ᠶᠠᠪᠠᠭᠠᠨ ᠰᠠᠭᠤᠴᠢᠬᠠᠭᠠᠳ ᠠᠯᠴᠠᠢᠵᠤ ᠰᠢᠭᠡᠳᠡᠭ ᠡᠮᠡ ᠤᠤ? ᠭᠡᠳᠡᠭ ᠢ᠋ᠶ᠋ᠡᠨ ᠨᠢᠭᠡ ᠦᠵᠡᠭᠦᠯᠦᠨᠡ ᠪᠢᠵᠡ !》 ᠭᠡᠵᠦ ᠬᠡᠰᠢᠭᠲᠡᠢ ᠶ᠋ᠢ ᠬᠣᠷᠣ ᠰᠠᠨᠠᠵᠤ ᠲᠡᠩᠰᠡᠬᠦ ᠪᠡᠷ ᠪᠣᠯᠪᠠ᠃ ᠲᠡᠭᠡᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠰᠢᠯᠢᠳᠡᠭ ᠴᠡᠷᠢᠭ ᠢ᠋ᠶ᠋ᠡᠨ ᠰᠣᠩᠭᠣᠵᠤ ᠪᠤᠭᠤᠲᠤ ᠶ᠋ᠢᠨ ᠡᠮᠦᠨᠡᠭᠦᠷ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠥᠪᠡᠭᠡ ᠪᠠᠷᠢᠨ ᠰᠠᠯᠴᠢᠨ ᠤ᠋ ᠣᠯᠣᠮ ᠢ᠋ ᠰᠠᠬᠢᠬᠤ ᠪᠣᠯᠵᠤ᠂ ᠨᠥᠭᠦᠭᠡ ᠴᠡᠴᠡᠨ ᠫᠤᠤᠴᠢ ᠸᠠᠴᠢᠷᠪᠠᠲᠤ ᠪᠠᠷ ᠬᠣᠰᠢᠭᠤ ᠬᠦᠩ ᠦ᠋ᠨ ᠶᠠᠮᠤᠨ᠂ ᠪᠠᠭᠠ ᠬᠠᠲᠤᠨ ᠤ᠋ ᠠᠮᠤᠷ ᠢ᠋ ᠬᠠᠮᠠᠭᠠᠯᠠᠭᠤᠯᠬᠤ ᠪᠠᠷ ᠬᠣᠴᠣᠷᠭᠠᠪᠠ᠃
ᠠᠨᠴᠢᠨᠵᠠᠪ ᠠᠭᠤᠯᠠ ᠶ᠋ᠢᠨ ᠠᠷᠤ ᠳ᠋ᠠᠬᠢ ᠤᠯᠠᠭᠠᠨ ᠡᠷᠭᠢ ᠭᠡᠳᠡᠭ ᠭᠠᠵᠠᠷ ᠲᠤ ᠴᠣᠭᠪᠠᠭᠠᠲᠤᠷ ᠤ᠋ᠨ ᠡᠨᠡ ᠬᠦ᠌ ᠵᠠᠷᠯᠢᠭ ᠢ᠋ ᠬᠦᠯᠢᠶᠡᠵᠦ ᠠᠪᠤᠨ ᠶᠠᠭᠤ ᠴᠦ᠍ ᠭᠡᠰᠡᠨ ᠴᠡᠷᠢᠭ ᠦ᠋ᠨ ᠬᠠᠲᠠᠭᠤ ᠵᠠᠷᠯᠢᠭ ᠪᠣᠯᠬᠣᠷ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠴᠡᠷᠢᠭ ᠮᠣᠷᠢ ᠪᠠᠨ ᠠᠪᠴᠤ ᠬᠥᠳᠡᠯᠪᠡ᠃
ᠠᠨᠴᠢᠨᠵᠠᠪ ᠲᠡᠮᠦᠷᠰᠦ᠋ᠬᠡ ᠲᠡᠢ ᠬᠣᠶᠠᠭᠤᠯᠠ ᠠᠭᠤᠯᠠ ᠶ᠋ᠢᠨ ᠠᠷᠤ ᠳ᠋ᠤ᠌ ᠳᠡᠭᠡᠷᠡᠮ ᠲᠣᠨᠣᠭᠠ ᠬᠢᠭᠰᠡᠨ ᠬᠠᠷᠠ ᠨᠢᠳᠦᠲᠦ ᠶ᠋ᠢ ᠴᠠᠭᠠᠰᠢ ᠨᠢ ᠬᠠᠨᠳᠤᠭᠤᠯᠴᠢᠬᠠᠭᠠᠳ ᠨᠡᠯᠢᠶᠡᠳ ᠴᠡᠷᠢᠭ ᠮᠣᠷᠢ ᠴᠤᠭᠯᠠᠭᠤᠯᠤᠨ ᠶᠠᠪᠤᠵᠤ ᠪᠠᠭᠠ ᠬᠠᠲᠤᠨ ᠤ᠋ ᠴᠡᠷᠢᠭ ᠲᠦ᠍ ᠣᠷᠣᠪᠠ᠃ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠠᠩᠴᠢᠨᠵᠠᠪ ᠤ᠋ᠨ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ ᠪᠠᠶᠠᠷᠯᠠᠭᠰᠠᠨ ᠢ᠋ ᠶᠠᠭᠤᠨ ᠥᠭᠦᠯᠡᠬᠦ᠃
ᠪᠠᠭᠠ ᠬᠠᠲᠤᠨ ᠠᠩᠴᠢᠨᠵᠠᠪ ᠢ᠋ ᠪᠠᠢᠩᠭᠤ ᠳᠡᠷᠭᠡᠳᠡ ᠪᠡᠨ ᠪᠠᠢᠯᠭᠠᠵᠤ ᠪᠡᠶᠡ ᠳ᠋ᠡᠭᠡᠨ ᠬᠠᠨᠢ ᠲᠠᠲᠠᠬᠤ ᠶ᠋ᠢᠨ ᠰᠢᠯᠲᠠᠭ ᠢ᠋ᠶ᠋ᠠᠷ ᠥᠷᠥᠭᠡᠯ ᠦ᠋ᠨ ᠨᠢᠳᠦ ᠰᠡᠳᠬᠢᠯ ᠢ᠋ ᠬᠠᠭᠤᠷᠬᠤ ᠠᠷᠭᠠ ᠠᠪᠴᠤ《 ᠬᠡᠰᠢᠭᠲᠡᠢ》 ᠭᠡᠰᠡᠨ ᠨᠡᠷᠡ ᠪᠡᠷ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠶᠠᠮᠤᠨ ᠤ᠋ ᠠᠮᠤᠷ ᠢ᠋ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠦ᠋ᠨ ᠲᠤᠸᠠᠨᠵᠠᠩ ᠤ᠋ᠨ ᠲᠤᠰᠢᠶᠠᠯ ᠳ᠋ᠤ᠌ ᠲᠣᠮᠢᠯᠠᠵᠤ ᠬᠡᠰᠡᠭ ᠴᠡᠷᠢᠭ ᠵᠠᠬᠢᠷᠤᠭᠤᠯᠤᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠪᠠᠷᠠᠭᠤᠨ ᠬᠣᠢᠲᠤ ᠠᠷᠤ ᠶ᠋ᠢᠨ ᠤᠯᠠᠭᠠᠨ ᠡᠷᠭᠢ ᠶ᠋ᠢ ᠰᠠᠬᠢᠭᠤᠯᠪᠠ᠃
ᠮᠠᠷᠭᠠᠲᠤᠷ ᠲᠤᠨᠢ ᠠᠩᠴᠢᠨᠵᠠᠪ ᠴᠣᠭᠪᠠᠭᠠᠲᠤᠷ ᠲᠤᠸᠠᠨᠵᠠᠩ ᠲᠠᠢ ᠠᠭᠤᠯᠵᠠᠵᠤ ᠴᠡᠷᠢᠭ ᠮᠣᠷᠢᠨ ᠤ᠋ ᠪᠠᠨ ᠪᠠᠢᠳᠠᠯ ᠢ᠋ ᠲᠤᠰᠬᠠᠨ ᠭᠠᠷ ᠬᠣᠭᠣᠰᠣᠨ ᠢ᠋ᠶ᠋ᠠᠷ ᠶᠠᠭᠠᠬᠢᠵᠤ ᠪᠠᠢᠯᠳᠤᠨᠠ ᠪᠣᠢ ᠭᠡᠵᠦ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠴᠡᠷᠢᠭ ᠦ᠋ᠨ ᠣᠲ᠋ᠷᠢᠶᠠᠳ᠋ ᠠ᠋ᠴᠠ ᠰᠤᠮᠤ ᠳᠠᠷᠢ ᠵᠡᠷᠭᠡ ᠶᠠᠭᠤᠮᠠᠰ ᠢ᠋ ᠭᠤᠶᠤᠴᠢᠯᠠᠭᠰᠠᠨ ᠳ᠋ᠤ᠌ ᠴᠣᠭᠪᠠᠭᠠᠲᠤᠷ《ᠴᠢ ᠠᠩᠭᠠᠢᠵᠤ ᠢᠳᠡᠭᠡᠳ ᠲᠠᠩᠬᠠᠢᠭᠠᠳ ᠬᠡᠪᠲᠡᠵᠦ ᠪᠠᠢ᠂ ᠪᠢ ᠠᠶᠠᠭᠠᠨ ᠳ᠋ᠤ᠌ ᠴᠢᠨᠢ ᠬᠣᠭᠣᠯᠠ ᠬᠢᠴᠢᠬᠡᠭᠡᠳ ᠬᠠᠯᠪᠠᠭᠠ ᠪᠠᠷ ᠠᠮᠠᠨ ᠳ᠋ᠤ᠌ ᠴᠢᠨᠢ ᠲᠡᠵᠢᠭᠡᠶᠦ! ᠬᠥᠮᠦᠰᠬᠡᠨ ᠳᠣᠣᠷᠠ ᠴᠢᠨᠢ ᠳᠠᠢᠰᠤᠨ ᠬᠦᠷᠴᠦ ᠢᠷᠡᠭᠡᠳ ᠲᠣᠭᠣᠨᠣ ᠶ᠋ᠢ ᠴᠢᠨᠢ ᠴᠣᠭᠣᠯᠵᠤ᠂ ᠲᠣᠭᠣᠭᠠ ᠶ᠋ᠢ ᠴᠢᠨᠢ ᠴᠥᠮᠥᠯᠦᠨᠡ ᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠴᠢ ᠪᠠᠰᠠ ᠶᠠᠭᠤᠨ ᠤ᠋ ᠡᠨᠡ ᠲᠡᠷᠡ ᠭᠡᠬᠦ ᠲᠡᠢ ᠶᠦᠮ⁈ ᠤᠬᠠᠭᠠᠨ ᠳ᠋ᠤ᠌ ᠴᠢᠨᠢ ᠤᠩᠭᠠᠰᠤ ᠤᠷᠭᠤᠭᠰᠠᠨ ᠦᠭᠡᠢ ᠯᠡ ᠶᠦᠮ ᠪᠣᠯ ᠥᠪᠡᠷ ᠢ᠋ᠶ᠋ᠡᠨ ᠠᠷᠭᠠ ᠤᠬᠠᠭᠠᠨ ᠰᠦᠪᠡᠯᠡᠵᠦ ᠦᠵᠡᠨᠡ ᠪᠢᠵᠡ? ᠵᠦᠭᠡᠷ ᠯᠡ ᠪᠡᠯᠡᠨ ᠪᠤᠳᠠᠭᠠ ᠢᠳᠡᠵᠦ ᠦᠬᠦᠭᠰᠡᠨ ᠲᠡᠮᠡᠭᠡ ᠬᠠᠷᠢᠭᠤᠯᠬᠤ ᠶᠤᠮ ᠪᠣᠯ ᠴᠢᠮᠠ ᠪᠠᠷ ᠴᠡᠷᠢᠭ ᠨᠣᠶᠠᠯᠠᠭᠤᠯᠵᠤ ᠡᠴᠢᠭᠡ ᠪᠡᠨ ᠬᠢᠬᠦ ᠪᠣᠢ! ᠶᠠᠪᠤ᠂ ᠴᠠᠭᠠᠰᠢ ᠶᠠᠪᠤᠵᠤ ᠴᠥᠮᠥᠷᠡᠵᠦ ᠢᠷᠡᠬᠦ ᠶᠡᠬᠡ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠨᠥᠬᠥᠴᠡᠯ ᠦᠭᠡᠢ ᠲᠤᠯᠵᠤ ᠪᠠᠢ!》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠠᠩᠴᠢᠨᠵᠠᠪ ᠳᠣᠲᠣᠷᠠ ᠪᠠᠨ《ᠡᠢᠨ ᠬᠦ᠌ ᠭᠠᠷ ᠬᠣᠭᠣᠰᠣᠨ ᠭᠠᠨᠵᠤᠭᠠ ᠰᠤᠯᠠ ᠬᠥᠮᠦᠰ ᠶᠠᠭᠠᠬᠢᠵᠤ ᠴᠦ᠍ ᠁》 ᠭᠡᠵᠦ ᠲᠡᠭᠡᠨᠡᠭᠡᠯᠵᠡᠨ ᠴᠣᠭᠪᠠᠭᠠᠲᠤᠷ ᠤ᠋ᠨ ᠬᠠᠲᠠᠭᠤ ᠵᠠᠷᠯᠢᠭ ᠲᠣᠭᠰᠢᠨ ᠴᠢᠷᠠᠢ ᠶ᠋ᠢᠨ ᠡᠮᠦᠨᠡ ᠪᠡᠶᠡ ᠪᠡᠨ ᠬᠣᠷᠢᠵᠤ ᠵᠣᠭᠰᠣᠲᠠᠯᠠ《ᠴᠡᠷᠢᠭ ᠦ᠋ᠨ ᠵᠠᠷᠯᠢᠭ ᠢ᠋ ᠳᠠᠭᠠᠬᠤ ᠤᠤ? ᠪᠠᠢᠨᠠ ᠤᠤ? ᠡᠭᠦᠷᠭᠡ ᠪᠡᠶᠡᠯᠡᠭᠦᠯᠵᠦ ᠳᠡᠢᠯᠬᠦ ᠦᠭᠡᠢ ᠪᠣᠯ ᠡᠷᠲᠡᠬᠡᠨ ᠦᠭᠡ ᠪᠡᠨ ᠬᠡᠯᠡ! ᠴᠢᠨᠦ ᠣᠷᠣᠨ ᠳ᠋ᠤ᠌ ᠳᠠᠢᠰᠤᠨ ᠤ᠋ ᠡᠮᠦᠨᠡ ᠡᠴᠡ ᠭᠠᠯᠵᠠᠭᠤ ᠪᠤᠤᠷᠠ ᠰᠢᠭ᠋ ᠰᠢᠷᠦᠭᠦᠨ ᠣᠷᠣᠳᠠᠭ ᠮᠣᠩᠭᠣᠯ ᠡᠷᠡ ᠪᠠᠢᠬᠤ ᠯᠠ ᠪᠤᠶᠠᠨ! ᠬᠢᠬᠦ ᠳᠤᠷᠠ ᠦᠭᠡᠢ ᠪᠣᠯ ᠠᠬᠤᠷ ᠫᠤᠤ᠂ ᠮᠣᠷᠢ ᠬᠣᠶᠠᠷ ᠢ᠋ᠶ᠋ᠠᠨ ᠣᠷᠬᠢᠵᠤ ᠶᠣᠳᠠᠷ ᠵᠠᠢᠳᠠᠯᠠᠭᠠᠳ ᠴᠠᠭᠠᠰᠢ ᠲᠣᠨᠢᠯ!》 ᠭᠡᠵᠦ ᠬᠡᠭᠵᠢᠭᠦᠨ ᠵᠠᠩᠨᠠᠭᠰᠠᠨ ᠢ᠋ ᠠᠩᠴᠢᠨᠵᠠᠪ ᠰᠣᠨᠣᠰᠬᠤ ᠰᠠᠨᠠᠭᠠ ᠦᠭᠡᠢ ᠪᠣᠯᠪᠠᠴᠤ《ᠵᠠ᠂ ᠪᠡᠶᠡᠯᠡᠭᠦᠯᠦᠶᠡ》 ᠭᠡᠳ ᠶᠠᠪᠤᠵᠤ ᠣᠳᠪᠠ᠃
ᠠᠩᠴᠢᠨᠵᠠᠪ ᠲᠡᠨᠳᠡ ᠡᠴᠡ ᠭᠠᠷᠴᠤ《ᠡᠷᠬᠡ ᠰᠦᠷ᠂ ᠡᠳ᠋ ᠮᠥᠩᠭᠥ᠂ ᠡᠮᠡ ᠠᠪᠠᠬᠠᠢ》 ᠭᠤᠷᠪᠠ ᠠ᠋ᠴᠠ ᠥᠭᠡᠷᠡ ᠶᠠᠭᠤᠮᠠ ᠣᠯᠵᠤ ᠦᠵᠡᠳᠡᠭ ᠦᠭᠡᠢ ᠭᠠᠷᠠᠬᠠᠨ ᠨᠢᠳᠦᠲᠡᠢ ᠴᠣᠭᠪᠠᠭᠠᠲᠤᠷ ᠤ᠋ᠨ ᠡᠮᠦᠨᠡ ᠡᠴᠡ ᠶᠠᠭᠤ ᠭᠡᠵᠦ ᠬᠡᠯᠡᠯᠲᠡᠢ ᠪᠢᠯᠡ? ᠴᠡᠷᠢᠭ ᠨᠣᠶᠠᠯᠠᠬᠤ ᠪᠠᠢᠷᠢ ᠰᠠᠭᠤᠷᠢ ᠪᠠᠷ ᠢ᠋ᠶ᠋ᠠᠨ ᠲᠡᠭᠦᠨ ᠦ᠌ ᠳᠣᠣᠷᠠ ᠪᠠᠢᠳᠠᠭ ᠲᠠᠭᠠᠨ ᠠᠷᠭᠠ ᠦᠭᠡᠢ᠃ ᠭᠡᠪᠡᠴᠦ ᠲᠡᠷᠡ ᠴᠡᠷᠢᠭ ᠬᠥᠮᠦᠨ ᠦ᠌ ᠶᠣᠰᠣᠭᠠᠷ ᠴᠡᠷᠢᠭ ᠦ᠋ᠨ ᠬᠠᠲᠠᠭᠤ ᠵᠠᠷᠯᠢᠭ ᠲᠤ ᠡᠪᠦᠳᠦᠭ ᠨᠤᠭᠤᠷᠠᠭᠰᠠᠨ ᠠ᠋ᠴᠠ ᠪᠢᠰᠢ ᠴᠣᠭᠪᠠᠭᠠᠲᠤᠷ ᠤ᠋ᠨ ᠬᠤᠪᠢ ᠪᠡᠶᠡ ᠳ᠋ᠦ᠍ᠨᠢ ᠲᠣᠯᠣᠭᠠᠢ ᠮᠡᠬᠦᠢᠭᠡ ᠦᠭᠡᠢ᠃ ᠲᠡᠷᠡ ᠪᠡᠷ ᠴᠡᠷᠢᠭ ᠦ᠋ᠨ ᠬᠠᠲᠠᠭᠤ ᠰᠤᠷᠭᠠᠭᠤᠯᠢᠯᠠᠯ ᠲᠠᠢ ᠫᠤᠤ ᠵᠡᠪᠰᠡᠭ᠂ ᠮᠣᠷᠢ ᠤᠨᠤᠭᠠᠨ ᠳ᠋ᠠᠭᠠᠨ ᠰᠢᠯᠭᠠᠷᠠᠭᠰᠠᠨ ᠬᠠᠲᠠᠭᠤ ᠡᠷᠡ ᠲᠤᠯᠠ ᠨᠢᠭᠡ ᠳ᠋ᠦ᠍᠂ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠦ᠋ᠨ ᠡᠮᠦᠨᠡ ᠡᠴᠡ ᠴᠡᠷᠢᠭ ᠲᠥᠷᠥ ᠶ᠋ᠢᠨ ᠬᠠᠲᠠᠭᠤ ᠶᠣᠰᠣᠨ ᠳ᠋ᠤ᠌ ᠬᠤᠭᠤᠷᠠᠬᠤ ᠠ᠋ᠴᠠ ᠪᠢᠰᠢ ᠨᠤᠭᠤᠷᠠᠬᠤ ᠦᠭᠡᠢ᠂ ᠬᠡᠯᠡᠪᠡᠯ ᠦᠭᠡ᠂ ᠭᠢᠰᠬᠢᠪᠡᠯ ᠭᠠᠵᠠᠷ ᠭᠡᠵᠦ ᠶᠠᠪᠤᠬᠤ ᠶᠣᠰᠣᠲᠠᠢ᠃ ᠬᠣᠶᠠᠷ ᠲᠤ᠂ ᠠᠨᠳᠠ᠂ ᠠᠬᠠ ᠳᠡᠭᠦᠦ ᠶ᠋ᠢᠨ ᠵᠢᠷᠤᠮ ᠤ᠋ᠨ ᠲᠥᠯᠥᠭᠡ ᠶᠠᠭᠤᠨ ᠠ᠋ᠴᠠ ᠴᠦ᠍ ᠪᠤᠴᠠᠬᠤ ᠦᠭᠡᠢ᠃ ᠳᠠᠬᠢᠪᠠᠯ ᠮᠣᠩᠭᠣᠯ ᠨᠤᠲᠤᠭ ᠪᠠ ᠡᠵᠢ ᠬᠣᠶᠠᠷ ᠢ᠋ᠶ᠋ᠠᠨ ᠠᠮᠢ ᠲᠠᠢ ᠪᠠᠨ ᠬᠣᠯᠪᠣᠵᠤ ᠠᠨᠳᠠᠭᠠᠢᠯᠠᠨ ᠶᠠᠪᠤᠳᠠᠭ ᠵᠣᠷᠢᠭᠲᠤ ᠮᠣᠩᠭᠣᠯ ᠡᠷᠡ ᠶ᠋ᠢᠨ ᠨᠢᠭᠡ ᠭᠡᠵᠦ ᠪᠡᠶᠡ ᠪᠡᠨ ᠢᠲᠡᠭᠡᠳᠡᠭ ᠠᠵᠢ᠃
ᠠᠩᠴᠢᠨᠵᠠᠪ ᠴᠣᠭᠪᠠᠭᠠᠲᠤᠷ ᠤ᠋ᠨ ᠡᠨᠡ ᠬᠦ᠌ ᠵᠣᠷᠢᠭᠤᠳᠠ ᠲᠡᠭᠦᠨ ᠳ᠋ᠦ᠍ ᠭᠠᠴᠢᠯᠠᠩ ᠠᠮᠰᠠᠭᠤᠯᠤᠭᠰᠠᠨ ᠴᠡᠷᠢᠭ ᠦ᠋ᠨ ᠵᠠᠷᠯᠢᠭ ᠢ᠋ ᠦᠭᠡ ᠳᠠᠭᠤᠨ ᠦᠭᠡᠢ ᠬᠦᠯᠢᠶᠡᠬᠦ ᠯᠡ ᠬᠡᠷᠡᠭᠲᠡᠢ᠃ ᠲᠡᠭᠦᠨ ᠲᠡᠢ ᠨᠢᠭᠤᠷᠳᠠᠨ ᠥᠰᠢᠯᠳᠦᠵᠦ ᠳᠡᠭᠡᠷᠡ ᠳᠣᠣᠷᠠ ᠪᠠᠨ ᠭᠠᠷᠤᠨᠠ ᠭᠡᠭᠴᠢ ᠡᠨᠡ ᠬᠣᠷᠸᠠ ᠳ᠋ᠤ᠌ ᠪᠠᠢᠳᠠᠭ ᠦᠭᠡᠢ ᠶᠣᠰᠣ᠃ ᠲᠡᠷᠡ ᠮᠥᠷᠲᠡᠭᠡᠨ ᠥᠪᠡᠷ ᠢ᠋ᠶ᠋ᠡᠨ ᠨᠡᠷᠡ ᠪᠤᠷᠤᠭᠤᠯᠠᠵᠤ ᠶᠠᠪᠤᠭᠠ ᠬᠤᠪᠢ ᠲᠠᠪᠢᠯᠠᠩ ᠲᠠᠢ ᠭᠡᠳᠡᠭ ᠢ᠋ᠶ᠋ᠡᠨ ᠰᠠᠢᠨ ᠮᠡᠳᠡᠬᠦ ᠲᠤᠯᠠ《ᠴᠢ ᠬᠡᠯᠡᠳᠡᠭ ᠢ᠋ᠶ᠋ᠡᠨ ᠬᠡᠯᠡ᠂ ᠪᠢ ᠬᠢᠳᠡᠭ ᠢ᠋ᠶ᠋ᠡᠨ ᠬᠢᠶᠡ》 ᠭᠡᠵᠦ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠢᠴᠢᠯᠠᠨ ᠵᠡᠭᠦᠨᠰᠢᠯᠡᠪᠡ᠃
ᠲᠠᠷᠭᠤ ᠬᠦᠴᠦ᠂ ᠲᠠᠷ ᠲᠡᠩᠬᠡᠭᠡ ᠪᠡᠷ ᠬᠢᠷᠢᠲᠡᠢᠬᠡᠨ ᠲᠡᠩᠴᠡᠭᠰᠡᠨ ᠵᠠᠭᠤᠭᠠᠳ ᠮᠣᠷᠢᠲᠠᠳ ᠠᠩᠴᠢᠨᠵᠠᠪ ᠤ᠋ᠨ ᠳᠠᠢᠴᠢᠯᠠᠯ ᠢ᠋ᠶ᠋ᠠᠷ ᠬᠠᠳᠤᠮᠠᠯ ᠤ᠋ᠨ ᠠᠮᠠ ᠠ᠋ᠴᠠ ᠵᠡᠭᠦᠨᠰᠢ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠢ᠋ᠶ᠋ᠡᠷ ᠬᠠᠯᠬᠠᠪᠴᠢ ᠪᠠᠷᠢᠨ ᠪᠦᠯᠦᠭ ᠪᠦᠯᠦᠭ᠂ ᠠᠩᠭᠢ ᠠᠩᠭᠢ ᠪᠠᠷ ᠲᠣᠭᠣᠰᠣ ᠲᠠᠲᠠᠭᠤᠯᠤᠨ ᠴᠤᠪᠤᠷᠠᠨᠠ᠁
ᠪᠠᠰᠠ ᠲᠡᠭᠡᠭᠡᠳ ᠬᠡᠰᠡᠭ ᠴᠡᠷᠢᠭ ᠦ᠋ᠳ ᠨᠢ ᠶᠣᠳᠠᠷ ᠤ᠋ᠨ ᠣᠷᠣᠨ ᠳ᠋ᠤ᠌ ᠰᠣᠬᠣᠷ ᠰᠤᠮᠤ ᠴᠦ᠍ ᠦᠭᠡᠢ ᠬᠣᠩᠭᠢᠯᠳᠠᠭ ᠬᠥᠬᠡ ᠲᠡᠮᠦᠷ ᠡᠭᠦᠷᠦᠭᠰᠡᠨ ᠢ᠋ ᠬᠡᠨ ᠮᠡᠳᠡᠬᠦ ᠪᠣᠢ⁈《ᠦᠬᠡᠷ ᠫᠤᠤ᠂ ᠫᠦᠯᠧᠮᠶᠣᠲ ᠲᠠᠢ ᠪᠣᠷᠣ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠲᠤᠯᠤᠨᠠ ᠭᠡᠨᠡ ᠰᠢᠦ! ᠡᠨᠡ ᠬᠡᠳᠦᠨ ᠮᠣᠩᠭᠣᠯ ᠡᠷᠡ ᠶ᠋ᠢᠨ ᠶᠠᠰᠤ ᠶ᠋ᠢ ᠲᠡᠨᠳᠡ ᠠᠪᠠᠴᠢᠵᠤ ᠵᠥᠪ ᠵᠦᠭᠡᠷ ᠫᠤᠤ ᠶ᠋ᠢᠨ ᠪᠥᠭᠯᠡᠭᠡ ᠪᠣᠯᠭᠠᠬᠤ ᠶ᠋ᠢᠨ ᠨᠡᠮᠡᠷᠢ!》 ᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ ᠠᠩᠴᠢᠨᠵᠠᠪ ᠤ᠋ᠨ ᠬᠥᠬᠡ ᠢᠨᠢᠶᠡᠳᠦ ᠨᠢ ᠬᠦᠷᠴᠦ᠂ ᠳᠠᠷᠢ ᠤᠲᠤᠭᠠ ᠪᠢᠰᠢ ᠮᠣᠷᠢᠨ ᠤ᠋ ᠬᠥᠯᠥᠰᠥᠨ ᠳ᠋ᠦ᠍ ᠳᠡᠪᠲᠦᠭᠰᠡᠨ ᠪᠤᠯᠢᠭᠠᠷᠢ ᠭᠥᠯᠢᠮ ᠦ᠋ᠨ ᠲᠠᠭᠠᠲᠠᠢ ᠦᠨᠦᠷ ᠲᠦ᠍ ᠬᠡᠰᠡᠭ ᠰᠣᠭᠲᠣᠭᠤᠷᠠᠨ ᠭᠠᠯᠭᠢᠭᠤᠯᠤᠨᠠ᠃
ᠠᠩᠴᠢᠨᠵᠠᠪ ᠤ᠋ᠨ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠪᠤᠭᠤᠲᠤ ᠠ᠋ᠴᠠ ᠴᠠᠭᠠᠰᠢ ᠵᠡᠭᠦᠨᠰᠢᠯᠡᠵᠦ ᠶᠠᠪᠤᠭᠠᠳ ᠰᠢᠭᠤᠢᠲᠤ ᠶ᠋ᠢᠨ ᠠᠮᠠ᠂ ᠠᠳᠤᠭᠤᠨ ᠤ᠋ ᠠᠢᠯ᠂ ᠰᠠᠯᠴᠢᠨ ᠰᠦᠮᠡ ᠶ᠋ᠢᠨ ᠬᠠᠪᠢ ᠪᠠᠷ ᠬᠣᠷᠭᠣᠳᠠᠵᠤ ᠵᠡᠭᠦᠨᠲᠡᠢ ᠡᠴᠡ ᠴᠥᠮᠥᠷᠡᠨ ᠢᠷᠡᠬᠦ ᠪᠣᠷᠣ ᠴᠡᠷᠢᠭ ᠦ᠋ᠨ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠬᠤ ᠳ᠋ᠠᠭᠠᠨ ᠪᠠᠴᠢᠮ ᠲᠤᠯᠭᠠᠭᠤ ᠪᠠᠢᠳᠠᠯ ᠳ᠋ᠤ᠌ ᠳᠠᠭᠠᠷᠢᠬᠤ᠂ ᠤᠬᠤᠷᠢᠬᠤ᠂ ᠪᠤᠯᠲᠠᠬᠤ ᠠᠯᠢᠨ ᠳ᠋ᠤ᠌ ᠴᠦ᠍ ᠠᠰᠢᠭ ᠲᠠᠢ ᠣᠷᠣᠨ ᠪᠠᠢᠷᠢ ᠶ᠋ᠢ ᠡᠵᠡᠯᠡᠪᠡ᠃ ᠳᠣᠪᠣ ᠰᠣᠨᠳᠤᠤᠯᠠ᠂ ᠬᠥᠲᠥᠯ ᠳᠠᠪᠠᠭᠠ᠂ ᠵᠢᠯᠠᠭᠠ ᠰᠠᠳᠠᠷᠭᠠ ᠶ᠋ᠢᠨ ᠠᠮᠠ ᠶ᠋ᠢ ᠠᠪᠴᠤ ᠬᠡᠳᠦᠨ ᠡᠳᠦᠷ ᠪᠦᠭᠭᠦᠪᠡ᠃ ᠭᠤᠷᠪᠠᠳᠠᠬᠢ ᠡᠳᠦᠷ ᠦ᠋ᠨ ᠥᠷᠯᠥᠭᠡ ᠡᠷᠲᠡ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠬᠠᠢᠭᠤᠯ ᠤ᠋ᠨ ᠵᠢᠰᠢᠶᠠᠨ ᠤ᠋ ᠴᠡᠷᠢᠭ ᠪᠠᠴᠢᠮ ᠴᠢᠮᠡᠭᠡ ᠤᠯᠠᠮᠵᠢᠯᠠᠨ ᠢᠷᠡᠭᠦᠯᠬᠦ ᠳ᠋ᠡᠭᠡᠨ᠂ ᠪᠣᠷᠣ ᠴᠡᠷᠢᠭ ᠦ᠋ᠳ ᠦᠨᠡᠬᠡᠷ ᠰᠠᠭᠠᠯᠢᠴᠢᠨ ᠠ᠋ᠴᠠ ᠪᠠᠷᠠᠭᠤᠨᠰᠢ ᠰᠤᠨᠤᠭᠰᠠᠨ ᠰᠢᠷᠠ ᠵᠠᠮ ᠢ᠋ᠶ᠋ᠠᠷ ᠰᠢᠷᠭᠤᠯᠵᠢ ᠶ᠋ᠢᠨ ᠰᠦᠷᠦᠭ ᠰᠢᠭ ᠪᠣᠷᠣᠯᠠᠵᠤ ᠠᠢᠰᠤᠢ ᠭᠡᠪᠡ᠃
ᠠᠩᠴᠢᠨᠵᠠᠪ ᠳᠤᠷᠠᠨ ᠠᠪᠴᠤ ᠱᠠᠭᠠᠢᠪᠠᠯ᠂ ᠦᠬᠡᠷ ᠫᠤᠤ᠂ ᠬᠣᠨᠢᠨ ᠫᠤᠤ①᠂ ᠬᠦᠨᠳᠦ ᠬᠥᠩᠭᠡᠨ ᠫᠦᠯᠧᠮᠶᠣᠲ ᠠᠴᠢᠭᠰᠠᠨ ᠲᠡᠷᠭᠡ᠂ ᠶᠠᠪᠠᠭᠠᠨ ᠫᠤᠤ ᠡᠭᠦᠷᠴᠦ ᠡᠪᠦᠳᠦᠭ ᠡᠴᠡ ᠪᠡᠨ ᠱᠠᠭᠠᠨᠲᠤ ᠬᠦᠷᠲᠡᠯᠡ ᠪᠡᠨ ᠨᠠᠷᠢᠨ ᠰᠢᠯᠪᠢ ᠪᠡᠨ ᠵᠣᠮᠪᠣᠢᠲᠠᠯᠠ ᠣᠷᠢᠶᠠᠭᠰᠠᠨ ᠪᠣᠷᠣ ᠪᠣᠷᠣ ᠬᠣᠪᠴᠠᠰᠤᠲᠠᠢ ᠴᠡᠷᠢᠭ ᠦ᠋ᠳ ᠦᠶᠡᠷ ᠦ᠋ᠨ ᠤᠰᠤ ᠳᠣᠯᠭᠢᠶᠠᠯᠠᠬᠤ ᠰᠢᠭ᠋ ᠢᠷᠡᠵᠦ ᠶᠠᠪᠤᠨᠠ᠃ ᠴᠢᠴᠧ ᠮᠠᠰᠢᠨ᠂ ᠠᠴᠢᠶᠠ ᠬᠥᠰᠭᠡᠲᠦ ᠲᠡᠷᠭᠡ ᠤᠨᠤᠭᠠ᠂ ᠮᠣᠷᠢᠨ ᠴᠡᠷᠢᠭ ᠂ ᠶᠠᠪᠠᠭᠠᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠵᠢᠪᠬᠤᠯᠠᠩᠲᠤ ᠠᠯᠬᠤᠭᠠ ᠵᠢᠭᠳᠡᠬᠡᠨ ᠵᠢᠷᠪᠢᠯᠵᠡᠬᠦ ᠶ᠋ᠢ ᠬᠠᠷᠠᠭᠠᠳ ᠲᠡᠷᠡ ᠳᠣᠲᠣᠷᠠ ᠪᠠᠨ《ᠡᠢᠮᠦ ᠯᠡ ᠴᠡᠷᠢᠭ ᠲᠦ᠍ ᠨᠣᠶᠠᠯᠠᠵᠤ ᠶᠠᠪᠤᠪᠠᠯ ᠰᠠᠶᠢ ᠨᠢᠷᠤᠭᠤ ᠬᠠᠲᠠᠭᠤ ᠳᠠ! ᠬᠠᠨᠳᠤᠭᠰᠠᠨ ᠵᠦᠭ ᠲᠦ᠍ ᠳᠠᠢᠰᠤᠨ ᠦᠭᠡᠢ᠂ ᠬᠠᠷᠪᠤᠭᠰᠠᠨ ᠰᠤᠮᠤᠨ ᠳ᠋ᠤ᠌ ᠰᠠᠭᠠᠳ ᠦᠭᠡᠢ ᠭᠡᠭᠴᠢ ᠡᠭᠦᠨ ᠢ᠋ ᠯᠡ ᠶᠠᠷᠢᠳᠠᠭ ᠪᠠᠢᠬᠠ ᠠ᠋! ᠬᠡᠩ! ᠴᠣᠭᠪᠠᠭᠠᠲᠤᠷ ᠮᠠᠭᠤ ᠯᠦᠳ᠋ ᠦ᠋ᠨ ᠤᠬᠠᠭᠠᠨ ᠳ᠋ᠤ᠌ ᠴᠢᠨᠢ ᠤᠬᠤᠨᠠ ᠦᠬᠦᠴᠢᠬᠡᠵᠡᠢ᠃ ᠴᠢ ᠪᠢᠳᠡ ᠬᠣᠶᠠᠷ ᠲᠡᠨᠡᠭ ᠲᠡᠭᠡᠨ ᠭᠡᠬᠦ ᠤᠤ? ᠳᠤᠷᠠ ᠲᠠᠢ ᠳ᠋ᠠᠭᠠᠨ ᠭᠡᠬᠦ ᠤᠤ? ᠶᠣᠰᠣᠲᠠᠢ ᠯᠠ ᠬᠠᠷᠠ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠪᠣᠷᠣ ᠴᠡᠷᠢᠭ ᠲᠦ᠍ ᠳᠠᠢᠰᠤᠨ ᠪᠣᠯᠤᠭᠰᠠᠨ ᠮᠢᠬᠠᠨ ᠪᠠᠮᠪᠠᠢ ᠪᠠᠢᠨᠠ ᠳᠠ! ᠦᠮᠡᠬᠡᠢ ᠵᠣᠪᠠᠯᠭᠠ ᠳ᠋ᠤ᠌ ᠴᠢᠨᠢ ᠱᠤᠤᠭᠢᠵᠤ ᠢᠷᠡᠬᠦ ᠰᠤᠮᠤ ᠣᠷᠣᠳᠠᠭ ᠦᠭᠡᠢ ᠭᠡᠵᠦ ᠰᠠᠨᠠᠪᠠ ᠤᠤ? ᠥᠷᠯᠥᠭ ᠴᠢᠩᠭᠢᠰ ᠦ᠋ᠨ ᠦᠷᠡᠰ ᠦᠬᠦᠳᠡᠭ ᠦᠭᠡᠢ ᠭᠡᠵᠦ ᠢᠲᠡᠭᠡᠪᠡ ᠤᠤ? ᠠᠢ ᠳᠠ! ᠮᠠᠨ ᠤ᠋ ᠡᠨᠡ ᠭᠣᠳ ᠴᠣᠳ ᠭᠡᠰᠡᠨ ᠬᠡᠳᠦᠬᠡᠨ ᠴᠡᠷᠢᠭ᠂ ᠲᠡᠷᠡ ᠮᠥᠷᠲᠡᠭᠡᠨ ᠭᠠᠷ ᠬᠣᠭᠣᠰᠣᠨ ᠢ᠋ᠶ᠋ᠠᠷ ᠶᠠᠭᠠᠬᠢᠵᠤ ᠴᠦ᠍ ᠡᠨᠡ ᠶᠡᠬᠡ ᠪᠣᠷᠣ ᠴᠡᠷᠢᠭ ᠲᠡᠢ ᠲᠤᠯᠤᠯᠳᠤᠵᠤ ᠳᠡᠢᠯᠬᠦ ᠪᠣᠢ! ᠶᠣᠰᠣᠲᠠᠢ ᠯᠠ ᠰᠢᠯ ᠪᠣᠯᠣᠷ ᠪᠥᠮᠪᠥᠭᠡ ᠰᠢᠷᠡᠮᠦᠨ ᠪᠤᠯᠤ ᠲᠠᠢ ᠮᠥᠷᠭᠥᠯᠳᠦᠵᠦ ᠰᠦᠢᠷᠡᠬᠦ ᠨᠢ ᠲᠡᠷᠡ ᠠ᠋》 ᠭᠡᠵᠦ ᠪᠣᠳᠣᠵᠤ ᠠᠮᠵᠢᠨ《ᠪᠤᠰᠢᠭᠤᠬᠠᠨ ᠮᠣᠷᠢ ᠬᠠᠷᠠ ᠪᠠᠨ ᠡᠮᠡᠭᠡᠯᠯᠡᠵᠦ᠂ ᠪᠤᠯᠲᠠᠵᠤ ᠭᠠᠷᠬᠤ ᠶ᠋ᠢ ᠪᠣᠳᠣ! ᠮᠠᠷᠭᠠᠲᠤᠷ ᠤ᠋ᠨ ᠣᠷᠣᠢ ᠮᠢᠩᠭᠠᠨ ᠤ᠋ ᠲᠠᠯᠠ ᠶ᠋ᠢᠨ ᠰᠢᠨᠠᠭᠠᠨ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠲᠦ᠍ ᠴᠤᠭᠯᠠᠷᠠ!》 ᠭᠡᠵᠦ ᠵᠠᠷᠯᠢᠭ ᠳᠠᠮᠵᠢᠭᠤᠯᠪᠠ᠃
ᠠᠩᠴᠢᠨᠵᠠᠪ ᠤ᠋ᠨ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ《ᠤᠬᠤᠷᠢ》 ᠭᠡᠰᠡᠨ ᠵᠠᠷᠯᠢᠭ ᠢ᠋ ᠳᠠᠮ ᠳᠠᠮ ᠤᠯᠠᠮᠵᠢᠯᠠᠨ ᠲᠡᠨᠳᠡ ᠡᠴᠡ ᠲᠦᠷᠭᠡᠨ ᠵᠠᠢᠯᠠᠵᠤ᠂ ᠰᠢᠭᠤᠢᠲᠤ᠂ ᠬᠥᠨᠳᠡᠯᠡᠨ᠂ ᠬᠠᠳᠤᠮᠠᠯ ᠤ᠋ᠨ ᠭᠣᠣᠯ ᠢ᠋ ᠥᠭᠰᠥᠨ ᠪᠤᠷᠤᠭᠤᠯᠠᠪᠠ᠃ ᠲᠡᠷᠡ ᠪᠣᠷᠣ ᠴᠡᠷᠢᠭ ᠨᠢᠭᠡ ᠯᠡ ᠡᠳᠦᠷ ᠰᠥᠨᠢ ᠶ᠋ᠢᠨ ᠵᠠᠢ ᠳ᠋ᠤ᠌ ᠪᠤᠭᠤᠲᠤ ᠶ᠋ᠢ ᠳᠠᠭᠠᠷᠢᠨ ᠡᠵᠡᠯᠡᠳᠡᠭ ᠢ᠋ᠶ᠋ᠡᠨ ᠡᠵᠡᠯᠡᠵᠦ ᠠᠮᠵᠢᠪᠠ᠃ ᠬᠠᠷᠠ ᠴᠡᠷᠢᠭ ᠦ᠋ᠨ ᠦᠯᠡᠳᠡᠭᠳᠡᠯ ᠴᠡᠷᠢᠭ ᠪᠠᠷᠠᠭᠤᠨᠰᠢ ᠪᠣᠷᠣᠲᠣᠬᠣᠢ ᠤᠷᠤᠭᠤ ᠤᠬᠤᠷᠢᠵᠤ ᠵᠠᠪᠳᠤᠭᠠᠳᠤᠢ ᠪᠠᠷ ᠳᠠᠭᠠᠷᠢᠭᠳᠠᠪᠠ᠃
ᠪᠤᠭᠤᠲᠤ ᠶ᠋ᠢᠨ ᠡᠮᠦᠨᠡ ᠵᠠᠮ ᠰᠠᠯᠴᠢᠨ ᠤ᠋ ᠣᠯᠣᠮ ᠢ᠋ ᠰᠠᠬᠢᠭᠰᠠᠨ ᠴᠣᠭᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠲᠡᠷᠡ ᠶᠡᠬᠡ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠫᠠᠷᠲ᠋ᠢᠽᠠᠨᠴᠢᠯᠠᠨ ᠴᠣᠬᠢᠵᠤ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠵᠡᠭᠡᠰᠦ ᠬᠤᠯᠤᠰᠤᠨ ᠳ᠋ᠤ᠌ ᠨᠢᠭᠤᠭᠳᠠᠨ ᠬᠣᠷᠭᠣᠳᠠᠨᠠ᠃ ᠴᠣᠭᠪᠠᠭᠠᠲᠤᠷ ᠳᠣᠲᠣᠷᠠ ᠪᠠᠨ《ᠠᠷᠤ ᠲᠠᠯᠠ ᠶ᠋ᠢᠨ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠵᠠᠮ ᠢ᠋ᠶ᠋ᠠᠷ ᠬᠡᠰᠢᠭᠲᠡᠢ ᠶ᠋ᠢᠨ ᠴᠡᠷᠢᠭ ᠰᠠᠬᠢᠵᠤ ᠪᠠᠢᠭᠠ᠁ ᠬᠡᠰᠢᠭᠲᠡᠢ ᠶ᠋ᠢᠨ ᠴᠡᠷᠢᠭ ᠵᠠᠬᠢᠷᠬᠤ ᠠᠪᠢᠶᠠᠰ ᠴᠢᠳᠠᠪᠤᠷᠢ ᠶᠠᠮᠠᠷᠬᠠᠨ ᠭᠡᠳᠡᠭ ᠢ᠋ ᠣᠢᠯᠠᠭᠠᠬᠤ ᠦᠭᠡᠢ᠃ ᠲᠡᠭᠦᠨ ᠦ᠌ ᠤᠬᠠᠭᠠᠨ ᠲᠠᠮᠢᠷ ᠢ᠋ ᠪᠢ ᠠᠮᠠᠨ ᠳᠡᠭᠡᠷᠡ ᠪᠡᠨ ᠵᠥᠪᠰᠢᠶᠡᠷᠡᠳᠡᠭ ᠦᠭᠡᠢ ᠪᠣᠯᠪᠠᠴᠤ ᠠᠶᠤᠤᠯᠢᠬᠠᠢ ᠳᠣᠲᠣᠷᠠ ᠪᠠᠨ ᠪᠣᠯ ᠪᠢᠰᠢᠷᠡᠨᠡ᠃ ᠨᠠᠳᠠ ᠠ᠋ᠴᠠ ᠳᠠᠪᠠᠨᠠ ᠤᠤ ᠭᠡᠬᠦ ᠡᠴᠡ ᠬᠣᠴᠣᠷᠬᠤ ᠦᠭᠡᠢ᠃ ᠲᠡᠷᠡ ᠭᠠᠢᠬᠠᠯ ᠴᠦ᠍ ᠰᠢᠭᠤᠢᠲᠤ ᠶ᠋ᠢᠨ ᠠᠮᠠ ᠶ᠋ᠢ ᠦᠬᠦᠬᠦᠸᠡᠷ ᠰᠠᠬᠢᠵᠤ ᠰᠠᠬᠢᠵᠤ ᠪᠠᠢᠭᠠ᠃ ᠡᠨᠡ ᠤᠳᠠᠭᠠᠨ ᠤ᠋ ᠲᠤᠯᠤᠯᠳᠤᠭᠠᠨ ᠢ᠋ ᠦᠨᠡᠨ ᠳ᠋ᠡᠭᠡᠨ ᠲᠡᠷᠡ ᠪᠢᠳᠡ ᠬᠣᠶᠠᠷ ᠤ᠋ᠨ ᠡᠷᠡ ᠴᠢᠳᠠᠯ ᠢ᠋ᠶ᠋ᠠᠨ ᠰᠢᠯᠭᠠᠭᠰᠠᠨ ᠮᠥᠷᠥᠢ ᠭᠡᠪᠡᠴᠦ ᠪᠣᠯᠤᠨᠠ᠃ ᠲᠡᠢᠮᠦ ᠪᠡᠷ ᠤᠬᠠᠭᠠᠨ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠠᠪᠢᠶᠠ ᠪᠠᠢᠭᠤᠯᠵᠤ᠂ ᠪᠠᠭᠠ ᠬᠠᠲᠤᠨ ᠢ᠋ᠶ᠋ᠠᠷ ᠳᠠᠮᠵᠢᠨ ᠪᠦᠷ ᠳᠡᠭᠡᠷᠡᠬᠢ ᠶ᠋ᠢᠨ ᠬᠥᠮᠦᠨ ᠳ᠋ᠦ᠍ ᠲᠣᠭᠣᠭᠳᠠᠪᠠᠯ ᠴᠦ᠍ ᠪᠠᠰᠠ ᠠᠮᠠᠷ ᠦᠭᠡᠢ ᠳᠡ!》 ᠭᠡᠵᠦ ᠰᠢᠵᠠᠭᠤᠷ ᠵᠠᠭᠤᠨ ᠬᠠᠶᠠ ᠨᠢᠭᠡ ᠵᠠᠪᠰᠠᠷ ᠵᠠᠭᠠᠯᠢᠬᠠᠢ ᠪᠠᠷ ᠭᠣᠳ ᠴᠣᠳ ᠬᠢᠨ ᠫᠤᠤ ᠳᠤᠤᠭᠠᠷᠭᠠᠵᠤ᠂ ᠵᠥᠭᠡᠢ ᠶ᠋ᠢᠨ ᠡᠭᠦᠷ ᠰᠡᠭᠴᠢᠭᠰᠡᠨ ᠰᠢᠦᠬᠡᠨ ᠶᠠᠭᠤᠮᠠ ᠪᠣᠯᠵᠤ ᠪᠣᠷᠣ ᠴᠡᠷᠢᠭ ᠦ᠋ᠨ ᠬᠠᠵᠠᠭᠤ ᠬᠠᠪᠢᠷᠭᠠ ᠪᠠᠷ ᠭᠣᠳᠯᠠᠵᠤ ᠠᠲᠠᠯᠠ ᠭᠡᠨᠡᠳᠲᠡ ᠨᠢᠭᠡ ᠰᠥᠨᠢ ᠲᠡᠭᠦᠨ ᠦ᠌ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠠᠷᠤ ᠬᠣᠢᠨᠠ ᠠ᠋ᠴᠠ ᠨᠢ ᠪᠦᠰᠡᠯᠡᠨ ᠰᠢᠷᠦᠭᠦᠨ ᠳᠠᠭᠠᠷᠢᠯᠲᠠ ᠬᠢᠪᠡ᠃ ᠴᠣᠭᠪᠠᠭᠠᠲᠤᠷ ᠤ᠋ᠨ ᠶᠢᠰᠦᠨ ᠪᠣᠳᠣᠯ ᠤ᠋ᠨ ᠵᠠᠢ ᠳ᠋ᠤ᠌ ᠣᠷᠣᠭᠰᠠᠨ ᠦᠭᠡᠢ ᠡᠨᠡ ᠬᠦ᠌ ᠭᠡᠨᠡᠳᠲᠡ ᠶ᠋ᠢᠨ ᠳᠠᠭᠠᠷᠢᠯᠲᠠ ᠲᠡᠭᠦᠨ ᠦ᠌ ᠴᠡᠷᠢᠭ ᠢ᠋ ᠶᠡᠬᠡᠳᠡ ᠬᠣᠬᠢᠷᠠᠭᠠᠪᠠ᠃ ᠲᠡᠷᠡ ᠪᠡᠷ ᠠᠷᠭᠠ ᠪᠤᠶᠤ ᠦᠯᠡᠮᠵᠢ ᠴᠡᠷᠢᠭ ᠮᠣᠷᠢ ᠪᠠᠨ ᠦᠷᠡᠭᠡᠵᠦ ᠰᠥᠨᠢᠵᠢᠨ ᠤᠯᠠᠭᠠᠨ ᠬᠠᠲᠤᠨ ᠢ᠋ ᠭᠠᠲᠤᠯᠵᠤ ᠠᠷᠠᠢ ᠴᠢᠷᠠᠢ ᠠᠮᠢ ᠵᠤᠯᠪᠠᠪᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠬᠠᠷᠠ ᠴᠡᠷᠢᠭ ᠦ᠋ᠨ ᠬᠢᠨ ᠦ᠌ ᠵᠡᠪᠰᠡᠭᠲᠦ ᠠᠷᠮᠢ ᠶ᠋ᠢᠨ ᠬᠡᠰᠡᠭ ᠴᠡᠷᠢᠭ ᠨᠢ ᠪᠤᠭᠤᠲᠤ ᠠ᠋ᠴᠠ ᠭᠠᠷᠴᠤ ᠨᠢᠭᠡ ᠡᠳᠦᠷ ᠦ᠋ᠨ ᠵᠠᠮ ᠬᠥᠭᠡᠭᠡᠵᠦ ᠬᠣᠶᠠᠷᠬᠤᠳᠲᠤᠭ ᠲᠤ ᠬᠦᠷᠦᠭᠡᠳ᠂ ᠪᠦᠷᠦᠢ ᠪᠣᠯᠬᠤ ᠳ᠋ᠤ᠌《ᠮᠠᠨ ᠤ᠋ ᠠᠷᠤ ᠳ᠋ᠤ᠌ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠶᠠᠮᠤᠨ ᠤ᠋ ᠴᠡᠷᠢᠭ ᠴᠠᠭᠠᠨᠠ ᠠ᠋ᠴᠠ ᠴᠥᠮᠥᠷᠡᠵᠦ ᠢᠷᠡᠬᠦ ᠪᠣᠷᠣ ᠴᠡᠷᠢᠭ ᠲᠡᠢ ᠲᠤᠯᠤᠯᠳᠤᠵᠤ ᠪᠠᠢᠭᠠ ᠶᠤᠮ᠃ ᠦᠬᠦᠬᠦ ᠡᠴᠡ ᠴᠦ᠍ ᠪᠤᠴᠠᠳᠠᠭ ᠦᠭᠡᠢ ᠡᠷᠡᠯᠬᠡᠭ ᠮᠣᠩᠭᠣᠯ ᠮᠣᠷᠢᠨ ᠴᠡᠷᠢᠭ ᠦ᠋ᠨ ᠬᠠᠰᠢᠯᠭᠠ ᠶ᠋ᠢ ᠰᠡᠲᠡᠯᠵᠦ ᠣᠷᠣᠬᠤ ᠭᠡᠭᠴᠢ ᠲᠡᠢᠮᠦ ᠬᠢᠯᠪᠠᠷ ᠪᠢᠰᠢ ᠠ᠋!》 ᠭᠡᠵᠦ ᠰᠡᠳᠬᠢᠯ ᠰᠠᠨᠠᠭᠠ ᠠᠮᠤᠷ ᠲᠡᠨᠳᠡ ᠪᠡᠨ ᠬᠣᠨᠣᠭᠯᠠᠪᠠ᠃ ᠭᠡᠨᠡᠳᠲᠡ ᠰᠥᠨᠢ ᠪᠡᠷ ᠫᠤᠤ ᠳᠤᠤᠭᠠᠷᠴᠤ ᠪᠣᠷᠣ ᠴᠡᠷᠢᠭ ᠲᠦ᠍ ᠪᠦᠰᠡᠯᠡᠭᠳᠡᠭᠰᠡᠨ ᠬᠠᠷᠠ ᠴᠡᠷᠢᠭ ᠰᠥᠨᠢᠵᠢᠨ ᠪᠠᠢᠯᠳᠤᠪᠠ᠃ ᠳᠠᠷᠠᠭᠠ ᠥᠷᠯᠥᠭᠡ ᠡᠷᠲᠡ ᠥᠨᠥᠬᠢ ᠵᠡᠪᠰᠡᠭᠲᠦ ᠠᠷᠮᠢ ᠶ᠋ᠢᠨ ᠬᠡᠰᠡᠭ ᠴᠡᠷᠢᠭ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠵᠦᠭ ᠪᠤᠷᠤᠭᠤᠯᠠᠵᠤ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠠᠭᠤᠢ ᠶ᠋ᠢᠨ ᠭᠣᠣᠯ᠂ ᠤᠯᠠᠭᠠᠨᠪᠤᠯᠠᠭ᠂ ᠮᠡᠷᠭᠡᠨ ᠭᠣᠣᠯ ᠢ᠋ᠶ᠋ᠠᠷ ᠥᠭᠡᠳᠡᠯᠡᠨ ᠠᠮᠢ ᠲᠡᠮᠡᠴᠡᠨ ᠵᠢᠭᠤᠲᠠᠪᠠ᠃ ᠡᠨᠡ ᠨᠢ ᠦᠨᠡᠨ ᠳ᠋ᠡᠭᠡᠨ ᠪᠦᠰᠡᠯᠡᠯᠲᠡ ᠶ᠋ᠢᠨ ᠣᠭᠣᠰᠣᠷ ᠢ᠋ ᠠᠳᠬᠤᠵᠤ ᠪᠠᠢᠭᠰᠠᠨ ᠪᠣᠷᠣ ᠴᠡᠷᠢᠭ ᠦ᠋ᠳ ᠵᠣᠷᠢᠭᠤᠳᠠ ᠵᠠᠮ ᠲᠠᠯᠪᠢᠵᠤ ᠳᠤᠲᠠᠭᠠᠯᠭᠠᠭᠰᠠᠨ ᠬᠡᠷᠡᠭ ᠪᠠᠢᠵᠠᠢ᠃ ᠬᠠᠰᠢᠯᠭᠠ ᠪᠣᠭᠣᠳᠠᠭ ᠢ᠋ᠶ᠋ᠠᠨ ᠰᠡᠲᠡᠯᠦᠭᠰᠡᠨ ᠣᠷᠭᠣᠳᠠᠭᠤᠯ ᠤ᠋ᠨ ᠬᠠᠷᠠ ᠴᠡᠷᠢᠭ ᠦ᠋ᠳ ᠵᠠᠮᠪᠠᠷᠠᠭᠠ ᠦᠭᠡᠢ ᠳᠤᠲᠠᠭᠠᠭᠰᠠᠨ ᠳ᠋ᠤ᠌ ᠠᠷᠤ ᠠ᠋ᠴᠠ ᠨᠢ ᠪᠣᠷᠣ ᠴᠡᠷᠢᠭ ᠦᠬᠡᠷ ᠫᠤᠤ ᠪᠠᠷ ᠳᠡᠯᠪᠡᠴᠢᠵᠦ ᠪᠠᠢᠭᠠᠳ ᠰᠥᠨᠥᠭᠡᠵᠡᠢ᠃ ᠳᠤᠲᠠᠭᠠᠵᠤ ᠭᠠᠷᠤᠭᠰᠠᠨ ᠴᠥᠭᠡᠪᠦᠷ ᠬᠠᠷᠠ ᠴᠡᠷᠢᠭ ᠦ᠋ᠳ ᠠᠭᠤᠯᠠᠨ ᠳ᠋ᠤ᠌ ᠨᠢᠭᠤᠭᠳᠠᠵᠤ᠂ ᠰᠡᠭᠦᠯ ᠳ᠋ᠡᠭᠡᠨ ᠪᠦᠷ ᠥᠯᠪᠡᠷᠴᠦ ᠦᠬᠦᠬᠦ ᠰᠢᠬᠠᠭᠠᠳ ᠠᠭᠤᠯᠠ ᠶ᠋ᠢᠨ ᠠᠷᠤ ᠲᠠᠯᠠ ᠳ᠋ᠤ᠌ ᠭᠠᠷᠤᠨ ᠰᠠᠭᠠᠳᠠᠭ᠂ ᠪᠡᠬᠢᠲᠦ᠂ ᠮᠢᠩᠭᠠᠨ ᠤ᠋ ᠰᠢᠲᠦᠭᠡᠨ᠂ ᠰᠢᠨᠠᠭᠠᠨ ᠠᠭᠤᠯᠠ ᠵᠡᠷᠭᠡ ᠭᠠᠵᠠᠷ ᠢ᠋ᠶ᠋ᠠᠷ ᠮᠠᠯᠴᠢᠨ ᠠᠷᠠᠳ ᠢ᠋ ᠴᠥᠯᠪᠡᠨ ᠳᠡᠭᠡᠷᠡᠮᠳᠡᠵᠦ᠂ ᠡᠮᠡᠰ ᠥᠬᠢᠳ ᠢ᠋ ᠪᠤᠵᠠᠷᠯᠠᠨ᠂ ᠡᠳᠡᠭᠡᠷ ᠭᠠᠵᠠᠷ ᠤ᠋ᠨ ᠠᠷᠠᠳ ᠢᠷᠭᠡᠳ ᠲᠦ᠍ ᠭᠠᠢ ᠲᠠᠷᠢᠭᠰᠠᠨ ᠢ᠋ ᠬᠡᠯᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ᠃
— — — —
① ᠤᠭᠰᠠᠷᠠᠭᠠ ᠪᠠᠷ ᠱᠦᠬᠦᠷᠳᠡᠳᠡᠭ ᠫᠤᠤ ᠶᠢ ᠵᠢᠭᠠᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠭᠠᠷᠮᠠ