ᠦᠷ ᠦᠨ ᠲᠤᠶᠠᠭᠠ III – ᠪ᠂ ᠷᠢᠨᠴᠢᠨ - ᠭᠤᠷᠪᠠᠳᠤᠭᠠᠷ ᠲᠡᠪᠲᠡᠷ <ᠪᠠᠢᠯᠳᠤᠵᠤ ᠣᠯᠣᠭᠰᠠᠨ ᠡᠬᠡ ᠣᠷᠣᠨ>- ᠬᠣᠶᠠᠷ Үүрийн туяа III – Б ᠂ Ренчин Гуравдугаар дэвтэр "Баялдаж олсон эх орон"-2
372ᠬᠣᠶᠠᠷ᠂ ᠢ ᠡᠪᠦᠭᠡᠨ ᠦ᠌ ᠳ᠋ᠦ᠍
ᠰᠠᠭᠠᠬᠠᠯᠲᠠ ᠬᠥᠮᠦᠨ ᠦ᠌ ᠰᠠᠨᠠᠭᠠ ᠨᠢᠭᠡ᠂
ᠠᠢᠯ ᠬᠥᠮᠦᠨ ᠦ᠌ ᠠᠮᠢ ᠨᠢᠭᠡ᠃
ᠠᠷᠠᠳ ᠤ᠋ᠨ ᠵᠦᠢᠷ ᠦᠭᠡ
— ᠮᠠᠨᠠᠢᠬᠢᠨ(ᠮᠠᠨ ᠤ᠋ ᠬᠢᠨ) ᠢᠷᠡᠪᠡᠦ( ᠢᠷᠡᠪᠡ ᠤᠤ) ᠳᠠ? ᠭᠡᠳ ᠨᠡᠬᠡᠢᠲᠦ᠂ ᠴᠣᠩᠬᠣᠨ ᠳᠣᠣᠷᠠᠬᠢ ᠥᠷᠭᠡᠨ ᠪᠠᠨᠲᠠᠩ ᠳᠡᠭᠡᠷᠡ ᠡᠴᠡ ᠪᠣᠰᠴᠤ᠂ ᠮᠣᠳᠣᠨ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠠᠷ ᠲᠦᠷ ᠭᠢᠰᠬᠢᠭᠰᠡᠭᠡᠷ ᠲᠣᠭᠣᠭᠠᠨ ᠤ᠋ ᠪᠠᠢᠰᠢᠩ ᠳ᠋ᠤ᠌ ᠣᠷᠣᠵᠠᠢ᠃ ᠮᠡᠷᠢ᠂ ᠦᠰᠦᠲᠡᠢ ᠣᠭᠣᠲᠣᠷ ᠳᠡᠭᠡᠯ(ᠳᠡᠪᠡᠯ) ᠢ᠋ᠶ᠋ᠡᠨ ᠶᠠᠪᠤᠭᠤᠲᠠ ᠡᠮᠦᠰᠴᠦ᠂ ᠨᠥᠬᠥᠷ ᠡᠴᠡ ᠪᠡᠨ ᠤᠷᠢᠲᠠᠵᠤ ᠶᠠᠭᠠᠷᠠᠨ᠂ ᠵᠣᠴᠢᠨ ᠢ᠋ ᠤᠭᠲᠤᠷᠠ ᠭᠠᠳᠠᠭᠠ ᠭᠠᠷᠴᠤ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠᠨ ᠤ᠋ ᠬᠥᠨᠳᠡᠯᠡᠨ ᠱᠤᠷᠠᠭ ᠢ᠋ ᠰᠤᠭᠤᠯᠵᠤ᠂ ᠬᠠᠰᠢᠶᠠᠨ ᠳ᠋ᠤ᠌ ᠣᠷᠣᠬᠤ ᠵᠠᠮ ᠨᠡᠭᠡᠭᠡᠬᠦ ᠭᠡᠵᠦ ᠶᠠᠭᠠᠷᠠᠨ ᠭᠦᠶᠦᠯᠡ᠃ ᠭᠤᠷᠪᠠᠨ ᠮᠣᠷᠢ ᠣᠷᠣᠭᠤᠯᠤᠭᠰᠠᠨ ᠥᠷᠭᠡᠨ ᠴᠢᠷᠭᠠ ᠬᠠᠰᠢᠶᠠᠨ ᠳ᠋ᠤ᠌ ᠣᠷᠣᠵᠤ ᠢᠷᠡᠭᠡᠳ ᠪᠠᠢᠰᠢᠩ ᠤ᠋ᠨ ᠡᠭᠦᠳᠡᠨ ᠲᠤᠰ ᠬᠦᠷᠦᠮᠡᠭᠴᠡ᠂ ᠤᠷᠢᠳᠤ ᠨᠢ ᠰᠠᠭᠤᠭᠰᠠᠨ ᠢᠸᠠᠨ ᠡᠪᠦᠭᠡᠨ ᠪᠠᠲᠤᠪᠠᠶᠠᠷ ᠬᠣᠶᠠᠷ ᠪᠠᠭᠤᠵᠤ᠂ ᠢᠸᠠᠨ ᠡᠪᠦᠭᠡᠨ᠂ ᠴᠢᠷᠭᠠᠨ ᠤ᠋ ᠪᠦᠬᠡᠭᠡᠭ ᠢ᠋ ᠪᠢᠲᠡᠭᠦᠯᠡᠭᠰᠡᠨ ᠬᠥᠰᠢᠭᠡ ᠶ᠋ᠢ ᠨᠢ ᠰᠡᠬᠦᠵᠦ᠂ ᠨᠠᠰᠤᠨᠪᠠᠲᠤ ᠶ᠋ᠢ ᠴᠢᠷᠭᠠᠨ ᠳᠣᠲᠣᠷᠠ ᠠ᠋ᠴᠠ ᠭᠠᠷᠬᠤ ᠳ᠋ᠤᠨᠢ(ᠳ᠋ᠤ᠌ ᠨᠢ) ᠲᠡᠳᠡᠨ ᠳᠡᠮᠵᠢᠵᠦ ᠥᠭᠪᠡ᠃ ᠪᠠᠲᠤᠪᠠᠶᠠᠷ᠂ ᠵᠠᠩ ᠱᠢ ᠲᠡᠢ ᠡᠯᠪᠡᠵᠦ ᠬᠠᠷᠠ ᠨᠣᠬᠠᠢ ᠳᠠᠬᠤ ᠰᠡᠬᠦᠵᠦ᠂ ᠵᠠᠮ ᠳ᠋ᠤ᠌ ᠨᠣᠢᠷ ᠨᠢ ᠬᠦᠷᠴᠦ ᠤᠨᠲᠠᠴᠢᠬᠠᠭᠰᠠᠨ ᠬᠣᠶᠠᠷ ᠠᠴᠢ ᠨᠠᠷ ᠢ᠋ᠶ᠋ᠠᠨ ᠰᠡᠷᠢᠭᠡᠪᠡ᠃
— ᠦ᠂ ᠨᠠᠰᠤᠨᠪᠠᠲᠤ ᠶᠠᠭᠠᠬᠢᠭᠰᠠᠨ ᠲᠠᠨᠢᠰᠢ ᠦᠭᠡᠢ ᠲᠠᠩᠬᠠᠢᠭᠰᠠᠨ ᠲᠣᠮᠣ ᠬᠥᠮᠦᠨ ᠪᠣᠯᠴᠢᠬᠠ ᠪᠣᠢ᠂ ᠴᠢ ᠮᠢᠨᠢ! ᠭᠡᠵᠦ ᠭᠠᠢᠬᠠᠨ᠂ ᠵᠠ ᠰᠠᠢᠨ ᠶᠠᠪᠤᠵᠤ ᠢᠷᠡᠪᠡᠦ( ᠢᠷᠡᠪᠡ ᠤᠤ)᠂ ᠬᠡᠦᠬᠡ! ᠵᠠᠮ ᠳ᠋ᠠᠭᠠᠨ ᠳᠠᠭᠠᠷᠠᠪᠠᠤ ᠳᠠ? ᠪᠤᠰᠢᠭᠤᠬᠠᠨ ᠳᠤᠯᠠᠭᠠᠨ ᠪᠠᠢᠰᠢᠩ ᠳ᠋ᠤ᠌ ᠣᠷᠣᠵᠤ ᠳᠤᠯᠠᠭᠠᠴᠠ ᠭᠡᠵᠦ ᠢᠸᠠᠨ ᠡᠪᠦᠭᠡᠨ ᠦ᠌ ᠠᠪᠠᠭᠠᠢ ᠫᠧᠳ᠋ᠷᠤᠸᠨᠠ ᠡᠮᠡᠭᠡᠨ᠂ ᠵᠣᠴᠢᠨ ᠢ᠋ ᠲᠣᠰᠣᠨ ᠭᠠᠷᠴᠤ᠂ ᠰᠡᠩᠳᠡ ᠮᠡᠩᠳᠡ ᠦᠨᠡᠨ ᠰᠡᠳᠬᠢᠯ ᠡᠴᠡ ᠪᠠᠶᠠᠷᠯᠠᠨ ᠤᠭᠲᠤᠪᠠ᠃
ᠡᠪᠦᠭᠡᠨ ᠢᠸᠠᠨ ᠤ᠋ ᠪᠡᠷᠢ ᠮᠡᠷᠢ ᠬᠠᠯᠠᠭᠤᠨ ᠲᠣᠭᠣᠭᠠᠨ ᠳ᠋ᠤ᠌ ᠴᠠᠢ ᠶ᠋ᠢᠨ ᠤᠰᠤ ᠪᠤᠴᠠᠯᠭᠠᠬᠤ ᠭᠡᠵᠦ ᠵᠣᠴᠢᠳ ᠢ᠋ᠶ᠋ᠠᠨ ᠬᠦᠨᠳᠦᠯᠡᠬᠦ ᠶᠠᠭᠤᠮᠠ ᠪᠡᠯᠡᠳᠬᠦ ᠵᠠᠪᠰᠠᠷ᠂ ᠫᠧᠳ᠋ᠷᠤᠸᠨᠠ ᠡᠮᠡᠭᠡᠨ ᠬᠣᠢᠮᠣᠷ ᠥᠷᠥᠭᠡᠨ ᠳ᠋ᠡᠭᠡᠨ ᠰᠢᠷᠡᠭᠡ ᠪᠡᠨ ᠰᠢᠨᠡ ᠴᠡᠪᠡᠷ ᠪᠦᠲᠡᠭᠡᠯᠭᠡ ᠪᠡᠷ ᠪᠦᠲᠡᠭᠡᠵᠦ᠂ ᠵᠠᠮ ᠳ᠋ᠠᠭᠠᠨ ᠬᠦᠢᠲᠡᠨ ᠳ᠋ᠦ᠍ ᠬᠠᠴᠠᠷ ᠤᠯᠠᠭᠠᠨ ᠪᠣᠯᠤᠭᠰᠠᠨ ᠵᠠᠩ ᠱᠢ ᠶ᠋ᠢ ᠬᠠᠷᠠᠨ ᠬᠠᠷᠠᠨ᠂
— ᠬᠡᠦᠬᠡ᠂ ᠴᠢᠨᠦ ᠵᠢᠰᠦ ᠴᠢᠷᠠᠢ ᠶ᠋ᠢ ᠬᠠᠷᠠᠪᠠᠯ ᠡᠴᠢᠭᠡ ᠲᠡᠢ ᠪᠡᠨ ᠶᠡᠬᠡᠯᠡ ᠲᠥᠰᠲᠡᠢ ᠶᠣᠮᠠ ᠴᠢ᠃ ᠡᠴᠢᠭᠡ ᠴᠢᠨᠢ ᠮᠠᠨᠠᠢ(ᠮᠠᠨ ᠤ᠋) ᠡᠪᠦᠭᠡᠨ ᠦ᠌ ᠶᠡᠬᠡ ᠳᠣᠲᠣᠨᠣ ᠶ᠋ᠢᠨ ᠰᠠᠢᠨ ᠨᠠᠢᠵᠠ ᠨᠥᠬᠥᠷ ᠨᠢ ᠰᠢᠦ ᠳᠡ᠃ ᠪᠠᠢᠵᠠ᠂ ᠨᠠᠳᠠᠳᠤ ᠴᠢᠨᠦ ᠠᠪᠤ ᠶ᠋ᠢᠨ ᠬᠢᠵᠦ ᠥᠭᠭᠦᠭᠰᠡᠨ ᠬᠥᠭᠡᠷᠦᠬᠦᠨ ᠬᠠᠭᠤᠷᠴᠠᠭ ᠰᠠᠪᠠ ᠪᠣᠢ ᠭᠡᠳ ᠶᠠᠭᠤᠮᠠ ᠶᠠᠷᠢᠬᠤ ᠳᠤᠷᠠ ᠲᠠᠢ᠂ ᠰᠠᠢᠬᠠᠨ ᠵᠠᠩ ᠠᠭᠠᠯᠢ ᠲᠠᠢ ᠲᠡᠷᠡ ᠡᠮᠡᠭᠡᠨ ᠲᠣᠮᠣ ᠲᠦᠯᠬᠢᠭᠦᠷ ᠪᠠᠷᠢᠵᠤ᠂ ᠬᠠᠭᠤᠴᠢᠨ ᠣᠷᠣᠰ ᠤᠷᠠᠴᠤᠳ ᠤ᠋ᠨ ᠬᠢᠴᠡ ᠲᠡᠢ ᠠᠪᠳᠠᠷᠠ ᠨᠡᠭᠡᠭᠡᠨ ᠲᠦᠯᠬᠢᠵᠦ᠂ ᠰᠠᠢᠬᠠᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠭᠠᠪᠤᠷᠠ(ᠭᠠᠪᠤᠷ) ᠮᠣᠳᠣᠨ ᠰᠡᠢᠯᠦᠮᠡᠯ ᠮᠠᠰᠢ ᠬᠥᠭᠡᠷᠦᠬᠦᠨ ᠬᠢᠴᠡ ᠲᠡᠢ ᠪᠢᠴᠢᠬᠠᠨ ᠬᠠᠭᠤᠷᠴᠠᠭ ᠰᠠᠪᠠ ᠭᠠᠷᠭᠠᠵᠤ᠂ ᠵᠠᠩ ᠱᠢ ᠳ᠋ᠦ᠍ ᠦᠵᠡᠭᠦᠯᠬᠦ ᠳ᠋ᠡᠭᠡᠨ᠂
— ᠵᠠ᠂ ᠡᠨᠡ ᠳᠡ᠃ ᠡᠪᠦᠭᠡᠨ ᠠᠪᠤ ᠴᠢᠨᠢ ᠨᠤᠲᠤᠭ ᠲᠤ᠌ ᠪᠠᠨ ᠪᠤᠴᠠᠬᠤ ᠶ᠋ᠢᠨ ᠤᠷᠢᠳᠠ(ᠤᠷᠢᠳ)᠂ ᠨᠠᠳᠠᠳᠤ (ᠨᠠᠳᠠ ᠳ᠋ᠤ᠌) ᠳᠤᠷᠠᠰᠬᠠᠯ ᠦᠯᠡᠳᠡᠭᠡᠨᠡ ᠭᠡᠵᠦ ᠤᠷᠠᠨ ᠭᠠᠷ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠬᠢᠵᠦ ᠥᠭᠭᠦᠭᠰᠡᠨ ᠪᠢᠯᠡ᠃ ᠮᠣᠳᠣ ᠨᠢ ᠶᠡᠬᠡ ᠰᠠᠢᠬᠠᠨ ᠦᠨᠦᠷ ᠲᠡᠢ᠂ ᠮᠠᠨᠠᠢ (ᠮᠠᠨ ᠤ᠋) ᠡᠨᠳᠡ ᠪᠠᠢᠳᠠᠭ ᠦᠭᠡᠢ ᠮᠣᠳᠣ᠃ ᠤᠩᠭᠠᠰᠤ ᠮᠢᠨᠳᠠᠰᠤᠨ ᠶᠠᠭᠤᠮᠠ ᠶ᠋ᠢ ᠲᠠᠰᠤ ᠬᠡᠪᠢᠵᠦ ᠢᠳᠡᠳᠡᠭ ᠬᠦᠢᠷ (ᠬᠦᠷᠢ) ᠭᠡᠳᠡᠭ ᠬᠣᠷᠣᠬᠠᠢ᠂ ᠡᠨᠡ ᠮᠣᠳᠣᠨ ᠤ᠋ ᠦᠨᠦᠷ ᠡᠴᠡ ᠠᠶᠤᠵᠤ ᠶᠡᠷᠦ ᠬᠠᠯᠳᠠᠳᠠᠭ ᠦᠭᠡᠢ ᠶᠦᠮ ᠪᠢᠯᠡ ᠭᠡᠵᠦ ᠦᠵᠡᠭᠦᠯᠪᠡ᠃
ᠡᠴᠢᠭᠡ ᠶ᠋ᠢᠨ ᠤᠷᠢᠳᠤ ᠳᠠᠷᠬᠠᠨ ᠭᠠᠷ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠪᠦᠲᠦᠭᠡᠭᠰᠡᠨ ᠲᠡᠷᠡ ᠰᠡᠢᠯᠦᠮᠡᠯ ᠰᠠᠢᠬᠠᠨ ᠬᠠᠭᠤᠷᠴᠠᠭ ᠢ᠋ ᠭᠠᠷ ᠲᠠᠭᠠᠨ ᠪᠠᠷᠢᠬᠤ ᠳ᠋ᠤ᠌ ᠵᠠᠩ ᠱᠢ ᠳ᠋ᠦ᠍ ᠶᠡᠬᠡᠯᠡ (ᠶᠡᠬᠡ ᠯᠡ) ᠰᠣᠨᠢᠨ ᠰᠠᠢᠬᠠᠨ ᠰᠢᠭ᠋ ᠰᠠᠨᠠᠭᠳᠠᠵᠤ᠂ ᠭᠠᠪᠤᠷᠠ(ᠭᠠᠪᠤᠷ) ᠮᠣᠳᠣᠨ ᠤ᠋ ᠰᠡᠷᠢᠭᠦᠨ ᠰᠠᠢᠬᠠᠨ ᠦᠨᠦᠷ ᠬᠠᠩᠬᠤᠯᠬᠤ ᠳ᠋ᠤ᠌᠂ ᠠᠯᠤᠰ ᠬᠣᠯᠠ ᠳᠣᠲᠣᠷ ᠭᠠᠵᠠᠷ᠂ ᠠᠪᠤ ᠶ᠋ᠢᠨ ᠨᠠᠷᠢᠨ ᠳᠠᠷᠬᠠ ᠬᠢᠳᠡᠭ ᠪᠠᠢᠰᠢᠩ ᠨᠢ ᠰᠠᠨᠠᠭᠳᠠᠵᠤ᠂ ᠡᠨᠡ ᠰᠠᠢᠬᠠᠨ ᠵᠠᠩ ᠲᠠᠢ ᠣᠷᠣᠰ ᠠᠪᠠᠭᠠᠢ ᠶ᠋ᠢᠨ ᠡᠭᠡᠭᠡ ᠨᠢᠭᠡᠨ ᠠᠳᠠᠯᠢ ᠬᠥᠩᠭᠡᠨ ᠬᠥᠯ ᠲᠡᠢ᠂ ᠰᠠᠢᠬᠠᠨ ᠰᠡᠳᠬᠢᠯ ᠲᠡᠢ ᠡᠮᠡᠭᠡᠨ ᠡᠬᠡ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠨᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠣᠷᠣᠵᠤ᠂ ᠲᠡᠷᠡ ᠰᠡᠢᠯᠦᠮᠡᠯ ᠬᠠᠭᠤᠷᠴᠠᠭ ᠢ᠋ ᠠᠶᠠᠷᠬᠠᠨ ᠭᠡᠭᠴᠢ ᠪᠡᠷ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠭᠠᠳ᠂ ᠪᠠᠨᠲᠠᠩ ᠳᠡᠭᠡᠷᠡ ᠡᠴᠡ ᠶᠠᠭᠠᠷᠠᠨ ᠪᠣᠰᠴᠤ᠂ ᠲᠡᠷᠡ ᠰᠠᠢᠬᠠᠨ ᠰᠠᠨᠠᠭᠠᠲᠠᠢ ᠠᠪᠠᠭᠠᠢ ᠶ᠋ᠢ ᠲᠡᠪᠡᠷᠢᠨ᠂
— ᠲᠠ ᠮᠢᠨᠦ ᠡᠵᠢ ᠲᠡᠢ ᠶᠠᠭᠤᠲᠠᠢ ᠠᠳᠠᠯᠢ ᠦᠵᠡᠭᠳᠡᠪᠡ ᠭᠡᠵᠦ ᠰᠡᠳᠬᠢᠯ ᠬᠥᠳᠡᠯᠵᠦ ᠡᠩᠬᠦᠷᠡᠢᠯᠡᠨ ᠲᠡᠪᠡᠷᠢᠵᠦ ᠰᠢᠪᠡᠨᠡᠬᠦ ᠳ᠋ᠦ᠍ ᠨᠢ᠂ ᠲᠡᠷᠡ ᠡᠮᠡᠭᠡᠨ᠂ ᠵᠠᠩ ᠱᠢ ᠶ᠋ᠢᠨ ᠮᠠᠩᠨᠠᠢ ᠶ᠋ᠢ ᠦᠨᠦᠰᠦᠯᠡ᠃
ᠲᠣᠭᠣᠭᠠᠨ ᠤ᠋ ᠪᠠᠢᠰᠢᠩ ᠠ᠋ᠴᠠ ᠮᠣᠳᠣᠨ ᠬᠥᠯ ᠢ᠋ᠶ᠋ᠡᠷ ᠲᠦᠰ ᠲᠦᠰ ᠭᠢᠰᠬᠢᠯᠡᠨ ᠡᠮᠡᠭᠡᠨ ᠦ᠌ ᠬᠦᠦ ᠨᠡᠬᠡᠢᠲᠦ ᠣᠷᠣᠵᠤ ᠢᠷᠡᠭᠡᠳ᠂ ᠲᠣᠭᠣᠭᠠᠨ ᠤ᠋ ᠪᠠᠢᠰᠢᠩ ᠳ᠋ᠤ᠌ ᠨᠠᠰᠤᠨᠪᠠᠲᠤ ᠢᠸᠠᠨ ᠡᠪᠦᠭᠡᠨ ᠬᠣᠶᠠᠷ ᠤ᠋ᠨ ᠳᠦᠩᠭᠡᠷ ᠳᠦᠩᠭᠡᠷ ᠦᠭᠡ ᠬᠡᠯᠡᠯᠴᠡᠬᠦ ᠨᠢ ᠰᠣᠨᠣᠰᠲᠠᠯᠠ᠃
ᠬᠠᠭᠠᠯᠭᠠ ᠶ᠋ᠢᠨ ᠴᠢᠮᠡᠭᠡ ᠭᠠᠷᠴᠤ᠂ ᠭᠠᠳᠠᠨᠠ ᠠ᠋ᠴᠠ ᠪᠠᠲᠤᠪᠠᠶᠠᠷ ᠣᠷᠣᠵᠤ ᠢᠷᠡᠯᠡ᠃ ᠡᠪᠦᠭᠡᠨ ᠢᠧᠠᠨ᠂
— ᠫᠧᠳ᠋ᠷᠤᠸᠨᠠ᠂ ᠴᠢ ᠶᠠᠭᠠᠬᠢᠴᠢᠬᠤᠪ(ᠶᠠᠭᠠᠬᠢᠴᠢᠬᠠᠪᠠ) ᠠ᠋? ᠵᠣᠴᠢᠳ ᠢ᠋ᠶ᠋ᠠᠨ ᠬᠦᠨᠳᠦᠯᠡᠵᠦ ᠳᠠᠢᠯᠠᠬᠤ ᠶᠤᠮ ᠪᠢᠰᠢ ᠤᠤ? ᠭᠡᠵᠦ ᠬᠦᠩᠭᠢᠨᠡᠵᠦ᠂ ᠪᠠᠲᠤᠪᠠᠶᠠᠷ ᠤ᠋ᠨ ᠵᠦᠭ᠂ ᠵᠠ ᠪᠠᠲᠤᠪᠠᠶᠠᠷ ᠠᠪᠤᠭᠠᠢ ᠮᠢᠨᠢ᠂ ᠮᠠᠨᠠᠢ(ᠮᠠᠨ ᠤ᠋) ᠲᠡᠷᠡ ᠴᠡᠪᠡᠷ ᠥᠷᠥᠭᠡᠨ ᠳ᠋ᠦ᠍ ᠥᠭᠡᠳᠡ ᠪᠣᠯ ᠭᠡᠵᠦ ᠵᠣᠴᠢᠳ ᠢ᠋ ᠬᠣᠢᠮᠣᠷ ᠪᠠᠢᠰᠢᠩ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠵᠠᠯᠠᠪᠠ᠃
ᠴᠠᠢ ᠤᠤᠭᠤᠵᠤ᠂ ᠰᠢᠪᠢᠷ ᠦ᠋ᠨ(ᠰᠢᠪᠧᠷᠢᠶᠡ ᠶ᠋ᠢᠨ) ᠣᠷᠣᠰ ᠶᠠᠩᠵᠤ ᠶ᠋ᠢᠨ ᠪᠠᠩᠰᠢ ᠭᠡᠳᠡᠭ ᠬᠢᠰᠤᠭᠠ ᠪᠣᠭᠣᠷᠰᠣᠭ ᠢᠳᠡᠭᠡᠳ᠂ ᠬᠣᠶᠠᠷ ᠡᠪᠦᠭᠡᠨ᠂ ᠬᠢᠲᠠᠳ ᠭᠠᠨᠽᠠᠢ ᠭᠡᠳᠡᠭ ᠰᠠᠢᠬᠠᠨ ᠠᠷᠢᠬᠢ ᠨᠤᠲᠤᠭ ᠤ᠋ᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠬᠠᠯᠠᠭᠠᠵᠤ᠂ ᠨᠡᠯᠢᠶᠡᠳ ᠬᠡᠳᠦᠨ ᠬᠤᠨᠳᠠᠭᠠ ᠤᠤᠭᠤᠭᠠᠳ ᠬᠥᠯᠴᠥᠵᠦ ᠤᠯᠠᠭᠠᠨ ᠵᠡᠭᠡᠷᠳᠡ ᠪᠣᠯᠤᠭᠠᠳ᠂ ᠥᠷᠭᠡᠨ ᠪᠠᠨᠲᠠᠩ ᠳᠡᠭᠡᠷᠡ ᠳᠡᠪᠢᠰᠦᠭᠰᠡᠨ ᠭᠤᠲᠤᠰᠤᠨ(ᠭᠣᠳᠣᠰ ᠤ᠋ᠨ) ᠳᠡᠭᠡᠷᠡ ᠰᠠᠭᠤᠵᠤ᠂ ᠨᠠᠮ ᠳᠠᠭᠤ ᠪᠠᠷ ᠦᠭᠡ ᠬᠡᠯᠡᠯᠴᠡᠪᠡ᠃
— ᠮᠠᠨᠠᠢᠬᠢᠨ(ᠮᠠᠨ ᠤ᠋ ᠬᠢᠨ) ᠴᠢᠮᠠᠲᠤ(ᠴᠢᠮᠠ ᠳ᠋ᠤ᠌) ᠪᠠᠬᠠᠨ ᠲᠦᠪᠡᠭ ᠴᠢᠷᠬᠦ ᠨᠢ ᠳᠡ᠃ ᠨᠢᠭᠡ ᠭᠡᠷ ᠠᠷᠭᠠᠴᠠᠨ ᠣᠯᠵᠤ᠂ ᠡᠨᠳᠡ ᠴᠢᠨᠢ ᠪᠠᠷᠢᠵᠤ ᠥᠭᠳᠡᠭ ᠶᠦᠮ ᠪᠢᠯᠢᠤ(ᠪᠢᠯᠡ ᠤᠤ) ᠳᠠ᠃ ᠬᠥᠭᠡᠷᠦᠬᠦᠢ ᠪᠡᠷᠢ ᠮᠢᠨᠢ᠂ ᠡᠪᠦᠯ ᠦ᠋ᠨ ᠬᠦᠢᠲᠡᠨ ᠴᠠᠭ ᠲᠤ᠌ ᠭᠡᠷ ᠲᠦ᠍ ᠰᠠᠭᠤᠵᠤ ᠶᠡᠷᠦ ᠦᠵᠡᠭᠡ ᠦᠭᠡᠢ ᠬᠥᠮᠦᠨ ᠶᠦᠮ ᠳᠡ᠃ ᠴᠢ ᠶᠠᠭᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠂ ᠢᠸᠠᠨ ᠮᠢᠨᠢ᠂ ᠶᠣᠰᠣᠷᠬᠠᠭᠠᠳ ᠶᠠᠭᠠᠬᠢᠬᠤᠪ(ᠶᠠᠭᠠᠬᠢᠬᠤ ᠪᠣᠢ)᠂ ᠦᠨᠡᠨ ᠢ᠋ᠶ᠋ᠡᠨ ᠨᠠᠳᠠᠳᠤ(ᠨᠠᠳᠠ ᠳ᠋ᠤ᠌)ᠬᠡᠯᠡ ᠯᠡ ᠳᠡ ᠭᠡᠵᠦ ᠪᠠᠲᠤᠪᠠᠶᠠᠷ ᠡᠪᠦᠭᠡᠨ ᠦ᠌ ᠲᠥᠪ ᠨᠠᠮ ᠳᠠᠭᠤᠨ ᠢ᠋ᠶ᠋ᠠᠷ ᠥᠭᠦᠯᠡᠬᠦ ᠳ᠋ᠦ᠍᠂
— ᠮᠠᠨᠠᠢ(ᠮᠠᠨ ᠤ᠋) ᠣᠷᠣᠰ ᠤ᠋ᠨ ᠬᠠᠭᠤᠴᠢᠨ ᠦᠭᠡᠨ ᠳ᠋ᠦ᠍ ᠴᠢᠬᠢᠯᠳᠦᠵᠦ ᠰᠠᠭᠤᠭᠰᠠᠨ ᠴᠤ᠌ ᠡᠪ ᠲᠡᠢ ᠨᠢ ᠰᠠᠢᠬᠠᠨ ᠭᠡᠳᠡᠭ ᠦᠭᠡ ᠪᠣᠢ᠂ ᠪᠠᠲᠤᠪᠠᠶᠠᠷ ᠮᠢᠨᠢ ᠭᠡᠵᠦ ᠬᠣᠶᠠᠷ ᠡᠪᠦᠭᠡᠨ ᠦ᠌ ᠶᠠᠷᠢᠯᠴᠠᠬᠤ ᠳ᠋ᠤᠨᠢ(ᠳ᠋ᠤ᠌ ᠨᠢ) ᠰᠠᠭᠠᠳ ᠪᠣᠯᠬᠤ ᠦᠭᠡᠢ ᠭᠡᠵᠦ ᠳᠠᠷᠤᠤ ᠵᠠᠩ ᠲᠠᠢ ᠵᠠᠩ ᠱᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠠᠪᠤᠭᠠᠳ ᠲᠣᠭᠣᠭᠠᠨ ᠤ᠋ ᠭᠡᠷ ᠲᠦ᠍ ᠣᠷᠣᠪᠠ᠃ ᠨᠠᠰᠤᠨᠪᠠᠲᠤ ᠴᠣᠩᠬᠣᠨ ᠤ᠋ ᠳᠡᠷᠭᠡᠳᠡ ᠲᠤᠭᠤᠷᠭᠠ ᠲᠦᠰᠢᠭᠡᠳ ᠰᠠᠭᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂ ᠨᠢᠭᠡ ᠮᠡᠳᠡᠲᠡᠯᠡ ᠨᠣᠢᠷ ᠬᠦᠷᠴᠦ ᠨᠢᠳᠦ ᠠᠨᠢᠯᠳᠤᠬᠤ ᠳ᠋ᠤ᠌᠂ ᠨᠣᠢᠷ ᠢ᠋ᠶ᠋ᠠᠨ ᠰᠡᠷᠡᠭᠡᠬᠦ ᠭᠡᠵᠦ ᠭᠠᠳᠠᠭᠠ ᠭᠠᠷᠪᠠ᠃ ᠶᠠᠭᠤᠮᠠ ᠬᠢᠳᠡᠭ ᠫᠧᠩ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠨᠡᠬᠡᠢᠲᠦ ᠮᠣᠳᠣᠨ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠠᠵᠠᠭᠠᠨᠠᠨ ᠭᠢᠰᠬᠢᠯᠡᠵᠦ᠂ ᠴᠢᠷᠭᠠ ᠠ᠋ᠴᠠ ᠳᠡᠪᠡᠯ᠂ ᠳᠡᠪᠢᠰᠬᠡᠷ᠂ ᠶᠠᠭᠤᠮᠠ ᠬᠡᠦᠮᠡ ᠶ᠋ᠢ ᠨᠢ ᠭᠠᠷᠭᠠᠭᠠᠳ᠂ ᠫᠧᠩ ᠳ᠋ᠦ᠍ ᠣᠷᠣᠭᠤᠯᠬᠤ ᠭᠡᠵᠦ ᠪᠠᠢᠭᠰᠠᠨ ᠢ᠋ ᠬᠠᠷᠠᠭᠠᠳ᠂
— ᠨᠡᠬᠡᠢᠲᠦ ᠭᠤᠸᠠᠢ ᠶ᠋ᠢ ᠢᠩᠭᠢᠵᠦ ᠴᠢᠯᠡᠭᠡᠵᠦ᠂ ᠶᠠᠭᠤᠮᠠ ᠪᠠᠨ ᠵᠥᠭᠡᠭᠡᠯᠭᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠢ ᠮᠡᠳᠡᠭᠰᠡᠨ ᠦᠭᠡᠢ᠃ ᠲᠠ ᠨᠠᠮᠠᠶ᠋ᠢ(ᠨᠠᠮᠠ ᠶ᠋ᠢ) ᠠᠭᠤᠴᠢᠯᠠᠭᠠᠷᠠᠢ ᠬᠡᠮᠡᠪᠡᠰᠦ᠂
— ᠠ᠂ ᠵᠦᠭᠡᠷ᠂ ᠵᠦᠭᠡᠷ᠂ ᠴᠢ ᠠᠶᠠᠨᠰᠢᠵᠤ ᠶᠠᠳᠠᠷᠠᠭᠰᠠᠨ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠪᠡᠶᠡ ᠴᠢᠨᠢ ᠴᠤ᠌ ᠨᠢᠭᠡ ᠶᠡᠬᠡ ᠰᠠᠢᠨ ᠪᠣᠯᠤᠭᠠ ᠦᠭᠡᠢ ᠪᠣᠯᠤᠯᠲᠠᠢ᠃ ᠪᠢ ᠡᠨᠡ ᠴᠢᠷᠭᠠᠨ ᠤ᠋ ᠶᠠᠭᠤᠮᠠ ᠶ᠋ᠢ ᠪᠠᠷᠤᠭ ᠢ᠋ ᠨᠢ ᠭᠠᠷᠭᠠᠵᠤ ᠫᠧᠩ ᠳ᠋ᠦ᠍ ᠣᠷᠣᠭᠤᠯᠴᠢᠬᠰᠠᠨ(ᠣᠷᠣᠭᠤᠯᠴᠢᠬᠠᠭᠰᠠᠨ)᠃ ᠣᠳᠣ ᠭᠡᠷ ᠲᠡᠭᠡᠨ ᠣᠷᠣᠶᠠ᠃ ᠰᠢᠷᠬᠠ ᠴᠢᠨᠢ ᠵᠦᠭᠡᠷ ᠪᠣᠯᠪᠠᠤ? ᠣᠷᠣᠢ ᠪᠢ ᠦᠵᠡᠭᠡᠳ ᠦᠭᠭᠦᠭᠡᠮᠵᠢ ᠭᠡᠬᠦ ᠳ᠋ᠦ᠍᠂
— ᠵᠦᠭᠡᠷ ᠪᠣᠯᠵᠤ ᠪᠠᠢᠨᠠ ᠭᠡᠵᠡᠢ᠃
— ᠵᠠ᠂ ᠲᠡᠭᠡᠪᠡᠯ ᠶᠠᠭᠠᠮᠠᠢ᠃ ᠮᠠᠨᠠᠢ(ᠮᠠᠨ ᠤ᠋) ᠡᠨᠳᠡ ᠲᠠᠢᠪᠤᠩ ᠠᠮᠤᠭᠤᠯᠠᠩ᠂ ᠭᠠᠮᠢᠩ᠂ ᠴᠠᠭᠠᠨᠲᠠᠨ ᠶᠡᠷᠦ ᠠᠯᠠᠭᠠ᠃ ᠮᠢᠨᠦ ᠮᠠᠭᠤ ᠬᠦᠦ ᠤᠯᠠᠭᠠᠨ ᠴᠡᠷᠢᠭ ᠲᠦ᠍ ᠪᠠᠢᠭᠠ᠂ ᠵᠥᠪᠯᠡᠯᠲᠦ ᠵᠠᠰᠠᠭ ᠤ᠋ᠨ ᠢ᠋ᠶ᠋ᠠᠨ ᠲᠥᠯᠥᠭᠡ ᠳᠠᠢᠰᠤᠨ ᠲᠠᠢ ᠬᠠᠯᠠᠭᠤᠨ ᠠᠮᠢ᠂ ᠪᠦᠯᠢᠶᠡᠨ ᠴᠢᠰᠤ ᠪᠠᠨ ᠬᠠᠢᠷᠠ ᠦᠭᠡᠢ ᠲᠤᠯᠵᠤ ᠶᠠᠪᠤᠭᠠ ᠳᠠ ᠭᠡᠵᠦ ᠬᠡᠯᠡᠯᠴᠡᠲᠡᠯᠡ᠂ ᠫᠧᠳ᠋ᠷᠤᠸᠨᠠ ᠡᠮᠡᠭᠡᠨ ᠪᠠᠢᠰᠢᠩ ᠠ᠋ᠴᠠ ᠭᠠᠷᠴᠤ᠂ ᠱᠠᠲᠤᠨ ᠳᠡᠭᠡᠷᠡ ᠡᠴᠡ ᠨᠠᠰᠤᠨᠪᠠᠲᠤ ᠶ᠋ᠢ᠂
— ᠬᠡᠦᠬᠡ᠂ ᠭᠡᠷ ᠲᠦ᠍ ᠣᠷᠣ᠃ ᠪᠢ ᠴᠢᠮᠠᠲᠤ(ᠴᠢᠮᠠ ᠳ᠋ᠤ᠌) ᠣᠷᠣ ᠳᠡᠪᠢᠰᠬᠡᠷ ᠵᠠᠰᠠᠴᠢᠯᠠ(ᠵᠠᠰᠠᠴᠢᠬᠠᠯᠠ)᠃ ᠬᠡᠪᠲᠡᠵᠦ ᠠᠮᠠᠷᠠ᠂ ᠵᠠᠮ ᠳ᠋ᠠᠭᠠᠨ ᠶᠠᠳᠠᠷᠠᠭᠰᠠᠨ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠭᠡᠵᠡᠢ᠃
ᠨᠠᠰᠤᠨᠪᠠᠲᠤ ᠬᠥᠳᠡᠭᠡ ᠠᠭᠯᠠᠭ ᠭᠠᠵᠠᠷ ᠰᠠᠨᠠᠭᠠ ᠠᠮᠤᠷ᠂ ᠲᠠᠢᠪᠤᠩ ᠰᠠᠢᠬᠠᠨ ᠰᠠᠭᠤᠬᠤ ᠪᠣᠯᠵᠤ᠂ ᠪᠠᠷᠤᠨ ᠤ᠋ ᠴᠡᠷᠢᠭ ᠪᠤᠷᠤᠩᠬᠤᠢᠯᠠᠵᠤ ᠪᠠᠢᠭᠰᠠᠨ ᠬᠦᠷᠢᠶᠡ ᠡᠴᠡ ᠲᠡᠷᠡ ᠡᠯᠢᠭᠡᠰᠡᠭ ᠰᠠᠢᠬᠠᠨ ᠰᠠᠨᠠᠭᠠᠲᠤ ᠣᠷᠣᠰ ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠷ ᠤ᠋ᠨ ᠳ᠋ᠤ᠌ ᠬᠦᠦ ᠡᠴᠡ ᠨᠢ ᠥᠭᠡᠷᠡ ᠦᠭᠡᠢ᠂ ᠥᠭᠡᠬᠦᠨ ᠳᠣᠲᠣᠷᠠᠬᠢ ᠪᠥᠭᠡᠷᠡ ᠰᠢᠭ ᠪᠥᠭᠡᠴᠡᠢᠯᠡᠭᠦᠯᠵᠦ ᠪᠠᠢᠪᠠ᠃
ᠨᠤᠲᠤᠭ ᠤ᠋ᠨ ᠠᠷᠠᠳ ᠤ᠋ᠳ ᠨᠡᠬᠡᠢᠲᠦ ᠳ᠋ᠦ᠍ ᠪᠡᠶᠡ ᠪᠡᠨ ᠦᠵᠡᠭᠦᠯᠬᠦ᠂ ᠡᠮ ᠵᠠᠯᠠᠬᠤ ᠭᠡᠵᠦ ᠢᠷᠡᠳᠡᠭ ᠪᠠᠢᠵᠤ᠂ ᠲᠡᠭᠡᠬᠦ ᠳ᠋ᠡᠭᠡᠨ ᠨᠠᠰᠤᠨᠪᠠᠲᠤ ᠠ᠋ᠴᠠ ᠬᠦᠷᠢᠶᠡᠨ ᠦ᠌ ᠰᠣᠨᠢᠨ ᠢ᠋ ᠠᠰᠠᠭᠤᠵᠤ᠂ ᠴᠠᠭ ᠲᠥᠷᠥ ᠶ᠋ᠢᠨ ᠪᠠᠢᠳᠠᠯ ᠢ᠋ ᠰᠣᠨᠢᠷᠬᠠᠳᠠᠭ ᠪᠠᠢᠪᠠ᠃ ᠨᠠᠰᠤᠨᠪᠠᠲᠤ ᠶ᠋ᠢ ᠰᠠᠢᠨ ᠲᠠᠨᠢᠳᠠᠭ ᠦᠭᠡᠢ ᠵᠠᠷᠢᠮ ᠨᠢᠭᠡ ᠨᠢ ᠢᠯᠡᠭᠦᠦ ᠳᠤᠲᠠᠭᠤ ᠦᠭᠡ ᠠᠯᠳᠠᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠨ᠂ ᠰᠠᠨᠠᠭᠠ ᠪᠠᠢᠳᠠᠯ ᠢ᠋ ᠨᠢ ᠳᠠᠩᠰᠠᠨ ᠮᠡᠳᠡᠬᠦ ᠭᠡᠵᠦ ᠶᠡᠬᠡ ᠬᠣᠯᠠ ᠠ᠋ᠴᠠ ᠲᠣᠭᠣᠷᠢᠭᠤᠯᠤᠨ ᠶᠠᠷᠢᠳᠠᠭ ᠪᠠᠢᠯᠠ᠃ ᠡᠪᠦᠭᠡᠨ ᠪᠠᠲᠤᠪᠠᠶᠠᠷ ᠢ᠋ ᠶᠠᠭᠤᠮᠠ ᠶᠡᠬᠡ ᠦᠵᠡᠵᠦ ᠥᠩᠭᠡᠷᠡᠭᠦᠯᠦᠭᠰᠡᠨ ᠰᠢᠳᠤᠷᠭᠤ ᠭᠣᠣᠯᠴᠢ᠂ ᠲᠣᠮᠣᠭᠠᠲᠠᠢ ᠰᠠᠢᠨ ᠬᠥᠮᠦᠨ ᠭᠡᠵᠦ ᠲᠠᠨᠢᠳᠠᠭ᠂ ᠡᠷᠬᠢᠮᠯᠡᠨ ᠬᠦᠨᠳᠦᠳᠬᠡᠳᠡᠭ ᠵᠠᠷᠢᠮ ᠨᠢᠭᠡ ᠨᠢ᠂ ᠨᠠᠰᠤᠨᠪᠠᠲᠤ ᠶ᠋ᠢ ᠴᠤ᠌ ᠲᠣᠮᠣᠭᠠᠲᠠᠢ ᠰᠠᠢᠨ ᠬᠥᠮᠦᠨ ᠦ᠌ ᠦᠷᠡ ᠬᠦᠦ᠂ ᠶᠠᠭᠤᠮᠠ ᠮᠡᠳᠡᠳᠡᠭ ᠬᠥᠮᠦᠨ ᠭᠡᠵᠦ ᠦᠭᠡ ᠶᠠᠷᠢᠬᠤ ᠳ᠋ᠠᠭᠠᠨ(ᠳ᠋ᠤ᠌ ᠪᠠᠨ) ᠦᠨᠡᠨ ᠢ᠋ᠶ᠋ᠡᠨ ᠶᠠᠷᠢᠵᠤ᠂ ᠠᠰᠠᠭᠤᠨ ᠯᠠᠪᠯᠠᠬᠤ᠂ ᠰᠡᠵᠢᠭ ᠲᠠᠰᠤᠯᠬᠤ ᠶᠠᠭᠤᠮᠠ ᠶ᠋ᠢ ᠡᠷᠡᠭᠡ ᠦᠭᠡᠢ ᠠᠰᠠᠭᠤᠨ ᠬᠡᠯᠡᠯᠴᠡᠵᠦ᠂
— ᠮᠠᠨᠠᠢ(ᠮᠠᠨ ᠤ᠋) ᠨᠥᠬᠥᠷ ᠬᠠᠨᠢ ᠴᠣᠬᠣᠮ ᠬᠡᠨ ᠪᠣᠯᠬᠤ ᠨᠢ ᠪᠣᠢ? ᠮᠠᠨᠠᠢ(ᠮᠠᠨ ᠤ᠋) ᠳᠠᠢᠰᠤᠨ ᠭᠠᠮᠢᠩ ᠢ᠋ ᠬᠦᠷᠢᠶᠡᠨ ᠡᠴᠡ ᠬᠥᠭᠡᠭᠡᠵᠦ᠂ ᠪᠢᠳᠡ ᠪᠦᠭᠦᠳᠡ ᠶ᠋ᠢᠨ ᠪᠠᠭᠰᠢ ᠪᠣᠭᠳᠠ ᠵᠢᠪᠽᠥ᠋ᠨᠳᠠᠮᠪᠠ ᠶ᠋ᠢ ᠳᠠᠬᠢᠨ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠭᠰᠠᠨ ᠪᠠᠷᠤᠨ ᠥᠩᠬᠧᠷᠡᠨ ᠦ᠌ ᠴᠠᠭᠠᠨ ᠣᠷᠣᠰ᠂ ᠮᠠᠨᠠᠢ(ᠮᠠᠨ ᠤ᠋) ᠨᠥᠬᠥᠷ ᠬᠠᠨᠢ ᠪᠣᠯᠬᠤ ᠤᠤ᠂ ᠤᠯᠠᠭᠠᠨ ᠣᠷᠣᠰ ᠪᠢᠳᠡᠨ ᠦ᠌ ᠦᠨᠡᠨ ᠨᠥᠬᠥᠷ ᠪᠣᠯᠬᠤ ᠤᠤ?
ᠪᠠᠷᠤᠨ ᠢ᠋ ᠵᠠᠷᠢᠮ ᠯᠠᠮᠠ ᠨᠠᠷ ᠲᠠᠪᠤᠳᠤᠭᠠᠷ ᠪᠣᠭᠳᠠ ᠶ᠋ᠢᠨ ᠬᠤᠪᠢᠯᠭᠠᠨ ᠭᠡᠳᠡᠭ᠃ ᠵᠠᠷᠢᠮ ᠯᠠᠮᠠ ᠨᠠᠷ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠤ᠋ ᠳᠣᠭᠰᠢᠨ ᠤᠯᠠᠭᠠᠨ ᠰᠠᠬᠢᠭᠤᠯᠰᠤ᠂ ᠭᠡᠰᠡᠷ ᠬᠠᠭᠠᠨ ᠤ᠋ ᠬᠤᠪᠢᠯᠭᠠᠨ ᠳᠦᠷᠢ ᠮᠥᠨ ᠭᠡᠵᠦ ᠶᠠᠷᠢᠳᠠᠭ ᠤ᠋ᠨ ᠠᠯᠢ ᠨᠢ ᠦᠨᠡᠨ ᠪᠣᠢ?
— ᠮᠠᠨᠠᠢ(ᠮᠠᠨ ᠤ᠋) ᠡᠨᠳᠡ ᠯᠠᠮᠠ ᠨᠠᠷ ᠤ᠋ᠨ ᠬᠡᠯᠡᠯᠴᠡᠬᠦ ᠶ᠋ᠢ ᠰᠣᠨᠣᠰᠪᠠᠯ᠂ ᠰᠦᠬᠡᠪᠠᠭᠠᠲᠤᠷ᠂ ᠴᠣᠢᠪᠠᠯᠰᠠᠩ ᠤ᠋ᠨ ᠵᠢᠷᠤᠮ ᠤ᠋ᠨ ᠴᠡᠷᠢᠭ ᠲᠦ᠍ ᠡᠯᠰᠡᠭᠰᠡᠨ ᠬᠥᠮᠦᠨ ᠪᠦᠬᠦᠨ᠂ ᠡᠴᠢᠭᠡ ᠡᠬᠡ᠂ ᠯᠠᠮᠠ ᠪᠠᠭᠰᠢ ᠶᠤᠭᠠᠨ ᠴᠤ᠌ ᠠᠯᠠᠵᠤ ᠴᠢᠳᠠᠨᠠ ᠭᠡᠵᠦ ᠲᠠᠩᠭᠠᠷᠢᠭᠯᠠᠭᠠᠳ᠂ ᠲᠡᠷᠡ ᠲᠠᠩᠭᠠᠷᠢᠭ ᠢ᠋ᠶ᠋ᠠᠨ ᠪᠠᠲᠤᠯᠠᠵᠤ᠂ ᠣᠷᠣᠰ ᠡᠮᠡ ᠶ᠋ᠢᠨ ᠥᠮᠥᠳᠦᠨ ᠳᠣᠭᠤᠤᠷ ᠰᠢᠷᠭᠤᠵᠤ ᠭᠠᠷᠳᠠᠭ ᠶᠤᠮ ᠭᠡᠵᠦ ᠬᠡᠯᠡᠯᠴᠡᠳᠡᠭ ᠦᠨᠡᠨ ᠤᠤ? ᠭᠡᠬᠦ ᠵᠡᠷᠭᠡ ᠪᠡᠷ ᠰᠡᠳᠬᠢᠯ ᠬᠣᠶᠠᠷᠳᠠᠨ ᠭᠠᠢᠬᠠᠭᠰᠠᠨ ᠢ᠋ᠶ᠋ᠠᠨ ᠠᠰᠠᠭᠤᠳᠠᠭ ᠪᠠᠢᠵᠠᠢ᠃
ᠡᠨᠡ ᠮᠡᠲᠦ ᠵᠦᠢᠯ ᠠᠰᠠᠭᠤᠳᠠᠭ ᠢ᠋ ᠦᠵᠡᠭᠡᠳ ᠨᠠᠰᠤᠨᠪᠠᠲᠤ᠂ ᠯᠠᠮᠠ ᠨᠣᠶᠠᠳ᠂ ᠠᠷᠠᠳ ᠣᠯᠠᠨ ᠤ᠋ ᠪᠢᠴᠢᠭ ᠦᠰᠦᠭ ᠮᠡᠳᠡᠬᠦ ᠦᠭᠡᠢ ᠬᠣᠴᠣᠷᠤᠭᠳᠠᠭᠰᠠᠨ ᠪᠠᠢᠳᠠᠯ᠂ ᠮᠤᠬᠤᠷ ᠰᠦᠰᠦᠭ ᠪᠢᠰᠢᠷᠡᠯ ᠳ᠋ᠦ᠍ ᠠᠪᠲᠠᠭᠳᠠᠭᠰᠠᠨ ᠢ᠋ ᠵᠠᠪᠰᠢᠨ ᠠᠰᠢᠭᠯᠠᠵᠤ᠂ ᠡᠯᠳᠡᠪ ᠢ᠋ᠶ᠋ᠡᠷ ᠣᠯᠠᠨ ᠤ᠋ ᠰᠡᠳᠬᠢᠯ ᠰᠠᠨᠠᠭᠠ ᠲᠥᠭᠡᠷᠢᠭᠳᠡᠭᠦᠯᠦᠨ ᠪᠠᠢᠭᠠ ᠶ᠋ᠢ ᠢᠯᠡᠳᠲᠡ ᠦᠵᠡᠵᠦ᠂ ᠠᠯᠢ ᠬᠣᠣᠷᠲᠠᠢ᠂ ᠠᠯᠢ ᠵᠢᠭᠲᠡᠢ ᠮᠠᠭᠤᠬᠠᠢ᠂ ᠶᠡᠷᠦ ᠬᠥᠮᠦᠨ ᠦ᠌ ᠰᠠᠨᠠᠭᠠ ᠰᠡᠳᠬᠢᠯ ᠳ᠋ᠦ᠍ ᠣᠷᠣᠮᠠ ᠦᠭᠡᠢ ᠴᠤᠤ ᠳᠠᠮ ᠦᠭᠡ ᠶ᠋ᠢᠨ ᠵᠦᠢᠯ ᠴᠥᠮ ᠰᠦᠮᠡ ᠬᠡᠢᠳ᠂ ᠨᠣᠶᠠᠳ ᠤ᠋ᠨ ᠥᠷᠭᠥᠭᠡ᠂ ᠲᠡᠳᠡᠨ ᠦ᠌ ᠲᠠᠮᠠᠭᠠ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠬᠠᠪᠢ ᠠ᠋ᠴᠠ ᠭᠠᠷᠳᠠᠭ ᠪᠠᠢᠳᠠᠯ ᠢ᠋ ᠲᠣᠳᠣᠷᠬᠠᠢ ᠮᠡᠳᠡᠪᠡ᠃
ᠵᠠᠷᠢᠮ ᠳ᠋ᠠᠭᠠᠨ ᠠᠷᠠᠳ ᠤ᠋ᠳ ᠡᠨᠡ ᠲᠡᠷᠡ ᠴᠤᠤ ᠳᠠᠮ ᠦᠭᠡ ᠶ᠋ᠢ ᠴᠣᠬᠣᠮ ᠲᠡᠷᠡ ᠬᠥᠮᠦᠨ ᠠᠩᠬᠠ ᠬᠡᠯᠡᠭᠰᠡᠨ ᠭᠡᠵᠦ ᠡᠵᠡᠨ ᠢ᠋ ᠬᠦᠷᠲᠡᠯᠡ ᠵᠢᠭᠠᠵᠤ ᠬᠡᠯᠡᠳᠡᠭ ᠪᠠᠢᠭᠰᠠᠨ ᠢ᠋ ᠬᠢᠨᠠᠨ ᠦᠵᠡᠪᠡᠯ᠂ ᠴᠥᠮ ᠭᠠᠮᠢᠩ ᠤ᠋ᠨ ᠦᠶᠡᠰ ᠲᠦ᠍ ᠵᠡᠷᠭᠡ ᠬᠡᠷᠬᠢᠮ᠂ ᠹᠦᠩᠯᠦ ᠶᠠᠩᠪᠠ ᠬᠦᠷᠲᠡᠭᠡᠳ᠂ ᠡᠴᠦᠰ ᠰᠡᠭᠦᠯ ᠳ᠋ᠦ᠍ᠨᠢ ᠪᠠᠷᠤᠨ ᠤ᠋ ᠲᠠᠯᠠ ᠳ᠋ᠤ᠌ ᠣᠷᠣᠭᠠᠳ᠂ ᠳᠠᠷᠤᠯᠠᠭᠳᠠᠭᠰᠠᠨ ᠣᠯᠠᠨ ᠤ᠋ ᠰᠡᠳᠬᠢᠯ ᠢ᠋ ᠲᠠᠲᠠᠵᠤ᠂ ᠤᠮᠠᠷᠠ ᠵᠦᠭ ᠲᠦ᠍ ᠬᠥᠭᠵᠢᠨ ᠮᠠᠨᠳᠤᠵᠤ ᠪᠠᠢᠭᠠ ᠠᠷᠠᠳ ᠤ᠋ᠨ ᠡᠷᠬᠡ ᠴᠢᠯᠥᠭᠡᠨ ᠦ᠌ ᠬᠥᠳᠡᠯᠭᠡᠭᠡᠨ ᠳ᠋ᠦ᠍ ᠡᠷᠬᠡ ᠠᠰᠢᠭ ᠢ᠋ᠶ᠋ᠠᠨ ᠠᠯᠳᠠᠬᠤ ᠠ᠋ᠴᠠ ᠡᠮᠢᠶᠡᠭᠰᠡᠨ ᠬᠠᠷᠠ ᠰᠢᠷᠠ ᠹᠧᠣᠳᠠᠯ᠂ ᠵᠠᠰᠠᠭ ᠨᠣᠶᠠᠳ᠂ ᠲᠣᠮᠣ ᠯᠠᠮᠠ ᠨᠠᠷ᠂ ᠲᠡᠷᠡ ᠮᠡᠲᠦ ᠴᠤᠤ ᠳᠠᠮ ᠦᠭᠡ ᠵᠣᠬᠢᠶᠠᠨ ᠲᠠᠷᠬᠠᠭᠠᠳᠠᠭ ᠪᠠᠢᠵᠠᠢ᠃
ᠨᠠᠰᠤᠨᠪᠠᠲᠤ ᠬᠦᠷᠢᠶᠡᠨ ᠳ᠋ᠦ᠍ ᠪᠠᠢᠬᠤ ᠦᠶᠡᠰ᠂ ᠨᠢᠭᠤᠴᠠ ᠳᠤᠭᠤᠢᠯᠠᠩ ᠳ᠋ᠤ᠌ ᠰᠦᠬᠡᠪᠠᠭᠠᠲᠤᠷ ᠴᠣᠢᠪᠠᠯᠰᠠᠩ᠂ ᠣᠷᠣᠰ ᠬᠤᠪᠢᠰᠬᠠᠯᠴᠢ ᠨᠥᠬᠥᠷ ᠺᠥ᠋ᠴᠧᠷᠧᠠᠺᠤ᠂ ᠭᠧᠮᠪᠠᠷᠵᠧᠧᠰᠺᠢ ᠨᠠᠷ ᠠ᠋ᠴᠠ ᠮᠠᠷᠺᠰ ᠯᠧᠨᠢᠨ ᠦ᠌ ᠰᠤᠷᠭᠠᠯ᠂ ᠪᠣᠯᠱᠧᠸᠢᠭ ᠨᠠᠮ᠂ ᠣᠷᠣᠰ ᠲᠠᠬᠢ ᠬᠣᠶᠠᠳᠤᠭᠠᠷ ᠰᠠᠷᠠ ᠶ᠋ᠢᠨ᠂ ᠮᠥᠨ ᠣᠺᠲ᠋ᠣᠪᠧᠷ ᠦ᠋ᠨ ᠬᠤᠪᠢᠰᠬᠠᠯ ᠤ᠋ᠨ ᠤᠴᠢᠷ ᠢ᠋ ᠶᠠᠷᠢᠵᠤ᠂ ᠵᠥᠪᠯᠡᠯᠲᠦ ᠶ᠋ᠢᠨ ᠤᠯᠠᠭᠠᠨ ᠴᠡᠷᠢᠭ᠂ ᠣᠷᠣᠰ ᠤ᠋ᠨ ᠵᠢᠷᠤᠮ ᠤ᠋ᠨ ᠤᠯᠠᠭᠠᠨ ᠴᠡᠷᠢᠭ ᠦ᠋ᠨ ᠲᠤᠬᠠᠢ᠂ ᠮᠥᠨ ᠲᠡᠳᠡᠨ ᠢ᠋ ᠬᠡᠷᠬᠢᠨ ᠬᠤᠪᠢᠰᠬᠠᠯ ᠤ᠋ᠨ ᠡᠰᠡᠷᠭᠦᠦ ᠨᠠᠷ ᠬᠢᠭᠡᠳ ᠠᠮᠧᠷᠢᠺᠠ᠂ ᠶᠠᠫᠣᠨ᠂ ᠠᠩᠭ᠌ᠯᠢ ᠶ᠋ᠢᠨ ᠵᠡᠷᠭᠡ ᠬᠥᠷᠥᠩᠭᠡᠲᠡᠨ ᠤᠯᠤᠰ ᠤ᠋ᠨ ᠬᠥᠨᠳᠡᠯᠡᠨ ᠡᠴᠡ ᠣᠷᠣᠰ ᠤᠯᠤᠰ ᠲᠤ᠌ ᠲᠦᠷᠢᠮᠡᠬᠡᠢᠯᠡᠨ ᠬᠠᠯᠳᠠᠭᠰᠠᠨ ᠴᠡᠷᠢᠭ ᠲᠡᠢ ᠪᠠᠢᠯᠳᠤᠨ ᠲᠡᠮᠡᠴᠡᠵᠦ ᠪᠠᠢᠭᠠ ᠶ᠋ᠢ᠂ ᠮᠥᠨ ᠠᠷᠠᠳ ᠣᠯᠠᠨ ᠢ᠋ᠶ᠋ᠠᠨ ᠭᠠᠳᠠᠭᠠᠳᠤ ᠳᠣᠲᠣᠭᠠᠳᠤ ᠶ᠋ᠢᠨ ᠳᠠᠷᠤᠯᠠᠭᠴᠢ ᠨᠠᠷ ᠤ᠋ᠨ ᠣᠯᠠᠨ ᠵᠠᠭᠤᠨ ᠵᠢᠯ ᠦ᠋ᠨ ᠳᠠᠷᠤᠯᠠᠯ ᠠ᠋ᠴᠠ ᠠᠩᠭᠢᠵᠢᠷᠠᠭᠤᠯᠬᠤ ᠭᠡᠵᠦ ᠨᠢᠴᠤᠯᠲᠠ ᠦᠭᠡᠢ᠂ ᠠᠮᠢ ᠪᠡᠶᠡ ᠪᠡᠨ ᠬᠠᠢᠷᠠ ᠦᠭᠡᠢ ᠵᠢᠳᠬᠦᠨ ᠲᠡᠮᠡᠴᠡᠬᠦ ᠡᠭᠦᠷᠭᠡ ᠶ᠋ᠢ ᠪᠡᠶᠡ ᠳ᠋ᠡᠭᠡᠨ ᠡᠬᠡ ᠣᠷᠣᠨ᠂ ᠠᠷᠠᠳ ᠲᠦᠮᠡᠨ ᠦ᠌ ᠡᠮᠦᠨᠡ ᠬᠦᠯᠢᠶᠡᠭᠰᠡᠨ ᠨᠠᠮ ᠤ᠋ᠨ ᠭᠡᠰᠢᠭᠦᠳ ᠦ᠋ᠨ ᠲᠠᠩᠭᠠᠷᠢᠭ ᠢ᠋ ᠶᠠᠷᠢᠵᠤ᠂ ᠠᠷᠠᠳ ᠣᠯᠠᠨ ᠤ᠋ ᠰᠡᠳᠬᠢᠯ ᠰᠠᠨᠠᠭᠠ ᠶ᠋ᠢ ᠲᠥᠭᠡᠷᠢᠯᠳᠦᠭᠦᠯᠦᠭᠴᠢ ᠪᠠᠯᠠᠷ ᠴᠤᠤᠷᠬᠠᠯ ᠦᠭᠡ ᠶ᠋ᠢᠨ ᠬᠤᠳᠠᠯ ᠬᠠᠭᠤᠷᠮᠠᠴᠢ (ᠬᠠᠭᠤᠷᠮᠠᠭᠴᠢ) ᠶ᠋ᠢ ᠤᠢᠳᠬᠠᠷ ᠦᠭᠡᠢ ᠲᠠᠢᠯᠪᠤᠷᠢᠯᠠᠨ ᠬᠡᠯᠡᠵᠦ ᠥᠭᠳᠡᠭ ᠪᠣᠯᠤᠯᠠ᠃
ᠨᠠᠰᠤᠨᠪᠠᠲᠤ ᠲᠠᠢ ᠶᠠᠷᠢᠬᠤ ᠭᠡᠵᠦ ᠢᠷᠡᠳᠡᠭ ᠡᠪᠦᠭᠡᠳ᠂ ᠲᠡᠭᠦᠨ ᠦ᠌ ᠦᠨᠡᠨ ᠰᠡᠳᠬᠢᠯ ᠦ᠋ᠨ ᠴᠢᠩ(ᠲᠡᠢᠨ) ᠬᠦ᠌ ᠦᠭᠡ ᠶ᠋ᠢ ᠪᠠᠬᠠᠳᠤᠨ ᠰᠣᠨᠣᠰᠤᠭᠠᠳ᠂
— ᠪᠢᠳᠡ ᠬᠠᠷᠠᠩᠭᠤᠢ ᠮᠤᠩᠬᠠᠭ ᠤᠯᠤᠰ᠂ ᠮᠠᠨᠠᠨ ᠳ᠋ᠤ᠌ ᠲᠥᠭᠡᠷᠢᠭᠰᠡᠨ ᠭᠠᠯᠠᠭᠤ ᠰᠢᠭ᠋ ᠤᠴᠢᠷ ᠵᠦᠭ ᠢ᠋ᠶ᠋ᠡᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠯᠠ᠃ ᠣᠳᠣ ᠦᠵᠡᠬᠦ ᠳ᠋ᠦ᠍ ᠪᠢᠳᠡᠨ ᠦ᠌ ᠢᠲᠡᠭᠡᠵᠦ ᠪᠠᠢᠭᠰᠠᠨ ᠯᠠᠮᠠ ᠪᠠᠭᠰᠢ ᠨᠠᠷ ᠬᠦᠷᠲᠡᠯᠡ᠂ ᠵᠠᠷᠢᠮ ᠵᠦᠢᠯ ᠳ᠋ᠡᠭᠡᠨ (ᠳ᠋ᠦ᠍ ᠪᠡᠨ )ᠪᠢᠳᠡᠨ ᠢ᠋ ᠪᠤᠷᠤᠭᠤ ᠪᠠᠷ ᠤᠳᠤᠷᠢᠳᠴᠤ᠂ ᠲᠥᠭᠡᠷᠢᠯᠳᠦᠭᠦᠯᠦᠨ ᠮᠡᠬᠡᠯᠡᠵᠦ ᠪᠠᠢᠭᠰᠠᠨ ᠠᠵᠢ᠃ ᠭᠠᠰᠢᠭᠤᠨ ᠬᠠᠷᠠᠩᠭᠤᠢ ᠪᠠᠷ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠪᠢᠳᠡᠨ ᠦ᠌ ᠡᠷᠬᠡ ᠵᠢᠷᠭᠠᠯ ᠤ᠋ᠨ ᠲᠥᠯᠥᠭᠡ ᠲᠡᠮᠡᠴᠡᠵᠦ ᠪᠠᠢᠭᠠ ᠰᠦᠬᠡᠪᠠᠭᠠᠲᠤᠷ᠂ ᠴᠣᠢᠪᠠᠯᠰᠠᠩ ᠤ᠋ᠨ ᠲᠤᠬᠠᠢ ᠦᠨᠡᠨ ᠤᠴᠢᠷ ᠢ᠋ ᠰᠣᠨᠣᠰᠤᠭᠠᠳ᠂ ᠪᠢᠳᠡᠨ ᠳ᠋ᠦ᠍ ᠠᠬᠠ ᠳᠡᠭᠦᠦ ᠮᠡᠲᠦ ᠲᠤᠰᠠᠯᠠᠬᠤ ᠵᠥᠪᠯᠡᠯᠲᠦ ᠶ᠋ᠢᠨ ᠠᠷᠠᠳ ᠲᠦᠮᠡᠨ᠂ ᠮᠠᠨᠠᠢ(ᠮᠠᠨ ᠤ᠋) ᠬᠠᠨᠢ ᠨᠥᠬᠥᠷ ᠪᠠᠢᠭᠠ ᠭᠡᠳᠡᠭ ᠢ᠋ ᠰᠣᠨᠣᠰᠬᠤ ᠳ᠋ᠤ᠌᠂ ᠬᠠᠷᠠᠩᠭᠤᠢ ᠰᠥᠨᠢ ᠨᠠᠷᠠ ᠤᠷᠭᠤᠭᠰᠠᠨ ᠰᠢᠭ᠋ ᠳᠣᠲᠣᠷᠠ ᠣᠩᠭᠣᠢᠯᠠ᠃ ᠣᠷᠣᠰ ᠤᠯᠤᠰ᠂ ᠪᠢᠳᠡᠨ ᠢ᠋ ᠤᠮᠠᠷᠠ ᠵᠦᠭ ᠡᠴᠡ ᠲᠤᠰᠠᠯᠠᠨ ᠲᠡᠩᠬᠡᠷᠡᠭᠦᠯᠵᠦ᠂ ᠬᠠᠷᠢ ᠶ᠋ᠢᠨ ᠳᠠᠷᠤᠯᠠᠯ ᠠ᠋ᠴᠠ ᠠᠩᠭᠢᠵᠢᠷᠠᠭᠤᠯᠵᠤ ᠥᠭᠬᠦ ᠲᠡᠦᠬᠡ ᠲᠡᠢ ᠶᠦᠮ ᠭᠡᠵᠦ ᠡᠪᠦᠭᠡᠳ ᠳᠡᠭᠡᠳᠦᠰ ᠮᠠᠨᠢ ᠤᠴᠢᠷ ᠲᠠᠢ ᠦᠭᠡ ᠬᠡᠯᠡᠯᠴᠡᠳᠡᠭ ᠪᠠᠢᠵᠠᠢ᠃
ᠣᠳᠣ᠂ ᠬᠡᠷᠪᠡ ᠮᠠᠨᠠᠢ(ᠮᠠᠨ ᠤ᠋) ᠦᠷᠡ ᠬᠡᠦᠬᠡᠳ ᠢ᠋ ᠪᠠᠷᠣᠨ ᠤ᠋ ᠴᠡᠷᠢᠭ ᠲᠦ᠍ ᠳᠠᠢᠴᠢᠯᠠᠵᠤ᠂ ᠮᠠᠨᠠᠢ(ᠮᠠᠨ ᠤ᠋) ᠡᠷᠬᠡ ᠵᠢᠷᠭᠠᠯ ᠤ᠋ᠨ ᠲᠥᠯᠥᠭᠡ ᠲᠡᠮᠡᠴᠡᠵᠦ ᠪᠠᠢᠭᠠ ᠰᠦᠬᠡᠪᠠᠭᠠᠲᠤᠷ᠂ ᠴᠣᠢᠪᠠᠯᠰᠠᠩ ᠤ᠋ᠨ ᠠᠷᠠᠳ ᠤ᠋ᠨ ᠵᠢᠷᠤᠮ ᠤ᠋ᠨ ᠴᠡᠷᠢᠭ᠂ ᠵᠥᠪᠯᠡᠯᠲᠦ ᠣᠷᠣᠰ ᠤᠯᠤᠰ ᠢ᠋ ᠪᠠᠢᠯᠳᠤᠨᠠ ᠭᠡᠬᠦ ᠶᠦᠮ ᠪᠣᠯ᠂ ᠮᠠᠨᠠᠢ(ᠮᠠᠨ ᠤ᠋) ᠦᠷᠡ ᠬᠡᠦᠬᠡᠳ ᠶᠠᠭᠠᠬᠢᠭᠰᠠᠨ ᠴᠤ᠌ ᠬᠠᠷᠭᠢᠰ ᠪᠠᠷᠣᠨ ᠤ᠋ ᠵᠣᠷᠢᠭᠰᠠᠨ ᠢ᠋ᠶ᠋ᠠᠷ ᠪᠣᠯᠬᠤ ᠦᠭᠡᠢ᠂ ᠫᠤᠤ ᠵᠡᠪᠰᠡᠭ ᠢ᠋ᠶ᠋ᠡᠨ ᠪᠠᠷᠣᠨ ᠤ᠋ ᠥᠭᠡᠳᠡ ᠡᠴᠡ ᠪᠠᠷᠢᠨ ᠲᠡᠮᠡᠴᠡᠨᠡ ᠭᠡᠵᠦ ᠰᠠᠢᠬᠠᠨ ᠰᠡᠳᠬᠢᠯ ᠲᠡᠢ ᠡᠭᠡᠯ ᠮᠠᠯᠴᠢᠨ ᠡᠪᠦᠭᠡᠳ ᠶᠠᠷᠢᠳᠠᠭ ᠪᠠᠢᠵᠠᠢ᠃
ᠭᠡᠪᠡᠴᠦ ᠵᠠᠷᠢᠮ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)᠂ ᠪᠠᠰᠠ ᠥᠭᠡᠷᠡ ᠵᠦᠢᠯ ᠦ᠋ᠨ ᠵᠣᠴᠢᠳ ᠢᠷᠡᠳᠡᠭ ᠪᠠᠢᠵᠠᠢ᠃ ᠨᠢᠭᠡ ᠡᠳᠦᠷ ᠡᠪᠦᠭᠡᠨ ᠢᠸᠠᠨ ᠤ᠋ ᠳ᠋ᠤ᠌ ᠠᠷᠤ ᠥᠪᠥᠷ ᠲᠡᠭᠡᠨ (ᠳ᠋ᠦ᠍ ᠪᠡᠨ) ᠫᠦᠰᠡᠲᠦ * ᠬᠦᠷᠮᠡ ᠲᠡᠢ ᠪᠦᠳᠦᠭᠦᠨ ᠲᠠᠷᠭᠤᠨ ᠯᠠᠮᠠ ᠲᠦᠰᠢᠮᠡᠯ ᠬᠢᠶᠡ ᠪᠡᠨ ᠳᠠᠭᠠᠭᠤᠯᠵᠤ ᠢᠷᠡᠭᠡᠳ᠂ ᠲᠣᠭᠣᠭᠠᠨ ᠤ᠋ ᠪᠠᠢᠰᠢᠩ ᠢ᠋ᠶ᠋ᠠᠷ ᠳᠡᠮᠵᠢᠵᠦ ᠬᠣᠢᠮᠣᠷ ᠥᠷᠥᠭᠡᠨ ᠳ᠋ᠦ᠍ᠨᠢ (ᠳ᠋ᠦ᠍ ᠨᠢ) ᠣᠷᠣᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)᠂ ᠮᠠᠷᠢᠶᠠ ᠳ᠋ᠤ᠌ ᠬᠣᠭᠣᠯᠠ ᠬᠢᠬᠦ ᠳ᠋ᠦ᠍ᠨᠢ (ᠳ᠋ᠦ᠍ ᠨᠢ) ᠲᠤᠰᠠᠯᠠᠯᠴᠠᠵᠤ ᠪᠠᠢᠭᠰᠠᠨ ᠵᠠᠩ ᠱᠢ ᠶ᠋ᠢ ᠭᠢᠯᠤᠢᠨ ᠬᠠᠷᠠᠵᠤ᠂ ᠬᠣᠢᠮᠣᠷ ᠪᠠᠢᠰᠢᠩ ᠳ᠋ᠤ᠌ ᠣᠷᠣᠭᠠᠳ᠂ ᠬᠠᠳᠬᠤᠮᠠᠯ ᠭᠣᠶᠣ ᠬᠦᠬᠦᠷ ᠦ᠋ᠨ ᠢ᠋ᠶ᠋ᠡᠨ ᠰᠠᠪᠠ ᠠ᠋ᠴᠠ ᠰᠡᠢᠯᠦᠮᠡᠯ ᠬᠠᠰ ᠴᠢᠯᠠᠭᠤᠨ ᠬᠦᠬᠦᠷ ᠭᠠᠷᠭᠠᠭᠠᠳ᠂ ᠵᠡᠭᠡᠷᠭᠡᠨᠡ ᠶ᠋ᠢᠨ ᠦᠨᠡᠰᠦᠲᠡᠢ ᠲᠥᠪᠡᠳ ᠴᠠᠭᠠᠨ ᠲᠠᠮᠠᠬᠢ ᠬᠠᠮᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠱᠣᠷ ᠬᠢᠲᠡᠯᠡ ᠲᠠᠲᠠᠵᠤ᠂ ᠠᠮᠠ ᠪᠠᠷ ᠢ᠋ᠶ᠋ᠠᠨ ᠴᠠᠭᠠᠨ ᠤᠲᠤᠭᠠ ᠰᠢᠭ᠋ ᠮᠠᠨᠠᠷᠠᠭᠤᠯᠤᠨ ᠦᠯᠢᠶᠡᠪᠡ᠃ ᠲᠡᠭᠡᠭᠡᠳ ᠫᠧᠳ᠋ᠷᠤᠸᠨᠠ ᠠ᠋ᠴᠠ᠂
— ᡀᠠ ᠪᠡᠢᠰᠡ ᠨᠣᠶᠠᠨᠲᠠᠨ ᠤ᠋ ᠬᠣᠰᠢᠭᠤ ᠠ᠋ᠴᠠ ᠵᠣᠯᠢᠭ ᠲᠤ᠌ ᠭᠠᠷᠤᠭᠠᠳ᠂ ᠬᠢᠲᠠᠳ ᠡᠬᠡᠨᠡᠷ ᠲᠡᠢ ᠪᠣᠯᠵᠤ ᠢᠷᠡᠭᠰᠡᠨ ᠨᠢᠭᠡ ᠮᠣᠩᠭᠣᠯ ᠬᠥᠮᠦᠨ ᠲᠠᠨᠠᠢᠳᠤ (ᠲᠠᠨ ᠤ᠋ ᠳ᠋ᠤ᠌) ᠰᠠᠭᠤᠵᠤ ᠪᠠᠢᠭᠠ ᠰᠤᠷᠠᠭ ᠲᠠᠢ᠃ ᠲᠡᠷᠡ ᠦᠨᠡᠨ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃
— ᠮᠠᠨ ᠤ᠋ ᠨᠢᠭᠡ ᠰᠠᠢᠨ ᠲᠠᠨᠢᠳᠠᠭ ᠬᠥᠮᠦᠨ ᠦ᠌ ᠬᠦᠦ᠂ ᠭᠡᠷᠭᠡᠢ ᠬᠡᠦᠬᠡᠳ ᠲᠡᠢ ᠪᠡᠨ ᠮᠠᠨᠠᠢᠳᠤ(ᠮᠠᠨ ᠤ᠋ ᠳ᠋ᠤ᠌)ᠰᠠᠭᠤᠵᠤ ᠪᠠᠢᠭᠠ ᠳᠠ ᠭᠡᠵᠦ ᠲᠡᠷᠡ ᠰᠠᠢᠬᠠᠨ ᠰᠠᠨᠠᠭᠠᠲᠤ ᠡᠮᠡᠭᠡᠨ ᠦ᠌ ᠬᠠᠷᠢᠭᠤᠯᠬᠤ ᠳ᠋ᠤ᠌᠂
— ᠲᠠᠨᠠᠢᠳᠤ (ᠲᠠᠨ ᠤ᠋ ᠳ᠋ᠤ᠌) ᠶᠠᠭᠤ ᠬᠢᠵᠦ ᠰᠠᠭᠤᠳᠠᠭ ᠬᠥᠮᠦᠨ ᠪᠢᠯᠡ? ᠲᠠᠨᠠᠢᠳᠤ(ᠲᠠᠨ ᠤ᠋ ᠳ᠋ᠤ᠌) ᠤᠳᠠᠬᠤ ᠬᠥᠮᠦᠨ ᠤᠤ ᠲᠡᠷᠡ? ᠭᠡᠵᠦ ᠯᠠᠮᠠ ᠲᠦᠰᠢᠮᠡᠯ ᠲᠠᠮᠠᠬᠢ ᠲᠠᠲᠠᠭᠰᠠᠭᠠᠷ ᠬᠥᠬᠡ ᠤᠯᠠᠭᠠᠨ ᠪᠣᠯᠤᠭᠰᠠᠨ ᠬᠠᠮᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠡᠢ ᠲᠡᠳᠡᠨ ᠠᠰᠠᠭᠤᠪᠠᠰᠤ᠂
— ᠮᠠᠨᠠᠢ(ᠮᠠᠨ ᠤ᠋) ᠬᠦᠦ ᠪᠡᠷ ᠡᠮᠴᠢᠯᠡᠭᠦᠯᠬᠦ ᠭᠡᠵᠦ ᠢᠷᠡᠭᠡᠳ᠂ ᠮᠠᠨᠠᠢᠳᠤ (ᠮᠠᠨ ᠤ᠋ ᠳ᠋ᠤ᠌) ᠪᠠᠢᠵᠤ ᠪᠠᠢᠭᠠ ᠶᠤᠮ ᠳᠠ ᠭᠡᠵᠦ ᠬᠠᠷᠢᠭᠤᠯᠬᠤ ᠳ᠋ᠤᠨᠢ(ᠳ᠋ᠤ᠌ ᠨᠢ)᠂
— ᠲᠡᠭᠡᠪᠡᠯ᠂ ᠣᠳᠣ ᠬᠠᠮᠢᠭᠠ ᠪᠠᠢᠨᠠ? ᠭᠡᠵᠦ᠂
— ᠣᠳᠣ᠂ ᠬᠥᠯ ᠦ᠋ᠨ ᠢ᠋ᠶ᠋ᠡᠨ ᠴᠢᠯᠡᠭᠡ ᠭᠠᠷᠭᠠᠬᠤ ᠭᠡᠵᠦ ᠭᠠᠳᠠᠭᠠ ᠲᠦᠷ ᠭᠠᠷᠤᠭᠰᠠᠨ ᠪᠣᠯᠪᠠᠤ(ᠪᠣᠯᠪᠠ ᠤᠤ) ᠳᠠ ᠭᠡᠳ ᠡᠮᠡᠭᠡᠨ ᠲᠡᠷᠡ ᠯᠠᠮᠠ ᠶ᠋ᠢᠨ ᠡᠯᠳᠡᠪ ᠢ᠋ᠶ᠋ᠡᠷ ᠱᠠᠯᠠᠭᠠᠨ ᠠᠰᠠᠭᠤᠬᠤ ᠠ᠋ᠴᠠ ᠨᠢ ᠰᠠᠯᠬᠤ ᠭᠡᠵᠦ ᠶᠠᠭᠠᠷᠠᠨ ᠴᠠᠭᠠᠨ ᠢᠳᠡᠭᠡ ᠲᠡᠢ ᠣᠷᠣᠰ ᠪᠣᠣᠪᠣ᠂ ᠴᠠᠢ ᠪᠠᠷᠢᠪᠠ᠃
ᠯᠠᠮᠠ ᠴᠠᠢ ᠢᠳᠡᠭᠡ ᠶ᠋ᠢ ᠨᠢ ᠲᠠᠮᠰᠢᠶᠠᠵᠤ ᠪᠠᠢᠭᠠᠳ ᠢᠳᠡᠵᠦ ᠢᠳᠡᠵᠦ᠂ ᠬᠠᠯᠠᠭᠤᠨ ᠴᠠᠢ ᠶ᠋ᠢ ᠨᠢ ᠭᠦᠵᠡᠭᠡᠯᠡᠵᠦ ᠭᠦᠵᠡᠭᠡᠯᠡᠵᠦ᠂ ᠲᠠᠭ ᠪᠣᠯᠤᠭᠰᠠᠨ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠠᠪᠵᠤ ᠶ᠋ᠢᠨ ᠳᠤᠭᠤᠢ ᠰᠢᠭ᠋ ᠳᠤᠭᠤᠢ ᠰᠢᠷᠠ ᠴᠢᠪᠠᠭᠠᠨᠴᠠ ᠨᠢᠭᠤᠷ ᠤ᠋ᠨ ᠢ᠋ᠶ᠋ᠠᠨ ᠴᠤᠪᠤᠷᠢᠬᠤ ᠬᠥᠯᠥᠰᠥ ᠠᠷᠴᠢᠪᠠ᠃ ᠭᠠᠳᠠᠨᠠ ᠠ᠋ᠴᠠ ᠬᠦᠢᠲᠡᠨ ᠳ᠋ᠦ᠍ ᠴᠢᠷᠠᠢ ᠨᠢ ᠤᠯᠠᠭᠠᠨ ᠪᠣᠯᠤᠭᠰᠠᠨ ᠨᠠᠰᠤᠨᠪᠠᠲᠤ ᠣᠷᠣᠵᠤ ᠢᠷᠡᠭᠡᠳ᠂ ᠵᠣᠴᠢᠨ ᠯᠠᠮᠠ ᠶ᠋ᠢᠨ ᠠᠮᠤᠷ ᠮᠡᠨᠳᠦ ᠶ᠋ᠢ ᠠᠶᠠᠲᠠᠢ ᠰᠠᠢᠬᠠᠨ ᠢ᠋ᠶ᠋ᠠᠷ ᠠᠰᠠᠭᠤᠪᠠ᠃
ᠲᠦᠰᠢᠮᠡᠯ ᠯᠠᠮᠠ᠂ ᠨᠠᠰᠤᠨᠪᠠᠲᠤ ᠠ᠋ᠴᠠ ᠶᠠᠭᠠᠬᠢᠭᠠᠳ ᠮᠣᠩᠭᠣᠯ ᠬᠥᠮᠦᠨ ᠮᠥᠷᠲᠡᠭᠡᠨ᠂ ᠣᠷᠣᠰ ᠠᠢᠯ ᠳ᠋ᠤ᠌ ᠰᠠᠭᠤᠵᠤ ᠪᠠᠢᠭᠠ ᠤᠴᠢᠷ ᠢ᠋ ᠠᠰᠠᠭᠤᠪᠠᠰᠤ᠂
— ᠬᠦᠷᠢᠶᠡᠨ ᠳ᠋ᠦ᠍ ᠭᠠᠮᠢᠩ ᠤ᠋ᠨ ᠱᠣᠷᠣᠩ ᠠ᠋ᠴᠠ ᠪᠣᠯᠵᠤ ᠪᠡᠶᠡ ᠮᠠᠭᠤᠳᠠᠭᠠᠳ ᠡᠨᠳᠡ ᠡᠮᠴᠢᠯᠡᠭᠦᠯᠵᠦ ᠪᠠᠢᠨᠠ᠃ ᠭᠠᠩᠳᠠᠨ ᠤ᠋ ᠡᠮᠴᠢ ᠨᠠᠷ ᠬᠥᠳᠡᠭᠡ ᠭᠠᠷᠪᠠᠯ ᠰᠠᠢᠨ ᠭᠡᠳ ᠵᠢᠷᠤᠬᠠᠢᠴᠢ ᠨᠠᠷ᠂ ᠡᠨᠡ ᠣᠷᠣᠰ ᠡᠮᠴᠢ ᠶ᠋ᠢ ᠨᠢᠭᠤᠷ ᠲᠠᠢ ᠭᠡᠵᠦ ᠠᠢᠯᠠᠳᠤᠭᠰᠠᠨ ᠪᠢᠯᠡ᠃ ᠡᠨᠡ ᠡᠮᠴᠢ ᠡᠳᠦᠷ ᠪᠦᠷᠢ ᠮᠠᠨᠠᠢᠳᠤ (ᠮᠠᠨ ᠤ᠋ ᠳ᠋ᠤ᠌) ᠣᠴᠢᠵᠤ ᠴᠢᠳᠠᠬᠤ ᠦᠭᠡᠢ ᠤᠴᠢᠷ᠂ ᠪᠢ ᠡᠳᠡᠨ ᠦ᠌ ᠳ᠋ᠦ᠍ ᠰᠠᠭᠤᠵᠤ ᠪᠠᠢᠨᠠ ᠬᠡᠮᠡᠪᠡᠰᠦ ᠲᠡᠷᠡ ᠯᠠᠮᠠ᠂ ᠨᠠᠰᠤᠨᠪᠠᠲᠤ ᠠ᠋ᠴᠠ᠄
— ᠰᠣᠨᠣᠰᠪᠠᠯ᠂ ᠪᠠᠷᠤᠨ ᠵᠠᠩᠵᠤᠨ ᠢ᠋ ᠲᠠᠪᠤᠳᠤᠭᠠᠷ ᠪᠣᠭᠳᠠ ᠶ᠋ᠢᠨ ᠬᠤᠪᠢᠯᠭᠠᠨ ᠭᠡᠳᠡᠭ᠃ ᠲᠠ ᠲᠡᠭᠦᠨ ᠢ᠋ ᠶᠠᠭᠤ ᠭᠡᠵᠦ ᠪᠣᠳᠣᠳᠠᠭ ᠪᠣᠢ? ᠭᠡᠵᠡᠢ᠃
— ᠪᠢ ᠨᠠᠢ᠍ᠮᠠᠳᠤᠭᠠᠷ ᠪᠣᠭᠳᠠ ᠶ᠋ᠢᠨ ᠥᠴᠦᠬᠡᠨ ᠨᠢᠭᠡᠨ ᠱᠠᠪᠢ ᠪᠣᠭᠣᠯ ᠪᠢᠯᠡ᠃ ᠥᠨᠳᠥᠷ ᠪᠣᠭᠳᠠ ᠶ᠋ᠢᠨ ᠨᠠᠢ᠍ᠮᠠᠳᠤᠭᠠᠷ ᠳᠦᠷᠢ ᠶ᠋ᠢ ᠡᠷᠳᠡᠨᠢ ᠶ᠋ᠢᠨ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠭᠰᠠᠨ ᠪᠠᠷᠤᠨ᠂ ᠶᠠᠭᠠᠬᠢᠭᠠᠳ ᠲᠡᠷᠡ ᠪᠣᠭᠳᠠ ᠶ᠋ᠢᠨ ᠲᠠᠪᠤᠳᠤᠭᠠᠷ ᠳᠦᠷᠢ ᠶ᠋ᠢᠨ ᠬᠤᠪᠢᠯᠭᠠᠨ ᠪᠣᠯᠵᠤ᠂ ᠨᠢᠭᠡ ᠪᠣᠭᠳᠠ ᠶ᠋ᠢᠨ ᠲᠠᠪᠤᠳᠤᠭᠠᠷ ᠳᠦᠷᠢ ᠨᠢ ᠨᠠᠢ᠍ᠮᠠᠳᠤᠭᠠᠷ ᠳᠦᠷᠢ ᠪᠡᠨ ᠵᠠᠯᠠᠵᠤ ᠪᠠᠢᠳᠠᠭ ᠪᠣᠯᠬᠤ ᠤᠴᠢᠷ ᠢ᠋ ᠴᠠᠰᠤᠨ ᠵᠢᠷᠦᠬᠡ ᠲᠡᠢ᠂ ᠤᠰᠤᠨ ᠨᠢᠳᠦ ᠲᠡᠢ ᠨᠠᠳᠠ ᠰᠢᠭ᠋ ᠶᠢᠷᠲᠢᠨᠴᠦ ᠶ᠋ᠢᠨ ᠡᠭᠡᠯ ᠲᠥᠷᠥᠯᠬᠢᠲᠡᠨ ᠮᠡᠳᠡᠬᠦ ᠴᠢᠳᠠᠯ ᠤᠬᠠᠭᠠᠨ ᠬᠦᠷᠬᠦ ᠦᠭᠡᠢ ᠪᠠᠢᠨᠠ᠃ ᠪᠠᠰᠠ ᠰᠣᠨᠣᠰᠪᠠᠯ᠂ ᠮᠠᠨᠵᠤᠰᠢᠷᠢ ᠪᠠᠭᠰᠢ᠂ ᠡᠨᠡ ᠲᠤᠬᠠᠢ ᠥᠭᠡᠷᠡ ᠪᠡᠷ ᠠᠢᠯᠠᠳᠳᠠᠭ ᠭᠡᠨᠡ ᠪᠢᠯᠡ᠃ ᠲᠠ ᠨᠠᠳᠠᠳᠤ (ᠨᠠᠳᠠ ᠳ᠋ᠤ᠌) ᠡᠭᠦᠨ ᠦ᠌ ᠤᠴᠢᠷ ᠢ᠋ ᠬᠠᠷᠢᠨ ᠰᠤᠷᠭᠠᠨ ᠰᠡᠩᠬᠡᠷᠡᠭᠦᠯᠵᠦ ᠠᠢᠯᠠᠳᠤᠨᠠᠤ(ᠠᠢᠯᠠᠳᠤᠨᠠ ᠤᠤ)? ᠭᠡᠪᠡᠯ᠂ ᠲᠡᠷᠡ ᠯᠠᠮᠠ ᠮᠤᠬᠤᠷᠳᠠᠨ ᠵᠠᠢᠮᠤᠷᠠᠭᠤᠯᠵᠤ ᠥᠭᠡᠷᠡ ᠶᠠᠭᠤᠮᠠ ᠶᠠᠷᠢᠵᠤ ᠡᠬᠢᠯᠡᠯᠡ᠃
ᠨᠠᠰᠤᠨᠪᠠᠲᠤ᠂ ᠲᠡᠷᠡ ᠯᠠᠮᠠ ᠲᠠᠢ ᠮᠠᠭᠤᠳᠠᠯᠴᠠᠬᠤ ᠦᠭᠡᠢ ᠶ᠋ᠢ ᠪᠣᠳᠣᠵᠤ᠂ ᠪᠠᠰᠠ ᠬᠠᠷᠠᠳᠠᠨ ᠰᠡᠵᠢᠭᠯᠡᠬᠦ ᠶ᠋ᠢ ᠨᠢ ᠲᠠᠰᠤᠯᠬᠤ ᠭᠡᠵᠦ ᠨᠢᠭᠡ ᠬᠠᠳᠠᠭ᠂ ᠬᠢᠲᠠᠳ ᠮᠥᠩᠭᠥᠨ ᠶᠠᠩᠴᠢᠶᠠᠨ ᠤ᠋ ᠬᠠᠮᠲᠤ ᠭᠠᠷᠭᠠᠵᠤ ᠪᠠᠷᠢᠭᠠᠳ᠂ ᠮᠢᠨᠦ ᠡᠪᠡᠳᠴᠢᠨ ᠡᠮᠭᠡᠭ ᠲᠦᠷᠭᠡᠨ ᠢᠯᠠᠷᠢ ᠪᠣᠯᠬᠤ ᠶ᠋ᠢᠨ ᠲᠤᠬᠠᠢ ᠲᠠᠨ ᠳ᠋ᠤ᠌ ᠵᠠᠯᠪᠠᠷᠢᠨ ᠳᠠᠭᠠᠳᠬᠠᠶᠠ᠃ ᠲᠠ ᠠᠳᠢᠰᠯᠠᠨ ᠰᠣᠶᠣᠷᠬᠠ ᠭᠡᠪᠡᠯ᠂ ᠲᠡᠷᠡ ᠯᠠᠮᠠ ᠬᠠᠳᠠᠭ ᠮᠥᠩᠭᠥ ᠶ᠋ᠢ ᠳᠤᠷᠠᠲᠠᠶᠠ ᠬᠣᠷᠢᠶᠠᠨ ᠠᠪᠴᠤ᠂ ᠨᠢᠭᠡ ᠶᠠᠭᠤᠮᠠ ᠤᠩᠰᠢᠬᠤᠢᠴᠠ ᠪᠠᠨ ᠪᠣᠯᠤᠭᠠᠳ᠂ ᠨᠠᠰᠤᠨᠪᠠᠲᠤ ᠶ᠋ᠢ ᠠᠳᠢᠰᠯᠠᠭᠠᠳ ᠮᠣᠷᠳᠠᠵᠠᠢ᠃
ᠯᠠᠮᠠ ᠶ᠋ᠢ ᠶᠠᠪᠤᠭᠰᠠᠨ ᠬᠣᠢᠨᠠ ᠨᠡᠬᠡᠢᠲᠦ ᠢᠨᠢᠶᠡᠨ ᠥᠭᠦᠯᠡᠷᠦᠨ᠂
— ᠴᠢ ᠰᠠᠢ᠍ᠢ(ᠰᠠᠶᠢ) ᠶ᠋ᠢᠨ ᠯᠠᠮᠠ ᠳ᠋ᠤ᠌ ᠬᠠᠳᠠᠭ ᠶᠠᠩᠴᠢᠶᠠᠨ ᠪᠠᠷᠢᠵᠤ᠂ ᠠᠳᠢᠰ ᠭᠤᠶᠤᠨ ᠳᠠᠭᠠᠳᠬᠠᠭᠰᠠᠨ ᠴᠢᠨᠢ ᠮᠠᠰᠢ ᠰᠠᠢᠨ ᠠᠷᠭᠠ᠂ ᠲᠡᠷᠡ ᠯᠠᠪ ᠴᠢᠮᠠᠶ᠋ᠢ (ᠴᠢᠮᠠ ᠶ᠋ᠢ) ᠳᠠᠩᠰᠠᠨ ᠦᠵᠡᠬᠦ ᠭᠡᠵᠦ ᠢᠷᠡᠭᠰᠡᠨ ᠪᠠᠢᠬᠤ ᠰᠢᠦ᠃ ᠵᠠ᠂ ᠭᠠᠢᠭᠤᠢ ᠳᠠ᠂ ᠤᠳᠠᠬᠤ ᠦᠭᠡᠢ ᠮᠠᠨᠠᠢᠬᠢᠨ (ᠮᠠᠨ ᠤ᠋ ᠬᠢᠨ) ᠦ᠌ ᠪᠠᠶᠠᠷ ᠬᠥᠷ ᠪᠣᠯᠬᠤ ᠴᠠᠭ ᠠᠢᠰᠤᠢ᠃ ᠤᠯᠠᠭᠠᠨ ᠴᠡᠷᠢᠭ᠂ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠲᠦᠮᠡᠨ ᠳ᠋ᠦ᠍ ᠲᠤᠰᠠᠯᠠᠵᠤ᠂ ᠴᠠᠭᠠᠨ ᠨᠠᠮ ᠤ᠋ᠨ ᠪᠤᠵᠠᠷ ᠡᠲᠡᠭᠡᠳ ᠢ᠋ ᠭᠠᠷ ᠬᠥᠯ ᠪᠣᠯᠤᠭᠰᠠᠨ ᠡᠲᠡᠭᠡᠳ ᠦ᠋ᠨ ᠬᠠᠮᠲᠤ ᠦᠯᠳᠡᠨ ᠠᠷᠢᠯᠭᠠᠬᠤ ᠴᠠᠭ ᠬᠣᠯᠠ ᠦᠭᠡᠢ ᠭᠡᠵᠡᠢ᠃
— — — —
* ᠫᠦᠰᠡ ᠭᠡᠵᠦ ᠠᠷᠤ ᠥᠪᠥᠷ ᠬᠣᠶᠠᠷ ᠲᠤ᠌ ᠪᠠᠨ ᠮᠥᠨ ᠬᠣᠶᠠᠷ ᠮᠥᠷᠦᠨ ᠳ᠋ᠡᠭᠡᠨ( ᠳ᠋ᠦ᠍ ᠪᠡᠨ)ᠬᠠᠳᠠᠳᠠᠭ ᠬᠡᠷᠬᠡᠮ ᠵᠡᠷᠭᠡ ᠶ᠋ᠢᠨ ᠲᠡᠮᠳᠡᠭ ᠪᠠᠢᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠶᠤᠨᠪᠢᠯᠢᠭ᠌᠂ ᠤᠢᠭᠤᠷᠵᠢᠨ· ᠣᠳᠬᠣᠨᠪᠠᠪᠠ᠂ ᠪᠠᠳᠮᠠᠰᠡᠴᠡᠨ᠂ ᠲᠠᠪᠤᠨ ᠤᠰᠤ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠣᠶᠤᠨᠪᠠᠲᠤ᠂ ᠪᠠᠯ