ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠭᠤᠲᠠᠭᠠᠷ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠨᠠᠢ᠍ᠮᠠ> Хан мунын сүүрс < доорд > – Мөнх зохиоов ᠂ Гутгаар бодь – Гуравдугаар бүлэг <8>
291ᠭᠤᠲᠠᠭᠠᠷ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠨᠠᠢ᠍ᠮᠠ>
ᠲᠠᠪᠤᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠲᠠᠪᠤᠨ ᠤ᠋ ᠥᠷᠯᠥᠭᠡᠭᠦᠷ ᠪᠯᠠᠮᠤ ᠡᠷᠲᠡ ᠪᠣᠰᠴᠤ ᠴᠠᠢ ᠶ᠋ᠢᠨ ᠮᠣᠳᠣᠨ ᠤ᠋ ᠵᠢᠯᠠᠭᠠ ᠰᠢᠪᠲᠤᠷᠠᠵᠤ᠂ ᠬᠡᠳᠦᠨ ᠮᠥᠴᠢᠷ ᠨᠣᠢᠲᠠᠨ ᠠᠭᠠᠷᠤ(ᠠᠷᠴᠠ) ᠬᠤᠭᠤᠯᠵᠤ ᠠᠪᠤᠨ ᠠᠷᠤ ᠡᠩᠭᠡᠷ ᠦ᠋ᠨ ᠰᠢᠷᠢᠩᠬᠡᠨ ᠳᠣᠲᠣᠷᠠ ᠠ᠋ᠴᠠ ᠵᠤᠮᠠᠭᠠᠭᠰᠠᠨ ᠠᠭᠢ ᠪᠠᠨ ᠬᠣᠷᠮᠣᠢᠯᠠᠭᠠᠳ《ᠡᠮ ᠪᠣᠯ᠂ ᠲᠣᠮ ᠪᠣᠯ》 ᠭᠡᠵᠦ ᠠᠮᠠᠨ ᠤᠩᠰᠢᠯᠭᠠ ᠪᠣᠯᠤᠨ ᠪᠤᠴᠠᠵᠤ ᠬᠠᠷᠢᠬᠤ ᠳ᠋ᠤ᠌ ᠣᠳᠬᠣᠨ ᠬᠦᠦ— ᠠᠭᠤᠯᠠᠨᠬᠦᠦ ᠨᠢ ᠬᠣᠶᠠᠷ ᠪᠢᠷᠠᠭᠤ ᠪᠠᠨ ᠬᠥᠩᠭᠡᠯᠡᠵᠦ ᠪᠠᠷᠠᠭᠠᠳ ᠬᠡᠳᠦᠨ ᠢᠰᠢᠭᠡ ᠪᠡᠨ ᠴᠢᠮᠬᠢᠬᠦ ᠭᠡᠵᠦ ᠢᠯᠭᠠᠵᠤ ᠪᠠᠢᠯᠠ᠃ ᠪᠯᠠᠮᠤ ᠬᠣᠷᠣᠭᠠᠨ ᠳ᠋ᠠᠭᠠᠨ ᠰᠠᠩ ᠤᠭᠤᠭᠢᠭᠤᠯᠵᠤ᠂ ᠮᠣᠳᠣᠨ ᠲᠠᠭᠱᠠᠨ ᠳᠣᠲᠣᠷᠠ ᠲᠠᠪᠤᠨ ᠲᠠᠷᠢᠶᠠᠨ ᠦᠷᠡ ᠬᠢᠵᠦ ᠳᠡᠭᠡᠷᠡ ᠨᠢ ᠰᠦ ᠳᠤᠰᠤᠭᠠᠵᠤ ᠠᠷᠴᠠ ᠬᠦᠵᠢᠰ ᠦ᠋ᠨ ᠵᠦᠢᠯ ᠢ᠋ᠶ᠋ᠡᠷ ᠠᠷᠢᠭᠤᠳᠬᠠᠨ ᠦᠢᠯᠡᠳᠴᠦ᠂ ᠬᠦᠦ ᠪᠡᠨ ᠬᠠᠮᠵᠢᠵᠤ ᠢᠰᠢᠭᠡ ᠨᠦ᠍ᠭᠦᠳ ᠢ᠋ᠶ᠋ᠡᠨ ᠴᠢᠮᠬᠢᠪᠡ᠃
ᠡᠨᠡ ᠦᠶᠡ ᠳ᠋ᠦ᠍ ᠠᠭᠤᠯᠠᠨᠬᠦᠦ ᠠᠷᠪᠠᠨ ᠳᠥᠷᠪᠡᠲᠡᠢ ᠪᠣᠯᠪᠠᠴᠤ ᠠᠷᠪᠠᠨ ᠨᠠᠢ᠍ᠮᠠ ᠶᠢᠰᠦᠲᠡᠢ ᠡᠷᠡ ᠶ᠋ᠢᠨ ᠰᠢᠨᠵᠢ ᠣᠷᠣᠵᠤ᠂ ᠪᠤᠯᠴᠢᠩ ᠰᠢᠷᠪᠥᠰᠥ ᠨᠢ ᠵᠠᠩᠭᠢᠷᠠᠨ ᠤᠷᠤᠭᠤᠯ ᠳ᠋ᠤᠨᠢ ᠤᠨᠠᠭᠠᠨ ᠰᠠᠬᠠᠯ ᠬᠠᠯᠢᠭᠤᠷᠠᠵᠠᠢ᠃ ᠠᠭᠤᠯᠠᠨᠬᠦᠦ ᠬᠡᠳᠦᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠦᠬᠡᠷ ᠨᠤᠭᠤᠰᠤᠯᠠᠵᠤ ᠲᠦᠳᠡᠬᠡᠨ ᠠᠷᠠᠰᠤ ᠶ᠋ᠢ ᠥᠪᠴᠢᠨ ᠮᠢᠬᠠ ᠶ᠋ᠢ ᠨᠢ ᠨᠢᠭᠡ ᠲᠡᠢᠰᠢ ᠨᠢ ᠲᠢᠭ ᠲᠠᠭ ᠪᠣᠯᠭᠠᠴᠢᠬᠠᠳᠠᠭ ᠴᠠᠷᠢᠭᠤᠨ ᠲᠠᠮᠢᠷ ᠲᠠᠢ ᠶ᠋ᠢ ᠬᠡᠯᠡᠬᠦ ᠦᠭᠡᠢ ᠬᠤᠷᠠᠭᠠ ᠢᠰᠢᠭᠡ ᠴᠢᠮᠬᠢᠬᠦ᠂ ᠪᠢᠷᠠᠭᠤ ᠰᠢᠳᠦᠯᠡᠩ ᠬᠥᠩᠭᠡᠯᠡᠬᠦ᠂ ᠦᠷᠢᠶᠡ ᠳᠠᠭᠠ ᠬᠠᠭᠠᠷᠢᠬᠤ ᠨᠠᠷᠢᠯᠢᠭ ᠴᠢᠮᠪᠠᠢ ᠠᠵᠢᠯ ᠳ᠋ᠤ᠌ ᠴᠤ᠌ ᠭᠠᠷ ᠬᠥᠩᠭᠡᠨ᠂ ᠡᠪ ᠳᠦᠢᠲᠡᠢ ᠠᠵᠢ᠃ ᠲᠡᠭᠦᠨ ᠦ᠌ ᠭᠠᠷ ᠢ᠋ᠶ᠋ᠠᠷ ᠬᠥᠩᠭᠡᠯᠡᠭᠳᠡᠭᠰᠡᠨ ᠪᠤᠲᠠ ᠪᠤᠭ ᠮᠠᠯ ᠤ᠋ᠨ ᠠᠯᠢᠨ ᠨᠢ ᠴᠦ᠍ ᠭᠡᠳ ᠭᠠᠷ ᠲᠦᠰᠢᠳᠡᠭ ᠦᠭᠡᠢ᠃ ᠲᠡᠷᠡ ᠳᠣᠣᠷᠠ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠠᠬᠤ ᠲᠡᠳᠦᠢ ᠴᠠᠭᠠᠰᠢ ᠶᠠᠪᠤᠭᠠᠳ ᠬᠡᠳᠦ ᠬᠣᠨᠣᠭᠰᠠᠨ ᠳ᠋ᠤ᠌ ᠠᠵᠢᠭ ᠦᠭᠡᠢ ᠲᠣᠭᠯᠠᠭᠠᠳ ᠭᠦᠶᠦᠴᠢᠭᠡᠳᠡᠭ᠃ ᠲᠡᠭᠡᠬᠦ ᠳ᠋ᠦ᠍ ᠬᠠᠶᠠ ᠵᠠᠷᠢᠮ ᠭᠠᠷ ᠬᠦᠨᠳᠦ ᠪᠤᠳᠤᠯᠢᠭᠤ ᠡᠷᠡ ᠶ᠋ᠢᠨ ᠬᠥᠩᠭᠡᠯᠡᠭᠰᠡᠨ ᠮᠠᠯ ᠰᠢᠷᠬᠠᠨ ᠳ᠋ᠠᠭᠠᠨ ᠪᠣᠭᠣᠭᠳᠠᠵᠤ ᠪᠥᠭᠡᠷᠡ ᠨᠢ ᠤᠨᠠᠴᠢᠬᠠᠭᠰᠠᠨ ᠶᠠᠭᠤᠮᠠ ᠰᠢᠭ᠋ ᠰᠡᠭᠦᠵᠢ ᠪᠡᠨ ᠳᠠᠭᠠᠭᠠᠬᠤ ᠦᠭᠡᠢ ᠭᠣᠢᠭᠣᠷᠵᠤ᠂ ᠨᠢᠭᠡ ᠪᠣᠯ ᠬᠡᠪᠲᠡᠴᠢᠬᠡᠨᠡ᠃ ᠵᠠᠷᠢᠮ ᠨᠢ ᠤᠮᠠᠳᠠᠭ ᠲᠤᠨᠢ ᠬᠡᠢ ᠬᠠᠪᠴᠢᠭᠤᠯᠵᠤ ᠣᠷᠬᠢᠭᠰᠠᠨ ᠠ᠋ᠴᠠ ᠨᠦᠬᠡ ᠭᠠᠷᠴᠤ ᠴᠢᠰᠤ ᠴᠤᠪᠤᠭᠠᠳ᠂ ᠬᠠᠯᠠᠭᠤᠨ ᠤ᠋ ᠴᠠᠭ ᠥᠳᠥᠵᠦ ᠦᠢᠯᠡ ᠪᠠᠷᠠᠨᠠ᠃ ᠠᠭᠤᠯᠠᠨᠬᠦᠦ ᠬᠡᠳᠦᠢᠪᠡᠷ ᠨᠠᠰᠤ ᠪᠠᠭᠠ ᠴᠢᠰᠤ ᠰᠢᠩᠭᠡᠨ ᠪᠣᠯᠪᠠᠴᠤ ᠡᠨᠡ ᠶᠠᠭᠤᠮᠠᠨ ᠤ᠋ ᠨᠠᠷᠢᠨ ᠤᠬᠠᠭᠠᠨ ᠢ᠋ ᠮᠡᠳᠡᠳᠡᠭ ᠪᠣᠯᠵᠠᠢ᠃ ᠲᠡᠷᠡ ᠪᠡᠷ ᠵᠠᠷᠢᠮ ᠠᠢᠯ ᠳ᠋ᠤ᠌ ᠵᠠᠯᠠᠭᠳᠠᠵᠤ ᠢᠰᠢᠭᠡ ᠬᠤᠷᠠᠭᠠ ᠴᠢᠮᠬᠢᠬᠦ ᠪᠡᠷ ᠣᠴᠢᠪᠠᠯ ᠤᠷᠢᠳ ᠢ᠋ᠶ᠋ᠠᠷ ᠭᠡᠷ ᠦ᠋ᠨ ᠡᠵᠡᠭᠲᠡᠢ ᠡᠴᠡ《ᠡᠪᠡᠷ ᠢ᠋ ᠨᠢ ᠪᠦᠳᠦᠭᠦᠨ ᠪᠣᠯᠭᠠᠬᠤ ᠤᠤ? ᠨᠠᠷᠢᠨ ᠡᠪᠡᠷ ᠲᠡᠢ ᠦᠯᠡᠳᠡᠭᠡᠬᠦ ᠤᠤ?》 ᠭᠡᠵᠦ ᠰᠠᠨᠠᠯ ᠢ᠋ ᠨᠢ ᠠᠪᠴᠤ ᠬᠢᠨᠡ᠃ ᠡᠪᠡᠷ ᠢ᠋ ᠨᠢ ᠰᠡᠷᠪᠡᠭᠡᠷ᠂ ᠳᠠᠷᠠᠭᠠᠷ ᠤᠬᠤᠨᠠᠨᠴᠢᠷ ᠪᠣᠯᠭᠠᠶᠠ ᠭᠡᠪᠡᠯ ᠢᠰᠢᠭᠡ ᠴᠢᠮᠬᠢᠬᠦ ᠳ᠋ᠦ᠍ ᠪᠥᠭᠡᠨᠰᠦᠭ ᠦ᠋ᠨ ᠬᠢᠨᠢ ᠳᠣᠲᠣᠷᠠ ᠬᠠᠯᠢᠰᠤ ᠶ᠋ᠢ ᠨᠢ ᠦᠯᠡᠳᠡᠭᠡᠵᠦ ᠨᠠᠷᠢᠨ ᠰᠤᠳᠠᠰᠤ ᠶ᠋ᠢ ᠨᠢ ᠳᠤᠲᠠᠭᠤᠬᠠᠨ ᠰᠢᠭ᠋ ᠲᠠᠰᠤᠯᠵᠤ ᠬᠣᠭᠣᠰᠣᠨ ᠤᠮᠠᠳᠠᠭ ᠢ᠋ ᠨᠢ ᠬᠡᠢ ᠬᠠᠪᠴᠢᠭᠤᠯᠬᠤ ᠦᠭᠡᠢ ᠴᠢᠮᠬᠢᠨᠡ᠃ ᠢᠩᠭᠢᠵᠦ ᠡᠪᠯᠢᠭ ᠴᠢᠮᠬᠢᠭᠰᠡᠨ ᠢᠰᠢᠭᠡ ᠬᠣᠵᠢᠮ ᠰᠢᠲᠦ ᠭᠦᠢᠴᠡᠭᠰᠡᠨ ᠰᠡᠷᠬᠡ ᠪᠣᠯᠪᠠᠯ ᠪᠦᠳᠦᠭᠦᠨ ᠡᠪᠡᠷ ᠲᠡᠢ ᠬᠣᠩᠭᠣ ᠳᠦᠭᠦᠷᠡᠩ ᠮᠢᠬᠠᠯᠢᠭ ᠪᠣᠯᠳᠠᠭ᠃ ᠬᠢᠬᠦ ᠳ᠋ᠡᠭᠡᠨ ᠨᠢᠭᠡ ᠮᠠᠭᠤ ᠨᠢ ᠤᠬᠤᠨᠠ ᠲᠠᠯᠪᠢᠬᠤ ᠦᠶᠡ ᠳ᠋ᠦ᠍ ᠣᠷᠣᠭᠠᠨ ᠤ᠋ ᠢᠮᠠᠭᠠ ᠬᠥᠭᠡᠭᠡᠵᠦ ᠴᠢᠷᠠᠢ ᠠᠯᠳᠠᠳᠠᠭ᠃ ᠬᠠᠷᠢᠨ ᠡᠭᠦᠨ ᠦ᠌ ᠳᠣᠲᠣᠷᠠ ᠬᠠᠯᠢᠰᠤ ᠶ᠋ᠢ ᠨᠢ ᠦᠯᠡᠳᠡᠭᠡᠬᠦ ᠦᠭᠡᠢ ᠬᠠᠭᠤᠯᠵᠤ᠂ ᠨᠠᠷᠢᠨ ᠤᠲᠠᠰᠤ ᠶ᠋ᠢ ᠨᠢ ᠰᠤᠨᠲᠠᠯᠠ ᠴᠡᠪᠡᠷᠬᠡᠨ ᠰᠤᠭᠤᠯᠪᠠᠯ ᠡᠮᠡ ᠢᠮᠠᠭᠠ ᠰᠢᠭ᠋ ᠨᠠᠷᠢᠬᠠᠨ ᠡᠪᠡᠷ ᠲᠡᠢ ᠬᠣᠩᠭᠣ ᠪᠠᠷ ᠢ᠋ᠶ᠋ᠠᠨ ᠬᠠᠪᠴᠢᠭᠠᠷᠳᠠᠭᠤ ᠪᠣᠯᠳᠠᠭ ᠪᠠᠢᠨᠠ᠃ ᠠᠭᠤᠯᠠᠨᠬᠦᠦ ᠪᠣᠯ ᠣᠯᠠᠩᠬᠢ ᠳ᠋ᠠᠭᠠᠨ ᠡᠮᠦᠨᠡᠬᠢ ᠠᠷᠭᠠ ᠪᠠᠷ ᠬᠥᠩᠭᠡᠯᠡᠳᠡᠭ ᠪᠠᠢᠯᠠ᠃
ᠠᠭᠤᠯᠠᠨᠬᠦᠦ ᠲᠣᠳᠣᠷᠭᠠ ᠶ᠋ᠢᠨ ᠠᠯᠠᠭ ᠲᠠᠢ ᠰᠢᠷᠠ ᠲᠣᠰᠣ ᠭᠥᠯᠢᠭᠡᠨᠡᠭᠰᠡᠨ ᠠᠮᠤᠰᠤ ᠢᠳᠡᠵᠦ᠂ ᠲᠠᠬᠢᠯᠭᠠ ᠶ᠋ᠢᠨ ᠵᠦᠢᠯ ᠢ᠋ᠶ᠋ᠡᠨ ᠲᠥᠬᠥᠭᠡᠷᠴᠦ ᠥᠯᠥᠩᠲᠦ ᠶ᠋ᠢᠨ ᠳᠠᠪᠠᠭᠠ ᠶ᠋ᠢ ᠳᠠᠪᠠᠨ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠶ᠋ᠢᠨ ᠬᠣᠩᠭᠢᠯ ᠳ᠋ᠤ᠌ ᠣᠴᠢᠬᠤᠯᠠ ᠯᠠᠮᠠᠪᠤᠭᠠᠢ ᠡᠵᠡᠭᠦᠢ ᠪᠠᠢᠵᠠᠢ᠃ ᠯᠠᠮᠠᠬᠠᠢ ᠶ᠋ᠢᠨ ᠬᠠᠶᠠᠭᠠ ᠮᠠᠨᠠᠳᠠᠭ ᠭᠢᠴᠢᠢ ᠴᠢᠨᠣᠠ ᠴᠤ᠌ ᠠᠭᠤᠯᠠᠨᠬᠦᠦ ᠶ᠋ᠢ ᠲᠠᠨᠢᠳᠠᠭ ᠪᠣᠯᠬᠣᠷ ᠲᠡᠭᠦᠨ ᠢ᠋ ᠣᠴᠢᠵᠤ ᠶᠠᠪᠤᠬᠤ ᠳ᠋ᠤᠨᠢ ᠰᠠᠭᠠᠳ ᠪᠣᠯᠳᠠᠭ ᠦᠭᠡᠢ᠃ ᠬᠣᠩᠭᠢᠯ ᠤ᠋ᠨ ᠲᠣᠲᠣᠭᠣ ᠬᠠᠳᠠᠨ ᠳ᠋ᠤ᠌ ᠡᠯᠭᠦᠭᠡᠰᠦᠲᠡᠢ ᠮᠤᠨᠠ ᠬᠠᠨ ᠤ᠋ ᠬᠥᠷᠥᠭ ᠬᠠᠷᠠᠭᠳᠠᠭᠠ ᠦᠭᠡᠢ ᠳ᠋ᠦ᠍᠂ ᠲᠡᠷᠡ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠰᠢᠷᠠ ᠣᠷᠣᠢ ᠳ᠋ᠤ᠌ ᠭᠠᠷᠴᠤ ᠮᠤᠨᠠ ᠬᠠᠨ ᠤ᠋ ᠲᠠᠬᠢᠯᠭᠠ ᠳ᠋ᠤ᠌ ᠡᠷᠲᠡᠯᠡᠨ ᠬᠥᠳᠡᠯᠪᠡ ᠭᠡᠰᠡᠨ ᠢ᠋ ᠮᠡᠳᠡᠵᠡᠢ᠃
ᠠᠭᠤᠯᠠᠨᠬᠦᠦ᠂ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠳ᠋ᠤ᠌ ᠲᠤᠰᠬᠠᠢ ᠠᠪᠴᠤ ᠢᠷᠡᠭᠰᠡᠨ ᠢᠰᠢᠭᠡᠨ ᠦ᠌ ᠪᠥᠭᠡᠨᠰᠦᠭ ᠰᠢᠭᠢᠳᠬᠡᠭᠰᠡᠨ ᠰᠢᠷᠠ ᠲᠣᠰᠣ ᠲᠠᠢ ᠲᠣᠳᠣᠷᠭᠠ ᠶ᠋ᠢᠨ ᠠᠮᠤᠰᠤ ᠪᠣᠯᠤᠨ ᠪᠢᠷᠠᠭᠤᠨ ᠤ᠋ ᠬᠣᠶᠠᠷ ᠪᠥᠭᠡᠨᠰᠦᠭ ᠢ᠋ ᠬᠠᠳᠠᠨ ᠬᠣᠩᠭᠢᠯ ᠳ᠋ᠤᠨᠢ ᠦᠯᠡᠳᠡᠭᠡᠵᠦ ᠲᠠᠯᠪᠢᠭᠠᠳ ᠪᠤᠷᠬᠠᠨ ᠤ᠋ ᠬᠢᠨᠢ ᠡᠮᠦᠨᠡ ᠨᠢᠭᠡ ᠲᠠᠬᠢᠯ ᠠᠰᠠᠭᠠᠵᠤ ᠮᠥᠷᠭᠥᠪᠡ᠃
ᠮᠤᠨᠠ ᠬᠠᠨ ᠤ᠋ ᠲᠠᠬᠢᠯᠭᠠ ᠠ᠋ᠴᠠ ᠠᠷᠠᠢ ᠬᠣᠵᠢᠮᠳᠠᠵᠤ ᠬᠦᠷᠦᠭᠰᠡᠨ ᠠᠭᠤᠯᠡᠨᠬᠦᠦ ᠮᠡᠷᠭᠡᠨ ᠭᠡᠭᠡᠨᠲᠠᠨ᠂ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ᠂ ᠤᠮᠵᠠᠳ ᠭᠡᠪᠬᠦᠢ᠂ ᠵᠢᠩᠰᠡ ᠣᠲᠣᠭᠠᠲᠠᠳ ᠤ᠋ᠨ ᠡᠮᠦᠨᠡᠭᠦᠷ ᠠᠵᠢᠭ ᠴᠤ᠌ ᠦᠭᠡᠢ ᠶᠠᠪᠤᠵᠤ ᠮᠤᠨᠠ ᠬᠠᠨ ᠤ᠋ ᠬᠥᠷᠥᠭ ᠵᠢᠷᠤᠭ ᠤ᠋ᠨ ᠡᠮᠦᠨᠡ ᠣᠴᠢᠵᠤ ᠰᠥᠬᠥᠷᠡᠨ ᠮᠥᠷᠭᠥᠨᠡ᠃ ᠬᠢᠷᠬᠢᠮᠲᠡᠨ ᠨᠣᠶᠠᠳ ᠲᠡᠭᠦᠨ ᠢ᠋ ᠬᠠᠷᠠᠭᠠᠳ ᠭᠠᠢᠬᠠᠯᠳᠤᠵᠤ᠂ ᠴᠢᠬᠢ ᠴᠢᠬᠢᠨ ᠳ᠋ᠡᠭᠡᠨ ᠰᠢᠪᠡᠨᠡᠯᠳᠦᠨ《ᠡᠨᠡ ᠶᠠᠭᠠᠬᠢᠭᠰᠠᠨ ᠠᠰᠠᠮᠠᠨ ᠬᠦᠦ ᠪᠣᠢ?》 ᠭᠡᠬᠦ ᠰᠢᠭ ᠬᠠᠷᠠᠴᠠ ᠭᠦᠶᠦᠯᠭᠡᠨ ᠲᠡᠷᠡ ᠬᠠᠷᠠ ᠬᠦᠦ ᠶ᠋ᠢ ᠰᠢᠷᠳᠡᠴᠡᠭᠡᠨᠡ᠃ ᠬᠠᠷᠠ ᠬᠦᠦ ᠳᠠᠯᠢᠩᠪᠤᠤ ᠬᠥᠬᠡ ᠲᠡᠷᠯᠢᠭ ᠦ᠋ᠨ ᠢ᠋ᠶ᠋ᠡᠨ ᠭᠠᠤᠯᠢᠨ ᠲᠣᠪᠴᠢ ᠶ᠋ᠢ ᠠᠯᠳᠠᠷᠠᠭᠠᠨ ᠡᠪᠦᠷ ᠡᠴᠡ ᠪᠡᠨ ᠰᠠᠭᠠᠯᠢ ᠶ᠋ᠢᠨ ᠳᠡᠭᠡᠵᠢ ᠡᠨᠡ ᠲᠡᠷᠡ ᠢᠳᠡᠭᠡᠨ ᠤᠮᠳᠠᠭᠠᠨ ᠡᠷᠭᠦᠵᠦ ᠴᠡᠩᠬᠡᠷ ᠴᠠᠭᠠᠨ ᠬᠠᠳᠠᠭ ᠳᠡᠪᠰᠢᠭᠦᠯᠪᠡ᠃ ᠲᠡᠭᠡᠭᠡᠳ ᠮᠡᠷᠭᠡᠨ ᠭᠡᠭᠡᠨ ᠪᠣᠯᠤᠨ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠶ᠋ᠢᠨ ᠮᠣᠳᠣᠷ ᠲᠤ ᠵᠤᠯᠠᠢ ᠪᠠᠨ ᠦᠨᠦᠰᠦᠭᠦᠯᠦᠨ ᠪᠤᠴᠠᠬᠤ ᠳᠤ ᠵᠣᠳᠪᠠ ᠭᠤᠸᠠᠢ ᠲᠡᠷᠡ ᠬᠠᠷᠠ ᠬᠦᠦ ᠶ᠋ᠢ ᠬᠠᠰᠢᠵᠤ᠄
— ᠠᠯᠢ ᠰᠤᠮᠤᠨ ᠤ᠋? ᠬᠡᠨ ᠦ᠌ ᠬᠦᠦ ᠪᠣᠢ?
— ᠵᠢᠭᠤᠴᠢᠨ ᠰᠤᠮᠤᠨ ᠤ᠋ ᠠᠭᠤᠯᠠᠨᠬᠦᠦ! ᠭᠡᠵᠦ ᠠᠮᠠᠨ ᠠᠶᠠ ᠪᠠᠷ ᠬᠠᠷᠢᠭᠤᠯᠪᠠ᠃
— ᠴᠢ᠁⁈ ᠭᠡᠵᠦ ᠵᠣᠳᠪᠠ ᠬᠡᠭᠵᠡᠭᠦᠬᠡᠨ ᠳᠤᠤᠭᠠᠷᠴᠤ《ᠡᠨᠡ ᠶᠠᠮᠠᠷ ᠬᠠᠮᠢᠭᠠᠰᠢ ᠪᠠᠨ ᠰᠤᠷᠲᠠᠯ ᠨᠣᠮ ᠦᠭᠡᠢ ᠬᠦᠦ ᠪᠣᠢ?》 ᠭᠡᠵᠦ ᠳᠣᠭᠰᠢᠨ ᠨᠢᠳᠦ ᠭᠥᠯᠢᠯᠵᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠭᠰᠠᠨ ᠡᠯᠳᠡᠩᠭᠡ᠂ ᠵᠣᠳᠪᠠ ᠶ᠋ᠢᠨ ᠬᠣᠷᠮᠣᠢ ᠶ᠋ᠢ ᠳᠠᠷᠤᠰᠬᠢᠨ《ᠮᠡᠷᠭᠡᠨ ᠭᠡᠭᠡᠨᠲᠠᠨ᠂ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠬᠦᠷᠲᠡᠯᠡ ᠮᠣᠳᠣᠷ ᠬᠠᠢᠷᠠᠯᠠᠵᠤ ᠪᠠᠢᠬᠤ ᠳ᠋ᠤ᠌᠁》 ᠭᠡᠰᠡᠨ ᠪᠠᠢᠳᠠᠯ ᠲᠠᠢ ᠵᠣᠳᠪᠠ ᠶ᠋ᠢ ᠣᠷᠣᠨ ᠳ᠋ᠤᠨᠢ ᠨᠠᠮ ᠰᠠᠭᠤᠯᠭᠠᠵᠤ᠄
— ᠡᠨᠡ ᠬᠠᠷᠠ ᠬᠦᠦ ᠴᠠᠭᠠᠰᠢ ᠶᠠᠪᠤᠭᠠᠴᠢ! ᠭᠡᠵᠦ ᠨᠠᠮᠬᠠᠨ ᠳᠤᠤᠭᠠᠷᠪᠠ᠃
ᠠᠭᠤᠯᠠᠨᠬᠦᠦ ᠵᠣᠳᠪᠠ ᠶ᠋ᠢᠨ ᠬᠠᠬᠢᠷ ᠭᠡᠷᠡᠯ ᠬᠠᠷᠪᠤᠭᠰᠠᠨ ᠳᠣᠭᠰᠢᠨ ᠨᠢᠳᠦ ᠪᠣᠯᠤᠨ ᠲᠠᠲᠠᠩᠬᠠᠢᠳᠠᠨ ᠢᠨᠢᠶᠡᠬᠦ ᠳ᠋ᠦ᠍ᠨᠢ ᠢᠷᠠᠯᠵᠠᠬᠤ ᠮᠣᠷᠢᠨ ᠴᠠᠭᠠᠨ ᠰᠢᠳᠦ ᠶ᠋ᠢ ᠴᠣᠭᠣᠷᠠᠲᠠᠯᠠ ᠬᠠᠷᠠᠵᠤ ᠠᠪᠤᠭᠠᠳ ᠳᠠᠷᠠᠭᠠ ᠨᠢ ᠡᠯᠳᠡᠩᠭᠡ ᠳᠠᠷᠤᠭᠠ ᠶ᠋ᠢ ᠬᠢᠯᠠᠪᠬᠢᠨ ᠰᠢᠷᠲᠡᠭᠡᠳ ᠴᠠᠭᠠᠰᠢ ᠶᠠᠪᠤᠵᠤ ᠣᠳᠪᠠ᠃
ᠬᠡᠢ ᠮᠣᠷᠢ ᠳᠠᠷᠴᠤᠭ ᠳᠡᠷᠪᠡᠯᠵᠡᠨ ᠬᠡᠢᠰᠦᠭᠰᠡᠨ ᠮᠤᠨᠠ ᠶ᠋ᠢᠨ ᠰᠢᠷᠠ ᠣᠷᠣᠢ ᠶ᠋ᠢᠨ ᠠᠷᠤ ᠬᠢᠷᠠ ᠶ᠋ᠢᠨ ᠵᠦᠯᠭᠡᠷᠬᠡᠭ ᠳᠡᠨᠵᠢᠨ ᠳ᠋ᠦ᠍ ᠲᠠᠬᠢᠯᠭᠠ ᠶ᠋ᠢᠨ ᠮᠥᠷᠭᠥᠯᠴᠢᠳ ᠡᠷᠡ ᠰᠢᠯᠭᠠᠵᠤ ᠰᠠᠢᠨ ᠡᠷᠡᠰ ᠪᠠᠷᠢᠯᠳᠤᠵᠠᠭᠠᠨᠠ᠃ ᠵᠢᠯ ᠳ᠋ᠡᠭᠡᠨ ᠡᠨᠳᠡ ᠡᠷᠡᠴᠦᠦᠯ ᠵᠦᠭᠡᠷ ᠯᠡ ᠪᠥᠬᠡ ᠶ᠋ᠢᠨ ᠰᠣᠷᠢᠶᠠᠨ ᠳ᠋ᠤ᠌ ᠮᠠᠭᠤ ᠬᠥᠯᠥᠰᠥ ᠪᠡᠨ ᠭᠠᠷᠭᠠᠵᠤ ᠪᠡᠶᠡ ᠲᠠᠢᠪᠤᠰᠢᠷᠠᠨ ᠬᠡᠢ ᠮᠣᠷᠢ ᠪᠠᠨ ᠬᠡᠢᠰᠬᠡᠳᠡᠭ ᠲᠡᠳᠦᠢ ᠡᠴᠡ ᠪᠢᠰᠢ ᠬᠡᠨ ᠴᠦ᠍ ᠵᠣᠬᠢᠶᠠᠨ ᠪᠠᠢᠭᠤᠯᠤᠭᠠ ᠦᠭᠡᠢ ᠶᠠᠮᠠᠷ ᠴᠤ᠌ ᠵᠦᠯᠲᠦ ᠪᠡᠯᠡᠭ ᠭᠡᠮᠡᠷ ᠶᠠᠭᠤᠮᠠ ᠪᠠᠢᠳᠠᠭ ᠦᠭᠡᠢ᠃ ᠭᠡᠲᠡᠯᠡ ᠥᠨᠥ ᠵᠢᠯ ᠠᠭᠤᠯᠠ ᠶ᠋ᠢᠨ ᠠᠷᠤ ᠶ᠋ᠢᠨ ᠪᠠᠶᠠᠨ ᠰᠤᠩᠷᠠᠢ ᠶ᠋ᠢᠨ ᠦᠬᠡᠷ ᠦ᠋ᠨ ᠰᠦᠷᠦᠭ ᠥᠨᠢᠷ ᠥᠰᠦᠭᠰᠡᠨ ᠡᠴᠡ ᠲᠡᠷᠢᠭᠦᠨ ᠪᠥᠬᠡ ᠳ᠋ᠦ᠍ ᠲᠤᠭᠤᠯ ᠲᠠᠢ ᠦᠨᠢᠶᠡ᠂ ᠳᠡᠳ᠋ ᠪᠥᠬᠡ ᠳ᠋ᠦ᠍ ᠭᠤᠨᠵᠢᠨ ᠦᠨᠢᠶᠡ᠂ ᠭᠤᠲᠠᠭᠠᠷ ᠪᠥᠬᠡ ᠳ᠋ᠦ᠍ ᠪᠢᠷᠠᠭᠤ ᠱᠠᠩᠨᠠᠨᠠ ᠭᠡᠵᠦ ᠵᠠᠷᠯᠠᠭᠰᠠᠨ ᠪᠣᠯᠬᠣᠷ ᠡᠯᠡ ᠰᠤᠮᠤᠨ ᠤ᠋ ᠪᠥᠬᠡᠴᠦᠦᠯ ᠪᠠᠶᠠᠨ ᠰᠤᠩᠷᠠᠢ ᠶ᠋ᠢᠨ ᠲᠤᠭᠤᠯ ᠲᠠᠢ ᠦᠨᠢᠶᠡᠨ ᠳ᠋ᠦ᠍ ᠰᠢᠨᠤᠵᠤ ᠰᠠᠢᠨ ᠳᠤᠷᠠ ᠶ᠋ᠢᠨ ᠪᠥᠬᠡ ᠶ᠋ᠢᠨ ᠰᠣᠷᠢᠶᠠᠨ ᠳ᠋ᠤ᠌ ᠨᠡᠷᠡ ᠮᠡᠳᠡᠭᠦᠯᠵᠦ ᠵᠠᠭᠤ ᠬᠣᠷᠢᠨ ᠨᠠᠢ᠍ᠮᠠᠨ ᠪᠥᠬᠡ ᠪᠦᠷᠢᠯᠳᠦᠪᠡ᠃ ᠡᠨᠡ ᠪᠠᠷᠲᠠᠭᠠ ᠶᠡᠬᠡᠲᠡᠢ ᠠᠭᠤᠯᠠ ᠶ᠋ᠢᠨ ᠬᠢᠷᠠ ᠳ᠋ᠤ᠌ ᠪᠣᠯᠤᠭᠰᠠᠨ ᠪᠥᠬᠡ ᠶ᠋ᠢᠨ ᠰᠣᠷᠢᠶᠠᠨ ᠳ᠋ᠤ᠌ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠨᠡᠷᠡ ᠲᠡᠢ ᠪᠥᠬᠡᠴᠦᠳ ᠡᠴᠡ ᠴᠤᠭᠤᠷᠬᠠᠢ ᠭᠣᠮᠪᠣ᠂ ᠲᠣᠩᠭᠣᠷᠠᠭᠠ ᠰᠤᠩᠳᠦᠢ᠂ ᠠᠴᠢᠶᠠ ᠯᠣᠷᠣᠢ᠁ ᠢᠷᠡᠭᠡ ᠦᠭᠡᠢ᠃ ᠵᠥᠪᠬᠡᠨ《ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠶ᠋ᠢᠨ ᠰᠢᠷᠡᠭᠡ ᠪᠠᠭᠰᠢ ᠶ᠋ᠢᠨ ᠬᠠᠪᠰᠤᠷᠤᠭᠠ(ᠴᠣᠬᠢᠶᠠ) ᠪᠣᠷᠣ᠂ ᠭᠡᠭᠡᠨ ᠰᠠᠩ ᠤ᠋ᠨ ᠭᠠᠳᠠᠰᠤ ᠪᠠᠳᠠᠢ ᠬᠣᠶᠠᠷ ᠯᠠ ᠬᠠᠷᠠᠭᠳᠠᠬᠤ ᠠ᠋ᠴᠠ ᠪᠠᠶᠠᠨ ᠰᠤᠩᠷᠠᠢ ᠶ᠋ᠢᠨ ᠲᠤᠭᠤᠯ ᠲᠠᠢ ᠦᠨᠢᠶᠡ᠂ ᠭᠤᠨᠵᠢᠨ ᠦᠨᠢᠶᠡ ᠶ᠋ᠢ ᠡᠳᠡ ᠬᠣᠶᠠᠷ ᠲᠤ ᠯᠠ ᠬᠤᠪᠢᠳᠠᠭᠤᠯᠤᠭᠰᠠᠨ ᠴᠢᠷᠠᠢ ᠭᠡᠵᠦ ᠬᠥᠮᠦᠰ ᠱᠤᠤᠭᠢᠯᠳᠤᠨᠠ᠃
ᠪᠥᠬᠡ ᠶ᠋ᠢᠨ ᠨᠤᠭᠤᠯᠭᠠ ᠬᠡᠳᠦ ᠨᠤᠭᠤᠯᠵᠤ᠂ ᠳᠡᠭᠡᠳᠦ ᠨᠠᠢ᠍ᠮᠠ ᠶ᠋ᠢᠨ ᠳᠠᠪᠠᠭᠠ ᠶ᠋ᠢ ᠳᠠᠪᠠᠭᠠᠳ ᠲᠦᠷᠦᠭᠦᠦ ᠳᠥᠷᠪᠡᠨ ᠪᠥᠬᠡ ᠳ᠋ᠦ᠍ ᠰᠢᠷᠡᠭᠡ ᠪᠠᠭᠰᠢ ᠶ᠋ᠢᠨ ᠬᠠᠪᠰᠤᠷᠤᠭᠠ ᠪᠣᠷᠣ᠂ ᠭᠡᠭᠡᠨ ᠰᠠᠩ ᠤ᠋ᠨ ᠭᠠᠳᠠᠰᠤ ᠪᠠᠳᠠᠢ᠂ ᠭᠣᠣᠯ ᠰᠤᠮᠤᠨ ᠤ᠋ ᠠᠳᠢᠶᠠ᠂ ᠵᠢᠭᠤᠴᠢᠨ ᠰᠤᠮᠤᠨ ᠤ᠋ ᠠᠭᠤᠯᠠᠨᠬᠦᠦ ᠰᠢᠯᠭᠠᠷᠠᠪᠠ᠃ ᠪᠥᠬᠡ ᠶ᠋ᠢᠨ ᠮᠥᠷᠥᠢ ᠳ᠋ᠦ᠍ ᠣᠯᠠᠨ ᠶᠠᠪᠤᠯᠴᠠᠭᠰᠠᠨ ᠬᠠᠰᠢᠷ ᠡᠷᠡᠰ ᠬᠠᠪᠰᠤᠷᠤᠭᠠ ᠪᠣᠷᠣ᠂ ᠭᠠᠳᠠᠰᠤ ᠪᠠᠳᠠᠢ ᠬᠣᠶᠠᠷ ᠨᠢᠭᠡ ᠰᠦᠮᠡ ᠶ᠋ᠢᠨ ᠯᠠᠮᠠ ᠪᠣᠯᠬᠣᠷ ᠠᠩᠬᠠᠨ ᠤ᠋ ᠰᠢᠪᠠᠭᠠ ᠶ᠋ᠢ ᠬᠣᠭᠣᠷᠣᠨᠳᠣ ᠨᠢ ᠪᠠᠷᠢᠯᠳᠤᠭᠤᠯᠤᠭᠰᠠᠨ ᠦᠭᠡᠢ ᠲᠤᠰ ᠲᠤᠰ ᠨᠢᠭᠡ ᠵᠥᠭᠡᠯᠡᠨ ᠪᠣᠭᠣᠷᠰᠣᠭ ᠥᠭᠴᠦ ᠳᠡᠳ᠋ ᠲᠡᠷᠢᠭᠦᠨ ᠪᠤᠯᠢᠶᠠᠯᠳᠤᠬᠤ ᠬᠠᠲᠠᠭᠤ ᠭᠣᠭᠴᠣᠭᠠ ᠶ᠋ᠢ ᠳᠠᠯᠳᠠ ᠦᠯᠡᠳᠡᠭᠡᠵᠡᠢ᠃ ᠭᠠᠳᠠᠰᠤ ᠪᠠᠳᠠᠢ ᠳ᠋ᠤ᠌ ᠠᠭᠤᠯᠠᠨᠬᠦᠦ ᠣᠨᠣᠭᠳᠠᠵᠤ᠂ ᠭᠣᠣᠯ ᠰᠤᠮᠤᠨ ᠤ᠋ ᠠᠳᠢᠶᠠ ᠬᠠᠪᠰᠤᠷᠤᠭᠠ ᠪᠣᠷᠣ ᠶ᠋ᠢᠨ ᠢᠳᠡᠰᠢ ᠪᠣᠯᠵᠤ ᠡᠪᠦᠳᠦᠭ ᠰᠥᠬᠥᠷᠡᠨ ᠪᠠᠭᠤᠵᠤ ᠥᠭᠪᠡ᠃
ᠭᠠᠳᠠᠰᠤ ᠪᠠᠳᠠᠢ ᠭᠡᠭᠴᠢ ᠯᠠᠭᠰᠢ ᠪᠡᠶᠡ ᠲᠡᠢ ᠭᠤᠴᠢ ᠶ᠋ᠢ ᠳᠠᠪᠠᠭᠰᠠᠨ ᠭᠤᠨᠠᠨ ᠪᠢᠷᠠ ᠲᠠᠢ ᠰᠠᠢᠨ ᠪᠥᠬᠡ ᠶ᠋ᠢᠨ ᠨᠢᠭᠡ᠃ ᠪᠥᠬᠡ ᠳ᠋ᠦ᠍ ᠳᠡᠮᠡᠢ ᠲᠣᠬᠢᠲᠠᠢ ᠠᠷᠭᠠ ᠮᠡᠬᠡ ᠭᠡᠵᠦ ᠪᠠᠢᠳᠠᠭ ᠦᠭᠡᠢ᠂ ᠠᠮᠢᠨ ᠳ᠋ᠤᠨᠢ ᠲᠤᠯᠤᠭᠰᠠᠭᠠᠷ ᠲᠠᠬᠢᠮ ᠳᠡᠭᠡᠭᠡᠳᠡᠬᠦ ᠡᠴᠡ ᠴᠠᠭᠠᠰᠢ ᠵᠠᠯᠢ ᠦᠭᠡᠢ᠃ ᠬᠠᠷᠠ ᠴᠢᠳᠠᠯ ᠳ᠋ᠠᠭᠠᠨ ᠡᠷᠳᠦᠵᠦ ᠬᠦᠴᠦ ᠲᠡᠩᠴᠡᠭᠰᠡᠨ ᠨᠢᠭᠡ ᠲᠡᠢ ᠪᠡᠨ ᠨᠣᠣᠷᠠᠭᠠᠳ ᠰᠠᠯᠳᠠᠭ ᠦᠭᠡᠢ᠃ ᠨᠥᠭᠦᠭᠡ ᠪᠥᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠵᠣᠳᠣᠭ ᠠ᠋ᠴᠠ ᠵᠤᠮᠠᠭᠠᠵᠤ ᠡᠭᠡᠮ ᠦ᠋ᠨ ᠶᠠᠰᠤ ᠶ᠋ᠢ ᠨᠢ ᠨᠤᠬᠤᠯᠠᠨ ᠲᠤᠯᠵᠤ ᠭᠦᠢᠴᠡᠭᠡᠳ ᠵᠣᠭᠰᠣᠴᠢᠬᠠᠪᠠᠯ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠡᠭᠦᠳᠡᠨ ᠳ᠋ᠡᠬᠢ ᠴᠢᠯᠠᠭᠤᠨ ᠭᠠᠳᠠᠰᠤ ᠰᠢᠭ᠋᠃ ᠪᠠᠷᠤᠭ ᠤ᠋ᠨ ᠪᠥᠬᠡ ᠬᠥᠳᠡᠯᠭᠡᠵᠦ ᠴᠢᠳᠠᠳᠠᠭ ᠦᠭᠡᠢ᠂ ᠡᠷᠡ ᠴᠢᠳᠠᠯ ᠤ᠋ᠨ ᠢ᠋ᠶ᠋ᠠᠨ ᠰᠢᠷᠭᠠᠭᠠᠨ ᠳ᠋ᠤ᠌ ᠳᠡᠪᠲᠦᠵᠦ ᠳᠡᠭᠡᠭᠰᠢ ᠭᠠᠷᠳᠠᠭ᠃ ᠲᠡᠭᠡᠭᠡᠳ ᠬᠥᠮᠦᠰ ᠲᠡᠭᠦᠨ ᠢ᠋《ᠭᠠᠳᠠᠰᠤ ᠪᠠᠳᠠᠢ》 ᠭᠡᠬᠦ ᠪᠤᠶᠤ ᠵᠠᠷᠢᠮ ᠨᠢ《ᠤᠶᠠᠭᠠ ᠪᠥᠬᠡ》 ᠭᠡᠳᠡᠭ᠃ ᠭᠠᠳᠠᠰᠤ ᠪᠠᠳᠠᠢ ᠶ᠋ᠢ ᠡᠪᠡᠷ ᠨᠢ ᠭᠤᠷᠪᠠᠨ ᠤᠭᠯᠠᠭᠤᠷ ᠤ᠋ᠨ ᠬᠡ ᠲᠣᠭᠲᠠᠭᠰᠠᠨ ᠠᠳᠠᠷᠠᠤ ᠣᠯᠠᠨ ᠤᠨᠵᠢᠭᠠᠷ ᠣᠮᠣᠷᠤᠤ ᠲᠠᠢ ᠪᠤᠬᠠ ᠭᠡᠪᠡᠯ ᠠᠭᠤᠯᠠᠨᠬᠦᠦ ᠲᠡᠭᠦᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠪᠤᠬᠠᠨᠴᠢᠷ ᠰᠢᠨᠵᠢ ᠣᠷᠣᠨ ᠪᠡᠶᠡ ᠬᠠᠳᠠ ᠨᠢ ᠰᠢᠷᠪᠥᠰᠥ ᠪᠤᠯᠴᠢᠩ ᠢ᠋ᠶ᠋ᠠᠷ ᠵᠠᠩᠭᠢᠷᠠᠵᠤ ᠰᠤᠪᠤᠷᠭᠠᠨ ᠡᠪᠡᠷ ᠨᠢ ᠱᠣᠷᠣᠯᠵᠠᠭᠠᠳ ᠶᠠᠭᠤᠨ ᠠ᠋ᠴᠠ ᠴᠤ᠌ ᠠᠶᠤᠨ ᠰᠦᠷᠳᠡᠬᠦ ᠦᠭᠡᠢ ᠪᠣᠯᠪᠠᠴᠤ ᠵᠠᠪᠠᠵᠢᠨ ᠠ᠋ᠴᠠ ᠨᠢ ᠰᠦ ᠬᠥᠭᠡᠰᠦᠷᠡᠭᠰᠡᠨ ᠭᠡᠨᠡᠨ ᠴᠠᠭᠠᠨ ᠲᠤᠭᠤᠯ ᠵᠠᠩ ᠨᠢ ᠢᠯᠡ ᠬᠠᠷᠠᠭᠳᠠᠵᠤ ᠪᠣᠢ᠃ ᠮᠤᠨᠠ ᠲᠠᠬᠢᠯᠭᠠ ᠶ᠋ᠢᠨ ᠣᠯᠠᠨ ᠮᠥᠷᠭᠥᠯᠴᠢᠳ ᠡᠨᠡ ᠬᠦ᠌ ᠪᠥᠬᠡ ᠶ᠋ᠢᠨ ᠮᠥᠷᠥᠢᠴᠡᠭᠡᠨ ᠳ᠋ᠦ᠍ ᠲᠣᠭᠣᠭᠰᠠᠨ ᠨᠢᠭᠡ ᠶ᠋ᠢ ᠪᠡᠨ《ᠰᠠᠢᠨ ᠡᠷᠡ ᠶᠦᠮ ᠠ᠋》 ᠭᠡᠵᠦ ᠱᠠᠭᠰᠢᠵᠤ᠂ ᠭᠡᠨᠡᠳᠡᠭᠰᠡᠨ ᠨᠢᠭᠡ ᠳ᠋ᠦ᠍ᠨᠢ《ᠠ ᠲᠡᠭᠡᠭᠰᠡᠨ ᠪᠣᠯ᠂ ᠢᠩᠭᠢᠭᠰᠡᠨ ᠪᠣᠯ ᠠ᠋》 ᠭᠡᠵᠦ ᠮᠡᠷᠭᠡᠯᠡᠨ ᠬᠠᠷᠠᠮᠰᠠᠵᠤ ᠨᠢᠳᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠤᠵᠢᠷᠯᠠᠨ ᠠᠮᠠ ᠬᠠᠭᠤᠷᠠᠢ ᠦᠭᠡᠢ ᠪᠠᠢᠯᠠ᠃
— ᠠ᠂ ᠪᠠᠢᠵᠠ ᠡᠨᠡ ᠵᠢᠭᠠᠬᠠᠨ ᠬᠦᠦ ᠪᠠᠰᠠ ᠲᠡᠭᠡᠭᠡᠳ ᠲᠦᠷᠦᠭᠦᠦ ᠳᠥᠷᠪᠡ ᠳ᠋ᠦ᠍ ᠣᠷᠣᠴᠢᠬᠠᠯᠠ ᠳᠠ!
— ᠴᠠᠭᠠᠳᠤᠬᠢ ᠭᠠᠳᠠᠰᠤ ᠪᠠᠳᠠᠢ ᠳ᠋ᠤ᠌ ᠶᠠᠭᠤ ᠪᠣᠯᠬᠤ ᠪᠣᠢ ᠳᠠ! ᠭᠠᠭᠴᠠ ᠨᠢᠭᠡ ᠰᠠᠵᠢᠬᠤ ᠳ᠋ᠤ᠌ ᠳᠠᠭᠠᠭᠠᠳᠠᠭ ᠴᠤ᠌ ᠪᠣᠯ ᠲᠡᠭᠡᠭᠡᠳ ᠶᠠᠭᠠᠬᠢᠬᠤ ᠪᠣᠢ? ᠳᠠᠭᠠᠭᠠᠳᠠᠭ ᠦᠭᠡᠢ ᠴᠤ᠌ ᠪᠣᠯ ᠪᠥᠨᠲᠥᠭᠡᠷ ᠨᠢ ᠬᠡᠴᠡᠭᠦᠳᠡᠨᠡ ᠳᠡ ᠬᠥᠭᠡᠷᠦᠬᠦᠢ᠃
— ᠦᠭᠡᠢ ᠠ᠋᠂ ᠲᠡᠭᠡᠭᠡᠳ ᠠᠯᠢ ᠰᠤᠮᠤᠨ ᠤ᠋ ᠬᠢ ᠪᠣᠢ?
— ᠠᠯᠳᠠᠴᠢᠨ ᠤ᠋ ᠬᠢ ᠭᠡᠪᠡ ᠤᠤ ᠳᠠ!
— ᠪᠢᠰᠢ᠂ ᠪᠢᠰᠢ! ᠵᠢᠭᠤᠴᠢᠨ ᠤ᠋ ᠭᠡᠰᠡᠨ!
— ᠡᠨᠡ ᠬᠦᠦ ᠴᠤ᠌ ᠣᠪᠣᠭᠠ ᠡᠷᠡ ᠭᠠᠷᠤᠨᠠ ᠪᠣᠢ! ᠬᠠᠲᠠᠭᠤ ᠬᠠᠯᠠ ᠲᠠᠢ ᠪᠥᠬᠡᠴᠦᠳ ᠲᠡᠢ ᠬᠠᠪᠢᠳᠠᠵᠤ ᠪᠠᠢᠪᠠᠯ ᠬᠠᠰᠢᠷ ᠰᠠᠭᠤᠨᠠ ᠳᠠ?
— ᠲᠡᠭᠡᠭᠡᠳ ᠪᠥᠬᠡ ᠥᠷᠡᠵᠠ ᠶ᠋ᠢᠨ ᠬᠣᠢᠴᠢᠰ ᠴᠤ᠌ ᠭᠡᠪᠡ ᠤᠤ ᠳᠠ?
— ᠵᠠ᠂ ᠲᠡᠭᠦᠨ ᠢ᠋ ᠬᠠᠷᠢᠨ ᠰᠣᠨᠣᠰᠤᠭᠠ ᠦᠭᠡᠢ᠃
ᠭᠠᠳᠠᠰᠤ ᠪᠠᠨᠲᠠᠢ ᠪᠠᠨᠲᠠᠩ ᠨᠢᠷᠤᠭᠤ᠂ ᠣᠬᠣᠷᠬᠠᠨ ᠬᠥᠯ ᠲᠠᠢ ᠳ᠋ᠠᠭᠠᠨ ᠪᠡᠶᠡ ᠪᠡᠨ ᠡᠷᠭᠦᠨ ᠮᠠᠭᠰᠢᠵᠤ ᠲᠡᠢᠯᠡᠬᠦ ᠦᠭᠡᠢ ᠶᠠᠪᠠᠭᠠᠨ ᠭᠠᠯᠠᠭᠤ ᠰᠢᠭ᠋ ᠪᠠᠭᠠᠴᠠᠭ ᠪᠠᠭᠠᠴᠠᠭ ᠭᠡᠬᠦᠢᠴᠡ ᠣᠷᠣᠨ ᠳ᠋ᠠᠭᠠᠨ ᠪᠠᠭᠠᠴᠠᠭᠠᠨᠠᠵᠤ ᠳᠡᠪᠬᠡᠷᠦᠭᠡᠳ ᠡᠪᠦᠳᠦᠭ ᠢ᠋ᠶ᠋ᠡᠨ ᠠᠯᠠᠭᠠᠳᠠᠨ ᠮᠥᠬᠥᠢᠬᠦ ᠳ᠋ᠦ᠍ᠨᠢ ᠭᠥᠯᠢᠩ ᠲᠣᠢᠮᠣᠭ ᠲᠣᠯᠣᠭᠠᠢ ᠳ᠋ᠤᠨᠢ ᠬᠥᠯᠥᠰᠥ ᠭᠢᠯᠲᠠᠭᠠᠨᠠᠨ ᠬᠤᠷᠴᠠ ᠨᠠᠷᠠᠨ ᠤ᠋ ᠣᠢᠯᠲᠠ ᠳ᠋ᠤ᠌ ᠵᠡᠰ ᠰᠢᠨᠠᠭᠠᠨ ᠲᠣᠯᠣᠭᠠᠢ ᠰᠢᠭ᠋ ᠭᠢᠯᠠᠯᠵᠠᠨᠠ᠃ ᠲᠡᠷᠲᠡᠭᠡ ᠪᠤᠳᠤᠯᠢᠭᠤᠬᠠᠨ ᠰᠢᠭᠦᠷᠭᠡᠢ ᠳᠠᠪᠢᠯᠲᠠ ᠲᠦᠱ ᠲᠦᠱ ᠬᠢᠨ ᠨᠦᠰᠡᠷ ᠬᠦᠨᠳᠦ ᠮᠠᠭᠰᠢᠵᠤ ᠠᠢᠰᠤᠢ ᠠᠭᠤᠯᠠᠨᠬᠦᠦ ᠶ᠋ᠢ ᠪᠠᠰᠤᠩᠭᠤᠢ ᠬᠠᠷᠠᠭᠠᠳ ᠲᠣᠭᠣ ᠶᠠᠳᠠᠨ ᠪᠠᠷᠳᠠᠮ ᠪᠣᠳᠣᠯ ᠳ᠋ᠠᠭᠠᠨ ᠳᠡᠢᠯᠦᠭᠳᠡᠵᠦ《ᠠᠮᠠᠨ ᠤ᠋ ᠬᠢᠨᠢ ᠰᠦ ᠨᠢ ᠠᠷᠢᠯᠤᠭᠠᠳᠤᠢ᠂ ᠬᠣᠭᠢᠰᠣ ᠨᠢ ᠨᠣᠢᠲᠠᠨ ᠮᠠᠭᠤ ᠲᠤᠭᠤᠯ ᠢ᠋ ᠬᠣᠬᠣᠢ᠂ ᠠᠪᠠᠭᠠ ᠮᠠᠮᠠ ᠨᠢ ᠥᠨᠥᠳᠥᠷ ᠵᠢᠭᠠᠬᠠᠨ ᠶᠠᠭᠤᠮᠠ ᠵᠢᠭᠠᠵᠤ ᠥᠭᠭᠦᠶᠡ ᠪᠠᠢᠵᠠ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ《ᠵᠠ ᠨᠠᠭᠠᠰᠢ ᠢᠷᠡ!》 ᠭᠡᠰᠡᠨ ᠰᠢᠭ ᠵᠣᠳᠣᠭ ᠠ᠋ᠴᠠ ᠨᠢ ᠴᠣᠴᠢᠮᠠᠭ ᠰᠢᠭᠦᠷᠡᠩᠭᠦᠲᠡ ᠪᠡᠨ ᠨᠢᠭᠡ ᠯᠡ ᠳᠤᠭᠲᠤᠷᠴᠢᠬᠠᠶᠠ ᠭᠡᠳ ᠭᠡᠨᠡᠳᠡᠭᠦᠯᠬᠦ ᠭᠡᠰᠡᠨ ᠴᠢᠨᠢ ᠨᠥᠭᠦᠭᠡ ᠠᠭᠤᠯᠠᠨᠬᠦᠦ ᠪᠣᠰᠤᠭᠠ ᠬᠦᠷᠡᠩ ᠬᠠᠳᠠ ᠰᠢᠭ᠋ ᠣᠷᠣᠨ ᠠ᠋ᠴᠠ ᠪᠠᠨ ᠴᠤ᠌ ᠬᠥᠳᠡᠯᠦᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠪᠠᠳᠠᠢ ᠥᠪᠡᠷ ᠦ᠋ᠨ ᠬᠦᠴᠦᠨ ᠳ᠋ᠡᠭᠡᠨ ᠲᠠᠢᠯᠳᠠᠨ ᠳᠡᠯᠳᠦᠷᠬᠢᠯᠡᠬᠦ ᠳ᠋ᠦ᠍ ᠠᠭᠤᠯᠠᠨᠬᠦᠦ ᠳᠠᠯᠤ ᠳᠡᠭᠡᠷᠡ ᠨᠢ ᠨᠢᠭᠡ ᠯᠡ ᠠᠯᠠᠭᠠᠳᠠᠭᠰᠠᠨ ᠳ᠋ᠤ᠌ ᠭᠠᠳᠠᠰᠤ ᠪᠠᠳᠠᠢ ᠡᠯᠢᠭᠡ ᠲᠦᠷᠦᠭᠦᠯᠡᠨ ᠰᠢᠷᠣᠢ ᠡᠮᠬᠦᠵᠦ ᠲᠠᠪᠠᠷᠴᠠᠭᠯᠠᠪᠠ᠃
— ᠴᠢᠭᠢᠶᠡᠲᠦᠷᠦᠦ᠂ ᠴᠣᠬᠣᠮ ᠪᠠᠰᠤᠭᠰᠠᠨ ᠡᠪᠡᠰᠦ ᠪᠥᠭᠰᠡ ᠬᠠᠳᠬᠤᠪᠠ ᠭᠡᠭᠴᠢ ᠪᠣᠯᠵᠠᠢ ᠭᠡᠳ ᠭᠠᠳᠠᠰᠤ ᠪᠠᠳᠠᠢ ᠠᠭᠤᠯᠠᠨᠬᠦᠦ ᠶ᠋ᠢ ᠬᠣᠷᠣᠰᠤᠯᠲᠠᠢ ᠬᠠᠷᠠᠭᠠᠳ ᠲᠠᠢᠪᠤᠭᠤᠬᠠᠨ ᠪᠣᠰᠴᠤ ᠰᠢᠷᠣᠢ ᠲᠣᠭᠣᠰᠣ ᠪᠠᠨ ᠭᠦᠪᠢᠨᠡ᠃
— ᠬᠥᠶᠢ᠂ ᠬᠦ! ᠡᠨᠡ ᠬᠠᠷᠠ ᠬᠦᠦ ᠪᠠᠶᠠᠨ ᠰᠤᠩᠷᠠᠢ ᠶ᠋ᠢᠨ ᠲᠤᠭᠤᠯ ᠲᠠᠢ ᠦᠨᠢᠶᠡ ᠶ᠋ᠢ ᠠᠪᠬᠤ ᠨᠢ ᠠ᠋!
— ᠭᠠᠳᠠᠰᠤ ᠪᠠᠳᠠᠢ ᠶ᠋ᠢ ᠭᠠᠭᠴᠠᠬᠠᠨ ᠠᠯᠠᠭᠠᠳᠠᠭᠠᠳ ᠰᠢᠷᠣᠢ ᠡᠮᠬᠦᠭᠦᠯᠦᠭᠰᠡᠨ ᠪᠥᠬᠡ ᠤᠷᠢᠳᠤ ᠡᠮᠦᠨᠡ ᠭᠠᠷᠤᠭᠠ ᠦᠭᠡᠢ ᠰᠠᠨ ᠳᠠ᠃
— ᠬᠣᠵᠢᠮ ᠡᠨᠡ ᠬᠦᠦ ᠴᠤ᠌ ᠪᠠᠷᠠᠭᠤᠨ ᠬᠦᠩ ᠢ᠋ ᠲᠤᠷᠭᠢᠭᠤᠯᠵᠤ᠂ ᠬᠠᠷᠢ ᠬᠣᠰᠢᠭᠤ ᠶ᠋ᠢ ᠱᠤᠤᠭᠢᠭᠤᠯᠤᠭᠰᠠᠨ ᠰᠠᠢᠨ ᠪᠥᠬᠡ ᠭᠠᠷᠤᠨᠠ ᠪᠣᠢ᠁ ᠭᠡᠵᠦ ᠮᠥᠷᠭᠥᠯᠴᠢᠳ ᠦ᠋ᠨ ᠢᠪᠡᠬᠡᠩᠭᠦᠢ ᠬᠠᠷᠠᠴᠠ ᠠᠭᠤᠯᠠᠨᠬᠦᠦ ᠬᠦᠦ ᠶ᠋ᠢᠨ ᠪᠡᠶᠡ ᠳᠡᠭᠡᠷᠡ ᠱᠠᠩᠨᠠᠵᠤ ᠪᠠᠢᠨᠠ᠃
ᠮᠤᠨᠠ ᠲᠠᠬᠢᠯᠭᠠ ᠶ᠋ᠢᠨ ᠰᠠᠢᠨ ᠳᠤᠷᠠ ᠶ᠋ᠢᠨ ᠪᠥᠬᠡ ᠶ᠋ᠢᠨ ᠰᠣᠷᠢᠶᠠᠨ ᠳ᠋ᠤ᠌ ᠳᠡᠳ᠋ ᠲᠡᠷᠢᠭᠦᠨ ᠰᠤᠭᠤᠷᠠᠬᠤ ᠦᠵᠡᠯᠴᠡᠭᠡᠨ ᠪᠣᠯᠵᠤ ᠮᠥᠷᠭᠥᠯᠴᠢᠳ ᠦ᠋ᠨ ᠨᠢᠳᠦ ᠰᠡᠳᠬᠢᠯ ᠰᠢᠷᠡᠭᠡ ᠪᠠᠭᠰᠢ ᠶ᠋ᠢᠨ ᠬᠠᠪᠰᠤᠷᠤᠭᠠ ᠪᠣᠷᠣ᠂ ᠠᠭᠤᠯᠠᠨᠬᠦᠦ ᠡᠨᠡ ᠬᠣᠶᠠᠷ ᠢ᠋ ᠱᠣᠷᠣᠯᠠᠵᠤ᠂ ᠰᠠᠨᠠᠭᠠᠨ ᠤ᠋ ᠭᠠᠳᠠᠭᠤᠷ ᠰᠢᠨᠡ ᠰᠡᠳᠦᠪ ᠡᠯᠭᠦᠭᠳᠡᠨ ᠬᠥᠮᠦᠨ ᠢ᠋ ᠪᠦᠦ ᠪᠠᠰᠠ᠂ ᠳᠠᠯᠠᠢ ᠶ᠋ᠢ ᠪᠦᠦ ᠶᠠᠨᠳᠠ ᠭᠡᠳᠡᠭ ᠢ᠋ᠶ᠋ᠡᠷ ᠪᠠᠶᠠᠨ ᠰᠤᠩᠷᠠᠢ ᠶ᠋ᠢᠨ ᠲᠦᠷᠦᠭᠦᠦ ᠱᠠᠩ ᠢ᠋ ᠡᠨᠡ ᠬᠠᠷᠠ ᠬᠦᠦ ᠭᠠᠨᠵᠤᠭᠠᠯᠠᠬᠤ ᠶᠤᠮ ᠪᠠᠢᠨᠠ ᠭᠡᠴᠡᠭᠡᠨ ᠱᠤᠤᠭᠢᠯᠳᠤᠨᠠ᠃
ᠬᠠᠪᠰᠤᠷᠤᠭᠠ ᠪᠣᠷᠣ ᠡᠷᠡᠦ ᠬᠠᠯᠲᠠᠷ ᠰᠠᠬᠠᠯ ᠲᠠᠢ᠂ ᠮᠥᠷᠥ ᠱᠤᠪᠲᠤᠩ ᠥᠨᠳᠥᠷᠬᠡᠦ ᠬᠠᠷᠠ ᠪᠣᠷᠣ ᠬᠥᠷᠥᠰᠥᠯᠢᠭ ᠡᠷᠡ᠃ ᠲᠠᠷᠴᠢᠩᠬᠠᠢ ᠪᠣᠯᠪᠠᠴᠤ ᠰᠢᠷᠪᠥᠰᠥ ᠬᠠᠲᠠᠭᠤ᠃ ᠲᠤᠯᠤᠮ ᠳ᠋ᠤ᠌ ᠴᠢᠬᠢᠭᠰᠡᠨ ᠴᠢᠯᠠᠭᠤ ᠭᠡᠮᠡᠷ ᠴᠢᠩᠭᠠ ᠪᠤᠯᠴᠢᠩ ᠨᠢ ᠭᠦᠷᠪᠡᠢᠵᠦ᠂ ᠭᠠᠷ ᠬᠥᠯ ᠦ᠋ᠨ ᠬᠢᠨᠢ ᠬᠠᠲᠠᠭᠤ ᠨᠢ ᠬᠠᠳᠠ ᠴᠢᠯᠠᠭᠤ ᠰᠢᠭ᠋᠃ ᠲᠡᠷᠡ ᠪᠡᠷ ᠨᠢᠳᠦ ᠬᠤᠷᠴᠠ᠂ ᠪᠠᠷᠢᠴᠠ ᠴᠢᠩᠭᠠ᠂ ᠭᠠᠷ ᠱᠠᠯᠠᠪ᠂ ᠬᠥᠯ ᠪᠣᠰᠢᠭᠣ᠃ ᠵᠥᠪ ᠰᠣᠯᠣᠭᠠᠢ ᠦᠭᠡᠢ ᠴᠣᠬᠢᠶᠠ ᠬᠠᠪᠰᠤᠷᠤᠭᠠ ᠬᠢᠳᠡᠭ ᠮᠡᠬᠡ ᠳ᠋ᠦ᠍ᠨᠢ ᠬᠢᠷᠢ ᠶ᠋ᠢᠨ ᠬᠥᠮᠦᠨ ᠲᠡᠰᠳᠡᠭ ᠦᠭᠡᠢ ᠣᠢᠴᠢᠳᠠᠭ᠃ ᠬᠣᠰᠢᠭᠤ ᠨᠠᠭᠠᠳᠤᠮ᠂ ᠣᠪᠣᠭᠠᠨ ᠤ᠋ ᠨᠠᠢᠷ ᠲᠤ ᠣᠯᠠᠨ ᠲᠡᠷᠢᠭᠦᠯᠡᠵᠦ᠂ ᠬᠠᠷᠢ ᠴᠢᠭᠤᠯᠭᠠᠨ ᠤ᠋ ᠨᠠᠢᠷ ᠨᠠᠭᠠᠳᠤᠮ ᠳ᠋ᠤ᠌ ᠴᠤ᠌ ᠳᠡᠭᠡᠷᠡ ᠨᠠᠢ᠍ᠮᠠ ᠠ᠋ᠴᠠ ᠪᠠᠭᠤᠳᠠᠭ ᠦᠭᠡᠢ ᠰᠠᠢᠨ ᠪᠥᠬᠡ ᠪᠠᠢᠯᠠ᠃ ᠬᠠᠪᠰᠤᠷᠤᠭᠠ ᠪᠣᠷᠣ ᠮᠠᠰᠢ ᠰᠢᠷᠦᠭᠦᠨ ᠱᠠᠯᠠᠮᠠᠭ ᠣᠷᠣᠳᠠᠭ ᠠᠪᠲᠠᠯ ᠲᠠᠢ ᠪᠣᠯᠪᠠᠴᠤ ᠨᠥᠭᠦᠭᠡ ᠡᠳᠦᠭᠡᠳ ᠦ᠋ᠨ ᠢ᠋ᠶ᠋ᠡᠨ ᠬᠠᠷᠢᠭᠤ ᠮᠡᠬᠡ ᠶ᠋ᠢ ᠴᠢᠩᠳᠠ ᠰᠡᠷᠭᠡᠢᠯᠡᠵᠦ ᠴᠢᠳᠠᠳᠠᠭ ᠬᠡᠷᠰᠡᠦ ᠲᠣᠯᠣᠭᠠᠢ᠃ ᠠᠪᠤᠷᠭᠤ ᠪᠥᠬᠡ ᠴᠤ᠌ ᠪᠣᠯᠤᠭ ᠠᠩᠬᠠᠨ ᠤ᠋ ᠴᠠᠭᠠᠨ ᠬᠡᠦᠬᠡᠳ ᠪᠥᠬᠡ ᠶ᠋ᠢ ᠴᠤ᠌ ᠪᠠᠰᠤᠵᠤ ᠴᠠᠯᠠᠭᠠᠢᠳᠠᠳᠠᠭ ᠦᠭᠡᠢ ᠨᠢᠮᠪᠠᠢ ᠬᠡᠷᠰᠡᠦ ᠪᠠᠷᠢᠯᠳᠤᠵᠤ ᠴᠢᠳᠠᠳᠠᠭ ᠤ᠋ᠨ ᠨᠢᠭᠡ᠃ ᠬᠠᠪᠰᠤᠷᠤᠭᠠ ᠪᠣᠷᠣ ᠶ᠋ᠢᠨ ᠪᠥᠬᠡ ᠶ᠋ᠢᠨ ᠲᠠᠪᠢᠯᠲᠠ ᠭᠣᠢᠳᠠ ᠴᠡᠪᠡᠷᠬᠡᠨ᠃ ᠠᠭᠠᠷ ᠲᠤ ᠨᠢᠰᠦᠭᠰᠡᠨ ᠡᠯᠢᠶᠡ ᠰᠢᠭ ᠴᠡᠷᠪᠡᠨ᠂ ᠮᠥᠷᠥ ᠪᠡᠷ ᠢ᠋ᠶ᠋ᠡᠨ ᠨᠠᠬᠢᠯᠵᠠᠨ ᠳᠡᠷᠪᠡᠳᠡᠭ ᠨᠢ ᠬᠥᠮᠦᠰ ᠲᠦ᠍ ᠪᠤᠰᠤᠳ ᠢ᠋ ᠪᠠᠰᠤᠵᠤ ᠪᠡᠶᠡ ᠪᠡᠨ ᠡᠷᠭᠦᠬᠦ ᠰᠠᠭᠰᠠᠭᠠᠷ ᠪᠠᠷᠳᠠᠮ ᠲᠥᠷᠥᠭᠳᠡᠯ ᠥᠭᠳᠡᠭ ᠦᠭᠡᠢ ᠠᠵᠢ᠃ ᠪᠥᠬᠡ ᠶ᠋ᠢᠨ ᠰᠣᠷᠢᠶᠠᠨ ᠳ᠋ᠤ᠌ ᠶᠠᠪᠤᠵᠤ ᠶᠡᠷᠦ ᠬᠠᠯᠠ ᠠᠮᠰᠠᠭᠠ ᠦᠭᠡᠢ ᠠᠭᠤᠯᠠᠨᠬᠦᠦ᠂ ᠱᠠᠭᠰᠢᠭᠰᠠᠨ ᠦᠢᠮᠡᠭᠡᠨ ᠳ᠋ᠦ᠍ ᠭᠠᠳᠠᠰᠤ ᠪᠠᠨᠳᠢ ᠶ᠋ᠢ ᠰᠢᠷᠣᠢᠲᠤᠭᠤᠯᠤᠭᠰᠠᠨ ᠳ᠋ᠠᠭᠠᠨ ᠬᠭᠢᠷᠢ ᠦᠭᠡᠢ ᠠᠷᠢᠭᠤᠨ ᠬᠡᠦᠬᠡᠳᠯᠢᠭ ᠠᠷᠠᠨᠰᠢᠨ ᠳ᠋ᠤᠨᠢ ᠪᠡᠶᠡ ᠪᠡᠨ ᠲᠣᠭᠣᠵᠤ ᠭᠠᠢᠬᠠᠭᠤᠯᠬᠤ ᠬᠠᠵᠠᠭᠠᠢ ᠪᠣᠳᠣᠯ ᠤᠷᠭᠤᠵᠤ᠂ ᠠᠭᠤᠯᠠᠨ ᠳ᠋ᠤ᠌ ᠵᠡᠷᠯᠢᠭ ᠭᠦᠶᠦᠭᠰᠡᠨ ᠭᠤᠨᠠ ᠶ᠋ᠢ ᠰᠡᠭᠦᠯᠳᠡᠵᠦ ᠭᠠᠭᠴᠠᠬᠠᠨ ᠰᠤᠭᠰᠤᠷᠤᠭᠠᠨ ᠳ᠋ᠤ᠌ ᠤᠨᠠᠭᠠᠴᠢᠬᠠᠳᠠᠭ ᠡᠷᠡ ᠴᠢᠳᠠᠯ ᠢ᠋ᠶ᠋ᠠᠨ ᠭᠠᠷᠭᠠᠨ ᠤᠬᠠᠭᠠ ᠲᠡᠩᠬᠡᠭᠡ ᠪᠡᠨ ᠰᠢᠯᠭᠠᠭᠰᠠᠭᠠᠷ ᠵᠠᠭᠤ ᠬᠣᠷᠢᠨ ᠨᠠᠢ᠍ᠮᠠᠨ ᠪᠥᠬᠡ ᠳ᠋ᠦ᠍ ᠳᠡᠳ᠋ ᠲᠡᠷᠢᠭᠦᠨ ᠦᠵᠡᠯᠴᠡᠬᠦ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠵᠢᠷᠦᠬᠡ ᠨᠢ ᠪᠦᠳᠦᠭᠦᠷᠡᠵᠦ ᠲᠡᠷᠲᠡᠭᠡ ᠰᠠᠯᠬᠢᠨ ᠳ᠋ᠤ᠌ ᠨᠠᠢᠭᠤᠮᠠ ᠴᠡᠷᠪᠡᠨ ᠳᠡᠪᠢᠭᠰᠡᠨ ᠬᠠᠪᠰᠤᠷᠤᠭᠠ ᠪᠣᠷᠣ ᠶ᠋ᠢ ᠭᠠᠭᠴᠠᠬᠠᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠠᠵᠢᠴᠢᠬᠠᠬᠤ ᠳ᠋ᠤ᠌ ᠶᠠᠪᠤᠴᠢᠬᠠᠬᠤ ᠰᠢᠭ᠋ ᠰᠠᠨᠠᠭᠳᠠᠨᠠ᠃ 《ᠬᠦᠦ ᠮᠢᠨᠢ᠂ ᠬᠠᠪᠰᠤᠷᠤᠭᠠ ᠪᠣᠷᠣ ᠳ᠋ᠤ᠌ ᠬᠥᠯ ᠢ᠋ᠶ᠋ᠡᠨ ᠥᠭᠴᠦ ᠯᠡ ᠪᠣᠯᠬᠤ ᠦᠭᠡᠢ᠃ ᠲᠡᠷᠡ ᠴᠢᠨᠢ ᠲᠡᠮᠦᠷ ᠴᠣᠬᠢᠭᠤᠷ ᠰᠢᠭ᠋ ᠪᠣᠷᠪᠢ ᠴᠣᠬᠢᠬᠤ ᠳ᠋ᠤ᠌ ᠲᠣᠭᠣᠰᠣ ᠦᠵᠡᠭᠳᠡᠬᠦ ᠦᠭᠡᠢ ᠬᠤᠰᠤᠳᠠᠭ ᠳᠣᠬᠢ ᠲᠣᠯᠣᠭᠠᠢ ᠰᠢᠦ!》 ᠭᠡᠵᠦ ᠲᠡᠭᠦᠨ ᠦ᠌ ᠴᠢᠬᠢᠨ ᠳ᠋ᠦ᠍ ᠶᠠᠮᠠᠷ ᠨᠢᠭᠡᠨ ᠬᠠᠰᠢᠷ ᠪᠥᠬᠡ ᠪᠠᠢᠨ ᠪᠠᠢᠨ ᠰᠢᠪᠡᠨᠡᠬᠦ ᠰᠢᠭ ᠪᠣᠯᠪᠠᠴᠤ ᠠᠭᠤᠯᠠᠨᠬᠦᠦ ᠶ᠋ᠢᠨ ᠳᠣᠲᠣᠷᠠ ᠡᠨᠡ ᠳᠠᠷᠴᠢᠩᠬᠠᠢ ᠪᠣᠷᠣ ᠡᠷᠡ ᠡᠴᠡ ᠥᠴᠦᠬᠡᠨ ᠲᠡᠳᠦᠢ ᠴᠤ᠌ ᠪᠠᠯᠠᠭᠳᠠᠭᠠ ᠦᠭᠡᠢ᠂ ᠵᠣᠳᠣᠭ ᠠ᠋ᠴᠠ ᠨᠢ ᠠᠳᠬᠤᠭᠠᠳ ᠯᠠ ᠠᠪᠤᠪᠠᠯ ᠬᠡᠢᠳᠡᠭᠦᠯᠵᠦ ᠪᠠᠢᠭᠠᠳ《ᠨᠢᠰᠬᠡᠴᠢᠬᠡᠶᠡ》 ᠭᠡᠵᠦ ᠪᠠᠷᠢᠴᠠ ᠪᠤᠯᠢᠶᠠᠯᠳᠤᠬᠤ ᠳ᠋ᠤ᠌ ᠬᠠᠪᠰᠤᠷᠤᠭᠠ ᠪᠣᠷᠣ ᠲᠡᠭᠦᠨ ᠦ᠌ ᠪᠣᠳᠣᠯ ᠳ᠋ᠠᠬᠢ ᠪᠠᠰᠤᠭᠰᠠᠨ《ᠵᠥᠭᠡᠯᠡᠨ ᠪᠣᠭᠣᠷᠰᠣᠭ》 ᠪᠢᠰᠢ ᠪᠠᠢᠵᠠᠢ᠃ ᠵᠣᠳᠣᠭ ᠠ᠋ᠴᠠ ᠨᠢ ᠪᠠᠷᠢᠮᠠ ᠪᠠᠷᠢᠮᠠ ᠵᠠᠪᠳᠤᠭᠠᠳ ᠵᠣᠳᠣᠭ ᠮᠤᠯᠲᠤᠷᠠᠬᠤ ᠳ᠋ᠤ᠌ ᠬᠠᠪᠰᠤᠷᠤᠭᠠ ᠪᠣᠷᠣ ᠲᠡᠷᠡ ᠵᠠᠪ ᠦᠭᠡᠢ ᠵᠣᠭᠰᠣᠭᠰᠠᠨ ᠣᠷᠣᠨ ᠠ᠋ᠴᠠ ᠵᠠᠢᠯᠠᠴᠢᠬᠠᠭᠠᠳ ᠪᠣᠷᠪᠢ ᠳᠠᠭᠠᠭᠤᠯᠵᠤ ᠬᠠᠪᠰᠤᠷᠤᠭᠠᠳ ᠠᠪᠬᠤ ᠶᠤᠮ᠃ ᠲᠡᠭᠡᠵᠦ ᠪᠠᠢᠭᠠᠳ ᠳᠥᠩᠭᠡᠵᠦ ᠪᠠᠷᠢᠴᠠ ᠠᠪᠤᠭᠠᠳ ᠬᠡᠢᠳᠡᠭᠦᠯᠦᠨ ᠬᠠᠶᠠᠪᠠᠯ ᠨᠥᠭᠦᠭᠡ ᠬᠠᠪᠰᠤᠷᠤᠭᠠ ᠪᠣᠷᠣ ᠬᠠᠷᠢᠨ ᠲᠡᠷᠲᠡᠭᠡ ᠵᠠᠢᠲᠠᠢ ᠲᠡᠭ ᠭᠡᠲᠡᠯᠡ ᠵᠣᠭᠰᠣᠵᠤ ᠪᠤᠴᠠᠭᠠᠳ ᠬᠢᠭᠰᠡᠨ ᠳᠠᠭᠠᠷᠢᠯᠲᠠ ᠳ᠋ᠠᠭᠠᠨ ᠠᠭᠤᠯᠠᠨᠬᠦᠦ ᠶ᠋ᠢ ᠭᠡᠨᠡᠳᠡᠭᠦᠯᠦᠨ ᠠᠷᠠᠢ ᠯᠠ ᠣᠢᠴᠢᠭᠰᠠᠨ ᠦᠭᠡᠢ᠃ ᠳᠠᠬᠢᠭᠠᠳ ᠵᠣᠳᠣᠭ ᠯᠠᠪᠰᠢᠷᠠᠭᠤᠯᠤᠨ ᠬᠡᠢᠳᠡᠭᠦᠯᠦᠶᠡ ᠭᠡᠰᠡᠨ ᠴᠢᠨᠢ ᠨᠣᠴᠣᠭᠠᠨᠠᠭᠤᠷ ᠰᠢᠭ᠋ ᠪᠡᠶᠡ ᠳ᠋ᠦ᠍ᠨᠢ ᠨᠠᠭᠠᠯᠳᠤᠨ᠂ ᠲᠡᠭᠦᠨ ᠢ᠋ ᠪᠤᠷᠤᠭᠤ ᠬᠥᠯ ᠢ᠋ᠶ᠋ᠡᠨ ᠰᠣᠯᠪᠢᠬᠤ ᠭᠡᠬᠦ ᠵᠠᠪᠰᠢᠶᠠᠨ ᠢ᠋ ᠣᠯᠵᠤ ᠬᠠᠪᠰᠤᠷᠤᠭᠰᠠᠨ ᠳ᠋ᠤ᠌ ᠠᠭᠤᠯᠠᠨᠬᠦᠦ ᠲᠦᠰᠬᠢᠨ ᠬᠠᠵᠠᠭᠤᠯᠳᠠᠨ ᠤᠨᠠᠪᠠ᠃
ᠬᠠᠪᠰᠤᠷᠤᠭᠠ ᠪᠣᠷᠣ ᠭᠠᠵᠠᠷ ᠰᠢᠭᠦᠷᠡᠭᠡᠳ ᠪᠣᠰᠤᠭᠰᠠᠨ ᠡᠯᠢᠶᠡ ᠰᠢᠭ ᠲᠠᠷᠪᠢᠵᠤ ᠠᠷᠢᠯᠪᠠ᠃ ᠬᠠᠷᠠᠭᠰᠠᠨ ᠬᠥᠮᠦᠰ ᠠᠭᠤᠯᠠᠨᠬᠦᠦ ᠶ᠋ᠢᠨ ᠣᠢᠴᠢᠭᠰᠠᠨ ᠳ᠋ᠤ᠌ ᠬᠠᠷᠠᠮᠰᠠᠨ ᠭᠡᠮᠰᠢᠪᠡᠴᠦ ᠲᠡᠭᠦᠨ ᠦ᠌ ᠡᠷᠡ ᠴᠢᠳᠠᠯ ᠢ᠋ ᠭᠠᠢᠬᠠᠵᠤ《ᠬᠣᠵᠢᠮ ᠡᠨᠡ ᠬᠦᠦ ᠠᠪᠤᠷᠭᠤ ᠪᠥᠬᠡ ᠪᠣᠯᠤᠨᠠ》 ᠭᠡᠵᠦ ᠵᠥᠩᠨᠡᠨᠡ᠃
ᠬᠠᠪᠰᠤᠷᠤᠭᠠ ᠪᠣᠷᠣ ᠠᠭᠤᠯᠠᠨᠬᠦᠦ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠢᠷᠡᠵᠦ ᠲᠡᠭᠦᠨ ᠦ᠌ ᠲᠠᠢᠯᠤᠭᠰᠠᠨ ᠵᠣᠳᠣᠭ ᠤ᠋ᠨ ᠲᠣᠭᠣᠰᠣ ᠶ᠋ᠢ ᠭᠦᠪᠢᠵᠦ᠄
— ᠵᠠ᠂ ᠬᠦᠦ ᠮᠢᠨᠢ ᠵᠠᠯᠠᠭᠤ ᠬᠥᠮᠦᠨ ᠦ᠌ ᠵᠠᠮ ᠤ᠋ᠨ ᠬᠦᠵᠦᠭᠦᠦ ᠤᠷᠲᠤ ᠭᠡᠳᠡᠭ᠃ ᠪᠢ ᠪᠠᠭᠠ ᠯᠠ ᠬᠢᠴᠢᠶᠡᠭᠰᠡᠨ ᠦᠭᠡᠢ ᠪᠣᠯ ᠴᠢᠮᠠ ᠳ᠋ᠤ᠌ ᠬᠠᠶᠠᠭᠳᠠᠨᠠ᠃ ᠢᠯᠡᠭᠦᠦ ᠬᠡᠳᠦᠨ ᠵᠢᠯ ᠨᠠᠭᠠᠳᠤᠮ ᠤ᠋ᠨ ᠲᠣᠭᠣᠰᠣ ᠬᠥᠳᠡᠯᠭᠡᠭᠰᠡᠨ ᠦ᠌ ᠬᠤᠪᠢ ᠳ᠋ᠤ᠌ ᠶᠣᠰᠣᠲᠠᠢ ᠯᠠ ᠳᠡᠭᠡᠭᠦᠷ ᠨᠡᠷᠡ ᠲᠡᠮᠡᠴᠡᠵᠦ᠂ ᠳᠣᠣᠭᠤᠷ ᠠᠮᠢ ᠲᠡᠮᠡᠴᠡᠯᠡ ᠰᠢᠦ! ᠴᠢᠨᠦ ᠬᠠᠳᠠᠨ ᠲᠠᠮᠢᠷ ᠲᠠᠢ ᠬᠣᠶᠠᠷ ᠴᠠᠷᠪᠠᠭᠤ ᠶ᠋ᠢᠨ ᠴᠢᠨᠢ ᠬᠦᠴᠦᠨ ᠳ᠋ᠦ᠍ ᠬᠡᠢᠳᠡᠭᠳᠡᠨ ᠬᠡᠢᠰᠴᠢᠬᠡᠬᠦ ᠰᠢᠬᠠᠯᠠ᠁ ᠠᠩᠬᠠ ᠪᠠᠷᠢᠯᠳᠤᠭᠰᠠᠨ ᠵᠠᠯᠠᠭᠤ ᠬᠥᠮᠦᠨ ᠦ᠌ ᠣᠮᠣᠭ ᠢ᠋ ᠳᠠᠷᠤᠵᠤ ᠳᠠᠷᠤᠤᠬᠠᠨ ᠬᠡᠷᠰᠡᠦ ᠤᠬᠠᠭᠠᠨ ᠴᠢᠮᠠ ᠳ᠋ᠤ᠌ ᠲᠤᠰᠠ ᠲᠠᠢ ᠭᠡᠳᠡᠭ ᠢ᠋ ᠰᠠᠨᠠᠭᠤᠯᠬᠤ ᠶ᠋ᠢᠨ ᠲᠥᠯᠥᠭᠡ ᠴᠢᠷᠮᠠᠢᠨᠠ᠃ ᠡᠷᠡ ᠬᠥᠮᠦᠨ ᠡᠷᠡ ᠬᠥᠮᠦᠨ ᠳ᠋ᠡᠭᠡᠨ ᠬᠠᠢᠷᠠᠲᠠᠢ ᠭᠡᠵᠦ ᠤᠷᠢᠳᠤ ᠶ᠋ᠢᠨ ᠬᠥᠮᠦᠰ ᠶᠠᠷᠢᠳᠠᠭ ᠨᠢ ᠦᠨᠡᠨ᠃ ᠡᠷᠡ ᠬᠥᠮᠦᠨ ᠦ᠌ ᠬᠠᠢᠷᠠ ᠬᠠᠯᠠ ᠲᠠᠢ ᠪᠠᠢᠳᠠᠭ ᠴᠤ᠌ ᠬᠠᠯᠠ ᠨᠢ ᠡᠯᠡᠭᠳᠡᠭᠡᠳ ᠬᠠᠢᠷᠠ ᠨᠢ ᠴᠤᠬᠤᠢᠳᠠᠭ ᠶᠤᠮ᠃ ᠲᠣᠭᠯᠠᠵᠤ ᠪᠠᠢᠭᠠᠳ ᠲᠤᠭᠤᠯ ᠠ᠋ᠴᠠ ᠪᠠᠨ ᠪᠤᠬᠠ ᠪᠣᠯᠳᠠᠭ᠂ ᠰᠢᠷᠣᠢᠳᠠᠵᠤ ᠪᠠᠢᠭᠠᠳ ᠪᠥᠬᠡ ᠡᠴᠡ ᠪᠡᠨ ᠠᠪᠤᠷᠭᠤ ᠪᠣᠯᠳᠠᠭ ᠶᠤᠮ ᠠ᠋ ᠬᠦᠦ ᠮᠢᠨᠢ! ᠰᠠᠢᠨ ᠪᠥᠬᠡ ᠪᠣᠯᠬᠤ ᠶ᠋ᠢᠨ ᠰᠢᠨᠳᠠᠰᠤ ᠲᠠᠨᠢᠭᠳᠠᠵᠤ ᠪᠠᠢᠨᠠ᠁ ᠭᠡᠳ ᠲᠡᠭᠦᠨ ᠦ᠌ ᠮᠥᠷᠥ ᠶ᠋ᠢ ᠲᠠᠪᠰᠢᠨ ᠥᠬᠥᠭᠡᠷᠳᠡᠪᠡ᠃
ᠪᠠᠶᠠᠨ ᠰᠤᠩᠷᠠᠢ ᠪᠥᠬᠡ ᠶ᠋ᠢᠨ ᠱᠠᠩ ᠳᠠᠭᠤᠳᠠᠵᠤ ᠬᠡᠵᠢᠶᠡ ᠬᠡᠵᠢᠶᠡ ᠦᠬᠡᠷ ᠦ᠋ᠨ ᠣᠲᠣᠷ ᠲᠤ᠌ ᠣᠴᠢᠵᠤ ᠱᠠᠩ ᠬᠠᠢᠷᠠᠯᠠᠬᠤ ᠶ᠋ᠢ ᠲᠣᠰᠤᠭᠠᠷᠠᠢ ᠭᠡᠪᠡ᠃
ᠦᠨᠡᠨ ᠳ᠋ᠡᠭᠡᠨ ᠪᠠᠶᠠᠨ ᠰᠣᠩᠷᠠᠢ᠂ ᠪᠥᠬᠡ ᠶ᠋ᠢᠨ ᠰᠣᠷᠢᠶᠠᠨ ᠳ᠋ᠤ᠌ ᠱᠠᠩ ᠬᠦᠷᠲᠡᠭᠡᠳᠡᠭ ᠨᠢ ᠤᠬᠠᠭᠠᠨ ᠳ᠋ᠠᠭᠠᠨ ᠴᠢᠳᠠᠯ ᠲᠡᠩᠬᠡᠭᠡ ᠲᠡᠢ ᠪᠥᠬᠡᠴᠦᠳ ᠢ᠋ ᠤᠷᠮᠠᠰᠢᠭᠤᠯᠵᠤ ᠵᠡᠷᠯᠢᠭ ᠭᠦᠶᠦᠭᠰᠡᠨ ᠪᠢᠷᠠᠭᠤ ᠬᠢᠵᠠᠯᠠᠩ ᠤ᠋ᠨ ᠪᠥᠭᠡᠨᠰᠦᠭ ᠢ᠋ ᠴᠢᠮᠬᠢᠵᠦ᠂ ᠦᠬᠡᠷ ᠢ᠋ᠶ᠋ᠡᠨ ᠲᠠᠮᠠᠭᠠᠯᠠᠬᠤ ᠰᠠᠨᠠᠭᠠ ᠲᠠᠢ ᠠᠵᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ