ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠭᠤᠲᠠᠭᠠᠷ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠲᠠᠪᠤ> Хан мунын сүүрс < доорд > – Мөнх зохиоов ᠂ Гутгаар бодь – Гуравдугаар бүлэг <5>
254ᠭᠤᠲᠠᠭᠠᠷ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠲᠠᠪᠤ>
ᠳᠠᠷᠠᠰᠤᠲᠠᠢ ᠪᠤᠯᠤᠩ ᠤ᠋ᠨ ᠨᠠᠮᠬᠠᠨ ᠳᠣᠪᠣᠴᠠᠭ ᠢ᠋ ᠮᠣᠷᠢᠨ ᠤ᠋ ᠪᠠᠨ ᠠᠶᠠ ᠪᠠᠷ ᠲᠠᠢᠪᠤᠭᠤᠬᠠᠨ ᠳᠠᠪᠠᠭᠠᠳ ᠭᠤᠰᠢᠯᠵᠠᠵᠤ ᠶᠠᠪᠤᠨᠠ᠃ ᠡᠨᠡ ᠬᠥᠮᠦᠨ ᠮᠢᠩᠭᠠᠨᠪᠤᠤ ᠪᠠᠢᠯᠠ᠃
ᠮᠢᠩᠭᠠᠨᠪᠤᠤ ᠭᠣᠪᠢ ᠨᠤᠲᠤᠭ ᠢ᠋ ᠵᠣᠷᠢᠨ ᠬᠤᠪᠢᠯᠴᠡᠴᠡᠭ ᠦ᠋ᠨ ᠰᠤᠷᠠᠭ ᠢ᠋ ᠬᠠᠢᠯᠠ᠃ ᠬᠤᠪᠢᠯᠴᠡᠴᠡᠭ ᠦ᠋ᠨ ᠬᠠᠭᠤᠴᠢᠨ ᠨᠤᠲᠤᠭ ᠤ᠋ᠨ ᠪᠠᠭᠤᠷᠢ ᠶ᠋ᠢ ᠨᠢ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠲᠠᠨᠢᠭᠠᠳ ᠪᠠᠢᠯᠠ᠁ ᠪᠣᠷᠣ ᠭᠡᠷ ᠪᠣᠰᠬᠠᠵᠤ ᠪᠠᠢᠭᠰᠠᠨ ᠲᠥᠭᠥᠷᠢᠭ ᠳᠤᠭᠤᠢ ᠣᠷᠣᠮ ᠲᠡᠳᠦᠢ ᠪᠢᠴᠢᠬᠠᠨ ᠬᠠᠯᠴᠠᠷᠠᠭᠰᠠᠨ ᠭᠠᠵᠠᠷ ᠪᠠ ᠠᠷᠭᠠᠯ ᠲᠦᠯᠡᠭᠡᠨ ᠦ᠌ ᠭᠠᠵᠠᠷ ᠴᠦ᠍ ᠡᠪᠡᠰᠦ ᠯᠤᠤᠯᠢ ᠤᠷᠭᠤᠨ ᠦᠨᠡᠰᠦᠨ ᠦ᠌ ᠣᠪᠣᠭᠠ ᠶ᠋ᠢᠨ ᠳᠡᠷᠭᠡᠳᠡ ᠬᠠᠷᠢᠨ ᠤᠮᠠᠷᠠᠵᠤ ᠰᠢᠷᠠᠯᠠᠭᠰᠠᠨ ᠪᠤᠶᠤ ᠬᠥᠭᠡᠴᠦᠷᠡᠭᠰᠡᠨ ᠢᠰᠡᠭᠡᠢ ᠶ᠋ᠢᠨ ᠥᠭᠡᠳᠡᠰᠦ᠂ ᠦᠨᠡᠰᠦ ᠰᠢᠪᠠᠷ ᠲᠤ ᠪᠤᠯᠠᠭᠳᠠᠭᠰᠠᠨ ᠤᠩᠭᠠᠰᠤ ᠬᠢᠯᠭᠠᠰᠤᠨ ᠤ᠋ ᠣᠷᠣᠮ ᠲᠡᠳᠦᠢᠬᠡᠨ ᠶᠠᠭᠤᠮᠠ ᠯᠠ《ᠶᠡᠬᠡ ᠡᠷᠲᠡ ᠡᠨᠳᠡ ᠬᠤᠪᠢᠯᠴᠡᠴᠡᠭ ᠭᠡᠳᠡᠭ ᠪᠦᠰᠡᠭᠦᠢ ᠬᠦᠦ ᠲᠡᠢ ᠪᠡᠨ ᠰᠠᠭᠤᠵᠤ ᠪᠠᠢᠭᠰᠠᠨ᠁》 ᠭᠡᠵᠦ ᠬᠡᠯᠡᠬᠦ ᠰᠢᠭ ᠬᠠᠷᠠᠭᠳᠠᠬᠤ ᠠ᠋ᠴᠠ ᠥᠭᠡᠷᠡ ᠲᠠᠨᠢᠭᠳᠠᠬᠤ ᠶᠠᠭᠤᠮᠠ ᠠᠯᠠᠭᠠ᠃
ᠤᠰᠤ ᠨᠢ ᠰᠢᠷᠭᠢᠭᠰᠡᠨ ᠬᠠᠭᠤᠷᠠᠢ ᠬᠤᠳᠳᠤᠭ ᠤ᠋ᠨ ᠬᠠᠪᠢ ᠳ᠋ᠤ᠌ ᠬᠠᠷᠠ ᠰᠡᠭᠦᠯᠲᠦ ᠵᠡᠭᠡᠷᠡ ᠶ᠋ᠢᠨ ᠰᠦᠷᠦᠭ ᠲᠠᠢᠪᠤᠩ ᠪᠡᠯᠴᠢᠵᠦ᠂ ᠤᠨᠤᠭᠠ ᠲᠠᠢ ᠭᠠᠭᠴᠠ ᠡᠪᠦᠭᠡᠨ ᠬᠥᠮᠦᠨ ᠢ᠋ ᠳᠡᠮᠡᠢ ᠲᠣᠭᠣᠬᠤ ᠦᠭᠡᠢ ᠣᠭᠣᠲᠣᠷ ᠬᠠᠷᠠ ᠰᠡᠭᠦᠯ ᠢ᠋ᠶ᠋ᠡᠨ ᠬᠠᠶᠠ ᠭᠣᠳᠣᠭᠣᠨᠠᠭᠤᠯᠤᠨ ᠡᠪᠡᠰᠦ ᠴᠢᠮᠬᠢᠯᠡᠨᠡ᠃ ᠭᠣᠪᠢ ᠶ᠋ᠢᠨ ᠬᠠᠷᠠ ᠰᠡᠭᠦᠯᠲᠦ ᠨᠦ᠍ᠭᠦᠳ ᠴᠦ᠍ ᠡᠪᠦᠭᠡᠷᠡᠭᠰᠡᠨ ᠰᠢᠪᠠᠭᠤ ᠶ᠋ᠢ ᠮᠠᠭᠤ ᠦᠵᠡᠵᠦ《ᠳᠠᠪᠬᠢᠶᠠ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠮᠠᠨᠤᠰ ᠠ᠋ᠴᠠ ᠰᠢᠭᠢᠷᠡᠳᠡᠵᠦ ᠪᠠᠢᠭᠰᠠᠨ ᠣᠮᠣᠭ ᠵᠢᠪᠬᠤᠭᠠ ᠴᠢᠨᠢ ᠶᠠᠭᠠᠬᠢᠪᠠ⁈》 ᠭᠡᠵᠦ ᠲᠠᠪᠠᠯᠠᠬᠤ ᠰᠢᠭ᠋ ᠰᠠᠨᠠᠭᠳᠠᠭᠰᠠᠨ ᠳ᠋ᠤ᠌ ᠮᠢᠩᠭᠠᠨᠪᠤᠤ《ᠪᠢ ᠡᠪᠦᠭᠡᠷᠡᠵᠡᠢ ᠠ᠋᠂ ᠬᠡᠷᠡᠭ ᠡᠴᠡ ᠪᠡᠨ ᠭᠠᠷᠴᠢᠬᠠᠭᠰᠠᠨ ᠬᠥᠮᠦᠨ ᠬᠣᠢᠨᠠ》 ᠭᠡᠵᠦ ᠰᠡᠳᠬᠢᠯ ᠳ᠋ᠡᠭᠡᠨ ᠰᠢᠪᠡᠨᠡᠨ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠪᠠ᠃
ᠮᠢᠩᠭᠠᠨᠪᠤᠤ ᠮᠣᠷᠢᠨ ᠤ᠋ ᠪᠠᠨ ᠬᠠᠵᠠᠭᠠᠷ ᠢ᠋ ᠮᠤᠯᠲᠤᠯᠤᠨ ᠡᠪᠡᠰᠦ ᠬᠠᠵᠠᠯᠠᠭᠤᠯᠵᠤ᠂ ᠢᠷᠣᠭᠠᠷ ᠨᠢ ᠰᠢᠷᠭᠢᠬᠦ ᠰᠢᠬᠠᠭᠰᠠᠨ ᠰᠢᠮᠡᠭᠦᠷ ᠬᠣᠣ ᠠ᠋ᠴᠠ ᠪᠠᠨ ᠨᠢᠭᠡ ᠣᠭᠣᠴᠢ ᠶᠠᠭᠤᠮᠠ ᠰᠢᠮᠡᠵᠦ᠂ ᠬᠠᠰ ᠰᠣᠷᠣᠭᠤᠯ ᠲᠠᠢ ᠭᠠᠩᠰᠠ ᠪᠠᠨ ᠨᠠᠷᠠᠨ ᠤᠲᠤᠭᠠ ᠤᠭᠤᠭᠢᠭᠤᠯᠤᠭᠠᠳ ᠨᠥᠭᠦᠭᠡ ᠬᠠᠷᠠ ᠰᠡᠭᠦᠯᠲᠦ ᠨᠦ᠍ᠭᠦᠳ ᠢ᠋ ᠰᠡᠳᠬᠢᠯ ᠳ᠋ᠡᠭᠡᠨ ᠪᠠᠬᠠᠳᠤᠵᠤ《ᠡᠳᠡ ᠥᠨᠥᠴᠢᠨ ᠢᠨᠵᠠᠭᠠ ᠶ᠋ᠢᠨ ᠮᠢᠨᠢ ᠤᠳᠤᠮ ᠴᠦ᠍ ᠪᠣᠯᠪᠠ ᠤᠤ᠃ ᠬᠥᠬᠡᠷᠦᠬᠦᠢ ᠳᠡ! ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠲᠣᠷᠭᠠᠨ ᠪᠡᠯᠴᠢᠭᠡᠷ ᠲᠦ᠍ ᠡᠷᠬᠡ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠡᠯᠴᠢᠵᠦ ᠶᠠᠪᠤᠬᠤ ᠠ᠋ᠴᠠ ᠢᠯᠡᠭᠦᠦ ᠰᠠᠢᠬᠠᠨ ᠵᠢᠷᠭᠠᠯ ᠬᠠᠮᠢᠭᠠ ᠪᠠᠢᠨᠠ? ᠨᠠᠳᠠ ᠰᠢᠭ᠋ ᠨᠤᠲᠤᠭ ᠤᠰᠤᠨ ᠠ᠋ᠴᠠ ᠪᠠᠨ ᠠᠯᠤᠰ ᠴᠥᠯᠡᠭᠳᠡᠵᠦ ᠶᠠᠪᠤᠭᠠ ᠶᠠᠳᠠᠭᠰᠠᠨ ᠡᠪᠦᠭᠡᠨ ᠢ᠋ ᠲᠠ ᠨᠠᠷ ᠲᠣᠭᠣᠵᠤ ᠶᠠᠳᠠᠬᠤ ᠨᠢ ᠠᠷᠭᠠ ᠦᠭᠡᠢ᠃ ᠭᠠᠮᠢᠩ ᠤ᠋ᠨ ᠭᠠᠰᠢᠭᠤᠨ ᠳᠠᠷᠢ ᠶ᠋ᠢᠨ ᠤᠲᠤᠭᠠᠨ ᠳ᠋ᠤ᠌ ᠬᠠᠬᠠᠵᠤ ᠡᠨᠳᠡᠭᠰᠡᠨ ᠲᠡᠷᠡ ᠰᠢᠷᠠᠭᠴᠢᠨ ᠰᠢᠭ᠋ ᠬᠠᠷᠠᠰᠠᠯᠲᠤ ᠲᠡᠦᠬᠡ ᠲᠠᠨ ᠤ᠋ ᠤᠳᠤᠮ ᠤᠭᠰᠠᠭᠠᠨ ᠳ᠋ᠤ᠌ ᠳᠠᠬᠢᠵᠤ ᠪᠢᠲᠡᠭᠡᠢ ᠭᠠᠷᠤᠭᠠᠰᠠᠢ! ᠴᠠᠭᠠᠨ ᠰᠦᠷᠦᠭ ᠲᠦ᠍ ᠴᠢᠨᠢ ᠬᠠᠷᠠ ᠰᠠᠪᠠᠷ ᠲᠥᠷᠥᠬᠦ ᠪᠤᠷᠤᠭᠤ ᠰᠠᠨᠠᠭᠠᠲᠠᠨ ᠠ᠋ᠴᠠ ᠦᠷᠭᠦᠮᠡᠲᠡᠭᠡᠢ ᠰᠣᠷᠭᠣᠭ ᠶᠠᠪᠤᠭᠠᠰᠠᠢ ᠳᠠ!᠁ ᠬᠠᠷᠠ ᠰᠡᠭᠦᠯᠲᠦ ᠨᠦ᠍ᠭᠦᠳ ᠮᠢᠨᠢ᠁》 ᠭᠡᠵᠦ ᠳᠦᠳᠦᠨᠡᠭᠡᠳ ᠪᠣᠰᠴᠤ ᠮᠣᠷᠳᠠᠨ ᠴᠠᠭᠠᠰᠢ ᠠᠢᠯ ᠤ᠋ᠨ ᠪᠠᠷᠠ ᠬᠠᠢᠪᠠ᠃
ᠬᠤᠪᠢᠯᠴᠡᠴᠡᠭ ᠢ᠋ᠶ᠋ᠡᠨ ᠬᠠᠢᠷᠠᠯᠠᠵᠤ ᠬᠠᠷᠠᠮᠨᠠᠬᠤ ᠬᠤᠪᠢ ᠲᠠᠪᠢᠯᠠᠩ ᠦᠭᠡᠢ ᠪᠠᠢᠵᠢ ᠳᠠ ᠭᠡᠰᠡᠨ ᠭᠤᠨᠢᠶᠠᠯ ᠳ᠋ᠤ᠌ ᠰᠢᠨᠠᠯᠤᠨ ᠶᠠᠪᠤᠬᠤ ᠵᠠᠭᠤᠷᠠ ᠪᠠᠨ ᠵᠠᠯᠠᠭᠤ ᠨᠠᠰᠤᠨ ᠤ᠋ ᠭᠠᠯ ᠬᠠᠢᠷᠠ ᠶ᠋ᠢᠨ ᠬᠡᠯᠲᠡᠷᠬᠡᠢ ᠶ᠋ᠢ ᠴᠣᠭᠰᠢᠭᠤᠯᠵᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠭᠡᠮᠰᠢᠨ ᠰᠠᠨᠠᠵᠤ᠂ ᠬᠤᠪᠢᠯᠴᠡᠴᠡᠭ ᠦ᠋ᠨ ᠬᠠᠭᠤᠴᠢᠨ ᠪᠠᠭᠤᠷᠢ ᠠ᠋ᠴᠠ ᠰᠠᠯᠵᠤ ᠦᠯᠦ ᠲᠦᠪᠳᠡᠨ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠰᠡᠳᠬᠢᠯ ᠠᠷᠭᠠᠮᠵᠢᠭᠳᠠᠵᠤ ᠪᠠᠢᠯᠠ᠁
《ᠬᠤᠪᠢᠯᠴᠡᠴᠡᠭ ᠦ᠋ᠨ ᠬᠦᠦ ᠠᠩᠴᠢᠨᠵᠠᠪ ᠠᠷᠪᠠᠨ ᠬᠡᠳᠦᠲᠡᠢ ᠳᠡᠭᠡᠷᠡ ᠪᠡᠨ ᠡᠮᠦᠨᠡ ᠭᠣᠪᠢ ᠶ᠋ᠢᠨ ᠴᠠᠭᠠᠳᠤ ᠮᠤᠨᠠ ᠠᠭᠤᠯᠠᠨ ᠠ᠋ᠴᠠ ᠢᠷᠡᠭᠰᠡᠨ ᠪᠠᠶᠠᠷᠲᠤ ᠯᠠᠮᠠᠬᠦᠦ ᠭᠡᠰᠡᠨ ᠬᠣᠶᠠᠷ ᠰᠠᠢᠨ ᠡᠷᠡ ᠲᠡᠢ ᠬᠠᠨᠢᠰᠠᠵᠤ ᠶᠠᠪᠤᠭᠠᠳ ᠰᠤᠷᠠᠭ ᠲᠠᠰᠤᠷᠠᠭᠰᠠᠨ᠁ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠲᠠᠩᠰᠢᠵᠤ ᠬᠣᠴᠣᠷᠤᠭᠰᠠᠨ ᠬᠤᠪᠢᠯᠴᠡᠴᠡᠭ ᠴᠦ᠍ ᠬᠡᠳᠦᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠠᠴᠢᠶᠠ ᠳ᠋ᠤ᠌ ᠳᠠᠢᠭᠳᠠᠵᠤ ᠡᠮᠦᠨᠡᠰᠢᠯᠡᠭᠰᠡᠨ᠁》 ᠭᠡᠰᠡᠨ ᠨᠤᠲᠤᠭ ᠤ᠋ᠨ ᠬᠢᠨᠢ ᠬᠥᠮᠦᠰ ᠦ᠋ᠨ ᠶᠠᠷᠢᠭᠰᠠᠨ ᠢ᠋ ᠭᠠᠨᠵᠤᠭᠠᠯᠠᠵᠤ ᠮᠢᠩᠭᠠᠨᠪᠤᠤ ᠲᠥᠷᠥᠭᠰᠡᠨ ᠨᠤᠲᠤᠭ ᠵᠦᠭ ᠢ᠋ᠶ᠋ᠡᠨ ᠠᠶᠠᠨ ᠤ᠋ ᠵᠢᠯᠣᠭᠣ ᠪᠠᠨ ᠵᠠᠯᠠᠪᠠ᠃
ᠬᠥᠬᠡ ᠪᠡᠴᠢᠨ ᠵᠢᠯ ᠦ᠋ᠨ ᠵᠤᠨ ᠢ᠋ᠶ᠋ᠠᠷ ᠮᠢᠩᠭᠠᠨᠪᠤᠤ ᠶ᠋ᠢᠨ ᠴᠦᠯᠡᠯᠭᠡ ᠶ᠋ᠢᠨ ᠬᠤᠭᠤᠴᠠᠭᠠ ᠳᠠᠭᠤᠰᠴᠤ ᠨᠤᠲᠤᠭ ᠤ᠋ᠨ ᠪᠠᠷᠠ ᠬᠠᠷᠠᠭᠰᠠᠨ ᠴᠦ᠍ ᠬᠡᠪᠲᠡᠯᠭᠡᠨ ᠳ᠋ᠦ᠍ ᠣᠷᠣᠵᠤ ᠬᠥᠮᠦᠨ ᠦ᠌ ᠭᠠᠷ ᠲᠦᠰᠢᠬᠦ ᠪᠣᠯᠪᠠ᠃
ᠬᠠᠷᠢ ᠨᠤᠲᠤᠭ ᠬᠥᠮᠦᠨ ᠦ᠌ ᠭᠠᠵᠠᠷ ᠬᠠᠯᠠ ᠲᠠᠮᠤ ᠠᠮᠰᠠᠵᠤ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠤᠷᠠᠳ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠬᠤᠪᠢ ᠵᠠᠶᠠᠭᠠ ᠦᠷᠡ ᠬᠣᠢᠴᠢᠰ ᠤᠳᠤᠮ ᠤᠭᠰᠠᠭᠠᠨ ᠤ᠋ ᠪᠠᠨ ᠲᠥᠯᠥᠭᠡ ᠰᠢᠷᠪᠥᠰᠥ ᠬᠠᠲᠠᠭᠤ ᠰᠢᠵᠠᠭᠤᠷ ᠵᠠᠭᠤᠵᠤ ᠶᠠᠪᠤᠭᠰᠠᠨ ᠡᠷᠡ ᠶ᠋ᠢᠨ ᠨᠢᠭᠡ ᠪᠡᠷ ᠨᠤᠲᠤᠭ ᠤ᠋ᠨ ᠪᠠᠷᠠ ᠶ᠋ᠢ ᠡᠳᠦᠷ ᠦ᠋ᠨ ᠨᠠᠷᠠ ᠲᠠᠢ ᠪᠠᠷᠠᠳᠠᠵᠤ ᠢᠷᠡᠭᠰᠡᠨ ᠳ᠋ᠡᠭᠡᠨ ᠴᠠᠭᠠᠨᠠ ᠪᠠᠨ ᠣᠮᠣᠭᠰᠢᠬᠤ ᠬᠥᠷᠥᠩᠭᠡ ᠲᠡᠢ ᠰᠢᠭ ᠰᠠᠨᠠᠭᠳᠠᠨᠠ᠃
ᠨᠠᠰᠤᠨ ᠤ᠋ ᠬᠠᠨᠢ ᠵᠠᠶᠠᠭᠠᠨ ᠤ᠋ ᠬᠢᠨᠢ ᠲᠦᠰᠢᠭ ᠪᠣᠯᠤᠭᠰᠠᠭᠠᠷ ᠢᠷᠡᠭᠰᠡᠨ ᠰᠠᠮᠠᠭᠠᠨ ᠮᠠᠨᠤᠨᠪᠠᠳᠮᠠ ᠶ᠋ᠢᠨ ᠢ᠋ᠶ᠋ᠡᠨ ᠪᠡᠯᠭᠡᠲᠦ ᠠᠮᠠᠨ ᠠ᠋ᠴᠠ《ᠪᠠᠭᠠ ᠬᠠᠲᠤᠨ ᠰᠢᠷᠠ ᠴᠡᠷᠢᠭ ᠦ᠋ᠨ ᠰᠢᠬᠠᠮᠳᠠᠭᠤᠯᠤᠭᠠ ᠪᠠᠷ ᠪᠠᠷᠠᠭᠤᠨᠰᠢ ᠪᠤᠷᠤᠭᠤᠯᠠᠵᠤ ᠬᠠᠩᠬᠠᠳᠠᠢ ᠤᠷᠤᠭᠤ ᠵᠠᠢᠯᠠᠭᠰᠠᠨ ᠪᠣᠯᠪᠠᠴᠤ ᠬᠠᠷᠠ ᠴᠡᠷᠢᠭ ᠦ᠋ᠨ ᠥᠮᠥᠭ ᠲᠦ᠍ ᠸᠠᠩ ᠰᠣᠬᠣᠷ ᠤ᠋ᠨ ᠡᠨᠡᠷᠢᠯ ᠢ᠋ ᠬᠦᠷᠲᠡᠵᠦ᠂ ᠵᠠᠩᠵᠤᠨ ᠶᠠᠮᠤᠨ ᠤ᠋ ᠡᠵᠡᠨ ᠨᠣᠶᠠᠨ ᠤ᠋ ᠵᠥᠪᠰᠢᠶᠡᠷᠡᠯ ᠢ᠋ᠶ᠋ᠡᠷ ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠠᠮᠤᠷ ᠢ᠋ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠦ᠋ᠨ ᠰᠸᠯᠢᠩ ᠦ᠋ᠨ ᠣᠳᠣ ᠵᠡᠭᠦᠵᠡᠢ᠃ ᠬᠠᠷᠠ ᠴᠡᠷᠢᠭ ᠲᠡᠢ ᠬᠠᠮᠵᠢᠵᠤ ᠰᠢᠷᠠ ᠴᠡᠷᠢᠭ ᠢ᠋ ᠪᠠᠷᠠᠭᠤᠨᠰᠢᠯᠠᠬᠤ ᠳ᠋ᠤ᠌ ᠲᠤᠯᠵᠤ ᠪᠠᠢᠯᠳᠤᠭᠠᠳ ᠶᠡᠬᠡᠳᠡ ᠴᠤᠤ ᠮᠠᠨᠳᠤᠵᠤ᠂ ᠣᠳᠣ ᠨᠤᠲᠤᠭ ᠪᠤᠴᠠᠬᠤ ᠰᠦᠷᠡᠬᠡᠢ ᠶᠠᠭᠤᠮᠠ ᠪᠣᠯᠤᠭᠰᠠᠨ ᠠ᠋!᠁ ᠲᠡᠷᠡᠴᠢᠯᠡᠨ＜ᠪᠠᠭᠠ ᠵᠠᠰᠠᠭ＞ᠴᠦ᠍ ᠡᠰᠡᠨ ᠮᠡᠨᠳᠦ ᠲᠣᠷᠨᠢᠨ ᠥᠰᠴᠦ ᠪᠠᠢᠭᠠ》 ᠭᠡᠬᠦ ᠰᠠᠢᠨ ᠴᠢᠮᠡᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠪᠡᠶᠡ ᠶ᠋ᠢᠨ ᠡᠪᠡᠷᠰᠢᠯ ᠢ᠋ᠶ᠋ᠡᠷ ᠵᠣᠪᠠᠨᠢᠭᠰᠠᠨ ᠴᠢᠷᠠᠢ ᠳ᠋ᠤᠨᠢ ᠦᠯᠦ ᠮᠡᠳᠡᠭ ᠢᠨᠢᠶᠡᠮᠰᠦᠭᠯᠡᠯ ᠲᠣᠳᠣᠷᠠᠨ᠄《 ᠪᠢ ᠥᠲᠡᠯᠵᠦ＜ᠡᠪᠦᠭᠡᠨ ᠰᠢᠪᠠᠭᠤ＞ ᠪᠠᠨ ᠳᠠᠭᠤᠯᠠᠬᠤ ᠴᠠᠭ ᠣᠢᠷᠠᠲᠤᠯᠠ᠁＜ᠪᠠᠭᠠ ᠵᠠᠰᠠᠭ＞ ᠪᠠᠰᠠ ᠪᠠᠯᠴᠢᠷ ᠪᠠᠢᠭᠰᠠᠭᠠᠷ᠁ ᠣᠳᠣᠬᠠᠨ ᠳ᠋ᠤ᠌ ᠬᠦᠦ ᠴᠣᠭᠪᠠᠭᠠᠲᠤᠷ ᠢ᠋ ᠳᠣᠳᠣᠮᠳᠠᠵᠤ ᠳᠥᠷᠥᠭᠡ ᠶ᠋ᠢ ᠨᠢ ᠡᠷᠭᠦᠶᠡ!》 ᠭᠡᠬᠦ ᠳ᠋ᠦ᠍ᠨᠢ ᠮᠠᠨᠤᠨᠪᠠᠳᠮᠠ ᠰᠠᠨᠠᠭᠠ ᠶ᠋ᠢ ᠨᠢ ᠣᠢᠯᠠᠭᠠᠵᠤ᠂ ᠴᠠᠭᠠᠳᠤᠭᠤᠯᠠ ᠳ᠋ᠠᠭᠠᠨ《ᠪᠢᠷ ᠴᠠᠭᠠᠰᠤ᠂ ᠪᠡᠬᠡ ᠵᠢᠭᠤᠷᠠᠭᠤᠯ ᠨᠠᠭᠠᠰᠢᠯᠠᠭᠤᠯ!》 ᠭᠡᠬᠦ ᠳ᠋ᠦ᠍ ᠵᠠᠷᠤᠴᠠ ᠬᠡᠦᠬᠡᠨ ᠪᠢᠴᠢᠭ ᠦ᠋ᠨ ᠬᠣᠷᠭᠣᠨ ᠠ᠋ᠴᠠ ᠬᠠᠭᠤᠴᠢᠨ ᠶᠠᠮᠤᠨ ᠤ᠋ ᠪᠢᠴᠢᠭᠡᠴᠢ ᠶ᠋ᠢᠨ ᠤᠯᠠᠭᠠᠨ ᠱᠤᠭᠤᠮ ᠲᠠᠢ ᠴᠠᠭᠠᠰᠤ᠂ ᠪᠢᠷ᠂ ᠶᠠᠨᠳᠠᠢ ᠵᠡᠷᠭᠡ ᠶ᠋ᠢ ᠪᠡᠯᠡᠨ ᠪᠣᠯᠭᠠᠪᠠ᠃
ᠮᠠᠨᠤᠨᠪᠠᠳᠮᠠ᠂ ᠡᠪᠦᠭᠡᠨ ᠦ᠌ ᠳᠠᠯᠤ ᠮᠥᠷᠦᠨ ᠡᠴᠡ ᠡᠪᠲᠡᠢᠬᠡᠨ ᠡᠷᠭᠦᠵᠦ ᠪᠤᠰᠬᠠᠭᠠᠳ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠵᠠᠷᠤᠴᠠ ᠥᠬᠢᠨ ᠳ᠋ᠦ᠍《ᠴᠢᠨᠦ ᠤᠴᠢᠷ ᠪᠠᠷᠠᠭᠰᠠᠨ᠂ ᠣᠳᠣ ᠭᠠᠷ!》 ᠭᠡᠰᠡᠨ ᠳᠣᠬᠢᠶᠠ ᠥᠭᠬᠦ ᠳ᠋ᠦ᠍ ᠵᠠᠷᠤᠴᠠ ᠥᠬᠢᠨ ᠱᠠᠯᠠᠪᠬᠠᠨ ᠭᠠᠷᠴᠤ ᠶᠠᠪᠤᠪᠠ᠃
ᠵᠠᠷᠤᠴᠠ ᠥᠬᠢᠨ ᠭᠠᠷᠴᠤ ᠶᠠᠪᠤᠬᠤ ᠲᠠᠢ ᠵᠡᠷᠭᠡ ᠬᠠᠪᠲᠠᠰᠤ ᠵᠥᠷᠢᠭᠡᠳ ᠴᠣᠭᠪᠠᠭᠠᠲᠤᠷ ᠣᠷᠣᠵᠤ ᠢᠷᠡᠪᠡ᠃
ᠴᠣᠭᠪᠠᠭᠠᠲᠤᠷ ᠡᠩᠭᠡᠷ ᠡᠪᠴᠢᠭᠦᠦ ᠪᠡᠨ ᠵᠠᠳᠠᠭᠠᠢ ᠲᠠᠯᠪᠢᠵᠤ ᠶᠡᠬᠡᠳᠡ ᠰᠣᠷᠲᠣᠭᠣᠲᠠᠢ᠃ ᠵᠠᠳᠠᠭᠠᠢ ᠡᠩᠭᠡᠷ ᠲᠡᠢ ᠴᠡᠷᠢᠭ ᠬᠤᠪᠴᠠᠰᠤᠨ ᠤ᠋ ᠰᠢᠷᠢᠨ ᠪᠥᠰᠡᠨ ᠳ᠋ᠦ᠍ᠨᠢ ᠠᠬᠤᠷ ᠫᠤᠤ ᠭᠢᠯᠠᠯᠵᠠᠵᠤ᠂ ᠣᠳᠣ ᠲᠠᠢ ᠮᠠᠯᠠᠭᠠᠢ ᠪᠠᠨ ᠠᠪᠴᠤ ᠰᠢᠷᠡᠭᠡᠨ ᠳᠡᠭᠡᠷᠡ ᠰᠠᠪᠠᠭᠠᠳ᠄
— ᠡᠯᠳᠡᠩᠭᠡ᠂ ᠲᠤᠰᠠᠯᠠᠭᠴᠢ ᠰᠠᠢᠨ ᠳᠤᠷᠠ ᠠ᠋ᠴᠠ ᠪᠠᠨ ᠲᠤᠰᠢᠶᠠᠯ ᠢ᠋ᠶ᠋ᠠᠨ ᠬᠠᠶᠠᠵᠤ᠂ ᠬᠥᠳᠡᠭᠡ ᠭᠡᠷ ᠲᠡᠭᠡᠨ ᠵᠢᠷ ᠦ᠋ᠨ ᠮᠠᠯᠴᠢᠨ ᠪᠣᠯᠬᠤ ᠭᠡᠰᠡᠨ ᠢ᠋ ᠪᠠᠭᠠ ᠬᠠᠲᠤᠨ ᠠᠭᠤᠴᠢᠯᠠᠨ ᠵᠥᠪᠰᠢᠶᠡᠷᠡᠭᠰᠡᠨ ᠭᠡᠨᠡ ᠭᠡᠵᠦ ᠬᠡᠯᠡᠪᠡ᠃
— ᠠ⁈ ᠡᠯᠳᠡᠩᠭᠡ ᠶ᠋ᠢ ᠤᠤ? ᠭᠡᠵᠦ ᠮᠠᠨᠤᠨᠪᠠᠳᠮᠠ ᠭᠠᠢᠬᠠᠨᠠ᠃
— ᠲᠡᠢᠮᠦ!
— ᠮᠠᠭᠤ ᠪᠣᠯᠵᠠᠢ ᠠ᠋! ᠪᠠᠭᠠ ᠬᠠᠲᠤᠨ ᠠ᠋᠂ ᠪᠠᠭᠠ ᠬᠠᠲᠤᠨ ᠠ᠋᠂ ᠲᠣᠯᠣᠭᠠᠢ ᠴᠢᠨᠢ ᠢᠩᠭᠢᠵᠦ ᠪᠤᠷᠤᠭᠤ ᠪᠠᠷ ᠡᠷᠭᠢᠪᠡ ᠤᠤ ᠳᠠ᠃ ᠬᠥᠭᠡᠷᠦᠬᠦᠢ! ᠡᠨᠡ ᠪᠣᠯ ᠮᠤᠨᠳᠠᠭ ᠶᠡᠬᠡ ᠣᠰᠣᠯ ᠪᠤᠷᠤᠭᠤ! ᠭᠡᠵᠦ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠪᠠᠭᠠ ᠬᠠᠲᠤᠨ ᠤ᠋ ᠣᠷᠣᠨ ᠳ᠋ᠤ᠌ ᠮᠠᠰᠢᠳᠠ ᠭᠡᠮᠰᠢᠨᠡ᠃
— ᠬᠡᠩ! ᠪᠢ ᠪᠠᠢᠭᠰᠠᠨ ᠪᠣᠯ ᠤᠤ! ᠮᠠᠭᠤ ᠥᠭᠢᠷᠡ ᠬᠤᠯᠠᠭᠠᠢ ᠶ᠋ᠢᠨ ᠠᠮᠠᠨ ᠬᠦᠵᠦᠭᠦᠦ ᠶ᠋ᠢ ᠨᠢ ᠮᠤᠰᠬᠢᠬᠤ ᠦᠭᠡᠢ ᠪᠣᠯ ᠠᠪᠤ ᠶ᠋ᠢᠨ ᠬᠦᠦ ᠪᠢᠰᠢ! ᠭᠡᠵᠦ ᠴᠣᠭᠪᠠᠭᠠᠲᠤᠷ ᠰᠦᠪᠡᠭᠡ ᠪᠡᠨ ᠲᠤᠯᠵᠤ ᠵᠠᠨᠤᠨᠠ᠃
— ᠡᠯᠳᠡᠩᠭᠡ ᠵᠣᠳᠪᠠ ᠬᠣᠶᠠᠷ ᠶᠠᠭᠤ ᠬᠢᠵᠦ ᠡᠴᠢᠨᠡᠭᠡᠨ ᠵᠢᠯ ᠳᠥᠷᠦᠭᠡᠨ ᠦ᠌ ᠲᠠᠪᠠᠭ ᠡᠯᠡᠭᠡᠵᠦ ᠶᠠᠪᠤᠪᠠ? ᠵᠢᠩᠰᠡ ᠪᠡᠨ ᠲᠤᠰᠢᠶᠠᠵᠤ ᠵᠡᠷᠭᠡ ᠪᠡᠨ ᠵᠠᠢᠴᠢᠯᠠᠵᠤ ᠪᠠᠢᠭᠠ ᠴᠢᠨᠢ ᠪᠢᠰᠢᠷ᠃ ᠰᠡᠭᠦᠯ ᠨᠢ ᠴᠠᠢᠭᠰᠠᠨ ᠬᠤᠯᠵᠢᠨ ᠦᠨᠡᠭᠡ ᠡᠯᠳᠡᠩᠭᠡ ᠶ᠋ᠢᠨ ᠤᠬᠠᠭᠠᠨ ᠳ᠋ᠤ᠌ ᠤᠨᠠᠬᠤ ᠨᠦᠬᠡ ᠪᠡᠨ ᠥᠪᠡᠷ ᠢ᠋ᠶ᠋ᠡᠨ ᠮᠠᠯᠲᠠᠯᠠ ᠳᠠ ᠬᠥᠭᠡᠷᠦᠬᠦᠢ ᠪᠠᠭᠠ ᠬᠠᠲᠤᠨ!
— ᠰᠢᠭᠡᠳᠡᠭ ᠭᠣᠣ ᠠ᠋ᠴᠠ ᠴᠠᠭᠠᠰᠢ ᠶᠠᠪᠤᠵᠤ ᠦᠵᠡᠭᠡ ᠦᠭᠡᠢ ᠪᠡᠯᠪᠡᠰᠦᠨ ᠡᠮᠡ ᠶ᠋ᠢᠨ ᠤᠬᠠᠭᠠᠨ ᠠ᠋ᠴᠠ ᠶᠠᠭᠤ ᠭᠠᠷᠤᠨᠠ ᠪᠣᠢ? ᠭᠡᠵᠦ ᠪᠡᠶᠡ ᠪᠡᠨ ᠡᠷᠭᠦᠨ ᠶᠡᠬᠡ ᠦᠭᠡ ᠬᠡᠯᠡᠭᠰᠡᠨ ᠴᠣᠭᠪᠠᠭᠠᠲᠤᠷ ᠢ᠋ ᠡᠬᠡ ᠨᠢ ᠲᠣᠭᠣᠵᠤ ᠶᠠᠳᠠᠨ᠄
— ᠵᠠ ᠪᠠᠢᠵᠠ᠂ ᠪᠢᠲᠡᠭᠡᠢ ᠨᠢᠭᠡ ᠠᠷᠠᠰᠤᠨ ᠳ᠋ᠠᠭᠠᠨ ᠪᠠᠭᠲᠠᠬᠤ ᠦᠭᠡᠢ ᠶᠠᠭᠤᠮᠠ ᠳᠣᠩᠭᠣᠰᠤᠭᠠᠳ ᠪᠠᠢ! ᠲᠡᠷᠡ ᠬᠥᠮᠦᠨ ᠴᠢᠨᠢ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠬᠠᠲᠤᠨ ᠰᠸᠯᠢᠩ ᠰᠢᠦ ᠳᠡ᠂ ᠬᠦᠦ ᠮᠢᠨᠢ ᠪᠠᠷᠤᠭᠲᠠᠢ ᠬᠥᠪᠰᠥᠷᠳᠡ! ᠭᠡᠵᠦ ᠳᠤᠷᠠ ᠦᠭᠡᠢᠯᠡᠭᠰᠡᠨ ᠦᠭᠡ ᠰᠣᠨᠣᠰᠬᠠᠪᠠ᠃ ᠲᠡᠭᠡᠪᠡᠴᠦ ᠳᠣᠲᠣᠷᠠ ᠪᠠᠨ《ᠨᠢᠳᠦᠨ ᠳ᠋ᠡᠭᠡᠨ ᠬᠥᠮᠦᠨ ᠪᠠᠭᠲᠠᠭᠠᠬᠤ ᠦᠭᠡᠢ ᠲᠡᠢᠮᠦ ᠲᠠᠷᠢᠬᠢ ᠤᠷᠭᠤᠭᠰᠠᠨ ᠴᠦ᠍ ᠪᠣᠯ ᠶᠠᠭᠠᠬᠢᠬᠤ ᠪᠣᠢ? ᠮᠢᠨᠦ ᠬᠦᠦ ᠲᠡᠷᠡ ᠵᠡᠷᠭᠡ ᠶ᠋ᠢᠨ ᠰᠸᠯᠢᠩ ᠨᠣᠶᠠᠨ ᠪᠣᠯ ᠲᠠᠷᠢᠬᠢ ᠵᠦᠳᠡᠷᠡᠭᠡᠬᠦ ᠦᠭᠡᠢ ᠱᠤᠤᠭᠢᠭᠤᠯᠵᠤ ᠴᠢᠳᠠᠨᠠ》 ᠭᠡᠵᠦ ᠪᠣᠳᠣᠨᠠ᠃
ᠡᠷᠡ ᠶ᠋ᠢᠨ ᠲᠤᠷᠪᠢ ᠲᠠᠨᠢᠭᠳᠠᠭᠰᠠᠨ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠲᠠᠷ ᠲᠠᠮᠢᠷ ᠢ᠋ ᠠᠯᠠᠭᠠᠨ ᠤ᠋ ᠪᠠᠨ ᠠᠷ ᠰᠢᠭ᠋ ᠲᠠᠨᠢᠳᠠᠭ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ《ᠪᠠᠭᠠ ᠬᠠᠲᠤᠨ ᠳ᠋ᠤ᠌ ᠦᠵᠡᠭᠦᠯᠦᠭᠰᠡᠨ ᠲᠤᠰᠠ ᠭᠠᠪᠢᠶᠠ ᠪᠠᠨ ᠬᠥᠷᠥᠩᠭᠡᠯᠡᠵᠦ ᠲᠡᠭᠦᠨ ᠡᠴᠡ ᠨᠠᠳᠠ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ᠋ ᠴᠡᠷᠢᠭ ᠦ᠋ᠨ ᠶᠡᠬᠡ ᠡᠷᠬᠡ ᠶ᠋ᠢ ᠣᠯᠭᠣᠵᠤ ᠥᠭᠬᠦ ᠶ᠋ᠢ ᠶᠠᠭᠠᠬᠢᠯᠠ? ᠠᠳᠠᠭ ᠨᠢ ᠡᠴᠢᠭᠡ ᠶ᠋ᠢᠨ ᠣᠷᠣ ᠶ᠋ᠢ ᠳᠠᠷᠤᠵᠤ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠶ᠋ᠢᠨ ᠵᠢᠩᠰᠡ ᠶ᠋ᠢ ᠲᠤᠰᠬᠤ ᠦᠭᠡᠢ ᠤᠤ ᠳᠠ! ᠲᠠᠨ ᠤ᠋ ᠦᠭᠡ ᠪᠠᠭᠠ ᠬᠠᠲᠤᠨ ᠤ᠋ ᠴᠢᠬᠢᠨ ᠳ᠋ᠦ᠍ ᠮᠢᠩᠭᠠᠨ ᠯᠠᠩ ᠭᠡᠰᠡᠨ ᠦᠭᠡ᠁ ᠲᠠᠨ ᠤ᠋ ᠨᠢᠭᠤᠷ ᠢ᠋ ᠬᠠᠷᠠᠵᠤ ᠮᠠᠭᠤ ᠬᠦᠦ ᠳ᠋ᠦ᠍ ᠴᠢᠨᠢ ᠨᠣᠶᠠᠨ ᠵᠡᠷᠭᠡ ᠬᠦᠷᠲᠡᠭᠡᠨᠡ ᠪᠣᠢ᠁》 ᠭᠡᠵᠦ ᠴᠣᠭᠪᠠᠭᠠᠲᠤᠷ ᠤ᠋ᠨ ᠣᠯᠠᠨᠲᠠ ᠲᠡᠭᠦᠨ ᠦ᠌ ᠴᠢᠬᠢ ᠰᠢᠪᠦᠭᠡᠳᠡᠭᠰᠡᠨ ᠢ᠋ ᠣᠯᠠᠨ ᠬᠣᠨᠣᠭ ᠰᠢᠷᠭᠠᠭᠠᠨ ᠪᠠᠢᠵᠤ《ᠤᠭ ᠨᠢ ᠵᠥᠪ ᠶᠦᠮ ᠠ᠋᠂ ᠡᠪᠦᠭᠡᠨ ᠢ᠋ ᠶᠠᠰᠤ ᠪᠠᠨ ᠲᠠᠯᠪᠢᠬᠤ ᠠ᠋ᠴᠠ ᠡᠮᠦᠨᠡ ᠪᠠᠭᠠ ᠬᠠᠲᠤᠨ ᠳ᠋ᠤ᠌ ᠡᠷᠭᠦᠳᠡᠯ ᠡᠷᠭᠦᠵᠦ ᠰᠠᠨᠠᠭᠠ ᠪᠠᠨ ᠮᠡᠳᠡᠭᠳᠡᠬᠦ ᠨᠢ ᠵᠦᠢᠲᠡᠢ! ᠡᠪᠦᠭᠡᠨ ᠳᠠᠯᠠᠢᠴᠢᠬᠠᠪᠠᠯ ᠪᠢᠳᠡ ᠳᠠᠭᠠᠭᠠᠳ ᠮᠠᠯᠢᠢᠴᠢᠬᠠᠨᠠ ᠰᠢᠦ!》 ᠭᠡᠵᠦ ᠥᠨᠥᠳᠥᠷ ᠡᠪᠡᠳᠴᠢᠲᠡᠢ ᠡᠪᠦᠭᠡᠨ ᠢ᠋ᠶ᠋ᠡᠨ ᠥᠨᠳᠡᠢᠯᠭᠡᠨ ᠪᠢᠷ ᠪᠠᠷᠢᠭᠤᠯᠪᠠ᠃
ᠡᠷᠭᠢᠨ ᠪᠠᠭᠠ ᠬᠠᠲᠤᠨ ᠲᠠᠨᠠ᠄
ᠠᠮᠤᠭᠤᠯᠠᠩ ᠠᠢᠯᠠᠳᠬᠠᠶᠠ!
ᠡᠳᠦᠭᠡ ᠬᠠᠭᠤᠴᠢᠨ ᠲᠦᠰᠢᠮᠡᠯ ᠮᠢᠩᠭᠠᠨᠪᠤᠤ ᠲᠠᠨ ᠤ᠋ ᠡᠮᠦᠨᠡ ᠡᠴᠡ ᠶᠠᠯᠠ ᠨᠥᠮᠥᠷᠦᠨ ᠠᠯᠤᠰ ᠲᠤ ᠴᠥᠯᠡᠭᠳᠡᠭᠰᠡᠨ ᠬᠤᠭᠤᠴᠠᠭᠠᠨ ᠳ᠋ᠠᠭᠠᠨ ᠡᠷᠭᠢᠨ ᠪᠠᠭᠠ ᠬᠠᠲᠤᠨ᠂ ᠪᠠᠭᠠ ᠵᠠᠰᠠᠭ ᠲᠠ ᠡᠬᠡ ᠬᠥᠪᠡᠭᠦᠨ ᠬᠣᠶᠠᠭᠤᠯᠠ ᠶ᠋ᠢ ᠪᠣᠳᠣᠯ ᠳ᠋ᠠᠭᠠᠨ ᠪᠠᠭᠲᠠᠭᠠᠵᠤ ᠶᠠᠪᠤᠯᠠ᠁
ᠬᠡᠳᠦᠢᠨ ᠴᠦᠯᠡᠯᠭᠡ ᠶ᠋ᠢᠨ ᠬᠤᠭᠤᠴᠠᠭᠠ ᠳᠠᠭᠤᠰᠤᠭᠰᠠᠨ ᠪᠣᠯᠪᠠᠴᠤ ᠡᠨᠡ ᠪᠡᠶᠡ ᠡᠪᠡᠳᠴᠢᠨ ᠳ᠋ᠦ᠍ ᠪᠠᠷᠢᠭᠳᠠᠨ ᠡᠮᠭᠡᠭ ᠲᠦ᠍ ᠪᠣᠭᠣᠭᠳᠠᠵᠤ᠂ ᠬᠥᠮᠦᠨ ᠦ᠌ ᠭᠠᠷ ᠲᠦᠰᠢᠨ ᠬᠡᠪᠲᠡᠷᠢ ᠳ᠋ᠦ᠍ ᠣᠷᠣᠯᠠ!
ᠡᠳᠦᠭᠡ ᠶᠢᠷᠲᠢᠨᠴᠦ ᠶ᠋ᠢᠨ ᠮᠥᠩᠬᠡ ᠪᠤᠰᠤ ᠶ᠋ᠢ ᠦᠵᠡᠬᠦ ᠡᠳᠦᠷ ᠢ᠋ᠶ᠋ᠡᠨ ᠲᠣᠭᠠᠯᠠᠭᠰᠠᠨ ᠡᠪᠦᠭᠡᠨ ᠲᠦᠰᠢᠮᠡᠯ ᠦ᠋ᠨ ᠥᠴᠦᠬᠡᠨ ᠰᠠᠨᠠᠭᠠ ᠶ᠋ᠢ ᠦᠷᠦ ᠡᠪᠡᠳᠴᠦ᠂ ᠡᠨᠡᠷᠢᠨ ᠪᠣᠳᠣᠬᠤ ᠶ᠋ᠢ ᠭᠤᠶᠤᠴᠢᠯᠠᠰᠤ᠃
ᠶᠢᠷᠲᠢᠨᠴᠦ ᠡᠴᠡ ᠬᠠᠯᠢᠬᠤ ᠠ᠋ᠴᠠ ᠡᠮᠦᠨᠡ ᠪᠢ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠨᠤᠲᠤᠭ ᠲᠠᠭᠠᠨ ᠬᠢᠮᠤᠰᠤᠨ ᠴᠢᠨᠡᠭᠡ ᠨᠡᠮᠡᠷᠢ ᠪᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠳ᠋ᠡᠭᠡᠨ ᠬᠠᠷᠠᠮᠰᠠᠮᠤᠢ᠃ ᠲᠡᠷᠡ ᠬᠦ᠌ ᠮᠡᠬᠦᠰ ᠪᠢ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠵᠢᠴᠢ ᠲᠡᠭᠦᠨ ᠢ᠋ ᠡᠵᠡᠨ ᠮᠡᠳᠡᠭᠴᠢ ᠰᠸᠯᠢᠩ ᠨᠣᠶᠠᠨ— ᠪᠠᠭᠠ ᠬᠠᠲᠤᠨ ᠳ᠋ᠤ᠌ ᠦᠷᠡ ᠶ᠋ᠢᠨ ᠭᠠᠭᠴᠠ ᠬᠦᠦ ᠪᠡᠨ ᠲᠤᠰᠢᠶᠠᠵᠤ᠂ ᠲᠡᠷᠡ ᠪᠡᠷ ᠲᠠᠨ ᠤ᠋ ᠳᠣᠳᠣᠮᠳᠠᠯᠭᠠ ᠪᠠᠷ ᠬᠣᠰᠢᠭᠤ ᠨᠤᠲᠤᠭ ᠤ᠋ᠨ ᠦᠢᠯᠡᠰ ᠲᠡᠭᠡᠨ ᠪᠡᠶᠡ ᠰᠡᠳᠬᠢᠯ ᠦ᠋ᠨ ᠬᠦᠴᠦ ᠪᠡᠨ ᠬᠠᠷᠠᠮ ᠦᠭᠡᠢ ᠡᠷᠭᠦᠲᠦᠭᠡᠢ! ᠡᠷᠭᠢᠨ ᠲᠠ ᠴᠢᠳᠠᠯ ᠲᠠᠢ ᠶ᠋ᠢ ᠨᠢ ᠳᠠᠩᠰᠠᠨ ᠪᠠᠢᠵᠤ ᠭᠠᠷ ᠳᠣᠣᠷᠠ ᠪᠠᠨ ᠵᠠᠷᠤᠬᠤ ᠳ᠋ᠤ᠌ ᠪᠠᠭᠠ ᠬᠠᠲᠤᠨ ᠲᠠᠨ ᠤ᠋ ᠡᠮᠦᠨᠡ ᠡᠴᠡ ᠴᠠᠯᠠᠭᠠᠢ ᠦᠭᠡᠢ ᠵᠢᠳᠬᠦᠭᠴᠢ ᠮᠣᠩᠭᠣᠯ ᠡᠷᠡ ᠶ᠋ᠢᠨ ᠨᠢᠭᠡ ᠪᠡᠷ ᠲᠠᠨᠢᠭᠳᠠᠬᠤ ᠪᠣᠢ?
ᠥᠷᠥᠰᠢᠶᠡᠯ ᠳ᠋ᠡᠭᠡᠨ ᠪᠠᠭᠲᠠᠭᠠᠨ ᠡᠨᠡᠷᠢᠬᠦ ᠠᠵᠢᠶᠠᠮᠤ!
ᠡᠭᠦᠨ ᠦ᠌ ᠲᠤᠯᠠ
ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠤᠤᠯ ᠬᠠᠭᠤᠴᠢᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ ᠬᠢᠴᠢᠶᠡᠩᠭᠦᠢᠯᠡᠪᠡᠢ
ᠲᠡᠨᠳᠡ ᠡᠴᠡ ᠴᠣᠭᠪᠠᠭᠠᠲᠤᠷ ᠤ᠋ᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠬᠦᠷᠭᠡᠭᠰᠡᠨ ᠡᠴᠢᠭᠡ ᠶ᠋ᠢᠨ ᠡᠷᠭᠦᠭᠰᠡᠨ ᠪᠢᠴᠢᠭ ᠢ᠋ ᠪᠠᠭᠠ ᠬᠠᠲᠤᠨ ᠤᠩᠰᠢᠵᠤ ᠳᠣᠲᠣᠷᠯᠠᠭᠠᠳ ᠶᠠᠭᠤ ᠴᠦ᠍ ᠭᠡᠵᠦ ᠥᠴᠢᠭᠰᠡᠨ ᠦᠭᠡᠢ ᠬᠠᠷᠢᠭᠤ ᠲᠣᠪᠴᠢ ᠪᠢᠴᠢᠭ ᠪᠤᠴᠠᠭᠠᠵᠤ ᠶᠠᠪᠤᠭᠤᠯᠪᠠ᠃
ᠠᠴᠢ ᠲᠤᠰᠠᠲᠤ ᠬᠣᠶᠠᠷ ᠨᠠᠰᠤᠲᠠᠨ ᠳ᠋ᠤᠷ᠄
ᠠᠮᠤᠷ ᠢ᠋ ᠲᠠᠨᠢ ᠡᠷᠢᠵᠦ᠂ ᠭᠡᠷ ᠬᠣᠲᠠᠯᠠᠭᠠᠷ ᠤ᠋ᠨ ᠲᠠᠨᠢ ᠰᠠᠢᠨ ᠰᠠᠢᠬᠠᠨ ᠢ᠋ ᠪᠡᠯᠭᠡᠳᠡᠵᠦ᠂ ᠪᠡᠶᠡ ᠯᠠᠭᠱᠠᠨ ᠤ᠋ ᠲᠠᠨᠢ ᠡᠷᠡᠭᠦᠯ ᠲᠤᠩᠭᠠᠯᠠᠭ ᠠᠬᠤ ᠶ᠋ᠢ ᠵᠥᠩᠨᠡᠶᠡ!
ᠲᠠᠨ ᠤ᠋ ᠰᠠᠨᠠᠭᠠ ᠶ᠋ᠢ ᠤᠬᠠᠯᠠ᠃
ᠵᠢᠮᠢᠰ ᠤᠯᠠᠢᠪᠠᠯ ᠮᠥᠴᠢᠷ ᠡᠴᠡ ᠪᠡᠨ ᠤᠨᠠᠳᠠᠭ ᠶᠣᠰᠣᠨ ᠪᠣᠢ᠃ ᠲᠡᠢᠨ ᠬᠦ᠌ ᠡᠨᠡ ᠶᠠᠪᠤᠳᠠᠯ ᠳ᠋ᠤ᠌ ᠬᠣᠶᠠᠷ ᠨᠠᠰᠤᠲᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠦᠳᠡᠭᠡᠬᠦ ᠬᠡᠷᠡᠭ ᠠᠯᠠᠭᠠ᠃ ᠪᠡᠶᠡ ᠪᠡᠨ ᠰᠠᠢᠲᠤᠷ ᠰᠤᠪᠢᠯᠠᠬᠤ ᠳ᠋ᠤ᠌ ᠴᠠᠯᠠᠭᠠᠢᠳᠠᠵᠤ ᠦᠯᠦ ᠪᠣᠯᠤᠨᠠ᠃ ᠪᠢ ᠵᠠᠪᠳᠤᠪᠠᠯ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠬᠦᠷᠴᠦ ᠲᠠᠨ ᠢ᠋ ᠪᠣᠯᠭᠣᠭᠠᠨᠠᠮ!
ᠡᠭᠦᠨ ᠦ᠌ ᠲᠤᠯᠠ
ᠰᠡᠷᠭᠦᠮᠡ ᠬᠢᠴᠢᠶᠡᠩᠭᠦᠢᠯᠡᠪᠡᠢ
ᠭᠡᠰᠡᠨ ᠲᠣᠪᠴᠢᠬᠠᠨ ᠪᠢᠴᠢᠭ ᠢ᠋ ᠦᠵᠡᠭᠡᠳ ᠮᠢᠩᠭᠠᠨᠪᠤᠤ ᠮᠠᠨᠤᠨᠪᠠᠳᠮᠠ ᠬᠣᠶᠠᠷ ᠤ᠋ᠨ ᠳᠣᠲᠣᠷᠠ ᠪᠠᠶᠠᠷᠯᠠᠬᠤ ᠴᠦ᠍ ᠪᠢᠰᠢ ᠪᠠᠴᠢᠮᠳᠠᠬᠤ ᠴᠦ᠍ ᠪᠢᠰᠢ ᠨᠢᠭᠡ ᠰᠦᠷᠡᠬᠡᠢ ᠮᠥᠯᠢᠢᠵᠡᠢ᠃
— ᠦᠭᠡᠢ ᠠ᠋᠂ ᠵᠢᠮᠢᠰ ᠤᠯᠠᠢᠪᠠᠯ ᠮᠥᠴᠢᠷ ᠡᠴᠡ ᠪᠡᠨ ᠤᠨᠠᠳᠠᠭ ᠭᠡᠭᠴᠢ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ? ᠭᠡᠰᠡᠨ ᠳ᠋ᠦ᠍᠂
— ᠣ᠂ ᠳᠠ᠂ ᠪᠢᠲᠡᠭᠡᠢ ᠶᠠᠭᠠᠷᠠ᠂ ᠴᠠᠭ ᠨᠢ ᠲᠤᠯᠪᠠᠯ ᠪᠣᠯᠬᠤ ᠯᠠ ᠪᠠᠢᠯᠭᠦᠢ ᠭᠡᠰᠡᠨ ᠰᠠᠨᠠᠭᠠ ᠰᠢᠳᠡ!
— ᠮᠠᠨ ᠤ᠋ ᠡᠨᠡ ᠮᠣᠳᠣᠨ ᠤ᠋ ᠵᠢᠮᠢᠰ ᠶᠡᠷᠦ ᠨᠢ ᠤᠯᠠᠢᠳᠠᠭ ᠦᠭᠡᠢ ᠴᠢᠯᠳᠡᠩ ᠲᠦᠭᠦᠬᠡᠢ ᠪᠡᠷ ᠢ᠋ᠶ᠋ᠡᠨ ᠪᠠᠢᠭᠠᠳ ᠪᠠᠢᠪᠠᠯ ᠶᠠᠭᠠᠬᠢᠨᠠ ᠪᠣᠢ? ᠮᠣᠳᠣᠨ ᠤ᠋ ᠪᠠᠨ ᠮᠥᠴᠢᠷ ᠲᠦ᠍ ᠬᠣᠷᠪᠣᠢᠵᠤ ᠬᠠᠲᠠᠬᠤ ᠶᠤᠮ ᠤᠤ᠂ ᠠᠵᠠ ᠦᠭᠡᠢᠳᠡᠪᠡᠯ ᠬᠣᠷᠣᠬᠠᠢᠳᠠᠵᠤ ᠴᠦ᠍ ᠮᠡᠳᠡᠨᠡ᠃
— ᠠ᠂ ᠪᠡᠯᠭᠡ ᠦᠭᠡᠢ ᠦᠭᠡ! ᠤᠯᠠᠢᠳᠠᠭ ᠦᠭᠡᠢ ᠵᠢᠮᠢᠰ ᠭᠡᠵᠦ ᠬᠠᠮᠢᠭᠠ ᠪᠠᠢᠬᠤ ᠪᠣᠢ? ᠤᠯᠠᠢᠬᠤ ᠯᠠ ᠪᠠᠢᠯᠭᠦᠢ! ᠪᠠᠭᠠ ᠬᠠᠲᠤᠨ ᠠ᠋ᠴᠠ《ᠡᠨᠡ ᠶᠠᠪᠤᠳᠠᠯ ᠳ᠋ᠤ᠌ ᠬᠣᠶᠠᠷ ᠨᠠᠰᠤᠲᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠦᠳᠡᠭᠡᠬᠦ ᠬᠡᠷᠡᠭ ᠠᠯᠠᠭᠠ》 ᠭᠡᠰᠡᠨ ᠦᠭᠡ ᠴᠢᠨᠢ《ᠰᠠᠨᠠᠭᠠ ᠠᠮᠤᠷ ᠪᠠᠢ᠂ ᠪᠢ ᠵᠦᠢ ᠵᠣᠬᠢᠰ ᠢ᠋ ᠦᠵᠡᠶᠡ!》 ᠭᠡᠰᠡᠨ ᠰᠠᠨᠠᠭᠠ ᠮᠥᠨ! ᠭᠡᠵᠦ ᠮᠢᠩᠭᠠᠨᠪᠤᠤ ᠮᠠᠰᠢ ᠴᠠᠭᠠᠯᠬᠠᠢ ᠰᠠᠨᠠᠭᠠ ᠪᠠᠷ ᠢᠲᠡᠭᠡᠵᠦ ᠶᠠᠷᠢᠨᠠ᠃
— ᠠ᠂ ᠮᠡᠳᠡᠬᠦ ᠦᠭᠡᠢ ᠳᠡ! ᠶᠠᠭᠤ ᠯᠠ ᠪᠣᠯ⁈ ᠴᠢ ᠪᠢᠳᠡ ᠬᠣᠶᠠᠷ ᠢ᠋ ᠬᠠᠭᠤᠷᠴᠤ᠁ ᠭᠡᠳ ᠮᠠᠨᠤᠨᠪᠠᠳᠮᠠ《ᠡᠨᠡ ᠪᠡᠶᠡ ᠪᠡᠨ ᠮᠡᠳᠡᠳᠡᠭ ᠦᠭᠡᠢ ᠪᠡᠯᠪᠡᠰᠦᠨ ᠡᠮᠡ ᠶ᠋ᠢᠨ ᠠᠮᠠᠨ ᠵᠠᠪᠠᠵᠢ ᠶ᠋ᠢ ᠬᠠᠷᠠᠭᠠᠳ ᠪᠠᠢᠬᠤ ᠳ᠋ᠤ᠌ ᠬᠠᠵᠠᠭᠠᠢ ᠰᠢᠤᠬᠠᠨ ᠪᠠᠢᠨᠠ ᠳᠠ᠃ ᠬᠠᠷᠢᠨ ᠲᠠᠩᠳᠠ ᠸᠠᠩ ᠰᠣᠬᠣᠷ ᠤ᠋ᠨ ᠠᠮᠢᠰᠬᠤᠭᠠ ᠪᠠᠷ ᠲᠤᠷᠭᠢᠳᠠᠭ ᠰᠢᠭ᠋ ᠰᠠᠨᠠᠭᠳᠠᠵᠤ ᠪᠠᠢᠨᠠ᠃ ᠬᠦᠦ ᠲᠡᠢ ᠪᠣᠯᠵᠤ ᠬᠥᠷᠥᠩᠭᠡᠰᠢᠭᠡᠳ ᠬᠥᠮᠦᠨ ᠬᠠᠷᠠ ᠲᠠᠨᠢᠬᠤ ᠪᠠᠨ ᠪᠣᠯᠢᠭᠰᠠᠨ ᠬᠣᠢᠲᠤ ᠮᠥᠷ ᠦᠭᠡᠢ ᠳᠠᠮᠰᠢᠭ᠁》 ᠭᠡᠵᠦ ᠬᠡᠯᠡᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠪᠣᠯᠢᠵᠤ ᠡᠪᠡᠳᠴᠢᠲᠡᠢ ᠡᠪᠦᠭᠡᠨ ᠢ᠋ᠶ᠋ᠡᠨ ᠲᠠᠭᠯᠠᠷᠠᠴᠢᠬᠠᠬᠤ ᠠ᠋ᠴᠠ ᠡᠮᠢᠶᠡᠨ ᠦᠭᠡ ᠪᠡᠨ ᠳᠤᠲᠠᠭᠤ ᠬᠡᠯᠡᠪᠡ᠃
ᠮᠢᠩᠭᠠᠨᠪᠤᠤ ᠡᠪᠦᠭᠡᠨ ᠨᠢᠳᠦ ᠪᠡᠨ ᠠᠨᠢᠭᠠᠳ ᠨᠠᠮ ᠬᠡᠪᠲᠡᠨᠡ᠃
ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠡᠪᠦᠭᠡᠨ ᠦ᠌ ᠪᠡᠨ ᠵᠣᠪᠠᠨᠢᠩᠭᠤᠢ ᠴᠢᠷᠠᠢ ᠲᠠᠢ ᠬᠡᠪᠲᠡᠬᠦ ᠶ᠋ᠢ ᠬᠠᠷᠠᠭᠠᠳ ᠡᠯᠢᠭᠡ ᠨᠢ ᠡᠮᠲᠡᠷᠡᠵᠦ ᠪᠣᠳᠣᠯ ᠤ᠋ᠨ ᠷᠣᠮᠠᠨ ᠤ᠋ ᠪᠠᠨ ᠬᠠᠭᠤᠳᠠᠰᠤᠨ ᠠ᠋ᠴᠠ ᠲᠡᠭᠦᠨ ᠦ᠌ ᠠᠮᠢᠳᠤᠷᠠᠯ ᠤ᠋ᠨ ᠬᠠᠯᠠᠭᠤᠨ ᠴᠢᠯᠠᠭᠤ ᠳᠣᠯᠢᠶᠠᠵᠤ ᠶᠠᠪᠤᠭᠰᠠᠨ ᠢ᠋ ᠰᠠᠨᠠᠨ《ᠥᠨᠥᠳᠥᠷ ᠮᠠᠷᠭᠠᠲᠤᠷ ᠲᠠᠭᠠᠨ ᠲᠤᠯᠤᠭᠰᠠᠨ ᠡᠪᠦᠭᠡᠨ ᠢ᠋ᠶ᠋ᠡᠨ ᠢᠩᠭᠢᠵᠦ ᠪᠢᠲᠡᠭᠦᠰᠦᠯᠦᠭᠡᠳ ᠶᠠᠭᠠᠬᠢᠨᠠᠮ᠂ ᠰᠡᠳᠬᠢᠯ ᠢ᠋ ᠨᠢ ᠣᠩᠭᠣᠢᠯᠭᠠᠬᠤ ᠶ᠋ᠢ ᠪᠣᠳᠣᠶᠠ! ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠶᠠᠪᠤᠵᠤ ᠪᠠᠭᠠ ᠬᠠᠲᠤᠨ ᠲᠠᠢ ᠪᠠᠷᠠᠳᠠᠶᠠ᠃ ᠪᠠᠭᠠ ᠬᠠᠲᠤᠨ ᠤ᠋ ᠪᠠᠯᠴᠢᠷ ᠤᠬᠠᠭᠠᠨ ᠢ᠋ ᠪᠠᠷᠤᠭᠯᠠᠬᠤ ᠦᠭᠡᠢ ᠴᠦ᠍ ᠪᠢᠰᠢ! ᠭᠠᠮᠢᠩ ᠤ᠋ᠨ ᠭᠣᠣ ᠰᠸᠯᠢᠩ ᠢ᠋ ᠪᠣᠳᠣᠪᠠᠯ ᠶᠠᠭᠤ ᠪᠠᠢᠬᠤ ᠪᠣᠢ⁈》 ᠭᠡᠵᠦ ᠲᠠᠩᠬᠢᠯ ᠵᠠᠯᠠᠭᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠭᠣᠣ ᠰᠸᠯᠢᠩ ᠢ᠋ ᠤᠬᠠᠭᠠᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠨᠠ᠁
ᠮᠢᠩᠭᠠᠨᠪᠤᠤ ᠵᠠᠯᠠᠭᠤ ᠳ᠋ᠠᠭᠠᠨ ᠭᠠᠩᠬᠤᠰ ᠭᠡᠰᠡᠨ ᠰᠠᠢᠬᠠᠨ ᠵᠠᠯᠠᠭᠤ᠂ ᠥᠨᠳᠥᠷ ᠨᠠᠷᠢᠨ ᠪᠡᠶᠡ ᠲᠡᠢ ᠮᠥᠷᠥ ᠪᠡᠷ ᠢ᠋ᠶ᠋ᠡᠨ ᠪᠠᠬᠠᠨ ᠮᠡᠭᠵᠢᠭᠡᠷ ᠰᠢᠭ ᠪᠣᠯᠪᠠᠴᠤ ᠴᠣᠭᠲᠠᠢ ᠬᠣᠶᠠᠷ ᠳᠠᠪᠬᠤᠷᠠ ᠨᠢᠳᠦ ᠨᠢ ᠢᠮᠠᠭᠲᠠ ᠬᠡᠢ ᠮᠣᠷᠢ ᠲᠠᠢ ᠭᠢᠯᠠᠯᠵᠠᠵᠤ ᠪᠠᠢᠳᠠᠭ᠃ ᠣᠳᠣ ᠲᠡᠭᠦᠨ ᠦ᠌ ᠬᠦᠦ ᠴᠣᠭᠪᠠᠭᠠᠲᠤᠷ ᠤ᠋ᠨ ᠪᠡᠶᠡ ᠲᠥᠯᠥᠪ ᠡᠴᠢᠭᠡ ᠶ᠋ᠢ ᠪᠡᠨ ᠬᠡᠪᠯᠡᠨ ᠳᠠᠭᠤᠷᠢᠶᠠᠵᠤ᠂ ᠨᠣᠭᠣᠭᠠᠨ ᠪᠤᠷᠴᠠᠭ ᠢ᠋ ᠬᠠᠭᠠᠯᠤᠭᠰᠠᠨ ᠰᠢᠭ᠋ ᠠᠳᠠᠯᠢᠬᠠᠨ ᠢ᠋ ᠶᠠᠭᠠᠬᠢᠬᠤ ᠪᠣᠢ!
ᠲᠡᠳᠡᠨ ᠦ᠌ ᠬᠢᠨ ᠤᠭ ᠨᠢ ᠨᠡᠷᠡᠲᠦ ᠪᠠᠶᠠᠨ ᠯᠣᠷᠣᠢᠭᠠᠯᠰᠠᠩ ᠤ᠋ᠨ ᠦᠬᠡᠷ ᠢ᠋ ᠬᠠᠷᠢᠭᠤᠯᠵᠤ᠂ ᠵᠢᠯ ᠦ᠋ᠨ ᠥᠩᠭᠡ ᠶ᠋ᠢᠨ ᠬᠠᠷᠢᠭᠤᠯᠤᠭᠠ ᠶ᠋ᠢ ᠲᠦᠰᠢᠵᠦ ᠠᠮᠢᠳᠤᠷᠠᠳᠠᠭ ᠪᠠᠢᠪᠠ᠃ ᠡᠴᠢᠭᠡ ᠨᠢ ᠦᠬᠡᠷ ᠬᠠᠷᠢᠭᠤᠯᠵᠤ᠂ ᠡᠬᠡ ᠨᠢ ᠦᠨᠢᠶᠡ ᠰᠠᠭᠠᠵᠤ ᠰᠦ ᠰᠠᠭᠠᠯᠢ ᠪᠠᠵᠠᠭᠠᠬᠤ ᠵᠠᠪ ᠴᠢᠯᠥᠭᠡᠨ ᠳ᠋ᠡᠭᠡᠨ ᠰᠦᠮᠡ ᠵᠢᠰᠠ ᠳ᠋ᠤ᠌ ᠪᠤᠳᠠᠭᠠ ᠬᠠᠭᠤᠷᠴᠤ ᠨᠦᠳᠦᠵᠦ ᠴᠠᠢᠯᠭᠠᠬᠤ ᠵᠡᠷᠭᠡ ᠥᠷᠲᠥᠭᠰᠡᠨ ᠠᠵᠢᠯ ᠪᠦᠬᠦᠨ ᠢ᠋ ᠭᠣᠯᠤᠯ ᠦᠭᠡᠢ ᠬᠢᠵᠦ ᠶᠠᠪᠤᠭᠰᠠᠨ ᠶᠠᠳᠠᠷᠠᠭᠤᠬᠠᠨ ᠲᠠᠢᠵᠢ ᠠᠢᠯ ᠤ᠋ᠨ ᠨᠢᠭᠡ᠃ ᠮᠢᠩᠭᠠᠨᠪᠤᠤ ᠯᠣᠷᠣᠢᠭᠠᠯᠰᠠᠩ ᠤ᠋ᠨ ᠠᠳᠤᠭᠤ ᠶ᠋ᠢ ᠬᠠᠷᠠᠵᠤ᠂ ᠡᠮᠨᠢᠭ ᠰᠤᠷᠭᠠᠬᠤ ᠠᠳᠤᠭᠤ ᠳᠡᠯᠯᠡᠬᠦ᠂ ᠦᠷᠢᠶᠡ ᠳᠠᠭᠠ ᠬᠠᠭᠠᠷᠢᠵᠤ ᠲᠠᠮᠠᠭᠠᠯᠠᠬᠤ ᠠᠯᠢ ᠪᠣᠯᠭᠠᠨ ᠳ᠋ᠤ᠌ ᠭᠠᠷ ᠳᠦᠢᠲᠡᠢ᠃ ᠲᠣᠯᠣᠭᠠᠢ ᠪᠠᠨ ᠭᠠᠵᠠᠷ ᠰᠢᠭᠠᠭᠠᠳ ᠤᠩᠭᠤᠰᠤ ᠠᠯᠲᠠᠨ ᠪᠤᠯᠭᠢᠳᠠᠭ ᠣᠩᠭᠣᠨ ᠡᠮᠨᠢᠭ ᠦ᠋ᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠭᠠᠷᠤᠭᠠᠳ ᠯᠠ ᠰᠠᠭᠤᠴᠢᠬᠠᠬᠤ ᠳ᠋ᠤ᠌ ᠶᠣᠰᠣᠲᠠᠢ ᠳᠥᠷᠪᠡᠨ ᠲᠤᠭᠤᠷᠠᠢ ᠨᠢ ᠳᠣᠭᠣᠭᠰᠢ ᠪᠠᠨ᠂ ᠳᠥᠷᠪᠡᠯᠵᠢᠨ ᠬᠥᠯ ᠦ᠋ᠳ ᠨᠢ ᠳᠡᠭᠡᠭᠰᠢ ᠪᠡᠨ ᠪᠠᠢᠭᠰᠠᠨ ᠴᠠᠭ ᠲᠤ ᠤᠨᠠᠨᠠ ᠭᠡᠵᠦ ᠪᠣᠯ ᠪᠠᠢᠬᠤ ᠦᠭᠡᠢ ᠬᠥᠮᠦᠨ ᠪᠠᠢᠯᠠ᠃ ᠢᠩᠭᠢᠭᠡᠳ ᠦᠶᠡ ᠬᠤᠷᠠᠭ ᠤ᠋ᠨ ᠬᠡᠦᠬᠡᠨᠴᠤᠤᠯ ᠤ᠋ᠨ ᠬᠠᠢᠷᠠ ᠰᠡᠳᠬᠢᠯ ᠢ᠋ ᠭᠡᠵᠢᠭᠡᠳᠡᠵᠦ ᠵᠣᠪᠠᠭᠠᠳᠠᠭ ᠪᠠᠢᠪᠠ᠃
ᠨᠤᠲᠤᠭ ᠤ᠋ᠨ ᠬᠡᠦᠬᠡᠨᠴᠦᠳ ᠲᠦ᠍ ᠮᠠᠨᠤᠨᠪᠠᠳᠮᠠ ᠭᠡᠭᠴᠢ ᠰᠡᠷᠭᠦᠯᠡᠩ ᠬᠡᠦᠬᠡᠨ ᠮᠢᠩᠭᠠᠨᠪᠤᠤ ᠶ᠋ᠢ ᠰᠦᠷᠡᠬᠡᠢ ᠲᠣᠭᠣᠵᠤ ᠳᠤᠷᠠᠲᠠᠶᠠ ᠨᠠᠰᠤᠨ ᠤ᠋ ᠵᠠᠶᠠᠭᠠ ᠪᠠᠨ ᠬᠣᠯᠪᠣᠵᠤ ᠶᠠᠪᠤᠬᠤ ᠶ᠋ᠢ ᠪᠣᠳᠣᠯ ᠳ᠋ᠠᠭᠠᠨ ᠮᠠᠨᠠᠵᠤ ᠶᠠᠪᠤᠭᠰᠠᠨ ᠢ᠋ ᠬᠡᠨ ᠮᠡᠳᠡᠯᠡ? ᠦᠬᠡᠷ ᠵᠢᠯ ᠦ᠋ᠨ ᠦᠢᠮᠡᠭᠡᠨ ᠳ᠋ᠦ᠍ ᠭᠠᠮᠢᠩ ᠤ᠋ᠨ ᠴᠡᠷᠢᠭ ᠮᠢᠩᠭᠠᠨᠪᠤᠤ ᠶ᠋ᠢ ᠤᠨᠤᠭᠠ ᠮᠠᠯ ᠳ᠋ᠤ᠌ ᠰᠠᠢᠨ᠂ ᠬᠢᠲᠠᠳ ᠦᠭᠡ ᠴᠦ᠍ ᠶᠠᠷᠢᠴᠢᠬᠠᠳᠠᠭ ᠲᠤᠨᠢ ᠲᠣᠭᠣᠵᠤ ᠴᠡᠷᠢᠭ ᠦ᠋ᠨ ᠠᠯᠪᠠ ᠳ᠋ᠤ᠌ ᠲᠡᠳᠡᠨ ᠦᠬᠡᠷ ᠲᠡᠮᠡᠭᠡ ᠬᠠᠷᠢᠭᠤᠯᠠᠭᠤᠯᠬᠤ ᠪᠠᠷ ᠬᠠᠯᠬᠠ ᠳ᠋ᠤ᠌ ᠠᠪᠴᠤ ᠶᠠᠪᠤᠯᠠ ᠭᠡᠰᠡᠨ᠁ ᠡᠨᠡ ᠬᠣᠭᠣᠷᠣᠨᠳᠣ ᠮᠠᠨᠤᠨᠪᠠᠳᠮᠠ᠂ ᠮᠢᠩᠭᠠᠨᠪᠤᠤ ᠶ᠋ᠢᠨ ᠡᠴᠢᠭᠡ ᠡᠬᠡ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠤᠶᠠᠭᠳᠠᠨ᠂ ᠪᠣᠭᠲᠣᠯᠠᠭᠠ ᠦᠭᠡᠢ ᠪᠡᠷᠢ ᠶ᠋ᠢᠨ ᠨᠡᠷᠡ ᠪᠡᠷ ᠡᠨᠡ ᠠᠢᠯ ᠳ᠋ᠤ᠌ ᠳᠤᠷᠠᠲᠠᠶᠠ《ᠮᠣᠷᠳᠠᠵᠤ》 ᠢᠷᠡᠪᠡ᠃《ᠬᠡᠦᠬᠡᠨ ᠮᠢᠨᠢ᠂ ᠦᠢᠯᠡ ᠪᠢᠰᠢ ᠤᠤ ᠳᠠ! ᠡᠨᠡ ᠴᠠᠭ ᠲᠥᠷᠥ ᠦᠢᠮᠡᠭᠰᠡᠨ ᠦᠶᠡ ᠳ᠋ᠦ᠍ ᠮᠢᠩᠭᠠᠨᠪᠤᠤ ᠴᠡᠷᠢᠭ ᠲᠦ᠍ ᠪᠠᠷᠢᠭᠳᠠᠵᠤ ᠶᠠᠪᠤᠭᠠᠳ ᠤᠯᠠᠭᠠᠨ ᠭᠣᠣᠯ ᠲᠠᠢ ᠢᠷᠡᠳᠡᠭ ᠴᠦ᠍ ᠶᠦᠮ ᠤᠤ? ᠦᠭᠡᠢ ᠴᠦ᠍ ᠶᠦᠮ ᠤᠤ? ᠡᠷᠲᠡᠬᠡᠨ ᠰᠢᠭ ᠦᠵᠡᠭᠰᠡᠨ ᠲᠣᠭᠣᠭᠰᠠᠨ ᠬᠥᠮᠦᠨ ᠪᠠᠢᠪᠠᠯ ᠵᠠᠶᠠᠭᠠ ᠪᠠᠨ ᠬᠣᠯᠪᠣᠬᠤ ᠶᠤᠮ ᠪᠢᠰᠢ ᠤᠤ⁈ ᠪᠠᠷᠠ ᠦᠭᠡᠢ ᠬᠥᠮᠦᠨ ᠦ᠌ ᠬᠣᠭᠣᠰᠣᠨ ᠨᠡᠷᠡ ᠳ᠋ᠦ᠍ ᠪᠡᠶᠡ ᠪᠡᠨ ᠪᠣᠭᠣᠵᠤ ᠶᠠᠭᠤ ᠬᠢᠬᠦ ᠪᠣᠢ!》 ᠭᠡᠵᠦ ᠡᠪᠦᠭᠡᠨ ᠬᠥᠭᠰᠢᠨ ᠬᠣᠶᠠᠷ ᠬᠡᠴᠢᠨᠡᠭᠡᠨ ᠰᠠᠨᠠᠭᠤᠯᠵᠤ ᠭᠣᠶᠣᠪᠠᠴᠤ ᠪᠣᠯᠳᠠᠭ ᠦᠭᠡᠢ᠃《ᠬᠣᠶᠠᠷ ᠨᠠᠰᠤᠲᠠᠨ ᠮᠢᠨᠢ᠂ ᠪᠢ ᠬᠦᠦ ᠲᠡᠢ ᠴᠢᠨᠢ ᠵᠠᠶᠠᠭᠠ ᠪᠠᠨ ᠬᠣᠯᠪᠣᠬᠤ ᠪᠠᠷ ᠰᠢᠭᠤᠳᠴᠢᠬᠠᠭᠰᠠᠨ! ᠳᠤᠷᠠ ᠳ᠋ᠤ᠌ ᠰᠢᠷᠠ ᠦᠭᠡᠢ ᠭᠡᠳᠡᠭ ᠢ᠋ᠶ᠋ᠡᠷ ᠪᠢ ᠲᠠᠨ ᠤ᠋ ᠮᠣᠷᠢᠨ ᠤ᠋ ᠱᠣᠩ ᠲᠠᠢ ᠴᠢᠨᠢ ᠵᠠᠶᠠᠭᠠ ᠪᠠᠨ ᠬᠣᠯᠪᠣᠭᠰᠠᠨ ᠴᠦ᠍ ᠶᠠᠭᠠᠮᠠᠢ!》 ᠭᠡᠵᠦ ᠡᠪᠦᠭᠡᠨ ᠬᠥᠭᠰᠢᠨ ᠢ᠋ ᠬᠦᠨᠳᠦᠯᠡᠨ ᠠᠰᠠᠷᠠᠵᠤ ᠬᠦᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠦᠦ ᠪᠣᠯᠵᠤ ᠶᠠᠪᠤᠯᠠ᠃
ᠮᠢᠩᠭᠠᠨᠪᠤᠤ ᠭᠣᠣ ᠰᠸᠯᠢᠩ ᠦ᠋ᠨ ᠴᠡᠷᠢᠭ ᠦ᠋ᠨ ᠠᠶᠠᠨ ᠢ᠋ᠶ᠋ᠠᠷ ᠬᠠᠯᠬᠠ ᠨᠤᠲᠤᠭ ᠲᠤ ᠴᠡᠷᠢᠭ ᠦ᠋ᠨ ᠲᠡᠮᠡᠭᠡ ᠬᠠᠷᠢᠭᠤᠯᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠬᠤᠪᠢᠯᠴᠡᠴᠡᠭ ᠬᠡᠦᠬᠡᠨ ᠳ᠋ᠦ᠍ ᠰᠡᠳᠬᠢᠯ ᠲᠡᠢ ᠪᠣᠯᠵᠤ ᠰᠠᠭᠤᠯᠠ ᠭᠡᠰᠡᠨ᠁ ᠭᠠᠮᠢᠩ ᠴᠡᠷᠢᠭ ᠴᠣᠬᠢᠭᠳᠠᠵᠤ ᠡᠮᠦᠨᠡᠰᠢ ᠪᠤᠴᠠᠬᠤ ᠳ᠋ᠤ᠌ ᠮᠢᠩᠭᠠᠨᠪᠤᠤ ᠴᠡᠷᠢᠭ ᠦ᠋ᠨ ᠬᠥᠯ ᠳᠠᠭᠠᠵᠤ ᠪᠤᠴᠠᠯ ᠦᠭᠡᠢ ᠪᠣᠯᠬᠤ ᠦᠭᠡᠢ ᠲᠤᠯᠠ ᠢᠵᠢᠯᠢᠰᠢᠭᠰᠡᠨ ᠬᠣᠶᠠᠷ ᠰᠠᠯ ᠶᠠᠳᠠᠨ ᠶᠣᠰᠣᠲᠠᠢ ᠯᠠ ᠡᠯᠢᠭᠡ ᠵᠢᠷᠦᠬᠡ ᠪᠡᠨ ᠤᠷᠠᠮᠠ ᠪᠣᠯᠤᠭᠰᠠᠨ ᠳ᠋ᠤ᠌ ᠮᠢᠩᠭᠠᠨᠪᠤᠤ ᠱ᠌ᠢᠷᠦᠨ ᠤᠯᠠᠭᠠᠨ ᠵᠢᠩᠰᠡ ᠲᠡᠢ ᠮᠠᠨᠤᠬᠤᠨ ᠬᠥᠬᠦᠦᠷ ᠢ᠋ᠶ᠋ᠡᠨ ᠭᠠᠷᠭᠠᠵᠤ ᠦᠨᠦᠰᠦᠭᠡᠳ《ᠨᠠᠮᠠᠶ᠋ᠢ ᠰᠠᠨᠠᠪᠠᠯ ᠦᠷᠬᠦᠢ ᠢᠩᠭᠢᠵᠦ ᠦᠨᠦᠰᠴᠦ ᠪᠠᠢᠭᠠᠷᠠᠢ᠂ ᠪᠢ ᠯᠠᠪ ᠴᠢᠮᠠ ᠳᠡᠭᠡᠷᠡ ᠪᠤᠴᠠᠵᠤ ᠢᠷᠡᠨᠡ》 ᠭᠡᠳ ᠬᠤᠪᠢᠯᠴᠡᠴᠡᠭ ᠬᠡᠦᠬᠡᠨ ᠳ᠋ᠦ᠍ ᠪᠡᠯᠡᠭᠯᠡᠭᠰᠡᠨ ᠳ᠋ᠦ᠍ ᠬᠠᠷᠢᠭᠤ ᠳ᠋ᠤᠨᠢ ᠳᠤᠲᠠᠭᠤ ᠤᠷᠠᠯᠠᠭᠰᠠᠨ ᠢᠨᠵᠠᠭᠠᠨ ᠬᠡ ᠲᠡᠢ ᠬᠥᠬᠦᠦᠷ ᠦ᠋ᠨ ᠬᠠᠪᠲᠠᠭᠠ ᠪᠠᠨ ᠥᠭᠴᠦ《᠁ ᠵᠠᠮ ᠳ᠋ᠠᠭᠠᠨ ᠰᠠᠢᠨ ᠶᠠᠪᠤᠭᠠᠷᠠᠢ ᠮᠢᠩᠭᠠᠨᠪᠤᠤ ᠠᠬᠠ ᠮᠢᠨᠢ!》 ᠭᠡᠵᠦ ᠮᠢᠩᠭᠠᠨᠪᠤᠤ ᠶ᠋ᠢᠨ ᠪᠠᠷᠠ ᠲᠠᠰᠤᠷᠠᠲᠠᠯᠠ ᠦᠳᠡᠵᠦ ᠵᠣᠭᠰᠣᠬᠤ ᠳ᠋ᠠᠭᠠᠨ᠄
ᠴᠡᠩᠬᠡᠷ ᠴᠠᠭᠠᠨ ᠡᠭᠦᠯᠡ ᠨᠢ ᠭᠠᠷᠪᠠᠯ
ᠴᠢᠭᠢᠭ ᠬᠤᠷᠠ ᠨᠢ ᠤᠨᠠᠳᠠᠭ ᠶᠤᠮ ᠠ᠋ ᠬᠦ
ᠴᠢᠩᠳᠠ ᠰᠡᠳᠬᠢᠯ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠪᠠᠯ
ᠴᠢᠭᠯᠡᠭᠡᠳ ᠢᠷᠡᠯᠭᠦᠢ ᠳᠡ ᠬᠦ
ᠪᠠᠳᠠᠷᠠᠩᠭᠤᠢ ᠡᠭᠦᠯᠡ ᠨᠢ ᠭᠠᠷᠪᠠᠯ
ᠪᠣᠷᠣᠭᠠᠨ ᠨᠢ ᠣᠷᠣᠳᠠᠭ ᠶᠤᠮ ᠠ᠋ ᠬᠦ
ᠪᠠᠲᠤ ᠰᠡᠳᠬᠢᠯ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠪᠠᠯ
ᠪᠤᠴᠠᠭᠠᠳ ᠢᠷᠡᠯᠭᠦᠢ ᠳᠡ !
ᠭᠠᠩᠭᠠᠷ ᠭᠤᠩᠭᠠᠷ ᠶᠤ᠌ ᠭᠠᠯᠠᠭᠤ ᠰᠢᠪᠠᠭᠤ ᠨᠢ
ᠭᠠᠵᠠᠷ ᠲᠠᠭᠠᠨ ᠶᠠᠪᠤᠬᠤ ᠶᠤᠮ ᠪᠠᠢᠨᠠ
ᠭᠠᠩᠭᠠᠩ ᠲᠥᠷᠥᠭᠰᠡᠨ ᠮᠢᠩᠭᠠᠨᠪᠤᠤ ᠠᠵᠠᠢ ᠮᠢᠨᠢ
ᠭᠡᠷ ᠲᠦ᠍ ᠪᠡᠨ ᠬᠠᠷᠢᠬᠤ ᠶᠤᠮ ᠪᠠᠢᠨᠠ᠁
ᠭᠡᠵᠦ ᠬᠤᠪᠢᠯᠴᠡᠴᠡᠭ ᠠᠮᠠᠷᠠᠭ ᠬᠣᠩᠭᠣᠷ ᠤ᠋ᠨ ᠢ᠋ᠶ᠋ᠠᠨ ᠠᠷᠤ ᠠ᠋ᠴᠠ ᠳᠠᠭᠤᠯᠠᠭᠰᠠᠨ ᠳ᠋ᠤ᠌ ᠴᠡᠯᠮᠡᠭ ᠣᠭᠲᠠᠷᠭᠤᠢ ᠳ᠋ᠤ᠌ ᠴᠡᠩᠬᠡᠷ ᠴᠠᠭᠠᠨ ᠡᠭᠦᠯᠡ ᠭᠠᠷᠴᠤ ᠪᠣᠷᠣᠭᠠᠨ ᠳᠤᠰᠤᠭᠠᠨᠠᠵᠤ ᠪᠠᠢᠪᠠ᠁
ᠤᠤᠯ ᠨᠢ ᠮᠢᠩᠭᠠᠨᠪᠤᠤ ᠭᠣᠣ ᠰᠸᠯᠢᠩ ᠦ᠋ᠨ ᠮᠢᠩᠭᠠᠭᠠᠳ ᠲᠡᠮᠡᠭᠡ ᠶ᠋ᠢ ᠬᠠᠷᠢᠭᠤᠯᠬᠤ ᠳ᠋ᠠᠭᠠᠨ ᠭᠣᠪᠢ ᠶ᠋ᠢᠨ ᠲᠡᠮᠡᠭᠡᠳ ᠭᠠᠵᠠᠷ ᠨᠤᠲᠤᠭ᠂ ᠪᠡᠯᠴᠢᠭᠡᠷ ᠤᠰᠤ ᠥᠭᠡᠷᠡᠯᠬᠡᠵᠦ᠂ ᠠᠭᠤᠯᠠᠷᠬᠠᠭ ᠵᠣ ᠭᠠᠵᠠᠷ ᠲᠡᠮᠡᠭᠡ ᠲᠣᠭᠲᠠᠬᠤ ᠦᠭᠡᠢ ᠦᠢᠯᠡ ᠦᠵᠡᠬᠦ ᠳ᠋ᠦ᠍ᠨᠢ ᠬᠡᠳᠦᠨ ᠵᠠᠭᠤᠨ ᠲᠡᠮᠡᠭᠡ ᠶ᠋ᠢ ᠳᠣᠲᠣᠷᠠ ᠭᠠᠵᠠᠷ ᠤᠷᠤᠭᠤ ᠪᠣᠷᠣᠯᠠᠭᠤᠯᠵᠤ᠂ ᠨᠢᠭᠡ ᠪᠦᠯᠦᠭ ᠢ᠋ ᠨᠢ ᠠᠷᠤ ᠲᠡᠢᠰᠢ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠬᠢᠷᠠ ᠳᠠᠪᠠᠭᠤᠯᠤᠨ ᠬᠥᠭᠡᠭᠡᠵᠦ᠂ ᠭᠣᠪᠢ ᠨᠤᠲᠤᠭ ᠤ᠋ᠨ ᠪᠠᠷᠠ ᠬᠠᠷᠠᠭᠤᠯᠪᠠ᠃ ᠡᠢᠨ ᠬᠦ᠌ ᠥᠪᠡᠷ ᠢ᠋ᠶ᠋ᠡᠨ ᠴᠡᠷᠢᠭ ᠦ᠋ᠨ ᠠᠯᠪᠠ ᠠ᠋ᠴᠠ ᠮᠤᠯᠲᠤᠷᠠᠵᠤ ᠬᠤᠪᠢᠯᠴᠡᠴᠡᠭ ᠲᠡᠢ ᠪᠡᠨ ᠠᠮᠠᠷᠠᠭᠯᠠᠨ ᠰᠠᠭᠤᠵᠤ ᠠᠢᠯ ᠭᠡᠷ ᠠᠵᠠ ᠵᠢᠷᠭᠠᠯ ᠤ᠋ᠨ ᠪᠠᠯ ᠢ᠋ ᠠᠩᠬᠠᠯᠠᠨ ᠠᠮᠲᠠᠯᠠᠲᠠᠯᠠ ᠭᠠᠢ ᠭᠠᠵᠠᠷ ᠳᠣᠣᠷᠠ ᠠ᠋ᠴᠠ ᠭᠡᠳᠡᠭ ᠨᠢ ᠭᠠᠮᠢᠩ ᠤ᠋ᠨ ᠴᠡᠷᠢᠭ ᠦ᠋ᠨ ᠭᠣᠣ ᠰᠸᠯᠢᠩ ᠮᠢᠩᠭᠠᠨᠪᠤᠤ ᠶ᠋ᠢᠨ ᠭᠡᠷ ᠨᠤᠲᠤᠭ᠂ ᠬᠣᠰᠢᠭᠤ ᠶᠠᠮᠤᠨ ᠳ᠋ᠤ᠌ ᠳᠠᠭᠤᠳᠠᠯᠭᠠ ᠨᠡᠬᠡᠯᠭᠡ ᠪᠣᠯᠪᠠ᠃《ᠮᠢᠩᠭᠠᠨᠪᠤᠤ ᠭᠣᠣ ᠰᠸᠯᠢᠩ ᠦ᠋ᠨ ᠮᠢᠩᠭᠠᠨ ᠲᠡᠮᠡᠭᠡ ᠡᠴᠡ ᠰᠠᠯᠭᠠᠵᠤ ᠲᠠᠭᠤᠪᠠ》 ᠭᠡᠰᠡᠨ ᠶᠠᠯᠠ ᠵᠢᠭᠠᠵᠤ ᠲᠡᠭᠦᠨ ᠢ᠋ ᠪᠠᠷᠢᠪᠴᠢᠯᠠᠷᠠ ᠴᠡᠷᠢᠭ ᠲᠣᠮᠢᠯᠠᠪᠠ᠃
ᠰᠠᠢᠨ ᠠᠨᠳᠠ ᠰᠸᠳᠠᠩ ᠦᠵᠡᠩ ᠡᠨᠡ ᠲᠤᠬᠠᠢ ᠪᠠᠲᠤᠲᠠᠢ ᠴᠢᠮᠡᠭᠡ ᠶ᠋ᠢ ᠣᠯᠵᠤ ᠮᠡᠳᠡᠭᠡᠳ ᠮᠢᠩᠭᠠᠨᠪᠤᠤ ᠶ᠋ᠢᠨ ᠰᠤᠷᠠᠭ ᠢ᠋ ᠠᠷᠤ ᠭᠣᠪᠢ ᠠ᠋ᠴᠠ ᠬᠠᠢᠵᠤ ᠣᠯᠤᠨ ᠬᠡᠳᠦᠭᠦᠯᠡ ᠬᠠᠷᠢ ᠨᠤᠲᠤᠭ ᠬᠣᠯᠠ ᠶᠠᠪᠤᠶᠠ ᠭᠡᠳ ᠲᠣᠭᠣᠰᠣ ᠬᠥᠳᠡᠯᠭᠡᠲᠡᠯᠡ ᠭᠠᠮᠢᠩ ᠤ᠋ᠨ ᠴᠡᠷᠢᠭ ᠦ᠋ᠳ ᠲᠦ᠍ ᠬᠠᠰᠢᠭᠳᠠᠭᠰᠠᠨ ᠪᠢᠯᠡ᠃
ᠮᠢᠩᠭᠠᠨᠪᠤᠤ ᠭᠠᠮᠢᠩ ᠤ᠋ᠨ ᠴᠡᠷᠢᠭ ᠲᠦ᠍ ᠪᠠᠷᠢᠭᠳᠠᠵᠤ ᠱᠣᠷᠣᠩ ᠳ᠋ᠤ᠌ ᠣᠷᠣᠪᠠ᠁
ᠲᠡᠭᠦᠨ ᠦ᠌ ᠡᠴᠢᠭᠡ ᠡᠬᠡ ᠨᠢᠯᠪᠤᠰᠤ ᠪᠠᠷ ᠨᠢᠭᠤᠷ ᠢ᠋ᠶ᠋ᠠᠨ ᠤᠬᠢᠶᠠᠬᠤ ᠠ᠋ᠴᠠ ᠴᠠᠭᠠᠰᠢ ᠶᠠᠮᠠᠷ ᠴᠦ᠍ ᠠᠷᠭᠠ ᠤᠬᠠᠭᠠᠨ ᠪᠠᠢᠭᠰᠠᠨ ᠦᠭᠡᠢ᠃ ᠮᠥᠩᠭᠥ ᠲᠥᠭᠥᠷᠢᠭ ᠢ᠋ᠶ᠋ᠡᠨ ᠪᠠᠷᠢᠭᠠᠳ ᠮᠥᠷᠭᠥᠬᠦ ᠬᠥᠮᠦᠨ ᠢ᠋ᠶ᠋ᠡᠨ ᠣᠯᠬᠤ ᠦᠭᠡᠢ᠃ ᠡᠨᠡ ᠦᠶᠡ ᠳ᠋ᠦ᠍ ᠭᠣᠣ ᠰᠸᠯᠢᠩ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠶᠠᠮᠤᠨ ᠳ᠋ᠤ᠌ ᠪᠢᠴᠢᠭ ᠥᠭᠴᠦ《ᠮᠢᠩᠭᠠᠨ ᠲᠡᠮᠡᠭᠡ ᠶ᠋ᠢ ᠮᠢᠨᠢ ᠲᠣᠭᠠ ᠶᠣᠰᠣᠭᠠᠷ ᠲᠥᠯᠥᠵᠦ ᠥᠭᠪᠡᠯ ᠬᠥᠮᠦᠨ ᠢ᠋ᠶ᠋ᠡᠨ ᠠᠪᠠᠴᠢ! ᠡᠰᠡ ᠲᠡᠢᠮᠦ ᠪᠣᠯ ᠦᠬᠦᠳᠡᠯ ᠢ᠋ ᠨᠢ ᠴᠢᠷᠬᠦ ᠪᠡᠷ ᠢᠷᠡ!》 ᠭᠡᠰᠡᠨ ᠦ᠌ ᠬᠠᠷᠢᠭᠤ ᠳ᠋ᠤ᠌ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠶᠠᠮᠤᠨ ᠠ᠋ᠴᠠ《ᠭᠠᠮᠢᠩ ᠤ᠋ᠨ ᠴᠡᠷᠢᠭ ᠮᠠᠨ ᠤ᠋ ᠬᠤᠰᠢᠭᠤᠨ ᠤ᠋ ᠢᠷᠭᠡᠳ ᠮᠢᠩᠭᠠᠨᠪᠤᠤ ᠶ᠋ᠢ ᠴᠡᠷᠢᠭ ᠲᠦ᠍ ᠲᠠᠲᠠᠵᠤ ᠲᠡᠮᠡᠭᠡ ᠬᠠᠷᠢᠭᠤᠯᠠᠭᠤᠯᠬᠤ ᠳ᠋ᠠᠭᠠᠨ ᠬᠣᠰᠢᠭᠤ ᠶᠠᠮᠤᠨ ᠢ᠋ᠶ᠋ᠠᠷ ᠳᠠᠮᠵᠢᠭᠰᠠᠨ ᠦᠭᠡᠢ ᠪᠠᠢᠲᠠᠯᠠ ᠥᠨᠥᠳᠥᠷ ᠬᠡᠷᠡᠭ ᠵᠠᠷᠭᠤ ᠥᠷᠢ ᠲᠥᠯᠥᠪᠦᠷᠢ ᠳ᠋ᠦ᠍ ᠴᠢᠷᠦᠭᠳᠡᠬᠦ ᠳ᠋ᠦ᠍ ᠶᠠᠮᠤᠨ ᠳ᠋ᠤ᠌ ᠬᠡᠯᠡᠬᠦ ᠶᠠᠭᠤ ᠪᠠᠢᠬᠤ ᠪᠣᠢ! ᠬᠣᠰᠢᠭᠤ ᠶᠠᠮᠤᠨ ᠮᠢᠩᠭᠠᠨᠪᠤᠤ ᠶ᠋ᠢᠨ ᠠᠯᠳᠠᠭᠰᠠᠨ ᠲᠡᠮᠡᠭᠡ ᠶ᠋ᠢ ᠲᠥᠯᠥᠬᠦ ᠶᠣᠰᠣ ᠦᠭᠡᠢ᠃ ᠲᠠ ᠨᠠᠷ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡ!》 ᠭᠡᠵᠦ ᠬᠠᠷᠢᠭᠤᠯᠲᠠ ᠥᠭᠭᠦᠭᠰᠡᠨ ᠪᠠᠢᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠮᠢᠩᠭᠠᠨᠪᠤᠤ ᠶ᠋ᠢᠨ ᠪᠡᠶᠡ ᠶ᠋ᠢᠨ ᠰᠢᠷᠠ ᠦᠰᠦᠨ ᠦ᠌ ᠰᠦᠪᠡ ᠪᠣᠯᠭᠠᠨ ᠨᠢ ᠠᠮᠠ ᠪᠣᠯᠵᠤ ᠬᠤᠪᠢᠷᠠᠭᠰᠠᠨ ᠴᠦ᠍ ᠶᠣᠰᠣ ᠪᠠᠨ ᠣᠯᠬᠤ ᠦᠭᠡᠢ ᠪᠣᠯᠵᠤ ᠦᠬᠦᠬᠦ ᠡᠳᠦᠷ ᠢ᠋ᠶ᠋ᠡᠨ ᠬᠦᠯᠢᠶᠡᠬᠦ ᠯᠡ ᠪᠣᠯᠪᠠ᠃
ᠦᠬᠦᠵᠦ ᠰᠡᠬᠡᠬᠦ ᠶ᠋ᠢᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠲᠡᠯᠴᠢᠯᠡᠭᠰᠡᠨ ᠮᠢᠩᠭᠠᠨᠪᠤᠤ ᠶ᠋ᠢ ᠮᠠᠨᠤᠨᠪᠠᠳᠮᠠ ᠡᠷᠯᠢᠭ ᠦ᠋ᠨ ᠡᠯᠴᠢ ᠡᠴᠡ ᠪᠤᠯᠢᠶᠠᠵᠤ ᠠᠪᠴᠢᠷᠠᠵᠠᠢ᠃
ᠮᠠᠨᠤᠨᠪᠳᠮᠠ ᠠᠯᠲᠠ ᠪᠤᠯᠬᠠᠭᠰᠠᠨ ᠮᠥᠩᠭᠥᠨ ᠲᠣᠯᠣᠭᠠᠢ ᠶ᠋ᠢᠨ ᠡᠳ᠋ᠯᠡᠯ᠂ ᠤᠨᠵᠢᠯᠭᠠ ᠰᠦᠢᠬᠡ ᠶ᠋ᠢ ᠵᠢᠮᠰᠡᠭ ᠪᠦᠷᠢᠳᠦᠭᠦᠯᠦᠨ ᠵᠡᠭᠦᠵᠦ᠂ ᠥᠪᠡᠷ ᠢ᠋ ᠪᠡᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠨᠣᠶᠠᠨ ᠤ᠋ ᠬᠠᠲᠤᠨ ᠢ᠋ᠶ᠋ᠠᠷ ᠵᠠᠰᠠᠵᠤ ᠴᠢᠮᠡᠭᠯᠡᠨ ᠡᠳᠦᠢ ᠲᠡᠳᠦᠢ ᠦᠨᠡᠲᠦ ᠪᠡᠯᠡᠭ ᠰᠡᠯᠲᠡ ᠭᠠᠨᠵᠤᠭᠠᠯᠠᠨ ᠪᠤᠭᠤᠲᠤ ᠤᠷᠤᠭᠤ ᠬᠥᠳᠡᠯᠵᠡᠢ᠃
ᠭᠤᠷᠪᠠ ᠬᠥᠯᠦᠭᠰᠡᠨ ᠲᠣᠷᠭᠠᠨ ᠰᠠᠴᠤᠭᠲᠤ ᠰᠡᠦᠬᠡ ᠲᠡᠷᠭᠡ ᠭᠣᠣ ᠰᠸᠯᠢᠩ ᠦ᠋ᠨ ᠬᠠᠶᠠᠭᠠᠨ ᠳ᠋ᠤ᠌ ᠶᠠᠮᠪᠠᠲᠠᠢᠬᠠᠨ ᠪᠠᠭᠤᠬᠤ ᠳ᠋ᠤ᠌ ᠭᠣᠣ ᠰᠸᠯᠢᠩ ᠦ᠋ᠨ ᠬᠤᠷᠤᠭᠤ ᠬᠢᠮᠤᠰᠤ ᠨᠤᠭᠤᠳ ᠭᠡᠭᠴᠢ《ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠠᠲᠤᠨ ᠲᠠᠢᠳᠠᠢ ᠢᠷᠡᠯᠡ》 ᠭᠡᠳ ᠠᠴᠢᠶᠠ ᠬᠥᠰᠬᠡ ᠪᠠᠭᠤᠯᠭᠠᠵᠤ ᠡᠨᠡ ᠲᠡᠷᠡ ᠶ᠋ᠢ ᠡᠪᠯᠡᠭᠦᠯᠦᠨ ᠪᠡᠷᠬᠡ ᠶᠠᠭᠠᠷᠠᠪᠠ᠃
ᠮᠠᠨᠤᠨᠪᠠᠳᠮᠠ ᠭᠣᠣ ᠰᠸᠯᠢᠩ ᠲᠡᠢ ᠨᠢᠭᠤᠷᠳᠠᠵᠤ ᠠᠭᠤᠯᠵᠠᠬᠤ ᠭᠡᠵᠦ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠭᠣᠣ ᠰᠸᠯᠢᠩ ᠨᠢ ᠡᠵᠡᠭᠦᠢ ᠪᠠᠢᠵᠠᠢ᠃ ᠭᠣᠣᠯ ᠡᠵᠡᠨ ᠭᠠᠤᠯᠢᠨ ᠪᠤᠷᠬᠠᠨ ᠨᠢ ᠪᠠᠢᠳᠠᠭ ᠦᠭᠡᠢ ᠳ᠋ᠦ᠍ ᠡᠷᠭᠦᠴᠡ ᠪᠡᠯᠡᠭ ᠢ᠋ᠶ᠋ᠡᠨ ᠬᠡᠨ ᠳ᠋ᠦ᠍ᠨᠢ ᠭᠡᠵᠦ ᠡᠷᠭᠦᠳᠡᠭ ᠪᠢᠯᠡ⁈ ᠠᠷᠠᠢ ᠯᠠ ᠴᠠᠭᠠᠳᠤ ᠲᠠᠲᠠᠪᠤᠷᠢ ᠨᠤᠭᠤᠳ ᠲᠤᠨᠢ ᠦᠭᠴᠢᠬᠡᠭᠡᠳ ᠬᠣᠭᠣᠰᠣᠨ ᠭᠣᠣ ᠦᠰᠦᠷᠴᠢᠬᠡᠬᠦ ᠪᠢᠰᠢ ᠪᠢᠵᠡ ᠭᠡᠵᠦ ᠰᠡᠳᠬᠢᠯ ᠬᠤᠭᠤᠷᠠᠬᠤ ᠪᠣᠯᠪᠠᠴᠤ ᠬᠠᠢᠷᠠᠲᠠᠢ ᠲᠠᠲᠠᠪᠤᠷᠢ ᠡᠮᠡ ᠶ᠋ᠢᠨ ᠬᠢᠨᠢ ᠰᠡᠳᠬᠢᠯ ᠢ᠋ ᠪᠠᠶᠠᠰᠬᠠᠬᠤ ᠨᠢ ᠲᠡᠷᠢᠭᠦᠨ ᠵᠣᠷ ᠭᠡᠭᠴᠢ ᠶ᠋ᠢ ᠲᠡᠷᠡ ᠶᠠᠭᠤᠨ ᠠᠨᠳᠠᠬᠤ ᠪᠢᠯᠡ!
ᠲᠠᠲᠠᠪᠤᠷᠢ ᠡᠮᠡ ᠳ᠋ᠦ᠍ᠨᠢ ᠠᠯᠲᠠ ᠮᠥᠩᠭᠥᠨ ᠪᠦᠯᠡᠵᠡᠭ ᠨᠢᠭᠡ ᠬᠣᠣᠰ᠂ ᠠᠯᠲᠠᠨ ᠡᠭᠡᠮᠦᠭ ᠨᠢᠭᠡ ᠬᠣᠣᠰ᠂ ᠭᠣᠣ ᠰᠸᠯᠢᠩ ᠳ᠋ᠦ᠍ ᠪᠤᠯᠠᠭᠠᠨ ᠠᠷᠠᠰᠤᠨ ᠳᠡᠪᠡᠯ ᠦ᠋ᠨ ᠳᠣᠲᠣᠷ᠂ ᠦᠨᠡᠭᠡᠨ ᠠᠷᠠᠰᠤᠨ ᠬᠣᠭᠣᠯᠠᠪᠴᠢ᠂ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠰᠤᠭᠤ ᠶ᠋ᠢᠨ ᠢᠬᠡᠷᠡ ᠢᠨᠵᠠᠭᠠ(ᠨᠦᠷᠡ) ᠵᠡᠷᠭᠡ ᠦᠨᠡᠲᠦ ᠴᠤᠬᠠᠭ ᠪᠡᠯᠡᠭ ᠬᠦᠷᠭᠡᠭᠰᠡᠨ ᠳ᠋ᠦ᠍ ᠭᠣᠣ ᠰᠸᠯᠢᠩ ᠦ᠋ᠨ ᠲᠠᠲᠠᠪᠤᠷᠢ ᠡᠮᠡ ᠶ᠋ᠢᠨ ᠱᠣᠢᠱᠣᠭ ᠬᠥᠯ ᠨᠢ ᠡᠭᠡᠷᠡᠭᠦᠯ ᠰᠢᠭ ᠡᠷᠭᠢᠯᠳᠦᠵᠦ ᠲᠥᠷᠥᠯᠬᠢ ᠶ᠋ᠢᠨ ᠢᠨᠢᠶᠡᠵᠦ ᠲᠥᠷᠥᠭᠰᠡᠨ ᠰᠢᠭ ᠴᠢᠷᠠᠢ ᠨᠢ ᠲᠡᠨᠢᠢᠨᠡ᠃
ᠡᠨᠡ ᠬᠣᠷᠸᠠ ᠪᠣᠯ ᠡᠢᠮᠦ ᠯᠡ ᠵᠣᠭᠣᠰ ᠲᠠᠢ ᠪᠣᠯ ᠵᠢᠷᠣᠭᠠ᠂ ᠵᠣᠭᠣᠰ ᠦᠭᠡᠢ ᠪᠣᠯ ᠵᠣᠭᠰᠣᠭᠠ ᠬᠣᠷᠸᠠ ᠰᠠᠨᠵᠠᠢ᠃
ᠭᠣᠣ ᠰᠸᠯᠢᠩ ᠦ᠋ᠨ ᠲᠠᠲᠠᠪᠤᠷᠢ ᠡᠮᠡ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠦᠩ ᠨᠣᠶᠠᠨ ᠤ᠋ ᠬᠠᠲᠤᠨ ᠡᠢᠨ ᠬᠦ᠌ ᠬᠦᠨᠳᠦ ᠪᠡᠯᠡᠭ ᠲᠡᠢ ᠵᠠᠯᠠᠷᠠᠵᠤ ᠪᠠᠭᠤᠭᠰᠠᠨ ᠳ᠋ᠤ᠌ ᠡᠯᠪᠡᠭ ᠰᠢᠷᠡᠭᠡ ᠵᠠᠰᠠᠵᠤ ᠦᠯᠡᠮᠵᠢ ᠶᠡᠬᠡ ᠳᠠᠢᠯᠠᠯᠭᠠ ᠬᠢᠪᠡ᠃
ᠢᠷᠡᠭᠰᠡᠨ ᠵᠣᠴᠢᠨ ᠤ᠋ ᠵᠡᠷᠭᠡ ᠵᠢᠩᠰᠡ᠂ ᠪᠡᠯᠡᠭ ᠰᠡᠯᠲᠡ ᠶ᠋ᠢᠨ ᠬᠦᠨᠳᠦ ᠬᠥᠩᠭᠡᠨ ᠢ᠋ ᠬᠠᠷᠠᠵᠤ ᠰᠢᠷᠡᠭᠡ ᠵᠠᠰᠠᠳᠠᠭ ᠤᠴᠢᠷ᠂ ᠥᠨᠥᠳᠥᠷ ᠦ᠋ᠨ ᠳᠠᠢᠯᠠᠯᠭᠠ ᠴᠦ᠍ ᠳᠤᠲᠠᠭᠤᠳᠠᠵᠤ ᠡᠰᠡ ᠪᠣᠯᠬᠤ ᠲᠤᠯᠠ ᠢᠷᠡᠭᠰᠡᠨ ᠪᠠ ᠢᠷᠡᠭᠦᠯᠦᠭᠰᠡᠨ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠴᠢᠷᠠᠢ ᠳ᠋ᠤ᠌ ᠪᠠᠶᠠᠰᠤᠯ ᠴᠠᠯᠭᠢᠵᠤ ᠢᠯᠠᠮᠠ ᠶ᠋ᠢᠨ ᠮᠣᠳᠣᠨ ᠳ᠋ᠤ᠌ ᠱᠠᠭᠠᠵᠠᠭᠠᠢ ᠴᠤᠭᠯᠠᠭᠰᠠᠨ ᠰᠢᠭ᠋ ᠪᠡᠶᠡ ᠪᠡᠶᠡ ᠪᠡᠨ ᠱᠠᠭᠰᠢᠵᠤ ᠪᠠᠢᠪᠠ᠃ ᠬᠡᠨ ᠬᠥᠮᠦᠨ ᠦ᠌ ᠴᠢᠷᠠᠢ ᠰᠡᠳᠬᠢᠯ ᠳ᠋ᠦ᠍ ᠰᠡᠵᠢᠭ ᠳᠠᠭᠠᠪᠤᠷᠢ ᠶ᠋ᠢᠨ ᠣᠨᠢᠰᠣᠭᠠ ᠭᠡᠵᠦ ᠰᠡᠪ ᠮᠡᠳᠡᠭᠳᠡᠬᠦ ᠦᠭᠡᠢ᠃ ᠭᠡᠬᠦ ᠳ᠋ᠦ᠍ ᠲᠣᠪ ᠲᠣᠭᠲᠠᠭᠤᠬᠠᠨ ᠨᠠᠭᠤᠷ ᠤ᠋ᠨ ᠤᠰᠤᠨ ᠳ᠋ᠤ᠌ ᠴᠢᠯᠠᠭᠤ ᠬᠠᠶᠠᠵᠤ ᠬᠤᠨᠢᠷᠢᠶᠠᠲᠤᠭᠤᠯᠬᠤ ᠶ᠋ᠢ ᠪᠠᠢᠲᠤᠭᠠᠢ ᠭᠠᠵᠠᠷ ᠢ᠋ ᠦᠨᠦᠰᠦᠨ ᠰᠡᠪᠢᠯᠵᠡᠬᠦ ᠵᠢᠪᠠᠷ ᠲᠤ ᠴᠦ᠍ ᠢᠯᠳᠠᠮᠬᠠᠨ ᠠᠷ ᠲᠠᠲᠠᠳᠠᠭ ᠪᠠᠢᠬᠤ ᠳ᠋ᠤ᠌ ᠢᠷᠡᠭᠰᠡᠨ ᠬᠥᠮᠦᠨ ᠤᠴᠢᠷ ᠲᠠᠢ᠂ ᠢᠨᠢᠶᠡᠭᠰᠡᠨ ᠬᠥᠮᠦᠨ ᠭᠡᠮ ᠲᠡᠢ ᠭᠡᠳᠡᠭ ᠢ᠋ ᠭᠣᠣ ᠰᠸᠯᠢᠩ ᠦ᠋ᠨ ᠲᠠᠲᠠᠪᠤᠷᠢ ᠡᠮᠡ ᠪᠣᠳᠣᠯ ᠳ᠋ᠠᠭᠠᠨ ᠠᠪᠤᠭᠰᠠᠨ ᠦᠭᠡᠢ ᠪᠢᠰᠢ᠃ ᠬᠠᠷᠢᠨ《ᠭᠡᠷ ᠲᠡᠭᠡᠨ ᠢᠷᠡᠭᠰᠡᠨ ᠭᠡᠢᠴᠢᠨ ᠦ᠌ ᠪᠡᠨ ᠭᠡᠳᠡᠰᠦ ᠶ᠋ᠢ ᠬᠠᠭᠠᠯᠵᠤ᠂ ᠡᠢᠮᠦ ᠠᠷᠪᠢᠨ ᠦᠨᠡᠲᠦ ᠨᠠᠨᠳᠢᠨ ᠪᠡᠯᠡᠭ ᠰᠡᠯᠲᠡ ᠲᠡᠢ ᠲᠠ ᠨᠠᠷ ᠶᠡᠷᠦ ᠨᠢ ᠶᠠᠮᠠᠷ ᠰᠠᠨᠠᠭᠠ ᠲᠠᠢ ᠢᠷᠡᠪᠡ?》 ᠭᠡᠵᠦ ᠶᠠᠭᠠᠬᠢᠵᠤ ᠠᠰᠠᠭᠤᠵᠤ ᠪᠣᠯᠬᠤ ᠪᠢᠯᠡ⁈ ᠭᠠᠭᠴᠠ ᠳᠠᠢᠯᠠᠯᠭᠠ ᠶ᠋ᠢᠨ ᠵᠤᠭᠠ ᠳᠤᠮᠳᠠ ᠠ᠋ᠴᠠ ᠠᠶᠠᠨᠳᠠᠭᠠᠨ ᠮᠡᠳᠡᠬᠦ ᠶ᠋ᠢ ᠣᠷᠣᠯᠳᠣᠨᠠ᠃
ᠮᠠᠨᠤᠨᠪᠠᠳᠮᠠ ᠳ᠋ᠤ᠌ ᠠᠪᠴᠤ ᠬᠡᠯᠡᠪᠡᠯ ᠮᠣᠩᠭᠣᠯ ᠨᠤᠲᠤᠭ ᠤ᠋ᠨ ᠶᠡᠬᠡ ᠳᠠᠢᠯᠠᠯᠭᠠ᠂ ᠲᠠᠬᠢᠯᠭᠠ᠂ ᠬᠤᠷᠢᠮ ᠨᠠᠢᠷ ᠲᠤ ᠰᠠᠭᠤᠭᠠ ᠦᠭᠡᠢ ᠴᠦ᠍ ᠦᠵᠡᠵᠦ ᠰᠣᠨᠣᠰᠤᠭᠰᠠᠨ ᠨᠢ ᠵᠥᠩᠳᠡᠭᠡᠨ᠃ ᠭᠡᠪᠡᠴᠦ ᠥᠨᠥᠳᠥᠷ ᠦ᠋ᠨ ᠰᠢᠭ ᠡᠢᠮᠦ ᠢᠳᠡᠭᠡᠨ ᠤᠮᠳᠠᠭᠠᠨ ᠤ᠋ ᠰᠢᠷᠡᠭᠡᠨ ᠳ᠋ᠦ᠍ ᠴᠡᠴᠡᠭ ᠨᠠᠪᠴᠢ ᠭᠡᠮᠡᠷ ᠠᠯᠠᠭ ᠡᠷᠢᠶᠡᠨ ᠶᠠᠩᠵᠤ ᠶ᠋ᠢᠨ ᠪᠣᠯᠭᠠᠨ ᠤ᠋ ᠬᠠᠭᠤᠷᠤᠯᠭᠠ ᠬᠠᠭᠠᠷᠢᠯᠭᠠ ᠲᠠᠬᠢᠯᠭᠠ ᠶ᠋ᠢᠨ ᠡᠷᠭᠦᠴᠡ ᠮᠡᠲᠦ ᠳᠠᠪᠬᠤᠷ ᠳᠠᠪᠬᠤᠷ ᠦᠷᠦᠭᠳᠡᠭᠰᠡᠨ ᠬᠢᠲᠠᠳ ᠳᠠᠢᠯᠠᠯᠭᠠ ᠳ᠋ᠤ᠌ ᠪᠣᠯ ᠬᠠᠷᠢᠨ ᠠᠩᠬᠠ ᠤᠳᠠᠭᠠ ᠨᠣᠶᠠᠨ ᠤ᠋《ᠬᠠᠲᠤᠨ》 ᠤ᠋ ᠪᠤᠶᠠᠨ ᠢ᠋ᠶ᠋ᠠᠷ ᠦᠵᠡᠵᠦ᠂ ᠬᠦᠷᠲᠡᠵᠦ ᠪᠠᠢᠭᠠ ᠨᠢ ᠡᠨᠡ᠃ ᠲᠡᠷᠡ ᠡᠨᠡ ᠪᠦᠬᠦᠨ ᠡᠴᠡ ᠰᠠᠪᠬᠠᠯᠠᠨ ᠠᠮᠰᠠᠵᠤ ᠲᠠᠮᠰᠢᠶᠠᠯᠠᠶᠠ ᠭᠡᠳᠡᠭ ᠪᠣᠳᠣᠯ ᠶᠠᠭ ᠣᠷᠣᠵᠤ ᠢᠷᠡᠬᠦ ᠦᠭᠡᠢ᠃ ᠶᠠᠭᠠᠬᠢᠵᠤ ᠪᠠᠢᠵᠤ ᠡᠨᠡ ᠬᠦ᠌ ᠢᠨᠢᠶᠡᠳᠦ ᠬᠠᠨᠢᠶᠠᠳᠤ ᠪᠠᠷ ᠳᠡᠪᠢᠰᠦᠭᠳᠡᠭᠰᠡᠨ ᠳᠡᠭᠲᠡᠷ ᠳᠡᠭᠲᠡᠷ ᠱᠠᠲᠤ ᠶ᠋ᠢ ᠳᠠᠪᠠᠵᠤ ᠲᠤᠭᠤᠯᠤᠨ ᠰᠡᠵᠢᠭ ᠠᠵᠢᠭ ᠦᠭᠡᠢ ᠪᠡᠷ ᠭᠣᠣ ᠰᠸᠯᠢᠩ ᠳ᠋ᠦ᠍ ᠲᠠᠭᠠᠯᠠᠭᠳᠠᠵᠤ ᠱᠣᠷᠣᠩ ᠳ᠋ᠠᠬᠢ ᠮᠢᠩᠭᠠᠨᠪᠤᠤ ᠪᠠᠨ ᠮᠡᠨᠳᠦ ᠭᠠᠷᠭᠠᠵᠤ ᠠᠪᠤᠶᠠ ᠯᠠ ᠭᠡᠳᠡᠭ ᠭᠠᠭᠴᠠ ᠪᠣᠳᠣᠯ ᠳ᠋ᠤ᠌ ᠡᠵᠡᠮᠳᠡᠭᠳᠡᠵᠦ ᠪᠠᠢᠯᠠ᠃ ᠳᠠᠢᠯᠠᠯᠭᠠ ᠳ᠋ᠤ᠌ ᠪᠠᠷᠠ ᠪᠣᠯᠣᠭᠰᠠᠳ ᠬᠣᠶᠠᠷ ᠬᠠᠲᠤᠭᠲᠠᠢ ᠶ᠋ᠢᠨ ᠴᠢᠷᠠᠢ ᠶ᠋ᠢᠨ ᠥᠩᠭᠡ ᠪᠡᠷ ᠳᠠᠭᠠᠯᠳᠤᠨ ᠪᠡᠶᠡᠰᠴᠦ ᠳᠦᠯᠡᠢ ᠨᠣᠬᠠᠢ ᠲᠦᠢᠪᠡᠭᠡᠨ ᠳ᠋ᠦ᠍ ᠭᠡᠳᠡᠭᠴᠢᠯᠡᠨ ᠳᠡᠮᠡᠢ ᠯᠡ ᠢᠨᠢᠶᠡᠵᠦ ᠬᠠᠨᠢᠶᠠᠨᠠ᠃
— ᠵᠠ᠂ ᠵᠠ! ᠢᠳᠡ᠂ ᠤᠤᠭᠤ! ᠡᠨᠡ ᠡᠴᠡ ᠨᠢ ᠲᠡᠷᠡ ᠡᠴᠡ ᠨᠢ ᠰᠠᠪᠬᠠᠯᠠ᠂ ᠪᠢᠲᠡᠭᠡᠢ ᠵᠡᠨᠵᠡᠢᠯᠡ! ᠭᠡᠵᠦ ᠭᠣᠣ ᠰᠸᠯᠢᠩ ᠦ᠋ᠨ ᠲᠠᠲᠠᠪᠤᠷᠢ ᠡᠮᠡ ᠪᠠᠢᠨ ᠪᠠᠢᠨ ᠬᠠᠭᠤᠷᠤᠯᠭᠠ ᠬᠠᠭᠠᠷᠢᠯᠭᠠ ᠠ᠋ᠴᠠ ᠰᠠᠪᠬᠠᠯᠠᠵᠤ ᠮᠠᠨᠤᠨᠪᠠᠳᠮᠠ ᠶ᠋ᠢᠨ ᠲᠠᠭᠱᠠᠨ ᠳ᠋ᠤ᠌ ᠨᠡᠮᠡᠷᠢᠯᠡᠨᠡ᠃
— ᠵᠠ ᠪᠣᠯᠤᠭᠰᠠᠨ᠂ ᠪᠢ ᠥᠪᠡᠷ ᠢ᠋ᠶ᠋ᠡᠨ᠁ ᠭᠡᠵᠦ ᠮᠠᠨᠤᠨᠪᠠᠳᠮᠠ ᠰᠠᠨᠳᠤᠷᠪᠠ᠃
— ᠭᠡᠳᠡᠰᠦ ᠴᠠᠳᠬᠤᠯᠠᠩ ᠪᠣᠯ ᠭᠡᠷ ᠢ᠋ᠶ᠋ᠡᠨ ᠰᠠᠨᠠᠬᠤ ᠦᠭᠡᠢ ᠶᠦᠮ! ᠰᠠᠶᠢᠬᠠᠨ ᠭᠡᠷ ᠡᠴᠡ ᠪᠡᠨ ᠭᠠᠷᠴᠤ ᠶᠠᠪᠤᠭᠠᠳ ᠬᠡᠳᠦ ᠬᠣᠨᠣᠭᠠᠳᠤᠢ ᠪᠠᠷ ᠬᠦᠩ ᠨᠣᠶᠠᠨ ᠤ᠋ ᠬᠠᠯᠠᠭᠤᠨ ᠡᠪᠦᠷ ᠢ᠋ ᠰᠠᠨᠠᠴᠢᠬᠠᠪᠠ ᠤᠤ? ᠠ! ᠭᠡᠳ ᠭᠣᠣ ᠰᠸᠯᠢᠩ ᠦ᠋ᠨ ᠲᠠᠲᠠᠪᠤᠷᠢ ᠡᠮᠡ ᠤᠷᠲᠤ ᠨᠠᠷᠢᠬᠠᠨ ᠱᠤᠯᠤᠮ ᠤ᠋ᠨ ᠤᠯᠠᠭᠠᠨ ᠬᠢᠮᠤᠰᠤ ᠲᠠᠢ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠮᠠ ᠪᠠᠨ ᠲᠠᠭᠯᠠᠨ ᠢᠴᠢᠩᠭᠦᠷᠡᠬᠦ ᠪᠠᠢᠳᠠᠯ ᠲᠠᠢ ᠢᠨᠢᠶᠡᠨᠡ᠃
一 ᠶᠠᠭᠤ ᠭᠡᠵᠢ? ᠲᠠ ᠬᠠᠷᠢᠨ ᠭᠣᠣ ᠰᠧᠯᠢᠩ ᠦ᠋ᠨ ᠡᠵᠡᠭᠦᠢ ᠳ᠋ᠦ᠍᠁ ᠦᠭᠡᠢ ᠠ᠋᠂ ᠦᠨᠡᠬᠡᠷ ᠮᠠᠨᠤᠨᠪᠠᠳᠮᠠ ᠳᠣᠷᠢᠭᠤᠨ ᠰᠡᠳᠦᠪ ᠡᠯᠭᠦᠵᠦ ᠠᠰᠠᠭᠤᠪᠠ᠃
一 ᠠ᠂ ᠲᠡᠷᠡ ᠊ᠦᠦ? ᠰᠠᠭᠠᠯᠢᠴᠢᠨ ᠤ᠋ ᠨᠢᠭᠡ ᠬᠤᠷᠢᠮ ᠤ᠋ᠨ ᠳᠠᠢᠯᠠᠯᠭᠠ ᠳ᠋ᠤ᠌ ᠵᠠᠯᠠᠷᠠᠭᠰᠠᠨ! ᠮᠠᠷᠭᠠᠲᠤᠷ ᠬᠠᠷᠢᠵᠤ ᠢᠷᠡᠬᠦ ᠪᠠᠢᠬᠠ! ᠬᠠᠲᠤᠭᠲᠠᠢ ᠲᠠ ᠡᠪᠦᠭᠡᠨ ᠢ᠋ ᠮᠢᠨᠢ᠁ ᠭᠡᠵᠦ ᠥᠨᠥᠬᠢ ᠲᠠᠲᠠᠪᠤᠷᠢ ᠡᠮᠡ ᠮᠠᠨᠤᠨᠪᠠᠳᠮᠠ ᠲᠠᠢ ᠰᠠᠶᠢᠬᠠᠨ ᠲᠠᠨᠢᠯᠴᠠᠭᠰᠠᠨ ᠠᠪᠠᠴᠤ ᠬᠠᠭᠤᠴᠢᠨ ᠲᠠᠨᠢᠯ ᠰᠢᠭ᠋ ᠡᠷᠡᠭᠡ ᠵᠢᠷᠣᠭᠠ ᠦᠭᠡᠢ ᠨᠠᠭᠠᠳᠤᠮ ᠱᠤᠤᠳᠠᠮ ᠬᠢᠬᠦ ᠳ᠋ᠦ᠍ ᠮᠠᠨᠤᠨᠪᠠᠳᠮᠠ ᠶ᠋ᠢᠨ ᠳᠣᠲᠣᠷᠠ ᠠᠶᠠᠲᠠᠢᠬᠠᠨ ᠰᠠᠨᠠᠭᠳᠠᠬᠤ ᠶ᠋ᠢ ᠶᠠᠭᠠᠬᠢᠨᠠ⁈
ᠮᠠᠨᠤᠨᠪᠠᠳᠮᠠ ᠡᠨᠡ ᠬᠦ᠌ ᠶᠡᠬᠡ ᠶᠠᠭᠤᠮᠠ ᠦᠵᠡᠵᠦ ᠡᠯᠡᠭᠡᠭᠰᠡᠨ ᠱᠣᠢᠱᠣᠭ ᠡᠮᠡ ᠶ᠋ᠢᠨ ᠡᠷᠡᠭᠡ ᠴᠡᠭᠡᠷ ᠦᠭᠡᠢ ᠰᠢᠯᠤᠭᠤᠮᠰᠤᠭ ᠵᠠᠩ ᠳ᠋ᠤ᠌ ᠲᠦᠳᠡᠬᠡᠨ ᠳᠠᠳᠴᠤ ᠠᠶᠠᠨᠳᠠᠭᠠᠨ ᠲᠡᠭᠦᠨ ᠢ᠋ ᠪᠢᠰᠢᠷᠡᠬᠦ ᠠᠪᠠᠴᠤ ᠬᠡᠦᠬᠡᠨ ᠪᠤᠯᠪᠠᠷᠠᠢ ᠴᠢᠷᠠᠢ ᠨᠢ ᠨᠢᠯᠴᠢᠭᠢᠨᠡᠭᠡᠳ ᠲᠣᠭᠣᠷ ᠤ᠋ᠨ ᠶᠠᠭᠠᠨ ᠥᠩᠭᠡ ᠲᠣᠭᠲᠠᠪᠠ᠃ ᠮᠠᠨᠤᠨᠪᠠᠳᠮᠠ ᠰᠠᠨᠳᠤᠷᠴᠤ᠄
一 ᠡᠷᠭᠢᠨ ᠬᠠᠲᠤᠭᠲᠠᠢ ᠲᠠᠢ ᠨᠢᠭᠡ ᠭᠡᠮ ᠲᠣᠭᠲᠠᠭᠠᠴᠢᠬᠠᠬᠤ ᠊ᠤᠤ ᠳᠠ? ᠲᠠᠨ ᠤ᠋ ᠬᠡᠯᠡᠳᠡᠭ ᠢ᠋ᠶ᠋ᠡᠷ ᠭᠣᠣ ᠰᠧᠯᠢᠩ ᠢ᠋ ᠲᠠᠨᠢ ᠦᠨᠡᠬᠡᠷ ᠬᠡᠴᠡᠭᠦᠦ ᠰᠠᠨᠠᠵᠤ ᠪᠠᠢᠨᠠ ᠰᠢᠦ! ᠭᠡᠳ ᠮᠠᠨᠤᠨᠪᠠᠳᠮᠠ ᠬᠤᠨᠳᠠᠭᠠ ᠪᠠᠨ ᠨᠥᠭᠦᠭᠡ ᠲᠠᠲᠠᠪᠤᠷᠢ ᠡᠮᠡ ᠶ᠋ᠢᠨ ᠬᠤᠨᠳᠠᠭᠠᠨ ᠤ᠋ ᠢᠷᠮᠡᠭ ᠲᠡᠢ ᠵᠡᠷᠭᠡᠴᠡᠭᠦᠯᠵᠦ ᠠᠪᠤᠭᠠᠳ ᠬᠥᠨᠲᠥᠷᠪᠡ᠃
一 ᠠ᠂ ᠲᠡᠭᠡᠪᠡᠯ ᠭᠣᠣ ᠰᠧᠯᠢᠩ ᠮᠠᠷᠭᠠᠲᠤᠷ ᠬᠠᠷᠢᠵᠤ ᠢᠷᠡᠭᠰᠡᠭᠡᠷ ᠲᠡᠭᠦᠨ ᠢ᠋ ᠴᠢᠮᠠ ᠳ᠋ᠤ᠌ ᠪᠡᠯᠡᠭᠯᠡᠴᠢᠬᠡᠶᠡ! ᠠᠪᠤᠨᠠ ᠊ᠤᠤ? ᠭᠡᠳ ᠬᠢ ᠬᠢ ᠬᠢᠳ ᠬᠢᠳ ᠬᠢᠨ ᠭᠤᠯᠠᠰᠤᠨ ᠢᠨᠢᠶᠡᠨᠡ᠃
ᠮᠠᠨᠤᠨᠪᠠᠳᠮᠠ ᠶ᠋ᠢᠨ ᠴᠢᠷᠠᠢ ᠳ᠋ᠤ᠌ ᠨᠢᠯ ᠬᠢᠭᠰᠡᠨ ᠭᠠᠯ ᠰᠢᠳᠡᠵᠦ ᠠᠪᠤᠭᠠᠳ ᠳᠣᠣᠷᠠ ᠪᠠᠨ ᠠᠷᠢᠯᠪᠠ᠃
一 ᠡᠷᠭᠢᠨ ᠬᠠᠲᠤᠭᠲᠠᠢ ᠠ᠋! ᠨᠠᠭᠠᠳᠤᠮ ᠴᠤ᠌ ᠨᠠᠭᠠᠳᠤᠮ ᠰᠢᠦ! ᠦᠨᠡᠬᠡᠷ ᠭᠣᠣ ᠰᠧᠯᠢᠩ ᠮᠠᠷᠭᠠᠲᠤᠷ ᠬᠠᠷᠢᠵᠤ ᠢᠷᠡᠪᠡᠯ ᠭᠣᠣ ᠰᠧᠯᠢᠩ ᠪᠣᠯᠤᠨ ᠬᠠᠲᠤᠭᠲᠠᠢ ᠶ᠋ᠢᠨ ᠨᠡᠷᠡ ᠲᠥᠷᠥ ᠳ᠋ᠦ᠍ ᠨᠥᠮᠥᠷᠢᠳᠡᠵᠦ ᠬᠢᠲᠠᠳ ᠤ᠋ᠨ ᠨᠡᠷᠡᠲᠡᠢ ᠰᠠᠢᠨ ᠡᠮᠴᠢ ᠬᠠᠢᠵᠤ ᠡᠪᠡᠳᠴᠢᠨ ᠬᠠᠭᠤᠴᠢᠨ ᠢ᠋ᠶ᠋ᠠᠨ ᠦᠵᠡᠭᠦᠯᠦᠶᠡ ᠯᠡ ᠭᠡᠰᠡᠨ! ᠣᠷᠴᠢᠮ ᠨᠣᠢᠷ ᠬᠤᠯᠵᠢᠭᠠᠳ ᠳᠣᠣᠷᠠ ᠪᠡᠶᠡ ᠳᠠᠭᠠᠷᠠᠳᠠᠰᠤ ᠬᠦᠷᠬᠦ ᠰᠢᠭ᠂ ᠬᠥᠯ ᠡᠴᠡ ᠵᠢᠩᠭᠢᠨᠡᠭᠡᠳ ᠪᠠᠢᠬᠤ ᠶᠤᠮ! ᠭᠡᠪᠡ᠃
一 ᠪᠣᠯᠤᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ! ᠲᠡᠷᠡ ᠶᠠᠮᠠᠷ ᠬᠠᠮᠢᠶᠠ ᠪᠠᠢᠨᠠ! ᠡᠨᠳᠡ ᠰᠤᠳᠠᠯ ᠳ᠋ᠠᠭᠠᠨ ᠮᠠᠰᠢ ᠮᠡᠷᠭᠡᠨ᠂ ᠮᠥᠩᠭᠥᠨ ᠵᠡᠭᠦᠦ ᠰᠠᠢᠨ ᠲᠥᠭᠡᠨᠡᠳᠡᠭ ᠵᠠᠩ ᠣᠪᠣᠭ ᠲᠠᠢ ᠡᠪᠦᠭᠡᠨ ᠡᠮᠴᠢ ᠪᠣᠢ ᠰᠢᠦ!
一 ᠵᠠ ᠲᠡᠭᠡᠪᠡᠯ ᠰᠠᠢᠨ ᠪᠣᠯᠤᠯᠠ᠃
一 ᠮᠠᠷᠭᠠᠲᠤᠷ ᠭᠣᠣ ᠰᠧᠯᠢᠩ ᠬᠠᠷᠢᠵᠤ ᠢᠷᠡᠪᠡᠯ ᠳᠠᠬᠢᠵᠤ ᠬᠡᠯᠡᠯᠴᠡᠶᠡ! ᠭᠡᠵᠦ ᠲᠠᠲᠠᠪᠤᠷᠢ ᠡᠮᠡ ᠶ᠋ᠢᠨ ᠰᠡᠳᠬᠢᠯ ᠲᠣᠭᠲᠠᠵᠤ ᠲᠠᠢᠪᠤᠰᠢᠷᠠᠨᠠ᠃
ᠲᠡᠷᠡ ᠣᠷᠣᠢ ᠶ᠋ᠢᠨ ᠳᠠᠢᠯᠠᠯᠭᠠ ᠢᠨᠢᠶᠡᠳᠦ ᠲᠡᠢ ᠬᠠᠨᠢᠶᠠᠳᠤ ᠲᠠᠢ ᠬᠥᠷ ᠬᠥᠭᠵᠢᠶᠡᠨᠲᠡᠢ ᠪᠣᠯᠵᠤ ᠥᠨᠳᠥᠷᠯᠡᠪᠡ᠃
ᠮᠠᠷᠭᠠᠲᠤᠷ ᠬᠠᠷᠢᠵᠤ ᠢᠷᠡᠨᠡ ᠭᠡᠰᠡᠨ ᠭᠣᠣ ᠰᠧᠯᠢᠩ ᠬᠡᠳᠦᠨ ᠮᠠᠷᠭᠠᠲᠤᠷ ᠪᠣᠯᠤᠭᠰᠠᠨ ᠴᠤ᠌ ᠢᠷᠡᠭᠡ ᠦᠭᠡᠢ᠃ ᠡᠨᠡ ᠨᠢ ᠮᠠᠨᠤᠪᠠᠳᠮᠠ ᠶ᠋ᠢᠨ ᠰᠡᠳᠬᠢᠯ ᠢ᠋ ᠳᠡᠩᠰᠡᠯᠭᠡᠬᠦ ᠪᠣᠯᠪᠠᠴᠤ ᠲᠠᠲᠠᠪᠤᠷᠢ ᠡᠮᠡ ᠲᠡᠢ ᠨᠢ ᠣᠢᠷᠠᠳᠴᠤ ᠳᠠᠳᠬᠤ ᠳ᠋ᠤ᠌ ᠵᠣᠯᠲᠠᠢ ᠵᠠᠪᠰᠢᠶᠠᠨ ᠪᠣᠯᠵᠤ ᠪᠠᠢᠪᠠ᠃
ᠡᠢᠨ ᠬᠦ᠌ ᠮᠠᠨᠤᠨᠪᠠᠳᠮᠠ ᠭᠣᠣ ᠰᠧᠯᠢᠩ ᠡᠵᠡᠭᠦᠢ ᠳ᠋ᠦ᠍ ᠲᠡᠭᠦᠨ ᠦ᠌ ᠲᠠᠲᠠᠪᠤᠷᠢ ᠡᠮᠡ ᠲᠡᠢ ᠡᠪᠲᠡᠢ ᠲᠠᠨᠢᠯᠴᠠᠨ᠂ ᠰᠠᠢᠬᠠᠨ ᠳᠠᠰᠤᠯᠴᠠᠭᠰᠠᠨ ᠢ᠋ ᠬᠡᠯᠡᠬᠦ ᠶᠠᠭᠤᠨ⁈ ᠡᠪᠡᠳᠴᠢᠨ ᠦᠵᠡᠭᠦᠯᠬᠦ ᠨᠡᠷᠡ ᠪᠡᠷ ᠡᠳᠡᠨ ᠦ᠌ ᠳ᠋ᠦ᠍ ᠰᠠᠭᠤᠵᠤ᠂ ᠴᠡᠩᠭᠡᠵᠦ ᠨᠠᠭᠠᠳᠤᠨ᠂ ᠵᠠᠷᠢᠮ ᠣᠷᠣᠢ ᠳ᠋ᠠᠭᠠᠨ ᠰᠢ ᠳᠠᠭᠤᠯᠠᠬᠤ ᠶ᠋ᠢ ᠰᠣᠨᠢᠷᠬᠠᠨ ᠮᠠᠰᠢᠳᠠ ᠵᠤᠭᠠᠲᠠᠢ ᠪᠠᠷ ᠡᠳᠦᠷ ᠢ᠋ ᠡᠯᠡᠭᠡᠵᠦ ᠰᠠᠭᠤᠨᠠ᠃
ᠳᠠᠬᠢᠭᠠᠳ ᠳᠡᠮᠡᠢ ᠬᠡᠳᠦ ᠬᠣᠨᠣᠭᠰᠠᠨ ᠦᠭᠡᠢ ᠡᠳᠡ ᠬᠣᠶᠠᠭᠤᠯᠠ《ᠵᠢᠷᠤᠮ ᠤ᠋ᠨ ᠡᠭᠡᠴᠢ ᠳᠡᠭᠦᠦ》 ᠪᠣᠯᠵᠤ ᠲᠩᠷᠢ ᠳ᠋ᠦ᠍ ᠮᠥᠷᠭᠥᠨ ᠬᠢᠲᠠᠳ ᠤ᠋ᠨ ᠵᠠᠩ ᠢ᠋ᠶ᠋ᠠᠷ ᠲᠠᠬᠢᠶᠠᠨ ᠴᠢᠰᠤ ᠳᠤᠰᠤᠯᠠᠭᠤᠯᠤᠭᠰᠠᠨ ᠠᠷᠢᠬᠢ ᠤᠤᠭᠤᠵᠤ᠂《ᠦᠬᠦᠨ ᠦᠬᠦᠲᠡᠯᠡ ᠪᠡᠨ ᠨᠢᠭᠡ ᠨᠢᠭᠡᠨ ᠳ᠋ᠡᠭᠡᠨ ᠲᠤᠰᠠ ᠳᠠᠮ ᠪᠣᠯᠵᠤ ᠶᠠᠪᠤᠵᠠᠭᠠᠶᠠ》 ᠭᠡᠵᠦ ᠲᠥᠷᠥᠭᠰᠡᠨ ᠡᠭᠡᠴᠢ ᠳᠡᠭᠦᠦ ᠶ᠋ᠢᠨ ᠬᠠᠢᠷᠠ ᠠ᠋ᠴᠠ ᠳᠠᠪᠠᠭᠰᠠᠨ ᠵᠤᠵᠠᠭᠠᠨ ᠨᠠᠢᠷ ᠢ᠋ ᠪᠠᠲᠤᠳᠬᠠᠨ ᠲᠠᠩᠭᠠᠷᠢᠭᠯᠠᠪᠠ᠃ ᠭᠣᠣ ᠰᠧᠯᠢᠩ ᠦ᠋ᠨ ᠲᠠᠲᠠᠪᠤᠷᠢ ᠡᠮᠡ ᠨᠠᠰᠤ ᠪᠠᠷ ᠡᠭᠡᠴᠢ ᠪᠣᠯᠬᠤᠢ ᠵᠢᠷᠤᠮ ᠤ᠋ᠨ ᠡᠭᠡᠴᠢ ᠪᠣᠯᠵᠤ᠂ ᠮᠠᠨᠤᠨᠪᠠᠳᠮᠠ ᠳᠡᠭᠦᠦ ᠨᠢ ᠪᠣᠯᠵᠠᠢ᠃ ᠭᠣᠣ ᠰᠧᠯᠢᠩ ᠬᠠᠷᠢᠵᠤ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠡᠮᠡᠰ ᠦ᠋ᠨ ᠬᠣᠭᠣᠷᠣᠨᠳᠣᠬᠢ ᠨᠠᠢᠵᠠ ᠨᠠᠢᠷ ᠤ᠋ᠨ ᠤᠴᠢᠷ ᠲᠤ᠌ ᠳᠡᠮᠡᠢ ᠨᠣᠵᠣᠭᠣᠷᠠᠭᠰᠠᠨ ᠦᠭᠡᠢ᠃ ᠮᠠᠨᠤᠨᠪᠠᠳᠮᠠ ᠴᠤ᠌ ᠡᠬᠢᠯᠡᠩᠭᠦᠲᠡ ᠤᠴᠢᠷ ᠨᠠᠴᠢᠷ ᠦᠭᠡᠢ《ᠭᠣᠣ ᠰᠧᠯᠢᠩ᠂ ᠭᠣᠣ ᠰᠧᠯᠢᠩ》 ᠭᠡᠵᠦ ᠨᠠᠭᠠᠯᠳᠤᠭᠠ ᠦᠭᠡᠢ᠃ ᠲᠠᠲᠠᠪᠤᠷᠢ ᠡᠮᠡ ᠲᠡᠢ ᠨᠢ ᠵᠢᠷᠤᠮ ᠤ᠋ᠨ ᠡᠭᠡᠴᠢ ᠳᠡᠭᠦᠦ ᠪᠠᠷᠢᠯᠳᠤᠭᠰᠠᠨ ᠠ᠋ᠴᠠ《ᠬᠦᠷᠭᠡᠨ ᠠᠬᠠ》 ᠭᠡᠵᠦ ᠬᠦᠨᠳᠦᠯᠡᠵᠦ ᠳᠠᠭᠤᠳᠠᠨ ᠵᠠᠢᠰᠬᠠᠨ ᠯᠠ ᠪᠠᠢᠪᠠ᠃
ᠬᠣᠶᠠᠷ ᠳᠣᠯᠣᠭᠠ ᠬᠣᠨᠣᠭ ᠥᠩᠭᠡᠷᠡᠭᠡᠳ ᠬᠢᠲᠠᠳ ᠡᠮ ᠳᠠᠩ ᠤᠤᠭᠤᠵᠤ ᠨᠢᠭᠡ ᠰᠤᠪᠢᠯᠠᠯᠲᠠ ᠶ᠋ᠢᠨ ᠬᠤᠭᠤᠴᠠᠭᠠ ᠶ᠋ᠢ ᠳᠠᠭᠤᠰᠬᠠᠨ ᠮᠠᠨᠤᠨᠪᠠᠳᠮᠠ ᠭᠡᠨᠡᠳᠲᠡ ᠨᠢᠭᠡ ᠡᠳᠦᠷ ᠮᠠᠰᠢ ᠵᠣᠪᠠᠭᠤᠷᠢᠲᠠᠢ ᠴᠢᠷᠠᠢᠯᠠᠨ ᠤᠬᠢᠯᠠᠩᠨᠠᠬᠤ ᠶ᠋ᠢ ᠲᠡᠭᠦᠨ ᠦ᠌《ᠵᠢᠷᠤᠮ ᠤ᠋ᠨ ᠡᠭᠡᠴᠢ》 ᠨᠢ ᠦᠵᠡᠭᠡᠳ᠄
一 ᠮᠠᠨᠤᠨ ᠠ᠋! ᠶᠠᠭᠠᠬᠢᠴᠢᠬᠠᠪᠠ? ᠪᠡᠶᠡ ᠴᠢᠨᠢ ᠠᠶᠠ ᠦᠭᠡᠢ ᠪᠠᠢᠨᠠ ᠊ᠤᠤ? ᠬᠠᠮᠢᠭᠠ ᠴᠢᠨᠢ ᠡᠪ ᠦᠭᠡᠢ ᠪᠣᠯᠪᠠ? ᠭᠡᠵᠦ ᠰᠠᠨᠳᠤᠷᠴᠤ ᠮᠠᠨᠤᠨᠪᠠᠳᠮᠠ ᠶ᠋ᠢᠨ ᠨᠢᠯᠪᠤᠰᠤ ᠶ᠋ᠢ ᠨᠢ ᠠᠷᠴᠢᠵᠤ《ᠶᠠᠮᠠᠷ ᠤᠴᠢᠷ ᠪᠠᠢᠪᠠᠯ ᠡᠭᠡᠴᠢ ᠳ᠋ᠡᠭᠡᠨ ᠬᠡᠯᠡᠨᠡ ᠪᠢᠵᠡ ᠳᠡ! ᠤᠬᠢᠯᠠᠭᠠᠳ ᠶᠠᠭᠠᠬᠢᠬᠤ ᠪᠣᠢ?》 ᠭᠡᠵᠦ ᠠᠷᠭᠠᠳᠠᠨᠠ᠃
ᠵᠢᠷᠤᠮ ᠤ᠋ᠨ ᠡᠭᠡᠴᠢ ᠨᠢ ᠰᠡᠳᠬᠢᠯ ᠵᠥᠭᠡᠯᠡᠷᠡᠨ ᠲᠡᠭᠦᠨ ᠢ᠋ ᠠᠷᠭᠠᠳᠠᠵᠤ ᠬᠠᠭᠤᠷᠠᠢᠯᠠᠬᠤ ᠳ᠋ᠤ᠌ ᠮᠠᠨᠤᠨᠪᠠᠳᠮᠠ ᠤᠯᠠᠮ ᠴᠤ᠌ ᠱᠣᠭᠰᠢᠷᠠᠨ ᠤᠬᠢᠯᠠᠪᠠ᠃
一 ᠮᠠᠨᠤᠨ ᠠ᠋! ᠪᠢᠲᠡᠭᠡᠢ ᠤᠬᠢᠯᠠ᠃ ᠵᠣᠷᠢᠭ ᠢ᠋ᠶ᠋ᠠᠨ ᠪᠡᠷᠢ᠂ ᠶᠠᠮᠠᠷ ᠵᠣᠪᠠᠯᠠᠩ ᠪᠠᠢᠭᠰᠠᠨ ᠴᠤ᠌ ᠪᠢᠳᠡ ᠡᠭᠡᠴᠢ ᠳᠡᠭᠦᠦ ᠬᠣᠶᠠᠷ ᠨᠢᠭᠡ ᠨᠢᠭᠡᠨ ᠳ᠋ᠡᠭᠡᠨ ᠲᠤᠰᠠᠯᠠᠯᠴᠠᠨᠠ ᠭᠡᠰᠡᠨ ᠪᠢᠰᠢ ᠊ᠦᠦ! ᠬᠡᠯᠡ᠂ ᠬᠡᠯᠡ! ᠡᠭᠡᠴᠢ ᠨᠢ ᠬᠠᠵᠠᠭᠤ ᠳ᠋ᠤ᠌ ᠴᠢᠨᠢ ᠪᠠᠢᠭᠠ ᠳ᠋ᠤ᠌ ᠶᠠᠮᠠᠷ ᠴᠤ᠌ ᠤᠴᠢᠷ ᠢ᠋ ᠡᠪᠯᠡᠭᠦᠯᠬᠦ ᠳ᠋ᠦ᠍ ᠪᠡᠯᠡᠨ ᠪᠠᠢᠨᠠ᠃ ᠳᠠᠬᠢᠭᠠᠳ ᠬᠡᠯᠡᠪᠡᠯ ᠪᠠᠷᠠᠭᠤᠨ ᠬᠦᠩ ᠳ᠋ᠡᠭᠡᠨ ᠴᠢ ᠲᠩᠷᠢ᠂ ᠪᠤᠭᠤᠲᠤ ᠶ᠋ᠢᠨ ᠬᠡᠪᠴᠢᠶᠡᠨ ᠳ᠋ᠡᠭᠡᠨ ᠪᠢ ᠲᠩᠷᠢ ᠰᠢᠦ ᠭᠡᠪᠡ᠃
ᠮᠠᠨᠤᠨᠪᠠᠳᠮᠠ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠢ᠋ᠶ᠋ᠡᠨ ᠠᠭᠤᠳᠠᠯᠤᠨ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰᠤᠭᠠᠳ ᠵᠢᠷᠤᠮ ᠤ᠋ᠨ ᠡᠭᠡᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠦᠵᠦᠭᠦᠦ ᠶ᠋ᠢ ᠲᠡᠪᠡᠷᠢᠵᠦ᠄
一 ᠡᠭᠡᠴᠢ ᠠ᠋᠂ ᠲᠠ ᠨᠠᠮᠠᠶ᠋ᠢ ᠬᠡᠨ ᠦ᠌ ᠬᠠᠲᠤᠨ ᠭᠡᠵᠦ ᠰᠠᠨᠠᠪᠠ? ᠭᠡᠰᠡᠨ ᠳ᠋ᠦ᠍ ᠲᠡᠷᠡ ᠱᠣᠢᠱᠣᠭ ᠡᠮᠡ ᠭᠠᠢᠬᠠᠵᠤ᠄
一 ᠬᠥᠶᠢ! ᠴᠢ ᠴᠢᠨᠢ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠦᠩ ᠨᠣᠶᠠᠨ ᠤ᠋ ᠬᠠᠲᠤᠨ ᠭᠡᠰᠡᠨ ᠪᠢᠰᠢ ᠶᠦᠮ ᠊ᠤᠤ?
一 ᠪᠢᠰᠢ! ᠭᠡᠵᠦ ᠮᠠᠨᠤᠨᠪᠠᠳᠮᠠ ᠲᠣᠯᠣᠭᠠᠢ ᠪᠠᠨ ᠰᠠᠵᠢᠪᠠ᠃
— ᠠ⁈ ᠪᠢᠰᠢ ᠭᠡᠨᠡ? ᠲᠡᠭᠡᠭᠡᠳ᠁
一 ᠡᠭᠡᠴᠢ ᠠ᠋᠂ ᠪᠢ ᠲᠠᠨ ᠢ᠋ ᠡᠢᠮᠦ ᠰᠠᠢᠨ ᠰᠠᠨᠠᠭᠠ ᠲᠠᠢ ᠦᠷᠦ ᠵᠥᠭᠡᠯᠡᠨ ᠬᠥᠮᠦᠨ ᠭᠡᠵᠦ ᠪᠣᠳᠣᠭᠰᠠᠨ ᠦᠭᠡᠢ᠃ ᠮᠠᠭᠤ ᠳᠡᠭᠦᠦ ᠴᠢᠨᠢ ᠪᠡᠶᠡ ᠪᠡᠨ《ᠬᠦᠩ ᠨᠣᠶᠠᠨ ᠤ᠋ ᠬᠠᠲᠤᠨ》 ᠭᠡᠵᠦ ᠵᠢᠷᠤᠮ ᠤ᠋ᠨ ᠡᠭᠡᠴᠢ ᠲᠠᠨ ᠢ᠋ ᠬᠤᠳᠠᠯ ᠬᠡᠯᠡᠭᠰᠡᠨ ᠳ᠋ᠡᠭᠡᠨ ᠬᠠᠷᠠᠮᠰᠠᠨ ᠵᠣᠪᠠᠨᠢᠵᠤ ᠪᠣᠢ᠃
一 ᠬᠠᠮᠢᠶᠠ ᠦᠭᠡᠢ᠃ ᠪᠢᠳᠡ ᠴᠢᠨᠢ ᠣᠳᠣ ᠡᠭᠡᠴᠢ ᠳᠡᠭᠦᠦ ᠬᠣᠶᠠᠷ ᠰᠢᠦ! ᠶᠠᠭᠤᠨ ᠳ᠋ᠤ᠌ ᠨᠣᠶᠠᠨ ᠮᠣᠶᠠᠨ ᠤ᠋ ᠬᠠᠲᠤᠨ ᠭᠡᠬᠦ ᠪᠣᠢ! ᠲᠩᠷᠢ ᠳ᠋ᠦ᠍ ᠮᠥᠷᠭᠥᠭᠰᠡᠨ ᠡᠭᠡᠴᠢ ᠳᠡᠭᠦᠦ ᠶ᠋ᠢᠨ ᠡᠯᠪᠡᠷᠢᠯ ᠵᠢᠷᠤᠮ ᠤ᠋ᠨ ᠦᠨᠡ ᠴᠠᠨᠠ ᠶᠠᠭᠤᠨ ᠠ᠋ᠴᠠ ᠴᠤ᠌ ᠡᠷᠬᠢᠮ᠃
一 ᠡᠭᠡᠴᠢ ᠠ᠋᠂ ᠪᠢ ᠪᠣᠯ ᠲᠠᠨ ᠤ᠋ ᠭᠣᠣ ᠰᠧᠯᠢᠩ ᠦ᠋ᠨ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠦ᠌ ᠡᠬᠡᠨᠡᠷ ᠮᠥᠨ᠃
一 ᠬᠡᠨ ᠦ᠌?
一 ᠮᠢᠩᠭᠠᠠᠨᠪᠣᠣ ᠶ᠋ᠢᠨ ᠡᠬᠡᠨᠡᠷ!
一 ᠮᠢᠩᠭᠠᠨᠪᠣᠣ ᠠ᠋⁈ ᠲᠡᠷᠡ ᠴᠢᠨᠢ ᠶᠣᠰᠣᠲᠠᠢ ᠠᠭᠤᠴᠢᠯᠠᠰᠢ ᠦᠭᠡᠢ ᠶᠠᠯᠠᠲᠠᠨ ᠰᠢᠦ! ᠳᠡᠭᠦᠦ ᠮᠢᠨᠢ ᠴᠢ ᠶᠠᠭᠠᠬᠢᠬᠤ ᠳ᠋ᠠᠭᠠᠨ᠁ ᠭᠡᠵᠦ ᠪᠠᠴᠢᠮᠳᠠᠨ ᠠᠭᠤᠷᠯᠠᠵᠤ ᠭᠠᠷ ᠨᠢ ᠰᠠᠯᠭᠠᠨᠠᠨᠠ᠃
一 ᠦᠭᠡᠢ ᠠ᠋᠂ ᠡᠭᠡᠴᠢ ᠠ᠋! ᠲᠠ ᠮᠢᠨᠦ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰ!
一 ᠁
ᠭᠣᠣ ᠰᠧᠯᠢᠩ ᠦ᠋ᠨ ᠲᠠᠲᠠᠪᠤᠷᠢ ᠡᠮᠡ ᠨᠢᠭᠡ ᠶᠠᠭᠤᠮᠠ ᠬᠡᠯᠡᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠪᠣᠯᠢᠪᠠ᠃
一 ᠮᠢᠩᠭᠠᠨᠪᠣᠣ ᠶᠠᠯᠠᠲᠠᠨ ᠪᠢᠰᠢ᠃ ᠬᠢᠯᠢᠰ! ᠬᠠᠮᠢᠶᠠ ᠬᠠᠢᠳᠠᠭ ᠦᠭᠡᠢ ᠬᠥᠮᠦᠨ ᠵᠠᠭᠤᠳᠠᠭ《ᠭᠠᠯᠵᠠᠭᠤ ᠨᠣᠬᠠᠢ》 ᠳ᠋ᠤ᠌ ᠬᠠᠵᠠᠭᠳᠠᠭᠰᠠᠨ ᠬᠥᠮᠦᠨ ᠶᠠᠮᠠᠷ ᠪᠠᠢᠳᠠᠭ ᠪᠣᠯ ᠮᠢᠩᠭᠠᠨᠪᠣᠣ ᠶᠠᠭ ᠲᠡᠢᠮᠦ! ᠲᠡᠭᠦᠨ ᠦ᠌ ᠬᠢᠯᠢᠰ ᠬᠡᠷᠡᠭ ᠢ᠋ ᠴᠠᠭᠠᠳᠬᠠᠬᠤ ᠳ᠋ᠤ᠌ ᠴᠣᠷ ᠤ᠋ᠨ ᠭᠠᠭᠴᠠ ᠭᠡᠷᠡᠴᠢᠯᠡᠭᠴᠢ ᠬᠥᠮᠦᠨ ᠪᠣᠯ ᠳᠠᠷᠤᠢ ᠪᠢ ᠮᠥᠨ᠃ ᠪᠢ ᠥᠪᠡᠷ ᠦ᠋ᠨ ᠠᠪᠠᠯᠢ ᠡᠷᠡ᠂ ᠬᠢᠯᠢᠰ ᠪᠣᠯᠤᠭᠰᠠᠨ ᠰᠢᠳᠤᠷᠭᠤ ᠬᠥᠮᠦᠨ ᠦ᠌ ᠡᠮᠦᠨᠡ ᠡᠴᠡ ᠭᠡᠷᠡᠴᠢ ᠲᠡᠢ ᠪᠢᠴᠢᠭ ᠲᠡᠢ ᠶᠠᠭᠤᠮᠠ ᠦᠵᠡᠭᠦᠯᠦᠨᠡ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠲᠠ ᠮᠢᠩᠭᠠᠨᠪᠣᠣ ᠶ᠋ᠢ ᠮᠥᠨ ᠶᠠᠯᠠᠲᠠᠨ ᠭᠡᠵᠦ ᠲᠠᠨᠢᠪᠠᠯ ᠮᠥᠨ ᠲᠡᠢᠮᠦ ᠪᠣᠯᠲᠤᠭᠠᠢ! ᠪᠢ ᠠᠷᠭᠠ ᠪᠠᠨ ᠶᠠᠳᠠᠬᠤ ᠳ᠋ᠠᠭᠠᠨ ᠢᠩᠭᠢᠵᠦ ᠬᠢᠪᠡ᠃ ᠡᠭᠡᠴᠢ ᠮᠢᠨᠢ ᠠᠭᠤᠴᠢᠯᠠᠭᠠᠷᠠᠢ!
ᠤᠴᠢᠷ ᠶᠠᠪᠤᠳᠠᠯ ᠤ᠋ᠨ ᠤᠭ ᠨᠢ ᠡᠢᠮᠦ ᠪᠠᠢᠵᠠᠢ᠃ ᠬᠠᠯᠬᠠ ᠶ᠋ᠢᠨ ᠭᠣᠪᠢ ᠨᠤᠲᠤᠭ ᠤ᠋ᠨ ᠥᠯᠴᠢᠷ ᠲᠡᠮᠡᠭᠡᠳ ᠮᠠᠨ ᠤ᠋ ᠡᠨᠡ ᠬᠠᠯᠠᠭᠤᠨ ᠭᠠᠵᠠᠷ ᠳᠠᠳᠬᠤ ᠦᠭᠡᠢ ᠡᠪᠡᠰᠦ ᠪᠡᠯᠴᠢᠭᠡᠷ ᠥᠭᠡᠷᠡᠯᠬᠡᠵᠦ ᠦᠯᠡᠮᠵᠢᠬᠡᠨ ᠦᠬᠦᠵᠦ ᠬᠠᠳᠠᠵᠠᠢ᠃ ᠦᠬᠦᠭᠰᠡᠨ ᠲᠡᠮᠡᠭᠡᠨ ᠦ᠌ ᠳᠤᠷᠠᠰᠬᠠ ᠨᠡᠢᠲᠡ ᠨᠠᠢ᠍ᠮᠠᠨ ᠵᠠᠭᠤ ᠪᠥᠭᠡᠳ ᠳᠥᠷᠪᠡ᠃ ᠲᠡᠷᠡ ᠲᠡᠮᠡᠭᠡᠨ ᠳᠤᠷᠠᠰᠬᠠ ᠨᠤᠭᠤᠳ ᠢ᠋ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠣᠪᠣᠭᠠᠯᠠᠵᠤ ᠪᠣᠢ᠃ ᠳᠠᠬᠢᠪᠠᠯ᠂ ᠮᠠᠨ ᠤ᠋ ᠨᠤᠲᠤᠭ ᠲᠤ᠌ ᠳᠡᠭᠡᠷᠡᠮ ᠲᠣᠨᠣᠭᠠ ᠣᠯᠠᠰᠢᠷᠠᠵᠤ ᠤᠨᠤᠭᠠ ᠮᠠᠯ ᠢ᠋ ᠰᠦᠷᠦᠭ ᠢ᠋ᠶ᠋ᠡᠷ ᠨᠢ ᠲᠠᠭᠤᠳᠠᠭ ᠨᠢ ᠰᠣᠨᠢᠨ ᠤᠴᠢᠷ ᠪᠢᠰᠢ ᠪᠣᠯᠤᠭᠰᠠᠨ ᠢ᠋ ᠲᠠ ᠰᠣᠨᠣᠰᠤᠭᠰᠠᠨ ᠪᠠᠢᠯᠭᠦᠢ! ᠮᠢᠩᠭᠠᠨᠪᠣᠣ ᠶ᠋ᠢᠨ ᠲᠡᠮᠡᠭᠡᠳ ᠡᠴᠡ ᠬᠣᠶᠠᠷ ᠤᠳᠠᠭᠠ ᠳᠡᠭᠡᠷᠡᠮ ᠬᠤᠯᠠᠭᠠᠢ ᠠᠪᠤᠭᠰᠠᠨ᠁
ᠵᠠᠷᠢᠮ ᠬᠥᠮᠦᠨ ᠬᠤᠪᠢ ᠶ᠋ᠢᠨ ᠥᠰᠢᠶᠡ ᠠᠲᠠᠭᠠᠨ ᠳ᠋ᠠᠭᠠᠨ ᠰᠢᠳᠡᠵᠦ ᠭᠣᠣ ᠰᠧᠯᠢᠩ ᠳ᠋ᠦ᠍ ᠭᠠᠷ ᠴᠠᠭᠠᠯᠠᠬᠤ ᠪᠡᠯᠡᠭ ᠬᠦᠷᠭᠡᠨ ᠭᠠᠵᠢ ᠪᠤᠷᠤᠭᠤ ᠵᠠᠷᠭᠤᠯᠳᠤᠭᠰᠠᠨ ᠠ᠋ᠴᠠ ᠮᠢᠩᠭᠠᠨᠪᠣᠣ ᠥᠨᠥᠳᠥᠷ ᠲᠣᠯᠣᠭᠠᠢ ᠤᠨᠠᠬᠤ ᠶᠠᠯᠠ ᠡᠭᠦᠷᠦᠯᠡ᠁ ᠮᠢᠩᠭᠠᠨᠪᠣᠣ ᠶ᠋ᠢ ᠶᠠᠮᠠᠷ ᠬᠥᠮᠦᠨ ᠭᠡᠰᠡᠨ ᠢ᠋ ᠭᠣᠣ ᠰᠧᠯᠢᠩ ᠶᠠᠮᠠᠷ ᠮᠡᠳᠡᠬᠦ ᠦᠭᠡᠢ ᠴᠦ᠍ ᠪᠢᠰᠢ! ᠬᠡᠴᠢᠨᠡᠭᠡᠨ ᠵᠢᠯ ᠴᠡᠷᠢᠭ ᠦ᠋ᠨ ᠠᠯᠪᠠᠨ ᠳ᠋ᠤ᠌ ᠶᠠᠪᠤᠬᠤ ᠳ᠋ᠠᠭᠠᠨ ᠣᠰᠣᠯ ᠪᠤᠷᠤᠭᠤ ᠭᠠᠷᠭᠠᠭᠰᠠᠨ ᠭᠠᠵᠠᠷ ᠣᠭᠲᠣ ᠦᠭᠡᠢ᠃ ᠥᠨᠥᠳᠥᠷ ᠵᠢᠳᠬᠦᠭᠰᠡᠨ ᠦᠬᠡᠷ ᠦ᠋ᠨ ᠵᠢᠷᠦᠬᠡ ᠤᠷᠤᠭᠤ ᠭᠡᠵᠦ ᠭᠣᠣ ᠰᠧᠯᠢᠩ 一 ᠬᠦᠷᠭᠡᠨ ᠠᠬᠠ ᠶ᠋ᠢᠨ ᠬᠢᠲᠤᠭᠠᠨ ᠳ᠋ᠤ᠌ ᠬᠦᠵᠦᠭᠦᠦ ᠲᠣᠯᠣᠭᠠᠢ ᠰᠠᠯᠬᠤ ᠪᠣᠯᠤᠭᠰᠠᠨ ᠢ᠋ ᠪᠣᠳᠣᠬᠤ ᠠ᠋ᠴᠠ ᠪᠠᠨ᠁ ᠭᠡᠵᠦ ᠮᠠᠨᠤᠨᠪᠠᠳᠮᠠ ᠶ᠋ᠢᠨ ᠡᠪᠬᠡᠷᠡᠯᠲᠡᠢ ᠤᠬᠢᠯᠠᠨ ᠲᠣᠭᠠᠴᠢᠭᠰᠠᠨ ᠢ᠋ ᠠᠯᠳᠠᠯ ᠦᠭᠡᠢ ᠰᠣᠨᠣᠰᠤᠭᠰᠠᠨ ᠵᠢᠷᠤᠮ ᠤ᠋ᠨ ᠡᠭᠡᠴᠢ ᠨᠢ ᠢᠲᠡᠭᠡᠵᠦ ᠰᠡᠳᠬᠢᠯ ᠨᠢ ᠵᠥᠭᠡᠯᠡᠷᠡᠪᠡ᠃
ᠭᠣᠣ ᠰᠧᠯᠢᠩ᠂ ᠲᠠᠲᠠᠪᠤᠷᠢ ᠡᠮᠡ ᠶ᠋ᠢᠨ ᠢ᠋ᠶ᠋ᠡᠨ ᠰᠢᠪᠡᠨᠡᠭᠰᠡᠨ ᠦᠭᠡ ᠶ᠋ᠢ ᠰᠣᠨᠣᠰᠴᠤ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠲᠣᠮᠢᠯᠠᠨ ᠮᠢᠩᠭᠠᠨᠪᠣᠣ ᠶ᠋ᠢᠨ ᠨᠤᠲᠤᠭ ᠢ᠋ᠶ᠋ᠠᠷ ᠳᠠᠯᠳᠠᠭᠤᠷ ᠪᠠᠢᠴᠠᠭᠠᠨ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠣᠪᠣᠭᠠᠯᠠᠭᠠᠰᠤᠲᠠᠢ ᠲᠡᠮᠡᠭᠡᠨ ᠳᠤᠷᠠᠰᠬᠠ ᠶ᠋ᠢ ᠲᠣᠭᠠᠯᠠᠵᠤ ᠦᠵᠡᠬᠦᠯᠡ ᠦᠨᠡᠬᠡᠷ ᠨᠠᠢ᠍ᠮᠠᠨ ᠵᠠᠭᠤ ᠳᠥᠷᠪᠡᠨ ᠰᠢᠷᠬᠡᠭ ᠲᠡᠮᠡᠭᠡᠨ ᠦ᠌ ᠠᠷᠠᠰᠤ ᠪᠠᠢᠭᠰᠠᠨ ᠢ᠋ ᠲᠣᠳᠣᠯᠠᠵᠠᠢ᠃ ᠦᠬᠦᠭᠰᠡᠨ ᠲᠡᠮᠡᠭᠡᠨ ᠦ᠌ ᠨᠢᠭᠡ ᠠᠷᠠᠰᠤ ᠶ᠋ᠢ ᠤᠰᠤᠨ ᠳ᠋ᠤ᠌ ᠳᠡᠪᠲᠦᠭᠡᠭᠡᠳ ᠲᠡᠯᠡᠵᠦ ᠰᠤᠩᠭᠠᠨ ᠳᠥᠷᠪᠡᠨ ᠰᠢᠷᠬᠡᠭ ᠪᠣᠯᠭᠠᠨ ᠵᠦᠰᠦᠵᠦ᠂ ᠦᠷᠴᠢᠢᠵᠦ ᠬᠣᠷᠪᠣᠢᠲᠠᠯᠠ ᠬᠠᠲᠠᠭᠠᠵᠤ ᠭᠣᠣ ᠰᠧᠯᠢᠩ ᠦ᠋ᠨ ᠨᠢᠳᠦ ᠶ᠋ᠢ ᠬᠠᠭᠤᠷᠤᠭᠰᠠᠨ ᠮᠠᠨᠤᠨᠪᠠᠳᠮᠠ ᠶ᠋ᠢᠨ ᠤᠬᠠᠭᠠᠨ ᠢ᠋ ᠮᠠᠯ ᠳ᠋ᠤ᠌ ᠣᠢᠷᠠᠲᠤᠭᠠ ᠦᠭᠡᠢ ᠬᠢᠲᠠᠳ ᠤ᠋ᠳ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ⁈
ᠭᠠᠮᠢᠩ ᠤ᠋ᠨ ᠭᠣᠣ ᠰᠧᠯᠢᠩ ᠤᠷᠠᠨ ᠬᠣᠩᠰᠢᠶᠠᠷ ᠲᠠᠢ ᠤᠬᠠᠭᠠᠨ ᠤ᠋ ᠤᠭᠤᠲᠠ ᠮᠠᠨᠤᠨᠪᠠᠳᠮᠠ ᠶ᠋ᠢᠨ ᠤᠬᠠᠭᠠᠨ ᠳ᠋ᠤ᠌ ᠬᠠᠭᠤᠷᠲᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠭᠡ ᠦᠭᠡᠢ ᠪᠡᠷ ᠦᠯᠦ ᠪᠠᠷᠠᠨ ᠮᠠᠨᠤᠨᠪᠠᠳᠮᠠ ᠶ᠋ᠢᠨ ᠵᠢᠰ ᠴᠢᠷᠠᠢᠯᠠᠭ ᠵᠢᠰᠦ ᠴᠢᠮᠪᠠᠢ ᠤᠬᠠᠭᠠᠨ ᠳ᠋ᠤᠨᠢ ᠪᠠᠢᠨ ᠪᠠᠢᠨ ᠪᠣᠳᠣᠯ ᠲᠥᠭᠡᠷᠢᠳᠡᠭ ᠢ᠋ ᠬᠡᠯᠡᠬᠦ ᠶᠠᠭᠤᠨ⁈
ᠮᠢᠩᠭᠠᠨᠪᠣᠣ᠂ ᠭᠣᠣ ᠰᠧᠯᠢᠩ ᠦ᠋ᠨ ᠶᠡᠬᠡ ᠠᠭᠤᠴᠢᠯᠠᠯ ᠢ᠋ ᠣᠯᠵᠤ ᠦᠬᠦᠬᠦ ᠶᠠᠯᠠ ᠠ᠋ᠴᠠ ᠬᠡᠯᠲᠦᠷᠢᠨ ᠱᠣᠷᠣᠩ ᠠ᠋ᠴᠠ ᠰᠤᠯᠠᠯᠠᠭᠳᠠᠪᠠ᠃
ᠮᠢᠩᠭᠠᠨᠪᠣᠣ᠂ ᠭᠣᠣ ᠰᠧᠯᠢᠩ ᠦ᠋ᠨ ᠶᠡᠬᠡ ᠠᠴᠢ ᠶ᠋ᠢ ᠤᠮᠠᠷᠲᠠᠬᠤ ᠦᠭᠡᠢ ᠭᠡᠵᠦ ᠪᠠᠢᠩᠭᠤ ᠠᠴᠢᠯᠠᠯᠲᠠᠢ ᠪᠠᠢᠳᠠᠭ ᠤ᠋ᠨ ᠤᠴᠢᠷ ᠲᠤ᠌ ᠬᠣᠶᠠᠭᠤᠯᠠ ᠶ᠋ᠢᠨ ᠡᠶᠡ ᠨᠠᠢᠷ ᠤᠯᠠᠮ ᠵᠤᠵᠠᠭᠠᠷᠠᠬᠤ ᠳ᠋ᠤ᠌᠂ ᠮᠠᠨᠤᠨᠪᠠᠳᠮᠠ ᠪᠣᠯᠤᠨ ᠭᠣᠣ ᠰᠧᠯᠢᠩ ᠦ᠋ᠨ ᠲᠠᠲᠠᠪᠤᠷᠢ ᠡᠮᠡ ᠬᠣᠶᠠᠷ ᠤ᠋ᠨ《ᠵᠢᠷᠤᠮ ᠤ᠋ᠨ ᠡᠭᠡᠴᠢ ᠳᠡᠭᠦᠦ》 ᠶ᠋ᠢᠨ ᠨᠠᠢᠷ ᠵᠢᠷᠤᠮ ᠢ᠋ ᠨᠡᠩ ᠶᠠᠭᠤ ᠬᠡᠯᠡᠬᠦ ᠪᠣᠢ⁈
ᠡᠷᠯᠢᠭ ᠦ᠋ᠨ ᠡᠭᠦᠳᠡᠨ ᠡᠴᠡ ᠠᠮᠢ ᠵᠤᠯᠪᠠᠭᠰᠠᠨ ᠮᠢᠩᠭᠠᠨᠪᠣᠣ᠂ ᠮᠠᠨᠤᠨᠪᠠᠳᠮᠠ ᠶ᠋ᠢᠨ ᠤᠰᠤᠨ ᠠ᠋ᠴᠠ ᠲᠤᠩᠭᠠᠯᠠᠭ ᠤᠬᠠᠭᠠᠨ ᠢ᠋ ᠪᠢᠰᠢᠷᠡᠵᠦ ᠬᠠᠢᠷᠠ ᠡᠭᠦᠰᠬᠦ ᠠᠪᠠᠴᠤ ᠤᠨᠠᠭᠠᠨ ᠬᠠᠢᠷᠠ ᠶ᠋ᠢ ᠭᠡᠵᠢᠭᠡᠳᠡᠭᠰᠡᠨ ᠬᠣᠪᠢᠯᠴᠡᠴᠡᠭ ᠢ᠋ᠶ᠋ᠡᠨ ᠶᠠᠭᠠᠬᠢᠪᠠᠴᠤ ᠮᠠᠷᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠰᠢᠨᠠᠯᠳᠠᠭ ᠪᠠᠢᠨᠠ᠃ ᠲᠡᠭᠡᠪᠡᠴᠦ ᠲᠣᠯᠣᠭᠠᠢ ᠤᠨᠠᠬᠤ ᠶᠠᠯᠠ ᠶ᠋ᠢ ᠨᠢ ᠬᠡᠯᠲᠦᠷᠢᠭᠦᠯᠦᠨ ᠠᠮᠢ ᠶ᠋ᠢ ᠨᠢ ᠠᠪᠤᠷᠠᠭᠰᠠᠨ ᠮᠠᠨᠤᠨᠪᠠᠳᠮᠠ ᠶ᠋ᠢᠨ ᠠᠴᠢ ᠲᠤᠰᠠ ᠶ᠋ᠢ ᠦᠲᠡᠭᠡᠷᠴᠦ ᠴᠢᠳᠠᠬᠤ ᠦᠭᠡᠢ ᠠᠷᠵᠠᠭ ᠪᠣᠷᠵᠠᠭ ᠠᠮᠢᠳᠤᠷᠠᠯ ᠤ᠋ᠨ ᠣᠯᠠᠨ ᠰᠥᠪᠡᠭᠴᠢᠲᠦ ᠭᠣᠭᠴᠣᠭᠠᠠᠨ ᠤ᠋ ᠨᠢᠭᠡ ᠰᠢᠵᠢᠮ ᠡᠴᠡ ᠬᠤᠪᠢ ᠵᠠᠶᠠᠭᠠᠨ ᠤ᠋ ᠪᠠᠨ ᠣᠭᠣᠰᠣᠷ ᠢ᠋ ᠠᠷᠭᠠᠮᠵᠢᠵᠤ ᠣᠷᠬᠢᠭᠰᠠᠨ ᠳ᠋ᠠᠭᠠᠨ ᠠᠷᠭᠠ ᠪᠤᠶᠤ ᠮᠠᠨᠤᠨᠪᠠᠳᠮᠠ ᠲᠠᠢ ᠦᠰᠦ ᠪᠡᠨ ᠬᠣᠯᠪᠣᠵᠤ ᠠᠢᠯ ᠡᠷᠦᠬᠡ ᠪᠡᠨ ᠣᠩᠭᠣᠢᠯᠭᠠᠵᠤ ᠶᠠᠪᠤᠯᠠ᠁
ᠲᠡᠭᠡᠬᠦ ᠳ᠋ᠦ᠍ ᠮᠠᠨᠤᠨᠪᠠᠳᠮᠠ ᠬᠠᠢᠷᠠᠯᠠᠵᠤ ᠳᠤᠷᠠᠯᠠᠭᠰᠠᠨ ᠬᠥᠮᠦᠨ ᠲᠡᠢ ᠪᠡᠨ ᠰᠠᠭᠤᠵᠤ᠂ ᠵᠠᠶᠠᠭᠠᠨ ᠤ᠋ ᠪᠠᠨ ᠵᠢᠷᠭᠠᠯ ᠳ᠋ᠤ᠌ ᠲᠠᠰᠢᠭᠤᠷᠠᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠮᠢᠩᠭᠠᠨᠪᠣᠣ ᠪᠠᠨ ᠡᠷᠡ ᠪᠦᠰᠡᠲᠡᠢ ᠬᠥᠮᠦᠨ᠂ ᠡᠨᠡ ᠬᠣᠷᠸᠠ ᠳ᠋ᠤ᠌ ᠬᠡᠢ ᠮᠣᠷᠢ ᠰᠦᠯᠳᠡ ᠲᠡᠢ ᠶᠠᠪᠤᠬᠤ ᠭᠡᠪᠡᠯ ᠵᠢᠩᠰᠡ ᠤᠲᠤᠭᠠ ᠵᠡᠭᠦᠵᠦ ᠵᠡᠷᠭᠡ ᠬᠡᠷᠬᠡᠮ ᠲᠡᠢ ᠭᠢᠯᠠᠯᠵᠠᠵᠤ ᠶᠠᠪᠤᠬᠤ ᠬᠡᠷᠡᠭᠲᠡᠢ᠃ ᠦᠭᠡᠢ ᠪᠣᠯ ᠵᠠᠶᠠᠭᠠᠨ ᠲᠩᠷᠢ ᠬᠠᠵᠠᠢᠵᠤ᠂ ᠠᠵᠠ ᠶ᠋ᠢᠨ ᠴᠢᠷᠠᠢ ᠪᠤᠷᠤᠭᠤᠯᠠᠨᠠ ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ ᠯᠠ ᠪᠠᠢᠵᠠᠢ᠃
ᠮᠠᠨᠤᠨᠪᠠᠳᠮᠠ ᠶᠠᠭᠤ ᠪᠠᠷ ᠳᠤᠲᠠᠪᠠᠴᠤ ᠤᠬᠠᠭᠠᠨ ᠢ᠋ᠶ᠋ᠠᠷ ᠳᠤᠲᠠᠬᠤ ᠦᠭᠡᠢ᠃ ᠣᠷᠭᠣᠭᠠᠳ ᠪᠠᠢᠳᠠᠭ ᠤᠬᠠᠭᠠᠨ ᠢ᠋ᠶ᠋ᠠᠨ ᠵᠠᠷᠤᠭᠠᠳ ᠪᠠᠷᠠᠬᠤ ᠦᠭᠡᠢ᠃ ᠡᠪᠲᠦ ᠱᠠᠭᠠᠵᠠᠭᠠᠢ ᠪᠤᠭᠤ ᠪᠠᠷᠢᠨᠠ ᠭᠡᠳᠡᠭ ᠢ᠋ᠶ᠋ᠡᠷ ᠮᠠᠨᠤᠪᠠᠳᠮᠠ ᠥᠨᠥᠬᠢ ᠭᠣᠣ ᠰᠧᠯᠢᠩ 一 ᠬᠦᠷᠭᠡᠨ ᠠᠬᠠ ᠪᠡᠨ ᠡᠷᠢᠵᠦ ᠣᠴᠢᠨ ᠡᠳᠦᠢ ᠲᠡᠳᠦᠢ ᠪᠡᠯᠡᠭ ᠰᠡᠯᠲᠡ ᠡᠷᠭᠦᠵᠦ᠄
一 ᠡᠷᠭᠢᠨ ᠬᠦᠷᠭᠡᠨ ᠠᠬᠠ ᠮᠢᠨᠢ᠂ ᠳᠡᠭᠦᠦ ᠬᠦᠷᠭᠡᠨ ᠳ᠋ᠡᠭᠡᠨ ᠪᠠᠭᠠ ᠰᠠᠭᠠ ᠴᠤ᠌ ᠭᠡᠰᠡᠨ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠵᠡᠷᠭᠡ ᠥᠭᠭᠦᠨᠡ ᠪᠢᠵᠡ? ᠭᠡᠵᠦ ᠦᠨᠡᠷᠬᠡᠨ ᠭᠤᠶᠤᠭᠰᠠᠨ ᠳ᠋ᠤ᠌ ᠭᠣᠣ ᠰᠧᠯᠢᠩ᠄
一 ᠥᠭᠴᠦ ᠴᠦ᠍ ᠪᠣᠯᠤᠯ ᠦᠭᠡᠢ ᠳᠡ᠃ ᠭᠡᠬᠦ ᠳ᠋ᠡᠭᠡᠨ ᠴᠡᠷᠢᠭ ᠮᠣᠷᠢ᠂ ᠵᠠᠷ ᠵᠡᠪᠰᠡᠭ ᠢ᠋ᠶ᠋ᠡᠨ ᠥᠪᠡᠷ ᠢ᠋ᠶ᠋ᠡᠨ ᠠᠷᠭᠠᠯᠠ! ᠭᠡᠵᠦ ᠥᠷᠥᠰᠢᠶᠡᠯ ᠬᠠᠢᠷᠠᠯᠠᠵᠠᠢ᠃ ᠢᠩᠭᠢᠭᠰᠡᠨ ᠢ᠋ᠶ᠋ᠡᠷ ᠮᠢᠩᠭᠠᠨᠪᠣᠣ ᠳᠣᠣᠷᠠ ᠪᠠᠨ ᠵᠠᠬᠢᠷᠬᠤ ᠴᠡᠷᠢᠭ ᠮᠣᠷᠢ᠂ ᠵᠠᠷ ᠵᠡᠪᠰᠡᠭ ᠲᠡᠢ ᠪᠣᠯᠵᠤ ᠬᠢᠷᠢ ᠪᠡᠷ ᠢ᠋ᠶ᠋ᠡᠨ ᠴᠢᠩᠭᠠᠷᠠᠭᠰᠠᠨ ᠪᠠᠶᠠᠨ ᠬᠡᠷᠬᠡᠮ ᠡᠷᠡ ᠶ᠋ᠢᠨ ᠨᠢᠭᠡ ᠪᠡᠷ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠳ᠋ᠤ᠌ ᠪᠠᠷᠤᠭ ᠤ᠋ᠨ ᠬᠥᠮᠦᠨ ᠢ᠋ ᠬᠠᠷᠠᠬᠤ ᠦᠭᠡᠢ ᠪᠣᠯᠪᠠ᠃ ᠰᠡᠭᠦᠯ ᠰᠡᠭᠦᠯ ᠳ᠋ᠡᠭᠡᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠶ᠋ᠢᠨ ᠱ᠌ᠢᠷᠦᠨ ᠵᠢᠩᠰᠡ ᠵᠡᠭᠦᠭᠰᠡᠨ ᠨᠢ ᠪᠦᠷ ᠯᠡ ᠮᠠᠨᠤᠨᠪᠠᠳᠮᠠ ᠶ᠋ᠢᠨ ᠴᠢᠰᠤ ᠬᠥᠯᠥᠰᠥ ᠠᠷᠭᠠ ᠤᠬᠠᠭᠠᠨ᠁ ᠡᠨᠳᠡ ᠬᠦᠷᠲᠡᠯᠡ ᠪᠣᠳᠣᠬᠤ ᠳ᠋ᠤ᠌ ᠲᠡᠭᠦᠨ ᠳ᠋ᠦ᠍ ᠪᠠᠭᠠ ᠬᠠᠲᠤᠨ ᠰᠡᠷᠭᠦᠮᠡ ᠶ᠋ᠢᠨ ᠨᠢᠯᠬᠠᠵᠢᠭᠤᠨ ᠤᠬᠠᠭᠠᠨ ᠭᠣᠣ ᠰᠧᠯᠢᠩ ᠦ᠋ᠨ ᠬᠠᠵᠠᠭᠤ ᠳ᠋ᠤ᠌ ᠶᠠᠭᠤ ᠴᠤ᠌ ᠪᠢᠰᠢ ᠰᠠᠨᠠᠭᠳᠠᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠬᠠᠭᠤᠴᠢᠨ ᠤ᠋ ᠬᠥᠮᠦᠰ ᠡᠷᠡ ᠬᠥᠮᠦᠨ ᠡᠷᠡ ᠬᠥᠮᠦᠨ ᠳ᠋ᠡᠭᠡᠨ ᠬᠠᠢᠷᠠᠲᠠᠢ ᠭᠡᠳᠡᠭ ᠪᠣᠯ ᠡᠮᠡ ᠬᠥᠮᠦᠨ ᠡᠮᠡ ᠬᠥᠮᠦᠨ ᠳ᠋ᠡᠭᠡᠨ ᠬᠠᠷᠠᠳᠠᠭᠠᠳ ᠪᠠᠢᠳᠠᠭ ᠨᠢ ᠡᠨᠡ ᠬᠣᠷᠸᠠ ᠶ᠋ᠢᠨ ᠪᠠᠰᠠ ᠨᠢᠭᠡ ᠰᠣᠯᠣᠭᠠᠢ ᠵᠢᠮᠡ ᠶᠣᠰᠣ ᠪᠠᠢᠵᠠᠢ᠃
ᠮᠠᠨᠤᠨᠪᠠᠳᠮᠠ᠂ ᠡᠪᠡᠳᠴᠢᠨ ᠳ᠋ᠦ᠍ ᠪᠣᠭᠣᠭᠳᠠᠭᠰᠠᠨ ᠡᠪᠦᠭᠡᠨ ᠦ᠌ ᠪᠡᠨ ᠰᠡᠷᠡᠭᠦᠨ ᠪᠠᠢᠭᠠ ᠳ᠋ᠤ᠌ ᠱᠠᠯᠠᠪᠬᠠᠨ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠲᠡᠢ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠣᠴᠢᠵᠤ ᠵᠣᠯᠭᠠᠨ ᠬᠥᠪᠡᠭᠦᠨ ᠴᠣᠭᠪᠠᠭᠠᠲᠤᠷ ᠢ᠋ᠶ᠋ᠠᠨ ᠡᠴᠢᠭᠡ ᠶ᠋ᠢᠨ ᠣᠷᠣ ᠶ᠋ᠢ ᠳᠠᠷᠤᠵᠤ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠪᠤᠶᠤ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠤ᠋ ᠲᠤᠰᠢᠶᠠᠯ ᠳ᠋ᠤ᠌ ᠳᠡᠪᠰᠢᠭᠦᠯᠬᠦ ᠪᠡᠷ ᠵᠥᠪᠰᠢᠶᠡᠷᠡᠭᠦᠯᠬᠦ ᠳ᠋ᠦ᠍ ᠣᠨᠴᠠ ᠶ᠋ᠢᠨ ᠠᠰᠠᠭᠤᠳᠠᠯ ᠦᠭᠡᠢ ᠪᠠᠢᠬᠠ! ᠲᠡᠷᠡ ᠪᠡᠷ ᠬᠥᠭᠰᠢᠨ ᠨᠢᠭᠤᠷ ᠢ᠋ ᠮᠢᠨᠢ ᠪᠣᠳᠣᠵᠤ ᠬᠥᠪᠡᠭᠦᠨ ᠢ᠋ ᠮᠢᠨᠢ ᠳᠡᠭᠡᠭᠰᠢ ᠲᠠᠲᠠᠵᠤ ᠶᠠᠮᠠᠷ ᠴᠤ᠌ ᠭᠡᠰᠡᠨ ᠨᠣᠶᠠᠨ ᠵᠡᠷᠭᠡ ᠥᠭᠭᠦᠯ ᠦᠭᠡᠢ ᠳᠡ! ᠭᠡᠵᠦ ᠪᠠᠲᠤ ᠢᠳᠡᠭᠡᠨ ᠡᠪᠦᠭᠡᠨ ᠦ᠌ ᠪᠡᠨ ᠰᠣᠨᠣᠷ ᠲᠤ᠌ ᠰᠣᠨᠣᠰᠬᠤᠯᠠᠩᠲᠠᠢ ᠶᠠᠭᠤᠮᠠ ᠰᠣᠨᠣᠰᠬᠠᠬᠤ ᠶᠤᠮᠰᠠᠨ ᠭᠡᠵᠦ ᠮᠣᠷᠢᠨ ᠳᠡᠯ ᠳᠡᠭᠡᠭᠦᠷ ᠶᠠᠭᠠᠷᠠᠨ ᠳᠣᠪᠲᠣᠯᠭᠠᠨᠠ᠁
ᠮᠠᠨᠤᠨᠪᠠᠳᠮᠠ ᠰᠠᠨᠠᠭᠰᠠᠨ ᠠ᠋ᠴᠠ ᠪᠠᠨ ᠴᠠᠭᠠᠰᠢ ᠭᠠᠪᠢᠶᠠᠷᠬᠠᠭ ᠰᠠᠢᠬᠠᠨ ᠶᠠᠭᠤᠮᠠ ᠰᠠᠨᠠᠵᠤ ᠶᠠᠪᠤᠲᠠᠯᠠ ᠠᠷᠤ ᠠ᠋ᠴᠠ《ᠲᠤᠰᠠᠯᠠᠭᠴᠢ ᠭᠤᠸᠠᠢ ᠶᠢᠷᠲᠢᠨᠴᠦ ᠶ᠋ᠢᠨ ᠮᠥᠩᠬᠡ ᠪᠤᠰᠤ ᠶ᠋ᠢ ᠦᠵᠡᠭᠦᠯᠴᠢᠬᠡᠯᠡ᠁》 ᠭᠡᠰᠡᠨ ᠳᠠᠭᠤᠳᠠᠯᠭᠠ ᠢᠷᠡᠵᠦ ᠲᠡᠭᠦᠨ ᠦ᠌ ᠮᠣᠷᠢᠨ ᠤ᠋ ᠵᠢᠯᠣᠭᠣ ᠶ᠋ᠢ ᠡᠷᠭᠢᠭᠦᠯᠪᠡ᠃
ᠬᠠᠭᠤᠴᠢᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠣᠣ ᠰᠠᠮᠠᠭᠠᠨ ᠤ᠋ ᠪᠠᠨ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠᠬᠠᠨ ᠭᠡᠨᠡᠳᠲᠡ ᠳᠣᠲᠣᠷᠠ ᠨᠢ ᠬᠠᠷᠠᠩᠭᠤᠢᠯᠠᠬᠤ ᠰᠢᠭ᠋ ᠪᠣᠯᠬᠤ ᠳ᠋ᠤ᠌ ᠬᠦᠦ ᠪᠡᠨ ᠬᠠᠵᠠᠭᠤ ᠳ᠋ᠠᠭᠠᠨ ᠳᠠᠭᠤᠳᠠᠵᠤ᠂ ᠳᠡᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠣᠣᠷᠠ ᠠ᠋ᠴᠠ ᠤᠯᠠᠭᠠᠨ ᠱ᠌ᠢᠷᠦᠨ ᠵᠢᠩᠰᠡᠲᠦ ᠮᠠᠨᠤᠬᠤᠨ ᠬᠥᠬᠦᠦᠷ ᠭᠠᠷᠭᠠᠵᠤ᠄
一 ᠡᠨᠡ ᠪᠣᠯ ᠴᠢᠨᠦ ᠡᠪᠦᠭᠡ ᠶ᠋ᠢᠨ ᠡᠪᠦᠭᠡ ᠶ᠋ᠢᠨ ᠦᠶᠡ ᠡᠴᠡ ᠤᠳᠤᠮ ᠳᠠᠮᠵᠢᠨ ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠢᠬᠡᠷᠡ ᠬᠣᠶᠠᠷ ᠮᠠᠨᠤᠬᠤᠨ ᠬᠥᠬᠦᠦᠷ ᠦ᠋ᠨ ᠥᠷᠥᠭᠡᠰᠦᠨ ᠨᠢ᠃ ᠮᠠᠨ ᠤ᠋ ᠳᠡᠭᠡᠳᠦᠭᠦᠯᠡ ᠡᠷᠲᠡ ᠦᠶᠡ ᠳ᠋ᠦ᠍ ᠶᠡᠬᠡ ᠪᠠᠭᠠᠲᠤᠷ ᠬᠥᠮᠦᠨ ᠪᠠᠢᠯᠠ ᠭᠡᠰᠡᠨ᠃ ᠴᠢᠩ ᠤᠯᠤᠰ ᠤ᠋ᠨ ᠴᠡᠷᠢᠭ ᠲᠡᠢ ᠬᠠᠮᠵᠢᠵᠤ ᠬᠢᠲᠠᠳ ᠤ᠋ᠨ ᠮᠢᠩ ᠤᠯᠤᠰ᠂ ᠰᠣᠯᠣᠩᠭᠣᠰ ᠤᠯᠤᠰ ᠢ᠋ ᠳᠠᠢᠯᠠᠨ ᠪᠠᠢᠯᠳᠤᠬᠤ ᠲᠡᠢᠨ ᠳ᠋ᠦ᠍ ᠣᠷᠣᠯᠴᠠᠨ ᠭᠠᠪᠢᠶᠠ ᠪᠠᠢᠭᠤᠯᠤᠯᠠ ᠭᠡᠳᠡᠭ᠃ ᠡᠭᠦᠨ ᠳ᠋ᠦ᠍ ᠡᠶᠡᠪᠡᠷ ᠵᠠᠰᠠᠭᠴᠢ ᠬᠠᠭᠠᠨ ᠠ᠋ᠴᠠ ᠲᠡᠭᠦᠨ ᠳ᠋ᠦ᠍ ᠢᠬᠡᠷᠡ ᠬᠣᠶᠠᠷ ᠱ᠌ᠢᠷᠦᠨ ᠵᠢᠩᠰᠡ ᠲᠡᠢ ᠠᠯᠲᠠᠨ ᠪᠥᠷᠵᠡᠲᠦ ᠮᠠᠨᠤᠬᠤᠨ ᠬᠥᠬᠦᠦᠷ ᠱᠠᠩᠨᠠᠵᠤ ᠥᠭᠬᠦ ᠳ᠋ᠡᠭᠡᠨ《ᠵᠠᠰᠠᠭ ᠲᠥᠷᠥ ᠴᠡᠷᠢᠭ ᠲᠡᠢᠨ ᠳ᠋ᠦ᠍ ᠰᠢᠭᠤᠷᠬᠠᠢᠯᠠᠭᠰᠠᠨ ᠬᠥᠮᠦᠨ᠁》 ᠭᠡᠵᠦ ᠮᠠᠭᠲᠠᠭᠰᠠᠨ ᠭᠡᠨᠡ᠃ ᠲᠡᠭᠡᠭᠡᠳ ᠳᠡᠭᠡᠳᠦᠭᠦᠯᠡ ᠶ᠋ᠢᠨ ᠦᠶᠡ ᠡᠴᠡ ᠡᠭᠦᠨ ᠢ᠋ ᠤᠳᠤᠮ ᠵᠠᠯᠭᠠᠭᠰᠠᠨ《ᠭᠣᠯᠣᠮᠲᠠ ᠡᠷᠳᠡᠨᠢ》 ᠪᠡᠷ ᠨᠠᠨᠳᠢᠩᠨᠠᠵᠤ ᠤᠯᠠᠮᠵᠢᠯᠠᠭᠰᠠᠨ ᠰᠠᠨ᠃ ᠡᠭᠦᠨ ᠢ᠋ ᠪᠡᠨ ᠡᠷᠬᠢᠮᠯᠡᠵᠦ ᠶᠠᠪᠤᠭᠠᠷᠠᠢ! ᠨᠥᠭᠦᠭᠡ ᠥᠷᠥᠭᠡᠰᠦᠨ ᠢ᠋᠁ ᠠᠷᠤ ᠭᠣᠪᠢ ᠶ᠋ᠢᠨ ᠨᠤᠲᠤᠭ ᠲᠤ᠌᠁ ᠭᠡᠵᠦ ᠬᠡᠯᠡᠬᠦ ᠭᠡᠰᠡᠨ ᠦᠭᠡ ᠨᠢ ᠲᠠᠰᠤᠯᠳᠠᠨ ᠵᠠᠩᠭᠢᠷᠠᠵᠤ ᠨᠢᠳᠦᠨ ᠳ᠋ᠦ᠍ᠨᠢ ᠵᠠᠢᠷ ᠬᠠᠢᠯᠵᠤ᠂ ᠬᠣᠪᠢᠯᠴᠡᠴᠡᠭ ᠪᠦᠰᠡᠭᠦᠢ ᠶ᠋ᠢᠨ ᠰᠠᠢᠬᠠᠨ ᠴᠢᠷᠠᠢ ᠪᠥᠷᠭᠥᠯᠵᠡᠨ ᠬᠠᠷᠠᠭᠳᠠᠭᠠᠳ《ᠴᠡᠩᠬᠡᠷ ᠴᠠᠭᠠᠨ ᠡᠭᠦᠯᠡ》 ᠭᠡᠳᠡᠭ ᠳᠠᠭᠤᠤ ᠶ᠋ᠢᠨ ᠠᠶᠠ ᠨᠠᠪ ᠨᠠᠮᠬᠠᠨ ᠬᠠᠩᠭᠢᠨᠠᠬᠤ ᠰᠢᠭ᠋ ᠰᠣᠨᠣᠰᠳᠠᠨ ᠥᠪᠡᠷ ᠢ᠋ᠶ᠋ᠡᠨ ᠬᠠᠷᠢᠨ ᠴᠡᠯᠮᠡᠭ ᠣᠭᠲᠠᠷᠭᠤᠢ ᠳ᠋ᠤ᠌ ᠭᠦᠪᠦᠯᠵᠡᠭᠰᠡᠨ ᠴᠡᠩᠬᠡᠷ ᠴᠠᠭᠠᠨ ᠡᠭᠦᠯᠡᠨ ᠳ᠋ᠦ᠍ ᠳᠡᠭᠳᠡᠭᠰᠡᠨ ᠰᠢᠭ ᠪᠣᠯᠤᠭᠠᠳ ᠶᠠᠪᠤᠴᠢᠬᠠᠯᠠ᠁
ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠢ᠋ ᠵᠠᠪᠳᠤᠵᠤ ᠢᠷᠡᠬᠦ ᠳ᠋ᠦ᠍ ᠮᠢᠩᠭᠠᠨᠪᠣᠣ ᠲᠤᠰᠠᠯᠠᠭᠴᠢ ᠨᠢᠭᠡᠨᠲᠡ ᠠᠮᠤᠷᠯᠢᠩᠭᠤᠢ ᠲᠠᠢᠪᠤᠩ ᠨᠣᠢᠷᠰᠤᠭᠰᠠᠨ ᠪᠠᠢᠯᠠ᠃
ᠲᠡᠭᠦᠨ ᠡᠴᠡ ᠬᠣᠢᠰᠢ ᠴᠣᠭᠪᠠᠭᠠᠲᠤᠷ ᠨᠠᠰᠤᠲᠠᠢ ᠡᠵᠢ ᠡᠴᠡ ᠪᠡᠨ ᠱ᠌ᠢᠷᠦᠨ ᠵᠢᠩᠰᠡ ᠲᠡᠢ ᠥᠷᠥᠭᠡᠰᠦᠨ ᠮᠠᠨᠤᠬᠤᠨ ᠬᠥᠬᠦᠦᠷ ᠦ᠋ᠨ ᠲᠤᠬᠠᠢ ᠲᠠᠰᠤᠭ ᠪᠤᠰᠠᠭ ᠰᠣᠨᠣᠰᠬᠠᠯ ᠳᠣᠮᠣᠭ ᠢ᠋ ᠰᠣᠨᠣᠰᠴᠤ ᠡᠭᠦᠨ ᠢ᠋ᠶ᠋ᠡᠨ ᠦᠷᠬᠦᠢ ᠪᠡᠶᠡ ᠳ᠋ᠡᠭᠡᠨ ᠠᠪᠴᠤ ᠠᠮᠢ ᠲᠠᠢ ᠪᠠᠨ ᠬᠣᠯᠪᠣᠳᠠᠭ ᠪᠣᠯᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ᠂ ᠣᠳᠣᠨᠬᠤᠸᠠᠷ