ᠦᠷ ᠦᠨ ᠲᠤᠶᠠᠭᠠ II – ᠪ᠂ ᠷᠢᠨᠴᠢᠨ - ᠬᠣᠶᠠᠳᠤᠭᠠᠷ ᠲᠡᠪᠲᠡᠷ <ᠭᠠᠯ ᠤᠰᠤᠨ ᠤ ᠭᠠᠰᠢᠭᠤᠨ ᠵᠣᠪᠠᠯᠠᠩ>- ᠠᠷᠪᠠᠨ ᠨᠠᠢ᠍ᠮᠠ Үүрийн туяа II – Б ᠂ Ренчин Хоёрдугаар дэвтэр "Гал усны гашуун зовлон"-18
291ᠠᠷᠪᠠᠨ ᠨᠠᠢ᠍ᠮᠠ᠂ ULTIMO RACIO REGUM*
Old Tartary the fierce I saw teh
whelming vintage hotly pierce
John keats * *
— ᠨᠣᠶᠠᠨ᠂ ᠥᠨᠥ ᠣᠷᠣᠢ ᠶ᠋ᠢᠨ ᠳᠡᠭᠡᠷᠡᠬᠢ ᠶ᠋ᠢᠨ ᠨᠠᠢᠷ ᠲᠤ᠌ ᠲᠠ ᠮᠣᠷᠢᠯᠠᠬᠤ ᠦᠭᠡᠢ ᠪᠠᠢᠪᠠᠯ ᠶᠠᠭᠠᠬᠢᠨᠠ ᠳᠠ ᠠ᠋? ᠪᠢ ᠲᠠᠨ ᠤ᠋ ᠠᠮᠢ ᠨᠠᠰᠤᠨ ᠤ᠋ ᠲᠥᠯᠥᠭᠡ ᠰᠡᠳᠬᠢᠯ ᠵᠣᠪᠠᠨᠢᠵᠤ ᠪᠠᠢᠨᠠ᠃
— ᠠ᠂ ᠲᠡᠭᠡᠵᠦ ᠣᠴᠢᠬᠤ ᠦᠭᠡᠢ ᠪᠠᠢᠵᠤ ᠪᠣᠯᠬᠤ ᠦᠭᠡᠢ ᠪᠣᠯᠤᠭᠰᠠᠨ᠃ ᠲᠠ ᠬᠠᠭᠠᠨ ᠢ᠋ ᠮᠡᠳᠡᠨᠡ ᠰᠢᠦ ᠳᠡ᠂ ᠥᠨᠥᠳᠥᠷ ᠬᠣᠶᠠᠷ ᠤᠳᠠᠭᠠ ᠵᠠᠷᠯᠠᠵᠤ᠂ ᠥᠷᠯᠥᠭᠡ ᠶᠠᠮᠤᠨ ᠳ᠋ᠤ᠌᠂ ᠣᠳᠣ ᠪᠠᠰᠠ ᠮᠠᠨᠠᠢ (ᠮᠠᠨ ᠤ᠋) ᠳ᠋ᠤ᠌ ᠬᠠᠭᠠᠯᠭᠠᠴᠢ ᠪᠠᠨ ᠶᠠᠪᠤᠭᠤᠯᠵᠠᠢ᠃ ᠵᠠᠪᠠᠯ ᠣᠴᠢᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠵᠠᠬᠢᠭᠤᠯᠤᠭᠰᠠᠨ᠃ ᠬᠡᠷᠪᠡ ᠨᠠᠮᠠᠶ᠋ᠢ (ᠨᠠᠮᠠ ᠶ᠋ᠢ) ᠡᠰᠡ ᠣᠴᠢᠪᠠᠯ᠂ ᠬᠠᠭᠠᠯᠭᠠᠴᠢ ᠨᠠᠷ ᠳᠠᠪᠬᠢᠵᠤ ᠢᠷᠡᠭᠡᠳ᠂ ᠬᠠᠭᠠᠨ ᠤ᠋ ᠡᠮᠦᠨᠡ ᠡᠴᠡ ᠳᠠᠷᠠᠰᠤ ᠬᠦᠷᠭᠡᠵᠦ ᠢᠷᠡᠯᠡ ᠭᠡᠳ ᠲᠥᠷᠥᠯ ᠠᠷᠠᠯᠵᠢᠬᠤ ᠠᠷᠠᠵᠠ ᠵᠠᠪᠠᠯ ᠠᠮᠰᠠᠭᠤᠯᠤᠨᠠ᠃ ᠲᠡᠭᠡᠭᠰᠡᠨ ᠡᠴᠡ ᠪᠠᠷᠰ ᠤ᠋ᠨ ᠡᠭᠦᠷᠦᠨ ᠳ᠋ᠦ᠍ᠨᠢ(ᠡᠭᠦᠷ ᠲᠦ᠍ ᠨᠢ) ᠠᠵᠠ ᠮᠡᠳᠡᠨ ᠣᠷᠣᠪᠠᠯ ᠳᠡᠭᠡᠷᠡ ᠪᠢᠵᠡ᠃
— ᠳᠡᠭᠡᠷᠡᠬᠢ ᠶ᠋ᠢᠨ ᠨᠠᠢᠷ ᠳᠡᠭᠡᠷᠡ᠂ ᠡᠬᠡ ᠳᠠᠭᠢᠨᠢ ᠥᠨᠥᠬᠢ ᠲᠥᠷᠥᠯ ᠠᠷᠠᠯᠵᠢᠬᠤ ᠠᠷᠠᠵᠠ ᠲᠠᠨ ᠳ᠋ᠤ᠌ ᠪᠠᠷᠢᠪᠠᠯ ᠶᠠᠭᠠᠬᠢᠨᠠ?
— ᠲᠡᠭᠡᠪᠡᠯ ᠰᠣᠭᠲᠣᠭᠤ ᠪᠠᠷ ᠳᠠᠯᠢᠮᠳᠠᠭᠤᠯᠤᠨ ᠬᠤᠨᠳᠠᠭᠠ ᠶ᠋ᠢ ᠤᠨᠠᠭᠠᠵᠤ ᠠᠰᠬᠠᠨᠠ᠃ ᠢᠳᠡᠬᠦ ᠤᠤᠭᠤᠬᠤ ᠳ᠋ᠠᠭᠠᠨ (ᠳ᠋ᠤ᠌ ᠪᠠᠨ) ᠬᠥᠮᠦᠨ ᠦ᠌ ᠤᠤᠭᠤᠭᠰᠠᠨ ᠢᠳᠡᠭᠰᠡᠨ ᠭᠠᠵᠠᠷ ᠠ᠋ᠴᠠ ᠨᠢ ᠯᠡ ᠢᠳᠡᠵᠦ ᠤᠤᠭᠤᠯᠴᠠᠭᠠᠳ ᠪᠠᠢᠪᠠᠯ᠂ ᠨᠢᠭᠡ ᠤᠳᠠᠭᠠ ᠳ᠋ᠠᠭᠠᠨ (ᠳ᠋ᠤ᠌ ᠪᠠᠨ) ᠭᠠᠢ ᠦᠭᠡᠢ ᠪᠣᠯᠪᠠᠤ(ᠪᠣᠯᠪᠠ ᠤᠤ)᠃ ᠬᠠᠷᠢᠨ ᠪᠤᠴᠠᠬᠤ ᠵᠠᠮ ᠳ᠋ᠤ᠌ ᠮᠢᠨᠢ《 ᠮᠣᠷᠢᠨ ᠠ᠋ᠴᠠ ᠣᠢᠴᠢᠯᠠ》 ᠭᠡᠵᠦ ᠬᠣᠵᠢᠮ ᠰᠢᠯᠲᠠᠬᠤ ᠨᠢᠭᠡ ᠶᠠᠭᠤᠮᠠ ᠠᠷᠭᠠᠯᠠᠵᠤ ᠮᠠᠭᠠᠳ ᠦᠭᠡᠢ᠃
— ᠨᠣᠶᠠᠨ᠂ ᠪᠢ ᠬᠣᠶᠠᠷ ᠰᠠᠢᠨ ᠬᠢᠶᠡ ᠳᠠᠭᠠᠭᠤᠯ ᠪᠣᠯᠭᠠᠵᠤ ᠶᠠᠪᠤᠭᠤᠯᠤᠶᠠ᠃ ᠶᠠᠪᠤᠬᠤ ᠵᠠᠮ ᠳ᠋ᠤ᠌ ᠰᠡᠭᠦᠳᠡᠷ ᠮᠡᠲᠦ ᠰᠠᠯᠤᠯ ᠦᠭᠡᠢ ᠳᠠᠭᠠᠵᠤ ᠬᠠᠮᠠᠭᠠᠯᠠ ᠭᠡᠵᠦ ᠵᠠᠬᠢᠵᠤ ᠬᠤᠷᠳᠤᠨ ᠫᠤᠤ ᠪᠠᠷᠢᠭᠤᠯᠵᠤ ᠶᠠᠪᠤᠭᠤᠯᠤᠶᠠ᠃ ᠨᠣᠶᠠᠨ ᠳ᠋ᠤ᠌᠂ ᠰᠠᠯᠬᠢᠨ ᠳ᠋ᠤ᠌ ᠭᠦᠢᠴᠡᠭᠳᠡᠳᠡᠭ ᠦᠭᠡᠢ ᠬᠤᠷᠳᠤᠨ ᠵᠢᠷᠣᠭᠠ ᠪᠣᠷᠣ ᠬᠦᠯᠦᠭ ᠢ᠋ ᠡᠮᠡᠭᠡᠯᠯᠡᠵᠦ ᠥᠭᠭᠦᠶᠡ᠃
ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠭᠠᠳᠠᠭᠠᠳᠤ ᠶᠠᠮᠤᠨ ᠤ᠋ ᠰᠠᠢᠳ᠂ ᠬᠠᠨᠳᠠᠳᠣᠷᠵᠢ ᠴᠢᠨ ᠸᠠᠩ ᠪᠤᠶᠤ ᠬᠤᠷᠢᠶᠠᠩᠭᠤᠢᠯᠠᠪᠠᠯ ᠬᠠᠨᠳᠠ ᠸᠠᠩ ᠭᠡᠳᠡᠭ ᠦ᠋ᠨ ᠬᠤᠰᠢᠭᠤᠨ ᠤ᠋ ᠴᠡᠷᠢᠭ ᠡᠷᠡ ᠶ᠋ᠢ ᠮᠡᠳᠡᠬᠦ ᠵᠠᠭᠳᠠ ᠵᠠᠬᠢᠷᠤᠭᠴᠢ᠂ ᠰᠠᠢᠳ ᠴᠢᠨ ᠸᠠᠩ ᠲᠠᠢ ᠰᠠᠶᠢᠬᠠᠨ ᠦᠭᠡ ᠬᠡᠯᠡᠯᠴᠡᠭᠡᠳ ᠴᠢᠷᠠᠢ ᠳ᠋ᠤᠨᠢ(ᠳ᠋ᠤ᠌ ᠨᠢ) ᠵᠣᠪᠠᠨᠢᠬᠤ ᠪᠠᠢᠳᠠᠯ ᠮᠡᠳᠡᠭᠳᠡᠨ᠂ ᠮᠡᠬᠦᠢᠰᠬᠢᠨ ᠶᠣᠰᠣᠯᠠᠵᠤ᠂ ᠬᠡᠪᠢᠰ ᠴᠢᠮᠡᠭ ᠪᠣᠯᠤᠭᠰᠠᠨ ᠨᠣᠶᠠᠨ ᠤ᠋ ᠦᠷᠭᠦᠭᠡᠨ ᠡᠴᠡ ᠭᠠᠷᠪᠠ᠃
ᠬᠠᠨᠳᠠ ᠸᠠᠩ᠂ ᠵᠠᠬᠢᠷᠤᠭᠴᠢ ᠶ᠋ᠢ ᠭᠠᠷᠤᠭᠰᠠᠨ ᠬᠣᠢᠨᠠ ᠪᠣᠳᠣᠯᠭᠠ ᠪᠣᠯᠵᠤ ᠰᠠᠭᠤᠪᠠ᠃ ᠥᠴᠥᠭᠡᠳᠦᠷ ᠬᠠᠭᠠᠨ ᠳ᠋ᠤ᠌ ᠪᠠᠷᠠᠭᠠᠯᠬᠠᠭᠠᠳ (ᠪᠠᠷᠠᠯᠬᠠᠭᠠᠳ) ᠰᠠᠨᠠᠯ ᠡᠷᠡᠰ ᠵᠥᠷᠢᠭᠰᠡᠨ ᠢ᠋ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠪᠠᠯ᠂ ᠬᠠᠭᠠᠨ ᠵᠢᠯ ᠪᠦᠷᠢ ᠣᠷᠣᠰ ᠤᠯᠤᠰ ᠲᠤ᠌ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ᠂ ᠮᠥᠨ ᠲᠤᠰᠬᠠᠢ ᠰᠤᠷᠭᠠᠭᠤᠯᠢ ᠦᠢᠯᠡᠳᠦᠭᠦᠯᠬᠦ ᠪᠡᠷ ᠰᠤᠷᠤᠭᠴᠢᠳ ᠶᠠᠪᠤᠭᠤᠯᠬᠤ ᠶ᠋ᠢ ᠲᠠᠲᠠᠭᠠᠯᠵᠠᠵᠤ᠂ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢᠨ ᠥᠩᠭᠡ ᠪᠠᠢᠳᠠᠯ ᠨᠢ ᠬᠡᠳᠦᠢᠪᠡᠷ ᠬᠠᠭᠠᠨ ᠤ᠋ ᠠᠮᠠᠨ ᠠ᠋ᠴᠠ ᠭᠠᠷᠤᠭᠰᠠᠨ ᠦᠭᠡ ᠪᠣᠯᠪᠠᠴᠤ᠂ ᠥᠭᠡᠷᠡ ᠬᠥᠮᠦᠨ ᠦ᠌ ᠦᠭᠡ ᠳᠠᠪᠲᠠᠨ ᠬᠡᠯᠡᠵᠦ᠂ ᠪᠤᠰᠤᠳ ᠤ᠋ᠨ ᠠᠮᠠ ᠪᠠᠷ ᠪᠤᠳᠠᠭᠠ ᠢᠳᠡᠵᠦ ᠪᠠᠢᠭᠠ ᠪᠠᠢᠳᠠᠯ ᠳᠠᠩᠴᠢ(ᠳᠠᠩᠴᠤ) ᠢᠯᠡᠷᠬᠡᠢ ᠪᠠᠢᠵᠠᠢ᠃ ᠬᠠᠨᠳᠠ ᠸᠠᠩ ᠢ᠋᠂ ᠣᠷᠣᠰ ᠤ᠋ᠨ ᠶᠠᠭᠤᠮᠠ ᠪᠦᠭᠦᠳᠡ ᠶ᠋ᠢ ᠬᠡᠲᠦᠷᠬᠡᠢ ᠣᠢᠰᠢᠶᠠᠵᠤ ᠳᠣᠲᠣᠨᠣ ᠦᠵᠡᠳᠡᠭ ᠭᠡᠵᠦ ᠬᠠᠭᠠᠨ ᠤ᠋ ᠳᠠᠭᠠᠷᠢᠨ ᠬᠡᠯᠡᠬᠦ ᠳ᠋ᠦ᠍᠂ ᠤᠲᠤᠭᠠ ᠲᠠᠢ ᠮᠠᠯᠠᠭᠠᠢ ᠡᠮᠦᠰᠴᠦ ᠭᠠᠷᠪᠠᠰᠤ᠂ ᠰᠠᠢᠳ ᠤ᠋ᠨ ᠣᠢᠷᠠᠬᠢ ᠰᠢᠳᠠᠷ ᠪᠦᠭᠦᠳᠡ ᠭᠠᠳᠠᠭᠠ᠂ ᠡᠪᠦᠯ ᠦ᠋ᠨ ᠡᠬᠢᠨ ᠰᠠᠷᠠ ᠶ᠋ᠢᠨ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠪᠡᠷ ᠳᠠᠭᠤᠨ ᠴᠢᠮᠡᠭᠡ ᠦᠭᠡᠢ ᠤᠭᠲᠤᠨ ᠲᠣᠰᠴᠤ᠂ ᠴᠢᠨ ᠸᠠᠩ ᠤ᠋ᠨ ᠤᠨᠤᠳᠠᠭ ᠬᠠᠢᠷᠠᠲᠠᠢ ᠵᠢᠷᠣᠭᠠ ᠪᠣᠷᠣ ᠬᠦᠯᠦᠭ ᠮᠣᠷᠢ ᠶ᠋ᠢ ᠳᠠᠭᠤᠨ ᠴᠢᠮᠡᠭᠡ ᠦᠭᠡᠢ ᠠᠪᠴᠢᠷᠠᠪᠠ᠃ ᠬᠣᠶᠠᠷ ᠴᠢᠭᠢᠷᠠᠭ ᠴᠡᠷᠢᠭ ᠡᠷᠡ᠂ ᠰᠠᠢᠳ ᠢ᠋ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠬᠤ ᠶ᠋ᠢ ᠳᠠᠭᠤᠨ ᠴᠢᠮᠡᠭᠡ ᠦᠭᠡᠢ ᠬᠦᠯᠢᠶᠡᠨ ᠵᠣᠭᠰᠣᠵᠤ ᠪᠠᠢᠪᠠ᠃
ᠳᠡᠭᠡᠷᠡᠬᠢ ᠶ᠋ᠢᠨ ᠨᠠᠢᠷ ᠲᠤ᠌ ᠡᠴᠦᠰ ᠦ᠋ᠨ ᠤᠳᠠᠭᠠ ᠣᠴᠢᠵᠤ ᠶᠠᠪᠤᠭᠠ ᠰᠠᠢᠳ ᠢ᠋ ᠦᠳᠡᠬᠦ ᠭᠡᠵᠦ ᠳᠠᠭᠤᠨ ᠴᠢᠮᠡᠭᠡ ᠦᠭᠡᠢ ᠴᠤᠭᠯᠠᠭᠠᠳ᠂ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠳ᠋ᠦ᠍ ᠬᠠᠷᠠᠯᠠᠨ ᠣᠪᠣᠭᠠᠷᠠᠯᠳᠤᠵᠤ ᠵᠣᠭᠰᠣᠭᠰᠠᠨ ᠤᠯᠤᠰ ᠢ᠋ ᠡᠷᠭᠢᠵᠦ ᠬᠠᠷᠠᠭᠠᠳ᠂ ᠬᠠᠨᠳᠠ ᠸᠠᠩ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ᠂ ᠡᠮᠦᠨᠡ ᠵᠦᠭ᠂ ᠲᠤᠤᠯᠠ ᠶ᠋ᠢᠨ ᠬᠥᠪᠡᠭᠡ ᠳ᠋ᠡᠬᠢ ᠬᠠᠭᠠᠨ ᠤ᠋ ᠣᠷᠳᠣᠨ ᠤ᠋ ᠵᠦᠭ ᠮᠣᠷᠢᠨ ᠤ᠋ ᠰᠡᠭᠦᠯ ᠬᠥᠳᠡᠯᠭᠡᠨ ᠶᠠᠪᠤᠪᠠ᠃ ᠫᠤᠤ ᠲᠠᠢ ᠬᠣᠶᠠᠷ ᠴᠡᠷᠢᠭ ᠬᠣᠢᠨᠠ ᠠ᠋ᠴᠠ ᠨᠢ ᠪᠠᠷᠠᠭᠠ(ᠪᠠᠷᠠ) ᠪᠣᠯᠵᠤ ᠳᠠᠭᠠᠯᠳᠤᠪᠠ᠃ ᠠᠮᠢᠲᠠᠨ ᠤ᠋ ᠬᠥᠯ ᠲᠠᠰᠤᠷᠠᠵᠤ ᠨᠠᠮ ᠭᠦᠮ ᠪᠣᠯᠤᠭᠰᠠᠨ ᠬᠦᠷᠢᠶᠡᠨ ᠦ᠌ ᠭᠤᠳᠤᠮᠵᠢ ᠴᠢᠯᠥᠭᠡ ᠪᠡᠷ ᠶᠠᠪᠠᠭᠠᠨ ᠰᠢᠭᠤᠷᠭᠠ᠂ ᠴᠠᠰᠤ ᠰᠡᠷᠴᠢᠭᠢᠨᠡᠭᠦᠯᠦᠨ ᠰᠢᠭᠤᠷᠪᠠ᠃
ᠰᠠᠢᠳ ᠸᠠᠩ ᠤ᠋ᠨ ᠬᠠᠰᠢᠶᠠᠨ ᠳ᠋ᠤ᠌ ᠲᠡᠷᠡ ᠰᠥᠨᠢ᠂ ᠬᠥᠮᠦᠨ ᠨᠢᠳᠦ ᠠᠨᠢᠭᠰᠠᠨ ᠦᠭᠡᠢ᠂ ᠬᠠᠰᠢᠶᠠᠨ ᠳᠣᠲᠣᠷᠠᠬᠢ ᠭᠡᠷ᠂ ᠰᠠᠢᠳ ᠤ᠋ᠨ ᠪᠠᠢᠰᠢᠩ ᠳ᠋ᠤ᠌ ᠴᠥᠮ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠰᠦᠮᠡᠯᠵᠡᠨ᠂ ᠦᠭᠡ ᠳᠠᠭᠤᠨ ᠶᠠᠷᠢᠶᠠ ᠴᠢᠮᠡᠭᠡ ᠪᠡᠨ ᠬᠤᠷᠢᠶᠠᠭᠰᠠᠨ ᠤᠯᠤᠰ᠂ ᠰᠠᠯᠬᠢᠨ ᠤ᠋ ᠴᠢᠮᠡᠭᠡ ᠴᠢᠩᠨᠠᠨ ᠪᠡᠶᠡ ᠪᠡᠶᠡ ᠶ᠋ᠢᠨ ᠥᠭᠡᠳᠡ ᠬᠠᠶᠠ ᠬᠠᠷᠠᠵᠤ᠂ ᠠᠮᠠᠨ ᠳᠣᠲᠣᠷᠠ ᠪᠠᠨ ᠤᠷᠤᠭᠤᠯ ᠬᠥᠳᠡᠯᠭᠡᠨ ᠵᠠᠯᠪᠠᠷᠢᠵᠠᠭᠠᠵᠤ ᠪᠠᠢᠪᠠ᠃ ᠭᠡᠨᠡᠳᠲᠡ ᠦᠬᠡᠷ ᠴᠠᠭ ᠤ᠋ᠨ ᠰᠡᠭᠦᠯ ᠢ᠋ᠶ᠋ᠡᠷ ᠲᠠᠰᠢᠷᠠᠮ ᠬᠠᠭᠠᠯᠭᠠ ᠳᠤᠤᠭᠠᠷᠬᠤ ᠴᠢᠮᠡᠭᠡ ᠭᠠᠷᠤᠭᠰᠠᠨ ᠳ᠋ᠤ᠌ ᠂ ᠭᠡᠷ ᠡᠴᠡ ᠤᠯᠤᠰ ᠶᠠᠭᠠᠷᠠᠨ ᠤᠭᠲᠤᠷᠠ ᠭᠠᠷᠴᠠᠭᠠᠵᠤ᠂ ᠳᠡᠪᠡᠯ ᠬᠤᠪᠴᠠᠰᠤ ᠨᠢ ᠴᠠᠰᠤ ᠪᠣᠯᠤᠭᠰᠠᠨ ᠥᠨᠥᠬᠢ ᠬᠣᠶᠠᠷ ᠴᠡᠷᠢᠭ ᠦ᠋ᠨ ᠥᠭᠡᠳᠡ ᠡᠴᠡ ᠰᠢᠷᠲᠡᠨ ᠬᠠᠷᠠᠵᠤ᠂ ᠰᠠᠢᠳ ᠬᠠᠮᠢᠭᠠ ᠪᠠᠢᠨᠠ? ᠭᠡᠵᠦ ᠵᠠᠭᠳᠠ ᠵᠠᠬᠢᠷᠤᠭᠴᠢ ᠶ᠋ᠢᠨ ᠳᠠᠪᠲᠠᠨ ᠠᠰᠠᠭᠤᠬᠤ ᠳ᠋ᠤ᠌᠂
— ᠰᠠᠢᠳ ᠣᠷᠳᠣᠨ ᠠ᠋ᠴᠠ ᠭᠠᠷᠴᠤ ᠢᠷᠡᠭᠡ ᠦᠭᠡᠢ᠂ ᠪᠢᠳᠡ ᠬᠠᠰᠢᠶᠠᠨ ᠤ᠋ ᠭᠠᠳᠠᠨᠠ ᠵᠣᠭᠰᠣᠵᠤ᠂ ᠰᠠᠯᠬᠢ ᠰᠢᠭᠤᠷᠭᠠᠨ ᠳ᠋ᠤ᠌ ᠣᠰᠤᠭᠤᠨ ᠠᠯᠳᠠᠵᠤ᠂ ᠲᠦᠷ ᠳᠤᠯᠠᠭᠠᠴᠠᠬᠤ ᠭᠡᠵᠦ ᠢᠷᠡᠯᠡ᠃ ᠯᠠᠪᠯᠠᠵᠤ ᠠᠰᠠᠭᠤᠪᠠᠯ᠂ ᠦᠷ ᠵᠠᠪᠰᠠᠷᠯᠠᠬᠤ ᠠ᠋ᠴᠠ ᠨᠠᠰᠢ(ᠨᠠᠭᠠᠰᠢ) ᠨᠠᠢᠷ ᠲᠠᠷᠠᠬᠤ ᠦᠭᠡᠢ ᠭᠡᠨᠡ ᠪᠢᠯᠡ᠂ ᠭᠡᠬᠦ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ)᠃
— ᠵᠠ᠂ ᠡᠳᠡᠨ ᠳ᠋ᠦ᠍ ᠬᠠᠯᠠᠭᠤᠨ ᠴᠠᠢ ᠬᠣᠭᠣᠯᠠ ᠥᠭ᠃ ᠲᠠ ᠨᠠᠷ ᠳᠤᠯᠠᠭᠠᠴᠠᠭᠠᠳ ᠪᠣᠰᠢᠭᠣ ᠪᠤᠴᠠ᠃ ᠳᠤᠯᠠᠭᠠᠨ ᠬᠤᠪᠴᠠᠰᠤᠯᠠᠵᠤ ᠶᠠᠪᠤ᠃ ᠰᠠᠢᠳ ᠢ᠋ ᠬᠡᠵᠢᠶᠡ ᠯᠡ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ ᠨᠢ ᠪᠡᠯᠡᠨ ᠪᠠᠢ ᠭᠡᠵᠦ ᠲᠠ ᠨᠠᠷ ᠲᠤ᠌ ᠡᠰᠡ ᠬᠡᠯᠡᠯᠦ? ᠭᠡᠪᠡ᠃
ᠲᠠᠭᠠᠷᠠᠵᠤ ᠪᠡᠭᠡᠷᠡᠭᠰᠡᠨ ᠲᠡᠷᠡ ᠬᠣᠶᠠᠷ ᠴᠡᠷᠢᠭ᠂ ᠬᠠᠯᠠᠭᠤᠨ ᠬᠣᠭᠣᠯᠠ ᠤᠮᠳᠠ ᠢᠳᠡᠵᠦ ᠤᠤᠭᠤᠭᠠᠳ ᠳᠤᠯᠠᠭᠠᠴᠠᠵᠤ᠂ ᠳᠠᠬᠢᠨ ᠮᠣᠷᠢᠨ ᠳ᠋ᠠᠭᠠᠨ(ᠳ᠋ᠤ᠌ ᠪᠠᠨ)ᠮᠣᠷᠳᠠᠭᠠᠳ᠂ ᠬᠣᠢᠨᠠ ᠠ᠋ᠴᠠ ᠰᠠᠯᠬᠢᠯᠠᠬᠤ ᠰᠠᠯᠬᠢᠨ ᠳ᠋ᠤ᠌ ᠲᠠᠭᠤᠭᠳᠠᠨ᠂ ᠠᠯᠵᠠᠯ ᠦᠭᠡᠢ ᠲᠤᠤᠯᠠ ᠶ᠋ᠢᠨ ᠬᠥᠪᠡᠭᠡᠨ ᠳ᠋ᠡᠬᠢ ᠪᠣᠭᠳᠠ ᠬᠠᠭᠠᠨ ᠤ᠋ ᠣᠷᠳᠣᠨ ᠤ᠋ ᠵᠦᠭ ᠬᠠᠲᠠᠷᠢᠨ ᠣᠳᠪᠠ᠃
ᠬᠥᠯᠴᠥᠭᠦᠦ ᠬᠠᠭᠠᠨ᠂ ᠨᠠᠢᠷ ᠤ᠋ᠨ ᠪᠠᠭᠠ ᠲᠢᠩᠬᠢᠮ ᠳ᠋ᠦ᠍ ᠡᠬᠡ ᠳᠠᠭᠢᠨᠢ ᠲᠠᠢ ᠵᠡᠷᠭᠡᠴᠡᠨ ᠰᠠᠭᠤᠵᠤ᠂ ᠬᠣᠶᠠᠷ ᠲᠠᠯᠠ ᠳ᠋ᠤᠨᠢ ᠰᠢᠳᠠᠷ ᠰᠠᠢᠳ ᠤᠯᠠᠭᠠᠨ ᠵᠡᠭᠡᠷᠳᠡ ᠪᠣᠯᠵᠤ᠂ ᠡᠭᠦᠳᠡ ᠲᠤᠰᠢᠶᠠ ᠬᠤᠭᠤᠷᠴᠢ ᠳᠠᠭᠤᠤᠴᠢ ᠨᠠᠷ ᠨᠠᠢᠷ ᠤ᠋ᠨ ᠬᠥᠭᠵᠢᠮ ᠳᠠᠭᠤᠤ ᠡᠷᠭᠦᠵᠦ ᠰᠠᠭᠤᠪᠠ᠃ ᠳᠡᠷᠭᠡᠳᠡ ᠶ᠋ᠢᠨ ᠯᠠᠮᠠ ᠬᠠᠭᠠᠯᠭᠠᠴᠢ ᠨᠠᠷ ᠳ᠋ᠧᠩ ᠯᠡ ᠶ᠋ᠢᠨ ᠭᠡᠷᠡᠯ ᠵᠠᠰᠠᠵᠤ᠂ ᠯᠠ ᠰᠣᠯᠢᠵᠤ ᠴᠢᠮᠡᠭᠡ ᠦᠭᠡᠢ ᠭᠢᠰᠬᠢᠨ ᠡᠭᠦᠪᠡᠷ ᠲᠡᠭᠦᠪᠡᠷ ᠶᠠᠪᠤᠵᠤ᠃ ᠬᠠᠭᠠᠨ ᠤ᠋ ᠠᠷᠢᠬᠢᠨ ᠤ᠋ ᠨᠥᠬᠥᠷ᠂ ᠰᠢᠳᠠᠷ ᠰᠠᠢᠳ ᠪᠥᠭᠡᠳ ᠰᠢᠭᠦᠬᠦ ᠶᠠᠮᠤᠨ ᠤ᠋ ᠰᠠᠢᠳ ᠨᠠᠮᠰᠠᠷᠠᠢ᠂ ᠬᠠᠨᠳᠠ ᠸᠠᠩ ᠤ᠋ᠨ ᠳᠡᠷᠭᠡᠳᠡ ᠰᠠᠭᠤᠭᠠᠳ᠂ ᠪᠣᠭᠳᠠ ᠶ᠋ᠢᠨ ᠠᠯᠢᠶᠠ ᠰᠠᠯᠪᠠᠳᠠᠢ ᠶ᠋ᠢ ᠣᠷᠣᠰ ᠲᠣᠷᠭᠤᠪ ᠨᠠᠷ ᠳᠠ ᠬᠦᠷᠢᠶᠡᠨ ᠳ᠋ᠦ᠍ ᠤᠯᠠᠭᠠᠨ ᠦᠨᠳᠦᠭᠨᠡᠭᠦᠷ ᠭᠤᠷᠪᠠᠨ ᠮᠣᠷᠢ ᠬᠥᠯᠦᠭᠰᠡᠨ (ᠬᠥᠯᠯᠡᠭᠰᠡᠨ)ᠲᠡᠷᠭᠡ ᠴᠢᠷᠭᠠ ᠪᠠᠷ ᠢᠩᠭᠢᠵᠦ ᠨᠠᠢᠷᠯᠠᠨ ᠳᠠᠪᠬᠢᠳᠠᠭ ᠭᠡᠵᠦ ᠪᠡᠶᠡ ᠪᠡᠷ ᠳᠦᠷᠰᠦᠯᠡᠨ ᠦᠵᠡᠭᠦᠯᠵᠦ ᠪᠠᠢᠭᠰᠠᠨ ᠢ᠋ ᠬᠠᠷᠠᠵᠤ ᠶᠡᠬᠡ ᠯᠡ ᠢᠨᠢᠶᠡᠵᠦ ᠰᠠᠭᠤᠪᠠ᠃
ᠴᠢᠩᠭᠢᠲᠡᠯᠡ᠂ ᠬᠠᠭᠠᠨ ᠪᠦᠯᠡᠵᠡᠭ ᠵᠡᠭᠦᠭᠰᠡᠨ ᠬᠤᠷᠤᠭᠤ ᠪᠠᠨ ᠵᠠᠩᠭᠢᠳᠴᠤ᠂ ᠡᠮᠦᠨᠡᠬᠢ ᠰᠢᠷᠡᠭᠡ ᠪᠡᠨ ᠲᠦᠰᠬᠢᠲᠡᠯᠡ ᠴᠣᠬᠢᠮᠠᠭᠴᠠ᠂ ᠶᠠᠷᠢᠶᠠ ᠴᠢᠮᠡᠭᠡ ᠪᠦᠷᠢᠨ ᠨᠠᠮᠳᠠᠪᠠ᠃ ᠬᠠᠭᠠᠨ᠂ ᠡᠬᠡ ᠳᠠᠭᠢᠨᠢ ᠶ᠋ᠢᠨ ᠵᠦᠭ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠵᠤ᠂ ᠲᠣᠳᠣᠬᠠᠨ ᠢ᠋ᠶ᠋ᠠᠷ ᠥᠭᠦᠯᠡᠷᠦᠨ᠂
— ᠰᠠᠢᠳ ᠬᠠᠨᠳᠠ ᠴᠢᠨ ᠸᠠᠩ ᠳ᠋ᠤ᠌ ᠠᠷᠠᠵᠠ ᠱᠠᠩᠨᠠᠶᠠ ᠭᠡᠪᠡᠯ ᠦᠲᠡᠯᠦᠰ ᠬᠢᠭᠰᠡᠨ ᠣᠪᠣᠷ ᠲᠠᠢ ᠤᠯᠴᠠᠭᠠᠷ ᠡᠬᠡ ᠳᠠᠭᠢᠨᠢ᠂ ᠰᠣᠶᠣᠭ ᠯᠠᠮᠠ ᠶ᠋ᠢᠨ ᠡᠷᠭᠦᠭᠰᠡᠨ ᠥᠴᠦᠬᠡᠨ ᠲᠡᠳᠦᠢ ᠪᠤᠯᠢᠩᠭᠠᠷ(ᠪᠤᠯᠠᠩᠭᠢᠷ) ᠥᠩᠭᠡ ᠲᠡᠢ ᠠᠷᠠᠵᠠ ᠲᠠᠢ ᠱᠠᠵᠠᠩ(ᠱᠠᠭᠠᠵᠠᠩ) ᠠᠶᠠᠭᠠ ᠪᠠᠷᠢᠭᠠᠳ᠂ ᠬᠠᠨᠳᠠ ᠴᠢᠨ ᠸᠠᠩ ᠤ᠋ᠨ ᠵᠦᠭ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠠᠷᠠᠵᠠ ᠪᠠᠷᠢᠲᠠᠯᠠ ᠬᠠᠨᠳᠠ ᠸᠠᠩ ᠨᠠᠢᠭᠤᠨ ᠪᠣᠰᠴᠤ᠂ ᠰᠣᠭᠲᠣᠭᠤ ᠬᠥᠮᠦᠨ ᠦ᠌ ᠰᠡᠷᠪᠡᠰᠬᠢᠬᠦ ᠠᠯᠬᠤᠮ ᠢ᠋ᠶ᠋ᠠᠷ ᠡᠬᠡ ᠳᠠᠭᠢᠨᠢ ᠬᠠᠲᠤᠨ ᠤ᠋ ᠡᠮᠦᠨᠡ ᠣᠴᠢᠵᠤ᠂ ᠳᠡᠭᠡᠷᠡᠬᠢ ᠶ᠋ᠢᠨ ᠱᠠᠩᠨᠠᠭᠰᠠᠨ ᠠᠷᠠᠵᠠ ᠬᠦᠷᠲᠡᠬᠦ ᠳᠦᠷᠢᠮ ᠶᠣᠰᠣᠭᠠᠷ ᠰᠥᠭᠥᠳᠴᠦ᠂ ᠠᠶᠠᠭᠠ ᠲᠠᠢ ᠠᠷᠢᠬᠢ ᠶ᠋ᠢ ᠠᠪᠤᠲᠠᠯᠠ(ᠠᠪᠲᠠᠯᠠ)᠂ ᠭᠡᠨᠡᠳᠲᠡ ᠠᠯᠳᠠᠵᠤ ᠭᠠᠵᠠᠷ ᠤᠨᠠᠭᠠᠪᠠᠰᠤ᠂ ᠡᠶᠡᠯᠳᠡᠭ ᠰᠠᠢᠬᠠᠨ ᠢ᠋ᠶ᠋ᠠᠷ ᠮᠦᠰᠢᠶᠡᠵᠦ ᠪᠠᠢᠭᠰᠠᠨ ᠡᠬᠡ ᠳᠠᠭᠢᠨᠢ ᠭᠡᠨᠡᠳᠲᠡ ᠬᠥᠮᠥᠰᠬᠡ ᠪᠡᠨ ᠠᠲᠤᠷᠢᠭᠤᠯᠪᠠ᠃ ᠰᠠᠢᠳ ᠸᠠᠩ ᠪᠥᠬᠥᠢᠭᠡᠳ᠂ ᠠᠰᠬᠠᠷᠠᠭᠰᠠᠨ ᠠᠷᠢᠬᠢ ᠶ᠋ᠢ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠨᠡᠷᠡ ᠦᠭᠡᠢ ᠬᠤᠷᠤᠭᠤ ᠪᠠᠷ ᠬᠦᠷᠴᠦ᠂ ᠳᠤᠬᠤᠨ ᠳ᠋ᠠᠭᠠᠨ ᠳᠦᠷᠭᠢᠭᠡᠳ᠂ ᠳᠠᠬᠢᠨ ᠬᠤᠷᠤᠭᠤ ᠪᠠᠨ ᠲᠦᠷᠢᠵᠦ(ᠲᠥᠷᠥᠵᠦ)᠂ ᠤᠷᠤᠭᠤᠯ ᠳ᠋ᠠᠭᠠᠨ ᠲᠦᠷᠬᠢᠭᠰᠡᠨ ᠳᠦᠷᠢᠮ ᠦᠵᠡᠭᠦᠯᠦᠭᠡᠳ ᠪᠣᠰᠴᠤ᠂ ᠬᠠᠭᠠᠨ ᠤ᠋ ᠬᠠᠢᠷᠠᠯᠠᠭᠰᠠᠨ ᠠᠷᠠᠵᠠ ᠶ᠋ᠢᠨ ᠬᠡᠰᠢᠭ ᠬᠦᠷᠲᠡᠭᠰᠡᠨ ᠶᠣᠰᠣᠭᠠᠷ ᠰᠥᠭᠥᠳᠴᠦ᠂ ᠭᠤᠷᠪᠠᠨᠲᠠ ᠮᠥᠷᠭᠥᠭᠡᠳ ᠨᠦᠰᠡᠷ ᠪᠠᠢᠳᠠᠯ ᠲᠠᠢ ᠥᠨᠳᠡᠢᠨ ᠪᠣᠰᠴᠤ᠂ ᠤᠭ ᠰᠠᠭᠤᠳᠠᠯ ᠳ᠋ᠠᠭᠠᠨ ᠡᠭᠡᠵᠦ ᠰᠠᠭᠤᠪᠠ᠃
ᠡᠬᠡ ᠳᠠᠭᠢᠨᠢ ᠶ᠋ᠢᠨ ᠳᠣᠬᠢᠶᠠ ᠥᠭᠭᠦᠮᠡᠭᠴᠡ᠂ ᠨᠣᠢᠷᠰᠤᠬᠤ ᠯᠠᠪᠠᠷᠠᠩ ᠤ᠋ᠨ ᠬᠣᠶᠠᠷ ᠯᠠᠮᠠ ᠬᠦᠷᠴᠦ ᠢᠷᠡᠭᠡᠳ᠂ ᠬᠠᠭᠠᠨ ᠢ᠋ ᠲᠦᠰᠢᠵᠦ ᠨᠣᠢᠷᠰᠤᠬᠤ ᠯᠠᠪᠠᠷᠠᠩ ᠳ᠋ᠤ᠌ ᠵᠠᠯᠠᠪᠠ᠃ ᠡᠬᠡ ᠳᠠᠭᠢᠨᠢ ᠪᠣᠰᠴᠤ᠂ ᠭᠠᠷ ᠢ᠋ᠶ᠋ᠠᠷ ᠰᠠᠯᠬᠤ ᠶᠣᠰᠣ ᠬᠢᠵᠦ ᠮᠡᠬᠦᠢᠰᠬᠢᠭᠡᠳ᠂ ᠬᠠᠭᠠᠨ ᠤ᠋ ᠬᠣᠢᠨᠠ ᠠ᠋ᠴᠠ ᠣᠳᠤᠮᠠᠭᠴᠠ᠂ ᠬᠠᠨᠳᠠ ᠸᠠᠩ ᠪᠣᠰᠴᠤ ᠨᠠᠢᠭᠤᠨ ᠱᠠᠷᠪᠠᠭᠰᠠᠭᠠᠷ(ᠰᠠᠷᠪᠠᠭᠰᠠᠭᠠᠷ) ᠳᠣᠣᠷᠠᠲᠤ ᠳᠠᠪᠬᠤᠷᠯᠢᠭ ᠲᠤ᠌ ᠬᠣᠶᠠᠷ ᠬᠠᠭᠠᠯᠭᠠᠴᠢ ᠯᠠᠮᠠ ᠪᠠᠷ ᠲᠦᠰᠢᠭᠦᠯᠦᠨ ᠪᠠᠭᠤᠪᠠ᠃
ᠣᠷᠳᠣᠨ ᠤ᠋ ᠬᠠᠰᠢᠶᠠᠨ ᠤ᠋ ᠭᠠᠳᠠᠨᠠ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠬᠣᠶᠠᠷ ᠬᠢᠶᠡ᠂ ᠰᠠᠢᠳ ᠲᠠᠭᠠᠨ ᠵᠢᠪᠠᠷ ᠲᠤ᠌ ᠤᠳᠠᠲᠠᠯᠠ ᠬᠦᠯᠢᠶᠡᠭᠰᠡᠨ ᠵᠢᠷᠣᠭᠠ ᠮᠣᠷᠢ ᠶ᠋ᠢ ᠠᠪᠴᠢᠷᠠᠵᠤ ᠲᠦᠰᠢᠨ ᠮᠣᠷᠳᠠᠭᠤᠯᠪᠠ᠃ ᠬᠠᠨᠳᠠ ᠸᠠᠩ ᠤᠮᠠᠷᠠ ᠵᠦᠭ ᠴᠢᠭᠯᠡᠵᠦ ᠶᠠᠪᠤᠲᠠᠯᠠ ᠬᠦᠢᠲᠡᠨ ᠰᠠᠯᠬᠢᠨ ᠳ᠋ᠤ᠌ ᠭᠠᠷᠤᠮᠠᠭᠴᠠ ᠠᠷᠢᠬᠢᠨ ᠤ᠋ ᠰᠣᠭᠲᠣᠭᠤ ᠨᠡᠮᠡᠭᠳᠡᠨ᠂ ᠭᠡᠨᠡᠳᠲᠡ ᠮᠣᠷᠢ ᠪᠠᠨ ᠲᠠᠰᠢᠭᠤᠷᠳᠠᠨ ᠮᠠᠰᠢ ᠬᠤᠷᠳᠤᠨ ᠢ᠋ᠶ᠋ᠠᠷ ᠵᠢᠷᠣᠭᠠᠯᠠᠭᠤᠯᠪᠠᠰᠤ᠂ ᠠᠯᠪᠠᠨ ᠤ᠋ ᠡᠴᠡᠩᠬᠡᠢ ᠤᠶᠠᠭᠠ ᠮᠣᠷᠢ ᠲᠠᠢ ᠬᠣᠶᠠᠷ ᠬᠢᠶᠡ᠂ ᠶᠠᠭᠠᠬᠢᠨ ᠰᠠᠢᠳ ᠤ᠋ᠨ ᠬᠤᠷᠳᠤᠨ ᠵᠢᠷᠣᠭᠠ ᠬᠦᠯᠦᠭ ᠢ᠋ ᠭᠦᠢᠴᠡᠬᠦ ᠠᠵᠢ᠃ ᠶᠠᠪᠠᠭᠠᠨ ᠬᠥᠮᠦᠨ ᠰᠢᠭ ᠬᠣᠴᠣᠷᠬᠤ ᠳ᠋ᠤ᠌᠂ ᠠᠷᠤ ᠠ᠋ᠴᠠ ᠨᠢ ᠮᠣᠷᠢ ᠲᠠᠢ ᠬᠥᠮᠦᠨ ᠳᠠᠪᠬᠢᠬᠤ ᠲᠦᠪᠦᠷᠭᠡᠨ ᠰᠣᠨᠣᠰᠳᠠᠵᠤ᠂ ᠤᠲᠤᠭᠠ ᠲᠠᠢ ᠮᠠᠯᠠᠭᠠᠢ ᠲᠠᠢ ᠬᠣᠶᠠᠷ ᠬᠥᠮᠦᠨ᠂ ᠬᠣᠶᠠᠷ ᠬᠠᠵᠠᠭᠤ ᠪᠠᠷ ᠨᠢ ᠱᠣᠷ ᠬᠢᠵᠦ ᠥᠩᠭᠡᠷᠡᠭᠡᠳ᠂ ᠬᠠᠨᠳᠠ ᠸᠠᠩ ᠤ᠋ᠨ ᠬᠣᠶᠠᠷ ᠬᠠᠵᠠᠭᠤ ᠠ᠋ᠴᠠ ᠲᠦᠰᠢᠨ᠂ ᠰᠠᠯᠬᠢᠨ ᠮᠡᠲᠦ ᠳᠣᠪᠲᠣᠯᠤᠨ ᠣᠳᠪᠠ᠃
ᠬᠣᠶᠠᠷ ᠬᠢᠶᠡ ᠮᠣᠷᠢ ᠪᠠᠨ ᠲᠠᠰᠢᠭᠤᠷᠳᠠᠨ ᠴᠣᠬᠢᠪᠠᠴᠤ ᠰᠠᠢᠳ ᠤ᠋ᠨ ᠪᠠᠷᠠᠭᠠ (ᠪᠠᠷᠠ) ᠳᠣᠷᠣ ᠠᠯᠠᠭᠠ ᠪᠣᠯᠵᠠᠢ᠃ ᠬᠠᠭᠠᠨᠲᠠᠨ ᠰᠢᠳᠠᠷ ᠬᠥᠮᠦᠨ ᠢ᠋ ᠶᠠᠪᠤᠭᠤᠯᠵᠤ᠂ ᠮᠠᠨᠠᠢ(ᠮᠠᠨ ᠤ᠋) ᠨᠣᠶᠠᠨ ᠢ᠋ ᠲᠦᠰᠢᠨ ᠬᠥᠷᠭᠡᠭᠦᠯᠪᠡ᠃ ᠮᠠᠨᠠᠢ(ᠮᠠᠨ ᠤ᠋) ᠨᠣᠶᠠᠨ ᠶᠠᠭᠤᠲᠠᠢ ᠵᠠᠶᠠᠭᠠ ᠪᠤᠶᠠᠨ ᠳᠡᠯᠭᠡᠷᠡᠭᠰᠡᠨ ᠨᠣᠶᠠᠨ ᠪᠢᠯᠡ ᠭᠡᠵᠦ ᠲᠡᠷᠡ ᠬᠣᠶᠠᠷ ᠬᠢᠶᠡ ᠶᠡᠷᠦ ᠠᠵᠢᠭ ᠰᠡᠵᠢᠭ ᠠᠪᠤᠭᠰᠠᠨ ᠦᠭᠡᠢ ᠴᠣᠭᠭᠢᠭᠰᠠᠭᠠᠷ ᠬᠠᠨᠳᠠ ᠸᠠᠩ ᠤ᠋ᠨ ᠬᠠᠰᠢᠶᠠᠨ ᠳ᠋ᠤ᠌ ᠬᠦᠷᠴᠦ ᠢᠷᠡᠪᠡᠯ ᠬᠠᠭᠠᠯᠭᠠ ᠳᠤᠤᠭᠠᠷᠬᠤ ᠴᠢᠮᠡᠭᠡ ᠪᠡᠷ ᠭᠡᠷ ᠡᠴᠡ ᠤᠯᠤᠰ ᠭᠠᠷᠴᠤ ᠢᠷᠡᠭᠡᠳ᠂ ᠵᠠᠭᠳᠠ ᠵᠠᠬᠢᠷᠤᠭᠴᠢ ᠥᠨᠥ ᠬᠣᠶᠠᠷ ᠬᠢᠶᠡ ᠶ᠋ᠢᠨ ᠪᠠᠷᠠ ᠬᠠᠷᠠᠭᠠᠳ ᠭᠦᠶᠦᠨ ᠰᠢᠮᠲᠡᠯᠡᠵᠦ᠂
— ᠨᠣᠶᠠᠨ ᠬᠠᠮᠢᠭᠠ ᠪᠠᠢᠨᠠ? ᠭᠡᠪᠡᠯ᠂
— ᠢᠷᠡᠭᠰᠡᠨ ᠦᠭᠡᠢ ᠤᠤ? ᠭᠡᠪᠡ᠃
— ᠲᠠ ᠨᠠᠷ ᠶᠠᠮᠠᠷ ᠰᠣᠯᠢᠶᠠᠲᠠᠢ ᠤᠯᠤᠰ ᠪᠢᠯᠡ? ᠨᠣᠶᠠᠨ ᠢ᠋ᠶ᠋ᠠᠨ ᠶᠠᠭᠠᠬᠢᠪᠠ ᠭᠡᠵᠦ ᠵᠠᠭᠳᠠ ᠶ᠋ᠢᠨ ᠠᠰᠠᠭᠤᠬᠤ ᠳ᠋ᠤ᠌ ᠬᠢᠶᠡ ᠨᠠᠷ ᠰᠠᠨᠳᠤᠷᠴᠤ᠂ ᠡᠴᠡᠩᠬᠡᠢ ᠮᠣᠷᠢ ᠨᠣᠶᠠᠨ ᠤ᠋ ᠵᠢᠷᠣᠭᠠ ᠬᠦᠯᠦᠭ ᠢ᠋ ᠭᠦᠢᠴᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠂ ᠠᠷᠭᠠ ᠦᠭᠡᠢ ᠬᠣᠴᠣᠷᠤᠨ ᠭᠡᠭᠡᠭᠳᠡᠭᠰᠡᠨ ᠤᠴᠢᠷ ᠢ᠋ ᠬᠡᠯᠡᠭᠡᠳ᠂ ᠰᠠᠢᠨ ᠮᠣᠷᠢ ᠲᠠᠢ ᠬᠣᠶᠠᠷ ᠬᠥᠮᠦᠨ᠂ ᠬᠠᠭᠠᠨ ᠤ᠋ ᠣᠷᠳᠣᠨ ᠠ᠋ᠴᠠ ᠬᠤᠷᠳᠤᠯᠠᠨ ᠭᠠᠷᠴᠤ᠂ ᠨᠣᠶᠠᠨ ᠢ᠋ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠳᠥᠰᠢᠨ ᠳᠠᠪᠬᠢᠵᠤ ᠣᠳᠤᠭᠰᠠᠨ ᠢ᠋ ᠶᠠᠷᠢᠭᠠᠳ᠂
— ᠪᠢᠳᠡ᠂ ᠪᠣᠭᠳᠠ ᠬᠠᠭᠠᠨ ᠰᠠᠢᠨ ᠬᠥᠮᠦᠨ ᠶᠠᠪᠤᠭᠤᠯᠵᠤ᠂ ᠮᠠᠨ ᠤ᠋ ᠨᠣᠶᠠᠨ ᠢ᠋ ᠦᠷᠭᠦᠭᠡᠨ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ)ᠳᠥᠰᠢᠨ ᠬᠦᠷᠦᠭᠦᠯᠦᠭᠰᠡᠨ (ᠬᠦᠷᠭᠡᠭᠦᠯᠦᠭᠰᠡᠨ)ᠭᠡᠵᠦ ᠪᠠᠶᠠᠷᠯᠠᠵᠤ ᠶᠠᠪᠤᠭᠰᠠᠨ ᠰᠢᠦ ᠭᠡᠵᠦ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠬᠦ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ) ᠵᠠᠭᠳᠠ ᠭᠤᠶᠠ ᠪᠠᠨ ᠠᠯᠠᠭᠠᠳᠠᠨ ᠭᠠᠰᠢᠭᠤᠳᠠᠵᠤ᠂
— ᠠᠢ ᠬᠠᠯᠠᠭ! ᠲᠡᠷᠡ ᠪᠣᠯᠳᠠᠭ ᠦᠭᠡᠢ ᠤᠯᠤᠰ ᠠ᠋ᠴᠠ ᠯᠠ ᠨᠣᠶᠠᠨ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠ ᠭᠡᠵᠦ ᠪᠢ ᠲᠠ ᠨᠠᠷ ᠢ᠋ ᠰᠢᠯᠢᠵᠦ ᠶᠠᠪᠤᠭᠤᠯᠤᠭᠰᠠᠨ ᠶᠤᠮ ᠪᠢᠰᠢᠦ ᠤᠤ? ᠮᠣᠷᠢ ᠠᠪᠤᠭᠠᠳ ᠢᠷᠡ᠃ ᠡᠷᠢᠯ ᠬᠢᠶᠡ! ᠭᠡᠵᠦ ᠰᠠᠨᠳᠤᠷᠪᠠ᠃
ᠲᠦᠳᠡᠬᠡᠨ ᠠᠷᠪᠠᠭᠠᠳ ᠮᠣᠷᠢ ᠲᠠᠢ ᠬᠥᠮᠦᠨ᠂ ᠵᠠᠭᠳᠠ ᠵᠠᠬᠢᠷᠤᠭᠴᠢ ᠲᠡᠷᠢᠭᠦᠲᠡᠢ ᠳᠠᠪᠬᠢᠨ ᠶᠠᠪᠤᠵᠤ᠂ ᠰᠠᠢᠳ ᠢ᠋ ᠡᠷᠢᠪᠡ᠃ ᠦᠷ ᠦ᠋ᠨ ᠭᠡᠭᠡ ᠰᠢᠷᠠᠯᠠᠬᠤ ᠦᠶᠡ ᠪᠡᠷ ᠵᠠᠭᠳᠠ᠂ ᠬᠡᠭᠡᠷᠡ ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠰᠬᠢᠨ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠬᠥᠭᠡᠷᠦᠬᠦᠢ ᠰᠠᠢᠳ ᠤ᠋ᠨ ᠶᠠᠰᠤ ᠶ᠋ᠢ ᠣᠯᠵᠠᠢ᠃ ᠰᠠᠯᠬᠢᠨ ᠳ᠋ᠤ᠌ ᠬᠡᠭᠦᠷ ᠦ᠋ᠨ ᠳᠡᠭᠡᠳᠦ ᠳᠣᠣᠷᠠᠲᠤ ᠬᠣᠶᠠᠷ ᠲᠠᠯᠠ ᠳ᠋ᠤᠨᠢ ᠪᠢᠴᠢᠬᠠᠨ ᠬᠤᠩᠭᠠᠷ(ᠬᠣᠩᠬᠣᠷ) ᠲᠣᠭᠲᠠᠵᠤ᠂ ᠨᠣᠶᠠᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠠᠷᠤ ᠠ᠋ᠴᠠ ᠨᠢ ᠬᠤᠯᠠᠭᠠᠢ ᠭᠡᠵᠢᠭᠡ ᠶ᠋ᠢᠨ ᠲᠤᠰ᠂ ᠬᠣᠶᠠᠷ ᠨᠢᠳᠦ ᠶ᠋ᠢ ᠰᠤᠭᠤ ᠦᠰᠦᠷᠲᠡᠯᠡ ᠪᠢᠯᠠᠭᠤ ᠪᠠᠷ ᠬᠠᠭᠠ ᠴᠣᠬᠢᠵᠤ᠂ ᠬᠣᠶᠠᠷ ᠨᠢᠳᠦ ᠨᠢ ᠰᠤᠭᠤ ᠦᠰᠦᠷᠦᠨ ᠭᠠᠷᠴᠤ᠂ ᠠᠩᠭᠠᠢᠭᠰᠠᠨ ᠠᠮᠠᠨ ᠳ᠋ᠤᠨᠢ ᠴᠠᠰᠤ ᠳᠦᠭᠦᠷᠦᠭᠡᠳ ᠴᠢᠰᠤ ᠰᠢᠩᠭᠡᠨ ᠬᠥᠯᠳᠡᠵᠡᠢ᠃
— ᠠ᠋᠂ ᠨᠣᠶᠠᠨ ᠢ᠋ᠶ᠋ᠠᠨ ᠪᠢᠳᠡ ᠬᠠᠮᠠᠭᠠᠯᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠂ ᠶᠠᠭᠤᠲᠠᠢ ᠣᠰᠣᠯ! ᠭᠡᠵᠦ ᠡᠪᠦᠭᠡᠨ ᠵᠠᠭᠳᠠ ᠬᠡᠭᠦᠷ ᠦ᠋ᠨ ᠡᠮᠦᠨᠡ ᠭᠠᠰᠢᠭᠤᠳᠠᠨ ᠰᠢᠪᠡᠭᠡᠨᠡᠵᠦ ᠰᠥᠭᠥᠳᠦᠭᠡᠳ᠂ ᠪᠣᠭᠳᠠ ᠬᠡᠳᠦᠢ ᠬᠠᠭᠠᠨ ᠡᠵᠡᠨ ᠪᠣᠯᠪᠠᠴᠤ ᠤᠯᠤᠰ ᠲᠥᠷᠥ ᠳ᠋ᠦ᠍ ᠬᠠᠭᠠᠨ᠂ ᠬᠠᠷᠠᠴᠤ ᠶ᠋ᠢᠨ ᠨᠢᠭᠡᠨ ᠠᠳᠠᠯᠢ ᠳᠠᠭᠠᠬᠤ ᠬᠠᠤᠯᠢ ᠪᠣᠢ᠃ ᠬᠠᠭᠠᠨ ᠠ᠋ᠴᠠ ᠨᠣᠶᠠᠨ ᠤ᠋ ᠪᠠᠨ ᠠᠮᠢ ᠶ᠋ᠢ ᠨᠡᠬᠡᠵᠦ ᠵᠠᠷᠭᠤᠯᠳᠤᠨᠠ ᠭᠡᠵᠡᠢ᠃
ᠬᠣᠩᠭᠣᠷ ᠰᠡᠳᠬᠢᠯᠲᠦ ᠲᠡᠷᠡ ᠡᠪᠦᠭᠡᠨ᠂ ᠨᠠᠰᠤ ᠪᠠᠷᠠᠭᠰᠠᠨ ᠲᠡᠷᠡ ᠨᠣᠶᠠᠨ ᠤ᠋ ᠬᠣᠰᠢᠭᠤ ᠲᠦᠰᠢᠮᠡᠳ ᠦ᠋ᠨ ᠳᠤᠮᠳᠠ ᠠ᠋ᠴᠠ ᠰᠡᠳᠬᠢᠯᠭᠡ ᠠᠳᠠᠯᠢ ᠬᠡᠳᠦᠨ ᠬᠥᠮᠦᠨ ᠢ᠋ ᠣᠯᠵᠤ᠂ ᠪᠣᠭᠳᠠ ᠠ᠋ᠴᠠ ᠨᠣᠶᠠᠨ ᠤ᠋ ᠠᠮᠢ ᠨᠡᠬᠡᠵᠦ ᠵᠠᠭᠠᠯᠳᠤᠨᠠ ᠭᠡᠳ᠂ ᠮᠥᠨ ᠬᠤᠰᠢᠭᠤᠨ ᠤ᠋ ᠲᠣᠢᠨ ᠬᠠᠮᠪᠤ ᠯᠠᠮᠠ᠂ ᠵᠠᠭᠳᠠ ᠳ᠋ᠤ᠌ ᠲᠤᠰᠠᠯᠠᠵᠤ ᠠᠯᠲᠠ ᠬᠢᠷᠢ ᠲᠡᠢ ᠪᠢᠴᠢᠭ ᠬᠢᠭᠡᠳ ᠵᠠᠭᠠᠯᠳᠤᠬᠤ ᠶ᠋ᠢ ᠵᠠᠪᠳᠤᠲᠠᠯᠠ᠂ ᠨᠥᠭᠴᠢᠭᠰᠡᠨ ᠰᠠᠢᠳ ᠤ᠋ᠨ ᠳᠡᠭᠦᠦ ᠭᠤᠩᠭᠠᠳᠣᠷᠵᠢ ᠲᠣᠢᠨ᠂ ᠰᠢᠳᠠᠷ ᠬᠣᠣᠷ ᠨᠠᠢᠷᠠᠭᠤᠯᠤᠭᠴᠢ ᠪᠠᠢᠭᠰᠠᠨ ᠨᠢ ᠵᠠᠭᠳᠠ ᠨᠠᠷ ᠢ᠋ ᠢᠳᠬᠠᠭᠰᠠᠭᠠᠷ ᠪᠣᠭᠳᠠ ᠶ᠋ᠢᠨ ᠠᠷᠢᠬᠢᠨ ᠤ᠋ ᠨᠥᠬᠥᠷ᠂ ᠰᠢᠭᠦᠬᠦ ᠶᠠᠮᠤᠨ ᠤ᠋ ᠰᠠᠢᠳ ᠨᠠᠮᠰᠠᠷᠠᠢ ᠸᠠᠩ ᠳ᠋ᠤ᠌ ᠵᠠᠷᠭᠤ ᠪᠠᠷᠢᠬᠤ ᠭᠡᠰᠡᠨ ᠢ᠋ ᠵᠣᠭᠰᠣᠭᠠᠪᠠ᠃ ᠲᠡᠨᠳᠡ ᠡᠴᠡ ᠤᠳᠠᠯ ᠦᠭᠡᠢ ᠵᠠᠭᠳᠠ᠂ ᠨᠥᠬᠥᠳ ᠰᠡᠯᠲᠡ ᠴᠥᠮ ᠭᠡᠨᠡᠳᠲᠡ ᠪᠢᠲᠡᠭᠦᠯᠢᠭ ᠬᠡᠷᠡᠭ ᠦ᠋ᠨ ᠤᠴᠢᠷ ᠲᠦᠰᠢᠮᠡᠯ ᠦ᠋ᠨ ᠵᠡᠷᠭᠡ ᠡᠪᠳᠡᠭᠦᠯᠵᠦ᠂ ᠵᠢᠩᠰᠡ ᠪᠡᠨ ᠠᠪᠤᠭᠤᠯᠪᠠ᠃ ᠲᠣᠢᠨ ᠬᠠᠮᠪᠤ᠂ ᠪᠣᠭᠳᠠ ᠠ᠋ᠴᠠ ᠨᠠᠢ᠍ᠮᠠᠨ ᠬᠥᠮᠦᠨ ᠢ᠋ᠶ᠋ᠡᠷ ᠳᠠᠮᠨᠠᠭᠤᠯᠬᠤ ᠰᠡᠦᠬᠡ ᠬᠡᠷᠡᠭᠯᠡᠬᠦ ᠶᠠᠩᠪᠠ ᠬᠦᠷᠲᠡᠵᠦ᠂ ᠪᠣᠭᠳᠠ ᠶ᠋ᠢᠨ ᠲᠡᠷᠡ ᠬᠥᠬᠢᠭᠦᠯᠬᠦ ᠵᠠᠷᠯᠢᠭ᠂ ᠢᠳᠡᠭᠡ ᠵᠣᠭᠣᠭ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠭᠤᠩᠭᠠᠳᠤᠷᠵᠢ ᠲᠣᠢᠨ ᠤ᠋ ᠣᠷᠣᠭᠠᠳ ᠭᠠᠷᠤᠭᠰᠠᠨ ᠤ᠋ ᠳᠠᠷᠠᠭᠠ ᠰᠠᠭᠤᠭᠠ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠦᠬᠦᠭᠰᠡᠨ ᠪᠠᠢᠵᠠᠢ᠃*
— — — —
* ᠬᠠᠭᠠᠨ ᠤ᠋ ᠲᠤᠢᠯ ᠤ᠋ᠨ ᠠᠷᠭᠠ ᠭᠡᠰᠡᠨ ᠯᠠᠲ᠋ᠢᠨ ᠦᠭᠡ᠃ ᠪᠣᠭᠳᠠ ᠬᠠᠭᠠᠨ ᠢ᠋᠂ ᠬᠠᠨᠳᠠ ᠸᠠᠩ ᠢ᠋ ᠬᠣᠣᠷᠯᠠᠨ ᠬᠥᠨᠥᠭᠡᠭᠰᠡᠨ ᠢ᠋ ᠪᠢᠲᠡᠭᠦᠦ ᠪᠡᠷ ᠡᠨᠡ ᠯᠠᠲ᠋ᠢᠨ ᠦᠭᠡ ᠶ᠋ᠢᠨ ᠤᠳᠬᠠ ᠪᠠᠷ ᠵᠢᠭᠠᠪᠠ᠃
** ᠬᠠᠭᠤᠴᠢᠨ ᠮᠣᠩᠭᠣᠯ ᠤ᠋ᠨ ᠬᠡᠷᠴᠡᠭᠡᠢ ᠶ᠋ᠢ ᠬᠠᠯᠠᠮᠴᠠᠭᠤᠯᠤᠭᠴᠢ ᠰᠠᠷᠬᠤᠳ ᠬᠥᠯᠴᠥᠭᠡᠨ ᠬᠥᠳᠡᠯᠭᠡᠬᠦ ᠶ᠋ᠢ ᠦᠵᠡᠯᠡ ᠪᠢ᠃ ᠵᠤᠨ· ᠺᠢᠶᠠᠲ᠋ᠰ ᠭᠡᠳᠡᠭ ᠠᠩᠭ᠌ᠯᠢ ᠢᠷᠠᠭᠤ ᠨᠠᠢᠷᠠᠭᠴᠢ᠃ (1795 — 1821)᠂ ᠰᠢᠯᠦᠭ ᠦ᠋ᠨ ᠬᠡᠯᠪᠡᠷᠢ ᠨᠢ ᠶᠡᠬᠡ ᠨᠠᠷᠢᠨ ᠰᠠᠢᠨ ᠭᠡᠵᠦ ᠠᠯᠳᠠᠷᠰᠢᠵᠠᠢ᠃
* ᠡᠨᠡ ᠪᠦᠯᠦᠭ ᠳᠠᠬᠢ ᠶᠠᠪᠤᠳᠠᠯ ᠢ᠋ ᠤᠴᠢᠷ ᠪᠠᠢᠳᠠᠯ ᠢ᠋ ᠮᠡᠳᠡᠬᠦ ᠲᠡᠷᠡ ᠦᠶᠡ ᠶ᠋ᠢᠨ ᠬᠥᠮᠦᠰ ᠦ᠋ᠨ ᠶᠠᠷᠢᠭᠰᠠᠨ ᠶᠣᠰᠣᠭᠠᠷ ᠲᠣᠪᠴᠢᠯᠠᠰᠬᠢᠨ ᠪᠢᠴᠢᠪᠡ᠃ ᠬᠥᠮᠦᠨ ᠦ᠌ ᠨᠡᠷᠡ ᠤᠰᠤ ᠴᠥᠮ ᠦᠨᠡᠨ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠷᠡᠢᠳ· ᠵᠣᠯ᠂ ᠣᠶᠤᠨᠪᠢᠯᠢᠭ᠌᠂ ᠤᠢᠭᠤᠷᠵᠢᠨ· ᠣᠳᠬᠣᠨᠪᠠᠪᠠ᠂ ᠮᠧᠢ ᠬᠤᠸᠠ᠂ ᠲᠠᠪᠤᠨ ᠤᠰᠤ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠣᠶᠤᠨᠪᠠᠲᠤ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ