ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠭᠤᠲᠠᠭᠠᠷ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠬᠣᠶᠠᠷ> Хан мунын сүүрс < доорд > – Мөнх зохиоов ᠂ Гутгаар бодь – Гуравдугаар бүлэг <2>
448ᠭᠤᠲᠠᠭᠠᠷ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠬᠣᠶᠠᠷ>
ᠬᠣᠶᠠᠷ
ᠡᠪᠡᠰᠦᠨ ᠦ᠌ ᠲᠣᠯᠣᠭᠠᠢ ᠪᠤᠭᠤᠷᠤᠯᠲᠤᠵᠤ᠂ ᠨᠠᠭᠤᠷ ᠬᠠᠷᠠᠵᠠᠨ ᠳ᠋ᠤ᠌ ᠡᠭᠡᠨᠡᠭᠰᠢᠭᠰᠡᠨ ᠨᠤᠭᠤᠰᠤ ᠭᠠᠯᠠᠭᠤᠳ ᠨᠡᠭᠦᠳᠡᠯ ᠦ᠋ᠨ ᠴᠢᠮᠡᠭᠡ ᠠᠪᠤᠨ ᠭᠠᠩᠭᠠᠷ ᠬᠤᠩᠭᠠᠷ ᠭᠣᠩᠭᠢᠨᠠᠯᠳᠤᠭᠠᠳ ᠤᠷᠠᠳ ᠨᠤᠲᠤᠭ ᠲᠤ ᠨᠠᠮᠤᠷ ᠤ᠋ᠨ ᠰᠡᠷᠢᠭᠦᠦ ᠠᠨᠢᠷᠲᠤᠭᠤᠯᠵᠠᠢ᠃
ᠪᠢᠰᠢᠯᠠᠭ ᠦᠨᠦᠷᠲᠦᠭᠰᠡᠨ ᠨᠠᠮᠤᠷ ᠤ᠋ᠨ ᠲᠣᠰᠣᠯᠢᠭ ᠨᠠᠷᠠ ᠨᠤᠲᠤᠭ ᠢᠪᠡᠭᠡᠨ ᠵᠤᠩᠭᠠᠭᠰᠢᠬᠤ ᠳ᠋ᠤ᠌ ᠨᠡᠭᠦᠳᠡᠯ ᠦ᠋ᠨ ᠰᠢᠪᠠᠭᠤ ᠪᠤᠴᠠᠵᠤ᠂ ᠨᠤᠲᠤᠭ ᠳᠥᠭᠥᠭᠰᠡᠨ ᠪᠠᠭᠠ ᠬᠠᠲᠤᠨ ᠤ᠋ ᠬᠥᠰᠬᠡ ᠲᠡᠷᠭᠡ ᠠᠭᠤᠯᠠ ᠪᠡᠯᠯᠡᠨ ᠠᠶᠠᠯᠠᠨᠠ᠃
ᠠᠭᠤᠯᠠ ᠶ᠋ᠢᠨ ᠪᠠᠯ᠂ ᠳᠠᠷᠠᠰᠤᠲᠠᠢ ᠨᠤᠭᠤ ᠶ᠋ᠢᠨ ᠡᠪᠡᠰᠦ ᠤᠰᠤᠨ ᠤ᠋ ᠡᠪᠯᠢᠭ ᠲᠦ᠍ ᠨᠠᠮᠤᠷᠵᠢᠭᠰᠠᠨ ᠮᠣᠩᠭᠣᠯ ᠠᠢᠯ ᠤ᠋ᠨ ᠬᠠᠶᠠᠭᠠ ᠠ᠋ᠴᠠ ᠲᠠᠷᠠᠭ ᠠᠢᠷᠠᠭ ᠱᠠᠩᠳᠠᠭᠤᠬᠠᠨ ᠬᠠᠩᠬᠤᠯᠤᠨᠠ᠃ ᠨᠠᠮᠤᠷ ᠤ᠋ᠨ ᠰᠣᠢᠯᠭᠠ ᠠᠪᠤᠭᠰᠠᠨ ᠬᠣᠨᠢᠳ ᠳᠡᠨᠵᠢᠷᠬᠡᠭ ᠭᠠᠵᠠᠷ ᠪᠠᠷᠢᠵᠤ ᠵᠢᠪᠠᠷ ᠥᠭᠰᠥᠨ ᠪᠡᠯᠴᠢᠭᠡᠷᠯᠡᠬᠦ ᠨᠢ ᠰᠤᠪᠤᠳ ᠰᠠᠴᠤᠭᠰᠠᠨ ᠮᠡᠲᠦ᠃ ᠲᠣᠰᠣᠨ ᠲᠠᠷᠭᠤ ᠲᠠᠢ ᠠᠳᠤᠭᠤᠳ ᠤ᠋ᠨ ᠨᠢᠷᠤᠭᠤ ᠵᠣ ᠬᠣᠪᠢᠯ ᠲᠠᠲᠠᠵᠤ ᠦᠰᠦ ᠰᠤᠷ ᠨᠢ ᠲᠣᠰᠣ ᠲᠦᠷᠬᠢᠭᠰᠡᠨ ᠭᠡᠮᠡᠷ ᠭᠢᠯᠲᠠᠭᠠᠨᠠᠨᠠ᠃
ᠥᠯᠵᠡᠢ ᠬᠡ ᠤᠷᠠᠯᠠᠭᠰᠠᠨ ᠴᠠᠴᠤᠭᠲᠤ ᠲᠣᠷᠭᠠᠨ ᠰᠡᠦᠬᠡ ᠲᠡᠷᠭᠡ ᠶ᠋ᠢ ᠢᠵᠢᠯᠢ ᠵᠢᠰᠦᠮ ᠦ᠋ᠨ ᠬᠣᠶᠠᠷ ᠬᠡᠭᠡᠷ ᠮᠣᠷᠢ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠵᠢᠳᠬᠦᠬᠦ ᠳ᠋ᠦ᠍ ᠬᠠᠮᠠᠷ ᠨᠢ ᠣᠩᠭᠣᠯᠵᠠᠨ ᠰᠤᠭᠤ ᠴᠠᠪᠢᠯᠠᠭᠤᠷ ᠢ᠋ᠶ᠋ᠠᠷ ᠨᠢ ᠬᠥᠯᠥᠰᠥ ᠳᠠᠭᠠᠭᠠᠪᠤᠷᠢᠯᠠᠨ ᠥᠯᠥᠨ ᠲᠣᠭᠣᠰᠣ ᠪᠣᠰᠬᠠᠨᠠ᠃ ᠪᠠᠷᠢᠭᠤ ᠲᠦᠰᠢᠯᠭᠡᠲᠦ ᠵᠥᠭᠡᠯᠡᠨ ᠢᠰᠡᠷᠢ ᠲᠡᠢ ᠰᠡᠦᠬᠡ ᠲᠡᠷᠭᠡᠨ ᠳᠡᠭᠡᠷᠡ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠪᠢᠴᠢᠬᠠᠨ ᠬᠦᠦ ᠲᠡᠢ ᠪᠡᠨ ᠨᠠᠮᠪᠠᠭᠠᠲᠠᠢ ᠰᠠᠭᠤᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠵᠠᠮ ᠬᠣᠷᠣᠵᠤ ᠥᠭᠳᠡᠭ ᠦᠭᠡᠢ ᠳ᠋ᠦ᠍ ᠪᠠᠢᠨ ᠪᠠᠢᠨ ᠴᠣᠩᠬᠣᠪᠴᠢ ᠰᠡᠬᠦᠵᠦ ᠭᠠᠵᠠᠷ ᠤ᠋ᠨ ᠪᠠᠢᠴᠠ ᠠᠵᠢᠭᠯᠠᠨᠠ᠃
ᠵᠠᠮ ᠤ᠋ᠨ ᠬᠠᠵᠠᠭᠤ ᠠᠭᠤᠯᠠ ᠶ᠋ᠢᠨ ᠪᠠᠯ ᠪᠦᠷᠢᠵᠦ ᠤᠷᠭᠤᠭᠰᠠᠨ ᠪᠠᠲᠤᠴᠠᠭᠠᠨ ᠤ᠋ ᠨᠠᠪᠴᠢ ᠴᠢᠰ ᠤᠯᠠᠢᠵᠤ᠂ ᠬᠠᠶᠠ ᠢᠯᠠᠮᠠ ᠶ᠋ᠢᠨ ᠮᠣᠳᠣᠨ ᠤ᠋ ᠰᠢᠷᠠ ᠨᠠᠪᠴᠢᠰ ᠠᠯᠠᠭᠯᠠᠨ ᠬᠠᠷᠠᠭᠳᠠᠬᠤ ᠨᠢ ᠡᠲᠡᠭᠡᠳ ᠭᠣᠶᠣ᠃ ᠳᠣᠯᠣᠭᠣᠨᠠ᠂ ᠦᠷᠢᠯ᠂ ᠮᠣᠢᠯ᠂ ᠤᠬᠤᠨᠠᠢ᠂ ᠬᠡᠷᠢᠶᠡᠨ ᠦ᠌ ᠨᠢᠳᠦ᠂ ᠬᠥᠩᠰᠥ ᠵᠡᠷᠭᠡ ᠵᠡᠷᠯᠢᠭ ᠵᠢᠮᠢᠰ ᠮᠥᠴᠢᠷ ᠳᠠᠭᠠᠭᠠᠭᠳᠠᠬᠤ ᠦᠭᠡᠢ ᠪᠥᠩᠵᠢᠭᠢᠨᠡᠬᠦ ᠨᠢ ᠤᠯᠠᠭᠠᠨ᠂ ᠬᠦᠷᠡᠩ ᠤᠯᠠᠭᠠᠨ᠂ ᠬᠠᠷᠠ ᠬᠦᠷᠡᠩ ᠶᠠᠩᠵᠤ ᠶ᠋ᠢᠨ ᠠᠯᠮᠠᠰ ᠰᠤᠪᠤᠳ ᠣᠭ᠌ᠶᠤ ᠲᠠᠨᠠ ᠡᠷᠳᠡᠨᠢ ᠰᠢᠭ ᠮᠡᠯᠴᠡᠢᠵᠦ᠂ ᠵᠠᠮ ᠤ᠋ᠨ ᠬᠥᠮᠦᠰ ᠦ᠋ᠨ ᠬᠣᠷᠣᠬᠠᠢ ᠶ᠋ᠢ ᠬᠥᠳᠡᠯᠭᠡᠨᠡ᠃
ᠦᠳᠡ ᠬᠡᠯᠪᠡᠢᠬᠦ ᠳ᠋ᠦ᠍ ᠪᠠᠭᠠ ᠬᠠᠲᠤᠨ ᠬᠠᠯᠠᠭᠠᠢ ᠶ᠋ᠢᠨ ᠪᠤᠯᠤᠩ ᠳ᠋ᠤ᠌ ᠣᠷᠣᠵᠤ ᠢᠷᠡᠪᠡ᠃ ᠡᠮᠦᠨᠡ ᠪᠡᠨ ᠪᠦᠷᠢᠨ ᠵᠡᠪᠰᠡᠭᠲᠦ ᠮᠣᠷᠢᠨ ᠴᠡᠷᠢᠭ ᠵᠠᠮ ᠤᠳᠤᠷᠢᠳᠤᠨ᠂ ᠬᠣᠢᠨᠠ ᠪᠠᠨ ᠪᠤᠶᠠᠨ ᠬᠤᠷᠢᠶᠠᠭᠴᠢ ᠴᠠᠭᠳᠠᠭᠤᠯ ᠤ᠋ᠨ ᠴᠡᠷᠢᠭ ᠡᠩᠨᠡᠭᠡ ᠬᠤᠮᠢᠵᠤ ᠶᠠᠪᠤᠬᠤ ᠨᠢ ᠬᠠᠷᠠᠬᠤ ᠳ᠋ᠤ᠌ ᠣᠮᠣᠭᠣᠯᠠᠩ ᠰᠦᠷᠲᠡᠢ ᠠᠵᠢ᠃
ᠬᠦᠩ ᠦ᠋ᠨ ᠶᠠᠮᠤᠨ ᠤ᠋ ᠬᠥᠬᠡ ᠲᠣᠭᠣᠰᠬᠠᠨ ᠬᠦᠷᠢᠶᠡᠨ ᠦ᠌ ᠡᠭᠦᠳᠡᠨ ᠳ᠋ᠦ᠍ ᠡᠯᠳᠡᠩᠭᠡ᠂ ᠵᠣᠳᠪᠠ᠂ ᠸᠴᠢᠷᠪᠠᠲᠤ ᠨᠠᠷ ᠠᠯᠢ ᠡᠷᠲᠡ ᠡᠴᠡ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠦ᠋ᠨ ᠬᠦᠷᠴᠦ ᠢᠷᠡᠬᠦ ᠶ᠋ᠢ ᠤᠭᠲᠤᠨ ᠬᠦᠯᠢᠶᠡᠵᠦ ᠪᠠᠢᠪᠠ᠃
ᠥᠪᠴᠢ ᠴᠡᠷᠢᠭ ᠬᠤᠪᠴᠠᠰᠤ ᠲᠠᠢ᠂ ᠠᠬᠤᠷ ᠫᠤᠤ ᠵᠡᠭᠦᠭᠰᠡᠨ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠰᠡᠦᠬᠡ ᠲᠡᠷᠭᠡᠨ ᠡᠴᠡ ᠪᠠᠭᠤᠵᠤ ᠢᠷᠡᠬᠦ ᠳ᠋ᠦ᠍ ᠣᠨᠴᠠ ᠴᠣᠭ ᠵᠢᠪᠬᠤᠭᠠᠲᠠᠢ ᠬᠠᠷᠠᠭᠳᠠᠨᠠ᠃ ᠲᠦᠳᠡᠬᠡᠨ ᠬᠣᠶᠠᠷ ᠳᠠᠭᠠᠯᠲᠠ ᠴᠡᠷᠢᠭ ᠵᠡᠭᠦᠨ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤᠨᠢ ᠨᠠᠭᠠᠯᠳᠤᠵᠤ ᠢᠷᠡᠨ ᠵᠠᠢ ᠦᠭᠡᠢ ᠬᠠᠮᠠᠭᠠᠯᠠᠵᠤ ᠶᠠᠪᠤᠬᠤ ᠨᠢ ᠤᠯᠠᠮ ᠰᠦᠷᠲᠡᠢ᠃ ᠬᠡᠯᠡᠬᠦ ᠡᠴᠡ ᠬᠣᠷᠮᠣᠢ ᠠ᠋ᠴᠠ ᠨᠢ ᠴᠢᠷᠦᠭᠳᠡᠭᠰᠡᠨ ᠪᠢᠴᠢᠬᠠᠨ ᠬᠦᠦ ᠴᠡᠷᠢᠭ ᠬᠤᠪᠴᠠᠰᠤ ᠲᠠᠢ ᠰᠧᠯᠢᠩ ᠬᠥᠮᠦᠨ ᠳ᠋ᠦ᠍ ᠳᠠᠩᠴᠤ ᠢᠯᠡᠭᠦᠳᠡᠭᠰᠡᠨ ᠰᠢᠭ ᠦᠵᠡᠭᠳᠡᠬᠦ ᠡᠴᠡ ᠥᠭᠡᠷᠡ ᠥ ᠰᠡᠪ ᠦᠭᠡᠢ᠃
ᠡᠢᠨ ᠬᠦ᠌ ᠰᠣᠷᠲᠣᠭᠣ ᠠᠪᠤᠭᠰᠠᠨ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠦ᠌ ᠵᠢᠮᠪᠡᠯᠵᠡᠭᠰᠡᠨ ᠠᠯᠬᠤᠭᠠ ᠲᠠᠢ ᠪᠠᠭᠠ ᠬᠠᠲᠤᠨ ᠤ᠋ ᠵᠢᠰᠦ ᠲᠥᠯᠥᠪ ᠡᠯᠳᠡᠩᠭᠡ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠠᠩᠬᠠᠨ ᠤ᠋ ᠲᠡᠷᠡ ᠠᠯᠲᠠ ᠮᠥᠩᠭᠥᠨ ᠲᠣᠯᠣᠭᠠᠢ ᠶ᠋ᠢᠨ ᠵᠢᠮᠰᠡᠭ ᠲᠡᠢ ᠮᠣᠩᠭᠣᠯ ᠬᠠᠲᠤᠭᠲᠠᠢ ᠶ᠋ᠢᠨ ᠳᠦᠷᠢ ᠣᠷᠣ ᠮᠥᠷ ᠦᠭᠡᠢ ᠠᠷᠢᠯᠵᠤ᠂ ᠬᠠᠷᠠ ᠴᠡᠷᠢᠭ ᠦ᠋ᠨ ᠬᠤᠪᠴᠠᠯᠠᠯ ᠲᠠᠢ᠂ ᠵᠠᠷ ᠵᠡᠪᠰᠡᠭ ᠦ᠋ᠨ ᠵᠠᠰᠠᠯ ᠢ᠋ᠶ᠋ᠠᠷ ᠬᠠᠷᠠᠭᠳᠠᠭᠰᠠᠨ ᠳ᠋ᠤ᠌ ᠳᠣᠲᠣᠷᠠ ᠨᠢ ᠠᠭᠱᠠᠨᠠ ᠰᠦᠷᠳᠡᠵᠦ ᠠᠪᠴᠠᠢ᠃ ᠲᠡᠭᠡᠪᠡᠴᠦ ᠴᠢᠷᠠᠢ ᠳᠡᠭᠡᠷᠡ ᠪᠡᠨ ᠰᠡᠪ ᠮᠡᠳᠡᠭᠳᠡᠭᠰᠡᠨ ᠦᠭᠡᠢ᠃《ᠮᠣᠩᠭᠣᠯ ᠵᠢᠮᠰᠡᠭ ᠵᠠᠰᠠᠯ ᠢ᠋ᠶ᠋ᠠᠨ ᠬᠠᠶᠠᠵᠤ ᠬᠠᠷᠠ ᠴᠡᠷᠢᠭ ᠦ᠋ᠨ ᠵᠠᠷ ᠵᠡᠪᠰᠡᠭ ᠵᠡᠭᠦᠭᠰᠡᠨ ᠰᠦᠷᠡᠬᠡᠢ ᠡᠮᠡ ᠪᠣᠯᠵᠢ ᠳᠠ! ᠡᠨᠡ ᠬᠡᠳᠦᠨ ᠵᠢᠯ ᠸᠠᠩ ᠰᠣᠬᠣᠷ ᠤ᠋ᠨ ᠬᠠᠯᠳᠠᠪᠤᠷᠢ ᠪᠡᠶᠡ ᠳ᠋ᠦ᠍ ᠴᠢᠨᠢ ᠨᠠᠭᠠᠯᠳᠤᠵᠢ ᠠ᠋ ᠬᠥᠭᠡᠷᠦᠬᠦᠢ!᠁》 ᠭᠡᠵᠦ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠪᠠᠨ ᠦᠯᠦ ᠲᠣᠭᠣᠮᠰᠠᠷᠯᠠᠬᠤ ᠠᠪᠠᠴᠤ ᠪᠡᠶᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠠᠯᠢ ᠪᠣᠯᠬᠤ ᠪᠠᠷ ᠵᠠᠰᠠᠵᠤ ᠪᠠᠭᠠ ᠬᠠᠲᠤᠨ ᠳ᠋ᠤ᠌ ᠣᠢᠷᠠᠳᠴᠤ ᠣᠴᠢᠨ᠄
— ᠪᠠᠭᠠ ᠬᠠᠲᠤᠨ ᠠᠮᠤᠷ ᠰᠠᠢᠨ? ᠵᠠᠮ ᠳ᠋ᠠᠭᠠᠨ ᠶᠠᠳᠠᠷᠠᠭᠰᠠᠨ ᠤᠤ? ᠭᠡᠵᠦ ᠣᠯᠠᠨ ᠠ᠋ᠴᠠ ᠴᠦ᠍ ᠲᠦᠷᠦᠭᠦᠯᠡᠨ ᠠᠮᠤᠷ ᠠᠢᠯᠠᠳᠬᠠᠪᠠ᠃
— ᠰᠠᠢᠨ᠂ ᠰᠠᠢᠨ! ᠳᠠᠶᠠᠭᠠᠷ ᠢ᠋ᠶ᠋ᠠᠨ ᠰᠠᠢᠨ ᠪᠠᠢᠵᠠᠭᠠᠨᠠ ᠤᠤ? ᠭᠡᠵᠦ ᠪᠠᠭᠠ ᠬᠠᠲᠤᠨ ᠤᠭᠲᠤᠯᠭᠠ ᠶ᠋ᠢᠨ ᠬᠥᠮᠦᠰ ᠲᠡᠢ ᠠᠮᠤᠷ ᠮᠡᠨᠳᠦ ᠠᠰᠠᠭᠤᠯᠴᠠᠨ ᠬᠦᠩ ᠦ᠋ᠨ ᠶᠠᠮᠤᠨ ᠤ᠋ ᠬᠠᠭᠠᠯᠭᠠ ᠪᠠᠷ ᠠᠯᠬᠤᠵᠤ ᠣᠷᠣᠪᠠ᠃
ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠤᠷᠢᠳ ᠢ᠋ᠶ᠋ᠠᠷ ᠪᠤᠷᠬᠠᠨ ᠤ᠋ ᠭᠡᠷ ᠲᠦ᠍ ᠣᠷᠣᠵᠤ ᠬᠦᠷᠡᠩ ᠽᠠᠨᠳᠠᠨ ᠭᠦᠩᠭᠠᠷᠠᠪᠠ ᠳ᠋ᠤ᠌ ᠰᠠᠭᠠᠲᠠᠭᠰᠠᠨ ᠱᠠᠭᠢᠮᠤᠨᠢ ᠪᠤᠷᠬᠠᠨ ᠳ᠋ᠤ᠌ ᠵᠤᠯᠠ ᠪᠠᠷᠢᠵᠤ ᠬᠦᠦ ᠪᠡᠨ ᠮᠥᠷᠭᠥᠭᠦᠯᠵᠦ᠂ ᠬᠣᠢᠨᠠ ᠠ᠋ᠴᠠ ᠨᠢ ᠥᠪᠡᠷ ᠢ᠋ᠶ᠋ᠡᠨ ᠭᠤᠷᠪᠠᠨᠲᠠ ᠨᠠᠮᠠᠨᠴᠢᠯᠠᠨ ᠮᠥᠷᠭᠥᠬᠦ ᠳ᠋ᠡᠭᠡᠨ《ᠪᠤᠷᠬᠠᠨ ᠲᠩᠷᠢ ᠮᠢᠨᠢ ᠠ᠋! ᠪᠢᠳᠡ ᠡᠬᠡ ᠬᠥᠪᠡᠭᠦᠨ ᠬᠣᠶᠠᠷ ᠢ᠋ ᠢᠪᠡᠭᠡᠨ ᠳᠡᠮᠵᠢᠲᠦᠭᠡᠢ! ᠤᠸᠮ ᠮᠠ᠋ ᠨᠢ ᠪᠠᠳ ᠮᠠᠢ ᠬᠣᠩ᠁》 ᠭᠡᠵᠦ ᠰᠢᠪᠡᠨᠡᠨ ᠪᠣᠰᠬᠤ ᠳ᠋ᠤᠨᠢ ᠠᠰᠠᠭᠠᠭᠰᠠᠨ ᠵᠤᠯᠠ ᠨᠢ ᠭᠡᠨᠡᠳᠲᠡ ᠤᠨᠲᠠᠷᠠᠪᠠ᠃ ᠲᠡᠭᠦᠨ ᠦ᠌ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠳᠠᠭᠠᠯᠲᠠ ᠴᠡᠷᠢᠭ ᠨᠢ ᠮᠠᠰᠢ ᠱᠠᠯᠠᠮᠠᠭᠠᠢ ᠰᠡᠷᠭᠡᠭ ᠡᠷᠡ ᠪᠠᠢᠵᠠᠢ᠃ ᠱᠠᠯᠠᠪᠬᠠᠨ ᠴᠦᠳᠡᠩ ᠬᠠᠪᠢᠷᠴᠤ ᠪᠥᠬᠥᠭᠰᠡᠨ ᠵᠤᠯᠠ ᠶ᠋ᠢ ᠰᠡᠷᠭᠦᠭᠡᠨ ᠠᠰᠠᠭᠠᠬᠤ ᠭᠡᠰᠡᠨ ᠳ᠋ᠦ᠍ ᠲᠦᠰ ᠬᠢᠨ ᠬᠥᠰᠡᠷ ᠰᠠᠪᠠᠵᠤ ᠤᠨᠠᠪᠠ᠁
《ᠡᠨᠡ ᠶᠠᠭᠤ ᠪᠣᠯᠴᠢᠬᠠᠪᠠ⁈》 ᠭᠡᠰᠡᠨ ᠰᠢᠭ ᠪᠠᠭᠠ ᠬᠠᠲᠤᠨ ᠤ᠋ ᠠᠷᠤ ᠳ᠋ᠤ᠌ ᠳᠠᠭᠠᠯᠳᠤᠭᠰᠠᠨ ᠪᠠᠷᠠ ᠪᠣᠯᠣᠭᠰᠠᠳ ᠰᠦᠵᠢᠭ ᠰᠡᠵᠢᠭ ᠦ᠋ᠨ ᠮᠠᠨᠠᠨ ᠳ᠋ᠤ᠌ ᠲᠥᠭᠡᠷᠢᠨ ᠤᠬᠠᠭᠠ ᠲᠥᠬᠥᠭᠡ ᠶ᠋ᠢ ᠨᠢ ᠣᠯᠬᠤ ᠦᠭᠡᠢ ᠮᠡᠯᠡᠷᠡᠵᠡᠭᠡᠪᠡ᠃
ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠦ᠋ᠨ ᠳᠣᠲᠣᠷᠠ ᠬᠢᠷᠳ᠋ᠬᠢᠵᠦ《ᠪᠤᠷᠬᠠᠨ ᠮᠢᠨᠢ ᠠ᠋᠂ ᠶᠠᠭᠠᠬᠢᠴᠢᠬᠠᠬᠤ ᠨᠢ ᠲᠡᠷᠡ ᠪᠣᠢ?》 ᠭᠡᠵᠦ ᠱᠠᠭᠢᠮᠤᠨᠢ ᠪᠤᠷᠬᠠᠨ ᠤ᠋ ᠴᠢᠷᠠᠢ ᠥᠭᠡᠳᠡ ᠡᠨᠡᠷᠢᠯ ᠭᠣᠷᠢᠳᠠᠨ ᠬᠠᠷᠠᠪᠠᠯ ᠱᠠᠭᠢᠮᠤᠨᠢ ᠪᠤᠷᠬᠠᠨ ᠮᠠᠰᠢᠳᠠ ᠠᠭᠤᠷᠯᠠᠭᠰᠠᠨ ᠰᠢᠭ᠋ ᠳᠣᠭᠰᠢᠨ ᠳᠦᠷᠢ ᠪᠡᠷ ᠦᠵᠡᠭᠳᠡᠭᠰᠡᠨ ᠳ᠋ᠦ᠍ ᠮᠠᠩᠨᠠᠢ ᠳ᠋ᠤᠨᠢ ᠬᠦᠢᠲᠡᠨ ᠬᠥᠯᠥᠰᠥ ᠴᠢᠭᠢᠭᠯᠡᠪᠡ᠃
ᠷᠠᠰᠢ ᠵᠠᠬᠢᠷᠤᠭᠴᠢ ᠰᠠᠨᠳᠤᠷᠤᠨ ᠥᠨᠥᠬᠢ ᠮᠠᠨᠠᠷᠠᠵᠤ ᠣᠢᠴᠢᠭᠰᠠᠨ ᠴᠡᠷᠢᠭ ᠡᠷᠡ ᠶ᠋ᠢ ᠬᠥᠮᠦᠨ ᠳᠡᠭᠡᠷᠡ ᠨᠢ ᠬᠦᠴᠦᠲᠡᠢ ᠬᠢᠮᠤᠰᠤᠯᠠᠵᠤ ᠬᠡᠳᠦᠨ ᠬᠥᠮᠦᠨ ᠢ᠋ᠶ᠋ᠡᠷ ᠡᠷᠭᠦᠭᠦᠯᠦᠨ ᠪᠤᠷᠬᠠᠨ ᠤ᠋ ᠭᠡᠷ ᠡᠴᠡ ᠠᠪᠴᠤ ᠭᠠᠷᠪᠠ᠃
— ᠵᠠ ᠶᠠᠮᠠᠷ ᠪᠣᠢ? ᠪᠤᠷᠬᠠᠨ ᠲᠩᠷᠢ ᠳ᠋ᠦ᠍ ᠪᠤᠷᠤᠭᠤ ᠦᠵᠡᠭᠳᠡᠨᠡ ᠭᠡᠭᠴᠢ ᠡᠨᠡ ᠳᠡ! ᠲᠩᠷᠢ ᠲᠦᠮᠡᠨ ᠨᠢᠳᠦ ᠲᠡᠢ ᠭᠡᠳᠡᠭ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠦᠨᠡᠨ ᠪᠠᠢᠨᠠ᠃ ᠦᠭᠡᠢ ᠶᠡᠷᠦ ᠨᠢ ᠪᠤᠷᠬᠠᠨ ᠭᠦᠩᠭᠠᠷᠠᠪᠠ ᠶ᠋ᠢᠨ ᠭᠡᠷ ᠲᠦ᠍ ᠫᠤᠤ ᠰᠠᠭᠠᠳᠠᠭ ᠲᠠᠢ ᠣᠷᠣᠨᠠ ᠭᠡᠳᠡᠭ ᠴᠢᠨᠢ ᠶᠠᠮᠠᠷ ᠰᠦᠵᠢᠭ ᠶᠦᠮ ᠪᠣᠢ! ᠮᠠᠭᠤ ᠢᠷᠣᠠ! ᠭᠡᠵᠦ ᠵᠣᠳᠪᠠ ᠮᠡᠢᠷᠡᠨ ᠡᠯᠳᠡᠩᠭᠡ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍ ᠰᠡᠮᠡᠬᠡᠷ ᠬᠡᠯᠡᠪᠡᠯ ᠡᠯᠳᠡᠩᠭᠡ᠂ ᠵᠣᠳᠪᠠ ᠶ᠋ᠢᠨ ᠴᠢᠷᠠᠢ ᠥᠭᠡᠳᠡ ᠬᠡᠷᠰᠡᠦᠬᠡᠨ ᠬᠦᠯᠢᠢᠵᠦ《ᠴᠢᠮᠡᠭᠡ ᠦᠭᠡᠢ ᠪᠠᠢ᠂ ᠴᠠᠭᠠᠳᠤᠭᠤᠯᠠ ᠴᠢᠨᠢ ᠰᠣᠨᠣᠰᠤᠭᠤᠵᠠᠢ!》 ᠭᠡᠳ ᠪᠠᠭᠠ ᠬᠠᠲᠤᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠬᠦᠷᠴᠦ᠄
— ᠵᠦᠭᠡᠷ᠂ ᠵᠦᠭᠡᠷ! ᠬᠥᠮᠦᠨ ᠦ᠌ ᠣᠯᠠᠨ ᠳ᠋ᠤ᠌ ᠡᠭᠦᠰᠦᠭᠰᠡᠨ ᠬᠤᠯᠠᠭᠠᠢ ᠵᠢᠪᠠᠷ ᠴᠣᠬᠢᠭᠰᠠᠨ ᠪᠠᠢᠯᠭᠦᠢ ᠳᠡ! ᠰᠡᠵᠢᠭ ᠦᠭᠡᠢ ᠪᠣᠯ ᠠᠵᠢᠭ ᠦᠭᠡᠢ ᠭᠡᠳᠡᠭ᠃ ᠵᠠ᠂ ᠣᠳᠣ ᠡᠢᠰᠢ ᠪᠡᠨ ᠲᠠᠮᠠᠭᠠ ᠶ᠋ᠢᠨ ᠣᠷᠳᠣᠨ ᠳ᠋ᠤ᠌᠁ ᠭᠡᠵᠦ ᠪᠠᠭᠠ ᠬᠠᠲᠤᠨ ᠤ᠋ ᠴᠣᠴᠢᠷᠳᠠᠭᠰᠠᠨ ᠰᠡᠳᠬᠢᠯ ᠢ᠋ ᠲᠠᠢᠪᠤᠰᠢᠷᠠᠭᠤᠯᠬᠤ ᠦᠭᠡ ᠬᠡᠯᠡᠭᠡᠳ ᠪᠠᠭᠠ ᠬᠠᠲᠤᠨ ᠢ᠋ ᠲᠠᠮᠠᠭᠠ ᠶ᠋ᠢᠨ ᠤᠷᠲᠤ ᠤᠷᠤᠭᠤ ᠵᠠᠯᠠᠪᠠ᠃
ᠲᠠᠮᠠᠭᠠ ᠶ᠋ᠢᠨ ᠤᠷᠲᠤ ᠪᠣᠯ ᠪᠤᠷᠬᠠᠨ ᠤ᠋ ᠭᠡᠷ ᠢ᠋ ᠨᠠᠭᠠᠯᠳᠤᠭᠰᠠᠨ ᠭᠣᠣᠯ ᠣᠷᠳᠣᠨ ᠪᠥᠭᠡᠳ ᠡᠭᠦᠳᠡᠨ ᠳ᠋ᠡᠭᠡᠨ ᠴᠡᠷᠢᠭ ᠮᠠᠨᠠᠭᠠ ᠲᠠᠢ ᠪᠠᠢᠪᠠ᠃ ᠲᠠᠮᠠᠭᠠ ᠶ᠋ᠢᠨ ᠣᠷᠳᠣᠨ ᠤ᠋ ᠬᠣᠢᠮᠣᠷ ᠤ᠋ᠨ ᠳᠡᠭᠡᠳᠦ ᠬᠠᠨᠠᠨ ᠳ᠋ᠤ᠌ ᠪᠤᠭᠤ ᠭᠥᠷᠦᠭᠡᠰᠦᠨ ᠦ᠌ ᠠᠷᠠᠰᠤᠨ ᠳᠡᠭᠡᠷᠡ ᠴᠢᠨᠣᠠ ᠶ᠋ᠢᠨ ᠵᠣᠭᠳᠣᠷ ᠢ᠋ᠶ᠋ᠠᠷ ᠤᠷᠠᠯᠠᠭᠰᠠᠨ ᠬᠣᠶᠠᠷ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠬᠠᠷᠴᠠᠭᠠᠢ ᠪᠦᠷᠭᠦᠳ ᠳᠡᠷᠪᠡᠭᠦᠯᠵᠦ᠂ ᠠᠪᠠ ᠶ᠋ᠢᠨ ᠲᠠᠢᠭᠠ ᠳᠠᠭᠠᠭᠤᠯᠤᠨ ᠬᠠᠯᠢᠭᠤᠨ ᠰᠠᠭᠠᠷᠠᠯ ᠮᠣᠷᠢ ᠬᠦᠯᠦᠭᠯᠡᠵᠦ ᠨᠤᠮᠤ ᠰᠠᠭᠠᠳᠠᠭ ᠠᠭᠰᠠᠭᠰᠠᠨ ᠬᠤᠶᠠᠭ ᠳᠤᠭᠤᠯᠠᠭᠠ ᠮᠤᠨᠠ ᠬᠠᠨ ᠤ᠋ ᠵᠢᠷᠤᠮᠠᠯ ᠬᠥᠷᠥᠭ ᠢ᠋ ᠡᠯᠭᠦᠵᠦ᠂ ᠲᠡᠷᠡ ᠵᠢᠷᠤᠭ ᠤ᠋ᠨ ᠠᠰ ᠳᠣᠣᠷᠠ ᠨᠢ ᠠᠭᠠᠷᠤ ᠽᠠᠨᠳᠠᠨ ᠮᠣᠳᠣ ᠪᠠᠷ ᠤᠷᠠᠯᠠᠵᠤ ᠰᠡᠢᠯᠦᠭᠰᠡᠨ ᠬᠦᠴᠦᠲᠦ ᠵᠠᠭᠠᠨ ᠰᠢᠷᠡᠭᠡᠨ① ᠦ᠌ ᠨᠢᠷᠤᠭᠤᠨ ᠳᠡᠭᠡᠷᠡ ᠳᠥᠷᠪᠡᠨ ᠥᠨᠴᠥᠭ ᠢ᠋ ᠨᠢ ᠪᠠᠷᠰ ᠤ᠋ᠨ ᠬᠡ ᠤᠷᠠᠯᠠᠵᠤ ᠰᠡᠢᠯᠦᠭᠰᠡᠨ ᠰᠢᠯ ᠨᠢᠭᠤᠷ ᠲᠠᠢ ᠰᠢᠷᠠ ᠠᠭᠠᠷᠤᠨ ᠵᠢᠵᠢᠭ ᠬᠣᠷᠭᠣ ᠳᠣᠲᠣᠷᠠ ᠪᠠᠷᠰ ᠣᠴᠣᠢᠭᠰᠠᠨ ᠴᠣᠯ ᠮᠥᠩᠭᠥᠨ ᠵᠠᠰᠠᠭ ᠲᠠᠮᠠᠭᠠ ᠶ᠋ᠢ ᠭᠣᠣᠯ ᠳ᠋ᠤᠨᠢ ᠪᠠᠢᠷᠢᠰᠢᠭᠤᠯᠵᠤ᠂ ᠵᠠᠭᠠᠨ ᠰᠢᠷᠡᠭᠡᠨ ᠦ᠌ ᠬᠣᠶᠠᠷ ᠦᠵᠦᠭᠦᠷ ᠲᠦ᠍ ᠡᠭᠦᠯᠡᠨ ᠬᠡ ᠲᠡᠢ ᠬᠥᠬᠡ ᠲᠡᠨᠢᠭᠡᠷ ᠵᠢᠵᠢᠭ ᠬᠣᠶᠠᠷ ᠠᠷᠰᠯᠠᠨ ᠪᠠᠲᠤ ᠰᠠᠬᠢᠭᠤᠯ ᠰᠢᠭ᠋ ᠴᠣᠩᠨᠣᠢᠭᠠᠳ᠂ ᠲᠠᠮᠠᠭᠠ ᠶ᠋ᠢᠨ ᠤᠷᠲᠤ ᠶ᠋ᠢ ᠰᠦᠷ ᠰᠦᠯᠳᠡ ᠲᠡᠢ᠂ ᠬᠦᠴᠦᠨ ᠲᠡᠭᠦᠯᠳᠡᠷ ᠴᠣᠭ ᠵᠢᠪᠬᠤᠭᠠᠲᠠᠢ ᠪᠣᠯᠭᠠᠭᠰᠠᠨ ᠨᠢ ᠬᠥᠮᠦᠰ ᠢ᠋ ᠡᠷᠬᠡ ᠦᠭᠡᠢ ᠲᠥᠪ ᠶᠡᠬᠡᠮᠰᠦᠭ ᠣᠷᠴᠢᠨ ᠳ᠋ᠤ᠌ ᠬᠥᠲᠥᠯᠦᠨ ᠠᠪᠠᠴᠢᠭᠰᠠᠨ ᠮᠡᠲᠦ ᠠᠵᠤᠭᠤ᠃
ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠬᠥᠪᠡᠭᠦᠨ ᠲᠡᠢ ᠪᠡᠨ ᠭᠤᠷᠪᠠ ᠭᠤᠷᠪᠠᠨ ᠶᠢᠰᠦᠨ ᠵᠤᠯᠠ ᠠᠮᠢᠯᠠᠭᠤᠯᠤᠨ ᠠᠰᠠᠭᠠᠵᠤ《ᠪᠠᠷᠰ ᠤ᠋ᠨ ᠬᠦᠴᠦᠲᠦ ᠵᠠᠰᠠᠭ ᠤ᠋ᠨ ᠲᠠᠮᠠᠭᠠ ᠶ᠋ᠢᠨ ᠰᠦᠷ ᠬᠦᠴᠦᠨ ᠢ᠋ᠶ᠋ᠡᠷ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠡᠭᠦᠷᠢᠳᠡ ᠡᠩᠬᠡ ᠠᠮᠤᠭᠤᠯᠠᠩ ᠠᠲᠤᠭᠠᠢ!》 ᠭᠡᠵᠦ ᠳᠠᠭᠠᠳᠬᠠᠨ ᠵᠠᠯᠪᠠᠷᠢᠭᠰᠠᠨ ᠳ᠋ᠤ᠌ ᠳᠠᠭᠠᠯᠳᠤᠭᠰᠠᠨ ᠬᠥᠮᠦᠨ ᠪᠦᠭᠦᠳᠡ ᠨᠢᠵᠡᠭᠡᠳ ᠵᠤᠯᠠ ᠪᠠᠷᠢᠨ ᠪᠠᠭᠠ ᠬᠠᠲᠤᠨ ᠤ᠋ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠮᠥᠨ ᠲᠡᠭᠡᠵᠦ ᠳᠠᠭᠠᠳᠬᠠᠨ ᠵᠠᠯᠪᠠᠷᠢᠪᠠ᠃
— ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠦ᠋ᠨ ᠴᠢᠷᠠᠢ ᠨᠢᠭᠡ ᠯᠡ ᠨᠡᠲᠦᠭᠡᠷ᠃ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠶᠠᠮᠤᠨ ᠤ᠋ ᠬᠦᠷᠢᠶᠡ ᠪᠡᠷ ᠠᠩᠬᠠ ᠠᠯᠬᠤᠮᠠᠭᠴᠠ ᠪᠤᠷᠬᠠᠨ ᠳ᠋ᠠᠭᠠᠨ ᠳᠠᠭᠠᠳᠬᠠᠵᠤ ᠪᠠᠢᠭᠰᠠᠨ ᠵᠤᠯᠠ ᠨᠢ ᠪᠥᠬᠥᠵᠦ ᠤᠨᠲᠠᠷᠠᠭᠰᠠᠨ ᠳ᠋ᠤ᠌ ᠮᠠᠭᠤ ᠢᠷᠣᠠ ᠭᠡᠵᠦ ᠰᠠᠨᠠᠭᠠᠨ ᠳ᠋ᠠᠭᠠᠨ ᠰᠡᠵᠢᠭ ᠠᠪᠤᠭᠰᠠᠨ ᠤᠤ? ᠡᠰᠡᠪᠡᠰᠦ ᠡᠯᠳᠡᠩᠭᠡ᠂ ᠵᠣᠳᠪᠠ ᠨᠠᠷ ᠢ᠋ ᠶᠠᠭᠠᠬᠢᠵᠤ ᠠᠷᠭᠠᠴᠠᠭᠠᠬᠤ ᠲᠤᠬᠠᠢ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠤᠤ᠂ ᠶᠠᠭᠤ ᠴᠦ᠍ ᠭᠡᠰᠡᠨ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠦ᠋ᠨ ᠳᠣᠲᠣᠷᠠ ᠨᠢ ᠮᠠᠰᠢ ᠡᠪ ᠦᠭᠡᠢ ᠪᠠᠢᠯᠠ᠃
ᠪᠠᠭᠠ ᠬᠠᠲᠤᠨ ᠤ᠋ ᠬᠥᠳᠡᠯᠦᠯ ᠪᠠᠷᠢᠯ᠂ ᠦᠭᠡ ᠬᠠᠮᠠᠷ ᠢ᠋ ᠴᠢᠯᠥᠭᠡ ᠵᠠᠢ ᠦᠭᠡᠢ ᠠᠵᠢᠭᠯᠠᠵᠤ ᠪᠠᠢᠭᠰᠠᠨ ᠡᠯᠳᠡᠩᠭᠡ ᠠᠯᠢ ᠡᠷᠲᠡ ᠲᠡᠭᠦᠨ ᠦ᠌ ᠴᠢᠷᠠᠢ ᠶ᠋ᠢᠨ ᠥᠩᠭᠡ ᠡᠴᠡ ᠨᠢᠭᠡ ᠶᠠᠭᠤᠮᠠ ᠪᠣᠳᠣᠵᠤ ᠳᠣᠲᠣᠷᠠ ᠪᠠᠨ《ᠢᠩᠭᠢᠵᠦ ᠰᠠᠢᠬᠠᠨ ᠢ᠋ᠶ᠋ᠠᠷ ᠬᠠᠨᠳᠤᠵᠤ ᠠᠲᠠᠯᠠ ᠥᠷᠥᠰᠢᠶᠡᠯ ᠠᠭᠤᠴᠢᠯᠠᠯ ᠥᠭᠳᠡᠭ ᠦᠭᠡᠢ ᠶᠦᠮ ᠪᠣᠯ ᠵᠠ ᠶᠠᠭᠠᠬᠢᠬᠤ ᠪᠣᠢ ᠵᠠᠶᠠᠭᠠ ᠨᠢ ᠮᠡᠳᠡᠭ ᠴᠠᠭᠠᠰᠢ!》 ᠭᠡᠵᠦ ᠳᠤᠷᠠ ᠦᠭᠡᠢᠴᠡᠬᠦ ᠪᠣᠯᠪᠠᠴᠤ ᠴᠢᠷᠠᠢ ᠳᠡᠭᠡᠷᠡ ᠪᠡᠨ ᠦᠯᠦ ᠮᠡᠳᠡᠭᠳᠡᠨ ᠳᠠᠢᠯᠠᠯᠭᠠ ᠶ᠋ᠢᠨ ᠶᠠᠭᠤᠮᠠᠰ ᠭᠠᠷ ᠥᠭᠡᠳᠡ ᠪᠣᠯᠤᠭᠰᠠᠨ ᠡᠰᠡᠬᠦ ᠶ᠋ᠢ ᠰᠢᠯᠭᠠᠬᠤ ᠭᠡᠵᠦ ᠪᠠᠷᠠᠭᠤᠨ ᠬᠦᠷᠢᠶᠡ ᠪᠡᠷ ᠣᠷᠣᠬᠤ ᠶ᠋ᠢ ᠵᠠᠪᠳᠤᠲᠠᠯᠠ ᠡᠮᠦᠨᠡ ᠡᠴᠡ ᠵᠣᠳᠪᠠ ᠮᠡᠢᠷᠡᠨ ᠭᠠᠷᠴᠤ ᠢᠷᠡᠨ᠄
— ᠲᠤᠰᠠᠯᠠᠭᠴᠢ ᠭᠤᠸᠠᠢ ᠠ᠋! ᠪᠡᠯᠡᠭ ᠰᠡᠯᠲᠡ᠂ ᠳᠠᠢᠯᠠᠯᠭᠠ ᠶ᠋ᠢᠨ ᠰᠢᠷᠡᠭᠡ ᠪᠦᠷ ᠲᠢᠭ ᠲᠠᠭ ᠪᠣᠯᠴᠢᠬᠠᠯᠠ᠁ ᠭᠡᠰᠡᠨ ᠳ᠋ᠦ᠍ ᠡᠯᠳᠡᠩᠭᠡ᠄
— ᠲᠡᠢᠮᠦ ᠤᠤ? ᠵᠠ ᠪᠣᠯᠵᠠᠢ! ᠤᠭᠤᠴᠠ ᠰᠢᠭᠦᠰᠦ ᠪᠡᠨ ᠰᠠᠢᠨ ᠤᠷᠪᠠᠭᠤᠯᠵᠤ ᠬᠥᠷᠪᠡᠭᠦᠯᠵᠦ ᠪᠠᠢ ᠭᠡᠵᠦ ᠴᠠᠭᠠᠳᠤᠭᠤᠯᠠ ᠳ᠋ᠠᠭᠠᠨ ᠰᠠᠢᠨ ᠵᠠᠬᠢ! ᠪᠢᠲᠡᠭᠡᠢ ᠯᠡ ᠭᠠᠯ ᠢ᠋ ᠨᠢ ᠰᠢᠷᠦᠭᠦᠰᠦᠭᠦᠯᠵᠦ ᠴᠢᠨᠠᠯᠭᠠ ᠶ᠋ᠢ ᠬᠡᠲᠦᠷᠡᠭᠦᠯᠴᠢᠬᠡ᠃ ᠲᠡᠭᠡᠭᠰᠡᠭᠡᠷ ᠴᠦ᠍ ᠢᠳᠡᠰᠢ ᠦᠭᠡᠢ ᠶᠦᠮ ᠠ᠋! ᠭᠡᠵᠦ ᠵᠠᠬᠢᠭᠰᠠᠨ ᠳ᠋ᠤ᠌ ᠵᠣᠳᠪᠠ ᠮᠡᠢᠷᠡᠨ᠄
— ᠵᠦᠭᠡᠷ! ᠤᠭᠤᠴᠠᠴᠢᠨ ᠪᠣᠷᠣ ᠭᠤᠸᠠᠢ ᠰᠢᠭᠦᠰᠦ ᠲᠥᠬᠥᠭᠡᠷᠴᠦ ᠪᠠᠢᠬᠤ ᠶᠤᠮ ᠴᠢᠨᠢ ᠲᠤᠰᠠᠯᠠᠭᠴᠢ ᠲᠠ ᠰᠠᠨᠠᠭᠠ ᠠᠮᠤᠷ ᠪᠠᠢ! ᠭᠡᠰᠡᠨ ᠳ᠋ᠦ᠍ ᠡᠯᠳᠡᠩᠭᠡ᠄
— ᠵᠠ᠂ ᠲᠡᠭᠡᠪᠡᠯ ᠳᠣᠷᠢᠭᠤᠨ ᠪᠣᠯᠵᠠᠢ ᠠ᠋! ᠭᠡᠪᠡ᠃
— ᠦᠭᠡᠢ ᠠ᠋᠂ ᠡᠨᠡ ᠡᠮᠡ ᠶ᠋ᠢᠨ ᠴᠢᠷᠠᠢ ᠭᠡᠭᠴᠢ ᠶᠠᠭᠠᠬᠢᠬᠤ ᠪᠠᠷ ᠢ᠋ᠶ᠋ᠠᠨ ᠲᠦᠭᠦᠬᠡᠢ ᠠᠭᠤᠰᠬᠢ ᠰᠢᠭ ᠶᠣᠯᠪᠣᠢᠭᠠᠳ ᠪᠠᠢᠨᠠ ᠪᠣᠢ? ᠲᠤᠰᠠᠯᠠᠭᠴᠢ ᠲᠠ ᠠᠩᠵᠠᠭᠠᠷᠠᠪᠠ ᠤᠤ? ᠶᠠᠭᠤᠨ ᠳ᠋ᠤᠨᠢ ᠳᠤᠷᠠ ᠦᠭᠡᠢᠴᠡᠵᠦ ᠪᠠᠢᠬᠤ ᠶᠤᠮ ᠪᠣᠯ? ᠭᠡᠵᠦ ᠵᠣᠳᠪᠠ ᠨᠠᠮ ᠳᠠᠭᠤᠨ ᠢ᠋ᠶ᠋ᠠᠷ ᠬᠡᠯᠡᠪᠡᠯ᠂
— ᠬᠠᠷᠢᠨ ᠳᠠᠭᠠ ᠦᠭᠡᠢ ᠪᠠᠢᠬᠤ ᠨᠢ ᠠ᠋! ᠬᠣᠯᠠ ᠠᠶᠠᠨ ᠳ᠋ᠤ᠌ ᠨᠤᠬᠤᠭᠳᠠᠵᠤ ᠶᠠᠳᠠᠷᠠᠭᠰᠠᠨ ᠪᠠᠢᠯᠭᠦᠢ ᠳᠡ! ᠭᠡᠯᠡ᠃
— ᠰᠡᠦᠬᠡ ᠲᠡᠷᠭᠡᠨ ᠳ᠋ᠦ᠍ ᠪᠦᠪᠡᠢᠯᠡᠭᠳᠡᠵᠦ ᠶᠠᠪᠤᠭᠠᠳ ᠶᠠᠳᠠᠷᠠᠨᠠ ᠭᠡᠭᠴᠢ ᠶᠠᠭᠤ ᠪᠠᠢᠳᠠᠭ ᠶᠤᠮ? ᠪᠤᠷᠬᠠᠨ ᠳ᠋ᠤ᠌ ᠪᠠᠷᠢᠭᠰᠠᠨ ᠵᠤᠯᠠ ᠨᠢ ᠪᠥᠬᠥᠵᠦ᠂ ᠳᠠᠭᠠᠯᠲᠠ ᠴᠡᠷᠢᠭ ᠨᠢ ᠮᠠᠨᠠᠷᠠᠵᠤ ᠤᠨᠠᠭᠰᠠᠨ ᠳ᠋ᠤ᠌ ᠨᠢᠭᠡ ᠶᠡᠬᠡ ᠮᠠᠭᠤ ᠢᠷᠣᠠ ᠭᠡᠵᠦ ᠰᠡᠵᠢᠭ ᠠᠪᠴᠤ ᠪᠣᠳᠣᠯ ᠳ᠋ᠠᠭᠠᠨ ᠰᠦᠷᠡᠬᠡᠢ ᠳᠠᠷᠤᠭᠠᠰᠤ ᠲᠠᠢ ᠪᠣᠯᠴᠢᠬᠠᠪᠠ⁈ ᠴᠢᠭᠢᠶᠡᠲᠦᠷᠦᠦ ᠪᠤᠷᠬᠠᠨ ᠳ᠋ᠤ᠌ ᠪᠤᠷᠤᠭᠤ ᠦᠵᠡᠭᠳᠡᠭᠰᠡᠨ ᠦ᠌ ᠯᠡ ᠪᠢᠵᠡ ᠠ᠋! ᠭᠡᠰᠡᠨ ᠳ᠋ᠦ᠍ ᠡᠯᠳᠡᠩᠭᠡ᠄
— ᠬᠡᠩ! ᠭᠡᠵᠦ ᠬᠠᠮᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠣᠭᠣ ᠶᠠᠳᠠᠨ ᠭᠣᠩᠰᠢᠭᠰᠠᠨ ᠨᠢ《ᠱᠣᠷᠣ ᠨᠢ ᠲᠡᠷᠡ ᠠ᠋! ᠬᠢᠩᠭᠠ ᠶ᠋ᠢᠨ ᠴᠠᠭ ᠲᠤ ᠬᠣᠰᠢᠭᠤ ᠨᠤᠲᠤᠭ ᠢ᠋ᠶ᠋ᠠᠨ ᠬᠠᠶᠠᠵᠤ᠂ ᠬᠠᠮᠢᠭᠠ ᠬᠠᠩᠬᠠᠳᠠᠢ ᠶ᠋ᠢᠨ ᠲᠡᠷᠲᠡᠭᠡᠬᠢ ᠬᠠᠷᠠ ᠴᠡᠷᠢᠭ ᠢ᠋ ᠲᠦᠰᠢᠵᠦ ᠸᠠᠩ ᠰᠣᠬᠣᠷ ᠢ᠋ ᠳᠣᠯᠳᠣᠢᠳᠬᠤ ᠪᠠᠷ ᠶᠠᠪᠤᠴᠢᠬᠠᠭᠠᠳ ᠶᠠᠮᠠᠷ ᠨᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠤᠴᠠᠵᠤ ᠢᠷᠡᠪᠡ? ᠭᠡᠵᠦ ᠪᠤᠷᠬᠠᠨ ᠲᠩᠷᠢ ᠪᠤᠷᠤᠭᠤ ᠦᠵᠡᠪᠡᠯ ᠲᠡᠷᠡ ᠵᠥᠪ! ᠦᠨᠡᠬᠡᠷ ᠮᠠᠭᠤ ᠢᠷᠣᠠ ᠶᠤᠮ ᠠ᠋!》 ᠭᠡᠰᠡᠨ ᠤᠳᠬᠠ ᠳᠠᠯᠳᠠᠯᠠᠭᠳᠠᠭᠰᠠᠨ ᠢ᠋ ᠵᠣᠳᠪᠠ ᠶᠠᠭᠤ ᠠᠨᠳᠠᠬᠤ ᠪᠣᠢ⁈
— ᠮᠠᠭᠤ ᠢᠷᠣᠠ! ᠭᠡᠵᠦ ᠬᠣᠭᠣᠯᠵᠠᠭᠤᠷ ᠳᠣᠲᠣᠷᠠ ᠪᠠᠨ ᠬᠡᠩ ᠬᠡᠩ ᠭᠡᠵᠦ ᠳᠠᠪᠠᠯᠠᠨ ᠢᠨᠢᠶᠡᠵᠦ《ᠡᠪᠦᠭᠡᠨ ᠲᠤᠰᠠᠯᠠᠭᠴᠢ ᠭᠤᠸᠠᠢ ᠰᠠᠨᠠᠭᠠ ᠠᠮᠤᠷ ᠪᠠᠢ》 ᠭᠡᠳ ᠵᠥᠷᠢᠵᠦ ᠶᠠᠪᠤᠪᠠ᠃
ᠣᠷᠣᠢ᠂ ᠡᠯᠳᠡᠩᠭᠡ ᠪᠠᠶᠠᠨ ᠲᠠᠷᠭᠤᠨ ᠳᠠᠢᠯᠠᠯᠭᠠ ᠶ᠋ᠢᠨ ᠰᠢᠷᠡᠭᠡ ᠵᠠᠰᠠᠵᠤ᠂ ᠪᠠᠭᠠ ᠵᠠᠰᠠᠭ᠂ ᠬᠠᠲᠤᠨ ᠰᠧᠯᠢᠩ ᠪᠠᠷᠠᠭᠤᠨ ᠬᠦᠩ ᠳ᠋ᠡᠭᠡᠨ ᠪᠤᠴᠠᠭᠰᠠᠨ ᠤ᠋ ᠤᠭᠲᠤᠯᠭᠠ ᠶ᠋ᠢᠨ ᠨᠠᠢᠷ ᠬᠢᠪᠡ᠃
ᠰᠢᠷᠡᠭᠡᠨ ᠳ᠋ᠦ᠍ ᠨᠢᠩ ᠪᠣᠭᠣᠷᠰᠣᠭ᠂ ᠠᠭᠠᠷᠤᠤᠯ᠂ ᠰᠢᠷᠠ ᠲᠣᠰᠣ᠂ ᠥᠷᠥᠮᠡ᠂ ᠬᠠᠲᠠᠭᠠᠭᠰᠠᠨ ᠥᠷᠥᠮᠡ᠂ ᠦᠵᠦᠮ᠂ ᠴᠢᠪᠠᠭᠠ᠂ ᠵᠢᠮᠢᠰ ᠡᠨᠡ ᠲᠡᠷᠡ ᠢᠳᠡᠭᠡᠨ ᠦ᠌ ᠵᠦᠢᠯ ᠢ᠋ ᠡᠯᠪᠡᠭ ᠳᠡᠯᠪᠡᠭ ᠵᠠᠰᠠᠵᠤ ᠰᠢᠪᠡᠭᠴᠢᠨ ᠥᠬᠢᠨ ᠠᠷᠢᠬᠢ ᠬᠤᠨᠳᠠᠭᠠᠯᠠᠬᠤ ᠳ᠋ᠤ᠌ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠤᠭᠲᠤᠯᠭᠠ ᠶ᠋ᠢᠨ ᠰᠠᠨᠠᠭᠠ ᠢᠯᠡᠳᠬᠡᠬᠦ ᠪᠡᠷ ᠬᠤᠨᠳᠠᠭᠠ ᠪᠢᠯᠬᠠᠭᠤᠯᠵᠤ᠄
— ᠡᠩ ᠲᠦᠷᠦᠭᠦᠨ ᠳ᠋ᠦ᠍ ᠪᠢ ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠶᠠᠮᠤᠨ ᠤ᠋ ᠡᠮᠦᠨᠡ ᠡᠴᠡ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠦ᠋ᠨ ᠬᠠᠷᠠ ᠴᠡᠷᠢᠭ ᠡᠴᠡ ᠨᠤᠲᠤᠭ ᠪᠡᠯᠴᠢᠭᠡᠷ ᠢ᠋ᠶ᠋ᠡᠨ ᠬᠠᠮᠠᠭᠠᠯᠠᠵᠤ ᠶᠠᠪᠤᠭᠰᠠᠨ ᠡᠷᠬᠢᠮ ᠳᠡᠭᠡᠳᠦ ᠵᠣᠷᠢᠭ ᠰᠠᠨᠠᠭᠠᠨ ᠳ᠋ᠤ᠌ ᠶᠡᠬᠡᠳᠡ ᠰᠡᠳᠬᠢᠯ ᠬᠥᠳᠡᠯᠵᠦ᠂ ᠲᠡᠭᠦᠨ ᠦ᠌ ᠪᠠᠷᠠᠭᠤᠨ ᠬᠦᠩ ᠳ᠋ᠡᠭᠡᠨ ᠪᠤᠴᠠᠵᠤ ᠢᠷᠡᠭᠰᠡᠨ ᠳ᠋ᠦ᠍ ᠪᠠᠶᠠᠷᠯᠠᠨ ᠤᠭᠲᠤᠵᠤ ᠪᠠᠢᠨᠠ᠃ ᠢᠩᠭᠢᠬᠦᠯᠡᠷ ᠡᠷᠭᠢᠨ ᠪᠠᠭᠠ ᠬᠠᠲᠤᠨ ᠡᠯᠳᠡᠩᠭᠡ ᠮᠢᠨᠦ ᠰᠦ ᠰᠢᠭ ᠠᠷᠢᠭᠤᠨ ᠴᠠᠭᠠᠨ ᠰᠡᠳᠬᠢᠯ ᠦ᠋ᠨ ᠪᠡᠯᠡᠭ ᠰᠡᠯᠲᠡ ᠶ᠋ᠢ ᠰᠣᠶᠣᠷᠬᠠᠨ ᠭᠠᠷᠳᠠᠮᠤ! ᠭᠡᠰᠡᠨ ᠳ᠋ᠦ᠍ ᠤᠷᠠᠳ ᠵᠠᠰᠠᠯ ᠲᠠᠢ ᠶᠢᠰᠦᠨ ᠬᠡᠭᠡᠨᠴᠢᠷ ᠥᠬᠢᠨ ᠬᠠᠳᠠᠭ ᠳᠡᠯᠭᠡᠨ ᠵᠢᠭᠰᠠᠵᠤ ᠶᠢᠰᠦᠨ ᠯᠠᠩ ᠰᠢᠵᠢᠷ ᠠᠯᠲᠠ᠂ ᠶᠢᠰᠦᠨ ᠴᠣᠬᠣᠷ ᠶᠤᠸᠠᠮᠪᠤᠤ( ᠲᠠᠪᠢᠨ ᠯᠠᠩ ᠤ᠋ᠨ)᠂ ᠶᠢᠰᠦᠨ ᠵᠠᠭᠤ ᠶᠡᠷᠡ ᠶᠢᠰᠦᠨ ᠴᠠᠭᠠᠨ ᠵᠣᠭᠣᠰ᠂ ᠶᠢᠰᠦᠨ ᠪᠣᠭᠣᠳᠠᠯ ᠬᠠᠷᠠ ᠲᠠᠮᠠᠬᠢ᠂ ᠶᠢᠰᠦᠨ ᠥᠩᠭᠡ ᠶ᠋ᠢᠨ ᠡᠷᠳᠡᠨᠢ ᠶ᠋ᠢᠨ ᠴᠢᠯᠠᠭᠤ᠂ ᠶᠢᠰᠦᠨ ᠴᠠᠭᠠᠨ ᠬᠤᠷᠠᠭᠠᠨ ᠠᠷᠠᠰᠤ᠂ ᠶᠢᠰᠦᠨ ᠪᠣᠭᠣᠳᠠᠯ ᠬᠢᠲᠠᠳ ᠶᠠᠨᠵᠤᠤᠷ᠂ ᠶᠢᠰᠦᠨ ᠯᠦᠦ ᠬᠠᠷᠠ ᠠᠷᠢᠬᠢ᠂ ᠶᠢᠰᠦᠨ ᠣᠷᠢᠶᠠᠮᠠᠭ ᠬᠣᠷᠭᠣᠢ ᠲᠣᠷᠭᠠ ᠵᠡᠷᠭᠡ ᠶᠢᠰᠦ ᠶᠢᠰᠦ ᠨᠠᠶᠠᠨ ᠨᠢᠭᠡᠨ ᠪᠡᠯᠡᠭ ᠢ᠋ ᠨᠠᠨᠳᠢᠩᠨᠠᠨ ᠪᠡᠯᠡᠭᠯᠡᠭᠰᠡᠨ ᠳ᠋ᠦ᠍ ᠪᠠᠭᠠ ᠬᠠᠲᠤᠨ ᠤ᠋ ᠡᠮᠦᠨᠡ ᠡᠴᠡ ᠷᠠᠰᠢ ᠵᠠᠬᠢᠷᠤᠭᠴᠢ ᠪᠡᠯᠡᠭ ᠢ᠋ ᠲᠣᠰᠴᠤ ᠠᠪᠤᠪᠠ᠃
— ᠡᠨᠡ ᠶᠡᠬᠡ ᠪᠠᠶᠠᠷᠲᠤ ᠤᠴᠢᠷ ᠤ᠋ᠨ ᠲᠥᠯᠥᠭᠡᠨᠡ ᠪᠢᠳᠡ ᠪᠦᠭᠦᠳᠡᠭᠡᠷ ᠠᠩᠬᠠᠨ ᠤ᠋ ᠭᠡᠮ ᠢ᠋ ᠤᠤᠭᠤᠵᠠᠭᠠᠶᠠ! ᠭᠡᠵᠦ ᠵᠣᠳᠪᠠ ᠬᠤᠨᠳᠠᠭᠠ ᠡᠷᠭᠦᠭᠰᠡᠨ ᠳ᠋ᠦ᠍ ᠣᠯᠠᠨ ᠪᠦᠭᠦᠳᠡ ᠠᠶᠠᠯᠳᠠᠪᠠ᠃ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ᠄
— ᠪᠠᠷᠰ ᠤ᠋ᠨ ᠬᠦᠴᠦᠲᠦ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠠᠰᠠᠭ ᠲᠠᠮᠠᠭᠠ ᠶ᠋ᠢ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠳ᠋ᠦ᠍ ᠡᠷᠭᠦᠵᠦ ᠳᠡᠪᠰᠢᠭᠦᠯᠦᠶᠡ ᠭᠡᠵᠦ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠶᠢᠰᠦᠨ ᠵᠢᠩ ᠬᠦᠨᠳᠦ ᠴᠣᠯ ᠮᠥᠩᠭᠥᠨ ᠲᠠᠮᠠᠭᠠ ᠶ᠋ᠢ ᠬᠠᠳᠠᠭ ᠲᠤ ᠳᠡᠪᠢᠰᠬᠡᠷᠯᠡᠨ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠳ᠋ᠦ᠍ ᠳᠡᠭᠡᠳᠦᠯᠡᠨ ᠡᠷᠭᠦᠭ᠍ᠰᠡᠨ ᠳᠦ ᠷᠠᠰᠢ ᠵᠠᠬᠢᠷᠤᠭᠴᠢ ᠪᠠᠶᠠᠷᠯᠠᠨ ᠬᠥᠭᠡᠷᠴᠦ᠂ ᠵᠣᠳᠪᠠ ᠠ᠋ᠴᠠ ᠵᠠᠪᠳᠤᠵᠤ᠄
— ᠵᠠ᠂ ᠡᠷᠭᠢᠨ ᠨᠣᠶᠠᠨᠲᠠᠨ ᠠᠬᠠᠢᠲᠠᠨ ᠨᠠᠷ ᠠ᠋! ᠵᠠᠰᠠᠭ ᠲᠠᠮᠠᠭᠠ ᠶ᠋ᠢᠨ ᠶᠡᠬᠡ ᠪᠠᠶᠠᠷ ᠳᠤ ᠪᠦᠭᠦᠳᠡ ᠨᠢᠭᠡ ᠭᠡᠮ ᠲᠣᠭᠲᠠᠭᠠᠨᠠ ᠤᠤ? ᠭᠡᠳ ᠬᠤᠨᠳᠠᠭᠠ ᠡᠷᠭᠦᠵᠦ ᠥᠪᠡᠷ ᠢ᠋ᠶ᠋ᠡᠨ ᠲᠦᠷᠦᠭᠦᠯᠡᠨ᠄
ᠤᠸᠠ ᠰᠠᠢᠨ ᠠᠮᠤᠭᠤᠯᠠᠩᠳᠠᠨ ᠪᠣᠯᠲᠤᠭᠠᠢ!
ᠡᠩᠬᠡ ᠰᠠᠢᠨ ᠵᠢᠷᠭᠠᠯᠠᠩᠲᠠᠨ ᠪᠣᠯᠲᠤᠭᠠᠢ!
ᠲᠡᠭᠰᠢ ᠰᠠᠢᠬᠠᠨ ᠪᠤᠶᠠᠨ ᠲᠠᠨᠢ
ᠲᠩᠷᠢ ᠶ᠋ᠢᠨ ᠵᠢᠷᠭᠠᠯ ᠮᠡᠲᠦ ᠳᠡᠯᠭᠡᠷᠡᠵᠦ
ᠲᠡᠭᠦᠰ ᠰᠠᠢᠬᠠᠨ ᠠᠯᠳᠠᠷ ᠲᠠᠨᠢ
ᠳᠡᠯᠡᠬᠡᠢ ᠶ᠋ᠢᠨ ᠨᠠᠷᠠᠨ ᠤ᠋ ᠭᠡᠷᠡᠯ ᠮᠡᠲᠦ ᠲᠤᠨᠤᠯᠤᠨ
ᠡᠩᠬᠡ ᠲᠥᠷᠥ ᠶ᠋ᠢᠨ ᠡᠮᠦᠨᠡ ᠡᠴᠡ
ᠡᠷᠬᠢᠮ ᠱᠠᠰᠢᠨ ᠤ᠋ ᠳᠤᠮᠳᠠ ᠠ᠋ᠴᠠ
ᠲᠥᠷᠥ ᠳ᠋ᠡᠭᠡᠨ ᠲᠣᠪᠴᠢ ᠪᠣᠯᠵᠤ
ᠲᠦᠮᠡᠨ ᠳ᠋ᠡᠭᠡᠨ ᠰᠦᠯᠳᠡ ᠪᠣᠯᠵᠤ
ᠡᠯᠪᠡᠭ ᠶᠡᠬᠡ ᠪᠤᠶᠠᠨ ᠲᠠᠢ
ᠳᠡᠯᠭᠡᠷ ᠶᠡᠬᠡ ᠬᠡᠰᠢᠭ ᠲᠡᠢ
ᠡᠷᠳᠡᠨᠢ ᠶ᠋ᠢᠨ ᠵᠦᠢᠯ ᠮᠡᠲᠦ
ᠡᠪᠳᠡᠷᠡᠯ ᠦᠭᠡᠢ ᠪᠠᠲᠤ
ᠡᠷᠢᠬᠡᠨ ᠦ᠌ ᠬᠡᠯᠬᠢᠶᠡ ᠮᠡᠲᠦ
ᠲᠠᠰᠤᠷᠠᠯ ᠦᠭᠡᠢ ᠪᠦᠲᠦᠨ
ᠡᠯᠢᠭᠡ ᠪᠡᠷ ᠢ᠋ᠶ᠋ᠡᠨ ᠡᠩᠬᠡ ᠮᠡᠨᠳᠦ
ᠲᠥᠷᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠡᠭᠦᠰ ᠮᠡᠨᠳᠦ
ᠲᠦᠮᠡᠨ ᠵᠦᠢᠯ ᠦ᠋ᠨ ᠪᠠᠶᠠᠷ ᠢ᠋ᠶ᠋ᠠᠷ
ᠮᠢᠩᠭᠠᠨ ᠵᠦᠢᠯ ᠦ᠋ᠨ ᠵᠢᠷᠭᠠᠯ ᠢ᠋ᠶ᠋ᠠᠷ
ᠴᠡᠩᠭᠡᠨ ᠵᠢᠷᠭᠠᠬᠤ ᠶ᠋ᠢᠨ ᠪᠡᠯᠭᠡ ᠪᠡᠷ
ᠴᠠᠯᠭᠢᠨ ᠬᠠᠯᠭᠢᠨ ᠨᠠᠷᠭᠢᠬᠤ ᠪᠠᠷ
ᠲᠦᠭᠡᠮᠡᠯ ᠶᠡᠬᠡ ᠰᠠᠷᠬᠤᠳ ᠤ᠋ᠨ ᠳᠡᠭᠡᠵᠢ ᠶ᠋ᠢ
ᠲᠥᠷᠥᠯ ᠰᠠᠳᠤᠨ ᠡᠬᠢᠯᠡᠨ
ᠲᠦᠮᠡᠨ ᠠᠬᠠ ᠳᠡᠭᠦᠦ ᠲᠠ ᠨᠠᠷ ᠲᠠᠭᠠᠨ
ᠡᠷᠭᠦᠨ ᠠᠢᠯᠠᠳᠬᠠᠵᠤ ᠪᠠᠢᠨᠠ᠁ ᠭᠡᠵᠦ ᠬᠤᠨᠳᠠᠭᠠᠨ ᠤ᠋ ᠢᠷᠦᠭᠡᠯ ᠤᠶᠠᠩᠭᠠᠯᠠᠭᠰᠠᠨ ᠳ᠋ᠤ᠌ ᠣᠯᠠᠨ ᠪᠦᠭᠦᠳᠡ《ᠡᠷᠭᠦᠨ ᠠᠢᠯᠠᠳᠬᠠᠵᠤ ᠪᠠᠢᠨᠠ ᠠ᠋》 ᠭᠡᠵᠦ ᠠᠶᠠᠯᠳᠠᠨ ᠬᠥᠮᠦᠨ ᠪᠦᠬᠦᠨ ᠨᠢᠵᠡᠭᠡᠳ ᠭᠡᠮ ᠬᠥᠨᠲᠥᠷᠴᠦ ᠣᠷᠬᠢᠪᠠ᠃ ᠡᠨᠡ ᠬᠢᠷᠢ ᠳᠠᠭᠤᠴᠢᠳ᠄
ᠴᠣᠭᠴᠠᠯᠠᠭᠰᠠᠨ ᠪᠤᠶᠠᠨ ᠤ᠋ ᠬᠢᠨᠢ ᠦᠷᠡ ᠨᠢ
ᠴᠣᠭᠴᠠ ᠪᠡᠶᠡ ᠶ᠋ᠢᠨ ᠰᠠᠨᠠᠭᠠᠨ ᠤ᠋ ᠠᠮᠤᠷ ᠰᠠᠢᠨ
ᠴᠣᠬᠣᠮ ᠡᠷᠬᠢᠮ ᠰᠡᠳᠬᠢᠯ ᠳ᠋ᠡᠬᠢ ᠴᠢᠨᠠᠷ ᠨᠢ
ᠴᠣᠭᠲᠤ ᠰᠦᠮᠪᠦᠷ ᠠᠭᠤᠯᠠ ᠮᠡᠲᠦ ᠪᠠᠲᠤ ᠰᠠᠢᠨ᠁ ᠭᠡᠵᠦ《ᠭᠤᠷᠪᠠᠨ ᠪᠤᠶᠠᠨ》 ᠤ᠋ ᠡᠬᠢᠨ ᠦ᠌ ᠪᠠᠳᠠᠭ ᠢ᠋ ᠤᠶᠠᠩᠭᠠᠲᠠᠢᠬᠠᠨ ᠡᠯᠭᠦᠬᠦ ᠳ᠋ᠦ᠍ ᠪᠦᠬᠦ ᠶᠠᠭᠤᠮᠠ ᠨᠠᠢᠷ ᠤ᠋ᠨ ᠠᠶᠠᠰ ᠲᠤ ᠠᠭᠤᠰᠴᠤ᠂ ᠡᠨᠡ ᠰᠠᠢᠬᠠᠨ ᠨᠠᠢᠷ ᠤ᠋ᠨ ᠰᠢᠷᠡᠭᠡ᠂ ᠰᠡᠳᠬᠢᠯ ᠦ᠋ᠨ ᠥᠨᠳᠥᠷ ᠲᠦ᠍ ᠬᠠᠮᠤᠭ ᠪᠦᠬᠦᠨ ᠦ᠌ ᠰᠡᠳᠬᠢᠯ ᠤᠶᠠᠷᠠᠨ ᠠᠯᠢᠪᠠ ᠮᠠᠭᠤ ᠮᠠᠭᠤᠬᠠᠢ ᠵᠢᠭᠰᠢᠯ ᠦ᠋ᠨ ᠵᠦᠢᠯᠡᠰ ᠣᠷᠣ ᠲᠠᠰᠤ ᠦᠭᠡᠢ ᠠᠷᠴᠢᠭᠳᠠᠬᠤ ᠲᠠᠢᠰᠢ ᠪᠠᠨ ᠬᠡᠯᠪᠡᠢᠵᠦ ᠪᠠᠢᠯᠠ᠁
ᠡᠨᠡ ᠬᠣᠭᠣᠷᠣᠨᠳᠣ ᠡᠯᠳᠡᠩᠭᠡ᠂ ᠵᠣᠳᠪᠠ᠂ ᠷᠠᠰᠢ ᠵᠠᠬᠢᠷᠤᠭᠴᠢ ᠨᠠᠷ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠳ᠋ᠦ᠍ ᠪᠠᠷᠠ ᠪᠣᠯᠵᠤ ᠵᠠᠰᠠᠭ ᠲᠠᠮᠠᠭᠠ ᠶ᠋ᠢ ᠲᠠᠮᠠᠭᠠ ᠶ᠋ᠢᠨ ᠣᠷᠳᠣᠨ ᠳ᠋ᠤ᠌ ᠠᠪᠠᠴᠢᠵᠤ ᠵᠤᠯᠠ ᠪᠠᠷᠢᠨ ᠮᠥᠷᠭᠥᠵᠡᠭᠡᠪᠡ᠃
ᠤᠭᠲᠤᠯᠭᠠ ᠶ᠋ᠢᠨ ᠨᠠᠢᠷ ᠡᠮᠬᠢ ᠳᠢᠭᠯᠢᠮ ᠲᠡᠢ ᠶᠠᠪᠤᠭᠳᠠᠵᠤ ᠳᠠᠭᠤᠴᠢᠳ《ᠦᠯᠡᠮᠵᠢ ᠶ᠋ᠢᠨ ᠪᠤᠶᠠᠨ》 ᠢ᠋ ᠡᠯᠭᠦᠬᠦ ᠳ᠋ᠦ᠍ ᠬᠣᠭᠣᠷᠣᠨᠳᠣ ᠨᠢ ᠨᠠᠢᠷ ᠤ᠋ᠨ ᠬᠥᠮᠦᠰ《ᠠᠶᠠ ᠪᠠᠨ ᠰᠡᠭᠡᠭᠡ᠁ ᠠᠰᠢᠳᠠ ᠶ᠋ᠢᠨ ᠠᠮᠤᠷ ᠵᠢᠷᠭᠠᠶᠠ!》 ᠭᠡᠵᠦ ᠠᠶᠠ ᠲᠦᠷᠡᠬᠦ ᠨᠢ ᠰᠡᠳᠬᠢᠯ ᠳ᠋ᠦ᠍ ᠲᠠᠭᠠᠯᠠᠭᠳᠠᠬᠤ ᠶ᠋ᠢ ᠥᠭᠦᠯᠡᠬᠦ ᠶᠠᠭᠤᠨ᠃
ᠠᠯᠲᠠ ᠮᠥᠩᠭᠥ ᠲᠦᠷᠦᠭᠦᠲᠡᠢ ᠪᠡᠯᠡᠭ ᠰᠡᠯᠲᠡ ᠶ᠋ᠢᠨ ᠬᠦᠴᠦᠨ ᠡᠴᠡ ᠤᠤ ᠡᠰᠡᠪᠡᠰᠦ ᠵᠠᠰᠠᠭ ᠲᠠᠮᠠᠭᠠ ᠪᠠᠨ ᠠᠮᠠᠷᠬᠠᠨ ᠭᠠᠷᠲᠠᠭᠰᠠᠨ ᠠ᠋ᠴᠠ ᠤᠤ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠦ᠋ᠨ ᠴᠢᠷᠠᠢ ᠲᠡᠨᠢᠢᠬᠦ ᠰᠢᠭ ᠪᠣᠯᠵᠤ ᠳᠠᠭᠤᠴᠢᠳ ᠤ᠋ᠨ ᠠᠶᠠ ᠳᠠᠭᠠᠵᠤ《ᠦᠯᠡᠮᠵᠢ ᠶ᠋ᠢᠨ ᠪᠤᠶᠠᠨ》 ᠢ᠋ ᠨᠠᠮᠤᠭᠤᠬᠠᠨ ᠠᠶᠠᠯᠤᠨᠠ᠃
ᠶᠠᠭᠤᠮᠠᠨ ᠤ᠋ ᠣᠩᠬᠢ ᠶ᠋ᠢ ᠠᠯᠳᠠᠯ ᠦᠭᠡᠢ ᠴᠣᠬᠢᠳᠠᠭ ᠡᠯᠳᠡᠩᠭᠡ ᠡᠪᠦᠷ ᠡᠴᠡ ᠪᠡᠨ ᠠᠶᠤᠰᠢ ᠬᠠᠳᠠᠭ ᠠᠯᠳᠠᠯᠠᠨ ᠲᠠᠲᠠᠵᠤ᠂ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠳ᠋ᠦ᠍ ᠨᠢᠭᠡ ᠭᠡᠮ ᠠᠷᠢᠬᠢ ᠪᠠᠷᠢᠵᠤ᠄
— ᠡᠷᠭᠢᠨ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠮᠢᠨᠢ᠂ ᠡᠨᠡ ᠭᠡᠮ ᠢ᠋ ᠲᠣᠭᠲᠠᠭᠠᠴᠢᠬᠠ! ᠬᠣᠯᠠ ᠶᠠᠪᠤᠵᠤ ᠬᠠᠷᠠᠭᠠ ᠨᠡᠭᠡᠭᠡᠭᠰᠡᠨ ᠬᠥᠮᠦᠨ ᠬᠣᠢᠨᠠ ᠳᠠ᠂ ᠮᠥᠨ ᠣᠨᠳᠣᠣ ᠶᠤᠮ ᠠ᠋! ᠡᠪᠦᠭᠡᠨ ᠪᠣᠷᠣ ᠰᠡᠳᠬᠢᠯ ᠢ᠋ ᠮᠢᠨᠢ ᠣᠢᠯᠠᠭᠠᠳᠠᠭ ᠯᠠ ᠶᠤᠮ ᠪᠣᠯ᠂ ᠣᠰᠣᠯ ᠪᠤᠷᠤᠭᠤ ᠶ᠋ᠢ ᠮᠢᠨᠢ ᠠᠭᠤᠴᠢᠯᠠᠨ ᠥᠷᠥᠰᠢᠶᠡᠬᠦ ᠪᠣᠯᠪᠠ ᠤᠤ⁈ ᠭᠡᠵᠦ ᠲᠣᠯᠣᠭᠠᠢ ᠮᠡᠬᠦᠢᠨᠡ᠃
ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠰᠠᠭᠤᠳᠠᠯ ᠠ᠋ᠴᠠ ᠪᠠᠨ ᠪᠣᠰᠴᠤ ᠡᠪᠦᠭᠡᠨ ᠲᠤᠰᠠᠯᠠᠭᠴᠢ ᠶ᠋ᠢᠨ ᠬᠠᠳᠠᠭ ᠲᠠᠲᠠᠭᠰᠠᠨ ᠠᠷᠢᠬᠢ ᠶ᠋ᠢ ᠲᠣᠰᠴᠤ ᠠᠪᠤᠨ᠄
— ᠲᠤᠰᠠᠯᠠᠭᠴᠢ ᠲᠠ ᠰᠠᠭᠤᠭᠠᠴᠢ! ᠪᠢ ᠡᠨᠡ ᠭᠡᠮ ᠠᠷᠢᠬᠢ ᠶ᠋ᠢ ᠲᠣᠭᠲᠠᠭᠠᠴᠢᠬᠠᠶᠠ ᠭᠡᠳ ᠠᠷᠢᠬᠢ ᠶ᠋ᠢ ᠲᠣᠰᠴᠤ ᠠᠪᠤᠭᠠᠳ ᠤᠤᠭᠤᠪᠠ᠃
ᠡᠯᠳᠡᠩᠭᠡ ᠶ᠋ᠢᠨ ᠳᠣᠲᠣᠷᠠ ᠶᠠᠭᠤ ᠪᠦᠬᠦᠨ ᠲᠣᠳᠣ ᠲᠤᠩᠭᠠᠯᠠᠭ ᠪᠣᠯᠤᠭᠠᠳ ᠶᠠᠪᠤᠴᠢᠬᠠᠯᠠ᠃ ᠨᠢᠭᠡ ᠯᠡ ᠰᠠᠷᠠᠭᠤᠯᠵᠢᠪᠠ᠃
ᠥᠷᠥᠪᠴᠢᠬᠡᠨ ᠡᠮᠵᠢᠭ ᠪᠣᠳᠣᠯ ᠲᠠᠢ ᠡᠮᠡ ᠬᠥᠮᠦᠨ ᠦ᠌ ᠬᠤᠪᠢ ᠳ᠋ᠤ᠌ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠦ᠋ᠨ ᠰᠡᠳᠬᠢᠯ ᠤᠶᠠᠷᠠᠵᠤ᠂ ᠤᠤᠯ ᠤ᠋ᠨ ᠡᠯᠳᠡᠩᠭᠡ ᠲᠡᠷᠢᠭᠦᠲᠡᠨ ᠢ᠋ ᠶᠠᠯᠠᠯᠠᠨ ᠴᠠᠭᠠᠵᠠᠯᠠᠬᠤ ᠭᠡᠵᠦ ᠦᠰ ᠵᠠᠩᠭᠢᠳᠴᠤ ᠪᠠᠢᠭᠰᠠᠨ ᠬᠠᠷᠠ ᠪᠣᠳᠣᠯ ᠨᠢ ᠲᠣᠪᠴᠢ ᠠᠯᠳᠠᠷᠠᠬᠤ ᠰᠢᠭ᠋ ᠢᠯᠳᠠᠮᠬᠠᠨ ᠲᠠᠢᠯᠤᠭᠳᠠᠨᠠ᠁
《ᠮᠢᠩᠭᠠᠨ ᠨᠣᠶᠠᠨ᠂ ᠰᠢᠷᠠ ᠴᠡᠷᠢᠭ ᠬᠣᠶᠠᠷ ᠢ᠋ ᠲᠦᠰᠢᠵᠦ ᠶᠠᠪᠤᠭᠠᠳ ᠴᠦ᠍ ᠮᠥᠨ ᠭᠠᠪᠢᠭᠰᠠᠨ ᠦᠭᠡᠢ ᠴᠢᠷᠠᠢ᠃ ᠬᠠᠮᠠᠷ ᠲᠤᠨᠢ ᠤᠲᠤᠭᠠ ᠣᠷᠣᠵᠤ ᠬᠠᠯᠠᠭᠤᠨ ᠴᠢᠯᠠᠭᠤ ᠳᠣᠯᠢᠶᠠᠭᠠᠳ ᠬᠠᠰᠢᠷᠵᠢᠭᠰᠠᠨ ᠲᠣᠯᠣᠭᠠᠢ ᠪᠣᠢ ᠳᠠ! ᠡᠴᠦᠰ ᠦ᠋ᠨ ᠡᠴᠦᠰ ᠲᠦ᠍ ᠨᠤᠲᠤᠭ ᠤ᠋ᠨ ᠴᠢᠨᠢ ᠮᠣᠳᠣ ᠰᠡᠭᠦᠳᠡᠷ ᠲᠡᠢ ᠪᠠᠢᠭᠠ᠁ ᠬᠥᠭᠡᠷᠦᠬᠦᠢ ᠶᠦᠮ ᠠ᠋! ᠡᠪᠦᠭᠡᠨ ᠰᠢᠪᠠᠭᠤ᠂ ᠥᠲᠡᠯᠬᠦ ᠶ᠋ᠢᠨ ᠦᠵᠦᠭᠦᠷ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠬᠠᠳᠠᠨ ᠳᠡᠭᠡᠷᠡ ᠪᠡᠭᠡᠪᠡᠢᠨ ᠰᠠᠭᠤᠪᠠᠯ ᠨᠠᠰᠤᠨ ᠤ᠋ ᠡᠪᠦᠯ ᠳ᠋ᠡᠭᠡᠨ ᠪᠤᠭᠤᠷᠤᠯᠲᠤᠬᠤ ᠳ᠋ᠤ᠌ ᠪᠡᠭᠡᠷᠡᠬᠦ ᠦᠭᠡᠢ ᠭᠡᠳᠡᠭ ᠢ᠋ᠶ᠋ᠡᠨ ᠡᠪᠦᠭᠡᠵᠢᠶᠡᠷ ᠲᠣᠯᠣᠭᠠᠢ ᠤᠬᠠᠭᠠᠷᠠᠭᠰᠠᠨ ᠪᠢᠵᠡ⁈᠁》 ᠭᠡᠵᠦ ᠪᠠᠭᠠ ᠬᠠᠲᠤᠨ ᠪᠣᠳᠣᠪᠠ᠃ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠪᠠᠷᠤᠭ ᠤ᠋ᠨ ᠬᠥᠮᠦᠨ ᠦ᠌ ᠳᠣᠣᠷᠠ ᠲᠣᠯᠣᠭᠠᠢ ᠮᠡᠬᠦᠢᠵᠦ ᠡᠪᠦᠳᠦᠭ ᠨᠤᠭᠤᠷᠠᠳᠠᠭ ᠦᠭᠡᠢ ᠶᠦᠮ ᠭᠡᠨᠡ ᠪᠢᠯᠡ᠃ ᠲᠡᠭᠦᠨ ᠦ᠌ ᠢᠩᠭᠢᠬᠦ ᠶ᠋ᠢ ᠠᠩᠬᠠ ᠬᠠᠷᠠᠭᠰᠠᠨ ᠪᠠᠭᠠ ᠬᠠᠲᠤᠨ ᠤ᠋ ᠰᠡᠳᠬᠢᠯ ᠵᠥᠭᠡᠯᠡᠷᠡᠨ ᠦᠷᠦ ᠡᠪᠡᠳᠬᠦ ᠳ᠋ᠦ᠍《ᠡᠮᠡ ᠬᠥᠮᠦᠨ ᠶᠠᠭᠠᠬᠢᠵᠤ ᠰᠣᠭᠰᠣᠯᠵᠠᠪᠠᠴᠤ ᠡᠷᠡ ᠬᠥᠮᠦᠨ ᠦ᠌ ᠳᠣᠣᠷᠠ ᠬᠠᠪᠲᠠᠯᠵᠠᠬᠤ ᠠ᠋ᠴᠠ ᠬᠠᠮᠢᠭᠠ ᠭᠠᠷᠬᠤ ᠪᠣᠢ? ᠢᠮᠠᠭᠠ ᠲᠤᠢᠯᠠᠭᠠᠳ ᠶᠠᠩᠭᠢᠶᠠ ᠡᠪᠳᠡᠬᠦ ᠦᠭᠡᠢ ᠭᠡᠳᠡᠭ ᠢ᠋ᠶ᠋ᠡᠷ ᠴᠢ ᠰᠣᠭᠰᠣᠯᠵᠠᠬᠤ ᠪᠠᠷ ᠢ᠋ᠶ᠋ᠠᠨ ᠰᠣᠭᠰᠣᠯᠵᠠᠵᠤ᠂ ᠢᠮᠠᠭᠠᠨ ᠲᠣᠢᠯᠠᠭᠠ ᠪᠠᠷ ᠪᠠᠷᠠᠭᠤᠨ ᠬᠣᠰᠢᠭᠤ ᠶ᠋ᠢ ᠪᠠᠭᠲᠠ ᠶᠠᠳᠠᠷᠠᠲᠠᠯᠠ ᠲᠣᠢᠯᠠᠵᠤ ᠯᠠ ᠪᠠᠢ ᠳᠠ! ᠪᠤᠷᠤᠭᠤ ᠵᠢᠯᠣᠭᠣ ᠳᠤᠭᠲᠤᠷᠴᠤ ᠶᠠᠪᠤᠭᠰᠠᠨ ᠮᠠᠭᠤ ᠶᠠᠩᠬᠠᠨ ᠡᠮᠡ ᠴᠢ᠂ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ᠋ ᠨᠤᠲᠤᠭ ᠲᠤ ᠪᠠᠷᠤᠭᠲᠠᠢᠬᠠᠨ ᠰᠢᠭ᠋ ᠲᠠᠪᠠᠷᠠ! ᠰᠠᠢᠨ ᠢ᠋ᠶ᠋ᠠᠨ ᠦᠵᠡᠬᠦ ᠴᠠᠭ ᠴᠢᠨᠢ ᠬᠣᠢᠨᠠ ᠪᠠᠨ ᠪᠣᠢ》 ᠭᠡᠵᠦ ᠴᠠᠭᠠᠨᠠ ᠪᠠᠨ ᠪᠢᠲᠡᠭᠦᠦ ᠵᠠᠨᠤᠯ ᠡᠪᠦᠷᠯᠡᠭᠰᠡᠨ ᠡᠯᠳᠡᠩᠭᠡ ᠶ᠋ᠢᠨ ᠢᠨᠢᠶᠡᠳᠦ ᠴᠠᠯᠭᠢᠭᠤᠯᠤᠭᠰᠠᠨ ᠴᠢᠷᠠᠢ ᠳ᠋ᠤ᠌ ᠨᠢᠭᠤᠴᠠᠬᠠᠨ ᠶᠠᠭᠤᠮᠠ ᠪᠠᠭᠯᠠᠭᠳᠠᠭᠰᠠᠨ ᠢ᠋ ᠪᠠᠭᠠ ᠬᠠᠲᠤᠨ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ⁈
ᠡᠶᠡᠷᠡᠬᠦᠨ ᠠᠮᠢᠰᠬᠤᠭᠠ ᠲᠠᠢ ᠳᠠᠢᠯᠠᠯᠭᠠ ᠶ᠋ᠢᠨ ᠰᠢᠷᠡᠭᠡᠨ ᠳ᠋ᠦ᠍ ᠵᠣᠩᠬᠢᠯᠠᠬᠤ ᠬᠥᠮᠦᠰ ᠦ᠋ᠨ ᠨᠢᠳᠦ ᠴᠠᠳᠬᠤᠯᠳᠠᠵᠤ ᠪᠣᠳᠣᠯ ᠮᠠᠩᠰᠢᠭᠤᠷᠠᠨ ᠡᠩᠬᠡ ᠮᠡᠨᠳᠦ ᠶ᠋ᠢᠨ ᠪᠡᠯᠭᠡᠰᠢᠶᠡᠯ ᠢ᠋ᠶ᠋ᠡᠷ ᠪᠠᠭᠠ ᠬᠠᠲᠤᠨ ᠤ᠋ ᠴᠢᠷᠠᠢ ᠥᠩᠭᠡ ᠶ᠋ᠢ ᠠᠶᠠᠯᠳᠠᠵᠤ ᠪᠠᠢᠬᠤ ᠳ᠋ᠤ᠌ ᠭᠠᠭᠴᠠ ᠷᠠᠰᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠴᠢᠷᠠᠢ ᠳ᠋ᠤ᠌ ᠡᠭᠦᠯᠡ ᠬᠤᠢᠯᠠᠷᠠᠵᠤ ᠪᠠᠢᠯᠠ᠃ ᠡᠯᠳᠡᠩᠭᠡ ᠶ᠋ᠢᠨ ᠢᠨᠢᠶᠡᠮᠰᠦᠭ ᠴᠢᠷᠠᠢ ᠳ᠋ᠤ᠌ ᠨᠢᠭᠤᠴᠠᠬᠠᠨ ᠪᠠᠭᠯᠠᠭᠳᠠᠭᠰᠠᠨ ᠪᠡᠯᠭᠡ ᠪᠤᠰᠤ ᠶ᠋ᠢᠨ ᠵᠦᠢᠯᠡᠰ ᠢ᠋ ᠲᠡᠷᠡ ᠰᠡᠮᠬᠡᠨ ᠳᠠᠭᠠᠵᠤ ᠮᠡᠳᠡᠵᠡᠢ᠃
ᠪᠠᠭᠠ ᠬᠠᠲᠤᠨ ᠬᠤᠨᠳᠠᠭᠠ ᠵᠠᠰᠠᠵᠤ᠄
— ᠲᠤᠰᠠᠯᠠᠭᠴᠢ ᠲᠠᠨ ᠤ᠋ ᠰᠠᠢᠨ ᠢ᠋ᠶ᠋ᠠᠷ ᠤᠭᠲᠤᠯᠭᠠ ᠶ᠋ᠢᠨ ᠨᠠᠢᠷ ᠰᠡᠳᠬᠢᠯ ᠳ᠋ᠦ᠍ ᠰᠠᠢᠬᠠᠨ ᠪᠠᠢᠨᠠ᠃ ᠲᠠ ᠮᠢᠨᠦ ᠬᠠᠷᠢᠭᠤ ᠪᠠᠷᠢᠭᠰᠠᠨ ᠠᠷᠢᠬᠢ ᠶ᠋ᠢ ᠲᠣᠭᠲᠠᠭᠠᠨᠠ ᠤᠤ⁈ ᠭᠡᠰᠡᠨ ᠳ᠋ᠦ᠍ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠬᠤᠨᠳᠠᠭᠠ ᠲᠠᠢ ᠠᠷᠢᠬᠢ ᠶ᠋ᠢ ᠲᠣᠰᠴᠤ ᠤᠤᠭᠤᠭᠠᠳ᠄
— ᠡᠷᠭᠢᠨ ᠬᠠᠲᠤᠨ ᠰᠧᠯᠢᠩ ᠤᠬᠠᠭᠠᠨ ᠴᠢᠳᠠᠯ ᠬᠣᠣᠰᠯᠠᠵᠤ᠂ ᠠᠯᠤᠰ ᠢ᠋ ᠪᠣᠳᠣᠨ ᠬᠣᠯᠠ ᠶ᠋ᠢ ᠬᠠᠷᠠᠵᠤ᠂ ᠥᠴᠦᠬᠡᠨ ᠬᠥᠮᠦᠨ ᠤ ᠠᠭᠤᠴᠢᠯᠠᠰᠢ ᠦᠭᠡᠢ ᠣᠰᠣᠯ ᠶᠠᠯᠠ ᠶ᠋ᠢ ᠥᠩᠭᠡᠷᠡᠭᠦᠯᠦᠭᠰᠡᠨ ᠡᠨᠡᠷᠢᠯ ᠳ᠋ᠦ᠍ ᠴᠢᠨᠢ ᠪᠢ ᠪᠠᠶᠠᠷᠯᠠᠵᠤ ᠪᠠᠷᠠᠰᠢ ᠦᠭᠡᠢ᠃ ᠡᠷᠭᠢᠨ ᠪᠠᠭᠠ ᠬᠠᠲᠤᠨ ᠣᠳᠣ ᠪᠠᠷᠠᠭᠤᠨ ᠬᠦᠩ ᠳ᠋ᠡᠭᠡᠨ ᠪᠤᠴᠠᠵᠤ ᠢᠷᠡᠭᠰᠡᠨ ᠨᠢ ᠰᠠᠢᠨ ᠪᠣᠯᠤᠯᠠ᠁ ᠪᠠᠷᠠᠭᠤᠨ ᠬᠦᠩ ᠮᠢᠨᠢ ᠥᠩᠭᠡᠷᠡᠭᠴᠢ ᠬᠡᠳᠦᠨ ᠵᠢᠯ ᠰᠦᠨᠡᠰᠦ ᠪᠡᠨ ᠭᠡᠭᠡᠭᠰᠡᠨ ᠬᠥᠮᠦᠨ ᠰᠢᠭ ᠮᠡᠨᠡᠭᠷᠡᠵᠦ ᠶᠠᠪᠤᠯᠠ᠁ ᠪᠠᠭᠠ ᠬᠠᠲᠤᠨ ᠮᠢᠨᠢ! ᠣᠳᠣ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠢᠯᠣᠭᠣ ᠡᠵᠡᠨ ᠳ᠋ᠡᠭᠡᠨ ᠪᠤᠴᠠᠭᠰᠠᠨ ᠨᠢ ᠠᠵᠠ ᠪᠤᠶᠠᠨ! ᠭᠣᠣᠯ ᠨᠢ ᠬᠣᠰᠢᠭᠤ ᠣᠯᠠᠨ ᠢ᠋ᠶ᠋ᠠᠨ ᠥᠭᠡᠳᠡ ᠨᠢ ᠲᠠᠲᠠᠳᠠᠭ ᠯᠠ ᠪᠣᠯ ᠮᠢᠨᠦ ᠬᠥᠭᠰᠢᠨ ᠶᠠᠰᠤ ᠶ᠋ᠢ ᠶᠠᠭᠠᠬᠢᠭᠰᠠᠨ ᠴᠦ᠍ ᠬᠠᠮᠢᠶᠠ ᠦᠭᠡᠢ᠁ ᠪᠢ ᠢᠩᠭᠢᠭᠡᠳ ᠡᠷᠭᠢᠨ ᠪᠠᠭᠠ ᠬᠠᠲᠤᠨ ᠤ᠋ ᠵᠠᠬᠢᠷᠤᠯ ᠳᠣᠣᠷᠠ ᠵᠢᠭᠠᠭᠰᠠᠨ ᠵᠦᠭ ᠲᠦ᠍ ᠴᠢᠨᠢ ᠶᠠᠪᠤᠵᠤ᠂ ᠵᠠᠩᠳᠤᠷᠤᠭᠰᠠᠨ ᠭᠠᠵᠠᠷ ᠴᠢᠨᠢ ᠵᠣᠭᠰᠣᠵᠤ ᠶᠠᠯᠠ ᠪᠠᠨ ᠭᠠᠪᠢᠶᠠ ᠪᠠᠷ ᠲᠠᠢᠯᠵᠤ ᠶᠠᠪᠤᠶᠠ! ᠭᠡᠰᠡᠨ ᠢ᠋ ᠰᠣᠨᠣᠰᠤᠭᠰᠠᠨ ᠪᠠᠭᠠ ᠬᠠᠲᠤᠨ ᠤᠶᠠᠷᠠᠵᠤ《ᠡᠯᠳᠡᠩᠭᠡ ᠭᠤᠸᠠᠢ ᠬᠠᠭᠤᠴᠢᠨ ᠵᠠᠰᠠᠭ ᠬᠦᠩ ᠨᠣᠶᠠᠨ ᠳ᠋ᠤ᠌ ᠠᠩᠬᠠ ᠠᠩᠬᠠᠨ ᠤ᠋ ᠭᠠᠪᠢᠶᠠᠲᠠᠢ ᠶᠠᠪᠤᠭᠰᠠᠨ ᠬᠥᠮᠦᠨ ᠦ᠌ ᠨᠢᠭᠡ᠁ ᠬᠡᠳᠦᠢᠪᠡᠷ ᠳᠣᠲᠣᠷᠠ ᠵᠠᠭᠤᠷᠠ ᠶ᠋ᠢᠨ ᠬᠢᠮᠤᠷᠠᠯ ᠭᠠᠷᠴᠤ ᠠᠯᠠᠭᠠᠨ ᠬᠥᠪᠰᠢᠭᠡᠨ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠭᠠᠭᠴᠠ ᠡᠯᠳᠡᠩᠭᠡ ᠳ᠋ᠦ᠍ ᠪᠤᠷᠤᠭᠤ ᠲᠣᠬᠣᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ᠃ ᠬᠣᠶᠠᠷ ᠠᠯᠠᠭᠠ ᠬᠠᠪᠰᠤᠷᠬᠤ ᠦᠭᠡᠢ ᠪᠣᠯ ᠶᠠᠭᠠᠬᠢᠵᠤ ᠳᠠᠭᠤᠨ ᠭᠠᠷᠬᠤ ᠪᠢᠯᠡ⁈ ᠴᠡᠴᠡᠭ ᠬᠠᠲᠤᠨ᠂ ᠮᠠᠨᠴᠤᠷᠭᠠ ᠶ᠋ᠢᠨ ᠰᠠᠮᠠᠭᠤᠷᠠᠭᠰᠠᠨ ᠤᠴᠢᠷ ᠢ᠋ ᠥᠯᠵᠡᠢᠰᠠᠩ ᠪᠣᠯᠠᠢ ᠡᠭᠦᠰᠬᠡᠵᠦ᠁》 ᠭᠡᠵᠦ ᠪᠣᠳᠣᠨ ᠴᠢᠷᠠᠢ ᠲᠡᠨᠢᠢᠯᠭᠡᠨ ᠶᠠᠭᠤ ᠨᠢᠭᠡ ᠶ᠋ᠢ ᠬᠡᠯᠡᠬᠦ ᠭᠡᠳ ᠥᠨᠳᠡᠢᠲᠡᠯᠡ ᠷᠠᠰᠢ ᠵᠠᠬᠢᠷᠤᠭᠴᠢ ᠪᠠᠭᠠ ᠬᠠᠲᠤᠨ ᠤ᠋ ᠴᠢᠬᠢᠨ ᠳ᠋ᠦ᠍ ᠨᠢᠭᠡ ᠶᠠᠭᠤᠮᠠ ᠰᠢᠪᠡᠨᠡᠪᠡ᠃
ᠡᠯᠳᠡᠩᠭᠡ ᠪᠣᠯ ᠶᠠᠮᠠᠷ ᠴᠦ᠍ ᠣᠷᠴᠢᠨ ᠬᠠᠮᠢᠭᠠ ᠴᠦ᠍ ᠭᠡᠰᠡᠨ ᠦᠭᠡᠢ ᠨᠣᠶᠠᠯᠠᠬᠤ ᠪᠠᠢᠷᠢ ᠶ᠋ᠢᠨ ᠡᠲᠡᠭᠡᠳ ᠦ᠋ᠨ ᠰᠤᠳᠠᠯ ᠢ᠋ ᠨᠢ ᠪᠠᠷᠢᠵᠤ ᠮᠡᠳᠡᠭᠰᠡᠨ ᠰᠢᠭ ᠴᠢᠷᠠᠢ ᠥᠩᠭᠡ ᠶ᠋ᠢ ᠨᠢ ᠦᠵᠡᠵᠦ᠂ ᠶᠠᠪᠤᠳᠠᠯ ᠤᠴᠢᠷ ᠤ᠋ᠨ ᠣᠨᠢ ᠶ᠋ᠢ ᠭᠣᠭᠴᠣᠭᠠᠯᠠᠵᠤ ᠰᠦᠪᠡᠯᠡᠳᠡᠭ ᠬᠠᠰᠢᠷ ᠰᠤᠷᠮᠠᠭᠠᠢ ᠡᠷᠡ ᠶ᠋ᠢᠨ ᠨᠢᠭᠡ ᠪᠡᠷ ᠥᠴᠦᠬᠡᠨ ᠴᠦ᠍ ᠮᠡᠩᠳᠡᠵᠦ ᠶᠠᠭᠠᠷᠠᠬᠤ ᠦᠭᠡᠢ᠂ ᠯᠠᠪᠳᠠᠭᠤᠨ ᠲᠠᠢᠪᠤᠩ ᠠᠪᠤᠷᠢ ᠪᠠᠷ ᠨᠥᠭᠦᠭᠡ ᠡᠲᠡᠭᠡᠳ ᠦ᠋ᠨ ᠢᠲᠡᠭᠡᠯ ᠢ᠋ ᠬᠣᠨᠵᠢᠵᠤ ᠬᠡᠵᠢᠶᠡ ᠠᠷᠤ ᠬᠣᠢᠨᠠ ᠨᠢ ᠥᠪᠡᠷ ᠲᠦ᠋ᠨᠢ ᠠᠰᠢᠭᠲᠠᠢ ᠶ᠋ᠢ ᠵᠠᠪᠰᠢᠵᠤ ᠴᠢᠳᠠᠳᠠᠭ ᠬᠥᠮᠦᠨ ᠮᠥᠨ ᠭᠡᠭᠴᠢ ᠶ᠋ᠢ ᠷᠠᠰᠢ ᠵᠠᠬᠢᠷᠤᠭᠴᠢ ᠬᠡᠷᠬᠢᠨ ᠠᠨᠳᠠᠬᠤ ᠪᠢᠯᠡ⁈ ᠲᠡᠷᠡ ᠪᠡᠷ ᠪᠠᠭᠠ ᠬᠠᠲᠤᠨ ᠤ᠋ ᠴᠢᠬᠢᠨ ᠳ᠋ᠦ᠍《ᠪᠠᠭᠠ ᠬᠠᠲᠤᠨ ᠠ᠋᠂ ᠡᠨᠡ ᠰᠡᠭᠦᠯ ᠨᠢ ᠤᠭ ᠲᠠᠭᠠᠨ ᠬᠦᠷᠲᠡᠯᠡ ᠴᠠᠢᠭᠰᠠᠨ ᠬᠤᠯᠵᠢᠨ ᠦᠨᠡᠭᠡᠨ ᠳ᠋ᠦ᠍ ᠨᠠᠢᠷ ᠲᠠᠯᠪᠢᠵᠤ ᠪᠣᠯᠬᠤ ᠦᠭᠡᠢ ᠰᠢᠦ! ᠡᠨᠡ ᠰᠠᠢᠬᠠᠨ ᠳᠡᠯᠢᠮ ᠢ᠋ᠶ᠋ᠡᠷ ᠲᠡᠭᠦᠨ ᠢ᠋ ᠴᠠᠭᠠᠵᠠ ᠪᠠᠷ ᠠᠪᠠᠴᠢᠬᠤ ᠬᠡᠷᠡᠭᠲᠡᠢ! ᠡᠰᠡ ᠲᠡᠢᠮᠦ ᠪᠣᠯ᠁ ᠬᠠᠪᠬᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠴᠢᠨᠣᠠ ᠶ᠋ᠢ ᠲᠠᠯᠪᠢᠵᠤ ᠶᠠᠪᠤᠭᠤᠯᠤᠭᠰᠠᠨ ᠶᠠᠭᠤᠮᠠ ᠪᠣᠯᠵᠤ ᠬᠡᠵᠢᠶᠡ ᠬᠣᠢᠨᠠ ᠴᠢᠮᠠᠶ᠋ᠢ ᠰᠣᠷᠪᠢ ᠦᠭᠡᠢ ᠬᠠᠳᠤᠷᠬᠤ ᠳ᠋ᠤ᠌ ᠭᠡᠮᠰᠢᠪᠡᠴᠦ ᠣᠷᠣᠢᠳᠠᠨᠠ》 ᠭᠡᠰᠡᠨ ᠢ᠋ ᠪᠠᠭᠠ ᠬᠠᠲᠤᠨ ᠦᠭᠡ ᠪᠣᠯᠭᠠᠭᠰᠠᠨ ᠦᠭᠡᠢ ᠢᠨᠢᠶᠡᠰᠬᠢᠭᠡᠳ ᠥᠩᠭᠡᠷᠡᠪᠡ᠃
ᠷᠠᠰᠢ ᠵᠠᠬᠢᠷᠤᠭᠴᠢ ᠪᠠᠭᠠ ᠬᠠᠲᠤᠨ ᠠ᠋ᠴᠠ ᠨᠢᠭᠤᠷ ᠣᠯᠤᠭᠰᠠᠨ ᠦᠭᠡᠢ ᠳ᠋ᠡᠭᠡᠨ ᠬᠠᠮᠰᠢᠢᠵᠤ᠂《ᠪᠠᠭᠠ ᠬᠠᠲᠤᠨ ᠲᠠ ᠮᠢᠨᠢ ᠠ᠋᠂ ᠮᠥᠩᠭᠥ ᠴᠠᠭᠠᠨ ᠨᠢᠳᠦ ᠤᠯᠠᠭᠠᠨ ᠠ᠋ᠴᠠ ᠪᠣᠯᠪᠠ ᠤᠤ? ᠡᠮᠡ ᠬᠥᠮᠦᠨ ᠦᠰᠦ ᠤᠷᠲᠤ ᠪᠣᠳᠣᠯ ᠣᠬᠣᠷ ᠠ᠋ᠴᠠ ᠪᠣᠯᠪᠠ ᠊ᠤᠤ? ᠡᠷᠭᠦᠴᠡ ᠪᠡᠯᠡᠭ ᠲᠤᠨᠢ ᠳᠤᠷᠠᠯᠠᠵᠤ᠂ ᠤᠷᠠᠨ ᠦᠭᠡᠨ ᠳ᠋ᠦ᠍ᠨᠢ ᠬᠠᠭᠤᠷᠲᠠᠪᠠ ᠊ᠤᠤ ᠲᠠ⁈ ᠡᠯᠳᠡᠩᠭᠡ ᠡᠨᠳᠡ ᠡᠴᠡ ᠭᠠᠷᠤᠭᠠᠳ ᠶᠠᠪᠤᠪᠠᠯ ᠬᠥᠷᠥᠰᠥ ᠪᠡᠨ ᠤᠷᠪᠠᠭᠤᠯᠵᠤ᠂ ᠬᠥᠳᠥᠰᠥ ᠪᠡᠨ ᠡᠷᠭᠢᠭᠦᠯᠦᠭᠡᠳ ᠡᠮᠦᠰᠴᠢᠬᠡᠬᠦ ᠬᠥᠮᠦᠨ ᠰᠢᠦ! ᠲᠡᠷᠡ ᠡᠯᠳᠡᠩᠭᠡ ᠣᠯᠠᠨ ᠤ᠋ ᠡᠮᠦᠨᠡ ᠢᠩᠭᠢᠵᠦ ᠣᠪᠯᠠᠬᠤ ᠳ᠋ᠠᠭᠠᠨ ᠬᠥᠮᠦᠨ ᠦ᠌ ᠨᠢᠳᠦ ᠰᠡᠳᠬᠢᠯ ᠢ᠋ ᠬᠠᠭᠤᠷᠴᠤ ᠪᠠᠢᠭᠠ ᠬᠡᠷᠡᠭ! ᠦᠨᠡᠨ ᠳ᠋ᠡᠭᠡᠨ ᠪᠠᠭᠠ ᠬᠠᠲᠤᠨ ᠲᠠᠨ ᠢ᠋ ᠨᠢᠳᠦᠨ ᠳ᠋ᠡᠭᠡᠨ ᠬᠠᠪᠴᠢᠭᠠ ᠦᠭᠡᠢ᠃ ᠬᠠᠳᠠᠭ ᠲᠡᠳᠡᠨ ᠲᠣᠯᠣᠭᠠᠢ ᠮᠡᠬᠦᠢᠨ ᠪᠠᠯ ᠲᠥᠰᠦᠷᠭᠡᠭᠰᠡᠨ ᠦᠭᠡ ᠤᠷᠤᠰᠬᠠᠬᠤ ᠳ᠋ᠠᠭᠠᠨ ᠴᠠᠭᠠᠨᠠ ᠪᠠᠨ ᠮᠡᠰᠡ ᠨᠢᠭᠤᠭᠰᠠᠨ ᠢ᠋ ᠴᠢ ᠬᠠᠷᠠᠵᠤ ᠪᠠᠢᠨᠠ ᠊ᠤᠤ? ᠬᠡᠵᠢᠶᠡ ᠬᠣᠢᠨᠠ ᠪᠠᠭᠠ ᠬᠠᠲᠤᠨ ᠲᠠᠨ ᠢ᠋ ᠡᠳ᠋ ᠮᠥᠩᠭᠥᠨ ᠳ᠋ᠦ᠍ ᠰᠢᠨᠤᠷᠠᠬᠠᠭᠰᠠᠨ ᠬᠣᠨᠵᠢᠩ ᠳ᠋ᠤ᠌ ᠳᠤᠷᠠᠲᠠᠢ ᠡᠮᠡ ᠶ᠋ᠢᠨ ᠨᠡᠷᠡ ᠵᠡᠭᠦᠯᠭᠡᠴᠢᠬᠡᠭᠡᠳ ᠬᠣᠩᠭᠣ ᠶ᠋ᠢ ᠴᠢᠨᠢ ᠤᠷᠠᠬᠤ ᠳ᠋ᠤ᠌ ᠲᠠ ᠬᠣᠵᠢᠳᠠᠨᠠ ᠳᠠ!》 ᠭᠡᠵᠦ ᠪᠠᠭᠠ ᠬᠠᠲᠤᠨ ᠤ᠋ ᠲᠥᠯᠥᠭᠡ ᠪᠣᠳᠣᠯ ᠪᠣᠯᠪᠠ᠃
ᠪᠠᠭᠠ ᠬᠠᠲᠤᠨ ᠡᠯᠳᠡᠩᠭᠡ ᠶ᠋ᠢᠨ ᠲᠠᠮᠢᠷ ᠢ᠋ ᠮᠡᠳᠡᠬᠦ ᠦᠭᠡᠢ ᠪᠢᠰᠢ ᠰᠠᠢᠨ ᠮᠡᠳᠡᠨᠡ᠃ ᠷᠠᠰᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠰᠠᠨᠠᠭᠤᠯᠤᠭᠰᠠᠨ ᠦᠭᠡ ᠪᠤᠷᠤᠭᠤ ᠦᠭᠡᠢ᠃ ᠡᠨᠡ ᠬᠢᠷᠢ ᠶ᠋ᠢᠨ ᠤᠬᠠᠭᠠᠨ ᠪᠤᠶᠤ ᠡᠯᠳᠡᠩᠭᠡ ᠶ᠋ᠢᠨ ᠣᠪᠣᠷ ᠰᠤᠷᠲᠠᠯ ᠢ᠋ ᠲᠡᠩᠰᠡᠵᠦ ᠪᠠᠢᠭᠠᠳ ᠶᠠᠮᠠᠷ ᠰᠢᠤᠬᠠᠨ ᠰᠢᠢᠳᠪᠦᠷᠢ ᠥᠭᠬᠦ ᠪᠣᠳᠣᠯ ᠲᠥᠰᠥᠪ ᠴᠡᠭᠡᠵᠢᠨ ᠳ᠋ᠦ᠍ᠨᠢ ᠲᠢᠭ ᠲᠠᠭ᠃ ᠢᠯᠠᠩᠭᠤᠶᠠ ᠡᠯᠳᠡᠩᠭᠡ ᠶ᠋ᠢᠨ ᠠᠰᠠᠭᠤᠳᠠᠯ ᠳ᠋ᠤ᠌ ᠬᠢᠨᠠᠭᠤᠷ ᠨᠢᠮᠪᠠᠢ ᠬᠠᠨᠳᠤᠬᠤ ᠬᠡᠷᠡᠭᠲᠡᠢ᠃ ᠡᠯᠳᠡᠩᠭᠡ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠠᠰᠠᠭ ᠶᠠᠮᠤᠨ ᠳ᠋ᠤ᠌ ᠨᠥᠯᠥᠭᠡ ᠲᠤᠰᠬᠠᠯ ᠲᠠᠢ ᠬᠥᠮᠦᠰ ᠦ᠋ᠨ ᠳᠣᠲᠣᠷᠠ ᠲᠡᠷᠢᠭᠦᠨ ᠳ᠋ᠦ᠍ ᠣᠷᠣᠨᠠ᠃ ᠳᠡᠭᠡᠷᠡ ᠳᠣᠣᠷᠠ᠂ ᠬᠠᠷᠠ ᠰᠢᠷᠠ ᠶ᠋ᠢᠨ ᠠᠯᠢᠨ ᠳ᠋ᠤᠨᠢ ᠴᠦ᠍ ᠵᠠᠢ ᠡᠵᠡᠯᠡᠬᠦ ᠤᠴᠢᠷ ᠠ᠋ᠴᠠ ᠡᠩ ᠦ᠋ᠨ ᠨᠢᠭᠡ ᠬᠠᠷᠠᠴᠤ ᠴᠠᠭᠠᠴᠢᠨ ᠢ᠋ ᠰᠢᠢᠳᠬᠡᠬᠦ ᠰᠢᠭ ᠬᠥᠩᠭᠡᠨ ᠬᠠᠭᠤᠮᠠᠭᠠᠢ ᠬᠥᠳᠡᠯᠵᠦ ᠦᠯᠦ ᠪᠣᠯᠤᠨᠠ᠃ ᠡᠢᠮᠦ ᠡᠴᠡ ᠬᠢᠯᠭᠠᠰᠤᠨ ᠴᠢᠨᠡᠭᠡᠨ ᠰᠡᠪ ᠭᠠᠷᠭᠠᠪᠠᠯ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠡᠰᠡᠭ ᠬᠥᠮᠦᠰ ᠦ᠋ᠨ ᠳᠤᠷᠠ ᠦᠭᠡᠢᠴᠡᠯ ᠢ᠋ ᠬᠦᠷᠭᠡᠵᠦ ᠡᠰᠡᠷᠭᠦᠴᠡᠯ ᠳ᠋ᠦ᠍ ᠤᠴᠠᠷᠠᠬᠤ ᠪᠣᠯᠤᠨᠠ᠃ ᠨᠢᠭᠡ ᠯᠡ ᠰᠢᠲᠠᠮ ᠢ᠋ᠶ᠋ᠠᠷ ᠲᠠᠷᠢᠬᠢ ᠶ᠋ᠢ ᠨᠢ ᠥᠰᠥᠷᠬᠡᠵᠦ ᠣᠷᠬᠢᠪᠠᠯ ᠠᠪᠤᠨ ᠵᠠᠭᠤᠷᠠ ᠳ᠋ᠠᠭᠠᠨ ᠬᠣᠷᠣᠰᠤᠯ ᠬᠢᠯᠢᠩ ᠠᠯᠳᠠᠷᠠᠭᠠᠭᠰᠠᠨ ᠡᠷᠡᠮᠡᠬᠡᠢ ᠠᠵᠢᠯᠯᠠᠭᠠ ᠪᠣᠯᠬᠤ ᠪᠣᠯᠪᠠᠴᠤ ᠠᠷᠤ ᠬᠣᠢᠨᠠ ᠨᠢ ᠠᠷᠴᠢᠭᠳᠠᠰᠢ ᠦᠭᠡᠢ ᠯᠠᠢ ᠯᠠᠨᠴᠢᠭ ᠭᠠᠷᠴᠤ ᠪᠣᠯᠣᠰᠢ ᠦᠭᠡᠢ᠃ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨᠢ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠨᠢᠭᠡ ᠨᠢᠭᠡᠨ ᠳ᠋ᠡᠭᠡᠨ ᠶᠠᠯᠢ ᠦᠭᠡᠢ ᠤᠴᠢᠷ ᠲᠤ᠌ ᠨᠠᠢᠷ ᠲᠠᠯᠪᠢᠬᠤ ᠦᠭᠡᠢ ᠦᠰ ᠬᠣᠨᠵᠢᠩ ᠪᠣᠳᠣᠵᠤ᠂ ᠬᠣᠷᠣ ᠠᠲᠠᠭᠠᠨ ᠳ᠋ᠠᠭᠠᠨ ᠪᠣᠭᠣᠭᠳᠠᠵᠤ᠂ ᠳᠣᠲᠣᠷᠠ ᠵᠠᠭᠤᠷᠠ ᠪᠠᠨ ᠮᠠᠭᠤᠳᠠᠯᠴᠠᠭᠠᠳ ᠥᠨᠥᠳᠥᠷ ᠪᠣᠯᠬᠤ ᠳ᠋ᠤ᠌ ᠲᠥᠷᠥ ᠵᠠᠰᠠᠭ ᠴᠤᠴᠠᠷᠠᠬᠤ ᠰᠢᠬᠠᠭᠰᠠᠨ ᠠᠮᠢᠳᠤ ᠲᠡᠦᠬᠡ ᠲᠡᠭᠦᠨ ᠳ᠋ᠦ᠍ ᠢᠮᠠᠭᠲᠠ ᠰᠡᠷᠡᠮᠵᠢ ᠶ᠋ᠢᠨ ᠳᠣᠬᠢᠶᠠ ᠥᠭᠭᠦᠭᠰᠡᠭᠡᠷ ᠪᠠᠢᠭᠠ ᠳ᠋ᠤ᠌᠂ ᠪᠠᠭᠠ ᠬᠠᠲᠤᠨ ᠤ᠋ ᠳᠣᠲᠣᠷᠠ《ᠠᠭᠤᠵᠢᠭᠤ ᠨᠠᠢᠷᠠᠮᠳᠠᠭᠤ ᠪᠣᠳᠣᠯᠭᠠ ᠠᠪᠴᠤ ᠳᠣᠲᠣᠷᠠ ᠵᠠᠭᠤᠷᠠ ᠪᠠᠨ ᠡᠶᠡ ᠡᠪᠲᠡᠢ ᠪᠡᠷ ᠬᠠᠷᠠ ᠰᠢᠷᠠ ᠴᠡᠷᠢᠭ ᠦ᠋ᠨ ᠡᠵᠡᠷᠬᠡᠭᠯᠡᠯ ᠢ᠋ ᠡᠰᠡᠷᠭᠦᠴᠡᠬᠦ ᠨᠢ ᠲᠡᠷᠢᠭᠦᠨ ᠴᠢᠬᠤᠯᠠ》 ᠭᠡᠳᠡᠭ ᠪᠣᠳᠣᠯ ᠭᠠᠵᠠᠷ ᠠᠪᠤᠭᠰᠠᠨ ᠪᠣᠯᠬᠣᠷ ᠡᠯᠳᠡᠩᠭᠡ ᠳ᠋ᠦ᠍ ᠠᠭᠤᠴᠢᠯᠠᠯ ᠦᠵᠡᠭᠦᠯᠵᠦ ᠪᠠᠢᠭᠠ ᠨᠢ ᠡᠨᠡ᠃ ᠬᠥᠮᠦᠨ ᠦ᠌ ᠵᠢᠷᠦᠬᠡ ᠭᠡᠭᠴᠢ ᠮᠢᠬᠠ ᠴᠢᠰᠤ ᠪᠠᠷ ᠪᠦᠷᠢᠯᠳᠦᠭᠰᠡᠨ ᠡᠴᠡ ᠪᠢᠰᠢ ᠬᠦᠷᠡᠯ ᠲᠡᠮᠦᠷ ᠢ᠋ᠶ᠋ᠡᠷ ᠴᠢᠳᠬᠤᠭᠰᠠᠨ ᠪᠢᠰᠢ᠂ ᠡᠶᠡᠷᠡᠭᠦᠨ ᠢ᠋ᠶ᠋ᠡᠷ ᠤᠶᠠᠷᠠᠭᠤᠯᠬᠤ ᠶ᠋ᠢ ᠪᠣᠳᠣᠵᠤ ᠲᠤᠯᠭᠠᠮᠳᠠᠭᠰᠠᠨ ᠦᠶᠡ ᠳ᠋ᠦ᠍ ᠵᠢᠯᠣᠭᠣ ᠶ᠋ᠢ ᠤᠷᠲᠤ ᠲᠠᠯᠪᠢᠬᠤ ᠨᠢ ᠵᠥᠪ ᠭᠡᠵᠦ ᠪᠠᠭᠠ ᠬᠠᠲᠤᠨ ᠡᠯᠳᠡᠩᠭᠡ ᠶ᠋ᠢ ᠬᠠᠷᠠᠭᠠᠳ᠄
一 ᠡᠯᠳᠡᠩᠭᠡ ᠭᠤᠸᠠᠢ ᠠ᠋! ᠲᠠ ᠢᠩᠭᠢᠵᠦ ᠴᠣᠴᠢᠮᠠᠭᠳᠠᠬᠤ ᠬᠡᠷᠡᠭ ᠦᠭᠡᠢ ᠠ᠋! ᠭᠡᠵᠦ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰᠤᠭᠰᠠᠨ ᠡᠯᠳᠡᠩᠭᠡ ᠶ᠋ᠢᠨ ᠨᠢᠳᠦ ᠰᠡᠷᠭᠦᠵᠦ ᠤᠴᠢᠷ ᠶᠠᠭᠤ ᠪᠣᠯᠬᠤ ᠶ᠋ᠢ ᠤᠷᠢᠳᠴᠢᠯᠠᠨ ᠮᠡᠳᠡᠭᠰᠡᠨ ᠰᠢᠭ《ᠲᠤᠰᠢᠶᠠᠯ ᠢ᠋ ᠴᠢᠨᠢ ᠮᠤᠯᠲᠤᠯᠵᠤ᠂ ᠭᠡᠷ ᠲᠦ᠍ ᠴᠢᠨᠢ ᠬᠠᠷᠢᠭᠤᠯᠤᠨᠠ》 ᠭᠡᠰᠡᠨ ᠦᠭᠡ ᠰᠣᠨᠣᠰᠪᠠᠯ ᠭᠣᠳ ᠪᠠᠶᠠᠷᠯᠠᠭᠠᠳ ᠭᠦᠶᠦᠨᠡ ᠳᠡ ᠭᠡᠵᠦ ᠪᠣᠳᠣᠨ ᠰᠠᠨᠳᠤᠷᠴᠤ᠄
一 ᠵᠠ! ᠬᠠᠲᠤᠨ ᠲᠠ ᠵᠠᠬᠢᠶᠠ ᠰᠤᠷᠭᠠᠯ ᠢ᠋ᠶ᠋ᠠᠨ ᠰᠣᠶᠣᠷᠬᠠᠭᠠᠴᠢ! ᠬᠢᠯᠭᠠᠰᠤᠨ ᠳᠡᠭᠡᠭᠦᠷ ᠭᠦᠶᠦᠬᠦ ᠡᠴᠡ ᠪᠤᠰᠤᠳ ᠢ᠋ ᠨᠢ ᠪᠡᠶᠡᠯᠡᠭᠦᠯᠵᠦ ᠪᠠᠢᠶᠠ ᠭᠡᠯᠡ᠃
一 ᠥᠨᠥᠳᠥᠷ ᠪᠢ ᠲᠠᠨ ᠠ᠋ᠴᠠ ᠶᠠᠯᠠ ᠠᠰᠠᠭᠤᠬᠤ ᠦᠭᠡᠢ ᠮᠥᠷᠲᠡᠭᠡᠨ ᠲᠤᠰᠠᠯᠠᠭᠴᠢ ᠲᠤᠰᠢᠶᠠᠯ ᠢ᠋ ᠴᠢᠨᠢ ᠦᠯᠡᠳᠡᠭᠡᠵᠦ᠂ ᠠᠪᠢᠶᠠᠰ ᠴᠢᠳᠠᠪᠤᠷᠢ ᠶ᠋ᠢ ᠴᠢᠨᠢ ᠪᠠᠳᠠᠷᠠᠭᠤᠯᠤᠨᠠ ᠰᠢᠦ! ᠭᠡᠰᠡᠨ ᠳ᠋ᠦ᠍ ᠡᠯᠳᠡᠩᠭᠡ ᠶ᠋ᠢᠨ ᠳᠣᠲᠣᠷᠠ ᠣᠨᠳᠣᠣ ᠪᠣᠳᠣᠯ ᠬᠠᠷᠪᠤᠨ ᠣᠷᠣᠵᠤ ᠴᠢᠬᠢ ᠪᠡᠨ ᠢᠲᠡᠭᠡᠵᠦ ᠶᠠᠳᠠᠨ《ᠡᠨᠡ ᠴᠦ᠍ ᠨᠠᠮᠠᠶ᠋ᠢ ᠠᠯᠠᠯᠠ ᠳᠠ᠂ ᠡᠨᠡ ᠥᠯᠥᠭᠴᠢᠨ ᠡᠮᠡ ᠶ᠋ᠢᠨ ᠠᠯᠪᠠ ᠳᠣᠣᠷᠠ ᠡᠢᠰᠢ ᠪᠡᠨ ᠭᠡᠵᠦ ᠡᠪᠯᠡᠵᠦ ᠶᠠᠪᠤᠬᠤ ᠊ᠤᠤ? ᠲᠠᠢᠰᠢ ᠪᠠᠨ ᠭᠡᠵᠦ ᠲᠡᠷᠰᠯᠡᠵᠦ ᠶᠠᠪᠤᠬᠤ ᠊ᠤᠤ? ᠯᠠᠮᠠ ᠭᠤᠷᠪᠠᠨ ᠡᠷᠳᠡᠨᠢ ᠮᠢᠨᠢ ᠠ᠋!》 ᠭᠡᠵᠦ ᠭᠠᠢᠬᠠᠰᠢ ᠠᠯᠳᠠᠬᠤ ᠳ᠋ᠠᠭᠠᠨ《ᠡᠨᠡ ᠡᠮᠡ ᠶᠠᠮᠠᠷ ᠪᠠᠰᠢᠷ ᠭᠠᠷᠭᠠᠵᠤ ᠪᠠᠢᠭᠠ ᠶᠤᠮ ᠪᠣᠯ? ᠡᠨᠡ ᠬᠡᠳᠦᠨ ᠵᠢᠯ ᠸᠠᠩ ᠰᠣᠬᠣᠷ ᠤ᠋ᠨ ᠳᠡᠷᠭᠡᠳᠡ ᠰᠠᠢᠨ ᠶᠠᠭᠤᠮᠠ ᠰᠤᠷᠤᠨᠠ ᠴᠤ᠌ ᠭᠡᠵᠦ ᠯᠠᠪ ᠯᠠ ᠪᠠᠢᠬᠤ ᠦᠭᠡᠢ᠃ ᠣᠳᠣ ᠡᠪᠦᠭᠡᠨ ᠮᠢᠨᠦ ᠲᠣᠯᠣᠭᠠᠢ ᠶ᠋ᠢ ᠢᠯᠢᠵᠦ ᠪᠠᠢᠭᠠᠳ ᠲᠠᠷᠢᠬᠢ ᠶ᠋ᠢ ᠨᠢ ᠰᠣᠷᠣᠬᠤ ᠭᠡᠵᠦ ᠪᠠᠢᠨᠠ ᠊ᠤᠤ⁈》 ᠭᠡᠵᠦ ᠪᠣᠳᠣᠵᠤ ᠠᠮᠵᠢᠭᠠᠳ᠄
一 ᠪᠠᠢᠶᠠ ᠳᠠ! ᠪᠠᠭᠠ ᠬᠠᠲᠤᠨ ᠮᠢᠨᠢ᠂ ᠲᠠᠨ ᠳ᠋ᠤ᠌ ᠭᠢᠯᠠᠢᠯᠠ! ᠲᠠ ᠮᠢᠨᠦ ᠣᠰᠣᠯ ᠶᠠᠯᠠ ᠶ᠋ᠢ ᠬᠥᠭᠡᠭᠡᠴᠡᠯᠳᠦᠬᠦ ᠦᠭᠡᠢ ᠡᠢᠨ ᠬᠦ᠌ ᠠᠭᠤᠴᠢᠯᠠᠯ ᠬᠦᠷᠲᠡᠭᠡᠭᠰᠡᠨ ᠨᠢ ᠨᠠᠳᠠ ᠳ᠋ᠠᠭᠠᠨ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠶᠡᠬᠡ ᠠᠵᠠ᠃ ᠥᠭᠢᠷᠡ ᠲᠣᠯᠣᠭᠠᠢ ᠪᠢ ᠶᠠᠮᠤᠨ ᠤ᠋ ᠶᠡᠬᠡ ᠲᠤᠰᠢᠶᠠᠯ ᠠ᠋ᠴᠠ ᠵᠠᠢᠯᠠᠵᠤ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠪᠡᠶᠡ ᠠᠮᠠᠷᠠᠶᠠ ᠳᠠ! ᠴᠠᠰᠤ ᠠᠭᠤᠯᠠ ᠶ᠋ᠢ ᠳᠠᠷᠤᠵᠤ᠂ ᠨᠠᠰᠤ ᠪᠡᠶᠡ ᠶ᠋ᠢ ᠳᠠᠷᠤᠨᠠ ᠭᠡᠭᠴᠢ ᠬᠡᠴᠡᠭᠦᠦ ᠪᠠᠢᠨᠠ! ᠭᠡᠵᠦ ᠡᠯᠳᠡᠩᠭᠡ ᠭᠤᠶᠤᠴᠢᠯᠠᠭᠰᠠᠨ ᠳ᠋ᠤ᠌ ᠪᠠᠭᠠ ᠬᠠᠲᠤᠨ᠄
一 ᠵᠠ᠂ ᠪᠠᠢᠵᠠ! ᠡᠭᠦᠨ ᠢ᠋ ᠴᠢᠨᠢ ᠬᠠᠷᠢᠨ ᠠᠶᠠᠷ ᠪᠣᠳᠣᠯᠬᠢᠯᠠᠵᠤ ᠦᠵᠡᠶᠡ! ᠭᠡᠳ ᠠᠮᠤᠷᠰᠠᠨᠠᠭᠠ ᠬᠦᠩ ᠨᠣᠶᠠᠨ ᠪᠠ ᠵᠣᠳᠪᠠ ᠮᠡᠢᠷᠡᠨ ᠦ᠌《ᠲᠤᠰᠠᠯᠠᠭᠴᠢ》 ᠶ᠋ᠢᠨ ᠵᠢᠩᠰᠡ ᠶ᠋ᠢ ᠮᠤᠯᠲᠤᠯᠵᠤ ᠭᠡᠷ ᠭᠡᠷ ᠲᠦ᠋ᠨᠢ ᠬᠠᠷᠢᠭᠤᠯᠪᠠ᠃
ᠨᠠᠮᠤᠷ ᠰᠢᠪᠲᠤᠷᠠᠵᠤ ᠡᠪᠦᠯ ᠪᠣᠯᠬᠤ ᠶ᠋ᠢᠨ ᠦᠶᠡᠰ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠪᠡᠶᠡ ᠪᠠᠷᠤᠭᠲᠠᠢ ᠪᠠᠢᠨᠠ ᠭᠡᠳᠡᠭ ᠢ᠋ᠶ᠋ᠡᠷ ᠰᠢᠯᠲᠠᠵᠤ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠲᠤᠰᠠᠯᠠᠭᠴᠢ ᠶ᠋ᠢᠨ ᠵᠢᠩᠰᠡ ᠪᠡᠨ ᠠᠮᠠᠷᠠᠭᠠᠵᠤ ᠭᠡᠷ ᠲᠡᠭᠡᠨ ᠰᠠᠭᠤᠪᠠ᠃
— — — —
① ᠵᠠᠭᠠᠨ ᠤ᠋ ᠬᠡᠯᠪᠡᠷᠢ ᠲᠡᠢ ᠲᠣᠮᠣ ᠰᠢᠷᠡᠭᠡ᠃ ᠲᠤᠯᠭᠠᠭᠤᠷ ᠪᠠᠭᠠ ᠰᠢᠭ᠋ ᠵᠠᠭᠠᠨ ᠤ᠋ ᠳᠥᠷᠪᠡᠨ ᠬᠥᠯ ᠲᠡᠢ᠂ ᠬᠣᠶᠠᠷ ᠲᠠᠯᠠ ᠳ᠋ᠠᠭᠠᠨ ᠵᠠᠭᠠᠨ ᠤ᠋ ᠬᠣᠶᠠᠷ ᠭᠣᠬᠢᠭᠠᠷ ᠬᠠᠮᠠᠷ ᠨᠢ ᠭᠠᠵᠠᠷ ᠢ᠋ ᠨᠢ ᠲᠤᠯᠵᠤ᠂ ᠬᠠᠷᠠᠬᠤ ᠳ᠋ᠤ᠌ ᠬᠣᠶᠠᠷ ᠵᠠᠭᠠᠨ ᠵᠥᠷᠢᠵᠦ ᠵᠣᠭᠰᠣᠭᠰᠠᠨ ᠶᠤᠮ ᠰᠢᠭ᠋ ᠪᠠᠢᠳᠠᠭ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠣᠳᠣᠨᠬᠤᠸᠠᠷ