ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠭᠤᠲᠠᠭᠠᠷ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠨᠢᠭᠡ> Хан мунын сүүрс < доорд > – Мөнх зохиоов ᠂ Гутгаар бодь – Гуравдугаар бүлэг <1>
322ᠭᠤᠲᠠᠭᠠᠷ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠨᠢᠭᠡ>
ᠨᠢᠭᠡ
ᠰᠢᠷᠠ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠠᠭᠸᠠᠩ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠲᠤᠤᠨᠠᠨ ᠬᠠᠳᠠᠨ ᠠ᠋ᠴᠠ ᠤᠨᠠᠵᠤ ᠦᠬᠦᠭᠰᠡᠨ ᠳ᠋ᠦ᠍ ᠰᠢᠷᠠ ᠴᠡᠷᠢᠭ ᠦ᠋ᠨ ᠬᠢᠨ ᠨᠢᠭᠡ ᠯᠡ ᠵᠢᠷᠦᠬᠡ ᠨᠢ ᠦᠬᠦᠵᠦ ᠮᠠᠭᠤ ᠵᠦᠩ ᠦ᠋ᠨ ᠰᠦᠵᠢᠭ ᠡᠪᠦᠷᠯᠡᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠵᠠᠭᠠᠷ ᠠ᠋ᠴᠠ ᠴᠡᠷᠢᠭ ᠮᠣᠷᠢ ᠪᠠᠨ ᠲᠠᠲᠠᠵᠤ ᠨᠢᠭᠡᠬᠡᠨ ᠰᠥᠨᠢ ᠶ᠋ᠢᠨ ᠬᠣᠭᠣᠷᠣᠨᠳᠣ ᠠᠯᠠᠭᠠ ᠪᠣᠯᠵᠠᠢ᠃
ᠰᠢᠷᠠ ᠴᠡᠷᠢᠭ ᠦ᠋ᠨ ᠰᠢᠮᠠᠷᠠᠭᠰᠠᠨ ᠨᠢ ᠡᠯᠳᠡᠩᠭᠡ ᠶ᠋ᠢᠨ ᠥᠮᠥᠭ ᠲᠦᠰᠢᠭ ᠨᠢ ᠨᠤᠷᠠᠭᠰᠠᠨ ᠶᠠᠭᠤᠮᠠ ᠪᠣᠯᠵᠤ ᠪᠤᠬᠢᠨᠢᠳᠤᠯ ᠤ᠋ᠨ ᠮᠠᠨᠠᠨ ᠲᠡᠭᠦᠨ ᠦ᠌ ᠪᠡᠶᠡ ᠶ᠋ᠢ ᠣᠷᠢᠶᠠᠨᠠ᠃
ᠡᠯᠳᠡᠩᠭᠡ ᠶ᠋ᠢᠨ ᠥᠳᠬᠡᠨ ᠬᠠᠷᠠ ᠬᠥᠮᠥᠰᠬᠡ ᠨᠢ ᠮᠣᠭᠠᠢ ᠣᠷᠢᠶᠠᠯᠳᠤᠭᠰᠠᠨ ᠰᠢᠭ᠋ ᠲᠣᠭᠰᠢᠨ ᠢ᠋ᠶ᠋ᠠᠷ ᠵᠠᠩᠭᠢᠳᠴᠤ ᠴᠢᠷᠠᠢ ᠨᠢ ᠪᠣᠷᠣᠯᠠᠨᠠ᠃
— ᠡᠪᠦᠭᠡᠨ ᠲᠤᠰᠠᠯᠠᠭᠴᠢ ᠲᠠ ᠠᠮᠤᠷ ᠰᠠᠢᠬᠠᠨ ᠰᠠᠭᠠᠲᠠᠵᠤ ᠪᠠᠢᠨᠠ ᠤᠤ? ᠭᠡᠳ ᠨᠢᠭᠡ ᠬᠥᠮᠦᠨ ᠭᠠᠵᠠᠷ ᠴᠥᠮᠥᠷᠡᠴᠢᠬᠡᠬᠦ ᠡᠴᠡ ᠠᠶᠤᠭᠰᠠᠨ ᠰᠢᠭ᠋ ᠬᠥᠩᠭᠡᠨ ᠠᠯᠬᠤᠵᠤ ᠣᠷᠣᠵᠤ ᠢᠷᠡᠭᠰᠡᠨ ᠢ᠋ ᠡᠯᠳᠡᠩᠭᠡ ᠠᠵᠢᠭᠰᠠᠨ ᠦᠭᠡᠢ᠃ ᠬᠠᠷᠠᠬᠤᠯᠠ ᠬᠦᠩ ᠨᠣᠶᠠᠨ ᠠᠮᠤᠷᠰᠠᠨᠠᠭᠠ ᠪᠠᠢᠭᠰᠠᠨ ᠠᠵᠤᠭᠤ᠃
— ᠣ! ᠬᠦᠩ ᠨᠣᠶᠠᠨᠲᠠᠨ ᠪᠠᠢᠭᠰᠠᠨ ᠶᠤᠮ ᠤᠤ? ᠠᠮᠤᠷ ᠰᠠᠢᠨ⁈ ᠭᠡᠵᠦ ᠡᠯᠳᠡᠩᠭᠡ ᠬᠠᠷᠢᠭᠤ ᠮᠡᠨᠳᠦᠯᠡᠭᠡᠳ《ᠰᠠᠭᠤ᠂ ᠰᠠᠭᠤ! ᠨᠠᠭᠠᠰᠢ ᠪᠠᠨ ᠰᠠᠭᠤᠭᠠᠴᠢ!》 ᠭᠡᠵᠦ ᠵᠤᠵᠠᠭᠠᠨ ᠣᠯᠪᠣᠭ ᠲᠠᠢ ᠵᠥᠭᠡᠯᠡᠨ ᠢᠰᠡᠷᠢ ᠵᠦᠭ ᠵᠢᠭᠠᠨ ᠰᠠᠭᠤᠳᠠᠯ ᠬᠠᠢᠷᠠᠯᠠᠪᠠ᠃
ᠬᠦᠩ ᠨᠣᠶᠠᠨᠲᠠᠨ ᠠᠮᠤᠷᠰᠠᠨᠠᠭᠠ ᠵᠥᠭᠡᠯᠡᠨ ᠢᠰᠡᠷᠢ ᠶ᠋ᠢᠨ ᠢᠷᠮᠡᠭ ᠪᠠᠷᠢᠵᠤ ᠮᠥᠴᠢᠳᠬᠡᠨ ᠰᠠᠭᠤᠭᠠᠳ᠄
— ᠣᠳᠣ ᠶᠠᠭᠠᠬᠢᠨᠠ ᠪᠣᠢ? ᠡᠪᠦᠭᠡᠨ ᠲᠤᠰᠠᠯᠠᠭᠴᠢ ᠭᠤᠸᠠᠢ ᠠ᠋⁈᠁ ᠭᠡᠳ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠨᠤᠬᠤᠯᠠᠨ ᠥᠷᠥᠵᠦ᠂ ᠠᠷᠭᠠ ᠨᠢ ᠪᠠᠷᠠᠭᠳᠠᠭᠰᠠᠨ ᠬᠡᠦᠬᠡᠳ ᠰᠢᠭ ᠡᠯᠳᠡᠩᠭᠡ ᠶ᠋ᠢᠨ ᠴᠢᠷᠠᠢ ᠶ᠋ᠢ ᠴᠣᠷᠭᠢᠨ ᠰᠢᠷᠲᠡᠬᠦ ᠨᠢ ᠲᠡᠭᠦᠨ ᠡᠴᠡ ᠶᠠᠭᠤ ᠨᠢᠭᠡ ᠶ᠋ᠢ ᠭᠣᠷᠢᠳᠠᠬᠤ ᠰᠢᠭ᠋ ᠬᠥᠭᠡᠷᠦᠬᠦᠢᠯᠡᠯᠲᠡᠢ ᠬᠠᠷᠠᠭᠳᠠᠨᠠ᠃
— ᠬᠦᠩ ᠨᠣᠶᠠᠨᠲᠠᠨ ᠲᠠ᠂ ᠶᠠᠮᠠᠷ ᠤᠴᠢᠷ ᠲᠤ ᠡᠢᠨ ᠬᠦ᠌ ᠰᠡᠳᠬᠢᠯ ᠴᠢᠯᠡᠭᠡᠨ ᠵᠣᠪᠠᠬᠤ ᠳ᠋ᠠᠭᠠᠨ᠁ ᠭᠡᠵᠦ ᠡᠯᠳᠡᠩᠭᠡ ᠶ᠋ᠢ ᠬᠡᠯᠡᠲᠡᠯᠡ ᠬᠦᠩ ᠨᠣᠶᠠᠨ ᠠᠮᠤᠷᠰᠠᠨᠠᠭᠠ ᠦᠭᠡ ᠲᠣᠰᠴᠤ᠄
— ᠰᠢᠷᠠ ᠴᠡᠷᠢᠭ᠂ ᠦᠭᠡᠢ᠃ ᠪᠠᠭᠠ ᠬᠠᠲᠤᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠶᠠᠮᠤᠨ ᠳ᠋ᠠᠭᠠᠨ ᠪᠤᠴᠠᠵᠤ ᠢᠷᠡᠬᠦ ᠴᠢᠮᠡᠭᠡ ᠲᠡᠢ᠁ ᠭᠡᠰᠡᠨ ᠳ᠋ᠦ᠍ ᠡᠯᠳᠡᠩᠭᠡ᠄
— ᠮᠥᠨ ᠡᠨᠡᠬᠡᠨ ᠤᠴᠢᠷ ᠲᠤ ᠤᠤ?
— ᠲᠡᠢᠮᠦ!
— ᠡᠨᠡᠬᠡᠨ ᠤᠴᠢᠷ ᠲᠤ ᠬᠦᠩ ᠨᠣᠶᠠᠨᠲᠠᠨ ᠲᠠ ᠰᠠᠨᠠᠭᠠ ᠠᠮᠤᠷ! ᠣᠷᠳᠣᠨ ᠳ᠋ᠠᠭᠠᠨ ᠪᠤᠴᠠᠵᠤ᠂ ᠣᠯᠪᠣᠭ ᠢ᠋ᠶ᠋ᠠᠨ ᠳᠠᠷᠤᠭᠠᠳ ᠰᠠᠨᠠᠭᠠ ᠠᠮᠤᠷ ᠰᠠᠭᠤᠵᠤ ᠪᠣᠢ! ᠤᠴᠢᠷ ᠤᠬᠠᠭᠠᠨ ᠨᠢ ᠠᠶᠠᠨᠳᠠᠭᠠᠨ ᠣᠯᠳᠠᠬᠤ ᠪᠠᠢᠯᠭᠦᠢ ᠭᠡᠰᠡᠨ ᠳ᠋ᠦ᠍ ᠬᠦᠩ ᠨᠣᠶᠠᠨᠲᠠᠨ ᠠᠮᠤᠷᠰᠠᠨᠠᠭᠠ《ᠵᠠ!》 ᠭᠡᠳ ᠪᠣᠰᠴᠤ ᠡᠭᠦᠳᠡ ᠳᠥᠭᠥᠪᠡ᠃
ᠰᠢᠷᠠ ᠬᠣᠷᠭᠣᠢ ᠲᠡᠷᠯᠢᠭ ᠨᠢ ᠲᠣᠮᠣᠳᠠᠵᠤ ᠬᠡᠯᠬᠡᠩ ᠬᠣᠯᠬᠣᠩ ᠭᠡᠰᠡᠨ ᠢ᠋ ᠬᠡᠯᠡᠬᠦ ᠦᠭᠡᠢ ᠮᠤᠤᠷ ᠰᠢᠭ᠋ ᠰᠠᠮᠪᠠᠭ ᠰᠠᠮᠪᠠᠭ ᠭᠡᠵᠦ ᠪᠣᠷᠪᠢ ᠱᠦᠷᠭᠦᠭᠡᠨ ᠰᠡᠮᠬᠡᠨ ᠠᠯᠬᠤᠬᠤ ᠠᠮᠤᠷᠰᠠᠨᠠᠭᠠ ᠶ᠋ᠢᠨ ᠠᠷᠤ ᠠ᠋ᠴᠠ ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠡᠯᠳᠡᠩᠭᠡ《ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠲᠩᠷᠢ ᠨᠤᠷᠠᠬᠤ ᠳ᠋ᠤ᠌ ᠡᠯᠳᠡᠩᠭᠡ ᠲᠤᠯᠤᠭᠠᠳ ᠠᠪᠬᠤ ᠲᠠᠷ ᠪᠠᠢᠬᠤ ᠠ᠋ᠴᠠ ᠪᠢᠰᠢ ᠴᠢᠮᠠ ᠳ᠋ᠤ᠌ ᠲᠡᠢᠮᠦ ᠲᠠᠷ ᠪᠠᠢᠬᠤ ᠪᠢᠰᠢ ᠳᠡ》 ᠭᠡᠵᠦ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠦᠯᠦ ᠰᠣᠨᠣᠰᠳᠠᠮᠠ ᠳᠦᠳᠦᠨᠡᠭᠡᠳ ᠣᠷᠣᠨ ᠳ᠋ᠠᠭᠠᠨ ᠡᠷᠭᠢᠵᠦ ᠰᠠᠭᠤᠪᠠ᠃
ᠡᠯᠳᠡᠩᠭᠡ ᠶ᠋ᠢᠨ ᠵᠠᠯᠢ ᠨᠢᠭᠤᠭᠳᠠᠭᠰᠠᠨ ᠨᠢᠳᠦᠨ ᠳ᠋ᠦ᠍ ᠪᠠᠷᠤᠭ ᠤ᠋ᠨ ᠬᠥᠮᠦᠨ ᠡᠯᠭᠦᠭᠳᠡᠬᠦ ᠦᠭᠡᠢ᠃ ᠭᠠᠭᠴᠠ ᠬᠦ᠌ ᠵᠣᠳᠪᠠ ᠶ᠋ᠢᠨ ᠤᠪ ᠤᠬᠠᠭᠠᠨ᠂ ᠤᠷᠠᠨ ᠬᠣᠩᠰᠢᠶᠠᠷ ᠨᠢ ᠲᠡᠭᠦᠨ ᠳ᠋ᠦ᠍ ᠦᠯᠡᠮᠵᠢ ᠲᠠᠭᠠᠯᠠᠭᠳᠠᠳᠠᠭ ᠪᠠᠢᠨᠠ᠃ ᠵᠣᠳᠪᠠ ᠮᠡᠢᠷᠡᠨ ᠦ᠌ ᠠᠯᠲᠠᠨ ᠰᠣᠶᠣᠭᠠᠲᠤ ᠮᠣᠷᠢᠨ ᠴᠠᠭᠠᠨ ᠰᠢᠳᠦ ᠢᠷᠠᠯᠵᠠᠨ ᠢᠨᠢᠶᠡᠬᠦ ᠪᠣᠯᠭᠠᠨ ᠨᠢᠭᠡ ᠤᠬᠠᠭᠠᠨ ᠭᠠᠷᠴᠤ᠂ ᠡᠯᠳᠡᠩᠭᠡ ᠶ᠋ᠢᠨ ᠴᠢᠬᠢ ᠪᠡᠷ ᠳᠡᠮᠵᠢᠵᠦ ᠯᠠᠪᠳᠠᠭᠤᠬᠠᠨ ᠰᠢᠭᠰᠢᠭᠦᠯᠦᠭᠡᠳ ᠨᠢᠭᠡ ᠶᠠᠭᠤᠮᠠ ᠪᠦᠲᠦᠬᠦ ᠲᠥᠯᠥᠪ ᠭᠠᠷᠳᠠᠭ ᠠᠵᠤᠭᠤ᠃
ᠵᠣᠳᠪᠠ ᠶ᠋ᠢ ᠳᠠᠭᠤᠳᠠᠭᠤᠯᠤᠭᠰᠠᠨ ᠳ᠋ᠤ᠌ ᠵᠣᠳᠪᠠ ᠳᠣᠣᠷᠠ ᠪᠠᠨ ᠣᠷᠣᠵᠤ ᠢᠷᠡᠨ ᠬᠣᠶᠠᠭᠤᠯᠠ ᠶᠡᠬᠡ ᠯᠡ ᠰᠡᠳᠬᠢᠯ ᠲᠠᠭᠠᠷᠠᠨ ᠨᠢᠭᠡ ᠶᠠᠭᠤᠮᠠ ᠰᠢᠪᠡᠨᠡᠯᠳᠦᠨᠡ᠃
— ᠪᠠᠭᠠ ᠬᠠᠲᠤᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠶᠠᠮᠤᠨ ᠳ᠋ᠠᠭᠠᠨ ᠪᠤᠴᠠᠵᠤ ᠢᠷᠡᠬᠦ ᠰᠤᠷᠠᠭ ᠲᠠᠢ ᠪᠠᠢᠨᠠ᠃
— ᠬᠠᠷᠢᠨ ᠲᠡᠭᠡᠭᠰᠡᠨ! ᠰᠠᠶᠢ ᠬᠦᠩ ᠨᠣᠶᠠᠨᠲᠠᠨ ᠠᠮᠤᠷᠰᠠᠨᠠᠭᠠ ᠭᠤᠸᠠᠢ ᠣᠷᠣᠵᠤ ᠢᠷᠡᠭᠡᠳ ᠨᠢᠭᠡ ᠶᠠᠭᠤᠮᠠ ᠪᠤᠪᠠᠲᠤᠨᠠᠵᠤ《 ᠣᠳᠣ ᠶᠠᠭᠠᠬᠢᠨᠠ ᠪᠣᠢ?》 ᠭᠡᠬᠦ ᠶᠦᠮ!
— ᠲᠡᠭᠡᠨᠡ ᠠ᠋᠂ ᠲᠡᠭᠡᠨᠡ᠃ ᠲᠡᠭᠦᠨ ᠳ᠋ᠦ᠍ ᠮᠥᠨ《 ᠣᠳᠣ ᠶᠠᠭᠠᠬᠢᠨᠠ ᠪᠣᠢ?》 ᠭᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠠᠬᠢᠬᠤ ᠪᠣᠢ ᠳᠠ ᠠ᠋!
— ᠪᠠᠭᠠ ᠬᠠᠲᠤᠨ ᠢ᠋ ᠪᠠᠷᠠᠭᠤᠨ ᠬᠦᠩ ᠳ᠋ᠡᠭᠡᠨ ᠪᠤᠴᠠᠵᠤ ᠢᠷᠡᠬᠦ ᠳ᠋ᠦ᠍ᠨᠢ ᠪᠢᠳᠡ ᠣᠳᠣ ᠤᠭᠲᠤᠨᠠ ᠤᠤ? ᠲᠤᠯᠤᠨᠠ ᠤᠤ?
— ᠪᠢᠳᠡ ᠤᠭᠲᠤᠪᠠᠯ ᠲᠡᠷᠡ ᠤᠯᠠᠮ ᠣᠭᠰᠣᠢᠬᠤ ᠪᠠᠢᠬᠠ!
— ᠲᠡᠭᠡᠪᠡᠯ ᠲᠤᠯᠤᠨᠠ ᠤᠤ? ᠲᠤᠯᠵᠤ ᠪᠠᠢᠯᠳᠤᠨᠠ ᠭᠡᠬᠦ ᠳ᠋ᠦ᠍ ᠲᠡᠷᠡ ᠴᠢᠨᠢ ᠴᠠᠭᠠᠨᠠ ᠪᠠᠨ ᠸᠠᠩ ᠰᠣᠬᠣᠷ ᠤ᠋ᠨ ᠲᠦᠰᠢᠭ ᠲᠡᠢ! ᠰᠢᠷᠠ ᠴᠡᠷᠢᠭ ᠤᠬᠤᠷᠢᠭᠰᠠᠨ ᠬᠣᠢᠨᠠ ᠪᠢᠳᠡ ᠥᠮᠥᠭ ᠲᠦᠰᠢᠭ ᠢ᠋ᠶ᠋ᠡᠨ ᠠᠯᠳᠠᠴᠢᠬᠠᠭᠰᠠᠨ ᠶᠤᠮ ᠴᠢᠨᠢ᠁
— ᠸᠠᠩ ᠰᠣᠬᠣᠷ ᠤ᠋ᠨ ᠬᠠᠷᠠ ᠴᠡᠷᠢᠭ ᠲᠡᠭᠦᠨ ᠳ᠋ᠦ᠍ ᠲᠡᠢᠮᠦ ᠨᠠᠢᠳᠠᠪᠤᠷᠢᠲᠠᠢ ᠲᠦᠰᠢᠭ ᠪᠣᠯᠤᠨᠠ ᠭᠡᠵᠢ ᠤᠤ? ᠬᠠᠢ ᠳᠠ᠂ ᠮᠡᠳᠡᠬᠦ ᠦᠭᠡᠢ᠃ ᠰᠣᠨᠣᠰᠬᠤ ᠳ᠋ᠤ᠌ ᠪᠠᠭᠠ ᠬᠠᠲᠤᠨ ᠸᠠᠩ ᠰᠣᠬᠣᠷ ᠲᠠᠢ ᠡᠪᠳᠡᠷᠡᠯᠴᠡᠭᠡᠳ ᠪᠠᠷᠠᠭᠤᠨ ᠬᠦᠩ ᠳ᠋ᠡᠭᠡᠨ ᠪᠤᠴᠠᠬᠤ ᠰᠠᠨᠠᠭᠠ ᠣᠷᠣᠯᠠ ᠭᠡᠰᠡᠨ᠃
— ᠶᠠᠭᠤᠨ ᠠ᠋ᠴᠠ ᠡᠪᠳᠡᠷᠡᠯᠴᠡᠪᠡ? ᠨᠠᠷᠢᠨ ᠶᠠᠭᠤᠮᠠᠰ ᠳᠤᠭᠤᠯᠪᠠ ᠤᠤ?
— ᠭᠠᠵᠠᠷ ᠨᠤᠲᠤᠭ ᠤ᠋ᠨ ᠤᠴᠢᠷ᠃ ᠸᠠᠩ ᠰᠣᠬᠣᠷ ᠪᠠᠭᠠ ᠬᠠᠲᠤᠨ ᠳ᠋ᠤ᠌ ᠭᠠᠪᠢᠶᠠᠷᠬᠠᠵᠤ᠂ ᠣᠷᠪᠣᠭ ᠤ᠋ᠨ ᠬᠣᠢᠲᠤ ᠵᠣ ᠠ᠋ᠴᠠ ᠤᠯᠠᠭᠠᠨ ᠡᠷᠭᠢ ᠬᠦᠷᠲᠡᠯᠡ ᠭᠠᠵᠠᠷ ᠳᠡᠭᠡᠰᠦᠯᠡᠵᠦ ᠠᠪᠬᠤ ᠭᠡᠬᠦ ᠳ᠋ᠦ᠍ᠨᠢ ᠪᠠᠭᠠ ᠬᠠᠲᠤᠨ ᠵᠥᠪᠰᠢᠶᠡᠷᠡᠭᠰᠡᠨ ᠦᠭᠡᠢ ᠭᠡᠨᠡ᠃
— ᠭᠠᠭᠴᠠ ᠡᠭᠦᠨ ᠡᠴᠡ ᠪᠢᠰᠢ ᠪᠠᠢᠬᠠ᠃ ᠭᠣᠣᠯ ᠨᠢ ᠰᠢᠷᠠ ᠴᠡᠷᠢᠭ ᠦ᠋ᠨ ᠤᠬᠤᠷᠢᠭᠰᠠᠨ ᠳ᠋ᠤ᠌ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠠᠰᠠᠭ ᠲᠠᠮᠠᠭᠠ ᠪᠠᠨ ᠰᠠᠨᠠᠭᠠᠷᠬᠠᠭᠰᠠᠨ ᠠ᠋ᠴᠠ ᠪᠣᠯᠤᠭᠰᠠᠨ ᠪᠠᠢᠯᠭᠦᠢ᠃
— ᠠᠯᠢ ᠠᠯᠢᠨ ᠠ᠋ᠴᠠ ᠨᠢ ᠴᠦ᠍ ᠪᠠᠢᠵᠤ ᠪᠣᠯᠤᠨᠠ᠃ ᠡᠨᠡ ᠪᠣᠯ ᠡᠷᠲᠡ ᠣᠷᠣᠢ ᠶ᠋ᠢᠨ ᠤᠴᠢᠷ᠃ ᠮᠢᠨᠦ ᠦᠵᠡᠬᠦ ᠪᠡᠷ ᠪᠢᠳᠡ ᠬᠦᠴᠦ ᠬᠦᠷᠦᠯᠴᠡᠬᠦ ᠳ᠋ᠦ᠍ ᠬᠦᠷᠪᠡᠯ ᠲᠤᠯᠬᠤ ᠶ᠋ᠢ ᠪᠣᠳᠣᠵᠤ ᠪᠣᠯᠤᠨᠠ᠃ ᠪᠠᠭᠠ ᠬᠠᠲᠤᠨ ᠪᠤᠴᠠᠵᠤ ᠢᠷᠡᠪᠡᠯ ᠮᠠᠨᠤᠰ ᠤ᠋ᠨ ᠵᠠᠶᠠᠭᠠ ᠬᠠᠵᠠᠢᠨᠠ ᠳᠠ! ᠲᠡᠢᠮᠦ ᠪᠢᠰᠢ ᠪᠣᠯ ᠪᠠᠭᠠ ᠬᠠᠲᠤᠨ ᠢ᠋ ᠤᠭᠲᠤᠵᠤ ᠠᠪᠬᠤ ᠨᠢ ᠵᠦᠢ᠃ ᠤᠷᠢᠲᠠᠵᠤ ᠡᠪᠯᠡᠷᠡᠵᠦ ᠪᠠᠢᠭᠠᠳ ᠳᠠᠷᠠᠭᠠ ᠨᠢ ᠶᠠᠭᠠᠬᠢᠬᠤ ᠪᠠᠨ ᠮᠡᠳᠡᠶᠡ! ᠭᠡᠵᠦ ᠵᠣᠳᠪᠠ ᠬᠡᠯᠡᠭᠰᠡᠨ ᠳ᠋ᠦ᠍ ᠡᠯᠳᠡᠩᠭᠡ᠄
— ᠳᠡᠢᠯᠬᠦ ᠳᠡᠢᠯᠳᠡᠬᠦ ᠶ᠋ᠢᠨ ᠤᠴᠢᠷ ᠪᠢᠰᠢ! ᠬᠣᠭᠣᠷᠣᠨᠳᠣ ᠪᠠᠨ ᠲᠤᠯᠤᠯᠴᠠᠭᠠᠳ ᠬᠣᠬᠢᠷᠠᠳᠠᠭ ᠨᠢ ᠮᠥᠨ ᠯᠡ ᠮᠠᠯᠴᠢᠨ ᠠᠷᠠᠳ ᠰᠢᠳᠡ! ᠪᠠᠢᠳᠠᠯ ᠢ᠋ ᠬᠠᠷᠠᠭᠠᠳ ᠪᠠᠢᠬᠤ ᠳ᠋ᠤ᠌ ᠪᠠᠭᠠ ᠬᠠᠲᠤᠨ ᠡᠨᠡ ᠤᠳᠠᠭᠠ ᠵᠢᠪᠠᠷ ᠳᠡᠭᠡᠷᠡ ᠵᠣᠭᠰᠣᠵᠤ ᠵᠠᠢ ᠡᠵᠡᠯᠡᠬᠦ ᠰᠢᠨᠵᠢ ᠲᠡᠢ᠃ ᠪᠢᠳᠡ ᠬᠡᠷᠰᠡᠦᠯᠡᠬᠦ ᠦᠭᠡᠢ ᠪᠣᠯ ᠵᠠᠢᠳᠠᠩ ᠮᠣᠷᠢ ᠵᠠᠢᠳᠠᠯᠠᠭᠠᠳ ᠵᠠᠢᠳᠠᠬᠤ ᠵᠠᠢ ᠦᠭᠡᠢ ᠪᠣᠯᠵᠤ ᠮᠡᠳᠡᠨᠡ ᠰᠢᠦ᠃
— ᠵᠥᠪ! ᠵᠥᠭᠡᠯᠡᠨ ᠨᠢ ᠬᠠᠲᠠᠭᠤ ᠪᠠᠨ ᠢᠳᠡᠨᠡ ᠭᠡᠳᠡᠭ ᠢ᠋ᠶ᠋ᠡᠷ ᠪᠢᠳᠡ ᠤᠷᠢᠳ ᠢ᠋ᠶ᠋ᠠᠷ ᠨᠠᠢᠷ ᠲᠠᠯᠪᠢᠶᠠ! ᠲᠡᠭᠡᠬᠦ ᠳ᠋ᠦ᠍ ᠤᠬᠠᠭᠠᠨ ᠨᠢ ᠣᠯᠳᠠᠬᠤ ᠪᠠᠢᠯᠭᠦᠢ᠃
— ᠪᠠᠭᠠ ᠬᠠᠲᠤᠨ ᠭᠠᠵᠠᠷ ᠰᠢᠷᠣᠢ ᠨᠤᠲᠤᠭ ᠪᠡᠯᠴᠢᠭᠡᠷ ᠦ᠋ᠨ ᠤᠴᠢᠷ ᠲᠤ ᠸᠠᠩ ᠰᠣᠬᠣᠷ ᠲᠠᠢ ᠮᠠᠭᠤᠳᠠᠯᠴᠠᠭᠰᠠᠨ ᠳᠡᠯᠢᠮ ᠢ᠋ ᠠᠰᠢᠭᠯᠠᠵᠤ᠂《ᠪᠠᠭᠠ ᠬᠠᠲᠤᠨ ᠬᠣᠰᠢᠭᠤ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠨᠤᠲᠤᠭ ᠪᠡᠯᠴᠢᠭᠡᠷ ᠢ᠋ᠶ᠋ᠡᠨ ᠬᠠᠮᠠᠭᠠᠯᠠᠭᠰᠠᠨ ᠤᠴᠢᠷ ᠲᠤ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠳᠠᠶᠠᠭᠠᠷ ᠢ᠋ᠶ᠋ᠠᠨ ᠪᠠᠶᠠᠷᠯᠠᠵᠤ ᠪᠠᠢᠨᠠ》 ᠭᠡᠵᠦ ᠲᠡᠭᠦᠨ ᠢ᠋ ᠮᠠᠯᠠᠭᠠᠢᠳᠠᠨ ᠤᠭᠲᠤᠵᠤ ᠦᠪᠡᠳᠡᠭᠰᠢ ᠶᠡᠬᠡ ᠳᠠᠢᠯᠠᠯᠭᠠ ᠬᠢᠶᠡ᠃ ᠪᠢ ᠡᠨᠳᠡᠬᠢ ᠳᠠᠢᠯᠠᠯᠭᠠ ᠶ᠋ᠢᠨ ᠶᠠᠪᠤᠳᠠᠯ ᠢ᠋ ᠪᠠᠵᠠᠭᠠᠶᠠ! ᠴᠢ ᠶᠠᠪᠤᠵᠤ ᠪᠠᠭᠠ ᠬᠠᠲᠤᠨ ᠲᠠᠢ ᠤᠷᠢᠳ ᠢ᠋ᠶ᠋ᠠᠷ ᠵᠣᠯᠭᠠᠵᠤ ᠡᠨᠡ ᠡᠨᠡ ᠰᠠᠨᠠᠭᠠ ᠶ᠋ᠢ ᠤᠷᠠᠯᠠᠨ ᠬᠢ! ᠭᠡᠰᠡᠨ ᠳ᠋ᠦ᠍ ᠵᠣᠳᠪᠠ ᠬᠡᠭ ᠬᠡᠭ ᠢᠨᠢᠶᠡᠨ《ᠡᠴᠦᠰ ᠦ᠋ᠨ ᠡᠴᠦᠰ ᠲᠦ᠍ ᠬᠠᠭᠤᠴᠢᠨ ᠫᠤᠤ ᠶ᠋ᠢᠨ ᠬᠤᠭᠤᠷᠬᠠᠢ ᠰᠢᠳᠡ!》 ᠭᠡᠵᠦ ᠡᠯᠳᠡᠩᠭᠡ ᠳ᠋ᠦ᠍ ᠢᠨᠢᠶᠡᠳᠦ ᠱᠠᠩᠨᠠᠭᠠᠳ ᠭᠠᠷᠴᠤ ᠶᠠᠪᠤᠪᠠ᠃
ᠸᠠᠩ ᠰᠣᠬᠣᠷ ᠤ᠋ᠨ ᠨᠥᠮᠥᠷᠢ ᠳ᠋ᠦ᠍ ᠪᠠᠭᠲᠠᠭᠰᠠᠨ ᠴᠦ᠍ ᠪᠣᠯᠤᠭ ᠬᠣᠭᠣᠷᠣᠨᠳᠣ ᠪᠠᠨ ᠮᠠᠭᠤᠳᠠᠯᠴᠠᠭᠰᠠᠨ ᠴᠦ᠍ ᠪᠣᠯᠤᠭ ᠶᠠᠭᠤ ᠴᠦ᠍ ᠭᠡᠰᠡᠨ ᠪᠠᠭᠠ ᠬᠠᠲᠤᠨ ᠪᠠᠷᠠᠭᠤᠨ ᠬᠦᠩ ᠳ᠋ᠡᠭᠡᠨ ᠪᠤᠴᠠᠵᠤ ᠢᠷᠡᠬᠦ ᠭᠡᠰᠡᠨ ᠨᠢ ᠡᠯᠳᠡᠩᠭᠡ ᠳ᠋ᠦ᠍ ᠮᠠᠭᠤ ᠪᠠᠢᠬᠤ ᠠ᠋ᠴᠠ ᠰᠠᠢᠨ ᠦᠭᠡᠢ ᠨᠢ ᠯᠠᠪ᠃ ᠬᠡᠯᠲᠦᠰᠬᠢᠪᠡᠯ ᠡᠯᠳᠡᠩᠭᠡ ᠲᠣᠯᠣᠭᠠᠢ ᠤᠨᠠᠬᠤ ᠶᠠᠯᠠ ᠲᠤᠯᠭᠠᠷᠠᠨᠠ ᠭᠡᠳᠡᠭ ᠢ᠋ ᠲᠡᠷᠡ ᠠᠯᠢ ᠤᠵᠠᠭᠤᠷ ᠤ᠋ᠨ ᠮᠡᠳᠡᠵᠦ ᠪᠠᠢᠯᠠ᠃ ᠬᠠᠰᠢᠷ ᠤ᠋ᠨ ᠮᠡᠬᠡ ᠠᠮᠢᠰᠬᠤᠯᠯᠠᠭᠰᠠᠨ ᠡᠯᠳᠡᠩᠭᠡ᠂ ᠵᠣᠳᠪᠠ ᠶ᠋ᠢ ᠡᠮᠦᠨᠡ ᠪᠡᠨ ᠪᠠᠷᠢᠵᠤ ᠪᠠᠭᠠ ᠬᠠᠲᠤᠨ ᠳ᠋ᠤ᠌ ᠬᠠᠳᠠᠭ ᠲᠡᠳᠡᠨ ᠵᠣᠯᠭᠠᠭᠤᠯᠵᠤ ᠨᠢᠭᠡ ᠲᠠᠯᠠ ᠪᠠᠷ ᠪᠠᠭᠠ ᠬᠠᠲᠤᠨ ᠢ᠋ ᠡᠷᠭᠦᠨ ᠮᠠᠭᠲᠠᠵᠤ᠂ ᠨᠥᠭᠦᠭᠡ ᠲᠠᠯᠠ ᠪᠠᠷ ᠪᠡᠶᠡ ᠪᠡᠨ ᠪᠤᠷᠤᠭᠤᠳᠬᠠᠵᠤ ᠬᠣᠭᠣᠷᠣᠨᠳᠣ ᠪᠠᠨ ᠡᠪᠰᠡᠬᠦ ᠵᠥᠪᠯᠡᠯᠭᠡ ᠠᠢᠯᠠᠳᠬᠠᠭᠤᠯᠤᠭᠰᠠᠨ ᠨᠢ ᠡᠨᠡ ᠪᠤᠶᠤ᠃
ᠵᠣᠳᠪᠠ ᠪᠠᠭᠠ ᠬᠠᠲᠤᠨ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠮᠣᠷᠳᠠᠪᠠ᠃
ᠪᠠᠭᠠ ᠬᠠᠲᠤᠨ ᠬᠠᠩᠬᠠᠲᠢ ᠶ᠋ᠢᠨ ᠲᠡᠨᠳᠡ ᠡᠴᠡ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠦ᠌ ᠰᠤᠷᠠᠭ ᠴᠢᠮᠡᠭᠡ ᠶ᠋ᠢ ᠠᠯᠳᠠᠯ ᠦᠭᠡᠢ ᠴᠢᠬᠢ ᠲᠠᠯᠪᠢᠨ ᠴᠢᠩᠨᠠᠵᠤ ᠪᠠᠢᠯᠠ᠃
ᠰᠢᠷᠠ ᠴᠡᠷᠢᠭ ᠦ᠋ᠨ ᠠᠭᠸᠠᠩ ᠨᠣᠶᠠᠨ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠴᠡᠩᠬᠡᠷ ᠴᠣᠩᠬᠢᠶᠠᠯ ᠤ᠋ᠨ ᠮᠥᠩᠭᠥᠨ ᠳ᠋ᠦ᠍ ᠰᠢᠨᠤᠵᠤ ᠶᠠᠪᠤᠭᠠᠳ ᠲᠤᠤᠨᠠᠨ ᠬᠠᠳᠠᠨ ᠠ᠋ᠴᠠ ᠬᠡᠢᠰᠴᠦ ᠦᠬᠦᠭᠡᠳ ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠰᠢᠷᠠ ᠴᠡᠷᠢᠭ ᠦ᠋ᠳ ᠲᠡᠨᠳᠡ ᠡᠴᠡ ᠤᠬᠤᠷᠢᠵᠤ ᠵᠡᠭᠦᠨᠰᠢᠯᠡᠯᠡ ᠭᠡᠰᠡᠨ ᠴᠢᠮᠡᠭᠡ ᠪᠠᠭᠠ ᠬᠠᠲᠤᠨ ᠤ᠋ ᠴᠢᠬᠢᠨ ᠳ᠋ᠦ᠍ ᠰᠠᠯᠬᠢ ᠰᠢᠭ᠋ ᠬᠤᠷᠳᠤᠨ ᠬᠦᠷᠴᠡᠢ᠃
ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠲᠥᠷᠥ ᠭᠦᠷᠦᠨ ᠦ᠌ ᠴᠠᠭ ᠤ᠋ᠨ ᠪᠠᠢᠳᠠᠯ ᠪᠠ ᠬᠣᠰᠢᠭᠤ ᠬᠦᠩ ᠦ᠋ᠨ ᠢ᠋ᠶ᠋ᠡᠨ ᠪᠠᠢᠳᠠᠯ ᠢ᠋ ᠢᠮᠠᠭᠲᠠ ᠠᠩᠬᠠᠷᠴᠤ ᠪᠠᠢᠭᠰᠠᠨ ᠲᠤᠯᠠ ᠪᠡᠶᠡ ᠳ᠋ᠦ᠍ᠨᠢ ᠠᠰᠢᠭᠲᠠᠢ ᠴᠠᠭ ᠪᠣᠯᠤᠭᠰᠠᠨ ᠳ᠋ᠤ᠌ ᠳᠣᠲᠣᠷᠠ ᠨᠢ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠬᠤ ᠪᠣᠳᠣᠯ ᠤᠷᠭᠤᠵᠤ ᠪᠠᠢᠯᠠ᠃ ᠨᠢᠭᠡ ᠡᠳᠦᠷ ᠸᠠᠩ ᠰᠣᠬᠣᠷ ᠪᠠᠭᠠ ᠬᠠᠲᠤᠨ ᠢ᠋ ᠳᠠᠭᠤᠳᠠᠭᠤᠯᠪᠠ᠃
ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠸᠠᠩ ᠰᠣᠬᠣᠷ ᠤ᠋ᠨ ᠣᠷᠳᠣᠨ ᠳ᠋ᠤ᠌ ᠣᠷᠣᠵᠤ ᠣᠴᠢᠪᠠᠯ ᠸᠠᠩ ᠰᠣᠬᠣᠷ ᠠᠯᠢ ᠬᠡᠳᠦᠢᠨ ᠡᠭᠦᠳᠡᠨ ᠦ᠌ ᠲᠤᠰᠢᠶᠠ ᠵᠣᠭᠰᠣᠨ ᠬᠦᠯᠢᠶᠡᠵᠦ ᠪᠠᠢᠵᠠᠢ᠃
— ᠸᠠᠩ ᠨᠣᠶᠠᠨ ᠰᠠᠢᠨ ᠤᠤ?
— ᠵᠠ᠂ ᠰᠠᠢᠨ᠃ ᠪᠠᠭᠠ ᠬᠠᠲᠤᠨ ᠰᠠᠢᠨ? ᠭᠡᠵᠦ ᠮᠡᠨᠳᠦ ᠪᠠᠷᠢᠯᠴᠠᠭᠠᠳ ᠨᠢᠭᠡ ᠨᠢᠭᠡᠨ ᠳ᠋ᠡᠭᠡᠨ ᠰᠠᠭᠤᠳᠠᠯ ᠬᠠᠢᠷᠠᠯᠠᠨᠠ᠃
ᠪᠠᠷᠰ ᠢᠷᠪᠢᠰ ᠦ᠋ᠨ ᠠᠷᠠᠰᠤ ᠪᠠᠷ ᠪᠦᠷᠢᠵᠦ ᠶᠠᠩᠵᠤᠯᠠᠭᠰᠠᠨ ᠬᠣᠶᠠᠷ ᠵᠥᠭᠡᠯᠡᠨ ᠢᠰᠡᠷᠢ ᠶ᠋ᠢ ᠵᠡᠷᠭᠡᠴᠡᠭᠦᠯᠵᠦ ᠲᠠᠯᠪᠢᠭᠰᠠᠨ ᠨᠢ ᠶᠡᠬᠡ ᠶᠠᠮᠪᠠ ᠰᠦᠷᠲᠡᠢ ᠬᠠᠷᠠᠭᠳᠠᠨᠠ᠃
— ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠠ᠋! ᠪᠠᠷᠰ ᠤ᠋ᠨ ᠣᠯᠪᠣᠭ ᠳᠡᠭᠡᠷᠡ ᠨᠢ ᠰᠠᠭᠠᠲᠠᠬᠤ ᠤᠤ? ᠢᠷᠪᠢᠰ ᠦ᠋ᠨ ᠢᠰᠡᠷᠢ ᠳᠡᠭᠡᠷᠡ ᠨᠢ ᠰᠠᠭᠠᠲᠠᠬᠤ ᠤᠤ? ᠠᠯᠢ ᠲᠣᠭᠣᠭᠰᠠᠨ ᠳᠡᠭᠡᠷᠡ ᠪᠡᠨ ᠰᠠᠭᠠᠲᠠᠭᠠᠴᠢ! ᠭᠡᠵᠦ ᠸᠠᠩ ᠰᠣᠬᠣᠷ ᠪᠠᠭᠠ ᠬᠠᠲᠤᠨ ᠤ᠋ ᠳᠣᠲᠣᠷᠠ ᠲᠠᠮᠢᠷ ᠢ᠋ ᠳᠠᠩᠰᠠᠨ ᠨᠠᠢᠷ ᠲᠠᠯᠪᠢᠨᠠ᠃
— ᠸᠠᠩ ᠨᠣᠶᠠᠨ ᠠ᠋! ᠲᠠ ᠪᠠᠷᠰ ᠣᠮᠣᠭ ᠲᠠᠢ ᠪᠠᠷ ᠢ᠋ᠶ᠋ᠠᠨ ᠪᠠᠷᠰ ᠤ᠋ᠨ ᠣᠯᠪᠣᠭ ᠳᠡᠭᠡᠷᠡ ᠪᠡᠨ ᠰᠠᠭᠠᠲᠠ! ᠭᠡᠵᠦ ᠪᠠᠭᠠ ᠬᠠᠲᠤᠨ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠰᠠᠭᠤᠳᠠᠯ ᠵᠠᠩᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠢᠷᠪᠢᠰ ᠦ᠋ᠨ ᠢᠰᠡᠷᠢ ᠳᠡᠭᠡᠷᠡ ᠨᠢ ᠠᠵᠢᠭ ᠦᠭᠡᠢ ᠰᠠᠭᠤᠪᠠ᠃
ᠸᠠᠩ ᠰᠣᠬᠣᠷ ᠤ᠋ᠨ ᠰᠠᠨᠠᠭᠰᠠᠨ ᠳ᠋ᠤ᠌ ᠵᠣᠬᠢᠴᠠᠭᠰᠠᠨ ᠪᠣᠯᠤᠯᠲᠠᠢ《 ᠬᠠ᠁ ᠬᠠ᠁》 ᠭᠡᠵᠦ ᠢᠨᠢᠶᠡᠨ ᠬᠠᠯᠵᠠᠨ ᠮᠠᠩᠨᠠᠢ ᠪᠠᠨ ᠢᠯᠢᠵᠦ᠄
— ᠠᠶᠠ᠂ ᠪᠠᠭᠠ ᠬᠠᠲᠤᠨ ᠥᠨᠥᠬᠢ ᠮᠣᠩᠭᠣᠯ ᠲᠡᠷᠯᠢᠭ ᠲᠠᠢᠯᠵᠤ ᠴᠡᠷᠢᠭ ᠬᠤᠪᠴᠠᠰᠤ ᠪᠠᠷ ᠵᠠᠰᠠᠭᠰᠠᠨ ᠴᠢᠨᠢ ᠤᠯᠠᠮ ᠦᠵᠡᠰᠬᠦᠯᠡᠩ ᠨᠡᠮᠡᠵᠦ ᠵᠠᠯᠠᠭᠤ ᠭᠠᠩᠭᠠᠩ ᠪᠣᠯᠴᠢᠬᠠᠵᠠᠢ ᠳᠠ! ᠭᠡᠵᠦ ᠬᠡᠯᠡᠭᠰᠡᠨ ᠨᠢ ᠪᠠᠭᠠ ᠬᠠᠲᠤᠨ ᠳᠤ《 ᠮᠢᠨᠦ ᠠᠴᠢ ᠪᠠᠷ ᠴᠢ ᠡᠨᠡ ᠬᠡᠳᠦᠨ ᠵᠢᠯ ᠬᠠᠩᠭᠢ ᠶᠠᠪᠤᠵᠤ ᠪᠠᠢᠨᠠ᠁ ᠴᠡᠷᠢᠭ ᠦ᠋ᠨ ᠰᠧᠯᠢᠩ ᠨᠣᠶᠠᠨ ᠵᠡᠷᠭᠡ ᠵᠡᠭᠦᠵᠦ ᠶᠡᠬᠡ ᠰᠣᠷᠲᠣᠭᠣᠲᠠᠢ ᠪᠣᠯᠴᠢᠬᠠᠵᠠᠢ ᠠ᠋》 ᠭᠡᠵᠦ ᠰᠣᠨᠣᠰᠳᠠᠬᠤ ᠳ᠋ᠤ᠌ ᠪᠠᠭᠠ ᠬᠠᠲᠤᠨ᠄
— ᠲᠠᠨ ᠤ᠋ ᠠᠴᠢ ᠪᠠᠷ ᠰᠢᠳᠡ! ᠭᠡᠰᠡᠨ ᠳ᠋ᠦ᠍᠂ ᠸᠠᠩ ᠰᠣᠬᠣᠷ᠄
— ᠬᠠᠮᠢᠭᠠ ᠠ᠋ᠴᠠ ᠳᠠ! ᠬᠠᠮᠢᠭᠠ ᠠ᠋ᠴᠠ ᠳᠠ! ᠪᠠᠭᠠ ᠬᠠᠲᠤᠨ ᠲᠥᠷᠥᠯᠬᠢ ᠶ᠋ᠢᠨ ᠰᠠᠢᠬᠠᠨ ᠬᠥᠮᠦᠨ ᠬᠣᠢᠨᠠ ᠳᠠ! ᠭᠡᠪᠡ᠃
ᠪᠠᠷᠰ ᠢᠷᠪᠢᠰ ᠦ᠋ᠨ ᠡᠯᠪᠡᠭ ᠠᠭᠤᠵᠢᠭᠤ ᠢᠰᠡᠷᠢ ᠶ᠋ᠢᠨ ᠳᠤᠮᠳᠠ ᠰᠢᠯ ᠨᠢᠭᠤᠷ ᠲᠠᠢ ᠬᠦᠷᠡᠩ ᠽᠠᠨᠳᠠᠨ ᠰᠢᠷᠡᠭᠡ ᠴᠢᠴᠠᠤᠯᠠᠨ ᠲᠠᠯᠪᠢᠵᠤ ᠨᠠᠷᠠᠨ ᠬᠤᠸᠠᠷ ᠤ᠋ᠨ ᠦᠷᠡ᠂ ᠬᠠᠷᠠ ᠴᠢᠪᠠᠭᠠ᠂ ᠣᠷᠣᠰ ᠰᠢᠬᠢᠷ᠂ ᠠᠯᠢᠮᠠ ᠵᠢᠮᠢᠰ ᠵᠡᠷᠭᠡ ᠶ᠋ᠢᠨ ᠢᠳᠡᠭᠡᠨ ᠢ᠋ ᠲᠠᠯᠪᠢᠭᠰᠠᠨ ᠨᠢ ᠪᠠᠶᠠᠨ ᠡᠷᠬᠢᠮᠰᠦᠭ ᠭᠡᠳᠡᠭ ᠢ᠋ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠭᠠᠢᠬᠠᠭᠤᠯᠤᠨᠠ᠃
— ᠵᠠ᠂ ᠵᠠ᠂ ᠬᠠᠲᠤᠨ ᠰᠧᠯᠢᠩ ᠵᠢᠮᠢᠰ ᠰᠢᠬᠢᠷ ᠡᠴᠡ ᠨᠢ ᠢᠳᠡᠭᠡᠴᠢ! ᠪᠢᠲᠡᠭᠡᠢ ᠡᠷᠡᠭᠡᠯᠡ ᠠ᠋! ᠪᠢᠳᠡ ᠶᠠᠮᠠᠷ ᠭᠠᠳᠠᠨᠠ ᠶ᠋ᠢᠨ ᠬᠥᠮᠦᠰ ᠴᠦ᠍ ᠪᠢᠰᠢ ᠳᠡ! ᠭᠡᠵᠦ ᠶᠠᠩᠨᠠᠬᠤ ᠳ᠋ᠤ᠌ ᠭᠤᠶᠠ ᠡᠰᠬᠡᠭᠰᠡᠨ ᠤᠷᠲᠤ ᠪᠠᠩᠵᠠᠯ ᠲᠠᠢ ᠢᠨᠵᠢ ᠥᠬᠢᠨ ᠪᠣᠯᠣᠷ ᠴᠣᠮᠣᠨ ᠳ᠋ᠤ᠌ ᠬᠢᠲᠠᠳ ᠴᠠᠢ ᠠᠪᠴᠢᠷᠠᠵᠤ ᠲᠠᠯᠪᠢᠪᠠ᠃
— ᠵᠠ᠂ ᠬᠠᠲᠤᠨ ᠰᠧᠯᠢᠩ ᠴᠠᠢ ᠤᠤᠭᠤ! ᠭᠡᠵᠦ ᠶᠡᠬᠡᠳᠡ ᠬᠥᠩᠭᠡᠮᠰᠦᠭ ᠠᠪᠤᠷᠢᠯᠠᠬᠤ ᠳ᠋ᠤᠨᠢ ᠴᠠᠭᠠᠨᠠ ᠨᠢ ᠶᠠᠭᠤᠮᠠ ᠨᠢᠭᠤᠭᠳᠠᠵᠤ ᠪᠠᠢᠭᠠ ᠶ᠋ᠢ ᠪᠠᠭᠠ ᠬᠠᠲᠤᠨ ᠲᠣᠪ ᠲᠣᠳᠣᠷᠬᠠᠢ ᠮᠡᠳᠡᠵᠦ ᠪᠠᠢᠯᠠ᠃ ᠲᠡᠭᠡᠭᠡᠳ ᠪᠠᠭᠠ ᠬᠠᠲᠤᠨ᠄
— ᠸᠠᠩ ᠨᠣᠶᠠᠨ ᠭᠤᠸᠠᠢ ᠨᠠᠮᠠᠶ᠋ᠢ ᠶᠠᠮᠠᠷ ᠤᠴᠢᠷ ᠲᠤ ᠳᠠᠭᠤᠳᠠᠭᠤᠯᠪᠠ? ᠵᠠᠷᠯᠢᠭ ᠵᠠᠬᠢᠶᠠ ᠪᠠᠢᠪᠠᠯ ᠰᠢᠭᠤᠳ ᠬᠡᠯᠡᠭᠡᠷᠡᠢ! ᠭᠡᠪᠡ᠃
— ᠠ᠂ ᠨᠢᠭᠡ ᠤᠴᠢᠷ ᠲᠠᠢ᠃ ᠪᠢᠳᠡ ᠪᠦᠷ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠪᠣᠯᠬᠣᠷ ᠰᠢᠯᠤᠭᠤᠨ ᠨᠢ ᠨᠢᠯᠠᠭᠤᠨ ᠠ᠋ᠴᠠ ᠪᠠᠨ ᠳᠡᠭᠡᠷᠡ᠃ ᠥᠨᠥᠳᠥᠷ ᠪᠢ ᠪᠠᠭᠠ ᠬᠠᠲᠤᠨ ᠲᠠᠢ ᠨᠢᠭᠡ ᠤᠴᠢᠷ ᠢ᠋ ᠵᠥᠪᠳᠡᠬᠦ ᠰᠠᠨᠠᠭᠠᠲᠠᠢ ᠪᠠᠢᠨᠠ᠃
— ᠶᠠᠮᠠᠷ ᠤᠴᠢᠷ ᠪᠣᠢ?
— ᠰᠣᠨᠣᠰᠬᠤᠯᠠ ᠣᠷᠪᠣᠭ ᠤ᠋ᠨ ᠠᠷᠤ ᠵᠣ ᠠ᠋ᠴᠠ ᠤᠯᠠᠭᠠᠨ ᠡᠷᠭᠢ ᠬᠦᠷᠲᠡᠯᠡ ᠨᠢᠭᠡ ᠬᠡᠰᠡᠭ ᠠᠲᠠᠷ ᠭᠠᠵᠠᠷ ᠪᠠᠢᠨᠠ ᠭᠡᠰᠡᠨ᠁ ᠭᠡᠳ ᠦᠭᠡ ᠪᠡᠨ ᠲᠠᠰᠤᠯᠪᠠ᠃
ᠪᠠᠭᠠ ᠬᠠᠲᠤᠨ ᠲᠡᠭᠦᠨ ᠦ᠌ ᠶᠠᠭᠤ ᠶᠠᠭᠠᠬᠢᠬᠤ ᠭᠡᠰᠡᠨ ᠰᠠᠨᠠᠭᠠ ᠶ᠋ᠢ ᠴᠠᠭᠠᠨᠠ ᠨᠢ ᠭᠠᠷᠲᠠᠯᠠ ᠮᠡᠳᠡᠵᠦ᠂《ᠡᠨᠡ ᠮᠠᠭᠤ ᠴᠢᠰᠤ ᠮᠤᠬᠤᠷ ᠬᠣᠳᠣᠭᠣᠳᠣ ᠲᠠᠢ ᠸᠠᠩ ᠰᠣᠬᠣᠷ ᠭᠡᠭᠴᠢ ᠪᠠᠭᠠ ᠯᠠ ᠶᠠᠭᠤᠮᠠ ᠪᠣᠯᠤᠭᠰᠠᠭᠠᠷ ᠪᠡᠶᠡ ᠪᠡᠨ ᠭᠠᠪᠢᠶᠠᠷᠬᠠᠵᠤ ᠭᠠᠵᠠᠷ ᠨᠤᠲᠤᠭ ᠭᠡᠳ ᠳᠠᠪᠰᠢᠭᠤᠷᠠᠬᠤ ᠨᠢ ᠡᠭᠳᠡᠭᠦᠲᠡᠢ ᠶᠦᠮ》 ᠭᠡᠵᠦ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠸᠠᠩ ᠰᠣᠬᠣᠷ᠂ ᠪᠠᠭᠠ ᠬᠠᠲᠤᠨ ᠢ᠋ ᠳᠤᠤᠭᠠᠷᠬᠤ ᠦᠭᠡᠢ ᠪᠣᠯᠬᠤ ᠳ᠋ᠤ᠌᠂
— ᠲᠡᠭᠡᠭᠡᠳ ᠲᠡᠷᠡ ᠬᠡᠰᠡᠭ ᠭᠠᠵᠠᠷ ᠢ᠋ᠶ᠋ᠠᠨ ᠨᠠᠳᠠ ᠳ᠋ᠤ᠌ ᠲᠦᠷᠢᠶᠡᠰᠦᠯᠡᠵᠦ ᠥᠭᠭᠦᠨᠡ ᠤᠤ? ᠭᠡᠰᠡᠨ ᠳ᠋ᠦ᠍ ᠪᠠᠭᠠ ᠬᠠᠲᠤᠨ ᠰᠠᠭᠤᠳᠠᠯ ᠠ᠋ᠴᠠ ᠳᠠᠪ ᠬᠢᠨ ᠪᠣᠰᠴᠤ᠄
— ᠦᠭᠡᠢ ᠠ᠋᠂ ᠸᠠᠩ ᠨᠣᠶᠠᠨ ᠲᠠ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠨᠤᠲᠤᠭ ᠪᠡᠯᠴᠢᠭᠡᠷ ᠡᠴᠡ ᠬᠢᠮᠤᠰᠤᠯᠠᠬᠤ ᠪᠠᠷ ᠢ᠋ᠶ᠋ᠠᠨ ᠪᠣᠯᠤᠯᠠ ᠪᠢᠵᠡ᠁ ᠭᠡᠵᠦ ᠠᠭᠤᠷᠲᠠᠢᠬᠠᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠸᠠᠩ ᠰᠣᠬᠣᠷ᠄
— ᠬᠠᠲᠤᠨ ᠰᠧᠯᠢᠩ ᠠ᠋᠂ ᠠᠭᠤᠷ ᠢ᠋ᠶ᠋ᠠᠨ ᠳᠠᠷᠤᠭᠠᠴᠢ! ᠶᠠᠭᠤᠮᠠ ᠶ᠋ᠢ ᠰᠠᠢᠬᠠᠨ ᠲᠤᠩᠭᠠᠵᠤ ᠪᠣᠳᠣᠳᠠᠭ ᠶᠤᠮ ᠰᠢᠦ! ᠵᠢᠯᠢᠭᠴᠢ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠢ᠋ ᠪᠠᠢᠬᠤ ᠳ᠋ᠤ᠌ ᠪᠢᠳᠡ ᠬᠠᠷᠢᠭᠤᠲᠠᠢ ᠪᠠᠷᠢᠭᠤᠲᠠᠢ ᠰᠠᠢᠬᠠᠨ ᠶᠠᠪᠤᠯᠴᠠᠭᠰᠠᠨ ᠰᠢᠦ ᠳᠡ! ᠲᠠ ᠶᠠᠮᠠᠷ ᠮᠡᠳᠡᠬᠦ ᠦᠭᠡᠢ ᠪᠢᠰᠢ!
— ᠶᠠᠭᠠᠬᠢᠭᠠᠳ ᠮᠡᠳᠡᠬᠦ ᠦᠭᠡᠢ ᠪᠣᠢ? ᠮᠡᠳᠡᠬᠦ ᠮᠡᠳᠡᠬᠦ ᠳ᠋ᠡᠭᠡᠨ ᠰᠠᠢᠨ ᠴᠦ᠍ ᠮᠡᠳᠡᠨᠡ᠁
— ᠮᠡᠳᠡᠳᠡᠭ ᠪᠣᠯ ᠰᠠᠢᠨ ᠳᠠ!
᠁
— ᠰᠢᠷᠠ ᠴᠡᠷᠢᠭ ᠡᠴᠡ ᠦᠷᠭᠦᠵᠦ ᠢᠷᠡᠭᠡᠳ ᠲᠠ ᠬᠠᠩᠬᠠᠲᠠᠢ ᠶ᠋ᠢᠨ ᠰᠢᠯᠢ ᠲᠦᠰᠢᠵᠦ ᠬᠡᠳᠦᠨ ᠵᠢᠯ ᠠᠮᠤᠷ ᠵᠢᠮᠤᠷ ᠰᠠᠭᠤᠯᠠ᠃ ᠰᠢᠷᠠ ᠴᠡᠷᠢᠭ ᠦ᠋ᠨ ᠬᠦᠴᠦᠨ ᠲᠠᠲᠠᠷᠠᠬᠤ ᠳ᠋ᠤ᠌ ᠰᠠᠨᠠᠭᠠ ᠴᠢᠨᠢ ᠣᠨᠳᠣᠣ ᠪᠣᠯᠵᠤ ᠪᠠᠢᠨᠠ ᠤᠤ⁈
一 ᠬᠠᠩᠬᠠᠲᠠᠢ ᠶ᠋ᠢᠨ ᠰᠢᠯᠢ ᠬᠡᠨ ᠦ᠌ ᠨᠤᠲᠤᠭ ᠪᠣᠢ? ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠭᠠᠵᠠᠷ ᠨᠤᠲᠤᠭ ᠪᠢᠰᠢ ᠊ᠦᠦ⁈
一 ᠬᠡᠩ! ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠨᠤᠲᠤᠭ ᠭᠡᠨᠡ⁈ ᠲᠡᠷᠡ ᠴᠢᠨᠢ ᠠᠯᠢ ᠤᠵᠠᠭᠤᠷ ᠤ᠋ᠨ ᠤᠴᠢᠷ ᠠ᠋! ᠴᠢ ᠨᠢᠯᠵᠠᠷᠠᠢ ᠪᠠᠢᠭᠰᠠᠨ᠁ ᠪᠠᠭᠠ ᠬᠠᠲᠤᠨ ᠲᠡᠭᠡᠭᠡᠳ ᠰᠢᠷᠠ ᠴᠡᠷᠢᠭ ᠡᠴᠡ ᠦᠷᠭᠦᠵᠦ ᠶᠠᠪᠤᠬᠤ ᠳ᠋ᠠᠭᠠᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠨᠤᠲᠤᠭ ᠤ᠋ᠨ ᠠᠯᠢ ᠮᠤᠬᠤᠷ ᠪᠤᠯᠤᠩ ᠢ᠋ ᠨᠢ ᠴᠦ᠍ ᠳᠠᠷᠤᠵᠤ ᠰᠠᠭᠤᠳᠠᠭ ᠦᠭᠡᠢ ᠭᠠᠭᠴᠠ ᠬᠠᠩᠬᠠᠲᠠᠢ ᠶ᠋ᠢᠨ ᠰᠢᠯᠢ ᠶ᠋ᠢ ᠰᠣᠩᠭᠣᠵᠤ ᠢᠷᠡᠳᠡᠭ ᠨᠢ ᠶᠠᠭᠤᠨ ᠠ᠋ᠴᠠ ᠪᠣᠢ? ᠭᠡᠵᠦ ᠸᠠᠩ ᠰᠣᠬᠣᠷ ᠤ᠋ᠨ ᠬᠡᠯᠡᠭᠰᠡᠨ ᠦᠭᠡ ᠪᠠᠭᠠ ᠬᠠᠲᠤᠨ ᠤ᠋ ᠴᠢᠬᠢᠨ ᠦ᠌ ᠬᠤᠯᠤᠭᠤ ᠶ᠋ᠢ ᠰᠢᠪᠦᠭᠡ ᠰᠢᠭ ᠬᠠᠳᠬᠤᠵᠤ《ᠣᠷᠣᠬᠤ ᠭᠡᠷ ᠦᠭᠡᠢ ᠣᠭᠣᠴᠢᠬᠤ ᠠᠶᠠᠭᠠ ᠦᠭᠡᠢ ᠪᠣᠯᠴᠢᠬᠠᠭᠠᠳ ᠨᠠᠮᠠᠶ᠋ᠢ ᠨᠥᠮᠥᠷᠢᠳᠡᠵᠦ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠮᠠᠷᠲᠠᠪᠠ ᠤᠤ ᠁》 ᠭᠡᠵᠦ ᠰᠣᠨᠣᠰᠳᠠᠭᠰᠠᠨ ᠳ᠋ᠤ᠌ ᠪᠠᠭᠠ ᠬᠠᠲᠤᠨ ᠤ᠋ ᠬᠣᠷᠣ ᠪᠤᠴᠠᠯᠵᠤ᠄
一 ᠶᠠᠭᠤ ᠴᠤ᠌ ᠶᠠᠷᠢᠬᠤ ᠪᠠᠨ ᠪᠤᠯᠢᠭᠠᠴᠢ! ᠪᠢ ᠣᠳᠣ ᠴᠢᠨᠦ ᠡᠨᠳᠡ ᠵᠢᠭᠠᠬᠠᠨ ᠴᠤ᠌ ᠬᠣᠷᠭᠣᠳᠠᠬᠤ ᠰᠠᠨᠠᠭᠠ ᠦᠭᠡᠢ ᠪᠠᠢᠨᠠ᠃ ᠶᠠᠮᠠᠷ ᠬᠠᠮᠢᠭᠠᠰᠢ ᠪᠠᠨ ᠴᠠᠳᠬᠤ ᠪᠠᠨ ᠮᠡᠳᠡᠳᠡᠭ ᠦᠭᠡᠢ ᠴᠢᠰᠤ ᠮᠤᠬᠤᠷ ᠦᠭᠡᠢ ᠬᠣᠳᠣᠭᠣᠳᠣ ᠲᠠᠢ ᠭᠡᠭᠴᠢ ᠪᠣᠢ⁈ ᠳᠠᠬᠢᠪᠠᠯ ᠠᠩᠴᠢᠨᠵᠠᠪ ᠨᠠᠮᠠᠶ᠋ᠢ ᠡᠷᠢᠵᠦ ᠢᠷᠡᠬᠦ ᠳ᠋ᠦ᠍ ᠴᠢ ᠠᠷᠤ ᠠ᠋ᠴᠠ ᠨᠢ ᠭᠡᠲᠡᠭᠦᠯ ᠶᠠᠪᠤᠭᠤᠯᠵᠤ ᠫᠤᠤ ᠲᠤᠯᠭᠠᠨ ᠪᠠᠷᠢᠪᠴᠢᠯᠠᠳᠠᠭ ᠨᠢ ᠶᠠᠭᠤ ᠪᠣᠢ? ᠭᠡᠵᠦ ᠰᠢᠨᠡ ᠬᠠᠭᠤᠴᠢᠨ ᠤᠴᠢᠷ ᠲᠤ᠌ ᠠᠭᠤᠷ ᠬᠣᠷᠣ ᠪᠠᠨ ᠨᠢᠭᠡ ᠯᠡ ᠠᠭᠤᠳᠠᠯᠤᠨ ᠬᠠᠷᠢᠶᠠᠵᠤ ᠬᠠᠷᠢᠶᠠᠭᠠᠳ ᠡᠭᠦᠳᠡ ᠭᠠᠷᠬᠤ ᠭᠡᠲᠡᠯᠡ ᠸᠠᠩ ᠰᠣᠬᠣᠷ᠄
一 ᠪᠠᠢᠵᠠ! ᠠᠩᠴᠢᠨᠵᠠᠪ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠮᠠᠨ ᠤ᠋ ᠴᠡᠷᠢᠭ ᠡᠴᠡ ᠬᠣᠶᠠᠷ ᠢ᠋ ᠬᠣᠬᠢᠷᠠᠭᠠᠵᠤ ᠨᠢᠭᠡ ᠶ᠋ᠢ ᠰᠢᠷᠬᠠᠲᠤᠭᠤᠯᠵᠤ ᠣᠷᠬᠢᠴᠢᠬᠠᠭᠠᠳ ᠲᠡᠷᠡ ᠳᠤᠲᠠᠭᠠᠵᠤ ᠠᠷᠢᠯᠤᠭᠰᠠᠨ ᠭᠡᠯᠡ᠃
一 ᠴᠡᠷᠢᠭ ᠢ᠋ᠶ᠋ᠡᠨ ᠬᠣᠬᠢᠷᠠᠭᠤᠯᠤᠭᠰᠠᠨ ᠴᠢᠨᠢ ᠬᠣᠬᠢ ᠨᠢ ᠲᠡᠷᠡ! ᠲᠠᠨᠤᠰ ᠯᠠ ᠲᠡᠭᠡᠵᠦ ᠲᠡᠭᠦᠨ ᠢ᠋ ᠳᠤᠲᠠᠭᠠᠯᠭᠠᠯᠠ ᠪᠢᠵᠡ⁈ ᠭᠡᠳ ᠪᠠᠭᠠ ᠬᠠᠲᠤᠨ ᠠᠭᠤᠷᠯᠠᠵᠤ ᠡᠭᠦᠳᠡ ᠪᠡᠨ ᠰᠠᠪᠠᠨ ᠭᠠᠷᠴᠤ ᠶᠠᠪᠤᠪᠠ᠃
ᠪᠠᠭᠠ ᠬᠠᠲᠤᠨ ᠳ᠋ᠤ᠌ ᠪᠡᠶᠡ ᠪᠡᠨ ᠭᠠᠢᠬᠠᠭᠤᠯᠤᠨ ᠳᠤᠮᠳᠠ ᠠ᠋ᠴᠠ ᠨᠢ ᠠᠰᠢᠭ ᠴᠣᠬᠢᠬᠤ ᠭᠡᠳ ᠠᠮᠠ ᠪᠠᠨ ᠠᠯᠠᠭᠠᠳᠠᠭᠤᠯᠵᠤ ᠬᠣᠴᠣᠷᠤᠭᠰᠠᠨ ᠸᠠᠩ ᠰᠣᠬᠣᠷ᠄
一 ᠬᠥᠮᠦᠨ ᠦ᠌ ᠰᠠᠢᠨ ᠢ᠋ ᠮᠡᠳᠡᠳᠡᠭ ᠦᠭᠡᠢ ᠮᠠᠭᠤ ᠥᠯᠥᠭᠴᠢᠨ ᠢ᠋ ᠬᠣᠬᠣᠢ! ᠶᠠᠮᠠᠷ ᠰᠠᠢᠨ ᠳ᠋ᠠᠭᠠᠨ ᠡᠯᠳᠡᠩᠭᠡ ᠨᠠᠷ ᠢ᠋ᠶ᠋ᠠᠷ ᠭᠠᠴᠢᠭᠤᠯᠵᠤ ᠶᠠᠪᠤᠪᠠ? ᠵᠠ ᠪᠠᠢᠵᠠ᠂ ᠴᠢ ᠴᠠᠭᠠᠰᠢ ᠶᠠᠪᠤᠵᠤ ᠳᠠᠪᠠᠷᠠᠵᠤ ᠯᠠ ᠪᠣᠢ! ᠠᠩᠴᠢᠨᠵᠠᠪ ᠢ᠋ ᠳᠠᠬᠢᠭᠠᠳ ᠱᠣᠷᠣᠩ ᠳ᠋ᠤ᠌ ᠴᠢᠬᠢᠬᠦ ᠳ᠋ᠦ᠍ ᠴᠢ ᠶᠠᠮᠠᠷ ᠰᠢᠦ ᠬᠥᠭᠡᠷᠦᠬᠦᠢ ᠪᠣᠯᠬᠤ ᠪᠠᠨ ᠪᠣᠳᠣᠭᠠᠷᠠᠢ! ᠭᠡᠵᠦ ᠵᠠᠨᠤᠩᠭᠤᠢ ᠬᠡᠯᠡᠭᠡᠳ ᠭᠣᠩᠰᠣᠢᠵᠤ ᠬᠣᠴᠣᠷᠪᠠ᠃
ᠪᠠᠭᠠ ᠬᠠᠲᠤᠨ᠂ ᠸᠠᠩ ᠰᠣᠬᠣᠷ ᠤ᠋ᠨ ᠨᠤᠲᠤᠭ ᠪᠡᠯᠴᠢᠭᠡᠷ ᠲᠤᠨᠤᠬᠤ ᠰᠢᠨᠤᠯ ᠳ᠋ᠤ᠌ ᠳᠤᠷᠠ ᠦᠭᠡᠢᠴᠡᠨ ᠨᠤᠲᠤᠭ ᠪᠤᠴᠠᠬᠤ ᠪᠠᠷ ᠴᠡᠷᠢᠭ ᠮᠣᠷᠢ ᠪᠠᠨ ᠴᠡᠭᠴᠡᠯᠡᠬᠦ ᠰᠠᠨᠠᠭᠠ ᠣᠷᠣᠭᠰᠠᠨ ᠪᠣᠯᠪᠠᠴᠤ ᠨᠤᠲᠤᠭ ᠤ᠋ᠨ ᠪᠠᠷᠠ ᠬᠠᠷᠠᠬᠤ ᠳ᠋ᠤ᠌ ᠡᠯᠳᠡᠩᠭᠡ ᠲᠡᠷᠢᠭᠦᠲᠡᠨ ᠨᠠᠮᠠᠶ᠋ᠢ ᠶᠠᠭᠠᠬᠢᠵᠤ ᠪᠤᠷᠤᠭᠤᠳᠬᠠᠵᠤ ᠬᠠᠷᠠᠭᠳᠠᠳᠠᠭ ᠪᠣᠯ⁈ ᠡᠯᠳᠡᠩᠭᠡ᠂ ᠵᠣᠳᠪᠠ᠂ ᠸᠴᠢᠷᠪᠠᠲᠤ ᠨᠠᠷ ᠥᠭᠡᠳᠡ ᠡᠴᠡ ᠬᠥᠷᠥᠰᠥ ᠪᠡᠨ ᠤᠷᠪᠠᠭᠤᠯᠤᠨ ᠲᠤᠯᠵᠤ ᠢᠷᠡᠪᠡᠯ ᠪᠠᠰᠠ ᠴᠤ᠌ ᠠᠮᠠᠷ ᠦᠭᠡᠢ᠃ ᠪᠠᠷᠠᠭᠤᠨ ᠬᠦᠩ ᠢ᠋ᠶ᠋ᠡᠨ ᠭᠣᠯᠣᠵᠤ ᠸᠠᠩ ᠰᠣᠬᠣᠷ ᠢ᠋ ᠨᠥᠮᠥᠷᠢᠳᠡᠵᠦ ᠶᠠᠪᠤᠴᠢᠬᠠᠭᠠᠳ ᠶᠠᠮᠠᠷ ᠨᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠡᠳᠡᠷᠭᠦ ᠪᠡᠨ ᠪᠤᠴᠠᠵᠤ ᠢᠷᠡᠨᠡ ᠪᠣᠢ? ᠭᠡᠵᠦ ᠠᠰᠠᠭᠤᠪᠠᠯ ᠪᠢ ᠥᠭᠡᠳᠡ ᠡᠴᠡ ᠨᠢ ᠶᠠᠭᠤ ᠭᠡᠵᠦ ᠬᠠᠷᠢᠭᠤᠯᠤᠨᠠ ᠪᠣᠢ⁈ ᠭᠡᠰᠡᠨ ᠡᠯᠳᠡᠪ ᠡᠷᠢᠶᠡᠨ ᠪᠣᠳᠣᠯ ᠳ᠋ᠤ᠌ ᠪᠣᠭᠣᠭᠳᠠᠨ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠳ᠋ᠠᠭᠠᠨ ᠨᠠᠭᠠᠰᠢ ᠴᠠᠭᠠᠰᠢ ᠳᠡᠮᠡᠢ ᠯᠡ ᠬᠣᠯᠬᠢᠨᠠ᠃
ᠡᠭᠦᠳᠡᠨ ᠦ᠌ ᠮᠠᠨᠠᠭᠠᠨ ᠤ᠋ ᠴᠡᠷᠢᠭ᠄
— ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠶᠠᠮᠤᠨ ᠠ᠋ᠴᠠ ᠵᠣᠳᠪᠠ ᠮᠡᠢᠷᠡᠨ ᠭᠤᠸᠠᠢ ᠬᠠᠲᠤᠨ ᠰᠧᠯᠢᠩ ᠲᠠᠨ ᠲᠠᠢ ᠠᠭᠤᠯᠵᠠᠷᠠ ᠢᠷᠡᠪᠡ ᠭᠡᠵᠦ ᠮᠡᠳᠡᠭᠦᠯᠦᠭᠰᠡᠨᠡ ᠬᠠᠲᠤᠨ ᠰᠧᠯᠢᠩ᠄
— ᠪᠤᠰᠢᠭᠤᠬᠠᠨ ᠤᠷᠤᠭᠤᠯ! ᠭᠡᠪᠡᠯ ᠤᠳᠠᠭᠰᠠᠨ ᠦᠭᠡᠢ ᠵᠣᠳᠪᠠ ᠮᠡᠢᠷᠡᠨ ᠬᠡᠳᠦᠨ ᠳᠠᠭᠠᠯᠲᠠ ᠴᠡᠷᠢᠭ ᠲᠡᠢ ᠣᠷᠣᠵᠤ ᠢᠷᠡᠨ᠄
— ᠪᠠᠭᠠ ᠬᠠᠲᠤᠨ ᠤ᠋ ᠠᠮᠤᠭᠤᠯᠠᠩ ᠢ᠋ ᠠᠢᠯᠠᠳᠬᠠᠶᠠ! ᠭᠡᠵᠦ ᠵᠣᠳᠪᠠ ᠮᠡᠢᠷᠡᠨ ᠡᠪᠦᠷ ᠡᠴᠡ ᠪᠡᠨ ᠰᠠᠮᠪᠠᠢ ᠬᠠᠳᠠᠭ ᠳᠡᠯᠭᠡᠵᠦ ᠶᠣᠰᠣᠴᠢᠯᠠᠨ ᠵᠣᠯᠭᠠᠭᠠᠳ ᠬᠣᠣᠰ ᠬᠣᠣᠰ ᠢ᠋ᠶ᠋ᠠᠷ ᠠᠯᠲᠠ ᠮᠥᠩᠭᠥᠨ ᠶᠤᠸᠠᠮᠪᠤᠤ ᠪᠠ ᠴᠠᠢ ᠶ᠋ᠢᠨ ᠰᠢᠭᠦᠰᠦ᠂ ᠬᠣᠣᠰ ᠪᠣᠭᠣᠳᠠᠯ ᠶᠠᠨᠵᠤᠤᠷ ᠲᠠᠮᠠᠬᠢ ᠡᠨᠡ ᠲᠡᠷᠡ ᠪᠡᠯᠡᠭ ᠰᠡᠯᠲᠡ ᠲᠠᠯᠪᠢᠩᠭᠠᠨ᠄
— ᠬᠠᠷᠠ ᠴᠡᠷᠢᠭ ᠦ᠋ᠨ ᠶᠡᠬᠡ ᠬᠢᠰᠠᠭᠠᠨ ᠳ᠋ᠤ᠌ ᠪᠠᠭᠠ ᠬᠠᠲᠤᠨ ᠡᠨᠡ ᠬᠡᠳᠦᠨ ᠵᠢᠯ ᠠᠶᠤᠵᠤ ᠴᠣᠴᠢᠷᠳᠠᠪᠠ ᠤᠤ? ᠶᠠᠳᠠᠷᠠᠵᠤ ᠵᠦᠳᠡᠷᠡᠪᠡ ᠤᠤ? ᠭᠡᠵᠦ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠶᠠᠮᠤᠨ ᠤ᠋ ᠡᠮᠦᠨᠡ ᠡᠴᠡ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠶ᠋ᠢ ᠣᠷᠣᠯᠠᠵᠤ ᠬᠠᠲᠤᠨ ᠲᠠᠨ ᠤ᠋ ᠠᠮᠤᠷ ᠮᠡᠨᠳᠦ ᠶ᠋ᠢ ᠠᠢᠯᠠᠳᠬᠠᠬᠤ ᠶ᠋ᠢᠨ ᠬᠠᠮᠲᠤ ᠡᠷᠭᠢᠨ ᠬᠠᠲᠤᠨ ᠤ᠋ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠳ᠋ᠠᠭᠠᠨ ᠠᠮᠤᠷ ᠲᠠᠢᠪᠤᠩ ᠰᠠᠭᠠᠲᠠᠵᠤ ᠪᠠᠭᠤᠬᠤ ᠶ᠋ᠢ ᠰᠠᠷᠠᠪᠴᠢᠯᠠᠨ ᠪᠠᠷᠠᠯᠠᠨᠠᠮ! ᠭᠡᠳ ᠮᠡᠬᠦᠯᠵᠡᠪᠡ᠃
ᠪᠠᠭᠠ ᠬᠠᠲᠤᠨ᠂ ᠵᠣᠳᠪᠠ ᠭᠤᠸᠠᠢ ᠶ᠋ᠢᠨ ᠡᠢᠨ ᠬᠦ᠌ ᠬᠦᠨᠳᠦ ᠪᠡᠯᠡᠭ ᠲᠡᠢ ᠢᠷᠡᠵᠦ ᠬᠥᠩᠭᠡᠮᠰᠦᠭ ᠲᠣᠷᠭᠠᠨ ᠵᠠᠩᠨᠠᠬᠤ ᠶ᠋ᠢ ᠬᠠᠷᠠᠭᠠᠳ ᠤᠶᠠᠷᠠᠵᠤ᠄
— ᠶᠠᠭᠤ ᠬᠢᠨᠡ ᠪᠣᠢ? ᠡᠨᠡ ᠵᠡᠷᠭᠡ ᠶ᠋ᠢᠨ ᠪᠡᠯᠡᠭ ᠰᠡᠯᠲᠡ ᠪᠡᠷ ᠲᠠ ᠶᠠᠭᠠᠬᠢᠬᠤ ᠨᠢ ᠪᠣᠢ? ᠵᠦᠭᠡᠷ ᠭᠠᠷ ᠬᠣᠭᠣᠰᠣᠨ ᠢᠷᠡᠵᠦ ᠨᠠᠳᠠ ᠲᠠᠢ ᠵᠣᠯᠭᠠᠭᠰᠠᠨ ᠴᠦ᠍ ᠪᠢ ᠠᠳᠠᠯᠢᠬᠠᠨ ᠪᠠᠶᠠᠷᠯᠠᠨᠠ ᠭᠡᠯᠡ᠃
— ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ? ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠮᠢᠨᠢ! ᠡᠨᠡ ᠡᠨᠡ ᠴᠢᠨᠢ ᠪᠦᠷ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠶ᠋ᠢᠨ ᠰᠡᠳᠬᠢᠯ ᠰᠢᠦ ᠳᠡ! ᠸᠠᠩ ᠰᠣᠬᠣᠷ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠦ᠌ ᠨᠤᠲᠤᠭ ᠪᠡᠯᠴᠢᠭᠡᠷ ᠡᠴᠡ ᠳᠡᠭᠡᠰᠦᠯᠡᠵᠦ ᠠᠪᠬᠤ ᠭᠡᠵᠦ ᠭᠣᠷᠢᠳᠠᠭᠰᠠᠨ ᠢ᠋ ᠰᠧᠯᠢᠩ ᠲᠠ ᠡᠷᠡᠰ ᠨᠢᠴᠤᠭᠠᠭᠰᠠᠨ ᠳ᠋ᠤ᠌ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠪᠠᠶᠠᠷᠯᠠᠵᠤ ᠪᠠᠢᠨᠠ ᠰᠢᠦ!
— ᠶᠠᠭᠤ ᠬᠠᠮᠢᠶᠠ ᠪᠠᠢᠬᠤ ᠪᠣᠢ? ᠸᠠᠩ ᠰᠣᠬᠣᠷ ᠢ᠋ ᠲᠡᠳᠡᠨᠦᠰ ᠮᠡᠳᠡᠬᠦ ᠦᠭᠡᠢ ᠴᠦ᠍ ᠪᠢᠰᠢ ᠳᠡ! ᠴᠠᠳᠬᠤ ᠪᠠᠨ ᠮᠡᠳᠡᠳᠡᠭ ᠦᠭᠡᠢ᠂ ᠴᠢᠰᠤ ᠮᠤᠬᠤᠷ ᠦᠭᠡᠢ ᠬᠣᠳᠣᠭᠣᠳᠣ ᠲᠠᠢ ᠠᠮᠢᠲᠠᠨ! ᠲᠡᠳᠡᠨᠦᠰ ᠦ᠋ᠨ ᠪᠡᠯᠴᠢᠭᠡᠷ ᠬᠢᠮᠤᠰᠤᠯᠠᠬᠤ ᠰᠠᠨᠠᠭᠠ ᠶ᠋ᠢ ᠬᠣᠷᠢᠭᠯᠠᠬᠤ ᠦᠭᠡᠢ ᠶᠦᠮ ᠪᠣᠯ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠬᠣᠣᠷ ᠨᠢ ᠬᠠᠮᠢᠭᠠ ᠲᠤᠰᠬᠤ ᠶ᠋ᠢ ᠬᠡᠨ ᠮᠡᠳᠡᠬᠦ ᠪᠣᠢ⁈
— ᠶᠠᠭ ᠢᠩᠭᠢᠬᠦᠯᠡᠷ ᠥᠴᠦᠬᠡᠨ ᠪᠢ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠶᠠᠮᠤᠨ ᠤ᠋ ᠡᠮᠦᠨᠡ ᠡᠴᠡ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠶ᠋ᠢᠨ ᠨᠠᠢᠳᠠᠯᠭᠠ ᠪᠠᠷ ᠡᠷᠭᠢᠨ ᠪᠠᠭᠠ ᠬᠠᠲᠤᠨ ᠰᠧᠯᠢᠩ ᠢ᠋ ᠤᠷᠢᠳ ᠠ᠋ᠴᠠ ᠤᠭᠲᠤᠵᠤ ᠪᠠᠢᠭᠠ ᠪᠠᠨ ᠢᠯᠡᠳᠬᠡᠭᠰᠡᠨ ᠢ᠋ ᠬᠦᠯᠢᠶᠡᠨ ᠠᠪᠤᠨᠠ ᠤᠤ⁈ ᠭᠡᠵᠦ ᠵᠣᠳᠪᠠ ᠭᠤᠸᠠᠢ ᠢᠷᠡᠭᠰᠡᠨ ᠵᠣᠷᠢᠭᠰᠠᠨ ᠢ᠋ᠶ᠋ᠠᠨ ᠳᠠᠬᠢᠨᠲᠠ ᠢᠯᠡᠳᠬᠡᠭᠰᠡᠨ ᠳ᠋ᠦ᠍ ᠪᠠᠭᠠ ᠬᠠᠲᠤᠨ᠄
— ᠲᠠᠨ ᠳ᠋ᠤ᠌ ᠭᠢᠯᠠᠢᠯᠠ! ᠲᠠ ᠤᠷᠢᠳ ᠢ᠋ᠶ᠋ᠠᠷ ᠬᠠᠷᠢᠭᠠᠴᠢ! ᠪᠢ ᠬᠡᠳᠦ ᠬᠣᠨᠣᠭ ᠠ᠋ᠴᠠ ᠬᠠᠷᠢᠨᠠ᠃ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠶ᠋ᠢᠨ ᠰᠠᠨᠠᠭᠠ ᠶ᠋ᠢ ᠲᠣᠭᠲᠠᠭᠠᠯᠠ᠃ ᠮᠡᠨᠳᠦ ᠶ᠋ᠢ ᠨᠢ ᠠᠰᠠᠭᠤᠵᠤ ᠪᠠᠢᠨᠠ ᠭᠡᠵᠦ ᠳᠠᠮᠵᠢᠭᠤᠯᠤᠭᠠᠷᠠᠢ! ᠭᠡᠰᠡᠨ ᠳ᠋ᠦ᠍ ᠷᠠᠰᠢ ᠵᠠᠬᠢᠷᠤᠭᠴᠢ ᠪᠠᠭᠠ ᠬᠠᠲᠤᠨ ᠤ᠋ ᠴᠢᠬᠢᠨ ᠳ᠋ᠦ᠍《 ᠢᠷᠡᠭᠰᠡᠨ ᠬᠥᠮᠦᠨ ᠤᠴᠢᠷ ᠲᠠᠢ᠂ ᠢᠨᠢᠶᠡᠭᠰᠡᠨ ᠬᠥᠮᠦᠨ ᠭᠡᠮ ᠲᠡᠢ ᠭᠡᠳᠡᠭ ᠶᠦᠮ᠃ ᠡᠯᠳᠡᠩᠭᠡ ᠶ᠋ᠢᠨ ᠨᠠᠭᠠᠳᠤᠭᠰᠠᠨ ᠪᠠᠰᠢᠷ ᠲᠤ ᠣᠷᠢᠶᠠᠭᠳᠠᠬᠤ ᠪᠠᠨ ᠬᠡᠷᠰᠡᠦᠯᠡᠭᠡᠷᠡᠢ!》 ᠭᠡᠰᠡᠨ ᠢ᠋ ᠪᠠᠭᠠ ᠬᠠᠲᠤᠨ ᠰᠠᠨᠠᠭᠠᠨ ᠳ᠋ᠠᠭᠠᠨ ᠠᠪᠤᠭᠰᠠᠨ ᠦᠭᠡᠢ᠃ ᠵᠣᠳᠪᠠ ᠮᠡᠢᠷᠡᠨ ᠲᠡᠢ ᠡᠢᠨ ᠲᠡᠢᠨ ᠭᠡᠵᠦ ᠬᠦᠦᠷᠨᠢᠨ ᠲᠡᠭᠦᠨ ᠢ᠋ ᠦᠳᠡᠪᠡ᠃
ᠵᠣᠳᠪᠠ ᠮᠡᠢᠷᠡᠨ ᠤᠷᠢᠳ ᠠ᠋ᠴᠠ ᠪᠠᠭᠠ ᠬᠠᠲᠤᠨ ᠢ᠋ ᠤᠭᠲᠤᠬᠤ ᠵᠠᠮ ᠢ᠋ ᠰᠢᠯᠤᠭᠤᠳᠬᠠᠭᠰᠠᠨ ᠤ᠋ ᠰᠠᠢᠨ ᠢ᠋ᠶ᠋ᠠᠷ ᠪᠠᠭᠠ ᠬᠠᠲᠤᠨ ᠤ᠋ ᠳᠣᠲᠣᠷᠠ ᠨᠢᠭᠡ ᠯᠡ ᠣᠩᠭᠣᠢᠵᠤ《 ᠪᠠᠷᠠᠭᠤᠨ ᠬᠦᠩ ᠳ᠋ᠡᠭᠡᠨ ᠪᠤᠴᠠᠬᠤ ᠳ᠋ᠤ᠌ ᠡᠯᠳᠡᠩᠭᠡ ᠨᠠᠷ ᠶᠠᠭᠠᠬᠢᠳᠠᠭ ᠪᠣᠯ? ᠢᠢᠳᠡᠭ ᠪᠣᠯ?》 ᠭᠡᠰᠡᠨ ᠪᠣᠳᠣᠯ ᠤ᠋ᠨ ᠡᠭᠡᠳᠡᠷᠡᠭᠡ ᠠᠯᠳᠠᠷᠠᠵᠤ᠂ ᠰᠡᠳᠬᠢᠯ ᠳ᠋ᠦ᠍ ᠬᠦᠨᠳᠦᠷᠡᠭᠡᠳ ᠪᠠᠢᠭᠰᠠᠨ ᠬᠡᠰᠡᠭ ᠴᠢᠯᠠᠭᠤ ᠤᠨᠠᠭᠰᠠᠨ ᠮᠡᠲᠦ ᠲᠠᠢᠪᠤᠰᠢᠷᠠᠪᠠ᠃
ᠲᠡᠭᠡᠬᠦ ᠳᠦ ᠲᠡᠭᠦᠨ ᠦ ᠪᠠᠷᠠᠭᠤᠨ ᠭᠥᠩ ᠳ᠋ᠡᠭᠡᠨ ᠪᠤᠴᠠᠬᠤ ᠰᠡᠳᠬᠢᠯ ᠢ ᠬᠡᠨ ᠨᠢᠭᠡ ᠨᠢ ᠠᠷᠤ ᠬᠣᠢᠨᠠ ᠠᠴᠠ ᠨᠢ ᠭᠠᠯᠳᠠᠵᠤ ᠬᠥᠪᠢᠭᠡᠳ ᠪᠠᠢᠬᠤ ᠰᠢᠭ᠋ ᠶᠠᠭᠠᠷᠠᠭᠤᠯᠬᠤ ᠶᠢ ᠶᠠᠭᠠᠬᠢᠨᠠ⁈
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠣᠳᠣᠨᠬᠤᠸᠠᠷ