ᠦᠷ ᠦᠨ ᠲᠤᠶᠠᠭᠠ II – ᠪ᠂ ᠷᠢᠨᠴᠢᠨ - ᠬᠣᠶᠠᠳᠤᠭᠠᠷ ᠲᠡᠪᠲᠡᠷ <ᠭᠠᠯ ᠤᠰᠤᠨ ᠤ ᠭᠠᠰᠢᠭᠤᠨ ᠵᠣᠪᠠᠯᠠᠩ>- ᠠᠷᠪᠠᠨ ᠬᠣᠶᠠᠷ Үүрийн туяа II – Б ᠂ Ренчин Хоёрдугаар дэвтэр "Гал усны гашуун зовлон"-12
223ᠠᠷᠪᠠᠨ ᠬᠣᠶᠠᠷ ᠂ ᠡᠪᠲᠦ ᠱᠠᠭᠠᠵᠠᠭᠠᠢ ᠯᠤᠤ ᠪᠠᠭᠤᠯᠭᠠᠳᠠᠭ
ᠬᠣᠶᠠᠷ ᠬᠥᠮᠦᠨ ᠡᠪ ᠰᠠᠢᠲᠠᠢ ᠪᠣᠯ ᠲᠡᠮᠦᠷ ᠬᠡᠷᠡᠮ ᠮᠡᠲᠦ᠃
《ᠠᠷᠠᠳ ᠤ᠋ᠨ ᠰᠡᠴᠡᠨ ᠦᠭᠡ》
ᠴᠡᠷᠢᠭ᠂ ᠬᠤᠸᠠᠷᠠᠨ ᠳ᠋ᠤ᠌ ᠰᠠᠭᠤᠵᠤ᠂ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠢᠵᠢᠯᠢᠳᠦᠨ ᠳᠠᠰᠤᠪᠠ᠃ ᠬᠤᠵᠢᠷᠪᠤᠯᠤᠩ ᠤ᠋ᠨ ᠴᠡᠷᠢᠭ᠂ ᠰᠢᠷᠴᠢᠨ ᠦ᠌ ᠦᠵᠡᠬᠦ ᠳ᠋ᠦ᠍ ᠶᠠᠪᠤᠭᠠ ᠶᠠᠪᠤᠭᠠᠨ ᠳ᠋ᠠᠭᠠᠨ ᠨᠡᠯᠢᠶᠡᠳ ᠣᠨᠳᠣᠣ ᠪᠣᠯᠵᠤ᠂ ᠤᠯᠢᠶᠠᠰᠤᠲᠠᠢ ᠶ᠋ᠢ ᠪᠠᠢᠯᠳᠤᠬᠤ ᠭᠡᠵᠦ ᠶᠠᠪᠤᠭᠰᠠᠨ ᠨᠤᠲᠤᠭ ᠤ᠋ᠨ ᠴᠡᠷᠢᠭ ᠡᠴᠡ ᠱᠠᠯ ᠮᠥᠷᠲᠡᠭᠡᠨ ᠪᠠᠢᠳᠠᠯ ᠲᠠᠢ ᠪᠣᠯᠵᠤ ᠪᠠᠢᠭᠠ ᠨᠢ ᠢᠯᠡᠷᠬᠡᠢ ᠮᠡᠳᠡᠭᠳᠡᠪᠡ᠃ ᠨᠤᠲᠤᠭ ᠤ᠋ᠨ ᠲᠡᠷᠡ ᠴᠡᠷᠢᠭ ᠲᠦ᠍ ᠬᠥᠮᠦᠨ᠂ ᠥᠷᠥᠭᠡᠯ ᠨᠥᠬᠥᠳ᠂ ᠬᠠᠮᠲᠤ ᠣᠯᠠᠨ ᠨᠠᠢᠬᠠᠨ ᠠᠰᠢᠭ ᠲᠤᠰᠠ ᠶ᠋ᠢ ᠶᠡᠷᠦ ᠪᠣᠳᠣᠬᠤ ᠦᠭᠡᠢ᠂ ᠬᠠᠷᠠ ᠠᠮᠢ ᠪᠠᠨ ᠪᠣᠳᠣᠳᠠᠭ ᠪᠠᠢᠳᠠᠯ ᠲᠠᠢ ᠪᠠᠢᠵᠤ ᠪᠢᠯᠡ᠃ ᠡᠪᠯᠡᠵᠦ ᠨᠡᠢᠯᠡᠬᠦ ᠳ᠋ᠡᠭᠡᠨ ᠭᠠᠭᠴᠠ ᠬᠦ᠌ ᠲᠦᠷ ᠵᠠᠭᠤᠷᠠ ᠶ᠋ᠢᠨ ᠠᠰᠢᠭ ᠤ᠋ᠨ ᠤᠴᠢᠷ ᠲᠦᠷ ᠬᠡᠯᠬᠢᠶᠡ ᠬᠣᠯᠪᠣᠭᠠ ᠪᠠᠢᠭᠤᠯᠵᠤ᠂ ᠲᠡᠷᠡ ᠬᠡᠷᠡᠭ ᠪᠦᠲᠦᠵᠦ ᠳᠠᠭᠤᠰᠤᠮᠠᠭᠴᠠ ᠪᠤᠶᠤ ᠪᠦᠲᠦᠬᠦ ᠦᠭᠡᠢ ᠪᠣᠯᠣᠮᠠᠭᠴᠠ᠂ ᠡᠪᠯᠡᠨ ᠨᠡᠢᠯᠡᠭᠰᠡᠨ ᠤᠯᠤᠰ ᠨᠢ ᠮᠥᠷ ᠮᠥᠷ ᠢ᠋ᠶ᠋ᠡᠨ ᠬᠥᠭᠡᠭᠡᠴᠡᠯᠳᠦᠳᠡᠭ ᠪᠠᠢᠵᠠᠢ᠃ ᠴᠢᠩᠭᠢᠭᠡᠳ ᠨᠥᠬᠥᠷ ᠬᠠᠨᠢ ᠲᠠᠲᠠᠬᠤ ᠳ᠋ᠠᠭᠠᠨ᠂ ᠲᠤᠬᠠᠢ ᠶ᠋ᠢᠨ ᠨᠢᠭᠡᠨ ᠪᠣᠳᠣᠭᠰᠠᠨ ᠬᠡᠷᠡᠭ ᠲᠦ᠍ ᠬᠦᠴᠦᠨ ᠨᠡᠮᠡᠷᠢ ᠪᠣᠯᠭᠠᠬᠤ ᠶ᠋ᠢ ᠪᠣᠳᠣᠭᠠᠳ ᠠᠰᠢᠭ ᠣᠯᠵᠠ ᠪᠠᠨ ᠬᠤᠪᠢᠶᠠᠬᠤ ᠳ᠋ᠤ᠌ ᠨᠣᠭᠳᠠᠬᠤ ᠬᠤᠪᠢ ᠪᠠᠭᠠ ᠪᠣᠯᠬᠤ ᠭᠡᠵᠦ᠂ ᠨᠢᠭᠡ ᠴᠦ᠍ ᠢᠯᠡᠭᠦᠦ ᠬᠥᠮᠦᠨ ᠢ᠋ ᠬᠠᠨᠢ ᠲᠠᠲᠠᠳᠠᠭ ᠦᠭᠡᠢ ᠪᠠᠢᠵᠠᠢ᠃ ᠪᠠᠰᠠ ᠨᠤᠲᠤᠭ ᠤᠰᠤ ᠨᠢᠭᠡᠲᠡᠢ ᠬᠥᠮᠦᠨ ᠢ᠋ᠶ᠋ᠡᠨ ᠳᠣᠲᠣᠨᠣᠯᠠᠭᠠᠳ!. ᠥᠭᠡᠷᠡ ᠨᠤᠲᠤᠭ ᠤᠰᠤᠨ ᠤ᠋ ᠬᠥᠮᠦᠨ ᠢ᠋ ᠬᠠᠷᠢᠯᠬᠠᠵᠤ᠂ ᠬᠡᠷᠡᠭ ᠪᠢᠰᠢ ᠪᠣᠯᠬᠤ ᠴᠠᠭ ᠲᠤ᠌᠂ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ ᠬᠡᠷᠡᠭ ᠡᠴᠡ ᠮᠤᠯᠲᠤᠷᠠᠬᠤ ᠪᠤᠶᠤ ᠬᠣᠯᠪᠣᠭᠳᠠᠯ ᠢ᠋ᠶ᠋ᠠᠨ ᠬᠥᠩᠭᠡᠨ ᠪᠣᠯᠭᠠᠬᠤ ᠭᠡᠵᠦ᠂ ᠭᠡᠮ ᠢ᠋ ᠨᠤᠲᠤᠭ ᠤᠰᠤ ᠥᠭᠡᠷᠡ ᠲᠡᠢ᠂ ᠭᠠᠳᠠᠨᠠ ᠶ᠋ᠢᠨ ᠭᠡᠵᠦ ᠦᠵᠡᠳᠡᠭ ᠬᠥᠮᠦᠨ ᠶᠦᠮ ᠤᠤ᠂ ᠲᠤᠩ ᠶᠠᠳᠠᠪᠠᠯ᠂ ᠪᠦᠬᠦ ᠬᠠᠮᠲᠤ ᠣᠯᠠᠨ ᠳᠡᠭᠡᠷᠡ ᠲᠦᠯᠬᠢᠬᠦ ᠶ᠋ᠢ ᠣᠷᠣᠯᠳᠣᠳᠠᠭ ᠵᠠᠩᠰᠢᠯ ᠲᠠᠢ ᠪᠠᠢᠵᠠᠢ᠃ ᠬᠠᠷᠢᠨ ᠬᠤᠵᠢᠷᠪᠤᠯᠤᠩ ᠳ᠋ᠤ᠌ ᠬᠥᠮᠦᠨ ᠪᠦᠷᠢ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ ᠪᠤᠰᠤᠳ ᠬᠠᠮᠲᠤ ᠣᠯᠠᠨ ᠲᠠᠢ ᠲᠦᠮᠡᠨ ᠵᠦᠢᠯ ᠦ᠋ᠨ ᠬᠡᠯᠬᠢᠶᠡ ᠲᠡᠢ ᠶ᠋ᠢ ᠶᠠᠭᠤᠮᠠ ᠪᠦᠷᠢ ᠳᠡᠭᠡᠷᠡ ᠮᠡᠳᠡᠵᠦ ᠠᠪᠤᠪᠠ᠃ ᠠᠩᠬᠠᠨ ᠳ᠋ᠠᠭᠠᠨ ᠨᠢᠭᠡ ᠬᠤᠰᠢᠭᠤᠨ ᠤ᠋ ᠤᠯᠤᠰ᠂ ᠡᠨᠡ ᠲᠡᠷᠡ ᠰᠤᠮᠤᠨ ᠠᠷᠪᠠᠨ ᠢ᠋ᠶ᠋ᠠᠷ ᠰᠠᠴᠤᠭᠳᠠᠭᠠᠳ᠂ ᠴᠢᠳᠠᠪᠠᠯ ᠪᠥᠭᠡᠮ ᠢ᠋ᠶ᠋ᠡᠷ ᠪᠠᠢᠬᠤ ᠰᠠᠨ ᠭᠡᠵᠦ ᠣᠷᠣᠯᠳᠣᠳᠠᠭ ᠪᠠᠢᠵᠠᠢ᠃ ᠴᠢᠩᠭᠢᠭᠰᠡᠭᠡᠷ ᠨᠣᠭᠳᠠᠭᠰᠠᠨ ᠠᠷᠪᠠᠨ ᠳ᠋ᠠᠭᠠᠨ᠂ ᠮᠥᠨ ᠰᠤᠮᠤᠨ ᠳ᠋ᠠᠭᠠᠨ᠂ ᠲᠡᠷᠡᠴᠢᠯᠡᠨ ᠬᠤᠸᠠᠷᠠᠨ ᠳ᠋ᠠᠭᠠᠨ᠂ ᠥᠭᠡᠷᠡ ᠬᠤᠰᠢᠭᠤᠨ ᠤ᠋ ᠬᠥᠮᠦᠨ ᠲᠡᠢ ᠨᠠᠢᠵᠢ ᠨᠥᠬᠥᠷ ᠪᠣᠯᠵᠤ ᠲᠠᠨᠢᠯᠴᠠᠨ ᠳᠠᠰᠤᠵᠤ(ᠲᠡᠰᠴᠦ) ᠢᠵᠢᠯᠢᠰᠴᠡᠭᠡᠪᠡ᠃ ᠲᠡᠭᠡᠭᠡᠳ ᠮᠠᠨᠠᠢ ᠬᠣᠰᠢᠭᠤ ᠶ᠋ᠢᠨ ᠬᠢᠨ᠂ ᠣᠨᠳᠣᠣ ᠬᠣᠰᠢᠭᠤ ᠶ᠋ᠢᠨ ᠬᠢᠨ ᠭᠡᠵᠦ ᠢᠯᠭᠠᠷᠠᠬᠤ ᠪᠠᠨ ᠪᠠᠢᠵᠠᠢ᠃
ᠴᠢᠯᠥᠭᠡᠨ ᠦ᠌ ᠬᠠᠭᠤᠳᠠᠰᠤ ᠪᠠᠷ ᠬᠣᠲᠠ ᠣᠷᠣᠵᠤ᠂ ᠠᠶᠠᠭᠠ ᠨᠠᠢᠬᠠᠨ(ᠠᠶᠠᠭᠠᠨ ᠤ᠋ ᠬᠢ) ᠬᠢᠴᠡᠨ ᠳ᠋ᠦ᠍ ᠨᠡᠮᠡᠷᠢ ᠪᠣᠯᠭᠠᠬᠤ ᠭᠠᠭᠴᠠ ᠨᠢᠭᠡ ᠰᠢᠷᠠ ᠴᠠᠢ᠂ ᠭᠠᠭᠴᠠ ᠨᠢᠭᠡ ᠤᠯᠠᠭᠠᠨ ᠮᠥᠩᠭᠥ ᠣᠯᠬᠤ ᠭᠡᠵᠦ ᠠᠢᠯ ᠤ᠋ᠨ ᠬᠠᠰᠢᠶᠠ ᠬᠣᠷᠢᠶᠠ ᠴᠡᠪᠡᠷᠯᠡᠬᠦ᠂ ᠲᠦᠯᠡᠭᠡ ᠬᠢᠷᠥᠭᠡᠳᠡᠬᠦ᠂ ᠬᠠᠭᠠᠯᠬᠤ᠂ ᠮᠥᠨ ᠮᠢᠬᠠ ᠶ᠋ᠢᠨ ᠵᠠᠬᠠ᠂ ᠱᠤᠤᠭᠢᠭᠤᠷ ᠳᠡᠭᠡᠷᠡ ᠮᠢᠬᠠ ᠲᠣᠰᠣ ᠡᠷᠭᠦᠬᠦ ᠳ᠋ᠡᠭᠡᠨ ᠬᠤᠵᠢᠷᠪᠤᠯᠤᠩ ᠤ᠋ᠨ ᠴᠡᠷᠢᠭ᠂ ᠲᠡᠷᠡ ᠬᠥᠮᠦᠨ ᠠᠮᠢᠲᠠᠨ ᠣᠯᠠᠨ ᠲᠠᠢ᠂ ᠬᠥᠯ ᠶᠡᠬᠡᠲᠡᠢ ᠬᠦᠷᠢᠶᠡ ᠶ᠋ᠢᠨ ᠬᠢᠨ᠂ ᠲᠡᠳᠡᠨ ᠢ᠋ ᠴᠦ᠍ ᠴᠣᠬᠣᠮ ᠠᠯᠢ ᠬᠤᠰᠢᠭᠤᠨ ᠤ᠋ ᠬᠥᠮᠦᠨ ᠪᠣᠢ? ᠮᠠᠨᠠᠢ ᠬᠤᠰᠢᠭᠤᠨ ᠨᠠᠢᠬᠢ ( ᠤ ᠬᠢ) ᠤᠤ? ᠪᠢᠰᠢᠦ? ᠬᠡᠨ ᠦ᠌ ᠠᠯᠪᠠᠲᠤ ᠬᠠᠮᠵᠢᠯᠭᠠ ᠪᠣᠢ? ᠭᠡᠵᠦ ᠣᠭᠲᠣ ᠰᠣᠨᠢᠷᠬᠠᠵᠤ ᠠᠰᠠᠭᠤᠬᠤ ᠦᠭᠡᠢ᠂ ᠭᠠᠭᠴᠠᠬᠦ (ᠭᠠᠭᠴᠠ ᠬᠦ᠌) ᠶᠠᠭᠤᠮᠠ ᠡᠭᠦᠷᠦᠭᠦᠯᠬᠦ᠂ ᠬᠣᠭ ᠰᠢᠷᠣᠢ ᠴᠡᠪᠡᠷᠯᠡᠬᠦ ᠵᠡᠷᠭᠡ ᠬᠠᠷᠠ ᠠᠵᠢᠯ ᠳ᠋ᠤ᠌ ᠵᠠᠷᠤᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠬᠢᠮᠳᠠ ᠬᠥᠯᠥᠰᠥ ᠲᠡᠢ ᠬᠤᠵᠢᠷᠪᠤᠯᠤᠩ ᠤ᠋ᠨ ᠴᠡᠷᠢᠭ ᠭᠡᠵᠦ ᠦᠵᠡᠳᠡᠭ ᠢ᠋ ᠪᠡᠶᠡ ᠪᠡᠷ ᠮᠡᠳᠡᠪᠡ᠃
ᠬᠤᠵᠢᠷᠪᠤᠯᠤᠩ ᠳ᠋ᠠᠭᠠᠨ ᠴᠡᠷᠢᠭ ᠦ᠋ᠨ ᠵᠠᠬᠢᠷᠤᠯ ᠴᠡᠷᠢᠭ ᠦ᠋ᠨ ᠬᠡᠷᠡᠭᠯᠡᠯ᠂ ᠬᠤᠪᠴᠠᠰᠤ ᠬᠤᠨᠠᠷ᠂ ᠢᠳᠡᠬᠦ ᠤᠤᠭᠤᠬᠤ ᠶᠠᠭᠤᠮᠠ ᠶ᠋ᠢ ᠨᠡᠢᠯᠡᠭᠦᠯᠬᠦ ᠡᠲᠡᠭᠡᠳ ᠮᠣᠩᠭᠣᠯ ᠬᠢᠲᠠᠳ᠂ ᠲᠥᠪᠡᠳ ᠯᠠᠮᠠ᠂ ᠬᠠᠷᠠ᠂ ᠲᠦᠰᠢᠮᠡᠯ᠂ ᠬᠤᠳᠠᠯᠳᠤᠭᠠᠴᠢᠨ ᠴᠥᠮ ᠬᠤᠵᠢᠷᠪᠤᠯᠤᠩ ᠤ᠋ᠨ ᠴᠡᠷᠢᠭ ᠢ᠋ ᠮᠠᠨᠠᠢ ᠬᠤᠰᠢᠭᠤᠨ ᠤ᠋ ᠴᠡᠷᠢᠭ᠂ ᠥᠭᠡᠷᠡ ᠬᠤᠰᠢᠭᠤᠨ ᠤ᠋ ᠴᠡᠷᠢᠭ ᠭᠡᠵᠦ ᠥᠴᠦᠬᠡᠨ ᠴᠦ᠍ ᠢᠯᠭᠠᠬᠤ ᠦᠭᠡᠢ᠂ ᠴᠥᠮ ᠨᠡᠢᠲᠡ ᠴᠡᠷᠢᠭ ᠦ᠋ᠨ ᠬᠡᠷᠡᠭᠯᠡᠯ ᠳ᠋ᠦ᠍ ᠲᠥᠰᠦᠪᠯᠡᠭᠰᠡᠨ ᠵᠦᠢᠯ ᠡᠴᠡ ᠢᠴᠢᠵᠦ ᠵᠣᠪᠠᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠢᠳᠡᠵᠦ ᠤᠤᠭᠤᠵᠤ ᠪᠠᠢᠳᠠᠭ ᠢ᠋ ᠦᠵᠡᠪᠡ᠃
ᠲᠡᠭᠡᠭᠡᠳ ᠣᠯᠠᠨ ᠴᠡᠷᠢᠭ᠂ ᠥᠪᠡᠷᠰᠡᠳ ᠢ᠋ ᠬᠥᠮᠦᠨ ᠦ᠌ ᠥᠪᠡᠷ ᠦ᠋ᠨ ᠬᠣᠰᠢᠭᠤ ᠭᠡᠵᠦ ᠢᠯᠭᠠᠬᠤ ᠶ᠋ᠢᠨ ᠬᠡᠷᠡᠭ ᠦᠭᠡᠢ᠂ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠵᠤ ᠠᠮᠢᠳᠤᠷᠠᠯ ᠨᠢᠭᠡ ᠲᠡᠢ᠂ ᠵᠣᠪᠠᠯ ᠵᠢᠷᠭᠠᠯ ᠨᠢᠭᠡ ᠲᠡᠢ ᠪᠠᠢᠭᠠ ᠪᠠᠨ ᠶᠠᠪᠤᠭᠠ ᠶᠠᠪᠤᠭᠠᠨ ᠳ᠋ᠠᠭᠠᠨ ᠮᠡᠳᠡᠵᠦ ᠠᠪᠤᠪᠠ᠃ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ᠂ ᠴᠡᠷᠢᠭ ᠢ᠋ ᠵᠣᠳᠣᠬᠤ ᠳᠠᠷᠤᠯᠠᠬᠤ᠂ ᠡᠯᠳᠡᠪ ᠢ᠋ᠶ᠋ᠡᠷ ᠬᠠᠷᠭᠢᠰᠯᠠᠬᠤ ᠳᠠᠮᠳᠢᠨ ᠲᠡᠷᠢᠭᠦᠨ᠂ ᠲᠦᠪᠰᠢᠨᠵᠢᠷᠭᠠᠯ᠂ ᠭᠠᠯᠰᠠᠩ ᠮᠡᠷᠡᠢᠨ᠂ ᠭᠣᠨᠴᠣᠭ ᠵᠠᠩᠭᠢ᠂ ᠱᠥᠢᠪ ᠦ᠋ᠨ ᠵᠡᠷᠭᠡ ᠳᠠᠷᠤᠭᠠ ᠨᠠᠷ ᠢ᠋ ᠴᠡᠷᠢᠭ ᠪᠦᠬᠦᠨ ᠨᠢᠭᠡᠨ ᠠᠳᠠᠯᠢ ᠬᠣᠷᠣᠰᠤᠨ ᠵᠠᠨᠤᠵᠤ᠂ ᠲᠡᠷᠡ ᠲᠤᠬᠠᠢ ᠬᠥᠮᠦᠨ ᠪᠦᠷᠢ ᠦᠭᠡ ᠰᠠᠨᠠᠭᠠ ᠨᠢᠭᠡ ᠲᠡᠢ ᠪᠡᠨ ᠮᠡᠳᠡᠪᠡ᠃ ᠪᠠᠰᠠ ᠴᠡᠷᠢᠭ ᠦ᠋ᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠭᠠᠷᠮᠠᠭᠠᠢ ᠰᠠᠢᠨ ᠫᠤᠤᠴᠢ᠂ ᠰᠡᠯᠡᠮᠡ ᠵᠢᠳᠠ ᠪᠠᠷ ᠴᠠᠪᠴᠢᠬᠤ ᠬᠠᠳᠬᠤᠬᠤ ᠳ᠋ᠠᠭᠠᠨ ᠣᠨᠴᠣᠭᠣᠢ ᠴᠢᠳᠠᠯ ᠲᠠᠢ ᠮᠣᠷᠢᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠲᠦᠷᠦᠭᠦᠯᠡᠳᠡᠭ᠂ ᠵᠢᠳᠠ ᠲᠠᠢ ᠫᠤᠤ᠂ ᠰᠡᠯᠡᠮᠡ᠂ ᠤᠷᠲᠤ ᠵᠢᠳᠠ ᠶ᠋ᠢᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠴᠢᠳᠠᠮᠠᠭᠠᠢ ᠴᠡᠷᠢᠭ ᠨᠢ ᠭᠠᠭᠴᠠ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠠᠷᠪᠠᠨ ᠤ᠋ ᠶᠤᠮ ᠤᠤ᠂ ᠭᠠᠭᠴᠠ ᠰᠤᠮᠤᠨ᠂ ᠭᠠᠭᠴᠠ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠤᠰᠢᠭᠤᠨ ᠤ᠋ ᠨᠡᠷᠡ ᠶ᠋ᠢ ᠮᠠᠨᠳᠤᠭᠤᠯᠵᠤ ᠪᠠᠢᠭᠠ ᠬᠡᠷᠡᠭ ᠪᠢᠰᠢ᠂ ᠬᠤᠵᠢᠷᠪᠤᠯᠤᠩ ᠤ᠋ᠨ ᠪᠦᠬᠦ ᠴᠡᠷᠢᠭ᠂ ᠨᠡᠢᠭᠡᠮ ᠪᠦᠭᠦᠳᠡ ᠶ᠋ᠢᠨ ᠠᠯᠳᠠᠷ ᠨᠡᠷᠡ ᠶ᠋ᠢ ᠥᠷᠭᠡᠨ ᠮᠠᠨᠳᠤᠭᠤᠯᠵᠤ ᠪᠠᠢᠭᠠ ᠶᠤᠮ ᠪᠠᠢᠨᠠ ᠭᠡᠵᠦ ᠮᠡᠳᠡᠪᠡ᠃ ᠣᠷᠣᠰ ᠤ᠋ᠨ ᠤᠯᠠᠭᠠᠨ ᠥᠨᠳᠡᠭᠡᠨ ᠦ᠌ ᠰᠠᠢᠨ ᠡᠳᠦᠷ ᠢ᠋ᠶ᠋ᠡᠷ ᠬᠤᠵᠢᠷᠪᠤᠯᠤᠩ ᠤ᠋ᠨ ᠬᠡᠳᠦᠨ ᠰᠢᠯᠭᠠᠷᠠᠭᠰᠠᠨ ᠴᠡᠷᠢᠭ ᠲᠡᠢ ᠺᠣᠨᠰᠣᠯ ᠤ᠋ᠨ ᠣᠷᠣᠰ ᠺᠠᠽᠠᠭ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠳ᠋ᠤ᠌ ᠤᠷᠢᠭᠳᠠᠨ ᠣᠴᠢᠵᠤ᠂ ᠺᠠᠽᠠᠭ ᠢ᠋ ᠰᠡᠯᠡᠮᠡ ᠴᠠᠪᠴᠢᠬᠤ᠂ ᠮᠣᠷᠢᠨ ᠰᠤᠷᠭᠠᠭᠤᠯᠢ ᠬᠢᠬᠦ ᠪᠡᠷ ᠭᠠᠢᠬᠠᠭᠤᠯᠵᠤ ᠴᠢᠳᠠᠭᠰᠠᠨ ᠰᠦᠬᠡ * ᠲᠡᠷᠢᠭᠦᠲᠡᠢ ᠬᠡᠳᠦᠨ ᠴᠡᠷᠢᠭ ᠢ᠋ ᠪᠦᠬᠦ ᠬᠤᠵᠢᠷᠪᠤᠯᠤᠩ ᠤ᠋ᠨ ᠬᠢᠨ ᠱᠠᠭᠰᠢᠨ ᠮᠠᠭᠲᠠᠵᠤ᠂
— ᠮᠠᠨᠠᠢ ᠴᠡᠷᠢᠭ ᠡᠷᠡ ᠴᠢᠳᠠᠯ ᠢ᠋ᠶ᠋ᠠᠨ ᠭᠠᠢᠬᠠᠭᠤᠯᠤᠨ ᠦᠵᠡᠭᠦᠯᠵᠡᠢ᠃ ᠪᠦᠬᠦ ᠣᠷᠣᠰ ᠺᠠᠽᠠᠭ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠠᠨᠠᠢ ᠴᠡᠷᠢᠭ ᠰᠦᠬᠡ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠡᠷᠳᠡᠮ ᠢ᠋ ᠭᠠᠢᠬᠠᠨ ᠪᠢᠰᠢᠷᠡᠪᠡ ᠭᠡᠵᠦ ᠬᠤᠵᠢᠷᠪᠤᠯᠤᠩ ᠤ᠋ᠨ ᠴᠡᠷᠢᠭ᠂ ᠴᠢᠯᠥᠭᠡᠨ ᠦ᠌ ᠬᠠᠭᠤᠳᠠᠰᠤ ᠪᠠᠷ ᠬᠦᠷᠢᠶᠡ ᠣᠷᠣᠬᠤ ᠳ᠋ᠠᠭᠠᠨ᠂ ᠵᠠᠬᠠ ᠵᠡᠭᠡᠯᠢ ᠶ᠋ᠢᠨ ᠭᠠᠵᠠᠷ᠂ ᠠᠢᠯ ᠬᠣᠷᠢᠶᠠ ᠪᠠᠷ ᠶᠠᠷᠢᠵᠤ᠂ ᠶᠡᠬᠡᠯᠡ ᠤᠷᠮᠠ ᠲᠠᠢ ᠪᠠᠢᠭᠰᠠᠨ ᠪᠢᠯᠡ᠃
ᠲᠡᠢᠨ ᠬᠦ᠌《ᠮᠠᠨᠠᠢ ᠴᠡᠷᠢᠭ》 ᠭᠡᠳᠡᠭ ᠬᠣᠶᠠᠷ ᠦᠭᠡ᠂ ᠬᠤᠵᠢᠷᠪᠤᠯᠤᠩ ᠤ᠋ᠨ ᠬᠢᠨ ᠦ᠌ ᠮᠠᠨᠠᠢ ᠬᠤᠰᠢᠭᠤᠨ ᠤ᠋ ᠬᠢᠨ᠂ ᠥᠭᠡᠷᠡ ᠬᠤᠰᠢᠭᠤᠨ ᠤ᠋ ᠬᠢᠨ ᠭᠡᠳᠡᠭ ᠢᠯᠭᠠᠭᠠ ᠶ᠋ᠢ ᠦᠭᠡᠢ ᠬᠢᠵᠡᠢ᠃ ᠲᠡᠢᠨ ᠬᠦ᠌ ᠴᠡᠷᠢᠭ ᠦ᠋ᠨ ᠬᠦᠨᠳᠦ ᠠᠮᠢᠳᠤᠷᠠᠯ ᠤ᠋ᠨ ᠪᠡᠷᠬᠡ ᠭᠠᠴᠢᠶᠠᠯ ᠢ᠋ ᠲᠤᠭᠤᠯᠤᠨ ᠳᠠᠪᠠᠬᠤ ᠳ᠋ᠤ᠌ ᠲᠤᠰᠠ ᠨᠡᠮᠡᠷᠢ ᠪᠣᠯᠵᠤ᠂ ᠬᠤᠵᠢᠷᠪᠤᠯᠤᠩ ᠤ᠋ᠨ ᠰᠤᠷᠭᠠᠭᠤᠯᠢ ᠲᠡᠭᠦᠰᠦᠭᠰᠡᠨ ᠳᠠᠢᠴᠢᠨ ᠴᠡᠷᠢᠭ ᠨᠥᠬᠥᠳ ᠦ᠋ᠨ ᠴᠢᠰᠤ ᠪᠠᠷ ᠪᠠᠢᠯᠳᠤᠭᠠᠨ ᠤ᠋ ᠭᠠᠵᠠᠷ ᠬᠣᠵᠢᠮ ᠬᠣᠢᠨᠠ ᠮᠢᠯᠢᠶᠠᠭᠰᠠᠨ ᠬᠠᠷᠢᠯᠴᠠᠨ ᠲᠤᠰᠠᠯᠠᠯᠴᠠᠬᠤ ᠡᠯᠢᠭᠡᠰᠡᠭ ᠨᠠᠢᠷᠲᠠᠢ ᠨᠥᠬᠥᠷ ᠦ᠋ᠨ ᠵᠢᠷᠤᠮ᠂ ᠬᠠᠮᠲᠤ ᠣᠯᠠᠨ ᠢ᠋ᠶ᠋ᠠᠷ ᠠᠵᠤ ᠲᠥᠷᠥᠬᠦ ᠶ᠋ᠢᠨ ᠵᠠᠷᠴᠢᠮ ᠵᠦᠢ ᠪᠣᠢ ᠪᠣᠯᠤᠨ ᠪᠠᠲᠤᠵᠢᠭᠰᠠᠨ ᠪᠢᠯᠡ᠃
ᠬᠤᠵᠢᠷᠪᠤᠯᠤᠩ ᠳ᠋ᠤ᠌ ᠪᠠᠢᠭᠠ ᠪᠦᠬᠦ ᠴᠡᠷᠢᠭ ᠦ᠋ᠨ ᠰᠤᠮᠤᠨ ᠳ᠋ᠤ᠌᠂ ᠰᠦᠬᠡ ᠴᠡᠷᠢᠭ ᠦ᠋ᠨ ᠨᠡᠷᠡ᠂ ᠴᠡᠷᠢᠭ ᠣᠯᠠᠨ ᠳ᠋ᠤ᠌ ᠳᠦᠷᠬᠢᠷᠡᠨ ᠰᠣᠨᠣᠰᠳᠠᠭᠰᠠᠨ ᠨᠢᠭᠡᠨ ᠶᠠᠪᠤᠳᠠᠯ ᠤ᠋ᠨ ᠤᠯᠠᠮ ᠠ᠋ᠴᠠ ᠶᠡᠬᠡᠯᠡ ᠬᠦᠨᠳᠦᠲᠡᠢ ᠳᠣᠲᠣᠨᠣ ᠪᠣᠯᠵᠤ ᠢᠷᠡᠭᠰᠡᠨ ᠨᠢ ᠱᠦᠢᠪ ᠳᠠᠷᠤᠭᠠ ᠫᠦᠯᠧᠮᠶᠣᠲ ᠰᠤᠮᠤᠨ ᠤ᠋ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠣᠭᠲᠣᠭᠤ ᠬᠥᠯᠴᠥᠭᠦᠦ ᠪᠡᠷ ᠢᠷᠡᠵᠦ ᠫᠤᠤ ᠪᠠᠷ ᠵᠢᠳᠠᠯᠠᠨ ᠪᠠᠢᠯᠳᠤᠬᠤ ᠰᠤᠷᠭᠠᠭᠤᠯᠢ ᠵᠢᠭᠠᠬᠤ ᠳ᠋ᠠᠭᠠᠨ᠄
— ᠢᠩᠭᠢᠵᠦ ᠬᠠᠳᠬᠤᠳᠠᠭ ᠶᠤᠮ᠂ ᠨᠠᠮᠠᠶ᠋ᠢ ᠰᠠᠢᠨ ᠬᠠᠷᠠᠵᠤ ᠪᠠᠢ ᠭᠡᠵᠦ ᠨᠢᠳᠦ ᠪᠡᠨ ᠠᠯᠠᠭ ᠡᠷᠢᠶᠡᠨ ᠢ᠋ᠶ᠋ᠡᠷ ᠡᠷᠭᠢᠭᠦᠯᠦᠨ᠂ ᠨᠢᠭᠤᠷ ᠠᠮᠠ ᠪᠠᠨ ᠮᠤᠷᠤᠢᠯᠭᠠᠵᠤ᠂ ᠵᠢᠳᠠ ᠪᠠᠷ ᠤᠬᠤᠰᠬᠢᠨ ᠴᠢᠴᠢᠵᠦ᠂ ᠳᠠᠢᠰᠤᠨ ᠢ᠋ ᠵᠢᠳᠠᠯᠠᠬᠤ ᠳᠦᠷᠢᠮ ᠦᠵᠡᠭᠦᠯᠬᠦ ᠭᠡᠵᠦ ᠰᠦᠷ ᠪᠠᠳᠠᠷᠠᠭᠤᠯᠤᠨ ᠬᠥᠳᠡᠯᠬᠦ ᠭᠡᠳ ᠪᠦᠳᠦᠭᠦᠨ ᠭᠡᠳᠡᠰᠦ ᠪᠡᠷ ᠢ᠋ᠶ᠋ᠡᠨ ᠬᠡᠭᠭᠢᠲᠡᠯᠡ ᠭᠠᠵᠠᠷ ᠴᠣᠬᠢᠵᠤ ᠬᠠᠯᠲᠤᠷᠢᠨ ᠣᠢᠴᠢᠬᠤ ᠳ᠋ᠤᠨᠢ ᠴᠡᠷᠢᠭ ᠦ᠋ᠨ ᠳᠤᠮᠳᠠ ᠠ᠋ᠴᠠ ᠨᠢᠭᠡ ᠬᠥᠮᠦᠨ ᠢᠨᠢᠶᠡᠳᠦ ᠠᠯᠳᠠᠵᠠᠢ᠃ ᠱᠤᠢᠪ᠂ ᠣᠢᠴᠢᠬᠤ ᠳ᠋ᠠᠭᠠᠨ ᠨᠡᠯᠢᠶᠡᠳ ᠡᠪᠡᠳᠦᠭᠰᠡᠨ ᠦ᠌ ᠳᠡᠭᠡᠷᠡ ᠬᠥᠮᠦᠨ ᠦ᠌ ᠡᠯᠡᠭᠯᠡᠨ ᠢᠨᠢᠶᠡᠬᠦ ᠶ᠋ᠢ ᠰᠣᠨᠣᠰᠤᠭᠠᠳ ᠠᠭᠤᠷ ᠬᠢᠯᠢᠩ ᠪᠠᠳᠠᠷᠠᠵᠤ᠂ ᠣᠷᠬᠢᠷᠠᠨ ᠪᠣᠰᠴᠤ ᠫᠤᠤ ᠪᠠᠨ ᠳᠠᠯᠠᠢᠨ ᠴᠡᠷᠢᠭ ᠦ᠋ᠨ ᠵᠦᠭ ᠤᠬᠤᠰᠬᠢᠵᠦ᠂ ᠭᠠᠷ ᠤ᠋ᠨ ᠳᠣᠣᠷᠠ ᠲᠣᠬᠢᠶᠠᠯᠳᠤᠭᠰᠠᠨ ᠨᠢᠭᠡᠨ ᠴᠡᠷᠢᠭ ᠢ᠋ ᠫᠤᠤ ᠶᠢᠨ ᠪᠥᠭᠰᠡ ᠮᠣᠳᠣ ᠪᠠᠷ ᠲᠡᠩᠬᠡᠭᠡ ᠮᠡᠳᠡᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢ ᠪᠠᠭᠤᠯᠭᠠᠨ ᠴᠣᠬᠢᠭᠰᠠᠨ ᠳ᠋ᠤ᠌᠂ ᠲᠡᠷᠡ ᠴᠡᠷᠢᠭ ᠴᠢᠰᠤ ᠴᠤᠪᠤᠷᠢᠨ᠂ ᠠᠶᠤᠩᠭᠠ ᠳ᠋ᠤ᠌ ᠨᠢᠷᠭᠡᠭᠦᠯᠦᠭᠰᠡᠨ ᠮᠡᠲᠦ ᠣᠢᠴᠢᠪᠠ᠃ ᠱᠣᠢᠪ᠂ ᠫᠤᠤ ᠶ᠋ᠢ ᠳᠣᠭᠣᠭᠰᠢ ᠪᠣᠯᠭᠠᠵᠤ᠂ ᠭᠠᠷ ᠢ᠋ᠶ᠋ᠠᠷ ᠲᠡᠷᠡ ᠪᠢᠷᠳᠠᠩ ᠫᠤᠤ ᠶ᠋ᠢᠨ ᠠᠮᠠ ᠶ᠋ᠢ ᠲᠤᠯᠤᠭᠠᠳ᠂ ᠬᠥᠯ ᠦ᠋ᠨ ᠡᠮᠦᠨᠡ ᠤᠯᠠᠭᠠᠨ ᠨᠡᠯᠦᠢ ᠪᠣᠯᠤᠭᠠᠳ ᠬᠡᠪᠲᠡᠵᠦ ᠪᠠᠢᠭᠠ ᠲᠡᠷᠡ ᠬᠥᠮᠦᠨ ᠢ᠋ ᠡᠨᠡ ᠶᠠᠭᠤ ᠪᠣᠯᠪᠠ? ᠭᠡᠵᠦ ᠭᠠᠢᠬᠠᠭᠰᠠᠨ ᠰᠢᠭ᠋ ᠰᠣᠭᠲᠣᠭᠤ ᠨᠢᠳᠦ ᠪᠡᠨ ᠪᠦᠯᠲᠡᠢᠯᠭᠡᠨ ᠡᠷᠭᠢᠭᠦᠯᠵᠦ ᠳᠡᠮᠡᠢ ᠯᠡ ᠰᠢᠷᠳᠡᠪᠡ᠃ ᠣᠷᠴᠢᠨ ᠲᠣᠭᠣᠷᠢᠨ ᠣᠯᠠᠨ ᠴᠡᠷᠢᠭ ᠴᠢᠪ ᠴᠢᠮᠡᠭᠡ ᠦᠭᠡᠢ ᠨᠠᠮ ᠭᠦᠮ ᠵᠣᠭᠰᠣᠵᠤ᠂ ᠭᠠᠭᠴᠠᠬᠦ ᠳᠡᠭᠡᠭᠦᠷ ᠨᠢ ᠬᠣᠩ ᠬᠣᠩ ᠳᠤᠤᠭᠠᠷᠴᠤ ᠨᠢᠰᠦᠨ ᠥᠩᠭᠡᠷᠡᠭᠰᠡᠨ ᠬᠣᠩ ᠬᠡᠷᠢᠶᠡ ᠶ᠋ᠢᠨ ᠵᠢᠭᠦᠷ ᠦ᠋ᠨ ᠥᠳᠥ ᠢᠰᠬᠡᠷᠦᠨ ᠳᠤᠤᠭᠠᠷᠬᠤ ᠴᠢᠮᠡᠭᠡ᠂ ᠲᠡᠷᠡ ᠰᠣᠭᠲᠣᠭᠤ ᠳᠠᠷᠤᠭᠠ ᠶ᠋ᠢᠨ ᠤᠭᠤᠬᠢᠯᠠᠨ ᠠᠮᠢᠰᠬᠤᠯᠯᠠᠬᠤ ᠴᠢᠮᠡᠭᠡ ᠰᠣᠨᠣᠰᠳᠠᠪᠠ᠃
ᠣᠯᠠᠨ ᠴᠡᠷᠢᠭ ᠭᠡᠮ ᠦᠭᠡᠢ ᠨᠢᠭᠡᠨ ᠨᠥᠬᠥᠷ ᠢ᠋ᠶ᠋ᠡᠨ ᠴᠣᠬᠢᠭᠤᠯᠵᠤ ᠣᠢᠴᠢᠭᠰᠠᠨ ᠳ᠋ᠤ᠌ ᠬᠢᠷᠳ᠋ᠬᠢᠨ ᠰᠣᠴᠢᠵᠤ᠂ ᠵᠣᠭᠣᠮᠠᠯ ᠴᠢᠯᠠᠭᠤᠨ ᠬᠥᠮᠦᠨ ᠰᠢᠭ ᠣᠭᠲᠣ ᠬᠥᠳᠡᠯᠬᠦ ᠦᠭᠡᠢ ᠵᠣᠭᠰᠣᠨ᠂ ᠲᠡᠷᠡ ᠣᠢᠴᠢᠭᠰᠠᠨ ᠴᠡᠷᠢᠭ ᠦ᠋ᠨ ᠲᠣᠯᠣᠭᠠᠢ ᠶ᠋ᠢᠨ ᠲᠤᠰ ᠴᠢᠰᠤ ᠤᠯᠠᠢᠵᠤ ᠪᠠᠢᠭᠠ ᠨᠢ ᠤᠯᠠᠮ ᠶᠡᠬᠡ ᠪᠣᠯᠵᠤ᠂ ᠲᠣᠯᠣᠭᠠᠢ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠣᠢᠴᠢᠭᠰᠠᠨ ᠮᠠᠯᠠᠭᠠᠢ ᠳ᠋ᠤᠨᠢ ᠣᠢᠷᠠᠲᠤᠵᠤ ᠪᠠᠢᠯᠠ᠃ ᠲᠡᠭᠡᠲᠡᠯᠡ ᠵᠢᠭᠰᠠᠭᠠᠯ ᠤ᠋ᠨ ᠳᠤᠮᠳᠠ ᠠ᠋ᠴᠠ ᠤᠭᠠᠯᠵᠠᠲᠠᠢ ᠭᠤᠲᠤᠯ ᠲᠠᠢ᠂ ᠬᠥᠬᠡ ᠲᠡᠯᠢᠩ ᠬᠠᠭᠤᠴᠢᠨ ᠳᠡᠪᠡᠯ ᠲᠡᠢ᠂ ᠬᠠᠷᠠ ᠬᠤᠷᠠᠭᠠᠨ ᠴᠢᠬᠢ ᠲᠡᠢ ᠬᠥᠬᠡ ᠴᠡᠩᠮᠡ ᠴᠡᠷᠢᠭ ᠲᠣᠪᠢ ᠮᠠᠯᠠᠭᠠᠢ ᠲᠠᠢ᠂ ᠥᠷᠭᠡᠨ ᠮᠥᠷᠥ ᠲᠡᠢ᠂ ᠥᠨᠳᠥᠷ ᠴᠡᠷᠢᠭ ᠤᠷᠤᠭᠰᠢ ᠳᠠᠪᠰᠢᠨ ᠭᠠᠷᠴᠤ ᠢᠷᠡᠪᠡ᠃ ᠨᠠᠷᠢᠨ ᠬᠢᠷᠠᠭ ᠪᠦᠰᠡ ᠪᠦᠰᠡᠯᠡᠭᠰᠡᠨ ᠨᠢ ᠲᠡᠷᠡ ᠴᠡᠷᠢᠭ ᠨᠢᠷᠤᠭᠤ ᠥᠨᠳᠥᠷ᠂ ᠪᠡᠶᠡ ᠴᠢᠭᠢᠷᠠᠭ᠂ ᠪᠡᠯᠬᠡᠭᠦᠰᠦ ᠨᠠᠷᠢᠨ ᠢ᠋ ᠤᠯᠠᠮ ᠲᠣᠳᠣᠷᠬᠠᠢ ᠪᠣᠯᠭᠠᠵᠠᠢ᠃ ᠲᠡᠷᠡ ᠴᠡᠷᠢᠭ᠂ ᠱᠣᠢᠪ ᠳᠠᠷᠤᠭᠠ ᠶ᠋ᠢ ᠣᠭᠲᠣ ᠦᠯᠦ ᠬᠠᠢᠬᠤᠷᠤᠨ ᠥᠨᠥᠬᠢ ᠣᠢᠴᠢᠭᠰᠠᠨ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠶᠠᠪᠠᠭᠠᠨ ᠰᠠᠭᠤᠵᠤ᠂ ᠡᠪᠦᠷ ᠡᠴᠡ ᠪᠡᠨ ᠴᠡᠪᠡᠷᠬᠡᠨ ᠤᠬᠢᠶᠠᠭᠰᠠᠨ ᠬᠠᠭᠤᠴᠢᠨ ᠳᠤᠷᠳᠤᠮ ᠠᠯᠴᠢᠭᠤᠷ ᠳᠣᠲᠣᠷᠠ ᠠ᠋ᠴᠠ ᠴᠠᠪ ᠴᠡᠪᠡᠷ ᠮᠠᠷᠠᠯ ᠱᠠ ᠣᠷᠢᠶᠠᠯᠳᠤ ᠭᠠᠷᠭᠠᠵᠤ᠂ ᠰᠢᠷᠬᠠ ᠶ᠋ᠢ ᠲᠤᠩ ᠴᠢᠳᠠᠮᠠᠭᠠᠢ ᠣᠷᠢᠶᠠᠵᠤ᠂ ᠲᠣᠯᠣᠭᠠᠢ ᠳ᠋ᠤᠨᠢ ᠮᠠᠯᠠᠭᠠᠢ ᠶ᠋ᠢ ᠨᠢ ᠳᠡᠷᠡᠯᠡᠭᠦᠯᠦᠭᠡᠳ ᠪᠣᠰᠴᠤ᠂ ᠥᠨᠥᠬᠢ ᠫᠤᠤ ᠪᠠᠨ ᠲᠤᠯᠤᠭᠰᠠᠭᠠᠷ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠨᠢᠷᠤᠭᠤ ᠨᠠᠮᠬᠠᠨ ᠲᠡᠷᠡ ᠪᠦᠳᠦᠭᠦᠨ ᠠᠯᠴᠠᠭᠠᠷ ᠳᠠᠷᠤᠭᠠ ᠶ᠋ᠢᠨ ᠵᠦᠭ᠂ ᠳᠡᠭᠡᠷᠡ ᠡᠴᠡ ᠳᠣᠭᠣᠭᠰᠢ ᠬᠠᠨᠳᠤᠨ ᠬᠠᠷᠠᠵᠤ ᠨᠠᠮ ᠪᠣᠯᠪᠠᠴᠤ ᠮᠠᠰᠢ ᠲᠣᠳᠣ ᠰᠣᠨᠣᠰᠳᠠᠬᠤ ᠳᠠᠭᠤᠨ ᠢ᠋ᠶ᠋ᠠᠷ᠂
— ᠡᠷᠬᠢᠮ ᠳᠠᠷᠤᠭᠠ ᠲᠠ ᠡᠨᠡ ᠵᠦᠭᠡᠷ ᠪᠠᠢᠵᠤ ᠪᠠᠢᠭᠰᠠᠨ ᠴᠡᠷᠢᠭ ᠢ᠋ ᠴᠣᠬᠢᠵᠤ ᠤᠨᠠᠭᠠᠭᠰᠠᠨ ᠢ᠋ᠶ᠋ᠠᠨ ᠬᠤᠸᠠᠷᠠᠨ ᠳ᠋ᠤ᠌ ᠳᠠᠮᠵᠢᠭᠤᠯᠵᠤ ᠬᠦᠷᠭᠡᠬᠦ ᠲᠤᠰᠢᠶᠠᠯ ᠥᠭᠭᠦᠨᠡᠦ᠃ ᠡᠨᠡ ᠬᠥᠮᠦᠨ ᠦᠬᠦᠵᠦ ᠮᠠᠭᠠᠳ ᠦᠭᠡᠢ ᠪᠠᠢᠨᠠ ᠭᠡᠬᠦ ᠳ᠋ᠦ᠍ᠨᠢ ᠱᠤᠢᠪ ᠨᠣᠢᠷ ᠠ᠋ᠴᠠ ᠰᠡᠷᠢᠭᠰᠡᠨ ᠮᠡᠲᠦ᠂ ᠣᠯᠠᠨ ᠴᠡᠷᠢᠭ ᠦ᠋ᠨ ᠵᠢᠭᠰᠠᠭᠠᠯ ᠤ᠋ᠨ ᠡᠮᠦᠨᠡ ᠨᠢᠭᠤᠷ ᠢ᠋ᠶ᠋ᠠᠨ ᠪᠣᠳᠣᠵᠤ ᠪᠠᠷᠬᠢᠷᠠᠨ᠂
— ᠶᠠᠭᠠᠬᠢᠨᠠ ᠭᠡᠨᠡ ᠠ᠋? ᠴᠢ ᠨᠠᠳᠠᠳᠤ ᠲᠤᠰᠢᠶᠠᠬᠤ ᠨᠢ ᠤᠤ? ᠨᠠᠳᠠᠳᠤ ᠤᠬᠠᠭᠠᠨ ᠵᠢᠭᠠᠬᠤ᠂ ᠴᠢ ᠶᠠᠭᠤ ᠪᠣᠯᠤᠭᠰᠠᠨ᠂ ᠬᠡᠨ ᠭᠡᠳᠡᠭ ᠠᠮᠢᠲᠠᠨ ᠪᠣᠢ? ᠬᠡᠮᠡᠪᠡᠰᠦ᠂
— ᠪᠢ ᠰᠦᠬᠡ ᠭᠡᠳᠡᠭ ᠬᠥᠮᠦᠨ᠂ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠴᠡᠷᠢᠭ ᠪᠢᠯᠡ᠃ ᠲᠤᠰᠢᠶᠠᠭᠰᠠᠨ ᠵᠦᠢᠯ ᠦᠭᠡᠢ᠂ ᠭᠠᠭᠴᠠ ᠬᠦ᠌ ᠲᠠᠨ ᠤ᠋ ᠰᠢᠷᠬᠠᠲᠤᠭᠤᠯᠤᠭᠰᠠᠨ ᠡᠨᠡ ᠴᠡᠷᠢᠭ ᠲᠦ᠍ ᠡᠮᠨᠡᠯᠭᠡ ᠶ᠋ᠢᠨ ᠲᠤᠰᠠᠯᠠᠮᠵᠢ ᠦᠵᠡᠭᠦᠯᠬᠦ ᠶ᠋ᠢ ᠬᠦᠰᠡᠨ ᠢᠯᠡᠷᠬᠡᠢᠯᠡᠭᠰᠡᠨ ᠪᠢᠯᠡ᠃ ᠪᠢᠳᠡ ᠲᠠᠨ ᠤ᠋ ᠵᠦᠢ ᠪᠤᠰᠤ ᠪᠠᠷ ᠬᠠᠷᠢᠯᠴᠠᠬᠤ ᠶ᠋ᠢ ᠣᠳᠣ ᠬᠦᠷᠲᠡᠯᠡ ᠬᠦᠯᠢᠴᠡᠨ ᠲᠡᠰᠴᠦ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠡᠨᠡ ᠤᠳᠠᠭᠠ ᠳ᠋ᠤ᠌ ᠥᠩᠭᠡᠷᠡᠭᠦᠯᠬᠦᠶᠡ ᠪᠡᠷᠬᠡ ᠪᠣᠯᠪᠠ᠃ ᠨᠢᠭᠡ ᠨᠥᠬᠥᠷ ᠢ᠋ᠶ᠋ᠡᠨ ᠲᠠᠨ ᠳ᠋ᠤ᠌ ᠢᠩᠭᠢᠭᠦᠯᠦᠭᠡᠳ ᠣᠷᠬᠢᠬᠤ ᠨᠢ ᠴᠡᠷᠢᠭ ᠨᠥᠬᠥᠷ ᠦ᠋ᠨ ᠶᠣᠰᠣᠨ ᠳ᠋ᠤ᠌ ᠲᠠᠭᠠᠷᠠᠬᠤ ᠦᠭᠡᠢ ᠲᠤᠯᠠ ᠪᠢ ᠵᠣᠬᠢᠬᠤ ᠳᠡᠭᠡᠳᠦ ᠳᠠᠷᠤᠭᠠ ᠨᠠᠷ ᠲᠤ᠌ ᠲᠠᠨ ᠤ᠋ ᠢᠩᠭᠢᠵᠦ ᠪᠠᠢᠭᠠ ᠶ᠋ᠢ ᠢᠯᠡᠳᠬᠡᠨ ᠮᠡᠳᠡᠭᠦᠯᠬᠦ ᠶᠣᠰᠣᠲᠠᠢ ᠪᠣᠯᠤᠯᠠ ᠭᠡᠵᠦ ᠦᠵᠡᠵᠦ ᠪᠠᠢᠨᠠ᠃ ᠲᠠ᠂ ᠪᠢᠳᠡᠨ ᠢ᠋ ᠮᠠᠯ ᠠ᠋ᠴᠠ ᠳᠣᠣᠷᠠ ᠦᠵᠡᠵᠦ ᠪᠠᠢᠨᠠ᠃ ᠬᠥᠮᠦᠨ ᠮᠠᠯ ᠢ᠋ᠶ᠋ᠠᠨ ᠬᠦᠷᠲᠡᠯᠡ ᠵᠦᠭᠡᠷ ᠪᠠᠢᠬᠤ ᠳ᠋ᠤ᠌ ᠢᠩᠭᠢᠬᠦ ᠶᠣᠰᠣᠨ ᠪᠠᠢᠬᠤ ᠦᠭᠡᠢ᠃ ᠲᠡᠭᠡᠬᠦ ᠳ᠋ᠦ᠍ ᠪᠢᠳᠡ ᠮᠠᠯ ᠪᠢᠰᠢ᠂ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠴᠣᠯᠠ ᠪᠦᠬᠦᠢ ᠬᠥᠮᠦᠨ ᠪᠢᠯᠡ ᠭᠡᠵᠦ ᠰᠦᠬᠡ ᠴᠡᠭᠡᠵᠢ ᠳᠦᠭᠦᠷᠡᠩ ᠰᠢᠲᠠᠭᠰᠠᠨ ᠠᠭᠤᠷ ᠢ᠋ᠶ᠋ᠠᠨ ᠳᠠᠷᠤᠵᠤ᠂ ᠴᠢᠷᠠᠢ ᠶ᠋ᠢ ᠪᠠᠷᠤᠢᠯᠭᠠᠨ ᠵᠣᠷᠢᠭᠲᠠᠢ ᠪᠠᠷ ᠤᠴᠢᠷ ᠢ᠋ ᠭᠠᠷᠭᠠᠪᠠ᠃ ᠥᠨᠳᠥᠷ ᠴᠡᠯᠡᠭᠡᠷ ᠪᠡᠶᠡ ᠲᠡᠢ ᠲᠡᠷᠡ ᠴᠡᠷᠢᠭ᠂ ᠲᠡᠰᠬᠡᠯ ᠦᠭᠡᠢ ᠬᠣᠷᠣᠰᠤᠭᠰᠠᠨ ᠳ᠋ᠠᠭᠠᠨ ᠬᠠᠲᠠᠭᠤᠵᠢᠨ ᠪᠠᠷᠢᠵᠤ᠂ ᠬᠢᠯᠢᠩ ᠪᠠᠳᠠᠷᠠᠭᠰᠠᠨ ᠨᠢᠳᠦ ᠪᠡᠷ ᠲᠡᠷᠡ ᠳᠠᠷᠤᠭᠠ ᠠ᠋ᠴᠠ ᠰᠢᠯᠵᠢᠯ ᠦᠭᠡᠢ ᠰᠢᠷᠲᠡᠨ᠂ ᠳᠦᠷᠢᠮ ᠳ᠋ᠦ᠍ ᠵᠢᠭᠠᠭᠰᠠᠨ ᠶᠣᠰᠣ ᠪᠠᠷ ᠡᠮᠦᠨᠡ ᠨᠢ ᠨᠣᠮᠣᠬᠠᠨ ᠵᠣᠭᠰᠣᠵᠠᠢ᠃ ᠲᠡᠭᠦᠨ ᠦ᠌ ᠴᠡᠭᠡᠵᠢᠨ ᠳ᠋ᠦ᠍ ᠭᠠᠯ ᠪᠠᠳᠠᠷᠠᠵᠤ ᠪᠠᠢᠭᠠ ᠪᠣᠯᠪᠠᠴᠤ᠂ ᠤᠲᠤᠭᠠ ᠶ᠋ᠢ ᠨᠢ ᠠᠮᠠ ᠬᠠᠮᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠠᠷᠭᠠᠬᠤ ᠦᠭᠡᠢ ᠭᠡᠵᠦ ᠪᠠᠢᠭᠠ ᠶᠡᠬᠡᠯᠡ ᠰᠠᠮᠪᠠᠭᠠ ᠵᠣᠷᠢᠭᠲᠠᠢ ᠡᠷᠡ ᠮᠥᠨ ᠦ᠌ ᠲᠤᠯᠠ ᠭᠠᠭᠴᠠ ᠬᠦ᠌ ᠪᠠᠷᠠᠭᠤᠨ ᠨᠢᠳᠦᠨ ᠳᠡᠭᠡᠷᠡ ᠪᠡᠨ ᠲᠠᠲᠠᠪ ᠲᠠᠲᠠᠪ ᠭᠡᠵᠦ᠂ ᠬᠠᠮᠠᠷ ᠰᠠᠷᠨᠠᠰᠬᠢᠭᠰᠡᠨ ᠲᠡᠳᠦᠢᠬᠡᠨ ᠢ᠋ᠶ᠋ᠡᠷ ᠨᠢ ᠬᠣᠷᠣᠰᠤᠯ ᠬᠢᠯᠢᠩ ᠴᠡᠭᠡᠵᠢ ᠳᠦᠭᠦᠷᠡᠩ ᠪᠠᠢᠭᠠ ᠶ᠋ᠢ ᠲᠠᠭᠠᠪᠤᠷᠢᠯᠠᠵᠤ ᠪᠣᠯᠤᠮᠤᠢ᠃
ᠱᠤᠢᠪ᠂ ᠲᠡᠷᠡ ᠴᠡᠷᠢᠭ ᠦ᠋ᠨ ᠭᠠᠯ ᠲᠠᠢ ᠨᠢᠳᠦᠨ ᠦ᠌ ᠬᠠᠷᠠᠴᠠ ᠶ᠋ᠢ ᠳᠠᠭᠠᠭᠠᠨ ᠲᠡᠰᠴᠦ ᠴᠢᠳᠠᠭᠰᠠᠨ ᠦᠭᠡᠢ᠂ ᠭᠠᠷ ᠢ᠋ᠶ᠋ᠠᠷ ᠵᠠᠩᠭᠠᠵᠤ᠂ ᠵᠠ᠂ ᠶᠠᠭᠠᠬᠢᠪᠠᠯ ᠶᠠᠭᠠᠬᠢᠲᠤᠭᠠᠢ ᠭᠡᠵᠦ ᠡᠷᠭᠢᠭᠡᠳ᠂ ᠣᠯᠠᠨ ᠴᠡᠷᠢᠭ ᠦ᠋ᠨ ᠣᠳᠣ ᠡᠨᠡ ᠵᠠᠯᠠᠭᠤ ᠳᠠᠷᠤᠭᠠ ᠶᠠᠭᠠᠬᠢᠵᠤ ᠰᠦᠢᠳ ᠪᠣᠯᠳᠠᠭ ᠪᠣᠯ ᠭᠡᠵᠦ ᠪᠣᠳᠣᠵᠤ ᠪᠠᠢᠲᠠᠯᠠ᠂ ᠫᠤᠤ ᠪᠠᠨ ᠲᠤᠯᠵᠤ ᠪᠠᠢᠰᠢᠩ ᠪᠠᠢᠷᠢ ᠶ᠋ᠢᠨ ᠵᠦᠭ ᠰᠢᠷᠪᠢᠰᠭᠢᠨ ᠠᠯᠬᠤᠯᠠᠵᠤ ᠣᠳᠪᠠ᠃
ᠣᠷᠣᠢ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠢ᠋ᠶ᠋ᠠᠷ ᠬᠡᠯᠡᠯᠴᠡᠭᠰᠡᠨ ᠨᠢ ᠵᠢᠷᠦᠬᠡᠲᠡᠢ ᠰᠦᠬᠡ ᠴᠡᠷᠢᠭ᠂ ᠳᠡᠭᠡᠳᠦ ᠳᠠᠷᠤᠭᠠ ᠨᠠᠷ ᠲᠤ᠌ ᠱᠤᠢᠪ ᠤ᠋ᠨ ᠲᠡᠷᠡ ᠬᠠᠷᠭᠢᠰ ᠵᠦᠢ ᠪᠤᠰᠤ ᠶ᠋ᠢ ᠢᠯᠡᠳᠬᠡᠨ ᠮᠡᠳᠡᠭᠦᠯᠵᠦ ᠵᠠᠷᠭᠤᠯᠳᠤᠭᠠᠳ᠂ ᠰᠢᠳᠤᠷᠭᠤ ᠵᠣᠷᠢᠭ ᠲᠠᠢ ᠰᠦᠬᠡ ᠶ᠋ᠢ ᠶᠡᠬᠡ ᠲᠣᠭᠣᠳᠠᠭ ᠶᠡᠷᠦᠩᠬᠡᠢ ᠰᠤᠷᠭᠠᠭᠴᠢ ᠸᠠᠰᠢᠯᠢᠶᠧᠹ ᠦ᠋ᠨ ᠱᠠᠭᠠᠷᠳᠠᠯᠭᠠ ᠪᠠᠷ ᠴᠡᠷᠢᠭ ᠦ᠋ᠨ ᠵᠠᠬᠢᠷᠤᠯ ᠳᠠᠮᠳᠢᠨ ᠲᠡᠷᠢᠭᠦᠨ᠂ ᠠᠷᠭᠠ ᠪᠤᠶᠤ ᠥᠨᠥᠬᠢ ᠱᠤᠢᠪ ᠢ᠋ ᠵᠢᠭᠰᠠᠭᠠᠯ ᠤ᠋ᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠴᠠᠭ ᠢ᠋ᠶ᠋ᠠᠷ ᠰᠣᠭᠲᠣᠭᠤ ᠪᠠᠷ ᠢᠷᠡᠵᠦ ᠵᠦᠢ ᠪᠤᠰᠤ ᠪᠠᠷ ᠠᠪᠤᠷᠢᠯᠠᠭᠰᠠᠨ ᠤᠴᠢᠷ ᠰᠠᠬᠢᠯᠭᠠ ᠶ᠋ᠢᠨ ᠱᠣᠷᠣᠩ ᠳ᠋ᠤ᠌ ᠨᠢᠭᠡᠨ ᠳᠣᠯᠣᠭᠠᠨ ᠬᠣᠨᠣᠭ ᠬᠣᠷᠢᠬᠤ ᠲᠤᠰᠢᠶᠠᠯ ᠭᠠᠷᠭᠠᠵᠠᠢ ᠭᠡᠵᠦ ᠱᠤᠤᠭᠢᠯᠳᠤᠨ ᠬᠡᠯᠡᠯᠴᠡᠪᠡ᠃ *
ᠨᠥᠬᠥᠷ ᠶᠦ᠍ᠭᠡᠨ ᠬᠠᠢᠷᠠᠯᠠᠨ ᠬᠠᠮᠠᠭᠠᠯᠠᠵᠤ᠂ ᠬᠠᠷᠭᠢᠰ ᠪᠤᠷᠤᠩᠬᠤᠢ ᠳᠠᠷᠤᠭᠠ ᠲᠠᠢ ᠠᠶᠤᠮᠰᠢᠭ ᠦᠭᠡᠢ ᠵᠠᠷᠭᠤᠯᠳᠤᠭᠰᠠᠨ ᠡᠷᠡᠯᠬᠡᠭ ᠰᠦᠬᠡ ᠶ᠋ᠢᠨ ᠲᠡᠷᠡ ᠵᠣᠷᠢᠭ ᠲᠡᠭᠦᠯᠳᠡᠷ ᠵᠢᠷᠤᠮᠲᠤ ᠶᠠᠪᠤᠳᠠᠯ ᠢ᠋ ᠴᠡᠷᠢᠭ ᠪᠦᠬᠦᠨ ᠪᠢᠰᠢᠷᠡᠨ ᠮᠡᠳᠡᠵᠦ᠂ ᠬᠥᠮᠦᠨ ᠪᠣᠯᠭᠠᠨ ᠵᠣᠷᠢᠭ ᠣᠷᠣᠵᠤ᠂ ᠬᠡᠢ ᠮᠣᠷᠢ ᠰᠡᠷᠭᠦᠵᠡᠢ᠃
— ᠪᠢᠳᠡ ᠤᠷᠢᠳᠤ ᠨᠢ ᠳᠠᠷᠤᠭᠠ ᠨᠠᠷ ᠠᠭᠠᠰᠢᠯᠠᠨ ᠵᠠᠩᠨᠠᠪᠠᠯ᠂ ᠵᠣᠳᠣᠬᠤ ᠦᠭᠡᠢ ᠨᠢ ᠶᠠᠮᠠᠢ ᠭᠡᠵᠦ᠂ ᠵᠣᠳᠣᠪᠠᠯ ᠨᠢ ᠠᠯᠠᠭᠠ ᠦᠭᠡᠢ ᠨᠢ ᠶᠠᠮᠠᠢ ᠭᠡᠵᠦ ᠪᠣᠳᠣᠳᠠᠭ ᠪᠠᠢᠯᠠ᠃ ᠰᠦᠬᠡ ᠪᠢᠳᠡᠨ ᠦ᠌ ᠨᠢᠳᠦ ᠶ᠋ᠢ ᠨᠡᠭᠡᠭᠡᠵᠦ ᠥᠭᠪᠡ᠃ ᠪᠢᠳᠡ ᠦᠨᠡᠬᠡᠷ ᠮᠠᠯ ᠪᠢᠰᠢ᠂ ᠤᠯᠤᠰ ᠤ᠋ᠨ ᠴᠡᠷᠢᠭ ᠭᠡᠳᠡᠭ ᠴᠣᠯᠠ ᠲᠠᠢ ᠬᠥᠮᠦᠨ ᠪᠠᠢᠨᠠ ᠰᠢᠦ ᠳᠡ᠃ ᠳᠠᠢᠰᠤᠨ ᠲᠠᠢ ᠪᠦᠯᠢᠶᠡᠨ ᠴᠢᠰᠤ᠂ ᠬᠠᠯᠠᠭᠤᠨ ᠠᠮᠢ ᠪᠠᠨ ᠬᠠᠢᠷᠠᠯᠠᠬᠤ ᠦᠭᠡᠢ᠂ ᠳᠠᠢᠯᠠᠭᠰᠠᠨ ᠰᠡᠯᠡᠮᠡ᠂ ᠱᠠᠭᠠᠢᠭᠰᠠᠨ ᠫᠤᠤ ᠠ᠋ᠴᠠ ᠬᠠᠯᠲᠤᠷᠢᠬᠤ ᠦᠭᠡᠢ ᠭᠡᠵᠦ ᠲᠠᠩᠭᠠᠷᠢᠭ ᠢ᠋ᠶ᠋ᠠᠨ ᠥᠭᠭᠦᠭᠰᠡᠨ ᠪᠣᠯᠬᠤ ᠠ᠋ᠴᠠ ᠪᠢᠰᠢ᠂ ᠠᠯᠢ ᠬᠠᠷᠭᠢᠰ ᠳᠠᠷᠤᠭᠠ ᠨᠠᠷ ᠤ᠋ᠨ ᠲᠣᠭᠯᠠᠭᠠᠮ ᠵᠤᠭᠠᠭᠠ ᠪᠣᠯᠵᠤ᠂ ᠴᠢᠰᠤ ᠪᠠᠨ ᠤᠷᠤᠰᠬᠠᠬᠤ ᠭᠡᠰᠡᠨ ᠶᠦᠮ ᠪᠢᠰᠢ ᠭᠡᠵᠦ ᠴᠡᠷᠢᠭ ᠦ᠋ᠳ ᠲᠡᠷᠡ ᠥᠷᠯᠥᠭᠡ ᠶ᠋ᠢᠨ ᠶᠠᠪᠤᠳᠠᠯ ᠢ᠋ ᠬᠡᠯᠡᠯᠴᠡᠨ ᠶᠠᠷᠢᠯᠴᠠᠵᠠᠢ᠃
— ᠤᠷᠢᠳᠤ ᠶ᠋ᠢᠨ ᠬᠠᠭᠤᠴᠢᠴᠤᠤᠯ ᠤ᠋ᠨ ᠦᠭᠡᠨ ᠳ᠋ᠦ᠍ ᠭᠠᠷ ᠤ᠋ᠨ ᠪᠥᠬᠡ ᠭᠠᠭᠴᠠ ᠬᠥᠮᠦᠨ ᠳ᠋ᠦ᠍᠂ ᠴᠡᠭᠡᠵᠢ ᠶ᠋ᠢᠨ ᠪᠥᠬᠡ ᠴᠡᠷᠢᠭ ᠬᠥᠮᠦᠨ ᠳ᠋ᠦ᠍ ᠭᠡᠳᠡᠭ ᠨᠢ ᠦᠨᠡᠨ ᠦᠭᠡ᠃ ᠴᠡᠭᠡᠵᠢ ᠶ᠋ᠢᠨ ᠪᠥᠬᠡ᠂ ᠦᠰᠦᠭ ᠪᠢᠴᠢᠭ ᠮᠡᠳᠡᠬᠦ᠂ ᠤᠴᠢᠷ ᠲᠠᠨᠢᠬᠤ ᠬᠥᠮᠦᠨ ᠭᠡᠳᠡᠭ ᠡᠢᠮᠦ ᠶᠦᠮ ᠪᠠᠢᠨᠠ ᠰᠢᠦ᠃ ᠳᠠᠷᠤᠭᠠ ᠨᠠᠷ ᠤ᠋ᠨ ᠪᠢᠳᠡᠨ ᠳ᠋ᠦ᠍ ᠨᠣᠮ ᠤ᠋ᠨ ᠦᠰᠦᠭ ᠵᠢᠭᠠᠬᠤ ᠦᠭᠡᠢ ᠭᠡᠵᠦ ᠪᠢᠴᠢᠭ ᠦᠰᠦᠭ ᠰᠤᠷᠭᠠᠬᠤ ᠳᠤᠷᠠ ᠦᠭᠡᠢ ᠤᠴᠢᠷ ᠢ᠋ ᠮᠡᠳᠡᠯᠡ᠃
— ᠰᠠᠢᠨ ᠡᠷᠡ ᠵᠣᠷᠢᠭᠰᠠᠨ ᠳ᠋ᠠᠭᠠᠨ᠂ ᠰᠠᠢᠨ ᠮᠣᠷᠢ ᠬᠠᠷᠠᠢᠭᠰᠠᠨ ᠳ᠋ᠠᠭᠠᠨ ᠬᠦᠷᠳᠡᠭ ᠭᠡᠳᠡᠭ᠃ ᠡᠷᠡ ᠬᠥᠮᠦᠨ ᠰᠦᠬᠡ ᠰᠢᠭ ᠡᠢᠮᠦ ᠯᠡ ᠪᠠᠢᠬᠤ ᠶᠣᠰᠣᠲᠠᠢ ᠭᠡᠵᠦ ᠴᠡᠷᠢᠭ ᠦ᠋ᠳ᠂ ᠪᠦᠬᠦ ᠬᠤᠵᠢᠷᠪᠤᠯᠤᠩ ᠤ᠋ᠨ ᠬᠢᠨ ᠢ᠋ ᠬᠥᠳᠡᠯᠭᠡᠭᠰᠡᠨ ᠲᠡᠷᠡ ᠶᠠᠪᠤᠳᠠᠯ ᠢ᠋ ᠡᠷᠲᠡᠨ ᠦ᠌ ᠮᠡᠷᠭᠡᠨ ᠰᠡᠴᠡᠨ ᠦᠭᠡ ᠪᠡᠷ ᠳ᠋ᠦᠩᠨᠡᠨ ᠬᠡᠯᠡᠯᠴᠡᠪᠡ᠃
— ᠰᠢᠳᠤᠷᠭᠤ ᠵᠣᠷᠢᠭ ᠲᠠᠢ ᠬᠥᠮᠦᠨ ᠪᠠᠢᠨᠠ ᠳᠠ᠃ ᠳᠠᠷᠤᠭᠠ ᠪᠣᠯᠪᠠᠯ ᠶᠣᠰᠣᠲᠠᠢ ᠰᠠᠢᠨ ᠳᠠᠷᠤᠭᠠ ᠪᠣᠯᠬᠤ ᠬᠥᠮᠦᠨ᠃ ᠨᠢᠳᠦᠨ ᠳ᠋ᠡᠭᠡᠨ ᠭᠠᠯ ᠲᠠᠢ ᠨᠢᠭᠤᠷ ᠲᠠᠭᠠᠨ ᠴᠣᠭ ᠲᠠᠢ᠂ ᠶᠣᠰᠣᠲᠠᠢ ᠡᠷᠡ ᠬᠥᠮᠦᠨ ᠭᠡᠵᠦ ᠡᠪᠦᠭᠡᠨ ᠴᠡᠷᠢᠭ ᠦ᠋ᠳ ᠰᠦᠬᠡ ᠶ᠋ᠢ ᠮᠠᠭᠲᠠᠨ ᠬᠡᠯᠡᠯᠴᠡᠪᠡ᠃
ᠰᠢᠷᠴᠢᠨ ᠲᠡᠭᠦᠨ ᠡᠴᠡ ᠬᠣᠢᠰᠢ᠂ ᠥᠨᠳᠥᠷ ᠪᠡᠶᠡ ᠲᠡᠢ᠂ ᠱᠠᠪ ᠬᠢᠭᠰᠡᠨ᠂ ᠭᠠᠳᠠᠨᠠ ᠠ᠋ᠴᠠ ᠴᠢᠷᠠᠢ ᠶ᠋ᠢ ᠨᠢ ᠬᠠᠷᠠᠬᠤ ᠳ᠋ᠤ᠌ ᠨᠡᠯᠢᠶᠡᠳ ᠴᠢᠩᠭᠠ ᠶᠠᠩᠵᠤ ᠶ᠋ᠢᠨ ᠬᠥᠮᠦᠨ ᠪᠣᠯᠤᠯᠲᠠᠢ ᠰᠦᠬᠡ ᠲᠡᠢ ᠠᠭᠤᠯᠵᠠᠬᠤ ᠳᠠᠭᠠᠷᠢᠯᠳᠤᠬᠤ ᠳ᠋ᠠᠭᠠᠨ ᠶᠡᠬᠡᠯᠡ ᠪᠢᠰᠢᠷᠡᠨ ᠬᠦᠨᠳᠦᠳᠬᠡᠵᠦ ᠦᠵᠡᠳᠡᠭ ᠪᠣᠯᠪᠠ᠃ ᠴᠡᠷᠢᠭ ᠦ᠋ᠨ ᠵᠠᠬᠢᠷᠤᠯ ᠳᠠᠷᠤᠭᠠ ᠨᠠᠷ ᠪᠤᠰᠤᠳ ᠣᠯᠠᠨ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠣᠨᠴᠠᠭᠠᠢ ᠳᠣᠪᠣᠢᠨ ᠢᠯᠭᠠᠷᠠᠵᠤ ᠪᠠᠢᠭᠰᠠᠨ ᠪᠠᠲᠤ ᠰᠠᠬᠢᠯᠭᠠ ᠲᠠᠢ ᠬᠠᠳᠠᠨ ᠵᠣᠷᠢᠭ ᠲᠠᠢ ᠲᠡᠷᠡ ᠬᠥᠮᠦᠨ ᠢ᠋ ᠥᠪᠡᠷ ᠢ᠋ᠶ᠋ᠡᠨ ᠶᠠᠮᠠᠷ ᠴᠤ᠌ ᠬᠦᠴᠦ ᠭᠠᠷᠭᠠᠵᠤ ᠣᠷᠣᠯᠳᠣᠬᠤ ᠦᠭᠡᠢ ᠪᠡᠷ ᠣᠯᠠᠨ ᠴᠡᠷᠢᠭ ᠦ᠋ᠨ ᠰᠡᠳᠬᠢᠯ ᠢ᠋ ᠲᠡᠮᠦᠷ ᠦ᠋ᠨ ᠦᠷᠳᠡᠰᠦ ᠲᠠᠲᠠᠭᠴᠢ ᠰᠣᠷᠢᠨᠵᠢᠨ ᠬᠦᠷᠦ ᠶ᠋ᠢᠨ ᠠᠳᠠᠯᠢ ᠪᠡᠶᠡ ᠳ᠋ᠡᠭᠡᠨ ᠲᠠᠲᠠᠭᠰᠠᠨ ᠢ᠋ ᠦᠵᠡᠭᠡᠳ᠂ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠪᠠᠭᠠ ᠰᠠᠭᠠ ᠱᠠᠩ ᠥᠭᠬᠦ᠂ ᠬᠠᠷᠠᠭᠤᠯ ᠮᠠᠨᠠᠭᠠ ᠡᠨᠡ ᠲᠡᠷᠡ ᠡᠴᠡ ᠴᠢᠯᠥᠭᠡᠯᠡᠬᠦ ᠵᠡᠷᠭᠡᠪᠡᠷ ᠥᠪᠡᠷ ᠳᠠᠰᠢ ᠲᠠᠲᠠᠵᠤ ᠭᠠᠷ ᠲᠠᠭᠠᠨ ᠣᠷᠣᠭᠤᠯᠬᠤ ᠭᠡᠵᠦ ᠤᠷᠤᠯᠳᠤᠵᠤ ᠦᠵᠡᠭᠡᠳ᠂ ᠲᠡᠷᠡ ᠦᠭᠡ ᠳᠠᠭᠤᠨ ᠴᠥᠭᠡᠨ ᠲᠡᠢ ᠴᠡᠷᠢᠭ ᠢ᠋ ᠥᠩᠭᠡ ᠮᠥᠩᠭᠥ᠂ ᠨᠢᠭᠤᠷ ᠲᠠᠯᠠ᠂ ᠡᠷᠬᠡ ᠲᠤᠰᠢᠶᠠᠯ᠂ ᠠᠯᠢ ᠠᠯᠢᠨ ᠢ᠋ᠶ᠋ᠠᠷ ᠴᠤ᠌ ᠰᠡᠳᠬᠢᠯ ᠢ᠋ ᠨᠢ ᠤᠷᠪᠠᠭᠤᠯᠵᠤ ᠪᠣᠯᠬᠤ ᠦᠭᠡᠢ ᠴᠢᠩ ᠰᠢᠳᠤᠷᠭᠤ ᠬᠥᠮᠦᠨ ᠭᠡᠵᠦ ᠮᠡᠳᠡᠭᠡᠳ᠂ ᠪᠡᠶᠡ ᠳ᠋ᠡᠭᠡᠨ ᠲᠠᠲᠠᠬᠤ ᠭᠡᠵᠦ ᠣᠷᠣᠯᠳᠣᠬᠤ ᠶ᠋ᠢ ᠴᠦ᠍ ᠣᠷᠬᠢᠵᠠᠢ᠃
ᠱᠣᠢᠪ ᠲᠠᠢ ᠨᠠᠢᠵᠢ᠂ ᠲᠡᠭᠦᠨ ᠦ᠌ ᠠᠷᠢᠬᠢᠨ ᠤ᠋ ᠨᠥᠬᠥᠷ ᠮᠡᠳᠡᠶᠧᠹ ᠭᠡᠳᠡᠭ ᠪᠤᠷᠢᠶᠠᠳ᠂ ᠺᠠᠽᠠᠭ ᠣᠹᠢᠼᠧᠷ ᠱᠣᠢᠪ ᠢ᠋ ᠰᠠᠬᠢᠯᠭᠠ ᠶ᠋ᠢᠨ ᠱᠣᠷᠣᠩ ᠤ᠋ᠨ ᠬᠣᠨᠣᠭ ᠤ᠋ᠨ ᠲᠣᠭᠠ ᠶ᠋ᠢ ᠭᠦᠢᠴᠡᠭᠡᠵᠦ ᠭᠠᠷᠤᠭᠰᠠᠨ ᠤ᠋ ᠣᠷᠣᠢ᠂ ᠱᠣᠢᠪ ᠤ᠋ᠨ ᠰᠤᠯᠠᠯᠠᠭᠳᠠᠭᠰᠠᠨ ᠤ᠋ ᠪᠠᠶᠠᠷ ᠲᠤ᠌《ᠰᠡᠷᠵᠢᠮ ᠡᠷᠭᠦᠶᠡ》 ᠭᠡᠵᠦ ᠣᠷᠣᠵᠤ᠂ ᠠᠷᠢᠬᠢ ᠬᠠᠯᠠᠭᠠᠯᠭᠠᠨ ᠤᠤᠭᠤᠭᠰᠠᠭᠠᠷ ᠤᠯᠠᠭᠠᠨ ᠵᠡᠭᠡᠷᠳᠡ ᠪᠣᠯᠵᠤ᠂ ᠬᠢᠲᠠᠳ ᠭᠠᠨᠼᠠᠢ ᠠᠷᠢᠬᠢ ᠣᠭᠣᠴᠢᠨ᠂ ᠣᠷᠣᠰ ᠮᠣᠩᠭᠣᠯ ᠦᠭᠡ ᠬᠣᠯᠢᠵᠤ᠂ ᠱᠣᠢᠪ ᠲᠤ᠌ ᠪᠠᠬᠠᠨ ᠠᠭᠰᠤᠮᠨᠠᠨ ᠠᠪᠤᠷᠢᠯᠠᠭᠰᠠᠨ ᠨᠢ᠄
— ᠮᠠᠭᠤ ᠨᠣᠬᠠᠢ! ᠴᠢ᠂ ᠨᠡᠷᠡ ᠪᠡᠨ ᠬᠤᠭᠤᠯᠬᠤ ᠪᠠᠷ ᠶᠠᠰᠤ ᠪᠠᠨ ᠬᠣᠭᠣᠷᠠ ᠭᠡᠳᠡᠭ ᠢ᠋ ᠮᠡᠳᠡᠬᠦ ᠦᠭᠡᠢ ᠤᠤ? ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠢᠩᠭᠢᠵᠦ ᠨᠡᠷᠡ ᠤᠰᠤ ᠪᠠᠨ ᠪᠤᠵᠠᠷᠯᠠᠬᠤ ᠭᠡᠵᠦ ᠪᠠᠢᠬᠤ ᠤᠤ? ᠲᠡᠷᠡ ᠳ᠋ᠤᠷᠠᠺ ᠤ᠋ᠳ ᠢ᠋ ᠳᠠᠷᠤᠭᠠ ᠨᠠᠷ ᠢ᠋ᠶ᠋ᠠᠨ ᠬᠦᠨᠳᠦᠳᠬᠡᠵᠦ ᠪᠢᠰᠢᠷᠡᠪᠡᠯ ᠵᠣᠬᠢᠬᠤ ᠶ᠋ᠢ ᠰᠤᠷᠭᠠᠬᠤ ᠶᠣᠰᠣ ᠲᠠᠢ ᠶᠤᠮ ᠪᠢᠰᠢ ᠤᠤ᠃ ᠴᠢ᠂ ᠲᠡᠭᠡᠬᠦ ᠳ᠋ᠦ᠍ ᠶᠠᠭᠠᠬᠢᠵᠤ ᠪᠠᠢᠭᠠ ᠨᠢ ᠡᠨᠡ ᠪᠢᠯᠡ? ᠨᠢᠭᠡ ᠳ᠋ᠤᠷᠠᠺ ᠤ᠋ᠨ ᠲᠣᠯᠣᠭᠠᠢ ᠶ᠋ᠢ ᠡᠪ ᠦᠭᠡᠢ ᠲᠣᠭᠰᠢᠭᠠᠳ ᠱᠣᠷᠣᠩ ᠳ᠋ᠤ᠌ ᠣᠷᠣᠵᠤ ᠪᠠᠢᠬᠤ ᠭᠡᠵᠦ᠂ ᠶᠠᠭᠠᠬᠢᠵᠤ ᠪᠠᠢᠭᠠ ᠴᠢᠨᠢ ᠡᠨᠡ ᠪᠢᠯᠡ? ᠴᠢ᠂ ᠬᠥᠮᠦᠨ ᠢ᠋ ᠠᠩᠬᠠ ᠤᠳᠠᠭᠠ ᠰᠠᠶᠢ(ᠰᠠᠢ᠍ᠢ) ᠵᠣᠳᠣᠵᠤ ᠦᠵᠡᠵᠦ ᠪᠠᠢᠭᠠ ᠴᠢᠨᠢ ᠡᠨᠡ ᠤᠤ? ᠭᠡᠬᠦ ᠳ᠋ᠦ᠍ᠨᠢ᠂
— ᠪᠢ ᠲᠡᠷᠡ ᠦᠶᠡ ᠳ᠋ᠦ᠍ ᠰᠣᠭᠲᠣᠭᠤ ᠪᠠᠢᠭᠠᠳ ᠲᠡᠢᠮᠦ ᠬᠡᠷᠡᠭ ᠭᠠᠷᠤᠭᠰᠠᠨ ᠪᠢᠯᠡ᠃ ᠬᠠᠷᠢᠨ ᠲᠡᠷᠡ ᠸᠠᠰᠢᠯᠢᠶᠧᠹ ᠮᠠᠭᠤ ᠵᠣᠯᠢᠭ ᠴᠢᠨᠢ᠂ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠨᠢᠭᠡ ᠶᠡᠬᠡ ᠠᠷᠠᠳ ᠦᠵᠡᠯ ᠲᠡᠢ ᠬᠥᠮᠦᠨ ᠪᠣᠯᠵᠤ ᠪᠠᠢᠬᠤ ᠦᠭᠡᠢ ᠤᠤ? ᠪᠢ ᠨᠢᠭᠡ ᠮᠠᠯ ᠰᠢᠭ ᠠᠮᠢᠲᠠᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠨᠢ ᠬᠠᠭᠠ ᠴᠣᠬᠢᠵᠤ᠂ ᠪᠠᠬᠠᠨ ᠴᠢᠰᠤ ᠨᠥᠵᠢ ᠶ᠋ᠢ ᠨᠢ ᠤᠷᠤᠰᠬᠠᠭᠰᠠᠨ ᠪᠢᠯᠡ᠂ ᠲᠡᠭᠦᠨ ᠡᠴᠡ ᠪᠣᠯᠵᠤ ᠲᠡᠷᠡ ᠮᠠᠭᠤ ᠴᠡᠷᠢᠭ ᠦᠬᠦᠵᠦ ᠬᠠᠲᠠᠭᠠᠳ᠂ ᠠᠮᠢᠨ ᠤ᠋ ᠬᠡᠷᠡᠭ ᠭᠠᠷᠤᠭᠰᠠᠨ ᠦᠭᠡᠢ ᠰᠢᠦ ᠳᠡ᠃ ᠨᠢᠭᠡ ᠶᠡᠬᠡ ᠰᠦᠷ ᠪᠠᠳᠠᠷᠠᠭᠤᠯᠵᠤ ᠰᠠᠨᠳᠤᠷᠤᠭᠰᠠᠨ ᠤ᠋ ᠬᠡᠷᠡᠭ ᠴᠦ᠍ ᠠᠯᠠᠭᠠ ᠯᠠ ᠪᠠᠢᠭᠰᠠᠨ ᠶᠤᠮ ᠪᠢᠯᠡ ᠳᠠ ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠮᠠᠳᠠᠶᠧᠹ ᠠᠷᠢᠬᠢ ᠬᠠᠩᠬᠤᠯᠤᠨ ᠬᠦᠩᠭᠢᠨᠡᠵᠦ᠄
— ᠵᠠ᠂ ᠪᠢ ᠲᠡᠷᠡ ᠫᠦᠯᠧᠮᠶᠣᠲ ᠰᠤᠮᠤᠨ ᠤ᠋ ᠬᠢᠨ ᠢ᠋ ᠳᠠᠷᠤᠭᠠ ᠨᠠᠷ ᠢ᠋ᠶ᠋ᠠᠨ ᠬᠦᠨᠳᠦᠳᠬᠡᠨ ᠠᠶᠤᠳᠠᠭ ᠪᠣᠯᠭᠠᠵᠤ ᠥᠭᠭᠦᠨᠡ ᠳᠡ᠂ ᠴᠢ ᠨᠠᠮᠠᠶ᠋ᠢ(ᠨᠠᠮᠠ ᠶ᠋ᠢ) ᠦᠵᠡᠭᠡᠷᠡᠢ ᠭᠡᠪᠡ᠃
— — — —
* ᠰᠦᠬᠡ ᠭᠡᠵᠦ ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯ ᠤ᠋ᠨ ᠵᠣᠬᠢᠶᠠᠨ ᠤᠳᠤᠷᠢᠳᠤᠭᠴᠢ ᠶ᠋ᠢᠨ ᠨᠡᠷᠡ᠃ ᠪᠠᠭᠠᠲᠤᠷ ᠭᠡᠳᠡᠭ ᠨᠢ 1921 ᠣᠨ ᠤ᠋ ᠠᠷᠠᠳ ᠤ᠋ᠨ ( ᠤ᠋) ᠬᠤᠪᠢᠰᠬᠠᠯ ᠠ᠋ᠴᠠ ᠡᠮᠦᠨᠡ ᠬᠢᠲᠠᠳ ᠤ᠋ᠨ ᠬᠠᠷᠭᠢᠰ ᠴᠡᠷᠢᠭ ᠦ᠋ᠨ ᠡᠷᠬᠡᠲᠡᠨ ᠲᠡᠢ ᠪᠠᠢᠯᠳᠤᠵᠤ ᠣᠯᠤᠭᠰᠠᠨ ᠭᠠᠪᠢᠶᠠ ᠶ᠋ᠢᠨ ᠴᠣᠯᠠ ᠪᠢᠯᠡ᠃
* ᠦᠨᠡᠨ ᠬᠡᠷᠡᠭ᠃
ᠲᠡᠭᠡᠭᠡᠳ ᠬᠠᠷᠠ ᠬᠤᠯᠤᠭᠠᠨᠠ ᠵᠢᠯ ᠦ᠋ᠨ ᠬᠠᠪᠤᠷ ᠤ᠋ᠨ ᠠᠳᠠᠭ ᠰᠠᠷᠠ ᠶ᠋ᠢᠨ ᠬᠠᠭᠤᠴᠢᠳ ᠢ᠋ᠶ᠋ᠠᠷ ᠬᠡᠷᠡᠭ ᠥᠳᠥᠭᠦᠯᠵᠡᠢ᠃ ᠬᠣᠷᠢᠶᠠᠨ ᠤ᠋ ᠰᠤᠷᠭᠠᠭᠤᠯᠢ ᠬᠢᠬᠦ ᠳ᠋ᠦ᠍ ᠮᠠᠳᠠᠶᠧᠹ᠂ ᠱᠣᠢᠪ ᠲᠠᠢ ᠬᠠᠮᠲᠤ ᠫᠤᠤᠳᠠᠯᠭᠠ ᠶ᠋ᠢᠨ ᠰᠤᠷᠭᠠᠭᠤᠯᠢ ᠬᠢᠳᠡᠭ ᠭᠠᠵᠠᠷ ᠫᠦᠯᠧᠮᠶᠣᠲ ᠰᠤᠮᠤᠨ ᠤ᠋ ᠴᠡᠷᠢᠭ ᠳᠠᠰᠢᠽᠡᠪᠡᠭ ᠢ᠋ ᠸᠢᠨᠲ᠋ᠣᠸ ᠫᠤᠤ ᠪᠠᠨ ᠮᠠᠭᠤ ᠴᠡᠪᠡᠷᠯᠡᠯᠡ ᠭᠡᠵᠦ ᠠᠪᠤᠷᠢᠯᠠᠨ ᠵᠠᠩᠨᠠᠭᠠᠳ᠂ ᠰᠡᠯᠡᠮᠡ ᠰᠤᠭᠤ ᠲᠠᠲᠠᠵᠤ ᠬᠠᠪᠲᠠᠭᠠᠢ ᠲᠠᠯᠠ ᠪᠠᠷ ᠨᠢ ᠲᠡᠷᠡ ᠴᠡᠷᠢᠭ ᠢ᠋ ᠬᠦᠴᠦᠯᠡᠨ ᠴᠣᠬᠢᠮᠠᠭᠴᠠ᠂ ᠬᠥᠭᠡᠷᠦᠬᠦᠢ ᠲᠡᠷᠡ ᠴᠡᠷᠢᠭ ᠶᠣᠢᠯᠠᠨ(ᠶᠣᠣᠯᠠᠨ)᠂ ᠰᠡᠯᠡᠮᠡ ᠶ᠋ᠢᠨ ᠦᠵᠦᠭᠦᠷ ᠨᠢ ᠠᠯᠪᠠᠨ ᠤ᠋ ᠴᠡᠷᠢᠭ ᠬᠥᠬᠡ ᠲᠡᠷᠯᠢᠭ᠂ ᠲᠡᠭᠦᠨ ᠦ᠌ ᠳᠣᠣᠷᠠ ᠡᠮᠦᠰᠦᠭᠰᠡᠨ ᠴᠠᠮᠴᠠ ᠶ᠋ᠢ ᠬᠠᠭᠠ ᠴᠠᠪᠴᠢᠭᠠᠳ᠂ ᠲᠠᠯᠤᠨ ᠤ᠋ ᠮᠥᠭᠡᠷᠰᠦᠨ ᠦ᠌ ᠲᠤᠰ ᠭᠠᠵᠠᠷ ᠠᠷᠠᠰᠤ ᠮᠢᠬᠠ ᠶ᠋ᠢ ᠲᠠᠰᠤ ᠴᠣᠬᠢᠵᠠᠢ᠃ ᠰᠡᠯᠡᠮᠡ ᠶ᠋ᠢᠨ ᠢᠷ ᠲᠦ᠍ ᠬᠠᠭᠠ ᠴᠠᠪᠴᠢᠭᠤᠯᠤᠭᠰᠠᠨ ᠳᠡᠪᠡᠯ ᠦ᠋ᠨ ᠴᠠᠭᠠᠨᠠ ᠠ᠋ᠴᠠ ᠴᠢᠰᠤᠨ ᠳ᠋ᠤ᠌ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠤᠯᠠᠭᠠᠨ ᠪᠣᠯᠤᠭᠰᠠᠨ ᠭᠬᠢᠷ ᠲᠡᠢ ᠴᠠᠭᠠᠨ ᠴᠤᠤᠶᠠᠩᠪᠤᠤ ᠴᠠᠮᠴᠠ ᠴᠤᠬᠤᠢᠨ ᠦᠵᠡᠭᠳᠡᠭᠰᠡᠨ ᠳ᠋ᠦ᠍ ᠴᠡᠷᠢᠭ ᠦ᠋ᠨ ᠵᠢᠭᠰᠠᠭᠠᠯ ᠳᠣᠲᠣᠷᠠ ᠠ᠋ᠴᠠ ᠬᠥᠮᠦᠨ ᠳᠠᠭᠤᠨ ᠠᠯᠳᠠᠵᠤ᠂ ᠵᠠᠷᠢᠮ ᠴᠡᠷᠢᠭ ᠶᠡᠬᠡᠯᠡ( ᠶᠡᠬᠡ ᠯᠡ) ᠲᠠᠴᠢᠶᠠᠳᠠᠨ᠂ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠨᠢ ᠡᠨᠡ ᠪᠢᠯᠡ? ᠡᠨᠡ ᠴᠢᠨᠢ ᠰᠡᠯᠡᠮᠡ ᠪᠡᠷ ᠴᠠᠪᠴᠢᠬᠤ ᠰᠤᠷᠭᠠᠭᠤᠯᠢ ᠬᠢᠳᠡᠭ ᠪᠤᠷᠭᠠᠰᠤ ᠪᠢᠰᠢ᠂ ᠬᠥᠮᠦᠨ ᠪᠠᠢᠨᠠ ᠰᠢᠦ ᠳᠡ ᠭᠡᠵᠦ ᠳᠤᠤᠭᠠᠷᠴᠠᠭᠠᠪᠠ᠃
— ᠲᠠ ᠨᠠᠷ ᠤ᠋ᠨ ᠬᠡᠨ ᠲᠠᠨᠢ ᠶᠠᠭᠤ ᠶᠠᠭᠤ ᠭᠡᠳ ᠪᠠᠢᠨᠠ ᠳᠠ? ᠭᠣᠮᠣᠳᠠᠯ ᠮᠡᠳᠡᠭᠦᠯᠬᠦ ᠰᠠᠨᠠᠭᠠ ᠲᠠᠢ ᠬᠥᠮᠦᠨ ᠪᠠᠢᠪᠠᠯ᠂ ᠤᠷᠤᠭᠰᠢ ᠠᠯᠬᠤᠭᠠᠳ ᠭᠠᠷ ᠭᠡᠵᠦ ᠲᠡᠷᠡ ᠺᠠᠽᠠᠭ ᠣᠹᠢᠼᠧᠷ ᠰᠡᠯᠡᠮᠡ ᠪᠡᠨ ᠬᠤᠢᠯᠠᠨ᠂ ᠴᠡᠷᠢᠭ ᠦ᠋ᠨ ᠵᠦᠭ ᠰᠢᠲᠦ ᠵᠠᠭᠤᠨ᠂ ᠮᠠᠭᠤᠬᠠᠢ ᠪᠠᠷ ᠰᠢᠷᠳᠡᠪᠡᠰᠦ᠂
— ᠪᠢ ᠪᠠᠢᠨᠠ!
— ᠪᠢ!
— ᠪᠢ ᠪᠠᠢᠨᠠ!
— ᠪᠢ᠂ ᠪᠠᠰᠠ! ᠭᠡᠳ ᠰᠦᠬᠡ ᠲᠡᠷᠢᠭᠦᠲᠡᠢ ᠭᠤᠷᠪᠠᠨ ᠴᠡᠷᠢᠭ᠂ ᠵᠢᠭᠰᠠᠭᠠᠯ ᠠ᠋ᠴᠠ ᠤᠷᠤᠭᠰᠢ ᠨᠢᠭᠡᠨ ᠠᠯᠬᠤᠮ ᠳᠠᠪᠰᠢᠨ ᠭᠠᠷᠪᠠ᠃
— ᠲᠠ ᠨᠠᠷ᠂ ᠳᠠᠷᠤᠭᠠ ᠨᠠᠷ ᠤ᠋ᠨ ᠥᠭᠡᠳᠡ ᠡᠴᠡ ᠡᠰᠡᠷᠭᠦᠴᠡᠨ ᠰᠠᠮᠠᠭᠤᠷᠠᠬᠤ ᠭᠡᠵᠦ ᠪᠠᠢᠭᠠ ᠤᠯᠤᠰ ᠤᠤ? ᠭᠡᠵᠦ ᠣᠹᠢᠼᠧᠷ ᠦ᠋ᠨ ᠠᠰᠠᠭᠤᠬᠤ ᠳ᠋ᠤ᠌᠄
— ᠦᠭᠡᠢ᠂ ᠪᠢᠳᠡ ᠰᠠᠮᠠᠭᠤᠷᠠᠬᠤ ᠰᠠᠨᠠᠭᠠ ᠦᠭᠡᠢ᠂ ᠭᠠᠭᠴᠠᠬᠦ (ᠭᠠᠭᠴᠠ ᠬᠦ᠌) ᠪᠢᠳᠡᠨ ᠢ᠋ ᠢᠩᠭᠢᠵᠦ ᠬᠠᠷᠭᠢᠰᠯᠠᠬᠤ ᠶ᠋ᠢ ᠬᠦᠯᠢᠶᠡᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠵᠦ ᠡᠰᠡᠷᠭᠦᠴᠡᠵᠦ ᠪᠠᠢᠨᠠ᠃
— ᠠ᠂ ᠲᠡᠢᠮᠦ ᠪᠣᠢ? ᠲᠠ ᠨᠠᠷ ᠪᠠᠰᠠ ᠡᠰᠡᠷᠭᠦᠴᠡᠨᠡ? ᠬᠥᠮᠦᠨ ᠦ᠌ ᠡᠷᠬᠡ ᠶ᠋ᠢ ᠬᠠᠮᠠᠭᠠᠯᠠᠬᠤ ᠶᠠᠭᠠᠬᠢᠭᠰᠠᠨ ᠰᠦᠷᠡᠬᠡᠢ ᠤᠯᠤᠰ ᠪᠣᠢ ᠪᠣᠯᠪᠠ? ᠠᠷᠪᠠᠨ ᠤ᠋ ᠳᠠᠷᠤᠭᠠ! ᠡᠳᠡᠨ ᠦ᠌ ᠵᠡᠪᠰᠡᠭ ᠢ᠋ ᠬᠤᠷᠢᠶᠠᠵᠤ ᠠᠪᠤᠭᠠᠳ᠂ ᠵᠠᠬᠢᠷᠤᠯ ᠳᠠᠮᠳᠢᠨ ᠲᠡᠷᠢᠭᠦᠨ ᠳ᠋ᠦ᠍ ᠫᠤᠤ ᠲᠠᠢ ᠴᠡᠷᠢᠭ ᠢ᠋ᠶ᠋ᠡᠷ ᠬᠦᠷᠭᠡᠭᠦᠯ᠃ ᠳᠠᠷᠤᠭᠠ ᠨᠠᠷ ᠤ᠋ᠨ ᠥᠭᠡᠳᠡ ᠡᠴᠡ ᠮᠠᠭᠤ ᠠᠪᠤᠷᠢ ᠵᠠᠩ ᠭᠠᠷᠭᠠᠵᠤ ᠡᠰᠡᠷᠭᠦᠴᠡᠳᠡᠭ ᠪᠣᠯᠪᠠᠯ᠂ ᠡᠢᠮᠦ ᠪᠠᠢᠳᠠᠭ ᠶᠤᠮ ᠪᠠᠢᠨᠠ ᠭᠡᠵᠦ ᠬᠠᠰᠢᠷᠠᠨ ᠵᠠᠯᠬᠠᠲᠠᠯᠠ ᠨᠢ ᠴᠡᠭᠡᠷᠯᠡᠭᠦᠯᠦᠨ ᠪᠠᠩᠵᠠᠳᠠᠭ (ᠪᠠᠨᠰᠠᠳᠠᠭ) ᠭᠡᠬᠦ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠲᠡᠷᠡ ᠬᠡᠳᠦᠨ ᠴᠡᠷᠢᠭ᠂
— ᠪᠢᠳᠡ ᠳᠠᠷᠤᠭᠠ ᠨᠠᠷ ᠤ᠋ᠨ ᠥᠭᠡᠳᠡ ᠡᠴᠡ ᠮᠠᠭᠤ ᠠᠪᠤᠷᠢ ᠵᠠᠩ ᠭᠠᠷᠭᠠᠭᠰᠠᠨ ᠦᠭᠡᠢ᠂ ᠭᠠᠭᠴᠠᠬᠦ (ᠭᠠᠭᠴᠠ ᠬᠦ᠌) ᠬᠠᠷᠭᠢᠰ ᠮᠠᠭᠤᠬᠠᠢ ᠪᠠᠷ ᠳᠠᠷᠤᠯᠠᠬᠤ ᠳ᠋ᠤᠨᠢ ( ᠳ᠋ᠤ᠌ ᠨᠢ )ᠡᠰᠡᠷᠭᠦᠴᠡᠭᠰᠡᠨ ᠪᠢᠯᠡ ᠬᠡᠮᠡᠪᠡᠰᠦ᠂
— ᠳᠤᠭᠤᠢ! ᠭᠡᠵᠦ ᠬᠠᠰᠬᠢᠷᠤᠭᠠᠳ ᠠᠷᠪᠠᠨ ᠤ᠋ ᠳᠠᠷᠤᠭᠠ ᠶ᠋ᠢ᠂ ᠴᠢ ᠮᠠᠭᠤ ᠨᠣᠬᠠᠢ᠂ ᠬᠥᠳᠡᠯᠬᠦ ᠪᠣᠯ ᠠᠮᠢᠳᠤ ᠶᠠᠭᠤᠮᠠ ᠰᠢᠭ᠋ ᠱᠠᠯᠠᠪᠬᠠᠨ ᠬᠥᠳᠡᠯᠦᠭᠡᠳ ᠪᠠᠢ ᠭᠡᠵᠦ ᠵᠠᠩᠳᠤᠷᠪᠠ᠃
ᠠᠷᠪᠠᠨ ᠤ᠋ ᠳᠠᠷᠤᠭᠠ ᠳᠤᠷᠠ ᠲᠠᠢ ᠳᠤᠷᠠ ᠦᠭᠡᠢ ᠬᠥᠳᠡᠯᠵᠦ᠂ ᠲᠡᠷᠡ ᠬᠣᠷᠢᠭᠳᠠᠬᠤ ᠴᠡᠷᠢᠭ ᠦ᠋ᠨ ᠫᠤᠤ ᠵᠡᠪᠰᠡᠭ ᠢ᠋ ᠬᠤᠷᠢᠶᠠᠬᠤᠢᠴᠠ ᠪᠣᠯᠤᠭᠠᠳ ᠰᠦᠬᠡ ᠨᠠᠷ ᠢ᠋ ᠫᠤᠤ ᠲᠠᠢ ᠴᠡᠷᠢᠭ ᠬᠤᠸᠠᠷᠠᠨ ᠤ᠋ ᠵᠦᠭ ᠲᠠᠭᠤᠵᠤ ᠬᠥᠳᠡᠯᠦᠮᠡᠭᠴᠡ ᠣᠯᠠᠨ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠨᠢᠭᠡ ᠬᠥᠮᠦᠨ᠂
— ᠨᠥᠬᠥᠳ ᠠ᠋! ᠮᠠᠨᠠᠢ( ᠮᠠᠨ ᠤ᠋) ᠡᠨᠡ ᠨᠥᠬᠥᠳ ᠢ᠋᠂ ᠪᠢᠳᠡᠨ ᠢ᠋ ᠵᠣᠳᠣᠵᠤ ᠨᠦᠳᠦᠵᠦ ᠳᠠᠷᠤᠯᠠᠵᠤ ᠬᠠᠷᠭᠢᠰᠯᠠᠳᠠᠭ ᠢ᠋ ᠡᠰᠡᠷᠭᠦᠴᠡᠭᠰᠡᠨ ᠤᠴᠢᠷ ᠠ᠋ᠴᠠ ᠪᠠᠩᠵᠠᠳᠠᠨ( ᠪᠠᠨᠰᠠᠳᠠᠨ) ᠰᠢᠳᠬᠡᠬᠦ( ᠰᠢᠢᠳᠬᠡᠬᠦ) ᠭᠡᠵᠦ ᠪᠠᠢᠨᠠ ᠰᠢᠦ᠃ ᠪᠢᠳᠡ ᠡᠨᠡ ᠨᠥᠬᠥᠳ ᠲᠡᠢ ᠪᠡᠨ ᠰᠠᠨᠠᠭᠠ ᠨᠢᠭᠡ ᠲᠡᠢ᠂ ᠪᠠᠩᠵᠠᠳᠠᠪᠠᠯ (ᠪᠠᠨᠰᠠᠳᠠᠪᠠᠯ) ᠪᠢᠳᠡᠨ ᠢ᠋ ᠪᠠᠰᠠ ᠪᠠᠩᠵᠠᠳᠠᠭ( ᠪᠨᠰᠠᠳᠠᠭ) ᠭᠡᠵᠦ ᠬᠠᠰᠬᠢᠷᠬᠤ ᠳ᠋ᠤᠨᠢ( ᠳ᠋ᠤ᠌ ᠨᠢ)᠂
— ᠪᠠᠩᠵᠠᠳᠠᠪᠠᠯ (ᠪᠠᠨᠰᠠᠳᠠᠪᠠᠯ )ᠪᠢᠳᠡᠨ ᠢ᠋ ᠪᠠᠰᠠ ᠪᠠᠩᠵᠠᠳᠠᠭ (ᠪᠠᠨᠰᠠᠳᠠᠭ)! ᠨᠢᠭᠡᠳᠦᠭᠡᠷ ᠬᠣᠶᠠᠳᠤᠭᠠᠷ ᠰᠤᠮᠤᠨ ᠤ᠋ ᠨᠥᠬᠥᠳ ᠪᠢᠳᠡᠨ ᠲᠡᠢ ᠰᠠᠨᠠᠯ ᠨᠡᠢᠯᠡᠵᠡᠭᠡ ᠭᠡᠵᠦ ᠣᠯᠠᠨ ᠴᠡᠷᠢᠭ ᠲᠠᠯᠠ ᠲᠠᠯᠠ ᠠ᠋ᠴᠠ ᠬᠠᠰᠬᠢᠷᠴᠠᠭᠠᠵᠤ᠂ ᠪᠦᠬᠦ ᠬᠣᠷᠢᠶᠠ ᠴᠡᠷᠢᠭ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠫᠤᠤ ᠶ᠋ᠢᠨ ᠵᠢᠳᠠ ᠠᠷᠵᠠᠭᠠᠨᠠᠭᠤᠯᠤᠨ᠂ ᠪᠠᠩᠵᠠᠳᠠᠪᠠᠯ (ᠪᠠᠨᠰᠠᠳᠠᠪᠠᠯ) ᠪᠢᠳᠡᠨ ᠢ᠋ ᠪᠦᠭᠦᠳᠡ ᠶ᠋ᠢ ᠪᠠᠩᠵᠠᠳᠠᠭ(ᠪᠠᠨᠰᠠᠳᠠᠭ) ᠭᠡᠵᠦ ᠨᠢᠷ ᠬᠢᠲᠡᠯᠡ ᠬᠠᠰᠬᠢᠷᠤᠨ᠂ ᠰᠦᠬᠡ — ᠨᠥᠬᠥᠳ ᠰᠡᠯᠲᠡ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠬᠤᠸᠠᠷᠠᠨ ᠤ᠋ ᠵᠦᠭ ᠰᠢᠷᠦᠭᠦᠯᠦᠨ( ᠰᠢᠷᠦᠭᠦᠯᠡᠨ) ᠠᠯᠬᠤᠵᠠᠢ᠃ *
ᠣᠹᠢᠼᠧᠷ ᠳᠠᠷᠤᠭᠠ ᠨᠠᠷ ᠠᠶᠤᠨ ᠰᠠᠨᠳᠤᠷᠴᠤ᠂ ᠰᠡᠯᠡᠮᠡ ᠪᠡᠨ ᠬᠥᠯ ᠳ᠋ᠦ᠍ ᠲᠡᠭᠡᠭᠯᠡᠬᠦ ᠦᠭᠡᠢ ᠭᠡᠵᠦ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠷᠢᠵᠤ ᠮᠣᠷᠢᠨ ᠴᠡᠷᠢᠭ ᠦ᠋ᠨ ᠤᠷᠲᠤ ᠰᠢᠨᠧᠯ ᠦ᠋ᠨ ᠬᠣᠷᠮᠣᠢ ᠳ᠋ᠤ᠌ ᠬᠥᠯ ᠣᠷᠢᠶᠠᠯᠳᠤᠨ᠄
— ᠲᠡᠷᠡ ᠬᠣᠷᠢᠭᠳᠠᠭᠰᠠᠨ ᠬᠡᠳᠦᠨ ᠴᠡᠷᠢᠭ ᠢ᠋ ᠪᠤᠴᠠᠭᠠ! ᠶᠠᠯᠠ ᠬᠡᠯᠡᠯᠴᠡᠬᠦ ᠦᠭᠡᠢ ᠪᠣᠯᠭᠠᠶᠠ ᠭᠡᠵᠦ ᠳᠠᠪᠲᠠᠨ ᠬᠠᠰᠬᠢᠷᠤᠯᠳᠤᠵᠤ᠂ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠤᠸᠠᠷᠠᠨ ᠤ᠋ ᠵᠦᠭ ᠠᠯᠬᠤᠨ ᠣᠳᠤᠭᠰᠠᠨ ᠪᠦᠬᠦ ᠬᠣᠷᠢᠶᠠ ᠴᠡᠷᠢᠭ ᠦ᠋ᠨ ᠬᠣᠢᠨᠠ ᠠ᠋ᠴᠠ ᠭᠦᠶᠦᠯᠳᠦᠪᠡ᠃
ᠬᠤᠸᠠᠷᠠᠨ ᠤ᠋ ᠵᠦᠭ ᠵᠢᠭᠰᠠᠭᠰᠠᠨ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠢᠷᠦᠭᠦᠯᠡᠨ ᠠᠯᠬᠤᠭᠰᠠᠨ ᠬᠣᠷᠢᠶᠠ ᠴᠡᠷᠢᠭ᠂ ᠱᠣᠢᠪ ᠮᠠᠳᠠᠶᠧᠹ ᠬᠣᠶᠠᠷ ᠢ᠋ ᠥᠨᠥᠬᠢ ᠪᠠᠩᠵᠠᠳᠠᠭᠤᠯᠬᠤ (ᠪᠠᠨᠰᠠᠳᠠᠭᠤᠯᠬᠤ) ᠭᠡᠵᠦ ᠶᠠᠪᠤᠭᠤᠯᠤᠭᠰᠠᠨ ᠴᠡᠷᠢᠭ ᠢ᠋ ᠡᠷᠭᠢᠭᠦᠯᠦᠨ ᠪᠤᠴᠠᠭᠠᠵᠤ᠂ ᠪᠦᠬᠦ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠪᠢᠳᠡ ᠵᠣᠳᠣᠬᠤ ᠨᠦᠳᠦᠬᠦ ᠶ᠋ᠢ ᠡᠰᠡᠷᠭᠦᠴᠡᠭᠰᠡᠨ ᠲᠠᠨ ᠤ᠋ ᠨᠥᠬᠥᠳ ᠢ᠋ ᠪᠠᠩᠵᠠᠳᠠᠨ(ᠪᠠᠨᠰᠠᠳᠠᠨ) ᠰᠢᠢᠳᠬᠡᠬᠦ ᠡᠯᠳᠡᠪ ᠢ᠋ᠶ᠋ᠡᠷ ᠬᠠᠪᠴᠢᠨ ᠵᠣᠪᠠᠭᠠᠬᠤ ᠦᠭᠡᠢ ᠭᠡᠵᠦ ᠠᠮᠠᠯᠠᠭᠰᠠᠨ ᠤ᠋ ᠰᠡᠭᠦᠯᠡᠷ ᠰᠠᠢ᠍ᠢ(ᠰᠠᠶᠢ) ᠵᠣᠭᠰᠣᠵᠤ ᠰᠤᠷᠭᠠᠭᠤᠯᠢ ᠬᠢᠬᠦ ᠭᠠᠵᠠᠷ ᠢ᠋ᠶ᠋ᠠᠨ ᠪᠤᠴᠠᠵᠤ ᠥᠭᠭᠦᠭᠰᠡᠨ ᠪᠢᠯᠡ᠃
— ᠪᠢᠳᠡ ᠪᠠᠬᠠᠨ ᠲᠦᠷᠭᠡᠳᠦᠯᠡ᠃ ᠲᠠ ᠨᠠᠷ ᠪᠢᠳᠡᠨ ᠢ᠋ ᠳᠡᠭᠡᠪᠡ ᠭᠡᠵᠦ ᠪᠢᠲᠡᠭᠡᠢ ᠮᠠᠭᠤ ᠰᠠᠨᠠᠭᠠᠷᠠᠢ᠃ ᠪᠢᠳᠡ ᠲᠠ ᠨᠠᠷ ᠢ᠋ ᠰᠠᠢᠨ ᠰᠤᠷᠭᠠᠭᠤᠯᠢ ᠲᠠᠢ ᠴᠡᠷᠢᠭ ᠪᠣᠯᠭᠠᠵᠤ ᠦᠵᠡᠬᠦ ᠭᠡᠵᠦ ᠲᠡᠭᠡᠵᠦ ᠪᠠᠢᠭᠰᠠᠨ ᠪᠢᠯᠡ᠃ ᠣᠳᠣ ᠡᠨᠡ ᠰᠠᠢ(ᠰᠠᠶᠢ) ᠶ᠋ᠢᠨ ᠬᠡᠷᠡᠭ ᠢ᠋ ᠬᠡᠨ ᠬᠡᠨ ᠮᠠᠨᠢ ᠴᠤ᠌ ᠬᠥᠭᠡᠭᠡᠴᠡᠯᠳᠦᠵᠦ ᠬᠡᠯᠡᠯᠴᠡᠬᠦ ᠶ᠋ᠢ ᠪᠠᠢᠭᠠᠳ᠂ ᠬᠢᠪᠡᠯ ᠵᠣᠬᠢᠬᠤ ᠬᠢᠴᠢᠶᠡᠯ ᠰᠤᠷᠭᠠᠭᠤᠯᠢ ᠪᠠᠨ ᠬᠢᠵᠦ ᠦᠵᠡᠶᠡ ᠲᠠ ᠮᠢᠨᠢ ᠭᠡᠵᠦ ᠣᠹᠢᠽᠧᠷ ᠳᠠᠷᠤᠭᠠ ᠨᠠᠷ ᠴᠡᠷᠢᠭ ᠦ᠋ᠨ ᠪᠠᠲᠤ ᠨᠢᠭᠡᠳᠦᠯᠲᠡᠢ ᠰᠠᠨᠠᠭᠠ ᠨᠢᠭᠡ ᠲᠡᠢ ᠡᠴᠡ ᠠᠶᠤᠨ ᠡᠮᠢᠶᠡᠵᠡᠢ᠃
ᠬᠠᠮᠤᠭ ᠤ᠋ᠨ ᠬᠠᠷᠭᠢᠰ ᠳᠠᠷᠤᠭᠠ ᠣᠹᠢᠽᠧᠷ ᠨᠠᠷ ᠲᠤ᠌ ᠴᠤ᠌ ᠪᠠᠲᠤ ᠨᠢᠭᠡᠳᠦᠯᠲᠡᠢ᠂ ᠡᠪ ᠰᠠᠨᠠᠭᠠ ᠨᠢᠭᠡ ᠲᠡᠢ ᠬᠠᠮᠲᠤ ᠣᠯᠠᠨ ᠤ᠋ ᠬᠦᠴᠦ ᠶ᠋ᠢ ᠦᠵᠡᠭᠦᠯᠵᠦ ᠴᠢᠳᠠᠭᠰᠠᠨ ᠲᠡᠷᠡ ᠶᠠᠪᠤᠳᠠᠯ ᠠ᠋ᠴᠠ ᠬᠣᠢᠰᠢ ᠣᠯᠠᠨ ᠴᠡᠷᠢᠭ᠄
— ᠦᠨᠡᠨ ᠵᠥᠪ ᠬᠡᠷᠡᠭ ᠲᠦ᠍ ᠭᠠᠭᠴᠠ ᠬᠥᠮᠦᠨ ᠪᠦᠭᠦᠳᠡ ᠶ᠋ᠢᠨ ᠲᠥᠯᠥᠭᠡ ᠴᠢᠷᠮᠠᠢᠵᠤ᠂ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠲᠡᠷᠡ ᠭᠠᠭᠴᠠ ᠬᠥᠮᠦᠨ ᠦ᠌ ᠲᠥᠯᠥᠭᠡ ᠡᠪ ᠰᠠᠨᠠᠭᠠ ᠨᠢᠭᠡ ᠪᠠᠢᠳᠠᠭ ᠪᠣᠯ ᠡᠢᠮᠦ ᠪᠠᠢᠳᠠᠭ ᠶᠤᠮ ᠪᠠᠢᠨᠠ ᠰᠢᠦ ᠭᠡᠵᠦ ᠬᠡᠯᠡᠯᠴᠡᠬᠦ ᠪᠣᠯᠪᠠ᠃ ᠣᠯᠠᠨ ᠴᠡᠷᠢᠭ ᠪᠠᠰᠠ ᠲᠡᠭᠦᠨ ᠡᠴᠡ ᠬᠣᠢᠰᠢ ᠣᠹᠢᠼᠧᠷ ᠳᠠᠷᠤᠭᠠ ᠨᠠᠷ᠂ ᠤᠷᠢᠳᠤ ᠶ᠋ᠢᠨ ᠠᠳᠠᠯᠢ ᠶᠠᠭᠤᠮᠠ ᠯᠠ ᠪᠣᠯ ᠵᠣᠳᠣᠬᠤ ᠵᠠᠨᠴᠢᠬᠤ ᠭᠡᠵᠦ ᠬᠠᠯᠲᠤᠰᠬᠢᠪᠡᠯ ᠬᠠᠷᠢᠶᠠᠬᠤ ᠠᠯᠬᠢᠬᠤ ᠪᠠᠨ ᠪᠠᠢᠭᠰᠠᠨ ᠢ᠋ ᠠᠵᠢᠭᠯᠠᠵᠤ ᠮᠡᠳᠡᠪᠡ᠃
ᠵᠤᠨ ᠤ᠋ ᠰᠡᠭᠦᠯᠡᠷ ᠪᠠᠰᠠ ᠨᠢᠭᠡ ᠬᠡᠷᠡᠭ ᠶᠠᠪᠤᠳᠠᠯ ᠭᠠᠷᠴᠤ᠂ ᠵᠠᠬᠢᠷᠤᠯ ᠳᠠᠷᠤᠭᠠ ᠲᠡᠭᠦᠨ ᠦ᠌ ᠤᠯᠠᠮ ᠠ᠋ᠴᠠ ᠤᠭᠴᠠᠷᠠᠪᠠ (ᠣᠭᠴᠣᠷᠠᠪᠠ)᠃ ᠳᠠᠮᠳᠢᠨ ᠲᠡᠷᠢᠭᠦᠨ ᠲᠡᠢ ᠰᠦᠷᠡᠬᠡᠢ ᠨᠠᠢᠵᠢ(ᠨᠠᠢᠵᠠ)᠂ ᠰᠠᠩ ᠤ᠋ᠨ ᠶᠠᠮᠤᠨ ᠤ᠋ ᠨᠢᠷᠪᠠ ᠬᠠᠭᠠᠷᠬᠠᠢ ᠳ᠋ᠠᠭᠪᠠ ᠭᠡᠳᠡᠭ ᠬᠥᠮᠦᠨ ᠬᠤᠵᠢᠷᠪᠤᠯᠤᠩ ᠤ᠋ᠨ ᠴᠡᠷᠢᠭ ᠲᠦ᠍ ᠮᠢᠬᠠ ᠨᠡᠢᠯᠡᠭᠦᠯᠬᠦ ᠭᠡᠷᠡ ᠬᠡᠯᠡᠯᠴᠡᠭᠡ ᠬᠢᠵᠦ᠂ ᠨᠡᠯᠢᠶᠡᠳ ᠠᠰᠢᠭ ᠬᠣᠨᠵᠢᠶᠠ ᠣᠯᠵᠤ ᠪᠠᠢᠭᠰᠠᠨ ᠨᠢ ᠳᠤᠯᠠᠭᠠᠨ ᠤᠯᠠᠷᠢᠯ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠬᠦᠷᠢᠶᠡᠨ ᠦ᠌ ᠶᠠᠷᠢᠭᠠᠴᠢᠨ(ᠶᠠᠷᠭᠠᠴᠢᠨ) ᠠ᠋ᠴᠠ ᠪᠠᠬᠠᠨ ᠦᠨᠦᠷ ᠣᠷᠣᠭᠠᠳ᠂ ᠠᠮᠢᠲᠠᠨ ᠬᠥᠮᠦᠨ ᠠᠪᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠮᠢᠬᠠ ᠶ᠋ᠢ ᠰᠤᠯᠠ ᠬᠢᠮᠳᠠ ᠦᠨᠡ ᠪᠡᠷ ᠠᠪᠴᠤ ᠵᠠᠪᠰᠠᠷ ᠠ᠋ᠴᠠ ᠮᠥᠩᠭᠥ ᠬᠣᠨᠵᠢᠨ᠂ ᠴᠡᠷᠢᠭ ᠦ᠋ᠨ ᠬᠡᠷᠡᠭᠯᠡᠬᠦ ᠮᠢᠬᠠ ᠨᠡᠢᠯᠡᠭᠦᠯᠵᠦ ᠨᠡᠯᠢᠶᠡᠳ ᠠᠮᠲᠠᠰᠢᠵᠠᠢ᠃ ᠴᠡᠷᠢᠭ ᠦ᠋ᠳ ᠦᠮᠡᠬᠡᠢ ᠪᠡᠭᠡᠭᠰᠡᠨ ᠮᠢᠬᠠ ᠭᠡᠵᠦ ᠬᠡᠳᠦᠢ ᠭᠣᠮᠣᠳᠠᠯ ᠭᠠᠷᠭᠠᠪᠠᠴᠤ᠂ ᠵᠠᠬᠢᠷᠤᠯ ᠳᠠᠷᠤᠭᠠ ᠨᠠᠷ ᠴᠠᠭ ᠤ᠋ᠨ ᠤᠷᠢᠨ ᠳᠤᠯᠠᠭᠠᠨ ᠳ᠋ᠤ᠌ ᠠᠷᠭᠠ ᠦᠭᠡᠢ ᠭᠡᠵᠦ ᠶᠡᠷᠦ ᠲᠣᠭᠣᠬᠤ ᠦᠭᠡᠢ ᠪᠠᠢᠵᠠᠢ᠃
ᠮᠢᠬᠠ ᠨᠡᠢᠯᠡᠭᠦᠯᠳᠡᠭ ᠲᠡᠷᠡ ᠬᠠᠭᠠᠷᠬᠠᠢ ᠳ᠋ᠠᠭᠪᠠ᠂ ᠰᠠᠷᠠ ᠳᠣᠳᠣᠮ ᠴᠡᠷᠢᠭ ᠦ᠋ᠨ ᠮᠢᠬᠠᠨ ᠳ᠋ᠤ᠌ ᠣᠯᠭᠣᠬᠤ ᠮᠥᠩᠭᠥ ᠶ᠋ᠢ ᠲᠣᠭᠠ ᠶᠣᠰᠣᠭᠠᠷ ᠠᠪᠤᠭᠠᠳ᠂ ᠡᠨᠡᠬᠡᠨ ᠲᠡᠷᠡᠬᠡᠨ ᠢ᠋ᠶ᠋ᠡᠷ ᠰᠢᠯᠲᠠᠵᠤ ᠭᠠᠭᠴᠠ ᠨᠢᠭᠡ ᠡᠳᠦᠷ ᠮᠢᠬᠠ ᠲᠠᠰᠤᠯᠳᠠᠭᠤᠯᠵᠤ ᠴᠡᠷᠢᠭ ᠢ᠋ ᠮᠢᠬᠠ ᠱᠥᠯᠥ ᠦᠭᠡᠢ ᠥᠨᠵᠢᠭᠦᠯᠳᠡᠭ ᠪᠠᠢᠯᠠ᠃ ᠲᠡᠭ ᠲᠡᠭᠡᠭᠰᠡᠭᠡᠷ ᠨᠢᠭᠡᠨ ᠡᠳᠦᠷ ᠱᠠᠯ ᠦᠮᠡᠬᠡᠢ ᠮᠢᠬᠠ ᠠᠪᠴᠢᠷᠠᠭᠰᠠᠨ ᠢ᠋ ᠬᠣᠷᠢᠶᠠᠨ ᠤ᠋ ᠵᠢᠵᠢᠭᠦᠷ ᠠᠪᠬᠤ ᠦᠭᠡᠢ ᠭᠡᠵᠦ ᠮᠠᠷᠭᠤᠯᠳᠤᠨ ᠪᠤᠴᠠᠭᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠬᠣᠶᠠᠷ ᠬᠣᠨᠣᠭ ᠮᠢᠬᠠ ᠲᠠᠰᠤᠯᠳᠠᠵᠤ᠂ ᠴᠡᠷᠢᠭ ᠭᠤᠯᠢᠷ᠂ ᠥᠭᠡᠬᠦ ᠶ᠋ᠢᠨ ᠲᠣᠰᠣ ᠪᠠᠷ ᠬᠢᠴᠡᠯᠡᠭᠰᠡᠨ ᠴᠠᠢ ᠪᠠᠷ ᠥᠯ ᠵᠠᠯᠭᠠᠵᠤ᠂ ᠭᠤᠷᠪᠠ ᠳ᠋ᠠᠬᠢ ᠡᠳᠦᠷ ᠬᠦᠷᠢᠶᠡᠨ ᠡᠴᠡ ᠬᠣᠶᠠᠷ ᠲᠡᠷᠭᠡ ᠮᠢᠬᠠ ᠠᠴᠢᠵᠤ ᠢᠷᠡᠭᠰᠡᠨ ᠨᠢ ᠲᠡᠷᠡ ᠲᠤᠬᠠᠢ ᠬᠣᠷᠢᠶᠠ ᠵᠢᠵᠢᠭᠦᠷ ᠰᠦᠬᠡ ᠪᠠᠢᠵᠠᠢ᠃ ᠳᠡᠭᠡᠷᠡ ᠡᠴᠡ ᠦᠬᠡᠷ ᠦ᠋ᠨ ᠨᠢᠭᠡ ᠨᠢᠭᠡ ᠥᠷᠥᠭᠡᠯ ᠰᠢᠨᠡ ᠮᠢᠬᠠ ᠪᠠᠷ ᠥᠩᠭᠡᠯᠡᠭᠰᠡᠨ᠂ ᠥᠳᠥ ᠳᠦᠭᠦᠷᠦᠭᠰᠡᠨ ᠦᠮᠡᠬᠡᠢ ᠮᠢᠬᠠ ᠠᠪᠴᠢᠷᠠᠭᠰᠠᠨ ᠢ᠋ ᠦᠵᠡᠪᠡᠯ ᠬᠣᠶᠠᠷ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠭᠣᠯᠣᠵᠤ ᠪᠤᠴᠠᠭᠠᠭᠰᠠᠨ ᠮᠢᠬᠠ ᠢᠷᠡᠯᠴᠡᠵᠡᠢ᠃ ᠰᠦᠬᠡ ᠲᠡᠷᠡ ᠥᠳᠥ ᠲᠡᠢ ᠮᠢᠬᠠ ᠶ᠋ᠢ ᠬᠡᠷᠬᠢᠪᠡᠴᠦ ᠬᠦᠯᠢᠶᠡᠨ ᠠᠪᠬᠤ ᠦᠭᠡᠢ ᠭᠡᠪᠡ᠃
ᠬᠠᠭᠠᠷᠬᠠᠢ ᠳ᠋ᠠᠭᠪᠠ ᠶ᠋ᠢᠨ ᠬᠠᠮᠢᠶᠠᠲᠠᠨ ᠨᠢᠭᠡ ᠳᠦᠯᠡᠢ ᠯᠠᠮᠠ ᠲᠡᠷᠡ ᠮᠢᠬᠠ ᠶ᠋ᠢ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠪᠠᠢᠵᠠᠢ᠃ ᠵᠢᠵᠢᠭᠦᠷ ᠢ᠋ ᠮᠢᠬᠠ ᠠᠪᠬᠤ ᠦᠭᠡᠢ ᠭᠡᠬᠦ ᠳ᠋ᠦ᠍ᠨᠢ ᠴᠢᠮᠠᠶ᠋ᠢ (ᠴᠢᠮᠠ ᠶ᠋ᠢ) ᠵᠠᠬᠢᠷᠤᠯ ᠳᠠᠮᠳᠢᠨ ᠭᠤᠸᠠᠢ ᠳ᠋ᠤ᠌ ᠬᠡᠯᠡᠵᠦ ᠠᠪᠬᠠᠭᠤᠯᠤᠨᠠ ᠳᠠ ᠭᠡᠵᠦ ᠳᠠᠮᠳᠢᠨ ᠲᠡᠷᠢᠭᠦᠨ ᠳ᠋ᠦ᠍ ᠣᠴᠢᠭᠠᠳ ᠲᠡᠷᠡ ᠯᠠᠮᠠ ᠥᠨᠥᠬᠢ ᠮᠢᠬᠠ ᠶ᠋ᠢ ᠲᠣᠭᠠ ᠶᠣᠰᠣᠭᠠᠷ ᠬᠦᠯᠢᠶᠡᠨ ᠠᠪ ᠭᠡᠰᠡᠨ ᠵᠤᠷᠪᠤᠰ ᠪᠢᠴᠢᠭ ᠠᠪᠴᠢᠷᠠᠪᠠ᠃ ᠲᠡᠭᠡᠭᠡᠳ ᠬᠣᠷᠢᠶᠠ ᠵᠢᠵᠢᠭᠦᠷ ᠢ᠋ ᠠᠷᠭᠠᠳᠠᠵᠤ ᠲᠡᠷᠡ ᠯᠠᠮᠠ᠂
— ᠡᠨᠡ ᠠᠪᠴᠢᠷᠠᠭᠰᠠᠨ ᠮᠢᠬᠠᠨ ᠳ᠋ᠤ᠌ ᠨᠢᠭᠡ ᠦᠬᠡᠷ ᠦ᠋ᠨ ᠰᠢᠨᠡ ᠰᠠᠢᠨ ᠮᠢᠬᠠ ᠪᠣᠢ᠃ ᠲᠡᠭᠦᠨ ᠢ᠋ᠶ᠋ᠡᠷ ᠬᠣᠷᠢᠶᠠ ᠵᠢᠵᠢᠭᠦᠷ ᠦ᠋ᠨ ᠵᠡᠷᠭᠡ ᠠᠯᠪᠠᠨ ᠤ᠋ ᠬᠥᠮᠦᠰ ᠬᠣᠭᠣᠯᠠ ᠬᠢᠬᠦ ᠳ᠋ᠦ᠍ ᠪᠠᠷᠲᠠᠭᠠ ᠪᠠᠷ ᠬᠦᠷᠦᠨᠡ᠃ ᠳ᠋ᠠᠭᠪᠠ ᠭᠤᠸᠠᠢ᠂ ᠤᠷᠵᠢ ᠶ᠋ᠢᠨ ᠴᠠᠭᠠᠳᠤ ᠡᠳᠦᠷ ᠦ᠋ᠨ ᠲᠡᠷᠡ ᠮᠢᠬᠠ ᠶ᠋ᠢ ᠡᠨᠡ ᠰᠢᠨᠡ ᠮᠢᠬᠠ ᠲᠠᠢ ᠬᠣᠯᠢᠵᠤ ᠬᠥᠰᠬᠥᠯᠡᠭᠡᠳ ᠭᠤᠯᠢᠷ ᠲᠠᠢ ᠬᠣᠭᠣᠯᠠ ᠬᠢᠵᠦ ᠥᠭᠪᠡᠯ ᠴᠡᠷᠢᠭ ᠦ᠋ᠳ ᠵᠠᠯᠭᠢᠵᠤ ᠣᠷᠭᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠭᠡᠵᠦ ᠬᠡᠯᠡᠭᠦᠯᠦᠭᠰᠡᠨ᠃ ᠪᠠᠰᠠ ᠬᠣᠷᠢᠶᠠ ᠵᠢᠵᠢᠭᠦᠷ ᠲᠦ᠍ ᠰᠠᠮᠤᠨᠠ ᠪᠣᠣᠪᠣ᠂ ᠰᠠᠷᠠᠨ ᠪᠣᠭᠣᠷᠰᠣᠭ * ᠥᠭᠭᠦᠭᠡᠷᠡᠢ ᠭᠡᠵᠦ ᠡᠭᠦᠨ ᠢ᠋ ᠥᠭᠭᠦᠭᠰᠡᠨ ᠭᠡᠬᠦ ᠳ᠋ᠦ᠍ᠨᠢ ᠰᠦᠬᠡ ᠶ᠋ᠢᠨ ᠴᠢᠷᠠᠢ ᠴᠢᠰ ᠤᠯᠠᠭᠠᠨ ᠪᠣᠯᠵᠤ᠂ ᠰᠤᠮᠤᠨ ᠵᠢᠵᠢᠭᠦᠷ ᠢ᠋ ᠬᠤᠸᠠᠷᠠᠨ ᠳ᠋ᠤ᠌ ᠠᠮᠠᠷᠠᠵᠤ ᠪᠠᠢᠭᠰᠠᠨ ᠪᠦᠬᠦ ᠴᠡᠷᠢᠭ ᠢ᠋ ᠳᠠᠭᠤᠳᠠ ᠭᠡᠵᠦ ᠲᠤᠰᠢᠶᠠᠭᠠᠳ᠂ ᠴᠡᠷᠢᠭ ᠢ᠋ ᠴᠤᠭᠯᠠᠵᠤ ᠢᠷᠡᠬᠦ ᠳ᠋ᠦ᠍᠄
— ᠨᠥᠬᠥᠳ ᠠ᠋! ᠮᠠᠨᠠᠢ(ᠮᠠᠨ ᠤ᠋) ᠬᠦᠨᠡᠰᠦᠨ ᠦ᠌ ᠮᠢᠬᠠ ᠨᠡᠢᠯᠡᠭᠦᠯᠳᠡᠭ ᠬᠠᠭᠠᠷᠬᠠᠢ ᠳ᠋ᠠᠭᠪᠠ ᠭᠡᠭᠴᠢ ᠬᠥᠮᠦᠨ ᠡᠨᠡ ᠦᠮᠡᠬᠡᠢ ᠪᠡᠭᠡᠭᠰᠡᠨ ᠮᠢᠬᠠ ᠶ᠋ᠢ ᠴᠡᠷᠢᠭ ᠦ᠋ᠳ ᠲᠦ᠍ ᠭᠤᠯᠢᠷ ᠲᠠᠢ ᠬᠣᠭᠣᠯᠠ ᠬᠢᠵᠦ ᠥᠭᠪᠡᠯ ᠵᠠᠯᠭᠢᠵᠤ ᠣᠷᠬᠢᠨᠠ ᠭᠡᠵᠦ ᠬᠡᠯᠡᠭᠦᠯᠵᠡᠢ᠃ ᠡᠨᠡ ᠪᠠᠢᠨᠠ᠂ ᠲᠡᠷᠡ ᠮᠢᠬᠠ ᠨᠢ ᠭᠡᠵᠦ ᠲᠡᠷᠭᠡᠨ ᠳᠡᠭᠡᠷᠡ ᠪᠣᠷᠣ ᠲᠣᠭᠣᠰᠣ ᠪᠣᠯᠤᠭᠰᠠᠨ ᠲᠠᠭᠠᠷ ᠢ᠋ ᠰᠡᠬᠦᠵᠦ ᠥᠩᠭᠡᠯᠡᠵᠦ ᠬᠤᠴᠢᠭᠰᠠᠨ ᠦᠬᠡᠷ ᠦ᠋ᠨ ᠥᠷᠥᠭᠡᠯ ᠢ᠋ ᠵᠠᠢᠯᠠᠭᠤᠯᠤᠭᠠᠳ᠂ ᠤᠷᠵᠢ ᠶ᠋ᠢᠨ ᠴᠠᠭᠠᠳᠤ ᠡᠳᠦᠷ ᠭᠣᠯᠣᠵᠤ ᠪᠤᠴᠠᠭᠠᠭᠰᠠᠨ᠂ ᠦᠲᠦᠴᠢᠭᠰᠡᠨ ᠱᠠᠯ ᠦᠮᠡᠬᠡᠢ ᠮᠢᠬᠠ ᠰᠡᠬᠦᠵᠦ ᠥᠭᠦᠯᠡᠪᠡᠰᠦ᠂ ᠳᠡᠷᠭᠡᠳᠡ ᠪᠠᠢᠭᠰᠠᠨ ᠴᠡᠷᠢᠭ ᠦ᠋ᠳ ᠫᠦᠬᠡ ᠫᠠᠬᠠ ᠭᠡᠵᠦ ᠬᠠᠮᠠᠷ ᠢ᠋ᠶ᠋ᠠᠨ ᠪᠠᠷᠢᠵᠤ ᠤᠬᠤᠷᠢᠪᠠ᠃
— ᠦᠮᠡᠬᠡᠢ ᠦᠨᠦᠷ ᠤᠲᠤᠵᠤ ᠪᠠᠢᠭᠠ ᠶ᠋ᠢ ᠨᠢ ᠲᠠ ᠨᠠᠷ ᠮᠡᠳᠡᠵᠦ ᠪᠠᠢᠨᠠᠤ? ᠳ᠋ᠠᠭᠪᠠ ᠪᠠᠰᠠ ᠦᠮᠡᠬᠡᠢ ᠮᠢᠬᠠ ᠬᠦᠯᠢᠶᠡᠨ ᠠᠪᠬᠤ ᠵᠢᠵᠢᠭᠦᠷ ᠲᠦ᠍ ᠱᠠᠩ ᠪᠣᠯᠭᠠᠵᠤ ᠰᠠᠮᠤᠨᠠ ᠪᠣᠣᠪᠣ᠂ ᠰᠠᠷᠠᠨ ᠪᠣᠭᠣᠷᠰᠣᠭ ᠶᠠᠪᠤᠭᠤᠯᠵᠠᠢ᠃ ᠡᠨᠡ ᠪᠠᠢᠨᠠ᠃ ᠲᠠ ᠪᠦᠬᠦᠨ ᠦ᠌ ᠡᠮᠦᠨᠡ ᠦᠮᠡᠬᠡᠢ ᠦᠨᠦᠷ ᠬᠠᠩᠬᠤᠯᠵᠤ ᠪᠠᠢᠭᠠ ᠡᠨᠡ ᠮᠢᠬᠠ ᠶ᠋ᠢ ᠤᠷᠵᠢ ᠡᠳᠦᠷ ᠦ᠋ᠨ ᠴᠠᠭᠠᠳᠤ ᠡᠳᠦᠷ ᠦ᠋ᠨ ᠵᠢᠵᠢᠭᠦᠷ ᠭᠣᠯᠣᠵᠤ ᠪᠤᠴᠠᠭᠠᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠡᠳᠦᠷ ᠲᠦ᠍ ᠲᠠ ᠨᠠᠷ ᠲᠤ᠌ ᠰᠠᠢᠨ ᠮᠢᠬᠠ ᠵᠠᠯᠭᠠᠭᠤᠯᠵᠤ ᠥᠭᠬᠦ ᠬᠦᠴᠦᠨ ᠨᠢ ᠬᠦᠷᠦᠭᠰᠡᠨ ᠦᠭᠡᠢ ᠪᠢᠯᠡ᠃ ᠪᠢ ᠬᠡᠷᠪᠡ ᠥᠨᠥᠳᠥᠷ ᠲᠡᠷᠡ ᠡᠳᠦᠷ ᠭᠣᠯᠣᠭᠰᠠᠨ ᠮᠢᠬᠠ ᠶ᠋ᠢ ᠠᠪᠬᠤ ᠦᠭᠡᠢ ᠭᠡᠵᠦ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠵᠢᠳᠬᠦᠵᠦ ᠪᠤᠴᠠᠭᠠᠪᠠᠯ ᠲᠠ ᠨᠠᠷ ᠥᠨᠥᠳᠥᠷ ᠮᠢᠬᠠ ᠱᠥᠯᠥ ᠦᠭᠡᠢ ᠬᠣᠨᠣᠬᠤ ᠪᠣᠯᠪᠠᠤ? ᠭᠡᠵᠦ ᠰᠠᠨᠠᠭᠠ ᠵᠣᠪᠠᠵᠤ ᠪᠠᠢᠨᠠ᠃ ᠣᠳᠣ ᠪᠢ ᠡᠨᠡ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠮᠠᠭᠤᠬᠠᠢ ᠮᠢᠬᠠ ᠠᠪᠴᠢᠷᠠᠭᠰᠠᠨ ᠢ᠋ ᠰᠢᠲᠠᠭᠠᠨ ᠤᠰᠠᠳᠬᠠᠬᠤ ᠠᠺᠲ ᠪᠢᠴᠢᠭ ᠢ ᠵᠣᠬᠢᠶᠠᠭᠠᠳ᠂ ᠡᠨᠡ ᠦᠮᠡᠬᠡᠢ ᠮᠢᠬᠠ ᠶ᠋ᠢ ᠬᠣᠭ ᠠᠰᠬᠠᠵᠤ ᠬᠠᠶᠠᠳᠠᠭ ᠭᠠᠵᠠᠷ ᠠᠪᠠᠴᠢᠨ ᠠᠰᠬᠠᠵᠤ ᠰᠢᠲᠠᠭᠠᠬᠤ ᠰᠠᠨᠠᠯ ᠭᠠᠷᠭᠠᠵᠤ ᠪᠠᠢᠨᠠ᠃ ᠲᠡᠭᠡᠭᠡᠳ᠁ ᠭᠡᠲᠡᠯᠡ ᠣᠯᠠᠨ ᠴᠡᠷᠢᠭ ᠬᠠᠰᠬᠢᠷᠤᠯᠳᠤᠨ᠂
— ᠲᠡᠭᠡᠭᠡᠳ ᠪᠢᠳᠡ ᠪᠦᠭᠦᠳᠡᠭᠡᠷ ᠬᠣᠲᠠ ᠣᠷᠣᠵᠤ ᠴᠡᠷᠢᠭ ᠦ᠋ᠨ ᠶᠠᠮᠤᠨ ᠤ᠋ ᠰᠠᠢᠳ ᠲᠤ᠌ ᠡᠨᠡ ᠤᠴᠢᠷ ᠢ᠋ ᠭᠠᠷᠭᠠᠵᠤ ᠡᠰᠡᠷᠭᠦᠴᠡᠯ ᠮᠡᠳᠡᠭᠦᠯᠦᠶᠡ ᠬᠡᠮᠡᠭᠡᠳ᠂ ᠳᠦᠯᠡᠢ ᠯᠠᠮᠠ ᠶ᠋ᠢ ᠲᠦᠯᠬᠢᠨ ᠵᠠᠢᠯᠠᠭᠤᠯᠵᠤ ᠥᠨᠥᠬᠢ ᠬᠣᠶᠠᠷ ᠲᠡᠷᠭᠡ ᠦᠮᠡᠬᠡᠢ ᠮᠢᠬᠠ ᠶ᠋ᠢ ᠬᠣᠭ ᠳᠡᠭᠡᠷᠡ ᠠᠪᠠᠴᠢᠪᠠᠯ ᠰᠦᠬᠡ᠂ ᠶᠠᠭᠤᠮᠠ ᠠᠭᠤᠯᠬᠤ ᠭᠠᠵᠠᠷ ᠠ᠋ᠴᠠ ᠺᠧᠷᠣᠰᠢᠨ ᠲᠣᠰᠣ ᠣᠯᠭᠣᠵᠤ ᠲᠠᠷᠭᠤᠨ ᠴᠠᠭᠠᠨ ᠥᠳᠥ ᠳᠦᠭᠦᠷᠦᠭᠰᠡᠨ ᠲᠡᠷᠡ ᠦᠮᠡᠬᠡᠢ ᠮᠢᠬᠠ ᠳᠡᠭᠡᠷᠡ ᠠᠰᠬᠠᠭᠤᠯᠤᠨ ᠰᠢᠳᠠᠭᠠᠯᠭᠠᠭᠣ᠌ᠠ᠂ ᠴᠡᠷᠢᠭ ᠦ᠋ᠳ᠂
— ᠣᠳᠣ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠬᠣᠲᠠ ᠣᠷᠣᠶᠠ! ᠭᠡᠵᠦ ᠵᠢᠭᠰᠠᠪᠠ᠃ ᠵᠢᠵᠢᠭᠦᠷ ᠨᠢᠸᠠᠯ ᠤ᠋ᠳ ᠬᠤᠸᠠᠷᠠᠨ ᠢ᠋ ᠡᠷᠭᠢᠵᠦ ᠨᠢᠭᠡ ᠴᠦ᠍ ᠴᠡᠷᠢᠭ ᠢ᠋ ᠦᠯᠡᠳᠡᠭᠡᠯ ᠦᠭᠡᠢ ᠣᠯᠠᠨ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠨᠢᠭᠡᠨ ᠰᠠᠨᠠᠭᠠ ᠪᠠᠷ ᠬᠦᠷᠢᠶᠡ ᠣᠷᠣᠵᠠᠭᠠ ᠭᠡᠵᠦ ᠬᠤᠵᠢᠷᠪᠤᠯᠤᠩ ᠤ᠋ᠨ ᠪᠦᠬᠦ ᠴᠡᠷᠢᠭ ᠰᠤᠮᠤᠨ ᠰᠤᠮᠤᠨ ᠢ᠋ᠶ᠋ᠠᠷ ᠵᠢᠭᠰᠠᠭᠠᠣ᠌ᠠ ᠬᠣᠲᠠ ᠶ᠋ᠢᠨ ᠵᠦᠭ ᠠᠯᠬᠤᠵᠠᠢ᠃
ᠳᠠᠮᠳᠢᠨ ᠲᠡᠷᠢᠭᠦᠨ ᠶᠡᠬᠡᠯᠡ(ᠶᠡᠬᠡ ᠯᠡ) ᠰᠠᠨᠳᠤᠷᠴᠤ᠂ ᠱᠲ᠋ᠠᠪ ᠤ᠋ᠨ ᠣᠹᠢᠼᠧᠷ ᠳᠥᠷᠪᠡᠨ ᠠᠢᠮᠠᠭ ᠤ᠋ᠨ ᠲᠥᠯᠥᠭᠡᠨ ᠦ᠌ ᠲᠦᠰᠢᠮᠡᠯ ᠢ᠋ ᠳᠠᠭᠤᠳᠠᠨ ᠢᠷᠡᠭᠦᠯᠵᠦ᠂ ᠲᠡᠳᠡᠨ ᠦ᠌ ᠬᠠᠮᠲᠤ ᠴᠡᠷᠢᠭ ᠦ᠋ᠨ ᠬᠣᠢᠨᠠ ᠠ᠋ᠴᠠ ᠳᠠᠪᠬᠢᠵᠤ ᠣᠴᠢᠭᠠᠳ ᠭᠤᠶᠤᠵᠤ ᠥᠭᠦᠯᠡᠷᠦᠨ᠄
— ᠣᠯᠠᠨ ᠴᠡᠷᠢᠭ ᠮᠢᠨᠢ᠂ ᠲᠣᠭᠲᠠᠵᠤ ᠬᠠᠢᠷᠠᠯᠠ! ᠮᠠᠨ ᠢ᠋ ᠪᠡᠨ ᠥᠷᠥᠰᠢᠶᠡᠵᠦ ᠬᠠᠢᠷᠠᠯᠠ! ᠪᠢᠳᠡ ᠰᠠᠢᠨ ᠮᠢᠬᠠ ᠣᠯᠵᠤ ᠲᠠ ᠨᠠᠷ ᠲᠤ᠌ ᠰᠠᠢᠬᠠᠨ ᠬᠣᠭᠣᠯᠠ ᠴᠠᠳᠲᠠᠯᠠ ᠢᠳᠡᠭᠦᠯᠦᠶᠡ᠂ ᠬᠤᠸᠠᠷᠠᠨ ᠳ᠋ᠠᠭᠠᠨ ᠪᠤᠴᠠᠵᠤ ᠬᠠᠢᠷᠠᠯᠠ! ᠣᠯᠠᠨ ᠲᠦᠮᠡᠨ ᠴᠡᠷᠢᠭ ᠦ᠋ᠳ ᠮᠢᠨᠢ! ᠭᠡᠵᠦ ᠭᠤᠶᠤᠪᠠᠰᠤ᠄
— ᠦᠭᠡᠢ᠂ ᠪᠢᠳᠡ ᠬᠦᠷᠬᠦ ᠭᠡᠰᠡᠨ ᠭᠠᠵᠠᠷ ᠲᠠᠭᠠᠨ ᠬᠦᠷᠴᠦ᠂ ᠬᠡᠯᠡᠬᠦ ᠭᠡᠰᠡᠨ ᠦᠭᠡ ᠪᠡᠨ ᠬᠡᠯᠡᠨᠡ᠃ ᠨᠥᠬᠥᠳ ᠶᠠᠪᠤᠭᠠᠳ ᠪᠠᠢ! ᠡᠨᠳᠡ ᠴᠠᠭ ᠭᠠᠷᠤᠵᠠᠲᠠᠭᠠᠣ᠌ᠠ ᠶᠠᠭᠠᠬᠢᠬᠤ ᠪᠣᠢ? ᠭᠡᠵᠦ ᠴᠡᠷᠢᠭ ᠦ᠋ᠳ ᠳᠤᠤᠭᠠᠷᠴᠠᠭᠠᠣ᠌ᠠ (ᠳᠤᠤᠭᠠᠷᠴᠠᠭᠠᠭᠠᠳ)᠂ ᠬᠣᠷᠢᠶᠠ ᠴᠡᠷᠢᠭ ᠲᠣᠭᠣᠰᠣᠲᠤ ᠵᠠᠮ ᠢ᠋ᠶ᠋ᠠᠷ ᠬᠦᠷᠢᠶᠡᠨ ᠦ᠌ ᠵᠦᠭ ᠠᠯᠬᠤᠯᠠᠨ ᠬᠥᠳᠡᠯᠪᠡ᠃
ᠴᠡᠷᠢᠭ ᠦ᠋ᠨ ᠶᠠᠮᠤᠨ ᠤ᠋ ᠡᠮᠦᠨᠡ ᠬᠤᠵᠢᠷᠪᠤᠯᠤᠩ ᠤ᠋ᠨ ᠴᠡᠷᠢᠭ ᠵᠢᠭᠰᠠᠨ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍ ᠲᠦᠰᠢᠮᠡᠳ ᠶᠡᠬᠡᠯᠡ ᠰᠣᠴᠢᠨ ᠰᠠᠨᠳᠤᠷᠴᠤ᠂ ᠴᠡᠷᠢᠭ ᠦ᠋ᠨ ᠶᠠᠮᠤᠨ ᠤ᠋ ᠰᠠᠢᠳ ᠳᠠᠯᠠᠢ ᠸᠠᠩ ᠢ᠋ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ ᠣᠯᠠᠨ ᠴᠡᠷᠢᠭ ᠨᠢᠵᠢᠭᠢᠨᠡᠲᠡᠯᠡ ᠬᠠᠰᠬᠢᠷᠤᠯᠳᠤᠵᠤ᠂ ᠳᠠᠯᠠᠢ ᠸᠠᠩ ᠰᠦᠷᠳᠡᠵᠦ ᠶᠡᠬᠡ ᠵᠠᠩ ᠲᠠᠢ ᠬᠡᠪᠯᠡᠬᠦᠨ ᠪᠠᠢᠳᠠᠯ ᠬᠡᠳᠦᠢᠨ ᠠᠯᠠᠭᠠ ᠪᠣᠯᠵᠤ ᠴᠢᠷᠠᠢ ᠳ᠋ᠤ᠌ ᠠᠶᠤᠭᠰᠠᠨ ᠬᠤᠯᠴᠠᠢᠬᠰᠠᠨ ᠪᠠᠢᠳᠠᠯ ᠮᠡᠳᠡᠭᠳᠡᠪᠡ᠃
ᠣᠯᠠᠨ ᠴᠡᠷᠢᠭ ᠦ᠋ᠨ ᠵᠢᠭᠰᠠᠭᠠᠯ ᠳᠤᠮᠳᠠ ᠠ᠋ᠴᠠ ᠨᠢᠭᠡ ᠡᠪᠦᠭᠡᠨ ᠴᠡᠷᠢᠭ ᠭᠠᠷᠴᠤ᠂ ᠤᠯᠤᠰ ᠤ᠋ᠨ ᠰᠠᠩ ᠠ᠋ᠴᠠ ᠴᠡᠷᠢᠭ ᠦ᠋ᠨ ᠬᠣᠭᠣᠯᠠ ᠬᠦᠨᠡᠰᠦᠨ ᠳ᠋ᠦ᠍ ᠲᠠᠯᠪᠢᠨ ᠣᠯᠭᠣᠳᠠᠭ ᠮᠥᠩᠭᠥ ᠶ᠋ᠢ ᠵᠠᠪᠰᠠᠷ ᠬᠣᠭᠣᠷᠣᠨᠳᠣ ᠠ᠋ᠴᠠ ᠳᠠᠷᠤᠭᠠ ᠲᠦᠰᠢᠮᠡᠳ ᠢᠳᠡᠵᠦ ᠴᠡᠷᠢᠭ ᠦ᠋ᠨ ᠬᠣᠭᠣᠯᠠ ᠮᠠᠰᠢ ᠮᠠᠭᠤ ᠪᠠᠢᠭᠠ ᠶ᠋ᠢ ᠲᠣᠳᠣᠷᠬᠠᠢ ᠲᠣᠮᠣᠷᠠᠨ ᠢ᠋ᠶ᠋ᠠᠷ ᠲᠠᠢᠯᠪᠤᠷᠢᠯᠠᠨ ᠬᠡᠯᠡᠪᠡᠯ᠂ ᠰᠠᠢᠳ ᠳᠠᠯᠠᠢ ᠸᠠᠩ᠂ ᠣᠯᠠᠨ ᠴᠡᠷᠢᠭ ᠡᠴᠡ ᠰᠦᠷᠳᠡᠵᠦ ᠨᠢᠳᠦ ᠪᠡᠨ ᠠᠨᠢᠭᠠᠨᠠᠨ᠂ ᠳᠡᠮᠡᠢ ᠯᠡ ᠬᠡ ᠬᠡ ᠬᠡ ᠭᠡᠵᠦ ᠬᠢᠴᠢᠶᠡᠩᠭᠦᠢᠯᠡᠨ ᠰᠣᠨᠣᠰᠴᠤ ᠪᠠᠢᠭᠠ ᠠᠩᠬᠠᠷᠤᠯᠲᠠᠢ ᠪᠠᠢᠳᠠᠯ ᠭᠠᠷᠭᠠᠪᠠ᠃
— ᠡᠪᠦᠭᠡᠨ ᠭᠤᠸᠠᠢ ᠵᠥᠪ ᠬᠡᠯᠡᠵᠡᠢ᠃ ᠵᠦᠢ ᠲᠡᠢ! ᠰᠠᠩ ᠤ᠋ᠨ ᠮᠥᠩᠭᠥ ᠢᠳᠡᠵᠦ ᠴᠡᠷᠢᠭ ᠠᠷᠠᠳ ᠢ᠋ ᠬᠣᠬᠢᠷᠠᠭᠤᠯᠳᠠᠭ ᠳᠠᠷᠤᠭᠠ ᠵᠠᠬᠢᠷᠤᠯ ᠢ᠋ ᠬᠠᠯᠠᠵᠤ ᠥᠭ! ᠪᠢᠳᠡᠨ ᠲᠡᠢ ᠬᠥᠮᠦᠨ ᠰᠢᠭ ᠬᠠᠷᠢᠯᠴᠠᠬᠤ ᠪᠣᠯᠭᠠᠵᠤ ᠥᠭ! ᠭᠡᠵᠦ ᠣᠯᠠᠨ ᠴᠡᠷᠢᠭ ᠦ᠋ᠨ ᠬᠠᠰᠬᠢᠷᠤᠯᠳᠤᠬᠤ ᠳ᠋ᠤ᠌ ᠰᠠᠨᠳᠤᠷᠤᠭᠰᠠᠨ ᠰᠠᠢᠳ ᠳᠠᠷᠤᠢ ᠵᠥᠪᠰᠢᠶᠡᠷᠡᠨ ᠬᠦᠯᠢᠶᠡᠵᠦ ᠰᠢᠨᠡ ᠵᠠᠬᠢᠷᠤᠯ ᠲᠣᠬᠣᠭᠠᠨ ᠲᠣᠮᠢᠯᠠᠵᠤ ᠥᠭᠬᠦ ᠪᠡᠷ ᠠᠮᠠᠯᠠᠵᠤ — ᠣᠳᠣ ᠪᠢ ᠲᠦᠰᠢᠮᠡᠯ ᠶᠠᠪᠤᠭᠤᠯᠵᠤ ᠲᠠ ᠨᠠᠷ ᠲᠤ᠌ ᠰᠠᠢᠨ ᠬᠣᠭᠣᠯᠠ ᠬᠦᠨᠡᠰᠦ ᠨᠡᠢᠯᠡᠭᠦᠯᠵᠦ ᠥᠭᠭᠦᠶᠡ᠃ ᠬᠤᠸᠠᠷᠠᠨ ᠳ᠋ᠠᠭᠠᠨ ᠪᠤᠴᠠᠬᠤ ᠠᠵᠢᠶᠠᠮᠤ — ᠪᠢ ᠵᠣᠬᠢᠰ ᠢ᠋ ᠦᠵᠡᠵᠦ ᠠᠷᠭᠠ ᠵᠦᠢ ᠶ᠋ᠢ ᠪᠣᠳᠣᠵᠤ ᠦᠵᠡᠶᠡ ᠭᠡᠵᠦ ᠠᠯᠠᠭᠠ ᠬᠠᠪᠰᠤᠷᠤᠨ ᠮᠡᠬᠦᠢᠵᠦ ᠶᠣᠰᠣᠯᠠᠪᠠ᠃
ᠴᠡᠷᠢᠭ ᠦ᠋ᠳ ᠵᠣᠷᠢᠭᠰᠠᠨ ᠭᠠᠵᠠᠷ ᠲᠠᠭᠠᠨ ᠬᠦᠷᠴᠦ ᠵᠠᠷᠭᠤ ᠪᠠᠨ ᠠᠪᠤᠭᠰᠠᠨ ᠳ᠋ᠠᠭᠠᠨ ᠶᠡᠬᠡᠯᠡ ᠪᠠᠶᠠᠷᠲᠠᠢ ᠶᠠᠷᠢᠶᠠ ᠬᠥᠷ ᠪᠣᠯᠵᠤ᠂ ᠲᠣᠮᠣ ᠲᠣᠮᠣ ᠪᠠᠷ ᠠᠯᠬᠤᠯᠠᠨ ᠬᠤᠵᠢᠷᠪᠤᠯᠤᠩ ᠳ᠋ᠠᠭᠠᠨ ᠪᠤᠴᠠᠬᠤ ᠵᠠᠮ ᠵᠠᠭᠤᠷᠠ᠂ ᠰᠦᠬᠡ ᠶ᠋ᠢᠨ ᠠᠴᠢ ᠪᠠᠷ ᠡᠢᠮᠦ ᠪᠣᠯᠤᠯᠠ᠃ ᠡᠰᠡ ᠲᠡᠭᠡᠪᠡᠯ ᠮᠢᠬᠠ ᠦᠭᠡᠢ ᠮᠠᠴᠠᠭ ᠪᠠᠷᠢᠵᠤ ᠰᠠᠭᠤᠬᠤ ᠠᠭᠰᠠᠨ᠃ ᠦᠭᠡᠢ ᠪᠣᠯ ᠦᠮᠡᠬᠡᠢ ᠮᠢᠬᠠ ᠢᠳᠡᠵᠦ ᠪᠠᠢᠬᠤ ᠠᠭᠰᠠᠨ᠃ ᠣᠳᠣ ᠬᠡᠨ ᠢ᠋ ᠵᠠᠬᠢᠷᠤᠯ ᠪᠣᠯᠭᠠᠳᠠᠭ ᠪᠣᠯ? ᠭᠡᠵᠦ ᠰᠢᠷᠴᠢᠨ ᠦ᠌ ᠰᠣᠨᠢᠷᠬᠠᠨ ᠠᠰᠠᠭᠤᠬᠤ ᠳ᠋ᠤ᠌ ᠨᠥᠬᠥᠳ ᠨᠢ ᠬᠣᠱᠣᠩᠨᠠᠨ᠄
— ᠴᠢᠮᠠᠶ᠋ᠢ᠃
— ᠬᠡ ᠬᠡ ᠬᠡ ᠠ᠋! ᠴᠢ ᠵᠠᠬᠢᠷᠤᠯ ᠪᠣᠯᠤᠭᠠᠳ᠂ ᠰᠢᠷᠴᠢᠨ ᠮᠢᠨᠢ ᠨᠠᠮᠠᠢ ᠪᠠᠨ ᠲᠤᠰᠠᠯᠠᠬᠤ ᠪᠣᠯᠤᠭᠠᠷᠠᠢ᠃
— ᠵᠠ᠂ ᠨᠥᠬᠥᠳ ᠮᠢᠨᠢ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠪᠠᠯ ᠶᠠᠭᠠᠬᠢᠨᠠ ᠳᠠ?
— ᠬᠦᠯᠢᠶᠡᠵᠦ ᠪᠠᠢ! ᠠᠷᠠᠢ ᠪᠣᠯᠤᠭᠠ ᠦᠭᠡᠢ᠂ ᠬᠤᠸᠠᠷᠠᠨ ᠳ᠋ᠠᠭᠠᠨ ᠣᠢᠷᠠᠲᠤᠰᠬᠢᠵᠤ ᠪᠠᠢᠭᠠᠳ ᠳᠠᠮᠳᠢᠨ ᠲᠡᠷᠢᠭᠦᠨ ᠦ᠌ ᠪᠣᠷᠣ ᠵᠢᠷᠦᠬᠡ ᠶ᠋ᠢ ᠳᠣᠯᠭᠢᠯᠠᠵᠤ᠂ ᠪᠣᠭᠣᠨᠢ ᠬᠠᠪᠢᠷᠭᠠ ᠶ᠋ᠢ ᠮᠠᠲᠠᠯᠵᠠᠲᠠᠯᠠ ᠳᠠᠭᠤᠯᠠᠭᠠᠳ ᠣᠷᠬᠢᠨᠠ ᠳᠠ ᠭᠡᠵᠦ ᠶᠠᠷᠢᠵᠠᠭᠠᠨ ᠶᠠᠪᠤᠪᠠ᠃
ᠬᠤᠵᠢᠷᠪᠤᠯᠤᠩ ᠤ᠋ᠨ ᠬᠤᠸᠠᠷᠠᠨ ᠳ᠋ᠤ᠌ ᠣᠢᠷᠠᠲᠤᠵᠤ ᠢᠷᠡᠭᠡᠳ᠂ ᠲᠡᠷᠡ ᠬᠣᠷᠢᠶᠠ ᠴᠡᠷᠢᠭ ᠳᠠᠭᠤᠤ ᠳᠠᠭᠤᠯᠠᠵᠤ ᠵᠠᠷᠭᠤ ᠪᠠᠨ ᠠᠪᠴᠤ ᠳᠡᠢᠯᠦᠭᠰᠡᠨ ᠰᠦᠷ ᠪᠠᠳᠠᠷᠠᠭᠤᠯᠤᠨ ᠪᠤᠴᠠᠵᠤ ᠢᠷᠡᠬᠦ ᠳ᠋ᠦ᠍ᠨᠢ᠂ ᠬᠣᠢᠨᠠ ᠠ᠋ᠴᠠ ᠨᠢ ᠤᠳᠠᠯ ᠦᠭᠡᠢ ᠲᠠᠷᠭᠤᠨ ᠦᠬᠡᠷ ᠦ᠋ᠨ ᠮᠢᠬᠠ ᠠᠴᠢᠭᠰᠠᠨ ᠲᠡᠷᠭᠡ ᠲᠡᠢ ᠲᠦᠰᠢᠮᠡᠯ ᠢᠷᠡᠵᠦ᠂ ᠰᠠᠢᠳ ᠳᠠᠯᠠᠢ ᠸᠠᠩ ᠤ᠋ᠨ ᠲᠤᠰᠢᠶᠠᠯ ᠢ᠋ᠶ᠋ᠠᠷ ᠳᠠᠮᠳᠢᠨ ᠲᠡᠷᠢᠭᠦᠨ ᠢ᠋ ᠬᠠᠯᠠᠵᠤ ᠣᠷᠣᠨ ᠳ᠋ᠤᠨᠢ ᠭᠠᠯᠰᠠᠩ ᠮᠡᠢᠷᠡᠨ ᠢ᠋ ᠲᠣᠬᠣᠭᠠᠨ ᠲᠠᠯᠪᠢᠭᠰᠠᠨ ᠪᠢᠴᠢᠭ ᠠᠪᠴᠢᠷᠠᠪᠠ᠃
— ᠪᠢ ᠴᠢᠮᠠᠲᠤ ᠮᠠᠨ ᠤ᠋ ᠳᠠᠷᠤᠭᠠ ᠨᠠᠷ ᠭᠡᠳᠡᠰᠦᠨ ᠳ᠋ᠡᠭᠡᠨ ᠬᠥᠯ ᠢ᠋ᠶ᠋ᠡᠨ ᠴᠢᠬᠢᠯᠴᠡᠳᠡᠭ ᠭᠡᠵᠦ ᠡᠰᠡ ᠬᠡᠯᠡᠯᠦ᠃ ᠣᠳᠣ ᠬᠠᠷᠠᠬᠤ ᠦᠭᠡᠢ ᠤᠤ? ᠭᠠᠯᠰᠠᠩ ᠮᠡᠢᠷᠡᠨ ᠵᠠᠪᠰᠢᠶᠠᠨ ᠢ᠋ ᠣᠯᠵᠤ ᠡᠨᠡ ᠳᠡᠯᠢᠮ ᠢ᠋ᠶ᠋ᠡᠷ ᠳᠠᠮᠳᠢᠨ ᠲᠡᠷᠢᠭᠦᠨ ᠢ᠋ ᠤᠨᠠᠭᠠᠵᠤ ᠣᠷᠣ ᠶ᠋ᠢ ᠨᠢ ᠡᠵᠡᠯᠡᠵᠡᠢ ᠭᠡᠵᠦ ᠰᠢᠷᠴᠢᠨ ᠳ᠋ᠦ᠍ ᠡᠪᠦᠭᠡᠨ ᠴᠡᠷᠢᠭ ᠥᠭᠦᠯᠡᠷᠦᠨ᠂
— ᠪᠢᠳᠡᠨ ᠢ᠋ ᠬᠦᠷᠢᠶᠡ ᠣᠷᠣᠵᠤ ᠶᠠᠪᠤᠬᠤ ᠳ᠋ᠤ᠌ ᠭᠠᠯᠰᠠᠩ ᠮᠡᠢᠷᠡᠨ ᠪᠢᠳᠡᠨ ᠡᠴᠡ ᠬᠣᠯᠠᠭᠤᠷ ᠲᠣᠭᠣᠷᠢᠵᠤ᠂ ᠬᠦᠷᠢᠶᠡ ᠣᠷᠣᠭᠠᠳ ᠴᠡᠷᠢᠭ ᠦ᠋ᠨ ᠶᠠᠮᠤᠨ ᠳ᠋ᠤ᠌ ᠣᠴᠢᠵᠤ ᠵᠠᠮ ᠢ᠋ᠶ᠋ᠠᠨ ᠵᠠᠰᠠᠵᠤ ᠪᠠᠢᠭᠰᠠᠨ ᠪᠢᠯᠡ᠃ ᠪᠢ ᠴᠡᠷᠢᠭ ᠦ᠋ᠨ ᠶᠠᠮᠤᠨ ᠤ᠋ ᠮᠣᠷᠢᠨ ᠤ᠋ ᠤᠶᠠᠭᠠᠨ ᠳᠡᠭᠡᠷᠡ ᠭᠠᠯᠰᠠᠩ ᠮᠡᠢᠷᠡᠨ ᠦ᠌ ᠮᠣᠷᠢ ᠶ᠋ᠢ ᠲᠠᠨᠢᠭᠰᠠᠨ᠃ ᠭᠠᠯᠰᠠᠩ ᠮᠡᠢᠷᠡᠨ ᠬᠡᠳᠦᠢᠪᠡᠷ ᠳᠠᠮᠳᠢᠨ ᠲᠡᠷᠢᠭᠦᠨ ᠦ᠌ ᠥᠷᠥᠭᠡᠰᠦᠨ ᠪᠥᠭᠡᠷᠡ ᠪᠣᠯᠪᠠᠴᠤ᠂ ᠪᠢᠳᠡ ᠵᠠᠷᠭᠤ ᠪᠠᠨ ᠠᠪᠴᠤ ᠳᠡᠢᠯᠦᠭᠰᠡᠨ᠃ ᠴᠢ ᠰᠠᠢᠳ ᠳᠠᠯᠠᠢ ᠸᠠᠩ ᠢ᠋ ᠪᠢᠳᠡᠨ ᠦ᠌ ᠡᠮᠦᠨᠡ ᠪᠦᠬᠦᠢᠯᠵᠡᠵᠦ(ᠪᠥᠬᠥᠯᠵᠡᠵᠦ)᠂ ᠭᠡᠳᠡᠰᠦ ᠭᠠᠷᠲᠠᠯᠠ ᠬᠣᠭᠣᠯᠠ ᠢᠳᠡᠭᠦᠯᠦᠨᠡ᠂ ᠰᠢᠳᠤᠷᠭᠤ ᠦᠭᠡᠢ ᠬᠣᠢᠷᠭᠣ ᠵᠠᠬᠢᠷᠤᠯ ᠳᠠᠷᠤᠭᠠ ᠶ᠋ᠢ ᠬᠠᠯᠠᠨᠠ ᠭᠡᠵᠦ ᠪᠠᠢᠬᠤ ᠶ᠋ᠢ ᠰᠣᠨᠣᠰᠴᠤ ᠬᠠᠷᠠᠭᠰᠠᠨ ᠰᠢᠦ ᠳᠡ᠃ ᠣᠳᠣ ᠲᠡᠷᠡ ᠬᠡᠯᠡᠭᠰᠡᠨ ᠠᠮᠠᠨ ᠳ᠋ᠠᠭᠠᠨ(ᠳ᠋ᠤ᠌ ᠪᠠᠨ) ᠰᠠᠢᠨ ᠮᠠᠭᠤ ᠴᠤ᠌ ᠪᠣᠯ ᠬᠦᠷᠴᠦ᠂ ᠮᠢᠬᠠ ᠶᠠᠪᠤᠭᠤᠯᠵᠤ᠂ ᠳᠠᠮᠳᠢᠨ ᠢ᠋ᠶ᠋ᠠᠨ ᠬᠠᠯᠠᠵᠠᠢ᠃ ᠨᠣᠶᠠᠨ ᠤ᠋ ᠠᠮᠠᠯᠠᠭᠰᠠᠨ ᠶᠠᠭᠤᠮᠠ ᠡᠢᠮᠦ ᠲᠦᠷᠭᠡᠨ ᠶᠣᠰᠣᠭᠠᠷ ᠪᠣᠯᠳᠠᠭ ᠢ᠋ ᠪᠢ ᠬᠥᠮᠦᠨ ᠪᠣᠯᠤᠭᠰᠠᠭᠠᠷ ᠰᠠᠢ᠍ᠢ(ᠰᠠᠶᠢ) ᠦᠵᠡᠵᠦ ᠪᠠᠢᠨᠠ᠃ ᠶᠠᠭᠠᠬᠢᠭᠠᠳ ᠡᠢᠮᠦ ᠪᠣᠯᠴᠢᠬᠤ(ᠪᠣᠯᠴᠢᠬᠠᠬᠤ) ᠪᠣᠢ? ᠭᠡᠬᠦ ᠳ᠋ᠦ᠍᠂ ᠨᠣᠶᠠᠨ ᠤ᠋ ᠲᠡᠢᠮᠦ ᠲᠦᠷᠭᠡᠨ ᠱᠠᠯᠠᠮᠠᠭᠠᠢ ᠬᠥᠳᠡᠯᠳᠡᠭ ᠨᠢ ᠪᠢᠳᠡ ᠪᠦᠭᠦᠳᠡ ᠶ᠋ᠢ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠦᠭᠡ ᠨᠡᠢᠯᠡᠭᠡᠳ ᠢᠷᠡᠬᠦ ᠳ᠋ᠡᠭᠡᠨ(ᠳ᠋ᠦ᠍ ᠪᠡᠨ) ᠬᠦᠴᠦ ᠲᠡᠢ(ᠬᠦᠴᠦᠲᠡᠢ )ᠪᠣᠯᠭᠠᠵᠤ ᠪᠠᠢᠭᠠ ᠠ᠋ᠴᠠ ᠲᠡᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠦ ᠳᠡ᠃ ᠭᠠᠯᠰᠠᠩ ᠮᠡᠢᠷᠡᠨ ᠰᠠᠢᠨ ᠨᠥᠬᠥᠷ ᠭᠡᠵᠦ ᠰᠦᠢᠳ ᠪᠣᠯᠵᠤ ᠪᠠᠢᠳᠠᠭ ᠳᠠᠮᠳᠢᠨ ᠲᠡᠷᠢᠭᠦᠨ ᠢ᠋ᠶ᠋ᠡᠨ ᠤᠨᠠᠭᠠᠭᠰᠠᠨ ᠰᠢᠭ᠋ ᠣᠨᠳᠣᠣ ᠨᠢᠭᠡ ᠨᠣᠶᠠᠨ ᠡᠨᠡ ᠬᠡᠷᠡᠭ ᠳᠡᠭᠡᠷᠡ ᠡᠴᠡ ᠳᠠᠯᠠᠢ ᠸᠠᠩ ᠢ᠋ ᠤᠨᠠᠭᠠᠵᠤ ᠪᠣᠯᠬᠤ ᠲᠤᠯᠠ᠂ ᠲᠡᠭᠡᠵᠦ ᠡᠪ ᠵᠦᠢ ᠶ᠋ᠢ ᠨᠢ ᠲᠦᠷᠭᠡᠨ ᠣᠯᠬᠤ ᠭᠡᠵᠦ ᠰᠠᠢᠳ ᠸᠠᠩ ᠶᠡᠬᠡ ᠭᠠᠪᠰᠢᠭᠠᠢᠯᠠᠵᠠᠢ᠃ ᠮᠠᠨᠠᠢᠬᠢᠨ(ᠮᠠᠨ ᠤ᠋ ᠬᠢᠨ) ᠣᠳᠣ ᠮᠠᠨᠠᠢ(ᠮᠠᠨ ᠤ᠋) ᠬᠤᠰᠢᠭᠤᠨ ᠤ᠋ ᠬᠢᠨ᠂ ᠥᠭᠡᠷᠡ ᠬᠤᠰᠢᠭᠤᠨ ᠤ᠋ ᠬᠢᠨ ᠭᠡᠵᠦ ᠶᠠᠷᠢᠬᠤ ᠪᠤᠲᠠᠷᠠᠬᠤ ᠪᠠᠨ ᠪᠠᠢᠵᠤ᠂ ᠡᠪ ᠰᠠᠨᠠᠭᠠ ᠨᠢᠭᠡ ᠲᠡᠢ ᠪᠣᠯᠤᠭᠠᠳ ᠢᠷᠡᠬᠦ ᠳ᠋ᠦ᠍ ᠨᠣᠶᠠᠳ ᠴᠤ᠌ ᠪᠢᠳᠡᠨ ᠦ᠌ ᠦᠭᠡ ᠶ᠋ᠢ ᠰᠣᠨᠣᠰᠬᠤ ᠪᠣᠯᠵᠠᠢ᠃ ᠭᠠᠭᠴᠠ ᠭᠠᠭᠴᠠ ᠪᠠᠷ ᠢ᠋ᠶ᠋ᠠᠨ ᠪᠢᠳᠡ ᠶᠠᠭᠤᠮᠠ ᠱᠠᠭᠠᠷᠳᠠᠪᠠᠯ ᠪᠢᠳᠡᠨ ᠢ᠋ ᠬᠠᠷᠠ ᠶᠠᠰᠤᠲᠤ ᠪᠣᠭᠣᠯ ᠬᠠᠮᠵᠢᠯᠭᠠ ᠭᠡᠵᠦ ᠲᠣᠭᠣᠵᠤ ᠶᠠᠷᠢᠬᠤ ᠴᠤ᠌ ᠦᠭᠡᠢ ᠠᠭᠰᠠᠨ᠃ ᠬᠠᠭᠤᠴᠢᠨ ᠤ᠋ ᠤᠯᠤᠰ᠂ ᠡᠪᠲᠦ ᠱᠠᠭᠠᠵᠠᠭᠠᠢ ᠯᠤᠤ ᠪᠠᠭᠤᠯᠭᠠᠳᠠᠭ ᠭᠡᠳᠡᠭ ᠨᠢ ᠦᠨᠡᠨ ᠰᠡᠴᠡᠨ ᠦᠭᠡ ᠰᠢᠦ ᠭᠡᠪᠡ᠃
— — — —
* ᠦᠨᠡᠨ ᠬᠡᠷᠡᠭ᠃
* ᠰᠠᠷᠠᠨ ᠪᠣᠭᠣᠷᠰᠣᠭ ᠢ᠋ ᠬᠢᠲᠠᠳ ᠢ᠋ᠶ᠋ᠠᠷ ᠶᠤᠸᠠᠢ ᠪᠢᠩ ᠭᠡᠳᠡᠭ᠃ ᠲᠡᠭᠦᠨ ᠢ᠋ ᠰᠤᠨᠵᠤᠷᠠᠭᠤᠯᠤᠨ ᠶᠧᠪᠡᠩ ᠭᠡᠳᠡᠭ᠃
* ᠦᠨᠡᠨ ᠬᠡᠷᠡᠭ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠲᠠᠪᠤᠨ ᠤᠰᠤ᠂ ᠤᠢᠭᠤᠷᠵᠢᠨ· ᠣᠳᠬᠣᠨᠪᠠᠪᠠ᠂ ᠬᠡᠷᠡᠢᠳ· ᠵᠣᠯ᠂ ᠣᠶᠤᠨᠪᠢᠯᠢᠭ᠌᠂
ᠮᠧᠢ ᠬᠤᠸᠠ᠂ ᠪᠠᠳᠮᠠᠰᠡᠴᠡᠨ᠂ ᠴᠡᠩᠬᠡᠯᠴᠡᠴᠡᠭ᠂ ᠮᠥᠩᠭᠦᠡᠭᠣᠸᠠ
ᠬᠢᠨᠠᠭᠴᠢ᠄ ᠤᠢᠭᠤᠷᠵᠢᠨ· ᠣᠳᠬᠣᠨᠪᠠᠪᠠ᠂ ᠣᠳᠬᠣᠨᠴᠡᠴᠡᠭ᠂ ᠬᠡᠷᠡᠢᠳ᠂ ᠵᠣᠯ᠂ ᠣᠶᠤᠨᠪᠠᠲᠤ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ