ᠦᠷ ᠦᠨ ᠲᠤᠶᠠᠭᠠ II – ᠪ᠂ ᠷᠢᠨᠴᠢᠨ - ᠬᠣᠶᠠᠳᠤᠭᠠᠷ ᠲᠡᠪᠲᠡᠷ <ᠭᠠᠯ ᠤᠰᠤᠨ ᠤ ᠭᠠᠰᠢᠭᠤᠨ ᠵᠣᠪᠠᠯᠠᠩ>- ᠠᠷᠪᠠᠨ ᠨᠢᠭᠡ Үүрийн туяа II – Б ᠂ Ренчин Хоёрдугаар дэвтэр "Гал усны гашуун зовлон"-11
390ᠠᠷᠪᠠᠨ ᠨᠢᠭᠡ᠂ ᠬᠤᠵᠢᠷᠪᠤᠯᠤᠩ ᠤ᠋ᠨ ᠬᠤᠸᠠᠷᠠᠨ ᠳ᠋ᠤ᠌
ᠬᠤᠪᠢ ᠵᠠᠶᠠᠭᠠ ᠪᠠᠢᠳᠠᠭ ᠯᠠ ᠶᠤᠮ ᠭᠡᠨᠡ ᠪᠢᠯᠡ᠃
ᠬᠠᠮᠢᠭᠠ ᠪᠠᠢᠳᠠᠭ ᠢ᠋ ᠨᠢ ᠬᠡᠨ ᠮᠡᠳᠡᠳᠡᠭ ᠪᠣᠯ?
ᠡᠷᠬᠡ ᠴᠢᠯᠥᠭᠡ ᠪᠠᠢᠳᠠᠭ ᠯᠠ ᠶᠤᠮ ᠭᠡᠨᠡ ᠪᠢᠯᠡ᠃
ᠬᠡᠨ ᠳ᠋ᠦ᠍ᠨᠢ( ᠳ᠋ᠦ᠍ ᠨᠢ) ᠪᠠᠢᠳᠠᠭ ᠢ᠋ ᠬᠡᠨ ᠮᠡᠳᠡᠳᠡᠭ ᠪᠣᠯ?
ᠱᠧᠪᠴᠧᠨᠺᠦ
ᠰᠢᠷᠴᠢᠨ᠂ ᠤᠲᠤᠭᠠᠨ ᠳ᠋ᠤ᠌ ᠨᠢᠳᠦ ᠬᠣᠷᠣᠰᠤᠨ ᠠᠨᠢᠰ ᠠᠨᠢᠰ ᠬᠢᠵᠦ᠂ ᠤᠷᠲᠤ ᠮᠣᠳᠣᠨ ᠡᠰᠢ ᠲᠡᠢ ᠲᠡᠮᠦᠷ ᠬᠦᠷᠵᠢ ᠪᠠᠷᠢᠭᠠᠳ᠂ ᠭᠠᠵᠠᠷ ᠵᠣᠭᠣᠭᠣᠭᠰᠠᠨ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠲᠣᠭᠣᠭᠠᠨ ᠳ᠋ᠤ᠌ ᠤᠰᠤ᠂ ᠪᠤᠳᠠᠭᠠ᠂ ᠡᠯᠵᠢᠭᠡᠨ ᠦ᠌ ᠮᠢᠬᠠ ᠬᠣᠯᠢᠭᠰᠠᠨ ᠪᠠᠨᠲᠠᠩ ᠢ᠋ ᠨᠡᠯᠢᠶᠡᠳ ᠶᠠᠳᠠᠷᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠬᠤᠳᠬᠤᠵᠤ ᠪᠠᠢᠯᠠ᠃ ᠲᠡᠷᠡ ᠥᠷᠯᠥᠭᠡ ᠰᠤᠷᠭᠠᠭᠤᠯᠢ ᠬᠢᠵᠦ ᠪᠠᠢᠭᠠᠳ ᠮᠣᠳᠣᠨ ᠮᠣᠷᠢ ᠬᠠᠷᠠᠢᠬᠤ ᠭᠡᠵᠦ ᠬᠠᠯᠲᠤᠷᠢᠵᠤ ᠣᠢᠴᠢᠭᠠᠳ᠂ ᠨᠢᠭᠡᠳᠦᠭᠡᠷ ᠰᠤᠮᠤᠨ ᠢ᠋ ᠰᠤᠷᠭᠠᠭᠤᠯᠢ ᠬᠢᠵᠦ ᠭᠦᠢᠴᠡᠲᠡᠯᠡ ᠭᠠᠷ ᠲᠠᠭᠠᠨ ( ᠲᠤ ᠪᠠᠨ) ᠴᠢᠯᠠᠭᠤ ᠠᠳᠬᠤᠵᠤ ᠨᠣᠮᠣᠬᠠᠨ ᠵᠣᠭᠰᠣᠬᠤ ᠰᠢᠳᠬᠡᠯ(ᠰᠢᠢᠳᠬᠡᠯ) ᠬᠦᠯᠢᠶᠡᠵᠦ᠂ ᠪᠠᠰᠠ ᠲᠡᠷᠡ ᠡᠳᠦᠷ ᠪᠠᠩᠵᠠᠳᠠᠭᠤᠯᠤᠭᠰᠠᠨ (ᠪᠠᠨᠰᠠᠳᠠᠭᠤᠯᠤᠭᠰᠠᠨ) ᠲᠤᠰᠠᠯᠠᠬᠤ ᠲᠣᠭᠣᠭᠠᠴᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠲᠣᠭᠣᠭᠠᠨ ᠤ᠋ ᠭᠠᠵᠠᠷ ᠴᠡᠷᠢᠭ ᠦ᠋ᠨ ᠨᠢᠭᠡ ᠡᠳᠦᠷ ᠦ᠋ᠨ ᠬᠣᠭᠣᠯᠠ ᠬᠢᠬᠦ ᠪᠡᠷ ᠰᠢᠳᠬᠡᠭᠦᠯᠦᠭᠰᠡᠨ(ᠰᠢᠢᠳᠬᠡᠭᠦᠯᠦᠭᠰᠡᠨ) ᠪᠠᠢᠵᠠᠢ᠃
ᠡᠪᠦᠭᠡᠨ ᠭᠠᠯᠴᠢ᠂ ᠰᠢᠷᠴᠢᠨ ᠦ᠌ ᠵᠠᠯᠬᠠᠭᠤᠷᠠᠨ ᠬᠤᠳᠬᠤᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ᠂ ᠥᠨᠥᠳᠥᠷ ᠦ᠋ᠨ ᠬᠣᠭᠣᠯᠠᠨ ᠳ᠋ᠤ᠌ ᠥᠴᠥᠭᠡᠳᠦᠷ ᠦ᠋ᠨ ᠢᠮᠠᠭᠠᠨ ᠤ᠋ ᠵᠣᠪᠠᠯᠭᠠ ᠶ᠋ᠢ ᠪᠣᠳᠣᠪᠠᠯ ᠡᠯᠵᠢᠭᠡ ᠶ᠋ᠢᠨ ᠮᠢᠬᠠ ᠪᠣᠯᠪᠠᠴᠤ ᠨᠡᠯᠢᠶᠡᠳ ᠲᠠᠷᠭᠤᠨ ᠮᠢᠬᠠ ᠢᠷᠡᠵᠡᠢ᠃ ᠴᠢ ᠰᠠᠢᠨ ᠬᠤᠳᠬᠤᠭᠠᠳ ᠪᠠᠢ᠃ ᠢᠷᠣᠭᠠᠷ ᠲᠤ᠌ ᠨᠢ ᠪᠤᠳᠠᠭᠠ ᠲᠦᠯᠡᠭᠳᠡᠬᠦ ᠪᠣᠢ᠃ ᠴᠢᠨᠦ ᠡᠨᠡ ᠬᠣᠭᠣᠯᠠ ᠶ᠋ᠢ ᠳᠠᠷᠤᠭᠠ ᠨᠠᠷ ᠢᠳᠡᠬᠦ ᠦᠭᠡᠢ᠂ ᠬᠥᠭᠡᠷᠦᠬᠦᠢ ᠴᠡᠷᠢᠭ ᠮᠠᠨᠢ ᠢᠳᠡᠬᠦ ᠶᠦᠮ ᠭᠡᠳᠡᠭ ᠢ᠋ ᠪᠣᠳᠣᠵᠤ ᠬᠢᠴᠢᠶᠡᠵᠦ ᠦᠵᠡᠭᠡᠴᠢ ᠭᠡᠵᠦ ᠬᠡᠯᠡᠭᠡᠳ᠂ ᠲᠣᠭᠣᠭᠠᠴᠢ ᠶ᠋ᠢᠨ ᠭᠡᠷ ᠡᠴᠡ ᠵᠡᠷᠯᠢᠭ ᠰᠣᠩᠭᠢᠨᠠ ᠲᠠᠢ᠂ ᠲᠠᠷᠭᠤᠨ ᠬᠣᠨᠢᠨ ᠤ᠋ ᠮᠢᠬᠠ ᠲᠠᠢ ᠰᠠᠢᠬᠠᠨ ᠭᠡᠭᠴᠢ ᠶ᠋ᠢᠨ ᠬᠠᠷᠠ ᠱᠥᠯᠥ ᠶ᠋ᠢᠨ ᠬᠣᠷᠣᠬᠠᠢ ᠬᠦᠷᠦᠮᠡᠷ ᠦᠨᠦᠷ ᠬᠠᠩᠬᠤᠯᠬᠤ ᠳ᠋ᠤ᠌ ᠰᠢᠩᠰᠢᠯᠡᠵᠦ᠂ ᠲᠡᠷᠡ ᠳᠠᠷᠤᠭᠠ ᠨᠠᠷ ᠤ᠋ᠨ ᠱᠥᠯᠥ ᠡᠴᠡ ᠭᠠᠭᠴᠠ ᠠᠶᠠᠭᠠ ᠴᠤ᠌ ᠣᠯᠵᠤ ᠤᠤᠭᠤᠳᠠᠭ ᠪᠣᠯ ᠶᠠᠭᠤ ᠪᠢᠯᠡ ᠭᠡᠵᠦ ᠰᠠᠨᠠᠭᠠ ᠠᠯᠳᠠᠵᠠᠢ᠃
ᠲᠡᠷᠡ ᠡᠪᠦᠭᠡᠨ ᠭᠠᠯᠴᠢ᠂ ᠤᠤᠯ ᠠ᠋ᠴᠠ ᠭᠠᠭᠴᠠ ᠪᠡᠶᠡ ᠬᠥᠮᠦᠨ ᠪᠠᠢᠵᠤ᠂ ᠬᠣᠰᠢᠭᠤ ᠠ᠋ᠴᠠ ᠴᠡᠷᠢᠭ ᠦ᠋ᠨ ᠠᠯᠪᠠᠨ ᠳ᠋ᠤ᠌ ᠳᠠᠢᠴᠢᠯᠠᠨ ᠶᠠᠪᠤᠭᠤᠯᠤᠭᠰᠠᠨ ᠢ᠋ ᠵᠢᠭᠰᠠᠭᠠᠯ ᠤ᠋ᠨ ᠠᠯᠪᠠᠨ ᠳ᠋ᠤ᠌ ᠲᠡᠩᠴᠡᠬᠦ ᠦᠭᠡᠢ ᠤᠴᠢᠷ ᠭᠠᠯᠴᠢ ᠪᠣᠯᠭᠠᠵᠤ ᠬᠡᠳᠦᠨ ᠤᠨᠠᠯᠤᠭᠤᠳᠠ ᠳ᠋ᠠᠭᠠᠨ ᠬᠦᠷᠦᠭᠰᠡᠨ ᠡᠪᠦᠭᠡᠨ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠪᠠᠷ ᠴᠡᠷᠢᠭ ᠦ᠋ᠨ ᠭᠠᠯ ᠲᠣᠭᠣᠭᠠᠨ ᠤ᠋ ᠭᠠᠵᠠᠷ ᠡᠯᠵᠢᠭᠡ ᠢᠮᠠᠭᠠ ᠨᠢᠲᠤᠯᠬᠤ᠂ ᠠᠷᠠᠰᠤ ᠰᠢᠷᠢ ᠶ᠋ᠢ ᠨᠢ ᠥᠪᠴᠢᠬᠦ᠂ ᠮᠢᠬᠠ ᠶ᠋ᠢ ᠨᠢ ᠡᠪᠳᠡᠬᠦ ᠵᠡᠷᠭᠡ ᠬᠠᠷᠠ ᠠᠵᠢᠯ ᠬᠢᠵᠦ᠂ ᠬᠢᠲᠤᠭᠠ ᠪᠠᠷᠢᠬᠤ ᠳ᠋ᠠᠭᠠᠨ ᠶᠠᠮᠠᠷ ᠴᠤ᠌ ᠮᠡᠰᠡ ᠶ᠋ᠢᠨ ᠵᠠᠰᠠᠯᠴᠢ ᠠ᠋ᠴᠠ ᠳᠠᠪᠠᠭᠤ᠂ ᠶᠡᠬᠡᠯᠡ(ᠶᠡᠬᠡ ᠯᠡ) ᠳᠦᠢᠲᠡᠢ ᠴᠡᠪᠡᠷ ᠰᠠᠢᠬᠠᠨ ᠠᠵᠢᠯᠯᠠᠳᠠᠭ ᠡᠪᠦᠭᠡᠨ ᠪᠠᠢᠵᠠᠢ᠃
— ᠴᠢ ᠪᠢᠲᠡᠭᠡᠢ ᠵᠠᠯᠬᠠᠭᠤᠷᠠᠭᠠᠳ ᠪᠠᠢ᠃ ᠨᠥᠬᠥᠳ ᠦ᠋ᠨ ᠢ᠋ᠶ᠋ᠡᠨ ᠬᠣᠭᠣᠯᠠ ᠬᠢᠵᠦ ᠪᠠᠢᠭᠠ ᠶ᠋ᠢ ᠪᠣᠳᠣᠵᠤ ᠬᠥᠳᠡᠯ᠃ᠨᠢᠭᠡ ᠡᠳᠦᠷ ᠦ᠋ᠨ ᠬᠣᠭᠣᠯᠠ ᠬᠢᠬᠦ ᠶᠠᠯᠠ ᠰᠢᠳᠬᠡᠭᠦᠯᠬᠦ(ᠰᠢᠢᠳᠬᠡᠭᠦᠯᠬᠦ) ᠴᠢᠨᠢ ᠭᠠᠢ ᠦᠭᠡᠢ ᠬᠡᠷᠡᠭ᠃ ᠪᠢ ᠶᠠᠯᠠ ᠰᠢᠳᠭᠡᠭᠦᠯᠦᠯ(ᠰᠢᠢ᠍ᠳᠬᠡᠭᠦᠯᠦᠯ) ᠦᠭᠡᠢ ᠪᠡᠷ ᠡᠳᠦᠷ ᠪᠦᠷᠢ ᠴᠢᠨᠦ ᠡᠨᠡ ᠠᠵᠢᠯ ᠢ᠋ ᠴᠢᠨᠢ ᠬᠢᠵᠦ᠂ ᠪᠠᠰᠠ ᠲᠤᠷᠠᠵᠤ ᠦᠬᠦᠬᠦ ᠳ᠋ᠡᠭᠡᠨ ᠰᠢᠬᠠᠭᠰᠠᠨ ᠮᠠᠭᠤ ᠰᠠᠢᠨ ᠢᠮᠠᠭᠠ ᠨᠢᠲᠤᠯᠬᠤ᠂ ᠮᠥᠰᠥ ᠵᠥᠭᠡᠭᠡᠬᠦ ᠠᠵᠢᠯ ᠬᠢᠵᠦ᠂ ᠴᠡᠷᠢᠭ ᠦ᠋ᠨ ᠠᠯᠪᠠ ᠬᠠᠭᠠᠵᠤ ᠪᠠᠢᠨᠠ ᠰᠢᠦ ᠳᠡ᠃ ᠬᠠᠷᠠᠴᠤ ᠠᠯᠪᠠᠲᠤ ᠪᠢᠳᠡ᠂ ᠡᠢᠮᠦ ᠯᠡ ᠬᠤᠪᠢ ᠲᠠᠢ ᠤᠯᠤᠰ ᠳᠠ᠃ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ᠃ ᠰᠠᠩ ᠠ᠋ᠴᠠ ᠴᠡᠷᠢᠭ ᠦ᠋ᠨ ᠬᠡᠷᠡᠭᠯᠡᠯ ᠳ᠋ᠦ᠍ ᠪᠠᠭᠤᠳᠠᠭ ᠮᠥᠩᠭᠥ ᠵᠠᠷᠤᠳᠠᠯ ᠪᠠᠭᠠ᠃ ᠪᠠᠭᠤᠭᠰᠠᠨ ᠮᠥᠩᠭᠥ ᠨᠢ ᠮᠠᠨᠠᠢ ᠲᠣᠭᠣᠭᠠᠨ ᠳ᠋ᠤ᠌ ᠬᠦᠷᠲᠡᠯᠡ ᠣᠯᠠᠨ ᠭᠠᠷ ᠳᠠᠮᠵᠢᠭᠰᠠᠭᠠᠷ ᠢᠮᠠᠭᠠᠨ ᠤ᠋ ᠵᠣᠪᠠᠯᠭᠠ᠂ ᠡᠯᠵᠢᠭᠡᠨ ᠦ᠌ ᠮᠢᠬᠠ ᠠ᠋ᠴᠠ ᠳᠡᠭᠡᠷᠡ ᠮᠢᠬᠠ ᠠᠪᠬᠤ ᠶᠠᠭᠤᠮᠠ ᠦᠯᠡᠳᠡᠬᠦ ᠦᠭᠡᠢ ᠶᠦᠮ ᠰᠢᠪ ᠳᠡ ᠭᠡᠵᠦ ᠲᠡᠷᠡ ᠡᠪᠦᠭᠡᠨ ᠭᠠᠰᠢᠭᠤᠳᠠᠨ ᠰᠡᠭᠦᠷᠡᠰᠦ ᠠᠯᠳᠠᠵᠤ᠂ ᠵᠠ ᠨᠠᠭᠠᠳᠤ ᠬᠣᠭᠣᠯᠠ ᠴᠢᠨᠢ ᠪᠤᠳᠠᠭᠠ ᠨᠢ ᠯᠡ ᠪᠣᠯᠤᠭᠰᠠᠨ ᠪᠣᠯ ᠪᠣᠯᠤᠭᠰᠠᠨ ᠪᠠᠢᠬᠠ ᠭᠡᠬᠦ ᠳ᠋ᠦ᠍ᠨᠢ᠂ ᠨᠥᠭᠦᠭᠡ ᠬᠡᠳᠦᠨ ᠡᠪᠦᠭᠡᠨ ᠭᠠᠯᠴᠢ ᠬᠡᠳᠦᠨ ᠲᠣᠮᠣ ᠲᠣᠭᠣᠭᠠᠨ ᠤ᠋ ᠳᠣᠣᠷᠠ ᠠ᠋ᠴᠠ ᠴᠣᠭ ᠢ᠋ ᠭᠠᠳᠠᠭᠰᠢ ᠨᠢ ᠭᠠᠷᠭᠠᠵᠤ᠂
— ᠵᠠ᠂ ᠮᠠᠨᠠᠢ ᠬᠡᠳᠦᠨ ᠲᠣᠭᠣᠭᠠᠨ ᠤ᠋ ᠬᠣᠭᠣᠯᠠ ᠴᠤ᠌ ᠪᠠᠰᠠ ᠪᠣᠯᠵᠠᠢ᠃ ᠰᠢᠷᠴᠢᠨ ᠴᠢ ᠵᠠᠯᠠᠭᠤ ᠪᠠᠷ ᠢ᠋ᠶ᠋ᠠᠨ ᠣᠴᠢᠵᠤ᠂ ᠠᠬᠠᠯᠠᠬᠤ ᠲᠣᠭᠣᠭᠠᠴᠢ ᠳ᠋ᠤ᠌ ᠬᠣᠭᠣᠯᠠ ᠪᠣᠯᠤᠭᠰᠠᠨ ᠭᠡᠵᠦ ᠬᠡᠯᠡᠭᠡᠳ ᠢᠷᠡ ᠭᠡᠬᠦ ᠳ᠋ᠦ᠍ᠨᠢ ᠤᠯᠠ ᠨᠢ ᠬᠠᠨᠵᠠᠷᠠᠵᠤ᠂ ᠰᠤᠷ ᠳᠡᠭᠡᠰᠦ ᠪᠡᠷ ᠣᠷᠢᠶᠠᠭᠰᠠᠨ ᠮᠠᠢᠵᠢᠭᠢ ᠭᠤᠲᠤᠯ ᠢ᠋ᠶ᠋ᠠᠨ ᠴᠢᠷᠴᠦ ᠠᠯᠴᠠᠭᠠᠨᠠᠨ ᠠᠯᠬᠤᠭᠰᠠᠭᠠᠷ᠂ ᠠᠬᠠᠯᠠᠬᠤ ᠲᠣᠭᠣᠭᠠᠴᠢ ᠶ᠋ᠢᠨ ᠭᠡᠷ ᠲᠦ᠍ ᠣᠷᠣᠵᠤ ᠬᠡᠯᠡᠪᠡᠰᠦ᠂ ᠲᠣᠭᠣᠭᠠᠴᠢ ᠭᠠᠷᠴᠤ ᠢᠷᠡᠭᠡᠳ᠂ ᠲᠡᠷᠡ ᠬᠡᠳᠦᠨ ᠲᠣᠮᠣ ᠲᠣᠭᠣᠭᠠ ᠤᠷᠤᠭᠤ ᠨᠢᠭᠡ ᠨᠢᠭᠡ ᠱᠠᠭᠠᠢᠵᠤ ᠦᠵᠡᠭᠡᠳ᠂ ᠠᠩᠭᠢ ᠶ᠋ᠢᠨ ᠵᠢᠵᠢᠭᠦᠷ ᠦ᠋ᠨ ᠭᠡᠷ ᠲᠦ᠍ ᠬᠣᠭᠣᠯᠠ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠭᠳᠡᠬᠦ ᠭᠡᠵᠦ ᠣᠴᠢᠵᠠᠢ᠃ ᠤᠳᠠᠯ ᠦᠭᠡᠢ ᠪᠦᠷᠢᠶᠡᠴᠢ ᠴᠡᠷᠢᠭ᠂ ᠬᠣᠭᠣᠯᠠᠨ ᠤ᠋ ᠪᠦᠷᠢᠶᠡ ᠲᠠᠲᠠᠵᠤ᠂ ᠬᠠᠭᠤᠴᠢᠨ ᠬᠢᠲᠠᠳ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠪᠠᠢᠭᠰᠠᠨ᠂ ᠡᠭᠦᠳᠡ ᠴᠣᠩᠬᠣ ᠨᠢ ᠴᠡᠷᠢᠭ ᠦ᠋ᠨ ᠲᠦᠯᠡᠰᠢ ᠪᠣᠯᠵᠤ ᠣᠩᠭᠣᠷᠬᠠᠢ ᠪᠣᠯᠤᠭᠰᠠᠨ ᠰᠢᠪᠠᠷ ᠪᠠᠢᠰᠢᠩ ᠤ᠋ᠳ ᠠ᠋ᠴᠠ ᠤᠷᠠᠩᠬᠠᠢ ᠮᠠᠭᠤᠬᠠᠢ ᠳᠡᠪᠡᠯ ᠲᠡᠢ ᠴᠡᠷᠢᠭ ᠦ᠋ᠳ᠂ ᠰᠡᠨᠵᠢᠲᠡᠢ ᠪᠢᠴᠢᠬᠠᠨ ᠪᠢᠴᠢᠬᠠᠨ ᠰᠠᠪᠠ ᠪᠠᠷᠢᠵᠠᠭᠠᠨ ᠭᠠᠷᠴᠤ ᠢᠷᠡᠭᠡᠳ᠂ ᠠᠷᠪᠠᠨ ᠠᠷᠪᠠᠨ ᠢ᠋ᠶ᠋ᠠᠷ ᠳᠡᠰ ᠳᠠᠷᠠᠭᠠ ᠪᠠᠨ ᠪᠠᠷᠢᠮᠲᠠᠯᠠᠨ ᠵᠢᠭᠰᠠᠭᠠᠳ᠂ ᠨᠢᠭᠡ ᠨᠢᠭᠡ ᠬᠡᠷᠴᠢᠮ ᠮᠢᠬᠠ ᠲᠠᠢ ᠰᠢᠩᠭᠡᠨ ᠪᠠᠨᠲᠠᠩ ᠬᠢᠯᠭᠡᠵᠦ ᠠᠪᠤᠭᠠᠳ᠂ ᠬᠤᠸᠠᠷᠠᠨ ᠳ᠋ᠠᠭᠠᠨ ᠣᠷᠣᠵᠠᠭᠠᠵᠤ ᠬᠠᠨᠵᠤᠨ ᠳᠡᠭᠡᠷᠡ ᠢ᠋ᠶ᠋ᠡᠨ ᠰᠠᠭᠤᠭᠠᠳ᠂ ᠮᠣᠳᠣᠨ ᠠᠶᠠᠭᠠᠨ ᠳ᠋ᠤ᠌ ᠲᠡᠷᠡ ᠪᠠᠨᠲᠠᠩ ᠢ᠋ᠶ᠋ᠠᠨ ᠠᠶᠠᠭᠠᠯᠠᠵᠤ᠂ ᠬᠠᠯᠪᠠᠭᠠ ᠰᠠᠪᠬᠠ ᠦᠭᠡᠢ ᠫᠠᠵᠢᠭᠢᠨᠠᠲᠠᠯᠠ ᠰᠣᠷᠣᠵᠤ᠂ ᠱᠥᠯᠥ ᠪᠡᠨ ᠤᠤᠭᠤᠵᠤ ᠳᠠᠭᠤᠰᠤᠭᠠᠳ ᠠᠶᠠᠭᠠ ᠪᠠᠨ ᠳᠣᠯᠢᠶᠠᠵᠤ᠂ ᠬᠣᠭᠣᠯᠠᠨ ᠤ᠋ ᠰᠠᠪᠠ ᠶ᠋ᠢᠨ ᠢᠷᠣᠭᠠᠷ ᠢ᠋ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠬᠤᠰᠤᠵᠤ᠂ ᠰᠢᠷᠬᠡᠭ ᠪᠤᠳᠠᠭᠠ ᠶ᠋ᠢ ᠴᠦ᠍ ᠦᠯᠡᠳᠡᠭᠡᠯ ᠦᠭᠡᠢ ᠢᠳᠡᠵᠦ ᠭᠦᠢᠴᠡᠪᠡ᠃
ᠴᠢᠩᠭᠢᠭᠡᠳ ᠫᠧᠯᠵᠡᠢ ᠭᠡᠳᠡᠭ ᠥᠨᠳᠥᠷ ᠴᠢᠭᠢᠷᠠᠭ ᠨᠢᠭᠡᠨ ᠴᠡᠷᠢᠭ᠂ ᠬᠠᠨᠵᠤᠨ ᠳᠡᠭᠡᠷᠡ ᠡᠴᠡ ᠥᠨᠳᠡᠢᠨ ᠪᠣᠰᠴᠤ᠂
— ᠵᠠ᠂ ᠴᠠᠢ ᠠᠪᠴᠢᠷᠠᠵᠤ ᠭᠡᠳᠡᠰᠦ ᠪᠡᠨ ᠳᠦᠭᠦᠷᠭᠡᠳᠡᠭ ᠶᠦᠮ ᠪᠢᠯᠢᠤ(ᠪᠢᠯᠡ ᠤᠤ) ᠳᠠ᠃ ᠣᠳᠣ ᠨᠠᠳᠠᠳᠤ(ᠨᠠᠳᠠ ᠳ᠋ᠤ᠌) ᠥᠷᠥᠭᠡᠯ ᠬᠣᠨᠢᠨ ᠤ᠋ ᠮᠢᠬᠠ ᠴᠢᠨᠠᠵᠤ ᠥᠭᠳᠡᠭ ᠪᠤᠶᠠᠨᠲᠠᠨ ᠬᠥᠮᠦᠨ ᠪᠠᠢᠭᠠᠰᠠᠢ᠂ ᠨᠢᠭᠡ ᠠᠮᠢ ᠪᠠᠷ ᠯᠠ ᠢᠳᠡᠵᠦ ᠣᠷᠬᠢᠬᠤ ᠰᠠᠨ᠃ ᠴᠡᠷᠢᠭ ᠦ᠋ᠨ ᠠᠯᠪᠠᠨ ᠬᠠᠭᠠᠬᠤ ᠭᠡᠵᠦ ᠥᠯᠥᠨ ᠪᠢᠷᠢᠳ ᠦ᠋ᠨ ᠵᠣᠪᠠᠯᠠᠩ ᠡᠳ᠋ᠯᠡᠵᠦ ᠪᠠᠢᠨᠠ ᠳᠠ᠂ ᠨᠥᠬᠥᠳ ᠮᠢᠨᠢ ᠭᠡᠵᠦ ᠬᠡᠯᠡᠵᠡᠢ᠃
— ᠪᠢ᠂ ᠵᠤᠳ ᠨᠣᠶᠠᠳ ᠬᠣᠶᠠᠷ ᠲᠤ᠌ ᠬᠣᠨᠢ ᠪᠠᠨ ᠴᠥᠯᠪᠡᠨ ᠢᠳᠡᠭᠦᠯᠴᠢᠬᠦ(ᠢᠳᠡᠭᠦᠯᠴᠢᠬᠡᠬᠦ) ᠶ᠋ᠢᠨ ᠡᠮᠦᠨᠡ ᠬᠣᠨᠢᠨ ᠤ᠋ ᠥᠷᠥᠭᠡᠯ ᠢ᠋ ᠭᠠᠭᠴᠠ ᠠᠮᠢ ᠪᠠᠷ ᠢᠳᠡᠴᠢᠳᠡᠭ(ᠢᠳᠡᠴᠢᠬᠡᠳᠡᠭ)ᠪᠠᠢᠭᠰᠠᠨ ᠪᠢᠯᠡ᠃ ᠣᠳᠣ ᠥᠷᠥᠭᠡᠯ ᠪᠠᠢᠲᠤᠭᠠᠢ ᠪᠦᠬᠦᠯᠢ ᠬᠣᠨᠢ ᠶ᠋ᠢ ᠴᠦ᠍ ᠢᠳᠡᠴᠢᠬᠡᠬᠦ ᠳ᠋ᠦ᠍ ᠬᠣᠳᠣᠭᠣᠳᠣ ᠮᠢᠨᠢ ᠬᠣᠲᠣᠢᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠤᠭ ᠠ( ᠠ᠋) ᠭᠡᠵᠦ ᠨᠢᠭᠡ ᠬᠥᠮᠦᠨ ᠬᠠᠷᠠᠩᠭᠤᠢ ᠪᠤᠯᠤᠩ ᠠ᠋ᠴᠠ ᠰᠥᠭᠡᠩᠭᠢ ᠪᠦᠳᠦᠭᠦᠨ ᠳᠠᠭᠤᠨ ᠢ᠋ᠶ᠋ᠠᠷ ᠥᠭᠦᠯᠡᠵᠦ᠂ ᠢᠩᠭᠢᠵᠦ ᠬᠣᠭᠣᠰᠣᠨ ᠨᠣᠢᠲᠠᠨ ᠶᠠᠪᠤᠵᠤ ᠠᠯᠪᠠ ᠬᠠᠭᠠᠬᠤ ᠨᠢ ᠬᠡᠴᠡᠭᠦᠦ ᠪᠠᠢᠨᠠ᠃ ᠪᠤᠷᠬᠠᠨ ᠲᠩᠷᠢ ᠮᠡᠳᠡᠭ! ᠪᠢ ᠶᠡᠷᠦᠨᠢ(ᠶᠡᠷᠦ ᠨᠢ)ᠪᠣᠰᠤᠨᠠ! ᠭᠡᠵᠡᠢ᠃
ᠡᠪᠦᠭᠡᠨ ᠨᠢᠸᠠᠯ ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ᠂ ᠴᠢ ᠳᠤᠭᠤᠢ ᠪᠠᠢ᠃ ᠳᠠᠷᠤᠭᠠ ᠨᠠᠷ ᠰᠣᠨᠣᠰᠪᠠᠯ ᠮᠢᠬᠠ ᠶ᠋ᠢ ᠴᠢᠨᠢ ᠢᠳᠡᠨᠡ ᠰᠢᠦ᠃ ᠲᠡᠭᠡᠵᠦ ᠪᠠᠢᠭᠰᠠᠨ ᠠ᠋ᠴᠠ ᠣᠴᠢᠵᠤ ᠬᠠᠯᠠᠭᠤᠨ ᠴᠠᠢ ᠠᠪᠴᠢᠷᠠ(ᠠᠪᠴᠢᠷᠠ)᠃ ᠫᠧᠯᠵᠡᠢ᠂ ᠯᠤᠪᠰᠠᠩ᠂ ᠰᠢᠷᠴᠢᠨ ᠲᠠ ᠨᠠᠷ ᠴᠠᠢ ᠳ᠋ᠤ᠌ ᠣᠴᠢᠯᠴᠠ ᠭᠡᠵᠦ ᠡᠪᠦᠯ ᠦ᠋ᠨ ᠰᠡᠭᠦᠯ ᠰᠠᠷᠠ ᠶ᠋ᠢᠨ ᠲᠡᠷᠡ ᠦᠳᠡᠰᠢ ᠶ᠋ᠢᠨ ᠪᠦᠷᠦᠩᠬᠦᠢ ᠪᠡᠷ ᠬᠡᠲᠡ ᠬᠠᠪᠢᠷᠴᠤ᠂ ᠬᠠᠨᠵᠤᠨ ᠤ᠋ ᠵᠤᠤᠬᠠᠨ ᠳ᠋ᠤ᠌ ᠭᠠᠯ ᠠᠰᠠᠭᠠᠪᠠ᠃ ᠭᠠᠯ ᠤ᠋ᠨ ᠳᠥᠯᠥ ᠳᠥᠷᠥᠯᠵᠡᠨ(ᠳᠦᠷᠡᠯᠵᠡᠨ)᠂ ᠭᠠᠯ ᠠᠰᠠᠭᠠᠭᠰᠠᠨ ᠲᠡᠷᠡ ᠡᠪᠦᠭᠡᠨ ᠴᠡᠷᠢᠭ ᠦ᠋ᠨ ᠬᠦᠷᠡᠯ ᠦ᠋ᠨ ᠥᠩᠭᠡ ᠲᠡᠢ ᠦᠷᠴᠢᠭᠢᠷ ᠨᠢᠭᠤᠷ᠂ ᠪᠠᠢᠰᠢᠩ ᠤ᠋ᠨ ᠲᠠᠭᠠᠵᠠ ᠠ᠋ᠴᠠ ᠤᠨᠵᠢᠭᠰᠠᠨ ᠬᠠᠷᠠ ᠬᠦ ᠢᠰᠦ ᠪᠣᠯᠤᠭᠰᠠᠨ ᠤᠷᠠᠩᠬᠠᠢ ᠴᠠᠭᠠᠰᠤᠨ ᠳ᠋ᠤ᠌ ᠲᠤᠶᠠᠭᠠ ᠲᠣᠰᠴᠤ᠂ ᠭᠠᠯ ᠲᠣᠭᠣᠷᠢᠭᠰᠠᠨ ᠴᠡᠷᠢᠭ ᠦ᠋ᠨ ᠰᠡᠭᠦᠳᠡᠷ᠂ ᠴᠠᠩᠳᠠᠭᠰᠠᠨ(ᠴᠠᠩᠲᠤᠭᠰᠠᠨ) ᠰᠢᠪᠠᠷ ᠲᠤᠭᠤᠷᠭᠠᠨ ᠳ᠋ᠤ᠌ ᠭᠠᠯ ᠤ᠋ᠨ ᠳᠥᠯᠥ ᠳᠥᠷᠥᠯᠵᠡᠬᠦ(ᠳᠦᠷᠡᠯᠵᠡᠬᠦ) ᠳ᠋ᠦ᠍ ᠣᠪᠣᠭᠠᠨᠠᠨ ᠬᠥᠳᠡᠯᠵᠦ᠂ ᠬᠠᠷᠠᠩᠭᠤᠢ ᠳᠣᠲᠣᠷᠠ ᠠ᠋ᠴᠠ ᠰᠠᠮᠨᠠᠭᠠ ᠦᠭᠡᠢ ᠶᠡᠬᠡᠯᠡ(ᠶᠡᠬᠡ ᠯᠡ) ᠤᠳᠠᠵᠤ᠂ ᠰᠢᠷᠢᠯᠳᠦᠭᠰᠡᠨ ᠭᠡᠵᠢᠭᠡ ᠲᠡᠢ᠂ ᠬᠦᠷᠡᠩ ᠤᠯᠠᠭᠠᠨ ᠴᠢᠷᠠᠢ ᠲᠠᠢ ᠬᠥᠮᠦᠨ᠂ ᠡᠨᠳᠡ ᠲᠡᠨᠳᠡ ᠡᠴᠡ ᠭᠠᠯ ᠤ᠋ᠨ ᠳᠡᠷᠭᠡᠳᠡ ᠢᠷᠡᠵᠦ ᠭᠠᠩᠰᠠ ᠪᠠᠨ ᠠᠰᠠᠭᠠᠭᠠᠳ᠂ ᠬᠠᠷᠠᠩᠭᠤᠢ ᠳ᠋ᠤ᠌ ᠬᠠᠨᠵᠤᠨ ᠳᠡᠭᠡᠷᠡ ᠣᠴᠢᠵᠤ ᠲᠠᠮᠠᠬᠢ ᠪᠠᠨ ᠲᠠᠲᠠᠬᠤ ᠳ᠋ᠤ᠌ ᠤᠯᠠᠭᠠᠨ ᠭᠠᠯ ᠡᠨᠳᠡ ᠲᠡᠨᠳᠡ ᠦᠵᠡᠭᠳᠡᠨ᠂ ᠭᠠᠩᠰᠠ ᠪᠠᠨ ᠲᠣᠩᠰᠢᠵᠠᠭᠠᠬᠤ ᠴᠢᠮᠡᠭᠡ ᠰᠣᠨᠣᠰᠳᠠᠪᠠ᠃
ᠡᠪᠦᠭᠡᠨ ᠨᠢᠸᠠᠯ᠂ ᠶᠣᠬᠣ ᠭᠡᠵᠦ ᠪᠣᠰᠤᠭᠠᠳ ᠬᠠᠷᠠ ᠬᠦ ᠪᠣᠯᠤᠭᠰᠠᠨ ᠰᠢᠯ ᠲᠡᠢ ᠬᠡᠳᠦᠨ ᠳ᠋ᠧᠩᠯᠦ ᠳ᠋ᠦ᠍ ᠬᠦᠢᠲᠡᠨ ᠳ᠋ᠦ᠍ ᠪᠡᠭᠡᠷᠡᠵᠦ ᠨᠤᠭᠤᠷᠠᠵᠤ ᠥᠭᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠳ᠋ᠧᠩ ᠪᠠᠷᠢᠬᠤ ᠭᠡᠵᠦ ᠮᠤᠩᠬᠢᠨᠠᠨ ᠣᠷᠣᠯᠳᠣᠭᠰᠠᠭᠠᠷ ᠭᠡᠷᠡᠯ ᠪᠠᠷᠢᠬᠤᠢᠴᠠ ᠪᠣᠯᠵᠠᠢ᠃ ᠲᠡᠷᠡ ᠬᠡᠳᠦᠨ ᠮᠠᠭᠤ ᠳ᠋ᠧᠩᠯᠦ ᠲᠡᠢ ᠳ᠋ᠧᠩ ᠦ᠋ᠨ ᠪᠦᠳᠡᠭᠢ ᠭᠡᠷᠡᠯ ᠳ᠋ᠦ᠍ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠭᠡᠵᠦ ᠪᠠᠢᠭᠠ ᠲᠡᠷᠡ ᠬᠦᠢᠲᠡᠨ ᠴᠢᠭᠢᠭ ᠲᠡᠢ ᠰᠢᠪᠡᠷ ᠪᠠᠢᠰᠢᠩ ᠤ᠋ᠨ ᠣᠩᠭᠣᠷᠬᠠᠢ ᠡᠭᠦᠳᠡ ᠴᠣᠩᠬᠣ ᠨᠢ ᠬᠠᠷᠠ ᠨᠦᠬᠡ ᠰᠢᠭ ᠬᠠᠷᠠᠭᠳᠠᠵᠤ᠂ ᠳᠡᠭᠡᠳᠦᠬᠢ ᠲᠠᠭᠠᠵᠠ ᠶ᠋ᠢᠨ ᠴᠣᠭᠣᠷᠣᠬᠠᠢ(ᠴᠤᠭᠤᠷᠬᠠᠢ) ᠣᠩᠭᠣᠢᠨ ᠦᠵᠡᠭᠳᠡᠵᠦ᠂ ᠬᠠᠨᠵᠤᠨ ᠳᠡᠭᠡᠭᠦᠷ ᠴᠡᠷᠢᠭ ᠦ᠋ᠨ ᠬᠤᠴᠢᠯᠭᠠ ᠬᠢᠵᠦ ᠪᠠᠢᠭᠰᠠᠨ ᠤᠷᠠᠩᠬᠠᠢ ᠨᠣᠣᠷᠬᠠᠢ ᠮᠠᠭᠤ ᠰᠠᠢᠨ ᠢᠮᠠᠭᠠᠨ ᠳᠠᠬᠤ᠂ ᠳᠡᠪᠡᠯ ᠬᠠᠷᠠᠭᠳᠠᠬᠤ ᠨᠢ ᠦᠨᠡᠬᠡᠷ ᠦᠷᠦ ᠡᠪᠡᠳᠦᠯᠲᠡᠢ᠃ ᠲᠡᠷᠡ ᠬᠤᠸᠠᠷᠠᠨ ᠢ᠋ ᠪᠣᠳᠣᠪᠠᠯ᠂ ᠲᠦᠮᠡᠨ ᠨᠦᠬᠡ ᠰᠦᠪᠡ ᠶ᠋ᠢ ᠮᠠᠭᠤ ᠰᠠᠢᠨ ᠠᠳᠠᠰᠬᠠ ᠪᠠᠷ ᠪᠥᠭᠯᠡᠵᠦ ᠲᠠᠭᠯᠠᠭᠰᠠᠨ ᠰᠢᠷᠠ ᠢᠰᠡᠭᠡᠢ ᠣᠪᠣᠬᠠᠢ ᠲᠠᠢ ᠶᠠᠳᠠᠭᠤ ᠶ᠋ᠢᠨ ᠲᠤᠢᠯ ᠳ᠋ᠤ᠌ ᠬᠦᠷᠦᠭᠰᠡᠨ ᠬᠥᠮᠦᠨ ᠦ᠌ ᠮᠠᠭᠤ ᠣᠪᠣᠬᠠᠢ ᠴᠤ᠌ ᠭᠡᠰᠡᠨ᠂ ᠭᠣᠯᠣᠮᠲᠠ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠭᠠᠯ ᠲᠠᠢ ᠳᠤᠯᠠᠭᠠᠨ ᠰᠠᠢᠬᠠᠨ ᠶᠡᠬᠡᠯᠡ(ᠶᠡᠬᠡ ᠯᠡ) ᠲᠣᠬᠢᠯᠢᠭ ᠰᠠᠢᠬᠠᠨ ᠣᠷᠣᠨ ᠭᠡᠷ ᠰᠢᠭ ᠦᠵᠡᠭᠳᠡᠬᠦ ᠪᠠᠢᠬᠠ᠃
ᠥᠨᠥᠬᠢ ᠤᠷᠭᠤᠵᠤ ᠪᠣᠰᠤᠨᠠ ᠭᠡᠰᠡᠨ ᠴᠡᠷᠢᠭ᠂ ᠭᠬᠢᠷ ᠲᠠᠭ ᠪᠣᠯᠤᠭᠰᠠᠨ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠮᠣᠳᠣᠨ ᠳᠣᠩᠪᠣ(ᠳᠣᠮᠪᠣ) ᠲᠠᠢ ᠴᠠᠢ ᠡᠭᠦᠷᠴᠦ ᠢᠷᠡᠭᠡᠳ ᠬᠠᠨᠵᠤᠨ ᠤ᠋ ᠡᠮᠦᠨᠡ ᠭᠠᠵᠠᠷ ᠲᠠᠯᠪᠢᠵᠤ᠂
— ᠵᠠ᠂ ᠳᠤᠷᠠᠲᠠᠢ ᠬᠥᠮᠦᠨ ᠴᠠᠢ ᠭᠦᠵᠡᠭᠡᠯᠡᠵᠦ ᠪᠠᠢ ᠭᠡᠵᠡᠢ᠃
ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠪᠠᠰᠠ ᠳᠣᠩᠪᠣ ᠲᠠᠢ ᠴᠠᠢ ᠡᠭᠦᠷᠴᠦ ᠶᠠᠪᠤᠭᠰᠠᠨ ᠴᠡᠷᠢᠭ᠂ ᠲᠠᠮᠤ ᠶ᠋ᠢᠨ ᠠᠮᠢᠲᠠᠨ ᠲᠠᠮᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ) ᠵᠢᠷᠭᠠᠯ ᠲᠠᠢ ᠭᠡᠵᠦ᠂ ᠠᠶᠠᠭᠠ ᠪᠠᠨ ᠲᠣᠰᠴᠤ ᠪᠠᠢ ᠨᠥᠬᠥᠳ ᠮᠢᠨᠢ ᠭᠡᠵᠦ ᠠᠭᠤᠷ ᠰᠠᠪᠰᠠᠭᠰᠠᠨ ᠬᠠᠯᠠᠭᠤᠨ ᠴᠠᠢ ᠲᠠᠢ ᠳᠣᠩᠪᠣ ᠪᠠᠨ ᠰᠢᠷᠣᠢ ᠶ᠋ᠢᠨ ᠱᠠᠯᠠ ᠳᠡᠭᠡᠷᠡ ᠲᠠᠯᠪᠢᠪᠠ᠃
ᠡᠪᠦᠭᠡᠨ ᠨᠢᠸᠠᠯ᠂ ᠡᠯᠵᠢᠭᠡ ᠮᠣᠳᠣᠨ ᠬᠤᠳᠠᠷᠭᠠᠨ ᠳ᠋ᠠᠭᠠᠨ ᠲᠠᠰᠤᠳᠠᠭ ᠭᠡᠳᠡᠭ ᠠ᠋ ᠭᠡᠵᠦ ᠭᠤᠨᠢᠨ ᠬᠣᠱᠣᠩᠨᠠᠵᠤ᠂ ᠰᠢᠷᠴᠢᠨ ᠳ᠋ᠦ᠍᠂ ᠮᠠᠢ ᠬᠦᠦ ᠮᠢᠨᠢ᠂ ᠨᠢᠭᠡ ᠠᠳᠬᠤ ᠬᠤᠷᠤᠳ᠂ ᠥᠨᠥᠳᠥᠷ ᠴᠡᠷᠢᠭ ᠦ᠋ᠨ ᠡᠮᠴᠢ ᠯᠠᠮᠠ ᠨᠠᠳᠠᠳᠤ (ᠨᠠᠳᠠ ᠳ᠋ᠤ᠌) ᠬᠣᠶᠠᠷ ᠠᠳᠬᠤ ᠰᠠᠢᠬᠠᠨ ᠬᠤᠷᠤᠳ ᠥᠭᠭᠦᠭᠰᠡᠨ᠃ ᠮᠠᠨᠠᠢ ᠴᠡᠷᠢᠭ ᠦ᠋ᠨ ᠢᠳᠡᠳᠡᠭ ᠬᠤᠷᠤᠳ ᠢ᠋ ᠪᠣᠳᠣᠪᠠᠯ ᠠᠮᠲᠠ ᠨᠢ ᠶᠠᠷᠢᠶᠠ ᠦᠭᠡᠢ ᠰᠠᠢᠬᠠᠨ ᠬᠤᠷᠤᠳ ᠠ᠋ ᠬᠡᠮᠡᠪᠡᠰᠦ᠂ ᠡᠪᠦᠯ ᠦ᠋ᠨ ᠲᠡᠰᠬᠢᠮᠡ ᠬᠦᠢᠲᠡᠨ ᠳ᠋ᠦ᠍ ᠬᠡᠳᠦᠨ ᠰᠠᠷᠠ ᠪᠠᠷ ᠠᠶᠠᠯᠠᠨ ᠶᠠᠪᠤᠵᠤ ᠪᠡᠷᠬᠡ ᠶ᠋ᠢ ᠲᠤᠭᠤᠯᠵᠤ ᠰᠤᠷᠤᠭᠰᠠᠨ ᠬᠠᠲᠠᠭᠤᠵᠢᠯ ᠲᠠᠢ ᠡᠷᠡᠴᠦᠳ᠂ ᠲᠡᠷᠡ ᠬᠡᠳᠦᠨ ᠳᠣᠩᠪᠣ ᠲᠠᠢ ᠬᠠᠯᠠᠭᠤᠨ ᠴᠠᠢ ᠶ᠋ᠢ ᠲᠣᠭᠣᠷᠢᠵᠠᠭᠠᠵᠤ᠂ ᠵᠠᠷᠢᠮ ᠨᠢ ᠴᠢᠯᠠᠭᠤ ᠰᠢᠭ᠋ ᠬᠠᠲᠠᠭᠤ ᠬᠤᠷᠤᠳ ᠴᠠᠢ ᠳ᠋ᠠᠭᠠᠨ ᠳᠡᠪᠲᠦᠭᠡᠵᠦ ᠤᠤᠭᠤᠬᠤ ᠭᠡᠵᠦ᠂ ᠵᠠᠷᠢᠮ ᠨᠢ ᠲᠠᠴᠢᠭᠢᠨᠠᠲᠠᠯᠠ ᠵᠠᠵᠢᠯᠤᠨ᠂ ᠵᠠᠷᠢᠮ ᠨᠢᠭᠡ ᠨᠢ ᠳᠠᠬᠢᠭᠠᠳ ᠯᠠ ᠬᠦᠭᠡᠴᠢᠷᠡᠭᠰᠡᠨ ᠬᠤᠷᠤᠳ ᠥᠭᠴᠡᠢ᠃ ᠠᠦ᠋ᠲ᠋ᠣᠨᠣᠮᠢ ᠭᠡᠳᠡᠭ ᠮᠠᠨᠢ ᠮᠠᠨᠵᠤ ᠨᠠᠷ ᠠ᠋ᠴᠠ ᠳᠣᠣᠷᠠ ᠶᠤᠮ ᠰᠢᠪ ᠳᠡ! ᠭᠡᠵᠦ ᠳᠤᠤᠭᠠᠷᠴᠠᠭᠠᠪᠠ᠃
ᠴᠢᠯᠥᠭᠡᠨ ᠦ᠌ ᠬᠠᠭᠤᠳᠠᠰᠤ ᠪᠠᠷ ᠬᠦᠷᠢᠶᠡ ᠣᠷᠣᠵᠤ ᠶᠠᠪᠤᠭᠠᠳ ᠢᠷᠡᠭᠰᠡᠨ ᠠᠵᠠ ᠲᠠᠢ ᠨᠢᠭᠡᠨ ᠨᠢ ᠮᠢᠬᠠ ᠡᠭᠦᠷᠴᠦ᠂ ᠭᠠᠭᠴᠠ ᠨᠢᠭᠡ ᠤᠯᠠᠭᠠᠨ ᠮᠥᠩᠭᠥ ᠣᠯᠵᠤ᠂ ᠢᠳᠡᠬᠦ ᠶᠠᠭᠤᠮᠠ ᠠᠪᠴᠢᠷᠠᠭᠰᠠᠨ ᠢ᠋ᠶ᠋ᠠᠨ ᠠᠪᠳᠠᠷᠠ ᠲᠠᠢ ᠨᠢ ᠠᠪᠳᠠᠷᠠ ᠠ᠋ᠴᠠ᠂ ᠪᠣᠭᠴᠣ ᠲᠠᠢ ᠨᠢ ᠪᠣᠭᠴᠣ ᠠ᠋ᠴᠠ ᠪᠠᠨ᠂ ᠬᠣᠨᠢᠨ ᠤ᠋ ᠪᠣᠯᠭᠣᠭᠰᠠᠨ ᠲᠣᠯᠣᠭᠠᠢ ᠰᠢᠭᠢᠷᠡ ᠭᠠᠷᠭᠠᠵᠤ ᠬᠠᠯᠠᠭᠤᠨ ᠴᠠᠢ ᠳ᠋ᠤ᠌ ᠭᠡᠰᠬᠡᠨ ᠢᠳᠡᠬᠦ ᠭᠡᠵᠦ ᠣᠷᠣᠯᠳᠣᠪᠠ᠃ ᠭᠡᠵᠢᠭᠡᠨ ᠦ᠌ ᠳᠠᠪ ᠲᠠᠯᠪᠢᠭᠰᠠᠨ ᠰᠠᠶᠢᠬᠠᠨ ᠬᠠᠷᠠ ᠪᠣᠯᠤᠭᠰᠠᠨ ᠪᠠᠢᠳᠠᠯ ᠲᠠᠢ ᠨᠢᠭᠡᠨ ᠴᠣᠬᠣᠷ ᠴᠡᠷᠢᠭ ᠪᠣᠭᠴᠣ ᠳᠣᠲᠣᠷᠠ ᠠ᠋ᠴᠠ ᠬᠣᠨᠢᠨ ᠤ᠋ ᠪᠣᠯᠭᠣᠭᠰᠠᠨ ᠬᠣᠶᠠᠷ ᠲᠣᠯᠣᠭᠠᠢ ᠭᠠᠷᠭᠠᠵᠤ ᠰᠢᠷᠴᠢᠨ ᠦ᠌ ᠵᠦᠭ ᠠᠨᠢᠰᠭᠢᠵᠤ᠂
— ᠭᠤᠷᠪᠠᠨ ᠮᠥᠩᠭᠥ ᠪᠡᠷ ᠨᠢᠭᠡ ᠶ᠋ᠢ ᠨᠢ ᠠᠪᠤᠪᠠᠯ ᠠᠪ᠃ ᠪᠢ ᠪᠠᠰᠠ ᠰᠢᠭᠢᠷᠡ ᠦᠭᠭᠦᠯᠴᠢᠨᠡ ᠭᠡᠬᠦ ᠳ᠋ᠦ᠍ᠨᠢ ᠲᠡᠷᠡ ᠲᠣᠯᠣᠭᠠᠢ ᠶᠡᠬᠡ ᠯᠡ ᠡᠠᠮᠲᠠᠲᠠᠢ ᠰᠠᠢᠬᠠᠨ ᠦᠵᠡᠭᠳᠡᠵᠦ ᠰᠢᠷᠴᠢᠨ ᠠᠷᠭᠠ ᠪᠤᠶᠤ ᠬᠥᠬᠡᠷᠡᠭ ᠦ᠋ᠨ ᠰᠠᠪᠠᠨ ᠳᠣᠲᠣᠷᠠ ᠠ᠋ᠴᠠ ᠴᠡᠷᠢᠭ ᠦ᠋ᠨ ᠨᠢᠭᠡᠨ ᠰᠠᠷᠠ ᠶ᠋ᠢᠨ ᠴᠠᠯᠢᠩ ᠭᠡᠵᠦ ᠰᠠᠶᠢ ᠪᠠᠭᠤᠭᠰᠠᠨ ᠭᠤᠴᠢᠨ ᠮᠥᠩᠭᠥᠨ ᠡᠴᠡ ᠭᠤᠷᠪᠠᠨ ᠮᠥᠩᠭᠥ ᠠᠪᠴᠤ ᠥᠭᠭᠦᠯᠡ᠃
ᠡᠪᠦᠭᠡᠨ ᠨᠢᠸᠠᠯ᠂ ᠲᠡᠷᠡ ᠲᠣᠯᠣᠭᠠᠢ ᠶ᠋ᠢ ᠦᠵᠡᠭᠡᠳ ᠬᠣᠷᠣᠬᠠᠢ ᠨᠢ ᠬᠦᠷᠴᠦ ᠣᠪᠣ ᠲᠠᠷᠭᠤᠨ ᠬᠣᠨᠢ ᠪᠠᠢᠵᠤ ᠳᠠ᠃ ᠰᠢᠭᠢᠷᠡ ᠨᠢ ᠴᠦ᠍ ᠮᠥᠨ ᠰᠠᠢᠬᠠᠨ ᠬᠤᠢᠬᠠᠯᠠᠵᠤ᠂ ᠠᠶᠠᠲᠠᠢᠬᠠᠨ ᠴᠢᠨᠠᠵᠠᠢ ᠭᠡᠵᠦ ᠲᠡᠷᠡ ᠬᠣᠨᠢᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠭᠢᠯᠠᠨ ᠬᠢᠵᠦ ᠬᠠᠷᠠᠪᠠ᠃ ᠰᠢᠷᠴᠢᠨ ᠲᠡᠷᠡ ᠡᠪᠦᠭᠡᠨ ᠢ᠋ ᠰᠠᠶᠢ ᠬᠤᠷᠤᠳ ᠠ᠋ᠴᠠ ᠪᠠᠨ ᠦᠭᠬᠦᠯᠴᠢᠭᠰᠡᠨ ᠪᠢᠯᠡ ᠭᠡᠵᠦ ᠪᠣᠳᠣᠭᠠᠳ᠂
— ᠡᠪᠦᠭᠡᠨ ᠭᠤᠸᠠᠢ᠂ ᠡᠨᠡ ᠲᠣᠯᠣᠭᠠᠢ ᠰᠢᠭᠢᠷᠡ ᠶ᠋ᠢ ᠬᠣᠶᠠᠭᠤᠯᠠ ᠪᠠᠨ ᠴᠠᠢ ᠳ᠋ᠤ᠌ ᠬᠢᠵᠦ ᠢᠳᠡᠶᠡ ᠭᠡᠬᠦ ᠳ᠋ᠦ᠍ᠨᠢ᠂ ᠵᠠ ᠭᠡᠵᠦ ᠪᠠᠶᠠᠷᠯᠠᠭᠠᠳ ᠬᠣᠭᠣᠯᠠᠨ ᠤ᠋ ᠰᠠᠪᠠᠨ ᠳ᠋ᠤ᠌ ᠬᠠᠯᠠᠭᠤᠨ ᠴᠠᠢ ᠶ᠋ᠢ ᠶᠠᠭᠠᠷᠠᠨ ᠬᠢᠪᠡ᠃
ᠬᠣᠭᠣᠯᠠ ᠢᠳᠡᠬᠦ ᠳ᠋ᠡᠭᠡᠨ ᠱᠤᠯᠤᠭᠠᠨᠠᠬᠤ ᠳᠤᠷᠠ ᠦᠭᠡᠢ ᠮᠣᠩᠭᠣᠯᠴᠤᠳ ᠬᠠᠶᠠ ᠭᠠᠭᠴᠠ ᠨᠢᠭᠡ ᠦᠭᠡ ᠳᠤᠤᠭᠠᠷᠴᠤ᠂ ᠴᠠᠢ ᠬᠣᠭᠣᠯᠠ ᠪᠠᠨ ᠳᠠᠭᠤᠨ ᠦᠭᠡᠢ ᠢᠳᠡᠵᠦ ᠤᠤᠭᠤᠭᠠᠳ᠂ ᠬᠠᠨᠵᠤᠨ ᠳᠡᠭᠡᠷᠡᠬᠢ ᠨᠠᠮᠬᠠᠨ ᠪᠠᠩᠵᠠᠨ ᠣᠷᠣᠨ ᠳᠡᠭᠡᠷᠡ ᠪᠡᠨ ᠰᠠᠭᠤᠵᠠᠭᠠᠨ ᠣᠷᠣᠢ ᠶ᠋ᠢᠨ ᠲᠣᠭᠠᠯᠠᠯᠭᠠ ᠪᠣᠯᠲᠠᠯᠠ ᠴᠠᠭ ᠥᠩᠭᠡᠷᠡᠭᠦᠯᠬᠦ ᠳ᠋ᠡᠭᠡᠨ ᠰᠠᠶᠢ ᠶᠠᠭᠤᠮᠠ ᠶᠠᠷᠢᠵᠠᠭᠠᠵᠤ᠂ ᠳᠦᠩᠭᠡᠷ ᠳᠦᠩᠭᠡᠷ ᠳᠤᠤᠭᠠᠷᠴᠠᠭᠠᠪᠠ᠃
ᠰᠢᠷᠴᠢᠨ ᠦ᠌ ᠬᠠᠵᠠᠭᠤ ᠳ᠋ᠠᠬᠢ ᠡᠪᠦᠭᠡᠨ ᠴᠡᠷᠢᠭ᠂ ᠥᠨᠥ ᠥᠷᠯᠥᠭᠡ ᠫᠦᠯᠧᠮᠶᠣᠲ ᠰᠤᠮᠤᠨ ᠳ᠋ᠤ᠌ ᠥᠨᠥᠬᠢ ᠭᠠᠯᠵᠠᠭᠤ ᠱᠦᠢᠪ ᠳᠠᠬᠢᠭᠠᠳ ᠯᠠ ᠨᠢᠭᠡ ᠴᠡᠷᠢᠭ ᠢ᠋ ᠵᠣᠳᠣᠵᠤ ᠤᠯᠠᠭᠠᠨ ᠨᠡᠯᠦᠢ ᠪᠣᠯᠭᠠᠵᠠᠢ᠃ ᠶᠡᠷᠦ ᠬᠥᠮᠦᠨ ᠵᠣᠳᠣᠬᠤ ᠦᠭᠡᠢ ᠥᠨᠵᠢᠬᠦ ᠭᠡᠵᠦ ᠪᠠᠢᠳᠠᠭ ᠦᠭᠡᠢ ᠮᠠᠭᠤᠬᠠᠢ ᠮᠢᠬᠠᠴᠢᠨ ᠳ᠋ᠠᠭ ᠠ (ᠠ᠋)ᠭᠡᠵᠦ ᠳᠤᠤᠭᠠᠷᠪᠠ᠃ ᠪᠠᠰᠠ ᠨᠢᠭᠡ ᠬᠥᠮᠦᠨ ᠤᠷᠵᠢ ᠰᠥᠨᠢ ᠬᠣᠶᠠᠳᠤᠭᠠᠷ ᠰᠤᠮᠤᠨ ᠠ᠋ᠴᠠ ᠲᠠᠪᠤᠨ ᠬᠥᠮᠦᠨ ᠪᠣᠰᠴᠤ ᠭᠡᠨᠡ ᠭᠡᠬᠦ ᠳ᠋ᠦ᠍ᠨᠢ᠄
— ᠢᠩᠭᠢᠵᠦ ᠪᠠᠢᠬᠤ ᠳ᠋ᠤ᠌ ᠠᠮᠢᠲᠠᠨ ᠪᠣᠰᠴᠤ ᠤᠷᠭᠤᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠭᠡᠵᠦ ᠨᠢᠭᠡ ᠬᠥᠮᠦᠨ ᠬᠡᠯᠡᠵᠡᠢ᠃
— ᠦᠭᠡᠢ ᠶᠡᠷᠦᠨᠢ ᠮᠠᠨᠵᠤ ᠬᠢᠲᠠᠳ ᠢ᠋ ᠬᠥᠭᠡᠭᠡᠵᠦ ᠣᠷᠬᠢᠪᠠᠯ ᠰᠠᠢᠨ ᠰᠠᠢᠬᠠᠨ ᠪᠣᠯᠤᠨᠠ ᠭᠡᠳᠡᠭ ᠮᠠᠨᠢ ᠶᠠᠭᠤ ᠪᠣᠯᠤᠭᠰᠠᠨ ᠪᠢᠯᠡ? ᠭᠡᠵᠦ ᠨᠢᠭᠡ ᠴᠡᠷᠢᠭ ᠦ᠋ᠨ ᠳᠤᠤᠭᠠᠷᠬᠤ ᠳ᠋ᠤ᠌᠄
— ᠣᠴᠢᠭᠠᠳ ᠳᠠᠮᠳᠢᠨ ᠲᠡᠷᠢᠭᠦᠨ ᠡᠴᠡ ᠠᠰᠠᠭᠤᠬᠤ ᠦᠭᠡᠢ ᠤᠤ? ᠭᠡᠵᠡᠢ᠃
— ᠪᠣᠯᠢᠶᠠ ᠳᠠ ᠴᠢ ᠮᠢᠨᠢ᠂ ᠲᠡᠭᠡᠵᠦ ᠮᠢᠬᠠ ᠪᠠᠨ ᠤᠷᠠᠭᠤᠯᠬᠤ ᠪᠠᠨ ᠭᠡᠵᠦ ᠶᠠᠷᠢᠵᠠᠭᠠᠵᠠᠢ᠃
* * *
ᠣᠷᠣᠢ ᠶ᠋ᠢᠨ ᠲᠣᠭᠠᠯᠠᠯᠭᠠ ᠶ᠋ᠢᠨ ᠰᠡᠭᠦᠯ ᠢ᠋ᠶ᠋ᠡᠷ ᠵᠢᠭᠰᠠᠭᠠᠯ ᠤ᠋ᠨ ᠳᠠᠷᠤᠭᠠ ᠨᠠᠷ᠂ ᠮᠠᠷᠭᠠᠰᠢ ᠶ᠋ᠢᠨ ᠠᠵᠢᠯ ᠠᠯᠪᠠᠨ ᠤ᠋ ᠲᠤᠬᠠᠢ ᠮᠡᠳᠡᠭᠳᠡᠬᠦ ᠵᠦᠢᠯ ᠢ᠋ ᠵᠠᠷᠯᠠᠭᠠᠳ ᠮᠠᠷᠭᠠᠲᠤᠷ ᠤ᠋ᠨ ᠮᠣᠷᠢᠨ ᠴᠠᠭ ᠲᠤ᠌ ᠪᠦᠬᠦ ᠭᠤᠷᠪᠠᠨ ᠰᠤᠮᠤᠨ ᠤ᠋ ᠴᠡᠷᠢᠭ ᠢ᠋ ᠪᠣᠭᠳᠠ ᠬᠠᠭᠠᠨ ᠳ᠋ᠤ᠌ ᠮᠥᠷᠭᠥᠭᠦᠯᠬᠦ ᠲᠤᠬᠠᠢ ᠵᠠᠬᠢᠷᠤᠯ ᠤ᠋ᠨ ᠲᠤᠰᠢᠶᠠᠯ ᠢ᠋ ᠰᠣᠨᠣᠰᠬᠠᠪᠠ᠃ ᠵᠢᠵᠢᠭᠦᠷ ᠦ᠋ᠨ ᠪᠦᠷᠢᠶᠡᠴᠢ ᠪᠦᠷᠢᠶᠡ ᠪᠡᠨ ᠲᠠᠲᠠᠵᠤ ᠵᠢᠭᠰᠠᠭᠰᠠᠨ ᠴᠡᠷᠢᠭ᠂ ᠳᠠᠷᠤᠭᠠ ᠨᠠᠷ ᠤ᠋ᠨ ᠺᠣᠮᠠᠨᠳᠠ ᠪᠠᠷ ᠮᠧᠭᠵᠢᠮ ᠤᠩᠰᠢᠵᠤ᠂ ᠮᠠᠨᠢ ᠬᠥᠭᠵᠢᠭᠡᠪᠡ᠃
* * *
— ᠥᠨᠥᠳᠥᠷ ᠡᠭᠡᠯᠲᠡᠢ(ᠡᠭᠡᠯᠢᠲᠡᠢ) ᠥᠩᠭᠡᠷᠡᠯᠡ᠃ ᠴᠢᠯᠠᠭᠤ ᠪᠠᠷᠢᠵᠤ ᠵᠣᠭᠰᠣᠭᠠᠳ᠂ ᠲᠣᠭᠣᠭᠠᠨ ᠤ᠋ ᠭᠠᠵᠠᠷ ᠴᠡᠷᠢᠭ ᠦ᠋ᠨ ᠬᠣᠭᠣᠯᠠ ᠬᠢᠬᠦᠢᠴᠡ ᠪᠣᠯᠤᠭᠠᠳ ᠰᠠᠭᠤᠯᠠ᠃ ᠱᠣᠢᠪ ᠪᠡᠶᠡ ᠶ᠋ᠢᠨ ᠰᠤᠷᠭᠠᠭᠤᠯᠢ ᠵᠢᠭᠠᠭᠠ ᠦᠭᠡᠢ ᠨᠢ ᠪᠣᠯᠵᠤ ᠳᠠ ᠭᠡᠵᠦ ᠰᠢᠷᠴᠢᠨ ᠬᠡᠪᠲᠡᠬᠦ ᠳ᠋ᠡᠭᠡᠨ ᠪᠣᠳᠣᠵᠠᠢ᠃ ᠮᠠᠷᠭᠠᠰᠢ ᠠᠮᠢᠳᠤ ᠪᠤᠷᠬᠠᠨ ᠪᠣᠭᠳᠠ ᠬᠠᠭᠠᠨ᠂ ᠤᠯᠤᠰ ᠤ᠋ᠨ ᠡᠬᠡ ᠳᠠᠭᠢᠨᠢ ᠶ᠋ᠢ ᠦᠵᠡᠵᠦ ᠠᠳᠢᠰ ᠬᠦᠷᠲᠡᠨᠡ ᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ ᠴᠡᠭᠡᠵᠢ ᠳᠦᠭᠦᠷᠡᠩ ᠪᠠᠶᠠᠷᠯᠠᠵᠤ᠂ ᠴᠣᠩᠬᠣ ᠬᠠᠭᠠᠯᠭᠠ ᠦᠭᠡᠢ ᠣᠩᠭᠣᠷᠬᠠᠢ᠂ ᠴᠢᠭᠢᠭ ᠲᠡᠢ ᠰᠢᠪᠡᠷ ᠬᠤᠸᠠᠷᠠᠨ ᠳ᠋ᠤ᠌ ᠲᠠᠭᠠᠷᠠᠵᠤ ᠥᠯᠥᠰᠬᠦ ᠶ᠋ᠢ ᠠᠷᠭᠠ ᠪᠤᠶᠤ ᠤᠷᠭᠤᠨ ᠵᠠᠢᠯᠠᠬᠤ ᠭᠠᠵᠠᠷ ᠦᠭᠡᠢ ᠤᠴᠢᠷ᠂ ᠲᠡᠰᠪᠦᠷᠢᠯᠡᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠨᠢ ᠪᠦᠷ ᠴᠦ᠍ ᠭᠣᠷᠢ ᠲᠠᠰᠤᠷᠠᠭᠰᠠᠨ ᠬᠡᠴᠡᠭᠦᠦ ᠠᠮᠢᠳᠤᠷᠠᠯ ᠠᠷᠠᠢ ᠪᠢᠰᠢ ᠪᠣᠯᠤᠯᠲᠠᠢ ᠭᠡᠵᠦ ᠰᠠᠨᠠᠭᠳᠠᠵᠤ᠂ ᠵᠠ᠂ ᠡᠨᠡ ᠴᠡᠷᠢᠭ ᠦ᠋ᠨ ᠰᠤᠷᠭᠠᠭᠤᠯᠢ ᠢᠩᠭᠢᠨ ᠲᠢᠩᠭᠢᠨ ᠲᠡᠭᠦᠰᠬᠡᠭᠡᠳ᠂ ᠪᠣᠭᠳᠠ ᠶ᠋ᠢᠨ ᠠᠪᠤᠷᠠᠯ ᠢ᠋ᠶ᠋ᠠᠷ ᠭᠠᠢ ᠦᠭᠡᠢ ᠪᠣᠯᠬᠤ ᠪᠣᠢ ᠭᠡᠵᠦ ᠪᠣᠳᠣᠵᠤ᠂ ᠳᠡᠷᠭᠡᠳᠡ ᠨᠢ ᠡᠪᠦᠭᠡᠨ ᠴᠡᠷᠢᠭ ᠤᠩᠰᠢᠯᠭᠠ ᠪᠠᠨ ᠰᠢᠪᠡᠨᠡᠨ ᠤᠩᠰᠢᠵᠤ ᠪᠠᠢᠭᠠ ᠶ᠋ᠢ ᠪᠦᠦᠷ ᠲᠦᠦᠷ ᠴᠢᠬᠢᠨ ᠦ᠌ ᠦᠵᠦᠭᠦᠷ ᠢ᠋ᠶ᠋ᠡᠷ ᠰᠣᠨᠣᠰᠤᠨ ᠤᠨᠲᠠᠴᠢᠪᠠ᠃
ᠥᠷᠯᠥᠭᠡ ᠨᠢ ᠵᠠᠷᠢᠮ ᠬᠥᠮᠦᠨ ᠨᠢᠭᠤᠷ ᠭᠠᠷ ᠢ᠋ᠶ᠋ᠠᠨ ᠴᠠᠰᠤ ᠪᠠᠷ ᠤᠬᠢᠶᠠᠵᠤ᠂ ᠵᠠᠷᠢᠮ ᠨᠢ ᠭᠠᠭᠴᠠ ᠪᠠᠯᠭᠤ ᠤᠰᠤ ᠪᠠᠷ ᠠᠮᠠᠨ ᠠ᠋ᠴᠠ ᠭᠠᠷ ᠳᠡᠭᠡᠷᠡ ᠢ᠋ᠶ᠋ᠡᠨ ᠨᠠᠷᠢᠬᠠᠨ ᠢ᠋ᠶ᠋ᠠᠷ ᠱᠣᠵᠢᠭᠢᠨᠠᠭᠤᠯᠤᠨ᠂ ᠭᠣᠭᠣᠵᠢᠭᠤᠯᠵᠤ᠂ ᠭᠠᠷ ᠨᠢᠭᠤᠷ ᠢ᠋ᠶ᠋ᠠᠨ ᠵᠢᠯᠮᠡᠢᠭᠰᠡᠨ ᠪᠣᠯᠵᠤ ᠶᠠᠭᠤ ᠴᠤ᠌ ᠪᠣᠯᠤᠭᠰᠠᠨ ᠪᠣᠭᠳᠠ ᠭᠡᠭᠡᠬᠡᠨ ᠦ᠌ ᠡᠮᠦᠨᠡ ᠵᠢᠭᠰᠠᠭᠠᠯ ᠤ᠋ᠨ ᠰᠤᠷᠭᠠᠭᠤᠯᠢ ᠦᠵᠡᠭᠦᠯᠬᠦ ᠶᠦᠮ ᠪᠠᠢᠨᠠ ᠭᠡᠵᠦ ᠡᠩ ᠦ᠋ᠨ ᠡᠳᠦᠷ ᠦ᠋ᠨ ᠡᠴᠡ ᠨᠢᠭᠤᠷ ᠭᠠᠷ ᠢ᠋ᠶ᠋ᠠᠨ ᠬᠣᠷᠮᠣᠢ ᠪᠠᠷ ᠠᠷᠴᠢᠬᠤ ᠳ᠋ᠠᠭᠠᠨ ᠪᠠᠬᠠᠨ ᠬᠢᠴᠢᠶᠡᠵᠦ ᠠᠷᠴᠢᠪᠠ᠃ ᠥᠷᠯᠥᠭᠡ ᠶ᠋ᠢᠨ ᠰᠤᠷᠭᠠᠭᠤᠯᠢ ᠬᠢᠬᠦ ᠶ᠋ᠢᠨ ᠡᠮᠦᠨᠡ ᠳᠠᠷᠤᠭᠠ ᠨᠠᠷ᠂ ᠴᠡᠷᠢᠭ ᠦ᠋ᠨ ᠶᠣᠰᠣᠯᠠᠯ ᠤ᠋ᠨ ᠳᠡᠪᠡᠯ ᠬᠤᠪᠴᠠᠰᠤ᠂ ᠵᠡᠪᠰᠡᠭ ᠢ᠋ ᠰᠠᠢᠲᠤᠷ ᠰᠢᠯᠭᠠᠨ ᠦᠵᠡᠪᠡ᠃ ᠬᠥᠬᠡ ᠲᠣᠷᠭᠠᠨ ᠲᠡᠯᠢᠩ ᠳᠡᠪᠡᠯ ᠲᠡᠢ᠂ ᠬᠠᠷᠠ ᠴᠠᠭᠠᠨ ᠬᠤᠷᠠᠭᠠᠨ ᠴᠢᠬᠢᠲᠡᠢ᠂ ᠬᠥᠬᠡ ᠴᠡᠩᠮᠡᠨ ᠲᠣᠪᠢ ᠮᠠᠯᠠᠭᠠᠢ ᠲᠠᠢ᠂ ᠭᠢᠯᠠᠯᠵᠠᠭᠰᠠᠨ ᠪᠤᠯᠢᠭᠠᠷᠢ ᠰᠢᠨᠡ ᠭᠤᠲᠤᠯ ᠲᠠᠢ ᠴᠡᠷᠢᠭ ᠶᠡᠬᠡᠯᠡ ᠭᠣᠶᠣ ᠰᠠᠢᠬᠠᠨ ᠦᠵᠡᠭᠳᠡᠵᠦ᠂ ᠬᠥᠮᠦᠨ ᠰᠢᠦ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠳ᠋ᠡᠭᠡᠨ ᠤᠷᠮᠠᠰᠢᠵᠤ᠂ ᠵᠢᠭᠰᠠᠭᠠᠯ ᠰᠤᠷᠭᠠᠭᠤᠯᠢ ᠪᠠᠨ ᠲᠡᠷᠡ ᠥᠷᠯᠥᠭᠡ ᠪᠤᠵᠠᠭᠠᠢ ᠬᠢᠵᠡᠢ᠃
— ᠰᠠᠢᠨ ᠪᠠᠢᠨᠠ᠂ ᠰᠠᠢᠨ ᠪᠠᠢᠨᠠ᠃ ᠠᠢ ᠳᠠᠬᠢᠭᠠᠳ ᠲᠠ ᠨᠠᠷ ᠡᠳᠦᠷ ᠪᠦᠷᠢ ᠥᠨᠥᠳᠥᠷ ᠰᠢᠭ ᠰᠤᠷᠭᠠᠭᠤᠯᠢ ᠬᠢᠨᠡ᠃ ᠠᠢ ᠮᠠᠷᠭᠠᠰᠢ᠂ ᠢ ᠨᠥᠭᠥᠭᠡᠳᠦᠷ ᠠᠢ᠂ ᠲᠡᠭᠦᠨᠴᠢᠯᠡᠨ ᠬᠡᠵᠢᠶᠡ ᠴᠦ᠍ ᠥᠨᠥᠳᠥᠷ ᠰᠤᠷᠭᠠᠭᠤᠯᠢ ᠶᠠᠮᠠᠷ ᠬᠢᠭᠰᠡᠨ᠂ ᠳ᠋ᠠᠩᠳᠠ ᠲᠡᠢᠮᠦ ᠬᠢᠭᠰᠡᠨ ᠬᠡᠷᠡᠭ ᠲᠡᠢ᠂ ᠠ ᠥᠨᠥᠳᠥᠷ ᠲᠠᠨ ᠤ᠋ ᠬᠥᠮᠦᠨ ᠰᠠᠢᠨ ᠪᠠᠢᠨᠠ᠂ ᠮᠣᠯᠣᠳ᠌ᠼᠢ( ᠵᠠᠯᠠᠭᠤ) ᠭᠡᠵᠦ ᠬᠤᠵᠢᠷᠪᠤᠯᠤᠩ ᠤ᠋ᠨ ᠴᠡᠷᠢᠭ ᠦ᠋ᠨ ᠰᠤᠷᠭᠠᠭᠴᠢ ᠶᠡᠬᠡ ᠴᠢᠩᠭᠠ ᠨᠢᠮᠪᠠᠢ ᠺᠠᠽᠠᠭ ᠦᠷᠢᠶᠡᠳ᠋ᠨᠢᠺ ᠠᠷᠤᠭᠠ ᠹᠷᠤᠯᠤᠸ ᠤ᠋ᠨ ᠮᠠᠭᠲᠠᠬᠤ ᠳ᠋ ᠷᠤᠲ᠋ᠮᠢᠰᠲ᠋ᠷ ᠠᠬᠠᠯᠠᠬᠤ ᠰᠤᠷᠭᠠᠭᠴᠢ ᠸᠠᠰᠢᠯᠢᠶᠧᠹ᠂ ᠲᠡᠷᠡ ᠰᠤᠷᠭᠠᠭᠴᠢ ᠶ᠋ᠢᠨ ᠵᠦᠭ ᠬᠠᠨᠳᠤᠵᠤ᠂
— ᠡᠨᠡ ᠴᠡᠷᠢᠭ ᠢ᠋ ᠦᠵᠡᠪᠡᠯ᠂ ᠰᠠᠢᠨ ᠰᠤᠷᠭᠠᠵᠤ᠂ ᠪᠠᠢᠷᠢ ᠪᠠᠢᠳᠠᠯ ᠢ᠋ ᠨᠢ ᠣᠯᠢᠭᠲᠠᠢ ᠰᠢᠦ ᠪᠣᠯᠭᠠᠪᠠᠯ ᠶᠠᠭᠤᠮᠠ ᠰᠤᠷᠬᠤ ᠰᠢᠨᠵᠢᠲᠡᠢ ᠤᠯᠤᠰ ᠰᠢᠦ᠂ ᠭᠠᠭᠴᠠ ᠬᠦ᠌ ᠪᠢᠳᠡᠨ ᠦ᠌ ᠡᠨᠡ ᠲᠤᠬᠠᠢ ᠮᠡᠷᠡᠢᠵᠦ ᠴᠡᠷᠢᠭ ᠦ᠋ᠨ ᠪᠠᠢᠳᠠᠯ ᠰᠠᠢᠵᠢᠷᠠᠭᠤᠯᠬᠤ ᠶ᠋ᠢ ᠱᠠᠭᠠᠷᠳᠠᠭᠰᠠᠨ ᠮᠠᠨᠢ ᠣᠳᠣ ᠬᠦᠷᠲᠡᠯᠡ ᠶᠠᠪᠤᠴᠠ ᠦᠭᠡᠢ ᠪᠠᠢᠵᠠᠢ᠃ ᠬᠠᠷᠢᠨ ᠥᠨᠥᠳᠥᠷ ᠬᠠᠭᠠᠨ ᠪᠡᠶᠡ ᠪᠡᠷ ᠴᠡᠷᠢᠭ ᠢ᠋ ᠦᠵᠡᠵᠦ ᠰᠣᠨᠢᠷᠬᠠᠬᠤ ᠲᠤᠯᠠ᠂ ᠨᠢᠭᠡ ᠤᠬᠠᠭᠠᠨ ᠪᠠᠢᠵᠤ ᠮᠠᠭᠠᠳ ᠦᠭᠡᠢ᠃ ᠭᠡᠪᠡᠴᠦ ᠮᠠᠨᠠᠢ ᠰᠠᠢᠳ ᠳᠠᠷᠤᠭᠠ ᠨᠠᠷ ᠤ᠋ᠨ ᠪᠠᠢᠳᠠᠯ ᠢ᠋ ᠦᠵᠡᠪᠡᠯ ᠪᠢ ᠬᠤᠪᠢ ᠳ᠋ᠠᠭᠠᠨ ᠭᠣᠷᠢ ᠲᠠᠰᠤᠷᠠᠯᠠ᠃ ᠶᠠᠭᠤ ᠴᠤ᠌ ᠪᠣᠯᠤᠭᠰᠠᠨ ᠵᠥᠭᠡᠯᠡᠨ ᠤᠰᠤ ᠳᠤᠰᠤᠯᠤᠨ ᠳᠤᠰᠤᠯᠤᠭᠰᠠᠭᠠᠷ ᠬᠠᠲᠠᠭᠤ ᠴᠢᠯᠠᠭᠤ ᠶ᠋ᠢ ᠨᠦᠬᠡᠯᠡᠳᠡᠭ ᠭᠡᠭᠴᠢ ᠶ᠋ᠢᠨ ᠦᠯᠢᠭᠡᠷ ᠢ᠋ᠶ᠋ᠡᠷ ᠳᠠᠬᠢᠨ ᠳᠠᠪᠲᠠᠨ ᠰᠠᠨᠠᠯ ᠬᠦᠰᠡᠯᠲᠡ ᠣᠷᠣᠭᠤᠯᠤᠭᠠᠳ ᠪᠠᠢᠪᠠᠯ᠂ ᠶᠠᠭᠠᠬᠢᠳᠠᠭ ᠪᠣᠯ? ᠣᠳᠣ ᠴᠡᠷᠢᠭ ᠢ᠋ ᠠᠮᠠᠷᠠᠭᠠᠶᠠ᠃ ᠮᠣᠷᠳᠠᠬᠤ ᠶ᠋ᠢᠨ ᠡᠮᠦᠨᠡ ᠲᠦᠷ ᠠᠮᠤᠰᠬᠢᠵᠦ᠂ ᠴᠠᠢ ᠬᠣᠭᠣᠯᠠ ᠪᠠᠨ ᠤᠤᠭᠤᠵᠤ ᠢᠳᠡᠭᠡᠳ ᠶᠠᠪᠤᠭ᠃ ᠪᠢ ᠬᠣᠶᠠᠳᠤᠭᠠᠷ᠂ ᠭᠤᠷᠪᠠᠳᠤᠭᠠᠷ ᠰᠤᠮᠤ ᠶ᠋ᠢ ᠰᠢᠯᠭᠠᠵᠤ ᠦᠵᠡᠭᠡᠳ᠂ ᠥᠨᠥᠳᠥᠷ ᠪᠡᠶᠡ ᠶ᠋ᠢᠨ ᠰᠤᠷᠭᠠᠭᠤᠯᠢ ᠠ᠋ᠴᠠ ᠴᠢᠯᠥᠭᠡᠯᠡᠵᠦ ᠠᠮᠠᠷᠠᠭᠤᠯᠤᠭᠰᠠᠨ ᠭᠡᠵᠦ ᠬᠡᠯᠡᠪᠡ᠃
* * *
ᠮᠣᠷᠢᠨ ᠴᠠᠭ ᠲᠤ᠌ ᠭᠤᠷᠪᠠ ᠭᠤᠷᠪᠠ ᠪᠠᠷ ᠵᠡᠷᠭᠡᠴᠡᠨ ᠵᠢᠭᠰᠠᠭᠰᠠᠨ ᠴᠡᠷᠢᠭ ᠦ᠋ᠨ ᠤᠷᠲᠤ ᠵᠢᠭᠰᠠᠭᠠᠯ ᠬᠤᠵᠢᠷᠪᠤᠯᠤᠩ ᠠ᠋ᠴᠠ ᠭᠠᠷᠴᠤ᠂ ᠬᠦᠷᠢᠶᠡ ᠴᠢᠭᠯᠡᠪᠡ᠃ ᠭᠣᠣᠯ ᠳ᠋ᠤᠨᠢ(ᠳ᠋ᠤ᠌ ᠨᠢ)ᠶᠠᠪᠤᠭᠰᠠᠨ ᠴᠡᠷᠢᠭ᠂ ᠴᠠᠭᠠᠨ ᠬᠤᠷᠠᠭᠠᠨ ᠴᠢᠬᠢ ᠲᠡᠢ ᠮᠠᠯᠠᠭᠠᠢ ᠲᠠᠢ᠂ ᠴᠠᠭᠠᠨ ᠮᠣᠷᠢ ᠲᠠᠢ ᠠᠵᠤᠭᠤ᠃ ᠠᠷᠪᠠᠨ ᠴᠡᠷᠢᠭ ᠳᠣᠳᠣᠮ ᠳ᠋ᠤ᠌ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠠᠷᠪᠠᠨ ᠤ᠋ ᠳᠠᠷᠤᠭᠠ ᠶ᠋ᠢᠨ ᠬᠢᠭᠢᠷᠢ ᠭᠡᠰᠡᠨ ᠴᠠᠭᠠᠨ ᠳᠠᠪᠤᠤ ᠦᠰᠦᠭ ᠲᠡᠢ᠂ ᠭᠤᠷᠪᠠᠨ ᠪᠦᠴᠡ ᠲᠡᠢ ᠤᠯᠠᠪᠠᠷ(ᠤᠯᠠᠪᠤᠷ) ᠰᠢᠷᠠ ᠬᠢᠭᠢᠷᠢ ᠪᠠᠷᠢᠵᠠᠢ᠃ ᠵᠢᠭᠰᠠᠭᠠᠯ ᠤ᠋ᠨ ᠡᠮᠦᠨᠡ ᠬᠡᠪᠢᠰ ᠬᠡᠵᠢᠮ ᠲᠡᠢ ᠤᠯᠠᠭᠠᠨ ᠮᠣᠯᠴᠣᠭ ᠲᠠᠢ ᠲᠠᠷᠭᠤᠨ ᠮᠣᠷᠢ ᠤᠨᠤᠭᠰᠠᠨ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠳᠠᠭᠠᠮᠠᠯ(ᠳᠠᠭᠠᠭᠠᠮᠠᠯ) ᠵᠢᠭᠰᠠᠵᠤ᠂ ᠲᠡᠳᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠲᠤᠭᠴᠢᠨ ᠪᠦᠷᠢᠶᠡᠴᠢᠨ ᠶᠠᠪᠤᠵᠠᠢ᠃
ᠲᠤᠤᠯᠠ ᠳ᠋ᠠᠬᠢ ᠪᠣᠭᠳᠠ ᠶ᠋ᠢᠨ ᠨᠣᠭᠣᠭᠠᠨ ᠣᠷᠳᠣᠨ ᠤ᠋ ᠲᠡᠨᠳᠡ ᠬᠦᠷᠴᠦ ᠢᠷᠡᠭᠡᠳ᠂ ᠣᠯᠠᠨ ᠴᠡᠷᠢᠭ ᠮᠣᠷᠢᠨ ᠠ᠋ᠴᠠ ᠪᠠᠭᠤᠵᠤ᠂ ᠴᠠᠭᠠᠨ ᠮᠣᠷᠢ ᠲᠠᠢ ᠳᠤᠮᠳᠠᠬᠢ ᠴᠡᠷᠢᠭ ᠨᠢ ᠮᠣᠷᠢ ᠪᠠᠨ ᠲᠤᠱᠠᠵᠤ(ᠲᠤᠰᠢᠵᠤ) ᠬᠠᠨᠲᠠᠢᠷᠤᠭᠠᠳ( ᠬᠠᠨᠲᠠᠢᠷᠠᠭᠠᠳ)᠂ ᠬᠣᠶᠠᠷ ᠬᠠᠵᠠᠭᠤ ᠶ᠋ᠢᠨ ᠴᠡᠷᠢᠭ ᠮᠣᠷᠢ ᠪᠠᠨ ᠳᠤᠮᠳᠠᠬᠢ ᠮᠣᠷᠢᠨ ᠳ᠋ᠤ᠌ ᠬᠣᠯᠪᠣᠵᠤ ᠪᠣᠭᠳᠠ ᠬᠠᠭᠠᠨ ᠤ᠋ ᠵᠠᠯᠠᠷᠠᠨ ᠭᠠᠷᠴᠤ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠨ᠂ ᠣᠷᠳᠣᠨ ᠤ᠋ ᠡᠮᠦᠨᠡ ᠵᠢᠭᠰᠠᠪᠠ᠃
ᠬᠦᠷᠢᠶᠡᠨ ᠦ᠌ ᠵᠦᠭ ᠡᠴᠡ ᠲᠥᠷᠥ ᠶ᠋ᠢᠨ ᠵᠢᠭᠰᠠᠭᠠᠯ ᠢ᠋ᠶ᠋ᠠᠷ ᠶᠠᠪᠤᠵᠤ ᠶᠠᠪᠤᠭᠠ ᠬᠥᠮᠦᠨ ᠦᠵᠡᠭᠳᠡᠵᠦ᠂ ᠡᠬᠢᠨ ᠳ᠋ᠦ᠍ᠨᠢ (ᠳ᠋ᠦ᠍ ᠨᠢ)ᠬᠣᠶᠠᠷ ᠮᠣᠷᠢ ᠲᠠᠢ ᠬᠥᠮᠦᠨ ᠵᠢᠭᠰᠠᠭᠠᠯ ᠢ᠋ ᠤᠳᠤᠷᠢᠳᠴᠤ᠂ ᠲᠡᠳᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠨᠠᠢ᠍ᠮᠠᠨ ᠴᠢᠭᠢᠷᠠᠭ ᠡᠷᠡ᠂ ᠤᠯᠠᠭᠠᠨ ᠠᠷᠠᠯ ᠳᠠᠮᠨᠠᠭᠤᠷ ᠲᠠᠢ᠂ ᠲᠣᠭᠣᠯᠭᠠᠨ ᠵᠢᠩᠰᠡᠲᠦ᠂ ᠨᠣᠭᠣᠭᠠᠨ ᠥᠩᠭᠡ ᠶ᠋ᠢᠨ ᠬᠥᠰᠢᠭ(ᠬᠥᠰᠢᠭᠡ) ᠳᠡᠭᠡᠪᠦᠷᠲᠦ ᠰᠡᠦᠬᠡ ᠳᠠᠮᠨᠠᠵᠠᠢ᠃ ᠰᠡᠦᠬᠡ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠸᠠᠩ ᠤ᠋ᠨ ᠵᠢᠭᠰᠠᠭᠠᠯ ᠳ᠋ᠤ᠌ ᠬᠡᠷᠡᠭᠯᠡᠬᠦ ᠤᠯᠠᠭᠠᠨ ᠲᠣᠷᠭᠠᠨ ᠳ᠋ᠤ᠌ ᠠᠯᠲᠠ ᠰᠦᠷᠰᠢᠭᠰᠡᠨ(ᠰᠦᠷᠴᠢᠭᠰᠡᠨ) ᠰᠢᠬᠦᠷ ᠨᠢᠭᠡ᠂ ᠲᠤᠭ ᠨᠢᠭᠡ᠂ ᠬᠢᠭᠢᠷᠢ ᠨᠠᠢ᠍ᠮᠠ ᠶ᠋ᠢ ᠪᠠᠷᠢᠵᠤ᠂ ᠵᠢᠷᠭᠤᠭᠠᠨ ᠬᠥᠮᠦᠨ ᠳᠠᠭᠠᠯᠳᠤᠵᠠᠢ᠃ ᠲᠡᠳᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠪᠠᠬᠠᠨ ᠬᠣᠯᠠᠬᠠᠨ ᠨᠢᠭᠡᠨ ᠬᠡᠰᠡᠭ ᠲᠦᠰᠢᠮᠡᠳ ᠳᠠᠭᠠᠯᠳᠤᠨ ᠴᠥᠮ ᠵᠢᠩᠰᠡᠲᠦ ᠮᠠᠯᠠᠭᠠᠢ᠂ ᠠᠷᠤ ᠥᠪᠥᠷ ᠲᠡᠭᠡᠨ ᠵᠡᠷᠭᠡ ᠶ᠋ᠢ ᠦᠵᠡᠭᠦᠯᠦᠭᠰᠡᠨ ᠹᠦᠰᠡ ᠬᠠᠲᠠᠭᠰᠠᠨ ᠶᠣᠰᠣᠲᠤ ᠬᠤᠪᠴᠠᠰᠤ ᠡᠮᠦᠰᠴᠡᠢ᠃ ᠤᠷᠳᠤᠨᠠ ᠣᠢᠷᠠᠲᠤᠭᠠᠳ᠂ ᠡᠮᠦᠨᠡ ᠤᠳᠤᠷᠢᠳᠬᠤ ᠬᠣᠶᠠᠷ ᠬᠥᠮᠦᠨ᠂ ᠬᠠᠭᠠᠨ ᠤ᠋ ᠤᠷᠳᠤᠨᠠ ᠣᠢᠷᠠᠳᠬᠤ ᠦᠶᠡᠰ ᠪᠠᠷᠢᠮᠲᠠᠯᠠᠬᠤ ᠬᠠᠤᠯᠢ ᠶ᠋ᠢ ᠳᠠᠭᠠᠵᠤ᠂ ᠰᠡᠦᠬᠡ ᠶ᠋ᠢᠨ ᠠᠷᠤ ᠳ᠋ᠤ᠌ ᠳᠠᠭᠠᠯᠳᠤᠨ ᠵᠢᠭᠰᠠᠪᠠ᠃ ᠴᠢᠩᠭᠢᠭᠡᠳ ᠣᠷᠳᠣᠨᠠ ᠣᠢᠷᠠᠲᠤᠮᠠᠭᠴᠠ ᠰᠡᠦᠬᠡ ᠳᠠᠮᠨᠠᠭᠰᠠᠨ ᠬᠥᠮᠦᠰ ᠵᠣᠭᠰᠣᠵᠤ᠂ ᠪᠠᠷᠠ ᠪᠣᠯᠤᠭᠴᠢᠳ ᠴᠡᠷᠢᠭ ᠦ᠋ᠨ ᠶᠠᠮᠤᠨ ᠤ᠋ ᠰᠠᠢᠳ ᠳᠠᠯᠠᠢ ᠸᠠᠩ ᠢ᠋ ᠳᠥᠰᠢᠨ ᠭᠠᠷᠭᠠᠭᠰᠠᠨ ᠨᠢ ᠪᠡᠶᠡ ᠮᠢᠬᠠᠯᠢᠭ᠂ ᠳᠥᠷᠪᠡᠨ ᠬᠢᠮᠤᠰᠤᠲᠤ ᠯᠤᠤᠲᠤ ᠮᠠᠩᠨᠤᠭ ᠳᠡᠪᠡᠯ᠂ ᠠᠷᠤ ᠥᠪᠥᠷ ᠲᠡᠭᠡᠨ ᠠᠯᠲᠠᠨ ᠰᠣᠶᠣᠩᠪᠣ ᠶ᠋ᠢᠨ ᠲᠥᠭᠥᠷᠢᠭ ᠹᠦᠰᠡ ᠲᠡᠢ᠂ ᠬᠣᠶᠠᠷ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠡᠷᠲᠡᠨ ᠦ᠌ ᠪᠡᠯᠭᠡ ᠲᠡᠮᠳᠡᠭ ᠨᠠᠷᠠ ᠰᠠᠷᠠ ᠶ᠋ᠢ ᠠᠯᠲᠠ ᠪᠠᠷ ᠬᠠᠳᠬᠤᠮᠠᠯᠯᠠᠭᠰᠠᠨ ᠪᠠᠭᠠ ᠲᠥᠭᠥᠷᠢᠭ ᠹᠦᠰᠡ ᠲᠡᠢ᠂ ᠪᠠᠷᠠᠭᠠᠨ ᠥᠩᠭᠡ ᠶ᠋ᠢᠨ ᠬᠦᠷᠮᠡ ᠲᠡᠢ᠂ ᠬᠥᠬᠡ ᠣᠷᠣᠢ ᠲᠠᠢ᠂ ᠤᠯᠠᠭᠠᠨ ᠵᠠᠯᠠᠭᠠ ᠲᠠᠢ᠂ ᠠᠯᠲᠠᠨ ᠰᠠᠭᠤᠷᠢᠲᠠᠢ ᠨᠠᠯ ᠡᠷᠳᠡᠨᠢ ᠶ᠋ᠢᠨ ᠵᠢᠩᠰᠡᠲᠦ ᠭᠤᠷᠪᠠᠨ ᠨᠢᠳᠦᠲᠦ ᠤᠲᠤᠭᠠ ᠲᠠᠢ᠂ ᠸᠠᠩ ᠤ᠋ᠨ ᠬᠠᠷᠠ ᠦᠨᠡᠭᠡᠨ ᠮᠠᠯᠠᠭᠠᠢ ᠲᠠᠢ ᠠᠵᠤᠭᠤ᠃
ᠬᠤᠵᠢᠷᠪᠤᠯᠤᠩ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠤ᠋ ᠵᠠᠬᠢᠷᠤᠯ ᠳᠠᠮᠳᠢᠨ ᠲᠡᠷᠢᠭᠦᠨ ᠭᠡᠳᠡᠭ ᠲᠠᠢᠵᠢ᠂
— ᠨᠣᠮᠣᠬᠠᠨ᠂ ᠪᠠᠷᠠᠭᠤᠨ ᠲᠠᠰᠢ(ᠲᠠᠢᠰᠢ) ᠵᠡᠷᠭᠡᠴᠡ ᠭᠡᠵᠦ ᠺᠣᠮᠡᠨᠳᠠᠯᠠᠭᠠᠳ᠂ ᠴᠡᠷᠢᠭ ᠦ᠋ᠨ ᠶᠠᠮᠤᠨ ᠤ᠋ ᠰᠠᠢᠳ ᠤ᠋ᠨ ᠵᠦᠭ ᠶᠠᠭᠠᠷᠠᠨ ᠳᠠᠪᠬᠢᠵᠤ᠂ ᠡᠪᠦᠳᠦᠭ ᠰᠥᠭᠥᠳᠦᠨ ᠶᠣᠰᠣᠯᠠᠭᠠᠳ᠂ ᠬᠤᠵᠢᠷᠪᠤᠯᠤᠩ ᠠ᠋ᠴᠠ ᠭᠤᠷᠪᠠᠨ ᠰᠤᠮᠤᠨ ᠴᠡᠷᠢᠭ ᠪᠣᠭᠳᠠ ᠡᠵᠡᠨ ᠬᠠᠭᠠᠨ ᠳ᠋ᠤ᠌ ᠮᠥᠷᠭᠥᠬᠦ ᠪᠡᠷ ᠢᠷᠡᠭᠰᠡᠨ ᠢ᠋ ᠰᠠᠢᠳ ᠲᠤ᠌ ᠠᠢᠯᠠᠳᠬᠠᠪᠠ᠃
ᠰᠠᠢᠳ ᠳᠠᠯᠠᠢ ᠸᠠᠩ᠂ ᠪᠠᠷᠠ ᠪᠣᠯᠤᠭᠴᠢᠳ ᠢ᠋ ᠳᠠᠭᠠᠭᠤᠯᠤᠨ ᠴᠡᠷᠢᠭ ᠦ᠋ᠨ ᠵᠢᠭᠰᠠᠭᠠᠯ ᠤ᠋ᠨ ᠡᠮᠦᠨᠡᠭᠦᠷ ᠶᠠᠪᠤᠵᠤ᠂ ᠲᠣᠭᠣᠮᠰᠠᠷ ᠦᠭᠡᠢ ᠮᠡᠨᠳᠦᠯᠡᠭᠡᠳ᠂ ᠣᠷᠳᠣᠨ ᠤ᠋ ᠬᠠᠭᠠᠯᠭᠠᠨ ᠤ᠋ ᠵᠦᠭ ᠣᠳᠴᠤ ᠳᠣᠲᠣᠭᠰᠢ ᠣᠷᠣᠭᠰᠠᠨ ᠳ᠋ᠤ᠌᠂ ᠪᠠᠷᠠ ᠪᠣᠯᠤᠭᠴᠢᠳ ᠭᠠᠳᠠᠭᠠ ᠬᠠᠢᠰᠠᠩ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠬᠣᠴᠣᠷᠪᠠ᠃
ᠰᠢᠷᠴᠢᠨ ᠦ᠌ ᠳᠡᠷᠭᠡᠳᠡ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠡᠪᠦᠭᠡᠨ ᠴᠡᠷᠢᠭ᠂
— ᠬᠠᠷᠠᠪᠠᠤ? ᠡᠨᠡ ᠪᠣᠯ ᠴᠡᠷᠢᠭ ᠦ᠋ᠨ ᠶᠠᠮᠤᠨ ᠤ᠋ ᠰᠠᠢᠳ ᠳᠠᠯᠠᠢ ᠸᠠᠩ ᠭᠡᠳᠡᠭ ᠪᠢᠯᠡ᠃ ᠡᠨᠡ ᠬᠥᠮᠦᠨ ᠬᠡᠳᠦᠨ ᠵᠢᠰᠤᠷ ᠪᠢᠯᠳᠠᠤ ᠪᠠᠷᠠ ᠪᠣᠯᠤᠭᠴᠢᠳ ᠤ᠋ᠨ ᠬᠠᠮᠲᠤ ᠪᠢᠳᠡᠨ ᠦ᠌ ᠬᠡᠷᠡᠭᠯᠡᠯ ᠡᠴᠡ ᠲᠣᠨᠣᠵᠤ ᠪᠠᠶᠠᠵᠢᠨ᠂ ᠪᠢᠳᠡ ᠨᠢ ᠬᠦᠢᠲᠡᠨ ᠳ᠋ᠦ᠍ ᠲᠠᠭᠠᠷᠠᠵᠤ᠂ ᠡᠯᠵᠢᠭᠡ᠂ ᠢᠮᠠᠭᠠᠨ ᠤ᠋ ᠵᠣᠪᠠᠯᠭᠠ ᠢᠳᠡᠵᠦ ᠪᠠᠢᠭᠠ ᠶᠤᠮ ᠰᠢᠦ ᠳᠡ᠃ ᠠᠶᠠ᠂ ᠪᠣᠭᠳᠠ ᠬᠠᠭᠠᠨ ᠡᠭᠦᠨ ᠢ᠋ ᠭᠡᠭᠡᠨ ᠳ᠋ᠦ᠍ ᠪᠡᠨ ᠲᠣᠯᠢᠯᠠᠨ ᠠᠢᠯᠠᠳᠪᠠᠯ ᠶᠠᠭᠤ ᠪᠢᠯᠡ ᠭᠡᠪᠡ᠃
ᠨᠣᠭᠣᠭᠠᠨ ᠣᠷᠳᠣᠨ ᠤ᠋ ᠳᠡᠭᠡᠳᠦ ᠳᠠᠪᠬᠤᠷᠯᠢᠭ ᠤ᠋ᠨ ᠬᠠᠢᠰᠠᠩᠲᠦ ᠲᠠᠪᠴᠠᠩ ᠤ᠋ᠨ ᠬᠠᠭᠠᠯᠭᠠ ᠨᠡᠭᠡᠭᠡᠭᠳᠡᠵᠦ᠂ ᠤᠯᠠᠭᠠᠨ ᠬᠤᠪᠴᠠᠰᠤᠲᠤ ᠯᠠᠮᠠ ᠨᠠᠷ ᠬᠣᠶᠠᠷ ᠲᠦᠰᠢᠯᠭᠡᠲᠦ ᠰᠠᠨᠳᠠᠯᠢ ᠭᠠᠷᠭᠠᠵᠤ ᠲᠠᠯᠪᠢᠪᠠ᠃ ᠣᠯᠠᠨ ᠴᠡᠷᠢᠭ ᠪᠣᠭᠳᠠ ᠬᠠᠭᠠᠨ ᠮᠣᠷᠢᠯᠠᠬᠤ ᠨᠢ ᠭᠡᠵᠦ ᠰᠢᠪᠡᠨᠡᠯᠳᠦᠪᠡ᠃ ᠭᠡᠪᠡᠴᠦ ᠲᠡᠷᠡ ᠬᠠᠢᠰᠠᠩᠲᠤ ᠲᠠᠪᠴᠠᠩ ᠤ᠋ᠨ ᠬᠠᠭᠠᠯᠭᠠ ᠨᠡᠭᠡᠭᠡᠭᠳᠡᠵᠦ ᠳᠠᠪᠬᠤᠷᠯᠢᠭ ᠪᠠᠢᠰᠢᠩ ᠠ᠋ᠴᠠ ᠭᠣᠶᠣ ᠰᠠᠢᠬᠠᠨ ᠬᠤᠪᠴᠠᠰᠤ ᠲᠠᠢ᠂ ᠰᠤᠪᠤᠳ ᠡᠷᠳᠡᠨᠢ ᠵᠡᠭᠦᠭᠰᠡᠨ ᠮᠢᠬᠠᠯᠢᠭ ᠬᠠᠲᠤᠨ ᠳᠠᠭᠠᠭᠤᠯᠤᠭᠰᠠᠨ᠂ ᠥᠲᠡᠯᠦᠭᠰᠡᠨ ᠣᠪᠣᠷ ᠲᠠᠢ᠂ ᠰᠢᠷᠠ ᠲᠣᠷᠭᠠᠨ ᠳᠡᠪᠡᠯ᠂ ᠪᠤᠯᠠᠭᠠᠨ ᠮᠠᠯᠠᠭᠠᠢ ᠲᠠᠢ ᠨᠢᠭᠡᠨ ᠬᠥᠮᠦᠨ ᠢ᠋ ᠭᠠᠷᠴᠤ ᠢᠷᠡᠲᠡᠯᠡ ᠨᠡᠯᠢᠶᠡᠳ ᠤᠳᠠᠪᠠ᠃ ᠲᠡᠷᠡ ᠬᠣᠶᠠᠷ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠴᠡᠷᠢᠭ ᠦ᠋ᠨ ᠶᠠᠮᠤᠨ ᠤ᠋ ᠰᠠᠢᠳ᠂ ᠪᠣᠭᠳᠠ ᠬᠠᠭᠠᠨ ᠤ᠋ ᠲᠦᠰᠢᠯᠭᠡᠲᠦ ᠰᠠᠨᠳᠠᠯᠢ ᠶ᠋ᠢᠨ ᠠᠷᠤ ᠳ᠋ᠤ᠌ ᠵᠣᠭᠰᠣᠬᠤ ᠬᠡᠰᠢᠭ ᠬᠦᠷᠲᠡᠭᠰᠡᠨ ᠳ᠋ᠡᠭᠡᠨ ᠲᠡᠰᠬᠡᠯ ᠦᠭᠡᠢ ᠪᠠᠶᠠᠷᠯᠠᠨ ᠭᠠᠷᠴᠤ ᠢᠷᠡᠪᠡ᠃ ᠳᠠᠪᠬᠤᠷᠯᠢᠭ ᠪᠠᠢᠰᠢᠩ ᠤ᠋ᠨ ᠬᠠᠢᠰᠠᠩᠲᠤ ᠲᠠᠪᠴᠠᠩ ᠤ᠋ᠨ ᠳᠣᠣᠷᠠ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠬᠡᠳᠦᠨ ᠯᠠᠮᠠ ᠨᠠᠷ ᠰᠡᠩᠳᠡᠨ ᠮᠡᠩᠳᠡᠨ ᠦᠢᠮᠡᠯᠳᠦᠪᠡ᠃ ᠲᠡᠷᠡ ᠰᠢᠷᠠ ᠳᠡᠪᠡᠯᠲᠦ ᠬᠥᠭᠰᠢᠨ ᠣᠪᠣᠷ ᠲᠠᠢ ᠬᠥᠮᠦᠨ ᠰᠤᠯᠠᠬᠠᠨ ᠳᠠᠭᠤᠨ ᠢ᠋ᠶ᠋ᠠᠷ᠂
— ᠣᠯᠠᠨ ᠴᠡᠷᠢᠭ ᠪᠦᠭᠦᠳᠡ ᠰᠠᠢᠨ ᠪᠠᠢᠨᠠᠤ? ᠬᠡᠮᠡᠪᠡᠰᠦ᠂
— ᠰᠠᠢᠨ! ᠭᠡᠵᠦ ᠨᠢᠭᠡᠨ ᠵᠡᠷᠭᠡ ᠨᠢᠷ ᠭᠡᠵᠦ ᠬᠠᠷᠢᠭᠤᠯᠪᠠ᠃
— ᠳᠠᠷᠤᠭᠠ ᠨᠠᠷ ᠣᠷᠣᠭᠰᠢ ᠳᠠᠪᠰᠢᠨ ᠭᠠᠷᠴᠤ ᠨᠠᠮᠠᠶ᠋ᠢ ᠳᠠᠭᠠᠭᠠᠳ ᠶᠠᠪᠤ ᠭᠡᠵᠦ ᠳᠠᠮᠳᠢᠨ ᠲᠡᠷᠢᠭᠦᠨ ᠲᠤᠰᠢᠶᠠᠪᠠ᠃
ᠪᠣᠭᠳᠠ ᠶ᠋ᠢᠨ ᠲᠦᠰᠢᠯᠭᠡᠲᠦ ᠰᠠᠨᠳᠠᠯᠢ ᠶ᠋ᠢᠨ ᠠᠷᠤ ᠳ᠋ᠤ᠌ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠤᠯᠠᠭᠠᠨ ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠯᠠᠮᠠ᠂ ᠤᠷᠲᠤ ᠨᠠᠩᠵᠢᠳ ᠬᠠᠳᠠᠭ ᠵᠠᠯᠭᠠᠭᠰᠠᠨ ᠤ᠋ ᠦᠵᠦᠭᠦᠷ ᠲᠦ᠍ ᠤᠶᠠᠭᠰᠠᠨ ᠰᠤᠩᠳᠠᠭ ᠢ᠋ ᠤᠨᠵᠢᠭᠤᠯᠤᠨ ᠳᠣᠭᠣᠭᠰᠢ ᠪᠠᠭᠤᠯᠭᠠᠪᠠᠰᠤ᠂ ᠳᠠᠪᠬᠤᠷᠯᠢᠭ ᠪᠠᠢᠰᠢᠩ ᠤ᠋ᠨ ᠲᠠᠪᠴᠠᠩ ᠦᠨ ᠳᠣᠣᠷᠠ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠯᠠᠮᠠ ᠰᠤᠩᠳᠠᠭ ᠢ᠋ ᠪᠠᠷᠢᠵᠤ᠂ ᠴᠡᠴᠡᠷᠯᠢᠭ ᠦ᠋ᠨ ᠬᠠᠢᠰᠠᠩ ᠤ᠋ᠨ ᠵᠦᠭ ᠣᠳᠪᠠ᠃ ᠰᠤᠩᠳᠠᠭ ᠤ᠋ᠨ ᠪᠠᠷᠢᠭᠤᠯ ᠤ᠋ᠨ ᠨᠢᠭᠡᠨ ᠦᠵᠦᠭᠦᠷ ᠨᠢ ᠮᠥᠩᠭᠥᠨ ᠮᠠᠲᠠᠷ ᠤ᠋ᠨ ᠠᠮᠠᠨ ᠠ᠋ᠴᠠ ᠳᠣᠲᠣᠷᠠ ᠪᠠᠨ ᠨᠣᠮ ᠳᠠᠷᠤᠮᠠᠯᠯᠠᠭᠰᠠᠨ ᠬᠤᠢᠯᠠᠮᠠᠯ ᠴᠠᠭᠠᠰᠤ ᠲᠠᠢ᠂ ᠪᠥᠭᠡᠷᠡᠩᠬᠡᠢ ᠬᠤᠨᠵᠢᠭᠤᠷ ᠪᠣᠷᠲᠣᠭᠣ ᠰᠢᠭ᠋ ᠶᠠᠭᠤᠮᠠ ᠤᠨᠵᠢᠭᠤᠯᠤᠭᠰᠠᠨ ᠬᠡᠯᠪᠡᠷᠢᠲᠡᠢ ᠠᠵᠤᠭᠤ᠃ ᠰᠤᠩᠳᠠᠭ ᠪᠠᠷᠢᠭᠰᠠᠨ ᠯᠠᠮᠠ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠪᠠᠰᠠ ᠪᠣᠭᠳᠠ ᠶ᠋ᠢᠨ ᠠᠳᠢᠰᠯᠠᠭᠰᠠᠨ ᠪᠥᠭᠡᠮ ᠵᠠᠩᠭᠢᠶᠠ ᠪᠠᠷᠢᠭᠰᠠᠨ ᠯᠠᠮᠠ ᠳᠠᠭᠠᠵᠤ᠂ ᠳᠠᠪᠬᠤᠷᠯᠢᠭ ᠪᠠᠢᠰᠢᠩ ᠤ᠋ᠨ ᠬᠠᠢᠰᠠᠩᠲᠤ ᠲᠠᠪᠴᠠᠩ ᠳᠡᠭᠡᠷᠡ ᠰᠠᠭᠤᠵᠤ ᠪᠠᠢᠭᠰᠠᠨ ᠪᠣᠭᠳᠠ ᠶ᠋ᠢ ᠰᠤᠩᠳᠠᠭ ᠤ᠋ᠨ ᠦᠵᠦᠭᠦᠷ ᠡᠴᠡ ᠤᠶᠠᠭᠰᠠᠨ ᠬᠠᠳᠠᠭ ᠢ᠋ ᠪᠠᠷᠢᠮᠠᠭᠴᠠ᠂ ᠳᠣᠣᠷᠠ ᠴᠡᠴᠡᠷᠯᠢᠭ ᠦ᠋ᠨ ᠬᠠᠢᠰᠠᠩ ᠤ᠋ᠨ ᠲᠡᠨᠳᠡ ᠰᠤᠩᠳᠠᠭ ᠪᠠᠷᠢᠵᠤ ᠪᠠᠢᠭᠰᠠᠨ ᠯᠠᠮᠠ᠂ ᠴᠡᠷᠢᠭ ᠦ᠋ᠨ ᠶᠠᠮᠤᠨ ᠤ᠋ ᠰᠠᠢᠳ ᠳᠠᠯᠠᠢ ᠸᠠᠩ ᠢ᠋ ᠳᠠᠭᠠᠯᠳᠤᠨ ᠢᠷᠡᠭᠰᠡᠨ ᠲᠦᠰᠢᠮᠡᠯ ᠳ᠋ᠦ᠍ ᠠᠳᠢᠰ ᠬᠦᠷᠲᠡᠭᠡᠨ᠂ ᠲᠡᠳᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠳᠠᠮᠳᠢᠨ ᠲᠡᠷᠢᠭᠦᠨ ᠢ᠋ ᠳᠠᠭᠠᠵᠤ᠂ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠨᠠᠷ ᠴᠤᠪᠤᠷᠠᠨ ᠠᠳᠢᠰ ᠭᠥᠷᠳᠡᠵᠡᠭᠡᠪᠡ᠃ ᠡᠭᠦᠨ ᠳ᠋ᠦ᠍᠂ ᠬᠠᠳᠠᠭ ᠤ᠋ᠨ ᠦᠵᠦᠭᠦᠷ ᠡᠴᠡ ᠪᠣᠭᠳᠠ ᠪᠠᠷᠢᠵᠤ ᠪᠠᠢᠭᠠ ᠨᠢ᠂ ᠲᠡᠭᠦᠨ ᠦ᠌ ᠠᠳᠢᠰ ᠴᠠᠬᠢᠯᠭᠠᠨ ᠭᠦᠶᠦᠳᠡᠯ ᠤᠲᠠᠰᠤ ᠪᠠᠷ ᠭᠦᠶᠦᠳᠡᠭ ᠲᠡᠢ ᠳ᠋ᠦ᠍ ᠠᠳᠠᠯᠢ᠂ ᠬᠠᠳᠠᠭ ᠢ᠋ᠶ᠋ᠠᠷ ᠰᠤᠩᠳᠠᠭ ᠲᠤ᠌ ᠣᠷᠣᠵᠤ᠂ ᠰᠤᠩᠳᠠᠭ ᠤ᠋ᠨ ᠮᠠᠲᠠᠷ ᠤ᠋ᠨ ᠠᠮᠠᠨ ᠠ᠋ᠴᠠ ᠤᠨᠵᠢᠭᠰᠠᠨ ᠪᠣᠷᠲᠣᠭᠣ ᠰᠢᠭ᠋ ᠶᠠᠭᠤᠮᠠ ᠨᠢ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠬᠦᠷᠦᠮᠡᠭᠴᠡ ᠠᠳᠢᠰ ᠬᠦᠷᠲᠡᠭᠰᠡᠨ ᠪᠣᠯᠬᠤ ᠨᠢ ᠴᠠᠬᠢᠯᠭᠠᠨ ᠢ᠋ ᠰᠢᠵᠢᠮ ᠤᠲᠠᠰᠤ ᠪᠠᠷ ᠭᠦᠶᠦᠯᠭᠡᠬᠦ ᠠᠷᠭᠠ ᠶ᠋ᠢ ᠣᠯᠬᠤ ᠠ᠋ᠴᠠ ᠡᠮᠦᠨᠡ《ᠠᠳᠢᠰ ᠢ᠋ ᠰᠢᠵᠢᠮ ᠢ᠋ᠶ᠋ᠡᠷ ᠭᠦᠶᠦᠯᠭᠡᠬᠦ》 ᠠᠷᠭᠠ ᠶ᠋ᠢ ᠣᠯᠤᠭᠰᠠᠨ ᠠᠵᠢ᠃ ᠰᠤᠩᠳᠠᠭ ᠤ᠋ᠨ ᠠᠳᠢᠰ ᠢ᠋ ᠬᠦᠷᠲᠡᠭᠰᠡᠨ ᠬᠥᠮᠦᠨ ᠪᠦᠬᠦᠨ ᠳ᠋ᠦ᠍ ᠰᠤᠩᠳᠠᠭᠴᠢ ᠯᠠᠮᠠ ᠶ᠋ᠢᠨ ᠳᠡᠷᠭᠡᠳᠡ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠵᠠᠩᠭᠢᠶᠠᠴᠢ ᠯᠠᠮᠠ ᠨᠢᠭᠡᠨ ᠰᠢᠷᠬᠡᠭ ᠵᠠᠩᠭᠢᠶᠠ ᠠᠪᠴᠤ᠂ ᠠᠳᠢᠰ ᠠᠪᠤᠭᠰᠠᠨ ᠬᠥᠮᠦᠨ ᠦ᠌ ᠬᠦᠵᠦᠭᠦᠨᠡ ᠲᠠᠯᠪᠢᠬᠤ ᠠᠵᠤᠭᠤ᠃
ᠪᠣᠭᠳᠠ᠂ ᠬᠡᠳᠦᠨ ᠲᠦᠰᠢᠮᠡᠯ᠂ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠨᠠᠷ ᠢ᠋ ᠰᠤᠩᠳᠠᠭ ᠢ᠋ᠶ᠋ᠠᠷ ᠠᠳᠢᠰᠯᠠᠭᠠᠳ ᠬᠠᠳᠠᠭ ᠤ᠋ᠨ ᠦᠵᠦᠭᠦᠷ ᠢ᠋ ᠪᠠᠷᠢᠭᠰᠠᠭᠠᠷ ᠪᠣᠰᠴᠤ ᠳᠣᠲᠣᠭᠰᠢ ᠣᠷᠣᠪᠠᠯ᠂ ᠤᠯᠤᠰ ᠤ᠋ᠨ ᠡᠬᠡ ᠳᠠᠭᠢᠨᠢ ᠬᠣᠢᠨᠠ ᠠ᠋ᠴᠠ ᠨᠢ ᠳᠠᠭᠠᠵᠤ ᠣᠷᠣᠪᠠ᠃ ᠲᠦᠰᠢᠯᠭᠡᠲᠦ ᠬᠣᠶᠠᠷ ᠰᠠᠨᠳᠠᠯᠢ ᠶ᠋ᠢᠨ ᠠᠷᠤ ᠳ᠋ᠤ᠌ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠰᠠᠢᠳ ᠳᠠᠯᠠᠢ ᠸᠠᠩ᠂ ᠰᠢᠳᠠᠷ ᠪᠠᠷᠠ ᠪᠣᠯᠤᠭᠴᠢ ᠳᠡᠷᠭᠡᠳᠡ ᠶ᠋ᠢᠨ ᠯᠠᠮᠠ ᠬᠣᠶᠠᠷ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠳᠣᠲᠣᠭᠰᠢ ᠣᠷᠣᠵᠤ᠂ ᠳᠠᠮᠳᠢᠨ ᠲᠡᠷᠢᠭᠦᠨ ᠦ᠌ ᠲᠤᠰᠢᠶᠠᠯ ᠢ᠋ᠶ᠋ᠠᠷ ᠴᠡᠷᠢᠭ ᠴᠤᠪᠤᠷᠠᠨ ᠵᠢᠭᠰᠠᠵᠤ᠂ ᠰᠤᠩᠳᠠᠭ ᠤ᠋ᠨ ᠠᠳᠢᠰ ᠭᠥᠷᠳᠡᠵᠡᠭᠡᠪᠡ᠃
— ᠪᠢᠳᠡᠨ ᠳ᠋ᠦ᠍ ᠬᠦᠷᠦᠮᠡᠭᠴᠡ᠂ ᠪᠣᠭᠳᠠ ᠬᠦᠷᠲᠡᠯᠡ ᠪᠣᠰᠤᠭᠠᠳ ᠶᠠᠪᠤᠴᠢᠬᠠᠳᠠᠭ ᠪᠠᠢᠨᠠ ᠠ᠋᠂ ᠨᠣᠶᠠᠳ ᠳᠠᠷᠤᠭᠠ ᠨᠠᠷ᠂ ᠪᠣᠭᠳᠠ ᠳ᠋ᠤ᠌ ᠬᠦᠷᠲᠡᠯᠡ ᠨᠢᠭᠤᠷ ᠲᠠᠢ ᠲᠠᠯᠠ ᠲᠠᠢ ᠪᠠᠢᠳᠠᠭ ᠶᠤᠮ ᠪᠠᠢᠵᠠᠢ ᠳᠠ ᠭᠡᠵᠦ ᠰᠢᠷᠴᠢᠨ ᠦ᠌ ᠳᠡᠷᠭᠡᠳᠡᠬᠢ ᠨᠢᠭᠡᠨ ᠴᠡᠷᠢᠭ ᠰᠢᠪᠡᠨᠡᠪᠡ᠃
— ᠳᠤᠭᠤᠢ! ᠭᠡᠵᠦ ᠡᠪᠦᠭᠡᠨ ᠴᠡᠷᠢᠭ᠂ ᠲᠡᠭᠦᠨ ᠢ᠋ ᠠᠭᠤᠷ ᠲᠠᠢ ᠪᠠᠷ ᠰᠢᠪᠡᠨᠡᠨ ᠭᠢᠯᠤᠢᠨ ᠬᠠᠷᠠᠭᠠᠳ᠂ ᠡᠨᠡ ᠬᠦᠢᠲᠡᠨ ᠳ᠋ᠦ᠍ ᠭᠠᠳᠠᠭᠠ ᠭᠣᠣᠯ ᠤ᠋ᠨ ᠵᠢᠪᠠᠷ ᠲᠤ᠌ ᠰᠠᠭᠤᠬᠤ ᠳ᠋ᠤ᠌ ᠳᠡᠭᠡᠷᠡᠬᠢ ᠶ᠋ᠢᠨ ᠭᠡᠭᠡᠭᠡᠨᠲᠡᠨ(ᠭᠡᠭᠡᠨᠲᠡᠨ) ᠲᠠᠭᠠᠷᠠᠵᠤ ᠪᠠᠢᠭᠠ ᠶᠤᠮ ᠪᠢᠰᠢᠦ(ᠪᠢᠰᠢ ᠤᠤ)? ᠬᠡᠮᠡᠪᠡᠰᠦ᠂
— ᠪᠢᠳᠡ ᠳᠠᠭᠠᠷᠠᠳᠠᠭ ᠦᠭᠡᠢ ᠶᠦᠮ ᠤᠤ? ᠭᠡᠵᠦ ᠲᠡᠷᠡ ᠴᠡᠷᠢᠭ ᠵᠣᠭᠰᠣᠵᠤ ᠥᠭᠬᠦ ᠦᠭᠡᠢ ᠪᠠᠢᠪᠠ᠃
— ᠪᠢᠲᠡᠭᠡᠢ ᠨᠢᠭᠦᠯ ᠬᠤᠷᠢᠶᠠ ᠭᠡᠵᠦ ᠡᠪᠦᠭᠡᠨ ᠴᠡᠷᠢᠭ ᠤᠨᠲᠤᠭᠤᠴᠠᠪᠠ᠃
ᠠᠳᠢᠰ ᠬᠦᠷᠲᠡᠭᠡᠵᠦ ᠪᠠᠢᠭᠰᠠᠨ ᠥᠨᠥᠬᠢ ᠯᠠᠮᠠ᠂ ᠰᠤᠩᠳᠠᠭ(ᠰᠤᠨᠳᠠᠭ) ᠥᠷᠭᠡᠨ ᠣᠯᠠᠨ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠳᠡᠭᠡᠷᠡ ᠠᠳᠢᠰ ᠳᠡᠯᠪᠢ ᠲᠠᠯᠪᠢᠭᠰᠠᠭᠠᠷ ᠡᠴᠡᠵᠦ᠂ ᠥᠭᠡᠷᠡ ᠨᠢᠭᠡᠨ ᠯᠠᠮᠠ᠂ ᠬᠠᠯᠠ(ᠬᠠᠯᠠᠭᠠ) ᠶ᠋ᠢ ᠨᠢ ᠠᠪᠤᠪᠠ᠃ ᠠᠳᠢᠰ ᠲᠠᠢ ᠵᠠᠩᠭᠢᠶᠠ ᠲᠦᠭᠡᠭᠡᠵᠦ ᠪᠠᠢᠭᠰᠠᠨ ᠯᠠᠮᠠ ᠵᠠᠩᠭᠢᠶᠠ ᠪᠠᠨ ᠥᠭᠴᠦ ᠪᠠᠷᠠᠭᠠᠳ᠂ ᠣᠷᠣᠨ ᠳ᠋ᠤᠨᠢ( ᠳ᠋ᠤ᠌ ᠨᠢ) ᠪᠠᠰᠠ ᠨᠢᠭᠡ ᠱᠠᠯᠬᠠᠭᠠᠷ ᠪᠦᠳᠦᠭᠦᠨ ᠯᠠᠮᠠ᠂ ᠪᠥᠭᠡᠮ ᠵᠠᠩᠭᠢᠶᠠ ᠪᠠᠷᠢᠵᠤ ᠲᠦᠭᠡᠭᠡᠨ ᠣᠯᠭᠣᠵᠤ ᠡᠬᠢᠯᠡᠪᠡ᠃
— ᠲᠡᠭ (ᠲᠡᠭᠡ) ᠲᠡᠭᠡᠭᠰᠡᠭᠡᠷ ᠰᠤᠩᠳᠠᠭ(ᠰᠤᠨᠳᠠᠭ) ᠤ᠋ᠨ ᠠᠳᠢᠰ ᠬᠦᠷᠲᠡᠭᠡᠵᠦ ᠭᠦᠢᠴᠡᠭᠡᠳ᠂ ᠣᠯᠠᠨ ᠴᠡᠷᠢᠭ᠂ ᠳᠠᠷᠤᠭᠠ ᠶ᠋ᠢᠨ ᠲᠤᠰᠢᠶᠠᠯ ᠢ᠋ᠶ᠋ᠠᠷ ᠮᠣᠷᠢᠨ ᠳ᠋ᠠᠭᠠᠨ(ᠳ᠋ᠤ᠌ ᠪᠠᠨ) ᠮᠣᠷᠳᠠᠵᠤ᠂ ᠪᠣᠭᠳᠠ ᠶ᠋ᠢᠨ ᠨᠣᠭᠣᠭᠠᠨ ᠣᠷᠳᠣᠨ ᠢ᠋ ᠨᠠᠷᠠ ᠵᠥᠪ ᠡᠷᠭᠢᠭᠡᠳ᠂ ᠬᠤᠵᠢᠷᠪᠤᠯᠤᠩ ᠳ᠋ᠤ᠌ ᠪᠠᠨ ᠪᠤᠴᠠᠪᠠ᠃
ᠬᠤᠸᠠᠷᠠᠨ ᠳ᠋ᠠᠭᠠᠨ (ᠳ᠋ᠤ᠌ ᠪᠠᠨ) ᠬᠦᠷᠴᠦ ᠢᠷᠡᠭᠡᠳ ᠴᠡᠷᠢᠭ᠂ ᠲᠡᠷᠡ ᠳᠣᠣᠷᠠ ᠪᠠᠨ ᠬᠠᠭᠤᠴᠢᠨ ᠤᠷᠠᠩᠬᠠᠢ ᠨᠣᠣᠷᠬᠠᠢ ᠳᠡᠪᠡᠯ ᠬᠠᠭᠤᠴᠢᠨ ᠭᠤᠲᠤᠯ ᠢ᠋ᠶ᠋ᠠᠨ ᠡᠮᠦᠰᠴᠦ᠂ ᠶᠣᠰᠣᠯᠠᠯ ᠤ᠋ᠨ ᠭᠣᠶᠣ ᠳᠡᠪᠡᠯ ᠭᠤᠲᠤᠯ ᠢ᠋ᠶ᠋ᠠᠨ ᠲᠤᠰᠢᠶᠠᠨ ᠬᠠᠳᠠᠭᠠᠯᠠᠵᠤ᠂ ᠳᠠᠬᠢᠨ ᠤᠷᠢᠳᠠ(ᠤᠷᠢᠳ) ᠬᠡᠪ ᠢ᠋ᠶ᠋ᠡᠷ ᠤᠷᠠᠩᠬᠠᠢ ᠨᠣᠣᠷᠬᠠᠢ ᠬᠤᠪᠴᠠᠰᠤᠲᠠᠨ ᠴᠤᠭᠯᠠᠭᠰᠠᠨ ᠭᠠᠵᠠᠷ ᠪᠣᠯᠵᠠᠢ᠃
* * *
ᠰᠢᠷᠴᠢᠨ᠂ ᠰᠠᠢᠳ ᠳᠠᠯᠠᠢ ᠸᠠᠩ ᠤ᠋ᠨ ᠰᠦᠷ ᠪᠠᠳᠠᠷᠠᠭᠤᠯᠤᠭᠰᠠᠨ ᠲᠥᠷᠥ ᠶ᠋ᠢᠨ ᠵᠢᠭᠰᠠᠭᠠᠯ᠂ ᠡᠮᠦᠰᠦᠭᠰᠡᠨ ᠭᠣᠶᠣ ᠮᠠᠩᠨᠤᠭ ᠳᠡᠪᠡᠯ᠂ ᠡᠳᠦᠢ ᠲᠡᠳᠦᠢ ᠬᠥᠮᠦᠨ ᠢ᠋ᠶ᠋ᠡᠷ ᠳᠠᠮᠨᠠᠭᠤᠯᠤᠭᠰᠠᠨ ᠰᠡᠦᠬᠡ ᠶ᠋ᠢ᠂ ᠪᠠᠰᠠ ᠪᠣᠭᠳᠠ ᠶ᠋ᠢᠨ ᠲᠦᠰᠢᠯᠭᠡᠲᠦ ᠰᠠᠨᠳᠠᠯᠢ ᠶ᠋ᠢᠨ ᠠᠷᠤ ᠳ᠋ᠤ᠌ ᠵᠣᠭᠰᠣᠭᠠᠳ᠂ ᠳᠠᠪᠬᠤᠷᠯᠢᠭ ᠪᠠᠢᠰᠢᠩ ᠤ᠋ᠨ ᠲᠠᠪᠴᠠᠩ ᠳᠡᠭᠡᠷᠡ ᠡᠴᠡ ᠴᠡᠷᠢᠭ ᠤᠷᠤᠭᠤ ᠲᠤᠩ ᠶᠡᠬᠡ ᠵᠠᠩ ᠲᠠᠢ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ ᠨᠢ ᠪᠣᠭᠳᠠ ᠬᠠᠭᠠᠨ ᠡᠬᠡ ᠳᠠᠭᠢᠨᠢ ᠬᠣᠶᠠᠷ ᠢ᠋ ᠬᠠᠷᠠᠭᠰᠠᠨ ᠠ᠋ᠴᠠ ᠢᠯᠡᠭᠦᠦ ᠭᠠᠢᠬᠠᠵᠠᠢ᠃ ᠠᠵᠢᠭᠴᠢ ᠵᠠᠯᠠᠭᠤ ᠬᠦᠦ᠂ ᠶᠡᠬᠡ ᠵᠠᠩ ᠲᠠᠢ ᠰᠠᠢᠳ ᠳᠠᠯᠠᠢ ᠸᠠᠩ ᠢ᠋ ᠡᠬᠡ ᠳᠠᠭᠢᠨᠢ ᠶ᠋ᠢ ᠲᠡᠭᠦᠨ ᠦ᠌ ᠵᠦᠭ ᠡᠷᠭᠢᠬᠦ ᠳ᠋ᠦ᠍ ᠭᠡᠨᠡᠳᠲᠡ ᠮᠠᠰᠢ ᠵᠢᠰᠤᠷᠴᠢ ᠪᠠᠢᠳᠠᠯ ᠲᠠᠢ ᠮᠡᠬᠦᠢᠰᠬᠢᠨ ᠪᠢᠯᠪᠢᠭᠦᠷᠳᠡᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ ᠬᠡᠳᠦᠢᠨ ᠠᠵᠢᠨ ᠬᠠᠷᠠᠵᠤ᠂ ᠣᠷᠣᠢ ᠬᠤᠸᠠᠷᠠᠨ ᠳ᠋ᠠᠭᠠᠨ ᠵᠡᠷᠭᠡᠯᠡᠳᠡᠭᠡ ᠣᠷᠣᠨ ᠳᠡᠭᠡᠷᠡ ᠬᠡᠪᠲᠡᠳᠡᠭ ᠡᠪᠦᠭᠡᠨ ᠴᠡᠷᠢᠭ ᠲᠦ᠍ ᠡᠳᠦᠷ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠬᠡᠯᠡᠪᠡᠰᠦ᠂ ᠡᠪᠦᠭᠡᠨ ᠴᠡᠷᠢᠭ ᠭᠠᠰᠢᠭᠤᠨᠠ ᠢᠨᠢᠶᠡᠮᠰᠦᠭᠯᠡᠨ ᠥᠭᠦᠯᠡᠷᠦᠨ᠄
— ᠪᠢᠳᠡᠨ ᠦ᠌ ᠡᠮᠦᠨᠡ ᠳᠠᠮᠳᠢᠨ ᠲᠡᠷᠢᠭᠦᠨ ᠭᠡᠳᠡᠭ ᠮᠠᠨᠠᠢ ᠳᠠᠷᠤᠭᠠ᠂ ᠶᠠᠭᠠᠬᠢᠵᠤ ᠶᠡᠬᠡ ᠵᠠᠩ ᠭᠠᠷᠭᠠᠵᠤ ᠪᠠᠢᠳᠠᠭ ᠢ᠋ ᠴᠢ ᠮᠡᠳᠡᠬᠦ ᠪᠢᠵᠡ ᠳᠡ᠃ ᠣᠳᠣ ᠥᠨᠥᠳᠥᠷ ᠴᠢ ᠲᠡᠭᠦᠨ ᠢ᠋ ᠰᠠᠢᠳ ᠳᠠᠯᠠᠢ ᠸᠠᠩ ᠤ᠋ᠨ ᠡᠮᠦᠨᠡ ᠶᠠᠭᠠᠬᠢᠵᠤ ᠪᠠᠢᠭᠠ ᠶ᠋ᠢ ᠬᠠᠷᠠᠭᠰᠠᠨ ᠪᠢᠵᠡ ᠳᠡ? ᠪᠠᠰᠠ᠂ ᠰᠠᠢᠳ ᠳᠠᠯᠠᠢ ᠸᠠᠩ᠂ ᠪᠢᠳᠡᠨ ᠳ᠋ᠦ᠍ ᠰᠦᠷ ᠪᠠᠳᠠᠷᠠᠭᠤᠯᠬᠤ ᠮᠥᠷᠲᠡᠭᠡᠨ᠂ ᠲᠡᠭᠦᠨ ᠦ᠌ ᠡᠮᠦᠨᠡ ᠵᠢᠰᠤᠷᠳᠠᠵᠤ ᠰᠦᠢᠳ ᠪᠣᠯᠵᠤ ᠪᠠᠢᠭᠠ ᠳᠠᠮᠳᠢᠨ ᠲᠡᠷᠢᠭᠦᠨ ᠦ᠌ ᠡᠮᠦᠨᠡ ᠶᠠᠮᠠᠷ ᠰᠢᠭ᠋ ᠪᠠᠢᠳᠠᠯ ᠲᠠᠢ ᠪᠠᠢᠭᠰᠠᠨ ᠢ᠋ ᠮᠥᠨ ᠬᠠᠷᠠᠭᠰᠠᠨ ᠪᠢᠵᠡ ᠳᠡ? ᠮᠠᠨᠠᠢ ᠶᠡᠬᠡ ᠪᠠᠭᠠ ᠰᠠᠢᠳ ᠳᠠᠷᠤᠭᠠ᠂ ᠨᠣᠶᠠᠳ ᠲᠦᠰᠢᠮᠡᠳ ᠡᠢᠮᠦ ᠯᠡ ᠪᠠᠢᠳᠠᠭ ᠶᠤᠮ ᠰᠢᠦ ᠳᠡ᠃
ᠴᠢ ᠪᠣᠳᠣᠭᠠᠳ ᠦᠵᠡ᠂ ᠳᠠᠮᠳᠢᠨ ᠲᠡᠷᠢᠭᠦᠨ᠂ ᠪᠢᠳᠡᠨ ᠦ᠌ ᠡᠮᠦᠨᠡ ᠰᠦᠷᠡᠬᠡᠢ ᠪᠠᠢᠳᠠᠭ ᠲᠠᠢ ᠪᠠᠨ ᠠᠳᠠᠯᠢ᠂ ᠰᠠᠢᠳ ᠳᠠᠯᠠᠢ ᠸᠠᠩ ᠤ᠋ᠨ ᠡᠮᠦᠨᠡ ᠲᠡᠷᠡ ᠪᠠᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠪᠠᠯ᠂ ᠬᠡᠴᠢᠨᠡᠨ ᠲᠣᠭᠲᠠᠬᠤ ᠪᠣᠢ? ᠭᠠᠯᠰᠠᠩ ᠮᠡᠢᠷᠡᠨ᠂ ᠲᠦᠪᠰᠢᠨᠵᠢᠷᠭᠠᠯ᠂ ᠭᠣᠨᠴᠣᠭ ᠵᠠᠩᠭᠢ᠂ ᠪᠢᠳᠡᠨ ᠢ᠋ ᠳᠠᠷᠤᠯᠠᠨ ᠵᠣᠪᠠᠭᠠᠳᠠᠭ ᠲᠡᠷᠡ ᠪᠦᠭᠦᠳᠡ ᠬᠠᠷᠭᠢᠰ᠂ ᠪᠡᠶᠡ ᠪᠡᠶᠡ ᠶ᠋ᠢᠨ ᠭᠡᠳᠡᠰᠦᠨ ᠳ᠋ᠦ᠍ ᠬᠥᠯ ᠢ᠋ᠶ᠋ᠡᠨ ᠴᠢᠬᠢᠯᠴᠡᠵᠦ ᠪᠠᠢᠳᠠᠭ ᠮᠥᠷᠲᠡᠭᠡᠨ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠨᠡᠢᠯᠡᠵᠦ ᠳᠠᠮᠳᠢᠨ ᠲᠡᠷᠢᠭᠦᠨ ᠢ᠋ ᠤᠨᠠᠭᠠᠭᠠᠳ᠂ ᠣᠷᠣᠨ ᠳ᠋ᠤᠨᠢ ᠰᠠᠭᠤᠬᠤ ᠭᠡᠵᠦ ᠤᠯᠠ ᠶ᠋ᠢ ᠨᠢ ᠱᠠᠭᠠᠢᠳᠠᠭ᠃ ᠲᠡᠷᠡ ᠮᠥᠷᠲᠡᠭᠡᠨ ᠳᠠᠮᠳᠢᠨ ᠲᠡᠷᠢᠭᠦᠨ ᠦ᠌ ᠪᠡᠨ ᠡᠮᠦᠨᠡ ᠵᠢᠰᠤᠷᠳᠠᠳᠠᠭ ᠨᠢ᠂ ᠳᠠᠮᠳᠢᠨ ᠤ᠋ ᠳᠠᠯᠠᠢ ᠸᠠᠩ ᠤ᠋ᠨ ᠡᠮᠦᠨᠡ ᠵᠢᠰᠤᠷᠳᠠᠳᠠᠭ ᠲᠠᠢ ᠠᠳᠠᠯᠢ᠃ ᠳᠠᠯᠠᠢ ᠸᠠᠩ᠂ ᠲᠡᠷᠢᠭᠦᠨ ᠮᠡᠢᠷᠡᠨ ᠪᠢᠰᠢ᠂ ᠸᠠᠩ ᠤ᠋ᠨ ᠵᠡᠷᠭᠡ ᠲᠡᠢ ᠪᠣᠯᠪᠠᠴᠤ᠂ ᠥᠨᠥᠬᠢ ᠯᠡ ᠳᠠᠮᠳᠢᠨ ᠲᠡᠷᠢᠭᠦᠨ ᠶᠦᠮ ᠤᠤ᠂ ᠭᠠᠯᠰᠠᠩ ᠮᠡᠢᠷᠡᠨ ᠦ᠌ ᠥᠷᠥᠭᠡᠰᠦᠨ ᠪᠥᠭᠡᠷᠡ ᠨᠢ ᠭᠡᠵᠦ ᠮᠡᠳᠡᠭᠡᠷᠡᠢ᠃ ᠳᠠᠯᠠᠢ ᠸᠠᠩ ᠡᠷᠳᠡᠮ ᠴᠢᠳᠠᠯ ᠢ᠋ᠶ᠋ᠠᠷ ᠴᠣ᠂ ᠴᠢ ᠪᠢᠳᠡ ᠬᠣᠶᠠᠷ ᠠ᠋ᠴᠠ ᠨᠢᠭᠡ ᠶᠡᠬᠡ ᠢᠯᠡᠭᠦᠦ ᠦᠭᠡᠢ ᠪᠠᠢᠬᠠ᠃ ᠪᠢᠴᠢᠭ ᠦᠰᠦᠭ ᠦ᠋ᠨ ᠲᠠᠯᠠ ᠪᠠᠷ ᠬᠡᠯᠡᠯᠴᠡᠪᠡᠯ᠂ ᠪᠢ ᠴᠦ᠍ ᠲᠡᠭᠦᠨ ᠡᠴᠡ ᠢᠯᠡᠭᠦᠦ ᠪᠢᠴᠢᠭ ᠦᠵᠡᠭᠰᠡᠨ ᠪᠠᠢᠵᠤ ᠪᠣᠯᠵᠣᠰᠢ ᠦᠭᠡᠢ᠃ ᠶᠠᠭᠤᠮᠠ ᠦᠵᠡᠬᠦ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠴᠤ᠌ ᠭᠡᠰᠡᠨ ᠪᠢ ᠲᠡᠭᠦᠨ ᠡᠴᠡ ᠢᠯᠡᠭᠦᠦ ᠣᠢᠮᠣᠰᠤ ᠡᠯᠡᠭᠡᠭᠰᠡᠨ ᠪᠠᠢᠬᠠ᠃ ᠥᠨᠥᠴᠢᠨ ᠪᠠᠭᠠ ᠳ᠋ᠠᠭᠠᠨ ᠪᠢ᠂ ᠨᠢᠭᠡ ᠪᠠᠳᠢᠷᠴᠢᠨ ᠳᠠᠭᠠᠵᠤ᠂ ᠮᠣᠩᠭᠣᠯ ᠭᠠᠵᠠᠷ ᠶᠠᠪᠤᠭᠠ ᠦᠭᠡᠢ ᠭᠠᠵᠠᠷ ᠦᠭᠡᠢ᠂ ᠪᠠᠰᠠ ᠬᠢᠲᠠᠳ᠂ ᠲᠥᠪᠡᠳ᠂ ᠡᠨᠡᠳᠬᠡᠭ ᠭᠠᠵᠠᠷ ᠢ᠋ᠶ᠋ᠠᠷ ᠴᠤ᠌ ᠶᠠᠪᠤᠵᠤ ᠦᠵᠡᠭᠰᠡᠨ᠃ ᠣᠷᠣᠰ ᠭᠠᠵᠠᠷ ᠴᠤ᠌ ᠭᠡᠰᠡᠨ ᠳ᠋ᠤᠨ ᠮᠥᠷᠡᠨ ᠭᠡᠳᠡᠭ ᠨᠢᠭᠡ ᠶᠡᠬᠡ ᠮᠥᠷᠡᠨ ᠪᠠᠢᠳᠠᠭ ᠶᠤᠮ᠃ ᠲᠡᠭᠦᠪᠡᠷ ᠶᠠᠪᠤᠵᠤ ᠲᠡᠨᠳᠡᠬᠢ ᠶ᠋ᠢᠨ ᠪᠦᠵᠠᠭᠠᠪ ᠨᠠᠷ ᠤ᠋ᠨ ᠨᠤᠲᠤᠭ ᠢ᠋ᠶ᠋ᠠᠷ ᠴᠤ᠌ ᠶᠠᠪᠤᠵᠤ ᠦᠵᠡᠭᠰᠡᠨ᠃ ᠪᠦᠵᠠᠭᠠᠪ ᠭᠡᠵᠦ ᠮᠠᠨᠠᠢ ᠳᠥᠷᠪᠡᠳ ᠰᠢᠭ ᠲᠡᠢᠮᠦ ᠨᠢᠭᠡ ᠤᠯᠤᠰ ᠪᠠᠢᠳᠠᠭ ᠶᠤᠮ ᠪᠢᠯᠡ᠃ ᠮᠢᠨᠦ ᠬᠡᠰᠦᠵᠦ ᠦᠵᠡᠭᠰᠡᠨ ᠭᠠᠵᠠᠷ ᠶᠡᠬᠡ ᠪᠣᠯᠪᠠᠴᠤ᠂ ᠪᠢ ᠥᠨᠥᠴᠢᠨ ᠥᠷᠥᠭᠡᠰᠦᠨ ᠬᠠᠷᠠ ᠶᠠᠰᠤᠲᠤ᠂ ᠬᠠᠷᠠᠴᠤ ᠠᠷᠠᠳ᠂ ᠳᠠᠯᠠᠢ ᠸᠠᠩ ᠪᠣᠯᠪᠠᠯ ᠴᠠᠭᠠᠨ ᠶᠠᠰᠤᠲᠤ ᠬᠥᠮᠦᠨ ᠪᠣᠯᠤᠭᠠᠳ᠂ ᠪᠡᠶᠡ ᠪᠡᠨ ᠨᠣᠮ ᠲᠠᠢ ᠴᠤ᠌ ᠭᠡᠰᠡᠨ ᠨᠣᠶᠠᠨ᠂ ᠨᠣᠮ ᠦᠭᠡᠢ ᠴᠦ᠍ ᠭᠡᠰᠡᠨ ᠬᠠᠷᠠᠴᠤ ᠨᠠᠷ ᠢ᠋ ᠵᠠᠬᠢᠷᠬᠤ ᠨᠣᠶᠠᠨ ᠭᠡᠵᠦ ᠦᠵᠡᠳᠡᠭ ᠦ᠋ᠨ ᠨᠢᠭᠡ ᠨᠢ ᠪᠢᠯᠡ᠃ ᠸᠠᠩ᠂ ᠮᠠᠨᠵᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠴᠦ᠍ ᠡᠷᠬᠡ ᠲᠡᠢ ᠶᠠᠩᠪᠠ ᠲᠠᠢ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠠᠢᠵᠠᠢ᠃ ᠣᠳᠣ ᠪᠦᠷ ᠴᠦ᠍ ᠮᠠᠨᠳᠤᠵᠤ ᠰᠢᠳᠠᠷ ᠰᠠᠢᠳ᠂ ᠴᠡᠷᠢᠭ ᠦ᠋ᠨ ᠶᠠᠮᠤᠨ ᠤ᠋ ᠰᠠᠢᠳ ᠭᠡᠵᠦ ᠵᠡᠷᠭᠡ ᠬᠡᠷᠬᠢᠮ ᠹᠦᠩᠯᠦ ᠡᠳᠦᠢ ᠲᠡᠳᠦᠢ ᠨᠡᠮᠡᠭᠳᠡᠵᠡᠢ᠃ ᠲᠡᠭᠦᠨ ᠢ᠋ ᠪᠡᠨ ᠠᠯᠳᠠᠬᠤ ᠦᠭᠡᠢ ᠭᠡᠵᠦ ᠮᠠᠷᠠᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ? ᠲᠡᠭᠡᠭᠡᠳ ᠯᠡ ᠳᠡᠭᠡᠭᠡᠭᠦᠷ ᠪᠠᠢᠭᠠ ᠤᠯᠤᠰ ᠢ᠋ ᠳᠣᠯᠢᠶᠠᠴᠢᠬᠠᠨ ᠠᠯᠳᠠᠵᠤ ᠪᠠᠢᠬᠤ ᠦᠭᠡᠢ ᠤᠤ ᠳᠠ᠃ ᠪᠣᠭᠳᠠ ᠶ᠋ᠢᠨ ᠲᠡᠷᠡ ᠰᠢᠷᠠ ᠬᠡᠦᠬᠡᠨ ᠶᠡᠬᠡ ᠮᠠᠲᠠᠯ ᠲᠠᠢ ᠬᠡᠦᠬᠡᠨ ᠰᠢᠦ᠃ ᠪᠣᠭᠳᠠ᠂ ᠲᠡᠷᠡ ᠬᠡᠦᠬᠡᠨ ᠦ᠌ ᠦᠭᠡᠨ ᠡᠴᠡ ᠨᠢᠭᠡ ᠴᠦ᠍ ᠭᠠᠷᠳᠠᠭ ᠦᠭᠡᠢ ᠶᠦᠮ ᠭᠡᠨᠡ ᠪᠢᠯᠡ᠃ ᠲᠡᠭᠡᠭᠡᠳ ᠲᠡᠷᠡ ᠨᠢ ᠣᠯᠠᠨ ᠰᠠᠢᠳ ᠢ᠋ ᠳᠡᠪᠰᠢᠭᠦᠯᠬᠦ ᠤᠭᠴᠠᠷᠠᠭᠤᠯᠬᠤ᠂ ᠮᠠᠭᠤ ᠳᠤᠷᠠ ᠪᠠᠨ ᠬᠦᠷᠪᠡᠯ ᠴᠢᠨᠠᠭᠰᠢ ᠨᠢ ᠬᠠᠷᠠᠭᠤᠯᠵᠤ ᠣᠷᠬᠢᠬᠤ᠂ ᠨᠢᠭᠡ ᠬᠤᠨᠳᠠᠭᠠ ᠠᠷᠢᠬᠢ ᠪᠠᠷᠢᠭᠤᠯᠤᠭᠠᠳ ᠯᠠ ᠲᠥᠷᠥᠯ ᠠᠷᠠᠯᠵᠢᠭᠤᠯᠵᠤ ᠣᠷᠬᠢᠬᠤ ᠲᠡᠢᠮᠦ ᠶᠠᠭᠤᠮᠠ ᠭᠡᠨᠡ ᠪᠢᠯᠡ᠃ ᠵᠠ ᠴᠢ ᠪᠢᠳᠡ ᠬᠣᠶᠠᠷ ᠤ᠋ᠨ ᠡᠨᠡ ᠦᠭᠡ ᠭᠠᠳᠠᠭᠰᠢ ᠵᠠᠳᠠᠷᠠᠭᠤᠯᠳᠠᠭ ᠦᠭᠡ ᠪᠢᠰᠢ ᠰᠢᠦ᠃ ᠳᠠᠷᠤᠭᠠ ᠨᠠᠷ ᠣᠯᠵᠤ ᠰᠣᠨᠣᠰᠪᠠᠯ ᠪᠢᠳᠡ ᠬᠣᠶᠠᠷ ᠢ᠋ ᠳᠣᠣᠷᠠ ᠨᠢ ᠯᠡ ᠰᠢᠷᠠ ᠬᠠᠳᠠᠨ ᠳ᠋ᠤ᠌ ᠶᠠᠪᠤᠭᠤᠯᠵᠤ ᠣᠷᠬᠢᠨᠠ ᠭᠡᠵᠦ ᠮᠡᠳᠡᠭᠡᠷᠡᠢ᠃
ᠴᠢ ᠪᠢᠳᠡ ᠬᠣᠶᠠᠷ᠂ ᠬᠠᠷᠠ ᠶᠠᠰᠤᠲᠤ ᠠᠯᠪᠠᠲᠤ ᠠᠷᠠᠳ ᠪᠢᠯᠡ᠃ ᠳᠡᠯᠡᠬᠡᠢ ᠳᠡᠭᠡᠷᠡ ᠬᠠᠷᠠ ᠴᠠᠭᠠᠨ ᠬᠣᠶᠠᠷ ᠶᠠᠰᠤ ᠪᠠᠢᠭᠠ ᠴᠠᠭ ᠲᠤ᠌ ᠬᠠᠷᠠ ᠶᠠᠰᠤᠲᠤ ᠬᠥᠮᠦᠨ ᠶᠠᠪᠤᠴᠠ ᠮᠠᠭᠤᠲᠠᠢ᠂ ᠴᠢ ᠪᠢᠳᠡ ᠬᠣᠶᠠᠷ ᠤ᠋ᠨ ᠰᠠᠨᠠᠵᠤ ᠪᠣᠳᠣᠬᠤ ᠶᠠᠭᠤᠮᠠ᠂ ᠶᠠᠭᠠᠬᠢᠵᠤ ᠨᠢᠭᠡ ᠡᠳᠦᠷ ᠴᠦ᠍ ᠭᠡᠰᠡᠨ ᠪᠠᠩᠵᠠ ᠱᠠᠬᠠᠢ ᠶᠠᠯᠠ ᠰᠢᠳᠬᠡᠯ ᠦᠭᠡᠢ ᠭᠡᠳᠡᠰᠦ ᠴᠠᠳᠬᠤᠯᠠᠩ ᠪᠠᠢᠬᠤ ᠪᠣᠢ ᠭᠡᠭᠴᠢ ᠶ᠋ᠢ ᠬᠢᠴᠢᠶᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤ ᠪᠠᠢᠬᠤ ᠪᠣᠢ?᠂᠂᠂᠂᠂᠂᠂᠂᠂ ᠲᠡᠷᠡ ᠴᠦ᠍ ᠭᠡᠰᠡᠨ ᠪᠠᠰᠠ ᠪᠢᠳᠡᠨ ᠦ᠌ ᠰᠠᠨᠠᠭᠠ ᠵᠣᠷᠢᠭ ᠢ᠋ᠶ᠋ᠠᠷ ᠲᠡᠷᠡ ᠪᠦᠷᠢ ᠪᠣᠯᠵᠤ ᠥᠭᠬᠦ ᠦᠭᠡᠢ ᠪᠠᠢᠳᠠᠭ ᠰᠢᠦ ᠭᠡᠬᠦ ᠳ᠋ᠦ᠍ᠨᠢ ᠡᠪᠦᠭᠡᠨ ᠴᠡᠷᠢᠭ ᠦ᠋ᠨ ᠬᠠᠵᠠᠭᠤ ᠳ᠋ᠤ᠌ ᠣᠷᠣ ᠲᠠᠢ ᠨᠢᠭᠡ ᠵᠠᠯᠠᠭᠤ ᠴᠡᠷᠢᠭ᠂
— ᠵᠠ᠂ ᠣᠳᠣ ᠡᠪᠦᠭᠡᠨ ᠭᠤᠸᠠᠢ᠂ ᠨᠢᠭᠡ ᠵᠢᠭᠠᠯ ᠵᠣᠭᠠᠭᠠᠲᠡᠢ ᠰᠣᠨᠢᠨ ᠶᠠᠭᠤᠮᠠ ᠶᠠᠷᠢᠵᠤ ᠥᠭᠭᠦᠨᠡᠦ᠂ ᠦᠯᠢᠭᠡᠷ ᠴᠦ᠍ ᠶᠦᠮ ᠤᠤ᠂ ᠶᠠᠭᠤ ᠴᠤ᠌ ᠶᠤᠮ ᠪᠣᠢ ᠭᠡᠬᠦ ᠳ᠋ᠦ᠍ᠨᠢ᠂
— ᠵᠠ᠂ ᠲᠡᠭᠡᠶᠡ ᠳᠡ᠃ ᠨᠢᠭᠡ ᠦᠯᠢᠭᠡᠷ ᠬᠡᠯᠡᠵᠦ ᠥᠭᠭᠦᠶᠡ ᠭᠡᠵᠦ ᠠᠷᠤ ᠳ᠋ᠠᠭᠠᠨ ᠮᠠᠭᠤ ᠢᠮᠠᠭᠠᠨ ᠳᠠᠬᠤ ᠪᠠᠨ ᠬᠥᠳᠡᠷᠦᠭᠡᠳ᠂ ᠡᠪᠦᠭᠡᠨ ᠲᠤᠬᠠᠲᠠᠢᠬᠠᠨ ᠢ᠋ᠶ᠋ᠠᠷ ᠮᠠᠭᠤ ᠮᠣᠳᠣᠨ ᠣᠷᠣᠨ ᠳᠡᠭᠡᠷᠡ ᠪᠡᠨ ᠰᠠᠭᠤᠵᠤ᠂ ᠦᠯᠢᠭᠡᠷ ᠬᠡᠯᠡᠵᠦ ᠡᠬᠢᠯᠡᠭᠰᠡᠨ ᠨᠢ᠄
— ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠨᠢᠭᠡᠨ ᠨᠣᠶᠠᠨ ᠪᠠᠢᠵᠤ ᠭᠡᠨᠡ᠃ ᠠᠭᠤᠷ ᠲᠠᠢ ᠳᠣᠭᠰᠢᠨ ᠭᠡᠳᠡᠭ ᠨᠢ ᠤᠴᠢᠷ ᠦᠭᠡᠢ᠃ ᠠᠯᠪᠠᠲᠤ ᠠᠮᠢᠲᠠᠨ ᠨᠢ ᠨᠣᠶᠠᠨ ᠨᠠᠢᠬᠠᠨ ᠥᠭᠡᠳᠡ ᠡᠴᠡ ᠬᠠᠷᠠᠬᠤ ᠠ᠋ᠴᠠ ᠴᠤ᠌ ᠠᠶᠤᠳᠠᠭ ᠲᠡᠢᠮᠦ ᠲᠣᠭᠰᠢᠨ ᠨᠣᠶᠠᠨ ᠪᠠᠢᠵᠤ ᠭᠡᠨᠡ ᠳᠡ ᠠ᠋᠃ ᠠᠯᠤᠰ ᠤ᠋ᠨ ᠠᠶᠠᠨ ᠳ᠋ᠤ᠌ ᠮᠣᠷᠳᠠᠬᠤ ᠨᠢᠭᠡᠨ ᠬᠡᠷᠡᠭ ᠭᠠᠷᠴᠠᠢ᠃ ᠲᠡᠷᠡ ᠨᠣᠶᠠᠨ ᠳ᠋ᠤ᠌ ᠮᠠᠨᠠᠢ(ᠮᠠᠨ ᠤ᠋) ᠰᠠᠢᠳ ᠸᠠᠩ ᠤ᠋ᠨ ᠥᠨᠥᠳᠥᠷ ᠶᠡᠬᠡ ᠶᠣᠰᠣᠯᠠᠯ ᠢ᠋ᠶ᠋ᠠᠷ ᠮᠣᠷᠢᠯᠠᠭᠰᠠᠨ ᠰᠢᠭ᠋᠂ ᠣᠯᠠᠨ ᠬᠢᠶᠡ ᠳᠠᠭᠠᠯᠲᠠ ᠲᠠᠢ᠂ ᠤᠷᠢᠳᠤ(ᠤᠷᠲᠤ) ᠨᠢ ᠴᠦ᠍ ᠵᠠᠮ ᠤᠳᠤᠷᠢᠳᠬᠤ ᠬᠥᠮᠦᠨ᠂ ᠬᠣᠢᠨᠠ ᠨᠢ ᠴᠦ᠍ ᠳᠠᠭᠠᠬᠤ ᠬᠥᠮᠦᠨ ᠲᠡᠢ ᠮᠣᠷᠢᠯᠠᠵᠤ ᠭᠡᠨᠡ ᠳᠡ᠃ ᠶᠠᠪᠤᠵᠤ ᠶᠠᠪᠤᠵᠤ᠂ ᠨᠢᠭᠡ ᠭᠠᠭᠴᠠ ᠰᠠᠭᠯᠠᠭᠠᠷ ᠮᠣᠳᠣᠨ ᠤ᠋ ᠳᠣᠣᠷᠠ ᠪᠠᠭᠤᠵᠤ ᠠᠮᠠᠷᠠᠬᠤ ᠪᠣᠯᠵᠠᠢ᠃ ᠳᠠᠭᠠᠯᠲᠠ ᠬᠢᠶᠡ ᠨᠠᠷ ᠨᠢ ᠨᠣᠶᠠᠨ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)ᠭᠠᠵᠠᠷ ᠣᠯᠪᠣᠭ ᠳᠡᠪᠢᠰᠴᠦ ᠰᠠᠭᠤᠳᠠᠯ ᠵᠠᠰᠠᠵᠤ ᠭᠡᠨᠡ᠃ ᠲᠡᠭᠡᠬᠦ ᠳ᠋ᠦ᠍ᠨᠢ (ᠳ᠋ᠦ᠍ ᠨᠢ)ᠲᠡᠷᠡ᠂ ᠣᠯᠪᠣᠭ ᠰᠠᠭᠤᠳᠠᠯ ᠢ᠋ᠶ᠋ᠠᠨ ᠭᠣᠯᠣᠵᠤ᠂ ᠪᠢ ᠨᠣᠶᠠᠨ ᠬᠥᠮᠦᠨ᠂ ᠲᠠ ᠨᠠᠷ ᠲᠠᠢ ᠠᠳᠠᠯᠢ ᠨᠣᠬᠠᠢ ᠰᠢᠭ᠋ ᠲᠡᠭᠡᠵᠦ ᠭᠠᠵᠠᠷ ᠰᠠᠭᠤᠬᠤ ᠦᠭᠡᠢ᠂ ᠨᠠᠮᠠᠶ᠋ᠢ(ᠨᠠᠮᠠ ᠶ᠋ᠢ)ᠳᠡᠭᠡᠷᠡ ᠡᠷᠭᠦᠵᠦ ᠰᠠᠭᠤᠯᠭᠠ ᠭᠡᠵᠦ ᠭᠡᠨᠡ᠃ ᠵᠠᠷᠤᠴᠠ ᠨᠠᠷ ᠨᠢ ᠲᠡᠷᠡ ᠲᠠᠯᠠ ᠭᠠᠵᠠᠷ ᠨᠣᠶᠠᠨ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)ᠶᠠᠭᠠᠬᠢᠵᠤ ᠥᠨᠳᠥᠷ ᠰᠠᠭᠤᠳᠠᠯ ᠵᠠᠰᠠᠬᠤ ᠪᠢᠯᠡ ᠭᠡᠵᠦ ᠰᠠᠨᠳᠤᠷᠴᠤ᠂ ᠠᠷᠭᠠ ᠪᠠᠷᠠᠭᠳᠠᠬᠤ ᠳ᠋ᠠᠭᠠᠨ( ᠳ᠋ᠤ᠌ ᠪᠠᠨ)ᠲᠡᠷᠡ ᠰᠠᠭᠯᠠᠭᠠᠷ ᠮᠣᠳᠣ ᠶ᠋ᠢ ᠪᠥᠬᠥᠢᠯᠭᠡᠵᠦ ᠨᠣᠶᠠᠨ ᠢ᠋ᠶ᠋ᠠᠨ ᠡᠷᠭᠦᠵᠦ ᠰᠠᠭᠤᠯᠭᠠᠶᠠ ᠭᠡᠵᠦ᠂ ᠮᠣᠳᠣᠨ ᠤ᠋ ᠦᠵᠦᠭᠦᠷ ᠢ᠋ ᠲᠠᠲᠠᠵᠤ ᠪᠥᠬᠥᠢᠯᠭᠡᠭᠡᠳ᠂ ᠨᠣᠶᠠᠨ ᠢ᠋ᠶ᠋ᠠᠨ ᠰᠠᠭᠤᠯᠭᠠᠵᠤ ᠲᠠᠯᠪᠢᠮᠠᠭᠴᠠ᠂ ᠮᠣᠳᠣᠨ ᠤ᠋ ᠣᠷᠣᠢ ᠲᠡᠨᠢᠢᠭᠡᠳ ᠨᠣᠶᠠᠨ ᠢ᠋ ᠲᠡ᠊ — ᠷᠠ ᠬᠣᠯᠠ ᠫᠢᠳ ᠬᠢᠲᠡᠯᠡ ᠰᠠᠪᠠᠵᠤ ᠣᠷᠬᠢᠪᠠ ᠭᠡᠨᠡ ᠳᠡ᠃ ᠵᠠᠷᠤᠴᠠ ᠬᠢᠶᠡ ᠨᠠᠷ ᠨᠢ ᠰᠡᠩᠳᠡ ᠮᠡᠩᠳᠡ ᠭᠦᠶᠦᠵᠦ᠂ ᠨᠣᠶᠠᠨ ᠢ᠋ᠶ᠋ᠠᠨ ᠲᠦᠰᠢᠭᠦᠯᠦᠨ ᠪᠣᠰᠬᠠᠵᠤ ᠡᠷᠭᠦᠲᠡᠯᠡ᠂ ᠨᠣᠶᠠᠨ ᠤ᠋ ᠲᠣᠯᠣᠭᠠᠢ ᠠᠯᠠᠭᠠ ᠪᠠᠢᠵᠠᠢ᠃ ᠬᠢᠶᠡ ᠨᠠᠷ ᠠᠶᠤᠵᠤ ᠰᠠᠨᠳᠤᠷᠴᠤ᠂ ᠨᠣᠶᠠᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠮᠣᠳᠣᠨ ᠤ᠋ ᠭᠡᠰᠢᠭᠦᠦ ᠲᠠᠰᠤ ᠰᠠᠪᠠᠵᠤ ᠤᠷᠭᠢᠪᠠᠤ(ᠣᠷᠬᠢᠪᠠ ᠤᠤ)᠂ ᠶᠡᠷᠦ ᠡᠴᠡ ᠪᠡᠨ ᠲᠣᠯᠣᠭᠠᠢ ᠦᠭᠡᠢ ᠪᠠᠢᠭᠰᠠᠨ ᠶᠤᠮ ᠪᠣᠯᠪᠠᠤ(ᠪᠣᠯᠪᠠ ᠤᠤ)? ᠭᠡᠵᠦ ᠡᠰᠢ ᠲᠡᠰᠢ(ᠡᠢᠰᠢ ᠲᠠᠢᠰᠢ) ᠪᠠᠨ ᠭᠦᠶᠦᠵᠦ ᠡᠷᠢᠯ ᠬᠢᠵᠦ ᠭᠡᠨᠡ᠃ ᠲᠡᠭᠡᠭᠡᠳ ᠲᠡᠷᠡ ᠤᠷᠤᠭᠤ ᠬᠣᠯᠠ ᠯᠠ ᠨᠢᠭᠡ ᠲᠣᠯᠣᠭᠠᠢ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠢ᠋ ᠣᠯᠵᠤ ᠭᠡᠨᠡ ᠳᠡ᠃ ᠭᠠᠭᠴᠠᠬᠦ(ᠭᠠᠭᠴᠠ ᠬᠦ᠌)ᠨᠣᠶᠠᠨ ᠤ᠋ ᠥᠭᠡᠳᠡ ᠡᠴᠡ ᠬᠠᠷᠠᠵᠤ ᠦᠵᠡᠭᠰᠡᠨ ᠬᠥᠮᠦᠨ ᠨᠢᠭᠡ ᠴᠦ᠍ ᠠᠯᠠᠭᠠ᠃ ᠲᠡᠷᠡ ᠲᠣᠯᠣᠭᠠᠢ ᠶ᠋ᠢ ᠨᠣᠶᠠᠨ ᠤ᠋ ᠲᠣᠯᠣᠭᠠᠢ ᠶᠤᠮ ᠤᠤ᠂ ᠪᠢᠰᠢ ᠶᠦᠮ ᠤᠤ ᠭᠡᠳᠡᠭ ᠢ᠋ ᠮᠡᠳᠡᠬᠦ ᠲᠠᠨᠢᠬᠤ ᠬᠥᠮᠦᠨ ᠡᠰᠡ ᠣᠯᠳᠠᠵᠠᠢ᠃
ᠵᠠ᠂ ᠣᠳᠣ ᠶᠠᠭᠠᠬᠢᠳᠠᠭ ᠶᠢᠳᠡᠭ(ᠡᠢᠳᠡᠭ) ᠪᠢᠯᠡ? ᠭᠡᠵᠦ ᠪᠣᠳᠣᠭᠠᠳ᠂ ᠵᠠᠬᠢᠷᠤᠭᠴᠢ ᠠᠪᠤᠭᠠᠢ ᠠ᠋ᠴᠠ ᠣᠴᠢᠵᠤ ᠠᠰᠠᠭᠤᠶᠠ᠃ ᠮᠠᠨ ᠤ᠋ ᠨᠣᠶᠠᠨ ᠤ᠋ ᠲᠣᠯᠣᠭᠠᠢ ᠲᠠᠢ ᠲᠣᠯᠣᠭᠠᠢ ᠦᠭᠡᠢ ᠶ᠋ᠢ ᠵᠠᠬᠢᠷᠤᠭᠴᠢ ᠠᠪᠤᠭᠠᠢ ᠯᠠᠪ ᠮᠡᠳᠡᠭᠰᠡᠨ ᠪᠠᠢᠬᠤ ᠭᠡᠵᠦ ᠬᠡᠯᠡᠯᠴᠡᠵᠦ᠂ ᠡᠪᠦᠭᠡᠨ ᠵᠠᠬᠢᠷᠤᠭᠴᠢ ᠠᠪᠤᠭᠠᠢ ᠳ᠋ᠤ᠌ ᠣᠴᠢᠵᠤ ᠠᠰᠠᠭᠤᠵᠤ ᠭᠡᠨᠡ ᠳᠡ᠂ ᠲᠡᠭᠡᠬᠦ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ) ᠵᠠᠬᠢᠷᠤᠭᠴᠢ ᠨᠢ ᠪᠤᠭᠤᠷᠤᠯ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠴᠦ᠂ ᠪᠦᠦ ᠮᠡᠳᠡ ᠠ᠋᠂ ᠬᠡᠦᠬᠡᠳ᠂ ᠲᠣᠯᠣᠭᠠᠢ ᠲᠠᠢ ᠴᠣ ᠪᠠᠢᠭᠰᠠᠨ ᠶᠤᠮ ᠤᠤ ᠨᠣᠶᠠᠨ ᠮᠠᠨᠢ᠂ ᠲᠣᠯᠣᠭᠠᠢ ᠦᠭᠡᠢ ᠴᠦ᠍ ᠪᠠᠢᠭᠰᠠᠨ ᠶᠤᠮ ᠤᠤ᠃ ᠪᠢ ᠨᠣᠶᠠᠨ ᠤ᠋ ᠰᠡᠷᠡᠭᠦᠨ ᠲᠤᠩᠭᠠᠯᠠᠭ ᠪᠠᠢᠬᠤ ᠳ᠋ᠤ᠌ ᠡᠮᠦᠨᠡ ᠨᠢ ᠰᠥᠭᠥᠳᠴᠦ ᠮᠥᠷᠭᠥᠭᠰᠡᠭᠡᠷ ᠶᠡᠷᠦ ᠴᠢᠷᠠᠢ ᠥᠭᠡᠳᠡ ᠨᠢ ᠬᠠᠷᠠᠵᠤ ᠦᠵᠡᠭᠰᠡᠨ ᠦᠭᠡᠢ ᠪᠢᠯᠡ᠃ ᠮᠠᠯᠠᠭᠠᠢ ᠳᠡᠭᠡᠷᠡ ᠪᠡᠨ ᠬᠠᠭᠠᠨ ᠤ᠋ ᠬᠠᠢᠷᠠᠯᠠᠭᠰᠠᠨ ᠨᠣᠶᠠᠨ ᠤ᠋ ᠬᠡᠷᠬᠢᠮ ᠵᠢᠩᠰᠡ ᠤᠲᠤᠭᠠ ᠲᠠᠢ ᠪᠠᠢᠭᠰᠠᠨ ᠢ᠋ ᠯᠡ ᠪᠢ ᠰᠠᠢᠨ ᠮᠡᠳᠡᠨᠡ᠃ ᠲᠣᠯᠣᠭᠠᠢ ᠲᠠᠢ ᠦᠭᠡᠢ ᠶ᠋ᠢ ᠨᠢ ᠮᠡᠳᠡᠬᠦ ᠦᠭᠡᠢ᠂ ᠬᠡᠦᠬᠡᠳ᠃ ᠬᠠᠷᠢᠨ ᠬᠠᠲᠤᠨ ᠠ᠋ᠴᠠ ᠨᠢ ᠣᠴᠢᠵᠤ ᠠᠰᠠᠭᠤ᠃ ᠲᠡᠷᠡ ᠮᠡᠳᠡᠬᠦ ᠪᠠᠢᠬᠤ ᠭᠡᠬᠦ ᠳ᠋ᠦ᠍ᠨᠢ ᠬᠠᠲᠤᠨ ᠠ᠋ᠴᠠ ᠨᠢ ᠣᠴᠢᠵᠤ ᠠᠰᠠᠭᠤᠵᠤ ᠭᠡᠨᠡ ᠳᠡ᠃ ᠲᠡᠭᠡᠬᠦ ᠳ᠋ᠦ᠍ᠨᠢ ᠬᠠᠲᠤᠨ᠂
— ᠵᠠ᠂ ᠪᠦᠦ ᠮᠡᠳᠡ᠂ ᠬᠢᠶᠡ ᠨᠠᠷ ᠮᠢᠨᠢ᠂ ᠪᠢ ᠨᠢᠭᠡ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠲᠣᠭᠰᠢᠨ ᠨᠣᠶᠠᠨ ᠤ᠋ ᠬᠦᠰᠡᠯ ᠲᠠᠭᠠᠯᠠᠯ ᠳ᠋ᠤᠨᠢ ᠨᠡᠢᠯᠡᠭᠦᠯᠦᠭᠰᠡᠭᠡᠷ᠂ ᠲᠣᠭᠰᠢᠨ ᠴᠢᠷᠠᠢ ᠬᠤᠷᠴᠠ ᠨᠢᠳᠦ ᠥᠭᠡᠳᠡ ᠨᠢ ᠬᠠᠷᠠᠬᠤ ᠵᠢᠷᠦᠬᠡ ᠤᠬᠠᠭᠠᠨ ᠣᠯᠳᠠᠭᠰᠠᠨ ᠦᠭᠡᠢ ᠪᠢᠯᠡ᠃ ᠨᠠᠮᠠᠶ᠋ᠢ ᠦᠨᠦᠰᠬᠦ ᠳ᠋ᠦ᠍ᠨᠢ ᠬᠢᠷᠪᠡᠭᠡ ᠰᠢᠷᠦᠭᠦᠨ ᠰᠠᠬᠠᠯ ᠨᠢ ᠯᠡ ᠨᠠᠮᠠᠶ᠋ᠢ ᠬᠠᠳᠬᠤᠭᠠᠳ ᠪᠠᠢᠳᠠᠭ ᠰᠠᠨ᠃ ᠴᠣᠬᠣᠮ ᠲᠣᠯᠣᠭᠠᠢ ᠲᠠᠢ ᠲᠣᠯᠣᠭᠠᠢ ᠦᠭᠡᠢ ᠶ᠋ᠢ ᠨᠢ ᠪᠦᠦ ᠮᠡᠳᠡ᠂ ᠬᠢᠶᠡ ᠨᠠᠷ ᠮᠢᠨᠢ ᠭᠡᠵᠡᠢ᠃ ᠲᠡᠭᠡᠭᠡᠳ ᠨᠣᠶᠠᠨ ᠤ᠋ ᠵᠠᠷᠤᠴᠠ ᠳᠠᠭᠠᠯᠲᠠ ᠨᠠᠷ ᠨᠢ ᠨᠣᠶᠠᠨ ᠳ᠋ᠠᠭᠠᠨ ᠴᠣᠬᠣᠮ ᠲᠣᠯᠣᠭᠠᠢ ᠲᠠᠢ ᠪᠠᠢᠭᠰᠠᠨ ᠤᠤ᠂ ᠲᠣᠯᠣᠭᠠᠢ ᠦᠭᠡᠢ ᠪᠠᠢᠭᠰᠠᠨ ᠤᠤ ᠭᠡᠳᠡᠭ ᠢ᠋ ᠮᠡᠳᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠭᠡᠨᠡ ᠪᠢᠯᠡ ᠭᠡᠵᠦ ᠡᠪᠦᠭᠡᠨ ᠴᠡᠷᠢᠭ ᠦ᠋ᠨ ᠦᠯᠢᠭᠡᠷ ᠢ᠋ᠶ᠋ᠡᠨ ᠲᠡᠭᠦᠰᠬᠡᠨ ᠬᠡᠯᠡᠬᠦ ᠳ᠋ᠦ᠍ᠨᠢ ᠲᠣᠭᠣᠷᠢᠨ ᠰᠠᠭᠤᠵᠤ ᠦᠯᠢᠭᠡᠷ ᠰᠣᠨᠣᠰᠤᠭᠰᠠᠨ ᠴᠡᠷᠢᠭ ᠲᠦᠰ ᠬᠢᠲᠡᠯᠡ ᠢᠨᠢᠶᠡᠯᠴᠡᠪᠡ᠃
— — — —
※ ᠰᠢᠷᠠ ᠬᠠᠳᠠ ᠭᠡᠵᠦ ᠬᠦᠷᠢᠶᠡᠨ ᠦ᠌ ᠵᠡᠭᠦᠨ ᠬᠣᠢᠨᠠ᠂ ᠥᠰᠢᠶᠡᠨᠲᠡᠨ ᠭᠡᠳᠡᠭ ᠠᠭᠠᠷ ᠤ᠋ᠨ ᠮᠡᠳᠡᠭᠡᠨ ᠦ᠌ ᠭᠠᠵᠠᠷ ᠤ᠋ᠨ ᠠᠷᠤ ᠳ᠋ᠤ᠌ ᠤᠷᠢᠳᠤ ᠴᠠᠭ ᠲᠤ᠌᠂ ᠬᠥᠮᠦᠨ ᠢ᠋ ᠴᠠᠭᠠᠵᠠ ᠪᠠᠷ ᠠᠪᠠᠴᠢᠵᠤ ᠪᠠᠢᠭᠰᠠᠨ ᠭᠠᠵᠠᠷ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠲᠠᠪᠤᠨ ᠤᠰᠤ᠂ ᠪᠠᠳᠮᠠᠰᠡᠴᠡᠨ᠂ ᠰᠠᠷᠠᠨᠲᠤᠶᠠᠭᠠ᠂ ᠤᠢᠭᠤᠷᠵᠢᠨ·ᠣᠳᠬᠣᠨᠪᠠᠪᠠ᠂ ᠮᠧᠢ ᠬᠤᠸᠠ᠂
ᠣᠶᠤᠨᠪᠢᠯᠢᠭ᠌᠂ ᠣᠶᠤᠨᠪᠠᠲᠤ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠣᠶᠤᠨᠪᠠᠲᠤ᠂ ᠬᠡᠷᠡᠢᠳ· ᠵᠣᠯ᠂ ᠣᠶ᠋ᠢᠭᠣᠷᠵᠢᠨ· ᠣᠳᠬᠣᠨᠪᠠᠪᠠ᠂ ᠲ· ᠬᠥᠮᠦᠵᠢᠯᠲᠦ᠂
ᠮᠥᠩᠭᠥᠨᠭᠣᠸᠠ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ