ᠴᠢᠩᠭᠢᠰ ᠬᠠᠭᠠᠨ ᠤ᠋ ᠪᠠᠢᠯᠳᠤᠬᠤ ᠪᠣᠳᠣᠯᠭᠠ ᠪᠠ ᠠᠷᠭᠠ10-ᠰᠥᠨᠥᠭᠡᠬᠦ ᠪᠠᠢᠯᠳᠤᠭᠠᠨ ᠬᠢᠭᠰᠡᠨ ᠨᠢЧингис хааны байлдах бодлого ба арга
996 ( ᠨᠢᠭᠡ) ᠴᠢᠩᠭᠢᠰ ᠬᠠᠭᠠᠨ ᠤ᠋ ᠱᠠᠰᠢᠨ ᠰᠤᠷᠲᠠᠬᠤᠨ ᠤ᠋ ᠦᠵᠡᠯ
ᠰᠠᠮᠠᠷᠺᠠᠨᠳ᠋ ᠡᠴᠡ ᠪᠦᠬᠠᠷ ᠬᠦᠷᠬᠦ ᠬᠣᠭᠣᠷᠣᠨᠳᠣᠬᠢ ᠣᠢ ᠰᠢᠭᠤᠢ ᠪᠤᠶᠤ ᠴᠡᠴᠡᠷᠯᠢᠭ᠂ ᠭᠦᠢᠯᠡᠰᠦ ᠠᠯᠢᠮᠠ ᠵᠡᠷᠭᠡ ᠵᠢᠮᠢᠰ ᠦ᠋ᠨ ᠬᠦᠷᠢᠶᠡᠯᠡᠩ ᠦ᠋ᠨ ᠳᠣᠲᠣᠷᠠ ᠬᠥᠨᠳᠡᠯᠡᠨ ᠭᠤᠯᠳᠤ ᠪᠠᠷ ᠢ᠋ᠶ᠋ᠠᠨ ᠬᠡᠳᠦᠨ ᠺᠢᠯᠣᠮᠧᠲ᠋ᠷ ᠦ᠋ᠨ ᠭᠠᠵᠠᠷ ᠲᠤ᠌ ᠮᠣᠩᠭᠣᠯᠴᠤᠳ ᠵᠤᠰᠠᠯᠠᠩ ᠤ᠋ᠨ ᠣᠷᠳᠣᠨ ᠪᠠᠢᠭᠤᠯᠪᠠ᠃ ᠡᠷᠭᠦᠮᠵᠢᠯᠡᠭᠰᠡᠨ ᠨᠤᠲᠤᠭ ᠲᠤ᠌ ᠲᠦᠮᠡᠨ ᠦ᠌ ᠳᠠᠷᠤᠭᠠ᠂ ᠦᠨᠳᠦᠰᠦᠲᠡᠨ᠂ ᠠᠢᠮᠠᠭ ᠪᠦᠯᠦᠭ᠂ ᠶᠠᠰᠤᠲᠠᠨ ᠭᠡᠬᠦ ᠵᠡᠷᠭᠡ ᠪᠡᠷ ᠲᠣᠳᠣ ᠢᠯᠭᠠᠭᠠᠲᠠᠢ ᠪᠠᠷ ᠪᠠᠭᠤᠵᠠᠭᠠᠪᠠ᠃ ᠮᠣᠩᠭᠣᠯᠴᠤᠳ ᠡᠨᠡ ᠭᠠᠵᠠᠷ ᠲᠤ᠌ ᠵᠠᠯᠠᠭᠤ ᠨᠠᠰᠤᠨ ᠤ᠋ ᠲᠦᠷᠺ ᠬᠥᠮᠦᠨ ᠪᠤᠶᠤ ᠫᠧᠷᠰ ᠬᠥᠮᠦᠨ ᠢ᠋ ᠬᠣᠵᠢᠮ ᠤ᠋ᠨ ᠡᠳᠦᠷ ᠲᠡᠳᠡᠨ ᠦ᠌ ᠤᠯᠤᠰ ᠤ᠋ᠨ ᠳᠣᠲᠣᠷᠠᠬᠢ ᠬᠣᠲᠠ ᠪᠣᠭᠣᠮᠲᠠ ᠶ᠋ᠢ ᠴᠣᠬᠢᠭᠤᠯᠬᠤ ᠬᠣᠰᠢᠭᠤᠴᠢ ᠪᠣᠯᠭᠠᠨ ᠬᠡᠷᠡᠭᠯᠡᠬᠦ ᠶ᠋ᠢᠨ ᠲᠥᠯᠥᠭᠡ ᠪᠣᠯᠪᠠᠰᠤᠷᠠᠭᠤᠯᠵᠤ ᠪᠠᠢᠪᠠ᠃ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠤᠭ ᠤ᠋ᠨ ᠪᠠᠢᠭᠰᠠᠨ ᠶᠠᠭᠤᠮᠠ ᠡᠴᠡ ᠬᠣᠯᠠ ᠰᠠᠢᠨ ᠴᠢᠯᠠᠭᠤ ᠰᠤᠮᠤᠳᠠᠬᠤ ᠰᠢᠨᠡ ᠮᠠᠶᠢᠭ ᠤ᠋ᠨ ᠪᠠᠭᠠᠵᠢ᠂ ᠰᠢᠨᠡ ᠮᠠᠶᠢᠭ ᠤ᠋ᠨ ᠫᠤᠤ᠂ ᠰᠢᠨᠡ ᠮᠠᠶᠢᠭ ᠤ᠋ᠨ ᠪᠠᠮᠪᠠᠢ ᠶ᠋ᠢ ᠯᠠᠯᠤ ᠶ᠋ᠢᠨ ᠮᠥᠷᠭᠥᠯᠲᠡᠨ ᠦ᠌ ᠰᠢᠯᠢᠳᠡᠭ ᠮᠡᠷᠭᠡᠵᠢᠯᠲᠡᠨ ᠢ᠋ᠶ᠋ᠡᠷ ᠦᠢᠯᠡᠳᠪᠦᠷᠢᠯᠡᠭᠦᠯᠵᠦ ᠪᠠᠢᠪᠠ᠃ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠭᠤᠷᠪᠠᠳᠤᠭᠠᠷ ᠬᠥᠪᠡᠭᠦᠨ ᠬᠤᠷᠴᠠ ᠰᠡᠷᠭᠦᠯᠡᠩ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠯᠳᠠᠷᠲᠠᠢ ᠥᠭᠡᠳᠡᠢ ᠦᠬᠡᠷ ᠫᠣᠤᠲᠤ ᠴᠡᠷᠢᠭ ᠦ᠋ᠨ ᠬᠠᠮᠤᠭ ᠤ᠋ᠨ ᠳᠡᠭᠡᠳᠦ ᠵᠢᠯᠣᠭᠣᠳᠤᠭᠴᠢ ᠪᠠᠷ ᠲᠣᠮᠢᠯᠠᠭᠳᠠᠵᠤ ᠡᠳᠡᠭᠡᠷ ᠠᠵᠢᠯ ᠢ᠋ ᠴᠦ᠍ ᠵᠠᠬᠢᠷᠴᠤ ᠪᠠᠢᠭᠰᠠᠨ ᠶᠤᠮ᠃ ᠰᠠᠮᠠᠷᠺᠠᠨᠳ᠋ ᠢ᠋ ᠲᠣᠭᠣᠷᠢᠭᠰᠠᠨ ᠴᠡᠴᠡᠭ ᠵᠢᠮᠢᠰ ᠦ᠋ᠨ ᠬᠦᠷᠢᠶᠡᠯᠡᠩ ᠳ᠋ᠡᠬᠢ ᠠᠯᠢ ᠣᠯᠠᠨ ᠵᠤᠰᠠᠯᠠᠩ ᠤ᠋ᠨ ᠭᠡᠷ ᠪᠠᠢᠰᠢᠩ ᠨᠢ ᠡᠳᠡᠭᠡᠷ ᠵᠡᠪᠰᠡᠭ ᠢ᠋ ᠰᠢᠯᠭᠠᠨ ᠪᠣᠯᠪᠠᠰᠤᠷᠠᠭᠰᠠᠭᠠᠷ ᠡᠪᠳᠡᠷᠬᠡᠢ ᠪᠠᠭᠤᠷᠢ ᠪᠣᠯᠵᠤ ᠭᠦᠢᠴᠡᠪᠡ᠃ ᠮᠣᠩᠭᠣᠯ ᠬᠥᠮᠦᠨ ᠪᠤᠶᠤ ᠬᠢᠲᠠᠳ ᠬᠥᠮᠦᠨ ᠥᠷᠥᠨᠡᠳᠠᠬᠢᠨ ᠤ᠋ ᠯᠠᠯᠤ ᠶ᠋ᠢᠨ ᠮᠥᠷᠭᠥᠯᠲᠡᠨ ᠦ᠌ ᠬᠢᠮᠢ ᠶ᠋ᠢᠨ ᠮᠡᠷᠭᠡᠵᠢᠯᠲᠡᠨ ᠡᠴᠡ ᠭᠠᠯ ᠰᠦᠷᠴᠢᠬᠦ ᠪᠠᠭᠠᠵᠢ ᠬᠡᠷᠡᠭᠯᠡᠬᠦ ᠠᠷᠭᠠ ᠶ᠋ᠢ ᠵᠢᠭᠠᠯᠭᠠᠨ ᠰᠤᠷᠴᠠᠢ᠃ ᠡᠨᠡᠬᠦ ᠪᠠᠭᠠᠵᠢ ᠪᠠᠷ ᠨᠣᠴᠣᠭᠠᠭᠰᠠᠨ ᠨᠡᠭᠦᠷᠡᠰᠦᠨ ᠲᠣᠰᠣ ᠶ᠋ᠢ ᠳᠠᠢᠰᠤᠨ ᠤ᠋ ᠵᠦᠭ ᠲᠠᠶᠠᠭᠳᠠᠨ ᠶᠠᠪᠤᠭᠤᠯᠬᠤ ᠶᠤᠮ ᠪᠠᠢᠨᠠ᠃ ᠡᠨᠡ ᠨᠢ ᠠᠢᠬᠤᠪᠲᠤᠷ ᠰᠦᠷᠡᠬᠡᠢ ᠵᠡᠪᠰᠡᠭ ᠠᠵᠢ᠃ ᠰᠠᠷᠠᠰᠸᠠ ᠬᠥᠮᠦᠨ ᠡᠢᠮᠦ ᠵᠡᠪᠰᠡᠭ ᠢ᠋ ᠬᠡᠷᠡᠭᠯᠡᠭᠡᠳ ᠵᠠᠭᠠᠯᠮᠠᠢ ᠲᠡᠮᠳᠡᠭᠲᠦ ᠴᠡᠷᠢᠭ ᠲᠦ᠍ ᠶᠡᠬᠡ ᠬᠣᠬᠢᠷᠠᠯ ᠤᠴᠠᠷᠠᠭᠤᠯᠤᠭᠰᠠᠨ
ᠶᠤᠮ᠃
ᠡᠢᠮᠦ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠦᠶᠡ ᠪᠣᠯ ᠳᠡᠮᠡᠢ ᠬᠥᠳᠡᠯᠬᠦ ᠴᠠᠭ ᠪᠤᠰᠤ ᠪᠣᠯᠬᠣᠷ᠂ ᠡᠢᠮᠦ ᠪᠠᠢᠳᠠᠯ ᠮᠣᠩᠭᠣᠯ ᠬᠥᠮᠦᠨ ᠳ᠋ᠦ᠍᠂ ᠰᠠᠢᠨ ᠬᠡᠷᠡᠭ ᠪᠢᠰᠢ ᠭᠡᠵᠦ ᠴᠢᠩᠭᠢᠰ ᠬᠠᠭᠠᠨ ᠰᠡᠳᠬᠢᠯ ᠵᠣᠪᠠᠵᠤ ᠪᠠᠢᠭᠰᠠᠨ ᠶᠤᠮ᠃ ᠮᠣᠩᠭᠣᠯᠴᠤᠳ ᠨᠡᠭᠦᠳᠡᠯᠯᠡᠨ ᠮᠠᠯᠵᠢᠬᠤ ᠴᠢᠩᠭᠠ ᠰᠦᠷᠡᠬᠡᠢ ᠪᠥᠭᠡᠳ ᠳᠥᠭᠥᠮ ᠬᠢᠯᠪᠠᠷ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠣᠷᠬᠢᠵᠤ ᠬᠠᠶᠠᠭᠠᠳ᠂ ᠱᠠᠯᠢᠨ ᠪᠦᠷᠢᠯᠭᠡᠬᠦ ᠠᠮᠢᠳᠤᠷᠠᠯ ᠳ᠋ᠤ᠌ ᠣᠷᠣᠵᠤ ᠪᠠᠢᠪᠠ᠃ ᠰᠤᠯᠠ ᠵᠠᠳᠠᠭᠠᠢ ᠠᠮᠢᠳᠤᠷᠠᠯ ᠡᠴᠡ ᠪᠣᠯᠵᠤ᠂ ᠬᠠᠷᠢᠯᠴᠠᠨ ᠠᠲᠠᠭᠠᠷᠬᠠᠬᠤ ᠪᠤᠶᠤ ᠵᠠᠯᠢ ᠮᠡᠬᠡ ᠬᠡᠷᠡᠭᠯᠡᠬᠦ ᠶᠠᠪᠤᠳᠠᠯ ᠡᠯᠡ ᠭᠠᠵᠠᠷ ᠲᠤ᠌ ᠭᠠᠷᠴᠤ ᠪᠠᠢᠯᠠ᠃ ᠵᠥᠴᠢ ᠭᠣᠶᠣ ᠰᠠᠢᠬᠠᠨ ᠣᠷᠳᠣᠨ ᠢ᠋ ᠪᠠᠢᠭᠤᠯᠤᠭᠠᠳ᠂ ᠳᠠᠭᠤᠴᠢᠨ᠂ ᠬᠥᠭᠵᠢᠮᠴᠢᠨ ᠢ᠋ ᠴᠤᠭᠯᠠᠭᠤᠯᠵᠤ ᠪᠠᠢᠯᠠ᠃ ᠥᠭᠡᠳᠡᠢ᠂ ᠲᠤᠯᠤᠢ᠂ ᠦᠵᠦᠮ ᠦ᠋ᠨ ᠠᠷᠢᠬᠢᠨ ᠤ᠋ ᠠᠮᠲᠠᠨ ᠳ᠋ᠤ᠌ ᠣᠷᠣᠭᠠᠳ᠂ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠬᠠᠤᠯᠢ ᠶᠣᠰᠣᠨ ᠳ᠋ᠤ᠌ ᠲᠣᠭᠲᠠᠭᠠᠭᠰᠠᠨ ᠵᠦᠢᠯ ᠢ᠋ ᠨᠢᠭᠡᠮᠦᠰᠦᠨ ᠤᠮᠠᠷᠲᠠᠭᠠᠳ ᠣᠷᠬᠢᠴᠢᠬᠠᠪᠠ᠃ ᠡᠭᠦᠨ ᠳ᠋ᠦ᠍《ᠬᠡᠷᠪᠡ ᠠᠷᠢᠬᠢ ᠤᠤᠭᠤᠬᠤ ᠶ᠋ᠢ ᠵᠣᠭᠰᠣᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯ ᠰᠠᠷᠠ ᠳ᠋ᠤ᠌ ᠭᠤᠷᠪᠠᠨ ᠤᠳᠠᠭᠠ ᠤᠤᠭᠤᠵᠤ ᠪᠣᠯᠤᠨᠠ᠃ ᠭᠤᠷᠪᠠᠨ ᠤᠳᠠᠭᠠ ᠡᠴᠡ ᠬᠡᠲᠦᠷᠡᠪᠡᠰᠦ ᠵᠥᠷᠢᠴᠡᠭᠰᠡᠨ ᠢ᠋ᠶ᠋ᠡᠷ ᠪᠣᠳᠣᠮᠤᠢ᠃ ᠬᠣᠶᠠᠷ ᠤᠳᠠᠭᠠ ᠨᠢ ᠭᠤᠷᠪᠠᠨ ᠤᠳᠠᠭᠠ ᠡᠴᠡ ᠳᠡᠭᠡᠷᠡ᠂ ᠨᠢᠭᠡ ᠯᠡ ᠤᠳᠠᠭᠠ ᠪᠣᠯᠪᠠᠰᠤ ᠨᠡᠩ ᠰᠠᠢᠨ᠃ ᠶᠠᠭ ᠳᠤᠷᠠᠰᠢᠶᠠᠬᠤ ᠦᠭᠡᠢ ᠪᠣᠯ ᠬᠠᠮᠤᠭ ᠤ᠋ᠨ ᠰᠠᠢᠨ᠃ ᠭᠡᠲᠡᠯᠡ ᠶᠠᠭ ᠤᠤᠭᠤᠬᠤ ᠦᠭᠡᠢ ᠬᠥᠮᠦᠨ ᠭᠡᠵᠦ ᠬᠠᠮᠢᠭᠠ ᠡᠴᠡ ᠣᠯᠳᠠᠬᠤ ᠠᠵᠢ》 ᠡᠨᠡ ᠪᠣᠯ ᠳᠦᠷᠢᠮ ᠲᠣᠭᠲᠠᠭᠠᠯ ᠤ᠋ᠨ ᠳᠣᠣᠷᠠᠬᠢ ᠠᠭᠤᠯᠭᠠ ᠪᠣᠯᠤᠨᠠ᠃ ᠴᠢᠩᠭᠢᠰ ᠬᠠᠭᠠᠨ ᠪᠣᠯ ᠠᠬᠤᠢᠴᠢ ᠦᠵᠡᠯᠲᠡᠨ ᠪᠣᠯᠬᠣᠷ᠂ ᠬᠢᠵᠦ ᠴᠢᠳᠠᠬᠤ ᠦᠭᠡᠢ ᠬᠡᠷᠡᠭ ᠢ᠋ ᠬᠥᠮᠦᠨ ᠳ᠋ᠦ᠍ ᠱᠠᠭᠠᠷᠳᠠᠬᠤ ᠶᠤᠮ ᠃ ᠬᠥᠮᠦᠰ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠵᠢᠷᠭᠠᠨ ᠴᠡᠩᠭᠡᠬᠦ ᠠᠮᠢᠳᠤᠷᠠᠯ ᠢ᠋ ᠬᠥᠭᠡᠭᠡᠴᠡᠯᠳᠦᠵᠦ ᠪᠠᠢᠯᠠ᠃ ᠴᠢᠩᠭᠢᠰ ᠬᠠᠭᠠᠨ ᠬᠢᠳᠠᠨ ᠲᠦᠰᠢᠮᠡᠯ ᠶᠸᠯᠢᠦᠢ ᠴᠦᠼᠠᠢ ᠳ᠋ᠤ᠌ ᠳᠣᠣᠷᠠᠬᠢ ᠮᠡᠲᠦ ᠭᠠᠰᠢᠭᠤᠳᠠᠵᠤ ᠬᠡᠯᠡᠭᠰᠡᠨ ᠤᠳᠠᠭᠠ ᠪᠠᠢᠪᠠ᠃
《ᠪᠢᠳᠡᠨᠡᠷ ᠦᠬᠦᠭᠰᠡᠨ ᠬᠣᠢᠨᠠ᠂ ᠮᠠᠨ ᠤ᠋ ᠦᠷᠡ ᠬᠡᠦᠬᠡᠳ ᠲᠣᠷᠭᠠ ᠳᠤᠷᠳᠤᠩ ᠢ᠋ᠶ᠋ᠠᠷ ᠬᠢᠭᠰᠡᠨ ᠰᠠᠢᠬᠠᠨ ᠬᠤᠪᠴᠠᠰᠤ ᠶ᠋ᠢ ᠡᠮᠦᠰᠴᠦ᠂ ᠰᠠᠢᠨ ᠬᠣᠭᠣᠯᠠ᠂ ᠠᠮᠲᠠᠲᠠᠢ ᠵᠢᠮᠢᠰ ᠢ᠋ ᠢᠳᠡᠬᠦ ᠪᠢᠵᠡ᠃ ᠲᠡᠳᠡ ᠰᠠᠢᠨ ᠮᠣᠷᠢ ᠶ᠋ᠢ ᠤᠨᠤᠭᠠᠳ ᠭᠣᠶᠣ ᠡᠮᠡᠭᠲᠡᠢ ᠲᠡᠢ ᠴᠡᠩᠭᠡᠯᠳᠦᠬᠦ ᠪᠠᠢᠬᠠ᠃
ᠲᠡᠳᠡᠨ ᠦ᠌ ᠡᠴᠢᠭᠡ ᠠᠬᠠ ᠨᠠᠷ ᠨᠢ ᠲᠡᠳᠡᠨ ᠦ᠌ ᠲᠥᠯᠥᠭᠡ ᠵᠢᠳᠬᠦᠵᠦ ᠬᠤᠷᠠᠮᠳᠤᠭᠤᠯᠤᠭᠰᠠᠨ ᠢ᠋ ᠪᠣᠳᠣᠬᠤ ᠦᠭᠡᠢ᠂ ᠡᠴᠢᠭᠡ ᠠᠬᠠ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠡᠨᠡ ᠡᠳᠦᠷ ᠦ᠋ᠨ ᠵᠦᠳᠡᠵᠦ ᠵᠣᠪᠠᠭᠰᠠᠨ ᠢ᠋ ᠪᠦᠷ ᠤᠮᠠᠷᠲᠠᠵᠤ ᠣᠷᠬᠢᠬᠤ ᠪᠢᠵᠡ》 ᠭᠡᠵᠡᠢ᠃
ᠶᠸᠯᠢᠦᠢ ᠴᠦᠼᠠᠢ ᠪᠣᠯ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠡᠴᠡ ᠶᠡᠷᠦ ᠰᠠᠯᠬᠤ ᠦᠭᠡᠢ ᠪᠣᠯᠬᠣᠷ ᠲᠡᠭᠦᠨ ᠦ᠌ ᠰᠡᠵᠢᠭ ᠲᠥᠷᠥᠬᠦ ᠪᠤᠶᠤ ᠰᠡᠳᠬᠢᠯ ᠵᠣᠪᠠᠵᠤ ᠪᠠᠢᠬᠤ ᠶ᠋ᠢ ᠮᠡᠳᠡᠬᠦ ᠴᠣᠷ ᠤ᠋ᠨ ᠭᠠᠭᠴᠠ ᠬᠥᠮᠦᠨ ᠮᠥᠨ ᠶᠤᠮ ᠃ ᠮᠣᠩᠭᠣᠯ ᠬᠠᠭᠠᠨᠲᠤ ᠤᠯᠤᠰ ᠪᠠᠰᠠ ᠪᠦᠷᠢᠨ ᠪᠡᠬᠢᠵᠢᠵᠦ ᠴᠢᠳᠠᠭᠠᠳᠤᠢ᠂ ᠪᠠᠢᠯᠳᠤᠨ ᠳᠠᠭᠠᠭᠤᠯᠬᠤ ᠬᠡᠷᠡᠭ ᠴᠤ ᠮᠥᠨ ᠭᠦᠢᠴᠡᠭᠡᠳᠦᠢ ᠪᠢᠯᠡ᠃ ᠴᠢᠩᠭᠢᠰ ᠬᠠᠭᠠᠨ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠥᠭᠰᠢᠷᠡᠵᠦ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠨᠢᠭᠡᠨᠲᠡ ᠮᠡᠳᠡᠵᠦ ᠪᠠᠢᠭᠰᠠᠨ ᠶᠤᠮ᠃ ᠲᠡᠷᠡ ᠬᠡᠳᠦᠢᠪᠡᠷ ᠣᠳᠣ ᠬᠦᠷᠲᠡᠯᠡ ᠴᠢᠭᠢᠷᠠᠭ ᠲᠡᠩᠬᠡᠯᠡᠭᠦᠨ ᠪᠠᠢᠵᠤ᠂ ᠠᠪᠠ ᠬᠦᠷᠦᠭᠡ ᠬᠢᠬᠦ ᠪᠤᠶᠤ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠪᠠᠰᠠᠴᠤ ᠪᠠᠬᠠᠲᠠᠢ ᠳᠤᠷᠠ ᠲᠠᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ᠂ ᠣᠳᠣ ᠨᠢᠭᠡᠨᠲᠡ ᠵᠢᠷᠠᠨ ᠨᠠᠰᠤᠨ ᠤ᠋ ᠦᠶᠡ ᠶ᠋ᠢᠨ ᠡᠷᠡᠨ ᠳ᠋ᠦ᠍ ᠣᠷᠣᠴᠢᠬᠠᠭᠰᠠᠨ ᠪᠥᠭᠡᠳ ᠪᠡᠶᠡ ᠨᠢ ᠴᠦ᠍ ᠮᠠᠷᠢᠶᠠᠯᠠᠭᠠᠳ ᠨᠦᠰᠡᠷ ᠬᠦᠨᠳᠦ ᠰᠢᠭ ᠪᠣᠯᠤᠭᠰᠠᠨ ᠶᠤᠮ ᠪᠠᠢᠨᠠ᠃ ᠢᠯᠡᠭᠦᠴᠡ ᠬᠡᠷᠡᠭ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠦᠬᠦᠭᠰᠡᠨ ᠬᠣᠢᠨᠠᠬᠢ ᠬᠡᠷᠡᠭ ᠢ᠋ ᠪᠣᠳᠣᠯᠬᠢᠯᠠᠬᠤ ᠪᠣᠯᠤᠭᠰᠠᠨ ᠪᠢᠯᠡ᠃ ᠲᠦᠮᠡᠨ ᠵᠦᠢᠯ ᠦ᠋ᠨ ᠬᠡᠷᠡᠭ ᠪᠦᠷ ᠬᠣᠶᠠᠷ ᠮᠥᠷᠥ ᠳᠡᠭᠡᠷᠡ ᠨᠢ ᠳᠠᠷᠤᠵᠤ᠂ ᠬᠡᠦᠬᠡᠳ ᠦ᠋ᠨ ᠠᠯᠢ ᠨᠢᠭᠡᠨ ᠨᠢ ᠴᠦ᠍ ᠪᠦᠷᠢᠮᠦᠰᠦᠨ ᠲᠡᠭᠦᠨ ᠢ᠋ ᠵᠠᠯᠭᠠᠮᠵᠢᠯᠠᠨ ᠦᠢᠯᠡᠰ ᠢ᠋ ᠨᠢ ᠭᠦᠢᠴᠡᠳᠬᠡᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠰᠡᠨ ᠢ᠋ ᠲᠡᠷᠡ ᠮᠡᠳᠡᠵᠦ ᠪᠠᠢᠯᠠ᠃ ᠥᠪᠡᠷ ᠦ᠋ᠨ ᠪᠡᠶᠡ ᠨᠢ ᠵᠠᠯᠭᠠᠭᠠᠳ ᠵᠢᠳᠬᠦᠵᠦ ᠴᠢᠳᠠᠬᠤ ᠤᠤ᠁᠃ ᠃ ᠬᠠᠭᠠᠨᠲᠤ ᠤᠯᠤᠰ ᠨᠢ ᠶᠠᠮᠠᠷ ᠪᠣᠯᠳᠠᠭ ᠶᠤᠮ ᠪᠣᠢ᠁᠃ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠵᠣᠪᠠᠬᠤ ᠨᠢ ᠡᠳᠡᠭᠡᠷ ᠤᠴᠢᠷ ᠤ᠋ᠨ ᠲᠥᠯᠥᠭᠡ ᠪᠢᠯᠡ᠃ ᠬᠣᠲᠠ ᠪᠠᠯᠭᠠᠰᠤᠨ ᠤ᠋ ᠬᠥᠮᠦᠰ ᠪᠣᠯ ᠠᠷᠪᠢᠨ ᠤᠴᠢᠷ ᠢ᠋ ᠮᠡᠳᠡᠨᠡ᠂ ᠠᠷᠪᠢᠨ ᠶᠠᠪᠤᠳᠠᠯ ᠢ᠋ ᠬᠢᠵᠦ ᠴᠢᠳᠠᠨᠠ᠃ ᠬᠣᠲᠠ ᠪᠠᠯᠭᠠᠰᠤᠨ ᠤ᠋ ᠬᠥᠮᠦᠰ ᠨᠡᠭᠦᠳᠡᠯᠴᠢᠨ ᠮᠠᠯᠴᠢᠨ ᠬᠥᠮᠦᠨ ᠡᠴᠡ ᠥᠨᠳᠥᠷ ᠨᠠᠰᠤᠲᠠᠨ ᠨᠢ ᠣᠯᠠᠨ ᠪᠠᠢᠳᠠᠭ ᠪᠣᠯᠪᠠᠴᠤ ᠪᠢᠷᠠ ᠴᠢᠳᠠᠯ ᠨᠢ ᠳᠠᠩᠴᠢ ᠳᠣᠷᠣᠢ ᠶᠤᠮ᠃ ᠲᠡᠳᠡ ᠪᠠᠷᠤᠭ ᠤᠷᠲᠤ ᠨᠠᠰᠤᠯᠠᠬᠤ ᠠᠷᠭᠠ ᠶ᠋ᠢ ᠮᠡᠳᠡᠵᠦ ᠪᠠᠢᠬᠤ ᠪᠣᠯᠤᠯᠲᠠᠢ᠃ ᠶᠸᠯᠤᠢ ᠴᠦᠼᠠᠢ ᠡᠢᠮᠦ ᠠᠷᠭᠠ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠪᠣᠯᠪᠠᠴᠤ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠳᠣᠲᠣᠷᠠᠬᠢ ᠨᠢᠭᠡᠨ ᠪᠣᠢᠳᠠ ᠭᠠᠵᠠᠷ ᠲᠤ᠌ ᠴᠠᠩ ᠴᠦᠨ ᠪᠣᠮᠪᠣ ᠭᠡᠭᠴᠢ ᠨᠢᠭᠡᠨ ᠠᠷᠰᠢ ᠪᠠᠢᠬᠤ ᠶ᠋ᠢ ᠮᠡᠳᠡᠵᠦ ᠪᠠᠢᠭᠰᠠᠨ ᠶᠤᠮ᠃ ᠡᠨᠡᠬᠦ ᠠᠷᠰᠢ ᠨᠢ ᠠᠮᠢ ᠨᠠᠰᠤ ᠶ᠋ᠢ ᠮᠥᠩᠬᠡᠷᠡᠭᠦᠯᠬᠦ ᠨᠢᠭᠤᠴᠠ ᠶ᠋ᠢ ᠮᠡᠳᠡᠬᠦ ᠪᠣᠮᠪᠣ ᠶ᠋ᠢᠨ ᠱᠠᠰᠢᠨ ᠤ᠋ ᠨᠣᠮᠯᠠᠯ ᠳ᠋ᠤ᠌ ᠰᠢᠯᠭᠠᠷᠠᠭᠰᠠᠨ ᠶᠤᠮ ᠭᠡᠨᠡ᠃ ᠲᠡᠭᠡᠭᠡᠳ《ᠳᠡᠯᠡᠬᠡᠢ ᠳᠠᠬᠢᠨ ᠤ᠋ ᠡᠵᠡᠨ ᠬᠠᠭᠠᠨ》 ᠪᠣᠯᠤᠭᠴᠢ ᠴᠢᠩᠭᠢᠰ ᠬᠠᠭᠠᠨ ᠳᠠᠷᠤᠢ ᠲᠦᠷᠭᠡᠨ ᠡᠨᠡᠬᠦ《ᠠᠷᠰᠢ ᠪᠣᠭᠳᠠ》 ᠳ᠋ᠤ᠌ ᠵᠣᠷᠢᠭᠤᠯᠵᠤ᠂ ᠰᠠᠢᠳ ᠨᠠᠷ ᠤ᠋ᠨ ᠲᠦᠷᠦᠭᠦᠦ ᠶᠸᠯᠣᠢ ᠴᠦᠼᠠᠢ ᠪᠠᠷ ᠨᠢᠭᠡᠨ ᠵᠠᠬᠢᠳᠠᠯ ᠪᠢᠴᠢᠭᠦᠯᠵᠡᠢ᠃ ᠡᠵᠡᠨ ᠬᠠᠭᠠᠨ ᠡᠴᠡ ᠭᠦᠨ ᠤᠬᠠᠭᠠᠨ ᠤ᠋ ᠡᠷᠳᠡᠮᠲᠡᠨ ᠳ᠋ᠦ᠍ ᠵᠣᠷᠢᠭᠤᠯᠵᠤ ᠵᠠᠬᠢᠳᠠᠯ ᠪᠢᠴᠢᠭᠦᠯᠦᠭᠰᠡᠨ ᠨᠢ ᠡᠷᠲᠡ ᠢᠵᠠᠭᠤᠷ ᠡᠴᠡ ᠣᠨᠳᠣᠣ ᠵᠢᠱ᠌ᠢᠶᠡ ᠦᠵᠡᠭᠳᠡᠭᠰᠡᠨ ᠦᠭᠡᠢ ᠶᠤᠮ᠃
ᠡᠨᠡᠬᠦ ᠭᠦᠨ ᠤᠬᠠᠭᠠᠨ ᠤ᠋ ᠡᠷᠳᠡᠮᠲᠡᠨ ᠪᠣᠯ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠪᠠᠢᠯᠳᠤᠨ ᠳᠠᠭᠠᠭᠤᠯᠤᠭᠰᠠᠨ ᠤᠯᠤᠰ ᠤ᠋ᠨ ᠨᠢᠭᠡᠨ ᠬᠥᠮᠦᠨ ᠶᠤᠮ᠃ ᠬᠠᠭᠠᠨ ᠤ᠋ ᠰᠠᠨᠳᠠᠭᠠᠵᠤ ᠭᠦᠢᠴᠡᠭᠰᠡᠨ ᠤᠯᠤᠰ ᠲᠤ᠌ ᠰᠠᠭᠤᠵᠤ ᠪᠠᠢᠬᠤ ᠪᠣᠯᠬᠣᠷ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠪᠠᠢᠯᠳᠤᠭᠠᠨ ᠪᠣᠯᠤᠨ ᠪᠠᠢᠯᠳᠤᠨ ᠳᠠᠭᠠᠭᠤᠯᠤᠭᠰᠠᠨ ᠲᠤᠬᠠᠢ ᠲᠠᠢᠯᠪᠤᠷᠢᠯᠠᠵᠤ ᠳᠣᠣᠷᠠᠬᠢ ᠮᠡᠲᠦ ᠪᠢᠴᠢᠵᠡᠢ᠃
《ᠠᠯᠲᠠᠨ ᠤᠯᠤᠰ ᠳᠠᠩᠴᠢ ᠱᠠᠯᠢᠵᠤ ᠪᠦᠷᠢᠯᠭᠡᠬᠦ ᠪᠠ ᠵᠢᠷᠭᠠᠨ ᠴᠡᠩᠭᠡᠬᠦ ᠳ᠋ᠦ᠍ ᠰᠢᠪᠠᠷᠳᠠᠭᠰᠠᠨ ᠡᠴᠡ<ᠲᠡᠭᠷᠢ ᠰᠠᠬᠢᠭᠤᠯᠰᠤᠨ>ᠠᠯᠲᠠᠨ ᠤᠯᠤᠰ ᠢ᠋ ᠨᠢᠭᠡᠮᠦᠰᠦᠨ ᠵᠢᠭᠰᠢᠵᠦ ᠣᠷᠬᠢᠭᠰᠠᠨ ᠪᠠᠢᠨᠠ᠃ ᠮᠢᠨᠦ ᠪᠡᠶᠡ ᠬᠠᠷᠢᠨ ᠱᠠᠯᠢᠵᠤ ᠪᠦᠷᠢᠯᠭᠡᠬᠦ ᠶ᠋ᠢ ᠵᠢᠭᠰᠢᠳᠡᠭ ᠪᠥᠭᠡᠳ ᠬᠦᠰᠡᠯ ᠢ᠋ᠶ᠋ᠡᠨ ᠬᠣᠷᠢᠭᠯᠠᠵᠤ ᠴᠢᠳᠠᠳᠠᠭ᠃ ᠮᠢᠨᠦ ᠪᠡᠶᠡ ᠳ᠋ᠦ᠍ ᠨᠢᠭᠡᠨ ᠵᠠᠬᠠ ᠬᠤᠪᠴᠠᠰᠤ ᠡᠴᠡ ᠢᠯᠡᠭᠦᠦ ᠵᠦᠢᠯ ᠪᠠᠢᠬᠤ ᠦᠭᠡᠢ᠂ ᠭᠠᠭᠴᠠ ᠵᠦᠢᠯ ᠦ᠋ᠨ ᠢᠳᠡᠭᠡᠨ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠶ᠋ᠢ ᠡᠳ᠋ᠯᠡᠳᠡᠭ ᠦᠭᠡᠢ᠃ ᠮᠢᠨᠦ ᠪᠡᠶᠡ ᠬᠠᠮᠤᠭ ᠳᠣᠣᠷᠠᠲᠤ ᠵᠡᠷᠭᠡ ᠶ᠋ᠢᠨ ᠮᠠᠯᠴᠢᠨ ᠠᠷᠠᠳ ᠯᠤᠭᠠ ᠠᠳᠠᠯᠢ ᠬᠣᠭᠣᠯᠠ ᠶ᠋ᠢ ᠢᠳᠡᠳᠡᠭ ᠪᠥᠭᠡᠳ ᠬᠡᠮᠵᠢᠶᠡ ᠬᠢᠵᠠᠭᠠᠷ ᠦᠭᠡᠢ ᠶᠠᠮᠠᠷ ᠴᠤ᠌ ᠰᠢᠨᠤᠬᠠᠢᠷᠠᠯ ᠪᠠᠢᠬᠤ ᠦᠭᠡᠢ᠃ ᠠᠯᠢᠪᠠ ᠴᠡᠷᠢᠭ ᠦ᠋ᠨ ᠶᠠᠪᠤᠳᠠᠯ ᠤ᠋ᠨ ᠠᠵᠢᠯᠯᠠᠭᠠ ᠳ᠋ᠤ᠌ ᠴᠥᠮ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠬᠠᠮᠤᠭ ᠤᠨ ᠡᠮᠦᠨᠡ ᠲᠠᠯᠠ ᠳ᠋ᠤ᠌ ᠵᠣᠭᠰᠣᠳᠠᠭ᠂ ᠳᠠᠢᠰᠤᠨ ᠲᠠᠢ ᠲᠤᠯᠵᠤ ᠪᠠᠢᠯᠳᠤᠬᠤ ᠦᠶᠡ ᠳ᠋ᠦ᠍ ᠮᠢᠨᠦ ᠪᠡᠶᠡ ᠬᠡᠵᠢᠶᠡ ᠴᠦ᠍ ᠠᠷᠤ ᠲᠡᠰᠢ ᠤᠬᠤᠷᠢᠳᠠᠭ ᠦᠭᠡᠢ᠃ ᠲᠡᠢᠮᠦ ᠤᠴᠢᠷ ᠡᠴᠡ ᠶᠡᠬᠡ ᠦᠢᠯᠡᠰ ᠢ᠋ ᠪᠦᠲᠦᠭᠡᠵᠦ᠂ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠭᠠᠭᠴᠠ ᠬᠠᠭᠠᠨᠲᠤ ᠤᠯᠤᠰ ᠲᠤ᠌ ᠬᠠᠮᠲᠤᠷᠠᠭᠤᠯᠤᠨ ᠵᠠᠰᠠᠬᠤ ᠬᠡᠷᠡᠭ ᠢ᠋ ᠪᠦᠲᠦᠭᠡᠵᠦ ᠴᠢᠳᠠᠪᠠᠢ᠃ ᠮᠢᠨᠦ ᠪᠡᠶᠡ ᠳ᠋ᠦ᠍ ᠲᠤᠰᠢᠶᠠᠭᠰᠠᠨ ᠲᠩᠷᠢ ᠶ᠋ᠢᠨ ᠪᠣᠱᠣᠭ ᠥᠨᠳᠥᠷ ᠶᠡᠬᠡ ᠪᠥᠭᠡᠳ ᠮᠢᠨᠦ ᠡᠭᠦᠷᠭᠡ ᠴᠦ᠍ ᠬᠦᠨᠳᠦ ᠪᠠᠢᠨᠠ᠃ ᠮᠢᠨᠦ ᠪᠡᠶᠡ ᠤᠯᠤᠰ ᠤ᠋ᠨ ᠠᠷᠠᠳ ᠢ᠋ᠶ᠋ᠠᠨ ᠥᠪᠡᠷ ᠦ᠋ᠨ ᠦᠷᠡ ᠬᠥᠪᠡᠭᠦᠳ ᠮᠡᠲᠦ ᠦᠵᠡᠳᠡᠭ ᠪᠣᠯᠬᠣᠷ᠂ ᠬᠠᠭᠠᠨ ᠰᠠᠭᠤᠷᠢᠨ ᠳ᠋ᠤ᠌ ᠰᠠᠭᠤᠭᠰᠠᠨ ᠡᠴᠡ ᠢᠨᠠᠭᠰᠢ ᠡᠭᠦᠷᠢᠳᠡ ᠤᠯᠤᠰ ᠤ᠋ᠨ ᠠᠷᠠᠳ ᠢ᠋ᠶ᠋ᠠᠨ ᠰᠠᠢᠲᠤᠷ ᠵᠠᠬᠢᠷᠰᠤᠭᠠᠢ ᠭᠡᠮᠡᠨ ᠴᠢᠷᠮᠠᠢᠭᠰᠠᠨ ᠪᠥᠯᠥᠭᠡ᠃ ᠭᠡᠪᠡᠴᠦ ᠮᠡᠬᠦᠰ ᠮᠢᠨᠦ ᠵᠠᠰᠠᠭ ᠤ᠋ᠨ ᠣᠷᠳᠣᠨ ᠤ᠋ ᠳᠣᠲᠣᠷᠠ ᠶᠠᠮᠠᠷ ᠨᠢᠭᠡᠨ ᠵᠦᠢᠯ ᠳᠤᠲᠠᠭᠳᠠᠵᠤ ᠪᠠᠢᠬᠤ ᠳ᠋ᠠᠭᠠᠨ ᠠᠶᠤᠨ ᠡᠮᠢᠶᠡᠵᠦ ᠪᠠᠢᠮᠤᠢ᠃
ᠭᠣᠣᠯ ᠭᠡᠲᠦᠯᠬᠦᠢ ᠳ᠋ᠦ᠍ᠷ ᠣᠩᠭᠣᠴᠠ ᠪᠣᠯᠤᠨ ᠰᠡᠯᠪᠢᠭᠦᠷ ᠬᠡᠷᠡᠭᠴᠡᠭᠡ ᠲᠡᠢ ᠮᠡᠲᠦ ᠪᠡᠷ᠂ ᠤᠯᠤᠰ ᠤ᠋ᠨ ᠳᠣᠲᠣᠷᠠᠬᠢ ᠪᠠᠨ ᠡᠮᠬᠢ ᠵᠢᠷᠤᠮ ᠲᠠᠢ ᠪᠣᠯᠭᠠᠬᠤ ᠶ᠋ᠢᠨ ᠲᠥᠯᠥᠭᠡ ᠮᠡᠷᠭᠡᠳ ᠡᠷᠳᠡᠮᠲᠡᠨ ᠬᠡᠷᠡᠭᠴᠡᠭᠡ ᠲᠡᠢ ᠪᠣᠯᠠᠢ᠃ ᠮᠡᠬᠦᠰ ᠮᠢᠨᠦ ᠪᠡᠶᠡ ᠰᠢᠯᠭᠠᠷᠠᠭᠰᠠᠨ ᠡᠷᠳᠡᠮ ᠦᠭᠡᠢ ᠪᠣᠯᠪᠠᠴᠤ᠂ ᠴᠢᠳᠠᠪᠤᠷᠢ ᠲᠠᠢ ᠬᠥᠮᠦᠰ ᠢ᠋ ᠥᠪᠡᠷ ᠦ᠋ᠨ ᠠᠬᠠ ᠳᠡᠭᠦᠦ ᠮᠡᠲᠦ ᠬᠠᠢᠷᠠᠯᠠᠬᠤ ᠲᠤᠯᠠᠳᠠ᠂ ᠮᠠᠨ ᠤ᠋ ᠬᠣᠭᠣᠷᠣᠨᠳᠣ ᠶ᠋ᠢᠨ ᠰᠠᠨᠠᠯ ᠢᠮᠠᠭᠲᠠ ᠨᠢᠭᠡᠳᠦᠯ ᠲᠡᠢ ᠪᠥᠭᠡᠳ ᠬᠠᠷᠢᠯᠴᠠᠨ ᠬᠦᠨᠳᠦᠯᠡᠯᠴᠡᠵᠦ ᠡᠭᠦᠷᠢᠳᠡ ᠨᠢᠭᠡᠨ ᠪᠡᠶᠡ ᠮᠡᠲᠦ ᠪᠣᠯᠵᠤ ᠴᠢᠳᠠᠭᠰᠠᠨ ᠪᠥᠯᠥᠭᠡ᠃ ᠭᠡᠪᠡᠴᠦ ᠮᠡᠬᠦᠰ ᠬᠥᠮᠦᠨ ᠪᠠᠰᠠᠴᠤ< ᠭᠤᠷᠪᠠᠨ ᠥᠨᠳᠥᠷ ᠡᠷᠬᠢᠮ> ᠪᠣᠯᠤᠨ< ᠶᠢᠰᠦᠨ ᠠᠭᠤᠤ ᠶᠡᠬᠡ> ᠶ᠋ᠢ ᠪᠡᠶᠡᠯᠡᠭᠦᠯᠵᠦ ᠴᠢᠳᠠᠬᠤ ᠡᠷᠳᠡᠮ ᠲᠡᠢ ᠬᠥᠮᠦᠨ ᠢ᠋ ᠣᠯᠵᠤ ᠴᠢᠳᠠᠭᠠ ᠦᠭᠡᠢ ᠪᠠᠢᠨᠠ》 ᠭᠡᠵᠡᠢ᠃ ᠳᠠᠷᠠᠭᠠ ᠳ᠋ᠤᠨᠢ ᠲᠡᠭᠦᠨ ᠦ᠌ ᠬᠡᠯᠡᠭᠰᠡᠨ ᠨᠢ᠄《ᠮᠢᠨᠦ ᠪᠡᠶᠡ ᠠᠷᠰᠢ ᠲᠠᠨ ᠤ᠋ ᠠᠰᠬᠠᠨ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠭᠠᠳ ᠦᠨᠡᠨ ᠶᠣᠰᠣᠨ ᠳ᠋ᠤ᠌ ᠨᠡᠪᠲᠡᠷᠡᠵᠦ ᠴᠢᠳᠠᠭᠰᠠᠨ ᠢ᠋ ᠮᠡᠳᠡᠵᠦ ᠪᠠᠢᠨᠠ᠃ ᠡᠷᠬᠢᠮ ᠴᠢᠨᠦ ᠪᠡᠶᠡ ᠡᠷᠳᠡᠮ ᠮᠡᠷᠭᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠯᠳᠠᠷ ᠨᠡᠷᠡ ᠲᠡᠢ ᠪᠥᠭᠡᠳ ᠡᠷᠲᠡᠨ ᠦ᠌ ᠪᠣᠭᠳᠠ ᠭᠡᠭᠡᠨ ᠦ᠌ ᠵᠢᠮᠡ ᠶᠣᠰᠣ ᠶ᠋ᠢ ᠰᠠᠬᠢᠵᠤ ᠪᠠᠢᠨᠠ᠃ ᠪᠣᠭᠳᠠ ᠪᠣᠯᠬᠤ ᠭᠡᠰᠡᠨ ᠬᠥᠮᠦᠰ ᠪᠦᠷ ᠲᠠᠨ ᠳ᠋ᠤ᠌ ᠵᠣᠯᠭᠠᠵᠤ ᠣᠴᠢᠵᠤ ᠪᠠᠢᠨᠠ᠃ ᠬᠠᠷᠢᠨ ᠮᠡᠬᠦᠰ ᠮᠢᠨᠦ ᠪᠡᠶᠡ ᠶᠠᠭᠠᠬᠢᠨ ᠲᠡᠭᠡᠵᠦ ᠴᠢᠳᠠᠬᠤ ᠠᠵᠢ᠃ ᠮᠡᠬᠦᠰ ᠮᠢᠨᠦ ᠪᠡᠶᠡ ᠲᠠᠨ ᠤ᠋ ᠳᠡᠷᠭᠡᠳᠡ ᠬᠦᠷᠴᠦ ᠴᠢᠳᠠᠬᠤ ᠦᠭᠡᠢ ᠪᠣᠯᠬᠣᠷ᠂ ᠬᠡᠷᠪᠡ ᠲᠠ ᠡᠨᠳᠡ ᠮᠣᠷᠢᠯᠠᠭᠠᠳ ᠢᠷᠡᠬᠦ ᠳ᠋ᠦ᠍ ᠬᠦᠷᠪᠡᠰᠦ ᠮᠢᠨᠦ ᠪᠡᠶᠡ ᠬᠠᠭᠠᠨ ᠤ᠋ ᠰᠢᠷᠡᠭᠡᠨ ᠡᠴᠡ ᠪᠡᠨ ᠪᠠᠭᠤᠵᠤ ᠬᠠᠵᠠᠭᠤᠳᠠ ᠴᠢᠨᠢ ᠰᠠᠭᠤᠵᠤ ᠴᠢᠳᠠᠬᠤ ᠲᠡᠳᠦᠢ ᠪᠥᠯᠥᠭᠡ᠃ ᠡᠢᠮᠦ ᠤᠴᠢᠷ ᠡᠴᠡ ᠪᠢᠳᠡᠨ ᠢ᠋ ᠠᠯᠤᠰᠯᠠᠭᠤᠯᠵᠤ ᠪᠠᠢᠬᠤ ᠠᠭᠤᠯᠠ ᠬᠠᠢᠷᠬᠠᠨ ᠲᠠᠯᠠ ᠨᠤᠲᠤᠭ ᠢ᠋ ᠪᠡᠷᠬᠡᠰᠢᠶᠡᠬᠦ ᠬᠡᠷᠡᠭ ᠦᠭᠡᠢ᠂ ᠡᠯᠡᠰᠦ ᠮᠠᠩᠬᠠ ᠶ᠋ᠢᠨ ᠥᠷᠭᠡᠨ ᠠᠭᠤᠳᠠᠮ ᠢ᠋ ᠦᠯᠦ ᠠᠯᠵᠢᠶᠠᠬᠤ ᠠᠵᠢᠶᠠᠮᠤ᠃ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠢ᠋ ᠡᠩᠬᠦᠷᠡᠢᠯᠡᠬᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠦᠵᠡᠭᠦᠯᠵᠦ ᠮᠡᠬᠦᠰ ᠮᠢᠨᠦ ᠪᠡᠶᠡ ᠳ᠋ᠦ᠍ ᠮᠥᠩᠬᠡ ᠠᠮᠢᠵᠢᠷᠠᠬᠤ ᠠᠷᠭᠠ ᠶ᠋ᠢ ᠤᠯᠠᠮᠵᠢᠯᠠᠬᠤ ᠶ᠋ᠢᠨ ᠲᠥᠯᠥᠭᠡ ᠵᠠᠯᠠᠷᠠᠨ ᠢᠷᠡᠬᠦ ᠶ᠋ᠢ ᠬᠦᠰᠡᠮᠦ᠃ ᠮᠡᠬᠦᠰ ᠪᠢ ᠰᠢᠳᠠᠷ ᠲᠦᠰᠢᠮᠡᠳ ᠲᠡᠭᠡᠨ ᠲᠠᠨ ᠳ᠋ᠤ᠌ ᠬᠠᠮᠠᠭᠠᠯᠠᠭᠴᠢ ᠴᠡᠷᠢᠭ ᠠᠩᠭᠢ ᠣᠯᠭᠣᠬᠤ ᠪᠠᠷ ᠵᠠᠷᠯᠢᠭᠳᠠᠭᠰᠠᠨ ᠶᠤᠮ᠃ ᠮᠡᠬᠦᠰ ᠪᠢ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠲᠠᠨ ᠳ᠋ᠤ᠌ ᠦᠢᠯᠡᠴᠢᠯᠡᠰᠦᠭᠡᠢ᠃ ᠡᠷᠬᠢᠮ ᠲᠠ ᠮᠡᠷᠭᠡᠨ ᠮᠡᠳᠡᠯᠭᠡ ᠡᠴᠡ ᠪᠡᠨ ᠳᠤᠰᠤᠯ ᠤ᠋ᠨ ᠲᠡᠳᠦᠢ ᠤᠯᠠᠮᠵᠢᠯᠠᠨ ᠰᠤᠷᠭᠠᠪᠠᠴᠤ ᠮᠡᠬᠦᠰ ᠪᠢ ᠳᠤᠷᠠᠲᠠᠢ ᠪᠠᠢᠨᠠ᠃ ᠭᠠᠭᠴᠠ ᠦᠭᠡ ᠬᠡᠯᠡᠵᠦ ᠥᠭᠪᠡᠴᠦ ᠮᠢᠨᠦ ᠪᠡᠶᠡ ᠳ᠋ᠦ᠍ ᠲᠤᠢᠯ ᠤ᠋ᠨ ᠶᠡᠬᠡ ᠵᠠᠪᠰᠢᠶᠠᠨ ᠪᠣᠯᠬᠤ ᠶᠤᠮ》 ᠭᠡᠵᠡᠢ᠃
ᠡᠨᠡ ᠵᠠᠬᠢᠳᠠᠯ ᠳ᠋ᠤ᠌ ᠢᠯᠡᠷᠬᠡᠢᠯᠡᠭᠰᠡᠨ ᠬᠢᠴᠢᠶᠡᠩᠭᠦᠢ ᠰᠡᠳᠬᠢᠯ ᠦ᠋ᠨ ᠳᠣᠲᠣᠷᠠ ᠪᠠᠰᠠ ᠮᠠᠷᠭᠤᠵᠤ ᠪᠣᠯᠣᠰᠢ ᠦᠭᠡᠢ ᠵᠠᠷᠯᠢᠭ ᠪᠠᠭᠲᠠᠵᠤ ᠪᠠᠢᠬᠤ ᠶᠤᠮ᠃ ᠪᠣᠮᠪᠣ ᠶ᠋ᠢᠨ ᠱᠠᠰᠢᠨ ᠤ᠋ ᠨᠣᠮᠯᠠᠯ ᠳ᠋ᠤ᠌ ᠦᠨᠡᠨᠴᠢ ᠰᠢᠳᠤᠷᠭᠤ ᠪᠠᠢᠳᠠᠭ ᠴᠠᠩ ᠴᠦᠨ ᠪᠣᠮᠪᠣ ᠢᠷᠠᠭᠤ ᠠᠯᠳᠠᠷ ᠢ᠋ ᠬᠥᠭᠡᠭᠡᠴᠡᠯᠳᠦᠬᠦ ᠦᠭᠡᠢ ᠪᠡᠷ ᠨᠢᠭᠤᠨ ᠰᠠᠭᠤᠬᠤ ᠠᠮᠢᠳᠤᠷᠠᠯ ᠢ᠋ ᠰᠣᠩᠭᠣᠵᠤ᠂ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠠᠯᠲᠠᠨ ᠤᠯᠤᠰ ᠪᠣᠯᠤᠨ ᠰᠥᠩ ᠤᠯᠤᠰ ᠤ᠋ᠨ ᠬᠠᠭᠠᠨ ᠤ᠋ ᠵᠠᠯᠠᠯᠭᠠ ᠶ᠋ᠢ ᠪᠦᠷ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ ᠦᠭᠡᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ᠂ ᠡᠨᠡ ᠤᠳᠠᠭᠠ ᠬᠠᠷᠢᠨ ᠠᠭᠰᠢᠷᠠᠭᠰᠠᠨ ᠪᠡᠶᠡ ᠶ᠋ᠢᠨ ᠳᠥᠭᠥᠮ ᠦᠭᠡᠢ ᠪᠤᠶᠤ ᠠᠯᠤᠰ ᠤ᠋ᠨ ᠠᠶᠠᠨ ᠤ᠋ ᠵᠦᠳᠡᠭᠦᠷᠢ ᠲᠡᠢ ᠭᠡᠰᠡᠨ ᠰᠢᠯᠲᠠᠭ ᠢ᠋ᠶ᠋ᠠᠷ ᠡᠰᠡᠷᠭᠦᠴᠡᠭᠰᠡᠨ ᠦᠭᠡᠢ᠃ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠰᠢᠳᠠᠷ ᠲᠦᠰᠢᠮᠡᠯ ᠨᠢ ᠪᠠᠰᠠ ᠬᠡᠷᠪᠡ ᠡᠨᠡ ᠠᠷᠰᠢ ᠪᠣᠭᠳᠠ ᠶ᠋ᠢ ᠳᠠᠭᠠᠭᠤᠯᠤᠭᠠᠳ ᠠᠪᠴᠢᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯ ᠲᠣᠯᠣᠭᠠᠢ ᠨᠢ ᠦᠰᠦᠷᠦᠭᠡᠳ ᠶᠠᠪᠤᠴᠢᠬᠠᠬᠤ ᠳ᠋ᠤ᠌ ᠬᠦᠷᠬᠦ ᠶᠤᠮ ᠭᠡᠵᠦ ᠮᠡᠳᠡᠵᠦ ᠪᠠᠢᠵᠠᠢ᠃ ᠲᠡᠭᠡᠭᠡᠳ ᠲᠡᠷᠡ ᠪᠣᠳᠣᠵᠤ ᠣᠯᠬᠤ ᠠᠯᠢᠪᠠ ᠳᠥᠭᠥᠮ ᠲᠤᠰᠠᠯᠠᠮᠵᠢ ᠶ᠋ᠢ ᠦᠵᠡᠭᠦᠯᠬᠦ ᠪᠡᠷ ᠬᠢᠴᠢᠶᠡᠩᠭᠦᠢᠯᠡᠵᠦ᠂ ᠡᠨᠡᠬᠦ ᠬᠥᠭᠰᠢᠨ ᠠᠷᠰᠢ ᠠᠶᠠᠨ ᠵᠠᠮ ᠳ᠋ᠤ᠌ ᠮᠣᠷᠳᠠᠬᠤ ᠦᠭᠡᠢ ᠪᠡᠷ ᠪᠣᠯᠬᠤ ᠦᠭᠡᠢ ᠪᠣᠯᠤᠭᠠᠳ᠂ ᠬᠠᠭᠠᠨ ᠤ᠋ ᠰᠢᠳᠠᠷ ᠲᠦᠰᠢᠮᠡᠯ ᠦ᠋ᠨ ᠬᠠᠮᠲᠤ ᠪᠡᠭᠡᠵᠢᠩ ᠪᠣᠯᠤᠨ ᠰᠡᠮᠡᠷᠺᠡᠨᠳ᠋ ᠦ᠋ᠨ ᠬᠣᠭᠣᠷᠣᠨᠳᠣᠬᠢ ᠤᠷᠲᠤᠷᠢᠭ ᠢ᠋ᠶ᠋ᠠᠷ ᠲᠠᠪᠢᠨ ᠭᠷᠠᠳᠦ᠋ᠰ ᠪᠠᠢᠬᠤ ᠤᠯᠤᠰ ᠤ᠋ᠨ ᠠᠶᠠᠨ ᠳ᠋ᠤ᠌ ᠮᠣᠷᠳᠠᠪᠠ᠃
ᠡᠨᠡ ᠴᠢᠯᠥᠭᠡ ᠶ᠋ᠢ ᠠᠰᠢᠭᠯᠠᠵᠤ ᠴᠢᠩᠭᠢᠰ ᠬᠠᠭᠠᠨ ᠰᠡᠮᠡᠷᠺᠡᠨᠳ᠋ ᠲᠦ᠍ ᠯᠠᠯᠤ ᠶ᠋ᠢᠨ ᠮᠥᠷᠭᠥᠯᠲᠡᠨ ᠦ᠌ ᠠᠬᠠᠮᠠᠳ ᠪᠠ ᠡᠷᠳᠡᠮᠲᠡᠨ ᠢ᠋ ᠴᠤᠭᠯᠠᠭᠤᠯᠤᠨ᠂ ᠵᠥᠩᠨᠡᠨ ᠮᠡᠳᠡᠭᠴᠢ ᠮᠦᠬᠠᠮᠧᠳ᠋ ᠦ᠋ᠨ ᠣᠯᠠᠨ ᠨᠣᠮ ᠢ᠋ ᠲᠠᠢᠯᠪᠤᠷᠢᠯᠠᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠡᠳᠡᠭᠡᠷ ᠶᠣᠰᠣ ᠳᠦᠷᠢᠮ ᠦ᠋ᠨ ᠳᠣᠲᠣᠷᠠ ᠡᠴᠡ ᠬᠡᠰᠡᠭ ᠲᠡᠳᠦᠢ ᠡᠴᠡ ᠠᠰᠲᠠᠭᠠᠨ ᠨᠢ ᠲᠡᠭᠦᠨ ᠳ᠋ᠦ᠍ ᠵᠥᠪᠰᠢᠶᠡᠷᠡᠭᠳᠡᠭᠰᠡᠨ ᠦᠭᠡᠢ ᠪᠢᠯᠡ᠃ 《ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠠᠳᠠᠪᠠᠰᠢ ᠨᠢᠭᠡᠨ ᠭᠠᠵᠠᠷ ᠲᠤ ᠴᠤᠭᠯᠠᠭᠠᠳ ᠮᠥᠷᠭᠥᠯ ᠬᠢᠬᠦ ᠴᠢᠨᠢ ᠤᠴᠢᠷ ᠠᠭᠤᠯᠭᠠ ᠦᠭᠡᠢ ᠶᠤᠮ᠂ ᠰᠠᠬᠢᠭᠤᠯᠰᠤᠨ ᠪᠣᠯ ᠭᠠᠵᠠᠷ ᠪᠦᠬᠦᠨ ᠳ᠋ᠦ᠍ ᠪᠠᠢᠬᠤ ᠪᠣᠯᠬᠣᠷ ᠮᠥᠷᠭᠥᠯ ᠬᠢᠬᠦ ᠳ᠋ᠡᠭᠡᠨ ᠨᠢᠭᠡᠨ ᠭᠠᠵᠠᠷ ᠲᠤ ᠴᠤᠭᠯᠠᠷᠠᠬᠤ ᠬᠡᠷᠡᠭ ᠠᠯᠠᠭᠠ》 ᠭᠡᠵᠦ ᠲᠡᠷᠡ ᠬᠡᠯᠡᠵᠡᠢ᠃ ᠴᠡᠪᠡᠷ ᠠᠳᠤᠭᠤᠰᠤ ᠭᠡᠬᠦ ᠪᠤᠶᠤ ᠪᠤᠵᠠᠷ ᠠᠳᠤᠭᠤᠰᠤ ᠭᠡᠵᠦ ᠬᠤᠪᠢᠶᠠᠬᠤ ᠶ᠋ᠢ ᠲᠡᠪᠴᠢᠬᠦ ᠶᠣᠰᠣᠲᠠᠢ ᠭᠡᠵᠦ ᠦᠵᠡᠵᠦ᠂ 《ᠠᠯᠢᠪᠠ ᠶᠠᠭᠤᠮᠠ ᠶ᠋ᠢ ᠪᠦᠷ ᠰᠠᠬᠢᠭᠤᠯᠰᠤᠨ ᠡᠴᠡ ᠡᠭᠦᠳᠦᠨ ᠪᠦᠲᠦᠭᠡᠭᠰᠡᠨ ᠶᠤᠮ᠃ ᠬᠥᠮᠦᠨ ᠪᠦᠬᠦᠨ ᠥᠪᠡᠷ ᠦ᠋ᠨ ᠳᠤᠷᠠ ᠲᠠᠢ ᠮᠠᠯ ᠤ᠋ᠨ ᠮᠢᠬᠠ ᠶ᠋ᠢ ᠢᠳᠡᠵᠦ ᠪᠣᠯᠬᠤ ᠶᠤᠮ》 ᠭᠡᠵᠦ ᠬᠡᠯᠡᠵᠡᠢ᠃ ᠵᠥᠩᠨᠡᠨ ᠮᠡᠳᠡᠭᠴᠢ( ᠯᠠᠯᠤ ᠶ᠋ᠢᠨ ᠮᠥᠷᠭᠥᠯᠲᠡᠨ ᠦ᠌ ᠡᠭᠦᠰᠬᠡᠭᠴᠢ ᠮᠦᠬᠠᠮᠧᠳ᠋) ᠲᠤ ᠰᠦᠰᠦᠭ ᠪᠢᠰᠢᠷᠡᠯ ᠢ᠋ᠶ᠋ᠡᠷ ᠦᠨᠡᠨᠴᠢ ᠪᠤᠰᠤ ᠬᠥᠮᠦᠨ ᠢ᠋ ᠭᠠᠳᠠᠭᠤᠷᠴᠢᠯᠠᠵᠤ᠂ ᠲᠡᠭᠦᠨ ᠳ᠋ᠦ᠍ ᠬᠣᠣᠷ ᠬᠦᠷᠭᠡᠬᠦ ᠲᠤᠬᠠᠢ ᠲᠡᠷᠡ ᠳᠣᠣᠷᠠᠬᠢ ᠮᠡᠲᠦ ᠲᠣᠭᠲᠠᠭᠠᠵᠠᠢ᠃ 《ᠲᠠᠨᠤᠰ ᠥᠪᠡᠷ ᠦ᠋ᠨ ᠬᠦᠰᠡᠳᠡᠭ ᠵᠦᠢᠯ ᠢ᠋ᠶ᠋ᠡᠨ ᠬᠠᠢᠷᠠᠯᠠᠵᠤ ᠪᠣᠯᠬᠤ ᠪᠣᠯᠪᠠᠴᠤ ᠵᠠᠷᠯᠠᠯ ᠢ᠋ᠶ᠋ᠠᠨ ᠶᠠᠪᠤᠭᠤᠯᠬᠤ ᠡᠴᠡ ᠭᠠᠳᠠᠨᠠ ᠲᠡᠳᠡᠨ ᠢ᠋ ᠬᠣᠣᠷᠯᠠᠬᠤ ᠪᠤᠶᠤ ᠠᠯᠠᠵᠤ ᠪᠣᠯᠬᠤ ᠦᠭᠡᠢ᠃ ᠮᠢᠨᠦ ᠬᠠᠭᠠᠨᠲᠤ ᠤᠯᠤᠰ ᠤᠨ ᠳᠣᠲᠣᠷᠠ ᠬᠥᠮᠦᠨ ᠪᠦᠷᠢ ᠥᠪᠡᠷ ᠦᠨ ᠰᠢᠲᠦᠳᠡᠭ ᠰᠠᠬᠢᠭᠤᠯᠰᠤᠨ ᠢ᠋ᠶ᠋ᠠᠨ ᠳᠠᠬᠢᠵᠤ ᠪᠣᠯᠤᠨᠠ᠃ ᠭᠡᠲᠡᠯᠡ ᠪᠦᠬᠦ ᠬᠥᠮᠦᠰ ᠴᠥᠮ ᠴᠢᠩᠭᠢᠰ ᠬᠠᠭᠠᠨ ᠤ ᠲᠣᠭᠲᠠᠭᠠᠭᠰᠠᠨ ᠬᠠᠤᠯᠢ ᠶ᠋ᠢ ᠳᠠᠭᠠᠬᠤ ᠦᠭᠡᠢ ᠪᠡᠷ ᠪᠣᠯᠬᠤ ᠦᠭᠡᠢ》 ᠭᠡᠵᠡᠢ᠃
ᠡᠨᠡᠬᠦ ᠲᠣᠭᠲᠠᠭᠠᠯ ᠡᠴᠡ ᠪᠣᠯᠵᠤ ᠳᠣᠣᠷᠠ ᠪᠠᠨ ᠢᠯᠡᠷᠡᠭᠰᠡᠨ ᠦᠷᠡ ᠳ᠋ᠦᠩ ᠨᠢ ᠰᠢᠳᠢᠲᠦ ᠬᠥᠮᠦᠨ ᠬᠠᠷᠠ ᠠᠯᠪᠠ ᠪᠠᠷ ᠰᠠᠩᠨᠠᠢᠲᠤ ᠬᠥᠮᠦᠨ ᠦ ᠳᠡᠭᠡᠷᠡ ᠲᠠᠯᠪᠢᠭᠰᠠᠨ ᠬᠣᠲᠣᠩ ᠯᠠᠮᠠ ᠨᠠᠷ ᠢ᠋ ᠲᠡᠳᠡ ᠬᠥᠭᠡᠭᠡᠵᠦ ᠶᠠᠪᠤᠭᠤᠯᠤᠭᠠᠳ ᠂ ᠨᠢᠰᠲ᠋ᠤᠷᠢ ᠱᠠᠰᠢᠨ ᠤ ᠱᠠᠪᠢ ᠨᠠᠷ ᠰᠦᠮᠡ ᠳᠡᠭᠡᠷᠡ ᠪᠡᠨ ᠵᠠᠭᠠᠯᠮᠠᠢ ᠪᠠᠨ ᠪᠣᠰᠬᠠᠨ᠂ ᠢᠪᠷᠠᠢᠴᠤᠳ ᠰᠦᠮᠡ ᠪᠡᠨ ᠳᠠᠬᠢᠨ ᠨᠡᠭᠡᠭᠡᠭᠡᠳ᠂ ᠫᠧᠷᠰ ᠦᠳ ᠰᠦᠮᠡ ᠳ᠋ᠡᠭᠡᠨ ᠳᠠᠬᠢᠨ ᠰᠠᠬᠢᠭᠤᠯᠰᠤᠨ ᠤ ᠭᠠᠯ ᠢ᠋ᠶ᠋ᠠᠨ ᠠᠰᠠᠭᠠᠵᠠᠢ᠃ ᠁ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠡᠩᠬᠡ ᠲᠦᠪᠰᠢᠨ ᠢ᠋ᠶ᠋ᠡᠷ ᠠᠮᠢᠳᠤᠷᠠᠵᠤ ᠶᠡᠷᠦ ᠶ᠋ᠢᠨ ᠠᠵᠢᠯ ᠦᠢᠯᠡᠰ ᠲᠡᠭᠡᠨ ᠣᠷᠣᠯᠴᠠᠨ᠂ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠬᠠᠮᠤᠭ ᠲᠡᠷᠢᠭᠦᠨ ᠳ᠋ᠦ᠍ ᠴᠣᠬᠢᠬᠳᠠᠭᠰᠠᠨ ᠰᠢᠷᠳᠠᠷᠢᠶᠠ ᠭᠣᠣᠯ᠂ ᠠᠮᠤᠳᠠᠷᠢᠶᠠ ᠭᠣᠣᠯ ᠤᠨ ᠬᠣᠭᠣᠷᠣᠨᠳᠣᠬᠢ ᠭᠠᠵᠠᠷ ᠣᠷᠣᠨ ᠨᠢ ᠪᠠᠢᠯᠳᠤᠭᠠᠨ ᠡᠴᠡ ᠪᠣᠯᠤᠭᠰᠠᠨ ᠬᠣᠬᠢᠷᠠᠯ ᠡᠪᠳᠡᠷᠡᠯ ᠢ᠋ᠶ᠋ᠡᠨ ᠰᠡᠷᠭᠦᠭᠡᠵᠦ ᠡᠬᠢᠯᠡᠪᠡ᠃
(ᠬᠣᠶᠠᠷ) ᠬᠦᠷᠢᠶᠡ ᠠᠪᠠ ᠶ᠋ᠢᠨ ᠮᠠᠶᠢᠭ ᠢ᠋ᠶ᠋ᠠᠷ ᠪᠠᠢᠯᠳᠣᠬᠣ ᠠᠷᠭᠠ
ᠱᠠᠭ ᠤᠨ ᠮᠥᠷ ᠢ᠋ ᠠᠯᠳᠠᠭᠰᠠᠨ ᠲᠤᠬᠠᠢ ᠰᠦᠪᠡᠭᠡᠳᠡᠢ ᠶ᠋ᠢᠨ ᠮᠡᠳᠡᠭᠦᠯᠦᠯᠲᠡ ᠮᠣᠩᠭᠣᠯᠴᠤᠳ ᠤᠨ ᠴᠡᠷᠢᠭ ᠤ᠋ᠨ ᠬᠦᠷᠢᠶᠡᠨ ᠦ ᠲᠣᠭᠲᠠᠭᠤᠨ ᠢ᠋ᠶ᠋ᠠᠷ ᠠᠮᠠᠷᠠᠵᠤ ᠪᠠᠢᠭᠰᠠᠨ ᠠᠮᠢᠳᠤᠷᠠᠯ ᠢ᠋ ᠲᠠᠰᠤᠯᠳᠠᠭᠤᠯᠪᠠ᠃ ᠮᠦᠬᠠᠮᠸᠳ᠋ ᠺᠠᠰᠫᠢ ᠲᠠᠩᠭᠢᠰ ᠲᠤ᠌ ᠬᠣᠢᠲᠤ ᠵᠦᠭ ᠬᠠᠨᠳᠤᠵᠤ ᠳᠠᠷᠪᠠᠭᠤᠯ ᠢ᠋ᠶ᠋ᠠᠨ ᠬᠡᠢᠰᠬᠡᠭᠰᠡᠨ ᠨᠢ ᠲᠡᠷᠡ ᠯᠠᠪ ᠠᠷᠠᠯ ᠲᠠᠩᠭᠢᠰ ᠤᠨ ᠬᠥᠪᠡᠭᠡᠨ ᠳ᠋ᠡᠬᠢ ᠲᠥᠷᠥᠭᠰᠡᠨ ᠨᠤᠲᠤᠭ ᠲᠠᠭᠠᠨ ᠣᠴᠢᠭᠰᠠᠨ ᠶᠣᠮ᠃ ᠡᠢᠮᠦ ᠡᠴᠡ ᠴᠢᠩᠭᠢᠰ ᠬᠠᠭᠠᠨ ᠲᠡᠷᠡ ᠣᠷᠣᠨ ᠣᠷᠣᠬᠤ ᠰᠢᠨᠡ ᠪᠠᠢᠯᠳᠤᠭᠠᠨ ᠬᠢᠬᠦ ᠠᠷᠭᠠ ᠬᠡᠷᠡᠭᠯᠡᠭᠦᠷ ᠢ᠋ ᠭᠦᠢᠴᠡᠳ ᠠᠪᠤᠯᠠ᠃ ᠵᠥᠴᠢ ᠪᠣᠯᠣᠡ ᠴᠠᠭᠠᠲᠠᠢ ᠶ᠋ᠢ ᠡᠷᠲᠡᠨ ᠦ ᠬᠣᠷᠸᠰᠮ ᠤᠨ ᠵᠦᠭ ᠮᠣᠷᠳᠠᠭᠤᠯᠬᠤ ᠪᠠᠷ ᠵᠠᠷᠯᠢᠭᠳᠠᠪᠠ᠃ ᠭᠡᠲᠡᠯᠡ ᠡᠨᠡᠬᠦ ᠪᠠᠭᠠ ᠤᠯᠤᠰ ᠪᠣᠯ ᠮᠦᠬᠠᠮᠸᠳ᠋· ᠱᠠᠭ ᠢ᠋ ᠥᠷᠭᠡᠨ ᠠᠭᠤᠳᠠᠮ ᠨᠤᠲᠤᠭ ᠲᠠᠢ ᠬᠠᠭᠠᠨᠲᠤ ᠤᠯᠤᠰ ᠢ ᠪᠠᠢᠯᠳᠤᠨ ᠳᠠᠭᠠᠭᠤᠯᠬᠤ ᠬᠦᠴᠦᠨ ᠲᠡᠢ ᠪᠣᠯᠭᠠᠵᠤ ᠪᠠᠢᠭᠰᠠᠨ ᠡᠴᠡ ᠰᠢᠷᠦᠭᠦᠨ ᠪᠠᠢᠯᠳᠤᠭᠠᠨ ᠬᠢᠬᠦ ᠪᠡᠷ ᠤᠷᠢᠳᠠᠰᠠ ᠪᠣᠳᠣᠯᠬᠢᠯᠠᠬᠤ ᠬᠡᠷᠡᠭᠲᠡᠢ ᠪᠠᠢᠵᠠᠢ᠃ ᠬᠡᠵᠢᠶᠡ ᠡᠭᠦᠷᠢᠳᠡ ᠶ᠋ᠢᠨ ᠶᠣᠰᠣ ᠪᠠᠷ ᠴᠢᠩᠭᠢᠰ ᠬᠠᠭᠠᠨ ᠲᠤᠢᠯ ᠤ᠋ᠨ ᠮᠡᠷᠭᠡᠨ ᠢ᠋ᠶ᠋ᠡᠷ ᠵᠥᠩᠨᠡᠵᠦ ᠮᠡᠳᠡᠬᠦ ᠰᠣᠳᠣ ᠮᠡᠷᠭᠡᠨ ᠢ᠋ᠶ᠋ᠡᠨ ᠲᠣᠳᠣ ᠢᠯᠡᠷᠡᠭᠦᠯᠦᠭᠰᠡᠨ ᠪᠠᠢᠨᠠ᠃ ᠳᠠᠷᠤᠢ ᠡᠨᠡᠬᠦ ᠠᠶᠠᠨ ᠲᠡᠢᠨ ᠦ᠌ ᠴᠡᠷᠢᠭ ᠲᠡᠭᠡᠨ ᠥᠭᠡᠳᠡᠢ ᠶ᠋ᠢᠨ ᠬᠣᠲᠠ ᠶ᠋ᠢ ᠳᠠᠭᠠᠷᠢᠨ ᠴᠣᠬᠢᠬᠤ ᠰᠢᠨᠡ ᠮᠠᠶᠢᠭ ᠤ᠋ᠨ ᠵᠡᠪᠰᠡᠭ ᠪᠠᠭᠠᠵᠢ ᠶ᠋ᠢ ᠬᠠᠮᠲᠤᠪᠠᠷ ᠳᠠᠭᠠᠭᠤᠯᠤᠨ ᠮᠣᠷᠳᠠᠭᠤᠯᠪᠠ᠃ ᠡᠨᠡᠬᠦ ᠰᠢᠨᠡ ᠵᠡᠪᠰᠡᠭ ᠦ᠋ᠨ ᠠᠴᠢ ᠲᠤᠰᠠ ᠶ᠋ᠢ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠦᠵᠡᠬᠦ ᠶ᠋ᠢᠨ ᠲᠥᠯᠥᠭᠡ ᠴᠢᠩᠭᠢᠰ ᠬᠠᠭᠠᠨ ᠲᠠᠷᠮᠢᠽᠢ ᠶ᠋ᠢᠨ ᠡᠮᠦᠨᠡ ᠱᠤᠭᠤᠮ ᠳ᠋ᠤ᠌ ᠬᠦᠷᠴᠡᠢ᠃ ᠡᠨᠡ ᠲᠠᠷᠮᠢᠽᠢ ᠪᠣᠯ ᠠᠮᠣᠳᠠᠷᠢᠶᠠ ᠭᠣᠣᠯ ᠤ᠋ᠨ ᠤᠷᠤᠰᠬᠠᠯ ᠤ᠋ᠨ ᠡᠬᠢ ᠳ᠋ᠦ᠍ ᠪᠠᠢᠬᠤ ᠡᠵᠡᠯᠡᠭᠳᠡᠭᠡᠳᠦᠢ ᠬᠣᠲᠠ ᠮᠥᠨ ᠪᠥᠭᠡᠳ ᠥᠭᠡᠳᠡᠢ ᠰᠢᠨᠡ ᠮᠠᠶᠢᠭ ᠤ᠋ᠨ ᠵᠡᠪᠰᠡᠭ ᠢ᠋ᠶ᠋ᠡᠨ ᠰᠢᠯᠭᠠᠬᠤ ᠶ᠋ᠢᠨ ᠲᠥᠯᠥᠭᠡ ᠲᠤᠰᠬᠠᠢᠯᠠᠨ ᠰᠣᠩᠭᠣᠭᠰᠠᠨ ᠭᠠᠵᠠᠷ ᠶᠤᠮ᠃ ᠴᠢᠩᠭᠢᠰ ᠬᠠᠭᠠᠨ ᠬᠡᠳᠦᠨ ᠵᠢᠩ ᠦ᠋ᠨ ᠬᠦᠨᠳᠦ ᠴᠢᠯᠠᠭᠤ ᠠᠭᠠᠷ ᠳᠡᠭᠡᠭᠦᠷ ᠨᠢᠰᠴᠦ ᠳᠠᠭᠠᠷᠢᠯᠲᠠ ᠶ᠋ᠢᠨ ᠬᠦᠴᠦᠨ ᠳ᠋ᠦ᠍ᠨᠢ ᠬᠠᠮᠤᠭ ᠬᠠᠲᠠᠭᠤ ᠪᠡᠬᠢ ᠬᠣᠲᠠ ᠪᠣᠭᠣᠮᠲᠠ ᠨᠤᠷᠠᠭᠠᠭᠳᠠᠵᠤ ᠪᠠᠢᠭᠰᠠᠨ ᠢ᠋ ᠦᠵᠡᠵᠡᠢ᠃ ᠲᠣᠰᠣ ᠲᠠᠢ ᠯᠣᠩᠬᠣ ᠨᠢ ᠥᠨᠳᠥᠷ ᠱᠤᠭᠤᠮ ᠵᠢᠷᠤᠭᠰᠠᠭᠠᠷ ᠭᠡᠷ ᠦ᠋ᠨ ᠣᠷᠣᠢ ᠳᠡᠭᠡᠷᠡ ᠤᠨᠠᠭᠠᠳ ᠳᠡᠯᠪᠡᠷᠡᠨ᠂ ᠭᠠᠯ ᠨᠣᠴᠣᠭᠰᠠᠨ ᠶᠠᠭᠤᠮᠠ ᠪᠠᠨ ᠰᠠᠴᠤᠭᠰᠠᠨ ᠭᠱᠠᠨ ᠵᠠᠭᠤᠷᠠ᠂ ᠲᠡᠳᠡᠭᠡᠷ ᠪᠠᠷᠢᠯᠭᠠ ᠪᠠᠢᠰᠢᠩ ᠤ᠋ᠳ ᠪᠦᠷ ᠭᠠᠯ ᠤ᠋ᠨ ᠳᠠᠯᠠᠢ ᠪᠣᠯᠵᠤ ᠨᠣᠴᠣᠬᠤ ᠶ᠋ᠢ ᠦᠵᠡᠵᠡᠢ᠃ ᠡᠳᠡᠭᠡᠷ ᠰᠢᠨᠡ ᠵᠡᠪᠰᠡᠭ ᠢ᠋ ᠵᠣᠬᠢᠶᠠᠨ ᠪᠦᠲᠦᠭᠡᠭᠰᠡᠨ ᠭᠠᠪᠢᠶᠠ ᠳ᠋ᠤᠨᠢ ᠱᠠᠩᠨᠠᠯ ᠬᠡᠰᠢᠭ ᠪᠣᠯᠭᠠᠵᠤ ᠥᠭᠡᠳᠡᠢ ᠶ᠋ᠢᠨ ᠱᠠᠯ ᠰᠣᠭᠲᠣᠭᠤ ᠶᠠᠪᠤᠳᠠᠭ ᠶᠠᠯᠠ ᠶ᠋ᠢ ᠨᠢ ᠠᠭᠤᠴᠢᠯᠠᠵᠠᠢ᠃ ᠥᠭᠡᠳᠡᠢ ᠠᠬᠠ ᠳᠡᠭᠦᠦ ᠨᠠᠷ ᠲᠠᠢ ᠪᠠᠨ ᠬᠠᠮᠲᠤ ᠮᠣᠷᠳᠠᠬᠤ ᠦᠬᠡᠷ ᠫᠣᠤᠲᠤ ᠴᠡᠷᠢᠭ ᠦ᠋ᠨ ᠬᠠᠮᠤᠭ ᠳᠡᠭᠡᠳᠦ ᠵᠢᠯᠣᠭᠣᠳᠤᠭᠴᠢ ᠶ᠋ᠢᠨ ᠲᠤᠰᠢᠶᠠᠯ ᠢ᠋ ᠬᠦᠯᠢᠶᠡᠪᠡ᠃ ᠡᠭᠦᠨ ᠦ᠌ ᠬᠠᠮᠲᠤ ᠴᠢᠩᠭᠢᠰ ᠬᠠᠭᠠᠨ ᠭᠤᠷᠪᠠᠨ ᠬᠥᠪᠡᠭᠦᠨ ᠳ᠋ᠡᠭᠡᠨ ᠵᠥᠪᠳᠡᠭᠴᠢ ᠶ᠋ᠢᠨ ᠳᠠᠷᠤᠭᠠ ᠪᠣᠯᠭᠠᠵᠤ᠂ ᠬᠠᠮᠤᠭ ᠤ᠋ᠨ ᠦᠨᠡᠨᠴᠢ ᠰᠢᠳᠤᠷᠭᠤ ᠬᠠᠮᠤᠭ ᠤ᠋ᠨ ᠬᠠᠭᠤᠴᠢᠨ ᠳᠠᠢᠴᠢᠨ ᠨᠥᠬᠥᠷ ᠪᠣᠭᠣᠷᠴᠤ ᠶ᠋ᠢ ᠳᠠᠭᠠᠭᠤᠯᠵᠠᠢ᠃ ᠪᠣᠭᠣᠷᠴᠤ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠳᠣᠲᠣᠷᠠ ᠡᠭᠦᠰᠦᠭᠰᠡᠨ ᠠᠯᠢᠪᠠ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ ᠨᠢᠭᠤᠴᠠ ᠪᠠᠷ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠮᠡᠳᠡᠭᠦᠯᠬᠦ ᠡᠭᠦᠷᠭᠡ ᠶ᠋ᠢ ᠬᠠᠷᠢᠭᠤᠴᠠᠵᠤ ᠪᠠᠢᠪᠠ᠃ ᠨᠢᠭᠡᠨ ᠲᠦᠪᠰᠢᠳᠬᠡᠬᠦ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠬᠡᠦᠬᠡᠳ ᠢ᠋ᠶ᠋ᠡᠨ ᠬᠠᠮᠲᠤᠷᠠᠭᠤᠯᠤᠨ ᠮᠣᠷᠳᠠᠭᠤᠯᠤᠭᠰᠠᠨ ᠨᠢ ᠬᠠᠮᠤᠭ ᠤ᠋ᠨ ᠲᠡᠷᠢᠭᠦᠨ ᠤᠳᠠᠭᠠ ᠪᠠᠢᠵᠤ᠂ ᠲᠡᠳᠡᠨᠡᠷ ᠶᠠᠭᠠᠬᠢᠵᠤ ᠬᠥᠳᠡᠯᠵᠦ ᠪᠠᠷᠢᠬᠤ ᠪᠠ ᠬᠢᠷᠢ ᠵᠡᠷᠭᠡ ᠬᠠᠮᠲᠤᠷᠠᠨ ᠠᠵᠢᠯᠯᠠᠬᠤ ᠶ᠋ᠢ ᠨᠢ ᠮᠡᠳᠡᠬᠦ ᠭᠡᠰᠡᠨ ᠶᠦᠮ᠃
ᠴᠢᠩᠭᠢᠰ ᠬᠠᠭᠠᠨ ᠤ᠋ ᠪᠡᠶᠡ ᠨᠢ ᠣᠳᠬᠣᠨ ᠬᠥᠪᠡᠭᠦᠨ ᠲᠤᠯᠤᠢ ᠲᠠᠢ ᠪᠠᠨ ᠬᠠᠮᠲᠤ ᠲᠥᠪ ᠣᠷᠣᠨ ᠢ᠋ ᠡᠵᠡᠯᠡᠵᠦ ᠰᠠᠭᠤᠭᠠᠳ ᠪᠦᠬᠦ ᠲᠠᠯᠠ ᠶ᠋ᠢ ᠠᠩᠬᠠᠷᠤᠨ ᠬᠡᠷᠡᠭᠴᠡᠭᠡ ᠲᠡᠢ ᠦᠶᠡ ᠳ᠋ᠦ᠍ ᠬᠣᠢᠲᠤ ᠵᠦᠭ ᠪᠤᠶᠤ ᠪᠠᠷᠠᠭᠤᠨ ᠵᠦᠭ ᠲᠦ᠍ ᠡᠰᠡᠬᠦᠯᠡ ᠡᠮᠦᠨᠡ ᠵᠦᠭ ᠲᠦ᠍ ᠭᠡᠮᠡᠨ ᠬᠠᠮᠢᠭᠠᠰᠢ ᠪᠣᠯᠪᠠᠴᠤ ᠮᠣᠷᠳᠠᠨ ᠭᠠᠷᠬᠤ ᠪᠠᠷ ᠪᠡᠯᠡᠬᠡᠨ ᠪᠠᠢᠪᠠ᠃ ᠭᠡᠪᠡᠴᠦ ᠬᠥᠳᠡᠯᠦᠯ ᠦᠭᠡᠢ ᠨᠡᠯᠢᠶᠡᠳ ᠤᠳᠠᠭᠠᠨ ᠬᠤᠭᠤᠴᠠᠭᠠ ᠦᠷᠭᠦᠯᠵᠢᠯᠡᠭᠰᠡᠨ ᠡᠴᠡ ᠪᠠᠢᠯᠳᠤᠭᠴᠢ ᠨᠠᠷ ᠤ᠋ᠨ ᠲᠠᠮᠢᠷ ᠨᠢ ᠰᠤᠯᠠᠷᠠᠵᠤ ᠢᠷᠡᠭᠰᠡᠨ ᠪᠣᠯᠬᠣᠷ ᠶᠡᠬᠡ ᠬᠦᠷᠢᠶᠡ ᠠᠪᠠ ᠶ᠋ᠢ ᠳᠠᠢᠰᠤᠨ ᠤ᠋ ᠤᠯᠤᠰ ᠤ᠋ᠨ ᠭᠣᠣᠯ ᠣᠷᠣᠨ ᠲᠠᠷᠮᠢᠽᠢ ᠶ᠋ᠢᠨ ᠠᠭᠤᠯᠠᠷᠬᠠᠭ ᠣᠷᠣᠨ ᠳ᠋ᠤ᠌ ᠬᠢᠬᠦ ᠪᠡᠷ ᠵᠠᠷᠯᠢᠭ ᠪᠠᠭᠤᠯᠭᠠᠵᠠᠢ᠃ ᠡᠢᠮᠦ ᠬᠦᠷᠢᠶᠡ ᠠᠪᠠ ᠬᠢᠬᠦ ᠨᠢ ᠪᠠᠢᠯᠳᠤᠭᠠᠨ ᠤ᠋ ᠠᠮᠵᠢᠯᠲᠠ ᠶ᠋ᠢᠨ ᠬᠣᠭᠣᠷᠣᠨᠳᠣ ᠮᠣᠩᠭᠣᠯ ᠴᠡᠷᠢᠭ ᠲᠡᠭᠡᠨ ᠶᠠᠪᠤᠭᠤᠯᠤᠭᠰᠠᠨ ᠪᠠᠢᠯᠳᠤᠭᠠᠨ ᠤ᠋ ᠰᠤᠷᠭᠠᠭᠤᠯᠢᠯᠠᠯ ᠪᠣᠯᠤᠨᠠ᠃
ᠯᠠᠯᠤ ᠶ᠋ᠢᠨ ᠮᠥᠷᠭᠥᠯᠲᠡᠨ ᠦ᠌ ᠬᠥᠮᠦᠰ ᠡᠨᠡ ᠮᠡᠲᠦ ᠶ᠋ᠢᠨ ᠠᠪᠠ ᠲᠠᠯᠪᠢᠬᠤ ᠶ᠋ᠢ ᠠᠩᠬᠠ ᠣᠯᠵᠤ ᠦᠵᠡᠵᠡᠢ᠃ ᠲᠡᠷᠡᠬᠦ ᠬᠦᠷᠢᠶᠡ ᠠᠪᠠ ᠶ᠋ᠢᠨ ᠪᠠᠢᠳᠠᠯ ᠢ᠋ ᠳᠡᠯᠡᠬᠡᠢ ᠶ᠋ᠢᠨ ᠲᠡᠦᠬᠡᠴᠢᠨ ᠨᠠᠷ ᠵᠢᠭᠲᠡᠢ ᠰᠣᠨᠢᠷᠬᠠᠵᠤ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠪᠢᠴᠢᠵᠦ ᠦᠯᠡᠳᠡᠭᠡᠭᠰᠡᠨ ᠲᠡᠮᠳᠡᠭᠯᠡᠯ ᠨᠢ ᠳᠣᠣᠷᠠᠬᠢ ᠮᠡᠲᠦ᠄《ᠴᠡᠷᠢᠭ ᠦ᠋ᠨ ᠵᠥᠪᠳᠡᠭᠴᠢ ᠶ᠋ᠢᠨ ᠶᠠᠮᠤᠨ ᠤ᠋ ᠨᠣᠶᠠᠳ ᠨᠠᠷ ᠣᠢ ᠰᠢᠭᠤᠢ ᠶ᠋ᠢ ᠲᠣᠭᠣᠷᠢᠨ ᠠᠪᠠ ᠲᠠᠯᠪᠢᠬᠤ ᠭᠠᠵᠠᠷ ᠤ᠋ᠨ ᠬᠡᠮᠵᠢᠶᠡ ᠪᠡᠨ ᠲᠣᠭᠲᠠᠭᠠᠨ᠂ ᠠᠩ ᠬᠢᠬᠦ ᠬᠦᠷᠢᠶᠡ ᠪᠡᠨ ᠲᠣᠭᠲᠠᠭᠠᠨᠠ᠃ ᠴᠡᠷᠢᠭ ᠨᠢ ᠲᠠᠷᠬᠠᠵᠤ ᠪᠠᠢᠯᠳᠤᠭᠴᠢ ᠨᠠᠷ ᠢ᠋ ᠨᠢᠭᠡᠳᠦᠭᠡᠷ ᠹᠷᠣᠨᠲ᠂ ᠬᠣᠶᠠᠳᠤᠭᠠᠷ ᠹᠷᠣᠨᠲ ᠭᠡᠵᠦ ᠵᠠᠢ ᠲᠠᠯᠪᠢᠵᠤ ᠤᠷᠤᠭᠰᠢᠯᠠᠵᠤ᠂ ᠵᠢᠭᠠᠨ ᠲᠣᠭᠲᠠᠭᠠᠭᠰᠠᠨ ᠣᠢ ᠰᠢᠭᠤᠢ ᠶ᠋ᠢ ᠪᠦᠰᠡᠯᠡᠨ ᠠᠪᠤᠨᠠ᠃ ᠬᠡᠩᠭᠡᠷᠭᠡ ᠴᠠᠩ ᠳᠡᠯᠡᠳᠦᠨ ᠪᠦᠷᠢᠶᠡ ᠪᠢᠰᠬᠢᠭᠦᠷ ᠳᠤᠤᠭᠠᠷᠭᠠᠵᠤ ᠰᠦᠷ ᠴᠤᠤ ᠮᠠᠨᠳᠤᠭᠤᠯᠤᠭᠰᠠᠭᠠᠷ ᠳᠥᠷᠪᠡᠨ ᠵᠦᠭ ᠡᠴᠡ ᠠᠪᠠ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠠᠭᠠᠨ ᠣᠷᠣᠵᠤ ᠢᠷᠡᠨᠡ᠃ ᠡᠨᠡ ᠦᠶᠡ ᠡᠴᠡ ᠡᠬᠢᠯᠡᠭᠡᠳ ᠶᠠᠮᠠᠷ ᠴᠤ ᠠᠮᠢᠲᠠᠨ ᠪᠤᠶᠤ ᠬᠡᠭᠡᠷᠡ ᠶ᠋ᠢᠨ ᠠᠷᠢᠶᠠᠲᠠᠨ ᠪᠦᠷ ᠪᠦᠰᠡᠯᠡᠭᠳᠡᠭᠡᠳ ᠭᠠᠳᠠᠭᠰᠢ ᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠴᠢᠬᠠᠬᠤ ᠶᠤᠮ᠃ ᠶᠠᠮᠠᠷᠪᠠ ᠪᠤᠲᠠ ᠰᠥᠭᠡᠭ ᠪᠤᠶᠤ ᠨᠠᠮᠤᠭ ᠳᠠᠭᠠᠭᠠᠴᠠ ᠭᠠᠵᠠᠷ᠂ ᠬᠠᠳᠠᠨ ᠤ᠋ ᠠᠭᠤᠢ ᠶ᠋ᠢ ᠬᠦᠷᠲᠡᠯᠡ ᠦᠯᠡᠳᠡᠭᠡᠯ ᠦᠭᠡᠢ ᠨᠡᠩᠵᠢᠵᠦ ᠶᠠᠭᠤ ᠶ᠋ᠢ ᠴᠤ ᠰᠢᠪᠲᠤᠯᠤᠨ ᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠭᠠᠨᠠ ᠃ ᠬᠣᠰᠢᠭᠤᠴᠢ ᠴᠡᠷᠢᠭ ᠦ᠋ᠨ ᠠᠷᠤ ᠲᠠᠯᠠ ᠳ᠋ᠤᠨᠢ ᠴᠡᠷᠢᠭ ᠦ᠋ᠨ ᠨᠣᠶᠠᠳ ᠮᠣᠷᠢ ᠤᠨᠤᠭᠠᠳ ᠶᠠᠪᠤᠨᠠ᠃ ᠠᠩᠴᠢᠨ ᠴᠡᠷᠢᠭ ᠨᠠᠷ ᠤ᠋ᠨ ᠤᠯᠠ ᠮᠥᠷ ᠪᠠ ᠠᠯᠢᠪᠠ ᠬᠥᠳᠡᠯᠪᠦᠷᠢ ᠶ᠋ᠢ ᠴᠥᠮ ᠠᠩᠬᠠᠷᠤᠨ ᠦᠵᠡᠵᠦ ᠶᠠᠪᠤᠨᠠ᠃ ᠠᠯᠢ ᠭᠠᠵᠠᠷ ᠤ᠋ᠨ ᠪᠤᠲᠠ ᠰᠥᠭᠡᠭ ᠦ᠋ᠨ ᠳᠣᠲᠣᠷᠠ ᠪᠠᠭᠠᠪᠠᠭᠠᠢ ᠵᠡᠷᠭᠡ ᠶ᠋ᠢᠨ ᠠᠷᠢᠶᠠᠲᠠᠨ ᠨᠢᠭᠤᠵᠤ ᠰᠢᠷᠭᠤᠭᠠᠳ ᠪᠠᠢᠬᠤ᠂ ᠡᠰᠡᠬᠦᠯᠡ ᠴᠡᠷᠢᠭ ᠦ᠋ᠨ ᠠᠷᠤ ᠳ᠋ᠤ᠌ ᠠᠩ ᠦᠯᠡᠳᠡᠭᠡᠳ ᠪᠠᠢᠬᠤ ᠶ᠋ᠢ ᠣᠯᠵᠤ ᠦᠵᠡᠬᠦ ᠳ᠋ᠦ᠍ ᠬᠦᠷᠪᠡᠯ ᠡᠨᠡ ᠠᠩᠴᠢᠨ ᠴᠡᠷᠢᠭ ᠨᠠᠷ ᠲᠤ᠌ ᠲᠤᠢᠯ ᠤ᠋ᠨ ᠬᠡᠴᠡᠭᠦᠦ ᠬᠡᠷᠡᠭ ᠪᠣᠯᠤᠨᠠ᠃ ᠠᠩᠴᠢᠨ ᠴᠡᠷᠢᠭ ᠦ᠋ᠨ ᠥᠩᠭᠡᠷᠡᠵᠦ ᠭᠠᠷᠤᠭᠰᠠᠨ ᠭᠠᠵᠠᠷ ᠤ᠋ᠨ ᠣᠢ ᠰᠢᠭᠤᠢ ᠨᠢ ᠬᠣᠭᠣᠰᠣᠷᠠᠨ ᠨᠠᠮ ᠭᠦᠮ ᠪᠣᠯᠬᠤ ᠦᠭᠡᠢ ᠪᠣᠯ ᠪᠣᠯᠬᠤ ᠦᠭᠡᠢ ᠶᠦᠮ᠃
ᠮᠣᠩᠭᠣᠯ ᠴᠡᠷᠢᠭ ᠤᠳ ᠪᠠᠢᠯᠳᠤᠭᠠ ᠤ᠋ ᠪᠡᠯᠡᠳᠬᠡᠯ ᠮᠠᠶᠢᠭ ᠢ᠋ᠶ᠋ᠠᠷ ᠬᠤᠶᠠᠭᠯᠠᠭᠠᠳ ᠭᠠᠭᠴᠠᠬᠦ ᠭᠠᠷ ᠲᠠᠭᠠᠨ ᠵᠡᠪᠰᠡᠭ ᠪᠠᠷᠢᠬᠤ ᠦᠭᠡᠢ᠃ ᠬᠡᠷᠪᠡ ᠪᠠᠭᠠᠪᠠᠭᠠᠢ᠂ ᠪᠠᠷᠰ᠂ ᠴᠢᠨᠣᠠ᠂ ᠪᠤᠶᠤ ᠬᠡᠭᠡᠷᠡ ᠶ᠋ᠢᠨ ᠭᠠᠬᠠᠢ ᠴᠡᠷᠢᠭ ᠤ᠋ᠨ ᠵᠦᠭ ᠨᠣᠴᠣᠨ ᠢᠷᠡᠪᠡᠯ᠂ ᠠᠩᠴᠢᠨ ᠴᠡᠷᠢᠭ ᠤᠳ ᠮᠣᠳᠣᠨ ᠪᠠᠮᠪᠠᠢ ᠪᠠᠷ ᠢ᠋ᠶ᠋ᠠᠨ ᠲᠡᠭᠦᠨ ᠢ᠋ ᠴᠢᠨᠠᠭᠰᠢ ᠲᠦᠯᠬᠢᠨ ᠶᠠᠪᠤᠭᠤᠯᠤᠨᠠ᠃ ᠶᠠᠮᠠᠷᠴᠤ ᠠᠩ ᠢ᠋ ᠪᠦᠷ ᠰᠢᠷᠬᠠᠲᠤᠭᠤᠯᠵᠤ ᠪᠣᠯᠬᠤ ᠦᠭᠡᠢ᠂ ᠨᠡᠩ ᠴᠦ᠍ ᠳᠤᠲᠠᠭᠠᠯᠭᠠᠵᠤ ᠪᠣᠯᠬᠤ ᠦᠭᠡᠢ᠃ ᠴᠡᠷᠢᠭ ᠤᠳ ᠢᠪᠴᠤᠤ ᠵᠡᠪᠡ ᠶ᠋ᠢ ᠲᠤᠭᠤᠯᠵᠤ ᠴᠠᠪᠴᠢᠯ ᠡᠷᠭᠢ ᠶ᠋ᠢ ᠭᠡᠲᠦᠯᠦᠨ᠂ ᠠᠭᠤᠯᠠ ᠥᠭᠡᠳᠡ ᠠᠪᠠᠷᠢᠵᠤ ᠠᠭᠤᠯᠠ ᠤᠷᠤᠭᠤ ᠪᠠᠭᠤᠨ ᠠᠯᠢᠪᠠ ᠠᠩ ᠭᠥᠷᠥᠭᠡᠰᠦ ᠶ᠋ᠢ ᠥᠪᠡᠷ ᠤ᠋ᠨ ᠡᠮᠦᠨᠡ ᠴᠤᠭᠯᠠᠭᠤᠯᠤᠨ ᠬᠥᠭᠡᠭᠡᠭᠰᠡᠭᠡᠷ ᠤᠷᠤᠭᠰᠢᠯᠠᠨᠠ᠃ ᠠᠯᠢᠪᠠ ᠨᠠᠭᠤᠷ ᠢ᠋ ᠥᠩᠭᠡᠷᠡᠨ ᠲᠣᠬᠢᠶᠠᠯᠳᠤᠭᠰᠠᠨ ᠪᠦᠬᠦ ᠭᠣᠣᠯ ᠮᠥᠷᠡᠨ ᠢ᠋ ᠭᠡᠲᠦᠯᠦᠭᠡᠳ ᠶᠠᠪᠤᠨᠠ᠃ ᠰᠥᠨᠢ ᠪᠣᠯᠤᠭᠰᠠᠨ ᠦᠶᠡᠰ ᠲᠦ᠍ ᠲᠦᠳᠡᠭ ᠤ᠋ᠨ ᠭᠡᠷᠡᠯ ᠢ᠋ᠶ᠋ᠡᠷ ᠲᠣᠭᠲᠠᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠪᠦᠰᠡᠯᠡᠨᠡ᠃ ᠡᠨᠡ ᠴᠠᠭᠠᠷᠢᠭ ᠨᠢ ᠳᠥᠷᠪᠡᠨ ᠮᠥᠷ ᠲᠠᠪᠤᠨ ᠮᠥᠷ ᠠᠩᠴᠢᠨ ᠴᠡᠷᠢᠭ ᠢ᠋ᠶ᠋ᠡᠷ ᠪᠦᠷᠢᠯᠳᠦᠵᠦ᠂ ᠡᠳᠦᠷ ᠢᠷᠡᠬᠦ ᠳᠣᠳᠣᠮ ᠤᠯᠠᠮ ᠳᠣᠲᠣᠭᠰᠢ ᠬᠤᠮᠢᠵᠤ ᠬᠤᠷᠢᠶᠠᠵᠤ ᠢᠷᠡᠨᠡ᠃ ᠡᠳᠦᠷ ᠥᠩᠭᠡᠷᠡᠬᠦ ᠶ᠋ᠢ ᠳᠠᠭᠠᠯᠳᠤᠨ ᠂ ᠠᠩ ᠭᠥᠷᠥᠭᠡᠰᠦ ᠵᠤᠵᠠᠭᠠᠷᠠᠭᠠᠳ ᠵᠢᠭᠤᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠤᠯᠠᠮ ᠤᠯᠠᠮ ᠪᠠᠴᠢᠮᠳᠠᠬᠤ ᠪᠣᠯᠤᠨᠠ᠃ ᠲᠣᠭᠰᠢᠨ ᠠᠷᠢᠶᠠᠲᠠᠨ ᠤᠯᠠᠮ ᠭᠠᠯᠵᠠᠭᠤᠷᠠᠭᠠᠳ ᠢᠷᠡᠨᠡ᠃ ᠤᠯᠠᠮ ᠭᠠᠯᠵᠠᠭᠤᠷᠠᠵᠤ ᠬᠢᠯᠢᠩᠯᠡᠭᠰᠡᠨ ᠠᠷᠢᠶᠠᠲᠠᠨ ᠪᠤᠭᠤ ᠰᠤᠭᠤ ᠤᠷᠤᠭᠤ ᠳᠠᠭᠠᠷᠢᠨ ᠪᠠᠷᠢᠵᠤ ᠢᠳᠡᠬᠦ ᠪᠤᠶᠤ ᠬᠠᠷᠢᠯᠴᠠᠨ ᠭᠡᠷᠡᠯᠲᠦᠨ ᠬᠠᠵᠠᠵᠤ ᠵᠢᠭᠤᠷᠠᠯᠳᠤᠨᠠ᠃ ᠭᠡᠪᠡᠴᠦ ᠡᠳᠡᠭᠡᠷ ᠠᠷᠢᠶᠠᠲᠠᠨ ᠤ᠋ ᠣᠷᠴᠢᠨ ᠠᠬᠤᠢ ᠨᠢ ᠡᠳᠦᠷ ᠪᠦᠷᠢ ᠮᠠᠭᠤᠳᠠᠵᠤ ᠢᠷᠡᠨᠡ᠃ ᠠᠮᠢᠳᠤᠷᠠᠨ ᠠᠬᠤ ᠴᠠᠭᠠᠷᠢᠭ ᠨᠢ ᠤᠯᠠᠮ ᠰᠦᠷᠡᠬᠡᠢ ᠪᠠᠴᠢᠮ ᠰᠢᠬᠠᠭᠤ ᠪᠣᠯᠳᠠᠭ ᠤᠴᠢᠷ ᠡᠴᠡ ᠲᠡᠢᠮᠦ ᠪᠣᠯᠤᠨᠠ᠃ ᠪᠣᠭᠳᠠ ᠬᠠᠭᠠᠨ ᠤᠳᠠᠭᠠ ᠪᠦᠷᠢ ᠬᠠᠮᠤᠭ ᠤ᠋ᠨ ᠪᠡᠷᠬᠡᠰᠢᠶᠡᠯ ᠲᠡᠢ ᠭᠠᠵᠠᠷ ᠲᠤ᠌ ᠬᠦᠷᠴᠦ᠂ ᠴᠡᠷᠢᠭ ᠠᠩᠭᠢ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠢᠯᠳᠤᠭᠠᠨ ᠤ᠋ ᠠᠷᠭᠠ ᠶ᠋ᠢ ᠨᠠᠷᠢᠨ ᠠᠩᠬᠠᠷᠤᠨ ᠦᠵᠡᠳᠡᠭ ᠪᠠᠢᠨᠠ᠃
ᠡᠨᠡ ᠮᠡᠲᠦ ᠶᠠᠪᠤᠭᠰᠠᠭᠠᠷ ᠶᠡᠬᠡ ᠬᠡᠪᠴᠢᠶᠡᠨ ᠦ᠌ ᠭᠠᠵᠠᠷ ᠣᠷᠣᠨ ᠤ᠋ ᠪᠦᠬᠦ ᠠᠩ ᠭᠥᠷᠥᠭᠡᠰᠦ ᠶ᠋ᠢ ᠭᠠᠭᠴᠠ ᠬᠦᠷᠢᠶᠡ ᠲᠠᠯᠪᠢᠭᠰᠠᠨ ᠭᠣᠣᠯ ᠲᠠᠯᠠᠪᠠᠢ ᠳ᠋ᠤ᠌ ᠰᠢᠬᠠᠵᠤ ᠴᠤᠭᠯᠠᠭᠤᠯᠤᠨᠠ᠃ ᠡᠳᠡᠭᠡᠷ ᠠᠷᠢᠶᠠᠲᠠᠨ ᠪᠦᠰᠡᠯᠡᠭᠳᠡᠨ ᠬᠠᠭᠠᠭᠳᠠᠭᠠᠳ ᠦᠬᠦᠯ ᠤ᠋ᠨ ᠴᠠᠭᠠᠷᠢᠭ ᠡᠴᠡ ᠮᠤᠯᠲᠤᠷᠠᠬᠤ ᠠᠷᠭᠠ ᠦᠭᠡᠢ ᠪᠣᠯᠤᠨᠠ᠃ ᠭᠡᠨᠡᠳᠲᠡ ᠬᠠᠭᠠᠯᠲᠠ ᠨᠢ ᠨᠢᠭᠡᠨ ᠴᠤᠪᠤᠭᠠ ᠵᠠᠮ ᠲᠠᠯᠪᠢᠨᠠ᠂ ᠲᠡᠷᠡ ᠦᠶᠡ ᠳ᠋ᠦ᠍ ᠠᠪᠠ ᠶ᠋ᠢᠨ ᠬᠥᠭᠵᠢᠮ ᠳᠤᠤᠭᠠᠷᠤᠨ ᠶᠠᠭ ᠲᠠᠮᠤ ᠶ᠋ᠢᠨ ᠠᠶᠠᠯᠭᠤ ᠮᠡᠲᠦ ᠪᠡᠷ ᠬᠦᠩᠭᠢᠨᠡᠵᠦ᠂ ᠬᠡᠭᠡᠷᠡ ᠶ᠋ᠢᠨ ᠠᠷᠢᠶᠠᠲᠠᠨ ᠳᠠᠭᠵᠢᠵᠤ ᠴᠡᠴᠡᠷᠡᠭᠡᠳ ᠮᠡᠯᠡᠷᠡᠨᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠪᠣᠭᠳᠠ ᠬᠠᠭᠠᠨ ᠪᠣᠯᠤᠨ ᠨᠣᠶᠠᠳ ᠲᠦᠰᠢᠮᠡᠳ ᠪᠠᠨ ᠳᠠᠭᠠᠭᠤᠯᠤᠨ ᠴᠠᠭᠠᠷᠢᠭ ᠤ᠋ᠨ ᠳᠣᠲᠣᠷᠠ ᠣᠷᠣᠵᠤ ᠣᠴᠢᠨᠠ᠃ ᠪᠣᠭᠳᠠ ᠬᠠᠭᠠᠨ ᠥᠪᠡᠷ ᠤ᠋ᠨ ᠪᠡᠶᠡ ᠨᠢ ᠢᠯᠳᠦ ᠰᠡᠯᠡᠮᠡ ᠪᠤᠶᠤ ᠨᠤᠮᠤ ᠰᠤᠮᠤ ᠪᠠᠷ ᠢ᠋ᠶ᠋ᠠᠨ ᠪᠠᠷᠰ ᠪᠤᠶᠤ᠂ ᠪᠠᠭᠠᠪᠠᠭᠠᠢ᠂ ᠬᠡᠭᠡᠷᠡ ᠶ᠋ᠢᠨ ᠭᠠᠬᠠᠢ ᠵᠡᠷᠭᠡ ᠶ᠋ᠢ ᠠᠯᠠᠭᠠᠳ ᠠᠩ ᠤ᠋ᠨ ᠡᠭᠦᠳᠡ ᠶ᠋ᠢ ᠨᠡᠭᠡᠭᠡᠨᠡ᠃ ᠡᠭᠦᠨ ᠢ᠋ᠶ᠋ᠡᠨ ᠳᠠᠭᠤᠰᠬᠠᠭᠠᠳ ᠪᠣᠭᠳᠠ ᠬᠠᠭᠠᠨ ᠤᠷᠢᠳᠠ ᠠᠴᠠ ᠪᠡᠯᠡᠳᠬᠡᠵᠦ ᠪᠠᠢᠭᠰᠠᠨ ᠬᠠᠭᠠᠨ ᠤ᠋ ᠰᠠᠭᠤᠷᠢᠨ ᠳ᠋ᠠᠭᠠᠨ ᠵᠠᠯᠠᠷᠠᠨᠠ᠃ ᠳᠠᠷᠠᠭᠠ ᠳ᠋ᠤᠨᠢ ᠨᠣᠶᠠᠳ ᠲᠦᠰᠢᠮᠡᠳ ᠢᠵᠠᠭᠤᠷᠲᠠᠨ ᠵᠠᠩᠵᠤᠨ ᠨᠠᠷ ᠣᠳᠣ ᠪᠢᠷᠠ ᠴᠢᠳᠠᠯ ᠢ᠋ᠶ᠋ᠠᠨ ᠭᠠᠢᠬᠠᠭᠤᠯᠵᠤ ᠦᠵᠡᠭᠦᠯᠳᠡᠭ᠃ ᠡᠨᠡ ᠮᠡᠲᠦ ᠪᠡᠷ ᠠᠬᠢᠨ ᠳᠠᠬᠢᠨ ᠡᠭᠡᠯᠵᠢᠯᠡᠭᠡᠳ ᠳᠠᠭᠠᠷᠢᠯᠲᠠ ᠨᠢ ᠶᠠᠪᠤᠬᠤ ᠳᠣᠳᠣᠮ ᠴᠠᠭᠠᠷᠢᠭ ᠤ᠋ᠨ ᠭᠣᠣᠯ ᠳᠤᠮᠳᠠ ᠣᠷᠣᠭᠠᠳ᠂ ᠠᠩ ᠴᠥᠭᠡᠷᠡᠨ ᠵᠢᠵᠢᠭ ᠪᠠᠭᠠ ᠠᠮᠢᠲᠠᠨ ᠤ᠋ ᠲᠡᠳᠦᠢ ᠪᠣᠯᠬᠤ ᠶᠤᠮ᠃ ᠭᠡᠪᠡᠴᠦ ᠪᠤᠲᠠ ᠰᠥᠭᠡᠭ ᠤ᠋ᠨ ᠳᠣᠲᠣᠷᠠ ᠡᠴᠡ ᠪᠠᠰᠠ ᠪᠠᠢᠨ ᠪᠠᠢᠨ ᠲᠣᠭᠰᠢᠨ ᠠᠷᠢᠶᠠᠲᠠᠨ ᠭᠠᠷᠤᠭᠠᠳ ᠢᠷᠡᠨᠡ᠃ ᠡᠨᠡ ᠦᠶᠡ ᠳᠤ ᠬᠤᠪᠢ ᠵᠠᠶᠠᠭᠠ ᠪᠠᠷ ᠰᠠᠢᠨ ᠠᠩᠴᠢᠨ ᠴᠡᠷᠢᠭ ᠪᠣᠭᠳᠠ ᠬᠠᠭᠠᠨ ᠤ᠋ ᠨᠢᠳᠦᠨ ᠡᠮᠦᠨᠡ ᠥᠪᠡᠷ ᠤ᠋ᠨ ᠡᠷᠡᠯᠬᠡᠭ ᠪᠠᠭᠠᠲᠤᠷ ᠪᠤᠶᠤ ᠤᠷᠠᠨ ᠮᠡᠷᠭᠡᠨ ᠢ᠋ᠶ᠋ᠡᠨ ᠦᠵᠡᠭᠦᠯᠵᠦ ᠴᠢᠳᠠᠬᠤ ᠶᠤᠮ᠃ ᠡᠢᠮᠦ ᠡᠴᠡ ᠱᠠᠩᠨᠠᠯ ᠣᠯᠬᠤ ᠪᠤᠶᠤ ᠵᠡᠷᠭᠡ ᠳᠡᠰ ᠳᠡᠪᠰᠢᠬᠦ ᠵᠠᠪᠰᠢᠶᠠᠨ ᠴᠤ ᠬᠦᠷᠴᠦ ᠢᠷᠡᠨᠡ᠃ < ᠠᠩ ᠠᠷᠢᠶᠠᠲᠠᠨ ᠤ᠋ ᠣᠯᠠᠩᠬᠢ ᠨᠢ ᠠᠯᠠᠭᠳᠠᠭᠰᠠᠨ ᠤ᠋ ᠬᠣᠢᠨᠠ᠂ ᠪᠣᠭᠳᠠ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠠᠴᠢ ᠬᠥᠪᠡᠭᠦᠨ ᠨᠢ ᠢᠷᠡᠭᠡᠳ ᠬᠥᠭᠡᠷᠦᠬᠦᠨ ᠪᠠᠭᠠ ᠠᠮᠢᠲᠠᠨ ᠤ᠋ ᠠᠮᠢ ᠶ᠋ᠢ ᠠᠪᠤᠷᠠᠬᠤ ᠪᠠᠷ ᠭᠤᠶᠤᠳᠠᠭ᠃ ᠪᠣᠭᠳᠠ ᠬᠠᠭᠠᠨ ᠡᠨᠡᠬᠦ ᠭᠤᠶᠤᠴᠢᠯᠠᠭᠠ ᠶ᠋ᠢ ᠬᠦᠯᠢᠶᠡᠨ ᠠᠪᠴᠤ ᠡᠳᠡᠭᠡᠷ ᠠᠮᠢᠲᠠᠨ ᠤ᠋ ᠠᠮᠢ ᠶ᠋ᠢ ᠠᠪᠤᠷᠠᠳᠠᠭ> ᠪᠠᠢᠨᠠ᠃ ᠠᠪᠠ ᠬᠤᠷᠢᠶᠠᠬᠤ ᠳᠣᠬᠢᠶᠠ ᠲᠠᠯᠪᠢᠮᠠᠭᠴᠠ᠂ ᠦᠬᠦᠯ ᠡᠴᠡ ᠭᠡᠯᠳᠦᠷᠢᠭᠰᠡᠨ ᠠᠮᠢᠲᠠᠳ ᠠᠶᠤᠨ ᠡᠮᠢᠶᠡᠭᠰᠡᠭᠡᠷ ᠣᠢ ᠰᠢᠭᠤᠢ ᠤᠷᠤᠭᠤ ᠳᠤᠲᠠᠭᠠᠨ᠂ ᠡᠷᠭᠢᠭᠡᠳ ᠡᠷᠬᠡ ᠴᠢᠯᠥᠭᠡ ᠲᠡᠢ ᠠᠮᠢᠳᠤᠷᠠᠬᠤ ᠪᠣᠯᠤᠨᠠ》 ᠭᠡᠵᠡᠢ᠃
ᠲᠠᠷᠮᠢᠽᠢ ᠣᠷᠴᠢᠮ ᠤ᠋ᠨ ᠬᠦᠷᠢᠶᠡ ᠠᠪᠠ ᠨᠢ ᠳᠥᠷᠪᠡᠨ ᠰᠠᠷᠠ ᠦᠷᠭᠦᠯᠵᠢᠯᠡᠪᠡ᠃ ᠡᠨᠡ ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠬᠣᠭᠣᠷᠣᠨᠳᠣ ᠠᠷᠪᠠᠨ ᠲᠦᠮᠡᠨ ᠮᠣᠩᠭᠣᠯᠴᠤᠳ ᠪᠦᠷᠢᠮᠦᠰᠦᠨ ᠡᠩᠬᠡ ᠠᠮᠤᠷ ᠪᠠᠢᠬᠤ ᠮᠡᠲᠦ ᠶᠠᠮᠠᠷ ᠴᠤ᠌ ᠵᠣᠪᠠᠨᠢᠯ ᠦᠭᠡᠢ ᠪᠡᠷ ᠠᠭᠤᠯᠠ ᠵᠡᠪᠡ ᠪᠤᠶᠤ ᠣᠢ ᠰᠢᠭᠤᠢ ᠳᠣᠲᠣᠷᠠ ᠭᠦᠶᠦᠯᠳᠦᠨ ᠡᠷᠭᠢᠯᠳᠦᠵᠦ ᠪᠠᠢᠵᠠᠢ᠃ ᠲᠡᠳᠡᠨ ᠦ᠌ ᠬᠢᠬᠦ ᠶᠣᠰᠣᠲᠠᠢ ᠭᠠᠭᠴᠠ ᠠᠵᠢᠯ ᠨᠢ ᠳᠠᠷᠤᠢ ᠶᠠᠮᠠᠷᠴᠤ ᠠᠮᠢᠲᠠᠨ ᠢ᠋ ᠳᠤᠲᠠᠭᠠᠯᠭᠠᠬᠤ ᠦᠭᠡᠢ ᠭᠡᠰᠡᠨ ᠤᠴᠢᠷ ᠤ᠋ᠨ ᠲᠡᠳᠦᠢ ᠪᠠᠢᠯᠠ᠃ ᠭᠡᠲᠡᠯᠡ ᠡᠨᠡ ᠬᠣᠭᠣᠷᠣᠨᠳᠣ ᠨᠢ ᠰᠢᠨᠡ ᠳᠠᠢᠰᠤᠨ ᠪᠣᠯᠤᠨ ᠰᠢᠨᠡ ᠠᠶᠤᠯ ᠲᠦᠭᠰᠢᠭᠦᠷᠢ ᠳᠥᠷᠪᠡᠨ ᠵᠦᠭ ᠡᠴᠡ ᠡᠭᠦᠰᠴᠦ ᠢᠷᠡᠯᠡ᠃
( ᠭᠤᠷᠪᠠ) ᠪᠠᠢᠯᠳᠤᠭᠠᠨ ᠤ᠋ ᠲᠥᠯᠥᠪᠯᠡᠭᠡ ᠶ᠋ᠢᠨ ᠨᠢᠭᠤᠴᠠ ᠮᠡᠳᠡᠭᠡ
ᠮᠦᠬᠠᠮᠸᠳ᠋ ᠱᠠᠭ ᠦᠬᠦᠭᠰᠡᠨ ᠪᠣᠯᠪᠠᠴᠤ ᠲᠡᠷᠡ ᠦᠬᠦᠬᠦ ᠡᠴᠡ ᠪᠡᠨ ᠡᠮᠦᠨᠡ᠂ ᠲᠡᠭᠦᠨ ᠦ᠌ ᠡᠬᠡ ᠶ᠋ᠢᠨ ᠬᠠᠢᠷᠠᠲᠤ ᠬᠥᠪᠡᠭᠦᠨ ᠪᠣᠯᠵᠤ ᠪᠠᠢᠭᠰᠠᠨ ᠵᠠᠩ ᠴᠢᠨᠠᠷ ᠨᠢ ᠥᠭᠡᠨᠴᠡ ᠵᠥᠭᠡᠯᠡᠨ ᠣᠰᠷᠠᠭᠱᠠ ᠶ᠋ᠢᠨ ᠣᠷᠣᠨ ᠳ᠋ᠤᠨᠢ ᠴᠣᠭ ᠰᠦᠯᠳᠡ ᠲᠡᠢ ᠲᠡᠭᠦᠯᠳᠡᠷ ᠵᠣᠷᠢᠭ ᠲᠠᠢ ᠰᠥᠰᠥ ᠶᠡᠬᠡ ᠲᠡᠢ ᠥᠪᠡᠷ ᠦ᠋ᠨ ᠬᠥᠪᠡᠭᠦᠨ ᠵᠸᠯᠡᠯ— ᠡᠳ᠋ — ᠳ᠋ᠢᠨ᠂ ᠮᠦᠬᠠᠮᠸᠳ᠋ᠢ᠋ ᠬᠠᠭᠠᠨ ᠤ᠋ ᠰᠠᠭᠤᠷᠢᠨ ᠢ᠋ ᠵᠠᠯᠭᠠᠮᠵᠢᠯᠠᠭᠤᠯᠬᠤ ᠪᠠᠷ ᠰᠣᠩᠭᠣᠵᠠᠢ᠃ ᠵᠸᠯᠡᠯ— ᠡᠳ᠋— ᠳ᠋ᠢᠨ ᠪᠠᠰᠠ ᠮᠣᠩᠭᠣᠯᠴᠤᠳ ᠯᠤᠭᠠ ᠶ᠋ᠢᠨ ᠲᠡᠮᠡᠴᠡᠯ ᠢ᠋ ᠳᠠᠬᠢᠨ ᠬᠥᠭᠵᠢᠭᠡᠬᠦ ᠪᠡᠷ ᠱᠠᠭᠠᠷᠳᠠᠵᠤ ᠪᠠᠢᠭᠰᠠᠨ ᠰᠠᠭᠤᠭᠠᠯᠢ ᠠᠷᠠᠳ ᠤ᠋ᠨ ᠬᠦᠷᠢᠶᠡᠯᠡᠯ ᠢ᠋ ᠣᠯᠵᠤ ᠪᠠᠢᠭᠰᠠᠨ ᠶᠤᠮ᠃ ᠭᠡᠪᠡᠴᠦ ᠬᠣᠷᠰᠧᠮ ᠦ᠋ᠨ ᠵᠠᠩᠵᠤᠨ ᠨᠠᠷ ᠣᠰᠷᠠᠭᠱᠠ ᠶ᠋ᠢ ᠬᠠᠭᠠᠨ ᠪᠣᠯᠭᠠᠪᠠᠯ ᠡᠷᠬᠡ ᠴᠢᠯᠥᠭᠡ ᠲᠡᠢ ᠪᠣᠯᠬᠤ ᠮᠠᠭᠠᠳ᠂ ᠡᠢᠮᠦ ᠡᠷᠬᠡ ᠴᠢᠯᠥᠭᠡ ᠨᠢ ᠠᠯᠤᠰ ᠬᠣᠯᠠ ᠡᠴᠡ ᠢᠷᠡᠭᠰᠡᠨ ᠮᠣᠩᠭᠣᠯᠴᠤᠳ ᠲᠠᠢ ᠪᠠᠢᠯᠳᠤᠭᠠᠨ ᠬᠢᠬᠦ ᠡᠴᠡ ᠴᠢᠬᠤᠯᠠ ᠭᠡᠵᠦ ᠪᠣᠳᠣᠭᠳᠠᠵᠤ ᠪᠠᠢᠭᠰᠠᠨ ᠪᠣᠯᠬᠣᠷ᠂ ᠵᠸᠯᠡᠯ— ᠡᠳ᠋ — ᠳ᠋ᠢᠨ ᠦ᠌ ᠥᠭᠡᠳᠡ ᠡᠴᠡ ᠬᠤᠤᠪᠢᠯᠳᠤᠯᠭᠠ ᠬᠢᠵᠦ ᠪᠠᠢᠵᠠᠢ᠃ ᠵᠸᠯᠡᠯ— ᠡᠳ᠋ — ᠳ᠋ᠢᠨ ᠪᠣᠯ ᠬᠤᠷᠠᠱᠠᠨ ᠳ᠋ᠤ᠌ ᠳᠤᠲᠠᠭᠠᠵᠤ ᠶᠠᠪᠤᠭᠠᠳ ᠵᠠᠮ ᠵᠠᠭᠤᠷᠠ ᠪᠠᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠲᠣᠮᠢᠯᠠᠭᠰᠠᠨ ᠴᠡᠷᠢᠭ ᠢ᠋ ᠳᠡᠢᠯᠦᠭᠰᠡᠨ ᠬᠣᠢᠨᠠ ᠭᠡᠨᠡᠳᠲᠡ ᠴᠢᠮᠡᠭᠡ ᠲᠠᠰᠤᠷᠠᠭᠠᠳ ᠬᠠᠮᠢᠭᠠ ᠣᠷᠣᠭᠰᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠪᠣᠯᠵᠠᠢ᠃ ᠬᠡᠨ ᠪᠣᠯᠪᠠᠴᠤ ᠲᠡᠭᠦᠨ ᠦ᠌ ᠶᠠᠭ ᠬᠠᠮᠢᠭᠠ ᠪᠠᠢᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ᠂ ᠬᠣᠵᠢᠮ ᠨᠢ ᠮᠣᠩᠭᠣᠯᠴᠤᠳ ᠲᠤ᠌ ᠳᠡᠢᠯᠦᠭᠳᠡᠭᠰᠡᠨ ᠭᠡᠬᠦ᠂ ᠡᠰᠡᠬᠦᠯᠡ ᠮᠣᠩᠭᠣᠯᠴᠤᠳ ᠲᠠᠢ ᠪᠠᠢᠯᠳᠤᠬᠤ ᠶ᠋ᠢᠨ ᠲᠥᠯᠥᠭᠡ ᠬᠦᠴᠦᠷᠬᠡᠭ ᠶᠡᠬᠡ ᠴᠡᠷᠢᠭ ᠢ᠋ ᠵᠣᠬᠢᠶᠠᠨ ᠪᠠᠢᠭᠤᠯᠬᠤ ᠪᠣᠯᠤᠯᠲᠠᠢ ᠭᠡᠬᠦ ᠮᠡᠲᠦ ᠶ᠋ᠢᠨ ᠬᠦᠨᠳᠦ ᠴᠢᠬᠤᠯᠠ ᠴᠤᠤᠷᠬᠠᠯ ᠡᠯᠡ ᠭᠠᠵᠠᠷ ᠲᠤ᠌ ᠳᠡᠭᠳᠡᠵᠦ ᠪᠠᠢᠭᠰᠠᠨ ᠲᠡᠳᠦᠢ ᠪᠢᠯᠡ᠃
ᠣᠰᠷᠠᠭᠱᠠ ᠪᠣᠯᠤᠨ ᠬᠣᠷᠰᠧᠮ ᠦ᠋ᠨ ᠪᠤᠰᠤᠳ ᠲᠦᠰᠢᠮᠡᠳ ᠨᠢ ᠮᠣᠩᠭᠣᠯᠴᠤᠳ ᠢᠷᠡᠬᠦ ᠡᠴᠡ ᠡᠮᠦᠨᠡ ᠨᠢ ᠳᠤᠲᠠᠭᠠᠭᠰᠠᠨ ᠪᠣᠯᠪᠠᠴᠤ ᠪᠠᠢᠯᠳᠤᠭᠠᠨ ᠤ᠋ ᠳᠤᠮᠳᠠ ᠣᠯᠵᠠᠯᠠᠭᠳᠠᠭᠠᠳ ᠠᠯᠠᠭᠳᠠᠪᠠ᠃ ᠳᠠᠷᠠᠭᠠ ᠳ᠋ᠤᠨᠢ ᠮᠣᠩᠭᠣᠯ ᠴᠡᠷᠢᠭ ᠠᠮᠣᠳᠠᠷᠢᠶᠠ ᠭᠣᠣᠯ ᠳᠠᠭᠠᠤ ᠥᠩ ᠰᠢᠮᠡᠯᠢᠭ ᠣᠷᠣᠨ ᠢ᠋ ᠪᠤᠯᠢᠶᠠᠭᠰᠠᠭᠠᠷ ᠭᠣᠣᠯ ᠤᠷᠤᠭᠤ ᠶᠠᠪᠤᠵᠠᠢ᠃ ᠡᠨᠡᠬᠦ ᠣᠷᠣᠨ ᠪᠣᠯ ᠬᠥᠮᠦᠨ ᠠᠮᠠ ᠪᠠᠷ ᠠᠷᠪᠢᠨ ᠪᠥᠭᠡᠳ ᠮᠠᠰᠢ ᠪᠠᠶᠠᠯᠢᠭ ᠬᠣᠲᠠ ᠪᠠᠯᠭᠠᠰᠤᠨ ᠪᠤᠶᠤ ᠠᠢᠯ ᠲᠣᠰᠬᠣᠨ ᠲᠠᠢ ᠭᠠᠵᠠᠷ ᠮᠥᠨ᠂ ᠡᠯᠡᠰᠦᠷᠬᠡᠭ ᠭᠠᠵᠠᠷ ᠲᠤ᠌ ᠱᠣᠷᠣ ᠰᠢᠭᠠᠭᠠᠳ ᠲᠠᠯᠪᠢᠭᠰᠠᠨ ᠮᠡᠲᠦ ᠢᠬᠴᠤ ᠬᠣᠲᠠ ᠨᠤᠭᠤᠳ ᠨᠢ ᠨᠢᠭᠡᠳ ᠨᠢᠭᠡ ᠪᠡᠷ ᠪᠦᠷ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠭᠠᠷ ᠲᠤ᠌ ᠣᠷᠣᠵᠠᠢ᠃ ᠮᠣᠩᠭᠣᠯ ᠴᠡᠷᠢᠭ ᠣᠳᠣ ᠵᠣᠭᠰᠣᠬᠤ ᠦᠭᠡᠢ ᠪᠣᠯᠬᠤ ᠦᠭᠡᠢ ᠪᠣᠯᠪᠠ᠃ ᠠᠮᠤᠳᠠᠷᠢᠶᠠ ᠭᠣᠣᠯ ᠤ᠋ᠨ ᠭᠤᠷᠪᠠᠯᠵᠢᠨ ᠬᠣᠢᠭ ᠲᠤ᠌ ᠪᠠᠢᠬᠤ ᠥᠷᠭᠡᠨᠴᠢ ᠬᠣᠲᠠ ᠪᠠᠷᠤᠭᠲᠠᠢ ᠳ᠋ᠤ᠌ ᠠᠪᠲᠠᠬᠤ ᠦᠭᠡᠢ ᠤᠴᠢᠷ ᠡᠴᠡ ᠲᠡᠢᠮᠦ ᠪᠣᠯᠤᠭᠰᠠᠨ ᠶᠤᠮ᠃ ᠡᠨᠡ ᠬᠣᠲᠣᠭᠣᠷ ᠲᠠᠯᠠ ᠭᠠᠵᠠᠷ ᠲᠤ᠌ ᠶᠠᠮᠠᠷᠴᠤ ᠬᠡᠰᠡᠭ ᠲᠡᠢ ᠴᠢᠯᠠᠭᠤ ᠣᠯᠳᠠᠬᠤ ᠦᠭᠡᠢ᠂ ᠰᠢᠨᠡ ᠵᠡᠪᠰᠡᠭ ᠦ᠋ᠨ ᠰᠦᠷ ᠬᠦᠴᠦᠨ ᠢ᠋ ᠦᠵᠡᠭᠦᠯᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠨᠠ᠃ ᠲᠡᠭᠡᠭᠡᠳ ᠮᠣᠳᠣ ᠶ᠋ᠢ ᠣᠭᠲᠣᠯᠤᠭᠠᠳ ᠬᠡᠰᠡᠭᠯᠡᠵᠦ ᠤᠰᠤᠨ ᠳ᠋ᠤ᠌ ᠳᠡᠪᠲᠦᠭᠡᠨ ᠬᠠᠷᠪᠤᠭᠰᠠᠨ ᠪᠣᠯᠪᠠᠴᠤ᠂ ᠣᠷᠣᠯᠠᠭᠤᠯᠤᠭᠰᠠᠨ ᠶᠠᠭᠤᠮᠠ ᠲᠡᠳᠦᠢ ᠲᠤᠰᠠ ᠭᠠᠷᠭᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠮᠣᠩᠭᠣᠯ ᠴᠡᠷᠢᠭ ᠦ᠋ᠳ ᠬᠣᠲᠠ ᠤᠷᠤᠭᠤ ᠰᠢᠪᠲᠤᠯᠤᠨ ᠴᠣᠬᠢᠭᠰᠠᠨ ᠨᠢ ᠤᠳᠠᠭᠠ ᠪᠦᠷᠢ ᠶᠡᠬᠡ ᠬᠣᠬᠢᠷᠠᠯ ᠣᠯᠤᠭᠠᠳ ᠤᠬᠤᠷᠢᠬᠤ ᠦᠭᠡᠢ ᠪᠡᠷ ᠪᠣᠯᠬᠤ ᠦᠭᠡᠢ ᠪᠣᠯᠪᠠ᠃
ᠲᠠᠷᠮᠢᠽᠢ ᠣᠷᠴᠢᠮ ᠲᠠᠯᠪᠢᠭᠰᠠᠨ ᠬᠦᠷᠢᠶᠡ ᠠᠪᠠ ᠪᠠᠷᠤᠭ ᠲᠡᠭᠦᠰᠬᠦ ᠦᠶᠡ ᠳ᠋ᠦ᠍ ᠦᠨᠡᠨᠴᠢ ᠰᠢᠳᠤᠷᠭᠤ ᠪᠣᠭᠣᠷᠴᠤ ᠶ᠋ᠢᠨ ᠨᠢᠭᠡᠨ ᠮᠡᠳᠡᠭᠦᠯᠦᠯᠲᠡ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠡᠪᠡ᠃ ᠵᠥᠴᠢ ᠪᠣᠯᠤᠨ ᠴᠠᠭᠠᠲᠠᠢ ᠬᠣᠶᠠᠷ ᠨᠣᠶᠠᠨ ᠤ᠋ ᠬᠣᠭᠣᠷᠣᠨᠳᠣ ᠬᠦᠨᠳᠦ ᠶᠡᠬᠡ ᠵᠢᠭᠤᠷᠠᠭᠠᠨ ᠭᠠᠷᠪᠠ ᠭᠡᠨᠡ᠃ ᠵᠥᠴᠢ ᠨᠡᠢᠰᠯᠡᠯ ᠪᠣᠯᠵᠤ ᠪᠠᠢᠭᠰᠠᠨ ᠥᠷᠭᠡᠨᠴᠢ ᠬᠣᠲᠠ ᠶ᠋ᠢ ᠬᠠᠷᠢᠶᠠ ᠭᠠᠵᠠᠷ ᠤ᠋ᠨ ᠢ᠋ᠶ᠋ᠠᠨ ᠨᠢᠭᠡᠨ ᠬᠡᠰᠡᠭ ᠪᠣᠯᠭᠠᠬᠤ ᠶ᠋ᠢ ᠬᠦᠰᠡᠪᠡ᠃ ᠨᠥᠭᠦᠭᠡ ᠲᠠᠯᠠ ᠳ᠋ᠤᠨᠢ ᠴᠠᠭᠠᠲᠠᠢ ᠠᠷᠠᠯ ᠲᠠᠩᠭᠢᠰ ᠬᠦᠷᠲᠡᠯᠡᠬᠢ ᠪᠦᠬᠦ ᠭᠠᠵᠠᠷ ᠢ᠋ ᠴᠢᠩᠭᠢᠰ ᠬᠠᠭᠠᠨ ᠲᠡᠭᠦᠨ ᠳ᠋ᠦ᠍ ᠥᠭᠬᠦ ᠪᠡᠷ ᠪᠣᠯᠵᠣᠭᠰᠠᠨ ᠭᠠᠵᠠᠷ ᠭᠡᠵᠦ ᠬᠠᠷᠢᠶᠠᠲᠤ ᠴᠡᠷᠢᠭ ᠲᠡᠭᠡᠨ ᠵᠥᠴᠢ ᠶ᠋ᠢᠨ ᠵᠠᠷᠯᠢᠭ ᠡᠴᠡ ᠵᠥᠷᠢᠴᠡᠭᠰᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠪᠠ᠁ ᠃ ᠴᠢᠩᠭᠢᠰ ᠬᠠᠭᠠᠨ ᠡᠨᠡᠬᠦ ᠮᠡᠳᠡᠭᠦᠯᠦᠯᠲᠡ ᠶ᠋ᠢ ᠰᠣᠨᠣᠰᠤᠭᠠᠳ ᠶᠡᠬᠡ ᠦᠨᠡᠮᠰᠢᠵᠦ ᠪᠣᠳᠣᠯᠠ᠃ ᠲᠡᠭᠡᠭᠡᠳ ᠲᠡᠷᠡ《ᠰᠤᠮᠤ ᠮᠡᠲᠦ ᠲᠦᠷᠭᠡᠨ》 ᠬᠣᠶᠠᠷ ᠡᠯᠴᠢ ᠶ᠋ᠢ ᠳᠠᠷᠤᠢ ᠲᠦᠷᠭᠡᠨ ᠮᠣᠷᠳᠠᠭᠤᠯᠬᠤ ᠪᠠᠷ ᠵᠠᠷᠯᠢᠭᠳᠠᠵᠠᠢ᠃ ᠨᠢᠭᠡ ᠶ᠋ᠢ ᠨᠢ ᠬᠣᠷᠧᠰᠮ ᠦ᠋ᠨ ᠵᠦᠭ ᠲᠣᠮᠢᠯᠠᠭᠠᠳ᠂ ᠪᠦᠬᠦ ᠴᠡᠷᠢᠭ ᠢ᠋ ᠵᠢᠯᠣᠭᠣᠳᠬᠤ ᠬᠠᠮᠤᠭ ᠳᠡᠭᠡᠳᠦ ᠡᠷᠬᠡ ᠶ᠋ᠢ ᠥᠭᠡᠳᠡᠢ ᠳ᠋ᠦ᠍ ᠲᠤᠰᠢᠶᠠᠵᠤ᠂ ᠬᠣᠶᠠᠷ ᠠᠬᠠ ᠨᠢ ᠲᠡᠭᠦᠨ ᠳ᠋ᠦ᠍ ᠵᠠᠬᠢᠷᠤᠭᠳᠠᠬᠤ ᠪᠠᠷ ᠵᠠᠷᠯᠠᠪᠠ᠃ ᠬᠡᠨ ᠠᠯᠢᠨ ᠴᠤ᠌ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠡᠴᠡ ᠵᠥᠷᠢᠴᠡᠭᠰᠡᠨ ᠦᠭᠡᠢ᠂ ᠵᠥᠴᠢ ᠪᠣᠯᠤᠨ ᠴᠠᠭᠠᠲᠠᠢ ᠬᠣᠶᠠᠭᠤᠯᠠ ᠡᠢᠮᠦ ᠢᠴᠢᠭᠦᠷᠢ ᠲᠡᠢ ᠪᠣᠯᠤᠭᠰᠠᠨ ᠳ᠋ᠤ᠌ ᠳᠣᠲᠣᠷᠠ ᠪᠠᠨ ᠠᠭᠤᠷᠯᠠᠭᠰᠠᠨ ᠪᠣᠯᠪᠠᠴᠤ ᠳᠠᠭᠤᠨ ᠭᠠᠷᠭᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠵᠠᠷᠯᠢᠭ ᠢ᠋ ᠳᠠᠭᠠᠪᠠ᠃ ᠥᠭᠡᠳᠡᠢ ᠶᠡᠬᠡ ᠤᠷᠠᠨ ᠠᠷᠭᠠ ᠲᠠᠢ ᠥᠴᠦᠬᠡᠨ ᠴᠦ᠍ ᠡᠷᠬᠡ ᠰᠦᠷ ᠢ᠋ᠶ᠋ᠡᠨ ᠬᠡᠷᠡᠭᠯᠡᠭᠰᠡᠨ ᠦᠭᠡᠢ᠃ ᠵᠠᠷᠢᠮ ᠳ᠋ᠠᠭᠠᠨ ᠡᠭᠦᠨ ᠡᠴᠡ ᠨᠢ ᠪᠠᠰᠠ ᠵᠠᠷᠢᠮ ᠳ᠋ᠠᠭᠠᠨ ᠨᠥᠭᠦᠭᠡ ᠡᠴᠡ ᠨᠢ ᠰᠠᠨᠠᠯ ᠠᠰᠠᠭᠤᠵᠤ ᠨᠡᠯᠢᠶᠡᠳ ᠬᠤᠷᠳᠤᠨ ᠢ᠋ᠶ᠋ᠠᠷ ᠵᠢᠯᠣᠭᠣᠳᠤᠯᠭᠠ ᠪᠠᠨ ᠨᠢᠭᠡᠳᠬᠡᠵᠦ ᠴᠢᠳᠠᠭᠰᠠᠨ ᠶᠤᠮ᠃ ᠲᠡᠭᠦᠨ ᠦ᠌ ᠵᠢᠯᠣᠭᠣᠳᠤᠯᠭᠠ ᠶ᠋ᠢᠨ ᠳᠣᠣᠷᠠ ᠥᠷᠭᠡᠨᠴᠢ ᠶ᠋ᠢᠨ ᠳᠡᠭᠡᠳᠦ ᠤᠷᠤᠰᠬᠠᠯ ᠳ᠋ᠤ᠌ ᠠᠮᠤᠲᠠᠷᠢᠶᠠ ᠭᠣᠣᠯ ᠤ᠋ᠨ ᠤᠷᠤᠰᠬᠠᠯ ᠢ᠋ ᠵᠠᠰᠠᠨ ᠬᠤᠪᠢᠷᠠᠭᠤᠯᠵᠤ ᠡᠬᠢᠯᠡᠪᠡ᠃
ᠬᠣᠶᠠᠳᠤᠭᠠᠷ《ᠰᠤᠮᠤ ᠮᠡᠲᠦ ᠲᠦᠷᠭᠡᠨ》 ᠡᠯᠴᠢ ᠨᠢ ᠺᠠᠰᠫᠢ ᠲᠠᠩᠭᠢᠰ ᠢ᠋ ᠴᠢᠭᠯᠡᠭᠡᠳ ᠳᠠᠪᠬᠢᠭᠤᠯᠵᠠᠢ᠃ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠢ᠋ ᠳᠠᠷᠤᠢ ᠲᠦᠷᠭᠡᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠢᠷᠡᠭᠲᠦᠨ ᠭᠡᠰᠡᠨ ᠶᠦᠮ᠃ ᠰᠦᠪᠡᠭᠡᠳᠡᠢ ᠪᠠᠰᠠ《ᠰᠤᠮᠤ ᠮᠡᠲᠦ ᠲᠦᠷᠭᠡᠨ》 ᠡᠯᠴᠢᠨ ᠦ᠌ ᠶᠠᠪᠤᠬᠤ ᠲᠠᠢ ᠠᠳᠠᠯᠢ ᠪᠠᠷ ᠲᠣᠯᠣᠭᠠᠢ ᠡᠴᠡ ᠪᠠᠨ ᠬᠥᠯ ᠳ᠋ᠡᠭᠡᠨ ᠬᠦᠷᠲᠡᠯᠡ ᠪᠦᠷ ᠪᠦᠰᠡ ᠪᠡᠷ ᠣᠷᠢᠶᠠᠭᠠᠳ ᠡᠳᠦᠷ ᠰᠥᠨᠢ ᠢᠯᠭᠠᠯ ᠦᠭᠡᠢ ᠮᠣᠷᠳᠠᠭᠠᠳ ᠭᠠᠷᠤᠯᠠ᠃ ᠳᠥᠴᠢ ᠡᠴᠡ ᠲᠠᠪᠢᠨ ᠺᠢᠯᠣᠮᠧᠲ᠋ᠷ ᠦ᠋ᠨ ᠦᠵᠦᠭᠦᠷ ᠲᠦ᠍ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠥᠷᠲᠡᠭᠡ ᠲᠡᠭᠦᠨ ᠳ᠋ᠦ᠍ ᠬᠠᠮᠤᠭ ᠰᠠᠢᠨ ᠮᠣᠷᠢ ᠪᠡᠯᠡᠳᠬᠡᠵᠦ ᠥᠭᠴᠦ ᠪᠠᠢᠭᠰᠠᠨ ᠪᠢᠯᠡ᠃ ᠨᠢᠭᠡᠨ ᠥᠷᠲᠡᠭᠡ ᠳ᠋ᠦ᠍ ᠶᠠᠭᠤ ᠴᠤ ᠪᠣᠯᠤᠨᠠ ᠬᠠᠰᠢ ᠶᠠᠰᠢ ᠢᠳᠡᠭᠡᠳ᠂ ᠨᠥᠭᠦᠭᠡ ᠥᠷᠲᠡᠭᠡ ᠳ᠋ᠦ᠍ ᠪᠦᠬᠦᠯᠢ ᠪᠡᠷ ᠢ᠋ᠶ᠋ᠡᠨ ᠬᠡᠳᠦᠬᠡᠨ ᠴᠠᠭ ᠤᠨᠲᠠᠭᠠᠳ ᠳᠠᠬᠢᠨ ᠮᠣᠷᠢᠨ ᠴᠢᠨᠡᠭᠡ ᠪᠡᠷ ᠳᠠᠪᠬᠢᠭᠤᠯᠳᠠᠭ ᠶᠤᠮ᠃ ᠨᠢᠭᠡᠨ ᠭᠠᠷᠠᠭ ᠤ᠋ᠨ ᠬᠣᠭᠣᠷᠣᠨᠳᠣ ᠡᠳᠦᠷ ᠰᠥᠨᠢ ᠢᠯᠭᠠᠯ ᠦᠭᠡᠢ ᠳᠣᠪᠲᠣᠯᠤᠭᠰᠠᠭᠠᠷ ᠬᠠᠭᠠᠨ ᠡᠵᠡᠨ ᠦ᠌ ᠬᠢᠨᠢ ᠪᠠᠢᠭᠰᠠᠨ ᠬᠣᠶᠠᠷ ᠮᠢᠩᠭᠠᠨ ᠺᠢᠯᠣᠮᠧᠲ᠋ᠷ ᠦ᠋ᠨ ᠠᠯᠤᠰ ᠭᠠᠵᠠᠷ ᠲᠤ ᠮᠥᠨ ᠨᠢᠭᠡ ᠯᠡ ᠭᠠᠷᠠᠭ ᠲᠤ ᠰᠢᠪᠲᠤ ᠬᠦᠷᠦᠭᠡᠳ ᠢᠷᠡᠵᠡᠢ᠃
ᠴᠢᠩᠭᠢᠰ ᠬᠠᠭᠠᠨ ᠵᠦᠳᠡᠷᠡᠵᠦ ᠶᠠᠳᠠᠷᠠᠭᠠᠳ ᠲᠤᠢᠯ ᠳ᠋ᠠᠭᠠᠨ ᠬᠦᠷᠦᠭᠰᠡᠨ ᠥᠷᠯᠥᠭ ᠦ᠋ᠨ ᠢ᠋ᠶ᠋ᠡᠨ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠪᠠ᠃ ᠮᠣᠩᠭᠣᠯ ᠤ᠋ᠨ ᠨᠣᠶᠠᠳ ᠨᠠᠷ ᠢᠯᠠᠯᠲᠠ ᠳ᠋ᠠᠭᠠᠨ ᠪᠠᠶᠠᠷᠯᠠᠭᠠᠳ ᠬᠣᠵᠢᠮ ᠬᠣᠢᠰᠢ ᠠᠯᠢ ᠣᠷᠣᠨ ᠢ᠋ ᠬᠤᠪᠢᠶᠠᠵᠤ ᠥᠭᠬᠦ ᠪᠣᠯᠪᠠᠤ ᠭᠡᠮᠡᠨ ᠪᠤᠯᠢᠶᠠᠯᠳᠤᠵᠤ ᠪᠠᠢᠭᠠ ᠦᠶᠡᠰ᠂ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠨᠠᠷ ᠨᠢ ᠰᠥᠰᠥ ᠶᠡᠬᠡ ᠲᠡᠢ ᠰᠢᠨᠡ ᠪᠡᠷ ᠮᠣᠷᠳᠠᠵᠤ ᠰᠦᠷ ᠠᠯᠳᠠᠷᠲᠠᠢ ᠪᠠᠢᠯᠳᠤᠭᠠᠨ ᠤ᠋ ᠭᠠᠪᠢᠶᠠ ᠶ᠋ᠢ ᠵᠡᠭᠦᠳᠦᠯᠡᠵᠦ ᠪᠠᠢᠭᠠ ᠦᠶᠡ ᠳ᠋ᠦ᠍᠂ ᠴᠢᠩᠭᠢᠰ ᠬᠠᠭᠠᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠠᠢᠳᠠᠯ ᠤ᠋ᠨ ᠰᠦᠷᠡᠬᠡᠢ ᠬᠦᠨᠳᠦ ᠴᠢᠨᠠᠷ ᠢ᠋ ᠠᠩᠬᠠᠷᠤᠭᠰᠠᠭᠠᠷ ᠪᠠᠢᠭᠰᠠᠨ ᠠ᠋ᠴᠠ ᠲᠡᠢᠮᠦ ᠪᠣᠯᠤᠭᠰᠠᠨ ᠶᠤᠮ᠃ ᠲᠡᠷᠡ ᠬᠣᠷᠢᠨ ᠲᠠᠪᠤᠨ ᠲᠦᠮᠡᠨ ᠮᠣᠩᠭᠣᠯ ᠤ᠋ᠨ ᠮᠣᠷᠢᠲᠤ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠭᠠᠳ ᠡᠨᠡᠬᠦ ᠤᠯᠤᠰ ᠲᠤ ᠢᠷᠡᠭᠰᠡᠨ ᠪᠠᠢᠨᠠ᠃ ᠣᠳᠣ ᠰᠦᠪᠡᠭᠡᠳᠡᠢ ᠵᠡᠪᠡ ᠶ᠋ᠢᠨ ᠬᠠᠮᠲᠤ ᠭᠤᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠨᠢ ᠥᠷᠥᠨᠡᠲᠦ ᠳ᠋ᠦ᠍ ᠪᠠᠢᠨᠠ᠃ ᠬᠡᠦᠬᠡᠳ ᠨᠢ ᠲᠠᠪᠤᠨ ᠲᠦᠮᠡᠨ ᠴᠡᠷᠢᠭ ᠠᠪᠤᠭᠠᠳ ᠤᠮᠠᠷᠠᠲᠤ ᠵᠦᠭ ᠮᠣᠷᠳᠠᠭᠰᠠᠨ ᠪᠠᠢᠨᠠ᠃ ᠤᠢᠭᠤᠷ ᠸᠠᠩ ᠪᠣᠯᠤᠨ ᠠᠷᠮᠠᠯᠢᠭ ᠤ᠋ᠨ ᠬᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠭᠠᠳ ᠤᠯᠤᠰ ᠲᠠᠭᠠᠨ ᠬᠠᠷᠢᠬᠤ ᠶ᠋ᠢ ᠭᠤᠶᠤᠴᠢᠯᠠᠭᠰᠠᠨ ᠪᠣᠯᠬᠣᠷ ᠴᠢᠩᠭᠢᠰ ᠬᠠᠭᠠᠨ ᠵᠥᠪᠰᠢᠶᠡᠷᠡᠭᠰᠡᠨ ᠶᠦᠮ᠃ ᠰᠠᠨᠠᠭᠠ ᠮᠠᠭᠤᠲᠠᠢ ᠪᠥᠭᠡᠳ ᠢᠲᠡᠭᠡᠵᠦ ᠪᠣᠯᠤᠮᠠᠷ ᠦᠭᠡᠢ ᠬᠥᠮᠦᠰ ᠢ᠋ ᠰᠢᠯᠢᠳᠡᠭ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠪᠠᠨ ᠪᠠᠢᠯᠳᠤᠬᠤ ᠶ᠋ᠢ ᠬᠦᠰᠡᠬᠦ ᠦᠭᠡᠢ ᠲᠤᠯᠠ ᠲᠡᠭᠡᠭᠰᠡᠨ ᠪᠠᠢᠨᠠ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠣᠯᠠᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠪᠠᠰᠠ ᠨᠡᠯᠢᠶᠡᠳ ᠬᠥᠨᠥᠭᠡᠯ ᠤᠴᠠᠷᠠᠭᠰᠠᠨ ᠪᠠᠢᠵᠠᠢ᠃ ᠣᠳᠣ ᠳ᠋ᠤ᠌ ᠬᠦᠷᠲᠡᠯᠡ ᠬᠢᠭᠰᠡᠨ ᠪᠠᠢᠯᠳᠤᠭᠠᠨ ᠨᠢ ᠶᠡᠬᠡ ᠲᠣᠭᠰᠢᠨ ᠴᠤ᠌ ᠪᠠᠢᠯᠠ᠃ ᠣᠳᠣ ᠲᠡᠭᠦᠨ ᠦ᠌ ᠭᠠᠷ ᠳᠣᠣᠷᠠ ᠪᠠᠢᠬᠤ ᠮᠣᠩᠭᠣᠯ ᠴᠡᠷᠢᠭ ᠨᠢ ᠠᠷᠪᠠᠨ ᠲᠦᠮᠡ ᠡᠴᠡ ᠢᠯᠡᠭᠦᠦ ᠦᠭᠡᠢ ᠪᠠᠢᠪᠠ᠃ ᠡᠭᠦᠨ ᠳ᠋ᠦ᠍ ᠲᠤᠰ ᠭᠠᠵᠠᠷ ᠡᠴᠡ ᠡᠯᠰᠡᠭᠰᠡᠨ ᠴᠡᠷᠢᠭ ᠢ᠋ ᠨᠡᠮᠡᠪᠡᠯ ᠬᠡᠮᠵᠢᠶᠡ ᠦᠭᠡᠢ ᠣᠯᠠᠨ ᠪᠣᠯᠭᠠᠵᠤ ᠴᠢᠳᠠᠬᠤ ᠪᠣᠯᠪᠠᠴᠤ ᠪᠠᠢᠯᠳᠤᠭᠠᠨ ᠤ᠋ ᠲᠠᠢᠯᠤᠨ ᠳᠡᠢᠯᠦᠭᠳᠡᠬᠦ ᠶ᠋ᠢ ᠲᠠᠰᠤᠯᠬᠤ ᠦᠶᠡ ᠳ᠋ᠦ᠍ ᠶᠠᠭ ᠢᠲᠡᠭᠡᠮᠵᠢᠯᠡᠵᠦ ᠪᠣᠯᠬᠤ ᠨᠢ ᠬᠠᠷᠢᠨ ᠡᠨᠡ ᠠᠷᠪᠠᠨ ᠲᠦᠮᠡᠨ ᠮᠣᠩᠭᠣᠯ ᠴᠡᠷᠢᠭ ᠶᠦᠮ᠃
ᠴᠢᠩᠭᠢᠰ ᠬᠠᠭᠠᠨ ᠤ᠋ ᠡᠨᠡᠬᠦ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠦ᠋ᠨ ᠡᠮᠦᠨᠡ᠂ ᠪᠠᠰᠠ ᠤᠯᠤᠰ ᠤ᠋ᠨ ᠬᠢᠯᠢ ᠨᠢ ᠬᠠᠮᠢᠭᠠ ᠬᠦᠷᠬᠦ ᠶ᠋ᠢ ᠮᠡᠳᠡᠵᠦ ᠣᠯᠤᠭᠠᠳᠤᠢ ᠨᠢᠭᠡᠨ ᠶᠡᠬᠡ ᠬᠠᠭᠠᠨᠲᠤ ᠤᠯᠤᠰ ᠪᠠᠢᠵᠤ ᠪᠠᠢᠨᠠ᠃ ᠵᠥᠴᠢ ᠵᠡᠪᠡ ᠬᠣᠶᠠᠭᠤᠯᠠ ᠬᠣᠶᠠᠷ ᠲᠦᠮᠡᠨ ᠮᠣᠷᠢᠲᠤ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠭᠠᠳ ᠲᠡᠷᠢᠭᠦᠨ ᠳᠠᠪᠠᠭᠠ ᠶ᠋ᠢ ᠳᠠᠪᠠᠭᠠᠳ ᠹᠸᠷᠭᠠᠨᠠ ᠶ᠋ᠢᠨ ᠬᠥᠨᠳᠡᠢ ᠳ᠋ᠦ᠍ ᠪᠠᠭᠤᠭᠰᠠᠨ ᠡᠴᠡ ᠢᠨᠠᠭᠰᠢ᠂ ᠬᠣᠶᠠᠷ ᠵᠢᠯ ᠦ᠋ᠨ ᠲᠤᠷᠰᠢ ᠮᠣᠩᠭᠣᠯ ᠴᠡᠷᠢᠭ ᠦᠷᠭᠦᠯᠵᠢᠯᠡᠨ ᠲᠠᠰᠤᠷᠠᠯ ᠦᠭᠡᠢ ᠢᠯᠠᠯᠲᠠ ᠣᠯᠤᠭᠠᠳ ᠯᠠᠯᠤ ᠶ᠋ᠢᠨ ᠮᠥᠷᠭᠥᠯᠲᠡᠨ ᠦ᠌ ᠶᠢᠷᠲᠢᠨᠴᠦ ᠶ᠋ᠢ ᠬᠥᠷᠪᠡᠭᠦᠯᠦᠭᠰᠡᠨ ᠪᠣᠯᠪᠠᠴᠤ ᠦᠨᠡᠨᠳᠡᠭᠡᠨ ᠡᠵᠡᠯᠡᠵᠦ ᠠᠪᠤᠭᠰᠠᠨ ᠭᠠᠵᠠᠷ ᠨᠢ ᠬᠤᠷᠸᠰᠮ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠵᠡᠭᠦᠨ ᠥᠨᠴᠥᠭ ᠡᠴᠡ ᠬᠡᠲᠦᠷᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠬᠣᠢᠲᠤ ᠲᠠᠯᠠ ᠳ᠋ᠤ᠌ ᠥᠭᠡᠳᠡᠢ ᠴᠣᠬᠣᠮ ᠬᠤᠷᠸᠰᠮ ᠤ᠋ᠨ ᠬᠠᠭᠤᠴᠢᠨ ᠨᠤᠲᠤᠭ ᠳᠡᠪᠢᠰᠬᠡᠷ ᠢ᠋ ᠪᠠᠢᠯᠳᠤᠨ ᠳᠠᠭᠠᠭᠤᠯᠬᠤ ᠪᠠᠷ ᠣᠳᠣ ᠰᠠᠶᠢ ᠡᠬᠢᠯᠡᠭᠡᠳ ᠪᠠᠢᠨᠠ᠃ ᠡᠮᠦᠨᠡ ᠲᠠᠯᠠ ᠳ᠋ᠤ᠌ ᠠᠭᠤᠯᠠᠷᠬᠠᠭ ᠣᠷᠣᠨ ᠤ᠋ ᠤᠯᠤᠰ ᠠᠹᠭᠠᠨᠢᠰᠲ᠋ᠠᠨ ᠪᠠᠢᠵᠤ ᠮᠣᠩᠭᠣᠯ ᠤ᠋ᠨ ᠨᠢᠭᠡᠨ ᠴᠡᠷᠢᠭ ᠴᠤ ᠲᠡᠨᠳᠡ ᠬᠠᠷᠠᠭᠳᠠᠭᠠᠳᠤᠢ ᠪᠢᠯᠡ ᠪᠠᠷᠠᠭᠤᠨ ᠡᠲᠡᠭᠡᠳ ᠲᠦ᠍ ᠪᠠᠢᠬᠤ ᠬᠤᠷᠠᠱᠠᠨ ᠤᠯᠤᠰ ᠲᠤ ᠰᠦᠪᠡᠭᠡᠳᠡᠢ ᠪᠣᠯᠤᠨ ᠵᠡᠪᠡ ᠶ᠋ᠢᠨ ᠴᠡᠷᠢᠭ ᠦᠳᠲᠡᠷ ᠲᠦᠷᠭᠡᠨ ᠥᠩᠭᠡᠷᠡᠭᠡᠳ ᠭᠠᠷᠤᠭᠰᠠᠨ ᠪᠣᠯᠬᠣᠷ ᠮᠣᠩᠭᠣᠯ ᠬᠥᠮᠦᠨ ᠢ᠋ ᠲᠡᠳᠡ ᠪᠠᠰᠠ ᠮᠡᠳᠡᠬᠦ ᠦᠭᠡᠢ ᠪᠠᠢᠭᠰᠠᠭᠠᠷ ᠶᠤᠮ᠃ ᠫᠧᠷᠰ ᠦ᠋ᠨ ᠣᠯᠠᠩᠬᠢ ᠬᠣᠲᠠ ᠨᠢ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠨᠣᠶᠠᠷᠬᠠᠬᠤ ᠡᠷᠬᠡ ᠶ᠋ᠢ ᠮᠡᠳᠡᠷᠡᠨ ᠲᠣᠮᠢᠯᠠᠭᠰᠠᠨ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠶ᠋ᠢ ᠨᠢ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠪᠣᠯᠪᠠᠴᠤ᠂ ᠡᠨᠡ ᠮᠡᠲᠦ ᠶ᠋ᠢᠨ ᠪᠠᠲᠤᠯᠠᠪᠤᠷᠢ ᠨᠢ ᠦᠨᠡᠨ ᠰᠡᠳᠬᠢᠯ ᠡᠴᠡ ᠪᠡᠨ ᠪᠠᠢᠭᠰᠠᠨ ᠶᠤᠮ ᠤᠤ᠂ ᠡᠰᠡᠬᠦᠯᠡ ᠵᠥᠪᠬᠡᠨ ᠪᠤᠯᠢᠶᠠᠭᠳᠠᠬᠤ ᠡᠴᠡ ᠪᠠᠨ ᠬᠡᠯᠲᠦᠷᠢᠬᠦ ᠶ᠋ᠢᠨ ᠲᠥᠯᠥᠭᠡ ᠲᠦᠷ ᠴᠠᠭ ᠤ᠋ᠨ ᠠᠷᠭᠠ ᠤᠬᠠᠭᠠᠨ ᠤ᠋ ᠲᠡᠳᠦᠢ ᠪᠠᠢᠵᠤ᠂ ᠬᠣᠵᠢᠮ ᠪᠦᠬᠦ ᠬᠦᠴᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠡᠳᠡᠷᠭᠦ ᠨᠣᠴᠣᠯᠳᠤᠭᠠᠳ ᠢᠷᠡᠬᠦ ᠵᠠᠯᠢᠬᠠᠢ ᠠᠷᠭᠠ ᠪᠣᠯᠬᠤ ᠶ᠋ᠢ ᠦᠯᠦ ᠮᠡᠳᠡᠨᠡ᠃ ᠬᠡᠷᠪᠡ ᠣᠳᠣ ᠪᠠᠭᠠᠲᠤᠷᠯᠢᠭ ᠪᠥᠭᠡᠳ ᠡᠷᠡᠰ ᠰᠢᠢᠳᠪᠦᠷᠢᠲᠦ ᠴᠢᠨᠠᠷ ᠲᠠᠢ ᠵᠧᠯᠡᠯ— ᠡᠳ᠋— ᠳ᠋ᠢᠨ ᠪᠠᠢᠯᠳᠤᠭᠲᠤᠨ ᠭᠡᠵᠦ ᠤᠷᠢᠶᠠᠯᠠᠪᠠᠯ ᠶᠡᠷᠦ ᠪᠣᠰᠤᠯᠭᠠ ᠪᠣᠯᠵᠤ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠪᠣᠰᠤᠯᠴᠠᠭᠠᠳ ᠬᠡᠳᠦᠨ ᠵᠠᠭᠤᠨ ᠲᠦᠮᠡᠨ ᠴᠡᠷᠢᠭ ᠦ᠋ᠨ ᠬᠦᠴᠦ ᠪᠡᠷ ᠲᠡᠭᠦᠨ ᠲᠡᠢ ᠪᠠᠢᠯᠳᠤᠬᠤ ᠬᠡᠷᠡᠭ ᠪᠣᠯᠬᠤ ᠪᠢᠰᠢᠦ᠁᠃ ᠨᠢᠭᠡᠬᠡᠨ ᠤᠳᠠᠭᠠᠨ ᠤ᠋ ᠰᠢᠢᠳᠪᠦᠷᠢᠲᠦ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠳᠡᠢᠯᠦᠭᠳᠡᠭᠡᠳ ᠢᠷᠡᠪᠡᠯ᠂ ᠬᠣᠷᠢᠨ ᠬᠡᠳᠦᠨ ᠵᠢᠯ ᠦ᠋ᠨ ᠤᠷᠲᠤ ᠬᠤᠭᠤᠴᠠᠭᠠ ᠪᠠᠷ ᠣᠯᠤᠭᠰᠠᠨ ᠢᠯᠠᠯᠲᠠ ᠨᠢ ᠪᠦᠷ ᠦᠭᠡᠢᠰᠬᠡᠭᠳᠡᠬᠦ ᠪᠥᠭᠡᠳ ᠬᠠᠭᠠᠨᠲᠤ ᠤᠯᠤᠰ ᠨᠢ ᠰᠥᠨᠥᠭᠡᠭᠳᠡᠭᠳ ᠳᠠᠭᠤᠰᠬᠤ ᠪᠢᠰᠢᠦ᠃ ᠲᠡᠭᠦᠨ ᠶᠠᠮᠠᠷ ᠴᠤ ᠳ᠋ᠦ᠍ ᠪᠡᠯᠡᠳᠬᠡᠯ ᠴᠡᠷᠢᠭ ᠦᠭᠡᠢ᠂ ᠥᠨᠢ ᠤᠳᠠᠭᠠᠨ ᠤᠯᠠᠮᠵᠢᠯᠠᠭᠰᠠᠨ ᠴᠢᠭᠢᠷᠠᠭ ᠬᠦᠴᠦᠨ ᠢ᠋ᠶ᠋ᠡᠷ ᠨᠢᠭᠡᠳᠬᠡᠭᠰᠡᠨ ᠠᠷᠤ ᠲᠠᠯᠠ ᠨᠢ ᠴᠦ᠍ ᠲᠡᠭᠦᠨ ᠳ᠋ᠦ᠍ ᠲᠤᠰᠠᠯᠠᠮᠵᠢ ᠣᠯᠭᠣᠬᠤ ᠴᠢᠳᠠᠯ ᠦᠭᠡᠢ᠃ ᠲᠡᠷᠡ ᠨᠢᠭᠡᠨᠲᠡ ᠪᠦᠬᠦ ᠵᠡᠪᠰᠡᠭᠲᠦ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠭᠠᠳ ᠢᠷᠡᠴᠢᠬᠡᠭᠰᠡᠨ ᠶᠤᠮ᠃ ᠬᠡᠷᠪᠡ ᠲᠡᠭᠦᠨ ᠦ᠌ ᠴᠡᠷᠢᠭ ᠨᠢ ᠳᠡᠢᠯᠦᠭᠳᠡᠬᠦ ᠳ᠋ᠦ᠍ ᠬᠦᠷᠪᠡᠯ ᠣᠳᠣ ᠪᠦᠬᠦ ᠦᠨᠳᠦᠰᠦᠲᠡᠨ ᠪᠦᠬᠦ ᠠᠢᠮᠠᠭ ᠤᠭᠰᠠᠭᠠ ᠨᠢ ᠰᠠᠯᠵᠤ ᠤᠷᠪᠠᠯᠭᠠ ᠭᠠᠷᠭᠠᠨ ᠳᠣᠲᠣᠭᠠᠳᠤ ᠶ᠋ᠢᠨ ᠲᠡᠢᠨ ᠳᠡᠭᠳᠡᠬᠦ ᠪᠣᠯᠤᠨᠠ᠃
ᠴᠢᠩᠭᠢᠰ ᠬᠠᠭᠠᠨ᠂ ᠰᠦᠪᠡᠭᠡᠳᠡᠢ ᠶ᠋ᠢ ᠳᠠᠭᠤᠳᠠᠵᠤ ᠢᠷᠡᠭᠦᠯᠦᠭᠰᠡᠨ ᠨᠢ ᠳᠠᠢᠰᠤᠨ ᠤ᠋ ᠲᠠᠯᠠ ᠶᠠᠮᠠᠷ ᠪᠣᠯᠤᠯᠴᠠᠭᠠ ᠲᠠᠢ ᠪᠠᠢᠬᠤ᠂ ᠶᠠᠮᠠᠷ ᠬᠡᠷᠡᠭ ᠭᠠᠷᠴᠤ ᠮᠡᠳᠡᠬᠦ ᠶ᠋ᠢ ᠲᠡᠭᠦᠨ ᠡᠴᠡ ᠠᠰᠠᠭᠤᠬᠤ ᠶ᠋ᠢᠨ ᠲᠥᠯᠥᠭᠡ ᠪᠠᠢᠵᠠᠢ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ ᠰᠦᠪᠡᠭᠡᠳᠡᠢ ᠪᠣᠯ ᠱᠠᠭ ᠢ᠋ ᠨᠡᠬᠡᠮᠵᠢᠯᠡᠭᠡᠳ ᠬᠣᠷᠧᠰᠮ ᠤᠯᠤᠰ ᠤ᠋ᠨ ᠪᠦᠬᠦ ᠭᠠᠵᠠᠷ ᠢ᠋ ᠲᠣᠭᠣᠷᠢᠵᠤ ᠳᠣᠪᠲᠣᠯᠤᠭᠰᠠᠨ ᠶᠤᠮ᠃ ᠰᠦᠪᠡᠭᠡᠳᠡᠢ ᠤᠷᠢᠳ ᠪᠠᠶᠠᠯᠢᠭ ᠬᠤᠷᠠᠱᠠᠨ ᠪᠣᠯᠤᠨ ᠬᠦᠴᠦᠷᠬᠡᠭ ᠣᠯᠠᠨ ᠬᠣᠲᠠ ᠪᠣᠭᠣᠮᠲᠠ᠂ ᠪᠠᠲᠤ ᠪᠡᠬᠢ ᠬᠣᠲᠠ ᠶ᠋ᠢᠨ ᠬᠡᠷᠡᠮ ᠢ᠋ᠶ᠋ᠡᠷ ᠲᠣᠭᠣᠷᠢᠭᠤᠯᠤᠭᠰᠠᠨ ᠶᠡᠬᠡ ᠬᠣᠲᠠ ᠶ᠋ᠢᠨ ᠲᠤᠬᠠᠢ ᠬᠡᠯᠡᠪᠡ᠃ ᠡᠨᠡᠬᠦ ᠬᠤᠷᠠᠱᠠᠨ ᠾᠧᠯᠡᠲ᠋ᠦ ᠡᠴᠡ ᠮᠧᠷᠪ ᠬᠦᠷᠲᠡᠯᠡ᠂ ᠮᠧᠷᠪ ᠡᠴᠡ ᠨᠢᠱᠡᠫᠥ᠋ᠷ ᠬᠦᠷᠲᠡᠯᠡ ᠥᠷᠭᠡᠨ ᠠᠭᠤᠳᠠᠮ ᠪᠠᠢᠨᠠ᠃ ᠨᠡᠩ ᠪᠠᠷᠠᠭᠤᠨ ᠳᠠᠰᠢ ᠶᠠᠪᠤᠪᠠᠯ ᠪᠠᠷᠤᠭ ᠲᠤᠭᠤᠯᠵᠤ ᠴᠢᠳᠠᠰᠢ ᠦᠭᠡᠢ ᠳᠠᠪᠤᠰᠤᠨ ᠴᠢᠨᠠᠷ ᠲᠠᠢ ᠠᠲᠠᠷ ᠲᠠᠯᠠ ᠪᠣᠯᠤᠨᠠ᠃ ᠣᠯᠠᠨ ᠰᠠᠭᠤᠭᠠᠯᠢ ᠠᠷᠠᠳ ᠲᠠᠢ ᠪᠠᠶᠠᠯᠢᠭ ᠪᠥᠭᠡᠳ ᠬᠥᠮᠦᠨ ᠠᠮᠠ ᠪᠠᠷ ᠣᠯᠠᠨ ᠪᠣᠯᠬᠤ ᠬᠣᠶᠠᠳᠤᠭᠠᠷ ᠭᠠᠵᠠᠷ ᠣᠷᠣᠨ ᠨᠢ ᠫᠧᠷᠰ ᠢᠷᠠᠺ ᠪᠣᠯᠤᠨ ᠠᠵᠢᠮᠢ ᠢᠷᠠᠺ ᠲᠤ ᠬᠦᠷᠬᠦ ᠭᠡᠪᠡᠯ ᠳᠡᠭᠡᠷᠡ ᠳᠤᠷᠠᠳᠤᠭᠰᠠᠨ ᠠᠲᠠᠷ ᠲᠠᠯᠠ ᠶ᠋ᠢᠨ ᠬᠥᠪᠡᠭᠡᠨ ᠳ᠋ᠡᠬᠢ ᠬᠠᠯᠴᠠᠭᠠᠢ ᠠᠭᠤᠯᠠ ᠶ᠋ᠢ ᠳᠠᠪᠠᠭᠠᠳ ᠤᠳᠠᠭᠠᠨ ᠡᠳᠦᠷ ᠶᠠᠪᠤᠬᠤ ᠦᠭᠡᠢ ᠪᠡᠷ ᠪᠣᠯᠬᠤ ᠦᠭᠡᠢ᠃
《ᠯᠠᠯᠤ ᠶ᠋ᠢᠨ ᠮᠥᠷᠭᠥᠯᠲᠡᠨ ᠦ᠌ ᠴᠡᠷᠢᠭ ᠠᠩᠭᠢ ᠨᠢ ᠲᠡᠨᠳᠡ ᠡᠴᠡ ᠪᠡᠨ ᠬᠤᠷᠠᠱᠠᠨ ᠳ᠋ᠤ᠌ ᠢᠷᠡᠬᠦ ᠳ᠋ᠡᠭᠡᠨ ᠬᠡᠳᠦᠢ ᠡᠳᠦᠷ ᠶᠠᠪᠤᠬᠤ ᠪᠣᠢ?》 ᠭᠡᠵᠦ ᠴᠢᠩᠭᠢᠰ ᠬᠠᠭᠠᠨ ᠠᠰᠠᠭᠤᠭᠰᠠᠨ ᠳ᠋ᠤ᠌ 《ᠬᠠᠯᠠᠭᠤᠨ ᠨᠠᠷᠠᠨ ᠡᠪᠡᠰᠦ ᠪᠦᠬᠦᠨ ᠢ᠋ ᠰᠢᠷᠠᠵᠤ ᠰᠢᠲᠠᠭᠠᠨ᠂ ᠭᠣᠣᠯ ᠮᠥᠷᠡᠨ ᠪᠦᠷ ᠬᠠᠲᠠᠵᠤ ᠰᠢᠷᠭᠢᠭᠰᠡᠨ ᠪᠣᠯᠬᠣᠷ ᠵᠤᠨ ᠤ᠋ ᠴᠠᠭ ᠲᠤ᠌ ᠯᠠᠯᠤ ᠶ᠋ᠢᠨ ᠮᠥᠷᠭᠥᠯᠲᠡᠨ ᠦ᠌ ᠴᠡᠷᠢᠭ ᠢᠷᠡᠵᠦ ᠴᠢᠳᠠᠬᠤ ᠦᠭᠡᠢ᠂ ᠡᠪᠦᠯ ᠦ᠋ᠨ ᠴᠠᠭ ᠲᠤ᠌ ᠯᠠᠯᠤ ᠶ᠋ᠢᠨ ᠮᠥᠷᠭᠥᠯᠲᠡᠨ ᠦ᠌ ᠮᠣᠷᠢᠳ ᠲᠤᠭᠤᠷᠠᠢ ᠪᠠᠷ ᠢ᠋ᠶ᠋ᠠᠨ ᠴᠠᠰᠤ ᠴᠠᠪᠴᠢᠨ ᠮᠠᠯᠲᠠᠵᠤ ᠡᠪᠡᠰᠦ ᠢᠳᠡᠵᠦ ᠴᠢᠳᠠᠬᠤ ᠦᠭᠡᠢ᠃ ᠲᠡᠢᠮᠦ ᠡᠴᠡ ᠱᠠᠭ ᠤ᠋ᠨ ᠴᠡᠷᠢᠭ ᠡᠨᠡ ᠮᠡᠲᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠠᠶᠠᠨ ᠬᠢᠬᠦ ᠪᠡᠷ ᠭᠣᠷᠢᠳᠠᠬᠤ ᠪᠣᠯ ᠡᠷᠬᠡᠪᠰᠢ ᠬᠠᠪᠤᠷ᠂ ᠨᠠᠮᠤᠷ ᠤ᠋ᠨ ᠬᠣᠶᠠᠷ ᠤᠯᠠᠷᠢᠯ ᠪᠣᠯᠤᠨᠠ᠃ ᠡᠨᠡ ᠮᠡᠲᠦ ᠶ᠋ᠢᠨ ᠠᠶᠠᠨ ᠲᠡᠢᠨ ᠢ᠋ ᠬᠢᠬᠦ ᠶ᠋ᠢᠨ ᠲᠥᠯᠥᠭᠡ ᠱᠠᠭ ᠤ᠋ᠨ ᠴᠡᠷᠢᠭ ᠪᠤᠲᠠ ᠮᠠᠯ ᠤ᠋ᠨ ᠰᠦᠷᠦᠭ ᠪᠣᠯᠤᠨ ᠠᠷᠪᠢᠨ ᠠᠴᠢᠶᠠ ᠲᠠᠢ ᠲᠡᠷᠭᠡ ᠲᠡᠮᠡᠭᠡ ᠠᠪᠴᠤ ᠶᠠᠪᠤᠬᠤ ᠦᠭᠡᠢ ᠪᠡᠷ ᠪᠣᠯᠬᠤ ᠦᠭᠡᠢ᠃ ᠭᠡᠲᠡᠯᠡ ᠪᠢ ᠠᠵᠢᠮᠢ ᠢᠷᠡᠨ ᠳ᠋ᠦ᠍ ᠡᠨᠡ ᠮᠡᠲᠦ ᠶ᠋ᠢᠨ ᠴᠡᠷᠢᠭ ᠠᠩᠭᠢ ᠶ᠋ᠢ ᠦᠵᠡᠭᠰᠡᠨ ᠦᠭᠡᠢ》 ᠭᠡᠵᠦ ᠰᠦᠪᠡᠭᠡᠳᠡᠢ ᠬᠠᠷᠢᠭᠤᠯᠵᠠᠢ᠃ ᠰᠦᠪᠡᠭᠡᠳᠠᠢ ᠶ᠋ᠢᠨ ᠡᠨᠡ ᠮᠡᠳᠡᠭᠦᠯᠦᠯᠲᠡ ᠶ᠋ᠢ ᠰᠣᠨᠣᠰᠤᠭᠠᠳ ᠢᠷᠡᠭᠡᠳᠦᠢ ᠶ᠋ᠢᠨ ᠪᠠᠢᠯᠳᠤᠭᠠᠨ ᠤ᠋ ᠴᠢᠭᠯᠡᠯᠲᠡ ᠪᠡᠨ ᠲᠣᠭᠲᠠᠭᠠᠪᠠ᠃ ᠬᠣᠷᠰᠸᠮ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠪᠠᠷᠠᠭᠤᠨ ᠵᠡᠭᠦᠨ ᠬᠣᠶᠠᠷ ᠬᠡᠰᠡᠭ ᠬᠣᠭᠣᠷᠣᠨᠳᠣ ᠪᠠᠨ ᠲᠤᠰᠠᠯᠠᠯᠴᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠰᠦᠪᠡᠭᠡᠳᠠᠢ ᠪᠠᠷᠠᠭᠤᠨ ᠭᠠᠵᠠᠷ ᠲᠤ᠌ ᠴᠡᠷᠢᠭ ᠡᠯᠰᠡᠭᠰᠡᠨ ᠪᠠᠢᠳᠠᠯ ᠢ᠋ ᠣᠯᠵᠤ ᠦᠵᠡᠭᠰᠡᠨ ᠦᠭᠡᠢ ᠭᠡᠵᠦ ᠪᠠᠢᠭᠠ ᠡᠴᠡ ᠦᠵᠡᠬᠦᠯᠡ ᠵᠸᠯᠡᠯ— ᠡᠳ᠋— ᠳ᠋ᠢᠨ ᠵᠡᠭᠦᠨ ᠪᠡᠶᠡ ᠶ᠋ᠢᠨ ᠠᠯᠢ ᠨᠢᠭᠡᠨ ᠭᠠᠵᠠᠷ ᠲᠤ᠌ ᠪᠠᠢᠬᠤ ᠨᠢ ᠰᠢᠯᠵᠢᠰᠢ ᠦᠭᠡᠢ᠂ ᠶᠡᠷᠦ ᠶ᠋ᠢᠨ ᠪᠣᠰᠤᠯᠭᠠ ᠭᠠᠷᠪᠠᠴᠤ ᠴᠢᠩᠭᠢᠰ ᠬᠠᠭᠠᠨ ᠵᠥᠪᠬᠡᠨ ᠠᠹᠭᠠᠨᠢᠰᠲ᠋ᠠᠨ ᠪᠣᠯᠤᠨ ᠬᠤᠷᠠᠱᠠᠨ ᠳ᠋ᠤ᠌ ᠠᠩᠬᠠᠷᠤᠯ ᠢ᠋ᠶ᠋ᠠᠨ ᠲᠠᠯᠪᠢᠪᠠᠯ ᠪᠣᠯᠴᠢᠬᠠᠬᠤ ᠶᠤᠮ᠃ ᠡᠨᠡ ᠬᠣᠶᠠᠷ ᠤᠯᠤᠰ ᠬᠡᠳᠦᠢ ᠴᠢᠭᠢᠷᠠᠭ ᠪᠣᠯᠪᠠᠴᠤ ᠬᠢᠯᠢ ᠬᠢᠵᠠᠭᠠᠷ ᠨᠢ ᠮᠢᠩᠭᠠᠨ ᠺᠢᠯᠣᠮᠧᠲ᠋ᠷ ᠦ᠋ᠨ ᠲᠥᠭᠥᠷᠢᠭ ᠳᠣᠲᠣᠷᠠ ᠪᠠᠢᠬᠤ ᠤᠴᠢᠷ ᠡᠴᠡ ᠡᠨᠡᠬᠦ ᠬᠡᠪᠴᠢᠶᠡ ᠨᠢ ᠮᠣᠩᠭᠣᠯ ᠴᠡᠷᠢᠭ ᠠᠮᠠᠷᠬᠠᠨ ᠢ᠋ᠶ᠋ᠠᠷ ᠪᠠᠢᠯᠳᠤᠭᠠᠨ ᠬᠢᠵᠦ ᠴᠢᠳᠠᠬᠤ ᠶᠤᠮ ᠪᠠᠢᠨᠠ᠃ ᠬᠡᠷᠡᠭᠴᠡᠭᠡ ᠪᠦᠬᠦᠢ ᠴᠠᠭ ᠲᠤ᠌ ᠡᠯᠡ ᠴᠡᠷᠢᠭ ᠠᠩᠭᠢ ᠨᠢ ᠬᠠᠷᠢᠯᠴᠠᠨ ᠲᠤᠰᠠᠯᠠᠯᠴᠠᠵᠤ ᠴᠢᠳᠠᠬᠤ ᠶᠤᠮ᠃ ᠡᠢᠮᠦ ᠡᠴᠡ ᠮᠣᠩᠭᠣᠯ ᠤ᠋ᠨ ᠠᠷᠪᠠᠨ ᠲᠦᠮᠡᠨ ᠮᠣᠷᠢᠲᠤ ᠴᠡᠷᠢᠭ ᠪᠠᠢᠬᠤ ᠪᠣᠯ ᠡᠨᠳᠡ ᠵᠠᠷᠤᠵᠤ ᠪᠠᠷᠠᠬᠤ ᠦᠭᠡᠢ᠂ ᠰᠦᠪᠡᠭᠡᠳᠠᠢ᠂ ᠵᠡᠪᠡ ᠶ᠋ᠢᠨ ᠴᠡᠷᠢᠭ ᠢ᠋ ᠲᠠᠲᠠᠵᠤ ᠠᠪᠴᠢᠷᠠᠬᠤ ᠬᠡᠷᠡᠭ ᠴᠤ᠌ ᠦᠭᠡᠢ᠃ ᠡᠨᠡ ᠰᠢᠢᠳᠪᠦᠷᠢ ᠨᠢ ᠬᠡᠳᠦᠨ ᠵᠠᠭᠤᠨ ᠣᠨ ᠢ᠋ ᠲᠤᠭᠤᠯᠤᠭᠰᠠᠨ ᠣᠷᠣᠰ ᠤ᠋ᠨ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠰᠢᠢᠳᠪᠦᠷᠢᠯᠡᠵᠦ ᠡᠸᠦᠢ᠍ᠷᠦᠫᠡ ᠶ᠋ᠢᠨ ᠵᠡᠭᠦᠨ ᠡᠮᠦᠨᠡ ᠡᠲᠡᠭᠡᠳ ᠲᠦ᠍ ᠬᠥᠨᠥᠭᠡᠯ ᠪᠣᠯᠤᠭᠠᠳ᠂ ᠪᠦᠬᠦ ᠡᠸᠦᠢ᠍ᠷᠦᠫᠡ ᠲᠢᠪ ᠦ᠋ᠨ ᠶᠡᠬᠡ ᠬᠠᠭᠤᠷᠠᠢ ᠳ᠋ᠤ᠌ ᠠᠶᠤᠯ ᠲᠦᠭᠰᠢᠭᠦᠷᠢ ᠤᠴᠠᠷᠠᠭᠰᠠᠨ ᠶᠤᠮ᠃
ᠰᠦᠪᠡᠭᠡᠳᠠᠢ ᠡᠪᠦᠯ ᠦ᠋ᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠠᠽᠢᠶᠠ ᠶ᠋ᠢᠨ ᠪᠠᠷᠠᠭᠤᠨᠳᠠᠬᠢ ᠣᠯᠠᠨ ᠤᠯᠤᠰ ᠢ᠋ ᠭᠡᠲᠦᠯᠦᠭᠡᠳ᠂ ᠥᠪᠡᠷ ᠦ᠋ᠨ ᠣᠷᠴᠢᠨ ᠲᠣᠭᠣᠷᠢᠨ ᠤ᠋ ᠪᠠᠢᠳᠠᠯ ᠢ᠋ ᠰᠠᠢᠲᠤᠷ ᠦᠵᠡᠵᠦ ᠠᠩᠬᠠᠷᠤᠭᠰᠠᠨ ᠪᠠᠢᠯᠠ᠃ ᠲᠡᠷᠡ ᠪᠠᠰᠠ ᠬᠣᠰᠢᠭᠤᠴᠢ ᠲᠠᠩᠨᠠᠭᠤᠯ ᠢ᠋ᠶ᠋ᠠᠨ ᠠᠽᠧᠷᠪᠠᠢᠵᠠᠨ᠂ ᠺᠦᠷᠺᠢᠰᠲ᠋ᠠᠨ᠂ ᠬᠢᠣ᠌ᠷᠬᠢᠶᠡ ᠳ᠋ᠦ᠍ ᠲᠣᠮᠢᠯᠠᠵᠤ ᠪᠠᠢᠯᠠ᠃ ᠮᠦᠬᠠᠮᠧᠳ᠋᠂ ᠱᠠᠭ ᠤ᠋ᠨ ᠣᠷᠣᠵᠤ ᠥᠭᠭᠦᠭᠰᠡᠨ ᠠᠷᠠᠯ ᠤ᠋ᠨ ᠴᠢᠨᠠᠳᠤ ᠲᠠᠯᠠ ᠳ᠋ᠤ᠌ ᠥᠨᠳᠥᠷ ᠠᠭᠤᠯᠠ ᠰᠦᠷᠯᠢᠭ ᠢ᠋ᠶ᠋ᠡᠷ ᠰᠦᠨᠳᠡᠷᠯᠡᠵᠦ ᠪᠠᠢᠯᠠ᠃ ᠴᠠᠪᠴᠢᠮᠠ ᠠᠰᠬᠠ ᠶ᠋ᠢ ᠨᠢ ᠳᠠᠪᠠᠪᠠᠯ ᠴᠢᠷᠠᠢ ᠨᠢ ᠭᠣᠵᠣᠭᠣᠷ ᠴᠠᠭᠠᠨ᠂ ᠰᠢᠷᠠ ᠦᠰᠦ᠂ ᠬᠥᠬᠡ ᠨᠢᠳᠦ ᠲᠡᠢ ᠬᠥᠮᠦᠰ ᠦ᠋ᠨ ᠤᠯᠤᠰ ᠲᠤ ᠬᠦᠷᠴᠦ ᠴᠢᠳᠠᠬᠤ ᠶᠤᠮ᠃ ᠡᠭᠦᠨ ᠦ᠌ ᠲᠤᠬᠠᠢ ᠬᠢᠪᠴᠠᠭ ᠤ᠋ᠨ ᠰᠠᠭᠤᠭᠠᠯᠢ ᠠᠷᠠᠳ ᠤ᠋ᠨ ᠬᠡᠯᠡᠭᠰᠡᠨ ᠨᠢ ᠲᠡᠳᠡ ᠪᠠᠷᠠᠭᠤᠨ ᠲᠠᠯᠠ ᠳ᠋ᠠᠬᠢ ᠬᠥᠮᠦᠨ ᠯᠦ᠍ᠭᠡ ᠠᠳᠠᠯᠢ ᠶᠠᠰᠤᠲᠠᠨ ᠪᠣᠯᠬᠤ ᠨᠢ ᠰᠢᠯᠵᠢᠰᠢ ᠦᠭᠡᠢ᠃ ᠤᠴᠢᠷ ᠡᠢᠮᠦ ᠡᠴᠡ ᠡᠨᠡᠬᠦ ᠳᠠᠯᠠᠢ ᠶ᠋ᠢ ᠲᠣᠭᠣᠷᠢᠪᠠᠯ ᠬᠢᠪᠴᠠᠭ ᠤ᠋ᠨ ᠰᠠᠷᠠᠭᠤᠯ ᠲᠠᠯᠠ ᠶ᠋ᠢ ᠭᠡᠲᠦᠯᠦᠭᠡᠳ ᠮᠣᠩᠭᠣᠯ ᠳ᠋ᠠᠭᠠᠨ ᠬᠠᠷᠢᠵᠤ ᠴᠢᠳᠠᠬᠤ ᠴᠤ᠌ ᠮᠠᠭᠠᠳ᠃ ᠰᠦᠪᠡᠭᠡᠳᠡᠢ ᠪᠣᠯᠤᠨ ᠵᠡᠪᠡ ᠬᠣᠶᠠᠭᠤᠯᠠ ᠡᠨᠡ ᠠᠶᠠᠨ ᠳ᠋ᠤ᠌ ᠮᠣᠷᠳᠠᠬᠤ ᠳᠤᠷᠠᠲᠠᠢ ᠪᠠᠢᠭᠰᠠᠨ ᠪᠥᠭᠡᠳ ᠡᠨᠡᠬᠦ ᠲᠠᠷᠢᠬᠢ ᠶ᠋ᠢ ᠨᠢ ᠬᠠᠯᠠᠭᠤ ᠣᠷᠭᠢᠭᠤᠯᠵᠤ ᠪᠠᠢᠭᠰᠠᠨ ᠶᠤᠮ᠃ ᠡᠳᠡᠨ ᠦ᠌ ᠬᠦᠰᠡᠯ ᠢ᠋ ᠪᠤᠷᠤᠭᠤᠰᠢᠶᠠᠬᠤ ᠰᠢᠯᠲᠠᠭᠠᠨ ᠭᠡᠵᠦ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠣᠭᠲᠣ ᠦᠭᠡᠢ ᠪᠠᠢᠵᠠᠢ᠃ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠡᠷᠭᠦᠮᠵᠢᠯᠡᠭᠰᠡᠨ ᠨᠤᠲᠤᠭ ᠳᠡᠪᠢᠰᠬᠡᠷ ᠪᠣᠯᠬᠤ《ᠮᠣᠩᠭᠣᠯ ᠮᠣᠷᠢᠨ ᠤ᠋ ᠲᠤᠭᠤᠷᠠᠢ ᠬᠦᠷᠴᠦ ᠴᠢᠳᠠᠬᠤ ᠭᠠᠵᠠᠷ ᠪᠦᠬᠦᠨ》 ᠡᠷᠴᠢᠰ ᠭᠣᠣᠯ ᠤ᠋ᠨ ᠪᠠᠷᠠᠭᠤᠨᠳᠠᠬᠢ ᠶᠢᠷᠲᠢᠨᠴᠦ ᠶ᠋ᠢᠨ ᠣᠯᠠᠨ ᠤᠯᠤᠰ ᠢ᠋ ᠵᠥᠴᠢ ᠳ᠋ᠦ᠍ ᠥᠭᠭᠦᠭᠰᠡᠨ ᠶᠤᠮ᠃ ᠤᠴᠢᠷ ᠡᠢᠮᠦ ᠡᠴᠡ ᠡᠨᠡᠬᠦ ᠲᠠᠩᠭᠢᠰ ᠤ᠋ᠨ ᠴᠢᠨᠠᠳᠤᠬᠢ ᠨᠤᠲᠤᠭ ᠳᠡᠪᠢᠰᠬᠡᠷ ᠪᠣᠯ ᠵᠥᠴᠢ ᠶ᠋ᠢᠨ ᠬᠠᠷᠢᠶᠠᠨ ᠤ᠋ ᠭᠠᠵᠠᠷ ᠪᠣᠯᠬᠤ ᠶᠣᠰᠣᠲᠠᠢ᠃ ᠲᠡᠭᠦᠨ ᠦ᠌ ᠵᠡᠷᠭᠡᠯᠡᠳᠡᠭᠡ ᠬᠥᠮᠦᠰ ᠢ᠋ ᠲᠠᠨᠢᠵᠤ ᠠᠪᠬᠤ ᠬᠡᠷᠡᠭᠴᠡᠭᠡ ᠪᠠᠢᠬᠤ ᠶᠤᠮ᠃
ᠲᠡᠭᠡᠭᠡᠳ ᠰᠦᠪᠡᠭᠡᠳᠡᠢ ᠲᠡᠷᠡᠬᠦ ᠠᠭᠤᠯᠠ ᠶ᠋ᠢ ᠳᠠᠪᠠᠭᠠᠳ᠂ ᠲᠡᠨᠳᠡ ᠶᠠᠮᠠᠷ ᠦᠨᠳᠦᠰᠦᠲᠡᠨ ᠰᠠᠭᠤᠵᠤ ᠪᠠᠢᠬᠤ᠂ ᠲᠡᠳᠡᠨ ᠦ᠌ ᠤᠯᠤᠰ ᠤ᠋ᠨ ᠬᠢᠴᠡ ᠬᠡᠪᠴᠢᠶᠡ ᠨᠢ ᠬᠡᠳᠦᠢ ᠴᠢᠨᠡᠭᠡ ᠪᠠᠢᠬᠤ᠂ ᠶᠠᠮᠠᠷ ᠵᠡᠷᠭᠡ ᠶ᠋ᠢᠨ ᠴᠡᠷᠢᠭ ᠠᠩᠭᠢ ᠲᠠᠢ ᠪᠠᠢᠬᠤ ᠶ᠋ᠢ ᠮᠡᠳᠡᠬᠦ ᠪᠡᠷ ᠺᠠᠰᠫᠢ ᠶ᠋ᠢᠨ ᠲᠠᠩᠭᠢᠰ ᠤ᠋ᠨ ᠴᠢᠨᠠᠳᠤ ᠲᠠᠯᠠ ᠳ᠋ᠤ᠌ ᠣᠴᠢᠬᠤ ᠨᠢ ᠵᠥᠪᠰᠢᠶᠡᠷᠡᠭᠳᠡᠪᠡ᠃ ᠡᠨᠡ ᠡᠭᠦᠷᠭᠡ ᠶ᠋ᠢ ᠪᠡᠶᠡᠯᠡᠭᠦᠯᠬᠦ ᠶ᠋ᠢᠨ ᠲᠥᠯᠥᠭᠡ ᠴᠢᠩᠭᠢᠰ ᠬᠠᠭᠠᠨ ᠭᠤᠷᠪᠠᠨ ᠵᠢᠯ ᠦ᠋ᠨ ᠬᠤᠭᠤᠴᠠᠭᠠ ᠥᠭᠴᠦ ᠺᠠᠰᠫᠢ ᠶ᠋ᠢᠨ ᠲᠠᠩᠭᠢᠰ ᠤ᠋ᠨ ᠠᠷᠤ ᠳ᠋ᠠᠬᠢ ᠰᠠᠷᠠᠭᠤᠯ ᠲᠠᠯᠠ ᠶ᠋ᠢ ᠳᠡᠮᠵᠢᠵᠦ ᠮᠣᠩᠭᠣᠯ ᠤᠯᠤᠰ ᠲᠠᠭᠠᠨ ᠪᠤᠴᠠᠬᠤ ᠪᠠᠷ ᠵᠠᠷᠯᠢᠭ ᠪᠠᠭᠤᠯᠭᠠᠪᠠ᠃ ᠰᠦᠪᠡᠭᠡᠳᠡᠢ ᠡᠷᠭᠢᠵᠦ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠭᠠᠳ ᠬᠣᠶᠠᠷ ᠭᠠᠷᠠᠭ ᠤ᠋ᠨ ᠬᠣᠢᠨᠠ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠡᠭᠡᠨ ᠬᠦᠷᠴᠡᠢ᠃
( ᠳᠥᠷᠪᠡ) ᠰᠥᠨᠥᠭᠡᠬᠦ ᠪᠠᠢᠯᠳᠤᠭᠠᠨ ᠤ᠋ ᠡᠬᠢᠯᠡᠯᠲᠡ
ᠵᠧᠯᠡᠯ— ᠡᠳ᠋— ᠳ᠋ᠢᠨ· ᠮᠦᠬᠠᠮᠧᠳ᠋ ᠦᠨᠡᠨ ᠳ᠋ᠡᠭᠡᠨ ᠬᠣᠷᠧᠰᠮ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠵᠡᠭᠦᠨ ᠬᠡᠰᠡᠭ ᠲᠦ᠍ ᠪᠠᠢᠭᠰᠠᠨ ᠠᠵᠢ᠃ ᠠᠹᠭᠠᠨᠢᠰᠲ᠋ᠠᠨ ᠤ᠋ ᠠᠭᠤᠯᠠᠨ ᠳᠣᠲᠣᠷᠠᠬᠢ ᠺᠡᠰᠨᠢ ᠣᠷᠴᠢᠮ ᠮᠣᠩᠭᠣᠯ ᠴᠡᠷᠢᠭ ᠲᠡᠢ ᠪᠠᠢᠯᠳᠤᠬᠤ ᠶ᠋ᠢᠨ ᠲᠥᠯᠥᠭᠡ ᠴᠡᠷᠢᠭ ᠠᠩᠭᠢ ᠪᠠᠨ ᠴᠤᠭᠯᠠᠭᠤᠯᠵᠤ ᠪᠠᠢᠵᠠᠢ᠃
ᠴᠢᠩᠭᠢᠰ ᠬᠠᠭᠠᠨ ᠤ᠋ ᠵᠥᠩᠨᠡᠵᠦ ᠪᠣᠳᠣᠭᠰᠠᠨ ᠶᠣᠰᠣᠭᠠᠷ ᠴᠠᠭ ᠤ᠋ᠨ ᠪᠠᠢᠳᠠᠯ ᠬᠥᠭᠵᠢᠵᠦ ᠪᠠᠢᠭᠰᠠᠨ ᠶᠤᠮ᠃ ᠤᠷᠪᠠᠯᠭᠠ ᠪᠦᠬᠦ ᠤᠯᠤᠰ ᠳᠠᠶᠠᠭᠠᠷ ᠥᠷᠨᠢᠯᠡ᠃ ᠡᠯᠡ ᠮᠣᠵᠢ᠂ ᠡᠯᠡ ᠬᠣᠲᠠᠨ ᠳ᠋ᠤ᠌ ᠪᠦᠷ ᠴᠡᠷᠢᠭ ᠲᠡᠢ ᠪᠣᠯᠤᠭᠰᠠᠨ ᠪᠥᠭᠡᠳ ᠱᠠᠰᠢᠨ ᠤ᠋ ᠬᠠᠭᠠᠨ ᠮᠦᠬᠠᠮᠧᠳ᠋ ᠦ᠋ᠨ ᠣᠷᠣ ᠶ᠋ᠢ ᠵᠠᠯᠭᠠᠮᠵᠢᠯᠠᠭᠴᠢ ᠶ᠋ᠢ ᠵᠥᠪᠰᠢᠶᠡᠷᠡᠭᠰᠡᠨ ᠪᠢᠯᠡ᠃ ᠯᠠᠯᠤ ᠶ᠋ᠢᠨ ᠮᠥᠷᠭᠥᠯᠲᠡᠨ ᠦ᠌ ᠠᠬᠠᠮᠠᠳ ᠪᠤᠶᠤ ᠯᠠᠮᠠ ᠨᠠᠷ ᠪᠣᠯ ᠤᠭ ᠲᠠᠭᠠᠨ ᠡᠵᠡᠨ ᠬᠠᠭᠠᠨ ᠤ᠋ ᠲᠥᠷᠥ ᠪᠤᠯᠢᠶᠠᠯᠳᠤᠬᠤ ᠳ᠋ᠤ᠌ ᠬᠠᠯᠳᠠᠬᠤ ᠦᠭᠡᠢ᠂ ᠬᠡᠵᠢᠶᠡ ᠴᠦ᠍ ᠳᠡᠢᠯᠦᠭᠰᠡᠨ ᠡᠲᠡᠭᠡᠳ ᠢ᠋ ᠡᠵᠡᠨ ᠬᠠᠭᠠᠨ ᠭᠡᠵᠦ ᠵᠥᠪᠰᠢᠶᠡᠷᠡᠵᠦ ᠪᠠᠢᠭᠰᠠᠨ ᠶᠤᠮ᠃ ᠲᠡᠳᠡᠨᠡᠷ ᠮᠦᠬᠠᠮᠧᠳ᠋ ᠱᠠᠭ ᠤ᠋ᠨ ᠬᠠᠷᠭᠢᠰ ᠵᠠᠰᠠᠭ ᠤ᠋ᠨ ᠳᠣᠣᠷᠠ ᠳᠠᠷᠤᠯᠠᠭᠳᠠᠵᠤ ᠪᠠᠢᠭᠰᠠᠨ ᠪᠣᠯᠬᠣᠷ ᠬᠤᠯᠠᠨ ᠨᠣᠮ ᠳ᠋ᠤᠨᠢ ᠰᠦᠰᠦᠭ ᠪᠢᠰᠢᠷᠡᠯ ᠦᠭᠡᠢ ᠨᠣᠬᠠᠢ ᠲᠠᠢ ᠲᠡᠮᠡᠴᠡᠲᠦᠭᠡᠢ ᠭᠡᠵᠦ ᠪᠢᠴᠢᠵᠦ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠱᠠᠰᠢᠨ ᠰᠤᠷᠲᠠᠬᠤᠨ ᠳ᠋ᠤ᠌ ᠬᠠᠯᠳᠠᠬᠤ ᠦᠭᠡᠢ ᠯᠡ ᠪᠣᠯ ᠲᠡᠭᠦᠨ ᠯᠦ᠍ᠭᠡ ᠬᠠᠮᠲᠤᠷᠠᠵᠤ ᠪᠠᠢᠬᠤ ᠭᠡᠰᠡᠨ ᠶᠤᠮ᠃ ᠭᠡᠲᠡᠯᠡ ᠴᠢᠩᠭᠢᠰ ᠬᠠᠭᠠᠨ ᠬᠠᠷᠢᠨ ᠡᠯᠡ ᠱᠠᠰᠢᠨ ᠰᠤᠷᠲᠠᠬᠤᠨ ᠡᠷᠬᠡ ᠲᠡᠭᠰᠢ ᠭᠡᠰᠡᠨ ᠠᠭᠤᠳᠠᠮ ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠ ᠶ᠋ᠢ ᠠᠪᠤᠭᠰᠠᠨ ᠡᠴᠡ ᠯᠠᠯᠤ ᠶ᠋ᠢᠨ ᠱᠠᠰᠢᠨ ᠢ᠋ ᠭᠠᠯᠵᠠᠭᠤᠷᠠᠨ ᠰᠢᠲᠦᠵᠦ ᠪᠠᠢᠭᠰᠠᠨ ᠬᠥᠮᠦᠰ ᠲᠦ᠍ ᠰᠡᠷᠡᠯᠲᠡ ᠥᠭᠴᠦ᠂ ᠮᠣᠩᠭᠣᠯᠴᠤᠳ ᠤ᠋ᠨ ᠪᠤᠯᠢᠶᠠᠵᠤ ᠳᠡᠭᠡᠷᠡᠮᠳᠡᠬᠦ ᠶᠠᠪᠤᠳᠠᠯ ᠪᠠ ᠬᠠᠷᠭᠢᠰ ᠠᠵᠢᠯᠯᠠᠭᠠ ᠨᠢ ᠲᠡᠳᠡᠨ ᠳ᠋ᠦ᠍ ᠲᠠᠪᠠ ᠦᠭᠡᠢ ᠰᠠᠨᠠᠭᠳᠠᠪᠠ᠃ ᠡᠭᠦᠨ ᠦ᠌ ᠳᠡᠭᠡᠷᠡ ᠪᠠᠭᠠᠲᠤᠷ ᠵᠣᠷᠢᠭ ᠲᠠᠢ᠂ ᠴᠢᠳᠠᠪᠤᠷᠢ ᠰᠠᠢᠲᠠᠢ ᠯᠠᠯᠤ ᠶ᠋ᠢᠨ ᠱᠠᠰᠢᠨ ᠢ᠋ ᠰᠢᠲᠦᠭᠴᠢ ᠵᠠᠯᠠᠭᠤ ᠵᠧᠯᠡᠯ— ᠡᠳ᠋— ᠳ᠋ᠢᠨ· ᠮᠦᠬᠠᠮᠧᠳ᠋· ᠱᠠᠭ ᠤ᠋ᠨ ᠤᠯᠤᠰ ᠠᠷᠠᠳ ᠲᠠᠭᠠᠨ ᠠᠷᠢᠭᠤᠨ ᠲᠡᠢᠨ ᠶᠠᠪᠤᠭᠤᠯᠬᠤ ᠶ᠋ᠢ ᠤᠷᠢᠶᠠᠯᠠᠭᠰᠠᠨ ᠪᠣᠯᠬᠣᠷ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠳᠠᠭᠠᠵᠤ᠂ ᠯᠠᠯᠤ ᠶ᠋ᠢᠨ ᠱᠠᠰᠢᠨ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠬᠤ ᠪᠠᠷ ᠪᠣᠰᠤᠯᠴᠠᠭᠰᠠᠨ ᠠᠵᠢ᠃
ᠵᠦᠭ ᠪᠦᠷᠢ ᠡᠴᠡ ᠮᠣᠩᠭᠣᠯᠴᠤᠳ ᠤ᠋ᠨ ᠲᠣᠮᠢᠯᠠᠭᠰᠠᠨ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠪᠠ ᠠᠯᠪᠠᠨ ᠨᠣᠶᠠᠳ ᠢ᠋ ᠰᠡᠮᠡᠬᠡᠷ ᠠᠯᠠᠵᠤ ᠡᠬᠢᠯᠡᠭᠰᠡᠨ ᠪᠥᠭᠡᠳ ᠲᠡᠳᠡᠨ ᠦ᠌ ᠨᠠᠮ ᠪᠦᠯᠦᠭ ᠦ᠋ᠨ ᠬᠥᠮᠦᠰ ᠢ᠋ ᠨᠢ ᠬᠢᠳᠤᠵᠤ ᠠᠯᠠᠬᠤ᠂ ᠴᠥᠭᠡᠨ ᠲᠣᠭᠠ ᠲᠠᠢ ᠮᠣᠩᠭᠣᠯ ᠤ᠋ᠨ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠢ᠋ ᠳᠠᠭᠠᠷᠢᠨ ᠴᠣᠬᠢᠬᠤ᠂ ᠡᠯᠡ ᠬᠣᠲᠠᠨ ᠳ᠋ᠤ᠌ ᠤᠷᠪᠠᠯᠭᠠ ᠭᠠᠷᠴᠤ ᠪᠠᠢᠬᠤ ᠮᠡᠳᠡᠭᠦᠯᠦᠯᠲᠡ ᠳᠡᠭᠡᠷᠡ ᠳᠡᠭᠡᠷᠡ ᠪᠡᠨ ᠬᠦᠷᠴᠦ ᠢᠷᠡᠯᠡ᠃
ᠤᠷᠪᠠᠯᠭᠠ ᠭᠠᠷᠤᠭᠰᠠᠨ ᠬᠠᠮᠤᠭ ᠤ᠋ᠨ ᠡᠬᠢᠨ ᠦ᠌ ᠴᠢᠮᠡᠭᠡ ᠢᠷᠡᠮᠡᠭᠴᠡ᠂ ᠴᠢᠩᠭᠢᠰ ᠬᠠᠭᠠᠨ ᠤᠳᠬᠤᠨ ᠬᠥᠪᠡᠭᠦᠨ ᠲᠤᠯᠤᠢ ᠳ᠋ᠠᠭᠠᠨ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠬᠠᠭᠠᠰ ᠢ᠋ ᠳᠠᠭᠠᠭᠤᠯᠤᠨ ᠬᠤᠷᠠᠱᠠᠡ ᠵᠦᠭ ᠮᠣᠷᠳᠠᠭᠤᠯᠪᠠ᠃ ᠲᠡᠷᠡ ᠪᠠᠢᠯᠳᠤᠨ ᠳᠠᠭᠠᠭᠤᠯᠬᠤ ᠶ᠋ᠢᠨ ᠲᠥᠯᠥᠭᠡ ᠮᠣᠷᠳᠠᠭᠰᠠᠨ ᠪᠢᠰᠢ᠃ ᠪᠠᠭᠤᠵᠤ ᠥᠭᠬᠦ ᠶ᠋ᠢ ᠱᠠᠭᠠᠷᠳᠠᠬᠤ ᠶ᠋ᠢᠨ ᠲᠥᠯᠥᠭᠡ ᠮᠣᠷᠳᠠᠭᠰᠠᠨ ᠴᠤ᠌ ᠪᠢᠰᠢ᠃ ᠲᠤᠯᠤᠢ ᠴᠣᠷ ᠤ᠋ᠨ ᠭᠠᠭᠴᠠ ᠵᠠᠷᠯᠢᠭ ᠢ᠋ ᠬᠦᠯᠢᠶᠡᠭᠰᠡᠨ ᠨᠢ:
《ᠰᠥᠨᠥᠭᠡᠭᠲᠦᠨ》ᠭᠡᠰᠡᠨ ᠵᠠᠷᠯᠢᠭ ᠶᠤᠮ ᠪᠠᠢᠨᠠ᠃
ᠡᠭᠦᠨ ᠡᠴᠡ ᠬᠣᠵᠢᠮ ᠤ᠋ᠨ ᠭᠠᠷᠤᠭᠰᠠᠨ ᠬᠡᠷᠡᠭ ᠪᠣᠯ ᠰᠠᠢᠲᠤᠷ ᠵᠡᠪᠰᠡᠭᠯᠡᠭᠰᠡᠨ ᠪᠥᠭᠡᠳ ᠲᠡᠮᠦᠷ ᠮᠡᠲᠦ ᠰᠠᠬᠢᠯᠭᠠ ᠪᠠᠲᠤ ᠲᠠᠢ ᠠᠷᠪᠠᠨ ᠲᠦᠮᠡᠨ ᠮᠣᠩᠭᠣᠯ ᠴᠡᠷᠢᠭ ᠪᠣᠯᠤᠨ ᠳᠠᠢᠰᠤᠩᠨᠠᠬᠤ ᠰᠡᠳᠬᠢᠯ ᠲᠡᠢ ᠭᠠᠯᠵᠠᠭᠤ ᠪᠢᠰᠢᠷᠡᠯ ᠲᠡᠢ ᠪᠣᠯᠪᠠᠴᠤ ᠰᠠᠬᠢᠯᠭᠠ ᠪᠠᠲᠤ ᠪᠠ ᠪᠦᠯᠬᠦᠮᠳᠡᠯ ᠢ᠋ᠶ᠋ᠡᠷ ᠮᠠᠭᠤ᠂ ᠳᠡᠢᠯᠦᠭᠰᠡᠨ ᠦᠶᠡ ᠳ᠋ᠡᠭᠡᠨ ᠪᠠᠰᠠᠴᠤ ᠬᠣᠣᠷᠯᠠᠨ ᠬᠢᠳᠤᠳᠠᠭ ᠬᠥᠮᠦᠰ ᠦ᠋ᠨ ᠬᠣᠭᠣᠷᠣᠨᠳᠣᠬᠢ ᠦᠬᠦᠵᠦ ᠰᠡᠬᠡᠬᠦ ᠶ᠋ᠢᠨ ᠪᠠᠢᠯᠳᠤᠭᠠᠨ ᠡᠭᠦᠰᠪᠡ᠃ ᠡᠨᠡ ᠪᠣᠯ ᠦᠬᠦᠵᠦ ᠳᠠᠭᠤᠰᠬᠤ ᠤᠤ᠂ ᠠᠮᠢᠳᠤᠷᠠᠵᠤ ᠦᠯᠡᠳᠡᠬᠦ ᠤᠤ ᠭᠡᠰᠡᠨ ᠲᠡᠮᠡᠴᠡᠯ ᠪᠣᠯᠤᠨᠠ᠃ ᠲᠣᠭᠰᠢᠨ ᠰᠦᠷᠡᠬᠡᠢ ᠪᠥᠭᠡᠳ ᠠᠭᠤᠴᠢᠯᠠᠯ ᠡᠨᠡᠷᠢᠯ ᠭᠡᠵᠦ ᠣᠭᠲᠣ ᠦᠭᠡᠢ ᠪᠠᠢᠯᠳᠤᠭᠠᠨ ᠪᠠᠢᠯᠠ᠃ ᠲᠤᠯᠤᠢ ᠶ᠋ᠢᠨ ᠳᠠᠭᠠᠭᠤᠯᠤᠭᠰᠠᠨ ᠴᠡᠷᠢᠭ ᠨᠢ ᠨᠢᠭᠡᠨ ᠭᠠᠵᠠᠷ ᠢ᠋ ᠡᠵᠡᠯᠡᠬᠦ ᠪᠦᠷᠢ᠂ ᠨᠢᠭᠡᠨ ᠬᠣᠲᠠ ᠶ᠋ᠢ ᠡᠪᠳᠡᠬᠦ ᠪᠦᠷᠢ ᠶᠡᠬᠡᠳᠴᠦ ᠢᠷᠡᠯᠡ᠃ ᠲᠡᠷᠡ ᠶᠠᠮᠠᠷ ᠭᠠᠵᠠᠷ ᠲᠤ᠌ ᠪᠣᠯᠪᠠᠴᠤ ᠰᠠᠬᠢᠬᠤ ᠴᠡᠷᠢᠭ ᠭᠡᠵᠦ ᠦᠯᠡᠳᠡᠭᠡᠬᠦ ᠦᠭᠡᠢ ᠪᠠᠢᠪᠠ᠃ ᠲᠡᠭᠦᠨ ᠦ᠌ ᠥᠩᠭᠡᠷᠡᠭᠰᠡᠨ ᠣᠷᠣᠨ ᠳ᠋ᠤ᠌ ᠬᠥᠮᠦᠨ ᠦᠭᠡᠢ ᠡᠪᠳᠡᠷᠬᠡᠢ ᠪᠠᠭᠤᠷᠢ ᠯᠠ ᠦᠯᠡᠳᠡᠵᠦ ᠪᠠᠢᠯᠠ᠃ ᠳᠣᠯᠣᠭᠠᠨ ᠲᠦᠮᠡ ᠪᠤᠶᠤ ᠠᠷᠪᠠᠨ ᠲᠦᠮᠡᠨ ᠬᠥᠮᠦᠨ ᠲᠡᠢ ᠬᠣᠲᠠᠨ ᠳ᠋ᠤ᠌《 ᠠᠮᠢ ᠲᠠᠢ ᠨᠢᠭᠡᠨ ᠮᠢᠭᠤᠢ ᠪᠤᠶᠤ ᠨᠢᠭᠡᠨ ᠨᠣᠬᠠᠢ》 ᠶ᠋ᠢ ᠴᠤ᠌ ᠦᠯᠡᠳᠡᠭᠡᠭᠰᠡᠨ ᠦᠭᠡᠢ ᠪᠢᠯᠡ᠃ ᠤᠷᠠᠯᠢᠬᠴᠢᠨ᠂ ᠠᠵᠢᠯᠴᠢᠨ ᠂ ᠵᠠᠯᠠᠭᠤ ᠡᠮᠡᠭᠲᠡᠢᠴᠦᠳ ᠢ᠋ ᠣᠯᠵᠠᠯᠠᠭᠰᠠᠳ ᠪᠣᠯᠭᠠᠨ ᠠᠪᠤᠭᠠᠳ ᠶᠠᠪᠤᠨᠠ᠂ ᠵᠡᠪᠰᠡᠭ ᠠᠳᠬᠤᠵᠤ ᠴᠢᠳᠠᠬᠤ ᠡᠷᠡᠭᠲᠡᠢᠴᠦᠳ ᠢ᠋ ᠪᠦᠷ ᠬᠣᠲᠠ ᠶ᠋ᠢ ᠳᠠᠭᠠᠷᠢᠨ ᠴᠣᠬᠢᠬᠤ ᠬᠣᠰᠢᠭᠤᠴᠢ ᠪᠣᠯᠭᠠᠬᠤ ᠪᠠᠷ ᠠᠪᠠᠴᠢᠵᠠᠢ᠃ ᠢᠩᠭᠢᠭᠡᠳ ᠲᠤᠯᠤᠢ ᠶ᠋ᠢᠨ ᠴᠡᠷᠢᠭ ᠣᠯᠠᠰᠢᠷᠠᠵᠤ ᠶᠡᠬᠡᠳᠴᠡᠢ᠃ ᠲᠡᠳᠡᠨᠡᠷ ᠬᠡᠷᠪᠡ ᠨᠢᠭᠡᠳᠦᠭᠡᠷ ᠹᠷᠣᠨᠲ ᠡᠴᠡ ᠵᠢᠭᠤᠲᠠᠪᠠᠯ ᠲᠡᠷᠡ ᠳᠠᠷᠤᠢ ᠮᠣᠩᠭᠣᠯ ᠴᠡᠷᠢᠭ ᠲᠦ᠍ ᠠᠯᠠᠭᠳᠠᠨᠠ᠃
ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠴᠠᠰᠤᠨ ᠪᠥᠮᠪᠥᠭᠡ ᠨᠢ ᠡᠰᠡᠷᠭᠦᠴᠡᠯ ᠪᠦᠬᠦᠨ ᠢ᠋ ᠬᠡᠮᠬᠡᠷᠡᠲᠡᠯᠡ ᠳᠠᠭᠠᠷᠢᠬᠤ ᠳᠣᠳᠣᠮ ᠶᠡᠬᠡᠳᠴᠦ ᠪᠠᠢᠯᠠ᠃ ᠶᠡᠬᠡ ᠬᠣᠲᠠ ᠮᠸᠷᠹ ᠭᠤᠷᠪᠠᠨ ᠭᠠᠷᠠᠭ ᠪᠡᠬᠢᠯᠡᠨ ᠡᠰᠡᠷᠭᠦᠴᠡᠭᠰᠡᠨ ᠪᠣᠯᠪᠠᠴᠤ᠂ ᠪᠠᠲᠤ ᠪᠡᠬᠢ ᠨᠢᠱᠠᠫᠦᠢ᠍ᠷ ᠭᠤᠷᠪᠠᠬᠠᠨ ᠡᠳᠦᠷ ᠡᠰᠡᠷᠭᠦᠴᠡᠭᠡᠳ ᠲᠡᠰᠦᠭᠰᠡᠨ ᠦᠭᠡᠢ ᠠᠪᠲᠠᠭᠳᠠᠪᠠ᠃ ᠲᠤᠰ ᠬᠣᠲᠠ ᠶ᠋ᠢ ᠰᠢᠪᠲᠤᠯᠤᠨ ᠴᠣᠬᠢᠬᠤ ᠶ᠋ᠢᠨ ᠲᠥᠯᠥᠭᠡ ᠲᠤᠯᠤᠢ ᠭᠠᠯ ᠰᠤᠮᠤ ᠬᠠᠷᠪᠤᠬᠤ ᠪᠠᠭᠠᠵᠢ ᠭᠤᠷᠪᠠᠨ ᠮᠢᠩᠭᠠ᠂ ᠴᠢᠯᠠᠭᠤ ᠰᠤᠮᠤᠳᠠᠬᠤ ᠪᠠᠭᠠᠵᠢ ᠭᠤᠷᠪᠠᠨ ᠵᠠᠭᠤ᠂ ᠨᠣᠴᠣᠭᠠᠭᠰᠠᠨ ᠲᠣᠰᠣᠨ ᠯᠣᠩᠬᠣ ᠶ᠋ᠢ ᠰᠤᠮᠤᠳᠠᠬᠤ ᠪᠠᠭᠠᠵᠢ ᠳᠣᠯᠣᠭᠠᠨ ᠵᠠᠭᠤ᠂ ᠬᠣᠲᠠ ᠠᠪᠠᠷᠢᠬᠤ ᠱᠠᠲᠤ ᠳᠥᠷᠪᠡᠨ ᠮᠢᠩᠭᠠ᠂ ᠰᠤᠪᠠᠭ ᠢ᠋ ᠲᠠᠬᠠᠯᠠᠬᠤ ᠰᠢᠷᠣᠢ ᠬᠢᠭᠰᠡᠨ ᠤᠭᠤᠲᠠ ᠬᠣᠶᠠᠷ ᠮᠢᠩᠭᠠ ᠲᠠᠪᠤᠨ ᠵᠠᠭᠤ ᠭᠡᠬᠦ ᠵᠡᠷᠭᠡ ᠶ᠋ᠢ ᠫᠣᠤᠲᠤ ᠴᠡᠷᠢᠭ ᠦ᠋ᠨ ᠦᠢᠯᠡᠳᠪᠦᠷᠢ ᠡᠴᠡ ᠦᠢᠯᠡᠳᠪᠦᠷᠢᠯᠡᠭᠰᠡᠨ ᠢ᠋ ᠠᠪᠴᠢᠷᠠᠵᠤ ᠬᠡᠷᠡᠭᠯᠡᠵᠡᠢ᠃ ᠬᠣᠲᠠ ᠪᠡᠬᠢᠯᠡᠯᠲᠡ ᠨᠢ ᠥᠴᠦᠬᠡᠨ ᠡᠰᠡᠷᠭᠦᠴᠡᠶᠡ ᠭᠡᠵᠦ ᠠᠭᠠᠰᠢᠯᠠᠭᠰᠠᠨ ᠪᠣᠯ ᠲᠤᠯᠤᠢ ᠪᠠᠭᠤᠵᠤ ᠥᠭᠬᠦ ᠪᠡᠷ ᠢᠷᠡᠭᠰᠡᠨ ᠡᠯᠴᠢ ᠶ᠋ᠢ ᠴᠤ᠌ ᠬᠦᠯᠢᠶᠡᠨ ᠠᠪᠬᠤ ᠦᠭᠡᠢ ᠪᠠᠢᠪᠠ᠃
ᠴᠣᠷ ᠤ᠋ᠨ ᠭᠠᠭᠴᠠ ᠤᠳᠠᠭᠠ ᠭᠡᠪᠡᠯ᠂ ᠲᠤᠯᠤᠢ ᠬᠡᠳᠦᠨ ᠰᠠᠷᠠ ᠬᠢᠳᠤᠵᠤ ᠶᠠᠳᠠᠷᠠᠭᠰᠠᠨ ᠴᠤ᠌ ᠮᠠᠭᠠᠳ ᠦᠭᠡᠢ᠂ ᠳᠠᠢᠰᠤᠨ ᠤ᠋ ᠵᠢᠯᠣᠭᠣᠳᠤᠭᠴᠢ ᠨᠢ ᠦᠬᠦᠭᠰᠡᠨ ᠬᠣᠢᠨᠠ᠂ ᠬᠤᠷᠠᠱᠠᠨ ᠤ᠋ ᠬᠠᠮᠤᠭ ᠪᠡᠬᠢ ᠪᠣᠭᠣᠮᠲᠠ ᠡᡁᠸᠯᠠᠲ᠋ᠤ ᠶ᠋ᠢᠨ ᠰᠠᠭᠤᠭᠠᠯᠢ ᠠᠷᠠᠳ ᠢ᠋ ᠠᠭᠤᠴᠢᠯᠠᠨ ᠥᠷᠥᠰᠢᠶᠡᠵᠡᠢ᠃ ᠪᠠᠭᠤᠵᠤ ᠥᠭᠬᠦ ᠦᠭᠡᠢ ᠲᠦᠮᠡ ᠬᠣᠶᠠᠷ ᠮᠢᠩᠭᠠᠨ ᠴᠡᠷᠢᠭ ᠡᠴᠡ ᠠᠰᠲᠠᠭᠠᠨ ᠪᠦᠬᠦ ᠰᠠᠭᠤᠭᠠᠯᠢ ᠠᠷᠠᠳ ᠢ᠋ ᠠᠯᠠᠬᠤ ᠠ᠋ᠴᠠ ᠬᠡᠯᠲᠦᠷᠢᠭᠦᠯᠦᠭᠰᠡᠨ ᠶᠤᠮ ᠃ ᠭᠡᠲᠡᠯᠡ᠂ ᠲᠤᠯᠤᠢ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠡᠮᠡᠭᠴᠡ᠂ ᠡᡁᠸᠯᠡᠲ᠋ᠤ ᠳ᠋ᠤ᠌ ᠰᠢᠨᠡ ᠪᠡᠷ ᠤᠷᠪᠠᠯᠭᠠ ᠭᠠᠷᠴᠤ᠂ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠲᠣᠮᠢᠯᠠᠭᠰᠠᠨ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠨᠢ ᠠᠯᠠᠭᠳᠠᠪᠠ ᠭᠡᠰᠡᠨ ᠴᠢᠮᠡᠭᠡ ᠢᠷᠡᠪᠡ᠃ ᠴᠢᠩᠭᠢᠰ ᠬᠠᠭᠠᠨ ᠲᠤᠯᠤᠢ ᠶ᠋ᠢ ᠳᠣᠩᠭᠣᠳᠤᠨ᠄ 《ᠶᠠᠭᠠᠬᠢᠭᠠᠳ ᠡᠢᠮᠦ ᠤᠷᠪᠠᠯᠭᠠ ᠭᠠᠷᠤᠭᠰᠠᠨ ᠶᠤᠮ ᠪᠣᠢ᠂ ᠰᠡᠯᠡᠮᠡ ᠴᠢᠨᠢ ᠡᡁᠸᠯᠡᠲ᠋ᠤ ᠶ᠋ᠢᠨ ᠮᠠᠭᠤ ᠠᠮᠢᠲᠠᠨ ᠳ᠋ᠤ᠌ ᠮᠢᠲᠠᠷᠠᠴᠢᠬᠠᠭᠰᠠᠨ ᠤᠤ》 ᠭᠡᠵᠦ ᠬᠡᠯᠡᠵᠡᠢ᠃
ᠴᠢᠩᠭᠢᠰ ᠬᠠᠭᠠᠨ ᠥᠭᠡᠷᠡ ᠨᠢᠭᠡᠨ ᠥᠷᠯᠥᠭ ᠲᠦ᠍ ᠣᠨᠳᠣᠣ ᠴᠡᠷᠢᠭ ᠥᠭᠭᠦᠭᠡᠳ:
《ᠦᠬᠦᠭᠰᠡᠨ ᠬᠥᠮᠦᠨ ᠡᠳᠡᠭᠡᠵᠦ ᠢᠷᠡᠭᠰᠡᠨ ᠪᠣᠯᠬᠣᠷ᠂ ᠲᠡᠳᠡᠨ ᠦ᠌ ᠲᠣᠯᠣᠭᠠᠢ ᠶ᠋ᠢ ᠪᠡᠶᠡ ᠡᠴᠡ ᠨᠢ ᠰᠠᠯᠭᠠᠭᠲᠤᠨ ᠭᠡᠵᠦ ᠵᠠᠷᠯᠢᠭᠳᠠᠰᠤᠭᠠᠢ》 ᠭᠡᠰᠡᠨ ᠰᠢᠨᠡ ᠡᠭᠦᠷᠭᠡ ᠲᠤᠰᠢᠶᠠᠵᠠᠢ᠃ ᠡᠨᠡ ᠵᠠᠷᠯᠢᠭ ᠢ᠋ ᠡᠷᠡᠰ ᠰᠢᠭᠤᠷᠬᠠᠢ ᠪᠡᠶᠡᠯᠡᠭᠦᠯᠪᠡ᠃ ᠡᡁᠸᠯᠡᠲ᠋ᠤ ᠬᠣᠲᠠ ᠡᠵᠡᠯᠡᠭᠡᠳ᠂ ᠰᠠᠭᠤᠭᠠᠯᠢ ᠠᠷᠠᠳ ᠢ᠋ ᠬᠢᠳᠤᠨ ᠠᠯᠠᠭᠰᠠᠨ ᠬᠣᠢᠨᠠ᠂ ᠨᠢᠭᠡᠨᠲᠡ ᠬᠠᠷᠢᠬᠤ ᠵᠠᠮ ᠳ᠋ᠠᠭᠠᠨ ᠭᠠᠷᠤᠭᠠᠳ ᠪᠠᠢᠭᠰᠠᠨ ᠡᠨᠡᠬᠦ ᠥᠷᠯᠥᠭ᠂ ᠬᠣᠶᠠᠷ ᠮᠢᠩᠭᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠲᠣᠮᠢᠯᠠᠨ ᠡᠨᠡ ᠬᠣᠲᠠᠨ ᠳ᠋ᠤ᠌ ᠡᠷᠭᠢᠵᠦ ᠣᠴᠢᠭᠤᠯᠤᠭᠠᠳ ᠡᠪᠳᠡᠷᠬᠡᠢ ᠪᠠᠭᠤᠷᠢ ᠡᠴᠡ ᠬᠥᠮᠦᠨ ᠭᠠᠷᠴᠤ ᠢᠷᠡᠨᠡ ᠤᠤ ᠦᠭᠡᠢ ᠤᠤ ᠭᠡᠵᠦ ᠯᠠᠪᠯᠠᠭᠤᠯᠵᠠᠢ᠃ ᠡᠨᠡ ᠴᠡᠷᠢᠭ ᠨᠢ ᠦᠨᠡᠬᠡᠷ ᠡᠪᠳᠡᠷᠬᠡᠢ ᠪᠠᠭᠤᠷᠠᠢ ᠳᠣᠲᠣᠷᠠ ᠡᠴᠡ ᠭᠤᠷᠪᠠᠨ ᠮᠢᠩᠭᠠᠨ ᠠᠮᠢᠳᠤ ᠬᠥᠮᠦᠨ ᠭᠠᠷᠴᠤ ᠢᠷᠡᠭᠰᠡᠨ ᠢ᠋ ᠮᠡᠳᠡᠭᠡᠳ ᠲᠡᠷᠡ ᠳᠠᠷᠤᠢ ᠳ᠋ᠤᠨᠢ ᠦᠯᠡᠳᠡᠭᠡᠯ ᠦᠭᠡᠢ ᠠᠯᠠᠭᠰᠠᠨ ᠪᠠᠢᠨᠠ᠃ ᠮᠣᠩᠭᠣᠯ ᠴᠡᠷᠢᠭ ᠬᠣᠶᠠᠳᠤᠭᠠᠷ ᠤᠳᠠᠭᠠ ᠴᠡᠷᠢᠭ ᠢ᠋ᠶ᠋ᠡᠨ ᠲᠠᠲᠠᠵᠤ ᠭᠠᠷᠭᠠᠬᠤ ᠦᠶᠡ ᠳ᠋ᠦ᠍᠂ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠰᠠᠬᠢᠵᠤ ᠪᠠᠢᠭᠰᠠᠨ ᠡᠨᠡᠬᠦ ᠬᠣᠲᠠ ᠶ᠋ᠢᠨ ᠡᠪᠳᠡᠷᠬᠡᠢ ᠪᠠᠭᠤᠷᠢ ᠡᠴᠡ ᠭᠠᠷᠴᠤ ᠢᠷᠡᠭᠰᠡᠨ ᠬᠥᠮᠦᠨ ᠠᠷᠪᠠᠨ ᠵᠢᠷᠭᠤᠭᠠ ᠪᠠᠢᠯᠠ᠃ ᠡᠭᠦᠨ ᠳ᠋ᠦ᠍ ᠬᠣᠲᠠ ᠶ᠋ᠢᠨ ᠲᠡᠭᠦᠷᠭᠡ ᠡᠴᠡ ᠬᠣᠷᠢᠨ ᠳᠥᠷᠪᠡᠨ ᠬᠥᠮᠦᠨ ᠢᠷᠡᠭᠡᠳ ᠠᠮᠢᠳᠤ ᠪᠠᠢᠭᠰᠠᠨ ᠪᠦᠭᠦᠳᠡ ᠡᠳᠦᠢ ᠯᠡ ᠬᠥᠮᠦᠨ ᠪᠠᠢᠯᠠ ᠭᠡᠵᠡᠢ᠃
ᠡᠨᠡ ᠮᠡᠲᠦ ᠶ᠋ᠢᠨ ᠰᠥᠨᠥᠭᠡᠬᠦ ᠪᠠᠢᠯᠳᠤᠭᠠᠨ ᠡᠯᠡ ᠭᠠᠵᠠᠷ᠂ ᠡᠯᠡ ᠲᠠᠯᠠ ᠳ᠋ᠤ᠌ ᠶᠠᠪᠤᠭᠳᠠᠵᠤ ᠪᠠᠢᠯᠠ᠃ ᠬᠣᠷᠰᠸᠮ ᠳ᠋ᠤ᠌ ᠥᠭᠡᠳᠡᠢ ᠰᠢᠪᠲᠤᠯᠤᠨ ᠴᠣᠬᠢᠭᠰᠠᠨ ᠡᠴᠡ ᠦᠷᠭᠡᠨᠴᠢ ᠶ᠋ᠢ ᠪᠠᠭᠤᠯᠭᠠᠵᠤ ᠠᠪᠴᠠᠢ᠃ ᠠᠮᠤᠳᠠᠷᠢᠶᠠ ᠭᠣᠣᠯ ᠤ᠋ᠨ ᠤᠷᠤᠰᠬᠠᠯ ᠢ᠋ ᠬᠤᠪᠢᠷᠠᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠰᠠᠭᠤᠭᠠᠯᠢ ᠠᠷᠠᠳ ᠤᠰᠤ ᠲᠠᠰᠤᠷᠠᠬᠤ ᠡᠴᠡ ᠤᠷᠢᠳ ᠬᠤᠳᠳᠤᠭ ᠮᠠᠯᠲᠠᠨ ᠪᠡᠯᠡᠳᠬᠡᠭᠰᠡᠨ ᠪᠣᠯᠬᠣᠷ ᠶᠠᠮᠠᠷ ᠴᠤ᠌ ᠲᠤᠰᠠ ᠭᠠᠷᠤᠭᠰᠠᠨ ᠦᠭᠡᠢ᠃ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠠᠭᠤᠷ ᠬᠢᠯᠢᠩ ᠥᠰᠢᠶᠡ ᠬᠣᠷᠣᠰᠤᠯ ᠶᠡᠷᠦ ᠪᠤᠰᠤ ᠶ᠋ᠢᠨ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠷᠦᠭᠰᠡᠨ ᠪᠢᠯᠡ᠃ ᠨᠢᠭᠡᠨ ᠤᠳᠠᠭᠠ ᠬᠣᠷᠰᠸᠮ ᠤ᠋ᠨ ᠬᠥᠮᠦᠰ ᠭᠤᠷᠪᠠᠨ ᠮᠢᠩᠭᠠᠨ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠠᠷᠤ ᠵᠠᠮ ᠢ᠋ ᠲᠠᠰᠤᠯᠤᠭᠠᠳ᠂ ᠡᠨᠡ ᠭᠤᠷᠪᠠᠨ ᠮᠢᠩᠭᠠᠨ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠡᠴᠦᠰ ᠲᠤᠨᠢ ᠨᠢᠭᠡᠨ ᠬᠥᠮᠦᠨ ᠢ᠋ ᠴᠦ᠍ ᠦᠯᠡᠳᠡᠭᠡᠯ ᠦᠭᠡᠢ ᠠᠯᠠᠭᠰᠠᠨ ᠶᠤᠮ᠃ ᠣᠳᠣ ᠥᠭᠡᠳᠡᠢ ᠮᠣᠳᠣᠨ ᠬᠠᠪᠲᠠᠰᠤ ᠪᠤᠶᠤ ᠪᠣᠭᠣᠵᠢ ᠲᠠᠢ ᠲᠦᠯᠡᠭᠡ ᠪᠡᠷ ᠰᠤᠪᠠᠭ ᠢ᠋ ᠳᠦᠭᠦᠷᠭᠡᠬᠦ ᠪᠡᠷ ᠵᠠᠷᠯᠠᠭᠠᠳ᠂ ᠭᠠᠯ ᠨᠣᠴᠣᠭᠠᠭᠰᠠᠨ ᠲᠣᠰᠣᠨ ᠯᠣᠩᠬᠣᠨ ᠤ᠋ ᠪᠣᠷᠣᠭᠠ ᠶ᠋ᠢ ᠬᠣᠲᠠ ᠶ᠋ᠢᠨ ᠲᠥᠪ ᠲᠦ᠍ ᠪᠠᠭᠤᠯᠭᠠᠵᠤ ᠪᠠᠢᠬᠤ ᠬᠣᠭᠣᠷᠣᠨᠳᠣ᠂ ᠮᠣᠩᠭᠣᠯ ᠴᠡᠷᠢᠭ ᠬᠣᠲᠠ ᠶᠢᠨ ᠬᠡᠷᠡᠮ ᠳ᠋ᠦ᠍ ᠠᠪᠠᠷᠢᠭᠠᠳ ᠭᠠᠷᠪᠠ᠃ ᠬᠣᠷᠰᠸᠮ ᠤ᠋ᠨ ᠬᠥᠮᠦᠰ ᠡᠨᠡ ᠵᠡᠭᠡᠯᠢ ᠡᠴᠡ ᠲᠡᠷᠡ ᠵᠡᠭᠡᠯᠢ ᠳ᠋ᠦ᠍᠂ ᠡᠨᠡ ᠪᠠᠢᠰᠢᠩ ᠡᠴᠡ ᠲᠡᠷᠡ ᠪᠠᠢᠰᠢᠩ ᠳ᠋ᠤ᠌ ᠰᠢᠯᠵᠢᠵᠦ ᠪᠡᠬᠢᠯᠡᠨ ᠪᠠᠢᠯᠳᠤᠪᠠ᠃ ᠳᠣᠯᠣᠭᠠᠨ ᠡᠳᠦᠷ ᠦ᠋ᠨ ᠬᠤᠭᠤᠴᠠᠭᠠ ᠳ᠋ᠤ᠌ ᠬᠠᠲᠠᠭᠤ ᠲᠡᠮᠡᠴᠡᠯ ᠢᠪᠴᠤᠤ ᠵᠡᠭᠡᠯᠢ ᠶ᠋ᠢᠨ ᠳᠤᠮᠳᠠ ᠶᠠᠪᠤᠭᠳᠠᠭᠰᠠᠨ ᠪᠣᠯᠪᠠᠴᠤ ᠡᠴᠦᠰ ᠦ᠋ᠨ ᠮᠥᠷᠲᠡᠭᠡᠨ ᠡᠰᠡᠷᠭᠦᠴᠡᠯ ᠦ᠋ᠨ ᠬᠦᠴᠦᠨ ᠨᠢ ᠪᠤᠲᠠ ᠨᠢᠷᠭᠡᠭᠳᠡᠪᠡ᠃ ᠠᠮᠢᠳᠤ ᠦᠯᠡᠳᠡᠭᠰᠡᠨ ᠬᠥᠮᠦᠰ ᠨᠢ ᠡᠰᠡᠷᠭᠦᠴᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠠᠳ ᠬᠣᠲᠠ ᠶ᠋ᠢᠨ ᠭᠠᠳᠠᠨᠠ ᠬᠥᠭᠡᠭᠡᠭᠳᠡᠨ ᠭᠠᠷᠤᠭᠰᠠᠨ ᠬᠣᠢᠨᠠ᠂ ᠤᠭ ᠤ᠋ᠨ ᠶᠣᠰᠣᠭᠠᠷ ᠤᠷᠠᠯᠢᠭ ᠤ᠋ᠨ ᠮᠡᠷᠭᠡᠵᠢᠯ ᠲᠡᠢ ᠬᠥᠮᠦᠰ᠂ ᠠᠵᠢᠯᠴᠢᠨ᠂ ᠵᠠᠯᠠᠭᠤ ᠡᠮᠡᠭᠲᠡᠢᠴᠦᠳ ᠢ᠋ ᠰᠣᠩᠭᠣᠨ ᠦᠯᠡᠳᠡᠭᠡᠭᠰᠡᠨ ᠦ᠌ ᠳᠠᠷᠠᠭᠠ᠂ ᠪᠥᠭᠡᠮ ᠢ᠋ᠶ᠋ᠡᠷ ᠨᠢ ᠬᠢᠳᠤᠵᠤ ᠳᠠᠭᠤᠰᠬᠠᠪᠠ᠃ ᠲᠡᠦᠬᠡᠴᠢᠨ ᠨᠠᠷ ᠡᠨᠳᠡᠬᠢ ᠨᠢᠭᠡᠨ ᠮᠣᠩᠭᠣᠯ ᠬᠥᠮᠦᠨ ᠬᠣᠷᠢᠨ ᠳᠥᠷᠪᠡᠨ ᠬᠥᠮᠦᠨ ᠢ᠋ ᠠᠯᠠᠪᠠ ᠭᠡᠵᠦ ᠲᠡᠮᠳᠡᠭᠯᠡᠵᠦ ᠪᠠᠢᠨᠠ᠃ ᠦᠨᠡ ᠴᠠᠨᠠ ᠬᠦᠷᠬᠦ ᠦᠭᠡᠢ ᠡᠳ᠋ ᠪᠠᠷᠠᠭᠠ ᠪᠦᠬᠦᠨ ᠢ᠋ ᠬᠣᠲᠠ ᠡᠴᠡ ᠠᠪᠴᠤ ᠭᠠᠷᠭᠠᠭᠰᠠᠨ ᠬᠣᠢᠨᠠ ᠭᠠᠯ ᠲᠠᠯᠪᠢᠵᠤ ᠰᠢᠲᠠᠭᠠᠭᠠᠳ᠂ ᠳᠠᠷᠠᠭᠠ ᠳ᠋ᠤᠨᠢ ᠪᠠᠰᠠ ᠠᠮᠤᠳᠠᠷᠢᠶᠠ ᠭᠣᠣᠯ ᠤ᠋ᠨ ᠤᠷᠤᠰᠬᠠᠯ ᠢ᠋ ᠬᠣᠲᠠ ᠶ᠋ᠢᠨ ᠡᠪᠳᠡᠷᠬᠡᠢ ᠪᠠᠭᠤᠷᠢ ᠳ᠋ᠤ᠌ ᠵᠠᠯᠠᠨ ᠴᠢᠳᠬᠤᠭᠤᠯᠤᠭᠰᠠᠨ ᠢ᠋ᠶ᠋ᠠᠷ ᠨᠢᠭᠡ ᠪᠤᠶᠤ ᠰᠤᠪᠠᠭ ᠤ᠋ᠨ ᠳᠣᠲᠣᠷᠠ ᠰᠢᠷᠭᠤᠨ ᠨᠢᠭᠤᠵᠤ ᠪᠠᠢᠭᠰᠠᠨ ᠠᠮᠢᠲᠠᠨ ᠨᠢ ᠪᠦᠷ ᠤᠰᠤᠨ ᠳ᠋ᠤ᠌ ᠵᠢᠪᠴᠦ ᠦᠬᠦᠵᠡᠢ᠃ ᠠᠮᠤᠳᠠᠷᠢᠶᠠ ᠭᠣᠣᠯ ᠤ᠋ᠨ ᠤᠷᠤᠰᠬᠠᠯ ᠬᠣᠶᠠᠷ ᠤᠳᠠᠭᠠ ᠥᠭᠡᠷᠡᠴᠢᠯᠡᠭᠳᠡᠨ ᠬᠤᠪᠢᠷᠠᠭᠰᠠᠨ ᠡᠴᠡ ᠡᠨᠡ ᠡᠳᠦᠷ ᠬᠦᠷᠲᠡᠯᠡ ᠡᠷᠳᠡᠮᠲᠡᠨ ᠨᠠᠷ ᠲᠡᠭᠦᠨ ᠦ᠌ ᠨᠢᠭᠡᠨ ᠰᠠᠯᠠᠭᠠ ᠨᠢ ᠺᠠᠰᠫᠢ ᠶ᠋ᠢᠨ ᠲᠠᠩᠭᠢᠰ ᠲᠤ᠌ ᠴᠢᠳᠬᠤᠵᠤ ᠪᠠᠢᠭᠰᠠᠨ ᠪᠢᠰᠢᠦ᠂ ᠭᠡᠵᠦ ᠣᠳᠣ ᠬᠠᠲᠠᠭᠠᠳ ᠬᠡᠳᠦᠨ ᠵᠠᠭᠤᠨ ᠺᠢᠯᠣᠮᠧᠲ᠋ᠷ ᠦ᠋ᠨ ᠤᠷᠲᠤ ᠭᠣᠣᠯ ᠤ᠋ᠨ ᠰᠠᠪᠠ ᠨᠢ ᠶᠠᠭᠤ ᠪᠠᠢᠭᠰᠠᠨ ᠶᠤᠮ ᠪᠣᠢ? ᠭᠡᠵᠦ ᠮᠠᠷᠭᠤᠯᠳᠤᠵᠤ ᠪᠠᠢᠨᠠ᠃ ᠡᠨᠡᠬᠦ ᠰᠠᠯᠪᠤᠷᠢ ᠤᠷᠤᠰᠬᠠᠯ ᠨᠢ ᠬᠠᠲᠠᠭᠰᠠᠨ ᠡᠴᠡ ᠪᠣᠯᠵᠤ ᠺᠠᠰᠫᠢ ᠶ᠋ᠢᠨ ᠲᠠᠩᠭᠢᠰ ᠪᠣᠯᠤᠨ ᠠᠷᠠᠯ ᠲᠠᠩᠭᠢᠰ ᠤ᠋ᠨ ᠬᠣᠭᠣᠷᠣᠨᠳᠣ ᠪᠠᠢᠭᠰᠠᠨ ᠭᠠᠵᠠᠷ ᠨᠢ ᠡᠯᠡᠰᠦ ᠮᠠᠩᠬᠠ ᠪᠣᠯᠤᠨ ᠬᠤᠪᠢᠷᠠᠭᠰᠠᠨ ᠪᠢᠰᠢᠦ᠃
ᠡᠨᠡ ᠬᠣᠭᠣᠷᠣᠨᠳᠣ ᠴᠢᠩᠭᠢᠰ ᠬᠠᠭᠠᠨ ᠾᠢᠨᠲᠤ ᠬᠣᠰᠢᠭᠤ ᠠᠭᠤᠯᠠ ᠶ᠋ᠢᠨ ᠰᠠᠯᠪᠤᠷᠢ ᠭᠠᠵᠠᠷ ᠢ᠋ ᠰᠢᠭᠦᠷᠳᠡᠨ ᠠᠷᠢᠯᠭᠠᠵᠤ ᠪᠠᠢᠯᠠ᠃ ᠪᠠᠯᠠᠭ ᠬᠣᠲᠠ᠂ ᠳᠠᠯᠠᠬᠠᠨ᠂ ᠭᠢᠯᠳᠥ᠋ᠨ ᠢ᠋ ᠡᠵᠡᠯᠡᠪᠡ᠃ ᠠᠭᠤᠯᠠ ᠪᠡᠬᠢᠯᠡᠯᠲᠡ ᠪᠠᠮᠢᠶᠠᠨ ᠤ᠋ ᠡᠮᠦᠨᠡ ᠲᠡᠭᠦᠨ ᠦ᠌ ᠠᠴᠢ ᠳᠠᠷᠤᠢ ᠴᠠᠭᠠᠲᠠᠢ ᠶ᠋ᠢᠨ ᠬᠥᠪᠡᠭᠦᠨ ᠮᠤᠭᠠᠳᠤᠭᠠᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠦᠬᠦᠭᠰᠡᠨ ᠪᠢᠯᠡ᠃ ᠬᠠᠢᠷᠠᠲᠠᠢ ᠠᠴᠢ ᠨᠢ ᠦᠬᠦᠭᠰᠡᠨ ᠳ᠋ᠦ᠍ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠬᠢᠯᠢᠩ ᠨᠢ ᠬᠥᠳᠡᠯᠪᠡ᠃ ᠡᠨᠡ ᠪᠡᠬᠢᠯᠡᠯᠲᠡ ᠶ᠋ᠢ ᠪᠤᠯᠢᠶᠠᠵᠤ ᠠᠪᠤᠭᠠᠳ᠂ ᠲᠡᠨᠳᠡ ᠪᠠᠢᠭᠰᠠᠨ ᠬᠥᠮᠦᠨ ᠮᠠᠯ ᠪᠦᠬᠦᠨ ᠢ᠋ ᠠᠯᠠᠭᠲᠤᠨ ᠭᠡᠵᠦ ᠵᠠᠷᠯᠢᠭᠳᠠᠵᠠᠢ᠃ ᠴᠢᠩᠭᠢᠰ ᠬᠠᠭᠠᠨ ᠠᠴᠢ ᠪᠠᠨ ᠳᠤᠷᠠᠰᠬᠠᠬᠤ ᠶ᠋ᠢᠨ ᠲᠥᠯᠥᠭᠡ ᠡᠨᠡ ᠭᠠᠵᠠᠷ ᠲᠤ᠌ ᠴᠢᠯᠠᠭᠤ ᠣᠪᠣᠭᠠᠯᠠᠵᠤ ᠡᠯᠡᠰᠦ ᠮᠠᠩᠬᠠ ᠪᠣᠯᠬᠤ ᠳ᠋ᠤ᠌ ᠬᠦᠷᠭᠡᠵᠡᠢ᠃ ᠬᠡᠳᠦᠨ ᠵᠠᠭᠤᠨ ᠵᠢᠯ ᠥᠩᠭᠡᠷᠡᠭᠰᠡᠨ ᠦ᠌ ᠬᠣᠢᠨᠠ᠂ ᠪᠠᠳᠠᠷᠠᠨ ᠬᠥᠭᠵᠢᠵᠦ ᠪᠠᠢᠬᠤ ᠳ᠋ᠤ᠌ ᠡᠨᠡ ᠭᠠᠵᠠᠷ ᠤᠷᠭᠤᠮᠠᠯ ᠤᠷᠭᠤᠬᠤ ᠦᠭᠡᠢ᠂ ᠬᠥᠮᠦᠨ ᠠᠮᠢᠲᠠᠨ ᠦᠭᠡᠢ ᠣᠷᠣᠨ ᠪᠣᠯᠤᠭᠠᠳ ᠮᠤᠤᠪᠠᠯᠠᠭ ᠭᠡᠮᠡᠨ ᠳᠠᠭᠤᠳᠠᠬᠤ ᠪᠣᠯᠤᠭᠰᠠᠨ ᠪᠢᠯᠡ᠃
ᠹᠠᠮᠢᠶᠠᠨ ᠢ᠋ ᠡᠪᠳᠡᠵᠦ ᠪᠠᠢᠭᠰᠠᠨ ᠦᠶᠡ ᠳ᠋ᠦ᠍ ᠥᠭᠡᠳᠡᠢ᠂ ᠴᠠᠭᠠᠲᠠᠢ ᠬᠣᠷᠧᠰᠮ ᠡᠴᠡ ᠬᠠᠷᠢᠵᠤ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠵᠥᠴᠢ ᠬᠠᠷᠢᠨ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠵᠢᠯᠣᠭᠣᠳᠤᠯᠭᠠ ᠳᠣᠣᠷᠠ ᠣᠷᠣᠭᠰᠠᠨ ᠳ᠋ᠠᠭᠠᠨ ᠠᠭᠤᠷᠯᠠᠭᠠᠳ ᠡᠷᠭᠦᠮᠵᠢᠯᠡᠵᠦ ᠥᠭᠭᠦᠭᠰᠡᠨ ᠨᠤᠲᠤᠭ ᠲᠠᠭᠠᠨ ᠶᠠᠪᠤᠴᠢᠬᠠᠭᠰᠠᠨ ᠶᠤᠮ᠃ ᠲᠡᠭᠡᠭᠡᠳ ᠲᠡᠷᠡ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠡᠨᠡᠬᠦ ᠴᠢᠮᠡᠭᠡ ᠶ᠋ᠢ ᠡᠴᠢᠭᠡ ᠳ᠋ᠡᠭᠡᠨ ᠬᠡᠯᠡᠵᠡᠢ᠃ ᠡᠭᠦᠨ ᠳ᠋ᠦ᠍᠄
《ᠡᠨᠡ ᠴᠢᠨᠢ ᠮᠢᠨᠦ ᠬᠡᠦᠬᠡᠳ ᠦ᠋ᠨ ᠰᠢᠨᠵᠢ ᠤᠤ᠂ ᠬᠡᠦᠬᠡᠳ ᠦ᠋ᠨ ᠲᠥᠯᠥᠭᠡ ᠪᠢ ᠡᠨᠡ ᠮᠡᠲᠦ ᠵᠢᠳᠬᠦᠵᠦ᠂ ᠣᠯᠠᠨ ᠦᠨᠳᠦᠰᠦᠲᠡᠨ᠂ ᠡᠯᠡ ᠴᠢᠭᠢᠷᠠᠭ ᠤᠯᠤᠰ ᠢ᠋ ᠪᠠᠢᠯᠳᠤᠨ ᠳᠠᠭᠠᠭᠤᠯᠵᠤ ᠪᠠᠢᠬᠤ ᠳ᠋ᠤ᠌᠂ ᠮᠢᠨᠦ ᠬᠡᠦᠬᠡᠳ ᠬᠠᠷᠢᠨ ᠦᠭᠡ ᠶ᠋ᠢ ᠰᠣᠨᠣᠰᠬᠤ ᠦᠭᠡᠢ᠂ ᠬᠠᠷᠢᠯᠴᠠᠨ ᠬᠡᠷᠡᠯᠳᠦᠬᠦ ᠡᠴᠡ ᠥᠭᠡᠷᠡ ᠶᠠᠭᠤ ᠶ᠋ᠢ ᠴᠤ᠌ ᠪᠦᠲᠦᠭᠡᠵᠦ ᠴᠢᠳᠠᠬᠤ ᠦᠭᠡᠢ》 ᠭᠡᠵᠦ ᠬᠠᠰᠬᠢᠷᠴᠤ ᠠᠭᠤᠷᠯᠠᠭᠰᠠᠨ ᠣᠪᠣᠷ ᠢ᠋ᠶ᠋ᠠᠷ ᠴᠠᠭᠠᠲᠠᠢ ᠶ᠋ᠢ ᠭᠥᠯᠢᠢᠵᠦ ᠬᠠᠷᠠᠪᠠ᠃ ᠵᠥᠴᠢ ᠯᠤᠭᠡ ᠲᠡᠮᠡᠴᠡᠭᠰᠡᠨ ᠪᠠ ᠲᠡᠭᠦᠨ ᠦ᠌ ᠬᠠᠷᠢᠭᠰᠠᠨ ᠰᠢᠯᠲᠠᠭᠠᠨ ᠢ᠋ ᠥᠪᠡᠷ ᠦ᠋ᠨ ᠪᠡᠶᠡ ᠳ᠋ᠦ᠍ᠨᠢ ᠡᠭᠦᠷᠭᠡᠯᠡᠭᠦᠯᠵᠦ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠠᠳ᠂ ᠴᠠᠭᠠᠲᠠᠢ ᠪᠥᠬᠥᠢᠨ ᠰᠥᠭᠥᠳᠴᠦ《ᠬᠡᠷᠪᠡ ᠡᠴᠢᠭᠡ ᠶ᠋ᠢᠨ ᠵᠠᠷᠯᠢᠭ ᠢ᠋ ᠰᠣᠨᠣᠰᠬᠤ ᠦᠭᠡᠢ ᠶᠠᠪᠤᠬᠤ ᠪᠠᠷ ᠢ᠋ᠶ᠋ᠠᠨ ᠦᠬᠦᠴᠢᠬᠡᠪᠡᠯ ᠳᠡᠭᠡᠷᠡ》 ᠭᠡᠵᠦ ᠲᠠᠩᠭᠠᠷᠢᠭᠯᠠᠵᠠᠢ᠃
《ᠴᠢ ᠮᠢᠨᠦ ᠶᠠᠮᠠᠷ ᠵᠠᠷᠯᠢᠭ ᠢ᠋ ᠴᠤ᠌ ᠰᠣᠨᠣᠰᠤᠨᠠ ᠤᠤ》 ᠭᠡᠵᠦ ᠴᠢᠩᠭᠢᠰ ᠬᠠᠭᠠᠨ ᠳᠠᠬᠢᠨ ᠠᠰᠠᠭᠤᠭᠰᠠᠨ ᠳ᠋ᠤ᠌᠂ ᠴᠠᠭᠠᠲᠠᠢ ᠬᠣᠶᠠᠷ ᠤᠳᠠᠭᠠ ᠲᠠᠩᠭᠠᠷᠢᠭᠯᠠᠭᠰᠠᠨ ᠪᠣᠯᠬᠣᠷ ᠴᠢᠩᠭᠢᠰ ᠬᠠᠭᠠᠨ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ
《ᠮᠤᠭᠠᠳᠤᠭᠠᠨ ᠬᠥᠪᠡᠭᠦᠨ ᠴᠢᠨᠢ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠦᠬᠦᠵᠡᠢ᠂ ᠴᠢ ᠤᠬᠢᠯᠠᠵᠤ ᠪᠣᠯᠬᠤ ᠦᠭᠡᠢ᠂ ᠰᠡᠭᠦᠷᠡᠰᠦ ᠴᠤ᠌ ᠠᠯᠳᠠᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠪᠢ ᠵᠠᠷᠯᠢᠭᠳᠠᠰᠤᠭᠠᠢ》 ᠭᠡᠵᠡᠢ᠃
ᠴᠠᠭᠠᠲᠠᠢ ᠶᠠᠭ ᠠᠶᠤᠩᠭᠠ ᠳ᠋ᠤ᠌ ᠨᠢᠷᠭᠡᠭᠳᠡᠭᠰᠡᠨ ᠮᠡᠲᠦ ᠮᠡᠯᠡᠷᠡᠴᠢᠬᠡᠭᠰᠡᠨ ᠪᠥᠭᠡᠳ ᠣᠭᠲᠣ ᠬᠠᠷᠢᠭᠤ ᠳᠤᠤᠭᠠᠷᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠲᠡᠷᠡ ᠴᠠᠭ ᠲᠤᠨᠢ ᠲᠡᠢᠮᠦ ᠪᠠᠢᠭᠰᠠᠨ᠂ ᠬᠣᠵᠢᠮ ᠬᠣᠢᠨᠠ ᠨᠢ ᠴᠤ᠌ ᠲᠡᠢᠮᠦ ᠪᠠᠢᠭᠰᠠᠨ ᠶᠤᠮ᠃
ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ ᠰᠠᠢᠲᠠᠢ ᠴᠥᠭᠡᠨ ᠲᠣᠭᠠᠨ ᠤ᠋ ᠬᠥᠮᠦᠨ ᠢᠯᠠᠯᠲᠠ ᠣᠯᠤᠭᠰᠠᠨ ᠡᠴᠡ᠂ ᠲᠡᠭᠦᠨ ᠦ᠌ ᠳᠠᠢᠰᠤᠨ ᠬᠠᠷᠢᠨ ᠪᠦᠬᠦ ᠤᠯᠤᠰ ᠢ᠋ᠶ᠋ᠠᠨ ᠰᠦᠢᠳᠬᠡᠵᠦ ᠳᠠᠭᠤᠰᠬᠠᠭᠰᠠᠨ ᠶᠤᠮ᠃ ᠬᠡᠳᠦᠨ ᠵᠠᠭᠤᠨ ᠲᠦᠮᠡᠨ ᠬᠥᠮᠦᠨ ᠠᠮᠠ ᠲᠠᠢ ᠪᠠᠢᠭᠰᠠᠨ ᠣᠯᠠᠨ ᠬᠣᠲᠠ ᠪᠠᠯᠭᠠᠳ ᠢ᠋ ᠡᠪᠳᠡᠷᠬᠡᠢ ᠪᠠᠭᠤᠷᠢ ᠪᠣᠯᠭᠠᠵᠤ ᠣᠷᠬᠢᠭᠠᠳ ᠰᠠᠭᠤᠬᠤ ᠬᠥᠮᠦᠨ ᠴᠦ᠍ ᠦᠭᠡᠢ ᠪᠣᠯᠭᠠᠵᠠᠢ᠃ ᠣᠳᠣ ᠳ᠋ᠤ᠌ ᠬᠦᠷᠲᠡᠯᠡ ᠠᠯᠢ ᠭᠠᠵᠠᠷ ᠲᠤ ᠭᠡᠳ᠂ ᠮᠣᠩᠭᠣᠯ ᠤ᠋ᠨ ᠳᠣᠲᠣᠭᠠᠳᠤ ᠶ᠋ᠢᠨ ᠲᠡᠢᠨ ᠳ᠋ᠦ᠍ ᠴᠤ᠌᠂ ᠠᠯᠲᠠᠨ ᠤᠯᠤᠰ ᠳᠠᠬᠢ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠴᠤ᠌᠂ ᠮᠣᠩᠭᠣᠯ ᠴᠡᠷᠢᠭ ᠡᠨᠡ ᠮᠡᠲᠦ ᠬᠢᠯᠢᠩᠯᠡᠭᠰᠡᠨ ᠶᠠᠪᠤᠳᠠᠯ ᠪᠠᠢᠭᠰᠠᠨ ᠦᠭᠡᠢ᠃ ᠤᠴᠢᠷ ᠡᠢᠮᠦ ᠡᠴᠡ ᠠᠷᠠᠯ ᠲᠠᠩᠭᠢᠰ ᠡᠴᠡ ᠫᠧᠷᠰ ᠦ᠋ᠨ ᠡᠯᠡᠰᠦ ᠮᠠᠩᠬᠠ ᠳ᠋ᠤ᠌ ᠬᠦᠷᠲᠡᠯᠡ ᠮᠣᠩᠭᠣᠯ ᠤ᠋ᠨ ᠰᠦᠷᠳᠡᠭᠦᠯᠭᠡ ᠳ᠋ᠦ᠍ ᠪᠦᠷᠬᠦᠭᠳᠡᠪᠡ᠃ ᠃ ᠠᠮᠢᠳᠤ ᠦᠯᠡᠳᠡᠭᠰᠡᠨ ᠬᠥᠮᠦᠰ ᠳᠣᠣᠷᠠ ᠳᠠᠭᠤᠨ ᠢ᠋ᠶ᠋ᠠᠷ《ᠵᠢᠭᠰᠢᠮᠡᠷ ᠠᠮᠢᠲᠠᠨ》 ᠭᠡᠵᠦ ᠰᠢᠪᠡᠭᠡᠨᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠨᠠ᠃ ᠮᠣᠩᠭᠣᠯ ᠤ᠋ᠨ ᠭᠠᠭᠴᠠ ᠮᠣᠷᠢᠲᠤ ᠴᠡᠷᠢᠭ ᠨᠢᠭᠡᠨ ᠲᠣᠰᠬᠣᠨ ᠳ᠋ᠤ᠌ ᠣᠷᠣᠭᠠᠳ᠂ ᠲᠡᠨᠳᠡ ᠠᠷᠪᠠᠨ ᠬᠣᠶᠠᠷ ᠬᠥᠮᠦᠨ ᠢ᠋ ᠠᠯᠠᠭᠠᠳ ᠪᠦᠬᠦ ᠮᠠᠯ ᠢ᠋ ᠨᠢ ᠲᠠᠭᠤᠭᠠᠳ ᠶᠠᠪᠤᠭᠰᠠᠨ ᠳ᠋ᠤ᠌ ᠬᠡᠨ ᠴᠦ᠍ ᠭᠠᠷ ᠬᠥᠳᠡᠯᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠡᠢᠮᠦ ᠬᠡᠷᠡᠭ ᠭᠠᠷᠤᠭᠰᠠᠨ ᠶᠤᠮ᠃ ᠬᠥᠮᠦᠨ ᠭᠡᠭᠴᠢ ᠠᠮᠢᠲᠠᠨ ᠡᠰᠡᠷᠭᠦᠴᠡᠬᠦ ᠪᠦᠬᠦ ᠴᠢᠳᠠᠯ ᠢ᠋ᠶ᠋ᠠᠨ ᠠᠯᠳᠠᠴᠢᠬᠠᠪᠠᠯ ᠡᠢᠮᠦ ᠪᠣᠯᠳᠠᠭ ᠠᠵᠢ᠃
ᠴᠢᠩᠭᠢᠰ ᠬᠠᠭᠠᠨ ᠤ᠋ ᠥᠪᠡᠷ ᠦ᠋ᠨ ᠪᠡᠶᠡ ᠨᠢ ᠴᠦ᠍ ᠡᠨᠡ ᠮᠡᠲᠦ ᠲᠡᠢᠨ ᠢ᠋ ᠬᠢᠬᠦ ᠳ᠋ᠡᠭᠡᠨ ᠪᠠᠬᠠᠨ ᠲᠦᠳᠡᠭᠡᠯᠵᠡᠯᠡ᠃ ᠲᠤᠯᠤᠢ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠣᠯᠵᠠᠯᠠᠭᠰᠠᠨ ᠠᠹᠭᠠᠨᠢᠰᠲ᠋ᠠᠨ ᠤ᠋ ᠨᠢᠭᠡᠨ ᠲᠦᠰᠢᠮᠡᠯ ᠢ᠋ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠬᠦᠷᠭᠡᠭᠰᠡᠨ ᠪᠠᠢᠵᠠᠢ᠃ ᠴᠢᠩᠭᠢᠰ ᠬᠠᠭᠠᠨ ᠲᠡᠭᠦᠨ ᠲᠡᠢ ᠬᠠᠶᠠ ᠬᠡᠯᠡᠯᠴᠡᠳᠡᠭ ᠪᠥᠭᠡᠳ ᠲᠡᠭᠦᠨ ᠡᠴᠡ:
《ᠭᠣᠷᠣᠬᠠ ᠮᠡᠲᠦ ᠤᠷᠤᠰᠤᠭᠰᠠᠨ ᠴᠢᠰᠤ ᠬᠥᠮᠦᠰ ᠦ᠋ᠨ ᠲᠠᠷᠢᠬᠢᠨ ᠳ᠋ᠤ᠌ ᠥᠨᠢ ᠤᠳᠠᠭᠠᠨ ᠴᠢᠭᠡᠵᠢᠯᠡᠭᠳᠡᠨᠡ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠤᠤ》 ᠭᠡᠵᠦ ᠠᠰᠠᠭᠤᠵᠠᠢ᠃ ᠲᠡᠷᠡ ᠲᠦᠰᠢᠮᠡᠯ ᠬᠡᠷᠪᠡ ᠦᠨᠡᠨ ᠢ᠋ᠶ᠋ᠡᠷ ᠬᠡᠯᠡᠪᠡᠯ ᠰᠦᠷᠡᠬᠡᠢ ᠬᠡᠷᠡᠭ ᠪᠣᠯᠬᠤ ᠪᠢᠰᠢᠦ ᠭᠡᠵᠦ ᠯᠠᠪᠯᠠᠭᠠᠳ ᠬᠠᠷᠢᠭᠤ ᠬᠡᠯᠡᠭᠰᠡᠨ ᠨᠢ᠄
《ᠬᠡᠷᠪᠡ ᠪᠣᠭᠳᠠ ᠬᠠᠭᠠᠨ ᠵᠠᠯᠭᠠᠭᠠᠳ ᠠᠯᠠᠵᠤ ᠬᠢᠳᠤᠪᠠᠯ ᠴᠢᠰᠤᠨ ᠤ᠋ ᠳᠣᠯᠭᠢᠶᠠᠨ ᠨᠢ ᠴᠦ᠍ ᠲᠡᠷᠡ᠂ ᠴᠡᠭᠡᠵᠢᠯᠡᠬᠦ ᠬᠥᠮᠦᠨ ᠨᠢ ᠴᠦ᠍ ᠲᠡᠷᠡ ᠪᠦᠷ ᠦᠭᠡᠢ ᠪᠣᠯᠬᠤ ᠪᠢᠵᠡ》 ᠭᠡᠵᠡᠢ᠃ ᠡᠨᠡᠬᠦ ᠦᠭᠡ ᠶ᠋ᠢ ᠣᠷᠴᠢᠭᠤᠯᠵᠤ ᠰᠣᠨᠤᠰᠬᠠᠬᠰᠠᠨ ᠬᠣᠢᠨᠠ᠂ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠴᠢᠷᠠᠢ ᠬᠥᠬᠡᠷᠡᠵᠦ ᠠᠭᠤᠷᠯᠠᠭᠠᠳ ᠭᠠᠷ ᠲᠠᠭᠠᠨ ᠪᠠᠷᠢᠵᠤ ᠪᠠᠢᠭᠰᠠᠨ ᠰᠤᠮᠤ ᠪᠠᠨ ᠬᠤᠭᠤᠯᠴᠢᠬᠠᠭᠰᠠᠨ ᠪᠠᠶ᠋ᠢᠨᠠ᠃ ᠭ᠌ᠱᠠᠨ ᠵᠠᠭᠤᠷᠠ ᠴᠢᠷᠠᠢ ᠶ᠋ᠢᠨ ᠥᠩᠭᠡ ᠨᠢ ᠶᠡᠷᠦ ᠶ᠋ᠢᠨ ᠦᠶᠡ ᠮᠡᠲᠦ ᠲᠣᠭᠲᠠᠭᠤᠨ ᠪᠣᠯᠤᠭᠠᠳ ᠪᠣᠳᠣᠯᠭᠠ ᠶ᠋ᠢ ᠨᠢ ᠬᠡᠨ ᠴᠦ᠍ ᠮᠡᠳᠡᠵᠦ ᠣᠯᠬᠤ ᠦᠭᠡᠢ ᠬᠡᠪ ᠦ᠋ᠨ ᠪᠠᠢᠳᠠᠯ ᠢ᠋ᠶ᠋ᠠᠷ 《ᠡᠢᠮᠦ ᠬᠥᠮᠦᠰ ᠨᠠᠳᠠᠳᠤ ᠠᠪᠴᠤ ᠬᠡᠯᠡᠪᠡᠯ ᠶᠠᠭᠤ ᠶᠤᠮ ᠪᠣᠢ᠃ ᠥᠭᠡᠷᠡ ᠤᠯᠤᠰ ᠣᠨᠳᠣᠣ ᠦᠨᠳᠦᠰᠦᠲᠡᠨ ᠪᠠᠢᠵᠤ ᠯᠠ ᠪᠠᠢᠨᠠ᠃
ᠮᠦᠬᠠᠮᠧᠳ᠋ ᠦ᠋ᠨ ᠮᠣᠷᠢᠨ ᠲᠤᠭᠤᠷᠠᠢ ᠶ᠋ᠢᠨ ᠲᠣᠭᠣᠰᠣ ᠪᠤᠲᠠᠷᠠᠭᠤᠯᠤᠭᠰᠠᠨ ᠭᠠᠵᠠᠷ ᠳᠤ᠂ ᠬᠠᠮᠢᠭᠠ ᠬᠦᠷᠲᠡᠯᠡ ᠦᠷᠭᠦᠯᠵᠢᠯᠡᠭᠦᠯᠦᠨ ᠠᠯᠠᠵᠤ ᠬᠢᠳᠤᠪᠠᠴᠤ ᠮᠢᠨᠦ ᠨᠡᠷᠡ ᠠᠯᠳᠠᠷ ᠣᠨᠳᠣᠣ ᠤᠯᠤᠰ ᠪᠣᠯᠤᠨ ᠥᠭᠡᠷᠡ ᠦᠨᠳᠦᠰᠦᠲᠡᠨ ᠳ᠋ᠦ᠍ ᠬᠠᠳᠠᠩᠰᠢᠬᠤ ᠶᠤᠮ》 ᠭᠡᠪᠡ᠃
ᠡᠨᠡ ᠮᠡᠲᠦ ᠶ᠋ᠢᠨ ᠠᠢᠬᠤᠪᠲᠤᠷ ᠲᠡᠮᠡᠴᠡᠯ ᠤᠭ ᠬᠡᠪ ᠢ᠋ᠶ᠋ᠡᠷ ᠦᠷᠭᠦᠯᠵᠢᠯᠡᠭᠡᠳ ᠳᠠᠭᠤᠰᠬᠤ ᠴᠠᠭ ᠨᠢ ᠪᠣᠯᠤᠭᠠᠳᠤᠢ ᠪᠠᠢᠯᠠ᠃ ᠠᠹᠭᠠᠨᠢᠰᠲ᠋ᠠᠨ ᠤ᠋ ᠠᠭᠤᠯᠠ ᠳᠣᠲᠣᠷᠠᠬᠢ ᠺᠡᠰᠨᠢ ᠳ᠋ᠦ᠍ ᠵᠧᠯᠡᠯ— ᠡᠳ᠋— ᠳ᠋ᠢᠨ ᠪᠠᠰᠠ ᠠᠮᠢᠳᠤ ᠪᠠᠷ ᠢ᠋ᠶ᠋ᠠᠨ ᠪᠠᠢᠭᠠᠳ᠂ ᠭᠠᠷ ᠳᠣᠣᠷᠠ ᠪᠠᠨ ᠠᠭᠤᠯᠠᠷᠬᠠᠭ ᠣᠷᠣᠨ ᠤ᠋ ᠣᠯᠠᠨ ᠦᠨᠳᠦᠰᠦᠲᠡᠨ ᠢ᠋ ᠴᠤᠭᠯᠠᠭᠤᠯᠵᠤ ᠪᠠᠢᠭᠰᠠᠨ ᠶᠤᠮ᠃ ᠴᠢᠩᠭᠢᠰ ᠬᠠᠭᠠᠨ ᠰᠢᠭᠢᠬᠤᠲᠤᠭ ᠲᠤ ᠭᠤᠷᠪᠠᠨ ᠲᠦᠮᠡᠨ ᠮᠣᠷᠢᠲᠤ ᠴᠡᠷᠢᠭ ᠥᠭᠴᠦ ᠮᠣᠷᠳᠠᠭᠤᠯᠵᠠᠢ᠃ ᠵᠧᠯᠡᠯ—— ᠡᠳ᠋— ᠳ᠋ᠢᠨ ᠪᠠᠰᠠ ᠲᠡᠭᠦᠨ ᠦ᠌ ᠵᠦᠭ ᠤᠷᠤᠭᠰᠢᠯᠠᠪᠠ᠃ ᠰᠢᠭᠢᠬᠤᠲᠤᠭ ᠴᠡᠷᠢᠭ ᠦ᠋ᠨ ᠰᠦᠷ ᠢ᠋ᠶ᠋ᠡᠨ ᠥᠷᠭᠡᠳᠬᠡᠵᠦ ᠳᠠᠢᠰᠤᠨ ᠢ᠋ ᠠᠶᠤᠯᠭᠠᠬᠤ ᠶ᠋ᠢᠨ ᠲᠥᠯᠥᠭᠡ ᠡᠪᠡᠰᠦᠨ ᠮᠠᠨᠤᠤᠯ ᠬᠢᠭᠡᠳ ᠬᠤᠪᠴᠠᠰᠤ ᠡᠮᠦᠰᠬᠡᠨ ᠪᠠᠢᠯᠳᠤᠭᠴᠢ ᠨᠠᠷ ᠢ᠋ᠶ᠋ᠠᠨ ᠬᠥᠲᠥᠯᠦᠭᠡ ᠮᠣᠷᠢᠨ ᠳ᠋ᠤ᠌ ᠤᠨᠤᠭᠤᠯᠵᠤ ᠵᠢᠭᠰᠠᠭᠠᠪᠠ᠂ ᠡᠨᠡ ᠠᠷᠭᠠ ᠮᠡᠬᠡ ᠨᠢ ᠲᠤᠰᠠ ᠭᠠᠷᠤᠭᠠᠳ᠂ ᠵᠧᠯᠡᠯ— ᠡᠳ᠋— ᠳ᠋ᠢᠨ ᠦ᠌ ᠵᠠᠩᠵᠤᠨ ᠨᠠᠷ ᠨᠢ ᠬᠣᠢᠰᠢ ᠪᠤᠷᠤᠭᠤᠯᠠᠬᠤ ᠪᠠᠷ ᠰᠠᠨᠠᠯ ᠳᠤᠷᠠᠳᠴᠠᠢ᠃ ᠭᠡᠪᠡᠴᠦ ᠵᠠᠯᠠᠭᠤ ᠱᠠᠭ ᠢ᠋ ᠠᠶᠤᠯᠭᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠱᠠᠭ ᠡᠷᠡᠰ ᠰᠢᠭᠤᠷᠬᠠᠢ ᠪᠠᠷ ᠳᠠᠭᠠᠷᠢᠨ ᠴᠣᠬᠢᠭᠰᠠᠨ ᠠ᠋ᠴᠠ ᠰᠢᠭᠢᠬᠤᠲᠤᠭ ᠳᠡᠢᠯᠦᠭᠳᠡᠭᠡᠳ ᠮᠣᠩᠭᠣᠯ ᠴᠡᠷᠢᠭ ᠪᠤᠷᠤᠭᠤᠯᠠᠪᠠ᠃ ᠴᠢᠩᠭᠢᠰ ᠬᠠᠭᠠᠨ ᠡᠨᠡ ᠮᠡᠲᠦ ᠳᠡᠢᠯᠦᠭᠳᠡᠭᠰᠡᠨ ᠴᠢᠮᠡᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠶᠠᠮᠠᠷ ᠴᠤ᠌ ᠦᠨᠡ ᠬᠦᠷᠬᠦ ᠦᠭᠡᠢ ᠭᠡᠵᠦ ᠪᠣᠳᠣᠭᠠᠳ ᠬᠡᠯᠡᠭᠰᠡᠨ ᠨᠢ᠄《ᠰᠢᠭᠢᠬᠤᠲᠤᠭ ᠳᠡᠢᠯᠦᠭᠰᠡᠨ ᠪᠠᠢᠯᠳᠤᠭᠠᠨ ᠢ᠋ ᠯᠡ ᠮᠡᠳᠡᠵᠦ ᠪᠠᠢᠭᠰᠠᠨ᠂ ᠣᠳᠣ ᠳᠡᠢᠯᠦᠭᠳᠡᠭᠰᠡᠨ ᠠᠮᠲᠠ ᠶ᠋ᠢ ᠮᠡᠳᠡᠭᠦᠯᠬᠦ ᠨᠢ ᠪᠠᠰᠠ ᠰᠠᠢᠨ ᠶᠤᠮ》 ᠭᠡᠵᠡᠢ᠃
ᠡᠨᠡ ᠤᠳᠠᠭᠠ ᠶ᠋ᠢᠨ ᠳᠡᠢᠯᠦᠭᠳᠡᠭᠰᠡᠨ ᠴᠢᠮᠡᠭᠡ ᠡᠴᠡ ᠪᠣᠯᠵᠤ᠂ ᠰᠢᠨᠡ ᠤᠷᠪᠠᠯᠭᠠ ᠭᠠᠷᠬᠤ ᠡᠴᠡ ᠡᠮᠦᠨᠡ᠂ ᠴᠢᠩᠭᠢᠰ ᠬᠠᠭᠠᠨ ᠥᠭᠡᠳᠡᠢ᠂ ᠴᠠᠭᠠᠲᠠᠢ᠂ ᠲᠤᠯᠤᠢ ᠶ᠋ᠢᠨ ᠬᠠᠮᠲᠤ ᠪᠦᠬᠦ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠭᠠᠳ ᠳᠠᠢᠰᠤᠨ ᠡᠴᠡ ᠤᠷᠢᠳ ᠵᠠᠪᠳᠤᠵᠤ ᠠᠭᠤᠯᠠᠷᠬᠠᠭ ᠣᠷᠣᠨ ᠲᠡᠰᠢ ᠮᠣᠷᠳᠠᠪᠠ᠃ ᠡᠨᠡ ᠤᠳᠠᠭᠠ ᠳᠠᠢᠰᠤᠨ ᠲᠠᠢ ᠣᠶ᠋ᠢᠷᠠᠳᠤᠵᠤ ᠣᠴᠢᠬᠤ ᠳ᠋ᠤ᠌ ᠶᠠᠮᠠᠷ ᠴᠤ᠌ ᠰᠠᠭᠠᠳ ᠤᠴᠠᠷᠠᠭᠰᠠᠨ ᠦᠭᠡᠢ ᠪᠡᠷ ᠪᠦᠬᠦ ᠠᠹᠭᠠᠨᠢᠰᠲ᠋ᠠᠨ ᠤ᠋ ᠬᠡᠪᠴᠢᠶᠡ ᠪᠡᠷ ᠪᠡᠶᠡᠯᠡᠭᠳᠡᠪᠡ᠃ ᠵᠥᠪᠬᠡᠨ ᠨᠢᠭᠡ ᠤᠳᠠᠭᠠ ᠰᠢᠭᠢᠬᠤᠲᠤᠭ ᠤ᠋ᠨ ᠳᠡᠢᠯᠦᠭᠳᠡᠭᠰᠡᠨ ᠭᠠᠵᠠᠷ ᠹᠢᠷᠦᠪᠡᠨ ᠣᠷᠴᠢᠮ᠂ ᠴᠢᠩᠭᠢᠰ ᠬᠠᠭᠠᠨ ᠰᠢᠨᠡ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠶᠠᠭᠠᠷᠠᠵᠤ ᠪᠠᠢᠭᠠ ᠴᠠᠭ ᠢ᠋ᠶ᠋ᠠᠨ ᠪᠠᠬᠠᠨ ᠰᠠᠭᠠᠲᠠᠭᠠᠵᠤ᠂ ᠵᠠᠯᠠᠭᠤ ᠥᠷᠯᠥᠭ ᠰᠢᠭᠢᠬᠤᠲᠤᠭ ᠢ᠋ ᠳᠠᠭᠠᠭᠤᠯᠵᠤ ᠪᠠᠢᠯᠳᠤᠭᠠᠨ ᠤ᠋ ᠲᠠᠯᠠᠪᠠᠢ ᠪᠠᠷ ᠲᠣᠭᠣᠷᠢᠨ᠂ ᠲᠡᠭᠦᠨ ᠦ᠌ ᠪᠠᠢᠯᠳᠤᠭᠠᠨ ᠤ᠋ ᠲᠠᠯᠠᠪᠠᠢ ᠶ᠋ᠢ ᠰᠣᠩᠭᠣᠭᠰᠠᠨ ᠳᠤᠲᠠᠭᠳᠠᠯ᠂ ᠪᠠᠢᠯᠳᠤᠬᠤ ᠵᠢᠭᠰᠠᠭᠠᠯ ᠤ᠋ᠨ ᠡᠨᠳᠡᠭᠦᠦ ᠪᠣᠯᠤᠭᠰᠠᠨ ᠭᠠᠵᠠᠷ ᠢ᠋ ᠵᠢᠭᠠᠨ ᠰᠤᠷᠭᠠᠵᠠᠢ᠃
ᠵᠸᠯᠡᠯ— ᠡᠳ᠋— ᠳ᠋ᠶ᠋ᠨ ᠴᠦ᠍ ᠬᠠᠯᠠᠭᠤᠨ ᠰᠡᠳᠬᠢᠯ ᠲᠡᠢ ᠵᠦᠢᠷᠯᠡᠰᠢ ᠦᠭᠡᠢ ᠵᠣᠷᠢᠭᠲᠠᠢ ᠪᠠᠢᠭᠰᠠᠨ ᠶᠤᠮ᠂ ᠪᠠᠢᠯᠳᠤᠭᠠᠨ ᠤ᠋ ᠲᠠᠯᠠᠪᠠᠢ ᠳ᠋ᠤ᠌ ᠢᠯᠠᠯᠲᠠ ᠣᠯᠬᠤ ᠠᠷᠭᠠ ᠶ᠋ᠢ ᠮᠡᠳᠡᠬᠦ ᠪᠥᠭᠡᠳ ᠴᠢᠩᠭᠢᠰ ᠬᠠᠭᠠᠨ ᠲᠠᠢ ᠳᠠᠢᠰᠤᠩᠨᠠᠬᠤ ᠪᠠᠷ ᠢ᠋ᠶ᠋ᠠᠨ ᠭᠠᠷ ᠲᠡᠩᠴᠡᠮᠡᠷ ᠪᠠᠢᠭᠰᠠᠨ ᠪᠣᠯᠪᠠᠴᠤ᠂ ᠳᠡᠢᠯᠦᠭᠰᠡᠨ ᠵᠠᠪᠰᠢᠶᠠᠨ ᠢ᠋ᠶ᠋ᠠᠨ ᠠᠰᠢᠭᠯᠠᠨ ᠢᠯᠠᠯᠲᠠ ᠪᠠᠨ ᠥᠷᠭᠡᠳᠬᠡᠬᠦ ᠠᠷᠭᠠ ᠶ᠋ᠢ ᠮᠡᠳᠡᠭᠰᠡᠨ ᠦᠭᠡᠢ ᠶᠤᠮ᠃ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠴᠡᠷᠢᠭ ᠡᠳᠦᠷ ᠡᠴᠡ ᠡᠳᠦᠷ ᠲᠦ᠍ ᠳᠠᠢᠰᠤᠨ ᠲᠠᠢ ᠣᠢᠷᠠᠲᠤᠵᠤ ᠣᠴᠢᠵᠤ ᠪᠠᠢᠬᠤ ᠦᠶᠡ ᠳ᠋ᠦ᠍᠂ ᠵᠸᠯᠡᠯ— ᠡᠳ᠋— ᠳ᠋ᠶ᠋ᠨ ᠬᠠᠷᠢᠨ ᠪᠠᠢᠯᠳᠤᠭᠠᠨ ᠤ᠋ ᠢᠯᠠᠯᠲᠠ ᠪᠠᠨ ᠪᠡᠯᠭᠡᠯᠡᠬᠦ ᠬᠤᠷᠢᠮ ᠬᠢᠬᠦ ᠪᠤᠶᠤ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠣᠯᠵᠠᠯᠠᠭᠳᠠᠭᠰᠠᠨ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠮᠥᠴᠢᠯᠡᠵᠦ ᠠᠯᠠᠬᠤ ᠵᠡᠷᠭᠡ ᠪᠡᠷ ᠵᠣᠪᠠᠭᠠᠵᠤ ᠡᠳᠦᠷ ᠢ᠋ᠶ᠋ᠡᠨ ᠥᠩᠭᠡᠷᠡᠭᠡᠵᠦ ᠪᠠᠢᠯᠠ᠃ ᠪᠠᠷᠢᠭᠳᠠᠭᠰᠠᠨ ᠴᠡᠷᠢᠭ ᠦ᠋ᠨ ᠴᠢᠬᠢᠨ ᠳ᠋ᠦ᠍ ᠲᠡᠷᠡ ᠭᠠᠳᠠᠰᠤ ᠭᠠᠳᠠᠵᠤ ᠠᠯᠠᠵᠤ ᠪᠠᠢᠵᠠᠢ᠃ ᠲᠡᠭᠦᠨ ᠦ᠌ ᠰᠢᠳᠠᠷ ᠲᠦᠰᠢᠮᠡᠯ ᠨᠢ ᠨᠢᠭᠡᠬᠡᠨ ᠠᠷᠠᠪ ᠮᠣᠷᠢ ᠶ᠋ᠢ ᠪᠤᠯᠢᠶᠠᠯᠳᠤᠨ᠂ ᠨᠢᠭᠡ ᠨᠢ ᠨᠥᠭᠦᠭᠡ ᠪᠡᠨ ᠲᠠᠰᠢᠭᠤᠷᠳᠠᠭᠠᠳ ᠲᠣᠯᠣᠭᠠᠢ ᠶ᠋ᠢ ᠨᠢ ᠰᠢᠷᠬᠠᠲᠤᠭᠤᠯᠤᠭᠰᠠᠨ ᠪᠠᠢᠲᠠᠯᠠ ᠵᠸᠯᠡᠯ— ᠡᠳ᠋— ᠳ᠋ᠶ᠋ᠨ ᠬᠠᠷᠢᠨ ᠲᠠᠰᠢᠭᠤᠷᠳᠠᠭᠴᠢ ᠡᠲᠡᠭᠡᠳ ᠢ᠋ ᠥᠮᠥᠭᠯᠡᠵᠡᠢ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ ᠲᠡᠷᠡ ᠬᠥᠮᠦᠨ ᠦ᠌ ᠴᠡᠷᠢᠭ ᠲᠤᠨᠢ ᠣᠯᠠᠨ ᠠᠢᠮᠠᠭ ᠪᠠᠢᠭᠰᠠᠨ ᠡᠴᠡ ᠲᠡᠭᠡᠭᠰᠡᠨ ᠶᠤᠮ ᠭᠡᠨᠡ᠃ ᠡᠢᠮᠦ ᠭᠣᠣᠯᠴᠢ ᠪᠤᠰᠤ ᠪᠠᠷ ᠳᠣᠷᠣᠮᠵᠢᠯᠠᠭᠳᠠᠭᠰᠠᠨ ᠡᠲᠡᠭᠡᠳ ᠨᠢ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠶ᠋ᠢ ᠠᠰᠢᠭᠯᠠᠭᠠᠳ ᠥᠪᠡᠷ ᠦ᠋ᠨ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠭᠠᠳ ᠶᠠᠪᠤᠴᠢᠬᠠᠭᠰᠠᠨ ᠪᠠᠢᠵᠠᠢ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠵᠸᠯᠡᠯ— ᠡᠳ᠋— ᠳ᠋ᠶ᠋ᠨ ᠦ᠌ ᠪᠡᠶᠡ ᠳ᠋ᠦ᠍ ᠲᠤᠯᠭᠠᠷᠠᠭᠰᠠᠨ ᠪᠠᠢᠳᠠᠯ ᠨᠢ ᠪᠣᠯ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠵᠢᠭᠤᠲᠠᠵᠤ ᠠᠮᠢ ᠪᠠᠨ ᠭᠠᠷᠬᠤ ᠡᠴᠡ ᠥᠭᠡᠷᠡ ᠵᠠᠮ ᠦᠭᠡᠢ ᠪᠣᠯᠵᠠᠢ᠃
ᠠᠹᠭᠠᠨᠢᠰᠲ᠋ᠠᠨ ᠤᠯᠤᠰ ᠳᠠᠬᠢ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠨ ᠠᠶᠠᠨ ᠨᠢ ᠲᠤᠢᠯ ᠤ᠋ᠨ ᠬᠤᠷᠳᠤᠨ ᠪᠠᠢᠭᠰᠠᠨ ᠡᠴᠡ ᠠᠭᠤᠯᠠᠷᠬᠠᠭ ᠣᠷᠣᠨ ᠤ᠋ ᠠᠷᠠᠳ᠂ ᠠᠭᠤᠯᠠ ᠪᠤᠶᠤ ᠬᠠᠪᠴᠢᠯ ᠵᠠᠮ ᠢ᠋ ᠠᠰᠢᠭᠯᠠᠨ ᠡᠰᠡᠷᠭᠦᠴᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠵᠠᠢ᠃ ᠬᠣᠲᠠ ᠵᠡᠭᠡᠯᠢ᠂ ᠬᠥᠳᠡᠭᠡ ᠲᠣᠰᠬᠣᠨ ᠨᠢ ᠪᠦᠷ ᠡᠰᠡᠷᠭᠦᠴᠡᠯ ᠦᠭᠡᠢ ᠪᠡᠷ᠂ ᠪᠠᠢᠯᠳᠤᠨ ᠳᠠᠭᠠᠭᠤᠯᠤᠭᠴᠢ ᠳ᠋ᠤ᠌ ᠬᠠᠭᠠᠯᠭᠠ ᠪᠠᠨ ᠲᠠᠯᠪᠢᠨ ᠦᠭᠭᠦᠭᠰᠡᠨ ᠪᠠᠢᠨᠠ᠃ ᠮᠣᠩᠭᠣᠯ ᠴᠡᠷᠢᠭ ᠡᠴᠦᠰ ᠦ᠋ᠨ ᠮᠥᠷᠲᠡᠭᠡᠨ ᠢᠨᠳᠡᠰ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠵᠠᠯᠠᠭᠤ ᠱᠠᠭ ᠢ᠋ ᠨᠡᠬᠡᠭᠡᠳ ᠭᠦᠢᠴᠡᠯᠡ᠃ ᠴᠢᠩᠭᠢᠰ ᠬᠠᠭᠠᠨ ᠲᠥᠷᠥᠭᠰᠡᠨ ᠡᠴᠡ ᠪᠡᠨ ᠲᠡᠷᠢᠭᠦᠨ ᠤᠳᠠᠭᠠ ᠳᠠᠢᠰᠤᠨ ᠡᠴᠡ ᠲᠣᠭᠠ ᠶ᠋ᠢᠨ ᠲᠠᠯᠠ ᠪᠠᠷ ᠢᠯᠡᠭᠦᠦ ᠴᠡᠷᠢᠭ ᠢ᠋ᠶ᠋ᠡᠷ ᠪᠠᠢᠯᠳᠤᠵᠤ ᠦᠵᠡᠪᠡ᠃ ᠡᠨᠡ ᠤᠳᠠᠭᠠ ᠶ᠋ᠢᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠲᠡᠭᠦᠨ ᠦ᠌ ᠳᠠᠢᠰᠤᠨ ᠵᠸᠯᠡᠯ— ᠡᠳ᠋— ᠳ᠋ᠢᠨ ᠦ᠌ ᠨᠡᠷᠡ ᠮᠠᠨᠳᠤᠭᠰᠠᠨ ᠨᠢᠭᠡᠨ ᠲᠡᠦᠬᠡ ᠪᠣᠯᠤᠨᠠ᠃ ᠡᠨᠡ ᠪᠠᠢᠯᠳᠤᠭᠠᠨ ᠤ᠋ ᠲᠤᠬᠠᠢ ᠡᠳᠦᠭᠡ ᠳ᠋ᠦ᠍ ᠬᠦᠷᠲᠡᠯᠡ ᠳᠤᠮᠳᠠᠳᠤ ᠳᠣᠷᠣᠨᠠᠲᠤ ᠶ᠋ᠢᠨ ᠣᠯᠠᠨ ᠤᠯᠤᠰ ᠦᠨᠳᠦᠰᠦᠲᠡᠨ ᠦ᠌ ᠳᠣᠲᠣᠷᠠ ᠦᠯᠢᠭᠡᠷ ᠳᠣᠮᠣᠭ ᠪᠣᠯᠤᠨ ᠦᠯᠡᠳᠡᠵᠦ ᠢᠷᠡᠭᠰᠡᠨ ᠪᠠᠢᠨᠠ᠃ ᠦᠯᠢᠭᠡᠷ ᠳᠣᠮᠣᠭ ᠲᠤ᠌ ᠤᠯᠠᠮᠵᠢᠯᠠᠯᠲᠤ ᠲᠡᠦᠬᠡ ᠲᠡᠢ ᠠᠯᠠ— ᠤᠳ᠋— ᠳ᠋ᠢᠨ᠂ ᠯᠦᠬᠠᠮᠸᠳ᠋ ᠭᠡᠭᠴᠢ ᠬᠥᠮᠦᠰ ᠲᠦ᠍ ᠪᠦᠷ ᠤᠮᠠᠷᠳᠠᠭᠳᠠᠭᠠᠳ᠂ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠵᠸᠯᠡᠯ— ᠡᠳ᠋— ᠳ᠋ᠢᠨ᠂ ᠮᠦᠬᠠᠮᠸᠳ᠋᠂ ᠬᠠᠷᠢᠨ ᠴᠢᠩᠭᠢᠰ ᠬᠠᠭᠠᠨ ᠲᠠᠢ ᠭᠠᠷ ᠲᠡᠩᠴᠡᠨ ᠪᠠᠢᠯᠳᠤᠭᠰᠠᠨ ᠭᠡᠵᠦ ᠤᠯᠠᠮᠵᠢᠯᠠᠭᠳᠠᠵᠤ ᠢᠷᠡᠵᠡᠢ᠃
ᠰᠢᠢᠳᠪᠦᠷᠢᠲᠦ ᠪᠠᠢᠯᠳᠤᠭᠠᠨ ᠬᠢᠬᠦ ᠡᠴᠡ ᠡᠮᠦᠨᠡ᠂ ᠵᠸᠯᠡᠯ— ᠡᠳ᠋— ᠳ᠋ᠢᠨ ᠢ᠋ ᠠᠮᠢᠳᠤ ᠪᠠᠷ ᠪᠠᠷᠢᠵᠤ ᠠᠪᠬᠤ ᠪᠠᠷ ᠪᠣᠭᠳᠠ ᠬᠠᠭᠠᠨ ᠴᠢᠩᠭᠠ ᠵᠠᠷᠯᠢᠭ ᠪᠠᠭᠤᠯᠭᠠᠵᠠᠢ᠃ ᠬᠡᠷᠪᠡ ᠵᠸᠯᠡᠯ— ᠡᠳ᠋— ᠳ᠋ᠢᠨ ᠢ᠋ ᠭᠠᠷ ᠲᠠᠭᠠᠨ ᠣᠷᠣᠭᠤᠯᠤᠭᠠᠳ ᠴᠢᠳᠠᠪᠠᠯ ᠠᠯᠢᠪᠠ ᠤᠷᠪᠠᠯᠭᠠ᠂ ᠪᠦᠬᠦᠢᠯᠡ ᠡᠰᠡᠷᠭᠦᠴᠡᠯ ᠨᠢ ᠪᠦᠷ ᠵᠣᠭᠰᠣᠬᠤ ᠳ᠋ᠤ᠌ ᠬᠦᠷᠦᠨᠡ᠃ ᠭᠡᠲᠡᠯᠡ ᠵᠸᠯᠡᠯ —ᠡᠳ᠋— ᠳ᠋ᠢᠨ ᠪᠠᠰᠠ ᠲᠡᠢᠮᠦ ᠠᠮᠠᠷ ᠪᠠᠷᠢᠭᠳᠠᠬᠤ ᠬᠥᠮᠦᠨ ᠪᠢᠰᠢ ᠪᠠᠢᠵᠠᠢ᠃ ᠨᠢᠭᠡᠨᠲᠡ ᠬᠡᠳᠦᠨ ᠲᠠᠯᠠ ᠡᠴᠡ ᠪᠦᠰᠡᠯᠡᠭᠳᠡᠭᠰᠡᠨ ᠪᠣᠯᠪᠠᠴᠤ ᠲᠡᠷᠡ ᠪᠠᠰᠠ ᠦᠯᠡᠳᠡᠭᠰᠡᠨ ᠳᠣᠯᠣᠭᠠᠨ ᠵᠠᠭᠤᠨ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠵᠤ ᠮᠣᠩᠭᠣᠯ ᠴᠡᠷᠢᠭ ᠥᠭᠡᠳᠡ ᠨᠢᠭᠡᠨ ᠤᠳᠠᠭᠠ ᠰᠢᠪᠲᠤᠯᠤᠨ ᠴᠣᠬᠢᠭᠠᠳ ᠵᠢᠭᠰᠠᠭᠠᠯ ᠢ᠋ ᠡᠪᠳᠡᠵᠦ᠂ ᠮᠣᠩᠭᠣᠯ ᠴᠡᠷᠢᠭ ᠲᠦ᠍ ᠪᠤᠯᠢᠶᠠᠭᠳᠠᠵᠤ ᠠᠪᠲᠠᠭᠰᠠᠨ ᠲᠤᠭ ᠢ᠋ᠶ᠋ᠠᠨ ᠪᠤᠯᠢᠶᠠᠨ ᠠᠪᠴᠤ᠂ ᠳᠠᠬᠢᠨ ᠨᠢᠭᠡᠨ ᠤᠳᠠᠭᠠ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠵᠢᠭᠰᠠᠭᠠᠯ ᠢ᠋ ᠰᠢᠪᠲᠤᠯᠤᠭᠠᠳ ᠮᠣᠷᠢ ᠤᠨᠤᠭᠰᠠᠨ ᠲᠡᠷᠡ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠣᠷᠢᠨ ᠲᠣᠬᠣᠢ ᠴᠠᠪᠴᠢᠮᠠ ᠡᠷᠭᠢ ᠳᠡᠭᠡᠷᠡ ᠡᠴᠡ ᠢᠨᠳᠡᠰ ᠭᠣᠣᠯ ᠳ᠋ᠤ᠌ ᠦᠰᠦᠷᠴᠦ ᠣᠷᠣᠭᠠᠳ ᠴᠡᠷᠢᠭ ᠦ᠋ᠨ ᠲᠤᠭ ᠢ᠋ᠶ᠋ᠠᠨ ᠭᠠᠷ ᠲᠠᠭᠠᠨ ᠠᠳᠬᠤᠭᠰᠠᠭᠠᠷ ᠭᠣᠣᠯ ᠢ᠋ ᠤᠮᠪᠠᠭᠤᠯᠤᠨ ᠭᠡᠲᠦᠯᠵᠡᠢ᠃ ᠡᠢᠮᠦ ᠪᠠᠭᠠᠲᠤᠷᠯᠢᠭ ᠵᠣᠷᠢᠭ ᠢ᠋ ᠭᠠᠢᠬᠠᠭᠰᠠᠨ ᠴᠢᠩᠭᠢᠰ ᠬᠠᠭᠠᠨ᠂ ᠲᠡᠭᠦᠨ ᠦ᠌ ᠵᠦᠭ ᠰᠤᠮᠤ ᠬᠠᠷᠪᠤᠬᠤ ᠶ᠋ᠢ ᠴᠠᠭᠠᠵᠠᠯᠠᠪᠠ᠃ ᠲᠡᠭᠡᠭᠡᠳ ᠬᠡᠯᠡᠭᠰᠡᠨ ᠨᠢ:《ᠲᠡᠢᠮᠦ ᠡᠴᠢᠭᠡ ᠡᠴᠡ ᠬᠠᠷᠢᠨ ᠡᠢᠮᠦ ᠬᠥᠪᠡᠭᠦᠨ ᠲᠥᠷᠥᠭᠰᠡᠨ ᠠᠵᠢ》 ᠭᠡᠳ᠂ ᠥᠪᠡᠷ ᠦ᠋ᠨ ᠦᠷᠡ ᠬᠡᠦᠬᠡᠳ ᠢ᠋ᠶ᠋ᠡᠨ ᠵᠸᠯᠡᠯ— ᠡᠳ᠋— ᠳ᠋ᠢᠨ ᠦ᠌ ᠪᠠᠭᠠᠲᠤᠷᠯᠢᠭ ᠪᠥᠭᠡᠳ ᠡᠷᠡᠰ ᠵᠣᠷᠢᠭ ᠢ᠋ ᠰᠣᠷᠣᠭᠲᠤᠨ ᠭᠡᠵᠦ ᠰᠤᠷᠭᠠᠵᠠᠢ᠃
ᠢᠩᠭᠢᠵᠦ ᠰᠠᠢᠰᠢᠶᠠᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠴᠢᠩᠭᠢᠰ ᠬᠠᠭᠠᠨ ᠪᠠᠰᠠ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠢ᠋ ᠲᠣᠮᠢᠯᠠᠵᠤ ᠭᠣᠣᠯ ᠤ᠋ᠨ ᠴᠢᠨᠠᠳᠤ ᠬᠥᠪᠡᠭᠡᠨ ᠳ᠋ᠦ᠍ ᠲᠡᠭᠦᠨ ᠢ᠋ ᠡᠭᠡᠭᠦᠯᠪᠡ᠃
ᠡᠨᠡ ᠴᠡᠷᠢᠭ ᠨᠢ ᠪᠠᠢᠱᠫᠣᠷ᠂ ᠯᠠᠬᠤᠢ᠂ ᠮᠦᠷᠲ᠋ᠠᠨ ᠵᠡᠷᠭᠡ ᠭᠠᠵᠠᠷ ᠢ᠋ ᠡᠵᠡᠯᠡᠨ ᠠᠪᠤᠭᠰᠠᠨ ᠪᠣᠯᠪᠠᠴᠤ᠂ ᠬᠠᠮᠢᠭᠠ ᠡᠴᠡ ᠴᠤ ᠵᠸᠯᠡᠯ— ᠡᠳ᠋— ᠳ᠋ᠢᠨ ᠢ᠋ ᠣᠯᠤᠭᠰᠠᠨ ᠦᠭᠡᠢ᠃ ᠬᠠᠪᠤᠷ ᠤ᠋ᠨ ᠴᠠᠭ ᠪᠣᠯᠤᠭᠠᠳ ᠲᠡᠷᠡ ᠬᠠᠯᠠᠭᠤᠨ ᠳ᠋ᠤ᠌ ᠮᠣᠩᠭᠣᠯ ᠴᠡᠷᠢᠭ ᠲᠡᠰᠪᠦᠷᠢᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠲᠤᠯᠠ᠂ ᠡᠨᠡ ᠴᠡᠷᠢᠭ ᠠᠩᠭᠢ ᠨᠢ ᠠᠹᠭᠠᠨᠢᠰᠲ᠋ᠠᠨ ᠳ᠋ᠤ᠌ ᠡᠭᠡᠵᠦ ᠢᠷᠡᠭᠰᠡᠨ ᠪᠥᠭᠡᠳ ᠡᠨᠡ ᠦᠶᠡ ᠳ᠋ᠦ᠍ ᠥᠭᠡᠳᠡᠢ ᠠᠹᠭᠠᠨᠢᠰᠲ᠋ᠠᠨ ᠤ᠋ ᠠᠭᠤᠯᠠᠷᠬᠠᠭ ᠣᠷᠣᠨ ᠤ᠋ ᠦᠨᠳᠦᠰᠦᠲᠡᠨ ᠨᠦ᠍ᠭᠦᠳ ᠢ᠋ ᠪᠠᠢᠯᠳᠤᠨ ᠳᠠᠭᠠᠭᠤᠯᠵᠠᠢ᠃ ᠴᠠᠭᠠᠲᠠᠢ ᠺᠠᠷᠮᠠᠨ ᠪᠣᠯᠤᠨ ᠪᠧᠷᠥ᠋ᠰᠴᠢᠰᠲ᠋ᠠᠨ ᠢ᠋ ᠪᠠᠢᠯᠳᠤᠨ ᠳᠠᠭᠠᠭᠤᠯᠪᠠ᠃
ᠡᠨᠡ ᠬᠣᠭᠣᠷᠣᠨᠳᠣ ᠵᠸᠯᠡᠯ— ᠡᠳ᠋— ᠳ᠋ᠢᠨ ᠲᠡᠭᠦᠨ ᠯᠦ᠍ᠭᠡ ᠬᠠᠮᠲᠤ ᠢᠨᠳᠡᠰ ᠭᠣᠣᠯ ᠤ᠋ᠨ ᠴᠢᠨᠠᠳᠤ ᠬᠥᠪᠡᠭᠡᠨ ᠳ᠋ᠦ᠍ ᠭᠠᠷᠤᠭᠰᠠᠨ ᠲᠠᠪᠢᠨ ᠬᠥᠮᠦᠨ ᠲᠡᠢ ᠬᠠᠮᠲᠤ᠂ ᠪᠠᠢᠯᠳᠤᠬᠤ ᠳᠤᠷᠠ ᠲᠠᠢ ᠾᠢᠨᠽᠢ ᠬᠥᠮᠦᠨ ᠦ᠌ ᠳᠤᠮᠳᠠ ᠰᠦᠷ ᠬᠦᠴᠦᠨ ᠢ᠋ᠶ᠋ᠡᠨ ᠥᠷᠭᠡᠳᠬᠡᠨ ᠨᠢᠭᠡᠨ ᠬᠡᠰᠡᠭ ᠠᠢᠮᠠᠭ ᠦᠨᠳᠦᠰᠦᠲᠡᠨ ᠢ᠋ ᠳᠠᠭᠠᠭᠤᠯᠵᠠᠢ᠃ ᠡᠳᠡᠭᠡᠷ ᠬᠠᠷᠢᠶᠠᠲᠤ ᠪᠠᠨ ᠳᠠᠭᠠᠭᠤᠯᠵᠤ ᠳ᠋ᠸᠯᠢ ᠳᠠᠰᠢ ᠮᠣᠷᠳᠠᠵᠤ᠂ ᠡᠨᠡ ᠬᠣᠲᠠ ᠶ᠋ᠢᠨ ᠡᠵᠡᠨ ᠢ᠋ ᠱᠠᠭᠠᠷᠳᠠᠨ ᠲᠡᠨᠳᠡ ᠰᠠᠭᠤᠭᠠᠳ᠂ ᠬᠡᠦᠬᠡᠨ ᠢ᠋ ᠨᠢ ᠡᠬᠡᠨᠡᠷ ᠪᠣᠯᠭᠠᠨ ᠠᠪᠴᠠᠢ᠃ ᠲᠡᠷᠡ ᠳ᠋ᠸᠯᠢ ᠳ᠋ᠦ᠍ ᠰᠠᠭᠤᠭᠠᠳ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠪᠤᠴᠠᠬᠤ ᠶ᠋ᠢ ᠬᠦᠯᠢᠶᠡᠭᠰᠡᠨ ᠪᠢᠯᠡ᠃ ᠬᠡᠳᠦᠨ ᠵᠢᠯ ᠦ᠋ᠨ ᠬᠣᠢᠨᠠ ᠠᠹᠭᠠᠨᠢᠰᠲ᠋ᠠᠨ ᠳ᠋ᠤ᠌ ᠡᠭᠡᠵᠦ ᠢᠷᠡᠵᠡᠢ᠃ ᠴᠢᠩᠭᠢᠰ ᠬᠠᠭᠠᠨ ᠥᠭᠡᠳᠡ ᠪᠣᠯᠤᠭᠰᠠᠨ ᠤ᠋ ᠬᠣᠢᠨᠠ ᠤᠯᠠᠮ ᠢ᠋ᠶ᠋ᠠᠷ ᠫᠧᠷᠰ ᠲᠦ᠍ ᠭᠦᠨᠵᠡᠭᠡᠢᠷᠡᠨ ᠳᠣᠪᠲᠣᠯᠤᠭᠰᠠᠨ ᠪᠣᠯᠪᠠᠴᠤ ᠮᠣᠩᠭᠣᠯ ᠤ᠋ᠨ ᠰᠢᠨᠡ ᠴᠡᠷᠢᠭ ᠨᠡᠬᠡᠵᠦ ᠤᠷᠤᠭᠰᠢᠯᠠᠭᠰᠠᠨ ᠤᠴᠢᠷ ᠡᠴᠡ ᠪᠠᠷᠠᠭᠤᠨ ᠠᠽᠢᠶᠠ ᠵᠦᠭ ᠳᠤᠲᠠᠭᠠᠭᠠᠳ᠂ ᠲᠡᠨᠳᠡ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠦᠬᠦᠵᠡᠢ᠃
( ᠲᠠᠪᠤ) ᠴᠢᠩᠭᠢᠰ ᠬᠠᠭᠠᠨ ᠮᠣᠩᠭᠣᠯ ᠳ᠋ᠠᠭᠠᠨ ᠬᠠᠷᠢᠭᠰᠠᠨ ᠨᠢ
ᠢᠨᠳᠡᠰ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠳ᠋ᠡᠬᠢ ᠪᠠᠢᠯᠳᠤᠭᠠᠨ ᠨᠢ ᠯᠠᠯᠤ ᠶ᠋ᠢᠨ ᠮᠥᠷᠭᠥᠯᠲᠡᠨ ᠦ᠌ ᠬᠢᠨ ᠦ᠌ ᠳᠡᠢᠯᠦᠭᠳᠡᠭᠰᠡᠨ ᠬᠠᠮᠤᠭ ᠡᠴᠦᠰ ᠦ᠋ᠨ ᠲᠡᠮᠳᠡᠭ ᠪᠣᠯᠪᠠ᠃ ᠬᠣᠷᠧᠰᠮ ᠬᠠᠭᠠᠨᠲᠤ ᠤᠯᠤᠰ ᠴᠤ ᠦᠭᠡᠢ ᠪᠣᠯᠪᠠ᠃ ᠪᠧᠷᠥ᠋ᠰᠴᠢᠰᠲ᠋ᠠᠨ᠂ ᠷᠦᠷᠢᠰᠲ᠋ᠠᠨ ᠺᠦᠷᠵᠢᠰᠲ᠋ᠠᠨ ᠵᠡᠷᠭᠡ ᠶ᠋ᠢᠨ ᠲᠤᠰᠠᠭᠠᠷ ᠪᠠᠢᠭᠰᠠᠨ ᠬᠡᠳᠦᠨ ᠭᠦᠩᠲᠦ ᠤᠯᠤᠰ ᠬᠣᠵᠢᠮ ᠤ᠋ᠨ ᠲᠡᠢᠨ ᠪᠠᠢᠯᠳᠤᠭᠠᠨ ᠢ᠋ᠶ᠋ᠠᠷ ᠳᠡᠮᠵᠢᠵᠦ ᠦᠯᠡᠳᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠶᠤᠮ᠃ ᠬᠢᠬᠦ ᠦᠭᠡᠢ ᠪᠣᠯ ᠪᠣᠯᠬᠤ ᠦᠭᠡᠢ ᠪᠠᠭᠠ ᠲᠤᠯᠤᠯᠳᠤᠭᠠᠨ ᠨᠢ ᠭᠠᠵᠠᠷ ᠣᠷᠣᠨ ᠤ᠋ ᠴᠢᠨᠠᠷ ᠲᠠᠢ ᠪᠥᠭᠡᠳ ᠳᠡᠮᠡᠢ ᠦᠨᠡ ᠬᠦᠷᠬᠦ ᠴᠦ᠍ ᠦᠭᠡᠢ ᠪᠡᠯᠡ᠃
ᠶᠠᠫᠣᠨ ᠲᠠᠩᠭᠢᠰ ᠡᠴᠡ ᠺᠠᠰᠫᠢ ᠶ᠋ᠢᠨ ᠲᠠᠩᠭᠢᠰ ᠬᠦᠷᠲᠡᠯᠡ᠂ ᠰᠣᠯᠣᠩᠭᠣᠰ ᠡᠴᠡ ᠺᠡᠦᠺᠡᠰ ᠲᠠᠩᠭᠢᠰ ᠬᠦᠷᠲᠡᠯᠡᠬᠢ ᠭᠠᠵᠠᠷ ᠲᠤ᠌ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠦᠭᠡ ᠨᠢ ᠳᠠᠷᠤᠢ ᠬᠠᠤᠯᠢ ᠠᠳᠠᠯᠢ ᠪᠣᠯᠪᠠ᠃ 《ᠮᠥᠩᠬᠡ ᠲᠩᠷᠢ》 ᠨᠢᠭᠡᠨᠲᠡ ᠲᠡᠭᠦᠨ ᠢ᠋ ᠭᠠᠵᠠᠷ ᠳᠡᠭᠡᠷᠡᠬᠢ ᠪᠦᠬᠦ ᠦᠨᠳᠦᠰᠦᠲᠡᠨ ᠦ᠌ ᠡᠵᠡᠨ ᠬᠠᠭᠠᠨ ᠪᠣᠯᠭᠠᠨ ᠲᠣᠭᠲᠠᠭᠠᠭᠰᠠᠨ ᠶᠤᠮ᠃
ᠭᠡᠪᠡᠴᠦ《ᠮᠥᠩᠬᠡ ᠲᠩᠷᠢ》 ᠶ᠋ᠢᠨ ᠲᠣᠭᠲᠠᠭᠠᠭᠰᠠᠨ ᠲᠥᠯᠥᠪᠯᠡᠭᠡ ᠨᠢ ᠪᠠᠰᠠ ᠪᠦᠷᠢᠨ ᠪᠡᠶᠡᠯᠡᠭᠳᠡᠭᠡᠳᠦᠢ ᠪᠠᠢᠵᠠᠢ᠃ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠥᠷᠥᠨᠡᠲᠦ ᠡᠴᠡ ᠬᠠᠷᠢᠵᠤ ᠢᠷᠡᠭᠰᠡᠨ ᠬᠣᠢᠨᠠ ᠰᠠᠶᠢ ᠥᠷᠥᠨᠡᠳᠠᠬᠢᠨ ᠢ᠋ ᠪᠠᠢᠯᠳᠤᠨ ᠳᠠᠭᠠᠭᠤᠯᠬᠤ ᠪᠣᠳᠣᠯᠭᠠ ᠪᠠᠨ ᠲᠣᠭᠲᠠᠭᠠᠵᠤ ᠴᠢᠳᠠᠬᠤ ᠶᠤᠮ᠃ ᠲᠡᠭᠦᠨ ᠦ᠌ ᠡᠭᠡᠵᠦ ᠢᠷᠡᠬᠦ ᠶ᠋ᠢ ᠪᠠᠰᠠ ᠬᠣᠶᠠᠷ ᠵᠢᠯ ᠬᠦᠯᠢᠶᠡᠬᠦ ᠶᠣᠰᠣᠲᠠᠢ᠃ ᠲᠡᠷᠡ ᠦᠶᠡ ᠪᠣᠯᠬᠤ ᠡᠴᠡ ᠤᠷᠢᠳ ᠵᠸᠯᠡᠯ— ᠡᠳ᠋— ᠳ᠋ᠢᠨ ᠢ᠋ ᠡᠨᠡᠳᠬᠡᠭ ᠬᠦᠷᠲᠡᠯᠡ ᠨᠡᠬᠡᠵᠦ ᠨᠢᠭᠤᠵᠤ ᠰᠢᠷᠭᠤᠭᠤᠯᠤᠭᠰᠠᠨ ᠭᠠᠵᠠᠷ ᠪᠤᠶᠤ ᠤᠯᠤᠰ ᠢ᠋ ᠪᠠᠢᠯᠳᠤᠨ ᠳᠠᠭᠠᠭᠤᠯᠬᠤ ᠬᠡᠷᠡᠭᠲᠡᠢ ᠪᠠᠢᠭᠰᠠᠨ᠂ ᠡᠰᠡᠬᠦᠯᠡ ᠲᠥᠪᠡᠳ ᠢ᠋ ᠲᠤᠭᠤᠯᠤᠨ ᠮᠣᠩᠭᠣᠯ ᠭᠠᠵᠠᠷ ᠲᠠᠭᠠᠨ ᠬᠠᠷᠢᠮᠠᠷ ᠪᠠᠢᠭᠰᠠᠨ᠃ ᠲᠥᠪᠡᠳ ᠪᠣᠯ ᠠᠢᠮᠠᠭ ᠤᠭᠰᠠᠭᠠ ᠶ᠋ᠢᠨ ᠬᠢᠨ ᠦ᠌ ᠡᠭᠦᠰᠦᠭᠰᠡᠨ ᠤᠯᠤᠰ ᠣᠷᠣᠨ ᠭᠡᠳᠡᠭ ᠬᠡᠯᠡᠯᠴᠡᠭᠡ ᠪᠠᠢᠭᠰᠠᠨ ᠪᠢᠯᠡ᠃ ᠡᠭᠦᠨ ᠢ᠋ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠳᠣᠲᠣᠷᠠ ᠪᠠᠨ ᠪᠠᠭᠲᠠᠭᠠᠪᠠᠰᠤ ᠵᠣᠬᠢᠰᠲᠠᠢ ᠪᠠᠢᠭᠰᠠᠨ ᠰᠠᠨ᠃ ᠣᠳᠣ ᠬᠠᠪᠤᠷ ᠤ᠋ᠨ ᠤᠯᠠᠷᠢᠯ ᠪᠣᠯᠤᠭᠠᠳ ᠪᠠᠢᠨᠠ᠃ ᠵᠤᠨ ᠤ᠋ ᠦᠶᠡ ᠳ᠋ᠦ᠍ ᠡᠨᠡᠳᠬᠡᠭ ᠲᠡᠢ ᠪᠠᠢᠯᠳᠤᠭᠠᠨ ᠬᠢᠪᠡᠯ᠂ ᠰᠠᠷᠠᠭᠤᠯ ᠲᠠᠯᠠ ᠶ᠋ᠢᠨ ᠮᠣᠩᠭᠣᠯ ᠮᠣᠷᠢᠲᠤ ᠴᠡᠷᠢᠭ ᠲᠡᠰᠪᠦᠷᠢᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠬᠠᠯᠠᠭᠤᠨ ᠪᠣᠯᠬᠣᠷ᠂ ᠡᠪᠦᠯ ᠪᠣᠯᠬᠤ ᠶ᠋ᠢ ᠬᠦᠯᠢᠶᠡᠬᠦ ᠬᠡᠷᠡᠭᠲᠡᠢ᠃ ᠲᠡᠭᠡᠭᠡᠳ ᠴᠢᠩᠭᠢᠰ ᠬᠠᠭᠠᠨ ᠵᠥᠪᠳᠡᠭᠴᠢ ᠶ᠋ᠢᠨ ᠶᠠᠮᠤᠨ ᠤ᠋ ᠴᠡᠷᠢᠭ ᠦ᠋ᠨ ᠨᠣᠶᠠᠳ ᠢ᠋ ᠫᠠᠮᠢᠷ ᠤ᠋ᠨ ᠥᠨᠳᠥᠷᠯᠢᠭ ᠲᠦ᠍ ᠲᠣᠮᠢᠯᠠᠭᠠᠳ᠂ ᠲᠥᠪᠡᠳ ᠲᠦ᠍ ᠨᠡᠪᠲᠡᠷᠡᠬᠦ ᠵᠠᠮ ᠤ᠋ᠳ ᠢ᠋ ᠪᠠᠢᠴᠠᠭᠠᠵᠤ ᠦᠵᠡᠭᠦᠯᠦᠭᠰᠡᠨ ᠶᠦᠮ᠃ ᠴᠡᠷᠢᠭ ᠦ᠋ᠨ ᠨᠣᠶᠠᠳ ᠨᠢ ᠡᠭᠡᠵᠦ ᠢᠷᠡᠭᠡᠳ ᠲᠡᠳᠡᠭᠡᠷ ᠵᠠᠮ ᠢ᠋ᠶ᠋ᠠᠷ ᠮᠣᠩᠭᠣᠯ ᠴᠡᠷᠢᠭ ᠪᠠᠢᠯᠳᠤᠭᠠᠨ ᠤ᠋ ᠪᠠᠭᠠᠵᠢ ᠪᠣᠯᠤᠨ ᠣᠯᠠᠨ ᠬᠥᠰᠬᠡ ᠲᠡᠷᠭᠡ ᠠᠪᠴᠤ ᠠᠭᠤᠯᠠᠰ ᠢ᠋ ᠳᠠᠪᠠᠵᠤ ᠴᠢᠳᠠᠬᠤ ᠦᠭᠡᠢ ᠭᠡᠵᠦ ᠮᠡᠳᠡᠭᠦᠯᠪᠡ᠂ ᠲᠡᠭᠡᠭᠡᠳ ᠴᠢᠩᠭᠢᠰ ᠬᠠᠭᠠᠨ ᠡᠨᠡᠳᠬᠡᠭ ᠲᠡᠰᠢ ᠮᠣᠷᠳᠠᠬᠤ ᠶ᠋ᠢᠨ ᠲᠥᠯᠥᠭᠡ ᠡᠪᠦᠯ ᠢ᠋ ᠬᠦᠯᠢᠶᠡᠬᠦ ᠪᠡᠷ ᠲᠣᠭᠲᠠᠵᠠᠢ᠃
ᠳᠣᠮᠣᠭ ᠶᠠᠷᠢᠶᠠ ᠶ᠋ᠢ ᠦᠨᠳᠦᠰᠦᠯᠡᠭᠰᠡᠨ ᠢ᠋ᠶ᠋ᠡᠷ ᠴᠢᠩᠭᠢᠰ ᠬᠠᠭᠠᠨ ᠡᡁᠢ᠍ᠨᠳᠣ ᠬᠣᠰᠢᠭᠤ ᠠᠭᠤᠯᠠᠨ ᠳ᠋ᠤ᠌ ᠮᠣᠷᠢᠯᠠᠵᠤ ᠶᠠᠪᠤᠭᠠᠳ᠂ ᠨᠢᠭᠡᠨ ᠠᠮᠢᠲᠠᠨ ᠲᠠᠢ ᠲᠠᠭᠠᠷᠠᠯᠳᠤᠯᠠ ᠭᠡᠨᠡ᠃ ᠡᠨᠡ ᠠᠮᠢᠲᠠᠳ ᠪᠤᠭᠤ ᠰᠢᠭ᠋ ᠪᠡᠶᠡ ᠲᠡᠢ᠂ ᠨᠣᠭᠣᠭᠠᠨ ᠦᠰᠦᠲᠡᠢ᠂ ᠮᠣᠷᠢᠨ ᠰᠡᠭᠦᠯᠲᠡᠢ᠂ ᠭᠠᠭᠴᠠ ᠡᠪᠡᠷᠳᠡᠢ ᠭᠡᠨᠡ᠃ ᠡᠨᠡ ᠠᠮᠢᠲᠠᠨ ᠪᠣᠯ ᠬᠥᠮᠦᠨ ᠦ᠌ ᠦᠭᠡ ᠬᠡᠯᠡᠵᠦ ᠴᠢᠳᠠᠬᠤ ᠪᠥᠭᠡᠳ ᠴᠢᠩᠭᠢᠰ ᠬᠠᠭᠠᠨ ᠢ᠋ 《ᠬᠠᠷᠢᠭᠲᠤᠨ》 ᠭᠡᠵᠦ ᠵᠠᠷᠯᠢᠭᠳᠠᠪᠠ ᠭᠡᠨᠡ ᠃ ᠴᠢᠩᠭᠢᠰ ᠬᠠᠭᠠᠨ ᠡᠭᠦᠷᠢᠳᠡ ᠶ᠋ᠢᠨ ᠠᠳᠠᠯᠢ ᠡᠭᠦᠨ ᠢ᠋ ᠶᠸᠯᠤᠢ ᠴᠦᠼᠠᠢ ᠡᠴᠡ ᠠᠰᠠᠭᠤᠭᠰᠠᠨ ᠳ᠋ᠤ᠌᠂ ᠴᠦᠽᠠᠢ ᠡᠨᠡᠬᠦ ᠵᠢᠭᠲᠡᠢ ᠠᠮᠢᠲᠠᠨ ᠢᠢ ᠮᠡᠳᠡᠵᠦ ᠪᠠᠢᠭᠰᠠᠨ ᠶᠤᠮ᠃ ᠴᠦᠼᠠᠢ ᠶ᠋ᠢᠨ ᠲᠠᠢᠯᠪᠤᠷᠢᠯᠠᠭᠰᠠᠨ ᠢ᠋ᠶ᠋ᠠᠷ ᠡᠨᠡ ᠠᠮᠢᠲᠠᠨ ᠢ᠋ ᠵᠢᠶᠣᠤ ᠳ᠋ᠦᠸᠠᠨ ᠭᠡᠵᠦ ᠬᠡᠯᠡᠳᠡᠭ ᠪᠥᠭᠡᠳ ᠶᠢᠷᠲᠢᠨᠴᠦ ᠳᠡᠭᠡᠷᠡᠬᠢ ᠬᠡᠯᠡ ᠪᠦᠬᠦᠨ ᠢ᠋ ᠪᠦᠷ ᠮᠡᠳᠡᠨᠡ᠂ ᠪᠦᠷ ᠬᠡᠯᠡᠵᠦ ᠴᠢᠳᠠᠨᠠ ᠭᠡᠨᠡ᠃ ᠡᠨᠡ ᠠᠮᠢᠲᠠᠨ ᠤᠴᠢᠷ ᠦᠭᠡᠢ ᠴᠢᠰᠤ ᠤᠷᠤᠰᠬᠠᠬᠤ ᠶ᠋ᠢ ᠬᠣᠷᠢᠭᠯᠠᠬᠤ ᠶ᠋ᠢᠨ ᠲᠥᠯᠥᠭᠡ ᠡᠭᠦᠷᠢᠳᠡ《ᠲᠡᠭᠷᠢ》 ᠡᠴᠡ ᠲᠣᠮᠢᠯᠠᠭᠳᠠᠨ ᠪᠠᠭᠤᠵᠤ ᠢᠷᠡᠬᠦ ᠶᠦᠮ᠃ ᠴᠢᠩᠭᠢᠰ ᠬᠠᠭᠠᠨ ᠥᠷᠥᠨᠡᠳᠠᠬᠢᠨ ᠤ᠋ ᠬᠠᠭᠠᠨᠲᠤ ᠤᠯᠤᠰ ᠢ᠋ ᠪᠤᠲᠠ ᠴᠣᠬᠢᠭᠰᠠᠨ ᠪᠣᠯᠪᠠᠴᠤ᠂ ᠡᠮᠦᠨᠡ ᠡᠲᠡᠭᠡᠳ ᠦ᠋ᠨ ᠬᠠᠭᠠᠨᠲᠤ ᠤᠯᠤᠰ ᠡᠨᠡᠳᠬᠡᠭ ᠢ᠋ ᠶᠠᠭᠠᠬᠢᠭᠰᠠᠨ ᠴᠤ᠌ ᠦᠭᠡᠢ ᠪᠠᠢᠯᠭᠠᠭᠰᠠᠭᠠᠷ ᠪᠢᠯᠡ᠃ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠥᠪᠡᠷ ᠦ᠋ᠨ ᠪᠡᠶᠡ ᠨᠢ 《ᠲᠩᠷᠢ 》 ᠶ᠋ᠢᠨ ᠠᠬᠠᠮᠠᠳ ᠬᠥᠪᠡᠭᠦᠨ ᠪᠠᠢᠭᠰᠠᠨ ᠪᠣᠯ᠂ ᠪᠤᠰᠤᠳ ᠤᠯᠤᠰ ᠦᠨᠳᠦᠰᠦᠲᠡᠨ ᠦ᠌ ᠬᠠᠭᠠᠨ ᠨᠢ ᠪᠦᠷ 《ᠲᠡᠭᠷᠢ 》 ᠶ᠋ᠢᠨ ᠬᠥᠪᠡᠭᠦᠨ ᠮᠥᠨ ᠪᠣᠯᠬᠣᠷ ᠥᠪᠡᠷ ᠦ᠋ᠨ ᠠᠬᠠ ᠳᠡᠭᠦᠦ ᠪᠡᠨ ᠮᠡᠲᠦ ᠬᠠᠢᠷᠠᠯᠠᠬᠤ ᠦᠭᠡᠢ ᠪᠣᠯᠬᠤ ᠦᠭᠡᠢ᠃ ᠲᠡᠷᠡ ᠬᠡᠷᠪᠡ 《ᠲᠡᠭᠷᠢ》 ᠡᠩᠬᠦᠷᠡᠢ ᠬᠠᠢᠷᠠ ᠶ᠋ᠢ ᠦᠷᠭᠦᠯᠵᠢᠯᠡᠨ ᠬᠦᠷᠲᠡᠬᠦ ᠭᠡᠵᠦ ᠪᠣᠳᠣᠪᠠᠯ ᠂ ᠪᠤᠰᠤᠳ ᠤᠯᠤᠰ ᠤ᠋ᠨ ᠠᠷᠠᠳ ᠢ᠋ ᠤᠭ ᠬᠡᠪ ᠢ᠋ᠶ᠋ᠡᠷ ᠨᠢ ᠠᠮᠤᠷ ᠲᠦᠪᠰᠢᠨ ᠪᠠᠢᠯᠭᠠᠬᠤ ᠬᠡᠷᠡᠭᠲᠡᠢ(ᠮᠣᠩᠭᠣᠯᠴᠢᠯᠠᠭᠴᠢ᠄ ᠵᠠᠷᠢᠮ ᠲᠡᠦᠬᠡᠨ ᠳᠡᠭᠡᠷᠡ ᠡᠨᠡ ᠵᠢᠭᠲᠡᠢ ᠠᠮᠢᠲᠠᠨ ᠢ᠋ ᠴᠢᠩᠭᠢᠰ ᠬᠠᠭᠠᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠠᠭᠤᠯᠵᠠᠨ ᠦᠵᠡᠭᠰᠡᠨ ᠪᠢᠰᠢ ᠭᠡᠳᠡᠭ᠃ ᠲᠡᠭᠦᠨ ᠦ᠌ ᠬᠠᠲᠤᠨ ᠱ᠌ᠢᠷᠦ ᠠᠶᠠᠨ ᠲᠡᠢᠨ ᠳᠤᠮᠳᠠ ᠬᠡᠦᠬᠡᠳ ᠬᠥᠩᠭᠡᠵᠢᠭᠡᠳ᠂ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠤᠯᠤᠰ ᠲᠠᠭᠠᠨ ᠬᠠᠷᠢᠬᠤ ᠭᠡᠵᠦ ᠢᠳᠬᠠᠭᠠᠳ ᠨᠡᠯᠢᠶᠡᠳ ᠵᠢᠮᠡᠯᠡᠭᠳᠡᠵᠡᠢ᠃ ᠲᠡᠭᠡᠭᠡᠳ ᠲᠡᠷᠡ ᠶᠸᠯᠤᠢ ᠴᠦᠼᠠᠢ ᠳ᠋ᠤ᠌ ᠰᠠᠨᠠᠭᠠ ᠪᠠᠨ ᠬᠡᠯᠡᠭᠰᠡᠨ ᠪᠥᠭᠡᠳ ᠬᠡᠰᠢᠭᠲᠡᠨ ᠴᠡᠷᠢᠭ ᠦ᠋ᠨ ᠬᠣᠶᠠᠷ ᠪᠠᠢᠯᠳᠤᠭᠴᠢ ᠳ᠋ᠤ᠌ ᠠᠷᠭᠠ ᠵᠢᠭᠠᠵᠤ ᠦᠭᠭᠦᠭᠰᠡᠨ ᠭᠡᠨᠡ᠃ ᠡᠨᠡ ᠬᠣᠶᠠᠷ ᠬᠥᠮᠦᠨ ᠰᠥᠨᠢ ᠶ᠋ᠢᠨ ᠬᠠᠷᠠᠭᠤᠯ ᠵᠣᠭᠰᠣᠭᠠᠳ᠂ ᠳᠠᠷᠠᠭᠠ ᠥᠷᠯᠥᠭᠡ ᠨᠢ ᠪᠣᠭᠳᠠ ᠬᠠᠭᠠᠨ ᠳ᠋ᠤ᠌ ᠮᠡᠳᠡᠭᠦᠯᠦᠭᠰᠡᠨ ᠨᠢ ᠥᠴᠥᠭᠡᠳᠦᠷ ᠰᠥᠨᠢ ᠨᠢᠭᠡᠨ ᠵᠢᠭᠲᠡᠢ ᠨᠣᠭᠣᠭᠠᠨ ᠦᠰᠦᠲᠡᠢ ᠠᠮᠢᠲᠠᠨ ᠡᠷᠢᠭᠡᠳ ᠬᠤᠷᠳᠤᠨ ᠬᠠᠷᠢᠭᠲᠤᠨ ᠭᠡᠵᠦ ᠬᠡᠯᠡᠪᠡ ᠭᠡᠵᠡᠢ᠃ ᠴᠢᠩᠭᠢᠰ ᠬᠠᠭᠠᠨ ᠬᠣᠶᠠᠭᠤᠯᠠ ᠡᠴᠡ ᠠᠰᠠᠭᠤᠬᠤ ᠳ᠋ᠤ᠌ ᠪᠦᠷ ᠠᠳᠠᠯᠢ ᠦᠭᠡ ᠲᠡᠢ ᠪᠠᠢᠵᠠᠢ᠃ ᠡᠨᠡ ᠬᠣᠶᠠᠷ ᠢ᠋ ᠰᠠᠯᠭᠠᠭᠠᠳ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠠᠮᠢᠲᠠᠨ ᠤ᠋ ᠦᠭᠡ ᠬᠡᠯᠡᠬᠦ ᠦᠶᠡ ᠶ᠋ᠢᠨ ᠪᠠᠢᠳᠠᠯ ᠣᠨᠳᠣᠣ ᠪᠣᠯᠵᠤ ᠰᠡᠪ ᠭᠠᠷᠤᠯᠠ᠃ ᠨᠢᠭᠡᠨ ᠨᠢ ᠣᠴᠣᠢᠵᠤ ᠪᠠᠢᠭᠠᠳ ᠬᠡᠯᠡᠯᠡ ᠭᠡᠵᠡᠢ᠃ ᠨᠢᠭᠡᠨ ᠨᠢ ᠠᠯᠬᠤᠵᠤ ᠢᠷᠡᠭᠡᠳ ᠬᠡᠯᠡᠯᠡ ᠭᠡᠪᠡ᠃ ᠴᠢᠩᠭᠢᠰ ᠬᠠᠭᠠᠨ ᠡᠳᠡᠨ ᠦ᠌ ᠬᠤᠳᠠᠯ ᠬᠡᠯᠡᠭᠰᠡᠨ ᠢ᠋ ᠮᠡᠳᠡᠭᠰᠡᠨ ᠪᠣᠯᠪᠠᠴᠤ ᠬᠠᠲᠤᠨ ᠪᠠ ᠲᠦᠰᠢᠮᠡᠳ ᠬᠢᠭᠡᠳ ᠴᠡᠷᠢᠭ ᠢ᠋ ᠪᠦᠷ ᠤᠳᠠᠭᠠᠨ ᠵᠢᠯ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠶᠠᠪᠤᠭᠠᠳ ᠬᠠᠰᠢᠷᠠᠬᠤ ᠰᠡᠳᠬᠢᠯ ᠣᠷᠣᠭᠰᠠᠨ ᠢ᠋ ᠮᠡᠳᠡᠪᠡ᠃ ᠲᠡᠢᠮᠦ ᠡᠴᠡ ᠴᠢᠩᠭᠢᠰ ᠬᠠᠭᠠᠨ ᠬᠠᠭᠤᠷᠮᠠᠭ ᠢ᠋ᠶ᠋ᠠᠷ ᠦᠨᠡᠮᠰᠢᠭᠰᠡᠨ ᠮᠡᠲᠦ ᠴᠡᠷᠢᠭ ᠡᠭᠡᠬᠦ ᠵᠠᠷᠯᠢᠭ ᠪᠠᠭᠤᠯᠭᠠᠪᠠ ᠭᠡᠨᠡ᠃ ᠡᠨᠡ ᠠᠮᠢᠲᠠᠨ ᠤ᠋ ᠢᠯᠡᠷᠡᠭᠰᠡᠨ ᠲᠤᠬᠠᠢ ᠶᠸᠯᠤᠢ ᠴᠦᠼᠠᠢ ᠶ᠋ᠢᠨ ᠲᠠᠢᠯᠪᠤᠷᠢᠯᠠᠭᠰᠠᠨ ᠢ᠋ ᠭᠡᠷᠡᠴᠢᠯᠡᠬᠦ ᠰᠢᠭ᠌᠂ ᠡᠨᠡᠳᠬᠡᠭ ᠡᠴᠡ ᠪᠤᠴᠠᠵᠤ ᠢᠷᠡᠭᠰᠡᠨ ᠴᠡᠷᠢᠭ ᠠᠩᠭᠢ ᠳ᠋ᠤ᠌ ᠰᠦᠷᠡᠬᠡᠢ ᠬᠠᠯᠳᠠᠪᠤᠷᠢᠲᠤ ᠡᠪᠡᠳᠴᠢᠨ ᠳᠡᠯᠭᠡᠷᠡᠪᠡ᠃ ᠡᠨᠡ ᠨᠢ ᠶᠠᠭ ᠠᠯᠲᠠᠨ ᠤᠯᠤᠰ ᠲᠠᠢ ᠪᠠᠢᠯᠳᠤᠭᠠᠨ ᠬᠢᠭᠰᠡᠨ ᠰᠡᠭᠦᠯᠴᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠮᠣᠩᠭᠣᠯ ᠴᠡᠷᠢᠭ ᠲᠦ᠍ ᠳᠡᠯᠭᠡᠷᠡᠭᠰᠡᠨ ᠬᠠᠯᠳᠠᠪᠤᠷᠢᠲᠤ ᠡᠪᠡᠳᠴᠢᠨ ᠲᠡᠢ ᠠᠳᠠᠯᠢ ᠪᠠᠢᠭᠰᠠᠨ ᠶᠤᠮ᠃
ᠴᠢᠩᠭᠢᠰ ᠬᠠᠭᠠᠨ ᠶᠠᠭᠠᠬᠢᠪᠠᠴᠤ《ᠲᠡᠭᠷᠢ》 ᠶ᠋ᠢᠨ ᠵᠣᠷᠢᠭ ᠰᠠᠨᠠᠭᠠ ᠲᠠᠢ ᠡᠰᠡᠷᠭᠦᠴᠡᠯᠳᠦᠬᠦ ᠬᠡᠷᠡᠭ ᠢ᠋ ᠬᠢᠬᠦ ᠦᠭᠡᠢ᠂ ᠡᠨᠡ ᠤᠳᠠᠭᠠ ᠪᠠᠰᠠᠴᠤ 《ᠲᠡᠭᠷᠢ》 ᠶ᠋ᠢᠨ ᠡᠮᠦᠨᠡ ᠲᠣᠯᠣᠭᠠᠢ ᠪᠥᠬᠥᠢᠪᠡ᠃ ᠲᠡᠭᠡᠭᠡᠳ ᠠᠮᠤᠳᠠᠷᠢᠶᠠ ᠶ᠋ᠢᠨ ᠬᠠᠭᠤᠴᠢᠨ ᠵᠠᠮ ᠢ᠋ᠶ᠋ᠠᠷ ᠮᠣᠩᠭᠣᠯ ᠳ᠋ᠠᠭᠠᠨ ᠬᠠᠷᠢᠬᠤ ᠪᠠᠷ ᠲᠣᠭᠲᠠᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠷᠡᠢᠳ ᠮᠥᠩᠬᠡᠨᠠᠰᠣᠡ᠂ ᠪᠠᠶᠠᠨᠴᠡᠴᠡᠭ᠂ ᠣᠶᠤᠨᠪᠢᠯᠢᠭ᠌᠂ ᠡᠷᠳᠡᠨᠢᠭᠤᠸᠠ᠂ ᠲᠣᠭᠲᠠᠭᠤᠨ
ᠬᠢᠨᠠᠭᠴᠢ᠄ ᠲ᠂ ᠬᠦᠮᠦᠵᠢᠯᠲᠦ᠂ ᠪᠠᠶᠠᠨᠴᠡᠴᠡᠭ᠂ ᠣᠳᠬᠠᠨᠰᠣᠠ