ᠦᠷ ᠦᠨ ᠲᠤᠶᠠᠭᠠ I – ᠪ᠂ ᠷᠢᠨᠴᠢᠨ - ᠲᠡᠷᠢᠬᠦᠨ ᠲᠡᠪᠲᠡᠷ <ᠮᠠᠨᠵᠤ ᠶᠢᠨ ᠳᠠᠯᠬᠢᠨ ᠳᠤ>(ᠬᠣᠷᠢᠨ ᠭᠤᠷᠪᠠ) Үүрийн туяа I – Б ᠂ Ренчин Тэргүүн дэвтэр "Манжийн талхинд" (23)
359ᠬᠣᠷᠢᠨ ᠭᠤᠷᠪᠠ᠂ ᠬᠣᠢᠳᠤ ᠡᠬᠡ
ᠥᠨᠥᠴᠢᠨ ᠥᠷᠥᠭᠡᠰᠦᠨ ᠬᠥᠮᠦᠨ ᠬᠡᠴᠡᠭᠦᠦ ᠠ᠋᠃
ᠱᠧᠪᠴᠧᠡᠺᠦ
ᠪᠠᠲᠤᠪᠠᠶᠠᠷ ᠤ᠋ᠨ ᠠᠯᠤᠰ ᠬᠣᠯᠠ ᠶ᠋ᠢᠨ ᠤᠲᠠᠢ ᠶ᠋ᠢᠨ ᠣᠷᠣᠨ ᠶᠠᠪᠤᠭᠰᠠᠨ ᠠ᠋ᠴᠠ ᠬᠣᠢᠰᠢ᠂ ᠵᠠᠮᠪᠠ ᠶ᠋ᠢᠨ ᠪᠢᠴᠢᠬᠠᠨ ᠬᠣᠲᠠ ᠠ᠋ᠴᠠ ᠠᠵᠠ ᠶ᠋ᠢᠨ ᠴᠢᠷᠠᠢ ᠪᠤᠷᠤᠭᠤᠯᠤᠭᠰᠠᠨ ᠰᠢᠭ᠋᠂ ᠠᠵᠤ ᠲᠥᠷᠥᠬᠦ ᠨᠢ ᠤᠷᠤᠭᠰᠢ ᠦᠭᠡᠢ ᠪᠣᠯᠪᠠ᠃ ᠠᠩ ᠤ᠋ᠨ ᠮᠥᠷ ᠢ᠋ᠶ᠋ᠡᠷ ᠬᠥᠭᠡᠭᠡᠴᠡᠯᠳᠦᠨ ᠡᠷᠭᠢᠭᠦᠯᠳᠡᠭ ᠵᠠᠮᠪᠠ᠂ ᠬᠡᠳᠦᠨ ᠳᠣᠯᠣᠭᠠ ᠬᠣᠨᠣᠭ ᠬᠦᠷᠦᠭᠡ ᠬᠢᠭᠰᠡᠭᠡᠷ ᠶᠠᠪᠤᠵᠤ ᠰᠤᠷᠤᠭᠠᠳ᠂ ᠲᠡᠷᠡ ᠵᠠᠪᠰᠠᠷ ᠠᠷᠤ ᠭᠡᠷ ᠦ᠋ᠨ ᠪᠦᠬᠦ ᠪᠡᠯᠴᠢᠭᠡᠷ ᠨᠡᠭᠦᠳᠡᠯ ᠦ᠋ᠨ ᠠᠶᠠ ᠶ᠋ᠢ ᠬᠠᠰᠢᠷ ᠡᠪᠦᠭᠡᠨ ᠮᠠᠯᠴᠢᠨ ᠪᠠᠲᠤᠪᠠᠶᠠᠷ ᠡᠷᠬᠢᠯᠡᠨ ᠳᠠᠭᠠᠭᠠᠵᠤ ᠶᠠᠪᠤᠳᠠᠭ ᠲᠤᠨᠢ ᠨᠠᠢᠳᠠᠵᠤ ᠰᠤᠷᠤᠭᠰᠠᠨ ᠪᠢᠯᠡ᠃ ᠨᠢᠮᠪᠠᠢ ᠪᠠᠲᠤᠪᠠᠶᠠᠷ᠂ ᠣᠯᠠᠨ ᠨᠡᠭᠦᠳᠡᠯ ᠦ᠋ᠨ ᠴᠢᠨᠠᠳᠤᠬᠢ ᠡᠪᠡᠰᠦ ᠪᠡᠯᠴᠢᠭᠡᠷ ᠦ᠋ᠨ ᠪᠠᠢᠳᠠᠯ ᠢ᠋ ᠤᠷᠢᠳ ᠠ᠋ᠴᠠ ᠠᠵᠢᠵᠤ᠂ ᠣᠢᠷᠠ ᠶ᠋ᠢᠨ ᠪᠠᠭᠤᠬᠤ ᠭᠠᠵᠠᠷ ᠤ᠋ᠨ ᠬᠠᠪᠢ ᠨᠤᠲᠤᠭ ᠲᠤ᠌ ᠴᠢᠨᠣᠠ ᠨᠣᠬᠠᠢ᠂ ᠡᠪᠡᠳᠴᠢᠨ ᠲᠠᠬᠤᠯ ᠲᠠᠢ ᠤᠤ ᠭᠡᠵᠦ ᠬᠣᠨᠣᠨ ᠥᠨᠵᠢᠨ ᠦᠵᠡᠵᠦ᠂ ᠪᠠᠭᠤᠬᠤ ᠭᠡᠵᠦ ᠪᠠᠢᠭᠰᠠᠨ ᠨᠤᠲᠤᠭ ᠢ᠋ᠶ᠋ᠠᠷ ᠡᠪᠡᠳᠴᠢᠨ ᠲᠠᠬᠤᠯ ᠲᠠᠢ ᠮᠠᠯ ᠬᠥᠲᠥᠯᠦᠭᠰᠡᠨ ᠲᠠᠭᠤᠭᠰᠠᠨ ᠠᠶᠠᠨ ᠵᠢᠩ ᠦ᠋ᠨ ᠬᠥᠮᠦᠨ ᠶᠠᠪᠤᠭᠰᠠᠨ ᠡᠰᠡᠭᠰᠡᠨ᠂ ᠲᠡᠷᠡ ᠬᠠᠪᠢ ᠨᠤᠲᠤᠭ ᠤ᠋ᠨ ᠮᠠᠯ ᠰᠦᠷᠦᠭ ᠦ᠋ᠨ ᠮᠡᠨᠳᠦ ᠶ᠋ᠢ ᠬᠡᠵᠢᠶᠡᠳᠡ ᠮᠡᠳᠡᠵᠦ ᠶᠠᠪᠤᠳᠠᠭ ᠪᠠᠢᠵᠤ ᠪᠢᠯᠡ᠃ ᠴᠢᠩᠭᠢᠭᠡᠳ ᠮᠠᠯ ᠢ᠋ ᠲᠡᠳᠦᠢ ᠳ᠋ᠦ᠍ ᠬᠤᠵᠢᠷᠯᠠᠭᠤᠯᠬᠤ ᠴᠠᠭ ᠪᠣᠯᠤᠯᠠ᠃ ᠲᠡᠳᠦᠢ ᠳ᠋ᠦ᠍ ᠲᠡᠢᠮᠦ ᠭᠠᠵᠠᠷ᠂ ᠮᠠᠯ ᠤ᠋ᠨ ᠬᠦᠴᠦ ᠲᠡᠪᠡᠭᠡᠷᠡᠭ ᠲᠦ᠍ ᠲᠤᠰᠬᠠᠢ ᠡᠪᠡᠰᠦ ᠨᠣᠭᠣᠭᠠ ᠪᠣᠯᠪᠠᠰᠤᠷᠠᠨᠠ ᠭᠡᠵᠦ ᠠᠨᠳᠤᠳᠠᠭ ᠦᠭᠡᠢ ᠮᠡᠳᠡᠳᠡᠭ ᠤᠴᠢᠷ᠂ ᠨᠡᠭᠦᠳᠡᠯ ᠬᠢᠬᠦ ᠳ᠋ᠦ᠍ ᠶᠡᠬᠡᠯᠡ(ᠶᠡᠬᠡ ᠯᠡ) ᠠᠮᠠᠷᠬᠠᠨ ᠰᠠᠨᠠᠭᠳᠠᠵᠤ ᠪᠠᠢᠳᠠᠭ ᠰᠠᠨ᠃ ᠪᠠᠭᠤᠭᠰᠠᠨ ᠨᠤᠲᠤᠭ ᠪᠦᠬᠦᠨ ᠳ᠋ᠦ᠍ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠪᠦᠷᠢ ᠳ᠋ᠦ᠍ ᠲᠣᠬᠢᠷᠠᠭᠰᠠᠨ ᠲᠦᠳᠡ ᠪᠡᠯᠴᠢᠭᠡᠷ ᠲᠡᠢ ᠪᠠᠢᠳᠠᠭ ᠳᠡᠭᠡᠷᠡ ᠡᠴᠡ ᠠᠳᠤᠭᠤ ᠬᠣᠨᠢᠨ ᠤ᠋ ᠴᠢᠮᠬᠢᠵᠦ ᠢᠳᠡᠬᠦ ᠭᠠᠵᠠᠷ᠂ ᠬᠡᠯᠡ ᠪᠡᠷ ᠣᠷᠢᠶᠠᠨ ᠳᠣᠯᠢᠶᠠᠳᠠᠭ ᠬᠥᠭᠡᠷᠦᠬᠦᠢ ᠦᠬᠡᠷ ᠬᠠᠮᠢᠭᠠ ᠪᠡᠯᠴᠢᠳᠡᠭ ᠪᠢᠯᠡ᠃ ᠲᠡᠮᠡᠭᠡᠨ ᠳ᠋ᠦ᠍ ᠲᠣᠬᠢᠷᠠᠮᠵᠢᠲᠠᠢ ᠪᠡᠯᠴᠢᠭᠡᠷ ᠬᠠᠮᠢᠭᠠ ᠪᠠᠢᠳᠠᠭ ᠪᠢᠯᠡ ᠭᠡᠵᠦ ᠰᠠᠨᠠᠭᠠ ᠵᠣᠪᠠᠯᠲᠠ ᠦᠭᠡᠢ ᠪᠠᠢᠳᠠᠭ ᠪᠢᠯᠡ᠃ ᠪᠠᠲᠤᠪᠠᠶᠠᠷ ᠠ᠋ᠴᠠ ᠬᠣᠢᠰᠢ ᠭᠡᠨᠡᠳᠲᠡ᠂ ᠲᠡᠢᠨ ᠬᠦ᠌ ᠰᠤᠷᠮᠠᠭᠠᠢ ᠨᠡᠭᠦᠳᠡᠭ ᠨᠡᠭᠦᠳᠡᠯ ᠨᠢ ᠨᠢᠭᠡ ᠯᠡ ᠪᠢᠰᠢ ᠪᠣᠯᠵᠤ᠂ ᠵᠠᠮᠪᠠ ᠶ᠋ᠢᠨ ᠬᠣᠲᠠ ᠠᠢᠯ ᠤ᠋ᠨ ᠬᠢᠨ ᠮᠤᠬᠤᠷ ᠰᠣᠬᠣᠷ ᠢ᠋ᠶ᠋ᠠᠷ ᠨᠢᠳᠦ ᠪᠠᠯᠠᠢ ᠨᠡᠭᠦᠳᠡᠭ ᠪᠣᠯᠪᠠ᠃ ᠰᠢᠷᠴᠢᠨ ᠨᠠᠰᠤ ᠪᠠᠭᠠ᠂ ᠪᠢᠷᠠᠭᠤ ᠶ᠋ᠢᠨ ᠪᠡᠯᠴᠢᠭᠡᠷ ᠡᠴᠡ ᠬᠡᠲᠦᠷᠡᠵᠦ ᠦᠵᠡᠭᠡ ᠦᠭᠡᠢ᠂ ᠪᠣᠷᠣ ᠨᠢᠷᠤᠭᠤᠨ ᠠ᠋ᠴᠠ ᠴᠢᠨᠠᠭᠰᠢ ᠳᠠᠪᠠᠵᠤ ᠦᠵᠡᠭᠡ ᠦᠭᠡᠢ ᠪᠠᠯᠴᠢᠷ ᠨᠠᠰᠤᠲᠠᠢ ᠬᠡᠦᠬᠡᠳ ᠪᠠᠢᠵᠠᠢ᠃ ᠭᠡᠷ ᠦ᠋ᠨ ᠬᠠᠮᠤᠭ ᠠᠵᠢᠯ ᠢ᠋ ᠬᠦᠵᠦᠭᠦᠨ ᠳ᠋ᠡᠭᠡᠨ ᠡᠭᠦᠷᠦᠭᠰᠡᠨ ᠲᠠᠷᠠᠩ ᠪᠡᠶᠡ ᠡᠪᠡᠳᠴᠢᠲᠡᠢ᠂ ᠲᠡᠩᠬᠡᠯ ᠲᠠᠮᠢᠷ ᠲᠠᠰᠤᠷᠠᠵᠤ᠂ ᠠᠷᠠᠢ ᠭᠡᠵᠦ ᠶᠠᠪᠤᠳᠠᠭ ᠪᠠᠢᠯᠠ᠃ ᠲᠡᠭᠡᠭᠡᠳ᠂ ᠲᠣᠭᠣᠭᠠ ᠲᠤᠯᠭᠠ ᠪᠠᠨ ᠲᠣᠭᠣᠷᠢᠭᠰᠠᠭᠠᠷ ᠡᠳᠦᠷ ᠥᠩᠭᠡᠷᠡᠵᠦ᠂ ᠨᠤᠲᠤᠭ ᠪᠡᠯᠴᠢᠭᠡᠷ ᠦᠵᠡᠬᠦ ᠰᠣᠩᠭᠣᠬᠤ ᠭᠡᠵᠦ ᠶᠠᠪᠤᠬᠤ ᠵᠢᠯᠣᠭᠣ ᠨᠢ ᠪᠣᠭᠣᠨᠢ ᠪᠠᠢᠵᠠᠢ᠃ ᠲᠡᠭᠡᠭᠡᠳ᠂ ᠰᠢᠨᠡ ᠭᠠᠵᠠᠷ ᠨᠡᠭᠦᠵᠦ ᠪᠠᠭᠤᠭᠰᠠᠨ ᠤ᠋ ᠰᠡᠭᠦᠯᠡᠷ ᠦᠵᠡᠪᠡᠯ᠂ ᠬᠠᠪᠤᠷ ᠤ᠋ᠨ ᠲᠠᠷᠴᠢᠭ ᠴᠠᠭ ᠢ᠋ᠶ᠋ᠠᠷ ᠲᠠᠷᠴᠢᠭ ᠡᠪᠡᠰᠦ ᠲᠡᠢ᠂ ᠪᠡᠯᠴᠢᠭᠡᠷ ᠨᠢ ᠬᠣᠯᠠᠳᠠᠭᠠᠳ᠂ ᠦᠬᠡᠷ ᠭᠡᠷ ᠲᠡᠭᠡᠨ ᠣᠷᠣᠢ ᠪᠤᠴᠠᠵᠤ ᠢᠷᠡᠬᠦ ᠪᠣᠯᠵᠤ᠂ ᠡᠴᠡᠵᠦ ᠲᠤᠷᠠᠳᠠᠭ ᠪᠠᠢᠵᠠᠢ᠃
ᠬᠠᠪᠤᠷ ᠬᠣᠨᠢ ᠬᠤᠷᠠᠭᠠᠯᠠᠵᠤ ᠡᠬᠢᠯᠡᠭᠡᠳ᠂ ᠡᠮᠡᠭᠡᠨ ᠰᠦᠷᠦᠩ᠂ ᠡᠳᠦᠷ ᠢᠷᠡᠬᠦ ᠳᠣᠳᠣᠮ ᠲᠡᠩᠬᠡᠭᠡ ᠲᠠᠮᠢᠷ ᠮᠠᠭᠤᠳᠠᠵᠤ ᠪᠠᠢᠭᠠ ᠳᠠᠷᠠᠩ ᠬᠣᠶᠠᠷ ᠨᠣᠢᠷ ᠠᠯᠲᠠᠨ᠂ ᠬᠣᠨᠢ ᠬᠤᠷᠠᠭᠠ ᠪᠠᠷ ᠨᠣᠴᠣᠯᠳᠤᠵᠤ᠂ ᠰᠢᠷᠴᠢᠨ ᠡᠳᠦᠷ ᠬᠣᠨᠢᠨ ᠳ᠋ᠤ᠌ ᠶᠠᠪᠤᠬᠤ ᠳ᠋ᠠᠭᠠᠨ᠂ ᠬᠡᠭᠡᠷᠡ ᠬᠤᠷᠠᠭᠠᠯᠠᠭᠰᠠᠨ ᠬᠤᠷᠠᠭᠠ ᠶ᠋ᠢ ᠤᠭᠤᠲᠠᠨ ᠳ᠋ᠠᠭᠠᠨ ᠣᠷᠣᠢ ᠪᠦᠷᠢ ᠡᠭᠦᠷᠴᠦ ᠢᠷᠡᠳᠡᠭ ᠪᠠᠢᠵᠠᠢ᠃ ᠲᠡᠭᠡᠵᠦ ᠬᠥᠮᠦᠨ ᠪᠦᠯᠢ ᠮᠠᠭᠤᠲᠠᠢ ᠲᠡᠷᠡ ᠬᠣᠲᠠ ᠶ᠋ᠢᠨ ᠬᠢᠨ ᠦ᠌ ᠳᠣᠣᠷᠠ ᠳᠣᠣᠷᠠ ᠪᠠᠨ ᠶᠠᠳᠠᠵᠤ ᠪᠠᠢᠲᠠᠯᠠ᠂ ᠬᠣᠨᠢ ᠬᠤᠷᠠᠭᠠᠯᠠᠵᠤ ᠰᠢᠪᠲᠤᠷᠬᠤ (ᠰᠢᠪᠲᠤᠷᠠᠬᠤ) ᠶ᠋ᠢᠨ ᠦᠶᠡ ᠪᠡᠷ ᠳᠠᠷᠠᠩ ᠨᠠᠰᠤ ᠪᠠᠷᠠᠵᠠᠢ᠃ ᠡᠷᠭᠦᠭᠰᠡᠨ ᠡᠬᠡ ᠳ᠋ᠡᠭᠡᠨ ᠲᠤᠰᠠᠯᠠᠵᠤ ᠪᠠᠢᠭᠰᠠᠨ ᠰᠢᠷᠴᠢᠨ᠂ ᠰᠥᠨᠢ ᠳᠦᠯᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠡᠴᠡᠭᠡᠳ᠂ ᠭᠡᠷ ᠲᠡᠭᠡᠨ( ᠲᠤ ᠪᠡᠨ) ᠣᠷᠣᠵᠤ ᠣᠷᠣ ᠪᠠᠨ ᠲᠦᠰᠢᠭᠡᠳ ᠦᠷᠭᠡᠯᠡᠨ ᠤᠨᠲᠠᠵᠠᠢ᠃ ᠨᠢᠭᠡ ᠮᠡᠳᠡᠬᠦᠨᠡ᠂ ᠰᠦᠷᠦᠩ ᠡᠮᠡᠭᠡᠨ ᠦᠷ ᠢ᠋ᠶ᠋ᠡᠷ ᠰᠢᠷᠴᠢᠨ ᠢ᠋ ᠰᠠᠨᠳᠤᠷᠤᠨ ᠰᠡᠷᠢᠭᠡᠵᠦ( ᠰᠡᠷᠡᠭᠡᠵᠦ)᠂
— ᠬᠦᠦ ᠮᠢᠨᠢ ᠪᠣᠰ ᠪᠣᠰ᠂ ᠡᠵᠢ ᠴᠢᠨᠢ ᠪᠤᠷᠬᠠᠨ ᠪᠣᠯᠴᠢᠯᠠ(ᠪᠣᠯᠴᠢᠬᠠᠯᠠ) ᠭᠡᠵᠡᠢ᠃ ᠰᠢᠷᠴᠢᠨ ᠨᠣᠢᠷᠮᠤᠭᠯᠠᠵᠤ᠂ ᠡᠮᠡᠭᠡᠨ ᠦ᠌ ᠰᠢᠲᠦ ᠦᠭᠡᠢ ᠠᠮᠠᠨ ᠳᠣᠲᠣᠷᠠ ᠪᠠᠨ ᠰᠠᠨᠳᠤᠷᠤᠨ ᠬᠦᠩᠭᠢᠨᠡᠬᠦ(ᠭᠦᠩᠭᠡᠨᠡᠬᠦ) ᠶ᠋ᠢ ᠰᠠᠢᠨ ᠤᠬᠠᠷᠠᠭᠰᠠᠨ( ᠤᠬᠠᠭᠠᠷᠠᠭᠰᠠᠨ) ᠦᠭᠡᠢ᠂
— ᠠ᠂ ᠶᠠᠭᠤ ᠭᠡᠨᠡ? ᠭᠡᠵᠦ ᠪᠣᠰᠤᠨ ᠬᠠᠷᠠᠢᠪᠠ᠃
— ᠡᠵᠢ ᠴᠢᠨᠢ ᠨᠠᠰᠤ ᠪᠠᠷᠠᠴᠢᠬᠰᠠᠨ (ᠪᠠᠷᠠᠴᠢᠬᠠᠭᠰᠠᠨ) ᠬᠣᠲᠠᠨ ᠳ᠋ᠤ᠌ ᠮᠠᠨᠢ᠂ ᠴᠢ ᠪᠢᠳᠡ ᠬᠣᠶᠠᠷ ᠠ᠋ᠴᠠ ᠥᠭᠡᠷᠡ ᠬᠥᠮᠦᠨ ᠠᠮᠢᠲᠠᠨ ᠪᠠᠢᠳᠠᠭ ᠦᠭᠡᠢ ᠶᠠᠭᠠᠬᠢᠨᠠ ᠳᠠ᠃ ᠠᠪᠤ ᠶ᠋ᠢᠨ ᠴᠢᠨᠢ ᠮᠠᠢᠬᠠᠨ ᠬᠠᠮᠢᠭᠠ ᠪᠠᠢᠳᠠᠭ ᠪᠢᠯᠡ? ᠮᠠᠯ ᠠᠳᠤᠭᠤᠰᠤ ᠰᠠᠨᠳᠠᠭᠠᠬᠤ ᠪᠣᠢ ᠭᠡᠵᠦ ᠳᠡᠭᠡᠷᠡ ᠨᠢ ᠮᠠᠢᠬᠠᠨ ᠰᠢᠭᠠᠵᠤ ᠦᠵᠡᠬᠦ ᠶᠤᠮᠰᠠᠨ ᠭᠡᠬᠦ ᠳ᠋ᠦ᠍ᠨᠢ (ᠳ᠋ᠦ᠍ ᠨᠢ)᠂
— ᠡᠵᠢ ᠮᠢᠨᠢ! ᠭᠡᠵᠦ ᠬᠠᠰᠬᠢᠷᠤᠭᠠᠳ᠂ ᠰᠢᠷᠴᠢᠨ ᠭᠡᠷ ᠡᠴᠡ ᠤᠬᠤᠰᠬᠢᠨ ᠭᠠᠷᠴᠤ ᠡᠬᠡ ᠶ᠋ᠢᠨ ᠵᠦᠭ ᠭᠦᠶᠦᠪᠡᠰᠦ᠂ ᠬᠡᠪᠲᠡᠵᠦ ᠪᠠᠢᠭᠠ ᠬᠣᠨᠢᠨ ᠤ᠋ ᠳᠡᠷᠭᠡᠳᠡ ᠦᠷ ᠦ᠋ᠨ ᠪᠦᠷᠦᠩᠬᠦᠢ ᠪᠡᠷ ᠳᠠᠷᠠᠩ ᠪᠠᠷᠠᠭᠤᠨ ᠬᠥᠯ ᠢ᠋ᠶ᠋ᠡᠨ ᠨᠤᠭᠤᠯᠵᠤ᠂ ᠴᠣᠮᠴᠣᠢᠵᠤ ᠰᠠᠭᠤᠳᠠᠭ ᠶᠠᠩᠵᠤ ᠪᠠᠷ ᠠᠮᠤᠷᠯᠢᠩᠭᠤᠢ ᠲᠠᠯᠪᠢᠭᠤᠨ ᠰᠠᠭᠤᠵᠤ ᠪᠠᠢᠭᠠ ᠪᠠᠷᠠᠭᠠ(ᠪᠠᠷᠠ )ᠨᠢ ᠬᠠᠷᠠᠭᠳᠠᠪᠠ᠃ ᠳᠡᠷᠭᠡᠳᠡ ᠨᠢ ᠰᠡᠩᠳᠡᠨ ᠮᠡᠩᠳᠡᠨ ᠭᠦᠶᠦᠵᠦ ᠣᠴᠢᠪᠠᠰᠤ᠂ ᠳᠠᠷᠠᠩ ᠤ᠋ᠨ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠠᠮᠬᠢᠨ ᠨᠢᠳᠦ ᠪᠡᠨ ᠠᠨᠢᠭᠰᠠᠨ᠂ ᠡᠴᠡᠵᠦ ᠶᠠᠳᠠᠷᠠᠭᠰᠠᠨ ᠴᠢᠷᠠᠢ ᠶᠡᠬᠡᠯᠡ (ᠶᠡᠬᠡ ᠯᠡ) ᠠᠮᠤᠷᠯᠢᠩᠭᠤᠢ ᠲᠠᠯᠪᠢᠭᠤᠨ᠂ ᠰᠣᠯᠣᠭᠠᠢ ᠭᠠᠷ ᠢ᠋ᠶ᠋ᠠᠨ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠭᠠᠳ᠂ ᠲᠦᠷ ᠰᠠᠭᠤᠵᠤ ᠠᠮᠤᠰᠬᠢᠬᠦ ᠭᠡᠳ ᠦᠷᠭᠡᠯᠡᠭᠰᠡᠨ ᠶᠦᠮ ᠰᠢᠭ ᠦᠵᠡᠭᠳᠡᠪᠡ᠃ ᠭᠠᠭᠴᠠᠬᠦ ᠲᠣᠯᠣᠭᠠᠢ ᠪᠠᠬᠠᠨ ᠡᠲᠡᠭᠡᠳ ᠰᠣᠨᠢᠬᠠᠨ ᠢ᠋ᠶ᠋ᠠᠷ ᠬᠠᠵᠠᠢᠵᠤ᠂ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠵᠢᠷᠦᠬᠡᠨ ᠲᠤᠰ ᠡᠪᠦᠷ ᠢ᠋ᠶ᠋ᠡᠨ ᠲᠠᠰᠤ ᠪᠠᠵᠠᠭᠰᠠᠨ ᠬᠠᠴᠢᠨ ᠪᠠᠢᠳᠠᠯ ᠢ᠋ ᠦᠵᠡᠪᠡᠰᠦ᠂ ᠨᠢᠭᠡ ᠨᠠᠰᠤ ᠪᠠᠷ ᠠᠮᠤᠷ ᠵᠠᠶᠠᠭᠠ ᠪᠠᠨ ᠦᠵᠡᠭᠡ ᠦᠭᠡᠢ ᠠᠵᠢᠯᠴᠢ ᠲᠡᠷᠡ ᠬᠥᠭᠡᠷᠦᠬᠦᠢ ᠡᠮᠡᠭᠲᠡᠢ᠂ ᠨᠢᠳᠦ ᠪᠡᠨ ᠡᠭᠦᠷᠢᠳᠡ ᠠᠨᠢᠭᠰᠠᠨ ᠪᠠᠢᠳᠠᠯ ᠲᠠᠢ ᠦᠵᠡᠭᠳᠡᠪᠡ᠃
ᠰᠢᠷᠢᠴᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠨᠢᠯᠪᠤᠰᠤ ᠮᠡᠯᠲᠡᠭᠡᠨᠡᠨ᠂ ᠢᠵᠢᠢ ᠭᠡᠵᠦ ᠰᠢᠪᠡᠨᠡᠭᠡᠳ ᠶᠠᠭᠠᠷᠠᠨ ᠰᠥᠭᠥᠳᠴᠦ᠂ ᠡᠬᠡ ᠶ᠋ᠢᠨ ᠵᠢᠷᠦᠬᠡᠨ ᠲᠤᠰ ᠪᠠᠷᠢᠭᠰᠠᠨ ᠭᠠᠷ ᠢ᠋ ᠠᠶᠠᠷᠬᠠᠨ ᠲᠡᠮᠲᠡᠷᠢᠨ ᠦᠵᠡᠪᠡᠰᠦ ᠮᠥᠰᠥ ᠮᠡᠲᠦ ᠬᠦᠢᠲᠡᠨ᠂ ᠴᠢᠯᠠᠭᠤ ᠮᠡᠲᠦ ᠬᠠᠲᠠᠭᠤ ᠪᠣᠯᠤᠭᠰᠠᠨ ᠠᠵᠢ᠃
ᠰᠢᠷᠴᠢᠨ ᠦ᠌ ᠠᠷᠤ ᠳ᠋ᠤ᠌ ᠲᠡᠮᠦᠷ ᠭᠠᠳᠠᠰᠤ ᠬᠠᠩᠭᠢᠨᠠᠨ᠂ ᠰᠦᠷᠦᠩ ᠡᠮᠡᠭᠡᠨ ᠭᠡᠷ ᠦ᠋ᠨ ᠠᠷᠤ ᠳ᠋ᠤ᠌ ᠪᠠᠢᠭᠰᠠᠨ ᠪᠠᠷᠠᠭᠠ ᠶ᠋ᠢᠨ ᠳᠣᠣᠷᠠ ᠠ᠋ᠴᠠ ᠬᠠᠭᠤᠴᠢᠨ ᠮᠠᠢᠬᠠᠨ ᠭᠠᠷᠭᠠᠭᠠᠳ ᠰᠢᠷᠴᠢᠨ ᠢ᠋ ᠳᠠᠭᠤᠳᠠᠵᠤ᠂
— ᠬᠦᠦ ᠮᠢᠨᠢ ᠡᠨᠡ ᠮᠠᠢᠬᠠᠨ ᠢ᠋ ᠳᠡᠮᠵᠢᠯᠴᠢ ᠭᠡᠵᠦ᠂ ᠡᠮᠡᠭᠡᠨ ᠰᠢᠷᠴᠢᠨ ᠬᠣᠶᠠᠷ ᠲᠠᠯᠢᠢᠭᠴᠢ ᠶ᠋ᠢᠨ ᠳᠡᠭᠡᠷᠡ ᠮᠠᠢᠬᠠᠨ ᠰᠢᠭᠠᠵᠤ᠂ ᠡᠮᠡᠭᠡᠨ ᠮᠠᠢᠬᠠᠨ ᠤ᠋ ᠬᠣᠷᠮᠣᠢ᠂ ᠡᠭᠦᠳᠡ ᠶ᠋ᠢ ᠰᠠᠢᠨ ᠵᠥᠷᠢᠭᠦᠯᠦᠭᠡᠳ᠂ ᠬᠤᠷᠠᠭᠠ ᠪᠠᠷᠤᠭ ᠳᠦᠭᠦᠷᠦᠭᠰᠡᠨ ᠲᠠᠷᠠᠩ ᠤ᠋ᠨ ᠭᠡᠷ᠂ ᠥᠪᠡᠷᠦᠨ ᠭᠡᠷ ᠬᠣᠶᠠᠷ ᠲᠤ᠌ ᠵᠤᠯᠠ ᠪᠠᠳᠠᠷᠠᠭᠠᠪᠠ᠃
ᠦᠳᠡ ᠡᠴᠡ ᠬᠣᠢᠰᠢ ᠵᠠᠮᠪᠠ ᠬᠦᠷᠴᠦ ᠢᠷᠡᠭᠡᠳ᠂ ᠵᠣᠭᠰᠣᠭᠠᠪᠠᠷ((ᠵᠣᠭᠰᠣᠭᠠ ᠪᠠᠷ) ᠯᠠᠮᠠ ᠵᠠᠯᠠᠬᠤ ᠭᠡᠵᠦ ᠮᠣᠷᠳᠠᠵᠤ᠂ ᠬᠣᠢᠲᠤ ᠡᠳᠦᠷ ᠨᠢ ᠦᠬᠦᠯ ᠵᠣᠪᠠᠯᠠᠩ ᠲᠤᠰᠤᠭᠰᠠᠨ ᠲᠡᠷᠡ ᠭᠠᠵᠠᠷ ᠠ᠋ᠴᠠ ᠪᠢᠴᠢᠬᠠᠨ ᠬᠣᠲᠠ ᠠᠢᠯ ᠤ᠋ᠨ ᠬᠢᠨ ᠶᠠᠭᠠᠷᠠᠨ ᠥᠭᠡᠷᠡ ᠭᠠᠵᠠᠷ ᠨᠡᠭᠦᠵᠦ ᠪᠢᠯᠡ᠃
ᠥᠲᠡᠯᠦᠭᠰᠡᠨ ᠪᠠᠭᠤᠷᠠᠢ ᠡᠮᠡᠭᠡᠨ ᠰᠦᠷᠦᠩ᠂ ᠵᠠᠮᠪᠠ ᠶ᠋ᠢᠨ ᠭᠡᠷ ᠦ᠋ᠨ ᠠᠵᠢᠯ ᠳ᠋ᠤ᠌ ᠡᠯᠪᠡᠯᠴᠡᠨ ᠲᠤᠰᠠᠯᠠᠯᠴᠠᠬᠤ ᠪᠣᠯᠪᠠ᠃ ᠤᠳᠠᠯ ᠦᠭᠡᠢ ᠵᠠᠮᠪᠠ ᠠᠯᠤᠰ ᠤ᠋ᠨ ᠨᠢᠭᠡ ᠠᠢᠯ ᠠ᠋ᠴᠠ ᠭᠠᠭᠴᠠ ᠪᠡᠶᠡ ᠴᠢᠪᠠᠭᠠᠨᠴᠠ ᠳᠤᠮᠠ ᠶ᠋ᠢ ᠳᠣᠯᠣᠭᠠᠨ ᠳᠣᠯᠣᠭᠠ ᠳᠥᠴᠢ ᠶᠢᠰᠦᠨ ᠬᠣᠨᠣᠭ ᠥᠩᠭᠡᠷᠡᠲᠡᠯᠡ ᠭᠡᠷ ᠦ᠋ᠨ ᠠᠵᠢᠯ ᠬᠢᠯᠭᠡᠬᠦ ᠭᠡᠵᠦ ᠠᠪᠴᠢᠷᠠᠭᠠᠳ᠂ ᠲᠡᠷᠡ ᠮᠠᠭᠤᠬᠠᠢ ᠠᠭᠠᠰᠢ ᠲᠠᠢ ᠴᠢᠪᠠᠭᠠᠨᠴᠠ᠂ ᠰᠢᠷᠴᠢᠨ ᠢ᠋ ᠪᠠᠢᠨ ᠪᠠᠢᠨ᠂
— ᠵᠠ᠂ ᠴᠢ ᠪᠤᠰᠢᠭᠤ ᠬᠥᠳᠡᠯ᠃ ᠶᠠᠭᠠᠬᠢᠭᠰᠠᠨ ᠤᠷᠤᠭᠰᠢ ᠦᠭᠡᠢ᠂ ᠦᠬᠦᠭᠰᠡᠨ ᠠᠮᠢᠳᠤ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠠᠮᠢᠲᠠᠨ ᠪᠣᠢ ᠴᠢ? ᠪᠠᠢᠵᠢ ᠳᠠ ᠴᠢᠮᠠᠶ᠋ᠢ᠂ ᠠᠪᠤ ᠴᠢᠨᠢ ᠬᠣᠢᠲᠤ ᠡᠬᠡ ᠠᠪᠴᠢᠷᠠᠪᠠᠯ᠂ ᠬᠥᠯ ᠢ᠋ ᠴᠢᠨᠢ ᠬᠥᠩᠭᠡᠨ ᠪᠣᠯᠭᠠᠵᠤ ᠥᠭᠬᠦ ᠪᠠᠢᠬᠠ ᠭᠡᠳᠡᠭ ᠪᠠᠢᠵᠠᠢ᠃
ᠦᠨᠡᠬᠡᠷ ᠳᠥᠴᠢ ᠶᠢᠰᠦᠨ ᠬᠣᠨᠣᠭ ᠲᠤᠨᠢ ᠪᠤᠶᠠᠨ ᠨᠣᠮ ᠬᠢᠨᠡ ᠭᠡᠵᠦ ᠵᠠᠮᠪᠠ᠂ ᠮᠠᠯ ᠠ᠋ᠴᠠ ᠪᠠᠨ ᠬᠣᠷᠢᠭᠠᠳ ᠬᠣᠨᠢ ᠲᠠᠭᠤᠵᠤ ᠬᠡᠢᠳ ᠣᠷᠣᠭᠠᠳ᠂ ᠬᠡᠳᠦ ᠬᠣᠨᠣᠬᠤ ᠳ᠋ᠠᠭᠠᠨ ᠯᠣᠳᠣᠢ ᠪᠠᠶᠠᠨ ᠤ᠋ ᠪᠤᠴᠠᠮᠠᠯ ᠳᠡᠭᠦᠦ ᠬᠡᠦᠬᠡᠨ ᠡᠴᠡᠩᠬᠡᠷ ᠵᠠᠩᠲᠠᠢ ᠶ᠋ᠢ ᠳᠠᠭᠠᠭᠤᠯᠵᠤ ᠢᠷᠡᠯᠡ᠃ ᠲᠡᠷᠡ ᠵᠠᠩᠲᠠᠢ᠂ ᠮᠠᠭᠤ ᠠᠪᠤᠷᠢ ᠲᠠᠢ᠂ ᠬᠡᠷᠡᠭᠦᠯᠴᠢ ᠪᠡᠷ ᠬᠣᠰᠢᠭᠤ ᠳᠠᠶᠠᠭᠠᠷ ᠲᠤ᠌ ᠠᠯᠳᠠᠷ ᠲᠠᠢ ᠡᠮᠡ ᠪᠠᠢᠵᠤ ᠪᠢᠯᠡ᠃ ᠬᠠᠪᠢ ᠨᠤᠲᠤᠭ ᠤ᠋ᠨ ᠬᠢᠨᠢ ᠲᠡᠭᠦᠨ ᠢ᠋ ᠡᠷᠡ ᠴᠦ᠍ ᠠᠪᠠᠴᠢᠬᠤ ᠦᠭᠡᠢ᠂ ᠡᠷᠯᠢᠭ ᠴᠦ᠍ ᠠᠪᠠᠴᠢᠬᠤ ᠦᠭᠡᠢ ᠭᠡᠵᠦ ᠠᠶᠠᠨ ᠤ᠋ ᠤᠯᠤᠰ ᠵᠠᠩᠲᠠᠢ ᠳ᠋ᠤ᠌ ᠶᠡᠷᠦ ᠬᠣᠨᠣᠳᠠᠭ ᠦᠭᠡᠢ ᠬᠣᠯᠠᠭᠤᠷ ᠲᠣᠭᠣᠷᠢᠵᠤ᠂ ᠶᠡᠷᠦ ᠵᠠᠩᠲᠠᠢ ᠳ᠋ᠤ᠌ ᠬᠣᠨᠣᠭᠰᠠᠨ ᠠ᠋ᠴᠠ᠂ ᠵᠢᠯᠠᠭᠠ ᠳ᠋ᠤ᠌ ᠬᠣᠨᠣᠭᠰᠠᠨ ᠨᠢ ᠳᠡᠭᠡᠷᠡ ᠭᠡᠵᠦ ᠬᠡᠯᠡᠯᠴᠡᠳᠡᠭ ᠲᠡᠢᠮᠦ ᠠᠪᠠᠭᠠᠢ ᠪᠠᠢᠵᠠᠢ᠃
ᠰᠢᠷᠴᠢᠨ ᠢ᠋ ᠡᠴᠢᠭᠡ ᠶ᠋ᠢᠨ ᠡᠮᠦᠨᠡ ᠡᠴᠡ ᠭᠦᠶᠦᠵᠦ ᠢᠷᠡᠬᠦ ᠳ᠋ᠦ᠍ᠨᠢ ᠵᠠᠩᠲᠠᠢ ᠨᠢᠭᠡ ᠰᠢᠷᠪᠢᠵᠦ ᠬᠠᠷᠠᠭᠠᠳ᠂
— ᠡᠨᠡ ᠴᠢᠨᠢ ᠥᠨᠥᠬᠢ ᠡᠷᠭᠦᠮᠡᠯ ᠴᠢᠨᠢ ᠤᠤ? ᠶᠠᠭᠠᠬᠢᠭᠰᠠᠨ ᠡᠷᠬᠡ ᠴᠢᠷᠠᠢ ᠲᠠᠢ ᠠᠮᠢᠲᠠᠨ ᠪᠣᠢ? ᠭᠡᠵᠦ ᠰᠢᠲᠦ ᠶ᠋ᠢᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠬᠦᠢᠲᠡᠨ ᠢ᠋ᠶ᠋ᠡᠷ ᠥᠭᠦᠯᠡᠪᠡᠰᠦ᠂ ᠵᠠᠮᠪᠠ ᠬᠡᠷᠡᠭ ᠠᠯᠳᠠᠭᠰᠠᠨ ᠭᠡᠮᠲᠦ ᠬᠦᠦ ᠰᠢᠭ ᠰᠤᠯᠠᠬᠠᠨ ᠢ᠋ᠶ᠋ᠠᠷ ᠢᠨᠢᠶᠡᠪᠬᠢᠯᠡᠭᠡᠳ᠂ ᠵᠠᠩᠲᠠᠢ ᠶ᠋ᠢ ᠳᠠᠭᠠᠵᠤ ᠦᠭᠡ ᠳᠠᠭᠤᠨ ᠦᠭᠡᠢ ᠭᠡᠷ ᠲᠡᠭᠡᠨ ᠣᠷᠣᠵᠤ ᠪᠢᠯᠡ᠃ ᠭᠡᠷ ᠦ᠋ᠨ ᠰᠢᠨᠡ ᠡᠵᠡᠭᠲᠡᠢ ᠢᠷᠡᠪᠡ ᠭᠡᠵᠦ᠂ ᠠᠯᠢ ᠬᠡᠳᠦᠢᠨᠡᠢ ᠤᠴᠢᠷ ᠢ᠋ ᠮᠡᠳᠡᠭᠰᠡᠨ ᠲᠤᠮᠠ ᠤᠷᠢᠳ ᠨᠢ ᠨᠠᠮᠪᠠᠭᠠᠨᠠᠨ ᠵᠢᠰᠤᠷᠳᠠᠵᠤ ᠴᠠᠢ ᠴᠢᠨᠠᠬᠤ ᠵᠠᠭᠤᠷᠠ᠂ ᠠᠵᠤ ᠪᠠᠢᠳᠠᠯ ᠢ᠋ᠶ᠋ᠠᠨ ᠶᠠᠷᠢᠬᠤ ᠳ᠋ᠠᠭᠠᠨ᠂ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠡᠬᠡᠯᠡ(ᠶᠡᠬᠡ ᠯᠡ) ᠵᠦᠳᠡᠷᠡᠪᠡ᠃ ᠡᠨᠡ ᠠᠢᠯ ᠤ᠋ᠨ ᠪᠠᠢᠳᠠᠯ ᠢ᠋ ᠰᠠᠢᠨ ᠮᠡᠳᠡᠬᠦ ᠦᠭᠡᠢ᠂ ᠰᠢᠨᠡ ᠬᠥᠮᠦᠨ ᠪᠣᠯᠤᠭᠠᠳ ᠲᠤᠩ ᠴᠦ᠍ ᠬᠡᠴᠡᠭᠦᠦ ᠪᠠᠢᠯᠠ᠃ ᠨᠠᠳᠠ ᠳ᠋ᠤ᠌ ᠲᠤᠰᠠᠯᠠᠳᠠᠭ ᠬᠥᠮᠦᠨ ᠭᠡᠬᠦ ᠳ᠋ᠦ᠍ ᠡᠨᠡ ᠣᠷᠣᠭᠰᠢ ᠦᠭᠡᠢ ᠵᠠᠭᠠᠯ(ᠵᠢᠭᠠᠯ) ᠭᠡᠵᠦ ᠲᠤᠮᠡ ᠴᠢᠪᠠᠭᠠᠨᠴᠠ᠂ ᠵᠠᠩᠲᠠᠢ ᠶ᠋ᠢᠨ ᠰᠢᠷᠴᠢᠨ ᠦ᠌ ᠵᠦᠭ ᠬᠦᠢᠲᠡᠨ ᠢ᠋ᠶ᠋ᠡᠷ ᠭᠢᠯᠤᠢᠨ ᠬᠠᠷᠠᠭᠰᠠᠨ ᠢ᠋ ᠬᠡᠳᠦᠢᠨᠡᠢ ᠠᠵᠢᠭᠯᠠᠭᠠᠳ᠂ ᠠᠶᠠᠰ ᠲᠤᠨᠢ ᠨᠡᠢᠯᠡᠭᠦᠯᠦᠨ ᠵᠢᠰᠤᠷᠳᠠᠵᠠᠢ᠃ ᠰᠢᠷᠴᠢᠨ᠂ ᠵᠠᠩᠲᠠᠢ ᠶ᠋ᠢ ᠤᠷᠢᠳ ᠰᠠᠢᠬᠠᠨ ᠰᠡᠳᠬᠢᠯᠲᠦ ᠡᠷᠭᠦᠭᠳᠡᠭᠰᠡᠨ ᠡᠬᠡ ᠶ᠋ᠢᠨ ᠰᠠᠭᠤᠳᠠᠭ ᠭᠠᠵᠠᠷ ᠠᠭᠤᠷ ᠲᠠᠢ᠂ ᠬᠦᠢᠲᠡᠨ ᠴᠢᠷᠠᠢ ᠲᠠᠢ ᠬᠠᠷᠢ ᠶ᠋ᠢᠨ ᠨᠢᠭᠡ ᠦᠯᠦ ᠲᠠᠨᠢᠬᠤ ᠡᠮᠡ ᠬᠥᠮᠦᠨ ᠬᠦᠷᠴᠦ ᠢᠷᠡᠭᠡᠳ ᠡᠵᠡᠨ ᠰᠢᠭ ᠰᠠᠭᠤᠵᠤ ᠪᠠᠢᠬᠤ ᠳ᠋ᠤᠨᠢ ᠳᠣᠲᠣᠷᠠ ᠠᠶᠠ ᠦᠭᠡᠢ ᠰᠠᠨᠠᠭᠳᠠᠵᠤ ᠰᠠᠮ ᠬᠠᠷᠠᠲᠠᠯᠠ ᠵᠠᠩᠲᠠᠢ᠂ ᠰᠢᠷᠴᠢᠨ ᠢ᠋ ᠠᠲᠤᠷᠢᠲᠠᠯᠠ ᠬᠦᠢᠲᠡᠨ ᠢ᠋ᠶ᠋ᠡᠷ ᠬᠠᠷᠠᠭᠰᠠᠨ ᠪᠠᠢᠵᠠᠢ᠃ ᠴᠢᠩᠭᠢᠭᠡᠳ ᠰᠢᠷᠴᠢᠨ ᠡᠴᠡ᠂
— ᠨᠡᠷᠡ ᠴᠢᠨᠢ ᠬᠡᠨ ᠪᠢᠯᠡ? ᠭᠡᠵᠦ ᠠᠰᠠᠭᠤᠭᠠᠳ᠂ ᠳᠠᠭᠤᠯᠠᠭᠠᠴᠢ ᠦᠭᠡᠢ ᠪᠣᠯᠵᠤ᠂ ᠠ᠂ ᠬᠡᠨ ᠭᠡᠨᠡ? ᠭᠡᠵᠦ ᠳᠠᠬᠢᠨ ᠠᠰᠠᠭᠤᠬᠤ ᠳ᠋ᠤᠨᠢ᠂ ᠵᠣᠷᠢᠭᠤᠳᠠ ᠲᠣᠭᠣᠮᠰᠠᠷ ᠦᠭᠡᠢ ᠪᠠᠢᠳᠠᠯ ᠢ᠋ᠶ᠋ᠠᠨ ᠮᠡᠳᠡᠭᠳᠡᠬᠦ ᠭᠡᠵᠦ ᠴᠢᠩᠭᠢᠵᠦ ᠪᠠᠢᠭᠠ ᠶ᠋ᠢ ᠨᠢ ᠮᠡᠳᠡᠭᠡᠳ᠂ ᠰᠢᠷᠴᠢᠨ ᠦ᠌ ᠳᠣᠲᠣᠷᠠ ᠪᠦᠯᠡᠬᠡ ᠵᠠᠯᠭᠢᠭᠰᠠᠨ ᠶᠤᠮ ᠰᠢᠭ᠋ ᠪᠣᠯᠪᠠ᠃
ᠴᠠᠢ ᠤᠤᠭᠤᠭᠠᠳ ᠬᠣᠢᠲᠤ ᠡᠬᠡ ᠠᠰᠠᠭᠤᠷᠤᠨ᠂
— ᠵᠠ᠂ ᠴᠢ ᠢᠩᠭᠢᠭᠡᠳ ᠡᠳᠦᠷᠵᠢᠨ ᠮᠢᠨᠦ ᠥᠭᠡᠳᠡ ᠡᠴᠡ ᠨᠢᠳᠦ ᠪᠡᠨ ᠪᠦᠯᠲᠡᠢᠯᠭᠡᠭᠡᠳ ᠰᠠᠭᠤᠬᠤ ᠠᠮᠢᠲᠠᠨ ᠤᠤ? ᠬᠣᠨᠢ ᠪᠠᠨ ᠬᠡᠨ ᠬᠠᠷᠢᠭᠤᠯᠬᠤ ᠪᠣᠯ ᠴᠢᠩᠭᠢᠪᠡᠯ᠂ ᠠ? ᠭᠡᠵᠦ ᠠᠰᠠᠭᠤᠵᠤ ᠪᠢᠯᠡ᠃
ᠰᠢᠷᠴᠢᠨ᠂ ᠣᠷᠣᠢ ᠬᠣᠨᠢᠨ ᠠ᠋ᠴᠠ ᠢᠷᠡᠭᠡᠳ᠂ ᠲᠤᠮᠡ ᠶ᠋ᠢ ᠨᠥᠭᠴᠢᠭᠰᠡᠨ ᠡᠵᠢ ᠶ᠋ᠢᠨ ᠬᠠᠭᠤᠴᠢᠨ ᠳᠡᠪᠡᠯ ᠬᠤᠪᠴᠠᠰᠤ ᠶ᠋ᠢ ᠭᠡᠷ ᠡᠴᠡ ᠭᠠᠷᠭᠠᠵᠤ᠂ ᠭᠡᠷ ᠦ᠋ᠨ ᠠᠷᠤ ᠳ᠋ᠤ᠌ ᠬᠤᠷᠢᠶᠠᠭᠰᠠᠨ ᠪᠠᠷᠠᠭᠠ ᠳ᠋ᠤ᠌ ᠴᠢᠬᠢᠵᠦ ᠪᠠᠢᠭᠠ ᠶ᠋ᠢ ᠬᠠᠷᠠᠭᠠᠳ᠂ ᠳᠣᠲᠣᠷᠠ ᠠᠶᠠ ᠦᠭᠡᠢ ᠪᠣᠯᠵᠤ ᠵᠢᠷᠦᠬᠡ ᠰᠢᠮᠰᠢᠷᠡᠨ᠂ ᠲᠡᠷᠡ ᠴᠢᠪᠠᠭᠠᠨᠴᠠ ᠶ᠋ᠢ ᠭᠡᠷ ᠲᠦ᠍ ᠣᠷᠣᠮᠠᠭᠴᠠ᠂ ᠪᠠᠷᠠᠭᠠ ᠶ᠋ᠢᠨ ᠳᠡᠷᠭᠡᠳᠡ ᠣᠴᠢᠵᠤ ᠰᠥᠬᠥᠷᠡᠭᠡᠳ᠂ ᠲᠠᠯᠢᠢᠭᠴᠢ ᠶ᠋ᠢᠨ ᠳᠡᠪᠡᠯ ᠦ᠋ᠨ ᠵᠠᠬᠠ ᠶ᠋ᠢ ᠲᠠᠲᠠᠵᠤ ᠭᠠᠷᠭᠠᠭᠠᠳ᠂ ᠨᠢᠭᠤᠷ ᠢ᠋ᠶ᠋ᠠᠨ ᠵᠠᠬᠠ ᠶ᠋ᠢᠨ ᠳᠣᠲᠣᠷᠠ ᠬᠢᠭᠡᠳ ᠦᠰᠦᠨ ᠳ᠋ᠦ᠍ᠨᠢ ᠭᠠᠷᠤᠭᠠ ᠦᠭᠡᠢ ᠬᠡᠪ ᠢ᠋ᠶ᠋ᠡᠷ ᠪᠠᠢᠭᠠ ᠡᠬᠡ ᠶ᠋ᠢᠨ ᠰᠠᠢᠬᠠᠨ ᠦᠨᠦᠷ ᠢ᠋ ᠠᠮᠢᠰᠬᠤᠯᠠᠨ( ᠠᠮᠢᠰᠬᠤᠯᠯᠠᠨ)᠂
— ᠡᠵᠢ ᠮᠢᠨᠢ᠂ ᠰᠦᠭᠺᠠᠸᠠᠳᠢ ᠶ᠋ᠢᠨ ᠰᠠᠢᠬᠠᠨ ᠣᠷᠣᠨ ᠳ᠋ᠤ᠌ ᠲᠥᠷᠥᠬᠦ ᠪᠣᠯᠲᠤᠭᠠᠢ ᠭᠡᠵᠦ ᠰᠢᠪᠡᠭᠡᠨᠡᠨ᠂ ᠨᠢᠯᠪᠤᠰᠤ ᠥᠪᠡᠷᠦᠨ ᠡᠷᠬᠡ ᠦᠭᠡᠢ ᠨᠢᠳᠦ ᠡᠴᠡ ᠴᠤᠪᠤᠷᠢᠪᠠ᠃
ᠭᠡᠷ ᠡᠴᠡ ᠲᠤᠮᠠ ᠶ᠋ᠢᠨ ᠲᠡᠰᠬᠡᠯ ᠦᠭᠡᠢ ᠵᠢᠰᠤᠷᠳᠠᠨ ᠦᠭᠡ ᠬᠡᠯᠡᠯᠴᠡᠬᠦ ᠳᠠᠭᠤᠨ ᠳᠦᠩᠭᠡᠷ ᠳᠦᠩᠭᠡᠷ ᠰᠣᠨᠣᠰᠳᠠᠨ᠂ ᠵᠠᠩᠲᠠᠢ ᠶ᠋ᠢᠨ ᠬᠦᠢᠲᠡᠨ ᠢᠶᠡᠷ ᠲᠠᠴᠢᠭᠢᠨᠠᠨ ᠢᠨᠢᠶᠡᠬᠦ ᠴᠢᠮᠡᠭᠡ ᠭᠠᠷᠴᠤ᠂ ᠪᠠᠶᠠᠴᠤᠳ ᠲᠤ᠌ ᠵᠢᠰᠤᠷᠳᠠᠨ ᠨᠡᠢᠯᠡᠭᠦᠯᠵᠦ ᠠᠶᠠᠭᠠ ᠬᠣᠭᠣᠯᠠ ᠣᠯᠵᠤ ᠰᠤᠷᠤᠭᠰᠠᠨ ᠲᠤᠮᠠ ᠡᠮᠡᠭᠡᠨ ᠦ᠌ ᠬᠤᠳᠠᠯ ᠢ᠋ᠶ᠋ᠠᠷ ᠵᠢᠰᠤᠷᠳᠠᠨ ᠪᠢᠯᠪᠢᠭᠦᠷᠳᠡᠵᠦ ᠢᠨᠢᠶᠡᠬᠦ ᠳᠠᠭᠤᠨ ᠭᠠᠷᠤᠭᠰᠠᠨ ᠳ᠋ᠤ᠌ ᠰᠢᠷᠴᠢᠨ᠂ ᠲᠡᠷᠡ ᠵᠠᠩᠲᠠᠢ ᠶ᠋ᠢᠨ ᠮᠠᠭᠤᠬᠠᠢ ᠳᠠᠭᠤᠨ᠂ ᠲᠤᠮᠠ ᠶ᠋ᠢᠨ ᠵᠢᠰᠤᠷᠳᠠᠨ ᠢᠨᠢᠶᠡᠬᠦ ᠶ᠋ᠢ ᠲᠤᠭᠤᠯᠬᠤ ᠦᠭᠡᠢ ᠭᠡᠵᠦ ᠲᠣᠯᠣᠭᠠᠢ ᠴᠢᠬᠢ ᠪᠡᠨ ᠲᠠᠯᠢᠢᠭᠴᠢ ᠶ᠋ᠢᠨ ᠳᠡᠪᠡᠯ ᠢ᠋ᠶ᠋ᠡᠷ ᠪᠢᠲᠡᠭᠦᠯᠡᠭᠡᠳ᠂ ᠰᠠᠨᠠᠮᠰᠠᠷ ᠦᠭᠡᠢ ᠤᠨᠲᠠᠵᠠᠢ᠃ ᠨᠢᠭᠡ ᠮᠡᠳᠡᠬᠦᠨᠡ ᠬᠥᠮᠦᠨ ᠲᠦᠯᠬᠢᠨ ᠶᠣᠪᠣᠷᠴᠤ᠂ᠳᠤᠭᠲᠤᠷᠤᠭᠰᠠᠨ ᠳ᠋ᠤ᠌ ᠰᠣᠴᠢᠨ ᠰᠡᠷᠢᠪᠡᠯ᠂ ᠲᠤᠮᠠ ᠵᠣᠷᠢᠭᠤᠳᠠ ᠭᠡᠷ ᠲᠦ᠍ ᠰᠣᠨᠣᠰᠤᠭ ᠭᠡᠵᠦ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠰᠢᠷᠴᠢᠨ ᠦ᠌ ᠴᠢᠬᠢᠨ ᠳ᠋ᠦ᠍ ᠬᠠᠰᠬᠢᠷᠤᠨ᠂
— ᠠ᠂ ᠴᠢ ᠡᠨᠳᠡ ᠨᠢᠭᠤᠭᠳᠠᠵᠤ ᠬᠡᠪᠲᠡᠭᠡ ᠬᠥᠮᠦᠨ ᠪᠣᠢ? ᠴᠢᠮᠠᠶ᠋ᠢ ᠬᠡᠴᠢᠨᠡᠨ ᠡᠷᠢᠯᠡ᠃ ᠣᠷᠣᠵᠤ ᠬᠣᠭᠣᠯᠠ ᠪᠠᠨ ᠢᠳᠡᠬᠦ ᠦᠭᠡᠢ ᠤᠤ? ᠬᠡᠮᠡᠪᠡᠰᠦ᠄
— ᠬᠠᠮᠢᠭᠠ ᠪᠠᠢᠨᠠ᠂ ᠴᠢᠨᠠᠳᠤᠬᠢ ᠴᠢᠨᠢ? ᠭᠡᠵᠦ ᠵᠠᠩᠲᠠᠢ ᠶ᠋ᠢᠨ ᠬᠦᠢᠲᠡᠨ ᠢ᠋ᠶ᠋ᠡᠷ ᠳᠤᠤᠭᠠᠷᠬᠤ ᠳᠠᠭᠤᠨ ᠭᠡᠷ ᠡᠴᠡ ᠰᠣᠨᠣᠰᠳᠠᠪᠠ᠃
— ᠡᠨᠳᠡ ᠭᠡᠷ ᠦ᠋ᠨ ᠠᠷᠤ ᠳ᠋ᠤ᠌ ᠨᠢᠭᠤᠭᠳᠠᠴᠢᠵᠠᠢ ᠭᠡᠵᠦ ᠲᠤᠮᠠ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍᠂
— ᠬᠠᠳᠠᠭ ᠪᠠᠷᠢᠵᠤ ᠵᠠᠯᠠᠨ ᠠᠢᠯᠠᠳᠬᠠᠬᠤ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠭᠠ ᠬᠡᠷᠡᠭ ᠤᠤ? ᠭᠡᠵᠦ ᠵᠠᠩᠲᠠᠢ ᠶ᠋ᠢᠨ ᠳᠤᠤᠭᠠᠷᠬᠤ ᠳ᠋ᠤ᠌᠂ ᠰᠢᠷᠴᠢᠨ ᠦ᠌ ᠳᠣᠲᠣᠷᠠ ᠶᠡᠬᠡᠯᠡ ᠤᠷᠮᠠ ᠦᠭᠡᠢ ᠪᠣᠯᠵᠤ᠂ ᠠᠮᠠᠨ ᠳᠣᠲᠣᠷᠠ ᠪᠠᠨ ᠰᠢᠷᠴᠢᠨ ᠢ᠋ ᠥᠭᠦᠯᠡᠵᠦ ᠶᠠᠪᠤᠭᠠ ᠲᠤᠮᠠ ᠡᠮᠡᠭᠡᠨ ᠢ᠋ ᠳᠠᠭᠠᠭᠰᠠᠭᠠᠷ ᠭᠡᠷ ᠲᠦ᠍ ᠣᠷᠣᠪᠠᠯ᠂ ᠲᠤᠯᠭᠠᠨ ᠳ᠋ᠤ᠌ ᠠᠰᠠᠵᠤ ᠪᠠᠢᠭᠰᠠᠨ ᠠᠷᠭᠠᠯ ᠤ᠋ᠨ ᠰᠦᠮᠡᠯᠵᠡᠬᠦ ᠭᠡᠷᠡᠯ ᠳ᠋ᠦ᠍ ᠲᠤᠮᠠ᠂ ᠰᠢᠷᠴᠢᠨ ᠦ᠌ ᠳᠡᠷᠭᠡᠳᠡ ᠠᠮᠲᠠ ᠦᠭᠡᠢ ᠬᠠᠲᠠᠭᠤ ᠮᠢᠬᠠ ᠲᠠᠢ ᠲᠤᠷᠠᠩᠬᠠᠢ ᠬᠣᠨᠢᠨ ᠤ᠋ ᠬᠦᠵᠦᠭᠦᠦ᠂ ᠢᠳᠡᠭᠡᠳ ᠦᠯᠡᠳᠡᠭᠡᠰᠡ ᠮᠢᠬᠠ ᠶ᠋ᠢᠨ ᠬᠠᠯᠢᠰᠤ ᠪᠦᠯᠡᠬᠡ ᠮᠡᠲᠦ ᠶ᠋ᠢ ᠣᠢᠷᠠᠲᠤᠭᠤᠯᠵᠤ ᠲᠠᠯᠪᠢᠭᠰᠠᠨ ᠨᠢ᠂ ᠪᠠᠶᠠᠨ ᠠᠢᠯ ᠳ᠋ᠤ᠌ ᠵᠠᠷᠤᠴᠠᠯᠠᠭᠳᠠᠳᠠᠭ ᠶᠠᠳᠠᠭᠤᠰ ᠤ᠋ᠨ ᠥᠯ ᠵᠠᠯᠭᠠᠳᠠᠭ ᠬᠣᠭᠣᠯᠠ ᠪᠠᠢᠵᠠᠢ᠃
ᠰᠢᠷᠴᠢᠨ᠂ ᠥᠪᠡᠷᠦᠨ ᠭᠡᠵᠦ ᠪᠣᠳᠣᠵᠤ ᠰᠤᠷᠤᠭᠰᠠᠨ᠂ ᠥᠰᠴᠦ ᠲᠣᠷᠨᠢᠭᠰᠠᠨ ᠭᠡᠷ ᠲᠡᠭᠡᠨ ᠬᠥᠮᠦᠨ ᠦ᠌ ᠬᠥᠮᠦᠨ ᠰᠢᠭ ᠥᠨᠥᠴᠢᠨ ᠥᠷᠥᠭᠡᠰᠦᠨ ᠠᠮᠢᠲᠠᠨ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠰᠠᠢ᠍ᠢ(ᠰᠠᠶᠢ) ᠭᠦᠢᠴᠡᠳ ᠮᠡᠳᠡᠭᠡᠳ᠂ ᠬᠤᠯᠠᠭᠠᠢ ᠨᠢᠳᠦ ᠪᠡᠷ ᠡᠷᠭᠦᠭᠰᠡᠨ ᠡᠴᠢᠭᠡ ᠶ᠋ᠢᠨ ᠵᠦᠭ ᠬᠠᠷᠠᠪᠠᠰᠤ᠂ ᠵᠠᠮᠪᠠ ᠪᠠᠬᠠᠨ ᠰᠡᠳᠬᠢᠯ ᠵᠣᠪᠠᠭᠰᠠᠨ ᠪᠠᠢᠳᠠᠯᠲᠠᠢ ᠪᠤᠷᠤᠭᠤ ᠬᠠᠷᠠᠵᠤ ᠰᠠᠭᠤᠪᠠ᠃
ᠭᠡᠮ ᠵᠢᠮᠡ ᠦᠭᠡᠢ ᠮᠥᠷᠲᠡᠭᠡᠨ᠂ ᠲᠡᠭᠡᠵᠦ ᠬᠥᠮᠦᠨ ᠦ᠌ ᠲᠣᠭᠠᠨ ᠠ᠋ᠴᠠ ᠬᠠᠰᠤᠭᠳᠠᠭᠰᠠᠨ ᠳ᠋ᠠᠭᠠᠨ ᠰᠢᠷᠴᠢᠨ ᠦ᠌ ᠳᠣᠲᠣᠷᠠ ᠶᠡᠬᠡᠯᠡ ᠪᠤᠬᠢᠨᠢᠳᠤᠨ ᠬᠣᠭᠣᠯᠠᠢ ᠨᠢ ᠵᠠᠩᠭᠢᠷᠠᠭᠠᠳ ᠥᠨᠥᠴᠢᠨ ᠠᠮᠢᠲᠠᠨ ᠤ᠋ ᠬᠣᠭᠣᠯᠠ ᠠᠩᠬᠠ ᠲᠡᠷᠡ ᠦᠳᠡᠰᠢ ᠬᠣᠭᠣᠯᠠᠢ ᠳ᠋ᠤᠨᠢ ᠣᠷᠣᠵᠤ ᠥᠭᠭᠦᠭᠰᠡᠨ ᠦᠭᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠠᠷᠠᠨᠲᠤᠶᠠᠭᠠ᠂ ᠣᠶᠤᠨᠪᠠᠲᠤ᠂ ᠤᠢᠭᠤᠷᠵᠢᠨ·ᠣᠳᠬᠣᠨᠪᠠᠪᠠ᠂
ᠣᠶᠤᠨᠪᠢᠯᠢᠭ᠌᠂ ᠣᠶᠤᠨᠪᠠᠲᠤ᠂ ᠮᠧᠢ ᠬᠤᠸᠠ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠣᠭ᠌ᠶᠤ᠂ ᠣᠶᠤᠨᠪᠠᠲᠤ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ