ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠭᠤᠲᠠᠭᠠᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠨᠠᠢ᠍ᠮᠠ> Хан мунын сүүрс < доорд > – Мөнх зохиоов ᠂ Гутгаар бодь – Нэгдүгээр бүлэг <8>
275 ᠡᠯᠳᠡᠩᠭᠡ ᠵᠤᠳᠪᠠ ᠨᠠᠷ ᠪᠠᠭᠠ ᠦᠳᠡ ᠡᠴᠡ ᠵᠠᠪᠳᠤᠵᠤ ᠬᠣᠰᠢᠭᠤ ᠣᠪᠣᠭᠠᠨ ᠤ᠋ ᠲᠥᠰᠦᠷ ᠪᠠᠭᠤᠵᠤ ᠣᠴᠢᠬᠤ ᠳ᠋ᠤ᠌ ᠰᠢᠷᠠ ᠴᠡᠷᠢᠭ ᠦ᠋ᠨ ᠬᠠᠷᠠᠭᠤᠯ ᠮᠠᠨᠠᠭᠠ ᠬᠣᠰᠢᠭᠤ ᠣᠪᠣᠭᠠᠨ ᠤ᠋ ᠲᠣᠭᠣᠷᠢᠨ ᠳ᠋ᠤ᠌ ᠵᠠᠢ ᠠᠪᠴᠤ ᠵᠣᠭᠰᠣᠭᠰᠠᠨ ᠪᠠᠢᠪᠠ᠃
ᠴᠠᠭᠠᠨ ᠯᠤᠤ ᠵᠢᠯ ᠦ᠋ᠨ ᠵᠤᠨ ᠤ᠋ ᠡᠬᠢᠨ ᠳ᠋ᠦ᠍ ᠬᠠᠷᠠ ᠮᠣᠷᠢ ᠡᠳᠦᠷ ᠢ᠋ ᠰᠣᠩᠭᠣᠵᠤ ᠬᠣᠰᠢᠭᠤ ᠬᠦᠩ ᠦ᠋ᠨ ᠣᠪᠣᠭᠠᠨ ᠤ᠋ ᠴᠢᠭᠤᠯᠭᠠ ᠪᠣᠯᠵᠠᠢ᠃
ᠬᠣᠰᠢᠭᠤ ᠣᠪᠣᠭᠠᠨ ᠤ᠋ ᠲᠠᠬᠢᠯᠭᠠ ᠶ᠋ᠢᠨ ᠡᠳᠦᠷ ᠪᠢᠰᠢ ᠪᠣᠯᠪᠠᠴᠤ ᠵᠦᠭ ᠵᠦᠭ ᠦ᠋ᠨ ᠬᠥᠮᠦᠰ ᠬᠣᠰᠢᠭᠤ ᠣᠪᠣᠭᠠ ᠵᠦᠭ ᠴᠤᠭᠯᠠᠷᠠᠵᠤ ᠪᠠᠢᠪᠠ᠃
ᠵᠢᠷ ᠵᠣᠷ ᠠᠨᠢᠷ ᠴᠢᠮᠡᠭᠡ ᠠᠪᠤᠭᠰᠠᠳ ᠨᠢ ᠡᠯᠳᠡᠪ ᠢ᠋ᠶ᠋ᠡᠷ ᠬᠡᠯᠡᠯᠴᠡᠨᠡ᠃
— ᠣᠪᠣᠭᠠ ᠲᠠᠬᠢᠬᠤ ᠪᠣᠯᠤᠭᠠ ᠦᠭᠡᠢ ᠯᠡ ᠳᠡ᠂ ᠵᠠ᠂ ᠴᠣᠬᠣᠮ ᠶᠠᠭᠤ ᠪᠣᠯᠪᠠ?
— ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ ᠨᠠᠷ ᠢ᠋ ᠴᠠᠭᠠᠵᠠᠯᠠᠬᠤ ᠶᠤᠮ ᠭᠡᠰᠡᠨ ᠳᠡ!
— ᠠ᠂ ᠮᠡᠳᠡᠬᠦ ᠦᠭᠡᠢ᠂ ᠬᠠᠷᠠ ᠴᠡᠷᠢᠭ ᠡᠴᠡ ᠬᠣᠢᠰᠢ ᠰᠢᠷᠠ ᠴᠡᠷᠢᠭ ᠦ᠋ᠳ ᠯᠡ ᠪᠤᠵᠢᠭᠢᠨᠠᠳᠠᠭ ᠪᠣᠯᠵᠠᠢ ᠠ᠋! ᠭᠡᠬᠦ ᠳ᠋ᠦ᠍ ᠶᠠᠮᠤᠨ ᠤ᠋ ᠲᠠᠬᠠᠷ ᠤ᠋ᠨ ᠠᠮᠠ ᠠ᠋ᠴᠠ ᠣᠪᠣᠭᠠᠨ ᠳ᠋ᠤ᠌ ᠴᠢᠭᠤᠯᠬᠤ ᠭᠡᠰᠡᠨ ᠵᠠᠷ ᠴᠢᠮᠡᠭᠡ ᠶ᠋ᠢ ᠯᠡ ᠲᠤᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠴᠣᠬᠣᠮ ᠶᠠᠭᠠᠬᠢᠬᠤ ᠭᠡᠰᠡᠨ ᠢ᠋ ᠮᠡᠳᠡᠳᠡᠭ ᠦᠭᠡᠢ ᠶ᠋ᠢ ᠰᠣᠨᠢᠭᠤᠴᠢᠯᠠᠨ᠄
— ᠰᠢᠷᠠ ᠴᠡᠷᠢᠭ ᠨᠢ ᠰᠦᠷᠡᠬᠡᠢ ᠶᠦᠮ ᠠ᠋! ᠭᠡᠳ ᠬᠥᠮᠦᠰ ᠳᠣᠷᠭᠢᠵᠤ ᠪᠠᠢᠨᠠ ᠳᠠ!
— ᠬᠠᠷᠠ ᠨᠢ ᠴᠦ᠍ ᠪᠣᠯᠤᠭ᠂ ᠰᠢᠷᠠ ᠨᠢ ᠴᠦ᠍ ᠪᠣᠯᠤᠭ ᠪᠦᠷ ᠳᠠᠷᠢ ᠵᠠᠯᠭᠢᠭᠰᠠᠨ ᠭᠠᠷᠯᠢᠭ ᠤ᠋ᠳ! ᠬᠦᠢᠲᠡᠨ ᠲᠡᠮᠦᠷ ᠡᠭᠡᠯᠳᠦᠷᠭᠡᠯᠡᠴᠢᠬᠡᠭᠡᠳ ᠬᠥᠮᠦᠨ ᠠᠮᠢᠲᠠᠨ ᠢ᠋ ᠬᠥᠨᠥᠭᠡᠬᠦ ᠡᠴᠡ ᠴᠠᠭᠠᠰᠢ ᠪᠦᠲᠦᠯᠲᠡᠢ ᠶᠠᠭᠤᠮᠠ ᠭᠡᠵᠦ ᠨᠢᠭᠡ ᠴᠦ᠍ ᠪᠠᠢᠬᠤ ᠦᠭᠡᠢ᠃
— ᠠᠮᠠ ᠪᠠᠨ ᠣᠯᠵᠤ ᠲᠣᠩᠭᠣᠰ ᠴᠢ᠂ ᠴᠠᠭᠠᠳᠤᠭᠤᠯᠠ ᠴᠢᠨᠢ ᠰᠣᠨᠣᠰᠪᠠᠯ ᠭᠠᠢᠲᠤᠨᠠ ᠰᠢᠦ! ᠴᠢ ᠪᠢᠳᠡ!
— ᠫᠦᠱ! ᠨᠣᠬᠠᠢ ᠳᠣᠯᠢᠶᠠᠭ ᠴᠠᠭᠠᠰᠢ! ᠭᠡᠳ ᠵᠠᠷᠢᠮ ᠨᠢ ᠰᠠᠨᠠᠭᠰᠠᠨ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠳᠡᠮᠡᠢ ᠯᠡ ᠠᠮᠠᠨ ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠶᠠᠷᠢᠵᠤ ᠶᠠᠪᠤᠨᠠ᠃
ᠡᠨᠳᠡ ᠲᠡᠨᠳᠡ ᠡᠴᠡ ᠴᠤᠭᠯᠠᠷᠠᠭᠰᠠᠨ ᠬᠥᠮᠦᠰ ᠬᠣᠰᠢᠭᠤ ᠣᠪᠣᠭᠠ ᠪᠠᠨ ᠲᠣᠭᠣᠷᠢᠭᠠᠳ ᠠᠷᠬᠠᠢᠯᠴᠠᠨᠠ᠃ ᠬᠣᠰᠢᠭᠤ ᠲᠤᠰᠠᠯᠠᠭᠴᠢ ᠨᠣᠶᠠᠨ᠂ ᠵᠠᠬᠢᠷᠤᠭᠴᠢ᠂ ᠮᠡᠢᠷᠡᠨ᠂ ᠵᠠᠩᠭᠢ᠂ ᠵᠠᠯᠠᠨ ᠪᠠ ᠶᠠᠮᠤᠨ ᠣᠢᠷᠠᠯᠴᠠᠭᠠ《ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》᠂ ᠬᠦᠩ ᠦ᠋ᠨ ᠰᠦᠮᠡ᠂ ᠵᠢᠷᠭᠠᠯᠲᠤ᠂ ᠰᠤᠪᠤᠷᠭᠠ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠬᠢᠨ ᠦ᠌ ᠭᠡᠭᠡᠲᠡᠨ ᠭᠡᠪᠬᠦᠢ᠂ ᠱᠠᠪᠷᠤᠩ ᠯᠠᠮᠠ᠂ ᠭᠠᠪᠵᠤ ᠯᠠᠮᠠᠬᠠᠢ᠂ ᠤᠮᠵᠠᠳ ᠳᠡᠮᠴᠢ ᠯᠠᠮᠠ ᠨᠠᠷ ᠵᠢᠴᠢ ᠠᠷᠪᠠᠨ ᠬᠣᠶᠠᠷ ᠰᠤᠮᠤᠨ ᠤ᠋ ᠬᠠᠷᠠᠴᠤᠰ ᠡᠳᠦᠢ ᠲᠡᠳᠦᠢ ᠬᠥᠮᠦᠰ ᠴᠤᠭᠯᠠᠷᠠᠵᠤ ᠬᠣᠰᠢᠭᠤ ᠣᠪᠣᠭᠠᠨ ᠤ᠋ ᠲᠣᠭᠣᠷᠢᠨ ᠳ᠋ᠤ᠌ ᠲᠠᠬᠢᠯᠭᠠ ᠰᠢᠲᠦᠯᠭᠡ ᠶ᠋ᠢᠨ ᠴᠢᠭᠤᠯᠭᠠ ᠪᠣᠯᠤᠭᠰᠠᠨ ᠰᠢᠭ᠋ ᠮᠣᠷᠢ ᠤᠨᠤᠭᠠ᠂ ᠬᠠᠰᠠᠭ ᠲᠡᠷᠭᠡ᠂ ᠬᠥᠮᠦᠨ ᠬᠠᠷᠠ ᠪᠠᠷ ᠳᠦᠭᠦᠷᠪᠡ᠃
ᠪᠠᠲᠤ ᠨᠤᠲᠠ ᠴᠢᠯᠠᠭᠤᠨ ᠰᠠᠭᠤᠷᠢ ᠲᠠᠢ ᠥᠨᠳᠥᠷ ᠰᠦᠷᠯᠢᠭ ᠬᠣᠰᠢᠭᠤ ᠣᠪᠣᠭᠠ ᠰᠤᠪᠤᠷᠭᠠᠨ ᠣᠷᠣᠢ ᠳ᠋ᠠᠭᠠᠨ ᠭᠬᠢᠪ ᠵᠠᠩᠭᠢᠶᠠ᠂ ᠬᠠᠳᠠᠭ ᠰᠠᠮᠪᠠᠢ ᠶᠠᠩᠵᠤᠯᠠᠭᠰᠠᠨ ᠪᠤᠷᠭᠠᠰᠤᠨ ᠵᠢᠮᠰᠡᠭ ᠲᠡᠢ᠃ ᠲᠡᠭᠦᠨ ᠦ᠌ ᠪᠡᠨ ᠲᠥᠪ ᠭᠣᠣᠯ ᠳ᠋ᠤ᠌ ᠬᠠᠨ ᠲᠩᠷᠢ ᠶ᠋ᠢ ᠱᠣᠷᠣᠯᠠᠭᠰᠠᠨ᠂ ᠬᠠᠷᠠᠯᠠᠭ ᠬᠥᠬᠥᠯᠲᠦ ᠰᠦᠯᠳᠡ ᠲᠤᠭ ᠨᠢ ᠨᠢᠭᠡ ᠯᠡ ᠲᠦᠩᠰᠦᠭᠡᠷ ᠶᠡᠬᠡᠮᠰᠦᠭ᠃ ᠣᠪᠣᠭᠠᠨ ᠤ᠋ ᠰᠦᠯᠳᠡ ᠶ᠋ᠢᠨ ᠰᠢᠯᠪᠢ ᠡᠴᠡ ᠪᠠᠷᠠᠭᠤᠨ ᠡᠮᠦᠨᠡ᠂ ᠵᠡᠭᠦᠨ ᠡᠮᠦᠨᠡ ᠵᠦᠭ ᠲᠦ᠍ ᠵᠡᠯᠡ ᠴᠢᠨᠳᠠᠮᠤᠨᠢᠯᠠᠨ ᠲᠠᠲᠠᠵᠤ ᠳᠠᠷᠴᠤᠭ ᠬᠡᠢᠰᠬᠡᠭᠰᠡᠨ ᠨᠢ ᠡᠲᠡᠭᠡᠳ ᠭᠣᠶᠣᠮᠰᠣᠭ ᠬᠠᠷᠠᠭᠳᠠᠬᠤ ᠠᠵᠤᠭᠤ᠃
ᠨᠣᠶᠠᠳ ᠶᠠᠮᠪᠠᠲᠠᠳ᠂ ᠯᠠᠮᠠ ᠨᠠᠷ ᠲᠦᠷᠦᠭᠦᠯᠡᠨ ᠬᠣᠰᠢᠭᠤ ᠣᠪᠣᠭᠠᠨ ᠤ᠋ ᠨᠠᠷᠠᠨ ᠲᠠᠯᠠ ᠳ᠋ᠠᠬᠢ ᠲᠠᠬᠢᠯᠭᠠ ᠶ᠋ᠢᠨ ᠲᠠᠯᠪᠢᠭᠤᠷ ᠲᠤ ᠱᠦᠮᠦᠷ ᠲᠠᠯᠪᠢᠵᠤ᠂ ᠠᠷᠢᠬᠢ ᠳᠡᠷᠡᠰᠦᠨ ᠦ᠌ ᠳᠡᠭᠡᠵᠢ ᠪᠡᠨ ᠰᠡᠷᠵᠢᠮᠯᠡᠵᠦ ᠡᠷᠭᠦᠨᠡ᠃
ᠣᠪᠣᠭᠠᠨ ᠤ᠋ ᠡᠮᠦᠨᠡᠬᠢ ᠲᠣᠮᠣ ᠤᠷᠲᠤᠯᠵᠢᠨ ᠠᠭᠠᠷᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠤᠭᠤᠴᠠ ᠰᠢᠭᠦᠰᠦ ᠲᠠᠯᠪᠢᠵᠤ᠂ ᠲᠡᠭᠦᠨ ᠦ᠌ ᠬᠠᠵᠠᠭᠤ ᠪᠠᠷ ᠬᠥᠮᠦᠰ ᠳᠠᠯᠢᠩ ᠭᠠᠨᠵᠤᠭᠠᠨ ᠠ᠋ᠴᠠ ᠪᠠᠨ ᠪᠣᠣᠪᠣ ᠪᠣᠭᠣᠷᠰᠣᠭ᠂ ᠥᠷᠥᠮᠡ ᠲᠣᠰᠣ᠂ ᠰᠢᠬᠢᠷ ᠴᠢᠪᠠᠭᠠ ᠵᠡᠷᠭᠡ ᠡᠷᠭᠦᠨ ᠣᠪᠣᠭᠠᠨ ᠳ᠋ᠠᠭᠠᠨ ᠮᠥᠷᠭᠥᠵᠦ ᠣᠪᠣᠭᠠ ᠪᠠᠨ ᠨᠠᠷᠠᠨ ᠵᠥᠪ ᠡᠷᠭᠢᠵᠡᠭᠡᠨᠡ᠁
ᠰᠢᠷᠠᠩᠭᠤᠢ ᠴᠡᠷᠢᠭ ᠬᠤᠪᠴᠠᠰᠤᠨ ᠳᠡᠭᠡᠷᠡ ᠥᠷᠭᠡᠨ ᠰᠢᠷᠢᠨ ᠪᠦᠰᠡ ᠪᠦᠰᠡᠯᠡᠨ ᠵᠥᠪ ᠪᠤᠷᠤᠭᠤ ᠲᠠᠰᠢᠶᠠᠨ ᠳ᠋ᠠᠭᠠᠨ ᠰᠢᠷᠢᠨ ᠬᠤᠢ ᠲᠠᠢ ᠠᠬᠤᠷ ᠫᠤᠤ ᠮᠤᠬᠢᠭᠠᠷ ᠤᠷᠲᠤ ᠰᠡᠯᠡᠮᠡ ᠶ᠋ᠢ ᠶᠠᠩᠵᠤᠯᠠᠵᠤ ᠵᠡᠭᠦᠭᠰᠡᠨ ᠮᠠᠷᠢᠶᠠᠯᠢᠭ ᠴᠢᠷᠠᠢ᠂ ᠪᠣᠭᠣᠨᠢᠬᠠᠨ ᠪᠡᠶᠡ ᠲᠡᠢ ᠪᠣᠯᠪᠠᠴᠤ ᠶᠡᠬᠡᠳᠡ ᠰᠣᠷᠲᠣᠭᠣ ᠠᠪᠤᠭᠰᠠᠨ ᠵᠢᠪᠬᠤᠭᠠᠯᠢᠭ ᠡᠷᠡ᠂ ᠡᠯᠳᠡᠩᠭᠡ᠂ ᠵᠤᠳᠪᠠ᠂ ᠸᠴᠢᠷᠪᠠᠲᠤ ᠨᠠᠷ ᠲᠠᠢ ᠪᠠᠢᠨ ᠪᠠᠢᠨ ᠲᠣᠯᠣᠭᠠᠢ ᠳᠣᠬᠢᠨ ᠨᠢᠭᠡ ᠶᠠᠭᠤᠮᠠ ᠶᠠᠷᠢᠬᠤ ᠠᠪᠠᠴᠤ ᠨᠠᠭᠠᠰᠢ ᠴᠠᠭᠠᠰᠢ ᠰᠡᠷᠲᠡᠭᠡᠨᠡᠬᠦ ᠨᠢ ᠶᠠᠭᠤᠮᠠᠨ ᠳ᠋ᠤ᠌ ᠪᠣᠯᠭᠣᠮᠵᠢᠲᠠᠢ ᠪᠠᠢᠬᠤ ᠶ᠋ᠢᠨ ᠲᠡᠮᠳᠡᠭ᠃ ᠡᠨᠡ ᠬᠥᠮᠦᠨ ᠪᠣᠯ ᠰᠢᠷᠠ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠠᠭᠸᠠᠩ ᠠᠵᠢ᠃
— ᠥᠨᠥᠳᠥᠷ ᠥᠯᠵᠡᠢᠲᠦ ᠡᠳᠦᠷ᠃ ᠴᠠᠭᠠᠨ ᠯᠤᠤ ᠵᠢᠯ ᠦ᠋ᠨ ᠵᠠᠰᠠᠭ ᠲᠠᠮᠠᠭᠠ ᠶ᠋ᠢᠨ ᠬᠠᠳᠠᠭ ᠰᠡᠬᠦᠶᠡ! ᠭᠡᠵᠦ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠣᠯᠠᠨᠠ ᠲᠤᠩᠬᠠᠯᠠᠭᠰᠠᠨ ᠳ᠋ᠤ᠌ ᠰᠢᠷᠠ ᠴᠡᠷᠢᠭ ᠦ᠋ᠨ ᠠᠭᠸᠠᠩ ᠨᠣᠶᠠᠨ ᠥᠨᠳᠥᠷ ᠳᠡᠭᠡᠷᠡ ᠭᠠᠷᠴᠤ᠄
— ᠡᠷᠭᠢᠨ ᠨᠣᠶᠠᠳ ᠲᠦᠰᠢᠮᠡᠳ ᠪᠠ ᠲᠠ ᠪᠦᠭᠦᠳᠡ ᠶ᠋ᠢᠨ ᠠᠮᠤᠷ ᠢ᠋ ᠠᠢᠯᠠᠳᠬᠠᠶᠠ! ᠭᠡᠵᠦ ᠲᠣᠯᠣᠭᠠᠢ ᠪᠠᠨ ᠶᠠᠯᠢ ᠦᠭᠡᠢ ᠮᠡᠬᠦᠯᠵᠡᠬᠦ ᠳ᠋ᠦ᠍ ᠬᠠᠵᠠᠭᠤ ᠠ᠋ᠴᠠ ᠨᠢ ᠬᠠᠪᠴᠢᠭ ᠪᠦᠷᠬᠦ ᠶ᠋ᠢ ᠬᠠᠵᠠᠭᠠᠢ ᠲᠠᠯᠪᠢᠭᠰᠠᠨ ᠬᠠᠲᠠᠩᠭᠢᠷ ᠰᠢᠷᠠ ᠬᠥᠮᠦᠨ ᠪᠦᠷᠬᠦ ᠪᠡᠨ ᠠᠪᠴᠤ ᠮᠡᠬᠦᠢᠨ ᠶᠣᠰᠣᠯᠠᠭᠠᠳ ᠠᠭᠸᠠᠩ ᠨᠣᠶᠠᠨ ᠤ᠋ ᠬᠡᠯᠡᠭᠰᠡᠨ ᠢ᠋ ᠭᠣᠳ ᠰᠢᠩᠭᠡᠨ ᠠᠪᠢᠶᠠ ᠪᠠᠷ ᠬᠡᠯᠡᠮᠦᠷᠴᠢᠯᠡᠭᠰᠡᠨ ᠨᠢ ᠬᠥᠮᠦᠰ ᠲᠦ᠍ ᠶᠣᠣᠵᠠ ᠮᠠᠭᠤᠲᠠᠢ ᠬᠠᠷᠠᠭᠳᠠᠪᠠ᠃ ᠡᠨᠡ ᠬᠥᠮᠦᠨ ᠨᠢ ᠥᠯᠵᠡᠢᠰᠠᠩ ᠪᠠᠢᠪᠠ᠃
— ᠡᠨᠡ ᠶᠣᠰᠣᠲᠠᠢ ᠱᠣᠯᠢ ᠦᠭᠡᠢ ᠠᠮᠢᠲᠠᠨ! ᠡᠯᠵᠢᠭᠡ ᠴᠦ᠍ ᠪᠢᠰᠢ᠂ ᠮᠣᠷᠢ ᠴᠤ᠌ ᠪᠢᠰᠢ᠂ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠶ᠋ᠢᠨ ᠯᠠᠭᠤᠰᠠ ᠰᠢᠤᠬᠠᠨ ᠶᠤᠮ ᠠ᠋᠃ ᠵᠠ᠂ ᠲᠡᠭᠡᠭᠡᠳ ᠳᠠᠭᠤᠨ ᠤ᠋ ᠬᠢᠨᠢ ᠮᠠᠭᠤᠬᠠᠢ ᠭᠡᠵᠢ ᠠ᠋! ᠭᠡᠵᠦ ᠵᠤᠳᠪᠠ ᠮᠡᠢᠷᠡᠨ ᠲᠣᠯᠣᠭᠠᠢ ᠰᠠᠵᠢᠯᠠᠨ ᠡᠯᠳᠡᠩᠭᠡ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍ ᠰᠢᠪᠡᠨᠡᠪᠡᠯ ᠡᠯᠳᠡᠩᠭᠡ ᠬᠡᠩ ᠭᠡᠵᠦ ᠦᠯᠦ ᠲᠣᠭᠣᠨ ᠢᠨᠢᠶᠡᠬᠦ ᠳᠦᠷᠢ ᠦᠵᠡᠭᠦᠯᠦᠨ ᠮᠣᠭᠠᠢ ᠬᠣᠷᠣᠨ ᠳ᠋ᠠᠭᠠᠨ ᠰᠢᠷᠠᠯᠠᠬᠤ ᠪᠣᠢ! ᠭᠡᠪᠡ᠃
— ᠥᠨᠥᠳᠥᠷ ᠦ᠋ᠨ ᠵᠠᠰᠠᠭ ᠲᠠᠮᠠᠭᠠ ᠶ᠋ᠢᠨ ᠬᠠᠳᠠᠭ ᠰᠢᠭᠦᠬᠦ ᠴᠤᠭᠯᠠᠭᠠᠨ ᠤ᠋ ᠲᠠᠰᠢᠷᠠᠮ ᠬᠣᠶᠠᠷ ᠤᠴᠢᠷ ᠢ᠋ ᠣᠯᠠᠨᠠ ᠵᠠᠷᠯᠠᠶᠠ᠄
ᠨᠢᠭᠡ ᠳ᠋ᠦ᠍᠂ ᠲᠠᠢᠵᠢ ᠢᠵᠠᠭᠤᠷᠲᠤ ᠯᠣᠪᠰᠠᠩᠰᠠᠩᠵᠡᠢ ᠶ᠋ᠢᠨ ᠠᠭᠡ ᠠᠮᠤᠷᠰᠠᠨᠠᠭᠠ ᠶ᠋ᠢ ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠦᠩ ᠨᠣᠶᠠᠨ ᠢ᠋ᠶ᠋ᠠᠷ ᠡᠷᠭᠦᠮᠵᠢᠯᠡᠶᠡ! ᠭᠡᠳ ᠠᠭᠸᠠᠩ ᠨᠣᠶᠠᠨ ᠠᠮᠤᠷᠰᠠᠨᠠᠭᠠ ᠳ᠋ᠤ᠌ ᠪᠠᠳᠮᠠᠷᠠᠭᠠ ᠵᠢᠩᠰᠡ ᠲᠡᠢ ᠣᠲᠣᠭᠠᠲᠤ ᠮᠠᠯᠠᠭᠠᠢ ᠵᠡᠭᠦᠯᠭᠡᠭᠰᠡᠨ ᠳ᠋ᠦ᠍ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠵᠤᠳᠪᠠ ᠮᠡᠢᠷᠡᠨ ᠬᠣᠶᠠᠷ ᠪᠠᠷᠰ ᠤ᠋ᠨ ᠲᠣᠯᠣᠭᠠᠢ ᠶ᠋ᠢᠨ ᠬᠡ ᠲᠡᠢ ᠰᠢᠯ ᠨᠢᠭᠤᠷ ᠲᠠᠢ ᠰᠢᠷᠠ ᠠᠭᠠᠷᠤᠨ ᠵᠢᠵᠢᠭ ᠬᠣᠷᠭᠣ ᠠ᠋ᠴᠠ ᠴᠣᠯ ᠮᠥᠩᠭᠥᠨ ᠵᠠᠰᠠᠭ ᠲᠠᠮᠠᠭᠠ ᠶ᠋ᠢ ᠨᠢᠮᠪᠠᠢᠯᠠᠨ ᠭᠠᠷᠭᠠᠵᠤ ᠬᠠᠳᠠᠭ ᠲᠡᠳᠡᠨ ᠡᠷᠭᠦᠪᠡ᠃
ᠰᠢᠨᠡ ᠬᠦᠩ ᠨᠣᠶᠠᠨ ᠠᠮᠤᠷᠰᠠᠨᠠᠭᠠ ᠪᠠᠳᠮᠠᠷᠠᠭᠠ ᠵᠢᠩᠰᠡ ᠵᠡᠭᠦᠵᠦ᠂ ᠰᠢᠷᠠ ᠬᠣᠷᠭᠣᠢ ᠲᠡᠷᠯᠢᠭ ᠳᠡᠭᠡᠷᠡ ᠪᠣᠷᠣ ᠲᠣᠷᠭᠠᠨ ᠬᠠᠨᠵᠢᠶᠠᠷ ᠴᠢᠮᠡᠭᠯᠡᠵᠦ ᠵᠠᠰᠠᠭᠰᠠᠨ ᠢ᠋ᠶ᠋ᠠᠷ ᠨᠢᠭᠡ ᠯᠡ ᠰᠦᠷ ᠨᠠᠮᠪᠠᠭᠠ ᠲᠠᠢ ᠬᠠᠷᠠᠭᠳᠠᠵᠤ᠂ ᠴᠢᠷᠠᠢ ᠳ᠋ᠤᠨᠢ ᠦᠯᠦ ᠮᠡᠳᠡᠭ ᠪᠠᠶᠠᠰᠤᠯ ᠣᠮᠤᠷᠬᠠᠯ ᠲᠣᠳᠣᠷᠠᠨᠠ᠃ ᠲᠡᠷᠡ ᠪᠡᠷ ᠶᠢᠰᠦᠨ ᠵᠢᠩ ᠬᠦᠨᠳᠦ ᠪᠠᠷᠰ ᠤ᠋ᠨ ᠪᠠᠷᠢᠭᠤᠯᠲᠤ ᠴᠣᠯ ᠮᠥᠩᠭᠥᠨ ᠵᠠᠰᠠᠭ ᠲᠠᠮᠠᠭᠠ ᠶ᠋ᠢ ᠲᠣᠰᠴᠤ ᠠᠪᠬᠤ ᠳ᠋ᠤ᠌ ᠭᠠᠷ ᠨᠢ ᠴᠡᠴᠡᠷᠡᠵᠦ ᠠᠢᠳᠠᠰ ᠬᠦᠷᠬᠦ ᠰᠢᠭ ᠪᠣᠯᠪᠠ᠃
ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠶ᠋ᠢᠨ ᠴᠠᠭᠠᠨᠠ ᠪᠠᠨ ᠲᠣᠭᠰᠢᠨ ᠪᠠᠭᠯᠠᠭᠰᠠᠨ ᠨᠣᠮᠣᠬᠠᠨ ᠬᠠᠷᠠᠴᠠ ᠲᠠᠢ ᠨᠢᠳᠦ ᠨᠢ ᠠᠮᠤᠷᠰᠠᠨᠠᠭᠠ ᠬᠦᠩ ᠨᠣᠶᠠᠨ ᠤ᠋ ᠬᠠᠷᠠᠴᠠ ᠲᠠᠢ ᠮᠥᠷᠭᠥᠬᠦ ᠳ᠋ᠦ᠍ ᠲᠡᠷᠡ ᠤᠯᠠᠮ ᠰᠦᠷᠳᠡᠵᠦ《ᠬᠠᠰᠢᠷ ᠲᠤᠰᠠᠯᠠᠭᠴᠢ ᠮᠢᠨᠢ ᠠ᠋! ᠲᠠᠨ ᠤ᠋ ᠰᠣᠳᠣᠨ ᠤᠬᠠᠭᠠᠨ ᠲᠠᠢ ᠶᠡᠬᠡ ᠭᠠᠪᠢᠶᠠᠨ ᠳ᠋ᠤ᠌ ᠪᠢ ᠮᠥᠩᠬᠡᠲᠡ ᠲᠠᠯᠠᠷᠬᠠᠨᠠ᠁ ᠮᠠᠷᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠠ᠋! ᠪᠢ ᠲᠠᠨ ᠢ᠋ ᠪᠡᠨ! ᠲᠡᠭᠡᠬᠦ ᠳ᠋ᠦ᠍ ᠡᠨᠡ ᠶᠢᠰᠦᠨ ᠵᠢᠩ ᠬᠦᠨᠳᠦ ᠵᠠᠰᠠᠭ ᠲᠠᠮᠠᠭᠠ ᠨᠠᠳᠠ ᠳ᠋ᠠᠭᠠᠨ ᠶᠡᠷᠡᠨ ᠵᠢᠩ᠂ ᠶᠢᠰᠦᠨ ᠵᠠᠭᠤᠨ ᠵᠢᠩ᠁ ᠬᠦᠨᠳᠦ ᠪᠠᠢᠨᠠ᠂ ᠲᠣᠭᠰᠢᠨ ᠪᠠᠷᠰ ᠣᠴᠣᠢᠭᠰᠠᠨ ᠲᠠᠮᠠᠭᠠ ᠶ᠋ᠢᠨ ᠪᠠᠷᠢᠭᠤᠯ ᠠ᠋ᠴᠠ ᠪᠠᠷᠢᠵᠤ ᠶᠠᠳᠠᠨ ᠰᠦᠷᠳᠡᠵᠦ ᠪᠠᠢᠨᠠ᠁ ᠬᠠᠰᠢᠷ ᠲᠤᠰᠠᠯᠠᠭᠴᠢ ᠭᠤᠸᠠᠢ ᠲᠠ ᠢᠯᠡᠭᠦᠬᠡᠨ ᠳᠣᠳᠣᠮᠳᠠᠵᠤ ᠪᠠᠢᠭᠠᠷᠠᠢ! ᠪᠢ ᠴᠢᠨᠢ᠁》 ᠭᠡᠵᠦ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠬᠡᠯᠡᠭᠰᠡᠨ ᠢ᠋ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠨᠡᠪᠲᠡ ᠣᠢᠯᠠᠭᠠᠵᠤ《ᠡᠪᠦᠭᠡᠨ ᠪᠢ ᠪᠠᠢᠭᠰᠠᠨ ᠴᠠᠭ ᠲᠤ ᠬᠦᠩ ᠨᠣᠶᠠᠨ ᠭᠤᠸᠠᠢ ᠠᠶᠤᠵᠤ ᠰᠦᠷᠳᠡᠬᠦ ᠶᠠᠭᠤᠮᠠ ᠠᠯᠠᠭᠠ! ᠰᠠᠨᠠᠭᠠ ᠠᠮᠤᠷ ᠪᠠᠢ!》 ᠭᠡᠳ ᠠᠮᠤᠷᠰᠠᠨᠠᠭᠠ ᠬᠦᠩ ᠨᠣᠶᠠᠨ ᠤ᠋ ᠵᠠᠰᠠᠭ ᠲᠠᠮᠠᠭᠠ ᠲᠡᠪᠡᠷᠢᠭᠰᠡᠨ ᠭᠠᠷ ᠢ᠋ ᠬᠥᠨᠳᠡᠢᠬᠡᠨ ᠳᠠᠪᠰᠢᠭᠰᠠᠨ ᠳ᠋ᠤ᠌᠂ ᠠᠮᠤᠷᠰᠠᠨᠠᠭᠠ ᠬᠦᠩ ᠨᠣᠶᠠᠨ ᠤ᠋ ᠳᠣᠲᠣᠷᠠ ᠪᠠᠬᠠᠨ ᠠᠭᠤᠵᠢᠷᠠᠪᠠ᠃
ᠬᠥᠮᠦᠰ ᠴᠢᠬᠢ ᠴᠢᠬᠢᠨ ᠳ᠋ᠡᠭᠡᠨ ᠡᠢᠨ ᠰᠢᠪᠡᠨᠡᠯᠳᠦᠨᠡ᠃
— ᠰᠢᠷᠠ ᠴᠡᠷᠢᠭ ᠨᠢ ᠬᠠᠷᠢᠨ ᠬᠠᠷᠠ ᠴᠡᠷᠢᠭ ᠡᠴᠡ ᠬᠠᠪᠢ ᠦᠭᠡᠢ ᠳᠡᠭᠡᠷᠡ ᠶᠦᠮ ᠴᠢᠷᠠᠢ⁈ ᠡᠳᠡᠨ ᠦ᠌ ᠥᠮᠥᠭ ᠲᠦ᠍ ᠶᠠᠭᠤ ᠴᠦ᠍ ᠭᠡᠰᠡᠨ ᠤᠷᠠᠳ ᠶᠠᠰᠤᠲᠠᠨ ᠤ᠋ ᠳᠣᠲᠣᠷᠠ ᠠ᠋ᠴᠠ ᠵᠠᠰᠠᠭ ᠪᠠᠷᠢᠬᠤ ᠬᠦᠩ ᠨᠣᠶᠠᠨ ᠲᠠᠢ ᠪᠣᠯᠤᠯᠠ᠁
— ᠰᠢᠷᠠ ᠴᠡᠷᠢᠭ ᠢ᠋ ᠰᠠᠢᠨ ᠭᠡᠬᠦ ᠡᠴᠡ ᠤᠳᠠᠬᠤ ᠦᠭᠡᠢ ᠭᠠᠤᠯᠢ ᠨᠢ ᠪᠤᠯᠲᠠᠢᠬᠤ ᠦᠭᠡᠢ ᠴᠦ᠍ ᠪᠣᠯ ᠶᠠᠭᠠᠬᠢᠬᠤ ᠪᠣᠢ!
— ᠬᠡᠨ ᠮᠡᠳᠡᠨᠡ⁈
— ᠬᠡᠩ! ᠬᠠᠷᠠ ᠴᠡᠷᠢᠭ᠂ ᠰᠢᠷᠠ ᠴᠡᠷᠢᠭ ᠦ᠋ᠨ ᠠᠯᠢᠨ ᠨᠢ ᠴᠦ᠍ ᠣᠯᠬᠢᠶᠠ ᠲᠠᠢ ᠶᠠᠭᠤᠮᠠ ᠪᠢᠰᠢ᠂ ᠭᠠᠢᠯᠢ ᠭᠤᠪᠴᠢᠭᠤᠷ᠂ ᠳᠡᠭᠡᠷᠡᠮ ᠲᠤᠨᠤᠭᠠ ᠪᠡᠯᠴᠢᠭᠡᠷ ᠨᠤᠲᠤᠭ᠁ ᠠᠢ ᠳᠠ! ᠭᠡᠵᠦ ᠬᠡᠯᠡᠯᠴᠡᠬᠦ ᠳ᠋ᠦ᠍ ᠪᠠᠰᠠ ᠵᠠᠷᠢᠮ ᠨᠢ᠄
— ᠡᠨᠡ ᠴᠦ᠍ ᠪᠠᠰᠠ ᠯᠠ ᠰᠢᠷᠠᠪᠳᠤᠷᠵᠢ ᠠ᠋ᠴᠠ ᠴᠠᠭᠠᠰᠢ ᠦᠭᠡᠢ ᠮᠠᠨᠠᠭᠤᠯ ᠬᠦᠩ ᠨᠣᠶᠠᠨ ᠶᠠᠳᠠᠬᠤ ᠦᠭᠡᠢ ᠠ᠋! ᠲᠡᠷᠡ ᠴᠢᠷᠠᠢ ᠶ᠋ᠢ ᠨᠢ ᠬᠠᠷᠠᠪᠠᠯ᠁
— ᠵᠠ᠂ ᠶᠠᠭᠠᠬᠢᠬᠤ ᠪᠣᠢ! ᠬᠠᠮᠢᠭᠠ ᠭᠠᠵᠠᠷ ᠤ᠋ᠨ ᠨᠢᠭᠡ ᠮᠠᠭᠤ ᠪᠡᠯᠪᠡᠰᠦᠨ ᠡᠮᠡ ᠪᠡᠷ ᠵᠠᠰᠠᠭ ᠪᠠᠷᠢᠭᠤᠯᠤᠭᠰᠠᠨ ᠠ᠋ᠴᠠ ᠳᠡᠭᠡᠷᠡ ᠪᠠᠢᠯᠭᠦᠢ!
— ᠲᠡᠷᠡ ᠴᠦ᠍ ᠲᠡᠢᠮᠦ ᠠ᠋! ᠲᠡᠭᠡᠪᠡᠴᠦ ᠮᠥᠨ ᠯᠡ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠶ᠋ᠢᠨ ᠠᠯᠠᠭᠠ ᠶ᠋ᠢᠨ ᠵᠢᠷᠤᠭ ᠠ᠋ᠴᠠ ᠴᠠᠭᠠᠰᠢ ᠲᠣᠭᠯᠠᠭᠠᠳ ᠬᠠᠮᠢᠭᠠ ᠬᠦᠷᠴᠢᠬᠡᠨᠡ ᠪᠣᠢ? ᠪᠠᠷᠤᠭ ᠤ᠋ᠨ ᠡᠷᠡ ᠲᠡᠭᠦᠨ ᠦ᠌ ᠴᠠᠭᠠᠲᠠᠢ ᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠠ᠋! ᠭᠡᠵᠡᠭᠡᠬᠦ ᠶᠦᠮ᠃
ᠠᠭᠸᠠᠩ ᠨᠣᠶᠠᠨ ᠵᠠᠯᠭᠠᠵᠤ᠄
— ᠲᠡᠭᠦᠨ ᠦ᠌ ᠳᠠᠷᠠᠭᠠ ᠳ᠋ᠤᠨᠢ ᠮᠢᠩᠭᠠᠨᠪᠤᠤ ᠱᠠᠭᠳᠠᠷᠰᠦ᠋ᠷᠦᠩ ᠵᠡᠷᠭᠡ ᠶᠠᠯᠠᠲᠠᠨ ᠢ᠋ ᠴᠠᠭᠠᠵᠠ ᠪᠠᠷ ᠶᠠᠯᠠᠯᠠᠵᠤ᠂ ᠬᠦᠷᠳᠦ ᠵᠡᠭᠦᠯᠭᠡᠨ ᠠᠯᠤᠰ ᠨᠤᠲᠤᠭ ᠰᠢᠯᠢ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠭᠤᠷᠪᠠᠨ ᠵᠢᠯ ᠦ᠋ᠨ ᠬᠤᠭᠤᠴᠠᠭᠠ ᠪᠠᠷ ᠴᠥᠯᠡᠨᠡ ᠭᠡᠰᠡᠨ ᠳ᠋ᠦ᠍ ᠴᠠᠭᠠᠨᠠ ᠠ᠋ᠴᠠ ᠬᠦᠵᠦᠭᠦᠨ ᠳ᠋ᠡᠭᠡᠨ ᠲᠥᠭᠡ ᠵᠤᠵᠠᠭᠠᠨ᠂ ᠠᠯᠠᠳᠠ ᠬᠢᠷᠢᠲᠡᠢ ᠤᠷᠲᠤ ᠬᠠᠢᠯᠠᠰᠤᠨ ᠬᠦᠷᠳᠦ ᠵᠡᠭᠦᠭᠰᠡᠨ ᠮᠢᠩᠭᠠᠨᠪᠤᠤ ᠲᠦᠷᠤᠭᠦᠲᠠᠢ ᠬᠡᠳᠦᠨ ᠶᠠᠯᠠᠲᠠᠨ ᠶᠠᠮᠤᠨ ᠤ᠋ ᠴᠡᠷᠢᠭ ᠲᠦ᠍ ᠲᠠᠭᠤᠭᠳᠠᠵᠤ ᠨᠦᠰᠡᠷ ᠠᠯᠬᠤᠭᠠ ᠪᠠᠷ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ ᠬᠥᠮᠦᠰ ᠬᠠᠷᠢᠨ ᠰᠦᠷᠳᠡᠨ ᠠᠶᠤᠭᠰᠠᠨ ᠶᠤᠮ ᠰᠢᠭ᠋ ᠬᠣᠶᠠᠷ ᠲᠠᠢᠰᠢ ᠬᠠᠭᠠᠷᠠᠨ ᠮᠢᠩᠭᠠᠨᠪᠤᠤ ᠳ᠋ᠤ᠌ ᠵᠠᠮ ᠲᠠᠯᠪᠢᠵᠤ ᠥᠭᠭᠦᠨᠡ᠃
ᠮᠢᠩᠭᠠᠨᠪᠤᠤ ᠵᠡᠷᠭᠡ ᠬᠡᠳᠦᠨ ᠶᠠᠯᠠᠲᠠᠨ ᠢ᠋ ᠬᠡᠷᠬᠡᠮ ᠨᠣᠶᠠᠨᠲᠠᠳ ᠤ᠋ᠨ ᠥᠭᠡᠳᠡ ᠬᠠᠨᠳᠤᠭᠤᠯᠤᠨ ᠵᠣᠭᠰᠣᠭᠠᠭᠰᠠᠨ ᠳ᠋ᠤ᠌ ᠵᠤᠳᠪᠠ ᠮᠡᠢᠷᠡᠨ ᠮᠢᠩᠭᠠᠨᠪᠤᠤ ᠶ᠋ᠢᠨ ᠶᠠᠯᠠ ᠶ᠋ᠢ ᠲᠣᠭᠠᠴᠢᠪᠠ᠃
ᠮᠢᠩᠭᠠᠨᠪᠤᠤ ᠡᠷᠡ ᠬᠦᠢᠰᠦ ᠲᠡᠢ᠂ ᠤᠷᠠᠳ ᠤ᠋ᠨ ᠬᠠᠷᠭᠤᠳ ᠰᠤᠮᠤᠨ ᠤ᠋ ᠲᠠᠢᠵᠢ ᠢᠵᠠᠭᠤᠷᠲᠤ᠃ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠠᠭᠠᠷᠤᠲᠠᠢ ᠡᠩᠭᠡᠷ ᠦ᠋ᠨ ᠤᠯᠠᠯᠵᠢ ᠶ᠋ᠢᠨ ᠬᠥᠮᠦᠨ᠃ ᠤᠤᠯ ᠤ᠋ᠨ ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ᠃ ᠲᠡᠷᠡ ᠪᠡᠷ ᠲᠤᠰᠠᠯᠠᠭᠴᠢ ᠪᠠᠢᠬᠤ ᠳ᠋ᠠᠭᠠᠨ ᠵᠢᠯᠢᠢᠭᠴᠢ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠢ᠋ ᠤᠬᠠᠭᠠᠯᠠᠵᠤ ᠬᠦᠩ ᠨᠣᠶᠠᠨ ᠪᠣᠯᠤᠨ ᠵᠡᠭᠦᠨ ᠲᠤᠰᠠᠯᠠᠭᠴᠢ ᠡᠯᠳᠡᠩᠭᠡ ᠶ᠋ᠢᠨ ᠬᠣᠭᠣᠷᠣᠨᠳᠣ ᠵᠠᠪᠰᠠᠷᠳᠠᠭᠤᠯᠤᠨ ᠬᠣᠰᠢᠭᠤ ᠬᠦᠩ ᠦ᠋ᠨ ᠳᠣᠲᠣᠷᠠ ᠵᠠᠭᠤᠷᠠ ᠶ᠋ᠢᠨ ᠵᠠᠳᠠᠷᠠᠯ ᠡᠭᠦᠰᠬᠡᠭᠰᠡᠨ ᠭᠣᠣᠯ ᠶᠠᠯᠠᠲᠠᠨ᠁ ᠮᠢᠩᠭᠠᠨᠪᠤᠤ ᠪᠠᠰᠠ ᠵᠡᠭᠦᠨ ᠲᠤᠰᠠᠯᠠᠭᠴᠢ ᠡᠯᠳᠡᠩᠭᠡ ᠶ᠋ᠢᠨ ᠡᠳ᠋ ᠬᠥᠷᠥᠩᠭᠡ ᠶ᠋ᠢ ᠬᠤᠷᠢᠶᠠᠵᠤ᠂ ᠭᠣᠯᠣᠮᠲᠠ ᠶ᠋ᠢ ᠨᠢ ᠭᠠᠯᠳᠠᠵᠤ᠂ ᠠᠢᠯ ᠡᠷᠦᠬᠡ ᠶ᠋ᠢ ᠪᠤᠰᠠᠨᠢᠭᠤᠯᠤᠭᠰᠠᠨ ᠶᠠᠯᠠ ᠲᠠᠢ᠃ ᠲᠡᠷᠡᠴᠢᠯᠡᠨ ᠪᠠᠰᠠ ᠪᠤᠭᠤᠲᠤ ᠶ᠋ᠢᠨ ᠠᠲᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠲᠣᠪᠴᠢᠶᠠ ᠶ᠋ᠢᠨ ᠬᠠᠷᠠ ᠴᠡᠷᠢᠭ ᠢ᠋ ᠬᠥᠳᠡᠯᠭᠡᠵᠦ ᠬᠦᠩ ᠦ᠋ᠨ ᠰᠦᠮᠡ ᠶ᠋ᠢᠨ ᠬᠤᠪᠢᠯᠭᠠᠨ ᠳ᠋ᠠᠨᠳᠠᠨ ᠳᠠ ᠯᠠᠮᠠ ᠶ᠋ᠢ ᠠᠯᠠᠭᠰᠠ ᠵᠡᠷᠭᠡ ᠠᠭᠤᠴᠢᠯᠠᠰᠢ ᠦᠭᠡᠢ ᠬᠦᠨᠳᠦ ᠶᠠᠯᠠ ᠲᠠᠢ ᠲᠤᠯᠠᠳᠠ ᠴᠠᠭᠠᠵᠠ ᠪᠠᠷ ᠰᠢᠢᠳᠬᠡᠵᠦ ᠬᠦᠷᠳᠦ ᠵᠡᠭᠦᠯᠭᠡᠨ ᠭᠤᠷᠪᠠᠨ ᠵᠢᠯ ᠢ᠋ᠶ᠋ᠡᠷ ᠠᠯᠤᠰ ᠨᠤᠲᠤᠭ ᠰᠢᠯᠢ ᠭᠣᠣᠯ ᠳ᠋ᠤ᠌ ᠴᠥᠯᠡᠯᠭᠡᠨ ᠳ᠋ᠦ᠍ ᠶᠠᠪᠤᠭᠤᠯᠬᠤ ᠪᠠᠷ ᠶᠠᠯᠠ ᠣᠨᠣᠭᠠᠪᠠ᠃
ᠦᠢ ᠣᠯᠠᠨ ᠤ᠋ ᠡᠮᠦᠨᠡ《ᠶᠠᠯᠠ ᠬᠢᠯᠢᠨᠴᠡ》 ᠪᠡᠨ ᠳᠠᠭᠤᠳᠠᠭᠤᠯᠤᠭᠰᠠᠨ ᠮᠢᠩᠭᠠᠨᠪᠤᠤ ᠶ᠋ᠢᠨ ᠳᠣᠲᠣᠷᠠ ᠭᠠᠯ ᠰᠢᠲᠠᠵᠤ ᠠᠭᠰᠤᠷᠤᠨ᠄
— ᠬᠢᠯᠢᠰ! ᠡᠨᠡ ᠪᠦᠷ ᠬᠢᠯᠢᠰ ᠠ᠋! ᠭᠡᠵᠦ ᠳᠡᠪᠬᠡᠴᠡᠨ ᠬᠠᠰᠬᠢᠷᠬᠤ ᠳ᠋ᠠᠭᠠᠨ ᠡᠯᠳᠡᠩᠭᠡ ᠶ᠋ᠢ ᠵᠠᠨᠤᠯᠲᠠᠢ ᠬᠠᠷᠠᠵᠤ《ᠰᠢᠷᠠ ᠴᠡᠷᠢᠭ ᠦ᠋ᠨ ᠨᠥᠮᠥᠷᠢ ᠳ᠋ᠦ᠍ ᠡᠷᠳᠦᠵᠦ ᠬᠥᠮᠦᠨ ᠦ᠌ ᠭᠠᠷ ᠢ᠋ᠶ᠋ᠠᠷ ᠮᠣᠭᠠᠢ ᠪᠠᠷᠢᠵᠤ ᠬᠥᠮᠦᠨ ᠢ᠋ ᠴᠢᠰᠤ ᠦᠭᠡᠢ ᠠᠯᠠᠳᠠᠭ ᠳᠠᠮᠰᠢᠭ ᠶᠤᠮ ᠠ᠋ ᠴᠢ!》 ᠭᠡᠵᠦ ᠰᠢᠨᠡ ᠪᠡᠨ ᠵᠠᠭᠤᠵᠤ ᠬᠡᠯᠡᠭᠰᠡᠨ ᠳ᠋ᠦ᠍ ᠡᠯᠳᠡᠩᠭᠡ ᠶ᠋ᠢᠨ ᠳᠣᠲᠣᠷᠠ ᠨᠢ ᠪᠤᠴᠠᠯᠬᠤ ᠠᠪᠠᠴᠤ ᠦᠭᠡ ᠳᠤᠤᠷᠭᠠᠷᠤᠭᠰᠠᠨ ᠦᠭᠡᠢ᠃ ᠬᠦᠷᠡᠩ ᠪᠣᠷᠣ ᠴᠢᠷᠠᠢ ᠨᠢ ᠣᠯᠣᠭᠠᠢᠳᠤᠨ ᠴᠢᠨᠦᠷᠡᠬᠦ ᠳ᠋ᠡᠭᠡᠨ ᠬᠡᠰᠡᠭ ᠴᠠᠢᠷᠠᠨ ᠬᠡᠰᠡᠭ ᠪᠣᠷᠣᠯᠠᠨᠠ᠃《ᠰᠢᠷᠠ ᠴᠡᠷᠢᠭ ᠦ᠋ᠨ ᠬᠠᠷᠭᠢᠰᠯᠠᠯ ᠢ᠋ᠶ᠋ᠠᠷ ᠪᠣᠯ ᠮᠢᠩᠭᠠᠨᠪᠤᠤ ᠴᠢᠮᠠᠶ᠋ᠢ ᠡᠨᠳᠡ ᠳᠡᠮᠡᠢ ᠬᠠᠰᠬᠢᠷᠬᠤ ᠲᠡᠩᠬᠡ ᠦᠭᠡᠢ ᠴᠢᠰᠤᠯᠠᠵᠤ ᠬᠠᠶᠠᠬᠤ ᠪᠠᠢᠭᠰᠠᠨ ᠶᠤᠮ᠁ ᠬᠡᠩ! ᠬᠥᠮᠦᠨ ᠦ᠌ ᠰᠠᠢᠨ ᠢ᠋ ᠮᠡᠳᠡᠬᠦ ᠦᠭᠡᠢ! ᠴᠢ ᠵᠢᠩᠬᠢᠨᠢ ᠡᠷᠡ ᠬᠥᠮᠦᠨ ᠪᠣᠯ ᠴᠦᠯᠡᠯᠭᠡ ᠶ᠋ᠢᠨ ᠭᠤᠷᠪᠠᠨ ᠵᠢᠯ ᠦ᠋ᠨ ᠬᠠᠯᠠ ᠶ᠋ᠢ ᠳᠠᠭᠠᠭᠠᠵᠤ ᠶᠠᠪᠤᠭᠠᠷᠠᠢ!》 ᠭᠡᠵᠦ ᠮᠢᠩᠭᠠᠨᠪᠤᠤ ᠵᠦᠭ ᠲᠣᠭᠰᠢᠨ ᠬᠠᠷᠠᠴᠠ ᠭᠦᠶᠦᠯᠭᠡᠭᠰᠡᠨ ᠤᠬᠠᠭᠠᠨ ᠢ᠋ ᠬᠡᠨ ᠴᠦ᠍ ᠣᠢᠯᠠᠭᠠᠭᠠ ᠦᠭᠡᠢ᠃
ᠮᠢᠩᠭᠠᠨᠪᠤᠤ ᠶ᠋ᠢᠨ ᠬᠢᠯᠢᠰᠳᠡᠭᠰᠡᠨ ᠭᠠᠰᠢᠭᠤᠨ ᠨᠢᠳᠦ ᠡᠯᠳᠡᠩᠭᠡ ᠶ᠋ᠢᠨ ᠲᠣᠭᠰᠢᠨ ᠬᠠᠷᠠᠴᠠ ᠲᠠᠢ ᠬᠠᠯᠵᠠ ᠲᠤᠯᠬᠤ ᠳ᠋ᠤ᠌ ᠠᠭᠤᠷ ᠬᠢᠯᠢᠩ ᠳ᠋ᠦ᠍ ᠰᠢᠲᠠᠭᠰᠠᠨ ᠮᠢᠩᠭᠠᠨᠪᠤᠤ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠬᠣᠷᠣᠰᠤᠯ ᠤ᠋ᠨ ᠣᠴᠢ ᠪᠠᠳᠠᠷᠠᠵᠤ ᠪᠠᠢᠯᠠ᠁
ᠵᠤᠳᠪᠠ ᠮᠡᠢᠷᠡᠨ ᠱᠠᠭᠳᠠᠷᠰᠦ᠋ᠷᠦᠩ ᠵᠡᠷᠭᠡ ᠬᠡᠳᠦᠨ ᠶᠠᠯᠠᠲᠠᠨ ᠤ᠋ ᠶᠠᠯᠠ ᠶ᠋ᠢ ᠵᠠᠯᠭᠠᠨ ᠲᠣᠭᠠᠴᠢᠵᠤ ᠳᠠᠭᠤᠰᠬᠤ ᠳ᠋ᠤ᠌ ᠰᠢᠷᠠ ᠴᠡᠷᠢᠭ ᠦ᠋ᠨ ᠠᠭᠸᠠᠩ ᠨᠣᠶᠠᠨ᠄
— ᠴᠠᠭᠠᠵᠠ ᠶᠠᠪᠤᠭᠤᠯ! ᠭᠡᠰᠡᠨ ᠳ᠋ᠦ᠍ ᠮᠢᠩᠭᠠᠨᠪᠤᠤ᠂ ᠱᠠᠭᠳᠠᠷᠰᠦ᠋ᠷᠦᠩ ᠨᠠᠷ ᠶᠠᠮᠤᠨ ᠤ᠋ ᠴᠡᠷᠢᠭ ᠦ᠋ᠨ ᠰᠢᠪᠠᠳᠠᠯᠭᠠ ᠪᠠᠷ ᠬᠥᠳᠡᠯᠪᠡ᠃
ᠡᠨᠡ ᠬᠦ᠌ ᠬᠥᠮᠦᠨ ᠦ᠌ ᠲᠡᠷᠢᠭᠦᠨ ᠢ᠋ ᠴᠠᠪᠴᠢᠬᠤ ᠠ᠋ᠴᠠ ᠳᠤᠲᠠᠭᠤᠳᠠᠬᠤ ᠦᠭᠡᠢ ᠨᠦᠰᠡᠷ ᠠᠢᠩᠭᠤᠷᠢᠲᠤ《ᠴᠠᠭᠠᠵᠠ ᠶ᠋ᠢᠨ ᠲᠠᠯᠠᠪᠠᠢ》 ᠳ᠋ᠠᠬᠢ ᠬᠥᠮᠦᠰ ᠡᠭᠦᠨ ᠡᠴᠡ ᠠᠶᠤᠨ ᠰᠦᠷᠳᠡᠭᠰᠡᠨ ᠴᠦ᠍ ᠶᠦᠮ ᠤᠤ ᠡᠰᠡᠪᠡᠰᠦ ᠮᠢᠩᠭᠠᠨᠪᠤᠤ᠂ ᠱᠠᠭᠳᠠᠷᠰᠦ᠋ᠷᠦᠩ ᠨᠠᠷ ᠲᠤ ᠬᠢᠯᠢᠰ ᠲᠣᠭᠲᠠᠭᠰᠠᠨ ᠶᠠᠯᠠ ᠳ᠋ᠤ᠌ ᠰᠡᠳᠬᠢᠯ ᠲᠦᠪᠳᠡᠬᠦ ᠦᠭᠡᠢ ᠪᠣᠯᠪᠠᠴᠤ ᠳᠤᠤᠷᠭᠠᠴᠤ ᠴᠢᠳᠠᠳᠠᠭ ᠦᠭᠡᠢ᠂ ᠳᠤᠤᠷᠭᠠᠴᠤ ᠴᠤ᠌ ᠪᠣᠯᠳᠠᠭ ᠦᠭᠡᠢ ᠳ᠋ᠡᠭᠡᠨ ᠤᠤ? ᠬᠡᠳᠦᠨ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠥᠪᠴᠢ ᠵᠡᠪᠰᠡᠭᠲᠦ ᠰᠢᠷᠠ ᠴᠡᠷᠢᠭ ᠦ᠋ᠨ ᠮᠠᠨᠠᠭᠠ ᠬᠦᠷᠢᠶᠡ ᠲᠡᠢ ᠬᠣᠰᠢᠭᠤ ᠣᠪᠣᠭᠠᠨ ᠤ᠋ ᠣᠷᠴᠢᠨ ᠲᠣᠭᠣᠷᠢᠨ ᠦᠬᠦᠭᠰᠡᠨ ᠶᠢᠷᠲᠢᠨᠴᠦ ᠰᠢᠭ ᠲᠠᠭ ᠴᠢᠮᠡᠭᠡ ᠦᠭᠡᠢ᠃
ᠬᠦᠨᠳᠦ ᠬᠠᠢᠯᠠᠰᠤᠨ ᠬᠦᠷᠳᠦ ᠪᠡᠷ ᠬᠦᠵᠦᠭᠦᠦ ᠪᠡᠨ ᠬᠠᠪᠴᠢᠭᠤᠯᠵᠤ ᠳᠠᠯᠤ ᠮᠥᠷᠥ ᠪᠡᠨ ᠢᠪ ᠳᠠᠷᠤᠭᠤᠯᠤᠭᠰᠠᠨ ᠮᠢᠩᠭᠠᠨᠪᠤᠤ ᠡᠨᠡᠬᠡᠨ ᠡᠷᠡᠭᠦᠦ ᠡᠴᠡ ᠥᠴᠦᠬᠡᠨ ᠴᠦ᠍ ᠰᠦᠷᠳᠡᠵᠦ ᠡᠮᠢᠶᠡᠭᠰᠡᠨ ᠶᠠᠩᠵᠤ ᠦᠭᠡᠢ ᠡᠢᠰᠢ ᠲᠠᠢᠰᠢ ᠬᠠᠵᠠᠭᠤ ᠶ᠋ᠢᠨ ᠬᠥᠮᠦᠰ ᠢ᠋ ᠰᠢᠷᠪᠢᠵᠦ ᠬᠠᠷᠠᠨ ᠠᠵᠢᠭ ᠴᠦ᠍ ᠦᠭᠡᠢ ᠡᠮᠦᠨᠡᠰᠢ ᠠᠯᠬᠤᠯᠠᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠡᠮᠦᠨᠡ ᠬᠢᠯᠢᠰ ᠬᠠᠷᠪᠤᠭᠰᠠᠨ ᠵᠢᠳᠠ ᠶ᠋ᠢᠨ ᠦᠵᠦᠭᠦᠷ ᠢ᠋ ᠵᠥᠷᠢᠭᠦᠯᠦᠭᠰᠡᠨ ᠬᠣᠶᠠᠷ ᠴᠡᠷᠢᠭ ᠶᠠᠪᠤᠨᠠ᠃ ᠡᠨᠡ ᠬᠦ᠌ ᠶᠡᠷᠦ ᠪᠤᠰᠤ ᠶ᠋ᠢᠨ ᠰᠦᠷᠯᠢᠭᠦᠨ ᠪᠠᠢᠳᠠᠯ ᠠ᠋ᠴᠠ ᠬᠥᠮᠦᠰ ᠵᠢᠭᠵᠢᠭᠦᠷᠬᠡᠨ ᠵᠠᠮ ᠲᠠᠯᠪᠢᠵᠤ ᠥᠭᠬᠦ ᠳ᠋ᠦ᠍ ᠣᠯᠠᠨ ᠤ᠋ ᠳᠤᠮᠳᠠ ᠠ᠋ᠴᠠ ᠳᠠᠯᠤ ᠮᠥᠷᠥ ᠪᠠᠷ ᠢ᠋ᠶ᠋ᠠᠨ ᠥᠩᠭᠡ ᠨᠢ ᠰᠢᠭᠤᠭᠰᠠᠨ ᠬᠦᠷᠡᠩ ᠲᠡᠷᠯᠢᠭ ᠳᠡᠭᠡᠷᠡ ᠮᠥᠩᠭᠥᠨ ᠲᠣᠪᠴᠢ ᠲᠠᠢ ᠬᠠᠭᠤᠴᠢᠪᠲᠤᠷ ᠣᠤᠵᠢ ᠡᠮᠦᠰᠦᠭᠰᠡᠨ ᠬᠥᠭᠰᠢᠨ ᠵᠢᠳᠠ ᠵᠥᠷᠢᠭᠦᠯᠦᠭᠰᠡᠨ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠲᠣᠰᠴᠤ ᠣᠴᠢᠨ᠄
— ᠲᠠ ᠨᠠᠷ ᠪᠠᠢᠵᠠ ᠭᠡᠳ ᠥᠨᠥᠬᠢ ᠬᠣᠶᠠᠷ ᠴᠡᠷᠢᠭ ᠦ᠋ᠨ ᠬᠠᠨᠴᠤᠢ ᠠ᠋ᠴᠠ ᠵᠠᠭᠤᠷᠠᠭᠰᠠᠨ ᠳ᠋ᠤ᠌ ᠬᠣᠶᠠᠷ ᠴᠡᠷᠢᠭ ᠲᠡᠷᠡ ᠬᠥᠭᠰᠢᠨ ᠢ᠋ ᠰᠤᠭᠤᠨ ᠠ᠋ᠴᠠ ᠨᠢ ᠲᠡᠭᠳᠡᠢᠲᠡᠯᠡ ᠡᠷᠭᠦᠵᠦ ᠠᠪᠤᠨ ᠬᠠᠵᠠᠭᠤ ᠲᠠᠢᠰᠢ ᠬᠠᠶᠠᠪᠠ᠃ ᠲᠡᠷᠡ ᠬᠥᠭᠰᠢᠨ ᠭᠦᠶᠦᠨ ᠪᠣᠰᠴᠤ ᠳᠠᠬᠢᠭᠠᠳ ᠲᠡᠳᠡᠨᠦᠰ ᠲᠡᠢ ᠵᠠᠭᠤᠷᠠᠭᠰᠠᠨ ᠳ᠋ᠤ᠌ ᠰᠢᠷᠠ ᠴᠡᠷᠢᠭ ᠦ᠋ᠨ ᠠᠭᠸᠠᠩ ᠨᠣᠶᠠᠨ᠄
— ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠢ? ᠲᠡᠭᠦᠨ ᠢ᠋ ᠠᠪᠠᠴᠢᠵᠤ ᠭᠢᠨᠳᠠᠨ ᠳ᠋ᠤ᠌ ᠳᠠᠷᠤ! ᠭᠡᠰᠡᠨ ᠳ᠋ᠦ᠍ ᠡᠯᠳᠡᠩᠭᠡ ᠠᠭᠸᠠᠩ ᠨᠣᠶᠠᠨ ᠤ᠋ ᠥᠭᠡᠳᠡ ᠡᠴᠡ ᠭᠠᠷ ᠵᠠᠩᠭᠠᠨ᠄
— ᠪᠠᠢᠵᠠ! ᠡᠨᠡ ᠮᠢᠭᠠᠨᠪᠤᠤ ᠶ᠋ᠢᠨ ᠬᠥᠭᠰᠢᠨ ᠮᠠᠨᠤᠨᠪᠠᠳᠮᠠ ᠭᠡᠵᠦ ᠬᠡᠯᠡᠭᠡᠳ《ᠲᠡᠭᠦᠨ ᠢ᠋ ᠳᠡᠯᠪᠢ! ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠣᠯᠤᠭ᠁》 ᠭᠡᠰᠡᠨ ᠳ᠋ᠦ᠍ ᠥᠨᠥᠬᠢ ᠬᠣᠶᠠᠷ ᠴᠡᠷᠢᠭ ᠲᠡᠷᠡ ᠬᠥᠭᠰᠢᠨ ᠢ᠋ ᠲᠠᠯᠪᠢᠪᠠ᠃
ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠲᠡᠷᠯᠢᠭ ᠦ᠋ᠨ ᠢ᠋ᠶ᠋ᠡᠨ ᠰᠢᠷᠣᠢ ᠶ᠋ᠢ ᠭᠦᠪᠢᠵᠦ ᠮᠢᠩᠭᠠᠨᠪᠤᠤ ᠶ᠋ᠢᠨ ᠳᠡᠷᠭᠡᠳᠡ ᠬᠦᠷᠦᠭᠡᠳ ᠡᠪᠦᠭᠡᠨ ᠦ᠌ ᠪᠡᠨ ᠭᠢᠨᠵᠢᠯᠡᠭᠳᠡᠭᠰᠡᠨ ᠭᠠᠷ ᠢ᠋ ᠨᠢ ᠢᠯᠪᠢᠨ ᠡᠪᠦᠷ ᠡᠴᠡ ᠪᠡᠨ ᠵᠢᠵᠢᠭ ᠬᠠᠷᠠ ᠪᠣᠳᠣᠩ ᠲᠠᠢ ᠠᠷᠢᠬᠢ ᠭᠠᠷᠭᠠᠨ ᠮᠥᠩᠭᠥᠨ ᠴᠥᠭᠦᠴᠡᠨ ᠳ᠋ᠦ᠍ ᠬᠡᠮᠨᠡᠭᠡᠳ᠄
— ᠡᠪᠦᠭᠡᠨ ᠮᠢᠨᠢ᠂ ᠵᠣᠪᠠᠭᠰᠠᠨ ᠴᠠᠭ ᠲᠤ ᠵᠣᠷᠢᠭ ᠬᠡᠷᠡᠭᠲᠡᠢ᠂ ᠵᠢᠷᠭᠠᠭᠰᠠᠨ ᠴᠠᠭ ᠲᠤ ᠰᠡᠷᠡᠮᠵᠢ ᠬᠡᠷᠡᠭᠲᠡᠢ ᠭᠡᠳᠡᠭ ᠪᠢᠰᠢ ᠤᠤ! ᠪᠡᠷᠬᠡ ᠶ᠋ᠢᠨ ᠬᠣᠯᠠ ᠬᠠᠷᠢ ᠨᠤᠲᠤᠭ ᠲᠠᠢ ᠬᠠᠲᠠᠭᠤᠬᠠᠨ ᠠᠶᠠᠨ ᠢ᠋ ᠲᠤᠭᠤᠯᠬᠤ ᠶᠤᠮ ᠪᠠᠢᠨᠠ᠃ ᠡᠭᠦᠨ ᠡᠴᠡ ᠭᠤᠷᠪᠠᠨ ᠭᠡᠮ ᠤᠤᠭᠤᠴᠢᠬᠠ ᠲᠠ! ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠶ᠋ᠢᠨ ᠨᠠᠢᠷᠠᠭᠤᠯᠤᠭᠰᠠᠨ ᠣᠨᠴᠠᠭᠠᠢ ᠨᠠᠢᠷᠠᠯ ᠲᠠᠢ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠣᠷᠬᠣᠳᠠᠢ ᠲᠠᠢ ᠠᠷᠢᠬᠢ ᠶᠤᠮᠰᠠᠨ᠃ ᠪᠡᠶᠡ ᠰᠡᠳᠬᠢᠯ ᠢ᠋ ᠲᠡᠭᠰᠢᠯᠡᠵᠦ᠂ ᠲᠠᠮᠢᠷ ᠲᠡᠩᠬᠡᠭᠡ ᠴᠢᠩᠭᠠᠯᠠᠳᠠᠭ ᠡᠳ᠋ ᠰᠢᠦ! ᠪᠡᠶᠡ ᠪᠠᠢᠪᠠᠯ ᠪᠡᠭᠡᠵᠢᠩ! ᠡᠪᠦᠭᠡᠨ ᠮᠢᠨᠢ ᠭᠡᠳ ᠠᠩᠬᠠᠨ ᠤ᠋ ᠭᠡᠮ ᠢ᠋ ᠡᠪᠦᠭᠡᠨ ᠦ᠌ ᠪᠡᠨ ᠤᠷᠤᠭᠤᠯ ᠳ᠋ᠤ᠌ ᠬᠦᠷᠭᠡᠬᠦ ᠳ᠋ᠦ᠍ ᠮᠢᠩᠭᠠᠨᠪᠤᠤ ᠲᠡᠷᠡ ᠠᠷᠢᠬᠢᠨ ᠠ᠋ᠴᠠ ᠣᠭᠣᠴᠢᠭᠰᠠᠨ ᠦᠭᠡᠢ ᠲᠩᠷᠢ ᠥᠭᠡᠳᠡ ᠬᠠᠷᠠᠪᠠ᠃ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠡᠪᠦᠭᠡᠨ ᠦ᠌ ᠪᠡᠨ ᠰᠠᠨᠠᠭᠠ ᠶ᠋ᠢ ᠣᠢᠯᠠᠭᠠᠵᠤ! ᠴᠥᠭᠥᠴᠡ ᠲᠡᠢ ᠠᠷᠢᠬᠢᠨ ᠠ᠋ᠴᠠ ᠢᠳᠠᠮᠯᠠᠨ《ᠬᠠᠨ ᠮᠤᠨᠠ᠂ ᠡᠴᠢᠭᠡ ᠲᠩᠷᠢ ᠮᠢᠨᠢ ᠠ᠋᠂ ᠬᠤᠷᠤᠢ ᠬᠤᠷᠤᠢ! ᠬᠠᠨ ᠪᠤᠶᠠᠨ ᠡᠬᠡ ᠳᠡᠯᠡᠬᠡᠢ ᠮᠢᠨᠢ ᠠ᠋! ᠬᠤᠷᠤᠢ ᠬᠤᠷᠤᠢ! ᠬᠠᠨ ᠭᠠᠯ ᠪᠤᠷᠬᠠᠨ ᠮᠢᠨᠢ ᠠ᠋! ᠬᠤᠷᠤᠢ ᠬᠤᠷᠤᠢ》 ᠭᠡᠵᠦ ᠰᠡᠷᠵᠢᠮ ᠲᠥᠰᠦᠷᠬᠡᠨ ᠭᠤᠷᠪᠠᠨᠲᠠ ᠢᠳᠠᠮᠯᠠᠭᠠᠳ ᠡᠪᠦᠭᠡᠨ ᠦ᠌ ᠪᠡᠨ ᠳᠥᠷᠥᠭᠡ ᠶ᠋ᠢ ᠴᠢᠩᠭᠠᠯᠠᠬᠤ ᠠᠷᠢᠬᠢ ᠥᠭᠭᠦᠭᠰᠡᠨ ᠳ᠋ᠦ᠍ ᠮᠢᠩᠭᠠᠨᠪᠤᠤ ᠭᠤᠷᠪᠠᠨ ᠴᠥᠭᠥᠴᠡ ᠠᠷᠢᠬᠢ ᠶ᠋ᠢ ᠬᠥᠨᠲᠥᠷᠴᠦ ᠣᠷᠬᠢᠪᠠ᠃
— ᠵᠠ ᠡᠪᠦᠭᠡᠨ ᠮᠢᠨᠢ᠂ ᠵᠣᠷᠢᠭ ᠢ᠋ᠶ᠋ᠠᠨ ᠯᠠ ᠬᠠᠲᠠᠭᠤ ᠪᠠᠷᠢᠵᠤ᠂ ᠵᠠᠮ ᠳ᠋ᠠᠭᠠᠨ ᠰᠠᠢᠨ ᠶᠠᠪᠤᠭᠠᠷᠠᠢ! ᠭᠡᠳ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠣᠭᠣᠯᠠᠢ ᠨᠢ ᠡᠷᠢᠶᠡᠨᠲᠦᠭᠰᠡᠨ ᠳ᠋ᠦ᠍ ᠮᠢᠩᠭᠠᠨᠪᠤᠤ᠄
— ᠪᠢᠲᠡᠭᠡᠢ ᠤᠬᠢᠯᠠ! ᠶᠠᠪᠤᠬᠤ ᠬᠥᠮᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠤᠰᠤᠨ ᠨᠢᠳᠦᠯᠡᠳᠡᠭ ᠦᠭᠡᠢ ᠶᠦᠮ᠃ ᠮᠠᠭᠤ ᠢᠷᠣᠠ! ᠭᠡᠳ ᠬᠥᠳᠡᠯᠦᠭᠰᠡᠨ ᠳ᠋ᠦ᠍ ᠮᠠᠨᠤᠨᠪᠠᠳᠮᠠ ᠰᠠᠨᠳᠤᠷᠴᠤ ᠴᠢᠭᠢᠭᠲᠦᠭᠰᠡᠨ ᠵᠣᠪᠬᠢ ᠪᠠᠨ ᠠᠷᠴᠢᠭᠠᠳ᠄
ᠦᠭᠡᠢ᠂ ᠪᠢ ᠣᠬᠢᠯᠠᠭᠠ ᠦᠭᠡᠢ ᠠ᠋! ᠭᠡᠳ ᠬᠥᠮᠥᠭᠡᠢ ᠪᠡᠨ ᠵᠠᠭᠤᠨ ᠵᠣᠷᠢᠭ ᠤ᠋ᠨ ᠪᠠᠷᠢᠨᠠ᠃
ᠶᠠᠯᠠᠲᠠᠨ ᠲᠠᠭᠤᠭᠰᠠᠨ ᠴᠤᠪᠤᠭᠠ ᠬᠣᠰᠢᠭᠤ ᠣᠪᠣᠭᠠᠨ ᠤ᠋ ᠵᠣ ᠠ᠋ᠴᠠ ᠠᠶᠠᠷᠯᠠᠵᠤ ᠨᠡᠯᠢᠶᠡᠳ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠰᠢᠷᠠ ᠵᠠᠮ ᠳ᠋ᠤ᠌ ᠣᠷᠣᠨ ᠵᠡᠭᠦᠨᠰᠢ ᠴᠢᠭᠯᠡᠨ ᠭᠣᠢᠭᠣᠷᠪᠠ᠃
ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠡᠨᠡ ᠬᠦ᠌ ᠶᠠᠯᠠᠲᠠᠨ ᠤ᠋ ᠴᠤᠪᠤᠭᠠ ᠶ᠋ᠢ ᠳᠠᠭᠠᠵᠤ ᠬᠡᠰᠡᠭ ᠭᠦᠶᠦᠭᠰᠡᠨ ᠪᠣᠯᠪᠠᠴᠤ ᠬᠥᠯ ᠨᠢ ᠵᠥᠭᠡᠯᠡᠷᠡᠨ ᠬᠥᠭᠡᠭᠡᠵᠦ ᠭᠦᠢᠴᠡᠬᠦ ᠪᠡᠨ ᠪᠣᠯᠢᠪᠠ᠃ ᠲᠡᠷᠡ ᠪᠡᠷ ᠬᠣᠰᠢᠭᠤ ᠣᠪᠣᠭᠠᠨ ᠤ᠋ ᠵᠡᠭᠦᠨ ᠰᠢᠯᠢ ᠳᠡᠭᠡᠷᠡ ᠭᠠᠷᠴᠤ ᠡᠪᠦᠭᠡᠨ ᠦ᠌ ᠪᠡᠨ ᠬᠣᠢᠨᠠ ᠠ᠋ᠴᠠ ᠪᠠᠷᠠᠯᠠᠵᠤ ᠵᠣᠭᠰᠣᠨ《ᠡᠪᠦᠭᠡᠨ ᠦ᠌ ᠮᠢᠨᠢ ᠪᠡᠶᠡ ᠬᠡᠳᠦᠢ ᠬᠦᠳᠡᠷ ᠴᠢᠬᠢᠷᠠᠭ ᠠᠪᠠᠴᠤ ᠬᠦᠨᠳᠦ ᠬᠦᠷᠳᠦ ᠶ᠋ᠢᠨ ᠤᠳᠠᠭᠠᠨ ᠬᠤᠭᠤᠴᠠᠭᠠ ᠨᠤᠬᠤᠬᠤ ᠬᠠᠯᠠ ᠶ᠋ᠢ ᠶᠠᠭᠠᠬᠢᠵᠤ ᠳᠠᠭᠠᠭᠠᠬᠤ ᠪᠢᠯᠡ⁈ ᠪᠤᠷᠬᠠᠨ ᠮᠢᠨᠢ ᠠ᠋᠂ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠶ᠋ᠢᠨ ᠣᠷᠬᠣᠳᠠᠢ ᠲᠠᠢ ᠠᠷᠢᠬᠢ ᠲᠡᠭᠦᠨ ᠳ᠋ᠦ᠍ ᠮᠢᠨᠢ ᠲᠤᠰᠠ ᠪᠣᠯᠳᠠᠭ ᠴᠤ᠌ ᠪᠣᠯᠤᠭᠠᠰᠠᠢ᠁》 ᠭᠡᠵᠦ ᠵᠥᠩᠨᠡᠬᠦ ᠳ᠋ᠡᠭᠡᠨ ᠰᠡᠳᠬᠢᠯ ᠨᠢ ᠬᠡᠴᠡᠭᠦᠦ ᠤᠶᠠᠷᠠᠨ ᠡᠵᠡᠭᠦᠢ ᠰᠢᠯᠢ ᠳᠡᠭᠡᠷᠡ ᠱᠣᠭᠰᠢᠷᠠᠲᠠᠯᠠ ᠤᠬᠢᠯᠠᠪᠠ᠃ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠬᠡᠳᠦᠢ ᠤᠳᠠᠭᠠᠨ ᠤᠶᠠᠷᠠᠨ ᠤᠬᠢᠯᠠᠭᠰᠠᠨ ᠢ᠋ ᠮᠡᠳᠡᠭᠰᠡᠨ ᠦᠭᠡᠢ᠂ ᠨᠢᠯᠪᠤᠰᠤ ᠨᠢ ᠬᠠᠲᠠᠭᠰᠠᠨ ᠤ᠋ ᠳᠠᠷᠠᠭᠠ ᠡᠪᠦᠭᠡᠨ ᠦ᠌ ᠪᠡᠨ ᠶᠠᠪᠤᠭᠰᠠᠨ ᠵᠦᠭ ᠲᠦ᠍ ᠬᠠᠷᠠᠭᠠ ᠰᠤᠩᠭᠠᠪᠠᠯ ᠬᠦᠷᠳᠦ ᠵᠡᠭᠦᠭᠰᠡᠨ ᠡᠪᠦᠭᠡᠨ ᠦ᠌ ᠬᠢᠨᠢ ᠪᠠᠷᠠ ᠥᠨᠳᠥᠷ ᠤᠷᠭᠤᠭᠰᠠᠨ ᠪᠤᠲᠠ ᠳᠠᠷᠠᠰᠤ᠂ ᠡᠪᠡᠰᠦ ᠰᠢᠷᠠᠯᠵᠢᠨ ᠤ᠋ ᠴᠠᠭᠠᠭᠤᠷ ᠳᠠᠯᠳᠠᠷᠠᠪᠠ᠃
ᠮᠠᠨᠤᠨᠪᠠᠳᠮᠠ᠂ ᠬᠣᠰᠢᠭᠤ ᠣᠪᠣᠭᠠᠨ ᠤ᠋ ᠵᠡᠭᠦᠨ ᠰᠢᠯᠢ ᠳᠡᠭᠡᠷᠡ ᠤᠳᠠᠲᠠᠯᠠ ᠰᠠᠭᠤᠬᠤ ᠳ᠋ᠠᠭᠠᠨ ᠡᠪᠦᠭᠡᠨ ᠦ᠌ ᠪᠡᠨ ᠪᠠᠷᠠ ᠶ᠋ᠢ ᠪᠦᠦᠷ ᠲᠦᠦᠷ ᠴᠦ᠍ ᠪᠣᠯᠤᠭ ᠳᠠᠬᠢᠨ ᠨᠢᠭᠡ ᠣᠯᠵᠤ ᠬᠠᠷᠠᠬᠤ ᠶᠤᠮᠰᠠᠨ ᠭᠡᠵᠦ ᠭᠣᠷᠢᠳᠠᠭᠰᠠᠨ ᠬᠦᠰᠡᠯ ᠲᠡᠭᠦᠨ ᠦ᠌ ᠪᠣᠳᠣᠯ ᠤ᠋ᠨ ᠵᠠᠢ ᠶ᠋ᠢ ᠪᠦᠷᠢᠨ ᠡᠵᠡᠮᠳᠡᠭᠰᠡᠨ ᠢ᠋ ᠶᠠᠭᠠᠬᠢᠨᠠ ᠪᠣᠢ?
ᠡᠪᠦᠭᠡᠨ ᠦ᠌ ᠪᠡᠨ ᠠᠷᠤ ᠠ᠋ᠴᠠ ᠬᠥᠲᠥᠯᠦᠭᠳᠡᠵᠦ ᠶᠠᠪᠤᠭᠰᠠᠨ ᠮᠠᠨᠤᠨᠪᠡᠳᠮᠠ ᠬᠥᠭᠰᠢᠨ ᠬᠠᠮᠢᠭᠠ ᠬᠦᠷᠦᠭᠰᠡᠨ ᠢ᠋ᠶ᠋ᠡᠨ ᠴᠦ᠍ ᠮᠡᠳᠡᠭᠰᠡᠨ ᠦᠭᠡᠢ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠪᠤᠷᠬᠠᠲᠤ ᠶ᠋ᠢᠨ ᠵᠣ ᠳ᠋ᠠᠬᠢ ᠬᠣᠶᠠᠷ ᠣᠪᠣᠭᠠ ᠪᠥᠷᠲᠥᠯᠵᠡᠨ ᠬᠠᠷᠠᠭᠳᠠᠨᠠ᠃ ᠬᠣᠶᠠᠷ ᠣᠪᠣᠭᠠᠨ ᠤ᠋ ᠪᠤᠷᠭᠠᠰᠤᠨ ᠲᠣᠯᠣᠭᠠᠢ ᠪᠥᠷᠲᠥᠯᠵᠡᠨ ᠬᠠᠷᠠᠭᠳᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠣᠪᠣᠭᠠ ᠨᠢ ᠡᠪᠦᠭᠡᠨ ᠮᠢᠩᠭᠠᠨᠪᠤᠤ ᠶ᠋ᠢᠨ ᠪᠤᠭᠤᠷᠤᠯ ᠲᠣᠯᠣᠭᠠᠢ ᠪᠣᠯᠵᠤ ᠬᠤᠪᠢᠯᠤᠭᠰᠠᠨ ᠰᠢᠭ᠋ ᠰᠣᠨᠢᠬᠠᠨ ᠰᠠᠨᠠᠭᠳᠠᠪᠠ᠃《ᠶᠠᠭ ᠳᠠ᠂ ᠡᠪᠦᠭᠡᠨ ᠮᠢᠨᠢ ᠬᠦᠯᠢᠶᠡᠵᠦ ᠪᠠᠢᠭᠠᠷᠠᠢ! ᠬᠣᠶᠠᠭᠤᠯᠠ ᠪᠠᠨ ᠡᠨᠡ ᠬᠣᠶᠠᠷ ᠣᠪᠣᠭᠠᠨ ᠳ᠋ᠤ᠌ ᠰᠦᠵᠢᠭ ᠦ᠋ᠨ ᠰᠦᠨᠡᠰᠦ ᠪᠡᠨ ᠰᠢᠩᠭᠡᠭᠡᠵᠦ ᠪᠠᠷᠠ ᠪᠠᠷᠠ ᠪᠠᠨ ᠬᠠᠷᠠᠭᠠᠳ ᠣᠷᠣᠰᠢᠴᠢᠬᠠᠵᠤ ᠪᠣᠯᠳᠠᠭ ᠦᠭᠡᠢ ᠪᠠᠢᠨᠠ ᠤᠤ⁈》 ᠭᠡᠵᠦ ᠳᠦᠳᠦᠨᠡᠭᠡᠳ ᠰᠡᠭᠦᠷᠡᠰᠦᠯᠡᠪᠡ᠃
ᠪᠤᠭᠤᠷᠤᠯ ᠨᠠᠷᠠ ᠪᠠᠷᠠᠭᠤᠨ ᠬᠥᠲᠥᠯ ᠦ᠋ᠨ ᠴᠠᠭᠠᠭᠤᠷ ᠳᠠᠯᠳᠠᠷᠠᠪᠠ᠃ ᠬᠠᠷᠠᠵᠤ ᠪᠠᠢᠲᠠᠯᠠ ᠰᠢᠷᠠ ᠪᠦᠷᠦᠢ ᠲᠠᠰᠤᠷᠠᠵᠤ᠂ ᠬᠠᠷᠠᠩᠭᠤᠢ ᠤᠢᠳᠬᠠᠷᠲᠤ ᠬᠥᠰᠢᠭᠡ ᠪᠠᠭᠤᠯᠠ᠃
ᠠᠯᠤᠰ ᠠ᠋ᠴᠠ ᠬᠡᠨ ᠨᠢᠭᠡ ᠬᠥᠮᠦᠨ ᠤᠢᠳᠬᠠᠷ ᠭᠤᠨᠢᠭ ᠤ᠋ᠨ ᠠᠶᠠ ᠭᠢᠭᠰᠢᠯᠡᠬᠦ ᠰᠢᠭ ᠰᠠᠨᠠᠭᠳᠠᠭᠰᠠᠨ ᠳ᠋ᠤ᠌ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠲᠡᠷᠡ ᠤᠢᠳᠬᠠᠷ ᠭᠤᠨᠢᠭ ᠤ᠋ᠨ ᠠᠶᠠ ᠳ᠋ᠤ᠌ ᠡᠢᠨ ᠬᠡᠳᠦᠨ ᠪᠠᠳᠠᠭ ᠳᠠᠭᠤᠤ ᠭᠢᠩᠰᠢᠵᠡᠢ᠄
ᠬᠣᠯᠠ ᠶ᠋ᠢᠨ ᠪᠦᠷᠦᠭ ᠲᠦ᠍ ᠲᠣᠳᠣᠷᠠᠭᠠᠳ ᠢᠷᠡᠬᠦ
ᠬᠣᠶᠠᠷ ᠰᠠᠢᠬᠠᠨ ᠣᠪᠣᠭᠠ ᠪᠠᠢᠨᠠ ᠠ᠋
ᠬᠣᠯᠠ ᠶ᠋ᠢᠨ ᠲᠣᠭᠣᠰᠣᠨ ᠳ᠋ᠤ᠌ ᠪᠠᠯᠠᠷᠠᠭᠠᠳ ᠶᠠᠪᠤᠬᠤ
ᠡᠪᠦᠭᠡᠨ ᠪᠤᠭᠤᠷᠤᠯ ᠲᠤᠰᠠᠯᠠᠭᠴᠢ ᠮᠢᠨᠢ ᠳᠡ!
ᠬᠠᠷᠠᠩᠭᠤᠢ ᠶ᠋ᠢᠨ ᠪᠦᠷᠦᠢ ᠳ᠋ᠦ᠍ ᠭᠢᠯᠠᠯᠵᠠᠭᠠᠳ ᠢᠷᠡᠬᠦ
ᠬᠠᠨᠳᠠᠭᠠᠢ ᠴᠣᠬᠣᠷ ᠣᠳᠣᠳ ᠪᠠᠢᠨᠠ ᠠ᠋
ᠬᠠᠷᠠᠩᠭᠤᠢ ᠶ᠋ᠢᠨ ᠮᠠᠨᠠᠨ ᠳ᠋ᠤ᠌ ᠵᠠᠯᠭᠢᠬᠳᠠᠭᠠᠳ ᠶᠠᠪᠤᠬᠤ
ᠡᠪᠦᠭᠡᠨ ᠪᠤᠭᠤᠷᠤᠯ ᠲᠤᠰᠠᠯᠠᠭᠴᠢ ᠮᠢᠨᠢ ᠳᠡ!
ᠬᠦᠳᠡᠷ ᠲᠣᠮᠣ ᠪᠡᠶᠡ ᠶ᠋ᠢ ᠴᠢᠨᠢ
ᠬᠦᠷᠳᠦ ᠶ᠋ᠢᠨ ᠲᠠᠮᠤ ᠳᠠᠷᠤᠵᠠᠢ ᠠ᠋
ᠬᠥᠮᠦᠨ ᠦ᠌ ᠭᠠᠵᠠᠷ ᠴᠥᠯᠡᠭᠳᠡᠬᠦ ᠳ᠋ᠡᠭᠡᠨ
ᠬᠦᠦ ᠪᠡᠨ ᠰᠠᠨᠠᠨ ᠰᠠᠨᠠᠨ
ᠵᠣᠷᠢᠭᠵᠢᠵᠤ ᠪᠠᠢᠭᠠᠷᠠᠢ! ᠡᠪᠦᠭᠡᠨ ᠮᠢᠨᠢ
ᠬᠠᠲᠠᠭᠤ ᠲᠡᠩᠬᠡᠭᠡ ᠪᠡᠶᠡ ᠶ᠋ᠢ ᠴᠢᠨᠢ
ᠬᠠᠢᠯᠠᠰᠤᠨ ᠬᠦᠷᠳᠦ ᠳᠠᠷᠤᠵᠠᠢ ᠠ᠋
ᠬᠠᠷᠢ ᠨᠤᠲᠤᠭ ᠲᠤ ᠶᠠᠯᠠᠯᠠᠭᠳᠠᠬᠤ ᠳ᠋ᠠᠭᠠᠨ
ᠬᠠᠢᠷᠠᠲᠤ ᠰᠠᠮᠠᠭᠠᠨ ᠢ᠋ᠶ᠋ᠠᠨ ᠪᠣᠳᠣᠨ ᠪᠣᠳᠣᠨ
ᠬᠠᠲᠠᠭᠤᠵᠢᠵᠤ ᠶᠠᠪᠤᠭᠠᠷᠠᠢ᠂ ᠡᠪᠦᠭᠡᠨ ᠮᠢᠨᠢ!
ᠭᠡᠵᠦ ᠳᠠᠭᠤᠯᠠᠨ᠂ ᠰᠢᠷᠠ ᠪᠦᠷᠦᠢ ᠲᠠᠰᠤᠷᠠᠬᠤ ᠶ᠋ᠢᠨ ᠲᠡᠷᠡ ᠬᠣᠷᠣᠮ ᠮᠠᠨᠤᠨᠪᠠᠳᠮᠠ ᠶ᠋ᠢᠨ ᠪᠠᠷᠠ ᠲᠡᠨᠳᠡ ᠡᠴᠡ ᠠᠶᠠᠷᠯᠠᠨ ᠵᠠᠢᠯᠠᠪᠠ᠁