ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠭᠤᠲᠠᠭᠠᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠳᠣᠯᠣᠭᠠ> Хан мунын сүүрс < доорд > – Мөнх зохиоов ᠂ Гутгаар бодь – Нэгдүгээр бүлэг <7>
368ᠭᠤᠲᠠᠭᠠᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠳᠣᠯᠣᠭᠠ>
ᠬᠠᠪᠤᠷ ᠤ᠋ᠨ ᠲᠩᠷᠢ ᠶ᠋ᠢᠨ ᠪᠤᠬᠤᠷ ᠨᠢ ᠡᠷᠭᠢᠴᠢᠬᠡᠭᠰᠡᠨ ᠶᠦᠮ ᠰᠢᠭ ᠤᠯᠠᠭᠠᠨ ᠲᠣᠭᠣᠰᠣ ᠪᠤᠵᠢᠭᠢᠨᠠᠭᠰᠠᠨ ᠬᠠᠷᠠ ᠰᠢᠭᠤᠷᠭᠠ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠵᠣ ᠶ᠋ᠢ ᠡᠪᠬᠡᠴᠢᠬᠡᠮᠡᠷ ᠬᠤᠢᠯᠠᠷᠠᠨᠠ᠃ ᠰᠤᠪᠤᠷᠭᠠ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠰᠠᠷᠠᠪᠴᠢᠨ ᠤ᠋ ᠰᠡᠵᠢᠭᠦᠷ ᠦ᠋ᠨ ᠬᠣᠩᠬᠣ ᠰᠠᠯᠬᠢᠨ ᠤ᠋ ᠭᠤᠶᠤᠳᠠᠯ ᠳ᠋ᠤ᠌ ᠬᠣᠯᠣᠩ ᠬᠣᠯᠣᠩ ᠳᠤᠤᠭᠠᠷᠴᠤ᠂ ᠪᠣᠷᠣᠭᠠᠨ ᠴᠢᠭᠢᠭ ᠲᠠᠲᠠᠭᠤ ᠬᠠᠭᠰᠠᠷᠭᠠᠨᠳᠤ ᠬᠠᠪᠤᠷ ᠤ᠋ᠨ ᠭᠤᠨᠢᠭ ᠤ᠋ᠨ ᠠᠶᠠ ᠡᠭᠦᠰᠬᠡᠨ ᠤᠢᠳᠬᠠᠷᠲᠠᠢ ᠰᠠᠨᠠᠭᠳᠠᠨᠠ᠃ ᠬᠦ
ᠪᠠᠷᠠᠭᠰᠠᠨᠣᠷᠪᠤ ᠯᠠᠮᠠᠬᠠᠢ ᠡᠷᠲᠡ ᠪᠣᠰᠴᠤ ᠵᠠᠰᠠᠭ ᠲᠠᠮᠠᠭᠠ① ᠶ᠋ᠢᠨ ᠲᠠᠬᠢᠯ ᠤ᠋ᠨ ᠵᠤᠯᠠ ᠵᠠᠰᠠᠵᠤ ᠪᠠᠷᠢᠭᠠᠳ《ᠪᠠᠷᠰ ᠤ᠋ᠨ ᠰᠦᠷ ᠪᠠᠳᠠᠷᠠᠭᠰᠠᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠠᠰᠠᠭ ᠲᠠᠮᠠᠭᠠ ᠮᠢᠨᠢ ᠡᠩᠬᠡ ᠠᠮᠤᠭᠤᠯᠠᠩ᠁ ᠤᠸᠮ ᠮᠠ ᠨᠢ ᠪᠠᠳ ᠮᠠᠢ ᠬᠣᠩ!》 ᠭᠡᠵᠦ ᠵᠠᠯᠪᠠᠷᠢᠨ ᠮᠥᠷᠭᠥᠪᠡ᠃ ᠪᠠᠳᠮᠠᠯᠠᠨ ᠠᠰᠠᠭᠰᠠᠨ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠳ᠋ᠦ᠍ ᠳᠥᠷᠪᠡᠨ ᠥᠨᠴᠥᠭ ᠢ᠋ ᠨᠢ ᠪᠠᠷᠰ ᠤ᠋ᠨ ᠬᠡ ᠤᠷᠠᠯᠠᠵᠤ ᠰᠡᠢᠯᠦᠭᠰᠡᠨ ᠰᠢᠯ ᠨᠢᠭᠤᠷ ᠲᠠᠢ ᠰᠢᠷᠠ ᠠᠭᠠᠷᠤ ᠵᠢᠵᠢᠭ ᠬᠣᠷᠭᠣᠨ ᠳ᠋ᠠᠬᠢ ᠳᠣᠭᠰᠢᠨ ᠪᠠᠷᠰ ᠣᠴᠣᠢᠭᠰᠠᠨ ᠬᠡᠯᠪᠡᠷᠢᠲᠡᠢ ᠴᠣᠯ ᠮᠥᠩᠭᠥᠨ ᠲᠠᠮᠠᠭᠠ② ᠤᠯᠠᠮ ᠴᠦ᠍ ᠰᠦᠷᠲᠡᠢ ᠬᠠᠷᠠᠭᠳᠠᠨᠠ᠃
— ᠵᠠ ᠪᠣᠯᠵᠢ ᠳᠠ᠂ ᠵᠠᠰᠠᠭ ᠲᠠᠮᠠᠭᠠ ᠮᠢᠨᠢ ᠵᠥᠩᠳᠡᠭᠡᠨ ᠠᠮᠤᠭᠤᠯᠠᠩ ᠪᠠᠢᠨᠠ ᠬᠦ᠂ ᠡᠨᠡ ᠰᠠᠮᠠᠭᠤᠨ ᠳᠡᠭᠳᠡᠭᠰᠡᠨ ᠲᠡᠢᠨ ᠦ᠌ ᠴᠠᠭ ᠲᠤ ᠵᠠᠰᠠᠭ ᠲᠠᠮᠠᠭᠠ ᠪᠠᠨ ᠨᠢᠭᠡ ᠡᠳᠦᠷ ᠴᠦ᠍ ᠭᠡᠰᠡᠨ ᠠᠮᠤᠷ ᠲᠠᠢᠪᠤᠩ ᠠᠪᠴᠤ ᠠᠰᠠᠷᠠᠨ ᠳᠠᠬᠢᠳᠠᠭ ᠮᠢᠨᠢ ᠡᠳᠦᠷ ᠦ᠋ᠨ ᠵᠢᠷᠭᠠᠯ ᠲᠡᠷᠡ ᠠ᠋! ᠭᠡᠵᠦ ᠳᠦᠳᠦᠨᠡᠨ ᠲᠠᠮᠠᠭᠠ ᠶ᠋ᠢᠨ ᠲᠠᠬᠢᠯ ᠤ᠋ᠨ ᠳᠣᠲᠣᠷᠠ ᠥᠷᠥᠭᠡᠨ ᠡᠴᠡ ᠭᠠᠷᠴᠤ ᠶᠠᠪᠤᠪᠠ᠃
ᠪᠠᠷᠠᠭᠰᠠᠨᠣᠷᠪᠤ ᠯᠠᠮᠠᠬᠠᠢ ᠡᠭᠦᠳᠡ ᠭᠠᠷᠤᠮᠠᠭᠴᠠ ᠭᠠᠳᠠᠨᠠ ᠬᠤᠢᠯᠠᠷᠠᠭᠰᠠᠨ ᠰᠠᠯᠬᠢᠨ ᠳ᠋ᠤ᠌ ᠳᠠᠯᠳᠢᠷᠠᠨ《ᠰᠥᠨᠢᠵᠢᠨ ᠰᠠᠯᠬᠢᠯᠠᠭᠠᠳ ᠵᠣᠭᠰᠣᠳᠠᠭ ᠦᠭᠡᠢ ᠶᠠᠮᠠᠷ ᠬᠠᠮᠢᠭᠠᠰᠢ ᠪᠠᠨ ᠲᠩᠷᠢ ᠪᠣᠢ⁈》 ᠭᠡᠵᠦ ᠳᠡᠮᠡᠢ ᠠᠬᠠᠷᠴᠢᠯᠠᠨ ᠴᠠᠭᠠᠰᠢ ᠶᠠᠪᠤᠵᠤ ᠣᠴᠣᠢᠨ ᠰᠠᠭᠤᠵᠤ ᠰᠢᠩᠭᠡᠨ ᠮᠥᠷ ᠦᠵᠡᠴᠢᠬᠡᠭᠡᠳ ᠪᠣᠰᠬᠤ ᠳ᠋ᠤ᠌ ᠭᠡᠨᠡᠳᠲᠡ ᠮᠣᠷᠢᠨ ᠲᠦᠪᠡᠷᠭᠡᠨ ᠲᠠᠴᠢᠭᠢᠨᠠᠵᠤ ᠲᠡᠷᠲᠡᠭᠡ ᠵᠡᠭᠦᠨ ᠡᠮᠦᠨᠡ ᠡᠴᠡ ᠠᠷᠪᠠ ᠬᠣᠷᠢᠨ ᠮᠣᠷᠢᠲᠠᠨ ᠳᠠᠪᠬᠢᠭᠤᠯᠵᠤ ᠠᠢᠰᠤᠢ ᠬᠠᠷᠠᠭᠳᠠᠭᠰᠠᠨ ᠳ᠋ᠤ᠌ ᠪᠠᠯᠠᠳᠠᠵᠤ᠄
— ᠵᠠ᠂ ᠡᠨᠡ ᠴᠦ᠍ ᠨᠢᠭᠡ ᠶᠠᠭᠤᠮᠠ ᠪᠣᠯᠬᠤ ᠨᠢ ᠳᠡ᠂ ᠶᠠᠭᠤᠨ ᠤ᠋ ᠮᠣᠷᠢᠲᠠᠳ ᠢᠩᠭᠢᠵᠦ ᠬᠠᠷᠠ ᠥᠷᠯᠥᠭᠡᠭᠦᠷ ᠰᠦᠮᠡ ᠳ᠋ᠦ᠍ ᠳᠠᠪᠬᠢᠵᠤ ᠢᠷᠡᠳᠡᠭ ᠪᠢᠯᠡ! ᠭᠡᠵᠦ ᠲᠠᠮᠠᠭᠠ ᠶ᠋ᠢᠨ ᠮᠠᠨᠠᠭᠠ ᠬᠣᠨᠣᠳᠠᠭ ᠪᠤᠷᠤᠭᠤ ᠬᠠᠨᠳᠤᠭᠰᠠᠨ ᠭᠡᠷ ᠦ᠋ᠨ ᠡᠭᠦᠳᠡ ᠶ᠋ᠢ ᠫᠦᠯᠲᠤ ᠲᠠᠯᠪᠢᠨ ᠣᠷᠣᠵᠤ ᠣᠴᠢᠪᠠᠯ᠂ ᠲᠠᠮᠠᠭᠠ ᠶ᠋ᠢᠨ ᠬᠣᠶᠠᠷ ᠮᠠᠨᠠᠭᠠᠨ ᠤ᠋ ᠴᠡᠷᠢᠭ ᠣᠷᠣᠨ ᠳᠣᠲᠣᠷᠠ ᠪᠠᠨ ᠬᠠᠷᠠ ᠲᠠᠮᠠᠬᠢ ᠴᠣᠷᠭᠢᠭᠤᠯᠵᠤ ᠬᠡᠪᠲᠡᠨᠡ᠃
— ᠬᠥᠰᠢ᠂ ᠪᠣᠰᠤᠭᠠᠴᠢ ᠲᠠ ᠬᠣᠶᠠᠷ! ᠶᠠᠭᠤᠨ ᠤ᠋ ᠤᠯᠤᠰ ᠶᠤᠮ ᠪᠣᠯ? ᠴᠠᠭᠠᠲᠠᠢ ᠴᠢᠨᠢ ᠪᠠᠬᠠᠨ ᠮᠣᠷᠢᠲᠠᠳ ᠰᠦᠮᠡ ᠤᠷᠤᠭᠤ ᠳᠠᠪᠬᠢᠵᠤ ᠠᠢᠰᠤᠢ ᠭᠡᠵᠦ ᠪᠠᠷᠠᠭᠰᠠᠨᠣᠷᠪᠤ ᠯᠠᠮᠠᠬᠠᠢ ᠠᠶᠤᠨ ᠴᠣᠴᠢᠨ ᠨᠢᠭᠡ ᠶᠠᠭᠤᠮᠠ ᠶᠠᠷᠢᠬᠤ ᠳ᠋ᠤ᠌ ᠥᠨᠥᠬᠢ ᠬᠣᠶᠠᠷ ᠮᠠᠨᠠᠭᠠᠨ ᠤ᠋ ᠴᠡᠷᠢᠭ ᠬᠠᠷᠠ ᠲᠠᠮᠠᠬᠢᠨ ᠳ᠋ᠤ᠌ ᠰᠢᠨᠤᠭ ᠠᠯᠳᠠᠵᠤ ᠯᠠᠮᠠᠬᠠᠢ ᠶ᠋ᠢᠨ ᠦᠭᠡ ᠶ᠋ᠢ ᠳᠡᠮᠡᠢ ᠶᠠᠭᠤᠮᠠ ᠪᠣᠯᠭᠠᠭᠰᠠᠨ ᠦᠭᠡᠢ᠃
— ᠦᠭᠡᠢ ᠠ᠋᠂ ᠲᠠ ᠬᠣᠶᠠᠷ ᠴᠢᠨᠢ ᠵᠠᠰᠠᠭ ᠲᠠᠮᠠᠭᠠ ᠶ᠋ᠢ ᠰᠠᠬᠢᠵᠤ ᠬᠠᠮᠠᠭᠠᠯᠠᠳᠠᠭ ᠵᠢᠰᠢᠶᠠᠨ ᠳ᠋ᠤ᠌ ᠰᠠᠭᠤᠭᠰᠠᠨ ᠬᠥᠮᠦᠨ ᠪᠢᠰᠢ ᠪᠢᠯᠡ ᠤᠤ? ᠬᠠᠷᠠ ᠨᠢᠳᠦ ᠪᠡᠨ ᠨᠡᠭᠡᠭᠡᠭᠰᠡᠭᠡᠷ ᠬᠠᠷᠠ ᠲᠠᠮᠠᠬᠢ᠂ ᠬᠠᠷᠠ ᠲᠠᠮᠠᠬᠢ ᠭᠡᠳ ᠦᠬᠦᠯᠳᠦᠳᠡᠭ ᠶᠠᠭᠠᠬᠢᠭᠰᠠᠨ ᠬᠠᠴᠢᠨ ᠤᠯᠤᠰ ᠭᠡᠭᠴᠢ ᠪᠣᠢ⁈ ᠭᠡᠳ ᠲᠡᠨᠳᠡ ᠡᠴᠡ ᠭᠠᠷᠴᠤ ᠰᠠᠨᠳᠤᠷᠤᠨ ᠭᠦᠷᠳᠠᠮᠴᠢ ᠯᠠᠮᠠᠬᠠᠢ ᠶ᠋ᠢᠨ ᠡᠭᠦᠳᠡᠨ ᠳ᠋ᠦ᠍ ᠬᠦᠷᠪᠡᠯ ᠢᠬᠡᠷᠡ ᠪᠠᠨᠰᠠᠨ ᠬᠠᠭᠠᠯᠭᠠ ᠨᠢ ᠳᠠᠪᠬᠤᠷ ᠭᠢᠨᠵᠢ ᠲᠡᠢ ᠲᠠᠩᠭᠤᠳ ᠬᠠᠷᠠ ᠴᠠᠭᠤᠷᠭᠠ③ ᠪᠠᠷ ᠲᠠᠭ ᠤᠨᠢᠰᠤᠯᠠᠭᠲᠠᠭᠰᠠᠨ ᠪᠠᠢᠪᠠ᠃ ᠪᠠᠷᠠᠭᠰᠨᠤᠷᠪᠤ ᠯᠠᠮᠠᠬᠠᠢ ᠰᠠᠨᠠᠭᠠᠨ ᠳ᠋ᠠᠭᠠᠨ ᠭᠦᠷᠳᠠᠮᠴᠢ ᠯᠠᠮᠠᠬᠠᠢ ᠶ᠋ᠢ ᠳᠠᠭᠤᠳᠠᠵᠤ ᠵᠠᠰᠠᠭ ᠲᠠᠮᠠᠭᠠᠨ ᠳ᠋ᠤ᠌ ᠭᠬᠢᠷ ᠬᠠᠯᠳᠠᠭᠠᠬᠤ ᠪᠣᠯᠤᠮᠵᠢ ᠶ᠋ᠢᠨ ᠡᠨᠡ ᠬᠦ᠌ ᠢᠷᠡᠵᠦ ᠶᠠᠪᠤᠭᠠ ᠢᠯᠡ ᠳᠡᠭᠡᠷᠡᠮ ᠲᠤᠨᠤᠭᠠ ᠪᠤᠶᠤ ᠳᠠᠯᠳᠠ ᠶ᠋ᠢᠨ ᠮᠠᠭᠤ ᠠᠳᠠ ᠴᠢᠳᠬᠥᠷ ᠢ᠋ ᠳᠠᠭᠠᠭᠤᠯᠤᠭᠰᠠᠨ ᠭᠠᠢ ᠶ᠋ᠢ ᠵᠠᠢᠯᠠᠭᠤᠯᠬᠤ ᠠᠷᠭᠠ ᠤᠬᠠᠭᠠᠨ ᠭᠠᠷᠭᠠᠨ ᠬᠦᠷᠲᠡᠮ ᠲᠠᠷᠨᠢ ᠪᠠᠭᠤᠯᠭᠠᠵᠤ ᠥᠭᠳᠡᠭ ᠶᠦᠮ ᠪᠢᠯᠡ ᠤᠤ? ᠭᠡᠰᠡᠨ ᠨᠢ ᠬᠣᠭᠣᠰᠣᠳᠠᠵᠤ ᠬᠠᠷᠠ ᠴᠠᠭᠤᠷᠭᠠ ᠮᠥᠷᠭᠥᠭᠰᠡᠨ ᠳ᠋ᠡᠭᠡᠨ《 ᠢᠰᠢ ᠪᠤᠷᠬᠠᠨ ᠮᠢᠨᠢ᠂ ᠭᠦᠷᠳᠡᠮᠴᠢ ᠯᠠᠮᠠᠬᠠᠢ ᠬᠠᠷᠠᠩᠭᠤᠢ ᠰᠥᠨᠢ ᠪᠡᠷ ᠪᠠᠰᠠ ᠬᠠᠮᠢᠭᠠᠭᠤᠷ ᠭᠦᠷᠲᠡᠮ ᠭᠣᠷᠢᠮ ᠪᠠᠭᠤᠯᠭᠠᠬᠤ ᠪᠠᠷ ᠶᠠᠪᠤᠪᠠ? ᠥᠴᠥᠭᠡᠳᠦᠷ ᠣᠷᠣᠢ ᠳ᠋ᠧᠩ ᠠᠰᠠᠬᠤ ᠳ᠋ᠤ᠌ ᠬᠦᠷᠲᠡᠯᠡ ᠪᠠᠢᠭᠰᠠᠨ ᠶᠤᠮ ᠳᠠ! ᠠ ᠢᠯᠡᠢ᠁》 ᠭᠡᠵᠦ ᠤᠷᠮᠠ ᠦᠭᠡᠢ ᠰᠠᠨᠠᠭᠠ ᠠᠯᠳᠠᠪᠠ᠃
ᠪᠠᠭᠠ ᠬᠠᠲᠤᠨ ᠰᠢᠷᠠ ᠴᠡᠷᠢᠭ ᠡᠴᠡ ᠰᠦᠷᠳᠡᠨ ᠪᠤᠷᠤᠭᠤᠯᠠᠵᠤ ᠪᠠᠷᠠᠭᠤᠰᠢ ᠬᠠᠷᠠ ᠴᠡᠷᠢᠭ ᠦ᠋ᠨ ᠸᠠᠩ ᠰᠣᠬᠣᠷ ᠢ᠋ ᠨᠥᠮᠥᠷᠢᠳᠡᠬᠦ ᠪᠡᠷ ᠶᠠᠪᠤᠬᠤ ᠳ᠋ᠠᠭᠠᠨ ᠴᠣᠯ ᠮᠥᠩᠭᠥᠨ ᠵᠠᠰᠠᠭ ᠲᠠᠮᠠᠭᠠ ᠪᠠᠨ ᠰᠤᠪᠤᠷᠭᠠ ᠶ᠋ᠢᠨ ᠰᠦᠮᠡ ᠶ᠋ᠢ ᠰᠣᠩᠭᠣᠵᠤ ᠬᠠᠳᠠᠭᠠᠯᠠᠭᠤᠯᠤᠨ ᠳᠠᠬᠢᠳᠠᠭ ᠨᠢ ᠴᠠᠭᠠᠨᠠ ᠪᠠᠨ ᠤᠴᠢᠷ ᠲᠠᠢ᠃ ᠲᠡᠷᠡ ᠨᠢ ᠰᠤᠪᠤᠷᠭᠠ ᠶ᠋ᠢᠨ ᠰᠦᠮᠡ ᠨᠢ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠬᠥᠯ ᠡᠴᠡ ᠪᠣᠢᠳᠠ ᠵᠠᠢᠰ ᠪᠠ ᠭᠣᠣᠯᠴᠢ ᠨᠣᠮᠣᠬᠠᠨ ᠨᠢᠮᠪᠠᠢ ᠵᠠᠩ ᠲᠠᠢ ᠪᠠᠷᠠᠭᠰᠨᠤᠷᠪᠤ ᠯᠠᠮᠠᠬᠠᠢ ᠳ᠋ᠤ᠌ ᠨᠢᠭᠡ ᠶᠠᠭᠤᠮᠠ ᠳᠠᠭᠠᠭᠠᠯᠭᠠᠴᠢᠬᠠᠬᠤ ᠳ᠋ᠤ᠌ ᠲᠦᠰᠢᠭ ᠲᠡᠢ᠃ ᠤᠯᠠᠮ ᠴᠦ᠍ ᠭᠦᠷᠳᠡᠮᠴᠢ ᠯᠠᠮᠠᠬᠠᠢ ᠳ᠋ᠤ᠌ ᠪᠠᠷᠤᠭ ᠤ᠋ᠨ ᠮᠠᠭᠤ ᠮᠠᠭᠤᠬᠠᠢ ᠠᠳᠠ ᠴᠢᠳᠬᠥᠷ ᠬᠠᠯᠳᠠᠳᠠᠭ ᠦᠭᠡᠢ ᠶ᠋ᠢᠨ ᠤᠴᠢᠷ ᠶᠤᠮ ᠪᠤᠶᠤ᠃
ᠪᠠᠷᠠᠭᠰᠨᠤᠷᠪᠤ ᠯᠠᠮᠠᠬᠠᠢ ᠶ᠋ᠢ ᠭᠠᠷᠴᠤ ᠶᠠᠪᠤᠭᠰᠠᠨ ᠬᠣᠢᠭᠤᠷ ᠥᠨᠥᠬᠢ ᠬᠣᠶᠠᠷ ᠤ᠋ᠨ ᠨᠢᠭᠡ ᠨᠢ ᠪᠣᠰᠴᠤ ᠠ᠂ ᠶᠣᠬᠣ! ᠭᠡᠵᠦ ᠡᠪᠰᠢᠶᠡᠯᠭᠡᠨ ᠰᠤᠨᠢᠶᠠᠯᠭᠠᠬᠤ ᠳ᠋ᠤ᠌ ᠨᠢᠯᠪᠤᠰᠤᠲᠤᠭᠰᠠᠨ ᠨᠢᠳᠦᠨ ᠳ᠋ᠦ᠍ᠨᠢ ᠬᠣᠶᠠᠷ ᠬᠥᠮᠦᠨ ᠪᠥᠷᠲᠥᠯᠵᠡᠵᠦ ᠦᠵᠡᠭᠳᠡᠬᠦ ᠰᠢᠭ ᠪᠣᠯᠪᠠ᠃ ᠠᠯᠢ ᠵᠠᠪ ᠲᠤᠨᠢ ᠭᠡᠷ ᠲᠦ᠍ ᠬᠥᠮᠦᠨ ᠣᠷᠣᠵᠤ ᠢᠷᠡᠭᠰᠡᠨ ᠢ᠋ ᠲᠡᠳᠡ ᠮᠡᠳᠡᠭᠰᠡᠨ ᠦᠭᠡᠢ᠂ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠬᠡᠳᠦ ᠬᠡᠳᠦᠨ ᠫᠤᠤ ᠭᠣᠵᠣᠯᠵᠠᠭᠤᠯᠤᠭᠰᠠᠨ ᠴᠡᠷᠢᠭ ᠡᠮᠦᠨᠡ ᠨᠢ ᠲᠤᠯᠵᠤ ᠵᠣᠭᠰᠣᠭᠰᠠᠨ ᠪᠠᠢᠪᠠ᠃ ᠨᠢᠭᠡ ᠯᠡ ᠶᠡᠬᠡ ᠰᠤᠨᠢᠶᠠᠯᠭᠠᠨ ᠡᠪᠰᠢᠶᠡᠭᠰᠡᠨ ᠨᠢᠭᠡ ᠨᠢ ᠪᠠᠯᠠᠳᠠᠨ ᠰᠠᠨᠳᠤᠷᠴᠤ ᠬᠡᠷᠡᠮ ᠳ᠋ᠦ᠍ ᠡᠯᠭᠦᠭᠡᠰᠦᠲᠡᠢ ᠲᠦᠷᠭᠡᠨ ᠫᠤᠤ ᠪᠠᠨ ᠰᠢᠭᠦᠷᠡᠬᠦ ᠭᠡᠵᠦ ᠥᠨᠳᠡᠢᠭᠰᠡᠨ ᠳ᠋ᠦ᠍ ᠭᠡᠷ ᠲᠦ᠍ ᠣᠷᠣᠵᠤ ᠢᠷᠡᠭᠰᠡᠨ ᠴᠡᠷᠢᠭ ᠬᠥᠮᠦᠰ ᠦ᠋ᠨ ᠲᠦᠷᠦᠭᠦᠦ ᠨᠢ ᠪᠣᠯᠤᠯᠲᠠᠢ ᠨᠢᠭᠡ ᠪᠠᠷᠵᠠᠭᠠᠷ ᠴᠢᠷᠠᠢ ᠲᠠᠢ ᠰᠢᠷᠦᠭᠦᠨ ᠬᠠᠷᠠ ᠡᠷᠡ᠄
— ᠪᠢᠲᠡᠭᠡᠢ ᠬᠥᠳᠡᠯ! ᠰᠦᠮᠡ ᠬᠡᠢᠳ ᠦ᠋ᠨ ᠭᠠᠵᠠᠷ ᠫᠤᠤ ᠵᠡᠪᠰᠡᠭ ᠬᠥᠳᠡᠯᠭᠡᠬᠦ ᠨᠢ ᠤᠤ? ᠭᠡᠰᠡᠨ ᠳᠠᠭᠤᠨ ᠳ᠋ᠤ᠌ ᠲᠡᠷᠡ ᠡᠷᠡ ᠶ᠋ᠢᠨ ᠬᠡᠷᠡᠮ ᠥᠭᠡᠳᠡ ᠰᠠᠷᠪᠠᠢᠭᠰᠠᠨ ᠭᠠᠷ ᠨᠢ ᠰᠢᠷᠪᠥᠰᠥ ᠨᠢ ᠲᠠᠰᠤᠷᠠᠭᠰᠠᠨ ᠶᠤᠮ ᠰᠢᠭ᠋ ᠳᠣᠷᠣᠭᠰᠢ ᠤᠨᠵᠢᠢᠪᠠ᠃
ᠤᠨᠵᠢᠢᠭᠰᠠᠨ ᠭᠠᠷ ᠢ᠋ᠶ᠋ᠠᠨ ᠬᠠᠮᠢᠭᠠ ᠲᠠᠯᠪᠢᠬᠤ ᠪᠠᠨ ᠣᠯᠬᠤ ᠦᠭᠡᠢ ᠠᠶᠤᠨ ᠪᠥᠮᠪᠥᠭᠡᠨᠡᠭᠰᠡᠨ ᠲᠡᠷᠡ ᠡᠷᠡ ᠡᠨᠡ ᠬᠦ᠌ ᠪᠠᠷᠵᠠᠭᠠᠷ ᠰᠢᠷᠦᠭᠦᠨ ᠬᠠᠷᠠ ᠡᠷᠡ ᠶ᠋ᠢᠨ ᠥᠭᠡᠳᠡ ᠡᠴᠡ ᠠᠰ ᠬᠠᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠳᠣᠲᠣᠷᠠ ᠪᠠᠨ《ᠯᠠᠮᠠ ᠭᠤᠷᠪᠠᠨ ᠡᠷᠳᠡᠨᠢ ᠠ᠋! ᠡᠨᠡ ᠰᠠᠢᠨ ᠡᠷᠡ ᠴᠢᠨᠢ ᠸᠴᠢᠷᠪᠠᠲᠤ ᠭᠤᠸᠠᠢ ᠪᠠᠢᠨᠠ ᠰᠢᠳᠡ᠃ ᠡᠭᠦᠨ ᠦ᠌ ᠡᠮᠦᠨᠡ ᠡᠴᠡ ᠨᠣᠮᠣᠬᠠᠷᠠᠬᠤ ᠦᠭᠡᠢ ᠬᠢᠯᠭᠠᠰᠤᠨ ᠲᠡᠳᠦᠢ ᠵᠥᠷᠢᠬᠦ ᠶᠦᠮ ᠪᠣᠯ ᠴᠤ᠌ ᠪᠠᠯᠢᠩ ᠲᠠᠬᠢᠯ ᠢ᠋ᠶ᠋ᠠᠨ ᠬᠤᠷᠢᠶᠠᠨᠠ ᠭᠡᠰᠡᠨ ᠦᠭᠡ! ᠪᠠᠢᠰᠢᠩ ᠤ᠋ᠨ ᠰᠠᠷᠠᠪᠴᠢᠨ ᠤ᠋ ᠣᠨᠢᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠠᠯᠢ ᠶ᠋ᠢ ᠨᠢ ᠵᠢᠭᠠᠪᠠᠯ ᠲᠡᠷᠡ ᠶ᠋ᠢ ᠨᠢ ᠠᠨᠳᠠᠬᠤ ᠦᠭᠡᠢ ᠫᠤᠤᠳᠠᠳᠠᠭ ᠡᠷᠡ ᠶ᠋ᠢ ᠬᠡᠨ ᠮᠡᠳᠡᠬᠦ ᠦᠭᠡᠢ᠂ ᠬᠡᠨ ᠠᠶᠤᠬᠤ ᠦᠭᠡᠢ ᠪᠣᠢ⁈ ᠵᠠ᠂ ᠲᠡᠭᠡᠵᠦ ᠴᠦ᠍ ᠦᠬᠦᠯ ᠢ᠋ᠶ᠋ᠡᠨ ᠡᠷᠢᠬᠦ ᠪᠡᠨ ᠪᠣᠯᠢᠶᠠ! ᠡᠨᠡ ᠰᠢᠷᠦᠭᠦᠨ ᠬᠠᠷᠠ ᠶ᠋ᠢᠨ ᠡᠮᠦᠨᠡ ᠨᠣᠮᠣᠬᠠᠨ ᠯᠠ ᠪᠠᠢᠵᠤ ᠮᠡᠳᠡᠶᠡ᠃ ᠶᠠᠭᠠᠬᠢ ᠭᠡᠪᠡᠯ ᠶᠠᠭᠠᠬᠢᠵᠤ ᠥᠭᠭᠦᠶᠡ! ᠠᠮᠢ ᠲᠠᠢ ᠯᠠ ᠭᠠᠷᠪᠠᠯ ᠵᠠ ᠶᠠᠭᠠᠬᠢᠪᠠᠯ ᠶᠠᠭᠠᠬᠢᠭ ᠴᠠᠭᠠᠰᠢ! ᠢᠰᠢ᠂ ᠪᠦᠦ ᠦᠵᠡᠭᠳᠡ!》 ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠡᠪᠦᠳᠦᠭ ᠨᠢ ᠴᠡᠴᠡᠷᠡᠨ᠄
— ᠵᠠ᠁ ᠲᠠ᠁ ᠶᠠᠭᠤ? ᠶᠠᠮᠠᠷ᠁ ᠭᠡᠵᠦ ᠴᠣᠯᠴᠢᠷᠠᠨ ᠪᠠᠢᠯᠠ᠃
— ᠵᠠᠰᠠᠭ ᠲᠠᠮᠠᠭᠠ ᠬᠠᠮᠢᠭᠠ ᠪᠣᠢ?
— ᠵᠠᠰᠠᠭ ᠲᠠᠮᠠᠭᠠ᠁᠃ ᠵᠠᠰᠠᠭ ᠲᠠᠮᠠᠭᠠ ᠪᠠᠷᠠᠭᠰᠨᠤᠷᠪᠤ ᠯᠠᠮᠠᠬᠠᠢ ᠶ᠋ᠢᠨ ᠳᠣᠲᠣᠷᠠ ᠭᠡᠷ ᠲᠦ᠍᠁
ᠸᠴᠢᠷᠪᠠᠲᠤ ᠳᠠᠭᠠᠯᠳᠤᠭᠰᠠᠨ ᠴᠡᠷᠢᠭ ᠲᠡᠭᠡᠨ《ᠡᠳᠡᠨᠥᠰ ᠦ᠋ᠨ ᠫᠤᠤ ᠰᠤᠮᠤ ᠶ᠋ᠢ ᠬᠤᠷᠢᠶᠠᠵᠤ ᠴᠠᠭᠠᠰᠢ ᠶᠠᠪᠤᠭᠤᠯ!》 ᠭᠡᠰᠡᠨ ᠪᠢᠲᠡᠭᠦᠦ ᠳᠣᠬᠢᠶᠠ ᠥᠭᠴᠦ ᠲᠡᠨᠳᠡ ᠡᠴᠡ ᠭᠠᠷᠪᠠ᠃
ᠪᠠᠷᠠᠭᠰᠨᠤᠷᠪᠤ ᠯᠠᠮᠠᠬᠠᠢ ᠮᠠᠨᠠᠭᠠᠨ ᠤ᠋ ᠬᠣᠶᠠᠷ ᠴᠡᠷᠢᠭ ᠢ᠋《ᠬᠤᠷᠳᠤᠨ ᠪᠣᠰ》 ᠭᠡᠵᠦ ᠳᠠᠭᠤᠳᠠᠵᠤ ᠳᠣᠬᠢᠶᠠ ᠦᠭᠴᠢᠬᠡᠭᠡᠳ ᠲᠠᠮᠠᠭᠠ ᠶ᠋ᠢᠨ ᠲᠠᠬᠢᠯᠭᠠ ᠶ᠋ᠢᠨ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠵᠤ ᠣᠴᠢᠭᠠᠳ ᠪᠤᠷᠬᠠᠨ ᠤ᠋ ᠪᠠᠨ ᠡᠮᠦᠨᠡ ᠰᠥᠭᠥᠳᠴᠦ《ᠪᠤᠷᠬᠠᠨ ᠲᠩᠷᠢ ᠮᠢᠨᠢ ᠥᠷᠥᠰᠢᠶᠡᠵᠦ ᠬᠠᠢᠷᠠᠯᠠ! ᠡᠨᠡ ᠤᠯᠤᠰ ᠤ᠋ᠳ ᠴᠣᠬᠣᠮ ᠶᠠᠭᠤᠨ ᠤ᠋ ᠬᠥᠮᠦᠨ ᠶᠦᠮ ᠪᠣᠯ? ᠪᠤᠷᠬᠠᠨ᠂ ᠲᠠᠮᠠᠭᠠ᠂ ᠠᠮᠢ ᠭᠤᠷᠪᠠ ᠶ᠋ᠢ ᠮᠢᠨᠢ ᠬᠥᠨᠳᠡᠬᠦ ᠦᠭᠡᠢ ᠪᠣᠯ ᠵᠠ ᠶᠠᠭᠠᠬᠢᠪᠠᠯ ᠶᠠᠭᠠᠬᠢᠭ ᠴᠠᠭᠠᠰᠢ! ᠠ᠂ ᠭᠣᠩᠴᠤᠭᠰᠤᠮ》 ᠭᠡᠵᠦ ᠵᠠᠯᠪᠠᠷᠢᠨ ᠮᠥᠷᠭᠥᠨᠡ᠃ ᠲᠡᠷᠡ ᠮᠣᠷᠢᠲᠠᠳ ᠰᠦᠮᠡ ᠬᠦᠷᠢᠶᠡᠨ ᠳ᠋ᠦ᠍ ᠣᠷᠣᠵᠤ ᠢᠷᠡᠪᠡ ᠪᠣᠯᠤᠯᠲᠠᠢ᠂ ᠬᠠᠲᠠᠭᠤ ᠰᠢᠷᠢᠨ ᠤᠯᠠ ᠲᠠᠢ ᠰᠡᠪᠬᠢᠨ ᠭᠤᠲᠤᠯ ᠤ᠋ᠨ ᠲᠣᠭᠣᠰᠬᠠᠨ ᠱᠠᠯᠠ ᠳᠡᠭᠡᠭᠦᠷ ᠲᠢᠱ ᠲᠠᠱ ᠠᠯᠬᠤᠬᠤ ᠴᠢᠮᠡᠭᠡ ᠶᠠᠭ ᠯᠠ ᠲᠡᠭᠦᠨ ᠦ᠌ ᠦᠩᠬᠦᠯᠴᠡᠭ ᠳᠡᠭᠡᠭᠦᠷ ᠭᠢᠰᠬᠢᠯᠡᠬᠦ ᠮᠡᠲᠦ ᠠᠮᠢᠰᠬᠤᠬᠠ ᠳᠠᠪᠬᠤᠴᠠᠭᠤᠯᠤᠨᠠ᠁
ᠪᠠᠷᠠᠭᠰᠨᠤᠷᠪᠤ ᠯᠠᠮᠠᠬᠠᠢ ᠰᠢᠯ ᠨᠢᠭᠤᠷ ᠲᠠᠢ ᠰᠢᠷᠠ ᠠᠭᠠᠷᠤᠨ ᠵᠢᠵᠢᠭ ᠬᠣᠷᠭᠣᠯ ᠠ᠋ᠴᠠ ᠵᠠᠰᠠᠭ ᠲᠠᠮᠠᠭᠠ ᠶ᠋ᠢ ᠬᠢᠴᠢᠶᠡᠩᠭᠦᠢ ᠭᠠᠷᠭᠠᠵᠤ ᠴᠡᠩᠬᠡᠷ ᠬᠠᠳᠠᠭ ᠢ᠋ᠶ᠋ᠠᠷ ᠳᠠᠪᠬᠤᠷ ᠳᠠᠪᠬᠤᠷ ᠨᠢᠮᠪᠠᠢ ᠪᠠᠭᠯᠠᠵᠤ《ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠬᠠᠳᠠᠨ ᠬᠣᠩᠭᠢᠯ ᠳ᠋ᠤ᠌ ᠨᠢᠭᠤᠵᠤ ᠲᠠᠯᠪᠢᠶᠠ》 ᠭᠡᠵᠦ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠦᠯᠦ ᠰᠣᠨᠣᠰᠳᠠᠮᠠ ᠳᠦᠳᠦᠨᠡᠵᠦ ᠵᠠᠰᠠᠭ ᠲᠠᠮᠠᠭᠠ ᠪᠠᠨ ᠡᠪᠦᠷᠲᠦᠯᠡᠶᠡ ᠭᠡᠲᠡᠯᠡ ᠳᠣᠲᠣᠷᠠ ᠥᠷᠥᠭᠡᠨ ᠦ᠌ ᠡᠭᠦᠳᠡ ᠵᠢᠷᠳ᠋ ᠬᠢᠨ ᠨᠡᠭᠡᠭᠡᠭᠳᠡᠵᠦ᠄
— ᠪᠠᠷᠠᠭᠰᠨᠤᠷᠪᠤ ᠭᠤᠸᠠᠢ ᠠ᠋᠂ ᠰᠠᠢᠨ ᠪᠠᠢᠨᠠ ᠤᠤ? ᠪᠤᠷᠬᠠᠨ ᠳ᠋ᠠᠭᠠᠨ ᠵᠤᠯᠠ ᠡᠷᠭᠦᠵᠦ ᠪᠠᠢᠨᠠ ᠤᠤ ᠲᠠ! ᠭᠡᠰᠡᠨ ᠳ᠋ᠦ᠍ ᠲᠡᠷᠡ ᠰᠣᠴᠢᠵᠤ᠄
— ᠠ!᠁ ᠲᠡᠢᠮᠦ᠂ ᠲᠡᠢᠮᠦ! ᠰᠠᠢᠨ᠂ ᠰᠠᠢᠨ᠁ ᠲᠠᠨᠤᠰ ᠰᠠᠢᠨ ᠶᠠᠪᠤᠵᠠᠭᠠᠵᠤ ᠪᠠᠢᠨᠠ ᠤᠤ? ᠭᠡᠯᠡ᠃
— ᠡᠪᠦᠷ ᠤᠷᠤᠭᠤ ᠪᠠᠨ ᠶᠠᠭᠤ ᠴᠢᠬᠢᠵᠦ ᠪᠠᠢᠬᠤ ᠶᠤᠮ ᠪᠣᠢ? ᠭᠡᠵᠦ ᠵᠣᠳᠪᠡ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠪᠠᠷᠠᠭᠰᠨᠤᠷᠪᠤ ᠯᠠᠮᠠᠬᠠᠢ ᠤᠯᠠᠮ ᠰᠠᠨᠳᠤᠷᠴᠤ᠄
— ᠠ᠁ ᠪᠠᠢᠵᠠ! ᠵᠢᠭᠠᠬᠠᠨ ᠬᠦᠨᠡᠰᠦ ᠡᠪᠦᠷᠲᠦᠯᠡᠵᠦ ᠲᠦᠯᠡᠭᠡ ᠡᠭᠦᠷᠬᠦ ᠪᠡᠷ ᠶᠠᠪᠤᠬᠤ ᠶᠤᠮ ᠪᠠ ᠭᠡᠵᠦ ᠬᠠᠷᠢᠭᠤᠯᠤᠭᠰᠠᠨ ᠳ᠋ᠤ᠌ ᠵᠣᠳᠪᠡ᠄
— ᠡᠢᠮᠦ ᠥᠨᠳᠥᠷ ᠨᠠᠰᠤᠲᠠᠢ ᠪᠠᠢᠲᠠᠯᠠ ᠪᠠᠨ ᠥᠪᠡᠷ ᠢ᠋ᠶ᠋ᠡᠨ ᠲᠦᠯᠡᠭᠡ ᠮᠦᠯᠡᠭᠡ ᠡᠭᠦᠷᠦᠭᠡᠳ ᠶᠠᠭᠠᠬᠢᠬᠤ ᠭᠡᠰᠡᠨ ᠶᠦᠮ ᠪᠣᠢ?
— ᠠ᠁ ᠪᠠᠢᠵᠠ᠂ ᠪᠠᠢᠵᠠ! ᠬᠠᠶᠠ ᠬᠠᠶᠠ ᠠᠭᠤᠯᠠ ᠬᠠᠳᠠᠨ ᠳ᠋ᠤ᠌ ᠶᠠᠪᠤᠵᠤ ᠲᠦᠯᠡᠭᠡ ᠮᠣᠳᠣ ᠡᠭᠦᠷᠴᠦ ᠪᠠᠢᠪᠠᠯ ᠪᠡᠶᠡ ᠳ᠋ᠦ᠍ ᠰᠠᠢᠨ! ᠬᠤᠶᠠᠩ ᠰᠢᠷᠠ ᠤᠰᠤ ᠲᠠᠷᠬᠠᠵᠤ᠁ ᠭᠡᠵᠦ ᠬᠡᠯᠡᠬᠦ ᠶ᠋ᠢ ᠨᠢ ᠸᠴᠢᠷᠪᠠᠲᠤ ᠳᠤᠸᠠᠨᠵᠠᠩ ᠲᠠᠰᠤᠯᠵᠤ᠄
— ᠪᠤᠷᠬᠠᠨ ᠰᠠᠭᠠᠲᠠᠭᠠ ᠦᠭᠡᠢ ᠬᠣᠭᠣᠰᠣᠨ ᠬᠣᠷᠭᠣ ᠶ᠋ᠢ ᠠᠮᠢᠳᠤ ᠵᠤᠯᠠ ᠪᠠᠷ ᠳᠠᠬᠢᠳᠠᠭ ᠤᠤ? ᠭᠡᠯᠡ᠃
— ᠠ᠁ ᠪᠠᠢᠵᠠ᠂ ᠪᠠᠢᠵᠠ᠁ ᠲᠡᠷᠡ ᠤᠤ⁈ ᠭᠡᠵᠦ ᠪᠠᠷᠠᠭᠰᠨᠤᠷᠪᠤ ᠯᠠᠮᠠᠬᠠᠢ ᠠᠰᠠᠭᠰᠠᠨ ᠵᠤᠯᠠ ᠶ᠋ᠢ ᠫᠦᠳ᠋ ᠬᠢᠨ ᠦᠯᠢᠶᠡᠨ ᠤᠨᠲᠠᠷᠠᠭᠠᠵᠤ ᠸᠴᠢᠷᠪᠠᠲᠤ ᠶ᠋ᠢᠨ ᠡᠮᠦᠨᠡ ᠡᠴᠡ ᠭᠥᠯᠢᠷᠡᠨ ᠬᠠᠷᠠᠵᠤ ᠴᠠᠭᠠᠰᠢ ᠶᠠᠭᠤ ᠴᠦ᠍ ᠳᠤᠤᠭᠠᠷᠴᠤ ᠴᠢᠳᠠᠭᠰᠠᠨ ᠦᠭᠡᠢ ᠪᠦᠬᠦ ᠪᠡᠶᠡ ᠳ᠋ᠦ᠍ᠨᠢ ᠬᠦᠢᠲᠡᠨ ᠬᠥᠯᠥᠰᠥ ᠴᠢᠭᠢᠭᠯᠡᠪᠡ᠃
《ᠡᠨᠡ ᠪᠠᠷᠵᠠᠭᠠᠷ ᠰᠢᠷᠦᠭᠦᠨ ᠡᠷᠡ ᠶ᠋ᠢ ᠲᠡᠷᠰᠯᠡᠪᠡᠯ ᠴᠣᠬᠣᠮ ᠰᠠᠢᠨ ᠢ᠋ᠶ᠋ᠠᠨ ᠣᠯᠵᠤ ᠦᠵᠡᠬᠦ ᠦᠭᠡᠢ᠃ ᠵᠢᠭᠠᠬᠠᠨ ᠪᠠᠨᠳᠢ ᠪᠠᠢᠬᠤ ᠳ᠋ᠠᠭᠠᠨ ᠠᠪᠠᠭᠠ ᠯᠠᠮᠵᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠪᠢᠷᠭᠠ ᠶ᠋ᠢ ᠬᠤᠭᠤ ᠢᠰᠬᠦᠯᠳᠡᠭ ᠪᠠᠢᠭᠰᠠᠨ ᠬᠣᠢᠨᠠ ᠳᠠ! ᠲᠡᠭᠡᠬᠦ ᠡᠴᠡ ᠪᠠᠰᠠ ᠴᠡᠴᠡᠨ ᠫᠤᠤᠴᠢ ᠭᠡᠬᠦ ᠶ᠋ᠢ ᠨᠢ ᠶᠠᠷᠢᠬᠤ ᠤᠤ ᠳᠠ?＜ᠪᠤᠷᠬᠠᠨ ᠰᠠᠭᠠᠳᠠᠭᠠ ᠦᠭᠡᠢ ᠬᠣᠭᠣᠰᠣᠨ ᠬᠣᠷᠭᠣ ᠶ᠋ᠢ ᠠᠮᠢᠳᠤ ᠵᠤᠯᠠ ᠪᠠᠷ ᠳᠠᠬᠢᠳᠠᠭ ᠤᠤ?＞ ᠭᠡᠰᠡᠨ ᠨᠢ＜ᠡᠨᠡ ᠬᠣᠷᠭᠣᠨ ᠳ᠋ᠠᠬᠢ ᠵᠠᠰᠠᠭ ᠲᠠᠮᠠᠭᠠ ᠶᠠᠭᠠᠬᠢᠪᠠ? ᠨᠠᠭᠠᠰᠢ ᠠᠯᠢ!＞ ᠭᠡᠰᠡᠨ ᠦᠭᠡ ᠪᠢᠰᠢ ᠥᠭᠡᠷᠡ ᠶᠠᠭᠤ ᠪᠣᠢ?》 ᠭᠡᠵᠦ ᠪᠣᠳᠣᠵᠤ ᠠᠮᠵᠢᠭᠰᠠᠨ ᠪᠠᠷᠠᠭᠰᠨᠤᠷᠪᠤ ᠮᠠᠩᠨᠠᠢ ᠳ᠋ᠤᠨᠢ ᠪᠤᠷᠵᠢᠢᠭᠰᠠᠨ ᠬᠥᠯᠥᠰᠥ ᠪᠡᠨ ᠵᠦᠯᠭᠦᠬᠦ ᠳ᠋ᠦ᠍ ᠭᠠᠷ ᠨᠢ ᠴᠡᠴᠡᠷᠡᠨᠡ᠃
— ᠵᠠ ᠶᠠᠭᠠᠬᠢᠬᠤ ᠪᠣᠢ! ᠪᠠᠷᠠᠭᠰᠨᠤᠷᠪᠤ ᠭᠤᠸᠠᠢ ᠲᠠ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠤᠷᠠᠳ ᠢᠵᠠᠭᠤᠷ ᠲᠠᠢ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢ ᠰᠢᠲᠠ! ᠡᠭᠦᠨ ᠦ᠌ ᠬᠤᠪᠢ ᠳ᠋ᠤ᠌ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠠᠰᠠᠭ ᠲᠠᠮᠠᠭᠠ ᠶ᠋ᠢ ᠠᠰᠠᠷᠠᠨ ᠳᠠᠬᠢᠵᠤ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠮᠠᠭᠠᠯᠠᠵᠤ ᠪᠠᠢᠭᠠ ᠳ᠋ᠤ᠌ ᠭᠠᠪᠢᠶᠠ ᠲᠣᠭᠠᠴᠢᠯᠲᠠᠢ ᠶᠤᠮ ᠠ᠋! ᠵᠠᠰᠠᠭ ᠲᠠᠮᠠᠭᠠ ᠪᠠᠨ ᠭᠡᠵᠦ ᠬᠥᠮᠦᠨ ᠬᠠᠷᠠ ᠠ᠋ᠴᠠ ᠨᠢᠭᠤᠨ ᠳᠠᠯᠳᠠᠯᠠᠵᠤ《ᠲᠦᠯᠡᠭᠡ ᠡᠭᠦᠷᠦᠨᠡ》 ᠭᠡᠵᠦ ᠬᠤᠳᠠᠯ ᠬᠡᠯᠡᠭᠰᠡᠨ ᠢ᠋ ᠲᠠᠨᠢ ᠪᠢᠳᠡ ᠪᠤᠷᠤᠭᠤ ᠪᠠᠷ ᠦᠵᠡᠬᠦ ᠦᠭᠡᠢ᠃ ᠢᠩᠭᠢᠬᠦ ᠨᠢ ᠵᠥᠪ! ᠲᠡᠭᠡᠬᠦ ᠳ᠋ᠦ᠍ ᠥᠨᠥᠳᠥᠷ ᠪᠢᠳᠡ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠵᠠᠰᠠᠭ ᠤ᠋ᠨ ᠡᠮᠦᠨᠡ ᠡᠴᠡ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠶ᠋ᠢᠨ ᠵᠢᠭᠠᠪᠤᠷᠢ ᠪᠠᠷ ᠬᠦᠩ ᠦ᠋ᠨ《ᠵᠠᠰᠠᠭ ᠲᠠᠮᠠᠭᠠ》 ᠶ᠋ᠢ ᠵᠠᠰᠠᠭ ᠶᠠᠮᠤᠨ ᠳ᠋ᠤ᠌ ᠵᠠᠯᠠᠬᠤ ᠪᠠᠷ ᠶᠠᠪᠤᠭᠠ ᠨᠢ ᠡᠨᠡ! ᠭᠡᠵᠦ ᠵᠣᠳᠪᠡ ᠮᠡᠢᠷᠡᠨ ᠬᠡᠭ ᠭᠡᠭ ᠭᠡᠵᠦ ᠢᠨᠢᠶᠡᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠪᠠᠷᠠᠭᠰᠨᠤᠷᠪᠤ ᠯᠠᠮᠠᠬᠠᠢ ᠶ᠋ᠢᠨ ᠴᠢᠷᠠᠢ ᠲᠡᠨᠢᠢᠬᠦ ᠰᠢᠭ ᠪᠣᠯᠵᠤ ᠳᠣᠲᠣᠷᠠ ᠨᠢ ᠪᠠᠬᠠᠨ ᠲᠠᠯᠪᠢᠭᠤᠷᠠᠪᠠ᠃ ᠪᠠᠷᠠᠭᠰᠨᠤᠷᠪᠤ ᠯᠠᠮᠠᠬᠠᠢ ᠶᠢᠰᠦᠨ ᠵᠢᠩ ᠬᠦᠨᠳᠦ ᠵᠠᠰᠠᠭ ᠲᠠᠮᠠᠭᠠ ᠡᠪᠦᠷᠲᠦᠯᠡᠭᠰᠡᠨ ᠡᠴᠡ ᠬᠦᠨᠳᠦᠳᠡᠭᠰᠡᠨ ᠡᠩᠭᠡᠯᠵᠡᠭᠦᠷ ᠨᠢ ᠪᠦᠰᠡ ᠪᠡᠨ ᠳᠠᠪᠠᠵᠤ ᠲᠤᠯᠤᠮᠨᠠᠭᠰᠠᠨ ᠡᠪᠦᠷ ᠢ᠋ᠶ᠋ᠡᠨ ᠲᠡᠮᠲᠡᠷᠢᠵᠦ᠄
— ᠶᠠᠭ ᠳᠠ᠃ ᠵᠣᠳᠪᠡ ᠮᠡᠢᠷᠡᠨ ᠭᠤᠸᠠᠢ ᠶ᠋ᠢᠨ ᠬᠡᠯᠡᠬᠦ ᠵᠥᠪ! ᠪᠢ ᠵᠣᠳᠪᠡ ᠭᠤᠸᠠᠢ᠂ ᠸᠴᠢᠷᠪᠠᠲᠤ ᠳᠣᠸᠠᠨᠵᠡᠩ ᠢ᠋ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠢᠩᠭᠢᠵᠦ ᠢᠷᠡᠨᠡ ᠭᠡᠵᠦ ᠶᠡᠷᠦ ᠰᠠᠨᠠᠭᠰᠠᠨ ᠦᠭᠡᠢ ᠠ᠋! ᠲᠡᠷᠲᠡᠭᠡ ᠠᠢᠰᠤᠢ ᠪᠠᠷᠠ ᠪᠠᠷ ᠨᠢ ᠬᠠᠷᠢᠨ ᠬᠠᠷᠠ ᠴᠡᠷᠢᠭ ᠴᠦ᠍ ᠶᠦᠮ ᠤᠤ? ᠰᠢᠷᠠ ᠴᠡᠷᠢᠭ ᠴᠦ᠍ ᠶᠦᠮ ᠤᠤ? ᠪᠠᠰᠠ ᠲᠡᠭᠡᠪᠡᠯ ᠶᠠᠪᠤᠭᠤᠯ ᠤ᠋ᠨ ᠳᠡᠭᠡᠷᠡᠮ ᠦ᠋ᠳ ᠴᠦ᠍ ᠶᠦᠮ ᠤᠤ? ᠭᠡᠵᠦ ᠮᠠᠭᠤ ᠮᠠᠭᠤᠬᠠᠢ ᠶᠠᠭᠤᠮᠠ ᠰᠠᠨᠠᠵᠤ ᠵᠠᠰᠠᠭ ᠲᠠᠮᠠᠭᠠ ᠪᠠᠨ ᠬᠣᠢᠲᠤ ᠠᠭᠤᠯᠠ ᠶ᠋ᠢᠨ ᠬᠠᠳᠠᠨ ᠬᠣᠩᠭᠢᠯ ᠳ᠋ᠤ᠌ ᠨᠢᠭᠤᠵᠤ ᠲᠠᠯᠪᠢᠶᠠ ᠭᠡᠰᠡᠨ ᠮᠢᠨᠢ ᠡᠨᠡ! ᠭᠡᠵᠦ ᠮᠠᠰᠢ ᠠᠷᠭᠠ ᠪᠠᠷᠠᠭᠳᠠᠭᠰᠠᠨ ᠰᠢᠤᠬᠠᠨ ᠬᠡᠯᠡᠪᠡ᠃
— ᠵᠢᠯᠢᠭᠴᠢ ᠰᠢᠷᠠᠪᠳᠤᠷᠵᠢ ᠬᠦᠩ ᠦ᠋ᠨ ᠦᠶᠡ ᠪᠢᠰᠢ ᠪᠣᠯᠵᠠᠢ ᠠ᠋! ᠴᠠᠭ ᠲᠥᠷᠥ ᠬᠤᠪᠢᠷᠠᠵᠤ ᠪᠠᠢᠨᠠ᠃ ᠡᠮᠦᠨᠡ ᠬᠡᠳᠦᠨ ᠵᠢᠯ ᠪᠡᠯᠪᠡᠰᠦᠨ ᠡᠮᠡ ᠶ᠋ᠢᠨ ᠭᠠᠷ ᠲᠤ ᠵᠠᠰᠠᠭ ᠲᠠᠮᠠᠭᠠ ᠮᠠᠨᠢ ᠪᠤᠵᠠᠷ ᠰᠠᠭᠤᠵᠤ ᠦᠢᠯᠡ ᠪᠡᠨ ᠦᠵᠡᠯᠡ᠁ ᠣᠳᠣ ᠵᠢᠩᠬᠢᠨᠢ ᠤᠷᠠᠳ ᠶᠠᠰᠤᠲᠠᠨ ᠤ᠋ ᠲᠠᠢᠵᠢ ᠢᠵᠠᠭᠤᠷᠲᠠᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠠᠰᠠᠭ ᠲᠠᠮᠠᠭᠠ ᠶ᠋ᠢ ᠡᠵᠡᠨ ᠮᠡᠳᠡᠬᠦ ᠴᠠᠭ ᠢᠷᠡᠭᠰᠡᠨ ᠢ᠋ ᠲᠠ ᠵᠥᠪ ᠣᠢᠯᠠᠭᠠᠭᠠᠷᠠᠢ! ᠭᠡᠵᠦ ᠵᠤᠳᠪᠡ ᠮᠡᠢᠷᠡᠨ ᠢᠨᠢᠶᠡᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠪᠠᠷᠠᠭᠰᠨᠤᠷᠪᠤ ᠯᠠᠮᠠᠬᠠᠢ᠄
— ᠵᠠ᠂ ᠲᠡᠢᠮᠦ ᠪᠣᠯᠲᠤᠭᠠᠢ! ᠲᠡᠢᠮᠦ ᠪᠣᠯ ᠡᠨᠡ ᠲᠠᠮᠠᠭᠠ ᠶ᠋ᠢ ᠲᠠ ᠬᠣᠶᠠᠷ ᠲᠤ ᠳᠡᠭᠡᠳᠦᠯᠡᠨ ᠲᠤᠰᠢᠶᠠᠶᠠ! ᠭᠡᠳ ᠡᠪᠦᠷ ᠳᠠᠬᠢ ᠵᠠᠰᠠᠭ ᠲᠠᠮᠠᠭᠠ ᠶ᠋ᠢ ᠭᠠᠷᠭᠠᠵᠤ᠂ ᠳᠠᠪᠬᠤᠷ ᠳᠠᠪᠬᠤᠷ ᠪᠠᠭᠯᠠᠭᠰᠠᠨ ᠬᠠᠳᠠᠭ ᠢ᠋ ᠴᠤᠴᠠᠯᠤᠨ᠂ ᠵᠠᠰᠠᠭ ᠲᠠᠮᠠᠭᠠ ᠶ᠋ᠢ ᠰᠢᠯ ᠨᠢᠭᠤᠷ ᠲᠠᠢ ᠰᠢᠷᠠ ᠠᠭᠠᠷᠤᠨ ᠬᠣᠷᠭᠣ ᠳ᠋ᠤᠨᠢ ᠰᠠᠭᠠᠲᠠᠭᠤᠯᠵᠤ᠂《ᠵᠠ᠂ ᠪᠠᠢᠵᠠ ᠳᠠ! ᠪᠢ ᠳᠠᠬᠢᠵᠤ ᠨᠢᠭᠡ ᠵᠤᠯᠠ ᠠᠰᠠᠭᠠᠵᠤ ᠠᠮᠢᠯᠠᠭᠤᠯᠤᠶᠠ》 ᠭᠡᠳ ᠴᠠᠭᠠᠳᠤ ᠭᠠᠤᠯᠢᠨ ᠭᠠᠷᠠᠬᠠ ᠲᠠᠢ ᠱᠦᠭᠦᠢ ᠶ᠋ᠢᠨ ᠪᠠᠷᠠᠭᠤᠨ ᠨᠢᠳᠦ ᠶ᠋ᠢ ᠲᠠᠲᠠᠵᠤ ᠭᠤᠷᠪᠠᠨ ᠲᠠᠬᠢᠯ ᠭᠠᠷᠭᠠᠨ ᠡᠷᠭᠦᠵᠦ《ᠪᠠᠷᠰ ᠤ᠋ᠨ ᠰᠦᠷ ᠪᠠᠳᠠᠷᠠᠭᠰᠠᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠠᠰᠠᠭ ᠲᠠᠮᠠᠭᠠ ᠮᠢᠨᠢ ᠡᠩᠬᠡ ᠠᠮᠤᠭᠤᠯᠠᠩ ᠢ᠋ᠶ᠋ᠠᠷ ᠡᠵᠡᠨ ᠳ᠋ᠡᠭᠡᠨ ᠪᠤᠴᠠᠭᠠᠷᠠᠢ! ᠤᠸᠮ ᠮᠠ ᠨᠢ ᠪᠠᠳ ᠮᠠᠢ ᠬᠣᠩ!》 ᠭᠡᠵᠦ ᠤᠩᠰᠢᠨ ᠪᠠᠷᠰ ᠤ᠋ᠨ ᠲᠣᠯᠣᠭᠠᠢ ᠶ᠋ᠢᠨ ᠬᠡ ᠤᠷᠠᠯᠠᠭᠰᠠᠨ ᠰᠢᠯ ᠨᠢᠭᠤᠷ ᠲᠠᠢ ᠰᠢᠷᠠ ᠠᠭᠠᠷᠤᠨ ᠬᠣᠷᠭᠣ ᠶ᠋ᠢ ᠬᠢᠴᠢᠶᠡᠩᠭᠦᠢᠯᠡᠨ ᠡᠷᠭᠦᠵᠦ ᠵᠤᠳᠪᠠ ᠮᠡᠢᠷᠡᠨ᠂ ᠸᠴᠢᠷᠪᠠᠲᠤ ᠲᠤᠸᠡᠨᠵᠠᠩ ᠳ᠋ᠤ᠌ ᠪᠠᠷᠢᠪᠠ᠃
ᠶᠣᠰᠣᠲᠠᠢ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠶ᠋ᠢᠨ ᠬᠡᠯᠡᠳᠡᠭ ᠢ᠋ᠶ᠋ᠡᠷ《᠁ ᠳᠣᠲᠣᠷᠠ ᠵᠠᠭᠤᠷᠠ ᠪᠠᠨ ᠪᠣᠯᠬᠤ ᠶ᠋ᠢᠨ ᠳᠣᠲᠣᠷᠠ ᠫᠤᠤ ᠰᠤᠮᠤ ᠬᠥᠳᠡᠯᠭᠡᠬᠦ ᠦᠭᠡᠢ ᠡᠪᠯᠡᠵᠦ ᠠᠪᠬᠤ ᠶ᠋ᠢ ᠪᠣᠳᠣ!》 ᠭᠡᠰᠡᠨ ᠢ᠋ᠶ᠋ᠡᠷ ᠵᠤᠳᠪᠠ ᠮᠡᠢᠷᠡᠨ᠂ ᠸᠴᠢᠷᠪᠠᠲᠤ ᠲᠤᠸᠡᠨᠵᠠᠩ ᠨᠠᠷ ᠵᠠᠰᠠᠭ ᠲᠠᠮᠠᠭᠠ ᠶ᠋ᠢ ᠡᠪᠲᠡᠢ ᠰᠠᠢᠬᠠᠨ ᠭᠠᠷᠳᠠᠵᠤ ᠠᠪᠤᠭᠠᠳ ᠵᠡᠷ ᠵᠡᠪᠰᠡᠭ ᠦ᠋ᠨ ᠴᠢᠮᠡᠭ ᠲᠡᠢ ᠴᠡᠷᠢᠭ ᠬᠤᠪᠴᠠᠰᠤ ᠲᠠᠢ ᠳᠠᠭᠠᠯᠲᠠ ᠨᠤᠭᠤᠳ ᠢ᠋ᠶ᠋ᠠᠨ ᠵᠠᠬᠢᠷᠴᠤ ᠰᠤᠪᠤᠷᠭᠠ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠬᠦᠷᠢᠶᠡ ᠪᠡᠷ ᠳᠥᠷᠪᠡᠯᠵᠢᠨ ᠠᠯᠬᠤᠭᠠ ᠪᠠᠷ ᠭᠠᠷᠴᠤ ᠶᠠᠪᠤᠬᠤ ᠶ᠋ᠢ ᠪᠠᠷᠠᠭᠰᠨᠤᠷᠪᠤ ᠯᠠᠮᠠᠬᠠᠢ ᠬᠠᠷᠠᠭᠠᠳ ᠳᠣᠲᠣᠷᠠ ᠨᠢ ᠨᠢᠭᠡ ᠯᠡ ᠬᠣᠭᠣᠰᠣᠷᠠᠨ ᠬᠣᠴᠣᠷᠴᠠᠢ᠁
— — — —
① ᠬᠠᠭᠤᠴᠢᠨ ᠳ᠋ᠤ᠌ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠠᠰᠠᠭ ᠲᠠᠮᠠᠭᠠ ᠶ᠋ᠢ ᠵᠤᠯᠠ ᠪᠠᠷᠢᠵᠤ ᠳᠠᠬᠢᠳᠠᠭ ᠪᠠᠢᠵᠠᠢ᠃
② ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠠᠰᠠᠭ ᠲᠠᠮᠠᠭᠠ ᠪᠣᠯ ᠡᠩᠬᠡ ᠠᠮᠤᠭᠤᠯᠠᠩ ᠤ᠋ᠨ ᠬᠣᠷᠢᠨ ᠨᠠᠢ᠍ᠮᠠᠳᠤᠭᠠᠷ ᠣᠨ ᠳ᠋ᠤ᠌ ᠣᠯᠭᠣᠭᠰᠠᠨ ᠶᠢᠰᠦᠨ ᠵᠢᠩ ᠬᠦᠨᠳᠦ ᠴᠣᠯ ᠮᠥᠩᠭᠥᠨ ᠲᠠᠮᠠᠭᠠ᠃
③ ᠲᠠᠩᠭᠤᠳ ᠴᠣᠣᠵᠢ᠃