ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠭᠤᠲᠠᠭᠠᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠲᠠᠪᠤ> Хан мунын сүүрс < доорд > – Мөнх зохиоов ᠂ Гутгаар бодь – Нэгдүгээр бүлэг <5>
342 ᠪᠠᠭᠠ ᠬᠠᠲᠤᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠠᠰᠠᠭ ᠢ᠋ᠶ᠋ᠠᠨ ᠬᠠᠶᠠᠵᠤ᠂ ᠸᠠᠩ ᠰᠣᠬᠣᠷ ᠤ᠋ᠨ ᠬᠠᠷᠠ ᠴᠡᠷᠢᠭ ᠢ᠋ ᠨᠥᠮᠥᠷᠢᠳᠡᠬᠦ ᠪᠡᠷ ᠪᠠᠷᠠᠭᠤᠨᠰᠢ ᠪᠠᠨ ᠬᠠᠩᠬᠠᠲᠠᠢ ᠶ᠋ᠢᠨ ᠰᠢᠯᠢ ᠤᠷᠤᠭᠤ ᠶᠠᠪᠤᠴᠢᠬᠠᠯᠠ ᠭᠡᠰᠡᠨ ᠶᠠᠪᠠᠭᠠᠨ ᠴᠤᠤ ᠲᠠᠷᠬᠠᠵᠤ ᠬᠥᠮᠦᠨ ᠪᠣᠯᠭᠠᠨ ᠤ᠋ ᠴᠢᠬᠢᠨ ᠦ᠌ ᠬᠤᠯᠤᠭᠤ ᠶ᠋ᠢ ᠬᠠᠳᠬᠤᠭᠰᠠᠨ ᠶᠣᠣᠵᠠ ᠦᠭᠡᠢ ᠶᠠᠭᠤᠮᠠ ᠪᠣᠯᠵᠤ ᠬᠥᠮᠦᠰ ᠬᠡᠯᠡᠯᠴᠡᠨᠡ᠃
— ᠵᠠ᠂ ᠪᠣᠯᠵᠤ ᠳᠠ᠂ ᠡᠨᠡ ᠮᠠᠭᠤ ᠬᠡᠭᠡᠯ ᠲᠣᠭᠲᠠᠳᠠᠭ ᠦᠭᠡᠢ ᠰᠤᠪᠠᠢ ᠦᠨᠢᠶᠡ ᠰᠢᠯᠢᠷᠡᠵᠦ ᠶᠠᠪᠤᠭᠰᠠᠨ ᠨᠢ ᠬᠠᠷᠢᠨ ᠳᠡᠭᠡᠷᠡ᠁
— ᠡᠨᠡ ᠪᠡᠯᠭᠡ ᠥᠬᠡᠢ ᠪᠡᠯᠪᠡᠰᠦᠨ ᠡᠮᠡ ᠶ᠋ᠢᠨ ᠰᠦᠨᠡᠰᠦ ᠡᠷᠲᠡᠬᠡᠨ ᠰᠢᠭ ᠴᠠᠭᠠᠰᠢ ᠪᠠᠨ ᠲᠣᠨᠢᠯᠤᠭ! ᠡᠭᠦᠨ ᠦ᠌ ᠤᠷᠰᠢᠭ ᠢ᠋ᠶ᠋ᠠᠷ ᠮᠠᠨ ᠤ᠋ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠵᠠᠳᠠᠷᠠᠵᠤ ᠭᠦᠢᠴᠡᠭᠰᠡᠨ ᠠ᠋! ᠲᠡᠭᠡᠭᠡᠳ ᠵᠠᠰᠠᠭ ᠶᠠᠮᠤᠨ ᠳᠣᠲᠣᠷᠠ ᠪᠠᠨ ᠡᠪᠳᠡᠷᠡᠯᠴᠡᠵᠦ᠂ ᠦᠬᠦᠳᠡᠭ ᠨᠢ ᠦᠬᠦᠵᠦ᠂ ᠰᠠᠷᠨᠢᠳᠠᠭ ᠨᠢ ᠰᠠᠷᠨᠢᠵᠤ ᠠᠵᠢᠷᠭᠠ ᠦᠭᠡᠢ ᠠᠳᠤᠭᠤᠨ ᠰᠦᠷᠦᠭ ᠰᠢᠭ ᠪᠣᠯᠤᠭᠰᠠᠨ ᠶᠤᠮ ᠴᠢᠨᠢ ᠤᠨᠠᠭᠠ ᠰᠠᠷᠪᠠ ᠪᠠᠨ ᠴᠢᠨᠣᠠ ᠳ᠋ᠤ᠌ ᠲᠠᠲᠠᠭᠤᠯᠳᠠᠭ ᠨᠢ ᠶᠠᠮᠠᠷ ᠰᠠᠢᠨ ᠳ᠋ᠠᠭᠠᠨ ᠪᠣᠢ⁈ ᠭᠡᠴᠢᠬᠡᠬᠦ ᠳ᠋ᠦ᠍ ᠵᠠᠷᠢᠮ ᠨᠢ ᠪᠠᠰᠠ᠄
— ᠬᠡᠦᠬᠡᠳ ᠰᠢᠤᠬᠠᠳ ᠳᠠᠭᠠᠭᠤᠯᠤᠭᠰᠠᠨ ᠪᠡᠲᠡᠷᠡᠩᠭᠦᠢ ᠪᠡᠯᠪᠡᠰᠦᠨ ᠪᠦᠰᠡᠭᠦᠢ ᠶ᠋ᠢ ᠸᠠᠩ ᠰᠣᠬᠣᠷ ᠤ᠋ᠨ ᠬᠢᠨ ᠶᠠᠭᠠᠬᠢᠳᠠᠭ ᠴᠦ᠍ ᠪᠣᠯ ᠳᠠ!
— ᠰᠢᠷᠠ ᠴᠡᠷᠢᠭ ᠡᠴᠡ ᠵᠠᠢᠯᠠᠪᠠ ᠭᠡᠳ ᠪᠠᠷᠰ ᠤ᠋ᠨ ᠠᠮᠠᠨ ᠠ᠋ᠴᠠ ᠮᠤᠯᠲᠤᠷᠠᠵᠤ ᠴᠢᠨᠣᠠ ᠶ᠋ᠢᠨ ᠢᠳᠡᠰᠢ ᠪᠣᠯᠤᠭᠰᠠᠨ ᠠ᠋ᠴᠠ ᠳᠤᠲᠠᠬᠤ ᠦᠭᠡᠢ ᠠ᠋!
— ᠣᠳᠣ ᠲᠡᠭᠡᠭᠡᠳ ᠮᠠᠨ ᠤ᠋ ᠪᠠᠷᠠᠭᠤᠨ ᠬᠦᠩ ᠳ᠋ᠦ᠍ ᠶᠣᠰᠣᠲᠠᠢ ᠵᠠᠰᠠᠭ ᠦᠭᠡᠢ ᠶᠠᠮᠤᠨ᠂ ᠵᠠᠩᠵᠤᠨ ᠦᠭᠡᠢ ᠴᠡᠷᠢᠭ ᠪᠣᠯᠴᠢᠬᠠᠵᠠᠢ᠃ ᠬᠠᠷᠠ ᠴᠡᠷᠢᠭ ᠨᠢ ᠳᠠᠯᠳᠠᠷᠠᠬᠤ ᠲᠠᠢ ᠵᠡᠷᠭᠡ ᠰᠢᠷᠠ ᠴᠡᠷᠢᠭ ᠨᠢ ᠪᠣᠰᠤᠭᠠᠳ ᠢᠷᠡᠳᠡᠭ ᠡᠨᠡ ᠬᠣᠷᠸᠠ ᠳ᠋ᠤ᠌ ᠡᠭᠡᠯ ᠠᠷᠠᠳ ᠶᠡᠷᠦ ᠨᠢ ᠠᠮᠤᠷ ᠵᠢᠮᠦᠷ ᠪᠠᠢᠵᠤ ᠴᠢᠳᠠᠬᠤ ᠪᠠᠨ ᠪᠠᠢᠵᠠᠢ ᠭᠡᠵᠦ ᠡᠨᠡᠷᠢᠵᠦ ᠬᠡᠯᠡᠳᠡᠭ ᠨᠢ ᠴᠦ᠍ ᠪᠣᠢ᠃
ᠵᠠᠰᠠᠭ ᠦᠭᠡᠢ ᠶᠠᠮᠤᠨ᠂ ᠵᠠᠩᠵᠤᠨ ᠦᠭᠡᠢ ᠴᠡᠷᠢᠭ ᠭᠡᠵᠦ ᠡᠭᠡᠯ ᠠᠷᠠᠳ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠪᠠᠨ ᠰᠠᠨᠠᠭᠠᠰᠢᠷᠠᠳᠠᠭ ᠤ᠋ᠨ ᠢᠷᠣᠠ ᠪᠠᠷ ᠰᠢᠷᠠ ᠴᠡᠷᠢᠭ ᠨᠤᠲᠤᠭ ᠡᠵᠡᠮᠳᠡᠵᠦ᠂ ᠪᠠᠰᠠ ᠪᠠᠷᠠᠭᠤᠨᠰᠢ ᠳᠠᠭᠠᠷᠢᠨ ᠪᠣᠷᠣᠳᠣᠬᠣᠢ ᠶ᠋ᠢᠨ ᠬᠠᠷᠠ ᠴᠡᠷᠢᠭ ᠢ᠋ ᠴᠣᠬᠢᠬᠤ ᠲᠤᠯᠤᠯᠳᠤᠭᠠᠨ ᠪᠣᠯᠪᠠ᠃
ᠬᠠᠰᠠᠭ ᠤ᠋ᠨ ᠣᠷᠣᠮ ᠢ᠋ᠶ᠋ᠠᠷ ᠵᠤᠷᠠᠢᠭᠰᠠᠨ ᠰᠢᠷᠠ ᠵᠠᠮ ᠢ᠋ ᠪᠠᠷᠢᠵᠤ ᠪᠠᠷᠠᠭᠤᠨᠰᠢ ᠴᠡᠷᠢᠭᠯᠡᠭᠰᠡᠨ ᠰᠢᠷᠠ ᠴᠡᠷᠢᠭ ᠦ᠋ᠳ ᠰᠢᠭᠤᠳ ᠶᠠᠪᠤᠵᠤ ᠬᠠᠩᠬᠠᠲᠠᠢ ᠶ᠋ᠢᠨ ᠵᠣ ᠶ᠋ᠢ ᠵᠣᠷᠢᠨ ᠴᠤᠪᠤᠷᠠᠨᠠ᠁
ᠨᠠᠷᠢᠨ ᠬᠦᠵᠦᠭᠦᠦ ᠲᠡᠢ᠂ ᠥᠨᠳᠥᠷ ᠴᠡᠭᠡᠵᠢ ᠲᠡᠢ ᠵᠡᠭᠡᠷᠳᠡ ᠵᠢᠰᠦᠮ ᠦ᠋ᠨ ᠮᠣᠷᠢ ᠤᠨᠤᠭᠰᠠᠨ ᠰᠢᠷᠠ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠲᠦᠷᠦᠭᠦᠲᠠᠢ ᠴᠥᠭᠡᠪᠦᠷ ᠮᠣᠷᠢᠨ ᠴᠡᠷᠢᠭ ᠦ᠋ᠨ ᠠᠷᠤ ᠠ᠋ᠴᠠ ᠰᠤᠪᠤᠷᠠᠭᠰᠠᠨ ᠰᠢᠷᠠ ᠴᠡᠷᠢᠭ ᠦ᠋ᠳ ᠰᠢᠷᠠ ᠰᠢᠷᠭᠤᠯᠵᠢ ᠰᠢᠭ᠋ ᠮᠥᠷ ᠮᠥᠷ ᠢ᠋ᠶ᠋ᠡᠨ ᠭᠢᠰᠬᠢᠨ ᠶᠠᠪᠤᠨᠠ᠃ ᠲᠡᠷᠡ ᠨᠢ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠮᠣᠳᠣ᠂ ᠠᠩ ᠬᠦᠷᠦᠭᠡ᠂ ᠡᠳ᠋ ᠠᠭᠤᠷᠰᠤ ᠪᠠ ᠬᠠᠩᠬᠠᠲᠠᠢ ᠵᠣ ᠶ᠋ᠢᠨ ᠤᠰᠤᠨ ᠲᠠᠷᠢᠶᠠ ᠳ᠋ᠤ᠌ ᠰᠢᠨᠤᠬᠠᠢᠷᠠᠵᠤ ᠶᠠᠪᠤᠭᠠ ᠠᠵᠢ᠃
ᠰᠢᠷᠠ ᠴᠡᠷᠢᠭ ᠦ᠋ᠨ ᠬᠥᠳᠡᠯᠦᠯ ᠬᠠᠨᠳᠤᠰᠢ ᠶ᠋ᠢ ᠢᠮᠠᠭᠲᠠ ᠴᠠᠭᠳᠠᠵᠤ ᠪᠠᠢᠳᠠᠭ ᠬᠠᠷᠠ ᠴᠡᠷᠢᠭ ᠦ᠋ᠨ ᠴᠠᠭᠳᠠᠭᠤᠯ ᠰᠢᠷᠠ ᠴᠡᠷᠢᠭ ᠦ᠋ᠨ ᠪᠠᠷᠠᠭᠤᠨᠰᠢ ᠪᠣᠷᠣᠳᠣᠬᠣᠢ ᠣᠷᠣᠨ ᠵᠦᠭ ᠴᠡᠷᠢᠭᠯᠡᠭᠰᠡᠨ ᠪᠠᠲᠤᠲᠠᠢ ᠴᠢᠮᠡᠭᠡ ᠶ᠋ᠢ ᠸᠠᠩ ᠰᠣᠬᠣᠷ ᠲᠤ ᠰᠣᠨᠣᠰᠬᠠᠭᠰᠠᠨ ᠳ᠋ᠤ᠌ ᠲᠡᠷᠡ ᠪᠡᠷ ᠪᠠᠭᠠ ᠬᠠᠲᠤᠨ ᠰᠡᠷᠭᠦᠮᠡ ᠶ᠋ᠢ ᠳᠠᠭᠤᠳᠠᠵᠤ᠄
— ᠰᠡᠷᠭᠦᠮᠡ ᠴᠢ ᠮᠣᠷᠢᠨ ᠴᠡᠷᠢᠭ ᠢ᠋ᠶ᠋ᠡᠨ ᠵᠠᠬᠢᠷᠴᠤ ᠰᠢᠷᠠ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠲᠤᠯᠵᠤ ᠪᠠᠢᠯᠳᠤᠭᠠᠷᠠᠢ! ᠪᠢ ᠪᠠᠷᠠᠭᠤᠨᠰᠢ ᠤᠬᠤᠷᠢᠵᠤ᠁ ᠭᠡᠵᠦ ᠬᠡᠯᠡᠲᠡᠯᠡ ᠰᠡᠷᠭᠦᠮᠡ ᠸᠠᠩ ᠰᠣᠬᠣᠷ ᠤ᠋ᠨ ᠦᠭᠡ ᠶ᠋ᠢ ᠲᠠᠰᠤᠯᠤᠨ᠄
— ᠮᠢᠨᠦ ᠬᠡᠳᠦᠨ ᠮᠣᠷᠢᠨ ᠴᠡᠷᠢᠭ ᠰᠢᠷᠠ ᠴᠡᠷᠢᠭ ᠦ᠋ᠨ ᠰᠢᠷᠦᠭᠦᠨ ᠳᠠᠭᠠᠷᠢᠯᠲᠠ ᠳ᠋ᠤ᠌ ᠶᠠᠭᠤ ᠪᠣᠯᠬᠤ ᠪᠣᠢ? ᠭᠡᠵᠦ ᠳᠤᠷᠠ ᠦᠭᠡᠢᠴᠡᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠸᠠᠩ ᠰᠣᠬᠣᠷ᠄
— ᠪᠢ ᠡᠨᠡ ᠬᠡᠳᠦᠨ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠰᠢᠷᠠ ᠴᠡᠷᠢᠭ ᠦ᠋ᠨ ᠪᠥᠭᠯᠡᠭᠡ ᠪᠣᠯᠭᠠᠨᠠ ᠭᠡᠰᠡᠨ ᠤᠴᠢᠷ ᠪᠢᠰᠢ ᠠ᠋! ᠭᠡᠨᠡ᠃
— ᠲᠡᠭᠡᠭᠡᠳ ᠶᠠᠭᠠᠬᠢᠬᠤ ᠭᠡᠰᠡᠨ ᠰᠠᠨᠠᠭᠠ ᠲᠠᠢ ᠶᠤᠮ? ᠡᠨᠡ ᠵᠠᠭᠤ ᠬᠦᠷᠬᠦ ᠦᠭᠡᠢ ᠮᠣᠷᠢᠨ ᠴᠡᠷᠢᠭ ᠰᠢᠷᠠ ᠴᠡᠷᠢᠭ ᠢ᠋ ᠶᠠᠭᠠᠬᠢᠵᠤ ᠲᠤᠯᠤᠨ ᠪᠠᠢᠯᠳᠤᠬᠤ ᠪᠣᠢ? ᠲᠤᠯᠵᠤ ᠲᠡᠢᠯᠬᠦ ᠪᠠᠢᠭᠰᠠᠨ ᠪᠣᠯ ᠪᠢ ᠶᠠᠭᠤ ᠭᠡᠵᠦ ᠨᠤᠲᠤᠭ ᠤᠰᠤ ᠪᠠᠨ ᠣᠷᠬᠢᠵᠤ ᠲᠠᠨ ᠢ᠋ ᠲᠦᠰᠢᠷᠡ ᠢᠷᠡᠬᠦ ᠪᠢᠯᠡ⁈
— ᠰᠡᠷᠭᠦᠮᠡ ᠲᠠ ᠠᠭᠤᠷ ᠢ᠋ᠶ᠋ᠠᠨ ᠳᠠᠷᠤ! ᠲᠠ ᠪᠣᠯ ᠴᠡᠷᠢᠭ ᠬᠥᠮᠦᠨ ᠰᠢᠦ ᠳᠡ! ᠮᠢᠨᠦ ᠬᠡᠯᠡᠵᠦ ᠪᠠᠷᠠᠬᠤ ᠶ᠋ᠢ ᠰᠣᠨᠣᠰᠤᠭᠠᠷᠠᠢ! ᠲᠠ ᠮᠣᠷᠢᠲᠤ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠢᠴᠢᠯᠠᠨ ᠰᠢᠷᠠ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠪᠠᠢᠯᠳᠤᠬᠤ ᠳᠦᠷᠢ ᠦᠵᠡᠭᠦᠯᠵᠦ ᠥᠳᠥᠭᠡᠭᠡᠳ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠥᠪᠡᠭᠡ ᠤᠷᠤᠭᠤ ᠣᠷᠣᠭᠤᠯᠪᠠᠯ ᠪᠢ ᠴᠠᠭᠠᠨᠠ ᠠ᠋ᠴᠠ ᠨᠢ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠤᠰᠤ ᠶ᠋ᠢ ᠦᠶᠡᠷᠯᠡᠭᠦᠯᠵᠦ ᠰᠢᠷᠠ ᠴᠡᠷᠢᠭ ᠢ᠋ ᠫᠤᠤ ᠰᠤᠮᠤ ᠦᠷᠡᠭᠡᠬᠦ ᠦᠭᠡᠢ ᠪᠡᠷ ᠰᠥᠨᠥᠭᠡᠵᠦ᠂ ᠣᠮᠣᠭ ᠰᠦᠷ ᠢ᠋ ᠨᠢ ᠳᠠᠷᠤᠵᠤ ᠣᠷᠬᠢᠨᠠ᠃ ᠣᠢᠯᠠᠭᠠᠪᠠ ᠤᠤ? ᠬᠠ᠂ ᠬᠠ᠁ ᠭᠡᠵᠦ ᠢᠨᠢᠶᠡᠨ ᠬᠠᠯᠵᠠᠨ ᠮᠠᠩᠨᠠᠢ ᠪᠠᠨ ᠢᠯᠢᠨᠡ᠃
ᠪᠠᠭᠠ ᠬᠠᠲᠤᠨ ᠸᠠᠩ ᠰᠣᠬᠣᠷ ᠤ᠋ᠨ ᠢᠩᠭᠢᠵᠦ ᠶᠠᠷᠢᠭᠰᠠᠨ ᠢ᠋ ᠰᠣᠨᠣᠰᠤᠭᠠᠳ ᠰᠢᠷᠠ ᠴᠡᠷᠢᠭ ᠢ᠋ ᠪᠠᠢᠯᠳᠤᠨ ᠰᠥᠨᠥᠭᠡᠬᠦ ᠠᠷᠭᠠ ᠤᠬᠠᠭᠠᠨ ᠢ᠋ ᠵᠥᠪᠰᠢᠶᠡᠬᠦ ᠪᠣᠯᠪᠠᠴᠤ ᠮᠢᠩᠭᠠ ᠲᠦᠮᠡᠨ ᠴᠡᠷᠢᠭ ᠳᠣᠲᠣᠷᠠ ᠠ᠋ᠴᠠ ᠵᠠᠪᠠᠯ ᠡᠨᠡ ᠴᠥᠭᠡᠪᠦᠷ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠡᠮᠦᠨᠡ ᠪᠡᠨ ᠪᠠᠷᠢᠳᠠᠭ ᠮᠠᠭᠤ ᠤᠬᠠᠭᠠᠨ ᠢ᠋ ᠲᠣᠭᠣᠬᠤ ᠦᠭᠡᠢ ᠴᠦ᠍ ᠭᠡᠰᠡᠨ ᠴᠡᠷᠢᠭ ᠬᠥᠮᠦᠨ ᠪᠣᠯᠬᠣᠷ ᠴᠡᠷᠢᠭ ᠦ᠋ᠨ ᠵᠠᠷᠯᠢᠭ ᠢ᠋ ᠬᠦᠯᠢᠶᠡᠳᠡᠭ ᠯᠡ ᠶᠠᠪᠤᠳᠠᠯ ᠭᠡᠵᠦ ᠪᠣᠳᠣᠨ᠄
— ᠵᠠ᠂ ᠨᠣᠶᠠᠨ ᠤ᠋ ᠵᠠᠷᠯᠢᠭ ᠢ᠋ ᠲᠡᠷᠡ ᠶᠣᠰᠣᠭᠠᠷ ᠪᠡᠶᠡᠯᠡᠭᠦᠯᠦᠶᠡ ᠭᠡᠵᠦ ᠸᠠᠩ ᠰᠣᠬᠣᠷ ᠲᠤ ᠴᠡᠷᠢᠭ ᠦ᠋ᠨ ᠶᠣᠰᠣ ᠬᠢᠵᠦ ᠭᠠᠷᠴᠤ ᠶᠠᠪᠤᠪᠠ᠃ ᠠᠷᠠᠢ ᠡᠭᠦᠳᠡ ᠰᠠᠪᠠᠯᠠᠬᠤ ᠠ᠋ᠴᠠ ᠨᠠᠭᠠᠭᠤᠷ ᠠᠭᠤᠷᠲᠠᠢᠬᠠᠨ ᠭᠠᠷᠴᠤ ᠶᠠᠪᠤᠭᠰᠠᠨ ᠪᠠᠭᠠ ᠬᠠᠲᠤᠨ ᠤ᠋ ᠠᠷᠤ ᠠ᠋ᠴᠠ ᠦᠭᠡ ᠳᠠᠭᠤᠨ ᠦᠭᠡᠢ ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠸᠠᠩ ᠰᠣᠬᠣᠷ《ᠬᠡᠭ᠂ ᠰᠢᠷᠠᠪᠳᠣᠷᠵᠢ ᠶ᠋ᠢᠨ ᠱᠠᠯᠢᠵᠤ ᠣᠷᠬᠢᠭᠰᠠᠨ ᠪᠣᠯᠪᠠᠰᠤᠨ ᠡᠮᠡ ᠶ᠋ᠢ ᠬᠣᠬᠣᠢ᠂ ᠬᠥᠨᠵᠢᠯᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠢᠷᠢ ᠪᠡᠷ ᠬᠥᠯ ᠢ᠋ᠶ᠋ᠡᠨ ᠵᠢᠭᠢᠬᠦ ᠶ᠋ᠢ ᠮᠡᠳᠡᠬᠦ ᠦᠭᠡᠢ᠂ ᠬᠢᠷᠢ ᠳ᠋ᠡᠭᠡᠨ ᠲᠡᠢᠷᠬᠦ ᠵᠠᠩ ᠲᠠᠢ ᠪᠠᠢᠵᠤ ᠤᠤ⁈ ᠡᠮᠡ ᠢᠮᠠᠭᠠ ᠲᠠᠷᠭᠤᠯᠠᠪᠠᠯ ᠬᠡᠪᠲᠡᠬᠦ ᠭᠠᠵᠠᠷ ᠢ᠋ᠶ᠋ᠠᠨ ᠣᠯᠬᠤ ᠦᠭᠡᠢ᠂ ᠡᠮᠡ ᠬᠥᠮᠦᠨ ᠵᠢᠷᠭᠠᠪᠠᠯ ᠬᠡᠯᠡᠬᠦ ᠦᠭᠡ ᠪᠡᠨ ᠣᠯᠬᠤ ᠦᠭᠡᠢ ᠭᠡᠵᠦ ᠤᠷᠠᠳ ᠤ᠋ᠳ ᠶᠠᠷᠢᠳᠠᠭ ᠨᠢ ᠶᠠᠭ ᠡᠭᠦᠨ ᠢ᠋ ᠵᠢᠭᠠᠵᠢ ᠳᠠ᠃ ᠴᠠᠭᠠᠨᠠ ᠪᠠᠨ ᠬᠥᠯ ᠲᠣᠭᠲᠠᠬᠤ ᠭᠠᠵᠠᠷ ᠦᠭᠡᠢ ᠪᠠᠢᠵᠤ ᠮᠢᠨᠦ ᠥᠭᠡᠳᠡ ᠡᠴᠡ ᠴᠣᠪ ᠴᠣᠪ ᠭᠡᠬᠦ ᠳ᠋ᠡᠭᠡᠨ᠃ ᠲᠣᠯᠣᠭᠠᠢ ᠶ᠋ᠢ ᠴᠢᠨᠢ ᠢᠯᠢᠵᠦ ᠲᠠᠷᠢᠬᠢ ᠶ᠋ᠢ ᠴᠢᠨᠢ ᠰᠤᠷᠤᠶᠠ ᠭᠡᠰᠡᠨ ᠡᠴᠡ ᠪᠢᠰᠢ᠂ ᠥᠭᠡᠷᠡ ᠴᠢᠮᠠᠶ᠋ᠢ ᠪᠢ ᠶᠠᠭᠤᠨ ᠳ᠋ᠠᠭᠠᠨ ᠭᠡᠵᠦ ᠢᠩᠭᠢᠨᠡ ᠪᠣᠢ?》 ᠭᠡᠵᠦ ᠳᠦᠳᠦᠨᠡᠭᠡᠳ᠄
— ᠴᠢ ᠶᠠᠪᠤ᠂ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠪᠣᠭᠣᠳᠠᠭ ᠤ᠋ᠨ ᠰᠠᠬᠢᠭᠤᠯ ᠳ᠋ᠤ᠌ ᠬᠡᠯᠡ ᠬᠦᠷᠭᠡ! ᠰᠢᠷᠠ ᠴᠡᠷᠢᠭ ᠦ᠋ᠳ ᠬᠣᠮᠣᠷᠭᠠᠨ ᠳ᠋ᠤ᠌ ᠣᠷᠣᠭᠰᠠᠭᠠᠷ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠪᠣᠭᠣᠳᠠᠭ ᠰᠡᠲᠡᠯᠬᠦ ᠪᠡᠷ ᠪᠡᠯᠡᠬᠡᠨ ᠪᠣᠯᠭᠠ ᠭᠡᠵᠦ ᠯᠠᠪ ᠯᠥᠪ ᠵᠠᠬᠢᠭᠠᠷᠠᠢ! ᠭᠡᠵᠦ ᠳᠡᠭᠡᠷᠡᠬᠢ ᠴᠡᠷᠢᠭ ᠦ᠋ᠨ ᠲᠠᠬᠠᠷ ᠢ᠋ᠶ᠋ᠠᠨ ᠵᠠᠬᠢᠷᠴᠤ ᠶᠠᠪᠤᠭᠤᠯᠪᠠ᠃
ᠲᠡᠨᠳᠡ ᠡᠴᠡ ᠠᠭᠤᠷ ᠣᠮᠣᠭ ᠲᠠᠢ ᠭᠠᠷᠴᠤ ᠶᠠᠪᠤᠭᠰᠠᠨ ᠪᠠᠭᠠ ᠬᠠᠲᠤᠨ ᠤ᠋ ᠪᠣᠳᠣᠯ ᠤ᠋ᠨ ᠲᠡᠩᠴᠡᠭᠦᠷᠢ ᠨᠢ ᠠᠷᠭᠠ ᠦᠭᠡᠢ ᠬᠡᠯᠪᠡᠯᠵᠡᠵᠦ《ᠪᠢ ᠴᠣᠬᠣᠮ ᠡᠨᠳᠡ ᠶᠠᠭᠤ ᠬᠢᠬᠦ ᠪᠡᠷ ᠢᠷᠡᠪᠡ? ᠢᠩᠭᠢᠬᠦ ᠶ᠋ᠢ ᠴᠢᠨᠢ ᠮᠡᠳᠡᠭᠰᠡᠨ ᠪᠣᠯ ᠪᠢ ᠬᠣᠰᠢᠭᠤ ᠨᠤᠲᠤᠭ ᠢ᠋ᠶ᠋ᠠᠨ ᠬᠠᠶᠠᠵᠤ ᠠᠬᠠ ᠳᠡᠭᠦᠦᠰ ᠦ᠋ᠨ ᠰᠡᠳᠬᠢᠯ ᠢ᠋ ᠦᠲᠡᠭᠡᠷᠬᠡᠪᠡ⁈ ᠸᠠᠩ ᠰᠣᠬᠣᠷ ᠴᠢ ᠶᠠᠭᠤ ᠪᠣᠳᠣᠬᠤ ᠳ᠋ᠠᠭᠠᠨ ᠨᠠᠮᠠᠶ᠋ᠢ ᠡᠮᠦᠨᠡ ᠪᠡᠨ ᠪᠠᠷᠢᠵᠤ ᠮᠣᠷᠢᠨ ᠴᠡᠷᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠢᠷᠠ ᠴᠡᠷᠢᠭ ᠢ᠋ ᠲᠤᠯᠤᠭᠤᠯᠤᠨᠠ ᠪᠣᠢ? ᠴᠢ ᠨᠠᠮᠠᠶ᠋ᠢ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠤᠭᠠᠳ ᠨᠢᠭᠡ ᠲᠡᠢᠰᠢ ᠳᠤᠲᠠᠭᠠᠴᠢᠬᠠᠬᠤ ᠠ᠋ᠴᠠ ᠠᠶᠤᠬᠤ ᠦᠭᠡᠢ ᠪᠠᠢᠨᠠ ᠤᠤ? ᠡᠰᠡᠪᠡᠰᠦ ᠴᠢ ᠨᠠᠮᠠᠶ᠋ᠢ( ᠬᠣᠶᠠᠷ ᠲᠣᠯᠣᠭᠠᠢᠲᠤ ᠮᠣᠷᠢ) ᠵᠠᠢᠳᠠᠯᠠᠭᠤᠯᠤᠭᠠᠳ ᠬᠣᠢᠨᠠ ᠠ᠋ᠴᠠ ᠮᠢᠨᠢ ᠬᠠᠷᠠᠵᠤ ᠬᠠᠮᠢᠭᠠᠰᠢ ᠪᠠᠨ ᠬᠡᠯᠪᠡᠯᠵᠡᠳᠡᠭ ᠪᠣᠯ? ᠭᠡᠵᠦ ᠮᠢᠨᠦ ᠲᠠᠮᠢᠷ ᠢ᠋ ᠲᠡᠩᠰᠡᠪᠡ ᠤᠤ?》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ ᠠᠮᠵᠢᠪᠠ᠃ ᠪᠠᠭᠠ ᠬᠠᠲᠤᠨ ᠬᠦᠩ ᠨᠣᠶᠠᠨ ᠤ᠋ ᠥᠮᠥᠭ ᠢ᠋ᠶ᠋ᠡᠷ ᠬᠠᠷᠠᠴᠤ ᠪᠣᠭᠣᠯ ᠳ᠋ᠤ᠌ ᠨᠢᠳᠦ ᠡᠷᠡᠢᠯᠭᠡᠵᠦ ᠶᠠᠪᠤᠭᠰᠠᠨ ᠠ᠋ᠴᠠ ᠪᠢᠰᠢ ᠥᠷᠥᠭᠡᠯ ᠪᠤᠰᠤᠳ ᠢ᠋ᠶ᠋ᠠᠷ ᠡᠢᠨ ᠬᠦ᠌ ᠪᠡᠶᠡ ᠪᠡᠨ ᠵᠠᠬᠢᠷᠤᠭᠤᠯᠵᠤ ᠦᠵᠡᠭᠡ ᠦᠭᠡᠢ ᠳ᠋ᠡᠭᠡᠨ ᠢᠩᠭᠢᠬᠦ ᠨᠢ ᠠᠷᠭᠠ ᠴᠤ᠌ ᠦᠭᠡᠢ ᠶᠦᠮ᠃
ᠪᠠᠭᠠ ᠬᠠᠲᠤᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠪᠠᠨ ᠬᠠᠶᠠᠵᠤ ᠸᠠᠩ ᠰᠣᠬᠣᠷ ᠤ᠋ᠨ ᠶᠡᠬᠡ ᠰᠡᠭᠦᠳᠡᠷ ᠲᠦ᠍ ᠨᠥᠮᠥᠷᠢᠳᠡᠬᠦ ᠪᠡᠷ ᠥᠪᠡᠷ ᠢ᠋ᠶ᠋ᠡᠨ ᠳᠤᠷᠠᠲᠠᠶᠠ ᠱᠣᠭᠰᠢᠭᠠᠳ ᠢᠷᠡᠭᠰᠡᠨ ᠪᠣᠯᠬᠣᠷ ᠲᠡᠭᠦᠨ ᠦ᠌ ᠵᠠᠷᠯᠢᠭ ᠵᠠᠬᠢᠶᠠ ᠶ᠋ᠢ ᠲᠦᠷ ᠴᠦ᠍ ᠭᠡᠰᠡᠨ ᠳᠠᠭᠠᠬᠤ ᠦᠭᠡᠢ ᠪᠠᠢᠵᠤ ᠪᠣᠯᠬᠤ ᠦᠭᠡᠢ ᠤᠴᠢᠷ ᠠ᠋ᠴᠠ ᠠᠭᠤᠷ ᠤᠴᠠᠭᠠᠷ ᠨᠢ ᠠᠶᠠᠨᠳᠠᠭᠠᠨ ᠨᠠᠮᠬᠠᠷᠠᠪᠠ᠃
ᠪᠠᠭᠠ ᠬᠠᠲᠤᠨ ᠵᠠᠭᠤ ᠬᠦᠷᠬᠦ ᠦᠭᠡᠢ ᠴᠥᠭᠡᠪᠦᠷᠢ ᠮᠣᠷᠢᠨ ᠴᠡᠷᠢᠭ ᠢ᠋ᠶ᠋ᠡᠨ ᠭᠤᠷᠪᠠ ᠰᠤᠮᠤᠯᠠᠨ᠂ ᠣᠲᠣᠷᠯᠠᠨ ᠪᠠᠢᠯᠳᠤᠬᠤ ᠠᠷᠭᠠ ᠪᠠᠷ ᠰᠢᠷᠠ ᠴᠡᠷᠢᠭ ᠢ᠋ ᠥᠳᠥᠭᠡᠨ ᠪᠠᠢᠯᠳᠤᠵᠤ ᠭᠤᠷᠪᠠᠳᠠᠬᠢ ᠡᠳᠦᠷ ᠦ᠋ᠨ ᠨᠠᠷᠠ ᠰᠢᠩᠭᠡᠬᠦ ᠳ᠋ᠦ᠍ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠤᠷᠤᠰᠬᠠᠯ ᠤ᠋ᠨ ᠮᠤᠷᠤᠢᠭᠰᠠᠨ ᠲᠣᠬᠣᠢ ᠨᠤᠭᠤ ᠳ᠋ᠤ᠌ ᠰᠢᠷᠠ ᠴᠡᠷᠢᠭ ᠢ᠋ ᠥᠳᠥᠭᠡᠵᠦ ᠠᠪᠴᠢᠷᠠᠪᠠ᠃
ᠭᠠᠵᠠᠷ ᠤ᠋ᠨ ᠪᠠᠢᠴᠠ ᠳ᠋ᠠᠭᠠᠨ ᠡᠷᠳᠦᠭᠰᠡᠨ ᠪᠠᠭᠠ ᠬᠠᠲᠤᠨ ᠤ᠋ ᠮᠣᠷᠢᠨ ᠴᠡᠷᠢᠭ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠵᠡᠭᠡᠰᠦ ᠬᠤᠯᠤᠰᠤ᠂ ᠤᠯᠠᠭᠠᠨ ᠰᠤᠬᠠᠢ ᠶ᠋ᠢᠨ ᠰᠢᠭᠤᠢ ᠪᠠᠷ ᠬᠠᠯᠬᠠᠪᠴᠢ ᠪᠠᠷᠢᠵᠤ ᠲᠡᠨᠳᠡ ᠡᠴᠡ ᠪᠦᠯᠦᠭ ᠪᠦᠯᠦᠭ ᠢ᠋ᠶ᠋ᠡᠷ ᠪᠤᠯᠲᠠᠵᠤ ᠵᠠᠢᠳᠠᠭᠰᠠᠨ ᠢ᠋ ᠰᠢᠷᠠ ᠴᠡᠷᠢᠭ ᠶᠠᠭᠠᠬᠢᠨ ᠮᠡᠳᠡᠬᠦ ᠪᠢᠯᠡ᠃
ᠬᠠᠷᠢ ᠬᠣᠰᠢᠭᠤ ᠬᠥᠮᠦᠨ ᠦ᠌ ᠨᠤᠲᠤᠭ ᠲᠤ ᠭᠠᠵᠠᠷ ᠮᠡᠳᠡᠬᠦ ᠦᠭᠡᠢ᠂ ᠵᠠᠮ ᠴᠦ᠍ ᠲᠠᠨᠢᠬᠤ ᠦᠭᠡᠢ ᠰᠢᠷᠠ ᠴᠡᠷᠢᠭ᠂ ᠪᠠᠭᠠ ᠬᠠᠲᠤᠨ ᠤ᠋ ᠥᠳᠥᠭᠡᠯᠭᠡ ᠳ᠋ᠦ᠍ ᠬᠠᠭᠤᠷᠲᠠᠵᠤ ᠭᠡᠨᠡᠳᠲᠡ ᠤᠬᠠᠭᠠᠷᠠᠬᠤ ᠳ᠋ᠤ᠌ ᠭᠡᠨᠡᠨ ᠪᠣᠯᠴᠢᠬᠠᠭᠰᠠᠨ ᠪᠠᠢᠯᠠ᠃ ᠥᠨᠳᠥᠷ ᠵᠡᠭᠡᠷᠳᠡ ᠮᠣᠷᠢᠲᠠᠢ ᠰᠢᠷᠠ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠡᠮᠦᠨᠡᠬᠢ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠮᠡᠯᠮᠡᠯᠵᠡᠬᠦ ᠤᠰᠤ ᠶ᠋ᠢ ᠬᠠᠷᠠᠭᠠᠳ ᠵᠠᠮ ᠪᠣᠭᠣᠭᠳᠠᠭᠰᠠᠨ ᠢ᠋ ᠰᠡᠷᠡᠵᠦ ᠴᠡᠷᠢᠭ ᠢ᠋ᠶ᠋ᠡᠨ ᠨᠣᠶᠠᠯᠠᠨ ᠪᠤᠴᠠᠬᠤ ᠭᠡᠰᠡᠨ ᠳ᠋ᠦ᠍ ᠪᠤᠬᠤᠷ ᠲᠠᠯᠠ ᠠ᠋ᠴᠠ ᠨᠢ ᠫᠤᠤ ᠳᠤᠤᠭᠠᠷᠴᠤ᠂ ᠬᠡᠳᠦᠨ ᠵᠦᠭ ᠡᠴᠡ ᠰᠤᠮᠤᠨ ᠮᠥᠨᠳᠥᠷ ᠱᠤᠤᠭᠢᠨᠠ᠃ ᠵᠦᠭ ᠢ᠋ᠶ᠋ᠡᠨ ᠣᠯᠬᠤ ᠦᠭᠡᠢ ᠳᠣᠣᠷᠠ ᠪᠤᠵᠢᠭᠢᠨᠠᠯᠳᠤᠭᠰᠠᠨ ᠰᠢᠷᠠ ᠴᠡᠷᠢᠭ ᠦ᠋ᠳ ᠡᠮᠦᠨᠡᠬᠢ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠡᠷᠭᠢ ᠥᠭᠡᠳᠡ ᠭᠦᠶᠦᠯᠳᠦᠭᠰᠡᠨ ᠳ᠋ᠦ᠍ ᠴᠠᠭᠠᠨᠠ ᠠ᠋ᠴᠠ ᠸᠠᠩ ᠰᠣᠬᠣᠷ᠄
— ᠪᠣᠭᠣᠳᠠᠭ ᠰᠡᠲᠡᠯ! ᠤᠰᠤ ᠳᠡᠯᠪᠢ! ᠰᠢᠷᠠ ᠴᠡᠷᠢᠭ ᠢ᠋ ᠪᠦᠭᠦᠳᠡ ᠶ᠋ᠢ ᠰᠥᠨᠥᠭᠡᠶᠡ ᠭᠡᠵᠦ ᠬᠠᠰᠭᠢᠷᠠᠬᠤ ᠳᠠᠭᠤᠨ ᠢ᠋ᠶ᠋ᠠᠷ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠪᠣᠭᠣᠳᠠᠭ ᠰᠡᠲᠡᠷᠡᠵᠦ ᠬᠦᠷᠡᠩ ᠤᠯᠠᠭᠠᠨ ᠪᠤᠤᠷᠠ ᠶ᠋ᠢᠨ ᠰᠦᠷᠦᠭ ᠪᠤᠵᠢᠭᠢᠨᠠᠨ ᠢᠷᠡᠬᠦ ᠰᠢᠭ ᠦᠶᠡᠷ ᠦ᠋ᠨ ᠤᠰᠤ ᠱᠤᠤᠭᠢᠨ ᠳᠣᠭᠰᠢᠷᠠᠵᠤ ᠰᠢᠷᠠ ᠴᠡᠷᠢᠭ ᠢ᠋ ᠤᠰᠤᠨ ᠳ᠋ᠤ᠌ ᠵᠢᠪᠦᠭᠦᠯᠪᠡ᠃
— ᠠᠮᠢ ᠠᠪᠤᠷᠠ ᠠ᠋! ᠦᠬᠦᠯᠡ᠂ ᠦᠬᠦᠯᠡ᠁ ᠤ᠂ ᠠ᠁
— ᠯᠤᠤᠰ ᠤ᠋ᠨ ᠡᠵᠡᠨ ᠠ᠋᠂ ᠠᠮᠢ ᠶ᠋ᠢ ᠮᠢᠨᠢ᠁ ᠭᠡᠬᠦ ᠤᠰᠤᠨ ᠳ᠋ᠤ᠌ ᠠᠪᠲᠠᠭᠰᠠᠨ ᠰᠢᠷᠠ ᠴᠡᠷᠢᠭ ᠦ᠋ᠳ ᠡᠷᠢᠶᠡᠨ ᠮᠡᠷᠢᠶᠡᠨ ᠢ᠋ᠶ᠋ᠡᠷ ᠬᠠᠰᠬᠢᠷᠤᠯᠳᠤᠵᠤ ᠠᠮᠢ ᠭᠠᠷᠬᠤ ᠪᠠᠷ ᠲᠡᠯᠴᠢᠯᠡᠬᠦ ᠳ᠋ᠦ᠍ ᠵᠠᠪᠰᠠᠷ ᠣᠯᠵᠤ ᠠᠮᠢ ᠵᠢᠭᠤᠲᠠᠭᠰᠠᠨ ᠨᠢ ᠦᠬᠦᠬᠦ ᠪᠡᠨ ᠮᠡᠳᠡᠬᠦ ᠦᠭᠡᠢ ᠣᠮ ᠬᠣᠮ ᠦᠭᠡᠢ ᠳᠤᠲᠠᠭᠠᠵᠤ ᠠᠷᠢᠯᠤᠨᠠ᠃
ᠤᠯᠠᠭᠠᠨ ᠬᠠᠲᠤᠨ ᠤ᠋ ᠡᠷᠭᠢ ᠳᠡᠭᠡᠷᠡ ᠠᠷᠬᠠᠢᠲᠠᠯᠠ ᠵᠣᠭᠰᠣᠵᠠᠭᠠᠭᠰᠠᠨ ᠬᠠᠷᠠ ᠴᠡᠷᠢᠭ ᠦ᠋ᠳ《ᠠ᠂ ᠢᠯᠠᠯᠲᠠ᠂ ᠠ᠂ ᠢᠯᠠᠯᠲᠠ! ᠬᠠ ᠬᠠ ᠬᠠ᠁》 ᠭᠡᠵᠦ ᠬᠠᠳᠠᠭᠠᠨᠠᠨ ᠢᠨᠢᠶᠡᠵᠦ᠂ ᠭᠠᠷ ᠰᠡᠷᠪᠡᠯᠵᠡᠨ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠣᠷᠢᠯᠠᠯᠳᠤᠬᠤ ᠨᠢ ᠥᠭᠶᠥᠭᠡ ᠦᠵᠡᠭᠰᠡᠨ ᠬᠡᠷᠢᠶᠡ ᠭᠤᠸᠠᠭᠯᠠᠬᠤ ᠮᠡᠲᠦ ᠠᠵᠢ᠃
ᠦᠳᠡᠰᠢ ᠶ᠋ᠢᠨ ᠲᠣᠯᠣᠩ ᠢᠳᠡᠭᠡᠰᠢᠭ ᠴᠠᠢ ᠶ᠋ᠢᠨ ᠥᠩᠭᠡ ᠪᠡᠷ ᠪᠤᠳᠤᠭᠰᠢᠵᠤ᠂ ᠬᠠᠷᠠ ᠰᠢᠷᠠ ᠴᠡᠷᠢᠭ ᠦ᠋ᠨ ᠠᠯᠠᠯᠳᠤᠭᠠᠨ ᠲᠤᠯᠤᠯᠳᠤᠭᠠᠨ ᠮᠥᠨ ᠠᠯᠢᠪᠠ ᠥᠷᠢᠰᠦᠯᠳᠦᠭᠡᠨᠲᠦ ᠥᠳᠥᠭᠡᠭᠴᠢ ᠪᠠ ᠲᠡᠢᠨ ᠲᠤᠯᠤᠭᠴᠢ ᠶ᠋ᠢᠨ ᠨᠢᠭᠡ ᠨᠢ ᠲᠠᠢᠯᠵᠤ ᠨᠥᠭᠦᠭᠡ ᠨᠢ ᠵᠠᠪᠠᠯ ᠳᠡᠢᠯᠳᠡᠳᠡᠭ ᠦ᠋ᠨ ᠵᠢᠮᠡ ᠪᠡᠷ ᠬᠠᠷᠠ ᠴᠡᠷᠢᠭ ᠲᠠᠢᠯᠵᠤ ᠰᠢᠷᠠ ᠴᠡᠷᠢᠭ ᠵᠣᠩᠭᠢᠯᠬᠤ ᠴᠡᠷᠢᠭ ᠢ᠋ᠶ᠋ᠡᠨ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠤᠰᠤᠨ ᠳ᠋ᠤ᠌ ᠵᠢᠪᠦᠭᠦᠯᠵᠦ ᠠᠮᠢ ᠶᠡᠬᠡ ᠲᠡᠢ ᠨᠢ ᠪᠤᠷᠬᠠᠨ ᠲᠩᠷᠢ ᠳ᠋ᠡᠭᠡᠨ ᠵᠠᠯᠪᠠᠷᠢᠵᠤ ᠪᠣᠷᠣ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠤᠴᠠᠵᠤ ᠠᠷᠢᠯᠪᠠ᠃ ᠲᠡᠭᠡᠭᠰᠡᠨ ᠡᠴᠡ ᠬᠣᠢᠰᠢ ᠰᠢᠷᠠ ᠴᠡᠷᠢᠭ ᠦ᠋ᠨ ᠬᠠᠮᠠᠷ ᠲᠤ ᠨᠢ ᠤᠲᠤᠭᠠ ᠣᠷᠣᠵᠤ ᠬᠠᠰᠢᠷᠠᠭᠰᠠᠨ ᠪᠣᠯᠤᠯᠲᠠᠢ᠂ ᠳᠠᠬᠢᠵᠤ ᠪᠣᠷᠣᠲᠣᠬᠣᠢ ᠣᠷᠣᠨ ᠵᠦᠭ ᠥᠨᠳᠡᠯᠵᠡᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠮᠣᠯᠴᠣᠭ ᠬᠣᠰᠢᠭᠤ ᠪᠠᠷ ᠬᠣᠷᠭᠣᠳᠠᠭᠰᠠᠨ ᠴᠢᠮᠡᠭᠡ ᠳᠤᠭᠤᠯᠳᠠᠪᠠ᠃
ᠵᠠᠩᠵᠤᠨ ᠶᠠᠮᠤᠨ ᠤ᠋ ᠨᠣᠶᠠᠨ ᠴᠦ᠍ ᠪᠣᠷᠣᠳᠣᠬᠣᠢ ᠳ᠋ᠤ᠌ ᠰᠠᠭᠤᠵᠤ ᠪᠠᠢᠭᠰᠠᠨ ᠪᠣᠯᠬᠣᠷ ᠲᠡᠷᠡ ᠪᠡᠷ ᠸᠠᠩ ᠰᠣᠬᠣᠷ ᠢ᠋ ᠣᠷᠳᠣᠨ ᠳ᠋ᠠᠭᠠᠨ ᠳᠠᠭᠤᠳᠠᠨ ᠠᠭᠤᠯᠵᠠᠵᠤ ᠸᠠᠩ ᠰᠣᠬᠣᠷ ᠢ᠋《ᠪᠣᠷᠣᠲᠣᠬᠣᠢ ᠶ᠋ᠢ ᠡᠵᠡᠯᠡᠬᠦ ᠪᠡᠷ ᠭᠣᠷᠢᠳᠠᠭᠰᠠᠨ ᠰᠢᠷᠠ ᠴᠡᠷᠢᠭ ᠲᠡᠢ ᠪᠠᠢᠯᠳᠤᠬᠤ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠤᠷᠠ ᠤᠬᠠᠭᠠᠨ ᠢ᠋ᠶ᠋ᠠᠷ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠤᠰᠤ ᠦᠶᠡᠷᠯᠡᠭᠦᠯᠵᠦ ᠰᠢᠷᠠ ᠴᠡᠷᠢᠭ ᠢ᠋ ᠦᠯᠡᠮᠵᠢ ᠠᠷᠪᠢᠨ ᠤᠰᠠᠳᠬᠠᠵᠤ᠂ ᠪᠣᠷᠣᠲᠣᠬᠣᠢ ᠣᠷᠣᠨ ᠤ᠋ ᠠᠮᠤᠷ ᠲᠦᠪᠰᠢᠨ ᠢ᠋ ᠬᠠᠮᠠᠭᠠᠯᠠᠭᠰᠠᠨ ᠴᠢᠳᠠᠯᠲᠤ ᠪᠠᠭᠠᠲᠤᠷ》 ᠭᠡᠵᠦ ᠮᠠᠭᠲᠠᠭᠠᠳ ᠲᠡᠷᠢᠭᠦᠨ ᠭᠠᠪᠢᠶᠠᠲᠤ ᠣᠳᠣᠨ ᠵᠡᠭᠦᠯᠭᠡᠵᠦ ᠲᠡᠭᠦᠨ ᠢ᠋ ᠬᠠᠷᠠ ᠴᠡᠷᠢᠭ ᠦ᠋ᠨ ᠪᠣᠷᠣᠲᠣᠬᠣᠢ ᠶ᠋ᠢᠨ ᠣᠷᠣᠨ ᠤ᠋ ᠳ᠋ᠢᠸᠢᠽᠢ ᠶ᠋ᠢᠨ ᠳᠠᠷᠤᠭᠠ ᠪᠠᠷ ᠲᠣᠮᠢᠯᠠᠪᠠ᠃ ᠲᠡᠷᠡᠴᠢᠯᠡᠨ ᠪᠠᠰᠠ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠦᠩ ᠨᠣᠶᠠᠨ ᠤ᠋ ᠪᠠᠭᠠ ᠬᠠᠲᠤᠨ ᠰᠡᠷᠭᠦᠮᠡ ᠶ᠋ᠢᠨ《ᠰᠢᠷᠠ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠵᠣᠷᠢᠭᠲᠠᠢ ᠲᠤᠯᠵᠤ᠂ ᠥᠳᠥᠭᠡᠨ ᠪᠠᠢᠯᠳᠤᠭᠰᠠᠨ》 ᠦᠢᠯᠡ ᠠᠵᠢᠯᠯᠠᠭᠠ ᠶ᠋ᠢ ᠴᠦ᠍ ᠡᠷᠡᠬᠡᠢ ᠭᠣᠵᠣᠢᠯᠭᠠᠨ ᠮᠠᠭᠲᠠᠵᠠᠢ᠃
ᠳᠡᠮᠡᠢ ᠰᠠᠷᠠ ᠪᠣᠯᠤᠭᠰᠠᠨ ᠦᠭᠡᠢ ᠸᠠᠩ ᠰᠣᠬᠣᠷ ᠪᠠᠭᠠ ᠬᠠᠲᠤᠨ ᠤ᠋ ᠴᠥᠭᠡᠪᠦᠷᠢ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠬᠠᠷᠠ ᠴᠡᠷᠢᠭ ᠦ᠋ᠨ ᠬᠠᠲᠠᠭᠤ ᠰᠤᠷᠭᠠᠭᠤᠯᠢᠯᠠᠯ ᠬᠢᠵᠦ ᠳᠠᠬᠢᠨ ᠴᠡᠭᠴᠡᠯᠡᠪᠡ᠃ ᠪᠠᠭᠠ ᠬᠠᠲᠤᠨ ᠢ᠋ ᠴᠦ᠍ ᠵᠠᠩᠵᠤᠨ ᠶᠠᠮᠤᠨ ᠤ᠋ ᠵᠠᠰᠠᠭ ᠢ᠋ᠶ᠋ᠠᠷ ᠵᠥᠪᠰᠢᠶᠡᠷᠡᠭᠦᠯᠦᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠤ᠋ ᠠᠮᠤᠷ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠦ᠋ᠨ ᠰᠸᠯᠢᠩ ᠨᠣᠶᠠᠨ ᠤ᠋ ᠣᠳᠣ ᠵᠡᠭᠦᠯᠭᠡᠵᠦ ᠴᠡᠷᠢᠭ ᠬᠤᠪᠴᠠᠰᠤ ᠪᠠᠷ ᠱᠠᠩᠨᠠᠪᠠ᠃
ᠪᠠᠭᠠ ᠬᠠᠲᠤᠨ ᠡᠨᠡ ᠡᠳᠦᠷ ᠡᠴᠡ ᠡᠬᠢᠯᠡᠵᠦ ᠮᠣᠩᠭᠣᠯ ᠤᠳᠤᠮ ᠤ᠋ᠨ ᠵᠠᠰᠠᠯ ᠵᠢᠮᠰᠡᠭᠲᠦ ᠬᠤᠪᠴᠠᠯᠠᠯ᠂ ᠵᠠᠰᠠᠭ ᠬᠦᠩ ᠨᠣᠶᠠᠨ ᠤ᠋ ᠪᠠᠭᠠ ᠬᠠᠲᠤᠨ ᠤ᠋ ᠴᠢᠮᠡᠭ ᠵᠢᠮᠰᠡᠭ ᠢ᠋ᠶ᠋ᠡᠨ ᠪᠠᠭᠤᠯᠭᠠᠨ ᠬᠠᠷᠠ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠤ᠋ ᠴᠠᠮᠪᠠᠨ ᠬᠤᠪᠴᠠᠰᠤ ᠡᠮᠦᠰᠴᠦ᠂ ᠰᠢᠷᠢᠨ ᠪᠥᠰᠡᠨ ᠳ᠋ᠡᠭᠡᠨ ᠠᠬᠤᠷ ᠫᠤᠤ ᠵᠡᠭᠦᠭᠰᠡᠨ ᠨᠢ ᠶᠡᠷᠦ ᠪᠤᠰᠤ ᠶ᠋ᠢᠨ ᠶᠡᠬᠡᠮᠰᠦᠭ ᠰᠦᠷᠯᠢᠭᠦᠨ ᠪᠣᠯᠵᠠᠢ᠃ ᠲᠡᠢᠨ ᠬᠦ᠌ ᠳᠣᠣᠷᠠᠬᠢ ᠬᠥᠮᠦᠰ ᠲᠡᠭᠡᠨ ᠵᠠᠷᠯᠢᠭ ᠵᠠᠬᠢᠶᠠ ᠪᠠᠭᠤᠯᠭᠠᠵᠤ ᠨᠣᠶᠠᠯᠠᠬᠤ ᠳ᠋ᠤ᠌ ᠴᠠᠭᠠᠨᠠ ᠪᠠᠨ ᠨᠢᠭᠡ ᠯᠡ ᠳᠠᠯᠳᠠ ᠲᠠᠮᠢᠷ ᠲᠠᠢ ᠰᠢᠭ᠋ ᠪᠣᠯᠤᠭᠰᠠᠨ ᠠᠵᠤᠭᠤ!