ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠭᠤᠲᠠᠭᠠᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠭᠤᠷᠪᠠ> Хан мунын сүүрс < доорд > – Мөнх зохиоов ᠂ Гутгаар бодь – Нэгдүгээр бүлэг <3>
312ᠭᠤᠲᠠᠭᠠᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠭᠤᠷᠪᠠ>
ᠮᠢᠩᠭᠠᠨ ᠸᠠᠩ ᠳᠣᠷᠵᠢᠸᠠᠩᠴᠣᠭ ᠤ᠋ᠨ ᠡᠯᠳᠡᠩᠭᠡ ᠶ᠋ᠢ ᠲᠤᠰᠠᠯᠠᠬᠤ ᠪᠦᠷᠢᠨ ᠵᠡᠪᠰᠡᠭᠯᠡᠭᠰᠡᠨ ᠮᠣᠷᠢᠨ ᠴᠡᠷᠢᠭ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠨᠤᠲᠤᠭ ᠲᠤ ᠰᠦᠷ ᠵᠢᠪᠬᠤᠯᠠᠩᠲᠠᠢ ᠪᠠᠭᠤᠪᠠ᠃
ᠪᠠᠳᠣᠸᠴᠢᠷ ᠢ᠋ᠶ᠋ᠠᠷ ᠠᠬᠠᠯᠠᠭᠰᠠᠨ ᠮᠣᠷᠢᠨ ᠴᠡᠷᠢᠭ ᠢ᠋ ᠵᠣᠳᠪᠠ ᠮᠡᠢᠷᠡᠨ ᠲᠡᠷᠢᠭᠦᠲᠡᠨ᠂ ᠡᠯᠳᠡᠩᠭᠡ ᠶ᠋ᠢᠨ ᠪᠢᠴᠢᠭ ᠲᠡᠢ ᠬᠠᠮᠲᠤ ᠤᠭᠲᠤᠵᠤ ᠠᠪᠤᠭᠠᠳ《ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠳ᠋ᠦ᠍ ᠬᠡᠳᠦ ᠬᠣᠨᠣᠭ ᠰᠠᠭᠤᠯᠭᠠᠪᠠ᠃ ᠲᠡᠭᠡᠭᠡᠳ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠥᠪᠡᠭᠡᠨ ᠳ᠋ᠡᠬᠢ ᠨᠣᠶᠠᠨ ᠰᠠᠩ ᠤ᠋ᠨ ᠵᠤᠰᠠᠭᠠᠯ᠂ ᠪᠢᠯᠵᠤᠤᠬᠠᠢ ᠵᠡᠷᠭᠡ ᠭᠠᠵᠠᠷ ᠢ᠋ᠶ᠋ᠠᠷ ᠴᠡᠷᠢᠭ ᠰᠠᠭᠤᠯᠭᠠᠵᠤ᠂ ᠵᠡᠭᠦᠨ ᠲᠠᠯᠠ ᠠ᠋ᠴᠠ ᠠᠲᠠᠷ ᠬᠠᠭᠠᠯᠪᠤᠷᠢᠯᠠᠬᠤ ᠬᠠᠷᠠ ᠴᠡᠷᠢᠭ ᠢ᠋ ᠴᠢᠩᠳᠠᠯᠠᠨ ᠰᠡᠷᠭᠡᠢᠯᠡᠵᠦ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠸᠠᠩ ᠰᠣᠬᠣᠷ ᠤ᠋ᠨ ᠲᠦᠰᠢᠯᠭᠡ ᠲᠡᠢ ᠪᠠᠭᠠ ᠬᠠᠲᠤᠨ ᠰᠡᠷᠭᠦᠮᠡ ᠳ᠋ᠦ᠍ ᠰᠦᠷᠳᠡᠭᠦᠯᠭᠡ ᠦᠵᠡᠭᠦᠯᠵᠦ᠂ ᠲᠡᠭᠦᠨ ᠦ᠌ ᠥᠪᠡᠷ ᠢ᠋ᠶ᠋ᠡᠨ ᠵᠠᠰᠠᠭ ᠤ᠋ᠨ ᠡᠷᠬᠡ ᠪᠡᠨ ᠶᠡᠭᠦᠯᠡᠨ ᠥᠭᠬᠦ ᠪᠤᠶᠤ ᠠᠶᠠᠨᠳᠠᠭᠠᠨ ᠵᠠᠢᠯᠠᠬᠤ ᠶ᠋ᠢ ᠨᠥᠷᠢᠨ ᠰᠢᠬᠠᠪᠠ᠃
ᠪᠠᠳᠣᠸᠴᠢᠷ ᠲᠣᠸᠠᠨᠵᠠᠩ ᠢ᠋ᠶ᠋ᠠᠷ ᠨᠣᠶᠠᠯᠠᠭᠤᠯᠤᠭᠰᠠᠨ ᠬᠠᠷᠢ ᠶ᠋ᠢᠨ ᠵᠡᠪᠰᠡᠭ ᠲᠡᠢ ᠮᠣᠷᠢᠨ ᠴᠡᠷᠢᠭ ᠨᠢ ᠰᠢᠷᠠ ᠴᠡᠷᠢᠭ ᠦ᠋ᠨ ᠬᠤᠪᠴᠠᠰᠤ ᠵᠠᠰᠠᠯ ᠳᠡᠭᠡᠷᠡ ᠥᠷᠭᠡᠨ ᠰᠢᠷᠢᠨ ᠪᠦᠰᠡ ᠪᠦᠰᠡᠯᠡᠵᠦ᠂ ᠫᠤᠤ ᠰᠠᠭᠠᠳᠠᠭ᠂ ᠰᠡᠯᠡᠮᠡ ᠬᠢᠲᠤᠭᠠ ᠵᠡᠭᠦᠭᠰᠡᠨ ᠨᠢ ᠦᠨᠡᠬᠡᠷ ᠰᠦᠷ ᠲᠡᠢ᠃ ᠢᠩᠭᠢᠬᠦᠯᠡᠷ ᠥᠨᠥᠬᠢ ᠮᠤᠤᠷ ᠪᠤᠶᠤ ᠦᠨᠡᠭᠡᠨ ᠠᠷᠠᠰᠤᠨ ᠬᠣᠭᠣᠯᠠᠢᠪᠴᠢ ᠲᠠᠢ ᠨᠡᠬᠡᠢ ᠳᠡᠪᠡᠯ᠂ ᠢᠰᠡᠭᠡᠢ ᠲᠣᠭᠣᠷᠴᠣᠭᠲᠤ᠂ ᠣᠭᠳᠣᠷ ᠣᠭᠳᠣᠷ ᠬᠠᠷᠠ ᠬᠦᠷᠮᠡ ᠶ᠋ᠢᠨ ᠬᠢᠨᠢ ᠬᠥᠪᠥᠩ ᠨᠢ ᠪᠤᠯᠲᠠᠢᠭᠰᠠᠨ ᠵᠠᠬᠠ ᠦᠭᠡᠢ ᠵᠠᠢᠳᠠᠩ ᠥᠮᠥᠳᠥ ᠲᠡᠢ ᠬᠢᠲᠠᠳ ᠳᠡᠭᠡᠷᠡᠮ᠂ ᠬᠠᠷᠠ ᠴᠡᠷᠢᠭ ᠦ᠋ᠳ ᠦ᠋ᠨ ᠬᠠᠯᠵᠠᠨ ᠣᠮᠣᠭ ᠢ᠋ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠳᠠᠷᠤᠵᠤ ᠪᠠᠢᠯᠠ᠃
ᠰᠢᠷᠠ ᠴᠡᠷᠢᠭ᠂ ᠬᠠᠷᠠ ᠴᠡᠷᠢᠭ᠂ ᠮᠢᠩᠭᠠᠨ ᠤ᠋ ᠮᠣᠷᠢᠨ ᠴᠡᠷᠢᠭ ᠦ᠋ᠨ ᠰᠦᠷᠳᠡᠭᠦᠯᠦᠯ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠶ᠋ᠢ ᠭᠤᠷᠪᠠᠨ ᠲᠠᠯᠠ ᠠ᠋ᠴᠠ ᠨᠢ ᠬᠠᠪᠴᠢᠵᠤ ᠪᠦᠬᠦᠯᠢ ᠪᠡᠷ ᠨᠢ ᠵᠠᠯᠭᠢᠬᠤ ᠭᠡᠰᠡᠨ ᠲᠦᠭᠰᠢᠭᠦᠷᠢ ᠪᠠᠭᠠ ᠬᠠᠲᠤᠨ ᠢ᠋ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠨᠥᠮᠥᠷᠢᠨ ᠢᠷᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠨᠢ ᠰᠠᠮᠭᠠᠷᠳᠠᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠠᠢᠪᠠ᠃ ᠰᠢᠷᠠ ᠴᠡᠷᠢᠭ ᠲᠦ᠍ ᠪᠠᠭᠤᠵᠤ ᠥᠭᠬᠦ ᠨᠢ ᠰᠢᠪᠰᠢᠭ᠂ ᠬᠠᠷᠠ ᠴᠡᠷᠢᠭ ᠢ᠋ ᠲᠦᠰᠢᠬᠦ ᠨᠢ ᠢᠴᠢᠭᠦᠷᠢ᠃ ᠶᠠᠭᠠᠬᠢᠪᠠᠯ ᠳᠡᠭᠡᠷᠡ ᠪᠣᠢ? ᠮᠣᠩᠭᠣᠯ ᠮᠣᠷᠢᠨ ᠴᠡᠷᠢᠭ ᠲᠡᠢ ᠡᠪᠰᠡᠵᠦ ᠪᠠᠢᠭᠠᠳ ᠦᠵᠡᠬᠦ ᠤᠤ? ᠪᠣᠯᠬᠤ ᠦᠭᠡᠢ᠃ ᠡᠯᠳᠡᠩᠭᠡ ᠴᠠᠭᠠᠨᠠ ᠨᠢ ᠥᠩᠭᠡᠯᠵᠡᠵᠦ ᠪᠠᠢᠬᠤ ᠪᠤᠯᠬᠤᠷ᠁ ᠭᠡᠵᠦ ᠡᠯᠳᠡᠪ ᠢ᠋ ᠪᠣᠳᠣᠨ ᠵᠣᠪᠠᠨᠢᠬᠤ ᠳ᠋ᠠᠭᠠᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠨᠢᠯᠪᠤᠰᠤ ᠤᠨᠠᠭᠠᠪᠠ᠁
ᠤᠯᠤᠰ ᠭᠦᠷᠦᠨ᠂ ᠬᠣᠰᠢᠭᠤ ᠨᠤᠲᠤᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠯ ᠠᠯᠳᠠᠭᠰᠠᠨ ᠣᠨᠴᠠᠭᠠᠢ ᠦᠶᠡ ᠳ᠋ᠦ᠍ ᠪᠤᠷᠤᠭᠤ ᠡᠰᠢᠯᠡᠭᠰᠡᠨ ᠰᠦᠬᠡ ᠮᠡᠲᠦ ᠪᠦᠰᠡᠭᠦᠢ ᠬᠥᠮᠦᠨ ᠦ᠌ ᠪᠣᠭᠣᠨᠢ ᠪᠣᠳᠣᠯ ᠢ᠋ᠶ᠋ᠠᠷ ᠱᠣᠭᠰᠢᠵᠤ ᠯᠠ ᠪᠣᠯᠬᠤ ᠦᠭᠡᠢ᠃ ᠣᠷᠴᠢᠨ ᠲᠣᠭᠣᠷᠢᠨ ᠤ᠋ ᠪᠣᠳᠠᠲᠠᠢ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠵᠤ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠠᠰᠠᠭ ᠤ᠋ᠨ ᠵᠢᠯᠣᠭᠣ ᠶ᠋ᠢ ᠪᠠᠷᠢᠬᠤ ᠳ᠋ᠤ᠌ ᠤᠶᠠᠨ ᠬᠠᠳᠠᠨ ᠤᠬᠠᠭᠠᠨ ᠰᠠᠨᠠᠭᠠ ᠬᠡᠷᠡᠭ ᠲᠡᠢ ᠭᠡᠳᠡᠭ ᠢ᠋ ᠪᠠᠭᠠ ᠬᠠᠲᠤᠨ ᠤ᠋ ᠵᠠᠰᠠᠭ ᠤ᠋ᠨ ᠠᠮᠢᠳᠤᠷᠠᠯ ᠳ᠋ᠤ᠌ ᠲᠣᠬᠢᠶᠠᠯᠳᠤᠭᠰᠠᠨ ᠨᠤᠭᠤᠷᠠᠯ ᠪᠦᠳᠦᠷᠢᠯ ᠲᠡᠭᠦᠨ ᠳ᠋ᠦ᠍ ᠬᠡᠯᠡᠵᠦ ᠥᠭᠴᠦ ᠪᠠᠢᠯᠠ᠃
ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠦ᠌ ᠡᠷᠡᠮᠡᠬᠡᠢ ᠵᠣᠷᠢᠭ ᠠᠷᠠᠨᠰᠢᠨ ᠳ᠋ᠤ᠌ ᠪᠡᠶᠡ ᠪᠡᠨ ᠬᠠᠪᠢᠳᠠᠭᠤᠯᠵᠤ ᠪᠠᠳᠣᠸᠴᠢᠷ ᠲᠣᠸᠠᠨᠵᠠᠩ ᠤ᠋ᠨ ᠰᠡᠳᠬᠢᠯ ᠢ᠋ ᠨᠢ ᠣᠯᠬᠤ ᠭᠡᠳᠡᠭ ᠪᠦᠰᠡᠭᠦᠢ ᠬᠥᠮᠦᠨ ᠳ᠋ᠦ᠍ ᠠᠪᠴᠤ ᠬᠡᠯᠡᠪᠡᠯ ᠭᠠᠷ ᠤ᠋ᠨ ᠠᠯᠠᠭᠠ ᠤᠷᠪᠠᠭᠤᠯᠬᠤ ᠰᠢᠭ᠋ ᠬᠢᠯᠪᠠᠷ ᠠᠵᠢ᠃ ᠲᠡᠭᠡᠬᠦ ᠳ᠋ᠦ᠍ ᠪᠠᠭᠠ ᠬᠠᠲᠤᠨ ᠪᠡᠶᠡ ᠪᠡᠨ ᠬᠠᠶᠠᠨ ᠲᠡᠭᠦᠨ ᠲᠡᠢ ᠨᠠᠭᠠᠯᠢᠩᠬᠠᠢᠲᠤᠵᠤ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠢᠯᠡ! ᠡᠨᠡ ᠨᠢ ᠨᠢᠭᠡ ᠬᠣᠰᠢᠭᠤ ᠵᠠᠰᠠᠭ ᠤ᠋ᠨ ᠵᠢᠯᠣᠭᠣ ᠶ᠋ᠢ ᠠᠳᠬᠤᠵᠤ ᠪᠠᠢᠭᠠ ᠪᠦᠰᠡᠭᠦᠢ ᠬᠥᠮᠦᠨ ᠳ᠋ᠦ᠍ ᠲᠤᠯᠭᠠᠷᠠᠭᠰᠠᠨ ᠶᠣᠰᠣᠲᠠᠢ ᠲᠦᠪᠡᠭᠲᠡᠢ ᠶᠠᠭᠤᠮᠠ ᠪᠣᠯᠪᠠ᠃ ᠲᠡᠢᠨ ᠬᠦ᠌ ᠪᠠᠳᠣᠸᠴᠢᠷ ᠲᠣᠸᠠᠨᠵᠠᠩ ᠢ᠋ ᠣᠯᠢᠢᠬᠤ ᠦᠭᠡᠢ ᠬᠠᠶᠠᠭᠠᠨ ᠳ᠋ᠤᠨᠢ ᠬᠠᠶᠠᠴᠢᠬᠠᠭᠠᠳ᠂ ᠨᠢᠭᠡ ᠶᠡᠬᠡ ᠯᠠᠷᠵᠢᠶᠠ ᠶᠠᠮᠪᠠ ᠲᠠᠲᠠᠭᠠᠳ ᠭᠡᠳᠡᠢᠵᠦ ᠪᠠᠰᠠ ᠪᠣᠯᠬᠤ ᠦᠭᠡᠢ ᠨᠢ ᠬᠡᠴᠡᠭᠦᠦ!
ᠡᠨᠡ ᠦᠶᠡ ᠳ᠋ᠦ᠍ ᠪᠠᠭᠠ ᠬᠠᠲᠤᠨ ᠬᠡᠦᠬᠡᠳ ᠲᠡᠢ ᠪᠣᠯᠬᠣᠷ ᠶᠠᠪᠤᠵᠤ ᠰᠠᠭᠤᠬᠤ ᠳ᠋ᠤ᠌ ᠳᠠᠩᠴᠤ ᠳᠥᠭᠥᠮ ᠦᠭᠡᠢ᠃ ᠬᠣᠰᠢᠭᠤ ᠨᠤᠲᠤᠭ᠂ ᠣᠷᠴᠢᠨ ᠲᠣᠭᠣᠷᠢᠨ ᠤ᠋ ᠴᠠᠭ ᠤ᠋ᠨ ᠪᠠᠢᠳᠠᠯ ᠢ᠋ ᠬᠠᠷᠠᠭᠠᠳ ᠪᠠᠢᠬᠤ ᠳ᠋ᠤ᠌ ᠲᠡᠭᠦᠨ ᠳ᠋ᠦ᠍ ᠲᠤᠰᠠᠯᠠᠵᠤ ᠢᠷᠡᠬᠦ ᠶᠠᠭᠤᠮᠠ ᠬᠣᠮᠰᠠᠳᠠᠬᠤ ᠳ᠋ᠤᠨᠢ ᠰᠡᠳᠬᠢᠯ ᠶᠡᠬᠡᠳᠡ ᠵᠣᠪᠠᠭᠤᠷᠢᠲᠠᠢ᠃ ᠰᠢᠷᠠ ᠴᠡᠷᠢᠭ᠂ ᠬᠠᠷᠠ ᠴᠡᠷᠢᠭ᠂ ᠮᠣᠩᠭᠣᠯ ᠮᠣᠷᠢᠨ ᠴᠡᠷᠢᠭ ᠦ᠋ᠨ ᠭᠤᠷᠪᠠᠨ ᠬᠠᠪᠴᠢᠯᠭᠠ ᠳᠣᠣᠷᠠ ᠲᠡᠷᠡ ᠪᠡᠷ ᠪᠣᠳᠣᠯ ᠤ᠋ᠨ ᠵᠢᠯᠣᠭᠣ ᠪᠠᠨ ᠲᠥᠪ ᠪᠠᠷᠢᠵᠤ᠂ ᠵᠣᠷᠢᠭ ᠢ᠋ᠶ᠋ᠠᠨ ᠬᠠᠲᠠᠭᠤᠵᠢᠭᠤᠯᠬᠤ ᠨᠢ ᠶᠠᠭᠤᠨ ᠠ᠋ᠴᠠ ᠴᠤ᠌ ᠴᠢᠬᠤᠯᠠ ᠭᠡᠳᠡᠭ ᠢ᠋ ᠣᠢᠯᠠᠭᠠᠵᠤ᠂ ᠰᠢᠷᠠ ᠴᠡᠷᠢᠭ ᠲᠦ᠍ ᠶᠠᠭᠠᠬᠢᠭᠰᠠᠨ ᠴᠤ᠌ ᠪᠠᠭᠤᠵᠤ ᠥᠭᠴᠦ ᠦᠯᠦ ᠪᠣᠯᠤᠨᠠ᠃ ᠤᠷᠢᠳ ᠢ᠋ᠶ᠋ᠠᠷ ᠮᠣᠷᠢᠨ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠪᠠᠳᠣᠸᠴᠢᠷ ᠲᠠᠢ ᠡᠪᠰᠡᠵᠦ ᠦᠵᠡᠶᠡ᠃ ᠲᠡᠢᠨ ᠬᠦ᠌ ᠪᠠᠲᠤᠯᠠᠭᠠ ᠮᠠᠭᠤᠲᠠᠢ ᠪᠣᠯ ᠬᠠᠷᠠ ᠴᠡᠷᠢᠭ ᠢ᠋ ᠨᠥᠮᠥᠷᠢᠳᠡᠵᠦ ᠣᠴᠢᠶᠠ ᠭᠡᠵᠦ ᠰᠢᠭᠤᠳᠪᠠ᠃ ᠲᠡᠭᠡᠭᠡᠳ ᠲᠤᠰᠠᠯᠠᠭᠴᠢ ᠱᠠᠭᠳᠠᠷ ᠢ᠋ ᠶᠠᠪᠤᠭᠤᠯᠵᠤ ᠮᠣᠷᠢᠨ ᠴᠡᠷᠢᠭ ᠦ᠋ᠨ ᠪᠠᠳᠣᠸᠴᠢᠷ ᠲᠣᠸᠠᠨᠵᠠᠩ ᠵᠡᠷᠭᠡ ᠨᠣᠶᠠᠨ ᠢ᠋ ᠬᠣᠰᠢᠭᠤ ᠵᠠᠰᠠᠭ ᠤ᠋ᠨ ᠶᠠᠮᠤᠨ ᠳ᠋ᠠᠭᠠᠨ ᠵᠠᠯᠠᠵᠤ ᠳᠠᠢᠯᠠᠯᠭᠠ ᠶᠠᠪᠤᠭᠤᠯᠤᠨ ᠪᠡᠶᠡ ᠳ᠋ᠡᠭᠡᠨ ᠲᠠᠲᠠᠬᠤ ᠪᠠᠷ ᠪᠡᠯᠡᠳᠬᠡᠯ ᠬᠢᠯᠡ᠃
ᠪᠠᠳᠣᠸᠴᠢᠷ ᠲᠤᠸᠠᠨᠵᠠᠩ ᠶᠡᠷᠦ ᠨᠢ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠨᠣᠶᠠᠨ ᠤ᠋ ᠪᠠᠭᠠ ᠬᠠᠲᠤᠨ ᠲᠠᠢ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠤᠴᠠᠷᠠᠵᠤ ᠵᠣᠯᠭᠠᠨ ᠰᠤᠳᠠᠯ ᠢ᠋ ᠨᠢ ᠪᠠᠷᠢᠵᠤ ᠦᠵᠡᠶᠡ ᠭᠡᠵᠦ ᠰᠠᠨᠠᠵᠤ ᠪᠠᠢᠭᠰᠠᠨ ᠳ᠋ᠤ᠌《ᠳᠠᠢᠯᠠᠯᠭᠠ ᠶ᠋ᠢᠨ ᠤᠷᠢᠯᠭᠠ》 ᠢᠷᠡᠭᠰᠡᠨ ᠳ᠋ᠦ᠍ ᠬᠡᠷᠡᠭ ᠤᠴᠢᠷ ᠰᠠᠨᠠᠭᠰᠠᠨ ᠢ᠋ᠶ᠋ᠠᠷ ᠨᠢ ᠪᠣᠯᠤᠭᠰᠠᠨ ᠳ᠋ᠤ᠌ ᠪᠠᠶᠠᠷᠯᠠᠨ ᠰᠠᠭᠠᠲᠠᠯ ᠦᠭᠡᠢ ᠵᠠᠯᠠᠷᠠᠨ ᠪᠠᠭᠤᠵᠠᠢ᠃
ᠪᠠᠭᠠ ᠬᠠᠲᠤᠨ ᠪᠠᠲᠣᠸᠴᠢᠷ ᠲᠣᠸᠠᠨᠵᠠᠩ ᠢ᠋ ᠮᠤᠬᠤᠷ ᠬᠢᠲᠤᠭᠠ ᠡᠮᠬᠦᠭᠦᠯᠵᠦ ᠮᠤᠩᠬᠠᠷᠠᠲᠠᠯᠠ ᠰᠣᠭᠲᠣᠭᠠᠵᠤ ᠪᠠᠢᠭᠠᠳ ᠵᠢᠯᠣᠭᠣ ᠶ᠋ᠢ ᠨᠢ ᠪᠠᠷᠢᠶᠠ ᠭᠡᠵᠦ ᠪᠠᠢᠭᠰᠠᠨ ᠲᠤᠯᠠ ᠲᠠᠷᠭᠤᠨ ᠤᠭᠤᠴᠠ ᠲᠠᠯᠪᠢᠵᠤ᠂ ᠤᠭᠤᠴᠠᠨ ᠤ᠋ ᠢᠷᠦᠭᠡᠯ ᠤᠩᠰᠢᠭᠤᠯᠤᠨ ᠳᠠᠭᠤᠴᠢᠨ ᠪᠦᠰᠡᠭᠦᠢ ᠪᠡᠷ《ᠭᠤᠷᠪᠠᠨ ᠪᠤᠶᠠᠨ》① ᠢ᠋ ᠰᠡᠳᠬᠢᠯ ᠰᠡᠩᠰᠡᠷᠡᠲᠡᠯᠡ ᠳᠠᠭᠤᠯᠠᠭᠤᠯᠤᠨ ᠵᠠᠰᠠᠯ ᠵᠢᠮᠰᠡᠭ ᠲᠡᠢ ᠤᠷᠠᠳ ᠬᠡᠣᠬᠡᠨᠴᠣᠣᠯ ᠢ᠋ᠶ᠋ᠠᠷ ᠠᠷᠢᠬᠢ ᠱᠣᠭᠰᠢᠭᠤᠯᠤᠨ ᠪᠠᠷᠢᠵᠤ ᠪᠠᠳᠣᠸᠴᠢᠷ ᠲᠣᠸᠠᠨᠵᠠᠩ ᠢ᠋ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠬᠦᠨᠳᠦᠯᠡᠵᠦ ᠲᠡᠭᠦᠨ ᠢ᠋《ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠤ᠋ ᠠᠮᠤᠷ ᠲᠦᠪᠰᠢᠨ ᠢ᠋ ᠬᠠᠮᠠᠭᠠᠯᠠᠬᠤ ᠳ᠋ᠤ᠌ ᠯᠤᠲᠤ ᠶᠡᠬᠡ ᠭᠠᠪᠢᠶᠠ ᠵᠢᠳᠬᠦᠯ ᠦᠵᠡᠭᠦᠯᠦᠯᠡ》 ᠭᠡᠵᠦ ᠠᠮᠠ ᠬᠠᠭᠤᠷᠠᠢ ᠦᠭᠡᠢ ᠦᠭᠡᠢ ᠡᠷᠭᠦᠨ ᠮᠠᠭᠲᠠᠪᠠ᠃
ᠪᠠᠲᠤᠸᠴᠢᠷ ᠳᠤᠸᠠᠨᠵᠠᠩ ᠪᠠᠭᠠ ᠬᠠᠲᠤᠨ ᠤ᠋ ᠢᠩᠬᠭᠢᠵᠦ ᠳᠠᠢᠯᠠᠭᠰᠠᠨ ᠳ᠋ᠤ᠌ ᠰᠡᠳᠬᠢᠯ ᠰᠦᠷᠡᠬᠡᠢ ᠬᠥᠳᠡᠯᠵᠡᠢ᠃ ᠱᠠᠭᠠᠵᠠᠭᠠᠢ ᠶ᠋ᠢᠨ ᠱᠠᠭᠰᠢᠯᠭᠠ ᠰᠢᠭ᠋ ᠤᠷᠠᠨ ᠦᠭᠡ᠂ ᠥᠬᠢᠳ ᠪᠦᠰᠡᠭᠦᠢ ᠶ᠋ᠢᠨ ᠮᠢᠰᠢᠶᠡᠬᠦ ᠴᠢᠷᠠᠢ᠂ ᠰᠠᠷᠬᠤᠳ ᠨᠠᠩᠴᠢᠳ ᠤ᠋ᠨ ᠱᠠᠯᠠᠯᠭᠠ᠂ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠶ᠋ᠢᠨ ᠤᠶᠠᠩᠭᠠ ᠬᠥᠭ ᠲᠦ᠍ ᠪᠠᠲᠤᠸᠴᠢᠷ ᠳᠤᠸᠠᠨᠵᠠᠩ ᠤ᠋ᠨ ᠲᠣᠯᠣᠭᠠᠢ ᠨᠢ ᠬᠥᠭᠡᠷᠦᠨ ᠬᠥᠪᠬᠡᠯᠵᠡᠬᠦ ᠳ᠋ᠡᠭᠡᠨ ᠵᠤᠳᠪᠠ ᠮᠡᠢᠷᠡᠨ ᠦ᠌ ᠬᠡᠯᠡᠭᠰᠡᠨ 《ᠮᠠᠨ ᠤ᠋ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠪᠠᠭᠠ ᠬᠠᠲᠤᠨ ᠭᠡᠭᠴᠢ ᠴᠡᠴᠡᠭ ᠨᠠᠪᠴᠢ ᠰᠢᠭ᠋ ᠴᠡᠪᠡᠷᠬᠡᠨ ᠪᠦᠰᠡᠭᠦᠢ ᠪᠣᠢ ᠳᠠ ! ᠴᠢᠳᠠᠯ ᠠᠪᠢᠶᠠᠰ ᠴᠢᠨᠢ ᠲᠡᠩᠴᠡᠪᠡᠯ ᠴᠦ᠍ ᠴᠢᠭᠢᠭ ᠬᠤᠷᠠ ᠨᠢ ᠪᠠᠭᠤᠨᠠ ᠳᠠ!》 ᠭᠡᠰᠡᠨ ᠢ᠋ ᠰᠠᠨᠠᠵᠤ ᠣᠯᠤᠨ ᠬᠦᠯᠴᠭᠦᠷᠡᠮᠡᠭ ᠴᠢᠷᠠᠢᠯᠠᠨ᠄
- ᠲᠠ ᠴᠦ᠍ ᠨᠡᠭᠡᠷᠡᠨ ᠴᠡᠴᠡᠭ ᠨᠠᠪᠴᠢ ᠰᠢᠭ᠋ ᠴᠡᠪᠡᠷᠬᠡᠨ ᠬᠠᠲᠤᠨ ᠶᠤᠮ ᠠ᠋᠃ ᠵᠠᠩ ᠰᠠᠢᠲᠠᠢ ᠬᠥᠮᠦᠨ ᠳ᠋ᠦ᠍ ᠨᠥᠬᠥᠷ ᠣᠯᠠᠨ᠂ ᠴᠢᠭᠢᠭ ᠰᠠᠢᠲᠠᠢ ᠠᠭᠤᠯᠠᠨ ᠳ᠋ᠤ᠌ ᠴᠡᠴᠡᠭ ᠠᠷᠪᠢᠨ ᠭᠡᠳᠡᠭ ᠰᠢᠳᠡ᠃ ᠭᠡᠳ ᠪᠠᠭᠠ ᠬᠠᠲᠤᠨ ᠤ᠋ ᠭᠠᠷ ᠢ᠋ ᠪᠠᠷᠢᠬᠤ ᠭᠡᠬᠦᠯᠡᠷ ᠪᠠᠭᠠ ᠬᠠᠲᠤᠨ ᠭᠠᠷ ᠢ᠋ᠶ᠋ᠠᠨ ᠬᠤᠷᠳᠤᠬᠠᠨ ᠵᠠᠢᠯᠠᠭᠤᠯᠵᠤ ᠬᠤᠨᠳᠠᠭᠠ ᠲᠠᠢ ᠠᠷᠢᠬᠢ ᠪᠠᠨ ᠠᠪᠴᠤ᠄
- ᠪᠠ ᠳᠤᠸᠠᠨᠵᠠᠩ ᠠ᠋᠂ ᠬᠤᠨᠳᠠᠭᠠ ᠲᠠᠢ ᠪᠠᠨ ! ᠭᠡᠵᠦ ᠦᠭᠡᠨ ᠦ᠌ ᠰᠡᠵᠢᠭᠦᠷ ᠢ᠋ ᠰᠢᠯᠵᠢᠭᠦᠯᠦᠨ ᠬᠤᠨᠳᠠᠭᠠ ᠡᠷᠭᠦᠪᠡᠯ ᠪᠠᠲᠤᠸᠴᠢᠷ᠄
- ᠵᠠ᠂ ᠵᠠ ! ᠴᠡᠴᠡᠭ ᠨᠢ ᠰᠠᠢᠬᠠᠨ ᠪᠣᠯᠪᠠᠴᠤ ᠴᠢᠭᠢᠭ ᠨᠢ ᠳᠤᠲᠠᠭᠤᠳᠠᠵᠤ ᠪᠠᠢᠭᠠ ᠪᠢᠵᠡ ! ᠤᠰᠤᠯᠠᠶᠠ᠂ ᠤᠰᠤᠯᠠᠶᠠ ᠁ ᠭᠡᠳ ᠪᠠᠭᠠ ᠬᠠᠲᠤᠨ ᠤ᠋ ᠬᠤᠨᠳᠠᠭᠠ ᠲᠠᠢ ᠠᠷᠢᠬᠢ ᠶ᠋ᠢ ᠴᠠᠯᠭᠢᠲᠠᠯᠠ ᠲᠤᠯᠭᠠᠵᠤ ᠪᠠᠷᠤᠭ ᠬᠤᠨᠳᠠᠭᠠ ᠲᠠᠢ ᠨᠢ ᠵᠠᠯᠭᠢᠴᠢᠬᠠᠮᠠᠷ ᠬᠥᠨᠲᠥᠷᠪᠡ᠃
ᠪᠠᠭᠠ ᠬᠠᠲᠤᠨ᠂ ᠪᠠ ᠳᠤᠸᠠᠨᠵᠠᠩ ᠤ᠋ᠨ ᠠᠷᠢᠬᠢ ᠨᠢ ᠬᠡᠲᠦᠷᠡᠵᠦ ᠠᠪᠢᠶᠠᠰ ᠨᠢ ᠴᠤᠬᠤᠯᠵᠠᠭᠰᠠᠨ ᠢ᠋ ᠮᠡᠳᠡᠭᠡᠳ ᠳᠣᠣᠷᠠᠬᠢ ᠬᠥᠮᠦᠰ ᠲᠡᠭᠡᠨ ᠨᠢᠳᠦ ᠵᠠᠷᠤᠵᠤ 《ᠲᠠ ᠨᠠᠷ ᠡᠭᠦᠨ ᠢ᠋ ᠰᠠᠢᠲᠤᠷ ᠠᠷᠭᠠᠳᠠᠵᠤ ᠮᠤᠩᠬᠠᠷᠠᠲᠠᠯᠠ ᠰᠣᠭᠲᠣᠭᠠᠵᠤ ᠣᠷᠭᠢ !》 ᠭᠡᠰᠡᠨ ᠳᠣᠬᠢᠶᠠ ᠥᠭᠴᠦ ᠪᠡᠶᠡ ᠴᠢᠯᠥᠭᠡᠯᠡᠨ ᠵᠠᠢᠯᠠᠪᠠ᠃ ᠲᠡᠭᠦᠨ ᠦ᠌ ᠣᠷᠣᠨ ᠳ᠋ᠤ᠌ ᠳᠠᠭᠤᠴᠢᠨ ᠪᠦᠰᠡᠭᠦᠢ ᠶ᠋ᠢᠨ ᠨᠢᠭᠡ ᠨᠢ ᠣᠷᠣᠯᠠᠵᠤ ᠰᠠᠭᠤᠨ᠂ ᠠᠶᠠ ᠡᠷᠭᠦᠨ ᠠᠷᠢᠬᠢ ᠪᠠᠷᠢᠪᠠ᠃
ᠵᠠᠮ ᠤ᠋ᠨ ᠵᠠᠬᠠ ᠳ᠋ᠤ᠌ ᠵᠠᠮᠤᠷ ᠰᠠᠢᠬᠠᠨ
ᠵᠠᠯᠠᠭᠤ ᠪᠠᠢᠬᠤ ᠳ᠋ᠤ᠌ ᠵᠢᠰᠦ ᠰᠠᠢᠬᠠᠨ ᠁ ᠭᠡᠵᠦ ᠳᠠᠭᠤᠴᠢ ᠪᠦᠰᠡᠭᠦᠢ ᠪᠠ ᠳᠤᠸᠠᠨᠵᠠᠩ ᠳ᠋ᠤ᠌ ᠳᠠᠭᠤᠯᠠᠬᠤ ᠶ᠋ᠢᠨ ᠬᠠᠮᠲᠤ ᠠᠷᠢᠬᠢ ᠪᠠᠢᠪᠠᠯ ᠲᠡᠷᠡ ᠪᠡᠷ ᠰᠡᠳᠬᠢᠯ ᠨᠢ ᠰᠡᠷᠪᠡᠯᠵᠡᠨ ᠥᠨᠳᠡᠯᠵᠡᠵᠦ ᠪᠥᠭᠰᠡᠨ ᠳ᠋ᠡᠭᠡᠨ ᠡᠷᠭᠢᠭᠦᠯᠭᠡ ᠲᠡᠢ ᠶᠦᠮ ᠰᠢᠭ ᠰᠠᠭᠤᠵᠤ ᠲᠣᠭᠲᠠᠬᠤ ᠦᠭᠡᠢ ᠲᠠᠰᠢᠶᠠ ᠪᠠᠷ ᠢ᠋ᠶ᠋ᠠᠨ ᠬᠣᠯᠬᠣᠯᠵᠠᠨ᠄
- ᠠᠶᠠ ! ᠪᠠᠭᠠ ᠬᠠᠲᠤᠨ ᠤ᠋ ᠬᠣᠭᠣᠯᠠᠢ ᠨᠢ ᠬᠣᠩᠬᠣ ᠰᠢᠭ᠋ ᠬᠣᠨᠳᠣᠯᠠᠢ ᠨᠢ ᠴᠡᠴᠡᠭ ᠰᠢᠭ᠌ ᠭᠡᠳ ᠪᠠᠷᠢᠭᠰᠠᠨ ᠬᠤᠨᠳᠠᠭᠠ ᠲᠠᠢ ᠠᠷᠢᠬᠢ ᠶ᠋ᠢ ᠨᠢ ᠬᠥᠨᠲᠥᠷᠴᠦ ᠯᠡ ᠪᠠᠢᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠴᠡᠴᠡᠭ ᠰᠢᠭ ᠴᠡᠪᠡᠷᠬᠡᠨ ᠪᠠᠭᠠ ᠬᠠᠲᠤᠨ ᠯᠠ ᠭᠠᠵᠠᠷ ᠠᠪᠴᠤ ᠨᠢᠳᠦᠨ ᠳ᠋ᠦ᠍ᠨᠢ ᠴᠡᠴᠡᠭ ᠦ᠋ᠨ ᠡᠷᠪᠡᠬᠡᠢ ᠡᠷᠭᠢᠯᠳᠦᠬᠦ ᠡᠴᠡ ᠪᠣᠯᠵᠤ ᠲᠡᠷᠡ ᠳᠠᠭᠤᠴᠢ ᠪᠦᠰᠡᠭᠦᠢ ᠶ᠋ᠢᠨ ᠵᠥᠭᠡᠯᠡᠨ ᠴᠠᠭᠠᠨ ᠭᠠᠷ ᠢ᠋ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠠᠯᠠᠭᠠᠨ ᠳᠡᠭᠡᠷᠡ ᠲᠠᠯᠪᠢᠵᠤ ᠳᠡᠭᠡᠷᠡ ᠡᠴᠡ ᠨᠢ ᠥᠭᠦᠭᠡᠷᠲᠡᠨ ᠲᠠᠪᠰᠢᠵᠤ 《ᠪᠠᠭᠠ ᠬᠠᠲᠤᠨ ᠦᠨᠡᠬᠡᠷ ᠴᠡᠴᠡᠭ ᠰᠢᠭ᠌ ᠴᠡᠪᠡᠷᠬᠡᠨ ᠲᠥᠷᠥᠭᠰᠡᠨ ᠮᠥᠷᠲᠡᠭᠡᠨ ᠳᠠᠭᠤᠤ ᠶ᠋ᠢ ᠴᠦ᠍ ᠰᠠᠢᠬᠠᠨ ᠳᠠᠭᠤᠯᠠᠵᠤ ᠪᠠᠢᠨᠠ᠃ ᠴᠢᠷᠠᠢ ᠨᠢ ᠴᠡᠴᠡᠭ ᠰᠢᠭ᠂ ᠬᠣᠭᠣᠯᠠᠢ ᠨᠢ ᠬᠣᠩᠬᠣ ᠰᠢᠭ᠋᠁》 ᠭᠡᠳ ᠬᠡᠯᠡᠭᠰᠡᠨ ᠦᠭᠡ ᠪᠡᠨ ᠨᠤᠷᠰᠢᠨ ᠨᠣᠵᠣᠭᠣᠷᠠᠬᠤ ᠳ᠋ᠤ᠌ ᠳᠠᠭᠤᠴᠢ ᠪᠦᠰᠡᠭᠦᠢ ᠲᠡᠭᠦᠨ ᠦ᠌ ᠡᠮᠦᠨᠡ ᠡᠴᠡ᠄
- ᠪᠠ ᠳᠤᠸᠠᠨᠵᠠᠩ ᠴᠤ᠌ ᠶᠣᠰᠣᠲᠠᠢ ᠨᠢᠭᠡ ᠡᠷᠡ ᠬᠥᠮᠦᠨ ᠪᠠᠢᠨᠠ ᠳᠠ ! ᠠᠷᠢᠬᠢ ᠶ᠋ᠢ ᠰᠠᠢᠨ ᠴᠦ᠍ ᠤᠤᠭᠤᠨᠠ᠂ ᠰᠠᠢᠬᠠᠨ ᠴᠤ᠌ ᠤᠤᠭᠤᠨᠠ᠂ ᠶᠣᠰᠣᠲᠠᠢ ᠯᠠ ᠬᠣᠳᠣᠭᠣᠳᠣ ᠨᠢ ᠯᠣᠩᠬᠣ ᠰᠢᠭ᠋ ᠭᠡᠬᠦ ᠳ᠋ᠦ᠍ ᠪᠠ ᠳᠤᠸᠠᠨᠵᠠᠩ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠲᠠᠰᠤᠯᠵᠤ᠄
- ᠬᠦᠢ ! ᠮᠢᠨᠦ ᠬᠣᠳᠤᠭᠤᠲᠤ ᠯᠣᠩᠬᠣ ᠰᠢᠭ᠋ ᠪᠠᠢᠨᠠ ᠭᠡᠵᠢ ᠤᠤ ? ᠬᠢ ᠬᠢ ᠂ ᠯᠣᠩᠬᠣ ᠰᠢᠭ᠋ ! ᠨᠡᠭᠡᠷᠡᠨ ᠦᠤ ? ᠭᠡᠳ ᠬᠤᠨᠳᠠᠭᠠ ᠲᠠᠢ ᠠᠷᠢᠬᠢ ᠶ᠋ᠢ ᠴᠢᠮᠠᠯᠠᠵᠤ᠂ ᠭᠠᠯᠠᠭᠤᠨ ᠬᠦᠵᠦᠭᠦᠲᠦ ᠶ᠋ᠢᠨ ᠳᠠᠷᠪᠠᠭᠠᠷ ᠠᠮᠠᠰᠠᠷ ᠢ᠋ ᠠᠮᠠ ᠲᠠᠢ ᠪᠠᠨ ᠲᠠᠭᠠᠷᠠᠭᠤᠯᠵᠤ ᠶᠡᠬᠡ ᠰᠠᠪᠠ ᠪᠠᠷ ᠨᠢ ᠶᠡᠭᠦᠯᠡᠵᠦ ᠠᠰᠬᠠᠨ ᠴᠢᠳᠬᠤᠨ ᠤᠤᠭᠤᠪᠠ᠃ ᠵᠣᠯ ᠢ᠋ᠶ᠋ᠠᠷ ᠲᠡᠷᠡ ᠭᠠᠯᠠᠭᠤᠨ ᠬᠦᠵᠦᠭᠦᠲᠦ ᠪᠣᠳᠣᠩ ᠳ᠋ᠤ᠌ ᠠᠷᠢᠬᠢ ᠳᠡᠮᠡᠢ ᠪᠠᠢᠭᠰᠠᠨ ᠦᠭᠡᠢ᠃
- ᠣᠳᠣ ᠮᠢᠨᠦ ᠬᠣᠳᠣᠭᠣᠳᠣ ᠯᠣᠩᠬᠣ ᠶ᠋ᠢᠨ ᠪᠣᠳᠣᠩ ᠤᠤ ? ᠠ ? ᠭᠡᠵᠦ ᠪᠡᠶᠡ ᠪᠡᠨ ᠤᠯᠠᠮ ᠰᠦᠷᠡᠬᠡᠢ ᠠᠷᠢᠬᠢ ᠤᠤᠭᠤᠳᠠᠭ ᠭᠡᠵᠦ ᠭᠠᠢᠬᠠᠭᠤᠯᠬᠤ ᠳ᠋ᠤ᠌ ᠵᠠᠪᠠᠵᠢᠨ ᠠ᠋ᠴᠠ ᠨᠢ ᠭᠣᠭᠣᠵᠢᠭᠰᠠᠨ ᠠᠷᠢᠬᠢ ᠡᠩᠭᠡᠯᠵᠡᠭᠦᠷ ᠢ᠋ ᠨᠢ ᠱᠠᠯ ᠨᠣᠷᠭᠠᠭᠰᠠᠨ ᠪᠠᠢᠯᠠ᠃ ᠪᠠ ᠳᠤᠸᠠᠨᠵᠠᠩ ᠱᠠᠯ ᠰᠣᠭᠲᠣᠵᠠᠢ᠃
- ᠰᠡᠷᠭᠦᠮᠡ ᠠ᠋ ! ᠨᠠᠭᠠᠰᠢ ᠪᠠᠨ ᠢᠷᠡᠭᠡᠴᠢ᠂ ᠴᠡᠴᠡᠭ ᠬᠤᠸᠠᠷ ᠰᠢᠭ᠋ ᠬᠥᠭᠡᠷᠦᠬᠦᠨ ᠶᠠᠭᠤᠮᠠ ᠁ ᠠᠯᠢᠪ᠂ ᠪᠢ ᠨᠢᠭᠡ ᠡᠮᠬᠦᠶᠡ᠂ ᠮᠢᠨᠦ ᠬᠣᠳᠣᠭᠣᠳᠣ ᠯᠣᠩᠬᠣ ᠰᠢᠭ᠋᠂ ᠴᠢᠨᠦ ᠬᠣᠭᠣᠯᠠᠢ ᠬᠣᠩᠬᠣ ᠰᠢᠭ᠋ ᠁ ᠭᠡᠵᠦ ᠱᠣᠯᠢ ᠦᠭᠡᠢ ᠶᠠᠭᠤᠮᠠ ᠱᠠᠯᠴᠢᠭᠰᠠᠭᠠᠷ ᠶᠠᠭᠤ ᠴᠤ᠌ ᠮᠡᠳᠡᠬᠦ ᠦᠭᠡᠢ ᠤᠬᠠᠭᠠ ᠠᠯᠳᠠᠪᠠ ᠁
ᠲᠡᠷᠡ ᠤᠳᠠᠭᠠᠨ ᠤ᠋ ᠲᠠᠢᠯᠠᠯᠭᠠᠨ ᠳ᠋ᠤ᠌ ᠪᠠ ᠳᠤᠸᠠᠨᠵᠠᠩ ᠤᠬᠠᠭᠠ ᠠᠯᠳᠠᠲᠠᠯᠠ ᠰᠣᠭᠲᠣᠭᠰᠠᠨ ᠪᠣᠯᠪᠠᠴᠤ ᠤᠷᠠᠳ ᠠᠷᠠᠳ ᠤ᠋ᠨ ᠤᠷᠲᠤ ᠶ᠋ᠢᠨ ᠰᠠᠢᠬᠠᠨ ᠳᠠᠭᠤᠤ ᠪᠣᠯᠤᠨ ᠰᠡᠷᠭᠦᠮᠡ ᠶ᠋ᠢᠨ ᠭᠠᠩᠭᠠᠩ ᠰᠠᠢᠬᠠᠨ ᠵᠢᠰᠦ ᠴᠢᠷᠠᠢ᠂ ᠵᠠᠩ ᠠᠭᠠᠯᠢ ᠨᠢ ᠲᠡᠭᠦᠨ ᠦ᠌ ᠪᠣᠳᠣᠯ ᠳ᠋ᠤ᠌ ᠠᠷᠢᠯᠤᠰᠢ ᠦᠭᠡᠢ ᠬᠣᠨᠣᠭᠰᠢᠵᠤ᠂ ᠪᠠᠭᠠ ᠬᠠᠲᠤᠨ ᠰᠡᠷᠭᠦᠮᠡ ᠶ᠋ᠢ ᠡᠵᠡᠮᠳᠡᠬᠦ ᠰᠠᠨᠠᠭᠠ ᠶ᠋ᠢ ᠨᠢ ᠤᠯᠠᠮ ᠣᠪᠣᠯᠵᠠᠭᠤᠯᠵᠠᠢ᠃ ᠲᠡᠭᠡᠬᠦ ᠪᠡᠷ ᠡᠯᠳᠡᠪ ᠰᠢᠯᠲᠠᠭ ᠡᠷᠢᠵᠦ ᠪᠠᠢᠨ ᠪᠠᠢᠨ ᠪᠠᠭᠠ ᠬᠠᠲᠤᠨ ᠤ᠋ ᠣᠷᠤᠭᠤ ᠭᠦᠶᠦᠵᠦ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠬᠠᠲᠠᠪᠴᠢ ᠶ᠋ᠢ ᠡᠯᠡᠭᠡᠳᠡᠭ ᠦ᠋ᠨ ᠨᠢᠭᠡ ᠪᠣᠯᠵᠠᠢ᠃ 《ᠡᠷᠡ ᠦᠭᠡᠢ ᠪᠡᠯᠪᠡᠰᠦᠨ ᠡᠮᠡ ᠶ᠋ᠢᠨ ᠡᠯᠳᠡᠩ ᠵᠠᠩ ᠢ᠋ ᠡᠷᠡ ᠬᠥᠮᠦᠨ ᠶᠠᠮᠠᠷ ᠠᠨᠳᠠᠬᠤ ᠪᠢᠰᠢ᠃ ᠭᠡᠳᠡᠭᠡ ᠲᠡᠢ ᠭᠠᠵᠠᠷ ᠢ᠋ ᠨᠢ ᠪᠠᠵᠠᠭᠠᠳ ᠠᠪᠤᠪᠠᠯ ᠭᠡᠳᠡᠷᠭᠦ ᠪᠡᠨ ᠴᠢᠮᠠᠶ᠋ᠢ ᠬᠠᠵᠠᠭᠠᠳ ᠠᠪᠬᠤ ᠰᠢᠭ᠋ ᠲᠣᠷᠭᠠᠨ ᠴᠠᠪᠢ ᠪᠠᠷ ᠢ᠋ᠶ᠋ᠠᠨ ᠴᠡᠴᠡᠷᠭᠡᠨᠡᠭᠡᠳ ᠲᠠᠪᠲᠤᠷ ᠠᠯᠳᠠᠬᠤ ᠪᠣᠢ ! ᠪᠠᠭᠠ ᠬᠠᠲᠤᠨ ᠴᠤ᠌ ᠬᠦᠩ ᠨᠣᠶᠠᠨ ᠠ᠋ᠴᠠ ᠬᠣᠢᠰᠢ ᠬᠡᠳᠦᠨ ᠵᠢᠯ ᠰᠤᠪᠠᠢ ᠭᠦᠶᠦᠭᠰᠡᠨ ᠦᠨᠢᠶᠡ ᠰᠢᠭ ᠣᠷᠣᠭᠠ ᠨᠢ ᠣᠷᠣᠭᠠᠳ ᠠᠷᠭᠠ ᠦᠭᠡᠢ ᠪᠣᠯᠵᠤ ᠪᠠᠢᠬᠤ ᠪᠣᠢ ᠁ ᠡᠨᠡ ᠦᠶᠡ ᠳ᠋ᠦ᠍ ᠴᠢ ᠶᠠᠭᠠᠬᠢᠵᠤ ᠪᠣᠯᠬᠤ ᠦᠭᠡᠢ ᠭᠡᠬᠦ ᠪᠣᠢ ᠳᠠ! ᠡᠮᠡ ᠬᠥᠮᠦᠨ ᠭᠡᠭᠴᠢ ᠡᠷᠬᠡ ᠰᠦᠷᠳᠡᠨ᠂ ᠡᠳ᠋ ᠮᠥᠩᠭᠥᠲᠡᠨ ᠦ᠌ ᠥᠨᠳᠥᠷ ᠬᠡᠷᠡᠮ ᠢ᠋ ᠳᠠᠪᠠᠵᠤ ᠳᠡᠢᠯᠳᠡᠭ ᠦᠭᠡᠢ ᠡᠪᠦᠳᠦᠭ ᠨᠢ ᠨᠠᠬᠢᠯᠵᠠᠭᠠᠳ ᠪᠠᠢᠳᠠᠭ ᠶᠤᠮ᠃ ᠡᠪᠲᠦ ᠱᠠᠭᠠᠵᠠᠭᠠᠢ ᠪᠤᠭᠤ ᠪᠠᠷᠢᠨᠠ ᠭᠡᠳᠡᠭ ᠦᠨᠡᠨ᠃ ᠪᠠ ᠲᠤᠸᠠᠨᠵᠠᠩ ᠡᠪ ᠢ᠋ ᠨᠢ ᠮᠡᠳᠡᠭᠰᠡᠨ ᠬᠡᠷᠡᠭ᠃ ᠣᠷᠣᠭᠠ ᠨᠢ ᠣᠷᠣᠭᠠ ᠪᠠᠷ ᠢ᠋ᠶ᠋ᠠᠨ ᠵᠢᠷᠣᠭᠠ ᠨᠢ ᠵᠢᠷᠣᠭᠠ ᠪᠠᠷ ᠢ᠋ᠶ᠋ᠠᠨ ᠭᠡᠳᠡᠭ ᠢ᠋ᠶ᠋ᠡᠷ ᠪᠠᠭᠠ ᠬᠠᠲᠤᠨ ᠪᠠ ᠲᠤᠸᠠᠨᠵᠠᠩ ᠬᠣᠶᠠᠷ ᠴᠤ᠌ ᠪᠣᠯ ᠨᠠᠰᠤ ᠵᠢᠯ᠂ ᠵᠢᠰᠦ ᠥᠩᠭᠡ᠂ ᠪᠡᠶᠡ ᠭᠠᠯᠪᠢᠷ᠂ ᠵᠡᠷᠭᠡ ᠵᠢᠩᠰᠡ ᠬᠠᠮᠢᠭᠠ ᠠ᠋ᠴᠠ ᠨᠢ ᠠᠪᠤᠭᠠᠳ ᠬᠣᠯᠪᠣᠭᠰᠠᠨ ᠴᠤ᠌ ᠬᠠᠵᠠᠢᠬᠤ ᠶᠠᠭᠤᠮᠠ ᠦᠭᠡᠢ ᠶᠠᠪ ᠴᠠᠪ ᠲᠣᠬᠢᠷᠠᠵᠤ ᠵᠡᠭᠦᠦ ᠤᠲᠠᠰᠤ ᠰᠦᠪᠡᠯᠡᠭᠰᠡᠨ ᠰᠢᠭ ᠶᠠᠭᠤᠮᠠ ᠪᠣᠯᠤᠨᠠ ᠳᠠ!》 ᠭᠡᠵᠦ ᠵᠤᠳᠪᠠ ᠮᠡᠢᠷᠡᠨ ᠦ᠌ ᠬᠡᠯᠡᠭᠰᠡᠨ ᠦᠭᠡ ᠨᠦ᠍ᠭᠦᠳ᠂ ᠲᠡᠭᠦᠨ ᠦ᠌ ᠴᠢᠬᠢᠨ ᠦ᠌ ᠬᠤᠯᠤᠭᠤ ᠶ᠋ᠢ ᠵᠠᠭᠠᠲᠤᠨᠠᠭᠤᠯᠤᠭᠠᠳ ᠥᠯᠮᠡᠢ ᠶ᠋ᠢᠨ ᠬᠢᠨᠢ ᠦᠵᠦᠭᠦᠷ ᠢ᠋ ᠪᠠᠭᠠ ᠬᠠᠲᠤᠨ ᠤ᠋ ᠤᠷᠤᠭᠤ ᠱᠣᠭᠰᠢᠭᠤᠯᠤᠭᠠᠳ ᠪᠠᠢᠳᠠᠭ ᠪᠣᠯᠪᠠ᠃
ᠪᠠ ᠲᠤᠸᠠᠨᠵᠠᠩ ᠦᠷᠭᠦᠯᠵᠢ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠣᠷᠣᠨ ᠭᠠᠷᠤᠨ ᠪᠠᠭᠠ ᠬᠠᠲᠤᠨ ᠤ᠋ ᠴᠢᠬᠢᠨ ᠳ᠋ᠦ᠍ ᠰᠣᠨᠣᠰᠬᠤᠯᠠᠩ ᠲᠠᠢ ᠴᠢᠮᠡᠭ ᠦᠭᠡ ᠶ᠋ᠢ ᠮᠢᠯᠢᠶᠠᠵᠤ ᠬᠡᠯᠡᠨ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠢ᠋ ᠬᠣᠨᠵᠢᠬᠤ ᠰᠠᠨᠠᠭᠠ ᠲᠠᠢ ᠲᠣᠭᠣᠷᠢᠭᠤᠯᠵᠤ ᠲᠣᠭᠰᠢᠨᠠ᠃
ᠨᠢᠭᠡ ᠡᠳᠦᠷ ᠪᠠ ᠲᠤᠸᠠᠨᠵᠠᠩ ᠪᠠᠭᠠ ᠬᠠᠲᠤᠨ ᠤ᠋ ᠳ᠋ᠤ᠌ ᠢᠷᠡᠭᠡᠳ ᠴᠠᠢ ᠤᠤᠭᠤᠵᠤ᠂ ᠬᠠᠷᠠ ᠲᠠᠮᠠᠬᠢ ᠰᠣᠷᠣᠬᠤ ᠶ᠋ᠢᠨ ᠳᠠᠭᠠᠤ᠄
- ᠡᠨᠡ ᠵᠡᠭᠦᠨᠲᠡᠢ ᠬᠤᠳᠳᠤᠭ ᠳᠡᠭᠡᠷᠡ ᠪᠢᠷᠠᠭᠤ ᠳᠠᠭᠠᠭᠤᠯᠤᠭᠰᠠᠨ ᠰᠢᠷᠠ ᠲᠠᠷᠯᠠᠨ ᠬᠤᠰᠠᠷᠠᠩ ᠦᠨᠢᠶᠡ ᠬᠠᠭᠰᠠᠭᠰᠠᠨ ᠮᠣᠳᠣᠨ ᠣᠩᠭᠣᠴᠠ ᠶ᠋ᠢ ᠦᠨᠦᠷᠯᠡᠵᠦ ᠵᠣᠭᠰᠣᠨᠠ᠃ ᠡᠨᠡ ᠭᠠᠩ ᠤ᠋ᠨ ᠬᠠᠯᠠᠭᠤᠨ ᠳ᠋ᠤ᠌ ᠬᠡᠴᠡᠭᠦᠦ ᠤᠮᠳᠠᠭᠠᠰᠤᠭᠰᠠᠨ ᠶᠠᠩᠵᠤᠲᠠᠢ᠃ ᠨᠢᠭᠡ ᠬᠣᠪᠣᠭᠣ ᠤᠰᠤ ᠲᠠᠲᠠᠭᠠᠳ ᠨᠢᠭᠡ ᠰᠠᠢᠨ ᠴᠠᠩᠭᠠᠭᠠ ᠶ᠋ᠢ ᠨᠢ ᠲᠠᠢᠯᠴᠢᠬᠠᠬᠤ ᠶᠤᠮ ᠤᠤ ᠭᠡᠳ ᠬᠤᠳᠳᠤᠭ ᠳᠡᠭᠡᠷᠡ ᠬᠦᠷᠦᠭᠡᠳ ᠣᠴᠢᠪᠠᠯ ᠣᠭᠣᠰᠣᠷ ᠦᠭᠡᠢ ᠬᠣᠪᠣᠭᠣ ᠥᠨᠥᠴᠢᠷᠡᠯᠲᠡᠢ ᠪᠠᠢᠭᠠ ᠳ᠋ᠤ᠌ ᠪᠢ ᠥᠨᠥᠬᠢ ᠶ᠋ᠢ ᠴᠢᠨᠢ ᠤᠰᠤᠯᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ! ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠪᠠᠭᠠ ᠬᠠᠲᠤᠨ ᠬᠦᠢᠲᠡᠨ ᠢᠨᠢᠶᠡᠭᠡᠳ᠄
- ᠥᠴᠥᠭᠡᠳᠦᠷ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠥᠪᠡᠭᠡᠨ ᠳ᠋ᠦ᠍ ᠨᠢᠭᠡ ᠵᠥᠨᠥᠭᠰᠡᠨ ᠬᠦᠷᠡᠩ ᠪᠤᠬᠠ ᠦᠨᠢᠶᠡᠨ ᠦ᠌ ᠰᠢᠭᠡᠰᠦ ᠰᠢᠩᠰᠢᠯᠡᠵᠦ ᠶᠠᠪᠤᠭᠰᠠᠭᠠᠷ ᠪᠠᠢᠵᠤ ᠤᠯᠠᠭᠠᠨ ᠵᠠᠭᠠᠷᠠᠭ ᠲᠠᠢ ᠱᠠᠯᠪᠠᠭ ᠲᠤ᠌ ᠰᠢᠪᠠᠷᠳᠠᠴᠢᠬᠠᠭᠰᠠᠨ ᠵᠣᠭᠰᠣᠵᠤ ᠪᠠᠢᠨᠠ ᠭᠡᠰᠡᠨ᠃ ᠲᠡᠭᠡᠭᠡᠳ ᠵᠢᠪᠠᠷ ᠳᠡᠭᠡᠷᠡ ᠡᠴᠡ ᠰᠡᠩᠭᠢᠨᠡᠬᠦ ᠦᠨᠢᠶᠡᠨ ᠦ᠌ ᠰᠢᠩᠭᠡᠭ ᠦᠨᠦᠷᠲᠦᠨ ᠰᠠᠨᠳᠤᠷᠬᠤ ᠳ᠋ᠠᠭᠠᠨ ᠬᠥᠳᠡᠯᠵᠦ ᠳᠡᠢᠯᠬᠦ ᠦᠭᠡᠢ ᠳᠡᠮᠡᠢ ᠯᠡ ᠰᠥᠭᠡᠩᠭᠢ ᠳᠠᠭᠤᠨ ᠢ᠋ᠶ᠋ᠠᠷ ᠮᠥᠭᠡᠷᠡᠵᠦ ᠪᠠᠢᠨᠠ᠃ ᠬᠢᠴᠢᠶᠡᠬᠦ ᠦᠭᠡᠢ ᠪᠣᠯ ᠭᠣᠣᠯ ᠤ᠋ᠨ ᠰᠢᠮᠠᠭᠤᠯ ᠳ᠋ᠤ᠌ ᠠᠮᠢᠳᠤ ᠪᠠᠷ ᠪᠠᠷᠢᠭᠳᠠᠨᠠ ᠭᠡᠵᠦ ᠮᠠᠨ ᠤ᠋ ᠨᠣᠶᠠᠨ ᠰᠠᠩ ᠤ᠋ᠨ ᠦᠬᠡᠷ ᠦ᠋ᠨ ᠬᠥᠮᠦᠨ ᠬᠡᠯᠡᠵᠦ ᠪᠠᠢᠨᠠ ᠪᠢᠯᠡ ᠭᠡᠳ ᠲᠡᠭᠦᠨ ᠦ᠌ ᠠᠮᠠ ᠶ᠋ᠢ ᠲᠣᠭᠰᠢᠪᠠ᠃
ᠪᠠ ᠲᠤᠸᠠᠨᠵᠠᠩ ᠪᠠᠭᠠ ᠬᠠᠲᠤᠨ ᠤ᠋ ᠬᠠᠵᠠᠭᠤ ᠬᠠᠪᠢᠷᠭᠠ ᠪᠠᠷ ᠵᠢᠭᠠᠬᠠᠨ ᠬᠦᠦ ᠨᠢ ᠳᠠᠪᠬᠢᠵᠤ ᠭᠦᠶᠦᠭᠡᠳ ᠪᠠᠢᠬᠤᠯᠠᠷ ᠰᠢᠭᠤᠳ ᠭᠠᠷ ᠲᠥᠷᠥᠵᠦ ᠪᠣᠯᠳᠠᠭ ᠦᠭᠡᠢ᠃ ᠡᠷᠭᠦᠮᠡᠯ ᠡᠬᠡ ᠨᠢ ᠭᠡᠵᠦ ᠨᠢᠭᠡ ᠬᠥᠭᠰᠢᠨ ᠲᠡᠭᠦᠨ ᠢ᠋ ᠰᠡᠭᠦᠳᠡᠷ ᠰᠢᠭ ᠳᠠᠭᠠᠨ ᠮᠠᠨᠠᠵᠤ ᠪᠠᠢᠳᠠᠭ ᠲᠤ᠌ ᠪᠠᠭᠠ ᠬᠠᠲᠤᠨ ᠢ᠋ ᠰᠠᠨᠠᠭᠰᠠᠨ ᠬᠠᠢᠷᠠᠯᠠᠭᠰᠠᠨ ᠰᠢᠤᠬᠠᠨ ᠪᠠᠯ ᠪᠤᠷᠠᠮ ᠤ᠋ᠨ ᠦᠭᠡ ᠶ᠋ᠢ ᠢᠯᠠᠨ ᠳᠠᠯᠠᠨ ᠦᠭᠡᠢ ᠠᠰᠬᠠᠵᠤ ᠬᠡᠯᠡᠨ ᠪᠡᠶᠡ ᠳ᠋ᠡᠭᠡᠨ ᠲᠠᠲᠠᠬᠤ ᠭᠡᠳ ᠶᠡᠷᠦ ᠵᠠᠪᠰᠢᠶᠠᠨ ᠣᠯᠤᠭᠰᠠᠨ ᠦᠭᠡᠢ᠃ ᠲᠡᠭᠡᠭᠡᠳ ᠲᠡᠷᠡ 《ᠬᠤᠳᠳᠤᠭ ᠳᠡᠭᠡᠷᠡ ᠤᠮᠳᠠᠭᠠᠰᠤᠭᠰᠠᠨ ᠲᠤᠭᠤᠯ ᠲᠠᠢ ᠬᠤᠰᠠᠷᠠᠩ ᠦᠨᠢᠶᠡ ᠁》 ᠭᠡᠵᠦ ᠪᠠᠭᠠ ᠬᠠᠲᠤᠨ ᠢ᠋ ᠳᠠᠭᠠᠷᠢᠭᠤᠯᠵᠤ ᠬᠡᠯᠡᠭᠰᠡᠨ ᠢ᠋ ᠤᠬᠠᠭᠠᠨ ᠢ᠋ ᠨᠢ ᠣᠯᠵᠤ ᠪᠡᠶᠡ ᠳ᠋ᠦ᠍ᠨᠢ ᠰᠠᠨᠠᠭᠠ ᠲᠠᠢ ᠰᠠᠨ ᠪᠣᠯ 《ᠮᠣᠷᠢᠨ ᠤ᠋ ᠪᠠᠨ ᠴᠤᠯᠪᠤᠭᠤᠷ ᠢ᠋ ᠲᠠᠢᠯᠵᠤ ᠠᠪᠤᠭᠠᠳ ᠬᠣᠪᠣᠭᠣᠨ ᠳ᠋ᠤ᠌ ᠵᠠᠯᠭᠠᠵᠤ ᠴᠠᠩᠭᠠᠵᠤ ᠪᠡᠷᠬᠡᠳᠡᠭᠰᠡᠨ ᠲᠡᠷᠡ ᠲᠤᠭᠤᠯ ᠲᠠᠢ ᠦᠨᠢᠶᠡ ᠶ᠋ᠢ ᠤᠰᠤᠯᠠᠵᠤ ᠥᠭᠳᠡᠭ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠪᠣᠢ? ᠮᠣᠩᠭᠣᠯ ᠬᠥᠮᠦᠨ ᠪᠠᠢᠭᠠᠳ ᠡᠨᠡᠷᠢᠯ ᠦᠭᠡᠢ ᠭᠡᠭᠴᠢ ᠨᠢ 》 ᠭᠡᠬᠦ ᠡᠢᠮᠦᠷᠬᠦᠦ ᠬᠠᠷᠢᠭᠤᠯᠲᠠ ᠶ᠋ᠢ ᠬᠦᠰᠡᠭᠰᠡᠨ ᠬᠦᠰᠡᠯ ᠨᠢ ᠬᠥᠰᠡᠷᠳᠡᠵᠦ ᠡᠷᠭᠢᠭᠡᠳ 《ᠵᠥᠨᠥᠭᠰᠡᠨ ᠬᠦᠷᠡᠩ ᠪᠤᠬᠠ᠁ ᠰᠢᠪᠡᠷᠲᠡᠯᠡ᠁ 》ᠭᠡᠵᠦ ᠥᠷᠭᠡᠰᠦ ᠲᠡᠢ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠰᠢᠪᠬᠠᠷᠠᠭᠤᠯᠤᠭᠰᠠᠨ ᠰᠢᠭ᠋ ᠠᠮᠠ ᠪᠠᠨ ᠠᠯᠠᠭᠠᠳᠠᠭᠤᠯᠵᠤ ᠰᠠᠭᠤᠪᠠ᠃ ᠲᠡᠭᠡᠬᠦ ᠳ᠋ᠦ᠍ ᠪᠤᠬᠠᠨ ᠤ᠋ ᠰᠢᠷᠢ ᠰᠢᠭ ᠢᠴᠢᠬᠦ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠵᠤᠵᠠᠭᠠᠨ ᠨᠢᠭᠤᠷ ᠲᠠᠢ ᠪᠠ ᠲᠤᠸᠠᠨᠵᠠᠩ ᠴᠢᠬᠢ ᠦᠭᠡᠢ ᠲᠣᠯᠣᠭᠠᠢ ᠰᠢᠭ᠋ ᠠᠨᠢᠷ ᠴᠤ᠌ ᠦᠭᠡᠢ ᠵᠦᠯᠴᠢᠢᠨᠡ᠃ ᠡᠢᠮᠦ ᠢᠴᠢᠬᠦ ᠨᠢᠭᠤᠷ ᠲᠠᠭᠠᠨ ᠢᠯᠭᠢ ᠨᠠᠭᠠᠭᠰᠠᠨ ᠰᠢᠭ᠋ ᠵᠠᠪᠬᠠᠷᠠᠴᠢᠬᠠᠭᠰᠠᠨ ᠠᠮᠢᠲᠠᠨ ᠢ᠋ ᠶᠠᠭᠠᠬᠢᠨᠠ ᠪᠣᠢ ? ᠪᠠᠭᠠ ᠬᠠᠲᠤᠨ ᠲᠡᠭᠦᠨ ᠢ᠋ ᠰᠢᠭᠤᠳ ᠡᠰᠡᠷᠭᠦᠴᠡᠵᠦ ᠴᠢᠳᠠᠳᠠᠭ ᠦᠭᠡᠢ ᠪᠣᠯᠪᠠᠴᠤ ᠠᠶᠠ ᠶ᠋ᠢ ᠨᠢ ᠳᠠᠭᠠᠭᠤᠯᠤᠨ ᠨᠠᠭᠠᠯᠢᠩᠬᠠᠢᠲᠤᠵᠤ ᠴᠤ᠌ ᠪᠣᠯᠳᠠᠭ ᠦᠭᠡᠢ ᠬᠣᠢᠨᠠ ᠶᠠᠭ ᠯᠠ ᠬᠢᠯᠭᠠᠰᠤ ᠵᠠᠢᠳᠠᠯᠠᠭᠰᠠᠨ ᠰᠢᠷᠭᠤᠯᠵᠢ ᠶ᠋ᠢᠨ ᠨᠢᠭᠡ ᠪᠠᠢᠯᠠ᠃
ᠲᠡᠷᠡ ᠡᠳᠦᠷ ᠪᠠ ᠲᠤᠸᠠᠨᠵᠠᠩ ᠰᠥᠨᠢ ᠳᠦᠯᠢ ᠪᠣᠯᠲᠠᠯᠠ ᠪᠠᠭᠠ ᠬᠠᠲᠤᠨ ᠤ᠋ ᠳ᠋ᠤ᠌ ᠵᠣᠭᠣᠭ ᠳᠡᠯᠭᠡᠨ ᠰᠠᠭᠤᠵᠤ ᠠᠷᠭᠠ ᠶᠠᠳᠠᠬᠤ ᠳ᠋ᠠᠭᠠᠨ 《ᠤᠷᠠᠳ ᠤ᠋ᠨ ᠣᠷᠣᠭᠠ ᠪᠠᠢᠳᠠᠰᠤ ᠶ᠋ᠢ ᠵᠠᠢᠳᠠᠯᠠᠬᠤ ᠨᠢᠭᠡ ᠡᠳᠦᠷ ᠪᠠᠢᠯᠭᠦᠢ ᠬᠦ! 》 ᠭᠡᠰᠡᠨ ᠭᠣᠭᠴᠣᠭᠠ ᠲᠠᠢ ᠦᠭᠡ ᠰᠢᠳᠡᠴᠢᠬᠡᠭᠡᠳ ᠠᠷᠢᠯᠪᠠ᠃
ᠪᠠᠭᠠ ᠬᠠᠲᠤᠨ ᠶᠠᠭᠠᠬᠢᠬᠤ ᠪᠠᠨ ᠣᠯᠬᠤ ᠦᠭᠡᠢ ᠪᠣᠯᠤᠭᠠᠳ ᠲᠠᠬᠠᠷ ᠭᠦᠶᠦᠯᠭᠡᠵᠦ ᠤᠯᠠᠯᠵᠢ ᠠ᠋ᠴᠠ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠢ᠋ ᠳᠠᠭᠤᠳᠠᠭᠤᠯᠪᠠ᠃
- ᠣᠳᠣ ᠶᠠᠭᠠᠬᠢᠨᠠ ᠪᠣᠢ? ᠪᠠᠳᠤᠸᠴᠢᠷ ᠭᠡᠳᠡᠭ ᠥᠯᠥᠨ ᠴᠢᠳᠬᠥᠷ ᠠᠪᠤᠯᠭᠠ ᠶ᠋ᠢᠨ ᠡᠵᠡᠨ ᠰᠢᠭ ᠥᠨᠵᠢᠭᠦᠲᠡ ᠬᠣᠨᠣᠭᠤᠲᠠ ᠢᠷᠡᠭᠡᠳ ᠲᠣᠭᠣᠷᠢᠭᠤᠯᠵᠤ ᠲᠣᠭᠰᠢᠭᠠᠳ ᠪᠣᠯᠬᠤ ᠦᠭᠡᠢ ᠭᠡᠵᠦ ᠪᠠᠭᠠ ᠬᠠᠲᠤᠨ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠮᠠᠨᠤᠨᠪᠠᠳᠮᠠ᠄
- ᠬᠠᠢ᠂ ᠲᠠᠨ ᠢ᠋ ᠲᠣᠭᠣᠯᠠ ᠳᠤᠷᠠᠯᠠᠯᠠ ᠭᠡᠳᠡᠭ ᠨᠢ ᠥᠲᠥᠨ ᠦ᠌ ᠬᠣᠷᠣᠬᠠᠢ ᠥᠩᠭᠡᠨ ᠦ᠌ ᠪᠠᠰᠢᠷ᠃ ᠴᠣᠬᠣᠮ ᠵᠣᠷᠢᠯᠭᠠ ᠨᠢ ᠴᠠᠭᠠᠨᠠ ᠨᠢ ᠪᠣᠢ ! ᠭᠡᠪᠡ᠃
- ᠡᠷᠡ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠠᠵᠢ᠂ ᠲᠡᠷᠡ ᠨᠠᠮᠠᠶ᠋ᠢ ᠡᠵᠡᠯᠡᠬᠦ ᠰᠠᠨᠠᠭᠠᠲᠠᠢ ᠯᠠ ᠨᠣᠵᠣᠭᠣᠷᠠᠵᠤ ᠪᠠᠢᠬᠤ ᠠ᠋ᠴᠠ ᠳᠠ᠃ ᠴᠠᠭᠠᠨᠠ ᠪᠠᠨ ᠶᠠᠭᠤ ᠯᠠ ᠪᠠᠢᠬᠤ ᠪᠣᠢ? ᠪᠢ ᠴᠤ᠌ ᠳᠤᠷᠠ ᠦᠭᠡᠢ᠃
- ᠪᠠᠭᠠ ᠬᠠᠲᠤᠨ ᠲᠠᠨ ᠢ᠋ ᠣᠷᠢᠶᠠᠭᠠᠳ ᠪᠠᠢᠳᠠᠭ ᠨᠢ ᠨᠢᠭᠡ ᠤᠴᠢᠷ ᠪᠣᠢ᠃ ᠲᠡᠷᠡ ᠵᠡᠷᠭᠡ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠬᠥᠮᠦᠨ ᠳ᠋ᠦ᠍ ᠤᠨᠤᠬᠤ ᠮᠣᠷᠢ ᠦᠭᠡᠢ ᠤᠨᠲᠠᠬᠤ ᠡᠮᠡ ᠦᠭᠡᠢ ᠪᠣᠯᠴᠢᠬᠠᠯᠠ ᠭᠡᠵᠢ ᠤᠤ? ᠮᠢᠨᠦ ᠬᠤᠪᠢ ᠳ᠋ᠤ᠌ ᠯᠠ ᠢᠲᠡᠭᠡᠬᠦ ᠦᠭᠡᠢ᠃
- ᠴᠠᠭᠠᠨᠠ ᠪᠠᠨ ᠥᠭᠡᠷᠡ ᠤᠬᠠᠭᠠ ᠪᠠᠢᠨᠠ ᠭᠡᠵᠢ ᠤᠤ?
- ᠪᠡᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠬᠠᠯᠲᠤᠰᠬᠢᠪᠡᠯ ᠵᠤᠳᠪᠠ ᠶ᠋ᠢᠨ ᠤᠬᠠᠭᠠᠯᠠᠭᠰᠠᠨ ᠮᠠᠭᠤ ᠤᠬᠠᠭᠠᠨ ᠪᠠᠢᠵᠤ ᠴᠤ᠌ ᠶᠠᠳᠠᠬᠤ ᠦᠭᠡᠢ᠃ ᠴᠠᠭ ᠴᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠳᠠᠭ ᠦᠭᠡᠢ᠂ ᠴᠠᠬᠢᠯᠳᠠᠭ ᠬᠥᠬᠡ ᠪᠡᠷ ᠢ᠋ᠶ᠋ᠡᠨ ᠪᠠᠢᠳᠠᠭ ᠦᠭᠡᠢ ᠭᠡᠳᠡᠭ ᠢ᠋ᠶ᠋ᠡᠷ ᠰᠢᠷᠠ ᠴᠡᠷᠢᠭ ᠣᠷᠣᠵᠤ ᠢᠷᠡᠭᠡᠳ ᠲᠦᠮᠡᠳ ᠰᠠᠭᠠᠯᠢᠴᠢᠨ᠂ ᠪᠤᠭᠤᠲᠤ ᠶ᠋ᠢ ᠡᠵᠡᠯᠡᠵᠦ ᠵᠠᠩᠵᠤᠨ ᠶᠠᠮᠤᠨ ᠤ᠋ ᠶᠡᠬᠡ ᠴᠡᠷᠢᠭ ᠬᠠᠲᠤᠨ ᠲᠣᠬᠣᠢ ᠶ᠋ᠢᠨ ᠪᠤᠯᠤᠩ ᠤᠷᠤᠭᠤ ᠤᠬᠤᠷᠢᠵᠤ ᠶᠠᠪᠤᠭᠰᠠᠨ ᠢ᠋ ᠲᠣᠬᠢᠶᠠᠯᠳᠤᠭᠤᠯᠵᠤ ᠲᠡᠳᠡᠨᠦᠰ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠨᠤᠲᠤᠭ᠂ ᠵᠠᠰᠠᠭ ᠤ᠋ᠨ ᠡᠷᠬᠡ ᠶ᠋ᠢ ᠪᠤᠯᠢᠶᠠᠬᠤ ᠰᠠᠨᠠᠭᠠᠲᠠᠢ᠃ ᠡᠯᠳᠡᠩᠭᠡ ᠮᠢᠩᠭᠠᠨ ᠬᠤᠰᠢᠭᠤᠨ ᠤ᠋ ᠸᠠᠩ ᠳᠤᠷᠵᠢᠸᠠᠩᠴᠤᠭ ᠢ᠋ ᠲᠦᠰᠢᠵᠦ ᠰᠢᠷᠠ ᠴᠡᠷᠢᠭ ᠦ᠋ᠨ ᠥᠮᠥᠭ ᠰᠦᠷ ᠲᠦ ᠡᠷᠳᠦᠵᠦ ᠬᠤᠰᠢᠭᠤᠨ ᠳ᠋ᠠᠭᠠᠨ ᠪᠤᠴᠠᠵᠤ ᠢᠷᠡᠨᠡ ᠭᠡᠰᠡᠨ ᠰᠤᠷᠠᠭ ᠲᠠᠢ᠃ ᠲᠡᠷᠡ ᠬᠥᠯ ᠢ᠋ᠶ᠋ᠡᠨ ᠬᠥᠯ ᠳᠡᠭᠡᠷᠡ ᠪᠡᠨ ᠠᠴᠢᠭᠠᠳ ᠵᠦᠭᠡᠷ ᠰᠠᠭᠤᠳᠠᠭ ᠬᠥᠮᠦᠨ ᠤᠤ ᠳᠠ? ᠤᠷᠢᠳᠤ ᠲᠡᠷᠡ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠲᠠᠢ ᠬᠤᠤᠪᠢᠯᠳᠤᠵᠤ᠂ ᠬᠣᠰᠢᠭᠤ ᠶᠠᠮᠤᠨ ᠲᠠᠢ ᠬᠠᠲᠠᠭᠤ ᠪᠠᠷ ᠣᠷᠣᠭᠠᠳ ᠪᠣᠯᠤᠭᠰᠠᠨ ᠦᠭᠡᠢ ᠪᠤᠷᠤᠭᠤᠳᠤᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠳᠡᠭ ᠳᠣᠬᠢ ᠲᠣᠯᠣᠭᠠᠢ ᠰᠢᠦ! ᠡᠨᠡ ᠬᠡᠳᠦᠨ ᠵᠢᠯ ᠲᠡᠷᠡ ᠶᠠᠭᠤ ᠭᠡᠵᠦ ᠳᠠᠭᠤ ᠴᠢᠮᠡᠭᠡ ᠦᠭᠡᠢ ᠨᠣᠮᠣᠬᠠᠨ ᠰᠠᠭᠤᠪᠠ? ᠣᠳᠣ ᠪᠠᠭᠠ ᠬᠠᠲᠤᠨ ᠲᠠᠨ ᠤ᠋ ᠡᠢᠨ ᠬᠦ᠌ ᠬᠡᠤᠬᠡᠳ ᠰᠢᠤᠬᠠᠳ ᠲᠠᠢ ᠪᠡᠯᠪᠡᠰᠦᠨ ᠪᠦᠰᠡᠭᠦᠢ ᠶ᠋ᠢᠨ ᠪᠡᠳᠡᠷᠡᠭᠰᠡᠨ ᠦᠶᠡ ᠳ᠋ᠦ᠍ ᠪᠡᠯᠡᠨ ᠤᠬᠠᠭᠠᠨ ᠵᠠᠷᠤᠵᠤ ᠭᠠᠨᠵᠤᠭᠠ ᠶ᠋ᠢ ᠴᠢᠨᠢ ᠪᠠᠭᠤᠯᠭᠠᠬᠤ ᠭᠡᠵᠦ ᠪᠠᠢᠭᠠ! ᠢᠩᠭᠢᠭᠡᠳ ᠰᠦᠷ ᠨᠠᠮᠪᠠᠭᠠᠲᠠᠢ ᠪᠠᠲᠤᠸᠴᠢᠷ ᠳᠤᠸᠠᠨᠵᠡᠩ ᠢ᠋ᠶ᠋ᠡᠷ ᠪᠠᠮᠪᠠᠢ ᠪᠠᠷᠢᠵᠤ ᠪᠠᠭᠠ ᠬᠠᠲᠤᠨ ᠲᠠᠨ ᠤ᠋ ᠣᠶᠣᠭ ᠬᠠᠢᠷᠠ ᠶ᠋ᠢᠨ ᠤᠴᠢᠷ ᠲᠤ ᠦᠷᠦ ᠡᠪᠡᠳᠴᠦ᠂ ᠥᠷᠥᠭᠡᠰᠦᠨ ᠪᠡᠯᠪᠡᠰᠦᠨ ᠬᠥᠮᠦᠨ ᠦ᠌ ᠡᠮᠵᠡᠭ ᠲᠠᠯᠠ ᠶ᠋ᠢ ᠪᠠᠷᠢᠨ ᠬᠥᠨᠵᠢᠯᠡ ᠳ᠋ᠦ᠍ᠨᠢ ᠬᠥᠯ ᠲᠥᠷᠥᠵᠦ《ᠬᠦᠦ》ᠶ᠋ᠢ ᠴᠢᠨᠢ ᠤᠨᠠᠭᠠᠬᠤ ᠭᠡᠰᠡᠨ ᠤᠬᠠᠭᠠᠨ᠃ ᠲᠡᠳᠡ ᠥᠩᠭᠡᠨ ᠳᠡᠭᠡᠷᠡ ᠵᠥᠭᠡᠯᠡᠨ ᠦᠭᠡ ᠪᠡᠷ ᠠᠷᠭᠠᠳᠠᠵᠤ ᠪᠠᠢᠪᠠᠴᠤ ᠠᠶᠤᠯᠠᠭᠠᠨ ᠰᠦᠷᠳᠡᠭᠦᠯᠬᠦ ᠤᠬᠠᠭᠠᠨ ᠨᠢ ᠰᠡᠭᠦᠳᠡᠷ ᠰᠢᠭ᠌ ᠨᠡᠲᠦᠪᠡᠯᠵᠡᠵᠦ᠂ ᠬᠠᠲᠠᠭᠤ ᠵᠥᠭᠡᠯᠡᠨ ᠠᠷᠭᠠ ᠪᠠᠷ ᠬᠠᠪᠴᠢᠵᠤ ᠪᠠᠢᠭᠠ ᠨᠢ ᠢᠯᠡ᠃ ᠲᠠ ᠦᠨᠡᠬᠡᠷ ᠰᠡᠳᠬᠢᠯ ᠤᠨᠠᠵᠤ ᠪᠠ ᠳᠤᠸᠠᠨᠵᠡᠩ ᠳ᠋ᠦ᠍ ᠪᠡᠶᠡ ᠪᠡᠨ ᠥᠭᠴᠦ ᠡᠩᠭᠡᠷ ᠵᠥᠷᠢᠭᠦᠯᠦᠭᠰᠡᠭᠡᠷ ᠪᠤᠷᠤᠭᠤ ᠰᠠᠨᠠᠭᠠ ᠲᠠᠢ ᠬᠥᠮᠦᠨ ᠦ᠌ ᠤᠷᠠᠬᠠᠨ ᠳ᠋ᠤ᠌ ᠤᠨᠠᠵᠤ ᠲᠠᠨ ᠤ᠋ ᠬᠦᠦ ᠴᠢᠨᠢ ᠪᠠᠷᠠᠭᠤᠨ ᠬᠣᠰᠢᠭᠤ ᠵᠠᠰᠠᠭ ᠵᠠᠯᠭᠠᠮᠵᠢᠯᠠᠬᠤ ᠡᠷᠬᠡ ᠦᠭᠡᠢ ᠪᠣᠯᠤᠨᠠ ᠰᠢᠦ᠃
- ᠡᠳᠡᠨᠥᠰ ᠢᠩᠭᠢᠳᠡᠭ ᠨᠢ ᠳᠠᠩᠴᠤ ᠬᠥᠮᠦᠨ ᠮᠠᠭᠤᠴᠢᠯᠠᠵᠤ ᠪᠠᠢᠨᠠ᠃ ᠪᠢ ᠦᠨᠡᠬᠡᠷ ᠠᠢᠳᠠᠰ ᠬᠦᠷᠴᠦ ᠪᠠᠢᠨᠠ᠃
- ᠪᠠᠭᠠ ᠬᠠᠲᠤᠨ ᠲᠠ ᠬᠤᠷᠳᠤᠨ ᠠᠷᠭᠠ ᠤᠬᠠᠭᠠᠨ ᠠᠪᠬᠤ ᠦᠭᠡᠢ ᠪᠣᠯ ᠲᠡᠳᠡᠨ ᠦ᠌ ᠬᠠᠶᠠᠭᠰᠠᠨ ᠤᠷᠭᠠ ᠶ᠋ᠢᠨ ᠬᠤᠢᠪᠢ ᠳ᠋ᠤ᠌ ᠨᠣᠭᠲᠤᠯᠠᠭᠳᠠᠭᠰᠠᠨ ᠮᠣᠷᠢ ᠰᠢᠭ᠋ ᠨᠣᠪ ᠨᠣᠮᠣᠬᠠᠨ ᠳᠠᠭᠠᠭᠠᠳ ᠱᠣᠭᠰᠢᠳᠠᠭ ᠬᠡᠷᠡᠭ! ᠪᠠ ᠳᠤᠸᠠᠨᠵᠡᠩ ᠣᠳᠣ ᠲᠠᠨ ᠤ᠋《ᠳᠤᠷᠠᠲᠠᠢ᠂ ᠳᠤᠷᠠ ᠦᠭᠡᠢ》 ᠭᠡᠰᠡᠨ ᠢ᠋ ᠤᠳᠠᠭᠠᠨ ᠬᠦᠯᠢᠶᠡᠵᠦ ᠰᠠᠭᠤᠬᠤ ᠬᠥᠮᠦᠨ ᠪᠢᠰᠢ᠃《ᠳᠤᠷᠠᠲᠠᠢ》 ᠭᠡᠪᠡᠯ ᠮᠣᠷᠳᠠᠶᠠ ᠭᠡᠰᠡᠨ ᠬᠥᠮᠦᠨ ᠳ᠋ᠦ᠍ ᠮᠣᠷᠢ ᠡᠮᠡᠭᠡᠯᠯᠡᠵᠦ ᠦᠭᠭᠦᠭᠰᠡᠨ ᠰᠢᠭ᠌ ᠪᠡᠯᠡᠨ ᠤᠨᠤᠭᠠ ᠲᠤᠰᠢᠶᠠᠨᠠ᠃《ᠳᠤᠷᠠ ᠦᠭᠡᠢ》 ᠭᠡᠬᠦ ᠳᠦ ᠴᠤ᠌ ᠡᠮᠨᠢᠭ ᠴᠢᠬᠢᠳᠡᠬᠦ ᠰᠢᠭ᠌ ᠠᠯᠪᠠ ᠪᠠᠷ ᠨᠣᠮᠣᠬᠠᠳᠬᠠᠨᠠ!
- ᠣᠳᠣ ᠶᠠᠭᠠᠬᠢᠬᠤ ᠤᠤ ᠲᠡᠭᠡᠭᠡᠳ? ᠶᠣᠰᠣᠲᠠᠢ ᠲᠠᠨ ᠤ᠋ ᠬᠡᠯᠡᠳᠡᠭ ᠢ᠋ᠶ᠋ᠡᠷ ᠪᠠᠷᠰ ᠤ᠋ᠨ ᠠᠮᠠᠨ ᠠ᠋ᠴᠠ ᠮᠤᠯᠲᠤᠷᠠᠵᠤ ᠴᠢᠨᠣᠠ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠣᠷᠣᠨᠠ ᠭᠡᠭᠴᠢ ᠡᠨᠡ ᠪᠣᠯᠵᠠᠢ᠃ ᠶᠠᠭᠠᠬᠢᠭᠰᠠᠨ ᠦᠢᠯᠡ ᠦᠷᠡ ᠲᠡᠢ ᠪᠣᠢ? ᠬᠡᠳᠦᠨ ᠵᠢᠯ ᠠᠮᠤᠷ ᠵᠢᠮᠤᠷ ᠪᠣᠯᠤᠭᠰᠠᠨ᠃ ᠡᠨᠡ ᠮᠠᠭᠤ ᠰᠠᠢᠨ ᠨᠤᠲᠤᠭ ᠨᠢ ᠡᠷᠭᠢᠭᠰᠡᠨ ᠰᠢᠷᠠ ᠴᠡᠷᠢᠭ ᠣᠷᠣᠵᠤ ᠢᠷᠡᠭᠰᠡᠨ ᠦᠭᠡᠢ ᠪᠣᠯ ᠡᠯᠳᠡᠩᠭᠡ ᠲᠡᠳᠡᠨᠦᠰ ᠠᠷᠠᠢ ᠢᠩᠭᠢᠵᠦ ᠬᠠᠷᠠᠳᠠᠬᠤ ᠪᠠᠷ ᠦᠭᠡᠢ ᠶᠦᠮ᠃
- ᠣᠳᠣ ᠱᠠᠯᠠᠪᠬᠠᠨ ᠬᠠᠩᠬᠠᠳᠡᠢ ᠶ᠋ᠢᠨ ᠸᠠᠩ ᠰᠣᠬᠣᠷ ᠲᠠᠢ ᠬᠣᠯᠪᠣᠭᠠ ᠪᠠᠷᠢᠵᠤ ᠲᠤᠰᠠᠯᠠᠮᠵᠢ ᠭᠤᠶᠤᠨᠠ ᠤᠤ? ᠡᠰᠡᠪᠡᠰᠦ ᠴᠡᠷᠢᠭ ᠮᠣᠷᠢ ᠪᠠᠨ ᠠᠪᠴᠤ ᠬᠠᠩᠬᠠᠳᠡᠢ ᠤᠷᠤᠭᠤ ᠲᠦᠷ ᠵᠠᠢᠯᠠᠨᠠ ᠤᠤ? ᠶᠠᠮᠠᠷ ᠴᠤ᠌ ᠪᠠᠢᠭᠰᠠᠨ ᠨᠢᠭᠡ ᠨᠠᠢᠳᠠᠪᠤᠷᠢᠲᠠᠢ ᠠᠷᠭᠠ ᠬᠡᠮᠵᠢᠶᠡ ᠠᠪᠬᠤ ᠬᠡᠷᠡᠭᠲᠡᠢ᠃ ᠦᠭᠡᠢ ᠪᠣᠯ ᠲᠡᠳᠡᠨᠦᠰ ᠡᠯᠳᠡᠪ ᠰᠢᠯᠲᠠᠭ ᠡᠷᠢᠵᠦ ᠲᠠᠨ ᠲᠠᠢ ᠨᠣᠣᠷᠠᠭᠠᠳ ᠨᠢᠭᠡ ᠶᠣᠣᠵᠠ ᠦᠭᠡᠢ ᠶᠠᠭᠤᠮᠠ ᠪᠣᠯᠤᠨᠠ ᠳᠠ ᠭᠡᠪᠡ᠃
ᠪᠠᠭᠠ ᠬᠠᠲᠤᠨ ᠮᠠᠨᠤᠨᠪᠠᠳᠮᠡ ᠬᠥᠭᠰᠢᠨ ᠦ᠌ ᠵᠠᠬᠢᠮᠵᠢ ᠰᠠᠨᠠᠭᠤᠯᠭᠠ ᠶ᠋ᠢ ᠠᠪᠴᠤ᠂ ᠸᠠᠩ ᠰᠣᠬᠣᠷ ᠲᠤ ᠵᠠᠬᠢᠳᠠᠯ ᠪᠢᠴᠢᠪᠡ᠃
ᠡᠷᠭᠢᠨ ᠸᠠᠩ ᠵᠠᠩᠭᠤᠢᠳᠠ ᠲᠠᠨᠠ᠄
ᠠᠮᠤᠭᠤᠯᠠᠩ ᠠᠢᠯᠠᠳᠬᠠᠶᠠ!
ᠰᠢᠷᠠ ᠴᠡᠷᠢᠭ ᠪᠤᠭᠤᠲᠤ ᠶ᠋ᠢ ᠡᠵᠡᠯᠡᠵᠦ᠂ ᠡᠳᠦᠭᠡ ᠪᠠᠰᠠ ᠪᠤᠷᠤᠳᠤᠬᠤᠢ ᠤᠷᠤᠭᠤ ᠨᠥᠷᠢᠬᠦ ᠴᠢᠮᠡᠭᠡ ᠲᠡᠢ᠃ ᠲᠡᠭᠡᠪᠡᠯ ᠮᠠᠨ ᠤ᠋ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠠᠮᠤᠷ ᠲᠦᠪᠰᠢᠨ ᠴᠤ᠌ ᠭᠡᠴᠡᠭᠦᠦ ᠶᠠᠭᠤᠮᠠ ᠪᠣᠯᠤᠨᠠ᠃ ᠪᠣᠯᠣᠮᠵᠢᠲᠠᠢ ᠪᠣᠯᠪᠠᠰᠤ ᠳᠠᠯᠢᠢᠭ᠌ᠴᠢ ᠬᠦᠩ ᠨᠣᠶᠠᠨ ᠤ᠋ ᠰᠠᠢᠨ ᠢ᠋ ᠰᠠᠨᠠᠵᠤ ᠲᠤᠰᠠᠯᠠᠮᠵᠢ ᠦᠵᠡᠭᠦᠯᠬᠦ ᠶ᠋ᠢ ᠭᠤᠶᠤᠨᠠᠮ!
ᠡᠭᠦᠨᠡ
ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠰᠡᠷᠭᠦᠮᠡ ᠡᠴᠡ ᠶᠣᠰᠣᠯᠠᠪᠠ
ᠭᠡᠰᠡᠨ ᠪᠢᠴᠢᠭ ᠬᠢᠵᠦ ᠲᠠᠬᠠᠷ ᠲᠣᠮᠢᠯᠠᠪᠠ᠃
ᠡᠢᠨ ᠬᠦ᠌ ᠪᠠᠭᠠ ᠬᠠᠲᠤᠨ ᠸᠠᠩ ᠰᠣᠬᠣᠷ ᠤ᠋ᠨ ᠬᠠᠷᠢᠭᠤ ᠶ᠋ᠢ ᠬᠦᠯᠢᠶᠡᠬᠦ ᠶ᠋ᠢᠨ ᠬᠠᠮᠲᠤ ᠷᠠᠰᠢ ᠵᠠᠬᠢᠷᠤᠭᠴᠢ ᠵᠡᠷᠭᠡ ᠢᠲᠡᠭᠡᠯ ᠲᠡᠢ ᠬᠥᠮᠦᠰ ᠲᠡᠭᠡᠨ ᠳᠠᠯᠳᠠᠭᠤᠷ ᠵᠠᠷᠯᠢᠭ ᠪᠣᠯᠵᠤ ᠴᠡᠷᠢᠭ ᠮᠣᠷᠢ ᠪᠠᠨ ᠲᠡᠭᠰᠢᠯᠡᠨ ᠪᠠᠷᠠᠭᠤᠨᠰᠢᠯᠠᠬᠤ ᠪᠠᠷ ᠰᠡᠮᠡᠬᠡᠷ ᠪᠠᠵᠠᠭᠠᠪᠠ᠃ ᠴᠡᠷᠢᠭ ᠨᠣᠶᠠᠳ ᠤ᠋ᠨ ᠳᠣᠲᠣᠷᠠ ᠸᠠᠩ ᠰᠣᠬᠣᠷ ᠤ᠋ᠨ ᠬᠠᠷᠠ ᠴᠡᠷᠢᠭ ᠢ᠋ ᠨᠥᠮᠥᠷᠢᠳᠡᠵᠦ ᠶᠠᠪᠤᠬᠤ ᠳ᠋ᠤ᠌ ᠳᠤᠷᠠ ᠦᠭᠡᠢᠴᠡᠬᠦ ᠬᠥᠮᠦᠨ ᠪᠣᠢ ᠪᠣᠯᠪᠠᠴᠤ ᠨᠢᠳᠦᠨ ᠡᠮᠦᠨᠡᠬᠢ ᠪᠠᠢᠳᠠᠯ ᠤ᠋ᠨ ᠡᠷᠬᠡᠨ ᠳ᠋ᠦ᠍ ᠳᠤᠤᠭᠠᠷᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃
ᠬᠠᠮᠢᠭᠠ ᠭᠠᠵᠠᠷ ᠤ᠋ᠨ ᠬᠠᠷᠠ ᠬᠡᠷᠢᠶᠡ ᠴᠤ᠌ ᠤᠯᠠᠢ ᠦᠵᠡᠪᠡᠯ ᠠᠳᠠᠯᠢᠬᠠᠨ᠃ ᠪᠠ᠊ ᠳᠤᠸᠠᠨᠵᠡᠩ ᠲᠡᠷᠡ ᠵᠠᠪ ᠦᠭᠡᠢ ᠠᠨᠢᠷ ᠠᠪᠴᠤ ᠮᠣᠯᠴᠣᠭ ᠬᠣᠰᠢᠭᠤ ᠶ᠋ᠢᠨ ᠪᠠᠷᠠᠭᠤᠨ ᠠᠮᠠ ᠶ᠋ᠢ ᠴᠡᠷᠢᠭ ᠶᠠᠪᠤᠭᠤᠯᠵᠤ ᠰᠠᠬᠢᠪᠠ᠃
ᠨᠢᠭᠡ ᠡᠳᠦᠷ ᠪᠠ᠊ ᠳᠤᠸᠠᠨᠵᠡᠩ ᠴᠡᠷᠢᠭ ᠲᠣᠮᠢᠯᠠᠵᠤ ᠴᠢᠮᠡᠭᠡ ᠢᠷᠡᠭᠦᠯᠦᠨ ᠪᠠᠭᠠ ᠬᠠᠲᠤᠨ ᠢ᠋ ᠵᠠᠯᠠᠵᠤ ᠬᠠᠷᠢᠭᠤ ᠳᠠᠢᠯᠠᠯᠭᠠ ᠬᠢᠬᠦ ᠪᠣᠯᠪᠠ᠃
ᠪᠠᠭᠠ ᠬᠠᠲᠤᠨ ᠤ᠋ ᠳᠣᠲᠣᠷᠠ ᠮᠥᠯᠢᠰ ᠬᠢᠨ ᠬᠦᠢᠲᠡᠨ ᠣᠷᠬᠢᠵᠤ《ᠪᠠ᠊ ᠲᠥᠸᠡᠡᠵᠠᠩ ᠪᠡᠶᠡ ᠪᠡᠷ ᠢᠶᠠᠨ ᠢᠷᠡᠳᠡᠭ ᠨᠢ ᠪᠢᠰᠢ ᠪᠣᠯᠵᠤ᠂ ᠬᠣᠶᠠᠷᠬᠠᠨ ᠦᠰᠦᠭ ᠦ᠋ᠨ ᠬᠠᠭᠤᠳᠠᠰᠤ ᠲᠠᠢ ᠳᠠᠭᠤᠳᠠᠯᠭᠠ ᠢᠷᠡᠭᠦᠯᠳᠡᠭ ᠨᠢ ᠰᠠᠢᠨ ᠶᠠᠪᠤᠳᠠᠯ ᠤ᠋ᠨ ᠰᠣᠪᠢᠩ ᠪᠢᠰᠢ! ᠠᠶᠠ ᠦᠭᠡᠢᠳᠡᠪᠡᠯ ᠥᠨᠥ ᠰᠥᠨᠢ ᠳ᠋ᠡᠭᠡᠨ ᠲᠡᠳᠡᠨ ᠦ᠌ ᠭᠠᠷ ᠲᠤ ᠪᠠᠯᠠᠷᠠᠬᠤ ᠨᠢ》 ᠭᠡᠳᠡᠭ ᠪᠣᠳᠣᠯ ᠵᠢᠷᠦᠪᠬᠢᠨ ᠣᠷᠣᠵᠤ ᠢᠷᠡᠯᠡ᠃
ᠲᠡᠭᠡᠭᠡᠳ ᠲᠡᠷᠡ《ᠪᠠ᠊ ᠲᠣᠸᠠᠠᠵᠠᠩ ᠳ᠋ᠤ᠌ ᠲᠠᠯᠠᠷᠬᠠᠯᠠ᠃ ᠠᠭᠤᠴᠢᠯᠠᠭᠠᠷᠠᠢ! ᠥᠨᠥ ᠣᠷᠣᠢ ᠪᠡᠶᠡ ᠠᠶᠠ ᠦᠭᠡᠢ ᠳᠡᠭᠡᠷᠡ ᠬᠡᠦᠬᠡᠳ ᠪᠠᠭᠠ ᠪᠣᠯᠬᠣᠷ ᠣᠷᠣᠢ ᠦᠳᠡᠰᠢ ᠨᠭᠠᠠᠰᠢ ᠴᠠᠭᠠᠰᠢ ᠶᠠᠪᠤᠬᠤ ᠳ᠋ᠤ᠌ ᠲᠦᠪᠡᠭᠲᠡᠢ᠃ ᠮᠠᠷᠭᠠᠲᠤᠷ ᠡᠷᠲᠡᠬᠡᠨ ᠰᠢᠭ ᠣᠴᠢᠵᠤ ᠨᠠᠷᠢᠨ ᠤᠴᠢᠷ ᠢ᠋ ᠨᠢᠮᠪᠠᠢ ᠶᠠᠷᠢᠯᠴᠠᠶᠠ》 ᠭᠡᠰᠡᠨ ᠳᠥᠬᠥᠮᠬᠡᠨ ᠪᠢᠴᠢᠭ ᠬᠢᠵᠦ ᠢᠷᠡᠭᠦᠯᠦᠭᠰᠡᠨ ᠴᠡᠷᠢᠭ ᠲᠦ ᠥᠭᠭᠥᠠ ᠪᠤᠴᠠᠭᠠᠪᠠ᠃
ᠡᠨᠡ ᠬᠠᠷᠢᠭᠤ ᠳᠠᠢᠯᠠᠯᠭᠠ ᠳ᠋ᠤ᠌ ᠵᠣᠳᠪᠠ ᠮᠠᠢᠷᠠᠨ ᠴᠤ᠌ ᠣᠷᠣᠯᠴᠠᠬᠤ ᠪᠠᠷ ᠤᠷᠢᠯᠭᠠ ᠬᠥᠯᠢᠶᠡᠭᠰᠡᠡ ᠤ ᠨᠢᠭᠡ ᠪᠡᠷ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠥᠪᠡᠭᠡᠨ ᠳ᠋ᠡᠬᠢ ᠨᠣᠶᠠᠨ ᠱᠠᠩ ᠤ᠋ᠨ ᠪᠠᠭᠤᠷᠢ ᠳ᠋ᠤ᠌ ᠲᠠᠯᠪᠢᠭᠠᠳ ᠪᠠᠭᠤᠵᠠᠢ᠃ 《ᠥᠨᠥ ᠣᠷᠣᠢ ᠪᠢᠯᠳᠠᠩ ᠢ᠋ᠶ᠋ᠠᠨ ᠭᠣᠭᠣᠵᠢᠭᠤᠯᠵᠤ ᠴᠢᠴᠠᠭᠠ ᠠᠯᠳᠠᠬᠤ ᠶ᠋ᠢ ᠴᠢᠨᠢ ᠬᠠᠷᠠᠨᠠ ᠳᠠ! ᠨᠢᠭᠡ ᠮᠠᠭᠤ ᠵᠠᠪᠠᠬᠠᠢ ᠡᠮᠡ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠨᠣᠶᠠᠨ ᠤ᠋ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠷᠠᠵᠤ ᠶᠠᠭᠠᠬᠢᠵᠤ ᠪᠠᠭᠠᠷᠳᠠᠬᠯᠠᠳᠠᠭ᠋ ᠢ᠋ ᠦᠵᠡᠭᠦᠯᠦᠨᠡ ᠬᠦ!》 ᠭᠡᠵᠦ ᠪᠠᠷᠳᠠᠮ ᠰᠠᠨᠠᠭᠰᠠᠨ ᠵᠣᠳᠪᠠ ᠮᠠᠢᠷᠠᠨ᠂ ᠪᠠ ᠲᠤᠸᠠᠡᠵᠠᠩ ᠬᠣᠶᠠᠷ ᠢᠨᠢᠶᠡᠳᠦᠨ ᠳ᠋ᠡᠭᠡᠨ ᠬᠠᠬᠠᠵᠤ ᠪᠥᠬᠰᠢᠨᠡ᠃ ᠶᠡᠬᠡ ᠰᠠᠨᠠᠭᠰᠠᠨ ᠭᠠᠵᠠᠷ ᠶᠢᠰᠦᠨ ᠰᠥᠨᠢ ᠬᠣᠭᠣᠰᠣᠨ ᠭᠡᠳᠡᠭ ᠢ᠋ᠶ᠋ᠡᠷ ᠴᠢᠮᠡᠭᠡ ᠠᠪᠴᠤ ᠢᠷᠡᠭᠰᠡᠨ ᠴᠡᠷᠢᠭ ᠦ᠋ᠨ ᠭᠠᠷ ᠠ᠋ᠴᠠ ᠮᠠᠷᠭᠠᠰᠢ ᠢᠷᠡᠶᠡ!》 ᠭᠡᠰᠡᠨ ᠬᠣᠭᠣᠰᠣᠨ ᠦᠭᠡ ᠲᠤᠰᠤᠭᠰᠠᠨ ᠪᠠ ᠲᠣᠸᠡᠡᠵᠠᠩ《ᠭᠤᠷᠪᠠᠨ ᠬᠥᠯ ᠢ᠋ ᠨᠢ ᠪᠣᠭᠣᠭᠰᠠᠨ ᠴᠢᠳᠥᠷ ᠲᠡᠢ ᠮᠣᠷᠢ ᠨᠢᠭᠡ ᠰᠥᠨᠢ ᠲᠡᠯᠴᠢᠯᠡᠭᠡᠳ ᠬᠠᠮᠢᠭᠠ ᠬᠦᠷᠬᠦ ᠪᠣᠢ》 ᠭᠡᠵᠦ ᠪᠣᠳᠣᠨ ᠮᠠᠷᠭᠠᠰᠢ ᠶ᠋ᠢᠨ ᠲᠠᠷᠭᠤᠨ ᠥᠭᠡᠬᠦ ᠶ᠋ᠢ ᠰᠠᠨᠠᠵᠤ ᠥᠨᠥᠳᠥᠷ ᠦ᠋ᠨ ᠠᠮᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠠᠭᠤᠰᠬᠢ ᠶ᠋ᠢ ᠨᠤᠯᠮᠤᠵᠤ ᠬᠠᠶᠠᠪᠠ᠃ ᠲᠡᠭᠡᠬᠦ ᠳ᠋ᠦ᠍ ᠵᠣᠳᠪᠡ ᠮᠠᠢᠷᠠᠨ《ᠮᠠᠷᠠᠭᠠᠰᠢ ᠶᠢᠨ ᠥᠭᠡᠬᠦ ᠡᠴᠡ ᠥᠨᠥᠳᠥᠷ ᠤᠨ ᠠᠭᠤᠰᠬᠢ ᠭᠡᠳᠡᠭ ᠰᠢᠦ᠂ ᠠᠮᠠᠨ ᠳ᠋ᠤ᠌ ᠣᠷᠣᠲᠠᠯᠠ ᠠᠷᠪᠠᠨ ᠳᠠᠪᠠᠭᠠ ᠪᠣᠢ》 ᠭᠡᠵᠦ ᠰᠡᠵᠢᠭ ᠡᠪᠥᠷᠯᠡᠬᠰᠡᠡ ᠪᠡᠨ᠄
— ᠥᠨᠥ ᠰᠥᠨᠢ ᠳ᠋ᠡᠭᠡᠨ ᠵᠢᠯᠢᠢᠴᠢᠬᠡᠬᠦ ᠪᠢᠰᠢ ᠪᠢᠵᠡ? ᠭᠡᠵᠡᠢ᠃
— ᠬᠡᠩ! ᠶᠠᠭᠤ ᠪᠣᠯᠴᠢᠬᠠᠯᠠ ᠭᠡᠵᠢ᠁ ᠵᠢᠭᠦᠷ ᠣᠷᠭᠣᠭᠠᠳ ᠨᠢᠰᠪᠡᠯ ᠮᠠᠭᠠᠳ ᠦᠭᠡᠢ!
ᠪᠠᠭᠠ ᠬᠠᠲᠤᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠢᠠ ᠰᠠᠮᠠᠭᠠᠨ ᠭᠡᠭᠴᠢ ᠨᠢᠭᠡ ᠠᠳᠠᠲᠠᠢ ᠬᠥᠬᠰᠢᠠ ᠪᠠᠢᠭᠠ᠁ ᠲᠡᠭᠦᠨ ᠦ᠌ ᠠᠷᠭᠠ ᠪᠠᠷ ᠣᠷᠣᠭᠰᠠᠭᠠᠷ ᠴᠤ᠌ ᠪᠠᠢᠳᠠᠭ ᠦᠭᠡᠢ ᠬᠡᠷᠡᠭ ᠠ᠋!
— ᠬᠠᠢ᠂ ᠢᠮᠠᠭᠠ ᠲᠣᠢᠯᠠᠭᠠᠳ ᠶᠠᠩᠭᠢᠶᠠ ᠡᠪᠳᠡᠬᠦ ᠦᠭᠡᠢ᠃ ᠡᠮᠡ ᠬᠥᠮᠦᠨ ᠶᠠᠭᠠᠬᠢᠯᠠ ᠭᠡᠳ ᠡᠷᠡ ᠬᠥᠮᠦᠨ ᠦ᠌ ᠳᠣᠣᠷᠠ ᠣᠷᠣᠨᠠ᠁
— ᠴᠢ ᠮᠡᠳᠡᠬᠦ ᠦᠭᠡᠢ ᠠ᠋! ᠮᠠᠨᠣᠡᠪᠠᠳᠮᠡ ᠭᠡᠭᠰᠡᠭᠡᠷ ᠮᠠᠨ ᠤ ᠪᠠᠷᠠᠭᠤᠨ ᠬᠦᠩ ᠪᠠᠷᠤᠭᠯᠠᠵᠤ ᠳᠤᠮᠳᠠᠳᠤ ᠬᠦᠩ ᠲᠣᠠᠳᠠᠭᠣᠷᠠᠯᠠᠳᠠᠭ᠋ ᠠᠮᠠᠷ ᠦᠭᠡᠢ ᠬᠥᠬᠰᠢᠠ ᠭᠡᠵᠦ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠨ ᠦᠭᠡᠢ᠃ ᠴᠢ ᠪᠢᠳᠡ ᠬᠣᠶᠠᠷ ᠢ᠋ ᠭᠤᠷᠪᠠ ᠭᠤᠷᠪᠠ ᠪᠠᠷ ᠵᠡᠷᠭᠡᠴᠡᠭᠦᠯᠵᠦ ᠵᠣᠭᠰᠣᠭᠠᠴᠢᠬᠠᠭᠠᠳ ᠤᠬᠠᠭᠠᠨ ᠢ᠋ ᠨᠢ ᠰᠣᠩᠭᠣᠵᠤ ᠲᠠᠯᠪᠢᠬᠤ ᠳ᠋ᠤ᠌ ᠲᠡᠷᠡ ᠬᠥᠬᠰᠢᠠ ᠶ᠋ᠢᠨ ᠴᠠᠭᠠᠨᠠ ᠨᠢ ᠭᠠᠷᠬᠤ ᠶᠤᠮ ᠪᠢᠰᠢ ᠠ᠋! ᠬᠡᠷᠰᠡᠦᠬᠡᠨ ᠪᠠᠢᠬᠤ ᠬᠡᠷᠡᠭᠲᠡᠢ᠃
— ᠬᠠᠮᠢᠭᠠ ᠶᠠᠪᠤᠳᠠᠭ ᠴᠢᠷᠠᠢ? ᠵᠡᠭᠦᠨᠰᠢ ᠪᠡᠨ ᠲᠡᠷᠡ ᠯᠠᠪ ᠶᠠᠪᠤᠬᠤ ᠦᠭᠡᠢ᠃ ᠪᠠᠷᠠᠭᠤᠨᠰᠢ ᠪᠠᠨ ᠵᠠᠪᠳᠤᠬᠤ ᠭᠡᠵᠦ ᠣᠷᠣᠯᠳᠤᠬᠣ ᠮᠠᠭᠠᠳ ᠦᠭᠡᠢ᠃ ᠲᠡᠭᠡᠬᠦ ᠳ᠋ᠦ᠍ ᠪᠠᠷᠠᠭᠤᠨ ᠲᠠᠯᠠ ᠶᠢᠨ ᠠᠮᠠ ᠶ᠋ᠢ ᠮᠠᠨ ᠤ᠋ ᠴᠡᠷᠢᠭ ᠰᠢᠪᠡᠭᠡᠨ ᠬᠣᠷᠢᠶᠠ ᠪᠠᠷᠢᠴᠢᠬᠠᠭᠰᠠᠨ ᠰᠢᠭ᠋ ᠮᠣᠯᠴᠣᠭ ᠤ᠋ᠨ ᠠᠮᠠ ᠶ᠋ᠢ ᠪᠣᠭᠣᠭᠠᠳ ᠲᠠᠯᠪᠢᠴᠢᠬᠠᠯᠠ! ᠵᠠ᠂ ᠵᠠ ᠬᠡᠳᠦᠭᠦᠯᠡ ᠪᠡᠨ ᠥᠨᠥ ᠰᠥᠨᠢ ᠰᠠᠢᠬᠠᠨ ᠨᠠᠷᠭᠢᠵᠤ ᠬᠣᠨᠣᠶᠠ! ᠮᠠᠷᠭᠠᠰᠢ ᠶᠢᠨ ᠨᠠᠷᠠ ᠭᠠᠷᠬᠤ ᠳ᠋ᠤ᠌ ᠨᠢᠭᠡ ᠶᠠᠭᠤᠮᠠ ᠪᠣᠯᠬᠤ ᠠ᠋ ! ᠵᠣᠳᠪᠠ ᠭᠤᠸᠠᠢ ᠲᠠ ᠬᠠᠷᠠᠵᠤ ᠯᠠ ᠪᠠᠢ ᠭᠡᠵᠦ ᠪᠠᠳᠣᠸᠠᠴᠢᠷ ᠲᠣᠸᠡᠡᠵᠠᠩ ᠮᠠᠭᠤ ᠣᠬᠬᠠᠭᠠ ᠳ᠋ᠠᠭᠠᠨ ᠪᠡᠷᠲᠡᠵᠦ ᠬᠥᠭ ᠬᠥᠭ ᠭᠡᠵᠦ ᠢᠨᠢᠶᠡᠨᠡ᠃
— — — —
① ᠮᠡᠷᠭᠡᠨ ᠭᠡᠭᠡᠨ ᠦ᠌ ᠵᠣᠬᠢᠶᠠᠭᠰᠠᠨ ᠳᠠᠭᠤᠤ᠄《ᠴᠣᠭᠴᠠᠯᠠᠭᠰᠠᠨ ᠪᠤᠶᠠᠨ》᠂《 ᠡᠷᠲᠡ ᠶ᠋ᠢᠨ ᠢᠷᠦᠭᠡᠯ ᠪᠤᠶᠠᠨ》᠂《 ᠦᠯᠡᠮᠵᠢ ᠶ᠋ᠢᠨ ᠪᠤᠶᠠᠨ》᠃ ᠤᠷᠠᠳ ᠤ᠋ᠳ ᠨᠠᠢᠷ ᠬᠤᠷᠢᠮ ᠳ᠋ᠤ᠌ ᠤᠷᠢᠳ ᠢ᠋ᠶ᠋ᠠᠷ ᠵᠠᠪᠠᠯ《ᠭᠤᠷᠪᠠᠨ ᠪᠤᠶᠠᠨ》 ᠢ᠋ ᠳᠠᠭᠤᠯᠠᠳᠠᠭ ᠳᠠᠳᠬᠠᠯ ᠲᠠᠢ᠃