ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠭᠤᠲᠠᠭᠠᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠬᠣᠶᠠᠷ> Хан мунын сүүрс < доорд > – Мөнх зохиоов ᠂ Гутгаар бодь – Нэгдүгээр бүлэг <2>
335 ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠲᠠᠯᠢᠢᠭᠴᠢ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠶᠣᠰᠣᠨ ᠳ᠋ᠠᠭᠠᠨ ᠵᠢᠩᠬᠢᠨᠢ ᠤᠷᠠᠳ ᠤᠳᠤᠮ ᠤ᠋ᠨ ᠬᠥᠮᠦᠨ ᠵᠠᠰᠠᠭ ᠵᠠᠯᠭᠠᠮᠵᠢᠯᠠᠬᠤ ᠶᠣᠰᠣᠲᠠᠢ ᠭᠡᠵᠦ ᠡᠯᠳᠡᠩᠭᠡ ᠪᠣᠳᠣᠵᠤ ᠶᠠᠪᠤᠵᠠᠢ᠃
ᠭᠡᠰᠢᠭᠳᠡᠯᠭᠡᠷ ᠨᠣᠶᠠᠨ ᠥᠪᠡᠷ ᠡᠴᠡ ᠪᠡᠨ ᠬᠡᠦᠬᠡᠳ ᠦᠭᠡᠢ ᠤᠴᠢᠷ ᠴᠢᠰᠤᠨ ᠤᠳᠤᠮ ᠲᠠᠰᠤᠷᠠᠭᠰᠠᠨ ᠠ᠋ᠴᠠ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠵᠠᠰᠠᠭ ᠵᠠᠯᠭᠠᠮᠵᠢᠯᠠᠬᠤ ᠶ᠋ᠢ ᠦᠶᠡᠯᠢᠳ ᠬᠠᠶᠠᠯᠢᠳ ᠭᠡᠳ ᠬᠣᠭᠣᠷᠣ ᠬᠣᠭᠣᠷᠣᠨᠳᠣ ᠪᠠᠨ ᠦᠰ ᠵᠠᠩᠭᠢᠳᠴᠤ ᠬᠢᠮᠤᠷᠠᠯᠳᠤᠨ ᠡᠳᠦᠭᠡ ᠳ᠋ᠦ᠍ ᠬᠦᠷᠪᠡ᠃
ᠣᠳᠣ ᠬᠠᠷᠢᠨ ᠨᠢᠭᠡ ᠵᠡᠭᠡᠭᠡᠭᠰᠡᠨ ᠵᠠᠰᠠᠭ ᠲᠠᠯᠪᠢᠴᠢᠬᠠᠪᠠᠯ ᠤᠷᠠᠳ ᠶᠠᠰᠤᠲᠠᠨ ᠨᠢᠭᠡ ᠰᠠᠨᠠᠭᠠ ᠠᠮᠤᠷᠠᠨᠠ ᠪᠣᠢ ᠭᠡᠵᠦ ᠰᠠᠨᠠᠭᠰᠠᠨ ᠨᠢ ᠪᠤᠷᠤᠭᠤᠳᠴᠠᠢ᠃ ᠵᠠᠩᠵᠤᠨ ᠶᠠᠮᠤᠨ ᠤ᠋ ᠵᠠᠰᠠᠭ᠂ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠲᠦᠯᠬᠢᠭᠰᠡᠨ ᠬᠡᠭᠡᠯᠢ ᠬᠠᠬᠤᠤᠯᠢ ᠶ᠋ᠢ ᠵᠠᠯᠭᠢᠭᠰᠠᠨ ᠠ᠋ᠴᠠ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠤ᠋ ᠵᠠᠰᠠᠭ ᠲᠠᠮᠠᠭᠠ ᠶ᠋ᠢᠨ ᠡᠷᠬᠡ ᠶ᠋ᠢ ᠪᠡᠯᠪᠡᠰᠦᠨ ᠡᠮᠡ ᠶ᠋ᠢᠨ ᠭᠠᠷ ᠲᠤ ᠪᠠᠷᠢᠭᠤᠯᠤᠨᠠ ᠭᠡᠵᠦ ᠲᠡᠷᠡ ᠶᠠᠭ ᠰᠠᠨᠠᠵᠤ ᠣᠯᠤᠭᠰᠠᠨ ᠦᠭᠡᠢ᠃
ᠲᠥᠷᠥᠭᠡᠳᠦᠢ ᠬᠡᠦᠬᠡᠳ ᠲᠦ᠍ ᠲᠡᠮᠦᠷ ᠥᠯᠥᠭᠡᠢ ᠪᠠᠵᠠᠭᠠᠪᠠ ᠭᠡᠭᠴᠢ ᠪᠡᠷ ᠪᠠᠭᠠ ᠬᠠᠲᠤᠨ ᠤ᠋ ᠪᠡᠶᠡ ᠵᠢᠷᠮᠦᠰᠦᠯᠡᠵᠦ᠂ ᠯᠠᠪ ᠬᠦᠦ ᠲᠥᠷᠥᠬᠦ ᠨᠢ ᠠ᠋! ᠬᠦᠦ ᠲᠥᠷᠥᠪᠡᠯ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠠᠰᠠᠭ ᠪᠠᠷᠢᠨᠠ᠁ ᠭᠡᠵᠦ ᠴᠠᠭᠠᠭᠤᠷ ᠶᠠᠪ ᠴᠠᠪ ᠲᠣᠪᠯᠠᠵᠤ ᠲᠠᠯᠪᠢᠭᠰᠠᠨ ᠪᠣᠯᠬᠣᠷ ᠪᠠᠢᠳᠠᠯ ᠬᠡᠴᠡᠭᠦᠦ ᠪᠣᠯᠤᠭᠰᠠᠨ ᠨᠢ ᠲᠣᠳᠣᠷᠬᠠᠢ ᠪᠠᠢᠯᠠ᠃ ᠵᠠᠰᠠᠭ ᠲᠥᠷᠥ ᠭᠡᠭᠴᠢ ᠤᠪᠠᠳᠢᠰ ᠲᠠᠢ ᠪᠥᠮᠪᠥᠷᠢᠳᠡᠭ ᠦ᠋ᠨ ᠲᠤᠬᠠᠢ ᠡᠯᠳᠡᠩᠭᠡ ᠬᠠᠰᠢᠷ ᠲᠤᠷᠰᠢᠯᠭᠠ ᠲᠠᠢ ᠪᠣᠯᠬᠣᠷ ᠡᠨᠡ ᠨᠢ ᠲᠤᠬᠠᠢ ᠶ᠋ᠢᠨ ᠦᠶᠡ ᠲᠥᠷᠥ ᠭᠦᠷᠦᠨ ᠦ᠌ ᠵᠠᠢᠯᠠᠰᠢ ᠦᠭᠡᠢ ᠶᠠᠪᠤᠳᠠᠯ ᠭᠡᠳᠡᠭ ᠢ᠋ ᠮᠡᠳᠡᠵᠦ ᠭᠣᠣᠯ ᠡᠷᠬᠡ ᠠᠳᠬᠤᠭᠰᠠᠨ ᠬᠥᠮᠦᠰ ᠲᠡᠢ ᠬᠦᠴᠦ ᠪᠡᠷ ᠵᠥᠷᠢᠭᠡ ᠦᠭᠡᠢ᠃ ᠬᠥᠨᠳᠡᠢ ᠵᠠᠢᠰ ᠪᠠᠢᠬᠤ ᠮᠡᠷᠭᠡᠨ ᠤᠬᠠᠭᠠᠨ ᠬᠡᠷᠡᠭᠯᠡᠪᠡ᠃ ᠲᠡᠷᠡ ᠪᠡᠷ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠬᠡᠰᠢᠭᠳᠡᠯᠭᠡᠷ ᠬᠦᠩ ᠨᠣᠶᠠᠨ ᠤ᠋ ᠵᠠᠰᠠᠭ ᠢ᠋ ᠵᠠᠯᠠᠭᠠᠮᠵᠢᠯᠠᠭᠤᠯᠬᠤ ᠭᠡᠵᠦ ᠰᠢᠷᠠᠪᠳᠣᠷᠵᠢ ᠶ᠋ᠢ ᠥᠩᠭᠡᠯᠡᠨ ᠡᠷᠭᠦᠵᠦ᠂ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠠᠴᠢ ᠬᠥᠪᠡᠭᠦᠨ ᠪᠠᠲᠤᠪᠠᠶᠠᠷ ᠢ᠋ ᠡᠮᠡᠭᠡᠯ ᠦ᠋ᠨ ᠠᠷᠤ ᠪᠠᠷ ᠰᠠᠭᠤᠯᠭᠠᠭᠰᠠᠨ ᠪᠣᠯ ᠣᠳᠣ ᠬᠠᠷᠢᠨ ᠬᠡᠷᠰᠡᠦ ᠣᠷᠣᠵᠤ ᠴᠠᠭ ᠢ᠋ ᠬᠦᠯᠢᠶᠡᠬᠦ ᠬᠡᠷᠡᠭᠲᠡᠢ ᠪᠣᠯᠤᠯᠠ᠃
ᠢᠩᠭᠢᠭᠡᠳ ᠡᠯᠳᠡᠩᠭᠡ ᠮᠢᠩᠭᠠᠨ ᠬᠤᠰᠢᠭᠤᠨ ᠤ᠋ ᠸᠠᠩ ᠳ᠋ᠤ᠌ ᠡᠳᠦᠢ ᠲᠡᠳᠦᠢ ᠦᠬᠡᠷ ᠠᠳᠤᠭᠤ᠂ ᠲᠡᠮᠡᠭᠡ᠂ ᠬᠣᠨᠢ ᠢᠮᠠᠭᠠ᠂ ᠪᠤᠰᠤᠳ ᠡᠳ᠋ ᠠᠭᠤᠷᠠᠰᠤ ᠵᠡᠷᠭᠡ ᠶ᠋ᠢᠨ ᠶᠠᠭᠤᠮᠠ ᠬᠦᠷᠭᠡᠵᠦ᠂ ᠲᠡᠳᠡᠨ ᠦ᠌ ᠬᠦᠴᠦᠨ ᠳ᠋ᠦ᠍ ᠲᠦᠰᠢᠨ ᠴᠡᠷᠢᠭ ᠮᠣᠷᠢ ᠪᠠᠨ ᠴᠡᠭᠴᠡᠯᠡᠵᠦ ᠠᠪᠤᠭᠠᠳ ᠮᠢᠩᠭᠠᠨ ᠸᠠᠩ ᠢ᠋ ᠴᠢᠷᠠᠢᠴᠢᠯᠠᠪᠠ᠃
ᠮᠢᠩᠭᠠᠨ ᠸᠠᠩ ᠳᠣᠷᠵᠢᠸᠠᠩᠴᠤᠭ ᠭᠡᠭᠴᠢ ᠬᠥᠷᠰᠢ ᠬᠤᠰᠢᠭᠤᠨ ᠳᠣᠲᠣᠷᠠ ᠪᠠᠨ ᠦᠵᠦᠭᠦᠷ ᠪᠠᠶᠠᠨ ᠳ᠋ᠤ᠌ ᠲᠣᠭᠠᠴᠠᠭᠳᠠᠬᠤ ᠶ᠋ᠢ ᠬᠡᠯᠡᠬᠦ ᠦᠭᠡᠢ᠂ ᠪᠠᠷᠤᠭ ᠤ᠋ᠨ ᠬᠥᠮᠦᠨ ᠳ᠋ᠦ᠍ ᠮᠥᠴᠡᠭᠡ ᠪᠡᠨ ᠥᠭᠬᠦ ᠦᠭᠡᠢ ᠣᠨᠴᠠᠯᠢᠭ ᠲᠠᠢ ᠡᠷᠡ ᠶ᠋ᠢᠨ ᠨᠢᠭᠡ ᠠᠵᠤᠭᠤ᠃ ᠳᠣᠷᠵᠢᠸᠠᠩᠴᠤᠭ ᠸᠠᠩ ᠠᠭᠲᠠ ᠶ᠋ᠢᠨ ᠰᠣᠳᠣ ᠶ᠋ᠢ ᠰᠣᠩᠭᠣᠵᠤ᠂ ᠡᠷᠡ ᠶ᠋ᠢᠨ ᠰᠠᠢᠨ ᠢ᠋ ᠰᠢᠯᠢᠨ ᠴᠡᠷᠢᠭ ᠦ᠋ᠨ ᠰᠤᠷᠭᠠᠭᠤᠯᠢᠯᠠᠯ ᠬᠢᠵᠦ ᠬᠣᠰᠢᠭᠤ ᠨᠤᠲᠤᠭ᠂ ᠪᠠᠢᠭᠠᠯᠢ ᠠᠬᠤᠢ ᠪᠠᠨ ᠡᠮᠵᠡᠭ ᠰᠣᠷᠪᠢ ᠦᠭᠡᠢ ᠬᠠᠮᠠᠭᠠᠯᠠᠵᠤ᠂ ᠠᠲᠠᠷ ᠬᠠᠭᠠᠯᠪᠤᠷᠢᠯᠠᠬᠤ ᠬᠠᠷᠠ ᠴᠡᠷᠢᠭ ᠲᠡᠢ ᠡᠷᠡᠰ ᠲᠤᠯᠵᠤ᠂ ᠠᠨᠵᠢᠰᠤᠨ ᠤ᠋ ᠬᠣᠰᠢᠭᠤ ᠪᠠᠷ ᠠᠪᠤ ᠶ᠋ᠢᠨ ᠨᠤᠲᠤᠭ ᠢ᠋ᠶ᠋ᠠᠨ ᠰᠡᠨᠳᠡᠯᠦᠭᠦᠯᠬᠦ ᠦᠭᠡᠢ ᠭᠡᠵᠦ ᠭᠡᠳᠡᠢᠵᠦ ᠶᠠᠪᠤᠭᠰᠠᠨ ᠳᠣᠮᠣᠭᠲᠤ ᠲᠡᠦᠬᠡ ᠲᠡᠢ᠃ ᠲᠡᠷᠡ ᠳᠣᠣᠭᠤᠷ ᠥᠩᠭᠡᠯᠵᠡᠳᠡᠭ ᠬᠠᠷᠠ ᠴᠡᠷᠢᠭ ᠲᠡᠢ ᠬᠦᠴᠦ ᠪᠡᠷ ᠲᠤᠯᠤᠯᠳᠤᠵᠤ᠂ ᠳᠡᠭᠡᠭᠦᠷ ᠳᠠᠷᠤᠯᠠᠳᠠᠭ ᠨᠣᠶᠠᠳ ᠢ᠋ ᠮᠢᠬᠠ ᠲᠣᠰᠣ᠂ ᠮᠥᠩᠭᠥ ᠲᠥᠭᠥᠷᠢᠭ ᠢ᠋ᠶ᠋ᠡᠷ ᠮᠢᠯᠢᠶᠠᠵᠤ ᠲᠡᠳᠡᠨᠦᠰ ᠦ᠋ᠨ ᠴᠢᠷᠠᠢ ᠶ᠋ᠢ ᠨᠢ ᠢᠨᠢᠶᠡᠵᠦ ᠴᠢᠳᠠᠬᠤ ᠦᠭᠡᠢ ᠤᠬᠢᠯᠠᠵᠤ ᠴᠤ᠌ ᠴᠢᠳᠠᠬᠤ ᠦᠭᠡᠢ ᠪᠣᠯᠭᠠᠳᠠᠭ ᠪᠠᠢᠪᠠ᠃ ᠲᠡᠭᠡᠭᠡᠳ ᠮᠢᠩᠭᠠᠨ ᠬᠣᠰᠢᠭᠤ ᠸᠠᠩ ᠨᠣᠶᠠᠨ ᠳᠣᠷᠵᠢᠸᠠᠩᠴᠤᠭ ᠤ᠋ᠨ《 ᠣᠭᠣᠷ ᠲᠤ ᠬᠢᠭᠡᠳ ᠨᠦᠳᠦᠭᠳᠡᠳᠡᠭ ᠦᠭᠡᠢ᠂ ᠤᠭᠤᠲᠠᠨ ᠳ᠋ᠤ᠌ ᠬᠢᠭᠡᠳ ᠪᠠᠷᠢᠭᠳᠠᠳᠠᠭ ᠦᠭᠡᠢ》 ᠭᠡᠰᠡᠨ ᠠᠯᠳᠠᠷ ᠴᠣᠯᠠ ᠨᠢ ᠮᠠᠨᠳᠤᠵᠤ ᠣᠯᠠᠨᠠ ᠱᠠᠭᠰᠢᠭᠳᠠᠵᠤ ᠪᠠᠢᠯᠠ᠃
ᠬᠠᠯᠠ ᠦᠵᠡᠵᠦ ᠬᠠᠰᠢᠷ ᠣᠷᠣᠭᠰᠠᠨ ᠡᠯᠳᠡᠩᠭᠡ ᠠᠯᠢ ᠡᠷᠲᠡ ᠡᠴᠡ ᠮᠢᠩᠭᠠᠨ ᠸᠠᠩ ᠳᠣᠷᠵᠢᠸᠠᠩᠴᠤᠭ ᠤ᠋ᠨ ᠥᠮᠥᠭ ᠰᠦᠷ ᠲᠦ᠍ ᠠᠪᠢᠶᠠᠰ ᠴᠢᠳᠠᠪᠤᠷᠢ ᠪᠠᠨ ᠭᠠᠢᠬᠠᠭᠤᠯᠤᠶᠠ ᠭᠡᠬᠦ ᠪᠣᠳᠣᠯ ᠣᠷᠣᠭᠠᠳ ᠤᠳᠠᠵᠠᠢ᠃
ᠮᠢᠩᠭᠠᠨ ᠸᠠᠩ ᠳᠣᠷᠵᠢᠸᠠᠩᠴᠤᠭ ᠡᠯᠳᠡᠩᠭᠡ ᠶ᠋ᠢᠨ ᠡᠢᠨ ᠬᠦ᠌ ᠭᠠᠷ ᠲᠠᠷᠭᠤᠨ ᠭᠠᠨᠵᠤᠭᠠ ᠳᠦᠭᠦᠷᠡᠩ ᠢᠷᠡᠵᠦ ᠭᠤᠶᠤᠭᠰᠠᠨ ᠢ᠋ ᠭᠣᠯᠣᠭᠰᠠᠨ ᠦᠭᠡᠢ ᠲᠣᠰᠴᠤ ᠠᠪᠤᠪᠠ᠃ ᠭᠡᠬᠦ ᠳ᠋ᠡᠭᠡᠨ ᠳᠣᠷᠵᠢᠸᠠᠩᠴᠤᠭ ᠡᠯᠳᠡᠩᠭᠡ ᠶ᠋ᠢᠨ ᠬᠦᠷᠭᠡᠭᠰᠡᠨ ᠠᠳᠤᠭᠤ᠂ ᠦᠬᠡᠷ ᠡᠨᠡ ᠲᠡᠷᠡ ᠡᠳ᠋ ᠬᠣᠭᠰᠢᠯ ᠳ᠋ᠤ᠌ ᠨᠢᠳᠦ ᠨᠢ ᠤᠯᠠᠢᠭᠰᠠᠨ ᠤᠴᠢᠷ ᠣᠭᠲᠣ ᠪᠤᠰᠤ᠂ ᠪᠤᠰᠤᠳ ᠢ᠋ᠶ᠋ᠠᠷ ᠭᠤᠶᠤᠯᠭᠠᠵᠤ ᠪᠡᠶᠡ ᠪᠡᠨ ᠡᠷᠭᠦᠭᠦᠯᠬᠦ ᠶ᠋ᠢ ᠴᠢᠳᠠᠯ ᠵᠢᠷᠭᠠᠯ ᠬᠣᠶᠠᠷ ᠢ᠋ᠶ᠋ᠠᠷ ᠰᠠᠨᠠᠵᠤ᠂ ᠪᠤᠰᠤᠳ ᠢ᠋ ᠭᠤᠶᠤᠵᠤ ᠪᠡᠶᠡ ᠪᠡᠨ ᠳᠣᠷᠣᠮᠵᠢᠯᠠᠬᠤ ᠶ᠋ᠢ ᠭᠤᠲᠤᠮᠰᠢᠭ ᠢᠴᠢᠭᠦᠷᠢ ᠪᠡᠷ ᠪᠣᠳᠣᠳᠠᠭ ᠠ᠋ᠴᠠ ᠪᠣᠯᠤᠭᠰᠠᠨ ᠶᠤᠮ᠃ ᠡᠢᠨ ᠬᠦ᠌《 ᠵᠠ᠂ ᠶᠠᠭᠤ ᠭᠡᠬᠦ ᠪᠣᠢ ᠳᠠ! ᠮᠣᠩᠭᠣᠯ ᠤᠭᠰᠠᠭᠠᠲᠠᠳ ᠵᠣᠪᠠᠯᠠᠩ ᠳ᠋ᠤ᠌ ᠳᠠᠭᠠᠷᠢᠭᠳᠠᠵᠤ ᠵᠤᠳᠠᠷᠠᠬᠤ ᠳ᠋ᠠᠭᠠᠨ ᠯᠠ ᠬᠥᠮᠦᠨ ᠭᠤᠶᠤᠵᠤ ᠪᠠᠢᠯᠭᠦᠢ! ᠬᠥᠮᠦᠨ ᠢ᠋ ᠭᠠᠴᠢᠯᠠᠩ ᠵᠣᠪᠠᠯᠠᠩ ᠲᠠᠢ ᠦᠶᠡ ᠳ᠋ᠦ᠍ᠨᠢ ᠲᠦᠰᠢᠵᠦ ᠲᠤᠯᠤᠭᠠᠳ ᠠᠪᠤᠶᠠ ᠪᠠᠢᠵᠠ! ᠪᠤᠷᠬᠠᠨ ᠲᠩᠷᠢ ᠨᠢᠳᠦ ᠲᠡᠢ ᠪᠣᠯ ᠪᠤᠶᠠᠨ ᠪᠣᠯᠤᠭ!》 ᠭᠡᠵᠦ ᠡᠯᠳᠡᠩᠭᠡ ᠶ᠋ᠢ ᠬᠠᠵᠠᠢᠭᠰᠠᠨ ᠦᠶᠡ ᠳ᠋ᠦ᠍ ᠲᠦᠯᠬᠢᠭᠰᠡᠨ ᠦᠭᠡᠢ ᠬᠠᠬᠠᠭᠰᠠᠨ ᠦᠶᠡ ᠳ᠋ᠦ᠍ ᠨᠢᠳᠤᠷᠤᠭᠰᠠᠨ ᠦᠭᠡᠢ ᠰᠤᠭᠤᠨ ᠳ᠋ᠠᠭᠠᠨ ᠪᠠᠭᠲᠠᠭᠠᠵᠤ ᠠᠪᠴᠠᠢ᠃
ᠲᠡᠢᠨ ᠳᠠᠵᠢᠨ ᠤ᠋ ᠬᠥᠯ ᠳ᠋ᠦ᠍ ᠳᠡᠭᠡᠷᠡᠮ ᠲᠤᠨᠤᠭᠠ ᠪᠣᠰᠴᠤ ᠲᠥᠷᠥ ᠭᠦᠷᠦᠨ ᠲᠠᠢᠪᠤᠩ ᠪᠣᠯᠤᠭᠰᠠᠨ ᠢ᠋ ᠥᠭᠦᠯᠡᠬᠦ ᠦᠭᠡᠢ᠃ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠦ᠌ ᠳᠣᠲᠣᠷᠠ ᠵᠠᠭᠤᠷᠠ ᠪᠠᠨ ᠮᠠᠭᠤᠳᠠᠯᠴᠠᠵᠤ ᠵᠠᠰᠠᠭ ᠲᠠᠮᠠᠭᠠ ᠬᠤᠰᠠᠷᠠᠭᠰᠠᠨ ᠠᠵᠠ ᠦᠭᠡᠢ ᠣᠷᠴᠢᠨ ᠠ᠋ᠴᠠ ᠡᠯᠳᠡᠩᠭᠡ ᠦᠳᠲᠡᠷ ᠵᠠᠢᠯᠠᠬᠤ ᠦᠭᠡᠢ ᠪᠣᠯᠬᠤ ᠦᠭᠡᠢ ᠭᠡᠵᠦ ᠮᠢᠩᠭᠠᠨ ᠸᠠᠩ ᠢ᠋ ᠲᠦᠰᠢᠷᠡ ᠢᠷᠡᠭᠰᠡᠨ ᠨᠢ ᠡᠨᠡ᠃ ᠡᠢᠨ ᠬᠦ᠌ ᠲᠡᠷᠡ ᠴᠠᠭ ᠤ᠋ᠨ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠨ ᠠᠷᠤᠨᠰᠢ ᠪᠠᠨ ᠰᠠᠭᠤᠵᠤ ᠢᠴᠡᠭᠡᠯᠡᠭᠰᠡᠨ ᠲᠠᠷᠪᠠᠭᠠ ᠰᠢᠭ᠋ ᠶᠡᠬᠡ ᠤᠳᠠᠭᠠᠨ ᠲᠣᠯᠣᠭᠠᠢ ᠪᠤᠯᠲᠠᠢᠯᠭᠠᠭᠰᠠᠨ ᠦᠭᠡᠢ᠃
ᠶᠠᠭ ᠡᠨᠡ ᠵᠠᠭᠤᠷᠠ ᠰᠢᠷᠠ ᠴᠡᠷᠢᠭ ᠦ᠋ᠨ ᠬᠢᠨ ᠬᠠᠷᠠ ᠴᠡᠷᠢᠭ ᠢ᠋ ᠤᠮᠠᠷᠠᠲᠠᠯᠠ ᠴᠣᠬᠢᠨ ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠨᠤᠲᠤᠭ ᠲᠤ ᠬᠥᠯ ᠲᠥᠷᠥᠯᠡ ᠭᠡᠰᠡᠨ ᠴᠢᠮᠡᠭᠡ ᠳᠤᠭᠤᠯᠳᠠᠪᠠ᠃
ᠨᠤᠲᠤᠭ ᠠ᠋ᠴᠠ ᠵᠤᠳᠪᠠ ᠮᠡᠢᠷᠡᠨ ᠪᠠᠢᠨ ᠪᠠᠢᠨ ᠴᠢᠮᠡᠭᠡ ᠢᠷᠡᠭᠦᠯᠵᠦ ᠡᠯᠳᠡᠩᠭᠡ ᠶ᠋ᠢ ᠪᠠᠷᠠᠭᠤᠨ ᠬᠦᠩ ᠳ᠋ᠡᠭᠡᠨ ᠬᠤᠷᠳᠤᠨ ᠪᠤᠴᠠᠵᠤ ᠢᠷᠡ᠂ ᠬᠡᠦᠬᠡᠳ ᠵᠤᠯᠵᠠᠭᠠ ᠳᠠᠭᠠᠭᠤᠯᠤᠭᠰᠠᠨ ᠪᠠᠭᠠ ᠬᠠᠲᠤᠨ ᠤ᠋ ᠵᠠᠰᠠᠭ ᠢ᠋ ᠰᠢᠷᠠ ᠴᠡᠷᠢᠭ ᠦ᠋ᠨ ᠬᠢᠨ ᠲᠣᠭᠣᠬᠤ ᠦᠭᠡᠢ ᠢᠷᠪᠠᠢᠵᠤ ᠪᠠᠢᠭᠠ ᠳ᠋ᠤᠨᠢ ᠲᠡᠳᠡᠨᠦᠰ ᠦ᠋ᠨ ᠮᠣᠷᠢᠨ ᠤ᠋ ᠬᠢᠨᠢ ᠲᠡᠰᠢᠶᠡ ᠤᠷᠤᠭᠤ ᠲᠠᠰᠢᠭᠤᠷ ᠨᠡᠮᠡᠬᠦ ᠬᠥᠮᠦᠨ ᠭᠠᠭᠴᠠ ᠬᠠᠰᠢᠷ ᠲᠤᠰᠠᠯᠠᠭᠴᠢ ᠲᠠ ᠪᠣᠯᠵᠤ ᠪᠠᠢᠨᠠ ᠭᠡᠳ ᠪᠣᠯᠳᠠᠭ ᠦᠭᠡᠢ᠃
ᠬᠡᠳᠦ ᠬᠣᠨᠣᠭᠰᠠᠨ ᠦᠭᠡᠢ ᠵᠤᠳᠪᠠ ᠮᠡᠢᠷᠡᠨ ᠮᠢᠩᠭᠠᠨ ᠬᠤᠰᠢᠭᠤᠨ ᠳ᠋ᠤ᠌ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠬᠦᠷᠦᠯᠴᠡᠨ ᠢᠷᠡᠵᠦ ᠡᠯᠳᠡᠩᠭᠡ ᠲᠡᠢ ᠴᠢᠬᠤᠯᠠ ᠶᠠᠪᠤᠳᠠᠯ ᠵᠥᠪᠳᠡᠵᠡᠢ᠃
ᠪᠠᠭᠠ ᠬᠠᠲᠤᠨ ᠴᠤ᠌ ᠮᠠᠶᠢᠭ ᠲᠠᠢ ᠰᠢᠷᠠ ᠴᠡᠷᠢᠭ ᠦ᠋ᠨ ᠲᠡᠭᠦᠨ ᠳ᠋ᠦ᠍ ᠨᠢᠭᠤᠷ ᠥᠭᠬᠦ ᠦᠭᠡᠢ ᠪᠠᠢᠳᠠᠯ ᠢ᠋ ᠭᠠᠳᠠᠷᠯᠠᠵᠤ ᠳᠡᠮᠡᠢ ᠲᠡᠭᠡᠵᠦ ᠰᠢᠷᠠ ᠴᠡᠷᠢᠭ ᠢ᠋ ᠨᠠᠭᠠᠯᠳᠤᠨ ᠳᠣᠯᠳᠣᠭᠣᠨᠠᠬᠤ ᠳᠤᠷᠠ ᠦᠭᠡᠢ᠃ ᠳᠡᠭᠡᠪᠡᠵᠦ ᠡᠮᠦᠨᠡ ᠡᠴᠡ ᠨᠢ ᠰᠢᠷᠦᠭᠦᠨ ᠣᠷᠣᠬᠤ ᠴᠡᠷᠢᠭ ᠮᠣᠷᠢᠨ ᠤ᠋ ᠴᠢᠳᠠᠯ ᠦᠭᠡᠢ ᠪᠣᠯᠬᠣᠷ ᠬᠠᠷᠠ ᠴᠡᠷᠢᠭ ᠦ᠋ᠨ ᠨᠥᠮᠥᠷᠢ ᠳ᠋ᠦ᠍ ᠲᠡᠷᠪᠡᠵᠦ ᠸᠠᠩ ᠰᠣᠬᠣᠷ ᠤ᠋ᠨ ᠲᠦᠰᠢᠭ ᠲᠤᠰᠠᠯᠠᠮᠵᠢ ᠶ᠋ᠢ ᠭᠣᠷᠢᠳᠠᠬᠤ ᠠ᠋ᠴᠠ ᠥᠭᠡᠷᠡ ᠭᠠᠷᠬᠤ ᠵᠠᠮ ᠦᠭᠡᠢ ᠪᠣᠯᠵᠠᠢ᠃ ᠶᠠᠭ ᠡᠨᠡ ᠬᠦ᠌ ᠳᠡᠭᠡᠰᠦᠨ ᠳᠥᠷᠥᠭᠡ ᠢᠰᠬᠦᠯᠦᠭᠰᠡᠨ ᠬᠡᠦᠬᠡᠳ ᠵᠤᠯᠵᠠᠭᠠ ᠲᠠᠢ ᠪᠡᠯᠪᠡᠰᠦᠨ ᠪᠦᠰᠡᠭᠦᠢ ᠶ᠋ᠢᠨ ᠪᠡᠳᠡᠷᠡᠭᠰᠡᠨ ᠦᠶᠡ ᠳ᠋ᠦ᠍ᠨᠢ᠂ ᠰᠢᠷᠠ ᠴᠡᠷᠢᠭ ᠦ᠋ᠨ ᠰᠦᠷ ᠢ᠋ᠶ᠋ᠡᠷ ᠲᠡᠭᠦᠨ ᠢ᠋ ᠴᠣᠴᠢᠭᠠᠵᠤ ᠬᠠᠶᠠᠪᠠᠯ ᠶᠠᠭᠤ ᠲᠡᠰᠬᠦ ᠪᠣᠢ! ᠶᠠᠭᠠᠬᠢᠯᠠ ᠭᠡᠳ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠨᠤᠲᠤᠭ ᠪᠡᠯᠴᠢᠭᠡᠷ ᠬᠠᠭᠠᠯᠤᠭᠰᠠᠨ ᠬᠠᠷᠠ ᠴᠡᠷᠢᠭ ᠢ᠋ ᠳᠣᠲᠣᠨᠣᠴᠢᠯᠠᠵᠤ ᠪᠣᠯᠬᠤ ᠪᠢᠵᠡ! ᠭᠡᠵᠦ ᠵᠤᠳᠪᠠ ᠮᠡᠢᠷᠡᠨ ᠲᠠᠰᠢᠶᠠ ᠶ᠋ᠢ ᠨᠢ ᠲᠡᠰᠢᠵᠦ ᠪᠠᠢᠭᠠ ᠰᠢᠭ᠋ ᠡᠯᠳᠡᠩᠭᠡ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍ ᠬᠣᠩᠬᠣ ᠵᠡᠭᠦᠯᠭᠡᠭᠡᠳ ᠠᠮᠤᠷ ᠪᠠᠢᠯᠭᠠᠬᠤ ᠦᠭᠡᠢ᠃
ᠡᠯᠳᠡᠩᠭᠡ ᠭᠡᠳᠡᠭ ᠬᠥᠮᠦᠨ ᠬᠠᠰᠢᠷ ᠤᠬᠠᠭᠠ ᠶ᠋ᠢ ᠱᠥᠯᠥ ᠦᠭᠡᠢ ᠪᠣᠯᠲᠠᠯᠠ ᠬᠠᠲᠠᠭᠠᠳᠠᠭ ᠳᠣᠬᠢ ᠲᠣᠯᠣᠭᠠᠢ᠂ ᠴᠢᠬᠢ ᠬᠠᠲᠠᠭᠤ ᠠᠮᠠᠭᠠᠢ ᠴᠢᠩᠭᠠ ᠬᠥᠮᠦᠨ ᠦ᠌ ᠨᠢᠭᠡ᠃ ᠤᠰᠤᠨ ᠭᠤᠯᠭᠤᠭᠤᠷ ᠲᠣᠰᠣᠨ ᠵᠦᠯᠭᠦᠭᠦᠷ ᠰᠢᠭ ᠤᠷᠠᠨ ᠬᠣᠩᠰᠢᠶᠠᠷ ᠲᠠᠢ ᠬᠥᠮᠦᠨ ᠦ᠌ ᠦᠭᠡ ᠪᠡᠷ ᠣᠷᠣᠵᠤ ᠲᠡᠢᠮᠦ ᠬᠢᠯᠪᠠᠷᠬᠠᠨ ᠰᠡᠳᠬᠢᠯ ᠬᠥᠳᠡᠯᠦᠭᠡᠳ ᠵᠢᠷᠣᠭᠠ ᠣᠷᠣᠴᠢᠬᠠᠳᠠᠭ ᠬᠥᠮᠦᠨ ᠪᠢᠰᠢ᠂ ᠤᠯᠠᠮ ᠴᠤ᠌ ᠬᠠᠰᠢᠷ ᠤᠬᠠᠭᠠᠨ ᠢᠶᠠᠨ ᠬᠥᠮᠦᠨ ᠪᠣᠯᠭᠠᠨ ᠤ᠋ ᠡᠮᠦᠨᠡ ᠭᠠᠢᠬᠠᠭᠤᠯᠵᠤ᠂ ᠬᠠᠮᠢᠶᠠ ᠨᠠᠮᠢᠶᠠ ᠦᠭᠡᠢ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠲᠤᠷᠭᠢᠳᠠᠭ ᠦᠭᠡᠢ᠃ ᠪᠣᠯᠤᠮᠵᠢ ᠦᠭᠡᠢ ᠦᠶᠡ ᠳ᠋ᠦ᠍ ᠰᠢᠳᠦᠨ ᠦ᠌ ᠪᠡᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠬᠡᠢ ᠴᠦ᠍ ᠭᠠᠷᠭᠠᠳᠠᠭ ᠦᠭᠡᠢ ᠠᠮᠠᠭᠠᠢ ᠴᠢᠩᠭᠠ ᠡᠷᠡ ᠰᠠᠨᠵᠠᠢ᠃ ᠲᠡᠭᠡᠬᠦ ᠳ᠋ᠦ᠍ ᠭᠠᠭᠴᠠ ᠵᠤᠳᠪᠠ ᠮᠡᠢᠷᠡᠨ ᠦ᠌ ᠤᠷᠠᠨ ᠬᠣᠩᠰᠢᠶᠠᠷ ᠤᠬᠠᠭᠠ ᠰᠠᠮᠪᠠᠭᠠ ᠶ᠋ᠢ ᠢᠲᠡᠭᠡᠵᠦ ᠲᠣᠭᠣᠳᠠᠭ ᠤ᠋ᠨ ᠬᠤᠪᠢ ᠳ᠋ᠤ᠌ ᠶᠡᠬᠡ ᠡᠴᠡ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠬᠤᠪᠢ ᠲᠠᠪᠢᠯᠠᠩ᠂ ᠳᠤᠮᠳᠠ ᠠ᠋ᠴᠠ ᠬᠣᠰᠢᠭᠤ ᠨᠤᠲᠤᠭ ᠤ᠋ᠨ ᠲᠣᠮᠣ ᠤᠴᠢᠷ᠂ ᠪᠠᠭᠠ ᠠ᠋ᠴᠠ ᠬᠤᠪᠢ ᠭᠡᠷ ᠦ᠋ᠨ ᠤᠴᠢᠷ ᠨᠠᠴᠢᠷ ᠲᠤ ᠵᠤᠳᠪᠠ ᠮᠡᠢᠷᠡᠨ ᠲᠡᠢ ᠵᠠᠮ ᠨᠡᠢᠯᠡᠵᠦ ᠳᠥᠷᠥᠭᠡ ᠬᠠᠷᠰᠢᠭᠤᠯᠳᠠᠭ ᠰᠠᠨ᠃ ᠲᠡᠭᠡᠭᠡᠳ ᠬᠣᠲᠠ ᠲᠠᠢ ᠬᠣᠨᠢ ᠦᠷᠭᠦᠬᠦ ᠡᠴᠡ ᠬᠤᠨᠳᠠᠭᠠ ᠲᠠᠢ ᠠᠷᠢᠬᠢ ᠴᠠᠯᠭᠢᠬᠤ ᠶ᠋ᠢᠨ ᠤᠴᠢᠷ ᠲᠤ ᠴᠢᠬᠢ ᠴᠢᠬᠢ ᠪᠡᠨ ᠬᠠᠵᠠᠮᠠᠷ ᠰᠢᠪᠡᠨᠡᠯᠳᠦᠨ ᠵᠥᠪᠯᠡᠯᠳᠦᠳᠡᠭ ᠠᠵᠤᠭᠤ᠃
ᠡᠯᠳᠡᠩᠭᠡ᠂ ᠵᠤᠳᠪᠠ ᠮᠡᠢᠷᠡᠨ ᠦ᠌ ᠮᠣᠷᠢᠨ ᠴᠠᠭᠠᠨ ᠰᠢᠳᠦ ᠪᠡᠨ ᠢᠷᠠᠯᠵᠠᠭᠤᠯᠤᠨ ᠢᠨᠢᠶᠡᠬᠦ ᠳ᠋ᠡᠭᠡᠨ ᠢᠨᠢᠶᠡᠵᠦ᠂ ᠬᠠᠨᠢᠶᠠᠬᠤ ᠳ᠋ᠠᠭᠠᠨ ᠬᠠᠨᠢᠶᠠᠵᠤ ᠬᠡᠰᠡᠭ ᠲᠡᠭᠡᠨ ᠬᠥᠮᠥᠰᠬᠡ ᠵᠠᠩᠭᠢᠳᠤᠨ ᠬᠠᠶᠠ ᠪᠠᠰᠠ ᠬᠥᠭ ᠬᠥᠭ ᠭᠡᠵᠦ ᠬᠥᠬᠥᠷᠡᠨ ᠢᠨᠢᠶᠡᠵᠦ ᠰᠢᠯᠦᠰᠦ ᠪᠡᠨ ᠲᠥᠰᠦᠷᠭᠡᠨ ᠦᠨᠡᠮᠰᠢᠷᠡᠭᠦᠯᠵᠦ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰᠤᠭᠠᠳ᠂
— ᠪᠠᠬᠠᠨ ᠬᠠᠵᠠᠭᠤᠯᠠᠰᠭᠢᠵᠤ ᠬᠦᠯᠢᠶᠡᠰᠬᠢᠵᠤ ᠪᠠᠢᠭᠠᠳ ᠬᠠᠪᠢᠷᠭᠠ ᠤᠷᠤᠭᠤ ᠨᠢ ᠬᠠᠳᠬᠤᠪᠠᠯ᠂ ᠳᠡᠭᠡᠷᠡ ᠶᠤᠮ ᠪᠢᠰᠢ ᠤᠤ? ᠳᠡᠩᠳᠡᠭᠦᠦ ᠡᠷᠲᠡ ᠬᠥᠳᠡᠯᠦᠭᠡᠳ ᠴᠦᠯᠢᠰᠳᠡᠪᠡᠯ ᠰᠢᠷᠠ ᠴᠡᠷᠢᠭ ᠲᠤ ᠴᠤ᠌ ᠨᠠᠢᠷ ᠦᠭᠡᠢ᠂ ᠬᠠᠷᠠ ᠴᠡᠷᠢᠭ ᠲᠦ᠍ ᠴᠦ᠍ ᠲᠠᠯᠠ ᠦᠭᠡᠢ᠂ ᠶᠣᠰᠣᠲᠠᠢ ᠡᠯᠵᠢᠭᠡ ᠴᠤ᠌ ᠦᠭᠡᠢ ᠭᠤᠷᠪᠠᠨ ᠯᠠᠩ ᠴᠤ᠌ ᠦᠭᠡᠢ ᠬᠣᠭᠣᠰᠣᠨ ᠬᠣᠴᠣᠷᠬᠤ ᠪᠣᠯᠤᠨᠠ ᠰᠢᠦ! ᠭᠡᠪᠡ᠃
— ᠲᠠᠨ ᠤ᠋ ᠬᠡᠯᠡᠬᠦ ᠨᠢ ᠲᠠᠭᠠᠷᠠᠬᠤ ᠨᠢ ᠴᠦ᠍ ᠲᠠᠭᠠᠷᠠᠨᠠ᠃ ᠲᠡᠭᠡᠪᠡᠴᠦ ᠳᠡᠩᠳᠡᠭᠦᠦ ᠬᠡᠷᠰᠡᠦ ᠤᠬᠠᠭᠠᠨ ᠳ᠋ᠠᠭᠠᠨ ᠰᠢᠳᠡᠵᠦ ᠠᠲᠤᠷᠢᠯᠳᠤᠭᠰᠠᠨ ᠮᠣᠭᠠᠢ ᠰᠢᠭ᠋ ᠡᠭᠦᠷ ᠲᠡᠭᠡᠨ ᠰᠢᠷᠭᠤᠭᠠᠳ ᠥᠨᠳᠡᠢᠬᠦ ᠦᠭᠡᠢ ᠪᠣᠯ ᠣᠯᠵᠠ ᠶ᠋ᠢᠨ ᠭᠠᠨᠵᠤᠭᠠ ᠬᠣᠰᠠᠷᠵᠤ᠂ ᠣᠷᠣᠢ ᠶ᠋ᠢᠨ ᠲᠣᠭᠤᠷᠴᠠᠭ ᠬᠡᠢᠰᠦᠨᠡ ᠭᠡᠳᠡᠭ ᠢ᠋ ᠮᠡᠳᠡᠵᠦ ᠪᠠᠢᠬᠤ ᠬᠡᠷᠡᠭᠲᠡᠢ᠃
— ᠰᠢᠷᠠ ᠴᠡᠷᠢᠭ ᠦ᠋ᠳ ᠭᠡᠵᠦ ᠴᠣᠬᠣᠮ ᠶᠠᠮᠠᠷ ᠵᠣᠷᠢᠯᠭᠠ ᠲᠠᠢ ᠶᠤᠮ ᠪᠣᠯ? ᠴᠠᠭᠠᠭᠤᠷ ᠢᠩᠭᠢᠯᠡ᠂ ᠴᠢᠩᠭᠢᠯᠡ ᠭᠡᠵᠦ ᠱᠤᠤᠭᠢᠯᠳᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠦᠵᠡᠵᠦ ᠪᠠᠢᠲᠠᠯᠠ ᠡᠭᠦᠳᠡᠨ ᠳᠡᠭᠡᠷᠡ ᠢᠷᠡᠴᠢᠬᠡᠯᠡ ᠬᠦ!
— ᠭᠠᠵᠠᠷ ᠨᠤᠲᠤᠭ᠂ ᠡᠳ᠋ ᠠᠭᠤᠷᠠᠰᠤ᠂ ᠠᠰᠢᠭ ᠬᠣᠨᠵᠢᠶᠠ ᠯᠠ ᠭᠡᠰᠡᠨ ᠪᠠᠢᠯᠭᠦᠢ᠃ ᠦᠭᠡᠢ᠂ ᠪᠠᠰᠠ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠴᠡᠩᠬᠡᠷ ᠴᠣᠩᠬᠢᠶᠠᠯ ᠤ᠋ᠨ ᠠᠯᠲᠠ ᠮᠥᠩᠭᠥᠨ ᠳ᠋ᠦ᠍ ᠰᠢᠨᠤᠵᠤ ᠢᠷᠡᠯᠡ ᠭᠡᠬᠦ ᠶᠦᠮ! ᠪᠦᠦ ᠮᠡᠳᠡ ᠳᠠ᠂ ᠶᠠᠭᠤ ᠴᠤ᠌ ᠭᠡᠰᠡᠨ ᠬᠠᠷᠠ ᠴᠡᠷᠢᠭ ᠦ᠋ᠳ ᠡᠵᠡᠮᠳᠡᠭᠰᠡᠨ ᠢ᠋ᠶ᠋ᠡᠨ ᠬᠠᠮᠪᠠᠭᠠᠷᠬᠠᠵᠤ ᠡᠮᠦᠨᠡ ᠡᠴᠡ ᠨᠢ ᠲᠤᠯᠬᠤᠯᠠᠷ ᠰᠢᠷᠠ ᠴᠡᠷᠢᠭ ᠥᠰᠢᠷᠬᠡᠵᠦ ᠴᠢᠨᠣᠠ ᠶ᠋ᠢᠨ ᠰᠦᠷᠦᠭ ᠬᠣᠲᠠ ᠲᠠᠢ ᠬᠣᠨᠢᠨ ᠳ᠋ᠤ᠌ ᠣᠷᠣᠬᠤ ᠰᠢᠭ᠋ ᠤᠯᠠᠩᠭᠠᠰᠴᠤ ᠪᠠᠢᠨᠠ ᠭᠡᠵᠡᠭᠡᠬᠦ ᠶᠦᠮ᠃ ᠲᠡᠭᠡᠪᠡᠴᠦ ᠰᠢᠷᠠ ᠴᠡᠷᠢᠭ ᠦ᠋ᠳ ᠪᠠᠰᠠ ᠮᠣᠩᠭᠣᠯ ᠬᠥᠮᠦᠨ᠂ ᠴᠢᠩᠭᠢᠰ ᠬᠠᠭᠠᠨ ᠢ᠋ ᠡᠪᠦᠭᠡ ᠳᠡᠭᠡᠳᠦᠰ ᠭᠡᠵᠦ ᠰᠢᠲᠦᠳᠡᠭ ᠭᠡᠵᠦ ᠪᠠᠢᠨᠠ᠁
— ᠬᠡᠩ! ᠲᠡᠷᠡ ᠴᠢᠨᠢ ᠴᠢᠮᠠᠶ᠋ᠢ ᠮᠤᠩᠬᠠᠷᠠᠭᠤᠯᠵᠤ《 ᠲᠣᠯᠣᠭᠠᠢ ᠶ᠋ᠢ ᠴᠢᠨᠢ ᠢᠯᠢᠭᠰᠡᠭᠡᠷ ᠪᠠᠢᠵᠤ ᠲᠠᠷᠢᠬᠢ ᠶ᠋ᠢ ᠨᠢ ᠰᠣᠷᠣᠵᠤ᠂ ᠰᠢᠯᠢ ᠶ᠋ᠢ ᠴᠢᠨᠢ ᠮᠠᠭᠠᠵᠢᠭᠰᠠᠭᠠᠷ ᠪᠠᠢᠵᠤ ᠰᠢᠷᠪᠠᠰᠤ ᠶ᠋ᠢ ᠨᠢ ᠰᠤᠭᠤᠯᠬᠤ》 ᠤᠬᠠᠭᠠᠨ ᠰᠢᠦ! ᠵᠤᠳᠪᠠ᠂ ᠮᠣᠩᠭᠣᠯ ᠤ᠋ᠨ ᠰᠡᠴᠡᠨ ᠦᠭᠡᠨ ᠳ᠋ᠦ᠍ ᠢᠷᠡᠭᠰᠡᠨ ᠬᠥᠮᠦᠨ ᠤᠴᠢᠷ ᠲᠠᠢ᠂ ᠢᠨᠢᠶᠡᠭᠰᠡᠨ ᠬᠥᠮᠦᠨ ᠭᠡᠮ ᠭᠡᠳᠡᠭ ᠰᠢᠦ ᠳᠡ ᠰᠢᠷᠦᠭᠦᠨ ᠬᠠᠷᠠᠭᠠᠳ ᠣᠷᠣᠳᠠᠭ ᠬᠥᠮᠦᠨ ᠦ᠌ ᠰᠦᠷ ᠨᠢ ᠶᠡᠬᠡ ᠰᠡᠭᠦᠳᠡᠷ ᠨᠢ ᠪᠠᠭᠠ᠃ ᠬᠠᠷᠢᠨ ᠢᠨᠢᠶᠡᠳᠦ ᠭᠠᠨᠵᠤᠭᠠᠯᠠᠭᠠᠳ ᠭᠤᠯᠭᠤᠵᠤ ᠪᠠᠢᠳᠠᠭ ᠬᠥᠮᠦᠨ ᠦ᠌ ᠠᠷᠤ ᠬᠣᠢᠨᠠ ᠨᠢ ᠶᠡᠬᠡ ᠤᠴᠢᠷ ᠪᠠᠢᠳᠠᠭ ᠰᠢᠦ!
ᠲᠡᠭᠡᠪᠡᠴᠦ ᠰᠢᠷᠠ ᠴᠡᠷᠢᠭ ᠦᠳ ᠮᠣᠩᠭᠣᠯ ᠬᠥᠮᠦᠨ ᠢ ᠠᠯᠠᠵᠤ ᠬᠢᠲᠤᠬᠤ ᠦᠭᠡᠢ᠂ ᠬᠣᠣᠷᠯᠠᠳᠠᠭ ᠦᠭᠡᠢ ᠳᠤᠰᠠ ᠬᠢᠵᠦ ᠪᠠᠢᠭᠠ᠁ ᠲᠡᠳᠡᠨᠦᠰ ᠪᠠᠰᠠ ᠴᠢᠩᠬᠢᠰ ᠬᠠᠭᠠᠨ᠂ ᠮᠣᠩᠭᠣᠯ ᠬᠥᠮᠦᠨ᠂ ᠮᠠᠨ ᠤ ᠡᠪᠦᠭᠡ ᠳᠡᠭᠡᠳᠦᠰ᠁ ᠭᠡᠬᠦ ᠶᠤᠮ᠃
— ᠲᠡᠭᠡᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ! ᠴᠢᠩᠬᠢᠰ ᠬᠠᠭᠠᠨ ᠤ ᠦᠷᠡᠳᠦᠰ ᠮᠣᠩᠭᠣᠯ ᠬᠥᠮᠥᠨ ᠦ ᠡᠪᠦᠭᠡ ᠳᠡᠭᠡᠳᠦᠰ ᠢᠶᠡᠨ ᠭᠡᠳᠡᠭ ᠨᠢ ᠭᠠᠭᠴᠠ ᠰᠢᠷᠠ ᠴᠡᠴᠡᠭ ᠦᠳ ᠬᠡᠯᠡᠵᠦ ᠪᠠᠢᠭᠠ ᠪᠢᠰᠢ! ᠠᠷᠪᠠᠨ ᠭᠤᠷᠪᠠᠳᠤᠭᠠᠷ ᠵᠠᠭᠤᠨ ᠳᠤ ᠴᠢᠩᠬᠢᠰ ᠬᠠᠭᠠᠨ ᠮᠣᠷᠢᠨ ᠤ ᠲᠤᠭᠤᠷᠠᠢ ᠪᠠᠷ ᠳᠡᠯᠡᠬᠡᠢ ᠶᠢ ᠳᠣᠩᠰᠣᠯᠭᠠᠭᠰᠠᠨ ᠶᠤᠮ ᠴᠢᠨᠢ ᠳᠠᠶᠠᠩ ᠳᠡᠯᠡᠬᠡᠢ ᠳᠦ ᠴᠢᠩᠬᠢᠰ ᠬᠠᠭᠠᠨ᠂ ᠮᠣᠩᠭᠣᠯ ᠬᠥᠮᠥᠨ ᠪᠤᠶᠤ ᠮᠣᠷᠢ᠂ ᠴᠢᠨᠣᠠ ᠭᠡᠬᠦ ᠳᠦ ᠠᠶᠤᠨ ᠳᠠᠭᠵᠢᠳᠠᠭ ᠬᠥᠮᠥᠰ ᠮᠣᠩ ᠦᠭᠡᠢ ᠨᠢ ᠲᠡᠢᠮᠦ ᠴᠤ᠌ ᠬᠠᠴᠢᠷᠬᠠᠯᠲᠠᠢ ᠶᠠᠪᠤᠳᠠᠯ ᠪᠢᠰᠢ᠃ ᠲᠡᠳᠡᠨ ᠦ ᠮᠣᠩᠭᠣᠯ ᠬᠥᠮᠥᠨ᠂ ᠮᠣᠷᠢ᠂ ᠴᠢᠨᠣᠠ ᠭᠤᠷᠪᠠ ᠶᠢᠨ ᠭᠠᠯᠵᠠᠭᠤ ᠶᠢ ᠬᠥᠳᠡᠯᠭᠡᠬᠦ ᠦᠭᠡᠢ ᠠᠶᠠ ᠪᠠᠷ ᠨᠢ ᠲᠠᠯᠪᠢᠵᠤ ᠠᠭᠠᠵᠢᠭᠤ ᠠᠭᠠᠵᠢᠭᠤ ᠪᠠᠷ ᠠᠷᠭᠠᠨ ᠳ᠋ᠠᠭᠠᠨ ᠣᠷᠣᠭᠤᠯᠵᠤ ᠠᠪᠬᠤ ᠰᠠᠨᠠᠭᠠᠲᠠᠢ ᠨᠢ ᠢᠪ ᠢᠯᠡᠬᠡᠨ! ᠮᠣᠩᠭᠣᠯ ᠬᠥᠮᠥᠨ ᠦ ᠭᠠᠯᠵᠠᠭᠤ ᠶᠢ ᠬᠥᠳᠡᠯᠭᠡᠵᠦ᠂ ᠮᠣᠷᠢᠳ ᠢ ᠨᠢ ᠠᠷᠭᠢᠶᠠᠳᠤᠭᠤᠯᠤᠨ᠂ ᠴᠢᠨᠣᠠ ᠨᠣᠬᠠᠢ ᠶᠢ ᠨᠢ ᠤᠯᠠᠩᠭᠠᠰᠤᠭᠤᠯᠣᠭᠰᠠᠭᠠᠷ ᠴᠤ᠌ ᠰᠠᠨᠠᠭᠰᠠᠨ ᠶᠠᠭᠤᠮᠠ ᠨᠢ ᠪᠠᠯᠠᠷᠠᠨᠠ ᠭᠡᠳᠡᠭ ᠢ ᠲᠡᠳᠡ ᠴᠠᠭᠠᠨᠠ ᠨᠢ ᠭᠠᠷᠲᠠᠯᠠ ᠮᠡᠳᠡᠨᠡ ᠡ᠃
— ᠲᠡᠷᠡ ᠴᠤ᠌ ᠲᠡᠢᠮᠦ ᠯᠠ ᠳ᠋ᠠ᠃ ᠲᠡᠭᠡᠪᠡᠴᠦ ᠰᠢᠷᠠ ᠴᠡᠷᠢᠭ ᠦᠨ ᠬᠤᠪᠴᠠᠰᠤ ᠵᠡᠭᠦᠯᠲᠡ᠂ ᠫᠤᠤ ᠵᠡᠪᠰᠡᠭ ᠦᠨ ᠲᠣᠨᠣᠭ ᠲᠥᠬᠥᠭᠡᠷᠦᠮᠵᠢ ᠠᠯᠢ ᠴᠤ᠌ ᠲᠠᠯᠠ ᠪᠠᠷ ᠢᠶᠠᠨ ᠮᠠᠨᠤᠰ ᠠᠴᠠ ᠴᠠᠷᠢᠭᠤᠨ᠃ ᠥᠭᠡᠷᠡ ᠶᠢ ᠬᠡᠯᠡᠬᠦ ᠪᠡᠨ ᠪᠠᠢᠶᠠ᠃ ᠮᠠᠨ ᠤ ᠪᠠᠷᠠᠭᠤᠨ ᠭᠥᠩ ᠳᠦ ᠰᠢᠷᠠ ᠴᠡᠷᠢᠭ ᠨᠢᠭᠤᠷ ᠥᠭᠬᠦ ᠦᠭᠡᠢ ᠶᠤᠮ ᠪᠣᠯ ᠮᠠᠨ ᠤ ᠪᠠᠷᠠᠭᠤᠨ ᠭᠥᠩ ᠦᠨ ᠬᠢᠨ ᠨᠢᠭᠡ ᠯᠠ ᠰᠥᠨᠢ ᠶᠢᠨ ᠱᠦᠭᠦᠷᠳᠡᠯᠲᠡ ᠶᠢ ᠶᠡᠷᠦ ᠳᠠᠭᠠᠭᠠᠬᠤ ᠦᠭᠡᠢ ᠡᠪᠦᠳᠦᠭ ᠨᠢ ᠨᠤᠭᠤᠷᠠᠭᠠᠳ ᠰᠥᠭᠥᠳᠬᠦ ᠳᠦ ᠪᠡᠪ ᠪᠡᠯᠡᠨ! ᠲᠠ ᠲᠡᠷᠡ ᠣᠳᠣ ᠶᠢᠨ ᠬᠣᠰᠢᠭᠤ ᠶᠠᠮᠤᠨ ᠤ ᠵᠠᠰᠠᠭ᠂ ᠳᠦᠰᠢᠮᠡᠳ ᠨᠣᠶᠠᠳ ᠤᠨ ᠴᠢᠷᠠᠢ ᠶᠢ ᠬᠠᠷᠠᠬᠤ ᠦᠭᠡᠢ ᠤᠤ! ᠢᠩᠬᠢᠬᠦᠯᠡᠷ ᠲᠠ ᠰᠢᠷᠠ ᠴᠡᠷᠢᠭ ᠦᠨ ᠬᠢᠨ ᠮᠠᠨᠤᠰ ᠲᠤ ᠵᠠᠢ ᠥᠭ᠍ᠬᠦ ᠳᠦ ᠵᠠᠪᠢᠯᠠᠵᠤ ᠰᠠᠭᠤᠬᠤ ᠦᠭᠡᠢ ᠪᠣᠯ ᠪᠠᠰᠠ ᠨᠢᠭᠡ ᠮᠤᠰᠢᠭᠠᠢ ᠪᠠᠷ ᠡᠷᠭᠢᠵᠦ ᠮᠡᠳᠡᠨᠡ ᠰᠢᠦ!
— ᠠ᠂ ᠪᠠᠰᠠ ᠵᠥᠪ ᠶᠤᠮ! ᠲᠡᠭᠡᠪᠡᠴᠦ ᠪᠢᠳᠠ ᠰᠢᠷᠠ ᠴᠡᠷᠢᠭ ᠦᠨ ᠰᠦᠷ ᠬᠦᠴᠦᠨ ᠢ ᠠᠰᠢᠭᠯᠠᠬᠤ ᠠᠴᠠ ᠪᠢᠰᠢ ᠲᠡᠳᠡᠨ ᠳᠦ ᠠᠰᠢᠭᠯᠠᠭᠳᠠᠵᠤ ᠪᠣᠯᠬᠤ ᠦᠭᠡᠢ!
— ᠵᠥᠪ᠂ ᠵᠥᠪ!
— ᠡᠪᠲᠦ ᠱᠠᠭᠠᠵᠠᠭᠠᠢ ᠪᠤᠭᠤ ᠪᠠᠢᠨᠠ ᠭᠡᠳᠡᠭ ᠢᠶᠡᠷ ᠰᠢᠷᠠ ᠴᠡᠷᠢᠭ ᠦᠨ ᠰᠦᠷ ᠢ ᠠᠰᠢᠭᠯᠠᠵᠤ ᠪᠠᠷᠠᠭᠤᠨ ᠭᠥᠩ ᠳ᠋ᠡᠭᠡᠨ ᠪᠤᠴᠠᠵᠤ ᠨᠢᠭᠡ ᠰᠦᠷ ᠰᠦᠭ ᠪᠠᠳᠠᠷᠠᠭᠤᠯᠬᠤ ᠨᠢ ᠲᠠᠭᠠᠷᠠᠨᠠ! ᠭᠡᠳ ᠡᠯᠳᠡᠩᠭᠡ ᠶᠢᠨ ᠴᠢᠷᠠᠢ ᠳᠤ ᠢᠨᠢᠶᠡᠳᠦ ᠬᠠᠯᠭᠢᠬᠤ ᠰᠢᠭ᠋ ᠲᠡᠨᠡᠢᠪᠡ᠃
ᠡᠯᠳᠡᠩᠭᠡ᠂ ᠵᠤᠳᠪᠠ ᠶᠢᠨ ᠬᠡᠯᠡᠭᠰᠡᠨ ᠢ ᠵᠠᠢ ᠠᠪᠴᠤ ᠵᠥᠪᠲᠥᠭᠡᠬᠦ ᠪᠣᠯᠪᠠᠴᠤ ᠰᠢᠷᠠ ᠴᠡᠷᠢᠭ᠂ ᠬᠠᠷᠠ ᠴᠡᠷᠢᠭ᠂ ᠲᠣᠲᠣᠷᠠ ᠶᠢᠨ ᠬᠢᠮᠤᠷᠠᠯ᠁ ᠵᠡᠷᠭᠡ ᠠᠯᠢ ᠣᠯᠠᠨ ᠪᠤᠳᠤᠯᠢᠶᠠᠨ ᠲᠦᠪᠡᠭ ᠢ ᠪᠣᠳᠣᠬᠤ ᠦᠭᠡᠢ ᠪᠣᠯᠬᠤ ᠦᠭᠡᠢ ᠪᠠᠢᠯᠠ᠁
ᠮᠢᠩᠭᠠᠨ ᠸᠠᠩ ᠳᠣᠷᠵᠢᠸᠠᠩᠴᠤᠭ ᠴᠤ᠌ ᠲᠥᠷᠥ ᠶᠢᠨ ᠠᠶᠠ ᠶᠢ ᠳᠠᠭᠠᠨ ᠰᠢᠷᠠ ᠴᠡᠷᠢᠭ ᠦᠨ ᠬᠤᠪᠴᠠᠰᠤᠨ ᠳᠡᠭᠡᠷᠡ ᠣᠷᠣᠰ ᠳᠤᠷᠠᠨ᠂ ᠫᠤᠤ ᠬᠣᠶᠠᠷ ᠢ ᠡᠩᠭᠡᠷ ᠵᠥᠷᠢᠭᠦᠯᠦᠨ ᠡᠭᠦᠷᠴᠦ᠂ ᠳᠠᠰᠢᠶᠠᠨ ᠳᠠᠭᠠᠨ ᠨᠣᠮᠣᠨ ᠬᠡᠯᠪᠡᠷᠢᠲᠡᠢ ᠳᠠᠢᠨ ᠤ ᠰᠡᠯᠡᠮᠡ ᠪᠠᠯᠳᠠᠭᠠᠨᠠᠭᠤᠯᠵᠤ᠂ ᠰᠢᠩᠭᠡᠨ ᠳᠡᠯ ᠣᠭᠣᠳᠣᠩ ᠰᠡᠭᠦᠯ ᠲᠠᠢ ᠥᠨᠳᠥᠷ ᠵᠡᠭᠡᠷᠳᠡ ᠮᠣᠷᠢ ᠤᠨᠤᠭᠰᠠᠨ ᠳᠦᠷᠢ ᠡᠯᠳᠡᠩᠭᠡ ᠳᠦ ᠵᠢᠪᠬᠤᠯᠠᠩ ᠲᠡᠭᠦᠯᠳᠡᠷ ᠬᠠᠷᠠᠭᠳᠠᠭᠠᠳ ᠪᠠᠢᠳᠠᠭ ᠲᠤᠨᠢ ᠪᠠᠷᠰ ᠤᠨ ᠰᠦᠷ ᠢᠶᠡᠷ ᠪᠤᠰᠤᠳ ᠢ ᠠᠶᠤᠯᠭᠠᠳᠠᠭ ᠦᠨᠡᠭᠡᠨ ᠦ ᠪᠠᠰᠢᠷ ᠤᠬᠠᠭᠠᠨ ᠢᠶᠠᠷ ᠰᠢᠷᠠ ᠴᠡᠷᠢᠭ ᠦᠨ ᠰᠦᠷ ᠢ ᠵᠢᠭᠡᠯᠡᠵᠦ᠂ ᠳᠣᠷᠵᠢᠸᠠᠩᠴᠤᠭ ᠤᠨ ᠬᠦᠴᠦ ᠶᠢ ᠳᠥᠰᠢᠨ ᠪᠠᠷᠠᠭᠤᠨ ᠭᠥᠩ ᠦᠨ ᠬᠣᠰᠢᠭᠤ ᠪᠠᠨ ᠪᠡᠯᠪᠡᠰᠦᠨ ᠡᠮᠡ ᠶᠢᠨ ᠭᠠᠷ ᠠᠴᠠ ᠪᠤᠯᠢᠶᠠᠵᠤ ᠠᠪᠬᠤ ᠪᠣᠳᠣᠯ ᠬᠥᠪᠥᠷᠡᠨ ᠥᠰᠴᠦ ᠬᠣᠰᠢᠭᠤ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠬᠤ ᠪᠡᠯᠡᠳᠬᠡᠯ ᠬᠢᠵᠦ ᠡᠬᠢᠯᠡᠪᠡ᠃
ᠶᠠᠭ ᠡᠢᠨ ᠬᠦ᠌ ᠤᠬᠠᠭᠠᠨ ᠰᠡᠢᠯᠵᠦ ᠠᠲᠠᠯᠠ ᠪᠠᠷᠠᠭᠤᠨ ᠭᠥᠩ ᠡᠴᠡ ᠪᠠᠰᠠ ᠲᠠᠬᠠᠷ ᠲᠣᠮᠢᠯᠠᠵᠤ ᠪᠠᠴᠢᠮ ᠮᠡᠳᠡᠭᠡ ᠬᠦᠷᠭᠡᠵᠦ ᠢᠷᠡᠭᠦᠯᠪᠡ᠃ ᠡᠨᠡ ᠨᠢ ᠵᠤᠳᠪᠠ ᠮᠠᠢᠷᠠᠨ ᠤ ᠲᠣᠮᠢᠯᠠᠭᠰᠠᠨ ᠲᠠᠬᠠᠷ ᠪᠠᠢᠵᠠᠢ᠃
ᠲᠡᠷᠡ ᠲᠠᠬᠠᠷ ᠤᠨ ᠠᠪᠴᠤ ᠢᠷᠡᠭᠰᠡᠨ ᠪᠠᠴᠢᠮ ᠴᠢᠮᠡᠭᠡ ᠳᠦ᠄
ᠡᠷᠬᠢᠨ ᠬᠦᠨᠳᠦᠲᠦ ᠳᠤᠰᠠᠯᠠᠭᠴᠢ ᠨᠣᠶᠠᠨ ᠲᠠᠨᠠ᠄
ᠠᠮᠤᠷ ᠰᠠᠢᠨ ᠢ ᠲᠠᠨᠢ ᠠᠢᠯᠠᠳᠬᠠᠶᠠ᠃
ᠡᠳᠦᠭᠡ ᠨᠣᠶᠠᠨᠲᠠᠨ ᠲᠠᠨ ᠳᠤ ᠮᠡᠳᠡᠭᠳᠡᠬᠦ ᠤᠴᠢᠷ ᠪᠣᠯᠪᠠᠰᠤ᠄ ᠰᠢᠷᠠ ᠴᠡᠷᠢᠭ ᠪᠤᠭᠤᠲᠤ ᠶᠢ ᠪᠦᠷᠢᠨ ᠡᠵᠡᠯᠡᠵᠦ ᠭᠣᠣᠯ ᠭᠣᠣᠯ ᠵᠡᠭᠡᠯᠢ ᠭᠤᠲᠤᠮᠵᠢ᠂ ᠪᠣᠭᠣᠮᠲᠠ ᠬᠠᠭᠠᠯᠭᠠ ᠶᠢ ᠡᠷᠬᠡᠰᠢᠶᠡᠵᠦ᠂ ᠬᠥᠨᠳᠡᠯᠡᠨ ᠭᠣᠯᠲᠤ ᠣᠷᠣᠵᠤ ᠭᠠᠷᠳᠠᠭ ᠪᠣᠯᠪᠠ᠃ ᠲᠡᠭᠡᠬᠦ ᠪᠡᠷ ᠥᠯᠥ ᠪᠠᠷᠠᠮ ᠤᠯᠠᠭᠠᠨᠴᠠᠪ ᠤᠨ ᠴᠢᠭᠤᠯᠭᠠᠨ ᠠᠴᠠ ᠠᠭᠸᠠᠩ ᠭᠡᠳᠡᠭ ᠰᠢᠷᠠ ᠴᠡᠷᠢᠭ ᠦᠨ ᠨᠣᠶᠠᠨ ᠢ ᠪᠠᠷᠠᠭᠤᠨ ᠭᠥᠩ ᠦᠨ ᠬᠣᠰᠢᠭᠤ ᠶᠠᠮᠤᠨ ᠳᠤ ᠰᠡᠲᠦᠭᠴᠢ ᠨᠣᠶᠠᠨ ᠢᠶᠠᠷ ᠲᠣᠮᠢᠯᠠᠵᠤ ᠢᠷᠡᠭᠦᠯᠬᠦ ᠰᠤᠷᠠᠭ ᠲᠠᠢ᠃ ᠡᠨᠡ ᠦᠶᠡ ᠳᠦ ᠨᠣᠶᠠᠨᠲᠠᠨ ᠲᠠ ᠦᠳᠲᠡᠷ ᠨᠤᠲᠤᠭ ᠪᠤᠴᠠᠵᠤ ᠬᠣᠰᠢᠭᠤ ᠨᠤᠲᠤᠭ ᠢᠶᠠᠨ ᠲᠢᠭ ᠲᠠᠢ ᠤᠬᠠᠭᠤᠯᠬᠤ ᠦᠭᠡᠢ᠂ ᠥᠨᠥᠬᠢ ᠪᠡᠯᠪᠡᠰᠦᠨ ᠡᠮᠡ ᠳᠦ ᠵᠠᠪᠰᠢᠶᠠᠨ ᠣᠯᠭᠣᠪᠠᠰᠤ ᠠᠵᠠ ᠶᠢᠨ ᠲᠡᠭᠷᠢ ᠬᠠᠵᠠᠢᠵᠤ ᠮᠡᠳᠡᠨᠡ᠃ ᠲᠡᠭᠡᠪᠡᠯ ᠪᠠᠭᠠ ᠬᠠᠲᠤᠨ – ᠰᠡᠷᠭᠦᠮᠡ ᠣᠳᠣ ᠰᠢᠷᠠ ᠴᠡᠷᠢᠭ ᠲᠦ ᠪᠠᠭᠤᠵᠤ ᠥᠭᠬᠦ ᠤᠤ ᠬᠠᠷᠠ ᠴᠡᠷᠢᠭ ᠢ ᠨᠥᠮᠥᠷᠢᠳᠡᠵᠦ ᠶᠠᠪᠤᠬᠤ ᠤᠤ ᠴᠣᠬᠣᠮ ᠬᠠᠮᠢᠭᠠᠰᠢ ᠬᠠᠮᠢᠭᠠᠰᠢ ᠪᠠᠨ ᠴᠤ᠌ ᠦᠭᠡᠢ ᠬᠦᠴᠦᠨ ᠮᠡᠬᠦᠰᠳᠡᠵᠦ ᠪᠣᠳᠣᠯᠭᠠ ᠭᠤᠢᠪᠢᠵᠤ ᠪᠠᠢᠭᠠ ᠲᠤᠯᠠ ᠡᠷᠬᠢᠨ ᠨᠣᠶᠠᠨᠲᠠᠨ ᠲᠠ ᠭᠡᠭᠡᠨ ᠳ᠋ᠡᠭᠡᠨ ᠲᠣᠯᠢᠳᠠᠬᠤ ᠠᠵᠢᠶᠠᠮᠦ!
ᠡᠬᠦᠨᠡ
ᠬᠢᠴᠢᠶᠡᠩᠭᠦᠢᠯᠡᠨ ᠶᠣᠰᠣᠯᠠᠪᠠᠢ
ᠵᠤᠳᠪᠠ ᠠᠴᠠ
ᠭᠡᠰᠡᠨ ᠪᠠᠢᠪᠠ᠃
ᠡᠯᠳᠡᠩᠭᠡ᠂ ᠵᠣᠳᠪᠠ ᠶᠢᠨ ᠪᠠᠴᠢᠮ ᠴᠢᠮᠡᠭᠡ ᠶᠢ ᠦᠵᠡᠵᠦ ᠪᠠᠷᠠᠭᠠᠳ ᠮᠠᠩᠨᠠᠢ ᠪᠠᠨ ᠪᠠᠵᠠᠵᠤ ᠬᠥᠮᠦᠰᠭᠡ ᠪᠡᠨ ᠠᠲᠤᠷᠢᠭᠤᠯᠤᠨ᠂ ᠨᠢᠭᠡ ᠭᠡᠰᠡᠭ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠢᠶᠠᠨ 《ᠵᠤᠳᠪᠠ ᠶᠢᠨ ᠬᠡᠯᠡᠭᠰᠡᠨ ᠡᠨᠡ ᠪᠥᠬᠥᠨ ᠦᠨᠡᠨ ᠯᠠ ᠶᠤᠮ ᠪᠣᠯ ᠳᠠᠷᠤᠢᠬᠠᠨ ᠤᠬᠠᠭᠤᠯᠬᠤ ᠬᠡᠷᠡᠭᠲᠡᠢ ᠪᠣᠯᠵᠠᠢ᠃ ᠶᠠᠭᠤᠨ ᠤ ᠤᠷᠢᠳ ᠮᠢᠩᠭᠠᠨ ᠸᠠᠩ ᠳᠣᠷᠵᠢᠸᠠᠩᠴᠤᠭ ᠠᠴᠠ ᠪᠦᠷᠢᠨ ᠵᠡᠪᠰᠡᠭᠲᠦ ᠮᠣᠷᠢᠨ ᠴᠡᠷᠢᠭ ᠦᠨ ᠳᠤᠰᠠᠯᠠᠮᠵᠢ ᠭᠣᠶᠣᠵᠤ ᠪᠠᠷᠠᠭᠤᠨ ᠭᠥᠩ ᠦᠨ ᠬᠣᠰᠢᠭᠤ ᠶᠠᠮᠤᠨ ᠤ ᠬᠠᠪᠢᠯᠳᠠᠭᠤ ᠰᠠᠭᠤᠯᠭᠠᠵᠤ᠂ ᠪᠠᠭᠠ ᠬᠠᠲᠤᠨ ᠰᠡᠷᠭᠦᠮᠡ ᠶᠢ ᠨᠢᠭᠡ ᠲᠠᠯᠠ ᠪᠠᠷ ᠰᠦᠷᠳᠡᠭᠦᠯᠵᠦ᠂ ᠨᠥᠭᠥᠭᠡ ᠲᠠᠯᠠ ᠪᠠᠷ ᠬᠥᠳᠡᠯᠦᠯ ᠬᠠᠨᠳᠤᠰᠢ ᠶᠢ ᠨᠢ ᠠᠩᠬᠠᠷᠴᠤ ᠰᠡᠷᠭᠡᠢᠯᠡᠶᠡ᠃ ᠢᠩᠬᠢᠵᠦ ᠲᠡᠭᠦᠨ ᠢ ᠥᠪᠡᠷ ᠦᠨ ᠪᠡᠶᠡ ᠪᠡᠷ ᠢᠶᠡᠨ ᠬᠦᠴᠦᠨ ᠮᠡᠬᠦᠰᠳᠡᠬᠦ ᠳ᠋ᠡᠭᠡᠨ ᠵᠠᠰᠠᠭ ᠤᠨ ᠡᠷᠬᠡ ᠪᠡᠨ ᠶᠠᠭᠦᠯᠡᠵᠦ ᠪᠠᠷᠠᠭᠤᠨ ᠭᠥᠩ ᠦᠨ ᠬᠣᠰᠢᠭᠤ ᠲᠠᠮᠠᠭᠠ ᠶᠢ ᠳᠤᠰᠢᠶᠠᠯᠭᠠᠬᠤ ᠪᠤᠶᠤ ᠪᠠᠷᠠᠭᠤᠨ ᠭᠥᠩ ᠦᠨ ᠬᠣᠰᠢᠭᠤ ᠨᠤᠲᠤᠭ ᠠᠴᠠ ᠰᠢᠬᠠᠵᠤ ᠪᠠᠢᠭᠠᠳ ᠵᠠᠢᠯᠠᠭᠤᠯᠤᠨᠠ᠃ ᠠᠷᠭᠠ ᠮᠤᠬᠤᠷᠳᠠᠬᠤ ᠳ᠋ᠠᠭᠠᠨ ᠲᠡᠷᠡ ᠬᠠᠷᠠ ᠴᠡᠷᠢᠭ ᠢ ᠨᠥᠮᠥᠷᠢᠳᠡᠨᠡ ᠤᠤ ᠰᠢᠷᠠ ᠴᠡᠷᠢᠭ ᠲᠦ ᠪᠠᠭᠤᠵᠤ ᠥᠭᠭᠦᠨᠡ ᠤᠤ᠂ ᠳᠤᠷᠠ ᠪᠡᠶᠡ ᠶᠢ ᠭᠣᠯᠣᠬᠤ ᠦᠭᠡᠢ ᠳᠤᠮᠳᠠ ᠴᠢᠮᠦᠭᠡ ᠱᠠᠭᠠ ᠪᠠᠨ ᠴᠢᠮᠠᠯᠠᠬᠤ ᠦᠭᠡᠢ ᠭᠡᠳᠡᠭ ᠢᠶᠡᠷ ᠲᠡᠭᠦᠨ ᠦ ᠥᠪᠡᠷ ᠦᠨ ᠬᠢᠨᠢ ᠳᠤᠷᠠ ᠮᠡᠳᠡᠭᠰᠡᠨ ᠬᠡᠷᠡᠭ᠃ ᠲᠠᠬᠢᠪᠠᠯ ᠰᠢᠷᠠ ᠴᠡᠷᠢᠭ ᠦᠨ ᠰᠠᠨᠠᠭᠠ ᠵᠣᠷᠢᠯᠭᠠ ᠪᠠ ᠬᠠᠷᠠ ᠴᠡᠷᠢᠭ ᠦᠨ ᠣᠪᠣᠷ ᠪᠠᠢᠳᠠᠯ ᠢ ᠲᠠᠩᠰᠠᠵᠤ ᠪᠠᠢᠭᠠᠳ ᠰᠡᠲᠦᠶᠡ! ᠪᠣᠳᠣᠯ ᠤᠨ ᠮᠡᠷᠭᠡ ᠪᠤᠷᠤᠭᠤ ᠲᠡᠢᠰᠢ ᠬᠡᠯᠪᠡᠢᠬᠦ ᠦᠭᠡᠢ ᠯᠠ ᠶᠤᠮ ᠪᠣᠯ ᠪᠥᠬᠥ ᠶᠠᠭᠤᠮᠠ ᠰᠠᠨᠠᠭᠠ ᠪᠠᠷ ᠪᠥᠮᠪᠥᠷᠢᠬᠦ ᠨᠢ ᠭᠠᠷᠴᠠᠭᠠ ᠦᠭᠡᠢ᠃ ᠰᠢᠷᠠ ᠴᠡᠷᠢᠭ ᠦᠨ ᠡᠷᠬᠡ ᠰᠦᠷ ᠢ ᠵᠢᠭᠡᠯᠡᠵᠦ᠂ ᠮᠢᠩᠭᠠᠨ ᠸᠠᠩ ᠤᠨ ᠮᠣᠷᠢᠨ ᠴᠡᠷᠢᠭ ᠦᠨ ᠳᠤᠰᠠᠯᠠᠮᠵᠢ ᠶᠢ ᠵᠠᠪᠰᠢᠵᠤ᠂ ᠥᠨᠥᠬᠢ ᠰᠡᠲᠦᠭᠴᠢ ᠠᠭᠸᠠᠩ ᠨᠣᠶᠠᠨ ᠢ ᠤᠬᠠᠭᠠᠯᠠᠵᠤ ᠬᠣᠰᠢᠭᠤ ᠨᠤᠲᠤᠭ᠂ ᠥᠪᠡᠷ ᠦᠨ ᠨᠡᠷᠡ ᠲᠥᠷᠥ ᠪᠠ ᠪᠡᠶᠡ ᠳᠦ ᠠᠰᠢᠭᠲᠠᠢ ᠪᠥᠬᠥᠨ ᠢ ᠮᠡᠳᠡᠯ ᠲᠣᠲᠣᠷᠠ ᠪᠠᠨ ᠵᠢᠷᠤᠭᠠᠯᠠᠭᠤᠯᠤᠶᠠ ᠪᠠᠢᠵᠠ!》 ᠭᠡᠵᠦ ᠳᠦᠳᠦᠨᠡᠬᠦ ᠳᠦ ᠵᠠᠩᠭᠢᠷᠠᠭᠰᠠᠨ ᠬᠠᠷᠠ ᠬᠥᠮᠦᠰᠭᠡ ᠨᠢ ᠲᠠᠢᠯᠤᠭᠳᠠᠵᠤ ᠮᠠᠩᠨᠠᠢ ᠳ᠋ᠤᠨᠢ ᠨᠠᠷᠠ ᠳᠤᠰᠤᠭᠰᠠᠨ ᠮᠡᠲᠦ ᠭᠢᠯᠠᠢᠪᠠ᠃