ᠦᠷ ᠦᠨ ᠲᠤᠶᠠᠭᠠ 1 – ᠪ᠂ ᠷᠢᠨᠴᠢᠨ - ᠲᠡᠷᠢᠬᠦᠨ ᠲᠡᠪᠲᠡᠷ <ᠮᠠᠨᠵᠤ ᠶᠢᠨ ᠳᠠᠯᠬᠢᠨ ᠳᠤ>(ᠠᠷᠪᠠᠨ ᠨᠢᠭᠡ) Үүрийн туяа I – Б ᠂ Ренчин Тэргүүн дэвтэр "<Манжийн талхинд" (11)
844ᠠᠷᠪᠠᠨ ᠨᠢᠭᠡ ᠂ ᠮᠢᠬᠠ ᠮᠠᠩᠨᠤᠭ ᠪᠣᠯᠵᠤ ᠮᠠᠨ ᠤ᠋ ᠪᠠᠶᠠᠨ ᠴᠢᠳᠬᠥᠷ ᠪᠣᠯᠵᠠᠢ
ᠵᠣᠪᠠᠯᠠᠩ ᠪᠣᠯᠬᠤ ᠳ᠋ᠤ᠌ ᠪᠠᠶᠠᠴᠤᠳ ᠲᠠᠷᠭᠤᠯᠠᠳᠠᠭ
(ᠠᠷᠠᠳ ᠤ᠋ᠨ ᠰᠡᠴᠡᠨ ᠦᠭᠡ)
ᠦᠷ ᠦ᠋ᠨ ᠲᠤᠶᠠᠭᠠ ᠳ᠋ᠤ᠌ ᠣᠳᠣᠨ ᠨᠢᠭᠡ ᠨᠢᠭᠡ ᠪᠡᠷ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠤᠭᠰᠠᠭᠠᠷ᠂ ᠳᠣᠷᠣᠨᠠ ᠵᠦᠭ ᠤᠯᠠᠪᠢᠷ ᠠᠯᠲᠠᠨ ᠵᠤᠷᠪᠤᠰ ᠲᠠᠲᠠᠵᠤ᠂ ᠥᠷᠦᠨᠡᠳᠡᠬᠢ (ᠥᠷᠥᠨᠡ ᠳ᠋ᠡᠬᠢ)ᠰᠠᠷᠠᠨ ᠴᠠᠢᠪᠤᠭᠠᠷ ᠪᠣᠯᠵᠤ᠂ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠᠨ ᠤ᠋ ᠳᠣᠣᠷᠠ ᠠ᠋ᠴᠠ ᠠᠷᠠᠢ ᠭᠠᠷᠴᠤ ᠢᠷᠡᠭᠡ ᠦᠭᠡᠢ ᠪᠢᠲᠡᠭᠦᠦ ᠪᠠᠢᠭᠠ ᠨᠠᠷᠠᠨ ᠤ᠋ ᠭᠡᠷᠡᠯ ᠰᠠᠴᠤᠷᠠᠨ ᠦᠵᠡᠭᠳᠡᠪᠡ᠃ ᠯᠣᠳᠣᠢ ᠪᠠᠶᠠᠨ ᠤ᠋ ᠨᠠᠢ᠍ᠮᠠᠨ ᠬᠠᠨᠠ ᠲᠠᠢ ᠲᠣᠮᠣ ᠭᠡᠷ ᠲᠣᠭᠣᠷᠢᠭᠰᠠᠨ ᠬᠣᠲᠠ ᠠᠢᠯ ᠤ᠋ᠨ ᠲᠣᠭᠣᠨᠣ ᠪᠠᠷ ᠴᠠᠭᠠᠨ ᠤᠲᠤᠭᠠ ᠪᠣᠷ ᠪᠣᠷ ᠭᠠᠷᠴᠤ ᠵᠢᠬᠡᠭᠦᠨ ᠠᠭᠠᠷ ᠲᠤ᠌ ᠵᠠᠮᠬᠠᠷᠠᠨ ᠦᠭᠡᠢ ᠪᠣᠯᠵᠤ ᠪᠠᠢᠪᠠ᠃
ᠯᠣᠳᠣᠢ᠂ ᠳᠡᠪᠡᠯ ᠢ᠋ᠶ᠋ᠡᠨ ᠨᠥᠮᠥᠷᠴᠦ ᠭᠠᠷᠤᠭᠠᠳ᠂ ᠮᠣᠷᠢᠨ ᠤ᠋ ᠤᠶᠠᠭᠠᠨ ᠤ ᠳᠡᠷᠭᠡᠳᠡ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠤᠷᠲᠤ ᠭᠡᠭᠴᠢ ᠶ᠋ᠢᠨ ᠡᠪᠡᠷ ᠲᠡᠢ ᠮᠥᠩᠭᠥᠨ ᠮᠡᠲᠦ ᠬᠢᠷᠠᠭᠤ ᠴᠠᠩ ᠪᠣᠯᠤᠭᠰᠠᠨ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠰᠠᠷᠯᠤᠭ ᠤ᠋ᠨ ᠪᠤᠬᠠ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠶᠠᠭᠠᠷᠠᠯ ᠦᠭᠡᠢ ᠲᠣᠭᠣᠷᠢᠨ ᠭᠠᠷᠴᠤ᠂ ᠮᠣᠷᠢ ᠪᠠᠨ ᠬᠠᠷᠠᠭᠠᠳ᠂ ᠡᠭᠦᠳᠡ ᠪᠡᠨ ᠡᠪᠲᠡᠢᠬᠡᠨ ᠢ᠋ᠶ᠋ᠡᠷ ᠰᠡᠬᠦᠭᠡᠵᠦ(ᠰᠡᠬᠦᠵᠦ)᠂ ᠰᠠᠷᠯᠤᠭ ᠤ᠋ᠨ ᠰᠦ ᠪᠡᠷ ᠰᠦᠯᠡᠭᠰᠡᠨ ᠴᠠᠢ ᠶ᠋ᠢᠨ ᠰᠠᠢᠬᠠᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠭᠡᠷ ᠲᠡᠭᠡᠨ ᠣᠷᠣᠵᠤ᠂ ᠡᠭᠦᠳᠡᠨ ᠦ᠌ ᠲᠤᠰᠢᠶᠠ ᠰᠠᠭᠤᠵᠤ ᠵᠡᠰ ᠬᠤᠮᠬᠠ ᠠ᠋ᠴᠠ ᠤᠰᠤ ᠭᠠᠷ ᠳᠡᠭᠡᠷᠡ ᠪᠡᠨ ᠭᠣᠭᠣᠵᠢᠭᠤᠯᠤᠨ ᠨᠢᠭᠤᠷ ᠭᠠᠷ ᠢ᠋ᠶ᠋ᠠᠨ ᠤᠬᠢᠶᠠᠭᠠᠳ᠂ ᠳᠡᠪᠡᠯ ᠦ᠋ᠨ ᠬᠣᠷᠮᠣᠢ ᠪᠠᠷ ᠠᠷᠴᠢᠯᠠ᠃
— ᠴᠠᠢ! ᠭᠡᠵᠦ ᠬᠡᠯᠡᠭᠡᠳ ᠯᠣᠳᠣᠢ ᠶ᠋ᠢᠨ ᠡᠬᠡᠨᠡᠷ ᠭᠤᠨᠢᠯ ᠰᠢᠩᠭᠡᠭᠰᠡᠨ ᠨᠢᠳᠦ ᠲᠡᠢ᠂ ᠨᠠᠰᠤᠲᠠᠢ ᠰᠢᠭ᠋ ᠪᠡᠶᠡ ᠡᠴᠡᠩᠬᠡᠷ ᠡᠮᠡᠭᠲᠡᠢ ᠤᠭᠠᠯᠵᠠ ᠲᠠᠢ ᠨᠠᠮᠬᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠦᠳᠡᠰᠢ ᠶ᠋ᠢᠨ ᠬᠣᠭᠣᠯᠠ ᠠ᠋ᠴᠠ ᠦᠯᠡᠳᠡᠭᠰᠡᠨ ᠮᠢᠬᠠ ᠲᠠᠢ ᠵᠡᠰ ᠴᠠᠷᠠ᠂ ᠮᠥᠩᠭᠥᠨ ᠠᠶᠠᠭᠠ ᠴᠢᠩᠭᠠᠮᠠᠯᠲᠠᠶ ᠬᠡᠦᠳᠡᠢ᠂ ᠥᠷᠥᠮᠡ ᠬᠤᠷᠤᠳ ᠲᠠᠢ᠂ ᠲᠣᠰᠣ ᠲᠠᠢ ᠵᠡᠰ ᠲᠠᠪᠠᠭ ᠲᠠᠯᠪᠢᠭᠠᠳ᠂ ᠰᠢᠷᠡᠭᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠮᠥᠩᠭᠥᠨ ᠳᠣᠩᠪᠣ ᠲᠠᠢ ᠴᠠᠢ ᠲᠠᠯᠪᠢᠪᠠ᠃
ᠯᠣᠳᠣᠢ ᠪᠠᠶᠠᠨ᠂ ᠠᠵᠢᠯ ᠤ᠋ᠨ ᠢ᠋ᠶ᠋ᠠᠨ ᠡᠳᠦᠷ ᠢ᠋ ᠨᠡᠯᠢᠶᠡᠳ ᠶᠡᠬᠡ ᠴᠠᠢ ᠬᠣᠭᠣᠯᠠ ᠢᠳᠡᠵᠦ ᠡᠬᠢᠯᠡᠬᠦ ᠳ᠋ᠦ᠍᠂ ᠠᠶᠠᠭᠠᠨ ᠳ᠋ᠠᠭᠠᠨ ᠴᠠᠢ ᠬᠢᠭᠡᠳ᠂ ᠮᠢᠬᠠ ᠨᠠᠷᠢᠨ ᠨᠠᠷᠢᠨ ᠬᠡᠷᠴᠢᠮ ᠢ᠋ᠶ᠋ᠡᠷ ᠬᠡᠰᠡᠭᠯᠡᠵᠦ ᠬᠢᠭᠡᠳ᠂ ᠠᠶᠠᠭᠠ ᠳᠦᠭᠦᠷᠬᠦ ᠳᠣᠳᠣᠮ ᠴᠠᠢ ᠠ᠋ᠴᠠ ᠪᠠᠯᠭᠤᠵᠤ᠂ ᠬᠢᠭᠰᠡᠨ ᠮᠢᠬᠠ ᠪᠠᠨ ᠲᠠᠮᠰᠢᠶᠠᠨ ᠢᠳᠡᠵᠦ ᠪᠠᠷᠠᠭᠠᠳ᠂ ᠠᠶᠠᠭᠠᠨ ᠳ᠋ᠠᠭᠠᠨ ᠴᠢᠩᠭᠠᠮᠠᠯ ᠠ᠋ᠴᠠ ᠬᠢᠵᠦ᠂ ᠥᠷᠥᠮᠡ᠂ ᠲᠣᠰᠣ ᠬᠢᠭᠡᠳ ᠴᠠᠢ ᠤᠤᠭᠤᠭᠰᠠᠭᠠᠷ ᠲᠣᠰᠣ ᠰᠢᠩᠭᠡᠵᠦ ᠳᠡᠪᠲᠦᠭᠰᠡᠨ ᠴᠢᠩᠭᠠᠮᠠᠯ ᠢ᠋ ᠳᠣᠯᠢᠶᠠᠨ ᠢᠳᠡᠵᠦ ᠪᠠᠷᠠᠭᠠᠳ᠂ ᠠᠶᠠᠭᠠᠨ ᠳ᠋ᠠᠭᠠᠨ ᠨᠢᠭᠡ ᠪᠠᠯᠭᠤ ᠴᠠᠢ ᠬᠢᠭᠡᠳ᠂ ᠠᠮᠠ ᠪᠠᠨ ᠵᠠᠢᠯᠵᠤ ᠵᠠᠯᠭᠢᠭᠠᠳ᠂ ᠳᠣᠯᠣᠪᠣᠷ ᠬᠤᠷᠤᠭᠤᠨ ᠤ᠋ ᠦᠵᠦᠭᠦᠷ ᠢ᠋ ᠵᠠᠪᠠᠵᠢᠨ ᠳ᠋ᠠᠭᠠᠨ ᠲᠤᠯᠭᠠᠵᠤ᠂ ᠡᠷᠡᠬᠡᠢ ᠬᠤᠷᠤᠭᠤᠨ ᠤ᠋ ᠤᠭ ᠢ᠋ ᠥᠩᠭᠡᠷᠡᠲᠡᠯᠡ ᠠᠮᠠ ᠪᠠᠨ ᠱᠤᠳᠤᠷᠤᠨ ᠠᠷᠴᠢᠭᠠᠳ᠂ ᠭᠠᠷ ᠢ᠋ ᠠᠷᠤ ᠲᠠᠯᠠ ᠪᠠᠷ ᠪᠠᠬᠠᠨ ᠡᠷᠭᠢᠭᠦᠯᠡᠰᠬᠢᠵᠦ ᠭᠡᠳᠡᠷᠭᠦ ᠳᠣᠯᠣᠪᠣᠷ ᠬᠤᠷᠤᠭᠤᠨ ᠤ᠋ ᠦᠵᠦᠭᠦᠷ ᠬᠦᠷᠲᠡᠯᠡ ᠲᠠᠲᠠᠵᠤ᠂ ᠠᠮᠠ ᠪᠠᠨ ᠠᠷᠴᠢᠵᠤ ᠭᠦᠢᠴᠡᠭᠡᠳ᠂ ᠴᠠᠳᠤᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠭᠳᠡᠵᠦ᠂ ᠰᠢᠷᠡᠭᠡ ᠶ᠋ᠢ ᠥᠴᠦᠬᠡᠨ ᠵᠠᠢᠯᠠᠭᠤᠯᠤᠰᠬᠢᠭᠡᠳ ᠬᠣᠢᠰᠢ ᠰᠠᠭᠤᠵᠤ᠂ ᠲᠦᠷᠡᠢ ᠡᠴᠡ ᠭᠠᠩᠰᠠ ᠪᠠᠨ ᠰᠤᠭᠤᠯᠵᠤ᠂ ᠲᠠᠮᠠᠬᠢ ᠨᠡᠷᠡᠭᠡᠳ ᠡᠬᠡᠨᠡᠷ ᠦ᠋ᠨ ᠠᠪᠴᠤ ᠥᠭᠭᠦᠭᠰᠡᠨ ᠵᠣᠮᠭᠣᠯ ᠤ᠋ᠨ ᠭᠠᠯ ᠠ᠋ᠴᠠ ᠭᠠᠩᠰᠠ ᠪᠠᠨ ᠠᠰᠠᠭᠠᠵᠤ᠂ ᠶᠡᠬᠡᠯᠡ(ᠶᠡᠬᠡ ᠯᠡ) ᠲᠠᠭᠠᠰᠢᠶᠠᠨ ᠬᠡᠳᠦ ᠰᠤᠷᠤᠭᠠᠳ᠂ ᠮᠥᠩᠭᠥᠨ ᠴᠣᠬᠢᠭᠤᠷ ᠲᠤ᠌ ᠦᠨᠡᠰᠦ ᠶ᠋ᠢ ᠴᠣᠬᠢᠵᠤ ᠭᠠᠷᠭᠠᠭᠠᠳ᠂ ᠪᠠᠮᠪᠠᠢ ᠲᠠᠢ ᠰᠠᠢᠬᠠᠨ ᠦᠨᠦᠷ ᠲᠡᠢ ᠳᠦᠩᠰᠡᠨ ᠲᠠᠮᠠᠬᠢᠨ ᠠ᠋ᠴᠠ ᠳᠠᠬᠢᠨ ᠨᠢᠭᠡ ᠨᠡᠷᠡᠵᠦ ᠴᠣᠬᠢᠭᠤᠷ ᠤ᠋ᠨ ᠦᠨᠡᠰᠦᠨ ᠦ᠌ ᠭᠠᠯ ᠠ᠋ᠴᠠ ᠭᠠᠩᠰᠠ ᠪᠠᠨ ᠠᠰᠠᠭᠠᠭᠠᠳ᠂ ᠨᠢᠭᠡ ᠰᠤᠷᠤᠭᠠᠳ᠂ ᠨᠢᠳᠦ ᠪᠡᠨ ᠠᠨᠢᠰᠬᠢᠨ ᠪᠣᠳᠣᠯᠭᠠ ᠪᠣᠯᠵᠤ ᠰᠠᠭᠤᠪᠠ᠃
ᠭᠡᠷ ᠦ᠋ᠨ ᠬᠠᠪᠢ ᠳ᠋ᠤ᠌ ᠶᠠᠭᠤ ᠶᠠᠭᠤ ᠬᠢᠬᠦ ᠠᠵᠢᠯ ᠢ᠋ ᠴᠥᠮ ᠤᠷᠢᠳ ᠦᠳᠡᠰᠢ ᠨᠢ ᠵᠣᠬᠢᠬᠴᠢᠳ ᠲᠤ᠌ ᠬᠡᠯᠡᠵᠦ ᠥᠭᠭᠦᠭᠡᠳ ᠬᠣᠨᠢᠴᠢᠨ ᠦᠬᠡᠷᠴᠢᠨ ᠳ᠋ᠦ᠍ ᠮᠠᠯ ᠢ᠋ᠶ᠋ᠠᠨ ᠠᠯᠢ ᠵᠦᠭ ᠬᠠᠮᠢᠭᠠ ᠪᠡᠯᠴᠢᠭᠡᠬᠦ ᠶ᠋ᠢ ᠬᠡᠯᠡᠭᠰᠡᠨ᠃ ᠲᠡᠷᠡ ᠲᠠᠯᠠ ᠪᠠᠷ ᠵᠣᠪᠠᠯᠲᠠ ᠦᠭᠡᠢ᠂ ᠪᠡᠯᠴᠢᠭᠡᠷ ᠰᠠᠢᠨ᠂ ᠬᠠᠷᠢᠨ ᠡᠳᠦᠢ ᠪᠠᠬᠠᠨ ᠭᠠᠳᠠᠭᠤᠷ ᠶᠠᠪᠤᠵᠤ ᠭᠠᠭᠴᠠ ᠨᠢᠭᠡ ᠠᠢᠯ ᠢ᠋ᠶ᠋ᠠᠷ ᠣᠷᠣᠬᠤ ᠬᠡᠷᠡᠭᠲᠡᠢ᠃ ᠣᠳᠣ ᠬᠣᠨᠢ ᠬᠤᠷᠠᠭᠠᠯᠠᠬᠤ ᠶ᠋ᠢᠨ ᠪᠡᠯᠡᠳᠬᠡᠯ ᠬᠢᠬᠦ᠂ ᠴᠠᠭᠠᠨᠠ ᠨᠢ ᠤᠷᠲᠤ ᠶ᠋ᠢᠨ ᠤᠩᠭᠠᠰᠤ ᠨᠣᠣᠰᠣ ᠬᠢᠷᠭᠠᠬᠤ ᠠᠵᠢᠯ ᠢ᠋ ᠤᠷᠢᠳ ᠠ᠋ᠴᠠ ᠪᠡᠯᠡᠳᠬᠡᠨ ᠪᠣᠳᠣᠬᠤ ᠬᠡᠷᠡᠭᠲᠡᠢ ᠪᠣᠯᠵᠠᠢ᠃ ᠬᠣᠨᠢ ᠡᠨᠡ ᠵᠢᠯ ᠪᠤᠷᠬᠠᠨ ᠤ᠋ ᠠᠪᠤᠷᠠᠯ ᠢ᠋ᠶ᠋ᠠᠷ ᠨᠠᠢ᠍ᠮᠠᠨ ᠮᠢᠩᠭᠠ ᠬᠦᠷᠴᠦ ᠠᠷᠪᠠᠨ ᠭᠤᠷᠪᠠᠨ ᠠᠢᠯ ᠬᠡᠰᠡᠭ ᠬᠡᠰᠡᠭ ᠬᠤᠪᠢᠶᠠᠨ ᠮᠠᠯᠯᠠᠵᠤ ᠪᠠᠢᠭᠠ ᠪᠣᠯᠪᠠᠴᠤ ᠬᠤᠷᠠᠭᠠᠯᠠᠬᠤ᠂ ᠤᠩᠭᠠᠰᠤ ᠬᠢᠷᠭᠠᠬᠤ ᠠᠵᠢᠯ ᠭᠠᠷᠳᠠᠭ ᠴᠠᠭ ᠬᠥᠮᠦᠨ ᠪᠦᠯᠢ ᠬᠦᠷᠦᠯᠴᠡᠬᠦ ᠦᠭᠡᠢ ᠪᠣᠯᠬᠤ ᠭᠡᠳ ᠪᠠᠢᠨᠠ ᠰᠢᠦ᠃ ᠣᠳᠣ ᠬᠠᠪᠤᠷ ᠤ᠋ᠨ ᠲᠠᠷᠴᠢᠭ ᠴᠠᠭ ᠢ᠋ᠶ᠋ᠠᠷ ᠠᠮᠵᠢᠵᠤ ᠠᠮᠢᠲᠠᠨ ᠤ᠋ ᠨᠠᠮᠤᠷ ᠤ᠋ᠨ ᠤᠭᠤᠴᠠ ᠲᠣᠰᠣ ᠢᠳᠡᠭᠡ ᠬᠣᠪᠣᠷᠳᠠᠵᠤ ᠬᠡᠦᠬᠡᠳ ᠰᠢᠤᠬᠠᠳ ᠣᠷᠣᠢ ᠶ᠋ᠢᠨ ᠬᠣᠭᠣᠯᠠ ᠱᠥᠯᠥ ᠨᠡᠬᠡᠳᠡᠭ ᠡᠨᠡ ᠴᠠᠭ ᠢ᠋ᠶ᠋ᠠᠷ ᠠᠷᠭᠠ ᠰᠠᠮᠠ ᠬᠢᠵᠦ ᠠᠮᠢᠲᠠᠨ ᠬᠥᠮᠦᠨ ᠢ᠋ ᠡᠷᠲᠡᠬᠡᠨ ᠡᠴᠡ ᠣᠯᠵᠤ ᠠᠪᠬᠤ ᠦᠭᠡᠢ ᠪᠣᠯ ᠬᠣᠵᠢᠮ ᠬᠥᠮᠦᠨ ᠣᠯᠳᠠᠵᠤ ᠥᠭᠬᠦ ᠦᠭᠡᠢ᠃ ᠵᠠ ᠡᠨᠡ ᠭᠠᠩᠰᠠᠨ ᠤ᠋ ᠪᠣᠬᠢ ᠨᠢ ᠶᠡᠬᠡᠳᠴᠦ ᠲᠠᠭᠵᠢᠷᠠᠭᠠᠳ ᠤᠨᠲᠠᠷᠠᠴᠢᠬᠠᠪᠠᠤ ᠳᠠ᠄
— ᠠᠢ ᠬᠦ᠂ ᠭᠠᠯ! ᠭᠡᠵᠦ ᠳᠠᠬᠢᠨ ᠭᠠᠩᠰᠠ ᠪᠠᠨ ᠠᠰᠠᠭᠠᠵᠤ ᠬᠡᠳᠦ ᠰᠤᠷᠤᠭᠠᠳ᠂ ᠦᠨᠡᠰᠦ ᠶ᠋ᠢ ᠴᠣᠬᠢᠵᠤ ᠭᠠᠩᠰᠠ ᠪᠠᠨ ᠲᠦᠷᠡᠢᠯᠡᠭᠡᠳ ᠳᠠᠬᠢᠨ ᠶᠠᠭᠠᠷᠠᠯ ᠦᠭᠡᠢ ᠲᠠᠯᠪᠢᠭᠤᠨ ᠢ᠋ᠶ᠋ᠠᠷ ᠪᠣᠳᠣᠯᠭᠠ ᠪᠣᠳᠣᠵᠤ᠂ ᠵᠠ ᠪᠠᠢᠵᠠ ᠤᠤ᠂ ᠥᠨᠥᠳᠥᠷ ᠡᠴᠡ ᠡᠬᠢᠯᠡᠨ ᠬᠣᠨᠢᠴᠢᠨ ᠬᠡᠦᠬᠡᠨ ᠢ᠋ ᠡᠷᠭᠢᠵᠦ ᠦᠵᠡᠬᠦ ᠶᠤᠮᠰᠠᠨ᠃ ᠭᠡᠷ ᠲᠡᠭᠡᠨ ᠴᠣᠬᠣᠮ ᠶᠠᠭᠤ ᠢᠳᠡᠵᠦ ᠪᠠᠢᠳᠠᠭ ᠪᠣᠯ? ᠪᠠᠯᠴᠢᠷ ᠬᠡᠦᠬᠡᠳ᠂ ᠵᠥᠨᠥᠭ ᠡᠪᠦᠭᠡᠳ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠳᠡᠭ ᠰᠢᠦ ᠳᠡ᠂ ᠢᠳᠡᠵᠦ ᠤᠤᠭᠤᠬᠤ ᠪᠠᠷ ᠲᠠᠰᠤᠯᠳᠠᠵᠤ ᠪᠠᠢᠭᠠ ᠠᠢᠯ ᠢ᠋ ᠮᠡᠳᠡᠵᠦ ᠠᠪᠤᠭᠠᠳ᠂ ᠬᠣᠭᠣᠰᠣᠨ ᠬᠣᠨᠣᠵᠤ ᠭᠣᠣᠯ ᠢ᠋ᠶ᠋ᠠᠨ ᠬᠠᠷᠠᠯᠠᠵᠤ ᠪᠠᠢᠭᠠ ᠨᠢᠭᠡᠨ ᠳ᠋ᠦ᠍ᠨᠢ ᠪᠠᠭᠠ ᠰᠠᠭᠠ ᠮᠢᠬᠠ ᠲᠣᠰᠣ᠂ ᠭᠤᠯᠢᠷ᠂ ᠨᠠᠮᠤᠷ ᠤ᠋ᠨ ᠨᠥᠭᠡᠴᠡ ᠡᠴᠡ ᠥᠭᠭᠦᠭᠡᠳ ᠬᠠᠷᠢᠭᠤ ᠳ᠋ᠤᠨᠢ ᠬᠣᠨᠢ ᠪᠠᠨ ᠬᠢᠷᠭᠠᠭᠤᠯᠤᠨᠠ᠃
ᠨᠠᠮᠤᠷ ᠠ᠋ᠴᠠ ᠬᠤᠯᠠᠭᠠᠢ ᠪᠠᠬᠠᠨ ᠰᠢᠷᠦᠭᠦᠨ ᠪᠣᠯᠵᠤ ᠬᠤᠰᠢᠭᠤᠨ ᠤ᠋ ᠥᠷᠢ ᠰᠢᠷᠢ ᠶ᠋ᠢᠨ ᠬᠦᠦ ᠶ᠋ᠢ ᠫᠦᠰᠡᠨ ᠳ᠋ᠦ᠍ ᠲᠥᠯᠥᠭᠰᠡᠨ ᠡᠴᠡ ᠬᠣᠢᠰᠢ ᠤᠯᠠᠮ ᠴᠢᠩᠭᠠᠷᠠᠵᠤ᠂ ᠳ᠋ᠠᠩ ᠪᠠᠶᠠᠨ ᠠᠢᠯ ᠤ᠋ᠨ ᠠᠳᠤᠭᠤᠨ ᠳ᠋ᠤ᠌ ᠬᠤᠯᠠᠭᠠᠢ ᠣᠷᠣᠳᠠᠭ ᠪᠣᠯᠵᠠᠢ᠃ ᠭᠣᠮᠪᠣ ᠵᠠᠯᠠᠨ ᠤ᠋ ᠰᠦᠷᠦᠭ ᠡᠴᠡ ᠬᠣᠷᠢᠨ ᠠᠳᠤᠭᠤ᠂ ᠮᠠᠨᠠᠢᠬᠢ ᠠ᠋ᠴᠠ ᠶᠢᠰᠦᠨ ᠠᠳᠤᠭᠤ ᠬᠤᠯᠠᠭᠠᠢ ᠠᠪᠴᠠᠢ᠃
ᠪᠢ ᠪᠠᠰᠠᠴᠤ ᠬᠠᠭᠤᠴᠢᠨ ᠬᠤᠯᠠᠭᠠᠢᠴᠢ ᠯᠣᠣᠵᠠᠩ ᠤ᠋ᠨ ᠳ᠋ᠤ᠌ ᠣᠴᠢᠵᠤ ᠪᠡᠯᠡᠭ ᠵᠠᠯᠠᠭ ᠥᠭᠴᠦ ᠠᠷᠭᠠᠳᠠᠭᠠᠳ ᠰᠤᠷᠠᠭ ᠭᠠᠷᠭᠠᠵᠤ ᠥᠭᠭᠥᠨᠡᠤ?(ᠥᠭᠭᠦᠨᠡ ᠤᠤ ?) ᠭᠡᠵᠦ ᠭᠤᠶᠤᠭᠰᠠᠨ ᠤ᠋ ᠠᠴᠢ ᠪᠠᠷ ᠡᠪᠦᠭᠡᠨ ᠴᠢᠬᠢ ᠲᠠᠯᠪᠢᠵᠤ ᠦᠵᠡᠶᠡ ᠭᠡᠵᠦ ᠠᠮᠠᠯᠠᠭᠠᠳ ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠬᠠᠢᠷᠠᠲᠠᠢ ᠵᠢᠷᠣᠭᠠ ᠮᠣᠷᠢ ᠮᠢᠨᠢ ᠲᠣᠬᠣᠮ ᠤ᠋ᠨ ᠰᠢᠨᠡᠬᠡᠨ ᠬᠥᠯᠥᠰᠥᠲᠡᠢ ᠥᠪᠡᠷ ᠢ᠋ᠶ᠋ᠡᠨ ᠠᠳᠤᠭᠤᠨ ᠳ᠋ᠠᠭᠠᠨ ᠭᠦᠶᠦᠵᠦ ᠢᠷᠡᠭᠰᠡᠨ ᠰᠢᠦ ᠳᠡ᠃ ᠲᠡᠷᠡ᠂ ᠲᠠᠯᠪᠢᠭᠰᠠᠨ ᠠ᠋ᠴᠠ ᠵᠠᠢᠯᠠᠬᠤ ᠦᠭᠡᠢ᠃ ᠬᠣᠰᠢᠭᠤ ᠲᠠᠮᠠᠭᠠ ᠪᠠᠷ ᠵᠠᠷᠭᠤᠯᠳᠤᠶᠠ ᠭᠡᠪᠡᠯ ᠢᠯᠡᠳᠲᠡ ᠪᠠᠷᠢᠮᠲᠠ ᠦᠭᠡᠢ ᠶᠠᠭᠤᠮᠠᠨ ᠳ᠋ᠤ᠌ ᠶᠠᠭᠠᠬᠢᠬᠤ ᠴᠤ᠌ ᠠᠷᠭᠠ ᠦᠭᠡᠢ᠃ ᠶᠠᠭᠠᠬᠢᠵᠤ ᠴᠤ᠌ ᠪᠠᠩᠵᠠᠳᠠᠭᠰᠠᠨ ᠬᠤᠯᠠᠭᠠᠢᠴᠢ ᠨᠠᠷ ᠬᠦᠯᠢᠶᠡᠵᠦ ᠥᠭᠳᠡᠭ ᠦᠭᠡᠢ ᠤᠯᠤᠰ ᠳᠠ᠃ ᠲᠡᠷᠡ ᠴᠤ᠌ ᠪᠠᠢᠲᠤᠭᠠᠢ ᠮᠠᠨ ᠤ᠋ ᠬᠣᠰᠢᠭᠤ ᠨᠣᠶᠠᠨ ᠤ᠋ ᠰᠦᠷᠦᠭ ᠡᠴᠡ᠂ ᠪᠠᠰᠠ ᠰᠠᠢᠨ ᠨᠣᠶᠠᠨ ᠬᠠᠭᠠᠨ ᠤ᠋ ᠰᠦᠷᠦᠭ ᠡᠴᠡ ᠰᠢᠯᠢᠳᠡᠭ ᠮᠣᠷᠢ ᠶ᠋ᠢ ᠨᠢ ᠬᠤᠯᠠᠭᠠᠢ ᠠᠪᠤᠭᠰᠠᠨ ᠭᠡᠨᠡ ᠪᠢᠯᠡ᠃ ᠡᠨᠡ ᠬᠤᠯᠠᠭᠠᠢ ᠶᠡᠷᠦ ᠨᠢ ᠪᠠᠶᠠᠨ ᠠᠢᠯ ᠳ᠋ᠤ᠌ ᠨᠢᠭᠡ ᠶᠣᠰᠣᠨ ᠤ᠋ ᠲᠠᠲᠠᠪᠤᠷᠢ ᠣᠨᠣᠭᠠᠭᠰᠠᠨ ᠰᠢᠭ᠋ ᠪᠣᠯᠵᠤ ᠪᠠᠢᠨᠠ ᠰᠢᠦ᠃ ᠪᠠᠷᠢᠵᠤ ᠠᠪᠤᠭᠠᠳ ᠨᠣᠢᠲᠠᠨ ᠰᠢᠷᠢ ᠪᠡᠷ ᠰᠢᠷᠢᠯᠡᠭᠡᠳ᠂ ᠴᠡᠭᠡᠷᠯᠡᠯ ᠪᠣᠯᠭᠠᠵᠤ ᠠᠮᠢᠳᠤ ᠪᠠᠷ ᠨᠢ ᠬᠠᠲᠠᠭᠠᠬᠤ ᠶᠤᠮᠰᠠᠨ᠃ ᠥᠭᠡᠯᠡᠬᠦ ᠪᠠᠷᠢᠮᠲᠠ ᠣᠯᠳᠠᠬᠤ ᠦᠭᠡᠢ ᠡᠴᠡ ᠬᠣᠢᠰᠢ ᠬᠠᠯᠳᠠᠵᠤ ᠲᠤᠯᠭᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠶ᠋ᠢ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ ᠳᠠ᠂ ᠠ— ᠴᠠ ᠪᠠᠰᠠ ᠳᠠ ᠭᠡᠵᠦ ᠰᠢᠳᠦ ᠪᠡᠨ ᠬᠠᠪᠢᠷᠤᠨ ᠵᠠᠭᠤᠮᠠᠭᠴᠠ᠂ ᠭᠡᠨᠡᠳᠲᠡ ᠡᠬᠡᠨᠡᠷ ᠦ᠋ᠨ ᠭᠠᠢᠬᠠᠨ ᠬᠠᠷᠠᠬᠤ ᠶ᠋ᠢ ᠦᠵᠡᠭᠡᠳ ᠰᠠᠨᠳᠤᠷᠤᠰᠬᠢᠵᠤ᠂
— ᠠᠢ – ᠬᠦ! ᠪᠣᠷᠣ ᠮᠣᠷᠢ ᠡᠮᠡᠭᠡᠯᠯᠡᠭᠦᠯ! ᠭᠡᠵᠦ ᠮᠣᠷᠢ ᠪᠠᠨ ᠡᠮᠡᠭᠡᠯᠯᠡᠭᠦᠯᠵᠦ ᠮᠣᠷᠳᠠᠬᠤ ᠳ᠋ᠠᠭᠠᠨ ᠡᠪᠦᠯᠵᠢᠭᠡ (ᠡᠪᠦᠯᠵᠢᠶᠡ) ᠪᠡᠨ ᠬᠠᠷᠠᠪᠠᠯ ᠬᠡᠳᠦᠨ ᠡᠬᠡᠨᠡᠷ ᠬᠡᠦᠬᠡᠨ᠂ ᠮᠠᠯ ᠤ᠋ᠨ ᠬᠡᠪᠲᠡᠰᠢ ᠶ᠋ᠢᠨ ᠬᠦᠢᠳᠡᠰᠦ ᠪᠠᠭᠠᠰᠤ ᠴᠡᠪᠡᠷᠯᠡᠨ ᠵᠠᠢᠯᠠᠭᠤᠯᠵᠤ᠂ ᠨᠢᠭᠡ ᠴᠤ᠌ ᠶᠠᠰᠤ ᠬᠠᠮᠢᠶᠠ ᠦᠭᠡᠢ ᠭᠠᠵᠠᠷ ᠬᠡᠪᠲᠡᠬᠦ ᠦᠭᠡᠢ ᠴᠠᠪ ᠴᠡᠪᠡᠷᠬᠡᠨ ᠪᠠᠢᠭᠠ ᠶ᠋ᠢ ᠪᠠᠬᠠᠷᠬᠠᠨ ᠬᠠᠷᠠᠵᠤ᠂ ᠭᠡᠷ ᠡᠴᠡ ᠠᠯᠤᠰ ᠡᠪᠦᠯᠵᠢᠭᠡᠨ (ᠡᠪᠦᠯᠵᠢᠶᠡᠨ) ᠦ᠌ ᠳᠥᠷᠪᠡᠨ ᠥᠨᠴᠥᠭ ᠲᠦ᠍ ᠨᠣᠬᠠᠢ ᠭᠡᠷ ᠦ᠋ᠨ ᠭᠠᠳᠠᠭᠠ ᠪᠦᠦ ᠰᠢᠬᠢᠭ ᠭᠡᠵᠦ ᠭᠣᠵᠣᠭᠣᠷ ᠴᠢᠯᠠᠭᠤ ᠪᠤᠰᠬᠠᠵᠤ᠂ ᠶᠠᠭᠤᠮᠠ ᠪᠦᠬᠦᠨ ᠳ᠋ᠦ᠍ ᠨᠠᠷᠢᠨ ᠨᠢᠮᠪᠠᠢ ᠡᠵᠡᠨ ᠬᠥᠮᠦᠨ ᠲᠡᠢ ᠪᠠᠢᠭᠠ ᠶ᠋ᠢᠨ ᠪᠠᠢᠳᠠᠯ ᠢᠯᠡᠷᠬᠡᠢ ᠪᠠᠢᠭᠠ ᠶ᠋ᠢ ᠨᠡᠯᠢᠶᠡᠳ ᠪᠠᠬᠠᠷᠬᠠᠨ ᠪᠠᠷᠳᠠᠵᠤ ᠬᠣᠨᠢᠴᠢᠨ ᠬᠡᠦᠬᠡᠳ ᠢ᠋ ᠡᠷᠢᠵᠦ ᠶᠠᠪᠤᠲᠠᠯᠠ᠂ ᠬᠡᠭᠡᠷᠡ ᠬᠠᠭᠤᠴᠢᠨ ᠮᠠᠭᠤᠳᠠᠭᠰᠠᠨ ᠠᠷᠤᠭ ᠡᠭᠦᠷᠦᠭᠰᠡᠨ ᠭᠤᠷᠪᠠᠨ ᠬᠡᠦᠬᠡᠳ ᠳᠠᠭᠠᠷᠢᠯᠳᠤᠵᠠᠢ᠃ ᠰᠢᠨᠡ ᠬᠠᠭᠤᠴᠢᠨ ᠲᠦᠮᠡᠨ ᠨᠥᠬᠥᠭᠡᠰᠦ ᠳᠠᠪᠬᠤᠴᠠᠭᠰᠠᠨ ᠤᠷᠠᠩᠬᠠᠢ ᠮᠠᠭᠤ ᠳᠡᠪᠡᠯ ᠲᠡᠢ᠂ ᠣᠯᠠᠨ ᠬᠣᠨᠣᠭ ᠨᠢᠭᠤᠷ ᠢ᠋ᠶ᠋ᠠᠨ ᠤᠬᠢᠶᠠᠭᠠ ᠦᠭᠡᠢ ᠬᠠᠯᠲᠠᠷ ᠬᠡᠦᠬᠡᠳ ᠦ᠋ᠨ ᠴᠢᠷᠠᠢ ᠶ᠋ᠢ ᠬᠠᠷᠠᠵᠤ ᠲᠠᠨᠢᠭᠠᠳ᠄
ᠪᠡᠶᠡ ᠮᠠᠭᠤᠲᠠᠢ ᠮᠠᠭᠤ ᠫᠧᠯᠵᠡᠢ ᠶ᠋ᠢᠨ ᠬᠡᠦᠬᠡᠳ ᠰᠢᠪ ᠳᠡ ᠭᠡᠵᠦ ᠪᠣᠳᠣᠭᠠᠳ ᠬᠠᠵᠠᠭᠤ ᠪᠠᠷ ᠨᠢ ᠥᠩᠭᠡᠷᠡᠨ ᠭᠠᠷᠬᠤ ᠭᠡᠵᠦ ᠶᠠᠪᠤᠲᠠᠯᠠ᠂ ᠴᠠᠳᠬᠤᠯᠠᠩ ᠲᠠᠷᠭᠤᠨ ᠮᠣᠷᠢ ᠪᠠᠨ ᠬᠡᠦᠬᠡᠳ ᠦ᠋ᠨ ᠳᠡᠷᠭᠡᠳᠡ ᠵᠣᠭᠰᠣᠭᠠᠵᠤ᠂ ᠶᠡᠬᠡ ᠬᠦᠦ ᠶ᠋ᠢᠨ ᠡᠭᠦᠷᠴᠦ ᠶᠠᠪᠤᠭᠰᠠᠨ ᠠᠷᠤᠭ ᠤᠷᠤᠭᠤ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠥᠨᠳᠡᠢᠰᠬᠢᠨ ᠪᠥᠬᠥᠢᠵᠦ ᠬᠠᠷᠠᠭᠠᠳ ᠢᠷᠪᠠᠢᠵᠤ᠄
— ᠡᠨᠡ ᠨᠣᠬᠠᠢ ᠰᠢᠩᠰᠢᠬᠦ ᠦᠭᠡᠢ ᠰᠡᠭ ᠢ᠋ ᠬᠠᠮᠢᠭᠠ ᠠ᠋ᠴᠠ ᠴᠢᠷᠴᠦ ᠶᠠᠪᠤᠭᠠ ᠶᠤᠮ ᠪᠣᠢ? ᠭᠡᠪᠡᠯ᠂
— ᠲᠡᠷᠡ ᠪᠣᠷᠣ ᠲᠣᠯᠣᠭᠠᠢ ᠶ᠋ᠢᠨ ᠴᠠᠭᠠᠨᠠ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠦᠬᠦᠭᠰᠡᠨ ᠵᠡᠭᠡᠷᠡ ᠠ᠋! ᠡᠵᠢ ᠶ᠋ᠢᠨ ᠪᠡᠶᠡ ᠮᠠᠭᠤ᠂ ᠢᠳᠡᠬᠦ ᠶᠠᠭᠤᠮᠠ ᠦᠭᠡᠢ ᠪᠣᠯᠤᠭᠠᠳ ᠥᠨᠥ ᠥᠷᠯᠥᠭᠡ ᠡᠵᠢ᠂ ᠰᠡᠭ ᠬᠠᠷᠠᠭᠰᠠᠨ ᠬᠢᠷᠢᠶᠡ ᠳᠤᠤᠭᠠᠷᠴᠤ ᠶᠠᠪᠤᠨᠠ᠃ ᠲᠠᠨᠠᠢ ᠲᠡᠷᠡ ᠵᠦᠭ ᠤᠷᠤᠭᠤ ᠶᠠᠪᠤ! ᠭᠡᠵᠦ ᠪᠢᠳᠡᠨ ᠢ᠋ ᠶᠠᠪᠤᠭᠤᠯᠤᠭᠰᠠᠨ ᠪᠢᠯᠡ᠃ ᠣᠳᠣ᠂ ᠨᠢᠭᠡ ᠱᠥᠯᠥ ᠭᠠᠷᠭᠠᠬᠤ ᠶᠣᠰᠣᠲᠠᠢ ᠪᠣᠯᠤᠭᠠᠳ ᠶᠠᠪᠤᠵᠤ ᠶᠠᠪᠤᠨᠠ ᠳᠠ ᠭᠡᠵᠦ ᠵᠠᠭᠠᠯ(ᠵᠢᠭᠠᠯ) ᠥᠬᠢᠨ ᠪᠣᠷᠣ ᠲᠣᠯᠣᠭᠠᠢ ᠶ᠋ᠢᠨ ᠵᠦᠭ ᠵᠢᠭᠠᠵᠤ ᠬᠡᠯᠡᠭᠡᠳ᠂
— ᠫᠡᠭ ! ᠭᠡᠵᠦ ᠯᠣᠳᠣᠢ ᠪᠠᠶᠠᠨ ᠤ᠋ ᠵᠢᠭᠰᠢᠨ ᠳᠤᠤᠭᠠᠷᠬᠤ ᠳ᠋ᠤ᠌᠂ ᠵᠠᠭᠠᠯ(ᠵᠢᠭᠠᠯ) ᠬᠦᠦ ᠶᠡᠬᠡ ᠮᠠᠭᠤᠬᠠᠢ ᠬᠢᠯᠠᠰᠬᠢᠵᠦ ᠬᠠᠷᠠᠭᠠᠳ᠂ ᠯᠣᠳᠣᠢ ᠡᠭᠦᠨ ᠢ᠋ ᠠᠵᠢᠭᠯᠠᠭᠠᠳ ᠴᠢᠯᠠᠭᠤᠨ᠂ ᠴᠢ ᠶᠠᠭᠤᠨ ᠳ᠋ᠤ᠌ ᠬᠥᠮᠦᠨ ᠦ᠌ ᠥᠭᠡᠳᠡ ᠴᠢᠨᠣᠠ ᠰᠢᠭ᠋ ᠭᠢᠯᠥᠢᠯᠵᠡᠵᠦ ᠪᠠᠢᠭᠠ ᠨᠣᠬᠠᠢ ᠪᠣᠢ? ᠭᠡᠵᠦ ᠵᠠᠩᠳᠤᠷᠪᠠᠯ᠂ ᠲᠡᠷᠡ ᠵᠠᠭᠠᠯ(ᠵᠢᠭᠠᠯ) ᠬᠦᠦ ᠦᠭᠡ ᠳᠠᠭᠤᠨ ᠦᠭᠡᠢ ᠡᠷᠭᠢᠭᠡᠳ᠂ ᠳᠡᠭᠡᠰᠦ ᠰᠤᠷ ᠤ᠋ᠨ ᠲᠠᠰᠤᠷᠬᠠᠢ ᠪᠠᠷ ᠣᠷᠢᠶᠠᠵᠤ ᠲᠣᠷᠭᠣᠭᠰᠠᠨ ᠢᠯᠵᠠᠷᠠᠭᠰᠠᠨ ᠪᠤᠯᠢᠭᠠᠷ ᠬᠠᠭᠠᠷᠬᠠᠢ ᠮᠠᠢᠵᠢᠭᠢ᠂ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠭᠤᠲᠤᠯ ᠢ᠋ ᠫᠡᠷ ᠫᠢᠷ ᠴᠢᠷᠴᠦ ᠬᠦᠨᠳᠦ ᠠᠷᠤᠭ ᠢ᠋ ᠪᠥᠬᠥᠢᠨ ᠡᠭᠦᠷᠴᠦ᠂ ᠡᠭᠡᠮ ᠢ᠋ ᠳᠠᠷᠤᠭᠰᠠᠨ ᠠᠷᠤᠭ ᠤ᠋ᠨ ᠳᠡᠭᠡᠰᠦ ᠡᠴᠡ ᠪᠠᠷᠢᠵᠤ ᠠᠯᠬᠤᠯᠠᠪᠠ᠃
ᠯᠣᠳᠣᠢ ᠪᠠᠶᠠᠨ᠂ ᠴᠢᠯᠠᠭᠤᠨ ᠤ᠋ ᠰᠢᠲᠦ ᠵᠠᠭᠤᠨ ᠭᠢᠯᠦᠢᠵᠦ ᠬᠠᠷᠠᠭᠰᠠᠨ ᠲᠠᠰᠤ ᠬᠠᠷᠠ ᠨᠢᠳᠦᠨ ᠦ᠌ ᠬᠣᠷᠣᠰᠤᠨ ᠵᠢᠭᠰᠢᠬᠦ ᠮᠠᠭᠤᠬᠠᠢ ᠬᠠᠴᠠᠷ ᠢ᠋ ᠰᠠᠨᠠᠭᠠᠳ᠂ ᠲᠡᠷᠡ ᠵᠢᠯ ᠮᠢᠨᠦ ᠬᠣᠨᠢ ᠬᠠᠷᠢᠭᠤᠯᠵᠤ ᠪᠠᠢᠭᠠᠳ ᠬᠥᠭᠡᠭᠡᠭᠳᠡᠭᠰᠡᠨ᠂ ᠮᠡᠩᠭᠡᠷ ᠲᠡᠢ ᠮᠠᠭᠤ ᠡᠴᠢᠭᠡ ᠲᠡᠢ ᠪᠡᠨ ᠶᠠᠭᠠᠬᠢᠭᠰᠠᠨ ᠠᠳᠠᠯᠢᠬᠠᠨ ᠪᠣᠯᠵᠤ ᠪᠣᠢ ᠨᠣᠬᠠᠢ ᠴᠢᠨᠢ? ᠬᠠᠷᠠᠴᠠ ᠨᠢ ᠬᠦᠷᠲᠡᠯᠡ᠂ ᠡᠴᠢᠭᠡ ᠰᠢᠭ ᠢ᠋ᠶ᠋ᠡᠨ ᠨᠠᠮᠠᠶ᠋ᠢ ᠮᠠᠭᠤᠬᠠᠢ ᠬᠠᠷᠠᠵᠤ ᠪᠠᠢᠨᠠ ᠰᠢᠦ ᠭᠡᠵᠦ ᠪᠣᠳᠣᠭᠠᠳ᠂
ᠮᠠᠭᠤ ᠠ᠋ᠴᠠ ᠮᠠᠭᠤ᠂ ᠮᠣᠳᠣᠨ ᠠ᠋ᠴᠠ ᠬᠦ ᠭᠡᠵᠦ ᠠᠮᠠ ᠳᠣᠲᠣᠷᠠ ᠪᠠᠨ ᠭᠦᠩᠭᠦᠨᠡᠵᠦ᠂ ᠪᠣᠷᠣ ᠲᠣᠯᠣᠭᠠᠢ ᠶ᠋ᠢᠨ ᠬᠣᠷᠮᠣᠢ ᠪᠠᠷ ᠠᠷᠤ ᠳ᠋ᠤᠨᠢ ᠭᠠᠷᠤᠭᠠᠳ᠂ ᠬᠡᠳᠦᠨ ᠡᠴᠡᠩᠬᠡᠢ ᠬᠣᠨᠢ ᠢᠮᠠᠭᠠ ᠬᠠᠷᠢᠭᠤᠯᠤᠭᠰᠠᠨ ᠬᠣᠶᠠᠷ ᠪᠢᠴᠢᠬᠠᠨ ᠬᠡᠦᠬᠡᠨ ᠲᠡᠢ ᠳᠠᠭᠠᠷᠢᠯᠳᠤᠵᠤ᠂
— ᠡᠵᠢ ᠴᠢᠨᠢ ᠪᠣᠢ ᠤᠤ ᠭᠡᠵᠦ ᠠᠰᠠᠭᠤᠪᠠ᠃
— ᠪᠣᠢ
— ᠥᠴᠥᠭᠡᠳᠦᠷ ᠣᠷᠣᠢ ᠲᠠᠨᠠᠷ ᠶᠠᠭᠤ ᠢᠳᠡᠵᠦ ᠬᠣᠨᠣᠪᠠ? ᠭᠡᠪᠡᠯ᠂
— ᠬᠠᠷᠠ ᠴᠠᠢ ᠤᠤᠭᠤᠵᠤ ᠬᠣᠨᠣᠭᠰᠠᠨ!
— ᠥᠨᠥ ᠥᠷᠯᠥᠭᠡ ᠶᠠᠭᠤ ᠢᠳᠡᠭᠰᠡᠨ ᠪᠣᠢ ? ᠭᠡᠪᠡᠯ
— ᠥᠴᠥᠭᠡᠳᠦᠷ ᠦ᠋ᠨ ᠴᠠᠢ ᠶ᠋ᠢᠨ ᠰᠢᠭᠠᠷᠤ ᠪᠤᠴᠠᠯᠭᠠᠵᠤ᠂ ᠨᠢᠭᠡ ᠬᠤᠷᠤᠳ ᠬᠤᠪᠢᠶᠠᠵᠤ ᠢᠳᠡᠭᠰᠡᠨ᠂
— ᠬᠤᠷᠤᠳ ᠴᠠᠭᠠᠨ ᠢᠳᠡᠭᠡ ᠲᠠᠨᠠᠢᠳᠤ (ᠲᠠᠨ ᠤ᠋ ᠳ᠋ᠤ᠌) ᠶᠡᠬᠡ ᠪᠣᠢ ᠤᠤ ? ᠭᠡᠪᠡᠯ᠂
— ᠡᠵᠢ᠂ ᠬᠤᠷᠤᠳ ᠭᠡᠬᠦ ᠪᠡᠷ ᠶᠠᠭᠤᠮᠠ ᠦᠭᠡᠢ ᠪᠣᠯᠤᠯᠠ ᠭᠡᠵᠦ᠂ ᠬᠡᠦᠳᠡᠢ ᠳᠣᠲᠣᠷᠠᠬᠢ ᠬᠤᠷᠤᠳ ᠢ᠋ᠶ᠋ᠠᠨ ᠲᠣᠭᠠᠯᠠᠵᠤ ᠪᠠᠢᠨᠠ ᠪᠢᠯᠡ ᠭᠡᠵᠦ ᠬᠡᠦᠬᠡᠳ ᠢ᠋ ᠬᠡᠯᠡᠬᠦ ᠳ᠋ᠦ᠍
— ᠲᠡᠭᠡᠪᠡᠯ ᠡᠵᠢ ᠳ᠋ᠡᠭᠡᠨ ᠮᠠᠨᠠᠢᠳᠤ (ᠮᠠᠨ ᠤ᠋ ᠳ᠋ᠤ᠌) ᠣᠴᠢ ᠭᠡᠵᠦ ᠬᠡᠯᠡᠭᠡᠷᠡᠢ᠃ ᠪᠢ ᠪᠠᠭᠠ ᠰᠠᠭᠠ ᠮᠢᠬᠠ ᠲᠣᠰᠣ᠂ ᠭᠤᠯᠢᠷ ᠥᠭᠭᠦᠨᠡᠮ ᠢᠠ᠃ ᠳᠠᠷᠠᠭᠠ ᠬᠣᠨᠢᠨ ᠠ᠋ᠴᠠ ᠮᠢᠨᠢ ᠬᠢᠷᠭᠠᠯᠴᠠᠵᠤ ᠥᠭᠭᠦᠨᠡ ᠪᠢᠵᠡ ᠭᠡᠵᠦ ᠬᠡᠯᠡᠭᠡᠷᠡᠢ᠂ ᠮᠠᠲᠠᠪᠠᠤ? ᠪᠤᠰᠢᠭᠤᠬᠠᠨ ᠣᠴᠢ! ᠭᠡᠵᠦ ᠬᠡᠯᠡᠭᠡᠷᠡᠢ᠂ ᠲᠡᠭᠡᠬᠦ ᠦᠭᠡᠢ ᠪᠣᠯ᠂ ᠪᠢ ᠬᠥᠮᠦᠨ ᠣᠯᠤᠭᠠᠳ ᠠᠪᠤᠨᠠ ᠰᠢᠦ᠃ ᠮᠠᠢ ᠨᠢᠭᠡ ᠨᠢᠭᠡ ᠬᠤᠷᠤᠳ ᠲᠠ ᠨᠠᠷ ᠲᠤ᠌ ᠥᠭᠭᠦᠶᠡ᠃ ᠰᠢᠷᠠ ᠵᠠᠪᠵᠢᠲᠠᠢ (ᠵᠠᠪᠠᠵᠢᠲᠠᠢ) ᠠᠩᠭᠠᠯᠵᠤᠤᠷ ᠰᠢᠭ᠋ ᠲᠠ ᠨᠠᠷ ᠢ᠋ ᠪᠢ ᠬᠠᠢᠷᠠᠯᠠᠵᠤ ᠪᠠᠢᠭᠠ ᠶᠤᠮ ᠰᠢᠦ ᠳᠡ᠃ ᠡᠵᠢ ᠳ᠋ᠡᠭᠡᠨ ᠨᠠᠮᠠᠶ᠋ᠢ ᠲᠠ ᠨᠠᠷ ᠢ᠋ ᠦᠷᠦ ᠡᠪᠡᠳᠦᠭᠡᠳ ᠵᠠᠭᠠᠯ ᠵᠤᠭᠤᠯ ᠢᠳᠡᠬᠦ ᠤᠤᠭᠤᠬᠤ ᠶᠠᠭᠤᠮᠠ ᠪᠠᠷ ᠲᠤᠰᠠᠯᠠᠶᠠ ᠭᠡᠰᠡᠨ ᠭᠡᠵᠦ ᠬᠡᠯᠡᠭᠡᠷᠡᠢ ᠮᠠᠲᠠᠪᠠᠤ ? ᠭᠡᠳ ᠪᠠᠰᠠ ᠬᠡᠳᠦᠨ ᠬᠣᠨᠢᠴᠢᠨ ᠬᠡᠦᠬᠡᠳ ᠳᠡᠭᠡᠭᠦᠷ ᠡᠷᠭᠢᠵᠦ᠂ ᠲᠡᠷᠡ ᠬᠠᠪᠢ ᠶ᠋ᠢᠨ ᠠᠢᠯ ᠤ᠋ᠨ ᠲᠤᠬᠠᠢ ᠬᠡᠷᠡᠭ ᠲᠡᠢ ᠮᠡᠳᠡᠭᠡ ᠰᠤᠷᠪᠤᠯᠵᠢᠯᠠᠵᠤ ᠣᠯᠤᠭᠠᠳ ᠬᠡᠳᠦᠨ ᠶᠠᠳᠠᠭᠤ ᠠᠢᠯ ᠢ᠋ᠶ᠋ᠠᠷ ᠣᠷᠣᠵᠠᠢ᠃ ᠬᠠᠪᠤᠷ ᠤ᠋ᠨ ᠲᠠᠷᠴᠢᠭ ᠴᠠᠭ ᠢ᠋ᠶ᠋ᠠᠷ ᠭᠠᠴᠢᠭᠳᠠᠭᠰᠠᠨ ᠤᠯᠤᠰ ᠠᠷᠭᠠ ᠪᠤᠶᠤ ᠯᠣᠳᠣᠢ ᠪᠠᠶᠠᠨ ᠤ᠋ ᠬᠠᠲᠠᠭᠤ ᠨᠠᠷᠢᠨ ᠬᠡᠯᠡᠯᠴᠡᠭᠡᠷ ᠢ᠋ ᠥᠯᠥᠰᠬᠦ ᠶ᠋ᠢᠨ ᠵᠣᠪᠠᠯᠠᠩ ᠳ᠋ᠤ᠌ ᠬᠠᠪᠴᠢᠭᠳᠠᠨ ᠬᠦᠯᠢᠶᠡᠵᠦ᠂ ᠬᠣᠨᠢᠨ ᠤ᠋ ᠨᠢᠭᠡ ᠬᠥᠯ ᠮᠢᠬᠠ᠂ ᠨᠢᠭᠡ ᠲᠣᠭᠣ ᠭᠤᠯᠢᠷ ᠪᠤᠳᠠᠭᠠ ᠪᠠᠷ ᠲᠡᠳᠤᠠᠢᠴᠢᠨᠡᠭᠡᠨ ᠬᠣᠨᠢ ᠬᠢᠷᠭᠠᠵᠤ ᠥᠭᠭᠦᠨᠡ᠂ ᠬᠣᠨᠢ ᠬᠤᠷᠠᠭᠠᠯᠠᠬᠤ ᠦᠶᠡ ᠪᠡᠷ ᠲᠥᠴᠢᠨᠡᠨ ᠬᠣᠨᠣᠭ ᠠᠵᠢᠯ ᠬᠢᠵᠦ ᠥᠭᠭᠦᠨᠡ ᠭᠡᠵᠦ ᠯᠣᠳᠣᠢ ᠶ᠋ᠢᠨ ᠠᠮᠠ ᠪᠠᠷ ᠪᠣᠯᠵᠠᠢ᠃
ᠮᠠᠯ ᠴᠥᠭᠡᠨ ᠲᠡᠢ᠂ ᠲᠣᠰᠣ ᠢᠳᠡᠭᠡ ᠪᠠᠭᠠ ᠠᠪᠤᠭᠰᠠᠨ ᠠᠢᠯ᠂ ᠬᠠᠪᠤᠷ ᠤ᠋ᠨ ᠲᠠᠷᠴᠢᠭ ᠴᠠᠭ ᠢ᠋ᠶ᠋ᠠᠷ ᠬᠡᠴᠡᠭᠦᠳᠡᠵᠦ᠂ ᠬᠡᠦᠬᠡᠳ ᠰᠢᠤᠬᠠᠳ ᠣᠷᠣᠢ ᠬᠣᠭᠣᠰᠣᠨ ᠨᠣᠢᠲᠠᠨ ᠬᠡᠪᠲᠡᠳᠡᠭ ᠪᠣᠯᠵᠠᠢ᠃ ᠡᠴᠢᠭᠡ ᠡᠬᠡ ᠨᠢ ᠠᠷᠭᠠ ᠶᠠᠳᠠᠬᠤ ᠳ᠋ᠠᠭᠠᠨ ᠬᠡᠦᠬᠡᠳ ᠢ᠋ᠶ᠋ᠡᠨ ᠮᠢᠬᠠ ᠪᠣᠯᠤᠭᠰᠠᠨ ᠬᠣᠢᠨᠠ ᠰᠡᠷᠢᠭᠡᠨᠡ ᠬᠡᠪᠲᠡᠵᠦ ᠪᠠᠢ ᠭᠡᠵᠦ ᠬᠠᠭᠤᠷᠴᠤ ᠬᠡᠪᠲᠡᠭᠦᠯᠳᠡᠭ ᠪᠠᠢᠵᠠᠢ᠃ ᠬᠠᠶᠠ ᠭᠠᠭᠴᠠ ᠨᠢᠭᠡ ᠴᠢᠮᠬᠢ ᠮᠢᠬᠠ ᠣᠯᠳᠠᠪᠠᠯ ᠡᠬᠡ ᠨᠢ ᠬᠡᠦᠬᠡᠳ ᠲᠡᠭᠡᠨ ᠬᠣᠪᠣᠷ ᠡᠷᠳᠡᠨᠢ ᠬᠤᠪᠢᠶᠠᠨ ᠲᠦᠭᠡᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠴᠢᠮᠬᠢ ᠴᠢᠮᠬᠢ ᠪᠡᠷ᠂ ᠬᠥᠮᠦᠨ ᠪᠦᠷᠢ ᠳ᠋ᠦ᠍ ᠠᠳᠠᠯᠢ ᠲᠡᠭᠰᠢ ᠬᠤᠪᠢ ᠣᠨᠣᠭᠠᠵᠤ— ᠬᠡᠦᠬᠡᠳ ᠰᠢᠤᠬᠠᠳ ᠲᠠᠭᠠᠨ ᠲᠦᠭᠡᠭᠡᠨ ᠥᠭᠳᠡᠭ ᠳᠡᠭᠡᠷᠡ ᠡᠴᠡ ᠮᠢᠬᠠ ᠮᠠᠩᠨᠤᠭ ᠪᠣᠯᠤᠯᠠ ᠮᠠᠨ ᠤ᠋ ᠡᠵᠢ ᠴᠢᠳᠬᠥᠷ ᠪᠣᠯᠤᠯᠠ ᠭᠡᠰᠡᠨ ᠬᠡᠦᠬᠡᠳ ᠦ᠋ᠨ ᠭᠤᠨᠢᠭᠲᠤ ᠵᠦᠢᠷ ᠦᠭᠡ ᠶᠡᠬᠡᠯᠡ(ᠶᠡᠬᠡ ᠯᠡ) ᠡᠷᠲᠡ ᠳᠡᠭᠡᠷᠡ ᠴᠠᠭ ᠭᠠᠷᠤᠭᠰᠠᠨ ᠠᠵᠢ᠃ ᠬᠥᠭᠡᠷᠦᠬᠦᠢ ᠥᠯᠥᠨ ᠬᠣᠭᠣᠰᠣᠨ ᠠ᠋ᠴᠠ ᠪᠣᠯᠵᠤ ᠴᠢᠭᠢᠭ ᠪᠠᠮ ᠳ᠋ᠤ᠌ ᠪᠠᠷᠢᠭᠳᠠᠭᠰᠠᠨ ᠡᠵᠢ ᠨᠢ ᠥᠪᠡᠷ ᠢ᠋ᠶ᠋ᠡᠨ ᠴᠢᠳᠬᠥᠷ ᠪᠣᠯᠬᠤ ᠦᠭᠡᠢ ᠮᠢᠬᠠ ᠶ᠋ᠢ ᠮᠠᠩᠨᠤᠭ ᠠ᠋ᠴᠠ ᠡᠯᠪᠡᠭ ᠪᠣᠯᠭᠠᠬᠤ ᠰᠠᠨᠠᠭᠠ ᠶᠡᠬᠡ ᠪᠠᠢᠪᠠᠴᠤ ᠬᠠᠮᠢᠭᠠ ᠠ᠋ᠴᠠ ᠬᠣᠭᠣᠰᠣᠨ ᠨᠣᠢᠲᠠᠨ ᠬᠡᠦᠬᠡᠳ ᠲᠡᠭᠡᠨ ᠡᠯᠪᠡᠭ ᠮᠢᠬᠠ ᠣᠯᠵᠤ ᠥᠭᠬᠦ ᠪᠢᠯᠡ᠃ ᠠᠷᠪᠠ᠂ ᠲᠠᠪᠤᠨ ᠮᠠᠯ ᠨᠢ ᠬᠣᠪᠣᠷ ᠴᠠᠭ ᠭᠡᠳᠡᠭ ᠡᠴᠡ ᠭᠠᠷᠤᠭᠰᠠᠨ ᠭᠠᠷᠤᠯᠲᠠᠢ ᠬᠠᠪᠤᠷ ᠴᠠᠭ ᠭᠡᠳᠡᠭ ᠨᠡᠷᠡᠲᠡᠢ ᠪᠡᠷᠬᠡ ᠲᠠᠷᠴᠢᠭ ᠴᠠᠭ ᠢ᠋ᠶ᠋ᠠᠷ ᠡᠷᠭᠦᠭᠦᠯᠦᠨ ᠪᠠᠷᠢᠭᠤᠯᠤᠨ ᠨᠠᠢ᠍ᠮᠠᠨ ᠶᠠᠰᠤᠨ ᠳ᠋ᠠᠭᠠᠨ ᠬᠡᠯᠬᠢᠴᠢᠭᠰᠡᠨ ᠠᠷᠠᠢ ᠭᠣᠣᠯ ᠲᠠᠢ ᠪᠠᠢᠳᠠᠭ ᠴᠠᠭ ᠢ᠋ᠶ᠋ᠠᠷ ᠶᠠᠭᠠᠬᠢᠬᠤ ᠶ᠋ᠢᠨ ᠴᠤ᠌ ᠠᠷᠭᠠ ᠮᠡᠬᠡ ᠪᠠᠢᠳᠠᠭ ᠦᠭᠡᠢ ᠴᠠᠭ ᠪᠠᠢᠵᠤ ᠰᠢᠦ ᠳᠡ᠂ ᠬᠠᠪᠤᠷ ᠭᠡᠳᠡᠭ ᠮᠠᠨᠢ᠃
ᠯᠣᠳᠣᠢ ᠪᠠᠶᠠᠨ ᠲᠡᠷᠡ ᠡᠳᠦᠷ ᠦ᠋ᠨ ᠶᠠᠪᠤᠳᠠᠯ ᠤᠷᠤᠭᠰᠢᠲᠠᠢ ᠣᠯᠵᠠ ᠲᠠᠢ ᠪᠣᠯᠪᠠ ᠭᠡᠵᠦ ᠪᠠᠶᠠᠷᠲᠠᠢ᠂ ᠠᠢᠯ ᠳ᠋ᠤ᠌ ᠲᠠᠯᠪᠢᠭᠰᠠᠨ ᠬᠡᠰᠡᠭ ᠬᠣᠨᠢ ᠪᠠᠨ ᠡᠷᠭᠢᠬᠦ ᠭᠡᠵᠦ ᠨᠡᠯᠢᠶᠡᠳ ᠲᠣᠭᠣᠷᠢᠵᠤ ᠲᠡᠷᠡ ᠬᠣᠲᠠ ᠳ᠋ᠤ᠌ ᠣᠢᠷᠠᠲᠤᠬᠤ ᠳ᠋ᠠᠭᠠᠨ᠂ ᠭᠡᠷ ᠡᠴᠡ ᠨᠢᠭᠡ ᠡᠬᠡᠨᠡᠷ ᠪᠣᠯᠤᠯᠲᠠᠢ ᠭᠦᠶᠦᠵᠦ ᠭᠠᠷᠤᠭᠠᠳ ᠬᠣᠯᠠ ᠠ᠋ᠴᠠ ᠯᠣᠳᠣᠢ ᠶ᠋ᠢ ᠲᠠᠨᠢᠮᠠᠭᠴᠠ ᠭᠡᠷ ᠳᠡᠭᠡᠷᠡ ᠡᠴᠡ ᠨᠢᠭᠡ ᠠᠷᠠᠰᠤ ᠰᠢᠬᠦᠷᠴᠦ ᠠᠪᠤᠭᠠᠳ ᠨᠣᠣᠷᠬᠠᠢ ᠬᠠᠷᠠ ᠢᠰᠡᠭᠡᠢ ᠬᠤᠷᠢᠶᠠᠭᠰᠠᠨ ᠪᠠᠷᠠᠭᠠ ᠶ᠋ᠢᠨ ᠳᠡᠷᠭᠡᠳᠡ ᠨᠢᠭᠡ ᠶᠠᠭᠤᠮᠠ ᠨᠢᠭᠤᠵᠤ ᠪᠠᠢᠭᠠ ᠶ᠋ᠢ ᠨᠢ ᠬᠠᠷᠠᠴᠢᠭᠠᠳ(ᠬᠠᠷᠠᠴᠢᠬᠠᠭᠠᠳ) ᠱᠥᠯᠥ ᠭᠠᠷᠭᠠᠵᠤ ᠳᠠ ᠭᠡᠵᠦ ᠪᠣᠳᠣᠭᠠᠳ᠂ ᠵᠣᠴᠢᠨ ᠢ᠋ ᠬᠦᠯᠢᠶᠡᠵᠦ ᠭᠠᠳᠠᠨᠠ ᠪᠠᠨ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠲᠡᠷᠡ ᠡᠬᠡᠨᠡᠷ ᠦ᠋ᠨ ᠳᠡᠷᠭᠡᠳᠡ ᠳᠠᠪᠬᠢᠵᠤ ᠣᠴᠢᠭᠠᠳ᠄
— ᠴᠢ ᠰᠠᠢ᠍ᠢ(ᠰᠠᠶᠢ) ᠭᠡᠷ ᠳᠡᠭᠡᠷᠡ ᠡᠴᠡ ᠶᠠᠭᠤ ᠪᠠᠨ ᠬᠣᠣ ᠲᠠᠲᠠᠭᠠᠳ ᠳᠠᠯᠳᠠ ᠬᠢᠪᠡ? ᠭᠡᠵᠦ ᠠᠮᠤᠷ ᠮᠡᠨᠳᠦ ᠶ᠋ᠢ ᠠᠰᠠᠭᠤᠬᠤ ᠵᠠᠪᠳᠤᠯ ᠦᠭᠡᠢ ᠲᠤᠯᠭᠠᠵᠤ᠂ ᠴᠣᠭᠣᠷᠬᠠᠢ ᠢᠰᠡᠭᠡᠢ ᠶ᠋ᠢᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠪᠠᠷᠠᠭᠠ ᠶ᠋ᠢᠨ ᠳᠣᠣᠷᠠ ᠠ᠋ᠴᠠ ᠬᠤᠯᠠᠭᠠᠢ ᠶ᠋ᠢ ᠨᠢ ᠪᠠᠷᠢᠭᠤᠯᠵᠤ ᠴᠤᠬᠤᠢᠵᠤ ᠪᠠᠢᠭᠰᠠᠨ ᠬᠣᠨᠢᠨ ᠤ᠋ ᠠᠷᠠᠰᠤ ᠶ᠋ᠢ ᠨᠢᠳᠦ ᠪᠡᠷ ᠰᠢᠷᠪᠢᠨ ᠬᠠᠷᠠᠪᠠᠯ᠂ ᠲᠡᠷᠡ ᠡᠬᠡᠨᠡᠷ ᠬᠠᠷᠢᠭᠤ ᠥᠴᠢᠷᠦᠨ᠄
— ᠶᠠᠭᠤ ᠴᠤ᠌ ᠳᠠᠯᠳᠠ ᠬᠢᠭᠰᠡᠨ ᠦᠭᠡᠢ ᠭᠡᠵᠡᠢ᠃
— ᠶᠠᠭᠤ ᠴᠤ᠌ ᠳᠠᠯᠳᠠ ᠬᠢᠭᠰᠡᠨ ᠦᠭᠡᠢ ᠭᠡᠪᠡᠦ ᠴᠢ? ᠲᠡᠷᠡ ᠴᠢᠨᠢ ᠶᠠᠭᠤ ᠪᠣᠢ ? ᠭᠠᠷᠭᠠᠭᠠᠳ ᠣᠷᠭᠢ! ᠭᠡᠵᠦ ᠪᠠᠷᠠᠭᠠ ᠶ᠋ᠢᠨ ᠵᠦᠭ ᠵᠢᠭᠠᠬᠤ ᠳ᠋ᠤᠨᠢ ᠤᠷᠠᠩᠬᠠᠢ ᠨᠣᠣᠷᠬᠠᠢ ᠳᠡᠪᠡᠯ ᠲᠡᠢ ᠡᠴᠡᠩᠬᠡᠷ ᠲᠡᠷᠡ ᠬᠥᠭᠡᠷᠦᠬᠦᠢ ᠡᠬᠡᠨᠡᠷ ᠠᠷᠭᠠ ᠪᠤᠶᠤ ᠪᠠᠷᠠᠭᠠ ᠶ᠋ᠢᠨ ᠵᠦᠭ ᠮᠣᠳᠣᠨ ᠬᠥᠮᠦᠨ ᠰᠢᠭ ᠠᠶᠠ ᠦᠭᠡᠢ ᠬᠥᠳᠡᠯᠵᠦ ᠣᠴᠢᠭᠠᠳ ᠬᠤᠮᠢᠵᠤ ᠴᠢᠬᠢᠭᠰᠡᠨ ᠠᠷᠠᠰᠤ ᠭᠠᠷᠭᠠᠵᠠᠢ᠃
— ᠳᠡᠯᠭᠡ᠂ ᠡᠨᠡ ᠬᠡᠨ ᠦ᠌ ᠬᠣᠨᠢᠨ ᠤ᠋ ᠠᠷᠠᠰᠤ ᠪᠣᠢ? ᠭᠡᠬᠦ ᠳ᠋ᠦ᠍ᠨᠢ ᠲᠡᠷᠡ ᠬᠥᠭᠡᠷᠦᠬᠦᠢ ᠡᠮᠡᠭᠲᠡᠢ ᠭᠡᠯᠮᠡᠭᠳᠡᠨ ᠠᠶᠤᠵᠤ ᠰᠢᠪᠡᠨᠡᠬᠦ ᠨᠢ ᠰᠣᠨᠣᠰᠳᠠᠭᠰᠠᠨ ᠦᠭᠡᠢ ᠳᠡᠮᠡᠢ ᠯᠡ ᠤᠷᠤᠭᠤᠯ ᠨᠢ ᠳᠠᠭᠤᠨ ᠦᠭᠡᠢ ᠬᠥᠳᠡᠯᠪᠡ᠃
— ᠴᠢᠨᠦ ᠬᠡᠯᠡ ᠠᠮᠠ ᠴᠢᠨᠢ ᠬᠠᠳᠠᠴᠢᠬᠰᠠᠨ ᠶᠤᠮ ᠤᠤ? ᠡᠨᠡ ᠴᠢᠨᠢ ᠮᠠᠨ ᠤ᠋ ᠬᠠᠯᠵᠠᠨ ᠬᠣᠨᠢᠨ ᠤ᠋ ᠠᠷᠠᠰᠤ ᠪᠠᠢᠬᠤ ᠰᠢᠪ ᠳᠡ᠂ ᠬᠡᠨ ᠭᠠᠷᠭᠠᠭᠰᠠᠨ ᠶᠤᠮ ᠪᠣᠢ ? ᠮᠢᠬᠠᠰᠠᠵᠤ ᠲᠠ ᠨᠠᠷ᠂ ᠬᠠᠷᠠ ᠨᠣᠬᠠᠢ! ᠬᠥᠮᠦᠨ ᠦ᠌ ᠮᠠᠯ ᠢ᠋ ᠢᠩᠭᠢᠵᠦ ᠬᠠᠷᠠᠳᠠᠭ ᠶᠤᠮ ᠤᠤ? ᠥᠨᠥᠳᠥᠷ ᠪᠢ ᠮᠠᠯ ᠢ᠋ᠶ᠋ᠠᠨ ᠬᠤᠷᠢᠶᠠᠵᠤ ᠠᠪᠤᠨᠠ᠃ ᠬᠥᠳᠡᠭᠡ ᠭᠠᠵᠠᠷ ᠭᠤᠢᠯᠢᠨᠴᠢᠨ᠂ ᠬᠣᠨᠢᠴᠢᠨ ᠶᠠᠮᠠᠷ ᠮᠤᠩᠳᠠᠬᠤ ᠶᠤᠮ ᠪᠢᠰᠢ᠃
ᠬᠠᠷᠠ ᠬᠥᠮᠦᠨ ᠴᠢᠨᠢ ᠮᠢᠨᠦ ᠬᠣᠨᠢᠨ ᠤ᠋ ᠮᠢᠬᠠ ᠶ᠋ᠢ ᠲᠥᠯᠥᠵᠦ ᠥᠭᠭᠦᠭ(ᠥᠭ) ᠲᠤᠭᠤᠯᠪᠠᠤ? ᠭᠡᠵᠦ ᠬᠠᠰᠬᠢᠷᠲᠠᠯᠠ ᠭᠡᠷ ᠦ᠋ᠨ ᠤᠷᠠᠩᠬᠠᠢ ᠡᠭᠦᠳᠡ ᠴᠡᠴᠡᠷᠡᠨ ᠴᠠᠭᠠᠨᠠ ᠠ᠋ᠴᠠ ᠨᠢ ᠡᠷᠭᠦᠭᠳᠡᠵᠦ ᠨᠢᠭᠡ ᠲᠠᠶᠠᠭ ᠤ᠋ᠨ ᠦᠵᠦᠭᠦᠷ ᠴᠤᠬᠤᠢᠵᠤ ᠦᠵᠡᠭᠳᠡᠭᠡᠳ᠂ ᠬᠣᠢᠨᠠ ᠠ᠋ᠴᠠ ᠨᠢ ᠰᠤᠷ ᠢ᠋ᠶ᠋ᠠᠷ ᠣᠷᠢᠶᠠᠵᠤ ᠲᠣᠷᠭᠣᠭᠰᠠᠨ ᠬᠠᠩᠵᠠᠷᠠᠭᠰᠠᠨ ᠮᠠᠢᠵᠢᠭᠢ ᠭᠤᠲᠤᠯ ᠭᠠᠷᠴᠤ ᠢᠷᠡᠭᠡᠳ᠂ ᠴᠠᠭᠠᠨᠠ ᠠ᠋ᠴᠠ ᠨᠢ ᠲᠡᠷᠡ ᠭᠤᠲᠤᠯ ᠲᠠᠶᠠᠭ ᠬᠣᠶᠠᠷ ᠤ᠋ᠨ ᠡᠵᠡᠨ ᠡᠴᠡᠩᠬᠡᠷ ᠬᠥᠬᠡ ᠪᠡᠶᠡ ᠨᠢ ᠤᠷᠠᠩᠬᠠᠢ ᠳᠡᠪᠡᠯ ᠦ᠋ᠨ ᠴᠣᠭᠣᠷᠣᠬᠠᠢ ᠪᠠᠷ ᠦᠵᠡᠭᠳᠡᠭᠰᠡᠨ ᠡᠴᠡᠵᠦ ᠲᠤᠷᠠᠭᠰᠠᠨ ᠨᠢᠭᠡᠨ ᠡᠮᠡᠭᠡᠨ ᠰᠠᠯᠭᠠᠯᠠᠨ(ᠰᠠᠯᠭᠠᠨᠠᠨ) ᠭᠠᠷᠴᠤ ᠢᠷᠡᠵᠦ᠂ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠨᠢᠳᠦ ᠭᠢᠯᠪᠠᠢᠨ ᠠᠨᠢᠰᠬᠢᠵᠦ᠂ ᠲᠣᠯᠣᠭᠠᠢ ᠨᠢ ᠰᠠᠯᠭᠠᠯᠠᠨ(ᠰᠠᠯᠭᠠᠨᠠᠨ) ᠯᠣᠳᠣᠢ ᠪᠠᠶᠠᠨ ᠤ᠋ ᠥᠭᠡᠳᠡ ᠡᠴᠡ ᠪᠤᠷᠤᠭᠤᠰᠢᠶᠠᠨ ᠥᠭᠦᠯᠡᠷᠦᠨ᠂
— ᠯᠣᠳᠣᠢ ᠲᠠ ᠲᠣᠮᠣᠭᠠ ᠲᠠᠢ ᠬᠥᠮᠦᠨ ᠮᠥᠷᠲᠡᠭᠡᠨ ᠭᠠᠭᠴᠠ ᠬᠣᠨᠢᠨ ᠤ᠋ ᠲᠥᠯᠥᠭᠡ ᠡᠨᠡ ᠬᠥᠭᠡᠷᠦᠬᠦᠢ ᠠᠮᠢᠲᠠᠨ ᠢ᠋ ᠵᠠᠩᠨᠠᠵᠤ ᠪᠤᠰᠤᠷᠮᠠᠭᠯᠠᠭᠠᠳ ᠶᠠᠭᠠᠬᠢᠬᠤ ᠨᠢ ᠪᠣᠢ? ᠡᠨᠡ ᠬᠣᠨᠢ ᠲᠠᠨ ᠤ᠋ ᠬᠣᠨᠢ ᠪᠠᠢᠭᠰᠠᠨ ᠨᠢ ᠦᠨᠡᠨ᠂ ᠤᠷᠵᠢᠳᠤᠷ ᠦᠬᠡᠷ ᠲᠦ᠍ ᠭᠢᠰᠬᠢᠭᠦᠯᠵᠦ ᠪᠡᠷᠲᠡᠭᠡᠳ ᠲᠠᠷᠴᠢᠯᠠᠵᠤ ᠵᠣᠪᠠᠬᠤ ᠳ᠋ᠤᠨᠢ ᠮᠠᠯ ᠪᠣᠯᠬᠤ ᠠ᠋ᠴᠠ ᠥᠩᠭᠡᠷᠡᠪᠡ ᠭᠡᠵᠦ ᠥᠴᠥᠭᠡᠳᠦᠷ ᠭᠠᠷᠭᠠᠭᠰᠠᠨ ᠶᠣᠮᠠ( ᠶᠤᠮ ᠠ᠋)᠃ ᠮᠢᠬᠠ ᠨᠢ ᠪᠦᠲᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠢᠬᠠᠭᠤ ᠪᠣᠢ᠂ ᠲᠠ ᠦᠵᠡᠪᠡᠯ ᠦᠵᠡ᠃ ᠪᠢ ᠥᠴᠥᠭᠡᠳᠦᠷ ᠣᠷᠣᠢ ᠨᠢᠭᠡ ᠠᠶᠠᠭᠠ ᠱᠥᠯᠥ ᠭᠠᠷᠭᠠᠬᠤ ᠭᠡᠵᠦ ᠠᠯᠠᠭᠠ ᠶ᠋ᠢᠨ ᠴᠢᠨᠡᠭᠡ ᠮᠢᠬᠠ ᠠᠪᠤᠭᠰᠠᠨ᠃ ᠪᠠᠰᠠ ᠮᠠᠨ ᠤ᠋ ᠠᠢᠯ ᠤ᠋ᠨ ᠡᠪᠡᠳᠴᠢᠲᠡᠢ ᠬᠡᠦᠬᠡᠨ ᠳ᠋ᠦ᠍ ᠨᠢᠭᠡ ᠠᠶᠠᠭᠠ ᠱᠥᠯᠥ ᠶ᠋ᠢᠨ ᠡᠮᠬᠦ ᠮᠢᠬᠠ ᠥᠭᠭᠦᠭᠰᠡᠨ ᠭᠡᠬᠦ ᠳ᠋ᠦ᠍ᠨᠢ᠄
— ᠥᠴᠥᠭᠡᠳᠦᠷ ᠨᠠᠳᠠ ᠬᠡᠯᠡᠬᠦ ᠶ᠋ᠢ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ ? ᠭᠡᠵᠡᠢ᠃
— ᠥᠴᠥᠭᠡᠳᠦᠷ ᠣᠷᠣᠢ ᠮᠠᠯ ᠪᠣᠯᠬᠤ ᠠ᠋ᠴᠠ ᠪᠠᠨ ᠥᠩᠭᠡᠷᠡᠵᠡᠢ ᠭᠡᠵᠦ ᠭᠠᠷᠭᠠᠭᠰᠠᠨ ᠶᠣᠮᠠ( ᠶᠤᠮ ᠠ᠋)᠃ ᠬᠦᠦ ᠲᠠᠨᠠᠢ (ᠲᠠᠨ ᠤ᠋) ᠳ᠋ᠤ᠌ ᠬᠣᠨᠢᠨ ᠳᠡᠭᠡᠷᠡ ᠡᠴᠡ ᠪᠡᠨ ᠳᠠᠭᠠᠷᠢᠵᠤ ᠣᠴᠢᠭᠠᠳ ᠬᠡᠯᠡᠨᠡ ᠭᠡᠵᠦ ᠥᠷᠯᠥᠭᠡ ᠭᠠᠷᠤᠭᠰᠠᠨ ᠭᠡᠵᠦ ᠡᠮᠡᠭᠡᠨ ᠦ᠌ ᠬᠡᠯᠡᠬᠦ ᠳ᠋ᠦ᠍᠂
— ᠵᠠ᠂ ᠶᠠᠭᠠᠮᠠᠢ᠃ ᠬᠠᠷᠢᠨ ᠮᠢᠬᠠ ᠶ᠋ᠢ ᠨᠢ ᠥᠨᠥᠳᠥᠷ ᠮᠠᠨᠠᠢᠳᠤ (ᠮᠠᠨ ᠤ᠋ ᠳ᠋ᠤ᠌) ᠬᠦᠷᠭᠡᠵᠦ ᠥᠭ ᠭᠡᠵᠦ ᠬᠡᠯᠡᠭᠡᠷᠡᠢ ᠬᠦᠦ ᠳ᠋ᠡᠭᠡᠨ᠂ ᠢᠷᠡᠬᠦ ᠳ᠋ᠦ᠍ᠨᠢ ᠭᠡᠪᠡᠯ᠄
— ᠯᠣᠳᠣᠢ ᠭᠤᠸᠠᠢ ᠲᠠ᠂ ᠬᠠᠪᠤᠷ ᠤ᠋ᠨ ᠵᠣᠪᠠᠯᠭᠠ ᠮᠢᠬᠠ ᠪᠠᠷ ᠶᠠᠭᠤ ᠬᠢᠬᠦ ᠨᠢ ᠪᠣᠢ? ᠬᠠᠷᠢᠨ ᠪᠢᠳᠡ ᠮᠡᠲᠦ ᠶ᠋ᠢᠨ ᠶᠠᠳᠠᠭᠰᠠᠨ ᠠᠮᠢᠲᠠᠨ ᠳ᠋ᠤ᠌ ᠣᠯᠳᠠᠰᠢ ᠦᠭᠡᠢ ᠶᠠᠭᠤᠮᠠ ᠰᠢᠦ ᠳᠡ᠃
ᠪᠢᠳᠡ᠂ ᠲᠠᠨ ᠤ᠋ ᠬᠣᠨᠢ ᠮᠠᠯ ᠢ᠋ ᠥᠪᠡᠷ ᠦ᠋ᠨ ᠮᠠᠯ ᠠ᠋ᠴᠠ ᠢᠯᠡᠭᠦᠦ ᠬᠢᠴᠢᠶᠡᠵᠦ ᠮᠠᠯᠯᠠᠵᠤ ᠪᠠᠢᠭᠠ ᠶᠤᠮ ᠪᠢᠰᠢ ᠤᠤ? ᠤᠯᠤᠰ ᠲᠠᠨ ᠢ᠋ ᠭᠠᠭᠴᠠ ᠬᠣᠨᠢᠨ ᠤ᠋ ᠵᠣᠪᠠᠯᠭᠠ ᠶ᠋ᠢᠨ ᠲᠥᠯᠥᠭᠡ ᠢᠩᠭᠢᠵᠦ ᠪᠠᠢᠭᠠ ᠶ᠋ᠢ ᠴᠢᠨᠢ ᠦᠵᠡᠪᠡᠯ ᠮᠢᠬᠠ ᠮᠠᠩᠨᠤᠭ ᠪᠣᠯᠵᠤ᠂ ᠮᠠᠨ ᠤ᠋ ᠪᠠᠶᠠᠨ ᠯᠣᠳᠣᠢ ᠴᠢᠳᠬᠥᠷ ᠪᠣᠯᠤᠯᠠ ᠭᠡᠵᠦ ᠬᠡᠯᠡᠬᠦ ᠶᠦ᠍ᠮ ᠪᠢᠰᠢ ᠤᠤ? ᠭᠡᠬᠦ ᠳ᠋ᠦ᠍ᠨᠢ᠄
— ᠨᠠᠳᠠ ᠬᠡᠷᠡᠭ ᠪᠠᠢᠨᠠ᠃ ᠬᠥᠮᠦᠨ ᠶᠠᠭᠤ ᠯᠠ ᠭᠡᠪᠡᠯ᠂ ᠭᠡᠵᠦ ᠪᠠᠢᠭ᠃ ᠨᠠᠳᠠ ᠲᠡᠷᠡ ᠬᠠᠮᠢᠶᠠ ᠦᠭᠡᠢ᠃ ᠲᠠᠨ ᠤ᠋ ᠡᠨᠳᠡ ᠢᠩᠭᠢᠭᠡᠳ ᠣᠷᠬᠢᠪᠠᠯ ᠳᠣᠯᠣᠭᠠ ᠬᠣᠨᠣᠭ ᠳᠣᠳᠣᠮ ᠦᠬᠡᠷ ᠴᠢᠨᠢ ᠨᠢᠭᠡ ᠬᠣᠨᠢ ᠭᠢᠰᠬᠢᠨ ᠠᠯᠠᠵᠤ ᠵᠠᠩᠰᠢᠬᠤ ᠨᠢ ᠠ᠋᠃ ᠬᠠᠷᠢᠨ ᠡᠭᠦᠨᠴᠡ ᠬᠣᠢᠰᠢ ᠲᠡᠭᠦᠨᠴᠡ ᠴᠠᠰᠢ(ᠴᠠᠭᠠᠰᠢ)ᠢᠩᠭᠢᠭᠡᠳ ᠪᠠᠢᠪᠠᠯ ᠭᠣᠷᠢ ᠦᠭᠡᠢ ᠳᠡ᠃ ᠬᠣᠨᠢ ᠪᠠᠨ ᠣᠨᠳᠣᠣ ᠠᠢᠯ ᠳ᠋ᠤ᠌ ᠯᠠ ᠲᠠᠯᠪᠢᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠣᠯᠤᠯᠠ ᠭᠡᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠢᠭᠤᠷᠵᠢᠨ ᠣᠳᠬᠣᠨᠪᠠᠪᠠ᠂ ᠣᠶᠤᠨᠪᠠᠲᠤ᠂ ᠣᠭ᠌ᠶᠤ᠂
ᠰᠠᠷᠠᠨᠲᠤᠶᠠᠭᠠ᠂ ᠪᠠᠯ᠂ ᠪᠠᠳᠮᠠᠰᠡᠴᠡᠨ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ