ᠦᠷ ᠦᠨ ᠲᠤᠶᠠᠭᠠ 1 – ᠪ᠂ ᠷᠢᠨᠴᠢᠨ - ᠲᠡᠷᠢᠬᠦᠨ ᠲᠡᠪᠲᠡᠷ <ᠮᠠᠨᠵᠤ ᠶᠢᠨ ᠳᠠᠯᠬᠢᠨ ᠳᠤ>(ᠠᠷᠪᠠ) Үүрийн туяа I – Б ᠂ Ренчин Тэргүүн дэвтэр "<Манжийн талхинд" (10)
637ᠠᠷᠪᠠ᠂ ᠠᠢᠯ ᠬᠥᠮᠥᠨ ᠠᠮᠢ ᠨᠢᠭᠡ ᠲᠠᠢ
ᠰᠠᠢᠬᠠᠨ ᠰᠠᠨᠠᠭᠠᠨ ᠤ᠋ ᠦᠵᠦᠭᠦᠷ ᠲᠦ᠍ ᠰᠦ
(ᠠᠷᠠᠳ ᠤ᠋ᠨ ᠰᠡᠴᠡᠨ ᠦᠭᠡ)
ᠡᠪᠦᠯ ᠦ᠋ᠨ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠰᠡᠭᠦᠯ ᠢ᠋ᠶ᠋ᠡᠷ ᠰᠢᠭᠤᠷᠭᠠ ᠬᠥᠳᠡᠯᠵᠡᠢ᠃ ᠥᠷᠯᠥᠭᠡ ᠡᠴᠡ ᠨᠠᠪᠰᠠ ᠤᠨᠠᠵᠤ ᠪᠠᠢᠭᠰᠠᠨ ᠯᠠᠪᠰᠠᠨ ᠴᠠᠰᠤ ᠰᠢᠷᠵᠢᠭᠢᠨᠡᠨ ᠡᠷᠭᠢᠬᠦ ᠬᠡᠢᠰᠬᠦ ᠨᠢ ᠰᠢᠷᠦᠭᠦᠰᠴᠦ᠂ ᠦᠳᠡ ᠡᠴᠡ ᠬᠣᠢᠰᠢ ᠲᠩᠷᠢ ᠶ᠋ᠢᠨ ᠬᠣᠷᠮᠣᠢ ᠪᠠᠷ ᠴᠠᠢᠪᠤᠷ ᠪᠤᠳᠠᠩ ᠲᠠᠲᠠᠵᠤ ᠪᠢᠴᠢᠬᠠᠨ ᠬᠣᠲᠠ ᠶ᠋ᠢ ᠨᠥᠮᠥᠷᠢᠯᠡᠭᠰᠡᠨ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠴᠠᠭᠠᠨ ᠤᠲᠤᠭᠠ ᠰᠤᠭᠤᠨᠠᠭᠯᠠᠬᠤ ᠮᠡᠲᠦ ᠴᠠᠰᠤ ᠬᠡᠢᠰᠴᠦ᠂ ᠶᠠᠪᠠᠭᠠᠨ ᠰᠢᠭᠤᠷᠭᠠ᠂ ᠬᠡᠭᠡᠷᠡ ᠴᠠᠰᠤᠨ ᠳᠡᠭᠡᠰᠦ ᠲᠠᠮᠤᠵᠤ᠂ ᠦᠳᠡᠰᠢ ᠲᠡᠰᠢ ᠰᠢᠭᠤᠷᠭᠠ ᠤᠯᠠᠮ ᠴᠢᠩᠭᠠᠷᠠᠭᠠᠳ᠂ ᠬᠡᠭᠡᠷᠡ ᠬᠡᠴᠡ ᠪᠠᠷᠢᠨ ᠰᠢᠭᠤᠷᠴᠤ ᠠᠭᠤᠯᠠᠨ ᠳ᠋ᠤ᠌ ᠬᠦᠩᠭᠢᠨᠡᠵᠦ ᠱᠤᠤᠭᠢᠪᠠ᠃
ᠰᠠᠭᠰᠠᠢᠭᠰᠠᠨ ᠳᠡᠯ ᠰᠡᠭᠦᠯ ᠲᠡᠢ ᠴᠠᠩ ᠪᠣᠯᠤᠭᠰᠠᠨ ᠮᠣᠷᠢ ᠶ᠋ᠢ ᠰᠢᠷᠪᠠᠰᠬᠢᠲᠡᠯᠡ ᠬᠦᠢ ᠬᠦᠢ ᠰᠠᠯᠬᠢᠯᠠᠵᠤ ᠪᠠᠢᠭᠰᠠᠨ ᠰᠠᠯᠬᠢ ᠰᠢᠭᠤᠷᠭᠠ ᠰᠥᠷᠴᠦ ᠬᠡᠭᠡᠷᠡ ᠶᠠᠪᠤᠭᠰᠠᠨ ᠭᠠᠭᠴᠠ ᠬᠥᠮᠦᠨ ᠢ᠋ ᠶᠠᠪᠤ ᠶᠠᠪᠤᠭᠰᠠᠭᠠᠷ ᠠᠭᠤᠯᠠ ᠶ᠋ᠢᠨ ᠬᠣᠷᠮᠣᠢ ᠬᠦᠷᠴᠦ ᠨᠥᠮᠥᠷᠢ ᠳ᠋ᠦ᠍ᠨᠢ ᠪᠠᠢᠭᠠ ᠡᠪᠦᠯᠵᠢᠭᠡᠨ (ᠡᠪᠦᠯᠵᠢᠶᠡᠨ) ᠳ᠋ᠦ᠍ ᠪᠠᠭᠤᠬᠤ ᠳ᠋ᠤ᠌᠂ ᠴᠢᠯᠠᠭᠤᠨ ᠬᠠᠳᠠ ᠠᠭᠤᠯᠠ ᠮᠥᠷᠭᠥᠭᠰᠡᠨ ᠰᠠᠯᠬᠢ ᠪᠠᠬᠠᠨ ᠵᠥᠭᠡᠯᠡᠨ ᠪᠣᠯᠵᠤ᠂ ᠨᠢᠳᠦ ᠱᠠᠪᠠᠬᠤ (ᠰᠢᠪᠠᠬᠤ) ᠴᠠᠰᠤ ᠴᠤ᠌ ᠮᠡᠳᠡᠭᠳᠡᠮᠡ ᠪᠠᠭᠠ ᠪᠣᠯᠵᠠᠢ᠃
ᠦᠨᠢᠶᠡ ᠨᠠᠮᠨᠠᠵᠤ ᠪᠠᠢᠭᠰᠠᠨ ᠪᠠᠲᠤᠪᠠᠶᠠᠷ᠂ ᠣᠷᠣᠢ ᠶ᠋ᠢᠨ ᠵᠣᠴᠢᠨ ᠢ᠋ ᠳᠣᠲᠣᠨᠣᠴᠢᠯᠠᠨ ᠲᠣᠰᠴᠤ᠄
— ᠵᠠ᠂ ᠶᠠᠸᠠᠨ ᠮᠢᠨᠢ᠂ ᠪᠤᠰᠢᠭᠤ ᠭᠡᠷ ᠲᠦ᠍ ᠣᠷᠣᠵᠤ ᠳᠤᠯᠠᠭᠠᠴᠢ(ᠳᠤᠯᠠᠭᠠᠴᠠ)᠃ ᠭᠠᠳᠠᠭᠠ ᠲᠩᠷᠢ ᠭᠠᠵᠠᠷ ᠬᠣᠶᠠᠷ ᠨᠡᠢᠯᠡᠵᠦ᠂ ᠬᠡᠴᠡᠭᠦᠦ ᠰᠢᠭᠤᠷᠭᠠ ᠲᠠᠯᠪᠢᠵᠤ ᠪᠠᠢᠬᠤ ᠰᠢᠪ ᠳᠡ᠃ ᠴᠢ ᠮᠠᠨᠠᠢᠳᠤ (ᠮᠠᠨ ᠤ᠋ ᠳ᠋ᠤ᠌) ᠬᠣᠨᠣᠨᠠ ᠪᠢᠵᠡ ᠳᠡ᠃ ᠡᠢᠮᠦ ᠣᠷᠣᠢ ᠬᠠᠮᠢᠭᠠ ᠠ᠋ᠴᠠ ᠶᠠᠪᠤᠵᠤ ᠪᠠᠢᠭᠠ ᠬᠥᠮᠦᠨ ᠪᠣᠢ ? ᠭᠡᠵᠦ ᠵᠣᠴᠢᠨ ᠠ᠋ᠴᠠ ᠠᠰᠠᠭᠤᠵᠠᠢ᠃
— ᠶᠠᠺᠤᠸ ᠤ᠋ᠨ ᠬᠢ ᠡᠴᠡ ᠬᠠᠷᠢᠵᠤ ᠶᠠᠪᠤᠭᠠᠳ᠂ ᠡᠨᠡ ᠰᠢᠭᠤᠷᠭᠠ ᠪᠠᠷ ᠮᠣᠷᠢ ᠡᠴᠡᠵᠦ ᠰᠦᠷᠡᠬᠡᠢ ᠴᠦ᠍ ᠲᠠᠭᠠᠷᠠᠯᠠ ᠭᠡᠳ ᠴᠢᠭᠢᠷᠠᠭ ᠵᠤᠵᠠᠭᠠᠨ ᠪᠡᠶᠡ ᠲᠡᠢ ᠲᠡᠷᠡ ᠰᠢᠪᠢᠷ ᠡᠪᠦᠭᠡᠨ ᠵᠣᠴᠢᠨ ᠮᠣᠩᠭᠣᠯ ᠶᠣᠰᠣᠭᠠᠷ ᠣᠶᠣᠭᠰᠠᠨ ᠨᠡᠬᠡᠢ ᠳᠡᠪᠡᠯ ᠦ᠋ᠨ ᠴᠠᠰᠤ ᠶ᠋ᠢ ᠭᠦᠪᠢᠵᠦ ᠭᠦᠢᠴᠡᠭᠡᠳ ᠬᠦᠢ ᠬᠦᠢ ᠰᠠᠯᠬᠢᠨ ᠳ᠋ᠤ᠌ ᠳᠣᠩᠰᠣᠯᠤᠭᠳᠠᠵᠤ ᠪᠠᠢᠭᠰᠠᠨ ᠭᠡᠷ ᠲᠦ᠍ ᠣᠷᠣᠪᠠᠯ᠂ ᠵᠤᠤᠬᠠ ᠳ᠋ᠤᠨᠢ ᠭᠠᠯ ᠳᠦᠷᠡᠯᠵᠡᠨ ᠰᠢᠷᠡᠮᠦᠨ ᠲᠣᠭᠣᠭᠠ ᠠ᠋ᠴᠠ ᠵᠡᠷᠯᠢᠭ ᠰᠣᠩᠭᠢᠨᠠ᠂ ᠬᠣᠨᠢᠨ ᠤ᠋ ᠮᠢᠬᠠ ᠴᠢᠨᠠᠵᠤ ᠪᠠᠢᠭᠠ ᠱᠥᠯᠥ ᠶ᠋ᠢᠨ ᠦᠨᠦᠷ ᠬᠠᠩᠬᠤᠯᠤᠨ᠂ ᠬᠠᠨᠠ ᠶ᠋ᠢᠨ ᠬᠠᠶᠠᠭᠠ ᠪᠠᠷ ᠬᠠᠷᠠᠩᠭᠤᠢ ᠪᠣᠯᠪᠠᠴᠤ ᠭᠣᠯᠣᠮᠲᠠ ᠬᠠᠪᠢ ᠪᠠᠷ ᠭᠠᠯ ᠤ᠋ᠨ ᠭᠡᠷᠡᠯ ᠲᠣᠰᠴᠤ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠰᠦᠮᠡᠯᠵᠡᠨ ᠬᠣᠢᠮᠣᠷ ᠢ᠋ ᠭᠡᠢᠭᠦᠯᠵᠦ ᠪᠠᠢᠭᠠ ᠨᠢ᠂ ᠭᠡᠷ ᠦ᠋ᠨ ᠬᠠᠨᠠ ᠨᠢᠮᠭᠡᠨ ᠲᠤᠭᠤᠷᠭᠠ ᠶ᠋ᠢᠨ ᠴᠠᠭᠠᠨᠠ ᠱᠤᠤᠭᠢᠵᠤ ᠪᠠᠢᠭᠠ ᠰᠠᠯᠬᠢ ᠰᠢᠭᠤᠷᠭᠠᠨ ᠤ᠋ ᠪᠤᠭᠤᠢᠯᠢ ᠠ᠋ᠴᠠ ᠠᠯᠳᠠᠭᠤᠯᠤᠨ ᠮᠤᠯᠲᠤᠷᠠᠵᠤ ᠣᠷᠣᠵᠤ ᠢᠷᠡᠭᠰᠡᠨ ᠠᠶᠠᠨ ᠤ᠋ ᠬᠥᠮᠦᠨ ᠳ᠋ᠦ᠍ ᠶᠡᠬᠡᠯᠡ(ᠶᠡᠬᠡ ᠯᠡ) ᠲᠠᠭᠠᠲᠠᠢ ᠳᠤᠯᠠᠭᠠᠨ ᠰᠠᠢᠬᠠᠨ ᠰᠠᠨᠠᠭᠳᠠᠪᠠ᠃
ᠰᠠᠬᠠᠯ ᠠ᠋ᠴᠠ ᠮᠥᠰᠥ ᠲᠡᠭᠦᠵᠦ᠂ ᠭᠠᠯ ᠤ᠋ᠨ ᠳᠡᠷᠭᠡᠳᠡ ᠳᠤᠯᠠᠭᠠᠴᠠᠬᠤ ᠵᠠᠪᠰᠠᠷ᠂ ᠵᠣᠴᠢᠨ ᠡᠪᠦᠭᠡᠨ᠂ ᠪᠠᠲᠤᠪᠠᠶᠠᠷ ᠤ᠋ᠨ ᠡᠮᠡᠭᠡᠨ ᠫᠠᠭᠮᠠ ᠲᠠᠢ ᠦᠭᠡ ᠬᠡᠯᠡᠯᠴᠡᠨ ᠠᠮᠤᠷ ᠮᠡᠨᠳᠦ᠂ ᠮᠠᠯ ᠰᠦᠷᠦᠭ ᠦ᠋ᠨ ᠬᠦᠴᠦ ᠲᠠᠷᠭᠤ ᠠᠰᠠᠭᠤᠵᠤ᠂ ᠭᠠᠷ ᠢ᠋ᠶ᠋ᠠᠨ ᠠᠴᠢᠲᠠᠢ ᠰᠠᠢᠬᠠᠨ ᠢᠯᠴᠢᠲᠡᠢ ᠭᠠᠯ ᠤ᠋ᠨ ᠡᠮᠦᠨᠡ ᠡᠭᠡᠭᠡᠪᠡ᠃
ᠲᠡᠭᠡᠲᠡᠯᠡ᠂ ᠬᠣᠪᠣᠩ ᠳ᠋ᠠᠭᠠᠨ ᠴᠣᠭ ᠲᠠᠢ᠂ ᠵᠤᠤᠬᠠ ᠳ᠋ᠠᠭᠠᠨ ᠭᠠᠯ ᠲᠠᠢ ᠪᠠᠢᠭᠠ ᠴᠠᠭ ᠲᠤ᠌ ᠢᠳᠡᠭᠡ ᠤᠮᠳᠠ ᠰᠠᠢᠲᠠᠢ ᠠᠢᠯ ᠳ᠋ᠤ᠌ ᠬᠡᠵᠢᠶᠡᠳᠡ ᠪᠡᠯᠡᠨ ᠪᠠᠢᠳᠠᠭ ᠰᠠᠢᠬᠠᠨ ᠬᠠᠯᠠᠭᠤᠨ ᠴᠠᠢ᠂ ᠲᠣᠰᠣ᠂ ᠪᠣᠯᠤᠭᠰᠠᠨ ᠭᠤᠯᠢᠷ᠂ ᠭᠱᠠᠨ ᠵᠠᠭᠤᠷᠠ ᠷᠢᠳᠢ ᠬᠤᠪᠢᠯᠭᠠᠨ ᠢ᠋ᠶ᠋ᠠᠷ ᠪᠣᠢ ᠪᠣᠯᠤᠭᠰᠠᠨ ᠶᠤᠮ ᠰᠢᠭ᠋ ᠵᠣᠴᠢᠨ ᠤ᠋ ᠡᠮᠦᠨᠡ ᠰᠢᠷᠡᠭᠡ ᠳᠦᠭᠦᠷᠡᠩ ᠢᠳᠡᠭᠡ ᠪᠣᠢ ᠪᠣᠯᠵᠤ᠂ ᠭᠡᠷ ᠦ᠋ᠨ ᠡᠵᠡᠨ ᠠᠪᠠᠭᠠᠢ ᠴᠢᠨᠠᠵᠤ ᠪᠠᠢᠭᠰᠠᠨ ᠬᠣᠭᠣᠯᠠ ᠳ᠋ᠠᠭᠠᠨ ᠳᠠᠯᠤ ᠳᠥᠷᠪᠡᠨ ᠥᠨᠳᠥᠷ ᠬᠢᠵᠦ᠂ ᠴᠠᠭᠠᠨ ᠢᠳᠡᠭᠡ᠂ ᠠᠭᠠᠷᠤᠤᠯ ᠲᠣᠰᠣᠨ ᠤ᠋ ᠠᠮᠲᠠᠲᠠᠢ ᠰᠠᠢᠬᠠᠨ ᠢ᠋ ᠲᠠᠯᠪᠢᠵᠤ᠂ ᠢᠸᠠᠨ ᠭᠤᠸᠠᠢ ᠶ᠋ᠢ ᠵᠣᠴᠢᠯᠠᠨ᠂ ᠠᠪᠳᠠᠷᠠ ᠪᠠᠨ ᠠᠭᠤᠳᠠᠯᠵᠤ᠂ ᠴᠠᠭᠠᠨ ᠪᠥᠭᠰᠡᠲᠦ ᠯᠣᠩᠬᠣ ᠲᠠᠢ ᠠᠷᠠᠵᠠ ᠭᠠᠷᠭᠠᠵᠤ᠂ ᠶᠡᠬᠡᠯᠡ (ᠶᠡᠬᠡ ᠯᠡ) ᠨᠠᠢᠷᠲᠠᠢ ᠳᠣᠲᠣᠨᠣ ᠡᠯᠢᠭᠡᠰᠡᠭ ᠪᠠᠢᠳᠠᠯᠲᠠᠢ ᠪᠠᠢᠭᠠ ᠶ᠋ᠢ ᠨᠢ ᠦᠵᠡᠪᠡᠯ᠂ ᠭᠡᠷ ᠦ᠋ᠨ ᠡᠵᠡᠨ ᠡᠮᠡᠭᠲᠡᠢ ᠨᠢ ᠨᠠᠢᠷᠲᠠᠢ ᠵᠣᠴᠢᠮᠰᠠᠭ(ᠵᠣᠴᠢᠨᠰᠠᠭ) ᠮᠣᠩᠭᠣᠯ ᠤ᠋ᠨ ᠶᠣᠰᠣ ᠭᠦᠢᠴᠡᠳᠬᠡᠨ ᠳᠠᠭᠠᠵᠤ ᠪᠠᠢᠭᠠ ᠲᠡᠳᠦᠢᠬᠡᠨ ᠪᠢᠰᠢ᠂ ᠦᠨᠡᠬᠡᠷ ᠰᠠᠢᠨ ᠬᠥᠮᠦᠨ ᠭᠡᠵᠦ ᠡᠷᠬᠢᠮᠯᠡᠨ ᠦᠵᠡᠵᠦ ᠪᠠᠢᠭᠠ ᠵᠣᠴᠢᠨ ᠢ᠋ᠶ᠋ᠠᠨ ᠬᠦᠨᠳᠦᠳᠬᠡᠵᠦ ᠵᠣᠴᠢᠯᠠᠭᠰᠠᠨ ᠪᠠᠢᠳᠠᠯᠲᠠᠢ ᠠᠵᠢ᠃
ᠦᠨᠡᠬᠡᠷ ᠰᠢᠪᠢᠷ ᠦ᠋ᠨ ᠲᠡᠷᠡ ᠣᠷᠣᠰ ᠢᠸᠠᠨ᠂ ᠡᠪᠦᠭᠡᠨ ᠮᠠᠯᠴᠢᠨ ᠪᠠᠲᠤᠪᠠᠶᠠᠷ ᠬᠣᠶᠠᠷ ᠦᠨᠡᠨ ᠰᠡᠳᠬᠢᠯ ᠦ᠋ᠨ ᠰᠠᠢᠬᠠᠨ ᠲᠠᠨᠢᠯᠴᠠᠭᠰᠠᠨ ᠵᠤᠵᠠᠭᠠᠨ ᠨᠠᠢᠷᠲᠠᠢ ᠵᠢᠷᠤᠮ ᠤ᠋ᠨ ᠬᠣᠶᠠᠷ ᠨᠥᠬᠥᠷ ᠪᠠᠢᠵᠠᠢ᠃ ᠨᠤᠲᠤᠭ ᠤ᠋ᠨ ᠮᠣᠩᠭᠣᠯᠴᠤᠳ ᠤ᠋ᠨ ᠬᠠᠯᠵᠠᠨ ᠶᠡᠺᠦᠸ ᠭᠡᠳᠡᠭ ᠣᠷᠣᠰ ᠬᠤᠳᠠᠯᠳᠤᠭᠠᠴᠢᠨ ᠲᠣᠷᠭᠣᠸ ᠤ᠋ᠨ ᠳ᠋ᠤ᠌ ᠵᠠᠷᠤᠴᠠᠯᠠᠭᠳᠠᠵᠤ ᠪᠠᠢᠬᠤ ᠳ᠋ᠠᠭᠠᠨ ᠢᠸᠠᠨ ᠡᠪᠦᠭᠡᠨ᠂ ᠰᠢᠳᠤᠷᠭᠤ ᠴᠢᠬᠡᠴᠢ ᠪᠠᠲᠤᠪᠠᠶᠠᠷ ᠲᠠᠢ ᠲᠠᠨᠢᠯᠴᠠᠭᠠᠳ ᠬᠣᠶᠠᠭᠤᠯᠠ ᠶᠡᠬᠡᠯᠡ(ᠶᠡᠬᠡ ᠯᠡ) ᠳᠣᠲᠣᠨᠣ ᠡᠯᠢᠭᠡᠰᠡᠭ ᠠᠬᠠ ᠳᠡᠭᠦᠦ ᠰᠢᠭ ᠪᠣᠯᠤᠭᠰᠠᠨ ᠤᠯᠤᠰ ᠪᠠᠢᠵᠠᠢ᠃
ᠢᠸᠠᠨ ᠡᠪᠦᠭᠡᠨ᠂ ᠰᠠᠢᠨ ᠨᠥᠬᠥᠷ ᠦ᠋ᠨ ᠭᠡᠷ ᠲᠦ᠍ ᠰᠠᠭᠤᠵᠤ ᠬᠣᠭᠣᠯᠠ ᠢᠳᠡᠵᠦ᠂ ᠠᠷᠠᠵᠠ ᠶ᠋ᠢ ᠳᠤᠷᠠᠲᠠᠶᠠ ᠰᠢᠮᠡᠵᠦ ᠰᠠᠭᠤᠬᠤ ᠳ᠋ᠠᠭᠠᠨ ᠭᠡᠷ ᠦ᠋ᠨ ᠡᠵᠡᠨ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠡᠨᠡ ᠰᠥᠨᠢ ᠶ᠋ᠢᠨ ᠰᠢᠭᠤᠷᠭᠠ ᠪᠠᠷ ᠯᠠᠪ ᠨᠣᠢᠷ ᠦᠭᠡᠢ ᠬᠣᠨᠣᠬᠤ ᠨᠢ ᠳᠡ ᠭᠡᠵᠦ ᠲᠥᠯᠥᠭᠡᠨᠡ ᠰᠡᠳᠬᠢᠯᠴᠢᠯᠡᠨ ᠰᠠᠭᠤᠵᠤ ᠠᠵᠢᠭᠯᠠᠪᠠᠯ᠂ ᠫᠠᠭᠮᠠ ᠪᠠᠲᠤᠪᠠᠶᠠᠷ ᠬᠣᠶᠠᠷ᠂ ᠬᠡᠳᠦᠨ ᠬᠦᠴᠦ ᠪᠠᠬᠠᠨ ᠮᠠᠭᠤᠳᠠᠭᠰᠠᠨ ᠦᠨᠢᠶᠡ ᠳ᠋ᠦ᠍ ᠦᠯᠡᠳᠡᠭᠰᠡᠨ ᠱᠥᠯᠥ ᠡᠴᠡ ᠤᠤᠭᠤᠯᠭᠠᠭᠠᠳ᠂ ᠥᠷᠯᠥᠭᠡ ᠲᠡᠰᠢ ᠪᠠᠰᠠ ᠠᠭᠠ ᠲᠠᠢ ᠴᠠᠢ ᠤᠤᠭᠤᠯᠭᠠᠨᠠ ᠭᠡᠵᠦ ᠶᠠᠷᠢᠯᠴᠠᠵᠤ᠂ ᠭᠡᠷ ᠦ᠋ᠨ ᠳᠣᠲᠣᠷᠠ ᠨᠢᠭᠡᠴᠤ ᠬᠥᠮᠦᠨ ᠳᠡᠪᠡᠯ ᠬᠤᠪᠴᠠᠰᠤ ᠪᠠᠨ ᠲᠠᠢᠯᠵᠤ᠂ ᠣᠷᠣ ᠳᠡᠪᠢᠰᠬᠡᠷ ᠵᠠᠰᠠᠭᠰᠠᠨ ᠦᠭᠡᠢ᠃ ᠪᠠᠲᠤᠪᠠᠶᠠᠷ᠂ ᠭᠠᠭᠴᠠᠬᠦ ᠵᠣᠴᠢᠨ ᠡᠪᠦᠭᠡᠨ ᠢ᠋ ᠤᠨᠲᠠᠵᠤ ᠠᠮᠠᠷᠠ ᠭᠡᠵᠦ ᠰᠢᠬᠠᠵᠤ᠂ ᠢᠸᠠᠨ ᠢ᠋ ᠡᠨᠡ ᠰᠢᠭᠤᠷᠭᠠ ᠪᠠᠷ ᠪᠢ ᠪᠠᠰᠠ ᠲᠤᠰᠠᠯᠠᠯᠴᠠᠵᠤ᠂ ᠮᠠᠯ ᠢ᠋ ᠴᠢᠨᠢ ᠡᠷᠭᠢᠵᠦ ᠬᠠᠷᠠᠯᠴᠠᠶᠠ ᠭᠡᠬᠦ ᠳ᠋ᠦ᠍ᠨᠢ᠄
— ᠰᠠᠢᠨ ᠨᠥᠬᠥᠷ ᠠᠢᠯᠴᠢᠨ ᠢ᠋ ᠡᠨᠡ ᠰᠢᠭᠤᠷᠭᠠᠨ ᠳ᠋ᠤ᠌ ᠬᠣᠨᠢ ᠮᠠᠯ ᠢ᠋ᠶ᠋ᠠᠷ ᠮᠢᠨᠢ ᠨᠣᠴᠣᠯᠳᠤ ᠭᠡᠵᠦ ᠬᠥᠮᠦᠨ ᠶᠠᠮᠠᠷ ᠨᠢᠭᠤᠷ ᠢ᠋ᠶ᠋ᠠᠷ ᠬᠡᠯᠡᠳᠡᠭ ᠶᠦᠮ ᠪᠣᠢ ? ᠴᠢ ᠳᠡᠮᠡᠢ ᠦᠭᠡ ᠨᠠᠳᠠᠳᠤ ᠪᠢᠲᠡᠭᠡᠢ ᠬᠡᠯᠡ᠃ ᠢᠸᠠᠨ ᠮᠢᠨᠢ᠃ ᠰᠥᠨᠢ ᠬᠦᠢᠲᠡᠨ ᠬᠣᠨᠣᠬᠤ ᠪᠠᠢᠬᠤ᠃ ᠡᠨᠡ ᠴᠢᠨᠣᠠ ᠶ᠋ᠢᠨ ᠳᠠᠬᠤ ᠨᠥᠮᠥᠷᠦᠭᠡᠳ ᠰᠠᠢᠨ ᠳᠤᠯᠠᠭᠠᠯᠠᠵᠤ ᠬᠡᠪᠲᠡ᠃ ᠭᠠᠯ ᠲᠦᠯᠡᠬᠦ ᠶ᠋ᠢ ᠵᠣᠭᠰᠣᠮᠠᠭᠴᠠ᠂ ᠭᠡᠷ ᠲᠦ᠍ ᠬᠦᠢᠲᠡᠨ ᠪᠣᠯᠤᠨᠠ ᠭᠡᠵᠦ ᠡᠪᠦᠭᠡᠨ ᠪᠠᠲᠤᠪᠠᠶᠠᠷ᠂ ᠫᠠᠭᠮᠠ ᠶ᠋ᠢ ᠠᠢᠯᠴᠢᠨ ᠳ᠋ᠤ᠌ ᠳᠡᠪᠢᠰᠬᠡᠷ ᠵᠠᠰᠠᠵᠤ᠂ ᠵᠥᠭᠡᠯᠡᠨ ᠰᠢᠷᠲᠡᠭ ᠳᠡᠭᠡᠷᠡ ᠪᠠᠭᠠᠪᠠᠭᠠᠢ ᠶ᠋ᠢᠨ ᠳᠤᠯᠠᠭᠠᠨ ᠰᠠᠬᠠᠯᠢᠭ ᠦᠰᠦᠲᠡᠢ ᠠᠷᠠᠰᠤ ᠳᠡᠯᠭᠡᠵᠦ ᠪᠠᠢᠬᠤ ᠳ᠋ᠤᠨᠢ ᠢᠸᠠᠨ ᠢ᠋ ᠢᠳᠬᠠᠵᠤ ᠪᠢᠯᠡ᠃ ᠲᠡᠭᠡᠭᠡᠳ ᠲᠡᠷᠡ ᠬᠣᠲᠠ ᠠᠢᠯ ᠤ᠋ᠨ ᠬᠢᠨ ᠰᠥᠨᠢᠵᠢᠨ ᠮᠠᠯ ᠢ᠋ᠶ᠋ᠠᠨ ᠡᠷᠭᠢᠵᠦ᠂ ᠨᠣᠢᠷ ᠦᠭᠡᠢ ᠬᠣᠨᠣᠵᠠᠢ᠃
ᠢᠸᠠᠨ ᠭᠤᠸᠠᠢ ᠦᠰᠦᠲᠡᠢ ᠳᠡᠪᠡᠯ᠂ ᠴᠢᠨᠣᠠ ᠶ᠋ᠢᠨ ᠳᠠᠬᠤ ᠪᠠᠷ ᠳᠤᠯᠠᠭᠠᠯᠠᠨ ᠬᠤᠴᠢᠵᠤ ᠬᠡᠪᠲᠡᠬᠦ ᠳ᠋ᠡᠭᠡᠨ ᠮᠠᠯᠴᠢᠨ ᠬᠥᠮᠦᠨ ᠦ᠌ ᠠᠵᠢᠯ ᠭᠡᠳᠡᠭ ᠮᠥᠨᠴᠥ ᠬᠦᠨᠳᠦ ᠰᠢᠷᠭᠠᠭᠤ ᠬᠥᠳᠡᠯᠮᠦᠷᠢ ᠳ᠋ᠡᠭ — ᠠ᠋᠃ ᠶᠡᠬᠡᠯᠡ ᠳᠠᠳᠤᠯᠭᠠ ᠲᠠᠢ ᠬᠠᠲᠠᠭᠤᠵᠢᠯᠲᠠᠢ ᠬᠥᠮᠦᠨ ᠦ᠌ ᠬᠢᠬᠦ ᠠᠵᠢᠯ ᠪᠠᠢᠨᠠ ᠳᠠ ᠭᠡᠵᠦ ᠮᠠᠯᠴᠢᠨ ᠠᠷᠠᠳ ᠤ᠋ᠨ ᠠᠵᠢᠯ ᠢ᠋ ᠪᠣᠳᠣᠭᠰᠠᠭᠠᠷ ᠬᠦᠢ ᠬᠦᠢ ᠰᠠᠯᠬᠢᠯᠠᠵᠤ ᠭᠡᠷ ᠢ᠋ ᠳᠣᠩᠰᠣᠯᠭᠠᠬᠤ ᠰᠢᠭᠤᠷᠭᠠᠨ ᠤ᠋ ᠴᠢᠮᠡᠭᠡᠨ ᠳᠤᠮᠳᠠᠭᠤᠷ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠬᠡᠳᠦᠢᠨᠡᠢ ᠤᠨᠲᠠᠵᠠᠢ᠃
ᠥᠷᠯᠥᠭᠡ᠂ ᠰᠢᠭᠤᠷᠭᠠ ᠪᠦᠷ ᠴᠦ᠍ ᠰᠢᠷᠦᠭᠦᠨ ᠪᠣᠯᠵᠤ᠂ ᠤᠷᠵᠢ ᠰᠥᠨᠢ ᠨᠣᠢᠷ ᠦᠭᠡᠢ ᠬᠣᠨᠣᠭᠰᠠᠨ ᠲᠡᠷᠡ ᠬᠣᠲᠠ ᠶ᠋ᠢᠨ ᠬᠢᠨ ᠮᠠᠯ ᠢ᠋ᠶ᠋ᠠᠨ ᠡᠪᠦᠯ ᠦ᠋ᠨ ᠰᠢᠭᠤᠷᠭᠠ ᠪᠠᠷ ᠪᠡᠯᠴᠢᠭᠡᠬᠦ ᠳ᠋ᠦ᠍ ᠬᠡᠷᠡᠭᠯᠡᠵᠦ᠂ ᠵᠣᠷᠢᠭᠤᠳᠠ ᠨᠡᠭᠡᠭᠡᠵᠦ ᠪᠠᠢᠭᠰᠠᠨ ᠨᠥᠮᠥᠷᠢ ᠪᠡᠯᠴᠢᠭᠡᠷ ᠦ᠋ᠨ ᠵᠦᠭ ᠮᠠᠯ ᠪᠡᠯᠴᠢᠭᠡᠬᠦ ᠪᠡᠷ ᠪᠣᠯᠵᠠᠢ᠃
ᠰᠢᠭᠤᠷᠭᠠᠨ ᠠ᠋ᠴᠠ ᠠᠭᠤᠯᠠ ᠬᠠᠳᠠ᠂ ᠪᠤᠷᠭᠠᠰᠤ ᠬᠠᠷᠭᠠᠨᠠ ᠪᠠᠷ ᠬᠠᠯᠬᠠᠯᠠᠭᠳᠠᠭᠰᠠᠨ ᠨᠥᠮᠥᠷᠢ ᠪᠡᠯᠴᠢᠭᠡᠷ ᠦ᠋ᠨ ᠵᠦᠭ ᠲᠡᠮᠡᠭᠡ ᠪᠡᠷ ᠴᠠᠰᠤᠨ ᠵᠠᠮ ᠭᠠᠷᠭᠠᠵᠤ᠂ ᠲᠡᠮᠡᠭᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠦᠬᠡᠷ ᠢ᠋ᠶ᠋ᠡᠨ᠂ ᠦᠬᠡᠷ ᠦ᠋ᠨ ᠬᠣᠢᠨᠠ ᠠ᠋ᠴᠠ ᠬᠣᠨᠢ ᠪᠠᠨ ᠲᠠᠭᠤᠵᠢ᠃ ᠬᠣᠲᠠᠨ ᠳ᠋ᠤᠨᠢ ᠭᠠᠭᠴᠠᠬᠦ ᠡᠮᠡᠭᠡᠨ ᠰᠦᠷᠦᠩ᠂ ᠵᠠᠭᠠᠯ ᠰᠢᠷᠴᠢᠨ᠂ ᠰᠢᠭᠤᠷᠭᠠ ᠨᠠᠮᠳᠠᠬᠤ ᠶ᠋ᠢ ᠲᠦᠷ ᠬᠦᠯᠢᠭᠡᠯᠵᠡᠨᠡᠭᠰᠡᠨ ᠢᠸᠠᠨ ᠲᠠᠢ ᠭᠤᠷᠪᠠᠭᠤᠯᠠ ᠦᠯᠡᠳᠡᠵᠡᠢ᠃
ᠴᠠᠰᠤᠨ ᠪᠤᠳᠠᠩ ᠳᠤᠮᠳᠠᠭᠤᠷ ᠲᠣᠮᠣ ᠴᠠᠭᠠᠨ ᠠᠳᠠ ᠤᠨᠤᠭᠰᠠᠨ ᠫᠠᠭᠮᠠ᠂ ᠲᠡᠮᠡᠭᠡ ᠲᠡᠢ ᠲᠦᠷᠦᠭᠦᠯᠡᠵᠦ᠂ ᠬᠣᠢᠨᠠ ᠠ᠋ᠴᠠ ᠨᠢ ᠬᠣᠨᠢ ᠪᠠᠨ ᠲᠠᠭᠤᠵᠤ᠂ ᠲᠡᠮᠡᠭᠡ ᠤᠨᠤᠵᠤ ᠳᠠᠭᠠᠭᠰᠠᠨ ᠪᠠᠲᠤᠪᠠᠶᠠᠷ ᠳᠠᠷᠠᠩ ᠬᠣᠶᠠᠷ ᠪᠤᠳᠠᠩ ᠳᠤᠮᠳᠠᠭᠤᠷ ᠬᠠᠴᠢᠨ ᠬᠡᠢ ᠦᠵᠡᠭᠳᠡᠯ ᠰᠢᠭ ᠰᠦᠮᠡᠯᠵᠡᠨ᠂ ᠬᠠᠶᠠ ᠰᠠᠯᠬᠢ ᠬᠦᠢ ᠬᠦᠢ ᠰᠠᠯᠬᠢᠯᠠᠵᠤ᠂ ᠲᠣᠮᠣ ᠲᠣᠮᠣ ᠲᠡᠮᠡᠭᠡ ᠶ᠋ᠢ ᠪᠡᠶᠡ ᠪᠡᠶᠡ ᠲᠡᠢ ᠨᠢ ᠮᠥᠷᠭᠥᠯᠳᠦᠲᠡᠯᠡ ᠰᠢᠭᠤᠷᠴᠤ ᠪᠠᠢᠪᠠ᠃ ᠲᠡᠭᠡᠵᠦ ᠶᠠᠪᠤᠭᠰᠠᠭᠠᠷ᠂ ᠠᠭᠤᠯᠠ ᠶ᠋ᠢᠨ ᠰᠤᠭᠤᠨ ᠳ᠋ᠠᠬᠢ ᠨᠥᠮᠥᠷᠢ ᠪᠡᠯᠴᠢᠭᠡᠷ ᠲᠦ᠍ ᠬᠦᠷᠪᠡᠯ᠂ ᠰᠠᠯᠬᠢ ᠲᠡᠷᠡ ᠬᠠᠪᠢ ᠳ᠋ᠤ᠌ ᠨᠡᠯᠢᠶᠡᠳ ᠨᠠᠮᠳᠠᠭᠤ᠂ ᠴᠠᠰᠤ ᠶ᠋ᠢ ᠵᠠᠢᠯᠠᠭᠤᠯᠵᠤ ᠬᠠᠮᠤᠬᠤ ᠳ᠋ᠤ᠌ ᠳᠣᠣᠷᠠ ᠠ᠋ᠴᠠ ᠨᠢ ᠤᠭ ᠲᠠᠭᠠᠨ ᠨᠣᠭᠣᠭᠠᠨ ᠥᠩᠭᠡᠲᠡᠢ ᠥᠳᠬᠡᠨ ᠬᠠᠭᠳᠠ ᠡᠪᠡᠰᠦ ᠭᠠᠷᠴᠤ᠂ ᠬᠦᠢᠲᠡᠨ ᠳ᠋ᠦ᠍ ᠲᠠᠭᠠᠷᠠᠵᠤ ᠪᠡᠶᠡ ᠪᠡᠨ ᠬᠤᠷᠢᠶᠠᠵᠤ ᠪᠥᠭᠴᠥᠢᠭᠰᠡᠨ ᠦᠬᠡᠷ ᠮᠠᠯ᠂ ᠴᠠᠰᠤᠨ ᠳᠣᠣᠷᠠ ᠠ᠋ᠴᠠ ᠭᠠᠷᠤᠭᠰᠠᠨ ᠬᠠᠭᠳᠠ ᠰᠢᠨᠤᠨ ᠢᠳᠡᠵᠦ᠂ ᠮᠠᠯᠯᠠᠵᠤ ᠶᠠᠪᠤᠭᠰᠠᠨ ᠬᠥᠮᠦᠨ ᠨᠢ ᠴᠢᠭᠢᠷᠠᠭ ᠬᠦᠴᠦᠲᠡᠢ ᠮᠠᠯ ᠨᠢ ᠬᠦᠴᠦ ᠲᠠᠷᠭᠤ ᠮᠠᠭᠤᠲᠠᠢ ᠪᠠᠨ ᠬᠣᠢᠰᠢ ᠲᠦᠷᠢᠭᠦᠵᠢᠨ ᠭᠡᠵᠦ ᠬᠠᠷᠢᠭᠤᠯᠤᠨ ᠮᠠᠯᠯᠠᠭᠰᠠᠭᠠᠷ᠂ ᠣᠷᠣᠢ ᠲᠡᠰᠢ ᠨᠡᠯᠢᠶᠡᠳ ᠶᠠᠳᠠᠷᠠᠵᠤ᠂ ᠮᠠᠯ ᠲᠠᠢ ᠪᠠᠨ ᠬᠠᠮᠲᠤ ᠪᠤᠴᠠᠵᠤ ᠢᠷᠡᠭᠡᠳ᠂ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠠᠵᠠᠭᠤ ᠨᠥᠮᠥᠷᠢ ᠳ᠋ᠦ᠍ ᠮᠠᠭᠤ ᠰᠠᠢᠨ ᠢᠰᠡᠭᠡᠢ ᠪᠡᠷ ᠳᠠᠷᠤᠭᠤᠯᠵᠤ᠂ ᠬᠣᠨᠢᠨ ᠤ᠋ ᠬᠣᠲᠠᠨ ᠤ᠋ ᠬᠣᠨᠢᠨ ᠬᠠᠰᠢᠶᠠ ᠶ᠋ᠢ ᠵᠠᠳᠠᠯᠠᠵᠤ ᠬᠠᠰᠢᠭᠰᠠᠨ ᠣᠪᠣᠭᠠᠯᠠᠰᠤᠲᠠᠢ ᠶᠡᠬᠡ ᠡᠪᠡᠰᠦ ᠦᠵᠡᠭᠡᠳ ᠶᠡᠬᠡᠯᠡ ᠭᠠᠢᠬᠠᠵᠠᠢ᠃ ᠪᠠᠲᠤᠪᠠᠶᠠᠷ᠂ ᠰᠦᠷᠦᠩ ᠡᠮᠡᠭᠡᠨ ᠢ᠋ ᠵᠠᠩᠨᠠᠵᠤ᠂ ᠴᠢ ᠢᠸᠠᠨ ᠢ᠋ ᠵᠣᠪᠠᠭᠠᠵᠤ᠂ ᠡᠨᠡ ᠬᠡᠴᠡᠭᠦᠦ ᠰᠢᠭᠤᠷᠭᠠᠨ ᠢ᠋ᠶ᠋ᠠᠷ ᠡᠪᠡᠰᠦ ᠴᠢᠷᠦᠭᠦᠯᠵᠦ ᠲᠦᠪᠡᠭ ᠲᠠᠲᠠᠭᠤᠯᠤᠭᠰᠠᠨ ᠪᠢᠵᠡ! ᠬᠥᠮᠦᠨ᠂ ᠡᠨᠡ ᠶᠡᠬᠡ ᠰᠠᠯᠬᠢ ᠰᠢᠭᠤᠷᠭᠠᠨ ᠢ᠋ᠶ᠋ᠠᠷ ᠬᠡᠭᠡᠷᠡ ᠵᠠᠮ ᠲᠥᠭᠡᠷᠢᠵᠦ᠂ ᠠᠮᠢ ᠦᠷᠡᠭᠳᠡᠪᠡᠯ ᠶᠠᠭᠠᠬᠢᠨᠠ? ᠭᠡᠵᠡᠢ᠃
— ᠦᠭᠡᠢ᠂ ᠪᠢ ᠶᠡᠷᠦ ᠳ᠋ᠡᠭᠡᠨ ᠶᠠᠭᠤᠮᠠ ᠬᠡᠯᠡᠭᠡ ᠦᠭᠡᠢ ᠰᠢᠦ᠃ ᠢᠸᠠᠨ᠂ ᠲᠠ ᠨᠠᠷ ᠠ᠋ᠴᠠ ᠬᠣᠢᠰᠢ ᠰᠠᠯᠬᠢ ᠪᠠᠬᠠᠨ ᠨᠠᠮᠳᠠᠬᠤ ᠨᠢᠭᠡ ᠵᠠᠪᠰᠠᠷ ᠲᠤ᠌ ᠨᠢ ᠶᠠᠪᠤᠭᠠᠳ ᠬᠠᠷᠢᠨ᠂ ᠨᠢᠭᠡ ᠮᠡᠳᠡᠬᠦᠯᠡ ᠦᠳᠡ ᠡᠴᠡ ᠬᠣᠢᠰᠢ ᠬᠣᠶᠠᠷ ᠴᠢᠷᠭᠠ ᠡᠪᠡᠰᠦ ᠠᠪᠴᠢᠷᠠᠭᠠᠳ᠂ ᠪᠠᠲᠤᠪᠠᠶᠠᠷ ᠢ᠋ ᠣᠯᠠᠨ ᠶᠠᠭᠤᠮᠠ ᠬᠡᠯᠡᠭᠡᠳ ᠪᠠᠢᠪᠠᠯ ᠠᠢᠯ ᠬᠥᠮᠦᠨ ᠠᠮᠢ ᠨᠢᠭᠡᠲᠡᠢ ᠶᠦᠮ ᠭᠡᠵᠦ ᠨᠠᠮᠠᠶ᠋ᠢ ᠬᠡᠯᠡᠭᠰᠡᠨ ᠭᠡᠵᠦ ᠬᠡᠯᠡᠭᠡᠷᠡᠢ ᠭᠡᠳ ᠶᠠᠪᠤᠴᠢᠬᠰᠠᠨ (ᠶᠠᠪᠤᠴᠢᠬᠠᠭᠰᠠᠨ) ᠭᠡᠬᠦ ᠳ᠋ᠦ᠍ᠨᠢ᠂
— ᠴᠢ ᠬᠠᠷᠢᠭᠤ ᠳ᠋ᠤᠨᠢ᠂ ᠠᠴᠢᠲᠠᠢ ᠪᠣᠯ ᠭᠡᠵᠦ ᠭᠠᠭᠴᠠ ᠴᠤ᠌ ᠦᠭᠡ ᠬᠡᠯᠡᠪᠡᠦ(ᠬᠡᠯᠡᠪᠡ ᠤᠤ?) ᠪᠢᠳᠡᠨ ᠦ᠌ ᠲᠥᠯᠥᠭᠡ ᠡᠨᠡ ᠰᠢᠭᠤᠷᠭᠠᠨ ᠢ᠋ᠶ᠋ᠠᠷ ᠬᠥᠮᠦᠨ ᠢ᠋ ᠲᠡᠭᠡᠵᠦ ᠪᠠᠢᠬᠤ ᠳ᠋ᠤ᠌?
— ᠪᠢ ᠠᠷᠠᠢ ᠭᠡᠵᠦ ᠨᠢᠭᠡ ᠭᠦᠵᠡᠭᠡ ᠲᠣᠰᠣ᠂ ᠬᠠᠷᠠ ᠪᠠ ᠪᠠᠷ(ᠠᠯᠪᠠ ᠪᠠᠷ) ᠥᠭᠴᠦ ᠶᠠᠪᠤᠭᠤᠯᠤᠭᠰᠠᠨ᠃ ᠶᠠᠭᠤᠮᠠ ᠠᠪᠬᠤ ᠦᠭᠡᠢ ᠭᠡᠳ ᠬᠠᠯᠠᠭᠠᠵᠤ(ᠬᠠᠯᠭᠠᠵᠤ) ᠥᠭᠭᠦᠭᠰᠡᠨ ᠦᠭᠡᠢ᠃
— ᠵᠠᠮᠪᠠ ᠢᠷᠡᠭᠰᠡᠨ ᠤᠤ ?
— ᠦᠳᠡ ᠶ᠋ᠢᠨ ᠠᠯᠲᠠᠲᠤ (ᠠᠯᠲᠠ ᠳ᠋ᠤ᠌) ᠢᠷᠡᠭᠡᠳ ᠶᠠᠪᠤᠭᠰᠠᠨ᠂ ᠠᠳᠤᠭᠤ ᠪᠦᠷᠢᠨ ᠰᠠᠢᠨ ᠭᠡᠨᠡ ᠪᠢᠯᠡ᠃ ᠰᠠᠯᠬᠢᠨ ᠳ᠋ᠤ᠌ ᠲᠠᠭᠤᠭᠳᠠᠭᠰᠠᠨ ᠲᠠᠪᠢᠭᠠᠳ ᠠᠳᠤᠭᠤ ᠶ᠋ᠢ ᠠᠳᠤᠭᠤᠨ ᠳ᠋ᠠᠭᠠᠨ ᠨᠡᠢᠯᠡᠭᠦᠯᠦᠭᠡᠳ ᠮᠠᠨᠠᠵᠤ ᠬᠣᠨᠣᠭᠰᠠᠨ ᠭᠡᠨᠡ ᠪᠢᠯᠡ᠃
— ᠵᠠ᠂ ᠪᠣᠯᠵᠠᠢ᠂ ᠪᠣᠯᠵᠠᠢ᠂ ᠶᠣᠰᠣᠲᠠᠢ ᠬᠥᠮᠦᠨ ᠰᠢᠭ ᠵᠥᠪ ᠬᠢᠵᠦ ᠳᠡ᠃ ᠡᠨᠡ ᠰᠢᠭᠤᠷᠭᠠᠨ ᠢ᠋ᠶ᠋ᠠᠷ ᠠᠳᠤᠭᠤ ᠦᠬᠡᠷ ᠢ᠋ᠶ᠋ᠡᠨ ᠠᠯᠳᠠᠭᠰᠠᠨ ᠬᠣᠬᠢᠷᠠᠭᠰᠠᠨ ᠤᠯᠤᠰ ᠶᠡᠬᠡᠯᠡ(ᠶᠡᠬᠡ ᠯᠡ) ᠣᠯᠠᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠶᠠᠮᠠᠷ᠂ ᠠᠢᠯ ᠪᠦᠷᠢ ᠪᠢᠳᠡ ᠰᠢᠭ᠋ ᠨᠥᠮᠥᠷᠢ ᠡᠪᠦᠯᠵᠢᠭᠡ (ᠡᠪᠦᠯᠵᠢᠶᠡ) ᠪᠡᠯᠴᠢᠭᠡᠷ ᠲᠡᠢ ᠪᠠᠢᠭᠠ(ᠪᠢᠰᠢ) ᠭᠡᠵᠡᠢ᠃ ᠪᠠᠰᠠ ᠬᠥᠮᠦᠨ ᠪᠦᠷᠢ ᠳ᠋ᠦ᠍ ᠪᠤᠶᠠᠨ ᠨᠢ ᠳᠡᠯᠭᠡᠷᠡᠭᠰᠡᠨ ᠢᠸᠠᠨ ᠭᠤᠸᠠᠢ ᠪᠠᠢᠳᠠᠭ ᠪᠢᠰᠢ᠂ ᠬᠡᠴᠡᠭᠦᠦ ᠪᠠᠢᠨᠠ ᠳᠠ ᠡᠳᠦᠢ ᠳ᠋ᠦ᠍ ᠭᠡᠵᠦ ᠬᠡᠯᠡᠯᠴᠡᠭᠰᠡᠭᠡᠷ ᠭᠡᠷ ᠲᠡᠭᠡᠨ ᠣᠷᠣᠵᠤ ᠳᠤᠯᠠᠭᠠᠴᠠᠪᠠ᠃
ᠰᠥᠨᠢ ᠳᠤᠮᠳᠠ ᠠ᠋ᠴᠠ ᠬᠣᠢᠰᠢ ᠰᠠᠯᠬᠢ ᠨᠠᠮᠳᠠᠵᠤ᠂ ᠰᠢᠭᠤᠷᠭᠠᠨ ᠢ᠋ᠶ᠋ᠠᠷ ᠮᠠᠯ ᠲᠠᠢ ᠨᠣᠴᠣᠯᠳᠤᠵᠤ ᠠᠯᠵᠢᠶᠠᠭᠰᠠᠨ ᠬᠣᠲᠠ ᠶ᠋ᠢᠨ ᠬᠢᠨ ᠰᠠᠢ᠍ᠢ (ᠰᠠᠶᠢ) ᠪᠡᠶᠡ ᠰᠡᠳᠬᠢᠯ ᠠᠮᠠᠷᠠᠪᠠ᠃
— ᠰᠠᠯᠬᠢᠨ ᠤ᠋ ᠡᠮᠡᠭᠡᠨ ᠣᠳᠣ ᠯᠠ ᠨᠢᠭᠡ᠂ ᠲᠤᠯᠤᠮᠠ ᠪᠠᠨ(ᠲᠤᠯᠤᠮ ᠢ᠋ᠶ᠋ᠠᠨ) ᠤᠶᠠᠵᠤ ᠳᠠ᠂ ᠪᠢᠳᠡ ᠴᠤ᠌ ᠭᠡᠰᠡᠨ ᠬᠥᠭᠰᠢᠨ ᠶᠠᠰᠤ ᠪᠠᠨ ᠠᠮᠠᠷᠠᠭᠠᠶᠠ ᠳᠠ ᠭᠡᠵᠦ ᠪᠠᠲᠤᠪᠠᠶᠠᠷ ᠰᠡᠭᠦᠯ ᠦ᠋ᠨ ᠤᠳᠠᠭᠠ ᠮᠠᠯ ᠢ᠋ᠶ᠋ᠠᠨ ᠨᠢᠭᠡ ᠡᠷᠭᠢᠵᠦ ᠦᠵᠡᠪᠡ᠃
ᠡᠭᠦᠯᠡᠨ ᠦ᠌ ᠵᠠᠪᠰᠠᠷ ᠠ᠋ᠴᠠ ᠰᠠᠷᠠ ᠭᠠᠷᠴᠤ᠂ ᠴᠠᠰᠤᠨ ᠪᠦᠲᠡᠭᠡᠯᠭᠡ ᠲᠡᠢ ᠵᠠᠬᠠ ᠬᠢᠵᠠᠭᠠᠷ ᠦᠭᠡᠢ ᠠᠭᠤᠳᠠᠮ ᠴᠠᠭᠠᠨ ᠲᠠᠯᠠ᠂ ᠰᠥᠨᠢ ᠶ᠋ᠢᠨ ᠲᠩᠷᠢ ᠵᠤᠷᠠᠢᠨ ᠬᠠᠷᠠᠭᠳᠠᠵᠤ ᠪᠠᠢᠭᠠ᠂ ᠬᠦᠢᠲᠡᠨ ᠠᠮᠢᠰᠬᠤᠯ ᠵᠢᠩᠭᠢᠨᠡᠭᠰᠡᠨ ᠰᠦᠷᠲᠡᠢ ᠠᠭᠤᠯᠠᠰ ᠢ᠋ ᠭᠡᠢᠵᠡᠢ᠃ ᠰᠠᠯᠬᠢᠨ ᠤ᠋ ᠱᠤᠤᠬᠢᠨᠠᠬᠤ ᠴᠢᠮᠡᠭᠡ ᠨᠠᠮᠳᠠᠵᠤ᠂ ᠶᠡᠬᠡᠯᠡ(ᠶᠡᠬᠡ ᠯᠡ) ᠨᠠᠮ ᠭᠦᠮ ᠪᠣᠯᠪᠠ᠃ ᠴᠠᠰᠤ ᠪᠣᠯᠤᠭᠰᠠᠨ ᠲᠡᠮᠡᠭᠡ᠂ ᠦᠬᠡᠷ᠂ ᠬᠣᠨᠢ᠂ ᠭᠡᠷ᠂ ᠰᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ᠂ ᠤᠷᠭᠤᠭᠠ ᠦᠬᠡᠷ ᠴᠢᠯᠠᠭᠤ ᠰᠢᠭ᠋ ᠦᠵᠡᠭᠳᠡᠵᠦ᠂ ᠬᠥᠮᠦᠨ ᠦ᠌ ᠮᠥᠷ ᠴᠠᠰᠤᠨ ᠳᠡᠭᠡᠷᠡ ᠵᠤᠷᠠᠢᠨ ᠦᠵᠡᠭᠳᠡᠵᠦ ᠪᠠᠢᠭᠠ ᠨᠢ ᠠᠰᠬᠠ ᠴᠢᠯᠠᠭᠤᠨ ᠳᠣᠣᠷᠠᠬᠢ ᠣᠭᠣᠲᠣᠨᠠ ᠶ᠋ᠢᠨ ᠮᠥᠷ ᠰᠢᠭ ᠬᠠᠷᠠᠭᠳᠠᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠢᠭᠤᠷᠵᠢᠨ ᠣᠳᠬᠣᠨᠪᠠᠪᠠ᠂ ᠪᠠᠳᠮᠠᠰᠡᠴᠡᠨ᠂ ᠣᠶᠤᠨᠪᠠᠲᠤ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠬᠦᠮᠦᠵᠢᠯᠲᠦ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ