ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠳᠡᠳ᠋ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠠᠷᠪᠠᠨ ᠨᠢᠭᠡ> Хан мунын сүүрс < дээд > – Мөнх зохиоов ᠂ Дэд бодь – Гуравдугаар бүлэг <11>
671 ᠬᠣᠪᠣᠩ ᠤ᠋ᠨ ᠴᠣᠭ ᠳᠡᠭᠡᠷᠡ ᠤᠳᠠᠭᠠᠨ ᠪᠤᠴᠠᠯᠤᠭᠰᠠᠨ ᠢᠳᠡᠭᠡᠰᠢᠭ ᠴᠠᠢ ᠠ᠋ᠴᠠ ᠠᠩᠴᠢᠨᠵᠠᠪ ᠨᠢᠭᠡ ᠣᠭᠣᠴᠢᠭᠠᠳ᠄
— ᠬᠠ᠂ ᠶᠠᠭᠠᠬᠢᠭᠰᠠᠨ ᠡᠬᠡᠭᠦᠨ ᠴᠠᠢ ᠪᠣᠢ! ᠭᠡᠵᠦ ᠱᠠᠭᠠᠵᠠᠩ ᠢ᠋ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠣᠱ ᠬᠢᠲᠡᠯᠡ ᠬᠦᠴᠦᠲᠡᠢ ᠲᠠᠯᠪᠢᠭᠰᠠᠨ ᠳ᠋ᠤ᠌ ᠮᠠᠨᠴᠤᠷᠭᠠ ᠰᠣᠴᠢᠰᠬᠢᠵᠦ ᠲᠡᠭᠦᠨ ᠢ᠋ ᠭᠥᠯᠢᠢᠨ ᠬᠠᠷᠠᠵᠤ《ᠬᠦᠢ᠂ ᠡᠨᠡ ᠪᠠᠰᠠ ᠦᠨᠡᠬᠡᠷ ᠲᠠᠭᠠᠲᠠᠢ ᠰᠠᠭᠠᠷᠢ ᠪᠠᠢᠨᠠ᠃ ᠮᠣᠩᠭᠣᠯ ᠬᠥᠮᠦᠨ ᠶᠦᠮ ᠪᠠᠢᠨᠠ᠂ ᠬᠦᠢᠲᠡᠨ ᠭᠡᠷ ᠲᠦ᠍ ᠪᠡᠭᠡᠷᠡᠭᠰᠡᠨ ᠪᠠᠢ ᠯᠠ ᠦᠭᠡᠢ᠂ ᠬᠠᠯᠠᠭᠤᠨ ᠴᠠᠢ ᠣᠭᠣᠴᠢᠵᠤ ᠪᠦᠯᠢᠶᠡᠰᠦᠭ ᠭᠡᠰᠡᠨ ᠴᠢᠨᠢ ᠶᠠᠭᠤ ᠪᠣᠯᠪᠠ? ᠬᠠᠮᠢᠭᠠ ᠨᠢ ᠬᠠᠳᠬᠤᠭᠠᠳ ᠠᠪᠤᠪᠠ?》 ᠭᠡᠰᠡᠨ ᠲᠥᠯᠥᠪᠲᠡᠢ ᠬᠡᠭᠵᠡᠢᠵᠦ᠄
— ᠶᠠᠭᠠᠬᠢᠪᠠ? ᠠᠶᠠᠭᠠᠯᠠᠭᠰᠠᠨ ᠴᠠᠢ ᠳᠠᠩᠴᠤ ᠬᠠᠯᠠᠭᠤᠨ ᠪᠠᠢᠨᠠ ᠤᠤ? ᠠᠶᠠᠭᠠ ᠱᠠᠭᠠᠵᠠᠩ ᠰᠠᠪᠠᠯᠠᠳᠠᠭ ᠴᠢᠨᠢ⁈ ᠮᠣᠩᠭᠣᠯ ᠬᠥᠮᠦᠨ ᠭᠡᠵᠦ ᠪᠠᠢᠭᠠᠳ ᠶᠣᠰᠣ ᠮᠡᠳᠡᠳᠡᠭ ᠦᠭᠡᠢ ᠶᠣᠷᠣᠭ ᠲᠠᠨᠢᠳᠠᠭ ᠦᠭᠡᠢ ᠲᠠᠷᠢᠶᠠᠨ ᠤ᠋ ᠬᠢᠲᠠᠳ ᠰᠢᠭ᠋ ᠮᠠᠭᠤᠬᠠᠢ ᠵᠠᠩᠨᠠᠳᠠᠭ ᠨᠢ᠁ ᠭᠡᠵᠦ ᠬᠡᠭᠵᠢᠭᠦᠨ ᠳᠤᠤᠭᠠᠷᠤᠭᠰᠠᠨ ᠳ᠋ᠤ᠌ ᠠᠩᠴᠢᠨᠵᠠᠪ᠄
— ᠴᠢ ᠴᠣᠬᠣᠮ ᠮᠣᠩᠭᠣᠯ ᠤᠤ ᠬᠢᠲᠠᠳ ᠤᠤ ᠭᠡᠳᠡᠭ ᠲᠦ᠍ ᠪᠢ ᠰᠡᠵᠢᠭ ᠲᠡᠢ ᠪᠠᠢᠨᠠ ᠭᠡᠪᠡ᠃
— ᠬᠡᠩ᠂ ᠡᠨᠡ ᠡᠪᠦᠭᠡᠨ ᠠᠬᠠ ᠴᠢᠨᠢ ᠮᠣᠩᠭᠣᠯ ᠮᠥᠷᠲᠡᠭᠡᠨ ᠥᠨᠳᠥᠷ ᠢᠵᠠᠭᠤᠷ ᠲᠠᠢ ᠬᠥᠮᠦᠨ᠃
— ᠲᠡᠢᠮᠦ ᠪᠣᠯ᠁ ᠮᠣᠩᠭᠣᠯ ᠮᠣᠩᠭᠣᠯ ᠢ᠋ᠶ᠋ᠠᠨ ᠢᠩᠭᠢᠵᠦ ᠬᠢᠬᠠᠳᠠᠭ ᠤᠤ? ᠡᠷᠡ ᠬᠥᠮᠦᠨ ᠦ᠌ ᠪᠡᠶᠡ ᠳ᠋ᠦ᠍ ᠳᠤᠲᠠᠵᠤ ᠪᠣᠯᠳᠠᠭ ᠦᠭᠡᠢ《ᠭᠤᠷᠪᠠᠨ ᠠᠮᠢᠲᠠᠢ》① ᠶ᠋ᠢ ᠮᠢᠨᠢ ᠴᠦ᠍ ᠦᠯᠡᠳᠡᠭᠡᠬᠦ ᠦᠭᠡᠢ ᠲᠤᠨᠤᠳᠠᠭ ᠶᠠᠮᠠᠷ ᠮᠣᠩᠭᠣᠯ ᠪᠣᠢ? ᠪᠢ ᠡᠢᠮᠦ ᠮᠣᠩᠭᠣᠯ ᠬᠥᠮᠦᠨ ᠦᠵᠡᠭᠡ ᠦᠭᠡᠢ ᠭᠡᠵᠦ ᠠᠩᠴᠢᠨᠵᠠᠪ ᠠᠭᠤᠷ ᠲᠠᠭᠠᠨ ᠰᠢᠷᠡᠭᠡ ᠠᠯᠠᠭᠠᠳᠠᠪᠠ᠃
ᠫᠡᠰᠬᠢᠲᠡᠯᠡ ᠴᠣᠴᠢᠮᠠᠭ ᠰᠢᠷᠡᠭᠡ ᠠᠯᠠᠭᠠᠳᠠᠭᠰᠠᠨ ᠳᠠᠭᠤᠨ ᠳ᠋ᠤ᠌ ᠮᠠᠨᠴᠤᠷᠭᠠ ᠰᠣᠴᠢᠵᠤ ᠠᠪᠤᠭᠰᠠᠨ ᠪᠣᠯᠪᠠᠴᠤ ᠲᠡᠭᠦᠨ ᠢ᠋ ᠬᠠᠷᠠᠭᠠᠳ ᠬᠥᠬᠡ ᠢᠨᠢᠶᠡᠳᠦ ᠨᠢ ᠬᠦᠷᠴᠦ᠄
— ᠵᠠᠯᠠᠭᠤ ᠬᠥᠮᠦᠨ ᠠᠭᠤᠷ ᠣᠮᠣᠭ ᠢ᠋ᠶ᠋ᠠᠨ ᠳᠠᠷᠤ᠃ ᠴᠢᠨᠦ ᠦᠵᠡᠭᠡ ᠦᠭᠡᠢ ᠶᠠᠭᠤᠮᠠ ᠣᠯᠠᠨ ᠪᠠᠢᠨᠠ ᠭᠡᠵᠦ ᠳᠡᠷᠡ ᠶ᠋ᠢᠨ ᠳᠣᠣᠷᠠ ᠠ᠋ᠴᠠ ᠠᠬᠤᠷ ᠫᠤᠤ ᠭᠠᠷᠭᠠᠵᠤ ᠰᠡᠢᠮᠡᠬᠡᠢ ᠬᠠᠭᠤᠴᠢᠨ ᠬᠠᠳᠠᠭ ᠢ᠋ᠶ᠋ᠠᠷ ᠵᠦᠯᠭᠦᠵᠦ ᠨᠢᠭᠡ ᠨᠢᠳᠦ ᠪᠡᠨ ᠠᠨᠢᠨ ᠫᠤᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠷᠠᠭᠠ ᠶ᠋ᠢ ᠣᠨᠢᠯᠠᠭᠠᠳ ᠳᠡᠭᠡᠷᠡ ᠨᠢ ᠦᠯᠦ ᠮᠡᠳᠡᠭᠳᠡᠬᠦ ᠲᠣᠷᠭᠠᠨ ᠲᠣᠭᠣᠰᠣ ᠨᠠᠭᠠᠯᠳᠤᠭᠰᠠᠨ ᠢ᠋ ᠫᠦᠳ᠋ ᠬᠢᠨ ᠦᠯᠢᠶᠡᠵᠦ《ᠵᠠᠯᠠᠭᠤ ᠮᠢᠨᠢ ᠴᠢ᠂ ᠡᠨᠡ ᠶᠠᠭᠤᠮᠠ ᠶ᠋ᠢ ᠦᠵᠡᠪᠡ ᠤᠤ?》 ᠭᠡᠵᠦ ᠬᠥᠢᠲᠡᠮᠰᠦᠭ ᠢᠨᠢᠶᠡᠭᠡᠳ ᠠᠬᠤᠷ ᠫᠤᠤ ᠪᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠬᠠᠶᠠᠭᠰᠠᠨ ᠳ᠋ᠤ᠌ ᠭᠦᠯᠳᠡᠭᠡᠨᠡᠭᠰᠡᠨ ᠥᠨᠥ ᠫᠤᠤ ᠴᠡᠨᠡᠭᠲᠦ ᠬᠡᠪᠡᠯᠢ ᠳ᠋ᠡᠭᠡᠨ ᠲᠠᠢᠯᠳᠠᠵᠤ ᠬᠡᠳᠦ ᠡᠷᠭᠢᠯᠳᠦᠭᠡᠳ ᠫᠤᠤ ᠶ᠋ᠢᠨ ᠠᠮᠠ ᠨᠢ ᠮᠠᠨᠴᠤᠷᠭᠠ ᠶ᠋ᠢᠨ ᠥᠭᠡᠳᠡ ᠬᠠᠷᠠᠪᠠ᠃ ᠮᠠᠨᠴᠤᠷᠭᠠ ᠠᠬᠤᠷ ᠫᠤᠤ ᠪᠠᠨ ᠭᠠᠷᠭᠠᠵᠤ ᠠᠷᠴᠢᠬᠤᠢᠴᠠ ᠪᠣᠯᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠰᠢᠳᠡᠭᠰᠡᠨ ᠨᠢ ᠴᠠᠭᠠᠳᠤᠬᠢ ᠶ᠋ᠢᠨ ᠢ᠋ᠶ᠋ᠡᠨ ᠰᠢᠷᠡᠭᠡ ᠠᠯᠠᠭᠠᠳᠠᠵᠤ ᠬᠡᠭᠵᠢᠭᠦᠨ ᠳᠤᠤᠭᠠᠷᠤᠭᠰᠠᠨ ᠤ᠋ ᠬᠠᠷᠢᠭᠤ ᠨᠢ ᠪᠠᠢᠯᠠ᠃ ᠲᠡᠭᠡᠬᠦ ᠳ᠋ᠦ᠍ ᠴᠠᠭᠠᠳᠤᠬᠢ ᠨᠢ ᠪᠠᠰᠠ ᠲᠡᠢᠮᠦ ᠠᠮᠠᠷᠬᠠᠨ ᠮᠥᠷᠥᠢ ᠪᠡᠨ ᠥᠭᠳᠡᠭ ᠡᠷᠡ ᠪᠢᠰᠢ ᠪᠠᠢᠵᠠᠢ᠃ ᠠᠩᠴᠢᠨᠵᠠᠪ᠂ ᠲᠡᠭᠦᠨ ᠦ᠌ ᠴᠠᠭᠠᠨᠠ ᠰᠠᠨᠠᠭᠠ ᠶ᠋ᠢ ᠨᠡᠪᠲᠡ ᠮᠡᠳᠡᠵᠦ᠄
— ᠫᠤᠤᠳᠠᠬᠤ ᠭᠡᠰᠡᠨ ᠪᠣᠯ ᠨᠠᠭᠠᠰᠢ ᠪᠠᠨ ᠰᠢᠭᠤᠳ ᠫᠤᠤᠳᠠ! ᠡᠷᠡ ᠶ᠋ᠢᠨ ᠴᠢᠮᠡᠭ ᠪᠡᠶᠡ ᠶ᠋ᠢᠨ ᠵᠡᠪᠰᠡᠭ ᠢ᠋ᠶ᠋ᠡᠨ ᠴᠦ᠍ ᠬᠤᠷᠢᠶᠠᠯᠭᠠᠭᠰᠠᠨ ᠬᠥᠮᠦᠨ ᠲᠠᠨ ᠢ᠋ ᠶᠠᠭᠠᠬᠢᠵᠤ ᠴᠢᠳᠠᠬᠤ ᠶᠤᠮ? ᠡᠷᠡ ᠶ᠋ᠢᠨ ᠨᠠᠭᠠᠳᠤᠮ ᠬᠠᠲᠠᠭᠤ ᠭᠡᠳᠡᠭ ᠴᠦ᠍ ᠪᠡᠶᠡ ᠪᠡᠨ ᠪᠠᠮᠪᠠᠢᠯᠠᠭᠰᠠᠨ ᠵᠡᠪᠰᠡᠭ ᠬᠥᠳᠡᠯᠭᠡᠵᠦ ᠬᠠᠯᠵᠠᠨ ᠰᠥᠷᠯᠡᠬᠦ ᠶ᠋ᠢ ᠪᠢ ᠦᠵᠡᠨ ᠶᠠᠳᠠᠨᠠ᠃ ᠡᠷᠡ ᠬᠥᠮᠦᠨ ᠤᠬᠠᠭᠠᠨ ᠰᠠᠮᠪᠠᠭᠠ᠂ ᠲᠠᠷ ᠲᠡᠩᠬᠡᠭᠡ ᠪᠡᠷ ᠢ᠋ᠶ᠋ᠡᠨ ᠡᠷᠡ ᠮᠥᠰᠥ ᠪᠡᠨ ᠰᠢᠯᠭᠠᠬᠤ ᠠ᠋ᠴᠠ ᠪᠢᠰᠢ ᠴᠢᠮᠠ ᠰᠢᠭ ᠢᠩᠭᠢᠳᠡᠭ ᠦᠭᠡᠢ ᠶᠦᠮ ᠰᠢᠦ! ᠭᠡᠯᠡ᠃
— ᠬᠥᠬᠦᠦᠷ ᠬᠠᠪᠲᠠᠭᠠ᠂ ᠬᠡᠲᠡ ᠬᠢᠲᠤᠭᠠ ᠶ᠋ᠢ ᠴᠢᠨᠢ ᠪᠢ ᠲᠣᠨᠣᠭᠰᠠᠨ ᠦᠭᠡᠢ ᠭᠡᠰᠡᠨ ᠳ᠋ᠦ᠍ ᠠᠩᠴᠢᠨᠵᠠᠪ᠄
— ᠲᠡᠷᠡ ᠡᠮᠦᠨᠡ ᠴᠢᠨᠢ ᠶᠠᠭᠤ ᠪᠣᠢ? ᠭᠡᠪᠡ᠃
— ᠣ᠂ ᠡᠨᠡ ᠤᠤ? ᠭᠡᠵᠦ ᠡᠮᠦᠨᠡ ᠨᠢ ᠲᠠᠯᠪᠢᠭᠠᠰᠤᠲᠠᠢ ᠬᠥᠬᠦᠦᠷ᠂ ᠬᠢᠲᠤᠭᠠ᠂ ᠭᠠᠩᠰᠠ ᠭᠤᠷᠪᠠ ᠶ᠋ᠢ ᠬᠠᠷᠠᠭᠠᠳ《ᠶᠠᠭ ᠳᠠ᠂ ᠡᠭᠦᠨ ᠢ᠋ᠶ᠋ᠡᠷ ᠴᠢᠨᠢ ᠴᠢᠮᠠᠶ᠋ᠢ ᠮᠣᠩᠭᠣᠯ ᠶᠤᠮ ᠪᠠᠢᠨᠠ᠂ ᠮᠥᠨ ᠴᠦ᠍ ᠰᠠᠢᠨ ᠡᠷᠡ ᠶ᠋ᠢᠨ ᠡᠳ᠋ᠯᠡᠬᠦᠨ ᠪᠠᠢᠨᠠ ᠭᠡᠳᠡᠭ ᠢ᠋ ᠮᠡᠳᠡᠵᠦ ᠴᠠᠭᠠᠳᠤᠬᠢ ᠨᠤᠭᠤᠳ ᠤ᠋ᠨ ᠭᠠᠷ ᠠ᠋ᠴᠠ ᠴᠢᠮᠠᠶ᠋ᠢ ᠰᠤᠯᠠᠯᠠᠨ ᠡᠨᠳᠡ ᠨᠠᠳᠠ ᠲᠠᠢ ᠰᠢᠷᠡᠭᠡ ᠬᠠᠪᠴᠢᠨ ᠴᠠᠢ ᠣᠭᠣᠴᠢᠯᠠᠵᠤ ᠴᠢᠯᠥᠭᠡᠲᠡᠢ ᠶᠠᠷᠢᠯᠴᠠᠬᠤ ᠵᠠᠪ ᠣᠯᠭᠣᠭᠰᠠᠨ ᠳᠠ! ᠡᠰᠡ ᠲᠡᠢᠮᠦ ᠪᠣᠯ ᠬᠤᠪᠢ ᠵᠠᠶᠠᠭᠠ ᠴᠢᠨᠢ ᠬᠠᠮᠢᠭᠠᠰᠢ ᠪᠠᠨ ᠬᠠᠵᠠᠢᠬᠤ ᠪᠠᠨ ᠴᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ ᠳᠠ》 ᠭᠡᠵᠦ ᠢᠨᠵᠠᠭᠠᠨ ᠬᠡ ᠲᠡᠢ ᠬᠠᠪᠲᠠᠭᠠᠨ ᠠ᠋ᠴᠠ ᠬᠦᠷᠡᠩ ᠵᠢᠩᠰᠡ ᠲᠡᠢ ᠬᠦᠬᠦᠷ ᠭᠠᠷᠭᠠᠵᠤ ᠶᠡᠬᠡ ᠯᠡ ᠱᠣᠬᠣᠭᠣᠷᠬᠠᠨᠠ᠃
ᠠᠩᠴᠢᠨᠵᠠᠪ ᠡᠨᠡ ᠬᠦ᠌ ᠳᠡᠭᠡᠷᠡᠮ ᠦ᠋ᠳ ᠲᠡᠭᠡᠨ ᠵᠠᠩᠭᠤᠢᠳᠠ ᠭᠡᠵᠦ ᠡᠷᠭᠦᠭᠳᠡᠭᠰᠡᠨ ᠮᠠᠷᠵᠠᠩ ᠡᠷᠡ ᠶ᠋ᠢ ᠬᠠᠷᠠᠬᠤ ᠳᠣᠳᠣᠮ ᠡᠭᠳᠡᠭᠦᠦ ᠨᠢ ᠬᠦᠷᠴᠦ᠂ ᠨᠡᠩ ᠴᠦ᠍ ᠬᠥᠬᠦᠦᠷ ᠢ᠋ ᠨᠢ ᠱᠣᠬᠣᠭᠣᠷᠬᠠᠵᠤ ᠪᠠᠢᠭᠠ ᠶ᠋ᠢ ᠬᠠᠷᠠᠭᠠᠳ᠂ ᠡᠨᠡ ᠵᠣᠯᠢᠭ ᠮᠠᠨᠤᠨ ᠬᠥᠬᠦᠦᠷ ᠲᠦ᠍ ᠮᠢᠨᠢ ᠳᠤᠷᠠᠯᠠᠵᠤ ᠪᠠᠢᠬᠤ ᠴᠢᠷᠠᠢ᠃《ᠡᠴᠢᠭᠡ ᠶ᠋ᠢᠨ ᠴᠢᠨᠢ ᠪᠤᠶᠠᠨ ᠶᠤᠮ ᠠ᠋᠂ ᠠᠮᠢᠲᠠᠢ ᠪᠠᠨ ᠬᠣᠯᠪᠣᠵᠤ ᠶᠠᠪᠤ》 ᠭᠡᠵᠦ ᠡᠵᠢ ᠨᠢ ᠲᠡᠭᠦᠨ ᠳ᠋ᠦ᠍ ᠦᠯᠡᠳᠡᠭᠡᠭᠰᠡᠨ ᠮᠠᠨᠤᠨ ᠬᠥᠬᠦᠦᠷ ᠢ᠋ᠶ᠋ᠡᠨ ᠡᠷᠬᠡ ᠦᠭᠡᠢ ᠬᠠᠷᠠᠮᠨᠠᠬᠤ ᠪᠣᠳᠣᠯ ᠲᠥᠷᠥᠭᠳᠡᠵᠦ᠂ ᠮᠠᠭᠤ ᠰᠠᠢᠨ ᠳᠡᠭᠡᠷᠡᠮ ᠲᠤᠨᠤᠭᠠᠨ ᠤ᠋ ᠬᠠᠷᠠ ᠰᠠᠪᠠᠷ ᠤ᠋ᠨ ᠣᠷᠣᠮ ᠪᠠ ᠰᠢᠨᠤᠭ ᠨᠢᠳᠦᠨ ᠦ᠌ ᠬᠢᠨᠢ ᠠᠳᠠ ᠬᠣᠣᠷ ᠮᠠᠨᠤᠨ ᠳ᠋ᠤᠨᠢ ᠰᠢᠩᠭᠡᠭᠦᠵᠡᠢ ᠭᠡᠵᠦ ᠪᠣᠳᠣᠬᠤ ᠲᠣᠰᠤᠮ ᠬᠣᠷᠣ ᠨᠢ ᠬᠥᠳᠡᠯᠵᠦ ᠰᠢᠷᠡᠭᠡ ᠬᠠᠪᠴᠢᠵᠤ ᠰᠠᠭᠤᠭᠠ ᠡᠨᠡ ᠬᠦ᠌ ᠮᠠᠷᠵᠠᠩ ᠡᠷᠡ ᠶ᠋ᠢ ᠵᠠᠭᠠᠮᠠᠳᠠᠴᠢᠬᠠᠮᠠᠷ ᠰᠠᠨᠠᠭᠳᠠᠨᠠ᠃
— ᠵᠠ᠂ ᠰᠠᠢᠬᠠᠨ ᠡᠳ᠋ ᠶᠦᠮ᠃ ᠵᠢᠩᠬᠢᠨᠢ ᠡᠷᠲᠡᠨ ᠦ᠌ ᠫᠢᠶᠤᠤᠷ ᠮᠠᠨᠤ② ᠭᠡᠳᠡᠭ ᠡᠨᠡ ᠪᠠᠢᠨᠠ ᠰᠢᠦ! ᠤᠳᠤᠮ ᠳᠠᠮᠵᠢᠳᠠᠭ ᠤᠷᠲᠤ ᠨᠠᠰᠤᠲᠠᠢ ᠡᠷᠳᠡᠨᠢ! ᠭᠡᠵᠦ ᠲᠡᠷᠡ ᠡᠷᠡ ᠥᠨᠥᠬᠢ ᠮᠠᠨᠤᠨ ᠬᠥᠬᠦᠦᠷ ᠢ᠋ ᠡᠷᠭᠢᠭᠦᠯᠦᠨ ᠤᠷᠪᠠᠭᠤᠯᠤᠨ ᠰᠢᠨᠵᠢᠵᠦ《ᠴᠢ ᠡᠭᠦᠨ ᠢ᠋ ᠬᠠᠮᠢᠭᠠ ᠠ᠋ᠴᠠ ᠣᠯᠪᠠ?》 ᠭᠡᠰᠡᠨ ᠲᠥᠯᠥᠪᠲᠡᠢ ᠲᠣᠯᠣᠭᠠᠢ ᠪᠠᠨ ᠭᠢᠯᠵᠢᠢᠯᠭᠡᠨ ᠠᠰᠠᠭᠤᠭᠰᠠᠨ ᠨᠢ ᠠᠩᠴᠢᠨᠵᠠᠪ ᠢ᠋ ᠶᠠᠭᠤ ᠭᠡᠵᠦ ᠬᠡᠯᠡᠬᠦ ᠪᠣᠯ ᠭᠡᠰᠡᠨ ᠰᠢᠭ ᠪᠠᠢᠪᠠ᠃
— ᠮᠢᠨᠦ ᠡᠴᠢᠭᠡ ᠳᠡᠭᠡᠳᠦᠰ ᠦ᠋ᠨ ᠥᠪ ᠶᠦᠮ᠂ ᠲᠠ ᠨᠠᠳᠠ ᠲᠡᠭᠦᠨ ᠢ᠋ ᠮᠢᠨᠢ ᠪᠤᠴᠠᠭᠠᠵᠤ ᠥᠭᠭᠦᠭᠡᠴᠢ! ᠥᠭᠡᠷᠡ ᠨᠢ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍ ᠲᠡᠷᠡ᠄
— ᠡᠴᠢᠭᠡ ᠳᠡᠭᠡᠳᠦᠰ ᠦ᠋ᠨ ᠥᠪ ᠭᠡᠨᠡ ᠤᠤ? ᠪᠢᠰᠢ ᠪᠠ? ᠡᠨᠡ ᠴᠢᠨᠢ ᠮᠠᠨ ᠤ᠋ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠨᠣᠶᠠᠳ ᠬᠡᠷᠭᠡᠮᠲᠡᠳ ᠦ᠋ᠨ ᠭᠠᠷ ᠲᠤ ᠴᠦ᠍ ᠴᠥᠭᠡᠨ ᠬᠠᠷᠠᠭᠳᠠᠬᠤ ᠬᠣᠪᠣᠷ ᠡᠳ᠋ ᠦ᠋ᠨ ᠨᠢᠭᠡ ᠳᠡ᠃ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ ᠶ᠋ᠢᠨ ᠭᠠᠷ ᠲᠤ ᠪᠠᠢᠩᠭᠤ ᠡᠢᠮᠦᠷᠬᠦᠦ ᠫᠢᠶᠤᠤᠷ ᠮᠠᠨᠤᠨ ᠬᠥᠬᠦᠦᠷ ᠭᠢᠯᠠᠯᠵᠠᠵᠤ ᠪᠠᠢᠳᠠᠭ ᠰᠠᠨ ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍ ᠲᠡᠷᠡ ᠮᠠᠨᠤᠨ ᠬᠥᠬᠦᠦᠷ ᠦ᠋ᠨ ᠦᠨᠡ ᠴᠠᠨᠠ ᠬᠡᠴᠢᠨᠡᠭᠡᠨ ᠳᠠᠬᠢᠨ ᠢ᠋ᠶ᠋ᠠᠷ ᠥᠰᠴᠦ ᠲᠣᠮᠣᠷᠠᠭᠰᠠᠨ ᠰᠢᠭ᠋ ᠬᠡᠨ ᠬᠡᠨ ᠳ᠋ᠦ᠍ᠨᠢ ᠲᠡᠭᠡᠵᠦ ᠬᠠᠷᠠᠭᠳᠠᠪᠠ᠃
ᠲᠡᠷᠡ ᠮᠠᠷᠵᠠᠩ ᠡᠷᠡ ᠶ᠋ᠢᠨ ᠬᠡᠯᠡᠭᠰᠡᠨ ᠦᠭᠡ ᠪᠠ ᠭᠢᠯᠵᠢᠢᠭᠰᠡᠨ ᠲᠣᠯᠣᠭᠠᠢ ᠨᠢ ᠶᠠᠭ ᠯᠠ ᠠᠩᠴᠢᠨᠵᠠᠪ ᠴᠢ ᠠᠷᠠᠢ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ ᠶ᠋ᠢᠨ ᠲᠡᠷᠡ ᠮᠠᠨᠤᠨ ᠬᠥᠬᠦᠦᠷ ᠢ᠋ ᠲᠤᠨᠤᠴᠢᠬᠠᠭᠰᠠᠨ ᠪᠢᠰᠢ ᠪᠢᠵᠡ᠂ ᠡᠰᠡᠪᠡᠰᠦ ᠬᠤᠯᠠᠭᠠᠢᠯᠠᠴᠢᠬᠠᠭᠰᠠᠨ ᠤᠤ? ᠭᠡᠵᠦ ᠲᠣᠯᠣᠭᠠᠢ ᠶ᠋ᠢ ᠨᠢ ᠲᠣᠭᠰᠢᠵᠤ ᠬᠡᠯᠡᠭᠰᠡᠨ ᠰᠢᠭ ᠰᠠᠨᠠᠭᠳᠠᠵᠠᠢ᠃
— ᠮᠢᠩᠭᠠᠨᠪᠤᠤ ᠲᠤᠰᠠᠯᠠᠭᠴᠢ ᠶ᠋ᠢᠨ ᠬᠥᠬᠦᠦᠷ⁈ ᠭᠡᠵᠦ ᠠᠩᠴᠢᠨᠵᠠᠪ ᠨᠢᠭᠡ ᠬᠡᠰᠡᠭ ᠭᠠᠢᠬᠠᠨ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠢ᠋ᠶ᠋ᠠᠨ《ᠮᠠᠨᠤᠰ ᠶᠠᠭᠠᠬᠢᠵᠤ ᠲᠤᠰᠠᠯᠠᠭᠴᠢ ᠨᠣᠶᠠᠨ ᠤ᠋ ᠶᠠᠭᠤᠮᠠᠨ ᠳ᠋ᠤ᠌ ᠭᠣᠷᠢᠯᠠᠵᠤ ᠶᠠᠪᠤᠬᠤ ᠪᠣᠢ! ᠲᠡᠢᠮᠦ ᠪᠠᠢᠭᠰᠠᠨ ᠪᠣᠯ ᠥᠨᠥᠳᠥᠷ ᠡᠨᠡ ᠬᠢᠷᠢ ᠬᠥᠮᠦᠨ ᠳ᠋ᠦ᠍ ᠮᠠᠭᠤ ᠪᠠᠨ ᠦᠵᠡᠭᠦᠯᠵᠦ ᠶᠠᠪᠤᠬᠤ ᠦᠭᠡᠢ ᠪᠠᠢᠬᠠ》 ᠭᠡᠰᠡᠨ ᠳ᠋ᠦ᠍ ᠲᠡᠷᠡ ᠡᠷᠡ᠄
— ᠬᠡᠩ᠂ ᠳᠠᠭᠠᠬᠢ ᠲᠠᠢ ᠭᠡᠵᠦ ᠳᠠᠭᠠ ᠮᠣᠷᠢ ᠶ᠋ᠢ ᠪᠢᠲᠡᠭᠡᠢ ᠪᠠᠰᠤ ᠭᠡᠳᠡᠭ ᠢ᠋ᠶ᠋ᠡᠷ ᠴᠢ ᠴᠦ᠍ ᠮᠥᠨ ᠬᠥᠮᠦᠨ ᠦ᠌ ᠭᠠᠨᠵᠤᠭᠠ ᠪᠠᠭᠤᠯᠭᠠᠳᠠᠭ ᠡᠷᠡ ᠶ᠋ᠢᠨ ᠨᠢᠭᠡ ᠪᠠᠢᠵᠤ ᠮᠡᠳᠡᠨᠡ ᠭᠡᠰᠡᠨ ᠳ᠋ᠦ᠍ ᠠᠩᠴᠢᠨᠵᠠᠪ᠄
— ᠪᠣᠯᠢ! ᠲᠠᠨᠤᠰ ᠰᠢᠭ᠋ ᠬᠥᠮᠦᠨ ᠠᠮᠢᠲᠠᠨ ᠢ᠋ ᠲᠣᠨᠣᠵᠤ ᠬᠥᠨᠥᠭᠡᠳᠡᠭ ᠢᠷᠣᠠ ᠶ᠋ᠢᠨ ᠠᠮᠢᠲᠠᠨ ᠪᠢᠰᠢ ᠯᠡ ᠳᠡ! ᠭᠡᠰᠡᠨ ᠳ᠋ᠦ᠍ ᠲᠡᠷᠡ ᠡᠷᠡ ᠭᠡᠨᠡᠳᠲᠡ ᠠᠭᠰᠤᠷᠤᠨ᠄
— ᠬᠥᠮᠦᠨ ᠲᠤᠨᠤᠳᠠᠭ ᠢᠷᠣᠠ ᠶ᠋ᠢᠨ ᠠᠮᠢᠲᠠᠨ ᠭᠡᠨᠡ ᠠ᠋! ᠴᠢᠮᠠᠶ᠋ᠢ ᠬᠡᠵᠢᠶᠡ ᠲᠣᠨᠣᠪᠠ ᠪᠢ? ᠭᠡᠵᠦ ᠠᠬᠤᠷ ᠫᠤᠤ ᠪᠠᠨ ᠠᠪᠴᠤ ᠬᠤᠸᠠᠷᠳ᠋ ᠬᠢᠨ ᠰᠤᠮᠤᠯᠠᠪᠠ᠃
ᠠᠩᠴᠢᠨᠵᠠᠪ ᠡᠨᠡ ᠴᠢᠨᠣᠠ ᠰᠢᠭ᠋ ᠠᠷᠬᠢᠷᠠᠭᠰᠠᠨ ᠡᠷᠡ ᠡᠴᠡ ᠥᠴᠦᠬᠡᠨ ᠴᠦ᠍ ᠭᠡᠯᠮᠡᠭᠳᠡᠭᠰᠡᠨ ᠦᠭᠡᠢ ᠪᠣᠯᠪᠠᠴᠤ ᠳᠡᠭᠡᠷᠡᠮ ᠲᠣᠨᠣᠭᠠ ᠬᠢᠳᠡᠭ ᠬᠥᠮᠦᠰ ᠦ᠋ᠨ ᠵᠠᠩ ᠠᠷᠠᠨᠰᠢ ᠶ᠋ᠢ ᠪᠠᠷᠤᠭᠯᠠᠳᠠᠭ ᠤᠴᠢᠷ《ᠡᠨᠡ ᠮᠠᠷᠵᠠᠩ ᠡᠷᠡ ᠶ᠋ᠢᠨ ᠲᠡᠨᠡᠭ ᠨᠢ ᠬᠥᠳᠡᠯᠪᠡᠯ ᠶᠠᠭᠠᠬᠢᠵᠤ ᠴᠦ᠍ ᠮᠠᠭᠠᠳ ᠦᠭᠡᠢ》 ᠭᠡᠵᠦ ᠬᠡᠷᠰᠡᠦᠬᠡᠨ ᠪᠣᠳᠣᠯ ᠳ᠋ᠠᠭᠠᠨ ᠠᠪᠲᠠᠵᠤ᠄
— ᠲᠠ ᠴᠢᠨᠢ ᠶᠠᠭᠠᠬᠢᠵᠤ ᠪᠠᠢᠭᠠ ᠨᠢ ᠡᠨᠡ ᠪᠣᠢ? ᠬᠥᠮᠦᠨ ᠦ᠌ ᠶᠠᠭᠤᠮᠠ ᠶ᠋ᠢ ᠲᠣᠨᠣᠵᠤ ᠳᠡᠭᠡᠷᠡᠮᠳᠡᠴᠢᠬᠡᠭᠡᠳ ᠪᠠᠰᠠ ᠨᠠᠳᠠ ᠫᠤᠤ ᠲᠤᠯᠭᠠᠨᠠ? ᠳᠡᠮᠡᠢ ᠬᠡᠯᠡ ᠠᠮᠠᠨ ᠤ᠋ ᠵᠢᠭᠤᠷᠠᠭᠠᠨ ᠬᠢᠬᠦ ᠡᠴᠡ ᠨᠢᠭᠡᠮᠦᠰᠦᠨ ᠴᠠᠭᠠᠰᠢ ᠨᠢ ᠬᠠᠨᠳᠤᠭᠤᠯᠴᠢᠬᠠᠪᠠᠯ ᠳᠡᠭᠡᠷᠡ ᠪᠢᠰᠢ ᠤᠤ! ᠭᠡᠰᠡᠨ ᠳ᠋ᠦ᠍ ᠲᠡᠷᠡ ᠡᠷᠡ ᠤᠯᠠᠮ ᠡᠭᠳᠡᠭᠦᠦ ᠨᠢ ᠬᠦᠷᠴᠦ ᠫᠤᠤ ᠪᠠᠨ ᠲᠡᠭᠦᠨ ᠦ᠌ ᠵᠦᠭ ᠴᠢᠭᠯᠡᠭᠦᠯᠵᠦ᠄
— ᠠᠮᠠ ᠪᠠᠨ ᠣᠯᠵᠤ ᠲᠣᠩᠭᠣᠰ! ᠴᠠᠭᠠᠳᠤ ᠬᠣᠶᠠᠷ ᠲᠤ ᠮᠢᠨᠢ ᠬᠢᠭᠳᠡᠭᠰᠡᠨ ᠦᠭᠡᠢ ᠳ᠋ᠡᠭᠡᠨ ᠵᠠᠶᠠᠭᠠᠨ ᠳ᠋ᠠᠭᠠᠨ ᠵᠠᠯᠪᠠᠷᠢ! ᠭᠡᠯᠡ᠃
— ᠫᠤᠤ ᠶ᠋ᠢᠨ ᠢ᠋ᠶ᠋ᠡᠨ ᠣᠨᠢ ᠶ᠋ᠢ ᠴᠠᠭᠠᠰᠢ ᠨᠢ! ᠨᠢᠭᠦᠯ! ᠵᠢᠩᠬᠢᠨᠢ ᠡᠷᠡ ᠬᠥᠮᠦᠨ ᠭᠡᠰᠡᠨ ᠪᠣᠯ ᠪᠢᠲᠡᠭᠡᠢ ᠨᠢᠭᠦᠯ ᠬᠢ! ᠬᠣᠶᠠᠷ《ᠰᠠᠢᠨ ᠨᠣᠬᠠᠢ》 ᠲᠡᠵᠢᠭᠡᠭᠰᠡᠨ ᠳ᠋ᠡᠭᠡᠨ ᠢᠩᠭᠢᠵᠦ ᠰᠠᠭᠰᠠᠭᠤᠷᠠᠬᠤ ᠳ᠋ᠠᠭᠠᠨ᠁ ᠭᠡᠰᠡᠨ ᠳ᠋ᠦ᠍ ᠲᠡᠷᠡ ᠡᠷᠡ ᠬᠠᠳ ᠬᠠᠳ ᠭᠡᠵᠦ ᠢᠨᠢᠶᠡᠵᠦ᠄
— ᠲᠡᠭᠡᠯᠭᠦᠢ ᠬᠦ᠂ ᠲᠡᠷᠡ ᠬᠠᠷᠠ ᠨᠢᠳᠦᠲᠦ ᠭᠡᠭᠴᠢ ᠰᠠᠢᠨ《ᠠᠩ》 ᠤ᠋ᠨ ᠨᠣᠬᠠᠢ᠂ ᠰᠦᠷᠡᠬᠡᠢ ᠱᠤᠮ ᠤ᠋ᠨ ᠭᠠᠷᠯᠢᠭ ᠰᠢᠦ! ᠭᠡᠳ ᠣᠨᠢᠯᠠᠭᠰᠠᠨ ᠫᠤᠤ ᠪᠠᠨ ᠬᠤᠷᠢᠶᠠᠵᠤ《ᠳᠡᠭᠦᠦ ᠶ᠋ᠢᠨ ᠠᠯᠳᠠᠷ ᠬᠡᠨ ᠪᠢᠯᠡ?》 ᠭᠡᠵᠦ ᠭᠡᠨᠡᠳᠲᠡ ᠵᠡᠭᠦᠳᠦ ᠡᠴᠡ ᠪᠡᠨ ᠰᠡᠷᠡᠭᠰᠡᠨ ᠰᠢᠭ ᠨᠡᠷᠡ ᠠᠯᠳᠠᠷ ᠢ᠋ ᠨᠢ ᠠᠰᠠᠭᠤᠪᠠ᠃
— ᠠᠩᠴᠢᠨᠵᠠᠪ᠃
— ᠠᠩᠴᠢᠨᠵᠠᠪ⁈
— ᠮᠥᠨ᠂ ᠠᠩᠴᠢᠨᠵᠠᠪ!
— ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠤ᠋ ᠡᠪᠦᠷ ᠡᠴᠡ ᠰᠢᠨᠡ ᠬᠠᠲᠤᠨ ᠢ᠋ ᠨᠢ ᠪᠤᠯᠢᠶᠠᠵᠤ ᠳᠤᠲᠠᠭᠠᠳᠠᠭ ᠠᠩᠴᠢᠨᠵᠠᠪ ᠮᠥᠨ ᠤᠤ?
— ᠪᠢ ᠬᠦᠩ ᠨᠣᠶᠠᠨ ᠤ᠋ ᠡᠪᠦᠷ ᠡᠴᠡ ᠬᠠᠲᠤᠨ ᠢ᠋ ᠨᠢ ᠪᠤᠯᠢᠶᠠᠭᠰᠠᠨ ᠪᠢᠰᠢ! ᠬᠠᠷᠢᠨ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠮᠢᠨᠦ ᠠᠮᠠᠷᠠᠭ ᠢ᠋ ᠪᠤᠯᠢᠶᠠᠭᠰᠠᠨ ᠠ᠋ᠴᠠ ᠪᠢᠰᠢ! ᠭᠡᠰᠡᠨ ᠳ᠋ᠦ᠍ ᠥᠨᠥᠬᠢ ᠮᠠᠷᠵᠠᠩ ᠡᠷᠡ ᠬᠠᠨᠵᠤᠨ ᠠ᠋ᠴᠠ ᠪᠠᠨ ᠦᠰᠦᠷᠦᠨ ᠪᠠᠭᠤᠵᠤ᠄
— ᠬᠠᠷᠠ ᠨᠢᠳᠦᠲᠦ ᠠ᠋! ᠭᠡᠵᠦ ᠵᠠᠩᠳᠠᠩᠭᠤᠢ ᠬᠠᠰᠬᠢᠷᠤᠭᠰᠠᠨ ᠳ᠋ᠤ᠌ ᠡᠭᠦᠳᠡ ᠮᠠᠨᠠᠵᠤ ᠵᠣᠭᠰᠣᠭᠰᠠᠨ ᠥᠨᠥᠬᠢ ᠨᠢ᠂ ᠡᠵᠡᠨ ᠦ᠌ ᠪᠡᠨ ᠬᠠᠬᠢᠷ ᠳᠠᠭᠤ ᠪᠠᠷ ᠳᠠᠷᠤᠢᠬᠠᠨ ᠣᠷᠣᠵᠤ ᠢᠷᠡᠨ᠂ ᠪᠥᠰᠡᠨ ᠳ᠋ᠡᠬᠢ ᠫᠤᠤ ᠪᠠᠨ ᠲᠡᠮᠲᠡᠷᠢᠨ ᠡᠵᠡᠨ ᠦ᠌ ᠪᠡᠨ ᠭᠠᠷ ᠠ᠋ᠴᠠ ᠶᠠᠰᠤ ᠭᠣᠷᠢᠳᠠᠭᠰᠠᠨ ᠭᠥᠯᠥᠭᠡ ᠰᠢᠭ ᠮᠠᠷᠵᠠᠩ ᠡᠷᠡ ᠶ᠋ᠢ ᠪᠦᠯᠲᠡᠭᠡᠨᠡᠨ ᠬᠠᠷᠠᠨᠠ᠁
ᠠᠩᠴᠢᠨᠵᠠᠪ ᠴᠦ᠍ ᠬᠠᠨᠵᠤᠨ ᠠ᠋ᠴᠠ ᠱᠠᠯᠠᠪ ᠪᠠᠭᠤᠵᠤ《ᠣᠳᠣ ᠴᠦ᠍ ᠬᠠᠷᠠᠯᠠᠭᠰᠠᠨ ᠠ᠋᠂ ᠡᠨᠡ ᠵᠣᠯᠢᠭ ᠤ᠋ᠳ ᠨᠠᠮᠠᠶ᠋ᠢ ᠬᠦᠩ ᠦ᠋ᠨ ᠶᠠᠮᠤᠨ ᠳ᠋ᠤ᠌ ᠳᠠᠷᠤᠵᠤ ᠠᠪᠠᠴᠢᠭᠰᠠᠭᠠᠷ ᠴᠦ᠍ ᠁》 ᠭᠡᠵᠦ ᠪᠣᠳᠣᠵᠤ ᠵᠠᠪᠳᠤᠨ ᠡᠳᠡᠨᠥᠰ ᠲᠡᠢ ᠡᠷᠡ ᠶ᠋ᠢ ᠪᠡᠨ ᠦᠵᠡᠯᠴᠡᠵᠦ ᠪᠠᠢᠭᠠᠳ ᠪᠣᠯᠤᠶᠠ ᠭᠡᠵᠦ ᠨᠢᠳᠤᠷᠭᠠ ᠪᠠᠨ ᠵᠠᠩᠭᠢᠳᠤᠨ ᠪᠠᠢᠪᠠ᠃
— ᠠᠩᠴᠢᠨᠵᠠᠪ᠂ ᠰᠠᠭᠤ! ᠶᠠᠭᠠᠬᠢᠵᠤ ᠪᠠᠢᠭᠠ ᠴᠢᠨᠢ ᠡᠨᠡ ᠪᠣᠢ! ᠬᠠᠷᠠ ᠨᠢᠳᠦᠲᠦ ᠴᠢ ᠶᠠᠪᠤᠵᠤ ᠠᠷᠢᠬᠢ ᠠᠪᠴᠢᠷᠠ! ᠭᠡᠰᠡᠨ ᠳ᠋ᠦ᠍ ᠬᠠᠷᠠ ᠨᠢᠳᠦᠲᠦ᠄
— ᠵᠠ! ᠭᠡᠳ ᠭᠠᠷᠪᠠ᠃
— ᠴᠢᠮᠠᠶ᠋ᠢ ᠪᠠᠷᠢᠵᠤ ᠬᠦᠯᠢᠭᠡᠳ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠳ᠋ᠤ᠌ ᠬᠦᠷᠭᠡᠴᠢᠬᠡᠬᠦ ᠡᠴᠡ ᠠᠶᠤᠪᠠ ᠤᠤ? ᠳᠡᠭᠦᠦ ᠮᠢᠨᠢ᠂ ᠠ᠂ ᠰᠠᠭᠤ᠂ ᠰᠠᠭᠤ! ᠬᠣᠶᠠᠭᠤᠯᠠ ᠪᠠᠨ ᠰᠠᠢᠬᠠᠨ ᠵᠣᠭᠣᠭᠳᠠᠵᠤ ᠰᠠᠭᠤᠶᠠ᠃ ᠴᠢ ᠰᠠᠢᠨ ᠡᠷᠡ ᠪᠠᠢᠨᠠ᠁ ᠭᠡᠵᠦ ᠲᠡᠷᠡ ᠮᠠᠷᠵᠠᠩ ᠡᠷᠡ ᠡᠶᠡᠷᠭᠦᠨ ᠳᠤᠤᠭᠠᠷᠴᠤ ᠠᠩᠴᠢᠨᠵᠠᠪ ᠤ᠋ᠨ ᠮᠥᠷᠥ ᠶ᠋ᠢ ᠲᠠᠪᠰᠢᠵᠤ ᠬᠠᠨᠵᠤᠨ ᠳᠡᠭᠡᠷᠡ ᠰᠠᠭᠤᠯᠭᠠᠪᠠ᠃
ᠠᠩᠴᠢᠨᠵᠠᠪ ᠡᠨᠡ ᠬᠦ᠌ ᠬᠦᠢᠲᠡᠨ ᠲᠡᠢ ᠬᠠᠯᠠᠭᠤᠨ ᠲᠠᠢ ᠡᠷᠡ ᠶ᠋ᠢ ᠭᠠᠢᠬᠠᠵᠤ᠂ ᠶᠠᠭᠠᠬᠢᠭᠠᠳ ᠮᠢᠨᠦ ᠨᠡᠷᠡ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠭᠡᠨᠡᠳᠲᠡ ᠨᠠᠳᠠ ᠰᠠᠢᠮᠰᠤᠷᠠᠵᠤ ᠫᠤᠤ ᠲᠤᠯᠭᠠᠳᠠᠭ ᠢ᠋ᠶ᠋ᠠᠨ ᠪᠣᠯᠢᠭᠠᠳ᠂ ᠠᠷᠢᠬᠢᠳᠠᠬᠤ ᠪᠣᠯᠴᠢᠬᠠᠪᠠ? ᠠᠷᠠᠢ ᠯᠠ ᠨᠠᠮᠠᠶ᠋ᠢ ᠰᠣᠭᠲᠣᠭᠠᠵᠤ ᠪᠠᠢᠭᠠᠳ ᠠᠷᠭᠠᠯᠠᠬᠤ ᠭᠡᠵᠦ ᠪᠠᠢᠭᠠ ᠪᠢᠰᠢ ᠪᠢᠵᠡ? ᠡᠨᠡ ᠮᠠᠭᠤ ᠰᠠᠢᠨ ᠳᠡᠭᠡᠷᠡᠮ ᠦ᠋ᠳ ᠡᠴᠡ ᠬᠡᠷᠰᠡᠦᠯᠡᠯᠲᠡᠢ ᠭᠡᠵᠦ ᠲᠡᠭᠦᠨ ᠢ᠋ ᠰᠡᠵᠢᠭ ᠲᠠᠢ ᠨᠢᠳᠦ ᠪᠡᠷ ᠬᠠᠷᠠᠭᠰᠠᠨ ᠳ᠋ᠤ᠌ ᠲᠡᠷᠡ ᠮᠠᠷᠵᠠᠩ ᠡᠷᠡ᠄
— ᠪᠠᠭᠠ ᠬᠠᠲᠤᠨ ᠢ᠋ ᠠᠪᠴᠤ ᠳᠤᠲᠠᠭᠠᠳᠠᠭ ᠲᠡᠷᠡ ᠵᠢᠯ ᠴᠢ ᠨᠠᠳᠠ ᠢᠩᠭᠢᠵᠦ ᠥᠷᠲᠥᠭᠰᠡᠨ ᠪᠣᠯ ᠴᠦ᠍ ᠦᠨᠡᠬᠡᠷ ᠴᠢᠮᠠᠶ᠋ᠢ ᠠᠲᠤᠷᠢᠲᠠᠯᠠ ᠬᠦᠯᠢᠵᠦ ᠬᠦᠩ ᠨᠣᠶᠠᠨ ᠤ᠋ ᠡᠪᠦᠳᠦᠭ ᠳᠣᠣᠷᠠ ᠰᠥᠭᠥᠳᠬᠡᠬᠦ ᠪᠠᠢᠭᠰᠠᠨ ᠳᠠ! ᠥᠨᠥᠳᠥᠷ ᠬᠠᠷᠢᠨ ᠲᠡᠢᠮᠦ ᠪᠢᠰᠢ ᠠ᠋᠂ ᠪᠣᠯᠳᠠᠭ ᠰᠠᠨ ᠪᠣᠯ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠢ᠋ ᠪᠠᠷᠢᠵᠤ ᠠᠪᠤᠨ ᠴᠢᠨᠦ ᠡᠮᠦᠨᠡ ᠰᠥᠭᠥᠳᠬᠡᠵᠦ ᠪᠠᠭᠠ ᠬᠠᠲᠤᠨ ᠢ᠋ ᠪᠤᠲᠠ ᠪᠡᠶᠡ ᠪᠡᠷ ᠨᠢ ᠴᠢᠮᠠ ᠳ᠋ᠤ᠌ ᠬᠦᠷᠭᠡᠵᠦ ᠥᠭᠬᠦ ᠰᠠᠨ ᠪᠢᠯᠡ᠁ ᠭᠡᠳ ᠳᠡᠰ ᠳᠡᠰ ᠢᠨᠢᠶᠡᠨᠡ᠃
— ᠲᠠ ᠶᠠᠭᠠᠬᠢᠬᠤ ᠳ᠋ᠠᠭᠠᠨ ᠰᠢᠷᠠᠪ ᠨᠣᠶᠠᠨ ᠢ᠋ ᠢᠩᠭᠢᠵᠦ ᠬᠣᠷᠣᠰᠳᠠᠭ ᠪᠣᠢ?
— ᠠᠢ᠂ ᠬᠡᠯᠡᠪᠡᠯ ᠦᠭᠡ ᠤᠷᠲᠤ᠂ ᠦᠯᠢᠭᠡᠷ ᠰᠢᠦᠬᠡᠨ ᠶᠦᠮ ᠠ᠋!
ᠡᠨᠡ ᠦᠶᠡ ᠳ᠋ᠦ᠍ ᠥᠨᠥᠬᠢ ᠬᠠᠷᠠ ᠨᠢᠳᠦᠲᠦ ᠭᠠᠯᠠᠭᠤᠨ ᠬᠦᠵᠦᠭᠦᠲᠦ ᠬᠠᠷᠠ ᠪᠣᠳᠣᠩ ᠳ᠋ᠤ᠌ ᠠᠷᠢᠬᠢ ᠬᠠᠯᠠᠭᠠᠵᠤ ᠠᠪᠴᠢᠷᠠᠪᠠ᠃ ᠲᠡᠭᠦᠨ ᠦ᠌ ᠠᠷᠤ ᠠ᠋ᠴᠠ ᠨᠥᠭᠦᠭᠡ ᠨᠢᠭᠡ ᠨᠢ ᠬᠣᠶᠠᠷ ᠬᠤᠷᠤᠭᠤ ᠵᠤᠵᠠᠭᠠᠨ ᠨᠤᠯ ᠰᠢᠷᠠ ᠥᠭᠡᠬᠦ ᠴᠡᠴᠡᠷᠭᠡᠨᠡᠭᠰᠡᠨ ᠦᠬᠡᠷ ᠦ᠋ᠨ ᠬᠠᠪᠢᠷᠭᠠ ᠣᠷᠣᠭᠤᠯᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠡᠷᠡ ᠠᠩᠴᠢᠨᠵᠠᠪ ᠲᠤ ᠠᠷᠢᠬᠢ ᠬᠤᠨᠳᠠᠭᠠᠯᠠᠵᠤ᠄
— ᠴᠢ ᠪᠢᠳᠡ ᠬᠣᠶᠠᠷ ᠤ᠋ᠨ ᠬᠤᠪᠢ ᠲᠠᠪᠢᠯᠠᠩ ᠠᠳᠠᠯᠢᠬᠠᠨ᠃ ᠦᠢᠯᠡ ᠲᠡᠢ ᠣᠳᠣᠨ ᠳ᠋ᠤ᠌ ᠵᠠᠶᠠᠭᠠᠭᠰᠠᠨ ᠪᠠᠢᠵᠤ ᠳᠠ᠂ ᠴᠢ ᠪᠢᠳᠡ ᠬᠣᠶᠠᠷ ᠬᠡᠳᠦᠢᠪᠡᠷ ᠠᠩᠬᠠ ᠤᠴᠠᠷᠠᠵᠤ ᠪᠠᠢᠭᠠ ᠪᠣᠯᠪᠠᠴᠤ ᠴᠢ ᠬᠠᠷᠢᠨ ᠨᠠᠳᠠ ᠰᠠᠢᠨ ᠡᠷᠡ ᠪᠡᠷ ᠲᠠᠨᠢᠭᠳᠠᠭᠰᠠᠨ᠃《ᠠᠵᠢᠷᠭᠠᠨ ᠬᠠᠷᠠ》 ᠭᠡᠰᠡᠨ ᠨᠡᠷᠡ ᠶ᠋ᠢ ᠴᠢᠨᠢ ᠠᠯᠢ ᠤᠵᠠᠭᠤᠷ ᠲᠤᠭᠤᠯᠵᠤ ᠪᠠᠢᠯᠠ᠃ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠨᠠᠳᠠ ᠨᠢᠭᠡ ᠯᠡ ᠡᠯᠢᠭᠡᠰᠡᠭ ᠰᠠᠨᠠᠭᠳᠠᠭᠠᠳ ᠪᠠᠢᠭᠰᠠᠨ ᠨᠢ ᠥᠨᠥᠳᠥᠷ《ᠠᠵᠢᠷᠭᠠᠨ ᠬᠠᠷᠠ》 ᠲᠠᠢ ᠪᠠᠨ ᠡᠨᠳᠡ ᠠᠭᠤᠯᠵᠠᠬᠤ ᠢᠷᠦᠭᠡᠯ ᠲᠡᠢ ᠪᠠᠢᠵᠠᠢ᠃ ᠵᠠ᠂ ᠲᠠᠨᠢᠯᠴᠠᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠨᠢᠭᠡ ᠬᠤᠨᠳᠠᠭᠠ ᠤᠤᠭᠤᠴᠢᠬᠠᠶᠠ ᠭᠡᠳ ᠬᠤᠨᠳᠠᠭᠠ ᠲᠤᠯᠭᠠᠭᠰᠠᠨ ᠳ᠋ᠤ᠌ ᠬᠤᠨᠳᠠᠭᠠ ᠲᠠᠢ ᠠᠷᠢᠬᠢ ᠶᠠᠯᠢ ᠦᠭᠡᠢ ᠴᠠᠯᠭᠢᠨᠠ᠃
ᠲᠡᠷᠡ ᠡᠷᠡ ᠬᠤᠨᠳᠠᠭᠠ ᠲᠠᠢ ᠠᠷᠢᠬᠢ ᠪᠠᠨ ᠨᠢᠭᠡ ᠯᠡ ᠬᠥᠨᠲᠥᠷᠴᠢᠬᠡᠭᠡᠳ ᠲᠠᠷᠭᠤᠨ ᠬᠠᠪᠢᠷᠭᠠᠨ ᠠ᠋ᠴᠠ ᠣᠭᠲᠣᠯᠵᠤ ᠠᠮᠠᠨ ᠳ᠋ᠠᠭᠠᠨ ᠬᠢᠭᠰᠡᠨ ᠳ᠋ᠦ᠍ ᠬᠣᠶᠠᠷ ᠵᠠᠪᠠᠵᠢᠨ ᠳ᠋ᠤᠨᠢ ᠲᠣᠰᠣ ᠭᠢᠯᠲᠠᠭᠠᠨᠠᠨᠠ᠃
— ᠬᠠᠷᠠ ᠨᠢᠳᠦᠲᠦ ᠠ᠋! ᠮᠠᠢ᠂ ᠡᠨᠡ ᠵᠣᠴᠢᠨ ᠳ᠋ᠤ᠌ ᠠᠷᠢᠬᠢ ᠪᠠᠷᠢᠵᠤ ᠪᠤᠷᠤᠭᠤ ᠮᠡᠳᠡ᠂ ᠬᠥᠮᠦᠨ ᠦ᠌ ᠮᠠᠨᠤᠨ ᠬᠥᠬᠦᠦᠷ ᠶᠠᠭᠤᠮᠠᠰ ᠢ᠋ ᠡᠵᠡᠨ ᠳ᠋ᠦ᠍ᠨᠢ ᠪᠤᠴᠠᠭᠠᠵᠤ ᠥᠭ! ᠴᠢ ᠡᠨᠡ ᠬᠥᠮᠦᠨ ᠢ᠋ ᠬᠡᠨ ᠭᠡᠵᠦ ᠰᠠᠨᠠᠨᠠ?《ᠠᠵᠢᠷᠭᠠᠨ ᠬᠠᠷᠠ》 ᠭᠡᠭᠴᠢ ᠰᠠᠢᠨ ᠡᠷᠡ᠃ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠤ᠋ ᠰᠢᠨᠡ ᠬᠠᠲᠤᠨ ᠢ᠋ ᠬᠤᠷᠢᠮᠯᠠᠭᠰᠠᠨ ᠲᠡᠷᠡ ᠰᠥᠨᠢ ᠳ᠋ᠦ᠍ᠨᠢ ᠠᠪᠴᠤ ᠳᠤᠲᠠᠭᠠᠭᠰᠠᠨ ᠭᠡᠵᠦ ᠪᠢ ᠴᠢᠮᠠ ᠳ᠋ᠤ᠌ ᠲᠠᠩᠳᠠ ᠶᠠᠷᠢᠵᠤ ᠪᠠᠢᠳᠠᠭ ᠲᠡᠷᠡ ᠰᠠᠢᠨ ᠡᠷᠡ ᠴᠢᠨᠢ ᠡᠨᠡ ᠪᠠᠢᠨᠠ ᠭᠡᠳ ᠭᠠᠯᠠᠭᠤᠨ ᠬᠦᠵᠦᠭᠦᠲᠦ ᠶ᠋ᠢ ᠲᠡᠭᠦᠨ ᠵᠦᠭ ᠳᠥᠬᠥᠭᠦᠯᠵᠦ ᠤᠷᠮᠠᠰᠢᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠬᠠᠷᠠ ᠨᠢᠳᠦᠲᠦ ᠰᠠᠨᠳᠤᠷᠤᠨ ᠨᠢᠭᠡ ᠭᠡᠮ ᠠᠷᠢᠬᠢ ᠬᠤᠨᠳᠠᠭᠠᠯᠠᠵᠤ ᠠᠩᠴᠢᠨᠵᠠᠪ ᠲᠤ ᠪᠠᠷᠢᠭᠠᠳ᠄
— ᠡᠷᠭᠢᠨ《ᠠᠵᠢᠷᠭᠠᠨ ᠬᠠᠷᠠ》 ᠠᠬᠠ ᠳ᠋ᠤ᠌ ᠣᠯᠳᠣᠢ ᠪᠢ ᠨᠢᠳᠦᠨ ᠳ᠋ᠡᠭᠡᠨ ᠤᠰᠤ ᠦᠭᠡᠢ ᠴᠡᠭᠡᠵᠢᠨ ᠳ᠋ᠡᠭᠡᠨ ᠪᠣᠳᠣᠯ ᠦᠭᠡᠢ ᠳ᠋ᠡᠭᠡᠨ ᠳᠠᠩᠴᠤ ᠴᠦᠯᠢᠰ ᠶᠠᠭᠤᠮᠠ ᠬᠢᠵᠦ ᠲᠠᠨ ᠢ᠋ ᠰᠣᠴᠢᠭᠠᠯᠠ᠁ ᠣ ᠪᠢ ᠪᠤᠷᠤᠭᠤ ᠮᠡᠳᠡᠶᠡ᠃ ᠥᠴᠦᠬᠡᠨ ᠬᠥᠮᠦᠨ ᠢ᠋ ᠠᠭᠤᠴᠢᠯᠠᠭᠠᠷᠠᠢ ᠭᠡᠵᠦ ᠬᠥᠰᠡᠷ ᠲᠦᠰᠬᠢᠲᠡᠯᠡ ᠰᠥᠭᠥᠳᠦᠨ ᠮᠥᠷᠭᠥᠪᠡ᠃ ᠡᠭᠦᠨ ᠳ᠋ᠦ᠍《ᠵᠣᠪᠠᠯᠭᠠ》 ᠭᠡᠳᠡᠭ ᠨᠢ ᠴᠦ᠍ ᠳᠠᠭᠠᠭᠠᠳ ᠠᠩᠴᠢᠨᠵᠠᠪ ᠲᠤ ᠰᠥᠭᠥᠳᠴᠦ ᠪᠤᠷᠤᠭᠤ ᠮᠡᠳᠡᠪᠡ᠃
— ᠵᠠ᠂ ᠪᠣᠰ ᠪᠣᠰ! ᠵᠠᠩᠭᠤᠢᠳᠠ ᠴᠢᠨᠢ ᠴᠢᠮᠠ ᠳ᠋ᠤ᠌ ᠨᠢᠭᠤᠷ ᠬᠠᠢᠷᠠᠯᠠᠭᠰᠠᠨ ᠪᠠᠢᠬᠤ ᠳ᠋ᠤ᠌ ᠪᠢ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ! ᠴᠢ ᠪᠢᠳᠡ ᠬᠣᠶᠠᠷ ᠬᠡᠨ ᠬᠡᠨ ᠢ᠋ᠶ᠋ᠡᠨ ᠲᠠᠨᠢᠬᠤ ᠦᠭᠡᠢ ᠶᠦᠮ ᠴᠢᠨᠢ᠁ ᠭᠡᠰᠡᠨ ᠳ᠋ᠦ᠍ ᠬᠠᠷᠠ ᠨᠢᠳᠦᠲᠦ ᠵᠣᠪᠠᠯᠭᠠ ᠬᠣᠶᠠᠷ ᠪᠣᠰᠴᠤ ᠵᠠᠩᠭᠤᠢᠳᠠ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠪᠠᠢᠭᠠ ᠬᠥᠬᠦᠦᠷ᠂ ᠬᠢᠲᠤᠭᠠ᠂ ᠭᠠᠩᠰᠠ ᠶ᠋ᠢ ᠡᠵᠡᠨ ᠳ᠋ᠦ᠍ᠨᠢ ᠪᠤᠴᠠᠭᠠᠵᠤ ᠥᠭᠭᠦᠭᠡᠳ ᠵᠠᠩᠭᠤᠢᠳᠠ ᠶ᠋ᠢᠨ ᠢ᠋ᠶ᠋ᠡᠨ ᠴᠢᠷᠠᠢ ᠤᠷᠤᠭᠤ ᠬᠠᠷᠠᠭᠰᠠᠨ ᠳ᠋ᠤ᠌ ᠲᠡᠭᠦᠨ ᠦ᠌ ᠨᠢᠳᠦᠨ ᠦ᠌ ᠬᠠᠷᠠᠴᠠ ᠳ᠋ᠤ᠌《ᠣᠳᠣ ᠭᠠᠷ》 ᠭᠡᠰᠡᠨ ᠰᠠᠨᠠᠭᠠ ᠪᠠᠢᠭᠠ ᠶ᠋ᠢ ᠣᠢᠯᠠᠭᠠᠵᠤ ᠪᠤᠰᠢᠭᠤᠬᠠᠨ ᠭᠠᠷᠴᠤ ᠶᠠᠪᠤᠪᠠ᠃
ᠠᠩᠴᠢᠨᠵᠠᠪ ᠬᠥᠬᠦᠦᠷ ᠢ᠋ᠶ᠋ᠡᠨ ᠠᠪᠴᠤ ᠡᠪᠦᠷᠲᠦᠯᠡᠭᠡᠳ ᠳᠣᠲᠣᠷᠠ ᠨᠢ ᠠᠭᠤᠵᠢᠷᠠᠵᠤ ᠬᠢᠲᠤᠭᠠ ᠲᠠᠢ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠵᠣᠷᠢᠭ ᠣᠷᠣᠭᠰᠠᠨ ᠰᠢᠭ᠋᠄
— ᠲᠠᠨ ᠳ᠋ᠤ᠌ ᠭᠢᠯᠠᠢᠯᠠ! ᠨᠠᠮᠠᠶ᠋ᠢ ᠪᠠᠨ ᠡᠨᠡᠷᠢᠵᠦ ᠠᠭᠤᠴᠢᠯᠠᠭᠰᠠᠨ ᠳ᠋ᠤ᠌ ᠳᠡᠭᠦᠦ ᠨᠢ ᠲᠠᠨ ᠳ᠋ᠤ᠌ ᠭᠡᠮ ᠠᠷᠢᠬᠢ ᠪᠠᠷᠢᠶᠠ ᠭᠡᠳ ᠥᠷᠥᠭᠡᠰᠦᠨ ᠡᠪᠦᠳᠦᠭ ᠢ᠋ᠶ᠋ᠡᠨ ᠰᠥᠬᠥᠷᠡᠨ ᠬᠦᠨᠳᠦᠯᠡᠭᠰᠡᠨ ᠳ᠋ᠦ᠍ ᠲᠡᠷᠡ ᠡᠷᠡ᠄
— ᠶᠠᠭᠤ ᠬᠢᠬᠦ ᠪᠣᠢ! ᠬᠣᠶᠠᠭᠤᠯᠠ ᠬᠤᠨᠳᠠᠭᠠ ᠲᠤᠯᠭᠠᠶᠠ᠂ ᠠᠩᠬᠠ ᠲᠠᠨᠢᠯᠴᠠᠭᠰᠠᠨ ᠪᠣᠯᠪᠠᠴᠤ ᠠᠯᠢ ᠡᠷᠲᠡ ᠶ᠋ᠢᠨ ᠠᠬᠠ ᠳᠡᠭᠦᠦ ᠤᠯᠤᠰ ᠭᠡᠵᠦ ᠪᠢ ᠰᠠᠨᠠᠵᠤ ᠪᠠᠢᠨᠠ ᠭᠡᠳ ᠲᠡᠭᠦᠨ ᠲᠡᠢ ᠬᠤᠨᠳᠠᠭᠠ ᠲᠤᠯᠭᠠᠵᠤ ᠤᠤᠭᠤᠪᠠ᠃
— ᠢᠩᠭᠢᠵᠦ ᠪᠣᠯᠬᠤ ᠦᠭᠡᠢ᠂ ᠮᠣᠩᠭᠣᠯ ᠬᠥᠮᠦᠨ ᠠᠬᠠᠰ ᠵᠠᠬᠠᠰ ᠢ᠋ᠶ᠋ᠠᠨ ᠬᠦᠨᠳᠦᠯᠡᠵᠦ ᠶᠠᠪᠤᠬᠤ ᠨᠢ ᠤᠵᠠᠭᠤᠷ ᠤ᠋ᠨ ᠶᠣᠰᠣ᠃ ᠳᠠᠬᠢᠪᠠᠯ ᠲᠠ ᠴᠦ᠍ ᠨᠠᠳᠠ ᠠ᠋ᠴᠠ ᠢᠯᠡᠭᠦᠦ ᠬᠡᠳᠦᠨ ᠰᠢᠭᠤᠳᠠᠢ ᠳᠠᠪᠤᠰᠤ ᠢᠳᠡᠭᠰᠡᠨ ᠲᠤᠯᠠ ᠪᠢ ᠲᠠᠨ ᠳ᠋ᠤ᠌᠂ ᠳᠡᠭᠦᠦ ᠶ᠋ᠢᠨ ᠬᠤᠪᠢ ᠪᠠᠷ ᠨᠢᠭᠡ ᠭᠡᠮ ᠠᠷᠢᠬᠢ ᠪᠠᠷᠢᠶᠠ᠃ ᠴᠣᠬᠣᠮ ᠳ᠋ᠠᠭᠠᠨ ᠤᠷᠠᠳ ᠤ᠋ᠨ ᠶᠣᠰᠣᠨ ᠳ᠋ᠤ᠌ ᠭᠤᠷᠪᠠᠨ ᠭᠡᠮ ᠪᠠᠷᠢᠪᠠᠯ ᠲᠠᠭᠠᠷᠠᠬᠤ ᠶᠤᠮ᠃ ᠠᠳᠠᠭ ᠨᠢ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠡᠨᠡ ᠭᠡᠮ ᠠᠷᠢᠬᠢ ᠶ᠋ᠢ ᠲᠣᠭᠲᠠᠭᠠᠨᠠ ᠤᠤ? ᠭᠡᠰᠡᠨ ᠳ᠋ᠦ᠍ ᠨᠥᠭᠦᠭᠡ ᠮᠠᠷᠵᠠᠩ ᠡᠷᠡ᠄
— ᠵᠠ᠂ ᠶᠠᠭᠠᠬᠢᠬᠤ ᠪᠣᠢ! ᠳᠡᠭᠦᠦ ᠶ᠋ᠢᠨ ᠬᠡᠰᠢᠭ ᠣᠯᠳᠠᠰᠢ ᠦᠭᠡᠢ ᠭᠡᠳᠡᠭ᠃ ᠰᠠᠢᠨ ᠡᠷᠡ ᠲᠡᠢ ᠲᠠᠨᠢᠯᠴᠠᠭᠰᠠᠨ ᠳ᠋ᠠᠭᠠᠨ ᠮᠢᠨᠦ ᠰᠡᠳᠬᠢᠯ ᠥᠶᠥᠭ ᠪᠠᠢᠨᠠ᠃ ᠤᠤᠭᠤᠴᠢᠬᠠᠶᠠ ᠭᠡᠳ ᠠᠩᠴᠢᠨᠵᠠᠪ ᠤ᠋ᠨ ᠪᠠᠷᠢᠭᠰᠠᠨ ᠠᠷᠢᠬᠢ ᠶ᠋ᠢ ᠭᠠᠭᠴᠠᠬᠠᠨ ᠬᠥᠨᠲᠥᠷᠪᠡ᠃
ᠠᠩᠴᠢᠨᠵᠠᠪ ᠲᠠᠷᠭᠤᠨ ᠬᠠᠪᠢᠷᠭᠠᠨ ᠠ᠋ᠴᠠ ᠣᠭᠲᠣᠯᠵᠤ ᠥᠭᠡᠬᠦ ᠶ᠋ᠢ ᠨᠢ ᠱᠠᠯᠴᠢᠭᠢᠨᠠᠭᠤᠯᠤᠨ ᠢᠳᠡᠬᠦ ᠳ᠋ᠦ᠍ ᠦᠨᠡᠬᠡᠷ ᠬᠣᠪᠳᠣᠭ ᠳᠡᠢᠯᠦᠮᠡ ᠰᠠᠢᠬᠠᠨ ᠪᠠᠢᠨᠠ᠃
— ᠥᠨᠥᠳᠥᠷ ᠲᠠᠨ ᠤ᠋ ᠶᠡᠬᠡ ᠨᠠᠢᠷ ᠲᠠᠯᠠ ᠳ᠋ᠤ᠌ ᠭᠤᠷᠪᠠᠨ ᠠᠮᠢᠲᠠᠢ ᠪᠠᠨ ᠪᠡᠶᠡ ᠳ᠋ᠡᠭᠡᠨ ᠡᠵᠡᠮᠳᠡᠵᠦ ᠶᠠᠪᠤᠬᠤ ᠪᠣᠯᠤᠭᠰᠠᠨ ᠳ᠋ᠤ᠌ ᠦᠨᠡᠬᠡᠷ ᠪᠠᠶᠠᠷᠲᠠᠢ ᠪᠠᠢᠨᠠ᠃ ᠮᠠᠨᠤᠨ ᠬᠥᠬᠦᠦᠷ ᠢ᠋ᠶ᠋ᠡᠨ ᠪᠢ ᠪᠡᠶᠡ ᠡᠴᠡ ᠪᠡᠨ ᠬᠡᠵᠢᠶᠡ ᠴᠦ᠍ ᠰᠠᠯᠭᠠᠳᠠᠭ ᠦᠭᠡᠢ ᠶᠦᠮ᠃ ᠡᠴᠢᠭᠡ ᠳᠡᠭᠡᠳᠦᠰ ᠦ᠋ᠨ ᠴᠢᠨᠢ ᠥᠪ ᠶᠦᠮ ᠭᠡᠵᠦ ᠡᠵᠢ ᠮᠢᠨᠢ ᠨᠠᠳᠠ ᠥᠪᠯᠡᠵᠦ ᠥᠭᠭᠦᠭᠰᠡᠨ ᠡᠴᠡ ᠬᠣᠢᠰᠢ ᠨᠠᠳᠠ ᠨᠢᠭᠡ ᠯᠡ ᠠᠮᠢᠨ ᠲᠦᠰᠢᠭ ᠲᠡᠢ ᠰᠢᠭ ᠰᠠᠨᠠᠭᠳᠠᠳᠠᠭ᠃ ᠪᠦᠯᠲᠡᠢᠭᠰᠡᠨ ᠬᠠᠷᠠ ᠨᠢᠳᠦᠲᠦ ᠴᠢᠨᠢ ᠡᠪᠦᠷ ᠡᠴᠡ ᠮᠢᠨᠢ ᠮᠠᠯᠲᠠᠵᠤ ᠠᠪᠬᠤ ᠳ᠋ᠤ᠌ ᠳᠣᠲᠣᠷᠠ ᠬᠠᠷᠠᠯᠠᠭᠠᠳ ᠶᠠᠪᠤᠴᠢᠬᠠᠭᠰᠠᠨ᠁ ᠬᠣᠶᠠᠷ ᠭᠠᠷ ᠢ᠋ ᠮᠢᠨᠢ ᠤᠶᠠᠭᠠ ᠦᠭᠡᠢ ᠪᠠᠢᠭᠰᠠᠨ ᠪᠣᠯ ᠥᠨᠥᠬᠢ ᠶ᠋ᠢᠨ ᠴᠢᠨᠢ ᠲᠠᠷᠢᠬᠢ ᠶ᠋ᠢ ᠰᠠᠴᠤᠭᠰᠠᠨ ᠪᠠᠢᠵᠤ ᠶᠠᠳᠠᠬᠤ ᠦᠭᠡᠢ᠁ ᠭᠡᠰᠡᠨ ᠳ᠋ᠦ᠍ ᠲᠡᠷᠡ ᠮᠠᠷᠵᠠᠩ ᠡᠷᠡ᠄
— ᠦᠨᠡᠬᠡᠷ ᠡᠴᠢᠭᠡ ᠳᠡᠭᠡᠳᠦᠰ ᠦ᠋ᠨ ᠴᠢᠨᠢ ᠠᠮᠢᠲᠠᠢ ᠡᠷᠳᠡᠨᠢ ᠶᠦᠮ ᠪᠠᠢᠨᠠ᠂ ᠮᠠᠨᠤᠨ ᠬᠥᠬᠦᠦᠷ ᠴᠢᠨᠢ ᠯᠡ ᠴᠢᠮᠠᠶ᠋ᠢ ᠵᠣᠪᠠᠯᠠᠩ ᠠ᠋ᠴᠠ ᠠᠪᠤᠷᠠᠵᠤ ᠳᠠ! ᠲᠡᠷᠡ ᠶ᠋ᠢ ᠴᠢᠨᠢ ᠬᠠᠷᠠᠭᠰᠠᠨ ᠦᠭᠡᠢ ᠪᠣᠯ ᠪᠢ ᠴᠢᠮᠠᠶ᠋ᠢ ᠳᠠᠯᠳᠠ ᠠ᠋ᠴᠠ ᠶᠠᠭᠠᠬᠢᠵᠤ ᠮᠣᠩᠭᠣᠯ ᠭᠡᠵᠦ ᠮᠡᠳᠡᠬᠦ ᠪᠣᠢ ᠳᠠ! ᠬᠠ ᠬᠠ᠁ ᠭᠡᠵᠦ ᠬᠥᠬᠥᠷᠡᠪᠡ᠃
— ᠶᠠᠭᠤᠮᠠ ᠶᠠᠭᠤᠮᠠ ᠭᠡᠭᠴᠢ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠣᠨᠳᠣᠣ ᠶᠤᠮ ᠳᠠ᠃ ᠪᠢᠳᠡ ᠬᠣᠶᠠᠷ ᠢᠩᠭᠢᠵᠦ ᠯᠡ ᠠᠭᠤᠯᠵᠠᠬᠤ ᠢᠷᠦᠭᠡᠯ ᠲᠡᠢ ᠪᠠᠢᠵᠠᠢ᠃
— ᠵᠥᠪ᠂ ᠵᠥᠪ! ᠲᠡᠭᠡᠵᠦ ᠯᠡ ᠳᠡ᠂ ᠢᠷᠣᠭᠠᠷ ᠲᠠᠢ ᠳ᠋ᠠᠭᠠᠨ ᠲᠣᠭᠲᠠᠵᠤ᠂ ᠢᠷᠦᠭᠡᠯ ᠲᠡᠢ ᠳ᠋ᠡᠭᠡᠨ ᠠᠭᠤᠯᠵᠠᠳᠠᠭ ᠭᠡᠳᠡᠭ ᠦᠨᠡᠨ ᠦᠭᠡ᠃
— ᠲᠠᠨᠢᠯᠴᠠᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠥᠨᠥᠬᠢ ᠪᠠᠭᠠ ᠰᠠᠭᠠ ᠭᠠᠨᠵᠤᠭᠠᠨ ᠤ᠋ ᠵᠦᠢᠯᠡᠰ ᠢ᠋ ᠲᠠᠨ ᠳ᠋ᠤ᠌ ᠪᠡᠯᠡᠭ ᠪᠠᠷᠢᠴᠢᠬᠠᠶᠠ ᠭᠡᠰᠡᠨ ᠳ᠋ᠦ᠍ ᠮᠠᠷᠵᠠᠩ ᠡᠷᠡ ᠰᠠᠨᠳᠤᠷᠴᠤ᠄
— ᠶᠠᠭᠤ ᠭᠡᠰᠡᠨ ᠦᠭᠡ ᠶᠦᠮ? ᠡᠷᠡ ᠬᠥᠮᠦᠨ ᠪᠤᠰᠤᠳ ᠤ᠋ᠨ ᠭᠠᠨᠵᠤᠭᠠ ᠪᠠᠭᠤᠯᠭᠠᠵᠤ ᠠᠮᠢᠰᠬᠤᠯ ᠥᠨᠳᠡᠢᠨᠡ ᠭᠡᠳᠡᠭ ᠮᠠᠭᠤᠬᠠᠢ ᠬᠡᠷᠡᠭ᠃ ᠠᠬᠠ ᠨᠢ ᠠᠷᠭᠠ ᠦᠭᠡᠢ ᠳ᠋ᠡᠭᠡᠨ ᠡᠢᠮᠦ ᠬᠤᠳᠠᠷᠭᠠ ᠦᠭᠡᠢ ᠠᠵᠢ ᠬᠢᠵᠦ ᠶᠠᠪᠤᠨᠠ᠃ ᠰᠢᠷᠠᠪᠳᠣᠷᠵᠢ ᠳ᠋ᠤ᠌ ᠰᠢᠬᠠᠭᠳᠠᠵᠤ᠂ ᠭᠡᠷ ᠨᠤᠲᠤᠭ ᠢ᠋ᠶ᠋ᠠᠨ ᠴᠦ᠍ ᠪᠤᠰᠠᠨᠢᠭᠤᠯᠤᠨ ᠭᠡᠷ ᠪᠠᠢᠭᠠᠳ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠴᠢᠳᠠᠬᠤ ᠦᠭᠡᠢ ᠡᠢᠮᠦ ᠲᠠᠴᠢᠶᠠᠨ ᠳ᠋ᠤ᠌ ᠬᠥᠷᠴᠢᠬᠡᠯᠡ᠁ ᠦᠬᠦᠲᠡᠯᠡ ᠪᠡᠨ ᠠᠮᠢ ᠬᠠᠢᠷᠠᠨ ᠭᠡᠳᠡᠭ ᠢ᠋ᠶ᠋ᠡᠷ ᠠᠮᠢ ᠲᠠᠢ ᠰᠠᠷᠪᠠᠢᠵᠤ ᠶᠠᠪᠤᠭᠰᠠᠨ ᠴᠠᠭ ᠲᠤ ᠥᠯ ᠭᠣᠣᠯ ᠵᠠᠯᠭᠠᠵᠤ ᠣᠨᠳᠣᠷᠣᠨᠠ ᠭᠡᠵᠦ ᠴᠢᠨᠦ ᠬᠡᠯᠡᠳᠡᠭ ᠢ᠋ᠶ᠋ᠡᠷ《ᠬᠠᠷᠠ ᠨᠢᠳᠦᠲᠦ》᠂《ᠵᠣᠪᠠᠯᠭᠠ》 ᠭᠡᠰᠡᠨ ᠬᠣᠶᠠᠷ《ᠰᠠᠢᠨ ᠨᠣᠬᠠᠢ》 ᠲᠡᠵᠢᠭᠡᠵᠦ ᠪᠡᠶᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠠᠭᠤᠷᠴᠤ ᠶᠠᠪᠤᠨᠠ᠁ ᠭᠡᠵᠦ ᠶᠠᠷᠢᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠬᠥᠮᠥᠰᠬᠡ ᠨᠢ ᠠᠲᠤᠷᠢᠨ ᠴᠢᠷᠠᠢ ᠨᠢ ᠪᠠᠷᠤᠢᠵᠤ ᠬᠠᠷᠠᠭᠳᠠᠨᠠ᠃
— ᠰᠢᠷᠠᠪᠳᠣᠷᠵᠢ ᠳ᠋ᠤ᠌ ᠰᠢᠬᠠᠭᠳᠠᠭᠠᠳ ᠭᠡᠨᠡ?᠁ ᠭᠡᠵᠦ ᠠᠩᠴᠢᠨᠵᠠᠪ ᠢ᠋ ᠬᠡᠯᠡᠲᠡᠯᠡ ᠲᠡᠷᠡ ᠡᠷᠡ ᠲᠣᠰᠴᠤ᠄
— ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠬᠣᠢᠲᠤ ᠮᠥᠷ ᠦᠭᠡᠢ᠃ ᠮᠠᠨᠠᠭᠤᠯ ᠨᠣᠶᠠᠨ ᠭᠡᠵᠦ ᠬᠡᠯᠡᠬᠦ ᠤᠤ ᠳᠠ᠂ ᠤᠷᠤᠭᠤ ᠲᠠᠢ ᠠᠮᠢᠲᠠᠨ᠃ ᠨᠢᠭᠡ ᠣᠯᠠᠨ ᠡᠮᠡ ᠠᠪᠴᠤ ᠪᠥᠭᠰᠡ ᠪᠡᠨ ᠲᠣᠭᠣᠷᠢᠭᠤᠯᠤᠭᠠᠳ ᠡᠵᠡᠨ ᠰᠠᠭᠤᠵᠤ ᠴᠢᠳᠠᠬᠤ ᠦᠭᠡᠢ᠃ ᠥᠨᠥᠬᠢ ᠨᠦ᠍ᠭᠦᠳ ᠨᠢ ᠲᠡᠭᠡᠭᠡᠳ ᠲᠡᠰᠬᠦ ᠠᠯᠳᠠᠷᠠᠬᠤ ᠳ᠋ᠠᠭᠠᠨ ᠲᠣᠯᠣᠭᠠᠢ ᠨᠢ ᠭᠠᠳᠠᠭᠰᠢ ᠪᠠᠨ᠁ ᠪᠢ ᠠᠩᠬᠠ ᠬᠡᠯᠡᠭᠰᠡᠨ ᠦᠭᠡᠢ ᠤᠤ᠂ ᠴᠢ ᠪᠢᠳᠡ ᠬᠣᠶᠠᠷ ᠤ᠋ᠨ ᠬᠤᠪᠢ ᠲᠠᠪᠢᠯᠠᠩ ᠠᠳᠠᠯᠢᠬᠠᠨ᠃ ᠦᠢᠯᠡ ᠲᠡᠢ ᠣᠳᠣᠨ ᠳ᠋ᠤ᠌ ᠵᠠᠶᠠᠭᠠᠵᠠᠢ᠃ ᠴᠢ ᠪᠠᠭᠠ ᠬᠠᠲᠤᠨ ᠢ᠋ ᠨᠢ ᠠᠪᠴᠤ ᠳᠤᠲᠠᠭᠠᠪᠠ ᠭᠡᠬᠦ ᠳ᠋ᠦ᠍ ᠮᠠᠭᠤ ᠠᠬᠠ ᠨᠢ ᠴᠡᠴᠡᠭ ᠬᠠᠲᠤᠨ ᠢ᠋ ᠨᠢ ᠤᠮᠠᠯᠵᠤ ᠪᠠᠢᠯᠠ᠃ ᠪᠢ ᠲᠡᠭᠦᠨ ᠢ᠋ ᠤᠮᠠᠯᠪᠠ ᠭᠡᠭᠴᠢ ᠳᠡ᠂ ᠬᠦᠩ ᠨᠣᠶᠠᠨ ᠬᠦᠦ ᠲᠡᠢ ᠪᠣᠯᠬᠤ ᠭᠡᠵᠦ ᠪᠠᠭᠠ ᠬᠠᠲᠤᠨ ᠪᠠᠭᠤᠯᠭᠠᠵᠤ ᠥᠨᠥᠬᠢ ᠪᠡᠨ ᠰᠢᠨᠡᠷᠬᠡᠭᠡᠳ ᠡᠮᠡ ᠢᠮᠠᠭᠠᠨ ᠳ᠋ᠤ᠌ ᠰᠢᠭᠢᠳᠦᠭᠰᠡᠨ ᠱᠠᠯᠵᠠ ᠰᠢᠭ᠋ ᠪᠣᠯᠳᠠᠭ ᠶᠤᠮ ᠪᠠᠢᠨᠠ᠃ ᠲᠡᠭᠡᠭᠡᠳ ᠢᠳᠡᠵᠦ ᠤᠤᠭᠤᠴᠢᠬᠠᠮᠠᠷ ᠪᠠᠢᠭᠰᠠᠨ ᠴᠡᠴᠡᠭ ᠬᠠᠲᠤᠨ ᠢ᠋ᠶ᠋ᠠᠨ ᠬᠠᠶᠠᠭᠠᠨ ᠳ᠋ᠤᠨᠢ ᠬᠠᠭᠰᠠᠭᠠᠴᠢᠬᠠᠬᠤ ᠦᠭᠡᠢ ᠤᠤ! ᠰᠠᠶᠢᠬᠢ ᠨᠢ ᠲᠡᠭᠡᠭᠡᠳ ᠬᠠᠭᠰᠠᠭᠰᠠᠨ ᠰᠠᠭᠤᠯᠠᠭᠠ ᠰᠢᠭ᠋ ᠪᠦᠷ ᠠᠭᠰᠠᠢᠵᠤ ᠲᠡᠰᠬᠦ ᠪᠡᠨ ᠪᠣᠯᠢᠬᠤ ᠳ᠋ᠠᠭᠠᠨ ᠨᠠᠳᠠ ᠲᠠᠢ ᠨᠤᠤᠷᠠᠭᠠᠳ᠁ ᠢᠩᠭᠢᠭᠡᠳ ᠠᠪᠤ ᠶ᠋ᠢᠨ ᠬᠦᠦ ᠮᠠᠨᠴᠤᠷᠭᠠ ᠪᠢ ᠲᠩᠷᠢ ᠶ᠋ᠢᠨ ᠪᠤᠬᠤᠷ ᠲᠤ ᠭᠠᠯ ᠲᠠᠯᠪᠢᠪᠠ ᠭᠡᠭᠴᠢ ᠶᠣᠰᠣᠲᠠᠢ ᠰᠢᠷᠠᠪᠳᠣᠷᠵᠢ ᠶ᠋ᠢᠨ ᠡᠭᠦᠷ ᠲᠦ᠍ ᠭᠠᠯ ᠣᠷᠣᠭᠤᠯᠵᠤ ᠪᠦᠬᠦ ᠶᠠᠭᠤᠮᠠ ᠪᠦᠷ ᠪᠤᠷᠤᠭᠤ ᠪᠠᠷ ᠡᠷᠭᠢᠭᠰᠡᠨ᠃ ᠨᠢᠭᠡ ᠪᠣᠳᠣᠪᠠᠯ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠳ᠋ᠤ᠌ ᠪᠦᠷ ᠪᠤᠷᠤᠭᠤ ᠭᠡᠵᠦ ᠲᠣᠬᠣᠬᠤ ᠠᠷᠭᠠ ᠦᠭᠡᠢ᠃ ᠴᠡᠴᠡᠭ ᠬᠠᠲᠤᠨ ᠭᠡᠭᠴᠢ ᠰᠦᠷᠡᠬᠡᠢ ᠱᠤᠮᠲᠠᠢ ᠠᠮᠢᠲᠠᠨ᠃ ᠡᠷᠡ ᠶ᠋ᠢᠨ ᠲᠣᠯᠣᠭᠠᠢ ᠡᠷᠭᠢᠭᠦᠯᠬᠦ ᠳ᠋ᠡᠭᠡᠨ ᠰᠠᠢᠨ᠃ ᠨᠠᠳᠠ ᠲᠠᠢ ᠨᠢᠭᠡ ᠦᠶᠡ ᠨᠤᠤᠷᠠᠭᠠᠳ ᠪᠣᠯᠬᠤ ᠦᠭᠡᠢ ᠳ᠋ᠦ᠍ ᠳᠤᠷᠠ ᠪᠡᠶᠡ ᠶ᠋ᠢ ᠭᠣᠯᠣᠬᠤ ᠦᠭᠡᠢ ᠳᠤᠮᠳᠠ ᠴᠢᠮᠥᠭᠡ ᠰᠡᠭᠦᠵᠢ ᠪᠡᠨ ᠭᠣᠯᠣᠬᠤ ᠦᠭᠡᠢ ᠭᠡᠭᠴᠢ ᠪᠡᠷ ᠲᠡᠷᠡ ᠤᠰᠤᠩᠬᠠᠢ ᠡᠮᠡ ᠶ᠋ᠢᠨ ᠠᠭᠠᠭ ᠲᠤ ᠡᠷᠭᠢᠭᠦᠳᠡᠵᠦ ᠶᠠᠭᠠᠬᠢᠭᠰᠠᠨ ᠴᠦ᠍ ᠰᠠᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠪᠠ᠃ ᠡᠨᠡ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ᠂ ᠲᠡᠷᠡ ᠡᠮᠡ ᠶ᠋ᠢᠨ ᠰᠠᠨᠠᠭᠠ ᠪᠠᠷ ᠪᠣᠯᠵᠤ ᠥᠭᠬᠦ ᠦᠭᠡᠢ ᠪᠣᠯ ᠬᠦᠩ ᠨᠣᠶᠠᠨ ᠤ᠋ ᠴᠢᠬᠢᠨ ᠳ᠋ᠦ᠍ ᠰᠣᠯᠣᠭᠠᠢ ᠬᠡᠯᠡ ᠲᠡᠢ ᠬᠣᠩᠬᠣ ᠵᠡᠭᠦᠯᠭᠡᠪᠡᠯ ᠪᠠᠰᠠ ᠠᠮᠠᠷ ᠦᠭᠡᠢ᠃ ᠢᠩᠭᠢᠭᠡᠳ ᠡᠪ ᠡᠪ ᠢ᠋ᠶ᠋ᠡᠨ ᠣᠯᠵᠤ ᠬᠥᠮᠦᠨ ᠠᠮᠢᠲᠠᠨ ᠠ᠋ᠴᠠ ᠳᠠᠯᠳᠠᠭᠤᠷ ᠨᠢᠭᠤᠵᠤ ᠬᠠᠪᠴᠢᠰᠬᠢᠨ ᠨᠢᠭᠡ ᠨᠢᠭᠡᠨ ᠢ᠋ᠶ᠋ᠡᠨ ᠬᠠᠢᠷᠠᠯᠠᠯᠴᠠᠵᠤ ᠰᠡᠪ ᠮᠡᠳᠡᠭᠳᠡᠬᠦ ᠦᠭᠡᠢ ᠭᠡᠵᠦ ᠪᠡᠶᠡ ᠪᠡᠨ ᠥᠮᠥᠭᠯᠡᠨ ᠪᠠᠢᠵᠤ ᠶᠠᠪᠤᠨ ᠶᠠᠪᠤᠨ ᠵᠣᠷᠢᠭ ᠪᠦᠳᠦᠭᠦᠷᠡᠵᠦ ᠪᠢᠯᠡ᠃ ᠨᠢᠭᠡ ᠤᠳᠠᠭᠠ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠶᠠᠮᠤᠨ ᠤ᠋ ᠲᠣᠮᠣᠭᠠᠲᠠᠳ ᠤ᠋ᠨ ᠪᠠᠷᠠ ᠪᠣᠯᠤᠯᠭᠠ ᠪᠠᠷ ᠪᠦᠭᠦᠳᠡᠭᠡᠷ《ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠶ᠋ᠢᠨ ᠮᠠᠨᠢ ᠶ᠋ᠢᠨ ᠬᠤᠷᠠᠯ ᠳ᠋ᠤ᠌ ᠶᠠᠪᠤᠭᠰᠠᠨ ᠬᠣᠢᠭᠤᠷ ᠴᠡᠴᠡᠭ ᠬᠠᠲᠤᠨ ᠲᠠᠢ ᠬᠣᠶᠠᠭᠤᠯᠠ ᠳᠡᠭᠡᠷᠡ ᠡᠴᠡ ᠪᠡᠨ ᠠᠶᠤᠬᠤ ᠶᠠᠭᠤᠮᠠ ᠦᠭᠡᠢ ᠳᠡᠷᠭᠡᠳᠡ ᠡᠴᠡ ᠴᠣᠴᠢᠬᠤ ᠶᠠᠭᠤᠮᠠ ᠠᠯᠠᠭᠠ ᠭᠡᠵᠦ ᠶᠣᠰᠣᠲᠠᠢ ᠨᠢᠭᠡ ᠵᠢᠷᠭᠠᠭᠰᠠᠨ ᠭᠡᠬᠦ ᠤᠤ ᠳᠠ! ᠲᠡᠷᠡ ᠰᠥᠨᠢ ᠣᠨᠴᠠ ᠨᠠᠮᠤᠭᠤᠬᠠᠨ᠂ ᠬᠠᠭᠤᠴᠢᠨ ᠤᠯᠠᠷᠢᠯ ᠤ᠋ᠨ ᠳᠣᠯᠣᠭᠠᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠬᠡᠳᠦᠨ ᠪᠠᠢᠭᠰᠠᠨ ᠪᠣᠯᠬᠣᠷ ᠰᠠᠷᠠ ᠲᠤᠨᠤᠷᠠᠭᠰᠠᠨ ᠰᠠᠢᠬᠠᠨ ᠴᠦ᠍ ᠰᠥᠨᠢ ᠭᠡᠳᠡᠭ ᠴᠦ᠍ ᠵᠢᠭᠲᠡᠢᠬᠡᠨ ᠪᠠᠢᠯᠠ᠃ ᠬᠡᠨ ᠮᠠᠲᠠᠨᠠᠮ᠂ ᠭᠠᠢ ᠭᠠᠵᠠᠷ ᠳᠣᠣᠷᠠ ᠠ᠋ᠴᠠ ᠭᠠᠳᠠᠰᠤ ᠪᠥᠭᠰᠡᠨ ᠳᠣᠣᠷᠠ ᠠ᠋ᠴᠠ ᠭᠡᠭᠴᠢ ᠪᠡᠷ ᠭᠡᠨᠡᠳᠲᠡ ᠡᠭᠦᠳᠡ ᠪᠠᠯᠪᠠᠵᠤ ᠬᠡᠳᠦ ᠬᠡᠳᠦᠨ ᠫᠤᠤ ᠶ᠋ᠢᠨ ᠠᠮᠠ ᠣᠩᠭᠣᠯᠵᠠᠵᠤ ᠴᠠᠭᠠᠨᠠ ᠨᠢ ᠢᠮᠠᠭᠠᠨ ᠳᠠᠭᠤ ᠲᠠᠢ ᠬᠥᠮᠦᠨ ᠦ᠌ ᠶᠠᠩ ᠶᠠᠩ ᠭᠡᠬᠦ ᠨᠢ ᠴᠢᠬᠢ ᠬᠠᠳᠬᠤᠨ ᠰᠣᠨᠣᠰᠳᠠᠪᠠ᠃
— ᠢᠮᠠᠭᠠᠨ ᠳᠠᠭᠤ ᠲᠠᠢ ᠬᠥᠮᠦᠨ ᠭᠡᠨᠡ ᠤᠤ?
— ᠲᠡᠢᠮᠦ! ᠨᠣᠶᠠᠨ ᠰᠠᠩ ᠤ᠋ᠨ ᠶᠠᠮᠤᠨ ᠳ᠋ᠤ᠌ ᠢᠮᠠᠭᠠᠨ ᠳᠠᠭᠤ ᠲᠠᠢ᠂ ᠠᠷᠠᠮᠠᠭ ᠲᠠᠷᠠᠮᠠᠭ ᠰᠢᠩᠭᠡᠨ ᠰᠠᠬᠠᠯ ᠲᠠᠢ ᠠᠭᠳᠠᠯᠠᠭᠰᠠᠨ ᠬᠥᠮᠦᠨ ᠰᠢᠭ ᠰᠢᠨᠵᠢ ᠮᠠᠭᠤ ᠲᠠᠢ ᠨᠢᠭᠡ ᠠᠮᠢᠲᠠᠨ ᠪᠠᠢᠳᠠᠭ ᠶᠤᠮ ᠭᠡᠵᠦ ᠮᠠᠨᠴᠤᠷᠭᠠ ᠶ᠋ᠢ ᠬᠡᠯᠡᠲᠡᠯᠡ ᠠᠩᠴᠢᠨᠵᠠᠪ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠲᠠᠰᠤᠯᠵᠤ᠄
— ᠡᠨᠡ ᠬᠥᠮᠦᠨ ᠢ᠋ ᠴᠢᠨᠢ ᠪᠢ ᠦᠵᠡᠵᠦ ᠥᠩᠭᠡᠷᠡᠭᠰᠡᠨ ᠭᠡᠪᠡ᠃
— ᠪᠢᠰᠢ᠃ ᠴᠢ ᠪᠤᠷᠤᠭᠤ ᠬᠥᠮᠦᠨ ᠲᠡᠢ ᠠᠨᠳᠠᠭᠤᠷᠠᠭᠰᠠᠨ ᠪᠠᠢᠬᠠ᠃ ᠡᠨᠡ ᠬᠥᠮᠦᠨ ᠢ᠋ ᠪᠢ ᠥᠯᠥᠩᠲᠦ ᠶ᠋ᠢᠨ ᠡᠬᠢ ᠳ᠋ᠦ᠍ ᠳᠡᠭᠦᠵᠢᠯᠡᠵᠦ ᠬᠠᠶᠠᠭᠰᠠᠨ ᠶᠤᠮ ᠴᠢᠨᠢ ᠠᠯᠢ ᠬᠡᠵᠢᠶᠡᠨ ᠦ᠌ ᠴᠢᠨᠣᠠ ᠶ᠋ᠢᠨ ᠬᠣᠭᠣᠯᠠ ᠪᠣᠯᠴᠢᠬᠠᠭᠰᠠᠨ ᠪᠠᠢᠯᠭᠦᠢ᠂ ᠴᠢ ᠶᠠᠭᠠᠬᠢᠵᠤ ᠲᠡᠭᠦᠨ ᠢ᠋᠁ ᠭᠡᠰᠡᠨ ᠳ᠋ᠦ᠍ ᠠᠩᠴᠢᠨᠵᠠᠪ ᠡᠪᠦᠳᠦᠭ ᠢ᠋ᠶ᠋ᠡᠨ ᠠᠯᠠᠭᠠᠳᠠᠨ ᠪᠣᠰᠴᠤ᠄
— ᠶᠠᠭᠤᠨ ᠳ᠋ᠤ᠌ ᠠᠨᠳᠠᠭᠤᠷᠠᠬᠤ ᠪᠣᠢ ᠳᠠ᠂ ᠮᠥᠨ ᠲᠡᠷᠡ ᠥᠯᠥᠩᠲᠦ ᠶ᠋ᠢᠨ ᠡᠬᠢ ᠳ᠋ᠦ᠍ ᠳᠡᠭᠦᠵᠢᠯᠡᠭᠡᠰᠦᠲᠡᠢ ᠦᠬᠦᠮᠡᠷ ᠪᠠᠢᠭᠰᠠᠨ ᠢ᠋ ᠪᠢ ᠲᠠᠯᠪᠢᠵᠤ ᠶᠠᠪᠤᠭᠤᠯᠤᠭᠰᠠᠨ ᠶᠤᠮ ᠭᠡᠯᠡ᠃
— ᠢᠰᠢ᠂ ᠴᠢ ᠶᠠᠭᠤ ᠭᠡᠵᠦ ᠲᠡᠭᠦᠨ ᠢ᠋ ᠲᠠᠯᠪᠢᠪᠠ⁈
— ᠪᠢ ᠴᠦ᠍ ᠤᠴᠢᠷ ᠤᠬᠠᠭᠠᠨ ᠢ᠋ ᠨᠢ ᠣᠯᠳᠠᠭ ᠦᠭᠡᠢ᠂ ᠲᠠᠨᠢᠵᠤ ᠮᠡᠳᠡᠬᠦ ᠦᠭᠡᠢ ᠶᠦᠮ ᠴᠢᠨᠢ ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠯᠴᠢᠬᠠᠪᠠ ᠭᠡᠵᠦ ᠦᠷᠦ ᠡᠪᠡᠳᠦᠭᠰᠡᠨ ᠦ᠌ ᠭᠠᠢ!
— ᠲᠡᠭᠦᠨ ᠢ᠋ ᠴᠢᠨᠢ ᠪᠢ ᠠᠪᠠᠴᠢᠵᠤ ᠳᠡᠭᠦᠵᠢᠯᠡᠵᠦ ᠬᠠᠶᠠᠭᠰᠠᠨ ᠶᠤᠮ᠃ ᠮᠣᠩᠭᠣᠯ ᠤ᠋ᠨ ᠤᠬᠢᠶᠠᠳᠠᠰᠤ ᠳᠣᠯᠢᠶᠠᠵᠤ ᠭᠡᠳᠡᠰᠦ ᠨᠢ ᠥᠭᠡᠬᠦᠯᠡᠭᠰᠡᠨ ᠮᠠᠭᠤ ᠳᠤᠷᠠᠰᠬᠠ ᠶ᠋ᠢ ᠥᠯᠥᠩᠲᠦ ᠶ᠋ᠢᠨ ᠡᠬᠢᠨ ᠳ᠋ᠦ᠍ ᠡᠯᠭᠦᠵᠦ ᠬᠠᠶᠠᠨ ᠦᠬᠦᠬᠦ ᠶ᠋ᠢᠨ ᠮᠠᠭᠤ ᠪᠠᠷ ᠦᠬᠦᠭ! ᠥᠯᠥᠭᠴᠢᠨ ᠴᠢᠨᠣᠠ ᠪᠠᠷ ᠰᠡᠭᠴᠢᠭᠦᠯᠵᠦ ᠦᠬᠦᠭ! ᠭᠡᠰᠡᠨ ᠶᠦᠮ᠃ ᠬᠠᠮᠢᠭᠠ ᠭᠠᠵᠠᠷ ᠴᠦ᠍ ᠲᠡᠢᠮᠦ ᠨᠢᠭᠡ ᠠᠢᠯ ᠤ᠋ᠨ ᠤᠬᠢᠶᠠᠳᠠᠰᠤ ᠳᠣᠯᠢᠶᠠᠭᠰᠠᠨ ᠵᠣᠯᠪᠢᠩ ᠨᠣᠬᠠᠢ ᠰᠢᠭ᠋ ᠭᠠᠪᠢᠬᠤ ᠦᠭᠡᠢ ᠠᠮᠢᠲᠠᠨ ᠪᠠᠢᠭᠠᠳ ᠪᠠᠢᠬᠤ ᠶᠤᠮ᠃ ᠲᠡᠷᠡ ᠬᠥᠮᠦᠨ ᠢ᠋ ᠥᠯᠵᠡᠢᠰᠠᠩ ᠭᠡᠳᠡᠭ᠃ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠨᠣᠶᠠᠨ ᠰᠠᠩ ᠤ᠋ᠨ ᠭᠣᠴᠢᠭᠠ ᠶᠠᠪᠤᠭᠰᠠᠨ ᠬᠥᠮᠦᠨ᠃ ᠬᠡᠵᠢᠶᠡ ᠳ᠋ᠡᠭᠡᠨ ᠬᠥᠮᠦᠨ ᠦ᠌ ᠮᠠᠭᠤ ᠶ᠋ᠢ ᠦᠵᠡᠬᠦ ᠭᠡᠵᠦ ᠰᠢᠩᠰᠢᠯᠡᠳᠡᠭ ᠡᠷᠡ᠃ ᠪᠢ ᠲᠡᠭᠦᠨ ᠢ᠋ ᠱᠠᠯ ᠵᠢᠭᠰᠢᠳᠡᠭ ᠶᠦᠮ᠃ ᠬᠠᠮᠢᠭᠠ ᠭᠠᠵᠠᠷ ᠤ᠋ᠨ ᠮᠠᠭᠤ ᠭᠤᠢᠷᠠᠨᠴᠢ ᠶ᠋ᠢᠨ ᠰᠢᠭᠡᠰᠦ ᠶᠠᠭᠠᠬᠢᠵᠤ ᠶᠠᠪᠤᠵᠤ ᠪᠠᠢᠭᠠᠳ ᠬᠦᠩ ᠦ᠋ᠨ ᠶᠠᠮᠤᠨ ᠳ᠋ᠤ᠌ ᠠᠯᠪᠠ ᠬᠠᠭᠠᠳᠠᠭ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ᠃ ᠭᠡᠬᠦ ᠳ᠋ᠡᠭᠡᠨ ᠨᠣᠶᠠᠳ ᠬᠡᠷᠭᠡᠮᠲᠡᠳ ᠢ᠋ ᠬᠢᠷᠢ ᠪᠡᠷ ᠢ᠋ᠶ᠋ᠡᠨ ᠪᠤᠬᠤᠷᠴᠢᠯᠠᠵᠤ ᠴᠢᠳᠠᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠡᠳᠡᠨᠦᠰ ᠲᠡᠭᠡᠨ ᠰᠠᠢᠬᠠᠨ ᠯᠠ ᠬᠠᠷᠠᠭᠳᠠᠳᠠᠭ ᠪᠠᠢᠯᠭᠦᠢ!
— ᠡᠢᠮᠦ ᠣᠯᠢᠭ ᠦᠭᠡᠢ ᠠᠮᠢᠲᠠᠨ ᠪᠠᠢᠭᠰᠠᠨ ᠶᠤᠮ ᠤᠤ! ᠳᠠᠩᠴᠤ ᠲᠡᠢᠮᠦ ᠪᠠᠢᠭᠰᠠᠨ᠃ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠢ᠋ ᠲᠠᠯᠢᠢᠭᠴᠢ ᠪᠣᠯᠳᠠᠭ ᠤ᠋ᠨ ᠲᠡᠷᠡ ᠵᠢᠯ ᠦ᠋ᠨ ᠵᠤᠨ ᠬᠠᠷᠠ ᠴᠡᠷᠢᠭ ᠦ᠋ᠨ ᠬᠢᠨ ᠢ᠋ ᠳᠠᠭᠠᠭᠤᠯᠵᠤ ᠨᠠᠮᠠᠶ᠋ᠢ ᠡᠰᠡ ᠯᠡ ᠱᠣᠷᠣᠩ ᠳ᠋ᠤ᠌ ᠬᠢᠴᠢᠬᠡᠬᠦ ᠰᠢᠬᠠᠭᠰᠠᠨ ᠶᠤᠮ᠃
— ᠲᠡᠭᠡᠨᠡ ᠠ᠋᠂ ᠲᠡᠭᠦᠨ ᠳ᠋ᠦ᠍ ᠬᠢᠬᠦ ᠦᠭᠡᠢ ᠮᠠᠭᠤ ᠠᠵᠢᠯ ᠭᠡᠵᠦ ᠪᠠᠢᠬᠤ ᠦᠭᠡᠢ᠃ ᠲᠡᠷᠡ ᠵᠢᠯ ᠴᠢ ᠪᠠᠭᠠ ᠬᠠᠲᠤᠨ ᠢ᠋ ᠠᠪᠴᠤ ᠳᠤᠲᠠᠭᠠᠳᠠᠭ ᠤᠳᠠᠭᠠ ᠬᠠᠷᠠ ᠡᠷᠲᠡ ᠪᠡᠷ ᠬᠦᠩ ᠨᠣᠶᠠᠨ ᠳ᠋ᠤ᠌ ᠠᠩᠬᠠ ᠮᠡᠳᠡᠭᠦᠯᠦᠭᠰᠡᠨ ᠬᠥᠮᠦᠨ ᠪᠣᠯ ᠮᠥᠨ ᠲᠡᠷᠡ ᠢᠮᠠᠭᠠᠨ ᠳᠠᠭᠤ ᠲᠠᠢ ᠥᠯᠵᠡᠢᠰᠠᠩ ᠰᠢᠲᠠ! ᠶᠡᠬᠡ ᠱᠠᠩ ᠤ᠋ᠨ ᠣᠯᠵᠠ ᠡᠪᠦᠷᠲᠦᠯᠡᠬᠦ ᠭᠡᠵᠦ ᠨᠣᠶᠠᠳ ᠲᠤ ᠰᠠᠢᠮᠰᠤᠷᠠᠵᠤ ᠮᠢᠨᠦ ᠦᠢᠯᠡ ᠶ᠋ᠢ ᠮᠠᠭᠤ ᠴᠦ᠍ ᠪᠠᠷᠠᠭᠠ ᠦᠭᠡᠢ᠃ ᠬᠠᠷᠢᠨ ᠲᠡᠷᠡ ᠤᠳᠠᠭᠠ ᠴᠢᠨᠦ ᠠᠷᠤ ᠠ᠋ᠴᠠ ᠴᠡᠷᠢᠭ ᠠᠪᠴᠤ ᠨᠡᠬᠡᠵᠦ ᠶᠠᠪᠤᠭᠰᠠᠨ ᠬᠥᠮᠦᠰ ᠦ᠋ᠨ ᠳᠤᠮᠳᠠ ᠪᠢ ᠪᠠᠢᠭᠰᠠᠨ ᠰᠢᠦ᠃
— ᠲᠡᠷᠡ ᠦᠶᠡ ᠳ᠋ᠦ᠍ ᠲᠠᠨ ᠤ᠋ ᠭᠠᠷ ᠲᠤ ᠥᠭᠲᠡᠭᠰᠡᠨ ᠪᠣᠯ ᠪᠢᠳᠡ ᠬᠣᠶᠠᠷ ᠦᠰᠲᠡᠨ ᠳᠠᠢᠰᠤᠨ ᠪᠣᠯᠴᠢᠬᠠᠭᠰᠠᠨ ᠪᠠᠢᠬᠠ! ᠥᠨᠥᠳᠥᠷ ᠥᠩᠭᠡᠷᠡᠭᠰᠡᠨ ᠲᠡᠦᠬᠡ ᠪᠡᠨ ᠬᠠᠭᠤᠴᠢᠯᠠᠵᠤ ᠰᠠᠭᠤᠬᠤ ᠳ᠋ᠤ᠌ ᠬᠠᠷᠢᠨ ᠰᠠᠢᠨ ᠨᠠᠢᠵᠠ ᠪᠣᠯᠴᠢᠬᠠᠭᠰᠠᠨ ᠪᠠᠢᠳᠠᠭ᠁ ᠣᠭᠣᠰᠣᠷ ᠦᠭᠡᠢ ᠣᠷᠴᠢᠯᠠᠩ ᠤ᠋ᠨ ᠶᠠᠪᠤᠳᠠᠯ ᠭᠡᠭᠴᠢ ᠡᠢᠮᠦ ᠯᠡ ᠶᠦᠮ ᠳᠡ! ᠭᠡᠵᠦ ᠬᠣᠶᠠᠭᠤᠯᠠ ᠵᠡᠷᠭᠡ ᠪᠡᠷ ᠢᠨᠢᠶᠡᠯᠴᠡᠨ ᠬᠤᠨᠳᠠᠭᠠ ᠲᠤᠯᠭᠠᠵᠤ ᠤᠤᠭᠤᠯᠴᠠᠪᠠ᠃
— ᠲᠡᠭᠡᠪᠡᠯ ᠡᠨᠡ ᠮᠠᠭᠤ ᠢᠮᠠᠭᠠᠨ ᠳᠤᠷᠠᠰᠬᠠ ᠴᠢᠨᠢ ᠣᠳᠣ ᠠᠮᠢᠳᠤ ᠭᠦᠶᠦᠵᠦ ᠪᠠᠢᠨᠠ ᠭᠡᠰᠡᠨ ᠦᠭᠡ ᠤᠤ?
— ᠲᠡᠭᠡᠯᠭᠦᠢ ᠳᠡ᠃ ᠪᠦᠷ ᠮᠢᠨᠦ ᠮᠠᠭᠤ ᠠ᠋ᠴᠠ ᠪᠣᠯᠵᠠᠢ᠃ ᠮᠡᠳᠡᠬᠦ ᠦᠭᠡᠢ᠂ ᠲᠠᠨᠢᠬᠤ ᠦᠭᠡᠢ ᠭᠡᠳᠡᠭ ᠴᠢᠨᠢ ᠬᠡᠴᠡᠭᠦᠦ ᠪᠠᠢᠬᠤ ᠦᠭᠡᠢ ᠤᠤ᠃ ᠶᠠᠪᠤᠵᠤ ᠶᠠᠪᠤᠵᠤ ᠤᠷᠰᠢᠭ ᠤ᠋ᠨ ᠦᠨᠳᠦᠰᠦ ᠶ᠋ᠢ ᠲᠠᠯᠪᠢᠵᠤ ᠶᠠᠪᠤᠭᠤᠯᠤᠨᠠ ᠭᠡᠳᠡᠭ ᠴᠢᠨᠢ᠁ ᠮᠠᠨᠴᠤᠷᠭᠠ ᠠᠬᠠ ᠬᠡᠷᠰᠡᠦᠯᠡᠵᠦ ᠪᠠᠢᠭᠠᠷᠠᠢ᠂ ᠬᠤᠯᠠᠭᠠᠢᠴᠢ ᠨᠣᠬᠠᠢ ᠪᠣᠷᠪᠢ ᠲᠠᠲᠠᠨᠠ ᠭᠡᠳᠡᠭ ᠰᠢᠦ!
— ᠶᠠᠭ ᠲᠡᠢᠮᠦ! ᠴᠢ ᠴᠦ᠍ ᠬᠡᠷᠰᠡᠦᠬᠡᠨ ᠪᠠᠢ ᠳᠠ! ᠴᠢ ᠪᠢᠳᠡ ᠬᠣᠶᠠᠷ ᠤ᠋ᠨ ᠠᠯᠢᠨ ᠢ᠋ ᠨᠢ ᠣᠭᠣᠰᠣᠷᠯᠠᠵᠤ ᠠᠪᠤᠭᠠᠳ ᠶᠠᠮᠤᠨ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍ ᠲᠡᠷᠡ ᠮᠠᠭᠤ ᠶ᠋ᠢᠨ ᠡᠪᠦᠷ ᠲᠦ᠍ ᠶᠡᠬᠡ ᠮᠥᠩᠭᠥ ᠲᠦᠭᠳᠦᠢᠨᠡ ᠰᠢᠦ!
— ᠣᠳᠣ ᠶᠠᠮᠤᠨ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ ᠳᠠ! ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠲᠠᠯᠢᠢᠭᠴᠢ ᠪᠣᠯᠴᠢᠬᠠᠯᠠ᠁ ᠬᠠᠷᠢᠨ ᠴᠠᠭᠠᠳᠤ ᠢᠮᠠᠭᠠᠨ ᠳᠠᠭᠤᠲᠤ ᠴᠢᠨᠢ ᠬᠤᠪᠢ ᠶ᠋ᠢᠨ ᠥᠰᠢᠶᠡ ᠵᠠᠩᠭᠢᠳᠴᠤ ᠪᠣᠯᠴᠢᠮᠠ ᠦᠭᠡᠢ ᠠᠵᠢᠯ ᠬᠢᠨᠡ᠃ ᠲᠡᠭᠡᠬᠦ ᠳ᠋ᠦ᠍ ᠬᠣᠬᠢᠷᠠᠳᠠᠭ ᠨᠢ ᠲᠠ ᠪᠢᠳᠡ ᠬᠣᠶᠠᠷ᠃ ᠴᠢᠷᠦᠯᠳᠦᠭᠡᠳ ᠡᠬᠡᠨᠡᠷ ᠬᠡᠦᠬᠡᠳ ᠦ᠋ᠳ ᠴᠦ᠍ ᠳᠠᠭᠠᠭᠠᠳ ᠵᠣᠪᠠᠯᠠᠩ ᠠᠮᠰᠠᠬᠤ ᠶ᠋ᠢᠨ ᠨᠡᠮᠡᠷᠢ!
— ᠬᠡᠯᠡᠪᠡᠯ ᠴᠦ᠍ ᠲᠡᠢᠮᠦ! ᠭᠡᠪᠡᠴᠦ ᠰᠢᠷᠠᠪᠳᠣᠷᠵᠢ ᠲᠠᠯᠢᠢᠭᠴᠢ ᠪᠣᠯᠴᠢᠬᠠᠯᠠ ᠭᠡᠬᠦ ᠳ᠋ᠦ᠍ ᠷᠠᠰᠢ ᠵᠠᠬᠢᠷᠤᠭᠴᠢ᠂ ᠮᠢᠩᠭᠠᠨᠪᠤᠤ ᠲᠤᠰᠠᠯᠠᠭᠴᠢ ᠵᠡᠷᠭᠡ ᠶ᠋ᠢᠨ ᠬᠠᠭᠤᠴᠢᠨ ᠫᠤᠤ ᠶ᠋ᠢᠨ ᠬᠤᠭᠤᠷᠬᠠᠢ ᠨᠤᠭᠤᠳ ᠪᠠᠢᠭᠠ ᠰᠢᠦ! ᠬᠠᠷᠢᠨ ᠴᠢᠮᠠ ᠳ᠋ᠤ᠌ ᠠᠵᠠ ᠲᠠᠢ ᠪᠠᠢᠵᠤ ᠮᠡᠳᠡᠨᠡ᠃ ᠲᠠᠯᠢᠢᠭᠴᠢ ᠬᠦᠩ ᠨᠣᠶᠠᠨ ᠠ᠋ᠴᠠ ᠬᠣᠢᠰᠢ ᠪᠠᠭᠠ ᠬᠠᠲᠤᠨ ᠵᠠᠰᠠᠭ ᠪᠠᠷᠢᠵᠤ ᠪᠠᠢᠨᠠ ᠭᠡᠰᠡᠨ ᠰᠤᠷᠠᠭ ᠲᠠᠢ᠃ ᠴᠢᠮᠠᠶ᠋ᠢ ᠬᠦᠷᠦᠭᠡᠳ ᠣᠴᠢᠬᠤ ᠳ᠋ᠤ᠌ ᠪᠠᠭᠠ ᠬᠠᠲᠤᠨ ᠪᠡᠷᠬᠡᠳᠡᠵᠦ ᠨᠢᠭᠡ ᠶᠠᠭᠤᠮᠠ ᠪᠣᠯᠬᠤ ᠪᠠᠢᠬᠤ ᠠ᠋᠁ ᠭᠡᠵᠦ ᠮᠠᠷᠵᠠᠩᠨᠠᠨ ᠢᠨᠢᠶᠡᠪᠡ᠃
— ᠣᠳᠣ ᠶᠠᠭᠤ ᠪᠠᠨ ᠬᠢᠬᠦ ᠪᠣᠢ? ᠠᠢᠯ ᠤ᠋ᠨ ᠡᠷᠦᠬᠡ ᠡᠭᠦᠳᠡ ᠶ᠋ᠢ ᠣᠩᠭᠣᠢᠯᠭᠠᠵᠤ᠂ ᠵᠠᠰᠠᠭ ᠶᠠᠮᠤᠨ ᠭᠡᠳ ᠰᠠᠭᠰᠠᠯᠵᠠᠭᠰᠠᠨ ᠡᠬᠡᠨᠡᠷ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠢ᠋ ᠳᠡᠩᠰᠡᠯᠭᠡᠬᠦ ᠪᠡᠨ ᠪᠠᠢᠶᠠ ᠵᠦᠭᠡᠷ! ᠭᠡᠳ ᠠᠩᠴᠢᠨᠵᠠᠪ ᠡᠪ ᠦᠭᠡᠢᠷᠬᠡᠨ ᠢᠨᠢᠶᠡᠮᠰᠦᠭᠯᠡᠪᠡ᠃
ᠮᠣᠷᠢ ᠬᠠᠷᠠᠵᠤ ᠦᠵᠡᠬᠦ ᠪᠡᠷ ᠭᠠᠷᠤᠭᠰᠠᠨ ᠮᠠᠨᠴᠤᠷᠭᠠ ᠭᠡᠷ ᠲᠦ᠍ ᠣᠷᠣᠵᠤ ᠢᠷᠡᠭᠡᠳ᠄
— ᠦᠦᠷ ᠦ᠋ᠨ ᠴᠣᠯᠮᠣᠨ ᠳᠡᠭᠡᠷᠡ ᠭᠢᠯᠠᠯᠵᠠᠵᠤ ᠪᠠᠢᠨᠠ᠃ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠪᠠᠨ ᠭᠠᠷᠴᠤ ᠲᠩᠷᠢ ᠳ᠋ᠦ᠍ ᠮᠥᠷᠭᠥᠶᠡ! ᠵᠤᠯᠠᠢ ᠵᠤᠯᠠᠢ ᠪᠠᠨ ᠭᠢᠰᠬᠢᠭᠰᠡᠨ ᠠᠬᠠ ᠳᠡᠭᠦᠦ ᠪᠢᠰᠢ ᠴᠦ᠍ ᠭᠡᠰᠡᠨ ᠵᠣᠪᠠᠯ ᠵᠢᠷᠭᠠᠯ ᠢ᠋ᠶ᠋ᠠᠨ ᠬᠠᠮᠲᠤᠳᠬᠠᠭᠰᠠᠨ ᠠᠬᠠ ᠳᠡᠭᠦᠦ ᠪᠠᠷᠢᠯᠳᠤᠶᠠ ᠭᠡᠰᠡᠨ ᠳ᠋ᠦ᠍ ᠠᠩᠴᠢᠨᠵᠠᠪ᠄
— ᠵᠠ ᠲᠡᠭᠡᠶᠡ ᠭᠡᠪᠡ᠃
— ᠬᠠᠷᠠ ᠨᠢᠳᠦᠲᠦ ᠠ᠋! ᠵᠣᠪᠠᠯᠭᠠ ᠠ᠋! ᠭᠡᠰᠡᠨ ᠳ᠋ᠦ᠍ ᠨᠥᠭᠦᠭᠡ ᠭᠡᠷ ᠡᠴᠡ ᠲᠡᠷᠡ ᠬᠣᠶᠠᠷ ᠱᠦᠷ ᠱᠠᠷ ᠬᠢᠨ ᠨᠢᠳᠦ ᠪᠡᠨ ᠨᠤᠬᠤᠯᠠᠭᠰᠠᠭᠠᠷ ᠭᠠᠷᠴᠤ ᠢᠷᠡᠪᠡ᠃
— ᠲᠠ ᠬᠣᠶᠠᠷ ᠶᠠᠭᠤᠮᠠ ᠪᠠᠵᠠᠭᠠ!
— ᠬᠠᠮᠢᠭᠠ ᠶᠠᠪᠤᠬᠤ ᠪᠣᠢ?
— ᠶᠠᠭᠤ ᠪᠠᠵᠠᠭᠠᠬᠤ ᠶᠤᠮ? ᠭᠡᠵᠦ ᠲᠡᠷᠡ ᠬᠣᠶᠠᠷ ᠤᠬᠠᠭᠠᠨ ᠲᠥᠬᠥᠭᠡ ᠶ᠋ᠢ ᠨᠢ ᠣᠯᠬᠤ ᠦᠭᠡᠢ ᠶᠠᠭᠤᠮᠠ ᠪᠣᠯᠵᠤ ᠳᠡᠮᠡᠢ ᠯᠡ ᠪᠡᠮᠪᠡᠭᠡᠨᠡᠨᠡ᠃
— ᠲᠩᠷᠢ ᠳ᠋ᠦ᠍ ᠮᠥᠷᠭᠥᠬᠦ ᠶᠠᠭᠤᠮᠠ ᠪᠠᠵᠠᠭᠠᠨᠠ ᠪᠢᠵᠡ! ᠪᠢᠳᠡ ᠬᠣᠶᠠᠷ ᠣᠳᠣ ᠲᠩᠷᠢ ᠳ᠋ᠦ᠍ ᠮᠥᠷᠭᠥᠵᠦ ᠠᠨᠳᠠ ᠪᠠᠷᠢᠯᠳᠤᠨ ᠲᠠᠩᠭᠠᠷᠢᠭ ᠲᠠᠯᠪᠢᠨᠠ᠃
— ᠵᠠ! ᠭᠡᠵᠦ ᠴᠠᠭᠠᠳᠤᠭᠤᠯᠠ ᠨᠢ ᠪᠣᠰᠢᠭᠣ ᠬᠥᠳᠡᠯᠪᠡ᠃
ᠭᠠᠳᠠᠨᠠ ᠰᠢᠷᠢᠳᠡᠭ ᠳᠡᠪᠢᠰᠴᠦ ᠰᠢᠷᠡᠭᠡᠨ ᠳᠡᠭᠡᠷᠡ ᠮᠥᠴᠢ ᠰᠢᠭᠦᠰᠦ᠂ ᠬᠠᠭᠤᠷᠤᠭᠰᠠᠨ ᠪᠤᠳᠠᠭᠠ᠂ ᠰᠢᠬᠢᠷ ᠴᠢᠪᠠᠭᠠ᠂ ᠰᠢᠷᠠ ᠲᠣᠰᠣ ᠠᠭᠠᠷᠤᠤᠯ᠂ ᠢᠳᠡᠵᠦ ᠤᠤᠭᠤᠬᠤ ᠲᠠᠪᠤᠨ ᠠᠮᠲᠠᠲᠠᠨ ᠵᠡᠷᠭᠡ ᠶᠠᠭᠤᠮᠠ ᠦᠷᠦᠭᠳᠡᠵᠦ ᠰᠠᠩ ᠲᠠᠯᠪᠢᠵᠤ ᠭᠤᠷᠪᠠᠨ ᠵᠤᠯᠠ ᠠᠰᠠᠭᠠᠪᠠ᠃
ᠮᠠᠨᠴᠤᠷᠭᠠ ᠠᠩᠴᠢᠨᠵᠠᠪ ᠬᠣᠶᠠᠷ ᠳᠡᠪᠢᠰᠦᠭᠰᠡᠨ ᠰᠢᠷᠢᠳᠡᠭ ᠳᠡᠭᠡᠷᠡ ᠰᠥᠭᠥᠳᠴᠦ ᠲᠩᠷᠢ ᠪᠤᠷᠬᠠᠨ ᠳ᠋ᠠᠭᠠᠨ ᠮᠥᠷᠭᠥᠨᠡ ᠭᠡᠵᠦ ᠣᠳᠣᠲᠤ ᠲᠩᠷᠢ ᠳ᠋ᠦ᠍ ᠠᠩᠬᠠᠯᠠᠨ ᠵᠠᠯᠪᠠᠷᠢᠨ ᠮᠥᠷᠭᠥᠭᠡᠳ᠂ ᠰᠢᠷᠠ ᠣᠷᠣᠢ ᠵᠦᠭ ᠬᠠᠲᠤᠨ ᠡᠴᠢᠭᠡ ᠬᠠᠨ ᠮᠤᠨᠠ ᠰᠠᠬᠢᠭᠤᠰᠤ ᠳ᠋ᠤ᠌ ᠮᠥᠷᠭᠥᠮᠦ ᠭᠡᠵᠦ ᠰᠦᠵᠢᠭᠯᠡᠨ ᠮᠥᠷᠭᠥᠭᠡᠳ ᠡᠬᠡ ᠤᠯᠠᠭᠠᠨ ᠬᠠᠲᠤᠨ ᠳ᠋ᠠᠭᠠᠨ ᠠᠨᠳᠠᠭᠠᠢᠯᠠᠨ ᠮᠥᠷᠭᠥᠮᠦ ᠭᠡᠵᠦ ᠭᠤᠷᠪᠠᠨᠲᠠ ᠮᠥᠷᠭᠥᠵᠦ ᠬᠣᠶᠠᠭᠤᠯᠠ ᠬᠠᠳᠠᠭ ᠰᠣᠯᠢᠯᠴᠠᠨ ᠬᠠᠴᠠᠷ ᠢ᠋ᠶ᠋ᠠᠨ ᠨᠠᠭᠠᠨ ᠴᠢᠩᠭᠠ ᠲᠡᠪᠡᠷᠢᠯᠴᠡᠪᠡ᠃
ᠠᠳᠤᠭᠤᠴᠢᠨ ᠬᠥᠮᠦᠨ ᠦ᠌ ᠨᠢᠳᠦ ᠪᠡᠷ ᠬᠠᠷᠠᠪᠠᠯ ᠡᠳᠡ ᠬᠣᠶᠠᠷ ᠡᠭᠡᠭᠡ ᠯᠡ ᠦᠦᠷ ᠦ᠋ᠨ ᠭᠡᠭᠡ ᠪᠡᠷ ᠦᠦᠷᠰᠡᠨ ᠢᠨᠴᠠᠭᠠᠭᠰᠠᠨ ᠬᠤᠷ ᠳᠡᠯ ᠲᠡᠢ ᠬᠣᠶᠠᠷ ᠠᠵᠢᠷᠭᠠ ᠥᠨᠳᠥᠷ ᠮᠤᠨᠠ ᠶ᠋ᠢᠨ ᠬᠢᠷᠠ ᠳᠡᠭᠡᠷᠡ ᠮᠤᠨᠳᠠᠭᠠ ᠮᠤᠨᠳᠠᠭᠠ ᠪᠠᠨ ᠬᠠᠵᠠᠯᠠᠨ ᠡᠭᠡᠨᠡᠭᠰᠢᠵᠦ ᠪᠠᠢᠭᠠ ᠵᠢᠷᠤᠭ ᠰᠢᠭ᠋ ᠬᠠᠷᠠᠭᠳᠠᠬᠤ ᠨᠢ ᠭᠠᠢᠬᠠᠯᠲᠠᠢ!
ᠮᠠᠷᠭᠠᠲᠤᠷ ᠨᠢ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠬᠠᠷᠢᠭᠠᠳ ᠢᠷᠡᠴᠢᠬᠡᠯᠡ ᠭᠡᠵᠦ ᠡᠳᠡ ᠬᠣᠶᠠᠷ ᠢ᠋ ᠱᠣᠣᠮᠠᠢ ᠶ᠋ᠢᠨ ᠲᠠᠭᠲᠤ ᠳ᠋ᠠᠭᠠᠨ ᠳᠠᠢᠯᠠᠬᠤ ᠪᠠᠷ ᠪᠣᠯᠪᠠ᠃
ᠠᠩᠴᠢᠨᠵᠠᠪ ᠪᠤᠭᠤᠲᠤ ᠠ᠋ᠴᠠ ᠰᠢᠨᠡᠯᠡᠵᠦ ᠴᠠᠭᠠᠯᠠᠬᠤ ᠭᠡᠵᠦ ᠭᠤᠯᠢᠷ ᠪᠤᠳᠠᠭᠠ᠂ ᠰᠢᠬᠢᠷ ᠴᠢᠪᠠᠭᠠ᠂ ᠪᠤᠷᠠᠮ ᠪᠣᠭᠣᠷᠰᠣᠭ᠂ ᠦᠵᠦᠮ᠂ ᠡᠯᠵᠢᠭᠡᠨ ᠴᠢᠬᠢ᠂ ᠴᠠᠢ ᠳᠠᠪᠤᠰᠤ᠂ ᠴᠦᠳᠡᠩ ᠬᠦᠵᠢ᠂ ᠳ᠋ᠦᠩᠰᠡᠨ ᠲᠠᠮᠠᠬᠢ ᠵᠡᠷᠭᠡ ᠡᠨᠡ ᠲᠡᠷᠡ ᠶᠠᠭᠤᠮᠠ ᠭᠠᠨᠵᠤᠭᠠᠯᠠᠵᠤ ᠠᠭᠤᠯᠠᠨ ᠳ᠋ᠠᠭᠠᠨ ᠪᠤᠴᠠᠵᠠᠢ᠃
ᠲᠡᠭᠦᠨ ᠡᠴᠡ ᠬᠣᠢᠰᠢ ᠠᠩᠴᠢᠨᠵᠠᠪ ᠬᠠᠶᠠ ᠪᠤᠭᠤᠲᠤ ᠳ᠋ᠤ᠌ ᠣᠷᠣᠵᠤ ᠢᠷᠡᠪᠡᠯ ᠮᠠᠨᠴᠤᠷᠭᠠ ᠲᠠᠢ ᠵᠠᠪᠠᠯ ᠠᠭᠤᠯᠵᠠᠵᠤ᠂ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠱᠣᠣᠮᠠᠢ ᠶ᠋ᠢᠨ ᠲᠠᠭᠲᠤ ᠳ᠋ᠤ᠌ ᠠᠷᠢᠬᠢᠳᠠᠳᠠᠭ ᠵᠤᠷᠰᠢᠯ ᠲᠠᠢ ᠪᠣᠯᠪᠠ᠃ ᠨᠢᠭᠡ ᠤᠳᠠᠭᠠ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠲᠠᠢ ᠭᠤᠷᠪᠠᠭᠤᠯᠠ ᠶᠡᠬᠡ ᠣᠷᠣᠢ ᠪᠣᠯᠲᠠᠯᠠ ᠠᠷᠢᠬᠢᠳᠠᠵᠤ ᠠᠩᠴᠢᠨᠵᠠᠪ ᠮᠠᠨᠴᠤᠷᠭᠠ ᠬᠣᠶᠠᠷ ᠥᠪᠡᠷ ᠦ᠋ᠨ ᠬᠠᠯᠠ ᠵᠣᠪᠠᠭᠤᠷᠢ ᠪᠠᠨ ᠠᠭᠤᠳᠠᠯᠤᠨ ᠲᠣᠭᠠᠴᠢᠵᠤ ᠶᠠᠷᠢᠯᠴᠠᠨ ᠬᠥᠭᠡᠷᠦᠭᠰᠡᠭᠡᠷ ᠪᠠᠢᠵᠤ ᠶᠡᠬᠡ ᠣᠷᠣᠢ ᠪᠣᠯᠭᠠᠪᠠ᠃ ᠨᠡᠯᠢᠶᠡᠳ ᠬᠠᠯᠠᠮᠰᠠᠭᠰᠠᠨ ᠤ᠋ ᠤᠴᠢᠷ ᠠᠩᠴᠢᠨᠵᠠᠪ ᠵᠠᠪᠠᠯ ᠰᠥᠨᠢ ᠪᠡᠷ ᠠᠭᠤᠯᠠᠨ ᠳ᠋ᠤ᠌ ᠭᠠᠷᠤᠨᠠ ᠭᠡᠵᠦ ᠵᠢᠳᠬᠦᠭᠡᠳ ᠪᠠᠢᠬᠤᠯᠠᠷ ᠮᠠᠨᠴᠤᠷᠭᠠ ᠲᠡᠭᠦᠨ ᠢ᠋ ᠬᠠᠷᠠ ᠳᠠᠪᠠᠭᠠ ᠳᠠᠪᠠᠲᠠᠯᠠ ᠦᠳᠡᠵᠡᠢ᠃
ᠬᠠᠷᠠ ᠳᠠᠪᠠᠭᠠᠨ ᠳᠡᠭᠡᠷᠡ ᠭᠠᠷᠤᠭᠠᠳ ᠰᠠᠯᠬᠤ ᠳ᠋ᠠᠭᠠᠨ ᠠᠩᠴᠢᠨᠵᠠᠪ᠄
— ᠮᠠᠨᠴᠤᠷᠭᠠ ᠠᠬᠠ ᠠ᠋᠂ ᠲᠡᠷᠡ ᠢᠮᠠᠭᠠᠨ ᠲᠤᠷᠠᠰᠬᠠ ᠶ᠋ᠢ ᠬᠠᠭᠤᠯᠵᠤ ᠮᠠᠭᠤ ᠵᠣᠪᠠᠯᠭᠠ ᠶ᠋ᠢ ᠨᠢ ᠴᠢᠨᠣᠠ ᠶ᠋ᠢᠨ ᠬᠣᠭᠣᠯᠠ ᠪᠣᠯᠭᠠᠶᠠ! ᠪᠢᠳᠡ ᠬᠣᠶᠠᠷ ᠴᠢᠨᠢ《 ᠬᠠᠭᠠᠨ》 ᠤ᠋ ᠬᠠᠲᠤᠨ ᠳ᠋ᠤ᠌ ᠬᠠᠯᠳᠠᠭᠰᠠᠨ ᠠᠭᠤᠴᠢᠯᠠᠰᠢ ᠦᠭᠡᠢ ᠶᠠᠯᠠᠲᠠᠨ ᠰᠢᠦ! ᠡᠨᠡ ᠢᠮᠠᠭᠠᠨ ᠳᠠᠭᠤᠲᠤ ᠶ᠋ᠢᠨ ᠭᠠᠢ ᠶ᠋ᠢ ᠡᠳ᠋ᠯᠡᠭᠰᠡᠨ ᠦᠭᠡᠢ ᠪᠣᠯ ᠪᠢᠳᠡ ᠣᠳᠣ ᠯᠠᠪ ᠰᠠᠢᠬᠠᠨ ᠶᠠᠪᠤᠵᠤ ᠪᠠᠢᠬᠠ ᠭᠡᠪᠡ᠃
— ᠲᠡᠢᠮᠦ ᠰᠢᠦ! ᠴᠢ ᠪᠢᠳᠡ ᠬᠣᠶᠠᠷ ᠰᠢᠭ᠋ ᠬᠦᠩ ᠨᠣᠶᠠᠨ ᠤ᠋ ᠬᠠᠲᠤᠨ ᠢ᠋ ᠪᠤᠯᠢᠶᠠᠵᠤ ᠡᠪᠦᠷᠯᠡᠬᠦ ᠰᠥᠰᠥ ᠲᠡᠢ ᠡᠷᠡ ᠬᠡᠳᠦ ᠪᠠᠢᠨᠠ? ᠡᠨᠡ ᠮᠠᠭᠤ ᠤᠷᠰᠢᠭ ᠤ᠋ᠨ ᠦᠨᠳᠦᠰᠦ ᠶ᠋ᠢ ᠡᠷᠲᠡᠬᠡᠨ ᠲᠠᠰᠤᠯᠬᠤ ᠶᠤᠮ ᠰᠠᠨ ᠭᠡᠰᠡᠨ ᠳ᠋ᠦ᠍ ᠠᠩᠴᠢᠨᠵᠠᠪ᠄
— ᠪᠠᠢᠵᠠ᠂ ᠮᠠᠨᠴᠤᠷᠭᠠ ᠠᠬᠠ ᠠ᠋! ᠡᠨᠡ ᠮᠠᠭᠤ ᠳᠠᠮᠰᠢᠭ ᠢ᠋ ᠪᠢ ᠲᠠᠯᠪᠢᠵᠤ ᠶᠠᠪᠤᠭᠤᠯᠤᠭᠰᠠᠨ ᠳ᠋ᠠᠭᠠᠨ ᠭᠡᠮᠰᠢᠵᠦ ᠪᠠᠷᠠᠬᠤ ᠦᠭᠡᠢ᠃ ᠪᠢ ᠲᠡᠭᠦᠨ ᠢ᠋ ᠬᠠᠮᠢᠭᠠ ᠠ᠋ᠴᠠ ᠲᠠᠯᠪᠢᠭᠰᠠᠨ ᠪᠣᠯ ᠮᠥᠨ ᠲᠡᠨᠳᠡ ᠨᠢ ᠠᠪᠠᠴᠢᠵᠤ ᠳᠤᠷᠠᠰᠬᠠ ᠶ᠋ᠢ ᠨᠢ ᠬᠠᠭᠤᠯᠵᠤ ᠬᠠᠶᠠᠨᠠ᠁ ᠠᠬᠠ ᠲᠠ ᠰᠠᠨᠠᠭᠠ ᠠᠮᠤᠷ ᠪᠠᠢ᠂ ᠳᠡᠭᠦᠦ ᠨᠢ ᠪᠠᠢᠭᠰᠠᠨ ᠴᠠᠭ ᠲᠤ ᠳᠥᠷᠥᠭᠡ ᠬᠣᠭᠣᠰᠣᠨ ᠬᠠᠪᠢᠷᠤᠯᠳᠤᠬᠤ ᠦᠭᠡᠢ ᠠ᠋ ᠭᠡᠯᠡ!
— ᠲᠡᠢᠮᠦ! ᠬᠣᠶᠠᠭᠤᠯᠠ ᠪᠠᠨ ᠲᠡᠷᠡ ᠮᠠᠭᠤ ᠢᠮᠠᠭᠠᠨ ᠳᠤᠷᠠᠰᠬᠠ ᠶ᠋ᠢ ᠵᠣᠪᠠᠭᠠᠵᠤ ᠪᠠᠢᠵᠤ ᠲᠤᠷᠠᠰᠬᠠᠯᠠᠶᠠ!
— ᠮᠥᠨ᠂ ᠶᠠᠭ ᠳᠠ! ᠮᠠᠨᠴᠤᠷᠭᠠ ᠠᠬᠠ ᠠ᠋᠂ ᠪᠢ ᠳᠠᠬᠢᠭᠠᠳ ᠪᠠᠭᠤᠵᠤ ᠢᠷᠡᠬᠦ ᠳ᠋ᠦ᠍ ᠲᠠᠨ ᠳ᠋ᠤ᠌ ᠨᠢᠭᠡ ᠰᠠᠢᠨ ᠮᠣᠷᠢ ᠣᠯᠵᠤ ᠢᠷᠡᠶᠡ! ᠪᠢ ᠣᠳᠣ ᠡᠨᠳᠡ ᠡᠴᠡ ᠪᠤᠴᠠᠵᠤ ᠬᠣᠢᠲᠤᠨ ᠬᠠᠪᠤᠷ ᠢ᠋ᠶ᠋ᠠᠷ ᠳᠤᠯᠠᠭᠠᠨ ᠣᠷᠣᠭᠰᠠᠭᠠᠷ ᠬᠣᠢᠰᠢ ᠪᠠᠨ ᠶᠠᠪᠤᠨᠠ᠃ ᠪᠤᠴᠠᠯᠭᠠᠨ ᠳ᠋ᠠᠭᠠᠨ ᠬᠥᠲᠥᠯᠦᠭᠡ ᠬᠣᠶᠠᠷ ᠮᠣᠷᠢ ᠲᠠᠢ ᠱᠤᠤᠭᠢᠭᠤᠯᠵᠤ ᠢᠷᠡᠨᠡ ᠰᠢᠦ᠃ ᠲᠡᠭᠡᠭᠡᠳ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠪᠠᠨ ᠮᠠᠭᠤ ᠳᠤᠷᠠᠰᠬᠠ ᠶ᠋ᠢ᠁ ᠭᠡᠬᠦ ᠳ᠋ᠦ᠍ ᠠᠩᠴᠢᠨᠵᠠᠪ ᠤ᠋ᠨ ᠨᠢᠳᠦᠨ ᠳ᠋ᠦ᠍ ᠨᠢᠯᠪᠤᠰᠤ ᠴᠡᠢᠯᠡᠭᠡᠨᠡᠵᠦ ᠪᠠᠢᠭᠰᠠᠨ ᠨᠢ ᠰᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠮᠡᠯᠲᠡᠯᠵᠡᠨᠡ᠃
— ᠵᠠ᠂ ᠳᠡᠭᠦᠦ ᠮᠢᠨᠢ ᠬᠦᠰᠡᠯ ᠵᠣᠷᠢᠯ ᠰᠠᠨᠠᠭᠰᠠᠨ ᠢ᠋ᠶ᠋ᠠᠷ ᠪᠡᠶᠡᠯᠡᠲᠦᠭᠡᠢ! ᠪᠢ ᠴᠢᠮᠠᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠶᠠ! ᠭᠡᠳ ᠮᠠᠨᠴᠤᠷᠭᠠ ᠠᠩᠴᠢᠨᠵᠠᠪ ᠢ᠋ ᠲᠡᠪᠡᠷᠢᠨ ᠵᠡᠭᠦᠨ ᠬᠠᠴᠠᠷ ᠢ᠋ ᠨᠢ ᠦᠨᠦᠰᠴᠦ《ᠢᠩᠭᠢᠭᠡᠳ ᠰᠠᠯᠬᠤ ᠶᠣᠰᠣ ᠬᠢᠶᠡ! ᠪᠠᠷᠠᠭᠤᠨ ᠬᠠᠴᠠᠷ ᠢ᠋ ᠴᠢᠨᠢ ᠳᠠᠬᠢᠵᠤ ᠪᠠᠶᠠᠷᠲᠠᠢ ᠠᠭᠤᠯᠵᠠᠬᠤ ᠳ᠋ᠠᠭᠠᠨ ᠦᠯᠡᠳᠡᠭᠡᠵᠦ ᠦᠨᠦᠰᠦᠶᠡ!》 ᠭᠡᠳ ᠨᠢᠭᠡ ᠨᠢᠭᠡᠨ ᠦ᠌ ᠪᠡᠨ ᠮᠥᠷᠥ ᠴᠡᠭᠡᠵᠢ ᠤᠷᠤᠭᠤ ᠬᠦᠴᠦᠲᠡᠢ ᠳᠡᠯᠡᠳᠴᠦ《ᠵᠠ᠂ ᠳᠡᠭᠦᠦ ᠮᠢᠨᠢ ᠣᠳᠣ ᠮᠣᠷᠳᠠ!》 ᠭᠡᠰᠡᠨ ᠢ᠋ᠶ᠋ᠡᠷ ᠠᠩᠴᠢᠨᠵᠠᠪ ᠮᠣᠷᠢᠨ ᠤ᠋ ᠪᠠᠨ ᠵᠢᠯᠣᠭᠣ ᠶ᠋ᠢ ᠬᠤᠷᠢᠶᠠᠰᠬᠢᠨ ᠮᠣᠷᠳᠠᠬᠤ ᠳ᠋ᠤ᠌ ᠠᠭᠰᠤᠮ ᠵᠠᠩ ᠲᠠᠢ ᠮᠣᠷᠢ ᠨᠢ ᠳᠥᠷᠥᠭᠡ ᠪᠤᠯᠢᠶᠠᠯᠴᠠᠵᠤ ᠪᠡᠶᠡ ᠶ᠋ᠢ ᠨᠢ ᠡᠷᠭᠢᠭᠡᠳ ᠪᠤᠵᠢᠭᠢᠨᠠᠨᠠ᠃
ᠠᠩᠴᠢᠨᠵᠠᠪ ᠮᠣᠷᠢᠨ ᠳ᠋ᠠᠭᠠᠨ《ᠴᠥᠬᠥ》 ᠭᠡᠳ ᠲᠠᠰᠢᠭᠤᠷ ᠥᠭᠬᠦ ᠳ᠋ᠦ᠍《ᠠᠬᠠ ᠰᠠᠢᠨ ᠰᠠᠭᠤᠵᠤ ᠪᠠᠢ᠂ ᠬᠡᠷᠰᠡᠦ ᠬᠡᠷᠡᠭ ᠲᠡᠢ ᠰᠢᠦ!》 ᠭᠡᠰᠡᠨ ᠦᠭᠡ ᠪᠣᠯᠵᠤ ᠮᠠᠨᠴᠤᠷᠭᠠ ᠳ᠋ᠤ᠌ ᠰᠣᠨᠣᠰᠳᠠᠭᠰᠠᠨ ᠪᠣᠯ ᠮᠣᠷᠢ ᠨᠢ ᠬᠣᠲᠣᠰᠬᠢᠨ ᠳᠠᠪᠬᠢᠵᠤ ᠠᠷᠵᠠᠭ ᠪᠠᠷᠵᠠᠭ ᠬᠠᠢᠷ ᠴᠢᠯᠠᠭᠤᠳ ᠢ᠋ ᠬᠠᠮᠤᠨ ᠳᠣᠪᠲᠣᠯᠤᠨᠠ᠃
ᠰᠥᠨᠢ ᠶ᠋ᠢᠨ ᠵᠢᠬᠡᠭᠦᠨ ᠵᠢᠪᠠᠷ ᠮᠠᠨᠴᠤᠷᠭᠠ ᠶ᠋ᠢᠨ ᠬᠠᠴᠠᠷ ᠢ᠋ ᠦᠯᠢᠶᠡᠬᠦ ᠳ᠋ᠦ᠍ ᠦᠯᠦ ᠮᠡᠳᠡᠭ ᠵᠢᠬᠡᠭᠦᠰᠬᠦ ᠰᠢᠭ ᠰᠠᠨᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠰᠡᠳᠬᠢᠯ ᠳ᠋ᠦ᠍ ᠠᠰᠬᠠᠭᠰᠠᠨ ᠬᠠᠢᠷᠠ ᠶ᠋ᠢᠨ ᠭᠠᠯ ᠨᠢᠯᠴᠢᠭᠢᠨᠡᠨ᠂ ᠬᠠᠷᠠᠩᠭᠤᠢ ᠳ᠋ᠤ᠌ ᠳᠠᠪᠬᠢᠨ ᠣᠳᠤᠭᠰᠠᠨ ᠠᠩᠴᠢᠨᠵᠠᠪ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠰᠠᠯᠵᠤ ᠲᠦᠪᠳᠡᠬᠦ ᠦᠭᠡᠢ ᠵᠣᠭᠰᠣᠭᠰᠠᠨ ᠣᠷᠣᠨ ᠳ᠋ᠠᠭᠠᠨ ᠶᠡᠬᠡ ᠤᠳᠠᠭᠠᠨ ᠮᠡᠯᠡᠷᠡᠬᠦ ᠳ᠋ᠡᠭᠡᠨ《 ᠡᠷᠡ ᠬᠥᠮᠦᠨ ᠡᠷᠡ ᠬᠥᠮᠦᠨ ᠳ᠋ᠡᠭᠡᠨ ᠬᠠᠢᠷᠠᠲᠠᠢ》 ᠭᠡᠵᠦ ᠬᠡᠨ ᠨᠢᠭᠡ ᠬᠥᠮᠦᠨ ᠦ᠌ ᠬᠡᠯᠡᠭᠰᠡᠨ ᠦᠭᠡ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠢ᠋ ᠠᠷᠭᠠ ᠦᠭᠡᠢ ᠤᠶᠠᠷᠠᠭᠤᠯᠵᠤ ᠪᠠᠢᠯᠠ᠁
— — — —
① ᠡᠨᠳᠡ ᠬᠥᠬᠦᠦᠷ᠂ ᠬᠢᠲᠤᠭᠠ᠂ ᠭᠠᠩᠰᠠ ᠭᠤᠷᠪᠠ ᠶ᠋ᠢ ᠵᠢᠭᠠᠵᠠᠢ᠃
② ᠤᠰᠤᠨ ᠳ᠋ᠤ᠌ ᠲᠠᠯᠪᠢᠬᠤ ᠳ᠋ᠤ᠌ ᠳᠡᠭᠡᠭᠦᠷ ᠨᠢ ᠬᠥᠪᠴᠦ ᠳᠡᠭᠳᠡᠳᠡᠭ ᠦᠨᠡᠲᠦ ᠮᠠᠨᠤ᠃