ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠳᠡᠳ᠋ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠠᠷᠪᠠ> Хан мунын сүүрс < дээд > – Мөнх зохиоов ᠂ Дэд бодь – Гуравдугаар бүлэг <10>
499ᠳᠡᠳ᠋ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠠᠷᠪᠠ>
ᠡᠪᠦᠯ ᠦ᠋ᠨ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠰᠡᠭᠦᠯᠴᠢ ᠪᠡᠷ ᠶᠡᠬᠡ ᠴᠠᠰᠤ ᠣᠷᠣᠪᠠ᠃ ᠠᠩᠴᠢᠨᠵᠠᠪ ᠪᠤᠭᠤᠲᠤ ᠣᠷᠣᠵᠤ ᠠᠩ ᠤ᠋ᠨ ᠬᠡᠰᠢᠭ ᠢ᠋ᠶ᠋ᠡᠨ ᠪᠠᠭᠠ ᠰᠠᠭᠠ ᠮᠥᠩᠭᠥ ᠪᠣᠯᠭᠠᠵᠤ ᠴᠠᠭᠠᠯᠠᠬᠤ ᠶᠠᠭᠤᠮᠠ ᠬᠡᠦᠮᠡ ᠲᠥᠬᠥᠭᠡᠷᠬᠦ ᠪᠡᠷ ᠠᠭᠤᠯᠠᠨ ᠠ᠋ᠴᠠ ᠪᠠᠭᠤᠪᠠ᠃ ᠲᠢᠰ ᠨᠢᠰ ᠭᠡᠰᠡᠨ ᠶᠢᠰᠦ ᠶ᠋ᠢᠨ ᠬᠦᠢᠲᠡᠨ ᠳ᠋ᠦ᠍ ᠠᠩᠴᠢᠨᠵᠠᠪ ᠢᠰᠡᠭᠡᠢ ᠣᠢᠮᠣᠰᠤ ᠲᠠᠢ ᠡᠭᠡᠳᠡᠨ ᠭᠤᠲᠤᠯ᠂ ᠡᠯᠪᠡᠭ ᠨᠡᠬᠡᠢ ᠳᠡᠪᠦᠯ᠂ ᠦᠨᠡᠭᠡᠨ ᠯᠣᠪᠤᠤᠵᠠ ᠡᠮᠦᠰᠦᠭᠰᠡᠨ ᠡᠴᠡ ᠬᠥᠳᠡᠯᠵᠦ ᠪᠠᠷᠢᠬᠤ ᠳ᠋ᠤ᠌ ᠪᠤᠳᠤᠯᠢᠭᠤ ᠪᠦᠳᠦᠭᠦᠯᠢᠭ ᠠᠵᠢ᠃
ᠴᠥᠭᠡᠬᠡᠨ ᠭᠤᠷᠠ ᠵᠦᠷ᠂ ᠢᠮᠠᠭᠠᠨ ᠭᠥᠷᠦᠭᠡᠰᠦᠨ ᠦ᠌ ᠠᠷᠠᠰᠤ᠂ ᠬᠣᠶᠠᠷ ᠰᠢᠷᠬᠡᠭ ᠤᠯᠠᠭᠠᠨ ᠦᠨᠡᠭᠡᠨ ᠦ᠌ ᠠᠷᠠᠰᠤ ᠪᠠᠨ ᠢᠯᠡ ᠭᠠᠨᠵᠤᠭᠠᠯᠠᠵᠤ᠂ ᠪᠤᠯᠠᠭᠠ ᠬᠠᠯᠢᠭᠤ ᠶ᠋ᠢᠨ ᠠᠷᠠᠰᠤ᠂ ᠪᠤᠭᠤ ᠶ᠋ᠢᠨ ᠬᠢᠷᠵᠠᠩ᠂ ᠣᠷᠬᠣᠳᠠᠢ ᠶ᠋ᠢᠨ ᠲᠥᠮᠥᠰᠥ᠁ ᠵᠡᠷᠭᠡ ᠦᠨᠡᠲᠦ ᠶᠠᠭᠤᠮᠠᠰ ᠢ᠋ᠶ᠋ᠠᠨ ᠲᠡᠯᠢᠩ ᠳᠣᠲᠣᠷᠠ ᠪᠠᠨ ᠳᠠᠯᠳᠠᠬᠠᠨ ᠠᠪᠴᠤ᠂ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠲᠤ᠌ ᠬᠦᠷᠭᠡᠬᠦ ᠰᠢᠷᠬᠡᠭ ᠪᠤᠭᠤ ᠶ᠋ᠢᠨ ᠬᠢᠷᠵᠠᠩ ᠢ᠋ᠶ᠋ᠠᠨ ᠨᠢᠮᠪᠠᠢ ᠡᠪᠦᠷᠲᠦᠯᠡᠵᠦ ᠶᠠᠪᠤᠭᠰᠠᠭᠠᠷ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠶᠡᠬᠡ ᠬᠦᠷᠢᠶᠡᠨ ᠳ᠋ᠦ᠍ ᠠᠴᠢᠶᠠ ᠬᠥᠰᠬᠡ ᠪᠡᠨ ᠪᠠᠭᠤᠯᠭᠠᠵᠤ ᠳᠠᠯᠢᠩ ᠢ᠋ᠶ᠋ᠠᠨ ᠮᠥᠷᠥᠯᠡᠭᠡᠳ ᠮᠠᠢᠮᠠᠢ ᠶ᠋ᠢᠨ ᠦᠨᠡ ᠬᠠᠩᠰᠢ᠂ ᠡᠳ᠋ ᠪᠠᠷᠠᠭᠠᠨ ᠤ᠋ ᠵᠣᠯᠢᠶᠠᠨ ᠤ᠋ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠵᠤ ᠨᠠᠭᠠᠰᠢ ᠴᠠᠭᠠᠰᠢ ᠰᠦᠯᠵᠢᠬᠦ ᠬᠥᠮᠦᠨ ᠣᠯᠠᠨ ᠤ᠋ ᠱᠤᠤᠭᠢᠶᠠᠨ ᠳ᠋ᠤ᠌ ᠵᠣᠷᠴᠢᠨ ᠶᠠᠪᠤᠵᠤ ᠪᠠᠢᠯᠠ᠃
ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠶᠡᠬᠡ ᠬᠦᠷᠢᠶᠡ ᠭᠡᠳᠡᠭ ᠨᠢ ᠪᠤᠭᠤᠲᠤ ᠪᠠᠯᠭᠠᠰᠤᠨ ᠤ᠋ ᠪᠠᠷᠠᠭᠤᠨ ᠵᠠᠬᠠ ᠶ᠋ᠢ ᠳᠠᠷᠤᠵᠤ ᠪᠣᠰᠤᠭᠰᠠᠨ ᠮᠠ ᠣᠪᠣᠭ ᠲᠠᠢ ᠬᠣᠲᠣᠩ ᠬᠥᠮᠦᠨ ᠡᠵᠡᠩᠨᠡᠭᠰᠡᠨ ᠠᠷᠠᠯᠵᠢᠶᠠᠨ ᠤ᠋ ᠭᠠᠵᠠᠷ ᠪᠢᠯᠡ᠃ ᠮᠠ ᠣᠪᠣᠭᠲᠤ ᠬᠣᠲᠣᠩ ᠭᠡᠭᠴᠢ ᠳᠥᠴᠢ ᠶ᠋ᠢᠨ ᠳᠠᠪᠠᠭᠠ ᠶ᠋ᠢ ᠳᠠᠪᠠᠵᠤ ᠶᠠᠪᠤᠭᠠ ᠲᠤᠷᠠᠩᠬᠠᠢ ᠳᠤᠮᠳᠠ ᠶ᠋ᠢᠨ ᠪᠡᠶᠡ ᠲᠡᠢ᠂ ᠤᠷᠤᠭᠤᠯ ᠬᠠᠯᠵᠠᠨ ᠪᠣᠯᠪᠠᠴᠤ ᠡᠷᠡᠦ ᠳᠣᠣᠭᠤᠷ ᠢ᠋ᠶ᠋ᠠᠨ ᠤᠬᠤᠨᠠᠨ ᠰᠠᠬᠠᠯ ᠲᠠᠢ᠂ ᠮᠠᠭᠠᠵᠢ ᠶ᠋ᠢᠨ ᠲᠣᠯᠪᠣᠲᠤ ᠴᠣᠬᠣᠷ ᠴᠢᠷᠠᠢ ᠲᠠᠢ ᠬᠥᠮᠦᠨ᠃ ᠲᠡᠷᠡ ᠠᠷᠠᠰᠤ ᠰᠢᠷᠢ᠂ ᠨᠣᠣᠰᠣ ᠨᠣᠣᠯᠣᠭᠤᠷ᠂ ᠠᠩ ᠭᠥᠷᠦᠭᠡᠨ ᠦ᠌ ᠠᠰᠢᠭ ᠰᠢᠮᠡ ᠡᠨᠡ ᠲᠡᠷᠡ ᠶ᠋ᠢ ᠠᠷᠠᠯᠵᠢᠶᠠᠯᠠᠵᠤ ᠪᠣᠷᠣᠯᠠᠭᠤᠯᠤᠨ ᠳᠤᠮᠳᠠ ᠠ᠋ᠴᠠ ᠨᠢ ᠶᠡᠬᠡ ᠠᠰᠢᠭ ᠴᠣᠬᠢᠵᠤ ᠴᠠᠭᠠᠷᠠᠭᠰᠠᠨ ᠬᠥᠮᠦᠨ ᠦ᠌ ᠨᠢᠭᠡ᠃ ᠰᠤᠸᠠᠮᠫᠠᠨ ᠰᠤᠷᠮᠠᠭᠠᠢ ᠨᠢᠰᠠᠯᠵᠤ᠂ ᠪᠠᠷᠠᠭᠠᠨ ᠤ᠋ ᠦᠨᠡ ᠬᠠᠩᠰᠢ ᠲᠣᠭᠠᠴᠠᠵᠤ ᠮᠡᠷᠭᠡᠯᠡᠨ ᠳᠠᠩᠰᠠ ᠰᠠᠢᠨ ᠪᠣᠳᠣᠳᠠᠭ ᠢ᠋ᠶ᠋ᠠᠷ ᠨᠢ ᠮᠠᠢᠮᠠᠢ ᠶ᠋ᠢᠨ ᠬᠥᠮᠦᠰ ᠲᠡᠭᠦᠨ ᠢ᠋ 《ᠰᠤᠸᠠᠮᠫᠠᠨ ᠮᠠ》 ᠭᠡᠳᠡᠭ ᠠᠵᠢ᠃ ᠭᠡᠲᠡᠯᠡ ᠬᠣᠶᠠᠷ ᠨᠢᠭᠤᠷ ᠲᠠᠢ ᠬᠣᠷᠸᠠ ᠶ᠋ᠢᠨ ᠵᠢᠮᠡ ᠪᠡᠷ ᠮᠠᠢᠮᠠᠢ ᠱᠣᠣᠮᠠᠢ ᠳ᠋ᠠᠭᠠᠨ ᠬᠣᠨᠵᠢᠭᠤᠯᠵᠤ ᠬᠣᠬᠢᠷᠠᠭᠰᠠᠨ ᠨᠢᠭᠡ ᠨᠢ ᠲᠡᠭᠦᠨ ᠦ᠌ ᠠᠷᠤ ᠬᠣᠢᠭᠤᠷ 《ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ》ᠭᠡᠳᠡᠭ ᠮᠠᠭᠤ ᠬᠣᠴᠢ ᠨᠢ 《ᠰᠤᠸᠠᠮᠫᠠᠨ ᠮᠠ᠋》 ᠭᠡᠳᠡᠭ ᠢ᠋ᠶ᠋ᠡᠨ ᠲᠠᠢᠯᠵᠤ ᠰᠡᠭᠦᠯ ᠳ᠋ᠡᠭᠡᠨ ᠪᠦᠷ ᠴᠦ᠍《ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ》 ᠭᠡᠪᠡᠯ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠨ ᠦᠭᠡᠢ ᠪᠣᠯᠵᠠᠢ᠃
ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠶᠡᠬᠡ ᠬᠦᠷᠢᠶᠡᠨ ᠳ᠋ᠦ᠍ ᠴᠢᠯᠥᠭᠡᠲᠦ ᠵᠠᠬᠠ ᠳᠡᠯᠭᠡᠭᠦᠷ ᠰᠢᠭ ᠬᠠᠮᠢᠭᠠ ᠭᠠᠵᠠᠷ ᠤ᠋ᠨ ᠶᠠᠮᠠᠷ ᠴᠦ᠍ ᠬᠥᠮᠦᠨ ᠪᠠᠢᠵᠤ ᠮᠡᠳᠡᠨᠡ᠃ ᠮᠣᠩᠭᠣᠯ᠂ ᠬᠢᠲᠠᠳ᠂ ᠬᠣᠲᠣᠩ᠂ ᠮᠠᠨᠵᠤ ᠵᠡᠷᠭᠡ ᠶ᠋ᠢᠨ ᠮᠠᠢᠮᠠᠢ ᠠᠷᠠᠯᠵᠢᠶᠠᠨ ᠤ᠋ ᠬᠥᠮᠦᠨ ᠭᠠᠨᠵᠤᠭᠠ ᠶ᠋ᠢᠨ ᠶᠠᠭᠤᠮᠠ ᠪᠠᠨ ᠠᠯᠢ ᠳᠤᠷᠠ ᠰᠣᠨᠢᠷᠬᠠᠯ ᠲᠠᠢ ᠵᠦᠢᠯ ᠢ᠋ᠶ᠋ᠡᠷ ᠦᠨᠡ ᠬᠠᠶᠠᠯᠴᠠᠨ ᠵᠣᠯᠢᠶᠠ ᠮᠠᠢᠮᠠᠢ ᠭᠡᠵᠦ ᠶᠡᠬᠡ ᠯᠡ ᠨᠠᠷᠭᠢᠶᠠᠨ ᠬᠥᠭᠵᠢᠶᠡᠨ ᠲᠡᠢ ᠶ᠋ᠢ ᠬᠡᠯᠡᠬᠦ ᠦᠭᠡᠢ ᠬᠤᠳᠠᠯ ᠬᠡᠯᠡᠬᠦ᠂ ᠬᠤᠯᠠᠭᠠᠢ ᠬᠢᠬᠦ᠂ ᠬᠡᠯᠲᠦᠰᠬᠢᠪᠡᠯ ᠲᠤᠨᠤᠭᠠ ᠳᠡᠭᠡᠷᠡᠮ ᠴᠦ᠍ ᠪᠠᠢᠳᠠᠭ ᠢ᠋ ᠠᠩᠴᠢᠨᠵᠠᠪ ᠶᠠᠭᠤ ᠠᠨᠳᠠᠬᠤ ᠪᠣᠢ᠃ ᠶᠡᠷᠦ ᠨᠢ ᠲᠡᠷᠡ ᠠᠩ ᠤ᠋ᠨ ᠭᠠᠨᠵᠤᠭᠠ ᠪᠠᠨ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠲᠤ᠌ ᠪᠠᠭᠠ ᠰᠠᠭᠠ ᠭᠠᠷ ᠴᠠᠢᠯᠭᠠᠨ ᠳᠠᠮᠵᠢᠭᠤᠯᠵᠤ ᠬᠠᠩᠭᠢ ᠦᠨᠡ ᠳ᠋ᠦ᠍ ᠬᠦᠷᠭᠡᠭᠡᠳ ᠠᠪᠴᠢᠬᠠᠳᠠᠭ᠃ ᠲᠡᠭᠡᠭᠰᠡᠭᠡᠷ ᠪᠠᠢᠵᠤ ᠠᠩᠴᠢᠨᠵᠠᠪ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠲᠠᠢ ᠶᠡᠬᠡ ᠵᠤᠵᠠᠭᠠᠨ ᠨᠠᠢᠷ ᠲᠠᠢ ᠪᠣᠯᠤᠭᠰᠠᠨ ᠶᠤᠮ᠃ ᠡᠨᠡ ᠤᠳᠠᠭᠠ ᠴᠦ᠍ ᠭᠡᠰᠡᠨ ᠠᠩᠴᠢᠨᠵᠠᠪ ᠬᠠᠭᠤᠴᠢᠨ ᠶᠣᠰᠣ ᠪᠠᠷ ᠡᠪᠦᠷ ᠳᠠᠬᠢ ᠪᠠᠨ ᠰᠡᠮᠬᠡᠨ ᠲᠡᠮᠲᠡᠷᠢᠵᠦ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠲᠤ᠌ ᠭᠠᠨᠵᠤᠭᠠ ᠶ᠋ᠢᠨ ᠶᠠᠭᠤᠮᠠ ᠪᠠᠨ ᠥᠭᠴᠦ ᠠᠮᠠᠷᠠᠭᠠᠳ᠂ ᠠᠪᠳᠠᠭ ᠶᠠᠭᠤᠮᠠ ᠪᠠᠨ ᠠᠪᠴᠤ ᠱᠠᠯᠠᠪ ᠪᠤᠴᠠᠶᠠ ᠭᠡᠵᠦ ᠰᠢᠭᠤᠳ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠡᠭᠦᠳᠡ ᠶ᠋ᠢ ᠲᠣᠭᠰᠢᠪᠠᠯ ᠥᠨᠥᠬᠢ ᠨᠢ ᠪᠠᠢᠳᠠᠭ ᠦᠭᠡᠢ᠃ ᠬᠠᠷᠠᠯᠠ ᠴᠠᠭᠠᠰᠢ! ᠭᠡᠵᠦ ᠲᠡᠭᠦᠨ ᠦ᠌ ᠭᠠᠷ ᠳᠣᠣᠷᠠᠬᠢ ᠬᠥᠮᠦᠰ ᠡᠴᠡ ᠬᠠᠮᠢᠭᠠ ᠶᠠᠪᠤᠭᠰᠠᠨ ᠢ᠋ ᠨᠢ ᠰᠤᠷᠠᠭᠯᠠᠪᠠᠯ ᠴᠠᠭᠠᠨ ᠬᠡᠷᠡᠮ ᠡᠴᠡ ᠴᠠᠭᠠᠰᠢ ᠣᠷᠣᠵᠤ ᠪᠥᠭᠡᠮ ᠪᠠᠷᠠᠭᠠ ᠪᠠᠨ ᠪᠣᠷᠣᠯᠠᠭᠤᠯᠬᠤ ᠪᠠᠷ ᠶᠠᠪᠤᠭᠠᠳ ᠬᠡᠳᠦ ᠬᠣᠨᠣᠴᠢᠬᠠᠯᠠ ᠭᠡᠨᠡ᠃ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠭᠡᠷ ᠲᠡᠭᠡᠨ ᠪᠠᠢᠳᠠᠭ ᠦᠭᠡᠢ ᠲᠡᠢ ᠨᠢ ᠲᠠᠭᠠᠷᠠᠴᠢᠬᠠᠭᠰᠠᠨ ᠶᠤᠮ ᠴᠢᠨᠢ ᠡᠦᠲᠦ ᠶᠠᠭᠠᠬᠢᠳᠠᠭ ᠪᠢᠯᠡ? ᠶᠠᠭᠠᠬᠢᠬᠤ ᠪᠣᠢ ᠳᠠ᠂ ᠪᠤᠷᠬᠠᠨ ᠳ᠋ᠠᠭᠠᠨ ᠳᠤᠲᠠᠭᠤ ᠵᠠᠯᠪᠠᠷᠢᠵᠤ ᠪᠤᠷᠤᠭᠤ ᠡᠳᠦᠷ ᠭᠡᠷ ᠡᠴᠡ ᠭᠠᠷᠴᠠᠢ ᠭᠡᠵᠦ ᠰᠠᠨᠠᠪᠠ᠃ ᠡᠦᠲᠦ ᠲᠡᠭᠡᠭᠡᠳ ᠪᠠᠭᠠ ᠰᠠᠭᠠ ᠶᠠᠭᠤᠮᠠ ᠪᠠᠨ ᠵᠠᠬᠠ ᠶ᠋ᠢᠨ ᠢᠷᠭᠡᠨ ᠳ᠋ᠦ᠍ ᠦᠨᠡ ᠬᠠᠪᠢᠯᠳᠤᠪᠠᠯ ᠥᠭᠳᠡᠭ ᠯᠡ ᠬᠡᠷᠡᠭ ᠭᠡᠵᠦ ᠠᠩᠴᠢᠨᠵᠠᠪ ᠳᠠᠯᠢᠩ ᠢ᠋ᠶ᠋ᠠᠨ ᠮᠥᠷᠥᠪᠴᠢᠯᠡᠨ ᠬᠥᠮᠦᠨ ᠣᠯᠠᠨ ᠤ᠋ ᠳᠤᠮᠳᠠ ᠠ᠋ᠴᠠ ᠭᠠᠷ ᠥᠭᠡᠳᠡ 《ᠭᠠᠨᠵᠤᠭᠠ ᠶ᠋ᠢᠨ ᠡᠵᠡᠨ》 ᠬᠠᠢᠵᠤ ᠶᠠᠪᠤᠯᠠ᠃
ᠲᠡᠭᠡᠲᠡᠯᠡ ᠬᠣᠶᠠᠷ ᠵᠠᠯᠠᠭᠤᠬᠠᠨ ᠡᠷᠡ ᠲᠡᠭᠦᠨ ᠦ᠌ ᠪᠡᠶᠡ ᠶ᠋ᠢ ᠨᠠᠯᠠᠵᠤ ᠢᠷᠡᠨ ᠵᠠᠮ ᠢ᠋ ᠨᠢ ᠬᠡᠷᠡᠵᠦ ᠵᠣᠭᠰᠣᠨᠠ᠃ ᠭᠠᠷ ᠲᠠᠭᠠᠨ ᠬᠡᠳᠦᠨ ᠴᠠᠭᠠᠨ ᠵᠣᠭᠣᠰ ᠰᠢᠯᠭᠡᠭᠡᠵᠦ ᠨᠠᠭᠠᠳᠤᠭᠰᠠᠨ ᠪᠦᠯᠲᠡᠭᠡᠷ ᠬᠠᠷᠠ ᠨᠢᠳᠦ ᠲᠡᠢ ᠨᠢᠭᠡ ᠨᠢ᠄
— ᠮᠣᠩᠭᠣᠯ ᠬᠥᠮᠦᠨ ᠤᠤ? ᠭᠡᠵᠦ ᠬᠡᠭᠵᠡᠭᠦᠨ ᠳᠤᠤᠭᠠᠷᠪᠠ᠃
— ᠮᠥᠨ᠂ ᠪᠢ ᠮᠣᠩᠭᠣᠯ ᠬᠥᠮᠦᠨ! ᠭᠡᠵᠦ ᠠᠩᠴᠢᠨᠵᠠᠪ ᠠᠵᠢᠭ ᠴᠤ᠌ ᠦᠭᠡᠢ ᠰᠢᠯᠤᠭᠤᠬᠠᠨ ᠬᠠᠷᠢᠭᠤᠯᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠵᠣᠭᠣᠰ ᠰᠢᠯᠭᠡᠭᠡᠵᠦ ᠨᠠᠭᠠᠳᠤᠭᠰᠠᠨ ᠡᠷᠡ ᠠᠩᠴᠢᠨᠵᠠᠪ ᠢ᠋ ᠡᠷᠭᠢᠵᠦ ᠲᠣᠭᠣᠷᠢᠨ ᠣᠷᠣᠢ ᠠ᠋ᠴᠠ ᠨᠢ ᠤᠯᠠ ᠳ᠋ᠤᠨᠢ ᠲᠤᠯᠲᠠᠯᠠ ᠨᠠᠷᠢᠨ ᠰᠢᠨᠵᠢᠭᠰᠡᠨ ᠢ᠋ᠶ᠋ᠡᠨ 《ᠡᠨᠡ ᠪᠠᠰᠠ ᠰᠠᠢᠨ ᠡᠷᠡ ᠶ᠋ᠢᠨ ᠰᠢᠨᠵᠢ ᠪᠠᠢᠨᠠ ᠰᠢᠦ! ᠬᠡᠷᠰᠡᠦᠬᠡᠨ ᠪᠠᠢ᠂ ᠡᠬᠡ ᠶ᠋ᠢᠨ ᠬᠢᠨᠢ ᠤᠩᠬᠤᠷ》 ᠭᠡᠵᠦ ᠨᠥᠭᠥᠭᠡᠳᠡᠬᠢ ᠳ᠋ᠡᠭᠡᠨ ᠰᠡᠷᠡᠮᠵᠢ ᠥᠭᠬᠦ ᠳ᠋ᠦ᠍ ᠴᠠᠭᠠᠳᠤᠬᠢ ᠨᠢ ᠠᠩᠴᠢᠨᠵᠠᠪ ᠢ᠋ ᠯᠠᠪᠯᠠᠵᠤ ᠨᠢᠭᠡ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠪᠠ᠃
ᠠᠩᠴᠢᠨᠵᠠᠪ ᠲᠤ᠌ ᠡᠨᠡ ᠬᠣᠶᠠᠷ ᠡᠷᠡ ᠶ᠋ᠢᠨ ᠬᠥᠳᠡᠯᠦᠯ ᠪᠠᠢᠳᠠᠯ ᠨᠢ ᠨᠢᠭᠡ ᠯᠡ ᠡᠲᠡᠭᠡᠳ ᠰᠣᠨᠢᠨ ᠰᠠᠨᠠᠭᠳᠠᠭᠰᠠᠨ ᠳ᠋ᠤ᠌ ᠥᠨᠥᠬᠢ ᠬᠣᠶᠠᠷ ᠡᠷᠡ ᠶ᠋ᠢ ᠡᠭᠡᠯᠵᠢᠯᠡᠨ ᠠᠵᠢᠭᠯᠠᠪᠠᠯ ᠭᠠᠷ ᠲᠠᠭᠠᠨ ᠴᠠᠭᠠᠨ ᠵᠣᠭᠣᠰ ᠰᠢᠯᠭᠡᠭᠡᠵᠦ ᠨᠠᠭᠠᠳᠤᠭᠰᠠᠨ ᠫᠠᠭᠳᠠᠭ ᠲᠠᠷᠭᠤᠨ ᠪᠡᠶᠡ ᠲᠡᠢ ᠪᠦᠯᠲᠡᠭᠡᠷ ᠬᠠᠷᠠ ᠨᠢᠳᠦ ᠲᠡᠢ ᠨᠢ ᠬᠠᠷᠠ ᠰᠢᠳᠦᠯᠡᠩ ᠦ᠋ᠨ ᠠᠷᠠᠰᠤᠨ ᠬᠣᠭᠣᠯᠠᠢᠪᠴᠢ ᠲᠠᠢ ᠢᠮᠠᠭᠠᠨ ᠣᠭᠴᠣᠷ ᠬᠡᠳᠡᠷᠴᠦ᠂ ᠲᠣᠯᠣᠭᠠᠢ ᠳ᠋ᠠᠭᠠᠨ ᠨᠣᠬᠠᠢ ᠶ᠋ᠢᠨ ᠠᠷᠠᠰᠤ ᠨᠠᠭᠠᠭᠰᠠᠨ ᠢᠰᠡᠭᠡᠢ ᠲᠣᠭᠣᠷᠴᠣᠭ ᠢ᠋ ᠥᠷᠥᠭᠡᠰᠦᠨ ᠴᠢᠬᠢᠪᠴᠢ ᠶ᠋ᠢ ᠨᠢ ᠪᠠᠭᠤᠯᠭᠠᠵᠤ ᠲᠠᠯᠪᠢᠭᠰᠠᠨ ᠪᠠᠢᠪᠠ᠃ ᠨᠥᠭᠦᠭᠡ ᠠᠷᠠᠢ ᠪᠡᠶᠡᠷᠬᠡᠭ ᠨᠢ ᠱᠤᠪᠲᠤᠩ ᠡᠷᠡᠦ ᠲᠡᠢ ᠭᠤᠷᠪᠠᠯᠵᠢᠨ ᠨᠢᠳᠦ ᠲᠡᠢ ᠬᠤᠯᠠᠭᠠᠢᠴᠢ ᠬᠠᠷᠠᠴᠠ ᠲᠠᠢ ᠬᠥᠮᠦᠨ ᠪᠠᠢᠯᠠ᠃ ᠠᠭᠤᠵᠢᠭᠤ ᠬᠠᠷᠠ ᠬᠥᠪᠥᠩᠲᠡᠢ ᠥᠮᠥᠳᠥᠨ ᠦ᠌ ᠪᠡᠨ ᠰᠢᠷᠬᠤᠨᠠᠭ ᠢ᠋ ᠪᠣᠭᠣᠭᠰᠠᠨ ᠤᠴᠢᠷ ᠶᠣᠣᠵᠠ ᠮᠠᠭᠤᠲᠠᠢ ᠬᠠᠷᠠᠭᠳᠠᠨ᠂ ᠣᠭᠳᠣᠷ ᠪᠣᠰᠢᠨᠵᠠ ᠶ᠋ᠢᠨ ᠡᠩᠭᠡᠷ ᠢ᠋ ᠨᠢ ᠵᠥᠷᠢᠭᠦᠯᠦᠨ ᠣᠯᠣᠰᠣᠨ ᠳᠡᠭᠡᠰᠦ ᠪᠡᠷ ᠴᠢᠩᠭᠠ ᠪᠦᠰᠡᠯᠡᠵᠦ᠂ ᠬᠤᠯᠤᠭᠤᠪᠴᠢ ᠴᠢᠬᠢ ᠲᠡᠢ ᠦᠰᠦ ᠨᠢ ᠲᠠᠬᠢᠷᠠᠭᠰᠠᠨ ᠬᠠᠭᠤᠴᠢᠨ ᠦᠨᠡᠭᠡᠨ ᠮᠠᠯᠠᠭᠠᠢ ᠡᠮᠦᠰᠦᠭᠰᠡᠨ ᠨᠢ ᠬᠥᠮᠦᠰ ᠲᠦ᠍ ᠳᠡᠭᠡᠷᠡᠮ ᠲᠤᠨᠤᠭᠠ ᠶ᠋ᠢ ᠰᠠᠨᠠᠭᠳᠠᠭᠤᠯᠤᠨᠠ᠃
— ᠶᠠᠮᠠᠷ ᠭᠠᠨᠵᠤᠭᠠ ᠲᠠᠢ ᠶᠠᠪᠤᠭᠠ ᠪᠣᠢ ᠭᠡᠵᠦ ᠨᠥᠭᠦᠭᠡ ᠰᠢᠷᠬᠤᠨᠠᠭ ᠢ᠋ᠶ᠋ᠠᠨ ᠪᠣᠭᠣᠭᠰᠠᠨ ᠨᠢᠭᠡ ᠨᠢ ᠲᠡᠭᠦᠨ ᠦ᠌ ᠳᠠᠯᠢᠩ ᠳ᠋ᠠᠬᠢ ᠶ᠋ᠢ ᠭᠣᠷᠢᠳᠠᠭᠰᠠᠨ ᠶᠠᠭᠤᠮᠠ ᠠᠰᠠᠭᠤᠪᠠ᠃
— ᠠ᠂ ᠶᠠᠭᠤ ᠯᠠ ᠪᠠᠢᠬᠤ ᠪᠣᠢ ! ᠠᠩ ᠭᠥᠷᠦᠭᠡᠨ ᠦ᠌ ᠵᠦᠢᠯ ᠲᠡᠳᠦᠢ ᠭᠡᠵᠦ ᠠᠩᠴᠢᠨᠵᠠᠪ ᠬᠠᠢᠩᠭᠤᠬᠠᠨ ᠬᠠᠷᠢᠭᠤᠯᠪᠠ᠃
— ᠠᠩ ᠬᠦᠷᠦᠭᠡ ? ᠠᠩᠴᠢᠨ ᠤᠤ?
— ᠲᠡᠢᠮᠦ! ᠠᠩᠴᠢᠨ ᠬᠥᠮᠦᠨ ! ᠭᠡᠰᠡᠨ ᠳ᠋ᠦ᠍᠂
— ᠬᠠᠮᠢᠭᠠᠬᠢ ᠶ᠋ᠢᠨ ᠠᠩᠴᠢᠨ? ᠭᠡᠵᠦ ᠬᠠᠷᠠ ᠨᠢᠳᠦ ᠲᠡᠢ ᠢᠰᠡᠭᠡᠢ ᠲᠣᠭᠣᠷᠴᠣᠭᠲᠤ ᠠᠰᠠᠭᠤᠪᠠ᠃
— ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠬᠢ᠃
— ᠪᠤᠭᠤ ᠶ᠋ᠢᠨ ᠬᠢᠷᠵᠠᠩ ᠪᠠᠢᠨᠠ ᠤᠤ ? ᠭᠡᠵᠦ ᠨᠥᠭᠦᠭᠡ ᠨᠢᠭᠡ ᠨᠢ ᠪᠠᠷᠤᠭ ᠲᠡᠭᠦᠨ ᠦ᠌ ᠮᠥᠷᠦᠨ ᠳ᠋ᠡᠬᠢ ᠲᠡᠯᠢᠩ ᠢ᠋ ᠪᠠᠭᠤᠯᠭᠠᠵᠤ ᠨᠡᠩᠵᠢᠮᠡᠷ ᠶᠠᠭᠤᠮᠠ ᠪᠣᠯᠪᠠ᠃
ᠠᠩᠴᠢᠨᠵᠠᠪ ᠲᠤ᠌ ᠡᠨᠡ ᠬᠣᠶᠠᠷ ᠤ᠋ᠨ ᠡᠮᠦᠰᠴᠦ ᠵᠡᠭᠦᠭᠰᠡᠨ᠂ ᠬᠥᠳᠡᠯᠦᠯ ᠪᠠᠷᠢᠯ ᠨᠢ ᠬᠠᠴᠢᠨ ᠡᠪ ᠦᠭᠡᠢ ᠬᠠᠷᠠᠭᠳᠠᠵᠤ ᠨᠠᠳᠠ ᠲᠠᠢ ᠨᠤᠤᠷᠠᠬᠤ ᠮᠠᠭᠤ ᠰᠠᠢᠨ ᠲᠣᠨᠣᠭᠠ ᠨᠤᠭᠤᠳ ᠤ᠋ᠨ ᠨᠢᠭᠡ ᠪᠣᠯᠴᠢᠬᠠᠪᠠ ᠤᠤ ᠳᠠ ! ᠭᠡᠵᠦ ᠪᠣᠳᠣᠨ 《ᠪᠠᠢᠵᠠ !》 ᠭᠡᠵᠦ ᠳᠠᠯᠢᠩ ᠢ᠋ᠶ᠋ᠠᠨ ᠯᠠᠪ ᠰᠢᠭ᠋ ᠮᠥᠷᠥᠯᠡᠭᠡᠳ᠄
— ᠨᠠᠳᠠ ᠠ᠋ᠴᠠ ᠶᠠᠭᠤ ᠠᠪᠤᠮᠠᠷ ᠪᠠᠢᠨᠠ? ᠭᠡᠵᠦ ᠠᠰᠠᠭᠤᠪᠠ᠃
— ᠪᠤᠭᠤ ᠶ᠋ᠢᠨ ᠬᠢᠷᠵᠠᠩ ᠪᠠᠢᠨᠠ ᠤᠤ? ᠭᠡᠰᠡᠨ ᠰᠢᠳᠡ ! ᠮᠠᠨ ᠤ᠋ ᠵᠠᠩᠭᠤᠢᠳᠠ ᠪᠤᠭᠤ ᠶ᠋ᠢᠨ ᠬᠢᠷᠵᠠᠩ ᠠᠪᠤᠨᠠ ᠭᠡᠵᠦ ᠪᠣᠢ᠃
— ᠶᠠᠮᠠᠷ ᠦᠨᠡ ᠪᠡᠷ ᠠᠪᠬᠤ ᠰᠠᠨᠠᠭᠠᠲᠠᠢ ᠶᠤᠮ?
— ᠲᠠ ᠨᠢᠭᠡ ᠰᠢᠷᠬᠡᠭ ᠲᠡᠭᠡᠨ ᠬᠡᠳᠦᠢ ᠮᠥᠩᠭᠥ ᠠᠪᠬᠤ ᠰᠠᠨᠠᠭᠠᠲᠠᠢ ᠶᠤᠮ? ᠰᠢᠭᠤᠳ ᠬᠡᠯᠡᠴᠢᠬᠡ᠂ ᠦᠨᠡ ᠲᠠᠭᠠᠷᠠᠪᠠᠯ ᠮᠥᠩᠭᠥ ᠪᠡᠯᠡᠨ ᠭᠡᠳ ᠢᠰᠡᠭᠡᠢ ᠲᠣᠭᠣᠷᠴᠣᠭᠲᠤ 《ᠡᠬᠡ ᠶ᠋ᠢᠨ ᠬᠢᠨᠢ ᠣᠩᠬᠣᠷ》 ᠭᠡᠵᠦ ᠪᠡᠯᠡᠨ ᠬᠠᠷᠢᠶᠠᠯ ᠲᠠᠯᠪᠢᠭᠠᠳ᠂ ᠠᠩᠴᠢᠨᠵᠠᠪ ᠤ᠋ᠨ ᠬᠠᠨᠴᠤᠢ ᠳ᠋ᠤ᠌ ᠭᠠᠷ ᠢ᠋ᠶ᠋ᠠᠨ ᠰᠢᠷᠭᠤᠭᠤᠯᠤᠨ 《ᠭᠤᠷᠪᠠᠨ ᠬᠤᠷᠤᠭᠤ》 ᠪᠠᠨ ᠲᠡᠮᠳᠡᠷᠢᠭᠦᠯᠪᠡ᠃
ᠠᠩᠴᠢᠨᠵᠠᠪ ᠳᠣᠲᠣᠷᠠ ᠪᠠᠨ 《ᠭᠤᠴᠢᠬᠠᠨ ᠮᠥᠩᠭᠥᠨ ᠵᠣᠭᠣᠰ》 ᠢ᠋ᠶ᠋ᠠᠷ ᠨᠢᠭᠡ ᠰᠢᠷᠬᠡᠭ ᠪᠤᠭᠤ ᠶ᠋ᠢᠨ ᠬᠢᠷᠵᠠᠩ ᠠᠪᠬᠤ ᠰᠠᠨᠠᠭᠠᠲᠠᠢ ᠭᠡᠳᠡᠭ ᠢ᠋ ᠮᠡᠳᠡᠵᠦ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠦᠨ᠂
— ᠡᠳᠦᠢᠬᠡᠨ ᠮᠥᠩᠭᠥ ᠳ᠋ᠦ᠍ ᠥᠭᠬᠦ ᠦᠭᠡᠢ᠃ ᠮᠢᠨᠦ ᠡᠨᠡ ᠡᠳ᠋ ᠵᠢᠩᠬᠢᠨᠢ ᠰᠠᠢᠨ ᠶᠠᠭᠤᠮᠠ᠃ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠬᠢᠵᠠᠭᠠᠯᠠᠩ ᠪᠤᠭᠤ ᠶ᠋ᠢᠨ ᠬᠢᠷᠵᠠᠩ ᠰᠢᠦ! ᠨᠠᠭᠠᠳᠤᠮ ᠪᠢᠰᠢ! ᠭᠡᠳ ᠲᠡᠳᠡ ᠬᠣᠶᠠᠷ ᠢ᠋ ᠲᠦᠯᠬᠢᠵᠦ ᠴᠠᠭᠠᠰᠢ ᠶᠠᠪᠤᠬᠤ ᠭᠡᠪᠡᠯ ᠢᠰᠡᠭᠡᠢ ᠲᠣᠭᠣᠷᠴᠣᠭᠲᠤ᠄
— ᠪᠠᠢᠵᠠ᠂ ᠪᠠᠢᠵᠠ ᠪᠢᠲᠡᠭᠡᠢ ᠰᠠᠨᠳᠤᠷ᠂ ᠵᠢᠩᠬᠢᠨᠢ ᠶᠠᠭᠤᠮᠠ ᠭᠡᠳ ᠯᠡ ᠪᠠᠢᠬᠤ ᠶᠤᠮ᠃ ᠪᠢᠳᠡ ᠶᠠᠭᠤᠮᠠ ᠶ᠋ᠢ ᠴᠢᠨᠢ ᠦᠵᠡᠵᠦ ᠪᠠᠢᠭᠠᠳ ᠳᠠᠬᠢᠵᠤ ᠦᠨᠡ ᠥᠭᠭᠦᠶᠡ! ᠡᠬᠡ ᠶ᠋ᠢᠨ ᠬᠢᠨᠢ ᠣᠩᠬᠣᠷ ᠁ ᠭᠡᠵᠦ ᠬᠠᠷᠢᠶᠠᠯ ᠲᠠᠯᠪᠢᠨ ᠲᠡᠭᠦᠨ ᠦ᠌ ᠡᠮᠦᠨᠡ ᠨᠢ ᠨᠠᠪᠲᠠᠭᠠᠨᠠᠨ ᠭᠦᠶᠦᠵᠦ ᠢᠷᠡᠭᠡᠳ ᠵᠠᠮ ᠢ᠋ ᠨᠢ ᠬᠣᠷᠢᠪᠠ᠃
ᠠᠩᠴᠢᠨᠵᠠᠪ ᠳᠣᠲᠣᠷᠠ ᠪᠠᠨ 《ᠡᠨᠡ ᠬᠣᠶᠠᠷ ᠵᠣᠯᠢᠭ ᠴᠤ᠌ ᠶᠠᠭ ᠨᠠᠳᠠ ᠲᠠᠢ ᠨᠣᠣᠷᠠᠴᠢᠬᠠᠯᠠ ᠳᠠ᠂ ᠶᠠᠭᠤᠮᠠ ᠶ᠋ᠢ ᠴᠢᠨᠢ ᠦᠵᠡᠶᠡ ᠭᠡᠳ ᠭᠠᠷᠭᠠᠬᠤ ᠲᠠᠢ ᠵᠡᠷᠭᠡ ᠭᠠᠷ ᠠ᠋ᠴᠠ ᠴᠢᠨᠢ ᠰᠤᠭᠤ ᠲᠡᠳᠡᠨ ᠠᠪᠴᠤ ᠭᠣᠳ ᠳᠤᠲᠠᠭᠠᠳᠠᠭ ᠭᠠᠷᠯᠢᠭ ᠤ᠋ᠳ ᠪᠠᠢᠬᠤ ᠨᠢ ᠠ᠋》 ᠭᠡᠵᠦ ᠳᠠᠯᠢᠩ ᠢ᠋ᠶ᠋ᠠᠨ ᠪᠠᠭᠤᠯᠭᠠᠵᠤ ᠬᠥᠰᠡᠷ ᠲᠠᠯᠪᠢᠨ 《ᠡᠨᠡ ᠢᠰᠡᠭᠡᠢ ᠲᠣᠭᠣᠷᠴᠣᠭᠲᠤ ᠶ᠋ᠢ ᠡᠯᠢᠭᠡ ᠲᠦᠷᠦᠭᠦᠰᠢ ᠪᠡᠨ ᠰᠢᠷᠣᠢ ᠡᠮᠬᠦᠬᠦᠯᠴᠢᠬᠡᠪᠡᠯ ᠶᠠᠭᠠᠬᠢᠳᠠᠭ ᠶᠤᠮ?》 ᠭᠡᠵᠦ ᠡᠪᠦᠷ ᠢ᠋ᠶ᠋ᠡᠨ ᠲᠡᠮᠲᠡᠷᠢᠬᠦ ᠮᠠᠶᠢᠭ ᠭᠠᠷᠭᠠᠨ ᠴᠣᠴᠢᠮᠠᠭ ᠳᠠᠭᠠᠷᠢᠬᠤ ᠭᠡᠲᠡᠯᠡ ᠭᠡᠨᠡᠳᠲᠡ ᠲᠡᠭᠦᠨ ᠦ᠌ ᠠᠷᠤ ᠠ᠋ᠴᠠ ᠲᠣᠯᠣᠭᠠᠢ ᠳ᠋ᠤᠨᠢ ᠰᠤᠮᠠᠯ ᠤᠭᠯᠠᠪᠠ᠃ ᠶᠠᠭᠠᠬᠢᠵᠤ ᠶᠠᠭᠠᠬᠢᠬᠤ ᠶ᠋ᠢᠨ ᠵᠠᠪ ᠪᠣᠯᠤᠭᠰᠠᠨ ᠦᠭᠡᠢ ᠬᠡᠳᠦ ᠬᠡᠳᠦᠨ ᠡᠷᠡ ᠲᠡᠭᠦᠨ ᠢ᠋ ᠬᠦᠯᠢᠵᠦ ᠣᠷᠬᠢᠪᠠ᠃
ᠠᠯᠢ ᠵᠦᠭ ᠲᠦ᠍ ᠬᠠᠮᠢᠭᠠ ᠬᠠᠮᠢᠭᠠᠰᠢ ᠪᠠᠨ ᠮᠤᠷᠤᠢᠵᠤ ᠶᠠᠪᠤᠭᠰᠠᠨ ᠢ᠋ ᠠᠩᠴᠢᠨᠵᠠᠪ ᠮᠡᠳᠡᠭᠰᠡᠨ ᠦᠭᠡᠢ᠃ ᠥᠨᠥᠬᠢ ᠬᠡᠳᠦᠨ ᠡᠷᠡ ᠲᠡᠭᠦᠨ ᠢ᠋ ᠲᠦᠯᠬᠢᠵᠦ ᠲᠠᠲᠠᠭᠰᠠᠭᠠᠷ ᠶᠠᠪᠤᠨ ᠨᠢᠭᠡ ᠴᠡᠯ ᠬᠦᠢᠲᠡᠨ ᠭᠡᠷ ᠲᠦ᠍ ᠣᠷᠣᠭᠤᠯᠵᠤ ᠬᠣᠷᠢᠵᠠᠢ᠃ ᠪᠦᠯᠲᠡᠭᠡᠷ ᠬᠠᠷᠠ ᠨᠢᠳᠦ ᠲᠡᠢ ᠨᠢ ᠲᠡᠭᠦᠨ ᠦ᠌ ᠡᠪᠦᠷ ᠲᠦ᠍ ᠭᠠᠷ ᠢ᠋ᠶ᠋ᠠᠨ ᠣᠷᠣᠭᠤᠯᠤᠨ ᠪᠣᠭᠣᠯᠲᠠ ᠲᠠᠢ ᠪᠤᠭᠤ ᠶ᠋ᠢᠨ ᠬᠢᠷᠵᠠᠩ᠂ ᠬᠦᠷᠡᠩ ᠤᠯᠠᠭᠠᠨ ᠵᠢᠩᠰᠡ ᠲᠡᠢ ᠮᠠᠨᠤᠨ ᠬᠥᠬᠦᠦᠷ ᠪᠠ ᠪᠥᠰᠡᠨ ᠳ᠋ᠡᠬᠢ ᠮᠣᠩᠭᠣᠯ ᠬᠢᠲᠤᠭᠠ᠂ ᠭᠤᠲᠤᠯ ᠤ᠋ᠨ ᠲᠦᠷᠡᠢ ᠡᠴᠡ ᠨᠢ ᠮᠥᠩᠭᠥᠨ ᠲᠣᠯᠣᠭᠠᠢ ᠲᠠᠢ ᠭᠠᠩᠰᠠ ᠶ᠋ᠢ ᠨᠢ ᠬᠦᠷᠲᠡᠯᠡ ᠦᠯᠡᠳᠡᠭᠡᠭᠰᠡᠨ ᠦᠭᠡᠢ ᠬᠤᠷᠢᠶᠠᠵᠤ ᠠᠪᠤᠪᠠ᠃
— ᠪᠠᠢᠵᠠ᠂ ᠮᠢᠨᠦ ᠬᠥᠬᠦᠦᠷ᠂ ᠬᠡᠲᠡ ᠴᠠᠬᠢᠭᠤᠷ᠂ ᠳ᠋ᠠᠢ ᠲᠠᠮᠠᠭᠠ (ᠭᠠᠩᠰᠠ) ᠶ᠋ᠢ ᠮᠢᠨᠢ ᠦᠯᠡᠳᠡᠭᠡᠵᠦ ᠥᠭ! ᠭᠡᠵᠦ ᠠᠩᠴᠢᠨᠵᠠᠪ ᠤ᠋ᠨ ᠬᠡᠯᠡᠬᠦ ᠳ᠋ᠦ᠍ ᠥᠨᠥᠬᠢ ᠪᠦᠯᠲᠡᠭᠡᠷ ᠬᠠᠷᠠ ᠨᠢᠳᠦᠲᠦ᠄
— ᠡᠬᠡ ᠶ᠋ᠢᠨ ᠴᠢᠨᠢ ᠣᠩᠬᠣᠷ᠃ ᠠᠯᠢ ᠶ᠋ᠢ ᠨᠢ ᠦᠯᠡᠳᠡᠭᠡᠵᠦ᠂ ᠠᠯᠢ ᠶ᠋ᠢ ᠨᠢ ᠠᠪᠬᠤ ᠪᠠᠨ ᠴᠢᠮᠠ ᠪᠠᠷ ᠵᠢᠭᠠᠯᠭᠠᠨᠠ ᠤᠤ? ᠭᠡᠭᠰᠡᠭᠡᠷ ᠡᠭᠦᠳᠡ ᠬᠠᠶᠠᠵᠤ ᠭᠠᠷᠴᠤ ᠶᠠᠪᠤᠬᠤ ᠳ᠋ᠤᠨᠢ ᠳᠠᠭᠠᠯᠳᠤᠭᠰᠠᠨ ᠨᠢᠭᠡ ᠨᠢ ᠮᠠᠭᠤ ᠪᠠᠨᠰᠠᠨ ᠬᠠᠭᠠᠯᠭᠠ ᠶ᠋ᠢ ᠣᠨᠢᠰᠤᠯᠠᠪᠠ ᠪᠣᠯᠤᠯᠲᠠᠢ᠂ ᠲᠠᠷᠳ᠋ ᠭᠡᠰᠡᠨ ᠳᠠᠭᠤᠨ ᠭᠠᠷᠪᠠ᠃
ᠪᠦᠯᠲᠡᠭᠡᠷ ᠬᠠᠷᠠ ᠨᠢᠳᠦ ᠲᠡᠢ ᠡᠷᠡ ᠲᠦᠷᠦᠭᠦᠲᠡᠢ ᠬᠡᠳᠦᠭᠦᠯᠡ ᠥᠨᠥᠬᠢ ᠠᠩᠴᠢᠨᠵᠠᠪ ᠠ᠋ᠴᠠ ᠲᠣᠨᠣᠭᠰᠠᠨ ᠭᠤᠷᠠ ᠵᠦᠷ᠂ ᠢᠮᠠᠭᠠᠨ ᠭᠥᠷᠦᠭᠡᠰᠦᠨ ᠦ᠌ ᠠᠷᠠᠰᠤ ᠡᠨᠡ ᠲᠡᠷᠡ ᠶᠠᠭᠤᠮᠠ ᠪᠠ ᠳᠠᠯᠢᠩ ᠲᠠᠢ ᠶᠠᠭᠤᠮᠠᠰ ᠢ᠋ ᠠᠪᠴᠤ ᠣᠯᠵᠠ ᠶ᠋ᠢᠨ ᠭᠠᠨᠵᠤᠭᠠ ᠳ᠋ᠠᠭᠠᠨ ᠪᠡᠶᠡᠰᠦᠨ ᠶᠡᠬᠡᠳᠡ ᠢᠨᠢᠶᠡᠯᠴᠡᠵᠦ ᠬᠠᠨᠢᠶᠠᠯᠴᠠᠭᠰᠠᠭᠠᠷ ᠭᠣᠣᠯ ᠭᠡᠷ ᠲᠡᠬᠢ ᠵᠠᠩᠭᠤᠢᠳᠠ ᠳ᠋ᠠᠭᠠᠨ ᠭᠠᠪᠢᠶᠠ ᠭᠠᠨᠵᠤᠭᠠ ᠪᠠᠨ ᠮᠡᠳᠡᠭᠦᠯᠬᠦ ᠪᠡᠷ ᠴᠥᠷᠬᠡᠯᠡᠭᠳᠡᠨ ᠣᠷᠣᠵᠠᠭᠠᠪᠠ᠃
ᠡᠨᠡ ᠬᠦ᠌ ᠲᠣᠭᠣᠰᠬᠠᠨ ᠭᠡᠷ ᠦ᠋ᠨ ᠳᠣᠲᠣᠷᠠ ᠥᠷᠥᠭᠡᠨ ᠦ᠌ ᠰᠢᠯ ᠭᠡᠭᠡᠪᠴᠢ ᠶ᠋ᠢᠨ ᠨᠠᠷᠠᠨ ᠡᠭᠡᠪᠦᠷ ᠲᠦ᠍ ᠬᠠᠨᠵᠤᠨ ᠤ᠋ ᠰᠢᠷᠡᠭᠡ ᠥᠩᠭᠡᠢᠨ ᠬᠠᠵᠠᠭᠤᠯᠳᠠᠭᠰᠠᠨ ᠭᠥᠯᠢᠩ ᠲᠣᠯᠣᠭᠠᠢ ᠲᠠᠢ ᠪᠦᠳᠦᠭᠦᠨ ᠡᠷᠡ ᠬᠠᠷᠠ ᠲᠠᠮᠠᠬᠢ ᠴᠣᠷᠭᠢᠵᠤ ᠰᠠᠭᠤᠨᠠ᠃
ᠡᠨᠡ ᠬᠥᠮᠦᠨ ᠪᠣᠯ ᠮᠠᠨᠴᠤᠷᠭᠠ᠃
ᠮᠠᠨᠴᠤᠷᠭᠠ᠂ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠤ᠋ ᠬᠠᠢᠷᠠᠲᠠᠢ ᠬᠠᠲᠤᠨ ᠴᠡᠴᠡᠭ ᠲᠡᠢ ᠡᠢᠮᠦ ᠲᠡᠢᠮᠦ ᠪᠣᠯᠵᠤ ᠬᠡᠷᠡᠭ ᠯᠡᠪᠡᠷᠡᠭᠰᠡᠨ ᠳ᠋ᠦ᠍ ᠶᠣᠰᠣᠲᠠᠢ ᠲᠡᠭᠷᠢ ᠶ᠋ᠢᠨ ᠪᠤᠬᠤᠷ ᠲᠤ᠌ ᠭᠠᠯ ᠲᠠᠯᠪᠢᠴᠢᠬᠠᠭᠠᠳ ᠠᠷᠭᠠ ᠪᠤᠶᠤ ᠥᠪᠡᠷ ᠢ᠋ᠶ᠋ᠡᠨ ᠬᠦᠯᠢᠶᠡᠰᠦ ᠪᠡᠨ ᠠᠯᠳᠠᠷᠠᠭᠠᠵᠤ ᠨᠣᠶᠠᠨ ᠰᠠᠩ ᠤ᠋ᠨ ᠶᠠᠮᠤᠨ ᠠ᠋ᠴᠠ ᠵᠢᠭᠤᠲᠠᠵᠠᠢ᠃ ᠡᠨᠡ ᠬᠣᠭᠣᠷᠣᠨᠳᠣ ᠲᠡᠭᠦᠨ ᠦ᠌ ᠡᠴᠢᠭᠡ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠡᠨᠡ ᠤᠴᠢᠷ ᠲᠤ᠌ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠲᠠᠢ ᠡᠪᠳᠡᠷᠡᠯᠴᠡᠵᠦ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠳᠣᠲᠣᠷᠠ ᠪᠠᠨ ᠶᠡᠬᠡᠳᠡ ᠬᠢᠮᠤᠷᠠᠭᠰᠠᠨ ᠢ᠋ ᠠᠳᠠ ᠥᠭᠦᠯᠡᠬᠦ ᠦᠭᠡᠢ᠃ ᠡᠭᠦᠨ ᠦ᠌ ᠤᠴᠢᠷ ᠲᠤ᠌ ᠲᠡᠷᠡ ᠬᠣᠰᠢᠭᠤ ᠨᠤᠲᠤᠭ ᠲᠠᠭᠠᠨ ᠬᠥᠯ ᠲᠥᠷᠥᠵᠦ ᠴᠢᠳᠠᠬᠤ ᠦᠭᠡᠢ᠂ ᠭᠡᠷ ᠲᠡᠭᠡᠨ ᠴᠦ᠍ ᠬᠠᠷᠢᠬᠤ ᠠᠷᠭᠠ ᠦᠭᠡᠢ ᠲᠡᠨᠦᠭᠦᠴᠢᠯᠡᠵᠦ ᠶᠠᠪᠤᠵᠠᠢ᠃
ᠤᠷᠰᠢᠭ ᠤ᠋ᠨ ᠲᠦᠷᠦᠭᠦᠦ ᠥᠯᠵᠡᠢᠰᠠᠩ ᠢ᠋ ᠥᠯᠥᠩᠲᠦ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠮᠣᠳᠣᠨ ᠳ᠋ᠤ᠌ ᠳᠡᠭᠦᠵᠢᠯᠡᠵᠦ ᠬᠠᠶᠠᠴᠢᠬᠠᠭᠠᠳ ᠪᠤᠭᠤᠲᠤ ᠪᠠᠷ ᠳᠠᠭᠠᠷᠢᠬᠤ ᠳ᠋ᠠᠭᠠᠨ ᠨᠠᠮᠰᠠᠷᠠᠢ ᠪᠤᠷᠬᠠᠨᠲᠤ ᠰᠦᠮᠡ ᠶ᠋ᠢᠨ ᠡᠭᠦᠳᠡᠨ ᠳ᠋ᠦ᠍ ᠵᠢᠭᠠᠬᠠᠨ ᠪᠠᠨᠳᠢ ᠲᠡᠮᠦᠷᠰᠥ᠋ᠬᠡ ᠶ᠋ᠢᠨ ᠠᠮᠠᠨ ᠠ᠋ᠴᠠ ᠷᠤᠯᠮᠠ ᠶ᠋ᠢᠨ ᠲᠤᠬᠠᠢ ᠵᠣᠯ ᠪᠤᠰᠤ ᠰᠤᠷᠠᠭ ᠲᠤᠭᠤᠯᠵᠤ᠂ ᠮᠥᠨ ᠰᠦᠮᠡ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠬᠡᠷᠡᠮ ᠳ᠋ᠦ᠍ ᠲᠡᠭᠦᠨ ᠦ᠌ ᠵᠢᠷᠤᠮᠠᠯ ᠬᠥᠷᠥᠭ ᠲᠡᠢ ᠪᠠᠷᠢᠪᠴᠢᠯᠠᠬᠤ ᠵᠠᠷ ᠨᠠᠭᠠᠭᠠᠰᠤᠲᠠᠢ ᠪᠠᠢᠭᠰᠠᠨ ᠢ᠋ ᠨᠢᠳᠦ ᠪᠡᠷ ᠣᠯᠵᠤ ᠦᠵᠡᠩᠭᠦᠲᠡ 《ᠡᠨᠡ ᠭᠠᠵᠠᠷ ᠤᠳᠠᠭᠠᠨ ᠪᠠᠢᠵᠤ ᠪᠣᠯᠬᠤ ᠦᠭᠡᠢ》 ᠭᠡᠵᠦ ᠲᠡᠨᠳᠡ ᠡᠴᠡ ᠱᠠᠯᠠᠪᠬᠠᠨ ᠰᠠᠯᠪᠠ᠃
ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠰᠠᠯᠴᠢᠨ ᠰᠦᠮᠡ ① ᠦ᠌ ᠭᠠᠯ ᠲᠣᠭᠣᠭᠠᠨ ᠤ᠋ ᠳᠣᠩᠷᠣᠪ ᠯᠠᠮᠠᠬᠠᠢ ᠶ᠋ᠢᠨ ᠳ᠋ᠦ᠍ ᠣᠴᠢᠵᠤ ᠬᠡᠳᠦ ᠬᠣᠨᠣᠭ ᠬᠣᠷᠭᠣᠳᠠᠪᠠ᠃ ᠲᠡᠭᠡᠭᠡᠳ ᠮᠠᠴᠠᠭ ᠪᠠᠷᠢᠵᠤ ᠮᠠᠨᠢ ᠲᠣᠭᠠᠯᠠᠨ ᠯᠠᠮᠠ ᠪᠣᠯᠤᠶᠠ ᠴᠤ᠌ ᠭᠡᠵᠦ ᠰᠠᠨᠠᠨ ᠦᠰᠦ ᠪᠡᠨ ᠬᠤᠰᠤᠵᠤ ᠰᠠᠯᠴᠢᠨ ᠰᠦᠮᠡ ᠶ᠋ᠢᠨ ᠯᠠᠮᠠ ᠪᠣᠯᠬᠤ ᠪᠠᠷ ᠬᠡᠳᠦᠨ ᠰᠠᠷᠠ ᠪᠡᠶᠡ ᠪᠡᠨ ᠲᠡᠪᠴᠢᠵᠦ ᠦᠵᠡᠪᠡ᠃ ᠪᠣᠯᠳᠠᠭ ᠶᠠᠭᠤᠮᠠ ᠪᠢᠰᠢ ᠵᠠᠷᠢᠮ ᠳ᠋ᠠᠭᠠᠨ ᠰᠥᠨᠢᠵᠢᠨ ᠨᠣᠢᠷ ᠦᠭᠡᠢ ᠬᠡᠪᠲᠡᠬᠦ ᠳ᠋ᠡᠭᠡᠨ ᠴᠡᠴᠡᠭ ᠬᠠᠲᠤᠨ ᠤ᠋ ᠥᠭᠡᠬᠦ ᠰᠢᠭ ᠲᠣᠷᠭᠠᠨ ᠪᠡᠶᠡ᠂ ᠷᠤᠯᠮᠠ ᠶ᠋ᠢᠨ ᠬᠣᠩᠭᠢᠯᠳᠠᠭ᠁ ᠵᠡᠷᠭᠡ ᠴᠢᠳᠬᠥᠷ ᠲᠡᠢ ᠶᠠᠭᠤᠮᠠ ᠪᠡᠶᠡ ᠰᠦᠨᠡᠰᠦ ᠶ᠋ᠢ ᠨᠢ ᠣᠷᠢᠶᠠᠭᠠᠳ ᠦᠯᠦ ᠰᠠᠯᠤᠨᠠ᠃ ᠭᠠᠰᠢᠭᠤᠨ ᠬᠠᠷᠠ᠂ ᠬᠠᠷᠠ ᠲᠠᠮᠠᠬᠢ ᠶ᠋ᠢ ᠪᠣᠯ ᠬᠡᠯᠡᠬᠦ ᠶᠠᠭᠤ ᠪᠠᠢᠬᠤ ᠪᠣᠢ? ᠲᠠᠩᠳᠠ ᠬᠣᠷᠣᠬᠠᠢ ᠶ᠋ᠢ ᠨᠢ ᠬᠥᠳᠡᠯᠭᠡᠨᠡ 《ᠯᠠᠮᠠ ᠪᠣᠯᠤᠨᠠ ᠭᠡᠳᠡᠭ ᠴᠢᠨᠢ ᠬᠠᠷᠠ ᠲᠣᠯᠣᠭᠠᠢᠲᠤ ᠬᠥᠮᠦᠨ ᠦ᠌ ᠦᠢᠯᠡᠳᠳᠡᠭ ᠠᠵᠢᠯ ᠳᠠᠩᠴᠤ ᠨᠢᠭᠡ ᠪᠢᠰᠢ ᠳᠡ! ᠶᠣᠰᠣᠲᠠᠢ ᠯᠠ ᠥᠪᠡᠷ ᠦ᠋ᠨ ᠮᠢᠬᠠ ᠪᠠᠨ ᠢᠳᠡᠵᠦ᠂ ᠴᠢᠰᠤ ᠪᠠᠨ ᠤᠤᠭᠤᠳᠠᠭ ᠰᠢᠭ᠋ ᠲᠠᠮᠤ ᠬᠣᠢᠨᠠ᠂ ᠪᠠᠢᠶᠠ 》 ᠭᠡᠵᠦ ᠨᠢᠭᠡ ᠰᠥᠨᠢ ᠮᠠᠨᠴᠤᠷᠭᠠ ᠰᠠᠯᠴᠢᠨ ᠰᠦᠮᠡ ᠡᠴᠡ ᠰᠡᠮᠡᠬᠡᠷ ᠤᠷᠭᠤᠵᠤ ᠶᠠᠪᠤᠪᠠ᠃
ᠮᠠᠨᠴᠤᠷᠭᠠ ᠰᠠᠯᠴᠢᠨ ᠰᠦᠮᠡ ᠡᠴᠡ ᠶᠠᠪᠤᠵᠤ ᠪᠤᠭᠤᠲᠤ ᠶ᠋ᠢᠨ ᠬᠠᠪᠢᠯᠳᠤᠭᠤ ᠰᠠᠭᠠᠯᠢᠴᠢᠨ᠂ ᠠᠳᠤᠭᠤᠨ ᠤ᠋ ᠠᠢᠯ᠂ ᠭᠤᠨᠵᠢᠨ ᠦᠬᠡᠷ ᠦ᠋ᠨ ᠪᠠᠢᠰᠢᠩ ᠵᠡᠷᠭᠡ ᠭᠠᠵᠠᠷ ᠢ᠋ᠶ᠋ᠠᠷ ᠬᠣᠯᠬᠢᠵᠤ ᠢᠰᠡᠭᠡᠢ ᠲᠣᠭᠣᠷᠴᠣᠭ ᠡᠮᠦᠰᠦᠨ ᠲᠠᠷᠢᠶᠠᠴᠢᠨ ᠬᠢᠲᠠᠳ ᠰᠢᠭ᠋ ᠨᠡᠷᠡ ᠵᠢᠰᠦ ᠪᠡᠨ ᠪᠤᠷᠤᠭᠤᠯᠠᠨ ᠣᠯᠠᠨ ᠲᠤᠨᠤᠭᠠᠨ ᠤ᠋ ᠠᠬᠠ ᠳᠡᠭᠦᠦ ᠲᠡᠢ ᠪᠣᠯᠵᠤ ᠪᠠᠶᠠᠳ ᠬᠠᠷᠬᠢᠰᠴᠤᠳ ᠢ᠋ ᠲᠣᠨᠣᠵᠤ ᠠᠮᠢ ᠪᠠᠨ ᠪᠣᠷᠣᠯᠠᠭᠤᠯᠳᠠᠭ ᠪᠣᠯᠵᠠᠢ᠃
ᠮᠥᠨ ᠲᠡᠷᠡ ᠡᠪᠦᠯ ᠶᠤᠮᠰᠠᠨ ᠲᠡᠭᠦᠨ ᠦ᠌ ᠡᠴᠢᠭᠡ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠮᠢᠩᠭᠠᠨ ᠬᠤᠰᠢᠭᠤᠨ ᠤ᠋ ᠳᠣᠷᠵᠢᠸᠠᠩᠴᠣᠭ ᠨᠣᠶᠠᠨ ᠢ᠋ ᠲᠦᠰᠢᠷᠡ ᠣᠴᠢᠵᠤ ᠭᠡᠷ ᠲᠡᠷᠭᠡ ᠪᠡᠨ ᠪᠦᠷ ᠲᠠᠢᠰᠢ ᠨᠢ ᠨᠡᠭᠦᠯᠭᠡᠯᠡ ᠭᠡᠰᠡᠨ ᠴᠢᠮᠡᠭᠡ ᠠᠪᠤᠪᠠ᠃
ᠮᠠᠨᠴᠤᠷᠭᠠ ᠠᠷᠪᠠᠭᠠᠳ ᠴᠡᠷᠢᠭ ᠮᠣᠷᠢ ᠲᠠᠢ ᠪᠠᠨ ᠭᠡᠷ ᠦ᠋ᠨ ᠪᠠᠷᠠ ᠬᠠᠷᠠᠬᠤ ᠪᠠᠷ ᠲᠡᠨᠳᠡ ᠡᠴᠡ ᠬᠥᠳᠡᠯᠪᠡ᠃ ᠪᠤᠭᠤᠲᠤ ᠠ᠋ᠴᠠ ᠬᠣᠢᠰᠢ ᠪᠠᠨ ᠮᠤᠨᠠ ᠠᠭᠤᠯᠠ ᠳᠠᠪᠠᠵᠤ ᠭᠠᠷᠤᠭᠠᠳ ᠮᠢᠩᠭᠠᠨ ᠤ᠋ ᠲᠠᠯᠠ ᠳ᠋ᠤ᠌ ᠣᠷᠣᠬᠤ ᠳ᠋ᠤ᠌ ᠴᠠᠰᠤ ᠶᠡᠬᠡᠲᠡᠢ ᠵᠠᠷᠢᠮ ᠭᠠᠵᠠᠷ ᠰᠥᠬᠥ ᠭᠠᠷᠴᠤ᠂ ᠭᠣᠣ ᠭᠠᠩᠭᠠ ᠲᠡᠭᠰᠢᠷᠡᠨ ᠮᠣᠷᠢᠲᠠᠢ ᠬᠥᠮᠦᠨ ᠳᠠᠷᠤᠯᠴᠠᠵᠤ ᠣᠢᠴᠢᠨ ᠵᠠᠮ ᠳᠥᠭᠥᠬᠦ ᠦᠭᠡᠢ ᠪᠣᠯᠬᠣᠷ ᠭᠡᠰᠡᠨ ᠶᠠᠯᠢ ᠦᠭᠡᠢ ᠲᠣᠰᠬᠣᠨ ᠳ᠋ᠤ᠌ ᠣᠷᠣᠵᠤ ᠬᠣᠨᠣᠬᠤ ᠬᠡᠷᠡᠭᠲᠡᠢ ᠪᠣᠯᠵᠠᠢ᠃
ᠡᠨᠡ ᠲᠣᠰᠬᠣᠨ ᠤ᠋ ᠵᠡᠭᠡᠭᠡᠭᠰᠡᠨ ᠪᠠᠶᠠᠨ ᠠᠢᠯ ᠢ᠋ ᠰᠣᠩᠭᠣᠵᠤ ᠬᠣᠨᠣᠭᠯᠠᠬᠤ ᠪᠠᠷ ᠪᠣᠯᠤᠭᠰᠠᠨ ᠳ᠋ᠤ᠌ ᠭᠡᠷ ᠦ᠋ᠨ ᠡᠵᠡᠨ ᠪᠣᠯᠤᠯᠲᠠᠢ ᠪᠠᠷᠵᠠᠭᠠᠷ ᠬᠠᠷᠠ ᠡᠪᠦᠭᠡᠨ ᠡᠳᠡᠨᠥᠰ ᠢ᠋ ᠫᠤᠤ ᠵᠡᠪᠰᠡᠭ᠂ ᠮᠣᠷᠢ ᠬᠠᠷᠠ ᠲᠠᠢ ᠪᠣᠯᠬᠣᠷ ᠠᠷᠭᠠ ᠦᠭᠡᠢ ᠰᠦᠷᠳᠡᠵᠦ᠄
— ᠲᠠ ᠨᠠᠷ ᠪᠢᠲᠡᠭᠡᠢ ᠯᠡ ᠡᠮᠡᠰ ᠥᠬᠢᠳ ᠢ᠋ ᠮᠢᠨᠢ᠁ ᠡᠳ᠋ ᠪᠠᠷᠠᠭᠠ ᠶ᠋ᠢ ᠮᠢᠨᠢ᠁ ᠪᠢᠲᠡᠭᠡᠢ ᠯᠡ ᠲᠣᠨᠣᠵᠤ ᠳᠡᠭᠡᠷᠡᠮᠳᠡᠭᠡᠷᠡᠢ᠁ ᠶᠠᠭᠤ ᠢᠳᠡᠵᠦ ᠤᠤᠭᠤᠪᠠᠯ ᠬᠠᠩᠭᠠᠯᠲᠠᠲᠠᠢ ᠥᠭᠭᠦᠶᠡ! ᠭᠡᠬᠦ ᠳ᠋ᠦ᠍ ᠮᠠᠨᠴᠤᠷᠭᠠ᠄
— ᠪᠥᠭᠰᠡ ᠪᠡᠨ ᠬᠠᠪᠴᠢᠭᠠᠳ ᠬᠤᠷᠳᠤᠨ ᠬᠣᠭᠣᠯᠠ ᠤᠮᠳᠠ ᠪᠠᠵᠠᠭᠠ! ᠬᠣᠨᠣᠭ ᠭᠤᠶᠤᠭᠠᠳ ᠭᠠᠷᠤᠶᠠ ᠭᠡᠰᠡᠨ ᠡᠴᠡ ᠪᠢᠰᠢ ᠪᠢᠳᠡ ᠶᠠᠮᠠᠷ ᠡᠮᠡᠰ ᠥᠬᠢᠳ ᠢ᠋ ᠴᠢᠨᠢ ᠶᠠᠭᠠᠬᠢᠬᠤ ᠭᠡᠵᠦ ᠪᠠᠢᠨᠠ? ᠮᠠᠨᠤᠰ ᠴᠢᠮᠠ ᠳ᠋ᠤ᠌ ᠳᠡᠭᠡᠷᠡᠮ ᠰᠢᠭ ᠬᠠᠷᠠᠭᠳᠠᠵᠤ ᠪᠠᠢᠨᠠ ᠤᠤ? ᠭᠡᠵᠦ ᠵᠠᠩᠨᠠᠵᠠᠢ᠃
— ᠦᠭᠡᠢ᠂ ᠦᠭᠡᠢ ᠠ᠋! ᠭᠡᠳ ᠪᠠᠷᠵᠠᠭᠠᠷ ᠬᠠᠷᠠ ᠡᠪᠦᠭᠡᠨ ᠠᠶᠤᠨ ᠪᠡᠮᠪᠡᠭᠡᠨᠡᠵᠦ ᠢᠳᠡᠰᠢ ᠤᠤᠭᠤᠰᠢ ᠲᠥᠪᠬᠢᠨᠡᠭᠦᠯᠬᠦ ᠪᠡᠷ ᠪᠣᠯᠪᠠ᠃ ᠲᠡᠭᠡᠭᠡᠳ ᠡᠳᠡᠨ ᠦ᠌ ᠬᠢᠨ ᠶᠡᠬᠡ ᠲᠡᠢ ᠪᠠᠭᠠ ᠲᠠᠢ ᠪᠠᠨ ᠬᠥᠳᠡᠯᠵᠦ ᠲᠠᠬᠢᠶᠠ ᠮᠤᠰᠬᠢᠬᠤ ᠨᠢ ᠲᠠᠬᠢᠶᠠ ᠮᠤᠰᠬᠢᠵᠦ᠂ ᠬᠣᠨᠢ ᠨᠢᠲᠤᠯᠬᠤ ᠨᠢ ᠬᠣᠨᠢ ᠨᠢᠲᠤᠯᠵᠤ ᠪᠤᠵᠢᠭᠢᠨᠠᠯᠳᠤᠪᠠ᠃ ᠲᠡᠢᠨ ᠲᠡᠢᠨ ᠬᠦ᠌ ᠲᠡᠷᠡ ᠠᠢᠯ ᠳ᠋ᠤ᠌ ᠠᠷᠢᠬᠢ ᠳᠠᠷᠠᠰᠤ ᠤᠤᠭᠤᠵᠤ᠂ ᠲᠠᠬᠢᠶᠠ ᠭᠠᠬᠠᠢ ᠶ᠋ᠢᠨ ᠮᠢᠬᠠᠨ ᠤ᠋ ᠵᠠᠭᠤᠰᠢ ᠬᠣᠨᠢᠨ ᠤ᠋ ᠲᠠᠷᠭᠤᠨ ᠮᠢᠬᠠ ᠢᠳᠡᠵᠦ ᠴᠠᠳᠤᠭᠠᠳ ᠪᠦᠬᠦᠯᠢ ᠪᠡᠷ ᠢ᠋ᠶ᠋ᠡᠨ ᠬᠡᠪᠲᠡᠵᠡᠭᠡᠪᠡ᠃
ᠬᠡᠪᠲᠡᠬᠦ ᠡᠴᠡ ᠡᠮᠦᠨᠡ 《ᠲᠠ ᠨᠠᠷ ᠮᠣᠷᠢᠨ ᠤ᠋ ᠪᠠᠨ ᠡᠮᠡᠭᠡᠯ ᠢ᠋ ᠪᠢᠲᠡᠭᠡᠢ ᠠᠪ᠂ ᠬᠠᠵᠠᠭᠠᠷ ᠢ᠋ ᠨᠢ ᠠᠮᠠᠭᠠᠢᠳᠠᠵᠤ ᠲᠡᠵᠢᠭᠡᠵᠦ ᠬᠣᠨᠣ! ᠰᠡᠷᠡᠮᠵᠢᠲᠡᠢ ᠪᠠᠢᠭᠠᠷᠠᠢ 》 ᠭᠡᠵᠦ ᠮᠠᠨᠴᠤᠷᠭᠠ ᠮᠠᠭᠤ ᠰᠤᠪᠢᠨ ᠲᠠᠲᠠᠭᠰᠠᠨ ᠮᠡᠲᠦ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢᠨ ᠣᠷᠣ ᠪᠠᠷ ᠦᠦᠷ ᠴᠠᠢᠬᠤ ᠶ᠋ᠢᠨ ᠠᠯᠲᠠ ᠪᠠᠷ ᠡᠨᠡ ᠠᠢᠯ ᠤ᠋ᠨ ᠬᠠᠶᠠᠭᠠᠨ ᠳ᠋ᠤ᠌ ᠫᠤᠤ ᠨᠢᠵᠢᠭᠢᠨᠡᠪᠡ᠃
ᠮᠠᠨᠴᠤᠷᠭᠠ ᠫᠤᠤ ᠶ᠋ᠢᠨ ᠳᠠᠭᠤᠨ ᠳ᠋ᠤ᠌ ᠬᠣᠪᠬᠤ ᠦᠰᠦᠷᠦᠨ ᠪᠣᠰᠴᠤ ᠪᠠᠨᠰᠠᠨ ᠬᠠᠭᠠᠯᠭᠠᠨ ᠤ᠋ ᠠᠷᠤ ᠳ᠋ᠤ᠌ ᠨᠢᠭᠤᠵᠤ ᠭᠠᠳᠠᠨᠠᠬᠢ ᠴᠢᠮᠡᠭᠡ ᠶ᠋ᠢ ᠴᠢᠩᠨᠠᠪᠠᠯ ᠲᠦᠰ ᠲᠦᠰ ᠬᠢᠨ ᠬᠡᠳᠦᠨ ᠬᠥᠮᠦᠨ ᠡᠭᠦᠳᠡ ᠳᠥᠭᠥᠨ ᠭᠦᠶᠦᠵᠦ ᠢᠷᠡᠬᠦ ᠬᠥᠯ ᠦ᠋ᠨ ᠴᠢᠮᠡᠭᠡ ᠳᠤᠭᠤᠯᠳᠠᠭᠰᠠᠨ ᠳ᠋ᠤ᠌᠂
— ᠰᠡᠷᠡᠩ ᠠ᠋᠂ ᠲᠠ ᠬᠡᠳᠦᠭᠦᠯᠡ ᠫᠤᠤ ᠪᠠᠨ ᠵᠠᠮᠤᠭᠯᠠᠭᠠᠳ ᠴᠣᠩᠬᠣ ᠪᠠᠷ ᠭᠠᠷᠴᠤ ᠮᠣᠷᠢᠳ ᠢ᠋ ᠣᠢᠷᠠᠲᠤᠭᠤᠯ᠂ ᠪᠢ ᠠᠳᠠ ᠡᠭᠦᠳᠡ ᠠᠪᠴᠤ ᠭᠡᠷ ᠲᠦ᠍ ᠣᠷᠣᠵᠤ ᠢᠷᠡᠭᠰᠡᠨ ᠳᠡᠭᠡᠷᠡᠮ ᠢ᠋ ᠨᠢ ᠨᠤᠭᠤᠰᠤᠯᠠᠶᠠ! ᠭᠡᠵᠦ ᠨᠠᠮ ᠳᠠᠭᠤ ᠪᠠᠷ ᠪᠣᠯᠪᠠᠴᠤ ᠬᠠᠲᠠᠭᠤ ᠵᠠᠷᠯᠢᠭ ᠪᠣᠯᠪᠠ᠃
ᠭᠡᠨᠡᠳᠲᠡ ᠬᠠᠭᠠᠯᠭᠠᠨ ᠤ᠋ ᠴᠣᠩᠬᠣ ᠪᠠᠷ ᠫᠠᠩ ᠭᠡᠵᠦ ᠫᠤᠤ ᠳᠤᠤᠭᠠᠷᠤᠨ ᠦᠰᠦᠷᠦᠭᠰᠡᠨ ᠰᠤᠮᠤ ᠬᠣᠢᠲᠤ ᠬᠡᠷᠡᠮ ᠢ᠋ ᠣᠩᠭᠢᠯᠵᠤ ᠰᠢᠷᠣᠢ ᠪᠤᠵᠢᠭᠢᠨᠠᠭᠤᠯᠪᠠ᠃
— ᠫᠤᠤ ᠪᠠᠨ ᠬᠠᠶᠠ᠂ ᠭᠠᠷ ᠢ᠋ᠶ᠋ᠠᠨ ᠡᠷᠭᠦ ! ᠨᠣᠮᠣᠬᠠᠨ ᠪᠠᠢᠪᠠᠯ ᠫᠤᠤᠳᠠᠬᠤ ᠦᠭᠡᠢ᠃ ᠫᠤᠤ ᠶ᠋ᠢᠨ ᠰᠤᠮᠤ ᠨᠢᠳᠦ ᠦᠭᠡᠢ ᠰᠢᠦ! ᠭᠡᠵᠦ ᠳᠡᠭᠡᠷᠡᠮ ᠦ᠋ᠳ ᠭᠠᠳᠠᠨᠠ ᠠ᠋ᠴᠠ ᠬᠠᠰᠬᠢᠷᠤᠯᠳᠤᠨ ᠡᠭᠦᠳᠡ ᠪᠠᠯᠪᠠᠵᠤ ᠰᠦᠷᠳᠡᠭᠦᠯᠦᠨᠡ᠃
ᠭᠡᠷ ᠦ᠋ᠨ ᠡᠵᠡᠨ ᠪᠠᠷᠵᠠᠭᠠᠷ ᠡᠪᠦᠭᠡᠨ ᠠᠶᠤᠬᠤ ᠳ᠋ᠠᠭᠠᠨ 《ᠠᠮᠢ ᠠᠪᠤᠷᠠ! ᠪᠤᠷᠬᠠᠨ ᠲᠡᠭᠷᠢ ᠮᠢᠨᠢ᠂ ᠪᠢ ᠶᠠᠮᠠᠷ ᠴᠦ᠍ ᠨᠢᠭᠦᠯ ᠬᠢᠭᠡ ᠦᠭᠡᠢ!》 ᠭᠡᠵᠦ ᠪᠣᠯᠳᠠᠭ ᠰᠠᠨ ᠪᠣᠯ ᠬᠠᠨᠵᠤᠨ ᠤ᠋ ᠬᠣᠢᠲᠤ ᠪᠤᠯᠤᠩ ᠢ᠋ᠶ᠋ᠠᠷ ᠭᠠᠳᠠᠭᠰᠢ ᠰᠢᠷᠭᠤᠭᠠᠳ ᠭᠠᠷᠴᠢᠬᠠᠮᠠᠷ ᠪᠡᠮᠪᠡᠭᠡᠨᠡᠵᠦ ᠪᠠᠢᠪᠠ᠃ ᠮᠠᠨᠴᠤᠷᠭᠠ᠄
— ᠡᠪᠦᠭᠡᠨ ᠠ᠋᠂ ᠪᠠᠭᠤᠵᠤ ᠢᠷᠡ! ᠭᠡᠵᠦ ᠰᠡᠮᠡᠬᠡᠷ ᠳᠣᠬᠢᠨ ᠳᠠᠭᠤᠳᠠᠭᠰᠠᠨ ᠳ᠋ᠤ᠌ ᠥᠮᠥᠳᠥᠨ ᠳ᠋ᠡᠭᠡᠨ ᠪᠠᠭᠤᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠲᠡᠷᠡ ᠡᠪᠦᠭᠡᠨ ᠱᠤᠤᠬᠢᠲᠤᠨᠠᠨ ᠪᠠᠭᠠᠴᠠᠭᠠᠭᠰᠠᠭᠠᠷ ᠮᠠᠨᠴᠤᠷᠭᠠ ᠶ᠋ᠢᠨ ᠳᠡᠷᠭᠡᠳᠡ ᠢᠷᠡᠪᠡ᠃ ᠲᠡᠷᠡ ᠡᠪᠦᠭᠡᠨ ᠦ᠌ ᠡᠷᠡᠦ ᠨᠢ ᠬᠠᠪᠬᠢᠨᠠᠨ ᠡᠪᠦᠳᠦᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠡᠴᠡᠷᠡᠵᠦ ᠪᠠᠢᠪᠠ᠃
— ᠪᠢᠲᠡᠭᠡᠢ ᠠᠶᠤ᠂ ᠳ᠋ᠧᠩ ᠢ᠋ᠶ᠋ᠡᠨ ᠠᠰᠠᠭᠠᠭᠠᠳ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠵᠦ ᠵᠣᠭᠰᠣ! ᠡᠨᠡ ᠳᠡᠭᠡᠷᠡᠮ ᠦ᠋ᠳ ᠴᠢᠮᠠᠶ᠋ᠢ ᠬᠣᠣᠷᠯᠠᠬᠤ ᠦᠭᠡᠢ! ᠪᠤᠰᠢᠭᠤ! ᠭᠡᠵᠦ ᠮᠠᠨᠴᠤᠷᠭᠠ ᠲᠡᠭᠦᠨ ᠦ᠌ ᠴᠢᠬᠢᠨ ᠳ᠋ᠦ᠍ ᠰᠢᠪᠡᠨᠡᠪᠡ᠃ ᠲᠡᠭᠦᠨ ᠦ᠌ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠪᠠᠷᠵᠠᠭᠠᠷ ᠡᠪᠦᠭᠡᠨ ᠦ᠌ ᠠᠢᠳᠠᠰ ᠨᠢ ᠵᠢᠭᠠᠬᠠᠨ ᠠᠷᠢᠯᠤᠭᠰᠠᠨ ᠰᠢᠭ᠋ ᠴᠦᠳᠡᠩ ᠵᠢᠷᠤᠵᠤ ᠳ᠋ᠧᠩ ᠠᠰᠠᠭᠠᠪᠠ᠃ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠳ᠋ᠦ᠍ ᠥᠨᠥᠬᠢ ᠪᠠᠷᠵᠠᠭᠠᠷ ᠡᠪᠦᠭᠡᠨ ᠮᠠᠨᠴᠤᠷᠭᠠ ᠶ᠋ᠢᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠭᠡᠳ ᠬᠥᠰᠡᠷ ᠰᠥᠭᠥᠳᠦᠭᠰᠡᠨ ᠪᠠᠢᠯᠠ᠁
ᠰᠡᠷᠡᠩ ᠰᠢᠷᠠᠮᠠᠩ ᠬᠣᠶᠠᠷ ᠴᠣᠩᠬᠣᠨ ᠤ᠋ ᠮᠣᠣᠲᠤᠤ ᠴᠠᠭᠠᠰᠤ ᠶ᠋ᠢ ᠴᠣᠭᠣᠯᠵᠤ ᠭᠠᠳᠠᠨᠠ ᠡᠭᠦᠳᠡ ᠠᠪᠴᠤ ᠵᠣᠭᠰᠣᠭᠰᠠᠨ ᠬᠣᠶᠠᠷ ᠢ᠋ ᠣᠨᠢᠯᠠᠵᠤ ᠫᠤᠤᠳᠠᠮᠠᠭᠴᠠ ᠪᠠᠨ ᠴᠣᠩᠬᠣ ᠪᠠᠷ ᠦᠰᠦᠷᠴᠦ ᠳᠤᠲᠠᠭᠠᠬᠤ ᠪᠠᠷ ᠪᠡᠯᠡᠬᠡᠨ ᠪᠣᠯᠪᠠ᠃
ᠭᠡᠷ ᠦ᠋ᠨ ᠡᠭᠦᠳᠡ ᠪᠡᠷ ᠫᠤᠤ ᠶ᠋ᠢᠨ ᠠᠮᠠ ᠣᠩᠭᠣᠯᠵᠠᠭᠰᠠᠭᠠᠷ ᠨᠢᠭᠡ ᠨᠢ ᠣᠷᠣᠵᠤ ᠢᠷᠡᠬᠦ ᠲᠡᠢ ᠵᠡᠷᠭᠡ ᠮᠠᠨᠴᠤᠷᠭᠠ ᠥᠨᠥᠬᠢ ᠶ᠋ᠢ ᠬᠦᠵᠦᠭᠦᠳᠡᠨ ᠲᠡᠪᠡᠷᠢᠵᠦ ᠠᠮᠠ ᠶ᠋ᠢ ᠨᠢ ᠪᠢᠲᠡᠭᠦᠯᠡᠪᠡ᠃ ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠫᠠᠩ᠂ ᠫᠠᠩ ᠭᠡᠵᠦ ᠬᠣᠶᠠᠷᠲᠠ ᠫᠤᠤ ᠳᠤᠤᠭᠠᠷᠤᠭᠰᠠᠨ ᠳ᠋ᠤ᠌ ᠭᠠᠳᠠᠨᠠ ᠡᠭᠦᠳᠡ ᠶ᠋ᠢ ᠠᠪᠴᠤ ᠵᠣᠭᠰᠣᠭᠰᠠᠨ ᠬᠣᠶᠠᠷ ᠡᠷᠡ ᠲᠦᠰ ᠬᠢᠨ ᠣᠢᠴᠢᠬᠤ ᠴᠢᠮᠡᠭᠡ ᠪᠡᠷ ᠭᠡᠷ ᠦ᠋ᠨ ᠴᠣᠩᠬᠣ ᠪᠠᠯᠪᠠ ᠢᠰᠬᠦᠯᠦᠭᠳᠡᠵᠦ ᠰᠡᠷᠡᠩ᠂ ᠰᠢᠷᠠᠮᠠᠩ ᠨᠠᠷ ᠴᠣᠩᠬᠣ ᠪᠠᠷ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠪᠠᠨ ᠦᠰᠦᠷᠦᠨ ᠭᠠᠷᠪᠠ᠃
ᠭᠡᠷ ᠲᠦ᠍ ᠫᠤᠤ ᠳᠤᠤᠭᠠᠷᠴᠤ᠂ ᠡᠭᠦᠳᠡᠨ ᠦ᠌ ᠬᠠᠵᠠᠭᠤ ᠶ᠋ᠢᠨ ᠬᠣᠶᠠᠷ ᠨᠢ ᠦᠬᠦᠭᠰᠡᠨ ᠢ᠋ ᠦᠵᠡᠭᠰᠡᠨ ᠨᠥᠭᠦᠭᠡ ᠬᠦᠷᠢᠶᠡᠨ ᠦ᠌ ᠠᠮᠠ ᠰᠠᠬᠢᠵᠤ ᠵᠣᠭᠰᠣᠭᠰᠠᠨ᠂ ᠮᠥᠨ ᠪᠠᠷᠠᠭᠤᠨ ᠭᠡᠷ ᠦ᠋ᠨ ᠡᠭᠦᠳᠡᠨ ᠳᠡᠭᠡᠷᠡᠬᠢ ᠰᠠᠬᠢᠭᠤᠯ ᠤ᠋ᠳ ᠬᠡᠳᠦ ᠬᠡᠳᠦ ᠨᠢ ᠴᠠᠭᠠᠰᠢ ᠳᠤᠲᠠᠭᠠᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠪᠠᠷᠠᠭᠤᠨ ᠭᠡᠷ ᠲᠦ᠍ ᠬᠡᠦᠬᠡᠳ ᠰᠢᠤᠬᠠᠳ ᠣᠷᠢᠯᠠᠯᠳᠤᠵᠤ ᠡᠬᠡᠨᠡᠷ ᠪᠦᠰᠡᠭᠦᠢ ᠮᠡᠭᠰᠢᠨ ᠤᠬᠢᠯᠠᠨᠠ᠃
ᠮᠠᠨᠴᠤᠷᠭᠠ ᠥᠨᠥᠬᠢ ᠭᠡᠷ ᠲᠦ᠍ ᠣᠷᠣᠵᠤ ᠢᠷᠡᠭᠰᠡᠨ ᠳᠡᠭᠡᠷᠡᠮ ᠦ᠋ᠨ ᠴᠢᠮᠠᠷᠬᠠᠢ ᠳ᠋ᠤ᠌ ᠫᠤᠤ ᠲᠤᠯᠭᠠᠵᠤ᠄
— ᠴᠢ ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠢ ᠭᠡᠵᠦ ᠠᠰᠠᠭᠤᠪᠠ᠃
ᠥᠨᠥᠬᠢ ᠨᠢ ᠳᠠᠭᠤᠨ ᠦᠭᠡᠢ ᠳᠠᠭᠵᠢᠨᠠ᠃
— ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠪᠡᠯ ᠠᠮᠢ ᠶ᠋ᠢ ᠴᠢᠨᠢ ᠦᠯᠡᠳᠡᠭᠡᠶᠡ᠃ ᠦᠭᠡᠢ ᠪᠣᠯ ᠭᠡᠳ ᠮᠠᠨᠴᠤᠷᠭᠠ ᠫᠤᠤ ᠶ᠋ᠢᠨ ᠠᠮᠠ ᠶ᠋ᠢ ᠲᠡᠭᠦᠨ ᠦ᠌ ᠴᠢᠮᠠᠷᠬᠠᠢ ᠳ᠋ᠤ᠌ ᠬᠦᠴᠦᠯᠡᠨ ᠨᠢᠳᠤᠷᠪᠠᠯ᠂ ᠥᠨᠥᠬᠢ ᠳᠡᠭᠡᠷᠡᠮ ᠰᠠᠨᠳᠤᠷᠴᠤ᠄
— ᠪᠢ ᠬᠡᠯᠡᠶᠡ᠂ ᠪᠢ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠶᠡ! ᠪᠢᠲᠡᠭᠡᠢ ᠫᠤᠤᠳᠠ! ᠠᠮᠢ ᠶ᠋ᠢ ᠮᠢᠨᠢ ᠦᠯᠡᠳᠡᠭᠡ᠂ ᠭᠤᠶᠤᠶᠠ ᠳᠠ ᠁ ᠭᠡᠵᠦ ᠪᠡᠮᠪᠡᠭᠡᠨᠡ ᠴᠡᠴᠡᠷᠡᠨᠡ᠃
— ᠬᠤᠷᠳᠤᠨ ᠬᠡᠯᠡ᠂ ᠪᠢᠲᠡᠭᠡᠢ ᠬᠤᠳᠠᠯ ᠶᠠᠭᠤᠮᠠ ᠱᠠᠯᠴᠢᠭᠠᠳ ᠪᠠᠢ! ᠴᠢ ᠶᠠᠮᠠᠷ ᠬᠥᠮᠦᠨ ᠪᠣᠢ? ᠶᠠᠭᠤ ᠬᠢᠬᠦᠨ ᠢ᠋ᠶ᠋ᠡᠷ ᠠᠳᠠ ᠦᠦᠷ ᠬᠠᠷᠠᠩᠭᠤᠢ ᠪᠠᠷ ᠬᠥᠮᠦᠨ ᠦ᠌ ᠠᠢᠯ ᠭᠡᠷ ᠢ᠋ ᠦᠢᠮᠡᠭᠦᠯᠪᠡ?
— ᠮᠢᠨᠦ ᠨᠡᠷᠡ ᠵᠣᠣ ᠪᠤᠤ ᠯᠧᠩ ᠭᠡᠳᠡᠭ᠃
— ᠬᠠᠮᠢᠭᠠᠭᠤᠷ ᠨᠤᠲᠤᠭ ᠲᠠᠢ?
— ᠰᠠᠭᠠᠯᠢᠴᠢᠨ ᠤ᠋ ᠬᠥᠮᠦᠨ᠃
— ᠴᠢ ᠶᠠᠭᠤ ᠭᠡᠵᠦ ᠦᠦᠷ ᠬᠠᠷᠠᠩᠭᠤᠢ ᠪᠠᠷ ᠡᠨᠡ ᠠᠢᠯ ᠢ᠋ ᠲᠣᠨᠣᠵᠤ ᠪᠠᠢᠭᠠ ᠶᠤᠮ? ᠭᠡᠳ ᠥᠨᠥᠬᠢ ᠭᠡᠷ ᠦ᠋ᠨ ᠡᠵᠡᠨ ᠪᠠᠷᠵᠠᠭᠠᠷ ᠬᠠᠷᠠ ᠡᠪᠦᠭᠡᠨ ᠢ᠋ ᠬᠠᠷᠠᠪᠠᠯ ᠮᠥᠨ ᠯᠡ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠨ ᠬᠥᠰᠡᠷ ᠰᠥᠭᠥᠳᠦᠭᠰᠡᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠭᠠ ᠶ᠋ᠢ ᠬᠠᠷᠠᠭᠠᠳ ᠮᠠᠨᠴᠤᠷᠭᠠ᠄
— ᠡᠪᠦᠭᠡᠨ ᠭᠤᠸᠠᠢ ᠠ᠋᠂ ᠡᠦᠲᠦ ᠪᠣᠰ⁈ ᠭᠡᠰᠡᠨ ᠳ᠋ᠦ᠍ ᠪᠠᠷᠵᠠᠭᠠᠷ ᠬᠠᠷᠠ ᠡᠪᠦᠭᠡᠨ ᠪᠣᠰᠪᠠ᠃
— ᠥᠨᠥᠬᠢ ᠳᠡᠭᠡᠷᠡᠮ ᠥᠷᠪᠥᠯᠵᠡᠨ ᠪᠣᠰᠤᠭᠰᠠᠨ ᠡᠪᠦᠭᠡᠨ ᠢ᠋ ᠬᠠᠷᠠᠭᠠᠳ᠄
— ᠡᠳᠡᠨ ᠦ᠌ ᠬᠢ ᠶ᠋ᠢ ᠲᠣᠨᠣᠵᠤ ᠳᠡᠭᠡᠷᠡᠮᠳᠡᠬᠦ ᠪᠡᠷ ᠢᠷᠡᠭᠰᠡᠨ ᠪᠢᠰᠢ! ᠭᠡᠯᠡ᠃
— ᠲᠡᠭᠡᠭᠡᠳ ᠶᠠᠭᠤ ᠭᠡᠵᠦ ᠠᠳᠠ ᠢᠷᠡᠪᠡ?
— ᠮᠠᠨᠴᠤᠷᠭᠠ ᠶ᠋ᠢ ᠠᠯᠠᠬᠤ ᠪᠠᠷ ᠠᠷᠤ ᠠ᠋ᠴᠠ ᠨᠢ ᠭᠡᠲᠡᠵᠦ ᠡᠨᠡ ᠠᠢᠯ ᠳ᠋ᠤ᠌ ᠪᠠᠭᠤᠭᠰᠠᠨ ᠢ᠋ ᠯᠠᠪ ᠮᠡᠳᠡᠵᠦ ᠦᠦᠷ ᠬᠠᠷᠠᠩᠭᠤᠢ ᠪᠠᠷ ᠭᠡᠨᠡᠳᠡᠭᠦᠯᠵᠦ ᠳᠠᠭᠠᠷᠢᠬᠤ ᠭᠡᠰᠡᠨ ᠶᠦᠮ᠃
— ᠮᠠᠨᠴᠤᠷᠭᠠ ᠶ᠋ᠢ ᠠᠯᠠᠬᠤ ᠪᠠᠷ⁈ ᠴᠢ ᠮᠠᠨᠴᠤᠷᠭᠠ ᠶ᠋ᠢ ᠲᠠᠨᠢᠳᠠᠭ ᠤᠤ?
— ᠲᠠᠨᠢᠬᠤ ᠦᠭᠡᠢ᠃
— ᠲᠡᠭᠡᠭᠡᠳ ᠴᠢ ᠵᠥᠪ ᠵᠦᠭᠡᠷ ᠪᠠᠢᠭᠠ ᠬᠥᠮᠦᠨ ᠢ᠋ ᠶᠠᠭᠤ ᠭᠡᠵᠦ ᠠᠯᠠᠵᠤ ᠱᠤᠯᠤᠨᠠ ᠭᠡᠳᠡᠭ ᠴᠢᠨᠢ ᠰᠣᠯᠢᠶᠠᠲᠠᠢ ᠤᠤ?
— ᠁
— ᠬᠡᠨ ᠴᠢᠮᠠᠶ᠋ᠢ ᠮᠠᠨᠴᠤᠷᠭᠠ ᠶ᠋ᠢ ᠠᠯᠠ ᠭᠡᠵᠦ ᠠᠷᠤ ᠠ᠋ᠴᠠ ᠴᠢᠨᠢ ᠳᠣᠬᠢᠭᠰᠠᠨ ᠪᠣᠢ?
— ᠡᠯ ᠾᠧᠢ ᠶᠠᠨ ②
— ᠡᠯ ᠾᠧᠢ ᠶᠠᠨ ᠬᠠᠮᠢᠭᠠ ᠪᠣᠢ?
— ᠮᠥᠨ ᠡᠨᠡ ᠪᠠᠷᠠᠭᠤᠨ ᠭᠡᠷ ᠲᠦ᠍ ᠣᠷᠣᠭᠰᠠᠨ᠃
ᠮᠠᠨᠴᠤᠷᠭᠠ ᠥᠨᠥᠬᠢ ᠵᠣᠣ ᠪᠤᠤ ᠯᠧᠩ ᠭᠡᠳᠡᠭ ᠳᠡᠭᠡᠷᠡᠮ ᠦ᠋ᠨ ᠳᠠᠯᠠᠢ ᠶ᠋ᠢ ᠠᠯᠳᠠᠷᠠᠭᠠᠵᠤ ᠭᠠᠷ ᠢ᠋ ᠨᠢ ᠠᠷᠤ ᠳ᠋ᠤᠨᠢ ᠤᠶᠠᠵᠤ ᠣᠷᠬᠢᠭᠠᠳ᠄
— ᠨᠣᠬᠠᠢ ᠢᠳᠡᠳᠡᠭ ᠦᠭᠡᠢ ᠵᠣᠪᠠᠯᠭᠠ ᠪᠠᠨ ᠪᠦᠲᠦᠨ ᠠᠪᠴᠤ ᠬᠠᠷᠢᠶᠠ ᠭᠡᠵᠦ ᠰᠠᠨᠠᠪᠠᠯ ᠠᠳᠠ ᠨᠣᠮᠣᠬᠠᠨ ᠬᠡᠪᠲᠡᠵᠦ ᠪᠠᠢ! ᠴᠢᠨᠦ ᠨᠡᠷᠡ ᠴᠢᠨᠢ ᠴᠢᠮᠠ ᠳ᠋ᠠᠭᠠᠨ ᠴᠢᠪ ᠵᠣᠬᠢᠷᠠᠭᠰᠠᠨ ᠮᠠᠭᠤ 《ᠵᠣᠪᠠᠯᠭᠠ》 ᠯᠠ ᠭᠡᠰᠡᠨ ᠦᠭᠡ ᠪᠠᠢᠨᠠ ᠳᠠ᠂ ᠴᠢᠭᠢᠶᠡᠲᠦᠷᠦᠦ ! ᠭᠡᠰᠡᠨ ᠢ᠋ ᠥᠨᠥᠬᠢ ᠨᠢ ᠣᠢᠯᠠᠭᠠᠭᠰᠠᠨ ᠴᠤ᠌ ᠦᠭᠡᠢ᠃
— ᠵᠠ᠂ ᠵᠠ! ᠪᠢ ᠨᠣᠮᠣᠬᠠᠨ ᠪᠠᠢᠶᠠ! ᠭᠡᠳ ᠨᠠᠪᠲᠠᠢᠪᠠ᠃
ᠡᠨᠡ ᠠᠢᠯ ᠤ᠋ᠨ ᠪᠠᠷᠠᠭᠤᠨ ᠭᠡᠷ ᠲᠦ᠍ ᠡᠮᠡᠰ ᠥᠬᠢᠳ ᠢ᠋ ᠤᠬᠢᠯᠠᠩᠨᠠᠭᠤᠯᠬᠤ᠂ ᠠᠢᠯ ᠤ᠋ᠨ ᠡᠬᠡᠨᠡᠷ ᠲᠦ᠍ ᠫᠤᠤ ᠲᠤᠯᠭᠠᠭᠰᠠᠨ ᠨᠢᠭᠡ ᠫᠠᠭᠳᠠᠭ ᠪᠡᠶᠡ ᠲᠡᠢ ᠡᠷᠡ᠄
— ᠮᠠᠨᠴᠤᠷᠭᠠ ᠬᠠᠮᠢᠭᠠ ᠪᠠᠢᠨᠠ? ᠴᠢ ᠮᠠᠨᠴᠤᠷᠭᠠ ᠶ᠋ᠢ ᠬᠠᠮᠢᠭᠠ ᠪᠠᠨ ᠨᠢᠭᠤᠪᠠ? ᠠ! ᠭᠡᠵᠦ ᠵᠠᠩᠳᠤᠷᠤᠨᠠ᠃
— ᠁
— ᠬᠤᠷᠳᠤᠨ ᠬᠡᠯᠡ! ᠬᠡᠯᠡᠬᠦ ᠦᠭᠡᠢ ᠪᠣᠯ ᠫᠤᠤᠳᠠᠯᠠ!
— ᠮᠡᠳᠡᠬᠦ ᠦᠭᠡᠢ ᠁ ᠮᠠᠨᠴᠤᠷᠭᠠ ᠭᠡᠰᠡᠨ ᠬᠥᠮᠦᠨ ᠢ᠋ ᠪᠢ᠁ ᠪᠢ᠁ ᠲᠠᠨᠢᠬᠤ ᠦᠭᠡᠢ ᠁ ᠭᠡᠵᠦ ᠠᠢᠯ ᠤ᠋ᠨ ᠡᠬᠡᠨᠡᠷ ᠤᠬᠢᠯᠠᠩᠨᠠᠨ ᠬᠡᠯᠡᠨᠡ᠃
ᠡᠨᠡ ᠦᠶᠡ ᠳ᠋ᠦ᠍ ᠭᠡᠨᠡᠳᠲᠡ ᠫᠠᠭᠳᠠᠭ ᠪᠡᠶᠡ ᠲᠡᠢ ᠡᠷᠡ ᠶ᠋ᠢᠨ ᠳᠤᠬᠤᠨ ᠳ᠋ᠤᠨᠢ ᠬᠦᠢᠲᠡᠨ ᠣᠷᠬᠢᠬᠤ ᠰᠢᠭ᠋ ᠪᠣᠯᠵᠤ ᠨᠢᠭᠡ ᠬᠠᠲᠠᠭᠤ ᠶᠠᠭᠤᠮᠠ ᠢᠪ ᠨᠠᠭᠠᠯᠳᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠡᠷᠡ ᠴᠣᠴᠢᠮᠠᠭ ᠡᠷᠭᠢᠵᠦ ᠬᠠᠷᠠᠪᠠᠯ ᠫᠤᠤ ᠶ᠋ᠢᠨ ᠬᠠᠷᠠ ᠠᠮᠠ ᠣᠩᠭᠣᠯᠵᠠᠵᠤ ᠬᠠᠷᠠᠭᠳᠠᠨ ᠲᠡᠭᠦᠨ ᠦ᠌ ᠮᠠᠩᠨᠠᠢ ᠳ᠋ᠤ᠌ ᠲᠤᠯᠵᠤ᠄
— ᠪᠢ ᠮᠠᠨᠴᠤᠷᠭᠠ ᠪᠠᠢᠨᠠ᠃ ᠴᠢ ᠨᠠᠮᠠᠶ᠋ᠢ ᠡᠷᠢᠵᠦ ᠪᠠᠢᠨᠠ ᠤᠤ? ᠭᠡᠰᠡᠨ ᠳ᠋ᠦ᠍ ᠲᠡᠷᠡ ᠫᠠᠭᠳᠠᠭ ᠡᠷᠡ ᠶ᠋ᠢᠨ ᠨᠢᠳᠦ ᠨᠢ ᠪᠦᠯᠲᠡᠯᠵᠡᠵᠦ ᠭᠠᠷ ᠳᠠᠬᠢ ᠫᠤᠤ ᠪᠠᠨ ᠬᠥᠰᠡᠷ ᠠᠯᠳᠠᠵᠤ ᠤᠨᠠᠭᠠᠪᠠ᠃
ᠮᠠᠨᠴᠤᠷᠭᠠ ᠲᠡᠷᠡ ᠫᠠᠨᠲᠠᠭ ᠡᠷᠡ ᠶ᠋ᠢᠨ ᠦᠬᠦᠭᠰᠡᠨ ᠪᠤᠬᠠ ᠶ᠋ᠢᠨ ᠨᠢᠳᠦ ᠮᠡᠲᠦ ᠪᠦᠯᠲᠡᠢᠭᠰᠡᠨ ᠬᠠᠷᠠ ᠨᠢᠳᠦ ᠨᠢ ᠴᠠᠪᠴᠢᠯᠠᠬᠤ ᠪᠠᠨ ᠪᠣᠯᠢᠭᠰᠠᠨ ᠳ᠋ᠤ᠌ ᠭᠠᠷ ᠫᠤᠤ ᠪᠠᠨ ᠪᠥᠰᠡᠨ ᠳ᠋ᠡᠭᠡᠨ ᠬᠠᠪᠴᠢᠭᠤᠯᠵᠤ ᠥᠨᠥᠬᠢ ᠡᠷᠡ ᠶ᠋ᠢ ᠭᠠᠭᠴᠠᠬᠠᠨ ᠠᠯᠠᠭᠠᠳᠠᠭᠰᠠᠨ ᠳ᠋ᠤ᠌ ᠲᠣᠩᠭᠣᠷᠴᠠᠭᠯᠠᠨ ᠣᠢᠴᠢᠵᠤ ᠠᠶᠤᠨ ᠪᠡᠮᠪᠡᠭᠡᠨᠡᠭᠰᠡᠨ ᠠᠢᠯ ᠤ᠋ᠨ ᠡᠬᠡᠨᠡᠷ ᠦ᠋ᠨ ᠠᠯᠠᠨ ᠳ᠋ᠤ᠌ ᠮᠥᠷᠭᠥᠵᠦ ᠣᠴᠢᠨ ᠰᠤᠯᠳᠠᠢᠪᠠ᠃
— ᠪᠣᠰ! ᠡᠯ ᠾᠧᠢ ᠶᠠᠨ! ᠭᠡᠵᠦ ᠮᠠᠨᠴᠤᠷᠭᠠ ᠵᠠᠩᠳᠤᠷᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠫᠠᠭᠳᠠᠭ ᠡᠷᠡ ᠭᠣᠰ ᠦᠰᠦᠷᠦᠨ ᠪᠣᠰᠤᠭᠰᠠᠨ ᠳ᠋ᠤ᠌ ᠮᠠᠨᠴᠤᠷᠭᠠ ᠪᠤᠷᠤᠭᠤ ᠲᠠᠯᠠ ᠠ᠋ᠴᠠ ᠨᠢ ᠪᠠᠰᠠ ᠨᠢᠭᠡ ᠲᠦᠭᠦᠰᠢᠯᠡᠭᠰᠡᠨ ᠳ᠋ᠦ᠍ ᠬᠠᠨᠵᠤᠨ ᠤ᠋ ᠮᠤᠬᠤᠷ ᠲᠤ᠌ ᠲᠠᠪᠠᠷᠴᠠᠭᠯᠠᠨ ᠤᠨᠠᠪᠠ᠃
— ᠴᠢ ᠡᠯ ᠾᠧᠢ ᠶᠠᠨ ᠮᠥᠨ ᠤᠤ?
— ᠮᠥᠨ᠃ ᠪᠢ ᠮᠥᠨ! ᠭᠡᠭᠰᠡᠭᠡᠷ ᠪᠣᠰᠪᠠ᠃
— ᠭᠠᠭᠴᠠᠬᠠᠨ ᠠᠯᠠᠭᠠ ᠳᠠᠭᠠᠭᠠᠬᠤ ᠦᠭᠡᠢ ᠪᠠᠢᠵᠤ᠂ ᠮᠠᠨᠴᠤᠷᠭᠠ ᠨᠠᠮᠠᠶ᠋ᠢ ᠠᠯᠠᠨᠠ ᠭᠡᠨᠡ?
ᠡᠯ ᠾᠧᠢ ᠶᠠᠨ ᠤ᠋ ᠬᠠᠮᠠᠷ ᠠᠮᠠᠨ ᠠ᠋ᠴᠠ ᠨᠢ ᠴᠢᠰᠤ ᠰᠠᠳᠠᠭᠠᠨᠠᠵᠤ ᠦᠵᠡᠬᠦ ᠶ᠋ᠢᠨ ᠳᠦᠷᠢ ᠦᠭᠡᠢ ᠪᠣᠯᠪᠠ᠃ ᠮᠠᠨᠴᠤᠷᠭᠠ ᠡᠯ ᠾᠧᠢ ᠶᠠᠨ ᠤ᠋ ᠬᠥᠰᠡᠷ ᠣᠢᠴᠢᠭᠰᠠᠨ ᠫᠤᠤ ᠶ᠋ᠢ ᠢᠰᠬᠦᠯᠵᠦ᠄
— ᠮᠠᠢ᠂ ᠫᠤᠤ ᠪᠠᠨ ᠠᠪ ᠭᠡᠵᠦ ᠵᠠᠩᠳᠤᠷᠪᠠ᠃
— ᠁
ᠡᠯ ᠾᠧᠢ ᠶᠠᠨ ᠦᠭᠡ ᠳᠠᠭᠤᠨ ᠦᠭᠡᠢ ᠮᠠᠨᠴᠤᠷᠭᠠ ᠶ᠋ᠢ ᠮᠡᠯᠡᠷᠡᠨ ᠬᠠᠷᠠᠨᠠ᠃
— ᠫᠤᠤ ᠪᠠᠨ ᠠᠪ! ᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠭᠡᠵᠦ ᠳᠠᠬᠢᠨᠲᠠ ᠵᠠᠩᠳᠤᠷᠤᠭᠰᠠᠨ ᠳ᠋ᠤ᠌ ᠡᠯ ᠾᠧᠢ ᠶᠠᠨ ᠰᠠᠨᠳᠤᠷᠴᠤ ᠬᠥᠰᠡᠷ ᠡᠴᠡ ᠫᠤᠤ ᠪᠠᠨ ᠰᠢᠭᠦᠷᠡᠨ ᠠᠪᠤᠪᠠ᠃
— ᠵᠠ᠂ ᠡᠦᠲᠦ ᠨᠠᠭᠠᠰᠢ ᠫᠤᠤᠳᠠ! ᠮᠠᠨᠴᠤᠷᠭᠠ ᠡᠮᠦᠨᠡ ᠴᠢᠨᠢ ᠵᠣᠭᠰᠣᠵᠤ ᠪᠠᠢᠨᠠ᠂ ᠭᠡᠰᠡᠨ ᠳ᠋ᠦ᠍ ᠡᠯ ᠾᠧᠢ ᠶᠠᠨ ᠰᠣᠴᠢᠭᠰᠠᠨ ᠳ᠋ᠠᠭᠠᠨ᠄
— ᠮᠠᠨᠴᠤᠷᠭᠠ⁈ ᠭᠡᠵᠦ ᠳᠠᠭᠤ ᠠᠯᠲᠠᠨ《ᠡᠨᠡ ᠡᠷᠡ ᠲᠡᠢ ᠢᠩᠭᠢᠵᠦ ᠬᠠᠯᠵᠠ ᠲᠠᠭᠠᠷᠠᠬᠤ ᠪᠠᠢᠵᠢ ᠳᠠ! ᠡᠦᠲᠦ ᠢᠩᠭᠢᠭᠡᠳ ᠴᠢᠮᠠᠶ᠋ᠢ ᠫᠠᠩ! ᠭᠡᠬᠦ ᠳ᠋ᠦ᠍ ᠴᠦᠩᠬᠦᠨ ᠳ᠋ᠦ᠍ ᠮᠢᠨᠢ ᠮᠥᠩᠭᠥ ᠳᠦᠭᠦᠷᠦᠨᠡ》 ᠭᠡᠵᠦ ᠣᠯᠵᠠᠨ ᠤ᠋ ᠬᠢᠨᠢ ᠰᠢᠨᠤᠭ ᠭᠢᠯᠠᠰᠬᠢᠨ ᠣᠪᠣᠯᠵᠠᠭᠰᠠᠨ ᠳ᠋ᠤ᠌ ᠬᠠᠷᠠ ᠰᠠᠨᠠᠭᠠᠨ ᠤ᠋ ᠬᠢᠨᠢ ᠶᠣᠷᠣ ᠲᠡᠭᠦᠨ ᠢ᠋ ᠡᠷᠬᠡ ᠦᠭᠡᠢ ᠵᠠᠬᠢᠷᠴᠤ ᠭᠠᠷ ᠳᠠᠬᠢ ᠫᠤᠤ ᠨᠢ ᠮᠠᠨᠴᠤᠷᠭᠠ ᠶ᠋ᠢᠨ ᠮᠠᠩᠨᠠᠢ ᠶ᠋ᠢ ᠣᠨᠢᠯᠠᠨ ᠫᠠᠩ᠂ ᠫᠠᠩ᠂ ᠫᠠᠩ ᠭᠡᠵᠦ ᠤᠭᠰᠠᠷᠠᠭᠠ ᠭᠤᠷᠪᠠ ᠳᠤᠤᠭᠠᠷᠪᠠ᠃ ᠮᠠᠨᠴᠤᠷᠭᠠ ᠲᠣᠯᠣᠭᠠᠢ ᠪᠠᠨ ᠬᠠᠵᠠᠢᠰᠬᠢᠨ ᠵᠠᠢᠯᠠᠭᠰᠠᠨ ᠳ᠋ᠤ᠌ ᠴᠢᠬᠢᠨ ᠦ᠌ ᠬᠠᠵᠠᠭᠤ ᠪᠠᠷ ᠱᠤᠤᠭᠢᠭᠰᠠᠨ ᠰᠤᠮᠤ ᠴᠠᠭᠠᠳᠤ ᠲᠤᠭᠤᠷᠭᠠ ᠶ᠋ᠢᠨ ᠴᠠᠭᠠᠨ ᠢ᠋ ᠣᠩᠭᠢᠯᠵᠤ ᠰᠢᠷᠣᠢ ᠪᠤᠲᠠᠷᠠᠨᠠ᠃
ᠳᠠᠬᠢᠭᠠᠳ ᠫᠤᠤᠳᠠᠬᠤ ᠠ᠋ᠴᠠ ᠰᠡᠷᠡᠮᠵᠢᠯᠡᠭᠰᠡᠨ ᠮᠠᠨᠴᠤᠷᠭᠠ ᠪᠥᠬᠥᠰᠬᠢᠨ ᠡᠷᠭᠢᠵᠦ ᠲᠡᠭᠦᠨ ᠦ᠌ ᠭᠠᠷ ᠫᠤᠤ ᠶ᠋ᠢ ᠨᠢ ᠭᠡᠨᠡᠳᠡᠭᠦᠯᠦᠨ ᠢᠰᠬᠦᠯᠵᠦ ᠬᠡᠩᠬᠦᠳᠡᠭ ᠤᠷᠤᠭᠤ ᠨᠢ ᠬᠦᠴᠦᠲᠡᠢ ᠨᠢᠳᠤᠷᠭᠠᠳᠠᠭᠰᠠᠨ ᠳ᠋ᠤ᠌ ᠡᠯ ᠾᠧᠢ ᠶᠠᠨ ᠪᠥᠭᠰᠡ ᠪᠡᠷ ᠢ᠋ᠶ᠋ᠡᠨ ᠬᠡᠯᠲᠦᠷᠢᠭᠰᠡᠭᠡᠷ ᠴᠠᠭᠠᠳᠤ ᠲᠤᠭᠤᠷᠭᠠ ᠶ᠋ᠢᠨ ᠢᠷᠣᠭᠠᠷ ᠲᠤ᠌ ᠯᠠᠭᠬᠢᠲᠠᠯᠠ ᠰᠠᠭᠤᠪᠠ᠃
— ᠡᠷᠯᠢᠭ ᠢ᠋ᠶ᠋ᠡᠨ ᠡᠷᠢᠭᠰᠡᠨ ᠬᠤᠯᠤᠭᠠᠨᠠ ᠮᠤᠤᠷ ᠤ᠋ᠨ ᠤᠮᠠᠳᠠᠭ ᠲᠡᠮᠲᠡᠷᠢᠪᠡ ᠭᠡᠭᠴᠢ ᠴᠢ ᠦᠨᠡᠬᠡᠷ ᠪᠦᠳᠦᠭᠦᠨ ᠵᠢᠷᠦᠬᠡ ᠲᠡᠢ ᠪᠠᠢᠨᠠ᠃ ᠮᠠᠨᠴᠤᠷᠭᠠ ᠶ᠋ᠢᠨ ᠮᠠᠩᠨᠠᠢ ᠳ᠋ᠤ᠌ ᠠᠶᠤᠮᠰᠢᠭ ᠦᠭᠡᠢ ᠫᠤᠤ ᠲᠤᠯᠭᠠᠨᠠ ᠭᠡᠳᠡᠭ ᠨᠠᠭᠠᠳᠤᠮ ᠪᠤᠰᠤ᠃ ᠪᠣᠰ! ᠫᠤᠤ ᠪᠠᠨ ᠲᠡᠭᠦᠵᠦ ᠠᠪ! ᠭᠡᠵᠦ ᠵᠠᠩᠳᠤᠷᠤᠭᠰᠠᠨ ᠳ᠋ᠤ᠌ ᠡᠯ ᠾᠧᠢ ᠶᠠᠨ ᠨᠢᠳᠦ ᠨᠢ ᠪᠤᠯᠲᠠᠢᠵᠤ ᠮᠠᠨᠴᠤᠷᠭᠠ ᠶ᠋ᠢ ᠭᠥᠯᠢᠢᠨ ᠬᠠᠷᠠᠨᠠ᠃
— ᠫᠤᠤ ᠪᠠᠨ ᠠᠪ! ᠭᠡᠰᠡᠨ ᠳ᠋ᠦ᠍ ᠡᠯ ᠾᠧᠢ ᠶᠠᠨ ᠪᠣᠰᠴᠤ ᠲᠤᠯᠭᠠᠨ ᠤ᠋ ᠮᠤᠬᠤᠷ ᠲᠤ᠌ ᠪᠠᠢᠭᠰᠠᠨ ᠫᠤᠤ ᠪᠠᠨ ᠠᠪᠴᠤ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠲᠣᠭᠣᠰᠣ ᠰᠢᠷᠣᠢ ᠶ᠋ᠢ ᠨᠢ ᠠᠷᠴᠢᠪᠠ᠃
— ᠰᠥᠰᠥᠲᠡᠢ ᠡᠷᠡ ᠶ᠋ᠢᠨ ᠨᠢᠭᠡ ᠪᠣᠯ ᠳᠠᠬᠢᠭᠠᠳ ᠨᠢᠭᠡ ᠫᠤᠤᠳᠠ! ᠨᠠᠭᠠᠰᠢ ᠪᠠᠨ᠁ ᠭᠡᠰᠡᠨ ᠳ᠋ᠦ᠍ ᠡᠯ ᠾᠧᠢ ᠶᠠᠨ᠄
— ᠦᠭᠡᠢ᠂ ᠡᠦᠲᠦ ᠪᠣᠯᠢᠶᠠ ! ᠠᠩᠬᠠ ᠫᠤᠤᠳᠠᠭᠠᠳ ᠤᠨᠤᠭᠰᠠᠨ ᠦᠭᠡᠢ ᠪᠡᠨ ᠪᠢ ᠳᠠᠬᠢᠵᠤ ᠫᠤᠤᠳᠠᠳᠠᠭ ᠦᠭᠡᠢ᠃ ᠴᠢ ᠡᠨᠡ ᠫᠤᠤ ᠶ᠋ᠢᠨ ᠰᠤᠮᠤᠨ ᠳ᠋ᠤ᠌ ᠦᠬᠦᠬᠦ ᠡᠷᠡ ᠪᠢᠰᠢ ᠶᠦᠮ ᠪᠠᠢᠨᠠ᠃ 《ᠮᠠᠢ》ᠭᠡᠳ ᠡᠯ ᠾᠧᠢ ᠶᠠᠨ ᠫᠤᠤ ᠪᠠᠨ ᠵᠠᠮᠤᠭᠯᠠᠵᠤ ᠮᠠᠨᠴᠤᠷᠭᠠ ᠳ᠋ᠤ᠌ ᠥᠭᠪᠡ᠃ ᠮᠠᠨᠴᠤᠷᠭᠠ ᠲᠡᠭᠦᠨ ᠦ᠌ ᠫᠤᠤ ᠶ᠋ᠢ ᠲᠣᠰᠴᠤ᠄
— ᠴᠢ ᠫᠤᠤᠳᠠᠬᠤ ᠦᠭᠡᠢ ᠪᠣᠯ ᠪᠢ ᠴᠢᠮᠠᠶ᠋ᠢ ᠫᠤᠤᠳᠠᠨᠠ ᠰᠢᠦ! ᠪᠢᠲᠡᠭᠡᠢ ᠭᠡᠮᠰᠢᠭᠡᠷᠡᠢ! ᠭᠡᠳ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠬᠦᠷᠴᠦ ᠴᠢᠮᠠᠷᠬᠠᠢ ᠳ᠋ᠤᠨᠢ ᠫᠤᠤ ᠲᠤᠯᠭᠠᠭᠰᠠᠨ ᠳ᠋ᠤ᠌ ᠡᠯ ᠾᠧᠢ ᠶᠠᠨ᠄
— ᠭᠡᠮᠰᠢᠬᠦ ᠶᠠᠭᠤ ᠪᠠᠢᠬᠤ ᠪᠣᠢ! ᠴᠢᠮᠠ ᠰᠢᠭ᠋ ᠰᠠᠢᠨ ᠡᠷᠡ ᠶ᠋ᠢᠨ ᠰᠤᠮᠤᠨ ᠳ᠋ᠤ᠌ ᠦᠬᠦᠬᠦ ᠳ᠋ᠡᠭᠡᠨ ᠪᠢ ᠭᠡᠮᠰᠢᠬᠦ ᠦᠭᠡᠢ᠃ ᠮᠢᠨᠦ ᠦᠬᠦᠬᠦ ᠡᠦᠲᠦ ᠮᠥᠨ ᠠᠳᠠ ᠯᠠ ᠪᠠᠢᠵᠢ ᠳᠠ! ᠨᠠᠮᠠᠶ᠋ᠢ ᠲᠦᠷᠭᠡᠯᠡᠭᠡᠴᠢ! ᠭᠡᠵᠦ ᠴᠡᠭᠡᠵᠢ ᠲᠦᠷᠢᠨ ᠵᠣᠭᠰᠣᠪᠠ᠃
ᠮᠠᠨᠴᠤᠷᠭᠠ ᠡᠨᠡ ᠪᠦᠯᠲᠡᠭᠡᠷ ᠨᠢᠳᠦ ᠲᠡᠢ ᠫᠠᠭᠳᠠᠭ ᠡᠷᠡ ᠶ᠋ᠢᠨ ᠡᠴᠡ ᠠᠶᠤᠬᠤ ᠦᠭᠡᠢ ᠰᠢᠭᠤᠷᠬᠠᠢ ᠵᠠᠩ ᠢ᠋ ᠲᠣᠭᠣᠵᠤ ᠬᠠ ᠬᠠ ᠭᠡᠵᠦ ᠬᠠᠳᠠᠭᠠᠨᠠᠲᠠᠯᠠ ᠢᠨᠢᠶᠡᠵᠦ᠄
— ᠵᠠ᠂ ᠪᠠᠰᠠ ᠴᠦ᠍ ᠣᠪᠣᠭᠠ ᠡᠷᠡ ᠶᠦᠮ ᠪᠠᠢᠨᠠ ᠴᠢ ! ᠮᠢᠨᠦ ᠭᠠᠷ ᠲᠤ᠌ ᠦᠬᠦᠬᠦ ᠳ᠋ᠡᠭᠡᠨ ᠭᠡᠮᠰᠢᠬᠦ ᠦᠭᠡᠢ ᠭᠡᠨᠡ ᠠ᠋ ⁈ ᠬᠠᠷᠢᠨ ᠦᠬᠦᠬᠦ ᠡᠴᠡ ᠪᠡᠨ ᠠᠶᠤᠵᠤ ᠡᠪᠦᠳᠦᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠡᠴᠡᠷᠡᠭᠰᠡᠨ ᠦᠬᠦᠭᠡᠨᠴᠡ ᠠᠮᠢᠲᠠᠨ ᠪᠠᠢᠭᠰᠠᠨ ᠪᠣᠯ ᠤᠤ᠂ ᠴᠢᠮᠠᠶ᠋ᠢ ᠪᠢ᠁ ᠭᠡᠳ ᠫᠤᠤ ᠶ᠋ᠢᠨ ᠢ᠋ᠶ᠋ᠡᠨ ᠭᠣᠬᠠ ᠶ᠋ᠢ ᠭᠣᠬᠠᠳᠠᠭᠰᠠᠨ ᠳ᠋ᠤ᠌ ᠫᠠᠩ! ᠭᠡᠰᠡᠨ ᠳᠠᠭᠤᠨ ᠢ᠋ᠶ᠋ᠠᠷ ᠴᠠᠭᠠᠳᠤ ᠮᠠᠭᠠᠵᠢᠨ ᠲᠣᠰᠣᠨ ᠳ᠋ᠧᠩ ᠤᠨᠲᠠᠷᠠᠪᠠ᠃
ᠡᠯ ᠾᠧᠢ ᠶᠠᠨ ᠤ᠋ ᠳᠣᠲᠣᠷᠠ ᠠᠭᠵᠠᠰᠬᠢᠵᠦ ᠠᠪᠤᠨ 《ᠪᠤᠷᠬᠠᠨ ᠮᠢᠨᠢ ᠠ᠋》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠥᠭᠡᠯᠡᠨ᠄
— ᠠᠯᠠᠬᠤ ᠭᠡᠵᠦ ᠢᠷᠡᠭᠰᠡᠨ ᠬᠥᠮᠦᠨ ᠦ᠌ ᠪᠡᠨ ᠲᠣᠯᠣᠭᠠᠢ ᠤᠷᠤᠭᠤ ᠫᠤᠤ ᠫᠤᠤᠳᠠᠳᠠᠭ ᠦᠭᠡᠢ᠂ ᠬᠠᠷᠢᠨ ᠬᠠᠮᠢᠶᠠ ᠦᠭᠡᠢ ᠳ᠋ᠧᠩ ᠢ᠋ ᠫᠤᠤᠳᠠᠳᠠᠭ ᠴᠢᠨᠢ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ? ᠭᠡᠵᠦ ᠡᠯ ᠾᠧᠢ ᠶᠠᠨ ᠮᠠᠨᠴᠤᠷᠭᠠ ᠶ᠋ᠢ ᠲᠡᠩᠰᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠮᠠᠨᠴᠤᠷᠭᠠ᠄
— ᠬᠡᠭ᠂ ᠪᠢ ᠴᠢᠮᠠᠶ᠋ᠢ ᠫᠤᠤᠳᠠᠬᠤ ᠦᠭᠡᠢ ᠭᠡᠵᠦ ᠰᠠᠨᠠᠪᠠ ᠤᠤ ? ᠡᠨᠡ ᠬᠠᠷᠠ ᠴᠠᠰᠤᠨ ᠳ᠋ᠤ᠌ ᠦᠦᠷ ᠬᠠᠷᠠᠩᠭᠤᠢ ᠪᠠᠷ ᠠᠢᠯ ᠬᠣᠲᠠ ᠦᠢᠮᠡᠭᠦᠯᠦᠨ ᠶᠠᠭᠠᠬᠢᠬᠤ ᠰᠠᠨᠠᠭᠠᠲᠠᠢ ᠪᠠᠨ ᠲᠣᠳᠣᠷᠬᠠᠢ ᠶᠠᠷᠢ! ᠡᠰᠡ ᠲᠡᠢᠮᠦ ᠪᠣᠯ ᠲᠡᠷᠡ ᠳ᠋ᠧᠩ ᠶᠠᠭᠠᠬᠢᠵᠤ ᠰᠥᠨᠥᠭᠰᠡᠨ ᠢ᠋ ᠬᠠᠷᠠᠭᠰᠠᠨ ᠪᠢᠵᠡ⁈
ᠡᠯ ᠾᠧᠢ ᠶᠠᠨ ᠮᠠᠨᠴᠤᠷᠭᠠ ᠶ᠋ᠢᠨ ᠡᠮᠦᠨᠡ ᠦᠬᠦᠬᠦ ᠡᠴᠡ ᠠᠶᠤᠳᠠᠭ ᠦᠭᠡᠢ ᠭᠡᠳᠡᠭ ᠰᠦᠷᠡᠬᠡᠢ ᠪᠡᠨ ᠦᠵᠡᠭᠦᠯᠬᠦ ᠭᠡᠵᠦ ᠪᠡᠶᠡ ᠪᠡᠨ ᠪᠠᠷᠢᠬᠤ ᠪᠣᠯᠪᠠᠴᠤ ᠮᠠᠨᠴᠤᠷᠭᠠ ᠶ᠋ᠢᠨ ᠬᠡᠳᠡᠷ ᠬᠠᠲᠠᠭᠤ ᠵᠠᠩ ᠳ᠋ᠤ᠌ ᠡᠷᠬᠡ ᠦᠭᠡᠢ ᠰᠦᠷᠳᠡᠵᠦ ᠳᠠᠩᠴᠤ ᠮᠣᠬᠣᠳᠠᠭ ᠦᠭᠡᠢ ᠡᠷᠡᠮᠡᠬᠡᠢᠯᠡᠵᠦ ᠪᠠᠢᠭᠠᠳ ᠡᠨᠡ ᠡᠷᠡ ᠶ᠋ᠢᠨ ᠭᠠᠷ ᠲᠤ᠌ ᠡᠷᠯᠢᠭ ᠢ᠋ᠶ᠋ᠡᠨ ᠦᠵᠡᠴᠢᠬᠡᠬᠦ ᠡᠴᠡ ᠪᠠᠰᠠ ᠡᠮᠢᠶᠡᠨᠡ᠃ ᠢᠩᠭᠢᠵᠦ ᠪᠣᠳᠣᠬᠤ ᠳᠣᠳᠣᠮ ᠢ᠋ᠶ᠋ᠠᠨ ᠲᠡᠭᠦᠨ ᠦ᠌ ᠡᠪᠦᠳᠦᠭ ᠦᠯᠦ ᠮᠡᠳᠡᠭ ᠴᠡᠴᠡᠷᠡᠰᠬᠢᠨ ᠮᠠᠨᠴᠤᠷᠭᠠ ᠶ᠋ᠢᠨ ᠥᠭᠡᠳᠡ ᠡᠴᠡ ᠶᠠᠭᠤ ᠬᠡᠯᠡᠬᠦ ᠪᠡᠨ ᠣᠯᠬᠤ ᠦᠭᠡᠢ 《ᠪᠢ ᠁ ᠪᠢ ᠁ 》ᠭᠡᠵᠦ ᠡᠭᠡᠷᠡᠬᠦ ᠳ᠋ᠦ᠍ ᠮᠠᠩᠨᠠᠢ ᠳ᠋ᠤᠨᠢ ᠬᠦᠢᠲᠡᠨ ᠬᠥᠯᠥᠰᠥ ᠴᠢᠭᠢᠭᠯᠡᠪᠡ᠃
ᠮᠠᠨᠴᠤᠷᠭᠠ ᠡᠨᠡ ᠪᠦᠯᠲᠡᠭᠡᠷ ᠨᠢᠳᠦ ᠲᠡᠢ ᠡᠷᠡ ᠶ᠋ᠢᠨ ᠪᠣᠳᠣᠯ ᠨᠢ ᠨᠤᠷᠠᠭᠰᠠᠨ ᠢ᠋ ᠭᠠᠳᠠᠷᠯᠠᠵᠤ ᠭᠠᠷ ᠫᠤᠤ ᠪᠠᠨ ᠬᠤᠢᠯᠠᠭᠠᠳ᠄
— ᠮᠠᠨᠴᠤᠷᠭᠠ ᠶ᠋ᠢ ᠠᠯᠠ! ᠭᠡᠵᠦ ᠬᠡᠨ ᠴᠢᠮᠠᠶ᠋ᠢ ᠠᠷᠤ ᠠ᠋ᠴᠠ ᠴᠢᠨᠢ ᠳᠣᠬᠢᠵᠤ ᠶᠡᠬᠡ ᠮᠥᠩᠭᠥ ᠡᠪᠦᠷᠲᠦᠯᠡᠭᠦᠯᠪᠡ ⁈ᠭᠡᠰᠡᠨ ᠳ᠋ᠦ᠍ ᠲᠡᠭᠦᠨ ᠦ᠌ ᠮᠠᠩᠨᠠᠢ ᠳ᠋ᠤᠨᠢ ᠲᠠᠭ ᠲᠤᠯᠭᠠᠭᠰᠠᠨ ᠫᠤᠤ ᠪᠠᠨ ᠠᠪᠴᠤ ᠬᠤᠢᠯᠠᠭᠰᠠᠨ ᠮᠠᠨᠴᠤᠷᠭᠠ ᠶ᠋ᠢ ᠬᠠᠷᠠᠭᠠᠳ ᠰᠠᠨᠠᠭᠠ ᠠᠯᠳᠠᠪᠠ᠃
— ᠰᠠᠨᠠᠭᠠ ᠠᠯᠳᠠᠬᠤ ᠶᠠᠭᠤ ᠪᠣᠢ? ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡ᠂ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠪᠡᠯ ᠥᠷᠥᠰᠢᠶᠡᠵᠦ᠂ ᠥᠴᠦᠬᠡᠨ ᠬᠤᠳᠠᠯ ᠬᠡᠯᠡᠪᠡᠯ ᠤᠤ? ᠶᠠᠭᠤ ᠪᠣᠯᠬᠤ ᠶ᠋ᠢ ᠴᠢ ᠮᠡᠳᠡᠨᠡ ᠪᠢᠵᠡ⁈
— ᠪᠢ ᠬᠡᠯᠡᠶᠡ! ᠮᠠᠨᠴᠤᠷᠭᠠ ᠠᠬᠠ ᠨᠠᠮᠠᠶ᠋ᠢ ᠥᠷᠥᠰᠢᠶᠡ! ᠰᠠᠭᠠᠯᠢᠴᠢᠨ ᠤ᠋ ᠵᠡᠭᠡᠯᠢ ᠳᠡᠭᠡᠷᠡ ᠮᠢᠨᠦ ᠨᠢᠭᠡ ᠲᠠᠨᠢᠳᠠᠭ ᠵᠠᠩ ᠣᠪᠣᠭ ᠲᠠᠢ ᠬᠠᠷᠠ ᠲᠠᠮᠠᠬᠢᠨ ᠤ᠋ ᠴᠢᠳᠬᠥᠷ ᠪᠠᠢᠳᠠᠭ ᠶᠤᠮ᠃ ᠲᠡᠷᠡ ᠨᠠᠳᠠ ᠵᠠᠭᠤᠨ ᠯᠠᠩ ᠤ᠋ᠨ ᠶᠤᠸᠠᠮᠪᠤᠤ᠂ ᠲᠠᠪᠢᠨ ᠮᠥᠩᠭᠥᠨ ᠵᠣᠭᠣᠰ ᠥᠭᠴᠦ 《ᠴᠢ ᠶᠠᠪᠤᠵᠤ ᠮᠠᠨᠴᠤᠷᠭᠠ ᠶ᠋ᠢ ᠠᠯᠠ! ᠬᠡᠷᠡᠭ ᠪᠦᠲᠦᠪᠡᠯ ᠪᠠᠰᠠ ᠱᠠᠩ ᠲᠠᠢ》 ᠭᠡᠵᠦ ᠬᠡᠯᠡᠭᠰᠡᠨ᠃ ᠲᠡᠭᠡᠭᠡᠳ ᠪᠢ ᠮᠥᠩᠭᠥᠨ ᠳ᠋ᠦ᠍ ᠳᠤᠷᠠᠯᠠᠵᠤ᠂ ᠡᠨᠡ ᠬᠠᠷᠠ ᠴᠠᠰᠤᠨ ᠳ᠋ᠤ᠌ ᠴᠢᠮᠠᠶ᠋ᠢ ᠠᠯᠠᠬᠤ ᠭᠡᠵᠦ ᠢᠷᠡᠭᠰᠡᠨ ᠮᠢᠨᠢ ᠡᠨᠡ᠃ ᠮᠠᠨᠴᠤᠷᠭᠠ ᠠᠬᠠ ᠠᠭᠤᠴᠢᠯᠠᠭᠠᠷᠠᠢ! ᠭᠡᠳ ᠲᠡᠭᠦᠨ ᠦ᠌ ᠡᠮᠦᠨᠡ ᠲᠦᠰ ᠬᠢᠲᠡᠯᠡ ᠰᠥᠭᠥᠳᠪᠡ᠃
— ᠲᠡᠷᠡ ᠵᠠᠩ ᠣᠪᠣᠭᠲᠠᠨ ᠭᠡᠳᠡᠭ ᠴᠢᠨᠢ ᠬᠠᠷᠠ ᠲᠠᠮᠠᠬᠢᠨ ᠤ᠋ ᠴᠢᠳᠬᠥᠷ ᠭᠡᠵᠦ ᠪᠠᠢᠭᠠᠳ ᠬᠠᠮᠢᠭᠠ ᠠ᠋ᠴᠠ ᠡᠢᠮᠦ ᠶᠡᠬᠡ ᠮᠥᠩᠭᠥ ᠪᠠᠢᠬᠤ ᠪᠣᠢ?
— ᠲᠡᠭᠦᠨ ᠦ᠌ ᠬᠡᠯᠡᠬᠦ ᠪᠡᠷ ᠥᠭᠡᠷᠡ ᠨᠢᠭᠡ ᠬᠥᠮᠦᠨ ᠲᠡᠭᠦᠨ ᠳ᠋ᠦ᠍ ᠶᠡᠬᠡ ᠮᠥᠩᠭᠥ ᠥᠭᠴᠦ ᠢᠩᠭᠢᠵᠦ ᠬᠢᠯᠭᠡᠯᠡ ᠭᠡᠰᠡᠨ᠃
— ᠨᠥᠭᠦᠭᠡ ᠬᠥᠮᠦᠨ ᠨᠢ ᠬᠡᠨ ᠪᠣᠢ?
— ᠪᠢ ᠦᠨᠡᠬᠡᠷ ᠮᠡᠳᠡᠬᠦ ᠦᠭᠡᠢ᠃ ᠲᠡᠷᠡ ᠬᠥᠮᠦᠨ ᠲᠡᠢ ᠪᠢ ᠠᠭᠤᠯᠵᠠᠭᠠ ᠦᠭᠡᠢ᠃
— ᠴᠠᠭᠠᠳᠤ ᠵᠠᠩ ᠣᠪᠣᠭᠲᠤ ᠴᠢᠨᠢ ᠶᠠᠮᠠᠷ ᠴᠤ᠌ ᠰᠡᠪ ᠭᠠᠷᠭᠠᠭᠰᠠᠨ ᠦᠭᠡᠢ ᠤᠤ?
— ᠵᠠᠩ ᠣᠪᠣᠭᠲᠠᠨ ᠨᠢᠭᠡ ᠤᠳᠠᠭᠠ ᠨᠠᠳᠠ ᠲᠠᠢ ᠠᠷᠢᠬᠢ ᠤᠤᠭᠤᠵᠤ ᠪᠠᠢᠭᠠᠳ 《ᠮᠠᠨᠴᠤᠷᠭᠠ ᠶ᠋ᠢ ᠴᠡᠪᠡᠷᠬᠡᠨ ᠬᠢᠴᠢᠬᠡ! ᠲᠡᠭᠡᠪᠡᠯ ᠮᠠᠭᠤ ᠢᠮᠠᠭᠠᠨ ᠳᠠᠭᠤᠲᠤ ᠪᠠᠰᠠ ᠮᠥᠩᠭᠥ ᠥᠭᠭᠦᠨᠡ ᠭᠡᠰᠡᠨ ᠰᠢᠦ!》 ᠭᠡᠵᠦ ᠮᠢᠨᠦ ᠮᠥᠷᠥ ᠶ᠋ᠢ ᠳᠠᠪᠰᠢᠵᠤ ᠪᠠᠢᠭᠰᠠᠨ᠁
— ᠢᠮᠠᠭᠠᠨ ᠳᠠᠭᠤ ᠲᠠᠢ ᠬᠥᠮᠦᠨ!
— ᠲᠡᠢᠮᠦ!
— ᠵᠠ᠂ ᠪᠣᠯᠵᠠᠢ᠃ ᠪᠣᠰ ! ᠴᠢ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠭᠰᠡᠨ ᠪᠠᠢᠨᠠ᠃ ᠥᠨᠥᠳᠥᠷ ᠠᠮᠢ ᠶ᠋ᠢ ᠴᠢᠨᠢ ᠥᠷᠥᠰᠢᠶᠡᠶᠡ ! ᠡᠦᠲᠦ ᠪᠡᠷ ᠢ᠋ᠶ᠋ᠡᠨ ᠠᠳᠠ ᠠ᠋ᠴᠠ ᠲᠣᠨᠢᠯ! ᠲᠡᠭᠡᠭᠡᠳ ᠵᠠᠩ ᠣᠪᠣᠭᠲᠠᠨ ᠪᠠ ᠢᠮᠠᠭᠠᠨ ᠳᠠᠭᠤ ᠲᠠᠢ ᠬᠥᠮᠦᠨ ᠳ᠋ᠡᠭᠡᠨ ᠣᠴᠢᠵᠤ ᠬᠡᠯᠡ ᠮᠠᠨᠴᠤᠷᠭᠠ ᠶ᠋ᠢᠨ ᠪᠡᠶᠡ ᠳ᠋ᠦ᠍ ᠰᠤᠮᠤ ᠣᠷᠣᠬᠤ ᠦᠭᠡᠢ ᠬᠠᠴᠢᠨ ᠶᠤᠮ! ᠬᠡᠯᠡᠵᠦ ᠥᠭ ! ᠭᠡᠪᠡ᠃
— ᠵᠠ᠂ ᠮᠡᠳᠡᠯᠡ᠃ ᠮᠠᠨᠴᠤᠷᠭᠠ ᠠᠬᠠ ᠶᠣᠰᠣᠲᠠᠢ ᠬᠡᠯᠡᠭᠰᠡᠨ ᠳ᠋ᠡᠭᠡᠨ ᠬᠦᠷᠳᠡᠭ ᠡᠷᠡ ᠬᠥᠮᠦᠨ ᠪᠠᠢᠨᠠ᠃ ᠥᠴᠦᠬᠡᠨ ᠠᠮᠢ ᠶ᠋ᠢ ᠮᠢᠨᠢ ᠥᠷᠥᠰᠢᠶᠡᠵᠦ ᠬᠠᠢᠷᠠᠯᠠᠭᠰᠠᠨ ᠠᠴᠢ ᠶ᠋ᠢ ᠴᠢᠨᠢ ᠪᠢ ᠬᠡᠵᠢᠶᠡᠳᠡ ᠮᠠᠷᠲᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠠᠬᠠ ᠠ᠋᠂ ᠦᠨᠡᠬᠡᠷ᠁ ᠭᠡᠵᠦ ᠮᠠᠨᠴᠤᠷᠭᠠ ᠶ᠋ᠢᠨ ᠡᠪᠦᠳᠦᠭ ᠳᠣᠣᠷᠠ ᠭᠤᠷᠪᠠᠨᠲᠠ ᠮᠥᠷᠭᠥᠭᠡᠳ ᠪᠣᠰᠴᠤ ᠰᠢᠯᠤᠭᠤᠬᠠᠨ ᠭᠠᠷᠴᠤ ᠶᠠᠪᠤᠪᠠ᠃
ᠮᠠᠨᠴᠤᠷᠭᠠ᠂ ᠰᠡᠷᠡᠩ ᠨᠠᠷ ᠥᠨᠥᠬᠢ ᠳᠡᠭᠡᠷᠡᠮ ᠦ᠋ᠳ ᠦ᠋ᠨ ᠫᠤᠤ ᠵᠡᠪᠰᠡᠭ ᠢ᠋ ᠬᠤᠷᠢᠶᠠᠵᠤ ᠠᠪᠤᠨ ᠮᠣᠷᠢᠨ ᠤ᠋ ᠪᠠᠨ ᠡᠮᠡᠭᠡᠯ ᠢ᠋ ᠵᠠᠰᠠᠵᠤ ᠣᠯᠣᠩ ᠢ᠋ ᠨᠢ ᠴᠢᠩᠭᠠᠯᠠᠭᠠᠳ ᠮᠣᠷᠳᠠᠬᠤ ᠳ᠋ᠤ᠌ ᠵᠡᠭᠦᠨ ᠡᠴᠡ ᠬᠠᠶᠠᠭᠠᠷᠠᠵᠤ ᠦᠦᠷ ᠮᠠᠩᠬᠠᠢᠲᠠᠯᠠ ᠴᠠᠢᠵᠤ ᠪᠠᠢᠪᠠ᠃
ᠰᠥᠬᠥᠷᠡᠭᠰᠡᠨ ᠶᠡᠬᠡ ᠴᠠᠰᠤᠨ ᠳ᠋ᠤ᠌ ᠮᠠᠨᠴᠤᠷᠭᠠ ᠵᠡᠷᠭᠡ ᠠᠷᠪᠠᠭᠠᠳ ᠮᠣᠷᠢᠲᠠᠨ ᠮᠣᠷᠢᠨ ᠤ᠋ ᠪᠠᠨ ᠠᠶᠠ ᠪᠠᠷ ᠱᠣᠭᠰᠢᠭᠤᠯᠵᠤ ᠶᠠᠪᠤᠬᠤ ᠳ᠋ᠤ᠌ ᠡᠷᠲᠡ ᠶ᠋ᠢᠨ ᠬᠦᠢᠲᠡᠨ ᠵᠢᠪᠠᠷ ᠴᠢᠷᠠᠢ ᠡᠭᠡᠭᠡᠵᠦ ᠰᠥᠨᠢ ᠨᠣᠢᠷ ᠳᠤᠲᠠᠭᠤᠳᠠᠭᠰᠠᠨ ᠠ᠋ᠴᠠ ᠪᠡᠶᠡ ᠵᠢᠬᠡᠭᠦᠰᠬᠦ ᠰᠢᠭ ᠪᠠᠢᠪᠠ᠃ ᠮᠣᠷᠢᠳ ᠤ᠋ᠨ ᠵᠢᠰᠦᠮ ᠳᠠᠩ ᠵᠢᠰᠦᠮ ᠦ᠋ᠨ ᠴᠠᠭᠠᠨ ᠪᠤᠭᠤᠷᠤᠯ ᠪᠣᠯᠵᠤ ᠴᠠᠩᠲᠤᠭᠰᠠᠨ ᠨᠢ ᠬᠣᠯᠠ ᠠ᠋ᠴᠠ ᠬᠠᠷᠠᠬᠤ ᠳ᠋ᠤ᠌ ᠡᠲᠡᠭᠡᠳ ᠰᠦᠷ ᠨᠠᠮᠨᠠᠭᠠ ᠲᠠᠢ ᠠᠵᠤᠭᠤ᠃
ᠨᠠᠷᠠ ᠰᠤᠪᠤᠷᠠᠬᠤ ᠳ᠋ᠤ᠌ ᠪᠤᠭᠤᠷᠤᠯᠲᠤᠭᠰᠠᠨ ᠮᠣᠷᠢᠳ ᠤ᠋ᠨ ᠵᠢᠰᠦᠮ ᠤᠯᠠᠪᠤᠷ ᠲᠤᠶᠠᠭᠠᠨ ᠳ᠋ᠤ᠌ ᠭᠢᠯᠲᠠᠭᠠᠨᠠᠵᠤ ᠬᠠᠷᠠᠭᠳᠠᠨ ᠬᠥᠯᠥᠷᠡᠭᠰᠡᠨ ᠪᠡᠶᠡ ᠡᠴᠡ ᠨᠢ ᠴᠠᠭᠠᠨ ᠪᠤᠭᠤᠷᠤᠯ ᠮᠠᠨᠠᠨ ᠲᠤᠨᠤᠷᠠᠨᠠ᠃
— ᠮᠠᠨᠴᠤᠷᠭᠠ ᠠᠬᠠ ᠠ᠋᠂ ᠬᠣᠶᠠᠷ ᠮᠣᠷᠢ ᠲᠠᠢ ᠬᠥᠮᠦᠨ ᠠᠷᠤ ᠠ᠋ᠴᠠ ᠨᠡᠬᠡᠵᠦ ᠠᠢᠰᠤᠢ᠃
— ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠢ?
— ᠠᠢᠯ ᠤ᠋ᠨ ᠠᠳᠤᠭᠤᠴᠢᠨ ᠴᠦ᠍ ᠶᠤᠮ ᠤᠤ? ᠪᠤᠤ ᠮᠡᠳᠡ ᠳᠠ!
— ᠫᠤᠤ ᠪᠠᠨ ᠵᠠᠮᠤᠭᠯᠠᠬᠤ᠂ ᠬᠡᠷᠰᠡᠦᠬᠡᠨ ᠪᠠᠢ! ᠭᠡᠵᠦ ᠮᠠᠨᠴᠤᠷᠭᠠ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠰᠡᠷᠡᠩ ᠳᠤᠷᠠᠨ ᠢ᠋ᠶ᠋ᠠᠷ ᠥᠨᠥᠬᠢ ᠬᠣᠶᠠᠷ ᠬᠥᠮᠦᠨ ᠢ᠋ ᠵᠢᠰᠦᠯᠡᠵᠦ ᠲᠠᠨᠢᠭᠠᠳ᠄
— ᠮᠠᠨᠴᠤᠷᠭᠠ ᠠᠬᠠ ᠠ᠋᠂ ᠥᠨᠥᠬᠢ ᠰᠠᠶᠢ ᠶ᠋ᠢᠨ ᠳᠡᠭᠡᠷᠡᠮ ᠦ᠋ᠨ ᠬᠣᠶᠠᠷ ᠲᠦᠷᠦᠭᠦᠦ ᠨᠢ ᠪᠣᠯᠤᠯᠲᠠᠢ᠃ ᠲᠣᠯᠣᠭᠠᠢ ᠳ᠋ᠠᠭᠠᠨ ᠢᠰᠡᠭᠡᠢ ᠲᠣᠭᠣᠷᠴᠣᠭ ᠲᠠᠢ ᠬᠠᠷᠠᠭᠳᠠᠬᠤ ᠨᠢ ᠮᠥᠨ ᠰᠢᠦ ᠪᠠᠢᠨᠠ ᠭᠡᠰᠡᠨ ᠳ᠋ᠦ᠍ ᠮᠠᠨᠴᠤᠷᠭᠠ᠄
— ᠫᠤᠤ ᠵᠡᠪᠰᠡᠭ ᠢ᠋ ᠨᠢ ᠬᠤᠷᠢᠶᠠᠴᠢᠬᠠᠭᠰᠠᠨ ᠶᠤᠮ ᠴᠢᠨᠢ ᠶᠠᠭᠠᠬᠢᠳᠠᠭ ᠴᠢᠷᠠᠢ ᠪᠠᠢᠨᠠ? ᠠᠬᠠ ᠳᠡᠭᠦᠦ ᠨᠠᠷ ᠠ᠋᠂ ᠪᠢᠲᠡᠭᠡᠢ ᠠᠶᠤ᠃ ᠬᠣᠰᠢᠭᠤᠷᠠᠵᠤ ᠶᠠᠪᠤ! ᠣᠢᠷᠠᠳᠤᠭᠠᠳ ᠢᠷᠡᠬᠦ ᠳ᠋ᠤ᠌ ᠬᠤᠮᠢᠭᠠᠳ ᠠᠪ ! ᠭᠡᠰᠡᠨ ᠳ᠋ᠦ᠍ ᠠᠷᠪᠠᠭᠠᠳ ᠮᠣᠷᠢᠲᠠᠳ ᠨᠡᠭᠦᠳᠡᠯ ᠦ᠋ᠨ ᠭᠠᠯᠠᠭᠤᠳ ᠰᠢᠭ᠋ ᠬᠣᠰᠢᠭᠤᠷᠠᠨ ᠶᠠᠪᠤᠪᠠ᠃
— ᠮᠠᠨᠴᠤᠷᠭᠠ ᠠᠬᠠ ᠠ᠋᠂ ᠬᠦᠯᠢᠶᠡᠵᠦ ᠪᠠᠢ᠂ ᠪᠢᠳᠡ ᠬᠣᠶᠠᠷ ᠢ᠋ ᠠᠪᠤᠭᠠᠳ ᠶᠠᠪᠤ! ᠭᠡᠵᠦ ᠠᠷᠤ ᠠ᠋ᠴᠠ ᠨᠢ ᠬᠠᠰᠬᠢᠷᠬᠤ ᠴᠢᠮᠡᠭᠡ ᠳᠤᠭᠤᠯᠳᠠᠨᠠ᠃
ᠶᠣᠬᠢᠷᠠᠩ᠂ ᠶᠣᠬᠢᠷᠠᠩ᠁ ᠭᠡᠵᠦ ᠭᠦᠶᠦᠳᠡᠯ ᠮᠠᠭᠤᠲᠠᠢ ᠬᠣᠶᠠᠷ ᠮᠣᠷᠢ ᠬᠠᠮᠠᠷ ᠨᠢ ᠣᠩᠭᠣᠯᠵᠠᠵᠤ᠂ ᠬᠤᠯᠤᠭᠤ ᠶ᠋ᠢ ᠨᠢ ᠳᠠᠭᠠᠭᠠᠳ ᠬᠥᠯᠥᠰᠥ ᠴᠤᠪᠤᠷᠠᠭᠰᠠᠨ ᠴᠤ᠌ ᠭᠠᠵᠠᠷ ᠳᠥᠭᠥᠬᠦ ᠦᠭᠡᠢ ᠳ᠋ᠦ᠍ ᠮᠣᠷᠢᠨ ᠳᠡᠭᠡᠷᠡᠬᠢ ᠶᠠᠭᠠᠷᠠᠮᠠᠲᠠᠭᠠᠢ ᠬᠣᠶᠠᠷ ᠡᠷᠡ ᠳᠡᠮᠡᠢ ᠯᠡ ᠬᠥᠯ ᠢ᠋ᠶ᠋ᠡᠨ ᠳᠠᠪᠢᠷᠠᠨ ᠳᠠᠷᠪᠠᠯᠵᠠᠨᠠ᠁
ᠥᠨᠥᠬᠢ ᠬᠣᠶᠠᠷ ᠮᠣᠷᠢᠨ ᠠ᠋ᠴᠠ ᠦᠰᠦᠷᠴᠦ ᠪᠠᠭᠤᠨ ᠴᠠᠰᠤᠨ ᠳᠡᠭᠡᠷᠡ ᠵᠡᠷᠭᠡᠴᠡᠨ ᠰᠥᠭᠥᠳᠴᠦ᠄
— ᠮᠠᠨᠴᠤᠷᠭᠠ ᠠᠬᠠ ᠠ᠋᠂ ᠪᠢᠳᠡ ᠬᠣᠶᠠᠷ ᠲᠠᠨ ᠳ᠋ᠤ᠌ ᠤᠰᠤᠯᠲᠠᠯᠠ᠃ ᠡᠦᠲᠦ ᠪᠢᠳᠡ ᠣᠰᠣᠯ ᠢ᠋ᠶ᠋ᠠᠨ ᠬᠦᠯᠢᠶᠡᠵᠦ ᠲᠠᠨ ᠤ᠋ ᠡᠪᠦᠳᠦᠭ ᠳᠣᠣᠷᠠ ᠬᠣᠶᠠᠷ ᠦᠭᠡᠢ ᠵᠢᠳᠬᠦᠵᠦ ᠶᠠᠪᠤᠶᠠ! ᠲᠠ ᠪᠢᠳᠡ ᠬᠣᠶᠠᠷ ᠢ᠋ ᠭᠣᠯᠣᠬᠤ ᠦᠭᠡᠢ ᠯᠡ ᠶᠦᠮ ᠪᠣᠯ ᠳᠠᠯᠠᠯᠤᠭᠰᠠᠨ ᠭᠠᠵᠠᠷ ᠲᠤ᠌ ᠴᠢᠨᠢ ᠢᠯᠡᠷᠡᠵᠦ᠂ ᠳᠠᠯᠠᠢᠭᠰᠠᠨ ᠭᠠᠵᠠᠷ ᠲᠤ᠌ ᠴᠢᠨᠢ ᠳᠠᠯᠳᠢᠷᠠᠵᠤ ᠪᠠᠢᠶᠠ! ᠭᠡᠳ ᠰᠢᠭᠡᠵᠡᠢ ᠬᠤᠷᠤᠭᠤᠨ ᠤ᠋ ᠪᠠᠨ ᠥᠨᠳᠡᠭᠡ ᠶ᠋ᠢ ᠲᠠᠰᠤ ᠬᠠᠵᠠᠭᠰᠠᠨ ᠳ᠋ᠤ᠌ ᠬᠦᠷᠡᠩ ᠬᠠᠷᠠ ᠴᠢᠰᠤ ᠮᠡᠯᠡᠰ ᠬᠢᠨ ᠤᠷᠤᠰᠴᠤ ᠴᠠᠰᠤ ᠴᠠᠭᠠᠨ ᠭᠠᠵᠠᠷ ᠢ᠋ ᠬᠡᠰᠡᠭ ᠤᠯᠠᠢᠯᠭᠠᠨ ᠪᠣᠳᠣᠵᠠᠢ᠃
ᠡᠨᠡ ᠬᠣᠶᠠᠷ ᠪᠣᠯ ᠨᠢᠭᠡ ᠨᠢ ᠪᠦᠯᠲᠡᠭᠡᠷ ᠬᠠᠷᠠ ᠨᠢᠳᠦ ᠲᠡᠢ ᠡᠯ ᠾᠧᠢ ᠶᠠᠨ᠂ ᠨᠥᠭᠦᠭᠡ ᠨᠢ ᠬᠤᠯᠠᠭᠠᠢᠴᠢ ᠬᠠᠷᠠᠴᠠ ᠲᠠᠢ ᠭᠤᠷᠪᠠᠯᠵᠢᠨ ᠨᠢᠳᠦ ᠲᠡᠢ ᠵᠣᠣ ᠪᠤᠤ ᠯᠧᠩ ᠭᠡᠳᠡᠭ ᠬᠣᠶᠠᠷ ᠳᠡᠭᠡᠷᠡᠮ ᠦ᠋ᠨ ᠲᠦᠷᠦᠭᠦᠦ ᠪᠠᠢᠵᠠᠢ᠃
ᠮᠠᠨᠴᠤᠷᠭᠠ ᠡᠨᠡ ᠬᠣᠶᠠᠷ ᠬᠢᠲᠠᠳ ᠤ᠋ᠨ ᠥᠪᠡᠷᠰᠡᠳ ᠦ᠋ᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠬᠤᠷᠤᠭᠤᠨ ᠤ᠋ ᠪᠠᠨ ᠥᠨᠳᠡᠭᠡ ᠶ᠋ᠢ ᠲᠠᠰᠤ ᠬᠠᠵᠠᠵᠤ ᠲᠠᠩᠭᠠᠷᠢᠭ ᠲᠠᠯᠪᠢᠭᠰᠠᠨ ᠳ᠋ᠤᠨᠢ 《ᠡᠳᠡ ᠬᠣᠶᠠᠷ ᠢ᠋ ᠦᠨᠡᠬᠡᠷ ᠳᠠᠭᠠᠭᠤᠯᠤᠭᠠᠳ ᠶᠠᠪᠤᠳᠠᠭ ᠴᠦ᠍ ᠶᠤᠮ ᠤᠤ⁈ ᠲᠡᠭᠡᠪᠡᠯ ᠰᠡᠷᠡᠩ ᠰᠢᠷᠠᠮᠠᠩ ᠬᠣᠶᠠᠷ ᠢ᠋ᠶ᠋ᠠᠷ ᠢᠮᠠᠭᠲᠠ ᠬᠡᠳᠡᠭᠥᠯᠵᠥ ᠪᠠᠢᠬᠤ ᠬᠡᠷᠡᠭᠲᠡᠢ》 ᠭᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ᠄
— ᠵᠠ ᠲᠡᠭᠡᠪᠡᠯ ᠲᠠ ᠬᠣᠶᠠᠷ ᠲᠤ᠌ ᠮᠣᠩᠭᠣᠯ ᠨᠡᠷᠡ ᠥᠭᠭᠦᠶᠡ ᠴᠢᠮᠠᠶ᠋ᠢ 《ᠬᠠᠷᠠ ᠨᠢᠳᠦᠲᠦ》 ᠭᠡᠶᠡ᠂ ᠴᠢᠮᠠᠶ᠋ᠢ 《ᠵᠣᠪᠠᠯᠭᠠ》 ᠭᠡᠶᠡ! ᠪᠣᠯᠤᠨᠠ ᠤᠤ? ᠭᠡᠪᠡ᠃
— ᠪᠣᠯᠤᠨᠠ᠂ ᠪᠣᠯᠤᠨᠠ ! ᠭᠡᠵᠦ ᠨᠥᠭᠦᠭᠡ ᠬᠣᠶᠠᠷ ᠵᠡᠷᠭᠡ ᠪᠡᠷ ᠳᠤᠤᠭᠠᠷᠤᠭᠰᠠᠨ ᠳ᠋ᠤ᠌ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠬᠥᠷ ᠬᠢᠨ ᠢᠨᠢᠶᠡᠯᠴᠡᠪᠡ ᠁
᠁
ᠬᠠᠷᠠ ᠨᠢᠳᠦᠲᠦ ᠪᠣᠯᠤᠨ ᠵᠣᠪᠠᠯᠭᠠ ᠬᠣᠶᠠᠷ ᠳᠠᠯᠢᠩ ᠲᠠᠢ ᠶᠠᠭᠤᠮᠠ ᠬᠡᠦᠮᠡ ᠶ᠋ᠢ ᠬᠥᠰᠡᠷ ᠲᠠᠯᠪᠢᠵᠤ᠄
— ᠮᠠᠨᠴᠤ ᠠᠬᠠ ᠠ᠋᠂ ᠥᠨᠥᠳᠥᠷ ᠬᠠᠷᠢᠨ ᠣᠯᠵᠠ ᠰᠠᠢᠲᠠᠢ᠃ ᠪᠤᠯᠠᠭᠠ ᠶ᠋ᠢᠨ ᠠᠷᠠᠰᠤ᠂ ᠪᠤᠭᠤ ᠶ᠋ᠢᠨ ᠬᠢᠷᠵᠠᠩ ᠵᠡᠷᠭᠡ ᠣᠪᠣᠭᠠ ᠦᠨᠡᠲᠡᠢ ᠶᠠᠭᠤᠮᠠ ᠣᠯᠵᠠᠢ ᠭᠡᠵᠦ ᠵᠣᠪᠠᠯᠭᠠ ᠬᠡᠯᠡᠲᠡᠯᠡ ᠬᠠᠷᠠ ᠨᠢᠳᠦᠲᠦ᠄
— ᠪᠠᠰᠠ ᠱ᠌ᠢᠷᠦᠨ ᠵᠢᠩᠰᠡ ᠲᠡᠢ ᠮᠠᠨᠤᠨ ᠬᠥᠬᠦᠦᠷ᠂ ᠮᠥᠩᠭᠥᠨ ᠬᠤᠢ ᠲᠠᠢ ᠬᠢᠲᠤᠭᠠ᠁ ᠭᠡᠳ ᠥᠨᠥᠬᠢ ᠶᠠᠭᠤᠮᠠᠰ ᠢ᠋ ᠮᠠᠨᠴᠤᠷᠭᠠ ᠳ᠋ᠤ᠌ ᠠᠪᠠᠴᠢᠵᠤ ᠥᠭᠪᠡ᠃
ᠮᠠᠨᠴᠤᠷᠭᠠ ᠬᠠᠷᠠ ᠲᠠᠮᠠᠬᠢᠨ ᠤ᠋ ᠳ᠋ᠧᠩ ᠢ᠋ᠶ᠋ᠡᠨ ᠦᠯᠢᠶᠡᠵᠦ ᠥᠨᠳᠡᠢᠨ ᠪᠣᠰᠴᠤ᠄
— ᠮᠠᠨᠤᠨ ᠬᠥᠬᠦᠦᠷ? ᠮᠥᠩᠭᠥᠨ ᠬᠤᠢ ᠲᠠᠢ ᠬᠢᠲᠤᠭᠠ᠁ ᠮᠣᠩᠭᠣᠯ ᠬᠥᠮᠦᠨ ᠤᠤ ᠴᠠᠭᠠᠳᠤᠬᠢ ᠴᠢᠨᠢ? ᠭᠡᠵᠦ ᠠᠰᠠᠭᠤᠯᠠ᠃
— ᠲᠡᠢᠮᠦ ᠠ᠋! ᠮᠣᠩᠭᠣᠯ ᠬᠥᠮᠦᠨ!
— ᠬᠠᠮᠢᠭᠠᠬᠢ ᠶ᠋ᠢᠨ ᠮᠣᠩᠭᠣᠯ ᠬᠥᠮᠦᠨ ᠪᠣᠢ?
— ᠮᠤᠨᠠ ᠶ᠋ᠢᠨ ᠠᠭᠤᠯᠠ ᠶ᠋ᠢᠨ᠁ ᠭᠡᠵᠦ ᠬᠡᠯᠡᠲᠡᠯᠡ ᠨᠥᠭᠦᠭᠡ ᠨᠢ᠄
— ᠠ᠂ ᠪᠠᠰᠠ ᠣᠪᠣᠭᠠ ᠰᠠᠢᠨ ᠡᠷᠡ ᠶ᠋ᠢᠨ ᠰᠢᠨᠵᠢ ᠲᠡᠢ ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍ ᠮᠠᠨᠴᠤᠷᠭᠠ᠄
— ᠡᠨᠡ ᠬᠥᠮᠦᠨ ᠡᠦᠲᠦ ᠬᠠᠮᠢᠭᠠ ᠪᠠᠢᠨᠠ ᠪᠣᠢ? ᠬᠠᠷᠠ ᠨᠢᠳᠦᠲᠦ ᠴᠢ ᠬᠤᠷᠳᠤᠨ ᠶᠠᠪᠤᠵᠤ ᠲᠡᠷᠡ ᠬᠥᠮᠦᠨ ᠢ᠋ ᠪᠠᠷᠢᠵᠤ ᠢᠷᠡ᠂ ᠪᠢ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠵᠤ ᠦᠵᠡᠶᠡ ᠶᠠᠮᠠᠷ ᠰᠠᠢᠨ ᠡᠷᠡ ᠪᠠᠢᠳᠠᠭ ᠶᠤᠮ ᠪᠠᠢᠨᠠ ᠭᠡᠯᠡ᠃
— ᠮᠠᠨᠴᠤ ᠠᠬᠠ ᠠ᠋᠂ ᠮᠥᠨ ᠡᠨᠡ ᠬᠦᠢᠲᠡᠨ ᠭᠡᠷ ᠲᠦ᠍ ᠪᠣᠢ᠃
— ᠶᠠᠪᠤ᠂ ᠲᠡᠭᠦᠨ ᠢ᠋ ᠣᠷᠣᠭᠤᠯᠵᠤ ᠢᠷᠡ ! ᠭᠡᠵᠦ ᠵᠠᠩᠳᠤᠷᠤᠭᠰᠠᠨ ᠳ᠋ᠤ᠌ ᠨᠥᠭᠦᠭᠡ ᠬᠣᠶᠠᠷ ᠪᠤᠰᠢᠭᠤᠬᠠᠨ ᠭᠠᠷᠴᠤ ᠶᠠᠪᠤᠪᠠ᠃
ᠤᠳᠠᠭᠰᠠᠨ ᠦᠭᠡᠢ ᠠᠩᠴᠢᠨᠵᠠᠪ ᠢ᠋ ᠬᠦᠯᠢᠶᠡᠰᠦᠲᠡᠢ ᠨᠢ ᠭᠡᠷ ᠲᠦ᠍ ᠣᠷᠣᠭᠤᠯᠪᠠ᠃
ᠮᠠᠨᠴᠤᠷᠭᠠ ᠡᠭᠦᠳᠡ ᠪᠡᠷ ᠬᠡᠩᠬᠦᠯᠵᠡᠨ ᠣᠷᠣᠵᠤ ᠢᠷᠡᠭᠰᠡᠨ ᠡᠨᠡ ᠬᠦ᠌ ᠡᠯᠪᠡᠭ ᠨᠡᠬᠡᠢ ᠳᠡᠪᠡᠯ ᠲᠡᠢ᠂ ᠡᠭᠡᠳᠡᠨ ᠭᠤᠲᠤᠯ ᠢᠰᠬᠦᠯᠦᠭᠰᠡᠨ ᠬᠦᠳᠡᠷᠯᠢᠭ ᠡᠷᠡ ᠶ᠋ᠢ ᠨᠠᠷᠢᠨ ᠠᠵᠢᠭᠯᠠᠭᠰᠠᠨ ᠳ᠋ᠤ᠌ ᠬᠣᠶᠠᠷ ᠴᠢᠮᠠᠷᠬᠠᠢ ᠠ᠋ᠴᠠ ᠨᠢ ᠳᠣᠷᠣᠭᠰᠢ ᠤᠷᠭᠤᠭᠰᠠᠨ ᠵᠤᠵᠠᠭᠠᠨ ᠰᠠᠬᠠᠯ ᠨᠢ ᠡᠷᠡᠦ ᠪᠡᠨ ᠪᠣᠭᠣᠵᠤ ᠬᠠᠷᠠᠯᠠᠭᠠᠳ᠂ ᠬᠢᠩᠭᠠ ᠥᠨᠳᠥᠷ ᠬᠠᠮᠠᠷ ᠨᠢ ᠡᠷᠡ ᠪᠡᠶᠡ ᠶ᠋ᠢᠨ ᠬᠢᠨᠢ ᠰᠦᠯᠳᠡ ᠰᠢᠭ ᠬᠠᠷᠠᠭᠳᠠᠨᠠ᠃
— ᠬᠦᠯᠢᠶᠡᠰᠦ ᠶ᠋ᠢ ᠨᠢ ᠲᠠᠢᠯ ᠭᠡᠰᠡᠨ ᠳ᠋ᠦ᠍ ᠨᠥᠭᠦᠭᠡ ᠬᠣᠶᠠᠷ ᠠᠩᠴᠢᠨᠵᠠᠪ ᠤ᠋ᠨ ᠬᠦᠯᠢᠶᠡᠰᠦ ᠶ᠋ᠢ ᠲᠡᠷᠡ ᠳᠣᠣᠷᠠ ᠨᠢ ᠠᠯᠳᠠᠷᠠᠭᠠᠪᠠ᠃
ᠮᠠᠨᠴᠤᠷᠭᠠ ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠨ ᠵᠠᠩᠭᠠᠵᠤ 《ᠲᠠ ᠬᠣᠶᠠᠷ ᠴᠠᠭᠠᠰᠢ ᠶᠠᠪᠤ!》 ᠭᠡᠰᠡᠨ ᠳᠣᠬᠢᠶᠠ ᠦᠭᠭᠦᠭᠰᠡᠨ ᠳ᠋ᠦ᠍ ᠨᠥᠭᠦᠭᠡ ᠬᠣᠶᠠᠷ ᠭᠠᠷᠴᠤ ᠶᠠᠪᠤᠪᠠ᠃
ᠠᠩᠴᠢᠨᠵᠠᠪ ᠦᠨᠡᠭᠡᠨ ᠯᠣᠪᠤᠤᠵᠠ ᠪᠠᠨ ᠠᠪᠬᠤ ᠳ᠋ᠤᠨᠢ ᠠᠵᠢᠷᠭᠠᠨ ᠳᠡᠯ ᠰᠢᠭ᠋ ᠰᠠᠳᠠᠷᠠᠭᠰᠠᠨ ᠭᠡᠵᠢᠭᠡ ᠨᠢ ᠮᠥᠷᠥ ᠤᠷᠤᠭᠤ ᠨᠢ ᠡᠮᠬᠢ ᠵᠠᠮᠪᠠᠷᠠᠭᠠ ᠦᠭᠡᠢ ᠪᠠᠭᠤᠪᠠ᠃
— ᠠ᠂ ᠰᠠᠢᠬᠠᠨ ᠮᠣᠩᠭᠣᠯ ᠡᠷᠡ ᠪᠠᠢᠨᠠ ᠭᠡᠰᠡᠨ ᠳ᠋ᠦ᠍ ᠠᠩᠴᠢᠨᠵᠠᠪ ᠡᠨᠡ ᠭᠥᠯᠢᠩ ᠲᠣᠯᠣᠭᠠᠢ ᠲᠠᠢ ᠵᠠᠩᠭᠤᠢᠳᠠ ᠨᠢ ᠮᠣᠩᠭᠣᠯ ᠦᠭᠡ ᠬᠡᠯᠡᠭᠰᠡᠨ ᠳ᠋ᠦ᠍ ᠭᠠᠢᠬᠠᠵᠤ᠄
— ᠲᠠ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠮᠣᠩᠭᠣᠯ ᠬᠥᠮᠦᠨ ᠪᠠᠢᠭᠰᠠᠨ ᠶᠤᠮ ᠤᠤ ᠭᠡᠵᠦ ᠬᠠᠴᠢᠷᠬᠠᠨ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠮᠠᠨᠴᠤᠷᠭᠠ ᠬᠠᠯ ᠬᠠᠯ ᠢᠨᠢᠶᠡᠵᠦ᠄
— ᠨᠠᠭᠠᠰᠢ ᠪᠠᠨ ᠰᠠᠭᠤ᠂ ᠰᠠᠭᠤ! ᠬᠠᠯᠠᠭᠤᠨ ᠴᠠᠢ ᠤᠤᠭᠤ! ᠭᠡᠵᠦ ᠬᠣᠪᠣᠩ ᠳᠡᠭᠡᠷᠡ ᠲᠠᠯᠪᠢᠭᠰᠠᠨ ᠵᠡᠰ ᠳᠡᠪᠦᠷᠡ ᠡᠴᠡ ᠴᠠᠢ ᠠᠶᠠᠭᠠᠯᠠᠨ ᠲᠡᠭᠦᠨ ᠳ᠋ᠦ᠍ ᠪᠠᠷᠢᠪᠠ᠃
– – – –
① ᠪᠤᠭᠤᠲᠤ ᠶ᠋ᠢᠨ ᠵᠡᠭᠦᠨᠲᠡᠢ ᠡᠭᠴᠡ ᠬᠠᠳᠠ ᠲᠠᠢ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠲᠦ᠍ ᠪᠠᠢᠳᠠᠭ ᠰᠦᠮᠡ᠃
② ᠡᠯ ᠾᠧᠢ ᠶᠠᠨ— ᠬᠢᠲᠠᠳ ᠬᠥᠮᠦᠨ᠃ ᠬᠣᠶᠠᠳᠤᠭᠠᠷ ᠬᠠᠷᠠ ᠨᠢᠳᠦᠲᠦ ᠭᠡᠰᠡᠨ ᠤᠳᠬᠠ ᠲᠠᠢ᠃