ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠳᠡᠳ᠋ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠶᠢᠰᠦ> Хан мунын сүүрс < дээд > – Мөнх зохиоов ᠂ Дэд бодь – Гуравдугаар бүлэг <9>
453ᠳᠡᠳ᠋ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠶᠢᠰᠦ>
ᠶᠢᠰᠦ
ᠵᠤᠨ ᠤ᠋ ᠵᠢᠷᠭᠤᠭᠠᠨ ᠰᠠᠷᠠ ᠶ᠋ᠢᠨ ᠨᠣᠮᠢᠨ ᠠᠭᠤᠯᠠ ᠨᠢ ᠵᠦᠢᠯ ᠦ᠋ᠨ ᠴᠡᠴᠡᠭ ᠮᠢᠷᠠᠯᠵᠠᠵᠤ᠂ ᠵᠢᠭᠦᠷᠲᠡᠨ ᠰᠢᠪᠠᠭᠤᠳ ᠳᠣᠩᠭᠣᠳᠤᠭᠰᠠᠨ ᠦᠵᠡᠮᠵᠢ ᠲᠡᠭᠦᠯᠳᠡᠷ ᠰᠠᠢᠬᠠᠨ ᠣᠷᠣᠨ ᠪᠠᠢᠯᠠ᠃
ᠨᠣᠮᠢᠨ ᠡᠨᠡ ᠬᠤᠪᠢ ᠢᠷᠦᠭᠡᠯᠲᠦ ᠭᠠᠩᠭᠠᠩ ᠪᠠᠢᠭᠠᠯᠢ ᠶ᠋ᠢᠨ ᠴᠡᠩᠭᠡᠭ ᠠᠭᠠᠷ ᠢ᠋ ᠴᠢᠯᠥᠭᠡᠲᠡᠢ ᠵᠠᠯᠭᠢᠯᠠᠵᠤ ᠥᠯᠥᠰᠪᠡᠯ ᠵᠡᠷᠯᠢᠭ ᠵᠢᠮᠢᠰ ᠢ᠋ᠶ᠋ᠡᠷ ᠥᠯ ᠪᠣᠯᠭᠠᠵᠤ ᠤᠮᠳᠠᠭᠠᠰᠪᠠᠯ ᠪᠤᠯᠠᠭ ᠤ᠋ᠨ ᠲᠤᠩᠭᠠᠯᠠᠭ ᠤᠰᠤᠨ ᠠ᠋ᠴᠠ ᠤᠮᠳᠠᠯᠠᠵᠤ ᠶᠠᠪᠤᠭᠰᠠᠭᠠᠷ ᠠᠭᠤᠯᠠᠨ ᠤ᠋ ᠭᠦᠨ ᠳ᠋ᠦ᠍ ᠣᠷᠣᠵᠤ ᠣᠴᠢᠵᠠᠢ᠃
ᠢᠯᠠᠮᠠ ᠶ᠋ᠢᠨ ᠮᠣᠳᠣᠨ ᠤ᠋ ᠰᠡᠭᠦᠳᠡᠷ ᠳᠣᠣᠷᠠ ᠤᠷᠲᠤ ᠴᠠᠭᠠᠨ ᠬᠥᠮᠥᠰᠬᠡ᠂ ᠤᠷᠲᠤ ᠴᠠᠭᠠᠨ ᠰᠠᠬᠠᠯ ᠲᠠᠢ ᠨᠢᠭᠡ ᠡᠪᠦᠭᠡᠨ ᠰᠡᠷᠢᠭᠦᠴᠡᠵᠦ ᠪᠠᠢᠪᠠ᠃
ᠨᠣᠮᠢᠨ ᠲᠡᠷᠡ ᠴᠠᠭᠠᠨ ᠰᠠᠬᠠᠯᠲᠤ ᠡᠪᠦᠭᠡᠨ ᠦ᠌ ᠬᠠᠵᠠᠭᠤ ᠳ᠋ᠤᠨᠢ ᠣᠴᠢᠭᠠᠳ ᠤᠳᠠᠲᠠᠯᠠ ᠵᠣᠭᠰᠣᠭᠰᠠᠨ ᠴᠤ᠌ ᠲᠡᠭᠦᠨ ᠢ᠋ ᠦᠵᠡᠭᠰᠡᠨ ᠦᠭᠡᠢ ᠰᠢᠭ ᠠᠨᠢᠷ ᠴᠤ᠌ ᠦᠭᠡᠢ ᠪᠠᠢᠯᠠ᠃
ᠴᠠᠭᠠᠨ ᠰᠠᠬᠠᠯᠲᠤ ᠡᠪᠦᠭᠡᠨ ᠨᠢᠭᠡ ᠭᠠᠷ ᠲᠠᠭᠠᠨ ᠠᠷᠵᠠᠭᠠᠨᠠᠲᠠᠯᠠ ᠥᠲᠥᠭᠰᠡᠨ ᠬᠣᠨᠢᠨ ᠤ᠋ ᠰᠡᠭᠦᠯ ᠢ᠋ ᠳᠡᠭᠡᠷᠡ ᠡᠷᠭᠦᠵᠦ᠂ ᠨᠥᠭᠦᠭᠡ ᠭᠠᠷ ᠲᠠᠬᠢ ᠬᠢᠲᠤᠭᠠ ᠪᠠᠷ ᠠᠷᠵᠠᠭᠠᠨᠠᠭᠰᠠᠨ ᠪᠤᠭᠤᠳᠠᠢ ᠶ᠋ᠢᠨ ᠰᠢᠷᠠ ᠥᠳᠥ ᠶ᠋ᠢ ᠢᠨᠵᠠᠭᠠᠨ ᠤ᠋ ᠢᠯᠭᠢᠨ ᠳᠡᠭᠡᠷᠡ ᠫᠡᠷ ᠫᠡᠷ ᠬᠢᠲᠡᠯᠡ ᠤᠨᠠᠭᠠᠵᠤ ᠨᠡᠯᠢᠶᠡᠳ ᠬᠤᠷᠠᠮᠳᠤᠭᠰᠠᠨ ᠢ᠋ ᠠᠳᠬᠤ ᠠᠳᠬᠤ ᠪᠠᠷ ᠵᠠᠵᠢᠯᠵᠤ ᠢᠳᠡᠨᠡ᠃
ᠴᠠᠭᠠᠨ ᠰᠠᠬᠠᠯᠲᠤ ᠡᠪᠦᠭᠡᠨ ᠲᠣᠰᠣᠲᠤᠭᠰᠠᠨ ᠠᠮᠠ ᠪᠠᠨ ᠠᠷᠴᠢᠵᠤ ᠬᠢᠲᠤᠭᠠ ᠪᠠᠨ ᠬᠤᠢᠯᠠᠭᠠᠳ᠄
一 ᠰᠠᠭᠤ᠂ ᠰᠠᠭᠤ! ᠨᠠᠭᠠᠰᠢ ᠪᠠᠨ ᠰᠠᠭᠤ! ᠭᠡᠬᠦ ᠳ᠋ᠦ᠍ ᠨᠣᠮᠢᠨ ᠰᠡᠳᠬᠢᠯ ᠨᠢ ᠤᠶᠠᠷᠠᠨ ᠶᠠᠭᠠᠬᠢᠪᠠᠴᠤ ᠲᠡᠰᠦᠭᠰᠡᠨ ᠦᠭᠡᠢ ᠱᠣᠭᠰᠢᠷᠠᠲᠠᠯᠠ ᠤᠬᠢᠯᠠᠪᠠ᠃ ᠡᠢᠮᠦ ᠡᠨᠡᠷᠢᠩᠭᠦᠢ ᠳᠤᠯᠠᠭᠠᠨ ᠬᠠᠯᠠᠮᠵᠢ ᠶ᠋ᠢᠨ ᠦᠭᠡ ᠶ᠋ᠢ ᠣᠯᠵᠤ ᠰᠣᠨᠣᠰᠤᠭᠠ ᠦᠭᠡᠢ ᠤᠳᠠᠭᠰᠠᠨ ᠨᠣᠮᠢᠨ ᠤ᠋ ᠰᠡᠳᠬᠢᠯ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠤᠶᠠᠷᠠᠪᠠ᠃
一 ᠪᠢᠲᠡᠭᠡᠢ ᠤᠬᠢᠯᠠ ᠬᠡᠦᠬᠡ! ᠪᠢ ᠴᠢᠨᠦ ᠵᠣᠪᠠᠯᠠᠩ ᠭᠠᠴᠢᠯᠠᠩ ᠢ᠋ ᠮᠡᠳᠡᠨᠡ᠃ ᠴᠢ ᠰᠠᠢᠬᠠᠨ ᠲᠥᠯᠥᠪ ᠲᠡᠢ ᠥᠬᠢᠨ ᠪᠠᠢᠭᠰᠠᠨ ᠶᠤᠮ ᠪᠠᠢᠨᠠ᠃ ᠴᠢᠨᠦ ᠰᠢᠲᠠᠩᠬᠠᠢ ᠴᠢᠷᠠᠢ ᠲᠥᠯᠥᠪ ᠦ᠋ᠨ ᠴᠠᠭᠠᠨᠠ ᠤᠤᠯ ᠤ᠋ᠨ ᠬᠡᠪ ᠲᠥᠷᠬᠦ ᠴᠢᠨᠢ ᠲᠡᠷᠡ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠬᠠᠷᠠᠭᠳᠠᠵᠤ ᠪᠠᠢᠨᠠ᠃ ᠵᠠ᠂ ᠬᠡᠦᠬᠡ ᠠ᠋! ᠨᠠᠮᠠᠶ᠋ᠢ ᠳᠠᠭᠠᠭᠠᠳ ᠢᠷᠡ! ᠭᠡᠳ ᠴᠠᠭᠠᠨ ᠰᠠᠬᠠᠯᠲᠤ ᠡᠪᠦᠭᠡᠨ ᠲᠡᠭ ᠬᠢᠲᠡᠯᠡ ᠪᠣᠰᠴᠤ ᠴᠠᠭᠠᠳᠤ ᠬᠠᠳᠠ ᠥᠭᠡᠳᠡ ᠮᠠᠴᠤᠪᠠ᠃
ᠪᠠᠷᠲᠠᠭᠠ ᠶᠡᠬᠡᠲᠡᠢ ᠳᠡᠭᠲᠡᠷ ᠳᠡᠭᠲᠡᠷ ᠬᠠᠳᠠ ᠮᠠᠴᠤᠵᠤ ᠨᠢᠭᠡᠨ ᠬᠠᠳᠠᠨ ᠬᠣᠩᠭᠢᠯ ᠤ᠋ᠨ ᠠᠮᠠᠨ ᠳ᠋ᠤ᠌ ᠬᠦᠷᠪᠡ᠃ ᠡᠭᠦᠳᠡ ᠬᠠᠶᠠᠭᠠ ᠰᠠᠬᠢᠭᠰᠠᠨ ᠬᠡᠳᠦ ᠬᠡᠳᠦᠨ ᠴᠢᠨᠣᠠ ᠡᠵᠡᠨ ᠬᠥᠮᠦᠨ ᠦ᠌ ᠬᠢᠨᠢ ᠠᠷᠤ ᠳ᠋ᠤ᠌ ᠨᠢᠭᠡ ᠦᠯᠦ ᠲᠠᠨᠢᠬᠤ ᠰᠡᠭᠰᠡᠭᠡᠷ ᠦᠰᠦ ᠲᠡᠢ ᠰᠢᠲᠠᠩᠬᠠᠢ ᠮᠠᠭᠤᠬᠠᠢ ᠴᠢᠷᠠᠢ ᠲᠠᠢ᠂ ᠤᠷᠠᠩ ᠨᠠᠪᠲᠠᠩ ᠬᠤᠪᠴᠠᠰᠤ ᠲᠠᠢ ᠡᠮᠡᠭᠲᠡᠢ ᠳᠠᠭᠠᠯᠳᠤᠵᠤ ᠶᠠᠪᠤᠭᠠ ᠶ᠋ᠢ ᠠᠳᠠᠭ ᠨᠢ ᠬᠠᠷᠠᠵᠤ ᠴᠤ᠌ ᠦᠵᠡᠬᠦ ᠦᠭᠡᠢ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠥᠭᠡᠷᠡ ᠬᠥᠮᠦᠨ ᠢᠷᠡᠬᠦ ᠳ᠋ᠦ᠍ ᠲᠠᠬᠢᠮ ᠤᠷᠤᠭᠤ ᠨᠢ ᠰᠢᠷᠦᠭᠦᠨ ᠨᠢᠳᠤᠷᠴᠤ ᠤᠨᠠᠭᠠᠨ ᠡᠵᠡᠨ ᠦ᠌ ᠪᠡᠨ ᠶᠠᠭᠤ ᠬᠡᠯᠡᠬᠦ ᠶ᠋ᠢ ᠴᠢᠷᠠᠢᠳᠠᠵᠤ ᠬᠠᠳᠠᠨ ᠬᠣᠩᠭᠢᠯ ᠤ᠋ᠨ ᠡᠵᠡᠨ ᠨᠢ《 ᠪᠣᠯᠢ! ᠨᠠᠭᠠᠰᠢ ᠶᠠᠪᠤᠭᠤᠯ!》 ᠭᠡᠬᠦ ᠳ᠋ᠦ᠍ ᠠᠶᠠ ᠪᠠᠷ ᠨᠢ ᠲᠠᠯᠪᠢᠳᠠᠭ ᠠᠵᠢ᠃ ᠡᠵᠡᠨ ᠨᠢ ᠡᠳᠦᠢ ᠲᠡᠳᠦᠢ ᠳᠤᠤᠭᠠᠷᠬᠤ ᠦᠭᠡᠢ ᠬᠣᠷᠢᠬᠤ ᠴᠢᠮᠡᠭᠡ ᠥᠭᠬᠦ ᠦᠭᠡᠢ ᠪᠣᠯ ᠲᠡᠭᠦᠨ ᠢ᠋ ᠳᠣᠣᠷᠠ ᠨᠢ ᠲᠠᠮᠲᠤᠭ ᠪᠣᠯᠲᠠᠯᠠ ᠰᠦᠢᠳᠬᠡᠵᠦ ᠣᠷᠬᠢᠨᠠ᠃
ᠨᠣᠮᠢᠨ ᠴᠤ᠌ ᠲᠡᠷᠡ ᠴᠠᠭᠠᠨ ᠰᠠᠬᠠᠯᠲᠤ ᠡᠪᠦᠭᠡᠨ ᠢ᠋ ᠪᠣᠷᠪᠢᠳᠠᠨ ᠳᠠᠭᠠᠵᠤ ᠴᠢᠨᠣᠠ ᠨᠤᠭᠤᠳ ᠠ᠋ᠴᠠ ᠣᠭᠲᠣᠬᠠᠨ ᠴᠤ᠌ ᠰᠦᠷᠳᠡᠭᠰᠡᠨ ᠦᠭᠡᠢ᠃
ᠡᠨᠡ ᠬᠥᠮᠦᠨ ᠪᠣᠯ ᠥᠭᠡᠷᠡ ᠬᠥᠮᠦᠨ ᠪᠢᠰᠢ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠪᠠᠢᠯᠠ᠃
ᠬᠠᠳᠠᠨ ᠬᠣᠩᠭᠢᠯ ᠳᠣᠲᠣᠷᠠ ᠣᠷᠣᠵᠤ ᠣᠴᠢᠭᠠᠳ ᠨᠣᠮᠢᠨ ᠢ᠋ ᠭᠥᠷᠦᠭᠡᠰᠦᠨ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠰᠠᠭᠤᠯᠭᠠᠵᠤ《ᠭᠠᠷ ᠢ᠋ᠶ᠋ᠠᠨ ᠨᠠᠭᠠᠰᠢ ᠪᠠᠨ ᠠᠯᠢ᠂ ᠰᠤᠳᠠᠯ ᠢ᠋ ᠴᠢᠨᠢ ᠪᠠᠷᠢᠶᠠ》 ᠭᠡᠳ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠨᠣᠮᠢᠨ ᠤ᠋ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠬᠢᠨᠢ ᠰᠤᠳᠠᠯ ᠢ᠋ ᠲᠡᠮᠲᠡᠷᠢᠵᠦ᠄
一 ᠵᠢᠷᠦᠬᠡᠨ ᠳᠦ ᠴᠢᠨᠢ ᠬᠠᠯᠠᠭᠤᠨ ᠰᠢᠷᠭᠤᠵᠤ᠂ ᠬᠡᠢ ᠡᠷᠭᠦᠭᠰᠡᠨ ᠪᠠᠢᠨᠠ᠁ ᠡᠨᠡ ᠬᠠᠯᠠᠭᠤᠨ ᠬᠡᠢ ᠨᠢᠳᠦᠨ ᠳ᠋ᠦ᠍ ᠴᠢᠨᠢ ᠬᠠᠷᠪᠤᠭᠰᠠᠭᠠᠷ ᠭᠠᠯᠵᠠᠭᠤᠷᠠᠨᠠ᠃ ᠵᠠ᠂ ᠶᠠᠭᠠᠬᠢᠬᠤ ᠪᠣᠢ! ᠭᠠᠢᠭᠤᠢ᠂ ᠭᠠᠢᠭᠤᠢ! ᠣ! ᠴᠢ ᠮᠣᠭᠠᠢ ᠵᠢᠯ ᠲᠡᠢ᠃ ᠵᠤᠨ ᠤ᠋ ᠲᠤᠢᠯ ᠤ᠋ᠨ ᠡᠳᠦᠷ ᠦ᠋ᠨ ᠦᠦᠷ ᠢ᠋ᠶ᠋ᠡᠷ ᠠᠶᠤᠩᠭᠠᠨ ᠳᠠᠭᠤᠨ ᠳ᠋ᠤ᠌ ᠲᠥᠷᠥᠭᠰᠡᠨ ᠶᠦᠮ ᠪᠠᠢᠨᠠ᠃ ᠤᠰᠤᠨ ᠮᠠᠬᠠᠪᠣᠳ᠂ ᠠᠭᠤᠯᠠᠨ ᠳ᠋ᠤ᠌ ᠰᠠᠭᠤᠳᠠᠯ ᠲᠠᠢ᠃ ᠵᠦᠭᠡᠷ᠂ ᠵᠦᠭᠡᠷ! ᠡᠨᠡ ᠪᠣᠭᠣᠳᠠᠯ ᠡᠮ ᠢ᠋ ᠤᠤᠭᠤᠴᠢᠬᠠ! ᠭᠡᠳ ᠲᠠᠰᠤ ᠬᠦᠢᠲᠡᠨ ᠪᠤᠯᠠᠭ ᠤ᠋ᠨ ᠤᠰᠤ ᠥᠭᠴᠦ ᠡᠮ ᠦ᠋ᠨ ᠬᠥᠯᠭᠡ ᠪᠣᠯᠭᠠᠪᠠ᠃
ᠨᠣᠮᠢᠨ ᠲᠡᠷᠡ ᠪᠣᠭᠣᠳᠠᠯ ᠲᠠᠢ ᠡᠮ ᠢ᠋ ᠯᠠᠮᠠᠬᠠᠢ ᠶ᠋ᠢᠨ ᠥᠭᠭᠦᠭᠰᠡᠨ ᠬᠦᠢᠲᠡᠨ ᠤᠰᠤ ᠪᠠᠷ ᠳᠠᠷᠤᠭᠤᠯᠵᠤ ᠤᠤᠭᠤᠭᠰᠠᠨ ᠳ᠋ᠤ᠌ ᠳᠣᠲᠣᠷᠠ ᠨᠢ ᠰᠡᠷᠢᠭᠦᠦ ᠣᠷᠬᠢᠭᠠᠳ ᠶᠠᠪᠤᠴᠢᠬᠠᠪᠠ᠃
一 ᠤᠳᠠᠬᠤ ᠦᠭᠡᠢ ᠨᠣᠢᠷ ᠴᠢᠨᠢ ᠬᠦᠷᠴᠦ ᠡᠪᠰᠢᠶᠡᠯᠭᠡᠬᠦ ᠪᠣᠢ ᠳᠠ! ᠨᠣᠢᠷ ᠬᠦᠷᠪᠡᠯ ᠡᠨᠳᠡ ᠨᠢᠭᠡ ᠤᠨᠲᠠᠭᠠᠳ ᠠᠪ! ᠰᠡᠷᠡᠬᠦᠯᠡᠷ ᠴᠢᠨᠢ ᠨᠢᠭᠡ ᠶᠠᠭᠤᠮᠠ ᠲᠠᠨᠢᠭᠳᠠᠬᠤ ᠪᠣᠢ ᠭᠡᠳ ᠮᠤᠬᠤᠷ ᠰᠢᠭᠢᠷᠡ ᠲᠡᠢ ᠭᠢᠴᠢᠢ ᠪᠡᠨ ᠳᠠᠭᠤᠳᠠᠵᠤ《ᠢᠷᠡ᠂ ᠡᠭᠦᠨ ᠢ᠋ ᠳᠣᠯᠢᠶᠠ!》 ᠭᠡᠬᠦ ᠳ᠋ᠦ᠍ ᠱ᠌ᠢᠷ ᠱᠣᠷ ᠬᠢᠬᠦ ᠵᠠᠪ ᠦᠭᠡᠢ ᠲᠡᠭᠦᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠡᠮᠦᠨᠡ ᠬᠣᠶᠠᠷ ᠰᠢᠭᠢᠷᠡ ᠨᠢ ᠮᠤᠬᠤᠷ ᠭᠢᠴᠢᠢ ᠴᠢᠨᠣᠠ ᠢᠷᠡᠵᠦ ᠱᠣᠩᠨᠣᠢᠪᠠ᠃
一 ᠡᠨᠡ ᠬᠡᠦᠬᠡᠨ ᠦ᠌ ᠨᠢᠭᠤᠷ ᠢ᠋ ᠰᠠᠢᠬᠠᠨ ᠳᠢᠭᠲᠡᠢ ᠳᠣᠯᠢᠶᠠᠵᠤ ᠥᠭ! ᠰᠢᠲᠠᠭᠰᠠᠨ ᠲᠠᠲᠠᠩᠬᠠᠢ ᠠᠷᠠᠰᠤ ᠶ᠋ᠢ ᠨᠢ ᠳᠠᠨᠠᠢᠲᠠᠯᠠ ᠳᠣᠯᠢᠶᠠ! ᠤᠤᠯ ᠤ᠋ᠨ ᠬᠢᠨᠢ ᠨᠢᠯᠬᠠᠰᠢᠶᠠᠷ ᠭᠤᠸᠠ ᠬᠡᠪ ᠲᠦ᠋ᠨᠢ ᠣᠷᠣᠲᠠᠯᠠ ᠳᠣᠯᠢᠶᠠ! ᠭᠡᠰᠡᠨ ᠳ᠋ᠦ᠍ ᠲᠡᠷᠡ ᠭᠢᠴᠢᠢ ᠰᠣᠶᠣᠭᠠᠲᠤ ᠲᠣᠮᠣ ᠠᠮᠠ ᠪᠠᠨ ᠠᠩᠭᠠᠯᠵᠠᠭᠤᠯᠤᠨ ᠡᠪᠰᠢᠶᠡᠵᠦ ᠠᠪᠤᠭᠠᠳ ᠨᠣᠮᠢᠨ ᠤ᠋ ᠰᠢᠲᠠᠩᠬᠠᠢ ᠠᠲᠤᠷᠢᠯᠳᠤᠭᠰᠠᠨ ᠨᠢᠭᠤᠷ ᠢ᠋ ᠳᠣᠯᠢᠶᠠᠵᠤ ᠡᠬᠢᠯᠡᠪᠡ᠃
ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠨᠣᠮᠢᠨ ᠬᠡᠦᠬᠡᠨ ᠡᠪᠰᠢᠶᠡᠯᠭᠡᠵᠦ ᠨᠣᠢᠷ ᠨᠢ ᠬᠦᠷᠪᠡ᠃ ᠬᠣᠶᠠᠷ ᠨᠢᠳᠦᠨ ᠦ᠌ ᠬᠢᠨᠢ ᠵᠣᠪᠬᠢ ᠨᠢ ᠠᠨᠢᠯᠳᠤᠭᠠᠳ ᠶᠠᠭ ᠲᠡᠰᠬᠦ ᠪᠡᠨ ᠪᠣᠯᠢᠪᠠ᠃ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠨᠣᠮᠢᠨ ᠤ᠋ ᠨᠣᠢᠷ ᠨᠢ ᠬᠦᠷᠦᠭᠰᠡᠨ ᠢ᠋ ᠦᠵᠡᠭᠡᠳ᠄
一 ᠵᠠ᠂ ᠣᠳᠣ ᠤᠨᠲᠠ᠂ ᠤᠨᠲᠠ! ᠪᠡᠶᠡ ᠪᠡᠨ ᠰᠠᠢᠬᠠᠨ ᠠᠮᠠᠷᠠᠭᠠᠵᠤ ᠲᠠᠪᠠᠲᠠᠢᠬᠠᠨ ᠨᠢᠭᠡ ᠤᠨᠲᠠᠭᠠᠳ ᠠᠪ! ᠭᠡᠰᠡᠨ ᠳ᠋ᠦ᠍ ᠨᠣᠮᠢᠨ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠶ᠋ᠢᠨ ᠤᠨᠲᠠᠭᠤᠯᠳᠠᠭ ᠡᠮ ᠢ᠋ ᠤᠤᠭᠤᠭᠠᠳ ᠪᠦᠪᠡᠢ ᠶ᠋ᠢᠨ ᠲᠠᠷᠨᠢ ᠶ᠋ᠢ ᠬᠦᠷᠲᠡᠭᠰᠡᠨ ᠰᠢᠭ ᠲᠡᠰᠬᠡᠯ ᠦᠭᠡᠢ ᠲᠤᠭ ᠨᠣᠢᠷ ᠲᠠᠭᠠᠨ ᠣᠷᠣᠪᠠ᠃
᠁
ᠬᠠᠮᠢᠭᠠ ᠴᠤ᠌ ᠶᠤᠮ ᠪᠤᠤ ᠮᠡᠳᠡ! ᠶᠠᠮᠠᠷ ᠨᠢᠭᠡᠨ ᠰᠣᠨᠢᠬᠠᠨ ᠭᠠᠵᠠᠷ ᠬᠦᠷᠦᠭᠡᠳ ᠣᠴᠢᠭᠰᠠᠨ ᠰᠢᠭ᠋᠃ ᠡᠭᠦᠯᠡ ᠴᠦ᠍ ᠰᠢᠭ ᠮᠠᠨᠠᠨ ᠴᠤ᠌ ᠰᠢᠭ᠋᠂ ᠮᠤᠰᠬᠢᠷᠠᠯᠳᠤᠨ ᠣᠷᠢᠶᠠᠯᠳᠤᠭᠰᠠᠨ ᠷᠠᠰᠢᠶᠠᠨ ᠪᠤᠯᠠᠭ ᠤ᠋ᠨ ᠤᠰᠤᠨ ᠳ᠋ᠤ᠌ ᠪᠡᠶᠡ ᠪᠡᠨ ᠤᠬᠢᠶᠠᠵᠤ ᠪᠠᠢᠨᠠ ᠭᠡᠵᠦ ᠵᠡᠭᠦᠳᠦᠯᠡᠪᠡ᠁
一 ᠵᠠ᠂ ᠴᠢ ᠡᠳᠦᠷ ᠡᠳᠦᠷ ᠡᠨᠳᠡ ᠢᠷᠡᠵᠦ ᠪᠡᠶᠡ ᠪᠡᠨ ᠤᠬᠢᠶᠠ! ᠤᠬᠢᠶᠠᠭᠰᠠᠭᠠᠷ ᠪᠠᠢᠲᠠᠯᠠ ᠬᠣᠨᠣᠭ ᠲᠣᠭᠠ ᠭᠦᠢᠴᠡᠵᠦ ᠨᠢᠭᠡ ᠡᠳᠦᠷ ᠪᠡᠶᠡ ᠡᠴᠡ ᠴᠢᠨᠢ ᠮᠠᠭᠤ ᠮᠠᠭᠤᠬᠠᠢ ᠰᠢᠲᠠᠩᠬᠠᠢ ᠲᠠᠲᠠᠩᠬᠠᠢ ᠬᠠᠢᠷᠰᠤ ᠰᠢᠪᠲᠤᠷᠠᠵᠤ ᠤᠨᠠᠬᠤ ᠪᠣᠯᠤᠨᠠ᠃ ᠲᠡᠭᠡᠪᠡᠯ ᠴᠢ ᠬᠣᠷᠸᠠ ᠳ᠋ᠤ᠌ ᠬᠣᠣᠰ ᠦᠭᠡᠢ ᠭᠤᠸᠠ ᠬᠡᠦᠬᠡᠨ ᠪᠣᠯᠵᠤ ᠬᠤᠪᠢᠷᠠᠨᠠ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠴᠢᠮᠠᠶ᠋ᠢ ᠳᠣᠭᠣᠭᠢᠯᠠᠵᠤ ᠳᠣᠷᠣᠮᠵᠢᠯᠠᠵᠤ ᠪᠠᠢᠭᠰᠠᠨ ᠬᠥᠮᠦᠰ ᠴᠢᠨᠦ ᠬᠠᠵᠠᠭᠤ ᠳ᠋ᠤ᠌ ᠢᠴᠢᠵᠦ ᠦᠬᠦᠨᠡ ᠭᠡᠳ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠬᠠᠳᠠ ᠴᠤᠤᠷᠢᠶᠳᠤᠲᠠᠯᠠ ᠢᠨᠢᠶᠡᠨᠡ᠃
一 ᠲᠡᠭᠡᠪᠡᠯ ᠶᠠᠮᠠᠷ ᠰᠠᠢᠬᠠᠨ ᠪᠣᠢ⁈ ᠪᠢ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠴᠢᠨᠢ ᠲᠡᠷᠡ ᠷᠠᠰᠢᠶᠠᠨ ᠳ᠋ᠤ᠌ ᠡᠳᠦᠷ ᠡᠳᠦᠷ ᠠᠯᠳᠠᠯ ᠦᠭᠡᠢ ᠤᠬᠢᠶᠠᠨᠠ᠃
一 ᠲᠡᠭᠡᠨᠡ ᠰᠢᠦ! ᠳᠡᠭᠡᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ! ᠲᠡᠭᠡᠪᠡᠴᠦ ᠵᠠᠷᠢᠮ ᠳ᠋ᠠᠭᠠᠨ ᠡᠨᠡ ᠷᠠᠰᠢᠶᠠᠨᠲᠤ ᠴᠡᠩᠬᠡᠷ ᠴᠣᠩᠬᠢᠶᠠᠯ ᠳ᠋ᠤ᠌ ᠨᠢᠭᠡ ᠠᠪᠤᠷᠭᠤ ᠨᠣᠭᠣᠭᠠᠨ ᠮᠣᠭᠠᠢ ᠲᠠᠭᠠᠷᠠᠯᠳᠤᠬᠤ ᠶᠤᠮ ᠠ᠋!
一 ᠮᠣᠭᠠᠢ ᠭᠡᠨᠡ ᠠ᠋?
— ᠲᠡᠢᠮᠦ ᠠ᠋᠂ ᠠᠪᠤᠷᠭᠤ ᠨᠣᠭᠣᠭᠠᠨ ᠮᠣᠭᠠᠢ᠂ ᠪᠠᠰᠠ ᠡᠪᠡᠷ ᠲᠡᠢ᠃
᠁
一 ᠲᠡᠭᠦᠨ ᠡᠴᠡ ᠪᠢᠲᠡᠭᠡᠢ ᠠᠶᠤ! ᠮᠣᠭᠠᠢ ᠠ᠋ᠴᠠ ᠠᠶᠤᠵᠤ ᠰᠣᠴᠢᠭᠠᠳ ᠳᠤᠲᠠᠭᠠᠵᠤ ᠴᠠᠭᠠᠰᠢ ᠪᠢᠲᠡᠭᠡᠢ ᠭᠦᠶᠦ! ᠨᠡᠩ ᠴᠦ᠍ ᠠᠶᠤᠵᠤ ᠪᠠᠯᠠᠭᠳᠠᠬᠤ ᠳ᠋ᠠᠭᠠᠨ ᠲᠡᠭᠦᠨ ᠢ᠋ ᠬᠣᠣᠷᠯᠠᠵᠤ ᠬᠥᠨᠥᠭᠡᠬᠦ ᠶ᠋ᠢ ᠤᠷᠤᠯᠳᠤᠵᠤ ᠪᠣᠯᠬᠤ ᠦᠭᠡᠢ᠃ ᠠᠵᠢᠭ ᠦᠭᠡᠢ ᠯᠡ ᠶᠠᠪᠤᠭᠠᠳ ᠪᠠᠢᠭᠠᠷᠠᠢ! ᠲᠡᠷᠡ ᠴᠢᠮᠠᠶ᠋ᠢ ᠶᠠᠭᠠᠬᠢᠬᠤ ᠴᠤ᠌ ᠦᠭᠡᠢ᠃ ᠴᠢ ᠬᠠᠷᠢᠨ ᠮᠢᠨᠦ ᠬᠡᠯᠡᠭᠰᠡᠨ ᠡᠴᠡ ᠵᠥᠷᠢᠴᠡᠵᠦ ᠠᠪᠤᠷᠭᠤ ᠨᠣᠭᠣᠭᠠᠨ ᠮᠣᠭᠠᠢ ᠠ᠋ᠴᠠ ᠠᠶᠤᠨ ᠳᠤᠲᠠᠭᠠᠵᠤ ᠰᠦᠢᠳ ᠪᠣᠯᠤᠭᠰᠠᠭᠠᠷ ᠲᠡᠷᠡ ᠴᠢᠮᠠᠶ᠋ᠢ ᠵᠢᠭᠰᠢᠵᠦ ᠦᠭᠡᠢ ᠬᠢᠨᠡ ᠰᠢᠦ! ᠲᠡᠷᠡ ᠠᠪᠤᠷᠭᠤ ᠮᠣᠭᠠᠢ ᠴᠢᠮᠠ ᠳ᠋ᠤ᠌ ᠥᠨᠢᠳᠡ ᠶ᠋ᠢᠨ ᠲᠦᠰᠢᠭ ᠪᠣᠯᠵᠤ ᠲᠡᠳᠬᠦᠬᠦ ᠶᠦᠮ! ᠶᠡᠷᠦ ᠡᠴᠡ ᠤᠷᠢᠲᠠᠵᠤ ᠴᠢᠮᠠ ᠳ᠋ᠤ᠌ ᠬᠣᠣᠷ ᠬᠥᠨᠥᠭᠡᠯ ᠲᠠᠷᠢᠬᠤ ᠦᠭᠡᠢ᠃ ᠶᠡᠷᠦ ᠨᠢ ᠭᠠᠭᠴᠠ ᠴᠢᠮᠠᠶ᠋ᠢ ᠢᠪᠡᠭᠡᠨ ᠡᠨᠡᠷᠢᠬᠦ ᠪᠡᠷ ᠵᠣᠭᠰᠣᠬᠤ ᠦᠭᠡᠢ᠂ ᠪᠠᠰᠠ ᠬᠠᠨ ᠮᠤᠨᠠ ᠶ᠋ᠢᠨ ᠠᠮᠢᠲᠠᠨ ᠵᠢᠷᠭᠤᠭᠠᠨ ᠵᠦᠢᠯ᠂ ᠡᠪᠡᠰᠦ ᠤᠷᠭᠤᠮᠠᠯ᠂ ᠮᠣᠳᠣ ᠦᠶᠡᠳᠡᠨ᠂ ᠷᠠᠬᠢᠨᠢ ᠴᠢᠬᠢᠨᠢ ᠪᠦᠭᠦᠳᠡ ᠶ᠋ᠢ ᠡᠨᠡᠷᠢᠨ ᠢᠪᠡᠭᠡᠵᠦ᠂ ᠪᠣᠷᠣᠭᠠᠨ ᠬᠤᠷᠠ ᠶ᠋ᠢ ᠴᠠᠭ ᠲᠤᠨᠢ ᠳᠠᠭᠤᠳᠠᠵᠤ ᠭᠠᠩ ᠬᠠᠭᠤᠷᠠᠢ ᠤᠰᠤ ᠴᠢᠭᠢᠭ ᠢ᠋ ᠲᠣᠬᠢᠷᠠᠭᠤᠯᠳᠠᠭ ᠯᠤᠤᠰ ᠤ᠋ᠨ ᠰᠠᠪᠳᠠᠭ ᠪᠤᠶᠤ!
一 ᠯᠤᠤᠰ ᠤ᠋ᠨ ᠰᠠᠪᠳᠠᠭ ᠭᠡᠨᠡ ᠊ᠤᠤ?
一 ᠲᠡᠢᠮᠦ᠃
一 ᠠᠯᠢ ᠳᠠᠯᠠᠢ ᠲᠠᠩᠭᠢᠰ ᠠ᠋ᠴᠠ ᠮᠣᠷᠢᠯᠠᠵᠤ ᠢᠷᠡᠭᠰᠡᠨ ᠯᠤᠤᠰ ᠤ᠋ᠨ ᠰᠠᠪᠳᠠᠭ ᠪᠣᠯᠴᠢᠬᠠᠪᠠ?
一 ᠴᠢ ᠡᠭᠦᠨ ᠢ᠋ ᠰᠣᠨᠢᠷᠬᠠᠵᠤ ᠪᠠᠢᠬᠤ ᠨᠢ ᠦᠯᠢᠭᠡᠷ ᠳᠣᠮᠣᠭ ᠢ᠋ ᠨᠢ ᠰᠣᠨᠣᠰᠬᠤ ᠰᠠᠨᠠᠭᠠᠲᠠᠢ ᠊ᠤᠤ?
一 ᠰᠣᠨᠣᠰᠤᠶᠠ! ᠲᠠ ᠨᠠᠳᠠ ᠬᠡᠯᠡᠭᠡᠳ ᠥᠭᠭᠦᠨᠡ ᠊ᠤᠤ?
一 ᠵᠠ ᠲᠡᠭᠡᠶᠡ! ᠭᠡᠳ ᠮᠥᠩᠭᠥᠨ ᠴᠠᠭᠠᠨ ᠰᠠᠬᠠᠯ ᠢ᠋ᠶ᠋ᠠᠨ ᠰᠢᠪᠲᠤᠷᠠᠵᠤ ᠠᠪᠤᠭᠠᠳ ᠦᠯᠢᠭᠡᠷ ᠢ᠋ᠶ᠋ᠡᠨ ᠶᠠᠷᠢᠵᠤ ᠡᠬᠢᠯᠡᠪᠡ᠃
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠬᠠᠨ ᠮᠤᠨᠠ ᠶ᠋ᠢᠨ ᠰᠢᠷᠠ ᠣᠷᠣᠢ ᠶ᠋ᠢᠨ ᠥᠪᠥᠷ ᠲᠦ᠍᠂ ᠬᠠᠳᠠ ᠲᠠᠢ ᠡᠩᠭᠡᠷ ᠦ᠋ᠨ ᠵᠢᠯᠠᠭᠠᠨ ᠳ᠋ᠤ᠌ ᠨᠢᠭᠡ ᠬᠠᠷᠠ ᠡᠷᠢᠶᠡᠨ ᠮᠣᠭᠠᠢ ᠪᠠᠢᠵᠠᠢ᠃ ᠲᠡᠷᠡ ᠪᠣᠯ ᠬᠠᠷᠠ ᠲᠠᠩᠭᠢᠰ ᠠ᠋ᠴᠠ ᠡᠨᠳᠡ ᠲᠣᠮᠢᠯᠠᠵᠤ ᠢᠷᠡᠭᠦᠯᠦᠭᠰᠡᠨ ᠯᠤᠤᠰ ᠤ᠋ᠨ ᠬᠦᠯᠦᠭ ᠦ᠋ᠨ ᠨᠢᠭᠡ᠂ ᠲᠡᠷᠡ ᠮᠣᠭᠠᠢ ᠬᠠᠨ ᠮᠤᠨᠠ ᠶ᠋ᠢᠨ ᠥᠪᠥᠷ ᠬᠠᠵᠠᠭᠤ᠂ ᠣᠢᠷᠠ ᠬᠠᠪᠢᠯᠳᠠᠭᠤ ᠨᠤᠲᠤᠭ ᠪᠡᠯᠴᠢᠭᠡᠷ ᠦ᠋ᠨ ᠤᠰᠤ ᠴᠢᠭᠢᠭ ᠢ᠋ ᠵᠣᠬᠢᠴᠠᠭᠤᠯᠵᠤ ᠥᠩ ᠰᠢᠮᠡᠯᠢᠭ ᠥᠨᠢᠷ ᠪᠠᠶᠠᠨ ᠪᠣᠯᠭᠠᠭᠰᠠᠨ ᠢ᠋ ᠬᠥᠮᠦᠰ ᠮᠡᠳᠡᠳᠡᠭ ᠦᠭᠡᠢ ᠪᠠᠢᠵᠠᠢ᠃ ᠲᠡᠷᠡ ᠠᠪᠤᠷᠭᠤ ᠮᠣᠭᠠᠢ ᠨᠢᠭᠡ ᠯᠤᠲᠤ ᠪᠠᠶᠠᠨ ᠠᠢᠯ ᠤ᠋ᠨ ᠵᠤᠵᠠᠭᠠᠨ ᠢᠮᠠᠭᠠᠨ ᠰᠦᠷᠦᠭ ᠡᠴᠡ ᠨᠢ ᠠᠯᠢ ᠲᠣᠮᠣ᠂ ᠲᠠᠷᠭᠤᠨ ᠢ᠋ ᠨᠢ ᠡᠳᠦᠷ ᠲᠦ᠍ ᠨᠢᠭᠡ ᠶ᠋ᠢ ᠰᠣᠷᠣᠵᠤ ᠢᠳᠡᠳᠡᠭ ᠪᠠᠢᠵᠠᠢ᠃ ᠭᠡᠷ ᠦ᠋ᠨ ᠡᠵᠡᠨ ᠨᠢ ᠶᠠᠪᠤᠭᠤᠯ ᠤ᠋ᠨ ᠬᠥᠮᠦᠨ ᠦ᠌ ᠬᠣᠪᠴᠢ ᠦᠭᠡᠨ ᠳ᠋ᠦ᠍ ᠣᠷᠣᠵᠤ ᠲᠡᠷᠡ ᠮᠣᠭᠠᠢ ᠶ᠋ᠢ ᠬᠥᠨᠥᠭᠡᠭᠰᠡᠨ ᠳ᠋ᠦ᠍ ᠠᠵᠢᠷᠭᠠᠨ ᠪᠣᠷᠣᠭᠠᠨ ᠣᠷᠣᠵᠤ ᠲᠣᠭᠰᠢᠨ ᠦᠶᠡᠷ ᠪᠠᠭᠤᠭᠠᠳ ᠲᠡᠷᠡ ᠪᠠᠶᠠᠨ ᠠᠢᠯ ᠢ᠋ ᠬᠣᠭ ᠦᠭᠡᠢ ᠠᠪᠴᠤ ᠶᠠᠪᠤᠵᠠᠢ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠯᠤᠤᠰ ᠤ᠋ᠨ ᠡᠵᠡᠨ ᠠᠭᠤᠷᠯᠠᠵᠤ ᠬᠠᠨ ᠮᠤᠨᠠ ᠶ᠋ᠢᠨ ᠨᠤᠲᠤᠭ ᠲᠤ᠌ ᠡᠯᠴᠢ ᠬᠦᠯᠦᠭ ᠲᠣᠮᠢᠯᠠᠬᠤ ᠪᠠᠨ ᠪᠣᠯᠢᠵᠤ ᠡᠨᠡ ᠨᠤᠲᠤᠭ ᠢ᠋ ᠭᠠᠩ ᠬᠠᠭᠤᠷᠠᠢ ᠪᠣᠯᠭᠠᠵᠤ ᠣᠷᠬᠢᠵᠠᠢ ᠭᠡᠨᠡ᠃
ᠬᠡᠵᠢᠶᠡ ᠬᠣᠢᠨᠠ《ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠶ᠋ᠢᠨ ᠮᠡᠷᠭᠡᠨ ᠭᠡᠭᠡᠨ᠂ ᠰᠦᠮᠡ ᠬᠡᠢᠳ ᠦ᠋ᠨ ᠢ᠋ᠶ᠋ᠡᠨ ᠳᠡᠭᠡᠳᠦ ᠭᠣᠣᠯ ᠢ᠋ ᠥᠭᠡᠳᠡᠯᠡᠵᠦ ᠶᠠᠪᠤᠨ ᠵᠦᠯᠭᠡᠯᠢᠭ ᠨᠣᠭᠣᠭᠠᠨ ᠭᠠᠵᠠᠷ ᠭᠡᠰᠡᠷ ᠰᠦᠮᠡ ᠪᠠᠢᠭᠤᠯᠵᠤ ᠲᠠᠪᠤᠨ ᠰᠠᠷᠠ ᠶ᠋ᠢᠨ ᠰᠢᠨᠡᠳ ᠢ᠋ᠶ᠋ᠡᠷ ᠯᠤᠤᠰ ᠤ᠋ᠨ ᠡᠵᠡᠨ ᠡᠴᠡ ᠪᠣᠷᠣᠭᠠᠨ ᠬᠤᠷᠠ ᠭᠤᠶᠤᠵᠤ ᠰᠦᠰᠦᠭᠯᠡᠨ ᠳᠠᠬᠢᠳᠠᠭ ᠪᠣᠯᠵᠠᠢ᠃ ᠰᠡᠭᠦᠯ ᠰᠡᠭᠦᠯ ᠳ᠋ᠡᠭᠡᠨ ᠪᠦᠷ ᠲᠠᠪᠤᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠲᠠᠪᠤᠨ ᠳ᠋ᠠᠭᠠᠨ ᠬᠤᠪᠢᠯᠭᠠᠨ ᠯᠠᠮᠠ ᠮᠡᠷᠭᠡᠨ ᠭᠡᠭᠡᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠮᠤᠨᠠ ᠬᠠᠢᠷᠬᠠᠨ ᠤ᠋ ᠬᠠᠮᠤᠭ ᠤ᠋ᠨ ᠥᠨᠳᠥᠷ ᠰᠠᠷᠢᠳᠠᠭ一 ᠰᠢᠷᠠ ᠣᠷᠣᠢ ᠳ᠋ᠤ᠌ ᠭᠠᠷᠴᠤ ᠳᠠᠬᠢᠯᠠᠭᠠ ᠦᠢᠯᠡᠳᠴᠦ ᠪᠣᠷᠣᠭᠠᠨ ᠬᠤᠷᠠ ᠭᠤᠶᠤᠳᠠᠭ ᠪᠣᠯᠤᠭᠰᠠᠨ ᠢ᠋ ᠮᠤᠨᠠ ᠬᠠᠨ ᠦᠵᠡᠭᠡᠳ ᠰᠡᠳᠬᠢᠯ ᠬᠥᠳᠡᠯᠵᠦ ᠯᠤᠤᠰ ᠤ᠋ᠨ ᠡᠵᠡᠨ ᠳ᠋ᠦ᠍《ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠶ᠋ᠢᠨ ᠮᠡᠷᠭᠡᠨ ᠭᠡᠭᠡᠨ ᠦ᠌ ᠦᠢᠯᠡ ᠵᠢᠷᠤᠮ ᠢ᠋ ᠦᠨᠡᠨ ᠮᠥᠨ ᠢ᠋ᠶ᠋ᠡᠷ ᠨᠢ ᠠᠢᠯᠠᠳᠬᠠᠭᠰᠠᠨ ᠳ᠋ᠤ᠌ ᠰᠢᠷᠠ ᠲᠠᠩᠭᠢᠰ ᠤ᠋ᠨ ᠯᠤᠤᠰ ᠤ᠋ᠨ ᠡᠵᠡᠨ ᠮᠤᠨᠠ ᠠᠭᠤᠯᠠᠨ ᠳ᠋ᠤ᠌ ᠯᠤᠤᠰ ᠤ᠋ᠨ ᠡᠯᠴᠢ ᠲᠣᠮᠢᠯᠠᠵᠤ ᠢᠷᠡᠭᠦᠯᠦᠭᠰᠡᠨ ᠭᠡᠨᠡ᠃
ᠨᠢᠭᠡ ᠡᠳᠦᠷ《ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠶ᠋ᠢᠨ ᠮᠡᠷᠭᠡᠨ ᠭᠡᠭᠡᠨ᠂ ᠭᠡᠭᠡᠨ ᠰᠠᠩ ᠵᠢᠰᠠ ᠶ᠋ᠢᠨ ᠣᠮᠪᠣ᠂ ᠨᠢᠷᠪᠠ᠂ ᠭᠡᠭᠡᠨ ᠯᠠᠪᠷᠤᠩ ᠤ᠋ᠨ ᠱᠠᠩᠽᠠᠳ᠂ ᠰᠣᠢᠪᠣᠨ ᠨᠠᠷ ᠲᠠᠭᠠᠨ᠄《 ᠥᠨᠥᠳᠥᠷ ᠵᠡᠭᠦᠨ ᠡᠮᠦᠨᠡ ᠵᠦᠭ ᠡᠴᠡ ᠡᠷᠬᠢᠮᠰᠦᠭ ᠬᠦᠨᠳᠦᠲᠡᠢ ᠵᠣᠴᠢᠨ ᠢᠷᠡᠨᠡ᠂ ᠲᠠ ᠨᠠᠷ ᠲᠦᠷᠭᠡᠬᠡᠨ ᠶᠠᠪᠤᠵᠤ ᠭᠡᠭᠡᠨ ᠯᠠᠪᠷᠤᠩ ᠤ᠋ᠨ ᠤᠯᠠᠭᠠᠨ ᠰᠢᠷᠠ ᠤᠭᠠᠯᠵᠠ ᠲᠠᠢ ᠨᠣᠭᠣᠭᠠᠨ ᠬᠥᠯᠲᠥᠷᠭᠡ ᠲᠡᠢ ᠭᠡᠷ ᠢ᠋ ᠴᠢᠭᠢᠭᠯᠢᠭ ᠰᠡᠷᠢᠭᠦᠨ ᠤᠷᠲᠤ ᠪᠣᠯᠭᠠᠵᠤ ᠪᠠᠷᠢᠭᠠᠳ᠂ ᠬᠦᠷᠢᠶᠡ ᠬᠠᠰᠢᠶᠠ ᠪᠠᠨ ᠭᠢᠯᠠ ᠴᠢᠯᠡ ᠪᠣᠯᠲᠠᠯᠠ ᠴᠡᠪᠡᠷᠯᠡᠨ᠂ ᠴᠢ ᠴᠤᠤ᠂ ᠬᠣᠭᠣᠯᠠ ᠬᠤᠰᠢ ᠪᠠᠨ ᠪᠡᠯᠡᠬᠡᠨ ᠪᠣᠯᠭᠠᠵᠤ᠂ ᠬᠦᠵᠢ ᠰᠠᠩ ᠤᠩᠭᠤᠰᠬᠠᠨ᠂ ᠵᠤᠯᠠ ᠲᠠᠬᠢᠯ ᠢ᠋ᠶ᠋ᠠᠨ ᠰᠡᠷᠭᠦᠭᠡᠨ᠂ ᠲᠡᠷᠡ ᠡᠷᠬᠢᠮᠰᠦᠭ ᠵᠣᠴᠢᠨ ᠢ᠋ ᠤᠭᠲᠤᠬᠤ ᠪᠠᠷ ᠪᠡᠯᠡᠳᠬᠡᠭᠡᠷᠡᠢ!》 ᠭᠡᠵᠡᠢ᠃ ᠲᠡᠭᠡᠭᠡᠳ ᠭᠡᠭᠡᠨ ᠯᠠᠪᠷᠤᠩ ᠤ᠋ᠨ ᠯᠠᠮᠠ ᠬᠤᠸᠠᠷᠠᠭ ᠨᠠᠷ ᠭᠡᠭᠡᠨ ᠬᠤᠪᠢᠯᠭᠠᠨ ᠤ᠋ ᠪᠠᠨ ᠵᠠᠬᠢᠭᠰᠠᠨ ᠶᠣᠰᠣ ᠪᠠᠷ ᠪᠦᠬᠦ ᠶᠠᠭᠤᠮᠠ ᠶ᠋ᠢ ᠪᠦᠷᠢᠨ ᠲᠡᠭᠦᠰ ᠪᠠᠵᠠᠭᠠᠴᠢᠬᠠᠭᠠᠳ ᠵᠡᠭᠦᠨ ᠡᠮᠦᠨᠡ ᠵᠦᠭ ᠤᠷᠤᠭᠤ ᠨᠢᠳᠦ ᠪᠡᠨ ᠬᠥᠬᠡᠷᠡᠲᠡᠯᠡ ᠬᠠᠷᠠᠭᠰᠠᠨ ᠪᠣᠯᠪᠠᠴᠤ ᠶᠠᠮᠠᠷ ᠴᠤ᠌ ᠬᠦᠨᠳᠦᠲᠦ ᠵᠣᠴᠢᠨ ᠭᠡᠮᠡᠷ ᠬᠥᠮᠦᠨ ᠬᠠᠷᠠ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ᠃ ᠨᠠᠷᠠ ᠬᠡᠯᠪᠡᠢᠵᠦ ᠭᠡᠭᠡᠨ ᠰᠠᠩ ᠤ᠋ᠨ ᠭᠡᠭᠦᠦ ᠲᠠᠯᠪᠢᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠵᠡᠭᠦᠨ ᠡᠮᠦᠨᠡ ᠴᠢᠨᠳᠠᠮᠤᠨᠢ ᠶ᠋ᠢᠨ ᠣᠪᠣᠭᠠ ᠶ᠋ᠢᠨ ᠴᠠᠭᠠᠭᠤᠷ ᠨᠣᠣᠷᠬᠠᠢ ᠳᠡᠪᠰᠡᠭ ᠦ᠋ᠨ ᠮᠤᠬᠤᠷ ᠬᠣᠰᠢᠭᠤ ᠶ᠋ᠢ ᠳᠤᠭᠤᠢᠯᠠᠵᠤ ᠬᠣᠶᠠᠷ ᠬᠥᠮᠦᠨ ᠦ᠌ ᠪᠠᠷᠠ ᠠᠢᠰᠤᠢ ᠭᠡᠨᠡ᠃ ᠣᠢᠷᠠᠲᠤᠭᠠᠳ ᠢᠷᠡᠬᠦᠯᠡᠷ ᠨᠣᠭᠣᠭᠠᠨ ᠲᠣᠷᠭᠠᠨ ᠨᠠᠪᠲᠠᠷᠬᠠᠢ ᠲᠡᠷᠯᠢᠭ ᠲᠡᠢ᠂ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠤᠯᠠᠭᠠᠨ ᠬᠣᠷᠭᠣᠢ ᠬᠥᠪᠡᠭᠡ ᠲᠡᠢ ᠤᠷᠠᠩᠬᠠᠢ ᠤᠤᠵᠢ ᠡᠮᠦᠰᠦᠭᠰᠡᠨ ᠨᠢᠭᠡ ᠶᠠᠳᠠᠷᠠᠭᠤᠬᠠᠨ ᠭᠤᠢᠷᠠᠨᠴᠢ ᠲᠥᠯᠥᠪ ᠲᠡᠢ ᠡᠮᠡᠭᠲᠡᠢ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠴᠠᠭᠠᠨ ᠡᠷᠢᠶᠡᠨ ᠳᠠᠯᠢᠩ ᠮᠥᠷᠥᠯᠡᠵᠦ᠂ ᠲᠡᠭᠦᠨ ᠢ᠋ ᠳᠠᠭᠠᠯᠳᠤᠨ ᠪᠠᠰᠠ ᠨᠢᠭᠡ ᠬᠦᠷᠡᠩ ᠤᠯᠠᠭᠠᠨ ᠴᠢᠷᠠᠢ ᠲᠠᠢ᠂ ᠬᠥᠬᠡ ᠮᠣᠷᠢ ᠬᠥᠲᠥᠯᠵᠦ ᠪᠡᠶᠡ ᠳ᠋ᠡᠭᠡᠨ ᠪᠠᠭᠠᠲᠤᠳ ᠤ᠋ᠨ ᠡᠮᠦᠰᠳᠡᠭ ᠬᠤᠶᠠᠭ ᠳᠤᠭᠤᠯᠠᠭᠠ ᠡᠮᠦᠰᠴᠦ ᠤᠷᠲᠤ ᠢᠯᠳᠦ ᠵᠡᠭᠦᠵᠦ᠂ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠬᠠᠷᠴᠠᠭᠠᠢ ᠰᠢᠪᠠᠭᠤ ᠳᠡᠷᠪᠡᠭᠦᠯᠦᠨ ᠲᠠᠢᠭᠠ ᠨᠣᠬᠠᠢ ᠳᠠᠭᠠᠭᠤᠯᠤᠭᠰᠠᠨ ᠰᠣᠨᠢᠨ ᠡᠲᠡᠭᠡᠳ ᠬᠣᠶᠠᠷ ᠬᠥᠮᠦᠨ《ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠶ᠋ᠢ ᠰᠢᠭᠤᠳ ᠴᠢᠭᠯᠡᠨ ᠬᠦᠷᠴᠦ ᠢᠷᠡᠭᠡᠳ᠄《ᠵᠠ᠂ ᠪᠢᠳᠡ ᠬᠣᠶᠠᠷ ᠮᠡᠷᠭᠡᠨ ᠭᠡᠭᠡᠨ ᠬᠤᠪᠢᠯᠭᠠᠨ ᠳ᠋ᠤ᠌ ᠪᠠᠷᠠᠳᠠᠬᠤ ᠪᠠᠷ ᠢᠷᠡᠯᠡ》 ᠭᠡᠪᠡ᠃ ᠡᠢᠨ ᠬᠦ᠌ ᠯᠠᠮᠠ ᠨᠠᠷ ᠰᠦᠢᠳ ᠪᠣᠯᠤᠨ ᠰᠠᠨᠳᠤᠷᠴᠤ ᠱᠠᠯᠠᠪᠬᠠᠨ ᠭᠡᠭᠡᠨ ᠳ᠋ᠦ᠍ ᠭᠦᠶᠦᠵᠦ ᠣᠴᠢᠭᠠᠳ《ᠲᠡᠢᠮᠦ ᠲᠡᠢᠮᠦ ᠰᠣᠨᠢᠬᠠᠨ ᠬᠣᠶᠠᠷ ᠬᠥᠮᠦᠨ ᠰᠦᠮᠡ ᠶ᠋ᠢᠨ ᠡᠭᠦᠳᠡᠨ ᠳᠡᠭᠡᠷᠡ ᠢᠷᠡᠭᠡᠳ ᠪᠠᠢᠨᠠ᠃ ᠭᠡᠭᠡᠨ ᠲᠠᠨ ᠲᠠᠢ ᠪᠠᠷᠠᠭᠳᠠᠬᠤ ᠶᠤᠮ ᠭᠡᠨᠡ》 ᠭᠡᠵᠦ ᠳᠠᠮᠵᠢᠭᠤᠯᠤᠭᠰᠠᠨ ᠳ᠋ᠤ᠌ ᠭᠡᠭᠡᠨ ᠮᠡᠷᠭᠡᠨ᠄《ᠵᠠ᠂ ᠡᠨᠡ ᠪᠣᠯ ᠪᠢᠳᠡᠨᠦᠰ ᠦ᠋ᠨ ᠤᠭᠲᠤᠬᠤ ᠡᠷᠬᠢᠮᠰᠦᠭ ᠬᠦᠨᠳᠦᠲᠦ ᠵᠣᠴᠢᠨ ᠮᠥᠨ! ᠲᠠᠨᠤᠰ ᠪᠤᠰᠢᠭᠤᠬᠠᠨ ᠶᠠᠪᠤᠵᠤ ᠭᠤᠷᠪᠠᠨ ᠴᠠᠭᠠᠨ᠂ ᠭᠤᠷᠪᠠᠨ ᠠᠮᠲᠠᠲᠠᠨ᠂ ᠭᠤᠷᠪᠠᠨ ᠵᠢᠮᠢᠰ ᠢ᠋ᠶ᠋ᠡᠷ ᠨᠠᠢᠷᠠᠭᠤᠯᠤᠭᠰᠠᠨ ᠲᠠᠷᠠᠭ᠂ ᠠᠮᠤᠰᠤ᠂ ᠰᠦ ᠲᠡᠢ ᠴᠠᠢ ᠪᠡᠯᠡᠳᠬᠡᠵᠦ ᠮᠢᠨᠦ ᠯᠠᠪᠷᠤᠩ ᠳ᠋ᠤ᠌ ᠠᠪᠠᠴᠢᠵᠤ ᠰᠠᠢᠲᠤᠷ ᠵᠣᠴᠢᠯᠠᠵᠤ ᠪᠠᠢᠭᠠᠷᠠᠢ!》 ᠭᠡᠵᠦ ᠠᠢᠯᠠᠳᠬᠠᠪᠠ᠃ ᠲᠡᠢᠨ ᠬᠦ᠌ ᠯᠠᠮᠠ ᠬᠤᠸᠠᠷᠠᠭ᠂ ᠱᠠᠪᠢ ᠨᠠᠷ ᠨᠢ ᠭᠡᠭᠡᠨ ᠦ᠌ ᠪᠡᠨ ᠠᠢᠯᠠᠳᠤᠭᠰᠠᠨ ᠢ᠋ᠶ᠋ᠠᠷ ᠬᠣᠶᠠᠷ ᠰᠣᠨᠢᠬᠠᠨ ᠭᠡᠢᠴᠢᠨ ᠢ᠋ ᠮᠠᠰᠢᠳᠠ ᠬᠦᠨᠳᠦᠯᠡᠨ ᠵᠣᠴᠢᠯᠠᠵᠠᠢ ᠭᠡᠨᠡ᠃ ᠵᠣᠴᠢᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠨᠥᠭᠦᠭᠡ ᠪᠠᠭᠠᠲᠤᠷ ᠵᠠᠩᠵᠤᠨ ᠰᠢᠭ᠋ ᠲᠥᠯᠥᠪᠲᠡᠢ ᠬᠦᠨᠳᠦᠲᠦ ᠵᠣᠴᠢᠨ ᠨᠢ᠄《ᠵᠠ᠂ ᠮᠢᠨᠦ ᠶᠠᠪᠤᠬᠤ ᠴᠠᠭ ᠪᠣᠯᠤᠯᠠ!》 ᠭᠡᠳ ᠬᠥᠬᠡ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ ᠮᠡᠷᠭᠡᠨ ᠭᠣᠣᠯ ᠢ᠋ ᠥᠭᠡᠳᠡᠯᠡᠨ ᠣᠮᠣᠭᠯᠠᠩ ᠰᠦᠷᠲᠡᠢ ᠶᠠᠪᠤᠭᠠᠳ ᠦᠭᠴᠢᠬᠡᠵᠡᠢ᠃
ᠪᠦᠷᠦᠢ ᠪᠣᠯᠵᠤ᠂ ᠳ᠋ᠧᠩ ᠠᠰᠠᠭᠠᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠮᠡᠷᠭᠡᠨ ᠭᠡᠭᠡᠨ ᠡᠨᠡ ᠬᠦ᠌ ᠬᠣᠴᠣᠷᠤᠭᠰᠠᠨ ᠰᠣᠨᠢᠨ ᠡᠷᠬᠢᠮᠰᠦᠭ ᠵᠣᠴᠢᠨ᠂ ᠶᠠᠳᠠᠷᠠᠭᠤᠬᠠᠨ ᠵᠠᠯᠠᠭᠤ ᠡᠮᠡᠭᠲᠡᠢ ᠶ᠋ᠢ ᠤᠯᠠᠭᠠᠨ ᠰᠢᠷᠠ ᠨᠣᠭᠣᠭᠠᠨ ᠬᠥᠯᠲᠥᠷᠭᠡ ᠲᠡᠢ ᠥᠷᠥᠭᠡᠨ ᠳ᠋ᠡᠭᠡᠨ ᠤᠷᠢᠵᠤ ᠬᠦᠨᠳᠦ ᠵᠣᠴᠢᠯᠠᠭᠠ ᠬᠢᠵᠦ ᠬᠣᠶᠠᠭᠤᠯᠠ ᠰᠡᠳᠬᠢᠯ ᠲᠠᠭᠠᠷᠠᠨ ᠦᠭᠡ ᠵᠣᠭᠣᠭ ᠨᠡᠢᠯᠡᠮᠵᠢᠲᠡᠢ ᠰᠥᠨᠢᠵᠢᠨ ᠳᠦᠩᠭᠢᠨᠡᠲᠡᠯᠡ ᠶᠠᠷᠢᠯᠴᠠᠪᠠ ᠭᠡᠨᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠨᠢᠭᠡ ᠨᠢᠷᠪᠠ ᠯᠠᠮᠠ ᠮᠠᠭᠤᠬᠠᠢ ᠰᠡᠵᠢᠭ ᠲᠥᠷᠥᠵᠦ᠄《ᠮᠠᠨ ᠤ᠋ ᠭᠡᠭᠡᠨ ᠯᠠᠮᠠᠬᠠᠢ ᠡᠨᠡ ᠰᠣᠨᠢᠬᠠᠨ ᠡᠮᠡᠭᠲᠡᠢ ᠲᠡᠢ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠲᠡᠯᠡ ᠪᠡᠨ ᠰᠥᠨᠢ ᠳᠦᠯᠢ ᠥᠩᠭᠡᠷᠡᠲᠡᠯᠡ ᠶᠠᠷᠢᠯᠴᠠᠵᠤ ᠠᠮᠠᠷᠠᠭᠯᠠᠬᠤ ᠨᠢ ᠪᠣᠢ?》 ᠭᠡᠳ ᠡᠭᠦᠳᠡᠨ ᠦ᠌ ᠵᠠᠪᠰᠠᠷ ᠢ᠋ᠶ᠋ᠠᠷ ᠰᠡᠮᠡᠭᠡᠷᠬᠡᠨ ᠱᠠᠭᠠᠢᠵᠤ ᠦᠵᠡᠭᠰᠡᠨ ᠳ᠋ᠦ᠍ ᠨᠢᠭᠡᠨ ᠠᠪᠤᠷᠭᠤ ᠪᠦᠳᠦᠭᠦᠨ ᠨᠣᠭᠣᠭᠠᠨ ᠮᠣᠭᠠᠢ ᠭᠡᠭᠡᠨ ᠯᠠᠮᠠᠬᠠᠢ ᠶ᠋ᠢᠨ ᠰᠢᠷᠡᠭᠡᠨ ᠦ᠌ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤᠨᠢ ᠤᠭᠠᠯᠵᠠᠯᠠᠨ ᠬᠡᠪᠲᠡᠵᠦ᠂ ᠮᠡᠷᠭᠡᠨ ᠭᠡᠭᠡᠨ ᠯᠠᠮᠠᠬᠠᠢ ᠵᠡᠭᠦᠨ ᠲᠠᠯᠠ ᠳ᠋ᠤᠨᠢ ᠮᠠᠨᠢ ᠶ᠋ᠢᠨ ᠡᠷᠢᠭᠡ ᠪᠡᠨ ᠪᠥᠮᠪᠥᠷᠢᠭᠦᠯᠦᠨ ᠢᠮᠡᠷᠴᠦ ᠮᠠᠰᠢᠳᠠ ᠲᠥᠪᠯᠡᠭᠦᠨ ᠢᠨᠢᠶᠡᠮᠰᠦᠭᠯᠡᠨ ᠨᠢᠭᠡ ᠶᠠᠭᠤᠮᠠ ᠶᠠᠷᠢᠵᠤ ᠰᠠᠭᠤᠨᠠ᠃ ᠮᠠᠷᠭᠠᠲᠤᠷ ᠤ᠋ᠨ ᠬᠢᠨᠢ ᠥᠷᠯᠥᠭᠡ ᠡᠷᠲᠡ ᠥᠩᠭᠡᠷᠡᠭᠴᠢ ᠰᠥᠨᠢ ᠭᠡᠷ ᠦ᠋ᠨ ᠡᠭᠦᠳᠡᠨ ᠦ᠌ ᠵᠠᠪᠰᠠᠷ ᠢ᠋ᠶ᠋ᠠᠷ ᠰᠡᠮᠡᠭᠡᠷᠬᠡᠨ ᠱᠠᠭᠠᠢᠭᠰᠠᠨ ᠲᠡᠷᠡ ᠨᠢᠷᠪᠠ ᠯᠠᠮᠠ ᠶ᠋ᠢᠨ ᠬᠣᠶᠠᠷ ᠨᠢᠳᠦ ᠨᠢ ᠰᠣᠬᠣᠷᠠᠴᠢᠬᠠᠵᠠᠢ ᠭᠡᠨᠡ᠃
ᠮᠡᠷᠭᠡᠨ ᠭᠡᠭᠡᠨ ᠲᠡᠷᠡ ᠬᠦ᠌ ᠡᠷᠬᠢᠮᠰᠦᠭ ᠵᠣᠴᠢᠨ ᠢ᠋ᠶ᠋ᠠᠨ ᠵᠣᠴᠢᠯᠠᠵᠤ ᠮᠡᠷᠭᠡᠨ ᠭᠣᠣᠯ ᠢ᠋ ᠥᠭᠡᠳᠡᠯᠡᠭᠦᠯᠵᠦ ᠵᠦᠯᠭᠡᠲᠦ ᠨᠣᠭᠣᠭᠠᠨ ᠭᠠᠵᠠᠷ ᠬᠦᠷᠲᠡᠯᠡ ᠦᠳᠡᠵᠦ ᠮᠣᠷᠳᠠᠭᠤᠯᠤᠭᠠᠳ ᠭᠡᠰᠡᠷ ᠰᠦᠮᠡ ᠶ᠋ᠢᠨ ᠶᠡᠨᠳᠡᠷ ᠲᠦ᠍ ᠬᠦᠨᠳᠦᠲᠡᠢ ᠶᠣᠰᠣ ᠬᠢᠵᠦ ᠰᠠᠯᠤᠯᠴᠠᠵᠠᠢ᠃ ᠲᠡᠷᠡ ᠬᠦ᠌ ᠨᠠᠪᠲᠠᠷᠬᠠᠢ ᠨᠣᠭᠣᠭᠠᠨ ᠲᠡᠷᠯᠢᠭ ᠲᠡᠢ ᠡᠮᠡᠭᠲᠡᠢ ᠴᠠᠭᠠᠰᠢ ᠮᠡᠷᠭᠡᠨ ᠭᠣᠣᠯ ᠢ᠋ᠶ᠋ᠠᠷ ᠥᠭᠰᠥᠨ ᠮᠡᠷᠭᠡᠨ ᠳᠠᠪᠠᠭᠠᠨ ᠤ᠋ ᠳᠣᠣᠷᠠ ᠰᠡᠷᠮᠡᠭᠦᠬᠡᠨ ᠭᠠᠵᠠᠷ ᠲᠤ᠌ ᠨᠢᠭᠡ ᠦᠳᠡᠯᠡᠭᠡᠳ ᠦᠳᠡᠰᠢ ᠪᠣᠯᠬᠤ ᠳ᠋ᠤ᠌ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠠᠷᠤ ᠳ᠋ᠠᠬᠢ ᠡᠷᠲᠡᠨ ᠦ᠌ ᠬᠠᠷᠢᠶᠠᠯ ᠢ᠋ᠶ᠋ᠠᠷ ᠪᠠᠷᠠᠭᠤᠨ ᠭᠠᠵᠠᠷ ᠠ᠋ᠴᠠ ᠵᠡᠭᠦᠨᠰᠢ ᠨᠡᠭᠦᠳᠡᠯᠯᠡᠵᠦ᠂ ᠵᠡᠭᠦᠨ ᠭᠠᠵᠠᠷ ᠤ᠋ᠨ ᠬᠠᠷᠠᠴᠢᠨ ᠨᠤᠲᠤᠭ ᠢ᠋ ᠬᠣᠣᠷᠯᠠᠬᠤ ᠪᠠᠷ ᠰᠢᠯᠵᠢᠵᠦ ᠪᠠᠢᠭᠰᠠᠨ ᠡᠯᠡᠰᠦᠨ ᠠᠭᠤᠯᠠᠨ ᠤ᠋《ᠭᠦᠶᠦᠩ》 ᠭᠡᠰᠡᠨ ᠭᠠᠵᠠᠷ ᠲᠤ᠌ ᠨᠢᠭᠡ ᠬᠣᠨᠣᠭᠠᠳ ᠳᠠᠷᠠᠭᠠ ᠡᠳᠦᠷ ᠲᠤᠨᠢ ᠮᠢᠩᠭᠠᠨ ᠲᠠᠯᠠ ᠠᠷᠤ ᠠᠭᠤᠯᠠᠨ ᠳ᠋ᠠᠬᠢ《ᠰᠢᠲᠦᠭᠡᠨ ᠰᠦᠮᠡ 》 ᠪᠡᠷ ᠨᠢᠭᠡ ᠡᠷᠭᠢᠴᠡᠵᠦ ᠠᠪᠤᠭᠠᠳ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠴᠢᠳᠬᠤᠯᠠᠩ ᠤ᠋ᠨ ᠴᠡᠩᠬᠡᠷ ᠴᠣᠩᠬᠢᠶᠠᠯ ᠬᠠᠪᠢ ᠳ᠋ᠤ᠌ ᠨᠤᠲᠤᠭᠰᠢᠵᠠᠢ ᠭᠡᠨᠡ᠃
ᠲᠡᠷᠡ ᠨᠠᠪᠲᠠᠷᠬᠠᠢ ᠲᠡᠷᠯᠢᠭ ᠲᠡᠢ ᠡᠮᠡᠭᠲᠡᠢ ᠥᠭᠡᠷᠡ ᠬᠥᠮᠦᠨ ᠪᠢᠰᠢ᠂ ᠬᠠᠷᠢᠨ ᠥᠨᠥ ᠯᠤᠤᠰ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠨᠣᠭᠣᠭᠠ ᠯᠤᠤᠰ ᠤ᠋ᠨ ᠬᠠᠭᠠᠨ ᠱᠠᠵᠢᠨ ᠠᠮᠢᠲᠠᠨ ᠳ᠋ᠤ᠌ ᠲᠤᠰᠠ ᠬᠦᠷᠭᠡᠬᠦ ᠶ᠋ᠢᠨ ᠲᠤᠯᠠᠳᠠ ᠮᠡᠷᠭᠡᠨ ᠭᠡᠭᠡᠨ ᠦ᠌ ᠪᠣᠷᠣᠭᠠᠨ ᠬᠤᠷᠠ ᠭᠤᠶᠤᠨ ᠳᠠᠭᠠᠳᠬᠠᠳᠠᠭ ᠲᠤ᠌ ᠰᠡᠳᠬᠢᠯ ᠬᠥᠳᠡᠯᠵᠦ《ᠲᠠᠪᠤᠨ ᠴᠥᠪ ᠦ᠋ᠨ ᠴᠠᠭ》 ᠲᠤ᠌ ᠤᠰᠤ ᠴᠣᠩᠬᠢᠶᠠᠯ ᠵᠠᠰᠠᠵᠤ᠂ ᠴᠢᠭᠢᠭ ᠬᠤᠷᠠ ᠵᠣᠬᠢᠴᠠᠭᠤᠯᠬᠤ ᠪᠠᠷ ᠲᠣᠮᠢᠯᠠᠵᠤ ᠢᠷᠡᠭᠦᠯᠦᠭᠰᠡᠨ ᠡᠯᠴᠢ ᠶᠦᠮ᠃ ᠡᠨᠡ ᠬᠦ᠌ ᠴᠢᠮᠡᠭᠡ ᠪᠡᠷ ᠭᠠᠵᠠᠷ ᠨᠤᠲᠤᠭ ᠊ ᠠᠭᠤᠯᠠ ᠰᠠᠬᠢᠭᠤᠯᠰᠤᠨ ᠤ᠋ ᠡᠵᠡᠨ ᠬᠠᠨ ᠮᠤᠨᠠ ᠣᠯᠵᠤ ᠮᠡᠳᠡᠭᠡᠳ ᠲᠡᠷᠡ ᠢᠷᠡᠭᠦᠯᠦᠭᠰᠡᠨ ᠡᠯᠴᠢ ᠲᠡᠢ ᠤᠷᠢᠲᠠᠵᠤ ᠠᠭᠤᠯᠵᠠᠭᠠᠳ ᠲᠡᠭᠦᠨ ᠢ᠋ ᠳᠠᠭᠠᠭᠤᠯᠵᠤ ᠮᠡᠷᠭᠡᠨ ᠭᠡᠭᠡᠨ ᠳ᠋ᠦ᠍ ᠠᠭᠤᠯᠵᠠᠭᠤᠯᠤᠭᠰᠠᠨ ᠨᠢ ᠲᠡᠷᠡ ᠪᠠᠢᠵᠠᠢ᠃ ᠲᠡᠢᠨ ᠬᠦ᠌《ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠶ᠋ᠢᠨ ᠮᠡᠷᠭᠡᠨ ᠭᠡᠭᠡᠨ ᠡᠨᠡ ᠬᠦ᠌ ᠡᠷᠬᠢᠮᠰᠦᠭ ᠵᠣᠴᠢᠨ ᠢ᠋ ᠮᠠᠰᠢᠳᠠ ᠬᠦᠨᠳᠦᠯᠡᠨ ᠳᠡᠭᠡᠳᠦᠯᠡᠵᠦ ᠱᠠᠵᠢᠨ ᠠᠮᠢᠲᠠᠨ ᠤ᠋ ᠲᠤᠰᠠ ᠶ᠋ᠢᠨ ᠲᠤᠯᠠᠳᠠ《ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠶ᠋ᠢᠨ ᠣᠯᠠᠨ ᠪᠤᠷᠰᠠᠩ ᠬᠤᠸᠠᠷᠠᠭ ᠪᠠ ᠰᠦᠰᠦᠭᠲᠡᠨ ᠱᠠᠪᠢ ᠨᠠᠷ ᠤ᠋ᠨ ᠢᠳᠡᠬᠦ ᠬᠡᠷᠡᠭᠯᠡᠬᠦ ᠤᠰᠤ ᠶ᠋ᠢ ᠬᠡᠵᠢᠶᠡᠳᠡ ᠲᠠᠲᠠᠯ ᠦᠭᠡᠢ ᠬᠠᠩᠭᠠᠵᠤ᠂ ᠬᠠᠨ ᠮᠤᠨᠠ ᠶ᠋ᠢᠨ ᠨᠤᠲᠤᠭ ᠪᠡᠯᠴᠢᠭᠡᠷ᠂ ᠤᠷᠠᠳ ᠬᠦᠩ ᠦ᠋ᠨ ᠥᠩ ᠥᠷᠭᠡᠨ ᠪᠡᠯᠴᠢᠭᠡᠷ ᠨᠤᠲᠤᠭ ᠲᠤ᠌ ᠬᠤᠷᠠ ᠪᠣᠷᠣᠭᠠᠨ ᠢ᠋ ᠲᠡᠩᠴᠡᠭᠦᠨ ᠪᠠᠢᠯᠭᠠᠬᠤ᠂ ᠪᠠᠰᠠ ᠮᠡᠷᠭᠡᠨ ᠭᠣᠣᠯ ᠤ᠋ᠨ ᠤᠷᠤᠰᠬᠠᠯ ᠤᠰᠤ ᠪᠠ《ᠰᠢᠲᠦᠭᠡᠨ ᠰᠦᠮᠡ》 ᠶ᠋ᠢᠨ ᠠᠷᠤ ᠳ᠋ᠠᠬᠢ ᠰᠢᠲᠦᠭᠡᠨ ᠠᠭᠤᠯᠠᠨ ᠤ᠋ ᠤᠰᠤ ᠶ᠋ᠢ ᠤᠨᠳᠤᠷᠤᠭᠠᠳ ᠪᠠᠷᠠᠰᠢ ᠦᠭᠡᠢ ᠳᠣᠨᠣᠯᠵᠠᠭᠠᠳ ᠪᠠᠢᠬᠤ ᠪᠠᠷ ᠶᠠᠷᠢᠯᠴᠠᠨ ᠲᠣᠭᠲᠠᠵᠠᠢ᠃ ᠲᠡᠢᠨ ᠬᠦ᠌ ᠨᠣᠭᠣᠭᠠᠨ ᠯᠤᠤᠰ ᠤ᠋ᠨ ᠬᠠᠭᠠᠨ ᠤ᠋ ᠡᠯᠴᠢ ᠶ᠋ᠢᠨ ᠠᠩᠬᠠ ᠠᠮᠠᠷᠠᠭᠰᠠᠨ ᠭᠠᠵᠠᠷ ᠲᠤᠨᠢ ᠨᠣᠭᠣᠭᠠᠨ ᠪᠤᠯᠠᠭ ᠣᠨᠳᠣᠷᠴᠤ᠂ ᠲᠡᠷᠡ ᠪᠤᠯᠠᠭ ᠢ᠋《ᠨᠣᠭᠣᠭᠠᠨ ᠪᠤᠯᠠᠭ》 ᠭᠡᠵᠦ᠂ ᠦᠳᠡᠯᠡᠭᠰᠡᠨ ᠰᠡᠷᠮᠡᠭᠦᠬᠡᠨ ᠭᠠᠵᠠᠷ ᠲᠤᠨᠢ ᠪᠥᠭᠡᠷᠡ ᠪᠤᠯᠠᠭ ᠪᠤᠷᠭᠢᠯᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠭᠠᠵᠠᠷ ᠢ᠋《ᠪᠥᠭᠡᠷᠡ ᠪᠤᠯᠠᠭ》 ᠭᠡᠮᠡᠨ ᠨᠡᠷᠡᠢᠳᠴᠦ᠂ ᠠᠷᠤ ᠡᠯᠡᠰᠦᠨ ᠠᠭᠤᠯᠠᠨᠠ ᠬᠣᠨᠣᠭᠯᠠᠭᠰᠠᠨ ᠳ᠋ᠤ᠌ ᠲᠡᠨᠳᠡ ᠬᠥᠶᠦᠭ ᠦ᠋ᠨ ᠪᠦᠷᠢᠳᠦ ᠡᠭᠦᠰᠴᠦ ᠲᠡᠷᠡ ᠭᠠᠵᠠᠷ ᠢ᠋《ᠭᠦᠶᠦᠩ ᠦ᠋ᠨ ᠪᠦᠷᠢᠳᠦ》 ᠭᠡᠵᠦ ᠨᠡᠷᠡᠢᠳᠦᠭᠰᠡᠨ ᠭᠡᠨᠡ᠃
᠁
ᠨᠢᠭᠡ ᠤᠨᠲᠠᠭᠠᠳ ᠰᠡᠷᠡᠬᠦᠯᠡᠷ ᠮᠠᠷᠭᠠᠲᠤᠷ ᠥᠷᠯᠥᠭᠡ ᠶ᠋ᠢᠨ ᠬᠢᠨᠢ ᠡᠷᠲᠡ ᠨᠠᠷᠠ ᠬᠠᠳᠠᠨ ᠬᠣᠩᠭᠢᠯ ᠢ᠋ ᠳᠤᠯᠠᠢᠲᠠᠯᠠ ᠭᠡᠷᠡᠯᠲᠦᠭᠦᠯᠵᠡᠢ᠃
一 ᠡᠨᠳᠡ ᠤᠨᠲᠠᠵᠤ ᠬᠠᠨᠤᠭᠠᠳ ᠠᠮᠠᠷᠠᠭᠰᠠᠨ ᠪᠣᠯ ᠵᠣᠷᠢᠭᠰᠠᠨ ᠲᠡᠷᠡ ᠭᠠᠵᠠᠷ ᠲᠠᠭᠠᠨ ᠶᠠᠪᠤ᠃ ᠲᠡᠨᠳᠡ ᠴᠢᠨᠦ ᠬᠦᠰᠡᠭᠰᠡᠨ ᠰᠠᠨᠠᠭᠰᠠᠨ ᠶᠠᠭᠤᠮᠠ ᠴᠢᠨᠢ ᠲᠡᠷᠡ ᠶᠣᠰᠣᠭᠠᠷ ᠪᠡᠶᠡᠯᠡᠬᠦ ᠪᠣᠢ ᠭᠡᠵᠦ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠬᠡᠯᠡᠪᠡᠯ ᠨᠣᠮᠢᠨ᠄
一 ᠵᠠ᠂ ᠮᠡᠳᠡᠯᠡ! ᠮᠢᠨᠦ ᠨᠢᠭᠤᠷ ᠴᠢᠷᠠᠢ ᠨᠢᠭᠡ ᠯᠡ ᠣᠨᠳᠣᠣ ᠪᠣᠯᠴᠢᠬᠠᠭᠰᠠᠨ ᠰᠢᠭ᠋ ᠶᠦᠮ ᠠ᠋ ᠁ ᠭᠡᠵᠡᠢ᠃
一 ᠵᠥᠪ᠃ ᠲᠡᠭᠡᠭᠡᠳ ᠲᠡᠷᠡ ᠴᠡᠩᠬᠡᠷ ᠴᠣᠩᠬᠢᠶᠠᠯ ᠤ᠋ᠨ ᠤᠰᠤᠨ ᠳ᠋ᠤ᠌ ᠤᠬᠢᠶᠠᠭᠠᠳ ᠯᠠ ᠪᠠᠢᠪᠠᠯ ᠤᠯᠠᠮ ᠴᠤ᠌ ᠭᠣᠶᠣ ᠰᠠᠢᠬᠠᠨ ᠪᠣᠯᠤᠨᠠ᠃ ᠲᠡᠷᠡ ᠨᠠᠪᠲᠠᠩ ᠰᠠᠪᠲᠠᠩ ᠤᠷᠠᠩᠬᠠᠢ ᠲᠡᠷᠯᠢᠭ ᠢ᠋ᠶ᠋ᠡᠨ ᠣᠷᠭᠢ! ᠡᠬᠡ ᠶ᠋ᠢᠨ ᠤᠮᠠᠢ ᠠ᠋ᠴᠠ ᠪᠠᠨ ᠡᠨᠡ ᠬᠣᠷᠸᠠ ᠳ᠋ᠤ᠌ ᠢᠷᠡᠬᠦ ᠳ᠋ᠡᠭᠡᠨ ᠴᠢ ᠶᠠᠭᠠᠬᠢᠵᠤ ᠢᠷᠡᠭᠰᠡᠨ ᠪᠣᠯ ᠮᠥᠨ ᠲᠡᠭᠡᠵᠦ ᠯᠡ ᠶᠠᠪᠤ! ᠲᠡᠷᠡ ᠪᠣᠯ ᠬᠠᠮᠤᠭ ᠤ᠋ᠨ ᠴᠡᠪᠡᠷ ᠲᠣᠬᠢᠯᠢᠭ ᠭᠬᠢᠷ ᠦᠭᠡᠢ ᠠᠷᠢᠭᠤᠨ《ᠬᠤᠪᠴᠠᠯᠠᠯ》 ᠪᠤᠶᠤ᠃ ᠪᠡᠶᠡ ᠪᠡᠨ ᠬᠠᠭᠤᠷᠴᠤ ᠪᠤᠰᠤᠳ ᠤ᠋ᠨ ᠨᠢᠳᠦ ᠶ᠋ᠢ ᠬᠠᠯᠬᠠᠯᠠᠭᠰᠠᠨ ᠬᠠᠭᠤᠷᠮᠠᠭ ᠪᠠᠭ ᠡᠮᠦᠰᠬᠦ ᠬᠡᠷᠡᠭ ᠶᠠᠭᠤ ᠪᠣᠢ⁈
一 ᠲᠡᠭᠡᠭᠡᠳ ᠪᠦᠷ ᠱᠠᠯᠳᠠᠩ ᠨᠢᠴᠦᠭᠦᠨ ᠢ᠋ᠶ᠋ᠡᠷ ᠊ᠤᠤ?
一 ᠵᠠ᠂ ᠲᠡᠷᠡ ᠬᠠᠷᠢᠨ ᠪᠤᠤ ᠮᠡᠳᠡ!
一 ᠬᠥᠮᠦᠰ ᠨᠠᠮᠠᠶ᠋ᠢ ᠡᠯᠡᠭᠯᠡᠬᠦ ᠦᠭᠡᠢ ᠊ᠦᠦ? ᠮᠠᠭᠤ ᠬᠡᠯᠡᠵᠦ ᠳᠣᠭᠣᠭᠢᠯᠠᠨᠠ ᠰᠢᠦ!
一 ᠶᠠᠭᠤ ᠭᠡᠵᠦ ᠡᠯᠡᠭᠯᠡᠳᠡᠭ ᠪᠣᠢ? ᠮᠠᠭᠤ ᠬᠡᠯᠡᠵᠦ ᠳᠣᠭᠣᠭᠢᠯᠠᠳᠠᠭ ᠬᠥᠮᠦᠨ ᠶᠡᠷᠦ ᠠᠯᠠᠭᠠ! ᠮᠠᠭᠤ ᠰᠠᠨᠠᠵᠤ ᠬᠠᠷᠠᠭᠰᠠᠨ ᠬᠥᠮᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠠᠪᠤᠷᠭᠤ ᠨᠣᠭᠣᠭᠠᠨ ᠮᠣᠭᠠᠢ ᠪᠣᠯᠵᠤ ᠦᠵᠡᠭᠳᠡᠭᠡᠳ ᠵᠣᠭᠰᠣᠬᠤ ᠦᠭᠡᠢ᠂ ᠮᠠᠭᠤᠬᠠᠢ ᠰᠠᠳᠤᠷ ᠰᠠᠮᠠᠭᠤᠨ ᠰᠡᠳᠬᠢᠯ ᠬᠥᠳᠡᠯᠥᠭᠰᠡᠳ ᠦ᠋ᠨ ᠨᠢᠳᠦ ᠨᠢ ᠰᠣᠬᠣᠷᠠᠵᠤ ᠬᠠᠷᠠᠭᠠ ᠦᠭᠡᠢ ᠪᠣᠯᠤᠨᠠ᠃ ᠵᠢᠩᠬᠢᠨᠢ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠭᠤᠸᠠ ᠰᠠᠢᠬᠠᠨ ᠤ᠋ ᠪᠦᠷᠢᠯᠸᠠ ᠶ᠋ᠢ ᠣᠢᠯᠠᠭᠠᠭᠰᠠᠳ ᠰᠠᠶᠢ ᠴᠢᠨᠦ ᠣᠣᠷ ᠪᠡᠶᠡ ᠮᠠᠬᠠᠪᠣᠳ ᠤ᠋ᠨ ᠴᠢᠨᠢ ᠭᠤᠸᠠᠯᠢᠭ ᠢ᠋ ᠪᠠᠬᠠᠷᠠᠭᠠᠳ ᠪᠠᠷᠠᠬᠤ ᠦᠭᠡᠢ᠂ ᠰᠢᠨᠵᠢᠭᠡᠳ ᠬᠠᠨᠤᠰᠢ ᠦᠭᠡᠢ ᠪᠠᠢᠬᠤ ᠶᠣᠰᠣᠲᠠᠢ᠁ ᠶᠡᠷᠦ ᠨᠢ ᠬᠠᠷᠠ ᠲᠡᠷᠢᠭᠦᠲᠡᠳ ᠬᠡᠵᠢᠶᠡ ᠨᠢᠭᠡ ᠡᠳᠦᠷ ᠡᠷᠭᠢᠬᠦ ᠵᠠᠭᠤᠨ ᠤ᠋ ᠡᠭᠡᠯᠵᠢᠯᠡᠯ ᠳ᠋ᠦ᠍ ᠪᠠᠯᠠᠷᠯᠢᠭ ᠨᠡᠢᠭᠡᠮ ᠦ᠋ᠨ ᠪᠣᠳᠠᠭᠠᠯᠢ ᠰᠢᠨᠵᠢ ᠳ᠋ᠡᠭᠡᠨ ᠪᠤᠴᠠᠵᠤ ᠣᠷᠴᠢᠬᠤ ᠨᠢᠭᠡ ᠶᠣᠰᠣᠨ ᠪᠣᠢ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠭᠠᠯᠪᠠ ᠶ᠋ᠢᠨ ᠬᠥᠮᠦᠰ ᠤᠬᠠᠭᠠᠷᠠᠵᠤ ᠵᠢᠩᠬᠢᠨᠢ ᠨᠢᠳᠦ ᠨᠡᠭᠡᠭᠡᠵᠦ᠂ ᠨᠢᠭᠡ ᠨᠢ ᠨᠥᠭᠦᠭᠡ ᠳ᠋ᠡᠭᠡᠨ ᠡᠯᠡᠭᠯᠡᠵᠦ ᠱᠣᠣᠯᠠᠬᠤ ᠤᠴᠢᠷ ᠦᠭᠡᠢ ᠪᠣᠯᠤᠨᠠ᠃ ᠭᠠᠭᠴᠠᠬᠠᠨ ᠬᠢᠯᠭᠠᠰᠤᠨ ᠳᠡᠭᠡᠭᠦᠷ ᠪᠠᠷᠢᠮᠵᠢᠶᠠ ᠰᠠᠴᠠᠭᠤ ᠱᠣᠭᠰᠢᠳᠠᠭ ᠤ᠋ᠨ ᠤᠴᠢᠷ ᠵᠦᠷ᠁ ᠭᠡᠵᠦ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠤᠴᠢᠷ ᠤᠬᠠᠭᠠᠨ ᠨᠢ ᠣᠯᠳᠠᠬᠤ ᠦᠭᠡᠢ ᠶᠠᠭᠤᠮᠠ ᠥᠭᠦᠯᠡᠵᠦ ᠬᠠᠳᠠᠨ ᠤ᠋ ᠬᠣᠩᠭᠢᠯ ᠤᠷᠤᠭᠤ ᠣᠷᠣᠪᠠ᠁
᠁
一 ᠴᠢ ᠲᠡᠭᠡᠭᠡᠳ ᠨᠣᠶᠠᠨ ᠰᠠᠩ ᠤ᠋ᠨ ᠠᠳᠤᠭᠤ ᠪᠠᠨ ᠮᠠᠨᠠᠳᠠᠭ ᠦᠭᠡᠢ ᠡᠨᠡ ᠬᠠᠷᠠ ᠠᠭᠤᠯᠠᠨ ᠳ᠋ᠤ᠌ ᠨᠠᠮᠠᠶ᠋ᠢ ᠪᠠᠨ ᠭᠡᠳ ᠲᠡᠨᠦᠵᠦ ᠶᠠᠪᠤᠭᠠ ᠨᠢ ᠡᠨᠡ ᠊ᠤᠤ?
一 ᠦᠨᠡᠨ ᠭᠡᠬᠦ ᠳ᠋ᠦ᠍ ᠬᠤᠳᠠᠯ᠂ ᠬᠤᠳᠠᠯ ᠭᠡᠬᠦ ᠳ᠋ᠦ᠍ ᠮᠥᠨ ᠦᠨᠡᠨ ᠳᠡ! ᠬᠥᠮᠦᠰ ᠴᠢᠮᠠᠶ᠋ᠢ ᠭᠡᠨᠡᠳᠲᠡ ᠠᠯᠠᠭᠠ ᠪᠣᠯᠴᠢᠬᠠᠬᠠᠤᠯᠠᠷ ᠤᠯᠠᠭᠠᠨ ᠬᠠᠳᠠᠨ ᠳ᠋ᠤ᠌ ᠬᠠᠷᠠᠢᠴᠢᠬᠠᠯᠠ᠂ ᠢᠩᠭᠢᠴᠢᠬᠡᠯᠡ ᠲᠡᠭᠡᠴᠢᠬᠡᠯᠡ ᠭᠡᠵᠦ ᠡᠯᠳᠡᠪ ᠢ᠋ᠶ᠋ᠡᠷ ᠱᠤᠤᠭᠢᠵᠤ ᠪᠠᠢᠯᠠ᠁ ᠪᠢ ᠴᠢᠨᠦ ᠬᠣᠢᠨᠠ ᠠ᠋ᠴᠠ ᠡᠷᠢᠯ ᠰᠤᠷᠠᠯ ᠲᠠᠯᠪᠢᠯᠠ᠂ ᠠᠯᠠᠭᠠ᠃ ᠲᠡᠭᠡᠭᠡᠳ ᠨᠢᠭᠡᠮᠦᠰᠦᠨ ᠵᠣᠷᠢᠭ ᠮᠣᠬᠣᠪᠠ᠃ ᠰᠡᠭᠦᠯ ᠳ᠋ᠦ᠍ᠨᠢ ᠰᠢᠷᠠᠪ ᠨᠣᠶᠠᠨ ᠴᠤ᠌ ᠡᠪᠡᠳᠴᠢᠨ ᠬᠠᠭᠤᠴᠢᠨ ᠳ᠋ᠤ᠌ ᠪᠣᠭᠣᠭᠳᠠᠭᠠᠳ ᠲᠡᠩᠬᠡᠷᠡᠳᠡᠭ ᠦᠭᠡᠢ ᠳ᠋ᠦ᠍ ᠮᠢᠨᠦ ᠪᠡᠶᠡ《ᠵᠣᠯᠢᠭ》 ᠤ᠋ᠨ ᠣᠷᠣᠨ ᠳ᠋ᠤ᠌ ᠵᠣᠯᠢᠭᠯᠠᠭᠤᠯᠵᠤ ᠡᠨᠡ ᠬᠠᠷᠠ ᠠᠭᠤᠯᠠᠨ ᠳ᠋ᠤ᠌ ᠢᠷᠡᠭᠰᠡᠨ ᠭᠡᠳ ᠦᠵᠡᠭᠰᠡᠨ ᠬᠠᠷᠠᠭᠰᠠᠨ ᠪᠦᠬᠦᠨ ᠢ᠋ᠶ᠋ᠡᠨ ᠨᠣᠮᠢᠨ ᠳ᠋ᠤ᠌ ᠨᠢ ᠨᠣᠤ ᠦᠭᠡᠢ ᠶᠠᠷᠢᠵᠤ ᠥᠭᠪᠡ᠃
一 ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ᠂ ᠤᠯᠠᠭᠠᠨ ᠬᠦᠵᠦᠭᠦᠲᠦ ᠠᠯᠠᠭ ᠰᠢᠪᠠᠭᠤ ᠴᠢ ᠪᠢᠳᠡ ᠬᠣᠶᠠᠷ ᠢ᠋ ᠠᠭᠤᠯᠵᠭᠤᠯᠵᠢ ᠳᠠ!
一 ᠬᠠᠷᠢᠨ ᠲᠡᠢᠮᠦ ᠪᠠᠢᠨᠠ᠃
ᠭᠣᠩᠴᠣᠭᠷᠠᠬᠤᠠ ᠨᠣᠮᠢᠨ ᠬᠣᠶᠠᠷ ᠬᠠᠳᠠᠨ ᠬᠣᠩᠭᠢᠯ ᠳᠣᠲᠣᠷᠠ ᠦᠨᠦᠰᠦᠯᠳᠦᠨ ᠲᠡᠪᠡᠷᠢᠯᠴᠡᠵᠦ᠂ ᠠᠮᠠᠷᠠᠭᠯᠠᠨ ᠬᠠᠢᠷᠠᠯᠠᠯᠴᠠᠵᠤ ᠨᠢᠰᠸᠠᠨᠢᠰ ᠤ᠋ᠨ ᠶᠡᠬᠡ ᠲᠦᠢᠮᠡᠷ ᠲᠦ᠍ ᠪᠡᠶᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠤᠢᠬᠠᠯᠠᠨ ᠰᠢᠲᠠᠭᠠᠨᠠ᠁