ᠦᠷ ᠦᠨ ᠲᠤᠶᠠᠭᠠ 1 – ᠪ᠂ ᠷᠢᠨᠴᠢᠨ - ᠲᠡᠷᠢᠬᠦᠨ ᠲᠡᠪᠲᠡᠷ < ᠮᠠᠨᠵᠤ ᠶᠢᠨ ᠳᠠᠯᠬᠢᠨ ᠳᠤ>(ᠳᠣᠯᠣᠭᠠ) Үүрийн туяа I – Б ᠂ Ренчин Тэргүүн дэвтэр "<Манжийн талхинд" (7)
646ᠳᠣᠯᠣᠭᠠ ᠂ ᠵᠣᠯᠢᠭ ᠲᠤ᠌ ᠭᠠᠷᠭᠠᠪᠠ
ᠪᠤᠵᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ
ᠠᠮᠠ (ᠠᠮᠢ) ᠶ᠋ᠢ ᠮᠠᠨᠢ ᠠᠳᠬᠤᠵᠠᠢ᠃
ᠨᠠᠽᠢᠮ ᠬᠢᠺᠮᠸᠲ᠋
ᠵᠣᠯᠢᠭ ᠭᠠᠷᠭᠠᠬᠤ ᠭᠦᠷᠢᠮ ᠦ᠋ᠨ ᠰᠦᠷᠲᠡᠢ ᠵᠠᠩ ᠦᠢᠯᠡ ᠲᠡᠭᠦᠰᠬᠦ ᠳᠠᠰᠢ ᠬᠠᠨᠳᠤᠵᠤ᠂ ᠬᠥᠮᠦᠨ ᠦ᠌ ᠴᠢᠮᠥᠭᠡ ᠪᠡᠷ ᠬᠢᠭᠰᠡᠨ ᠭᠠᠩᠯᠢᠩ ᠤ᠋ᠨ ᠤᠬᠢᠯᠠᠬᠤ ᠮᠡᠲᠦ ᠮᠠᠭᠤᠬᠠᠢ ᠳᠠᠭᠤᠨ᠂ ᠡᠷᠢᠶᠡᠨ ᠪᠣᠳᠣᠭ ᠲᠠᠢ ᠵᠦᠮᠪᠦᠷ ᠬᠡ ᠲᠡᠢ ᠲᠣᠮᠣ ᠬᠡᠩᠭᠡᠷᠭᠡ ᠶ᠋ᠢᠨ ᠨᠢᠵᠢᠭᠢᠨᠡᠬᠦ ᠳᠠᠭᠤᠨ᠂ ᠦᠶᠡ ᠦᠶᠡ ᠳᠤᠤᠭᠠᠷᠬᠤ ᠲᠤᠩ ᠪᠦᠷᠢᠶᠡ ᠶ᠋ᠢᠨ ᠳᠠᠭᠤᠨ ᠨᠢ ᠭᠣᠶᠣ ᠰᠠᠢᠬᠠᠨ ᠨᠣᠮ ᠤ᠋ᠨ ᠬᠤᠪᠴᠠᠰᠤ ᠵᠠᠩᠴᠢ ᠨᠥᠮᠥᠷᠦᠭᠰᠡᠨ ᠯᠠᠮᠠ ᠨᠠᠷ ᠤ᠋ᠨ ᠨᠣᠮ ᠤᠩᠰᠢᠬᠤ ᠳᠠᠭᠤᠨ ᠢ᠋ ᠬᠡᠰᠡᠭ ᠬᠡᠰᠡᠭ ᠳᠠᠷᠤᠵᠤ᠂ ᠴᠠᠩ ᠬᠡᠩᠭᠡᠷᠭᠡ ᠨᠢᠵᠢᠭᠢᠨᠡᠵᠦ ᠫᠢᠵᠢᠭᠢᠨᠡᠵᠦ ᠪᠠᠢᠪᠠ᠃
ᠲᠡᠭᠡᠭᠰᠡᠭᠡᠷ ᠵᠣᠯᠢᠭ ᠲᠤ᠌ ᠭᠠᠷᠬᠤ ᠬᠥᠮᠦᠨ ᠱᠣ ᠬᠠᠶᠠᠬᠤ ᠴᠠᠭ ᠪᠣᠯᠵᠤ᠂ ᠴᠣᠬᠣᠷ ᠲᠥᠪᠡᠳ ᠬᠥᠭᠡᠷᠦᠬᠦᠨ ᠱᠣ ᠬᠠᠶᠠᠭᠠᠳ᠂ ᠱᠣ ᠶ᠋ᠢᠨ ᠨᠢᠳᠦᠨ ᠦ᠌ ᠲᠣᠭᠠ ᠪᠠᠷ ᠲᠠᠪᠤᠨ ᠬᠤᠷᠤᠭᠤ ᠪᠠᠨ ᠠᠷᠪᠠᠢᠯᠭᠠᠨ ᠦᠵᠡᠭᠦᠯᠵᠡᠢ᠂ ᠵᠣᠯᠢᠭ ᠲᠤ᠌ ᠭᠠᠷᠬᠤ ᠯᠤᠤᠭᠠᠨ ᠪᠣᠯᠤᠭᠴᠢ ᠬᠥᠮᠦᠨ᠂ ᠨᠢᠭᠤᠷ ᠢ᠋ᠶ᠋ᠠᠨ ᠴᠠᠭᠠᠨ ᠬᠠᠷᠠ ᠪᠣᠳᠣᠭ ᠢ᠋ᠶ᠋ᠠᠷ ᠠᠯᠠᠭᠯᠠᠨ ᠪᠣᠳᠣᠭᠠᠳ᠂ ᠴᠠᠭᠠᠨ ᠢᠮᠠᠭᠠᠨ ᠤ᠋ ᠦᠰᠦ ᠶ᠋ᠢ ᠭᠠᠳᠠᠭᠰᠢ ᠬᠠᠷᠠᠭᠤᠯᠤᠭᠰᠠᠨ ᠬᠤᠪᠴᠠᠰᠤ ᠡᠮᠦᠰᠴᠦ᠂ ᠭᠠᠷ ᠲᠠᠭᠠᠨ ᠰᠠᠷᠯᠤᠭ ᠤ᠋ᠨ ᠰᠠᠭᠰᠠᠭᠠᠷ ᠰᠡᠭᠦᠯ ᠪᠠᠷᠢᠭᠠᠳ᠂ ᠲᠠᠯᠠ ᠪᠦᠬᠦᠨ ᠳ᠋ᠡᠭᠡᠨ ᠭᠠᠭᠴᠠ ᠭᠠᠭᠴᠠ ᠨᠢᠳᠦ ᠲᠡᠢ ᠪᠦᠳᠦᠭᠦᠨ ᠬᠢᠴᠡ ᠲᠡᠢ ᠲᠣᠮᠣ ᠮᠣᠳᠣᠨ ᠱᠣ ᠪᠠᠨ ᠭᠤᠷᠪᠠᠨᠲᠠ ᠬᠠᠶᠠᠭᠠᠳ᠂ ᠭᠤᠷᠪᠠ ᠳᠠᠬᠢᠨ ᠭᠠᠭᠴᠠ ᠨᠢᠳᠦ ᠪᠠᠭᠤᠵᠤ ᠠᠯᠳᠠᠭᠰᠠᠨ ᠳ᠋ᠠᠭᠠᠨ ᠠᠭᠤᠷᠯᠠᠭᠰᠠᠨ ᠳᠦᠷᠢᠮ ᠦᠵᠡᠭᠦᠯᠵᠦ᠂ ᠱᠣ ᠪᠠᠨ ᠭᠠᠵᠠᠷ ᠰᠠᠪᠠᠬᠤ ᠳ᠋ᠤᠨᠢ᠂ᠰᠦᠷᠴᠢᠭᠢᠨᠡᠲᠡᠯᠡ ᠣᠢᠵᠤ᠂ ᠭᠦᠷᠢᠮᠴᠢ ᠶ᠋ᠢᠨ ᠡᠪᠦᠷ ᠳᠡᠭᠡᠷᠡ ᠲᠤᠰᠴᠠᠢ᠃
ᠰᠦᠷᠲᠡᠢ ᠵᠠᠩ ᠦᠢᠯᠡ ᠶ᠋ᠢᠨ ᠠᠶᠤᠮᠠᠷ ᠪᠠᠢᠳᠠᠯ ᠳ᠋ᠤ᠌ ᠡᠮᠢᠶᠡᠨ᠂ ᠬᠣᠨᠢ ᠰᠢᠭ᠋ ᠪᠥᠭᠡᠮᠨᠡᠷᠡᠭᠰᠡᠨ ᠣᠯᠠᠨ᠂ ᠲᠡᠭᠦᠨ ᠢ᠋ ᠦᠵᠡᠭᠡᠳ ᠠᠢ ᠭᠡᠵᠦ ᠨᠢᠭᠡᠨ ᠵᠡᠷᠭᠡᠪᠡᠷ ᠳᠠᠭᠤᠨ ᠠᠯᠲᠠᠨ ᠰᠣᠴᠢᠪᠠ᠃ ᠭᠠᠩᠯᠢᠩ ᠭᠠᠩᠳᠤᠩ( ᠭᠠᠨᠳᠠᠩ) ᠭᠡᠳᠡᠭ ᠶᠠᠰᠤᠨ ᠪᠦᠷᠢᠶᠡ᠂ ᠵᠡᠰ ᠪᠦᠷᠢᠶᠡ᠂ ᠬᠥᠮᠦᠨ ᠠᠮᠢᠲᠠᠨ ᠠᠶᠤᠮᠠᠷ ᠮᠠᠭᠤᠬᠠᠢ ᠳᠤᠤᠭᠠᠷᠤᠭᠠᠳ᠂ ᠲᠤᠩ ᠪᠦᠷᠢᠶᠡ᠂ ᠴᠠᠩ ᠬᠡᠩᠭᠡᠷᠭᠡ ᠨᠢᠵᠢᠭᠢᠨᠡᠵᠦ᠂ ᠦᠬᠡᠷ ᠪᠦᠷᠢᠶᠡ ᠶ᠋ᠢᠨ ᠪᠦᠳᠦᠭᠦᠨ ᠰᠥᠭᠡᠩᠭᠢ ᠳᠠᠭᠤᠨ᠂ ᠴᠢᠮᠡᠭᠡ ᠪᠦᠬᠦᠨ ᠢ᠋ ᠳᠠᠷᠤᠵᠤ ᠰᠦᠷᠳᠡᠶᠡ ᠳᠤᠤᠭᠠᠷᠤᠭᠠᠳ᠂ ᠵᠣᠯᠢᠭ ᠲᠤ᠌ ᠭᠠᠷᠴᠤ ᠪᠠᠢᠭᠠ ᠬᠥᠮᠦᠨ᠂ ᠵᠡᠭᠦᠨ ᠡᠮᠦᠨᠡ ᠵᠦᠭ ᠲᠣᠰᠣ ᠲᠠᠢ ᠡᠪᠡᠰᠦ ᠨᠠᠷᠢᠨ ᠬᠠᠭᠤᠷᠠᠢ ᠮᠣᠳᠣ ᠪᠠᠷ ᠪᠤᠰᠬᠠᠵᠤ ᠲᠣᠰᠣ ᠴᠢᠳᠬᠤᠭᠰᠠᠨ ᠱᠣᠪᠣᠭᠣᠷ ᠤ᠋ᠨ ᠵᠦᠭ ᠭᠦᠶᠦᠪᠡ᠃
ᠣᠯᠠᠨ ᠯᠠᠮᠠ ᠨᠠᠷ ᠬᠣᠢᠨᠠ ᠠ᠋ᠴᠠ ᠨᠢ ᠳᠠᠭᠠᠵᠤ᠂ ᠯᠾᠠ ᠪᠠᠢᠰᠠ ᠶ᠋ᠢᠨ ᠪᠡᠶᠡ ᠶ᠋ᠢᠨ ᠬᠥᠷᠥᠭ᠂ ᠰᠤᠷ ᠪᠠᠷᠢᠭᠰᠠᠨ ᠯᠠᠮᠠ ᠨᠠᠷ ᠲᠡᠷᠡ ᠱᠣᠪᠣᠭᠣᠷ ᠤ᠋ᠨ ᠵᠦᠭ ᠵᠡᠷᠭᠡ ᠣᠢᠷᠠᠲᠤᠮᠠᠭᠴᠠ᠂ ᠭᠦᠷᠢᠮᠴᠢ ᠴᠢᠭᠢᠷᠠᠭ ᠬᠦᠷᠡᠩ ᠭᠠᠷ ᠲᠠᠭᠠᠨ ᠰᠤᠷ ᠪᠠᠷᠢᠭᠠᠳ ᠴᠠᠮᠨᠠᠨ᠂ ᠬᠣᠷᠮᠣᠢ ᠨᠢ ᠳᠡᠷᠪᠡᠨ ᠬᠡᠢᠰᠴᠦ᠂ ᠶᠠᠮᠠᠷ ᠨᠢᠭᠡᠨ ᠲᠤᠷᠤᠭ ᠶᠡᠬᠡ ᠰᠢᠪᠠᠭᠤᠨ ᠤ᠋ ᠳᠡᠯᠭᠡᠭᠰᠡᠨ ᠵᠢᠭᠦᠷ ᠰᠢᠭ ᠦᠵᠡᠭᠳᠡᠭᠡᠳ᠂ ᠭᠢᠯᠠᠯᠵᠠᠭᠰᠠᠨ ᠨᠢᠳᠦ ᠪᠡᠨ ᠪᠦᠯᠲᠡᠢᠲᠡᠯᠡ ᠨᠡᠭᠡᠭᠡᠵᠦ᠂ ᠬᠠᠷᠠ ᠴᠠᠬᠢᠯᠭᠠᠨ ᠴᠠᠬᠢᠯᠵᠤ ᠪᠠᠢᠭᠰᠠᠨ ᠶᠤᠮ ᠰᠢᠭ᠋ ᠳᠣᠭᠰᠢᠨ ᠢ᠋ᠶ᠋ᠠᠷ ᠡᠷᠭᠢᠭᠦᠯᠦᠨ᠂ ᠡᠰᠢ ᠲᠡᠰᠢ ᠨᠢᠰᠬᠦ ᠮᠡᠲᠦ ᠦᠰᠦᠷᠦᠨ ᠪᠥᠵᠢᠭᠯᠡᠬᠦ ᠳ᠋ᠦ᠍ᠨᠢ ᠴᠠᠭᠠᠨ ᠰᠢᠲᠦ ᠪᠡᠨ ᠶᠠᠷᠵᠠᠢᠯᠭᠠᠨ (ᠢᠷᠵᠠᠢᠯᠭᠠᠨ) ᠬᠥᠮᠦᠨ ᠠᠮᠢᠲᠠᠨ ᠠᠶᠤᠮᠠᠷ ᠮᠦᠰᠢᠶᠡᠵᠦ᠂ᠤᠯᠠᠭᠠᠨ ᠭᠠᠯ ᠳᠦᠷᠪᠡᠯᠵᠡᠨ (ᠳᠦᠷᠡᠯᠵᠡᠨ) ᠪᠠᠳᠠᠷᠠᠭᠰᠠᠨ᠂ ᠭᠢᠯᠠᠯᠵᠠᠨ ᠴᠠᠢᠭᠰᠠᠨ ᠬᠣᠬᠢᠮᠠᠢ ᠲᠣᠯᠣᠭᠠᠢ ᠶ᠋ᠢ ᠰᠢᠭᠦᠷᠦᠭᠰᠡᠨ (ᠰᠢᠭᠦᠷᠡᠭᠰᠡᠨ) ᠦᠯᠡᠮᠵᠢ ᠪᠡᠶᠡᠲᠦ ᠨᠢᠰᠬᠦ ᠵᠢᠪ* ᠮᠡᠲᠦ ᠳᠡᠭᠳᠡᠯᠬᠡᠢᠯᠡᠵᠦ (ᠳᠡᠭᠳᠡᠯᠬᠢᠯᠡᠵᠦ)᠂ ᠭᠡᠨᠡᠳᠲᠡ ᠬᠡᠳᠦ ᠲᠣᠮᠣ ᠦᠰᠦᠷᠦᠭᠡᠳ᠂ ᠲᠦᠷᠵᠢᠭᠨᠡᠨ (ᠲᠦᠷᠴᠢᠭᠢᠨᠡᠨ) ᠠᠰᠠᠵᠤ ᠪᠠᠢᠭᠠ ᠲᠡᠷᠡ ᠱᠣᠪᠣᠭᠣᠷ ᠤ᠋ᠨ ᠵᠦᠭ ᠰᠤᠷ ᠢ᠋ᠶ᠋ᠠᠨ ᠴᠢᠯᠠᠭᠤᠳᠠᠮᠠᠭᠴᠠ᠂ ᠴᠡᠷᠢᠭ ᠴᠠᠬᠢᠭᠤᠷ ᠫᠤᠤ᠂ ᠪᠢᠷᠳᠠᠩ ᠫᠤᠤ ᠪᠠᠷ ᠨᠢᠵᠢᠭᠢᠨᠡᠲᠡᠯᠡ ᠫᠤᠤᠳᠠᠪᠠ᠃
ᠭᠦᠷᠢᠮᠴᠢ ᠶ᠋ᠢᠨ ᠭᠠᠷ ᠲᠤ᠌ ᠭᠡᠨᠡᠳᠲᠡ᠂ ᠦᠵᠦᠭᠦᠷ ᠲᠡᠭᠡᠨ ᠬᠠᠷᠠ ᠬᠠᠳᠠᠭ ᠤᠶᠠᠭᠰᠠᠨ ᠲᠤᠩᠷᠠ ᠭᠡᠳᠡᠭ ᠲᠠᠷᠨᠢ ᠤᠷᠢᠬᠤ ᠬᠠᠷᠠ ᠡᠪᠡᠷ ᠦᠵᠡᠭᠳᠡᠭᠡᠳ᠂ ᠭᠦᠷᠢᠮᠴᠢ ᠫᠤᠤ ᠲᠠᠴᠢᠭᠢᠨᠠᠬᠤ᠂ ᠪᠦᠷᠢᠶᠡ ᠬᠠᠰᠬᠢᠷᠬᠤ ᠳᠤᠮᠳᠠᠭᠤᠷ ᠲᠤᠩᠷᠠ ᠪᠠᠷ ᠳᠦᠷᠪᠡᠯᠵᠡᠨ (ᠳᠦᠷᠡᠯᠵᠡᠨ) ᠪᠠᠢᠭᠠ ᠭᠠᠯ ᠤ᠋ᠨ ᠵᠦᠭ ᠮᠠᠭᠤ ᠠᠳᠠ ᠵᠡᠳᠬᠡᠷ ᠢ᠋ ᠬᠥᠭᠡᠭᠡᠬᠦ ᠲᠠᠷᠨᠢ ᠤᠩᠰᠢᠨ᠂ ᠭᠤᠷᠪᠠᠨᠲᠠ ᠶᠡᠬᠡᠯᠡ ᠰᠦᠷᠲᠡᠢ ᠳᠣᠬᠢᠵᠠᠢ᠃ ᠲᠡᠭᠡᠭᠡᠳ᠂ ᠰᠤᠷ ᠵᠠᠯᠠᠭᠰᠠᠨ ᠣᠯᠠᠨ ᠴᠥᠮ ᠨᠢᠭᠡᠨ ᠵᠡᠷᠭᠡ ᠬᠥᠳᠡᠯᠵᠦ᠂ ᠭᠡᠳᠡᠷᠭᠦ ᠪᠡᠨ ᠪᠤᠴᠠᠵᠤ᠂ ᠡᠷᠯᠢᠭ ᠦ᠋ᠨ ᠡᠯᠴᠢ ᠨᠠᠷ ᠠᠮᠢ ᠵᠣᠯᠢᠬᠤ ᠵᠣᠯᠢᠭ ᠢ᠋ ᠠᠪᠤᠭᠰᠠᠨ ᠪᠣᠯᠵᠠᠢ᠃
ᠬᠣᠢᠲᠤ ᠡᠳᠦᠷ ᠦ᠋ᠨ ᠣᠷᠣᠢ᠂ ᠬᠥᠲᠥᠯᠭᠡᠭᠡ(ᠬᠥᠲᠥᠯᠦᠭᠡ) ᠮᠣᠷᠢ ᠲᠠᠢ ᠭᠤᠷᠪᠠᠨ ᠬᠥᠮᠦᠨ — ᠵᠣᠯᠢᠭ ᠲᠤ᠌ ᠭᠠᠷᠤᠭᠰᠠᠨ ᠬᠦᠦ᠂ ᠴᠡᠷᠢᠭ ᠪᠠᠯᠳᠠᠨ᠂ ᠭᠦᠷᠢᠮᠴᠢ ᠶ᠋ᠢᠨ ᠱᠠᠪᠢ ᠰᠠᠮᠲᠠᠨᠪᠠᠵᠠᠷ (ᠰᠠᠮᠲᠠᠨᠪᠠᠽᠠᠷ )᠂ ᠨᠣᠶᠠᠨ ᠤ᠋ ᠦᠷᠭᠦᠭᠡᠨ ᠡᠴᠡ ᠬᠣᠯᠠᠳᠠᠨ ᠳᠠᠪᠬᠢᠭᠰᠠᠭᠠᠷ᠂ ᠪᠠᠷᠠᠭᠤᠨ ᠰᠥᠨᠢᠳ ᠦ᠋ᠨ ᠨᠤᠲᠤᠭ ᠤ᠋ᠨ ᠵᠦᠭ ᠴᠢᠭᠯᠡᠵᠦ᠂ ᠬᠤᠰᠢᠭᠤᠨ ᠤ᠋ ᠵᠠᠬᠠ ᠳᠠᠰᠢ ᠲᠡᠮᠡᠴᠡᠨ ᠳᠠᠪᠬᠢᠵᠤ᠂ ᠨᠥᠭᠥᠭᠡᠳᠦᠷ ᠦ᠋ᠨ ᠰᠢᠩᠭᠡᠬᠦ ᠨᠠᠷᠠᠨ ᠤ᠋ ᠦᠶᠡᠰ᠂ ᠵᠡᠷᠭᠡᠯᠡᠳᠡᠭᠡ ᠬᠤᠰᠢᠭᠤᠨ ᠤ᠋ ᠰᠡᠪ ᠨᠤᠲᠤᠭ ᠲᠤ᠌ ᠬᠦᠷᠴᠦ᠂ ᠲᠥᠪᠡᠳ ᠰᠠᠮᠲᠠᠨᠪᠠᠵᠠᠷ(ᠰᠠᠮᠲᠠᠨᠪᠠᠽᠠᠷ)᠂ ᠴᠡᠷᠢᠭ ᠪᠠᠯᠳᠠᠩ (ᠪᠠᠯᠳᠠᠨ) ᠳ᠋ᠤ᠌ ᠬᠥᠲᠥᠯᠭᠡᠭᠡ( ᠬᠥᠲᠥᠯᠦᠭᠡ) ᠮᠣᠷᠢ ᠪᠠᠨ ᠥᠭᠭᠦᠭᠡᠳ᠂
— ᠣᠳᠣ ᠪᠢ ᠡᠨᠡ ᠬᠥᠮᠦᠨ ᠢ᠋ ᠲᠡᠷᠡ ᠳᠠᠪᠠᠭᠠ ᠥᠩᠭᠡᠷᠡᠲᠡᠯᠡ ᠥᠳᠥᠵᠦ(ᠦᠳᠡᠵᠦ) ᠥᠭᠭᠦᠭᠡᠳ᠂ ᠳᠠᠪᠠᠭᠠᠨ ᠳᠡᠭᠡᠷᠡ ᠭᠠᠷᠴᠤ᠂ ᠰᠠᠩ ᠰᠡᠷᠵᠢᠮ ᠡᠷᠭᠦᠵᠦ ᠥᠭᠭᠦᠶᠡ᠂ ᠲᠠ ᠡᠨᠳᠡ ᠮᠣᠷᠢ ᠪᠠᠨ ᠠᠮᠠᠷᠠᠭᠠᠵᠤ᠂ ᠨᠠᠮᠠᠶ᠋ᠢ ᠲᠦᠷ ᠬᠦᠯᠢᠶᠡ (ᠬᠦᠯᠢᠶᠡ)ᠭᠡᠵᠡᠢ᠃ ᠡᠪᠦᠭᠡᠨ ᠪᠠᠯᠳᠠᠨ ᠥᠭᠦᠯᠡᠷᠦᠨ᠂
— ᠵᠠ᠂ ᠪᠢ ᠪᠠᠰᠠ ᠭᠠᠢ ᠵᠡᠳᠬᠡᠷ ᠢ᠋ᠶ᠋ᠡᠨ ᠨᠢᠮᠭᠡᠯᠡᠬᠦ ᠰᠠᠨᠠᠭᠠ ᠲᠠᠢ ᠶᠤᠮᠰᠠᠨ᠃ ᠶᠠᠳᠠᠭᠤ ᠨᠠᠳᠠ ᠳ᠋ᠤ᠌ ᠥᠭᠬᠦ ᠠᠯᠲᠠ ᠮᠥᠩᠭᠥ ᠠᠯᠠᠭᠠ ᠳᠠ᠃ ᠤᠨᠤᠭᠰᠠᠨ ᠮᠣᠷᠢ᠂ ᠡᠭᠦᠷᠦᠭᠰᠡᠨ ᠫᠤᠤ ᠰᠠᠩ ᠤ᠋ᠨ ᠶᠤᠮ(ᠶᠠᠭᠤᠮᠠ)᠃ ᠡᠮᠦᠰᠦᠭᠰᠡᠨ ᠮᠠᠭᠤ ᠳᠡᠪᠡᠯ ᠢ᠋ᠶ᠋ᠡᠷ ᠮᠢᠨᠢ᠂ ᠴᠢ ᠶᠠᠭᠤ ᠬᠢᠬᠦ ᠪᠣᠢ ᠳᠠ᠃ ᠡᠨᠡ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠴᠢᠮᠠᠲᠤ ᠪᠠᠷᠢᠶᠠ᠃ ᠪᠦᠦ ᠭᠣᠯᠣᠭᠠᠷᠠᠢ᠃ ᠪᠢ ᠡᠭᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠢᠨᠣᠠ ᠴᠣᠬᠢᠵᠤ ᠶᠠᠪᠤᠭᠰᠠᠨ ᠬᠥᠮᠦᠨ ᠰᠢᠦ᠃ ᠰᠠᠢᠨ ᠲᠠᠰᠢᠭᠤᠷ ᠢ᠋ ᠡᠵᠡᠭᠦᠢ ᠬᠡᠭᠡᠷᠡ ᠡᠷᠡ ᠬᠥᠮᠦᠨ ᠦ᠌ ᠵᠡᠮᠰᠡᠭ (ᠵᠢᠮᠰᠡᠭ)ᠭᠡᠳᠡᠭ ᠤᠴᠢᠷ ᠲᠠᠢ ᠪᠣᠢ᠃ ᠪᠣᠯᠭᠣᠮᠵᠢᠲᠠᠢ᠂ ᠰᠡᠷᠡᠮᠵᠢᠲᠡᠢ ᠶᠠᠪᠤᠭᠠᠷᠠᠢ᠂ ᠬᠦᠦ ᠮᠢᠨᠢ᠂ ᠡᠵᠡᠨ ᠬᠢᠴᠢᠶᠡᠪᠡᠯ᠂ ᠠᠵᠠ ᠬᠢᠴᠢᠶᠡᠨᠡ ᠭᠡᠳᠡᠭ ᠰᠢᠦ ᠭᠡᠵᠦ ᠨᠢᠳᠦ ᠪᠡᠨ ᠰᠠᠮ ᠢᠷᠮᠡᠰᠬᠢᠨ ᠳᠣᠬᠢᠭᠰᠠᠨ ᠳ᠋ᠤ᠌᠂ ᠨᠠᠰᠤᠨᠪᠠᠲᠤ᠂ ᠡᠪᠦᠭᠡᠨ ᠦ᠌ ᠲᠡᠷᠡ ᠲᠠᠰᠢᠭᠤᠷ ᠢ᠋ ᠠᠪᠤᠭᠠᠳ᠂ ᠦᠵᠦᠭᠦᠷ ᠲᠡᠭᠡᠨ ᠮᠠᠰᠢ ᠬᠦᠨᠳᠦ ᠲᠤᠯᠠ᠂ ᠲᠤᠭᠤᠯᠭᠠ ᠴᠢᠳᠬᠤᠭᠰᠠᠨ ᠢ᠋ ᠮᠡᠳᠡᠪᠡ᠃
ᠡᠪᠦᠭᠡᠨ ᠲᠠᠢ ᠰᠠᠯᠬᠤ ᠶᠣᠰᠣ ᠬᠢᠵᠦ᠂ ᠥᠨᠥᠬᠢ ᠳᠠᠪᠠᠭᠠᠨ ᠤ᠋ ᠵᠦᠭ ᠣᠳᠴᠤ᠂ ᠳᠠᠪᠠᠭᠠᠨ ᠳᠡᠭᠡᠷᠡᠬᠢ ᠣᠪᠣᠭᠠᠨ ᠤ᠋ ᠳᠡᠷᠭᠡᠳᠡ ᠲᠡᠷᠡ ᠲᠥᠪᠡᠳ ᠦ᠋ᠨ ᠰᠡᠷᠵᠢᠮ ᠡᠷᠭᠦᠬᠦ ᠵᠠᠪᠰᠠᠷ᠂ ᠨᠠᠰᠤᠨᠪᠠᠲᠤ᠂ ᠰᠢᠩᠭᠡᠬᠦ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠭᠢᠯᠠᠯᠵᠠᠵᠤ ᠪᠠᠢᠭᠠ ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ᠂ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠵᠦᠭ ᠰᠢᠷᠳᠡᠨ ᠬᠠᠷᠠᠪᠠᠯ᠂ ᠨᠠᠷᠠᠨ ᠳ᠋ᠤ᠌ ᠭᠠᠩᠳᠠᠭᠰᠠᠨ᠂ ᠰᠢᠷᠠᠪᠲᠤᠷ ᠨᠣᠭᠣᠭᠠᠨ ᠥᠩᠭᠡᠲᠡᠢ᠂ ᠳᠣᠪᠣ ᠲᠣᠯᠣᠭᠠᠢᠳ(ᠲᠤᠯᠤᠭᠠᠳ) ᠪᠣᠯᠤᠭᠰᠠᠨ ᠲᠠᠯᠠ ᠭᠠᠵᠠᠷ᠂ ᠬᠥᠬᠡᠷᠡᠨ ᠬᠠᠷᠠᠭᠳᠠᠭᠴᠢ ᠠᠯᠤᠰ ᠤ᠋ᠨ ᠠᠭᠤᠯᠠ ᠶ᠋ᠢᠨ ᠬᠣᠷᠮᠣᠢ ᠲᠠᠢ ᠵᠠᠯᠭᠠᠯᠳᠤᠨ᠂ ᠲᠡᠷᠡ ᠠᠭᠤᠯᠠᠰ ᠤ᠋ᠨ ᠲᠡᠷᠲᠡᠭᠡ ᠪᠠᠰᠠ ᠨᠢᠭᠡ ᠶᠡᠬᠡ ᠲᠠᠯᠠ᠂ ᠲᠡᠭᠦᠨ ᠦ᠌ ᠴᠠᠭᠠᠨᠠ ᠪᠠᠰᠠ ᠠᠭᠤᠯᠠ᠂ ᠲᠡᠷᠡ ᠠᠭᠤᠯᠠ ᠶ᠋ᠢᠨ ᠴᠠᠭᠠᠨᠠ ᠭᠠᠷᠬᠤ ᠳ᠋ᠤ᠌ ᠡᠨᠡ ᠳᠠᠪᠠᠭᠠᠨ ᠤ᠋ ᠬᠣᠶᠠᠷ ᠲᠠᠯᠠ ᠳ᠋ᠤ᠌ ᠲᠩᠷᠢ ᠶ᠋ᠢᠨ ᠬᠣᠷᠮᠣᠢ ᠳ᠋ᠤ᠌ ᠵᠢᠷᠢᠯᠵᠡᠵᠦ ᠪᠠᠢᠭᠠ ᠵᠡᠭᠡᠷᠡ ᠲᠡᠢ᠂ ᠵᠠᠬᠠ ᠬᠢᠵᠠᠭᠠᠷ ᠦᠭᠡᠢ ᠥᠷᠭᠡᠨ ᠲᠠᠯᠠ ᠰᠢᠭ᠋ ᠡᠯᠴᠢᠯ ᠦᠭᠡᠢ ᠠᠭᠤᠵᠢᠮ ᠲᠠᠯᠠ ᠪᠣᠢ᠃
ᠲᠡᠷᠡ ᠮᠢᠨᠦ ᠨᠤᠲᠤᠭ ᠭᠡᠵᠦ ᠰᠠᠨᠠᠬᠤ ᠳ᠋ᠠᠭᠠᠨ ᠰᠡᠳᠬᠢᠯ ᠨᠢ ᠤᠶᠠᠷᠠᠨ ᠭᠤᠨᠢᠪᠠ᠃ ᠬᠡᠭᠡᠷᠡ ᠶ᠋ᠢᠨ ᠠᠭᠢ ᠭᠠᠩᠭᠠ ᠳᠠᠭᠠᠨᠠ ᠬᠠᠩᠬᠤᠯᠤᠭᠰᠠᠨ ᠰᠠᠯᠬᠢ ᠨᠢ᠂ ᠲᠥᠷᠥᠭᠰᠡᠨ ᠨᠤᠲᠤᠭ ᠤ᠋ᠨ ᠮᠢᠨᠢ ᠰᠠᠢᠬᠠᠨ ᠦᠨᠦᠷ᠂ ᠠᠢᠯ ᠬᠣᠲᠠ ᠶ᠋ᠢᠨ ᠮᠢᠨᠢ ᠠᠷᠭᠠᠯ ᠤ᠋ᠨ ᠤᠲᠤᠭᠠ ᠬᠠᠩᠬᠤᠯᠵᠤ ᠶᠠᠪᠤᠨᠠᠤ ᠳᠠ! ᠭᠡᠵᠦ ᠰᠠᠨᠠᠭᠳᠠᠵᠤ ᠪᠠᠢᠲᠠᠯᠠ ᠠᠷᠤ ᠳ᠋ᠤᠨᠢ ᠠᠶᠠᠷᠬᠠᠨ ᠭᠡᠳᠡᠰᠬᠢᠨ ᠭᠢᠰᠬᠢᠬᠦ ᠴᠢᠮᠡᠭᠡ ᠰᠣᠨᠣᠰᠳᠠᠪᠠ᠂ ᠡᠷᠭᠢᠵᠦ ᠬᠠᠷᠠᠪᠠᠯ᠂ ᠥᠨᠥᠬᠢ ᠲᠥᠪᠡᠳ᠂ ᠰᠡᠷᠵᠢᠮ ᠢ᠋ᠶ᠋ᠡᠨ ᠡᠷᠭᠦᠵᠦ ᠭᠦᠢᠴᠡᠭᠡᠳ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠮᠰᠦᠷᠡᠨ᠂ ᠨᠠᠰᠤᠨᠪᠠᠲᠤ ᠶ᠋ᠢᠨ ᠵᠦᠭ ᠠᠢᠰᠤᠢ ᠠᠵᠢ᠃ ᠲᠥᠪᠡᠳ ᠦ᠋ᠨ ᠲᠡᠷᠡ ᠬᠦᠢᠲᠡᠨ ᠴᠢᠷᠠᠢ ᠶ᠋ᠢ ᠨᠢ ᠦᠵᠡᠭᠡᠳ᠂ ᠨᠠᠰᠤᠨᠪᠠᠲᠤ ᠰᠠᠢᠨ ᠰᠠᠨᠠᠭᠠᠲᠤ ᠡᠪᠦᠭᠡᠨ ᠪᠠᠯᠳᠠᠨ ᠤ᠋ ᠰᠠᠨᠠᠭᠤᠯᠤᠭᠰᠠᠨ ᠦᠭᠡ ᠶ᠋ᠢ ᠰᠠᠨᠠᠵᠤ᠂ ᠶᠡᠬᠡᠯᠡ ᠬᠢᠴᠢᠶᠡᠨ ᠪᠣᠯᠭᠣᠮᠵᠢᠯᠠᠪᠠ᠃
— ᠤᠨᠠᠭᠰᠠᠨ ᠭᠠᠵᠠᠷ᠂ ᠤᠬᠢᠶᠠᠭᠰᠠᠨ ᠤᠰᠤ᠂ ᠨᠤᠲᠤᠭ ᠤ᠋ᠨ ᠵᠦᠭ ᠬᠠᠷᠠᠵᠤ ᠪᠠᠢᠨᠠᠤ? ᠭᠠᠢ ᠦᠭᠡᠢ ᠣᠳᠣ ᠲᠤᠩ ᠤᠳᠠᠬᠤ ᠦᠭᠡᠢ ᠰᠡᠳᠬᠢᠯ ᠦ᠋ᠨ ᠵᠣᠪᠠᠯᠠᠩ ᠭᠤᠨᠢᠯ ᠴᠥᠮ ᠠᠷᠢᠯᠤᠨᠠ᠃ ᠶᠠᠪᠤᠶᠠ ᠪᠢ ᠴᠢᠮᠠᠶ᠋ᠢ ᠳᠠᠪᠠᠭᠠ ᠤᠷᠤᠭᠤ ᠥᠲᠥᠭᠡᠳ (ᠦᠳᠡᠭᠡᠳ) ᠥᠭᠭᠦᠶᠡ ᠭᠡᠵᠡᠢ᠃
ᠵᠠᠭᠠᠯ(ᠵᠢᠭᠠᠯ) ᠬᠦᠦ ᠶ᠋ᠢᠨ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍᠂ ᠵᠡᠷᠭᠡᠴᠡᠵᠦ ᠶᠠᠪᠤᠭᠰᠠᠨ ᠲᠡᠷᠡ ᠲᠥᠪᠡᠳ ᠦ᠋ᠨ ᠮᠣᠷᠢᠨ ᠤ᠋ ᠲᠣᠯᠣᠭᠠᠢ ᠨᠢ ᠠᠶᠠᠷᠬᠠᠨ ᠠᠶᠠᠷᠬᠠᠨ ᠢ᠋ᠶ᠋ᠠᠷ ᠬᠣᠴᠣᠷᠣᠰᠬᠢᠬᠦ(ᠬᠣᠴᠣᠷᠣᠰᠬᠢᠬᠤ) ᠪᠠᠢᠳᠠᠯᠲᠠᠢ ᠪᠣᠯᠵᠤ ᠡᠬᠢᠯᠡᠬᠦ ᠳ᠋ᠦ᠍᠂ ᠣᠳᠣ ᠯᠠ ᠮᠢᠨᠦ ᠬᠣᠢᠨᠠ ᠠ᠋ᠴᠠ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠭᠤᠯᠭᠠᠬᠤ ᠨᠢ ᠳᠡ ᠭᠡᠵᠦ ᠪᠣᠳᠣᠭᠠᠳ ᠣᠷᠴᠢᠨ ᠲᠣᠭᠣᠷᠢᠨ ᠤ᠋ ᠭᠠᠵᠠᠷ ᠤ᠋ᠨ ᠪᠠᠢᠳᠠᠯ ᠢ᠋ ᠬᠠᠷᠠᠭᠰᠠᠨ ᠶᠤᠮ ᠰᠢᠭ᠋᠂ ᠡᠷᠭᠢᠵᠦ ᠬᠠᠷᠠᠬᠤ ᠳ᠋ᠤᠨᠢ ᠥᠨᠥᠬᠢ ᠲᠥᠪᠡᠳ᠂ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠰᠠᠮ ᠲᠠᠲᠠᠰᠬᠢᠭᠡᠳ(ᠲᠠᠲᠠᠰᠬᠢᠭᠠᠳ) ᠨᠢᠳᠦ ᠪᠡᠨ ᠠᠨᠢᠰᠬᠢᠵᠤ ᠬᠦᠨᠳᠦ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠲᠠᠰᠤ ᠠᠳᠬᠤᠭᠠᠳ ᠶᠠᠪᠤᠵᠠᠢ᠃
— ᠴᠣᠬᠢᠬᠤ ᠶ᠋ᠢ ᠨᠢ ᠬᠦᠯᠢᠶᠡᠬᠦ ᠤᠤ? ᠥᠪᠡᠷ ᠢ᠋ᠶ᠋ᠡᠨ ᠤᠷᠢᠲᠠᠭᠠᠳ ᠴᠣᠬᠢᠵᠤ ᠦᠵᠡᠬᠦ ᠤᠤ? ᠭᠡᠵᠦ ᠪᠤᠳᠤᠲᠠᠯᠠ ᠨᠢ᠂ ᠭᠡᠨᠡᠳᠲᠡ ᠮᠣᠷᠢ ᠨᠢ ᠬᠣᠢᠨᠠ ᠠ᠋ᠴᠠ ᠪᠠᠨ ᠶᠠᠭᠤᠮᠠᠨ ᠳ᠋ᠤ᠌ ᠬᠥᠭᠡᠭᠡᠭᠳᠡᠵᠦ ᠦᠷᠭᠦᠭᠰᠡᠨ ᠶᠦ᠍ᠮ ᠰᠢᠭ ᠤᠬᠤᠰᠬᠢᠨ ᠦᠰᠦᠷᠦᠮᠡᠭᠴᠡ᠂ ᠲᠥᠪᠡᠳ ᠦ᠋ᠨ ᠲᠠᠰᠢᠭᠤᠷ ᠨᠢ ᠱᠣᠷ ᠬᠢᠵᠦ ᠵᠠᠯᠠᠭᠤ ᠬᠦᠦ ᠶ᠋ᠢᠨ ᠰᠢᠯᠢᠨ ᠬᠦᠵᠦᠭᠦᠦ ᠶ᠋ᠢ ᠲᠠᠰᠢᠭᠤᠷ ᠤ᠋ᠨ ᠪᠣᠭᠣᠨᠢ ᠰᠤᠷ ᠡᠪᠡᠳᠲᠡᠯᠡ ᠰᠢᠷᠪᠢᠵᠡᠢ᠃ ᠨᠠᠰᠤᠨᠪᠠᠲᠤ ᠶ᠋ᠢ ᠬᠥᠲᠥᠯᠭᠡᠭᠡ ᠮᠣᠷᠢᠨ ᠤ᠋ ᠪᠠᠨ ᠴᠤᠯᠪᠤᠭᠤᠷ ᠢ᠋ ᠶᠠᠭᠠᠷᠠᠨ ᠵᠡᠭᠦᠨ ᠭᠠᠷ ᠲᠠᠭᠠᠨ ᠪᠠᠷᠢᠵᠤ᠂ ᠥᠨᠥᠬᠢ ᠲᠥᠪᠡᠳ ᠦ᠋ᠨ ᠵᠦᠭ ᠰᠠᠨᠳᠤᠷᠤᠨ ᠡᠷᠭᠢᠲᠡᠯᠡ᠂ ᠲᠡᠷᠡ ᠨᠢ ᠠᠯᠳᠠᠵᠤ ᠳᠤᠲᠠᠭᠤ ᠴᠣᠬᠢᠭᠰᠠᠨ ᠳ᠋ᠠᠭᠠᠨ ᠬᠣᠷᠣᠰᠴᠤ᠂ ᠴᠢᠷᠠᠢ ᠪᠠᠨ ᠨᠢᠭᠡ ᠶᠡᠬᠡ ᠮᠠᠭᠤᠬᠠᠢ ᠪᠣᠯᠭᠠᠵᠤ ᠶᠠᠷᠪᠠᠢᠭᠠᠳ (ᠢᠷᠪᠠᠢᠭᠠᠳ)᠂ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠳᠠᠬᠢᠨ ᠳᠠᠯᠠᠢᠨ ᠵᠠᠪᠳᠤᠵᠠᠢ᠃
ᠨᠠᠰᠤᠨᠪᠠᠲᠤ ᠰᠡᠩᠳᠡᠨ ᠲᠡᠪᠡᠳᠡᠬᠦ ᠶ᠋ᠢᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠪᠡᠶᠡ ᠪᠡᠨ ᠬᠠᠮᠠᠭᠠᠯᠠᠨ᠂ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠤᠯᠭᠤ᠂ ᠲᠦᠢ ᠮᠠᠭᠤᠲᠠᠢ ᠪᠠᠷ ᠨᠢᠭᠡ ᠰᠢᠷᠪᠢᠭᠡᠳ ᠣᠷᠬᠢᠭᠰᠠᠨ ᠴᠢᠨᠢ᠂ ᠲᠤᠭᠤᠯᠭᠠ ᠴᠢᠳᠬᠤᠭᠰᠠᠨ ᠬᠦᠨᠳᠦ ᠦᠵᠦᠭᠦᠷ ᠢ᠋ᠶ᠋ᠡᠷ ᠨᠢ ᠰᠠᠨᠠᠮᠰᠠᠷ ᠦᠭᠡᠢ ᠥᠨᠥᠬᠢ ᠲᠥᠪᠡᠳ ᠢ᠋ ᠰᠢᠷᠪᠢᠲᠡᠯᠡ ᠨᠢ ᠬᠠᠮᠠᠷ ᠳᠡᠭᠡᠷᠡ ᠨᠢ ᠴᠣᠬᠢᠵᠠᠢ᠃ ᠲᠡᠭᠡᠭᠡᠳ᠂ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠤᠬᠠᠭᠠᠨ ᠠᠮᠢ ᠦᠭᠡᠢ ᠳᠡᠮᠡᠢ ᠯᠡ ᠰᠠᠪᠠᠵᠤ ᠪᠠᠢᠭᠰᠠᠨ᠂ ᠨᠢᠭᠡ ᠮᠡᠳᠡᠲᠡᠯᠡ ᠲᠡᠷᠡ ᠲᠥᠪᠡᠳ ᠨᠢ ᠮᠣᠷᠢᠨ ᠠ᠋ᠴᠠ ᠪᠠᠨ ᠣᠢᠴᠢᠭᠠᠳ᠂ ᠴᠢᠰᠤ ᠨᠥᠵᠢ ᠪᠣᠯᠵᠤ ᠭᠠᠵᠠᠷ ᠲᠠᠷᠴᠢᠯᠠᠵᠤ ᠬᠡᠪᠲᠡᠪᠡ᠃
— ᠠᠮᠢ ᠠᠪᠤᠷᠠ( ᠠᠪᠤᠷᠠ)᠂ ᠨᠠᠭᠠᠨᠠ᠂ ᠠᠮᠢ ᠠᠪᠤᠷᠠ( ᠠᠪᠤᠷᠠ)! ᠨᠠᠷᠠ ᠪᠠᠢᠨᠠ᠃ ᠪᠢ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠶᠡ! ᠭᠡᠵᠦ ᠲᠡᠷᠡ ᠲᠥᠪᠡᠳ᠂ ᠰᠢᠯᠦᠰᠦ ᠴᠢᠰᠤ ᠪᠠᠨ ᠬᠠᠬᠠᠨ ᠴᠡᠴᠡᠨ ᠵᠠᠯᠭᠢᠵᠤ᠂ ᠠᠷᠬᠢᠷᠠᠨ ᠬᠡᠯᠡᠵᠦ— ᠭᠦᠷᠢᠮᠴᠢ ᠪᠠᠭᠰᠢ᠂ ᠴᠢᠮᠠᠶ᠋ᠢ ᠠᠯᠠ ᠭᠡᠵᠦ ᠵᠠᠬᠢᠵᠤ ᠨᠠᠮᠠᠶ᠋ᠢ ᠶᠠᠪᠤᠭᠤᠯᠤᠭᠰᠠᠨ ᠶᠤᠮ᠃ ᠪᠠᠭᠰᠢ᠂ ᠮᠠᠨ ᠤ᠋ ᠲᠥᠪᠡᠳ ᠭᠠᠵᠠᠷ ᠭᠠᠭᠴᠠ᠁ ᠶᠡᠬᠡ ᠯᠠᠮᠠ ᠨᠠᠷ ᠲᠤ᠌ ᠬᠠᠶᠠ ᠭᠠᠭᠴᠠ ᠨᠢᠭᠡ ᠪᠠᠢᠳᠠᠭ ᠡᠷᠳᠡᠨᠢ ᠶ᠋ᠢᠨ ᠭᠠᠪᠠᠯᠠ ᠬᠢᠬᠦ ᠭᠡᠵᠦ᠂ ᠴᠢᠨᠦ ᠭᠠᠪᠠᠯᠠ ᠶ᠋ᠢ ᠣᠯᠵᠤ ᠢᠷᠡ ᠭᠡᠵᠦ ᠨᠠᠮᠠᠶ᠋ᠢ ᠶᠠᠪᠤᠭᠤᠯᠤᠭᠰᠠᠨ ᠪᠢᠯᠡ᠃ ᠥᠴᠦᠬᠡᠨ ᠮᠢᠨᠦ ᠪᠡᠶᠡ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠯᠡ ᠵᠠᠷᠯᠢᠭ ᠢ᠋ ᠳᠠᠭᠠᠵᠤ ᠶᠠᠪᠤᠭᠰᠠᠨ ᠪᠢᠯᠡ᠃ ᠪᠢ᠂᠂᠂ ᠪᠢ᠂᠂᠂ ᠠ᠋ — ᠠ᠋ ! ᠮᠢᠨᠦ ᠬᠣᠷᠣᠬᠠᠢ ᠮᠡᠲᠦ ᠠᠮᠢ ᠶ᠋ᠢ ᠠᠭᠤᠴᠢᠯᠠᠨ ᠬᠠᠢᠷᠠᠯᠠ!᠂᠂᠂᠂ ᠪᠢ ᠴᠢᠮᠠᠲᠤ ᠠᠮᠢ ᠶ᠋ᠢᠨ ᠢ᠋ᠶ᠋ᠡᠨ ᠵᠣᠯᠢᠶᠠ ᠠᠯᠲᠠ ᠂᠂᠂ ᠶᠡᠬᠡ ᠠᠯᠲᠠ ᠥᠭᠭᠦᠶᠠ᠂᠂᠂ ᠮᠢᠨᠦ ᠡᠪᠦᠷ ᠲᠦ᠍ ᠬᠦᠵᠦᠭᠦᠨ ᠡᠴᠡ ᠵᠡᠭᠦᠯᠲᠡᠲᠡᠢ ᠪᠢᠴᠢᠬᠠᠨ ᠬᠡᠦᠳᠡᠢ ᠰᠠᠪᠠ ᠲᠠᠢ ᠠᠯᠲᠠ ᠪᠣᠢ᠂᠂᠂᠂᠂ ᠪᠢ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠨ ᠬᠤᠭᠤ ᠴᠣᠬᠢᠭᠤᠯᠵᠤ ᠣᠷᠬᠢᠭᠠᠳ᠂ ᠥᠪᠡᠷ ᠢ᠋ᠶ᠋ᠡᠨ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ᠃ ᠳᠡᠭᠦᠦ ᠮᠢᠨᠢ ᠨᠠᠮᠠᠶ᠋ᠢ ᠪᠠᠨ ᠥᠷᠥᠰᠢᠶᠡ᠃ ᠠᠮᠢ ᠬᠠᠢᠷᠠᠯᠠ! ᠠᠮᠢ ᠬᠠᠢᠷᠠᠯᠠ! ᠶᠣᠰᠣᠲᠠᠢ ᠵᠣᠯᠢᠭ ᠲᠤ᠌ ᠭᠠᠷᠤᠭᠰᠠᠨ ᠠᠮᠢᠲᠠᠨ ᠴᠢᠨᠢ ᠪᠢ ᠪᠠᠢᠨᠠ ᠰᠢᠦ᠃ ᠳᠡᠭᠦᠦ ᠮᠢᠨᠢ᠂ ᠮᠢᠨᠦ ᠬᠣᠷᠣᠬᠠᠢ ᠮᠡᠲᠦ ᠠᠮᠢ ᠶ᠋ᠢ ᠠᠭᠤᠴᠢᠯᠠ᠂᠂᠂᠂᠂ ᠨᠠᠭᠠᠨᠠ᠂ ᠨᠠᠭᠠᠨᠠ᠂ ᠠ᠋ — ᠠ᠋! ᠠᠮᠢ ᠬᠠᠢᠷᠠᠯᠠ! ᠭᠡᠵᠦ ᠨᠠᠰᠤᠨᠪᠠᠲᠤ ᠶ᠋ᠢᠨ ᠬᠥᠳᠡᠯᠬᠦ ᠶ᠋ᠢ ᠠᠵᠢᠭᠯᠠᠵᠤ ᠪᠠᠷᠬᠢᠷᠠᠨ ᠭᠤᠶᠤᠵᠠᠢ᠃
ᠵᠠᠯᠠᠭᠤ ᠬᠦᠦ᠂ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠭᠠᠳ᠂ ᠰᠠᠢ᠍ᠢ (ᠰᠠᠶᠢ) ᠶ᠋ᠢᠨ ᠰᠠᠨᠳᠤᠷᠤᠭᠰᠠᠨ ᠠ᠋ᠴᠠ ᠴᠡᠴᠡᠷᠡᠨ ᠰᠠᠯᠭᠠᠨᠠᠵᠤ ᠪᠠᠢᠭᠠ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠨᠲᠠᠷᠴᠤ ᠲᠤᠱᠠᠭᠠᠳ᠂ ᠬᠥᠲᠥᠯᠭᠡᠭᠡ ᠮᠣᠷᠢ ᠪᠠᠨ᠂ ᠤᠨᠤᠵᠤ ᠶᠠᠪᠤᠭᠰᠠᠨ ᠮᠣᠷᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠦᠵᠦᠭᠦᠨ ᠡᠴᠡ ᠤᠶᠠᠭᠠᠳ᠂ ᠲᠡᠷᠡ ᠲᠥᠪᠡᠳ ᠦ᠋ᠨ ᠳᠡᠷᠭᠡᠳᠡ ᠣᠴᠢᠬᠤ ᠳ᠋ᠤᠨᠢ ᠶᠠᠭᠠᠬᠢᠳᠠᠭ ᠪᠣᠯ ᠭᠡᠵᠦ ᠰᠠᠨᠳᠤᠷᠴᠤ ᠪᠠᠢᠭᠰᠠᠨ ᠲᠡᠷᠡ ᠲᠥᠪᠡᠳ ᠨᠢ ᠨᠠᠰᠤᠨᠪᠠᠲᠤ ᠶ᠋ᠢ ᠬᠦᠨᠳᠦ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠡᠮᠡᠭᠡᠯ ᠦ᠋ᠨ ᠪᠦᠭᠦᠷᠭᠡ ᠡᠴᠡ ᠵᠡᠭᠦᠵᠦ᠂ ᠠᠯᠠᠬᠤ ᠬᠣᠣᠷᠯᠠᠬᠤ ᠰᠠᠨᠠᠭᠠ ᠦᠭᠡᠢ ᠣᠢᠷᠠᠲᠤᠵᠤ ᠢᠷᠡᠭᠰᠡᠨ ᠳ᠋ᠦ᠍ᠨᠢ ᠳᠣᠲᠣᠷᠠ ᠨᠢ ᠪᠠᠬᠠᠨ ᠣᠩᠭᠣᠢᠵᠤ
— ᠠᠯᠲᠠ ᠡᠨᠳᠡ ᠮᠢᠨᠦ ᠡᠯᠢᠭᠡᠨ ᠳᠡᠭᠡᠷᠡ ᠪᠣᠢ᠂ ᠪᠥᠬᠥᠢᠭᠡᠳ᠂ ᠡᠪᠦᠷ ᠡᠴᠡ ᠮᠢᠨᠢ ᠠᠪ᠂ ᠲᠩᠷᠢ ᠨᠠᠮᠠᠶ᠋ᠢ ᠬᠡᠰᠬᠡᠬᠡᠵᠡᠢ (ᠭᠡᠰᠬᠡᠵᠡᠢ) ᠭᠡᠵᠦ ᠭᠦᠩᠭᠦᠨᠡᠪᠡ᠃
— ᠴᠢᠨᠦ ᠠᠯᠲᠠ ᠨᠠᠳᠠ ᠬᠡᠷᠡᠭ ᠦᠭᠡᠢ᠃ ᠪᠢ ᠴᠢᠨᠦ ᠬᠣᠪᠳᠣᠭ ᠪᠠᠭᠰᠢ ᠲᠠ ᠬᠣᠶᠠᠷ ᠲᠠᠢ ᠠᠳᠠᠯᠢ ᠬᠥᠮᠦᠨ ᠪᠢᠰᠢ᠃ ᠴᠢᠮᠠᠶ᠋ᠢ ᠵᠦᠢ ᠨᠢ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠣᠬᠢᠵᠤ ᠠᠯᠠᠪᠠᠯ ᠵᠣᠬᠢᠪᠠᠴᠤ᠂ ᠲᠥᠷᠥᠭᠰᠡᠨ ᠨᠤᠲᠤᠭ ᠠ᠋ᠴᠠ ᠪᠠᠨ ᠬᠠᠭᠠᠴᠠᠬᠤ ᠶ᠋ᠢᠨ ᠬᠠᠮᠲᠤ ᠬᠥᠮᠦᠨ ᠠᠯᠠᠵᠤ ᠭᠠᠷ ᠢ᠋ᠶ᠋ᠠᠨ ᠪᠤᠵᠠᠷᠯᠠᠬᠤ ᠶ᠋ᠢ ᠪᠢ ᠦᠯᠦ ᠬᠦᠰᠡᠨᠡ᠃ ᠴᠢ ᠮᠣᠷᠢ ᠪᠠᠨ ᠪᠠᠷᠢᠵᠤ ᠴᠢᠳᠠᠬᠤ ᠤᠤ? ᠲᠡᠷᠡ᠂ ᠢᠳᠡᠵᠦ ᠶᠠᠪᠤᠨᠠ ᠭᠡᠬᠦ ᠳ᠋ᠦ᠍ᠨᠢ
— ᠮᠢᠨᠦ ᠭᠠᠷ ᠬᠤᠭᠤᠷᠠᠭᠰᠠᠨ ᠭᠡᠵᠦ ᠶᠣᠢᠯᠠᠪᠠ(ᠶᠣᠣᠯᠠᠪᠠ)᠃
— ᠵᠠ᠂ ᠲᠡᠭᠡᠪᠡᠯ᠂ ᠪᠢ ᠴᠢᠨᠦ ᠮᠣᠷᠢ ᠶ᠋ᠢ ᠳᠥᠬᠥᠭᠦᠯᠵᠦ ᠥᠭᠭᠦᠶᠡ ᠭᠡᠳ ᠲᠡᠷᠡ ᠵᠠᠯᠠᠭᠤ ᠵᠠᠮ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠣᠢᠷᠠᠬᠠᠨ ᠨᠣᠭᠣᠭᠠ ᠵᠣᠯᠭᠠᠵᠤ(ᠵᠤᠯᠭᠠᠭᠠᠵᠤ) ᠶᠠᠪᠤᠭᠰᠠᠨ ᠮᠣᠷᠢ ᠶ᠋ᠢ ᠨᠢ ᠤᠷᠲᠤ ᠴᠤᠯᠪᠤᠭᠤᠷ ᠠ᠋ᠴᠠ ᠨᠢ ᠪᠠᠷᠢᠵᠤ ᠠᠪᠤᠭᠠᠳ ᠡᠷᠭᠢᠵᠦ ᠢᠷᠡᠬᠦ ᠳ᠋ᠦ᠍ᠨᠢ᠂ ᠥᠨᠥᠬᠢ ᠲᠥᠪᠡᠳ ᠨᠢ ᠥᠨᠳᠡᠢᠭᠡᠳ᠂ ᠤᠨᠵᠢᠴᠢᠭᠰᠠᠨ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠨ ᠶᠣᠢᠯᠠᠨ ᠲᠡᠮᠲᠡᠷᠢᠵᠦ ᠰᠠᠭᠤᠪᠠ᠃ ᠬᠦᠦ ᠶ᠋ᠢᠨ
— ᠮᠠᠢ᠂ ᠮᠣᠷᠢ ᠪᠠᠨ ᠠᠪ ᠭᠡᠬᠦ ᠳ᠋ᠦ᠍ᠨᠢ ᠂
— ᠠ᠋ ᠳᠠ ᠂ ᠵᠠᠶᠠᠭᠠ ᠪᠤᠶᠠᠨ ᠴᠢᠨᠢ ᠳᠡᠯᠭᠡᠷᠡᠵᠦ᠂ ᠲᠩᠷᠢ ᠪᠤᠷᠬᠠᠨ ᠴᠢᠮᠠᠶ᠋ᠢ ᠬᠠᠷᠠᠭ᠃ ᠴᠢ ᠶᠣᠰᠣᠲᠠᠢ ᠰᠦ ᠰᠢᠭ ᠴᠠᠭᠠᠨ ᠰᠠᠨᠠᠭᠠ ᠲᠠᠢ ᠬᠥᠮᠦᠨ ᠪᠠᠢᠨᠠ ᠳᠠ᠂ ᠨᠠᠷᠠ ᠪᠠᠢᠨᠠ᠂ ᠪᠢ ᠴᠢᠮᠠᠲᠤ ᠣᠳᠣ ᠲᠦᠮᠡᠨ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠶᠡ᠃ ᠴᠢᠮᠠᠶ᠋ᠢ(ᠴᠢᠮᠠ ᠶ᠋ᠢ) ᠮᠢᠨᠦ ᠡᠪᠦᠷ ᠡᠴᠡ ᠦᠨᠡᠨ ᠳ᠋ᠡᠭᠡᠨ ᠪᠠᠢᠬᠤ ᠦᠭᠡᠢ ᠠᠯᠲᠠ ᠠᠪᠬᠤ ᠭᠡᠵᠦ ᠪᠥᠬᠥᠢᠪᠡᠯ ᠴᠢᠨᠢ ᠪᠢ ᠬᠢᠲᠤᠭᠠᠯᠠᠵᠤ ᠠᠯᠠᠬᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠰᠠᠨ ᠪᠢᠯᠡ᠃ ᠪᠢ ᠪᠣᠯ ᠪᠠᠶᠠᠨ ᠪᠠᠭᠰᠢ ᠳ᠋ᠠᠭᠠᠨ ᠨᠣᠬᠠᠢ ᠮᠣᠷᠢᠨ ᠤ᠋ ᠬᠦᠴᠦ ᠭᠠᠷᠭᠠᠵᠤ ᠵᠢᠳᠬᠦᠳᠡᠭ ᠶᠠᠳᠠᠭᠤ ᠱᠠᠪᠢ ᠨᠢ ᠪᠢᠯᠡ᠃ ᠪᠠᠭᠰᠢ ᠨᠠᠮᠠᠶ᠋ᠢ ᠪᠤᠴᠠᠵᠤ ᠣᠴᠢᠬᠤ ᠳ᠋ᠤ᠌ ᠡᠷᠳᠡᠨᠢ ᠶ᠋ᠢᠨ ᠭᠠᠪᠠᠯᠠ ᠶ᠋ᠢ ᠠᠯᠳᠠᠯᠠ ᠭᠡᠵᠦ ᠨᠠᠮᠠᠶ᠋ᠢ ᠰᠢᠳᠬᠡᠨᠡ ᠳᠡ᠃ ᠰᠢᠳᠬᠡᠪᠡᠯ ᠴᠤ᠌ ᠰᠢᠳᠬᠡᠭ! ᠴᠢᠨᠦ ᠵᠥᠭᠡᠯᠡᠨ ᠰᠠᠢᠬᠠᠨ ᠰᠡᠳᠬᠢᠯ ᠴᠢᠨᠢ᠂ ᠮᠢᠨᠦ ᠨᠢᠳᠦ ᠶ᠋ᠢ ᠪᠥᠭᠯᠡᠭᠰᠡᠨ ᠠᠷᠪᠠᠨ ᠬᠠᠷᠠ ᠨᠢᠭᠦᠯ ᠦ᠋ᠨ ᠰᠠᠷᠠᠪᠴᠢ ᠶ᠋ᠢ ᠰᠡᠬᠦᠵᠦ ᠥᠭᠭᠦᠯᠡ᠃ ᠳᠡᠭᠡᠷᠡᠮᠴᠢᠨ ᠬᠥᠮᠦᠨ ᠦ᠌ ᠫᠤᠤ ᠨᠢ ᠭᠤᠷᠪᠠᠨ ᠵᠢᠯ ᠪᠣᠯᠤᠭᠠᠳ᠂ ᠡᠵᠡᠨ ᠦ᠌ ᠪᠡᠨ ᠥᠭᠡᠳᠡ ᠡᠴᠡ ᠨᠢᠭᠡ ᠬᠠᠷᠠᠳᠠᠭ ᠭᠡᠳᠡᠭ᠃ ᠪᠢ ᠭᠦᠷᠢᠮᠴᠢ ᠪᠠᠭᠰᠢ ᠳ᠋ᠠᠭᠠᠨ ᠭᠤᠴᠢᠨ ᠵᠢᠯ ᠵᠠᠷᠤᠭᠳᠠᠵᠤ ᠶᠠᠪᠤᠭᠰᠠᠨ ᠶᠤᠮ᠃ ᠣᠳᠣ᠂ ᠲᠡᠷᠡ ᠬᠥᠮᠦᠨ ᠢ᠋ ᠲᠠᠪᠤᠨ ᠵᠠᠭᠤᠨ ᠲᠥᠷᠥᠯ ᠳ᠋ᠡᠭᠡᠨ ᠨᠠᠮᠠᠶ᠋ᠢ ᠮᠠᠷᠲᠠᠬᠤ ᠦᠭᠡᠢ ᠪᠣᠯᠲᠠᠯᠠ ᠨᠢ ᠥᠭᠡᠳᠡ ᠡᠴᠡ ᠨᠢ ᠨᠢᠭᠡ ᠬᠠᠷᠠᠨᠠ ᠳᠠ ! ᠴᠢ ᠮᠢᠨᠦ ᠭᠠᠷ ᠢ᠋ ᠬᠤᠭᠤ ᠲᠠᠰᠢᠭᠰᠠᠨ ᠪᠢᠰᠢ᠂ ᠮᠢᠨᠦ ᠪᠠᠭᠰᠢ ᠶ᠋ᠢᠨ ᠨᠢᠭᠦᠯ ᠦ᠋ᠨ ᠰᠠᠪᠠ ᠳᠦᠭᠦᠷᠦᠭᠰᠡᠨ ᠦ᠌ ᠲᠡᠮᠳᠡᠭ ᠨᠢ ᠲᠡᠷᠡ ᠠ᠋! ᠣ᠁ ᠣ᠁ ᠣ᠁ ᠭᠡᠵᠦ ᠮᠣᠷᠢᠨ ᠤ᠋ ᠪᠠᠨ ᠴᠤᠯᠪᠤᠭᠤᠷ ᠢ᠋ ᠲᠠᠰᠤ ᠠᠳᠬᠤᠭᠠᠳ ᠣᠷᠬᠢᠷᠠᠲᠠᠯᠠ᠂ ᠳᠠᠪᠠᠭᠠᠨ ᠤ᠋ ᠴᠠᠭᠠᠨᠠ ᠠ᠋ᠴᠠ ᠮᠣᠷᠢᠨ ᠤ᠋ ᠲᠦᠪᠦᠷᠭᠡᠨ ( ᠲᠦᠪᠡᠷᠭᠡᠨ) ᠰᠣᠨᠣᠰᠳᠠᠵᠤ᠂ ᠡᠪᠦᠭᠡᠨ ᠴᠡᠷᠢᠭ ᠪᠠᠯᠳᠠᠨ ᠬᠥᠲᠥᠯᠭᠡᠭᠡ ᠮᠣᠷᠢᠨ ᠬᠥᠲᠥᠯᠦᠭᠰᠡᠭᠡᠷ ᠳᠠᠪᠬᠢᠵᠤ ᠢᠷᠡᠭᠡᠳ᠂ ᠰᠠᠮᠲᠠᠨᠪᠠᠵᠠᠷ ( ᠰᠠᠮᠲᠠᠨᠪᠠᠽᠠᠷ ) ᠤᠷᠤᠭᠤ ᠬᠠᠷᠠᠵᠤ
— ᠵᠠ ᠶᠠᠭᠤ ᠪᠣᠯᠴᠢᠬᠠᠪᠠ? ᠮᠣᠷᠢᠨ ᠠ᠋ᠴᠠ ᠪᠠᠨ ᠣᠢᠴᠢᠪᠠᠤ( ᠣᠢᠴᠢᠪᠠ ᠤᠤ) ᠭᠡᠵᠡᠢ᠃
— ᠦᠭᠡᠢ᠂ ᠪᠢ ᠬᠥᠮᠦᠨ ᠠᠯᠠᠬᠤ ᠭᠡᠳ᠂ ᠲᠩᠷᠢ ᠨᠠᠮᠠᠶ᠋ᠢ ᠭᠡᠰᠬᠡᠨ ᠰᠢᠳᠬᠡᠵᠡᠢ ᠭᠡᠵᠦ ᠠᠷᠬᠢᠷᠠᠭᠠᠳ ᠭᠠᠷ ᠢ᠋ ᠮᠢᠨᠢ ᠴᠢᠭ ᠪᠠᠷᠢᠵᠤ ᠪᠣᠭᠣᠵᠤ ᠥᠭᠭᠦᠨᠡᠦ᠂ ᠠ— ᠷᠠ— ᠷᠠ— ᠷᠠ! * ᠭᠡᠵᠦ ᠶᠣᠢᠯᠠᠨ ᠪᠠᠷᠬᠢᠷᠠᠭᠠᠳ᠂ ᠲᠡᠰᠬᠡᠯ ᠦᠭᠡᠢ ᠡᠪᠡᠳᠦᠭᠰᠡᠨ ᠡᠴᠡ ᠪᠣᠯᠵᠤ᠂ ᠴᠢᠷᠠᠢ ᠨᠢ ᠵᠢᠪᠡᠬᠡᠢᠷᠡᠭᠡᠳ᠂ ᠭᠡᠨᠡᠳᠲᠡ ᠬᠠᠵᠠᠭᠤ ᠲᠠᠰᠢ ᠪᠠᠨ ᠦᠬᠦᠳᠬᠢᠨ ᠤᠨᠠᠪᠠ᠃
— — — —
* ᠨᠢᠰᠬᠦ ᠵᠢᠪ ᠰᠠᠷᠢᠰᠤᠨ ᠪᠠᠭᠪᠠᠭᠠᠢ ᠶ᠋ᠢᠨ ᠨᠢᠭᠡ ᠵᠦᠢᠯ᠃
* ᠲᠥᠪᠡᠳ ᠬᠥᠮᠦᠨ ᠶᠣᠢᠯᠠᠬᠤ ᠳ᠋ᠠᠭᠠᠨ ᠠ— ᠷᠠ— ᠷᠠ— ᠷᠠ— ᠭᠡᠳᠡᠭ ᠶᠦᠮ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠳᠮᠠᠰᠡᠴᠡᠨ᠂ ᠣᠶᠤᠨᠪᠠᠲᠤ᠂ ᠰᠠᠷᠠᠨᠲᠤᠶᠠᠭᠠ᠂ ᠤᠢᠭᠤᠷᠵᠢᠨ ᠣᠳᠬᠣᠨᠪᠠᠪᠠ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ ᠂ ᠠᠯᠲᠠᠨᠱᠠ᠂ ᠤᠢᠭᠤᠷᠵᠢᠨ ᠣᠳᠬᠣᠨᠪᠠᠪᠠ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ