ᠦᠷ ᠦᠨ ᠲᠤᠶᠠᠭᠠ 1 – ᠪ᠂ ᠷᠢᠨᠴᠢᠨ - ᠲᠡᠷᠢᠬᠦᠨ ᠲᠡᠪᠲᠡᠷ < ᠮᠠᠨᠵᠤ ᠶᠢᠨ ᠳᠠᠯᠬᠢᠨ ᠳᠤ>(ᠲᠠᠪᠤ) Үүрийн туяа I – Б ᠂ Ренчин Тэргүүн дэвтэр "<Манжийн талхинд" (5)
621ᠲᠠᠪᠤ᠂ ᠠᠶᠤᠮᠠᠬᠠᠢ ᠨᠣᠬᠠᠢ ᠴᠢᠮᠡᠭᠡ ᠦᠭᠡᠢ ᠵᠠᠭᠤᠳᠠᠭ
ᠬᠡᠯᠡᠨ ᠦ᠌ ᠦᠵᠦᠭᠦᠷ ᠵᠥᠪ ᠵᠥᠭᠡᠯᠡᠬᠡᠨ
(ᠠᠷᠠᠳ ᠤ᠋ᠨ ᠰᠡᠴᠡᠨ ᠦᠭᠡ)
ᠲᠤᠰ ᠬᠤᠰᠢᠭᠤᠨ ᠤ᠋ ᠵᠠᠰᠠᠭ ᠨᠣᠶᠠᠨ ᠯᠾᠠ ᠪᠠᠢᠰᠠ ᠦᠷᠭᠦᠭᠡᠨ ᠳ᠋ᠡᠭᠡᠨ ᠡᠪᠡᠳᠴᠢᠲᠡᠢ ᠬᠡᠪᠲᠡᠵᠡᠢ᠃ ᠴᠡᠴᠡᠷᠡᠭ ᠡᠪᠡᠳᠴᠢᠨ ᠲᠣᠰᠴᠤ᠂ ᠱᠣᠨᠲᠣᠭᠣᠷ ᠪᠣᠭᠣᠨᠢ ᠬᠠᠮᠠᠷ ᠲᠠᠢ᠂ ᠬᠠᠯᠵᠠᠨ ᠶᠡᠬᠡ ᠳᠤᠬᠤ ᠲᠠᠢ᠂ ᠴᠢᠪᠠᠭᠠᠨᠴᠠ ᠴᠢᠷᠠᠢ ᠲᠠᠢ ᠲᠡᠷᠡ ᠨᠣᠶᠠᠨ ᠤ᠋ ᠤᠯᠴᠠᠭᠠᠷ ᠨᠢᠭᠤᠷ ᠨᠢ ᠬᠠᠷᠠ ᠬᠥᠯᠥᠰᠥ ᠴᠢᠬᠠᠷᠠᠵᠤ᠂ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠪᠢᠯᠡ᠃
ᠳᠡᠷᠭᠡᠳᠡ ᠨᠢ ᠰᠢᠳᠠᠷ ᠡᠮᠴᠢ ᠵᠠᠮᠰᠤ ᠮᠠᠷᠠᠮᠪᠠ ᠭᠡᠳᠡᠭ᠂ ᠪᠤᠭᠤᠷᠤᠯᠲᠤᠵᠤ ᠪᠠᠢᠭᠠ ᠦᠰᠦ ᠪᠡᠨ ᠵᠦᠢᠯᠡᠭᠰᠡᠨ ᠲᠣᠯᠣᠭᠠᠢ ᠲᠠᠢ᠂ ᠪᠤᠯᠴᠠᠭᠠᠷ ᠭᠠᠷ ᠲᠠᠢ ᠮᠠᠷᠢᠶᠠ ᠶᠡᠬᠡᠲᠡᠢ ᠡᠪᠦᠭᠡᠨ᠂ ᠨᠣᠶᠠᠨ ᠳ᠋ᠤ᠌ ᠴᠡᠴᠡᠷᠡᠭ ᠳᠠᠷᠤᠬᠤ ᠡᠮ ᠥᠭᠭᠦᠭᠡᠳ ᠰᠢᠩᠭᠡᠬᠦ ᠶ᠋ᠢ ᠨᠢ ᠬᠦᠯᠢᠶᠡᠵᠦ᠂ ᠨᠣᠶᠠᠨ ᠤ᠋ ᠤᠷᠢᠵᠤ ᠢᠷᠡᠭᠦᠯᠦᠭᠰᠡᠨ ᠭᠦᠷᠢᠮᠴᠢ ᠵᠢᠷᠤᠬᠠᠢᠴᠢ ᠸᠠᠩᠴᠢᠭᠨᠤᠷᠫᠢᠯ ᠲᠠᠢ ᠳᠡᠷᠭᠡᠳᠡᠬᠢ ᠬᠥᠮᠦᠨ ᠦ᠌ ᠮᠡᠳᠡᠬᠦ ᠦᠭᠡᠢ ᠲᠥᠪᠡᠳ ᠦᠭᠡ ᠪᠡᠷ ᠨᠠᠮ ᠳᠠᠭᠤᠨ ᠢ᠋ᠶ᠋ᠠᠷ ᠬᠡᠯᠡᠯᠴᠡᠨ ᠰᠠᠭᠤᠵᠤ ᠪᠠᠢᠪᠠ᠃
ᠰᠢᠳᠠᠷ ᠡᠮᠴᠢ᠂ ᠨᠣᠶᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠵᠠᠯᠢᠲᠠᠢ ᠲᠡᠷᠡ ᠲᠥᠪᠡᠳ ᠦ᠋ᠨ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍᠂ ᠳᠣᠲᠣᠷᠠ ᠪᠠᠨ ᠳᠤᠷᠠ ᠦᠭᠡᠢᠴᠡᠵᠦ᠂ ᠠᠰᠢᠭ ᠲᠡᠮᠡᠴᠡᠬᠦ ᠡᠲᠡᠭᠡᠳ ᠭᠠᠷᠴᠤ ᠢᠷᠡᠪᠡ ᠭᠡᠵᠦ ᠪᠣᠳᠣᠪᠠᠴᠤ᠂ ᠭᠠᠳᠠᠨᠠ ᠪᠠᠨ ᠶᠡᠬᠡ ᠨᠠᠢᠷᠲᠠᠢ ᠰᠠᠢᠬᠠᠨ ᠪᠠᠢᠳᠠᠯᠲᠠᠢ ᠪᠠᠢᠵᠤ᠂
— ᠮᠢᠨᠦ ᠡᠮ᠂ ᠴᠡᠴᠡᠷᠡᠭ ᠡᠪᠡᠳᠴᠢᠨ ᠢ᠋ ᠳᠠᠷᠤᠨᠠ᠃ ᠭᠠᠭᠴᠠᠬᠦ᠂ ᠨᠣᠶᠠᠨ ᠲᠠᠨ ᠰᠠᠢ᠍ᠢ ᠪᠡᠭᠡᠵᠢᠩ ᠣᠷᠣᠭᠠᠳ᠂ ᠪᠡᠶᠡ ᠮᠠᠬᠠᠪᠣᠳ ᠨᠢ ᠮᠠᠭᠤᠳᠠᠵᠤ᠂ ᠰᠥᠨᠢ ᠵᠡᠭᠦᠳᠦᠯᠡᠬᠦ᠂ ᠬᠠᠷᠠ ᠳᠠᠷᠤᠭᠤᠯᠬᠤ ᠪᠣᠯᠪᠠ᠃ ᠡᠪᠡᠳᠴᠢᠨ ᠦ᠌ ᠡᠨᠳᠡ ᠵᠡᠳᠬᠡᠷ ᠬᠥᠨᠥᠭᠡᠵᠦ ᠪᠠᠢᠭᠠ ᠪᠣᠯᠪᠠᠴᠤ᠂ ᠣᠲᠣᠴᠢ ᠪᠤᠷᠬᠠᠨ ᠤ᠋ ᠠᠴᠢ ᠪᠠᠷ ᠪᠢ ᠡᠪᠡᠳᠴᠢᠨ ᠢ᠋ ᠠᠨᠠᠭᠠᠵᠤ ᠴᠢᠳᠠᠨᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠭᠡᠵᠡᠢ᠃ ᠲᠡᠭᠡᠬᠦ ᠳ᠋ᠦ᠍ᠨᠢ᠂ ᠲᠡᠷᠡ ᠲᠥᠪᠡᠳ ᠰᠠᠨᠠᠯ ᠵᠥᠷᠢᠵᠦ᠂
— ᠮᠢᠨᠦ ᠵᠢᠷᠤᠬᠠᠢ ᠵᠢᠷᠤᠭᠰᠠᠨ ᠢ᠋ᠶ᠋ᠠᠷ ᠪᠣᠯ᠂ ᠨᠣᠶᠠᠨᠲᠠᠨ ᠪᠠᠷᠴᠢᠳ ᠢ᠋ᠶ᠋ᠠᠨ ᠨᠢᠮᠭᠡᠯᠡᠵᠦ᠂ ᠪᠤᠶᠠᠨ ᠦᠢᠯᠡᠳᠬᠦ᠂ ᠵᠣᠯᠢᠭ ᠭᠠᠷᠭᠠᠬᠤ ᠬᠡᠷᠡᠭᠲᠡᠢ ᠪᠣᠯᠤᠭᠠᠳ ᠪᠠᠢᠭᠠ ᠶᠤᠮ ᠪᠠᠢᠨᠠ᠃ ᠡᠷᠬᠢᠮ ᠭᠣᠮᠪᠣ ᠵᠠᠯᠠᠨ ᠥᠭᠯᠢᠭᠡ ᠶ᠋ᠢᠨ ᠡᠵᠡᠨ ᠯᠤᠳᠣᠶ ᠬᠣᠶᠠᠷ ᠯᠤᠤᠭᠠᠨ ᠪᠣᠯᠵᠤ᠂ ᠨᠣᠶᠠᠨ ᠤ᠋ ᠭᠠᠢ ᠵᠡᠳᠬᠡᠷ ᠢ᠋ ᠪᠡᠶᠡ ᠪᠡᠷ ᠵᠣᠯᠢᠭ ᠭᠠᠷᠭᠠᠬᠤ ᠬᠥᠮᠦᠨ ᠢ᠋ ᠣᠯᠵᠤ ᠥᠭᠭᠦᠨᠡ ᠭᠡᠰᠡᠨ᠃ ᠭᠠᠭᠴᠠᠬᠦ᠂ ᠲᠡᠷᠡ ᠬᠡᠷᠡᠭ ᠲᠦ᠍ ᠲᠠᠨ ᠢ᠋ ᠰᠢᠲᠦᠬᠦ ᠪᠣᠯᠵᠣᠰᠢ ᠦᠭᠡᠢ ᠲᠤᠯᠠ ᠨᠠᠮᠠᠶ᠋ᠢ ᠡᠷᠬᠢᠮ ᠡᠮᠴᠢ ᠲᠠᠨ ᠤ᠋ ᠲᠤᠰ ᠢᠪᠡᠭᠡᠯ ᠳ᠋ᠦ᠍ ᠰᠢᠲᠦᠪᠡᠯ ᠰᠠᠢᠨ ᠭᠡᠵᠦ ᠬᠡᠯᠡᠵᠦ ᠥᠭᠭᠦᠭᠰᠡᠨ ᠪᠢᠯᠡ ᠭᠡᠵᠦ ᠠᠷᠭᠠᠳᠠᠬᠤ ᠮᠠᠶᠢᠭ ᠢ᠋ᠶ᠋ᠠᠷ ᠪᠢᠯᠪᠢᠭᠦᠷᠳᠡᠨ᠂ ᠶᠠᠭᠤ ᠬᠡᠯᠡᠬᠦ ᠶ᠋ᠢ ᠬᠦᠯᠢᠶᠡᠵᠦ ᠰᠠᠭᠤᠬᠤ ᠳ᠋ᠤᠨᠢ᠂
— ᠪᠢ ᠡᠮᠴᠢ ᠬᠥᠮᠦᠨ᠂ ᠡᠮ ᠥᠭᠬᠦ ᠡᠴᠡ ᠣᠨᠳᠣᠣ ᠶᠠᠭᠤᠮᠠ ᠮᠡᠳᠡᠳᠡᠭ ᠦᠭᠡᠢ ᠪᠢᠯᠡ᠃ ᠲᠠᠨ ᠤ᠋ ᠡᠷᠬᠢᠯᠡᠭᠰᠡᠨ ᠵᠢᠷᠤᠬᠠᠢ ᠶ᠋ᠢᠨ ᠤᠬᠠᠭᠠᠨ᠂ ᠠᠳᠠ ᠵᠡᠳᠬᠡᠷ ᠳᠠᠷᠤᠬᠤ᠂ ᠭᠦᠷᠢᠮ ᠬᠢᠬᠦ ᠳ᠋ᠦ᠍ ᠮᠡᠳᠡᠬᠦ ᠴᠢᠳᠠᠬᠤ ᠶᠠᠭᠤᠮᠠ ᠨᠠᠳᠠᠳᠤ ᠠᠯᠠᠭᠠ᠃ ᠲᠤᠬᠠᠢᠯᠠᠨ ᠵᠢᠱ᠌ᠢᠶᠡᠯᠡᠪᠡᠯ᠂ ᠮᠢᠨᠦ ᠡᠮ ᠪᠠᠷᠢᠬᠤ ᠵᠦᠢᠯ ᠳ᠋ᠦ᠍ ᠲᠠᠨ ᠤ᠋ ᠴᠢᠳᠠᠳᠠᠭ ᠦᠭᠡᠢ ᠲᠡᠢ ᠠᠳᠠᠯᠢ᠂ ᠪᠢ ᠴᠦ᠍ ᠲᠠᠨ ᠤ᠋ ᠡᠷᠬᠢᠯᠡᠭᠰᠡᠨ ᠦᠢᠯᠡᠳᠪᠦᠷᠢ ᠳ᠋ᠦ᠍ ᠮᠡᠳᠡᠬᠦ ᠶᠠᠭᠤᠮᠠ ᠠᠯᠠᠭᠠ ᠳᠠ ᠭᠡᠵᠡᠢ᠃
ᠴᠢᠩᠭᠢᠬᠦ ᠳ᠋ᠦ᠍ᠨᠢ ᠲᠡᠷᠡ ᠲᠥᠪᠡᠳ᠂ ᠥᠨᠥᠬᠢ ᠮᠠᠷᠠᠮᠪᠠ ᠶ᠋ᠢᠨ ᠦᠭᠡ ᠶ᠋ᠢᠨ ᠰᠢᠪᠦᠭᠡᠨ ᠳ᠋ᠦ᠍ ᠬᠠᠳᠬᠤᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠭᠡᠴᠢ ᠦᠭᠡᠢ ᠪᠣᠯᠤᠨ᠂ ᠶᠡᠬᠡᠯᠡ ᠡᠯᠢᠭᠡᠰᠡᠭ ᠳᠦᠷᠢᠮ ᠦᠵᠡᠭᠦᠯᠵᠦ ᠥᠭᠦᠯᠡᠷᠦᠨ᠂
— ᠮᠢᠨᠦ ᠰᠠᠨᠠᠬᠤ ᠳ᠋ᠤ᠌ ᠡᠷᠬᠢᠮ ᠦ᠋ᠨ ᠮᠠᠩᠬᠠᠭ ᠲᠠᠢ ᠡᠮ ᠳᠣᠲᠣᠷᠠ ᠬᠥᠮᠦᠨ ᠦ᠌ ᠤᠬᠠᠭᠠᠨ ᠮᠡᠳᠡᠭᠡ ᠶ᠋ᠢ ᠪᠠᠯᠠᠷᠳᠠᠭᠤᠯᠳᠠᠭ ᠡᠮ ᠪᠣᠢ ᠪᠣᠯᠪᠠᠤ? ᠭᠡᠬᠦ ᠳ᠋ᠦ᠍ᠨᠢ᠂
— ᠲᠠ᠂ ᠬᠥᠮᠦᠨ ᠢ᠋ ᠬᠠᠪᠴᠢᠯᠭᠠ ᠪᠠᠷ ᠵᠣᠯᠢᠭ ᠪᠣᠯᠭᠠᠬᠤ ᠭᠡᠵᠦ ᠪᠠᠢᠭᠠ ᠬᠡᠷᠡᠭ ᠤᠤ? ᠭᠡᠵᠦ ᠠᠰᠠᠭᠤᠵᠠᠢ᠃
— ᠦᠭᠡᠢ᠂ ᠪᠢ ᠬᠣᠪᠢᠨ ᠳ᠋ᠠᠭᠠᠨ᠂ ᠬᠡᠨ ᠢ᠋ ᠴᠤ᠌ ᠬᠠᠪᠴᠢᠵᠤ ᠪᠠᠢᠭᠠ ᠬᠡᠷᠡᠭ ᠪᠢᠰᠢ᠃ ᠵᠣᠯᠢᠭ ᠲᠤ᠌ ᠭᠠᠷᠬᠤ ᠬᠥᠮᠦᠨ᠂ ᠥᠪᠡᠷ ᠢ᠋ᠶ᠋ᠡᠨ ᠰᠠᠢᠨ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠣᠯᠤᠨᠠᠤ᠂ ᠬᠠᠪᠴᠢᠯᠭᠠ ᠪᠠᠷ ᠪᠣᠯᠤᠨᠠᠤ᠂ ᠲᠡᠷᠡ ᠬᠡᠷᠡᠭ ᠨᠢ ᠶᠡᠷᠦ᠂ ᠲᠠ ᠪᠢᠳᠡ ᠬᠣᠶᠠᠷ ᠲᠤ᠌ ᠬᠠᠮᠢᠶᠠ ᠦᠭᠡᠢ᠂ ᠴᠣᠬᠣᠮ ᠨᠠᠷᠢᠨ ᠶᠣᠰᠣ ᠬᠡᠯᠡᠯᠴᠡᠪᠡᠯ᠂ ᠰᠠᠢᠨ ᠳᠤᠷᠠ ᠪᠠᠷ ᠵᠣᠯᠢᠭ ᠲᠤ᠌ ᠭᠠᠷᠬᠤ ᠭᠡᠵᠦ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ ? ᠠᠮᠠᠨ ᠳ᠋ᠠᠭᠠᠨ ᠰᠠᠢᠨ ᠳᠤᠷᠠ ᠪᠠᠷ ᠲᠡᠭᠡᠶᠡ ᠭᠡᠵᠦ ᠵᠥᠪᠰᠢᠨ ᠬᠦᠯᠢᠶᠡᠭᠰᠡᠨ ᠬᠥᠮᠦᠨ᠂ ᠨᠠᠷᠢᠨ ᠳᠡᠭᠡᠷᠡ ᠪᠡᠨ ᠶᠠᠳᠠᠭᠤ ᠬᠣᠭᠣᠰᠣᠨ ᠤ᠋ ᠵᠣᠪᠠᠯᠠᠩ ᠳ᠋ᠤ᠌ ᠬᠠᠪᠴᠢᠭᠳᠠᠨ ᠵᠣᠯᠢᠭ ᠲᠤ᠌ ᠭᠠᠷᠴᠤ ᠪᠠᠢᠭᠠ ᠬᠡᠷᠡᠭ ᠰᠢᠦ ᠳᠡ᠃ ᠵᠢᠱ᠌ᠢᠶᠡ ᠨᠢ᠄ ᠲᠠ ᠡᠨᠡ ᠨᠣᠶᠠᠨ ᠤ᠋ ᠰᠢᠳᠠᠷ ᠡᠮᠴᠢ ᠬᠥᠮᠦᠨ᠂ ᠥᠯᠥᠰᠬᠦ ᠲᠠᠭᠠᠷᠠᠬᠤ ᠶᠠᠳᠠᠬᠤ ᠵᠦᠳᠡᠬᠦ ᠵᠣᠪᠠᠯᠠᠩ ᠤ᠋ᠨ ᠲᠠᠰᠢᠭᠤᠷ ᠲᠤ᠌ ᠲᠠᠭᠤᠭᠳᠠᠬᠤ ᠦᠭᠡᠢ ᠤᠴᠢᠷ ᠠ᠋ᠴᠠ ᠨᠣᠶᠠᠨ ᠤ᠋ ᠪᠠᠨ ᠭᠠᠢ ᠵᠡᠳᠬᠡᠷ ᠢ᠋ ᠰᠠᠢᠨ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠡᠶᠡ ᠳ᠋ᠡᠭᠡᠨ ᠡᠭᠦᠷᠴᠦ᠂ ᠵᠣᠯᠢᠭ ᠲᠤᠨᠢ ᠭᠠᠷᠤᠶᠠ ᠭᠡᠵᠦ ᠶᠠᠭᠠᠬᠢᠭᠰᠠᠨ ᠴᠤ᠌ ᠬᠡᠯᠡᠬᠦ ᠦᠭᠡᠢ ᠪᠠᠢᠬᠠ᠃
ᠪᠢ ᠲᠠᠨ ᠤ᠋ ᠲᠤᠰᠠᠯᠠᠨ ᠲᠡᠳᠬᠦᠬᠦ ᠶ᠋ᠢ ᠭᠤᠶᠤᠬᠤ ᠳ᠋ᠠᠭᠠᠨ ᠵᠣᠯᠢᠭ ᠲᠤ᠌ ᠭᠠᠷᠬᠤ ᠲᠡᠷᠡ ᠵᠣᠪᠠᠯᠠᠩᠲᠤ ᠶᠠᠳᠠᠭᠤ ᠠᠮᠢᠲᠠᠨ ᠢ᠋ ᠡᠨᠡᠷᠢᠨ ᠦᠷᠦ ᠡᠪᠡᠳᠦᠭᠰᠡᠨ ᠳ᠋ᠡᠭᠡᠨ ᠲᠡᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠦ᠃ ᠲᠠ ᠡᠮ ᠢ᠋ᠶ᠋ᠡᠷ ᠲᠤᠰᠠᠯᠠᠵᠤ ᠲᠡᠷᠡ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠢ᠋ ᠮᠠᠨᠠᠷᠠᠭᠤᠯᠤᠨ᠂ ᠵᠣᠪᠠᠯᠠᠩ ᠢ᠋ ᠨᠢ ᠳᠠᠷᠤᠵᠤ ᠥᠭᠪᠡᠯ᠂ ᠲᠡᠭᠦᠪᠡᠷ ᠢ᠋ᠶ᠋ᠡᠨ ᠪᠠᠰᠠ ᠨᠣᠶᠠᠨ ᠤ᠋ ᠪᠠᠨ ᠰᠡᠳᠬᠢᠯ ᠢ᠋ ᠡᠮᠨᠡᠵᠦ᠂ ᠡᠪᠡᠳᠴᠢᠨ ᠵᠣᠪᠠᠯᠠᠩ ᠠ᠋ᠴᠠ ᠣᠳᠣ ᠰᠠᠯᠵᠤ᠂ ᠤᠷᠲᠤ ᠨᠠᠰᠤᠯᠠᠬᠤ ᠬᠤᠲᠤᠭᠲᠠᠢ ᠪᠣᠯᠤᠯᠠ ᠭᠡᠵᠦ ᠵᠣᠷᠢᠭ ᠪᠠᠳᠠᠷᠠᠭᠤᠯᠬᠤ ᠶ᠋ᠢ ᠪᠣᠳᠣᠵᠤ ᠦᠵᠡ᠃ ᠲᠡᠭᠡᠪᠡᠯ᠂ ᠨᠢᠭᠡᠨᠲᠡ ᠰᠡᠳᠬᠢᠯ ᠰᠠᠨᠠᠭᠠ ᠠᠮᠤᠷ ᠪᠣᠯᠵᠤ ᠢᠷᠡᠭᠰᠡᠨ ᠬᠣᠢᠨᠠ᠂ ᠪᠡᠶᠡ ᠶ᠋ᠢ ᠠᠮᠤᠷ ᠪᠣᠯᠭᠠᠵᠤ ᠠᠨᠠᠭᠠᠬᠤ ᠳ᠋ᠤ᠌ ᠳᠥᠭᠥᠮ ᠪᠣᠯᠬᠤ ᠶᠣᠰᠣ ᠪᠣᠢ ᠭᠡᠵᠡᠢ᠃ ᠲᠡᠭᠡᠬᠦ ᠳ᠋ᠦ᠍ᠨᠢ᠂ ᠰᠢᠳᠠᠷ ᠡᠮᠴᠢ ᠥᠭᠦᠯᠡᠷᠦᠨ᠂
— ᠪᠢ ᠪᠤᠷᠬᠠᠨ ᠱᠠᠰᠢᠨ ᠲᠠᠢ ᠭᠡᠯᠦᠩ ᠬᠥᠮᠦᠨ᠂ ᠲᠠᠨ ᠤ᠋ ᠲᠡᠷᠡ ᠦᠭᠡ ᠶ᠋ᠢ ᠳᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠭᠡᠬᠦ ᠳ᠋ᠦ᠍ᠨᠢ᠂ ᠴᠢᠨᠠᠳᠤᠬᠢ ᠨᠢ᠂
— ᠪᠢ ᠴᠦ᠍ ᠪᠠᠰᠠ ᠪᠤᠷᠬᠠᠨ ᠱᠠᠰᠢᠨ ᠲᠠᠢ ᠭᠡᠯᠦᠩ ᠬᠥᠮᠦᠨ ᠳᠡ᠃ ᠲᠡᠢᠮᠦ ᠳᠡᠭᠡᠷᠡ ᠡᠴᠡ ᠴᠤ᠌ ᠮᠠᠨ ᠤ᠋ ᠽᠦᠩᠺᠠᠸᠠ ᠪᠣᠭᠳᠠ ᠶ᠋ᠢᠨ ᠱᠠᠰᠢᠨ ᠳ᠋ᠤ᠌ ᠠᠮᠢᠲᠠᠨ ᠤ᠋ ᠲᠤᠰᠠ ᠶ᠋ᠢᠨ ᠲᠤᠯᠠᠳᠠ ᠲᠣᠭᠲᠠᠭᠠᠭᠰᠠᠨ ᠲᠡᠷᠡ ᠠᠷᠭᠠ ᠵᠠᠰᠠᠯ ᠢ᠋ ᠬᠡᠷᠡᠭᠯᠡᠬᠦ ᠨᠢ ᠱᠠᠰᠢᠨ ᠠᠮᠢᠲᠠᠨ ᠤ᠋ ᠲᠤᠰᠠ ᠶ᠋ᠢ ᠪᠣᠳᠣᠭᠰᠠᠨ ᠬᠡᠷᠡᠭ ᠭᠡᠵᠦ ᠦᠵᠡᠵᠦ ᠪᠠᠢᠨᠠ᠃ ᠨᠣᠶᠠᠨ ᠤ᠋ ᠵᠡᠳᠬᠡᠷ ᠦ᠋ᠨ ᠵᠣᠯᠢᠶᠠᠰᠤᠨ ᠳ᠋ᠤ᠌ ᠭᠠᠷᠴᠤ ᠵᠣᠯᠢᠭ ᠪᠣᠯᠬᠤ ᠲᠡᠷᠡ ᠬᠥᠮᠦᠨ ᠱᠠᠩ ᠬᠡᠰᠢᠭ ᠦᠯᠡᠮᠵᠢ ᠶ᠋ᠢ ᠬᠦᠷᠲᠡᠵᠦ᠂ ᠲᠡᠭᠦᠪᠡᠷ ᠢ᠋ᠶ᠋ᠡᠨ ᠠᠷᠢᠯᠤᠭᠰᠠᠨ ᠣᠷᠣᠨ ᠪᠠᠷᠠᠭᠤᠨ ᠵᠣᠣ ᠳ᠋ᠤ᠌ ᠬᠦᠷᠴᠦ᠂ ᠪᠣᠳᠢ ᠮᠥᠷ ᠢ᠋ ᠵᠣᠷᠢᠭᠰᠠᠨ ᠭᠡᠯᠦᠩ ᠬᠥᠮᠦᠨ ᠪᠣᠯᠵᠤ ᠪᠣᠯᠬᠤ ᠶᠣᠰᠣ ᠪᠣᠢ᠃ ᠪᠤᠰᠤᠳ ᠤ᠋ᠨ ᠲᠤᠰᠠ ᠶ᠋ᠢ ᠪᠣᠳᠣᠵᠤ ᠪᠡᠶᠡ ᠳ᠋ᠡᠭᠡᠨ ᠵᠡᠳᠬᠡᠷ ᠢ᠋ ᠡᠭᠦᠷᠦᠨ ᠭᠠᠷᠤᠭᠰᠠᠨ ᠪᠤᠶᠠᠨ ᠤ᠋ ᠬᠦᠴᠦ ᠪᠡᠷ ᠲᠡᠷᠡ ᠬᠥᠮᠦᠨ᠂ ᠬᠠᠷᠢᠨ ᠴᠤ᠌ ᠪᠡᠶᠡ ᠪᠡᠨ ᠪᠤᠷᠬᠠᠨ ᠱᠠᠰᠢᠨ ᠲᠠᠢ᠂ ᠭᠡᠯᠦᠩ ᠰᠠᠨᠸᠠᠷ ᠲᠠᠢ ᠭᠡᠵᠦ ᠬᠠᠩᠬᠤᠯᠵᠠᠳᠠᠭ ᠵᠠᠷᠢᠮ ᠡᠲᠡᠭᠡᠳ ᠡᠴᠡ ᠤᠷᠢᠳ ᠢ᠋ᠶ᠋ᠠᠷ ᠪᠤᠷᠬᠠᠨ ᠤ᠋ ᠬᠤᠲᠤᠭ ᠢ᠋ ᠣᠯᠵᠤ ᠪᠣᠯᠬᠤ ᠵᠠᠪᠰᠢᠶᠠᠨ ᠪᠣᠢ ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠨ ᠬᠡᠯᠡᠭᠡᠳ᠂ ᠣᠳᠣ ᠡᠨᠡ ᠮᠣᠩᠭᠣᠯ ᠠ᠋ᠴᠠ ᠬᠠᠷᠢᠭᠤ ᠪᠠᠨ ᠠᠪᠴᠠᠢ᠃ ᠪᠢ ᠴᠦ᠍ ᠭᠡᠰᠡᠨ ᠬᠥᠪᠥᠩ ᠢ᠋ᠶ᠋ᠡᠷ ᠣᠷᠢᠶᠠᠭᠰᠠᠨ ᠴᠢᠯᠠᠭᠤ ᠪᠠᠷ ᠨᠢᠭᠡ ᠴᠣᠬᠢᠭᠠᠳ ᠠᠪᠤᠯᠠ ᠭᠡᠵᠦ ᠪᠠᠬᠠᠳᠤᠲᠠᠯᠠ᠂ ᠴᠢᠨᠠᠳᠤ ᠮᠣᠩᠭᠣᠯ ᠨᠢ ᠶᠡᠬᠡ ᠨᠠᠢᠷᠲᠠᠢ ᠡᠯᠢᠭᠡᠰᠡᠭ ᠢ᠋ᠶ᠋ᠡᠷ ᠢᠨᠢᠶᠡᠮᠰᠦᠭᠯᠡᠨ᠂ ᠦᠭᠡ ᠪᠡᠷ ᠰᠢᠪᠦᠭᠡᠳᠡᠵᠦ ᠥᠭᠦᠯᠡᠷᠦᠨ᠂
— ᠲᠡᠭᠡᠪᠡᠯ᠂ ᠤᠬᠠᠭᠠᠨ ᠨᠢ᠂ ᠪᠤᠰᠤᠳ ᠤ᠋ᠨ ᠵᠡᠳᠬᠡᠷ ᠢ᠋ ᠡᠭᠦᠷᠴᠦ ᠵᠣᠯᠢᠭ ᠲᠤ᠌ ᠭᠠᠷᠤᠭᠰᠠᠨ ᠬᠥᠮᠦᠨ᠂ ᠠᠳᠠ ᠵᠡᠳᠬᠡᠷ ᠳᠠᠷᠤᠳᠠᠭ ᠶᠡᠬᠡ ᠭᠦᠷᠢᠮᠴᠢ ᠲᠠᠨ ᠠ᠋ᠴᠠ ᠤᠷᠢᠲᠠᠵᠤ᠂ ᠪᠤᠷᠬᠠᠨ ᠤ᠋ ᠬᠤᠲᠤᠭ ᠢ᠋ ᠣᠯᠵᠤ ᠪᠣᠯᠬᠤ ᠨᠢ ᠰᠢᠪ ᠳᠡ ? ᠭᠡᠬᠦ ᠳ᠋ᠦ᠍᠂
— ᠥᠴᠦᠬᠡᠨ ᠮᠢᠨᠢ ᠪᠡᠶᠡ᠂ ᠬᠠᠮᠤᠭ ᠠᠮᠢᠲᠠᠨ ᠤ᠋ ᠪᠣᠳᠢ ᠬᠤᠲᠤᠭ ᠢ᠋ ᠣᠯᠤᠭᠰᠠᠨ ᠬᠣᠢᠨᠠ ᠨᠢᠷᠸᠠᠨ ᠤ᠋ ᠬᠤᠲᠤᠭ ᠢ᠋ ᠣᠯᠤᠨᠠ ᠭᠡᠳᠡᠭ ᠪᠣᠳᠢᠰᠠᠳ᠋ᠸᠠ ᠨᠠᠷ ᠤ᠋ᠨ ᠦᠯᠢᠭᠡᠷ ᠢ᠋ ᠳᠠᠭᠠᠵᠤ ᠶᠠᠪᠤᠭᠠ ᠬᠥᠮᠦᠨ ᠭᠡᠵᠦ ᠬᠠᠷᠢᠭᠤ ᠬᠡᠯᠡᠬᠦ ᠠᠷᠭᠠ ᠪᠠᠨ ᠣᠯᠤᠭᠠᠳ᠂ ᠴᠢᠷᠠᠢ ᠪᠠᠨ ᠲᠥᠪ ᠪᠣᠯᠭᠠᠨ ᠥᠭᠦᠯᠡᠷᠦᠨ᠂
— ᠵᠠ᠂ ᠡᠷᠬᠢᠮ ᠡᠮᠴᠢ᠂ ᠲᠠ ᠨᠠᠳᠠᠳᠤ ᠲᠤᠰᠠᠯᠠᠬᠤ ᠪᠢᠵᠡ ᠳᠡ᠂ ᠬᠡᠷᠪᠡ ᠡᠷᠬᠢᠮ ᠦ᠋ᠨ ᠮᠠᠩᠬᠠᠭ ᠲᠤ᠌ ᠮᠢᠨᠦ ᠬᠡᠷᠡᠭᠯᠡᠵᠦ ᠪᠣᠯᠵᠣᠰᠢ ᠦᠭᠡᠢ ᠵᠦᠢᠯ ᠪᠠᠢᠬᠤ ᠦᠭᠡᠢ ᠪᠠᠢᠪᠠᠯ᠂ ᠠᠷᠭᠠ ᠪᠤᠶᠤ ᠨᠣᠶᠠᠨ ᠳ᠋ᠤ᠌ ᠠᠢᠯᠠᠳᠬᠠᠭᠠᠳ᠂ ᠲᠠᠨ ᠤ᠋ ᠠᠷᠤ ᠭᠠᠵᠠᠷ ᠡᠪᠡᠳᠴᠢᠲᠡᠨ ᠵᠣᠪᠠᠯᠠᠩᠲᠠᠨ ᠳ᠋ᠤ᠌ ᠲᠤᠰᠠᠯᠠᠷᠠ ᡀᠠᠰᠠ ᠠ᠋ᠴᠠ ᠢᠷᠡᠭᠰᠡᠨ ᠲᠥᠪᠡᠳ ᠡᠮᠴᠢ ᠶ᠋ᠢ ᠵᠠᠯᠠᠬᠤ ᠠ᠋ᠴᠠ ᠳᠠ ᠭᠡᠬᠦ ᠳ᠋ᠦ᠍ᠨᠢ᠂ ᠨᠣᠶᠠᠨ ᠤ᠋ ᠰᠢᠳᠠᠷ ᠡᠮᠴᠢ᠂ ᠲᠡᠷᠡ ᠲᠥᠪᠡᠳ ᠦ᠋ᠨ ᠪᠢᠲᠡᠭᠦᠦ ᠪᠡᠷ ᠵᠠᠨᠤᠨ ᠰᠦᠷᠳᠡᠭᠦᠯᠦᠭᠰᠡᠨ ᠤᠴᠢᠷ ᠢ᠋ ᠣᠯᠵᠤ ᠮᠡᠳᠡᠭᠡᠳ᠂ ᠨᠣᠶᠠᠨ ᠤ᠋ ᠪᠤᠶᠠᠨ ᠢ᠋ ᠬᠥᠮᠦᠨ ᠦ᠌ ᠲᠥᠪᠡᠳ ᠨᠣᠬᠠᠢ ᠢᠳᠡᠭᠰᠡᠨ ᠡᠴᠡ᠂ ᠥᠪᠡᠷᠦᠨ ᠮᠣᠩᠭᠣᠯ ᠨᠣᠬᠠᠢ ᠢᠳᠡᠭ ᠭᠡᠵᠦ ᠪᠣᠳᠣᠭᠠᠳ ᠶᠠᠭᠠᠷᠠᠨ ᠵᠥᠪᠰᠢᠶᠡᠷᠡᠵᠦ᠂ ᠲᠥᠪᠡᠳ ᠭᠦᠷᠢᠮᠴᠢ ᠶ᠋ᠢᠨ ᠦᠭᠡ ᠶ᠋ᠢ ᠳᠠᠭᠠᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠣᠶᠤᠨᠪᠠᠲᠤ᠂ ᠮᠥᠩᠭᠥᠨᠭᠣᠸᠠ᠂ ᠣᠭ᠌ᠶᠤ
ᠬᠢᠨᠠᠭᠴᠢ᠄ ᠠᠯᠲᠠᠨᠱᠠ᠂ ᠣᠳᠬᠣᠨᠴᠡᠴᠡᠭ ᠂ ᠲ ᠬᠦᠮᠦᠵᠢᠯᠲᠦ ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ