ᠦᠷ ᠦᠨ ᠲᠤᠶᠠᠭᠠ 1 – ᠪ᠂ ᠷᠢᠨᠴᠢᠨ - ᠲᠡᠷᠢᠬᠦᠨ ᠲᠡᠪᠲᠡᠷ < ᠮᠠᠨᠵᠤ ᠶᠢᠨ ᠳᠠᠯᠬᠢᠨ ᠳᠤ>(ᠳᠦᠷᠪᠡ) Үүрийн туяа I – Б ᠂ Ренчин Тэргүүн дэвтэр "<Манжийн талхинд" (4)
662ᠳᠥᠷᠪᠡ᠂ ᠪᠡᠯᠴᠢᠭᠡᠷ ᠨᠤᠲᠤᠭ ᠲᠡᠮᠡᠴᠡᠪᠡ
(ᠠᠷᠠᠳ ᠤ᠋ᠨ ᠵᠦᠢᠷ ᠦᠭᠡᠨ ᠡᠴᠡ)
ᠰᠠᠢ᠍ᠢ ᠶ᠋ᠢᠨ ᠪᠢᠴᠢᠬᠠᠨ ᠬᠣᠲᠠ ᠠᠢᠯ ᠤ᠋ᠨ ᠢ᠋ᠶ᠋ᠠᠨ ᠥᠷᠢ ᠪᠡᠨ ᠬᠤᠭᠤᠴᠠᠭᠠᠨ ᠳ᠋ᠤᠨᠢ ᠠᠷᠭᠠᠯᠠᠵᠠᠢ᠃ ᠡᠪᠦᠭᠡᠨ ᠪᠠᠲᠤᠪᠠᠶᠠᠷ ᠬᠤᠰᠢᠭᠤᠨ ᠳ᠋ᠤᠨᠢ ᠰᠠᠶᠢᠪᠲᠤᠷ ᠪᠣᠢ ᠪᠣᠯᠤᠭᠰᠠᠨ ᠬᠠᠯᠵᠠᠨ ᠶᠠᠺᠦᠸ ᠭᠡᠳᠡᠭ ᠣᠷᠣᠰ ᠬᠤᠳᠠᠯᠳᠤᠭᠠᠴᠢᠨ ᠲᠠᠢ ᠬᠡᠯᠡᠯᠴᠡᠭᠡ ᠲᠣᠬᠢᠷᠠᠵᠠᠢ᠃ ᠤᠩᠭᠠᠰᠤ᠂ ᠬᠣᠨᠢ ᠮᠠᠯ ᠢ᠋ᠶ᠋ᠠᠨ ᠥᠭᠬᠦ ᠪᠡᠷ ᠬᠡᠯᠡᠯᠴᠡᠵᠦ᠂ ᠮᠥᠩᠭᠥ ᠤᠷᠢᠳᠴᠢᠯᠠᠵᠤ ᠠᠪᠤᠭᠠᠳ᠂ ᠬᠢᠲᠠᠳ ᠤ᠋ᠨ ᠥᠷᠢ ᠶ᠋ᠢ ᠳᠣᠣᠷᠠ ᠨᠢ ᠲᠥᠯᠥᠵᠦ ᠪᠢᠯᠡ᠃
ᠭᠡᠪᠡᠴᠦ ᠪᠠᠰᠠ ᠨᠢᠭᠡ ᠭᠠᠢ ᠲᠦᠪᠡᠭ ᠴᠤᠬᠤᠢᠵᠤ ᠪᠠᠢᠭᠰᠠᠨ ᠶᠤᠮ ᠪᠠᠢᠵᠠᠢ᠃ ᠲᠤᠰ ᠬᠤᠰᠢᠭᠤᠨ ᠤ᠋ ᠲᠡᠷᠢᠭᠦᠨ ᠪᠠᠶᠠᠨ ᠯᠣᠳᠣᠢ ᠭᠡᠭᠴᠢ᠂ ᠲᠥᠷᠥᠯ ᠦ᠋ᠨ ᠵᠠᠬᠠ ᠪᠣᠯᠤᠭᠰᠠᠨ ᠵᠠᠯᠠᠨ ᠭᠣᠮᠪᠣ ᠲᠠᠢ ᠬᠣᠶᠠᠭᠤᠯᠠ ᠪᠠᠨ ᠵᠠᠮᠪᠠ ᠶ᠋ᠢᠨ ᠬᠢᠨᠢ ᠨᠠᠮᠤᠷᠵᠢᠶᠠ ᠶ᠋ᠢᠨ ᠭᠠᠵᠠᠷ ᠰᠢᠪᠠᠭᠠ ᠪᠤᠰᠬᠠᠴᠢᠵᠡᠢ᠃
ᠪᠠᠲᠤᠪᠠᠶᠠᠷ ᠨᠠᠮᠤᠷ ᠤ᠋ᠨ ᠪᠡᠯᠴᠢᠭᠡᠷ ᠨᠤᠲᠤᠭ ᠢ᠋ ᠡᠷᠭᠢᠵᠦ ᠶᠠᠪᠤᠲᠠᠯᠠ ᠪᠠᠨ᠂ ᠨᠢᠳᠤᠨᠤᠨ ᠵᠢᠯ ᠦ᠋ᠨ ᠪᠠᠭᠤᠭᠰᠠᠨ ᠭᠠᠵᠠᠷ ᠤ᠋ᠨ ᠬᠠᠪᠢ ᠳ᠋ᠤ᠌ ᠨᠢᠭᠡ ᠰᠢᠪᠠᠭᠠ ᠭᠠᠳᠠᠰᠤ ᠰᠢᠭᠠᠭᠰᠠᠨ ᠢ᠋ ᠦᠵᠡᠭᠡᠳ ᠮᠣᠷᠢᠨ ᠠ᠋ᠴᠠ ᠪᠠᠭᠤᠭᠠᠳ᠂ ᠡᠨᠡ ᠶᠠᠭᠤ ᠪᠤᠯᠴᠢᠪᠠ? ᠭᠡᠵᠦ ᠲᠡᠷᠡ ᠭᠠᠳᠠᠰᠤ ᠶ᠋ᠢ ᠰᠤᠭᠤ ᠲᠠᠲᠠᠬᠤ ᠭᠡᠲᠡᠯᠡ᠂ ᠵᠠᠯᠠᠨ ᠭᠣᠮᠪᠣ ᠶ᠋ᠢᠨ ᠨᠠᠮᠤᠷᠵᠢᠬᠤ ᠭᠠᠵᠠᠷ ᠭᠡᠵᠦ ᠪᠢᠴᠢᠭᠰᠡᠨ ᠢ᠋ ᠦᠵᠡᠭᠡᠳ᠂ ᠪᠤᠭᠤᠷᠤᠯ ᠰᠠᠬᠠᠯ ᠳᠣᠣᠷᠠ ᠪᠠᠨ ᠮᠢᠰᠢᠶᠡᠰᠬᠢᠭᠡᠳ᠂ ᠬᠢᠲᠤᠭᠠ ᠪᠠᠨ ᠭᠠᠷᠭᠠᠵᠤ᠂ ᠲᠡᠷᠡ ᠰᠢᠪᠠᠭᠠ ᠲᠠᠯᠪᠢᠭᠰᠠᠨ ᠭᠠᠳᠠᠰᠤ ᠮᠣᠳᠣᠨ ᠳ᠋ᠤ᠌ ᠨᠢᠭᠡ ᠶᠠᠭᠤᠮᠠ ᠬᠤᠰᠤᠭᠠᠳ ᠮᠣᠷᠳᠠᠵᠠᠢ᠃
ᠤᠳᠠᠯ ᠦᠭᠡᠢ ᠡᠪᠦᠭᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠳᠡᠪᠡᠯ ᠳ᠋ᠡᠭᠡᠨ ᠪᠠᠭᠲᠠᠵᠤ ᠶᠠᠳᠠᠲᠠᠯᠠ ᠠᠭᠤᠷᠯᠠᠭᠰᠠᠨ ᠯᠣᠳᠣᠢ ᠪᠠᠶᠠᠨ ᠳᠠᠪᠬᠢᠵᠤ ᠢᠷᠡᠭᠡᠳ᠂ ᠰᠠᠭᠰᠠᠢᠨ ᠤᠷᠭᠤᠭᠰᠠᠨ ᠤᠷᠲᠤ ᠬᠥᠮᠥᠰᠬᠡ ᠳᠣᠣᠷᠠ ᠠ᠋ᠴᠠ ᠬᠣᠶᠠᠷ ᠨᠢᠳᠦ ᠨᠢ ᠬᠣᠷᠣᠰᠤᠨ ᠭᠢᠯᠠᠯᠵᠠᠵᠤ᠂ ᠪᠠᠷᠠᠭᠤᠨ ᠴᠢᠬᠢᠨ ᠳᠣᠲᠣᠷᠠᠬᠢ ᠣᠯᠣᠭᠠᠢ ᠰᠢᠭ᠋ ᠪᠦᠳᠦᠭᠦᠨ ᠬᠦᠷᠡᠩ ᠣᠯᠬᠤ ᠨᠢ ᠳᠡᠯᠪᠡᠷᠡᠬᠦ ᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ (ᠰᠢᠭ) ᠴᠢᠨᠡᠷᠡᠵᠦ (ᠴᠢᠨᠦᠷᠡᠵᠦ)᠂ ᠠᠮᠢᠰᠬᠤᠯ ᠨᠢ ᠳᠠᠪᠬᠤᠴᠠᠨ᠂
— ᠰᠠᠢ᠍ᠢ ᠶ᠋ᠢᠨ ᠲᠡᠷᠡ ᠴᠢᠮᠠᠴᠠ ᠭᠠᠷᠤᠭᠰᠠᠨ ᠤᠤ? ᠭᠡᠵᠦ ᠠᠰᠠᠭᠤᠵᠠᠢ᠄
— ᠦᠭᠡᠢ ᠨᠣᠬᠠᠢ ᠠ᠋ᠴᠠ ᠭᠠᠷᠤᠭᠰᠠᠨ ᠬᠡᠷᠡᠭ᠃ ᠬᠠᠷᠢᠨ ᠪᠢ᠂ ᠴᠡᠪᠡᠷ ᠭᠠᠵᠠᠷ ᠢ᠋ ᠨᠣᠬᠠᠢ ᠪᠤᠵᠠᠷᠯᠠᠵᠠᠢ ᠭᠡᠵᠦ ᠬᠤᠰᠤᠵᠤ ᠴᠡᠪᠡᠷᠯᠡᠭᠰᠡᠨ ᠪᠢᠯᠡ᠃ ᠨᠣᠬᠠᠢ ᠶ᠋ᠢᠨ ᠬᠠᠮᠢᠭᠠ ᠦᠭᠡᠢ ᠭᠠᠷᠯᠠᠬᠤ ᠳ᠋ᠤ᠌ ᠳᠤᠷᠠ ᠦᠭᠡᠢ ᠬᠦᠷᠳᠡᠭ ᠶᠦᠮ ᠳᠡ ᠭᠡᠬᠦ ᠳ᠋ᠦ᠍ᠨᠢ ᠯᠣᠳᠣᠢ᠂ ᠪᠠᠲᠤᠪᠠᠶᠠᠷ ᠡᠪᠦᠭᠡᠨ ᠦ᠌ ᠶᠣᠭᠲᠠ ᠦᠭᠡ ᠶ᠋ᠢᠨ ᠤᠴᠢᠷ ᠢ᠋ ᠮᠡᠳᠡᠭᠡᠳ ᠲᠡᠰᠬᠡᠯ ᠦᠭᠡᠢ ᠠᠭᠤᠷᠯᠠᠵᠤ᠂
— ᠴᠢ ᠵᠠᠯᠠᠨ ᠤ᠋ ᠵᠠ᠊ ᠭᠡᠳᠡᠭ ᠲᠣᠯᠣᠭᠠᠢ ᠶ᠋ᠢ ᠰᠠᠨᠠᠭᠠ ᠲᠠᠢ ᠪᠠᠷ ᠬᠤᠰᠤᠵᠤ᠂ ᠲᠥᠷᠥ ᠶ᠋ᠢᠨ ᠴᠣᠯᠠ ᠶ᠋ᠢ ᠳᠠᠷᠤᠯᠠᠵᠠᠢ᠃ ᠲᠡᠷᠡ ᠴᠢᠨᠢ ᠲᠡᠭᠡᠭᠡᠳ ᠥᠩᠭᠡᠷᠡᠳᠡᠭ ᠬᠡᠷᠡᠭ ᠪᠢᠰᠢ ᠰᠢᠦ᠂ ᠬᠥᠭᠰᠢᠨ ᠨᠣᠬᠠᠢ᠃ ᠪᠢ ᠴᠢᠮᠠᠶ᠋ᠢ ᠲᠠᠮᠠᠭᠠ ᠶ᠋ᠢᠨ ᠭᠠᠵᠠᠷ ᠮᠡᠳᠡᠭᠦᠯᠦᠨᠡ ᠭᠡᠬᠦ ᠳ᠋ᠦ᠍ᠨᠢ ᠪᠠᠲᠤᠪᠠᠶᠠᠷ ᠢᠨᠢᠶᠡᠮᠰᠦᠭᠯᠡᠵᠦ᠂
— ᠶᠠᠭᠠᠬᠢᠬᠤ ᠪᠣᠢ᠂ ᠪᠢ ᠲᠠᠮᠠᠭᠠ ᠶ᠋ᠢᠨ ᠭᠠᠵᠠᠷ ᠴᠢᠮᠠᠲᠤ ᠬᠡᠯᠡᠭᠰᠡᠨ ᠦᠭᠡ ᠪᠠᠨ ᠯᠠ ᠬᠡᠯᠡᠨᠡ᠃ ᠬᠠᠷᠢᠨ᠂ ᠬᠥᠮᠦᠨ ᠴᠢᠨᠦ ᠬᠦᠷᠭᠡᠨ ᠵᠠᠯᠠᠨ ᠤ᠋ ᠵᠠ᠊ ᠭᠡᠳᠡᠭ ᠲᠣᠯᠣᠭᠠᠢ ᠶ᠋ᠢ ᠨᠢ ᠬᠤᠰᠤᠪᠠᠯ ᠰᠢᠪᠰᠢᠭ ᠦ᠋ᠨ ᠶᠠᠭᠤᠮᠠ ᠪᠣᠯᠴᠢᠳᠠᠭ (ᠪᠣᠯᠴᠢᠬᠠᠳᠠᠭ) ᠭᠡᠵᠦ ᠠᠮᠢᠲᠠᠨ ᠰᠣᠨᠣᠰᠪᠠᠯ ᠴᠢᠨᠦ ᠰᠡᠳᠬᠢᠯ ᠠᠮᠤᠷᠬᠤ (ᠠᠮᠠᠷᠠᠬᠤ) ᠤᠤ? ᠶᠠᠭᠠᠬᠢᠬᠤ ᠪᠣᠢ᠂ ᠵᠠᠯᠠᠨ ᠢ᠋ᠶ᠋ᠠᠨ ᠠᠢᠮᠠᠭ ᠳᠠᠶᠠᠭᠠᠷ ᠲᠤ᠌ ᠠᠯᠳᠠᠷᠰᠢᠭᠤᠯᠵᠤ ᠨᠢᠭᠡ ᠨᠠᠰᠤᠨ ᠳ᠋ᠤᠨᠢ ᠰᠠᠯᠬᠤ ᠦᠭᠡᠢ ᠬᠣᠴᠢ ᠲᠠᠢ ᠪᠣᠯᠭᠠᠬᠤ ᠭᠡᠪᠡᠯ ᠮᠡᠳᠡᠭᠦᠯᠵᠦ ᠪᠠᠢ᠃
ᠬᠡᠷᠪᠡ᠂ ᠨᠢᠭᠤᠷ ᠢ᠋ᠶ᠋ᠠᠨ ᠪᠣᠳᠣᠳᠠᠭ ᠪᠣᠯ᠂ ᠲᠡᠷᠡ ᠬᠤᠰᠤᠭᠤᠯᠤᠭᠰᠠᠨ ᠭᠠᠳᠠᠰᠤ ᠪᠠᠨ ᠰᠤᠭᠤ ᠲᠠᠲᠠᠭᠠᠳ᠂ ᠠᠢᠯ ᠤ᠋ᠨ ᠨᠤᠲᠤᠭ ᠪᠠᠭᠤᠴᠠ ᠪᠢᠲᠡᠭᠡᠢ ᠪᠤᠯᠢᠶᠠᠴᠠᠯᠳᠤ᠃ ᠨᠠᠮᠠᠶ᠋ᠢ ᠤᠷᠢᠶᠠᠩᠬᠠᠢ ᠣᠮᠣᠭᠲᠠᠢ ᠬᠥᠮᠦᠨ ᠭᠡᠵᠦ ᠪᠦᠦ ᠮᠠᠷᠲᠠᠭᠠᠷᠠᠢ᠃ ᠪᠠᠶᠠᠨ ᠨᠣᠶᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠠᠯᠠᠢᠯᠭᠠᠵᠤ᠂ ᠬᠥᠮᠦᠨ ᠦ᠌ ᠨᠤᠲᠤᠭ ᠪᠡᠯᠴᠢᠭᠡᠷ ᠪᠤᠯᠢᠶᠠᠬᠤ ᠶ᠋ᠢ ᠴᠢᠨᠢ ᠨᠤᠲᠤᠭ ᠤᠰᠤᠨ ᠤ᠋ ᠡᠵᠡᠨ ᠰᠠᠪᠳᠠᠭ ᠨᠢ ᠳᠡᠮᠡᠢ ᠣᠢᠰᠢᠶᠠᠬᠤ ᠦᠭᠡᠢ ᠬᠢᠯᠢᠩᠨᠡᠵᠦ ᠮᠠᠭᠠᠳ ᠦᠭᠡᠢ ᠰᠢᠦ᠂ ᠬᠦ! ᠭᠡᠬᠦ ᠳ᠋ᠦ᠍ ᠰᠡᠵᠢᠭᠭᠦᠴᠢ (ᠰᠡᠵᠢᠭᠴᠢ) ᠪᠠᠶᠠᠨ ᠤ᠋ ᠴᠢᠷᠠᠢ ᠨᠢ ᠦᠨᠡᠰᠦᠨ ᠬᠥᠬᠡ ᠪᠣᠯᠲᠠᠯᠠ ᠶᠡᠬᠡᠳᠡ ᠠᠶᠤᠨ ᠬᠢᠷᠳ᠋ᠬᠢᠵᠦ ᠬᠡᠯᠡ ᠨᠢ ᠡᠭᠡᠳᠡᠷᠡᠨ᠂
— ᠪᠢ᠁ ᠪᠢ᠁ ᠰᠠᠨᠠᠮᠰᠠᠷ ᠦᠭᠡᠢ᠂ ᠶᠣᠰᠣᠨ ᠠ᠋ᠴᠠ ᠭᠠᠵᠢᠭᠤ ᠦᠭᠡ ᠬᠡᠯᠡᠯᠡ᠃ ᠴᠢ ᠨᠠᠳᠠ ᠪᠦᠦ ᠮᠠᠭᠤ ᠰᠠᠨᠠᠭᠠᠷᠠᠢ᠃ ᠪᠢᠳᠡ ᠬᠣᠶᠠᠷ ᠤ᠋ᠨ ᠡᠴᠢᠭᠡ ᠨᠠᠢᠷᠲᠠᠢ ᠰᠠᠢᠬᠠᠨ ᠶᠠᠪᠤᠭᠰᠠᠨ ᠤᠯᠤᠰ ᠰᠢᠦ ᠳᠡ᠃ ᠣᠳᠣ ᠪᠣᠯᠬᠤ ᠳ᠋ᠤ᠌᠂ ᠴᠢ ᠪᠢᠳᠡ ᠬᠣᠶᠠᠷ ᠶᠠᠭᠤᠨ ᠳ᠋ᠠᠭᠠᠨ ᠭᠡᠵᠦ ᠡᠪᠳᠡᠷᠡᠨ ᠮᠠᠭᠤᠳᠠᠯᠴᠠᠬᠤ ᠪᠢᠯᠡ? ᠡᠨᠡ ᠴᠢᠨᠢ ᠭᠣᠮᠪᠣ ᠯᠠ ᠨᠠᠮᠠᠶ᠋ᠢ ᠬᠠᠳᠬᠠᠨ(ᠬᠠᠳᠬᠤᠨ) ᠥᠳᠥᠭᠡᠵᠦ ᠪᠠᠢᠭᠠᠳ᠂ ᠪᠢ ᠦᠭᠡᠨ ᠳ᠋ᠦ᠍ᠨᠢ ᠣᠷᠣᠵᠤ᠂ ᠲᠡᠷᠡ ᠮᠠᠭᠤ ᠰᠢᠪᠠᠭᠠ ᠪᠣᠰᠬᠠᠴᠢᠬᠰᠠᠨ(ᠪᠤᠰᠬᠠᠴᠢᠬᠠᠭᠰᠠᠨ) ᠶᠤᠮ᠃ ᠣᠳᠣ᠂ ᠪᠢ ᠭᠣᠮᠪᠣ ᠳ᠋ᠤ᠌ ᠪᠠᠢᠯᠠ ᠭᠡᠵᠦ ᠬᠡᠯᠡᠨᠡ᠃ ᠴᠢ ᠨᠠᠳᠠ ᠭᠣᠮᠣᠳᠠᠵᠤ ᠥᠰᠢᠶᠡ ᠪᠢᠲᠡᠭᠡᠢ ᠵᠠᠩᠭᠢᠳᠤᠭᠠᠷᠠᠢ ᠭᠡᠵᠡᠢ᠃ ᠲᠡᠭᠡᠬᠦ ᠳ᠋ᠦ᠍ᠨᠢ ᠪᠠᠲᠤᠪᠠᠶᠠᠷ᠂
— ᠪᠢ ᠲᠡᠢᠮᠦ ᠥᠰᠢᠶᠡ ᠡᠪᠦᠷᠯᠡᠵᠦ ᠶᠠᠪᠤᠳᠠᠭ ᠬᠥᠮᠦᠨ ᠪᠢᠰᠢ᠃ ᠬᠡᠷᠪᠡ ᠴᠢ ᠦᠨᠡᠨ ᠰᠡᠳᠬᠢᠯ ᠲᠡᠢ ᠠᠢᠯ ᠠᠬᠠ ᠳᠡᠭᠦᠦ ᠬᠥᠮᠦᠨ ᠶᠦᠮ ᠪᠣᠯ᠂ ᠮᠠᠨᠠᠢᠬᠢᠨ ᠤ᠋ ᠤᠩᠭᠠᠰᠤ ᠪᠠᠨ ᠰᠠᠪᠠᠬᠤ ᠳ᠋ᠤ᠌᠂ ᠬᠡᠳᠦᠨ ᠬᠥᠮᠦᠨ ᠶᠠᠪᠤᠭᠤᠯᠵᠤ ᠲᠤᠰᠠᠯᠠᠯᠴᠠᠭᠤᠯᠵᠤ ᠥᠭᠬᠦ ᠦᠭᠡᠢ ᠤᠤ᠃ ᠮᠠᠨ ᠤ᠋ ᠬᠣᠲᠠ᠂ ᠭᠤᠷᠪᠠᠬᠠᠨ ᠠᠢᠯ ᠲᠠᠢ᠂ ᠬᠥᠮᠦᠨ ᠪᠦᠯᠢ ᠮᠠᠭᠤ ᠲᠠᠢ ᠪᠠᠢᠨᠠ ᠭᠡᠵᠡᠢ᠃
— ᠲᠡᠭᠡᠶᠡ᠂ ᠲᠡᠭᠡᠶᠡ! ᠭᠡᠵᠦ ᠯᠣᠳᠣᠢ ᠪᠠᠶᠠᠨ ᠪᠠᠶᠠᠷᠯᠠᠭᠠᠳ᠂ ᠦᠳᠡᠰᠢ ᠨᠢ ᠪᠠᠲᠤᠪᠠᠶᠠᠷ᠂ ᠵᠠᠮᠪᠠ᠂ ᠰᠦᠷᠦᠩ ᠡᠮᠡᠭᠡᠨ ᠬᠣᠶᠠᠷ ᠲᠤ᠌ ᠯᠣᠳᠣᠢ ᠪᠠᠶᠠᠨ ᠤ᠋ ᠵᠢᠷᠦᠬᠡ ᠶ᠋ᠢ ᠠᠮᠠ ᠪᠠᠷ ᠢ᠋ᠶ᠋ᠠᠨ ᠦᠬᠦᠭᠦᠯᠦᠭᠰᠡᠨ ᠢ᠋ ᠶᠠᠷᠢᠵᠤ᠂ ᠲᠡᠷᠡ ᠪᠢᠴᠢᠬᠠᠨ ᠬᠣᠲᠠ ᠨᠠᠢᠬᠠᠨ ᠰᠡᠵᠢᠭ ᠶᠡᠬᠡᠲᠡᠢ ᠠᠶᠤᠮᠠᠬᠠᠢ ᠪᠠᠶᠠᠨ ᠢ᠋ ᠡᠯᠢᠭᠡ ᠪᠡᠨ ᠬᠥᠰᠢᠲᠡᠯᠡ ᠢᠨᠢᠶᠡᠵᠦ᠂ ᠰᠦᠷᠦᠩ ᠡᠮᠡᠭᠡ᠂
— ᠰᠦᠰᠦᠭ ᠡᠴᠡ ᠪᠤᠷᠬᠠᠨ᠂ ᠰᠡᠵᠢᠭ ᠡᠴᠡ ᠴᠢᠳᠬᠥᠷ ᠭᠡᠵᠦ ᠬᠠᠭᠤᠴᠢᠨ ᠤ᠋ ᠦᠭᠡᠨ ᠳ᠋ᠦ᠍ ᠪᠠᠢᠳᠠᠭ ᠨᠢ ᠠᠷᠭᠠ ᠦᠭᠡᠢ ᠦᠨᠡᠨ ᠦᠭᠡ ᠳᠡ᠃ ᠴᠢ ᠴᠦ᠍ ᠪᠠᠰᠠ ᠴᠢ ᠳᠡ᠃ ᠮᠥᠨ ᠴᠦ᠍ ᠳᠦᠷᠰᠦ ᠦᠭᠡᠢ ᠠᠯᠢᠶᠠ ᠠᠮᠢᠲᠠᠨ ᠰᠢᠪ ᠳᠡ ᠭᠡᠵᠡᠢ᠃ ᠴᠢᠩᠭᠢᠬᠦ ᠳ᠋ᠦ᠍ᠨᠢ᠂ ᠪᠠᠲᠤᠪᠠᠶᠠᠷ᠂ ᠪᠠᠶᠠᠨ ᠨᠣᠶᠠᠨ ᠬᠣᠶᠠᠷ ᠬᠥᠮᠦᠨ ᠢ᠋ ᠬᠣᠣᠷ ᠦᠭᠡᠢ ᠳᠠᠮᠰᠢᠭᠯᠠᠵᠤ ᠴᠢᠳᠠᠭᠰᠠᠨ ᠳᠠᠭᠠᠨ ᠪᠠᠬᠠᠳᠤᠵᠤ᠂
— ᠦᠭᠡᠢ᠂ ᠰᠦᠷᠦᠩ ᠠᠪᠠᠭᠠᠢ᠂ ᠮᠠᠨ ᠤ᠋ ᠬᠤᠰᠢᠭᠤᠨ ᠤ᠋ ᠲᠡᠷᠢᠭᠦᠨ ᠪᠠᠶᠠᠨ ᠠᠢᠯ ᠤ᠋ᠨ ᠬᠢᠨ ᠮᠠᠨ ᠤ᠋ ᠤᠩᠭᠠᠰᠤ ᠠ᠋ᠴᠠ ᠰᠡᠪᠡᠯᠴᠡᠴᠦ ᠥᠭᠬᠦ ᠨᠢ ᠰᠠᠢᠬᠠᠨ ᠶᠤᠮ ᠪᠢᠰᠢᠦ? ᠪᠠᠰᠠ ᠲᠠᠮᠠᠭᠠ ᠶ᠋ᠢᠨ ᠭᠠᠵᠠᠷ ᠢ᠋ᠶ᠋ᠠᠷ ᠣᠷᠣᠯ ᠦᠭᠡᠢ ᠤᠷᠠᠨ ᠠᠷᠭᠠ ᠪᠠᠷ ᠨᠤᠲᠤᠭ ᠪᠡᠯᠴᠢᠭᠡᠷ ᠢ᠋ᠶ᠋ᠡᠨ ᠡᠷᠭᠢᠭᠦᠯᠵᠦ ᠠᠪᠤᠭᠰᠠᠨ ᠮᠢᠨᠢ ᠲᠠᠭᠠᠲᠠᠢ ᠬᠡᠷᠡᠭ ᠪᠢᠰᠢᠦ? ᠲᠠᠮᠠᠭᠠ ᠶ᠋ᠢᠨ ᠭᠠᠵᠠᠷ ᠵᠠᠷᠭᠤᠯᠳᠤᠪᠠᠯ᠂ ᠵᠠᠯᠠᠨ ᠠᠪᠤᠭᠠᠢ ᠶ᠋ᠢᠨ ᠭᠠᠭᠴᠠ ᠵᠢᠩᠰᠡ ᠨᠢ ᠮᠠᠨ ᠤ᠋ ᠬᠣᠲᠠ ᠶ᠋ᠢᠨ ᠭᠤᠷᠪᠠᠨ ᠠᠢᠯ ᠠ᠋ᠴᠠ ᠢᠯᠡᠭᠦᠦ ᠵᠢᠩ ᠲᠡᠢ ᠪᠣᠯᠴᠢᠵᠤ ᠮᠡᠳᠡᠬᠦ ᠯᠠ ᠬᠡᠷᠡᠭ ᠭᠡᠵᠦ ᠢᠨᠢᠶᠡᠯᠴᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠢᠭᠤᠷᠵᠢᠨ ᠣᠳᠬᠣᠨ᠂ ᠮᠥᠩᠭᠥᠨᠭᠣᠸᠠ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠬᠦᠮᠦᠵᠢᠯᠲᠦ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ