ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠳᠡᠳ᠋ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠨᠠᠢ᠍ᠮᠠ> Хан мунын сүүрс < дээд > – Мөнх зохиоов ᠂ Дэд бодь – Гуравдугаар бүлэг <8>
389ᠳᠡᠳ᠋ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠨᠠᠢ᠍ᠮᠠ>
ᠭᠣᠩᠴᠣᠭᠷᠠᠬᠤᠠ ᠶᠠᠮᠠᠷ ᠴᠤ᠌ ᠬᠣᠯᠢᠶᠠ ᠦᠭᠡᠢ ᠴᠡᠪᠡᠷ ᠰᠣᠳᠣᠯᠢᠭ ᠡᠮᠡ ᠬᠥᠮᠦᠨ ᠦ᠌ ᠦᠨᠦᠷ ᠲᠦ᠍ ᠰᠣᠭᠲᠣᠭᠤᠷᠠᠵᠤ᠂ ᠬᠠᠳᠠᠨ ᠬᠣᠩᠭᠢᠯ ᠥᠩᠭᠡᠢᠭᠰᠡᠨ ᠪᠥᠬᠡᠬᠡᠨ ᠰᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠲᠤᠨᠤᠷᠠᠵᠤ ᠬᠠᠷᠠᠭᠳᠠᠬᠤ ᠨᠣᠮᠢᠨ ᠤ᠋ ᠬᠥᠭᠡᠷᠦᠬᠦᠨ ᠨᠢᠳᠦ ᠬᠥᠮᠥᠰᠬᠡ᠂ ᠬᠠᠴᠠᠷ ᠤᠷᠤᠭᠤᠯ ᠠ᠋ᠴᠠ ᠠᠪᠤᠭᠠᠳ ᠬᠦᠵᠦᠭᠦᠦ ᠬᠦᠢᠰᠦ᠂ ᠬᠥᠬᠥ ᠪᠡᠯᠬᠡᠭᠦᠰᠦ ᠬᠦᠷᠲᠡᠯᠡ ᠦᠨᠦᠰᠴᠦ᠂ ᠪᠡᠶᠡ ᠪᠡᠷ ᠨᠢ ᠰᠢᠷᠭᠠᠯᠲᠤᠨ ᠬᠠᠯᠢᠭᠤᠷᠠᠭᠰᠠᠨ ᠤᠨᠠᠭᠠᠨ ᠦᠰᠦ ᠶ᠋ᠢ ᠢᠯᠪᠢᠵᠦ᠄
— ᠨᠣᠮᠢᠨ ᠠ᠋᠂ ᠥᠨᠥ ᠨᠢᠭᠤᠷ ᠤ᠋ᠨ ᠴᠢᠨᠢ ᠰᠢᠲᠠᠭᠰᠠᠨ ᠰᠣᠷᠪᠢ ᠶᠠᠭᠠᠬᠢᠭᠠᠳ ᠰᠡᠪ ᠦᠭᠡᠢ ᠰᠠᠢᠬᠠᠨ ᠡᠳᠡᠭᠡᠷᠡᠵᠦ ᠤᠤᠯ ᠤ᠋ᠨ ᠢ᠋ᠶ᠋ᠠᠨ ᠲᠥᠷᠥᠯᠬᠢ ᠵᠢᠰᠦ ᠲᠥᠯᠥᠪ ᠡᠴᠡ ᠪᠡᠨ ᠤᠯᠠᠮ ᠴᠤ᠌ ᠭᠣᠶᠣ ᠪᠣᠯᠤᠭᠠ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃
— ᠲᠡᠢᠮᠦ ᠭᠡᠵᠦ ᠤᠤ?
— ᠲᠡᠢᠮᠦ ᠠ᠋!
— ᠴᠢ ᠨᠠᠮᠠᠶ᠋ᠢ ᠤᠳᠠᠭᠠᠨ ᠦᠵᠡᠭᠰᠡᠨ ᠦᠭᠡᠢ ᠪᠣᠯᠬᠣᠷ ᠴᠢᠮᠠ ᠳ᠋ᠤ᠌ ᠰᠠᠢᠬᠠᠨ ᠬᠠᠷᠠᠭᠳᠠᠵᠤ ᠪᠣᠢ ᠯᠠ ᠦᠭᠡᠢ᠃
— ᠲᠡᠷᠡ ᠴᠤ᠌ ᠲᠡᠢᠮᠦ ᠠ᠋᠂ ᠲᠡᠭᠡᠪᠡᠴᠦ᠁ ᠮᠢᠨᠦ ᠰᠡᠳᠬᠢᠯ ᠳ᠋ᠦ᠍ ᠠᠩᠬᠠ ᠰᠡᠢᠯᠦᠭᠳᠡᠭᠰᠡᠨ ᠬᠡᠦᠬᠡᠨ ᠮᠥᠨ ᠭᠡᠵᠦ ᠢᠳᠡᠭᠡ ᠶᠠᠳᠠᠨᠠ᠃ ᠴᠢᠷᠠᠢ ᠴᠢᠨᠢ ᠰᠢᠲᠠᠵᠤ ᠵᠢᠰᠦ ᠡᠪᠳᠡᠷᠡᠨ ᠰᠣᠷᠪᠢ ᠲᠣᠭᠲᠠᠭᠰᠠᠨ ᠲᠡᠷᠡ ᠨᠣᠮᠢᠨ ᠯᠠᠪ ᠪᠢᠰᠢ! ᠪᠢ ᠦᠨᠡᠬᠡᠷ ᠭᠠᠢᠬᠠᠨᠠ᠃ ᠣᠭ᠌ᠶᠤ ᠠᠮᠢᠨᠳᠠᠢ ᠪᠠᠨ ᠵᠡᠭᠦᠭᠡ ᠦᠭᠡᠢ ᠪᠣᠯ ᠪᠢ ᠶᠠᠭᠠᠬᠢᠭᠰᠠᠨ ᠴᠤ᠌ ᠴᠢᠮᠠ ᠶ᠋ᠢ ᠭᠡᠵᠦ ᠲᠠᠨᠢᠬᠤ ᠦᠭᠡᠢ᠃
— ᠦᠨᠡᠬᠡᠷ ᠭᠣᠶᠣ ᠪᠣᠯᠴᠢᠬᠠᠵᠤ ᠤᠤ?
— ᠦᠨᠡᠬᠡᠷ ᠦᠨᠡᠭᠡᠷ! ᠲᠡᠭᠡᠪᠡᠴᠦ ᠡᠭᠦᠨ ᠦ᠌ ᠴᠠᠭᠠᠨᠠ ᠨᠢ ᠣᠨᠢᠰᠣᠭᠠ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠭᠠᠳ ᠪᠠᠢᠬᠤ ᠶᠤᠮ᠃
— ᠁
ᠨᠣᠮᠢᠨ ᠲᠡᠷᠲᠡᠭᠡ ᠣᠭᠲᠠᠷᠭᠤᠢ ᠶ᠋ᠢᠨ ᠲᠠᠩᠨᠠᠢ ᠳ᠋ᠤ᠌ ᠰᠦ ᠠᠰᠬᠠᠷᠠᠭᠤᠯᠤᠨ ᠬᠠᠨᠠᠷᠠᠭᠰᠠᠨ ᠰᠠᠷᠠᠨ ᠢ᠋ ᠰᠢᠷᠳᠡᠭᠡᠳ ᠨᠢᠳᠦᠨ ᠡᠴᠡ ᠨᠢ ᠨᠢᠯᠪᠤᠰᠤ ᠪᠥᠮᠪᠥᠷᠢᠯᠡ᠁
ᠤᠯᠠᠭᠠᠨ ᠬᠠᠲᠤᠨ ᠤ᠋ ᠪᠣᠭᠣᠳᠠᠭ ᠬᠠᠷᠠᠭᠰᠠᠨ ᠸᠠᠩ ᠰᠣᠬᠣᠷ ᠤ᠋ᠨ ᠬᠣᠶᠠᠷ ᠬᠠᠷᠠ ᠴᠡᠷᠢᠭ ᠵᠢᠭᠠᠰᠤ ᠭᠥᠬᠢᠳᠡᠬᠦ ᠭᠡᠵᠦ ᠥᠭᠶᠥᠭᠡ ᠨᠠᠮᠢᠯᠵᠠᠭᠤᠯᠤᠨ《ᠴᠢ᠂ ᠪᠢ》 ᠭᠡᠵᠦ ᠭᠥᠬᠢ ᠪᠤᠯᠢᠶᠠᠯᠳᠤᠵᠤ ᠪᠠᠢᠲᠠᠯᠠ ᠴᠠᠭᠠᠳᠤ ᠵᠠᠮ ᠢ᠋ᠶ᠋ᠠᠷ ᠨᠢᠭᠡ ᠤᠷᠠᠩᠬᠠᠢ ᠬᠤᠪᠴᠠᠰᠤ ᠲᠠᠢ ᠦᠰᠦ ᠭᠡᠵᠢᠭᠡ ᠨᠢ ᠰᠡᠭᠰᠡᠭᠡᠷ ᠪᠦᠰᠡᠭᠦᠢ ᠬᠠᠭᠵᠠᠷᠬᠠᠢ ᠮᠠᠬᠠᠢ ᠭᠤᠲᠤᠯ ᠴᠢᠷᠦᠭᠰᠡᠭᠡᠷ ᠪᠣᠭᠣᠳᠠᠭ ᠳᠠᠪᠠᠵᠤ ᠠᠢᠰᠤᠢ! ᠡᠩ ᠦ᠋ᠨ ᠴᠠᠭ ᠲᠤ ᠡᠮᠡᠰ ᠦ᠋ᠨ ᠪᠠᠷᠠ ᠣᠯᠵᠤ ᠦᠵᠡᠳᠡᠭ ᠦᠭᠡᠢ ᠬᠠᠷᠠ ᠴᠡᠷᠢᠭ ᠵᠢᠭᠠᠰᠤᠨ ᠤ᠋ ᠭᠥᠬᠢ ᠪᠡᠨ ᠪᠤᠯᠢᠶᠠᠯᠳᠤᠬᠤ ᠪᠠᠨ ᠪᠣᠯᠢᠵᠤ ᠰᠡᠭᠰᠡᠭᠡᠷ ᠭᠡᠵᠢᠭᠡ ᠲᠡᠢ ᠲᠡᠷᠡ ᠪᠦᠰᠡᠭᠦᠢ ᠶ᠋ᠢ ᠬᠠᠷᠠᠭᠠᠳ᠄
— ᠢᠷᠡ᠂ ᠢᠷᠡ! ᠨᠠᠭᠠᠰᠢ ᠪᠠᠨ ᠢᠷᠡ᠂ ᠮᠠᠢ! ᠵᠢᠭᠠᠰᠤ ᠥᠭᠭᠦᠶᠡ ᠭᠡᠳ ᠬᠠᠲᠠᠩᠭᠢᠷ ᠲᠣᠯᠣᠭᠠᠢ ᠲᠠᠢ ᠴᠡᠷᠢᠭ ᠭᠥᠬᠢᠳᠡᠭᠰᠡᠨ ᠵᠢᠭᠠᠰᠤᠨ ᠠ᠋ᠴᠠ ᠪᠠᠨ ᠨᠢᠭᠡ ᠶ᠋ᠢ ᠳᠡᠭᠦᠵᠢᠯᠡᠨ ᠲᠡᠭᠦᠨ ᠵᠦᠭ ᠳᠠᠯᠠᠯᠪᠠ᠃ ᠲᠡᠷᠡ ᠰᠡᠭᠰᠡᠭᠡᠷ ᠭᠡᠵᠢᠭᠡ ᠲᠡᠢ ᠪᠦᠰᠡᠭᠦᠢ ᠵᠢᠭᠠᠰᠤ ᠱᠣᠬᠤᠭᠤᠷᠠᠬᠠᠭᠰᠠᠨ ᠳ᠋ᠠᠭᠠᠨ ᠵᠠᠮ ᠠ᠋ᠴᠠ ᠪᠠᠨ ᠭᠠᠷᠴᠤ ᠱᠠᠯᠴᠢᠭ ᠪᠠᠯᠴᠢᠭ ᠢ᠋ ᠴᠤ᠌ ᠬᠠᠢᠬᠤᠷᠤᠯ ᠦᠭᠡᠢ ᠦᠢᠮᠡᠵᠦ ᠲᠡᠷᠡ ᠬᠣᠶᠠᠷ ᠬᠠᠷᠠ ᠴᠡᠷᠢᠭ ᠦ᠋ᠨ ᠬᠠᠵᠠᠭᠤ ᠳ᠋ᠤ᠌ ᠣᠴᠢᠪᠠ᠃
ᠡᠪᠦᠭᠡᠵᠢᠶᠡᠷ ᠰᠢᠭ ᠨᠢ ᠡᠨᠡ ᠬᠦ᠌ ᠰᠢᠲᠠᠩᠬᠠᠢ ᠴᠢᠷᠠᠢ᠂ ᠥᠮᠥᠳᠥ ᠴᠤ᠌ ᠦᠭᠡᠢ ᠱᠠᠯᠳᠠᠩ᠂ ᠲᠡᠷᠯᠢᠭ ᠦ᠋ᠨ ᠣᠷᠣᠨᠴᠣᠭ ᠲᠡᠳᠦᠢ ᠬᠡᠳᠡᠷᠦᠭᠰᠡᠨ ᠰᠡᠭᠰᠡᠭᠡᠷ ᠮᠣᠩᠭᠣᠯ ᠪᠦᠰᠡᠭᠦᠢ ᠶ᠋ᠢ ᠬᠠᠷᠠᠭᠠᠳ《ᠡᠪᠡᠳᠴᠢᠲᠡᠢ ᠵᠣᠪᠠᠯᠠᠩᠲᠠᠢ ᠬᠥᠮᠦᠨ ᠢ᠋ ᠶᠠᠭᠠᠬᠢᠬᠤ ᠪᠣᠢ?》 ᠭᠡᠰᠡᠨ ᠰᠢᠭ ᠲᠡᠭᠦᠨ ᠢ᠋ ᠳᠡᠮᠡᠢ ᠤᠪᠠᠢᠨ ᠳ᠋ᠤ᠌ ᠰᠠᠨᠠᠭᠰᠠᠨ ᠦᠭᠡᠢ ᠬᠥᠰᠡᠷ ᠡᠴᠡ ᠵᠢᠭᠠᠰᠤᠨ ᠤ᠋ ᠭᠥᠬᠢ ᠪᠡᠨ ᠰᠢᠭᠦᠷᠡᠨ ᠰᠠᠭᠤᠭᠰᠠᠨ ᠣᠷᠣᠨ ᠠ᠋ᠴᠠ ᠪᠠᠨ ᠪᠣᠰᠴᠤ ᠲᠡᠳᠡᠨ ᠡᠴᠡ ᠵᠠᠢᠰᠬᠠᠨ ᠰᠢᠭ᠋ ᠣᠴᠣᠢᠵᠤ ᠰᠠᠭᠤᠭᠠᠳ ᠵᠢᠭᠠᠰᠤ ᠭᠥᠬᠢᠳᠡᠪᠡ᠃ ᠨᠥᠭᠦᠭᠡ ᠬᠠᠲᠠᠩᠭᠢᠷ ᠲᠣᠯᠣᠭᠠᠢ ᠲᠠᠢ ᠨᠢ ᠤᠬᠤᠨᠠᠨᠴᠢᠷ ᠡᠷᠡ ᠶ᠋ᠢᠨ ᠨᠢᠭᠡ ᠪᠠᠢᠵᠠᠢ᠃ ᠤᠳᠠᠭᠠᠨ ᠡᠳᠦᠷ ᠵᠤᠵᠠᠭᠠᠨ ᠬᠣᠨᠣᠭ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠰᠠᠬᠢᠵᠤ ᠡᠮᠡ ᠬᠥᠮᠦᠨ ᠦ᠌ ᠪᠠᠷᠠ ᠣᠯᠵᠤ ᠦᠵᠡᠭᠡ ᠦᠭᠡᠢ ᠪᠣᠯᠬᠣᠷ《ᠮᠡᠭᠡᠵᠢ ᠭᠠᠬᠠᠢ ᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠴᠤ᠌ ᠳᠠᠪᠬᠤᠷᠠ ᠨᠢᠳᠦ ᠲᠡᠢ ᠰᠠᠨᠠᠭᠳᠠᠳᠠᠭ ᠶᠤᠮ ᠴᠢᠨᠢ ᠡᠨᠡ ᠴᠢᠨᠢ ᠶᠠᠭᠠᠬᠢᠯᠠ ᠴᠤ᠌ ᠭᠡᠰᠡᠨ ᠬᠥᠮᠦᠨ ᠪᠢᠰᠢ ᠤᠤ ᠳᠠ》 ᠭᠡᠵᠦ ᠪᠣᠳᠣᠨ ᠰᠠᠶᠢᠬᠢ ᠭᠣᠷᠢ ᠨᠢ ᠭᠣᠳᠣᠭᠣᠨᠠᠨ᠄
— ᠵᠠᠩ ᠭᠤᠸᠠᠢ ᠠ᠋᠂ ᠴᠢ ᠵᠢᠭᠠᠰᠤ ᠪᠠᠨ ᠭᠥᠬᠢᠳᠡᠳᠡᠭ ᠢ᠋ᠶ᠋ᠡᠨ ᠭᠥᠬᠢᠳᠡ᠂ ᠪᠢ ᠡᠨᠡ ᠡᠵᠡᠨ ᠦᠭᠡᠢ ᠡᠮᠡ ᠶ᠋ᠢ ᠨᠢᠭᠡ ᠱᠣᠮᠤᠴᠢᠬᠠᠶᠠ᠂ ᠶᠠᠭᠠᠬᠢᠳᠠᠭ ᠶᠤᠮ⁈ ᠭᠡᠪᠡ᠃
— ᠴᠠᠭᠠᠳᠤᠬᠢ ᠴᠢᠨᠢ ᠲᠡᠢᠮᠦ ᠳᠦᠷᠰᠦ ᠮᠠᠭᠤᠲᠠᠢ! ᠬᠥᠮᠦᠨ ᠴᠤ᠌ ᠶᠤᠮ ᠤᠤ ᠴᠢᠳᠬᠥᠷ ᠴᠤ᠌ ᠶᠤᠮ ᠤᠤ ᠪᠦᠦ ᠮᠡᠳᠡ!
— ᠣ ᠳᠠ᠂ ᠶᠠᠭᠠᠬᠢᠬᠤ ᠪᠣᠢ!《ᠮᠠᠢ!》 ᠭᠡᠳ ᠬᠦᠷᠭᠡᠭᠡᠳ ᠢᠷᠡᠬᠦ ᠮᠢᠬᠠ ᠶ᠋ᠢ ᠦᠨᠦᠷᠲᠦᠳᠡᠭ ᠦᠭᠡᠢ ᠮᠤᠤᠷ ᠬᠠᠮᠢᠭᠠ ᠪᠠᠢᠯᠠ? ᠭᠡᠳ ᠳᠡᠷᠭᠡᠳᠡ ᠨᠢ ᠬᠦᠷᠴᠦ ᠢᠷᠡᠭᠰᠡᠨ ᠲᠡᠷᠡ ᠰᠣᠯᠢᠶᠠᠲᠠᠢ ᠰᠡᠭᠰᠡᠭᠡᠷ ᠪᠦᠰᠡᠭᠦᠢ ᠶ᠋ᠢᠨ ᠣᠩᠭᠣᠢᠬᠤ ᠬᠠᠯᠲᠠᠷ ᠴᠠᠪᠢ ᠤᠷᠤᠭᠤ ᠨᠢᠳᠦ ᠭᠦᠶᠦᠯᠭᠡᠨ᠄
— ᠮᠠᠢ᠂ ᠵᠢᠭᠠᠰᠤ ᠠᠪᠤᠨᠠ ᠤᠤ ᠭᠡᠰᠡᠨ ᠲᠥᠯᠥᠪᠲᠡᠢ ᠨᠢᠭᠡ ᠶᠠᠭᠤᠮᠠ ᠬᠡᠯᠡᠩᠭᠡᠨ ᠭᠠᠷ ᠳᠠᠬᠢ ᠵᠢᠭᠠᠰᠤ ᠪᠠᠨ ᠥᠭᠬᠦ ᠳ᠋ᠦ᠍᠄
— ᠠᠯᠢ ᠨᠠᠭᠠᠰᠢ ᠪᠠᠨ ᠭᠡᠳ ᠲᠡᠷᠡ ᠰᠣᠯᠢᠶᠠᠲᠠᠢ ᠰᠡᠭᠰᠡᠭᠡᠷ ᠪᠦᠰᠡᠭᠦᠢ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠪᠢᠲᠡᠭᠦᠯᠡᠨ ᠲᠤᠰᠪᠠ᠃ ᠲᠡᠭᠡᠬᠦ ᠳ᠋ᠦ᠍ ᠬᠠᠲᠠᠩᠭᠢᠷ ᠲᠣᠯᠣᠭᠠᠢᠲᠤ ᠥᠨᠥᠬᠢ ᠵᠢᠭᠠᠰᠤ ᠪᠠᠨ ᠬᠠᠷᠠᠮᠨᠠᠵᠤ᠄
— ᠠ᠂ ᠴᠢ ᠦᠨᠡᠬᠡᠷ ᠵᠢᠭᠠᠰᠤᠨ ᠳ᠋ᠤ᠌ ᠳᠤᠷᠠᠲᠠᠢ ᠤᠤ? ᠭᠡᠬᠦ ᠳ᠋ᠦ᠍ ᠲᠡᠷᠡ ᠰᠣᠯᠢᠶᠠᠲᠠᠢ ᠰᠡᠭᠰᠡᠭᠡᠷ ᠪᠦᠰᠡᠭᠦᠢ ᠥᠨᠥᠬᠢ ᠶ᠋ᠢᠨ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠣᠢᠯᠠᠭᠠᠭᠰᠠᠨ ᠦᠭᠡᠢ ᠪᠣᠯᠪᠠᠴᠤ《ᠠᠩ》 ᠭᠡᠵᠦ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠪᠠ᠃
— ᠦᠨᠡᠬᠡᠷ ᠵᠢᠭᠠᠰᠤᠨ ᠳ᠋ᠤ᠌ ᠳᠤᠷᠠᠲᠠᠢ ᠰᠠᠨ ᠪᠣᠯ ᠪᠢ ᠴᠢᠮᠠ ᠳ᠋ᠤ᠌ ᠨᠢᠭᠡ ᠠᠮᠢᠳᠤ ᠵᠢᠭᠠᠰᠤ ᠥᠭᠭᠦᠶᠡ! ᠭᠡᠳ ᠵᠡᠭᠦᠨ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠡᠷᠡᠬᠡᠢ ᠪᠣᠯᠤᠨ ᠳᠣᠯᠢᠶᠠᠪᠤᠷ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠨᠢᠭᠡ ᠣᠩᠭᠣᠢᠮᠠ ᠨᠦᠬᠡ ᠬᠡᠯᠪᠡᠷᠢ ᠲᠡᠢ ᠶᠠᠭᠤᠮᠠ ᠪᠣᠯᠭᠠᠵᠤ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠳᠣᠯᠢᠶᠠᠪᠤᠷ ᠬᠤᠷᠤᠭᠤ ᠶ᠋ᠢ ᠭᠣᠵᠣᠵᠠᠭᠤᠯᠤᠨ ᠨᠥᠭᠦᠭᠡ ᠵᠡᠭᠦᠨ ᠭᠠᠷ ᠤ᠋ᠨ ᠨᠦᠬᠡ ᠬᠡᠯᠪᠡᠷᠢᠲᠡᠢ ᠶᠠᠭᠤᠮᠠ ᠤᠷᠤᠭᠤ ᠪᠠᠨ ᠴᠢᠴᠢᠯᠡᠨ ᠰᠢᠷᠭᠤᠭᠤᠯᠬᠤ ᠱᠠᠯᠢᠭ ᠳᠦᠷᠰᠦᠯᠡᠯ ᠦᠵᠡᠭᠦᠯᠦᠨᠡ᠃《ᠢᠩᠭᠢᠪᠡᠯ ᠪᠣᠯᠤᠨᠠ ᠤᠤ》 ᠭᠡᠰᠡᠨ ᠳ᠋ᠦ᠍ ᠰᠣᠯᠢᠶᠠᠲᠠᠢ ᠰᠡᠭᠰᠡᠭᠡᠷ ᠡᠮᠡ ᠶᠠᠭᠤ ᠶᠠᠭᠠᠬᠢᠬᠤ ᠭᠡᠰᠡᠨ ᠢ᠋ ᠤᠬᠠᠭᠠᠨ ᠲᠥᠬᠥᠭᠡ ᠶ᠋ᠢ ᠨᠢ ᠣᠯᠬᠤ ᠦᠭᠡᠢ《ᠪᠣᠯᠤᠨᠠ᠂ ᠠᠪᠤᠨᠠ》 ᠭᠡᠰᠡᠨ ᠰᠢᠭ ᠭᠠᠷ ᠢ᠋ᠶ᠋ᠠᠨ ᠰᠡᠷᠪᠡᠢᠨ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠵᠤ᠄
— ᠪᠢ ᠵᠢᠭᠠᠰᠤ ᠠᠪᠤᠶᠠ! ᠪᠢ ᠵᠢᠭᠠᠰᠤ ᠨᠠᠭᠠᠳᠤᠶᠠ! ᠵᠢᠭᠠᠰᠤ ᠭᠡᠵᠦ ᠮᠠᠰᠢ ᠬᠥᠭᠡᠷᠦᠬᠦᠨ ᠠᠮᠢᠲᠠᠨ ᠶᠤᠮ ᠭᠡᠵᠦ ᠭᠠᠷ ᠢ᠋ᠶ᠋ᠠᠨ ᠲᠤᠰᠬᠤ ᠳ᠋ᠤ᠌ ᠴᠠᠭᠠᠳᠤᠬᠢ ᠨᠢ ᠤᠴᠢᠷ ᠤᠬᠠᠭᠠᠨ ᠢ᠋ ᠨᠢ ᠣᠯᠤᠭᠰᠠᠨ ᠦᠭᠡᠢ᠂ ᠶᠠᠭᠤ ᠭᠡᠵᠦ ᠪᠣᠳᠣᠭᠰᠠᠨ ᠢ᠋ ᠪᠦᠦ ᠮᠡᠳᠡ᠂ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ᠶ᠋ᠠᠨ ᠲᠠᠢᠯᠵᠤ ᠭᠡᠨᠡᠳᠲᠡ ᠲᠡᠷᠡ ᠰᠣᠯᠢᠶᠠᠲᠠᠢ ᠰᠡᠭᠰᠡᠭᠡᠷ ᠭᠡᠵᠢᠭᠡ ᠲᠡᠢ ᠪᠦᠰᠡᠭᠦᠢ ᠤᠷᠤᠭᠤ ᠨᠣᠴᠣᠨ ᠣᠷᠣᠵᠤ᠂ ᠬᠠᠷᠠ ᠬᠦᠷᠮᠡ ᠪᠡᠷ ᠢ᠋ᠶ᠋ᠡᠨ ᠲᠡᠷᠡ ᠪᠦᠰᠡᠭᠦᠢ ᠶ᠋ᠢᠨ ᠨᠢᠭᠤᠷ ᠢ᠋ ᠪᠦᠲᠡᠭᠡᠵᠦ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠪᠣᠭᠣᠳᠠᠭ ᠤ᠋ᠨ ᠬᠠᠭᠤᠷᠤᠭᠰᠠᠨ ᠵᠠᠭᠠᠷᠠᠭ ᠳᠡᠭᠡᠷᠡ ᠳᠠᠷᠤᠵᠤ ᠤᠨᠠᠪᠠ᠃
ᠨᠢᠭᠡ ᠨᠢ ᠳᠡᠭᠡᠷᠡ ᠨᠢ ᠮᠥᠯᠬᠥᠵᠦ᠂ ᠨᠢᠭᠡ ᠨᠢ ᠳᠣᠣᠷᠠ ᠨᠢ ᠲᠡᠯᠴᠢᠯᠡᠨ ᠨᠢᠭᠡ ᠪᠥᠭᠡᠮ ᠪᠣᠯᠤᠨ ᠵᠢᠭᠤᠷᠠᠯᠳᠤᠭᠰᠠᠨ ᠬᠣᠶᠠᠷ ᠨᠣᠴᠣᠯᠳᠤᠨ ᠨᠣᠴᠣᠯᠳᠤᠭᠰᠠᠭᠠᠷ ᠪᠠᠢᠵᠤ ᠭᠡᠨᠡᠳᠲᠡ ᠬᠣᠶᠠᠭᠤᠯᠠ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠤᠰᠤᠨ ᠳ᠋ᠤ᠌ ᠫᠥᠯᠥᠷᠡᠩ ᠬᠢᠵᠦ ᠣᠷᠣᠭᠠᠳ ᠪᠠᠷᠠ ᠲᠠᠰᠤᠷᠠᠪᠠ᠁
ᠤᠯᠠᠭᠠᠨ ᠵᠠᠭᠠᠷᠠᠭ ᠢ᠋ᠶ᠋ᠠᠷ ᠬᠤᠢᠯᠠᠷᠠᠨ ᠳᠠᠪᠠᠯᠭᠠᠯᠠᠭᠰᠠᠨ ᠬᠠᠲᠤᠨ ᠤ᠋ ᠤᠰᠤ ᠲᠡᠷᠡ ᠬᠣᠶᠠᠷ ᠢ᠋ ᠬᠠᠢᠷᠠ ᠨᠠᠢᠷ ᠦᠭᠡᠢ ᠵᠠᠯᠭᠢᠪᠠ᠃ ᠫᠥᠯᠥᠷᠡᠩ ᠭᠡᠬᠦ ᠠᠵᠠ ᠮᠠᠭᠤᠲᠠᠢ ᠴᠢᠮᠡᠭᠡ ᠪᠡᠷ ᠳᠠᠬᠢᠵᠤ ᠪᠠᠷᠠ ᠨᠢ ᠦᠵᠡᠭᠳᠡᠭᠰᠡᠨ ᠦᠭᠡᠢ ᠨᠥᠭᠦᠭᠡ ᠬᠣᠶᠠᠷ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠵᠠᠩ ᠭᠤᠸᠠᠢ ᠬᠠᠲᠠᠩᠭᠢᠷ ᠲᠣᠯᠣᠭᠠᠢᠲᠤ ᠶ᠋ᠢᠨ ᠨᠡᠷᠡ ᠪᠡᠷ ᠨᠢ ᠬᠠᠰᠬᠢᠷᠤᠨ ᠪᠠᠷᠬᠢᠷᠠᠨ ᠬᠠᠲᠤᠨ ᠤ᠋ ᠬᠥᠪᠡᠭᠡ ᠳᠠᠭᠠᠵᠤ ᠬᠡᠰᠡᠭ ᠭᠦᠶᠦᠭᠡᠳ ᠰᠠᠨᠠᠭᠠ ᠪᠠᠨ ᠬᠤᠷᠢᠶᠠᠪᠠ᠃
— ᠬᠡᠷᠡᠭ ᠢ᠋ᠶ᠋ᠡᠨ ᠪᠠᠷᠠᠭᠰᠠᠨ ᠶᠠᠭᠤᠮᠠᠨ ᠳ᠋ᠤ᠌ ᠳᠤᠷᠠᠯᠠᠵᠤ ᠰᠣᠯᠢᠶᠠ ᠪᠠᠯᠠᠢᠲᠠᠢ ᠡᠮᠡ ᠳ᠋ᠦ᠍ ᠬᠠᠯᠳᠠᠪᠠ ᠭᠡᠳ ᠨᠢᠭᠡ ᠨᠠᠰᠤ ᠠᠷᠪᠠᠨ ᠭᠤᠷᠪᠠ ᠪᠠᠨ ᠳᠠᠭᠤᠰᠬᠠᠴᠢᠬᠠᠨᠠ ᠭᠡᠵᠦ ᠳᠡ! ᠲᠡᠷᠡ ᠰᠢᠲᠠᠩᠬᠠᠢ ᠴᠢᠷᠠᠢ ᠲᠠᠢ ᠰᠡᠭᠰᠡᠭᠡᠷ ᠡᠮᠡ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠣᠨᠳᠣᠣ ᠯᠠ ᠬᠠᠷᠠᠭᠳᠠᠭᠠᠳ ᠪᠠᠢᠭᠰᠠᠨ ᠶᠤᠮ! ᠭᠡᠵᠦ ᠥᠷᠥᠭᠡᠰᠦᠨ ᠨᠢᠭᠡ ᠶ᠋ᠢ ᠪᠡᠨ ᠤᠯᠠᠭᠠᠨ ᠬᠠᠲᠤᠨ ᠳ᠋ᠤ᠌ ᠠᠯᠳᠠᠭᠰᠠᠨ ᠳ᠋ᠠᠭᠠᠨ ᠤᠷᠮᠠ ᠮᠠᠭᠤᠲᠠᠢ ᠭᠣᠩᠰᠣᠢᠨᠠ᠃
ᠰᠣᠯᠢᠶᠠᠲᠠᠢ ᠪᠦᠰᠡᠭᠦᠢ ᠳ᠋ᠦ᠍ ᠤᠮᠠᠳᠠᠭ ᠢ᠋ᠶ᠋ᠠᠨ ᠪᠠᠵᠠᠭᠤᠯᠤᠭᠰᠠᠨ ᠬᠠᠲᠠᠩᠭᠢᠷ ᠲᠣᠯᠣᠭᠠᠢᠲᠤ ᠪᠤᠯᠠᠩᠭᠢᠷ ᠲᠠᠢ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠤᠰᠤᠨ ᠳ᠋ᠤ᠌ ᠬᠡᠳᠦ ᠣᠭᠰᠢᠭᠠᠳ ᠰᠤᠯᠳᠠᠢᠪᠠ᠃
ᠰᠣᠯᠢᠶᠠᠲᠠᠢ ᠪᠦᠰᠡᠭᠦᠢ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠤᠰᠤᠨ ᠳ᠋ᠤ᠌ ᠬᠡᠴᠢᠨᠡᠭᠡᠨ ᠤᠳᠠᠭᠠᠨ ᠵᠠᠢᠮᠤᠴᠢᠭᠤᠯᠤᠭᠰᠠᠨ ᠢ᠋ ᠪᠦᠦ ᠮᠡᠳᠡ᠂ ᠨᠢᠭᠡ ᠰᠡᠷᠡᠬᠦᠯᠡ ᠴᠢᠬᠢᠷᠰᠦ ᠳᠡᠪᠢᠰᠦᠭᠰᠡᠨ ᠵᠢᠵᠢᠭᠬᠡᠨ ᠪᠦᠷᠭᠡ ᠭᠡᠷ ᠦ᠋ᠨ ᠬᠠᠨᠵᠤᠨ ᠳᠡᠭᠡᠷᠡ ᠬᠡᠪᠲᠡᠵᠦ ᠪᠠᠢᠯᠠ᠃ ᠤᠤᠯ ᠨᠢ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠳᠣᠣᠷᠠᠲᠤ ᠤᠷᠤᠰᠬᠠᠯ ᠤ᠋ᠨ ᠨᠢᠭᠡᠨ ᠰᠠᠯᠴᠢᠨ ᠡᠪᠦᠭᠡᠨ ᠲᠡᠭᠦᠨ ᠢ᠋ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠥᠪᠡᠭᠡᠨ ᠳ᠋ᠦ᠍ ᠠᠮᠢ ᠲᠠᠢ ᠠᠮᠢ ᠦᠭᠡᠢ ᠪᠠᠢᠭᠠ ᠶ᠋ᠢ ᠣᠯᠵᠤ ᠦᠵᠡᠭᠡᠳ ᠴᠠᠴᠠᠭᠰᠠᠨ ᠬᠥᠮᠦᠨ ᠢ᠋ ᠥᠭᠡᠳᠡ ᠲᠠᠲᠠᠬᠤ ᠬᠠᠭᠤᠴᠢᠨ ᠲᠤᠷᠰᠢᠯᠭᠠ ᠪᠠᠷ ᠢ᠋ᠶ᠋ᠠᠨ ᠲᠡᠭᠦᠨ ᠢ᠋ ᠲᠡᠩᠬᠡᠷᠡᠭᠦᠯᠵᠡᠢ᠃ ᠲᠡᠭᠦᠨ ᠢ᠋ ᠰᠡᠷᠡᠭᠰᠡᠨ ᠬᠣᠢᠨᠠ ᠰᠠᠯᠴᠢᠨ ᠡᠪᠦᠭᠡᠨ᠄
— ᠠᠢ᠂ ᠬᠡᠦᠬᠡᠨ ᠠ᠋᠂ ᠴᠢ ᠶᠠᠭᠤ ᠶᠠᠭᠠᠬᠢᠯᠠ ᠭᠡᠵᠦ ᠤᠯᠠᠭᠠᠨ ᠬᠠᠲᠤᠨ ᠳ᠋ᠤ᠌ ᠬᠠᠷᠠᠢᠵᠤ ᠠᠮᠢ ᠲᠠᠢ ᠪᠠᠨ ᠨᠠᠭᠠᠳᠤᠮ ᠬᠢᠪᠡ? ᠭᠡᠵᠦ ᠠᠰᠠᠭᠤᠪᠠᠯ ᠲᠡᠷᠡ ᠰᠣᠯᠢᠶᠠᠲᠠᠢ ᠪᠦᠰᠡᠭᠦᠢ《ᠮᠡᠳᠡᠬᠦ ᠦᠭᠡᠢ》 ᠭᠡᠵᠦ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠦᠨᠡ᠃
— ᠬᠠᠮᠢᠭᠠᠬᠢ ᠨᠤᠲᠤᠭ ᠤ᠋ᠨ ᠬᠡᠨ ᠭᠡᠳᠡᠭ ᠨᠡᠷᠡ ᠲᠡᠢ ᠶᠦᠮ? ᠭᠡᠪᠡᠯ ᠲᠡᠷᠡ ᠮᠥᠨ ᠰᠣᠯᠢᠶᠠ ᠪᠠᠯᠠᠢ ᠪᠠᠷ ᠲᠣᠯᠣᠭᠠᠢ ᠪᠠᠨ ᠰᠠᠵᠢᠬᠤ ᠠ᠋ᠴᠠ ᠥᠭᠡᠷᠡ ᠦᠭᠡ ᠦᠭᠡᠢ᠃
— ᠵᠢᠭᠠᠯ ᠵᠢᠭᠤᠯ ᠶᠠᠭᠤᠮᠠ ᠢᠳᠡᠨᠡ ᠤᠤ? ᠭᠡᠬᠦ ᠳ᠋ᠦ᠍ ᠮᠥᠨ ᠯᠡ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠦᠨᠡ᠃
ᠰᠠᠯᠴᠢᠨ ᠡᠪᠦᠭᠡᠨ ᠡᠨᠡ ᠰᠢᠲᠠᠩᠬᠠᠢ ᠴᠢᠷᠠᠢ ᠲᠠᠢ ᠪᠦᠰᠡᠭᠦᠢ ᠶ᠋ᠢ ᠦᠷᠦ ᠡᠪᠡᠳᠦᠨ᠂ ᠤᠰᠤᠨ ᠳ᠋ᠤ᠌ ᠤᠨᠠᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠨᠢᠭᠡ ᠣᠭᠣᠴᠢ ᠬᠠᠷᠠ ᠠᠷᠢᠬᠢ ᠤᠤᠭᠤᠯᠭᠠᠵᠤ ᠲᠣᠲᠣᠷᠠ ᠲᠠᠪᠤᠨ ᠴᠤᠯᠤ ᠶᠢ ᠨᠢ ᠪᠦᠯᠢᠶᠡᠰᠭᠡᠵᠦ ᠥᠭ᠍ᠭᠦᠶᠡ ᠭᠡᠳ ᠣᠷᠣᠨ ᠤ ᠪᠠᠨ ᠴᠠᠭᠠᠭᠤᠷ ᠲᠠᠯᠪᠢᠭᠠᠰᠤᠲᠠᠢ ᠵᠢᠵᠢᠭ᠍ᠬᠡᠨ ᠪᠤᠲᠤᠩ ᠲᠣᠲᠣᠷᠠ ᠠᠴᠠ ᠨᠢᠭᠡ ᠬᠡᠮ ᠠᠷᠢᠬᠢ ᠬᠤᠨᠳᠠᠭᠠᠯᠠᠪᠠᠯ ᠵᠢᠵᠢᠭᠬᠡᠨ ᠭᠡᠷ ᠲᠦ᠍ ᠬᠠᠩᠬᠤ ᠲᠠᠲᠠᠲᠠᠯᠠ ᠠᠷᠢᠬᠢ ᠦᠨᠦᠷᠲᠦᠪᠡ᠃ ᠰᠠᠯᠴᠢᠨ ᠡᠪᠦᠭᠡᠨ ᠲᠡᠷᠡ ᠬᠤᠨᠳᠠᠭᠠ ᠲᠠᠢ ᠠᠷᠢᠬᠢ ᠪᠠᠨ ᠠᠰᠬᠠᠭᠤᠵᠠᠢ ᠭᠡᠳ ᠮᠠᠰᠢ ᠬᠢᠴᠢᠶᠡᠵᠦ ᠲᠡᠭᠦᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠣᠴᠢᠭᠠᠳ᠄
— ᠵᠠ᠂ ᠬᠡᠦᠬᠡᠨ ᠮᠢᠨᠢ ᠡᠭᠦᠨ ᠢ᠋ ᠤᠤᠭᠤᠴᠢᠬᠠ! ᠵᠢᠬᠡᠭᠦᠴᠡᠭᠰᠡᠨ ᠬᠥᠮᠦᠨ ᠣᠭᠣᠴᠢ ᠠᠷᠢᠬᠢ ᠤᠤᠭᠤᠪᠠᠯ ᠳᠣᠲᠣᠷᠠ ᠪᠦᠯᠢᠶᠡᠰᠳᠡᠭ ᠶᠦᠮ ᠭᠡᠵᠦ ᠵᠢᠵᠢᠭ ᠬᠠᠷᠠ ᠱᠠᠭᠠᠵᠠᠩ ᠬᠤᠨᠳᠠᠭᠠ ᠲᠠᠢ ᠠᠷᠢᠬᠢ ᠪᠠᠨ ᠤᠷᠤᠭᠤᠯ ᠳ᠋ᠤᠨᠢ ᠣᠢᠷᠠᠲᠤᠭᠤᠯᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠰᠣᠯᠢᠶᠠᠲᠠᠢ ᠪᠦᠰᠡᠭᠦᠢ《ᠠ!》 ᠭᠡᠵᠦ ᠣᠷᠢᠯᠠᠵᠤ᠄
— ᠮᠠᠭᠤ ᠬᠠᠲᠠᠩᠭᠢᠷ ᠲᠣᠯᠣᠭᠠᠢ ᠴᠢ ᠨᠠᠮᠠᠶ᠋ᠢ ᠶᠠᠭᠠᠬᠢᠬᠤ ᠰᠠᠨᠠᠭᠠ ᠲᠠᠢ ᠶᠤᠮ? ᠨᠠᠳᠠ ᠳ᠋ᠤ᠌ ᠬᠣᠣᠷ ᠥᠭᠴᠦ ᠠᠯᠠᠬᠤ ᠨᠢ ᠤᠤ? ᠪᠢ ᠴᠢᠮᠠᠶ᠋ᠢ ᠶᠠᠭᠠᠬᠢᠪᠠ? ᠮᠢᠨᠦ ᠬᠣᠭᠣᠯᠠᠢ᠂ ᠬᠥᠬᠥ ᠳᠠᠯᠠᠩ ᠢ᠋ ᠪᠠᠵᠠᠭᠳᠠᠨ᠁ ᠪᠠᠰᠠ ᠨᠠᠮᠠᠶ᠋ᠢ ᠤᠯᠠᠭᠠᠨ ᠬᠠᠲᠤᠨ ᠳ᠋ᠤ᠌ ᠲᠦᠯᠬᠢᠳᠡᠭ ᠨᠢ ᠶᠠᠭᠤ ᠪᠣᠢ? ᠠ⁈ ᠪᠢ ᠶᠢᠰᠦᠨ ᠲᠥᠷᠥᠯ ᠦ᠋ᠨ ᠳᠡᠭᠡᠳᠦᠰ ᠲᠦ᠍ ᠴᠢᠨᠢ ᠥᠷᠢ ᠲᠡᠢ ᠤᠤ ᠦᠰ ᠲᠡᠢ ᠤᠤ? ᠴᠢ ᠯᠠᠪ ᠰᠢᠷᠠᠪ ᠨᠣᠶᠠᠨ ᠤ᠋ ᠠ᠂ ᠪᠠᠰᠠ ᠷᠠᠰᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠨᠣᠬᠠᠢ ᠶ᠋ᠢᠨ ᠭᠤᠶᠠ ᠨᠤᠭᠤᠳ ᠤ᠋ᠨ ᠨᠢᠭᠡ ᠪᠠᠢᠬᠠ᠁ ᠬᠡᠩ᠂ ᠴᠢ ᠨᠠᠮᠠᠶ᠋ᠢ ᠤᠯᠠᠭᠠᠨ ᠬᠠᠲᠤᠨ ᠳ᠋ᠤ᠌ ᠲᠦᠯᠬᠢᠭᠡᠳ ᠴᠠᠴᠠᠭᠠᠵᠤ ᠠᠯᠠᠬᠤ ᠰᠠᠨᠠᠭᠠ ᠲᠠᠢ ᠤᠤ? ᠭᠤᠨᠵᠢ ᠠ᠋᠂ ᠭᠤᠨᠵᠢ! ᠡᠨᠡ ᠡᠬᠡ ᠴᠢᠨᠢ ᠳᠡᠭᠡᠳᠦ ᠲᠥᠷᠥᠯ ᠦ᠋ᠨ ᠤᠰᠤᠴᠢ ᠠᠮᠢᠲᠠᠨ ᠠ᠋ᠴᠠ ᠤᠯᠠᠷᠢᠭᠰᠠᠨ ᠰᠦᠨᠡᠰᠦ ᠰᠢᠦ! ᠭᠡᠵᠦ ᠡᠷᠢᠶᠡᠨ ᠮᠡᠷᠢᠶᠡᠨ ᠬᠠᠰᠬᠢᠷᠤᠨ ᠵᠢᠵᠢᠭ ᠬᠠᠷᠠ ᠬᠤᠨᠳᠠᠭᠠ ᠲᠠᠢ ᠠᠷᠢᠬᠢ ᠶ᠋ᠢ ᠠᠯᠠᠭᠠᠳᠠᠵᠤ ᠤᠨᠠᠭᠠᠨ ᠳᠠᠪ ᠬᠢᠨ ᠪᠣᠰᠤᠭᠠᠳ ᠭᠠᠳᠠᠭᠰᠢ ᠭᠦᠶᠦᠪᠡ᠃
ᠰᠠᠯᠴᠢᠨ ᠡᠪᠦᠭᠡᠨ ᠠᠷᠢᠬᠢ ᠬᠤᠨᠳᠠᠭᠠᠯᠠᠭᠰᠠᠨ ᠳ᠋ᠠᠭᠠᠨ ᠭᠡᠮᠰᠢᠵᠦ《ᠠ ᠢᠯᠡᠢ᠂ ᠪᠢ ᠶᠠᠭᠤ ᠭᠡᠵᠦ ᠡᠢᠮᠦ ᠡᠷᠭᠢᠭᠦᠲᠦᠭᠰᠡᠨ ᠠᠵᠢᠯ ᠦᠢᠯᠡᠳᠪᠡ?》 ᠭᠡᠵᠦ ᠪᠡᠶᠡ ᠪᠡᠨ ᠵᠢᠮᠡᠯᠡᠨ ᠲᠡᠭᠦᠨ ᠦ᠌ ᠠᠷᠤ ᠠ᠋ᠴᠠ ᠰᠠᠨᠳᠤᠷᠤᠨ᠄
— ᠬᠥᠶᠢ! ᠬᠡᠦᠬᠡ ᠠ᠋! ᠳᠠᠬᠢᠵᠤ ᠪᠢᠲᠡᠭᠡᠢ ᠯᠡ ᠤᠯᠠᠭᠠᠨ ᠬᠠᠲᠤᠨ ᠳ᠋ᠤ᠌ ᠬᠠᠷᠠᠢ! ᠮᠡᠳᠡᠪᠡ ᠤᠤ! ᠭᠡᠵᠦ ᠬᠣᠢᠨᠠ ᠠ᠋ᠴᠠ ᠨᠢ ᠭᠦᠶᠦᠪᠡ᠃
ᠦᠷᠭᠦᠭᠰᠡᠨ ᠰᠢᠷᠠᠭᠴᠢᠨ ᠰᠢᠭ᠋ ᠲᠡᠭ ᠭᠦᠶᠦᠵᠦ ᠣᠳᠤᠭᠰᠠᠨ ᠲᠡᠷᠡ ᠪᠦᠰᠡᠭᠦᠢ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠡᠪᠦᠭᠡᠨ ᠶᠠᠭᠠᠬᠢᠵᠤ ᠭᠦᠢᠴᠡᠬᠦ ᠪᠢᠯᠡ⁈ ᠶᠠᠭᠤ ᠴᠤ᠌ ᠭᠡᠰᠡᠨ ᠲᠡᠷᠡ ᠪᠦᠰᠡᠭᠦᠢ ᠶ᠋ᠢᠨ ᠠᠷᠤ ᠠ᠋ᠴᠠ ᠬᠠᠷᠠᠵᠤ ᠵᠣᠭᠰᠣᠬᠤ ᠳ᠋ᠠᠭᠠᠨ《ᠳᠠᠬᠢᠵᠤ ᠪᠢᠲᠡᠭᠡᠢ ᠤᠯᠠᠭᠠᠨ ᠬᠠᠲᠤᠨ ᠳ᠋ᠤ᠌ ᠬᠠᠷᠠᠢ! ᠤᠰᠤ ᠭᠠᠯ ᠤ᠋ᠨ ᠠᠶᠤᠯ ᠭᠡᠭᠴᠢ ᠨᠢᠳᠦ ᠦᠭᠡᠢ ᠰᠢᠦ! ᠠᠢ᠂ ᠬᠥᠭᠡᠷᠦᠬᠦᠢ᠂ ᠶᠠᠮᠠᠷ ᠨᠢᠭᠡ ᠠᠵᠠ ᠪᠢᠰᠢᠳᠡᠭᠰᠡᠨ ᠠᠢᠯ ᠤ᠋ᠨ ᠠᠴᠢᠷ ᠶᠤᠮ ᠪᠣᠯ ᠠ᠋!》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠳᠠᠭᠠᠳᠬᠠᠨ ᠵᠠᠯᠪᠠᠷᠢᠵᠤ ᠵᠣᠭᠰᠣᠨᠠ᠃
ᠲᠡᠷᠡ ᠰᠣᠯᠢᠶᠠᠲᠠᠢ ᠪᠦᠰᠡᠭᠦᠢ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠥᠪᠡᠭᠡ ᠳᠠᠭᠠᠤ ᠭᠦᠶᠦᠨ ᠭᠦᠶᠦᠭᠰᠡᠭᠡᠷ ᠰᠠᠯᠴᠢᠨ ᠡᠪᠦᠭᠡᠨ ᠦ᠌《ᠳᠠᠬᠢᠵᠤ ᠪᠢᠲᠡᠭᠡᠢ ᠤᠯᠠᠭᠠᠨ ᠬᠠᠲᠤᠨ ᠳ᠋ᠤ᠌ ᠬᠠᠷᠠᠢ᠁》 ᠭᠡᠵᠦ ᠳᠠᠭᠠᠳᠬᠠᠨ ᠳᠦᠳᠦᠨᠡᠭᠰᠡᠨ ᠢ᠋ ᠳᠠᠯᠳᠠ ᠠ᠋ᠴᠠ ᠰᠣᠨᠣᠰᠤᠭᠰᠠᠨ ᠰᠢᠭ᠋ ᠬᠠᠲᠤᠨ ᠤ᠋ ᠬᠥᠪᠡᠭᠡ ᠪᠣᠭᠣᠳᠠᠭ ᠳᠡᠭᠡᠷᠡ ᠡᠴᠡ ᠪᠠᠭᠤᠵᠤ ᠪᠢᠲᠡᠭᠦᠦ ᠵᠡᠭᠡᠰᠦ ᠬᠤᠯᠤᠰᠤᠨ ᠳ᠋ᠤ᠌ ᠣᠷᠣᠵᠤ ᠳᠠᠯᠳᠢᠷᠠᠪᠠ᠃
ᠰᠠᠯᠴᠢᠨ ᠡᠪᠦᠭᠡᠨ ᠤᠷᠲᠤᠬᠠᠨ ᠨᠢᠭᠡ ᠠᠮᠢᠰᠬᠤᠵᠤ ᠰᠠᠨᠠᠭᠠ ᠨᠢ ᠪᠠᠭᠠ ᠲᠠᠢᠪᠤᠰᠢᠷᠠᠭᠰᠠᠨ ᠪᠣᠯᠤᠯᠲᠠᠢ ᠪᠢᠴᠢᠬᠠᠨ ᠪᠥᠷᠭᠡ ᠵᠦᠭ ᠢ᠋ᠶ᠋ᠡᠨ ᠬᠡᠯᠲᠦᠷᠢᠪᠡ᠃
᠁
ᠵᠡᠭᠦᠨᠰᠢ ᠪᠡᠨ ᠪᠤᠭᠤᠲᠤ᠂ ᠰᠠᠭᠠᠯᠢᠴᠢᠨ᠂ ᠪᠠᠷᠠᠭᠤᠨᠰᠢ ᠪᠠᠨ ᠬᠠᠩᠬᠠᠲᠠᠢ ᠶ᠋ᠢᠨ ᠴᠠᠭᠠᠳᠤ ᠵᠠᠬᠠ ᠤᠯᠠᠭᠠᠨᠪᠤᠬᠠ ᠶ᠋ᠢᠨ ᠮᠠᠩᠬᠠ᠂ ᠬᠣᠢᠰᠢ ᠪᠠᠨ ᠮᠢᠩᠭᠠᠨ ᠲᠠᠯᠠ᠂ ᠰᠢᠨᠠᠭᠠ ᠶ᠋ᠢᠨ ᠠᠭᠤᠯᠠ᠂ ᠡᠮᠦᠨᠡᠰᠢ ᠪᠡᠨ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠥᠪᠡᠭᠡ ᠳᠠᠭᠠᠤ ᠠᠢᠯ ᠤ᠋ᠨ ᠬᠠᠶᠠᠭᠠ ᠪᠠᠷ ᠬᠠᠶᠠ ᠨᠢᠭᠡ ᠰᠠᠩᠭᠤᠢᠭᠰᠠᠨ ᠰᠡᠭᠰᠡᠭᠡᠷ ᠦᠰᠦ ᠲᠡᠢ᠂ ᠰᠢᠲᠠᠩᠬᠠᠢ ᠪᠠᠷᠵᠠᠭᠠᠷ ᠴᠢᠷᠠᠢ ᠲᠠᠢ ᠭᠤᠢᠷᠠᠨᠴᠢ ᠴᠤ᠌ ᠶᠤᠮ ᠤᠤ ᠡᠢᠮᠦ ᠨᠢᠭᠡ ᠶᠠᠪᠤᠭᠤᠯ ᠡᠮᠡ ᠲᠠᠩᠳᠠ ᠲᠡᠨᠦᠭᠦᠴᠢᠯᠡᠵᠦ ᠶᠠᠪᠤᠳᠠᠭ ᠪᠣᠯᠪᠠ᠃ ᠵᠠᠷᠢᠮ ᠳ᠋ᠠᠭᠠᠨ ᠬᠥᠬᠥ ᠳᠠᠯᠠᠩ ᠢ᠋ᠶ᠋ᠠᠨ ᠰᠡᠷᠡᠢᠯᠭᠡᠵᠦ᠂ ᠵᠠᠷᠢᠮ ᠳ᠋ᠠᠭᠠᠨ ᠪᠥᠭᠰᠡ ᠪᠡᠯᠬᠡᠭᠦᠰᠦ ᠪᠡᠷ ᠢ᠋ᠶ᠋ᠡᠨ ᠱᠠᠯᠳᠠᠩ᠂ ᠵᠤᠨ ᠤ᠋ ᠢᠳᠡ ᠬᠠᠯᠠᠭᠤᠨ ᠳ᠋ᠤ᠌ ᠨᠡᠬᠡᠢ ᠡᠮᠦᠰᠴᠦ᠂ ᠡᠪᠦᠯ ᠦ᠋ᠨ ᠶᠢᠰᠦ ᠶ᠋ᠢᠨ ᠬᠦᠢᠲᠡᠨ ᠳ᠋ᠦ᠍ ᠴᠦ᠍ ᠬᠥᠯ ᠨᠢᠴᠦᠭᠦᠨ ᠭᠦᠶᠦᠵᠦ ᠶᠠᠪᠤᠭᠠ ᠡᠨᠡ ᠪᠦᠰᠡᠭᠦᠢ ᠶ᠋ᠢ ᠡᠨᠡᠷᠢᠵᠦ ᠠᠪᠤᠭᠰᠠᠨ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ᠃ ᠪᠠᠷᠤᠭ ᠤ᠋ᠨ ᠬᠥᠮᠦᠰ ᠪᠠᠷᠠ ᠶ᠋ᠢ ᠨᠢ ᠦᠵᠡᠮᠡᠭᠴᠡ ᠡᠭᠳᠡᠭᠦᠴᠡᠬᠦ ᠳ᠋ᠡᠭᠡᠨ ᠲᠡᠭᠦᠨ ᠡᠴᠡ ᠵᠠᠢᠯᠠᠵᠤ ᠶᠠᠪᠤᠨᠠ᠃ ᠠᠢᠯ ᠤ᠋ᠨ ᠬᠠᠶᠠᠭᠠᠨ ᠳ᠋ᠤᠨᠢ ᠳᠥᠭᠥᠵᠦ ᠣᠴᠢᠪᠠᠯ《ᠬᠡᠦᠬᠡᠳ ᠰᠢᠤᠬᠠᠳ ᠠᠶᠤᠯᠭᠠᠯᠠ᠁ ᠶᠠᠮᠠᠷ ᠬᠠᠮᠢᠭᠠᠰᠢ ᠪᠠᠨ ᠡᠮᠡ ᠪᠣᠢ》 ᠭᠡᠵᠦ ᠲᠡᠭᠦᠨ ᠢ᠋ ᠬᠥᠭᠡᠭᠡᠵᠦ ᠲᠠᠭᠤᠨᠠ᠃ ᠵᠠᠷᠢᠮ ᠪᠠᠶᠠᠨ ᠳᠡᠭᠡᠷᠡᠩᠭᠦᠢ ᠠᠢᠯ ᠨᠢ ᠲᠣᠭᠰᠢᠨ ᠨᠣᠬᠠᠢ ᠪᠠᠨ ᠲᠠᠯᠪᠢᠵᠤ ᠠᠶᠤᠯᠭᠠᠵᠤ ᠵᠠᠢᠯᠠᠭᠤᠯᠳᠠᠭ᠃ ᠲᠡᠭᠡᠬᠦ ᠳ᠋ᠦ᠍ ᠪᠠᠰᠠ ᠰᠣᠨᠢᠨ! ᠡᠨᠡ ᠰᠠᠩᠭᠤᠢᠭᠰᠠᠨ ᠰᠡᠭᠰᠡᠭᠡᠷ ᠦᠰᠦ ᠲᠡᠢ ᠡᠮᠡ ᠶ᠋ᠢ ᠬᠥᠮᠦᠨ ᠬᠠᠷᠠ ᠲᠣᠯᠣᠭᠠᠢᠲᠠᠨ ᠠᠳᠠ ᠦᠵᠡᠵᠦ ᠵᠢᠭᠰᠢᠳᠡᠭ ᠪᠣᠯᠪᠠᠴᠤ ᠶᠠᠮᠠᠷ ᠴᠤ᠌ ᠠᠢᠯ ᠤᠨ ᠳᠣᠭᠰᠢᠨ ᠨᠣᠬᠠᠳ ᠲᠡᠭᠦᠨ ᠢ᠋ ᠬᠣᠷᠭᠣᠭᠣᠵᠤ ᠵᠠᠭᠤᠳᠠᠭ ᠦᠭᠡᠢ ᠨᠢ ᠰᠣᠨᠢᠷᠬᠠᠯᠲᠠᠢ᠃ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠠᠭᠠᠳ ᠲᠡᠭᠦᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠨᠣᠪ ᠨᠣᠮᠣᠬᠠᠨ᠃ ᠲᠡᠷᠡ ᠰᠡᠭᠰᠡᠭᠡᠷ ᠭᠡᠵᠢᠭᠡ ᠲᠡᠢ ᠡᠮᠡ ᠶ᠋ᠢᠨ ᠭᠠᠷ ᠠ᠋ᠴᠠ ᠶᠠᠮᠠᠷ ᠨᠢᠭᠡ ᠢᠳᠡᠮᠡᠷ ᠶᠠᠭᠤᠮᠠ ᠭᠣᠷᠢᠳᠠᠬᠤ ᠰᠢᠭ᠋ ᠪᠠᠢᠳᠠᠭ ᠲᠤ《ᠨᠠᠳᠠ ᠶᠠᠭᠤ ᠴᠤ᠌ ᠦᠭᠡᠢ! ᠤᠨᠵᠢᠭᠢᠨᠠᠭᠰᠠᠨ ᠬᠣᠭᠣᠰᠣᠨ ᠬᠣᠶᠠᠷ ᠭᠠᠷ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠴᠤ᠌ ᠦᠭᠡᠢ ᠠ᠋》 ᠭᠡᠬᠦ ᠳ᠋ᠦ᠍ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠠᠯᠵᠠᠭᠰᠠᠨ ᠨᠣᠬᠠᠳ ᠴᠤ᠌ ᠲᠡᠭᠦᠨ ᠦ᠌ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠣᠢᠯᠠᠭᠠᠭᠰᠠᠨ ᠰᠢᠭ᠋ ᠴᠠᠭᠠᠰᠢ ᠪᠠᠨ ᠶᠠᠪᠤᠭᠠᠳ ᠥᠭᠭᠦᠨᠡ᠃
ᠶᠠᠭᠤ ᠴᠤ᠌ ᠦᠭᠡᠢ ᠭᠠᠷ ᠬᠣᠭᠣᠰᠣᠨ ᠭᠠᠨᠵᠤᠭᠠ ᠳᠦᠭᠦᠷᠭᠡ ᠴᠦ᠍ ᠪᠠᠢᠬᠤ ᠦᠭᠡᠢ ᠰᠣᠯᠢᠶᠠ ᠪᠠᠯᠠᠢ ᠲᠠᠢ ᠡᠨᠡ ᠰᠡᠭᠰᠡᠭᠡᠷ ᠡᠮᠡ ᠥᠯᠥᠰᠴᠢᠬᠡᠬᠦ ᠪᠣᠢ᠂ ᠤᠮᠳᠠᠭᠠᠰᠴᠢᠬᠠᠬᠤ ᠪᠣᠢ᠂ ᠳᠠᠭᠠᠷᠠᠴᠢᠬᠠᠬᠤ ᠪᠣᠢ᠂ ᠪᠡᠭᠡᠷᠡᠴᠢᠬᠡᠬᠦ ᠪᠣᠢ᠂ ᠭᠤᠳᠤᠷᠠᠴᠢᠬᠠᠬᠤ ᠴᠤ᠌ ᠪᠣᠢ᠁ ᠭᠡᠰᠡᠨ ᠲᠠᠪᠤᠨ ᠵᠣᠪᠠᠯᠠᠩ ᠤ᠋ᠨ ᠠᠯᠢᠨ ᠢ᠋ ᠴᠦ᠍ ᠬᠠᠢᠬᠤᠷᠬᠤ ᠦᠭᠡᠢ ᠰᠠᠨᠠᠭᠠ ᠠᠭᠤᠵᠢᠮ ᠰᠠᠪᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠬᠥᠷᠥᠰᠥᠲᠦ ᠳᠡᠯᠡᠬᠡᠢ ᠶ᠋ᠢᠨ ᠵᠤᠵᠠᠭᠠᠨ ᠳᠡᠪᠢᠰᠬᠡᠷ ᠲᠡᠢ ᠬᠥᠬᠡ ᠲᠩᠷᠢ ᠶ᠋ᠢᠨ ᠠᠭᠤᠵᠢᠮ ᠬᠥᠨᠵᠢᠯᠡ ᠲᠡᠢ ᠭᠠᠯᠪᠠ ᠳ᠋ᠤ᠌ ᠭᠠᠭᠴᠠᠬᠠᠨ ᠲᠡᠷᠡ ᠪᠠᠶᠠᠨ ᠭᠡᠰᠡᠨ ᠰᠢᠭ ᠡᠨᠡ ᠬᠣᠷᠸᠠ ᠶ᠋ᠢᠨ ᠥᠷᠥᠭᠡᠰᠦᠨ ᠵᠢᠮᠡ ᠶ᠋ᠢᠨ ᠰᠣᠯᠣᠭᠠᠢ ᠶᠣᠰᠣ ᠪᠠᠷ ᠣᠨᠳᠣᠷᠣᠵᠤ ᠶᠠᠪᠤᠨᠠ᠁
ᠬᠡᠢ ᠰᠣᠯᠢᠶᠠᠲᠠᠢ ᠬᠥᠮᠦᠨ ᠪᠣᠯᠬᠣᠷ ᠵᠣᠷᠢᠯᠭᠠ ᠴᠤ᠌ ᠦᠭᠡᠢ ᠵᠢᠯᠣᠭᠣ ᠴᠤ᠌ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠠᠪᠤ ᠶ᠋ᠢᠨ ᠬᠢᠨᠢ ᠲᠥᠷᠥᠯ ᠠᠪᠠᠭᠠ ᠶ᠋ᠢᠨ ᠳ᠋ᠦ᠍ ᠪᠡᠨ ᠬᠦᠷᠦᠭᠡᠳ ᠣᠴᠢᠳᠠᠭ ᠶᠤᠮ ᠪᠠᠢᠨᠠ᠃ ᠶᠡᠬᠡᠰ ᠪᠠᠭᠠᠴᠤᠤᠯ ᠦᠭᠡᠢ ᠠᠳᠠ ᠴᠢᠳᠬᠥᠷ ᠦᠵᠡᠭᠰᠡᠨ ᠰᠢᠭ ᠬᠦᠢᠲᠡᠨ ᠴᠢᠷᠠᠢᠯᠠᠵᠤ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠴᠢᠷᠠᠢ ᠪᠠᠷᠤᠭᠠᠷ ᠪᠠᠢᠯᠠ!
— ᠠᠪᠠᠭᠠ ᠠ᠋᠂ ᠠᠪᠠᠭᠠ ᠪᠡᠷᠭᠡᠨ ᠮᠢᠨᠢ᠂ ᠠᠴᠢ ᠥᠬᠢᠨ ᠢ᠋ᠶ᠋ᠡᠨ ᠡᠨᠡᠷᠢᠵᠦ ᠦᠵᠡᠨᠡ ᠤᠤ ᠳᠠ⁈ ᠬᠣᠨᠢ ᠮᠠᠯ ᠢ᠋ ᠴᠢᠨᠢ ᠬᠥᠯᠥᠰᠥ ᠦᠭᠡᠢ ᠬᠠᠷᠢᠭᠤᠯᠵᠤ ᠥᠭᠭᠦᠶᠡ᠂ ᠠᠷᠭᠠᠯ ᠲᠦᠯᠡᠭᠡ ᠶ᠋ᠢ ᠴᠢᠨᠢ ᠣᠷᠣᠢᠲᠠᠭᠤᠯᠵᠤ᠂ ᠠᠯᠢ ᠬᠠᠲᠠᠭᠤ ᠠᠵᠢᠯ ᠢ᠋ ᠴᠢᠨᠢ ᠬᠢᠵᠦ ᠥᠭᠭᠦᠶᠡ! ᠬᠣᠷᠭᠣᠳᠠᠬᠤ ᠣᠷᠣᠨ ᠲᠠᠢ᠂ ᠬᠣᠳᠣᠭᠣᠳᠣ ᠳᠦᠭᠦᠷᠭᠡᠬᠦ ᠥᠯ ᠬᠣᠭᠣᠯᠠ ᠲᠠᠢ ᠯᠠ ᠪᠣᠯ ᠪᠣᠯᠴᠢᠬᠠᠨᠠ᠁ ᠭᠡᠳ ᠤᠬᠢᠯᠠᠩ ᠠᠯᠲᠠᠨ ᠰᠥᠭᠥᠳᠴᠦ ᠮᠥᠷᠭᠥᠪᠡ᠃
— ᠦᠭᠡᠢ᠂ ᠴᠢ ᠪᠣᠰ᠂ ᠪᠣᠰ! ᠶᠠᠭᠤᠨ ᠤ᠋ ᠡᠢᠮᠦ ᠳᠦᠷᠰᠦ ᠮᠠᠭᠤᠲᠠᠢ ᠡᠮᠡ ᠪᠣᠢ? ᠭᠡᠵᠦ ᠠᠪᠠᠭᠠ ᠨᠢ ᠬᠡᠯᠡᠬᠦ ᠳ᠋ᠦ᠍᠄
— ᠬᠠᠶᠠᠭᠠ ᠪᠤᠵᠠᠷᠯᠠᠴᠢᠬᠠᠬᠤ ᠶᠤᠮ ᠪᠠᠢᠨᠠ᠃ ᠬᠤᠷᠳᠤᠨ ᠴᠠᠭᠠᠰᠢ ᠪᠠᠨ ᠲᠣᠨᠢᠯ! ᠲᠣᠨᠢᠯ! ᠭᠡᠵᠦ ᠠᠪᠠᠭᠠ ᠪᠡᠷᠭᠡᠨ ᠨᠢ ᠠᠮᠠ ᠬᠠᠮᠠᠷ ᠢ᠋ᠶ᠋ᠠᠨ ᠳᠠᠷᠤᠨ ᠡᠭᠳᠡᠭᠦᠴᠡᠩᠭᠦᠢ ᠳᠤᠤᠭᠠᠷᠪᠠ᠃
— ᠠᠪᠠᠭᠠ ᠠ᠋᠂ ᠭᠤᠶᠤᠶᠠ᠂ ᠬᠣᠨᠢ ᠶ᠋ᠢ ᠴᠢᠨᠢ ᠪᠢ ᠬᠠᠷᠢᠭᠤᠯᠵᠤ᠁
— ᠵᠠ᠂ ᠪᠣᠯᠢ! ᠴᠢᠨᠦ ᠡᠨᠡ ᠮᠠᠭᠤᠬᠠᠢ ᠳᠦᠷᠰᠦ ᠡᠴᠡ ᠮᠠᠯ ᠦᠷᠭᠦᠵᠦ ᠬᠣᠲᠠ ᠪᠠᠨ ᠬᠠᠪᠢᠳᠠᠬᠤ ᠪᠠᠨ ᠪᠠᠢᠴᠢᠬᠠᠨᠠ! ᠡᠷᠲᠡᠬᠡᠨ ᠴᠠᠭᠠᠰᠢ ᠶᠠᠪᠤᠵᠤ ᠠᠷᠢᠯ!
— ᠦᠭᠡᠢ ᠠ᠋᠂ ᠠᠪᠠᠭᠠ ᠠ᠋᠂ ᠲᠠ ᠨᠠᠮᠠᠶ᠋ᠢ ᠲᠠᠨᠢᠬᠤ ᠦᠭᠡᠢ ᠪᠠᠢᠭᠠ ᠤᠤ? ᠪᠢ ᠴᠢᠮᠡᠳ ᠦ᠋ᠨ ᠪᠠᠭᠠ ᠥᠬᠢᠨ ᠨᠣᠮᠢᠨ ᠰᠢᠲᠠ᠁
— ᠪᠢᠰᠢ! ᠨᠠᠳᠠ ᠡᠢᠮᠦ ᠠᠴᠢᠷ ᠪᠠᠢᠬᠤ ᠦᠭᠡᠢ᠃ ᠮᠢᠨᠦ ᠠᠴᠢ ᠥᠬᠢᠨ ᠨᠣᠶᠠᠨ ᠰᠠᠩ ᠤ᠋ᠨ ᠴᠡᠴᠡᠭ ᠬᠠᠲᠤᠨ ᠤ᠋ ᠢᠨᠵᠢ ᠶᠠᠪᠤᠭᠠ ᠭᠡᠰᠡᠨ ᠰᠤᠷᠠᠭ ᠲᠠᠢ ᠠ᠋ᠴᠠ ᠪᠢᠰᠢ ᠡᠢᠮᠦ ᠳᠦᠷᠰᠦ ᠮᠠᠭᠤᠲᠠᠢ ᠶᠠᠭᠤᠮᠠ ᠪᠢᠰᠢ! ᠭᠡᠵᠦ ᠬᠡᠯᠡᠲᠡᠯᠡ ᠠᠪᠠᠭᠠ ᠪᠡᠷᠭᠡᠨ ᠨᠢ ᠲᠡᠭᠦᠨ ᠢ᠋ ᠲᠦᠯᠬᠢᠵᠦ ᠭᠠᠷᠭᠠᠨ᠄
— ᠲᠣᠨᠢᠯ᠂ ᠲᠣᠨᠢᠯ! ᠨᠢᠳᠦᠨ ᠳ᠋ᠦ᠍ ᠪᠦᠦ ᠦᠵᠡᠭᠳᠡ! ᠭᠡᠵᠦ ᠫᠠᠰ ᠬᠢᠲᠡᠯᠡ ᠡᠭᠦᠳᠡ ᠪᠡᠨ ᠬᠠᠭᠠᠪᠠ᠃
ᠰᠡᠭᠰᠡᠭᠡᠷ ᠦᠰᠦ ᠲᠡᠢ ᠲᠡᠷᠡ ᠡᠮᠡ ᠠᠪᠠᠭᠠ᠂ ᠠᠪᠠᠭᠠ ᠪᠡᠷᠭᠡᠨ ᠳ᠋ᠡᠭᠡᠨ ᠬᠥᠭᠡᠭᠡᠭᠳᠡᠭᠰᠡᠨ ᠪᠣᠯᠪᠠᠴᠤ ᠠᠭᠤᠷᠯᠠᠭᠰᠠᠨ ᠥᠬᠡᠢ᠂ ᠭᠣᠮᠣᠳᠠᠭᠰᠠᠨ ᠴᠤ᠌ ᠦᠭᠡᠢ᠃ 《ᠬᠥᠮᠦᠨ ᠭᠡᠭᠴᠢ ᠰᠣᠨᠢᠨ ᠶᠤᠮ ᠠ᠋! ᠡᠳ᠋ ᠬᠣᠭᠰᠢᠯ ᠲᠠᠢ ᠪᠣᠯᠵᠤ ᠬᠥᠷᠥᠩᠭᠡᠵᠢᠭᠰᠡᠭᠡᠷ ᠨᠢᠳᠦ ᠨᠢ ᠥᠭᠡᠬᠦᠯᠡᠵᠦ ᠬᠥᠮᠦᠨ ᠲᠠᠨᠢᠬᠤ ᠪᠠᠨ ᠪᠣᠯᠢᠴᠢᠬᠠᠨᠠ᠃ ᠮᠢᠨᠦ ᠡᠨᠡ ᠰᠢᠲᠠᠩᠬᠠᠢ ᠴᠢᠷᠠᠢ ᠰᠡᠭᠰᠡᠭᠡᠷ ᠦᠰᠦ ᠶ᠋ᠢ ᠦᠵᠡᠭᠡᠳ ᠠᠪᠠᠭᠠ ᠮᠢᠨᠢ ᠠᠶᠤᠭᠰᠠᠨ ᠪᠠᠢᠯᠭᠦᠢ! ᠶᠠᠪᠤᠶᠠ᠂ ᠶᠠᠪᠤᠶᠠ! ᠲᠣᠨᠢᠯᠵᠤ ᠥᠭᠭᠦᠶᠡ! ᠨᠢᠳᠦᠨ ᠳ᠋ᠦ᠍ᠨᠢ ᠳᠠᠬᠢᠨ ᠦᠵᠡᠭᠳᠡᠬᠦ ᠪᠡᠷ ᠦᠭᠡᠢ ᠲᠣᠨᠢᠯᠵᠤ ᠠᠷᠢᠯᠤᠶᠠ! ᠠᠪᠤ ᠶ᠋ᠢᠨ ᠲᠥᠷᠥᠯ ᠠᠪᠠᠭᠠ ᠮᠢᠨᠢ ᠬᠦᠷᠲᠡᠯᠡ ᠨᠠᠮᠠᠶ᠋ᠢ ᠵᠢᠭᠰᠢᠵᠦ ᠪᠠᠢᠭᠠ ᠶᠤᠮ ᠴᠢᠨᠢ ᠲᠠᠨᠢᠵᠤ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠰ ᠦ᠋ᠨ ᠵᠢᠭᠰᠢᠬᠦ ᠨᠢ ᠴᠦ᠍ ᠲᠦᠮᠡᠨ ᠵᠥᠪ!》 ᠭᠡᠵᠦ ᠠᠪᠠᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠶᠠᠭᠠᠨ ᠳ᠋ᠤ᠌ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠬᠠᠩᠭᠢᠨᠠᠲᠠᠯᠠ ᠬᠠᠰᠬᠢᠷᠤᠭᠠᠳ ᠶᠠᠪᠤᠵᠤ ᠣᠳᠪᠠ᠃
ᠮᠡᠳᠡᠷᠡᠯ ᠳ᠋ᠦ᠍ᠨᠢ ᠭᠡᠮ ᠠᠷᠬᠠᠭ ᠲᠠᠢ ᠪᠣᠯᠤᠭᠰᠠᠨ ᠨᠣᠮᠢᠨ ᠬᠡᠦᠬᠡᠨ ᠢᠴᠢᠵᠦ ᠠᠶᠤᠬᠤ ᠪᠠᠨ ᠴᠤ᠌ ᠮᠡᠳᠡᠳᠡᠭ ᠦᠭᠡᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌᠂ ᠬᠠᠮᠢᠭᠠ ᠭᠠᠵᠠᠷ ᠢ᠋ᠶ᠋ᠠᠷ ᠴᠤ᠌ ᠲᠡᠨᠦᠭᠦᠴᠢᠯᠡᠨ ᠬᠡᠰᠦᠵᠦ ᠣᠷᠣᠬᠤ ᠦᠭᠡᠢ ᠴᠤ᠌ ᠭᠡᠷ ᠦᠭᠡᠢ᠂ ᠱᠠᠬᠠᠢᠬᠤ ᠦᠭᠡᠢ ᠴᠤ᠌ ᠨᠦᠬᠡ ᠦᠭᠡᠢ᠂ ᠴᠣᠬᠣᠮ ᠶᠠᠭᠤ ᠡᠷᠢᠵᠦ ᠬᠠᠢᠵᠤ ᠶᠠᠪᠤᠭᠠ ᠶᠤᠮ ᠪᠦᠦ ᠮᠡᠳᠡ᠂ ᠬᠥᠮᠦᠰ ᠲᠦ᠍ ᠠᠳᠠᠯᠠᠭᠳᠠᠨ ᠳᠣᠷᠣᠮᠵᠢᠯᠠᠭᠤᠯᠪᠠᠴᠤ ᠲᠡᠷᠡ ᠲᠡᠷᠡ ᠶ᠋ᠢ ᠶᠠᠭᠤᠮᠠᠨ ᠲᠡᠳᠦᠢ ᠦᠯᠦ ᠪᠣᠳᠣᠨ ᠡᠷᠡᠭᠦᠯ ᠨᠢᠭᠡ ᠡᠳᠦᠷ᠂ ᠡᠭᠡᠷᠡᠭ ᠨᠢᠭᠡ ᠡᠳᠦᠷ ᠢ᠋ᠶ᠋ᠡᠷ ᠰᠢᠷᠠ ᠡᠳᠦᠷ ᠪᠣᠷᠣ ᠬᠣᠨᠣᠭ ᠢ᠋ ᠡᠯᠡᠭᠡᠨᠡ᠃
ᠠᠭᠤᠯᠠ ᠶ᠋ᠢᠨ ᠵᠡᠷᠯᠢᠭ ᠢᠯᠠᠮᠠ᠂ ᠳᠣᠯᠣᠭᠠᠨᠠ᠂ ᠦᠷᠡᠯ ᠢᠳᠡᠬᠦ ᠶᠤᠮᠰᠠᠨ ᠭᠡᠵᠦ ᠮᠠᠰᠢᠳᠠ ᠬᠥᠭᠰᠡᠨ ᠪᠠᠭᠠ ᠳ᠋ᠠᠭᠠᠨ ᠠᠭᠤᠯᠠ ᠶ᠋ᠢᠨ ᠢᠯᠠᠮᠠ ᠲᠡᠭᠦᠵᠦ ᠢᠳᠡᠭᠰᠡᠨ ᠢ᠋ᠶ᠋ᠡᠨ ᠰᠠᠨᠠᠵᠤ《 ᠪᠦᠭᠦᠳᠡ ᠠᠮᠢᠲᠠᠨ ᠨᠠᠮᠠᠶ᠋ᠢ ᠳᠣᠣᠷᠠᠰᠢᠶᠠᠳᠠᠭ ᠬᠣᠢᠨᠠ ᠳᠠ᠂ ᠪᠢ ᠮᠥᠨ ᠠᠭᠤᠯᠠ ᠶ᠋ᠢᠨ ᠭᠦᠨ ᠳ᠋ᠦ᠍ ᠣᠷᠣᠶᠠ! ᠬᠡᠨ ᠨᠠᠮᠠᠶ᠋ᠢ ᠮᠠᠭᠤᠰᠢᠶᠠᠵᠤ ᠳᠣᠷᠣᠮᠵᠢᠯᠠᠬᠤ ᠪᠣᠢ! ᠵᠠ᠂ ᠶᠠᠪᠤᠵᠤ ᠠᠭᠤᠯᠠᠨ ᠤ᠋ ᠢᠯᠠᠮᠠ᠂ ᠴᠢᠪᠠᠭᠠ᠂ ᠳᠣᠯᠣᠭᠠᠨᠠ᠂ ᠦᠷᠢᠯ᠁ ᠲᠡᠭᠦᠵᠦ ᠢᠳᠡᠨᠡ ᠬᠦ!》 ᠭᠡᠵᠦ ᠠᠷᠠᠭᠠᠨ ᠠ᠋ᠴᠠ ᠪᠠᠨ ᠬᠠᠷᠠ ᠤᠰᠤ ᠴᠤᠪᠤᠭᠤᠯᠤᠭᠰᠠᠭᠠᠷ ᠮᠤᠨᠠ ᠠᠭᠤᠯᠠᠨ ᠳ᠋ᠤ᠌ ᠭᠠᠷᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ