ᠦᠷ ᠦᠨ ᠲᠤᠶᠠᠭᠠ I – ᠪ᠂ ᠷᠢᠨᠴᠢᠨ - ᠲᠡᠷᠢᠬᠦᠨ ᠲᠡᠪᠲᠡᠷ < ᠮᠠᠨᠵᠤ ᠶᠢᠨ ᠳᠠᠯᠬᠢᠨ ᠳᠤ>(ᠨᠢᠭᠡ) Үүрийн туяа I – Б ᠂ Ренчин Тэргүүн дэвтэр "<Манжийн талхинд" (1)
1878ᠨᠢᠭᠡ᠂ ᠬᠥᠪᠡᠭᠦᠨ ᠡᠷᠭᠦᠵᠦ ᠠᠪᠤᠪᠠ
ᠮᠠᠨᠠᠨ ᠶᠠᠭᠠᠬᠢᠭᠠᠳ ᠲᠠᠰᠤᠷᠠᠬᠤ ᠪᠣᠢ?
ᠮᠢᠬᠠ ᠴᠢᠰᠤᠨ ᠳ᠋ᠤ᠌ ᠲᠥᠷᠥᠭᠰᠡᠨ ᠬᠣᠢᠨᠠ
ᠵᠣᠪᠠᠯᠠᠩ ᠶᠠᠭᠠᠬᠢᠭᠠᠳ ᠲᠠᠰᠤᠷᠠᠬᠤ ᠪᠣᠢ?
( ᠲᠡᠷᠡ ᠦᠶᠡ ᠶ᠋ᠢᠨ ᠠᠷᠠᠳ ᠤ᠋ᠨ ᠳᠠᠭᠤᠤ)
ᠲᠡᠭᠰᠢᠬᠡᠨ ᠵᠠᠰᠠᠭᠰᠠᠨ ᠳᠡᠯ ᠲᠡᠢ᠂ ᠬᠠᠳᠠ ᠮᠡᠲᠦ ᠬᠠᠨᠲᠠᠷᠭᠠᠰᠤᠲᠠᠢ ᠰᠠᠢᠬᠠᠨ ᠬᠠᠯᠲᠠᠷ ᠮᠣᠷᠢ᠂ ᠵᠡᠭᠦᠨ ᠭᠠᠷ ᠲᠠᠭᠠᠨ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠪᠠᠷᠢᠭᠠᠳ᠂ ᠤᠷᠲᠤ ᠭᠠᠩᠰᠠ ᠪᠠᠨ ᠶᠠᠭᠠᠷᠠᠯ ᠦᠭᠡᠢ ᠲᠠᠲᠠᠵᠤ ᠰᠠᠭᠤᠭᠰᠠᠨ ᠡᠵᠡᠨ ᠢ᠋ᠶ᠋ᠡᠨ ᠪᠠᠢᠨ ᠪᠠᠢᠨ ᠬᠠᠷᠠᠵᠤ᠂ ᠰᠣᠷᠭᠣᠭ ᠬᠣᠶᠠᠷ ᠴᠢᠬᠢ ᠪᠡᠨ ᠰᠣᠯᠪᠢᠯᠴᠠᠭᠤᠯᠤᠨ ᠵᠣᠭᠰᠣᠵᠤ ᠪᠠᠢᠪᠠ᠃
ᠡᠵᠡᠨ ᠨᠢ ᠭᠠᠩᠰᠠ ᠪᠠᠨ ᠶᠡᠬᠡᠯᠡ ᠲᠠᠭᠠᠲᠠᠢᠬᠠᠨ ᠢ᠋ᠶ᠋ᠠᠷ ᠲᠠᠲᠠᠵᠤ ᠭᠦᠢᠴᠡᠭᠡᠳ᠂ ᠦᠨᠡᠰᠦ ᠶ᠋ᠢ ᠴᠢᠯᠠᠭᠤᠨ ᠳ᠋ᠤ᠌ ᠶᠠᠭᠠᠷᠠᠯ ᠦᠭᠡᠢ ᠳᠣᠩᠰᠢᠭᠠᠳ᠂ ᠴᠣᠮᠴᠣᠢᠨ ᠰᠠᠭᠤᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠠᠩᠰᠠ ᠪᠠᠨ ᠲᠦᠷᠡᠢᠯᠡᠭᠡᠳ᠂ ᠬᠤᠷᠴᠠ ᠬᠠᠷᠠᠭᠠ ᠲᠠᠢ ᠨᠢᠳᠦ ᠪᠡᠨ ᠠᠨᠢᠰᠬᠢᠵᠦ᠂ ᠣᠢᠷᠠ ᠶ᠋ᠢᠨ ᠲᠦᠳᠡᠯᠡᠭᠦᠷ ᠦ᠋ᠨ ᠴᠢᠨᠠᠳᠤ ᠠ᠋ᠴᠠ ᠭᠠᠷᠴᠤ ᠢᠷᠡᠭᠰᠡᠨ᠂ ᠠᠷᠤ ᠳ᠋ᠠᠭᠠᠨ ᠠᠷᠤᠭ ᠡᠭᠦᠷᠦᠭᠰᠡᠨ ᠡᠬᠡᠨᠡᠷ ᠬᠥᠮᠦᠨ ᠢ᠋ ᠰᠣᠨᠢᠷᠬᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠰᠢᠷᠲᠡᠰᠬᠢᠪᠡ᠃ ᠲᠡᠷᠡ ᠡᠬᠡᠨᠡᠷ ᠦ᠋ᠨ ᠬᠣᠢᠨᠠ ᠠ᠋ᠴᠠ ᠪᠠᠰᠠ ᠨᠢᠴᠦᠭᠦᠨ ᠰᠢᠬᠠᠭᠤ ᠬᠣᠶᠠᠷ ᠬᠡᠦᠬᠡᠳ᠂ ᠬᠡᠳᠦᠨ ᠬᠣᠨᠢ ᠢᠮᠠᠭᠠ ᠲᠠᠭᠤᠭᠠᠳ ᠭᠠᠷᠴᠤ ᠢᠷᠡᠪᠡ᠃
— ᠳᠣᠯᠣᠭᠠᠨ ᠬᠣᠨᠢ ᠲᠠᠪᠤᠨ ᠢᠮᠠᠭᠠ ᠭᠡᠵᠦ ᠠᠮᠠᠨ ᠳᠣᠲᠣᠷᠠ ᠪᠠᠨ ᠲᠣᠭᠠᠯᠠᠭᠠᠳ ᠶᠠᠭᠠᠷᠠᠯ ᠦᠭᠡᠢ ᠪᠣᠰᠴᠤ᠂ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠭᠠᠳ ᠲᠡᠷᠡ ᠡᠬᠡᠨᠡᠷ ᠦ᠋ᠨ ᠵᠦᠭ ᠴᠢᠭᠯᠡᠬᠦ ᠳ᠋ᠦ᠍᠂ ᠳᠠᠪᠠᠭᠠᠨ ᠳᠡᠭᠡᠷᠡ ᠠᠮᠠᠷᠠᠭᠰᠠᠨ ᠮᠣᠷᠢ ᠨᠢ ᠶᠡᠬᠡᠯᠡ ᠢᠯᠠᠭᠤᠮᠬᠠᠨ ᠳᠠᠪᠬᠢᠵᠤ᠂ ᠮᠣᠷᠢᠨ ᠤ᠋ ᠬᠥᠯ ᠳᠣᠣᠷᠠ ᠠ᠋ᠴᠠ ᠬᠣᠶᠠᠷ ᠲᠠᠰᠢ ᠪᠠᠨ ᠬᠣᠷᠭᠣᠯ ᠰᠠᠴᠤᠭᠰᠠᠨ ᠶᠤᠮ ᠰᠢᠭ᠋ ᠳᠡᠪᠬᠡᠷᠡᠭ ᠴᠠᠷᠴᠠᠬᠠᠢ ᠦᠰᠦᠷᠦᠭᠦᠯᠦᠭᠰᠡᠭᠡᠷ᠂ ᠲᠡᠷᠡ ᠬᠥᠮᠦᠨ ᠥᠨᠥᠬᠢ ᠡᠬᠡᠨᠡᠷ ᠦ᠋ᠨ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠡᠭᠡᠳ ᠮᠣᠷᠢᠨ ᠤ᠋ ᠵᠢᠯᠣᠭᠣ ᠲᠠᠲᠠᠵᠤ᠂
— ᠰᠠᠢᠨ ᠶᠠᠪᠤᠵᠤ ᠪᠠᠢᠨᠠᠤ? ᠭᠡᠵᠦ ᠠᠶᠠᠨ ᠵᠠᠮ ᠳ᠋ᠤ᠌ ᠠᠭᠤᠯᠵᠠᠭᠰᠠᠨ ᠬᠥᠮᠦᠨ ᠦ᠌ ᠮᠡᠨᠳᠦᠯᠡᠳᠡᠭ ᠶᠣᠰᠣᠭᠠᠷ ᠠᠮᠤᠷ ᠮᠡᠨᠳᠦ ᠶ᠋ᠢ ᠨᠢ ᠠᠰᠠᠭᠤᠪᠠᠯ᠂
— ᠰᠠᠢᠨ᠂ ᠲᠠ ᠰᠠᠢᠨ ᠶᠠᠪᠤᠵᠤ ᠪᠠᠢᠨᠠᠤ? ᠭᠡᠵᠦ ᠬᠠᠷᠢᠭᠤ ᠠᠰᠠᠭᠤᠭᠠᠳ᠂ ᠠᠷᠤ ᠳ᠋ᠠᠭᠠᠨ ᠡᠭᠦᠷᠴᠦ ᠶᠠᠪᠤᠭᠰᠠᠨ ᠠᠷᠤᠭ ᠢ᠋ᠶ᠋ᠠᠨ ᠠᠶᠠᠷᠬᠠᠨ ᠭᠠᠵᠠᠷ ᠲᠠᠯᠪᠢᠭᠠᠳ᠂ ᠠᠯᠵᠢᠶᠠᠭᠰᠠᠨ ᠪᠠᠢᠳᠠᠯᠲᠠᠢ ᠳᠣᠷᠣᠭᠰᠢ ᠰᠠᠭᠤᠵᠤ᠂ ᠣᠮᠣᠭᠣᠯᠲᠤᠭᠰᠠᠨ ᠬᠠᠭᠤᠷᠠᠢ ᠤᠷᠤᠭᠤᠯ ᠢ᠋ᠶ᠋ᠠᠨ ᠳᠣᠯᠢᠶᠠᠵᠠᠢ᠃
ᠠᠯᠵᠢᠶᠠᠨ ᠡᠴᠡᠵᠦ ᠵᠦᠳᠡᠷᠡᠭᠰᠡᠨ ᠪᠠᠢᠳᠠᠯᠲᠠᠢ᠂ ᠥᠲᠡᠯᠬᠦ ᠴᠠᠭ ᠠ᠋ᠴᠠ ᠡᠮᠦᠨᠡ ᠥᠲᠡᠯᠵᠦ᠂ ᠠᠲᠤᠷᠢᠶᠠ ᠪᠣᠯᠤᠭᠰᠠᠨ᠂ ᠬᠠᠯᠠᠭᠤᠨ ᠨᠠᠷᠠᠨ ᠳ᠋ᠤ᠌ ᠭᠠᠩᠳᠠᠭᠰᠠᠨ ᠡᠴᠡᠩᠬᠡᠷ ᠬᠦᠷᠡᠩ ᠨᠢᠭᠤᠷ ᠢ᠋ᠶ᠋ᠠᠷ ᠨᠢ ᠬᠥᠯᠥᠰᠥ ᠴᠤᠪᠤᠷᠢᠵᠤ᠂ ᠭᠠᠩᠳᠠᠵᠤ ᠣᠩᠭᠣᠭᠰᠠᠨ ᠬᠠᠭᠤᠴᠢᠨ ᠳᠡᠪᠡᠯ ᠡᠴᠡ ᠨᠢ ᠪᠠᠶᠠᠨ ᠠᠢᠯ ᠤ᠋ᠨ ᠮᠠᠯ ᠢ᠋ᠶ᠋ᠠᠷ ᠬᠣᠯᠭᠣᠲᠠᠯᠠ ᠪᠠᠨ ᠨᠣᠴᠣᠯᠳᠤᠭᠰᠠᠨ᠂ ᠬᠥᠭᠡᠷᠦᠬᠦᠨ ᠬᠡᠯᠪᠡᠷᠢᠲᠦ ᠪᠢᠴᠢᠬᠠᠨ ᠭᠠᠷ ᠠ᠋ᠴᠠ ᠨᠢ ᠬᠣᠨᠢᠨ ᠤ᠋ ᠵᠤᠩᠭᠠᠭ ᠰᠢᠪᠲᠦᠷ᠂ ᠦᠬᠡᠷ ᠦ᠋ᠨ ᠪᠠᠭᠠᠰᠤᠨ ᠤ᠋ ᠦᠨᠦᠷ ᠬᠠᠩᠬᠤᠯᠵᠠᠢ᠃
ᠬᠠᠯᠲᠠᠷ ᠮᠣᠷᠢᠲᠠᠢ ᠬᠥᠮᠦᠨ᠂ ᠲᠡᠷᠡ ᠡᠬᠡᠨᠡᠷ ᠦ᠋ᠨ ᠨᠡᠷᠡ ᠤᠰᠤ ᠶ᠋ᠢ ᠠᠰᠠᠭᠤᠭᠠᠳ᠂ ᠬᠤᠷᠴᠠ ᠨᠠᠷᠠᠨ ᠳ᠋ᠤ᠌ ᠠᠨᠢᠰᠬᠢᠬᠰᠠᠨ ᠨᠢᠳᠦ ᠪᠡᠷ ᠡᠴᠡᠩᠬᠡᠷ ᠡᠬᠡᠨᠡᠷ ᠢ᠋ ᠰᠢᠷᠪᠢᠵᠦ ᠬᠠᠷᠠᠩᠭᠤᠲᠠ᠂ ᠠᠷᠤᠭ ᠲᠤᠨᠢ ᠨᠣᠪᠰᠢ ᠨᠣᠣᠷᠬᠠᠢ ᠳᠡᠭᠡᠷᠡ ᠰᠠᠨᠠᠭᠠ ᠠᠮᠤᠷ ᠤᠮᠲᠠᠵᠤ ᠪᠠᠢᠭᠰᠠᠨ᠂ ᠬᠣᠶᠠᠷ ᠨᠠᠰᠤᠲᠠᠢ ᠪᠣᠯᠤᠯᠲᠠᠢ ᠵᠠᠬᠠᠨ ᠬᠦᠦ ᠶ᠋ᠢ ᠠᠵᠢᠰᠬᠢᠨ ᠬᠠᠷᠠᠪᠠᠯ᠂ ᠲᠡᠷᠡ ᠡᠬᠡᠨᠡᠷ ᠵᠠᠭᠠᠯ ᠬᠦᠦ ᠶ᠋ᠢ ᠰᠣᠨᠢᠷᠬᠠᠨ ᠬᠠᠷᠠᠭᠰᠠᠨ ᠢ᠋ ᠮᠡᠳᠡᠭᠡᠳ
— ᠪᠤᠶᠠᠨ ᠲᠠᠢ ᠠᠬᠠ ᠮᠢᠨᠢ᠂ ᠲᠠ ᠮᠢᠨᠦ ᠵᠠᠭᠠᠯ ᠬᠦᠦ ᠶ᠋ᠢ ᠡᠷᠭᠦᠵᠦ ᠠᠪᠬᠤ ᠦᠭᠡᠢ ᠤᠤ? ᠪᠢ ᠤᠯᠠᠭᠠᠨ ᠴᠤᠷᠪᠠ ᠳᠥᠷᠪᠡᠨ ᠬᠡᠦᠬᠡᠳ ᠲᠡᠢ᠂ ᠪᠠᠰᠠ ᠨᠢᠭᠡ ᠶᠠᠭᠤᠮᠠ ᠲᠠᠢ ᠪᠣᠯᠬᠤ ᠭᠡᠵᠦ ᠶᠠᠪᠤᠭᠠ᠂ ᠶᠠᠳᠠᠭᠰᠠᠨ ᠨᠢᠭᠡᠨ ᠠᠮᠢᠲᠠᠨ ᠪᠠᠢᠨᠠ᠃ ᠮᠠᠨ ᠤ᠋ ᠨᠥᠬᠥᠷ ᠨᠠᠮᠠᠶ᠋ᠢ ᠬᠡᠦᠬᠡᠳ ᠲᠡᠢ ᠮᠢᠨᠢ ᠣᠷᠬᠢᠭᠠᠳ ᠪᠡᠯᠪᠡᠰᠦᠷᠡᠭᠰᠡᠨ ᠥᠬᠢᠨ ᠲᠡᠢ ᠨᠢᠭᠡᠨ ᠪᠠᠶᠠᠨ ᠴᠢᠪᠠᠭᠠᠨᠴᠠ ᠶ᠋ᠢᠨ ᠳ᠋ᠦ᠍ ᠬᠦᠷᠭᠡᠨ ᠣᠷᠣᠭᠠᠳ᠂ ᠪᠢᠳᠡ ᠲᠠᠪᠤ ᠭᠡᠵᠦ ᠡᠢᠮᠦ ᠨᠢᠭᠡᠨ ᠵᠦᠳᠡᠷᠡᠴᠢᠭᠰᠡᠨ ᠠᠮᠢᠲᠠᠨ ᠪᠣᠯᠵᠠᠢ᠃ ᠲᠠ ᠪᠤᠶᠠᠨ ᠰᠠᠨᠠᠵᠤ᠂ ᠨᠠᠳᠠ ᠳ᠋ᠤ᠌ ᠲᠤᠰᠠ ᠪᠣᠯᠵᠤ ᠦᠵᠡᠭᠡᠴᠢ᠃ ᠳᠥᠷᠪᠡᠨ ᠥᠯᠥᠨ ᠠᠮᠠ ᠳᠠᠭᠠᠭᠤᠯᠤᠭᠰᠠᠨ᠂ ᠪᠠᠰᠠ ᠬᠥᠯ ᠬᠦᠨᠳᠦ ᠠᠮᠢᠲᠠᠨ ᠢ᠋ ᠭᠡᠷ ᠲᠡᠭᠡᠨ ᠪᠠᠢᠯᠭᠠᠵᠤ ᠵᠠᠷᠤᠬᠤ ᠬᠥᠮᠦᠨ ᠣᠯᠳᠠᠵᠤ ᠥᠭᠬᠦ ᠦᠭᠡᠢ ᠬᠡᠴᠡᠭᠦᠳᠡᠵᠦ ᠶᠠᠪᠤᠨᠠ᠃ ᠮᠢᠨᠦ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠪᠠᠢᠭᠰᠠᠨ ᠠᠢᠯ ᠤ᠋ᠨ ᠬᠢᠨ ᠥᠴᠥᠭᠡᠳᠦᠷ ᠥᠷᠯᠥᠭᠡ ᠨᠡᠭᠦᠭᠡᠳ᠂ ᠨᠤᠲᠤᠭ ᠳᠡᠭᠡᠷᠡ ᠨᠢ ᠬᠣᠴᠣᠷᠤᠭᠰᠠᠨ ᠪᠢ ᠬᠠᠮᠬᠤᠤᠯ ᠰᠢᠭ᠋ ᠰᠠᠯᠬᠢᠨ ᠦᠯᠢᠶᠡᠭᠰᠡᠨ ᠲᠡᠰᠢ ᠶᠠᠪᠤᠵᠤ ᠶᠠᠪᠤᠨᠠ᠃ ᠥᠨᠥ ᠥᠷᠯᠥᠭᠡ ᠦᠯᠡᠳᠡᠭᠰᠡᠨ ᠬᠡᠳᠦᠨ ᠰᠠᠮᠪᠠᠢ ᠬᠠᠳᠠᠭ ᠤ᠋ᠨ ᠭᠤᠯᠢᠷ ᠢ᠋ ᠤᠰᠤᠨ ᠳ᠋ᠤ᠌ ᠪᠠᠵᠢᠵᠤ᠂ ᠬᠡᠦᠬᠡᠳ ᠲᠡᠭᠡᠨ ᠶᠠᠭᠤᠮᠠ ᠢᠳᠡᠭᠦᠯᠬᠦᠢᠴᠡ ᠪᠣᠯᠤᠭᠠᠳ ᠶᠠᠪᠤᠵᠤ ᠶᠠᠪᠤᠨᠠ ᠭᠡᠵᠦ ᠡᠪᠦᠷ ᠡᠴᠡ ᠪᠡᠨ ᠪᠠᠵᠢᠵᠤ ᠨᠢᠭᠡ ᠪᠥᠭᠡᠮ ᠶᠠᠭᠤᠮᠠ ᠪᠣᠯᠭᠠᠭᠰᠠᠨ ᠬᠡᠳᠦᠨ ᠰᠠᠮᠪᠠᠢ ᠬᠠᠳᠠᠭ ᠭᠠᠷᠭᠠᠵᠤ ᠦᠵᠡᠭᠦᠯᠪᠡ᠃
ᠬᠠᠯᠲᠠᠷ ᠮᠣᠷᠢᠲᠠᠢ ᠬᠥᠮᠦᠨ᠂ ᠮᠣᠷᠢᠨ ᠠ᠋ᠴᠠ ᠪᠠᠨ ᠶᠠᠭᠠᠷᠠᠯ ᠦᠭᠡᠢ ᠪᠠᠭᠤᠭᠠᠳ ᠲᠡᠷᠡ ᠡᠬᠡᠨᠡᠷ ᠦ᠋ᠨ ᠳᠡᠷᠭᠡᠳᠡ ᠰᠠᠭᠤᠵᠤ ᠥᠨᠥᠬᠢ ᠠᠷᠤᠭ ᠳᠣᠲᠣᠷᠠ ᠨᠣᠢᠷᠰᠤᠵᠤ ᠪᠠᠢᠭᠰᠠᠨ ᠵᠠᠭᠠᠯ ᠢ᠋ ᠠᠵᠢᠭᠯᠠᠨ ᠦᠵᠡᠬᠦ ᠪᠡᠷ᠂ ᠨᠠᠷᠠᠨ ᠳ᠋ᠤ᠌ ᠭᠠᠩᠳᠠᠭᠰᠠᠨ ᠬᠥᠬᠡ ᠳᠡᠯᠢᠨ ᠴᠠᠮᠴᠠ ᠲᠠᠢ ᠲᠤᠷᠠᠩᠬᠠᠢ ᠪᠢᠴᠢᠬᠠᠨ ᠬᠡᠦᠬᠡᠨ᠂ ᠬᠦᠦ ᠳᠡᠭᠦᠦ ᠪᠡᠨ ᠠᠷᠤ ᠳ᠋ᠠᠭᠠᠨ ᠡᠭᠦᠷᠴᠦ᠂ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠡᠭᠡᠳ᠂ ᠠᠷᠤ ᠳ᠋ᠠᠭᠠᠨ ᠪᠦᠳᠦᠭᠦᠨ ᠬᠠᠷᠠ ᠭᠡᠵᠢᠭᠡᠨ ᠳ᠋ᠦ᠍ ᠲᠣᠰᠣ ᠪᠣᠯᠤᠭᠰᠠᠨ᠂ ᠪᠠᠬᠠᠨ ᠣᠩᠭᠣᠭᠰᠤᠨ ᠴᠢᠰᠴᠡᠦ ᠳᠡᠪᠡᠯ ᠲᠡᠢ᠂ ᠲᠠᠨᠢᠬᠤ ᠦᠭᠡᠢ ᠲᠡᠷᠡ ᠬᠥᠮᠦᠨ ᠦ᠌ ᠥᠭᠡᠳᠡ ᠡᠴᠡ ᠪᠢᠰᠢᠭᠦᠷᠡᠬᠡᠰᠬᠢᠨ ᠰᠢᠷᠳᠡᠪᠡ᠃
— ᠬᠡᠨ ᠭᠡᠵᠦ ᠨᠡᠷᠡᠲᠡᠢ ᠶᠦᠮ ᠪᠣᠢ ᠬᠦᠦ ᠴᠢᠨᠢ? ᠨᠢᠳᠦᠨ ᠳ᠋ᠦ᠍ ᠳᠤᠯᠠᠭᠠᠨ ᠦᠵᠡᠭᠳᠡᠬᠦ ᠵᠠᠭᠠᠯ ᠬᠦᠦ ᠪᠠᠢᠨᠠ ᠳᠠ······ ᠬᠡᠷᠪᠡ᠂ ᠶᠠᠷᠢᠶᠠ ᠲᠠᠭᠠᠷᠠᠪᠠᠯ᠂ ᠡᠷᠭᠦᠵᠦ ᠠᠪᠬᠤ ᠳ᠋ᠤ᠌ ᠪᠣᠯᠬᠤ ᠯᠠ ᠬᠡᠦᠬᠡᠳ ᠪᠣᠯᠤᠯᠲᠠᠢ ᠭᠡᠬᠦ ᠳ᠋ᠦ᠍ᠨᠢ᠂
— ᠰᠢᠷᠴᠢᠨ ᠭᠡᠳᠡᠭ ᠶᠤᠮᠠ᠃ ᠪᠤᠶᠠᠨ ᠲᠠᠢ ᠠᠬᠠ ᠮᠢᠨᠢ᠂ ᠣᠷᠣᠬᠤ ᠣᠷᠣᠨ ᠦᠭᠡᠢ ᠶᠠᠳᠠᠭᠤ ᠨᠠᠮᠠᠶ᠋ᠢ ᠭᠣᠮᠣᠳᠠᠭᠤᠯᠬᠤ ᠦᠭᠡᠢ ᠪᠢᠵᠡ ᠳᠡ᠃ ᠡᠭᠡᠴᠢ ᠠᠬᠠ ᠨᠠᠷ ᠲᠤᠨᠢ ᠲᠠ ᠶᠠᠭᠤ ᠯᠠ ᠬᠠᠢᠷᠠᠯᠠᠳᠠᠭ ᠪᠣᠯ᠂ ᠬᠡᠰᠢᠭ ᠢ᠋ ᠴᠢᠨᠢ ᠳᠤᠷᠠᠲᠠᠶᠠ ᠭᠥᠷᠳᠡᠶᠡ ᠭᠡᠵᠡᠢ᠃
— ᠵᠠ ᠲᠡᠭᠡᠪᠡᠯ ᠪᠢ ᠪᠤᠶᠠᠨ ᠰᠠᠨᠠᠵᠤ᠂ ᠬᠦᠦ ᠶ᠋ᠢ ᠴᠢᠨᠢ ᠡᠷᠭᠦᠵᠦ ᠠᠪᠤᠶᠠ᠃ ᠡᠬᠡᠨᠡᠷ ᠪᠢᠳᠡ ᠬᠣᠶᠠᠷ ᠶᠡᠷᠦᠨᠢ ᠴᠦ᠍ ᠬᠡᠦᠬᠡᠳ ᠦᠭᠡᠢ ᠶᠤᠮᠰᠠᠨ᠃ ᠡᠨᠡ ᠵᠠᠭᠠᠯ ᠬᠦᠦ᠂ ᠮᠠᠨ ᠤ᠋ ᠭᠠᠯ ᠭᠣᠯᠣᠮᠲᠠ ᠶ᠋ᠢ ᠵᠠᠯᠭᠠᠬᠤ ᠬᠤᠪᠢ ᠲᠠᠢ ᠬᠥᠮᠦᠨ ᠴᠦ᠍ ᠪᠠᠢᠵᠤ ᠶᠠᠭᠤᠨ ᠤ᠋ ᠮᠠᠭᠠᠳ᠃ ᠪᠢ ᠴᠢᠮᠠᠲᠤ ᠨᠢᠭᠡᠨ ᠮᠠᠢᠬᠠᠨ ᠥᠭᠭᠦᠶᠡ᠃ ᠪᠠᠬᠠᠨ ᠬᠠᠭᠤᠴᠢᠨ ᠶᠤᠮ ᠳᠠ᠃ ᠭᠡᠪᠡᠴᠦ ᠭᠠᠢ ᠦᠭᠡᠢ᠃ ᠳᠡᠭᠡᠷᠡ ᠡᠴᠡ ᠨᠢ ᠪᠠᠰᠠ ᠨᠢᠭᠡ ᠲᠤᠭᠤᠯ ᠲᠠᠢ ᠦᠨᠢᠶᠡ᠂ ᠨᠢᠭᠡᠨ ᠬᠥᠭᠰᠢᠨ ᠱᠠᠷ ᠥᠭᠭᠦᠶᠡ᠃ ᠬᠡᠦᠬᠡᠳ ᠰᠢᠤᠬᠠᠳ᠂ ᠨᠣᠪᠰᠢ ᠨᠣᠣᠷᠬᠠᠢ ᠪᠠᠨ ᠠᠴᠢᠬᠤ ᠳ᠋ᠤ᠌ ᠴᠢᠨᠢ ᠨᠡᠮᠡᠷᠢ ᠪᠣᠯᠤᠭ᠃ ᠮᠠᠨ ᠤ᠋ ᠡᠬᠡᠨᠡᠷ ᠪᠠᠰᠠ ᠢᠳᠡᠵᠦ ᠡᠮᠦᠰᠬᠦ ᠶᠠᠭᠤᠮᠠ ᠠ᠋ᠴᠠ ᠨᠡᠮᠡᠵᠦ ᠥᠭᠬᠦ ᠶᠦᠮ ᠪᠣᠯ ᠥᠭᠭᠦᠨᠡ ᠪᠢᠵᠡ ᠲᠡᠭᠦᠪᠡᠷ ᠢ᠋ᠶ᠋ᠡᠨ ᠭᠡᠬᠦ ᠳ᠋ᠦ᠍ᠨᠢ᠂
— ᠵᠠ ᠲᠠᠨ ᠤ᠋ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠪᠣᠯᠤᠶᠠ᠂ ᠵᠠᠮᠪᠠ ᠠᠪᠤᠭᠠᠢ ᠮᠢᠨᠢ ᠭᠡᠵᠦ ᠲᠡᠷᠡ ᠡᠬᠡᠨᠡᠷ ᠬᠦᠯᠢᠴᠡᠩᠭᠦᠢ ᠨᠣᠮᠣᠬᠠᠨ ᠢ᠋ᠶ᠋ᠠᠷ ᠥᠴᠢᠪᠡ᠃ ᠵᠠᠮᠪᠠ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠭᠠᠳ ᠪᠡᠶᠡ ᠪᠡᠨ ᠨᠤᠲᠤᠭ ᠤ᠋ᠨ ᠣᠯᠠᠨ ᠳ᠋ᠤ᠌ ᠵᠢᠩ ᠲᠡᠢ ᠬᠦᠨᠳᠦ ᠲᠡᠢ ᠤᠴᠢᠷ᠂ ᠡᠵᠡᠭᠦᠢ ᠬᠡᠭᠡᠷᠡ ᠲᠣᠬᠢᠶᠠᠯᠳᠤᠭᠰᠠᠨ ᠦᠭᠡᠭᠦᠦ ᠬᠣᠭᠣᠰᠣᠨ᠂ ᠨᠡᠷᠡ ᠲᠥᠷᠥ ᠦᠭᠡᠢ ᠠᠮᠢᠲᠠᠨ ᠲᠠᠢ ᠵᠢᠱ᠌ᠢᠶᠡ ᠦᠭᠡᠢ ᠭᠡᠳᠡᠭ ᠢ᠋ᠶ᠋ᠡᠨ ᠦᠵᠡᠭᠦᠯᠬᠦ ᠭᠡᠵᠦ ᠥᠭᠦᠯᠡᠷᠦᠨ᠂
— ᠭᠡᠪᠡᠴᠦ ᠬᠦᠦ ᠶ᠋ᠢ ᠮᠢᠨᠢ ᠡᠷᠭᠦᠭᠰᠡᠨ ᠬᠥᠮᠦᠨ ᠭᠡᠳ ᠮᠠᠨᠠᠢ ᠳ᠋ᠤ᠌ ᠨᠣᠢᠲᠠᠨ ᠬᠠᠮᠠᠭᠤ ᠰᠢᠭ᠋ ᠨᠠᠭᠠᠯᠳᠤᠭᠰᠠᠨ ᠤ᠋ ᠬᠡᠷᠡᠭ ᠠᠯᠠᠭᠠ ᠰᠢᠦ᠂ ᠴᠢᠮᠠᠲᠤ᠂ ᠵᠠᠭᠠᠯ ᠢ᠋ᠶ᠋ᠠᠨ ᠮᠠᠨᠠᠢ ᠳ᠋ᠤ᠌ ᠢᠳᠡᠭᠡᠰᠢᠨ ᠲᠠᠰᠤᠳᠠᠯᠠ ᠨᠢᠭᠡ ᠬᠡᠳᠦ ᠬᠣᠨᠣᠪᠠᠯ ᠬᠣᠨᠣᠭᠠᠷᠠᠢ᠂ ᠲᠡᠭᠡᠭᠡᠳ᠂ ᠮᠥᠷ ᠮᠥᠷ ᠢ᠋ᠶ᠋ᠡᠨ ᠬᠥᠭᠡᠭᠡᠪᠡᠯ ᠳᠡᠭᠡᠷᠡ ᠪᠢᠵᠡ ᠳᠡ᠃ ᠴᠢ ᠡᠨᠳᠡ ᠲᠦᠷ ᠬᠦᠯᠢᠶᠡᠵᠦ ᠪᠠᠢ᠃ ᠪᠢ ᠡᠨᠡ ᠬᠠᠪᠢ ᠳ᠋ᠤ᠌ ᠨᠢᠭᠡ ᠠᠢᠯ ᠠ᠋ᠴᠠ ᠲᠡᠷᠭᠡ ᠭᠤᠶᠤᠵᠤ ᠣᠯᠤᠭᠠᠳ ᠲᠠ ᠨᠠᠷ ᠢ᠋ ᠠᠪᠠᠴᠢᠶᠠ ᠭᠡᠵᠦ᠃
ᠬᠡᠭᠡᠷᠡ ᠶ᠋ᠢᠨ ᠡᠪᠡᠰᠦ ᠨᠣᠭᠣᠭᠠ ᠶ᠋ᠢᠨ ᠰᠠᠢᠬᠠᠨ ᠦᠨᠦᠷ ᠬᠠᠩᠬᠤᠯᠵᠤ᠂ ᠲᠣᠭᠠ ᠲᠣᠮᠰᠢ ᠦᠭᠡᠢ ᠣᠯᠠᠨ ᠳᠡᠪᠬᠡᠷᠡᠭ ᠴᠠᠷᠴᠠᠬᠠᠢ ᠶ᠋ᠢᠨ ᠬᠠᠩᠭᠢᠨᠠᠵᠤ ᠪᠠᠢᠳᠠᠭ ᠵᠢᠩ ᠦᠳᠡ ᠶ᠋ᠢᠨ ᠪᠥᠭᠡᠨᠡᠮ ᠬᠠᠯᠠᠭᠤᠨ ᠢ᠋ᠶ᠋ᠠᠷ ᠵᠠᠮᠪᠠ ᠦᠬᠡᠷ ᠲᠡᠷᠭᠡ ᠬᠥᠲᠥᠯᠦᠭᠡᠳ ᠢᠷᠡᠵᠡᠢ᠂ ᠲᠡᠷᠭᠡᠨ ᠳ᠋ᠦ᠍ᠨᠢ ᠳᠡᠪᠢᠰᠦᠭᠰᠡᠨ ᠢᠰᠡᠭᠡᠢ ᠳᠡᠭᠡᠷᠡ ᠠᠢᠯ ᠤ᠋ᠨ ᠬᠣᠨᠢᠴᠢᠨ ᠬᠡᠦᠬᠡᠳ᠂ ᠵᠡᠰ ᠳᠣᠩᠪᠣ ᠲᠠᠢ ᠴᠠᠢ᠂ ᠲᠠᠪᠠᠭ ᠲᠠᠢ ᠪᠢᠰᠢᠯᠠᠭ ᠥᠷᠥᠮᠡ ᠪᠠᠷᠢᠭᠠᠳ᠂ ᠵᠠᠮᠪᠠ ᠶ᠋ᠢ ᠲᠠᠭᠠᠯᠴᠠᠨ ᠢᠷᠡᠵᠡᠢ᠃
— ᠵᠠ᠂ ᠡᠨᠡ ᠴᠠᠢ ᠪᠠᠷ ᠠᠮᠠ ᠨᠠᠢᠬᠠᠨ ᠴᠠᠩᠭᠠ ᠪᠠᠨ ᠭᠠᠷᠭᠠ᠃ ᠲᠡᠭᠡᠭᠡᠳ ᠶᠠᠪᠤᠶᠠ᠃ ᠱᠠᠯᠠᠪᠬᠠᠨ ᠬᠥᠳᠡᠯᠪᠡᠯ᠂ ᠨᠠᠷᠠᠨ ᠰᠢᠩᠭᠡᠬᠦ ᠳ᠋ᠦ᠍ ᠮᠠᠨᠠᠢ ᠳ᠋ᠤ᠌ ᠬᠦᠷᠬᠦ ᠪᠠᠢᠬᠤ ᠪᠢᠳᠡ᠃ ᠡᠨᠡ ᠵᠢᠭᠠᠯ ᠬᠦᠦ᠂ ᠴᠢᠨᠦ ᠬᠡᠳᠦᠨ ᠬᠣᠨᠢ ᠢᠮᠠᠭᠠ ᠶ᠋ᠢ ᠬᠣᠨᠢᠨ ᠳ᠋ᠠᠭᠠᠨ ᠠᠪᠠᠴᠢᠵᠤ ᠨᠡᠢᠯᠡᠭᠦᠯᠦᠭ᠃ ᠪᠢ ᠡᠳᠡᠨ ᠨᠡᠢᠬᠢ ᠲᠡᠢ ᠬᠡᠯᠡᠯᠴᠡᠵᠦ ᠲᠣᠬᠢᠷᠠᠯᠠ᠃ ᠴᠢ ᠪᠤᠴᠠᠬᠤ ᠳ᠋ᠠᠭᠠᠨ ᠡᠳᠡᠨ ᠦ᠌ ᠦᠬᠡᠷ ᠲᠡᠷᠭᠡ ᠶ᠋ᠢ ᠬᠦᠷᠭᠡᠵᠦ ᠥᠭᠭᠦᠭᠡᠷᠡᠢ᠃ ᠨᠠᠳᠠᠳᠤ ᠵᠠᠭᠠᠯᠬᠠᠨ ᠥᠷᠢ ᠲᠡᠢ ᠪᠠᠢᠭᠰᠠᠨ ᠠᠢᠯ ᠶᠤᠮ ᠳᠠ᠃ ᠪᠢ ᠲᠡᠷᠡ ᠥᠷᠢ ᠶ᠋ᠢ ᠨᠢ ᠭᠡᠯᠳᠦᠷᠢᠭᠦᠯᠦᠭᠡᠳ᠂ ᠬᠠᠷᠢᠭᠤ ᠳ᠋ᠤᠨᠢ ᠲᠡᠷᠡ ᠴᠢᠮᠠᠢ᠍ᠢ ᠡᠨᠡ ᠵᠤᠨᠵᠢᠨ ᠢ᠋ᠶ᠋ᠠᠨ ᠪᠠᠢᠯᠭᠠᠬᠤ ᠪᠠᠷ ᠪᠣᠯᠤᠭᠰᠠᠨ᠃ ᠵᠣᠬᠢᠯᠳᠤᠪᠠᠯ᠂ ᠡᠪᠦᠯ ᠳ᠋ᠡᠭᠡᠨ ᠴᠦ᠍ ᠪᠠᠢᠯᠭᠠᠵᠤ ᠮᠠᠭᠠᠳ ᠦᠭᠡᠢ᠃ ᠲᠡᠭᠡᠬᠦ ᠳ᠋ᠦ᠍ ᠴᠢ ᠪᠠᠰᠠ ᠬᠠᠷᠢᠭᠤ ᠳ᠋ᠤᠨᠢ ᠠᠵᠢᠯ ᠠ᠋ᠴᠠ ᠨᠢ ᠬᠢᠯᠴᠢᠵᠦ ᠥᠭᠭᠦᠭᠡᠷᠡᠢ᠃ ᠶᠡᠬᠡ ᠥᠬᠢᠨ ᠴᠢᠨᠢ ᠲᠡᠳᠡᠨ ᠦ᠌ ᠬᠣᠨᠢ ᠮᠠᠯ ᠬᠠᠷᠢᠭᠤᠯᠬᠤ ᠳ᠋ᠤ᠌ ᠪᠠᠰᠠ ᠨᠡᠮᠡᠷᠢ ᠪᠣᠯᠬᠤ ᠶᠤᠮ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠭᠡᠵᠦ ᠵᠠᠮᠪᠠ ᠲᠡᠷᠡ ᠡᠬᠡᠨᠡᠷ ᠲᠦ᠍ ᠬᠡᠯᠡᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠶᠤᠨᠪᠠᠲᠤ᠂ ᠮᠥᠩᠭᠥᠨᠭᠣᠸᠠ᠂ ᠰᠠᠷᠠᠨᠲᠤᠶᠠᠭᠠ᠂ ᠪᠠᠳᠮᠠᠰᠡᠴᠡᠨ᠂ ᠡᠷᠳᠡᠨᠢᠭᠣᠸᠠ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠬᠦᠮᠦᠵᠢᠯᠲᠦ᠂ ᠠᠯᠲᠠᠨᠱᠠ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ