ᠦᠷ ᠦᠨ ᠲᠤᠶᠠᠭᠠ I – ᠪ᠂ ᠷᠢᠨᠴᠢᠨ < ᠵᠣᠬᠢᠶᠠᠭᠴᠢ ᠶᠢᠨ ᠣᠷᠣᠰᠢᠯ> Үүрийн туяа I – Б ᠂ Ренчин "Зохиогчийн оршил"
1014ᠵᠣᠬᠢᠶᠠᠭᠴᠢ ᠶᠢᠨ ᠣᠷᠣᠰᠢᠯ
ᠵᠣᠬᠢᠶᠠᠭᠰᠠᠨ ᠨᠣᠮ ᠳᠡᠪᠲᠡᠷ ᠶᠦ᠍ᠭᠡᠨ ᠬᠠᠭᠤᠳᠠᠰᠤ ᠶ᠋ᠢ
ᠵᠣᠷᠢᠭᠲᠤ ᠵᠢᠷᠦᠬᠡᠨ ᠦ᠌ ᠴᠢᠰᠤᠨ ᠢ᠋ᠶ᠋ᠠᠷ ᠪᠢᠴᠢᠯᠡ᠃
ᠡᠬᠡ ᠣᠷᠣᠨ ᠳ᠋ᠠᠭᠠᠨ ᠴᠢᠩ ᠰᠢᠳᠤᠷᠭᠤ ᠶ᠋ᠢᠨ ᠵᠢᠷᠤᠮ ᠢ᠋
ᠡᠭᠦᠷᠢᠳᠡ ᠰᠡᠳᠬᠢᠯ ᠵᠢᠷᠦᠬᠡᠨ ᠳ᠋ᠡᠭᠡᠨ ᠬᠠᠳᠠᠭᠠᠯᠠᠮᠤ ᠪᠢ᠃
ᠨᠠᠢᠯᠵᠠᠭᠤᠷ ᠮᠥᠴᠢᠷ ᠶᠦ᠍ᠭᠡᠨ ᠡᠪᠦᠳᠦᠭᠴᠡ ᠣᠰᠤᠨᠠ
ᠨᠠᠬᠢᠯᠤᠨ ᠤᠨᠵᠢᠭᠤᠯᠵᠤ᠂ ᠤᠳᠠ ᠮᠣᠳᠣᠨ ᠣᠷᠭᠣᠮᠤ᠂
ᠡᠨᠡ ᠮᠢᠨᠦ ᠪᠡᠶᠡ ᠴᠦ᠍ ᠦᠨᠳᠦᠰᠦᠨ ᠬᠣᠯᠪᠣᠭᠠ᠂
ᠡᠬᠡ ᠣᠷᠣᠨ ᠯᠤᠭᠠ ᠡᠭᠡᠨᠡᠭᠲᠡ ᠨᠢᠭᠡᠨ ᠪᠣᠢ᠃
ᠡᠬᠡ ᠣᠷᠣᠨ ᠠ᠋ᠴᠠ ᠬᠣᠯᠠᠳᠠᠭᠠᠳ ᠠᠩᠭᠢᠵᠢᠷᠠᠪᠠᠯ ᠪᠢ᠂
ᠡᠷᠳᠡᠮ ᠬᠦᠴᠦᠨ ᠬᠠᠮᠢᠭᠠ ᠠ᠋ᠴᠠ ᠨᠠᠳᠠ ᠣᠯᠳᠠᠮᠤ᠃
ᠴᠢᠩᠭᠢᠭᠰᠡᠨ ᠡᠴᠡ᠂ ᠠᠯᠲᠠᠨ ᠠᠮᠢᠨ ᠠ᠋ᠴᠠ ᠬᠠᠭᠠᠴᠠᠵᠤ᠂
ᠴᠢᠪᠢᠯᠲᠦ ᠭᠦᠨ ᠴᠥᠭᠥᠷᠥᠮ ᠳ᠋ᠦ᠍ ᠤᠨᠠᠬᠤ ᠨᠢ ᠳᠡᠭᠡᠷᠡ᠃
ᠴᠠᠭ ᠢᠮᠠᠭᠲᠠ ᠡᠬᠡ ᠣᠷᠣᠨ ᠶᠤᠭᠠᠨ ᠮᠠᠭᠲᠠᠬᠤ ᠶ᠋ᠢ ᠬᠦᠰᠡᠮᠦ᠃
ᠴᠠᠭᠯᠠᠰᠢ ᠦᠭᠡᠢ ᠭᠡᠷᠡᠯ ᠢ᠋ᠶ᠋ᠡᠷ ᠨᠢ ᠭᠡᠢᠭᠦᠯᠦᠭᠳᠡᠭᠰᠡᠨ ᠪᠢ᠃
ᠲᠠᠩᠰᠤᠭ ᠰᠠᠢᠬᠠᠨ ᠲᠡᠭᠦᠨ ᠦ᠌ ᠭᠤᠤᠭ ᠠ᠋ᠴᠠ ᠠᠩᠭᠢᠳᠠ
ᠲᠠᠭᠠᠯᠠᠯᠲᠠᠢ ᠶᠠᠭᠤᠮᠠ᠂ ᠢᠷᠠᠭᠤ ᠨᠠᠢᠷᠠᠭᠴᠢ ᠳ᠋ᠤ᠌ ᠠᠯᠠᠭᠠ᠂
ᠦᠯᠡᠮᠵᠢ ᠶᠡᠬᠡ ᠦᠶᠡ ᠶ᠋ᠢᠨ ᠭᠠᠪᠢᠶᠠᠲᠤ ᠦᠢᠯᠡᠰ ᠶᠠᠪᠤᠳᠠᠯ ᠢ᠋
ᠦᠯᠢᠰᠢ ᠦᠭᠡᠢ ᠰᠠᠢᠬᠠᠨ ᠢ᠋ᠶ᠋ᠠᠷ ᠡᠭᠡᠰᠢᠭᠯᠡᠨ ᠳᠠᠭᠤᠯᠠᠮᠤ᠃
ᠬᠦᠷᠵᠢ ᠶ᠋ᠢᠨ ᠦᠯᠢᠭᠡᠷ ᠲᠤᠤᠯᠢ᠂ ᠰᠠᠢᠬᠠᠨ ᠳᠠᠭᠤᠤ ᠶ᠋ᠢᠨ
ᠭᠦᠶᠦᠳᠡᠯ ᠬᠤᠷᠳᠤᠨ ᠤᠷᠤᠰᠬᠠᠯ ᠲᠦᠷᠬᠢᠷᠡᠨ ᠱᠤᠤᠭᠢᠮᠤ᠃
ᠦᠯᠡᠮᠵᠢ ᠰᠠᠢᠬᠠᠨ ᠪᠦᠲᠦᠭᠡᠯ᠂ ᠰᠢᠨᠡ ᠢᠯᠠᠯᠲᠠ ᠶ᠋ᠢ
ᠦᠵᠡᠭᠡᠳ᠂ ᠲᠡᠰᠬᠡᠯ ᠦᠭᠡᠢ ᠪᠠᠬᠠᠳᠤᠭᠴᠢ ᠭᠡᠷᠡᠴᠢ ᠶ᠋ᠢᠨ ᠪᠡᠶᠡ᠂
ᠦᠭᠡᠰ ᠦ᠋ᠨ ᠰᠠᠢᠬᠠᠨ ᠤᠭᠠᠯᠵᠠ ᠰᠡᠢᠯᠦᠭᠴᠢ ᠤᠷᠠᠨ ᠪᠢ᠂
ᠦᠨᠡᠨ ᠭᠣᠣᠯ ᠠ᠋ᠴᠠ ᠡᠬᠡ ᠣᠷᠣᠨ ᠳ᠋ᠠᠭᠠᠨ ᠵᠢᠳᠬᠦᠬᠦ ᠶ᠋ᠢᠨ ᠴᠠᠭ ᠢᠷᠡᠯᠡ᠃
ᠺᠠᠲ᠋ᠸᠸᠯᠢ ᠶ᠋ᠢᠨ ᠣᠳᠣᠨ ᠵᠢᠷᠦᠪ ᠵᠠᠷᠤᠪ ᠵᠢᠷᠦᠪᠪᠡᠯᠵᠡᠬᠦ ᠶ᠋ᠢ
ᠰᠢᠯᠦᠭᠯᠡᠯᠲᠦ ᠦᠭᠡ ᠪᠡᠷ ᠡᠭᠡᠰᠢᠭᠯᠡᠨ ᠮᠠᠭᠲᠠᠮᠤ᠃
ᠡᠬᠡ ᠣᠷᠣᠨ ᠪᠣᠯᠪᠠᠯ᠂ — ᠮᠢᠨᠦ ᠠᠮᠢ ᠨᠠᠰᠤᠨ ᠪᠤᠶᠤ
ᠡᠬᠡ ᠣᠷᠣᠨ ᠪᠣᠯᠪᠠᠯ᠂ — ᠮᠢᠨᠦ ᠨᠣᠮ ᠤ᠋ᠳ ᠤ᠋ᠨ ᠨᠡᠷᠡ ᠪᠤᠶᠤ᠃
ᠬᠢᠦᠷᠬᠢ ᠯᠢᠶᠣᠨᠢᠽᠢ
ᠮᠢᠨᠦ ᠨᠠᠢᠵᠠ᠂ ᠬᠦᠷᠵᠢ ᠶ᠋ᠢᠨ ᠪᠢᠴᠢᠭ ᠦ᠋ᠨ ᠬᠥᠮᠦᠨ ᠯᠢᠶᠣᠨᠢᠽᠢ ᠶ᠋ᠢᠨ ᠡᠨᠡ ᠲᠠᠩᠰᠤᠭ ᠰᠢᠯᠦᠭᠯᠡᠯ ᠢ᠋ᠶ᠋ᠡᠷ ᠣᠷᠣᠰᠢᠯ ᠤ᠋ᠨ ᠡᠬᠢᠨ ᠦ᠌ ᠰᠢᠯᠦᠭᠯᠡᠯ ᠪᠣᠯᠭᠠᠮᠠᠷ ᠰᠠᠨᠠᠭᠳᠠᠵᠤ ᠴᠢᠳᠠᠨ ᠶᠠᠳᠠᠨ ᠮᠣᠩᠭᠣᠯᠴᠢᠯᠠᠵᠤ ᠪᠢᠴᠢᠯᠡ᠃
ᠳᠣᠯᠣᠭᠠᠲᠠᠢ ᠳ᠋ᠠᠭᠠᠨ ᠪᠢ ᠮᠣᠩᠭᠣᠯ ᠴᠠᠭᠠᠨ ᠲᠣᠯᠣᠭᠠᠢ ᠵᠢᠭᠠᠯᠭᠠᠵᠤ᠂ ᠨᠣᠮ ᠦᠵᠡᠳᠡᠭ ᠪᠣᠯᠤᠭᠰᠠᠨ ᠪᠢᠯᠡ᠃ ᠨᠠᠰᠤᠨ ᠠᠬᠠᠮᠠᠳ ᠡᠪᠦᠭᠡᠳ ᠡᠮᠡᠭᠡᠳ ᠡᠴᠡ ᠭᠠᠢᠬᠠᠯᠲᠠᠢ ᠰᠠᠢᠬᠠᠨ ᠦᠯᠢᠭᠡᠷ ᠲᠤᠤᠯᠢ ᠰᠣᠨᠣᠰᠴᠤ᠂ ᠪᠠᠭᠠ ᠨᠠᠰᠤᠨ ᠠ᠋ᠴᠠ ᠠᠷᠠᠳ ᠤ᠋ᠨ ᠠᠮᠠᠨ ᠵᠣᠬᠢᠶᠠᠯ ᠤ᠋ᠨ ᠢᠷᠠᠭᠤ ᠰᠠᠢᠬᠠᠨ ᠳ᠋ᠤ᠌ ᠪᠠᠬᠠᠳᠤᠨ ᠳᠤᠷᠠᠯᠠᠳᠠᠭ ᠪᠣᠯᠤᠭᠰᠠᠨ ᠪᠢᠯᠡ᠃ ᠮᠣᠩᠭᠣᠯ ᠪᠢᠴᠢᠭ ᠵᠣᠬᠢᠶᠠᠯ ᠳ᠋ᠠᠭᠠᠨ ᠶᠡᠬᠡ ᠳᠤᠷᠠᠲᠠᠢ᠂ ᠲᠡᠭᠦᠨ ᠦ᠌ ᠥᠩᠭᠡᠷᠡᠭᠰᠡᠨ ᠦᠶᠡ ᠶ᠋ᠢᠨ ᠳᠤᠷᠠᠰᠬᠠᠯ ᠢ᠋ ᠪᠠᠬᠠᠷᠬᠠᠨ ᠦᠵᠡᠵᠦ᠂ ᠰᠡᠳᠬᠢᠯ ᠳ᠋ᠦ᠍ᠨᠢ ᠲᠡᠷᠡ ᠨᠢ ᠠᠮᠢᠳᠤ ᠮᠡᠲᠦ ᠪᠠᠢᠭᠠ᠂ ᠬᠥᠳᠡᠭᠡᠨ ᠦ᠌ ᠮᠣᠩᠭᠣᠯ ᠲᠠᠢ ᠭᠡᠳᠡᠭ ᠪᠢᠴᠢᠭᠲᠡᠨ ᠡᠪᠦᠭᠡᠳ᠂ ᠨᠠᠮᠠᠶ᠋ᠢ ᠪᠢᠴᠢᠭ ᠦᠰᠦᠭ ᠰᠢᠮᠳᠠᠨ ᠤᠷᠤᠯᠳᠤᠵᠤ᠂ ᠪᠢᠴᠢᠭ ᠦ᠋ᠨ ᠬᠡᠯᠡᠨ ᠳ᠋ᠦ᠍ ᠠᠮᠵᠢᠯᠲᠠ ᠲᠠᠢ ᠰᠤᠷᠴᠤ ᠪᠠᠢᠭᠠ ᠳ᠋ᠤ᠌ ᠬᠡᠦᠬᠡᠳ ᠮᠡᠲᠦ ᠪᠡᠶᠡᠰᠴᠦ᠂ ᠠᠷᠠᠳ ᠤ᠋ᠨ ᠬᠡᠯᠡᠨ ᠦ᠌ ᠰᠢᠮᠡ ᠲᠡᠢ᠂ ᠠᠮᠲᠠᠲᠠᠢ ᠶ᠋ᠢ ᠨᠢ ᠪᠠᠬᠠᠳᠤᠬᠤ ᠰᠡᠳᠬᠢᠯ ᠲᠥᠷᠥᠭᠦᠯᠦᠨ᠂ ᠤᠳᠬᠠ ᠶ᠋ᠢᠨ ᠡᠪᠦᠭᠡᠨ ᠦ᠌ ᠲᠤᠯᠳᠠᠭ ᠦᠭᠡ ᠶ᠋ᠢᠨ ᠲᠠᠶᠠᠭ ᠢ᠋ ᠴᠢᠬᠤᠯᠠ ᠪᠣᠯᠭᠠᠬᠤ ᠶ᠋ᠢ ᠰᠠᠨᠠᠭᠤᠯᠵᠤ᠂ ᠤᠯᠤᠰ ᠪᠦᠭᠦᠳᠡ ᠶ᠋ᠢᠨ᠂ ᠬᠡᠯᠡᠲᠡᠨ ᠪᠦᠭᠦᠳᠡ ᠶ᠋ᠢᠨ ᠤᠳᠬᠠ ᠵᠣᠬᠢᠶᠠᠯ ᠢ᠋ ᠡᠷᠬᠢᠮᠯᠡᠨ ᠦᠵᠡᠬᠦ ᠶ᠋ᠢ ᠵᠢᠭᠠᠨ ᠰᠤᠷᠭᠠᠳᠠᠭ ᠪᠢᠯᠡ᠃
ᠨᠣᠮ ᠰᠤᠳᠤᠷ ᠢ᠋ ᠬᠦᠢᠷ ᠬᠡᠪᠢᠩ ᠦ᠋ᠨ ᠬᠣᠷᠣᠬᠠᠢ ᠬᠡᠪᠢᠵᠦ ᠢᠳᠡᠭᠦᠵᠢᠨ ᠭᠡᠵᠦ᠂ ᠠᠯᠤᠰ ᠡᠮᠦᠨᠡ ᠵᠦᠭ ᠦ᠋ᠨ ᠣᠷᠣᠨ ᠤ᠋ ᠡᠪᠡᠰᠦ᠂ ᠦᠨᠦᠷᠲᠡᠨ ᠡᠮ ᠦᠨᠳᠦᠰᠦ ᠬᠢᠭᠰᠡᠨ ᠪᠢᠴᠢᠭ ᠦ᠋ᠨ ᠠᠪᠳᠠᠷᠠ ᠠ᠋ᠴᠠ ᠨᠠᠳᠠᠳᠤ ᠪᠠᠬᠠᠳᠤᠮ ᠰᠠᠢᠬᠠᠨ ᠰᠢᠳᠢᠲᠦ ᠦᠯᠢᠭᠡᠷ ᠦ᠋ᠨ ᠪᠢᠴᠢᠭ ᠭᠠᠷᠭᠠᠵᠤ᠂ ᠠᠷᠭᠠᠯ ᠤ᠋ᠨ ᠤᠲᠤᠭᠠ ᠠᠭᠢ ᠶᠢᠨ ᠦᠨᠦᠷ᠂ ᠥᠭᠡᠷᠡ ᠵᠦᠭ ᠦ᠋ᠨ ᠠᠯᠤᠰ ᠣᠷᠣᠨ ᠤ᠋ ᠡᠮ ᠦᠨᠦᠷᠲᠡᠨ ᠬᠠᠩᠬᠤᠯᠤᠭᠰᠠᠨ ᠲᠡᠷᠡ ᠪᠢᠴᠢᠭ ᠳᠡᠪᠲᠡᠷ ᠢ᠋ ᠨᠠᠳᠠ ᠤᠩᠰᠢᠭᠤᠯᠬᠤ ᠪᠠᠷ ᠵᠢᠭᠡᠯᠡᠨ ᠥᠭᠳᠡᠭ᠂ ᠮᠢᠨᠦ ᠡᠪᠦᠭᠡ ᠶ᠋ᠢᠨ ᠦᠶᠡᠯᠢᠳ ᠡᠪᠦᠭᠡᠨ ᠠᠮᠤᠭᠤᠯᠠᠩ ᠵᠠᠩᠭᠢ ᠂
— ᠮᠠᠨ ᠤ᠋ ᠯᠠᠮᠠ ᠨᠠᠷ᠂ ᠬᠤᠳᠳᠤᠭ ᠤ᠋ᠨ ᠮᠡᠯᠡᠬᠡᠢ ᠰᠢᠭ᠂ ᠳᠡᠯᠡᠬᠡᠢ ᠳ᠋ᠦ᠍ ᠲᠡᠳᠡᠨ ᠦ᠌ ᠬᠤᠳᠳᠤᠭ ᠠ᠋ᠴᠠ ᠲᠣᠮᠣ ᠳᠠᠯᠠᠢ ᠪᠠᠢᠳᠠᠭ ᠦᠭᠡᠢ ᠭᠡᠵᠦ ᠦᠵᠡᠳᠡᠭ ᠤᠯᠤᠰ᠃ ᠲᠡᠷᠡ ᠪᠤᠷᠤᠭᠤ ᠶᠤᠮ ᠰᠢᠦ᠃ ᠴᠢ ᠤᠯᠤᠰ ᠪᠦᠬᠦᠨ ᠦ᠌ ᠵᠣᠬᠢᠶᠠᠯ ᠢ᠋ ᠬᠦᠨᠳᠦᠳᠬᠡᠵᠦ ᠪᠠᠢᠭᠠᠷᠠᠢ᠃ ᠠᠯᠢ ᠴᠦ᠍ ᠤᠯᠤᠰ ᠤ᠋ᠨ ᠵᠣᠬᠢᠶᠠᠯ ᠳ᠋ᠤ᠌ ᠴᠢᠨᠦ ᠦᠵᠡᠬᠦ ᠳ᠋ᠦ᠍ ᠡᠳᠦᠢ ᠲᠡᠳᠦᠢ ᠰᠠᠢᠬᠠᠨ ᠶᠠᠭᠤᠮᠠ ᠣᠯᠳᠠᠨᠠ ᠭᠡᠵᠦ ᠵᠠᠬᠢᠳᠠᠭ ᠰᠠᠨ᠃
ᠶᠢᠰᠦᠨ ᠨᠠᠰᠤᠨ ᠠ᠋ᠴᠠ ᠪᠠᠨ ᠪᠢ ᠣᠷᠣᠰ ᠬᠡᠯᠡ ᠪᠢᠴᠢᠭ ᠦᠵᠡᠵᠦ ᠡᠬᠢᠯᠡᠭᠰᠡᠨ ᠪᠢᠯᠡ᠃ ᠲᠡᠭᠡᠭᠡᠳ᠂ ᠮᠢᠨᠦ ᠭᠠᠢᠬᠠᠭᠰᠠᠨ ᠨᠢᠳᠦᠨ ᠦ᠌ ᠡᠮᠦᠨᠡ ᠡᠲᠡᠭᠡᠳ ᠰᠣᠨᠢᠨ᠂ ᠰᠢᠨᠡ᠂ ᠭᠠᠢᠬᠠᠮᠰᠢᠭᠲᠤ ᠶᠢᠷᠲᠢᠨᠴᠦ ᠨᠡᠭᠡᠭᠡᠭᠳᠡᠨ ᠦᠵᠡᠭᠳᠡᠵᠡᠢ᠃ ᠬᠠᠭᠤᠴᠢᠨ ᠮᠣᠩᠭᠣᠯ ᠤᠳᠬᠠ ᠵᠣᠬᠢᠶᠠᠯ᠂ ᠪᠢᠴᠢᠭ ᠦ᠋ᠨ ᠬᠢᠭᠡᠳ ᠠᠮᠠᠨ ᠵᠣᠬᠢᠶᠠᠯ ᠳ᠋ᠤ᠌ ᠭᠠᠷᠳᠠᠭ ᠨᠠᠩᠭᠢᠶᠠᠳ ᠬᠢᠲᠠᠳ ᠵᠠᠭᠠᠷ᠂ ᠡᠨᠡᠳᠬᠡᠭ᠂ ᠪᠠᠯᠪᠤ᠂ ᠴᠠᠰᠤᠲᠤ ᠶ᠋ᠢᠨ ᠣᠷᠣᠨ ᠲᠥᠪᠡᠳ᠂ ᠲᠡᠮᠡᠭᠡᠨ ᠦ᠌ ᠰᠠᠢᠨ ᠭᠠᠷᠳᠠᠭ ᠬᠠᠷᠠ ᠲᠣᠭᠮᠠᠭ ᠤᠯᠤᠰ᠂ ᠲᠣᠯᠣᠩᠭᠤᠳᠤᠭᠰᠠᠨ ᠬᠤᠨ ᠴᠠᠭᠠᠨ ᠬᠣᠪᠴᠠᠰᠤᠲᠠᠢ ᠰᠣᠯᠣᠩᠭᠣ ᠤᠯᠤᠰ᠂ ᠡᠷᠲᠡᠨ ᠦ᠌ ᠦᠯᠢᠭᠡᠷ ᠳᠣᠮᠣᠭ ᠤ᠋ᠨ ᠰᠢᠳᠢᠲᠦ ᠤᠨᠢᠶᠠᠷ ᠲᠠᠲᠠᠭᠰᠠᠨ ᠲᠠᠵᠢᠭ᠂ ᠰᠠᠷᠲ᠋ᠤᠤᠯ᠂ ᠪᠤᠬᠠᠷ᠂ ᠲᠣᠬᠠᠷ᠂ ᠮᠢᠰᠢᠷ ᠭᠡᠳᠡᠭ ᠶᠢᠬᠢᠫᠲ᠋᠂ ᠢᠷᠡᠩ ᠳᠦᠷᠡᠩ ᠭᠡᠳᠡᠭ ᠤᠯᠤᠰ ᠣᠷᠣᠨ ᠢ᠋ ᠮᠡᠳᠡᠳᠡᠭ ᠪᠠᠢᠭᠰᠠᠨ ᠤ᠋ ᠳᠡᠭᠡᠷᠡ᠂ ᠣᠷᠣᠰ ᠬᠡᠯᠡ ᠪᠢᠴᠢᠭ ᠨᠠᠳᠠ ᠳᠡᠯᠡᠬᠡᠢ ᠶᠢᠷᠲᠢᠨᠴᠦ ᠶ᠋ᠢᠨ ᠨᠢᠭᠡᠨ ᠬᠠᠭᠠᠰ ᠢ᠋ ᠪᠤᠶᠤ ᠲᠡᠭᠦᠨ ᠡᠴᠡ ᠴᠦ᠍ ᠶᠡᠬᠡ ᠬᠤᠪᠢ ᠶ᠋ᠢ ᠨᠡᠭᠡᠭᠡᠵᠦ ᠦᠭᠭᠦᠭᠰᠡᠨ ᠢ᠋ᠶ᠋ᠡᠷ᠂ ᠦᠯᠢᠭᠡᠷ ᠳᠣᠮᠣᠭ ᠤ᠋ᠨ ᠡᠳᠦᠢ ᠲᠡᠳᠦᠢ ᠣᠯᠠᠨ ᠤᠯᠤᠰ ᠣᠷᠣᠨ ᠦᠨᠡᠬᠡᠷ ᠪᠣᠳᠠᠲᠠᠢ᠂ ᠤᠷᠢᠳ ᠪᠠᠢᠭᠰᠠᠨ ᠪᠤᠶᠤ ᠣᠳᠣ ᠴᠦ᠍ ᠪᠠᠢᠭᠰᠠᠭᠠᠷ ᠪᠠᠢᠭᠠ ᠤᠯᠤᠰ᠂ ᠭᠠᠵᠠᠷ ᠣᠷᠣᠨ ᠪᠣᠯᠵᠤ᠂ ᠮᠢᠨᠦ ᠭᠠᠳᠠᠷᠯᠠᠬᠤ ᠪᠣᠯᠵᠤ ᠪᠠᠢᠭᠰᠠᠨ ᠭᠠᠵᠠᠷ ᠤ᠋ᠨ ᠵᠦᠢ ᠶ᠋ᠢᠨ ᠵᠢᠷᠤᠭ ᠲᠤ᠌ ᠪᠠᠢᠷᠢ ᠰᠠᠭᠤᠷᠢ ᠪᠠᠨ ᠪᠠᠲᠤᠳᠠ ᠡᠵᠡᠯᠡᠵᠢ᠃ ᠣᠷᠣᠰ ᠦᠯᠢᠭᠡᠷ ᠦ᠋ᠨ ᠢᠷᠠᠭᠤ ᠰᠠᠢᠬᠠᠨ ᠳ᠋ᠤᠨᠢ ᠠᠪᠲᠠᠭᠳᠠᠭᠠᠳ᠂ ᠨᠢᠭᠡ ᠮᠡᠳᠡᠬᠦᠨᠡ ᠤᠩᠰᠢ ᠤᠩᠰᠢᠭᠰᠠᠭᠠᠷ ᠣᠷᠣᠰ ᠬᠡᠯᠡ ᠲᠡᠢ ᠪᠣᠯᠤᠭᠰᠠᠨ ᠮᠢᠨᠦ ᠪᠡᠶᠡ᠂ ᠲᠡᠳᠡᠭᠡᠷ ᠣᠷᠣᠰ ᠦᠯᠢᠭᠡᠷ ᠦ᠋ᠨ ᠰᠢᠳᠢᠲᠦ ᠶᠢᠷᠲᠢᠨᠴᠦ ᠳ᠋ᠦ᠍᠂ ᠬᠠᠷᠢᠨ ᠴᠦ᠍ ᠮᠢᠨᠦ ᠤᠷᠢᠳ ᠦᠵᠡᠭᠰᠡᠨ ᠰᠣᠨᠣᠰᠤᠭᠰᠠᠨ ᠮᠣᠩᠭᠣᠯ᠂ ᠬᠢᠲᠠᠳ᠂ ᠡᠨᠡᠳᠬᠡᠭ ᠦᠯᠢᠭᠡᠷ ᠲᠦ᠍ ᠪᠠᠢᠳᠠᠭ᠂ ᠮᠢᠨᠦ ᠠᠯᠢ ᠬᠡᠳᠦᠢᠨᠡᠢ ᠬᠠᠭᠤᠴᠢᠨ ᠲᠠᠨᠢᠯ ᠤ᠋ᠳ ᠪᠠᠢᠵᠤ ᠪᠠᠢᠭᠰᠠᠨ ᠢ᠋ ᠦᠵᠡᠭᠡᠳ ᠶᠡᠬᠡᠯᠡ ᠰᠣᠨᠢᠷᠬᠠᠨ ᠪᠠᠶᠠᠷᠯᠠᠭᠰᠠᠨ ᠪᠢᠯᠡ᠃ ᠲᠡᠭᠡᠭᠡᠳ ᠣᠷᠣᠰ ᠤ᠋ᠨ ᠤᠳᠬᠠ ᠵᠣᠬᠢᠶᠠᠯ ᠢ᠋ ᠦᠵᠡᠵᠦ ᠲᠠᠨᠢᠯᠴᠠᠬᠤ ᠳᠤᠰᠤᠮᠠ᠂ ᠬᠠᠭᠤᠴᠢᠨ ᠮᠣᠩᠭᠣᠯ ᠤᠳᠬᠠ ᠵᠣᠬᠢᠶᠠᠯ ᠤ᠋ᠨ ᠶᠡᠬᠡ ᠲᠥᠯᠥᠪ ᠲᠤᠨᠢ ᠶᠢᠷᠲᠢᠨᠴᠦ ᠶ᠋ᠢ ᠪᠢᠰᠢᠯᠭᠠᠨ ᠦᠵᠡᠬᠦ ᠠᠮᠤᠷᠯᠢᠩᠭᠤᠢ ᠬᠦᠯᠢᠴᠡᠩᠭᠦᠢ ᠪᠠᠢᠳᠠᠯ ᠲᠠᠢ ᠪᠠᠢᠳᠠᠭ ᠠ᠋ᠴᠠ ᠮᠠᠰᠢ ᠥᠭᠡᠷᠡ ᠦᠵᠡᠭᠳᠡᠵᠦ ᠭᠠᠢᠬᠠᠮ ᠰᠣᠨᠢᠨ ᠪᠠᠢᠭᠰᠠᠨ ᠣᠨᠴᠠᠯᠢᠭ ᠵᠦᠢᠯ ᠨᠢ ᠭᠡᠪᠡᠯ᠂ ᠵᠢᠷᠭᠠᠯ ᠤ᠋ᠨ ᠢ᠋ᠶ᠋ᠠᠨ ᠵᠠᠮ ᠢ᠋ ᠨᠡᠭᠡᠭᠡᠵᠦ ᠴᠢᠳᠠᠬᠤ ᠴᠢᠳᠠᠯ ᠬᠦᠴᠦᠨ ᠬᠥᠮᠦᠨ ᠳ᠋ᠦ᠍ ᠪᠣᠢ ᠭᠡᠵᠦ ᠢᠲᠡᠭᠡᠬᠦ ᠢᠲᠡᠭᠡᠯ ᠪᠦᠷᠢᠳᠦᠭᠰᠡᠨ ᠪᠥᠭᠡᠳ ᠬᠥᠮᠦᠨ ᠢ᠋ ᠡᠷᠬᠢᠮ ᠪᠣᠯᠭᠠᠬᠤ ᠡᠨᠡᠷᠢᠩᠭᠦᠢ ᠬᠥᠮᠦᠨᠯᠢᠭ ᠴᠢᠨᠠᠷ ᠲᠡᠭᠦᠰ ᠢ᠋ ᠭᠠᠢᠬᠠᠨ ᠪᠢᠰᠢᠷᠡᠵᠦ ᠪᠢᠯᠡ᠃ ᠤᠳᠬᠠ ᠵᠣᠬᠢᠶᠠᠯ ᠳ᠋ᠤ᠌ ᠮᠢᠨᠦ ᠪᠡᠶᠡ ᠲᠡᠭᠡᠵᠦ ᠠᠮᠲᠠ ᠶ᠋ᠢ ᠠᠪᠴᠤ᠂ ᠬᠦᠰᠡᠨ ᠡᠷᠡᠮᠡᠯᠵᠡᠳᠡᠭ ᠪᠣᠯᠤᠭᠰᠠᠨ ᠪᠢᠯᠡ᠃ ᠲᠡᠭᠡᠭᠡᠳ ᠠᠷᠭᠠ ᠶ᠋ᠢᠨ 1921 ᠣᠨ᠂ ᠪᠢᠯᠢᠭ ᠦ᠋ᠨ ᠴᠠᠭᠠᠭᠴᠢᠨ ᠲᠠᠬᠢᠶᠠ ᠵᠢᠯ ᠦ᠋ᠨ ᠬᠠᠪᠤᠷ᠂ ᠰᠦᠬᠡᠪᠠᠭᠠᠲᠤᠷ ᠴᠣᠢᠪᠠᠯᠰᠠᠩ ᠤ᠋ᠨ ᠵᠢᠷᠤᠮ ᠤ᠋ᠨ ᠴᠡᠷᠢᠭ ᠲᠦ᠍ ᠪᠤᠲᠠ ᠨᠢᠷᠭᠡᠭᠦᠯᠦᠨ ᠳᠠᠷᠤᠭᠳᠠᠭᠰᠠᠨ ᠭᠠᠮᠢᠩ ᠢ᠋ ᠬᠢᠶᠠᠭᠲᠤ ᠶ᠋ᠢᠨ ᠮᠠᠢᠮᠠᠢ ᠬᠣᠲᠠ ᠶ᠋ᠢ ᠰᠦᠢᠳᠬᠡᠨ ᠵᠢᠭᠤᠲᠠᠬᠤ ᠳ᠋ᠤ᠌᠂ ᠬᠤᠳᠠᠯᠳᠤᠭᠠᠴᠢᠨ ᠬᠢᠲᠠᠳ ᠤ᠋ᠨ ᠬᠥᠬᠡ ᠰᠢᠪᠡᠷ ᠴᠣᠭᠴᠠᠯᠠᠭᠰᠠᠨ ᠲᠡᠷᠡ ᠪᠣᠷᠣ ᠰᠢᠷᠣᠢ ᠬᠣᠲᠠ᠂ ᠬᠠᠮᠠᠭᠠᠯᠠᠵᠤ ᠪᠠᠢᠭᠰᠠᠨ ᠥᠨᠥᠬᠢ ᠭᠠᠮᠢᠩ ᠤ᠋ᠳ ᠲᠠᠭᠠᠨ ᠲᠣᠨᠣᠭᠣᠯᠠᠭᠠᠳ᠂ ᠭᠠᠯ ᠲᠠᠯᠪᠢᠭᠤᠯᠤᠭᠠᠳ ᠨᠡᠯᠢᠶᠡᠳ ᠪᠥᠭᠡᠮ ᠶᠡᠬᠡ ᠭᠠᠯ ᠳᠦᠷᠡᠯᠵᠡᠵᠦ ᠪᠠᠢᠬᠤ ᠳ᠋ᠤᠨᠢ ᠲᠡᠷᠡ ᠴᠠᠭ ᠲᠤ᠌ ᠰᠤᠷᠭᠠᠭᠤᠯᠢ ᠶ᠋ᠢᠨ ᠰᠤᠷᠤᠭᠴᠢ ᠪᠠᠢᠭᠰᠠᠨ ᠮᠢᠨᠦ ᠪᠡᠶᠡ ᠨᠢᠳᠦᠨ ᠦ᠌ ᠡᠮᠦᠨᠡ ᠪᠣᠯᠵᠤ ᠪᠠᠢᠭᠰᠠᠨ ᠲᠡᠷᠡ ᠶᠠᠪᠤᠳᠠᠯ ᠢ᠋ ᠬᠣᠢᠴᠢ ᠡᠳᠦᠷ ᠬᠡᠷᠡᠭ ᠪᠣᠯᠭᠤᠵᠢᠨ ᠭᠡᠵᠦ᠂ ᠡᠳᠦᠷ ᠦ᠋ᠨ ᠢ᠋ᠶ᠋ᠡᠨ ᠲᠡᠮᠳᠡᠭᠯᠡᠯ ᠳᠡᠪᠲᠡᠷ ᠲᠦ᠍ ᠲᠡᠮᠳᠡᠭᠯᠡᠨ ᠪᠢᠴᠢᠵᠦ ᠪᠠᠢᠭᠰᠠᠨ ᠪᠢᠯᠡ᠃ ᠭᠠᠯ ᠳ᠋ᠤ᠌ ᠠᠪᠲᠠᠭᠳᠠᠨ ᠰᠦᠷᠲᠡᠢ ᠳᠥᠯᠥ ᠳᠦᠷᠡᠯᠵᠡᠵᠦ ᠪᠠᠢᠭᠰᠠᠨ ᠬᠢᠶᠠᠭᠲᠤ ᠶ᠋ᠢᠨ ᠮᠠᠢᠮᠠᠢ ᠬᠣᠲᠠ ᠶ᠋ᠢᠨ ᠵᠡᠭᠦᠨ ᠵᠦᠭ ᠲᠦ᠍ ᠠᠯᠲᠠᠨᠪᠤᠯᠠᠭ ᠭᠡᠵᠦ ᠨᠡᠷᠡᠲᠡᠢ ᠪᠢᠴᠢᠬᠠᠨ ᠭᠠᠴᠠᠭᠠᠨ ᠤ᠋ ᠪᠠᠢᠳᠠᠯ᠂ ᠰᠥᠨᠢ ᠲᠡᠷᠡ ᠭᠠᠴᠠᠭᠠᠨ ᠤ᠋ ᠠᠢᠯ ᠤ᠋ᠨ ᠬᠠᠰᠢᠶᠠ ᠭᠤᠲᠤᠮ ᠢ᠋ ᠤᠯᠠᠭᠠᠨ ᠲᠤᠶᠠᠭᠠ ᠲᠠᠲᠠᠭᠤᠯᠵᠤ ᠪᠠᠢᠭᠰᠠᠨ ᠬᠢᠶᠠᠭᠲᠤ ᠶ᠋ᠢᠨ ᠰᠦᠷᠲᠦ ᠶᠡᠬᠡ ᠭᠠᠯ ᠤ᠋ᠨ ᠪᠠᠢᠳᠠᠯ᠂ ᠬᠠᠷᠠᠩᠭᠤᠢ ᠰᠥᠨᠢ ᠶ᠋ᠢᠨ ᠪᠠᠷᠠᠭᠠᠨ ᠣᠭᠲᠠᠷᠭᠤᠢ ᠳ᠋ᠤ᠌ ᠤᠯᠠᠯᠵᠠᠨ ᠳᠦᠷᠡᠯᠵᠡᠵᠦ ᠪᠠᠢᠭᠠ ᠶᠡᠬᠡ ᠭᠠᠯ ᠤ᠋ᠨ ᠳᠥᠯᠥ ᠶ᠋ᠢᠨ ᠰᠦᠷᠲᠡᠢ ᠦᠵᠡᠭᠳᠡᠯ᠂ ᠭᠠᠯ ᠠᠪᠤᠯᠴᠠᠨ ᠰᠢᠲᠠᠭᠰᠠᠨ ᠰᠢᠪᠡᠷ ᠪᠠᠢᠰᠢᠩ ᠤ᠋ᠨ ᠵᠤᠵᠠᠭᠠᠨ ᠭᠡᠭᠴᠢ ᠶ᠋ᠢᠨ ᠰᠢᠪᠡᠷ ᠣᠷᠣᠢ ᠶ᠋ᠢ ᠳᠣᠲᠣᠭᠰᠢ ᠪᠠᠨ ᠨᠤᠷᠠᠨ ᠣᠢᠴᠢᠬᠤ ᠳ᠋ᠤ᠌᠂ ᠦᠯᠡᠮᠵᠢ ᠶᠡᠬᠡ ᠬᠥᠭᠡᠷᠭᠡ ᠪᠡᠷ ᠬᠥᠭᠡᠷᠭᠡᠳᠡᠭᠰᠡᠨ ᠶᠦᠮ ᠰᠢᠭ᠂ ᠣᠭᠲᠠᠷᠭᠤᠢ ᠶ᠋ᠢᠨ ᠵᠦᠭ ᠭᠠᠯ ᠬᠠᠷᠪᠤᠨ ᠣᠯᠤᠭᠤᠢᠳᠴᠤ ᠪᠠᠢᠭᠠ ᠪᠠᠢᠳᠠᠯ᠂ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠲᠦ᠍ ᠶᠠᠪᠤᠭᠠ ᠨᠤᠲᠤᠭ ᠤ᠋ᠨ ᠲᠠᠨᠢᠳᠠᠭ ᠡᠪᠦᠭᠡᠳ ᠦ᠋ᠨ ᠶᠠᠷᠢᠵᠤ ᠪᠠᠢᠭᠰᠠᠨ ᠰᠣᠨᠢᠨ ᠶᠠᠷᠢᠶᠠ ᠶ᠋ᠢ ᠬᠣᠵᠢᠮ ᠬᠣᠢᠨᠠ ᠶ᠋ᠢᠨ ᠴᠠᠭ᠂ ᠪᠢᠴᠢᠭ ᠦ᠋ᠨ ᠬᠥᠮᠦᠨ ᠪᠣᠯᠵᠤ ᠨᠣᠮ ᠬᠢᠬᠦ᠂ ᠵᠣᠬᠢᠶᠠᠯ ᠵᠣᠬᠢᠶᠠᠬᠤ ᠪᠣᠯᠬᠤ ᠪᠠᠷ ᠬᠡᠷᠡᠭ ᠪᠣᠯᠬᠤ ᠪᠤᠶᠤ ᠭᠡᠵᠦ ᠡᠳᠦᠷ ᠦ᠋ᠨ ᠲᠡᠮᠳᠡᠭᠯᠡᠯ ᠳᠡᠪᠲᠡᠷ ᠲᠦ᠍ ᠲᠡᠮᠳᠡᠭᠯᠡᠳᠡᠭ ᠪᠠᠢᠯᠠ᠃
ᠲᠡᠭᠡᠭᠡᠳ᠂ ᠲᠡᠷᠡ ᠦᠶᠡ ᠳ᠋ᠦ᠍ ᠭᠡᠨᠡᠳᠲᠡ ᠬᠥᠮᠦᠨ ᠣᠯᠠᠨ ᠲᠠᠢ᠂ ᠬᠥᠯ ᠲᠡᠢ ᠬᠥᠬᠦᠭᠡᠨ ᠪᠣᠯᠤᠭᠰᠠᠨ ᠠᠯᠲᠠᠨᠪᠤᠯᠠᠭ ᠭᠡᠳᠡᠭ ᠪᠢᠴᠢᠬᠠᠨ ᠭᠠᠴᠠᠭᠠᠨ ᠤ᠋ ᠨᠢᠭᠡᠨ ᠭᠣᠳᠣᠮᠵᠢᠨᠠ ᠰᠦᠬᠡᠪᠠᠭᠠᠲᠤᠷ ᠵᠠᠩᠵᠤᠨ ᠨᠢᠭᠡᠨ ᠡᠳᠦᠷ ᠨᠠᠳᠠᠲᠠᠢ ᠠᠭᠤᠯᠵᠠᠭᠠᠳ᠂ ᠴᠢ ᠬᠠᠮᠢᠭᠠ᠂ ᠶᠠᠮᠠᠷ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠶᠠᠪᠤᠵᠤ ᠪᠠᠢᠨᠠ? ᠭᠡᠵᠦ ᠠᠰᠠᠭᠤᠭᠠᠳ᠂ ᠨᠣᠮ ᠰᠠᠢᠨ ᠰᠤᠷ᠂ ᠪᠢᠳᠡᠨ ᠳ᠋ᠦ᠍ ᠡᠷᠳᠡᠮᠲᠡᠢ ᠨᠣᠮ ᠲᠠᠢ ᠬᠥᠮᠦᠨ ᠬᠡᠷᠡᠭᠲᠡᠢ ᠰᠢᠦ᠃ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠪᠠᠨ ᠲᠡᠭᠦᠰᠬᠡᠬᠦ ᠳ᠋ᠦ᠍ ᠴᠢᠨᠢ᠂ ᠴᠢᠨᠠᠭᠰᠢ ᠪᠠᠰᠠ ᠰᠤᠷᠭᠠᠭᠤᠯᠢ ᠬᠢᠯᠭᠡᠬᠦ ᠪᠡᠷ ᠶᠠᠪᠤᠭᠤᠯᠤᠨᠠ ᠭᠡᠵᠦ ᠬᠡᠯᠡᠵᠦ ᠪᠢᠯᠡ᠃
ᠲᠡᠷᠡ ᠵᠠᠬᠢᠭᠰᠠᠨ ᠦᠭᠡ ᠶ᠋ᠢ ᠨᠢ ᠪᠣᠳᠣᠭᠰᠠᠭᠠᠷ᠂ ᠪᠢᠴᠢᠭ ᠦ᠋ᠨ ᠬᠥᠮᠦᠨ᠂ ᠵᠣᠬᠢᠶᠠᠯᠴᠢ ᠬᠥᠮᠦᠨ ᠪᠣᠯᠬᠤ ᠭᠡᠪᠡᠯ᠂ ᠬᠡᠷᠬᠢᠪᠡᠴᠦ ᠬᠡᠯᠡ ᠪᠢᠴᠢᠭ ᠦ᠋ᠨ ᠰᠢᠨᠵᠢᠯᠡᠯᠲᠡ᠂ ᠬᠡᠯᠡ ᠪᠢᠴᠢᠭ ᠦ᠋ᠨ ᠮᠡᠷᠭᠡᠵᠢᠯᠲᠡᠨ ᠪᠣᠯᠬᠤ ᠬᠡᠷᠡᠭᠲᠡᠢ ᠶᠦ᠍ᠮ ᠪᠠᠢᠨᠠ ᠰᠢᠦ ᠭᠡᠵᠦ᠂ ᠮᠣᠩᠭᠣᠯ ᠬᠡᠯᠡ ᠪᠢᠴᠢᠭ ᠦ᠋ᠨ ᠰᠢᠨᠵᠢᠯᠡᠯᠲᠡᠨ ᠪᠣᠯᠬᠤ ᠢᠷᠡᠭᠡᠳᠦᠢ ᠶ᠋ᠢᠨ ᠢ᠋ᠶ᠋ᠡᠨ ᠮᠡᠷᠭᠡᠵᠢᠯ ᠢ᠋ ᠵᠠᠩᠵᠤᠨ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠵᠠᠬᠢᠵᠤ ᠰᠠᠨᠠᠭᠤᠯᠤᠭᠰᠠᠨ ᠦᠭᠡᠨ ᠡᠴᠡ ᠰᠠᠨᠠᠭᠠ ᠠᠪᠴᠤ ᠭᠤᠴᠢᠨ ᠵᠢᠯ ᠦ᠋ᠨ ᠡᠮᠦᠨᠡ ᠣᠳᠣ ᠶ᠋ᠢᠨ ᠢ᠋ᠶ᠋ᠡᠨ ᠮᠡᠷᠭᠡᠵᠢᠯ ᠢ᠋ ᠰᠣᠩᠭᠣᠨ ᠲᠣᠭᠲᠠᠭᠰᠠᠨ ᠪᠢᠯᠡ᠃ ᠡᠷᠳᠡᠮ ᠨᠣᠮ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠵᠣᠷᠢᠵᠤ ᠣᠷᠣᠯᠳᠣᠬᠤ ᠳᠤᠰᠤᠮᠠ ᠮᠢᠨᠦ ᠨᠢᠳᠦ ᠨᠡᠭᠡᠭᠡᠭᠳᠡᠵᠦ᠂ ᠭᠡᠷ ᠦ᠋ᠨ ᠳᠣᠲᠣᠷᠠᠬᠢ ᠲᠣᠭᠲᠠᠮᠠᠯ ᠪᠠᠢᠷᠢ ᠲᠠᠢ ᠶᠤᠮ ᠰᠢᠭ᠋᠂ ᠠᠬᠤᠢ ᠪᠠᠢᠳᠠᠯ ᠠᠮᠢᠳᠤᠷᠠᠯ ᠳ᠋ᠤ᠌ ᠠᠯᠢ ᠬᠡᠳᠦᠢᠨ ᠬᠡᠪᠰᠢᠨ ᠲᠣᠭᠲᠠᠵᠤ ᠵᠠᠩᠰᠢᠭᠰᠠᠨ ᠶᠤᠮ ᠭᠡᠵᠦ ᠦᠵᠡᠳᠡᠭ ᠵᠦᠢᠯ ᠦ᠋ᠨ ᠣᠯᠠᠩᠬᠢ ᠶ᠋ᠢ ᠨᠢ ᠱᠠᠯ ᠥᠮᠨᠥᠭᠡ ᠪᠡᠷ ᠦᠵᠡᠬᠦ ᠨᠢᠳᠦᠨ᠂ ᠰᠤᠷᠤᠯᠭᠠ ᠠᠰᠠᠭᠤᠯᠭᠠ ᠨᠡᠮᠡᠭᠳᠡᠬᠦ ᠳᠣᠳᠣᠮ ᠨᠡᠭᠡᠭᠡᠭᠳᠡᠵᠦ ᠢᠷᠡᠭᠰᠡᠨ ᠪᠢᠯᠡ᠃ ᠪᠣᠳᠣᠵᠤ ᠦᠵᠡᠪᠡᠯ᠂ ᠰᠤᠷᠭᠠᠯ ᠲᠣᠭᠣᠵᠢ ᠶ᠋ᠢᠨ ᠵᠡᠷᠭᠡ ᠮᠠᠰᠢ ᠶᠡᠬᠡ ᠤᠳᠬᠠ ᠪᠢᠴᠢᠭ ᠦ᠋ᠨ ᠵᠦᠢᠯ᠂ ᠦᠨᠡᠨ ᠪᠣᠳᠠᠲᠠᠢ ᠪᠡᠶᠡ ᠮᠠᠬᠠᠪᠣᠳ ᠲᠠᠢ ᠶᠤᠮ᠂ ᠵᠢᠭᠲᠡᠢ ᠭᠠᠢᠬᠠᠮᠰᠢᠭᠲᠠᠢ ᠷᠢᠳᠢ ᠰᠢᠳᠢᠲᠡᠢ ᠶᠠᠭᠤᠮᠠ ᠬᠠᠷᠢᠯᠴᠠᠨ ᠣᠷᠢᠶᠠᠯᠳᠤᠭᠰᠠᠨ ᠮᠡᠲᠦ ᠰᠦᠯᠵᠢᠯᠳᠦᠨ ᠠᠪᠤᠯᠴᠠᠭᠰᠠᠨ ᠭᠠᠢᠬᠠᠮᠰᠢᠭᠲᠤ ᠶᠠᠭᠤᠮᠠᠨ ᠤ᠋ ᠶᠢᠷᠲᠢᠨᠴᠦ ᠶ᠋ᠢ ᠥᠭᠦᠯᠡᠭᠴᠢ ᠲᠣᠭᠣᠵᠢ᠂ ᠦᠯᠡᠮᠵᠢ ᠪᠡᠶᠡᠲᠡᠨ ᠠᠶᠤᠮᠰᠢᠭᠲᠤ ᠵᠢᠭᠲᠡᠢ ᠠᠮᠢᠲᠠᠨ ᠮᠠᠩᠭᠤᠰ ᠰᠢᠮᠨᠤᠰ᠂ ᠰᠢᠳᠢᠲᠡᠨ ᠳᠠᠭᠢᠨᠢᠰ᠂ ᠪᠤᠷᠬᠠᠨ ᠬᠤᠪᠢᠯᠭᠠᠨ ᠢ᠋ ᠥᠭᠦᠯᠡᠭᠰᠡᠨ᠂ ᠬᠠᠭᠠᠨ ᠲᠦᠰᠢᠮᠡᠯ ᠦ᠋ᠨ ᠶᠣᠰᠣ᠂ ᠡᠵᠡᠨ ᠪᠣᠭᠣᠯ ᠤ᠋ᠨ ᠬᠡᠯᠬᠢᠶᠡ ᠶ᠋ᠢ ᠥᠭᠦᠯᠡᠭᠰᠡᠨ ᠲᠡᠦᠬᠡ ᠪᠢᠴᠢᠭ ᠦ᠋ᠨ ᠵᠦᠢᠯ ᠨᠢ ᠲᠡᠭᠦᠨ ᠢ᠋ ᠪᠣᠢ ᠪᠣᠯᠭᠠᠨ ᠲᠥᠷᠥᠭᠦᠯᠦᠭᠰᠡᠨ ᠹᠧᠣᠳᠠᠯ ᠤ᠋ᠨ ᠪᠠᠢᠭᠤᠯᠤᠯᠭᠠ ᠶ᠋ᠢᠨ ᠬᠠᠮᠲᠤ ᠥᠩᠭᠡᠷᠡᠨ ᠨᠥᠭᠴᠢᠭᠡᠳ ᠲᠡᠦᠬᠡ ᠶ᠋ᠢᠨ ᠥᠪ ᠪᠣᠯᠤᠭᠰᠠᠨ ᠠᠵᠢ᠃
ᠲᠡᠭᠡᠪᠡᠴᠦ ᠲᠡᠷᠡ ᠦᠯᠡᠮᠵᠢ ᠬᠡᠭᠦᠷ ᠨᠢ ᠮᠠᠨ ᠤ᠋ ᠤᠩᠰᠢᠭᠴᠢ ᠶ᠋ᠢ ᠲᠠᠰᠤ ᠲᠡᠪᠡᠷᠢᠭᠰᠡᠭᠡᠷ ᠪᠠᠢᠭᠠ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠵᠣᠬᠢᠶᠠᠯᠴᠢ ᠪᠣᠯᠬᠤ ᠭᠡᠵᠦ ᠤᠷᠤᠯᠳᠤᠵᠤ᠂ ᠨᠢᠳᠦᠨ ᠦ᠌ ᠡᠮᠦᠨᠡ ᠦᠯᠢᠭᠡᠷ ᠵᠢᠱ᠌ᠢᠶᠡ ᠪᠣᠯᠭᠠᠬᠤ ᠶᠤᠮ ᠭᠡᠪᠡᠯ ᠬᠠᠭᠤᠴᠢᠨ ᠤᠳᠬᠠ ᠵᠣᠬᠢᠶᠠᠯ ᠲᠡᠭᠦᠨ ᠦ᠌ ᠲᠣᠭᠲᠠᠭᠰᠠᠨ ᠬᠡᠪ ᠳᠦᠷᠢᠮ ᠡᠴᠡ ᠥᠭᠡᠷᠡ ᠮᠥᠷᠳᠡᠯᠭᠡ ᠪᠣᠯᠭᠠᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠠᠢᠭᠠ ᠵᠣᠬᠢᠶᠠᠯᠴᠢ ᠨᠠᠷ ᠢ᠋ ᠴᠦ᠍ ᠲᠠᠰᠤ ᠲᠡᠪᠡᠷᠢᠭᠡᠳ ᠬᠠᠮᠢᠭᠠᠰᠢ ᠴᠦ᠍ ᠬᠥᠳᠡᠯᠭᠡᠬᠦ ᠦᠭᠡᠢ ᠪᠠᠷᠢᠵᠤ ᠪᠠᠢᠭᠠ ᠶᠤᠮ ᠪᠠᠢᠨᠠ ᠭᠡᠵᠦ ᠮᠡᠳᠡᠯᠡ᠃
ᠲᠡᠭᠡᠭᠡᠳ ᠲᠡᠷᠡ ᠦᠶᠡᠰ᠂ ᠴᠢᠪ ᠭᠡᠮᠡᠨ ᠵᠥᠪᠯᠡᠯᠲᠦ ᠶ᠋ᠢᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶ᠋ᠢᠨ ᠣᠶᠤᠲᠠᠨ ᠪᠠᠢᠭᠰᠠᠨ ᠦᠶᠡᠰ᠂ ᠮᠣᠩᠭᠣᠯ ᠤ᠋ᠨ ᠣᠯᠠᠨ ᠤᠩᠰᠢᠭᠴᠢ ᠨᠠᠷ ᠮᠥᠨ ᠪᠢᠴᠢᠭ ᠵᠣᠬᠢᠶᠠᠯ ᠣᠷᠣᠯᠳᠣᠬᠤ ᠠᠪᠢᠶᠠᠰ ᠳᠤᠷᠠᠲᠠᠢ ᠪᠣᠯᠪᠠᠴᠤ᠂ ᠪᠤᠰᠤᠳ ᠤᠯᠤᠰ ᠤ᠋ᠨ ᠦᠭᠡ ᠦᠰᠦᠭ ᠮᠡᠳᠡᠬᠦ ᠦᠭᠡᠢ ᠤᠴᠢᠷ ᠬᠠᠭᠤᠴᠢᠨ ᠪᠢᠴᠢᠭ ᠵᠣᠬᠢᠶᠠᠯ ᠠ᠋ᠴᠠ ᠥᠭᠡᠷᠡ ᠶᠠᠭᠤᠮᠠ ᠣᠯᠵᠤ ᠦᠵᠡᠬᠦ ᠠᠷᠭᠠ ᠨᠥᠬᠥᠴᠡᠯ ᠦᠭᠡᠢ ᠨᠥᠬᠥᠳ ᠲᠡᠭᠡᠨ ᠲᠡᠳᠡᠨ ᠦ᠌ ᠤᠷᠢᠳ ᠡᠮᠦᠨᠡ ᠣᠯᠵᠤ ᠦᠵᠡᠭᠡ ᠦᠭᠡᠢ ᠣᠷᠣᠰ ᠤ᠋ᠨ ᠬᠢᠭᠡᠳ ᠳᠡᠯᠡᠬᠡᠢ ᠳ᠋ᠠᠬᠢᠨ ᠤ᠋ ᠪᠤᠰᠤᠳ ᠤᠯᠤᠰ ᠤ᠋ᠨ( ᠮᠣᠩᠭᠣᠯ ᠬᠠᠭᠤᠴᠢᠨ ᠵᠣᠬᠢᠶᠠᠯ ᠳ᠋ᠤ᠌ ᠪᠠᠢᠳᠠᠭ ᠦᠭᠡᠢ) ᠵᠣᠬᠢᠶᠠᠯ ᠤ᠋ᠨ ᠠᠭᠤᠤ ᠶᠢᠷᠲᠢᠨᠴᠦ ᠲᠡᠢ ᠲᠠᠨᠢᠯᠴᠠᠬᠤ ᠳ᠋ᠤᠨᠢ ᠲᠤᠰᠠ ᠨᠡᠮᠡᠷᠢ ᠪᠣᠯᠬᠤ ᠶᠤᠮᠰᠠᠨ ᠭᠡᠵᠦ ᠴᠢᠩ ᠰᠠᠨᠠᠭᠠ ᠪᠠᠷᠢᠵᠤ᠂ ᠪᠠᠬᠠᠳᠤᠨ ᠦᠵᠡᠳᠡᠭ ᠵᠣᠬᠢᠶᠠᠯᠴᠢ ᠨᠠᠷ ᠤ᠋ᠨ ᠪᠢᠴᠢᠭ ᠵᠣᠬᠢᠶᠠᠯ ᠠ᠋ᠴᠠ ᠮᠣᠩᠭᠣᠯ ᠪᠣᠯᠭᠠᠵᠤ ᠣᠷᠴᠢᠭᠤᠯᠬᠤ ᠶ᠋ᠢ ᠲᠤᠭᠤᠷᠪᠢᠨ ᠤᠷᠤᠯᠳᠤᠵᠤ ᠡᠬᠢᠯᠡᠭᠰᠡᠨ ᠪᠢᠯᠡ᠃
ᠲᠡᠭᠡᠬᠦ ᠳ᠋ᠡᠭᠡᠨ᠂ ᠲᠣᠭᠲᠠᠮᠠᠯ ᠲᠥᠯᠥᠪᠯᠡᠭᠡ ᠦᠭᠡᠢ᠂ ᠭᠠᠭᠴᠠᠬᠦ ᠬᠦᠴᠦ ᠭᠦᠷᠦᠮ ᠪᠤᠶᠤ ᠨᠡᠩ ᠲᠠᠭᠠᠯᠠᠮᠵᠢᠲᠠᠢ ᠰᠠᠢᠬᠠᠨ ᠵᠣᠬᠢᠶᠠᠯ ᠠ᠋ᠴᠠ ᠣᠷᠴᠢᠭᠤᠯᠵᠤ᠂ ᠬᠡᠳᠦ ᠳᠠᠬᠢᠨ ᠵᠠᠰᠠᠵᠤ ᠪᠣᠯᠪᠠᠰᠤᠷᠠᠭᠤᠯᠤᠭᠰᠠᠭᠠᠷ ᠫᠥᠱᠺᠢᠨ᠂ ᠮᠠᠺᠰᠢᠮ ᠭᠣᠷᠺᠢ᠂ ᠲᠦᠷᠬᠸᠨ᠋ᠸᠸ᠂ ᠴᠸᠬᠤᠸ᠂ ᠠᠯᠸᠺᠰᠠᠨᠳ᠋ᠷ᠂ ᠨᠸᠸᠸᠷᠤᠸ᠂ ᠽᠸᠺ ᠯᠣᠨᠳᠣᠨ᠂ ᠮᠤᠫᠠᠰᠰᠠᠨ᠂ ᠠᠯᠹᠤᠨᠰ᠂ ᠳ᠋ᠤᠳᠸ᠂ ᠵᠢᠶᠦᠨ ᠷᠢᠳ᠂( ᠶᠢᠷᠲᠢᠨᠴᠦ ᠶ᠋ᠢ ᠳᠣᠩᠰᠣᠯᠭᠠᠨ ᠬᠥᠳᠡᠯᠭᠡᠭᠰᠡᠨ ᠠᠷᠪᠠᠨ ᠡᠳᠦᠷ) ᠠᠷᠠᠪ ᠤ᠋ᠨ ᠮᠢᠩᠭᠠ ᠨᠢᠭᠡᠨ ᠰᠥᠨᠢ ᠶ᠋ᠢᠨ ᠦᠯᠢᠭᠡᠷ ᠭᠡᠬᠦ ᠵᠡᠷᠭᠡ ᠶ᠋ᠢ ᠣᠷᠴᠢᠭᠤᠯᠵᠤ ᠦᠭᠡ ᠨᠠᠢᠷᠠᠭᠤᠯᠬᠤ᠂ ᠡᠪᠯᠡᠭᠦᠯᠬᠦ᠂ ᠤᠳᠬᠠ ᠶ᠋ᠢ ᠨᠡᠪᠲᠡᠷᠡᠭᠦᠯᠬᠦ᠂ ᠪᠢᠴᠢᠭ ᠵᠣᠬᠢᠶᠠᠬᠤ ᠶ᠋ᠢᠨ ᠨᠢᠭᠡ ᠶᠣᠰᠣᠨ ᠤ᠋ ᠰᠤᠷᠭᠠᠯ ᠬᠢᠭᠰᠡᠨ ᠨᠢ ᠬᠣᠵᠢᠮ ᠨᠠᠳᠠᠳᠤ ᠶᠡᠬᠡᠯᠡ ᠲᠤᠰᠠ ᠪᠣᠯᠵᠠᠢ᠃ ᠣᠳᠣ᠂ ᠲᠡᠷᠡ ᠬᠣᠷᠢ ᠭᠤᠴᠢᠨ ᠵᠢᠯ ᠦ᠋ᠨ ᠡᠮᠦᠨᠡ ᠡᠴᠡ ᠣᠷᠴᠢᠭᠤᠯᠤᠭᠰᠠᠭᠠᠷ ᠢᠷᠡᠭᠰᠡᠨ ᠵᠦᠢᠯ ᠢ᠋ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠵᠤ ᠦᠵᠡᠬᠦ ᠳ᠋ᠦ᠍᠂ ᠶᠠᠳᠠᠬᠤ ᠦᠭᠡᠢ ᠶᠠᠭᠤᠮᠠ ᠳᠡᠭᠡᠷᠡ ᠶᠡᠬᠡᠯᠡ ᠶᠠᠳᠠᠵᠤ ᠵᠦᠳᠡᠵᠦ᠂ ᠵᠦᠳᠡᠬᠦ ᠦᠭᠡᠢ ᠶᠠᠭᠤᠮᠠᠨ ᠳᠡᠭᠡᠷᠡ ᠮᠢᠬᠠ ᠪᠠᠨ ᠢᠳᠡᠵᠦ ᠪᠠᠢᠭᠰᠠᠨ ᠵᠦᠢᠯ ᠲᠤᠩ ᠣᠯᠠᠨ ᠪᠠᠢᠵᠠᠢ᠃ ᠲᠡᠭᠡᠵᠦ ᠨᠤᠬᠤᠯᠤᠨ ᠣᠷᠴᠢᠭᠤᠯᠵᠤ ᠪᠠᠢᠭᠰᠠᠨ ᠤ᠋ ᠠᠷᠪᠠᠨ ᠬᠤᠪᠢ ᠶ᠋ᠢᠨ ᠪᠠᠷᠤᠭ ᠨᠠᠢ᠍ᠮᠠᠨ ᠬᠤᠪᠢ ᠶ᠋ᠢ ᠰᠡᠳᠬᠦᠯ ᠳᠡᠪᠲᠡᠷ ᠵᠡᠷᠭᠡ ᠳ᠋ᠦ᠍ ᠬᠡᠪᠯᠡᠨ ᠨᠡᠢᠲᠡᠯᠡᠭᠰᠡᠨ ᠪᠢᠯᠡ᠃
ᠦᠭᠡ ᠨᠠᠢᠷᠠᠭᠤᠯᠭᠠ ᠶ᠋ᠢ ᠡᠷᠬᠢᠮᠯᠡᠵᠦ᠂ ᠤᠳᠬᠠ ᠶ᠋ᠢ ᠢᠷᠠᠭᠤ ᠲᠣᠳᠣᠷᠬᠠᠢ ᠪᠠᠷ ᠨᠡᠪᠲᠡᠷᠡᠭᠦᠯᠬᠦ ᠶ᠋ᠢᠨ ᠰᠤᠷᠭᠠᠯ ᠢ᠋ ᠡᠢᠨᠬᠦ ᠬᠢᠭᠰᠡᠨ ᠨᠢ ᠵᠣᠬᠢᠶᠠᠯᠴᠢ ᠪᠣᠯᠬᠤ ᠶ᠋ᠢᠨ ᠨᠢᠭᠡ ᠶᠣᠰᠣᠨ ᠤ᠋ ᠰᠤᠷᠭᠠᠭᠤᠯᠢ ᠮᠡᠲᠦ ᠰᠠᠨᠠᠭᠳᠠᠬᠤ ᠠᠵᠢ᠃
ᠵᠥᠪᠯᠡᠯᠲᠦ ᠶ᠋ᠢᠨ ᠡᠬᠡ ᠣᠷᠣᠨ ᠤ᠋ ᠶᠡᠬᠡ ᠲᠡᠢᠨ ᠦ᠌ ᠦᠶᠡᠰ᠂ ᠦᠨᠡᠨ ᠰᠣᠨᠢᠨ ᠤ᠋ ᠭᠠᠵᠠᠷ ᠤᠳᠬᠠ ᠵᠣᠬᠢᠶᠠᠯ ᠤ᠋ᠨ ᠠᠵᠢᠯ ᠢ᠋ ᠬᠢᠬᠦ ᠦᠶᠡᠰ᠂ ᠵᠥᠪᠯᠡᠯᠲᠦ ᠶ᠋ᠢᠨ ᠪᠢᠴᠢᠭ ᠦ᠋ᠨ ᠬᠥᠮᠦᠨ᠂ ᠵᠣᠬᠢᠶᠠᠯᠴᠢ ᠨᠠᠷ ᠤ᠋ᠨ ᠲᠡᠷᠡ ᠴᠠᠭ ᠲᠤ᠌ ᠹᠷᠣᠨᠲ ᠲᠤ᠌ ᠬᠢᠭᠡᠳ ᠠᠷᠤ ᠲᠠᠯᠠ ᠳ᠋ᠤ᠌ ᠵᠥᠪᠯᠡᠯᠲᠦ ᠶ᠋ᠢᠨ ᠬᠥᠮᠦᠨ ᠠᠷᠠᠳ ᠤ᠋ᠨ ᠪᠠᠢᠭᠤᠯᠤᠭᠰᠠᠨ ᠦᠯᠡᠮᠵᠢ ᠶ᠋ᠢᠨ ᠵᠢᠳᠬᠦᠯ ᠭᠠᠪᠢᠶᠠ ᠶ᠋ᠢ ᠰᠡᠳᠬᠢᠯ ᠵᠢᠷᠦᠬᠡ ᠬᠥᠳᠡᠯᠭᠡᠨ ᠪᠠᠬᠠᠲᠠᠢ ᠰᠠᠢᠬᠠᠨ ᠢ᠋ᠶ᠋ᠠᠷ ᠦᠵᠡᠭᠦᠯᠦᠭᠰᠡᠨ ᠵᠣᠬᠢᠶᠠᠯ ᠥᠭᠦᠯᠡᠯ ᠨᠠᠢᠷᠠᠭᠤᠯᠤᠯ ᠢ᠋ ᠣᠷᠴᠢᠭᠤᠯᠤᠨ ᠨᠡᠢᠲᠡᠯᠡᠬᠦ᠂ ᠮᠥᠨ ᠮᠠᠨ ᠤ᠋ ᠠᠷᠠᠳ ᠲᠦᠮᠡᠨ ᠦ᠌ ᠴᠢᠩ ᠰᠡᠳᠬᠢᠯ ᠢ᠋ᠶ᠋ᠡᠷ ᠹᠷᠣᠨᠲ ᠲᠤ᠌ ᠲᠤᠰᠠᠯᠠᠨ ᠪᠦᠬᠦᠢ ᠪᠠᠢᠳᠠᠯ ᠢ᠋ ᠪᠢᠴᠢᠬᠦ ᠵᠡᠷᠭᠡᠪᠡᠷ ᠰᠣᠨᠢᠨ ᠳ᠋ᠤ᠌ ᠥᠭᠦᠯᠡᠯ ᠪᠢᠴᠢᠵᠦ ᠰᠤᠷᠬᠤ ᠰᠤᠷᠭᠠᠯ ᠬᠢᠵᠦ᠂ ᠵᠥᠪᠯᠡᠯᠲᠦ ᠶ᠋ᠢᠨ ᠰᠡᠳᠬᠦᠯᠴᠢ ᠨᠠᠷ ᠤ᠋ᠨ ᠲᠤᠷᠰᠢᠯᠭᠠ ᠳᠡᠮᠵᠢᠯᠭᠡ ᠪᠡᠷ ᠤᠯᠠᠮᠯᠠᠨ ᠥᠭᠦᠯᠡᠯ ᠨᠠᠢᠷᠠᠭᠤᠯᠤᠯ ᠪᠢᠴᠢᠬᠦ ᠪᠣᠯᠵᠤ᠂ ᠨᠢᠭᠡ ᠶᠣᠰᠣᠨ ᠤ᠋ ᠰᠡᠳᠬᠦᠯᠴᠢ ᠶ᠋ᠢᠨ ᠰᠤᠷᠭᠠᠭᠤᠯᠢ ᠬᠢᠭᠰᠡᠨ ᠨᠢ ᠵᠣᠬᠢᠶᠠᠯᠴᠢ ᠪᠣᠯᠬᠤ ᠳ᠋ᠤ᠌ ᠪᠠᠰᠠ ᠨᠢᠭᠡ ᠠᠯᠬᠤᠮ ᠳᠠᠪᠰᠢᠭᠰᠠᠨ ᠪᠢᠯᠡ᠃ ᠰᠣᠨᠢᠨ ᠤ᠋ ᠭᠠᠵᠠᠷ ᠠᠵᠢᠯᠯᠠᠬᠤ ᠦᠶᠡᠰ᠂ ᠵᠣᠬᠢᠶᠠᠯᠴᠢ ᠬᠥᠮᠦᠨ ᠳ᠋ᠦ᠍ ᠡᠷᠢᠭᠡᠳ ᠣᠯᠳᠠᠭ ᠦᠭᠡᠢ ᠡᠷᠳᠡᠨᠢ ᠮᠡᠲᠦ᠂ ᠰᠤᠷᠤᠭᠠᠳ ᠣᠯᠳᠠᠳᠠᠭ ᠦᠭᠡᠢ ᠰᠤᠪᠤᠳ ᠮᠡᠲᠦ ᠰᠠᠢᠬᠠᠨ ᠪᠠᠷᠢᠮᠲᠠ᠂ ᠦᠨᠡᠨ ᠪᠣᠳᠠᠲᠠᠢ ᠵᠦᠢᠯ᠂ ᠴᠢᠩ ᠰᠡᠳᠬᠢᠯᠲᠦ ᠮᠠᠨ ᠤ᠋ ᠠᠷᠠᠳ ᠤ᠋ᠨ ᠵᠢᠳᠬᠦᠯ ᠬᠥᠳᠡᠯᠮᠦᠷᠢ ᠶ᠋ᠢᠨ ᠦᠯᠢᠭᠡᠷ ᠵᠢᠱ᠌ᠢᠶᠡ ᠡᠳᠦᠢ ᠲᠡᠳᠦᠢ ᠪᠣᠯᠵᠤ ᠢᠷᠡᠭᠰᠡᠨ ᠳ᠋ᠦ᠍᠂ ᠥᠭᠦᠯᠡᠯ ᠨᠠᠢᠷᠠᠭᠤᠯᠤᠨ ᠪᠢᠴᠢᠬᠦᠢᠴᠡ ᠪᠡᠨ ᠪᠣᠯᠤᠭᠰᠠᠨ ᠠ᠋ᠴᠠ ᠪᠠᠰᠠ ᠨᠢᠭᠡ ᠠᠯᠬᠤᠮ ᠳᠠᠪᠰᠢᠵᠤ ᠲᠣᠭᠣᠵᠢ ᠷᠣᠮᠠᠨ ᠵᠡᠷᠭᠡ ᠶ᠋ᠢᠨ ᠲᠣᠮᠣᠬᠠᠨ ᠵᠣᠬᠢᠶᠠᠯ ᠪᠢᠴᠢᠬᠦ ᠵᠣᠷᠢᠭ ᠤᠷᠮᠠᠰ ᠲᠥᠷᠥᠵᠦ᠂1945—1947 ᠣᠨ ᠳ᠋ᠤ᠌ ᠵᠥᠪᠯᠡᠯᠲᠦ ᠤᠯᠤᠰ ᠤ᠋ᠨ ᠮᠣᠰᠺᠸᠠ ᠬᠣᠲᠠᠨᠠ ᠵᠥᠪᠯᠡᠯᠲᠦ ᠶ᠋ᠢᠨ ᠣᠯᠠᠨ ᠵᠣᠬᠢᠶᠠᠯᠴᠢ ᠨᠥᠬᠥᠳ ᠲᠡᠢ ᠠᠭᠤᠯᠵᠠᠨ ᠰᠡᠳᠬᠢᠯ ᠦ᠋ᠨ ᠦᠭᠡᠰ ᠢ᠋ ᠬᠠᠷᠢᠯᠴᠠᠨ ᠶᠠᠷᠢᠯᠴᠠᠵᠤ᠂ ᠲᠣᠮᠣ ᠬᠡᠯᠪᠡᠷᠢ ᠶ᠋ᠢᠨ ᠵᠣᠬᠢᠶᠠᠯ ᠪᠢᠴᠢᠬᠦ ᠠᠷᠭᠠ ᠣᠨᠣᠯ ᠢ᠋ ᠬᠡᠯᠡᠯᠴᠡᠨ ᠵᠥᠪᠯᠡᠯᠳᠦᠯᠴᠡᠵᠦ᠂ ᠲᠡᠢᠨ ᠦ᠌ ᠦᠶᠡ ᠤᠯᠤᠰ ᠤ᠋ᠨ ᠨᠢᠭᠡᠨ ᠰᠠᠢᠨ ᠮᠠᠯᠴᠢᠨ ᠰᠢᠷᠴᠢᠨ ᠭᠡᠭᠴᠢ ᠶ᠋ᠢᠨ ᠪᠡᠶᠡ ᠶ᠋ᠢᠨ ᠨᠠᠮᠲᠠᠷ ᠲᠡᠦᠬᠡ ᠣᠯᠵᠤ ᠠᠪᠤᠭᠰᠠᠨ ᠢ᠋ ᠠᠩᠬᠠᠨ ᠤ᠋ ᠡᠭᠦᠰᠬᠡᠯ ᠪᠣᠯᠭᠠᠨ᠂ ᠨᠢᠭᠡᠨ ᠲᠡᠦᠬᠡᠨ ᠷᠣᠮᠠᠨ ᠬᠢᠬᠦ ᠪᠡᠷ ᠵᠣᠷᠢᠨ ᠲᠤᠭᠤᠷᠪᠢᠵᠤ᠂1947 ᠣᠨ ᠠ᠋ᠴᠠ ᠪᠣᠳᠣᠭᠰᠠᠭᠠᠷ ᠢᠷᠡᠭᠰᠡᠨ ᠪᠢᠯᠡ᠃ ᠨᠡᠷᠡ ᠶ᠋ᠢ ᠨᠢ ᠦᠷ ᠦ᠋ᠨ ᠲᠤᠶᠠᠭᠠ ᠭᠡᠵᠦ ᠨᠡᠷᠡᠯᠡᠬᠦ ᠪᠡᠷ ᠪᠣᠳᠣᠭᠰᠠᠨ ᠨᠢ ᠮᠢᠨᠦ ᠨᠠᠢᠵᠠ᠂ ᠵᠥᠪᠯᠡᠯᠲᠦ ᠶ᠋ᠢᠨ ᠡᠷᠬᠢᠮ ᠵᠣᠬᠢᠶᠠᠯᠴᠢ ᠨᠢᠺᠤᠯᠠᠢ ᠲᠢᠬᠤᠨᠤᠸ ᠶᠠᠷᠢᠯᠴᠠᠭᠰᠠᠭᠠᠷ᠂ ᠲᠡᠭᠡᠵᠦ ᠨᠡᠷᠡᠯᠡᠬᠦ ᠪᠡᠷ ᠲᠣᠭᠲᠠᠵᠤ᠂ ᠨᠠᠮᠠᠶ᠋ᠢ ᠤᠷᠮᠠᠰᠢᠭᠤᠯᠤᠨ᠂ ᠨᠠᠳᠠᠳᠤ ᠵᠣᠷᠢᠭᠤᠯᠤᠨ ᠪᠢᠴᠢᠵᠦ ᠥᠭᠭᠦᠭᠰᠡᠨ ᠰᠢᠯᠦᠭᠯᠡᠯ ᠢ᠋ ᠡᠨᠡᠬᠦ ᠷᠣᠮᠠᠨ ᠤ᠋ ᠡᠬᠢᠨ ᠳ᠋ᠦ᠍ ᠪᠠᠬᠠᠳᠤᠨ ᠭᠠᠷᠭᠠᠯᠠ᠃
ᠦᠷ ᠦ᠋ᠨ ᠲᠤᠶᠠᠭᠠ ᠭᠡᠳᠡᠭ ᠡᠨᠡ ᠷᠣᠮᠠᠨ ᠢ᠋ ᠪᠢᠴᠢᠬᠦ ᠳ᠋ᠡᠭᠡᠨ ᠮᠢᠨᠦ ᠪᠡᠶᠡ᠂ ᠵᠢᠩᠬᠢᠨᠢ ᠪᠣᠳᠠᠲᠠᠢ ᠲᠡᠦᠬᠡ ᠵᠢᠨ ᠮᠡᠲ᠋ᠸᠷᠢᠶᠡᠯ ᠢ᠋ ᠤᠷᠠᠨ ᠰᠠᠢᠬᠠᠨ ᠤ᠋ ᠠᠷᠭᠠ ᠪᠠᠷ ᠪᠣᠯᠪᠠᠰᠤᠷᠠᠭᠤᠯᠬᠤ ᠶ᠋ᠢ ᠣᠷᠣᠯᠳᠣᠭᠰᠠᠨ ᠤᠴᠢᠷ ᠤᠭ ᠦᠨᠡᠨ ᠪᠠᠢᠳᠠᠯ ᠠ᠋ᠴᠠ ᠬᠠᠵᠠᠢᠯᠭᠠᠨ᠂ ᠡᠯᠳᠡᠪ ᠤᠷᠠᠨ ᠵᠣᠬᠢᠶᠠᠯ ᠢ᠋ᠶ᠋ᠠᠷ ᠵᠣᠷᠢᠭ ᠮᠡᠳᠡᠨ ᠴᠢᠮᠡᠭᠯᠡᠬᠦ ᠵᠢᠷᠦᠬᠡ ᠬᠦᠷᠦᠭᠰᠡᠨ ᠦᠭᠡᠢ᠃ ᠲᠡᠷᠡ ᠤᠴᠢᠷ ᠠ᠋ᠴᠠ ᠤᠭ ᠵᠣᠬᠢᠶᠠᠯ ᠳ᠋ᠤ᠌ ᠭᠠᠷᠤᠭᠰᠠᠨ ᠬᠥᠮᠦᠰ ᠦ᠋ᠨ ᠠᠷᠪᠠᠨ ᠤ᠋ ᠶᠢᠰᠦᠨ ᠬᠤᠪᠢ ᠳ᠋ᠤᠨᠢ ᠴᠣᠬᠣᠮ ᠬᠦ᠌ ᠪᠣᠳᠠᠲᠠᠢ ᠨᠡᠷᠡ ᠪᠡᠷ ᠨᠡᠷᠡᠯᠡᠭᠰᠡᠨ᠂ ᠮᠠᠮᠠ ᠶ᠋ᠢᠨ ᠳᠠᠯᠠᠩ ᠭᠡᠬᠦ ᠵᠡᠷᠭᠡ ᠶ᠋ᠢᠨ ᠬᠣᠴᠢ ᠪᠦᠬᠦᠢ ᠬᠥᠮᠦᠨ ᠢ᠋ ᠬᠦᠷᠲᠡᠯᠡ᠂ ᠲᠡᠷᠡ ᠬᠡᠪ ᠢ᠋ᠶ᠋ᠡᠷ ᠨᠢ ᠪᠢᠴᠢᠵᠦ᠂ ᠵᠠᠷᠢᠮ ᠨᠢᠭᠡᠨ ᠭᠠᠵᠠᠷ ᠦᠨᠡᠨ ᠬᠡᠷᠡᠭ ᠭᠡᠵᠦ ᠵᠡᠭᠦᠯᠲᠡ ᠵᠡᠭᠦᠪᠡᠴᠦ᠂ ᠲᠡᠷᠡ ᠪᠦᠷᠢ ᠳ᠋ᠦ᠍ ᠦᠨᠡᠨ ᠬᠡᠷᠡᠭ᠂ ᠦᠨᠡᠨ ᠬᠡᠷᠡᠭ ᠭᠡᠵᠦ ᠲᠣᠭᠠᠴᠢᠬᠤ ᠪᠣᠯᠪᠠᠯ ᠨᠢᠭᠡᠨ ᠬᠠᠭᠤᠳᠠᠰᠤᠨ ᠳ᠋ᠤ᠌ ᠡᠳᠦᠢ ᠲᠡᠳᠦᠢ ᠵᠡᠭᠦᠯᠲᠡ ᠬᠢᠬᠦ ᠳ᠋ᠦ᠍ ᠬᠦᠷᠬᠦ ᠲᠤᠯᠠ ᠠᠷᠭᠠ ᠪᠤᠶᠤ ᠬᠡᠮᠨᠡᠵᠦ᠂ ᠬᠠᠶᠠ ᠭᠠᠭᠴᠠ ᠨᠢᠭᠡ ᠭᠠᠵᠠᠷ ᠲᠡᠮᠳᠡᠭᠯᠡᠪᠡ᠃ ᠪᠢᠴᠢᠭ ᠪᠠᠷᠢᠮᠲᠠ ᠠ᠋ᠴᠠ ᠡᠰᠢ ᠲᠠᠲᠠᠬᠤ ᠳ᠋ᠠᠭᠠᠨ ᠤᠭ ᠡᠬᠡ ᠪᠢᠴᠢᠭ ᠢ᠋ ᠨᠢ ᠨᠢᠭᠡ ᠴᠦ᠍ ᠦᠭᠡ ᠬᠠᠵᠠᠢᠯᠭᠠᠯ ᠦᠭᠡᠢ ᠰᠡᠢᠷᠡᠭᠦᠯᠵᠦ᠂ ᠭᠠᠭᠴᠠᠬᠦ ᠵᠠᠷᠢᠮ ᠨᠢᠭᠡᠨ ᠭᠠᠵᠠᠷ ᠲᠣᠪᠴᠢᠯᠠᠬᠤ ᠠ᠋ᠴᠠ ᠥᠭᠡᠷᠡ ᠬᠤᠪᠢᠰᠤᠨ ᠥᠭᠡᠷᠡᠴᠢᠯᠡᠭᠰᠡᠨ ᠵᠦᠢᠯ ᠦᠭᠡᠢ ᠪᠢᠯᠡ᠃ ᠤᠭ ᠷᠣᠮᠠᠨ ᠢ᠋ ᠵᠣᠬᠢᠶᠠᠬᠤ ᠪᠠᠨ ᠮᠣᠩᠭᠣᠯ ᠦᠰᠦᠭ ᠦ᠋ᠨ ᠪᠢᠴᠢᠭ ᠪᠠᠷᠢᠮᠲᠠ ᠠ᠋ᠴᠠ ᠭᠠᠳᠠᠨᠠ᠂ ᠣᠷᠣᠰ᠂ ᠭᠧᠷᠮᠠᠨ ᠵᠡᠷᠭᠡ ᠬᠡᠯᠡ ᠪᠡᠷ ᠵᠣᠬᠢᠶᠠᠨ ᠨᠡᠢᠲᠡᠯᠡᠭᠰᠡᠨ ᠨᠣᠮ ᠳᠡᠪᠲᠡᠷ᠂ ᠵᠢᠴᠢ ᠠᠷᠠᠳ ᠤ᠋ᠨ ᠠᠮᠠᠨ ᠵᠣᠬᠢᠶᠠᠯ ᠵᠡᠷᠭᠡ ᠶ᠋ᠢ ᠲᠤᠯᠭᠤᠷ ᠪᠣᠯᠭᠠᠨ ᠬᠡᠷᠡᠭᠯᠡᠪᠡ᠃
ᠤᠯᠤᠰ ᠤ᠋ᠨ ᠭᠤᠴᠢᠨ ᠵᠢᠯ ᠦ᠋ᠨ ᠰᠠᠢᠬᠠᠨ ᠣᠢ ᠶ᠋ᠢ ᠥᠴᠦᠬᠡᠨ ᠪᠣᠯᠪᠠᠴᠤ ᠪᠦᠲᠦᠭᠡᠯ ᠢ᠋ᠶ᠋ᠡᠷ ᠤᠭᠲᠤᠨ ᠲᠡᠮᠳᠡᠭᠯᠡᠬᠦ ᠶ᠋ᠢ ᠵᠣᠬᠢᠶᠠᠯᠴᠢ ᠶ᠋ᠢᠨ ᠬᠤᠪᠢ ᠪᠠᠷ ᠮᠠᠰᠢ ᠡᠷᠬᠢᠮ ᠪᠣᠯᠭᠠᠭᠰᠠᠨ ᠤᠴᠢᠷ᠂ ᠦᠷ ᠦ᠋ᠨ ᠲᠤᠶᠠᠭᠠ ᠭᠡᠳᠡᠭ ᠷᠣᠮᠠᠨ ᠤ᠋ ᠭᠤᠷᠪᠠᠨ ᠳᠡᠪᠲᠡᠷ ᠢ᠋ ᠠᠷᠭᠠ ᠪᠤᠶᠤ ᠮᠠᠰᠢ ᠪᠣᠭᠣᠨᠢ ᠱᠠᠭᠠᠷ ᠬᠤᠭᠤᠴᠠᠭᠠᠨᠠ ᠪᠢᠴᠢᠵᠦ ᠳᠠᠭᠤᠰᠬᠠᠬᠤ ᠪᠣᠯᠤᠭᠰᠠᠨ ᠤ᠋ ᠳᠡᠭᠡᠷᠡ᠂ ᠤᠷᠢᠳ ᠡᠮᠦᠨᠡ ᠡᠢᠮᠦ ᠬᠡᠮᠵᠢᠶᠡᠨ ᠦ᠌ ᠲᠣᠮᠣ ᠵᠣᠬᠢᠶᠠᠯ ᠢ᠋ ᠤᠩᠰᠢᠬᠤ ᠠ᠋ᠴᠠ ᠪᠢᠰᠢ ᠶᠡᠷᠦ ᠪᠢᠴᠢᠵᠦ ᠦᠵᠡᠭᠡ ᠦᠭᠡᠢ ᠵᠡᠷᠭᠡ ᠪᠡᠷᠬᠡᠲᠡᠢ ᠵᠦᠢᠯ ᠨᠡᠯᠢᠶᠡᠳ ᠪᠠᠢᠭᠰᠠᠨ᠂ ᠡᠭᠦᠨ ᠳ᠋ᠦ᠍ ᠮᠢᠨᠦ ᠪᠡᠶᠡ᠂ ᠵᠥᠪᠯᠡᠯᠲᠦ ᠶ᠋ᠢᠨ ᠵᠣᠬᠢᠶᠠᠯᠴᠢ ᠠᠯᠸᠺᠰᠸᠢ ᠲᠤᠯᠰᠲ᠋ᠤᠢ ᠶ᠋ᠢᠨ ᠲᠡᠦᠬᠡ ᠶ᠋ᠢᠨ ᠵᠣᠬᠢᠶᠠᠯ ᠢ᠋ ᠪᠠᠬᠠᠳᠤᠳᠠᠭ ᠤᠴᠢᠷ᠂ ᠲᠡᠭᠦᠨ ᠦ᠌ ᠪᠢᠴᠢᠬᠦ ᠠᠷᠭᠠ ᠵᠦᠢ ᠶ᠋ᠢ ᠨᠡᠯᠢᠶᠡᠳ ᠰᠣᠨᠢᠷᠬᠠᠭᠰᠠᠨ᠂ ᠡᠭᠦᠨ ᠳ᠋ᠦ᠍ ᠲᠡᠷᠡ ᠵᠣᠬᠢᠶᠠᠯᠴᠢ ᠶ᠋ᠢᠨ《 ᠲᠠᠷᠢᠶᠠ ᠪᠤᠳᠠᠭᠠ》 ᠭᠡᠳᠡᠭ ᠲᠣᠭᠣᠵᠢ ᠪᠢᠴᠢᠭᠰᠡᠨ ᠲᠤᠬᠠᠢ ᠥᠭᠦᠯᠡᠭᠰᠡᠨ ᠦᠭᠡ ᠶ᠋ᠢ ᠨᠢ ᠪᠢ ᠡᠨᠡᠬᠦ ᠴᠢᠳᠠᠨ ᠶᠠᠳᠠᠨ ᠪᠢᠴᠢᠭᠰᠡᠨ ᠦᠷ ᠦ᠋ᠨ ᠲᠤᠶᠠᠭᠠ ᠭᠡᠳᠡᠭ ᠷᠣᠮᠠᠨ ᠳ᠋ᠠᠭᠠᠨ ᠡᠰᠢ ᠲᠠᠲᠠᠵᠤ ᠬᠡᠯᠡᠬᠦ ᠶ᠋ᠢ ᠬᠦᠰᠡᠬᠦ ᠨᠢ᠂ ᠲᠣᠯᠰᠲ᠋ᠣᠢ ᠶ᠋ᠢᠨ ᠪᠢᠴᠢᠭᠰᠡᠨ ᠨᠢ᠄
《 ᠲᠠᠷᠢᠶᠠ ᠪᠤᠳᠠᠭᠠ》— ᠪᠣᠯ ᠲᠡᠦᠬᠡ ᠶ᠋ᠢᠨ ᠪᠠᠲᠤᠲᠠᠢ ᠨᠠᠷᠢᠨ ᠮᠠᠲ᠋ᠧᠷᠢᠶᠠᠯ ᠢ᠋ ᠤᠷᠠᠨ ᠰᠠᠢᠬᠠᠨ ᠤ᠋ ᠠᠷᠭᠠ ᠪᠠᠷ ᠪᠣᠯᠪᠠᠰᠤᠷᠠᠭᠤᠯᠬᠤ ᠶ᠋ᠢᠨ ᠲᠤᠷᠰᠢᠴᠠ ᠪᠠᠢᠭᠰᠠᠨ ᠤᠴᠢᠷ᠂ ᠪᠠᠨᠲ᠋ᠨᠽᠢ ᠲᠤᠰᠢᠶᠠᠰᠤᠲᠠᠢ ᠪᠠᠢᠬᠤ ᠨᠢ ᠠᠷᠭᠠ ᠦᠭᠡᠢ᠃ ᠭᠡᠪᠡᠴᠦ ᠡᠢᠮᠦ ᠲᠤᠷᠰᠢᠴᠠ ᠮᠢᠨᠢ ᠬᠣᠵᠢᠮ ᠬᠣᠢᠨᠠ ᠬᠦᠨᠳᠦ ᠬᠡᠷᠡᠭ ᠪᠣᠯᠬᠤ ᠴᠦ᠍ ᠮᠠᠭᠠᠳ ᠦᠭᠡᠢ᠃ ᠵᠣᠬᠢᠶᠠᠯᠴᠢ ᠬᠥᠮᠦᠨ ᠲᠤᠷᠰᠢᠯᠭᠠ ᠬᠢᠬᠦ᠂ ᠮᠥᠨ ᠲᠡᠭᠦᠨ ᠡᠴᠡ ᠪᠣᠯᠵᠤ ᠠᠯᠳᠠᠭᠠ ᠴᠦ᠍ ᠬᠢᠬᠦ ᠡᠷᠬᠡᠲᠡᠢ ᠭᠡᠳᠡᠭ ᠢ᠋ ᠪᠢ ᠬᠠᠮᠠᠭᠠᠯᠠᠨ ᠵᠢᠳᠬᠦᠬᠦ ᠬᠥᠮᠦᠨ ᠰᠢᠦ᠃ ᠵᠢᠷᠦᠬᠡᠯᠡᠨ ᠣᠷᠣᠯᠳᠣᠬᠤ ᠦᠭᠡᠢ ᠶᠦᠮ ᠪᠣᠯ ᠤᠷᠠᠯᠢᠭ ᠴᠢᠳᠠᠯ ᠴᠦ᠍ ᠬᠠᠮᠢᠭᠠ ᠠ᠋ᠴᠠ ᠪᠣᠢ ᠪᠣᠯᠬᠤ ᠪᠢᠯᠡ ᠭᠡᠵᠦ ᠪᠢᠴᠢᠵᠡᠢ᠃ ᠡᠭᠦᠨ ᠳ᠋ᠦ᠍ ᠪᠢ᠂ ᠮᠥᠨ ᠲᠡᠦᠬᠡ ᠶ᠋ᠢᠨ ᠨᠠᠷᠢᠨ ᠮᠠᠲ᠋ᠧᠷᠢᠶᠠᠯ ᠢ᠋ ᠤᠷᠠᠨ ᠵᠣᠬᠢᠶᠠᠯ ᠪᠣᠯᠭᠠᠬᠤ ᠭᠡᠵᠦ ᠠᠩᠬᠠ ᠲᠤᠷᠰᠢᠨ ᠣᠷᠣᠯᠳᠣᠬᠤ ᠳ᠋ᠠᠭᠠᠨ《ᠬᠣᠵᠢᠮ ᠬᠣᠢᠨᠠ᠂ ᠬᠦᠨᠳᠦ ᠬᠡᠷᠡᠭ ᠪᠣᠯᠬᠤ ᠴᠦ᠍ ᠮᠠᠭᠠᠳ ᠦᠭᠡᠢ》 ᠭᠡᠵᠦ ᠲᠣᠯᠰᠲ᠋ᠤᠢ ᠶ᠋ᠢᠨ ᠲᠡᠢᠨᠬᠦ ᠦᠵᠡᠭᠰᠡᠨ ᠢ᠋ ᠶᠡᠬᠡᠯᠡ ᠪᠠᠬᠠᠳᠤᠨ ᠪᠢᠰᠢᠷᠡᠵᠦ᠂ ᠲᠡᠷᠡ ᠲᠤᠷᠰᠢᠬᠰᠠᠨᠴᠢᠯᠠᠨ᠂ ᠪᠠᠰᠠ ᠴᠢᠳᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠢᠷᠢ ᠪᠡᠷ ᠲᠤᠷᠰᠢᠵᠤ ᠣᠷᠣᠯᠳᠣᠭᠰᠠᠨ ᠮᠢᠨᠢ ᠡᠨᠡ《 ᠦᠷ ᠦ᠋ᠨ ᠲᠤᠶᠠᠭᠠ》 ᠭᠡᠭᠴᠢ ᠷᠣᠮᠠᠨ ᠪᠢᠯᠡ᠃ ᠰᠡᠳᠬᠢᠯᠭᠡ ᠠᠳᠠᠯᠢ ᠵᠣᠷᠢᠯᠭᠠ ᠨᠢᠭᠡᠨ ᠵᠣᠬᠢᠶᠠᠯᠴᠢ ᠨᠥᠬᠥᠳ᠂ ᠮᠥᠨ ᠵᠠᠷᠢᠮ ᠰᠤᠷᠭᠠᠭᠤᠯᠢ ᠶ᠋ᠢᠨ ᠣᠶᠤᠲᠠᠨ ᠵᠡᠷᠭᠡ ᠨᠥᠬᠥᠳ᠂ ᠮᠢᠨᠦ ᠡᠢᠨᠬᠦ ᠪᠢᠴᠢᠬᠦ ᠦᠶᠡᠰ ᠪᠦᠯᠦᠭ ᠪᠦᠷᠢ ᠶ᠋ᠢ ᠨᠢᠭᠲᠠᠯᠠᠨ ᠦᠵᠡᠵᠦ᠂ ᠰᠠᠨᠠᠯ ᠪᠣᠳᠣᠯ ᠢ᠋ᠶ᠋ᠠᠨ ᠬᠠᠷᠠᠮ ᠦᠭᠡᠢ ᠬᠡᠯᠡᠭᠰᠡᠨ ᠨᠢ ᠨᠠᠳᠠᠳᠤ ᠶᠡᠬᠡᠯᠡ ᠲᠤᠰᠠ ᠪᠣᠯᠤᠭᠰᠠᠨ ᠲᠤᠯᠠ᠂ ᠲᠡᠳᠡ ᠪᠦᠬᠦ ᠨᠥᠬᠥᠳ ᠲᠦ᠍ ᠴᠢᠩ ᠰᠡᠳᠬᠢᠯ ᠡᠴᠡ ᠲᠠᠯᠠ ᠥᠭᠭᠦᠨᠡ᠃ ᠪᠦᠯᠦᠭ ᠪᠦᠷᠢ ᠶ᠋ᠢᠨ ᠡᠬᠢᠨ ᠳ᠋ᠦ᠍ ᠰᠠᠨᠠᠭᠠ ᠶ᠋ᠢ ᠦᠵᠡᠭᠦᠯᠦᠭᠰᠡᠨ ᠪᠦᠯᠦᠭ ᠦ᠋ᠨ ᠡᠰᠢᠯᠡᠯ ᠳ᠋ᠦ᠍ ᠣᠯᠠᠨ ᠵᠣᠬᠢᠶᠠᠯᠴᠢ ᠨᠠᠷ ᠤ᠋ᠨ ᠰᠢᠯᠦᠭ ᠵᠡᠷᠭᠡ ᠡᠴᠡ ᠡᠰᠢ ᠲᠠᠲᠠᠭᠰᠠᠨ᠂ ᠡᠭᠦᠨ ᠢ᠋ᠶ᠋ᠡᠨ ᠲᠡᠷᠢᠭᠦᠨ ᠳᠡᠪᠲᠡᠷ ᠦ᠋ᠨ ᠵᠠᠷᠢᠮ ᠪᠦᠯᠦᠭ ᠲᠦ᠍ ᠡᠰᠢᠯᠡᠯ ᠦ᠋ᠨ ᠦᠭᠡ ᠳᠤᠲᠠᠭᠤ ᠪᠠᠢᠭᠰᠠᠨ ᠢ᠋ ᠷᠸᠳᠠᠺᠲ᠋ᠣᠷ ᠨᠥᠬᠥᠷ ᠴᠠᠳᠠᠨᠵᠠᠪ ᠰᠤᠷᠪᠤᠯᠵᠢᠯᠠᠨ ᠡᠷᠢᠵᠦ᠂ ᠨᠥᠬᠥᠨ ᠭᠦᠢᠴᠡᠭᠡᠵᠦ ᠥᠭᠭᠦᠭᠰᠡᠨ ᠳ᠋ᠦ᠍ ᠪᠠᠶᠠᠷᠯᠠᠪᠠ᠃
ᠠᠩᠬᠠᠨ ᠤᠳᠠᠭᠠ ᠶ᠋ᠢᠨ ᠮᠢᠨᠦ ᠲᠤᠭᠤᠷᠪᠢᠨ ᠪᠢᠴᠢᠭᠰᠡᠨ ᠡᠨᠡᠬᠦ ᠷᠣᠮᠠᠨ ᠳ᠋ᠤ᠌ ᠭᠠᠭᠴᠠ ᠨᠢᠭᠡ ᠤᠨᠤᠵᠤ ᠪᠢᠴᠢᠭᠰᠡᠨ ᠵᠦᠢᠯ ᠪᠣᠢ ᠪᠣᠯ ᠲᠡᠳᠦᠢᠯᠡ ᠪᠢᠵᠡ᠃ ᠣᠰᠣᠯᠳᠠᠨ ᠠᠯᠳᠠᠭᠰᠠᠨ ᠵᠦᠢᠯ ᠪᠣᠢ ᠠᠬᠤᠯᠠ᠂ ᠤᠩᠰᠢᠨ ᠦᠵᠡᠬᠦ ᠣᠯᠠᠨ ᠨᠥᠬᠥᠳ ᠵᠠᠰᠠᠨ ᠵᠢᠭᠠᠪᠤᠷᠢᠯᠠᠬᠤ ᠰᠠᠨᠠᠯ ᠢ᠋ᠶ᠋ᠠᠨ ᠵᠣᠬᠢᠶᠠᠯᠴᠢ ᠨᠠᠳᠠᠳᠤ ᠬᠠᠷᠠᠮ ᠦᠭᠡᠢ ᠭᠠᠷᠭᠠᠵᠤ ᠲᠤᠰᠠᠯᠠᠬᠤ ᠶ᠋ᠢ ᠥᠴᠢᠮᠦ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠱᠠ᠂ ᠣᠶᠤᠨᠪᠠᠲᠤ᠂ ᠪᠠᠯ᠂ ᠤᠢᠭᠤᠷᠵᠢᠨ ᠣᠳᠬᠣᠨᠪᠠᠪᠠ᠂ ᠪᠠᠳᠮᠠᠰᠡᠴᠡᠨ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠠᠯᠲᠠᠨᠱᠠ᠂ ᠪᠠᠯ
ᠤᠩᠰᠢᠭᠴᠢ ᠄ ᠨᠠᠰᠤᠨ᠌ᠦ᠌ᠯᠵᠡᠢ