ᠬᠠᠢᠷᠠ ᠶ᠋ᠢᠨ ᠬᠠᠪᠤᠷ- ᠭ· ᠴᠢᠩᠪᠠᠭᠠᠲᠤᠷХайрын хавар-Г·Чинбаатар
359ᠬᠠᠢᠷᠠ ᠶ᠋ᠢᠨ ᠬᠠᠪᠤᠷ
ᠭ᠂ ᠴᠢᠩᠪᠠᠭᠠᠲᠤᠷ
ᠠᠵᠢᠯ ᠳ᠋ᠤ᠌ ᠭᠠᠷᠤᠭᠰᠠᠨ ᠤ᠋ ᠳᠠᠷᠠᠭᠠᠬᠠᠨ ᠪᠠᠢᠭᠰᠠᠨ ᠰᠠᠨ᠃ ᠰᠢᠨᠡ ᠣᠷᠴᠢᠨ ᠳ᠋ᠠᠭᠠᠨ ᠳᠠᠳᠴᠤ ᠡᠬᠢᠯᠡᠭᠰᠡᠨ ᠪᠣᠯᠪᠠᠴᠤ ᠦᠶᠡ ᠳᠠᠩ ᠤ᠋ᠨ ᠬᠥᠮᠦᠨ ᠴᠥᠭᠡᠨ ᠲᠡᠢ᠂ ᠲᠡᠷᠡ ᠮᠥᠷᠲᠡᠭᠡᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠦᠷᠢᠶᠡᠨ ᠳ᠋ᠡᠬᠢ ᠲᠣᠮᠣᠭᠠ ᠦᠭᠡᠢ ᠦᠶᠡ ᠮᠢᠨᠢ ᠥᠩᠭᠡᠷᠡᠭᠰᠡᠨ ᠪᠣᠯᠬᠣᠷ ᠠᠯᠪᠠᠨ ᠪᠠᠢᠭᠤᠯᠭᠠ ᠳ᠋ᠤ᠌ ᠠᠵᠢᠯᠯᠠᠨᠠ ᠭᠡᠳᠡᠭ ᠭᠠᠭᠴᠠᠭᠠᠷᠳᠠᠯ ᠲᠠᠢ ᠰᠠᠨᠠᠭᠳᠠᠵᠤ ᠪᠠᠢᠭᠰᠠᠨ ᠳᠠ᠃ ᠬᠠᠷᠢᠨ ᠠᠵᠢᠯ ᠤ᠋ᠨ ᠡᠷᠬᠡ ᠪᠡᠷ ᠰᠤᠷᠪᠤᠯᠵᠢᠯᠠᠭᠠ ᠠᠪᠬᠤ ᠶᠤᠮ ᠭᠡᠳ ᠬᠥᠬᠡᠬᠣᠲᠠ ᠶ᠋ᠢᠨ ᠵᠡᠭᠡᠯᠢ ᠪᠡᠷ ᠳᠠᠪᠬᠢᠳᠠᠭ ᠯᠠ ᠪᠠᠢᠭᠰᠠᠨ ᠮᠢᠨᠢ ᠶᠠᠭᠤ ᠶᠠᠭᠤᠨ ᠠ᠋ᠴᠠ ᠴᠤ᠌ ᠢᠯᠡᠭᠦᠦ ᠠᠵᠠ ᠪᠠᠢᠭᠰᠠᠨ ᠪᠣᠯᠪᠠ ᠤᠤ!
ᠲᠡᠷᠡ ᠵᠢᠯ ᠦ᠋ᠨ ᠡᠪᠦᠯ ᠦ᠋ᠨ ᠰᠡᠭᠦᠯᠴᠢ ᠡᠳᠦᠷ ᠦ᠋ᠳ ᠨᠠᠳᠠ ᠲᠣᠳᠣ ᠠ᠋ᠴᠠ ᠲᠣᠳᠣ ᠰᠠᠨᠠᠭᠳᠠᠵᠤ ᠪᠠᠢᠨᠠ᠃ ᠰᠢᠨᠡᠬᠡᠨ ᠨᠡᠭᠡᠭᠡᠭᠰᠡᠨ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠦ᠋ᠨ ᠡᠭᠦᠳᠡ ᠶ᠋ᠢ ᠠᠯᠬᠤᠵᠤ ᠣᠷᠣᠬᠤ ᠳ᠋ᠤ᠌ ᠡᠭᠦᠳᠡᠨ ᠲᠤᠰᠢᠶᠠ ᠰᠠᠭᠤᠭᠰᠠᠨ ᠵᠢᠭᠠᠬᠠᠨ ᠪᠣᠷᠣ ᠥᠬᠢᠨ ᠴᠢᠷᠠᠢ ᠤᠯᠠᠢᠯᠭᠠᠨ ᠤᠭᠲᠤᠭᠰᠠᠨ ᠢ᠋ ᠨᠡᠬᠡᠨ ᠰᠠᠨᠠᠬᠤ ᠳ᠋ᠤ᠌ ᠰᠠᠢᠬᠠᠨ ᠪᠠᠢᠨᠠ᠃
— ᠡᠨᠡ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠢ᠋ ᠴᠢ ᠡᠷᠬᠢᠯᠡᠵᠦ ᠪᠠᠢᠬᠤ ᠶᠤᠮ ᠤᠤ? (ᠲᠠᠨᠢᠬᠤ ᠴᠤ᠌ ᠦᠭᠡᠢ ᠪᠠᠢᠵᠤ ᠴᠢ ᠭᠡᠳ ᠳᠠᠭᠤᠳᠠᠴᠢᠬᠠᠳᠠᠭ ᠵᠣᠯᠢᠭ ᠰᠢᠦ
ᠪᠢ !)
—ᠦᠭᠡᠢ᠁
—ᠲᠡᠭᠡᠪᠡᠯ ᠵᠠᠩᠭᠤᠢᠳᠠ ᠴᠢᠨᠢ᠁?
— ᠳᠡᠮᠡᠢ ᠢᠷᠡᠳᠡᠭ ᠦᠭᠡᠢ᠁
— ᠵᠠ᠁
ᠠᠮᠢᠳᠤᠷᠠᠯ ᠳᠤᠮᠳᠠ ᠰᠠᠢᠬᠠᠨ ᠬᠡᠦᠬᠡᠨ ᠵᠥᠩᠳᠡᠭᠡᠨ ᠪᠠᠢᠳᠠᠭ ᠪᠣᠯᠪᠠᠴᠤ ᠲᠡᠷᠡ ᠪᠣᠯᠭᠠᠨ ᠡᠭᠡᠯᠢᠲᠡᠢ ᠰᠠᠢᠬᠠᠨ ᠬᠠᠷᠠᠭᠳᠠᠳᠠᠭ ᠦᠭᠡᠢ ᠯᠡ ᠳᠡ᠃ ᠭᠡᠪᠡᠴᠦ ᠴᠢᠷᠠᠢ ᠪᠠᠨ ᠤᠯᠠᠢᠯᠭᠠᠭᠰᠠᠨ ᠪᠢᠰᠢᠭᠦᠷᠬᠡᠭ ᠳᠥᠯᠭᠡᠨ ᠵᠠᠩ ᠲᠠᠢ ᠡᠨᠡ ᠬᠡᠦᠬᠡᠨ ᠢ᠋ ᠪᠢ ᠠᠩᠬᠠ ᠬᠠᠷᠠᠩᠭᠤᠲᠠ ᠪᠠᠨ ᠯᠠ ᠳᠠᠬᠢᠵᠤ ᠤᠴᠠᠷᠠᠬᠤ ᠶ᠋ᠢ ᠰᠠᠨᠠᠴᠢᠬᠠᠵᠤ ᠪᠢᠯᠡ᠃ ᠬᠣᠷᠣᠮ ᠵᠠᠭᠤᠷᠠ ᠪᠣᠯᠵᠤ ᠥᠩᠭᠡᠷᠡᠭᠰᠡᠨ ᠤᠴᠠᠷᠠᠯ ᠢ᠋ᠶ᠋ᠠᠨ ᠬᠣᠵᠢᠮ ᠨᠢ ᠬᠣᠶᠠᠭᠤᠯᠠ ᠳᠤᠷᠠᠰᠤᠭᠠᠳ ᠢᠨᠢᠶᠡᠯᠴᠡᠳᠡᠭ ᠪᠠᠢᠯᠠ᠃ ᠠᠮᠢᠳᠤᠷᠠᠯ ᠳᠤᠮᠳᠠ ᠭᠡᠨᠡᠳᠲᠡ ᠶ᠋ᠢᠨ ᠲᠣᠬᠢᠶᠠᠯ ᠢ᠋ᠶ᠋ᠠᠷ ᠮᠥᠴᠢᠳᠬᠡᠨ ᠵᠠᠭᠤᠷᠠ ᠴᠤ ᠪᠣᠯᠲᠤᠭᠠᠢ ᠵᠢᠷᠭᠠᠯ ᠡᠳ᠋ᠯᠡᠭᠦᠯᠦᠭᠰᠡᠨ ᠪᠦᠬᠦᠨ ᠢ᠋ ᠡᠷᠭᠢᠨ ᠳᠤᠷᠠᠰᠬᠤ ᠳ᠋ᠤ᠌ ᠰᠠᠢᠬᠠᠨ ᠯᠠ ᠪᠠᠢᠳᠠᠭ ᠳᠠ᠃
ᠬᠣᠶᠠᠷ ᠬᠣᠨᠣᠭ ᠤ᠋ᠨ ᠬᠢᠨᠢ ᠳᠠᠷᠠᠭᠠ ᠰᠤᠷᠪᠤᠯᠵᠢᠯᠠᠬᠤ ᠶᠤᠮ ᠭᠡᠰᠡᠨ ᠨᠡᠷᠡ ᠵᠢᠭᠠᠵᠤ ᠣᠴᠢᠬᠤ ᠳ᠋ᠠᠭᠠᠨ ᠳᠡᠯᠭᠡᠭᠦᠷ ᠢ᠋ ᠭᠣᠣᠯᠯᠠᠨ ᠬᠠᠮᠢᠶᠠᠷᠴᠤ ᠪᠠᠢᠭᠰᠠᠨ ᠵᠠᠯᠠᠭᠤ ᠲᠠᠢ ᠲᠠᠨᠢᠯᠴᠠᠵᠤ ᠨᠠᠢᠵᠠᠯᠠᠭᠰᠠᠨ ᠮᠠᠨᠢ ᠡᠷᠭᠢᠵᠦ ᠣᠯᠠᠨ ᠳᠠᠬᠢᠨ ᠢᠷᠡᠬᠦ ᠶ᠋ᠢᠨ ᠠᠵᠠ ᠪᠣᠯᠵᠠᠢ᠃ ᠴᠠᠭᠠᠨ ᠰᠠᠷᠠ ᠠ᠋ᠴᠠ ᠡᠮᠦᠨᠡᠬᠡᠨ ᠨᠣᠮ ᠦᠵᠡᠬᠦ᠂ ᠰᠠᠶᠢᠬᠢ ᠥᠬᠢᠨ ᠲᠡᠢ ᠤᠴᠠᠷᠠᠬᠤ ᠠᠴᠠ ᠪᠣᠳᠣᠯ ᠳ᠋ᠤ᠌ ᠬᠥᠲᠥᠯᠦᠭᠳᠡᠨ ᠣᠴᠢᠬᠤ ᠳ᠋ᠠᠭᠠᠨ ᠬᠡᠳᠦᠨ ᠦᠭᠡ ᠰᠣᠯᠢᠯᠴᠠᠭᠰᠠᠨ ᠶᠤᠮ᠃
—ᠭᠡᠷ ᠲᠡᠭᠡᠨ ᠬᠠᠷᠢᠬᠤ ᠪᠣᠯᠤᠭᠠ ᠦᠭᠡᠢ ᠤᠤ?
—ᠬᠣᠶᠠᠷ ᠬᠣᠨᠣᠭ ᠠ᠋ᠴᠠ᠁ (ᠪᠠᠰᠠ ᠯᠠ ᠬᠠᠴᠠᠷ ᠨᠢ ᠤᠯᠠᠢᠬᠤ ᠨᠢ ᠲᠡᠷᠡ)
—ᠨᠤᠲᠤᠭ ᠴᠢᠨᠢ?
—ᠣᠷᠳᠣᠰ ᠤ᠋ᠨ ᠦᠦᠰᠢᠨ ᠦ᠌ ᠱᠠᠷᠯᠢᠭ ᠤ᠋ᠨ᠁
ᠬᠠᠴᠠᠷ ᠤ᠋ᠨ ᠬᠢᠨᠢ ᠶᠠᠭᠠᠨ ᠲᠤᠶᠠᠭᠠᠨ ᠳ᠋ᠤ᠌ ᠪᠠᠬᠠᠷᠬᠠᠯ ᠪᠤᠴᠠᠯᠤᠭᠤᠯᠤᠨ ᠨᠣᠮ ᠦᠵᠡᠭᠴᠢ ᠪᠣᠯᠤᠨ ᠤᠳᠠᠭᠠᠨ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠵᠤ ᠪᠠᠢᠨᠠ᠃
ᠴᠠᠭᠠᠨ ᠰᠠᠷᠠ ᠴᠤ ᠫᠤᠤᠵᠢᠩ ᠤ᠋ᠨ ᠳᠠᠭᠤᠨ ᠳᠤᠮᠳᠠ ᠶᠠᠭᠤ ᠬᠠᠢ ᠦᠭᠡᠢ ᠥᠩᠭᠡᠷᠡᠴᠢᠬᠡᠯᠡ᠃ ᠬᠠᠪᠤᠷ ᠤ᠋ᠨ ᠤᠷᠢᠨ ᠪᠣᠯᠵᠤ᠂ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠦ᠋ᠨ ᠡᠭᠦᠳᠡᠨ ᠳ᠋ᠡᠬᠢ ᠮᠣᠳᠣᠳ ᠴᠤ ᠨᠠᠬᠢᠶᠠᠯᠠᠵᠤ ᠡᠬᠢᠯᠡᠪᠡ᠃ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠦ᠋ᠨ ᠵᠠᠯᠠᠭᠤ ᠪᠢᠳᠡ ᠬᠣᠶᠠᠭᠤᠯᠠ ᠺᠢᠷᠢᠯ ᠦᠰᠦᠭ ᠦ᠋ᠨ ᠨᠣᠮ ᠪᠠᠭᠤᠯᠭᠠᠬᠤ ᠠᠵᠢᠯ ᠳ᠋ᠤ᠌ ᠶᠠᠭᠠᠷᠠᠨ (ᠦᠨᠡᠨ ᠳ᠋ᠡᠭᠡᠨ ᠨᠠᠳᠠ ᠯᠠ ᠵᠠᠪᠰᠢᠶᠠᠨ ᠪᠠᠢᠭᠰᠠᠨ ᠭᠡᠳᠡᠭ ᠢ᠋ ᠨᠢᠭᠤᠯ ᠦᠭᠡᠢ ᠬᠡᠯᠡᠴᠢᠬᠡᠶᠡ) ᠰᠥᠨᠢ ᠳᠦᠯᠢ ᠪᠣᠯᠲᠠᠯᠠ ᠰᠠᠭᠤᠳᠠᠭ ᠪᠠᠢᠯᠠ᠃ ᠴᠠᠭ ᠣᠷᠣᠢ ᠪᠣᠯᠪᠠᠯ ᠵᠠᠯᠠᠭᠤ ᠪᠢᠳᠡ ᠬᠣᠶᠠᠭᠤᠯᠠ ᠭᠡᠷ ᠭᠡᠷ ᠵᠦᠭ ᠢ᠋ᠶ᠋ᠡᠨ ᠪᠤᠴᠠᠵᠤ᠂ ᠰᠠᠶᠢᠬᠢ ᠬᠡᠦᠬᠡᠨ ᠳᠡᠯᠭᠡᠭᠦᠷ ᠦ᠋ᠨ ᠬᠠᠵᠠᠭᠤ ᠳ᠋ᠠᠬᠢ ᠴᠢᠬᠢᠨ ᠭᠡᠷ ᠲᠦ᠍ ᠭᠠᠭᠴᠠᠭᠠᠷ ᠬᠣᠴᠣᠷᠳᠠᠭ ᠪᠠᠢᠯᠠ᠃ ᠡᠳᠦᠷ ᠦ᠋ᠨ ᠤᠳᠠᠭᠠᠨ ᠳ᠋ᠤ᠌ ᠳᠠᠰᠤᠯᠴᠠᠵᠤ ᠢᠷᠡᠬᠦ ᠪᠡᠷ ᠪᠢᠳᠡ ᠬᠣᠶᠠᠷ ᠬᠠᠶᠠ ᠶᠠᠷᠢᠯᠴᠠᠳᠠᠭ ᠪᠣᠯᠤᠯᠠ᠃
—ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠲᠦ᠍ ᠣᠶᠤᠲᠠᠳ ᠣᠯᠠᠨ ᠢᠷᠡᠨᠡ᠂ ᠲᠡᠳᠡᠨ ᠢ᠋ ᠬᠠᠷᠠᠭᠠᠳ ᠪᠢ ᠪᠠᠰᠠ ᠰᠤᠷᠤᠭᠴᠢ ᠪᠣᠯᠤᠭᠰᠠᠨ ᠪᠣᠯ ᠠ᠋ ᠭᠡᠵᠦ ᠰᠠᠨᠠᠬᠤ ᠶᠤᠮ᠁
(ᠲᠡᠷᠡ ᠥᠨᠳᠥᠷ ᠳᠤᠮᠳᠠᠳᠤ ᠪᠠᠨ ᠲᠡᠭᠦᠰᠦᠭᠡᠳ ᠡᠨᠳᠡ ᠢᠷᠡᠭᠰᠡᠨ ᠪᠠᠢᠵᠠᠢ)
—ᠪᠣᠯᠣᠯᠭᠦᠢ ᠳᠡ᠂ ᠡᠨᠡ ᠨᠠᠮᠤᠷ ᠴᠢ ᠲᠤᠰᠬᠠᠢ ᠮᠡᠷᠭᠡᠵᠢᠯ ᠦ᠋ᠨ ᠠᠩᠭᠢ ᠳ᠋ᠤ᠌ ᠨᠡᠷᠡ ᠮᠡᠳᠡᠭᠦᠯ (ᠪᠢ ᠰᠠᠨᠠᠭᠠᠨ ᠳ᠋ᠠᠭᠠᠨ ᠲᠡᠭᠦᠨ ᠢ᠋ ᠬᠥᠬᠡᠬᠣᠲᠠ ᠳ᠋ᠤ᠌ ᠯᠠ ᠪᠠᠢᠯᠭᠠᠬᠤ ᠬᠣᠷᠣᠨ ᠤᠬᠠᠭᠠ ᠵᠠᠷᠤᠵᠤ ᠪᠠᠢᠬᠠ ᠨᠢ ᠲᠡᠷᠡ) !
—ᠭᠡᠷ ᠲᠡᠭᠡᠨ ᠬᠡᠯᠡᠵᠦ ᠪᠠᠢᠭᠠᠳ ᠪᠣᠯᠤᠶᠠ᠁
ᠳᠥᠯᠭᠡᠨ ᠪᠣᠷᠣ ᠨᠢᠳᠦᠨ ᠦ᠌ ᠬᠢᠨᠢ ᠴᠠᠭᠠᠨᠠ ᠰᠤᠷᠤᠭᠴᠢ ᠪᠣᠯᠬᠤ ᠰᠠᠨ ᠭᠡᠰᠡᠨ ᠳᠡᠩᠳᠡᠭᠦᠦ ᠮᠥᠷᠥᠭᠡᠳᠦᠯ ᠨᠢ ᠮᠠᠨᠠᠭᠠ ᠲᠠᠢ ᠪᠠᠢᠯᠠ᠃
ᠬᠠᠪᠤᠷ ᠤ᠋ᠨ ᠪᠦᠯᠢᠶᠡᠨ ᠡᠳᠦᠷ ᠦ᠋ᠳ ᠥᠩᠭᠡᠷᠡᠭᠰᠡᠭᠡᠷ ᠯᠡ᠁ ᠲᠡᠷᠡ ᠬᠠᠪᠤᠷ ᠮᠢᠨᠦ ᠤᠷᠢᠳᠤ ᠨᠢ ᠥᠩᠭᠡᠷᠡᠭᠡᠵᠦ ᠢᠷᠡᠭᠰᠡᠨ ᠣᠯᠠᠨ ᠬᠠᠪᠤᠷ ᠠ᠋ᠴᠠ ᠬᠣᠯᠠ ᠲᠤᠯᠭᠠᠨ ᠪᠦᠯᠢᠶᠡᠨ᠂ ᠴᠠᠭᠠᠨᠠ ᠪᠠᠨ ᠨᠢᠭᠡᠯᠡ ᠮᠥᠷᠥᠭᠡᠳᠦᠯ ᠤᠶᠠᠰᠬᠠᠭᠰᠠᠨ ᠬᠠᠪᠤᠷ ᠪᠠᠢᠯᠠ᠃ ᠶᠡᠬᠡ ᠰᠤᠷᠭᠠᠭᠤᠯᠢ ᠶ᠋ᠢᠨ ᠵᠠᠮ ᠳ᠋ᠠᠬᠢ ᠢᠪᠴᠤᠤ ᠨᠠᠷᠢᠬᠠᠨ ᠭᠤᠳᠤᠮᠵᠢ ᠪᠠᠷ ᠡᠳᠦᠷᠵᠢᠨ ᠨᠠᠭᠠᠰᠢ ᠴᠠᠭᠠᠰᠢ ᠶᠠᠪᠤᠬᠤ ᠳ᠋ᠠᠭᠠᠨ ᠬᠥᠮᠦᠨ ᠳ᠋ᠦ᠍ ᠳᠤᠷᠠᠯᠠᠬᠤ ᠶ᠋ᠢᠨ ᠵᠢᠷᠭᠠᠯ ᠳ᠋ᠤ᠌ ᠬᠠᠪᠤᠷ ᠤ᠋ᠨ ᠨᠠᠯᠠᠭᠠᠷ ᠡᠳᠦᠷ ᠦ᠋ᠳ ᠲᠡᠢ ᠴᠣᠭ ᠬᠠᠯᠭᠢᠵᠤ ᠶᠠᠪᠤᠭᠰᠠᠨ ᠪᠠᠢᠵᠤ ᠳᠠ!
ᠤᠷᠠᠨ ᠵᠣᠬᠢᠶᠠᠯ᠂ ᠠᠮᠢᠳᠤᠷᠠᠯ ᠦᠢᠯᠡᠰ ᠦ᠋ᠨ ᠲᠠᠯᠠ ᠪᠠᠷ ᠳᠤᠷᠠ ᠰᠣᠨᠢᠷᠬᠠᠯ ᠨᠡᠢᠯᠡᠭᠡᠳ ᠢᠷᠡᠬᠦᠯᠡᠷ ᠶᠠᠷᠢᠶᠠ ᠴᠤ ᠤᠷᠲᠤᠯᠠᠨᠠ᠃ ᠲᠡᠷᠡ ᠴᠤ ᠮᠡᠯᠲᠡᠭᠡᠷ ᠪᠣᠷᠣ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠨᠠᠮᠠᠶ᠋ᠢ ᠳᠤᠭᠤᠢᠬᠠᠨ ᠰᠢᠷᠳᠡᠵᠦ᠂ ᠬᠠᠶᠠ ᠬᠠᠶᠠ ᠴᠣᠯᠭᠢᠨ ᠴᠣᠪᠣᠭᠣ ᠢᠨᠢᠶᠡᠴᠢᠬᠡᠭᠰᠡᠨ᠂ ᠪᠢ ᠤᠯᠠᠮ ᠲᠡᠨᠡᠭ ᠬᠥᠳᠡᠯᠦᠨ ᠶᠠᠷᠢᠬᠤ ᠦᠭᠡᠢ᠂ ᠦᠯᠢᠶᠡᠬᠦ ᠦᠭᠡᠢ ᠶᠠᠭᠤᠮᠠ ᠦᠭᠡᠢ ᠪᠣᠯᠴᠢᠬᠠᠭᠰᠠᠨ ᠪᠠᠢᠳᠠᠭ ᠮᠠᠨᠢ ᠣᠢᠯᠠᠭᠠᠯᠴᠠᠯ ᠳᠠᠰᠤᠯᠴᠠᠯ ᠤ᠋ᠨ ᠰᠢᠵᠢᠮ ᠪᠣᠯᠤᠨ ᠬᠦᠪᠦᠷᠡᠭᠰᠡᠭᠡᠷ ᠠᠪᠠᠢ᠃ ᠳᠤᠷᠠᠯᠠᠯ ᠬᠠᠢᠷᠠ ᠶ᠋ᠢ ᠮᠡᠳᠡᠬᠦ ᠪᠣᠯᠤᠭᠰᠠᠨ ᠠ᠋ᠴᠠ ᠪᠠᠨ ᠠᠪᠤᠭᠠᠳ ᠰᠡᠳᠬᠢᠯ ᠳ᠋ᠡᠭᠡᠨ ᠰᠠᠮ ᠡᠷᠢᠭᠰᠡᠭᠡᠷ ᠢᠷᠡᠭᠰᠡᠨ ᠬᠡᠦᠬᠡᠳᠯᠢᠭ ᠨᠢᠯᠬᠠᠰᠠᠭ᠂ ᠭᠡᠨᠡᠨ ᠴᠠᠭᠠᠪᠤᠷ᠂ ᠡᠭᠡᠯ ᠪᠣᠷᠣᠭᠵᠢᠭᠤᠨ ᠮᠣᠩᠭᠣᠯ ᠬᠡᠦᠬᠡᠨ ᠦ᠌ ᠳᠦᠷᠢ ᠢᠩᠭᠢᠵᠦ ᠯᠡ ᠪᠡᠶᠡᠯᠡᠯ ᠢ᠋ᠶ᠋ᠡᠨ ᠣᠯᠬᠤ ᠪᠠᠷ ᠬᠤᠪᠢ ᠲᠠᠪᠢᠯᠠᠩ ᠤ᠋ᠨ ᠲᠤᠬᠠᠢ ᠪᠢ ᠢᠳᠡᠭᠡᠨ ᠰᠠᠨᠠᠳᠠᠭ ᠪᠣᠯᠤᠭᠰᠠᠨ ᠶᠤᠮ᠃ ᠤᠶᠠᠷᠠᠭᠤᠨ ᠭᠤᠨᠢᠭᠲᠤ ᠵᠣᠬᠢᠶᠠᠯ ᠶᠠᠷᠢᠪᠠᠯ ᠨᠢᠳᠦᠨ ᠳ᠋ᠦ᠍ᠨᠢ ᠨᠢᠯᠪᠤᠰᠤ ᠮᠡᠯᠲᠡᠭᠡᠨᠡᠳᠡᠭ ᠪᠢᠴᠢᠬᠠᠨ ᠬᠡᠦᠬᠡᠨ ᠡᠳᠦᠭᠡ ᠴᠤ ᠰᠢᠷᠪᠡᠭᠡᠨᠡᠭ ᠬᠡᠷᠪᠢ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠣᠯᠪᠠᠴᠤ ᠥᠩᠭᠡᠷᠡᠭᠰᠡᠨ ᠪᠦᠬᠦᠨ ᠢ᠋ ᠳᠤᠷᠠᠰᠤᠨ ᠶᠠᠷᠢᠯᠴᠠᠬᠤ ᠳ᠋ᠤ᠌ ᠱᠣᠭᠲᠠᠢ ᠰᠢᠦ ᠭᠡᠳ ᠢᠨᠢᠶᠡᠳᠡᠭ ᠲᠡᠷᠡ ᠮᠠᠨᠢ ᠨᠠᠳᠠ ᠠ᠋ᠴᠠ ᠢᠴᠢᠬᠦ ᠪᠡᠨ ᠪᠣᠯᠢᠭᠰᠠᠨ ᠰᠢᠦ ᠳᠡ᠃
—ᠴᠢ ᠦᠨᠡᠬᠡᠷ ᠪᠦᠳᠦᠭᠦᠨ ᠵᠢᠷᠦᠬᠡ ᠲᠡᠢ᠁
—ᠶᠠᠭᠠᠬᠢᠪᠠ?
—ᠶᠠᠷᠢᠯᠴᠠᠵᠤ ᠪᠠᠢᠭᠠᠳ ᠭᠡᠨᠡᠳᠲᠡᠬᠡᠨ ᠬᠥᠮᠦᠨ ᠦ᠌ ᠭᠠᠷ ᠢ᠋ ᠪᠠᠷᠢᠴᠢᠬᠠᠭᠠᠳ᠁
—ᠪᠢ ᠪᠦᠳᠦᠭᠦᠨ ᠵᠢᠷᠦᠬᠡ ᠭᠠᠷᠭᠠᠬᠤ ᠦᠭᠡᠢ ᠪᠣᠯ ᠴᠢᠨᠦ ᠲᠡᠷᠡ ᠶᠠᠩᠵᠤ ᠪᠠᠷ ᠬᠡᠵᠢᠶᠡ ᠠᠮᠠ ᠨᠡᠭᠡᠭᠡᠳᠡᠭ ᠢ᠋ ᠪᠦᠦ ᠮᠡᠳᠡ᠃ ᠪᠢ ᠬᠦᠯᠢᠶᠡᠭᠰᠡᠭᠡᠷ ᠪᠠᠢᠭᠠᠳ ᠪᠦᠷ ᠡᠪᠦᠭᠡᠷᠡᠴᠢᠬᠡᠬᠦ ᠦᠭᠡᠢ ᠤᠤ?
—ᠦᠨᠡᠨ ᠢ᠋ ᠬᠡᠯᠡᠪᠡᠯ ᠪᠢ ᠴᠢᠮᠠᠢ᠍ᠢ ᠲᠠᠩᠳᠠ ᠪᠣᠳᠣᠳᠠᠭ ᠪᠠᠢᠭᠰᠠᠨ ᠰᠢᠦ᠁
—ᠪᠢ ᠴᠦ᠍ ᠠᠳᠠᠯᠢᠬᠠᠨ᠁
ᠮᠥᠩᠬᠡ ᠶ᠋ᠢᠨ ᠴᠠᠢᠯᠭᠠᠨ ᠳᠤᠷᠠᠰᠤᠮᠵᠢ ᠪᠣᠯᠤᠨ ᠬᠠᠳᠠᠩᠰᠢᠭᠰᠠᠨ ᠲᠡᠷᠡ ᠬᠠᠪᠤᠷ ᠶᠠᠭᠤ ᠪᠦᠬᠦᠨ ᠳᠤᠷᠠᠯᠠᠯ ᠬᠠᠢᠷᠠ ᠶ᠋ᠢ ᠠᠪᠴᠢᠷᠠᠭᠰᠠᠨ ᠪᠢᠴᠢᠬᠠᠨ ᠥᠬᠢᠨ ᠦ᠌ ᠬᠡᠦᠬᠡᠳᠯᠢᠭ ᠬᠠᠷᠠᠴᠠ ᠰᠢᠭ᠋ ᠮᠢᠨᠦ ᠵᠢᠷᠦᠬᠡᠨ ᠳ᠋ᠦ᠍ ᠢᠨᠢᠶᠡᠭᠰᠡᠭᠡᠷ ᠪᠠᠢᠭᠠ᠃ ᠰᠠᠨᠠᠭᠰᠠᠨ ᠬᠦᠰᠡᠯ ᠨᠢ ᠲᠡᠷᠭᠡᠯᠰᠢᠭᠰᠡᠨ ᠲᠡᠷᠡ ᠵᠢᠯ ᠦ᠋ᠨ ᠨᠠᠮᠤᠷ《ᠪᠢᠴᠢᠬᠠᠨ ᠥᠬᠢᠨ》 ᠶᠡᠬᠡ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠦᠷᠢᠶᠡᠨ ᠳ᠋ᠦ᠍ ᠪᠢᠴᠢᠭ ᠦ᠋ᠨ ᠪᠣᠭᠴᠣ ᠮᠥᠷᠥᠯᠡᠨ ᠠᠯᠬᠤᠬᠤ ᠪᠣᠯᠤᠭᠰᠠᠨ ᠪᠢᠯᠡ᠃
ᠤᠢᠳᠬᠠᠷ ᠪᠤᠬᠢᠨᠢᠳᠤᠯ ᠢ᠋ ᠮᠢᠨᠢ ᠬᠤᠪᠢᠶᠠᠯᠴᠠᠨ ᠨᠠᠮᠠᠶ᠋ᠢ ᠪᠠᠶᠠᠷᠯᠠᠭᠤᠯᠬᠤ ᠭᠡᠵᠦ ᠬᠡᠦᠬᠡᠳ ᠰᠢᠭ ᠠᠭᠠᠰᠢᠯᠠᠳᠠᠭ᠂ ᠰᠠᠢᠬᠠᠨ ᠳᠠᠭᠤᠤ ᠰᠣᠨᠣᠰᠪᠠᠯ ᠮᠥᠮᠥ ᠪᠡᠨ ᠰᠠᠨᠠᠭᠠᠳ ᠨᠢᠯᠪᠤᠰᠤ ᠵᠠᠶ᠋ᠢᠷᠯᠠᠭᠤᠯᠳᠠᠭ᠂ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠠᠳᠬᠤᠭᠤᠯᠤᠭᠰᠠᠨ ᠭᠠᠭᠴᠠ ᠠᠯᠢᠮᠠ ᠶ᠋ᠢ ᠨᠠᠳᠠ ᠲᠠᠢ ᠬᠤᠪᠢᠶᠠᠵᠤ ᠢᠳᠡᠬᠦ ᠶᠦᠮ ᠭᠡᠳ ᠦᠯᠡᠳᠡᠭᠡᠳᠡᠭ ᠲᠡᠷᠡ ᠪᠢᠴᠢᠬᠠᠨ ᠥᠬᠢᠨ ᠊ᠢ ᠷᠤᠯᠮᠠ ᠭᠡᠳᠡᠭ᠃
※ ᠠᠷᠪᠠᠨ ᠵᠢᠯ ᠪᠣᠯᠴᠢᠬᠠᠯᠠ᠃ ᠶᠠᠭᠠᠬᠢᠭᠰᠠᠨ ᠬᠤᠷᠳᠤᠨ ᠤᠷᠤᠰᠳᠠᠭ ᠴᠠᠭ ᠶᠤᠮ ᠪᠣᠢ! ᠭᠡᠪᠡᠴᠦ ᠲᠡᠷᠡ ᠬᠠᠪᠤᠷ ᠵᠢᠯ ᠵᠢᠯ ᠦ᠋ᠨ ᠬᠠᠪᠤᠷ ᠲᠠᠢ ᠴᠣᠭ ᠡᠷᠭᠢᠨ ᠪᠤᠴᠠᠨ ᠪᠢᠳᠡ ᠬᠣᠶᠠᠷ ᠤ᠋ᠨ ᠳᠡᠷᠭᠡᠳᠡ ᠢᠷᠡᠭᠰᠡᠭᠡᠷ ᠪᠠᠢᠳᠠᠭ ᠨᠢ ᠳᠠᠩᠴᠤ ᠰᠠᠢᠬᠠᠨ᠃ ᠶᠠᠯᠢᠮ ᠦᠭᠡᠢ ᠵᠦᠢᠯ ᠳ᠋ᠦ᠍ ᠤᠴᠠᠭᠠᠷ ᠬᠦᠷᠬᠦ ᠪᠣᠯᠭᠠᠨ ᠨᠣᠮ ᠤ᠋ᠨ ᠰᠠᠩ ᠤ᠋ᠨ ᠲᠡᠷᠡ ᠦᠢᠯᠡᠴᠢᠯᠡᠭᠴᠢ ᠥᠬᠢᠨ ᠢ᠋ ᠨᠡᠬᠡᠨ ᠰᠠᠨᠠᠪᠠᠯ᠂ ᠳᠦᠷᠡᠰᠬᠢᠨ ᠰᠢᠳᠡᠮᠡᠷ ᠪᠠᠢᠭᠰᠠᠨ ᠠᠭᠤᠷ ᠮᠠᠨᠢ ᠰᠠᠯᠬᠢ ᠦᠵᠡᠭᠰᠡᠨ ᠤᠲᠤᠭᠠ ᠰᠢᠭ᠋ ᠠᠷᠢᠯᠳᠠᠭ ᠰᠠᠨ᠃ ᠠᠷᠪᠠᠨ ᠵᠢᠯ《ᠪᠢᠴᠢᠬᠠᠨ ᠥᠬᠢᠨ》 ᠦ᠌ ᠮᠢᠨᠢ ᠵᠠᠩ ᠠᠪᠤᠷᠢ ᠶ᠋ᠢ ᠥᠭᠡᠷᠡᠴᠢᠯᠡᠵᠦ ᠴᠢᠳᠠᠭᠠ ᠦᠭᠡᠢ ᠯᠡ ᠪᠠᠢᠨᠠ᠃ ᠬᠥᠳᠡᠭᠡ ᠪᠡᠨ ᠬᠠᠷᠢᠪᠠᠯ ᠦᠨᠢᠶᠡ ᠬᠣᠨᠢ ᠪᠠᠨ ᠰᠠᠭᠠᠵᠤ᠂ ᠠᠢᠷᠠᠭ ᠴᠠᠭᠠ ᠪᠠᠨ ᠣᠷᠣᠯᠳᠣᠳᠠᠭ ᠲᠡᠷᠡ《ᠪᠢᠴᠢᠬᠠᠨ ᠥᠬᠢᠨ》 ᠢ᠋ ᠪᠤᠷᠬᠠᠨ ᠲᠩᠷᠢ ᠨᠠᠳᠠ ᠬᠠᠢᠷᠠᠯᠠᠭᠰᠠᠨ ᠳᠠᠭᠢᠨᠢ ᠭᠡᠮᠡᠨ ᠪᠢ ᠢᠲᠡᠭᠡᠵᠦ ᠶᠠᠪᠤᠳᠠᠭ᠃ ᠲᠡᠷᠡ ᠵᠢᠯ ᠦ᠋ᠨ ᠲᠡᠷᠡ ᠬᠠᠪᠤᠷ ᠬᠡᠵᠢᠶᠡ ᠴᠦ᠍ ᠥᠩᠭᠡᠷᠡᠨ ᠣᠳᠬᠤ ᠶᠣᠰᠣ ᠦᠭᠡᠢ ᠮᠥᠩᠬᠡ ᠶ᠋ᠢᠨ ᠬᠠᠪᠤᠷ ᠭᠡᠳᠡᠭ ᠲᠦ᠍ ᠪᠢ ᠡᠷᠡᠭᠡᠯᠵᠡᠬᠦ ᠦᠭᠡᠢ᠁᠃
2007. 5. 11 ᠥᠨᠥᠳᠥᠷ ᠮᠠᠰᠢ ᠰᠠᠯᠬᠢ ᠲᠠᠢ᠂ ᠪᠢ ᠲᠡᠷᠡ ᠬᠠᠪᠤᠷ ᠢ᠋ ᠪᠠᠰᠠ ᠯᠠ ᠰᠠᠨᠠᠴᠢᠬᠠᠯᠠ᠁
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠢᠳᠰᠢᠩᠬᠣᠷᠯᠣ᠂ ᠪᠠᠶᠠᠨᠴᠡᠴᠡᠭ᠂ ᠨᠡᠭᠦᠳᠡᠯ᠂ ᠭᠡᠷᠡᠯ
ᠬᠢᠨᠠᠭᠴᠢ᠄ ᠭᠠᠷᠮᠠ᠂ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ