ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠡᠷᠢᠭᠦᠨ ᠪᠣᠲᠢ – ᠬᠣᠶᠠᠳᠤᠭᠠᠷ ᠪᠦᠯᠦᠭ <ᠭᠤᠷᠪᠠ> Хан мунын сүүрс < дээд > – Мөнх зохиоов ᠂ Тэргүүн бодь – Хоёрдугаар бүлэг <3>
323ᠲᠡᠷᠢᠭᠦᠨ ᠪᠣᠲᠢ – ᠬᠣᠶᠠᠳᠤᠭᠠᠷ ᠪᠦᠯᠦᠭ <ᠭᠤᠷᠪᠠ>
ᠭᠤᠷᠪᠠ
ᠶᠡᠬᠡ ᠵᠣᠣ ᠶ᠋ᠢᠨ ᠴᠢᠭᠤᠯᠭᠠᠨ ᠤ᠋ ᠳᠠᠯᠠᠳ ᠬᠦᠩ ᠦ᠋ᠨ ᠪᠠᠶᠠᠨ ᠣᠢᠷᠣᠪ ᠤ᠋ᠨ ᠠᠳᠤᠭᠤᠴᠢᠨ ᠠᠩᠴᠢᠨᠵᠠᠪ ᠵᠠᠯᠠᠭᠤ ᠬᠥᠮᠦᠨ ᠦ᠌ ᠣᠮᠣᠭ ᠢ᠋ᠶ᠋ᠠᠷ ᠢᠨᠠᠭ ᠬᠣᠩᠭᠣᠷ ᠤ᠋ᠨ ᠢ᠋ᠶ᠋ᠠᠨ ᠬᠣᠢᠨᠠ ᠠ᠋ᠴᠠ ᠰᠡᠳᠬᠢᠯ ᠦ᠋ᠨ ᠭᠣᠯᠣᠮᠲᠠ ᠪᠠᠨ ᠬᠠᠷᠠᠯᠠᠭᠤᠯᠬᠤ ᠰᠢᠬᠠᠭᠰᠠᠨ ᠠ᠋ᠴᠠ᠂ ᠶᠠᠭᠤ ᠴᠤ᠌ ᠬᠢᠴᠢᠬᠡᠬᠦ ᠭᠡᠨᠡᠨ ᠨᠠᠰᠤᠨ ᠤ᠋ ᠠᠭᠠᠭ ᠲᠤ᠌ ᠰᠡᠷᠭᠦᠮᠡ ᠶ᠋ᠢᠨ ᠬᠤᠷᠤᠭᠤ ᠬᠠᠭᠤᠳᠠᠰᠤ ᠶ᠋ᠢ ᠲᠤᠰᠤᠮᠠᠭᠴᠠ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠪᠠᠶᠠᠨ ᠣᠢᠷᠣᠪ ᠤ᠋ᠨ ᠠᠳᠤᠭᠤᠨ ᠠ᠋ᠴᠠ ᠠᠯᠢ ᠰᠠᠢᠨ ᠬᠣᠶᠠᠷ ᠠᠭᠲᠠ ᠰᠢᠯᠢᠵᠦ ᠤᠨᠤᠨ ᠵᠠᠶᠠᠭᠠᠨ ᠤ᠋ ᠪᠠᠨ ᠠᠮᠠᠷᠠᠭ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠶᠠᠪᠤᠪᠠ᠃ ᠬᠠᠢᠷᠠᠲᠤ ᠬᠥᠮᠦᠨ ᠢ᠋ᠶ᠋ᠡᠨ ᠬᠠᠷᠢ ᠬᠤᠰᠢᠭᠤᠨ ᠤ᠋ ᠬᠦᠩ ᠨᠣᠶᠠᠨ ᠳ᠋ᠤ᠌ ᠠᠯᠳᠠᠵᠤ ᠲᠠᠭᠤᠭᠰᠠᠨ ᠳ᠋ᠠᠭᠠᠨ ᠢᠴᠢᠵᠦ ᠰᠡᠳᠬᠢᠯ ᠲᠦᠪᠳᠡᠬᠦ ᠦᠭᠡᠢ ᠰᠢᠨᠠᠯᠤᠨ ᠪᠠᠢᠭᠰᠠᠨ ᠢ᠋ ᠥᠭᠦᠯᠡᠬᠦ ᠶᠠᠭᠤᠨ᠃ ᠡᠴᠢᠭᠡ ᠡᠬᠡ ᠶ᠋ᠢᠨ ᠮᠠᠭᠤ ᠠ᠋ᠴᠠ ᠶᠤᠮ ᠤᠤ ᠳᠠ᠂ ᠠ᠂ ᠬᠠᠷᠢᠨ ᠡᠨᠡ ᠬᠣᠷᠸᠠ ᠳ᠋ᠤ᠌ ᠡᠳ᠋ ᠮᠥᠩᠭᠥ ᠡᠷᠬᠡ ᠰᠦᠷ ᠦ᠋ᠨ ᠠᠯᠢᠨ ᠨᠢ ᠴᠤ᠌ ᠪᠡᠶᠡ ᠳ᠋ᠦ᠍ ᠨᠠᠭᠠᠯᠳᠤᠬᠤ ᠶᠠᠭᠤᠮᠠ ᠦᠭᠡᠢ᠂ ᠮᠠᠭᠤ ᠡᠦᠲᠦᠨ ᠳ᠋ᠦ᠍ ᠲᠥᠷᠥᠯᠡ ᠭᠡᠵᠦ ᠲᠡᠷᠡ ᠶᠡᠷᠦ ᠭᠣᠮᠣᠳᠠᠳᠠᠭ ᠦᠭᠡᠢ᠃ ᠭᠠᠭᠴᠠ ᠰᠡᠷᠭᠦᠮᠡ ᠲᠠᠢ ᠪᠠᠨ ᠯᠠ ᠵᠠᠶᠠᠭᠠ ᠪᠠᠨ ᠬᠣᠯᠪᠣᠵᠤ ᠶᠠᠪᠤᠪᠠᠯ᠂ ᠵᠠ ᠶᠠᠭᠠᠬᠢᠬᠤ ᠪᠣᠢ ᠶᠣᠳᠣᠷ ᠵᠠᠢᠳᠠᠯᠠᠭᠠᠳ ᠶᠣᠷᠣᠭ ᠡᠮᠦᠰᠴᠦ ᠶᠠᠪᠤᠭᠰᠠᠨ ᠴᠤ᠌ ᠰᠡᠳᠬᠢᠯ ᠢ᠋ᠶ᠋ᠡᠷ ᠪᠠᠶᠠᠨ ᠴᠠᠳᠬᠤᠯᠠᠩ ᠠᠮᠢᠳᠤᠷᠠᠨᠠ ᠭᠡᠵᠦ ᠰᠠᠨᠠᠵᠤ ᠰᠠᠷᠪᠠᠢᠵᠤ ᠪᠠᠢᠯᠠ᠃ ᠶᠠᠭᠤᠮᠠ ᠦᠭᠡᠢ ᠶᠠᠳᠠᠷᠠᠭᠤ ᠬᠥᠮᠦᠰ ᠢ᠋ ᠶᠠᠭᠠᠬᠢᠬᠤ ᠳ᠋ᠠᠭᠠᠨ ᠲᠠᠩᠳᠠ ᠠᠳᠠ ᠦᠵᠡᠵᠦ ᠶᠠᠪᠤᠳᠠᠭ ᠡᠨᠡ ᠬᠣᠷᠸᠠ ᠶ᠋ᠢᠨ ᠲᠡᠭᠰᠢ ᠪᠤᠰᠤ ᠶ᠋ᠢ ᠶᠠᠰᠤᠨ ᠳ᠋ᠠᠭᠠᠨ ᠣᠷᠣᠲᠠᠯᠠ ᠬᠣᠷᠣᠰᠤᠭᠰᠠᠨ ᠠᠳᠤᠭᠤᠴᠢᠨ ᠬᠦᠦ ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠦᠩ ᠨᠣᠶᠠᠨ ᠤ᠋ ᠬᠠᠯᠠᠭᠤᠨ ᠡᠪᠦᠷ ᠡᠴᠡ ᠬᠠᠢᠷᠠᠲᠤ ᠠᠮᠠᠷᠠᠭ ᠢ᠋ᠶ᠋ᠠᠨ ᠪᠣᠰᠬᠠᠵᠤ ᠠᠪᠤᠭᠠᠳ ᠬᠠᠷᠢ ᠬᠣᠯᠠ ᠨᠤᠲᠤᠭ ᠲᠤ᠌ ᠬᠥᠯ ᠲᠣᠭᠲᠠᠶᠠ ᠭᠡᠵᠦ ᠰᠢᠭᠤᠳᠤᠭᠠᠳ ᠲᠡᠭᠡᠵᠦ ᠬᠢᠭᠰᠡᠨ ᠨᠢ ᠳᠡᠩᠳᠡᠭᠦᠦ ᠴᠦᠯᠲᠦ ᠪᠣᠯᠵᠤ ᠲᠠᠤᠯᠠᠢ ᠪᠤᠷᠤᠭᠤ ᠪᠣᠰᠳᠠᠭ ᠤ᠋ᠨ ᠢᠷᠣᠠ ᠪᠠᠷ ᠬᠣᠭᠣᠰᠣᠨ ᠭᠣᠣ ᠬᠠᠷᠠᠢᠭᠰᠠᠨ ᠳ᠋ᠠᠭᠠᠨ ᠨᠠᠰᠤᠨ ᠤ᠋ ᠭᠡᠮᠰᠢᠭᠦᠯᠡᠩ ᠪᠣᠯᠵᠠᠢ᠃
ᠨᠢᠭᠡ ᠬᠠᠵᠠᠭᠠᠢ ᠬᠢᠰᠬᠢᠪᠡᠯ ᠠᠷᠪᠠ ᠲᠤᠭᠤᠯᠤᠨᠠ ᠭᠡᠭᠴᠢ ᠪᠡᠷ ᠪᠤᠷᠤᠭᠤ ᠵᠠᠮ ᠢ᠋ᠶ᠋ᠠᠷ ᠪᠤᠳᠠᠭᠠ ᠲᠡᠭᠡᠭᠡᠵᠦ᠂ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠰᠢᠷᠣᠢ ᠲᠡᠭᠡᠭᠡᠵᠦ ᠤᠷᠭᠤᠨ ᠶᠠᠪᠤᠬᠤ ᠳᠠᠭᠠᠨ ᠬᠥᠮᠥᠨ ᠳᠦ ᠮᠡᠳᠡᠭᠳᠡᠵᠦ᠂ ᠪᠤᠴᠠᠭᠠᠳ ᠪᠤᠯᠲᠠᠬᠤ ᠭᠡᠲᠡᠯᠡ ᠪᠠᠷᠢᠭᠳᠠᠬᠤ ᠶ᠋ᠢᠨ ᠳᠡᠮ ᠳᠡᠮ ᠠᠶᠤᠯ ᠳ᠋ᠤ᠌ ᠳᠠᠭᠠᠷᠢᠭᠳᠠᠭᠰᠠᠨ ᠨᠢ ᠥᠪᠡᠷ ᠦ᠋ᠨ ᠬᠢ ᠪᠢᠰᠢ ᠬᠥᠮᠦᠨ ᠤ ᠶᠠᠭᠤᠮᠠᠨ ᠳ᠋ᠤ᠌ ᠭᠣᠷᠢᠯᠠᠵᠤ ᠪᠡᠶᠡ ᠪᠡᠨ ᠬᠡᠳᠦ ᠵᠣᠪᠠᠭᠠᠭᠰᠠᠨ ᠶᠠᠭᠤᠮᠠ ᠪᠣᠯᠵᠢ ᠤᠤ ᠳᠠ ᠭᠡᠵᠦ ᠴᠤ᠌ ᠪᠣᠳᠣᠨᠠ᠃
ᠲᠡᠷᠡ ᠣᠷᠣᠢ ᠪᠡᠯᠴᠢᠭᠡᠷ ᠲᠦ ᠪᠠᠢᠭᠰᠠᠨ ᠠᠢᠯ ᠤ᠋ᠨ ᠴᠢᠳᠥᠷ ᠲᠡᠢ ᠬᠣᠶᠠᠷ ᠮᠣᠷᠢ ᠶ᠋ᠢ ᠵᠠᠢᠳᠠᠯᠠᠵᠤ ᠲᠣᠲᠠᠭᠠᠬᠤ ᠳ᠋ᠠᠭᠠᠨ ᠴᠤᠯᠪᠤᠭᠤᠷ ᠤ᠋ᠨ ᠦᠵᠦᠭᠦᠷ ᠢ᠋ᠶ᠋ᠡᠷ ᠮᠣᠷᠢᠨ ᠤ ᠳᠠᠰᠢᠶᠠ ᠤᠷᠤᠭᠤ ᠬᠦᠱ ᠭᠡᠲᠡᠯᠡ ᠥᠭᠬᠦ ᠳᠦ ᠨᠠᠮᠤᠷ ᠤᠨ ᠴᠠᠳᠬᠤᠯᠳᠠᠭᠰᠠᠨ ᠮᠣᠷᠢ ᠢᠨᠴᠠᠭ ᠠᠯᠳᠠᠵᠤ ᠳᠤᠷᠪᠠᠨ ᠲᠤᠭᠤᠷᠠᠢ ᠨᠢ ᠳᠣᠣᠷᠠ ᠪᠠᠨ ᠲᠠᠪᠠᠷᠠᠩ ᠲᠠᠪᠠᠷᠠᠩ ᠳᠠᠪᠢᠷᠴᠠᠭᠯᠠᠬᠤ ᠠᠴᠠ ᠴᠠᠭᠠᠰᠢ ᠦᠭᠡᠢ ᠪᠠᠢᠭᠰᠠᠨ ᠨᠢ ᠰᠠᠨᠳᠤᠷᠤᠭᠰᠠᠨ ᠰᠡᠳᠬᠢᠯ ᠦᠨ ᠵᠢᠬᠦᠷ ᠡᠴᠡ ᠨᠢ ᠬᠣᠯᠠ ᠬᠠᠶᠠᠭᠳᠠᠵᠤ᠂ ᠬᠠᠱᠠᠩ ᠰᠠᠷᠯᠤᠭ ᠤᠨᠤᠴᠢᠬᠠᠭᠰᠠᠨ ᠰᠢᠭ᠋ ᠭᠠᠵᠠᠷ ᠬᠣᠷᠣᠭᠠᠬᠤ ᠦᠭᠡᠢ ᠰᠦᠷᠡᠬᠡᠢ ᠰᠠᠨᠳᠤᠷᠠᠭᠠᠪᠠ᠃ ᠨᠡᠬᠡᠭᠦᠯ ᠦᠨ ᠴᠢᠮᠡᠭᠡ ᠮᠣᠷᠢᠨ ᠤ ᠬᠢᠨᠢ ᠠᠷᠤ ᠪᠠᠷ ᠰᠤᠭᠳᠠᠯᠠᠭᠰᠠᠨ ᠴᠢᠳᠬᠦᠷ ᠰᠢᠭ ᠣᠢᠷᠠᠬᠠᠨ ᠰᠣᠨᠣᠰᠳᠠᠬᠤ ᠪᠠᠷ ᠮᠥᠨ ᠢᠩᠬᠢᠵᠦ ᠬᠠᠱᠠᠩᠳᠠᠪᠠᠯ ᠠᠮᠠᠨ ᠬᠦᠵᠦᠭᠦᠦ ᠪᠠᠨ ᠮᠤᠰᠭᠢᠭᠤᠯᠬᠤ ᠳᠤ ᠬᠣᠯᠠ ᠦᠭᠡᠢ ᠭᠡᠳᠡᠭ ᠲᠦ ᠪᠠᠯᠠᠭᠳᠠᠵᠠᠢ ᠪᠢᠯᠡ᠃ ᠨᠣᠬᠠᠢ ᠬᠠᠮᠠᠷ ᠲᠠᠭᠠᠨ ᠬᠦᠷᠬᠦ ᠪᠡᠷ ᠤᠰᠤᠴᠢ ᠭᠡᠭᠴᠢ ᠪᠡᠷ ᠲᠡᠷᠡ ᠵᠠᠢ ᠦᠵᠡᠵᠦ ᠬᠣᠶᠠᠷ ᠮᠣᠷᠢᠨ ᠤ ᠪᠥᠭᠰᠡᠨ ᠳᠦ ᠵᠠᠩᠭᠤᠤ ᠬᠠᠪᠴᠢᠭᠤᠯᠵᠤ ᠬᠣᠶᠠᠭᠤᠯᠠ ᠶᠢ ᠬᠣᠯᠪᠣᠨ ᠵᠦᠭ ᠪᠤᠷᠤᠭᠤᠯᠠᠨ ᠭᠤᠶᠠᠳᠠᠵᠤ ᠠᠮᠢ ᠪᠠᠨ ᠪᠤᠯᠲᠠᠬᠤ ᠳᠤ ᠵᠣᠯ ᠢᠶᠠᠷ ᠨᠡᠬᠡᠭᠦᠯ ᠦᠨ ᠬᠥᠮᠥᠰ ᠲᠦ ᠮᠡᠳᠡᠭᠳᠡᠭᠰᠡᠨ ᠦᠭᠡᠢ᠃ ᠨᠡᠬᠡᠭᠦᠯ ᠦᠨ ᠲᠦᠷᠦᠭᠦᠦ ᠨᠢ ᠨᠢᠭᠡ ᠪᠣᠯ ᠬᠠᠰᠢᠷ ᠡᠷᠡ ᠲᠣᠬᠢᠶᠠᠵᠤ ᠮᠢᠨᠦ ᠪᠤᠷᠤᠭᠤᠯᠠᠭᠰᠠᠨ ᠢ ᠠᠵᠢᠭ ᠮᠡᠳᠡᠵᠦ ᠵᠣᠷᠢᠭᠤᠳᠠ ᠲᠠᠯᠪᠢᠵᠤ ᠶᠠᠪᠤᠭᠤᠯᠤᠭᠰᠠᠨ᠂ ᠨᠢᠭᠡ ᠪᠣᠯ ᠬᠠᠢᠩᠭᠤᠬᠠᠨ ᠡᠷᠡ ᠲᠠᠭᠠᠷᠠᠯᠳᠤᠵᠤ ᠮᠣᠷᠢᠨ ᠤ ᠲᠣᠭᠣᠰᠣᠨ ᠠᠴᠠ ᠰᠤᠭᠤᠷᠠᠭᠰᠠᠨ ᠲᠥᠪᠡᠷᠬᠡᠨ ᠳᠦ ᠬᠠᠭᠤᠷᠳᠠᠵᠤ ᠡᠵᠡᠨ ᠦᠭᠡᠢ ᠬᠣᠶᠠᠷ ᠮᠣᠷᠢ ᠶᠢ ᠲᠠᠭᠤᠭᠰᠠᠨ ᠁ ᠭᠡᠳ ᠠᠶᠤᠯ ᠠᠴᠠ ᠮᠤᠯᠲᠤᠷᠠᠭᠰᠠᠨ ᠠᠢᠩᠭᠤᠷᠢ ᠪᠠᠨ ᠠᠷᠠᠢ ᠭᠡᠵᠦ ᠨᠠᠮᠵᠢᠭᠤᠯᠵᠤ ᠪᠤᠷᠬᠠᠨᠲᠤ ᠶᠢᠨ ᠡᠩᠭᠡᠷ ᠢᠶᠡᠷ ᠬᠠᠷᠠᠩᠭᠤᠢ ᠳᠤ ᠲᠡᠮᠲᠡᠴᠢᠨ ᠶᠠᠪᠤᠯᠠ᠃
ᠵᠠᠮ ᠲᠠᠢ ᠵᠠᠮ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠬᠡᠳᠦᠨ ᠬᠥᠲᠥᠯ ᠳᠠᠪᠠᠪᠠ᠃ ᠲᠡᠷᠲᠡᠭᠡ ᠴᠠᠭᠠᠨᠠ ᠪᠠᠷᠠᠭᠤᠨ ᠬᠣᠢᠨᠠ ᠵᠢᠯᠠᠭᠠ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠨᠢᠭᠡ ᠮᠠᠭᠤᠬᠠᠨ ᠳ᠋ᠸᠩ ᠦ᠋ᠨ ᠭᠡᠷᠡᠯ ᠬᠠᠷᠠᠭᠳᠠᠬᠤ ᠰᠢᠦ ᠪᠣᠯᠬᠤ ᠳ᠋ᠤ᠌ ᠬᠥᠮᠦᠨ ᠦ᠌ ᠠᠨᠢᠷ ᠢ᠋ᠶ᠋ᠠᠷ ᠨᠣᠬᠠᠢ ᠬᠣᠷᠭᠣᠭᠣᠪᠠ᠃ ᠨᠣᠬᠠᠢ ᠬᠤᠴᠠᠬᠤ ᠳᠠᠭᠤᠨ ᠢ᠋ᠶ᠋ᠠᠷ ᠲᠡᠷᠡ ᠰᠦᠮᠡᠯᠵᠡᠭᠰᠡᠨ ᠳ᠋ᠧᠩ ᠦ᠋ᠨ ᠬᠡᠷᠡᠯ ᠲᠦᠳᠡᠬᠡᠨ ᠤᠨᠲᠠᠷᠠᠪᠠ᠃ ᠡᠨᠡ ᠠᠢᠯ ᠨᠢ ᠬᠠᠳᠤᠮᠠᠯ ᠤ᠋ᠨ ᠵᠡᠭᠦᠨ ᠰᠤᠵᠠᠭ ᠤ᠋ᠨ ᠠᠮᠠᠨ ᠳ᠋ᠤ᠌ ᠨᠤᠲᠤᠭᠰᠢᠭᠰᠠᠨ ᠪᠯᠠᠮᠤ ᠶ᠋ᠢᠨ ᠬᠢ ᠪᠠᠢᠪᠠ᠃ ᠠᠪᠤ ᠨᠢ ᠲᠤᠤᠷᠬᠠ ① ᠣᠷᠣᠵᠤ ᠢᠳᠡᠯᠭᠡ ᠤᠤᠭᠤᠯᠭᠠ ᠠ᠋ᠴᠠ ᠭᠠᠷᠴᠤ ᠬᠡᠪᠲᠡᠷᠢ ᠳ᠋ᠦ᠍ ᠣᠷᠣᠭᠰᠠᠨ ᠪᠠᠢᠵᠠᠢ᠃ ᠡᠢᠨ ᠬᠦ᠌ ᠪᠯᠠᠮᠤ ᠡᠪᠡᠳᠴᠢᠨ ᠲᠡᠢ ᠠᠪᠤ ᠥᠨᠥᠴᠢᠨ ᠬᠡᠦᠬᠡᠳ ᠲᠡᠢ ᠪᠡᠨ ᠪᠠᠳᠠᠷᠠᠵᠤ ᠠᠮᠢᠳᠤᠷᠠᠨᠠ᠃ ᠬᠠᠷᠠ ᠬᠥᠮᠥᠨ ᠨᠢ ᠬᠣᠰᠢᠭᠤ ᠴᠡᠷᠢᠭ ᠲᠦ ᠲᠠᠲᠠᠭᠳᠠᠵᠤ ᠶᠠᠪᠤᠭᠠᠳ ᠲᠡᠷᠡ ᠵᠢᠯ ᠳᠡᠭᠡᠷᠡᠮ ᠳᠦ ᠠᠯᠠᠭᠳᠠᠭᠰᠠᠨ ᠴᠤᠤ ᠪᠠᠷ ᠰᠤᠷᠠᠭ ᠳᠠᠰᠤᠷᠠᠪᠠ᠃ ᠪᠯᠠᠮᠤ ᠪᠦᠰᠡᠭᠦᠢ ᠭᠠᠳᠠᠨᠠ ᠨᠣᠬᠠᠢ ᠶ᠋ᠢᠨ ᠳᠠᠭᠤ ᠪᠠᠷ ᠰᠣᠴᠢᠨ ᠭᠡᠯᠮᠡᠭᠳᠡᠵᠦ 《 ᠳᠡᠭᠡᠷᠡᠮ ᠢᠷᠡᠯᠡ!》 ᠭᠡᠳ ᠪᠠᠢᠳᠠᠭ ᠢ᠋ᠶ᠋ᠠᠨ ᠳᠠᠯᠳᠠᠯᠠᠵᠤ ᠳ᠋ᠧᠩ ᠢ᠋ᠶ᠋ᠡᠨ ᠤᠨᠲᠠᠷᠠᠭᠠᠵᠠᠢ᠃ ᠳᠡᠭᠡᠷᠡ ᠪᠡᠨ ᠲᠦᠰᠢᠭ ᠦᠭᠡᠢ ᠳᠡᠷᠭᠡᠳᠡ ᠪᠡᠨ ᠥᠮᠥᠭ ᠦᠭᠡᠢ ᠡᠨᠡ ᠪᠦᠰᠡᠭᠦᠢ ᠥᠴᠥᠭᠡᠳᠦᠷ ᠰᠥᠨᠢ ᠦᠦᠷ ᠴᠠᠢᠬᠤ ᠠᠯᠲᠠ ᠪᠠᠷ ᠳᠡᠭᠡᠷᠡᠮ ᠳ᠋ᠦ᠍ ᠪᠠᠢᠳᠠᠭ ᠢ᠋ᠶ᠋ᠠᠨ ᠲᠣᠨᠣᠭᠤᠯᠤᠭᠰᠠᠨ ᠳᠠᠭᠠᠨ ᠨᠣᠬᠠᠢ ᠬᠤᠴᠠᠬᠤ ᠳᠠᠭᠤᠨ ᠠ᠋ᠴᠠ ᠬᠠᠰᠢᠷᠠᠬᠤ ᠪᠣᠯᠤᠭᠰᠠᠨ ᠠᠵᠢ᠃ ᠣᠷᠴᠢᠮ ᠤ᠋ᠨ ᠵᠢᠯ ᠦᠳ ᠠ᠋ᠴᠠ ᠲᠤᠨᠤᠭᠠ ᠳᠡᠭᠡᠷᠡᠮ ᠬᠡᠴᠡᠭᠦᠳᠡᠵᠦ᠂ ᠮᠠᠯ ᠦᠨ ᠴᠢᠷᠠᠢ ᠬᠠᠷᠠᠵᠤ᠂ ᠲᠠᠷᠢᠶᠠᠨ ᠲᠦᠷᠦᠭᠦᠦ ᠲᠡᠭᠦᠵᠦ ᠤᠨᠳᠤᠷᠤᠭᠰᠠᠨ ᠮᠠᠯᠴᠢᠳ ᠠᠮᠤᠷ ᠰᠠᠭᠤᠬᠤ ᠠᠷᠭᠠ ᠦᠭᠡᠢ ᠪᠣᠯᠵᠤ᠂ ᠪᠦᠷ ᠠᠭᠤᠯᠠ ᠶᠢᠨ ᠵᠢᠯᠠᠭᠠ ᠬᠠᠪᠢᠳᠠᠵᠤ ᠰᠠᠭᠤᠷᠢᠰᠢᠬᠤ ᠪᠣᠯᠵᠠᠢ᠃
ᠭᠠᠳᠠᠨᠠ ᠤᠶᠠᠭᠠ ᠲᠠᠢ ᠨᠣᠬᠠᠢ ᠰᠣᠶᠣᠭᠠ ᠶ᠋ᠢ ᠨᠢ ᠪᠤᠯᠭᠤᠯᠬᠤ ᠭᠡᠵᠦ ᠪᠠᠢᠭᠠ ᠰᠢᠭ᠋ ᠠᠭᠰᠤᠷᠤᠨ ᠬᠣᠷᠭᠣᠭᠣᠨᠠ᠃
ᠭᠡᠷ ᠲᠤᠲᠤᠷᠠ ᠬᠥᠮᠥᠰ ᠣᠳᠣ ᠪᠠᠰᠠ ᠶᠠᠮᠠᠷ ᠭᠠᠢ ᠪᠣᠯᠳᠠᠭ ᠪᠣᠯ ᠭᠡᠵᠦ ᠶᠠᠮᠠᠷ ᠴᠤ᠌ ᠠᠷᠭᠠ ᠦᠭᠡᠢ ᠬᠤᠪᠢ ᠵᠠᠶᠠᠭᠠᠨ ᠳᠠᠭᠠᠨ ᠳᠠᠭᠠᠳᠬᠠᠵᠤ ᠭᠡᠷ ᠦᠨ ᠮᠤᠬᠤᠷ ᠪᠤᠯᠤᠩ ᠪᠠᠷᠢᠵᠤ ᠬᠠᠷᠠᠩᠭᠤᠢ ᠳᠤ ᠪᠥᠯᠲᠡᠩ ᠪᠥᠯᠲᠡᠩ ᠭᠡᠵᠦ ᠪᠡᠭᠡᠪᠡᠢᠨᠡ᠃
— ᠵᠣᠪ! ᠶᠠᠭᠤ ᠶᠠᠭᠠᠬᠢᠪᠠ ᠭᠡᠵᠦ ᠮᠣᠩᠭᠣᠯ ᠢᠶᠠᠷ ᠵᠠᠩᠳᠤᠷᠬᠤ ᠳᠠᠭᠤᠨ ᠢ ᠰᠣᠨᠣᠰᠤᠭᠰᠠᠨ ᠪᠯᠠᠮᠤ ᠪᠦᠰᠡᠬᠦᠢ ᠶᠢᠨ ᠵᠢᠷᠦᠬᠡ ᠠᠷᠠᠢ ᠲᠠᠢᠪᠤᠰᠢᠷᠠᠵᠤ 《ᠬᠥᠷᠥᠭ ᠦᠨ ᠭᠣᠣᠯ ᠤᠨ ᠠᠩᠴᠢᠨ ᠸᠠᠩᠵᠢᠯ ᠭᠤᠸᠠᠢ ᠴᠤ᠌ ᠶᠤᠮ ᠤᠤ?》 ᠭᠡᠵᠦ ᠴᠠᠭᠠᠳᠤ ᠪᠤᠯᠤᠩ ᠳᠤ ᠬᠡᠪᠲᠡᠭᠰᠡᠨ ᠠᠪᠤ ᠳᠠᠭᠠᠨ ᠦᠭᠡ ᠳᠠᠮᠵᠢᠭᠤᠯᠵᠤ ᠬᠡᠯᠡᠨᠡ᠃ ᠲᠡᠭᠡᠵᠦ ᠪᠠᠢᠲᠠᠯᠠ ᠮᠠᠭᠤ ᠪᠠᠨᠰᠠᠨ ᠡᠭᠦᠳᠡ ᠵᠢᠷᠳ᠋ ᠭᠡᠵᠦ ᠨᠡᠭᠡᠭᠡᠭᠳᠡᠨ ᠨᠢᠭᠡ ᠬᠥᠮᠥᠨ ᠣᠷᠣᠵᠤ ᠢᠷᠡᠪᠡ᠃
— ᠬᠥᠮᠥᠨ ᠪᠠᠢᠨᠠ ᠤᠤ ?
— ᠁
— ᠳ᠋ᠸᠩ ᠢᠶᠡᠨ ᠨᠣᠴᠣᠭᠠ! ᠪᠢ ᠵᠠᠮ ᠤᠨ ᠬᠥᠮᠥᠨ ᠪᠠᠢᠨᠠ᠃ ᠬᠣᠨᠣᠭ ᠭᠣᠶᠣᠭᠠᠳ ᠭᠠᠷᠤᠶᠠ ᠭᠡᠬᠦ ᠡᠴᠡ ᠨᠢ ᠲᠠᠨᠢᠯ ᠪᠢᠰᠢ ᠴᠤ᠌ ᠮᠣᠩᠭᠣᠯ ᠬᠥᠮᠥᠨ ᠪᠠᠢᠭᠠ ᠳᠤ ᠪᠯᠠᠮᠤ ᠠᠷᠠᠢ ᠵᠢᠷᠦᠬᠡ ᠣᠷᠣᠵᠤ ᠴᠦᠳᠡᠩ ᠵᠢᠷᠤᠵᠤ ᠱᠥᠯᠥᠨ ᠦ ᠲᠣᠰᠣᠨ ᠳ᠋ᠧᠩ ᠢ᠋ᠶ᠋ᠡᠨ ᠠᠰᠠᠭᠠᠪᠠ᠃ ᠪᠡᠶᠡ ᠪᠡᠨ ᠴᠤ᠌ ᠰᠠᠢᠨ ᠣᠯᠵᠤ ᠦᠵᠡᠬᠦ ᠦᠭᠡᠢ ᠮᠠᠭᠤᠬᠠᠨ ᠰᠦᠮᠡᠭᠢ ᠳ᠋ᠸᠩ ᠦᠨ ᠭᠡᠷᠡᠯ ᠳ᠋ᠦ᠍ ᠱᠠᠯᠳᠠᠩ ᠨᠢᠴᠦᠭᠦᠨ ᠰᠢᠬᠠᠭᠤ ᠡᠪᠦᠭᠡᠨ ᠬᠠᠨᠵᠤᠨ ᠤ᠋ ᠬᠣᠢᠲᠤ ᠢᠷᠣᠭᠠᠷ ᠲᠤ᠌ ᠶᠣᠣᠯᠠᠵᠤ ᠬᠡᠪᠲᠡᠬᠦ ᠬᠠᠷᠠᠭᠳᠠᠨᠠ᠃ ᠠᠳᠠᠭ ᠨᠢ ᠣᠯᠢᠭᠲᠠᠢᠬᠠᠨ ᠬᠤᠴᠢᠯᠭᠠ ᠶᠢᠨ ᠶᠠᠭᠤᠮᠠ ᠴᠤ᠌ ᠦᠭᠡᠢ ᠠᠵᠢ᠃ ᠨᠢᠭᠡ ᠵᠠᠯᠠᠭᠤᠬᠠᠨ ᠡᠬᠡᠨᠡᠷ ᠬᠠᠨᠵᠤᠨ ᠤ᠋ ᠪᠤᠯᠤᠩ ᠳ᠋ᠤ᠌ ᠬᠠᠷᠴᠠᠭᠠᠢ ᠦᠵᠡᠭᠡᠳ ᠪᠤᠳᠠᠨ ᠳᠤ ᠰᠢᠷᠭᠤᠭᠰᠠᠨ ᠪᠣᠷᠣ ᠪᠣᠯᠵᠣᠮᠣᠷ ᠰᠢᠭ᠋ ᠪᠡᠭᠡᠪᠡᠢᠵᠦ ᠬᠠᠷᠠᠭᠳᠠᠬᠤ ᠨᠢ ᠦᠷᠦ ᠡᠪᠡᠳᠦᠯᠲᠡᠢ᠃
ᠬᠡᠯᠡ ᠤᠯᠠ ᠪᠠᠨ ᠣᠯᠣᠯᠴᠠᠵᠤ᠂ ᠭᠡᠷ ᠲᠣᠲᠣᠷᠠ ᠠᠷᠠᠢ ᠲᠠᠢᠪᠤᠩ ᠠᠮᠢᠰᠬᠤᠯ ᠲᠠᠢ ᠪᠣᠯᠵᠤ ᠪᠯᠠᠮᠤ᠄
— ᠮᠠᠭᠤ ᠵᠤᠯᠵᠠᠭᠠ ᠨᠤᠭᠤᠳ ᠮᠢᠨᠢ ᠭᠠᠷᠴᠤ ᠢᠷᠡ ! ᠳᠡᠭᠡᠷᠡᠮ ᠪᠢᠰᠢ ᠠ᠋ ᠂ ᠰᠠᠢᠨ ᠬᠥᠮᠦᠨ ᠪᠠᠢᠨᠠ᠁ ᠭᠡᠬᠦ ᠳ᠋ᠦ᠍ᠨᠢ ᠬᠥᠰᠡᠷ ᠳᠣᠣᠷᠠ ᠵᠡᠷᠭᠡᠯᠡᠵᠦ ᠬᠥᠮᠥᠷᠢᠭᠰᠡᠨ ᠮᠠᠢᠵᠢᠢᠭᠰᠠᠨ ᠬᠣᠶᠠᠷ ᠠᠷᠤᠭ ᠤ᠋ᠨ ᠳᠣᠣᠷᠠ ᠠ᠋ᠴᠠ ᠳᠠᠯᠠᠨ ᠳᠠᠪᠬᠤᠷ ᠨᠥᠬᠥᠭᠡᠰᠦ ᠲᠡᠢ ᠰᠤᠮᠠᠯ ᠤ᠋ᠨ ᠥᠭᠡᠳᠡᠰᠦ ᠨᠥᠮᠥᠷᠦᠭᠰᠡᠨ ᠬᠣᠶᠠᠷ ᠵᠢᠭᠠᠯ ᠬᠦᠦ ᠨᠢᠰᠦ ᠪᠡᠨ ᠲᠠᠲᠠᠭᠰᠠᠭᠠᠷ ᠲᠣᠯᠣᠭᠠᠢ ᠪᠠᠨ ᠪᠤᠯᠲᠠᠢᠯᠭᠠᠪᠠ᠃
ᠠᠩᠴᠢᠨᠵᠠᠪ ᠡᠨᠡ ᠠᠢᠯ ᠤ᠋ᠨ ᠪᠡᠲᠡᠷᠡᠭᠰᠡᠨ ᠴᠢᠷᠠᠢ ᠶ᠋ᠢ ᠬᠠᠷᠠᠭᠠᠳ ᠡᠯᠢᠭᠡ ᠰᠢᠮᠰᠢᠷᠡᠵᠦ ᠥᠪᠡᠷ ᠦ᠋ᠨ ᠡᠮᠦᠰᠴᠦ ᠪᠠᠢᠭᠠ ᠬᠤᠪᠴᠠᠰᠤ <ᠲᠡᠷᠡ ᠡᠳᠦᠷ ᠵᠢᠰᠦ ᠪᠤᠷᠤᠭᠤᠯᠠᠬᠤ ᠭᠡᠵᠦ ᠲᠠᠷᠢᠶᠠᠴᠢᠨ ᠠᠢᠯ ᠠ᠋ᠴᠠ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠣᠭᠣᠲᠣᠷ ᠬᠤᠪᠴᠠᠰᠤ> ᠪᠠᠨ ᠲᠠᠢᠯᠵᠤ ᠲᠡᠨᠳᠡ ᠣᠯᠢᠭᠲᠠᠢ ᠬᠣᠶᠠᠷ ᠦᠭᠡ ᠬᠡᠯᠡᠴᠢᠬᠡᠮᠡᠷ ᠳᠡᠷ ᠦᠭᠡᠢ ᠬᠡᠪᠲᠡᠭᠰᠡᠨ ᠡᠪᠦᠭᠡᠨ ᠦ᠌ ᠳᠡᠭᠡᠭᠦᠷ ᠬᠤᠴᠢᠵᠤ ᠥᠭᠪᠡ᠃
— ᠦᠬᠡᠷ ᠵᠢᠯ ᠤ᠋ᠨ ᠬᠠᠯᠬᠠ ᠶ᠋ᠢᠨ ᠦᠢᠮᠡᠭᠡᠨ ᠡᠴᠡ ᠬᠣᠢᠰᠢ ᠮᠠᠨ ᠤ᠋ ᠨᠤᠲᠤᠭ ᠲᠤ᠌ ᠲᠣᠨᠣᠭᠠ ᠳᠡᠭᠡᠷᠡᠮ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥᠨ ᠡᠴᠡ ᠤᠷᠭᠤᠵᠤ ᠪᠠᠢᠭᠠ ᠰᠢᠬ ᠵᠦᠩᠳᠡᠭᠡᠨ ᠪᠣᠯᠵᠤ ᠠᠲᠠᠷ ᠬᠠᠭᠠᠯᠪᠤᠷᠢᠯᠠᠵᠤ ᠪᠡᠯᠴᠢᠭᠡᠷ ᠡᠪᠳᠡᠭᠡᠳ ᠮᠤᠨᠠ ᠶ᠋ᠢᠨ ᠬᠥᠭᠡᠪᠦᠷ ᠦ᠋ᠨ ᠮᠠᠯᠴᠢᠳ ᠠᠮᠢᠳᠤᠷᠠᠬᠤ ᠠᠷᠭᠠᠴᠠᠯ ᠦᠭᠡᠢ ᠪᠣᠯᠬᠤ ᠳ᠋ᠠᠭᠠᠨ ᠠᠭᠤᠯᠠᠨ ᠳ᠋ᠤ᠌ ᠰᠢᠷᠭᠤᠵᠤ᠂ ᠴᠢᠳᠠᠯ ᠲᠡᠩᠬᠡᠬᠡᠲᠡᠢ ᠨᠢᠭᠡ ᠨᠢ ᠠᠩ ᠬᠥᠷᠥᠭᠡ ᠬᠢᠵᠦ ᠳᠥᠩᠭᠡᠵᠦ ᠠᠮᠢ ᠵᠠᠭᠤᠨᠠ ᠁ ᠥᠴᠥᠭᠡᠳᠦᠷ ᠰᠥᠨᠢ ᠪᠠᠰᠠ ᠳᠡᠭᠡᠷᠡᠮ ᠢᠷᠡᠭᠰᠡᠨ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ᠨᠢ ᠡᠪᠦᠭᠡᠨ ᠦ ᠠᠮᠢᠰᠬᠤᠭᠠ ᠳᠡᠭᠡᠷᠡᠲᠡᠵᠦ ᠭᠡᠷᠡᠯ ᠨᠢ ᠤᠨᠲᠠᠷᠠᠭᠰᠠᠨ ᠡᠭᠦᠯᠡᠨ ᠬᠥᠬᠡ ᠨᠢᠳᠦ ᠨᠢ ᠴᠠᠪᠴᠢᠯᠬᠢᠯᠠᠨ᠂ ᠤᠷᠤᠭᠤᠯ ᠨᠢ ᠣᠮᠣᠭᠣᠨᠠᠵᠤ ᠪᠠᠢᠯᠠ᠃ ᠬᠡᠴᠢᠨᠡᠬᠡᠨ ᠡᠳᠦᠷ ᠬᠡᠯᠡᠨ ᠳᠡᠭᠡᠷᠡ ᠪᠡᠨ ᠨᠣᠢᠲᠠᠨ ᠶᠠᠭᠤᠮᠠ ᠲᠠᠯᠪᠢᠭᠠ ᠦᠭᠡᠢ ᠡᠪᠡᠳᠴᠢᠨ ᠦ ᠡᠪᠡᠷᠰᠢᠶᠡᠯ ᠳᠦ ᠲᠠᠮᠤᠯᠠᠭᠳᠠᠵᠤ ᠬᠡᠪᠲᠡᠭᠰᠡᠨ ᠳ᠋ᠡᠭᠡᠨ ᠠᠳᠠᠭ ᠨᠢ ᠤᠬᠢᠯᠠᠬᠤ ᠭᠡᠬᠦ ᠳ᠋ᠤᠨᠢ ᠨᠢᠯᠪᠤᠰᠤ ᠦᠭᠡᠢ ᠤᠬᠤᠷᠬᠠᠢ ᠨᠢ ᠰᠢᠷᠭᠢᠵᠦ ᠬᠠᠲᠠᠭᠰᠠᠨ ᠢ ᠶᠠᠭᠤ ᠬᠡᠯᠡᠬᠦ ᠪᠣᠢ!
— ᠠᠢ ᠳ᠋ᠠ᠂ ᠡᠨᠡ ᠬᠥᠯ ᠦᠭᠡᠢ ᠳᠦᠷᠪᠡᠭᠰᠡᠨ ᠨᠡᠢᠭᠡᠮ ᠳ᠋ᠦ᠍ ᠶᠠᠭᠠᠬᠢᠵᠤ ᠴᠤ᠌ ᠠᠮᠢᠳᠤᠷᠠᠶᠠ ᠳ᠋ᠠ! ᠭᠡᠳ ᠲᠡᠨᠳᠡ ᠶᠣᠣᠯᠠᠨ ᠬᠡᠪᠲᠡᠭᠡ ᠠᠪᠤ ᠪᠣᠯᠤᠨ ᠬᠣᠶᠠᠷ ᠨᠢᠴᠦᠭᠦᠨ ᠬᠦᠦ ᠪᠡᠨ ᠡᠭᠡᠯᠵᠢᠯᠡᠨ ᠬᠠᠷᠠᠬᠤ ᠪᠦᠰᠡᠭᠦᠢ 《ᠮᠥᠨ ᠡᠢᠮᠦ ᠯᠡ ᠬᠥᠭᠰᠢᠨ ᠨᠢ ᠬᠥᠭᠰᠢᠨ᠂ ᠬᠡᠦᠬᠡᠳ ᠨᠢ ᠬᠡᠦᠬᠡᠳ ᠁ ᠬᠠᠶᠠᠭᠠᠳ ᠴᠤ᠌ ᠶᠠᠪᠤᠵᠤ ᠲᠦᠪᠳᠡᠬᠦ ᠦᠭᠡᠢ᠂ ᠳᠡᠭᠡᠭᠰᠢ ᠨᠢ ᠲᠠᠲᠠᠬᠤ ᠴᠤ᠌ ᠲᠡᠩᠬᠡᠭᠡ ᠦᠭᠡᠢ ᠪᠠᠳᠠᠷᠠᠵᠤ ᠠᠮᠢᠳᠤᠷᠠᠭᠠ ᠰᠢᠦ ! ᠪᠣᠯᠳᠠᠭ ᠰᠠᠨ ᠪᠣᠯ ᠁ 》ᠭᠡᠵᠦ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠲᠣᠭᠠᠴᠢᠵᠤ ᠲᠡᠭᠦᠨ ᠡᠴᠡ ᠠᠪᠤᠷᠠᠯ ᠭᠣᠶᠣᠭᠠ ᠰᠢᠭ᠋ ᠬᠡᠯᠡᠵᠦ ᠪᠠᠢᠭᠠ ᠶ᠋ᠢ ᠠᠩᠴᠢᠨᠵᠠᠪ ᠣᠢᠯᠠᠭᠠᠵᠠᠢ᠃
ᠠᠩᠴᠢᠨᠵᠠᠪ ᠲᠡᠷᠡ ᠪᠡᠲᠡᠷᠡᠭᠰᠡᠨ ᠡᠬᠡᠨᠡᠷ ᠡᠴᠡ 《 ᠦᠭᠡᠢ᠂ ᠲᠠᠨ ᠤ᠋ ᠬᠠᠷᠠ ᠬᠥᠮᠦᠨ ᠴᠢᠨᠢ?》 ᠭᠡᠵᠦ ᠠᠰᠠᠭᠤᠬᠤ ᠭᠡᠳ ᠠᠰᠠᠭᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠠ ᠶ᠋ᠢ ᠠᠵᠢᠭᠠᠳ ᠪᠯᠠᠮᠤ ᠪᠦᠰᠡᠭᠦᠢ ᠠᠩᠴᠢᠨᠵᠠᠪ ᠤᠨ ᠨᠢᠴᠦᠭᠦᠨ ᠮᠥᠷᠥ ᠱᠠᠯᠳᠠᠩ ᠴᠡᠭᠡᠵᠢ ᠶ᠋ᠢ ᠬᠠᠢᠩᠭᠤᠳᠠ ᠰᠢᠷᠲᠡᠭᠰᠡᠨ ᠢ᠋ᠶ᠋ᠡᠨ ᠨᠢᠭᠤᠷ ᠨᠢ ᠨᠢᠯᠴᠢᠭᠢᠨᠡᠵᠦ᠄
— ᠬᠠᠷᠠ ᠬᠥᠮᠦᠨ ᠮᠢᠨᠢ ᠪᠠᠢᠭᠰᠠᠨ ᠪᠣᠯ ᠮᠠᠨ ᠤ᠋ ᠬᠢ ᠠᠷᠠᠢ ᠡᠢᠮᠦ ᠳᠠᠵᠢᠶᠠᠨ ᠳ᠋ᠤ᠌ ᠬᠦᠷᠬᠦ ᠦᠭᠡᠢ ᠯᠡ ᠳᠡ ! ᠠᠢ ᠳᠠ ᠂ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠪᠥᠭᠡᠰᠦ ② ᠶ᠋ᠢ ᠣᠯᠠᠨ ᠬᠣᠷᠣᠭᠠᠯᠠ ᠭᠡᠵᠦ ᠲᠡᠭᠷᠢ ᠪᠤᠷᠬᠠᠨ ᠪᠤᠷᠤᠭᠤ ᠦᠵᠡᠴᠢᠬᠡᠵᠡᠢ ! ᠭᠡᠳ ᠰᠠᠨᠠᠭᠠ ᠠᠯᠳᠠᠪᠠ᠃
— ᠁
— ᠠᠩ ᠬᠦᠷᠦᠭᠡ ᠰᠠᠢᠨ ᠬᠢᠵᠦ ᠫᠤᠤ ᠳ᠋ᠠᠭᠠᠨ ᠴᠡᠴᠡᠨ ᠪᠣᠯᠬᠣᠷ ᠬᠣᠰᠢᠭᠤ ᠬᠦᠩ ᠦ᠋ᠨ ᠲᠤᠰᠠᠯᠠᠭᠴᠢ ᠦᠵᠡᠵᠦ ᠲᠣᠭᠣᠭᠠᠳ ᠴᠡᠷᠢᠭ ᠲᠦ᠍ ᠲᠠᠲᠠᠭᠰᠠᠨ ᠁ ᠭᠡᠳ ᠪᠦᠰᠡᠬᠦᠢ ᠮᠡᠭᠰᠢᠪᠡ᠃
— ᠲᠡᠭᠡᠭᠡᠳ ᠳᠡᠭᠡᠷᠡᠮ ᠳᠦ ᠠᠯᠠᠭᠳᠠᠯᠠ ᠭᠡᠰᠡᠨ ᠰᠤᠷᠠᠭ ᠭᠠᠷᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠬᠣᠶᠠᠷ ᠵᠢᠯ ᠦ᠋ᠨ ᠨᠢᠭᠤᠷ ᠦᠵᠡᠯᠡ ᠁
ᠪᠯᠠᠮᠤ ᠶᠢᠨ ᠬᠠᠷᠠ ᠬᠥᠮᠥᠨ ᠢ ᠵᠠᠩᠴᠤᠪ ᠭᠡᠳᠡᠭ᠃ ᠬᠡᠴᠢᠨᠡᠬᠡᠨ ᠵᠢᠯ ᠦᠨ ᠳᠤᠷᠰᠢ ᠮᠤᠨᠠ ᠠᠭᠤᠯᠠ ᠶᠢᠨ ᠣᠲᠣᠷ ᠤᠨ ᠪᠠᠢᠰᠢᠩ ᠳᠤ ᠮᠠᠯ ᠬᠠᠷᠢᠭᠤᠯᠬᠤ ᠳᠠᠭᠠᠨ ᠭᠠᠯ ᠫᠤᠤ ᠪᠠᠷ ᠠᠩ ᠬᠥᠷᠥᠭᠡ ᠬᠢᠵᠦ ᠪᠤᠭᠤ᠂ ᠭᠤᠷᠠ᠂ ᠦᠨᠡᠬᠡ᠂ ᠴᠢᠨᠣᠠ ᠠᠯᠠᠵᠤ ᠠᠮᠢᠳᠤᠷᠠᠯ ᠳᠠᠭᠠᠨ ᠨᠡᠮᠡᠷᠢᠯᠡᠵᠦ ᠪᠠᠢᠪᠠ᠃ ᠲᠡᠷᠡ ᠪᠡᠷ ᠪᠠᠯᠠᠷᠯᠢᠭ ᠭᠠᠯ ᠫᠤᠤ <ᠠᠮᠠ ᠪᠠᠷ ᠨᠢ ᠰᠤᠯᠠ ᠳᠠᠷᠢ ᠰᠠᠪᠠᠯᠠᠵᠤ ᠨᠦᠳᠦᠭᠡᠳ ᠴᠡᠨᠡᠭᠯᠡᠳᠡᠭ> ᠪᠠᠷ ᠭᠥᠷᠥᠭᠡ ᠬᠢᠬᠦ ᠳ᠋ᠡᠭᠡᠨ ᠴᠤ᠌ ᠣᠨᠢᠯᠠᠵᠤ ᠬᠠᠷᠠᠭᠠᠯᠠᠳᠠᠭ ᠦᠭᠡᠢ ᠳᠠᠮ ᠢᠶᠠᠷ ᠢᠶᠠᠨ ᠫᠤᠤᠳᠠᠵᠤ ᠨᠢᠭᠡ ᠳᠤ ᠨᠢᠭᠡ ᠤᠨᠠᠭᠠᠳᠠᠭ᠃ ᠦᠨᠡᠭᠡ ᠲᠠᠤᠯᠠᠢ ᠶᠢ ᠳᠡᠷᠭᠡᠳᠡ ᠪᠡᠨ ᠳᠠᠭᠤᠳᠠᠵᠤ ᠠᠪᠴᠢᠷᠠᠭᠠᠳ ᠲᠠᠬᠢᠨ ᠳᠤᠰᠬᠠᠢ ᠦᠷᠭᠦᠭᠡᠵᠦ ᠴᠠᠭᠠᠰᠢ ᠲᠣᠭᠲᠠᠭᠠᠬᠤ ᠳ᠋ᠤᠨᠢ ᠬᠣᠢᠨᠠ ᠠᠴᠠ ᠨᠢ ᠬᠠᠷᠪᠤᠵᠤ ᠤᠨᠠᠭᠠᠳᠠᠭ ᠴᠡᠴᠡᠨ ᠫᠤᠤᠴᠢ ᠪᠠᠢᠵᠠᠢ᠃
ᠨᠢᠭᠡ ᠡᠳᠦᠷ ᠵᠠᠩᠴᠤᠪ ᠥᠯᠵᠡᠢᠲᠦ ᠶᠢᠨ ᠭᠣᠣᠯ ᠳᠤ ᠰᠢᠷᠬᠠᠳᠤᠭᠤᠯᠤᠭᠰᠠᠨ ᠦᠨᠡᠭᠡ ᠬᠥᠭᠡᠭᠡᠵᠦ ᠶᠠᠪᠤᠭᠠᠳ ᠠᠷᠪᠠᠭᠠᠳ ᠫᠤᠤ ᠲᠠᠢ ᠬᠥᠮᠥᠰ ᠲᠠᠢ ᠠᠭᠤᠯᠵᠠᠪᠠ᠃ ᠠᠵᠢᠭᠯᠠᠬᠤᠯᠠ ᠴᠥᠮ ᠮᠣᠩᠭᠣᠯᠵᠢᠭᠤ ᠵᠠᠰᠠᠯ ᠲᠠᠢ᠂ ᠬᠠᠶᠠ ᠨᠢᠭᠡ ᠬᠣᠶᠠᠷ ᠨᠢ ᠴᠡᠷᠢᠭ ᠬᠤᠪᠴᠠᠰᠤ ᠰᠤᠷ ᠪᠦᠰᠡ ᠲᠡᠢ ᠡᠴᠡ ᠨᠢ ᠳᠡᠭᠡᠷᠡᠮ ᠪᠢᠰᠢ ᠴᠡᠷᠢᠭ ᠦ᠋ᠨ ᠬᠥᠮᠦᠰ ᠭᠡᠵᠦ ᠮᠡᠳᠡᠭᠡᠳ ᠰᠠᠨᠠᠭᠠ ᠨᠢ ᠠᠭᠤᠵᠢᠷᠠᠵᠠᠢ᠃ ᠲᠡᠭᠡᠲᠡᠯᠡ ᠳᠠᠷᠤᠭᠠ ᠮᠠᠶᠢᠭᠲᠠᠢ ᠪᠢᠲᠡᠭᠦᠦ ᠨᠠᠭᠠᠯ ᠲᠠᠢ ᠨᠢᠭᠡ ᠡᠷᠡ᠄
— ᠴᠢ ᠶᠠᠭᠤᠨ ᠤ ᠬᠥᠮᠦᠨ ᠪᠤᠢ? ᠭᠡᠯᠡ᠃
— ᠭᠥᠷᠥᠭᠡᠴᠢ ᠭᠡᠬᠦ ᠳᠦ ᠥᠨᠥᠬᠢ ᠡᠷᠡ ᠮᠣᠷᠢᠨ ᠠᠴᠠ ᠪᠠᠨ ᠪᠠᠭᠤᠵᠤ ᠠᠬᠤᠷ ᠫᠤᠤ ᠪᠠᠨ ᠬᠤᠢᠯᠠᠭᠰᠠᠨ ᠳᠤ ᠳᠠᠭᠠᠭᠰᠠᠳ ᠨᠢ ᠮᠣᠷᠢᠨ ᠠᠴᠠ ᠪᠠᠨ ᠪᠠᠭᠤᠵᠠᠭᠠᠪᠠ᠃ ᠲᠡᠷᠡ ᠪᠢᠲᠡᠭᠦᠦ ᠨᠠᠭᠠᠯ ᠲᠠᠢ ᠡᠷᠡ ᠵᠠᠩᠴᠤᠪ ᠢ ᠵᠤᠯᠠᠢ ᠠᠴᠠ ᠨᠢ ᠠᠪᠤᠭᠠᠳ ᠤᠯᠠ ᠳ᠋ᠤᠨᠢ ᠲᠤᠯᠲᠠᠯᠠ ᠠᠵᠢᠭᠯᠠᠯᠠ᠃
— ᠨᠡᠷᠡ ᠴᠢᠨᠢ ?
— ᠵᠠᠩᠴᠤᠪ !
— ᠵᠠᠩᠴᠤᠪ ⁈
— ᠁
ᠵᠠᠩᠴᠤᠪ ᠲᠣᠯᠣᠭᠠᠢ ᠪᠠᠨ ᠲᠣᠬᠢᠪᠠ᠂
— ᠠᠩ ᠬᠥᠷᠥᠭᠡᠨ ᠳ᠋ᠦ᠍ ᠰᠠᠢᠨ ᠬᠠᠷᠪᠤᠭᠠᠴᠢ ᠭᠡᠵᠦ ᠨᠡᠷᠡ ᠴᠤᠤ ᠭᠠᠷᠳᠠᠭ ᠵᠠᠩᠴᠤᠪ ᠮᠥᠨ ᠪᠢᠵᠡ ?
— ᠲᠡᠢᠮᠦ ᠴᠤ᠌ ᠶᠡᠬᠡ ᠴᠤᠤ ᠭᠠᠷᠴᠤ ᠳᠠᠶᠠᠩ ᠢ᠋ ᠱᠤᠤᠭᠢᠭᠤᠯᠤᠨᠠ ᠦᠭᠡᠢ᠃
— ᠫᠤᠤ ᠳ᠋ᠠᠭᠠᠨ ᠴᠡᠴᠡᠨ ᠤᠤ ?
— ᠴᠡᠴᠡᠨ ᠴᠤ᠌ ᠭᠡᠵᠦ ᠬᠥᠪᠰᠥᠷᠳᠡᠵᠦ ᠴᠢᠳᠠᠬᠤ ᠦᠭᠡᠢ ᠠ᠋ ! ᠳᠥᠩᠭᠡᠭᠦᠷᠢ ᠭᠡᠬᠦ ᠳ᠋ᠦ᠍ᠨᠢ ᠥᠨᠥᠬᠢ ᠪᠢᠲᠡᠭᠦᠦ ᠨᠠᠭᠠᠯ ᠲᠠᠢ ᠡᠷᠡ 《 ᠫᠤᠤ ᠪᠠᠨ ᠠᠯᠢᠵᠢ !》 ᠭᠡᠵᠦ ᠲᠡᠭᠦᠨ ᠥᠭᠡᠳᠡ ᠭᠠᠷ ᠢ᠋ᠶ᠋ᠠᠨ ᠵᠠᠩᠭᠠᠪᠠᠯ ᠮᠠᠭᠤ ᠭᠠᠯ ᠫᠤᠤ ᠪᠠᠨ ᠲᠡᠷᠡ ᠡᠷᠡ ᠳ᠋ᠦ᠍ ᠱᠣᠷᠳ᠋ ᠭᠡᠲᠡᠯᠡ ᠰᠢᠳᠡᠵᠦ ᠥᠭᠪᠡ᠃ ᠲᠡᠷᠡ ᠡᠷᠡ ᠵᠠᠩᠴᠤᠪ ᠤᠨ ᠭᠠᠯ ᠫᠤᠤ ᠶ᠋ᠢᠨ ᠵᠠᠮᠤᠭ ᠢ᠋ ᠲᠠᠢᠯᠤᠨ ᠰᠠᠪᠠᠯᠠᠭᠰᠠᠨ ᠳᠠᠷᠢ ᠶ᠋ᠢ ᠨᠢ ᠠᠰᠬᠠᠪᠠ᠃
— ᠳᠥᠷᠪᠡᠨ ᠬᠥᠯ ᠲᠠᠢ ᠬᠥᠷᠥᠭᠡᠨ ᠳ᠋ᠡᠭᠡᠨ ᠰᠠᠢᠨ ᠭᠡᠵᠦ ᠠᠯᠳᠠᠷᠰᠢᠭᠰᠠᠨ ᠬᠥᠮᠦᠨ ᠬᠣᠶᠠᠷ ᠬᠥᠯ ᠲᠡᠢ ᠬᠥᠷᠥᠭᠡᠨ ᠳ᠋ᠦ᠍ ᠶᠠᠮᠠᠷ ᠪᠣᠢ ?
— ᠠ ᠮᠡᠳᠡᠬᠦ ᠦᠭᠡᠢ ᠡ ! ᠪᠢ ᠲᠡᠢᠮᠦ ᠠᠵᠢ ᠬᠢᠵᠦ ᠦᠵᠡᠭᠡ ᠦᠭᠡᠢ᠃
— ᠪᠠᠢᠳᠠᠯ ᠲᠥᠯᠥᠪ ᠡᠴᠡ ᠴᠢᠨᠢ ᠦᠵᠡᠬᠦ ᠳ᠋ᠦ᠍ ᠵᠢᠭᠠᠬᠠᠨ ᠳᠡᠭᠡᠷᠡᠮ ᠦ᠋ᠨ ᠰᠢᠨᠵᠢ ᠲᠡᠢ᠃ ᠳᠡᠭᠡᠷᠡᠮ ᠬᠢᠵᠦ ᠥᠩᠭᠡᠷᠡᠭᠰᠡᠨ ᠤᠤ ?
— ᠦᠭᠡᠢ ᠠ᠋ ᠂ ᠦᠭᠡᠢ᠃ ᠳᠡᠭᠡᠷᠡᠮ ᠳ᠋ᠦ᠍ ᠳᠡᠭᠡᠷᠡᠮᠳᠡᠭᠳᠡᠭᠰᠡᠨ ᠡᠴᠡ ᠪᠢᠰᠢ ᠬᠠᠷᠢᠨ ᠳᠡᠭᠡᠷᠡᠮ ᠬᠢᠵᠦ ᠦᠵᠡᠭᠡ ᠦᠭᠡᠢ᠃
— ᠶᠠᠩᠬᠠᠢ ᠶ᠋ᠢᠨ ᠭᠣᠣᠯ ᠠᠳᠠ ᠠ᠋ᠴᠠ ᠬᠡᠳᠦᠢ ᠬᠣᠯᠠ ᠪᠣᠢ ?
— ᠲᠡ – ᠷᠡ ᠤᠯᠠᠭᠠᠨ ᠰᠡᠷᠪᠡᠭᠡᠷ ᠬᠠᠳᠠ ᠲᠠᠢ ᠣᠷᠣᠢ ᠶ᠋ᠢᠨ ᠨᠠᠭᠠᠳᠤ ᠳᠣᠣᠷᠠ ᠪᠣᠢ᠃
— ᠬᠡᠳᠦᠢ ᠤᠳᠠᠭᠠᠨ ᠶᠠᠪᠤᠪᠠᠯ ᠲᠡᠨᠳᠡ ᠬᠦᠷᠬᠦ ᠪᠣᠢ?
— ᠠᠭᠤᠯᠠᠨ ᠵᠠᠮ ᠪᠠᠷᠲᠠᠭᠠᠲᠠᠢ ᠳᠠ ᠭᠡᠳ ᠲᠡᠷᠡ ᠴᠡᠷᠢᠭ ᠦ᠋ᠳ ᠦ᠋ᠨ ᠮᠣᠷᠢᠳ ᠢ᠋ ᠬᠠᠷᠠᠭᠠᠳ 《 ᠲᠠᠨᠤᠰ ᠤ᠋ᠨ ᠮᠣᠷᠢᠳ ᠤ᠋ᠨ ᠴᠢᠷᠠᠢ ᠪᠠᠷ ᠨᠠᠷᠠ ᠰᠢᠩᠭᠡᠬᠦ ᠳ᠋ᠦ᠍ ᠬᠥᠷᠪᠡᠯ ᠪᠤᠷᠬᠠᠨ ᠳ᠋ᠠᠭᠠᠨ ᠵᠠᠯᠪᠠᠷᠢ 》ᠭᠡᠵᠦ ᠪᠣᠳᠣᠭᠠᠳ᠄
— ᠮᠣᠷᠢᠲᠠᠢ ᠬᠥᠮᠥᠰ ᠶᠠᠭᠤ ᠤᠳᠠᠬᠤ ᠪᠣᠢ! ᠳᠤᠨᠳᠠᠭᠤᠷ ᠡᠳᠦᠷ ᠦ᠋ᠨ ᠵᠠᠮ ᠠ᠋ ᠭᠡᠪᠡ᠃
— ᠲᠦᠷᠦᠭᠦᠬᠡᠨ ᠶᠠᠩᠬᠠᠢ ᠶ᠋ᠢᠨ ᠭᠣᠣᠯ ᠢ᠋ᠶ᠋ᠠᠷ ᠨᠢᠭᠡ ᠪᠦᠯᠦᠭ ᠳᠡᠭᠡᠷᠡᠮ ᠠᠢᠯ ᠲᠣᠨᠣᠵᠤ ᠪᠠᠢᠨᠠ ᠭᠡᠰᠡᠨ ᠢ᠋ ᠲᠤᠭᠤᠯᠤᠭᠰᠠᠨ ᠤᠤ?
— ᠲᠤᠭᠤᠯᠤᠭᠰᠠᠨ! ᠥᠴᠥᠭᠡᠳᠦᠷᠬᠡᠨ ᠵᠤᠳᠪᠠ ᠮᠡᠢᠷᠡᠨ ᠦ᠌ ᠭᠤᠴᠢᠭᠠᠳ ᠦᠬᠡᠷ᠂ ᠵᠠᠭᠤ ᠭᠠᠷᠤᠢ ᠬᠣᠨᠢ ᠢᠮᠠᠭᠠ ᠶ᠋ᠢ ᠨᠢ ᠰᠠᠯᠭᠠᠵᠤ ᠲᠠᠭᠤᠯᠠ ᠭᠡᠰᠡᠨ᠃
— ᠲᠡᠷᠡ ᠳᠡᠭᠡᠷᠡᠮ ᠦᠳ ᠡᠦᠲᠦ ᠶᠠᠩᠬᠠᠢ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠪᠠᠢᠭᠠ ᠪᠣᠯᠪᠠ ᠤᠤ ?
— ᠶᠠᠪᠤᠴᠢᠬᠠᠭᠠ ᠦᠭᠡᠢ ᠪᠣᠯ ᠪᠠᠢᠬᠤ ᠯᠠ ᠶᠣᠰᠣᠲᠠᠢ᠃
— ᠴᠢ ᠮᠠᠨᠤᠰ ᠲᠤ ᠲᠦᠳᠡ ᠵᠠᠮ ᠢ᠋ᠶ᠋ᠠᠷ ᠭᠠᠵᠠᠷᠴᠢᠯᠠᠵᠤ ᠵᠤᠳᠪᠠ ᠮᠡᠢᠷᠡᠨ ᠦ᠌ ᠬᠢ ᠶ᠋ᠢ ᠵᠢᠭᠠᠵᠤ ᠥᠭ! ᠮᠡᠳᠡᠪᠡ ᠤᠤ ⁈ ᠭᠡᠳ ᠬᠥᠲᠥᠯᠵᠦ ᠶᠠᠪᠤᠭᠠ ᠵᠠᠢᠳᠠᠩ ᠮᠣᠷᠢᠨ ᠤ ᠰᠣᠷ ᠴᠤᠯᠪᠤᠭᠤᠷ ᠢ ᠰᠢᠲᠡᠵᠦ ᠥᠭᠪᠡ᠃
ᠨᠠᠷᠠ ᠬᠥᠲᠥᠯ ᠦᠨ ᠣᠷᠣᠢ ᠰᠢᠪᠲᠤᠷᠤᠨ᠂ ᠠᠭᠤᠯᠠ ᠶ᠋ᠢᠨ ᠰᠡᠭᠦᠳᠡᠷ ᠤᠨᠠᠬᠤ ᠳ᠋ᠤ᠌ ᠶᠠᠩᠬᠠᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠠᠮᠠᠨ ᠳ᠋ᠤ᠌ ᠣᠲᠣᠷᠯᠠᠭᠰᠠᠨ ᠵᠤᠳᠪᠠ ᠮᠡᠢᠷᠡᠨ ᠤ ᠣᠲᠣᠷ ᠤᠨ ᠭᠡᠷ ᠦᠨ ᠬᠢᠨᠢ ᠵᠡᠭᠦᠨ ᠬᠠᠮᠠᠷ ᠳᠡᠭᠡᠷᠡ ᠣᠴᠢᠵᠤ ᠮᠣᠷᠢᠨ ᠠ᠋ᠴᠠ ᠪᠠᠭᠤᠵᠠᠭᠠᠪᠠ᠃
ᠳᠤᠷᠠᠨ ᠤ ᠬᠠᠷᠠᠭᠠᠨ ᠳᠤ ᠬᠣᠷᠢ ᠭᠤᠴᠢᠭᠠᠳ ᠮᠣᠷᠢᠳ ᠡᠨᠳᠡ ᠲᠡᠨᠳᠡ ᠮᠣᠳᠣᠨ ᠤ ᠳᠣᠣᠷᠠ ᠤᠶᠠᠭᠠᠲᠠᠢ ᠬᠠᠷᠠᠭᠳᠠᠵᠤ᠂ ᠭᠡᠷ ᠦᠨ ᠲᠣᠲᠣᠷᠠ ᠭᠠᠳᠠᠨᠠ ᠬᠥᠮᠥᠰ ᠠᠪᠠᠭᠠᠷᠠᠯᠳᠤᠵᠤ᠂ ᠲᠤᠯᠭᠠ ᠲᠣᠭᠣᠭᠠ ᠲᠣᠭᠣᠷᠢᠭᠠᠳ ᠪᠤᠵᠢᠭᠢᠨᠠᠯᠳᠤᠵᠤ ᠪᠠᠢᠭᠠ ᠠᠴᠠ ᠪᠣᠳᠣᠪᠠᠯ ᠬᠣᠨᠢ ᠮᠠᠯ ᠠᠯᠠᠵᠤ ᠮᠢᠬᠠ ᠴᠢᠨᠠᠵᠤ ᠢᠳᠡᠬᠦ ᠭᠡᠵᠦ ᠪᠠᠢᠭᠠ ᠪᠣᠯᠣᠯᠲᠠᠢ᠃ ᠣᠴᠢᠭᠰᠠᠨ ᠬᠥᠮᠥᠰ ᠱᠠᠯᠠᠪᠳᠠᠵᠤ ᠵᠡᠭᠦᠨ ᠪᠠᠷᠠᠭᠤᠨ ᠬᠣᠢᠳᠤ ᠬᠥᠲᠥᠯ ᠢ ᠪᠦᠰᠡᠯᠡᠵᠦ᠂ ᠤᠷᠳᠤ ᠠᠮᠠ ᠶᠢ ᠨᠢ ᠣᠩᠭᠣᠢᠯᠭᠠᠵᠤ ᠲᠡᠭᠦᠪᠡᠷ ᠲᠤᠲᠠᠭᠠᠬᠤ ᠳ᠋ᠤᠨᠢ ᠪᠦᠭᠭᠦᠵᠦ ᠤᠰᠠᠳᠬᠠᠬᠤ ᠪᠠᠷ ᠪᠡᠯᠡᠳᠬᠡᠪᠡ᠃ ᠬᠣᠶᠠᠷ ᠲᠠᠯᠠ ᠪᠠᠷ ᠢᠶᠠᠨ ᠰᠢᠷᠦᠭᠦᠨ ᠲᠤᠯᠤᠯᠳᠤᠵᠤ ᠡᠬᠢᠯᠡᠯᠡ᠃ ᠵᠠᠩᠴᠤᠪ ᠡᠳᠡᠨᠥᠰ ᠦ᠋ᠨ ᠫᠤᠤ ᠰᠠᠢᠨ ᠴᠤ᠌ ᠳᠡᠮᠡᠢ ᠬᠣᠭᠣᠰᠣᠨ ᠫᠤᠤᠳᠠᠬᠤ ᠶ᠋ᠢ ᠦᠵᠡᠭᠡᠳ ᠭᠠᠩᠰᠠᠨ ᠲᠠᠮᠠᠬᠢ ᠪᠤᠭ ᠤᠷᠤᠯᠳᠤᠵᠤ ᠰᠠᠭᠤᠬᠤ ᠳ᠋ᠠᠭᠠᠨ ᠫᠤᠤ ᠰᠤᠮᠤᠨ ᠤ᠋ ᠬᠣᠷᠣᠬᠠᠢ ᠨᠢ ᠬᠥᠳᠡᠯᠵᠦ ᠭᠠᠷ ᠨᠢ ᠵᠠᠭᠠᠲᠤᠨᠠᠵᠤ᠄
— ᠢᠰᠢ᠂ ᠶᠣᠰᠣᠲᠠᠢ ᠬᠠᠢᠷᠠᠨ ᠰᠤᠮᠤ ᠡᠢᠮᠦ ᠰᠠᠢᠨ ᠫᠤᠤ ᠰᠤᠮᠤ ᠲᠠᠢ ᠪᠠᠢᠭᠠᠳ ᠁ ᠭᠡᠳ ᠡᠷᠡᠦ ᠪᠡᠨ ᠮᠤᠰᠬᠢᠵᠤ ᠬᠡᠯᠡᠬᠦ ᠳᠦ ᠨᠥᠭᠦᠭᠡ ᠪᠢᠲᠡᠭᠦᠦ ᠨᠠᠭᠠᠯ ᠲᠠᠢ ᠡᠷᠡ ᠰᠣᠨᠣᠰᠤᠭᠠᠳ᠄
— ᠡᠨᠡ ᠴᠤ᠌ ᠪᠠᠰᠠ ᠨᠢᠭᠡ ᠲᠠᠭᠠᠲᠠᠢ ᠠᠷᠠᠰᠤᠨ ᠳᠠᠭᠠᠨ ᠪᠠᠭᠲᠠᠬᠤ ᠦᠭᠡᠢ ᠬᠥᠪᠰᠥᠷᠳᠡᠳᠡᠭ 《ᠭᠠᠯ ᠦᠨ ᠭᠡᠰᠢᠭ 》③ ᠶᠤᠮ ᠡ ! ᠮᠠᠢ᠂ ᠴᠢᠮᠠ ᠳᠤ ᠨᠢᠭᠡ ᠫᠤᠤ ᠥᠭᠭᠦᠶᠡ! ᠴᠢᠨᠦ ᠫᠤᠤᠳᠠᠬᠤ ᠶ᠋ᠢ ᠦᠵᠡᠶᠡ᠃ ᠵᠠᠳᠠᠭᠠᠢ ᠭᠦᠶᠦᠭᠰᠡᠨ ᠭᠥᠷᠥᠭᠡᠰᠦ ᠠᠷᠠᠢ ᠪᠢᠰᠢ ᠰᠢᠦ᠃ ᠴᠠᠭᠠᠳᠤᠬᠢ ᠴᠢᠨᠢ ᠫᠤᠤ ᠵᠡᠪᠰᠡᠭ ᠲᠡᠢ ᠬᠥᠮᠦᠨ ᠪᠠᠢᠨᠠ᠁ ᠶᠠᠭᠤ ᠭᠡᠵᠦ ᠰᠠᠨᠠᠪᠠ? ᠭᠡᠬᠦ ᠳᠦ᠂
— ᠵᠠ᠂ ᠠᠯᠢ! ᠭᠡᠳ ᠠᠯᠢ ᠬᠡᠳᠦᠢᠨ ᠭᠠᠷ ᠨᠢ ᠵᠠᠭᠠᠲᠤᠨᠠᠭᠰᠠᠨ ᠵᠠᠩᠴᠤᠪ ᠲᠦᠷᠭᠡᠨ ᠫᠤᠤ ᠶ᠋ᠢ ᠲᠣᠰᠴᠤ ᠰᠤᠮᠤ ᠳᠠᠷᠤᠮᠠᠭᠴᠠ ᠬᠠᠷᠠᠭᠠᠯᠠᠬᠤ ᠴᠤ᠌ ᠦᠭᠡᠢ ᠪᠡᠷ ᠫᠤᠤᠳᠠᠬᠤ ᠭᠡᠬᠦ ᠳᠦ ᠄
— ᠬᠦᠶᠢ᠂ ᠬᠦᠶᠢ! ᠬᠢᠴᠢᠶᠡ᠂ ᠬᠢᠴᠢᠶᠡ 《 ᠭᠠᠯ ᠤ᠋ᠨ ᠬᠡᠰᠢᠭ 》 ᠠ᠋ ! ᠫᠤᠤ ᠰᠤᠮᠤ ᠭᠡᠭᠴᠢ ᠠᠨᠳᠠᠭᠠ ᠲᠠᠢ ᠪᠠᠢᠳᠠᠭ ᠰᠢᠦ ! ᠲᠦᠷᠭᠡᠨ ᠫᠤᠤ ᠭᠡᠭᠴᠢ ᠣᠨᠢᠯᠠᠵᠤ ᠬᠠᠷᠠᠭᠠᠯᠠᠳᠠᠭ ᠶᠤᠮ ᠰᠢᠦ ! ᠵᠦᠭᠡᠷ ᠯᠡ ᠶᠣᠳᠠᠷ ᠳᠠᠯᠠᠢᠬᠤ ᠰᠢᠭ᠋ ᠁ ᠠᠢ ᠳᠠ᠂ ᠡᠨᠡ ᠴᠤ᠌ ᠲᠦᠷᠭᠡᠨ ᠫᠤᠤ ᠪᠠᠷᠢᠵᠤ ᠴᠤ᠌ ᠦᠭᠡᠢ ᠵᠣᠯᠢᠭ ᠶᠤᠮ ᠪᠠᠢᠨᠠ ᠁ ᠴᠢᠨᠦ ᠡᠨᠡ ᠶᠠᠩᠵᠤ ᠪᠠᠷ ᠳᠠ! ᠭᠡᠵᠦ ᠴᠠᠭᠠᠳᠤᠬᠢ ᠨᠢ ᠲᠣᠭᠣᠮᠰᠠᠷ ᠦᠭᠡᠢ ᠢᠷᠪᠠᠢᠵᠤ ᠪᠠᠢᠯᠠ᠃
ᠵᠠᠩᠴᠤᠪ ᠬᠥᠮᠥᠨ ᠰᠢᠭ ᠫᠤᠤ ᠣᠨᠢᠯᠠᠵᠤ ᠬᠠᠷᠠᠭᠠᠯᠠᠨᠠ ᠭᠡᠳᠡᠭ ᠦᠭᠡᠢ ᠡᠷᠭᠦᠵᠦ ᠠᠪᠤᠭᠠᠳ ᠲᠡᠷᠡ ᠵᠦᠭ ᠤᠷᠤᠭᠤ ᠳᠠᠮ ᠢᠶᠠᠷ ᠨᠢ ᠫᠤᠤᠳᠠᠵᠤ ᠥᠭᠪᠡ᠃ ᠲᠡᠭᠡᠬᠦ ᠳᠦ ᠨᠡᠬᠡᠷᠡᠨ ᠰᠠᠨᠠᠭᠰᠠᠨ ᠠᠴᠠ ᠭᠠᠳᠠᠭᠤᠷ ᠬᠡᠳᠦ ᠬᠡᠳᠦᠨ ᠳᠡᠭᠡᠷᠡᠮ ᠢ ᠲᠣᠩᠭᠣᠢᠯᠭᠠᠴᠢᠬᠠᠪᠠ᠃ ᠲᠡᠭᠡᠭᠡᠳ ᠲᠡᠷᠡ ᠤᠳᠠᠭᠠ ᠣᠯᠠᠨ ᠳᠡᠭᠡᠷᠡᠮ ᠢ᠋ ᠤᠰᠠᠳᠬᠠᠭᠰᠠᠨ ᠠ᠋ᠴᠠ ᠪᠢᠲᠡᠭᠦᠦ ᠨᠠᠭᠠᠯ ᠲᠠᠢ ᠡᠶᠡ ᠲᠡᠭᠦᠨ ᠢ᠋ ᠲᠣᠭᠣᠵᠤ ᠬᠣᠰᠢᠭᠤ ᠴᠡᠷᠢᠭ ᠲᠡᠭᠡᠨ ᠲᠠᠲᠠᠵᠤ ᠠᠪᠴᠠᠢ᠃
᠁
ᠪᠯᠠᠮᠤ ᠪᠦᠰᠡᠬᠦᠢ ᠨᠢᠯᠪᠤᠰᠤ ᠪᠠᠨ ᠵᠦᠯᠭᠦᠵᠦ᠄
— ᠥᠴᠥᠭᠡᠳᠦᠷ ᠰᠥᠨᠢ ᠶᠢᠨ ᠳᠡᠭᠡᠷᠡᠮ ᠭᠡᠵᠦ ᠶᠣᠰᠣᠲᠠᠢ ᠨᠢᠳᠦᠨ ᠳ᠋ᠡᠭᠡᠨ ᠤᠰᠤ ᠦᠭᠡᠢ ᠴᠢᠰᠤ ᠨᠤᠭᠤᠳ ᠪᠠᠢᠭᠠ ᠁ ᠦᠬᠦᠬᠦ ᠳ᠋ᠡᠭᠡᠨ ᠣᠢᠷᠠᠲᠤᠭᠰᠠᠨ ᠡᠪᠦᠭᠡᠨ ᠦ ᠬᠤᠴᠢᠯᠭᠠ <ᠤᠲᠠᠰᠤᠨ ᠰᠢᠷᠬᠡᠭ ᠲᠠᠢ ᠨᠢᠮᠬᠡᠨ ᠬᠤᠴᠢᠯᠭᠠ> ᠶᠢ ᠬᠦᠷᠲᠡᠯᠡ ᠬᠠᠭᠤᠯᠵᠤ᠂ ᠡᠮᠦᠰᠦᠭᠰᠡᠨ ᠮᠠᠭᠤ ᠲᠠᠪᠤᠤ ᠲᠡᠷᠯᠢᠭ ᠢ ᠨᠢ ᠬᠦᠷᠲᠡᠯᠡ ᠠᠪᠴᠤ ᠶᠠᠪᠤᠭᠰᠠᠨ ᠁ ᠭᠡᠬᠦ ᠨᠢ ᠡᠭᠡᠭᠡ ᠯᠠ ᠬᠦᠯᠢᠶᠡᠵᠦ ᠬᠦᠯᠢᠶᠡᠵᠦ ᠤᠳᠠᠭᠠᠳ ᠢᠷᠡᠬᠦ ᠬᠠᠷᠠ ᠬᠥᠮᠥᠨ ᠦ ᠪᠡᠨ ᠪᠠᠷᠠ ᠪᠠᠷ ᠲᠣᠨᠢᠷᠬᠠᠨ ᠭᠣᠮᠣᠳᠠᠵᠤ ᠳᠠᠯᠠᠨ ᠪᠤᠯᠴᠢᠷᠬᠠᠢ ᠪᠠᠨ ᠲᠣᠭᠠᠯᠠᠵᠤ ᠪᠠᠢᠭᠠ ᠰᠢᠭ᠋ ᠪᠠᠢᠯᠠ᠃
— ᠠᠢ᠂ ᠪᠢ ᠴᠢᠨᠢ ᠦᠭᠡᠨ ᠳ᠋ᠡᠭᠡᠨ ᠪᠣᠯᠣᠭᠠᠳ ᠵᠣᠴᠢᠨ ᠳᠠᠭᠠᠨ ᠴᠠᠢ ᠴᠤ᠌ ᠦᠭᠡᠢ ᠭᠡᠳ ᠪᠣᠰᠴᠤ ᠵᠡᠰ ᠳᠡᠪᠦᠷᠡ ᠳᠦ ᠴᠠᠢ ᠣᠢᠵᠤ ᠭᠠᠯ ᠨᠣᠴᠣᠭᠠᠪᠠ᠃
ᠬᠥᠰᠡᠷ ᠵᠣᠭᠰᠣᠭᠠ ᠬᠣᠶᠠᠷ ᠵᠢᠭᠠᠯ ᠬᠦᠦ ᠡᠨᠡ ᠢᠷᠡᠭᠰᠡᠨ ᠭᠡᠢᠴᠢᠨ ᠦ᠌ ᠭᠠᠷ ᠠ᠋ᠴᠠ ᠶᠠᠭᠤ ᠨᠢᠭᠡ ᠶᠠᠭᠤᠮᠠ ᠭᠣᠷᠢᠳᠠᠭᠰᠠᠨ ᠰᠢᠭ᠋ ᠪᠦᠯᠲᠡᠩ ᠪᠦᠯᠲᠡᠩ ᠬᠠᠷᠠᠨᠠ᠃
ᠠᠩᠴᠢᠨᠵᠠᠪ ᠱᠤᠤᠮᠠᠰᠠ ᠪᠠᠨ ᠲᠡᠮᠲᠡᠷᠢᠵᠦ ᠬᠡᠦᠬᠡᠳ ᠦ᠋ᠨ ᠨᠢᠳᠤᠷᠭᠠᠨ ᠴᠢᠨᠡᠭᠡ ᠬᠣᠶᠠᠷ ᠬᠡᠰᠡᠭ ᠮᠥᠰᠥᠨ ᠰᠢᠬᠢᠷ ᠭᠠᠷᠭᠠᠵᠤ ᠥᠨᠥᠬᠢ ᠬᠣᠶᠠᠷ ᠬᠡᠦᠬᠡᠳ ᠲᠦ᠍ ᠥᠭᠪᠡᠯ ᠬᠣᠶᠠᠷ ᠬᠡᠦᠬᠡᠳ ᠲᠠᠨᠢᠬᠤ ᠦᠭᠡᠢ ᠬᠠᠷᠠ ᠬᠥᠮᠦᠨ ᠡᠴᠡ ᠪᠢᠰᠢᠭᠦᠷᠬᠡᠵᠦ ᠬᠣᠶᠠᠷ ᠪᠢᠴᠢᠬᠠᠨ ᠭᠠᠷ ᠢ᠋ᠶ᠋ᠠᠨ ᠨᠤᠬᠤᠯᠠᠭᠠᠳ ᠠᠪ ᠶᠠᠳᠠᠨᠠ᠃ ᠠᠪᠤ ᠠ᠋ᠴᠠ ᠪᠠᠨ ᠬᠣᠢᠰᠢ ᠶᠡᠬᠡ ᠤᠳᠠᠭᠠᠨ ᠰᠢᠬᠢᠷ ᠦ᠋ᠨ ᠠᠮᠲᠠ ᠶ᠋ᠢ ᠠᠮᠲᠠᠯᠠᠵᠤ ᠦᠵᠡᠭᠡ ᠦᠭᠡᠢ᠂ ᠪᠠᠷᠤᠭ ᠮᠠᠷᠲᠠᠬᠤ ᠳᠡᠭᠡᠷᠡ ᠬᠦᠷᠦᠭᠰᠡᠨ ᠬᠣᠶᠠᠷ ᠬᠡᠦᠬᠡᠳ ᠦ᠋ᠨ ᠪᠣᠳᠣᠯ ᠳ᠋ᠤ᠌ ᠡᠨᠡ ᠬᠥᠮᠦᠨ ᠦ᠌ ᠭᠠᠷ ᠳᠠᠬᠢ ᠮᠥᠰᠥᠨ ᠰᠢᠬᠢᠷ ᠨᠢ ᠶᠠᠭᠤᠨ ᠠᠴᠠ ᠢᠯᠡᠭᠦᠦ ᠡᠷᠬᠢᠮ ᠰᠠᠢᠬᠠᠨ ᠰᠠᠨᠠᠭᠳᠠᠵᠤ᠂ ᠡᠨᠡ ᠰᠢᠬᠢᠷ ᠥᠭᠴᠦ ᠪᠠᠢᠭᠠ ᠬᠥᠮᠦᠨ ᠠᠪᠤ ᠨᠢ ᠪᠠᠢᠭᠰᠠᠨ ᠪᠣᠯ ᠠᠯᠢ ᠬᠡᠳᠦᠢᠨ ᠡᠪᠦᠷ ᠲᠤᠨᠢ ᠣᠴᠢᠵᠤ ᠰᠠᠭᠤᠭᠠᠳ ᠪᠤᠯᠢᠶᠠᠯᠳᠤᠵᠤ ᠰᠢᠬᠢᠷ ᠢ᠋ᠶ᠋ᠡᠷ ᠨᠣᠵᠣᠭᠣᠷᠠᠭᠰᠠᠨ ᠰᠢᠯᠦᠰᠦ ᠪᠡᠨ ᠴᠤᠪᠤᠷᠠᠭᠤᠯᠲᠠᠯᠠ ᠬᠦᠯᠬᠦᠬᠦ ᠪᠠᠢᠭᠰᠠᠨ᠃ ᠭᠡᠲᠡᠯᠡ ᠡᠨᠡ ᠬᠠᠷᠠ ᠬᠥᠮᠦᠨ ᠠᠪᠤ ᠨᠢ ᠪᠢᠰᠢ ᠪᠣᠯᠬᠣᠷ ᠲᠡᠭᠡᠵᠦ ᠡᠷᠬᠡ ᠳᠤᠷᠠ ᠪᠡᠷ ᠪᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠯᠡ ᠪᠠᠢᠯᠠ᠃
ᠨᠢᠵᠢᠭᠡᠳ ᠮᠥᠰᠥᠨ ᠰᠢᠬᠢᠷ ᠢ᠋ᠶ᠋ᠠᠷ ᠱᠠᠩᠨᠠᠭᠤᠯᠤᠭᠠᠳ ᠬᠣᠶᠠᠷ ᠵᠢᠭᠠᠯ ᠬᠦᠦ ᠠᠮᠲᠠᠷᠬᠠᠨ ᠬᠦᠯᠬᠦᠵᠦ ᠪᠠᠢᠪᠠ᠃ ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠥᠨᠥᠬᠢ ᠬᠣᠶᠠᠷ ᠵᠢᠭᠠᠯ ᠬᠦᠦ ᠶᠢᠨ ᠵᠣᠷᠢᠭ ᠨᠢ ᠪᠦᠳᠦᠭᠦᠷᠡᠵᠦ ᠬᠠᠨᠵᠤᠨ ᠳᠡᠭᠡᠷᠡ ᠦᠰᠦᠷᠴᠦ ᠭᠠᠷᠤᠭᠠᠳ ᠠᠩᠴᠢᠨᠵᠠᠪ ᠢ ᠠᠪᠤ ᠪᠠᠨ ᠭᠡᠵᠦ ᠪᠣᠳᠣᠭᠰᠠᠨ ᠴᠤ᠌ ᠪᠣᠯᠪᠠ ᠤᠤ ᠭᠡᠮᠡᠷ ᠲᠡᠭᠦᠨ ᠲᠡᠢ ᠡᠭᠡᠨᠡᠭᠰᠢᠵᠦ ᠬᠠᠪᠢᠳᠠᠬᠤ ᠰᠠᠨᠠᠭᠠᠲᠠᠢ ᠭᠠᠷ ᠬᠤᠷᠤᠭᠤ ᠶ᠋ᠢ ᠨᠢ ᠣᠷᠣᠯᠳᠣᠬᠤ ᠰᠢᠭ᠋ ᠪᠣᠯᠤᠯᠠ᠃
ᠳᠡᠪᠦᠷᠡ ᠲᠠᠢ ᠴᠠᠢ ᠪᠤᠴᠠᠯᠪᠠ᠃ ᠪᠯᠠᠮᠤ ᠠᠩᠴᠢᠨᠵᠠᠪ ᠲᠤ ᠴᠠᠢ ᠠᠶᠠᠭᠠᠯᠠᠬᠤ ᠶ᠋ᠢᠨ ᠵᠠᠪᠰᠠᠷ᠄
— ᠲᠣᠮᠣᠭᠠ ᠲᠠᠢ ᠰᠠᠭᠤ! ᠡᠨᠡ ᠬᠥᠮᠥᠨ ᠬᠤᠭᠤᠨᠤᠩ ④ ᠬᠡᠦᠬᠡᠳ ᠦᠨ ᠴᠢᠬᠢ ᠣᠭᠲᠣᠯᠳᠠᠭ ᠰᠢᠦ! ᠲᠠᠬᠢᠭᠠᠳ ᠦᠭᠡ ᠰᠣᠨᠣᠰᠬᠤ ᠦᠭᠡᠢ ᠪᠣᠯ ᠪᠥᠯᠳᠦᠭ ᠴᠤ᠌ ᠠᠪᠴᠢᠬᠠᠳᠠᠭ ᠬᠥᠮᠥᠨ ᠭᠡᠨᠡ ᠯᠠᠢ ᠭᠡᠬᠦ ᠳᠦ ᠬᠣᠶᠠᠷ ᠬᠡᠦᠬᠡᠳ ᠠᠩᠴᠢᠨᠵᠠᠪ ᠤᠨ ᠴᠢᠷᠠᠢ ᠥᠭᠡᠳᠡ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠬᠠᠷᠠᠩᠭᠠᠨ ᠦᠨᠡᠭᠡᠷ ᠨᠠᠮᠠᠶ᠋ᠢ ᠮᠥᠰᠥᠨ ᠰᠢᠬᠢᠷ ᠢᠶᠡᠷ ᠢᠶᠡᠨ ᠬᠠᠭᠤᠷᠴᠤ ᠪᠠᠢᠭᠠᠳ ᠪᠥᠯᠳᠦᠭ ᠢ ᠮᠢᠨᠢ᠂ ᠡᠰᠡᠪᠡᠰᠦ ᠴᠢᠬᠢ ᠶᠢ ᠮᠢᠨᠢ ᠠᠪᠴᠢᠬᠠᠳᠠᠭ ᠴᠤ᠌ ᠶᠤᠮ ᠪᠢᠯᠡ ᠤᠤ ᠭᠡᠰᠡᠨ ᠰᠢᠨᠵᠢᠲᠡᠢ ᠨᠢᠭᠡ ᠨᠢ ᠴᠢᠬᠢ ᠪᠡᠨ ᠪᠠᠷᠢᠵᠤ᠂ ᠨᠥᠭᠦᠭᠡ ᠨᠢ ᠪᠥᠯᠲᠦᠭ ᠢ᠋ᠶ᠋ᠡᠨ ᠲᠡᠮᠲᠡᠷᠢᠵᠦ ᠪᠥᠭᠰᠡ ᠪᠡᠷ ᠢ᠋ᠶ᠋ᠡᠨ ᠶᠤᠭᠤᠵᠤ ᠠᠷᠤᠨᠰᠢ ᠪᠠᠨ ᠰᠠᠭᠤᠪᠠ᠃
ᠪᠯᠠᠮᠤ ᠭᠤᠷᠠ ᠶ᠋ᠢᠨ ᠠᠷᠠᠰᠤᠨ ᠲᠤᠯᠤᠮ ᠤ᠋ᠨ ᠢᠷᠣᠭᠠᠷ ᠰᠡᠭᠰᠦᠷᠦᠨ ᠲᠤᠯᠤᠮ ᠤ᠋ᠨ ᠰᠢᠭᠢᠷᠡ᠂ ᠥᠨᠴᠥᠭ ᠪᠤᠯᠤᠩ ᠳ᠋ᠤ᠌ ᠦᠯᠡᠳᠡᠵᠦ ᠬᠣᠴᠣᠷᠤᠭᠰᠠᠨ ᠬᠠᠭᠤᠷᠤᠭᠰᠠᠨ ᠪᠤᠳ᠋ᠠᠭᠠᠨ ᠤ᠋ ᠠᠭᠠ ᠵᠠᠷᠮᠠ ᠨᠢ ᠳᠡᠢᠯᠳᠡᠬᠦᠦ ᠪᠠᠯᠪᠠᠳᠠᠭ ᠢ᠋ ᠠᠷᠠᠢ ᠳᠤᠨᠳᠠᠭᠤᠷ ᠠᠶᠠᠭᠠ ᠬᠢᠷᠢᠲᠡᠢ ᠬᠥᠪᠢᠵᠦ ᠣᠯᠤᠭᠠᠳ ᠭᠡᠢᠴᠢᠨ ᠦ᠌ ᠪᠡᠨ ᠤᠷᠢᠲᠠᠢ ᠲᠠᠯᠪᠢᠵᠤ ᠳᠠᠷᠠᠭᠠ ᠨᠢ ᠤᠢᠰᠤᠨ ᠬᠠᠪᠴᠢᠭ ᠲᠠᠢ ᠬᠦᠴᠢᠲᠡᠢ ᠰᠦ᠂ ᠭᠠᠰᠢᠯᠤᠭᠰᠠᠨ ᠠᠮᠲᠠ ᠲᠠᠢ ᠬᠠᠷᠠ ᠠᠭᠠᠷᠤᠤᠯ ᠵᠡᠷᠭᠡ ᠶᠠᠭᠤᠮᠠ ᠲᠠᠯᠪᠢᠵᠤ ᠥᠭᠪᠡ᠃ ᠡᠨᠡ ᠠᠢᠯ ᠤᠨ ᠪᠠᠢᠳᠠᠭ ᠢ᠋ᠶ᠋ᠠᠨ ᠲᠡᠮᠲᠡᠷᠢᠵᠦ᠂ ᠬᠦᠨᠳᠦᠲᠡᠢ ᠵᠣᠴᠢᠨ ᠢ᠋ᠶ᠋ᠠᠨ ᠵᠣᠴᠢᠯᠠᠵᠤ ᠪᠠᠢᠭᠠ ᠶ᠋ᠢᠨ ᠬᠢᠨᠢ ᠲᠠᠷ ᠨᠢ ᠡᠨᠡ ᠪᠠᠢᠯᠠ᠃ ᠡᠬᠡᠨᠡᠷ ᠬᠥᠮᠦᠨ ᠨᠢ ᠡᠵᠡᠭᠦᠢ ᠠᠢᠯ ᠤ᠋ᠨ ᠢᠯᠴᠢ ᠴᠢᠮᠡᠭ ᠨᠢ ᠰᠤᠯᠠᠷᠠᠵᠤ᠂ ᠡᠷᠡ ᠪᠦᠰᠡᠲᠡᠢ ᠬᠥᠮᠦᠨ ᠨᠢ ᠡᠵᠡᠭᠦᠢ ᠠᠢᠯ ᠤ᠋ᠨ ᠰᠦᠷ ᠰᠦᠯᠳᠡ ᠨᠢ ᠤᠨᠲᠠᠷᠠᠭᠰᠠᠨ ᠭᠡᠪᠡᠯ ᠡᠨᠡ ᠠᠢᠯ ᠢ᠋ ᠬᠡᠯᠡᠵᠡᠢ᠃ ᠭᠡᠬᠦ ᠳ᠋ᠡᠭᠡᠨ ᠡᠨᠡ ᠣᠷᠣᠶ ᠶ᠋ᠢᠨ ᠡᠨᠡᠬᠡᠨ ᠠᠭᠱᠠᠨ ᠳ᠋ᠤ᠌ ᠡᠨᠡ ᠠᠢᠯ ᠤᠨ ᠢᠯᠴᠢ ᠴᠢᠮᠡᠭ᠂ ᠰᠦᠷ ᠰᠦᠯᠳᠡ ᠨᠢ ᠵᠡᠷᠭᠡ ᠪᠡᠷ ᠭᠢᠯᠠᠷᠠᠬᠤ ᠰᠢᠭ᠋ ᠪᠣᠯᠪᠠ᠃ ᠪᠯᠠᠮᠤ ᠶ᠋ᠢᠨ ᠴᠢᠷᠠᠢ ᠳ᠋ᠤ᠌ 《ᠥᠨᠥᠳᠥᠷ ᠳᠡᠭᠡᠷᠡᠮ ᠪᠠᠢᠲᠤᠭᠠᠢ᠂ ᠲᠡᠭᠷᠢ ᠨᠤᠷᠠᠵᠤ ᠭᠠᠯᠪᠠ ᠶᠡᠭᠦᠷᠡᠪᠡᠴᠦ ᠲᠤᠯᠤᠭᠠᠳ ᠠᠪᠬᠤ ᠲᠦᠰᠢᠭ ᠲᠤᠯᠭᠠᠭᠤᠷᠢ ᠲᠠᠢ ᠪᠣᠯᠤᠯᠠ 》 ᠭᠡᠰᠡᠨ ᠪᠠᠢᠳᠠᠯ ᠢᠯᠡ ᠪᠠᠢᠯᠠ᠃
ᠴᠠᠢ ᠤᠤᠭᠤᠭᠠᠳ ᠬᠥᠯᠥᠷᠡᠵᠦ ᠰᠠᠭᠤᠭᠰᠠᠨ ᠭᠡᠷᠳᠡᠭᠡᠷ ᠱᠠᠯᠳᠠᠩ ᠴᠡᠭᠡᠵᠢ ᠲᠠᠢ ᠡᠷᠡ ᠬᠥᠮᠥᠨ ᠢ ᠬᠠᠶᠠ ᠬᠠᠶᠠ ᠬᠤᠯᠠᠭᠠᠢ ᠬᠠᠷᠠᠭᠰᠠᠨ ᠪᠯᠠᠮᠤ ᠶᠢᠨ ᠨᠢᠳᠦ ᠳᠠᠯᠮᠢᠶᠠᠳᠤᠵᠤ ᠪᠣᠳᠣᠯ ᠤᠨ ᠵᠢᠯᠣᠭᠣ ᠠᠯᠳᠠᠭᠤᠯᠵᠤ ᠪᠠᠢᠪᠠ᠃ ᠬᠡᠴᠢᠨᠡᠭᠡᠨ ᠡᠳᠦᠷ ᠡᠷᠡ ᠬᠥᠮᠦᠨ ᠦ᠌ ᠦᠨᠦᠷ ᠠᠪᠤᠭᠠ ᠦᠭᠡᠢ ᠳ᠋ᠡᠭᠡᠨ ᠡᠨᠡᠭᠦᠬᠡᠨ ᠳ᠋ᠦ᠍ ᠠᠩᠴᠢᠨᠵᠠᠪ ᠤᠨ ᠪᠡᠶᠡ ᠡᠴᠡ ᠡᠷᠡ ᠬᠥᠮᠦᠨ ᠦ᠌ ᠪᠡᠨ ᠦᠨᠦᠷ ᠠᠪᠤᠭᠠᠳ ᠪᠡᠶᠡ ᠰᠡᠳᠬᠢᠯ ᠨᠢ ᠬᠠᠴᠢᠨ ᠪᠣᠯᠪᠠ᠃
ᠬᠡᠪᠲᠡᠷᠢ ᠳᠦ ᠪᠠᠢᠭᠠ ᠡᠪᠡᠳᠴᠢᠲᠡᠢ ᠡᠪᠦᠭᠡᠨ ᠠᠩᠴᠢᠨᠵᠠᠪ ᠢ᠋ ᠬᠠᠶᠠ ᠬᠠᠶᠠ ᠭᠠᠢᠬᠠᠨ ᠰᠢᠷᠲᠡᠵᠦ《ᠡᠨᠡ ᠬᠥᠮᠦᠨ ᠰᠠᠢᠨ ᠬᠥᠮᠦᠨ ᠦ᠌ ᠲᠥᠯᠥᠪ ᠲᠠᠢ ᠳᠠ ᠂ ᠴᠠᠭᠠᠨᠠ ᠪᠠᠨ ᠴᠣᠬᠣᠮ ᠬᠥᠮᠥᠨ ᠲᠠᠢ ᠪᠠᠢᠭᠠ ᠤᠤ ? ᠬᠡᠦᠬᠡᠨ ᠦ᠌ ᠮᠢᠨᠢ ᠰᠡᠳᠬᠢᠯ ᠤ᠋ᠨ ᠲᠤᠯᠭᠠᠭᠤᠷ ᠨᠢ ᠪᠣᠯᠤᠮᠠᠷ ᠬᠥᠮᠦᠨ ᠮᠥᠰᠥ ᠲᠡᠢ ᠴᠤ᠌ ᠪᠣᠯ ᠁ 》ᠭᠡᠵᠦ ᠡᠯᠳᠡᠪ ᠰᠠᠢᠨ ᠰᠠᠢᠬᠠᠨ ᠢ ᠭᠣᠷᠢᠳᠠᠨ ᠪᠣᠳᠣᠵᠤ ᠬᠡᠪᠲᠡᠵᠡᠢ᠃
ᠠᠩᠴᠢᠨᠵᠠᠪ᠂ ᠡᠪᠡᠳᠴᠢᠲᠡᠢ ᠡᠪᠦᠭᠡᠨ ᠦ ᠪᠡᠶᠡ ᠪᠡᠨ ᠴᠢᠩᠨᠠᠨ ᠬᠡᠪᠲᠡᠵᠦ ᠪᠠᠢᠭᠠ ᠡᠨᠡᠯᠦᠯᠲᠡᠢ ᠪᠠᠢᠳᠠᠯ ᠢ ᠠᠵᠢᠵᠦ ᠮᠡᠳᠡᠭᠡᠳ ᠬᠣᠷᠢᠨ ᠮᠥᠩᠭᠥᠨ ᠵᠣᠭᠣᠰ ᠨᠢᠭᠡ ᠴᠣᠬᠣᠷ ᠪᠥᠭᠰᠡ ᠲᠠᠢ ᠵᠢᠭᠠᠬᠠᠨ ᠶᠤᠸᠠᠮᠪᠤᠤ ᠭᠠᠷᠭᠠᠵᠤ ᠪᠯᠠᠮᠤ ᠳᠤ ᠭᠠᠷᠳᠠᠭᠤᠯᠤᠭᠠᠳ᠄
— ᠮᠠᠷᠭᠠᠲᠤᠷ ᠡᠭᠡᠴᠢ ᠲᠠ᠂ ᠡᠭᠦᠨ ᠢᠶᠡᠷ ᠡᠮ ᠵᠠᠯᠠᠵᠤ ᠨᠠᠰᠤᠲᠠᠢ ᠠᠪᠤ ᠶᠢᠨ ᠡᠪᠡᠳᠴᠢᠨ ᠢ ᠦᠵᠡᠭᠦᠯ᠂ ᠲᠡᠭᠡᠭᠡᠳ ᠪᠠᠰᠠ ᠠᠮᠢᠳᠤᠷᠠᠯ ᠳᠠᠭᠠᠨ ᠬᠡᠷᠡᠭᠴᠡᠭᠡᠲᠡᠢ ᠶᠠᠭᠤᠮᠠ ᠲᠦᠬᠦᠭᠡᠷ! ᠪᠢ ᠡᠷᠲᠡ ᠵᠠᠮ ᠳᠠᠭᠠᠨ ᠣᠷᠣᠨᠠ᠃ ᠬᠥᠮᠥᠨ ᠦ ᠠᠳᠤᠭᠤ ᠠᠯᠳᠠᠭᠰᠠᠨ ᠪᠣᠯᠬᠣᠷ ᠬᠤᠷᠳᠤᠨ ᠶᠠᠪᠤᠯ ᠦᠭᠡᠢ ᠭᠣᠷᠢ ᠦᠭᠡᠢ ᠭᠡᠳ ᠦᠭᠡᠨ ᠦ ᠰᠢᠪᠲᠤᠷᠠᠭᠠᠨ ᠳᠠᠭᠠᠨ ᠱᠠᠯ ᠬᠤᠳᠠᠯ ᠶᠠᠭᠤᠮᠠ ᠲᠠᠯᠪᠢᠯᠠ᠃
— ᠪᠢ ᠁ ᠪᠢ ᠁ ᠲᠠᠨ ᠤ ᠶᠠᠭᠤᠮᠠ ᠶᠢ ᠭᠠᠷ ᠬᠣᠭᠣᠰᠤᠨ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ᠃
— ᠡᠭᠡᠴᠢ ᠡ᠂ ᠪᠢ ᠡᠷᠡ ᠪᠦᠰᠡᠲᠡᠢ ᠬᠥᠮᠥᠨ ᠭᠠᠷᠤᠭᠠᠳ ᠯᠠ ᠶᠠᠪᠤᠪᠠᠯ ᠭᠠᠨᠵᠤᠭᠠ ᠲᠠᠢ᠃ ᠡᠮᠡ ᠬᠥᠮᠥᠨ ᠲᠠᠢ ᠲᠠᠭᠠᠷᠠᠬᠤ ᠦᠭᠡᠢ ᠰᠢᠦ! ᠭᠡᠬᠦ ᠳ᠋ᠤᠨᠢ ᠪᠯᠠᠮᠤ ᠪᠦᠰᠡᠬᠦᠢ ᠤᠶᠠᠷᠠᠨ ᠨᠢᠯᠪᠤᠰᠤ ᠤᠨᠠᠭᠠᠪᠠ᠃
— ᠪᠢ ᠵᠠᠪ ᠲᠠᠢ ᠪᠣᠯ ᠲᠠᠨ ᠤ ᠳᠤ ᠶᠠᠭᠠᠬᠢᠭᠰᠠᠨ ᠴᠤ᠌ ᠲᠠᠬᠢᠵᠤ ᠢᠷᠡᠨᠡ᠃
— ᠢᠷᠡᠬᠦ ᠶᠤᠮ ᠪᠢᠵᠡ ᠳ᠋ᠠ
— ᠦᠨᠡᠭᠡᠷ ᠢᠷᠡᠨᠡ! ᠲᠠᠨ ᠢ ᠳᠤᠰᠠᠯᠠᠵᠤ ᠳᠡᠮᠵᠢᠬᠦ ᠪᠡᠷ ᠢᠷᠡᠨᠡ᠃
— ᠲᠡᠭᠡᠪᠡᠯ ᠲᠠᠨ ᠤ ᠢᠷᠡᠬᠦ ᠶᠢ ᠬᠠᠷᠠᠵᠤ ᠪᠠᠢᠶᠠ ᠭᠡᠵᠦ ᠪᠯᠠᠮᠤ ᠬᠣᠭᠣᠯᠠᠢ ᠨᠢ ᠴᠡᠴᠡᠷᠬᠢᠯᠡᠨ ᠠᠩᠴᠢᠨᠵᠠᠪ ᠤᠨ ᠭᠠᠷ ᠢ ᠠᠶᠠᠷᠬᠠᠨ ᠪᠠᠷᠢᠪᠠ᠃
ᠰᠦᠮᠡᠬᠢ ᠭᠡᠷᠡᠯ ᠲᠠᠢ ᠱᠥᠯᠥᠨ ᠳᠤᠰᠤᠨ ᠤ ᠳ᠋ᠸᠩ ᠤᠨ ᠳᠤᠰᠤ ᠬᠠᠲᠠᠵᠤ ᠳ᠋ᠸᠩ ᠪᠥᠬᠥᠯᠡ᠃
ᠲᠡᠷᠡ ᠰᠥᠨᠢ ᠲᠡᠷᠡ ᠬᠣᠶᠠᠷ ᠬᠡᠨ ᠬᠡᠨ ᠨᠢ ᠴᠤ᠌ ᠨᠣᠢᠷ ᠦᠭᠡᠢ ᠳᠥᠩᠭᠢᠨᠡᠲᠡᠯᠡ ᠶᠠᠷᠢᠯᠴᠠᠵᠤ ᠬᠣᠨᠣᠯᠠ ᠁
ᠬᠣᠶᠠᠷ ᠵᠢᠭᠠᠯ ᠬᠡᠦᠬᠡᠳ ᠨᠢ ᠴᠤ᠌ ᠡᠴᠢᠭᠡ ᠪᠡᠨ ᠦᠵᠡᠭᠰᠡᠨ ᠮᠡᠲᠦ ᠭᠦᠭᠰᠡᠵᠦ ᠣᠷᠣᠨ ᠲᠣᠲᠣᠷᠠ ᠪᠠᠨ ᠨᠢᠭᠡ ᠨᠢᠭᠡᠨ ᠢᠶᠡᠨ ᠭᠡᠳᠡᠭᠡᠯᠡᠵᠦ᠂ ᠭᠣᠷ ᠱᠣᠷ ᠭᠡᠵᠦ ᠪᠠᠢᠯᠠ᠃ ᠭᠠᠭᠴᠠ ᠡᠪᠡᠳᠴᠢᠲᠡᠢ ᠡᠪᠦᠭᠡᠨ ᠭᠤᠸᠠᠢ ᠶᠣᠣᠯᠠᠭᠰᠠᠨ ᠴᠤ᠌ ᠦᠭᠡᠢ ᠵᠣᠪᠠᠭᠰᠠᠨ ᠴᠤ᠌ ᠦᠭᠡᠢ ᠪᠥᠬᠡ ᠨᠣᠢᠷᠰᠤᠭᠰᠠᠨ ᠪᠠᠢᠪᠠ᠃
ᠪᠯᠠᠮᠤ ᠥᠷᠯᠥᠭᠡ ᠡᠷᠲᠡ ᠪᠣᠰᠴᠤ ᠴᠠᠢ ᠪᠠᠨ ᠴᠢᠨᠠᠬᠤ ᠵᠠᠭᠤᠷᠠ ᠠᠩᠴᠢᠨᠵᠠᠪ ᠴᠤ᠌ ᠶᠠᠪᠤᠬᠤ ᠪᠡᠯᠡᠳᠬᠡᠯ ᠢᠶᠡᠨ ᠬᠢᠪᠡ᠃
– – – –
① ᠨᠤᠲᠤᠭ ᠤᠨ ᠬᠡᠯᠡᠯᠭᠡ᠃ ᠤᠯᠠᠭᠠᠨ ᠬᠣᠭᠣᠯᠠᠢ ᠶᠢᠨ ᠦᠮᠡᠨ ᠡᠪᠡᠳᠴᠢᠨ᠃
② ᠠᠭᠤᠯᠠ ᠶᠢᠨ ᠭᠥᠷᠥᠭᠡᠰᠦ ᠶᠢ ᠵᠢᠭᠠᠪᠠ᠃
③ ᠨᠤᠲᠤᠭ ᠤᠨ ᠬᠡᠯᠡᠯᠭᠡ᠃ ᠶᠠᠭᠤᠮᠠᠨ ᠳᠤ ᠪᠣᠳᠣᠯᠭᠠ ᠦᠭᠡᠢ ᠲᠦᠭᠦᠬᠡᠢ ᠲᠡᠨᠡᠭ ᠡᠷᠡ ᠶᠢ ᠢᠩᠬᠢᠵᠦ ᠬᠡᠯᠡᠳᠡᠭ᠃
④ ᠨᠤᠲᠤᠭ ᠤᠨ ᠬᠡᠯᠡᠯᠭᠡ᠃ ᠡᠳ᠋ ᠦᠭᠡᠢ ᠳᠡᠭᠵᠢᠨ ᠠᠯᠢᠶᠠ ᠬᠡᠦᠬᠡᠳ ᠢ ᠤᠷᠠᠳᠴᠤᠤᠯ ᠬᠣᠭᠣᠨᠣᠩ ᠭᠡᠳᠡᠭ᠃