ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ < ᠳᠡᠭᠡᠳᠦ > – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠠᠷᠪᠠᠨ ᠬᠣᠶᠠᠷ> Хан мунын сүүрс < дээд > – Мөнх зохиоов ᠂ Тэргүүн бодь – Нэгдүгээр бүлэг <12>
347ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ < ᠠᠷᠪᠠᠨ ᠬᠣᠶᠠᠷ >
ᠰᠣᠯᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠰᠠᠪᠠ ᠪᠠᠷ ᠰᠠᠭᠰᠠᠯᠵᠠᠭᠰᠠᠨ ᠪᠤᠷᠭᠠᠰᠤ᠂ ᠤᠳᠠᠨ ᠤ᠋ ᠮᠥᠴᠢᠷ ᠭᠥᠯᠥᠭᠡᠯᠡᠵᠦ᠂ ᠣᠭ᠌ᠶᠤ ᠱ᠌ᠢᠷᠦ ᠤᠨᠵᠢᠯᠭᠠ ᠪᠠᠨ ᠣᠳᠣ ᠪᠠᠷ ᠢ᠋ᠶ᠋ᠠᠨ ᠶᠠᠩᠵᠤᠯᠠᠨ ᠵᠡᠭᠦᠵᠦ ᠨᠠᠢᠭᠠᠳ ᠭᠠᠩᠬᠤᠬᠤ ᠭᠡᠰᠡᠨ ᠬᠡᠦᠬᠡᠨ ᠰᠢᠭ ᠬᠠᠷᠠᠭᠳᠠᠬᠤ ᠳ᠋ᠤ᠌ ᠡᠩᠭᠡᠷ ᠬᠠᠵᠠᠭᠤ ᠶ᠋ᠢᠨ ᠭᠦᠢᠯᠡᠰᠦᠨ ᠴᠡᠴᠡᠭ ᠶᠠᠭᠠᠷᠠᠨ ᠳᠡᠯᠭᠡᠷᠡᠭᠰᠡᠨ ᠨᠢ ᠪᠠᠢᠭᠠᠯᠢ ᠶ᠋ᠢᠨ ᠭᠠᠩᠭᠠᠩ ᠴᠣᠭᠴᠠᠰ ᠤ᠋ᠨ ᠭᠣᠶᠣ ᠬᠡᠭᠡᠨᠴᠢᠷ ᠢ᠋ ᠭᠠᠢᠬᠠᠭᠤᠯᠤᠨᠠ᠃
ᠵᠠᠯᠬᠠᠭᠤᠲᠠᠢ ᠨᠡᠭᠡᠭᠡᠬᠦ ᠬᠠᠪᠤᠷ ᠤ᠋ᠨ ᠨᠠᠷᠠᠨ ᠤ᠋ ᠢᠯᠴᠢ ᠮᠣᠷᠢᠨ ᠳᠡᠭᠡᠷᠡ ᠤᠳᠠᠭᠠᠨ ᠰᠠᠵᠢᠯᠠᠭᠤᠯᠤᠭᠰᠠᠨ ᠬᠥᠮᠦᠨ ᠢ᠋ ᠥᠯᠥᠭᠡᠢ ᠳ᠋ᠦ᠍ ᠪᠦᠪᠡᠢᠯᠡᠭᠳᠡᠭᠰᠡᠨ ᠨᠢᠯᠬᠠ ᠬᠡᠦᠬᠡᠳ ᠰᠢᠭ ᠠᠷᠭᠠ ᠦᠭᠡᠢ ᠨᠣᠢᠷ ᠬᠦᠷᠭᠡᠬᠦ ᠨᠢ ᠬᠡᠴᠡᠭᠦᠦ᠃
ᠠᠩᠴᠢᠨᠵᠠᠪ ᠡᠳᠡ ᠭᠤᠷᠪᠠᠭᠤᠯᠠ ᠭᠠᠯ ᠨᠡᠢᠯᠡᠵᠦ ᠬᠠᠨᠢᠰᠠᠬᠤ ᠳ᠋ᠠᠭᠠᠨ ᠮᠣᠷᠢᠨ ᠳᠡᠭᠡᠷᠡ ᠮᠥᠨ ᠴᠦ᠍ ᠣᠯᠠᠨ ᠬᠣᠨᠣᠭ ᠱᠣᠭᠰᠢᠭᠤᠯᠪᠠ᠃ ᠲᠠᠮᠢᠷ ᠰᠢᠷᠪᠥᠰᠥ ᠪᠡᠷ ᠢ᠋ᠶ᠋ᠡᠨ ᠠᠷᠠᠢ ᠪᠥᠬᠡᠵᠢᠭᠡᠳᠦᠢ ᠠᠩᠴᠢᠨᠵᠠᠪ ᠡᠨᠡ ᠬᠣᠶᠠᠷ ᠰᠠᠢᠨ ᠡᠷᠡ ᠶ᠋ᠢᠨ ᠬᠠᠶᠠ ᠳ᠋ᠠᠭᠠᠨ ᠵᠣᠷᠢᠭᠤᠳᠠ ᠲᠡᠭᠦᠨ ᠢ᠋ ᠬᠠᠷᠠᠳᠠᠬᠤ ᠰᠢᠭ᠋ ᠤᠨᠲᠠᠯᠭᠠ ᠬᠡᠪᠲᠡᠯᠭᠡ ᠦᠭᠡᠢ᠂ ᠢᠳᠡᠯᠭᠡ ᠤᠤᠭᠤᠯᠭᠠ ᠦᠭᠡᠢ ᠱᠣᠭᠰᠢᠳᠠᠭ ᠬᠠᠲᠠᠭᠤ ᠬᠠᠯᠠ ᠶ᠋ᠢ ᠵᠠᠷᠢᠮ ᠳ᠋ᠠᠭᠠᠨ ᠲᠡᠰᠪᠦᠷᠢᠯᠡᠮᠡ ᠦᠭᠡᠢ ᠠᠵᠢ᠃ ᠨᠠᠷᠠᠨ ᠤ᠋ ᠢᠯᠴᠢ ᠠᠩᠴᠢᠨᠵᠠᠪ ᠤ᠋ᠨ ᠳᠤᠬᠤ ᠰᠢᠯᠢ᠂ ᠳᠠᠯᠤ ᠮᠥᠷᠥ ᠶ᠋ᠢ ᠠᠶᠠᠲᠠᠢᠬᠠᠨ ᠰᠢᠷᠠᠬᠤ ᠳ᠋ᠤ᠌ ᠬᠠᠶᠠ ᠲᠡᠷᠡ ᠪᠡᠷ ᠪᠦᠭᠦᠷᠭᠡ ᠪᠡᠨ ᠲᠡᠪᠡᠷᠢᠭᠡᠳ ᠦᠷᠭᠡᠯᠡᠨᠡ᠃
— ᠬᠥᠶᠢ! ᠲᠡᠷᠡ᠂ ᠲᠡᠷᠡ ᠳᠠᠬᠢ ᠶ᠋ᠢᠨ ᠤᠳᠤᠮ ᠲᠠᠢ ᠰᠦᠷᠦᠭ! ᠭᠡᠵᠦ ᠯᠠᠮᠠᠬᠦᠦ ᠬᠠᠰᠬᠢᠷᠤᠭᠰᠠᠨ ᠳ᠋ᠤ᠌ ᠠᠩᠴᠢᠨᠵᠠᠪ ᠳᠠᠪ ᠬᠢᠨ ᠰᠣᠴᠢᠵᠤ ᠪᠡᠶᠡ ᠶ᠋ᠢ ᠨᠢ ᠣᠷᠢᠶᠠᠭᠰᠠᠨ ᠬᠣᠪᠳᠣᠭ ᠨᠣᠢᠷ ᠨᠢ ᠰᠡᠷᠭᠦᠪᠡ᠃
ᠮᠣᠷᠢᠲᠠᠢ ᠬᠥᠮᠦᠨ ᠡᠴᠡ ᠦᠷᠭᠦᠭᠰᠡᠨ ᠬᠤᠸᠠ ᠬᠠᠯᠲᠠᠷ ᠴᠥᠭᠡᠬᠡᠨ ᠬᠠᠯᠢᠭᠤᠨ ᠲᠠᠢ ᠬᠣᠷᠢ ᠭᠤᠴᠢᠭᠠᠳ ᠵᠡᠷᠯᠢᠭ ᠠᠳᠤᠭᠤ ᠲᠣᠭᠣᠰᠣ ᠲᠡᠳᠡᠨ ᠪᠢᠵᠢᠭᠢᠨᠡᠵᠦ ᠨᠢᠳᠦ ᠢᠷᠮᠡᠬᠦ ᠶ᠋ᠢᠨ ᠵᠠᠭᠤᠷᠠ ᠨᠢᠭᠡ ᠪᠥᠭᠡᠮ ᠰᠢᠷᠠ ᠲᠣᠭᠣᠰᠣ ᠣᠷᠬᠢᠴᠢᠬᠠᠭᠠᠳ ᠰᠣᠯᠢ ᠶ᠋ᠢᠨ ᠬᠢᠷᠠ ᠳᠠᠪᠠᠨ ᠠᠷᠢᠯᠪᠠ᠃
ᠲᠡᠷᠡ ᠪᠤᠵᠢᠭᠢᠨᠠᠭᠰᠠᠨ ᠲᠣᠭᠣᠰᠣ ᠶ᠋ᠢ ᠰᠢᠪᠲᠤᠯᠤᠨ ᠭᠤᠷᠪᠠᠨ ᠵᠤᠷᠪᠤᠰ ᠱᠤᠭᠤᠮᠳᠠᠭᠰᠠᠨ ᠰᠢᠭ᠋ ᠨᠠᠷᠢᠨ ᠲᠣᠭᠣᠰᠣ ᠪᠣᠰᠴᠤ ᠬᠢᠭᠢᠯᠢ ᠶ᠋ᠢᠨ ᠶᠣᠩᠬᠣᠷ ᠢ᠋ ᠨᠢᠰᠠᠯᠤᠨ ᠬᠥᠭᠵᠢᠮ ᠡᠭᠦᠰᠬᠡᠭᠰᠡᠨ ᠮᠡᠲᠦ ᠠᠭᠲᠠ ᠶ᠋ᠢᠨ ᠲᠦᠪᠡᠷᠭᠡᠨ ᠪᠣᠯᠵᠤ ᠪᠢᠵᠢᠬᠢᠨᠠᠪᠠ᠃
ᠪᠠᠶᠠᠷᠲᠤ ᠶ᠋ᠢᠨ ᠤᠨᠤᠭᠰᠠᠨ ᠥᠨᠳᠥᠷ ᠴᠡᠭᠡᠵᠢ ᠲᠡᠢ ᠬᠠᠯᠲᠠᠷ ᠬᠡᠭᠡᠷ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠲᠤ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠪᠥᠭᠰᠡᠳᠡᠵᠦ ᠣᠴᠢᠭᠰᠠᠨ ᠪᠣᠯᠪᠠᠴᠤ ᠴᠠᠭᠠᠭᠤᠷ ᠨᠢ ᠡᠷᠭᠢᠭᠦᠯᠵᠦ ᠪᠤᠴᠠᠭᠠᠶᠠ ᠭᠡᠰᠡᠨ ᠨᠢ ᠦᠯᠦ ᠪᠦᠲᠦᠨ ᠤᠯᠠᠮ ᠦᠷᠭᠦᠭᠡᠨ ᠣᠮ ᠬᠣᠮ ᠦᠭᠡᠢ ᠳᠠᠪᠬᠢᠨ ᠠᠯᠠᠭᠠ ᠪᠣᠯᠪᠠ᠃ ᠨᠥᠭᠦᠭᠡ ᠬᠠᠷᠠ ᠬᠡᠭᠡᠷ ᠪᠠ ᠠᠩᠴᠢᠨᠵᠠᠪ ᠤ᠋ᠨ ᠬᠦᠷᠡᠩ ᠦᠷᠢᠶᠡ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠲᠤ ᠶ᠋ᠢᠨ ᠲᠣᠭᠣᠰᠣ ᠶ᠋ᠢ ᠴᠦ᠍ ᠦᠨᠦᠷᠯᠡᠭᠡ ᠦᠭᠡᠢ᠂ ᠶᠣᠰᠣᠲᠠᠢ ᠯᠠ ᠨᠤᠲᠤᠭ ᠳᠡᠭᠡᠷᠡ ᠪᠡᠨ ᠬᠣᠴᠣᠷᠴᠠᠢ᠃
ᠭᠤᠷᠪᠠᠭᠤᠯᠠ ᠳᠡᠮᠡᠢ ᠳᠠᠪᠬᠢᠵᠤ ᠤᠨᠤᠭᠰᠠᠨ ᠮᠣᠷᠢᠨ ᠤ᠋ ᠪᠠᠨ ᠬᠠᠷᠠ ᠬᠥᠯᠥᠰᠥ ᠶ᠋ᠢ ᠰᠢᠪᠬᠠᠭᠰᠠᠨ ᠰᠢᠭ᠋ ᠪᠣᠯᠪᠠ᠃
— ᠠ᠂ ᠮᠥᠨ ᠬᠡᠴᠡᠭᠦᠦ ᠬᠤᠷᠳᠤᠨ ᠠᠳᠤᠭᠤᠰᠤ ᠨᠤᠭᠤᠳ ᠶᠤᠮ ᠠ᠋! ᠳᠠᠭᠠᠷᠢᠵᠤ ᠭᠠᠷᠤᠭᠠᠳ ᠪᠤᠴᠠᠭᠠᠶᠠ ᠭᠡᠬᠦ ᠳ᠋ᠦ᠍ ᠳᠠᠩᠴᠤ ᠨᠢᠭᠡ ᠬᠦᠴᠦ ᠮᠡᠬᠦᠰᠳᠡᠭᠡᠳ᠁ ᠰᠦᠷᠦᠭ ᠦ᠋ᠨ ᠡᠴᠦᠰ ᠲᠦ᠍ ᠳᠠᠪᠬᠢᠭᠰᠠᠨ ᠬᠠᠯᠲᠠᠷ ᠬᠠᠯᠢᠭᠤᠨ ᠪᠠᠢᠳᠠᠰᠤ ᠶ᠋ᠢ ᠨᠣᠭᠲᠣᠯᠠᠴᠢᠬᠠᠶᠠ ᠭᠡᠳ ᠵᠠᠳᠠᠭᠠᠢ ᠨᠣᠭᠲᠣ ᠰᠢᠳᠡᠭᠰᠡᠨ ᠴᠢᠨᠢ ᠪᠠᠢᠨᠠ ᠤᠤ᠂ ᠨᠣᠭᠲᠣ ᠶ᠋ᠢᠨ ᠲᠣᠯᠣᠭᠠᠢ ᠬᠠᠯᠲᠠᠷ ᠬᠠᠯᠢᠭᠤᠨ ᠤ᠋ ᠬᠣᠨᠳᠣᠯᠠᠢ ᠳᠡᠭᠡᠷᠡ ᠨᠢ ᠲᠣᠰᠤᠭᠠᠳ ᠨᠣᠭᠲᠣᠯᠠᠭᠰᠠᠨ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ᠂ ᠬᠠᠷᠢᠨ ᠴᠦ᠍《 ᠬᠤᠷᠳᠤᠨ ᠴᠠᠭᠠᠰᠢ ᠳᠤᠲᠠᠭᠠ!》 ᠭᠡᠵᠦ ᠬᠣᠨᠳᠣᠯᠠᠢ ᠳᠡᠭᠡᠷᠡ ᠨᠢ ᠲᠠᠰᠢᠭᠤᠷ ᠨᠡᠮᠡᠭᠰᠡᠨ ᠰᠢᠭ ᠬᠣᠴᠣᠷᠤᠯᠠ᠃ ᠲᠡᠭᠡᠭᠡᠳ ᠥᠨᠥᠬᠢ ᠨᠦ᠍ᠭᠦᠳ ᠢ᠋ ᠪᠦᠷ ᠴᠦ᠍ ᠦᠷᠭᠦᠭᠡᠪᠡ᠃ ᠠ᠂ ᠢᠯᠡᠢ ᠠ᠋! ᠭᠡᠵᠦ ᠭᠡᠵᠦ ᠪᠠᠶᠠᠷᠲᠤ ᠡᠷᠡᠦ ᠪᠡᠨ ᠰᠢᠪᠲᠤᠷᠠᠨᠠ᠃
一 ᠭᠤᠨᠠᠨ ᠪᠠᠳᠠᠢ ᠬᠠᠮᠲᠤ ᠶᠠᠪᠤᠭᠰᠠᠨ ᠪᠣᠯ ᠪᠠᠰᠠ ᠨᠢᠭᠡ ᠰᠠᠢᠨ ᠠᠭᠲᠠ ᠤᠷᠭᠠᠯᠠᠴᠢᠬᠠᠭᠰᠠᠨ ᠴᠤ᠌ ᠶᠠᠭᠤ ᠮᠠᠭᠠᠳ᠃ ᠠᠢ ᠳᠠ᠂ ᠣᠴᠣᠭ ᠤ᠋ᠨ ᠭᠤᠷᠪᠠᠨ ᠴᠢᠯᠠᠭᠤ ᠰᠢᠭ᠋ ᠭᠤᠷᠪᠠᠭᠤᠯᠠ ᠪᠠᠨ ᠲᠣᠭᠣᠭᠠ ᠪᠠᠨ ᠲᠡᠩᠨᠡᠭᠦᠨ ᠲᠤᠯᠤᠭᠠᠳ ᠠᠪᠳᠠᠭ ᠴᠤ᠌ ᠪᠣᠯᠤᠭᠠᠰᠠᠢ ᠳᠠ! ᠢᠩᠭᠢᠬᠦ ᠳ᠋ᠦ᠍ ᠨᠢᠭᠡ ᠪᠡᠨ ᠡᠵᠡᠭᠦᠢ ᠳ᠋ᠦ᠍ ᠳᠣᠭᠣᠯᠠᠩ ᠰᠢᠦ ᠪᠣᠯᠵᠤ ᠣᠷᠬᠢᠭᠠᠳ᠁ ᠭᠡᠵᠦ ᠯᠠᠮᠠᠬᠦᠦ ᠭᠤᠨᠠᠨ ᠪᠠᠳᠠᠢ ᠶ᠋ᠢ ᠦᠭᠡᠢᠯᠡᠨ ᠰᠠᠨᠠᠭᠠᠯᠵᠠᠵᠤ ᠶᠠᠷᠢᠭᠰᠠᠨ ᠶᠠᠷᠢᠶᠠᠨ ᠳ᠋ᠤ᠌ ᠥᠷᠭᠡᠰᠦᠲᠡᠢ ᠦᠭᠡ ᠬᠠᠪᠴᠢᠭᠳᠠᠵᠤ ᠲᠡᠭᠦᠨ ᠢ᠋ ᠬᠥᠮᠦᠨ ᠦ᠌ ᠲᠣᠭᠠᠨ ᠳ᠋ᠤ᠌ ᠪᠣᠳᠣᠭᠠ ᠦᠭᠡᠢ ᠬᠠᠷᠢᠨ᠂《ᠡᠨᠡ ᠭᠡᠵᠦ ᠨᠢᠭᠡ ᠬᠥᠮᠦᠨ ᠦ᠌ ᠣᠷᠣᠨᠴᠣᠭ᠂ ᠪᠢᠳᠡᠨ ᠢ᠋ ᠳᠠᠭᠠᠵᠤ ᠳᠡᠷᠪᠡᠬᠦ ᠡᠴᠡ ᠴᠠᠭᠠᠰᠢ ᠨᠡᠮᠡᠷᠢ ᠦᠭᠡᠢ》 ᠭᠡᠰᠡᠨ ᠰᠠᠨᠠᠭᠠ ᠨᠢᠭᠤᠭᠳᠠᠭᠰᠠᠨ ᠢ᠋ ᠨᠡᠪᠲᠡ ᠣᠢᠯᠠᠭᠠᠭᠰᠠᠨ ᠠᠩᠴᠢᠨᠵᠠᠪ᠄
一 ᠪᠢ ᠴᠦ᠍ ᠡᠷᠡ ᠬᠥᠮᠦᠨ ᠦ᠌ ᠲᠣᠭᠠᠨ ᠳ᠋ᠤ᠌ ᠣᠷᠣᠬᠤ ᠦᠭᠡᠢ ᠨᠢ ᠠ᠋᠃ ᠣᠴᠣᠭ ᠤ᠋ᠨ ᠭᠤᠷᠪᠠᠨ ᠴᠢᠯᠠᠭᠤᠨ ᠤ᠋ ᠥᠷᠥᠭᠡᠰᠦᠨ ᠨᠢᠭᠡ ᠪᠡᠷ ᠲᠣᠭᠣᠭᠠ ᠶ᠋ᠢ ᠲᠡᠩᠨᠡᠭᠦᠨ ᠲᠤᠯᠬᠤ ᠳ᠋ᠤ᠌ ᠶᠠᠭᠤ ᠨᠢ ᠳᠤᠲᠠᠪᠠ? ᠭᠡᠵᠦ ᠪᠡᠶᠡ ᠪᠡᠨ ᠡᠷᠭᠦᠨ ᠨᠥᠭᠦᠭᠡ ᠬᠣᠶᠠᠷ ᠲᠤ᠌ ᠭᠣᠮᠣᠷᠬᠠᠭᠰᠠᠨ ᠦᠭᠡ ᠠᠮᠰᠠᠭᠤᠯᠪᠠ᠃
一 ᠳᠡᠭᠦᠦ ᠮᠢᠨᠢ᠂ ᠴᠢ ᠠᠯᠢ ᠨᠢᠭᠡ ᠡᠳᠦᠷ ᠡᠷᠡ ᠶ᠋ᠢᠨ ᠰᠠᠢᠨ ᠢ᠋ᠶ᠋ᠠᠷ ᠲᠠᠨᠢᠭᠳᠠᠬᠤ ᠨᠢ ᠯᠠᠪ! ᠣᠳᠣ ᠴᠢ ᠠᠷᠠᠢ ᠢᠳᠡᠭᠡᠰᠢᠭᠡᠳᠦᠢ ᠭᠡᠵᠦ ᠪᠠᠶᠠᠷᠲᠤ ᠠᠩᠴᠢᠨᠵᠠᠪ ᠤ᠋ᠨ ᠮᠥᠷᠥ ᠶ᠋ᠢ ᠲᠠᠪᠰᠢᠨ ᠢᠨᠢᠶᠡᠪᠡ᠃ ᠠᠩᠴᠢᠨᠵᠠᠪ ᠲᠡᠭᠦᠨ ᠦ᠌ ᠪᠠᠰᠤᠭᠰᠠᠨ ᠦᠭᠡᠨ ᠳ᠋ᠦ᠍ ᠠᠲᠠᠭᠠᠷᠬᠠᠵᠤ᠄
一 ᠪᠢ ᠲᠡᠷᠡ ᠬᠠᠯᠲᠠᠷ ᠬᠡᠭᠡᠷ ᠢ᠋ ᠴᠢᠨᠢ ᠤᠨᠤᠭᠰᠠᠨ ᠪᠣᠯ ᠳᠠᠬᠢ ᠶ᠋ᠢᠨ ᠬᠠᠯᠲᠠᠷ ᠬᠠᠯᠢᠭᠤᠨ ᠳᠠᠭᠠ ᠠ᠋ᠴᠠ ᠨᠢᠭᠡ ᠶ᠋ᠢ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠰᠡᠭᠦᠯᠳᠡᠵᠦ ᠤᠨᠠᠭᠠᠨᠠ᠁ ᠭᠡᠵᠦ ᠣᠮᠣᠭᠣᠯᠠᠩ ᠳᠤᠤᠭᠠᠷᠪᠠ᠃
一 ᠵᠠ᠂ ᠳᠡᠭᠦᠦ ᠮᠢᠨᠢ᠂ ᠲᠡᠭᠡᠪᠡᠯ ᠮᠠᠷᠭᠠᠲᠤᠷ ᠡᠨᠡ ᠦᠶᠡ ᠳ᠋ᠦ᠍ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠲᠤ ᠶ᠋ᠢᠨ ᠰᠦᠷᠦᠭ ᠮᠥᠨ ᠡᠨᠡ ᠬᠠᠪᠢ ᠪᠠᠷ ᠤᠰᠤᠨ ᠳ᠋ᠤ᠌ ᠣᠷᠣᠵᠤ ᠢᠷᠡᠬᠦ ᠪᠠᠢᠬᠠ! ᠲᠡᠭᠡᠬᠦ ᠳ᠋ᠦ᠍ ᠴᠢᠮᠠ ᠳ᠋ᠤ᠌ ᠬᠠᠯᠲᠠᠷ ᠬᠡᠭᠡᠷ ᠢ᠋ ᠥᠭᠭᠦᠶᠡ! ᠤᠰᠤ ᠤᠤᠭᠤᠭᠰᠠᠨ ᠬᠣᠢᠨᠠ ᠨᠢ ᠨᠢᠭᠡ ᠨᠡᠬᠡᠵᠦ ᠦᠵᠡ ᠳᠡ!ᠳᠠᠬᠢ ᠶ᠋ᠢᠨ ᠬᠠᠯᠲᠠᠷ ᠬᠠᠯᠢᠭᠤᠨ ᠳᠠᠭᠠ ᠰᠡᠭᠦᠯᠳᠡᠵᠦ ᠳᠠᠷᠤᠬᠤ ᠶ᠋ᠢ ᠴᠢᠨᠢ ᠬᠠᠷᠠᠶᠠ ᠪᠠᠢᠵᠠ! ᠭᠡᠵᠦ ᠯᠠᠮᠠᠬᠦᠦ ᠪᠠᠶᠠᠷᠲᠤ ᠶ᠋ᠢ ᠬᠠᠷᠠᠭᠠᠳ ᠠᠩᠴᠢᠨᠵᠠᠪ ᠢ᠋ ᠶᠥᠭᠡᠳᠡᠩᠭᠦᠢ ᠬᠡᠯᠡᠪᠡ᠃
ᠮᠠᠷᠭᠠᠲᠤᠷ ᠨᠢ ᠪᠠᠭᠠ ᠦᠳᠡ ᠬᠡᠯᠪᠡᠢᠬᠦ ᠠᠯᠲᠠ ᠪᠠᠷ ᠭᠤᠴᠢᠭᠠᠳ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠲᠤ ᠶ᠋ᠢᠨ ᠰᠦᠷᠦᠭ ᠤᠰᠤᠨ ᠳ᠋ᠤ᠌ ᠣᠷᠣᠵᠤ ᠢᠷᠡᠪᠡ᠃
ᠠᠩᠴᠢᠨᠵᠠᠪ ᠡᠨᠡ ᠲᠣᠬᠢᠶᠠᠯ ᠢ᠋ ᠬᠦᠯᠢᠶᠡᠵᠦ ᠶᠠᠳᠠᠨ ᠪᠠᠢᠲᠠᠯᠠ ᠠᠰᠢᠭᠦᠢ ᠬᠦᠷᠦᠭᠡᠳ ᠢᠷᠡᠯᠡ᠃ ᠲᠡᠷᠡ ᠳᠣᠭᠳᠣᠯᠤᠯ ᠢ᠋ᠶ᠋ᠠᠨ ᠳᠠᠷᠤᠵᠤ ᠶᠠᠳᠠᠨ ᠬᠥᠪᠬᠡᠯᠵᠡᠵᠦ᠂《ᠠᠭᠲᠠ ᠶ᠋ᠢᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠡᠴᠡ ᠤᠨᠠᠭᠠ ᠰᠠᠷᠪᠠᠭᠠ ᠰᠡᠭᠦᠯᠳᠡᠳᠡᠭ ᠡᠷᠳᠡᠮ ᠢ᠋ᠶ᠋ᠡᠨ ᠡᠳᠡ ᠬᠣᠶᠠᠷ ᠲᠤ ᠨᠢᠭᠡ ᠭᠠᠢᠬᠠᠭᠤᠯᠵᠤ ᠨᠢᠳᠦ ᠶ᠋ᠢ ᠨᠢ ᠨᠡᠭᠡᠭᠡᠶᠡ ᠪᠠᠢᠵᠠ!》 ᠭᠡᠵᠦ ᠲᠡᠷᠲᠡᠭᠡ ᠰᠣᠯᠢ ᠶ᠋ᠢᠨ ᠬᠢᠷᠠ ᠠ᠋ᠴᠠ ᠰᠤᠪᠤᠷᠠᠨ ᠪᠠᠭᠤᠵᠤ ᠢᠷᠡᠬᠦ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠲᠤ ᠶ᠋ᠢᠨ ᠰᠦᠷᠦᠭ ᠢ᠋ ᠰᠢᠨᠤᠯᠲᠠᠢᠬᠠᠨ ᠪᠠᠷᠠᠭᠠᠯᠠᠵᠤ ᠵᠣᠭᠰᠣᠭᠰᠠᠨ ᠢ᠋ ᠪᠠᠶᠠᠷᠲᠤ ᠬᠠᠷᠠᠭᠠᠳ ᠄
一 ᠳᠡᠭᠦᠦ ᠮᠢᠨᠢ ᠯᠠᠪᠳᠠᠭᠤᠬᠠᠨ ᠬᠦᠯᠢᠶᠡᠵᠦ ᠪᠠᠢ᠂ ᠤᠰᠤᠨ ᠳ᠋ᠤ᠌ ᠣᠷᠣᠭᠠᠳ ᠡᠷᠭᠢᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠥᠳᠡᠯ! ᠭᠡᠪᠡᠯ ᠠᠩᠴᠢᠨᠵᠠᠪ᠄
一 ᠦᠭᠡᠢ ᠠ᠋! ᠵᠢᠭᠠᠬᠠᠨ ᠣᠢᠷᠠᠲᠤᠭᠤᠯᠵᠤ ᠪᠠᠢᠭᠠᠳ ᠤᠰᠤᠨ ᠳ᠋ᠤ᠌ ᠬᠣᠰᠢᠭᠤ ᠪᠠᠨ ᠬᠦᠷᠭᠡᠬᠦ ᠡᠴᠡ ᠨᠢ ᠡᠮᠦᠨᠡ ᠬᠥᠳᠡᠯᠦᠨᠡ ᠰᠢᠦ! ᠤᠰᠤ ᠤᠤᠭᠤᠭᠰᠠᠨ ᠠᠳᠤᠭᠤᠨ ᠤ᠋ ᠬᠣᠢᠨᠠ ᠠ᠋ᠴᠠ ᠰᠢᠷᠦᠭᠦᠨ ᠬᠥᠭᠡᠭᠡᠵᠦ ᠪᠣᠯᠬᠤ ᠦᠭᠡᠢ᠃ ᠴᠠᠳᠬᠤᠯᠳᠠᠭᠰᠠᠨ ᠠᠳᠤᠭᠤᠨ ᠤ᠋ ᠠᠭᠤᠰᠬᠢᠨ ᠳ᠋ᠤ᠌ ᠤᠰᠤ ᠬᠠᠷᠪᠤᠵᠤ ᠭᠡᠮ ᠪᠣᠯᠤᠨᠠ ᠭᠡᠳ ᠵᠠ ᠵᠠ᠂ ᠣᠳᠣ ᠬᠥᠳᠡᠯᠦᠶᠡ ᠭᠡᠭᠰᠡᠭᠡᠷ ᠬᠠᠯᠲᠠᠷ ᠬᠡᠭᠡᠷ ᠦ᠋ᠨ ᠡᠮᠡᠭᠡᠯ ᠢ᠋ ᠬᠠᠭᠤᠯᠵᠤ ᠬᠠᠶᠠᠨ ᠨᠠᠪᠲᠠᠰᠬᠢᠬᠦ ᠲᠡᠢ ᠵᠡᠷᠭᠡ ᠬᠠᠯᠲᠠᠷ ᠬᠡᠭᠡᠷ ᠦ᠋ᠨ ᠨᠢᠷᠤᠭᠤᠨ ᠳ᠋ᠤ᠌ ᠱᠠᠯᠵᠠ ᠰᠢᠭ᠋ ᠨᠠᠭᠠᠯᠳᠤᠪᠠ᠃
ᠥᠨᠥᠬᠢ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠲᠤ ᠶ᠋ᠢᠨ ᠰᠦᠷᠦᠭ ᠨᠢ ᠤᠵᠠᠭᠤᠷ ᠠᠨᠢᠷ ᠠᠪᠴᠤ ᠭᠦᠷᠳ᠋ ᠬᠢᠨ ᠦᠷᠭᠦᠪᠡ᠃ ᠨᠢᠭᠡ ᠬᠠᠷᠠᠬᠤᠯᠠ ᠬᠠᠯᠲᠠᠷ ᠬᠡᠭᠡᠷ ᠮᠣᠷᠢᠨ ᠤ᠋ ᠨᠢᠷᠤᠭᠤᠨ ᠳᠡᠭᠡᠷᠡ ᠪᠠᠢᠭᠰᠠᠨ ᠠᠩᠴᠢᠨᠵᠠᠪ ᠬᠠᠷᠠᠭᠳᠠᠬᠤ ᠦᠭᠡᠢ᠂ ᠭᠠᠭᠴᠠ ᠬᠠᠯᠲᠠᠷ ᠬᠡᠭᠡᠷ ᠯᠡ ᠵᠢᠭᠦᠷ ᠤᠷᠭᠤᠭᠰᠠᠨ ᠶᠤᠮ ᠰᠢᠭ᠋ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠨᠲᠤ ᠶ᠋ᠢᠨ ᠰᠦᠷᠦᠭ ᠵᠦᠭ ᠰᠤᠮᠤᠳᠠᠨ ᠳᠠᠪᠬᠢᠵᠤ ᠪᠠᠢᠯᠠ᠃
一 ᠵᠠ᠂ ᠳᠠᠩᠴᠤ ᠨᠢᠭᠡ ᠬᠥᠪᠰᠥᠷᠳᠡᠵᠦ ᠯᠡ ᠪᠠᠢᠭᠰᠠᠨ ᠶᠤᠮ ᠠ᠋! ᠵᠠᠯᠠᠭᠤ ᠬᠥᠮᠦᠨ ᠦ᠌ ᠤᠩᠭᠢᠷᠠᠭᠠ ᠣᠮᠣᠭ ᠭᠡᠭᠴᠢ ᠡᠢᠮᠦ ᠰᠢᠳᠡ! ᠬᠠᠯᠲᠠᠷ ᠬᠡᠭᠡᠷ ᠦ᠋ᠨ ᠳᠠᠪᠬᠢᠶᠠᠨ ᠳ᠋ᠤ᠌ ᠥᠨᠥᠬᠢ ᠴᠢᠨᠢ ᠮᠣᠷᠢᠨ ᠤ᠋ ᠰᠤᠭᠤ ᠬᠠᠪᠴᠢᠵᠤ ᠳᠡᠢᠯᠬᠦ ᠦᠭᠡᠢ ᠬᠡᠢᠰᠬᠡᠴᠢᠬᠡᠵᠡᠢ᠃ ᠲᠠᠬᠢ ᠶ᠋ᠢᠨ ᠠᠵᠢᠷᠭᠠᠲᠤ ᠰᠦᠷᠦᠭ ᠡᠴᠡ ᠰᠡᠭᠦᠯᠳᠡᠨᠡ᠂ ᠤᠷᠭᠠᠯᠠᠨᠠ ᠭᠡᠭᠰᠡᠭᠡᠷ ᠪᠠᠢᠭᠠᠳ ᠥᠨᠥᠬᠢ ᠬᠠᠯᠲᠠᠷ ᠬᠡᠭᠡᠷ ᠢ᠋ᠶ᠋ᠡᠨ ᠴᠦ᠍ ᠢᠵᠢᠯᠢ ᠳ᠋ᠦ᠍ᠨᠢ ᠠᠯᠳᠠᠭᠠᠳ ᠬᠥᠭᠡᠭᠡᠴᠢᠬᠡᠯᠡ ᠪᠢᠵᠡ! ᠭᠡᠵᠦ ᠯᠠᠮᠠᠬᠦᠦ ᠲᠣᠭᠲᠠᠪᠤᠷᠢ ᠠᠯᠲᠠᠨ ᠶᠠᠭᠰᠢᠨᠠ᠃
— ᠨᠣᠬᠠᠢ ᠳ᠋ᠠᠭᠠᠨ ᠢᠲᠡᠭᠡᠵᠦ ᠭᠡᠷ ᠲᠡᠭᠡᠨ ᠪᠠᠭᠠᠪᠠ ᠭᠡᠭᠴᠢ ᠠᠷᠠᠢ ᠲᠡᠢᠮᠦ ᠰᠣᠨᠣᠰᠬᠠᠯ ᠮᠠᠭᠤᠲᠠᠢ ᠶᠠᠭᠤᠮᠠ ᠪᠣᠯᠬᠤ ᠦᠭᠡᠢ ᠪᠢᠵᠡ! ᠭᠡᠵᠦ ᠪᠠᠶᠠᠷᠲᠤ ᠢᠲᠡᠭᠡᠵᠦ ᠶᠠᠳᠠᠨ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ《 ᠵᠠ ᠶᠠᠪᠤᠵᠠᠭᠠᠶᠠ》 ᠭᠡᠵᠦ ᠯᠠᠮᠠᠬᠦᠦ ᠳ᠋ᠡᠭᠡᠨ ᠳᠣᠬᠢᠶᠠ ᠥᠭᠴᠦ ᠠᠩᠴᠢᠨᠵᠠᠪ ᠤ᠋ᠨ ᠠᠷᠤ ᠠ᠋ᠴᠠ ᠬᠥᠳᠡᠯᠪᠡ᠃
ᠠᠩᠴᠢᠨᠵᠠᠪ ᠬᠠᠯᠲᠠᠷ ᠬᠡᠭᠡᠷ ᠦ᠋ᠨ ᠨᠢᠷᠤᠭᠤᠨ ᠳ᠋ᠤ᠌ ᠭᠠᠷᠤᠮᠠᠭᠴᠠ ᠥᠪᠡᠷ ᠲᠤᠨᠢ ᠵᠢᠭᠦᠷ ᠣᠷᠭᠣᠴᠢᠬᠠᠭᠰᠠᠨ ᠰᠢᠭ᠋ ᠰᠠᠨᠠᠭᠠᠨ ᠳ᠋ᠤᠨᠢ ᠠᠶᠠᠲᠠᠢᠬᠠᠨ ᠰᠠᠨᠠᠭᠳᠠᠵᠤ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠲᠤᠭᠤᠷᠠᠢ ᠲᠠᠴᠢᠭᠢᠨᠠᠬᠤ ᠴᠢᠮᠡᠭᠡ ᠰᠠᠯᠬᠢ ᠲᠡᠳᠡᠨ ᠱᠤᠤᠭᠢᠬᠤ ᠳ᠋ᠤ᠌ ᠨᠢᠳᠦᠨ ᠡᠴᠡ ᠨᠢ ᠲᠦᠮᠡ ᠮᠢᠩᠭᠠᠨ ᠣᠴᠢ ᠬᠠᠷᠪᠤᠬᠤ ᠰᠢᠭ᠋ ᠪᠣᠯᠵᠠᠢ᠃ ᠮᠣᠷᠢᠨ ᠤ᠋ ᠲᠦᠪᠡᠷᠭᠡᠨ ᠢ᠋ᠶ᠋ᠡᠷ ᠦᠷᠭᠦᠭᠰᠡᠨ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠲᠤ ᠶ᠋ᠢᠨ ᠰᠦᠷᠦᠭ ᠲᠡᠷᠲᠡᠭᠡ ᠰᠣᠯᠢ ᠶ᠋ᠢᠨ ᠬᠢᠷᠠ ᠳᠡᠭᠡᠷᠡ ᠭᠠᠷᠴᠤ ᠬᠠᠯᠲᠠᠷ ᠬᠠᠯᠢᠭᠤᠨ ᠠᠵᠢᠷᠭᠠ《 ᠡᠨᠡ ᠶᠠᠭᠤ ᠪᠣᠯᠴᠢᠬᠠᠪᠠ? ᠭᠡᠰᠡᠨ ᠰᠢᠦᠬᠡᠨ ᠭᠡᠳᠡᠷᠭᠦ ᠬᠠᠷᠠᠵᠤ ᠦᠵᠡᠬᠦᠯᠡ ᠰᠦᠷᠦᠭ ᠡᠴᠡ ᠪᠡᠨ ᠬᠣᠴᠣᠷᠤᠭᠰᠠᠨ ᠭᠠᠭᠴᠠ ᠬᠠᠯᠲᠠᠷ ᠬᠡᠭᠡᠷ ᠳᠠᠪᠬᠢᠵᠤ ᠠᠢᠰᠤᠢ ᠳ᠋ᠤ᠌ ᠰᠠᠨᠠᠭᠠ ᠨᠢ ᠠᠮᠠᠷᠠᠵᠤ ᠰᠦᠷᠦᠭ ᠢ᠋ᠶ᠋ᠡᠨ ᠬᠤᠮᠢᠵᠤ ᠬᠤᠷᠢᠶᠠᠭᠠᠳ ᠠᠭᠠᠵᠢᠭᠤᠬᠠᠨ ᠬᠥᠲᠥᠯ ᠳᠠᠪᠠᠨᠠ᠃
ᠠᠩᠴᠢᠨᠵᠠᠪ ᠪᠠᠭᠠ ᠠ᠋ᠴᠠ ᠪᠠᠨ ᠬᠦᠯᠦᠭ ᠦ᠋ᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠬᠥᠯᠪᠡᠷᠢᠵᠦ ᠨᠠᠭᠠᠳᠤᠨ ᠮᠣᠷᠢᠨ ᠤ᠋ ᠭᠡᠳᠡᠰᠦ ᠴᠡᠭᠡᠵᠢᠨ ᠳ᠋ᠦ᠍ᠨᠢ ᠨᠠᠭᠠᠯᠳᠤᠨ ᠳᠠᠪᠬᠢᠭᠤᠯᠵᠤ ᠰᠤᠷᠤᠭᠰᠠᠨ ᠤᠴᠢᠷ ᠴᠠᠭᠠᠳᠤ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠲᠤ ᠶ᠋ᠢᠨ ᠰᠦᠷᠦᠭ ᠮᠣᠷᠢᠨ ᠤ᠋ ᠨᠢᠷᠤᠭᠤᠨ ᠳᠡᠭᠡᠷᠡ ᠱᠣᠪᠣᠢᠵᠤ ᠰᠠᠭᠤᠭᠰᠠᠨ ᠲᠡᠭᠦᠨ ᠡᠴᠡ ᠵᠢᠭᠰᠢᠨ ᠦᠷᠭᠦᠭᠦᠵᠡᠢ ᠭᠡᠵᠦ ᠬᠠᠯᠲᠠᠷ ᠬᠡᠭᠡᠷ ᠦ᠋ᠨ ᠪᠤᠷᠤᠭᠤ ᠲᠠᠯᠠ ᠶ᠋ᠢᠨ ᠪᠥᠭᠡᠷᠡᠨ ᠳ᠋ᠦ᠍ ᠪᠡᠶᠡ ᠪᠡᠨ ᠳᠠᠯᠳᠠᠯᠠᠵᠠᠢ᠃ ᠲᠡᠭᠡᠬᠦᠯᠡᠷ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠ ᠴᠤ᠌ ᠲᠡᠭᠦᠨ ᠦ᠌ ᠮᠡᠬᠡᠨ ᠳ᠋ᠦ᠍ ᠤᠨᠠᠵᠤ ᠰᠡᠷᠡᠮᠵᠢ ᠠᠯᠳᠠᠭᠰᠠᠨ ᠢ᠋ ᠶᠠᠷᠢᠬᠤ ᠦᠭᠡᠢ ᠬᠣᠢᠨᠠ ᠬᠣᠴᠣᠷᠤᠭᠰᠠᠨ ᠬᠣᠶᠠᠷ ᠴᠤ᠌ ᠲᠡᠭᠦᠨ ᠢ᠋ ᠬᠠᠯᠲᠠᠷ ᠬᠡᠭᠡᠷ ᠦ᠋ᠨ ᠬᠤᠷᠳᠤᠨ ᠳᠠᠪᠬᠢᠶᠠᠨ ᠳ᠋ᠤ᠌ ᠬᠡᠢᠰᠴᠢᠬᠡᠯᠡ ᠭᠡᠵᠦ ᠡᠨᠳᠡᠭᠦᠷᠡᠭᠰᠡᠨ ᠪᠠᠢᠵᠠᠢ᠃
ᠨᠥᠭᠦᠭᠡ ᠬᠣᠶᠠᠷ ᠰᠣᠯᠢ ᠶ᠋ᠢᠨ ᠬᠢᠷᠠ ᠳᠡᠭᠡᠷᠡ ᠮᠡᠯᠬᠢᠵᠦ ᠭᠠᠷᠲᠠᠯᠠ ᠬᠥᠲᠥᠯ ᠦ᠋ᠨ ᠴᠠᠭᠠᠳᠤ ᠵᠢᠯᠠᠭᠠ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠨᠢᠭᠡ ᠪᠥᠭᠡᠮ ᠲᠣᠭᠣᠰᠣ ᠬᠤᠢᠯᠠᠷᠠᠨᠠ᠃
ᠠᠩᠴᠢᠨᠵᠠᠪ ᠬᠠᠯᠲᠠᠷ ᠬᠡᠭᠡᠷ ᠦ᠋ᠨ ᠭᠡᠳᠡᠰᠦᠨ ᠳ᠋ᠦ᠍ ᠨᠢᠭᠤᠭᠳᠠᠵᠤ ᠶᠠᠪᠤᠨ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠲᠤ ᠶ᠋ᠢᠨ ᠰᠦᠷᠦᠭ ᠢ᠋ ᠨᠡᠬᠡᠵᠦ ᠬᠦᠷᠦᠭᠡᠳ᠂ ᠤᠷᠲᠤ ᠵᠣ᠂ ᠥᠨᠳᠥᠷ ᠴᠡᠭᠡᠵᠢ ᠲᠡᠢ ᠮᠠᠩᠭᠢᠰᠤᠨ ᠬᠠᠯᠢᠭᠤᠨ ᠰᠢᠳᠦᠯᠡᠩ ᠠᠵᠢᠷᠭᠠ ᠶ᠋ᠢ ᠰᠡᠭᠦᠯᠳᠡᠵᠦ ᠤᠨᠠᠭᠠᠨ ᠱᠠᠯᠠᠪ ᠮᠣᠷᠢᠨ ᠠ᠋ᠴᠠ ᠪᠠᠨ ᠬᠥᠯᠪᠡᠷᠢᠨ ᠪᠠᠭᠤᠵᠤ ᠥᠨᠥᠬᠢ ᠶ᠋ᠢ ᠴᠢᠬᠢᠳᠡᠨ ᠳᠠᠷᠤᠵᠤ ᠠᠪᠤᠪᠠ᠃ ᠪᠠᠶᠠᠷᠲᠤ ᠯᠠᠮᠠᠬᠦᠦ ᠬᠣᠶᠠᠷ ᠢ᠋ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍ ᠠᠩᠴᠢᠨᠵᠠᠪ ᠲᠡᠷᠡ ᠮᠠᠩᠬᠢᠰᠤᠨ ᠬᠠᠯᠢᠭᠤᠨ ᠤ᠋ ᠡᠮᠦᠨᠡ ᠬᠣᠶᠠᠷ ᠬᠥᠯ ᠳ᠋ᠦ᠍ᠨᠢ ᠴᠢᠳᠥᠷ ᠦ᠋ᠨ ᠠᠯᠠᠭ ᠣᠷᠣᠭᠤᠯᠴᠢᠬᠠᠭᠰᠠᠨ ᠪᠠᠢᠪᠠ᠃
ᠴᠢᠳᠥᠷᠯᠡᠭᠳᠡᠭᠰᠡᠨ ᠮᠠᠩᠬᠢᠰᠤᠨ ᠬᠠᠯᠢᠭᠤᠨ ᠴᠢᠳᠥᠷ ᠲᠡᠭᠡᠨ ᠪᠣᠭᠣᠭᠳᠠᠨ ᠪᠦᠳᠦᠴᠢᠵᠦ᠂ ᠲᠣᠢᠯᠠᠨ ᠳᠦᠢᠯᠡᠨ ᠪᠤᠯᠭᠢᠶᠠ ᠭᠡᠳ ᠰᠠᠨᠠᠭᠠ ᠪᠠᠷ ᠨᠢ ᠪᠣᠯᠳᠠᠭ ᠦᠭᠡᠢ ᠳ᠋ᠦ᠍ ᠲᠦᠷᠦᠭᠦᠰᠢ ᠪᠡᠨ ᠨᠢᠭᠡ ᠲᠦᠭᠵᠢᠵᠦ᠂ ᠠᠷᠤᠨᠰᠢ ᠪᠠᠨ ᠪᠥᠭᠰᠡ ᠪᠡᠷ ᠢ᠋ᠶ᠋ᠡᠨ ᠨᠢᠭᠡ ᠰᠠᠭᠤᠵᠤ ᠦᠢᠴᠢᠨ ᠡᠮᠨᠢᠭ ᠠᠭᠠᠰᠢᠨ ᠳ᠋ᠠᠭᠠᠨ ᠪᠡᠶᠡ ᠪᠡᠨ ᠰᠢᠨᠠᠯᠭᠠᠨᠠ᠃ ᠪᠡᠶᠡ ᠳ᠋ᠡᠭᠡᠨ ᠲᠣᠷᠭᠠᠨ ᠲᠣᠭᠣᠰᠣ ᠴᠤ᠌ ᠭᠥᠷᠬᠡᠭᠡ ᠦᠭᠡᠢ ᠣᠩᠭᠣᠨ ᠭᠦᠶᠦᠭᠰᠡᠨ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠ ᠵᠡᠭᠦᠳᠦᠯᠡᠵᠦ ᠴᠦ᠍ ᠦᠵᠡᠭᠡ ᠦᠭᠡᠢ ᠬᠡᠴᠡᠭᠦᠦ ᠲᠠᠮᠤ ᠳ᠋ᠤ᠌ ᠠᠶᠤᠨ ᠴᠣᠴᠢᠷᠳᠠᠵᠤ ᠳᠡᠪᠬᠡᠴᠡᠬᠦ ᠲᠣᠰᠤᠮ ᠢ᠋ᠶ᠋ᠠᠨ ᠪᠣᠭᠣᠭᠳᠠᠭᠰᠠᠨ ᠴᠢᠳᠥᠷ ᠡᠴᠡ ᠰᠠᠯᠵᠤ ᠦᠯᠦ ᠴᠢᠳᠠᠨᠠ᠃ ᠳᠡᠪᠬᠡᠴᠡᠵᠦ ᠲᠠᠮᠢᠷ ᠢ᠋ᠶ᠋ᠠᠨ ᠰᠢᠪᠬᠠᠭᠰᠠᠨ ᠠ᠋ᠴᠠ ᠪᠡᠶᠡ ᠨᠢ ᠴᠢᠭᠢᠭᠲᠦᠵᠦ ᠬᠠᠮᠠᠷ ᠤ᠋ᠨ ᠨᠦᠬᠡ ᠨᠢ ᠣᠩᠭᠣᠯᠵᠠᠨ᠂ ᠰᠢᠷᠦᠭᠦᠨ ᠰᠢᠷᠦᠭᠦᠨ ᠠᠮᠢᠰᠬᠤᠯᠯᠠᠵᠤ ᠴᠠᠪᠢ ᠶ᠋ᠢᠨ ᠬᠢᠨᠢ ᠬᠥᠬᠡ ᠮᠢᠬᠠ ᠨᠢ ᠴᠡᠴᠡᠷᠡᠵᠦ ᠪᠠᠢᠪᠠ᠃
一 ᠡᠷᠡ ᠳᠡᠭᠦᠵᠢᠯᠡᠵᠦ ᠲᠥᠷᠥᠭᠰᠡᠨ ᠨᠡᠷᠡ ᠪᠡᠨ ᠭᠤᠲᠤᠭᠠᠮᠠ ᠦᠭᠡᠢ ᠰᠠᠢᠨ ᠡᠷᠡ ᠪᠣᠯᠬᠤ ᠨᠢ ᠠ᠋ ᠭᠡᠵᠦ ᠯᠠᠮᠠᠬᠦᠦ ᠠᠩᠴᠢᠨᠵᠠᠪ ᠢ᠋ ᠱᠠᠭᠰᠢᠬᠤ ᠳ᠋ᠤ᠌ ᠪᠠᠶᠠᠷᠲᠤ᠄
一 ᠮᠠᠨ ᠤ᠋ ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠮᠢᠩᠭᠠᠨᠪᠤᠤ ᠲᠤᠰᠠᠯᠠᠭᠴᠢ ᠭᠤᠸᠠᠢ ᠵᠠᠯᠠᠭᠤ ᠳ᠋ᠠᠭᠠᠨ ᠳᠠᠬᠢ ᠶ᠋ᠢᠨ ᠵᠡᠷᠯᠢᠭ ᠠᠵᠢᠷᠭᠠᠲᠤ ᠶ᠋ᠢᠨ ᠰᠦᠷᠦᠭ ᠡᠴᠡ ᠲᠠᠭᠤᠵᠤ ᠠᠪᠤᠭᠠᠳ ᠭᠣᠪᠢ ᠤᠷᠤᠭᠤ ᠣᠷᠣᠵᠤ ᠪᠠᠢᠯᠠ ᠭᠡᠳᠡᠭ ᠁ ᠲᠡᠭᠦᠨ ᠦ᠌ ᠤᠨᠤᠵᠤ ᠪᠠᠢᠭᠰᠠᠨ ᠪᠠᠨᠰᠠᠲᠤ ᠬᠠᠯᠢᠭᠤᠨ ᠨᠢ ᠭᠣᠪᠢ ᠶ᠋ᠢᠨ ᠬᠠᠷᠠ ᠰᠡᠭᠦᠯᠲᠦ ᠶ᠋ᠢ ᠭᠦᠢᠴᠡᠳᠡᠭ ᠬᠤᠢ ᠰᠢᠭ᠋ ᠲᠦᠷᠭᠡᠨ ᠬᠦᠯᠦᠭ ᠪᠠᠢᠭᠰᠠᠨ ᠭᠡᠰᠡᠨ ᠳᠣᠮᠣᠭ ᠰᠢᠭ᠋ ᠦᠯᠢᠭᠡᠷ ᠪᠠᠢᠳᠠᠭ᠃ ᠥᠨᠥᠳᠥᠷ ᠠᠩᠴᠢᠨᠵᠠᠪ ᠤ᠋ᠨ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠲᠤ ᠶ᠋ᠢᠨ ᠮᠠᠩᠬᠢᠰᠤᠨ ᠬᠠᠯᠢᠭᠤᠨ ᠰᠡᠭᠦᠯᠳᠡᠬᠦ ᠶ᠋ᠢ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠦᠵᠡᠯᠡ᠃ ᠳᠠᠯᠠᠢ ᠶ᠋ᠢ ᠪᠤᠤ ᠶᠠᠨᠳᠠ᠂ ᠬᠥᠮᠦᠨ ᠢ᠋ ᠪᠤᠤ ᠪᠠᠰᠤ ᠭᠡᠳᠡᠭ ᠴᠦ᠍ ᠠᠷᠭᠠ ᠦᠭᠡᠢ ᠦᠨᠡᠨ ᠦᠭᠡ ᠶᠦᠮ ᠭᠡᠪᠡ᠃
— ᠡᠵᠢ ᠶ᠋ᠢᠨ ᠮᠢᠨᠢ ᠬᠡᠯᠡᠬᠦ ᠪᠡᠷ ᠮᠢᠨᠦ ᠡᠴᠢᠭᠡ ᠴᠦ᠍ ᠪᠠᠰᠠ ᠤᠷᠢᠳᠤ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠲᠤ ᠶ᠋ᠢᠨ ᠰᠦᠷᠦᠭ ᠰᠠᠯᠭᠠᠵᠤ ᠬᠥᠭᠡᠭᠡᠳᠡᠭ ᠰᠠᠢᠨ ᠡᠷᠡ ᠪᠠᠢᠯᠠ ᠭᠡᠰᠡᠨ᠁ ᠭᠣᠪᠢ ᠶ᠋ᠢᠨ ᠲᠠᠷᠭᠤᠨ ᠬᠠᠷᠠ ᠰᠡᠭᠦᠯᠲᠦ ᠶ᠋ᠢ ᠲᠠᠭᠤᠵᠤ ᠪᠠᠢᠭᠠᠳ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠪᠡᠨ ᠰᠢᠭᠢᠷᠡᠳᠡᠵᠦ᠂ ᠭᠡᠳᠡᠰᠦ ᠳᠣᠲᠣᠷ ᠢ᠋ ᠨᠢ ᠴᠡᠪᠡᠷᠬᠡᠨ ᠭᠠᠵᠠᠷ ᠶᠡᠭᠦᠯᠡᠵᠦ ᠬᠠᠶᠠᠴᠢᠬᠠᠭᠠᠳ ᠳᠡᠭᠦᠷᠦᠭᠡᠳ ᠬᠠᠷᠢᠳᠠᠭ ᠪᠠᠢᠭᠰᠠᠨ ᠭᠡᠨᠡ ᠯᠠᠢ ᠭᠡᠵᠦ ᠠᠩᠴᠢᠨᠵᠠᠪ ᠡᠨᠡ ᠬᠣᠶᠠᠷ ᠰᠠᠢᠨ ᠡᠷᠡ ᠳ᠋ᠦ᠍ ᠳᠠᠬᠢ ᠶ᠋ᠢᠨ ᠮᠠᠩᠭᠢᠰᠤᠨ ᠬᠠᠯᠢᠭᠤᠨ ᠳ᠋ᠤ᠌ ᠰᠡᠭᠦᠯᠳᠡᠵᠦ ᠴᠢᠳᠥᠷᠯᠡᠭᠰᠡᠨ ᠳ᠋ᠡᠭᠡᠨ ᠪᠠᠷᠳᠠᠵᠤ ᠶᠡᠬᠡ ᠯᠡ ᠬᠥᠭᠵᠢᠯᠲᠡᠢ ᠢᠨᠢᠶᠡᠨ ᠬᠡᠯᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠶᠡᠬᠡᠷᠬᠡᠭ ᠬᠠᠷᠠ ᠴᠢᠷᠠᠢ ᠳ᠋ᠤ᠌《 ᠡᠴᠢᠭᠡ ᠶ᠋ᠢᠨ ᠰᠢᠨᠳᠠᠰᠤ ᠶ᠋ᠢ ᠥᠪᠴᠢᠵᠦ ᠲᠥᠷᠥᠭᠰᠡᠨ ᠡᠷᠡ ᠬᠥᠮᠦᠨ ᠪᠣᠯ ᠡᠢᠮᠦ ᠯᠡ ᠪᠠᠢᠬᠤ ᠶᠣᠰᠣᠲᠠᠢ》 ᠭᠡᠰᠡᠨ ᠪᠠᠷᠳᠠᠮ ᠣᠮᠣᠭᠯᠠᠩ ᠵᠠᠩ ᠢᠯᠡ ᠪᠠᠢᠪᠠ᠃
— ᠵᠠ᠂ ᠣᠳᠣ ᠬᠠᠷᠢᠨ ᠭᠤᠨᠠᠨ ᠪᠠᠳᠠᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠮᠠᠨ ᠤ᠋ ᠣᠴᠣᠭ ᠤ᠋ᠨ ᠭᠤᠷᠪᠠᠨ ᠴᠢᠯᠠᠭᠤᠨ ᠤ᠋ ᠨᠢᠭᠡ ᠪᠡᠷ ᠲᠣᠭᠣᠭᠠ ᠲᠤᠯᠵᠤ ᠪᠣᠯᠬᠤ ᠲᠦᠰᠢᠭ ᠲᠡᠢ ᠪᠣᠯᠤᠯᠠ᠁ ᠵᠠᠯᠠᠭᠤ ᠬᠥᠮᠦᠨ ᠢᠷᠡᠪᠡᠯ ᠬᠦᠴᠦ ᠨᠡᠮᠡᠨᠡ ᠭᠡᠳᠡᠭ ᠶᠠᠭ ᠡᠨᠡ ᠳᠡ! ᠭᠡᠵᠦ ᠯᠠᠮᠠᠬᠦᠦ ᠬᠥᠭᠰᠡᠨ ᠢᠨᠢᠶᠡᠨᠡ᠃
ᠡᠨᠡ ᠬᠣᠶᠠᠷ ᠰᠠᠢᠨ ᠡᠷᠡ ᠠᠨᠳᠠ ᠭᠤᠨᠠᠨ ᠪᠠᠳᠠᠢ ᠠ᠋ᠴᠠ ᠰᠠᠯᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠵᠣᠷᠢᠭ ᠰᠢᠨᠲᠠᠷᠠᠵᠤ᠂ ᠬᠦᠴᠦᠨ ᠮᠡᠬᠦᠰᠳᠡᠬᠦ ᠶ᠋ᠢ ᠬᠡᠯᠡᠬᠦ ᠦᠭᠡᠢ ᠭᠠᠷ ᠮᠤᠬᠤᠷᠳᠠᠨ ᠭᠠᠨᠵᠤᠭᠠ ᠰᠤᠯᠠᠷᠠᠬᠤ ᠳ᠋ᠤ᠌ ᠬᠠᠶᠠ ᠠᠩᠴᠢᠨᠵᠠᠪ ᠲᠤ ᠳᠤᠷᠠ ᠠᠯᠳᠠᠷᠠᠨ᠂ ᠨᠠᠰᠤ ᠪᠠᠭᠠ ᠴᠢᠰᠤ ᠰᠢᠩᠭᠡᠨ ᠭᠡᠵᠦ ᠭᠣᠯᠣᠵᠤ ᠪᠠᠢᠭᠰᠠᠨ ᠨᠢ ᠪᠤᠷᠤᠭᠤᠳᠠᠵᠤ᠂ ᠡᠨᠡ ᠵᠠᠯᠠᠭᠤ ᠬᠥᠮᠦᠨ ᠲᠡᠢ ᠡᠪᠲᠡᠢ ᠬᠠᠨᠢᠯᠠᠪᠠᠯ ᠬᠠᠷᠢᠨ ᠬᠣᠢᠰᠢᠳᠠ ᠶ᠋ᠢᠨ ᠠᠮᠢᠳᠤᠷᠠᠯ ᠤ᠋ᠨ ᠬᠠᠷᠭᠤᠢ ᠳ᠋ᠤ᠌ ᠲᠤᠰᠠ ᠲᠦᠰᠢᠭ ᠪᠣᠯᠬᠤ ᠬᠥᠮᠦᠨ ᠪᠠᠢᠨᠠ ᠭᠡᠳᠡᠭ ᠢ᠋ ᠲᠠᠨᠢᠬᠤ ᠳ᠋ᠠᠭᠠᠨ ᠰᠡᠳᠬᠢᠯ ᠨᠢ ᠪᠠᠶᠠᠷᠲᠠᠢ ᠪᠠᠢᠯᠠ᠁
ᠲᠡᠳᠡ ᠭᠤᠷᠪᠠᠭᠤᠯᠠ ᠬᠠᠯᠬᠠ ᠨᠤᠲᠤᠭ ᠢ᠋ᠶ᠋ᠠᠷ ᠰᠠᠷᠠ ᠭᠠᠷᠤᠢ ᠶᠠᠪᠤᠵᠤ ᠭᠤᠨᠠᠨ ᠪᠠᠳᠠᠢ ᠶ᠋ᠢᠨ ᠰᠤᠷᠠᠭ ᠢ᠋ ᠬᠠᠢᠪᠠᠯ《 ᠰᠢᠷᠢ ᠲᠡᠢ ᠪᠡᠨ ᠣᠷᠭᠣᠴᠢᠬᠠᠯᠠ ᠯᠠ ᠭᠡᠰᠡᠨ᠁ ᠴᠢᠨᠣᠠ ᠶ᠋ᠢᠨ ᠬᠣᠭᠣᠯᠠ ᠪᠣᠯᠤᠭᠰᠠᠨ ᠪᠠᠢᠯᠭᠦᠢ》 ᠭᠡᠬᠦ ᠪᠤᠶᠤ《 ᠲᠡᠷᠡ ᠰᠠᠢᠨ ᠡᠷᠡ ᠶ᠋ᠢ ᠲᠩᠷᠢ ᠪᠤᠷᠤᠭᠤ ᠦᠵᠡᠬᠦ ᠦᠭᠡᠢ ᠠ᠋! ᠣᠳᠣ ᠪᠠᠰᠠ ᠬᠠᠮᠢᠭᠠ ᠨᠢᠭᠡᠨ ᠭᠠᠵᠠᠷ ᠬᠦᠯᠦᠭ ᠦ᠋ᠨ ᠨᠢᠷᠤᠭᠤᠨ ᠳ᠋ᠤ᠌ ᠬᠡᠢᠰᠬᠡᠬᠦᠯᠵᠦ ᠶᠠᠪᠤᠭᠠ ᠪᠢᠵᠡ!》 ᠭᠡᠰᠡᠨ ᠪᠠ ᠪᠠᠰᠠ ᠵᠠᠷᠢᠮ ᠨᠢ《 ᠪᠢᠲᠡᠭᠦᠯᠡᠵᠦ ᠲᠣᠪᠬᠢᠭᠰᠠᠨ ᠪᠥᠭᠡᠰᠦ ᠲᠡᠢ ᠰᠢᠷᠢ ᠶ᠋ᠢ ᠨᠢ ᠠᠢᠯ ᠤ᠋ᠨ ᠨᠣᠬᠠᠢ ᠴᠢᠷᠦᠭᠡᠳ ᠶᠠᠪᠤᠵᠤ ᠪᠠᠢᠯᠠ᠁》 ᠭᠡᠬᠦ ᠶᠦᠮ᠃ ᠵᠠᠷᠢᠮ ᠨᠢ ᠪᠠᠰᠠ《 ᠵᠠᠪᠬᠠᠨ ᠠᠢᠮᠠᠭ ᠤ᠋ᠨ ᠲᠦᠷᠦᠭᠦᠦ ᠪᠠᠶᠠᠨ ᠤ᠋ ᠠᠳᠤᠭᠤ ᠶ᠋ᠢ ᠭᠡᠯᠢᠭᠡᠳ ᠶᠠᠪᠤᠪᠠ᠁》 ᠭᠡᠰᠡᠨ ᠶᠠᠩᠵᠤ ᠶᠠᠩᠵᠤ ᠶ᠋ᠢᠨ ᠶᠠᠪᠤᠭᠤᠯ ᠴᠢᠮᠡᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠠᠷᠭᠠ ᠪᠤᠶᠤ ᠡᠮᠦᠨᠡᠰᠢᠯᠡᠪᠡ᠃
᠁
ᠨᠠᠷᠠ ᠭᠠᠷᠬᠤ ᠲᠠᠢ ᠤᠷᠤᠯᠳᠤᠵᠤ ᠬᠡᠳᠦᠭᠦᠯᠡ ᠭᠡᠯᠢᠭᠰᠡᠨ ᠠᠳᠤᠭᠤ ᠪᠠᠨ ᠬᠠᠲᠤᠨ ᠲᠣᠬᠣᠢ ᠶ᠋ᠢᠨ ᠪᠤᠷᠭᠠᠰᠤᠨ ᠳ᠋ᠤ᠌ ᠲᠣᠭᠲᠠᠭᠠᠵᠤ ᠠᠮᠵᠢᠪᠠ᠃
— ᠠᠩᠴᠢᠨᠵᠠᠪ ᠠ᠋᠂ ᠮᠣᠷᠢᠨ ᠤ᠋ ᠪᠠᠨ ᠣᠯᠣᠩ ᠢ᠋ ᠰᠤᠯᠠᠯᠠᠵᠤ᠂ ᠡᠪᠡᠰᠦ ᠬᠠᠵᠠᠭᠤᠯᠴᠢᠬᠠᠭᠠᠳ ᠬᠤᠷᠳᠤᠨ ᠠᠮᠵᠢᠵᠤ ᠵᠢᠭᠠᠬᠠᠨ ᠨᠢᠳᠦ ᠬᠠᠮᠬᠢᠭᠠᠳ ᠠᠪ! ᠪᠦᠷᠦᠢ ᠪᠣᠯᠤᠭᠰᠠᠭᠠᠷ ᠤᠯᠠᠭᠠᠨ ᠬᠠᠲᠤᠨ ᠭᠠᠲᠤᠯᠤᠶᠠ ᠭᠡᠵᠦ ᠯᠠᠮᠠᠬᠦᠦ ᠬᠡᠯᠡᠬᠦ ᠳ᠋ᠦ᠍ ᠪᠠᠶᠠᠷᠲᠤ ᠲᠣᠰᠴᠤ᠄
— ᠰᠡᠷᠡᠮᠵᠢᠲᠡᠢ ᠤᠨᠲᠠᠭᠠᠷᠠᠢ! ᠬᠠᠲᠤᠨ ᠲᠣᠬᠣᠢ ᠶ᠋ᠢᠨ ᠬᠠᠪᠢ ᠪᠠᠷ ᠬᠠᠷᠠ ᠴᠡᠷᠢᠭ ᠦ᠋ᠨ ᠲᠣᠨᠣᠭᠠ ᠳᠡᠭᠡᠷᠡᠮ ᠬᠡᠴᠡᠭᠦᠦ ᠭᠡᠵᠦ ᠳᠤᠭᠤᠯᠳᠠᠭᠰᠠᠨ᠁ ᠲᠡᠷᠡ ᠵᠠᠨᠠᠭ ᠤ᠋ᠳ ᠲᠦᠷᠭᠡᠨ ᠫᠤᠤ ᠲᠠᠢ ᠳ᠋ᠠᠭᠠᠨ ᠪᠠᠷᠳᠠᠵᠤ ᠣᠯᠵᠠᠨ ᠤ᠋ ᠪᠠᠨ ᠲᠤᠯᠤᠮ ᠢ᠋ ᠠᠮᠠᠷᠬᠠᠨ ᠳᠦᠭᠦᠷᠭᠡᠳᠡᠭ ᠭᠡᠰᠡᠨ ᠭᠡᠵᠦ ᠬᠡᠯᠡᠪᠡ᠃
— ᠮᠠᠨᠤᠰ ᠤ᠋ᠨ ᠭᠠᠨᠵᠤᠭᠠ ᠶ᠋ᠢ ᠪᠠᠭᠤᠯᠭᠠᠴᠢᠬᠠᠬᠤ ᠰᠥᠰᠥ ᠲᠡᠢ ᠡᠷᠡ ᠪᠠᠢᠨᠠ ᠤᠤ⁈ ᠴᠠᠪᠠᠰᠤ! ᠭᠡᠵᠦ ᠠᠩᠴᠢᠨᠵᠠᠪ ᠬᠠᠷᠠ ᠴᠡᠷᠢᠭ ᠢ᠋ ᠦᠯᠦ ᠲᠣᠭᠣᠨ ᠬᠠᠷᠢᠶᠠᠯ ᠲᠠᠯᠪᠢᠭᠰᠠᠭᠠᠷ ᠬᠡᠪᠲᠡᠬᠦ ᠳ᠋ᠦ᠍ ᠯᠠᠮᠠᠬᠦᠦ᠄
— ᠵᠠ᠂ ᠳᠤᠭᠤᠢ ᠤᠨᠲᠠ᠂ ᠤᠨᠲᠠ! ᠭᠡᠯᠢᠭᠰᠡᠨ ᠠᠳᠤᠭᠤ ᠪᠠᠨ ᠬᠠᠲᠤᠨ ᠤ᠋ ᠴᠠᠭᠠᠨᠠ ᠠᠪᠠᠴᠢᠵᠤ ᠠᠮᠤᠷ ᠲᠠᠢᠪᠤᠩ ᠪᠣᠷᠣᠯᠠᠭᠤᠯᠴᠢᠬᠠᠭᠠᠳ ᠡᠵᠢ ᠳᠡᠭᠡᠷᠡ ᠪᠡᠨ ᠭᠠᠨᠵᠤᠭᠠ ᠲᠠᠢ ᠪᠤᠴᠠᠨᠠ ᠪᠢᠵᠡ! ᠡᠵᠢ ᠴᠢᠨᠢ ᠴᠢᠨᠦ ᠬᠣᠢᠨᠠ ᠠ᠋ᠴᠠ ᠳᠠᠩᠰᠠᠯᠠᠵᠤ ᠪᠣᠢ ᠳᠠ᠃ ᠳᠡᠭᠦᠦ ᠮᠢᠨᠢ ᠵᠢᠭᠠᠬᠠᠨ ᠶᠠᠰᠤ ᠠᠮᠠᠷᠠᠭᠠᠳ ᠠᠪ! ᠭᠡᠳ ᠪᠢᠲᠡᠭᠦᠦ ᠪᠤᠷᠭᠠᠰᠤᠨ ᠤ᠋ ᠴᠠᠭᠠᠭᠤᠷ ᠠᠳᠤᠭᠤᠨ ᠤ᠋ ᠪᠠᠷᠠ ᠬᠠᠷᠠᠬᠤ ᠪᠠᠷ ᠪᠣᠰᠪᠠ᠃ ᠠᠩᠴᠢᠨᠵᠠᠪ ᠨᠥᠭᠦᠭᠡ ᠬᠣᠶᠠᠷ ᠢ᠋ ᠶᠠᠪᠤᠮᠠᠭᠴᠠ ᠤᠨᠲᠠᠵᠤ ᠣᠷᠬᠢᠪᠠ᠃
ᠰᠢᠷᠠ ᠪᠦᠷᠦᠢ ᠲᠠᠰᠤᠷᠠᠵᠤ᠂ ᠠᠯᠤᠰ ᠤ᠋ᠨ ᠪᠠᠷᠠ ᠪᠥᠷᠲᠥᠯᠵᠡᠵᠦ ᠡᠬᠢᠯᠡᠬᠦ ᠳ᠋ᠦ᠍ ᠬᠡᠳᠦᠭᠦᠯᠡ ᠠᠳᠤᠭᠤ ᠪᠠᠨ ᠬᠤᠮᠢᠵᠤ ᠠᠪᠤᠭᠠᠳ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠣᠯᠣᠮ ᠢ᠋ ᠭᠠᠲᠤᠯᠬᠤ ᠪᠠᠷ ᠭᠡᠯᠢᠲᠡᠯᠡ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠥᠪᠡᠭᠡ ᠡᠴᠡ ᠭᠡᠨᠡᠳᠲᠡ ᠫᠤᠤ ᠲᠠᠴᠢᠭᠢᠨᠠᠪᠠ᠃
ᠪᠦᠷᠦᠭ ᠪᠠᠷᠤᠭ ᠲᠤ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠥᠪᠡᠭᠡ ᠪᠡᠷ ᠬᠠᠷᠠ ᠴᠡᠷᠢᠭ ᠦ᠋ᠨ ᠲᠣᠯᠣᠭᠠᠢ ᠱᠣᠪᠣᠯᠵᠠᠨᠠ᠃ ᠤᠯᠠᠰ ᠤᠯᠠᠰ ᠴᠠᠬᠢᠯᠠᠬᠤ ᠭᠡᠷᠡᠯ ᠡᠴᠡ ᠳᠠᠷᠢ ᠶ᠋ᠢᠨ ᠦᠨᠦᠷ ᠬᠠᠩᠬᠤᠯᠵᠤ᠂ ᠲᠦᠷᠭᠡᠨ ᠫᠤᠤ ᠶ᠋ᠢᠨ ᠳᠠᠭᠤᠨ ᠲᠠᠰᠤᠷᠠᠭᠠ ᠦᠭᠡᠢ ᠲᠠᠴᠢᠭᠢᠨᠠᠨᠠ᠃ ᠠᠳᠤᠭᠤᠳ ᠤ᠋ᠨ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠱᠤᠤᠭᠢᠬᠤ ᠰᠤᠮᠤᠨ ᠤ᠋ ᠢᠰᠬᠡᠷᠦᠯ ᠵᠢᠪᠡᠭᠦᠦ ᠲᠡᠢ ᠰᠣᠨᠣᠰᠳᠠᠨᠠ᠃ ᠠᠳᠤᠭᠤᠳ ᠦᠷᠭᠦᠪᠡ᠁
— ᠪᠣᠯᠣᠮᠵᠢᠲᠠᠢ ᠰᠠᠨ ᠪᠣᠯ ᠠᠳᠤᠭᠤᠨ ᠠ᠋ᠴᠠ ᠲᠠᠰᠤᠯᠵᠤ ᠬᠥᠬᠡᠭᠡ! ᠭᠡᠳ ᠯᠠᠮᠠᠬᠦᠦ ᠠᠩᠴᠢᠨᠵᠠᠪ ᠵᠦᠭ ᠰᠠᠨᠳᠤᠷᠴᠤ ᠬᠠᠰᠬᠢᠷᠤᠨ ᠠᠳᠤᠭᠤᠨ ᠤ᠋ ᠲᠦᠷᠦᠭᠦᠦ ᠶ᠋ᠢ ᠵᠡᠭᠦᠨᠰᠢᠯᠡᠭᠦᠯᠵᠦ ᠲᠠᠭᠤᠨᠠ᠃
— ᠡᠨᠡ ᠨᠢᠳᠦ ᠦᠭᠡᠢ ᠰᠤᠮᠤᠨ ᠳ᠋ᠤ᠌ ᠣᠨᠣᠭᠳᠠᠪᠠᠯ ᠴᠦ᠍ ᠭᠠᠢ ᠪᠣᠯᠤᠨᠠ ᠭᠡᠳ ᠠᠩᠴᠢᠨᠵᠠᠪ ᠴᠥᠭᠡᠪᠦᠷᠢ ᠠᠳᠤᠭᠤ ᠰᠠᠯᠭᠠᠵᠤ ᠠᠪᠤᠭᠠᠳ ᠠᠰ ᠬᠣᠢᠰᠢ ᠪᠠᠨ ᠭᠡᠯᠢᠪᠡ᠃ ᠫᠤᠤ ᠶ᠋ᠢᠨ ᠳᠠᠭᠤ᠂ ᠬᠥᠮᠦᠰ ᠦ᠋ᠨ ᠤᠷᠢᠯᠠᠯᠲᠠ᠂ ᠨᠣᠬᠠᠳ ᠭᠠᠰᠠᠯᠬᠤ ᠡᠯᠳᠡᠪ ᠵᠢᠪᠡᠭᠦᠨ ᠳᠠᠭᠤᠨ ᠠ᠋ᠴᠠ ᠦᠷᠭᠦᠭᠰᠡᠨ ᠠᠳᠤᠭᠤᠳ ᠨᠢᠳᠦ ᠦᠭᠡᠢ ᠳᠠᠪᠬᠢᠯᠳᠤᠪᠠ᠃
ᠠᠩᠴᠢᠨᠵᠠᠪ ᠤ᠋ᠨ ᠤᠨᠤᠭᠰᠠᠨ ᠮᠠᠩᠭᠢᠰᠤᠨ ᠬᠠᠯᠢᠭᠤᠨ ᠰᠠᠯᠬᠢ ᠰᠢᠭ᠋ ᠬᠤᠷᠳᠤᠨ ᠳᠠᠪᠬᠢᠵᠤ ᠡᠵᠡᠨ ᠦ᠌ ᠪᠡᠨ ᠡᠷᠡ ᠵᠣᠷᠢᠭ ᠢ᠋ ᠬᠥᠪᠴᠢᠯᠡᠨᠡ᠃ ᠲᠡᠭᠦᠨ ᠦ᠌ ᠠᠷᠤ ᠠ᠋ᠴᠠ ᠳᠡᠪᠢᠷᠡᠩ ᠳᠡᠪᠢᠷᠡᠩ ᠲᠠᠪᠠᠷᠴᠠᠭᠯᠠᠬᠤ ᠮᠣᠷᠢᠨ ᠤ᠋ ᠲᠤᠭᠤᠷᠠᠢ ᠬᠣᠯᠠ ᠰᠣᠨᠣᠰᠳᠠᠬᠤ ᠪᠣᠯᠪᠠᠴᠤ ᠬᠠᠶᠠ ᠬᠠᠷᠠᠩᠭᠤᠢ ᠶ᠋ᠢ ᠵᠦᠰᠦᠭᠰᠡᠨ ᠰᠤᠮᠤᠨ ᠤ᠋ ᠱᠤᠤᠭᠢᠶᠠ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠨᠢ ᠢᠰᠬᠡᠷᠦᠨᠡ᠁ ᠵᠡᠷᠯᠢᠭ ᠰᠤᠮᠤᠨ ᠳ᠋ᠤ᠌ ᠳᠠᠭᠠᠷᠢᠭᠳᠠᠭᠤᠵᠠᠢ ᠭᠡᠵᠦ ᠠᠩᠴᠢᠨᠵᠠᠪ ᠡᠮᠡᠭᠡᠯ ᠦ᠋ᠨ ᠢ᠋ᠶ᠋ᠡᠨ ᠪᠥᠭᠦᠷᠭᠡᠨ ᠡᠴᠡ ᠳᠡᠭᠦᠵᠢᠯᠡᠭᠳᠡᠵᠦ ᠮᠣᠷᠢᠨ ᠤ᠋ ᠪᠠᠨ ᠪᠤᠷᠤᠭᠤ ᠲᠠᠯᠠ ᠪᠠᠷ ᠬᠥᠯᠪᠡᠷᠢᠨ ᠭᠥᠯᠢᠮ ᠳ᠋ᠡᠭᠡᠨ ᠴᠠᠪᠠᠤ ᠰᠢᠭ᠋ ᠨᠠᠭᠠᠯᠳᠤᠪᠠ ᠁ ᠠᠩᠴᠢᠨᠵᠠᠪ ᠭᠡᠨᠡᠳᠲᠡ ᠮᠣᠷᠢ ᠲᠠᠢ ᠪᠠᠨ ᠳᠠᠷᠤᠯᠴᠠᠵᠤ ᠤᠨᠠᠪᠠ᠃ ᠮᠠᠩᠭᠢᠰᠤᠨ ᠬᠠᠯᠢᠭᠤᠨ ᠤ᠋ ᠴᠢᠬᠢᠯᠵᠢᠭᠦᠷ ᠢ᠋ᠶ᠋ᠡᠷ ᠰᠤᠮᠤ ᠣᠷᠣᠵᠤ ᠭᠠᠪᠠᠯᠠ ᠶ᠋ᠢ ᠨᠢ ᠴᠥᠮᠥᠯᠵᠡᠢ᠃ ᠮᠠᠩᠭᠢᠰᠤᠨ ᠬᠠᠯᠢᠭᠤᠨ ᠪᠣᠰᠬᠤ ᠭᠡᠵᠦ ᠬᠡᠳᠦ ᠲᠡᠯᠴᠢᠯᠡᠭᠡᠳ ᠳᠠᠬᠢᠵᠤ ᠬᠥᠳᠡᠯᠦᠭᠰᠡᠨ ᠦᠭᠡᠢ᠃ ᠠᠩᠴᠢᠨᠵᠠᠪ ᠮᠠᠩᠭᠢᠰᠤᠨ ᠬᠠᠯᠢᠭᠤᠨ ᠤ᠋ ᠬᠥᠯᠥᠰᠥᠨ ᠡᠴᠡ ᠮᠠᠩᠨᠠᠢ ᠳ᠋ᠠᠭᠠᠨ ᠲᠦᠷᠬᠢᠵᠦ《ᠴᠤᠴᠠᠯᠲᠠ ᠦᠭᠡᠢ ᠳᠠᠪᠬᠢᠳᠠᠭ ᠬᠡᠢᠮᠣᠷᠢ ᠰᠦᠨᠡᠰᠦ ᠴᠢᠨᠢ ᠡᠵᠡᠨ ᠦ᠌ ᠪᠡᠨ ᠪᠡᠶᠡ ᠳ᠋ᠦ᠍ ᠣᠷᠣᠰᠢᠭ!》 ᠭᠡᠳ ᠴᠢᠰᠤ ᠪᠤᠷᠭᠢᠯᠤᠭᠰᠠᠨ ᠮᠣᠷᠢᠨ ᠤ᠋ ᠪᠠᠨ ᠲᠣᠯᠣᠭᠠᠢ ᠶ᠋ᠢ ᠲᠡᠪᠡᠷᠢᠨ ᠴᠤᠷᠬᠢᠷᠠᠨ ᠤᠬᠢᠯᠠᠪᠠ᠁
— ᠠᠮᠢᠳᠤ ᠪᠠᠷ ᠨᠢ ᠪᠡᠷᠢ! ᠭᠡᠵᠦ ᠬᠠᠰᠬᠢᠷᠤᠯᠳᠤᠭᠰᠠᠨ ᠬᠠᠷᠠ ᠴᠡᠷᠢᠭ ᠦ᠋ᠳ ᠠᠩᠴᠢᠨᠵᠠᠪ ᠢ᠋ ᠪᠦᠰᠡᠯᠡᠭᠰᠡᠨ ᠳ᠋ᠦ᠍ ᠵᠦᠭ ᠵᠦᠭ ᠦ᠋ᠨ ᠫᠤᠤ ᠶ᠋ᠢᠨ ᠬᠠᠷᠠ ᠨᠦᠬᠡ ᠲᠡᠭᠦᠨ ᠵᠦᠭ ᠣᠩᠭᠣᠢᠵᠤ ᠬᠠᠷᠠᠭᠳᠠᠨᠠ᠃ ᠬᠠᠢᠷᠠᠲᠤ ᠬᠦᠯᠦᠭ ᠢ᠋ᠶ᠋ᠡᠨ ᠬᠠᠷᠠ ᠴᠡᠷᠢᠭ ᠦ᠋ᠨ ᠰᠤᠮᠤᠨ ᠳ᠋ᠤ᠌ ᠠᠯᠳᠠᠭᠰᠠᠨ ᠶᠡᠬᠡ ᠭᠠᠰᠢᠭᠤᠳᠠᠯ ᠤ᠋ᠨ ᠮᠠᠨᠠᠨ ᠳ᠋ᠤ᠌ ᠪᠣᠭᠣᠭᠳᠠᠭᠰᠠᠨ ᠠᠩᠴᠢᠨᠵᠠᠪ ᠪᠡᠶᠡ ᠶ᠋ᠢ ᠨᠢ ᠣᠨᠢᠯᠠᠭᠰᠠᠨ ᠫᠤᠤ᠂ ᠪᠦᠰᠡᠯᠡᠬᠦ ᠰᠢᠬᠠᠭᠰᠠᠨ ᠬᠠᠷᠠ ᠴᠡᠷᠢᠭ ᠢ᠋ ᠶᠠᠭᠤᠮᠠᠨ ᠳ᠋ᠤ᠌ ᠪᠣᠳᠣᠭᠠ ᠦᠭᠡᠢ᠂ ᠮᠠᠩᠭᠢᠰᠤᠨ ᠬᠠᠯᠢᠭᠤᠨ ᠤ᠋ ᠪᠠᠨ ᠬᠣᠢᠨᠠ ᠠ᠋ᠴᠠ ᠭᠠᠰᠢᠭᠤᠳᠠᠵᠤ ᠵᠣᠭᠰᠣᠨᠠ᠃《 ᠮᠣᠩᠭᠣᠯ ᠡᠷᠡ ᠮᠣᠷᠢᠨ ᠠ᠋ᠴᠠ ᠪᠠᠨ ᠰᠠᠯᠤᠭᠰᠠᠨ ᠦᠶᠡ ᠳ᠋ᠦ᠍ ᠰᠦᠨᠡᠰᠦ ᠦᠭᠡᠢ ᠬᠥᠮᠦᠨ ᠰᠢᠭ᠁》 ᠭᠡᠵᠦ ᠠᠩᠴᠢᠨᠵᠠᠪ ᠭᠠᠰᠠᠯᠤᠨ ᠪᠣᠳᠣᠬᠤ ᠳ᠋ᠤ᠌ ᠨᠢᠳᠦᠨ ᠳ᠋ᠦ᠍ᠨᠢ ᠳᠠᠬᠢᠭᠠᠳ ᠨᠢᠯᠪᠤᠰᠤ ᠴᠡᠢᠯᠡᠭᠡᠨᠡᠪᠡ᠁
ᠰᠡᠭᠦᠯ ᠳ᠋ᠦ᠍ᠨᠢ ᠲᠡᠷᠡ ᠸᠠᠩ ᠰᠣᠬᠣᠷ ᠤ᠋ᠨ ᠴᠡᠷᠢᠭ ᠦ᠋ᠨ ᠠᠳᠤᠭᠤ ᠬᠠᠷᠢᠭᠤᠯᠤᠨ ᠴᠡᠷᠢᠭ ᠦ᠋ᠨ ᠠᠭᠲᠠ ᠰᠤᠷᠭᠠᠵᠤ ᠬᠡᠳᠦᠨ ᠵᠢᠯ ᠡᠯᠡᠭᠡᠭᠰᠡᠨ ᠪᠣᠯᠪᠠᠴᠤ ᠴᠡᠷᠢᠭ ᠦ᠋ᠨ ᠬᠠᠲᠠᠭᠤ ᠠᠯᠪᠠ ᠳ᠋ᠤ᠌ ᠪᠠᠷᠢᠭᠳᠠᠨ ᠭᠡᠷ ᠦ᠋ᠨ ᠪᠠᠷᠠ ᠬᠠᠷᠠᠵᠤ ᠡᠵᠢ ᠲᠡᠢ ᠪᠡᠨ ᠣᠴᠢᠵᠤ ᠠᠭᠤᠯᠵᠠᠬᠤ ᠵᠠᠪᠰᠢᠶᠠᠨ ᠣᠯᠤᠭᠠ ᠦᠭᠡᠢ᠃ ᠠᠩᠴᠢᠨᠵᠠᠪ ᠠᠳᠤᠭᠤ ᠳᠠᠯᠠᠯᠵᠤ᠂ ᠦᠷᠢᠶᠡ ᠬᠠᠭᠠᠷᠢᠬᠤ᠂ ᠤᠨᠠᠭᠠ ᠰᠠᠷᠪᠠ ᠲᠠᠮᠠᠭᠠᠯᠠᠬᠤ᠂ ᠡᠮᠨᠢᠭ ᠴᠢᠬᠢᠳᠡᠵᠦ ᠠᠭᠲᠠ ᠰᠤᠷᠭᠠᠬᠤ ᠵᠡᠷᠭᠡ ᠠᠳᠤᠭᠤᠨ ᠤ᠋ ᠦᠢᠯᠡ ᠳ᠋ᠦ᠍ ᠴᠠᠭᠠᠷᠠᠭᠰᠠᠨ ᠢ᠋ ᠬᠥᠮᠦᠰ ᠡᠷᠡᠬᠡᠢ ᠭᠤᠵᠤᠢᠯᠠᠭᠠᠨ ᠱᠠᠭᠰᠢᠳᠠᠭ ᠪᠣᠯᠪᠠ᠃
ᠸᠠᠩ ᠰᠣᠬᠣᠷ ᠴᠤ᠌ ᠠᠳᠤᠭᠤᠨ ᠳ᠋ᠤ᠌ ᠬᠠᠰᠢᠷ ᠠᠩᠴᠢᠨᠵᠠᠪ ᠢ᠋ ᠮᠠᠰᠢᠳᠠ ᠲᠣᠭᠣᠵᠤ《 ᠮᠣᠩᠭᠣᠯ ᠬᠣᠰᠢᠭᠤᠳ ᠤ᠋ᠨ ᠸᠠᠩ ᠬᠦᠩ᠂ ᠪᠠᠶᠠᠳ ᠨᠣᠶᠠᠳ ᠤ᠋ᠨ ᠠᠳᠤᠭᠤ ᠶ᠋ᠢ ᠤᠬᠠᠭᠠᠯᠠᠬᠤ ᠳ᠋ᠤ᠌ ᠡᠢᠮᠦ ᠨᠢᠭᠡ ᠰᠠᠢᠨ ᠡᠷᠡ ᠪᠠᠢᠬᠤ ᠦᠭᠡᠢ ᠪᠠᠰᠠ ᠪᠣᠯᠬᠤ ᠦᠭᠡᠢ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠲᠡᠭᠦᠨ ᠢ᠋ ᠠᠰᠢᠭᠯᠠᠬᠤ ᠤᠬᠠᠭᠠᠨ ᠪᠢᠰᠢᠯᠭᠠᠵᠤ ᠪᠠᠢᠯᠠ᠃
ᠨᠢᠭᠡ ᠤᠳᠠᠭᠠ ᠳᠠᠯᠠᠳ ᠬᠦᠩ ᠦ᠋ᠨ ᠣᠢᠷᠤᠪ ᠪᠠᠶᠠᠨ ᠸᠠᠩ ᠰᠣᠬᠣᠷ ᠬᠣᠶᠠᠭᠤᠯᠠ ᠮᠥᠷᠥᠢ ᠲᠡᠢ ᠴᠠᠭᠠᠰᠤᠨ ᠫᠠᠢ ᠨᠠᠭᠠᠳᠪᠠ᠃
ᠳᠡᠯᠡᠳ ᠬᠦᠩ ᠦ᠋ᠨ ᠣᠢᠷᠤᠪ ᠪᠠᠶᠠᠨ ᠱᠦᠭᠦᠭᠳᠡᠪᠡᠯ ᠸᠠᠩ ᠰᠣᠬᠣᠷ ᠲᠡᠭᠦᠨ ᠦ᠌ ᠠᠳᠤᠭᠤᠨ ᠠ᠋ᠴᠠ ᠠᠷᠪᠠᠨ ᠠᠭᠲᠠ ᠰᠣᠩᠭᠣᠬᠤ᠂ ᠸᠠᠩ ᠰᠣᠬᠣᠷ ᠱᠦᠭᠦᠭᠳᠡᠪᠡᠯ ᠣᠢᠷᠤᠪ ᠲᠡᠭᠦᠨ ᠦ᠌ ᠠᠮᠤ ᠶ᠋ᠢᠨ ᠬᠥᠮᠥᠷᠭᠡ ᠡᠴᠡ ᠠᠷᠪᠠᠨ ᠬᠠᠰᠠᠭ( ᠨᠢᠭᠡ ᠬᠠᠰᠠᠭ ᠠᠷᠪᠠᠨ ᠰᠠᠭᠤᠯᠠᠭᠠ) ᠬᠠᠷᠠ ᠪᠤᠳᠠᠭᠠ ᠲᠡᠭᠡᠭᠡᠬᠦ ᠭᠡᠵᠦ ᠬᠣᠶᠠᠷ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠠᠮᠠᠯᠳᠠᠨ ᠲᠣᠭᠲᠠᠵᠠᠢ᠃ ᠠᠲᠠᠭᠠ ᠪᠠᠭᠯᠠᠭᠰᠠᠨ ᠨᠠᠭᠠᠳᠤᠮ ᠳ᠋ᠤ᠌ ᠠᠵᠠ ᠶ᠋ᠢᠨ ᠲᠩᠷᠢ ᠬᠠᠵᠠᠢᠭᠰᠠᠨ ᠳᠠᠯᠠᠳ ᠬᠦᠩ ᠦ᠋ᠨ ᠣᠢᠷᠤᠪ ᠪᠠᠶᠠᠨ ᠸᠠᠩ ᠰᠣᠬᠣᠷ ᠲᠤ ᠱᠦᠭᠦᠭᠳᠡᠵᠦ ᠠᠳᠤᠭᠤᠨ ᠰᠦᠷᠦᠭ ᠡᠴᠡ ᠪᠡᠨ ᠠᠷᠪᠠᠨ ᠰᠠᠢᠨ ᠠᠭᠲᠠ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠰᠢᠯᠢᠭᠦᠯᠬᠦ ᠪᠣᠯᠪᠠ᠃
ᠣᠢᠷᠤᠪ ᠪᠠᠶᠠᠨ ᠬᠣᠷᠣ ᠨᠢ ᠪᠤᠴᠠᠯᠵᠤ᠄
— ᠸᠠᠩ ᠵᠠᠩᠭᠤᠢᠳᠠ ᠴᠢ ᠮᠢᠨᠦ ᠠᠳᠤᠭᠤᠨ ᠠ᠋ᠴᠠ ᠣᠩᠭᠣᠨ ᠬᠠᠷᠠ ᠶ᠋ᠢ ᠪᠠᠷᠢᠵᠤ ᠴᠢᠳᠠᠪᠠᠯ ᠪᠢ ᠳᠡᠭᠡᠷᠡ ᠨᠢ ᠪᠠᠰᠠ ᠠᠷᠪᠠᠨ ᠠᠭᠲᠠ ᠨᠡᠮᠡᠵᠦ ᠱᠠᠩᠨᠠᠶᠠ! ᠭᠡᠵᠦ ᠲᠡᠭᠦᠨ ᠢ᠋ ᠳᠣᠣᠷᠠᠰᠢᠶᠠᠵᠤ ᠬᠡᠯᠡᠪᠡ᠃
— ᠲᠠ ᠪᠢᠲᠡᠭᠡᠢ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠮᠠᠯᠵᠢᠵᠤ ᠬᠡᠬᠡᠷᠡᠭᠰᠡᠨ ᠢ᠋ᠶ᠋ᠡᠨ ᠵᠠᠯᠭᠢ! ᠪᠢᠳᠡ ᠫᠠᠢ ᠲᠣᠭᠯᠠᠬᠤ ᠠ᠋ᠴᠠ ᠡᠮᠦᠨᠡ ᠲᠣᠪ ᠲᠣᠳᠣᠷᠬᠠᠢ ᠮᠥᠷᠥᠢ ᠲᠣᠭᠲᠠᠴᠢᠬᠠᠭᠠᠳ ᠪᠠᠰᠠ ᠶᠠᠭᠠᠬᠢᠵᠤ ᠪᠠᠢᠭᠠ ᠨᠢ ᠡᠨᠡ ᠪᠣᠢ⁈ ᠪᠢ ᠲᠡᠷᠡ ᠣᠩᠭᠣᠨ ᠬᠠᠷᠠ ᠶ᠋ᠢ ᠴᠢᠨᠢ ᠤᠷᠭᠠᠯᠠᠵᠤ ᠳᠡᠢᠯᠬᠦ ᠦᠭᠡᠢ ᠪᠣᠯ ᠶᠠᠭᠠᠬᠢᠨᠠ ᠪᠣᠢ? ᠠᠷᠪᠠᠨ ᠠᠭᠲᠠ ᠴᠦ᠍ ᠠᠯᠠᠭᠠ ᠭᠡᠰᠡᠨ ᠦᠭᠡ ᠤᠤ? ᠭᠡᠵᠦ ᠸᠠᠩ ᠰᠣᠬᠣᠷ ᠶᠡᠬᠡ ᠲᠦᠪᠡᠭᠰᠢᠶᠡᠭᠰᠡᠨ ᠪᠠᠢᠳᠠᠯ ᠲᠠᠢ ᠳᠤᠤᠭᠠᠷᠪᠠᠯ ᠣᠢᠷᠤᠪ ᠪᠠᠶᠠᠨ᠄
— ᠳᠡᠭᠡᠯ ᠯᠡ ᠦᠭᠡᠢ᠂ ᠠᠳᠤᠭᠤᠨ ᠳ᠋ᠤ᠌ ᠮᠢᠨᠢ ᠤᠷᠭᠠ ᠲᠥᠷᠥᠵᠦ ᠠᠯᠢ ᠰᠠᠢᠨ ᠠ᠋ᠴᠠ ᠨᠢ ᠰᠢᠯᠢᠬᠦ ᠪᠣᠯᠤᠭᠰᠠᠨ ᠳ᠋ᠤ᠌ ᠪᠢ ᠵᠠᠩᠭᠤᠢᠳᠠ ᠲᠠᠨ ᠳ᠋ᠤ᠌ ᠤᠨᠠᠭᠠᠨ ᠠ᠋ᠴᠠ ᠪᠠᠨ ᠣᠩᠭᠣᠨ ᠭᠦᠶᠦᠭᠰᠡᠨ ᠬᠠᠷᠠ ᠠᠵᠢᠷᠭᠠ ᠶ᠋ᠢ ᠵᠢᠭᠠᠵᠤ ᠥᠭᠭᠦᠶᠡ! ᠤᠷᠭᠠᠯᠠᠵᠤ ᠴᠢᠳᠠᠪᠠᠯ ᠠᠷᠤ ᠠ᠋ᠴᠠ ᠨᠢ ᠬᠣᠷᠢᠨ ᠰᠠᠢᠨ ᠠᠭᠲᠠ ᠬᠣᠯᠪᠣᠵᠤ ᠥᠭᠭᠦᠶᠡ! ᠭᠡᠵᠦ ᠲᠠᠰᠤ ᠳᠤᠤᠭᠠᠷᠪᠠ᠃
— ᠲᠡᠭᠡᠵᠦ ᠶᠡᠬᠡ ᠰᠠᠨᠠᠬᠤ ᠪᠠᠨ ᠪᠣᠯᠢᠶᠠ᠂ ᠱᠦᠭᠦᠭᠰᠡᠨ ᠠᠷᠪᠠᠨ ᠠᠭᠲᠠ ᠪᠠᠨ ᠯᠠ ᠨᠤᠭᠲᠤᠯᠭᠠᠳ ᠮᠣᠷᠳᠠᠶᠠ ᠭᠡᠳ ᠸᠠᠩ ᠰᠣᠬᠣᠷ ᠬᠠᠯᠠᠭᠠᠬᠤ ᠦᠭᠡᠢ ᠪᠠᠢᠯᠠ᠃
ᠸᠠᠩ ᠰᠣᠬᠣᠷ ᠳᠡᠢᠯᠬᠦ ᠦᠭᠡᠢ ᠭᠡᠳ ᠭᠡᠳᠡᠷᠭᠦᠯᠡᠬᠦ ᠲᠣᠰᠤᠮ ᠣᠢᠷᠤᠪ ᠪᠠᠶᠠᠨ ᠳᠠᠪᠰᠢᠭᠤᠷᠠᠵᠤ《ᠣᠩᠭᠣᠨ ᠬᠠᠷᠠ ᠶ᠋ᠢ ᠤᠷᠭᠠᠯᠠᠵᠤ ᠳᠡᠢᠯᠬᠦ ᠦᠭᠡᠢ ᠪᠣᠯ ᠠᠷᠪᠠᠨ ᠠᠭᠲᠠ ᠠᠪᠬᠤ ᠰᠠᠨᠠᠭᠠ ᠪᠠᠨ ᠬᠤᠷᠢᠶᠠᠴᠢᠬᠠ》 ᠭᠡᠳ ᠮᠥᠷᠥᠢ ᠪᠡᠨ ᠥᠭᠳᠡᠭ ᠦᠭᠡᠢ᠃ ᠲᠡᠷᠡ ᠪᠡᠷ ᠣᠩᠭᠣᠨ ᠬᠠᠷᠠ ᠪᠠᠷ ᠢ᠋ᠶ᠋ᠠᠨ ᠪᠡᠮᠪᠡᠢᠯᠡᠵᠦ ᠡᠨᠡ ᠲᠡᠷᠡ ᠴᠡᠷᠢᠭ ᠦ᠋ᠨ ᠠᠭᠲᠠ ᠲᠠᠲᠠᠪᠤᠷᠢᠯᠠᠬᠤ ᠠᠯᠪᠠ ᠶ᠋ᠢ ᠣᠯᠠᠨ ᠤᠳᠠᠭᠠ ᠲᠦᠯᠬᠢᠵᠦ ᠥᠩᠭᠡᠷᠡᠭᠰᠡᠨ ᠠᠵᠢ᠃ ᠣᠩᠭᠣᠨ ᠬᠠᠷᠠ ᠠᠵᠢᠷᠭᠠ ᠭᠡᠭᠴᠢ ᠣᠯᠠᠨ ᠰᠠᠢᠨ ᠠᠳᠤᠭᠤᠴᠢ ᠶ᠋ᠢᠨ ᠤᠷᠭᠠ ᠬᠤᠭᠤᠯᠵᠤ ᠴᠡᠷᠢᠭ ᠦ᠋ᠨ ᠠᠭᠲᠠ ᠳ᠋ᠤ᠌ ᠲᠠᠲᠠᠪᠤᠷᠢᠯᠠᠬᠤ ᠠ᠋ᠴᠠ ᠮᠤᠯᠲᠤᠷᠠᠭᠰᠠᠨ ᠡᠵᠡᠨ ᠳ᠋ᠡᠭᠡᠨ ᠭᠠᠪᠢᠶᠠ ᠲᠠᠢ ᠬᠡᠴᠡᠭᠦᠦ ᠠᠳᠤᠭᠤᠰᠤ ᠪᠠᠢᠵᠠᠢ᠃
ᠠᠩᠴᠢᠨᠵᠠᠪ ᠣᠢᠷᠤᠪ ᠪᠠᠶᠠᠨ ᠤ᠋ ᠠᠳᠤᠭᠤᠨ ᠠ᠋ᠴᠠ ᠣᠩᠭᠣᠨ ᠬᠠᠷᠠ ᠶ᠋ᠢ ᠤᠷᠭᠠᠯᠠᠬᠤ ᠪᠠᠷ ᠪᠣᠯᠪᠠ᠃ ᠣᠩᠭᠣᠨ ᠬᠠᠷᠠ ᠤᠷᠭᠠ ᠨᠠᠬᠢᠯᠵᠠᠬᠤ ᠪᠠᠷ ᠠᠳᠤᠭᠤᠨ ᠳ᠋ᠤ᠌ ᠨᠠᠭᠠᠰᠢ ᠴᠠᠭᠠᠰᠢ ᠬᠣᠯᠬᠢᠵᠤ ᠭᠦᠶᠦᠨᠡ᠃ ᠴᠢᠬᠢ ᠪᠡᠨ ᠬᠤᠯᠮᠠᠢᠨ ᠲᠣᠯᠣᠭᠠᠢ ᠪᠠᠨ ᠳᠠᠮᠠᠷᠤᠳᠠᠭᠤᠯᠤᠭᠠᠳ ᠶᠡᠷᠦ ᠨᠢ ᠤᠷᠭᠠ ᠶ᠋ᠢᠨ ᠳᠠᠮ ᠳ᠋ᠤ᠌ ᠣᠷᠣᠵᠤ ᠥᠭᠳᠡᠭ ᠦᠭᠡᠢ᠃ ᠡᠴᠦᠰ ᠲᠡᠭᠡᠨ ᠠᠩᠴᠢᠨᠵᠠᠪ ᠠᠳᠤᠭᠤᠨ ᠳᠣᠲᠣᠷᠠ ᠪᠦᠲᠦᠨ ᠭᠤᠷᠪᠠ ᠡᠷᠭᠢᠯᠳᠦᠭᠡᠳ ᠣᠩᠭᠣᠨ ᠬᠠᠷᠠ ᠠᠵᠢᠷᠭᠠᠨ ᠤ᠋ ᠬᠦᠵᠦᠭᠦᠨ ᠳ᠋ᠦ᠍ ᠤᠷᠭᠠ ᠬᠢᠪᠡ᠃ ᠴᠢᠬᠢᠯᠵᠡᠭᠦᠷ ᠬᠦᠵᠦᠭᠦᠨ ᠳ᠋ᠦ᠍ᠨᠢ ᠤᠷᠭᠠ ᠶ᠋ᠢᠨ ᠬᠤᠢᠪᠢ ᠲᠣᠷᠣᠯᠳᠤᠭᠰᠠᠨ ᠳ᠋ᠤ᠌ ᠣᠩᠭᠣᠨ ᠬᠠᠷᠠ ᠲᠣᠯᠣᠭᠠᠢ ᠪᠠᠨ ᠭᠠᠵᠠᠷ ᠰᠢᠭᠠᠭᠠᠳ ᠦᠬᠦᠨ ᠵᠢᠳᠬᠦᠪᠡ᠃ ᠠᠩᠴᠢᠨᠵᠠᠪ ᠮᠣᠷᠢᠨ ᠤ᠋ ᠪᠠᠨ ᠡᠮᠡᠭᠡᠯ ᠦ᠋ᠨ ᠠᠷᠤ ᠳ᠋ᠤ᠌ ᠯᠠᠪᠳᠠᠭᠤᠬᠠᠨ ᠰᠠᠭᠤᠵᠤ ᠭᠡᠳᠡᠢᠪᠡᠯ ᠨᠥᠭᠦᠭᠡ ᠣᠩᠭᠣᠨ ᠬᠠᠷᠠ ᠠᠵᠢᠷᠭᠠ ᠵᠢᠳᠬᠦᠵᠦ ᠳᠡᠢᠯᠬᠦ ᠦᠭᠡᠢ ᠪᠡᠨ ᠮᠡᠳᠡᠵᠦ ᠤᠬᠤᠰᠬᠢᠨ ᠡᠷᠭᠢᠵᠦ ᠪᠤᠴᠠᠭᠠᠳ ᠭᠦᠶᠦᠪᠡ᠃ ᠠᠩᠴᠢᠨᠵᠠᠪ ᠣᠩᠭᠣᠨ ᠬᠠᠷᠠ ᠠᠵᠢᠷᠭᠠᠨ ᠳ᠋ᠤ᠌ ᠬᠠᠭᠤᠷᠲᠠᠵᠤ ᠪᠤᠴᠠᠵᠤ ᠪᠤᠯᠲᠠᠬᠤ ᠳ᠋ᠤᠨᠢ ᠤᠷᠭᠠ ᠪᠠᠨ ᠠᠯᠳᠠᠵᠤ ᠣᠷᠬᠢᠪᠠ᠁ ᠣᠩᠭᠣᠨ ᠬᠠᠷᠠ ᠠᠵᠢᠷᠭᠠ ᠠᠳᠤᠭᠤᠴᠢᠨ ᠡᠷᠡ ᠶ᠋ᠢᠨ ᠭᠠᠷ ᠠ᠋ᠴᠠ ᠤᠷᠭᠠ ᠠᠯᠳᠠᠭᠤᠯᠵᠤ ᠰᠤᠷᠤᠭᠰᠠᠨ ᠳ᠋ᠠᠭᠠᠨ ᠡᠷᠳᠦᠵᠦ ᠠᠳᠤᠭᠤᠨ ᠳᠣᠲᠣᠷᠠ ᠢᠯᠠᠭᠴᠢ ᠶ᠋ᠢᠨ ᠠᠪᠤᠷᠢᠲᠠᠢ ᠰᠡᠭᠰᠡᠯᠵᠡᠨ ᠳᠠᠪᠬᠢᠨᠠ᠃《ᠡᠨᠡ ᠠᠳᠤᠭᠤᠰᠤ ᠴᠦ᠍ ᠶᠣᠰᠣᠲᠠᠢ ᠤᠷᠭᠠ ᠬᠤᠭᠤᠯᠵᠤ ᠮᠠᠭᠤ ᠵᠠᠩ ᠰᠤᠷᠤᠭᠰᠠᠨ ᠶᠤᠮ ᠪᠠᠢᠨᠠ᠃ ᠵᠠ᠂ ᠪᠠᠢᠵᠠ ᠴᠢᠮᠠ ᠳ᠋ᠤ᠌ ᠵᠠᠳᠠᠭᠠᠢ ᠨᠣᠭᠲᠣ ᠱᠠᠩᠨᠠᠵᠤ ᠤᠷᠭᠢᠶᠠ!》 ᠭᠡᠳ ᠠᠩᠴᠢᠨᠵᠠᠪ ᠣᠩᠭᠣᠨ ᠬᠠᠷᠠ ᠶ᠋ᠢ ᠴᠢᠭᠯᠡᠨ ᠣᠷᠣᠪᠠ᠁
ᠠᠩᠴᠢᠨᠵᠠᠪ ᠣᠩᠭᠣᠨ ᠬᠠᠷᠠ ᠶ᠋ᠢ ᠤᠷᠭᠠᠯᠠᠵᠤ ᠠᠪᠤᠭᠠᠳ ᠠᠯᠳᠠᠵᠤ ᠲᠠᠭᠤᠭᠰᠠᠨ ᠢ᠋ ᠲᠣᠳᠣᠷᠬᠠᠢ ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠣᠢᠷᠣᠪ ᠪᠠᠶᠠᠨ ᠠᠯᠠᠭᠠ ᠲᠡᠰᠢᠵᠦ《ᠵᠠ᠂ ᠶᠠᠮᠠᠷ ᠪᠣᠢ? ᠪᠠᠷᠤᠭ ᠤ᠋ᠨ ᠡᠷᠡᠰ ᠦ᠋ᠳ ᠣᠩᠭᠣᠨ ᠬᠠᠷᠠ ᠳ᠋ᠤ᠌ ᠬᠠᠭᠤᠷᠲᠠᠵᠤ ᠤᠷᠭᠠ ᠪᠠᠨ ᠬᠤᠭᠤᠯᠵᠤ ᠣᠷᠬᠢᠳᠠᠭ ᠶᠤᠮ ᠠ᠋》 ᠭᠡᠵᠦ ᠸᠠᠩ ᠰᠣᠬᠣᠷ ᠲᠤ᠌ ᠰᠣᠨᠣᠰᠬᠠᠨᠠ᠃
一 ᠠᠩᠴᠢᠨᠵᠠᠪ᠂ ᠪᠤᠳᠠᠭᠠᠨ ᠤ᠋ ᠲᠤᠯᠤᠮ᠁ ᠭᠡᠵᠦ ᠬᠠᠷᠢᠶᠠᠯ ᠲᠠᠯᠪᠢᠭᠰᠠᠨ ᠸᠠᠩ ᠰᠣᠬᠣᠷ ᠣᠢᠷᠣᠪ ᠪᠠᠶᠠᠨ ᠢ᠋ᠶ᠋ᠠᠷ ᠬᠣᠷᠣ ᠪᠠᠨ ᠮᠠᠯᠲᠠᠭᠤᠯᠤᠭᠰᠠᠨ ᠳ᠋ᠠᠭᠠᠨ ᠬᠠᠮᠠᠷ ᠳᠡᠭᠡᠷᠡ ᠨᠢ ᠬᠥᠯᠥᠰᠥ ᠪᠤᠷᠴᠠᠭᠯᠠᠨᠠ᠃ ᠲᠡᠭᠡᠵᠦ ᠪᠠᠢᠲᠠᠯᠠ ᠴᠠᠭᠠᠨᠠ ᠬᠥᠮᠦᠰ ᠪᠤᠵᠢᠭᠢᠨᠠᠯᠳᠤᠵᠤ᠄
一 ᠬᠥᠶᠢ᠂ ᠥᠨᠥᠬᠢ ᠴᠢᠨᠢ ᠣᠩᠭᠣᠨ ᠬᠠᠷᠠ ᠠᠵᠢᠷᠭᠠᠨ ᠤ᠋ ᠨᠢᠷᠤᠭᠤᠨ ᠳᠡᠭᠡᠷᠡ ᠭᠠᠷᠴᠢᠬᠠᠭᠠᠳ ᠪᠤᠯᠭᠢᠭᠤᠯᠵᠤ ᠠᠢᠰᠤᠢ! ᠭᠡᠵᠡᠭᠡᠨᠡ᠃
ᠪᠦᠭᠦᠳᠡ ᠬᠥᠮᠦᠰ ᠲᠡᠷᠡ ᠬᠦ᠌ ᠲᠣᠭᠣᠰᠣ ᠪᠤᠵᠢᠭᠢᠨᠠᠭᠰᠠᠨ ᠵᠦᠭ ᠬᠠᠷᠠᠬᠤᠯᠠ ᠠᠩᠴᠢᠨᠵᠠᠪ ᠣᠩᠭᠣᠨ ᠬᠠᠷᠠ ᠠᠵᠢᠷᠭᠠᠨ ᠤ᠋ ᠨᠢᠷᠤᠭᠤᠨ ᠳᠡᠭᠡᠷᠡ ᠱᠠᠯᠵᠠᠨ ᠬᠠᠳᠠᠭᠠᠰᠤ ᠪᠠᠷ ᠬᠠᠲᠠᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠬᠥᠳᠡᠯᠬᠦ ᠴᠦ᠍ ᠦᠭᠡᠢ ᠪᠤᠯᠭᠢᠭᠤᠯᠤᠨᠠ᠁
ᠤᠤᠯ ᠨᠢ ᠠᠩᠴᠢᠨᠵᠠᠪ ᠣᠩᠭᠣᠨ ᠬᠠᠷᠠ ᠠᠵᠢᠷᠭᠠᠨ ᠳ᠋ᠤ᠌ ᠵᠠᠳᠠᠭᠠᠢ ᠨᠣᠭᠲᠣ ᠬᠠᠶᠠᠵᠤ ᠨᠣᠭᠲᠣᠯᠠᠭᠠᠳ ᠳᠡᠭᠡᠷᠡ ᠨᠢ ᠵᠠᠢᠳᠠᠯᠠᠭᠰᠠᠨ ᠪᠠᠢᠯᠠ᠃
ᠴᠣᠷᠣᠢᠨ ᠪᠤᠯᠭᠢᠭᠰᠠᠨ ᠣᠩᠭᠣᠨ ᠬᠠᠷᠠ ᠠᠵᠢᠷᠭᠠ ᠶ᠋ᠢᠨ ᠭᠠᠵᠠᠷ ᠰᠢᠭᠦᠷᠡᠭᠰᠡᠨ ᠬᠤᠷ ᠳᠡᠯ ᠪᠠ ᠲᠤᠭ ᠰᠡᠭᠦᠯ ᠨᠢ ᠰᠡᠭᠰᠡᠯᠵᠡᠵᠦ ᠳᠡᠭᠡᠷᠡ ᠨᠢ ᠰᠠᠭᠤᠭᠰᠠᠨ ᠠᠩᠴᠢᠨᠵᠠᠪ ᠤ᠋ᠨ ᠰᠠᠳᠠᠷᠠᠭᠰᠠᠨ ᠭᠡᠵᠢᠭᠡ ᠨᠢ ᠬᠠᠷᠠ ᠠᠵᠢᠷᠭᠠᠨ ᠤ᠋ ᠪᠤᠯᠬᠢᠶᠠᠨ ᠳ᠋ᠤ᠌ ᠳᠡᠯᠪᠡᠰ ᠳᠡᠯᠪᠡᠰ ᠬᠡᠢᠰᠬᠦ ᠶ᠋ᠢ ᠬᠠᠷᠠᠭᠰᠠᠨ ᠨᠢᠭᠡ ᠨᠢ ᠠᠩᠴᠢᠨᠵᠠᠪ ᠢ᠋《ᠠᠵᠢᠷᠭᠠᠨ ᠬᠠᠷᠠ》 ᠭᠡᠵᠦ ᠬᠣᠴᠢᠯᠠᠵᠤ ᠵᠠᠪᠳᠤᠪᠠ᠃ ᠲᠡᠭᠡᠭᠡᠳ ᠣᠢᠷᠣᠪ ᠪᠠᠶᠠᠨ ᠸᠠᠩ ᠰᠣᠬᠣᠷ ᠲᠤ ᠮᠥᠷᠥᠢ ᠱᠦᠭᠦᠭᠳᠡᠭᠡᠳ ᠣᠩᠭᠣᠨ ᠬᠠᠷᠠ ᠳᠡᠭᠡᠷᠡ ᠪᠡᠨ ᠬᠣᠷᠢᠨ ᠠᠭᠲᠠ ᠠᠯᠳᠠᠪᠠ᠃《 ᠠᠵᠢᠷᠭᠠᠨ ᠬᠠᠷᠠ》 ᠭᠡᠭᠴᠢ ᠠᠩᠴᠢᠨᠵᠠᠪ ᠣᠩᠭᠣᠨ ᠬᠠᠷᠠ ᠠᠵᠢᠷᠭᠠ ᠶ᠋ᠢ ᠨᠣᠭᠲᠣᠯᠠᠵᠤ ᠵᠠᠢᠳᠠᠯᠠᠭᠰᠠᠨ ᠦᠨᠡᠨ ᠦᠯᠢᠭᠡᠷ ᠳᠠᠮ ᠳᠠᠮ ᠳᠡᠮᠵᠢᠵᠦ ᠶᠠᠪᠤᠨ ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ ᠦᠭᠡᠢ ᠨᠡᠢᠳᠡᠮ ᠲᠠᠷᠬᠠᠭᠰᠠᠨ ᠪᠠᠢᠯᠠ᠃
ᠬᠡᠵᠢᠶᠡ ᠬᠣᠢᠨᠠ ᠣᠢᠷᠣᠪ ᠪᠠᠶᠠᠨ ᠸᠠᠩ ᠰᠣᠬᠣᠷ ᠲᠤ ᠨᠠᠶᠠᠨ ᠴᠢᠩ ᠭᠠᠵᠠᠷ ᠳᠡᠭᠡᠰᠦᠯᠡᠵᠦ ᠥᠭᠭᠦᠨ《 ᠠᠵᠢᠷᠭᠠᠨ ᠬᠠᠷᠠ》 ᠠᠩᠴᠢᠨᠵᠠᠪ ᠢ᠋ ᠠᠳᠤᠭᠤᠴᠢᠨ ᠢ᠋ᠶ᠋ᠠᠨ ᠪᠣᠯᠭᠠᠯᠠ ᠭᠡᠵᠦ ᠬᠥᠮᠦᠰ ᠬᠡᠯᠡᠯᠴᠡᠳᠡᠭ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠣᠳᠣᠨᠬᠤᠸᠠᠷ᠂ ᠳᠠᠪᠰᠢᠯᠲᠦ᠂ ᠪᠠᠭᠠᠲᠤᠷ