ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ < ᠳᠡᠭᠡᠳᠦ > – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠠᠷᠪᠠ> Хан мунын сүүрс < дээд > – Мөнх зохиоов ᠂ Тэргүүн бодь – Нэгдүгээр бүлэг <10>
324ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠠᠷᠪᠠ>
ᠮᠢᠩᠭᠠᠨᠪᠤᠤ ᠴᠠᠰᠤᠨ ᠤ᠋ ᠴᠣᠬᠣᠷᠲᠤᠭᠰᠠᠨ ᠬᠡᠰᠡᠭ ᠢ᠋ ᠪᠠᠷᠢᠵᠤ ᠠᠳᠤᠭᠤᠴᠢᠨ ᠰᠣᠳᠨᠠᠮ ᠭᠤᠸᠠᠢ ᠶ᠋ᠢᠨ ᠶᠠᠪᠤᠭᠰᠠᠨ ᠮᠥᠷ ᠢ᠋ᠶ᠋ᠡᠷ ᠬᠥᠲᠥᠯᠦᠭᠡ ᠮᠣᠷᠢ ᠲᠠᠢ ᠰᠤᠨᠤᠮᠠ ᠨᠢᠭᠡ ᠡᠳᠦᠷ ᠶᠠᠪᠤᠪᠠ᠃ ᠣᠢᠷᠠ ᠲᠥᠰᠦᠷ ᠠᠢᠯ ᠤ᠋ᠨ ᠪᠠᠷᠠ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ᠃ ᠬᠡᠳᠦᠨ ᠮᠣᠷᠢ ᠲᠠᠢ ᠬᠥᠮᠦᠨ ᠶᠠᠪᠤᠭᠰᠠᠨ ᠮᠥᠷ ᠬᠠᠶᠠ ᠪᠠᠯᠠᠷᠠᠵᠤ ᠬᠠᠶᠠ ᠲᠣᠳᠣᠷᠠᠨᠠ᠃ ᠵᠠᠷᠢᠮ ᠳ᠋ᠠᠭᠠᠨ ᠬᠡᠳᠦ ᠬᠡᠳᠦᠨ ᠭᠠᠵᠠᠷ ᠴᠠᠰᠤ ᠰᠥᠬᠥᠷᠡᠵᠦ ᠲᠡᠳᠡᠨ ᠦ᠌ ᠮᠥᠷ ᠪᠤᠯᠠᠭᠳᠠᠬᠤ ᠳ᠋ᠤ᠌ ᠲᠥᠯᠥᠪ ᠴᠢᠭ ᠪᠠᠷᠢᠵᠤ ᠶᠠᠪᠤᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠠᠢᠪᠠ᠃ ᠲᠡᠭᠦᠨ ᠦ᠌ ᠵᠠᠮ ᠳ᠋ᠤ᠌ ᠦᠨᠡᠭᠡ ᠲᠠᠤᠯᠠᠢ ᠶ᠋ᠢᠨ ᠮᠥᠷ ᠬᠠ ᠶᠠ ᠦᠭᠡᠢ ᠲᠣᠬᠢᠶᠠᠯᠳᠤᠨᠠ᠃ ᠲᠡᠭᠡᠪᠡᠴᠦ ᠵᠡᠭᠦᠨ ᠬᠣᠢᠰᠢᠯᠠᠬᠤ ᠵᠦᠭ ᠢ᠋ᠶ᠋ᠡᠨ ᠠᠯᠳᠠᠬᠤ ᠦᠭᠡᠢ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠪᠦᠷᠦᠢ ᠪᠣᠯᠬᠤ ᠳ᠋ᠤ᠌ ᠮᠢᠩᠭᠠᠨᠪᠤᠤ ᠰᠣᠳᠨᠠᠮ ᠡᠪᠦᠭᠡᠨ ᠲᠡᠳᠡᠨ ᠦ᠌ ᠬᠣᠨᠣᠭᠯᠠᠵᠤ ᠥᠩᠭᠡᠷᠡᠭᠰᠡᠨ ᠪᠠᠭᠤᠷᠠᠢ ᠶ᠋ᠢ ᠣᠯᠵᠤ ᠠᠪᠤᠪᠠ᠃
ᠮᠢᠩᠭᠠᠨᠪᠤᠤ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠭᠠᠵᠠᠷ ᠤ᠋ᠨ ᠪᠠᠢᠴᠠ ᠶ᠋ᠢ ᠠᠵᠢᠭᠯᠠᠬᠤᠯᠠ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠳᠡᠨᠵᠢᠷᠬᠡᠭ ᠵᠡᠭᠦᠨᠰᠢ ᠪᠡᠨ ᠨᠠᠯᠠᠤ ᠭᠠᠵᠠᠷ ᠪᠠᠢᠯᠠ᠃ ᠨᠢᠭᠡ ᠲᠣᠮᠣᠬᠠᠨ ᠬᠠᠪᠲᠠᠭᠠᠢ ᠬᠥᠬᠡ ᠴᠢᠯᠠᠭᠤᠨ ᠤ᠋ ᠨᠥᠮᠥᠷᠢ ᠪᠠᠷᠢᠵᠤ ᠪᠠᠭᠤᠳᠠᠯᠯᠠᠭᠰᠠᠨ ᠪᠠᠢᠨᠠ᠃ ᠲᠡᠷᠡ ᠪᠡᠷ ᠬᠠᠪᠲᠠᠭᠠᠢ ᠬᠥᠬᠡ ᠴᠢᠯᠠᠭᠤᠨ ᠤ᠋ ᠨᠥᠮᠥᠷᠢ ᠳ᠋ᠡᠬᠢ ᠴᠠᠰᠤ ᠶ᠋ᠢ ᠴᠡᠪᠡᠷᠯᠡᠵᠦ ᠬᠠᠭᠤᠷᠠᠢ ᠡᠪᠡᠰᠦ ᠵᠤᠯᠭᠠᠭᠠᠵᠤ ᠬᠣᠶᠠᠷ ᠮᠣᠷᠢ ᠪᠠᠨ ᠲᠡᠵᠢᠭᠡᠪᠡ᠃ ᠡᠨᠡ ᠨᠢ ᠪᠠᠰᠠ ᠪᠠᠷᠠᠭᠤᠨ ᠬᠣᠢᠨᠠ ᠠ᠋ᠴᠠ ᠲᠡᠢᠯᠳᠡᠭᠦᠦ ᠵᠢᠪᠠᠷᠯᠠᠳᠠᠭ ᠵᠢᠪᠠᠷ ᠰᠠᠯᠬᠢ ᠬᠠᠯᠬᠠᠯᠠᠳᠠᠭ ᠤᠬᠠᠭᠠᠨ ᠲᠠᠢ᠃ ᠮᠢᠩᠭᠠᠨᠪᠤᠤ ᠬᠠᠪᠲᠠᠭᠠᠢ ᠬᠥᠬᠡ ᠴᠢᠯᠠᠭᠤᠨ ᠤ᠋ ᠨᠥᠮᠥᠷᠢ ᠳ᠋ᠦ᠍ ᠭᠠᠯ ᠨᠣᠴᠣᠭᠠᠨ ᠴᠠᠢ ᠴᠢᠨᠠᠵᠤ ᠮᠢᠬᠠ ᠭᠥᠰᠭᠥᠯᠵᠦ ᠢᠳᠡᠵᠦ ᠤᠤᠭᠤᠴᠢᠬᠠᠭᠠᠳ ᠡᠪᠦᠷ ᠡᠴᠡ ᠪᠡᠨ ᠰᠢᠮᠡᠭᠦᠷ ᠬᠣᠣ ᠪᠠᠨ ᠲᠡᠮᠲᠡᠷᠢᠨ ᠭᠠᠷᠭᠠᠵᠤ ᠭᠠᠰᠢᠭᠤᠨ ᠬᠠᠷᠠ ᠠ᠋ᠴᠠ ᠬᠡᠳᠦᠨ ᠣᠭᠣᠴᠢ ᠰᠢᠮᠡᠵᠦ ᠪᠦᠯᠢᠶᠡᠰᠪᠡ᠃ ᠮᠢᠩᠭᠠᠨᠪᠤᠤ ᠦᠦᠷ ᠴᠠᠢᠮᠠᠭᠴᠠ ᠮᠣᠷᠳᠠᠵᠤ ᠨᠠᠷᠠ ᠪᠤᠯᠲᠠᠢᠬᠤ ᠳ᠋ᠤ᠌ ᠰᠣᠯᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠪᠠᠷᠠᠭᠤᠨ ᠡᠮᠦᠨᠡ ᠨᠢᠭᠡᠨ ᠨᠠᠮᠬᠠᠨ ᠳᠣᠪᠣᠴᠠᠭ ᠳᠡᠭᠡᠷᠡ ᠭᠠᠷᠪᠠ᠃ ᠮᠢᠩᠭᠠᠨᠪᠤᠤ ᠶ᠋ᠢᠨ ᠤᠨᠤᠭᠰᠠᠨ ᠵᠡᠭᠡᠷᠳᠡ ᠮᠣᠷᠢ ᠨᠢ ᠴᠠᠩᠲᠤᠭᠠᠳ ᠶᠠᠭᠠᠨ ᠪᠤᠭᠤᠷᠤᠯ ᠪᠣᠯᠵᠤ ᠥᠪᠡᠷ ᠦ᠋ᠨ ᠬᠢᠨᠢ ᠨᠢᠳᠦ ᠬᠥᠮᠥᠰᠬᠡ ᠰᠠᠬᠠᠯ ᠰᠠᠮᠪᠠᠢ ᠨᠢ ᠴᠤ᠌ ᠴᠠᠩᠲᠤᠵᠠᠢ᠃ ᠪᠡᠶᠡ ᠨᠢ ᠬᠠᠯᠠᠰᠠᠵᠤ ᠳᠠᠪᠬᠢᠬᠤ ᠶ᠋ᠢ ᠭᠣᠷᠢᠳᠠᠭᠰᠠᠨ ᠬᠠᠯᠵᠠᠨ ᠵᠡᠭᠡᠷᠳᠡ ᠮᠣᠷᠢ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠨᠠᠭᠠᠳᠤᠨ ᠪᠠᠢᠨ ᠪᠠᠢᠨ ᠡᠵᠡᠨ ᠦ᠌ ᠪᠡᠨ ᠳᠠᠯᠤ ᠮᠥᠷᠥ ᠶ᠋ᠢ ᠨᠢᠳᠤᠷᠴᠤ ᠫᠦᠷᠳ᠋ᠬᠢᠨ ᠲᠤᠷᠭᠢᠬᠤ ᠨᠢ《 ᠬᠤᠷᠳᠤᠨ ᠶᠠᠪᠤᠶᠠ》 ᠭᠡᠵᠦ ᠬᠡᠯᠡᠬᠦ ᠰᠢᠭ ᠪᠠᠢᠯᠠ᠃
ᠰᠠᠢᠬᠠᠨ ᠡᠳᠦᠷ ᠪᠠᠢᠪᠠ᠃ ᠡᠪᠦᠯ ᠦ᠋ᠨ ᠡᠪᠦᠭᠡᠨ ᠨᠠᠷᠠ ᠵᠠᠯᠬᠠᠭᠤᠲᠠᠢ ᠠᠨᠢᠪᠠᠯᠵᠠᠭᠰᠠᠭᠠᠷ ᠳᠡᠭᠡᠭᠰᠢ ᠳᠡᠭᠳᠡᠵᠦ《 ᠮᠣᠩᠭᠣᠯ ᠨᠤᠲᠤᠭ ᠰᠠᠢᠨ ᠨᠣᠢᠷᠰᠤᠪᠠ ᠤᠤ?》 ᠭᠡᠳ ᠪᠤᠮᠠᠨ ᠰᠠᠴᠤᠷᠠᠭ ᠢᠯᠴᠢ ᠪᠡᠨ ᠡᠬᠡ ᠳᠡᠯᠡᠬᠡᠢ ᠳ᠋ᠦ᠍ ᠲᠦᠭᠡᠭᠡᠬᠦ ᠳ᠋ᠡᠭᠡᠨ《 ᠮᠣᠩᠭᠣᠯ ᠨᠤᠲᠤᠭ ᠲᠤ ᠢᠯᠡᠭᠦᠦ ᠬᠤᠪᠢᠳᠠᠭᠤᠯᠤᠶᠠ》 ᠭᠡᠰᠡᠨ ᠰᠢᠭ ᠢᠰᠪᠡᠯᠵᠡᠨᠡ᠃ ᠮᠢᠩᠭᠠᠨᠪᠣᠤ ᠢᠯᠴᠢ ᠭᠡᠷᠡᠯ ᠢ᠋ᠶ᠋ᠡᠨ ᠬᠣᠷᠸᠠ ᠳ᠋ᠤ᠌ ᠲᠤᠰᠬᠠᠭᠰᠠᠨ ᠡᠪᠦᠭᠡᠨ ᠨᠠᠷᠠᠨ ᠤ᠋ ᠠᠭᠠᠵᠢᠮ ᠢ᠋ᠶ᠋ᠠᠷ ᠳᠡᠭᠳᠡᠬᠦ ᠶ᠋ᠢ ᠬᠠᠷᠠᠭᠠᠳ ᠡᠩ ᠦ᠋ᠨ ᠡᠳᠦᠷ ᠡᠴᠡ ᠨᠡᠩᠳᠡ ᠢᠯᠡᠭᠦᠦ ᠳᠣᠲᠣᠨᠣ ᠰᠠᠨᠠᠭᠳᠠᠪᠠ᠃ ᠨᠡᠯᠦᠢᠭᠰᠡᠨ ᠴᠠᠭᠠᠨ ᠴᠠᠰᠤᠨ ᠳ᠋ᠤ᠌ ᠨᠠᠷᠠᠨ ᠤ᠋ ᠭᠡᠷᠡᠯ ᠢ᠋ᠶ᠋ᠡᠷ ᠭᠢᠯᠲᠠᠭᠠᠨᠠᠨ ᠴᠡᠩᠬᠡᠷᠯᠡᠬᠦ ᠰᠣᠯᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠮᠥᠰᠥ ᠬᠣᠯᠠ ᠠ᠋ᠴᠠ ᠬᠠᠷᠠᠬᠤ ᠳ᠋ᠤ᠌ ᠠᠯᠳᠠᠯᠠᠨ ᠰᠤᠩᠭᠠᠭᠰᠠᠨ ᠴᠡᠩᠬᠡᠷ ᠬᠠᠳᠠᠭ ᠰᠢᠭ᠋ ᠠᠵᠢ᠃ ᠲᠡᠷᠲᠡᠭᠡ ᠪᠤᠲᠠ ᠮᠣᠳᠣ ᠲᠠᠢ ᠡᠩᠭᠡᠷ ᠳᠡᠭᠡᠭᠦᠷ ᠠᠳᠤᠭᠤᠨ ᠤ᠋ ᠬᠥᠯ ᠳ᠋ᠦ᠍ ᠭᠢᠰᠬᠢᠭᠳᠡᠭᠰᠡᠨ ᠴᠠᠰᠤ ᠴᠣᠬᠣᠷᠯᠠᠨ ᠬᠠᠷᠠᠭᠳᠠᠵᠤ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠ ᠲᠠᠢ ᠬᠠᠯᠢᠭᠤᠭᠴᠢ ᠭᠡᠭᠦᠦ ᠵᠡᠷᠭᠡ ᠠᠷᠪᠠᠭᠠᠳ ᠠᠳᠤᠭᠤ ᠮᠢᠩᠭᠠᠪᠣᠤ ᠶ᠋ᠢᠨ ᠳᠤᠷᠠᠨ ᠳ᠋ᠤ᠌ ᠲᠣᠳᠣᠷᠠᠪᠠ᠃ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠ ᠲᠠᠢ ᠵᠡᠷᠯᠢᠭ ᠠᠳᠤᠭᠤ ᠥᠨᠵᠢᠭᠦᠲᠡ ᠬᠣᠨᠣᠭᠤᠲᠠ ᠮᠥᠰᠥᠨ ᠦ᠌ ᠬᠠᠯᠢᠶᠠ ᠳ᠋ᠤ᠌ ᠪᠠᠭᠤᠵᠤ ᠢᠷᠡᠵᠦ ᠤᠰᠤ ᠤᠤᠭᠤᠳᠠᠭ ᠠᠵᠢ᠁ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠ ᠲᠦᠷᠦᠭᠦᠲᠠᠢ ᠬᠠᠯᠢᠭᠤᠭᠴᠢ ᠭᠡᠭᠦᠦ ᠬᠣᠷᠢᠭᠠᠳ ᠵᠡᠷᠯᠢᠭ ᠠᠳᠤᠭᠤ ᠬᠢᠷᠠ ᠠ᠋ᠴᠠ ᠳᠣᠷᠣᠭᠰᠢ ᠭᠣᠣᠯ ᠤ᠋ᠨ ᠬᠠᠯᠢᠶᠠ ᠰᠢᠮᠡᠬᠦ ᠪᠡᠷ ᠴᠤᠪᠤᠵᠤ ᠪᠠᠭᠤᠨᠠ᠃
ᠵᠡᠷᠯᠢᠭ ᠠᠳᠤᠭᠤᠳ ᠭᠣᠣᠯ ᠤ᠋ᠨ ᠬᠥᠪᠡᠭᠡ ᠣᠢᠷᠠᠳᠬᠤ ᠳ᠋ᠤ᠌ ᠬᠣᠢᠲᠤ ᠵᠦᠭ ᠦ᠋ᠨ ᠪᠠᠷᠠᠭᠤᠨ ᠲᠠᠯᠠ ᠠ᠋ᠴᠠ ᠬᠡᠰᠡᠭ ᠮᠣᠷᠢᠲᠠᠢ ᠬᠥᠮᠦᠰ ᠴᠠᠰᠤ ᠪᠤᠲᠠᠷᠠᠭᠤᠯᠤᠨ ᠳᠠᠪᠬᠢᠵᠤ ᠢᠷᠡᠭᠡᠳ《 ᠬᠠᠢ᠂ ᠬᠥᠶᠢ》 ᠬᠠᠰᠬᠢᠷᠤᠯᠴᠠᠨ ᠵᠡᠷᠯᠢᠭ ᠠᠳᠤᠭᠤᠳ ᠢ᠋ ᠭᠣᠣᠯ ᠤ᠋ᠨ ᠮᠥᠰᠥ ᠤᠷᠤᠭᠤ ᠶᠠᠭᠤ ᠬᠠᠢ ᠦᠭᠡᠢ ᠰᠢᠬᠠᠪᠠ᠃ ᠡᠮᠦᠨᠡ ᠨᠢ ᠪᠢᠲᠡᠭᠦᠦ ᠪᠤᠷᠭᠠᠰᠤ ᠲᠠᠢ ᠪᠣᠯᠬᠣᠷ ᠲᠡᠳᠡ ᠵᠡᠷᠯᠢᠭ ᠠᠳᠤᠭᠤᠳ ᠤ᠋ᠨ ᠪᠤᠷᠭᠠᠰᠤᠨ ᠳ᠋ᠤ᠌ ᠰᠢᠷᠭᠤᠬᠤ ᠠ᠋ᠴᠠ ᠠᠶᠤᠬᠤ ᠦᠭᠡᠢ ᠪᠠᠢᠯᠠ᠃
ᠵᠡᠷᠯᠢᠭ ᠠᠳᠤᠭᠤᠳ ᠴᠤ᠌ ᠬᠥᠮᠦᠨ ᠡᠴᠡ ᠮᠡᠷᠭᠡᠨ᠂ ᠲᠡᠷᠡ ᠬᠦ᠌ ᠬᠠᠰᠢᠶᠠ ᠰᠢᠭ᠋ ᠪᠢᠲᠡᠭᠦᠦ ᠪᠤᠷᠭᠠᠰᠤ ᠤᠷᠤᠭᠤ ᠦᠯᠦ ᠬᠠᠪᠢᠳᠠᠨᠠ᠃ ᠬᠡᠳᠦᠨ ᠵᠦᠭ ᠡᠴᠡ ᠬᠥᠮᠦᠰ ᠬᠠᠰᠬᠢᠷᠤᠯᠳᠤᠨ ᠰᠢᠬᠠᠭᠰᠠᠨ ᠠ᠋ᠴᠠ ᠵᠡᠷᠯᠢᠭ ᠠᠳᠤᠭᠤᠳ ᠦᠷᠭᠦᠨ ᠪᠢᠵᠢᠬᠢᠨᠠᠵᠤ᠂ ᠬᠠᠯᠢᠶᠠ ᠬᠦᠪᠦᠷᠡᠭᠰᠡᠨ ᠮᠥᠰᠥ ᠤᠷᠤᠭᠤ ᠴᠢᠬᠢᠯᠳᠦᠵᠦ ᠰᠣᠯᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠮᠥᠰᠥᠨ ᠦ᠌ ᠬᠥᠪᠡᠭᠡᠨ ᠳ᠋ᠦ᠍ ᠪᠤᠵᠢᠭᠢᠨᠠᠯᠳᠤᠨᠠ᠃ ᠬᠡᠳᠦᠨ ᠪᠠᠢᠳᠠᠰᠤ ᠬᠠᠯᠢᠶᠠ ᠤᠷᠤᠰᠤᠭᠰᠠᠨ ᠮᠥᠰᠥᠨ ᠳᠡᠭᠡᠷᠡ ᠣᠢᠴᠢᠭᠠᠳ ᠪᠣᠰᠴᠤ ᠲᠡᠢᠯᠡᠬᠦ ᠦᠭᠡᠢ ᠬᠣᠩᠰᠢᠶᠠᠷ ᠢ᠋ᠶ᠋ᠠᠨ ᠮᠥᠰᠥᠨ ᠳᠡᠭᠡᠷᠡ ᠲᠦᠱ ᠲᠦᠱ ᠭᠡᠲᠡᠯᠡ ᠮᠥᠷᠭᠥᠵᠦ ᠲᠡᠢᠴᠢᠭᠢᠨᠡᠨᠡ᠃ ᠴᠢᠬᠢ ᠨᠢ ᠬᠤᠯᠮᠠᠯᠵᠠᠭᠰᠠᠨ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠ ᠲᠣᠯᠣᠭᠠᠢ ᠪᠠᠨ ᠭᠠᠵᠠᠷ ᠰᠢᠭᠠᠨ᠂ ᠴᠠᠰᠤ ᠰᠢᠷᠣᠢ ᠪᠤᠵᠢᠭᠢᠨᠠᠲᠠᠯᠠ ᠪᠥᠭᠡᠮᠨᠡᠷᠡᠯᠳᠦᠭᠰᠡᠨ ᠠᠳᠤᠭᠤ ᠪᠠᠨ ᠬᠡᠳᠦ ᠲᠣᠭᠣᠷᠢᠨ ᠬᠤᠷᠢᠶᠠᠭᠠᠳ ᠬᠤᠤᠬᠢᠲᠤᠨᠠᠨ ᠦᠦᠷᠰᠡᠵᠦ《 ᠪᠢ ᠣᠳᠣ ᠡᠨᠡ ᠪᠦᠰᠡᠯᠡᠯᠲᠡ ᠶ᠋ᠢᠨ ᠰᠡᠲᠡᠷᠬᠡᠢ ᠪᠡᠷ ᠰᠢᠪᠲᠤᠯᠤᠶᠠ! ᠲᠠ ᠨᠠᠷ ᠨᠠᠮᠠ ᠶ᠋ᠢ ᠵᠠᠪᠳᠤᠭᠤᠯ》 ᠭᠡᠰᠡᠨ ᠰᠢᠤᠬᠠᠨ ᠭᠡᠨᠡᠳᠲᠡ ᠪᠠᠷᠠᠭᠤᠨ ᠬᠣᠢᠰᠢ ᠳᠠᠭᠠᠷᠢᠪᠠ᠃ ᠬᠠᠰᠢᠯᠲᠠ ᠶ᠋ᠢᠨ ᠴᠠᠭᠠᠨᠠᠬᠠᠨ ᠠᠯᠢ ᠤᠵᠠᠭᠤᠷ ᠤ᠋ᠨ ᠪᠡᠯᠡᠳᠬᠡᠯ ᠲᠡᠢ ᠪᠠᠢᠭᠰᠠᠨ ᠬᠢᠵᠢᠶᠡᠯ ᠨᠠᠰᠤᠨ ᠤ᠋ ᠨᠢᠭᠡ ᠠᠳᠤᠭᠤᠴᠢ ᠲᠣᠯᠣᠭᠠᠢ ᠪᠠᠨ ᠭᠠᠵᠠᠷ ᠰᠢᠭᠠᠵᠤ ᠴᠢᠬᠢ ᠪᠡᠨ ᠬᠤᠯᠮᠠᠯᠵᠠᠭᠤᠯᠤᠭᠰᠠᠨ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠨ ᠤ᠋ ᠬᠦᠵᠦᠭᠦᠨ ᠳ᠋ᠦ᠍ ᠠᠮᠵᠢᠵᠤ ᠤᠷᠭᠠ ᠶ᠋ᠢᠨ ᠬᠤᠢᠪᠢ ᠬᠠᠶᠠᠵᠤ ᠵᠠᠪᠳᠤᠪᠠ᠃ ᠣᠩᠭᠣᠨ ᠭᠦᠶᠦᠭᠰᠡᠨ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠ ᠬᠦᠵᠦᠭᠦᠨ ᠳ᠋ᠦ᠍ᠨᠢ ᠨᠢᠭᠡ ᠶᠠᠭᠤᠮᠠ ᠲᠣᠷᠣᠯᠳᠤᠬᠤ ᠳ᠋ᠤ᠌ ᠰᠣᠴᠢᠨ ᠵᠢᠭᠰᠢᠵᠦ ᠣᠩᠭᠣᠰᠤ ᠠᠯᠲᠠᠨ᠂ ᠬᠦᠵᠦᠭᠦᠦ ᠰᠡᠭᠡᠷ ᠢ᠋ᠶ᠋ᠡᠨ ᠰᠡᠭᠰᠦᠷᠦᠩᠭᠡᠨ ᠵᠢᠳᠬᠦᠬᠦ ᠳ᠋ᠦ᠍ ᠨᠥᠭᠦᠭᠡ ᠠᠳᠤᠭᠤᠴᠢ ᠡᠷᠡ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠨ ᠤ᠋ ᠣᠭᠵᠣᠮ ᠬᠦᠴᠦᠨ ᠳ᠋ᠦ᠍ ᠲᠡᠢᠯᠳᠦᠵᠦ ᠤᠷᠭᠠ ᠪᠠᠨ ᠠᠯᠳᠠᠪᠠ᠃ ᠬᠡᠳᠦᠨ ᠠᠯᠲᠠ ᠤᠷᠲᠤ ᠬᠤᠰᠤᠨ ᠤᠷᠭᠠ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠨ ᠤ᠋ ᠬᠦᠵᠦᠭᠦᠦ ᠡᠩᠭᠡᠯᠵᠡᠭᠦᠷ ᠡᠴᠡ ᠵᠡᠭᠦᠭᠳᠡᠬᠦ ᠳ᠋ᠦ᠍ ᠥᠨᠥᠬᠢ ᠨᠢ ᠤᠯᠠᠮ ᠡᠭᠳᠡᠭᠦᠦ ᠨᠢ ᠬᠦᠷᠴᠦ ᠰᠡᠭᠦᠯ ᠡᠴᠡ ᠪᠡᠨ ᠦᠷᠭᠦᠨ ᠪᠤᠯᠭᠢᠨ ᠪᠤᠯᠭᠢᠨ ᠳᠠᠪᠬᠢᠨᠠ᠃
ᠲᠡᠭᠡᠬᠦ ᠳ᠋ᠦ᠍ ᠭᠡᠨᠡᠳᠲᠡ ᠨᠢᠭᠡ ᠠᠳᠤᠭᠤᠴᠢᠨ ᠤᠷᠭᠠ ᠴᠢᠷᠦᠨ ᠳᠠᠪᠬᠢᠭᠰᠠᠨ ᠠᠵᠢᠷᠭᠠᠨ ᠤ᠋ ᠬᠣᠢᠨᠠ ᠠ᠋ᠴᠠ ᠬᠠᠷᠪᠤᠭᠰᠠᠨ ᠰᠤᠮᠤ ᠰᠢᠭ᠋ ᠭᠦᠢᠴᠡᠭᠡᠳ ᠬᠠᠷᠠᠵᠤ ᠪᠠᠢᠲᠠᠯᠠ ᠡᠮᠡᠭᠡᠯ ᠦ᠋ᠨ ᠢ᠋ᠶ᠋ᠡᠨ ᠪᠤᠷᠤᠭᠤ ᠲᠡᠢᠰᠢ ᠬᠥᠯᠪᠡᠷᠢᠨ ᠪᠦᠷᠭᠦᠳ ᠲᠠᠤᠯᠠᠢ ᠰᠢᠭᠦᠷᠡᠬᠦ ᠠᠳᠠᠯᠢ ᠴᠢᠷᠦᠭᠳᠡᠭᠰᠡᠨ ᠤᠷᠭᠠ ᠶ᠋ᠢ ᠰᠢᠭᠦᠷᠡᠨ ᠠᠪᠤᠪᠠ᠃ ᠡᠨᠡ ᠡᠷᠡ ᠪᠣᠯ ᠮᠢᠩᠭᠠᠨᠪᠣᠤ ᠪᠠᠢᠯᠠ᠃ ᠬᠠᠯᠵᠠᠨ ᠵᠡᠭᠡᠷᠳᠡ ᠡᠵᠡᠨ ᠦ᠌ ᠪᠡᠨ ᠰᠠᠨᠠᠭᠠ ᠤᠷᠭᠠ ᠶ᠋ᠢᠨ ᠳᠣᠬᠢᠯᠲᠠ ᠪᠠᠷ ᠪᠥᠭᠰᠡ ᠪᠡᠷ ᠢ᠋ᠶ᠋ᠡᠨ ᠴᠤᠬᠤᠢᠨ ᠰᠠᠭᠤᠭᠰᠠᠨ ᠳ᠋ᠤ᠌ ᠬᠥᠷ ᠴᠠᠰᠤ ᠬᠠᠢᠷ ᠴᠢᠯᠠᠭᠤᠳ ᠶᠡᠭᠦᠷᠡᠬᠦ ᠰᠢᠭ ᠰᠠᠳᠠᠷᠠᠨ ᠪᠤᠲᠠᠷᠠᠨᠠ᠃ ᠮᠢᠩᠭᠠᠨᠪᠣᠤ ᠶ᠋ᠢᠨ ᠲᠠᠮᠢᠷᠵᠢᠭᠰᠠᠨ ᠳᠤᠷᠪᠢᠲᠦ ᠠᠳᠬᠤᠭᠠᠯ ᠤᠷᠭᠠ ᠶ᠋ᠢᠨ ᠡᠷᠴᠢᠮ ᠢ᠋ ᠴᠢᠩᠭᠠᠯᠠᠬᠤ ᠳ᠋ᠤ᠌ ᠪᠥᠭᠡᠮ ᠴᠠᠰᠤ ᠬᠤᠢᠯᠠᠷᠠᠨ ᠴᠠᠭᠠᠨ ᠪᠤᠭᠤᠷᠤᠯ ᠮᠠᠨᠠᠨ ᠳᠡᠭᠳᠡᠪᠡ᠃ ᠠᠳᠠ ᠦᠵᠡᠭᠰᠡᠨ ᠰᠢᠭ ᠨᠠᠳᠬᠤᠨ ᠲᠡᠮᠡᠦᠯᠦᠭᠰᠡᠨ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠨ ᠤ᠋ ᠬᠦᠴᠦ ᠮᠢᠩᠭᠠᠨᠪᠣᠤ ᠶ᠋ᠢᠨ ᠲᠠᠮᠢᠷ ᠬᠣᠶᠠᠷ ᠲᠡᠩᠴᠡᠵᠦ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠ ᠬᠣᠢᠲᠤ ᠬᠣᠶᠠᠷ ᠬᠥᠯ ᠳᠡᠭᠡᠷᠡ ᠪᠡᠨ ᠴᠣᠷᠣᠢᠨ ᠪᠣᠰᠪᠠ᠃ ᠮᠢᠩᠭᠠᠨᠪᠣᠤ《 ᠣᠳᠣ ᠴᠢᠮᠠ ᠶ᠋ᠢ ᠶᠠᠭᠠᠬᠢᠬᠤ ᠶ᠋ᠢ ᠴᠢᠨᠢ ᠬᠠᠷᠠᠶᠠ ᠪᠠᠢᠵᠠ》 ᠭᠡᠵᠦ ᠪᠣᠳᠣᠲᠠᠯᠠ ᠴᠣᠷᠣᠢᠨ ᠪᠣᠰᠤᠭᠰᠠᠨ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠ ᠬᠠᠩᠭᠢᠨᠠᠲᠠᠯᠠ ᠦᠦᠷᠰᠡᠭᠡᠳ ᠡᠮᠦᠨᠡ ᠬᠣᠶᠠᠷ ᠲᠤᠭᠤᠷᠠᠢ ᠪᠠᠨ ᠴᠠᠪᠴᠢᠯᠠᠨ ᠲᠣᠯᠣᠭᠠᠢ ᠪᠠᠨ ᠭᠠᠵᠠᠷ ᠰᠢᠭᠠᠨ ᠵᠢᠳᠬᠦᠭᠰᠡᠨ ᠳ᠋ᠦ᠍ ᠤᠷᠭᠠ ᠶ᠋ᠢᠨ ᠴᠡᠭᠡᠵᠢ ᠫᠢᠰ ᠬᠢᠨ ᠬᠤᠭᠤᠷᠠᠵᠤ ᠮᠢᠩᠭᠠᠨᠪᠣᠤ ᠮᠣᠷᠢ ᠲᠠᠢ ᠪᠠᠨ ᠠᠷᠤᠨᠰᠢ ᠳᠠᠷᠤᠯᠴᠠᠨ ᠤᠨᠠᠪᠠ᠃ ᠥᠨᠥ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠦᠨ ᠰᠡᠭᠰᠦᠷᠦᠨ ᠣᠮ ᠬᠣᠮ ᠦᠭᠡᠢ ᠳᠠᠪᠬᠢᠨ ᠣᠳᠪᠠ᠃ ᠡᠨᠡ ᠵᠠᠭᠤᠷᠠ ᠮᠣᠷᠢᠨ ᠳ᠋ᠠᠭᠠᠨ ᠳᠠᠬᠢᠨ ᠮᠣᠷᠳᠠᠭᠰᠠᠨ ᠮᠢᠩᠭᠠᠨᠪᠣᠣ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠨ ᠤ᠋ ᠬᠣᠢᠨᠠ ᠠ᠋ᠴᠠ ᠰᠤᠭᠤᠷᠠᠵᠤ ᠭᠦᠶᠦᠭᠰᠡᠨ ᠬᠠᠯᠢᠭᠤᠭᠴᠢ ᠭᠡᠭᠦᠦ ᠶ᠋ᠢ ᠠᠮᠠᠳᠠᠨ ᠲᠣᠰᠴᠤ ᠵᠠᠳᠠᠭᠠᠢ ᠨᠣᠭᠲᠣ ᠬᠠᠶᠠᠵᠤ ᠪᠠᠷᠢᠪᠠ᠃
ᠮᠥᠰᠥᠨ ᠦ᠌ ᠬᠥᠪᠡᠭᠡᠨ ᠳ᠋ᠦ᠍ ᠬᠡᠳᠦᠨ ᠠᠳᠤᠭᠤᠴᠢ ᠬᠠᠰᠢᠭᠳᠠᠭᠰᠠᠨ ᠠᠳᠤᠭᠤ ᠶ᠋ᠢ ᠪᠠᠷᠢᠵᠤ ᠬᠦᠴᠦᠷᠡ ᠠᠯᠲᠠᠨ ᠮᠥᠰᠥ ᠤᠷᠤᠭᠤ ᠰᠢᠬᠠᠵᠤ ᠪᠤᠵᠢᠭᠢᠨᠠᠯᠳᠤᠨᠠ᠃ ᠨᠣᠭᠲᠣ ᠰᠠᠬᠠᠯ ᠲᠠᠢ ᠨᠢᠭᠡ ᠡᠷᠡ ᠨᠢᠭᠡ ᠪᠠᠢᠳᠠᠰᠤ ᠴᠢᠬᠢᠳᠡᠵᠦ ᠤᠨᠠᠭᠠᠭᠰᠠᠨ ᠳ᠋ᠤ᠌ ᠨᠥᠭᠦᠭᠡ ᠠᠳᠤᠭᠤᠴᠢ ᠶᠠᠴᠢᠶᠠᠷ ① ᠲᠡᠢ ᠨᠣᠭᠲᠣ ᠨᠣᠭᠲᠣᠯᠠᠬᠤ ᠪᠠᠷ ᠶᠠᠭᠠᠷᠠᠨᠠ᠃
— ᠨᠠᠮᠳᠠᠭ ᠠ᠋᠂ ᠴᠢ ᠭᠡᠵᠦ ᠶᠣᠰᠣᠲᠠᠢ ᠨᠢᠭᠡ ᠤᠮᠠᠳᠠᠭ ᠲᠠᠭᠠᠨ ᠰᠢᠭᠡᠭᠰᠡᠨ ᠵᠣᠯᠢᠭ! ᠶᠡᠬᠡ ᠶ᠋ᠢ ᠰᠠᠨᠠᠵᠤ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠨ ᠳ᠋ᠤ᠌ ᠰᠠᠨᠠᠭᠠᠷᠬᠠᠭᠠᠳ ᠡᠴᠦᠰ ᠲᠡᠭᠡᠨ ᠠᠵᠢᠷᠭᠠ ᠴᠤ᠌ ᠦᠭᠡᠢ ᠭᠡᠭᠦᠦ ᠴᠤ᠌ ᠦᠭᠡᠢ ᠪᠦᠭᠦᠳᠡ ᠶ᠋ᠢ ᠠᠯᠳᠠᠭᠠᠳ ᠲᠠᠭᠤᠴᠢᠬᠠᠬᠤ ᠭᠡᠵᠦ᠁ ᠣᠳᠣ ᠡᠨᠡ ᠴᠢᠬᠢᠳᠡᠭᠦᠯᠦᠭᠰᠡᠨ ᠪᠠᠢᠳᠠᠰᠤ ᠶ᠋ᠢ ᠴᠤ᠌ ᠨᠣᠭᠲᠣᠯᠠᠵᠤ ᠶᠠᠳᠠᠭᠠᠳ ᠪᠠᠢᠳᠠᠭ ᠴᠢᠨᠢ᠂ ᠮᠥᠨ ᠴᠤ᠌ ᠪᠤᠳᠤᠯᠢᠭᠤ ᠠᠮᠢᠲᠠᠨ ᠶᠤᠮ ᠠ᠋ ᠴᠢ!《 ᠨᠣᠭᠲᠣ ᠪᠠᠨ ᠨᠠᠭᠠᠰᠢ ᠪᠠᠨ》 ᠭᠡᠵᠦ ᠡᠷᠡᠦ ᠬᠠᠯᠲᠠᠷ ᠡᠷᠡ ᠨᠠᠮᠳᠠᠭ ᠠ᠋ᠴᠠ ᠨᠣᠭᠲᠣ ᠶ᠋ᠢ ᠠᠪᠴᠤ ᠰᠣᠯᠣᠭᠠᠢ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠳᠠᠰᠤ ᠶ᠋ᠢ ᠨᠣᠭᠲᠣᠯᠠᠪᠠ᠃
— ᠬᠥᠶᠢ᠂ ᠨᠠᠮᠳᠠᠭ ᠠ᠋! ᠴᠠᠭᠠᠳᠤᠬᠢ ᠴᠢᠨᠢ ᠬᠡᠨ ᠪᠣᠢ? ᠬᠠᠯᠢᠭᠤᠭᠴᠢ ᠭᠡᠭᠦᠦ ᠶ᠋ᠢ ᠬᠥᠲᠥᠯᠦᠭᠡᠳ ᠢᠷᠡᠯᠡ ᠳᠠ! ᠭᠡᠰᠡᠨ ᠳ᠋ᠦ᠍ ᠬᠡᠳᠦᠨ ᠠᠳᠤᠭᠤᠴᠢ ᠶ᠋ᠢᠨ ᠨᠢᠳᠦ ᠮᠢᠩᠭᠠᠨᠪᠣᠣ ᠶ᠋ᠢ ᠪᠢᠰᠢᠷᠡᠯ ᠠᠲᠠᠭᠠᠷᠬᠠᠯ ᠬᠣᠣᠰᠯᠠᠭᠰᠠᠨ ᠬᠠᠷᠠᠴᠠ ᠪᠠᠷ ᠰᠢᠷᠲᠡᠵᠡᠭᠡᠨᠡ᠃
— ᠵᠠ᠂ ᠲᠠ ᠨᠠᠷ ᠰᠠᠢᠨ ᠪᠠᠢᠵᠠᠭᠠᠨᠠ ᠤᠤ? ᠭᠡᠳ ᠮᠢᠩᠭᠠᠨᠪᠣᠣ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠬᠡᠩᠬᠦᠯᠵᠡᠨ ᠠᠯᠬᠤᠬᠤ ᠳ᠋ᠤ᠌ ᠬᠠᠯᠵᠠᠨ ᠵᠡᠭᠡᠷᠳᠡ ᠶ᠋ᠢᠨ ᠬᠢᠨᠢ ᠴᠢᠨᠣᠠ ᠶ᠋ᠢᠨ ᠬᠣᠶᠠᠷ ᠴᠢᠬᠢ ᠨᠢ ᠰᠣᠯᠪᠢᠴᠠᠨ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠲᠣᠭᠯᠠᠨ ᠨᠠᠭᠠᠳᠴᠤ᠂ ᠬᠠᠮᠠᠷ ᠨᠢ ᠣᠩᠭᠣᠯᠵᠠᠬᠤ ᠨᠢ ᠡᠵᠡᠨ ᠦ᠌ ᠪᠡᠨ ᠣᠷᠣᠨ ᠳ᠋ᠤ᠌ ᠪᠡᠶᠡ ᠪᠡᠨ ᠭᠠᠢᠬᠠᠭᠤᠯᠤᠭᠰᠨ ᠪᠢᠰᠢᠷᠡᠭᠰᠡᠨ ᠠᠯᠢᠨ ᠪᠣᠯᠬᠤ ᠨᠢ ᠲᠣᠳᠣ ᠦᠭᠡᠢ ᠬᠠᠷᠠᠴᠠ ᠪᠠᠷ ᠲᠡᠭᠦᠨ ᠢ᠋ ᠰᠢᠷᠳᠡᠨᠡ᠃ ᠮᠢᠩᠭᠠᠨᠪᠣᠣ᠂ ᠭᠣᠪᠢ ᠶ᠋ᠢᠨ ᠠᠳᠤᠭᠤᠳ ᠤ᠋ᠨ ᠲᠡᠷᠡ ᠬᠠᠷᠠᠴᠠᠨ ᠳᠣᠣᠷᠠ ᠶᠠᠪᠤᠵᠤ ᠰᠣᠳᠨᠠᠮ ᠡᠪᠦᠭᠡᠨ ᠦ᠌ ᠳᠡᠷᠭᠡᠳᠡ ᠣᠴᠢᠭᠠᠳ᠄
—ᠠᠪᠤ ᠲᠠ ᠠᠮᠤᠷ ᠰᠠᠢᠨ? ᠪᠡᠶᠡ ᠯᠠᠭᠱᠠᠨ ᠲᠤᠩᠭᠠᠯᠠᠭ? ᠭᠡᠵᠦ ᠡᠪᠦᠳᠦᠭ ᠰᠥᠬᠥᠷᠡᠨ ᠮᠡᠨᠳᠦᠯᠡᠭᠰᠡᠨ ᠳ᠋ᠦ᠍ ᠡᠪᠦᠭᠡᠨ᠄
— ᠵᠠ᠂ ᠰᠠᠢᠨ! ᠪᠠᠢᠵᠠ ᠳᠠ᠂ ᠡᠨᠡ ᠬᠦᠦ ᠴᠢᠨᠢ ᠬᠡᠨ ᠪᠢᠯᠡ? ᠬᠢᠵᠦ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠲᠠᠨᠢᠬᠤ ᠮᠡᠲᠦ ᠠᠲᠠᠯᠠ ᠪᠠᠨ ᠳᠠᠷᠤᠢᠬᠠᠨ ᠪᠣᠳᠣᠵᠤ ᠡᠰᠡ ᠣᠯᠤᠨ ᠡᠪᠦᠭᠡᠨ ᠪᠣᠷᠣ ᠨᠢᠳᠦ ᠨᠢ ᠠᠨᠢᠯᠵᠠᠬᠤ ᠳ᠋ᠤᠨᠢ ᠮᠢᠩᠭᠠᠨᠪᠣᠣ᠄
— ᠪᠢ ᠬᠠᠪᠤᠷ ᠲᠠᠨ ᠤ᠋ ᠳ᠋ᠤ᠌ ᠢᠨᠵᠠᠭᠠ ᠲᠡᠪᠡᠷᠢᠵᠦ ᠠᠪᠠᠴᠢᠭᠰᠠᠨ ᠰᠢᠳᠡ! ᠭᠡᠪᠡ᠃
— ᠵᠠ᠂ ᠵᠠ ᠣᠳᠣ ᠲᠠᠨᠢᠯᠠ᠂ ᠮᠤᠨᠠ ᠶ᠋ᠢᠨ ᠵᠡᠭᠦᠨ ᠥᠪᠥᠷ ᠦ᠋ᠨ ᠭᠡᠰᠡᠨ᠂ ᠠᠯᠢ ᠪᠠᠢᠵᠠ ᠠ᠋᠂ ᠨᠡᠷᠡ ᠴᠢᠨᠢ ᠬᠡᠨ ᠭᠡᠯᠡ?
— ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠲᠠᠢᠵᠢ ᠢᠵᠠᠭᠤᠷᠲᠤ ᠬᠠᠷᠠᠨᠤᠳ ᠮᠢᠩᠭᠠᠨᠪᠣᠣ᠃
— ᠵᠠ᠂ ᠲᠡᠢᠮᠦ ᠪᠠᠢᠭᠰᠠᠨ ᠪᠠᠢᠬᠠ᠃
— ᠁
— ᠭᠠᠮᠢᠩ ᠤ᠋ᠨ ᠬᠠᠷᠠ ᠴᠡᠷᠢᠭ ᠪᠠᠰᠠ ᠨᠠᠭᠠᠰᠢᠯᠠᠬᠤ ᠨᠢ ᠤᠤ? ᠴᠢᠭᠢᠶᠡᠲᠦᠷᠦᠦ!
— ᠦᠭᠡᠢ ᠠ᠋᠂ ᠪᠢ ᠲᠠ ᠨᠠᠷ ᠢ᠋ ᠡᠷᠭᠢᠵᠦ ᠦᠵᠡᠬᠦ ᠪᠡᠷ ᠢᠷᠡᠭᠰᠡᠨ ᠶᠦᠮ ᠠ᠋᠂ ᠢᠨᠵᠠᠭᠠ ᠴᠤ᠌ ᠬᠣᠪᠢᠯᠴᠡᠴᠡᠭ ᠦ᠋ᠨ ᠳᠣᠳᠣᠮᠳᠠᠯᠭᠠ ᠪᠠᠷ ᠲᠣᠮᠣ ᠪᠣᠯᠴᠢᠬᠠᠵᠠᠢ᠃
— ᠲᠡᠭᠡ ᠯᠡ ᠦᠭᠡᠢ᠂ ᠬᠥᠭᠡᠷᠦᠬᠦᠢ! ᠢᠷᠡᠵᠦ ᠣᠴᠢᠬᠤ ᠳ᠋ᠤ᠌ ᠪᠦᠷ ᠬᠥᠮᠦᠨ ᠦ᠌ ᠬᠥᠯ ᠣᠷᠢᠶᠠᠭᠠᠳ ᠰᠠᠯᠵᠤ ᠥᠭᠳᠡᠭ ᠦᠭᠡᠢ ᠬᠥᠭᠡᠷᠦᠬᠦᠨ ᠠᠮᠢᠲᠠᠨ ᠶᠤᠮ ᠠ᠋! ᠮᠠᠭᠤ ᠥᠬᠢᠨ ᠲᠡᠢ ᠮᠢᠨᠢ ᠪᠦᠷ ᠴᠤ᠌ ᠳᠠᠰᠤᠯ᠃ ᠠᠶᠠᠭᠠ ᠲᠠᠢ ᠪᠠᠨ ᠬᠤᠪᠢᠶᠠᠯᠴᠠᠵᠤ ᠠᠯᠢᠶᠠᠷᠬᠠᠭᠠᠳ ᠰᠦᠢᠳ ᠪᠣᠯᠳᠠᠭ ᠰᠢᠦ ᠳᠡ ᠭᠡᠳ ᠢᠨᠵᠠᠭᠠ ᠶ᠋ᠢᠨ ᠲᠤᠬᠠᠢ ᠰᠡᠳᠦᠪ ᠡᠯᠭᠦᠬᠦ ᠳ᠋ᠦ᠍ ᠰᠣᠳᠨᠠᠮ ᠡᠪᠦᠭᠡᠨ ᠦ᠌ ᠴᠢᠷᠠᠢ ᠳ᠋ᠤ᠌ ᠡᠨᠡᠷᠢᠩᠭᠦᠢ ᠪᠣᠷᠣ ᠢᠨᠢᠶᠡᠳᠦ ᠰᠠᠴᠤᠷᠠᠨᠠ᠃ ᠡᠨᠡ ᠵᠤᠵᠠᠭᠠᠨ ᠴᠠᠰᠤ ᠲᠠᠢ ᠬᠠᠷᠠ ᠬᠦᠢᠲᠡᠨ ᠳ᠋ᠦ᠍ ᠮᠢᠩᠭᠠᠨᠪᠣᠣ ᠶ᠋ᠢᠨ ᠡᠨᠳᠡ ᠶᠠᠭᠤ ᠬᠢᠬᠦ ᠪᠡᠷ ᠢᠷᠡᠭᠰᠡᠨ ᠢ᠋ ᠴᠠᠭᠠᠨᠠ ᠨᠢ ᠭᠠᠷᠲᠠᠯᠠ ᠮᠡᠳᠡᠭᠰᠡᠨ ᠡᠪᠦᠭᠡᠨ᠄《 ᠵᠠ᠂ ᠵᠠᠯᠠᠭᠤ ᠬᠥᠮᠦᠨ ᠢᠷᠡᠪᠡᠯ ᠬᠦᠴᠦ ᠨᠡᠮᠡᠨᠡ ᠭᠡᠳᠡᠭ᠃ ᠡᠨᠡ ᠬᠦᠦ ᠴᠤ᠌ ᠮᠥᠨ ᠠᠳᠤᠭᠤᠨ ᠳ᠋ᠤ᠌ ᠬᠡᠴᠡᠭᠦᠦ ᠡᠪ ᠲᠡᠢ ᠬᠥᠮᠦᠨ ᠪᠠᠢᠨᠠ᠃ ᠤᠷᠭᠠ ᠬᠠᠪᠢᠳᠠᠭᠤᠯᠬᠤ ᠦᠭᠡᠢ ᠰᠢᠯᠢᠷᠡᠭᠡᠳ ᠪᠠᠢᠳᠠᠭ ᠬᠠᠯᠢᠭᠤᠭᠴᠢ ᠭᠡᠭᠦᠦ ᠶ᠋ᠢ ᠨᠣᠭᠲᠣᠯᠠᠵᠤ ᠢᠷᠡᠭᠰᠡᠨ ᠬᠥᠮᠦᠨ ᠮᠠᠨ ᠤ᠋ ᠡᠨᠡ ᠬᠡᠳᠦᠨ ᠠᠳᠤᠭᠤᠴᠢᠨ ᠳ᠋ᠤ᠌ ᠭᠠᠷᠤᠭᠠ ᠦᠭᠡᠢ᠃ ᠮᠠᠨ ᠤ᠋ ᠤᠷᠠᠳ ᠤ᠋ᠳ ᠴᠤ᠌ ᠬᠠᠮᠢᠭᠠ ᠶ᠋ᠢᠨ ᠬᠢ ᠭᠡᠰᠡᠨ ᠦᠭᠡᠢ ᠠᠳᠤᠭᠤᠨ ᠳ᠋ᠤ᠌ ᠭᠠᠷᠮᠠᠭᠠᠢ ᠶᠤᠮ᠃ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠥᠪᠥᠷ ᠦ᠋ᠨ ᠬᠦᠦ ᠡᠳᠡᠨᠥᠰ ᠲᠤ ᠭᠠᠢᠬᠠᠭᠤᠯᠤᠭᠰᠠᠨ ᠶᠤᠮ ᠰᠢᠭ᠋ ᠬᠠᠯᠢᠭᠤᠭᠴᠢ ᠭᠡᠭᠦᠦ ᠶ᠋ᠢ ᠬᠥᠲᠥᠯᠦᠭᠡᠳ ᠢᠷᠡᠯᠡ ᠰᠢᠦ!》 ᠭᠡᠳ ᠳᠣᠲᠣᠷᠠ ᠪᠠᠨ ᠣᠮᠣᠭᠰᠢᠵᠤ ᠨᠢᠭᠡ ᠭᠠᠩᠰᠠ ᠲᠠᠮᠠᠬᠢ ᠨᠡᠷᠡᠪᠡ᠃
ᠨᠥᠭᠦᠭᠡ ᠬᠡᠳᠦᠭᠦᠯᠡ ᠬᠢᠵᠠᠭᠠᠯᠠᠩ ᠨᠠᠰᠤᠨ ᠤ᠋ ᠪᠠᠨᠰᠠᠲᠦ ᠬᠠᠯᠢᠭᠤᠨ ᠳ᠋ᠤ᠌ ᠬᠠᠪᠢᠳᠠᠵᠤ ᠳᠡᠢᠯᠬᠦ ᠦᠭᠡᠢ ᠪᠤᠵᠢᠭᠢᠨᠠᠯᠳᠤᠨᠠ᠃
— ᠬᠥᠰᠢ᠂ ᠡᠨᠡ ᠪᠣᠷᠣ ᠬᠦᠦ ᠨᠠᠭᠠᠰᠢ ᠪᠠᠨ ᠢᠷᠡ! ᠪᠠᠨᠰᠠᠲᠦ ᠬᠠᠯᠢᠭᠤᠨ ᠢ᠋ ᠨᠣᠭᠲᠣᠯᠠᠵᠤ ᠲᠠᠢᠯᠠᠪᠠᠯ ᠴᠢᠨᠦᠬᠢ ᠪᠣᠯᠤᠭ! ᠭᠡᠵᠦ ᠨᠥᠭᠦᠭᠡ ᠬᠡᠳᠦᠭᠦᠯᠡ ᠶ᠋ᠢᠨ ᠳᠣᠲᠣᠷᠠ ᠠ᠋ᠴᠠ ᠨᠢᠭᠡ ᠨᠢ ᠮᠢᠩᠭᠠᠪᠣᠥ ᠶ᠋ᠢ ᠳᠠᠭᠤᠳᠠᠨᠠ᠃ ᠤᠭ ᠨᠢ ᠨᠠᠮᠳᠠᠭ ᠰᠢᠯᠢᠷᠡᠭᠴᠢ ᠬᠠᠯᠢᠭᠤᠨ ᠢ᠋ ᠨᠣᠭᠲᠣᠯᠠᠨᠠ ᠭᠡᠵᠦ ᠶᠡᠬᠡ ᠦᠭᠡᠢ ᠦᠭᠡ ᠲᠠᠯᠪᠢᠴᠢᠬᠠᠭᠠᠳ ᠴᠢᠳᠠᠬᠤ ᠦᠭᠡᠢ ᠨᠢᠭᠤᠷ ᠲᠤ ᠨᠢ ᠲᠤᠯᠤᠭᠰᠠᠨ ᠤᠴᠢᠷ ᠬᠠᠯᠢᠭᠤᠭᠴᠢ ᠭᠡᠭᠦᠦ ᠶ᠋ᠢ ᠬᠡᠭᠡᠷᠡ ᠡᠴᠡ ᠬᠥᠲᠥᠯᠵᠦ ᠢᠷᠡᠭᠰᠡᠨ ᠮᠢᠩᠭᠠᠨᠪᠣᠣ ᠶ᠋ᠢᠨ ᠬᠢᠷᠢ ᠶ᠋ᠢ ᠦᠵᠡᠬᠦ ᠭᠡᠵᠦ ᠢᠩᠭᠢᠭᠰᠡᠨ ᠪᠠᠢᠵᠠᠢ᠃ ᠤᠯᠠᠮᠪᠠᠶᠠᠷ ᠲᠠᠢᠵᠢ ᠶ᠋ᠢᠨ ᠠᠳᠤᠭᠤᠨ ᠤ᠋ ᠳᠠᠩᠰᠠ ᠳ᠋ᠤ᠌ ᠪᠠᠢᠭᠠ ᠦᠭᠡᠢ ᠡᠨᠡ ᠪᠠᠢᠳᠠᠰᠤ ᠬᠠᠯᠢᠭᠤᠨ ᠢ᠋ ᠠᠳᠤᠭᠤᠴᠢᠳ ᠨᠢᠳᠦ ᠤᠯᠠᠢᠵᠤ ᠬᠣᠭᠣᠷᠣᠨᠳᠣ ᠪᠠᠨ ᠮᠥᠷᠥᠢ ᠲᠠᠯᠪᠢᠵᠤ《 ᠪᠠᠨᠰᠠᠲᠦ ᠬᠠᠯᠢᠭᠤᠨ ᠢ᠋ ᠬᠡᠨ ᠨᠣᠭᠲᠣᠯᠠᠴᠢᠬᠠᠪᠠᠯ ᠲᠡᠭᠦᠨ ᠦ᠌ ᠪᠣᠯᠤᠭ!》 ᠭᠡᠴᠡᠭᠡᠨ ᠱᠤᠤᠭᠢᠯᠳᠤᠵᠤ ᠲᠤᠰ ᠲᠤᠰ ᠤ᠋ᠨ ᠴᠢᠳᠠᠯ ᠢ᠋ᠶ᠋ᠠᠨ ᠭᠠᠷᠭᠠᠬᠤ ᠪᠠᠷ ᠬᠠᠨᠴᠤᠢ ᠰᠢᠮᠠᠯᠠᠨᠠ᠃ ᠨᠠᠮᠳᠠᠭ ᠶᠠᠭᠤᠨ ᠤ᠋ ᠲᠦᠷᠦᠭᠦᠦ《 ᠡᠨᠡ ᠮᠠᠭᠤ ᠶ᠋ᠢ ᠰᠡᠭᠦᠯᠳᠡᠵᠦ ᠤᠨᠠᠭᠠᠶᠠ》 ᠭᠡᠳ ᠲᠡᠯᠡᠯᠭᠡᠨ ᠳᠡᠭᠡᠷᠡ ᠦᠷᠢᠶᠡ ᠳᠠᠭᠠ ᠰᠡᠭᠦᠯᠳᠡᠳᠡᠭ ᠰᠢᠭ ᠢ᠋ᠶ᠋ᠡᠨ ᠪᠠᠨᠰᠠᠲᠦ ᠬᠠᠯᠢᠭᠤᠨ ᠢ᠋ ᠰᠡᠭᠦᠯᠳᠡᠬᠦ ᠭᠡᠵᠦ ᠬᠡᠳᠦ ᠣᠷᠣᠯᠳᠣᠭᠠᠳ ᠡᠴᠦᠰ ᠦ᠋ᠨ ᠤᠳᠠᠭᠠ ᠪᠠᠨ ᠠᠷᠠᠢ ᠯᠠ ᠡᠷᠡᠦ ᠪᠡᠨ ᠪᠠᠯᠪᠠ ᠢᠰᠬᠦᠯᠦᠭᠦᠯᠴᠢᠬᠡᠭᠰᠡᠨ ᠦᠭᠡᠢ᠃ ᠨᠥᠭᠦᠭᠡ ᠨᠣᠭᠲᠤᠨ ᠰᠠᠬᠠᠯᠲᠤ ᠡᠷᠡ ᠪᠣᠯ ᠠᠳᠤᠭᠤ ᠴᠢᠬᠢᠳᠡᠬᠦ ᠳ᠋ᠡᠭᠡᠨ ᠨᠤᠲᠤᠭ ᠤᠰᠤᠨ ᠳ᠋ᠠᠭᠠᠨ ᠴᠤᠤ ᠲᠠᠢ ᠭᠡᠭᠳᠡᠳᠡᠭ ᠡᠷᠡ᠃ ᠬᠢᠷᠢ ᠪᠠᠷᠤᠭ ᠤ᠋ᠨ ᠡᠮᠨᠢᠭ ᠣᠷᠣᠭᠠ ᠠᠳᠤᠭᠤᠳ ᠲᠡᠭᠦᠨ ᠦ᠌ ᠭᠠᠷ ᠲᠤ ᠥᠷᠲᠥᠭᠰᠡᠭᠡᠷ ᠰᠠᠢᠨ ᠢ᠋ᠶ᠋ᠠᠨ ᠦᠵᠡᠳᠡᠭ ᠦᠭᠡᠢ᠃ ᠲᠡᠷᠡ ᠪᠡᠷ ᠪᠠᠨᠰᠠᠲᠦ ᠬᠠᠯᠢᠭᠤᠨ ᠢ᠋ ᠴᠢᠬᠢᠳᠡᠬᠦ ᠭᠡᠵᠦ ᠬᠡᠳᠦᠨᠲᠡ ᠣᠢᠷᠠᠲᠤᠭᠠᠳ ᠪᠣᠯᠤᠭᠰᠠᠨ ᠦᠭᠡᠢ᠃ ᠪᠠᠨᠰᠠᠲᠦ ᠬᠠᠯᠢᠭᠤᠨ ᠢᠰᠬᠦᠯᠵᠦ ᠲᠡᠢᠷᠬᠦ᠂ ᠬᠠᠵᠠᠬᠤ ᠬᠠᠮᠤᠬᠤ ᠡᠯᠳᠡᠪ ᠦ᠋ᠨ ᠮᠠᠭᠤ ᠵᠠᠩ ᠲᠠᠢ ᠠᠳᠤᠭᠤᠰᠤ ᠪᠠᠢᠪᠠ᠃
ᠮᠢᠩᠭᠠᠨᠪᠣᠣ ᠪᠠᠨᠰᠠᠲᠦ ᠬᠠᠯᠢᠭᠤᠨ ᠢ᠋ ᠬᠣᠯᠠ ᠠ᠋ᠴᠠ ᠬᠠᠷᠠᠵᠤ ᠵᠣᠭᠰᠣᠬᠤ ᠳ᠋ᠠᠭᠠᠨ《 ᠡᠨᠡ ᠵᠡᠷᠯᠢᠭ ᠠᠳᠤᠭᠤᠰᠤ ᠶ᠋ᠢ ᠴᠢᠬᠢᠳᠡᠵᠦ ᠰᠡᠭᠦᠯᠳᠡᠭᠡᠳ ᠪᠣᠯᠬᠤ ᠶᠠᠭᠤᠮᠠ ᠪᠢᠰᠢ᠃ ᠬᠦᠵᠦᠭᠦᠨ ᠳ᠋ᠦ᠍ᠨᠢ ᠤᠷᠭᠠ ᠶ᠋ᠢᠨ ᠬᠤᠢᠪᠢ ᠰᠢᠳᠡᠴᠢᠬᠡᠯᠡ ᠭᠡᠳ ᠤᠷᠭᠠ ᠬᠤᠭᠤᠯᠬᠤ ᠶ᠋ᠢᠨ ᠨᠡᠮᠡᠷᠢ! ᠵᠠ᠂ ᠪᠠᠢᠵᠠ! ᠵᠠᠳᠠᠭᠠᠢ ᠨᠣᠭᠲᠣᠯᠠᠬᠤ ᠠ᠋ᠴᠠ ᠯᠠ ᠥᠭᠡᠷᠡ ᠠᠷᠭᠠ ᠪᠠᠢᠬᠤ ᠦᠭᠡᠢ》 ᠭᠡᠵᠦ ᠪᠣᠳᠣᠭᠠᠳ ᠬᠠᠯᠵᠠᠨ ᠵᠡᠭᠡᠷᠳᠡ ᠳ᠋ᠡᠭᠡᠨ ᠮᠣᠷᠳᠠᠵᠤ᠄
— ᠵᠠ᠂ ᠲᠠ ᠨᠠᠷ ᠬᠡᠳᠦᠨ ᠲᠠᠯᠠ ᠶ᠋ᠢᠨ ᠬᠠᠰᠢᠯᠭᠠ ᠶ᠋ᠢ ᠰᠡᠷᠭᠡᠢᠯᠡᠵᠦ ᠪᠠᠢᠭᠠᠷᠠᠢ! ᠬᠠᠰᠢᠯᠭᠠ ᠰᠢᠪᠲᠤᠯᠬᠤ ᠠᠶᠤᠯ ᠲᠠᠢ᠃ ᠬᠡᠳᠦᠨ ᠲᠠᠯᠠ ᠠ᠋ᠴᠠ ᠨᠢ ᠦᠷᠭᠦᠭᠡᠵᠦ ᠯᠡ ᠪᠠᠢᠪᠠᠯ ᠪᠣᠯᠴᠢᠬᠠᠨᠠ ᠭᠡᠪᠡ᠃
ᠪᠠᠨᠰᠠᠲᠦ ᠬᠠᠯᠢᠭᠤᠨ ᠬᠣᠶᠠᠷ ᠴᠢᠬᠢ ᠪᠡᠨ ᠬᠠᠢᠴᠢᠯᠠᠨ ᠰᠡᠷᠲᠡᠯᠵᠡᠵᠦ ᠬᠠᠮᠠᠷ ᠳᠤᠤᠭᠠᠷᠭᠠᠨ ᠬᠠᠪᠢᠳᠠᠵᠤ ᠣᠴᠢᠬᠤ ᠤᠨᠤᠭᠠ ᠲᠠᠢ ᠬᠥᠮᠦᠨ ᠡᠴᠡ ᠵᠢᠭᠰᠢᠵᠦ ᠴᠢᠳᠥᠷ ᠲᠡᠢ ᠪᠠᠢᠳᠠᠰᠤ ᠶ᠋ᠢᠨ ᠳᠡᠭᠡᠭᠦᠷ ᠬᠠᠷᠠᠢᠨ ᠬᠠᠰᠢᠯᠭᠠ ᠶ᠋ᠢᠨ ᠬᠥᠮᠦᠨ ᠢ᠋ ᠳᠠᠭᠠᠷᠢᠪᠠ᠃ ᠪᠠᠨᠰᠠᠲᠦ ᠬᠠᠯᠢᠭᠤᠨ ᠨᠠᠮᠳᠠᠭ ᠤ᠋ᠨ ᠴᠢᠭᠯᠡᠯ ᠢ᠋ᠶ᠋ᠡᠷ ᠴᠣᠷᠣᠢᠨ ᠪᠣᠰᠴᠤ ᠬᠤᠤᠬᠢᠲᠤᠨᠠᠨ《 ᠴᠢ ᠯᠡ ᠣᠳᠤᠯᠭᠠ ᠶ᠋ᠢᠨ ᠲᠦᠷᠦᠭᠦᠦ ᠪᠠᠢᠬᠠ᠃ ᠴᠢᠳᠠᠯ ᠦᠭᠡᠢ ᠪᠡᠨ ᠮᠡᠳᠡᠬᠦ ᠦᠭᠡᠢ ᠪᠤᠰᠤᠳ ᠢ᠋ ᠥᠳᠥᠭᠡᠳᠡᠭ ᠨᠢ ᠶᠠᠭᠠᠬᠢᠪᠠ?》 ᠭᠡᠰᠡᠨ ᠰᠢᠦᠬᠡᠨ ᠨᠠᠮᠳᠠᠭ ᠢ᠋ ᠬᠠᠮᠤᠭᠠᠳ ᠤᠨᠠᠭᠠᠴᠢᠬᠠᠮᠠᠷ ᠨᠢᠳᠦ ᠮᠠᠳ ᠦᠭᠡᠢ ᠰᠢᠪᠲᠤᠯᠪᠠ᠃ ᠳᠥᠵᠢᠷ ᠪᠠᠵᠠᠷ ᠭᠡᠵᠦ ᠠᠳᠤᠭᠤᠨ ᠤ᠋ ᠬᠠᠲᠠᠭᠤ ᠲᠤᠭᠤᠷᠠᠢ ᠬᠥᠯᠳᠡᠭᠦᠦ ᠭᠠᠵᠠᠷ ᠢ᠋ ᠲᠤᠷᠭᠢᠭᠤᠯᠤᠨ ᠪᠢᠵᠢᠭᠢᠨᠡᠬᠦ ᠠᠭᠱᠠᠨᠠ ᠪᠠᠨᠰᠠᠲᠦ ᠬᠠᠯᠢᠭᠤᠨ ᠬᠠᠰᠢᠯᠭᠠ ᠰᠡᠲᠡᠯᠪᠡ᠃
— ᠡᠨᠡ ᠪᠡᠯᠭᠡ ᠥᠬᠡᠢ ᠮᠠᠭᠤ ᠠᠳᠤᠭᠤᠰᠤ! ᠴᠢᠭᠢᠶᠡᠲᠦᠷᠦᠦ᠁ ᠭᠡᠵᠦ ᠨᠠᠮᠳᠠᠭ ᠴᠠᠰᠤ ᠰᠢᠷᠣᠢ ᠳ᠋ᠤ᠌ ᠪᠤᠯᠠᠭᠳᠠᠭᠰᠠᠨ ᠬᠣᠷᠮᠣᠢ ᠪᠠᠨ ᠭᠦᠪᠢᠵᠦ《 ᠴᠠᠭᠠᠰᠢ ᠪᠠᠨ ᠵᠢᠯᠢᠢᠭᠰᠡᠨ ᠨᠢ ᠳᠡᠭᠡᠷᠡ᠃ ᠡᠨᠡ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠮᠤᠨᠳᠠᠭ ᠡᠷᠡ ᠶ᠋ᠢᠨ ᠭᠠᠷ ᠲᠤ ᠡᠵᠡᠮᠳᠡᠭᠦᠯᠪᠡᠯ ᠨᠠᠮᠳᠠᠭ ᠪᠢ ᠬᠠᠯᠵᠠᠨ ᠨᠢᠭᠤᠷ ᠢ᠋ᠶ᠋ᠠᠨ ᠬᠠᠮᠢᠭᠠ ᠬᠢᠬᠦ ᠪᠢᠯᠡ⁈ ᠴᠠᠭᠠᠰᠢᠯᠠᠭᠤᠯᠵᠤ ᠶᠠᠷᠢᠬᠤ ᠳ᠋ᠤ᠌ ᠭᠣᠪᠢ ᠶ᠋ᠢᠨ ᠠᠳᠤᠭᠤᠴᠢᠳ ᠤ᠋ᠨ ᠨᠢᠭᠤᠷ ᠪᠠᠭᠠᠰᠤᠳᠠᠭᠰᠠᠨ ᠢᠴᠢᠭᠦᠷᠢᠲᠡᠢ ᠶᠠᠪᠤᠳᠠᠯ!》 ᠭᠡᠵᠦ ᠰᠡᠳᠬᠢᠯ ᠳ᠋ᠡᠭᠡᠨ ᠰᠢᠪᠡᠨᠡᠲᠡᠯᠡ ᠴᠠᠭᠠᠨᠠ᠄
— ᠵᠠᠢᠯᠠ! ᠭᠡᠵᠦ ᠨᠢᠭᠡ ᠡᠷᠡ ᠶ᠋ᠢᠨ ᠠᠶᠤᠩᠭᠠᠲᠤ ᠳᠠᠭᠤᠨ ᠳ᠋ᠤᠨᠢ ᠨᠠᠮᠳᠠᠭ ᠰᠣᠴᠢᠵᠤ ᠠᠪᠤᠨ ᠨᠡᠮᠡᠰᠬᠢᠨ ᠵᠠᠢᠯᠠᠨᠠ᠃
ᠮᠢᠩᠭᠠᠨᠪᠣᠣ ᠶ᠋ᠢᠨ ᠬᠠᠯᠵᠠᠨ ᠵᠡᠭᠡᠷᠳᠡ ᠰᠠᠯᠬᠢ ᠰᠢᠭ᠋ ᠱᠤᠤᠭᠢᠭᠤᠯᠤᠨ ᠪᠠᠨᠰᠠᠲᠦ ᠬᠠᠯᠢᠭᠤᠨ ᠤ᠋ ᠠᠷᠤ ᠠ᠋ᠴᠠ ᠪᠢᠵᠢᠬᠢᠨᠠᠡᠭᠡᠳ ᠠᠷᠢᠯᠪᠠ᠃ ᠴᠠᠰᠤᠨ ᠬᠤᠢ ᠡᠷᠭᠢᠯᠳᠦᠬᠦ ᠰᠢᠭ ᠪᠤᠵᠢᠭᠢᠨᠠᠵᠤ ᠠᠪᠤᠭᠠᠳ ᠮᠢᠩᠭᠠᠨᠪᠣᠣ ᠪᠠᠨᠰᠠᠲᠦ ᠬᠠᠯᠢᠭᠤᠨ ᠤ᠋ ᠲᠣᠯᠣᠭᠠᠢ ᠳ᠋ᠤ᠌ ᠲᠡᠮᠦᠷ ᠶᠠᠴᠢᠶᠠᠷ ᠲᠠᠢ ᠵᠠᠳᠠᠭᠠᠢ ᠨᠣᠭᠲᠣ ᠬᠠᠶᠠᠲᠠᠯᠠ ᠥᠨᠥᠬᠢ ᠨᠢ ᠥᠪᠡᠷ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠪᠠᠨ ᠬᠢᠭᠰᠡᠨ ᠰᠢᠭ ᠨᠣᠭᠲᠣᠯᠠᠭᠳᠠᠪᠠ᠃ ᠬᠠᠩᠭᠠᠯ ᠭᠦᠶᠦᠭᠰᠡᠨ ᠪᠠᠨᠰᠠᠲᠦ ᠬᠠᠯᠢᠭᠤᠨ ᠮᠢᠩᠭᠠᠨᠪᠣᠣ ᠶ᠋ᠢᠨ ᠬᠠᠯᠵᠠᠨ ᠵᠡᠭᠡᠷᠳᠡ ᠶ᠋ᠢᠨ ᠠᠷᠤ ᠠ᠋ᠴᠠ ᠨᠣᠬᠠᠢ ᠰᠢᠭ᠋ ᠱᠣᠭᠰᠢᠨᠠ᠃ ᠬᠣᠷᠣᠰᠤᠯ ᠠᠲᠠᠭᠠᠷᠬᠠᠯ ᠨᠢ ᠪᠤᠴᠠᠯᠤᠭᠰᠠᠨ ᠨᠠᠮᠳᠠᠭ ᠠ᠋ᠴᠠ ᠪᠤᠰᠤᠳ ᠨᠢ ᠮᠢᠩᠭᠠᠨᠪᠣᠤ ᠶ᠋ᠢᠨ ᠥᠭᠡᠳᠡ ᠡᠴᠡ ᠡᠭᠡᠯᠢᠲᠡᠢ ᠬᠠᠷᠠᠴᠠ ᠱᠠᠩᠨᠠᠵᠤ ᠡᠷᠡᠬᠡᠢ ᠭᠣᠵᠣᠢᠯᠭᠠᠨ᠄
— ᠠ᠂ ᠶᠣᠰᠣᠲᠠᠢ ᠰᠠᠢᠨ ᠡᠷᠡ ᠪᠠᠢᠨᠠ! ᠭᠡᠵᠡᠭᠡᠬᠦ ᠳ᠋ᠦ᠍ ᠰᠣᠳᠨᠠᠮ ᠡᠪᠦᠭᠡᠨ᠄
— ᠮᠣᠩᠭᠣᠯ ᠬᠥᠮᠦᠨ ᠮᠣᠷᠢ ᠴᠢᠨᠣᠠ ᠭᠤᠷᠪᠠ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠰᠦᠯᠪᠡᠭᠡ ᠲᠡᠢ ᠬᠣᠢᠨᠠ ᠳᠠ! ᠮᠣᠩᠭᠣᠯ ᠡᠷᠡ ᠪᠦᠬᠦᠨ ᠡᠢᠮᠦ ᠯᠡ ᠪᠠᠢᠬᠤ ᠶᠣᠰᠣᠲᠠᠢ ᠰᠠᠨ ᠳᠠ ᠭᠡᠵᠦ ᠮᠢᠩᠭᠠᠨᠪᠣᠤ ᠶ᠋ᠢ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠬᠤ ᠳ᠋ᠤ᠌ ᠲᠣᠰᠴᠤ ᠣᠴᠢᠭᠠᠳ ᠮᠠᠩᠨᠠᠢ ᠶ᠋ᠢ ᠨᠢ ᠥᠬᠥᠭᠡᠷᠳᠡᠨ ᠦᠨᠦᠰᠪᠡ᠃ ᠡᠨᠡ ᠨᠢ ᠨᠠᠮᠳᠠᠭ ᠲᠤ ᠲᠣᠯᠣᠭᠠᠢ ᠶ᠋ᠢ ᠨᠢ ᠴᠣᠬᠢᠭᠰᠠᠨ ᠦᠭᠡ ᠪᠣᠯᠵᠤ ᠰᠣᠨᠣᠰᠳᠠᠭᠰᠠᠨ ᠳ᠋ᠤ᠌ ᠨᠠᠮᠳᠠᠭ《 ᠲᠦᠢ!》 ᠭᠡᠵᠦ ᠬᠣᠭᠣᠰᠣᠨ ᠨᠤᠯᠮᠤᠭᠠᠳ《 ᠣᠳᠣ ᠲᠡᠷᠡ ᠪᠡᠶᠡ ᠳᠡᠭᠡᠷᠡ ᠪᠡᠨ ᠡᠷᠡ ᠢᠯᠠᠭᠠ ᠰᠠᠭᠤᠯᠭᠠᠳᠠᠭ ᠦᠭᠡᠢ ᠥᠬᠢᠨ ᠢ᠋ᠶ᠋ᠡᠨ ᠡᠨᠡ ᠮᠠᠭᠤ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠮᠠᠨᠴᠤᠷᠭᠠ ᠳ᠋ᠤ᠌ ᠥᠭᠭᠦᠨᠡ ᠪᠢᠵᠡ ᠴᠢ!》 ᠭᠡᠵᠦ ᠰᠣᠳᠨᠠᠮ ᠡᠪᠦᠭᠡᠨ ᠢ᠋ᠶ᠋ᠡᠷ ᠨᠢᠭᠡ ᠤᠳᠠᠭᠠ ᠥᠬᠢᠨ ᠦ᠌ ᠬᠢᠨᠢ ᠤᠴᠢᠷ ᠲᠤ ᠤᠮᠠᠯᠭᠤᠯᠤᠭᠰᠠᠨ ᠳ᠋ᠠᠭᠠᠨ ᠬᠣᠷᠣᠰᠴᠤ ᠳᠦᠳᠦᠨᠡᠭᠰᠡᠨ ᠢ᠋ ᠬᠡᠨ ᠴᠤ᠌ ᠰᠣᠨᠣᠰᠤᠭᠰᠠᠨ ᠦᠭᠡᠢ᠃
ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠲᠦ ᠡᠴᠡ ᠲᠡᠢᠯᠳᠡᠭᠦᠦ ᠠᠳᠤᠭᠤ ᠪᠠᠨ ᠰᠠᠯᠭᠠᠵᠤ ᠠᠪᠤᠭᠰᠠᠨ ᠠᠳᠤᠭᠤᠴᠢᠳ ᠪᠠᠶᠠᠷᠯᠠᠨ ᠬᠥᠭᠡᠷᠴᠦ ᠨᠠᠮᠳᠠᠭ ᠤ᠋ᠨ ᠪᠤᠬᠤᠷ ᠴᠢᠷᠠᠢᠯᠠᠨ ᠶᠠᠪᠤᠭᠰᠠᠨ ᠢ᠋ ᠨᠠᠷᠢᠨ ᠠᠵᠢᠭᠯᠠᠬᠤ ᠪᠠᠢᠲᠤᠭᠠᠢ ᠬᠠᠷᠠᠭᠰᠠᠨ ᠴᠤ᠌ ᠬᠥᠮᠦᠨ ᠠᠯᠠᠭᠠ᠃
— ᠡᠷᠡ ᠬᠥᠮᠦᠨ ᠬᠡᠯᠡᠭᠰᠡᠨ ᠳ᠋ᠡᠭᠡᠨ᠂ ᠡᠷᠡ ᠮᠣᠷᠢ ᠬᠠᠷᠠᠢᠭᠰᠠᠨ ᠳ᠋ᠠᠭᠠᠨ ᠭᠡᠳᠡᠭ ᠰᠢᠦ ᠳᠡ! ᠮᠢᠩᠭᠠᠨᠪᠣᠤ ᠪᠢᠳᠡᠨᠦᠰ ᠲᠤ ᠶᠡᠬᠡ ᠲᠤᠰᠠ ᠬᠢᠯᠡ᠃ ᠡᠷᠡᠴᠤᠤᠯ ᠤ᠋ᠨ ᠮᠥᠷᠥᠢ ᠳ᠋ᠦ᠍ ᠨᠠᠭᠠᠳᠤᠮ ᠦᠭᠡᠢ᠂ ᠠᠮᠠᠯᠠᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠨᠰᠠᠲᠦ ᠬᠠᠯᠢᠭᠤᠨ ᠢ᠋ ᠬᠥᠲᠥᠯᠦᠭᠡ ᠮᠣᠷᠢᠨ ᠤ᠋ ᠬᠦᠵᠦᠭᠦᠨ ᠳ᠋ᠦ᠍ ᠬᠣᠯᠪᠣᠵᠤ ᠲᠠᠭᠤᠬᠤ ᠳ᠋ᠤ᠌ ᠰᠢᠯᠤᠭᠤᠨ ᠪᠠᠢᠪᠠ᠃ ᠬᠠᠷᠢᠨ ᠡᠯᠵᠢᠭᠡ ᠯᠠᠭᠤᠰᠠ ᠰᠢᠭ᠋ ᠵᠥᠷᠢᠭᠦᠳᠯᠡᠬᠦ ᠦᠭᠡᠢ ᠨᠢ ᠰᠣᠨᠢᠨ ᠶᠤᠮ ᠠ᠋! ᠮᠢᠩᠭᠠᠨᠪᠣᠤ《 ᠱᠠᠩᠨᠠᠯ》 ᠳ᠋ᠤ᠌ ᠢᠷᠡᠭᠰᠡᠨ ᠪᠠᠨᠰᠠᠲᠦ ᠬᠠᠯᠢᠭᠤᠨ ᠢ᠋ᠶ᠋ᠠᠨ ᠬᠠᠯᠵᠠᠨ ᠵᠡᠭᠡᠷᠳᠡ ᠲᠡᠢ ᠪᠡᠨ ᠬᠣᠯᠪᠣᠵᠤ ᠬᠥᠲᠥᠯᠦᠭᠡᠳ ᠱᠣᠭᠰᠢᠭᠤᠯᠤᠨᠠ᠁
ᠭᠠᠷᠠᠭ ᠰᠢᠬᠠᠭᠤ ᠬᠠᠷᠠ ᠴᠠᠰᠤᠨ ᠳ᠋ᠤ᠌ ᠪᠡᠲᠡᠷᠡᠭᠰᠡᠨ ᠠᠳᠤᠭᠤᠴᠢᠳ ᠥᠨᠥᠳᠥᠷ ᠭᠡᠷ ᠦ᠋ᠨ ᠪᠠᠷᠠ ᠬᠠᠷᠠᠬᠤ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠬᠥᠮᠦᠨ ᠪᠦᠭᠦᠳᠡ ᠶ᠋ᠢᠨ ᠴᠢᠷᠠᠢ ᠳ᠋ᠤ᠌ ᠨᠠᠷᠠ ᠮᠠᠨᠳᠤᠵᠤ ᠰᠠᠷᠠ ᠳᠤᠯᠠᠢᠬᠤ ᠮᠡᠲᠦ ᠪᠠᠢᠪᠠ᠃ ᠵᠠᠯᠠᠭᠤᠰ ᠤ᠋ᠨ ᠠᠷᠤ ᠠ᠋ᠴᠠ ᠮᠣᠷᠢᠨ ᠤ᠋ ᠪᠠᠨ ᠠᠶᠠ ᠪᠠᠷ ᠭᠠᠯᠭᠢᠭᠤᠯᠵᠤ ᠶᠠᠪᠤᠭᠠ ᠰᠣᠳᠨᠠᠮ ᠡᠪᠦᠭᠡᠨ ᠲᠡᠳᠡᠭᠡᠷ ᠵᠠᠯᠠᠭᠤᠰ ᠤ᠋ᠨ ᠵᠠᠷᠢᠮ ᠨᠢ ᠲᠦᠷᠭᠡᠨ ᠳᠡᠭᠡᠷᠡ ᠪᠡᠨ ᠮᠣᠷᠢᠨ ᠤ᠋ ᠠᠯᠬᠤᠳᠠᠯ ᠢ᠋ᠶ᠋ᠠᠷ ᠬᠡᠰᠡᠭ ᠵᠣᠭᠰᠣᠨ ᠥᠨᠳᠡᠢᠭᠰᠡᠨ᠂ ᠵᠠᠷᠢᠮ ᠨᠢ ᠡᠮᠡᠭᠡᠯ ᠳᠡᠭᠡᠷᠡ ᠪᠡᠨ ᠶᠠᠮᠪᠠᠲᠠᠢ ᠲᠠᠰᠢᠶᠠᠯᠳᠤᠵᠤ ᠰᠠᠭᠤᠭᠰᠠᠨ ᠡᠨᠡ ᠪᠦᠬᠦᠨ ᠢ᠋ ᠬᠠᠷᠠᠭᠠᠳ《 ᠵᠠᠯᠠᠭᠤ ᠽᠠᠨᠳᠠᠨ ᠨᠠᠰᠤᠨ ᠳ᠋ᠤ᠌ ᠴᠤ᠌ ᠠᠷᠭᠠ ᠦᠭᠡᠢ ᠶᠦᠮ ᠳᠡ᠃ ᠴᠠᠰᠤ ᠠᠭᠤᠯᠠ ᠶ᠋ᠢ ᠳᠠᠷᠤᠵᠤ᠂ ᠨᠠᠰᠤ ᠪᠡᠶᠡ ᠶ᠋ᠢ ᠳᠠᠷᠤᠨᠠ ᠭᠡᠭᠴᠢ ᠪᠡᠷ ᠪᠢ ᠥᠲᠡᠯᠵᠡᠢ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠪᠠᠴᠤ ᠡᠪᠦᠭᠡᠨ ᠦ᠌ ᠬᠥᠷᠥᠰᠥᠯᠢᠭ ᠪᠣᠷᠣ ᠴᠢᠷᠠᠢ ᠳ᠋ᠤ᠌ ᠮᠥᠨ ᠪᠠᠶᠠᠷ ᠪᠢᠯᠬᠠᠵᠤ ᠪᠠᠢᠨᠠ᠃ ᠣᠯᠠᠮᠪᠠᠶᠠᠷ ᠲᠠᠢᠵᠢ ᠶ᠋ᠢᠨ《 ᠠᠳᠤᠭᠤ ᠰᠢᠯᠢᠷᠡᠵᠦ ᠶᠠᠪᠤᠯᠠ᠁ ᠨᠠᠭᠠᠰᠢᠯᠠᠭᠤᠯᠬᠤ ᠪᠠᠨ ᠶᠠᠭᠠᠬᠢᠪᠠ? ᠭᠡᠳᠡᠰᠦ ᠥᠯᠥᠰᠬᠦᠯᠡᠩ ᠮᠥᠷᠥ ᠬᠠᠭᠠᠷᠬᠠᠢ ᠶᠠᠪᠤᠬᠤ ᠭᠡᠰᠡᠨ ᠪᠣᠯ ᠡᠷᠲᠡᠬᠡᠨ ᠦᠭᠡ ᠪᠡᠨ ᠢᠯᠡ ᠬᠡᠯᠡ!》 ᠭᠡᠵᠦ ᠪᠠᠢᠨ ᠪᠠᠢᠨ ᠥᠭᠢᠷᠡ ᠲᠣᠯᠣᠭᠠᠢ ᠪᠠᠨ ᠲᠣᠭᠰᠢᠭᠤᠯᠳᠠᠭ ᠢ᠋ᠶ᠋ᠠᠨ ᠪᠠᠢᠵᠤ ᠥᠨᠥᠳᠥᠷ《 ᠲᠣᠭᠰᠢᠭᠤᠯᠳᠠᠭ》 ᠢ᠋ᠶ᠋ᠠᠨ《 ᠱᠠᠩᠨᠠᠭᠤᠯᠳᠠᠭ》 ᠪᠣᠯᠬᠤ ᠨᠢ ᠠ᠋! ᠭᠡᠵᠦ ᠭᠠᠨᠵᠤᠭᠠ ᠰᠠᠢᠲᠠᠢ ᠶᠠᠪᠤᠭᠠ ᠳ᠋ᠠᠭᠠᠨ ᠤᠤ? ᠦᠭᠡᠢ ᠪᠣᠯ ᠥᠭᠡᠷᠡ ᠶᠠᠮᠠᠷ ᠨᠢᠭᠡ ᠣᠯᠵᠠᠷᠬᠠᠭ ᠪᠣᠳᠣᠯ ᠠ᠋ᠴᠠ ᠤᠤ? ᠶᠠᠭᠤ ᠴᠤ᠌ ᠭᠡᠰᠡᠨ ᠲᠡᠭᠦᠨ ᠢ᠋ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠬᠡᠢᠷᠬᠡᠭᠦᠯᠵᠦ ᠪᠠᠢᠯᠠ᠃
ᠭᠡᠷ ᠦ᠋ᠨ ᠤᠲᠤᠭᠠ ᠠᠨᠢᠷᠲᠤᠭᠰᠠᠨ ᠠᠳᠤᠭᠤᠳ ᠤ᠋ᠨ ᠬᠦᠯᠦᠭ ᠦ᠋ᠨ ᠲᠤᠭᠤᠷᠠᠢ ᠠ᠋ᠴᠠ ᠤᠷᠭᠤᠭᠰᠠᠨ ᠪᠤᠭᠤᠷᠤᠯ ᠮᠠᠨᠠᠨ ᠡᠭᠦᠯᠡ ᠲᠡᠢ ᠬᠣᠯᠪᠣᠯᠳᠤᠭᠰᠠᠨ ᠰᠢᠭ᠋ ᠬᠠᠷᠠᠭᠳᠠᠬᠤ ᠨᠢ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠭᠰᠠᠨ ᠶᠡᠬᠡ ᠴᠡᠷᠢᠭ ᠦ᠋ᠨ ᠰᠦᠷᠲᠦ ᠡᠩᠨᠡᠭᠡ ᠰᠢᠭ ᠵᠢᠪᠬᠤᠯᠠᠩ ᠲᠡᠭᠦᠯᠳᠡᠷ ᠠᠵᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ