ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ < ᠳᠡᠭᠡᠳᠦ > – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠶᠢᠰᠦ> Хан мунын сүүрс < дээд > – Мөнх зохиоов ᠂ Тэргүүн бодь – Нэгдүгээр бүлэг <9>
405ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠶᠢᠰᠦ>
ᠬᠠᠩᠬᠠᠢ ᠠᠭᠤᠵᠢᠮ ᠭᠣᠪᠢ ᠨᠤᠲᠤᠭ ᠨᠡᠢᠳᠡᠮ ᠴᠠᠰᠤᠨ ᠳ᠋ᠤ᠌ ᠬᠣᠵᠢᠭᠳᠠᠵᠤ ᠲᠦᠮᠡᠨ ᠭᠠᠵᠠᠷ ᠨᠠᠪ ᠨᠡᠯᠦᠭᠡᠷ᠃ ᠠᠭᠤᠯᠠ ᠲᠤᠯᠤᠭᠠᠳ᠂ ᠳᠣᠪᠣ ᠳᠣᠪᠣᠴᠠᠭ ᠤ᠋ᠨ ᠡᠩᠭᠡᠷ ᠬᠠᠵᠠᠭᠤ ᠶᠢᠨ ᠵᠤᠵᠠᠭᠠᠨ ᠴᠠᠰᠤ ᠰᠠᠯᠬᠢᠨ ᠳ᠋ᠤ᠌ ᠢᠳᠡᠭᠳᠡᠵᠦ ᠨᠢᠮᠭᠡᠷᠡᠨ ᠬᠠᠷᠠ ᠴᠣᠬᠣᠷ ᠲᠣᠯᠪᠣᠰᠢᠷᠠᠨ ᠬᠠᠢᠷᠰᠤᠯᠠᠨ ᠬᠥᠯᠳᠡᠭᠡᠳ ᠲᠠᠰᠢᠬᠤ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠭᠢᠯᠠᠰᠤᠨ ᠬᠠᠷᠬᠠᠳᠠᠬᠤ ᠡᠴᠡ ᠭᠣᠪᠢ ᠨᠤᠲᠤᠭ ᠵᠠ ᠲᠡᠭᠷᠢ ᠴᠤ᠌ ᠴᠡᠪᠳᠡᠭ ᠬᠦᠢᠲᠡᠨ ᠡᠪᠦᠯ ᠦ᠋ᠨ ᠴᠠᠰᠤᠨ ᠤ᠋ ᠵᠢᠩ ᠳ᠋ᠦ᠍ ᠴᠠᠷᠴᠠᠭᠰᠠᠨ ᠰᠢᠭ᠋ ᠪᠦᠦᠳᠡᠭᠡᠷ ᠪᠠᠢᠪᠠ᠃
ᠭᠣᠪᠢ ᠨᠤᠲᠤᠭ ᠤᠨ ᠡᠪᠦᠯ ᠭᠡᠵᠦ ᠡᠢᠮᠦ ᠴᠠᠪᠡᠷ ᠴᠡᠮᠴᠡᠭᠡᠷ ᠪᠣᠯᠪᠠᠴᠤ ᠴᠡᠪᠳᠡᠭ ᠬᠦᠢᠲᠡᠨ ᠠᠵᠢ᠃ ᠰᠠᠯᠬᠢᠨ ᠤ᠋ ᠡᠮᠡᠭᠡᠨ᠂ ᠴᠠᠰᠤᠨ ᠤ᠋ ᠵᠢᠩ ᠳ᠋ᠦ᠍ ᠳᠠᠭᠵᠢᠵᠤ ᠬᠠᠶᠠ ᠪᠥᠭᠰᠢᠨ ᠬᠠᠨᠢᠶᠠᠯᠭᠠᠬᠤ ᠳ᠋ᠠᠭᠠᠨ ᠰᠠᠯᠬᠢᠨ ᠤ᠋ ᠲᠤᠯᠤᠮ ᠢ᠋ᠶ᠋ᠠᠨ ᠣᠩᠭᠣᠢᠯᠭᠠᠳᠠᠭ ᠪᠣᠯᠤᠯᠲᠠᠢ ᠰᠢᠭᠤᠷᠭᠠ ᠢᠰᠬᠡᠷᠦᠨ ᠬᠣᠤᠬᠢᠵᠤ ᠢᠰᠡᠭᠡᠢ ᠲᠤᠭᠤᠷᠭᠠ ᠶ᠋ᠢ ᠨᠡᠪᠲᠡ ᠦᠯᠢᠶᠡᠨᠡ᠃
ᠬᠤᠪᠢᠯᠴᠡᠴᠡᠭ ᠠᠳᠤᠭᠤᠨ ᠤ ᠡᠷᠢᠯ ᠳ᠋ᠤ᠌ ᠶᠠᠪᠤᠭᠠᠳ ᠭᠤᠷᠪᠠ ᠬᠣᠨᠣᠭᠰᠠᠨ ᠠᠪᠤ ᠪᠠᠨ ᠢᠷᠡᠬᠦ ᠳ᠋ᠦ᠍ᠨᠢ ᠬᠠᠯᠠᠭᠤᠨ ᠴᠠᠢ ᠪᠦᠯᠢᠶᠡᠨ ᠬᠣᠭᠣᠯᠠ ᠲᠠᠢ ᠪᠠᠢᠵᠤ ᠦᠵᠡᠬᠦ ᠶᠤᠮᠰᠠᠨ ᠭᠡᠵᠦ ᠭᠠᠤᠯᠢᠨ ᠲᠣᠭᠣᠭᠠᠨ ᠳ᠋ᠠᠭᠠᠨ ᠮᠢᠬᠠ ᠴᠢᠨᠠᠵᠤ᠂ ᠵᠡᠰ ᠳᠡᠪᠦᠷᠡ ᠳ᠋ᠡᠭᠡᠨ ᠴᠠᠢ ᠪᠤᠴᠠᠯᠭᠠᠨ ᠪᠣᠷᠣ ᠭᠡᠷ ᠢ᠋ᠶ᠋ᠡᠨ ᠬᠠᠩᠬᠤᠯᠤᠭᠤᠨ ᠱᠥᠯᠥ᠍ ᠬᠠᠨᠳᠠᠭᠤᠨ ᠴᠠᠢ ᠶᠢᠨ ᠦᠨᠦᠷ ᠢᠶᠡᠷ ᠪᠥᠭ ᠬᠢᠲᠡᠯᠡ ᠳᠤᠯᠠᠭᠠᠯᠠᠵᠤ ᠠᠪᠤ ᠪᠠᠨ ᠢᠷᠡᠬᠦ ᠶᠢ ᠬᠦᠯᠢᠶᠡᠵᠦ ᠰᠠᠭᠤᠯᠠ ᠁
《 ᠡᠵᠡᠨ ᠢᠶᠡᠨ ᠠᠯᠳᠠᠭᠰᠠᠨ ᠰᠢᠯᠢᠷᠡᠭᠰᠡᠨ ᠬᠠᠯᠢᠭᠤᠨ ᠪᠠᠢᠲᠠᠰᠤ ᠲᠥᠷᠦᠬᠥᠲᠡᠢ ᠬᠡᠳᠦᠨ ᠠᠳᠤᠭᠤ ᠲᠠᠬᠢ ᠶ᠋ᠢᠨ ᠠᠵᠢᠷᠭᠠ ᠳᠤ ᠬᠤᠷᠢᠶᠠᠭᠳᠠᠭᠠᠳ ᠠᠯᠠᠭᠠ ᠪᠣᠯᠣᠭᠰᠠᠨ ᠳᠤ ᠤᠯᠠᠮᠪᠠᠶᠠᠷ ᠡᠴᠢᠭᠡ ᠶᠢ ᠨᠢ ᠡᠢᠮᠦ ᠲᠡᠢᠮᠦ ᠭᠡᠵᠦ ᠵᠠᠩᠨᠠᠭᠠᠳ ᠪᠠᠢᠬᠤᠯᠠᠷ ᠬᠡᠳᠦᠨ ᠠᠳᠤᠭᠤᠴᠢᠨ ᠬᠠᠨᠢᠰᠠᠵᠤ ᠥᠨᠥᠬᠢ ᠨᠦ᠍ᠭᠦᠳ ᠢ᠋ ᠰᠣᠯᠢ ᠶᠢᠨ ᠭᠣᠣᠯ ᠤᠨ ᠮᠥᠰᠥᠨ ᠳᠦ ᠬᠠᠰᠢᠵᠤ ᠢᠯᠭᠠᠬᠤ ᠪᠠᠷ ᠶᠠᠪᠤᠭᠠᠳ ᠠᠯᠠᠭᠠ ᠁ ᠥᠨᠥᠳᠥᠷ ᠴᠤ᠌ ᠭᠡᠷ ᠦᠨ ᠪᠠᠷᠠ ᠬᠠᠷᠠᠭᠠ ᠦᠭᠡᠢ ᠳᠡ! 》ᠭᠡᠵᠦ ᠬᠤᠪᠢᠯᠴᠡᠴᠡᠭ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠶᠡᠬᠡ ᠣᠷᠣᠢ ᠪᠣᠯᠲᠠᠯᠠ ᠬᠦᠯᠢᠶᠡᠭᠡᠳ ᠢᠷᠡᠭᠰᠡᠨ ᠦᠭᠡᠢ ᠳ᠋ᠦ᠍ ᠱᠥᠯᠦᠨ ᠲᠣᠰᠣᠨ ᠳ᠋ᠧᠩ ᠢ᠋ᠶ᠋ᠡᠨ ᠦᠯᠢᠶᠡᠵᠦ ᠣᠷᠣᠨ ᠳ᠋ᠠᠭᠠᠨ ᠤᠷᠦᠵᠦ ᠬᠡᠪᠲᠡᠯᠡ ᠁
ᠬᠡᠳᠦᠢ ᠤᠳᠠᠭᠰᠠᠨ ᠢ᠋ ᠪᠤᠤ ᠮᠡᠳᠡ ᠭᠡᠨᠡᠳᠲᠡ ᠨᠣᠬᠠᠢ ᠰᠦᠷᠡᠬᠡᠢ ᠬᠣᠷᠭᠣᠭᠣᠵᠤ ᠮᠣᠷᠢ ᠲᠤᠷᠭᠢᠬᠤ ᠴᠢᠮᠡᠭᠡ ᠪᠡᠷ ᠬᠤᠪᠢᠯᠴᠡᠴᠡᠭ ᠰᠣᠴᠢᠨ ᠰᠡᠷᠡᠵᠦ ᠴᠢᠩᠨᠠᠪᠠᠯ ᠯᠦᠰ ᠯᠦ᠋ᠰ ᠭᠡᠰᠡᠨ ᠨᠦᠰᠡᠷ ᠬᠦᠨᠳᠦ ᠬᠥᠯ ᠦ᠋ᠨ ᠴᠢᠮᠡᠭᠡ ᠨᠠᠭᠠᠰᠢᠯᠠᠨᠠ᠃ ᠨᠣᠬᠠᠢ ᠰᠦᠷᠡᠬᠡᠢ ᠬᠣᠷᠭᠣᠭᠣᠬᠤ ᠪᠠᠷ ᠢᠷᠡᠵᠦ ᠪᠠᠢᠭᠠ ᠬᠥᠮᠦᠨ ᠠᠪᠤ ᠨᠢ ᠪᠢᠰᠢ ᠪᠠᠢᠬᠤ ᠨᠢ ᠳᠤᠳᠤᠷᠬᠠᠢ᠃ 《 ᠦᠭᠡᠢ᠂ ᠲᠡᠭᠡᠭᠡᠳ ᠬᠠᠷᠠᠩᠭᠤᠢ ᠰᠥᠨᠢ ᠪᠡᠷ ᠬᠠᠷᠠ ᠴᠠᠰᠤᠨ ᠳ᠋ᠤ᠌ ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠯᠴᠢᠬᠠᠪᠠ ⁈ 》 ᠭᠡᠵᠦ ᠠᠶᠤᠬᠤ ᠰᠣᠴᠢᠬᠤ ᠬᠣᠣᠰᠯᠠᠭᠰᠠᠨ ᠬᠤᠪᠢᠯᠴᠡᠴᠡᠭ ᠶᠣᠰᠣᠲᠠᠢ ᠯᠠ ᠪᠣᠷᠣ ᠵᠢᠷᠦᠬᠡ ᠨᠢ ᠫᠣᠯ ᠫᠣᠯ᠂ ᠪᠣᠭᠣᠨᠢ ᠬᠠᠪᠢᠷᠭᠠ ᠨᠢ ᠰᠢᠷ ᠰᠢᠷ ᠭᠡᠵᠦ ᠪᠠᠢᠪᠠ᠃ ᠡᠭᠦᠳᠡᠨ ᠦ᠌ ᠲᠤᠰᠢᠶᠠ ᠣᠴᠢᠭᠰᠠᠨ ᠳ᠋ᠤ᠌ ᠭᠡᠷ ᠦᠨ ᠵᠡᠭᠦᠨ ᠡᠮᠦᠨᠡ ᠵᠠᠢ ᠠᠪᠴᠤ ᠬᠡᠪᠲᠡᠭᠰᠡᠨ ᠢᠨᠵᠠᠭᠠ ᠴᠤ᠌ ᠬᠥᠮᠥᠨ ᠤ᠋ ᠴᠢᠮᠡᠭᠡ ᠪᠡᠷ ᠰᠡᠷᠳ᠋ ᠬᠢᠨ ᠪᠣᠰᠴᠤ ᠰᠣᠴᠢᠭᠰᠠᠨ ᠬᠣᠶᠠᠷ ᠮᠣᠢᠯ ᠨᠢᠳᠦ ᠨᠢ ᠪᠦᠯᠲᠡᠭᠡᠨᠡᠨ ᠦᠷᠭᠦᠮᠡᠲᠡᠭᠡᠢ ᠬᠣᠶᠠᠷ ᠴᠢᠬᠢ ᠨᠢ ᠰᠣᠯᠪᠢᠴᠠᠵᠤ 《 ᠶᠠᠭᠤ ᠪᠣᠯᠴᠢᠬᠠᠪᠠ ⁈ 》 ᠭᠡᠰᠡᠨ ᠰᠢᠭ ᠪᠠᠢᠪᠠ᠃
ᠨᠣᠬᠠᠢ ᠠᠢᠬᠤᠪᠲᠤᠷ ᠳᠣᠭᠰᠢᠷᠠᠨ ᠬᠣᠷᠭᠣᠭᠣᠵᠤ᠂ ᠡᠭᠦᠳᠡᠨ ᠳ᠋ᠦ᠍ ᠲᠤᠯᠵᠤ ᠢᠷᠡᠭᠰᠡᠨ ᠲᠡᠷᠡ ᠬᠥᠮᠦᠨ ᠦ᠌ ᠪᠣᠷᠪᠢ ᠶ᠋ᠢ ᠨᠢ ᠲᠠᠲᠠᠴᠢᠬᠠᠮᠠᠷ ᠠᠭᠰᠤᠷᠤᠨᠠ᠃
— ᠵᠣᠪ! ᠶᠠᠭᠠᠬᠢᠬᠤ ᠶᠤᠮ? ᠭᠡᠵᠦ ᠨᠣᠬᠠᠢ ᠵᠠᠩᠳᠤᠷᠤᠭᠰᠠᠨ ᠳᠠᠭᠤ ᠵᠢ ᠰᠣᠨᠣᠰᠤᠭᠰᠠᠨ ᠬᠤᠪᠢᠯᠴᠡᠴᠡᠭ《 ᠶᠠᠭᠠᠬᠢᠭᠰᠠᠨ ᠲᠠᠨᠢᠮᠠᠷ ᠳᠠᠭᠤ ᠪᠣᠢ ?》ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠪᠠ᠃
ᠡᠭᠦᠳᠡᠨ ᠳ᠋ᠦ᠍ ᠲᠤᠯᠵᠤ ᠢᠷᠡᠭᠰᠡᠨ ᠬᠥᠮᠦᠨ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠲᠡᠪᠡᠭᠡ ᠲᠡᠢ ᠮᠠᠭᠤ ᠪᠠᠯᠪᠠᠷᠬᠠᠢ ᠡᠭᠦᠳᠡ ᠶ᠋ᠢ ᠲᠡᠷᠴᠢᠭᠢᠨᠡᠲᠡᠯᠡ ᠲᠠᠲᠠᠨᠠ᠃
— ᠠᠳᠤᠭᠤᠴᠢᠨ ᠰᠣᠳᠨᠠᠮ ᠭᠤᠸᠠᠢ ᠶ᠋ᠢᠨ ᠬᠢ ᠮᠥᠨ ᠪᠢᠵᠡ? ᠡᠭᠦᠳᠡ ᠪᠡᠨ ᠠᠯᠳᠠᠷᠠᠭᠠ !
— ᠠᠪᠤ ᠪᠠᠢᠬᠤ ᠦᠭᠡᠢ᠃
— ᠬᠤᠪᠢᠯᠴᠡᠴᠡᠭ ᠤᠤ? ᠰᠠᠢᠨ ᠪᠠᠢᠨᠠ ᠤᠤ? ᠭᠡᠵᠦ ᠭᠠᠳᠠᠨᠠ ᠠ᠋ᠴᠠ ᠢᠷᠡᠭᠰᠡᠨ ᠬᠥᠮᠦᠨ ᠲᠠᠨᠢᠯ ᠪᠣᠯᠵᠤ ᠠᠰᠠᠭᠤᠬᠤ ᠳ᠋ᠤ᠌ ᠬᠤᠪᠢᠯᠴᠡᠴᠡᠭ ᠄
— ᠲᠠ ᠬᠡᠨ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃
— ᠡᠭᠦᠳᠡ ᠪᠡᠨ ᠳᠡᠢᠯᠪᠡᠯ ᠲᠠ ᠲᠠᠨᠢᠯᠭᠦᠢ ᠳᠡ᠃
— ᠠᠪᠤ ᠲᠠᠢ ᠤᠴᠢᠷ ᠲᠠᠢ ᠪᠣᠯ ᠲᠠ ᠬᠡᠳᠦᠨ ᠡᠳᠦᠷ ᠡᠴᠡ ᠢᠷᠡᠭᠡᠷᠡᠢ! ᠠᠪᠤ ᠠᠳᠤᠭᠤᠨ ᠤ᠋ ᠡᠷᠢᠯ ᠳ᠋ᠦ᠍ ᠶᠠᠪᠤᠭᠠᠳ ᠢᠷᠡᠭᠡ ᠦᠭᠡᠢ᠃
— ᠬᠣᠪᠢᠯᠴᠡᠴᠡᠭ ᠠ᠋! ᠴᠢ ᠨᠠᠮᠠᠶ᠋ᠢ ᠲᠠᠨᠢᠬᠤ ᠦᠭᠡᠢ ᠪᠠᠢᠨᠠ ᠤᠤ?
— ᠨᠢᠭᠡ ᠯᠡ ᠲᠠᠨᠢᠬᠤ ᠦᠭᠡᠢ ᠪᠠᠢᠨᠠ᠃
— ᠨᠡᠷᠡ ᠪᠡᠨ ᠬᠡᠯᠡᠬᠦ ᠦᠭᠡᠢ ᠴᠤ᠌ ᠲᠠᠨᠢᠬᠤ ᠯᠠ ᠶᠣᠰᠣᠲᠠᠢ ᠶᠤᠮ ᠳᠠ᠃ ᠬᠣᠪᠢᠯᠴᠡᠴᠡᠭ ᠠ᠋᠂ ᠴᠢ ᠦᠨᠡᠬᠡᠷ ᠨᠠᠮᠠᠶ᠋ᠢ ᠲᠠᠨᠢᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠪᠣᠯ ᠪᠢ ᠣᠳᠣ ᠪᠠᠷ ᠢ᠋ᠶ᠋ᠠᠨ ᠪᠤᠴᠠᠶᠠ ᠁ ᠴᠢᠮᠠᠶ᠋ᠢ ᠥᠨᠥᠴᠢᠨ ᠢᠨᠵᠠᠭᠠ ᠲᠠᠢ ᠪᠠᠨ ᠡᠷᠭᠢᠵᠦ ᠦᠵᠡᠬᠦ ᠪᠡᠷ ᠢᠷᠡᠭᠰᠡᠨ ᠰᠠᠨ᠁ ᠭᠡᠪᠡᠯ ᠬᠣᠪᠢᠯᠴᠡᠴᠡᠭ ᠰᠡᠭᠡᠰᠭᠢᠨ᠄
— ᠮᠢᠩᠭᠠᠨᠪᠣᠣ ᠠᠬᠠ ᠤᠤ ᠲᠠ⁈ ᠭᠡᠳ ᠡᠭᠦᠳᠡᠨ ᠦ᠌ ᠲᠡᠪᠡᠭᠡ ᠰᠤᠷ ᠢ᠋ ᠲᠠᠢᠯᠵᠤ ᠮᠢᠩᠭᠠᠨᠪᠣᠣ ᠶ᠋ᠢ ᠭᠡᠷ ᠲᠦ᠍ ᠣᠷᠣᠭᠤᠯᠤᠭᠠᠳ ᠳ᠋ᠧᠩ ᠢ᠋ᠶ᠋ᠡᠨ ᠠᠰᠠᠭᠠᠪᠠ᠃
ᠴᠢᠩᠭᠠ ᠲᠣᠪᠴᠢᠯᠠᠭᠰᠠᠨ ᠦᠨᠡᠭᠡᠨ ᠯᠣᠪᠤᠤᠵᠠ ᠶ᠋ᠢᠨ ᠢ᠋ᠶ᠋ᠡᠨ ᠪᠦᠴᠡ ᠶ᠋ᠢ ᠠᠯᠳᠠᠷᠠᠭᠠᠬᠤ ᠳ᠋ᠤ᠌ ᠬᠥᠮᠥᠰᠬᠡ ᠰᠠᠬᠠᠯ ᠨᠢ ᠴᠠᠩᠲᠤᠵᠤ ᠪᠤᠭᠤᠷᠤᠯᠲᠤᠭᠰᠠᠨ ᠠ᠋ᠴᠠ ᠬᠠᠮᠢᠭᠠ ᠨᠢᠭᠡ ᠭᠠᠵᠠᠷ ᠬᠠᠯᠵᠠ ᠠᠭᠤᠯᠵᠠᠭᠠᠳ ᠦᠭᠡ ᠳᠤᠤᠭᠠᠷᠬᠤ ᠦᠭᠡᠢ ᠪᠣᠯ ᠦᠨᠡᠬᠡᠷ ᠲᠠᠨᠢᠭᠳᠠᠰᠢ ᠦᠭᠡᠢ ᠠᠵᠢ᠃ ᠪᠥᠭ ᠭᠡᠰᠡ ᠳᠤᠯᠠᠭᠠᠬᠠᠨ ᠭᠡᠷ ᠲᠤ ᠣᠷᠣᠵᠤ ᠣᠴᠢᠭᠰᠠᠨ ᠮᠢᠩᠭᠠᠨᠪᠣᠣ ᠶ᠋ᠢᠨ ᠪᠡᠶᠡ ᠬᠦᠢᠲᠡᠨ ᠵᠢᠪᠠᠷ ᠰᠡᠪᠢᠵᠦ ᠮᠠᠭᠤᠬᠠᠨ ᠰᠦᠮᠡᠯᠵᠡᠬᠦ ᠱᠥᠯᠦᠨ ᠲᠣᠰᠣᠨ ᠳ᠋ᠧᠩ ᠢ᠋ ᠤᠨᠲᠠᠷᠠᠭᠠᠴᠢᠬᠠᠬᠤ ᠰᠢᠬᠠᠪᠠ᠃ ᠳᠡᠪᠡᠯ ᠮᠠᠯᠠᠭᠠᠢ ᠰᠠᠬᠠᠯ ᠬᠥᠮᠥᠰᠬᠡ ᠳ᠋ᠦ᠍ᠨᠢ ᠪᠠᠷᠵᠠᠢᠨ ᠰᠠᠭᠰᠠᠯᠵᠠᠭᠰᠠᠨ ᠮᠥᠰᠥ ᠴᠠᠩ ᠨᠢ ᠲᠦᠳᠡᠬᠡᠨ ᠬᠠᠢᠯᠪᠠ᠃ ᠮᠢᠩᠭᠠᠨᠪᠣᠣ ᠶ᠋ᠢᠨ ᠬᠥᠮᠥᠰᠬᠡ ᠰᠠᠬᠠᠯ ᠨᠢ ᠭᠡᠷ ᠦ᠋ᠨ ᠬᠠᠯᠠᠭᠤᠨ ᠠᠭᠤᠷ ᠲᠤ ᠬᠠᠢᠯᠵᠤ ᠰᠢᠭᠦᠳᠡᠷᠢ ᠶ᠋ᠢᠨ ᠪᠥᠮᠪᠥᠯᠢᠭ ᠡᠮᠬᠦᠭᠰᠡᠨ ᠵᠦᠯᠭᠡ ᠨᠠᠪᠴᠢᠰ ᠰᠢᠭ᠋ ᠮᠠᠭᠤ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠳ᠋ᠦ᠍ ᠭᠢᠯᠲᠠᠭᠠᠨᠠᠵᠤ ᠬᠠᠷᠠᠭᠳᠠᠨᠠ᠃
— ᠵᠠ! ᠲᠠ ᠨᠠᠷ ᠲᠡᠭᠡᠭᠡᠳ ᠰᠠᠢᠨ ᠯᠠ ᠪᠠᠢᠵᠠᠭᠠᠪᠠ ᠤᠤ? ᠨᠠᠰᠤᠲᠠᠢ ᠠᠪᠤ ᠬᠠᠮᠢᠭᠠ ᠶᠠᠪᠤᠪᠠ? ᠥᠨᠥᠴᠢᠨ ᠢᠨᠵᠠᠭᠠ ᠮᠢᠨᠢ ᠰᠤᠭᠤ ᠰᠢᠭ᠋ ᠰᠠᠢᠬᠠᠨ ᠥᠰᠦᠭᠰᠡᠨ ᠪᠢᠵᠡ! ᠭᠡᠳ ᠮᠢᠩᠭᠠᠨᠪᠣᠣ ᠢᠨᠵᠠᠭᠠ ᠶ᠋ᠢ ᠥᠬᠥᠭᠡᠷᠳᠡᠵᠦ ᠦᠰᠦ ᠰᠤᠷ ᠢ᠋ ᠨᠢ ᠢᠯᠪᠡᠭᠦ ᠭᠡᠳ ᠣᠢᠷᠠᠲᠤᠭᠰᠠᠨ ᠳ᠋ᠤ᠌ ᠮᠢᠩᠭᠠᠨᠪᠣᠣ ᠶ᠋ᠢ ᠬᠦᠨᠡᠢᠷᠬᠡᠵᠦ ᠵᠠᠢᠯᠠᠨ ᠵᠡᠭᠦᠨ ᠬᠠᠨᠠ ᠳᠠᠭᠠᠭᠤᠯᠵᠤ ᠳᠡᠪᠢᠰᠦᠭᠰᠡᠨ ᠬᠣᠪᠢᠯᠴᠡᠴᠡᠭ ᠦ᠋ᠨ ᠣᠷᠣ ᠳᠡᠭᠡᠭᠦᠷ ᠦᠰᠦᠷᠦᠨ ᠳᠠᠪᠰᠠᠭ ᠳᠡᠭᠡᠷᠡ ᠭᠠᠷᠴᠤ ᠵᠣᠭᠰᠣᠪᠠ᠃
ᠬᠣᠪᠢᠯᠴᠡᠴᠡᠭ ᠲᠤᠯᠭᠠᠨ ᠳ᠋ᠠᠭᠠᠨ ᠠᠷᠭᠠᠯ ᠨᠡᠮᠡᠵᠦ᠄
— ᠠᠬᠠ ᠲᠠ ᠶᠠᠮᠠᠷ ᠬᠠᠰᠢ ᠪᠠᠨ ᠶᠤᠮ ᠪᠣᠢ? ᠨᠡᠷᠡ ᠪᠡᠨ ᠡᠷᠲᠡ ᠬᠡᠯᠡᠳᠡᠭ ᠦᠭᠡᠢ ᠴᠢᠨᠢ᠁ ᠬᠠᠷᠠ ᠰᠥᠨᠢ ᠪᠡᠷ ᠬᠥᠮᠦᠨ ᠠᠶᠤᠯᠭᠠᠴᠢᠬᠠᠯᠠ ᠭᠡᠳ ᠮᠢᠩᠭᠠᠨᠪᠣᠣ ᠶ᠋ᠢ ᠵᠢᠮᠡᠯᠡᠭᠰᠡᠨ ᠪᠣᠯᠪᠠᠴᠤ ᠳᠣᠲᠣᠷᠠ ᠪᠠᠨ ᠲᠡᠭᠦᠨ ᠦ᠌ ᠢᠷᠡᠭᠰᠡᠨ ᠳ᠋ᠦ᠍ ᠪᠠᠶᠠᠷᠯᠠᠭᠰᠠᠨ ᠪᠣᠯᠬᠤ ᠨᠢ ᠴᠢᠷᠠᠢ ᠳᠡᠭᠡᠷᠡ ᠨᠢ ᠮᠡᠳᠡᠭᠳᠡᠵᠦ ᠪᠠᠢᠪᠠ᠃
— ᠬᠠᠷᠠ ᠴᠠᠰᠤᠨ ᠳᠤ ᠯᠠᠭᠬᠢᠭᠤᠯᠤᠭᠰᠠᠭᠠᠷ ᠪᠠᠢᠵᠤ ᠣᠷᠣᠢ ᠪᠣᠯᠭᠠᠴᠢᠬᠠᠯᠠ! ᠭᠣᠪᠢ ᠤᠷᠤᠭᠤ ᠴᠠᠰᠤ ᠤᠯᠠᠮ ᠵᠤᠵᠠᠭᠠᠨ᠂ ᠵᠠᠮ ᠵᠥᠷᠢᠭ ᠴᠤ᠌ ᠠᠯᠠᠭᠠ!
— ᠡᠨᠡ ᠭᠦᠨ ᠴᠠᠰᠤᠨ ᠳ᠋ᠤ᠌ ᠲᠠ ᠶᠠᠭᠠᠬᠢᠬᠤ ᠳ᠋ᠠᠭᠠᠨ ᠲᠥᠭᠡᠷᠢᠵᠦ ᠬᠥᠳᠡᠭᠡ ᠬᠣᠨᠣᠴᠢᠬᠠᠭᠰᠠᠨ ᠦᠭᠡᠢ ᠪᠣᠢ ⁈
— ᠥᠨᠥᠴᠢᠨ ᠢᠨᠵᠠᠭᠠ ᠶ᠋ᠢᠨ ᠲᠡᠯᠴᠢᠯᠡᠵᠦ ᠪᠠᠢᠭᠰᠠᠨ ᠳᠠᠷᠠᠰᠤᠲᠠᠢ ᠬᠣᠭᠣᠯᠠᠢ ᠶ᠋ᠢᠨ ᠥᠨᠳᠥᠷ ᠳᠠᠷᠠᠰᠤ ᠶ᠋ᠢ ᠲᠠᠨᠢᠭᠠ ᠦᠭᠡᠢ ᠰᠠᠨ ᠪᠣᠯ ᠬᠥᠳᠡᠭᠡ ᠬᠣᠨᠣᠬᠤ ᠳ᠋ᠤ᠌ ᠴᠤ᠌ ᠳᠥᠭᠥᠭᠰᠡᠨ!
— ᠲᠡᠭᠡᠭᠰᠡᠨ ᠴᠤ᠌ ᠪᠣᠯ ᠥᠪᠥᠷ ᠦ᠋ᠨ ᠨᠢᠭᠡ ᠰᠠᠢᠨ ᠡᠷᠡ ᠬᠥᠳᠡᠭᠡ ᠬᠣᠨᠣᠵᠤ ᠬᠥᠯᠳᠡᠵᠦ ᠦᠬᠦᠯᠡ ᠭᠡᠳᠡᠭ ᠦᠯᠢᠭᠡᠷ ᠡᠭᠦᠰᠦᠨᠡ ᠳᠡ !
— ᠲᠡᠷᠡ ᠨᠢ ᠴᠤ᠌ ᠶᠠᠭᠤ ᠯᠠ ᠪᠣᠯ ⁈ ᠬᠠᠷᠢᠨ ᠠᠢᠯ ᠤ᠋ᠨ ᠬᠠᠯᠠᠭᠤᠨ ᠬᠠᠶᠠᠭᠠᠨ ᠳ᠋ᠤ᠌ ᠢᠷᠡᠭᠡᠳ ᠭᠡᠷ ᠲᠡᠬᠢ ᠬᠥᠮᠦᠨ ᠨᠢ ᠡᠭᠦᠳᠡ ᠪᠡᠨ ᠲᠠᠢᠯᠬᠤ ᠦᠭᠡᠢ ᠭᠠᠳᠠᠭᠠ ᠬᠣᠨᠣᠬᠤ ᠠ᠋ᠴᠠ ᠠᠶᠤᠵᠤ ᠪᠠᠢᠯᠠ᠃
— ᠮᠢᠩᠭᠠᠨᠪᠤᠤ ᠠᠬᠠ ᠶᠠᠮᠠᠷ ᠣᠯᠢᠭ ᠦᠭᠡᠢ ᠶᠦᠮ ᠪᠣᠢ? ᠥᠪᠡᠷ ᠢ᠋ᠶ᠋ᠡᠨ ᠨᠡᠷᠡ ᠪᠡᠨ ᠬᠡᠯᠡᠬᠦ ᠦᠭᠡᠢ ᠡᠭᠦᠳᠡ ᠲᠠᠷᠴᠢᠭᠢᠨᠠᠭᠤᠯᠤᠭᠠᠳ ᠠᠢᠯ ᠤ᠋ᠨ ᠬᠡᠦᠬᠡᠨ ᠥᠬᠢᠨ ᠬᠥᠮᠦᠨ ᠢ᠋ ᠠᠶᠤᠯᠭᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠬᠦ ᠦᠭᠡᠢ ᠬᠠᠷᠢᠨ ᠪᠤᠷᠤᠭᠤ ᠶ᠋ᠢ ᠨᠢ ᠨᠠᠳᠠ ᠳ᠋ᠤ᠌ ᠳᠤᠬᠤᠴᠢᠬᠠᠭᠠᠳ ᠁ ᠭᠡᠵᠦ ᠢᠨᠢᠶᠡᠬᠦ ᠨᠢ ᠤᠯᠠᠮ ᠬᠥᠭᠡᠷᠦᠬᠦᠨ ᠬᠠᠷᠠᠭᠳᠠᠨᠠ᠃
ᠮᠢᠩᠭᠠᠨᠪᠤᠤ ᠬᠤᠪᠢᠯᠴᠡᠴᠡᠭ ᠬᠣᠶᠠᠷ ᠤᠨ ᠠᠯᠢᠶᠠᠯᠠᠭᠰᠠᠨ ᠶᠠᠷᠢᠶᠠ ᠶᠢ ᠴᠢᠩᠨᠠᠵᠤ ᠵᠣᠭᠰᠣᠭᠰᠠᠨ ᠢᠨᠵᠠᠭᠠ ᠴᠠᠭᠠᠳᠤ ᠳᠠᠪᠰᠠᠭ ᠳᠡᠭᠡᠷᠡ ᠡᠴᠡ ᠲᠦᠵᠢᠷᠡᠭ ᠭᠡᠲᠡᠯᠡ ᠦᠰᠦᠷᠴᠦ ᠪᠠᠭᠤᠭᠠᠳ ᠬᠤᠪᠢᠯᠴᠡᠴᠡᠭ ᠤᠨ ᠬᠠᠵᠠᠭᠤ ᠳᠤ ᠢᠷᠡᠵᠦ ᠲᠡᠭᠦᠨ ᠦ ᠴᠢᠬᠢᠨ ᠤ ᠤᠭᠤᠷᠠᠭ ᠢ ᠰᠢᠮᠡᠭᠦ ᠭᠡᠵᠦ ᠨᠢᠳᠤᠴᠢᠭᠰᠠᠨ ᠨᠢ ᠭᠡᠢᠴᠢᠨ ᠳ᠋ᠡᠭᠡᠨ ᠬᠠᠯᠠᠭᠤᠨ ᠴᠠᠢ ᠠᠶᠠᠭᠠᠯᠠᠬᠤ ᠦᠭᠡᠢ ᠶᠤᠮ ᠤᠤ ᠭᠡᠬᠦ ᠰᠢᠭ ᠪᠠᠢᠪᠠ᠃ ᠬᠤᠪᠢᠯᠴᠡᠴᠡᠭ ᠢᠨᠵᠠᠭᠠᠨ ᠤ᠋ ᠪᠠᠨ ᠥᠯᠥᠰᠬᠦ ᠳ᠋ᠡᠭᠡᠨ ᠲᠡᠭᠦᠨ ᠦ᠌ ᠴᠢᠬᠢᠨ ᠦ᠌ ᠤᠭᠤᠷᠠᠭ ᠢ᠋ ᠰᠢᠮᠡᠳᠡᠭ ᠢ ᠰᠠᠨᠠᠵᠤ 《ᠦᠨᠡᠬᠡᠷ ᠪᠢ ᠴᠢᠨᠢ ᠶᠠᠭᠤᠨ ᠳ᠋ᠠᠭᠠᠨ ᠤᠬᠠᠭᠠ ᠠᠯᠳᠠᠭᠠᠳ ᠢᠷᠡᠭᠰᠡᠨ ᠭᠡᠢᠴᠢᠨ ᠳ᠋ᠡᠭᠡᠨ ᠴᠠᠢ ᠠᠶᠠᠭᠠᠯᠠᠬᠤ ᠪᠠᠨ ᠮᠠᠷᠲᠠᠴᠢᠬᠠᠪᠠ ? 》 ᠭᠡᠳ ᠪᠤᠰᠴᠤ ᠬᠣᠪᠤᠩ ᠲᠠᠢ ᠭᠠᠯ ᠢ᠋ ᠰᠡᠷᠭᠦᠭᠡᠨ ᠴᠠᠢ ᠴᠤᠤ ᠪᠤᠴᠠᠯᠭᠠᠵᠤ᠂ ᠢᠳᠡᠵᠦ ᠤᠤᠭᠤᠬᠤ ᠶᠠᠭᠤᠮᠠ ᠲᠥᠪᠬᠢᠨᠡᠭᠦᠯᠵᠦ ᠣᠢᠷᠠᠲᠤᠭᠤᠯᠤᠨᠠ᠃
ᠫᠣᠷ ᠪᠣᠷ ᠪᠤᠴᠠᠯᠬᠤ ᠵᠢᠯᠠᠪᠴᠢ ᠲᠣᠭᠣᠭᠠᠨ ᠠ᠋ᠴᠠ ᠬᠠᠯᠠᠭᠤᠨ ᠠᠭᠤᠷ ᠰᠠᠪᠰᠠᠵᠤ᠂ ᠪᠣᠷᠣ ᠱᠥᠯᠦᠨ ᠦ᠌ ᠦᠨᠦᠷ ᠭᠡᠷ ᠳᠤᠯᠠᠭᠠᠯᠠᠨ ᠦᠨᠦᠷᠲᠦᠪᠡ᠃ ᠶᠢᠰᠦ ᠶᠢᠨ ᠬᠦᠢᠲᠡᠨ ᠦ᠌ ᠴᠠᠰᠤᠨ ᠳ᠋ᠤ᠌ ᠳᠠᠭᠠᠷᠠᠴᠤ ᠪᠡᠭᠡᠷᠡᠭᠰᠡᠨ ᠮᠢᠩᠭᠠᠨᠪᠤᠤ ᠶ᠋ᠢᠨ ᠪᠡᠶᠡ ᠶ᠋ᠢ ᠪᠦᠯᠢᠶᠡᠰᠬᠡᠭᠰᠡᠨ ᠨᠢ ᠲᠡᠭᠦᠨ ᠳ᠋ᠦ᠍ ᠨᠢᠭᠡ ᠶᠣᠰᠣᠨ ᠤ ᠵᠢᠷᠭᠠᠯ ᠪᠠᠢᠯᠠ᠃
ᠬᠣᠪᠣᠩ ᠤ᠋ᠨ ᠴᠣᠭ ᠳᠡᠭᠡᠷᠡ ᠲᠠᠯᠪᠢᠭᠰᠠᠨ ᠵᠡᠰ ᠳᠡᠪᠦᠷᠡ ᠲᠡᠢ ᠴᠠᠢ ᠳᠠᠷᠭᠢᠯᠤᠨ ᠪᠤᠴᠠᠯᠵᠤ᠂ ᠬᠤᠪᠢᠯᠴᠡᠴᠡᠭ ᠮᠢᠩᠭᠠᠨᠪᠤᠤ ᠳᠤ ᠮᠥᠩᠭᠦᠨ ᠠᠶᠠᠭᠠᠨ ᠳᠤ ᠴᠠᠢ ᠠᠶᠠᠭᠠᠯᠠᠪᠠ᠃
ᠴᠠᠰᠤ ᠰᠥᠬᠥᠷᠡᠭᠰᠡᠨ ᠶᠠᠳᠠᠷᠠᠭᠠ ᠲᠠᠢ ᠵᠠᠮ ᠢ᠋ᠶ᠋ᠠᠷ ᠮᠣᠷᠢᠨ ᠤ᠋ ᠨᠢᠷᠤᠭᠤᠨ ᠳᠡᠭᠡᠷᠡ ᠨᠢᠭᠡ ᠡᠳᠦᠷ ᠶᠥᠷᠭᠡᠭᠦᠯᠦᠭᠰᠡᠨ ᠮᠢᠩᠭᠠᠨᠪᠣᠣ ᠠᠢᠯ ᠤ᠋ᠨ ᠬᠡᠦᠬᠡᠨ ᠦ᠌ ᠴᠢᠨᠠᠭᠰᠠᠨ ᠥᠳᠬᠡᠨ ᠰᠢᠷᠭᠠᠯ ᠴᠠᠢ ᠶ᠋ᠢ ᠠᠮᠰᠠᠬᠤ ᠳ᠋ᠤ᠌ ᠶᠠᠳᠠᠷᠠᠭᠠ ᠲᠠᠢᠯᠤᠭᠳᠠᠵᠤ ᠨᠢᠳᠦ ᠨᠢ ᠣᠩᠭᠣᠢᠬᠤ ᠰᠢᠭ᠋ ᠪᠣᠯᠪᠠ᠃
ᠴᠠᠢ ᠠᠮᠰᠠᠭᠰᠠᠨ ᠤ᠋ ᠳᠠᠷᠠᠭᠠ ᠰᠠᠪᠠ ᠲᠠᠯᠪᠢᠬᠤ ᠭᠡᠵᠦ ᠲᠡᠯᠢᠩ ᠢᠶᠠᠨ ᠠᠭᠤᠳᠠᠯᠬᠤ ᠳ᠋ᠤ᠌ ᠳᠡᠭᠡᠷᠡ ᠪᠡᠨ ᠤᠯᠠᠭᠠᠨ ᠵᠣᠰᠣ ᠲᠠᠢ ᠳᠣᠲᠣᠷᠠ ᠠ᠋ᠴᠠ ᠨᠢ ᠲᠣᠰᠣ ᠨᠨᠪᠴᠢᠭᠰᠠᠠ ᠰᠢᠷᠠ ᠪᠣᠷᠣ ᠴᠠᠭᠠᠰᠤᠨ ᠪᠠᠭᠯᠠᠭᠠ ᠲᠠᠢ ᠨᠠᠷᠢᠨ ᠪᠣᠭᠣᠷᠰᠣᠭ᠂ ᠪᠤᠷᠠᠮ᠂ ᠮᠥᠰᠥᠨ ᠰᠢᠬᠢᠷ᠂ ᠬᠡᠪ ᠦ᠋ᠨ ᠴᠠᠢ᠂ ᠵᠢᠵᠢᠭᠬᠡᠨ ᠬᠣᠶᠠᠷ ᠬᠠᠷᠠ ᠸᠠᠭᠠᠷ ᠤ᠋ᠨ ᠪᠣᠳᠣᠩ ᠲᠠᠢ ᠬᠠᠷᠠ ᠠᠷᠢᠬᠢ᠂ ᠬᠣᠪᠢᠯᠴᠡᠴᠡᠭ ᠲᠦ ᠮᠥᠩᠭᠥᠨ ᠣᠳᠪᠠᠯᠠ ᠴᠡᠴᠡᠭ ᠦ᠋ᠨ ᠬᠡ ᠲᠡᠢ ᠨᠣᠭᠣᠭᠠᠨ ᠲᠣᠷᠭᠠᠨ ᠳᠡᠪᠡᠯ ᠦ᠋ᠨ ᠬᠣᠷᠭᠣᠢ ᠵᠡᠷᠭᠡ ᠶᠠᠭᠤᠮᠠ ᠪᠠᠢᠯᠠ᠃
ᠮᠢᠩᠭᠠᠪᠣᠣ ᠵᠡᠰ ᠳᠡᠪᠦᠷᠡ ᠲᠡᠢ ᠴᠠᠢ ᠠ᠋ᠴᠠ ᠪᠣᠭᠣᠷᠰᠣᠭ᠂ ᠬᠡᠪ ᠦ᠋ᠨ ᠴᠠᠢ ᠳᠡᠭᠡᠷᠡ ᠶᠠᠯᠢᠮᠬᠠᠠ ᠲᠥᠰᠦᠷᠭᠡᠵᠦ᠂ ᠵᠢᠵᠢᠭ ᠬᠠᠷᠠ ᠪᠣᠳᠣᠩ ᠲᠠᠢ ᠠᠷᠢᠬᠢᠨ ᠤ᠋ ᠤᠯᠠᠭᠠᠨ ᠲᠣᠷᠭᠠᠨ ᠪᠣᠭᠣᠳᠠᠯ ᠢ᠋ ᠵᠠᠳᠠᠯᠵᠤ᠄
— ᠵᠠ᠂ ᠮᠢᠨᠦ ᠳᠡᠭᠦᠦ ᠡᠳᠡᠭᠡᠷ ᠢ᠋ ᠴᠠᠭᠠᠰᠢ ᠲᠡᠭᠡᠭᠰᠢᠯᠡᠭᠦᠯᠦᠭᠡᠴᠢ! ᠭᠡᠳ ᠬᠡᠪ ᠦ᠋ᠨ ᠴᠠᠢ᠂ ᠪᠣᠭᠣᠳᠠᠯ ᠲᠠᠢ ᠨᠠᠷᠢᠨ ᠪᠣᠭᠣᠷᠰᠣᠭ᠂ ᠰᠢᠬᠢᠷ ᠴᠢᠪᠠᠭᠠ ᠵᠡᠷᠭᠡ ᠢᠳᠡᠭᠡᠨ ᠢ᠋ ᠬᠣᠪᠢᠯᠴᠡᠴᠡᠭ ᠲᠦ᠍ ᠳᠠᠮᠵᠢᠭᠤᠯᠪᠠ᠃
— ᠨᠠᠨ ᠰᠠᠢᠨ ᠠᠷᠢᠬᠢ ᠶᠤᠮ! ᠨᠠᠰᠤᠲᠠᠢ ᠠᠪᠤ ᠳ᠋ᠤ᠌ ᠥᠭᠭᠦᠶᠡ ᠭᠡᠵᠦ ᠥᠨᠥᠬᠢ ᠬᠣᠶᠠᠷ ᠵᠢᠵᠢᠭ ᠪᠣᠳᠣᠩ ᠲᠠᠢ ᠠᠷᠢᠬᠢ ᠶ᠋ᠢ ᠭᠠᠷᠳᠠᠭᠤᠯᠤᠨᠠ᠃
— ᠡᠭᠦᠨ ᠢ᠋ ᠴᠢᠮᠠᠶ᠋ᠢ ᠳ᠋ᠤ᠌ ᠭᠡᠳ ᠳᠡᠪᠡᠯ ᠦ᠋ᠨ ᠬᠣᠷᠭᠣᠢ ᠶ᠋ᠢ ᠥᠭᠬᠦ ᠳ᠋ᠦ᠍ ᠬᠣᠪᠢᠯᠴᠡᠴᠡᠭ ᠪᠠᠶᠠᠷᠯᠠᠭᠰᠠᠨ ᠢᠴᠢᠭᠰᠡᠨ ᠠᠯᠢᠨ ᠠ᠋ᠴᠠ ᠪᠣᠯᠤᠭᠰᠠᠨ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ ᠴᠢᠷᠠᠢ ᠨᠢ ᠤᠯᠠᠢᠪᠠ ᠁
— ᠲᠠ ᠢᠩᠭᠢᠵᠦ ᠮᠥᠩᠭᠥ ᠦᠷᠡᠭᠡᠵᠣ ᠶᠠᠭᠠᠬᠢᠬᠤ ᠭᠡᠰᠡᠨ ᠶᠦᠮ? ᠭᠡᠳ ᠡᠪ ᠦᠭᠡᠢᠷᠬᠡᠭᠰᠡᠨ ᠬᠣᠪᠢᠯᠴᠡᠴᠡᠭ᠂《 ᠭᠠᠷ ᠬᠣᠭᠣᠰᠣᠨ ᠬᠦᠷᠦᠭᠡᠳ ᠢᠷᠡᠭᠰᠡᠨ ᠴᠤ᠌ ᠪᠢ ᠪᠠᠶᠠᠷᠯᠠᠨᠠ》 ᠭᠡᠰᠡᠨ ᠰᠢᠭ ᠪᠠᠢᠯᠠ᠃
— ᠶᠠᠭᠠᠬᠢᠬᠤ ᠪᠣᠢ ᠳᠠ! ᠮᠣᠩᠭᠣᠯ ᠬᠥᠮᠦᠨ ᠬᠡᠵᠢᠶᠡ ᠭᠠᠷ ᠬᠣᠭᠣᠰᠣᠨ ᠭᠠᠨᠵᠤᠭᠠ ᠰᠤᠯᠠ ᠶᠠᠪᠤᠳᠠᠭ ᠪᠠᠢᠪᠠ⁈ ᠭᠡᠳ ᠮᠢᠩᠭᠠᠨᠪᠣᠣ ᠢᠨᠢᠶᠡᠪᠡᠯ ᠲᠡᠭᠦᠨ ᠦ᠌ ᠬᠥᠷᠥᠰᠥᠯᠢᠭ ᠪᠣᠷᠣ ᠴᠢᠷᠠᠢ ᠳ᠋ᠤᠨᠢ ᠰᠢᠩᠭᠡᠰᠢ ᠦᠭᠡᠢ ᠨᠠᠷᠠ ᠰᠠᠴᠤᠷᠠᠬᠤ ᠰᠢᠭ᠋ ᠬᠠᠷᠠᠭᠳᠠᠨᠠ᠃
ᠲᠠᠪᠠᠭ ᠲᠤ ᠡᠪᠴᠢᠭᠦᠦ ᠳᠥᠷᠪᠡᠨ ᠥᠨᠳᠥᠷ᠂ ᠳᠠᠯᠤ ᠰᠡᠭᠦᠵᠢ ᠲᠠᠪᠠᠭᠯᠠᠵᠤ ᠲᠠᠯᠪᠢᠭᠠᠳ ᠬᠣᠪᠢᠯᠴᠡᠴᠡᠭ ᠴᠠᠭᠠᠳᠤ ᠳᠠᠪᠰᠠᠭ ᠡᠴᠡ ᠳᠤᠨᠳᠠᠭᠤᠷ ᠰᠢᠯ ᠤᠯᠠᠪᠤᠷ ᠰᠢᠷᠠ ᠠᠷᠢᠬᠢ ᠭᠠᠷᠭᠠᠵᠤ ᠡᠪᠡᠷ ᠬᠤᠨᠳᠠᠭᠠᠨ ᠳ᠋ᠤ᠌ ᠬᠤᠨᠳᠠᠭᠠᠯᠠᠪᠠ᠃
— ᠵᠠ᠂ ᠮᠢᠩᠭᠠᠠᠪᠣᠣ ᠠᠬᠠ ᠲᠠ ᠵᠠᠮ ᠳ᠋ᠠᠭᠠᠨ ᠲᠠᠭᠠᠷᠠᠭᠰᠠᠨ ᠪᠠᠢᠯᠭᠦᠢ! ᠭᠡᠵᠦ ᠬᠣᠪᠢᠯᠴᠡᠴᠡᠭ ᠮᠢᠩᠭᠠᠠᠪᠣᠣ ᠳ᠋ᠤ᠌ ᠠᠷᠢᠬᠢ ᠪᠠᠷᠢᠪᠠᠯ ᠮᠢᠩᠭᠠᠠᠪᠣᠣ ᠬᠤᠨᠳᠠᠭᠠ ᠶ᠋ᠢ ᠲᠣᠰᠴᠤ ᠭᠤᠷᠪᠠᠨᠲᠠ ᠢᠳᠠᠮᠯᠠᠵᠤ ᠠᠮᠰᠠᠬᠤᠢᠴᠠ ᠪᠣᠯᠤᠭᠠᠳ᠄
— ᠵᠠ᠂ ᠮᠢᠨᠦ ᠳᠡᠭᠦᠦ ᠡᠭᠦᠨ ᠢ᠋ᠶ᠋ᠡᠨ ᠴᠠᠭᠠᠰᠢ ᠳᠡᠭᠡᠭᠰᠢᠯᠡᠭᠦᠯᠴᠢᠬᠡ! ᠳᠡᠭᠡᠵᠢ ᠶ᠋ᠢ ᠨᠢ ᠠᠮᠰᠠᠴᠢᠬᠠᠯᠠ ᠭᠡᠳ ᠬᠤᠨᠳᠠᠭᠠ ᠲᠠᠢ ᠠᠷᠢᠬᠢ ᠶ᠋ᠢ ᠪᠤᠴᠠᠭᠠᠬᠤ ᠭᠡᠪᠡᠯ ᠬᠤᠪᠢᠯᠴᠡᠴᠡᠭ᠄
— ᠠᠬᠠ ᠲᠠ ᠲᠣᠭᠲᠠᠭᠠᠴᠢᠬᠠ! ᠪᠤᠭᠤ ᠶ᠋ᠢᠨ ᠴᠢᠰᠤ ᠲᠠᠢ ᠠᠷᠢᠬᠢ ᠶᠤᠮ ᠰᠢᠦ! ᠠᠪᠤ ᠲᠠᠩᠳᠠ ᠬᠦᠢᠲᠡᠨ ᠳ᠋ᠦ᠍ ᠲᠠᠭᠠᠷᠠᠵᠤ ᠢᠷᠡᠪᠡᠯ ᠪᠡᠶᠡ ᠪᠦᠯᠢᠶᠡᠰᠦᠶᠡ ᠭᠡᠵᠦ ᠭᠠᠭᠴᠠ ᠬᠣᠶᠠᠷ ᠭᠡᠮ ᠤᠤᠭᠤᠳᠠᠭ ᠶᠤᠮ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠪᠠᠷᠤᠭ ᠤ᠋ᠨ ᠬᠥᠮᠦᠨ ᠳ᠋ᠦ᠍ ᠭᠠᠷᠭᠠᠵᠤ ᠥᠭᠳᠡᠭ ᠦᠭᠡᠢ ᠰᠢᠦ! ᠭᠡᠬᠦ ᠳ᠋ᠦ᠍ ᠮᠢᠩᠭᠠᠨᠪᠤᠤ ᠬᠤᠨᠳᠠᠭᠠ ᠲᠠᠢ ᠠᠷᠢᠬᠢ ᠶ᠋ᠢ ᠬᠥᠨᠲᠥᠷᠪᠡ᠃
ᠬᠤᠪᠢᠯᠴᠡᠴᠡᠭ ᠦ᠋ᠨ ᠠᠶᠠᠭᠠᠯᠠᠭᠰᠠᠨ ᠪᠤᠳᠠᠭᠠ ᠲᠠᠢ ᠰᠢᠷᠭᠠᠯ ᠡᠬᠡᠭᠦᠨ ᠴᠠᠢ ᠠ᠋ᠴᠠ ᠣᠭᠣᠴᠢᠯᠠᠵᠤ᠂ ᠪᠤᠭᠤ ᠶ᠋ᠢᠨ ᠴᠢᠰᠤ ᠲᠠᠢ ᠠᠷᠢᠬᠢᠨ ᠠ᠋ᠴᠠ ᠠᠮᠰᠠᠨ ᠬᠦᠢᠲᠡᠨ ᠳ᠋ᠦ᠍ ᠵᠢᠬᠡᠭᠦᠴᠡᠭᠰᠡᠨ ᠪᠡᠶᠡ ᠨᠢ ᠪᠦᠯᠢᠶᠡᠰᠦᠨ ᠲᠠᠯᠪᠢᠭᠳᠠᠭᠰᠠᠨ ᠳ᠋ᠤ᠌ ᠮᠢᠩᠭᠠᠨᠪᠤᠤ ᠲᠠᠪᠠᠭ ᠲᠠᠢ ᠲᠠᠷᠭᠤᠨ ᠮᠢᠬᠠᠨ ᠠ᠋ᠴᠠ ᠴᠢᠯᠥᠭᠡ ᠦᠭᠡᠢ ᠣᠭᠲᠣᠯᠤᠨ ᠢᠳᠡᠬᠦ ᠳ᠋ᠦ᠍ ᠵᠠᠪᠠᠵᠢᠨ ᠠ᠋ᠴᠠ ᠨᠢ ᠲᠣᠰᠣ ᠭᠣᠭᠣᠵᠢᠵᠤ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠳ᠋ᠦ᠍ ᠭᠢᠯᠲᠦᠭᠡᠨᠡᠨ ᠬᠠᠷᠠᠭᠳᠠᠨᠠ᠃
ᠮᠢᠩᠭᠠᠨᠪᠤᠤ ᠬᠢᠲᠤᠭᠠ ᠪᠠᠨ ᠵᠦᠯᠭᠦᠵᠦ ᠵᠠᠭᠠᠨ ᠤ᠋ ᠶᠠᠰᠤᠨ ᠰᠠᠪᠬᠠ ᠪᠠᠨ ᠬᠣᠶᠠᠷ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠬᠠᠪᠢᠷᠤᠨ ᠠᠷᠴᠢᠵᠤ ᠬᠤᠢᠯᠠᠭᠠᠳ ᠡᠭᠦᠯᠡᠨ ᠴᠠᠭᠠᠨ ᠤᠭᠠᠯᠵᠠ ᠲᠠᠢ ᠹᠧᠢᠰᠦ᠋ᠢ ᠰᠢᠯᠪᠢ ᠲᠡᠢ ᠮᠥᠩᠭᠥᠨ ᠲᠣᠯᠣᠭᠠᠢᠲᠤ ᠭᠠᠩᠰᠠᠨ ᠳ᠋ᠠᠭᠠᠨ ᠳᠦᠭᠦᠷᠡᠩ ᠲᠠᠮᠠᠬᠢ ᠨᠡᠷᠡᠵᠦ ᠶᠤᠸᠠᠨ ᠱᠢ ᠺᠠᠢ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢᠨ ᠬᠥᠷᠥᠭ ᠲᠡᠢ ᠣᠭᠣᠰᠣᠷᠲᠤ ᠴᠠᠭᠠᠨ ᠵᠣᠭᠣᠰ ᠢ᠋ᠶ᠋ᠠᠷ ᠣᠪᠣᠭᠠᠯᠠᠨ ᠨᠡᠷᠡᠭᠰᠡᠨ ᠲᠠᠮᠠᠬᠢ ᠶ᠋ᠢ ᠳᠠᠷᠤᠵᠤ ᠲᠡᠭᠰᠢᠯᠡᠭᠡᠳ ᠰᠢᠨᠤᠯᠲᠠᠢᠬᠠᠨ ᠰᠣᠷᠣᠬᠤ ᠳ᠋ᠤ᠌ ᠤᠭᠠᠯᠵᠠᠷᠠᠭᠰᠠᠨ ᠰᠢᠷᠠ ᠤᠲᠤᠭᠠ ᠭᠡᠷ ᠦ᠋ᠨ ᠲᠠᠭᠠᠵᠠ ᠳ᠋ᠤ᠌ ᠮᠠᠨᠠᠷᠠᠨᠠ᠃ ᠬᠦᠢᠲᠡᠨ ᠳ᠋ᠦ᠍ ᠬᠥᠳᠡᠭᠡ ᠭᠠᠳᠠᠭᠠ ᠠᠳᠤᠭᠤ ᠮᠠᠯ ᠳ᠋ᠤ᠌ ᠶᠠᠪᠤᠵᠤ ᠶᠠᠪᠤᠵᠤ ᠲᠠᠭᠠᠷᠠᠵᠤ ᠪᠡᠭᠡᠷᠡᠭᠰᠡᠨ ᠬᠥᠮᠦᠨ ᠳᠤᠯᠠᠭᠠᠬᠠᠨ ᠭᠡᠷ ᠲᠦ᠍ ᠰᠢᠷᠭᠤᠵᠤ ᠲᠠᠷᠭᠤᠨ ᠮᠢᠬᠠ ᠢᠳᠡᠵᠦ ᠬᠠᠨᠳᠠ ᠱᠥᠯᠥ ᠣᠭᠣᠴᠢᠯᠠᠨ ᠳᠡᠭᠡᠷᠡ ᠡᠴᠡ ᠨᠢ ᠪᠠᠰᠠ ᠬᠣᠶᠠᠷ ᠭᠡᠮ ᠠᠷᠢᠬᠢ ᠪᠠᠯᠭᠤᠬᠤ ᠨᠢ ᠪᠡᠶᠡ ᠪᠦᠯᠢᠶᠡᠰᠬᠦ ᠶ᠋ᠢ ᠬᠡᠯᠡᠬᠦ ᠦᠭᠡᠢ ᠶᠠᠳᠠᠷᠠᠭᠠ ᠴᠢᠯᠡᠭᠡ ᠲᠠᠢᠯᠳᠠᠭ ᠢ᠋ ᠥᠭᠦᠯᠡᠬᠦ ᠶᠠᠭᠤᠨ⁈ ᠢᠳᠡᠵᠦ ᠤᠤᠭᠤᠵᠤ ᠴᠠᠳᠴᠤ ᠬᠠᠨᠤᠭᠠᠳ ᠠᠶᠠᠭᠠ ᠪᠠᠨ ᠲᠦᠯᠬᠢᠵᠦ ᠠᠷᠤᠨᠰᠢ ᠪᠠᠨ ᠰᠠᠭᠤᠵᠤ ᠲᠠᠮᠠᠬᠢᠯᠠᠬᠤ ᠨᠢ ᠡᠷᠡ ᠬᠥᠮᠦᠨ ᠦ᠌ ᠨᠢᠭᠡ ᠴᠠᠭ ᠤ᠋ᠨ ᠵᠢᠷᠭᠠᠯ ᠭᠡᠳᠡᠭ ᠪᠣᠯ ᠥᠨᠥᠳᠥᠷ ᠮᠢᠩᠭᠠᠨᠪᠤᠤ ᠡᠨᠡ ᠪᠦᠬᠦᠢ ᠵᠢᠷᠭᠠᠯ ᠢ᠋ ᠡᠳ᠋ᠯᠡᠭᠡᠳ ᠵᠣᠭᠰᠣᠭᠠ ᠦᠭᠡᠢ ᠪᠠᠰᠠ ᠤᠯᠢᠶᠠᠷᠬᠠᠭ ᠰᠡᠴᠡᠨ ᠬᠡᠦᠬᠡᠨ ᠬᠤᠪᠢᠯᠴᠡᠴᠡᠭ ᠢ᠋ᠶ᠋ᠡᠷ ᠲᠠᠢᠯᠠᠭᠤᠯᠵᠤ ᠰᠠᠭᠤᠬᠤ ᠳ᠋ᠠᠭᠠᠨ ᠰᠡᠳᠬᠢᠯ ᠳ᠋ᠦ᠍ᠨᠢ ᠬᠡᠴᠢᠨᠡᠭᠡᠨ ᠵᠢᠷᠭᠠᠯ ᠲᠠᠢ ᠰᠠᠨᠠᠭᠳᠠᠬᠤ ᠶ᠋ᠢ ᠥᠭᠦᠯᠡᠵᠦ ᠬᠡᠷᠬᠢᠨ ᠪᠠᠷᠠᠨᠠ⁈
— ᠮᠢᠩᠭᠠᠨᠪᠤᠤ ᠠᠬᠠ ᠪᠢᠲᠡᠭᠡᠢ ᠵᠡᠨᠵᠡᠢᠯᠡ! ᠰᠠᠢᠨ ᠢᠳᠡᠭᠡᠴᠢ᠂ ᠬᠦᠢᠲᠡᠨ ᠳ᠋ᠦ᠍ ᠬᠣᠯᠠ ᠵᠠᠮ ᠬᠥᠭᠡᠭᠡᠭᠰᠡᠨ ᠬᠥᠮᠦᠨ ᠶᠠᠳᠠᠷᠠᠵᠤ ᠥᠯᠥᠰᠦᠭᠰᠡᠨ ᠪᠠᠢᠯᠭᠦᠢ! ᠭᠡᠷ ᠲᠡᠭᠡᠨ ᠢᠷᠡᠭᠰᠡᠨ ᠰᠢᠭ ᠯᠡ ᠪᠠᠢᠭᠠᠷᠠᠢ!
— ᠳᠡᠭᠡᠯ ᠯᠡ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ! ᠪᠢ ᠴᠤ᠌ ᠶᠤᠰᠤᠲᠠᠢ ᠬᠣᠯᠠ ᠶᠠᠪᠤᠭᠠᠳ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠢᠷᠡᠭᠰᠡᠨ ᠰᠢᠭ ᠪᠣᠯᠤᠯᠠ᠃ ᠶᠠᠭᠠᠬᠢᠯᠠ ᠭᠡᠵᠦ ᠡᠷᠡᠭᠡᠯᠡᠬᠦ ᠪᠢᠯᠡ ?
— ᠵᠥᠪ ᠳᠡ᠂ ᠵᠥᠪ! ᠭᠡᠳ ᠬᠤᠪᠢᠯᠴᠡᠴᠡᠭ ᠳᠡᠪᠦᠷᠡ ᠲᠡᠢ ᠴᠠᠢ ᠠᠶᠠᠭᠠ ᠬᠣᠶᠠᠷ ᠠ᠋ᠴᠠ ᠪᠤᠰᠤᠳ ᠢ᠋ ᠨᠢ ᠴᠠᠭᠠᠰᠢ ᠠᠬᠤᠢᠯᠠᠪᠠ᠃
ᠬᠥᠭᠡᠷᠦᠬᠦᠨ ᠢᠨᠵᠠᠭᠠ ᠡᠨᠡ ᠡᠵᠡᠭᠦᠢ ᠬᠦᠳᠡᠷ ᠡᠷᠡ ᠶ᠋ᠢ ᠠᠩᠬᠠ ᠬᠦᠨᠡᠢᠷᠬᠡᠵᠦ ᠪᠠᠢᠭᠰᠠᠨ ᠢᠶᠠᠨ ᠲᠡᠷᠡ ᠡᠷᠡ ᠭᠡᠷ ᠦ᠋ᠨ ᠡᠵᠡᠨ ᠬᠥᠮᠦᠨ ᠰᠢᠭ ᠬᠣᠢᠮᠣᠷ ᠲᠤ᠌ ᠵᠠᠪᠢᠯᠠᠵᠤ ᠰᠠᠭᠤᠭᠠᠳ ᠬᠤᠪᠢᠯᠴᠡᠴᠡᠭ ᠲᠠᠢ ᠳᠦᠩᠭᠦᠷ ᠳᠦᠩᠭᠦᠷ ᠶᠠᠷᠢᠯᠴᠠᠬᠤ ᠶ᠋ᠢ ᠴᠢᠩᠨᠠᠨ ᠲᠡᠭᠦᠨ ᠦ᠌ ᠡᠷᠡᠭᠡ ᠵᠢᠷᠣᠭᠠ ᠦᠭᠡᠢ ᠢᠳᠡᠵᠦ ᠤᠤᠭᠤᠬᠤ ᠶ᠋ᠢ ᠬᠠᠷᠠᠭᠰᠠᠭᠠᠷ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠤᠨᠲᠠᠵᠤ ᠣᠷᠬᠢᠵᠠᠢ᠃ ᠬᠥᠭᠡᠷᠦᠬᠦᠨ ᠬᠣᠰᠢᠭᠤ ᠪᠠᠨ ᠱᠥᠪᠥᠢᠯᠭᠡᠨ ᠬᠠ ᠪᠠᠨ ᠳᠡᠷᠡᠯᠡᠵᠦ ᠨᠤᠭᠳᠤᠢᠨ ᠤᠨᠲᠠᠭᠰᠠᠨ ᠢᠨᠵᠠᠭᠠ ᠪᠠᠨ ᠬᠤᠪᠢᠯᠴᠡᠴᠡᠭ ᠥᠬᠥᠭᠡᠷᠳᠡᠨ ᠦᠨᠦᠰᠴᠦ 《 ᠬᠥᠭᠡᠷᠦᠬᠦᠨ ᠠᠮᠢᠲᠠᠨ ᠶᠤᠮ ᠠ᠋ 》ᠭᠡᠪᠡ᠃
ᠪᠣᠷᠣ ᠭᠥᠷᠦᠭᠡᠰᠦᠨ ᠦ᠌ ᠵᠤᠯᠵᠠᠭᠠ ᠶ᠋ᠢ ᠬᠦᠷᠲᠡᠯᠡ ᠠᠮᠢ ᠲᠠᠢ ᠪᠠᠨ ᠬᠣᠯᠪᠣᠵᠤ ᠥᠬᠥᠭᠡᠷᠳᠡᠵᠦ ᠪᠠᠢᠭᠠ ᠬᠤᠪᠢᠯᠴᠡᠴᠡᠭ ᠢ ᠬᠠᠷᠠᠭᠠᠳ ᠮᠢᠩᠭᠠᠨᠪᠤᠤ ᠲᠣᠲᠣᠷᠠ ᠪᠠᠨ 《ᠥᠪᠡᠷ ᠢ᠋ᠶ᠋ᠡᠨ ᠬᠡᠦᠬᠡᠳ ᠲᠡᠢ ᠪᠣᠯᠬᠤ ᠶᠤᠮ ᠪᠣᠯ ᠡᠨᠡ ᠵᠠᠯᠠᠭᠤ ᠡᠬᠡ ᠡᠯᠢᠭᠡᠨ ᠡᠴᠡ ᠨᠢ ᠡᠮᠲᠡᠷᠡᠭᠰᠡᠨ ᠮᠢᠬᠠ ᠭᠡᠵᠦ ᠦᠷᠡ ᠪᠡᠨ ᠶᠠᠭᠠᠬᠢᠵᠤ ᠴᠤ᠌ ᠬᠠᠢᠷᠠᠯᠠᠳᠠᠭ ᠪᠣᠯ ᠳᠠ?》 ᠭᠡᠵᠦ ᠪᠣᠳᠣᠬᠤ ᠲᠠᠢ ᠵᠡᠷᠭᠡ ᠵᠢᠷᠦᠬᠡ ᠨᠢ ᠰᠦᠷᠡᠬᠡᠢ ᠪᠤᠯᠭᠢᠯᠠᠪᠠ᠃
ᠮᠢᠩᠭᠠᠨᠪᠤᠤ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠠᠢᠯ ᠤ᠋ᠨ ᠡᠨᠡ ᠬᠡᠦᠬᠡᠨ ᠢ᠋ ᠬᠠᠢᠷᠠᠯᠠᠬᠤ ᠪᠣᠳᠣᠯ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠣᠪᠣᠯᠵᠠᠵᠤ ᠵᠢᠷᠦᠬᠡ ᠶ᠋ᠢ ᠨᠢ ᠲᠦᠭᠰᠢᠭᠦᠯᠵᠦ ᠪᠠᠢᠭᠠ ᠨᠢ ᠡᠨᠡ!
ᠬᠤᠪᠢᠯᠴᠡᠴᠡᠭ ᠮᠢᠩᠭᠠᠨᠪᠤᠤ ᠳᠤ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠢᠮᠠᠭᠠᠨ ᠳᠡᠪᠢᠰᠭᠡᠷ ᠳᠡᠪᠢᠰᠴᠤ ᠬᠣᠨᠢᠨ ᠬᠥᠨᠵᠢᠯᠡ ᠥᠭᠭᠦᠭᠡᠳ ᠥᠪᠡᠷ ᠢᠶᠡᠨ ᠵᠡᠭᠦᠨ ᠲᠠᠯᠠ ᠪᠠᠷ ᠢᠨᠵᠠᠭᠠᠨ ᠤ ᠬᠠᠵᠠᠭᠤ ᠪᠠᠷ ᠣᠷᠣ ᠵᠠᠰᠠᠪᠠ᠃
ᠱᠥᠯᠦᠨ ᠲᠣᠰᠣᠨ ᠳ᠋ᠧᠩ ᠤᠨᠲᠠᠷᠠᠭᠠᠳ ᠨᠡᠯᠢᠶᠡᠳ ᠤᠳᠠᠭᠰᠠᠨ ᠪᠣᠯᠪᠠᠴᠤ ᠬᠤᠪᠢᠯᠴᠡᠴᠡᠭ ᠨᠣᠢᠷ ᠬᠤᠯᠵᠢᠵᠤ ᠡᠷᠭᠢᠨ ᠤᠷᠪᠠᠵᠤ ᠤᠨᠲᠠᠵᠤ ᠦᠯᠦ ᠣᠷᠣᠨᠠ᠃ ᠴᠣᠬᠣᠮ ᠶᠠᠭᠠᠬᠢᠭᠠᠳ ᠤᠨᠲᠠᠵᠤ ᠨᠣᠢᠷ ᠢᠷᠡᠳᠡᠭ ᠦᠭᠡᠢ ᠪᠡᠨ ᠲᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠴᠤ᠌ ᠮᠡᠳᠡᠬᠦ ᠦᠭᠡᠢ ᠪᠠᠢᠪᠠ᠃ ᠢᠩᠭᠢᠵᠦ ᠰᠡᠷᠡᠭᠦᠨ ᠬᠡᠪᠲᠡᠬᠦ ᠳ᠋ᠡᠭᠡᠨ ᠪᠣᠳᠣᠯ ᠳ᠋ᠤᠨᠢ ᠡᠯᠳᠡᠪ ᠶᠠᠭᠤᠮᠠ ᠣᠷᠣᠵᠤ ᠪᠠᠢᠯᠠ᠃ ᠭᠡᠨᠡᠳᠲᠡ ᠲᠡᠷᠡ ᠨᠢᠭᠡ ᠤᠳᠠᠭᠠᠨ ᠤ᠋ ᠭᠡᠨᠡᠨ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠳᠠᠬᠢᠨ ᠪᠣᠳᠣᠯᠠ ᠁
ᠨᠢᠭᠡ ᠰᠥᠨᠢ ᠲᠡᠷᠡ ᠵᠠᠨᠴᠢᠭᠳᠠᠭᠰᠠᠨ ᠰᠢᠭ᠋ ᠪᠡᠶᠡ ᠪᠠᠯᠠᠷᠠᠨ ᠯᠦᠭ ᠰᠦᠭ ᠦᠭᠡᠢ ᠤᠨᠲᠠᠴᠢᠬᠠᠵᠠᠢ᠃ ᠨᠢᠭᠡ ᠮᠡᠳᠡᠬᠦᠢ ᠳ᠋ᠦ᠍ ᠬᠠᠷᠠᠩᠭᠤᠢ ᠰᠥᠨᠢ ᠡᠵᠡᠭᠦᠢ ᠬᠡᠭᠡᠷᠡ ᠵᠣᠷᠢᠯᠭᠠ ᠦᠭᠡᠢ ᠲᠡᠨᠦᠵᠦ ᠶᠠᠪᠤᠭᠰᠠᠭᠠᠷ ᠭᠦᠨ ᠬᠠᠷᠠ ᠨᠦᠬᠡᠨ ᠳ᠋ᠦ᠍ ᠤᠨᠠᠭᠠᠳ ᠬᠡᠷᠬᠢᠨ ᠮᠠᠴᠤᠪᠠᠴᠤ ᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠪᠠᠷᠬᠢᠷᠠᠶᠠ ᠭᠡᠬᠦ ᠳ᠋ᠦ᠍ ᠠᠮᠢᠰᠬᠤᠭᠠ ᠨᠢ ᠪᠢᠲᠡᠭᠦᠷᠡᠭᠡᠳ ᠳᠠᠭᠤ ᠭᠠᠷᠬᠤ ᠦᠭᠡᠢ᠃ ᠶᠠᠭ ᠯᠠ ᠳᠡᠭᠡᠷᠡ ᠡᠴᠡ ᠨᠢ ᠬᠦᠨᠳᠦ ᠴᠢᠯᠠᠭᠤ ᠳᠠᠷᠤᠭᠰᠠᠨ ᠰᠢᠭ᠋ ᠪᠠᠢᠪᠠ ᠁ ᠭᠡᠨᠡᠳᠲᠡ ᠲᠡᠭᠦᠨ ᠦ᠌ ᠬᠠᠮᠤᠭ ᠤ᠋ᠨ ᠡᠮᠵᠡᠭ ᠭᠠᠵᠠᠷ ᠨᠢ ᠡᠪᠡᠳᠬᠦ ᠰᠢᠭ ᠪᠣᠯᠬᠤᠯᠠ ᠬᠤᠪᠢᠯᠴᠡᠴᠡᠭ ᠰᠣᠴᠢᠨ ᠰᠡᠷᠡᠪᠡ᠃ ᠨᠢᠭᠡ ᠲᠣᠮᠣ ᠡᠷᠡ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠡᠴᠡ ᠨᠢ ᠳᠠᠷᠤᠵᠤ ᠪᠣᠨᠲᠣᠭᠣᠷ ᠮᠥᠮᠥ ᠶ᠋ᠢᠨ ᠬᠢᠨᠢ ᠬᠡᠦᠬᠡᠨ ᠴᠡᠴᠡᠭ ᠢ᠋ ᠨᠢ ᠡᠮᠬᠦᠴᠢᠭᠡᠭᠡᠳ ᠬᠦᠯᠬᠦᠵᠦ ᠪᠠᠢᠯᠠ᠃
ᠬᠤᠪᠢᠯᠴᠡᠴᠡᠭ ᠢᠴᠢᠵᠦ ᠠᠭᠤᠷᠯᠠᠬᠤ ᠶ᠋ᠢᠨ ᠲᠤᠢᠯ ᠳ᠋ᠤ᠌ ᠬᠦᠷᠴᠦ ᠲᠡᠷᠡ ᠡᠷᠡ ᠶ᠋ᠢ ᠲᠦᠯᠬᠢᠨ ᠵᠠᠢᠯᠠᠭᠤᠯᠤᠭᠠᠳ᠄
— ᠬᠡᠨ ᠪᠣᠢ ? ᠭᠡᠵᠦ ᠬᠠᠰᠬᠢᠷᠤᠭᠰᠠᠨ ᠳ᠋ᠤ᠌᠄
— ᠪᠢ ᠨᠠᠮᠳᠠᠭ ᠪᠠᠢᠨᠠ᠃ ᠲᠠᠨᠢᠬᠤ ᠦᠭᠡᠢ ᠪᠠᠢᠨᠠ ᠤᠤ ᠭᠡᠰᠡᠨ ᠳ᠋ᠦ᠍ ᠥᠭᠡᠬᠦ ᠲᠣᠰᠣ᠂ ᠠᠷᠢᠬᠢ ᠲᠠᠮᠠᠬᠢᠨ ᠤ᠋ ᠦᠨᠦᠷ ᠬᠤᠳᠬᠤᠯᠳᠤᠭᠰᠠᠨ ᠦᠮᠡᠬᠡᠢ ᠪᠠᠷ ᠠᠮᠢᠰᠬᠤᠭᠰᠠᠨ ᠳ᠋ᠤᠨᠢ ᠬᠤᠪᠢᠯᠴᠡᠴᠡᠭ ᠵᠢᠭᠰᠢᠵᠦ᠄
— ᠨᠠᠮᠳᠠᠭ ᠴᠢ ᠲᠣᠨᠢᠯ ! ᠭᠡᠵᠦ ᠤᠨᠲᠠᠬᠤ ᠠ᠋ᠴᠠ ᠡᠮᠦᠨᠡ ᠳᠡᠷᠭᠡᠳᠡ ᠪᠡᠨ ᠲᠠᠯᠪᠢᠭᠰᠠᠨ ᠰᠤᠬᠠᠢ ᠲᠠᠰᠢᠭᠤᠷ ᠢ᠋ ᠰᠢᠭᠦᠷᠡᠨ ᠵᠥᠪ ᠰᠣᠯᠣᠭᠠᠢ ᠦᠭᠡᠢ ᠭᠤᠶᠠᠳᠠᠯᠠᠪᠠ᠃
— ᠬᠦᠶᠢ!ᠬᠦᠶᠢ! ᠶᠠᠭᠠᠬᠢᠵᠤ ᠪᠠᠢᠭᠠ ᠨᠢ ᠡᠨᠡ ᠪᠣᠢ ? ᠶᠣ᠂ ᠶᠤ ᠁ ᠭᠡᠵᠦ ᠨᠠᠮᠳᠠᠭ ᠲᠠᠰᠢᠭᠤᠷ ᠤ᠋ᠨ ᠠᠮᠲᠠᠨ ᠳ᠋ᠤ᠌ ᠦᠰᠦᠷᠬᠢᠯᠡᠵᠦ ᠥᠮᠥᠳᠥ ᠬᠤᠪᠴᠠᠰᠤ ᠣᠢᠮᠣᠰᠤ ᠭᠤᠲᠤᠯ ᠢ᠋ᠶ᠋ᠠᠨ ᠴᠤ᠌ ᠡᠮᠦᠰᠦᠯ ᠦᠭᠡᠢ ᠭᠡᠷ ᠡᠴᠡ ᠭᠠᠷᠴᠤ ᠳᠤᠲᠠᠭᠠᠪᠠ᠃
— ᠢᠴᠢᠬᠦ ᠨᠢᠭᠤᠷ ᠲᠠᠭᠠᠨ ᠢᠯᠭᠢ ᠨᠠᠭᠠᠭᠰᠠᠨ ᠨᠣᠪᠰᠢ ᠶ᠋ᠢᠨ ᠠᠮᠢᠲᠠᠨ! ᠨᠣᠳ ᠰᠢᠩᠭᠡᠴᠢᠭᠡᠭᠰᠡᠨ ᠤᠤ ᠴᠢᠮᠠ ᠳ᠋ᠤ᠌ ᠁ ᠭᠡᠳ ᠰᠣᠭᠲᠣᠭᠤ ᠨᠠᠮᠳᠠᠭ ᠤ᠋ᠨ ᠬᠤᠪᠴᠠᠰᠤ ᠬᠤᠨᠠᠷ᠂ ᠣᠢᠮᠣᠰᠤ ᠭᠤᠲᠤᠯ ᠢ᠋ ᠨᠢ ᠭᠠᠳᠠᠭᠰᠢ ᠰᠢᠲᠠᠪᠠ᠃
ᠱᠠᠯᠳᠠᠩ ᠨᠢᠴᠦᠭᠦᠯᠡᠭᠰᠡᠨ ᠣᠯᠬᠢᠶᠠ ᠦᠭᠡᠢ ᠰᠣᠭᠲᠣᠭᠤ ᠨᠠᠮᠳᠠᠭ ᠢ᠋ ᠨᠣᠬᠠᠢ ᠨᠢ ᠵᠢᠭᠰᠢᠨ ᠬᠣᠷᠭᠣᠭᠣᠵᠤ ᠪᠠᠷᠢᠵᠤ ᠢᠳᠡᠮᠡᠷ ᠠᠭᠰᠤᠷᠤᠨᠠ᠃
— ᠬᠣᠪᠢᠯ ᠠ᠋ ᠂ ᠴᠢ ᠨᠣᠬᠠᠢ ᠪᠠᠨ ᠁
— ᠲᠣᠨᠢᠯ ᠴᠠᠭᠠᠰᠢ ᠪᠠᠨ! ᠨᠣᠬᠠᠢ ᠢᠳᠡᠬᠦ ᠦᠭᠡᠢ ᠵᠣᠪᠠᠯᠭᠠ ᠭᠡᠵᠦ ᠬᠤᠪᠢᠯᠴᠡᠴᠡᠭ ᠡᠭᠦᠳᠡ ᠪᠡᠨ ᠫᠠᠰ ᠬᠢᠲᠡᠯᠡ ᠬᠠᠭᠠᠪᠠ᠃
ᠭᠠᠳᠠᠨᠠ ᠨᠣᠬᠠᠢ ᠠᠭᠰᠤᠷᠴᠤ᠂ ᠨᠠᠮᠳᠠᠭ ᠲᠠᠢ ᠵᠠᠭᠤᠷᠠᠯᠳᠤᠨᠠ᠃
— ᠬᠤᠪᠢᠯ ᠡ ! ᠴᠢ ᠬᠦᠯᠢᠶᠡᠵᠦ ᠪᠠᠢ ᠠᠯᠢ ᠨᠢᠭᠡ ᠡᠳᠦᠷ ᠁ ᠪᠤᠷᠤᠭᠤ ᠬᠠᠨᠳᠤᠭᠰᠠᠨ ᠪᠤᠯᠠᠭ ᠲᠤ ᠴᠢᠨᠢ ᠪᠣᠷᠣ ᠠᠵᠢᠷᠭᠠ ᠪᠠᠨ ᠤᠰᠤᠯᠠᠨᠠ ᠳ᠋ᠠ ᠬᠥ᠋᠂ ᠴᠢ ᠬᠠᠷᠠᠵᠤ ᠯᠠ ᠪᠠᠢ ᠭᠡᠵᠦ ᠬᠠᠰᠬᠢᠷᠤᠭᠰᠠᠭᠠᠷ ᠨᠠᠮᠳᠠᠭ ᠤ᠋ᠨ ᠳᠠᠭᠤ ᠲᠠᠰᠤᠷᠠᠪᠠ᠃
ᠮᠠᠷᠭᠠᠲᠤᠷ ᠥᠷᠯᠥᠭᠡ ᠦᠦᠷ ᠢ᠋ᠶ᠋ᠡᠷ ᠠᠪᠤ ᠨᠢ ᠠᠳᠤᠭᠤᠨ ᠠ᠋ᠴᠠ ᠬᠠᠷᠢᠵᠤ ᠢᠷᠡᠬᠦ ᠳ᠋ᠦ᠍ ᠨᠣᠬᠠᠢ ᠶ᠋ᠢᠨ ᠤᠶᠠᠭᠠᠨ ᠳᠡᠭᠡᠷᠡ ᠥᠷᠥᠭᠡᠰᠦᠨ ᠪᠤᠯᠢᠭᠠᠷᠢ ᠭᠤᠲᠤᠯ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ ᠭᠠᠢᠬᠠᠵᠤ 《ᠡᠨᠡ ᠶᠠᠭᠤᠨ ᠤ᠋ ᠭᠤᠲᠤᠯ ᠪᠣᠢ ? 》 ᠭᠡᠵᠦ ᠨᠣᠬᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠵᠠᠭᠤ ᠳ᠋ᠤ᠌ ᠣᠴᠢᠪᠠᠯ ᠬᠠᠯᠲᠠᠷ ᠨᠣᠬᠠᠢ ᠨᠢ ᠡᠵᠡᠨ ᠢ᠋ᠶ᠋ᠡᠨ ᠦᠵᠡᠭᠡᠳ ᠬᠠᠮᠠᠷ ᠠᠮᠠ ᠪᠡᠨ ᠳᠣᠯᠢᠶᠠᠨ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠠᠩᠭᠠᠨ ᠬᠥᠪ ᠬᠥᠪ ᠭᠡᠵᠦ ᠪᠠᠷᠠᠭᠤᠨ ᠡᠮᠦᠨᠡ ᠵᠦᠭ ᠲᠦ᠍ ᠬᠣᠷᠭᠣᠭᠣᠭᠰᠠᠨ ᠨᠢ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠ ᠬᠡᠯᠡᠬᠦ ᠰᠢᠭ ᠠᠵᠢ᠃
ᠰᠣᠳᠨᠠᠮ ᠡᠪᠦᠭᠡᠨ ᠢ᠋ ᠡᠭᠦᠳᠡ ᠠᠯᠬᠤᠩᠭᠤᠲᠠ ᠬᠤᠪᠢᠯᠴᠡᠴᠡᠭ ᠠᠪᠤ ᠪᠠᠨ ᠲᠡᠪᠡᠷᠢᠨ ᠱᠣᠭᠰᠢᠷᠠᠨ ᠤᠬᠢᠯᠠᠪᠠ᠃
— ᠮᠢᠨᠦ ᠥᠬᠢᠨ ᠶᠠᠭᠠᠬᠢᠪᠠ ?
— ᠁
— ᠪᠢᠲᠡᠭᠡᠢ ᠤᠬᠢᠯᠠ! ᠠᠪᠤ ᠳ᠋ᠠᠭᠠᠨ ᠬᠡᠯᠡ᠂ ᠬᠡᠨ ᠴᠢᠮᠠᠶ᠋ᠢ ᠶᠠᠭᠠᠬᠢᠪᠠ ?
— ᠮᠠᠭᠤ ᠠᠳᠤᠭᠤᠰᠤ ᠁
— ᠬᠡᠨ ᠪᠣᠢ?
— ᠰᠣᠭᠲᠣᠭᠤ ᠨᠠᠮᠲᠠᠭ! ᠢᠴᠢᠬᠦ ᠨᠢᠭᠤᠷ ᠲᠠᠭᠠᠨ ᠢᠯᠭᠢ ᠨᠠᠭᠠᠭᠰᠠᠨ ᠮᠠᠭᠤ ᠠᠳᠤᠭᠤᠰᠤ ᠁ ᠭᠡᠳ ᠣᠬᠢᠯᠠᠩᠨᠠᠭᠰᠠᠨ ᠳᠤ ᠰᠣᠳᠨᠠᠮ ᠡᠪᠦᠭᠡᠨ 《ᠵᠠ᠂ ᠪᠠᠢᠵᠠ !ᠬᠡᠦᠬᠡ ᠡ !》ᠭᠡᠳ ᠭᠠᠷᠴᠤ ᠮᠤᠷᠳᠠᠪᠠ ᠁
ᠲᠡᠭᠦᠨ ᠡᠴᠡ ᠬᠤᠢᠰᠢ ᠬᠤᠪᠢᠯᠴᠡᠴᠡᠭ ᠠᠪᠤ ᠪᠠᠨ ᠠᠳᠤᠭᠤᠨ ᠤ᠋ ᠮᠠᠨᠠᠭᠠᠨ ᠳ᠋ᠤ᠌ ᠶᠠᠪᠤᠭᠰᠠᠭᠠᠷ ᠡᠭᠦᠳᠡ ᠪᠡᠨ ᠳᠣᠲᠣᠷᠠ ᠠ᠋ᠴᠠ ᠨᠢ ᠲᠡᠪᠡᠭᠡᠯᠡᠨ ᠤᠶᠠᠳᠠᠭ ᠪᠤᠯᠵᠠᠢ᠃
ᠥᠰᠴᠦ ᠬᠦᠢᠴᠡᠭᠰᠡᠨ ᠰᠤᠭᠤ ᠰᠢᠭ᠋ ᠬᠡᠦᠬᠡᠨ ᠪᠡᠶᠡ ᠳ᠋ᠦ᠍ ᠡᠷᠡ ᠰᠣᠭᠣᠭ ᠤᠨ ᠠᠨᠢᠷ ᠵᠠᠩᠭᠢ ᠬᠠᠶᠠ ᠲᠠᠯᠠ ᠶᠢᠨ ᠵᠡᠷᠭᠡᠯᠭᠡᠨ ᠰᠢᠭ ᠭᠡᠳᠡᠭᠡᠯᠡᠨ ᠢᠷᠡᠬᠦ ᠶᠢ ᠬᠤᠪᠢᠯᠴᠡᠴᠡᠭ ᠢᠳᠡᠭ ᠢᠳᠡᠭ ᠢ᠋ᠶ᠋ᠡᠷ ᠪᠣᠳᠣᠯ ᠳᠠᠭᠠᠨ ᠮᠡᠳᠡᠷᠡᠨ ᠬᠦᠯᠢᠶᠡᠳᠡᠭ ᠪᠣᠯᠤᠯᠠ᠃ ᠬᠠᠮᠢᠭᠠ ᠥᠯᠥ᠍ ᠲᠠᠨᠢᠬᠤ ᠪᠥᠬᠡ ᠴᠤ᠌ ᠶᠤᠮ ᠤᠤ ᠠᠳᠤᠭᠤᠴᠢᠨ ᠴᠤ᠌ ᠶᠤᠮ ᠤᠤ ? ᠠᠯᠢ ᠡᠰᠡᠬᠦᠯᠡ ᠰᠢᠯᠢ ᠶᠢᠨ ᠰᠠᠢᠨ ᠡᠷᠡ ᠶᠢᠨ ᠨᠢᠭᠡ ᠶᠢ ᠨᠢ ᠬᠡᠢ ᠲᠠᠭᠠᠮᠠᠭ ᠢᠶᠠᠷ ᠪᠣᠳᠣᠯ ᠳᠠᠭᠠᠨ ᠠᠮᠢᠯᠠᠭᠤᠯᠤᠨ ᠤᠷᠭᠤᠭᠤᠯᠵᠤ᠂ ᠬᠠᠩᠬᠠᠭᠠᠷ ᠲᠣᠮᠣ ᠴᠡᠭᠡᠵᠢᠨ ᠳ᠋ᠦ᠍ᠨᠢ ᠴᠡᠴᠡᠭ ᠦ᠋ᠨ ᠪᠤᠯᠪᠠᠷᠠᠢ ᠳᠡᠯᠪᠢ ᠰᠢᠭ ᠬᠥᠭᠡᠷᠦᠬᠦᠨ ᠴᠢᠷᠠᠢ ᠪᠠᠨ ᠨᠠᠭᠠᠵᠤ ᠪᠥᠬᠡ ᠬᠠᠲᠠᠭᠤ ᠪᠡᠯᠭᠡᠭᠦᠰᠦ ᠪᠡᠷ ᠨᠢ ᠢᠪ ᠲᠡᠪᠡᠷᠢᠴᠢᠭᠡᠭᠰᠡᠨ ᠁ ᠭᠡᠵᠦ ᠡᠯᠳᠡᠪ ᠢ᠋ ᠪᠣᠳᠣᠬᠤ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠬᠠᠶᠠ ᠨᠢᠭᠤᠷ ᠨᠢ ᠨᠢᠯᠴᠢᠭᠢᠨᠡᠳᠡᠭ ᠪᠠᠢᠪᠠ᠃
ᠲᠡᠭᠷᠢ ᠶᠢᠨ ᠨᠠᠷᠠ ᠬᠤᠷᠠ ᠶᠢ ᠲᠡᠩᠴᠡᠭᠦᠬᠡᠨ ᠡᠳ᠋ᠯᠡᠬᠦ ᠬᠤᠪᠢ ᠲᠠᠪᠢᠯᠠᠩ ᠲᠠᠢ ᠡᠷᠡᠭᠦᠯᠬᠡᠨ ᠰᠡᠷᠪᠡᠯᠵᠡᠭ᠍ᠰᠡᠨ ᠲᠣᠷᠭᠠᠨ ᠴᠣᠮᠣᠷᠯᠢᠭ ᠢ ᠵᠥᠨᠦᠭᠰᠡᠨ ᠪᠤᠬᠠᠨ ᠤ ᠬᠣᠬᠢᠰᠤ ᠳ᠋ᠤ᠌ ᠲᠠᠰᠤ ᠭᠢᠰᠬᠢᠭᠦᠯᠬᠦ ᠰᠢᠭ ᠡᠴᠢᠭᠡ ᠡᠴᠡ ᠪᠡᠨ ᠪᠤᠰᠤ ᠡᠷᠡ ᠬᠥᠮᠦᠨ ᠪᠦᠬᠦᠨ ᠢ᠋ ᠰᠣᠭᠲᠣᠭᠤ ᠨᠠᠮᠳᠠᠭ ᠰᠢᠭ᠋ ᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ ᠵᠢᠭᠰᠢᠬᠦ ᠪᠣᠯᠪᠠ᠃ ᠭᠡᠬᠦ ᠳ᠋ᠦ᠍ ᠥᠨᠥᠳᠥᠷ ᠮᠢᠩᠭᠠᠨᠪᠤᠤ ᠁ ᠪᠢᠰᠢ ᠠ᠋ ! ᠬᠠᠪᠤᠷ ᠢ᠋ᠶ᠋ᠠᠷ ᠡᠨᠡ ᠰᠠᠯᠠᠢ ᠨᠢ ᠬᠠᠲᠠᠭᠠᠳᠤᠢ ᠥᠴᠦᠬᠡᠨ ᠠᠮᠢᠲᠠᠨ ᠢ᠋ ᠲᠡᠪᠡᠷᠢᠵᠦ ᠢᠷᠡᠭᠰᠡᠨ ᠬᠦᠳᠡᠷ ᠪᠣᠷᠣ ᠡᠷᠡ ᠶ᠋ᠢ ᠬᠤᠪᠢᠯᠴᠡᠴᠡᠭ ᠠᠩᠬᠠ ᠬᠠᠷᠠᠮᠠᠭᠴᠠ ᠬᠡᠦᠬᠡᠨ ᠤᠶᠠᠬᠠᠨ ᠰᠡᠳᠬᠢᠯ ᠨᠢ ᠣᠪᠣᠯᠵᠠᠵᠤ ᠡᠬᠢᠯᠡᠭᠰᠡᠨ ᠢ᠋ ᠥᠪᠡᠷ ᠢ᠋ᠶ᠋ᠡᠨ ᠴᠤ᠌ ᠭᠠᠢᠬᠠᠨᠠᠮ ᠪᠢᠯᠡ᠃ ᠲᠠᠯᠠ ᠶ᠋ᠢᠨ ᠪᠣᠷᠣ ᠭᠥᠷᠦᠭᠡᠰᠦᠨ ᠦ᠌ ᠥᠴᠦᠬᠡᠨ ᠠᠮᠢ ᠶ᠋ᠢ ᠦᠷᠦ ᠡᠪᠡᠳᠴᠦ ᠲᠡᠪᠡᠷᠢᠵᠦ ᠢᠷᠡᠭᠡᠳ ᠠᠢᠯ ᠭᠡᠷ ᠲᠦ᠍ ᠣᠷᠬᠢᠭᠠᠳ ᠶᠠᠪᠤᠭᠰᠠᠨ ᠬᠥᠷᠥᠰᠥᠯᠢᠭ ᠪᠣᠷᠣ ᠡᠷᠡ ᠶ᠋ᠢ ᠲᠡᠷᠡ ᠮᠠᠷᠲᠠᠵᠤ ᠦᠯᠦ ᠴᠢᠳᠠᠨᠠ᠃ ᠥᠨᠥᠳᠥᠷ ᠰᠥᠨᠢ ᠪᠡᠷ ᠭᠡᠷ ᠲᠦ᠋ᠨᠢ ᠬᠦᠷᠦᠭᠡᠳ ᠢᠷᠡᠬᠦᠯᠡᠷ ᠪᠠᠢᠳᠠᠭ ᠢ᠋ᠶ᠋ᠠᠨ ᠲᠡᠮᠲᠡᠷᠢᠵᠦ ᠢᠳᠡᠭᠦᠯᠦᠶᠡ᠂ ᠤᠤᠭᠤᠯᠭᠠᠶᠠ ᠭᠡᠳ ᠲᠡᠷᠡ ᠡᠷᠡ ᠶ᠋ᠢ ᠣᠭᠲᠣᠬᠠᠨ ᠴᠤ᠌ ᠬᠦᠨᠡᠢᠷᠬᠡᠭᠰᠡᠨ ᠦᠭᠡᠢ ᠦᠨᠡᠨ ᠵᠢᠷᠦᠬᠡᠨ ᠡᠴᠡ ᠪᠡᠨ ᠳᠣᠲᠣᠨᠣᠴᠢᠯᠠᠨ ᠰᠠᠨᠠᠵᠠᠢ᠃ ᠮᠢᠩᠭᠠᠨᠪᠤᠤ ᠲᠠᠢ ᠠᠩᠬᠠ ᠠᠭᠤᠯᠵᠠᠭᠰᠠᠨ ᠲᠡᠷᠡ ᠡᠳᠦᠷ ᠡᠴᠡ ᠡᠬᠢᠯᠡᠭᠡᠳ ᠬᠡᠦᠬᠡᠨ ᠪᠣᠳᠣᠯ ᠳ᠋ᠤᠨᠢ ᠳᠣᠯᠭᠢᠶᠠ ᠭᠠᠷᠴᠤ ᠤᠳᠠᠭᠠᠨ ᠳ᠋ᠠᠭᠠᠨ ᠪᠦᠷ ᠳᠠᠪᠠᠯᠭᠠᠯᠠᠵᠤ ᠡᠢᠮᠦᠷᠬᠦᠦ ᠡᠷᠡ ᠬᠥᠮᠦᠨ ᠦ᠌ ᠠᠷᠤ ᠠ᠋ᠴᠠ ᠪᠠᠢᠨ ᠪᠠᠢᠨ ᠪᠣᠳᠣᠯ ᠤ᠋ᠨ ᠵᠢᠯᠣᠭᠣ ᠠᠯᠳᠠᠳᠠᠭ ᠪᠣᠯᠪᠠ᠃
《 ᠡᠷᠡ ᠬᠥᠮᠥᠨ ᠥᠷᠥ᠍ ᠵᠥᠭᠡᠯᠡᠨ ᠪᠣᠯ ᠳᠣᠷᠣᠢ ᠶᠢᠨ ᠲᠡᠮᠲᠡᠭ ᠭᠡᠳᠡᠭ᠃ ᠮᠢᠩᠭᠠᠨᠪᠤᠤ ᠴᠢ ᠳᠣᠷᠣᠢ ᠤᠤ? ᠪᠢᠰᠢ᠂ ᠴᠢ ᠳᠣᠷᠣᠢ ᠪᠢᠰᠢ! ᠴᠢ ᠪᠣᠯ ᠰᠠᠢᠬᠠᠨ ᠰᠡᠳᠬᠢᠯ ᠲᠡᠢ ᠰᠢᠵᠠᠷᠠᠭᠤᠨ ᠡᠷᠡ ᠪᠠᠢᠬᠤ ᠶᠣᠰᠣᠲᠠᠢ᠃ ᠬᠡᠷᠪᠡ ᠴᠢ ᠁ ᠶᠦᠮ ᠪᠣᠯ ᠪᠢ ᠬᠡᠦᠬᠡᠨ ᠬᠥᠮᠦᠨ ᠦ᠌ ᠪᠦᠬᠦ ᠬᠠᠢᠷᠠ ᠪᠠᠨ ᠶᠡᠭᠦᠯᠡᠨᠡ ᠳᠡ ᠴᠢᠮᠠ ᠳ᠋ᠤ᠌ ᠁ 》ᠭᠡᠵᠦ ᠰᠡᠳᠬᠢᠯ ᠳ᠋ᠡᠭᠡᠨ ᠰᠢᠪᠡᠨᠡᠨ ᠬᠡᠪᠲᠡᠬᠦ ᠳ᠋ᠦ᠍ ᠨᠣᠢᠷ ᠢ᠋ ᠨᠢ ᠨᠣᠬᠠᠢ ᠢᠳᠡᠭᠰᠡᠨ ᠰᠢᠭ ᠭᠥᠯᠢᠢᠴᠢᠭᠡᠭᠡᠳ ᠲᠠᠪᠠ ᠠᠯᠳᠠᠭᠤᠯᠤᠨᠠ᠃
᠁ ᠬᠡᠦᠬᠡᠨ ᠮᠠᠬᠠᠪᠣᠳ ᠨᠢ ᠴᠡᠴᠡᠷᠬᠢᠯᠡᠭᠡᠳ ᠪᠠᠢᠬᠤ ᠴᠤ᠌ ᠰᠢᠭ᠋᠂ ᠬᠥᠬᠥ ᠶ᠋ᠢᠨ ᠬᠢᠨᠢ ᠲᠣᠷᠭᠠᠨ ᠴᠡᠴᠡᠭ ᠨᠢ ᠦᠯᠦ ᠮᠡᠳᠡᠭ ᠰᠠᠷᠪᠠᠢᠴᠢᠬᠠᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠨᠠ᠃ ᠬᠡᠨ ᠨᠢᠭᠡ ᠡᠷᠡ ᠬᠦᠢᠰᠦᠲᠡᠨ ᠢ᠋ᠶ᠋ᠡᠷ ᠰᠠᠷᠪᠠᠢᠭᠰᠠᠨ ᠬᠥᠬᠥ ᠶ᠋ᠢᠨ ᠲᠣᠷᠭᠠᠨ ᠴᠡᠴᠡᠭ ᠢ᠋ ᠬᠥᠨᠳᠡᠭᠦᠯᠦᠭᠡᠳ ᠪᠦᠬᠦ ᠪᠡᠶᠡ ᠨᠢ ᠡᠷᠪᠡᠭᠡᠨᠡᠨ ᠮᠢᠨᠴᠦᠭᠦᠷᠡᠵᠦ᠂ ᠨᠢᠭᠡᠨ ᠵᠤᠷᠪᠤᠰ ᠬᠠᠢᠯ ᠤ᠋ᠨ ᠬᠠᠯᠢᠶᠠ ᠰᠢᠭ᠋ ᠳᠣᠷᠣᠭᠰᠢ ᠪᠠᠨ ᠤᠷᠤᠰᠴᠤ ᠳᠣᠣᠷᠠᠲᠤ ᠨᠢᠭᠤᠴᠠᠭᠠᠢ ᠶ᠋ᠢ ᠨᠢ ᠴᠢᠭᠢᠭᠲᠦᠭᠦᠯᠦᠨᠡ ᠁
ᠮᠢᠩᠭᠠᠨᠪᠤᠤ ᠨᠡᠬᠡᠢ ᠬᠥᠨᠵᠢᠯᠡ ᠳ᠋ᠦ᠍ ᠳᠤᠯᠠᠭᠠᠬᠠᠨ ᠬᠡᠪᠲᠡᠬᠦ ᠳ᠋ᠡᠭᠡᠨ ᠬᠡᠳᠦᠢᠪᠡᠷ 《 ᠥᠨᠥ ᠰᠥᠨᠢ ᠲᠣᠮᠣᠭᠠᠲᠠᠢ ᠯᠠ ᠪᠠᠢᠵᠤ ᠦᠵᠡᠶᠡ᠂ ᠠᠢᠯ ᠤ᠋ᠨ ᠬᠡᠦᠬᠡᠨ ᠢ ᠴᠣᠴᠢᠭᠠᠵᠤ᠂ ᠬᠦᠨᠳᠦ ᠪᠡᠨ ᠪᠠᠷᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠤᠨᠲᠠᠵᠤ ᠤᠷᠭᠢᠶᠠ! 》 ᠭᠡᠵᠦ ᠪᠡᠶᠡ ᠪᠡᠨ ᠪᠠᠷᠢᠬᠤ ᠪᠣᠯᠪᠠᠴᠤ ᠵᠡᠭᠦᠨ ᠬᠠᠶᠠᠭᠠ ᠪᠠᠷ ᠢᠨᠵᠠᠭᠠ ᠲᠡᠪᠡᠷᠢᠵᠦ ᠬᠡᠪᠲᠡᠭᠡ ᠬᠤᠪᠢᠯᠴᠡᠴᠡᠭ ᠤᠨ ᠨᠠᠮᠬᠠᠨ ᠰᠡᠭᠦᠷᠡᠰᠦ ᠠᠯᠳᠠᠵᠤ ᠡᠷᠭᠢᠵᠦ ᠤᠷᠪᠠᠨ ᠤᠨᠲᠠᠵᠤ ᠣᠷᠣᠬᠤ ᠦᠭᠡᠢ ᠪᠠᠢᠭᠠ ᠳ᠋ᠤᠨᠢ ᠡᠪᠦᠷ ᠲᠤᠨᠢ ᠰᠢᠷᠭᠤᠴᠢᠬᠠᠮᠠᠷ ᠰᠠᠨᠠᠭᠳᠠᠬᠤ ᠶ᠋ᠢ ᠶᠠᠭᠤᠨ ᠥᠭᠦᠯᠡᠨᠡ⁈ ᠮᠢᠩᠭᠠᠨᠪᠤᠤ ᠡᠢᠨ ᠬᠦ ᠠᠴᠠ ᠪᠣᠳᠣᠯ ᠤ᠋ᠨ ᠬᠣᠭᠣᠷᠣᠨᠳᠣ ᠬᠣᠯᠬᠢᠵᠤ ᠬᠡᠪᠲᠡᠭᠰᠡᠭᠡᠷ ᠪᠦᠬᠦᠯᠢ ᠡᠳᠦᠷᠵᠢᠨ ᠤᠨᠤᠭᠠᠨ ᠳᠡᠭᠡᠷᠡ ᠳᠤᠩᠰᠢᠭᠤᠯᠤᠭᠰᠠᠨ ᠶᠠᠳᠠᠷᠠᠭᠠᠨ ᠳ᠋ᠤ᠌ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠤᠨᠲᠠᠭᠠᠳ ᠥᠭᠴᠡᠢ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠡᠪᠦᠷ ᠳᠣᠲᠣᠷᠠ ᠨᠢ ᠥᠭᠡᠬᠦ ᠰᠢᠭ ᠵᠥᠭᠡᠯᠡᠨ ᠶᠠᠭᠤᠮᠠ ᠪᠥᠮᠪᠥᠯᠵᠡᠨ ᠬᠥᠳᠡᠯᠬᠦ ᠳ᠋ᠦ᠍ ᠲᠡᠷᠡ ᠬᠤᠪᠢᠯᠴᠡᠴᠡᠭ ᠢ ᠡᠯᠢᠭᠡᠨ ᠳ᠋ᠡᠭᠡᠨ ᠴᠢᠪ ᠴᠢᠩᠭᠠ ᠲᠡᠪᠡᠷᠢᠴᠢᠬᠡᠭᠰᠡᠨ ᠬᠡᠪᠲᠡᠨᠡ᠃
ᠬᠤᠪᠢᠯᠴᠡᠴᠡᠭ᠂ ᠮᠢᠩᠭᠠᠨᠪᠤᠤ ᠶ᠋ᠢᠨ ᠬᠠᠩᠬᠠᠭᠠᠷ ᠡᠪᠴᠢᠭᠦᠨ ᠳᠡᠭᠡᠷᠡ ᠡᠯᠢᠭᠡᠳᠡᠵᠦ ᠬᠡᠪᠲᠡᠴᠢᠭᠡᠭᠡᠳ᠄
— ᠮᠢᠩᠭᠠᠨᠪᠤᠤ ᠠᠬᠠ ᠨᠠᠮᠠᠶ᠋ᠢ ᠰᠠᠨᠠᠭᠰᠠᠨ ᠤᠤ ? ᠭᠡᠵᠦ ᠬᠣᠭᠣᠯᠠᠢ ᠨᠢ ᠴᠡᠴᠡᠷᠬᠢᠯᠡᠨ ᠠᠰᠠᠭᠤᠪᠠ᠃
— ᠰᠠᠨᠠᠭᠠ ᠦᠭᠡᠢ ᠶᠦᠮ ᠪᠣᠯ ᠶᠠᠭᠤ ᠭᠡᠵᠦ ᠡᠨᠡ ᠬᠠᠷᠠ ᠴᠠᠰᠤᠨ ᠳ᠋ᠤ᠌ ᠲᠡᠷᠡ ᠬᠣᠯᠠ ᠠ᠋ᠴᠠ ᠵᠣᠷᠢᠵᠤ ᠢᠷᠡᠬᠦ ᠪᠣᠢ ᠭᠡᠵᠦ ᠮᠢᠩᠭᠠᠨᠪᠤᠤ ᠬᠠᠷᠢᠭᠤᠯᠤᠯᠠ᠃
— ᠲᠡᠭᠡᠭᠡᠳ ᠶᠠᠭᠤ ᠭᠡᠵᠦ ᠮᠢᠨᠦ ᠡᠪᠦᠷ ᠲᠦ᠍ ᠁ ᠭᠡᠳ ᠴᠢᠷᠠᠢ ᠨᠢ ᠨᠢᠯᠴᠢᠭᠢᠨᠡᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠢᠩᠭᠠᠨᠪᠤᠤ ᠶ᠋ᠢᠨ ᠬᠠᠴᠠᠷ ᠢ᠋ ᠢᠯᠪᠢᠨᠡ᠃
— ᠴᠢᠮᠠ ᠪᠠᠨ ᠠᠢᠬᠤᠪᠲᠤᠷ ᠰᠠᠨᠠᠯᠠ ᠰᠢᠦ ! ᠠᠩᠬᠠ ᠴᠢᠮᠠᠶ᠋ᠢ ᠬᠠᠷᠠᠩᠭᠤᠲᠠ ᠪᠠᠨ ᠬᠠᠢᠷᠠ ᠡᠭᠦᠰᠴᠦ ᠬᠠᠮᠤᠭ ᠪᠡᠶᠡ ᠬᠠᠢᠯᠴᠢᠬᠠᠬᠤ ᠠᠯᠳᠠᠯᠠ ᠁
— ᠰᠠᠨᠠᠭᠰᠠᠨ ᠪᠠᠢᠲᠠᠯᠠ ᠪᠠᠨ ᠡᠴᠢᠨᠡᠭᠡᠨ ᠤᠳᠠᠭᠠᠳ ᠢᠷᠡᠳᠡᠭ ᠦᠭᠡᠢ ᠨᠢ ᠭᠡᠰᠡᠨ ᠳ᠋ᠦ᠍ ᠮᠢᠩᠭᠠᠨᠪᠤᠤ ᠬᠤᠪᠢᠯᠴᠡᠴᠡᠭ ᠤᠨ ᠳᠠᠯᠤ ᠮᠥᠷᠥ ᠡᠴᠡ ᠠᠪᠤᠭᠠᠳ ᠲᠠᠰᠢᠶᠠ ᠰᠠᠯᠲᠠᠭᠠ ᠬᠦᠷᠲᠡᠯᠡ ᠥᠬᠥᠭᠡᠷᠳᠡᠨ ᠢᠯᠪᠢᠭᠡᠳ᠄
— ᠴᠢᠮᠠ ᠲᠠᠢ ᠪᠠᠨ ᠬᠤᠷᠳᠤᠬᠠᠨ ᠠᠭᠤᠯᠵᠠᠶᠠ ᠭᠡᠰᠡᠨ ᠪᠣᠳᠣᠯ ᠳᠣᠲᠣᠷᠠ ᠭᠠᠯ ᠰᠢᠲᠠᠭᠰᠠᠨ ᠰᠢᠭ᠋ ᠪᠣᠯᠤᠭᠠ ᠶ᠋ᠢ ᠬᠡᠨ ᠴᠤ᠌ ᠣᠢᠯᠠᠭᠠᠬᠤ ᠦᠭᠡᠢ᠃ ᠵᠠᠪ ᠴᠢᠯᠥᠭᠡ᠂ ᠡᠪ ᠵᠦᠢ ᠬᠦᠯᠢᠶᠡᠭᠡᠳ ᠤᠲᠡᠯᠡ᠃ ᠡᠪᠦᠯ ᠦ᠋ᠨ ᠠᠭᠤᠷ ᠣᠷᠣᠬᠤ ᠲᠠᠢ ᠵᠡᠷᠭᠡ ᠭᠣᠣ ᠰᠧᠯᠢᠩ ᠦ᠋ᠨ ᠲᠡᠮᠡᠭᠡᠳ ᠡᠴᠡ ᠬᠡᠳᠦᠨ ᠵᠠᠭᠤ ᠶ᠋ᠢ ᠨᠢ ᠳᠣᠲᠣᠷᠠ ᠭᠠᠵᠠᠷ ᠤᠷᠤᠭᠤ ᠪᠣᠷᠣᠯᠠᠭᠤᠯᠵᠤ ᠶᠠᠪᠤᠭᠤᠯᠤᠭᠠᠳ ᠵᠠᠭᠤᠭᠠᠳ ᠲᠡᠮᠡᠭᠡ ᠶᠢ ᠮᠤᠨᠠ ᠠᠭᠤᠯᠠ ᠳᠠᠪᠠᠭᠤᠯᠤᠨ ᠬᠣᠢᠰᠢ ᠪᠠᠨ ᠬᠥᠭᠡᠭᠡᠪᠡ᠃ ᠲᠡᠭᠡᠭᠡᠳ ᠭᠠᠮᠢᠨ ᠴᠡᠷᠢᠭ ᠦ᠋ᠨ ᠲᠡᠮᠡᠭᠡᠳ ᠨᠤᠲᠤᠭ ᠵᠦᠭ ᠢ᠋ᠶ᠋ᠡᠨ ᠰᠥᠨᠢ ᠪᠡᠷ ᠳᠤᠲᠠᠭᠠᠴᠢᠬᠠᠯᠠ ᠭᠡᠳᠡᠭ ᠨᠡᠷᠡ ᠵᠢᠭᠠᠵᠤ ᠭᠣᠣ ᠰᠧᠯᠢᠩ ᠡᠴᠡ ᠴᠢᠯᠥᠭᠡ ᠠᠢᠯᠠᠳᠬᠠᠵᠤ ᠠᠪᠤᠭᠠᠳ ᠴᠢᠮᠠ ᠳᠡᠭᠡᠷᠡ ᠪᠡᠨ ᠢᠷᠡᠭᠰᠡᠨ ᠨᠢ ᠡᠨᠡ ᠭᠡᠳ ᠮᠢᠩᠭᠠᠨᠪᠤᠤ ᠭᠡᠨᠡᠳᠲᠡ ᠬᠥᠯᠪᠡᠷᠢᠨ ᠬᠤᠪᠢᠯᠴᠡᠴᠡᠭ ᠤᠨ ᠳᠡᠭᠡᠷᠡ ᠨᠢ ᠭᠠᠷᠤᠭᠠᠳ ᠭᠠᠯᠵᠠᠭᠤᠷᠠᠭᠰᠠᠨ ᠶᠤᠮ ᠰᠢᠭ᠋ ᠲᠡᠭᠦᠨ ᠦ᠌ ᠬᠡᠦᠬᠡᠨ ᠴᠠᠭᠠᠨ ᠪᠡᠶᠡ ᠶ᠋ᠢ ᠬᠣᠭᠣᠰᠣᠨ ᠵᠠᠢ ᠦᠭᠡᠢ ᠡᠷᠪᠡᠭᠡᠨᠡᠭᠦᠯᠦᠨ ᠦᠨᠦᠰᠴᠦ᠂ ᠬᠣᠶᠠᠷ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠪᠣᠨᠲᠣᠭᠣᠷ ᠬᠥᠬᠥᠨ ᠦ᠌ ᠬᠢᠨᠢ ᠲᠣᠷᠭᠠᠨ ᠴᠡᠴᠡᠭ ᠢ᠋ ᠵᠥᠭᠡᠯᠡᠨ ᠱᠦᠷᠭᠦᠭᠡᠪᠡᠯ ᠬᠤᠪᠢᠯᠴᠡᠴᠡᠭ ᠨᠢᠷᠤᠭᠤ ᠪᠠᠷ ᠢᠶᠠᠨ ᠬᠣᠲᠣᠯᠵᠠᠵᠤ ᠨᠠᠮᠤᠭᠤᠬᠠᠨ ᠢᠷᠠᠭᠯᠠᠪᠠ ᠁
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ <ᠬᠡᠯᠡ ᠪᠢᠴᠢᠭ> ᠬᠣᠯᠪᠣᠭᠠ