ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ < ᠳᠡᠭᠡᠳᠦ > – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠨᠠᠢ᠍ᠮᠠ> Хан мунын сүүрс < дээд > – Мөнх зохиоов ᠂ Тэргүүн бодь – Нэгдүгээр бүлэг <8>
327ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠨᠠᠢ᠍ᠮᠠ>
— ᠵᠠ᠂ ᠠᠮᠤᠷ ᠰᠠᠢᠨ ᠤᠤ?
— ᠰᠠᠢᠨ ᠰᠠᠢᠨ᠂ ᠲᠠ ᠨᠠᠷ ᠰᠠᠢᠨ ᠶᠠᠪᠤᠵᠠᠭᠠᠵᠤ ᠪᠠᠢᠨᠠ ᠤᠤ?
— ᠪᠣᠷᠣᠭᠠᠨ ᠬᠤᠷᠠ ᠡᠯᠪᠡᠭ ᠲᠠᠢ ᠰᠠᠢᠬᠠᠨ ᠬᠠᠪᠤᠷᠵᠢᠵᠤ ᠪᠠᠢᠨᠠ ᠤᠤ?
— ᠰᠠᠢᠨ!
ᠢᠷᠡᠭᠰᠡᠨ ᠬᠣᠶᠠᠷ ᠵᠣᠴᠢᠨ ᠭᠡᠷ ᠲᠦ ᠲᠥᠬᠥᠵᠦ ᠢᠷᠡᠭᠡᠳ ᠨᠣᠬᠠᠢ ᠬᠣᠷᠢᠵᠤ ᠵᠣᠭᠰᠣᠭᠰᠠᠨ ᠭᠡᠷ ᠦᠨ ᠡᠵᠡᠭᠲᠡᠢ ᠯᠦ᠋ᠭᠡ ᠡᠪᠦᠳᠦᠭ ᠰᠥᠬᠥᠷᠡᠨ ᠠᠮᠤᠷ ᠡᠷᠢᠵᠤ ᠮᠡᠨᠳᠦᠯᠡᠪᠡ᠃ ᠭᠡᠷ ᠦ᠋ᠨ ᠡᠵᠡᠭᠲᠡᠢ᠄
— ᠵᠠ᠂ ᠲᠣᠲᠤᠭᠰᠢ ᠰᠠᠭᠠᠲᠠ! ᠭᠡᠬᠦ ᠳᠦ ᠱᠤᠤᠮᠠᠰᠠ᠂ ᠭᠠᠨᠵᠤᠭᠠ ᠳᠠᠯᠢᠩ ᠳᠣᠬᠣᠢᠪᠴᠢᠯᠠᠭᠰᠠᠨ ᠥᠯᠥ᠍ ᠲᠠᠨᠢᠬᠤ ᠬᠣᠶᠠᠷ ᠬᠠᠷᠠ ᠬᠥᠮᠥᠨ ᠭᠡᠷ ᠲᠦ ᠣᠷᠣᠪᠠ᠃
ᠠᠮᠠᠷᠠᠭ ᠬᠥᠮᠥᠨ ᠮᠢᠨᠢ ᠢᠷᠡᠵᠦ ᠶᠠᠪᠤᠭᠠ ᠭᠡᠵᠦ ᠠᠨᠳᠠᠭᠤᠷᠠᠵᠤ ᠰᠡᠳᠬᠢᠯ ᠴᠠᠯᠭᠢᠨ ᠪᠠᠶᠠᠷ ᠭᠣᠮᠣᠳᠠᠯ ᠤᠨ ᠨᠢᠯᠪᠤᠰᠤ ᠪᠠᠨ ᠳᠡᠰᠭᠡᠯ ᠦᠭᠡᠢ ᠠᠰᠬᠠᠷᠠᠭᠤᠯᠤᠭᠰᠠᠨ ᠬᠤᠪᠢᠯᠴᠡᠴᠡᠭ ᠢᠭᠲᠦᠯᠦᠭᠰᠡᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠠᠰᠠᠵᠤ ᠡᠨᠡ ᠬᠣᠶᠠᠷ ᠦᠯᠦ ᠲᠠᠨᠢᠬᠤ ᠵᠣᠴᠢᠨ ᠳᠤ ᠴᠠᠢ ᠠᠶᠠᠭᠠᠯᠠᠵᠤ ᠢᠳᠡᠭᠡ ᠪᠤᠳᠠᠭᠠ ᠲᠠᠯᠪᠢᠬᠤ ᠪᠠᠷ ᠶᠠᠭᠠᠷᠠᠨᠠ᠃
ᠬᠠᠮᠢᠭᠠ ᠬᠣᠯᠠ ᠵᠢᠷᠪᠡᠯᠵᠡᠵᠦ ᠠᠢᠰᠤᠢ ᠮᠣᠷᠢᠲᠠᠢ ᠬᠥᠮᠥᠨ ᠦ ᠪᠠᠷᠠ ᠬᠠᠷᠠᠨ ᠬᠣᠪᠣᠩ ᠳᠡᠭᠡᠷᠡ ᠪᠡᠨ ᠭᠠᠤᠯᠢᠨ ᠳᠡᠪᠦᠷᠡ ᠲᠠᠢ ᠴᠠᠢ ᠲᠠᠯᠪᠢᠵᠤ ᠳᠠᠷᠭᠢᠯᠤᠭᠤᠯᠤᠭᠰᠠᠭᠠᠷ ᠪᠠᠢᠵᠤ ᠢᠳᠡᠭᠡᠰᠢᠬᠦ ᠡᠴᠡ ᠪᠡᠨ ᠴᠠᠭᠠᠰᠢ ᠪᠣᠯᠣᠭᠰᠠᠨ ᠤᠯᠠᠭᠠᠨ ᠬᠦᠷᠡᠩ ᠴᠠᠢ ᠠᠶᠠᠭᠠᠯᠠᠵᠤ ᠢᠷᠡᠭᠰᠡᠨ ᠵᠣᠴᠢᠳ ᠲᠤ ᠪᠠᠷᠢᠪᠠᠯ ᠥᠨᠳᠥᠷ ᠰᠢᠭ ᠪᠡᠶᠡ ᠲᠠᠢ᠂ ᠵᠤᠷᠪᠤᠰ ᠨᠠᠷᠢᠨ ᠰᠠᠬᠠᠯ ᠢ ᠤᠷᠤᠭᠤᠯ ᠴᠢᠮᠡᠵᠦ ᠵᠠᠰᠠᠭᠰᠠᠨ ᠨᠢᠭᠡ ᠨᠢ ᠠᠶᠠᠭᠠᠯᠠᠭᠰᠠᠨ ᠴᠠᠢ ᠠᠴᠠ ᠣᠭᠣᠴᠢᠭᠠᠳ᠄
— ᠵᠦᠳᠡᠭ ᠰᠠᠢᠬᠠᠨ ᠴᠠᠢ ᠪᠠᠢᠩᠭᠤᠨ ᠴᠣᠬᠣᠮ ᠴᠤ᠌ ᠨᠢᠭᠡ 《 ᠡᠯᠵᠢᠭᠡ ᠰᠢᠪᠠᠷᠳᠠᠵᠤ᠂ ᠡᠵᠢ ᠰᠠᠨᠠᠭᠳᠠᠮᠠ ᠴᠠᠢ ᠪᠠᠢᠬᠤ ᠰᠢᠦ ᠭᠡᠳ ᠶᠡᠬᠡ ᠵᠤᠤ ᠶᠢᠨ ᠠᠶᠠᠯᠭᠤ ᠳᠠᠭᠤᠷᠢᠶᠠᠨ ᠡᠳ᠋ ᠦᠭᠡᠢᠯᠡᠨ ᠳᠤᠤᠭᠠᠷᠴᠤ ᠰᠠᠨᠠᠭᠠᠨ ᠳ᠋ᠤᠨᠢ ᠲᠠᠭᠠᠷᠠᠭᠰᠠᠨ ᠰᠠᠢᠬᠠᠨ ᠴᠠᠢ ᠠᠮᠰᠠᠨ ᠲᠠᠮᠰᠢᠶᠠᠯᠠᠵᠤ ᠪᠠᠢᠯᠠ᠃
ᠰᠡᠳᠬᠢᠯ ᠦᠨ ᠠᠮᠠᠷᠠᠭ ᠲᠠᠭᠠᠨ ᠬᠠᠯᠠᠭᠤᠨ ᠪᠦᠯᠢᠶᠡᠨ ᠰᠠᠢᠬᠠᠨ ᠴᠠᠢ ᠪᠠᠨ ᠠᠮᠰᠠᠭᠤᠯᠬᠤ ᠨᠢ ᠪᠦᠰᠡᠭᠦᠢ ᠬᠥᠮᠥᠨ ᠦ ᠵᠢᠷᠭᠠᠯ ᠭᠡᠵᠦ ᠰᠠᠨᠠᠨ ᠬᠤᠪᠢᠯᠴᠡᠴᠡᠭ ᠭᠦᠯᠢᠶᠡᠭᠰᠡᠨ ᠬᠥᠮᠥᠨ ᠢᠶᠡᠨ ᠬᠥᠷᠥᠭᠡᠳ ᠢᠷᠡᠳᠡᠭ ᠴᠤ᠌ ᠪᠢᠯᠡ ᠤᠤ ᠭᠡᠵᠦ ᠡᠳᠦᠷ ᠪᠦᠷᠢ ᠬᠣᠪᠣᠩ ᠮᠠᠨᠠᠵᠤ ᠴᠠᠢ ᠪᠦᠯᠢᠶᠡᠨ ᠪᠠᠢᠯᠭᠠᠳᠠᠭ ᠠᠵᠢ᠃ ᠭᠠᠵᠠᠷ ᠠ᠋ᠴᠠ ᠤᠢᠭᠰᠠᠨ ᠴᠡᠩᠬᠡᠷ ᠵᠡᠷᠭᠡᠯᠭᠡᠨ ᠢ ᠤᠢᠮᠤᠵᠤ ᠰᠣᠨᠤᠩᠬᠠᠢ ᠰᠢᠷᠠ ᠥᠯᠥᠨ ᠬᠠᠪᠤᠷ ᠤ᠋ᠨ ᠡᠳᠦᠷ ᠴᠤ᠌ ᠭᠡᠰᠡᠨ ᠮᠣᠩᠭᠣᠯ ᠬᠥᠮᠦᠨ ᠶᠡᠷᠦ ᠡᠴᠡ ᠢᠷᠡᠭᠰᠡᠨ ᠵᠣᠴᠢᠨ ᠳ᠋ᠠᠭᠠᠨ ᠴᠠᠢ ᠠᠶᠠᠭᠠᠯᠠᠵᠤ ᠴᠠᠭᠠ ᠠᠮᠰᠠᠭᠤᠯᠳᠠᠭ ᠰᠠᠢᠬᠠᠨ ᠳᠠᠳᠬᠠᠯ ᠲᠠᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌᠂ ᠢᠷᠡᠭᠰᠡᠨ ᠦᠯᠦ ᠲᠠᠨᠢᠬᠤ ᠭᠡᠢᠴᠢᠨ ᠳ᠋ᠡᠭᠡᠨ ᠴᠠᠢ ᠠᠶᠠᠭᠠᠯᠠᠵᠤ ᠦᠭᠭᠦᠭᠰᠡᠨ ᠢ᠋ ᠡᠨᠡ ᠲᠤᠷᠠᠩᠬᠠᠢ ᠭᠣᠵᠣᠯᠵᠠᠭᠰᠠᠨ ᠡᠷᠡ ᠵᠦᠳᠡᠭ ᠰᠠᠢᠬᠠᠨ ᠴᠠᠢ ᠁ ᠡᠯᠵᠢᠭᠡ ᠰᠢᠪᠠᠷᠳᠠᠭᠰᠠᠨ ᠴᠠᠢ ᠁ 》 ᠭᠡᠳᠡᠭ ᠨᠢ ᠲᠡᠭᠦᠨ ᠳ᠋ᠦ᠍ ᠢᠯᠵᠢᠷᠡᠭᠰᠡᠨ ᠬᠠᠷᠠ ᠴᠠᠢ ᠤᠤᠭᠤᠯᠭᠠᠯᠠ ᠭᠡᠰᠡᠨ ᠪᠣᠯᠣᠨ ᠤᠮᠳᠠᠭᠠᠰᠤᠭᠰᠠᠨ ᠬᠥᠮᠥᠨ ᠳᠦ ᠤᠮᠳᠠ ᠪᠣᠯᠣᠮᠠ ᠰᠠᠢᠬᠠᠨ ᠢᠳᠡᠭᠡᠰᠢᠭ ᠴᠠᠢ ᠠᠶᠠᠭᠠᠯᠠᠵᠤ ᠥᠭᠭᠦᠯᠡ᠂ ᠭᠡᠰᠡᠨ ᠬᠣᠶᠠᠷ ᠤ᠋ᠨ ᠠᠯᠢᠨ ᠪᠣᠯᠬᠤ ᠶ᠋ᠢᠨ ᠲᠥᠬᠥᠭᠡ ᠤᠴᠢᠷ ᠢ ᠨᠢ ᠣᠯᠣᠭᠰᠠᠨ ᠦᠭᠡᠢ᠃ ᠠᠢᠯ ᠤ᠋ᠨ ᠪᠦᠰᠡᠭᠦᠢ ᠶ᠋ᠢᠨ ᠴᠠᠢ ᠶ᠋ᠢ ᠨᠢ ᠠᠮᠰᠠᠮᠠᠭᠴᠠ ᠪᠠᠨ ᠦᠭᠡ ᠥᠳᠥᠭᠡᠵᠦ ᠮᠠᠭᠠᠰᠠᠭᠠᠨᠠᠵᠤ ᠪᠠᠢᠭᠠ ᠲᠡᠷᠡ ᠡᠷᠡ ᠶ᠋ᠢ ᠬᠤᠪᠢᠯᠴᠡᠴᠡᠭ ᠲᠣᠲᠣᠷᠠ ᠪᠠᠨ ᠭᠣᠯᠣᠭᠰᠠᠨ ᠪᠣᠯᠪᠠᠴᠤ ᠭᠡᠷ ᠲᠡᠭᠡᠨ ᠢᠷᠡᠭᠰᠡᠨ ᠭᠡᠢᠴᠢᠨ ᠢ᠋ ᠶᠠᠭᠠᠬᠢᠯᠲᠠᠢ ᠪᠣᠢ ᠭᠡᠵᠦ ᠪᠣᠳᠣᠭᠠᠳ ᠳᠤᠭᠤᠢ ᠥᠩᠭᠡᠷᠡᠭᠡᠪᠡ᠃
ᠡᠨᠡ ᠥᠨᠳᠥᠷᠬᠡᠨ ᠪᠡᠶᠡ ᠲᠡᠢ ᠲᠤᠷᠠᠩᠬᠠᠢᠪᠲᠤᠷ ᠭᠣᠵᠣᠯᠵᠠᠭᠰᠠᠨ ᠡᠷᠡ ᠵᠠ ᠨᠡᠷᠡ ᠰᠣᠯᠣᠭᠠᠢ ᠨᠠᠮᠵᠢᠯ᠃ ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠠᠯᠲᠠᠴᠢᠨ ᠣᠪᠣᠭ ᠲᠠᠢ ᠬᠥᠮᠦᠨ᠃ ᠭᠤᠴᠢ ᠡᠷᠭᠢᠮᠡ ᠨᠠᠰᠤᠨ ᠤ᠋ ᠣᠪᠣᠷ ᠲᠠᠢ᠂ ᠦᠭᠡ ᠬᠠᠮᠠᠷ ᠲᠠᠭᠠᠨ ᠰᠠᠢᠨ᠂ ᠬᠣᠱᠣᠩ ᠱᠣᠭᠴᠢ᠂ ᠰᠡᠷᠳ᠋ ᠭᠡᠬᠦ ᠶ᠋ᠢ ᠠᠨᠳᠠᠳᠠᠭ ᠦᠭᠡᠢ ᠰᠡᠷᠭᠦᠯᠡᠩ ᠪᠠᠢᠷᠢ ᠶ᠋ᠢᠨ ᠡᠷᠡ ᠪᠢᠯᠡ᠃ ᠬᠣᠯᠠ ᠭᠠᠵᠠᠷ ᠬᠥᠮᠦᠨ ᠦ᠌ ᠨᠤᠲᠤᠭ ᠢ᠋ᠶ᠋ᠠᠷ ᠶᠠᠪᠤᠬᠤ ᠳ᠋ᠠᠭᠠᠨ ᠥᠪᠡᠷ ᠢ᠋ ᠪᠡᠨ ᠣᠷᠳᠣᠰ ᠴᠢᠭᠤᠯᠭᠠᠨ ᠤ᠋ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠬᠥᠮᠦᠨ ᠭᠡᠵᠦ ᠠᠩᠬᠠ ᠠᠭᠤᠯᠵᠠᠭᠰᠠᠨ ᠬᠥᠮᠦᠨ ᠲᠡᠢ ᠣᠷᠳᠣᠰ ᠦᠭᠡ ᠬᠡᠯᠡᠵᠦ ᠬᠥᠮᠦᠨ ᠲᠥᠭᠡᠷᠢᠭᠦᠯᠳᠡᠭ ᠠᠯᠢᠶᠠ ᠵᠠᠩ ᠲᠠᠢ᠃ ᠲᠡᠭᠦᠨ ᠦ᠌ ᠪᠤᠷᠤᠭᠤᠯᠠᠭᠰᠠᠨ ᠨᠡᠷᠡ ᠨᠢ ᠯᠡᠮᠡᠬᠦᠦ᠃ ᠨᠠᠢᠷ ᠨᠠᠭᠠᠳᠤᠮ ᠳ᠋ᠤ᠌ ᠳᠤᠷᠠᠲᠠᠢ᠂ ᠪᠠᠷᠤᠭ ᠤ᠋ᠨ ᠪᠥᠬᠡ ᠶᠢᠨ ᠰᠤᠷᠢᠶᠠᠨ ᠳ᠋ᠤ᠌ ᠰᠣᠯᠣᠭᠠᠢ ᠠᠪᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠡᠭᠡᠷᠡ ᠠᠷᠪᠠᠨ ᠵᠢᠷᠭᠤᠭᠠ ᠳ᠋ᠤ᠌ ᠣᠷᠣᠴᠢᠬᠠᠳᠠᠭ᠃ ᠤᠷᠢᠳ ᠢ᠋ᠶ᠋ᠠᠷ ᠰᠣᠯᠣᠭᠠᠢ ᠬᠠᠪᠰᠤᠷᠤᠭᠠ ᠪᠠᠷ ᠲᠠᠰᠢᠬᠤ ᠳ᠋ᠤᠨᠢ ᠣᠢᠴᠢᠭᠰᠠᠨ ᠦᠭᠡᠢ ᠪᠥᠬᠡ ᠳ᠋ᠦ᠍ ᠵᠠᠯᠭᠠᠭᠠᠳ ᠰᠣᠯᠣᠭᠠᠢ ᠲᠣᠩᠭᠣᠷᠠᠭᠠ ᠬᠢᠵᠦ ᠨᠥᠭᠦᠭᠡ ᠡᠲᠡᠭᠡᠳ ᠢ᠋ᠶ᠋ᠡᠨ ᠤᠨᠠᠭᠠᠳᠠᠭ ᠪᠠᠢᠨᠠ᠃ ᠠᠳᠤᠭᠤᠨ ᠠ᠋ᠴᠠ ᠮᠣᠷᠢ ᠪᠠᠷᠢᠯᠠᠬᠤ ᠳ᠋ᠠᠭᠠᠨ ᠤᠷᠭᠠ ᠬᠡᠷᠡᠭᠯᠡᠳᠡᠭ ᠦᠭᠡᠢ ᠳᠠᠪᠬᠢᠵᠤ ᠣᠴᠢᠭᠠᠳ ᠪᠤᠷᠤᠭᠤ ᠲᠠᠯᠠ ᠪᠠᠷ ᠨᠢ ᠰᠣᠯᠣᠭᠠᠢ ᠪᠣᠭᠣᠮᠢ ᠰᠢᠲᠡᠵᠦ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠪᠡᠨ ᠨᠣᠭᠲᠣᠯᠠᠴᠢᠬᠠᠳᠠᠭ ᠪᠣᠯᠬᠣᠷ ᠰᠣᠯᠣᠭᠠᠢ ᠨᠠᠮᠵᠢᠯ ᠭᠡᠳᠡᠭ ᠬᠣᠴᠢ ᠲᠠᠢ ᠪᠣᠯᠵᠠᠢ᠃
ᠬᠣᠪᠢᠯᠴᠡᠴᠡᠭ ᠴᠠᠭᠠᠳᠤ ᠪᠣᠭᠣᠨᠢ ᠡᠷᠭᠢᠭᠦᠯᠭᠡ ᠡᠴᠡ ᠵᠡᠭᠡᠷᠡ ᠶ᠋ᠢᠨ ᠬᠠᠲᠠᠭᠰᠠᠨ ᠪᠣᠷᠴᠠ᠂ ᠦᠬᠡᠷ ᠦ᠋ᠨ ᠱᠥᠯᠦᠨ ᠦ᠌ ᠲᠣᠰᠣ᠂ ᠰᠢᠮᠡᠯᠳᠡᠭ᠂ ᠪᠠᠯᠪᠠᠳᠠᠭ ᠪᠤᠳᠠᠭᠠ᠁ ᠡᠨᠡ ᠲᠡᠷᠡ ᠢᠳᠡᠵᠦ ᠤᠤᠭᠤᠬᠤ ᠶᠠᠭᠤᠮᠠ ᠡᠪᠯᠡᠭᠦᠯᠵᠦ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠬᠤ ᠳ᠋ᠤ᠌ ᠲᠡᠷᠡ ᠲᠤᠷᠡᠩᠬᠠᠢᠪᠳᠤᠷ ᠭᠣᠵᠣᠯᠵᠠᠭᠰᠠᠨ ᠡᠷᠡ᠄
— ᠵᠠ ᠴᠢᠭᠦᠨ ᠨᠢᠭᠡ ᠬᠥᠯᠥᠷᠡᠲᠡᠯᠡ ᠴᠠᠢ ᠤᠤᠭᠤᠴᠢᠬᠠᠬᠤ! ᠴᠢᠩᠭᠢᠭᠡᠳ ᠶᠠᠪᠤᠬᠤ! ᠭᠡᠨᠡ᠃
ᠡᠨᠡ ᠭᠣᠵᠣᠯᠵᠠᠭᠰᠠᠨ ᠡᠷᠡ ᠶ᠋ᠢᠨ ᠦᠭᠡ ᠬᠠᠮᠠᠷ ᠨᠢ ᠠᠷᠠᠢ ᠣᠨᠳᠣᠣ ᠰᠣᠨᠣᠰᠳᠠᠭᠠᠳ ᠪᠠᠢᠬᠤᠯᠠᠷ ᠲᠡᠭᠦᠨ ᠢ᠋ ᠬᠦᠨᠨᠢᠢᠷᠭᠡᠵᠦ᠂ ᠨᠥᠭᠦᠭᠡ ᠨᠠᠮᠬᠠᠨ ᠰᠢᠷᠠ ᠵᠠᠯᠠᠭᠤ ᠶ᠋ᠢ ᠬᠠᠷᠠᠭᠠᠳ《 ᠡᠨᠡ ᠬᠣᠶᠠᠷ ᠬᠥᠮᠦᠨ ᠦ᠌ ᠡᠮᠦᠰᠴᠦ ᠵᠡᠭᠦᠭᠰᠡᠨ ᠨᠢ ᠠᠷᠠᠢ ᠵᠢᠭᠠᠬᠠ ᠢᠯᠭᠠᠭᠠ ᠲᠠᠢ ᠶ᠋ᠢ ᠬᠡᠯᠡᠬᠦ ᠦᠭᠡᠢ᠂ ᠬᠡᠯᠡ ᠶᠠᠷᠢᠶᠠᠨ ᠳ᠋ᠠᠭᠠᠨ ᠨᠢᠭᠡ ᠨᠤᠳᠤᠭ ᠤ᠋ᠨ ᠬᠥᠮᠦᠨ ᠪᠢᠰᠢ ᠭᠡᠰᠡᠨ ᠨᠢ ᠮᠡᠳᠡᠭᠳᠡᠵᠦ ᠪᠠᠢᠨᠠ᠃ ᠡᠨᠡ ᠨᠠᠮᠬᠠᠨ ᠪᠡᠶᠡ ᠲᠡᠢ ᠦᠭᠡ ᠳᠠᠭᠤᠨ ᠴᠥᠭᠡᠨᠲᠡᠢ ᠰᠢᠷᠠ ᠵᠠᠯᠠᠭᠤ ᠶ᠋ᠢᠨ ᠡᠮᠦᠰᠴᠦ ᠵᠡᠭᠦᠭᠰᠡᠨ᠂ ᠬᠥᠳᠡᠯᠵᠦ ᠪᠠᠷᠢᠬᠤ᠂ ᠬᠡᠯᠡᠵᠦ ᠶᠠᠷᠢᠬᠤ ᠨᠢ ᠶᠠᠭ ᠯᠠ ᠤᠷᠠᠳ ᠨᠤᠲᠤᠭ ᠤ᠋ᠨ ᠬᠡᠪ ᠨᠠᠮᠪᠠ ᠲᠠᠢ ᠪᠠᠢᠨᠠ》 ᠭᠡᠵᠦ ᠪᠣᠳᠣᠨ ᠠᠷᠠᠢ ᠳᠣᠲᠣᠨᠣ ᠰᠠᠨᠠᠭᠳᠠᠪᠠ᠃
— ᠳᠡᠭᠦᠦ ᠶ᠋ᠢᠨ ᠨᠤᠲᠤᠭ ᠬᠠᠮᠢᠭᠠᠭᠤᠷ ᠪᠢᠯᠡ?
— ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ᠃
— ᠠᠯᠢ ᠰᠤᠮᠤᠨ ᠤ᠋ ᠬᠢ ᠶᠦᠮ ᠪᠣᠯ ᠠ᠋?
— ᠭᠣᠣᠯ ᠰᠤᠮᠤᠨ ᠤ᠋᠂ ᠨᠡᠷᠡ ᠪᠠᠶᠠᠷᠲᠤ᠃
— ᠵᠠ ᠪᠠᠢᠵᠠ ᠭᠣᠣᠯ ᠰᠤᠮᠤᠨ ᠤ᠋ ᠬᠢ ᠭᠡᠳᠡᠭ ᠴᠢᠨᠢ ᠵᠡᠭᠦᠨᠰᠢ ᠪᠡᠨ ᠪᠢᠯᠡ ᠤᠤ?
— ᠲᠡᠢᠮᠦ! ᠮᠤᠨᠠ ᠶ᠋ᠢᠨ ᠵᠡᠭᠦᠨ ᠥᠪᠥᠷ ᠦ᠋ᠨ ᠪᠢᠯᠵᠤᠤᠬᠠᠢᠳᠤ ᠭᠡᠰᠡᠨ ᠭᠠᠵᠠᠷ ᠨᠤᠲᠤᠭ ᠲᠠᠢ ᠭᠡᠵᠦ ᠨᠠᠮᠬᠠᠨ ᠰᠢᠷᠠ ᠵᠠᠯᠠᠭᠤ ᠪᠡᠶᠡ ᠪᠡᠨ ᠲᠠᠨᠢᠯᠴᠠᠭᠤᠯᠪᠠ᠃
ᠡᠨᠡ ᠨᠠᠮᠬᠠᠨ ᠰᠢᠷᠠ ᠵᠠᠯᠠᠭᠤ ᠪᠡᠶᠡ ᠪᠡᠨ ᠪᠠᠶᠠᠷᠲᠤ ᠭᠡᠰᠡᠨ ᠨᠢ ᠪᠤᠷᠤᠭᠤᠯᠠᠭᠰᠠᠨ ᠨᠠᠷ ᠠ᠋᠃ ᠦᠨᠡᠨ ᠨᠡᠷᠡ ᠨᠢ ᠵᠠᠩᠴᠣᠪ᠃ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠬᠥᠷᠥᠭ ᠦ᠋ᠨ ᠭᠣᠣᠯ ᠨᠣᠳᠣ᠊ᠭ ᠲᠠᠢ ᠬᠥᠮᠦᠨ᠃ ᠬᠠᠷᠠ ᠪᠠᠭᠠ ᠠ᠋ᠴᠠ ᠪᠠᠨ ᠫᠤᠤ ᠰᠤᠮᠤᠨ ᠳ᠋ᠤ᠌ ᠬᠣᠷᠣᠬᠠᠢᠲᠠᠢ ᠶ᠋ᠢᠨ ᠳᠡᠭᠡᠷᠡ ᠠᠷᠪᠠᠨ ᠬᠡᠳᠦᠲᠡᠢ ᠡᠴᠡ ᠪᠡᠨ ᠡᠴᠢᠭᠡ ᠪᠡᠨ ᠳᠠᠭᠠᠵᠤ ᠮᠤᠨᠠ ᠠᠭᠤᠯᠠᠨ ᠳ᠋ᠤ᠌ ᠠᠩ ᠬᠦᠷᠦᠭᠡ ᠬᠢᠵᠦ ᠰᠤᠷᠤᠭᠰᠠᠨ ᠤᠴᠢᠷ ᠠᠩ ᠬᠥᠷᠥᠭᠡᠨ ᠳ᠋ᠦ᠍ ᠬᠣᠷᠣᠬᠠᠢᠲᠠᠢ᠂ ᠰᠤᠮᠤ ᠭᠠᠷᠣᠵᠠᠳᠠᠭᠣᠯᠳᠠ᠊ᠭ ᠦᠭᠡᠢ ᠴᠡᠴᠡᠨ ᠫᠤᠤᠴᠢ ᠠᠵᠤᠭᠤ᠃ ᠲᠡᠢᠨ ᠊ᠬᠦ ᠴᠡᠴᠡᠨ ᠫᠤᠤᠴᠢ ᠵᠠᠩᠴᠣᠪ ᠭᠡᠪᠡᠯ ᠬᠠᠪᠢ ᠣᠢᠷᠠ ᠶ᠋ᠢᠨ ᠬᠢᠨᠢ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠨ ᠦᠭᠡᠢ᠃
— ᠵᠡᠭᠦᠨ ᠥᠪᠥᠷ ᠦ᠋ᠨ ᠪᠣᠯ ᠬᠠᠷᠠᠨᠤᠳ ᠤ᠋ᠨ ᠮᠢᠩᠭᠠᠨ᠋ᠪᠣᠤ ᠶ᠋ᠢ ᠲᠠᠨᠢᠬᠤ ᠊ᠤᠤ ?
— ᠮᠢᠩᠭᠠᠨ᠋ᠪᠣᠤ ᠭᠡᠨᠡ ᠊ᠤᠤ ?
— ᠲᠡᠢᠮᠦ !
— ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠮᠢᠩᠭᠠᠨ᠋ᠪᠣᠤ ᠲᠤᠰᠠᠯᠠᠭᠴᠢ ᠊ᠤᠤ ?
— ᠪᠢᠰᠢ ᠂ ᠪᠢᠰᠢ ! ᠲᠤᠰᠠᠯᠠᠭᠴᠢ ᠮᠣᠰᠠᠯᠠᠬᠴᠢ ᠴᠤ᠌ ᠪᠢᠰᠢ ᠠ᠋ ! ᠡᠠᠩᠬᠠ ᠴᠡᠷᠢᠭ ᠲᠦ᠍ ᠯᠡ ᠶᠠᠪᠤᠵᠤ ᠪᠠᠢᠭᠰᠠᠨ ᠶᠤᠮ᠃
— ᠮᠢᠩᠭᠠᠨ᠋ᠪᠣᠤ ᠲᠤᠰᠠᠯᠠᠭᠴᠢ ᠶ᠋ᠢ ᠪᠣᠯ ᠳᠠᠶᠠᠭᠠᠷ ᠢ᠋ᠶ᠋ᠠᠨ ᠮᠡᠳᠡᠨᠡ᠃ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨᠢ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠨ ᠦᠭᠡᠢ᠃ ᠲᠠ ᠲᠡᠭᠦᠨ ᠢ᠋ ᠬᠡᠯᠡᠵᠦ ᠪᠠᠢᠨᠠ ᠤᠤ? ᠭᠡᠰᠡᠨ ᠳ᠋ᠦ᠍ ᠬᠣᠪᠢᠯᠴᠠᠴᠠᠭ᠌ ᠤ᠋ᠨ ᠴᠢᠷᠠᠢ ᠳᠣᠣᠷᠠ ᠪᠠᠨ ᠤᠯᠠᠢᠵᠤ ᠶᠠᠭᠤ ᠬᠡᠯᠡᠬᠦ ᠪᠡᠨ ᠣᠯᠬᠤ ᠦᠭᠡᠢ ᠲᠦᠭᠳᠡᠷᠡᠵᠦ ᠄
— ᠲᠠᠨᠢᠨᠠ ! ᠪᠢᠰᠢ ! ᠪᠢᠰᠢ ! ᠪᠢ ᠴᠢᠨᠢ ᠵᠥᠨᠥᠴᠢᠬᠡᠵᠡᠢ᠃ ᠮᠠᠨ ᠤ᠋ ᠬᠢ ᠲᠡᠢ ᠬᠣᠯᠠ ᠶ᠋ᠢᠨ ᠲᠥᠷᠥᠯ ᠤᠬᠠᠭᠠᠨ ᠲᠠᠢ ᠶᠤᠮ᠃ ᠪᠠᠭᠠ ᠳ᠋ᠤ᠌ ᠪᠢᠳᠡ ᠠᠭᠤᠯᠵᠠᠵᠤ ᠪᠠᠢᠭᠰᠠᠨ᠃ ᠣᠳᠣ ᠦᠵᠡᠪᠡᠯ ᠲᠠᠨᠢᠬᠤ ᠦᠭᠡᠢ ᠴᠤ᠌ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠬᠤᠳᠠᠯ ᠬᠡᠯᠡᠭᠰᠡᠨ ᠳ᠋ᠡᠭᠡᠨ ᠵᠢᠷᠦᠬᠡ ᠨᠢ ᠫᠣᠯ ᠫᠣᠯ ᠪᠤᠯᠭᠢᠯᠠᠵᠤ ᠪᠠᠢᠪᠠ᠃
— ᠲᠤᠰᠠᠯᠠᠭᠴᠢ ᠮᠢᠩᠭᠠᠨ᠋ᠪᠣᠤ ᠭᠤᠸᠠᠢ ᠲᠠᠨ ᠤ᠋ ᠲᠥᠷᠥᠯ ᠮᠥᠨ ᠪᠣᠯᠲᠤᠭᠠᠢ ᠳᠠ !
— ᠠ ᠮᠡᠳᠡᠬᠦ ᠦᠭᠡᠢ ᠂ ᠨᠣᠶᠠᠨ ᠬᠥᠮᠦᠨ ᠦ᠌ ᠨᠢᠳᠦ ᠲᠠᠷᠭᠤᠨ ᠬᠤᠨᠠ ᠳᠠ᠂ ᠶᠠᠳᠠᠭᠰᠠᠨ ᠮᠠᠨᠤᠰ ᠢ᠋ ᠲᠠᠨᠢᠳᠠᠭ ᠴᠤ᠌ ᠪᠣᠯᠤᠭᠠᠰᠠᠢ ! ᠭᠡᠵᠦ ᠬᠡᠯᠡᠴᠢᠬᠡᠭᠡᠳ ᠳᠣᠲᠣᠷᠠ ᠨᠢ ᠲᠦᠭ ᠲᠠᠭ ᠪᠣᠯᠵᠤ《 ᠮᠢᠩᠭᠠᠨ᠋ᠪᠣᠤ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠲᠤᠰᠠᠯᠠᠭᠴᠢ ᠲᠤᠰᠢᠶᠠᠯ ᠲᠠᠢ ᠪᠣᠯᠴᠢᠬᠠᠵᠠᠢ ᠊ᠤᠤ ᠳᠠ ! ᠳᠠᠩᠴᠤ ᠨᠢᠭᠡ ᠴᠢᠮᠡᠭᠡ ᠰᠣᠷᠠ᠊ᠭ ᠦᠭᠡᠢ ᠪᠣᠯᠴᠢᠬᠠᠭᠰᠠᠨ ᠪᠠᠢᠭᠰᠠᠨ ᠶᠤᠮ ᠠ᠋ !》 ᠭᠡᠵᠦ ᠳᠣᠲᠣᠷᠠ ᠨᠢ ᠭᠠᠩᠰᠠᠷᠠᠨ᠂ ᠮᠠᠨᠠᠭᠠᠳ ᠤᠳᠠᠭᠰᠠᠨ ᠬᠠᠢᠷᠠ ᠶ᠋ᠢᠨ ᠬᠢᠨᠢ ᠭᠠᠯ ᠳᠡᠭᠡᠷᠡ ᠬᠠᠷᠠ ᠤᠰᠤ ᠴᠢᠳᠬᠤᠭᠰᠠᠨ ᠰᠢᠭ᠋ ᠪᠣᠯᠪᠠ᠃
ᠨᠥᠭᠦᠭᠡ ᠬᠣᠶᠠᠷ ᠵᠣᠴᠢᠨ ᠴᠠᠢ ᠠᠮᠰᠠᠭᠠᠳ ᠱᠤᠤᠮᠠᠰᠠ᠂ ᠳᠠᠯᠢᠩ ᠢ᠋ᠶ᠋ᠠᠨ ᠠᠭᠤᠳᠠᠯᠵᠤ ᠳᠡᠭᠡᠷᠡ ᠪᠡᠨ ᠳᠥᠷᠪᠡᠯᠵᠢᠨ ᠤᠯᠠᠭᠠᠨ ᠴᠠᠭᠠᠰᠤ ᠲᠠᠢ ᠨᠠᠷᠢᠨ ᠪᠣᠭᠣᠷᠰᠣᠭ᠂ ᠮᠥᠰᠥᠨ ᠰᠢᠬᠢᠷ᠂ ᠴᠢᠪᠠᠭᠠ ᠡᠨᠡ ᠲᠡᠷᠡ ᠢᠳᠡᠵᠦ ᠤᠤᠭᠤᠬᠤ ᠪᠠᠭᠠ ᠰᠠᠭᠠ ᠪᠡᠯᠡᠭ ᠲᠠᠯᠪᠢᠪᠠ᠃
— ᠶᠠᠭᠤ ᠬᠢᠬᠦ ᠪᠣᠢ ᠲᠠ ᠨᠠᠷ᠂ ᠵᠠᠮ ᠤ᠋ᠨ ᠬᠦᠨᠡᠰᠦ ᠪᠡᠨ ᠦᠷᠡᠭᠡᠵᠦ ᠶᠠᠭᠠᠬᠢᠬᠤ ᠶᠤᠮ⁈ ᠭᠠᠳᠠᠭᠰᠢ ᠭᠠᠷᠤᠭᠰᠠᠨ ᠬᠥᠮᠦᠨ ᠭᠠᠨᠵᠤᠭᠠ ᠲᠠᠢ ᠪᠣᠯ ᠬᠡᠢ ᠮᠣᠷᠢ ᠲᠠᠢ ᠰᠢᠦ ᠳᠡ !
— ᠮᠣᠩᠭᠣᠯ ᠬᠥᠮᠦᠨ ᠠᠢᠯ ᠳ᠋ᠤ᠌ ᠭᠠᠷ ᠬᠣᠭᠣᠰᠣᠨ ᠣᠷᠣᠬᠤ ᠭᠡᠭᠴᠢ ᠮᠠᠭᠤᠬᠠᠢ ! ᠡᠨᠡ ᠨᠢ ᠪᠤᠭᠤᠲᠤ ᠶ᠋ᠢᠨ ᠨᠠᠷᠢᠨ ᠪᠣᠭᠣᠷᠰᠣᠭ᠂ ᠡᠨᠡ ᠨᠢ ᠲᠡᠮᠡᠭᠡᠲᠦ ᠶ᠋ᠢᠨ ᠬᠦᠷᠡᠩ ᠴᠢᠪᠠᠭᠠ ᠁ ᠭᠡᠵᠦ 《ᠵᠠ ᠡᠭᠦᠨ ᠢ᠋ᠶ᠋ᠡᠨ ᠳᠡᠭᠡᠭᠰᠢᠯᠡᠭᠦᠯᠴᠢᠬᠡ》 ᠭᠡᠰᠡᠨ ᠰᠢᠭ ᠬᠣᠶᠠᠷ ᠠᠯᠠᠭᠠ ᠪᠠᠨ ᠳᠡᠯᠭᠡᠵᠦ ᠭᠡᠷ ᠦ᠋ᠨ ᠡᠵᠡᠭᠲᠡᠢ ᠵᠦᠭ ᠵᠠᠩᠭᠠᠪᠠ᠃
ᠬᠤᠪᠢᠯᠴᠡᠴᠡᠭ ᠢᠷᠡᠭᠰᠡᠨ ᠭᠡᠢᠴᠢᠨ ᠦ᠌ ᠳᠡᠭᠡᠵᠢᠯᠡᠭᠰᠡᠨ ᠪᠡᠯᠡᠭ ᠢ᠋ ᠨᠢᠮᠪᠠᠢᠬᠠᠨ ᠠᠪᠴᠤ ᠪᠤᠷᠬᠠᠨ ᠳ᠋ᠠᠭᠠᠨ ᠡᠷᠭᠦᠵᠦ《ᠪᠤᠷᠬᠠᠨ ᠮᠢᠨᠢ᠂ ᠪᠤᠭᠤᠲᠤ ᠶ᠋ᠢᠨ ᠨᠠᠷᠢᠨ ᠪᠣᠭᠣᠷᠰᠣᠭ ᠠ᠋ᠴᠠ ᠲᠠ ᠤᠷᠢᠳ ᠢ᠋ᠶ᠋ᠠᠷ ᠳᠡᠭᠡᠵᠢ ᠶ᠋ᠢ ᠨᠢ ᠵᠣᠭᠣᠭᠯᠠ ᠳᠠ ! ᠨᠠᠳᠠ ᠳ᠋ᠠᠭᠠᠨ ᠪᠣᠯ ᠬᠣᠪᠣᠷ ᠤ᠋ᠨ ᠶᠠᠭᠤᠮᠠ ᠭᠠᠵᠠᠷ᠃ ᠤᠷᠢᠳᠤ ᠮᠢᠩᠭᠠᠨᠪᠣᠤ ᠯᠠ ᠪᠤᠭᠤᠲᠤ ᠠ᠋ᠴᠠ ᠨᠠᠷᠢᠨ ᠪᠣᠭᠣᠷᠰᠣᠭ᠂ ᠴᠢᠪᠠᠭᠠ᠂ ᠰᠢᠬᠢᠷ ᠭᠡᠳ ᠨᠢᠳᠦᠨ ᠦ᠌ ᠬᠣᠷᠣᠬᠠᠢ ᠬᠥᠳᠡᠯᠭᠡᠬᠦ ᠶᠠᠭᠤᠮᠠ ᠠᠪᠴᠢᠷᠠᠳᠠᠭ ᠪᠠᠢᠯᠠ ᠁》 ᠭᠡᠵᠦ ᠭᠡᠢᠴᠢᠨ ᠦ᠌ ᠦᠭᠭᠦᠭᠰᠡᠨ ᠪᠡᠯᠡᠭ ᠰᠡᠯᠲᠡ ᠶ᠋ᠢ ᠠᠬᠤᠢᠯᠠᠵᠤ ᠲᠠᠯᠪᠢᠴᠢᠬᠠᠭᠠᠳ ᠲᠣᠭᠣᠭᠠᠨ ᠠ᠋ᠴᠠ ᠪᠠᠨ ᠫᠣᠷ ᠫᠣᠷ ᠪᠤᠴᠠᠯᠤᠭᠰᠠᠨ ᠲᠣᠯᠣᠭᠠᠢ ᠰᠢᠭᠢᠷᠡ ᠭᠠᠷᠭᠠᠵᠤ ᠭᠡᠢᠴᠢᠨ ᠦ᠌ ᠡᠮᠦᠨᠡ ᠲᠠᠯᠪᠢᠭᠰᠠᠨ ᠢ᠋ᠶ᠋ᠠᠨ ᠡᠪ ᠦᠭᠡᠢᠷᠭᠡᠭᠰᠡᠨ ᠶᠠᠩᠵᠤᠲᠠᠢ᠄
— ᠵᠠ᠂ ᠲᠠ ᠨᠠᠷ ᠬᠣᠯᠠ ᠶ᠋ᠢᠨ ᠵᠠᠮ ᠳ᠋ᠤ᠌ ᠥᠯᠥᠰᠦᠭᠰᠡᠨ ᠪᠠᠢᠯᠭᠦᠢ ᠳᠡ ! ᠬᠤᠢᠬᠠᠨ ᠤ᠋ ᠮᠢᠬᠠ ᠭᠡᠵᠦ ᠭᠣᠯᠣᠬᠤ ᠦᠭᠡᠢ ᠪᠣᠯ ᠵᠣᠭᠣᠭᠯᠠᠭᠠᠷᠠᠢ ! ᠬᠠᠪᠤᠷ ᠤ᠋ᠨ ᠤᠷᠲᠤ ᠰᠢᠷᠠ ᠡᠳᠦᠷ ᠢ᠋ ᠲᠤᠭᠤᠯᠵᠤ ᠶᠠᠪᠤᠬᠤ ᠭᠡᠭᠴᠢ ᠬᠡᠴᠡᠭᠦᠦ ! ᠢᠳᠡ᠂ ᠢᠳᠡ ! ᠭᠡᠵᠦ ᠨᠥᠭᠦᠭᠡ ᠬᠣᠶᠠᠷ ᠢ᠋ ᠱᠠᠯᠠᠨᠠ᠃
ᠳᠤᠨᠳᠠᠭᠤᠷ ᠡᠳᠦᠷ ᠮᠣᠷᠢᠨ ᠳᠡᠭᠡᠷᠡ ᠰᠠᠵᠢᠭᠳᠠᠭᠰᠠᠨ ᠬᠣᠶᠠᠷ ᠬᠠᠷᠠ ᠬᠥᠮᠦᠨ ᠬᠡᠦᠷᠰᠢᠮᠡᠯ ᠬᠤᠢᠬᠠᠨ ᠤ᠋ ᠦᠨᠦᠷ ᠲᠦ᠍ ᠬᠣᠪᠳᠣᠭ ᠨᠢ ᠬᠥᠳᠡᠯᠵᠦ ᠶᠡᠬᠡ ᠥᠯᠥᠰᠦᠭᠰᠡᠨ ᠢ᠋ᠶ᠋ᠡᠨ ᠰᠠᠶᠢ ᠮᠡᠳᠡᠪᠡ᠃
ᠳᠤᠬᠤᠨ ᠤ᠋ ᠨᠠᠢᠷ ᠲᠤ᠌ ᠰᠠᠭᠤᠵᠤ ᠬᠤᠢᠬᠠ ᠮᠥᠯᠵᠢᠬᠦ ᠭᠡᠭᠴᠢ ᠪᠠᠰᠠ ᠴᠠᠭᠠᠨᠠ ᠪᠠᠨ ᠨᠢᠭᠡ ᠠᠮᠲᠠ ᠪᠠᠢᠳᠠᠭ ᠰᠠᠨ᠃
ᠡᠨᠡ ᠬᠣᠶᠠᠷ ᠬᠠᠷᠠ ᠬᠥᠮᠦᠨ ᠬᠤᠢᠬᠠᠨ ᠤ᠋ ᠮᠢᠬᠠ ᠭᠡᠵᠦ ᠭᠣᠯᠣᠯ ᠦᠭᠡᠢ ᠠᠮᠲᠠᠷᠬᠠᠨ ᠢᠳᠡᠵᠦ ᠪᠠᠢᠭᠠ ᠶ᠋ᠢ ᠬᠠᠷᠠᠭᠰᠠᠨ ᠬᠤᠪᠢᠯᠴᠡᠴᠡᠭ ᠳᠣᠲᠣᠷᠠ ᠪᠠᠨ《ᠮᠢᠩᠭᠠᠨᠪᠤᠤ ᠲᠠᠢ ᠪᠠᠨ ᠭᠡᠷᠯᠡᠵᠦ ᠰᠠᠭᠤᠭᠰᠠᠨ ᠰᠠᠨ ᠪᠣᠯ ᠬᠣᠢᠮᠣᠷ ᠲᠠᠭᠠᠨ ᠥᠪᠡᠷ ᠦ᠋ᠨ ᠬᠠᠷᠠ ᠬᠥᠮᠦᠨ ᠢ᠋ᠶ᠋ᠡᠨ ᠢᠩᠭᠢᠵᠦ ᠯᠠᠪ ᠯᠦᠪ ᠰᠠᠭᠤᠯᠭᠠᠴᠢᠬᠠᠭᠠᠳ ᠴᠠᠢ ᠤᠰᠤ᠂ ᠬᠣᠭᠣᠯᠠ ᠬᠣᠰᠢ ᠶ᠋ᠢ ᠨᠢ ᠣᠢᠷᠠᠲᠤᠭᠤᠯᠵᠤ ᠠᠰᠠᠷᠠᠵᠤ ᠬᠦᠨᠳᠦᠯᠡᠬᠦ ᠨᠢ ᠴᠦ᠍ ᠰᠡᠳᠬᠢᠯ ᠳ᠋ᠦ᠍ ᠥᠮᠥᠭ ᠲᠡᠢ ᠪᠠᠢᠬᠤ ᠦᠭᠡᠢ ᠤᠤ ᠳᠠ᠃＜ ᠡᠮᠡ ᠬᠥᠮᠦᠨ ᠦᠭᠡᠢ ᠭᠡᠷ ᠥᠴᠥᠭᠡᠷ᠂ ᠡᠷᠡ ᠬᠥᠮᠦᠨ ᠦᠭᠡᠢ ᠭᠡᠷ ᠨᠠᠪᠲᠠᠭᠠᠷ＞ ᠭᠡᠳᠡᠭ ᠴᠦ᠍ ᠦᠨᠡᠨ ᠦᠭᠡ ᠶᠦᠮ ᠳᠡ! ᠥᠨᠥᠳᠥᠷ ᠬᠠᠮᠢᠭᠠ ᠭᠠᠵᠠᠷ ᠤ᠋ᠨ ᠬᠠᠷᠠ ᠬᠥᠮᠦᠨ ᠬᠣᠢᠮᠣᠷ ᠬᠤᠪᠢᠳᠠᠵᠤ ᠰᠠᠭᠤᠭᠠᠳ ᠬᠤᠢᠬᠠ ᠵᠣᠭᠣᠭᠯᠠᠵᠤ ᠪᠠᠢᠭᠠ ᠪᠣᠯᠪᠠᠴᠤ ᠮᠠᠭᠤ ᠨᠠᠪᠲᠠᠭᠠᠷ ᠪᠣᠷᠣ ᠭᠡᠷ ᠢ᠋ ᠮᠢᠨᠢ ᠭᠢᠯᠪᠠᠵᠤ ᠰᠦᠷ ᠭᠡᠷᠡᠯ ᠲᠡᠢ ᠪᠣᠯᠭᠠᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠬᠤ ᠶ᠋ᠢ ᠶᠠᠭᠠᠬᠢᠨᠠ⁈ ᠡᠨᠡ ᠴᠦ᠍ ᠠᠭᠱᠡᠨ ᠵᠠᠭᠤᠷᠠ ᠶ᠋ᠢᠨ ᠭᠢᠯᠪᠠᠭᠠᠨ ᠰᠢᠭ᠋ ᠭᠢᠯᠠᠰ ᠭᠡᠳ ᠥᠩᠭᠡᠷᠡᠳᠡᠭ ᠤᠬᠠᠭᠠᠨ ᠲᠠᠢ᠁》 ᠭᠡᠵᠦ ᠤᠵᠠᠭᠤᠷ ᠤ᠋ᠨ ᠠᠮᠠᠷᠠᠭ ᠬᠣᠩᠭᠣᠷ ᠮᠢᠩᠭᠠᠨᠪᠣᠣ ᠪᠠᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠰᠠᠨᠠᠵᠤ ᠰᠠᠭᠤᠲᠠᠯᠠ ᠬᠣᠲᠠᠴᠢ ᠬᠥᠪ ᠬᠥᠪ ᠭᠡᠵᠦ ᠬᠣᠷᠭᠣᠭᠣᠭᠠᠳ ᠲᠡᠭᠦᠨ ᠦ᠌ ᠪᠣᠳᠣᠯ ᠢ᠋ ᠲᠠᠰᠤᠯᠪᠠ᠃
ᠠᠯᠤᠰ ᠠ᠋ᠴᠠ ᠫᠢᠵᠢᠷ ᠫᠢᠵᠢᠷ ᠭᠡᠵᠦ ᠳᠣᠪᠲᠣᠯᠭᠠᠭᠰᠠᠨ ᠮᠣᠷᠢᠨ ᠤ᠋ ᠲᠦᠪᠡᠷᠭᠡᠨ ᠰᠣᠨᠣᠰᠳᠠᠵᠤ᠂ ᠤᠳᠠᠯ ᠦᠭᠡᠢ ᠱᠣᠩ ᠳᠡᠭᠡᠷᠡ ᠮᠣᠷᠢᠲᠠᠢ ᠬᠥᠮᠦᠨ ᠪᠠᠭᠤᠯᠠ᠃ ᠤᠶᠠᠭᠠᠨ ᠤ᠋ ᠮᠣᠷᠢᠳ ᠪᠡᠶᠡ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠦᠦᠷᠰᠡᠨ ᠢᠨᠴᠠᠭᠠᠪᠠ᠃
ᠢᠷᠡᠭᠰᠡᠨ ᠬᠥᠮᠦᠨ ᠪᠣᠯ ᠬᠣᠪᠢᠯᠴᠡᠴᠡᠭ ᠦ᠋ᠨ ᠬᠦᠦ ᠠᠩᠴᠢᠨᠵᠠᠪ ᠪᠠᠢᠪᠠ᠃
ᠠᠷᠪᠠᠨ ᠵᠢᠷᠭᠤᠭᠠ ᠳᠣᠯᠣᠭᠠᠲᠠᠢ ᠡᠨᠡ ᠬᠦᠦ ᠶ᠋ᠢᠨ ᠪᠡᠶᠡ ᠪᠢᠯᠳᠠᠷ ᠬᠦᠳᠡᠷ ᠴᠢᠬᠢᠷᠠᠭ᠂ ᠬᠣᠶᠠᠷ ᠴᠢᠮᠠᠷᠬᠠᠢ ᠠ᠋ᠴᠠ ᠳᠣᠷᠣᠭᠰᠢ ᠪᠠᠨ ᠬᠠᠷᠠᠯᠠᠭᠰᠠᠨ ᠰᠠᠬᠠᠯ ᠨᠢ ᠡᠷᠦ ᠶ᠋ᠢ ᠨᠢ ᠬᠤᠮᠢᠨ ᠨᠣᠭᠲᠣᠯᠠᠵᠤ ᠦᠷᠢᠶᠡ ᠠᠵᠢᠷᠭᠠᠨ ᠤ᠋ ᠬᠤᠷ ᠳᠡᠯ ᠰᠢᠭ ᠬᠤᠨᠢᠷᠢᠶᠠᠲᠤ ᠭᠡᠵᠢᠭᠡ ᠶ᠋ᠢ ᠤᠷᠤᠭᠤ ᠰᠤᠯᠠ ᠲᠠᠯᠪᠢᠭᠰᠠᠨ ᠨᠢ ᠡᠲᠡᠭᠡᠳ ᠵᠢᠪᠬᠤᠯᠠᠩᠲᠠᠢ ᠬᠠᠷᠠᠭᠳᠠᠨᠠ᠃
ᠱᠣᠩ ᠳᠡᠭᠡᠷᠡ ᠤᠶᠠᠭᠠᠲᠠᠢ ᠬᠣᠶᠠᠷ ᠬᠡᠭᠡᠷ ᠵᠢᠰᠦᠮ ᠦ᠋ᠨ ᠮᠣᠷᠢᠨ ᠤ᠋ ᠡᠮᠡᠭᠡᠯ ᠪᠦᠭᠦᠷᠭᠡ ᠶ᠋ᠢᠨ ᠲᠥᠯᠥᠪ᠂ ᠨᠣᠭᠲᠣ ᠬᠠᠵᠠᠭᠠᠷ ᠤ᠋ᠨ ᠵᠠᠩᠭᠢᠳᠤᠭᠠ᠂ ᠳᠡᠯ ᠮᠤᠨᠳᠠᠭᠠ ᠶ᠋ᠢ ᠨᠢ ᠬᠢᠷᠭᠠᠵᠤ ᠵᠠᠰᠠᠭᠰᠠᠨ ᠬᠡᠪ ᠭᠣᠪᠢ ᠨᠤᠲᠤᠭ ᠤ᠋ᠨ ᠬᠢ ᠲᠡᠢ ᠠᠷᠠᠢ ᠯᠠ ᠥᠭᠡᠷᠡ ᠬᠠᠷᠠᠭᠳᠠᠬᠤ ᠠ᠋ᠴᠠ ᠢᠷᠡᠭᠰᠡᠨ ᠬᠥᠮᠦᠰ ᠪᠣᠯ ᠬᠣᠯᠠ ᠶ᠋ᠢᠨ ᠵᠣᠴᠢᠨ ᠭᠡᠳᠡᠭ ᠢ᠋ ᠠᠳᠤᠭᠤ ᠮᠠᠯ᠂ ᠠᠭᠲᠠ ᠬᠦᠯᠦᠭ ᠲᠤ ᠬᠣᠷᠣᠬᠠᠢᠲᠠᠢ ᠠᠩᠴᠢᠨᠵᠠᠪ ᠤ᠋ᠨ ᠭᠢᠷᠠᠬᠠᠢ ᠨᠢᠳᠦ ᠰᠡᠪ ᠦᠭᠡᠢ ᠠᠵᠢᠭᠯᠠᠵᠠᠢ᠃
ᠬᠥᠯᠥᠰᠥ ᠨᠢ ᠠᠷᠠᠢ ᠡᠪᠡᠷᠡᠵᠦ ᠵᠠᠪᠳᠤᠭᠠᠳᠤᠢ ᠬᠣᠶᠠᠷ ᠬᠡᠭᠡᠷ ᠮᠣᠷᠢᠨ ᠤ᠋ ᠴᠢᠬᠢ ᠬᠤᠯᠤᠭᠤ᠂ ᠴᠡᠭᠡᠵᠢ᠂ ᠴᠠᠪᠢ ᠬᠣᠨᠳᠣᠯᠠᠢ ᠶ᠋ᠢᠨ ᠭᠣᠪᠢᠯ ᠢ᠋ᠶ᠋ᠠᠷ ᠬᠥᠯᠥᠰᠥᠨ ᠦ᠌ ᠣᠷᠣᠮ ᠳ᠋ᠤ᠌ ᠰᠢᠷᠢᠯᠳᠦᠭᠰᠡᠨ ᠦᠰᠦ ᠬᠢᠯᠭᠠᠰᠤ ᠨᠢ ᠰᠠᠳᠠᠷᠠᠭᠠᠳᠤᠢ ᠶ᠋ᠢ ᠬᠠᠷᠠᠭᠠᠳ《 ᠡᠨᠡ ᠬᠣᠶᠠᠷ ᠵᠣᠴᠢᠨ ᠬᠠᠮᠢᠭᠠ ᠠ᠋ᠴᠠ ᠶᠠᠭᠤ ᠬᠢᠬᠦ ᠪᠡᠷ ᠢᠷᠡᠪᠡ?》 ᠭᠡᠵᠦ ᠪᠣᠳᠣᠨᠠ᠃ ᠱᠣᠩ ᠳᠡᠭᠡᠷᠡ ᠤᠶᠠᠭᠠᠲᠠᠢ ᠬᠣᠶᠠᠷ ᠮᠣᠷᠢᠨ ᠠ᠋ᠴᠠ ᠥᠨᠳᠥᠷ ᠴᠡᠭᠡᠵᠢ᠂ ᠬᠣᠲᠣᠩ ᠰᠡᠭᠦᠯ ᠲᠡᠢ᠂ ᠴᠢᠨᠣᠠ ᠶ᠋ᠢᠨ ᠬᠣᠶᠠᠷ ᠴᠢᠬᠢ ᠨᠢ ᠴᠢᠯᠥᠭᠡ ᠵᠠᠪ ᠦᠭᠡᠢ ᠰᠣᠯᠪᠢᠨ ᠬᠠᠢᠴᠢᠯᠠᠭᠰᠠᠨ ᠬᠠᠯᠲᠠᠷ ᠬᠡᠭᠡᠷ ᠮᠣᠷᠢ ᠲᠡᠭᠦᠨ ᠦ᠌ ᠳᠤᠷᠠ ᠶ᠋ᠢ ᠪᠤᠯᠢᠶᠠᠵᠤ᠂ ᠬᠣᠨᠳᠣᠯᠠᠢ ᠪᠡᠶᠡ᠂ ᠲᠤᠭᠤᠷᠠᠢ ᠶ᠋ᠢ ᠨᠢ ᠬᠦᠷᠲᠡᠯᠡ ᠨᠠᠷᠢᠨ ᠰᠢᠨᠵᠢᠭᠰᠡᠨ ᠢ᠋ᠶ᠋ᠡᠨ《 ᠬᠠᠯᠳᠠᠢ ᠬᠡᠭᠡᠷ ᠮᠣᠷᠢ ᠰᠠᠢᠨ ᠤᠳᠤᠮ ᠲᠠᠢ ᠬᠦᠯᠦᠭ ᠪᠠᠢᠵᠤ ᠶᠠᠳᠠᠬᠤ ᠦᠭᠡᠢ᠂ ᠵᠠᠮ ᠤ᠋ᠨ ᠬᠣᠯᠠ ᠳ᠋ᠤ᠌ ᠰᠢᠷᠪᠥᠰᠥᠯᠢᠭ ᠶᠠᠩᠵᠤ ᠲᠠᠢ᠁ ᠰᠣᠯᠢ ᠶ᠋ᠢᠨ ᠬᠢᠷᠠ ᠶ᠋ᠢᠨ ᠬᠠᠢᠷᠤᠪ ᠪᠠᠶᠠᠨ ᠤ᠋ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠ ᠲᠠᠢ ᠵᠡᠷᠯᠢᠭ ᠠᠳᠤᠭᠤᠨ ᠤ᠋ ᠤᠳᠤᠮ ᠴᠤ᠌ ᠶᠤᠮ ᠤᠤ》 ᠭᠡᠵᠦ ᠪᠣᠳᠣᠭᠠᠳ ᠰᠤᠬᠠᠢ ᠲᠠᠰᠢᠭᠤᠷ ᠤ᠋ᠨ ᠢ᠋ᠶ᠋ᠠᠨ ᠪᠠᠷᠢᠶᠠ ᠪᠠᠷ ᠬᠠᠯᠲᠠᠷ ᠬᠡᠭᠡᠷ ᠦ᠋ᠨ ᠨᠢᠮᠭᠡᠨ ᠴᠠᠪᠢ ᠤᠷᠤᠭᠤ ᠳᠠᠩᠰᠠᠨ ᠴᠢᠴᠢᠭᠰᠡᠨ ᠳ᠋ᠦ᠍ ᠲᠡᠷᠡ ᠬᠦᠯᠦᠭ ᠳᠠᠪ ᠬᠢᠨ ᠰᠣᠴᠢᠵᠤ ᠲᠡᠭ ᠬᠢᠲᠡᠯᠡ ᠦᠰᠦᠷᠦᠨ ᠱᠣᠩ ᠪᠤᠯᠭᠤᠯᠴᠢᠬᠠᠬᠤ ᠰᠢᠬᠠᠪᠠ᠃
— ᠶᠠᠭ ᠮᠥᠨ᠃ ᠰᠣᠯᠢ ᠶ᠋ᠢᠨ ᠬᠢᠷᠠ ᠶ᠋ᠢᠨ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠ ᠲᠠᠢ ᠵᠡᠷᠯᠢᠭ ᠠᠳᠤᠭᠤᠨ ᠤ᠋ ᠤᠳᠤᠮ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠮᠥᠨ ᠪᠠᠢᠨᠠ ᠭᠡᠵᠦ ᠳᠦᠳᠦᠨᠡᠨ《 ᠡᠨᠡ ᠰᠠᠢᠨ ᠤᠳᠤᠮ ᠤ᠋ᠨ ᠬᠦᠯᠦᠭ ᠢ᠋ ᠯᠠᠪ ᠰᠠᠢᠨ ᠡᠷᠡ ᠡᠳ᠋ᠯᠡᠵᠦ ᠶᠠᠪᠤᠨᠠ᠁》 ᠭᠡᠵᠦ ᠭᠡᠷ ᠲᠦ᠋ᠨᠢ ᠢᠷᠡᠭᠰᠡᠨ ᠭᠡᠢᠴᠢᠨ ᠢ᠋ ᠤᠤᠯ ᠤ᠋ᠨ ᠪᠠᠰᠤᠵᠤ ᠲᠤᠭᠤᠮᠰᠠᠷᠠᠯᠠᠭᠰᠠᠨ ᠪᠣᠳᠣᠯ ᠨᠢ ᠪᠢᠰᠢᠷᠡᠯ ᠬᠦᠨᠳᠤᠤᠬᠡᠯ ᠢ᠋ᠶ᠋ᠡᠷ ᠰᠣᠯᠢᠭᠳᠠᠵᠤ ᠬᠤᠷᠳᠤᠬᠠᠨ ᠡᠳᠤᠨᠤᠰ ᠲᠠᠢ ᠠᠭᠤᠯᠵᠠᠬᠤ ᠶᠤᠮᠰᠠᠨ ᠭᠡᠵᠦ ᠡᠭᠦᠳᠡ ᠲᠠᠲᠠᠪᠠ᠃
— ᠵᠠ᠂ ᠰᠠᠢᠨ ᠢᠷᠡᠪᠡ ᠤᠤ? ᠭᠡᠵᠦ ᠠᠩᠴᠢᠨᠵᠠᠪ ᠡᠪᠦᠳᠦᠭ ᠰᠥᠬᠥᠷᠡᠨ ᠮᠡᠨᠳᠦ ᠮᠡᠳᠡᠪᠡᠯ ᠬᠣᠢᠮᠤᠷ ᠲᠤ ᠰᠠᠭᠤᠭᠠᠳ ᠬᠤᠢᠬᠠ ᠮᠥᠯᠵᠢᠵᠦ ᠪᠠᠢᠭᠰᠠᠨ ᠬᠣᠶᠠᠷ ᠭᠡᠢᠴᠢᠨ ᠪᠠᠷᠤᠭ ᠵᠡᠷᠭᠡ ᠪᠡᠷ᠄
— ᠵᠠ᠂ ᠰᠠᠢᠨ! ᠰᠠᠢᠨ ᠶᠠᠪᠤᠵᠤ ᠢᠷᠡᠪᠡ ᠤᠤ? ᠭᠡᠵᠦ ᠬᠠᠷᠢᠭᠤ ᠮᠡᠨᠳᠦᠯᠡᠪᠡ᠃
ᠠᠩᠴᠢᠨᠵᠠᠪ ᠡᠪᠦᠷ ᠡᠴᠡ ᠪᠡᠨ ᠬᠥᠬᠦᠦᠷ ᠭᠠᠷᠭᠠᠨ ᠨᠥᠭᠦᠭᠡ ᠬᠣᠶᠠᠷ ᠲᠠᠢ ᠬᠥᠬᠦᠦᠷ ᠰᠣᠯᠢᠯᠴᠠᠨ ᠮᠡᠨᠳᠦᠯᠡᠬᠦ ᠳ᠋ᠡᠭᠡᠨ᠄
— ᠬᠣᠯᠠ ᠶ᠋ᠢᠨ ᠵᠠᠮ ᠳ᠋ᠠᠭᠠᠨ ᠶᠠᠳᠠᠷᠠᠪᠠ ᠤᠤ? ᠭᠡᠬᠦ ᠳ᠋ᠦ᠍ ᠲᠤᠷᠠᠩᠬᠠᠢᠪᠲᠤᠷ ᠭᠣᠵᠣᠯᠵᠠᠭᠰᠠᠨ ᠡᠷᠡ ᠡᠨᠡ ᠴᠣᠭᠯᠢᠭ ᠰᠠᠢᠬᠠᠨ ᠵᠠᠯᠠᠭᠤ ᠶ᠋ᠢ ᠦᠵᠡᠮᠡᠭᠴᠡ ᠲᠣᠭᠣᠵᠤ᠄
— ᠭᠠᠢᠭᠤᠢ ᠬᠦ᠂ ᠭᠠᠵᠠᠷ ᠲᠠᠨᠢᠬᠤ ᠦᠭᠡᠢ ᠨᠤᠲᠤᠭ ᠲᠤ ᠴᠤ᠌ ᠭᠡᠰᠡᠨ ᠭᠠᠨᠵᠤᠭᠠ ᠰᠤᠯᠠ ᠦᠭᠡᠢ ᠠ᠋! ᠨᠠᠭᠠᠰᠢ ᠪᠠᠨ ᠰᠠᠭᠤ! ᠭᠡᠵᠦ ᠨᠠᠢᠷ ᠲᠠᠯᠪᠢᠭᠠᠳ《 ᠬᠦᠦ ᠶ᠋ᠢᠨ ᠨᠡᠷᠡ ᠬᠡᠨ ᠪᠢᠯᠡ?》 ᠭᠡᠵᠦ ᠪᠠᠭᠠ ᠵᠡᠷᠭᠡ ᠠᠵᠢᠬᠯᠠᠰᠬᠢᠨ ᠠᠰᠠᠭᠤᠪᠠᠯ ᠬᠤᠪᠢᠯᠴᠡᠴᠡᠭ᠄
— ᠡᠨᠡ ᠮᠢᠨᠢ ᠮᠠᠭᠤ ᠬᠦᠦ! ᠨᠡᠷᠡ ᠠᠩᠴᠢᠨᠵᠠᠪ ᠭᠡᠪᠡ᠃
— ᠣ ᠬᠥᠭᠡᠷᠦᠬᠦᠢ ᠳᠡ! ᠲᠠ ᠴᠢᠨᠢ ᠰᠠᠢᠬᠠᠨ ᠬᠦᠦ ᠲᠡᠢ ᠬᠥᠮᠦᠨ ᠪᠠᠢᠨᠠ! ᠬᠦᠦ ᠲᠡᠢ ᠬᠥᠮᠦᠨ ᠬᠥᠯ ᠵᠢᠭᠢᠨᠡ ᠭᠡᠳᠡᠭ ᠢ᠋ᠶ᠋ᠡᠷ ᠡᠭᠡᠴᠢ ᠲᠠᠨ ᠤ᠋ ᠵᠢᠷᠭᠠᠬᠤ ᠴᠠᠭ ᠴᠤ᠌ ᠢᠷᠡᠵᠦ ᠪᠠᠢᠨᠠ ᠭᠡᠵᠦ ᠲᠤᠷᠠᠩᠬᠠᠢᠪᠲᠤᠷ ᠭᠣᠵᠣᠯᠵᠠᠭᠰᠠᠨ ᠡᠷᠡ ᠭᠡᠷ ᠦ᠋ᠨ ᠡᠵᠡᠭᠲᠡᠢ ᠤᠷᠤᠭᠤ ᠬᠠᠷᠠᠨ ᠬᠡᠯᠡᠪᠡᠯ ᠬᠤᠪᠢᠯᠴᠡᠴᠡᠭ᠄
— ᠡᠷᠡ ᠥᠰᠴᠦ ᠢᠰᠡᠭᠡᠢ ᠰᠤᠨᠳᠠᠭ ᠭᠡᠳᠡᠭ ᠢ᠋ᠶ᠋ᠡᠷ ᠮᠠᠭᠤ ᠬᠦᠦ ᠮᠢᠨᠢ ᠬᠥᠮᠦᠨ ᠦ᠌ ᠵᠡᠷᠭᠡ ᠳ᠋ᠦ᠍ ᠬᠦᠷᠴᠡᠢ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠰᠡᠳᠬᠢᠯ ᠳ᠋ᠦ᠍ ᠨᠢᠭᠡ ᠯᠡ ᠥᠶᠥᠭ ᠶᠦᠮ! ᠭᠡᠪᠡ᠃
— ᠳᠡᠭᠡᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ! ᠭᠡᠵᠦ ᠨᠥᠭᠦᠭᠡ ᠨᠠᠮᠬᠠᠨ ᠰᠢᠷᠠ ᠡᠷᠡ ᠭᠡᠷ ᠦ᠋ᠨ ᠡᠵᠡᠭᠲᠡᠢ ᠶ᠋ᠢᠨ ᠦᠭᠡ ᠶ᠋ᠢ ᠳᠠᠭᠠᠭᠤᠯᠤᠨ ᠶᠠᠷᠢᠪᠠ᠃
— ᠱᠣᠩ ᠳᠡᠭᠡᠷᠡ ᠤᠶᠠᠭᠠᠲᠠᠢ ᠬᠣᠶᠠᠷ ᠬᠡᠭᠡᠷ ᠮᠣᠷᠢᠨ ᠤ᠋ ᠴᠢᠨᠢ ᠥᠨᠳᠥᠷ ᠴᠡᠭᠡᠵᠢ ᠲᠡᠢ ᠬᠠᠯᠲᠠᠷ ᠬᠡᠭᠡᠷ ᠮᠣᠷᠢ ᠭᠡᠵᠦ ᠮᠥᠨ ᠨᠡᠯᠢᠶᠡᠳ ᠰᠠᠢᠨ ᠮᠣᠷᠢᠨ ᠤ᠋ ᠰᠢᠨᠵᠢ ᠲᠡᠢ ᠠᠳᠤᠭᠤ ᠶᠤᠮ ᠠ᠋ ! ᠭᠡᠵᠦ ᠠᠳᠤᠭᠤᠨ ᠳ᠋ᠤ᠌ ᠬᠣᠷᠣᠬᠠᠢᠲᠠᠢ ᠠᠩᠴᠢᠨᠵᠠᠪ ᠲᠡᠷᠡ ᠬᠠᠯᠲᠠᠷ ᠬᠡᠭᠡᠷ ᠢ᠋ ᠰᠣᠨᠢᠷᠬᠠᠵᠤ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠲᠤᠷᠠᠩᠬᠠᠢᠪᠲᠤᠷ ᠭᠣᠵᠣᠯᠵᠠᠭᠰᠠᠨ ᠡᠷᠡ ᠠᠩᠴᠢᠨᠵᠠᠪ ᠢ᠋ ᠠᠩᠬᠠ 《 ᠰᠠᠢᠨ ᠬᠦᠦ᠂ ᠰᠠᠢᠬᠠᠨ ᠬᠦᠦ》 ᠭᠡᠵᠦ ᠡᠬᠡ ᠳ᠋ᠦ᠍ᠨᠢ ᠮᠠᠭᠲᠠᠭᠰᠠᠨ ᠪᠣᠯᠪᠠᠴᠤ ᠦᠨᠡᠨ ᠳ᠋ᠡᠭᠡᠨ《 ᠠᠮᠠᠨ ᠤ᠋ ᠬᠢᠨᠢ ᠰᠦ ᠭᠦᠢᠴᠡᠳ ᠠᠷᠢᠯᠤᠭᠠᠳᠤᠢ ᠨᠢᠯᠬᠠᠰᠢᠶᠡᠷ ᠵᠠᠯᠠᠭᠤ᠃ ᠪᠡᠶᠡ ᠡᠴᠡ ᠨᠢ ᠠᠩᠭᠢᠷ ᠤᠭᠤᠷᠠᠭ ᠦᠨᠦᠷᠲᠦᠨᠡ 》 ᠭᠡᠵᠦ ᠪᠠᠰᠤᠩᠭᠤᠢ ᠪᠣᠳᠣᠵᠤ ᠪᠠᠢᠭᠰᠠᠨ ᠲᠤᠯᠠ ᠤᠶᠠᠭᠠᠲᠠᠢ ᠮᠣᠷᠢᠳ ᠤ᠋ᠨ ᠰᠠᠢᠨ ᠮᠠᠭᠤ ᠶ᠋ᠢ ᠬᠠᠷᠠᠩᠭᠠᠨ ᠭᠠᠳᠠᠷᠯᠠᠵᠤ ᠶᠠᠷᠢᠭᠰᠠᠨ ᠦᠭᠡᠨ ᠳ᠋ᠦ᠍ᠨᠢ ᠭᠠᠢᠬᠠᠰᠢ ᠲᠥᠷᠥᠵᠦ᠂ ᠬᠣᠵᠢᠮ ᠬᠦᠯᠦᠭ ᠦ᠋ᠨ ᠰᠠᠢᠨ ᠢ᠋ ᠲᠠᠨᠢᠳᠠᠭ ᠰᠦᠷᠡᠬᠡᠢ ᠡᠷᠡ ᠭᠠᠷᠬᠤ ᠨᠢ ᠭᠡᠵᠦ ᠥᠭᠡᠳᠡ ᠡᠴᠡ ᠨᠢ ᠬᠡᠰᠡᠭ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
— ᠰᠠᠢᠨ ᠮᠣᠷᠢᠨ ᠤ᠋ ᠰᠢᠨᠵᠢ ᠶ᠋ᠢ ᠶᠠᠭᠤ ᠪᠠᠷ ᠨᠢ ᠲᠠᠨᠢᠪᠠ ⁈ ᠭᠡᠵᠦ ᠬᠠᠰᠢᠷᠯᠠᠨ ᠠᠰᠠᠭᠤᠪᠠ᠃
— ᠶᠠᠭᠤ ᠴᠤ᠌ ᠭᠡᠬᠦ ᠶᠦᠮ ᠳᠡ᠃ ᠵᠢᠰᠦᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠣᠨᠳᠣᠣ ᠶᠤᠮ ᠠ᠋ ! ᠶᠡᠷᠦ ᠨᠢ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠡᠦᠲᠦᠮ ᠶᠠᠰᠤ ᠨᠢ ᠥᠭᠡᠷᠡ ᠬᠠᠷᠠᠭᠳᠠᠭᠠᠳ ᠪᠠᠢᠨᠠ᠁ ᠭᠡᠵᠦ ᠠᠩᠴᠢᠨᠵᠠᠪ ᠵᠢᠭᠠᠬᠠᠨ ᠪᠦᠭᠡᠷᠡᠩᠬᠡᠢᠯᠡᠰᠬᠢᠵᠦ ᠬᠠᠷᠢᠭᠤᠯᠪᠠ᠃
《 ᠡᠦᠲᠦᠮ ᠶᠠᠰᠤ ᠨᠢ ᠥᠭᠡᠷᠡ ᠁》ᠭᠡᠵᠦ ᠬᠣᠯᠠ ᠴᠠᠭᠠᠭᠤᠷ ᠶᠠᠭᠤᠮᠠ ᠬᠡᠯᠡᠬᠦᠯᠡᠷ ᠲᠤᠷᠠᠩᠬᠠᠢᠪᠲᠤᠷ ᠡᠷᠡ ᠄
— ᠠ !ᠡᠨᠡ ᠬᠠᠯᠲᠠᠷ ᠬᠡᠭᠡᠷ ᠦ᠋ᠨ ᠡᠦᠲᠦᠮ ᠶᠠᠰᠤ ᠴᠤ᠌ ᠭᠡᠵᠦ ᠶᠠᠭᠤ ᠪᠠᠢᠬᠤ ᠪᠣᠢ ᠳᠠ ! ᠡᠩ ᠦ᠋ᠨ ᠭᠣᠪᠢ ᠨᠤᠲᠤᠭ ᠤ᠋ᠨ ᠠᠳᠤᠭᠤ᠃ ᠣᠨᠣᠩᠭᠤᠲᠠ ᠴᠣᠴᠢᠮᠠᠭ ᠬᠤᠷᠳᠤᠨ ᠳᠠᠪᠬᠢᠶᠠ ᠲᠠᠢ ᠪᠣᠯᠪᠠᠴᠤ ᠶᠠᠪᠤᠭᠠᠨ ᠳ᠋ᠠᠭᠠᠨ ᠫᠠᠯᠠᠷᠠᠩ ᠫᠠᠯᠠᠷᠠᠩ ᠭᠡᠳ ᠳᠠᠭᠠᠭᠠᠮᠠᠭᠠᠢ ᠲᠠᠷ ᠢ᠋ᠶ᠋ᠠᠷ ᠭᠠᠪᠢᠬᠤ ᠦᠭᠡᠢ ᠶᠦᠮ ᠠ᠋ ᠭᠡᠨᠡ᠃ ᠡᠭᠦᠨ ᠳ᠋ᠦ᠍ ᠠᠩᠴᠢᠨᠵᠠᠪ᠄
— ᠠᠷᠠᠢ ᠲᠡᠢᠮᠦ ᠪᠢᠰᠢ ᠪᠠᠢᠬᠠ᠃ ᠡᠨᠡ ᠬᠠᠯᠲᠠᠷ ᠬᠡᠭᠡᠷ ᠮᠣᠷᠢ ᠰᠣᠯᠢ ᠶ᠋ᠢᠨ ᠬᠢᠷᠠ ᠶ᠋ᠢᠨ ᠳᠠᠬᠢ ᠶ᠋ᠢᠨ ᠡᠦᠲᠦᠮ ᠲᠡᠢ ᠠᠳᠤᠭᠤ ᠪᠣᠯᠵᠤ ᠲᠠᠭᠠᠷᠠᠨᠠ᠃ ᠬᠣᠯᠠ ᠠᠶᠠᠨ ᠳ᠋ᠤ᠌ ᠶᠠᠰᠤ ᠨᠢ ᠬᠠᠯᠠᠬᠤ ᠲᠣᠰᠤᠮ ᠢ᠋ᠶ᠋ᠠᠨ ᠴᠢᠩᠭᠠᠷᠠᠳᠠᠭ ᠰᠢᠨᠳᠠᠰᠤ ᠰᠠᠢᠲᠠᠢ ᠬᠦᠯᠦᠭ ᠰᠢᠨᠵᠢ ᠲᠡᠢ ᠁ ᠭᠡᠵᠦ ᠲᠡᠷᠡ ᠲᠤᠷᠠᠩᠬᠠᠢᠪᠲᠤᠷ ᠭᠣᠵᠣᠯᠵᠠᠭᠰᠠᠨ ᠡᠷᠡ ᠶ᠋ᠢᠨ ᠭᠣᠭᠴᠣᠭᠠᠯᠠᠵᠤ ᠲᠠᠯᠪᠢᠭᠰᠠᠨ ᠡᠭᠡᠳᠡᠷᠡᠭᠡᠨᠲᠡᠢ ᠣᠨᠢᠰᠣᠭᠠ ᠶ᠋ᠢ ᠠᠯᠳᠠᠷᠠᠭᠠᠨ ᠲᠠᠢᠯᠤᠭᠰᠠᠨ ᠰᠢᠭ᠋ ᠤᠷᠤᠰᠤᠭᠤᠯᠵᠤ ᠬᠡᠯᠡᠭᠰᠡᠨ ᠳ᠋ᠦ᠍ ᠲᠡᠷᠡ ᠲᠤᠷᠠᠩᠬᠠᠢᠪᠲᠤᠷ ᠭᠣᠵᠣᠯᠵᠠᠭᠰᠠᠨ ᠡᠷᠡ ᠠᠩᠴᠢᠨᠵᠠᠪ ᠤ᠋ᠨ ᠠᠳᠤᠭᠤ ᠮᠠᠯ ᠳ᠋ᠤ᠌ ᠬᠠᠩᠭᠢ ᠭᠢᠷᠠᠬᠠᠢ ᠪᠣᠯᠪᠠᠴᠤ ᠡᠴᠦᠰ ᠲᠡᠭᠡᠨ ᠨᠢᠯᠠᠭᠰᠠᠭ ᠴᠠᠭᠠᠪᠤᠷ ᠵᠠᠩ ᠨᠢ ᠠᠷᠭᠠ ᠦᠭᠡᠢ ᠪᠤᠯᠲᠠᠢᠭᠰᠠᠨ ᠢ᠋ ᠪᠣᠳᠣᠨ ᠶᠠᠯᠢ ᠦᠭᠡᠢ ᠢᠨᠢᠶᠡᠪᠬᠢᠯᠡᠨ᠄
— ᠡᠨᠡ ᠴᠦ᠍ ᠨᠡᠯᠢᠶᠡᠳ ᠨᠢᠳᠦᠨ ᠳ᠋ᠡᠭᠡᠨ ᠤᠰᠤᠲᠠᠢ ᠬᠦᠦ ᠪᠠᠢᠨᠠ ᠃ ᠬᠣᠵᠢᠮ ᠴᠤ᠌ ᠨᠢᠭᠡ᠁ ᠭᠡᠵᠦ ᠬᠡᠯᠡᠬᠦ ᠭᠡᠰᠡᠨ ᠢ᠋ ᠠᠩᠴᠢᠨᠵᠠᠪ ᠦᠭᠡ ᠶ᠋ᠢ ᠨᠢ ᠲᠠᠰᠤᠯᠵᠤ᠄
— ᠲᠡᠢᠮᠦ ᠪᠢᠰᠢ ᠪᠣᠯ ᠲᠠ ᠬᠣᠯᠠ ᠶ᠋ᠢᠨ ᠠᠶᠠᠨ ᠳ᠋ᠤ᠌ ᠬᠥᠲᠥᠯᠦᠭᠡ ᠮᠣᠷᠢ ᠲᠠᠢ ᠶᠠᠪᠤᠬᠤ ᠶᠤᠮ ᠪᠠᠢᠯᠭᠦᠢ ᠭᠡᠬᠦ ᠳ᠋ᠦ᠍ ᠲᠡᠷᠡ ᠨᠠᠮᠬᠠᠨ ᠰᠢᠷᠠ ᠡᠷᠡ᠄
— ᠲᠡᠢᠮᠦ ᠠ᠋! ᠲᠡᠢᠮᠦ! ᠭᠡᠪᠡ᠃
— ᠲᠡᠭᠡᠪᠡᠯ ᠨᠥᠭᠦᠭᠡ ᠬᠠᠷᠠ ᠬᠡᠭᠡᠷ ᠨᠢ ᠶᠠᠮᠠᠷ ᠪᠣᠢ?
— ᠵᠠ᠂ ᠲᠡᠷᠡ ᠴᠤ᠌ ᠶᠠᠭᠠᠬᠢᠬᠤ ᠪᠣᠢ! ᠭᠣᠪᠢ ᠶ᠋ᠢᠨ ᠠᠳᠤᠭᠤᠨ ᠤ᠋ ᠤᠳᠤᠮ ᠲᠠᠢ ᠮᠣᠷᠢ ᠪᠠᠢᠨᠠ᠃ ᠲᠡᠭᠡᠯᠡ ᠴᠤ᠌ ᠭᠡᠰᠡᠨ ᠬᠠᠯᠲᠠᠷ ᠬᠡᠭᠡᠷ ᠦ᠋ᠨ ᠲᠣᠭᠣᠰᠣᠨ ᠠ᠋ᠴᠠ ᠴᠢᠨᠢ ᠳᠡᠮᠡᠢ ᠬᠣᠴᠣᠷᠬᠤ ᠦᠭᠡᠢ ᠬᠦᠯᠦᠭ ᠪᠠᠢᠨᠠ ᠭᠡᠰᠡᠨ ᠳ᠋ᠦ᠍ ᠨᠠᠮᠬᠠᠨ ᠰᠢᠷᠠ ᠡᠷᠡ ᠠᠩᠴᠢᠨᠵᠠᠪ ᠢ᠋ ᠴᠣᠭᠣᠷᠠᠲᠠᠯᠠ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
— ᠪᠠᠢᠵᠠ ᠠ᠋᠂ ᠡᠨᠡ ᠬᠦᠦ ᠲᠡᠢ ᠬᠠᠮᠢᠭᠠ ᠨᠢᠭᠡ ᠠᠭᠤᠯᠵᠠᠭᠰᠠᠨ ᠰᠢᠭ᠋ ᠭᠡᠬᠦ ᠳ᠋ᠤ᠌ ᠲᠤᠷᠠᠩᠬᠠᠢᠪᠲᠤᠷ ᠭᠣᠵᠣᠯᠵᠠᠭᠰᠠᠨ ᠡᠷᠡ ᠭᠡᠨᠡᠳᠲᠡ ᠭᠤᠶᠠ ᠪᠠᠨ ᠠᠯᠠᠭᠠᠳᠠᠨ᠄
— ᠠᠱᠢ! ᠥᠷᠯᠥᠭᠡᠭᠦᠷ ᠡᠨᠡᠭᠦᠬᠡᠨ ᠳ᠋ᠦ᠍ ᠠᠳᠤᠭᠤᠨ ᠤ᠋ ᠲᠡᠯᠯᠡᠭᠡᠨ ᠳᠡᠭᠡᠷᠡ ᠬᠠᠷᠠᠭᠰᠠᠨ ᠬᠦᠦ ᠪᠢᠰᠢ ᠪᠢᠯᠡ ᠤᠤ⁈ ᠤᠷᠭᠠᠴᠢᠳ ᠢ᠋ ᠰᠠᠨᠳᠤᠷᠭᠠᠨ ᠬᠠᠰᠢᠯᠭᠠ ᠳᠠᠭᠠᠷᠢᠵᠤ ᠬᠦᠵᠦᠭᠦᠨ ᠳ᠋ᠡᠬᠢ ᠤᠷᠭᠠ ᠶ᠋ᠢ ᠠᠯᠳᠠᠭᠤᠯᠤᠨ ᠨᠠᠳᠬᠤᠳᠠᠭ ᠮᠠᠩᠭᠢᠰᠤᠨ ᠬᠠᠯᠢᠭᠤᠨ ᠦᠷᠢᠶᠡ ᠶ᠋ᠢ ᠵᠠᠳᠠᠭᠠᠢ ᠨᠣᠭᠲᠣ ᠬᠠᠶᠠᠵᠤ ᠨᠣᠭᠲᠣᠯᠠᠭᠠᠳ ᠪᠠᠷᠢᠴᠠ ᠵᠠᠢᠳᠠᠯᠠᠵᠤ ᠣᠷᠢᠯᠠᠭᠤᠯᠤᠨ ᠪᠤᠯᠭᠢᠭᠤᠯᠵᠤ ᠴᠣᠴᠢᠭᠠ ᠶ᠋ᠢ ᠨᠢ ᠭᠠᠷᠭᠠᠴᠢᠬᠠᠭᠠᠳ ᠳᠡᠯ ᠢ᠋ ᠨᠢ ᠬᠢᠷᠭᠠᠵᠤ ᠬᠣᠨᠳᠣᠯᠠᠢ ᠳᠡᠭᠡᠷᠡ ᠨᠢ ᠫᠠᠳ ᠭᠡᠲᠡᠯᠡ ᠠᠯᠠᠭᠠᠳᠠᠵᠤ ᠲᠠᠭᠤᠳᠠᠭ ᠬᠦᠦ ᠪᠠᠢᠨᠠ ᠰᠢᠲᠠ! ᠭᠡᠵᠦ ᠬᠣᠶᠠᠭᠤᠯᠠ ᠢᠨᠢᠶᠡᠬᠦ ᠳ᠋ᠦ᠍ ᠠᠩᠴᠢᠨᠵᠠᠪ ᠡᠪ ᠥᠭᠡᠢᠷᠬᠡᠵᠤ᠄《 ᠲᠡᠷᠡ ᠶᠠᠭᠠᠮᠠᠢ ᠳᠠ᠂ ᠦᠶᠡ ᠬᠤᠷᠠᠭᠴᠤᠤᠯ ᠤ᠋ᠨ ᠡᠷᠡ ᠶ᠋ᠢᠨ ᠨᠠᠭᠠᠳᠤᠮ ᠤ᠋ᠨ ᠵᠤᠭᠠ ᠰᠢᠲᠠ!》 ᠭᠡᠪᠡ᠃
ᠭᠤᠷᠪᠠᠭᠤᠯᠠ ᠡᠢᠨ ᠲᠡᠢᠨ ᠭᠡᠵᠦ ᠡᠷᠡ ᠬᠥᠮᠦᠨ᠂ ᠠᠭᠲᠠ ᠬᠦᠯᠦᠭ ᠦ᠋ᠨ ᠲᠤᠬᠠᠢ ᠡᠳᠦᠢ ᠲᠡᠳᠦᠢ ᠵᠣᠭᠣᠭ ᠬᠡᠯᠡᠯᠴᠡᠵᠦ ᠶᠡᠬᠡᠳᠡ ᠰᠡᠳᠬᠢᠯ ᠲᠠᠭᠠᠷᠠᠨ ᠨᠠᠷᠭᠢᠭᠰᠠᠨ ᠢ᠋ᠶ᠋ᠠᠨ ᠨᠥᠭᠦᠭᠡ ᠬᠣᠶᠠᠷ ᠭᠡᠢᠴᠢᠨ ᠥᠨᠳᠥᠷᠯᠡᠬᠦ ᠶ᠋ᠢᠨ ᠲᠦᠭᠦᠰ ᠪᠣᠯᠵᠤ ᠲᠡᠯᠢᠩ ᠰᠠᠪᠠ ᠪᠠᠨ ᠲᠥᠪᠬᠢᠨᠡᠭᠦᠯᠬᠦ ᠳ᠋ᠦ᠍ ᠠᠩᠴᠢᠨᠵᠠᠪ ᠤᠳᠠᠭᠠᠨ ᠵᠢᠯ ᠦ᠋ᠨ ᠵᠤᠵᠠᠭᠠᠨ ᠨᠠᠢᠷ ᠲᠠᠢ ᠠᠨᠳᠠ ᠨᠠᠢᠵᠠ ᠠ᠋ᠴᠠ ᠪᠠᠨ ᠰᠠᠯ ᠶᠠᠳᠠᠬᠤ ᠮᠡᠲᠦ᠄
— ᠶᠠᠭᠠᠷᠠᠭᠠᠳ ᠶᠠᠭᠠᠬᠢᠬᠤ ᠪᠣᠢ? ᠬᠦᠯᠦᠭ ᠮᠣᠷᠢᠨ ᠤ᠋ ᠪᠠᠨ ᠬᠥᠯ ᠨᠢᠷᠤᠭᠤ ᠶ᠋ᠢ ᠠᠮᠠᠷᠠᠭᠠᠵᠤ ᠬᠣᠨᠣᠭᠠᠳ ᠮᠠᠷᠭᠠᠰᠢ ᠥᠷᠯᠥᠭᠡ ᠡᠷᠲᠡ ᠶᠠᠪᠤ ᠯᠠ ᠳᠠ ᠭᠡᠪᠡ᠃
— ᠶᠠᠪᠤᠬᠤ ᠦᠭᠡᠢ ᠭᠣᠷᠢ ᠦᠭᠡᠢ᠂ ᠶᠡᠬᠡ ᠬᠦᠷᠢᠶᠡ ᠣᠷᠣᠲᠠᠯᠠ ᠵᠠᠮ ᠴᠤ᠌ ᠬᠣᠯᠠ ᠪᠠᠢᠨᠠ ᠰᠢᠦ᠃
— ᠭᠠᠯ ᠠᠪᠬᠤ ᠭᠡᠵᠦ ᠶᠠᠭᠠᠷᠠᠭᠠ ᠪᠢᠰᠢ ᠪᠣᠯ ᠬᠣᠨᠣᠴᠢᠬᠠᠭᠠᠳ ᠮᠠᠷᠭᠠᠲᠤᠷ ᠡᠷᠲᠡ ᠶᠠᠪᠤᠬᠤ ᠳ᠋ᠤ᠌ ᠶᠠᠭᠤ ᠠᠯᠵᠠᠬᠤ ᠪᠣᠢ? ᠭᠡᠵᠦ ᠠᠩᠴᠢᠨᠵᠠᠪ ᠡᠳᠡ ᠬᠣᠶᠠᠷ ᠢ᠋ ᠬᠣᠨᠣᠭᠤᠯᠬᠤ ᠭᠡᠳ ᠪᠠᠢᠳᠠᠭ ᠨᠢ ᠬᠠᠯᠲᠠᠷ ᠬᠡᠭᠡᠷ ᠢ᠋ ᠨᠢ ᠨᠢᠭᠡ ᠵᠠᠢᠳᠠᠯᠠᠵᠤ ᠦᠵᠡᠬᠦ ᠶ᠋ᠢ ᠭᠣᠷᠢᠳᠠᠭᠰᠠᠨ ᠤ᠋ ᠤᠴᠢᠷ ᠠᠵᠢ᠃
— ᠪᠣᠯᠬᠤ ᠦᠭᠡᠢ᠂ ᠳᠡᠭᠦᠦ ᠮᠢᠨᠢ᠂ ᠪᠢᠳᠡ ᠶᠡᠷᠦ ᠨᠢ ᠶᠠᠭᠠᠷᠠᠯᠲᠠᠢ ᠶᠠᠪᠤᠭᠠ ᠤᠯᠤᠰ᠃ ᠮᠠᠨᠤᠰ ᠬᠠᠯᠬᠠ ᠶ᠋ᠢᠨ ᠰᠠᠢᠨ ᠡᠷᠡ ᠭᠤᠨᠠᠨ ᠪᠠᠳᠠᠢ ᠲᠠᠢ ᠠᠭᠤᠯᠵᠠᠬᠤ ᠭᠡᠵᠦ ᠶᠠᠭᠠᠷᠠᠵᠤ ᠶᠠᠪᠤᠨᠠ ᠭᠡᠵᠦ ᠡᠨᠡ ᠬᠦᠦ ᠶ᠋ᠢ ᠳᠠᠩᠴᠤ ᠪᠠᠰᠤᠵᠤ ᠰᠠᠨᠠᠮᠰᠠᠷ ᠦᠭᠡᠢ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠠᠩᠴᠢᠨᠵᠠᠪ《ᠭᠤᠨᠠᠨ ᠪᠠᠳᠠᠢ 》 ᠭᠡᠬᠦ ᠲᠡᠢ ᠵᠡᠷᠭᠡ ᠨᠢᠳᠦ ᠨᠢ ᠣᠷᠣᠢ ᠳᠡᠭᠡᠷᠡ ᠪᠡᠨ ᠭᠠᠷᠴᠤ᠄
— ᠭᠤᠨᠠᠨ ᠪᠠᠳᠠᠢ ᠭᠡᠨᠡ ᠠ᠋⁈ ᠭᠡᠵᠦ ᠠᠰᠠᠭᠤᠯᠠ᠃
— ᠵᠤᠤᠬᠠᠢ ᠳᠠ! ᠴᠢ ᠭᠤᠨᠠᠨ ᠪᠠᠳᠠᠢ ᠶ᠋ᠢ ᠲᠠᠨᠢᠳᠠᠭ ᠤᠤ ?
— ᠲᠠᠨᠢᠬᠤ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ? ᠭᠤᠨᠠᠨ ᠪᠠᠳᠠᠢ ᠴᠤ᠌ ᠶᠣᠰᠣᠲᠠᠢ ᠡᠷᠡ ᠰᠢᠦ ᠳᠡ! ᠭᠡᠵᠦ ᠬᠥᠭᠡᠷᠪᠡ᠃
— ᠭᠤᠨᠠᠨ ᠪᠠᠳᠠᠢ ᠶ᠋ᠢ ᠴᠢ ᠲᠠᠨᠢᠨᠠ ᠭᠡᠨᠡ ᠠ᠋? ᠭᠡᠵᠦ ᠲᠤᠷᠠᠩᠬᠠᠢᠪᠲᠤᠷ ᠭᠣᠵᠣᠯᠵᠠᠭᠰᠠᠨ ᠡᠷᠡ 《 ᠪᠢᠲᠡᠭᠡᠢ ᠬᠤᠳᠠᠯ ᠬᠡᠯᠡ᠂ ᠳᠡᠭᠦᠦ ᠮᠢᠨᠢ !》 ᠭᠡᠰᠡᠨ ᠰᠢᠭ ᠨᠥᠭᠦᠭᠡ ᠨᠠᠮᠬᠠᠨ ᠰᠢᠷᠠ ᠡᠷᠡ ᠶ᠋ᠢ ᠬᠠᠷᠠᠵᠤ ᠪᠠᠰᠤᠩᠭᠤᠢ ᠢᠨᠢᠶᠡᠨᠡ᠃
ᠨᠥᠭᠦᠭᠡ ᠨᠠᠮᠬᠠᠨ ᠰᠢᠷᠠ ᠵᠠᠯᠠᠭᠤ ᠴᠤ᠌ ᠲᠡᠭᠦᠨ ᠦ᠌ ᠵᠦᠭ ᠬᠠᠷᠠᠭᠠᠳ 《 ᠠᠷᠠᠢ ᠴᠤ᠌ ᠦᠭᠡᠢ ᠪᠠᠢᠯᠭᠦᠢ ᠳᠡ 》 ᠭᠡᠰᠡᠨ ᠰᠢᠭ ᠢᠨᠢᠶᠡᠪᠡ᠃
— ᠭᠤᠨᠠᠨ ᠪᠠᠳᠠᠢ ᠡᠮᠦᠨᠡ ᠭᠣᠪᠢ ᠶ᠋ᠢᠨ ᠬᠡᠳᠦᠨ ᠰᠠᠢᠨ ᠡᠷᠡ ᠲᠡᠢ ᠵᠠᠰᠠᠭ ᠤ᠋ᠨ ᠠᠳᠤᠭᠤ ᠰᠠᠯᠭᠠᠵᠤ ᠲᠠᠭᠤᠭᠠᠳ ᠪᠠᠷᠢᠭᠳᠠᠵᠤ ᠵᠠᠰᠠᠭ ᠤ᠋ᠨ ᠶᠠᠯᠠ ᠲᠠᠮᠤ ᠳ᠋ᠤ᠌ ᠤᠨᠠᠭᠠᠳ ᠰᠢᠷᠢᠯᠡᠭᠳᠡᠭᠰᠡᠨ ᠭᠡᠨᠡ ᠃ ᠦᠢᠯᠡ ᠲᠠᠮᠤ ᠪᠠᠨ ᠦᠵᠡᠵᠡᠢ ᠠ᠋ ᠂ ᠴᠢᠰᠤᠨ ᠨᠥᠵᠢ ᠪᠣᠯᠲᠠᠯᠠ ᠬᠣᠩᠭᠣ ᠪᠠᠨ ᠪᠠᠨᠰᠠᠳᠠᠭᠤᠯᠤᠭᠰᠠᠨ ᠴᠤ᠌ ᠬᠣᠰᠢᠭᠤ ᠨᠤᠳᠤᠭ᠂ ᠨᠡᠷᠡ ᠤᠰᠤ᠂ ᠬᠠᠨᠢ ᠬᠠᠮᠰᠠᠭᠠᠲᠠᠨ ᠢ᠋ᠶ᠋ᠠᠨ ᠥᠴᠢᠭᠯᠡᠭᠡ ᠦᠭᠡᠢ ᠰᠠᠢᠨ ᠡᠷᠡ ᠭᠡᠨᠡ᠃ ᠬᠢᠲᠤᠭᠠ ᠰᠢᠭ᠋ ᠢᠷ ᠲᠡᠢ ᠮᠣᠭᠠᠢ ᠲᠠᠰᠢᠭᠤᠷ ᠤ᠋ᠨ ᠭᠤᠶᠠᠳᠠᠯ ᠳ᠋ᠤ᠌ ᠬᠣᠩᠭᠣ ᠶ᠋ᠢᠨ ᠬᠢᠨᠢ ᠮᠢᠬᠠ ᠲᠠᠰᠤᠷᠠᠵᠤ ᠪᠠᠢᠭᠰᠠᠨ ᠴᠤ᠌ ᠶᠣ ᠭᠡᠵᠦ ᠬᠠᠰᠬᠢᠷᠬᠤ ᠦᠭᠡᠢ ᠰᠢᠳᠦ ᠨᠢ ᠱᠠᠷᠴᠢᠭᠢᠨᠠᠭᠠᠳ᠂ ᠬᠥᠯᠥᠰᠥ ᠪᠠᠳᠬᠤᠭᠠᠳ ᠯᠠ ᠪᠠᠢᠭᠰᠠᠨ ᠭᠡᠨᠡ ᠁ ᠭᠡᠵᠦ ᠵᠢᠭᠠᠯ ᠠᠩᠴᠢᠨᠵᠠᠪ ᠪᠤᠰᠤᠳ ᠤ᠋ᠨ ᠠᠮᠠᠨ ᠠ᠋ᠴᠠ ᠳᠠᠮ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠨ ᠨᠢᠳᠦ ᠪᠡᠷ ᠦᠵᠡᠭᠰᠡᠨ ᠰᠢᠭ ᠳᠦᠷᠰᠦᠯᠡᠵᠦ ᠮᠡᠷᠭᠡᠯᠡᠬᠦ ᠳ᠋ᠦ᠍ ᠨᠥᠭᠦᠭᠡ ᠬᠣᠶᠠᠷ ᠡᠷᠡ ᠶ᠋ᠢᠨ ᠴᠢᠷᠠᠢ ᠰᠤᠨᠢᠨ ᠪᠣᠯᠵᠤ᠄
— ᠭᠤᠨᠠᠨ ᠪᠠᠳᠠᠢ ᠡᠦᠲᠦ ᠬᠠᠮᠢᠭᠠ ᠪᠠᠢᠨᠠ? ᠴᠢ ᠪᠠᠰᠠ ᠶᠠᠭᠤ ᠳᠤᠭᠤᠯᠪᠠ? ᠭᠡᠵᠦ ᠨᠢᠮᠪᠠᠢ ᠤᠬᠤᠴᠢᠯᠠᠭᠰᠠᠨ ᠳ᠋ᠤ᠌᠂ ᠠᠩᠴᠢᠨᠵᠠᠪ ᠠᠮᠠ ᠪᠠᠨ ᠠᠩᠭᠠᠢᠨ ᠲᠣᠯᠣᠭᠠᠢ ᠪᠠᠨ ᠮᠠᠭᠠᠵᠢᠭᠠᠳ ᠬᠡᠰᠡᠭ ᠲᠦᠭᠳᠡᠷᠡᠭᠰᠡᠨ ᠢ᠋ᠶ᠋ᠡᠨ᠄
— ᠁ ᠶᠠᠭᠤ ᠴᠤ᠌ ᠭᠡᠰᠡᠨ᠂ ᠵᠠᠰᠠᠭ ᠤ᠋ᠨ ᠶᠠᠮᠤᠨ ᠳ᠋ᠤ᠌ ᠶᠠᠯᠠᠯᠠᠭᠳᠠᠵᠤ ᠲᠦᠭᠦᠬᠡᠢ ᠰᠢᠷᠢᠨ ᠳ᠋ᠦ᠍ ᠰᠢᠷᠢᠯᠡᠭᠳᠡᠭᠰᠡᠨ ᠬᠢᠷᠢᠨ ᠢ᠋ᠶ᠋ᠡᠨ ᠳᠤᠲᠠᠭᠠᠭᠠᠳ ᠠᠯᠠᠭᠠ ᠪᠣᠯᠴᠢᠬᠠᠯᠠ ᠭᠡᠰᠡ ᠰᠤᠷᠠᠭ ᠲᠠᠢ ᠁ ᠭᠡᠵᠦ ᠠᠮᠠᠨ ᠵᠠᠪᠠᠵᠢ ᠨᠢ ᠰᠤᠯᠠᠷᠠᠨ ᠠᠩᠬᠠ ᠠᠩᠬᠠᠨ ᠤ 《ᠭᠤᠨᠠᠨ ᠪᠠᠳᠠᠢ ᠶ᠋ᠢ ᠲᠠᠨᠢᠨᠠ ᠁ ᠭᠤᠨᠠᠨ ᠪᠠᠳᠢ ᠶᠠᠭᠠᠬᠢᠯᠠ ᠡᠢᠯᠡ ᠁ 》ᠭᠡᠵᠦ ᠬᠥᠪᠰᠥᠷᠳᠡᠡ ᠨᠥᠭᠦᠭᠡ ᠡᠮᠦᠨᠠ ᠭᠣᠪᠢ ᠶ᠋ᠢᠨ ᠴᠠᠭᠠᠨᠠ ᠠ᠋ᠴᠠ ᠢᠷᠡᠭᠰᠡᠨ ᠬᠤᠶᠠᠷ ᠡᠷᠡ ᠶ᠋ᠢ ᠪᠠᠰᠤᠵᠤ ᠡᠬᠢᠯᠡᠭᠡᠳ ᠲᠠᠨᠢᠯ ᠪᠣᠯᠬᠤ ᠰᠠᠢᠨ ᠡᠷᠡ ᠶ᠋ᠢ ᠨᠢ ᠦᠯᠦ ᠲᠠᠨᠢᠬᠤ ᠬᠥᠮᠦᠨ ᠳ᠋ᠦ᠍ ᠰᠢᠭ ᠭᠦᠪᠢᠵᠦ ᠮᠠᠭᠲᠠᠭᠰᠠᠨ ᠣᠮᠣᠭ ᠨᠢ ᠬᠠᠮᠰᠢᠢᠪᠠ᠃
ᠠᠩᠴᠢᠨᠵᠠᠪ ᠤᠨ ᠢᠩᠭᠢᠵᠦ ᠨᠥᠭᠦᠭᠡ ᠬᠣᠶᠠᠷ ᠲᠤ᠌ ᠮᠡᠳᠡᠮᠡᠬᠡᠢᠷᠡᠨ ᠮᠡᠷᠭᠡᠯᠡᠭᠰᠡᠨ ᠨᠢ ᠨᠠᠷᠢᠨ ᠤᠬᠠᠭᠠᠨ ᠪᠢᠰᠢ᠃ ᠡᠨᠡ ᠨᠢ ᠦᠨᠡᠨ ᠳ᠋ᠡᠭᠡᠨ ᠭᠤᠨᠠᠨ ᠪᠠᠳᠠᠢ ᠶ᠋ᠢ ᠪᠢᠰᠢᠷᠡᠵᠦ ᠲᠡᠭᠦᠨ ᠲᠡᠢ ᠣᠯᠵᠤ ᠠᠭᠤᠯᠵᠠᠬᠤ ᠶ᠋ᠢᠨ ᠬᠦᠰᠡᠯᠡᠩ ᠪᠣᠯᠬᠤ ᠳ᠋ᠠᠭᠠᠨ ᠬᠠᠮᠢᠭᠠ ᠨᠤᠲᠤᠭ ᠤᠨ ᠦᠯᠦ ᠲᠠᠨᠢᠬᠤ ᠬᠥᠮᠦᠨ ᠳ᠋ᠦ᠍ ᠪᠡᠶᠡ ᠪᠡᠨ ᠭᠠᠢᠬᠠᠭᠤᠯᠤᠨ 《ᠪᠢ ᠲᠠᠨᠢᠨᠠ》 ᠭᠡᠵᠦ ᠬᠡᠦᠬᠡᠳᠯᠢᠭ ᠵᠠᠩᠨᠠᠭᠰᠠᠨ ᠬᠡᠷᠡᠭ᠃ ᠭᠠᠭᠴᠠ ᠵᠣᠷᠢᠯᠭᠠ ᠨᠢ ᠭᠡᠪᠡᠯ ᠪᠠᠰᠠ ᠯᠠ ᠨᠥᠭᠦᠭᠡ ᠬᠣᠶᠠᠷ ᠵᠣᠴᠢᠨ ᠢ᠋ ᠭᠡᠷ ᠲᠡᠭᠡᠨ ᠬᠤᠨᠤᠭᠤᠯᠤᠭᠠᠳ ᠬᠠᠯᠲᠠᠷ ᠬᠡᠭᠡᠷ ᠮᠣᠷᠢ ᠶ᠋ᠢ ᠨᠢ ᠤᠬᠠᠭᠠᠯᠠᠵᠤ ᠦᠵᠡᠬᠦ ᠶᠤᠮᠰᠠᠨ ᠭᠡᠰᠡᠨ ᠳᠥᠬᠥᠮᠬᠡᠨ ᠪᠣᠳᠣᠯ᠃ ᠭᠡᠬᠦ ᠳ᠋ᠡᠭᠡᠨ ᠡᠨᠡ ᠨᠢ ᠬᠦᠦ ᠶ᠋ᠢᠨ ᠰᠠᠨᠠᠭᠰᠠᠨ ᠢ᠋ᠶ᠋ᠠᠷ ᠪᠣᠯᠤᠭᠰᠠᠨ ᠦᠬᠡᠢ᠃ ᠬᠠᠷᠢᠨ ᠡᠭᠦᠨ ᠤ ᠡᠰᠡᠷᠭᠦ ᠪᠡᠷ ᠨᠥᠭᠦᠭᠡ ᠬᠣᠶᠠᠷ ᠲᠤ᠌ ᠠᠳᠠ ᠠ᠋ᠴᠠ ᠤᠯᠠᠮ ᠴᠤ᠌ ᠱᠠᠯᠠᠪᠬᠠᠨ ᠬᠥᠳᠡᠯᠬᠦ ᠭᠡᠰᠡᠨ ᠪᠣᠳᠣᠯ ᠣᠷᠣᠭᠤᠯᠵᠠᠢ᠃ ᠡᠭᠦᠨ ᠦ᠌ ᠤᠯᠠᠮ ᠢᠶᠠᠷ ᠨᠥᠭᠦᠭᠡ ᠬᠣᠶᠠᠷ ᠵᠣᠴᠢᠨ ᠤ ᠰᠠᠭᠤᠳᠠᠯ ᠳᠣᠣᠷᠠ ᠠ᠋ᠴᠠ ᠥᠷᠭᠡᠰᠦ ᠬᠠᠳᠬᠤᠭᠰᠠᠨ ᠰᠢᠭ᠋ ᠪᠣᠰᠴᠤ ᠬᠥᠳᠡᠯᠪᠡ᠃
ᠬᠠᠵᠠᠭᠠᠷ ᠨᠣᠭᠲᠤᠨ ᠤ ᠭᠠᠷᠠᠬᠠ ᠡᠷᠭᠢᠭᠦᠯᠭᠡ ᠶ᠋ᠢᠨ ᠳᠠᠭᠤᠨ ᠬᠠᠩᠭᠢᠨᠠᠵᠤ ᠰᠠᠢᠬᠢ ᠬᠣᠶᠠᠷ ᠡᠷᠡ ᠶ᠋ᠢ ᠮᠣᠷᠢᠨ ᠳᠠᠭᠠᠨ ᠮᠣᠷᠳᠠᠵᠤ 《ᠲᠠ ᠨᠠᠷ ᠰᠠᠢᠨ ᠰᠠᠭᠤᠵᠤ ᠪᠠᠢᠭᠠᠷᠠᠢ》 ᠭᠡᠳ ᠬᠥᠳᠡᠯᠬᠦ ᠳ᠋ᠦ᠍ ᠠᠩᠴᠢᠨᠵᠠᠪ ᠦᠨ ᠰᠡᠳᠬᠢᠯ ᠭᠡᠨᠡᠳᠲᠡ ᠬᠥᠭᠰᠡᠨ ᠳᠣᠭᠳᠣᠯᠵᠤ《 ᠵᠢᠩᠬᠢᠨᠢ ᠡᠷᠡ ᠭᠦᠨ ᠦ᠌ ᠣᠮᠣᠭ ᠵᠢᠪᠬᠤᠭᠠ ᠭᠡᠭᠴᠢ ᠡᠨᠡ ᠯᠡ ᠳᠡ ! ᠭᠤᠨᠠᠨ ᠪᠠᠳᠠᠢ ᠯᠠᠪ ᠯᠠ ᠡᠢᠮᠦᠷᠬᠦᠦ ᠲᠥᠯᠥᠪ ᠲᠡᠢ ᠪᠠᠢᠬᠠ! ᠡᠳᠡᠨᠥᠰ ᠲᠡᠢ ᠬᠠᠮᠰᠠᠭᠠᠲᠠᠨ ᠴᠤ᠌ ᠪᠠᠢᠵᠤ ᠮᠡᠳᠡᠨᠡ》 ᠭᠡᠳᠡᠭ ᠪᠣᠳᠣᠯ ᠳᠠᠷᠢᠬᠢᠨ ᠳᠤᠨᠢ ᠬᠠᠷᠪᠤᠨ ᠤᠷᠤᠵᠤ ᠲᠡᠭᠦᠨ ᠤ ᠠᠷᠠᠢ ᠲᠥᠯᠥᠪᠵᠢᠭᠡ ᠦᠭᠡᠢ ᠡᠷᠡ ᠬᠣᠩᠭᠣᠷ ᠪᠣᠳᠣᠯ ᠢ᠋ ᠣᠪᠣᠯᠵᠠᠭᠤᠯᠤᠨᠠ᠃
ᠨᠥᠭᠦᠭᠡ ᠬᠣᠶᠠᠷ ᠡᠷᠡ ᠮᠣᠷᠳᠠᠮᠠᠭᠴᠠ ᠪᠠᠨ ᠡᠨᠡ ᠡᠵᠢ ᠬᠦᠦ ᠬᠣᠶᠠᠷ ᠢ᠋ ᠬᠠᠩᠬᠠᠢ ᠪᠣᠷᠣ ᠭᠡᠷ ᠲᠡᠢ ᠨᠢ ᠥᠨᠦᠴᠢᠷᠡᠭᠦᠯᠵᠦ ᠬᠠᠶᠠᠨ᠂ ᠲᠠᠴᠢᠭᠢᠨᠠᠭᠠᠳ ᠣᠳᠬᠤ ᠮᠣᠷᠢᠨ ᠤ᠋ ᠲᠦᠪᠡᠷᠭᠡᠨ ᠳ᠋ᠦ᠍ ᠬᠤᠢᠯᠠᠷᠠᠭᠰᠠᠨ ᠲᠣᠭᠣᠰᠣᠨ ᠳ᠋ᠠᠭᠠᠨ ᠨᠢᠭᠤᠭᠳᠠᠵᠤ ᠳᠣᠪᠲᠣᠯᠪᠠ᠃
ᠭᠡᠰᠡᠭ ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠠᠩᠴᠢᠨᠵᠠᠪ ᠲᠡᠷᠡ ᠬᠣᠶᠠᠷ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠲᠡᠰᠬᠡᠯ ᠦᠭᠡᠢ《 ᠨᠠᠮᠠᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠭᠠᠷᠠᠢ᠂ ᠪᠢ ᠪᠠᠰᠠ ᠭᠤᠨᠠᠨ ᠪᠠᠳᠠᠢ ᠲᠠᠢ ᠠᠭᠤᠯᠵᠠᠶᠠ》ᠭᠡᠵᠦ ᠬᠠᠰᠬᠢᠷᠤᠭᠠᠳ ᠮᠣᠷᠢᠨ ᠤ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠲᠠᠢᠯᠵᠤ ᠡᠵᠢ ᠳ᠋ᠠᠭᠡᠨ᠄
— ᠡᠵᠢ ᠠ᠋᠂ ᠪᠢ ᠪᠠᠰᠠ ᠡᠳᠡᠨᠦᠰ ᠲᠠᠢ ᠶᠠᠪᠤᠶᠠ! ᠡᠨᠡ ᠬᠣᠶᠠᠷ ᠡᠷᠡ ᠭᠤᠨᠠᠨ ᠪᠠᠳᠠᠢ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠶᠠᠪᠤᠭᠠ ᠶᠤᠮ ᠪᠠᠢᠨᠠ᠃ ᠰᠠᠢᠨ ᠬᠥᠮᠥᠰ ᠪᠠᠢᠨᠠ᠃ ᠪᠢ ᠡᠳᠡᠨᠦᠰ ᠲᠦ ᠳᠤᠰᠠ ᠪᠣᠯᠬᠤ ᠶᠤᠮᠰᠠᠨ ᠭᠡᠪᠡ᠃ ᠡᠭᠦᠨ ᠳ᠋ᠦ᠍ ᠬᠤᠪᠢᠯᠴᠡᠴᠡᠭ᠄
— ᠬᠦᠦ ᠮᠢᠨᠢ᠂ ᠪᠠᠢᠭ ᠳ᠋ᠠ ! ᠡᠴᠢᠭᠡ ᠴᠢᠨᠢ ᠶᠠᠪᠤᠬᠤ ᠳ᠋ᠠᠭᠠᠨ 《ᠪᠣᠴᠠᠵᠣ ᠯᠠᠪ ᠢᠷᠡᠨᠡ》 ᠭᠡᠵᠦ ᠠᠮᠠᠯᠠᠭᠠᠳ ᠣᠳᠣ ᠪᠣᠯᠲᠠᠯᠠ ᠠᠯᠠᠭᠠ᠃ ᠬᠦᠦ ᠮᠢᠨᠢ ᠡᠦᠲᠦ ᠡᠵᠢ ᠪᠡᠨ ᠣᠷᠬᠢᠭᠠᠳ ᠶᠠᠪᠤᠪᠠᠯ ᠡᠵᠢ ᠨᠢ ᠰᠢᠨᠠᠯᠵᠤ ᠦᠬᠦᠨᠡ ᠰᠢᠦ ᠳᠡ ᠭᠡᠪᠡ᠃
— ᠦᠭᠡᠢ᠂ ᠡᠵᠢ ᠠ᠋! ᠪᠢ ᠡᠳᠡᠨᠥᠰ ᠲᠡᠢ ᠶᠠᠪᠤᠵᠤ ᠭᠤᠨᠠᠨ ᠪᠠᠳᠠᠢ ᠲᠠᠢ ᠠᠭᠤᠯᠵᠠᠴᠢᠬᠠᠭᠠᠳ ᠯᠠ ᠪᠤᠴᠠᠵᠤ ᠢᠷᠡᠨᠡ᠃ ᠲᠠ ᠰᠠᠨᠠᠭᠠ ᠠᠮᠤᠷ ᠪᠠᠢ !
— ᠪᠢᠲᠡᠭᠡᠢ ᠲᠡᠭᠡ! ᠬᠦᠦ ᠮᠢᠨᠢ᠂ ᠡᠨᠡ ᠬᠣᠶᠠᠷ ᠴᠢᠨᠢ ᠶᠠᠮᠠᠷ ᠬᠠᠰᠢ ᠪᠠᠨ ᠤᠯᠤᠰ ᠢ᠋ ᠬᠡᠯᠡᠵᠦ ᠮᠡᠳᠡᠬᠦ ᠦᠭᠡᠢ ᠠ᠋! ᠭᠡᠷ ᠣᠷᠣᠨ ᠭᠡᠵᠦ ᠪᠠᠢᠳᠠᠭ ᠦᠭᠡᠢ ᠬᠡᠰᠦᠭᠦᠯ ᠦ᠋ᠨ ᠬᠥᠮᠦᠨ ᠰᠢᠭ ᠯᠡ ᠬᠠᠷᠠᠭᠳᠠᠨᠠ᠁ ᠭᠤᠨᠠᠨ ᠪᠠᠳᠠᠢ ᠶ᠋ᠢ ᠴᠢᠨᠢ ᠪᠠᠷᠢᠬᠤ ᠪᠠᠷ ᠶᠠᠪᠤᠭᠠ ᠴᠤ᠌ ᠮᠠᠭᠠᠳ ᠦᠭᠡᠢ᠃ ᠭᠤᠨᠠᠨ ᠪᠠᠳᠠᠢ᠂ ᠭᠤᠨᠠᠨ ᠪᠠᠳᠠᠢ ᠭᠡᠵᠦ ᠰᠤᠷᠠᠭᠯᠠᠭᠠᠳ ᠪᠠᠢᠳᠠᠭ ᠨᠢ ᠲᠡᠳᠡᠨᠦᠰ ᠴᠠᠭᠠᠭᠤᠷ ᠢ᠋ᠶ᠋ᠠᠨ ᠬᠣᠯᠪᠣᠭᠠ ᠲᠠᠢ ᠤᠯᠤᠰ ᠤᠤ ᠳᠠ⁈ ᠬᠡᠯᠡᠵᠦ ᠮᠡᠳᠡᠬᠦ ᠦᠭᠡᠢ ᠁ ᠬᠡᠳᠦᠭᠦᠯᠡ ᠬᠠᠮᠰᠠᠵᠤ ᠵᠠᠰᠠᠭ ᠤ᠋ᠨ ᠠᠳᠤᠭᠤ ᠰᠠᠯᠭᠠᠵᠤ ᠲᠠᠭᠤᠭᠠᠳ ᠭᠤᠨᠠᠨ ᠪᠠᠳᠠᠢ ᠪᠠᠨ ᠬᠡᠷᠡᠭ ᠲᠦ᠍ ᠴᠢᠷᠦᠭᠦᠯᠦᠨ ᠰᠢᠷᠢᠯᠡᠭᠦᠯᠵᠦ ᠦᠢᠯᠡ ᠲᠠᠮᠤ ᠶ᠋ᠢ ᠨᠢ ᠦᠵᠡᠭᠡᠳ ᠁ ᠡᠦᠲᠦ ᠴᠠᠭᠠᠳᠤᠬᠢ ᠪᠠᠨ ᠰᠤᠷᠠᠭᠯᠠᠵᠤ ᠶᠠᠪᠤᠭᠠ ᠨᠢ ᠠᠯᠢ ᠨᠢᠭᠡ ᠡᠳᠦᠷ ᠪᠠᠰᠠ ᠵᠠᠰᠠᠭ ᠤ᠋ᠨ ᠬᠢᠨ ᠳ᠋ᠦ᠍ ᠪᠠᠷᠢᠭᠳᠠᠵᠤ ᠲᠠᠭᠤᠭᠳᠠᠪᠠᠯ ᠬᠦᠦ ᠮᠢᠨᠢ ᠲᠡᠭᠡᠭᠡᠳ ᠳᠠᠭᠤᠰᠬᠤ ᠨᠢ ᠠ᠋ ! ᠴᠢᠮᠠᠶ᠋ᠢ ᠡᠮᠦᠨᠡ ᠪᠡᠨ ᠴᠢᠬᠢᠴᠢᠬᠡᠭᠡᠳ ᠴᠠᠭᠠᠰᠢ ᠭᠤᠳᠤᠢᠴᠢᠬᠠᠳᠠᠭ ᠤᠯᠤᠰ ᠪᠠᠢᠵᠤ ᠶᠠᠳᠠᠬᠤ ᠦᠭᠡᠢ ᠭᠡᠳ ᠨᠢᠯᠪᠤᠰᠤ ᠤᠨᠠᠭᠠᠭᠰᠠᠨ ᠳ᠋ᠤ᠌ ᠠᠩᠴᠢᠨᠵᠠᠪ
— ᠡᠵᠢ ᠠ᠋! ᠪᠢᠳᠡᠬᠡᠢ ᠤᠬᠢᠯᠠ! ᠬᠦᠦ ᠴᠢᠨᠢ ᠳᠡᠷᠭᠡᠳᠡ ᠴᠢᠨᠢ ᠪᠠᠢᠭᠠ ᠰᠢᠲᠠ! ᠪᠢ ᠶᠠᠪᠤᠬᠤ ᠦᠭᠡᠢ! ᠭᠡᠳ ᠮᠣᠷᠢᠨ ᠳ᠋ᠠᠭᠠᠨ ᠤᠬᠤᠰᠬᠢᠨ ᠮᠤᠷᠳᠠᠵᠤ᠄ 《ᠪᠢ ᠲᠡᠷᠡ ᠬᠣᠶᠠᠷ ᠤᠨ ᠬᠠᠮᠢᠭᠠᠰᠢ ᠪᠠᠨ ᠵᠦᠭᠯᠡᠭᠰᠡᠨ ᠢ ᠬᠠᠷᠠᠴᠢᠬᠠᠭᠠᠳ ᠢᠷᠡᠶᠡ》 ᠭᠡᠳ ᠨᠥᠭᠥᠭᠡ ᠬᠣᠶᠠᠷ ᠮᠣᠷᠢᠲᠠᠨ ᠤ ᠶᠠᠪᠤᠭᠰᠠᠨ ᠵᠦᠭ ᠲᠦ ᠲᠣᠭᠣᠰᠣ ᠮᠠᠨᠠᠷᠠᠭᠤᠯᠤᠨ ᠳᠠᠪᠬᠢᠨ ᠣᠳᠪᠠ᠃
ᠨᠢᠭᠡ ᠯᠡ ᠲᠠᠰᠢᠭᠤᠷ ᠲᠤ᠌ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠶ᠋ᠢ ᠬᠣᠲᠣᠯᠵᠠᠲᠠᠯᠠ ᠳᠠᠪᠬᠢᠭᠰᠠᠨ ᠬᠦᠷᠡᠩ ᠦᠷᠢᠶᠡ ᠡᠮᠡᠭᠡᠯ ᠠᠭᠤᠯᠠ ᠶ᠋ᠢᠨ ᠠᠷᠤ ᠰᠤᠵᠠᠭ ᠬᠦᠷᠦᠭᠡᠳ ᠬᠠᠮᠠᠷ ᠨᠢ ᠣᠩᠭᠣᠯᠵᠠᠨ ᠠᠭᠠᠬᠢᠯᠵᠠᠵᠤ ᠡᠬᠢᠯᠡᠪᠡ᠃
ᠨᠥᠭᠦᠭᠡ ᠬᠣᠶᠠᠷ ᠤ᠋ᠨ ᠪᠠᠷᠠ ᠠᠯᠠᠭᠠ᠃
ᠬᠠᠩᠭᠢ ᠬᠠᠲᠠᠷᠢᠳᠠᠭ ᠪᠣᠯᠪᠠᠴᠤ ᠢᠳᠡᠭᠡᠰᠢᠵᠦ ᠴᠢᠮᠥᠭᠡᠰᠢᠭᠡᠲᠦᠢ ᠬᠦᠷᠡᠩ ᠦᠷᠢᠶᠡ ᠲᠡᠷᠡ ᠨᠠᠰᠤ ᠭᠦᠢᠴᠡᠭᠰᠡᠨ ᠮᠣᠷᠢᠳ ᠤ᠋ᠨ ᠥᠯᠥᠨ ᠲᠣᠭᠣᠰᠣ ᠶ᠋ᠢ ᠴᠤ᠌ ᠦᠨᠦᠷᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠨᠢ ᠮᠡᠳᠡᠭᠡᠵᠢ᠃ ᠠᠩᠴᠢᠨᠵᠠᠪ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠮᠣᠷᠢ ᠪᠠᠨ ᠬᠥᠲᠥᠯᠦᠨ ᠡᠮᠡᠭᠡᠯ ᠠᠭᠤᠯᠠ ᠶ᠋ᠢᠨ ᠠᠷᠤ ᠬᠥᠲᠥᠯ ᠳᠡᠭᠡᠷᠡ ᠭᠠᠷᠴᠤ ᠬᠦᠷᠡᠩ ᠦᠷᠢᠶᠡ ᠪᠠᠨ ᠴᠣᠮᠣᠵᠤ ᠲᠡᠭᠷᠢ ᠬᠠᠷᠠᠨ ᠲᠠᠩᠭᠠᠢᠨ ᠬᠡᠪᠲᠡᠪᠡ᠃
《 ᠰᠠᠢᠨ ᠡᠷᠡ ᠯᠡ ᠰᠡᠶᠢ ᠰᠠᠢᠨ ᠬᠦᠯᠦᠭ ᠣᠯᠵᠤ ᠡᠳ᠋ᠯᠡᠨᠡ ᠳᠡ! ᠡᠳᠡ ᠬᠣᠶᠠᠷ ᠴᠤ᠌ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠭᠤᠨᠠᠨ ᠪᠠᠳᠠᠢ ᠶ᠋ᠢᠨ ᠬᠠᠮᠰᠠᠭᠠᠲᠠᠨ ᠃ ᠲᠡᠢᠮᠦ ᠪᠢᠰᠢ ᠪᠣᠯ ᠶᠠᠭᠠᠬᠢᠯᠠ ᠭᠡᠵᠦ ᠰᠣᠯᠢ ᠶ᠋ᠢᠨ ᠬᠢᠷᠠ ᠶ᠋ᠢᠨ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠳᠦ ᠶ᠋ᠢᠨ ᠠᠳᠤᠭᠤᠨ ᠤ᠋ ᠡᠦᠲᠦᠮ ᠲᠡᠢ ᠬᠦᠯᠦᠭ ᠣᠯᠵᠤ ᠤᠨᠤᠨᠠ ᠪᠣᠢ》 ᠭᠡᠵᠦ ᠪᠤᠲᠤᠠ ᠨᠥᠭᠦᠭᠡ ᠬᠣᠶᠠᠷ ᠡᠷᠡ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠶᠠᠪᠤᠬᠤ ᠰᠠᠨ ᠭᠡᠬᠦ ᠪᠣᠳᠣᠯ ᠨᠢ ᠶᠠᠭᠠᠬᠢᠪᠠᠴᠤ ᠪᠣᠯᠬᠤ ᠦᠭᠡᠢ ᠣᠪᠣᠯᠵᠠᠬᠤ ᠳ᠋ᠤ᠌ ᠭᠦᠶᠦᠨ ᠪᠣᠰᠴᠤ ᠬᠦᠷᠡᠩ ᠦᠷᠢᠶᠠ ᠶ᠋ᠢᠨ ᠢ᠋ᠶ᠋ᠡᠨ ᠣᠯᠣᠩ ᠢ᠋ ᠴᠢᠩᠭᠠᠯᠠᠬᠤ ᠳ᠋ᠤ᠌ ᠨᠣᠣᠷᠬᠠᠢ ᠪᠣᠷᠣ ᠭᠡᠷ᠂ ᠪᠤᠭᠤᠷᠤᠯ ᠡᠵᠢ ᠬᠣᠶᠠᠷ ᠨᠢ ᠨᠢᠳᠦᠨ ᠳ᠋ᠦ᠍ᠨᠢ ᠪᠥᠷᠲᠥᠯᠵᠡᠵᠦ ᠬᠠᠷᠠᠭᠳᠠᠬᠤᠯᠠᠷ ᠰᠡᠳᠬᠢᠯ ᠨᠢ ᠠᠷᠭᠠ ᠦᠭᠡᠢ ᠬᠣᠷᠭᠣᠳᠠᠵᠤ ᠮᠣᠷᠢᠨ ᠤ᠋ ᠪᠠᠨ ᠡᠮᠡᠭᠡᠯ ᠦ᠋ᠨ ᠪᠦᠭᠦᠷᠭᠡ ᠶ᠋ᠢ ᠲᠦᠰᠢᠵᠦ ᠪᠣᠳᠣᠯᠭᠠ ᠪᠣᠯᠪᠠ᠃ ᠬᠦᠷᠡᠩ ᠦᠷᠢᠶᠡ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠨᠠᠭᠠᠳᠤᠨ 《 ᠲᠡᠷᠡ ᠬᠣᠶᠠᠷ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠶᠠᠪᠤᠬᠤ ᠤᠤ? ᠡᠵᠢ ᠳᠡᠭᠡᠷᠡ ᠪᠡᠨ ᠪᠤᠴᠠᠬᠤ ᠤᠤ? ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠣᠯ! ᠪᠢ ᠴᠤ᠌ ᠬᠠᠮᠢᠭᠠᠰᠢ ᠪᠣᠯ ᠲᠠᠢᠰᠢ ᠪᠠᠨ ᠵᠢᠯᠣᠭᠣ ᠳᠤᠭᠲᠤᠷᠴᠤ ᠳᠠᠪᠬᠢᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠠ᠋ ! 》ᠭᠡᠰᠡᠨ ᠰᠢᠭ ᠪᠠᠢᠯᠠ᠃
《 ᠡᠴᠢᠭᠡ ᠴᠢᠨᠢ ᠨᠡᠮᠠᠶ᠋ᠢ ᠰᠢᠨᠠᠯᠭᠠᠵᠤ < ᠯᠠᠪ ᠪᠤᠴᠠᠵᠤ ᠢᠷᠡᠨᠡ > ᠭᠡᠳ ᠶᠠᠪᠤᠭᠠᠳ ᠡᠦᠲᠦ ᠪᠣᠯᠲᠠᠯᠠ ᠠᠯᠠᠭᠠ ᠁ ᠡᠦᠲᠦ ᠬᠦᠦ ᠮᠢᠨᠢ ᠡᠵᠢ ᠪᠡᠨ ᠪᠢᠲᠡᠭᠡᠢ ᠴᠢᠩᠭᠢᠵᠦ ᠰᠢᠨᠠᠯᠭᠠ ᠳᠠ ᠁ 》ᠭᠡᠰᠡᠨ ᠦᠭᠡ ᠲᠡᠭᠦᠨ ᠦ᠌ ᠬᠥᠯ ᠢ᠋ ᠲᠤᠰᠢᠵᠤ ᠰᠠᠨᠠᠭᠠ ᠶ᠋ᠢ ᠨᠢ ᠠᠷᠭᠠ ᠦᠭᠡᠢ ᠮᠣᠬᠣᠭᠣᠵᠤ ᠪᠠᠢᠪᠠ᠃
ᠠᠩᠴᠢᠨᠵᠠᠪ ᠵᠢᠯᠣᠭᠣ ᠪᠠᠨ ᠪᠤᠴᠠᠭᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠨᠥᠭᠦᠭᠡ ᠬᠣᠶᠠᠷ ᠤ᠋ᠨ ᠳᠣᠪᠲᠣᠯᠭᠠᠵᠤ ᠣᠳᠤᠭᠰᠠᠨ ᠲᠡᠷᠡ ᠬᠣᠯᠠ ᠠᠯᠤᠰ ᠤ᠋ᠨ ᠪᠠᠷᠠ ᠶ᠋ᠢ ᠰᠢᠷᠲᠡᠬᠦ ᠳ᠋ᠦ᠍ ᠬᠣᠶᠠᠷ ᠵᠤᠷᠪᠤᠰ ᠰᠢᠷᠠ ᠲᠣᠭᠣᠰᠣ ᠴᠤᠪᠤᠷᠠᠨ ᠬᠠᠷᠠᠭᠳᠠᠵᠤ 《 ᠠᠩᠴᠢᠨᠵᠠᠪ ᠠ᠋! ᠭᠤᠨᠠᠨ ᠪᠠᠳᠠᠢ ᠲᠠᠢ ᠠᠭᠤᠯᠵᠠᠬᠤ ᠰᠠᠨ ᠪᠣᠯ ᠮᠠᠨᠤᠰ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠱᠠᠯᠠᠪᠳᠠ ᠠ᠋!᠁》 ᠭᠡᠵᠦ ᠲᠡᠭᠦᠨ ᠢ᠋ ᠳᠠᠯᠠᠯᠵᠤ ᠪᠠᠢᠭᠠ ᠰᠢᠭ᠋ ᠰᠤᠨᠤᠯᠵᠠᠨᠠ ᠁
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ <ᠬᠡᠯᠡ ᠪᠢᠴᠢᠭ> ᠬᠣᠯᠪᠣᠭᠠ