ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ < ᠳᠡᠭᠡᠳᠦ > – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠳᠣᠯᠣᠭᠠ> Хан мунын сүүрс < дээд > – Мөнх зохиоов ᠂ Тэргүүн бодь – Нэгдүгээр бүлэг <7>
479ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ < ᠳᠣᠯᠣᠭᠠ >
ᠭᠣᠪᠢ ᠶᠢᠨ ᠴᠡᠩᠬᠡᠷ ᠲᠡᠭᠷᠢ ᠠᠷᠴᠢᠭᠰᠠᠨ ᠲᠣᠯᠢ ᠰᠢᠭ᠋ ᠲᠤᠩᠭᠠᠯᠠᠭ ᠪᠠᠢᠯᠠ᠃
ᠭᠣᠪᠢ ᠨᠤᠲᠤᠭ ᠲᠤ ᠬᠠᠨᠵᠠᠷᠠᠭᠰᠠᠨ ᠴᠠᠰᠤᠨ ᠤ ᠬᠠᠢᠯ ᠤᠨ ᠳᠠᠷᠠᠭᠠ ᠤᠳᠠᠭᠰᠠᠨ ᠦᠭᠡᠢ ᠤᠷᠢᠨ ᠳᠤᠯᠠᠭᠠᠨ ᠣᠷᠣᠵᠤ᠂ ᠪᠣᠳᠠ ᠪᠣᠷᠣᠯᠵᠢ ᠶᠢᠨ ᠨᠥᠮᠥᠷᠢ᠂ ᠵᠠᠭ ᠳᠡᠷᠡᠰᠦᠨ ᠦ ᠢᠷᠤᠭᠠᠷ ᠳᠠᠭᠠᠭᠰᠠᠨ ᠡᠭᠡᠪᠦᠷ ᠭᠠᠵᠠᠷ ᠲᠤ ᠬᠠᠭᠲᠠ ᠨᠢᠳᠦᠯᠡᠭᠰᠡᠨ ᠬᠠᠪᠤᠷ ᠤᠨ ᠨᠢᠭᠡᠨ ᠡᠳᠦᠷ ᠪᠠᠢᠯᠠ᠃
ᠳᠡᠨᠵᠢᠷᠬᠡᠭ ᠭᠠᠵᠠᠷ ᠤᠲᠤᠭᠠ ᠲᠣᠭᠣᠰᠣ ᠨᠠᠷᠠ ᠰᠠᠯᠬᠢᠨ ᠳᠤ ᠢᠳᠡᠭᠳᠡᠭᠰᠡᠭᠡᠷ ᠪᠠᠢᠵᠤ ᠰᠢᠷᠠᠯᠠᠨ ᠬᠥᠬᠡᠷᠡᠭᠰᠡᠨ ᠨᠠᠪᠲᠠᠭᠠᠷ ᠪᠣᠷᠣ ᠭᠡᠷ ᠲᠠᠷᠭᠤᠨ ᠡᠷᠡ ᠶᠢᠨ ᠬᠠᠴᠠᠷ ᠳᠡᠭᠡᠷᠡᠬᠢ ᠬᠥᠬᠡ ᠮᠡᠩᠭᠡ ᠰᠢᠭ ᠱᠣᠪᠣᠢᠵᠤ᠂ ᠡᠷᠦᠬᠡ ᠪᠡᠨ ᠰᠡᠬᠦᠵᠡᠢ᠃ ᠲᠣᠭᠣᠨᠣ ᠠᠴᠠ ᠨᠢ ᠫᠣᠷ ᠫᠣᠷ ᠴᠡᠩᠬᠡᠷ ᠤᠲᠤᠭᠠ ᠪᠤᠷᠭᠢᠯᠤᠨᠠ᠃ ᠭᠡᠷ ᠦᠨ ᠡᠵᠡᠭᠲᠡᠢ ᠶᠠᠭᠤ ᠨᠢᠭᠡ ᠶᠠᠭᠤᠮᠠᠨ ᠳᠤ ᠮᠣᠩᠭᠠᠨᠢᠵᠤ ᠪᠠᠢᠭᠠ ᠪᠣᠯᠣᠯᠲᠠᠢ᠃ ᠭᠡᠷ ᠦᠨ ᠪᠠᠷᠠᠭᠤᠨᠲᠠᠢ ᠬᠥᠬᠡᠷᠡᠨ ᠦᠵᠢᠷᠡᠭᠰᠡᠨ ᠬᠠᠭᠤᠴᠢᠨ ᠬᠠᠰᠠᠭ ᠤᠨ ᠠᠷᠠᠯ ᠠᠴᠠ ᠤᠶᠠᠭᠠᠲᠠᠢ ᠪᠤᠭᠤᠳᠠᠢ ᠶᠢᠨ ᠴᠣᠬᠣᠷ ᠪᠣᠷᠣ ᠮᠣᠷᠢ ᠦᠷᠭᠡᠯᠡᠵᠦ ᠵᠣᠭᠰᠣᠨᠠ᠃
ᠪᠤᠷᠭᠠᠰᠤᠨ ᠬᠠᠰᠢᠶᠠᠨ ᠳ᠋ᠤ᠌ ᠠᠷᠪᠠᠭᠠᠳ ᠬᠤᠷᠠᠭᠠ ᠬᠣᠷᠢᠭᠠᠲᠠᠢ ᠪᠠᠢᠨᠠ᠃ ᠨᠣᠭᠣᠭᠠ ᠬᠠᠵᠠᠯᠠᠮᠠᠭᠴᠠ ᠬᠥᠷᠥᠪᠡᠵᠢᠵᠦ ᠲᠤᠭᠯᠠᠴᠢᠬᠠᠮᠠᠷᠬᠠᠨ ᠪᠠᠢᠳᠠᠯ ᠲᠠᠢ᠃ ᠨᠠᠪᠲᠠᠭᠠᠷ ᠪᠣᠷᠣ ᠭᠡᠷ ᠦ᠋ᠨ ᠰᠡᠭᠦᠳᠡᠷ ᠲᠦ᠍ ᠬᠠᠯᠲᠠᠷ ᠨᠣᠬᠠᠢ ᠲᠠᠪᠠᠭ ᠢ᠋ᠶ᠋ᠠᠨ ᠳᠡᠷᠡᠯᠡᠵᠦ ᠠᠯᠤᠰ ᠤ᠋ᠨ ᠴᠢᠮᠡᠭᠡ ᠴᠢᠩᠨᠠᠵᠤ ᠬᠡᠪᠲᠡᠨᠡ᠃
ᠬᠣᠲᠠᠴᠢ ᠬᠠᠯᠲᠠᠷ ᠶᠠᠯᠢ ᠦᠭᠡᠢ ᠭᠠᠵᠠᠷ ᠳᠣᠷᠭᠢᠭᠰᠠᠨ ᠮᠣᠷᠢᠨ ᠲᠦᠪᠡᠷᠭᠡᠨ ᠢ᠋ᠶ᠋ᠡᠷ ᠥᠨᠳᠡᠢᠨ《ᠬᠥᠪ ᠬᠥᠪ 》 ᠬᠤᠴᠠᠬᠤ ᠳ᠋ᠤ᠌ ᠨᠢᠷᠤᠭᠤ ᠪᠠᠨ ᠬᠠᠪᠤᠷ ᠤ᠋ᠨ ᠢᠯᠴᠢᠲᠡᠢ ᠨᠠᠷᠠᠨ ᠳ᠋ᠤ᠌ ᠡᠭᠡᠭᠡᠵᠦ ᠮᠠᠩᠰᠢᠭᠤᠷᠠᠨ ᠦᠷᠭᠡᠯᠡᠭᠰᠡᠨ ᠪᠤᠭᠤᠳᠠᠢ ᠶ᠋ᠢᠨ ᠴᠣᠬᠣᠷ ᠪᠤᠷᠤ ᠮᠣᠷᠢ ᠰᠣᠴᠢᠵᠤ ᠲᠣᠯᠣᠭᠠᠢ ᠪᠢᠨ ᠡᠷᠭᠦᠰᠬᠢᠭᠰᠡᠨ ᠢ᠋ᠶ᠋ᠡᠨ ᠳᠠᠬᠢᠨ ᠦᠷᠭᠡᠯᠡᠨᠡ᠃
ᠲᠤᠯᠭᠠᠨ ᠤ᠋ ᠡᠮᠦᠨᠡ ᠴᠣᠮᠴᠣᠢᠵᠤ ᠬᠣᠨᠢᠨ ᠤ᠋ ᠬᠤᠢᠬᠠ ᠪᠤᠴᠠᠯᠭᠠᠭᠠ ᠵᠢᠯᠠᠪᠴᠢ ᠲᠣᠭᠣᠭᠠᠨ ᠤ᠋ ᠳᠣᠣᠭᠤᠷ ᠠᠷᠭᠠᠯ ᠵᠡᠷᠭᠡᠯᠡᠵᠦ ᠭᠠᠯ ᠥᠷᠳᠡᠭᠰᠡᠨ ᠬᠢᠵᠢᠶᠡᠯ ᠪᠦᠰᠡᠭᠦᠢ ᠨᠤᠬᠠᠢ ᠬᠤᠷᠭᠤᠭᠤᠬᠤ ᠴᠢᠮᠡᠭᠡ ᠪᠡᠷ ᠰᠠᠨᠳᠤᠷᠤᠨ ᠪᠣᠰᠴᠤ 《 ᠬᠡᠨ ᠢᠷᠡᠪᠡ ? ᠮᠠᠨ ᠤ᠋ ᠬᠥᠮᠦᠨ ᠬᠦᠷᠦᠭᠡᠳ ᠢᠷᠡᠪᠡ ᠤᠤ? 》ᠭᠡᠵᠦ ᠰᠠᠩᠳᠠ ᠮᠡᠩᠳᠡ ᠬᠠᠲᠠᠪᠴᠢ ᠠᠯᠬᠤᠲᠠᠯᠠ ᠬᠣᠲᠠᠴᠢ ᠬᠠᠯᠲᠠᠷ ᠨᠢ ᠡᠵᠡᠨ ᠦ᠌ ᠪᠡᠨ ᠰᠠᠨᠠᠭᠠ ᠶ᠋ᠢ ᠮᠡᠳᠡᠭᠰᠡᠨ ᠶᠦᠮ ᠰᠢᠭ ᠲᠡᠭᠦᠨ ᠦ᠌ ᠬᠣᠷᠮᠣᠢ ᠶ᠋ᠢ ᠨᠠᠯᠠᠵᠤ 《 ᠪᠢᠰᠢ ᠠ᠋᠂ ᠪᠢᠰᠢ᠂ ᠲᠡᠷᠡ ᠬᠠᠮᠢᠭᠠ ᠬᠣᠯᠠ ᠤᠨᠤᠭᠠ ᠲᠠᠢ ᠵᠠᠮ ᠤ᠋ᠨ ᠬᠥᠮᠦᠨ ᠪᠣᠯᠤᠯᠲᠠᠢ 》 ᠭᠡᠰᠡᠨ ᠰᠢᠭ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠠᠨ ᠡᠷᠬᠡᠯᠡᠪᠡ᠃
ᠨᠣᠬᠠᠢ ᠶᠢᠨ ᠳᠠᠭᠤ ᠪᠠ ᠬᠥᠮᠥᠨ ᠦ ᠪᠠᠷᠠ ᠪᠡᠷ ᠭᠡᠷ ᠡᠴᠡ ᠨᠡᠯᠢᠶᠡᠳ ᠵᠠᠢᠲᠠᠢ ᠪᠠᠢᠭᠠ ᠬᠤᠳᠳᠤᠭ ᠤᠨ ᠣᠩᠭᠣᠴᠠ ᠥᠩᠭᠡᠢᠭᠰᠡᠨ ᠬᠠᠷᠠ ᠰᠡᠭᠦᠯᠲᠦ ᠵᠡᠭᠡᠷᠡ ᠨᠦᠭᠦᠳ ᠦᠷᠭᠦᠵᠦ ᠵᠠᠢᠯᠠᠨᠠ᠃
— ᠵᠢᠭᠠᠬᠠᠨ ᠪᠠᠢᠰᠬᠢᠭᠡᠳ ᠬᠠᠷᠠ ᠰᠡᠭᠦᠯᠲᠦ ᠨᠦᠭᠦᠳ ᠲᠡᠭᠡᠨ ᠣᠩᠭᠣᠴᠠ ᠳᠦᠭᠦᠷᠭᠡᠵᠦ ᠥᠭᠭᠦᠶᠡ ᠪᠠᠢᠵᠠ ᠭᠡᠳ ᠬᠣᠲᠠᠴᠢ ᠬᠠᠯᠲᠠᠷ ᠲᠠᠭᠠᠨ ᠬᠠᠭᠤᠷᠳᠠᠭᠰᠠᠨ ᠭᠡᠷ ᠦᠨ ᠡᠵᠡᠭᠲᠡᠢ ᠡᠪᠦᠳᠦᠭ ᠱᠦᠷᠭᠦᠭᠡᠭᠰᠡᠨ ᠬᠠᠯᠲᠠᠷ ᠢᠶᠠᠨ 《ᠵᠣᠪ! ᠴᠠᠭᠠᠰᠢ ᠪᠠᠨ ᠶᠠᠪᠤᠵᠤ ᠬᠡᠪᠲᠡ! ᠬᠥᠮᠥᠨ ᠬᠠᠭᠤᠷᠴᠤ ᠬᠣᠭᠣᠰᠤᠨ ᠬᠣᠷᠭᠣᠭᠣᠳᠠᠭ ᠨᠢ ᠶᠠᠭᠤ ᠪᠣᠢ?》ᠭᠡᠳ ᠭᠡᠷ ᠲᠡᠭᠡᠨ ᠣᠷᠣᠪᠠ᠃
ᠵᠢᠯᠠᠪᠴᠢᠨ ᠲᠣᠭᠣᠭᠠᠨ ᠳᠤ ᠫᠣᠷ ᠫᠣᠷ ᠪᠤᠴᠠᠯᠤᠭᠰᠠᠨ ᠬᠣᠨᠢᠨ ᠤ ᠬᠤᠢᠬᠠ᠂ ᠰᠢᠭᠢᠷᠡ ᠪᠣᠷᠣᠯᠠᠨ ᠬᠠᠩᠬᠤᠯᠵᠤ᠂ ᠮᠠᠭᠤ ᠨᠠᠪᠲᠠᠭᠠᠷ ᠪᠣᠷᠣ ᠭᠡᠷ ᠢ ᠪᠠᠶᠠᠨ ᠴᠠᠳᠬᠤᠯᠠᠩ ᠠᠮᠢᠰᠬᠤᠯ ᠢᠶᠠᠷ ᠪᠢᠯᠬᠠᠭᠤᠯᠤᠨᠠ᠃ ᠭᠡᠷ ᠦᠨ ᠡᠵᠡᠭᠲᠡᠢ ᠱᠥᠯᠥᠨ ᠦ ᠪᠡᠨ ᠳᠠᠪᠤᠰᠤ ᠶᠢ ᠠᠮᠰᠠᠵᠤ 《ᠵᠢᠭᠠᠬᠠᠨ ᠬᠥᠯ ᠠᠮᠠᠷᠠᠭᠠᠶᠠ》ᠭᠡᠵᠦ ᠴᠣᠮᠴᠣᠢᠲᠠᠯᠠ ᠬᠣᠲᠠᠴᠢ ᠨᠣᠬᠠᠢ ᠪᠠᠰᠠ《 ᠬᠥᠪ ᠬᠥᠪ 》ᠭᠡᠵᠦ ᠬᠤᠴᠠᠪᠠ ᠃ ᠡᠨᠡ ᠭᠡᠷ ᠦ᠋ᠨ ᠡᠵᠡᠭᠲᠡᠢ ᠶᠢ ᠬᠤᠪᠢᠯᠴᠡᠴᠡᠭ ᠭᠡᠨᠡ᠃ ᠲᠣᠮᠣ ᠠᠯᠠᠭ ᠨᠢᠳᠦᠨ ᠦ ᠬᠢᠨᠢ ᠵᠣᠪᠬᠢᠨ ᠳᠤ ᠥᠯᠥ᠍ ᠮᠡᠳᠡᠭ ᠦᠷᠴᠢᠯᠡᠭᠡ ᠰᠠᠭᠤᠭᠰᠠᠨ ᠴᠤ᠌ ᠵᠠᠯᠠᠭᠤ ᠦᠷᠡ ᠶ᠋ᠢᠨ ᠭᠠᠩᠭᠠᠩ ᠲᠥᠷᠬᠦ ᠪᠡᠨ ᠠᠯᠳᠠᠭᠠ ᠦᠭᠡᠢ ᠠᠵᠢ᠃ ᠡᠨᠡᠷᠢᠩᠭᠦᠢ ᠬᠠᠷᠠᠴᠠ ᠲᠠᠢ ᠪᠣᠷᠣ ᠠᠯᠠᠭ ᠨᠢᠳᠦᠨ ᠳ᠋ᠤᠨᠢ ᠤᠳᠠᠭᠠᠨ ᠨᠢᠭᠤᠭᠳᠠᠭᠰᠠᠨ ᠴᠣᠭ ᠨᠠᠮᠤᠭᠤᠬᠠᠨ ᠪᠣᠯᠪᠠᠴᠤ ᠭᠡᠷᠡᠯᠲᠡᠢ ᠪᠠᠢᠯᠠ᠃
ᠬᠣᠲᠠᠴᠢ ᠬᠠᠯᠲᠠᠷ ᠲᠠᠭᠠᠨ ᠪᠠᠢᠨ ᠪᠠᠢᠨ ᠬᠠᠭᠤᠷᠲᠠᠬᠤ ᠳᠤᠷᠠᠲᠠᠢ ᠳ᠋ᠠᠭᠠᠨ ᠬᠣᠷᠭᠣᠭᠣᠬᠤ ᠪᠣᠯᠭᠠᠨ ᠳ᠋ᠤᠨᠢ ᠭᠠᠷᠴᠤ ᠬᠣᠯᠠ ᠶ᠋ᠢᠨ ᠪᠠᠷᠠ ᠬᠠᠷᠠᠳᠠᠭ ᠨᠢ ᠬᠤᠪᠢᠯᠴᠡᠴᠡᠭ ᠤᠨ ᠲᠣᠭᠠᠲᠠᠢ ᠡᠳᠦᠷ ᠦ᠋ᠨ ᠳᠠᠳᠬᠠᠯ ᠪᠤᠰᠤ᠃ ᠵᠢᠷᠦᠬᠡᠨ ᠦ᠌ ᠠᠮᠠᠷᠠᠭ ᠬᠥᠮᠦᠨ ᠢ᠋ᠶ᠋ᠡᠨ ᠴᠡᠷᠢᠭ ᠦ᠋ᠨ ᠬᠠᠲᠠᠭᠤ ᠠᠯᠪᠠᠨ ᠳ᠋ᠤ᠌ ᠦᠳᠡᠵᠦ ᠶᠠᠪᠤᠭᠤᠯᠤᠭᠰᠠᠨ ᠲᠡᠷᠡ ᠡᠳᠦᠷ ᠡᠴᠡ ᠡᠬᠢᠯᠡᠵᠦ 《 ᠪᠠᠲᠤ ᠰᠡᠳᠬᠢᠯ ᠴᠢᠨᠢ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠪᠠᠯ ᠪᠤᠴᠠᠭᠠᠳ ᠢᠷᠡᠯᠭᠦᠢ ᠳᠡ ᠬᠦ! 》 ᠭᠡᠵᠦ ᠬᠣᠩᠭᠣᠷ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠶᠠᠪᠤᠵᠤ ᠣᠳᠤᠭᠰᠠᠨ ᠵᠡᠭᠦᠨ ᠡᠮᠦᠨᠡ ᠵᠦᠭ ᠲᠦ᠍ 《 ᠪᠤᠶᠠᠨ ᠴᠠᠭᠠᠨ ᠤ᠋ ᠮᠥᠷ ᠲᠡᠢ ᠶᠠᠪᠤᠵᠤ ᠢᠷᠡᠲᠦᠭᠡᠢ!》ᠭᠡᠵᠦ ᠥᠷᠯᠥᠭᠡ ᠪᠣᠯᠭᠠᠨ ᠴᠠᠢ ᠶ᠋ᠢᠨ ᠳᠡᠭᠡᠵᠢ ᠶ᠋ᠢ ᠡᠷᠭᠦᠨ ᠬᠠᠷᠢᠵᠤ ᠢᠷᠡᠭᠦ ᠵᠢ ᠨᠢ ᠨᠢᠭᠡ ᠯᠡ ᠰᠡᠳᠬᠢᠯ ᠢ᠋ᠶ᠋ᠡᠷ ᠬᠦᠰᠡᠨ ᠬᠦᠯᠢᠶᠡᠭᠰᠡᠭᠡᠷ ᠠᠷᠪᠠᠨ ᠵᠢᠷᠭᠤᠭᠠᠨ ᠬᠠᠪᠤᠷ ᠨᠠᠮᠤᠷ ᠢ᠋ ᠳᠣᠭᠣᠯᠵᠠᠢ᠃
ᠲᠡᠷᠡ ᠪᠡᠷ ᠨᠣᠬᠠᠢ ᠬᠣᠷᠭᠣᠭᠣᠬᠤ ᠪᠣᠯᠭᠠᠨ《 ᠬᠣᠩᠭᠣᠷ ᠮᠢᠨᠢ ᠢᠷᠡᠭᠡ ᠤᠤ ᠳᠠ ?》 ᠭᠡᠰᠡᠨ ᠪᠣᠳᠣᠯ ᠳ᠋ᠠᠭᠠᠨ ᠬᠥᠲᠥᠯᠦᠭᠳᠡᠨ ᠭᠠᠷᠴᠤ ᠪᠠᠷᠠ ᠬᠠᠷᠠᠵᠤ ᠯᠠ ᠮᠡᠳᠡᠯᠡ ᠃ ᠪᠦᠷ ᠬᠣᠭᠣᠰᠣᠳᠠᠭᠰᠠᠨ᠃ ᠡᠨᠡ ᠤᠳᠠᠭᠠ ᠬᠠᠷᠢᠨ ᠠᠯᠤᠰ ᠢ᠋ ᠰᠠᠷᠠᠪᠴᠢᠯᠠᠨ ᠬᠠᠷᠠᠪᠠᠯ ᠦᠨᠡᠬᠡᠷ ᠵᠡᠭᠦᠨ ᠡᠮᠦᠨᠡ ᠵᠦᠭ ᠡᠴᠡ ᠪᠤᠲᠠ ᠵᠠᠭ ᠣᠷᠢᠶᠠᠵᠤ ᠮᠤᠰᠬᠢᠷᠠᠯᠳᠤᠭᠰᠠᠨ ᠬᠠᠷᠭᠤᠢ ᠪᠠᠷ ᠬᠣᠶᠠᠷ ᠪᠠᠷᠠᠭᠠᠨ ᠮᠣᠷᠢᠲᠠᠨ ᠬᠠᠪᠤᠷ ᠤ᠋ᠨ ᠵᠠᠯᠬᠠᠭᠤ ᠨᠠᠷᠠᠨ ᠤ᠋ ᠣᠢᠯᠲᠠ ᠳ᠋ᠤ᠌ ᠵᠢᠷᠢᠯᠵᠡᠬᠦ ᠵᠡᠷᠭᠡᠯᠭᠡᠨ ᠤᠢᠮᠤᠵᠤ ᠢᠷᠡᠵᠦ ᠶᠠᠪᠤᠨᠠ᠃ ᠬᠣᠶᠠᠷ ᠪᠠᠷᠠᠭᠠᠨ ᠮᠣᠷᠢᠲᠠᠨ ᠤ᠋ ᠪᠠᠷᠠ ᠪᠠᠷ ᠬᠥᠭᠡᠷᠦᠬᠦᠢ ᠬᠤᠪᠢᠯᠴᠡᠴᠡᠭ ᠪᠦᠰᠡᠭᠦᠢ ᠨᠢᠳᠦ ᠨᠢ ᠵᠠᠢᠷᠲᠤᠵᠤ ᠵᠢᠷᠦᠬᠡ ᠨᠢ ᠲᠦᠭᠰᠢᠪᠡ᠃ ᠬᠠᠭᠤᠷᠠᠢ ᠦᠶᠡᠷ ᠦ᠋ᠨ ᠳᠣᠯᠭᠢᠶᠠ ᠰᠢᠬ ᠦᠶᠡᠯᠵᠡᠨ ᠪᠤᠯᠭᠢᠬᠤ ᠵᠡᠷᠭᠡᠯᠭᠡᠨ ᠳᠤᠮᠳᠠᠭᠤᠷ ᠬᠣᠶᠠᠷ ᠪᠠᠷᠠᠭᠠᠨ ᠮᠣᠷᠢᠲᠠᠨ ᠬᠡᠰᠡᠭ ᠲᠣᠳᠣᠷᠠᠵᠤ ᠬᠡᠰᠡᠭ ᠪᠠᠯᠠᠷᠠᠵᠤ ᠵᠠᠷᠢᠮ ᠳ᠋ᠠᠭᠠᠨ ᠭᠠᠭᠴᠠᠬᠠᠨ ᠬᠥᠮᠦᠨ ᠴᠤ᠌ ᠰᠢᠭ ᠪᠣᠯᠵᠤ ᠤᠳᠠᠯ ᠦᠭᠡᠢ ᠳᠠᠬᠢᠭᠠᠳ ᠬᠣᠶᠠᠷ ᠪᠣᠯᠵᠤ ᠰᠠᠯᠤᠭᠠᠳ ᠲᠡᠭᠦᠨ ᠲᠡᠢ ᠵᠣᠷᠢᠭᠤᠳᠠ ᠲᠣᠭᠯᠠᠭᠠᠮ ᠬᠢᠭᠡ ᠰᠢᠭ ᠶᠡᠷᠦ ᠨᠢ ᠨᠢᠭᠡ ᠯᠡ ᠲᠣᠳᠣ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠶᠠᠮᠠᠷ ᠨᠢᠭᠡ ᠭᠣᠷᠢᠳᠠᠯ ᠡᠪᠦᠷᠯᠡᠭᠰᠡᠨ ᠡᠴᠡ ᠪᠣᠯᠵᠤ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠪᠣᠯᠣᠷ ᠬᠤᠨᠳᠠᠭᠠᠨ ᠠ᠋ᠴᠠ ᠮᠡᠯᠮᠡᠯᠵᠡᠨ ᠠᠰᠬᠠᠭᠰᠠᠨ ᠠᠷᠢᠬᠢ ᠮᠡᠲᠦ ᠨᠢᠯᠪᠤᠰᠤ ᠪᠠᠨ ᠵᠦᠯᠭᠦᠵᠦ 《 ᠵᠠ᠂ ᠪᠠᠢᠵᠠ᠂ ᠴᠣᠬᠣᠮ ᠶᠠᠮᠠᠷ ᠬᠥᠮᠦᠨ ᠪᠣᠯᠴᠢᠬᠠᠪᠠ? ᠮᠠᠭᠤ ᠬᠦᠦ ᠮᠢᠨᠢ ᠢᠷᠡᠭᠡ ᠤᠤ ? ᠥᠷᠯᠥᠭᠡ ᠡᠷᠲᠡ ᠦᠦᠷ ᠴᠥᠦᠷ ᠢ᠋ᠶ᠋ᠡᠷ ᠪᠣᠰᠴᠤ ᠤᠯᠠᠮᠪᠠᠶᠠᠷ ᠲᠠᠢᠵᠢ ᠶ᠋ᠢᠨ ᠠᠳᠤᠭᠤᠨ ᠤ᠋ ᠳᠡᠯᠯᠡᠭᠡᠨ ᠳ᠋ᠦ᠍ ᠶᠠᠪᠤᠭᠰᠠᠨ ᠬᠥᠮᠦᠨ ᠡᠦᠲᠦ ᠯᠡ ᠢᠷᠡᠬᠦ ᠪᠣᠯᠤᠭᠠ ᠶᠤᠮ! ᠲᠡᠭᠡᠬᠦ ᠳ᠋ᠡᠭᠡᠨ ᠭᠠᠭᠴᠠᠭᠠᠷ ᠪᠠᠢᠬᠤ ᠤᠴᠢᠷ ᠲᠠᠢ ᠁ ᠬᠥᠲᠥᠯᠦᠭᠡ ᠮᠣᠷᠢ ᠲᠠᠢ ᠭᠡᠬᠦ ᠳ᠋ᠦ᠍ ᠢᠩᠭᠢᠵᠦ ᠬᠠᠷᠠᠭᠳᠠᠬᠤ ᠶᠣᠰᠣ ᠦᠭᠡᠢ᠃ ᠪᠢᠰᠢ᠂ ᠬᠣᠶᠠᠷ ᠮᠣᠷᠢᠲᠠᠢ ᠬᠥᠮᠦᠨ ᠪᠠᠢᠨᠠ᠃ ᠵᠠ᠂ ᠪᠠᠢᠵᠠ᠂ ᠡᠨᠡ ᠴᠤ᠌ ᠬᠤᠯᠠ ᠶᠢᠨ ᠭᠡᠢᠴᠢᠨ ᠪᠣᠯᠤᠯᠲᠠᠢ᠃ ᠮᠠᠨ ᠤ᠋ ᠬᠥᠮᠦᠨ ᠢᠷᠡᠵᠦ ᠶᠠᠪᠤᠭᠠ ᠶᠤᠮ ᠤᠤ ? ᠬᠦᠦ ᠮᠢᠨᠢ ᠡᠴᠢᠭᠡ ᠲᠡᠢ ᠪᠡᠨ ᠣᠯᠵᠤ ᠠᠭᠤᠯᠵᠠᠭᠠᠳ ᠬᠣᠶᠠᠭᠤᠯᠠ ᠪᠣᠯᠵᠤ ᠢᠷᠡᠪᠡ ᠤᠤ ? ᠲᠡᠭᠡᠬᠦ ᠳ᠋ᠦ᠍ ᠮᠠᠭᠤ ᠬᠦᠦ ᠮᠢᠨᠢ ᠡᠴᠢᠭᠡ ᠪᠡᠨ ᠲᠠᠨᠢᠬᠤ ᠦᠭᠡᠢ ᠰᠢᠦ ᠳ᠋ᠠ ! ᠲᠡᠭᠦᠨ ᠢ ᠶᠠᠪᠤᠬᠤ ᠳᠤ ᠭᠠᠷᠤᠭᠠ ᠴᠤ᠌ ᠦᠭᠡᠢ ᠪᠠᠢᠭᠰᠠᠨ ᠶᠤᠮ ᠴᠢᠨᠢ᠃ ᠭᠡᠬᠦ ᠳ᠋ᠡᠭᠡᠨ ᠶᠠᠭᠤᠮᠠ ᠶᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ⁈ 》ᠭᠡᠵᠦ ᠣᠯᠠᠨ ᠲᠠᠪᠤᠨ ᠶᠠᠭᠤᠮᠠ ᠪᠣᠳᠣᠵᠤ᠄
— ᠵᠠ᠂ ᠪᠤᠷᠬᠠᠨ ᠲᠡᠭᠷᠢ ᠮᠢᠨᠢ ᠥᠷᠥᠰᠢᠶᠡᠯ ᠳ᠋ᠡᠭᠡᠨ ᠪᠠᠭᠲᠠᠭᠠᠵᠤ ᠦᠵᠡ! ᠬᠠᠷᠢᠭᠰᠠᠨ ᠭᠠᠯᠠᠭᠤ ᠪᠤᠴᠠᠵᠤ᠂ ᠶᠠᠪᠤᠭᠰᠠᠨ ᠬᠥᠮᠥᠨ ᠢᠷᠡᠳᠡᠭ ᠭᠡᠵᠦ ᠳᠦᠳᠦᠨᠡᠨ ᠭᠡᠷ ᠲᠡᠭᠡᠨ ᠣᠷᠣᠵᠤ ᠭᠦᠩᠭᠠᠷᠠᠪᠠ ᠲᠠᠢ ᠪᠤᠷᠬᠠᠨ ᠳ᠋ᠠᠭᠠᠨ ᠬᠦᠵᠢ ᠠᠰᠠᠭᠠᠨ 《 ᠠᠢᠰᠤᠢ ᠬᠣᠶᠠᠷ ᠬᠥᠮᠦᠨ ᠦ᠌ ᠨᠢᠭᠡ ᠨᠢ ᠠᠷᠪᠠᠨ ᠵᠢᠷᠭᠤᠭᠠᠨ ᠵᠢᠯ ᠬᠦᠰᠡᠵᠦ ᠬᠦᠯᠢᠶᠡᠭᠰᠡᠨ ᠬᠣᠩᠭᠣᠷ ᠮᠢᠨᠢ ᠪᠠᠢᠭᠠᠰᠠᠢ! ᠪᠤᠷᠬᠠᠨ ᠲᠡᠭᠷᠢ ᠳ᠋ᠡᠭᠡᠨ ᠪᠢ ᠣᠰᠣᠯ ᠪᠤᠷᠤᠭᠤ ᠣᠭᠲᠣᠬᠠᠨ ᠴᠤ᠌ ᠬᠢᠭᠡ ᠦᠭᠡᠢ ᠭᠠᠭᠴᠠ ᠨᠢᠭᠦᠯᠡᠰᠦᠩᠭᠦᠢ ᠰᠡᠳᠬᠢᠯ ᠢ᠋ᠶ᠋ᠡᠷ ᠭᠠᠴᠢᠭ ᠵᠣᠪᠠᠯᠠᠩ ᠢ᠋ᠶ᠋ᠠᠷ ᠳᠦᠭᠦᠷᠦᠭᠰᠡᠨ ᠠᠮᠢᠳᠤᠷᠠᠯ ᠤ᠋ᠨ ᠵᠥᠷᠢᠭ ᠢᠶᠠᠷ ᠮᠠᠯᠭᠢᠭᠰᠠᠭᠠᠷ ᠥᠨᠥᠳᠥᠷ ᠪᠣᠯᠣᠯᠠ ᠁ ᠵᠠᠶᠠᠭᠠ ᠮᠠᠭᠤᠲᠠᠢ ᠪᠢᠳᠡ ᠬᠣᠶᠠᠭᠤᠯᠠ ᠶ᠋ᠢ ᠪᠤᠷᠬᠠᠨ ᠲᠡᠭᠷᠢ ᠳᠤᠯᠠᠭᠠᠨ ᠮᠡᠯᠮᠡᠢ ᠪᠠᠷ ᠢ᠋ᠶ᠋ᠠᠨ ᠲᠣᠯᠢᠳᠠᠵᠤ᠂ ᠡᠷᠲᠡ ᠨᠢᠭᠡ ᠡᠳᠦᠷ ᠠᠭᠤᠯᠵᠠᠭᠤᠯᠵᠤ ᠥᠷᠥᠰᠢᠶᠡᠭᠡᠷᠡᠢ ᠳᠡ ! 》ᠭᠡᠵᠦ ᠭᠤᠷᠪᠠᠨᠲᠠ ᠰᠥᠭᠥᠳᠴᠦ ᠮᠥᠷᠭᠥᠭᠰᠡᠨ ᠢ᠋ᠶ᠋ᠡᠨ ᠡᠷᠭᠢᠭᠦᠯ ᠦᠨ ᠥᠷᠥᠭᠡᠰᠦᠨ ᠨᠢᠳᠦᠨ ᠡᠴᠡ ᠭᠠᠤᠯᠢᠨ ᠲᠣᠯᠢ ᠭᠠᠷᠭᠠᠨ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠠᠷᠴᠢᠵᠤ ᠵᠢᠰᠦ ᠪᠡᠨ ᠭᠠᠢᠭᠤᠢ ᠲᠣᠯᠢᠳᠠᠨ ᠥᠷᠪᠥᠢᠭᠰᠡᠨ ᠦᠰᠦ ᠭᠡᠵᠢᠭᠡ ᠪᠡᠨ ᠰᠠᠮᠨᠠᠵᠤ᠂ ᠡᠩᠭᠡᠯᠵᠡᠭᠦᠷ ᠦᠨ ᠳᠣᠪᠴᠢ ᠰᠢᠯᠪᠢ ᠪᠡᠨ ᠲᠢᠭᠲᠡᠢ ᠰᠠᠢᠬᠠᠨ ᠳᠣᠪᠴᠢᠯᠠᠵᠤ ᠬᠠᠲᠠᠪᠴᠢ ᠠᠯᠬᠤᠶᠠ ᠭᠡᠪᠡᠯ ᠭᠠᠳᠠᠨᠠ ᠬᠣᠲᠠᠴᠢ ᠬᠠᠯᠲᠠᠷ ᠰᠦᠷᠡᠬᠡᠢ ᠳᠣᠭᠰᠢᠷᠠᠨ ᠪᠤᠷᠭᠤᠨᠠ᠃
ᠬᠣᠶᠠᠷ ᠪᠠᠷᠠᠭᠠᠨ ᠮᠣᠷᠢᠲᠠᠨ ᠬᠤᠳᠳᠤᠭ ᠤᠨ ᠴᠠᠭᠠᠨᠠᠬᠠᠨ ᠣᠢᠷᠠᠳᠴᠤ ᠢᠷᠡᠬᠦ ᠳ᠋ᠦ᠍ ᠬᠠᠷᠠ ᠰᠡᠭᠦᠯᠲᠡᠳ ᠦᠷᠭᠦᠵᠦ ᠬᠣᠯᠠᠳᠤᠨᠠ᠃
《ᠡᠨᠡ ᠬᠤᠤᠳᠤᠭ ᠤᠨ ᠴᠠᠭᠠᠨᠠ ᠪᠢ ᠴᠢᠮᠠᠶ᠋ᠢ ᠪᠠᠨ ᠬᠦᠯᠦᠭ ᠦ᠋ᠨ ᠵᠢᠯᠣᠭᠣ ᠪᠠᠨ ᠨᠤᠲᠤᠭ ᠤ᠋ᠨ ᠵᠦᠭ ᠵᠠᠯᠠᠬᠤ ᠳ᠋ᠤ᠌ ᠴᠢᠨᠢ ᠦᠳᠡᠭᠰᠡᠨ ᠰᠠᠨ ᠁ ᠵᠡᠭᠦᠨ ᠡᠮᠦᠨᠡᠰᠢᠯᠡᠨ ᠮᠤᠰᠬᠢᠷᠠᠯᠳᠤᠨ ᠤᠳᠤᠭᠰᠠᠨ ᠡᠨᠡ ᠬᠦ ᠬᠠᠷᠭᠤᠢ ᠪᠠᠷ ᠴᠢ ᠮᠢᠨᠢ ᠨᠠᠮᠠᠶ᠋ᠢ ᠪᠠᠨ ᠣᠷᠬᠢᠵᠤ ᠶᠠᠳᠠᠨ ᠶᠠᠪᠤᠬᠤ ᠳᠤ ᠪᠢ ᠴᠢᠮᠠ ᠠᠴᠠ ᠪᠠᠨ ᠰᠠᠯᠵᠤ ᠴᠢᠳᠠᠬᠤ ᠦᠭᠡᠢ ᠵᠢᠷᠦᠬᠡ ᠰᠢᠮᠰᠢᠷᠡᠵᠦ ᠵᠠᠮ ᠳᠤ ᠣᠷᠣᠭᠤᠯᠤᠭᠰᠠᠨ᠁ ᠥᠨᠥᠳᠥᠷ ᠴᠢ ᠮᠥᠨ ᠡᠨᠡ ᠵᠠᠮ ᠢᠶᠠᠷ ᠪᠤᠴᠠᠵᠤ ᠢᠷᠡᠬᠦ ᠶᠣᠰᠣᠲᠠᠢ 》 ᠭᠡᠵᠦ ᠪᠣᠳᠣᠬᠤ ᠳᠤᠰᠤᠮ ᠢᠶᠠᠨ ᠡᠨᠡ ᠢᠷᠡᠭᠡ ᠬᠥᠮᠥᠨ ᠯᠠᠪ ᠮᠥᠨ ᠭᠡᠵᠦ ᠢᠲᠡᠭᠡᠨ ᠰᠡᠳᠬᠢᠯ ᠨᠢ ᠶᠡᠷᠦ ᠪᠤᠰᠤ ᠪᠠᠷ ᠳᠣᠭᠳᠣᠯᠤᠨᠠ᠃
ᠨᠥᠭᠥᠭᠡ ᠬᠣᠶᠠᠷ ᠪᠠᠷᠠᠭᠠᠨ ᠮᠣᠷᠢᠲᠠᠨ ᠣᠢᠷᠠᠳᠴᠤ ᠢᠷᠡᠪᠡᠯ ᠨᠢᠭᠡ ᠨᠢ ᠥᠨᠳᠥᠷ ᠴᠡᠭᠡᠵᠢ ᠲᠠᠢ ᠬᠠᠯᠲᠠᠷ ᠬᠡᠭᠡᠷ ᠮᠣᠷᠢ ᠲᠠᠢ᠂ ᠨᠥᠭᠥᠭᠡ ᠨᠢ ᠪᠠᠨᠳᠠᠩ ᠪᠡᠶᠡ ᠲᠡᠢ ᠬᠠᠷᠠ ᠬᠡᠭᠡᠷ ᠮᠣᠷᠢ ᠲᠠᠢ ᠬᠥᠮᠥᠨ ᠪᠠᠢᠯᠠ᠃ ᠭᠡᠬᠦ ᠳᠡᠬᠡᠨ ᠬᠥᠮᠥᠨ ᠦ ᠬᠢᠨᠢ ᠵᠢᠰᠦ ᠬᠡᠨ ᠪᠣᠯᠬᠤ ᠨᠢ ᠪᠠᠰᠠ ᠯᠠ ᠲᠠᠨᠢᠭᠳᠠᠬᠤ ᠦᠭᠡᠢ ᠪᠠᠢᠪᠠ᠃ ᠮᠣᠷᠢᠲᠠᠳ ᠱᠣᠩ ᠳᠡᠭᠡᠷᠡ ᠪᠠᠭᠤᠪᠠ᠃ ᠥᠨᠳᠥᠷ ᠬᠡᠭᠡᠷ ᠮᠣᠷᠢᠨ ᠠᠴᠠ ᠪᠠᠭᠤᠭᠰᠠᠨ ᠬᠥᠮᠥᠨ ᠦ ᠡᠮᠦᠰᠦᠭᠰᠡᠨ ᠲᠡᠷᠯᠢᠭ ᠨᠢ ᠬᠣᠶᠠᠷ ᠬᠠᠵᠠᠭᠤ ᠳ᠋ᠠᠭᠠᠨ ᠣᠨᠣᠭᠣ ᠲᠠᠢ ᠤᠷᠠᠳ ᠵᠠᠰᠠᠯ ᠤᠨ ᠲᠡᠷᠯᠢᠭ ᠲᠠᠢ ᠪᠣᠯᠬᠤ ᠢ ᠬᠠᠷᠠᠭᠠᠳ ᠬᠤᠪᠢᠯᠴᠡᠴᠡᠭ《ᠮᠠᠨ ᠤ ᠬᠥᠮᠥᠨ ᠯᠠᠪ ᠮᠥᠨ!》 ᠭᠡᠵᠦ ᠪᠣᠳᠣᠩᠭᠤᠳᠠ ᠪᠡᠶᠡ ᠪᠡᠨ ᠪᠠᠷᠢᠵᠤ ᠴᠢᠳᠠᠯ ᠦᠭᠡᠢ ᠮᠡᠭᠰᠢᠨ ᠣᠬᠢᠯᠠᠪᠠ᠃
᠁
ᠦᠦᠷ ᠬᠠᠶᠠᠭᠠᠷᠠᠪᠠ᠃
ᠬᠤᠪᠢᠯᠴᠡᠴᠡᠭ ᠪᠣᠰᠴᠤ ᠲᠤᠯᠭᠠᠨ ᠳᠤ ᠠᠷᠭᠠᠯ ᠵᠡᠷᠭᠡᠯᠡᠵᠦ ᠭᠠᠯ ᠢᠶᠠᠨ ᠬᠥᠭᠵᠢᠭᠡᠭᠡᠳ《ᠠᠪᠤ ᠣᠳᠣ ᠯᠠ ᠠᠳᠤᠭᠤᠨ ᠠᠴᠠ ᠢᠷᠡᠬᠦ ᠣᠢᠷᠠᠲᠤᠯᠠ᠃ ᠴᠠᠢ ᠶ᠋ᠢ ᠨᠢ ᠬᠠᠯᠠᠭᠤᠬᠠᠨ ᠪᠠᠢᠯᠭᠠᠶᠠ》ᠭᠡᠵᠦ ᠳᠡᠪᠦᠷᠡ ᠳ᠋ᠡᠭᠡᠨ ᠴᠠᠢ ᠣᠢᠲᠠᠯᠠ ᠭᠠᠳᠠᠨᠠ ᠨᠣᠬᠠᠢ ᠬᠣᠷᠭᠣᠭᠣᠪᠠ᠃《 ᠵᠠ᠂ ᠠᠪᠤ ᠠᠳᠤᠭᠤᠨ ᠠ᠋ᠴᠠ ᠪᠠᠨ ᠢᠷᠡᠯᠡ ᠁ ᠴᠠᠢ ᠴᠤ᠌ ᠪᠤᠴᠠᠯᠤᠭᠠ ᠦᠭᠡᠢ》ᠭᠡᠵᠦ ᠲᠤᠯᠭᠠᠨ ᠳ᠋ᠡᠬᠢ ᠤᠭᠤᠬᠢᠭᠰᠠᠨ ᠠᠷᠭᠠᠯ ᠢ ᠤᠲᠤᠭᠠᠨ ᠳ᠋ᠤᠨᠢ ᠨᠢᠳᠦ ᠪᠡᠨ ᠬᠣᠷᠣᠰᠲᠠᠯᠠ ᠦᠯᠢᠶᠡᠵᠦ ᠭᠠᠯ ᠤᠨ ᠰᠣᠷ ᠥᠷᠪᠥᠯᠵᠡᠭᠦᠯᠦᠨ ᠬᠥᠭᠵᠢᠭᠡᠭᠡᠳ ᠦᠨᠡᠰᠦ ᠠᠰᠬᠠᠬᠤ ᠪᠠᠷ ᠡᠭᠦᠳᠡ ᠪᠡᠨ ᠨᠡᠭᠡᠭᠡᠭᠡᠳ ᠭᠠᠳᠠᠨᠠ ᠭᠠᠷᠴᠤ ᠬᠠᠷᠠᠪᠠᠯ ᠲᠡᠷᠲᠡᠭᠡ ᠦᠦᠷ ᠬᠠᠶᠠᠭᠠᠷᠠᠭᠰᠠᠨ ᠵᠦᠭ ᠡᠴᠡ ᠰᠡᠮᠪᠡᠯᠵᠡᠭᠰᠡᠨ ᠠᠯᠬᠤᠭᠠ ᠲᠠᠢ ᠮᠣᠷᠢ ᠤᠨᠤᠭᠰᠠᠨ ᠬᠥᠮᠦᠨ ᠭᠡᠷ ᠦ᠋ᠨ ᠵᠦᠭ ᠠᠢᠰᠤᠢ᠃ ᠮᠣᠷᠢᠨ ᠤ ᠬᠢᠨᠢ ᠠᠯᠬᠤᠳᠠᠯ ᠢ᠋ᠶ᠋ᠠᠷ ᠠᠪᠤ ᠪᠠᠨ ᠪᠢᠰᠢ ᠪᠣᠯᠬᠤ ᠶ᠋ᠢ ᠮᠡᠳᠡᠭᠰᠡᠨ ᠬᠤᠪᠢᠯᠴᠡᠴᠡᠭ ᠢᠷᠡᠵᠦ ᠶᠠᠪᠤᠭᠠ ᠬᠥᠮᠥᠨ ᠦ ᠵᠦᠭ ᠦᠨᠡᠰᠦ ᠬᠡᠢᠰᠦᠭᠦᠵᠡᠢ ᠭᠡᠮᠡᠨ ᠭᠡᠷ ᠲᠡᠭᠡᠨ ᠪᠤᠴᠠᠨ ᠣᠷᠣᠵᠣ ᠦᠨᠡᠰᠦ ᠪᠡᠨ ᠲᠤᠯᠭᠠᠨ ᠤ᠋ ᠳᠡᠷᠭᠡᠳᠡ ᠲᠠᠯᠪᠢᠭᠠᠳ ᠭᠡᠵᠢᠭᠡ ᠦᠰᠦ ᠪᠡᠨ ᠰᠠᠮᠨᠠᠵᠤ᠂ ᠵᠠᠭᠠᠮᠠ ᠳᠣᠪᠴᠢ ᠪᠠᠨ ᠶᠠᠩᠵᠤᠯᠠᠲᠠᠯᠠ ᠨᠣᠬᠠᠢ ᠰᠦᠷᠡᠬᠡᠢ ᠠᠭᠰᠤᠷᠤᠨ ᠬᠣᠷᠭᠣᠭᠣᠵᠤ ᠮᠣᠷᠢᠲᠠᠢ ᠬᠥᠮᠥᠨ ᠱᠣᠩ ᠳᠡᠭᠡᠷᠡ ᠢᠷᠡᠪᠡ ᠪᠣᠯᠣᠯᠲᠠᠢ᠂ ᠬᠤᠪᠢᠯᠴᠡᠴᠡᠭ ᠢ ᠭᠠᠷᠴᠤ ᠵᠠᠪᠳᠤᠬᠤ ᠠᠴᠠ ᠡᠮᠦᠨᠡ᠄
— ᠨᠣᠬᠠᠢ ᠪᠠᠨ ᠭᠡᠵᠦ ᠳᠠᠭᠤᠳᠠᠨᠠ᠃
— ᠵᠠ ᠂ ᠣᠳᠣᠬᠠᠨ ! ᠭᠡᠳ ᠬᠤᠪᠢᠯᠴᠡᠴᠡᠭ ᠢ ᠭᠡᠷ ᠡᠴᠡ ᠭᠠᠷᠲᠠᠯᠠ ᠨᠥᠭᠦᠭᠡ ᠬᠥᠮᠦᠨ ᠱᠣᠩ ᠳᠡᠭᠡᠷᠡ ᠪᠠᠭᠤᠵᠤ ᠮᠣᠷᠢ ᠪᠠᠨ ᠤᠶᠠᠨᠠ᠃ ᠬᠠᠮᠠᠷ ᠨᠢ ᠤᠩᠭᠤᠯᠵᠠᠭᠰᠠᠨ ᠬᠠᠯᠵᠠᠨ ᠵᠡᠭᠡᠷᠳᠡ ᠮᠣᠷᠢ ᠲᠣᠯᠣᠭᠠᠢ ᠪᠠᠷ ᠢᠶᠠᠨ ᠨᠠᠭᠠᠳᠤᠨ ᠲᠣᠬᠢᠯᠵᠠᠵᠤ ᠪᠠᠢᠭᠠ ᠶᠢ ᠬᠠᠷᠠᠭᠠᠳ ᠴᠣᠭ ᠬᠡᠢ ᠮᠣᠷᠢ ᠲᠠᠢ ᠡᠷᠡ ᠬᠥᠮᠥᠨ ᠦ ᠤᠨᠤᠭᠠ ᠪᠣᠯᠬᠤ ᠨᠢ ᠮᠡᠳᠡᠭᠳᠡᠵᠦ ᠪᠠᠢᠪᠠ᠃
ᠮᠥᠷᠥ ᠪᠡᠷ ᠢᠶᠡᠨ ᠥᠩᠭᠡ ᠠᠯᠳᠠᠭᠰᠠᠨ ᠬᠥᠬᠡ ᠳᠠᠪᠤᠤ ᠲᠡᠷᠯᠢᠭ ᠦ᠋ᠨ ᠬᠣᠷᠮᠣᠢ ᠶ᠋ᠢ ᠰᠢᠭᠤᠵᠤ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠ ᠪᠥᠭᠡᠴᠡᠢᠯᠡᠨ ᠲᠡᠪᠡᠷᠢᠭᠰᠡᠨ ᠲᠡᠷᠡ ᠥᠨᠳᠥᠷᠬᠡᠨ ᠪᠡᠶᠡ ᠲᠠᠶ᠂ ᠪᠣᠷᠣ ᠴᠢᠷᠠᠢ ᠲᠠᠢ ᠡᠷᠡ 《ᠵᠣᠪ! ᠶᠠᠭᠠᠬᠢᠬᠤ ᠶᠤᠮ⁈ ᠭᠡᠵᠦ ᠭᠡᠷ ᠦ᠋ᠨ ᠡᠵᠡᠨ ᠬᠥᠮᠦᠨ ᠰᠢᠭ ᠨᠣᠬᠠᠢ ᠵᠠᠩᠳᠤᠷᠴᠤ᠂ ᠠᠵᠢᠭ ᠴᠤ᠌ ᠦᠭᠡᠢ ᠬᠡᠩᠬᠦᠯᠵᠡᠲᠡᠯᠡ ᠠᠯᠬᠤᠵᠤ ᠭᠡᠷ ᠳᠥᠭᠥᠵᠦ ᠢᠷᠡᠭᠡᠳ᠄
— ᠵᠠ᠂ ᠰᠠᠢᠨ ᠤᠤ ? ᠭᠡᠵᠦ ᠠᠮᠤᠷ ᠡᠷᠢᠭᠰᠡᠨ ᠳ᠋ᠦ᠍ ᠠᠢᠯ ᠤ᠋ᠨ ᠬᠡᠦᠬᠡᠨ ᠬᠤᠪᠢᠯᠴᠡᠴᠡᠭ ᠡᠨᠡ ᠵᠠᠯᠠᠭᠤ ᠡᠷᠡ ᠡᠴᠡ ᠢᠴᠢᠰᠬᠢᠨ᠄
— ᠰᠠᠢᠨ᠂ ᠲᠠ ᠰᠠᠢᠨ ᠢᠷᠡᠪᠡ ᠤᠤ? ᠭᠡᠵᠦ ᠴᠢᠷᠠᠢ ᠨᠢ ᠤᠯᠠᠰᠬᠢᠨ ᠨᠠᠮ ᠬᠠᠷᠢᠭᠤᠯᠪᠠ᠃
ᠪᠣᠷᠣ ᠴᠢᠷᠠᠢ ᠲᠠᠢ ᠡᠷᠡ ᠲᠡᠷᠡ ᠬᠣᠷᠮᠣᠢᠯᠠᠭᠰᠠᠨ ᠢᠨᠵᠠᠭᠠ ᠪᠠᠨ ᠬᠠᠷᠠᠵᠤ᠄
— ᠡᠨᠡ ᠬᠥᠭᠡᠷᠦᠬᠦᠨ ᠠᠮᠢᠲᠠᠨ ᠢ ᠬᠥᠳᠡᠭᠡ ᠡᠴᠡ ᠣᠯᠣᠯᠠ᠃ ᠪᠦᠯᠢᠶᠡᠨ ᠠᠮᠢ ᠪᠢᠰᠢ ᠤᠤ᠂ ᠬᠥᠭᠡᠷᠦᠬᠦᠢ! ᠭᠡᠳ ᠭᠡᠷ ᠦᠨ ᠬᠠᠶᠠᠭᠠᠨ ᠳᠤ ᠲᠠᠯᠪᠢᠬᠤ ᠭᠡᠲᠡᠯᠡ ᠬᠤᠪᠢᠯᠴᠡᠴᠡᠭ᠄
— ᠬᠥᠭᠡᠷᠦᠬᠦᠢ ᠳ᠋ᠠ᠂ ᠰᠠᠯᠠᠢ ᠨᠢ ᠴᠤ᠌ ᠰᠠᠢᠨ ᠬᠠᠲᠠᠭᠠᠳᠤᠢ ᠨᠢᠯᠵᠠᠷᠠᠢ ᠠᠮᠢᠲᠠᠨ ᠪᠠᠢᠨᠠ ᠰᠢᠳᠡ! ᠠᠯᠢᠵᠢ᠂ ᠨᠠᠭᠠᠰᠢ ᠪᠠᠨ ᠭᠡᠳ ᠰᠠᠨᠳᠤᠷᠤᠨ ᠲᠡᠷᠡ ᠪᠣᠷᠣ ᠴᠢᠷᠠᠢᠲᠤ ᠶᠢᠨ ᠡᠪᠦᠷ ᠡᠴᠡ ᠢᠨᠵᠠᠭᠠ ᠶᠢ ᠳᠤᠰᠴᠤ ᠠᠪᠤᠪᠠ᠃
— ᠠᠷᠭᠠ ᠦᠭᠡᠢ ᠬᠥᠭᠡᠷᠦᠬᠦᠨ ᠠᠮᠢᠲᠠᠨ ᠶᠤᠮ ᠠ᠋ ᠂ ᠠᠮᠢᠲᠠᠨ ᠪᠦᠭᠦᠳᠡ ᠨᠢᠯᠬᠠ ᠳᠡᠭᠡᠷᠡ ᠪᠡᠨ ᠬᠥᠭᠡᠷᠦᠬᠦᠨ ᠪᠠᠢᠳᠠᠭ ᠶᠤᠮ ᠪᠠᠢᠨᠠ᠃
— ᠦᠭᠡᠢ ᠠ᠋᠂ ᠲᠠ ᠶᠠᠭᠤ ᠭᠡᠵᠦ ᠡᠨᠡ ᠨᠣᠢᠲᠠᠨ ᠭᠣᠣᠯᠳᠠᠨ ᠢ᠋ ᠡᠬᠡ ᠡᠴᠡ ᠨᠢ ᠰᠠᠯᠭᠠᠵᠤ ᠠᠪᠴᠢᠷᠠᠪᠠ? ᠶᠠᠮᠠᠷ ᠨᠢᠭᠦᠯ ᠦ᠋ᠨ ᠠᠮᠢᠲᠠᠨ ᠪᠣᠢ ᠲᠠ⁈ ᠭᠡᠵᠦ ᠬᠤᠪᠢᠯᠴᠡᠴᠡᠭ ᠨᠥᠭᠦᠭᠡ ᠡᠷᠡ ᠶ᠋ᠢ ᠪᠤᠷᠤᠭᠤᠳᠬᠠᠵᠤ ᠵᠢᠮᠡᠯᠡᠩᠭᠦᠢ ᠳᠤᠤᠭᠠᠷᠬᠤ ᠳ᠋ᠤ᠌ ᠲᠡᠷᠡ ᠡᠷᠡ ᠬᠠᠭ ᠬᠠᠭ ᠢᠨᠢᠶᠡᠨ᠄
— ᠮᠢᠨᠦ ᠳᠡᠭᠦᠦ ᠨᠢᠭᠦᠯᠡᠰᠦᠩᠭᠦᠢ ᠰᠡᠳᠬᠢᠯ ᠢ᠋ᠶ᠋ᠡᠷ ᠨᠢᠯᠬᠠ ᠢᠨᠵᠠᠭᠠ ᠶ᠋ᠢ ᠡᠩᠬᠦᠷᠡᠢᠯᠡᠵᠦ ᠬᠥᠷᠥᠪᠡᠵᠢᠭᠦᠯᠦᠨ ᠡᠬᠡ ᠪᠠᠢᠭᠠᠯᠢ ᠳ᠋ᠤ᠌ ᠲᠠᠯᠪᠢᠵᠤ ᠣᠷᠭᠢ! ᠳᠡᠭᠡᠪᠡᠯ ᠪᠤᠶᠠᠨ ᠦᠢᠯᠡᠳᠦᠯᠡ ᠭᠡᠵᠦ ᠡᠨᠡ ᠨᠢᠭᠦᠯ ᠦ᠋ᠨ ᠮᠠᠭᠤ ᠠᠬᠠ ᠴᠢᠨᠢ ᠰᠠᠨᠠᠵᠤ ᠶᠠᠪᠤᠶᠠ! ᠭᠡᠵᠦ ᠬᠡᠯᠡᠪᠡ᠃
ᠬᠤᠪᠢᠯᠴᠡᠴᠡᠭ ᠲᠡᠷᠡ ᠢᠨᠵᠠᠭᠠ ᠶ᠋ᠢ ᠥᠬᠥᠭᠡᠷᠳᠡᠨ ᠬᠠᠢᠷᠠᠯᠠᠵᠤ ᠬᠣᠰᠢᠭᠤ ᠶ᠋ᠢ ᠨᠢ ᠲᠠᠭᠠᠯᠠᠨ ᠦᠨᠦᠰᠦᠭᠡᠳ᠄
— ᠢᠨᠵᠠᠭᠠᠨ ᠤ ᠬᠣᠰᠢᠭᠤ ᠠ᠋ᠴᠠ ᠰᠢᠷᠠ ᠲᠣᠰᠣ ᠦᠨᠦᠷᠲᠦᠵᠦ ᠪᠠᠢᠨᠠ! ᠲᠠ ᠰᠢᠷᠠ ᠲᠣᠰᠣ ᠁ ᠭᠡᠵᠦ ᠬᠡᠯᠡᠲᠡᠯᠡ ᠲᠡᠷᠡ ᠡᠷᠡ ᠲᠣᠰᠴᠤ ᠄
— ᠥᠯᠪᠡᠷᠡᠭᠰᠡᠨ ᠨᠢᠯᠬᠠ ᠠᠮᠢᠲᠠᠨ ᠤ᠋ ᠲᠠᠩᠨᠠᠢ ᠳ᠋ᠤᠨᠢ ᠰᠢᠷᠠ ᠲᠣᠰᠣ ᠬᠦᠷᠲᠡᠭᠡᠭᠰᠡᠨ ᠶᠦᠮ ᠠ᠋ ᠂ ᠬᠥᠭᠡᠷᠦᠬᠦᠢ! ᠭᠡᠯᠡ᠃
— ᠡᠬᠡ ᠡᠴᠡ ᠪᠡᠨ ᠥᠨᠥᠴᠢᠷᠡᠭᠰᠡᠨ ᠶᠠᠭᠤᠮᠠ ᠪᠠᠢᠭᠠ ᠳᠠ !
— ᠲᠡᠢᠮᠦ! ᠭᠡᠳ ᠲᠡᠷᠡ ᠬᠦᠳᠡᠷᠯᠢᠭ ᠪᠣᠷᠣ ᠴᠢᠷᠠᠢ ᠲᠠᠢ ᠡᠷᠡ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠨᠢᠯᠪᠤᠰᠤ ᠴᠡᠢᠯᠡᠭᠡᠨᠡᠪᠡ ᠁
ᠬᠤᠪᠢᠯᠴᠡᠴᠡᠭ ᠡᠨᠡ ᠲᠣᠮᠣ ᠬᠠᠩᠬᠠᠭᠠᠷ ᠡᠷᠡ ᠶ᠋ᠢᠨ ᠪᠤᠬᠠᠨ ᠠᠯᠠᠭ ᠨᠢᠳᠦᠨ ᠳ᠋ᠦ᠍ ᠥᠨᠥᠴᠢᠨ ᠲᠤᠭᠤᠯ ᠤ᠋ᠨ ᠦᠷᠦ ᠡᠪᠡᠳᠦᠯᠲᠡᠢ ᠨᠢᠯᠪᠤᠰᠤ ᠬᠤᠷᠠᠭᠰᠠᠨ ᠢ᠋ ᠬᠠᠷᠠᠭᠠᠳ ᠪᠡᠶᠡ ᠳ᠋ᠡᠭᠡᠨ ᠭᠡᠮᠰᠢᠵᠦ ᠪᠢ ᠶᠠᠭᠤ ᠭᠡᠵᠦ ᠲᠠᠨᠢᠵᠤ ᠮᠡᠳᠡᠬᠦ ᠦᠭᠡᠢ ᠬᠠᠷᠠ ᠬᠥᠮᠦᠨ ᠦ᠌ ᠥᠭᠡᠳᠡ ᠡᠴᠡ 《 ᠶᠠᠮᠠᠷ ᠨᠢᠭᠦᠯ ᠴᠠ ᠠᠮᠢᠲᠠᠨ ᠪᠣᠢ ᠲᠠ ? ᠭᠡᠵᠦ ᠬᠡᠯᠡᠪᠡ ᠭᠡᠵᠦ ᠪᠡᠶᠡ ᠪᠡᠨ ᠪᠤᠷᠤᠭᠤᠳᠬᠠᠨ ᠠᠩᠬᠠ ᠨᠢᠭᠤᠷ ᠬᠠᠭᠠᠷᠠᠵᠤ ᠠᠭᠤᠯᠵᠠᠮᠠᠭᠴᠠ ᠪᠠᠨ ᠶᠠᠭᠤ ᠭᠡᠵᠦ ᠡᠨᠡ ᠲᠠᠨᠢᠯ ᠪᠤᠰᠤ ᠡᠷᠡ ᠡᠴᠡ ᠢᠴᠢᠮᠡᠬᠡᠢᠷᠡᠨ ᠪᠢᠰᠢᠭᠦᠷᠬᠡᠯ ᠦᠭᠡᠢ ᠨᠢᠯᠬᠠ ᠢᠨᠵᠠᠭᠠᠨ ᠤ ᠲᠥᠯᠥᠭᠡ ᠲᠡᠭᠦᠨ ᠢ᠋ ᠪᠤᠷᠤᠭᠤᠳᠬᠠᠪᠠ ? ᠭᠡᠵᠦ ᠭᠡᠳᠡᠷᠭᠦ ᠪᠡᠨ ᠲᠡᠷᠡ ᠡᠷᠡ ᠶ᠋ᠢ ᠦᠷᠦ ᠡᠪᠡᠳᠪᠡ᠃ ᠡᠨᠡ ᠪᠣᠰᠤᠭᠠ ᠬᠠᠩᠭᠠᠢ ᠡᠷᠡ ᠬᠥᠮᠥᠨ ᠤ ᠨᠢᠳᠦᠨ ᠡᠴᠡ ᠳᠤᠰᠤᠯᠠᠭᠰᠠᠨ ᠦᠨᠡᠲᠡᠢ ᠨᠢᠯᠪᠤᠰᠤ ᠲᠡᠭᠦᠨ ᠳ᠋ᠦ᠍ ᠶᠠᠭᠤ ᠨᠢᠭᠡ ᠶ᠋ᠢ ᠮᠡᠳᠡᠭᠦᠯᠦᠭᠰᠡᠨ ᠮᠡᠲᠦ ᠪᠠᠢᠯᠠ᠃
— ᠵᠠ ᠳᠡᠭᠦᠦ ᠮᠢᠨᠢ ᠦᠨᠢᠶᠡᠨ ᠦ ᠰᠦ ᠂ ᠡᠰᠡᠬᠦᠯᠡ ᠁ ᠵᠤᠲᠠᠩ ᠴᠤ᠌ ᠶᠠᠭᠠᠬᠢᠬᠤ ᠪᠣᠢ᠃ ᠡᠨᠡ ᠥᠨᠥᠴᠢᠨ ᠢᠨᠵᠠᠭᠠ ᠶᠢ ᠥᠰᠭᠡᠭᠡᠳ ᠁ ᠭᠡᠳ ᠰᠢᠷᠣᠢ ᠬᠠᠭ ᠨᠠᠭᠠᠯᠳᠤᠭᠰᠠᠨ ᠢᠨᠵᠠᠭᠠᠨ ᠤ ᠪᠦᠷᠵᠢᠭᠢᠷ ᠦᠰᠦ ᠵᠢ ᠠᠶᠠᠷᠬᠠᠨ ᠢᠯᠢᠬᠦ ᠳᠦ ᠴᠠᠭᠠᠨ ᠵᠣᠭᠣᠰᠤᠨ ᠤ ᠴᠢᠨᠡᠭᠡᠨ ᠲᠣᠮᠣ ᠨᠢᠯᠪᠤᠰᠤᠨ ᠳᠤᠰᠤᠯ ᠢᠨᠵᠠᠭᠠᠨ ᠤ ᠰᠢᠯᠢᠨ ᠬᠦᠵᠦᠭᠦᠨ ᠳᠡᠭᠡᠷᠡ ᠫᠠᠳ ᠬᠢᠲᠡᠯᠡ ᠤᠨᠠᠭᠰᠠᠨ ᠳᠤ ᠬᠥᠭᠡᠷᠦᠬᠦᠢ ᠢᠨᠵᠠᠭᠠ ᠵᠡᠷᠯᠢᠭ ᠬᠦᠷᠦᠭᠡᠰᠦᠨ ᠦ ᠲᠥᠷᠥᠯᠬᠢ ᠵᠠᠩ ᠢᠶᠠᠷ ᠰᠣᠴᠢᠰᠬᠢᠵᠦ ᠠᠪᠤᠪᠠ᠃
᠁
— ᠵᠠ᠂ ᠠᠬᠠ ᠶ᠋ᠢᠨ ᠬᠢᠨᠢ ᠨᠡᠷᠡ ᠮᠢᠩᠭᠠᠨᠪᠤᠤ ᠭᠡᠳᠡᠭ᠃ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠠᠷᠠᠨᠤᠳ ᠰᠤᠮᠤᠨ ᠤ᠋ ᠲᠠᠢᠵᠢ ᠢᠵᠠᠭᠤᠷᠲᠤ ᠠᠢᠯ ᠤ᠋ᠨ ᠬᠦᠦ᠃ ᠭᠠᠮᠢᠩ ᠤᠨ ᠬᠠᠷᠠ ᠴᠡᠷᠢᠭ ᠮᠠᠨ ᠤ ᠨᠤᠲᠤᠭ ᠢ᠋ ᠴᠥᠯᠪᠡᠵᠦ ᠡᠷᠡ ᠬᠦᠢᠰᠦᠲᠡᠨ ᠪᠦᠬᠦᠨ ᠢ᠋ ᠬᠥᠭᠰᠢᠨ ᠵᠠᠯᠠᠭᠤ ᠦᠭᠡᠢ ᠴᠡᠷᠢᠭ ᠲᠦ᠍ ᠪᠠᠷᠢᠵᠤ ᠨᠤᠲᠤᠭ ᠲᠤ᠌ ᠮᠢᠨᠢ ᠭᠠᠢ ᠲᠠᠷᠢᠭᠰᠠᠨ᠃ ᠪᠢ ᠪᠢᠷᠠ ᠴᠢᠳᠠᠯ ᠲᠠᠢ᠂ ᠮᠣᠷᠢ ᠤᠨᠤᠭᠠᠨ ᠳ᠋ᠤ᠌ ᠰᠠᠢᠨ ᠪᠤᠯᠬᠤᠷ ᠨᠠᠮᠠᠶ᠋ᠢ ᠴᠡᠷᠢᠭ ᠦ᠋ᠨ ᠦᠬᠡᠷ ᠲᠡᠮᠡᠭᠡ ᠬᠠᠷᠢᠭᠤᠯᠤᠭᠤᠯᠬᠤ ᠭᠡᠵᠦ ᠡᠨᠡ ᠭᠠᠵᠠᠷ ᠠᠯᠪᠠᠳᠠᠵᠤ ᠠᠪᠴᠢᠷᠠᠪᠠ᠃
ᠭᠠᠮᠢᠩ ᠤᠨ ᠬᠠᠷᠠ ᠴᠡᠷᠢᠭ ᠬᠣᠢᠰᠢ ᠪᠠᠨ ᠴᠥᠮᠥᠷᠡᠵᠦ ᠶᠡᠬᠡ ᠬᠦᠷᠢᠶᠡ ᠣᠷᠣᠭᠠᠳ ᠮᠠᠭᠰᠤᠷᠵᠠᠪ ᠵᠠᠩᠵᠤᠨ ᠤ ᠮᠣᠩᠭᠣᠯ ᠴᠡᠷᠢᠭ ᠲᠦ ᠬᠢᠶᠠᠷ ᠴᠣᠬᠢᠭᠳᠠᠵᠤ ᠪᠤᠴᠠᠯᠭᠠᠨ ᠳ᠋ᠡᠭᠠᠨ ᠮᠣᠩᠭᠣᠯᠴᠤᠳ ᠤ᠋ᠨ ᠠᠳᠤᠭᠤ ᠮᠠᠯ ᠢ᠋ ᠪᠠᠷᠤᠭ ᠬᠣᠭᠣᠰᠣᠷᠠᠲᠠᠯᠠ ᠴᠥᠯᠪᠡᠭᠰᠡᠨ ᠳᠡ ᠁
ᠡᠨᠡ ᠬᠥᠭᠡᠷᠦᠬᠦᠨ ᠠᠮᠢᠲᠠᠨ ᠢ᠋ ᠥᠨᠦᠴᠢᠷᠡᠭᠦᠯᠦᠭᠰᠡᠨ ᠨᠢ ᠮᠢᠨᠦ ᠤᠷᠰᠢᠭ ᠠ᠋ᠴᠠ ᠪᠣᠯᠤᠯᠠ᠃ ᠪᠢ ᠭᠠᠮᠢᠩ ᠤ᠋ᠨ ᠴᠡᠷᠢᠭ ᠲᠦ᠍ ᠬᠥᠭᠡᠭᠡᠭᠳᠡᠭᠰᠡᠨ ᠠᠳᠤᠭᠤ ᠲᠡᠮᠡᠭᠡ ᠶ᠋ᠢ ᠬᠥᠭᠡᠷᠦᠬᠦᠢᠯᠡᠵᠦ᠂ ᠠᠳᠠ ᠬᠣᠨᠣᠭᠯᠠᠶᠠ ᠭᠡᠰᠡᠨ ᠦᠭᠡᠢ ᠪᠣᠯ ᠶᠠᠭᠠᠬᠢᠯᠠ ᠭᠡᠵᠦ ᠡᠨᠡ ᠢᠨᠵᠠᠭᠠ ᠡᠬᠡ ᠡᠴᠡ ᠪᠡᠨ ᠥᠨᠥᠴᠢᠷᠡᠬᠦ ᠪᠢᠯᠡ ?
ᠥᠴᠥᠭᠡᠳᠦᠷ ᠨᠠᠷᠠ ᠰᠢᠩᠭᠡᠬᠦ ᠠᠯᠲᠠ ᠪᠠᠷ ᠭᠠᠮᠢᠩ ᠤ᠋ᠨ ᠱᠣᠭᠰᠢᠶᠠ ᠪᠠᠷ ᠲᠠᠭᠤᠭᠰᠠᠨ ᠦᠬᠡᠷ ᠲᠡᠮᠡᠭᠡᠳ ᠡᠨᠡ ᠵᠡᠭᠦᠨᠲᠡᠢᠬᠡᠨ ᠳᠠᠷᠠᠰᠤᠲᠠᠢ ᠬᠣᠭᠣᠯᠠᠢ ᠳ᠋ᠤ᠌ ᠬᠦᠷᠴᠦ ᠢᠷᠡᠬᠦᠯᠡᠷ ᠥᠯᠥᠩᠬᠢᠲᠦᠭᠰᠡᠨ ᠦᠬᠡᠷ ᠲᠡᠮᠡᠭᠡᠳ ᠥᠯᠥᠩ ᠡᠪᠡᠰᠦ᠂ ᠳᠡᠷᠡᠰᠦᠨ ᠦ᠌ ᠨᠠᠮᠠᠭᠠ᠂ ᠵᠠᠭ ᠰᠢᠪᠠᠭ ᠤ᠋ᠨ ᠮᠥᠴᠢᠷ ᠴᠢᠮᠬᠢᠯᠡᠵᠦ ᠶᠠᠪᠤ ᠶᠠᠳᠠᠬᠤ ᠪᠠᠷ ᠨᠢ 《ᠨᠠᠷᠠ ᠣᠷᠣᠢ ᠪᠣᠯᠴᠢᠬᠠᠯᠠ᠂ ᠠᠳᠠ ᠬᠣᠨᠣᠭᠯᠠᠭᠠᠳ ᠮᠠᠷᠭᠠᠲᠤᠷ ᠡᠷᠲᠡ ᠶᠠᠪᠤᠵᠠᠭᠠᠶᠠ! ᠬᠠᠪᠤᠷ ᠤ᠋ᠨ ᠮᠠᠯ ᠢ᠋ ᠡᠪᠡᠰᠦ ᠬᠠᠵᠠᠯᠠᠭᠤᠯᠬᠤ ᠦᠭᠡᠢ ᠢᠩᠭᠢᠵᠦ ᠰᠢᠷᠦᠭᠦᠨ ᠳᠠᠭᠤᠪᠠᠯ ᠵᠠᠮ ᠳ᠋ᠤ᠌ ᠲᠠᠷᠲᠠᠵᠤ ᠦᠬᠦᠨᠡ ᠰᠢᠦ ! 》ᠭᠡᠰᠡᠨ ᠳ᠋ᠦ᠍ ᠬᠠᠮᠢᠶᠠᠷᠤᠭᠰᠠᠨ ᠴᠡᠷᠢᠭ ᠵᠥᠪᠰᠢᠶᠡᠷᠡᠵᠦ ᠲᠡᠷᠡ ᠳᠠᠷᠠᠰᠤᠲᠠᠢ ᠬᠣᠭᠣᠯᠠᠢ ᠳ᠋ᠤ᠌ ᠮᠠᠢᠬᠠᠨ ᠢ᠋ᠶ᠋ᠠᠨ ᠰᠢᠭᠠᠵᠤ ᠬᠣᠨᠣᠯᠠ᠃
ᠲᠠᠪᠢ ᠵᠢᠷᠠ ᠶ᠋ᠢᠨ ᠲᠣᠭᠠᠨ ᠤ᠋ ᠬᠠᠷᠠ ᠰᠡᠭᠦᠯᠲᠦ ᠵᠡᠭᠡᠷᠡ ᠨᠦ᠍ᠭᠦᠳ ᠤᠲᠤᠭᠠ ᠦᠨᠦᠷᠲᠦᠵᠦ ᠭᠠᠮᠢᠩ ᠤ᠋ᠨ ᠭᠣᠵᠣᠩ ᠭᠣᠵᠣᠩ ᠬᠠᠷᠠ ᠲᠣᠯᠣᠭᠠᠢᠲᠠᠨ ᠢ᠋ ᠰᠣᠨᠢᠷᠬᠠᠵᠤ《ᠡᠨᠡ ᠶᠠᠭᠤᠨ ᠤ᠋ ᠠᠴᠠ ᠬᠥᠯ ᠲᠡᠢ ᠠᠷᠵᠠᠭᠠᠷ ᠬᠠᠷᠠ ᠲᠣᠯᠣᠭᠠᠢ ᠲᠠᠢ ᠠᠮᠢᠲᠠᠳ ᠪᠣᠯᠪᠠ ? 》 ᠭᠡᠰᠡᠨ ᠰᠢᠭ ᠬᠠᠶᠠᠭᠠᠨ ᠳ᠋ᠤ᠌ ᠣᠢᠷᠠᠲᠤᠨ ᠬᠠᠴᠢᠷᠬᠠᠵᠤ ᠬᠠᠷᠠᠭᠠᠳ ᠭᠡᠨᠡᠳᠲᠡ ᠬᠦᠷᠳ᠋ ᠬᠢᠨ ᠦᠷᠭᠦᠵᠦ ᠳᠤᠲᠠᠭᠠᠪᠠ᠃ ᠢᠩᠭᠢᠲᠡᠯᠡ ᠨᠢᠭᠡ ᠭᠠᠮᠢᠩ ᠰᠣᠴᠢᠵᠤ《 ᠮᠣᠩᠭᠣᠯ ᠴᠡᠷᠢᠭ ᠁ ᠮᠣᠩᠭᠣᠯ ᠮᠣᠷᠢᠨ ᠴᠡᠷᠢᠭ ᠁ ᠫᠤᠤᠳᠠ ! 》 ᠭᠡᠵᠦ ᠦᠷᠭᠦᠵᠦ ᠠᠷᠢᠯᠤᠭᠰᠠᠨ ᠬᠠᠷᠠ ᠰᠡᠭᠦᠯᠲᠦ ᠶ᠋ᠢᠨ ᠠᠷᠤ ᠠ᠋ᠴᠠ ᠰᠣᠯᠢᠶᠠᠲᠠᠢ ᠰᠢᠭ᠋ ᠤᠭᠰᠠᠷᠠᠭᠠ ᠪᠠᠷ ᠫᠠᠴᠢᠭᠢᠨᠠᠭᠤᠯᠪᠠ᠃ ᠪᠢ ᠳᠣᠲᠣᠷᠠ ᠪᠠᠨ 《ᠡᠴᠢᠭᠡ ᠶ᠋ᠢᠨ ᠴᠢᠨᠢ ᠮᠣᠩᠭᠣᠯ ᠴᠡᠷᠢᠭ! ᠬᠠᠪᠤᠷ ᠤᠨ ᠭᠠᠴᠢᠭ ᠴᠠᠭ ᠤᠨ ᠵᠡᠭᠡᠷᠡ ᠶ᠋ᠢ ᠢᠩᠭᠢᠵᠦ ᠫᠤᠤᠲᠠᠳᠠᠭ ᠦᠭᠡᠢ ᠶᠦᠮ᠃ ᠰᠢᠷᠠᠭᠴᠢᠨ ᠲᠥᠯᠯᠡᠵᠦ ᠪᠣᠢ ᠤᠯᠠᠷᠢᠯ ᠲᠤᠯᠠ ᠰᠣᠬᠣᠷ ᠰᠤᠮᠤᠨ ᠳ᠋ᠤᠨᠢ ᠬᠡᠭᠡᠯ ᠲᠡᠢ ᠰᠢᠷᠠᠭᠴᠢᠨ ᠨᠤᠭᠤᠳ ᠣᠨᠣᠭᠳᠠᠵᠤ ᠮᠡᠳᠡᠨᠡ᠃ ᠡᠨᠡ ᠮᠠᠭᠤ ᠰᠠᠢᠨ ᠵᠠᠨᠠᠭ ᠤ᠋ᠳ ᠭᠡᠵᠦ ᠴᠣᠬᠣᠮ ᠨᠢᠭᠡ ᠨᠢᠭᠦᠯ ᠦ᠋ᠨ ᠲᠤᠯᠤᠮ ᠤ᠋ᠳ ᠶᠣᠮ ᠡ ! ᠮᠣᠩᠭᠣᠯ ᠴᠡᠷᠢᠭ ᠳᠡᠢᠯᠳᠡᠭᠡᠳ ᠬᠣᠷᠣᠰᠤᠯ ᠢ᠋ᠶ᠋ᠠᠨ ᠠᠳᠤᠭᠤ ᠮᠠᠯ ᠳ᠋ᠣᠨᠢ ᠴᠠᠬᠢᠵᠤ ᠲᠠᠢᠯᠬᠤ ᠳ᠋ᠠᠭᠠᠨ ᠪᠠᠰᠠ ᠬᠠᠨᠤᠰᠢ ᠦᠭᠡᠢ ᠭᠠᠷ ᠨᠢ ᠵᠠᠭᠠᠲᠤᠨᠠᠵᠤ ᠲᠠᠯᠠ ᠶ᠋ᠢᠨ ᠨᠣᠮᠣᠬᠠᠨ ᠪᠤᠷᠤ ᠬᠦᠷᠦᠭᠡᠰᠦ ᠵᠢ ᠳᠠᠷᠴᠢᠯᠠᠭᠠᠳᠠᠭ ᠨᠢ ᠶᠠᠭᠤ ᠪᠤᠢ ?》ᠭᠡᠵᠦ ᠪᠢᠲᠡᠭᠦᠬᠡᠨ ᠵᠠᠨᠤᠵᠤ ᠪᠣᠳᠣᠬᠤ ᠳ᠋ᠠᠭᠠᠨ ᠰᠥᠨᠢ ᠨᠣᠢᠷ ᠬᠤᠯᠵᠢᠭᠠᠳ ᠤᠨᠲᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠥᠷᠯᠦᠭᠡ᠂ ᠦᠦᠷ ᠲᠡᠮᠳᠡᠭᠷᠡᠮᠡᠭᠴᠡ ᠪᠤᠰᠴᠤ ᠥᠴᠥᠭᠡᠳᠦᠷ ᠣᠷᠣᠢ ᠴᠠᠭᠠᠳᠤ ᠳᠠᠷᠠᠰᠤᠲᠠᠢ ᠪᠤᠯᠤᠩ ᠤᠷᠤᠭᠤ ᠦᠷᠭᠦᠵᠦ ᠲᠠᠭᠰᠢᠭᠰᠠᠨ ᠵᠡᠭᠡᠷᠡ ᠶᠢᠨ ᠮᠥᠷ ᠢ᠋ᠶ᠋ᠡᠷ ᠣᠷᠣᠭᠠᠳ᠂ ᠬᠡᠭᠡᠯ ᠲᠠᠢ ᠰᠢᠷᠠᠭᠴᠢᠨ ᠨᠤᠭᠤᠳ ᠡᠴᠡ ᠰᠤᠬᠤᠷ ᠰᠤᠮᠤᠨ ᠳ᠋ᠤ᠌ ᠣᠨᠣᠭᠳᠠᠭᠠ ᠦᠭᠡᠢ ᠯᠡ ᠪᠠᠢᠭᠠᠰᠠᠢ ᠭᠡᠵᠦ ᠳᠣᠲᠣᠷᠠ ᠪᠠᠨ ᠳᠠᠭᠠᠳᠬᠠᠨ ᠶᠠᠪᠤᠲᠠᠯᠠ ᠠᠳᠠ ᠲᠡᠨᠳᠡ ᠬᠡᠳᠦ ᠬᠡᠳ᠋ᠣᠨ ᠬᠠᠷᠠ ᠰᠡᠭᠦᠯᠲᠦ ᠲᠡᠷᠡᠢᠵᠦ ᠬᠡᠪᠲᠠᠨᠠ᠃ ᠲᠠᠷᠳᠠᠭᠰᠠᠨ ᠬᠥᠭᠰᠢᠨ ᠣᠭᠣᠨᠣ᠂ ᠮᠠᠭᠤ ᠳᠠᠭᠠᠬᠢ ᠲᠠᠢ ᠰᠢᠳᠦᠯᠡᠩ᠂ ᠵᠤᠰᠠᠭ ᠴᠠᠭᠠᠨ ᠰᠢᠷᠠᠭᠴᠢᠨ ᠁ ᠵᠡᠷᠭᠡ ᠬᠠᠪᠤᠷ ᠴᠠᠭ ᠰᠥᠷᠦᠭ ᠦᠨ ᠠᠷᠤ ᠡᠴᠡ ᠭᠣᠢᠭᠣᠷᠤᠭᠰᠠᠨ ᠮᠠᠭᠤ ᠰᠠᠢᠨ ᠨᠤᠭᠤᠳ ᠠ᠋ᠴᠠ ᠬᠡᠰᠡᠭ ᠨᠢ ᠰᠤᠮᠤᠨ ᠳ᠋ᠤ᠌ ᠣᠨᠣᠭᠳᠠᠵᠤ ᠦᠬᠦᠵᠡᠢ ᠁《 ᠪᠤᠷᠬᠠᠨ ᠥᠷᠥᠰᠢᠶᠡᠭ !ᠬᠡᠭᠡᠯ ᠲᠠᠢ ᠰᠢᠷᠠᠭᠴᠢᠨ ᠪᠠᠢᠬᠤ ᠦᠭᠡᠢ ᠶᠦᠮ ᠪᠠᠢᠨᠠ ! ᠡᠨᠡ ᠭᠡᠳᠡᠰᠦ ᠪᠡᠨ ᠰᠤᠪᠤᠭᠤᠯᠵᠤ ᠦᠬᠦᠭᠰᠡᠨ ᠵᠤᠰᠠᠭ ᠴᠠᠭᠠᠨ ᠰᠢᠷᠠᠭᠴᠢᠨ ᠣᠷᠣᠢ ᠶ᠋ᠢᠨ ᠲᠥᠯ ᠲᠠᠢ ᠶᠤᠮ ᠪᠤᠯ ᠤᠤ?》ᠭᠡᠵᠤ ᠪᠣᠳᠣᠯ ᠪᠣᠯᠤᠨ ᠥᠨᠥᠬᠢ ᠬᠡᠳᠦᠨ ᠦᠬᠦᠭᠰᠡᠨ ᠵᠡᠭᠡᠷᠡ ᠶ᠋ᠢ ᠨᠢᠳᠦᠨ ᠳᠠᠯᠳᠠ ᠬᠣᠩᠬᠣᠷ ᠭᠠᠵᠠᠷ ᠡᠪᠯᠡᠭᠦᠯᠦᠨ ᠲᠠᠯᠪᠢᠵᠤ ᠰᠡᠳᠬᠢᠯ ᠭᠤᠮᠤᠷᠬᠠᠬᠤ ᠶ᠋ᠢᠨ ᠡᠷᠬᠡᠨ ᠳ᠋ᠤ᠌ ᠬᠡᠲᠡ ᠴᠠᠬᠢᠨ ᠨᠢᠭᠡ ᠭᠠᠩᠰᠠ ᠲᠠᠮᠠᠬᠢ ᠨᠡᠷᠡᠵᠦ ᠪᠠᠭᠠᠭᠢᠭᠤᠯᠵᠤ ᠰᠠᠭᠤᠯᠠ ᠁ ᠲᠡᠭᠡᠲᠡᠯᠡ ᠭᠤᠴᠢᠭᠠᠳ ᠠᠯᠴᠠᠮ ᠵᠠᠢᠲᠠᠢ ᠨᠢᠭᠡ ᠳᠡᠷᠡᠰᠦᠨ ᠤ ᠴᠠᠭᠠᠭᠤᠷ ᠪᠦᠦᠷ ᠲᠦᠦᠷ ᠨᠢᠭᠡ ᠶᠠᠭᠤᠮᠠ ᠬᠥᠳᠡᠯᠬᠦ ᠰᠢᠭ ᠪᠣᠯᠬᠤ ᠳ᠋ᠤ᠌ 《 ᠠᠳᠠ ᠶᠠᠭᠤ ᠪᠠᠢᠭᠠ ᠪᠣᠯ ? 》 ᠭᠡᠵᠦ ᠪᠣᠰᠤᠭᠠᠳ ᠬᠠᠷᠠᠪᠠᠯ ᠴᠠᠭᠠᠨᠠ ᠠ᠋ᠴᠠ ᠤᠩᠭᠠᠰᠤ ᠨᠣᠣᠰᠣ ᠨᠢ ᠰᠢᠷᠢᠯᠳᠦᠭᠰᠡᠨ ᠨᠢᠭᠡ ᠦᠨᠡᠭᠡ ᠭᠣᠪᠴᠢ ᠭᠣᠪᠴᠢ ᠭᠡᠳ ᠭᠠᠵᠠᠷ ᠰᠢᠩᠰᠢᠯᠡᠨ ᠪᠤᠷᠤᠭᠤᠯᠠᠵᠤ ᠭᠦᠶᠦᠨᠡ᠃ ᠲᠡᠭᠡᠭᠡᠳ ᠳᠡᠷᠡᠰᠦᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠬᠦᠷᠴᠦ ᠣᠴᠢᠪᠠᠯ ᠪᠤᠷᠬᠠᠨ ᠮᠢᠨᠢ ᠡ᠂ ᠪᠣᠣ ᠦᠵᠡᠭᠳᠡ᠂ ᠮᠢᠨᠦ ᠠᠯᠢ ᠦᠵᠡᠬᠦ ᠳᠤᠷᠠ ᠦᠭᠡᠢ ᠲᠡᠷᠡ ᠭᠤᠨᠢᠭᠲᠤ ᠦᠵᠡᠭᠳᠡᠯ ᠨᠢᠳᠦᠨ ᠦ᠌ ᠡᠮᠦᠨᠡ ᠳᠡᠯᠭᠡᠭᠳᠡᠯᠡ᠃ ᠨᠢᠭᠡ ᠵᠢᠵᠢᠭᠬᠡᠨ ᠪᠦᠷᠵᠢᠭᠢᠷ ᠪᠠᠭᠠᠴᠠᠭᠠᠨᠠᠵᠤ ᠪᠣᠰᠣᠭᠠᠳ ᠬᠣᠶᠠᠷ ᠳᠠᠯᠤ ᠪᠠᠨ ᠴᠥᠮᠥ᠍ ᠫᠤᠤᠳᠠᠭᠤᠯᠤᠭᠰᠠᠨ ᠰᠢᠷᠠᠭᠴᠢᠨ ᠤ᠋ ᠴᠢᠰᠤ ᠨᠥᠵᠢ ᠲᠡᠢ ᠰᠣᠭᠣ ᠴᠠᠪᠢ ᠤᠷᠤᠭᠤ ᠨᠢ ᠨᠢᠯᠬᠠ ᠬᠣᠰᠢᠭᠤ ᠪᠠᠷ ᠢᠶᠠᠨ ᠨᠢᠳᠤᠴᠢᠨᠠ᠃ ᠰᠡᠭᠦᠳᠡᠰᠬᠢᠨ ᠬᠠᠪᠢᠳᠠᠭᠰᠠᠨ ᠬᠥᠮᠥᠨ ᠦ ᠠᠨᠢᠷ ᠢᠶᠠᠷ ᠲᠡᠷᠡ ᠢᠨᠵᠠᠭᠠ ᠰᠣᠴᠢᠵᠤ ᠦᠷᠬᠦᠭᠡᠳ ᠰᠤᠯᠳᠠᠢᠨ ᠬᠡᠪᠲᠡᠭᠡ ᠡᠬᠡ ᠰᠢᠷᠠᠭᠴᠢᠨ ᠤ ᠦᠭᠦᠬᠡᠷ ᠲᠦ ᠪᠦᠳᠦᠷᠢᠵᠤ ᠣᠢᠴᠢᠪᠠ᠃
ᠰᠢᠷᠠᠭᠴᠢᠨ ᠤ ᠪᠡᠶᠡ ᠭᠥᠰᠢᠵᠦ ᠠᠮᠵᠢᠭᠠᠳᠤᠢ ᠵᠥᠭᠡᠯᠡᠨ ᠪᠦᠯᠢᠶᠡᠨ ᠪᠠᠢᠪᠠ᠃ ᠪᠣᠳᠣᠬᠤᠯᠠ ᠰᠠᠶᠢᠬᠠᠨ ᠠᠮᠢ ᠲᠠᠯᠪᠢᠭᠰᠠᠨ ᠪᠣᠯᠣᠯᠲᠠᠢ᠃ ᠰᠥᠨᠢᠵᠢᠨ ᠰᠢᠷᠬᠠᠨ ᠳᠠᠭᠠᠨ ᠡᠨᠡᠯᠵᠤ᠂ ᠬᠡᠪᠡᠯᠢ ᠲᠣᠲᠣᠷᠡᠬᠢ ᠢᠨᠵᠠᠭᠠ ᠪᠠᠨ ᠪᠦᠲᠡᠭᠦᠯᠵᠦ ᠦᠬᠦᠭᠦᠯᠬᠦ ᠡᠴᠡ ᠠᠮᠢ ᠲᠠᠢ ᠬᠣᠴᠣᠷᠭᠠᠶᠠ ᠭᠡᠰᠡᠨ ᠰᠢᠭ ᠢᠨᠵᠠᠭᠠ ᠪᠠᠨ ᠵᠠᠪᠳᠤᠵᠤ ᠲᠥᠷᠥᠬᠦᠯᠵᠢ ᠳ᠋ᠠ᠃ ᠰᠢᠷᠬᠠᠨ ᠳᠠᠭᠠᠨ ᠵᠣᠪᠠᠵᠤ ᠲᠦᠯᠢᠯᠭᠡᠨ ᠳ᠋ᠡᠭᠡᠨ ᠡᠪᠡᠷᠰᠢᠶᠡᠨ ᠭᠠᠵᠠᠷ ᠤᠨ ᠬᠥᠷᠥᠰᠥ᠍ ᠶᠢ ᠨᠦᠬᠡ ᠭᠠᠷᠲᠠᠯᠠ ᠳᠡᠯᠴᠢᠯᠡᠭ᠍ᠰᠡᠨ ᠪᠠᠢᠨᠠ᠃ ᠠᠷᠠᠢ ᠭᠡᠵᠦ ᠢᠨᠵᠠᠭᠠᠯᠠᠭᠰᠠᠨ ᠤᠯᠠᠭᠠᠨ ᠨᠢᠯᠬᠠ ᠢᠨᠵᠠᠭᠠ ᠪᠠᠨ ᠥᠯᠪᠡᠷᠴᠢᠭᠡᠬᠦ ᠪᠣᠢ ᠭᠡᠵᠦ ᠴᠢᠨᠦᠭᠰᠡᠨ ᠭᠦᠬᠦ ᠪᠡᠨ ᠬᠣᠰᠢᠭᠤᠨ ᠳ᠋ᠤᠨᠢ ᠬᠦᠷᠭᠡᠵᠦ ᠡᠮᠬᠦᠭᠦᠯᠬᠦ ᠭᠡᠵᠦ ᠪᠣᠰᠬᠤ ᠪᠠᠷ ᠠᠮᠢ ᠲᠡᠮᠡᠴᠡᠨ ᠤᠷᠤᠯᠳᠤᠭᠰᠠᠨ ᠪᠣᠯᠣᠯᠲᠠᠢ᠃
《ᠪᠢ ᠡᠨᠡ ᠬᠠᠷᠠᠰᠠᠯᠲᠤ ᠬᠣᠷᠸᠠ ᠶᠢ ᠬᠠᠶᠠᠵᠤ ᠲᠦᠪᠳᠡᠬᠦ ᠦᠭᠡᠢ ᠳ᠋ᠡᠭᠡᠨ ᠰᠢᠨᠠᠯᠤᠭᠰᠠᠨ ᠪᠢᠰᠢ! ᠡᠨᠡ ᠬᠥᠭᠡᠷᠦᠬᠦᠨ ᠦᠷᠡ ᠮᠢᠨᠢ ᠡᠯᠢᠭᠡ ᠵᠢᠷᠦᠬᠡ ᠶᠢ ᠮᠢᠨᠢ ᠤᠷᠠᠵᠤ ᠨᠠᠮᠠᠶ᠋ᠢ ᠬᠡᠴᠡᠭᠦᠦ ᠵᠣᠪᠠᠭᠠᠨᠠ ᠳ᠋ᠠ! ᠲᠠᠢᠪᠤᠩ ᠴᠠᠭᠠᠨ ᠪᠡᠯᠴᠢᠭᠡᠷ ᠲᠦ᠍ ᠮᠢᠨᠢ ᠬᠠᠮᠢᠭᠠ ᠠᠴᠠ ᠢᠷᠡᠭᠰᠡᠨ ᠭᠠᠰᠢᠭᠤᠨ ᠤᠲᠤᠭᠠ ᠲᠠᠢ ᠭᠠᠩᠳᠠᠭᠤᠨ ᠮᠠᠭᠤᠬᠠᠢ ᠳᠠᠭᠤ ᠶᠤᠮ ᠪᠣᠣ ᠮᠡᠳᠡ ! ᠥᠨᠥᠴᠢᠷᠡᠭᠰᠡᠨ ᠢᠨᠵᠠᠭᠠ ᠮᠢᠨᠢ ᠡᠨᠡ ᠬᠣᠵᠢᠭᠤ ᠶᠢᠨ ᠭᠠᠰᠢᠭᠤᠨ ᠬᠣᠷᠸᠠ ᠳᠤ ᠥᠯᠦᠰᠦᠭᠦᠵᠡᠢ ᠠ᠋᠂ ᠥᠯᠪᠡᠷᠦᠭᠦᠵᠡᠢ ᠠ᠋᠂ ᠲᠠᠭᠠᠷᠠᠭᠤᠵᠠᠢ ᠠ᠋ ᠂ ᠪᠡᠭᠡᠷᠡᠭᠦᠵᠡᠢ ᠠ᠋ ᠁ ᠭᠡᠳᠡᠭ ᠲᠦ᠍ ᠲᠦᠪᠳᠡᠳᠡᠭ ᠦᠭᠡᠢ ᠡᠬᠡ ᠶᠢᠨ ᠡᠮᠵᠡᠭ ᠬᠠᠢᠷᠠ ᠪᠠᠨ ᠦᠷᠡ ᠳ᠋ᠡᠭᠡᠨ ᠬᠣᠷᠣᠮᠬᠠᠨ ᠴᠤ᠌ ᠪᠣᠯᠣᠭ ᠬᠣᠴᠣᠷᠭᠠᠵᠤ ᠦᠯᠡᠳᠡᠭᠡᠶᠡ ᠭᠡᠵᠦ ᠰᠢᠨᠠᠯᠤᠨ ᠬᠣᠷᠭᠣᠳᠠᠯᠠ ᠁ 》ᠭᠡᠵᠦ ᠲᠡᠷᠡᠢᠨ ᠬᠡᠪᠲᠡᠭᠰᠡᠨ ᠰᠢᠷᠠᠭᠴᠢᠨ ᠨᠠᠮᠠᠶ᠋ᠢ ᠵᠠᠨᠤᠨ ᠰᠢᠭᠦᠮᠵᠢᠯᠡᠬᠦ ᠰᠢᠭ ᠰᠦᠨᠡᠰᠦ ᠨᠢ ᠪᠡᠶᠡ ᠶ᠋ᠢ ᠣᠷᠢᠶᠠᠵᠤ ᠰᠢᠪᠡᠨᠡᠭᠡᠳ ᠪᠠᠢᠨᠠ᠃
ᠰᠢᠷᠠᠭᠴᠢᠨ ᠤ ᠴᠠᠪᠴᠢᠯ ᠦᠭᠡᠢ ᠪᠦᠯᠲᠡᠭᠡᠨᠡᠭᠰᠡᠨ ᠬᠠᠷᠠ ᠨᠢᠳᠦᠨ ᠳᠤ ᠳᠠᠷᠢ ᠠᠮᠲᠠᠯᠠᠭᠳᠠᠭᠰᠠᠨ ᠭᠠᠰᠢᠭᠤᠨ ᠳᠠᠭᠤ ᠶᠢ ᠦᠬᠦᠨ ᠬᠣᠷᠣᠰᠤᠭᠰᠠᠨ ᠤ ᠴᠠᠭᠠᠨᠠ ᠨᠢ ᠥᠨᠥᠴᠢᠨ ᠬᠣᠴᠣᠷᠤᠭᠰᠠᠨ ᠢᠨᠵᠠᠭᠠ ᠪᠠᠨ ᠡᠨᠡᠷᠢᠭᠰᠡᠨ ᠤᠶᠠᠷᠠᠩᠭᠤᠢ ᠨᠢᠯᠪᠤᠰᠤ ᠴᠤᠪᠤᠭᠰᠠᠨ ᠪᠠᠢᠯᠠ ᠁
ᠥᠨᠥᠴᠢᠷᠡᠨ ᠲᠡᠯᠴᠢᠯᠡᠭᠰᠡᠨ ᠪᠡᠭᠡᠷᠡᠩᠬᠡᠢ ᠢᠨᠵᠠᠭᠠ ᠶ᠋ᠢ ᠲᠡᠪᠡᠷᠢᠵᠤ ᠠᠪᠤᠭᠠᠳ ᠡᠪᠦᠷ ᠲᠡᠬᠢ ᠣᠯᠣᠭᠠᠢ ᠲᠠᠢ ᠰᠢᠷᠠ ᠳᠤᠰᠤᠨ ᠤ ᠰᠢᠪᠬᠠᠷᠤᠤ ᠶᠢ ᠬᠤᠰᠤᠵᠤ ᠢᠨᠵᠠᠭᠠᠨ ᠤ ᠲᠠᠩᠨᠠᠢ ᠳᠤ ᠬᠦᠷᠲᠡᠭᠡᠵᠦ ᠰᠢᠮᠡᠭᠦᠯᠦᠭᠰᠡᠨ ᠳᠦ ᠬᠥᠬᠥᠭᠦᠯ ᠠᠮᠢᠲᠠᠨ ᠥᠴᠥᠬᠡᠨ ᠰᠢᠷᠠ ᠳᠤᠰᠤᠨ ᠤ ᠰᠢᠮᠡ ᠳ᠋ᠤ᠌ ᠳᠣᠣᠷᠠ ᠪᠠᠨ ᠰᠠᠷᠪᠠᠢᠵᠤ ᠳᠠᠭᠵᠢᠨ ᠴᠡᠴᠡᠷᠡᠬᠦ ᠪᠡᠨ ᠪᠣᠯᠢᠪᠠ᠃
ᠬᠤᠪᠢᠯᠴᠡᠴᠡᠭ ᠢ ᠬᠠᠷᠠᠪᠠᠯ ᠨᠢᠯᠪᠤᠰᠤ ᠨᠢ ᠬᠠᠮᠠᠷ ᠢ᠋ ᠨᠢ ᠬᠠᠪᠴᠢᠨ ᠤᠷᠤᠰᠴᠤ ᠲᠡᠷᠯᠢᠭ ᠦᠨ ᠬᠢᠨᠢ ᠡᠩᠭᠡᠷ᠂ ᠭᠤᠲᠤᠯ ᠤ᠋ᠨ ᠬᠣᠩᠰᠢᠶᠠᠷ ᠲᠤᠨᠢ ᠳᠤᠰᠤᠯᠠᠵᠤ ᠪᠠᠢᠪᠠ᠃
— ᠪᠢ ᠡᠵᠢ ᠡᠴᠡ ᠪᠡᠨ ᠥᠨᠥᠴᠢᠨ ᠥᠰᠦᠭᠰᠡᠨ ᠬᠡᠦᠬᠡᠳ᠃ ᠡᠨᠡ ᠥᠨᠥᠴᠢᠷᠡᠭᠰᠡᠨ ᠢᠨᠵᠠᠭᠠ ᠲᠠᠢ ᠠᠳᠠᠯᠢᠬᠠᠨ ᠯᠠ ᠬᠤᠪᠢ ᠲᠠᠪᠢᠯᠠᠩ ᠲᠠᠢ᠃ ᠡᠨᠡ ᠬᠤᠷᠸᠠ ᠳ᠋ᠤ᠌ ᠡᠵᠢ ᠮᠢᠨᠢ ᠦᠷᠠ ᠨᠠᠮᠠᠶ᠋ᠢ ᠪᠠᠨ ᠲᠥᠷᠥᠭᠦᠯᠬᠦ ᠭᠡᠵᠦ ᠴᠢᠰᠤ ᠶᠡᠬᠡ ᠠᠯᠳᠠᠭᠰᠠᠨ ᠠ᠋ᠴᠠ ᠲᠠᠯᠢᠢᠭᠴᠢ ᠪᠣᠯᠤᠯᠠ ᠭᠡᠵᠦ ᠠᠪᠤ ᠮᠢᠨᠢ ᠨᠠᠳᠠ ᠶᠠᠷᠢᠭᠰᠠᠨ ᠢ᠋ ᠪᠢ ᠬᠡᠵᠢᠶᠡᠳᠡ ᠮᠠᠷᠲᠠᠳᠠᠭ ᠦᠭᠡᠢ ᠭᠡᠳ ᠢᠨᠵᠠᠭᠠ ᠶ᠋ᠢ ᠡᠯᠢᠭᠡᠨ ᠳ᠋ᠡᠭᠡᠨ ᠴᠢᠩᠭᠠ ᠲᠡᠪᠡᠷᠢᠨ ᠮᠢᠩᠭᠠᠨᠪᠤᠤ ᠶ᠋ᠢ ᠬᠠᠷᠠᠵᠤ᠄
— ᠠᠬᠠ ᠠ᠋᠂ ᠲᠠ ᠥᠨᠥᠴᠢᠨ ᠥᠷᠥᠭᠡᠰᠦᠨ ᠥᠴᠦᠬᠡᠨ ᠠᠮᠢᠲᠠᠨ ᠢ᠋ ᠡᠨᠡᠷᠢᠨ ᠬᠠᠢᠷᠠᠯᠠᠳᠠᠭ ᠰᠠᠢᠨ ᠬᠥᠮᠦᠨ ᠶᠦᠮ ᠪᠠᠢᠨᠠ᠃ ᠲᠠ ᠰᠠᠨᠠᠭᠠ ᠠᠮᠤᠷ ᠪᠠᠢ᠂ ᠪᠢ ᠡᠨᠡ ᠥᠨᠥᠴᠢᠨ ᠢᠨᠵᠠᠭᠠ ᠶᠢ ᠮᠠᠯ ᠪᠣᠯᠭᠠᠵᠤ ᠡᠬᠡ ᠪᠠᠢᠭᠠᠯᠢ ᠳᠤ ᠪᠤᠴᠠᠭᠠᠶᠠ ᠭᠡᠳ ᠨᠢᠯᠪᠤᠰᠤ ᠪᠠᠨ ᠵᠦᠯᠭᠦᠬᠦ ᠶᠢᠨ ᠳᠠᠭᠠᠤ ᠴᠠᠢ ᠪᠤᠴᠠᠯᠴᠢᠬᠠᠯᠠ᠂ ᠭᠡᠷ ᠲᠦ ᠣᠷᠣᠶᠠ! ᠭᠡᠳ ᠮᠢᠩᠭᠠᠨᠪᠤᠤ ᠶ᠋ᠢ ᠭᠡᠷ ᠲᠡᠭᠡᠨ ᠤᠷᠢᠵᠤ ᠣᠷᠣᠭᠤᠯᠤᠭᠠᠳ ᠴᠠᠢ ᠠᠶᠠᠭᠠᠯᠠᠵᠤ᠂ ᠢᠳᠡᠵᠦ ᠤᠤᠭᠤᠬᠤ ᠭᠡᠬᠦ ᠡᠴᠡ ᠵᠢᠭᠠᠯ ᠵᠢᠭᠤᠯ ᠨᠥᠭᠡᠴᠢᠯᠡᠵᠦ ᠲᠠᠯᠪᠢᠭᠰᠠᠨ ᠪᠠᠯᠪᠠᠳᠠᠭ ᠲᠠᠢ ᠠᠭᠠᠷᠤᠤᠯ᠂ ᠪᠤᠷᠴᠠ᠂ ᠵᠠᠷᠮᠠ ᠰᠢᠤᠬᠠᠨ ᠶᠠᠭᠤᠮᠠ ᠳᠡᠯᠪᠢᠵᠦ ᠥᠭᠪᠡ᠃
ᠮᠢᠩᠭᠠᠨᠪᠤᠤ ᠬᠡᠦᠬᠡᠨ ᠦ᠌ ᠠᠶᠠᠭᠠᠯᠠᠭᠰᠠᠨ ᠴᠠᠢ ᠶ᠋ᠢ ᠠᠮᠰᠠᠵᠤ ᠠᠶᠠᠭᠠ ᠪᠠᠨ ᠪᠠᠷᠢᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠢ᠋ ᠮᠡᠯᠡᠷᠡᠨ ᠬᠠᠷᠠᠵᠤ《ᠠᠷᠢᠯᠭᠠᠭᠰᠠᠨ ᠰᠣᠩᠭᠢᠨᠠ ᠰᠢᠭ᠋ ᠴᠡᠪᠡᠷᠬᠡᠨ ᠠᠷᠪᠠᠨ ᠬᠤᠷᠤᠭᠤ ᠲᠠᠢ᠂ ᠬᠠᠯᠢᠰᠤᠯᠠᠭᠰᠠᠨ ᠥᠨᠳᠡᠭᠡ ᠰᠢᠭ ᠬᠬᠢᠷ ᠦᠭᠡᠢ ᠭᠤᠸᠠᠯᠢᠭ ᠰᠠᠢᠬᠠᠨ ᠤᠯᠠᠭᠠᠨ ᠴᠠᠭᠠᠨ ᠨᠢ ᠢᠯᠭᠠᠷᠠᠭᠰᠠᠨ ᠶᠠᠮᠠᠷ ᠰᠠᠢᠬᠠᠨ ᠬᠡᠦᠬᠡᠨ ᠪᠣᠢ ?》 ᠭᠡᠵᠦ ᠳᠤᠳᠤᠷᠠ ᠪᠠᠨ ᠪᠤᠳᠤᠲᠠᠯᠠ᠂ ᠰᠤᠭᠤᠨ ᠠ᠋ᠴᠠ ᠨᠢ ᠶᠠᠭᠤ ᠨᠢᠭᠡ ᠶᠠᠭᠤᠮᠠ ᠨᠢᠳᠤᠴᠢᠵᠤ ᠪᠠᠷᠢᠭᠰᠠᠨ ᠠᠶᠠᠭᠠ ᠲᠠᠢ ᠬᠠᠯᠠᠭᠤᠨ ᠴᠠᠢ ᠶ᠋ᠢ ᠨᠢ ᠴᠠᠯᠭᠢᠭᠤᠯᠪᠠ᠃ ᠪᠣᠳᠣᠯ ᠤ᠋ᠨ ᠵᠢᠯᠣᠭᠣ ᠠᠯᠳᠠᠭᠰᠠᠨ ᠮᠢᠩᠭᠠᠨᠪᠤᠤ ᠰᠠᠨᠳᠤᠷᠴᠤ ᠬᠠᠵᠠᠭᠤ ᠲᠠᠢᠰᠢ ᠬᠠᠷᠠᠪᠠᠯ ᠬᠠᠷᠢᠨ ᠥᠨᠥ ᠢᠨᠵᠠᠭᠠ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠥᠬᠥ ᠶ᠋ᠢ ᠨᠢᠳᠤᠷᠴᠤ ᠪᠠᠢᠨᠠ ᠭᠡᠵᠦ ᠮᠢᠩᠭᠠᠨᠪᠤᠤ ᠶ᠋ᠢᠨ ᠡᠪᠦᠳᠦᠭ ᠳᠡᠭᠡᠷᠡ ᠨᠢ ᠭᠠᠷᠴᠤ ᠰᠤᠭᠤ ᠤᠷᠤᠭᠤ ᠨᠢ ᠨᠢᠳᠤᠴᠢᠵᠤ ᠪᠠᠢᠪᠠ᠃ 《ᠴᠠᠢ ᠪᠠᠨ ᠤᠤᠭᠤᠳᠠᠭ ᠢ᠋ᠶ᠋ᠠᠨ ᠤᠤᠭᠤᠬᠤ ᠦᠭᠡᠢ ᠶᠠᠭᠤᠨ ᠳ᠋ᠤ᠌ ᠠᠢᠯ ᠤᠨ ᠬᠡᠦᠬᠡᠨ ᠢ᠋ ᠱᠣᠬᠣᠭᠣᠷᠬᠠᠭᠠᠳ ᠪᠠᠢᠪᠠ? ᠲᠡᠭᠡᠭᠡᠳ ᠨᠠᠳᠠ ᠶᠠᠭᠤᠮᠠ ᠢᠳᠡᠭᠦᠯᠬᠦ ᠦᠭᠡᠢ ᠤᠤ?》 ᠭᠡᠵᠦ ᠪᠠᠢᠭᠠ ᠰᠢᠭ᠋ ᠬᠥᠭᠡᠷᠦᠬᠦᠨ ᠢᠨᠵᠠᠭᠠ ᠶ᠋ᠢᠨ ᠢᠩᠭᠢᠵᠦ ᠳᠦᠷᠰᠦ ᠦᠭᠡᠢᠳᠡᠭᠰᠡᠨ ᠢ᠋ ᠮᠡᠳᠡᠭᠰᠡᠨ ᠦᠭᠡᠢ᠃ ᠮᠢᠩᠭᠠᠨᠪᠤᠤ ᠥᠨᠥᠴᠢᠨ ᠢᠨᠵᠠᠭᠠ ᠶ᠋ᠢ ᠲᠡᠪᠡᠷᠢᠨ ᠬᠣᠰᠢᠭᠤ ᠶ᠋ᠢ ᠨᠢ ᠦᠨᠦᠰᠬᠦ ᠳ᠋ᠦ᠍ ᠮᠠᠭᠤ ᠢᠨᠵᠠᠭᠠ ᠵᠢᠭᠠᠬᠠᠨ ᠬᠠᠷᠠ ᠰᠡᠭᠦᠯ ᠢ᠋ᠶ᠋ᠡᠨ ᠭᠣᠳᠣᠰ ᠭᠣᠳᠣᠰ ᠬᠥᠳᠡᠯᠭᠡᠵᠦ ᠡᠬᠡ ᠳ᠋ᠡᠭᠡᠨ ᠡᠷᠬᠡᠯᠡᠬᠦ ᠰᠢᠭ ᠬᠥᠮᠦᠨ ᠦ᠌ ᠬᠠᠢᠷᠠ ᠶ᠋ᠢ ᠲᠠᠲᠠᠨᠠ᠃
ᠴᠠᠢ ᠪᠤᠳᠠᠭᠠ᠂ ᠠᠶᠠᠭᠠ ᠰᠠᠪᠬᠠ ᠡᠨᠡ ᠲᠡᠷᠡ ᠭᠡᠳ ᠶᠠᠭᠠᠷᠠᠭᠰᠠᠨ ᠬᠤᠪᠢᠯᠴᠡᠴᠡᠭ ᠡᠨᠡ ᠪᠦᠭᠦᠳᠡ ᠶ᠋ᠢ ᠨᠡᠪᠲᠡ ᠠᠵᠢᠭᠯᠠᠵᠤ᠂ ᠡᠨᠡ ᠪᠥᠬᠡ ᠭᠡᠮᠡᠷ ᠬᠦᠳᠡᠷ ᠲᠤᠮᠤ ᠪᠡᠶᠡ ᠲᠡᠢ ᠪᠣᠯᠪᠠᠴᠤ ᠡᠬᠡ ᠶ᠋ᠢᠨ ᠨᠢᠩᠵᠢᠨ ᠴᠠᠭᠠᠨ ᠰᠡᠳᠬᠢᠯ ᠲᠡᠢ ᠦᠷᠦ ᠵᠥᠭᠡᠯᠡᠨ ᠪᠣᠷᠣ ᠵᠠᠯᠠᠭᠤ ᠶ᠋ᠢ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠲᠣᠭᠣᠵᠤ 《ᠴᠠᠭᠠᠨᠠ ᠪᠠᠨ ᠬᠥᠮᠦᠨ ᠲᠡᠢ ᠶᠣᠮᠠ ᠪᠢᠯᠡ ᠤᠤ ? ᠭᠡᠵᠦ ᠡᠯᠳᠡᠪ ᠢ᠋ ᠵᠤᠢᠵᠤ ᠪᠤᠳᠤᠭᠰᠠᠨ ᠳ᠋ᠠᠭᠠᠨ ᠢᠴᠢᠩᠭᠦᠷᠡᠨ ᠴᠢᠷᠠᠢ ᠨᠢ ᠬᠦᠵᠦᠭᠦᠨ ᠳ᠋ᠡᠭᠡᠨ ᠲᠤᠯᠲᠠᠯᠠ ᠤᠯᠠᠢᠭᠰᠠᠨ ᠢ᠋ ᠨᠢᠯ ᠨᠢᠯ ᠨᠢᠯᠴᠢᠭᠢᠨᠡᠭᠰᠡᠨ ᠡᠴᠡ ᠨᠢ ᠮᠡᠳᠡᠵᠦ ᠡᠪᠡᠷ ᠤᠭᠵᠢᠨ ᠳ᠋ᠤ᠌ ᠰᠦ ᠪᠦᠯᠢᠶᠡᠰᠬᠡᠨ ᠬᠢᠵᠦ ᠮᠢᠩᠭᠠᠨᠪᠤᠤ ᠶ᠋ᠢᠨ ᠡᠪᠦᠷ ᠳᠡᠭᠡᠷᠡ ᠡᠴᠡ ᠥᠨᠥᠴᠢᠨ ᠢᠨᠵᠠᠭᠠ ᠶ᠋ᠢ ᠲᠣᠰᠴᠤ ᠠᠪᠤᠨ ᠤᠭᠵᠢᠪᠠ᠃ ᠥᠯᠥᠩᠭᠢᠳᠴᠦ ᠬᠣᠪᠳᠣᠭᠯᠠᠭᠰᠠᠨ ᠢᠨᠵᠠᠭᠠ ᠱᠣᠪ ᠱᠣᠪ ᠮᠥᠮᠥᠨᠡ᠃
ᠬᠤᠪᠢᠯᠴᠡᠴᠡᠭ ᠢᠨᠵᠠᠭᠠ ᠤᠭᠵᠢᠬᠤ ᠳ᠋ᠠᠭᠠᠨ ᠳᠣᠲᠣᠷᠠ ᠪᠠᠨ ᠠᠢᠯ ᠭᠡᠷ ᠠᠮᠢᠳᠤᠷᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠦᠰᠡᠯ ᠵᠢᠷᠤᠭ ᠢ᠋ ᠵᠦᠢᠴᠢᠯᠡᠨ ᠪᠣᠳᠣᠵᠤ᠂ ᠥᠪᠡᠷ ᠢ᠋ ᠪᠡᠨ ᠡᠨᠡ ᠠᠢᠯ ᠤᠨ ᠰᠢᠨᠡ ᠪᠡᠷᠢ ᠪᠣᠯᠭᠠᠵᠤ ᠢᠰᠢᠭᠡ ᠬᠤᠷᠠᠭᠠ ᠤᠭᠵᠢᠵᠤ ᠲᠡᠵᠢᠭᠡᠨ᠂ ᠴᠠᠢ ᠤᠰᠤ ᠪᠤᠴᠠᠯᠭᠠᠨ᠂ ᠦᠨᠢᠶᠡ ᠲᠤᠭᠤᠯ ᠨᠡᠢᠯᠡᠭᠦᠯᠵᠦ ᠪᠦᠯᠢᠳᠡᠬᠦ ᠳ᠋ᠡᠭᠡᠨ ᠮᠢᠩᠭᠠᠨᠪᠤᠤ ᠶ᠋ᠢ ᠬᠠᠷᠠ ᠬᠥᠮᠦᠨ ᠢ᠋ᠶ᠋ᠡᠷ ᠵᠦᠢᠴᠢᠯᠡᠨ ᠬᠣᠢᠮᠣᠷ ᠰᠠᠭᠤᠯᠭᠠᠨ ᠳᠡᠭᠡᠳᠦᠯᠡᠨ ᠬᠦᠨᠳᠦᠳᠬᠡᠨᠡ ᠁
ᠦᠨᠡᠬᠡᠷ ᠢᠩᠭᠢᠵᠦ ᠶᠠᠭᠠᠷᠠᠵᠤ ᠰᠠᠭᠠᠷᠠᠬᠤ ᠠᠵᠢᠯ ᠬᠢᠳᠡᠯ ᠲᠡᠢ᠂ ᠰᠠᠨᠠᠵᠤ ᠰᠠᠷᠨᠠᠢᠬᠤ ᠬᠠᠷᠠ ᠬᠥᠮᠦᠨ ᠲᠡᠢ᠂ ᠥᠭᠡᠳᠡ ᠨᠢ ᠲᠠᠲᠠᠬᠤ ᠠᠵᠤ ᠠᠮᠢᠳᠤᠷᠠᠯ ᠲᠠᠢ ᠰᠠᠨ ᠪᠣᠯ ᠶᠠᠭᠤᠲᠠᠢ ᠰᠠᠢᠬᠠᠨ ᠪᠢᠯᠡ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠤᠯᠠᠭᠠᠨ ᠶᠠᠭᠠᠨ ᠴᠢᠷᠠᠢ ᠳ᠋ᠤ᠌ ᠵᠢᠷᠭᠠᠯ ᠦᠨ ᠨᠠᠷᠠ ᠰᠢᠩᠭᠡᠰᠢ ᠦᠭᠡᠢ ᠰᠠᠴᠤᠷᠠᠨ ᠬᠡᠷᠡᠯᠳᠦᠬᠦ ᠮᠡᠲᠦ ᠠᠵᠢ᠃
ᠭᠡᠳᠡᠰᠦ ᠨᠢ ᠴᠠᠳᠤᠭᠰᠠᠨ ᠢᠨᠵᠠᠭᠠ ᠭᠡᠷ ᠳᠣᠲᠣᠷᠠᠬᠢ ᠶᠠᠭᠤᠮᠠ ᠪᠣᠯᠭᠠᠨ ᠢ᠋ ᠰᠣᠨᠢᠷᠬᠠᠨ ᠦᠨᠦᠷᠯᠡᠵᠦ ᠨᠢᠳᠤᠷᠴᠤ ᠮᠥᠷᠭᠥᠨᠡ᠃ ᠲᠣᠭᠯᠠᠰᠬᠢᠨ ᠶᠠᠪᠤᠵᠤ ᠲᠤᠯᠭᠠ ᠶ᠋ᠢᠨ ᠬᠥᠯ ᠳ᠋ᠦ᠍ ᠣᠢᠷᠠᠳᠬᠤ ᠳᠤ ᠬᠤᠪᠢᠯᠴᠡᠴᠡᠭ ᠢᠨᠵᠠᠭᠠ ᠶᠢ ᠰᠠᠨᠳᠤᠷᠤᠨ ᠲᠡᠪᠡᠷᠢᠵᠤ᠄
— ᠨᠢᠯᠬᠠ ᠬᠤᠩᠰᠢᠶᠠᠷ ᠢᠶᠠᠨ ᠭᠠᠯ ᠳᠤ ᠬᠠᠭᠠᠷᠢᠭᠤᠯᠬᠤ ᠨᠢ ᠤᠤ? ᠭᠡᠳ ᠮᠠᠭᠤ ᠢᠨᠵᠠᠭᠠ ᠢ ᠠᠷᠤᠭ ᠳᠣᠣᠷᠠ ᠬᠣᠷᠢᠭᠰᠠᠨ ᠳᠤ ᠭᠡᠳᠡᠰᠦ ᠴᠠᠳᠬᠤᠯᠠᠩ ᠤᠨ ᠡᠷᠬᠡᠨ ᠳᠦ ᠤᠳᠠᠯ ᠦᠭᠡᠢ ᠮᠠᠩᠰᠢᠭᠤᠷᠠᠨ ᠤᠨᠲᠠᠪᠠ᠃
ᠮᠣᠷᠢ ᠢᠵᠢᠯᠢᠰᠢᠨ ᠦᠦᠷᠰᠡᠵᠦ᠂ ᠬᠠᠵᠠᠭᠠᠷ ᠨᠣᠭᠲᠣ ᠬᠠᠩᠭᠢᠨᠠᠬᠤ ᠴᠢᠮᠡᠭᠡ ᠪᠡᠷ ᠨᠣᠬᠠᠢ ᠬᠥᠪ ᠬᠥᠪ ᠭᠡᠵᠦ ᠬᠡᠳᠦᠬᠡᠨ ᠬᠤᠴᠠᠭᠠᠳ ᠳᠣᠣᠷᠠᠬᠠᠨ ᠢᠶᠠᠨ ᠨᠠᠮᠵᠢᠪᠠ᠃
— ᠬᠥᠮᠦᠨ ᠢᠷᠡᠪᠡ ᠪᠣᠯᠤᠯᠲᠠᠢ᠂ ᠡᠦᠲᠦ ᠪᠢ ᠶᠠᠪᠤᠶᠠ! ᠭᠠᠮᠢᠩ ᠤ᠋ᠨ ᠮᠠᠭᠤ ᠰᠠᠢᠨ ᠭᠠᠷᠯᠢᠭ ᠤ᠋ᠳ ᠮᠢᠨᠦ ᠬᠣᠢᠨᠠ ᠠ᠋ᠴᠠ ᠁ ᠭᠡᠵᠦ ᠮᠢᠩᠭᠠᠨᠪᠤᠤ ᠶᠢᠨ ᠬᠡᠯᠡᠬᠦ ᠶᠢ ᠬᠤᠪᠢᠯᠴᠡᠴᠡᠭ ᠳᠠᠰᠤᠯᠵᠤ᠄
— ᠠᠪᠤ ᠠᠳᠤᠭᠤᠨ ᠠᠴᠠ ᠬᠠᠷᠢᠵᠤ ᠢᠷᠡᠭᠰᠡᠨ ᠪᠠᠢᠯᠭᠦᠢ᠂ ᠥᠨᠥᠳᠥᠷ ᠶᠠᠭᠠᠬᠢᠭᠠᠳ ᠢᠩᠬᠢᠵᠦ ᠣᠷᠣᠢᠲᠠᠵᠤ ᠢᠷᠡᠭᠰᠡᠨ ᠶᠤᠮ ᠪᠣᠯ ᠳ᠋ᠠ ᠭᠡᠳ ᠬᠤᠪᠢᠯᠴᠡᠴᠡᠭ ᠡᠭᠦᠳᠡ ᠰᠡᠬᠦᠨ ᠭᠠᠷᠪᠠᠯ ᠮᠢᠩᠭᠠᠨᠪᠤᠤ ᠲᠡᠭᠦᠨ ᠦ᠌ ᠠᠷᠤ ᠠ᠋ᠴᠠ ᠳᠠᠭᠠᠯᠳᠤᠵᠤ ᠭᠠᠷᠪᠠ᠃
ᠢᠮᠠᠭᠠᠨ ᠪᠤᠭᠤᠷᠤᠯ ᠡᠷᠡᠦ ᠰᠠᠬᠠᠯ ᠲᠠᠢ᠂ ᠨᠠᠰᠤᠨ ᠤ᠋ ᠡᠷᠬᠡᠨ ᠳ᠋ᠦ᠍ ᠨᠢᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠶᠠᠯᠢᠮ ᠦᠭᠡᠢ ᠪᠥᠭᠲᠥᠢᠭᠰᠡᠨ ᠬᠠᠷᠠ ᠡᠪᠦᠭᠡᠨ ᠭᠠᠷ ᠲᠠᠭᠠᠨ ᠬᠠᠵᠠᠭᠠᠷ ᠳᠡᠭᠦᠵᠢᠯᠡᠵᠦ ᠭᠡᠷ ᠵᠦᠭ ᠢ᠋ᠶ᠋ᠡᠨ ᠮᠣᠢᠩᠭᠤ ᠲᠤᠢᠩᠭᠤ ᠠᠯᠬᠤᠵᠤ ᠢᠷᠡᠨᠡ᠃
ᠬᠤᠪᠢᠯᠴᠡᠴᠡᠭ ᠤᠨ ᠠᠪᠤ ᠪᠣᠯᠬᠤ ᠡᠨᠡ ᠡᠪᠦᠭᠡᠨ ᠦ᠌ ᠨᠡᠷᠡ ᠰᠣᠳᠨᠠᠮ᠂ ᠤᠯᠠᠮᠪᠠᠶᠠᠷ ᠲᠠᠢᠵᠢ ᠶ᠋ᠢᠨ ᠠᠳᠤᠭᠤᠴᠢᠨ ᠠᠵᠢ᠃
— ᠠᠪᠤ ᠶᠠᠭᠠᠬᠢᠭᠠᠳ ᠥᠨᠥᠳᠥᠷ?
— ᠶᠠᠭᠠᠬᠢᠬᠤ ᠪᠣᠢ ᠳᠠ! ᠡᠨᠡ ᠵᠡᠭᠦᠨᠲᠡᠢ ᠳᠠᠷᠠᠰᠤᠲᠠᠢ ᠬᠣᠭᠣᠯᠠᠢ ᠳ᠋ᠤ᠌ ᠭᠠᠮᠢᠩ ᠤ᠋ᠨ ᠴᠡᠷᠢᠭ ᠤ᠋ᠳ ᠴᠤᠪᠤᠯᠳᠤᠵᠤ ᠪᠣᠢ᠃ ᠴᠥᠭᠡᠪᠲᠦᠷ ᠦᠬᠡᠷ ᠠᠳᠤᠭᠤ ᠵᠤᠵᠠᠭᠠᠨ ᠲᠡᠮᠡᠭᠡᠳ ᠬᠥᠭᠡᠭᠡᠭᠡᠳ ᠬᠤᠰᠤ ᠶ᠋ᠢᠨ ᠭᠣᠣᠯ ᠤᠷᠤᠭᠤᠳᠠᠵᠤ ᠶᠠᠪᠤᠨᠠ᠃ ᠮᠠᠭᠤ ᠰᠠᠢᠨ ᠭᠠᠷᠯᠢᠭ ᠤ᠋ᠳ ᠤᠯᠠᠮᠪᠠᠶᠠᠷ ᠲᠠᠢᠵᠢ ᠶ᠋ᠢᠨ ᠠᠳᠤᠭᠤᠨ ᠠ᠋ᠴᠠ ᠰᠠᠯᠭᠠᠭᠠᠳ ᠬᠥᠭᠡᠭᠡᠴᠢᠭᠡᠬᠦ ᠪᠣᠢ ᠭᠡᠵᠦ ᠵᠢᠭᠠᠬᠠᠨ ᠵᠠᠢᠰᠬᠠᠨ ᠠᠳᠤᠭᠤ ᠬᠠᠰᠢᠵᠤ ᠪᠡᠳᠡᠷᠢᠯᠡ ᠁ ᠭᠡᠳ ᠡᠭᠦᠳᠡᠨ ᠳᠡᠭᠡᠷᠡ ᠵᠣᠭᠰᠣᠭᠠ ᠦᠯᠦ ᠲᠠᠨᠢᠬᠤ ᠵᠠᠯᠠᠭᠤ ᠡᠷᠡ ᠶᠢ ᠰᠢᠷᠪᠢᠭᠰᠡᠨ ᠳᠦ ᠮᠢᠩᠭᠠᠨᠪᠤᠤ᠄
— ᠠᠪᠤ ᠲᠠ ᠰᠠᠢᠨ ᠤᠤ ᠭᠡᠵᠦ ᠮᠡᠨᠳᠦᠯᠡᠪᠡ᠃
— ᠰᠠᠢᠨ ᠰᠠᠢᠨ! ᠴᠢ ᠰᠠᠢᠨ ᠤᠤ? ᠭᠡᠳ ᠥᠬᠢᠨ ᠢᠶᠡᠨ ᠬᠠᠷᠠᠵᠤ 《ᠶᠠᠭᠤᠨ ᠤ ᠬᠥᠮᠦᠨ ᠪᠤᠢ ?》ᠭᠡᠵᠦ ᠨᠢᠳᠦ ᠪᠡᠷ ᠢᠶᠠᠨ ᠠᠰᠠᠭᠤᠩᠭᠠᠨ ᠭᠡᠷ ᠲᠦ ᠣᠷᠣᠪᠠ᠃
ᠬᠤᠪᠢᠯᠴᠡᠴᠡᠭ ᠠᠪᠤ ᠳ᠋ᠠᠭᠠᠨ ᠬᠠᠯᠠᠭᠤᠨ ᠴᠠᠢ ᠠᠶᠠᠭᠠᠯᠠᠬᠤ ᠵᠠᠭᠤᠷᠠ᠄
— ᠡᠨᠡ ᠠᠬᠠ ᠶ᠋ᠢᠨ ᠨᠡᠷᠡ ᠮᠢᠩᠭᠠᠨᠪᠤᠤ᠃ ᠠᠪᠤ ᠠ᠋᠂ ᠰᠠᠢᠨ ᠰᠠᠨᠠᠭᠠ ᠲᠠᠢ ᠬᠥᠮᠦᠨ ᠶᠦᠮ ᠠ᠋ ! ᠁ ᠲᠠ ᠬᠠᠷᠠᠭᠠᠴᠢ! ᠭᠡᠳ ᠠᠷᠤᠭ ᠤ᠋ᠨ ᠳᠣᠣᠷᠠᠬᠢ ᠢᠨᠵᠠᠭᠠ ᠶ᠋ᠢ ᠵᠢᠭᠠᠭᠠᠳ《ᠡᠨᠡ ᠥᠨᠥᠴᠢᠨ ᠢᠨᠵᠠᠭᠠ ᠶ᠋ᠢ ᠡᠨᠡ ᠠᠬᠠ ᠲᠡᠪᠡᠷᠢᠵᠦ ᠢᠷᠡᠭᠰᠡᠨ ! 》 ᠭᠡᠵᠦ ᠡᠴᠢᠭᠡ ᠳ᠋ᠡᠭᠡᠨ ᠨᠢᠯᠬᠠ ᠬᠡᠦᠬᠡᠳ ᠰᠢᠭ ᠥᠨᠥᠴᠢᠨ ᠢᠨᠵᠠᠭᠠ ᠶ᠋ᠢ ᠡᠪᠦᠭᠡᠨ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠰᠢᠭᠤ ᠳ᠋ᠤ᠌ ᠬᠦᠷᠭᠡᠪᠡᠯ ᠡᠪᠦᠭᠡᠨ ᠥᠨᠥᠴᠢᠨ ᠢᠨᠵᠠᠭᠠ ᠶ᠋ᠢ ᠥᠬᠥᠭᠡᠷᠳᠡᠨ ᠦᠨᠦᠰᠴᠦ 《ᠤ ᠂ ᠬᠥᠭᠡᠷᠦᠬᠦᠢ ! ᠬᠥᠭᠡᠷᠦᠬᠦᠢ》ᠭᠡᠪᠡ᠃
— ᠡᠬᠡ ᠶ᠋ᠢ ᠨᠢ ᠭᠠᠮᠢᠩ ᠤ᠋ᠨ ᠴᠡᠷᠢᠭ ᠰᠢᠷᠠᠭᠳᠤᠭᠤᠯᠵᠤ ᠦᠬᠦᠭᠦᠯᠦᠭᠰᠡᠨ ᠭᠡᠨᠡ! ᠶᠠᠮᠠᠷ ᠨᠢᠭᠦᠯ ᠦ᠋ᠨ ᠬᠥᠮᠦᠰ ᠪᠣᠢ ?
— ᠪᠢ ᠬᠠᠷᠠᠭᠰᠠᠨ ᠬᠠᠷᠠᠭᠰᠠᠨ ! ᠳᠠᠷᠠᠰᠤᠲᠠᠢ ᠶ᠋ᠢᠨ ᠬᠣᠭᠣᠯᠠᠢ ᠶ᠋ᠢᠨ ᠵᠡᠭᠦᠨ ᠬᠣᠲᠣᠭᠣᠷ ᠲᠤ᠌ ᠬᠡᠳᠦ ᠬᠡᠳᠦᠨ ᠵᠡᠭᠡᠷᠡ ᠶ᠋ᠢᠨ ᠵᠣᠪᠠᠯᠭᠠ ᠶ᠋ᠢ ᠳᠡᠭᠡᠷᠡ ᠳᠡᠭᠡᠷᠡ ᠡᠴᠡ ᠨᠢ ᠣᠪᠣᠭᠠᠯᠠᠵᠤ ᠬᠠᠶᠠᠭᠰᠠᠨ ᠪᠠᠢᠨᠠ᠃ ᠴᠠᠭᠠᠨᠠ ᠨᠢ ᠪᠠᠰᠠ ᠨᠢᠭᠡ ᠰᠢᠷᠠᠭᠴᠢᠨ ᠳᠠᠯᠤ ᠪᠠᠷ ᠢ᠋ᠶ᠋ᠠᠨ ᠴᠥᠮᠥ ᠫᠤᠤᠳᠠᠭᠤᠯᠵᠤ ᠵᠣᠪᠠᠭᠤᠷᠢᠲᠠᠢ ᠦᠬᠦᠭᠰᠡᠨ ᠨᠢ ᠡᠨᠡ ᠥᠨᠥᠴᠢᠨ ᠢᠨᠵᠠᠭᠠ ᠶ᠋ᠢᠨ ᠡᠬᠡ ᠨᠢ ᠪᠠᠢᠵᠢ ᠳᠠ! ᠬᠠᠪᠤᠷ ᠤ᠋ᠨ ᠲᠠᠷᠴᠢᠭ ᠴᠠᠭ ᠲᠤ᠌ ᠬᠡᠭᠡᠯ ᠲᠡᠢ ᠭᠥᠷᠥᠭᠡᠰᠦ ᠶ᠋ᠢ ᠠᠩᠨᠠᠬᠤ ᠴᠡᠭᠡᠷ ᠢ᠋ ᠴᠤ᠌ ᠮᠡᠳᠡᠳᠡᠭ ᠦᠭᠡᠢ ᠮᠠᠭᠤ ᠰᠠᠢᠨ ᠭᠠᠷᠯᠢᠭ ᠤ᠋ᠳ ᠢ᠋ ᠬᠦ! ᠭᠡᠵᠦ ᠬᠠᠷᠢᠶᠠᠯ ᠲᠠᠯᠪᠢᠨ ᠬᠠᠰ ᠰᠢᠯᠪᠢ ᠲᠡᠢ ᠭᠠᠩᠰᠠ ᠪᠠᠨ ᠭᠠᠷᠭᠠᠵᠤ ᠲᠠᠮᠠᠬᠢ ᠲᠠᠲᠠᠪᠠ᠃
— ᠵᠠ᠂ ᠪᠢ ᠡᠦᠲᠦ ᠶᠠᠪᠤᠶᠠ ᠳᠠ ᠭᠡᠵᠦ ᠮᠢᠩᠭᠠᠨᠪᠤᠤ ᠥᠨᠳᠡᠢᠭᠰᠡᠨ ᠳ᠋ᠦ᠍ ᠡᠪᠦᠭᠡᠨ᠄
— ᠵᠠ᠂ ᠴᠢ ᠲᠡᠭᠡᠭᠡᠳ ᠨᠤᠲᠣᠭ ᠤᠰᠤ ᠬᠠᠮᠢᠭᠠᠭᠤᠷ? ᠬᠡᠨ ᠦ᠌ ᠬᠦᠦ ᠪᠢᠯᠡ ᠳᠠ? ᠶᠡᠬᠡᠴᠦᠦᠯ ᠢ᠋ ᠲᠠᠨᠢ ᠪᠢ ᠲᠠᠨᠢᠳᠠᠭ ᠴᠤ᠌ ᠪᠢᠯᠡ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃
— ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠠᠷᠠᠨᠤᠳ ᠮᠢᠩᠭᠠᠨᠪᠤᠤ᠂ ᠮᠤᠨᠠ ᠶ᠋ᠢᠨ ᠵᠡᠭᠦᠨ ᠥᠪᠥᠷ ᠦ᠋ᠨ ᠬᠥᠮᠦᠨ᠃
— ᠠ᠂ ᠲᠠᠨᠢᠬᠤ ᠦᠭᠡᠢ ᠶᠦᠮ ᠪᠠᠢᠨᠠ᠃《ᠬᠠᠮᠢᠭᠠ ᠬᠣᠯᠠ ᠠ᠋ᠴᠠ ᠶᠠᠭᠤ ᠬᠢᠵᠦ ᠶᠠᠪᠤᠭᠠ ᠶᠤᠮ ? 》 ᠭᠡᠵᠦ ᠡᠪᠦᠭᠡᠨ ᠲᠡᠭᠦᠨ ᠢ᠋ ᠴᠣᠭᠣᠷᠠᠲᠠᠯᠠ ᠰᠢᠷᠳᠡᠨᠡ᠃
— ᠭᠠᠮᠢᠩ ᠤ᠋ᠨ ᠴᠡᠷᠢᠭ ᠲᠦ᠍ ᠪᠠᠷᠢᠭᠳᠠᠵᠤ᠂ ᠡᠳᠡᠨᠥᠰ ᠦ᠋ᠨ ᠦᠬᠡᠷ ᠲᠡᠮᠡᠭᠡ ᠶ᠋ᠢ ᠬᠠᠷᠢᠭᠤᠯᠵᠤ ᠶᠠᠪᠤᠭᠠ ᠶᠤᠮ ᠠ᠋! ᠭᠡᠰᠡᠨ ᠳ᠋ᠦ᠍ ᠡᠪᠦᠭᠡᠨ ᠤ ᠴᠢᠷᠠᠢ ᠣᠨᠳᠣᠣ ᠪᠣᠯᠵᠤ᠄
— ᠭᠠᠮᠢᠩ ᠤ᠋ᠨ ᠴᠡᠷᠢᠭ ᠭᠡᠨᠡ ᠠ᠋ ⁈ ᠭᠡᠵᠦ ᠬᠡᠭᠵᠡᠭᠦᠨ ᠳᠤᠤᠭᠠᠷᠤᠭᠰᠠᠨ ᠨᠢ ᠮᠢᠩᠭᠠᠨᠪᠤᠤ ᠳ᠋ᠤ᠌ 《ᠲᠡᠭᠡᠪᠡᠯ ᠠᠳᠠ ᠠ᠋ᠴᠠ ᠳᠠᠷᠤᠢᠬᠠᠨ ᠲᠣᠨᠢᠯ ! 》 ᠭᠡᠰᠡᠨ ᠰᠢᠭ ᠰᠠᠨᠠᠭᠳᠠᠪᠠ᠃ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠩ ᠠᠷᠠᠨᠰᠢᠨ ᠢ᠋ ᠠᠨᠳᠠᠬᠤ ᠦᠭᠡᠢ ᠬᠤᠪᠢᠯᠴᠡᠴᠡᠭ ᠬᠡᠦᠬᠡᠨ《ᠡᠨᠡ ᠠᠬᠠ ᠰᠠᠢᠨ ᠬᠥᠮᠦᠨ ᠦ᠌ ᠪᠠᠢᠳᠠᠯ ᠲᠠᠢ᠃ ᠴᠠᠭᠠᠳᠤ ᠭᠠᠮᠢᠩ ᠤᠨ ᠴᠡᠷᠢᠭ ᠲᠦ᠍ ᠠᠯᠪᠠᠳᠠᠭᠳᠠᠵᠤ ᠶᠠᠪᠤᠭᠠ ᠮᠣᠩᠭᠣᠯ ᠬᠥᠮᠦᠨ ᠪᠠᠢᠨᠠ! 》 ᠭᠡᠵᠦ ᠡᠴᠢᠭᠡ ᠶ᠋ᠢᠨ ᠵᠦᠭ ᠮᠢᠩᠭᠠᠨᠪᠤᠤ ᠳ᠋ᠤ᠌ ᠲᠠᠯᠠ ᠵᠠᠰᠠᠭᠰᠠᠨ ᠢᠶᠡᠨ ᠄
— ᠠᠬᠠ ᠲᠠ᠂ ᠶᠠᠭᠤ ᠶᠠᠭᠠᠷᠠᠬᠤ ᠪᠣᠢ? ᠴᠠᠢ ᠴᠤᠤ ᠰᠠᠢᠨ ᠤᠤᠭᠤᠭᠠᠳ ᠶᠠᠪᠤ ᠯᠠ ᠳᠠ! ᠭᠡᠪᠡ᠃
— ᠰᠠᠢᠨ ᠤᠤᠭᠤᠯᠠ ᠁ ᠣᠳᠣ ᠪᠤᠰᠢᠭᠤ ᠶᠠᠪᠤᠬᠤ ᠦᠭᠡᠢ ᠪᠣᠯᠬᠤ ᠦᠭᠡᠢ᠃ ᠥᠨᠥᠬᠢ ᠭᠠᠷᠯᠢᠭ ᠤᠳ ᠮᠢᠨᠦ ᠬᠣᠢᠨᠠ ᠠᠴᠠ ᠢᠷᠡᠪᠡᠯ ᠲᠠᠨ ᠤ ᠳᠤ ᠴᠤ᠌ ᠭᠡᠰᠡᠨ ᠭᠠᠢ ᠲᠠᠷᠢᠵᠤ ᠮᠠᠭᠠᠳ ᠦᠭᠡᠢ᠃ ᠴᠠᠭᠠᠳᠤᠬᠢ ᠭᠠᠮᠢᠩ ᠤ᠋ᠳ ᠴᠢᠨᠢ ᠬᠥᠮᠦᠨ ᠦ᠌ ᠦᠨᠦᠷ ᠦᠭᠡᠢ ᠭᠠᠢᠬᠠᠯ ᠤ᠋ᠳ ᠭᠡᠳ《ᠨᠠᠰᠤᠲᠠᠢ ᠠᠪᠤ ᠰᠠᠢᠨ ᠰᠠᠭᠤᠵᠤ ᠪᠠᠢᠭᠠᠷᠠᠢ》 ᠭᠡᠳ ᠭᠠᠷᠪᠠ᠃
ᠬᠤᠪᠢᠯᠴᠡᠴᠡᠭ ᠵᠠᠯᠠᠭᠤ ᠳ᠋ᠤ᠌ ᠶᠠᠭᠤ ᠨᠢᠭᠡ ᠢᠳᠡᠵᠦ ᠤᠤᠭᠤᠬᠤ ᠶᠠᠭᠤᠮᠠ ᠥᠭᠬᠦ ᠭᠡᠬᠦ ᠳ᠋ᠦ᠍ ᠥᠭᠭᠦᠮᠡᠷ ᠶᠠᠭᠤᠮᠠ ᠣᠯᠳᠠᠬᠤ ᠦᠭᠡᠢ ᠬᠡᠰᠡᠭ ᠮᠡᠩᠳᠡᠵᠦ᠂ ᠠᠷᠠᠢ ᠬᠢᠵᠦ ᠠᠳᠠᠯᠢᠬᠠᠨ ᠬᠡ ᠲᠡᠢ ᠬᠡᠪ ᠲᠦ᠍ ᠬᠡᠪᠯᠡᠵᠦ ᠬᠠᠲᠠᠭᠠᠭᠰᠠᠨ ᠤᠲᠠᠰᠤᠨ ᠬᠡᠯᠬᠢᠶᠡ ᠲᠡᠢ ᠶᠢᠰᠦᠨ ᠡᠭᠡᠵᠡᠭᠡᠢ ᠠᠪᠴᠤ ᠰᠡᠩᠳᠡ ᠮᠡᠩᠳᠡ ᠭᠠᠷᠪᠠᠯ ᠮᠢᠩᠭᠠᠨᠪᠤᠤ ᠬᠡᠳᠦᠢᠨ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ ᠬᠤᠳᠳᠤᠭ ᠤ᠋ᠨ ᠴᠠᠭᠠᠨᠠ ᠶᠠᠪᠤᠵᠤ ᠪᠠᠢᠯᠠ᠃
— ᠪᠠᠢᠵᠠ᠂ ᠮᠢᠩᠭᠠᠨᠪᠤᠤ ᠠᠬᠠ ᠠ᠋ ᠡᠭᠦᠨ ᠢ᠋ ᠠᠪᠤᠭᠠᠳ ᠶᠠᠪᠤ ! ᠭᠡᠳ ᠬᠤᠪᠢᠯᠴᠡᠴᠡᠭ ᠮᠢᠩᠭᠠᠨᠪᠤᠤ ᠶ᠋ᠢᠨ ᠠᠷᠤ ᠠ᠋ᠴᠠ ᠳᠠᠭᠤᠳᠠᠵᠤ ᠭᠦᠶᠦᠪᠡ᠃
ᠬᠣᠪᠢᠯᠴᠡᠴᠡᠭ ᠤᠨ ᠬᠡᠦᠬᠡᠨ ᠬᠣᠩᠭᠣᠷ ᠳᠠᠭᠤ ᠮᠢᠩᠭᠠᠨᠪᠣᠣ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍ ᠠᠯᠲᠠᠨ ᠬᠣᠩᠬᠣ ᠰᠢᠭ᠋ ᠬᠠᠩᠭᠢᠨᠠᠨ ᠳᠤᠤᠭᠠᠷᠬᠤ ᠳ᠋ᠤ᠌ ᠲᠡᠷᠡ ᠪᠡᠷ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠠᠭᠲᠠ ᠶ᠋ᠢᠨ ᠵᠢᠯᠣᠭᠣ ᠪᠠᠨ ᠲᠠᠲᠠᠵᠤ ᠡᠷᠭᠢᠵᠦ ᠬᠠᠷᠠᠭᠠᠳ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠪᠠ᠃
ᠬᠤᠪᠢᠯᠴᠡᠴᠡᠭ ᠤᠨ ᠦᠭᠭᠦᠭᠰᠡᠨ ᠤᠲᠠᠰᠤᠨ ᠬᠡᠯᠬᠢᠶᠡ ᠲᠡᠢ ᠬᠤᠷᠤᠳ ᠢ᠋ ᠮᠢᠩᠭᠠᠨᠪᠤᠤ ᠨᠢᠮᠪᠠᠢ ᠡᠪᠦᠷᠲᠦᠯᠡᠭᠡᠳ ᠬᠡᠦᠬᠡᠨ ᠢ᠋ ᠰᠢᠷᠲᠡᠵᠦ ᠬᠡᠰᠡᠭ ᠪᠣᠳᠣᠯ ᠪᠣᠯᠵᠤ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ 《ᠦᠳᠡᠰᠢ ᠶ᠋ᠢᠨ ᠪᠦᠷᠦᠭ ᠴᠤ᠌ ᠪᠠᠢᠭᠠᠰᠠᠢ ᠪᠢ ᠴᠢᠮᠠᠶ᠋ᠢ ᠪᠠᠨ ᠪᠡᠶᠡ ᠳ᠋ᠡᠭᠡᠨ ᠠᠭᠤᠰᠲᠠᠯᠠ ᠲᠡᠪᠡᠷᠢᠵᠦ᠂ ᠥᠭᠡᠷᠡ ᠡᠷᠡ ᠬᠦᠢᠰᠦᠲᠡᠨ ᠦ᠌ ᠬᠣᠰᠢᠭᠤ ᠬᠦᠷᠬᠦ ᠵᠠᠶ ᠦᠭᠡᠢ ᠪᠣᠯᠲᠠᠯᠠ ᠦᠨᠦᠰᠬᠦ ᠪᠠᠢᠭᠰᠠᠨ ᠁ 》ᠭᠡᠵᠦ ᠪᠣᠳᠣᠭᠠᠳ᠄
— ᠵᠠ᠂ ᠳᠡᠭᠦᠦ ᠮᠢᠨᠢ᠂ ᠭᠢᠯᠠᠢᠯᠠ ! ᠮᠡᠨᠳᠦ ᠰᠠᠢᠨ ᠰᠠᠭᠤᠵᠤ ᠪᠠᠢᠭᠠᠷᠠᠢ ! ᠠᠬᠠ ᠨᠢ ᠳᠠᠬᠢᠭᠠᠳ ᠢᠷᠡᠨᠡ ᠭᠡᠵᠦ ᠬᠡᠯᠡᠴᠢᠬᠡᠭᠡᠳ ᠬᠠᠯᠵᠠᠨ ᠵᠡᠭᠡᠷᠳᠡ ᠮᠣᠷᠢᠨ ᠳ᠋ᠠᠭᠠᠨ ᠠᠯᠠᠪᠬᠢᠨ ᠮᠣᠷᠳᠠᠪᠠ᠃
— ᠠᠬᠠ ᠠ᠋᠂ ᠵᠠᠮ ᠳ᠋ᠠᠭᠠᠨ ᠮᠡᠨᠳᠦ ᠰᠠᠢᠨ ᠶᠠᠪᠤᠭᠠᠷᠠᠢ !
— ᠢᠷᠦᠭᠡᠯ ᠴᠢᠨᠢ ᠲᠣᠭᠲᠠᠭ! ᠭᠡᠳ 《ᠴᠥᠬᠥ》 ᠭᠡᠵᠦ ᠮᠢᠩᠭᠠᠨᠪᠤᠤ ᠡᠪᠦᠳᠦᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠡᠭᠡᠷᠳᠡ ᠪᠡᠨ ᠳᠠᠪᠢᠷᠠᠪᠠᠯ ᠬᠠᠯᠵᠠᠨ ᠵᠡᠭᠡᠷᠳᠡ ᠨᠢ ᠬᠠᠲᠠᠭᠤ ᠭᠠᠵᠠᠷ ᠢ᠋ ᠬᠠᠮᠤᠵᠤ ᠬᠠᠷᠠ ᠠᠯᠬᠤᠭᠠ ᠪᠠᠷ ᠰᠤᠨᠤᠯᠵᠠᠲᠠᠯᠠ ᠠᠯᠬᠤᠪᠠ᠃
ᠬᠤᠪᠢᠯᠴᠡᠴᠡᠭ ᠶᠠᠭᠤᠨ ᠳ᠋ᠠᠭᠠᠨ ᠰᠡᠶᠢ ᠲᠠᠨᠢᠯᠴᠠᠭᠰᠠᠨ ᠡᠨᠡ ᠪᠣᠷᠣ ᠵᠠᠯᠠᠭᠤ ᠳ᠋ᠤ᠌ ᠰᠠᠯ ᠶᠠᠳᠠᠨ ᠬᠣᠷᠭᠣᠳᠠᠭᠰᠠᠨ ᠢ᠋ᠶ᠋ᠠᠨ ᠥᠪᠡᠰᠦᠪᠡᠨ ᠴᠤ᠌ ᠮᠡᠳᠡᠬᠦ ᠦᠭᠡᠢ ᠪᠠᠢᠪᠠ᠃ 《ᠠᠬᠠ ᠠ᠋ ᠳᠠᠬᠢᠭᠠᠳ ᠬᠡᠵᠢᠶᠡ ᠨᠠᠮᠠᠶ᠋ᠢ ᠦᠵᠡᠬᠦ ᠪᠡᠷ ᠢᠷᠡᠬᠦ ᠶᠦᠮ⁈》 ᠭᠡᠵᠦ ᠮᠢᠩᠭᠠᠨᠪᠤᠤ ᠶ᠋ᠢᠨ ᠠᠷᠤ ᠠ᠋ᠴᠠ ᠬᠠᠰᠬᠢᠷᠬᠤ ᠭᠡᠳ ᠴᠢᠳᠠᠭᠰᠠᠨ ᠦᠭᠡᠢ ᠪᠣᠯᠪᠠ ᠤᠤ᠄
— ᠮᠢᠩᠭᠠᠨᠪᠤᠤ ᠠᠬᠠ ᠠ᠋ ᠂ ᠬᠥᠭᠡᠷᠦᠬᠦᠨ ᠢᠨᠵᠠᠭᠠ ᠪᠠᠨ ᠬᠡᠵᠢᠶᠡ ᠦᠵᠡᠬᠦ ᠪᠡᠷ ᠢᠷᠡᠬᠦ ᠪᠣᠢ ᠭᠡᠵᠦ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠣᠰᠢᠭᠤ ᠪᠠᠨ ᠪᠢᠲᠡᠭᠦᠯᠡᠨ ᠬᠣᠢᠨᠠ ᠠ᠋ᠴᠠ ᠪᠠᠷᠬᠢᠷᠠᠪᠠ᠃
ᠫᠢᠳ ᠫᠢᠳ ᠭᠡᠵᠦ ᠰᠢᠷᠣᠢ ᠮᠠᠯᠲᠠᠨ ᠳᠠᠪᠬᠢᠭᠰᠠᠨ ᠵᠡᠭᠡᠷᠳᠡ ᠶ᠋ᠢᠨ ᠵᠥᠪ ᠲᠠᠯᠠ ᠶ᠋ᠢᠨ ᠵᠢᠯᠣᠭᠣ ᠭᠡᠨᠡᠳᠲᠡ ᠡᠷᠭᠢᠵᠦ ᠲᠣᠭᠣᠰᠣ ᠪᠠᠭᠯᠠᠷᠠᠨ ᠪᠤᠵᠢᠭᠢᠨᠠᠵᠤ ᠮᠢᠩᠭᠠᠨᠪᠤᠤ᠄
— ᠪᠢ ᠯᠠᠪ ᠪᠤᠴᠠᠵᠤ ᠢᠷᠡᠨᠡ ᠁ ᠬᠥᠭᠡᠷᠦᠬᠦᠨ ᠥᠨᠥᠴᠢᠨ ᠢᠨᠵᠠᠭᠠ ᠴᠢᠮᠠᠶ᠋ᠢ ᠪᠠᠨ ᠡᠷᠭᠢᠵᠦ ᠦᠵᠡᠬᠦ ᠪᠡᠷ ᠯᠠᠪ ᠢᠷᠡᠨᠡ ᠠ᠋! ᠨᠠᠮᠠᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠭᠠᠷᠠᠢ ᠭᠡᠵᠦ ᠬᠠᠢᠷᠠ ᠪᠠᠭᠯᠠᠭᠰᠠᠨ ᠬᠠᠯᠠᠭᠤᠬᠠᠨ ᠳᠠᠭᠤ ᠤᠨᠠᠭᠠᠴᠢᠬᠠᠭᠠᠳ ᠶᠠᠪᠤᠵᠤ ᠣᠳᠪᠠ ᠁
ᠬᠤᠪᠢᠯᠴᠡᠴᠡᠭ᠂ ᠮᠢᠩᠭᠠᠨᠪᠤᠤ ᠶ᠋ᠢᠨ ᠠᠷᠤ ᠠ᠋ᠴᠠ ᠤᠳᠠᠲᠠᠯᠠ ᠬᠠᠷᠠᠵᠤ ᠵᠣᠭᠰᠣᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ <ᠬᠡᠯᠡ ᠪᠢᠴᠢᠭ> ᠬᠣᠯᠪᠣᠭᠠ