ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ < ᠳᠡᠭᠡᠳᠦ > – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠵᠢᠷᠭᠤᠭᠠ> Хан мунын сүүрс < дээд > – Мөнх зохиоов ᠂ Тэргүүн бодь – Нэгдүгээр бүлэг <6>
466ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ < ᠵᠢᠷᠭᠤᠭᠠ >
ᠵᠢᠷᠭᠤᠭᠠ
ᠠᠩᠴᠢᠨ ᠠ᠋ᠴᠠ ᠦᠷᠭᠦᠵᠦ ᠳᠤᠲᠠᠭᠠᠭᠰᠠᠨ ᠣᠭᠣᠨᠣ ᠰᠢᠷᠠᠭᠴᠢᠨ ᠰᠢᠭ᠋ ᠠᠩᠴᠢᠨᠵᠠᠪ ᠰᠡᠷᠭᠦᠮᠡ ᠬᠣᠶᠠᠷ ᠨᠠᠷᠠ ᠲᠠᠰᠢᠬᠤ ᠳ᠋ᠤ᠌ ᠪᠤᠭᠤᠲᠤ ᠳ᠋ᠤ᠌ ᠣᠷᠣᠵᠤ ᠣᠴᠢᠪᠠ᠃ ᠴᠡᠷᠢᠭ ᠴᠠᠭᠳᠠᠭᠠ ᠦᠢᠮᠡᠯᠳᠦᠨ ᠬᠥᠮᠦᠨ ᠬᠠᠷᠠ ᠳᠡᠪᠵᠢᠶᠡᠷᠡᠵᠦ ᠪᠠᠢᠯᠠ᠂ ᠪᠠᠢᠳᠠᠯ ᠡᠪ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ ᠪᠠᠷᠤᠭᠯᠠᠭᠰᠠᠨ ᠠᠩᠴᠢᠨᠵᠠᠪ ᠤᠯᠠᠭᠠᠨ ᠬᠠᠲᠤᠨ ᠤ ᠰᠠᠯᠴᠢᠨ ᠡᠪᠦᠭᠡᠨ ᠢ᠋ ᠰᠠᠨᠠᠵᠤ ᠣᠯᠤᠨ ᠲᠡᠭᠦᠨ ᠡᠴᠡ ᠲᠤᠰᠠᠯᠠᠮᠵᠢ ᠭᠤᠶᠤᠬᠤ ᠪᠠᠷ ᠵᠡᠭᠦᠨᠰᠢᠯᠡᠪᠡ᠃ ᠰᠢᠷᠠ ᠪᠦᠷᠦᠢ ᠪᠣᠯᠬᠤ ᠠ᠋ᠴᠠ ᠡᠮᠦᠨᠡ ᠵᠠᠪᠳᠤᠵᠤ ᠤᠯᠠᠭᠠᠨ ᠬᠠᠲᠤᠨ ᠣᠯᠣᠮ ᠳ᠋ᠤ᠌ ᠬᠦᠷᠴᠦ ᠣᠴᠢᠪᠠ᠃ ᠠᠩᠴᠢᠨᠵᠠᠪ ᠲᠡᠷᠡ ᠮᠠᠭᠤᠬᠠᠨ ᠮᠣᠩᠭᠣᠯ ᠦᠭᠡ ᠲᠡᠢ ᠵᠠᠩ ᠣᠪᠣᠭᠲᠤ ᠰᠠᠯᠴᠢᠨ ᠡᠪᠦᠭᠡᠨ ᠢ᠋ ᠲᠠᠨᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠡᠨᠳᠡ ᠡᠴᠡ ᠬᠥᠯ ᠵᠠᠯᠭᠠᠬᠤ ᠶ᠋ᠢ ᠵᠣᠷᠢᠭᠰᠠᠨ ᠨᠢ ᠡᠨᠡ!
ᠠᠩᠴᠢᠨᠵᠠᠪ᠂ ᠰᠠᠯᠴᠢᠨ ᠡᠪᠦᠭᠡᠨ ᠲᠡᠢ ᠮᠡᠨᠳᠦ ᠮᠡᠳᠡᠵᠦ ᠢᠷᠡᠭᠰᠡᠨ ᠵᠣᠷᠢᠭᠰᠠᠨ ᠢ᠋ᠶ᠋ᠠᠨ ᠳᠥᠩᠭᠡᠵᠦ ᠬᠡᠯᠡᠵᠦ ᠵᠠᠪᠳᠤᠲᠠᠯᠠ ᠡᠪᠦᠭᠡᠨ ᠦ᠌ ᠬᠡᠦᠬᠡᠨ ᠪᠣᠯᠤᠯᠲᠠᠢ ᠨᠢᠭᠡ ᠵᠠᠯᠠᠭᠤᠬᠠᠨ ᠱᠣᠢᠱᠣᠭ ᠡᠮᠡ ᠴᠥᠮᠴᠥᠭ ᠴᠥᠮᠴᠥᠭ ᠭᠡᠵᠦ ᠣᠷᠣᠵᠤ ᠢᠷᠡᠨ᠄
— ᠠᠪᠤ ᠠ᠋! ᠲᠡᠷᠡ ᠵᠡᠭᠡᠰᠦᠨ ᠦ᠌ ᠴᠠᠭᠠᠨᠠ ᠠ᠋ᠴᠠ ᠠᠷᠪᠠᠭᠠᠳ ᠮᠣᠷᠢᠲᠠᠨ ᠠᠢᠰᠤᠢ᠂ ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠯᠴᠢᠬᠠᠪᠠ ? ᠭᠡᠵᠦ ᠶᠠᠭᠠᠷᠠᠨ ᠬᠡᠯᠡᠪᠡ᠃
— ᠠᠷᠪᠠᠭᠠᠳ ᠮᠣᠷᠢᠲᠠᠨ ?
— ᠲᠡᠢᠮᠦ᠃
— ᠶᠠᠮᠤᠨ ᠤ ᠴᠡᠷᠢᠭ ᠦᠳ ᠁ ᠪᠤᠰᠢᠭᠤ! ᠭᠡᠵᠦ ᠠᠩᠴᠢᠨᠵᠠᠪ ᠰᠠᠯᠴᠢᠨ ᠡᠪᠦᠭᠡᠨ ᠢ ᠰᠢᠷᠲᠡᠵᠦ᠂ ᠡᠪᠦᠭᠡᠨ ᠭᠤᠸᠠᠢ ᠡ᠂ ᠲᠦᠷ ᠪᠡᠶᠡ ᠳᠠᠯᠳᠠᠯᠠᠬᠤ ᠭᠠᠵᠠᠷ ᠣᠯᠭᠣᠭᠠᠴᠢ! ᠭᠡᠵᠦ ᠬᠡᠯᠡᠪᠡᠯ ᠰᠡᠷᠭᠦᠮᠡ ᠰᠠᠨᠳᠤᠷᠴᠤ᠄
— ᠡᠦᠲᠦ ᠶᠠᠭᠠᠬᠢᠨᠠ ᠪᠣᠢ ? ᠭᠡᠯᠡ᠃
— ᠪᠢᠲᠡᠭᠡᠢ ᠰᠠᠨᠳᠤᠷ᠂ ᠨᠠᠮᠠᠶ᠋ᠢ ᠳᠠᠭᠠᠭᠠᠳ ᠢᠷᠡ!ᠭᠡᠵᠦ ᠰᠠᠯᠴᠢᠨ ᠡᠪᠦᠭᠡᠨ ᠪᠠᠲᠤᠯᠠᠭᠠᠲᠠᠢ ᠬᠡᠯᠡᠬᠦ ᠳ᠋ᠦ᠍ ᠰᠡᠷᠭᠦᠮᠡ ᠶ᠋ᠢᠨ ᠪᠤᠯᠭᠢᠯᠠᠭᠰᠠᠨ ᠵᠢᠷᠦᠬᠡ ᠠᠷᠠᠢ ᠨᠠᠮᠳᠠᠵᠤ《 ᠯᠠᠮᠠ ᠭᠤᠷᠪᠠᠨ ᠡᠷᠳᠡᠨᠢ ᠮᠢᠨᠢ!》 ᠭᠡᠳ ᠰᠠᠯᠴᠢᠨ ᠡᠪᠦᠭᠡᠨ ᠦ᠌ ᠠᠷᠤ ᠠ᠋ᠴᠠ ᠵᠠᠶᠠᠭᠠᠨ ᠳ᠋ᠠᠭᠠᠨ ᠳᠠᠭᠠᠳᠬᠠᠨ ᠱᠠᠯᠠᠪᠬᠠᠨ ᠳᠠᠭᠠᠵᠤ ᠭᠠᠷᠪᠠ᠃
ᠰᠠᠯᠴᠢᠨ ᠡᠪᠦᠭᠡᠨ ᠲᠡᠳᠡ ᠬᠣᠶᠠᠭᠤᠯᠠ ᠶ᠋ᠢ ᠳᠠᠭᠠᠭᠤᠯᠤᠨ ᠲᠠᠷᠢᠶᠠᠴᠢᠨ ᠲᠣᠰᠬᠣᠨ ᠤ᠋ ᠨᠢᠭᠡ ᠠᠢᠯ ᠳ᠋ᠤ᠌ ᠣᠴᠢᠪᠠ᠃
— ᠲᠠ ᠬᠣᠶᠠᠭᠤᠯᠠ ᠡᠨᠳᠡ ᠪᠠᠢᠵᠤ ᠪᠠᠢ᠃ ᠪᠠᠢᠳᠠᠯ ᠮᠠᠭᠤ ᠪᠣᠯᠪᠠᠯ ᠵᠣᠭᠣᠷᠢᠨ ᠳ᠋ᠤᠨᠢ ᠣᠷᠣᠵᠤ ᠳᠠᠯᠳᠠᠯᠠ! ᠪᠢ ᠶᠠᠪᠤᠵᠤ ᠶᠠᠭᠤᠮᠠ ᠲᠥᠪᠬᠢᠨᠡᠭᠦᠯᠦᠶᠡ ᠭᠡᠵᠦ ᠳᠥᠬᠥᠮᠬᠡᠨ ᠲᠤᠰᠢᠶᠠᠴᠢᠬᠠᠭᠠᠳ ᠣᠯᠣᠮ ᠤ᠋ᠨ ᠢ᠋ᠶ᠋ᠠᠨ ᠬᠠᠪᠴᠢᠭ ᠭᠡᠷ ᠢ ᠴᠢᠭᠯᠡᠨ ᠬᠤᠷᠳᠤᠯᠠᠪᠠ᠃
ᠪᠤᠭᠤᠲᠤ ᠠ᠋ᠴᠠ ᠲᠦᠷᠭᠡᠨ ᠵᠠᠢᠯᠠᠵᠤ᠂ ᠬᠣᠯᠠ ᠶᠠᠪᠤᠬᠤ ᠨᠢ ᠳᠡᠭᠡᠷᠡ᠃ ᠡᠨᠡ ᠬᠥᠮᠦᠨ ᠠᠮᠢᠲᠠᠨ ᠪᠤᠵᠢᠭᠢᠨᠠᠭᠰᠠᠨ ᠭᠠᠵᠠᠷ ᠤᠳᠠᠭᠠᠨ ᠪᠠᠢᠵᠤ ᠪᠣᠯᠬᠤ ᠦᠭᠡᠢ ᠭᠡᠳᠡᠭ ᠠᠢᠩᠭᠣᠷᠢᠲᠣ ᠪᠣᠳᠣᠯ ᠲᠡᠷᠡ ᠬᠣᠶᠠᠷ ᠢ᠋ ᠴᠠᠭ ᠢᠮᠠᠭᠲᠠ ᠡᠵᠡᠮᠳᠡᠵᠦ ᠪᠠᠢᠯᠠ᠃
ᠮᠠᠷᠭᠠᠲᠤᠷ ᠨᠢ ᠠᠩᠴᠢᠨᠵᠠᠪ ᠬᠣᠶᠠᠷ ᠮᠣᠷᠢ ᠪᠠᠨ ᠮᠥᠩᠭᠥ ᠪᠣᠯᠭᠠᠵᠤ ᠵᠠᠪᠳᠤᠭᠰᠠᠨ ᠢ᠋ᠶ᠋ᠠᠷ ᠬᠠᠮᠢᠭᠠᠰᠢ ᠨᠢᠭᠡ ᠪᠤᠷᠤᠭᠤᠯᠠᠬᠤ ᠳ᠋ᠤ᠌ ᠲᠦᠳᠡ ᠰᠢᠯᠤᠭᠤᠨ ᠪᠣᠯᠤᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠵᠤ ᠲᠦᠨᠡᠷ ᠬᠠᠷᠠᠩᠭᠤᠢ ᠳ᠋ᠤ᠌ ᠵᠤᠷᠪᠤᠰ ᠭᠡᠭᠡ ᠣᠯᠵᠤ ᠬᠠᠷᠠᠭᠰᠠᠨ ᠰᠢᠭ᠋ ᠳᠣᠲᠣᠷᠠ ᠨᠢ ᠪᠠᠭᠠ ᠵᠡᠷᠭᠡ ᠲᠠᠢᠪᠤᠰᠢᠷᠠᠪᠠ᠃ ᠲᠡᠷᠡ ᠰᠠᠯᠴᠢᠨ ᠡᠪᠦᠭᠡᠨ ᠳ᠋ᠦ᠍ ᠲᠠᠪᠤᠨ ᠴᠠᠭᠠᠨ ᠵᠣᠭᠣᠰ ᠠᠳᠬᠤᠭᠤᠯᠤᠭᠠᠳ ᠪᠠᠮᠪᠠᠷᠴᠠᠭ ᠦᠬᠡᠷ ᠬᠠᠰᠠᠭ ᠲᠠᠢ ᠲᠠᠷᠢᠶᠠᠴᠢᠨ ᠵᠠᠰᠠᠯ ᠢ᠋ᠶ᠋ᠠᠷ ᠵᠢᠰᠦ ᠪᠡᠨ ᠪᠤᠷᠤᠭᠤᠯᠠᠨ ᠪᠠᠷᠠᠭᠤᠨᠰᠢᠯᠠᠵᠤ ᠡᠪ ᠲᠠᠭᠠᠷᠠᠪᠠᠯ ᠬᠠᠳᠤᠮᠠᠯ ᠤ᠋ᠨ ᠭᠣᠣᠯ ᠢ᠋ᠶ᠋ᠠᠷ ᠠᠭᠤᠯᠠᠨ ᠳ᠋ᠤ᠌ ᠭᠠᠷᠴᠤ ᠬᠣᠷᠭᠣᠳᠠᠵᠤ ᠪᠠᠢᠭᠠᠳ ᠭᠣᠪᠢ ᠲᠠᠢᠰᠢ ᠪᠠᠨ ᠴᠢᠭᠯᠡᠬᠦ ᠪᠡᠷ ᠪᠣᠯᠪᠠ᠃ ᠤᠴᠢᠷ ᠨᠢ ᠬᠣᠲᠠ ᠶ᠋ᠢᠨ ᠪᠠᠷᠠᠭᠤᠨ ᠬᠠᠭᠠᠯᠭᠠ ᠪᠠᠷ ᠭᠠᠷᠬᠤ ᠬᠥᠮᠦᠨ ᠢ᠋ ᠬᠠᠭᠠᠬᠤ ᠦᠬᠡᠢ ᠨᠢ ᠯᠠᠪ ᠭᠡᠵᠦ ᠲᠡᠳᠡ ᠢᠲᠡᠭᠡᠵᠦ ᠪᠠᠢᠪᠠ᠃
ᠰᠢᠷᠠ ᠪᠦᠷᠦᠢ ᠲᠠᠰᠤᠷᠠᠬᠤ ᠳ᠋ᠤ᠌ ᠲᠡᠳᠡ ᠬᠣᠶᠠᠭᠤᠯᠠ ᠬᠤᠮᠢᠭᠠᠷ ᠡᠪᠡᠷ ᠲᠡᠢ ᠡᠴᠡᠩᠬᠡᠢ ᠬᠦᠷᠡᠩ ᠱᠠᠷ ᠬᠥᠯᠦᠭᠰᠡᠨ ᠪᠠᠯᠪᠠᠷᠬᠠᠢ ᠪᠠᠮᠪᠠᠷᠴᠠᠭ ᠬᠠᠰᠠᠭ ᠢ᠋ᠶ᠋ᠠᠷ ᠪᠠᠷᠠᠭᠤᠨᠰᠢ ᠴᠢᠭᠯᠡᠪᠡ᠃ ᠮᠥᠭᠡᠷ ᠨᠢ ᠬᠠᠭᠰᠠᠨ ᠠᠭᠵᠠᠢᠭᠰᠠᠨ ᠬᠠᠰᠠᠭ ᠤ᠋ᠨ ᠬᠠᠷᠠ ᠭᠣᠣᠯ ᠨᠢ ᠵᠠᠭᠤᠷᠠᠵᠤ ᠴᠢᠬᠢ ᠬᠠᠳᠬᠤᠮᠠ ᠮᠠᠭᠤᠬᠠᠢ ᠳᠠᠭᠤ ᠪᠠᠷ ᠬᠢᠬᠤᠨᠠᠭᠠᠳ ᠶᠠᠪᠤᠭᠤᠷᠢ ᠮᠠᠭᠤᠲᠠᠢ ᠪᠠᠢᠯᠠ᠃ ᠬᠠᠰᠠᠭ ᠭᠡᠯᠢᠭᠰᠡᠨ ᠰᠠᠯᠴᠢᠨ ᠡᠪᠦᠭᠡᠨ ᠠᠷᠠᠯ ᠤ᠋ᠨ ᠳᠠᠪᠤᠰᠠᠩ ᠳ᠋ᠤ᠌ ᠳᠡᠭᠦᠵᠢᠯᠡᠭᠳᠡᠭᠰᠡᠨ ᠮᠠᠭᠠᠵᠢᠨ ᠲᠣᠰᠣᠨ ᠤ᠋ ᠬᠤᠯᠤ ᠠ᠋ᠴᠠ ᠪᠠᠢᠨ ᠪᠠᠢᠨ ᠬᠠᠰᠠᠭ ᠤ᠋ᠨ ᠭᠣᠣᠯ ᠳ᠋ᠤ᠌ ᠲᠣᠰᠣ ᠳᠣᠰᠣᠭᠠᠨ ᠶᠠᠪᠤᠨᠠ᠃ ᠲᠠᠷᠢᠶᠠᠨ ᠤ᠋ ᠦᠢᠯᠡ ᠳ᠋ᠦ᠍ ᠠᠨᠵᠢᠰᠤ ᠬᠠᠰᠢᠷᠠᠲᠠᠯᠠ ᠪᠠᠨ ᠵᠢᠳᠬᠦᠨ ᠰᠡᠭᠦᠵᠢᠨ ᠶᠠᠰᠤ ᠨᠢ ᠰᠠᠭᠠᠭ ᠤ᠋ᠨ ᠭᠤᠷᠪᠠᠨ ᠲᠠᠯᠠ ᠰᠢᠭ᠋ ᠭᠣᠵᠣᠢᠭᠰᠠᠨ ᠬᠦᠷᠡᠩ ᠱᠠᠷ᠂《 ᠳ᠋ᠡᠳ ᠳ᠋ᠡᠳ᠂ ᠯᠠᠢ ᠯᠠᠢ!》 ᠭᠡᠬᠦ ᠠᠨᠵᠢᠰᠤ᠂ ᠬᠠᠰᠠᠭ ᠤ᠋ᠨ ᠱᠠᠷ ᠳᠣᠳᠣᠮᠳᠠᠬᠤ ᠲᠠᠷᠢᠶᠠᠴᠢᠨ ᠤ᠋ ᠵᠠᠬᠢᠷᠤᠯ ᠢ᠋ ᠲᠡᠳᠦᠢ ᠯᠡ ᠣᠢᠰᠢᠶᠠᠬᠤ ᠦᠭᠡᠢ ᠶᠠᠪᠤ ᠶᠠᠳᠠᠨ ᠬᠠᠱᠠᠩᠨᠠᠬᠤ ᠳ᠋ᠤ᠌᠂ ᠡᠪᠦᠭᠡᠨ ᠳᠡᠯᠢᠮ ᠬᠢᠷᠡᠳᠡᠢ ᠤᠯᠠᠭᠠᠨ ᠰᠤᠬᠠᠢ ᠪᠠᠷ ᠭᠣᠵᠣᠢᠭᠰᠠᠨ ᠶᠠᠭᠢᠷ ᠰᠡᠭᠦᠵᠢᠨ ᠳᠡᠭᠡᠷᠡ ᠨᠢ ᠬᠡᠳᠦᠢ ᠪᠠᠢᠨ ᠳᠠᠬᠢᠨ ᠳᠡᠰ ᠬᠢᠲᠡᠯᠡ ᠪᠠᠭᠤᠯᠭᠠᠪᠠᠴᠤ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠠᠭᠠᠳ ᠡᠪᠡᠷ ᠢ᠋ᠶ᠋ᠡᠨ ᠳᠣᠩᠬᠣᠯᠵᠠᠭᠤᠯᠬᠤ ᠠ᠋ᠴᠠ ᠴᠠᠭᠠᠰᠢ ᠦᠭᠡᠢ ᠠᠵᠢ᠃ ᠪᠠᠯᠪᠠᠷᠬᠠᠢ ᠪᠠᠮᠪᠠᠷᠴᠠᠭ ᠬᠠᠰᠠᠭ᠂ ᠰᠡᠭᠦᠵᠢ ᠨᠢ ᠶᠣᠷᠳᠣᠢᠨ ᠭᠣᠵᠣᠢᠭᠰᠠᠨ ᠬᠦᠷᠡᠩ ᠱᠠᠷ᠂ ᠡᠷᠡᠦ ᠨᠢ ᠬᠠᠮᠰᠢᠢᠭᠰᠠᠨ ᠠᠲᠤᠭᠠᠷ ᠰᠠᠯᠴᠢᠨ ᠡᠪᠦᠭᠡᠨ ᠭᠤᠷᠪᠠ ᠶ᠋ᠢᠨ ᠴᠢᠷᠠᠢ ᠪᠠᠷ ᠬᠡᠵᠢᠶᠡ ᠴᠦ᠍ ᠬᠠᠮᠢᠭᠠ ᠭᠡᠵᠦ ᠬᠦᠷᠳᠡᠭ ᠪᠢᠯᠡ? ᠭᠡᠵᠦ ᠡᠨᠡ ᠪᠦᠬᠦᠨ ᠢ᠋ ᠬᠠᠷᠠᠭᠠᠳ ᠰᠢᠷᠬᠤᠨᠠᠭ ᠢ᠋ᠶ᠋ᠠᠨ ᠵᠣᠮᠪᠣᠢᠲᠠᠯᠠ ᠪᠣᠭᠣᠵᠤ᠂ ᠨᠠᠪᠲᠠᠷᠬᠠᠢ ᠤᠯᠠᠭᠠᠨ ᠬᠦᠷᠮᠡ ᠡᠮᠦᠰᠦᠭᠰᠡᠨ ᠱᠣᠢᠱᠣᠭ ᠵᠠᠰᠠᠯ ᠲᠠᠢ ᠰᠡᠷᠭᠦᠮᠡ ᠵᠣᠪᠠᠭᠤᠷᠢᠲᠠᠢ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ 《 ᠮᠥᠨ ᠢᠩᠭᠢᠵᠦ ᠮᠠᠯᠬᠢᠬᠤ ① ᠶᠤᠮ ᠪᠣᠯ ᠨᠡᠬᠡᠭᠦᠯ ᠦ᠋ᠨ ᠬᠥᠮᠦᠰ ᠲᠦ᠍ ᠪᠠᠷᠢᠭᠳᠠᠬᠤ ᠳ᠋ᠤ᠌ ᠣᠢᠷᠠᠬᠠᠨ ᠳᠠ !᠁ 》ᠭᠡᠵᠦ ᠳᠦᠳᠦᠨᠡᠪᠡ᠃
ᠲᠡᠷᠡ ᠬᠣᠶᠠᠭᠤᠯᠠ ᠡᠢᠨ ᠬᠦ ᠬᠠᠰᠠᠭ ᠲᠡᠷᠭᠡ ᠪᠡᠷ ᠶᠠᠪᠤᠬᠤ ᠳ᠋ᠠᠭᠠᠨ ᠬᠠᠶᠠ ᠵᠠᠮ ᠤ᠋ᠨ ᠬᠠᠵᠠᠭᠤ ᠪᠤᠲᠠ ᠳᠡᠷᠡᠰᠦᠨ ᠡᠴᠡ ᠫᠦᠷᠳ᠋ ᠬᠢᠨ ᠦᠷᠭᠦᠨ ᠨᠢᠰᠬᠦ ᠪᠣᠯᠵᠣᠮᠣᠷ ᠰᠢᠪᠠᠭᠤᠳ ᠠ᠋ᠴᠠ ᠶ᠋ᠢᠨ ᠰᠦᠷᠳᠡᠵᠦ 《 ᠠᠷᠤ ᠠ᠋ᠴᠠ ᠬᠥᠮᠦᠨ ᠨᠡᠬᠡᠭᠦᠵᠡᠢ 》 ᠭᠡᠳ ᠠᠶᠤᠨ ᠰᠣᠴᠢᠨ ᠶᠠᠪᠤᠭᠰᠠᠭᠠᠷ ᠬᠣᠯᠠ ᠶ᠋ᠢᠨ ᠪᠠᠷᠠ ᠪᠥᠷᠲᠥᠯᠵᠡᠬᠦ ᠦᠶᠡ ᠳ᠋ᠦ᠍ ᠪᠤᠷᠬᠠᠨᠲᠤ ᠶ᠋ᠢᠨ ᠵᠣ ᠲᠤᠭᠤᠯᠵᠤ ᠬᠠᠳᠤᠮᠠᠯ ᠤ᠋ᠨ ᠪᠡᠯ ᠳᠥᠭᠥᠯᠡ᠃ ᠮᠠᠭᠤ ᠪᠠᠮᠪᠠᠷᠴᠠᠭ ᠤ᠋ᠨ ᠬᠢᠬᠤᠨᠠᠭᠠᠨ ᠳ᠋ᠤ᠌ ᠳᠣᠩᠰᠣᠯᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠵᠠᠮ ᠬᠣᠷᠣᠳᠠᠭ ᠦᠭᠡᠢ ᠬᠡᠴᠡᠭᠦᠦ᠃ ᠲᠡᠭᠡᠲᠡᠯᠡ ᠶᠠᠯᠢ ᠦᠭᠡᠢ ᠨᠢᠭᠡ ᠮᠠᠭᠤ ᠬᠠᠭᠤᠷᠠᠢ ᠭᠣᠣᠯ ᠤ᠋ᠨ ᠠᠷᠵᠠᠭ ᠪᠠᠷᠵᠠᠭ ᠲᠠᠷᠭᠢᠯ ᠳᠣᠲᠣᠷᠠ ᠳᠦᠩᠭᠦᠷ ᠳᠦᠩᠭᠦᠷ ᠶᠣᠩᠭᠢᠴᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠪᠠᠮᠪᠠᠷᠴᠠᠭ ᠤ᠋ᠨ ᠬᠦᠷᠳᠦᠨ ᠤ ᠬᠢᠨᠢ ᠵᠦᠢᠳᠡᠭᠡᠰᠦ ᠤᠨᠠᠵᠤ᠂ ᠡᠮᠲᠡᠷᠡᠭᠰᠡᠨ ᠪᠣᠭᠣᠷᠰᠣᠭ ᠰᠢᠭ᠋ ᠪᠣᠯᠵᠤ ᠠᠳᠠᠭ ᠨᠢ ᠬᠢᠬᠤᠨᠠᠬᠤ ᠪᠠᠨ ᠴᠤ᠌ ᠪᠣᠯᠢᠪᠠ᠃ ᠪᠥᠵᠥᠩ ᠡᠪᠦᠷᠯᠡᠭᠰᠡᠨ ᠥᠨᠥᠬᠢ ᠬᠣᠶᠠᠷ ᠲᠤ᠌ ᠯᠠᠨᠴᠢᠭ ᠲᠠᠷᠢᠵᠠᠢ᠃ ᠡᠨᠡ ᠨᠢ ᠶᠠᠳᠠᠩᠬᠠᠢ ᠬᠦᠷᠡᠩ ᠱᠠᠷ ᠲᠤ᠌ ᠵᠣᠯ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ 《ᠡᠨᠡ ᠮᠠᠭᠤ ᠵᠢᠰᠢᠬᠦ ᠳ᠋ᠡᠭᠡᠨ ᠰᠢᠬᠠᠭᠰᠠᠨ ᠥᠭᠢᠷᠡ ᠲᠣᠯᠣᠭᠠᠢ᠂ ᠲᠠᠪᠤᠨ ᠴᠠᠭᠠᠨ ᠵᠣᠭᠣᠰᠤᠨ ᠤ᠋ ᠮᠢᠨᠢ ᠬᠠᠷᠢᠭᠤ ᠳ᠋ᠤ᠌ ᠡᠢᠮᠦ ᠪᠠᠯᠪᠠᠷᠬᠠᠢ ᠶᠠᠭᠤᠮᠠ ᠪᠠᠷ ᠨᠢᠳᠦ ᠬᠠᠭᠤᠷᠴᠤ ᠴᠠᠭᠠᠰᠢ ᠴᠤ᠌ ᠦᠭᠡᠢ ᠨᠠᠭᠠᠰᠢ ᠴᠤ ᠦᠭᠡᠢ ᠲᠠᠯᠠ ᠳᠡᠭᠡᠷᠡ ᠭᠠᠬᠠᠢ ᠶᠠᠪᠠᠭᠠᠨ ᠣᠷᠬᠢᠯᠠ 》 ᠭᠡᠵᠦ ᠬᠣᠶᠠᠭᠤᠯᠠ ᠬᠣᠭᠣᠷᠣᠨᠳᠣ ᠪᠠᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠬᠡᠯᠡᠯᠴᠡᠵᠦ ᠰᠠᠯᠴᠢᠨ ᠡᠪᠦᠭᠡᠨ ᠳ᠋ᠦ᠍ ᠪᠤᠷᠤᠭᠤ ᠲᠣᠬᠣᠵᠤ ᠵᠣᠭᠰᠣᠲᠠᠯᠠ ᠲᠡᠷᠲᠡᠭᠡ ᠠᠭᠤᠯᠠ ᠶ᠋ᠢᠨ ᠪᠠᠯ ᠠ᠋ᠴᠠ ᠬᠡᠳᠦᠨ ᠮᠣᠷᠢᠲᠠᠨ ᠲᠣᠭᠣᠰᠣ ᠮᠠᠨᠠᠷᠠᠭᠤᠯᠤᠨ ᠳᠠᠪᠬᠢᠵᠤ ᠠᠢᠰᠤᠢ᠃
— ᠡᠦᠲᠦ ᠶᠠᠭᠠᠬᠢᠳᠠᠭ ᠪᠢᠯᠡ? ᠶᠠᠭ ᠯᠠ ᠪᠢᠳᠡᠨᠦᠰ ᠢ᠋ ᠠᠮᠠᠳᠠᠴᠢᠬᠠᠯᠠ ᠃ ᠬᠤᠷᠳᠤᠨ ᠳᠤᠲᠠᠭᠠᠬᠤ ᠦᠭᠡᠢ ᠪᠣᠯ ᠪᠠᠯᠠᠷᠠᠬᠤ ᠨᠢ ᠠ᠋ ! ᠰᠡᠷᠭᠦᠮᠡ ᠠ᠋ ! ᠪᠤᠰᠢᠭᠤᠯᠠ! ᠭᠡᠵᠦ ᠠᠩᠴᠢᠨᠵᠠᠪ ᠰᠠᠨᠳᠤᠷᠪᠠᠯ ᠰᠡᠷᠭᠦᠮᠡ᠄
— ᠪᠢᠳᠡ ᠬᠣᠶᠠᠭᠤᠯᠠ ᠪᠠᠨ ᠭᠠᠬᠠᠢ ᠶᠠᠪᠠᠭᠠᠨ ᠬᠠᠮᠢᠭᠠᠰᠢ ᠪᠠᠨ ᠳᠤᠲᠠᠭᠠᠬᠤ ᠪᠣᠢ? ᠴᠢ ᠮᠢᠨᠢ ᠵᠠᠪᠳᠤᠪᠠᠯ ᠬᠠᠮᠢᠭᠠᠰᠢ ᠪᠠᠨ ᠴᠤ᠌ ᠪᠣᠯᠤᠭ ᠳᠤᠲᠠᠭᠠ! ᠪᠠᠷᠢᠭᠳᠠᠭᠰᠠᠭᠠᠷ ᠴᠤ᠌ ᠶᠣᠰᠣᠲᠠᠢ ᠰᠠᠢᠨ ᠢ᠋ᠶ᠋ᠠᠨ ᠣᠯᠵᠤ ᠦᠵᠡᠬᠦ ᠦᠭᠡᠢ ᠠ᠋ ! ᠬᠦᠩ ᠨᠣᠶᠠᠨ ᠤ᠋ ᠬᠠᠲᠤᠨ ᠳ᠋ᠤ᠌ ᠬᠠᠯᠲᠠᠯᠠ ᠭᠡᠵᠦ ᠬᠡᠴᠡᠭᠦᠦ ᠲᠠᠮᠤ ᠦᠵᠡᠭᠦᠯᠦᠨᠡ ᠰᠢᠦ ! ᠭᠡᠪᠡ᠃
— ᠰᠡᠷᠭᠦᠮᠡ ᠠ᠋! ᠦᠬᠦᠪᠡᠴᠦ ᠬᠣᠶᠠᠭᠤᠯᠠ ᠪᠠᠨ ᠬᠠᠮᠲᠤ ᠦᠬᠦᠶᠡ! ᠶᠠᠪᠤᠶᠠ ᠂ ᠬᠣᠶᠠᠭᠤᠯᠠ ᠪᠠᠨ ᠳᠤᠲᠠᠭᠠᠶᠠ !
— ᠢᠯᠡᠭᠦᠦ ᠳᠤᠲᠠᠭᠤ ᠬᠡᠷᠡᠭ ᠦᠭᠡᠢ ᠣᠯᠠᠨ ᠦᠭᠡ ᠬᠡᠯᠡᠬᠦ ᠪᠡᠨ ᠪᠠᠢᠭ᠃ ᠠᠮᠢᠳᠤ ᠶᠠᠪᠤᠪᠠᠯ ᠠᠯᠲᠠᠨ ᠠᠶᠠᠭᠠᠨ ᠠ᠋ᠴᠠ ᠤᠰᠤ ᠤᠤᠭᠤᠨᠠ ᠭᠡᠳᠡᠭ ᠰᠢᠦ ᠳᠡ᠃ ᠴᠢ ᠪᠤᠰᠢᠭᠤᠬᠠᠨ ᠠᠷᠭᠠ ᠪᠠᠨ ᠣᠯ! ᠪᠢ ᠠᠳᠠ ᠪᠠᠨ ᠪᠠᠢᠵᠦ ᠯᠡ ᠪᠠᠢᠶᠠ! ᠲᠦᠷᠭᠡᠯᠡ ᠳᠡ! ᠭᠡᠵᠦ ᠰᠡᠷᠬᠦᠮᠡ ᠠᠩᠴᠢᠨᠵᠠᠪ ᠲᠤ ᠨᠠᠮᠬᠠᠨ ᠪᠣᠯᠪᠠᠴᠤ ᠵᠠᠩᠳᠤᠷᠤᠩᠭᠤᠢ ᠬᠡᠯᠡᠪᠡ᠃
ᠠᠩᠴᠢᠨᠵᠠᠪ ᠲᠣᠲᠣᠷᠠ ᠪᠠᠨ 《ᠡᠨᠡ ᠮᠠᠭᠤ ᠵᠥᠨᠥᠭ ᠡᠴᠡ ᠪᠣᠯᠵᠤ ᠠᠯᠢᠪᠠ ᠶᠠᠭᠤᠮᠠ ᠪᠡᠯᠡᠷᠡᠯᠡ᠃ ᠪᠤᠷᠬᠠᠨ ᠲᠡᠭᠷᠢ ᠳ᠋ᠦ᠍ ᠪᠤᠷᠤᠭᠤ ᠦᠵᠡᠭᠳᠡᠭᠰᠡᠨ ᠵᠠᠨᠠᠭ ᠴᠢᠮᠠᠶ᠋ᠢ ᠳᠠ᠂ ᠪᠣᠯᠳᠠᠭ ᠰᠠᠨ ᠪᠣᠯ ᠬᠤᠯᠤᠨ ᠲᠣᠯᠣᠭᠠᠢ ᠢ ᠴᠢᠨᠢ ᠬᠠᠭᠠᠯᠵᠤ ᠤᠰᠤ ᠢ ᠨᠢ ᠠᠰᠬᠠᠵᠤ ᠬᠠᠶᠠᠯᠲᠠᠢ ᠶᠤᠮ 》ᠭᠡᠵᠦ ᠪᠠᠷᠰ ᠲᠤ ᠭᠠᠷᠭᠠᠬᠤ ᠠᠭᠤᠷ ᠢᠶᠠᠨ ᠪᠠᠮᠪᠠᠷ ᠲᠤ ᠭᠡᠳᠡᠭ ᠢᠶᠡᠷ ᠰᠠᠯᠴᠢᠨ ᠡᠪᠦᠭᠡᠨ ᠢ᠋ ᠵᠠᠨᠤᠯᠲᠠᠢ ᠬᠠᠷᠠᠵᠤ ᠠᠪᠤᠭᠠᠳ ᠴᠠᠭᠠᠳᠤ ᠦᠶᠡᠷ ᠦ᠋ᠨ ᠭᠣᠣ ᠤᠷᠤᠭᠤ ᠪᠡᠶᠡ ᠳᠠᠯᠳᠠᠯᠠᠨ ᠭᠦᠶᠦᠪᠡ᠃ ᠰᠡᠷᠭᠦᠮᠡ ᠠᠷᠤ ᠠ᠋ᠴᠠ ᠨᠢ ᠨᠢᠳᠦ ᠠᠯᠳᠠᠯ ᠦᠭᠡᠢ ᠬᠠᠷᠠᠵᠤ ᠵᠣᠭᠰᠣᠨᠠ᠃ ᠠᠩᠴᠢᠨᠵᠠᠪ ᠲᠡᠷᠲᠡᠭᠡ ᠵᠠᠢᠰᠬᠠᠨ ᠢᠳᠡᠰᠢᠯᠡᠵᠦ ᠪᠠᠢᠭᠰᠠᠨ ᠴᠢᠳᠦᠷ ᠲᠠᠢ ᠮᠣᠷᠢ ᠤᠷᠤᠭᠤ ᠪᠥᠭᠴᠥᠭᠡᠨᠡᠨ ᠬᠦᠶᠦᠬᠦ ᠨᠢ ᠬᠠᠷᠠᠭᠳᠠᠪᠠ ᠁
ᠥᠷᠯᠥᠭᠡ ᠡᠷᠲᠡ ᠪᠣᠰᠣᠭᠰᠠᠨ ᠮᠢᠩᠭᠠᠨᠪᠤᠤ ᠲᠤᠰᠠᠯᠠᠭᠴᠢ ᠬᠠᠲᠤᠮᠠᠯ ᠤᠨ ᠪᠠᠷᠠᠭᠤᠨ ᠠᠮᠠᠨ ᠤ ᠨᠣᠷᠪᠤᠫᠢᠯ ᠭᠤᠸᠠᠢ ᠶᠢᠨ ᠳᠦ ᠦᠳᠡᠯᠡᠵᠦ ᠠᠪᠤᠭᠠᠳ ᠨᠠᠷᠠ ᠤᠨᠠᠬᠤ ᠶᠢ ᠬᠦᠯᠢᠶᠡᠵᠦ ᠪᠤᠭᠤᠲᠤ ᠠ᠋ᠴᠠ ᠪᠠᠷᠠᠭᠤᠨᠰᠢ ᠰᠤᠨᠤᠯᠵᠠᠬᠤ ᠰᠢᠷᠠ ᠵᠠᠮ ᠤ᠋ᠨ ᠠᠭᠤᠯᠵᠠᠷ ᠢ᠋ ᠪᠠᠢᠨ ᠪᠠᠢᠨ ᠳᠤᠷᠠᠨᠳᠠᠵᠤ ᠰᠠᠭᠤᠵᠠᠢ᠃ ᠨᠠᠷᠠ ᠤᠨᠠᠵᠤ ᠰᠢᠷᠠ ᠪᠦᠷᠦᠢ ᠲᠠᠰᠤᠷᠠᠬᠤ ᠶ᠋ᠢᠨ ᠦᠶᠡ ᠪᠡᠷ ᠪᠤᠭᠤᠲᠤ ᠶ᠋ᠢᠨ ᠵᠦᠭ ᠡᠴᠡ ᠪᠠᠷᠠᠭᠤᠨᠰᠢᠯᠠᠬᠤ ᠰᠢᠷᠠ ᠵᠠᠮ ᠢ᠋ᠶ᠋ᠠᠷ ᠦᠬᠡᠷ ᠬᠠᠰᠠᠭ ᠰᠠᠵᠢᠯᠠᠬᠤ ᠨᠢ ᠬᠠᠷᠠᠭᠳᠠᠬᠤ ᠪᠠᠷ᠂《 ᠵᠠ᠂ ᠡᠨᠡ ᠴᠤ᠌ ᠮᠦᠨ ᠰᠢᠭ ᠪᠠᠢᠨᠠ᠃ ᠪᠡᠶᠡ ᠪᠡᠨ ᠬᠦᠷᠭᠡᠭᠡᠳ ᠢᠷᠡᠵᠢ ᠳᠠ᠃ ᠶᠠᠭᠤ ᠴᠤ᠌ ᠭᠡᠰᠡᠨ ᠭᠤᠷᠪᠠᠨ ᠲᠣᠯᠣᠭᠠᠢ ᠪᠦᠷᠦᠯᠵᠡᠵᠦ ᠨᠢᠭᠡ ᠶᠠᠭᠤᠮᠠ ᠰᠣᠨᠣᠰᠬᠠᠬᠤ ᠳ᠋ᠤ᠌ ᠣᠢᠷᠬᠠᠨ ᠪᠣᠯᠵᠠᠢ 》 ᠭᠡᠵᠦ ᠪᠣᠳᠣᠪᠠ᠃ ᠦᠬᠡᠷ ᠬᠠᠰᠠᠭ ᠨᠠᠭᠠᠰᠢ ᠳᠥᠭᠥᠬᠦ ᠲᠣᠰᠤᠮ ᠢ᠋ᠶ᠋ᠠᠨ ᠨᠢᠭᠡ ᠤᠯᠠᠪᠤᠷ ᠬᠦᠷᠮᠡ ᠲᠡᠢ ᠱᠣᠢᠱᠣᠭ ᠬᠣᠶᠠᠷ ᠪᠠᠷᠠᠭᠠᠨ ᠬᠤᠪᠴᠠᠰᠤ ᠲᠠᠢ ᠬᠥᠮᠦᠨ ᠳᠤᠷᠠᠨ ᠤ᠋ ᠬᠠᠷᠠᠭᠠᠨ ᠳ᠋ᠤ᠌ ᠤᠷᠤᠵᠤ ᠢᠷᠡᠯᠡ᠃ ᠲᠡᠭᠡᠵᠦ ᠪᠠᠢᠲᠠᠯᠠ ᠬᠠᠰᠠᠭ ᠬᠠᠬᠠᠵᠤ᠂ ᠬᠥᠮᠦᠰ ᠨᠢ ᠪᠠᠭᠤᠵᠤ ᠨᠢᠭᠡ ᠶᠠᠭᠤᠮᠠ ᠤᠷᠤᠯᠳᠤᠬᠤ ᠰᠢᠭ᠋ ᠪᠣᠯᠬᠤᠯᠠ ᠮᠢᠩᠭᠠᠨᠪᠤᠤ ᠬᠡᠳᠦᠭᠦᠯᠡ ᠲᠡᠷᠡ ᠵᠠᠪ ᠦᠭᠡᠢ ᠳᠡᠭᠡᠷᠡ ᠡᠴᠡ ᠨᠢ ᠮᠣᠷᠳᠠᠵᠤ ᠪᠠᠭᠤᠭᠠ ᠨᠢ ᠡᠨᠡ ᠠ᠋᠃
ᠳᠠᠶᠠᠩ ᠢ᠋ ᠲᠣᠭᠣᠷᠢᠵᠤ ᠬᠠᠰᠢᠷ ᠰᠠᠭᠤᠭᠰᠠᠨ ᠮᠢᠩᠭᠠᠨᠪᠤᠤ ᠲᠤᠰᠠᠯᠠᠭᠴᠢ᠂ ᠬᠦᠩ ᠨᠣᠶᠠᠨ ᠤ᠋ ᠪᠠᠭᠠ ᠬᠠᠲᠤᠨ ᠤ᠋ ᠳᠣᠷᠣᠢ ᠪᠠᠢᠳᠠᠯ ᠳ᠋ᠤ᠌ ᠲᠤᠯᠭᠠᠮᠳᠠᠭᠰᠠᠨ ᠢ᠋ ᠬᠠᠷᠠᠭᠠᠳ ᠲᠡᠭᠦᠨ ᠲᠡᠢ ᠢᠯᠡᠭᠦᠦ ᠳᠤᠲᠠᠭᠤ ᠶᠠᠭᠤ ᠴᠤ᠌ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠨᠥᠭᠦᠭᠡ ᠳᠠᠭᠠᠯᠳᠤᠵᠤ ᠶᠠᠪᠤᠭᠠ ᠴᠡᠷᠢᠭ ᠲᠡᠭᠡᠨ᠄
— ᠭᠣᠮᠪᠣ ᠠ᠋! ᠰᠡᠷᠡᠩ ᠲᠠ ᠬᠣᠶᠠᠭᠤᠯᠠ ᠪᠠᠭᠠ ᠬᠠᠲᠤᠨ ᠳ᠋ᠤ᠌ ᠪᠠᠷᠠ ᠪᠣᠯᠤᠭᠠᠳ ᠠᠭᠠᠷᠤᠲᠠᠢ ᠶ᠋ᠢᠨ ᠡᠩᠭᠡᠷ ᠦ᠋ᠨ ᠨᠢᠭᠡ ᠲᠥᠪᠬᠢᠨᠡᠬᠦᠬᠡᠨ ᠠᠢᠯ ᠳ᠋ᠤ᠌ ᠪᠠᠭᠤᠯᠭᠠᠵᠤ ᠰᠠᠢᠬᠠᠨ ᠠᠮᠠᠷᠠᠭᠠᠵᠤ ᠬᠣᠨᠣ ! ᠠᠮᠤᠷ ᠲᠠᠢᠪᠤᠩ ᠢ᠋ ᠪᠠᠲᠤᠯᠠᠬᠤ ᠬᠡᠷᠡᠭᠲᠡᠢ᠃ ᠠᠯᠳᠠᠰᠢ ᠭᠠᠷᠪᠠᠯ ᠶᠠᠭᠤ ᠪᠣᠯᠬᠤ ᠪᠠᠨ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠨᠡ ᠪᠢᠵᠡ ! ᠲᠡᠭᠡᠭᠡᠳ ᠤᠯᠠᠯᠵᠢᠨ ᠤ᠋ ᠣᠲᠣᠭ ② ᠠ᠋ᠴᠠ ᠵᠡᠭᠡᠭᠡᠭᠰᠡᠨ ᠨᠢᠭᠡ ᠰᠡᠦᠬᠡ ᠲᠡᠷᠭᠡ ᠣᠯᠬᠤ ᠶ᠋ᠢ ᠪᠣᠳᠣ! ᠭᠡᠵᠦ ᠲᠣᠪᠴᠢᠬᠠᠨ ᠪᠣᠯᠪᠠᠴᠤ ᠳᠤᠰᠢᠶᠠᠩᠭᠤᠢ ᠬᠡᠯᠡᠴᠢᠬᠡᠭᠡᠳ᠄
— ᠴᠢᠮᠡᠳᠰᠡᠷᠡᠩ ᠲᠠ ᠬᠡᠳᠦᠭᠦᠯᠡ ᠨᠠᠮᠠᠶ᠋ᠢ ᠳᠠᠭᠠᠭᠠᠳ ᠢᠷᠡ ᠭᠡᠰᠡᠨ ᠢ᠋ᠶ᠋ᠡᠨ ᠵᠡᠭᠦᠨ ᠬᠣᠢᠰᠢ ᠰᠤᠨᠤᠭᠰᠠᠨ ᠪᠦᠷᠦᠭ ᠨᠠᠷᠢᠨ ᠲᠣᠭᠣᠰᠣ ᠶ᠋ᠢ ᠴᠢᠭᠯᠡᠨ ᠳᠠᠪᠬᠢᠵᠠᠭᠠᠪᠠ᠃
— ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠭᠤᠸᠠᠢ ᠠ᠋ ! ᠲᠡᠭᠦᠨ ᠦ᠌ ᠠᠮᠢᠨ ᠳ᠋ᠤ᠌ ᠪᠢᠲᠡᠭᠡᠢ ᠬᠣᠣᠷ ᠬᠢᠭᠡᠴᠢ ᠲᠡᠭᠦᠨ ᠳ᠋ᠦ᠍ ᠶᠠᠯᠠ ᠦᠭᠡᠢ᠃ ᠪᠤᠷᠤᠭᠤ ᠨᠢ ᠪᠦᠷ ᠮᠢᠨᠦᠬᠢ ! ᠭᠡᠵᠦ ᠰᠡᠷᠭᠦᠮᠡ ᠮᠣᠷᠢ ᠲᠠᠢ ᠬᠥᠮᠦᠨ ᠦ᠌ ᠠᠷᠤ ᠠ᠋ᠴᠠ ᠤᠬᠢᠯᠠᠩᠨᠠᠨ ᠬᠠᠰᠬᠢᠷᠪᠠ ᠃ ᠮᠣᠷᠢᠳ ᠤ᠋ᠨ ᠲᠠᠴᠢᠭᠢᠨᠠᠬᠤ ᠲᠤᠭᠤᠷᠠᠢ ᠶ᠋ᠢᠨ ᠴᠢᠮᠡᠭᠡ ᠬᠠᠷᠠᠩᠭᠤᠢ ᠳ᠋ᠤ᠌ ᠵᠠᠮᠠᠭᠷᠠᠨᠠ᠃
ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠤᠶᠠᠬᠠᠨ ᠵᠥᠭᠡᠯᠡᠨ ᠪᠤᠢᠯᠠᠭᠠᠨ ᠳ᠋ᠤ᠌ ᠮᠢᠩᠭᠠᠨᠪᠤᠤ ᠶᠢᠨ ᠳᠣᠲᠣᠷᠠ ᠨᠢᠭᠡ ᠯᠡ ᠪᠢᠰᠢ ᠪᠠᠢᠯᠠ᠃ ᠲᠡᠢᠨ ᠠᠪᠠᠴᠤ ᠬᠦᠩ ᠨᠣᠶᠠᠨ ᠤ᠋ ᠵᠠᠷᠯᠢᠭ ᠵᠢᠭᠠᠪᠤᠷᠢ ᠲᠤᠰᠠᠯᠠᠭᠴᠢ ᠬᠥᠮᠦᠨ ᠦ᠌ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭᠠ ᠶ᠋ᠢ ᠬᠡᠷᠬᠢᠨ ᠦᠲᠡᠭᠡᠷᠬᠡᠵᠦ ᠪᠣᠯᠬᠤ ᠠᠵᠢ! 《᠁ ᠴᠠᠭᠠᠳᠤᠭᠤᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠰᠦᠨᠡᠰᠦ ᠶ᠋ᠢ ᠪᠡᠳᠡᠬᠡᠢ ᠰᠣᠴᠢᠭᠠ! ᠮᠠᠨᠤᠰ ᠤ᠋ᠨ ᠬᠡᠦᠬᠡᠳ ᠦᠷᠡ ᠠᠴᠢᠷ ᠲᠠᠢ ᠢᠯᠭᠠᠭᠠ ᠶᠠᠭᠤ ᠪᠣᠢ?᠁ 》 ᠭᠡᠵᠦ ᠰᠠᠨᠠᠭᠤᠯᠵᠤ ᠪᠠᠢᠭᠰᠠᠨ ᠰᠠᠮᠠᠭᠠᠨ ᠤ᠋ ᠬᠢᠨᠢ ᠦᠭᠡ ᠦᠶᠡ ᠦᠶᠡ ᠴᠢᠬᠢᠨ ᠳ᠋ᠦ᠍ᠨᠢ ᠳᠤᠭᠤᠯᠳᠠᠬᠤ ᠰᠢᠭ᠋ ᠪᠣᠯᠬᠤ ᠳ᠋ᠤ᠌ ᠰᠠᠯᠬᠢᠨ ᠵᠡᠭᠡᠷᠳᠡ ᠶ᠋ᠢᠨ ᠢ᠋ᠶ᠋ᠡᠨ ᠠᠮᠠ ᠶ᠋ᠢ ᠪᠠᠢᠨ ᠪᠠᠢᠨ ᠲᠠᠲᠠᠰᠬᠢᠵᠦ ᠶᠠᠪᠤᠪᠠ᠃ ᠮᠢᠩᠭᠠᠨᠪᠤᠤ ᠤᠶᠠᠬᠠᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠤᠨᠠᠵᠤ ᠪᠠᠢᠯᠠ᠃
ᠬᠠᠷᠠ ᠪᠦᠷᠦᠢ ᠳᠠᠰᠤᠷᠠᠵᠤ ᠬᠠᠷᠠᠩᠭᠤᠢ ᠪᠣᠯᠪᠠ᠃ ᠥᠨᠥᠬᠢ ᠵᠢᠭᠤᠳᠠᠭᠰᠠᠨ ᠬᠥᠮᠥᠨ ᠦ ᠠᠷᠤ ᠠᠴᠠ ᠬᠦᠢᠴᠡᠬᠦ ᠠᠶᠠᠳᠬᠤ ᠳᠤ ᠭᠡᠨᠡᠳᠲᠡ 《ᠴᠥᠬᠥ!》 ᠭᠡᠰᠡᠨ ᠡᠷᠡ ᠬᠥᠮᠥᠨ ᠦ ᠳᠠᠭᠤ ᠭᠠᠷᠴᠤ ᠮᠣᠷᠢ ᠳᠠᠰᠢᠭᠤᠷᠳᠠᠬᠤ ᠠᠨᠢᠷ ᠢᠶᠠᠷ ᠮᠣᠷᠢᠨ ᠤ ᠲᠤᠭᠤᠷᠠᠢ ᠴᠣᠴᠢᠮᠠᠭ ᠡᠷᠭᠢᠵᠦ ᠡᠮᠦᠨᠡ ᠵᠦᠭ ᠲᠠᠴᠢᠬᠢᠨᠠᠪᠠ᠃
ᠳᠤᠰᠠᠯᠠᠭᠴᠢ ᠶᠠᠭᠤ ᠪᠣᠯᠣᠭᠠ ᠢ ᠭᠠᠳᠠᠷᠯᠠᠭᠰᠠᠨ ᠰᠢᠨᠵᠢᠲᠡᠢ᠄
— ᠠ ᠂ ᠴᠠᠪᠠᠰᠤ ! ᠣᠪᠣᠭᠠ ᠡᠷᠡ ᠲᠣᠬᠢᠶᠠᠵᠤ ᠳᠠ ! ᠮᠣᠷᠢᠨ ᠳ᠋ᠠᠭᠠᠨ ᠲᠠᠵᠢ ᠦᠭᠡᠢ ᠲᠣᠯᠣᠭᠠᠢ ᠪᠠᠢᠬᠤ ᠶᠠᠳᠠᠬᠤ ᠦᠭᠡᠢ ᠭᠡᠳ ᠵᠢᠯᠣᠭᠣ ᠡᠷᠭᠢᠭᠦᠯᠵᠦ ᠲᠡᠷᠡ ᠳᠠᠪᠬᠢᠭᠰᠠᠨ ᠮᠣᠷᠢᠳ ᠤ᠋ᠨ ᠠᠷᠤ ᠡᠴᠡ ᠨᠢ ᠨᠡᠬᠡᠪᠡ᠃ ᠲᠤᠰᠠᠯᠠᠭᠴᠢ ᠶ᠋ᠢ ᠮᠣᠷᠢᠨ ᠤ᠋ ᠪᠠᠨ ᠲᠡᠰᠢᠶᠡ ᠤᠷᠤᠭᠤ ᠲᠠᠰᠢᠭᠤᠷ ᠥᠭᠭᠦᠮᠡᠭᠴᠡ ᠤᠬᠤᠰᠬᠢᠨ ᠳᠠᠪᠬᠢᠭᠰᠠᠨ ᠰᠠᠯᠬᠢᠨ ᠵᠡᠭᠡᠷᠳᠡ ᠵᠢᠭᠤᠳ᠋ᠠᠭᠰᠠᠨ ᠮᠣᠷᠢᠲᠠᠨ ᠢ᠋ ᠬᠠᠷᠪᠤᠭᠰᠠᠨ ᠰᠤᠮᠤ ᠰᠢᠭ᠋ ᠨᠡᠬᠡᠵᠦ ᠣᠴᠢᠪᠠ᠃ ᠲᠡᠭᠡᠲᠡᠯᠡ ᠴᠢᠮᠡᠳᠰᠡᠷᠡᠩ ᠴᠤ᠌ ᠬᠦᠷᠴᠦ ᠮᠣᠷᠢᠨ ᠤ᠋ ᠴᠤᠯᠪᠤᠭᠤᠷ ᠠ᠋ᠴᠠ ᠡᠯᠭᠦᠵᠦ ᠠᠪᠤᠭᠰᠠᠨ ᠳ᠋ᠤ᠌ ᠬᠣᠯᠪᠣᠭᠠᠲᠠᠢ ᠵᠠᠢᠳᠠᠩ ᠬᠣᠶᠠᠷ ᠮᠣᠷᠢ ᠯᠠ ᠪᠠᠢᠪᠠ ᠃《ᠤᠨᠤᠭᠰᠠᠨ ᠡᠵᠡᠨ ᠨᠢ ᠭᠠᠵᠠᠷ ᠤ᠋ᠨ ᠠᠩ ᠢ᠋ᠶ᠋ᠠᠷ ᠣᠷᠣᠴᠢᠬᠠᠪᠠ ᠤᠤ ?》ᠭᠡᠬᠦ ᠳ᠋ᠦ᠍ ᠬᠣᠯᠪᠣᠭᠠᠲᠠᠢ ᠮᠣᠷᠢᠳ ᠨᠢ ᠪᠥᠭᠰᠡᠨ ᠡᠴᠡ ᠪᠡᠨ ᠨᠠᠳᠬᠤᠵᠤ ᠰᠡᠭᠦᠯ ᠢ᠋ᠶ᠋ᠡᠨ ᠲᠠᠰᠤ ᠬᠠᠪᠴᠢᠭᠠᠳ ᠴᠢᠳᠬᠥᠷ ᠵᠠᠢᠳᠠᠯᠠᠭᠰᠠᠨ ᠶᠤᠮ ᠰᠢᠭ᠋ ᠬᠣᠭᠣᠰᠣᠨ ᠪᠤᠯᠭᠢᠵᠤ ᠪᠠᠢᠪᠠ᠃
ᠤᠤᠯ ᠨᠢ ᠠᠩᠴᠢᠨᠵᠠᠪ ᠡᠪᠡᠰᠦ ᠬᠠᠵᠠᠯᠠᠵᠤ ᠪᠠᠢᠭᠰᠠᠨ ᠠᠢᠯ ᠤᠨ ᠬᠣᠶᠠᠷ ᠴᠢᠳᠦᠷ ᠲᠠᠢ ᠮᠣᠷᠢ ᠶᠢ ᠪᠠᠷᠢᠵᠤ ᠵᠠᠢᠳᠠᠯᠠᠭᠠᠳ ᠨᠢᠭᠡ ᠭᠡᠰᠡᠭ ᠵᠡᠭᠦᠨ ᠬᠣᠢᠰᠢ ᠳᠠᠪᠬᠢᠭᠰᠠᠨ ᠢ᠋ᠶ᠋ᠠᠨ ᠠᠷᠤ ᠠ᠋ᠴᠠ ᠨᠢ ᠨᠡᠬᠡᠭᠴᠢᠳ ᠣᠢᠷᠠᠲᠤᠭᠰᠠᠨ ᠳ᠋ᠤ᠌ ᠪᠦᠷᠦᠭ ᠬᠠᠷᠠᠩᠭᠤᠢ ᠪᠠᠷ《 ᠴᠢᠳᠬᠥᠷ 》 ᠬᠢᠵᠦ ᠵᠦᠭ ᠢ᠋ᠶ᠋ᠡᠨ ᠪᠤᠷᠤᠭᠤᠯᠠᠭᠰᠠᠨ ᠨᠢ ᠡᠨᠡ ᠪᠠᠢᠵᠠᠢ᠃ ᠠᠷᠵᠠᠭᠠᠷ ᠬᠠᠪᠲᠠᠭᠠᠢ ᠴᠢᠯᠠᠭᠤ ᠶ᠋ᠢ ᠣᠷᠢᠶᠠᠮᠠᠭ ᠵᠠᠩᠭᠤᠤ ᠳ᠋ᠤ᠌ ᠪᠠᠭᠯᠠᠵᠤ ᠨᠢᠭᠡ ᠮᠣᠷᠢᠨ ᠤ᠋ ᠰᠡᠭᠦᠯ ᠦ᠋ᠨ ᠬᠢᠨᠢ ᠤᠭ ᠲᠤ᠌ ᠬᠠᠪᠴᠢᠭᠤᠯᠤᠭᠠᠳ ᠬᠣᠶᠠᠭᠤᠯᠠ ᠶᠢ ᠬᠣᠯᠪᠣᠵᠤ ᠪᠥᠭᠰᠡ ᠤᠷᠤᠭᠤ ᠨᠢ ᠴᠢᠳᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠦᠴᠦᠲᠡᠢ ᠭᠡᠭᠴᠢ ᠭᠤᠶᠠᠳᠠᠵᠤ 《 ᠴᠥᠬᠥ 》 ᠭᠡᠳ ᠦᠷᠭᠦᠭᠡᠭᠰᠡᠨ ᠳ᠋ᠦ᠍ ᠬᠣᠶᠠᠷ ᠮᠣᠷᠢ ᠶᠣᠰᠣᠲᠠᠢ ᠯᠠ ᠰᠡᠭᠦᠯ ᠡᠴᠡ ᠪᠡᠨ ᠦᠷᠭᠦᠨ ᠰᠡᠭᠦᠳᠡᠷ ᠡᠴᠡ ᠪᠡᠨ ᠨᠠᠳᠬᠤᠵᠤ ᠣᠮ ᠬᠣᠮ ᠦᠭᠡᠢ ᠪᠢᠴᠢᠭᠢᠨᠡᠯᠳᠦᠨ ᠳᠠᠪᠬᠢᠪᠠ ᠁
ᠨᠡᠬᠡᠭᠰᠡᠨ ᠬᠥᠮᠦᠰ ᠮᠣᠷᠢᠨ ᠤ᠋ ᠲᠦᠪᠡᠷᠭᠡᠨ ᠢ᠋ᠶ᠋ᠡᠷ ᠴᠢᠮᠡᠭᠡ ᠠᠪᠴᠤ ᠪᠤᠷᠤᠭᠤᠯᠠᠭᠰᠠᠨ ᠵᠦᠭ ᠤᠷᠤᠭᠤ ᠪᠢᠴᠢᠭᠢᠨᠡᠵᠦ ᠠᠷᠢᠯᠪᠠ ᠁
ᠠᠩᠴᠢᠨᠵᠠᠪ ᠮᠣᠷᠢᠨ ᠤ᠋ ᠴᠢᠳᠥᠷ ᠢ᠋ ᠪᠦᠰᠡᠯᠡᠵᠦ ᠵᠦᠭ ᠢ᠋ᠶ᠋ᠡᠨ ᠪᠤᠷᠤᠭᠤᠯᠠᠨ ᠪᠤᠷᠬᠠᠨᠲᠤ ᠶ᠋ᠢᠨ ᠡᠩᠭᠡᠷ ᠢ᠋ ᠳᠠᠪᠠᠵᠤ ᠠᠭᠤᠯᠠᠨ ᠳ᠋ᠤ᠌ ᠣᠷᠣᠯᠠ᠃
ᠲᠡᠭᠷᠢ ᠬᠠᠷᠠᠩᠭᠤᠢ ᠪᠣᠯᠪᠠ᠃
ᠬᠠᠵᠠᠭᠤ ᠬᠠᠪᠢ ᠶ᠋ᠢᠨ ᠭᠣᠣ ᠭᠠᠩᠭᠠ᠂ ᠳᠣᠪᠣ ᠰᠣᠨᠳᠤᠤᠯᠠ᠂ ᠪᠤᠲᠠ ᠪᠣᠷᠣᠯᠵᠠᠢ ᠪᠠᠷ ᠬᠡᠰᠡᠭ ᠱᠦᠭᠦᠷᠳᠡᠭᠡᠳ ᠨᠡᠬᠡᠭᠦᠯ ᠴᠡᠷᠢᠭ ᠡᠴᠦᠰ ᠲᠡᠭᠡᠨ ᠪᠤᠴᠠᠭᠠᠪᠠ᠃ 《ᠮᠢᠩᠭᠠᠨᠪᠤᠤ ᠠ᠋! ᠡᠦᠲᠦ ᠢᠩᠭᠢᠭᠡᠳ ᠪᠤᠴᠠ᠂ ᠪᠤᠴᠠ ! ᠪᠠᠭᠠ ᠬᠠᠲᠤᠨ ᠢ᠋ ᠡᠰᠡᠨ ᠮᠡᠨᠳᠦ ᠠᠪᠤᠭᠠᠳ ᠬᠠᠷᠢᠪᠠᠯ ᠴᠢᠨᠦ ᠬᠡᠷᠡᠭ ᠪᠦᠲᠦᠴᠢᠬᠡᠬᠦ ᠨᠢ ᠲᠡᠷᠡ ᠴᠠᠭᠠᠳᠤᠬᠢ ᠪᠠᠨ ᠲᠠᠯᠪᠢᠵᠤ ᠶᠠᠪᠤᠭᠤᠯ᠂ ᠨᠡᠬᠡᠬᠦ ᠪᠡᠨ ᠪᠠᠢᠭ ᠠ᠋ ! ᠪᠢᠲᠡᠭᠡᠢ ᠨᠢᠭᠦᠯ ᠬᠢ᠂ ᠪᠤᠷᠬᠠᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠪᠤᠶᠠᠨ ᠦᠢᠯᠡᠳᠬᠦ ᠶ᠋ᠢ ᠰᠠᠨᠠᠵᠤ ᠶᠠᠪᠤᠭᠠᠷᠠᠢ ! ᠴᠠᠭᠠᠳᠤᠬᠢ ᠴᠢᠨᠢ ᠴᠢᠮᠠ ᠳ᠋ᠤ᠌ ᠥᠴᠦᠬᠡᠨ ᠦ᠌ ᠬᠣᠣᠷ ᠬᠦᠷᠭᠡᠭᠡ ᠦᠭᠡᠢ ᠠᠮᠢᠲᠠᠨ᠃ ᠴᠢᠨᠦ ᠨᠡᠬᠡᠯᠭᠡᠨ ᠠᠴᠠ ᠳᠤᠲᠠᠭᠠᠵᠤ ᠠᠮᠢ ᠵᠢᠭᠤᠲᠠᠬᠤ ᠪᠠᠷ ᠭᠣᠷᠢᠳᠠᠭᠰᠠᠨ ᠠᠮᠢᠲᠠᠨ ᠢ ᠶᠠᠭᠠᠬᠢᠬᠤ ᠪᠣᠢ ᠳᠠ ᠂ ᠬᠥᠭᠡᠷᠦᠬᠦᠢ!》ᠭᠡᠵᠦ ᠳᠠᠯᠳᠠ ᠠ᠋ᠴᠠ ᠬᠡᠨ ᠨᠢᠭᠡ ᠬᠥᠮᠦᠨ ᠲᠡᠭᠦᠨ ᠦ᠌ ᠴᠢᠬᠢᠨ ᠳ᠋ᠦ᠍ ᠢᠩᠭᠢᠵᠦ ᠬᠡᠯᠡᠬᠦ ᠰᠢᠭ ᠪᠣᠯᠤᠭᠰᠠᠨ ᠳ᠋ᠤ᠌ ᠮᠢᠩᠭᠠᠨᠪᠤᠤ ᠮᠣᠷᠢᠨ ᠤ᠋ ᠪᠠᠨ ᠵᠢᠯᠣᠭᠣ ᠶ᠋ᠢ ᠬᠤᠷᠢᠶᠠᠵᠤ ᠡᠪᠦᠷ ᠢ᠋ᠶ᠋ᠡᠨ ᠲᠡᠮᠲᠡᠷᠢᠨ ᠰᠢᠮᠡᠭᠦᠷ ᠬᠣᠣ ᠠ᠋ᠴᠠ ᠪᠠᠨ ᠱᠣᠷᠳ᠋ ᠬᠢᠲᠡᠯᠡ ᠨᠢᠭᠡ ᠣᠭᠣᠴᠢ ᠠᠷᠢᠬᠢ ᠰᠢᠮᠡᠭᠰᠡᠨ ᠢ᠋ᠶ᠋ᠡᠨ《ᠴᠡᠷᠢᠭ ᠵᠡᠪᠰᠡᠭ ᠲᠡᠢ ᠬᠣᠯᠪᠣᠭᠠᠯᠠᠭᠰᠠᠨ ᠦᠭᠡᠢ ᠴᠤ᠌ ᠪᠣᠯ ᠶᠠᠭᠠᠮᠠᠢ ! ᠵᠦᠭᠡᠷ ᠯᠡ ᠵᠠᠯᠠᠭᠤᠰ ᠤ᠋ᠨ ᠢᠨᠠᠭ ᠳᠤᠷᠠᠯᠠᠯ ᠤ᠋ᠨ ᠤᠴᠢᠷ ᠴᠤ᠌ ᠪᠣᠯ ᠶᠠᠯᠢ ᠦᠭᠡᠢ ᠳᠡ ! ᠲᠡᠢᠮᠦ ᠪᠠᠢᠯᠠ ᠴᠤ᠌ ᠭᠡᠰᠡᠨ ᠴᠠᠭᠠᠳᠤᠭᠤᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠰᠦᠨᠡᠰᠦ ᠶ᠋ᠢ ᠨᠢ ᠪᠢᠲᠡᠭᠡᠢ ᠰᠣᠴᠢᠭᠠ! ᠮᠠᠨᠤᠰ ᠤ᠋ᠨ ᠬᠡᠦᠬᠡᠳ ᠠᠴᠢᠷ ᠠᠳᠠᠯᠢᠬᠠᠨ ᠳᠠ ᠁》 ᠭᠡᠵᠦ ᠰᠠᠮᠠᠭᠠᠨ ᠤ᠋ ᠪᠠᠨ ᠰᠠᠨᠠᠭᠤᠯᠵᠤ ᠪᠠᠢᠭᠰᠠᠨ ᠢ᠋ ᠰᠠᠨᠠᠵᠤ ᠮᠢᠩᠭᠠᠨᠪᠤᠤ ᠲᠤᠰᠠᠯᠠᠭᠴᠢ᠄
— ᠵᠠ᠂ ᠡᠨᠡ ᠪᠠᠭᠠ ᠬᠠᠲᠤᠨ ᠤ ᠮᠡᠨᠳᠦ ᠪᠠᠢᠬᠤ ᠳ᠋ᠤ᠌ ᠭᠣᠮᠣᠳᠠᠬᠤ ᠭᠠᠵᠠᠷ ᠠᠯᠠᠭᠠ᠃ ᠴᠠᠭᠠᠳᠤᠬᠢ ᠨᠢ ᠲᠡᠭᠡᠭᠡᠳ ᠵᠣᠷᠢᠭ ᠢ᠋ᠶ᠋ᠠᠨ ᠮᠡᠳᠡᠭ ᠴᠠᠭᠠᠰᠢ ᠭᠡᠳ ᠨᠡᠬᠡᠭᠦᠯ ᠦ᠋ᠨ ᠬᠡᠳᠦᠨ ᠴᠡᠷᠢᠭ ᠲᠡᠢ ᠪᠡᠨ ᠰᠠᠨᠠᠭᠠ ᠪᠠᠨ ᠬᠤᠮᠢᠵᠤ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠣᠷᠣᠪᠠ᠃
ᠨᠢᠳᠦ ᠴᠢᠴᠢᠮᠡ ᠬᠠᠷᠠᠩᠭᠤᠢ ᠰᠥᠨᠢ ᠨᠢᠭᠡ ᠨᠢᠭᠡᠨ ᠦ᠌ ᠪᠡᠨ ᠵᠢᠰᠦ ᠶ᠋ᠢ ᠣᠯᠵᠤ ᠬᠠᠷᠠᠬᠤ ᠦᠭᠡᠢ᠃ ᠳᠠᠷᠭᠢᠯ ᠴᠢᠯᠠᠭᠤᠳ ᠲᠤ᠌ ᠬᠠᠪᠢᠷᠤᠯᠳᠤᠭᠰᠠᠨ ᠮᠣᠷᠢᠨ ᠤ᠋ ᠲᠠᠬᠠ ᠠ᠋ᠴᠠ ᠪᠤᠲᠠᠷᠠᠬᠤ ᠣᠴᠢ ᠨᠢᠭᠡ ᠨᠢᠭᠡᠨ ᠳ᠋ᠡᠭᠡᠨ 《 ᠪᠢ ᠠᠳᠠ ᠪᠣᠢ 》 ᠭᠡᠵᠦ ᠬᠡᠯᠡᠬᠦ ᠰᠢᠭ ᠳᠠᠭᠤ ᠴᠢᠮᠡᠭᠡ ᠠᠪᠤᠯᠴᠠᠨ ᠪᠢᠴᠢᠭᠢᠨᠠᠯᠳᠤᠨᠠ᠃
ᠮᠠᠷᠭᠠᠲᠤᠷ ᠨᠢ ᠡᠷᠲᠡ ᠶ᠋ᠢᠨ ᠴᠠᠢ ᠶ᠋ᠢᠨ ᠳᠠᠷᠠᠭᠠ ᠮᠢᠩᠭᠠᠨᠪᠤᠤ ᠨᠣᠮᠣᠬᠠᠨ ᠪᠣᠷᠣ ᠮᠣᠷᠢ ᠬᠥᠯᠦᠭᠰᠡᠨ ᠰᠡᠦᠬᠡ ᠲᠡᠷᠭᠡᠨ ᠳ᠋ᠦ᠍ ᠪᠠᠭᠠ ᠬᠠᠲᠤᠨ ᠢ᠋ ᠰᠠᠭᠤᠯᠭᠠᠭᠠᠳ ᠨᠣᠶᠠᠨ ᠰᠠᠩ ᠤ᠋ᠨ ᠵᠤᠰᠠᠭᠠᠯ ᠢ᠋ ᠴᠢᠭᠯᠡᠨ ᠭᠠᠯᠭᠢᠭᠤᠯᠪᠠ᠃
ᠪᠤᠭᠤᠲᠤ ᠠ᠋ᠴᠠ ᠪᠠᠷᠠᠭᠤᠨᠰᠢ ᠰᠤᠨᠤᠯᠵᠠᠭᠰᠠᠨ ᠰᠢᠷᠠ ᠵᠠᠮ ᠬᠠᠶᠠ ᠳᠠᠷᠠᠰᠤ ᠰᠣᠨᠳᠤᠤᠯᠠ ᠳ᠋ᠤ᠌ ᠪᠣᠭᠣᠭᠳᠠᠵᠤ ᠪᠠᠯᠠᠷᠠᠪᠠᠴᠤ ᠳᠠᠬᠢᠭᠠᠳ ᠡᠯᠭᠦᠬᠦ ᠵᠠᠮ ᠤ᠋ᠨ ᠬᠦᠵᠦᠭᠦᠦ ᠲᠡᠭᠷᠢ ᠶ᠋ᠢᠨ ᠬᠢᠵᠠᠭᠠᠷ ᠢ᠋ ᠵᠣᠷᠢᠭᠰᠠᠨ ᠰᠢᠭ᠋ ᠦᠵᠦᠭᠦᠷ ᠦᠭᠡᠢ ᠦᠷᠭᠦᠯᠵᠢᠯᠡᠬᠦ ᠨᠢ ᠮᠣᠷᠢᠨ ᠦ᠌ ᠨᠢᠷᠤᠭᠤᠨ ᠳ᠋ᠤ᠌ ᠰᠠᠵᠢᠯᠠᠭᠤᠯᠬᠤ ᠬᠥᠮᠦᠨ ᠢ᠋ ᠵᠠᠯᠬᠠᠭᠤ ᠬᠦᠷᠭᠡᠮᠡ ᠠᠵᠢ !
ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠣᠢᠲᠤ ᠲᠣᠬᠣᠢ ᠪᠠᠷ ᠵᠡᠭᠡᠰᠦ ᠬᠤᠯᠤᠰᠤ᠂ ᠰᠤᠬᠠᠢ ᠪᠢᠲᠡᠭᠦᠦ ᠤᠷᠭᠤᠵᠤ ᠂ ᠬᠣᠢᠰᠢ ᠪᠠᠨ ᠰᠦᠷᠯᠢᠭ ᠥᠨᠳᠥᠷ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠬᠣᠷᠮᠣᠢ ᠬᠦᠷᠲᠡᠯᠡ ᠦᠷᠭᠦᠯᠵᠢᠯᠡᠬᠦ ᠮᠤᠨᠠ ᠶ᠋ᠢᠨ ᠬᠥᠭᠡᠪᠦᠷ ᠵᠠᠷ ᠪᠤᠲᠠ ᠪᠤᠳᠤᠷᠭᠠᠨᠠ᠂ ᠬᠣᠨᠢᠨ ᠭᠦᠢᠯᠡᠰᠦ ᠂ ᠵᠠᠮᠤᠷ ᠂ ᠴᠤᠯᠢᠭᠢᠷ ᠠᠯᠠᠭᠯᠠᠨ ᠤᠷᠭᠤᠭᠰᠠᠨ ᠨᠢ ᠡᠲᠡᠭᠡᠳ ᠭᠣᠶᠣ ᠬᠠᠷᠠᠭᠳᠠᠨᠠ᠃ ᠵᠦᠯᠭᠡᠷᠬᠡᠭ ᠬᠣᠲᠣᠭᠣᠷ ᠭᠠᠵᠠᠷ ᠢ᠋ᠶ᠋ᠠᠷ ᠨᠢ ᠮᠣᠷᠢᠨ ᠴᠠᠬᠢᠷᠮᠠ᠂ ᠳᠠᠷᠠᠰᠤ ᠰᠠᠬᠤᠯᠢᠭ ᠣᠷᠭᠣᠭᠠᠳ ᠮᠣᠷᠢ ᠲᠡᠮᠡᠭᠡ ᠲᠡᠢ ᠬᠥᠮᠦᠨ ᠣᠷᠣᠪᠠᠴᠤ ᠪᠠᠷᠠ ᠳᠠᠯᠳᠠᠷᠠᠬᠤ ᠪᠠᠷ ᠠᠵᠢ᠃
ᠬᠠᠶᠠ ᠵᠡᠭᠡᠷᠡ ᠶ᠋ᠢᠨ ᠰᠦᠷᠦᠭ ᠵᠡᠷᠭᠡᠯᠭᠡᠨ ᠳᠤᠮᠳᠠ ᠬᠤᠢᠯᠠᠷᠠᠵᠤ ᠬᠠᠷᠠᠭᠳᠠᠨ ᠱᠠᠩᠳᠠ ᠳᠤᠭᠤᠷᠢᠮ᠂ ᠨᠠᠮᠤᠭᠤᠬᠠᠨ ᠠᠯᠭᠠᠭ ᠲᠤ᠌ ᠲᠠᠢᠪᠤᠩ ᠪᠠᠯᠴᠢᠬᠦ ᠬᠣᠨᠢ ᠢᠮᠠᠭᠠᠨ ᠰᠦᠷᠦᠭ ᠲᠦ᠋ᠨᠢ ᠪᠤᠭᠤ ᠰᠤᠭᠤ ᠬᠠᠷᠠᠭᠳᠠᠨᠠ᠃ ᠵᠠᠮ ᠤ᠋ᠨ ᠬᠣᠢᠲᠤ ᠵᠤ ᠳᠡᠭᠡᠭᠦᠷ ᠲᠠᠢᠪᠤᠩ ᠪᠡᠯᠴᠢᠭᠰᠡᠨ ᠴᠠᠭᠠᠨ ᠴᠠᠭᠠᠨ ᠪᠤᠬᠤᠷ ᠲᠠᠢ ᠵᠡᠭᠡᠷᠡ ᠨᠦ᠍ᠭᠦᠳ ᠬᠠᠰᠠᠭ ᠲᠡᠷᠭᠡᠨ ᠦ᠌ ᠳᠠᠭᠤ ᠴᠢᠮᠡᠭᠡ ᠪᠡᠷ ᠦᠷᠭᠦᠨ ᠲᠠᠭᠰᠢᠵᠤ ᠥᠨᠳᠥᠷ ᠤᠷᠭᠤᠭᠰᠠᠨ ᠳᠡᠷᠡᠰᠦᠨ ᠳ᠋ᠦ᠍ ᠰᠢᠷᠭᠤᠵᠤ ᠳᠠᠯᠳᠠᠷᠠᠨᠠ᠃
ᠲᠡᠷᠲᠡᠭᠡ ᠬᠣᠯᠠ ᠰᠡᠬᠦᠢᠨ ᠬᠠᠷᠠᠭᠳᠠᠬᠤ ᠬᠠᠨ ᠮᠤᠨᠠ ᠶ᠋ᠢᠨ ᠰᠢᠷᠠ ᠣᠷᠣᠢ ᠶ᠋ᠢᠨ ᠥᠨᠳᠥᠷ ᠰᠠᠷᠢᠳᠠᠭ ᠠ᠋ᠴᠠ ᠡᠭᠦᠯᠡ ᠤᠷᠭᠤᠭᠰᠠᠨ ᠴᠤ᠌ ᠶᠤᠮ ᠰᠢᠭ᠋ ᠪᠥᠭᠡᠮ ᠪᠥᠭᠡᠮ ᠴᠡᠩᠬᠡᠷ ᠴᠠᠭᠠᠨ ᠡᠭᠦᠯᠡᠰ ᠰᠠᠯᠬᠢᠨ ᠤ᠋ ᠠᠶᠠ ᠪᠠᠷ ᠪᠥᠮᠪᠥᠢᠨ ᠨᠡᠭᠦᠳᠡᠯᠯᠡᠬᠦ ᠨᠢ ᠭᠤᠸᠠ ᠳᠠᠭᠢᠨᠢᠰ ᠲᠡᠭᠷᠢ ᠶ᠋ᠢᠨ ᠮᠠᠩᠨᠠᠢ ᠶ᠋ᠢ ᠵᠦᠯᠭᠦᠬᠦ ᠰᠢᠭ ᠰᠠᠨᠠᠭᠳᠠᠨᠠ᠃
ᠪᠠᠷᠠᠭᠠᠳ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ ᠪᠠᠭᠠ ᠬᠠᠲᠤᠨ ᠤ᠋ ᠰᠠᠭᠤᠭᠰᠠᠨ ᠰᠡᠦᠬᠡ ᠲᠡᠷᠭᠡᠨ ᠦ᠌ ᠵᠢᠪᠠᠷ ᠳᠣᠣᠷᠠ ᠮᠣᠷᠢᠨ ᠤ᠋ ᠪᠠᠨ ᠠᠶᠠ ᠪᠠᠷ ᠶᠠᠪᠤᠬᠤ ᠳ᠋ᠤ᠌ ᠲᠡᠷᠭᠡᠨ ᠳᠣᠲᠣᠷᠠ ᠠ᠋ᠴᠠ ᠪᠠᠭᠠ ᠬᠠᠲᠤᠨ ᠤ᠋ ᠮᠡᠭᠰᠢᠬᠦ ᠶ᠋ᠢ ᠰᠣᠨᠣᠰᠤᠭᠠᠳ ᠰᠡᠳᠬᠢᠯ ᠡᠪᠬᠡᠷᠡᠵᠦ᠄
《 ᠦᠭᠡᠢ ᠠ᠋᠂ ᠪᠢ ᠴᠢᠨᠢ ᠬᠦᠩ ᠨᠣᠶᠠᠨ ᠳ᠋ᠠᠭᠠᠨ ᠰᠠᠢᠷᠬᠠᠵᠤ ᠪᠤᠶᠠᠨ ᠦᠢᠯᠡᠳᠴᠦ ᠶᠠᠪᠤᠭᠠ ᠤᠤ ? ᠡᠰᠡᠬᠦᠯᠡ ᠪᠠᠭᠠ ᠬᠠᠲᠤᠨ ᠳ᠋ᠤ᠌ ᠨᠢᠭᠦᠯ ᠬᠢᠵᠦ ᠪᠠᠢᠭᠠ ᠤᠤ ? 》 ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠱ᠌ᠢᠷᠦᠨ ᠤᠯᠠᠭᠠᠨ ᠵᠢᠩᠰᠡ ᠨᠢ ᠬᠦᠨᠳᠦᠷᠡᠵᠦ ᠵᠤᠯᠠᠢ ᠳᠡᠭᠡᠷᠡ ᠡᠴᠡ ᠨᠢ ᠥᠭᠡᠷ ᠴᠢᠯᠠᠭᠤ ᠳᠠᠷᠤᠭᠰᠠᠨ ᠮᠡᠲᠦ ᠪᠣᠯᠵᠤ ᠲᠣᠯᠣᠭᠠᠢ ᠨᠢ ᠴᠢᠨᠦᠷᠡᠨ ᠡᠪᠡᠳᠪᠡ᠃
ᠲᠤᠰᠠᠯᠠᠭᠴᠢ ᠨᠣᠶᠠᠨ ᠤ᠋ ᠤᠲᠤᠭᠠ ᠵᠢᠩᠰᠡ ᠭᠢᠯᠠᠯᠵᠠᠭᠤᠯᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠬᠦᠩ ᠨᠣᠶᠠᠨ ᠤ᠋ ᠪᠠᠨ ᠰᠢᠨᠡᠬᠡᠨ ᠪᠣᠭᠲᠣᠯᠠᠵᠤ ᠠᠪᠤᠭᠰᠠᠨ ᠪᠠᠭᠠ ᠬᠠᠲᠤᠨ ᠢ᠋ ᠳᠡᠭᠡᠷᠡᠮ ᠳ᠋ᠦ᠍ ᠣᠣᠯᠠᠭᠠᠯᠠᠭᠣᠯᠵᠣ ᠳᠤᠲᠠᠭᠠᠯᠭᠠᠭᠰᠠᠨ ᠨᠢ ᠲᠤᠰᠠᠯᠠᠭᠴᠢ ᠨᠣᠶᠠᠨ ᠳ᠋ᠤ᠌ ᠣᠭᠲᠣ ᠬᠠᠷᠢᠭᠤᠴᠠᠯᠭᠠ ᠦᠭᠡᠢ ᠭᠡᠬᠦ ᠶᠢᠨ ᠠᠷᠭᠠ ᠦᠭᠡᠢ᠃ ᠲᠡᠭᠡᠭᠡᠳ ᠪᠠᠭᠠ ᠬᠠᠲᠤᠨ ᠢ᠋ ᠠᠪᠴᠤ ᠳᠤᠲᠠᠭᠠᠭᠰᠠᠨ ᠴᠠᠭᠠᠳᠤᠬᠢ ᠭᠠᠷᠯᠢᠭ᠋ ᠢ᠋ ᠪᠠᠷᠢᠵᠤ ᠴᠠᠭᠠᠵᠢᠯᠠᠵᠣ ᠴᠢᠳᠠᠬᠤ ᠦᠭᠡᠢ ᠪᠣᠯ ᠶᠠᠭᠤ ᠪᠣᠯᠬᠤ᠂ ᠪᠠᠭᠠ ᠬᠠᠲᠤᠨ ᠢ᠋ ᠡᠰᠡᠨ ᠮᠡᠨᠳᠦ ᠬᠦᠩ ᠨᠣᠶᠠᠨ ᠳ᠋ᠤ᠌ ᠪᠠᠷᠠᠭᠠᠳᠣᠭᠣᠯᠵᠣ ᠡᠰᠡ ᠴᠢᠳᠠᠪᠠᠯ ᠶᠠᠭᠠᠬᠢᠬᠤ ᠪᠠᠨ ᠲᠣᠳᠣᠷᠬᠠᠢ ᠮᠡᠳᠡᠬᠦ ᠶᠢᠨ ᠬᠤᠪᠢ ᠳ᠋ᠤ᠌ ᠮᠢᠩᠭᠠᠨᠪᠣᠣ ᠪᠡᠶᠡ ᠳ᠋ᠡᠭᠡᠨ ᠢᠲᠡᠭᠡᠯ ᠲᠡᠢ ᠪᠠᠢᠯᠠ᠃ ᠠᠮᠢᠳᠤᠷᠠᠯ ᠤ᠋ᠨ ᠬᠤᠵᠢᠷ ᠳᠠᠪᠤᠰᠤᠨ ᠳ᠋ᠤ᠌ ᠤᠬᠠᠭᠠᠨ ᠴᠢᠳᠠᠯ ᠢ᠋ᠶ᠋ᠠᠨ ᠣᠯᠠᠨ ᠵᠢᠯ ᠳᠠᠪᠤᠰᠤᠯᠠᠵᠤ ᠶᠠᠪᠤᠭᠰᠠᠨ ᠬᠠᠰᠢᠷ ᠲᠣᠯᠣᠭᠠᠢ《ᠪᠠᠭᠠ ᠬᠠᠲᠤᠨ ᠳᠤᠲᠠᠭᠠᠴᠢᠬᠠᠯᠠ》ᠭᠡᠬᠦ ᠳ᠋ᠦ᠍ ᠰᠦᠢᠳ ᠮᠥᠢᠳ ᠪᠣᠯᠤᠭᠰᠠᠨ ᠴᠤ᠌ ᠦᠭᠡᠢ《ᠪᠠᠭᠠ ᠬᠠᠲᠤᠨ ᠰᠢᠨᠡ ᠣᠷᠴᠢᠨ ᠳ᠋ᠤ᠌ ᠳᠠᠳᠬᠤ ᠦᠭᠡᠢ ᠬᠡᠦᠬᠡᠳ ᠰᠢᠭ ᠵᠣᠵᠢᠭᠯᠠᠵᠤ ᠳᠤᠲᠠᠭᠠᠭᠰᠠᠨ ᠪᠣᠯ ᠬᠠᠮᠢᠭᠠ ᠬᠣᠯᠠᠳᠠᠬᠤ ᠪᠣᠢ? ᠬᠠᠷᠢᠨ ᠵᠠᠯᠠᠭᠤᠰ ᠬᠣᠭᠣᠷᠣᠨᠳᠣ ᠪᠠᠨ ᠢᠨᠠᠭ ᠳᠤᠷᠠᠯᠠᠯ ᠤ᠋ᠨ ᠰᠢᠵᠢᠮ ᠳ᠋ᠦ᠍ ᠠᠷᠭᠠᠮᠵᠢᠭᠳᠠᠨ ᠵᠢᠯᠢᠭᠰᠡᠠ ᠴᠤ᠌ ᠪᠣᠯ ᠶᠠᠭᠠᠬᠢᠬᠤ ᠪᠣᠢ ᠳᠠ! ᠮᠠᠭᠤ ᠰᠠᠢᠨ ᠬᠡᠦᠬᠡᠳ ᠦ᠋ᠳ ᠡᠪᠦᠭᠡᠨ ᠨᠠᠳᠠ ᠲᠠᠢ ᠨᠢᠭᠤᠯᠴᠠᠭᠠ ᠨᠠᠭᠠᠳᠤᠭᠠ ᠰᠢᠭ᠋ ᠭᠠᠵᠠᠷ ᠤ᠋ᠨ ᠠᠩ ᠢᠶᠡᠷ ᠣᠷᠣᠴᠢᠬᠠᠬᠤ ᠦᠭᠡᠢ ᠯᠡ ᠪᠢᠰᠢ ᠪᠣᠯ ᠠᠯᠢᠶᠠ ᠪᠡᠴᠢᠨ ᠠᠷᠪᠠᠨ ᠲᠦᠮᠡᠨ ᠭᠠᠵᠠᠷ ᠲᠣᠩᠭᠣᠷᠴᠠᠬᠯᠰᠠᠠ ᠴᠤ᠌ ᠪᠤᠷᠬᠠᠨ ᠪᠠᠭᠰᠢ ᠶᠢᠨ ᠠᠯᠠᠭᠠᠨ ᠡᠴᠡ ᠮᠤᠯᠲᠤᠷᠠᠬᠤ ᠦᠭᠡᠢ ᠭᠡᠭᠴᠢ ᠶ᠋ᠢᠨ ᠦᠯᠢᠭᠡᠷ ᠯᠡ ᠪᠣᠯᠤᠨᠠ ᠳᠠ᠃ ᠮᠠᠭᠤ ᠰᠠᠢᠨ ᠬᠡᠦᠬᠡᠳ ᠦ᠋ᠳ ᠳᠡᠮᠡᠢ ᠯᠡ ᠪᠡᠶᠡ ᠪᠡᠨ ᠵᠣᠪᠠᠭᠠᠭᠰᠠᠨ ᠪᠣᠯᠤᠨᠠ ᠳᠠ ᠬᠥᠭᠡᠷᠦᠬᠦᠢ!》 ᠭᠡᠵᠦ ᠳᠠᠩᠴᠤ ᠪᠠᠷᠳᠠᠮ ᠰᠠᠨᠠᠭᠰᠠᠨ ᠨᠢ ᠪᠤᠷᠤᠭᠤᠳᠴᠤ ᠶᠣᠰᠣᠲᠠᠢ ᠪᠠᠰᠤᠭᠰᠠᠨ ᠡᠪᠡᠰᠦ ᠪᠠᠭᠠᠳᠠᠭ ᠬᠠᠳᠬᠤᠭᠰᠠᠨ ᠶᠠᠪᠤᠳᠠᠯ ᠪᠣᠯᠵᠠᠢ᠃ ᠪᠠᠭᠠ ᠬᠠᠲᠤᠨ ᠢ᠋ ᠠᠪᠴᠤ ᠳᠤᠲᠠᠭᠠᠭᠰᠠᠨ ᠴᠠᠭᠠᠳᠤᠬᠢ《ᠬᠤᠯᠠᠭᠠᠢ》ᠭᠡᠭᠴᠢ ᠰᠦᠷᠡᠬᠡᠢ ᠡᠷᠡ ᠪᠠᠢᠵᠠᠢ᠃ ᠯᠠᠪ ᠯᠠ ᠣᠢᠷᠠ ᠶ᠋ᠢᠨ《ᠬᠤᠯᠠᠭᠠᠢ》ᠪᠢᠰᠢ᠂ ᠰᠦᠷᠡᠬᠡᠢ ᠬᠣᠯᠠ ᠬᠠᠷᠠᠢᠳᠠᠭ᠂ ᠮᠣᠷᠢ ᠤᠨᠤᠭᠠᠨ ᠳ᠋ᠤ᠌ ᠲᠠᠵᠢ ᠦᠭᠡᠢ ᠬᠠᠰᠢᠷ ᠲᠣᠯᠣᠭᠠᠢ ᠪᠠᠢᠵᠤ ᠴᠢᠷᠠᠢ᠃ ᠪᠦᠷᠦᠭ ᠬᠠᠷᠠᠩᠭᠤᠢ ᠶ᠋ᠢ ᠳᠠᠯᠢᠮᠳᠠᠭᠤᠯᠵᠤ ᠡᠪᠦᠭᠡᠨ ᠨᠠᠮᠠᠶ᠋ᠢ ᠬᠠᠭᠤᠷᠴᠤ ᠵᠦᠭ ᠪᠤᠷᠤᠭᠤᠯᠠᠨ ᠳᠤᠲᠠᠭᠠᠴᠢᠬᠠᠳᠠᠭ ᠰᠠᠢᠨ ᠡᠷᠡ ᠨᠠᠳᠠ ᠴᠥᠭᠡᠨ ᠲᠣᠬᠢᠶᠠᠯᠳᠣᠭᠰᠠᠠ ᠳᠠ! ᠵᠠ᠂ ᠲᠡᠭᠡᠭᠡᠳ ᠴᠠᠭᠠᠳᠤᠬᠢ ᠨᠢ ᠶᠠᠮᠠᠷ ᠴᠤ᠌ ᠪᠠᠢᠭ ᠶᠠᠭᠤ ᠴᠤ᠌ ᠭᠡᠰᠡᠨ ᠰᠢᠨᠳᠠᠰᠤ ᠲᠠᠢ ᠲᠦᠷᠦᠭᠰᠠᠠ ᠰᠠᠢᠨ ᠡᠷᠡ ᠶᠢᠨ ᠨᠢᠭᠡ ᠪᠠᠢᠭᠠ ᠪᠠᠨ ᠲᠠᠨᠢᠭᠤᠯᠤᠯᠠ᠃ ᠡᠰᠡ ᠲᠡᠢᠮᠦ ᠪᠣᠯ ᠶᠠᠭᠠᠬᠢᠵᠤ ᠪᠦᠳᠦᠭᠦᠨ ᠵᠢᠷᠦᠬᠡᠯᠡᠵᠦ ᠬᠦᠩ ᠨᠣᠶᠠᠨ ᠤ᠋ ᠬᠠᠯᠠᠭᠤᠨ ᠡᠪᠦᠷ ᠡᠴᠡ ᠬᠠᠲᠤᠨ ᠢ᠋ ᠨᠢ ᠤᠷᠭᠤᠭᠤᠯᠬᠤ ᠭᠡᠨᠡᠨ ᠦᠢᠯᠡ ᠦᠢᠯᠡᠳᠬᠦ ᠪᠢᠯᠡ⁈ ᠪᠠᠷᠢᠭᠳᠠᠬᠤ ᠶᠤᠮ ᠪᠣᠯ ᠴᠤ᠌ ᠮᠠᠭᠤ ᠪᠦᠡᠳᠥᠭᠡᠷ ᠡᠴᠡ ᠪᠡᠨ ᠰᠠᠯᠤᠨᠠ ᠳᠠ! ᠭᠡᠪᠡᠴᠦ ᠨᠠᠨ ᠰᠠᠢᠨ ᠡᠷᠡ ᠶ᠋ᠢ ᠮᠥᠷᠳᠡᠵᠦ ᠣᠭᠣᠰᠣᠷᠯᠠᠭᠠᠳ ᠬᠦᠩ ᠨᠣᠶᠠᠨ ᠤ᠋ ᠡᠮᠦᠨᠡ ᠰᠥᠭᠥᠳᠬᠡᠨ ᠴᠠᠭᠠᠨ ᠵᠣᠭᠣᠰ ᠬᠠᠩᠭᠢᠨᠠᠭᠤᠯᠤᠨ ᠱᠠᠩᠭᠢᠨᠠᠭᠣᠯᠬᠣ ᠶ᠋ᠢ ᠮᠢᠩᠭᠠᠨᠪᠣᠣ ᠳᠤᠷᠠᠯᠠᠭᠠ ᠦᠭᠡᠢ᠃ ᠬᠠᠷᠢᠨ ᠬᠠᠮᠢᠭᠠ ᠨᠢᠭᠡ ᠳᠠᠯᠳᠠ ᠠ᠋ᠴᠠ ᠬᠠᠨ ᠮᠤᠨᠠ ᠶ᠋ᠢᠨ ᠰᠠᠬᠢᠭᠤᠰᠤ᠄《ᠨᠠᠨ ᠰᠠᠢᠨ ᠡᠷᠡ ᠶ᠋ᠢ ᠲᠠᠯᠪᠢᠵᠤ ᠶᠠᠪᠤᠭᠤᠯ! ᠪᠢᠲᠡᠭᠡᠢ ᠨᠢᠭᠦᠯ ᠬᠢᠭᠡᠳ ᠪᠠᠢ! ᠮᠢᠩᠭᠠᠨᠪᠣᠣ ᠴᠢ ᠬᠤᠪᠢᠯᠴᠡᠴᠡᠭ ᠲᠤ ᠨᠢᠭᠦᠯ ᠬᠢᠭᠰᠡᠨ ᠢ᠋ᠶ᠋ᠡᠨ ᠴᠢᠮᠠᠯᠠᠵᠤ ᠥᠨᠥᠳᠥᠷ ᠢᠷᠦᠭᠡᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠭᠤᠯᠵᠠᠭᠰᠠᠨ ᠡᠨᠡ ᠬᠣᠶᠠᠷ ᠤ᠋ᠨ ᠵᠢᠷᠭᠠᠯ ᠢ᠋ ᠪᠠᠯᠠᠯᠵᠤ ᠶᠠᠪᠤᠬᠤ ᠨᠢ ᠤᠤ?》ᠭᠡᠰᠡᠨ ᠬᠠᠮ ᠪᠦᠳᠦᠭᠦᠨ ᠬᠣᠭᠣᠯᠠᠢ ᠲᠡᠭᠦᠨ ᠢ᠋ ᠵᠠᠩᠳᠤᠷᠬᠤ ᠰᠢᠭ᠋ ᠪᠣᠯᠬᠤ ᠳ᠋ᠤ᠌ ᠮᠢᠩᠭᠠᠨᠪᠤᠤ ᠪᠠᠭᠠ ᠬᠠᠲᠤᠨ ᠢ᠋ ᠡᠷᠬᠡ ᠦᠭᠡᠢ ᠦᠷᠦ ᠡᠪᠡᠳᠪᠡ᠃
《 ＜ ᠭᠣᠮᠣᠳᠠᠭᠠᠬᠤ ᠪᠠᠷ ᠭᠣᠮᠣᠳᠠᠭᠠ᠂ ᠡᠮᠡ ᠬᠥᠮᠦᠨ ᠢ᠋ ᠪᠢᠲᠡᠭᠡᠢ ᠭᠣᠮᠣᠳᠠᠭᠠ＞ ᠭᠡᠳᠡᠭ ᠢ᠋ᠶ᠋ᠡᠷ ᠪᠠᠭᠠ ᠬᠠᠲᠤᠨ ᠤ᠋ ᠬᠤᠪᠢ ᠲᠠᠪᠢᠯᠠᠩ ᠢ᠋ ᠴᠢᠳᠥᠷᠯᠡᠵᠦ ᠭᠣᠮᠣᠳᠠᠭᠠᠬᠤ ᠶ᠋ᠢᠨ ᠶᠡᠬᠡ ᠪᠡᠷ ᠭᠣᠮᠣᠳᠠᠭᠠᠯᠠ᠁ ᠬᠠᠨ ᠮᠤᠨᠢ ᠶ᠋ᠢᠨ ᠰᠠᠬᠢᠭᠤᠰᠤ ᠮᠢᠨᠢ ᠥᠴᠦᠬᠡᠨ ᠲᠤᠰᠠᠯᠠᠭᠴᠢ ᠨᠠᠮᠠᠶ᠋ᠢ ᠪᠠᠨ ᠥᠷᠥᠰᠢᠶᠡᠭᠡᠴᠢ! ᠬᠠᠷᠢᠨ ᠴᠠᠭᠠᠳᠤ ᠰᠠᠢᠨ ᠡᠷᠡ ᠶ᠋ᠢ ᠪᠣᠯ ᠲᠠᠯᠪᠢᠵᠤ ᠶᠠᠪᠤᠭᠤᠯᠤᠭᠰᠠᠨ ᠠ᠋! ᠲᠠ ᠬᠠᠷᠠᠭᠰᠠᠨ ᠪᠠᠢᠯᠭᠦᠢ! ᠭᠡᠬᠦ ᠳ᠋ᠡᠭᠡᠨ ᠪᠢ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠶ᠋ᠢᠨ ᠱ᠌ᠢᠷᠦᠨ ᠵᠢᠩᠰᠡᠨ ᠳ᠋ᠦ᠍ ᠳᠠᠷᠤᠭᠳᠠᠭᠰᠠᠨ ᠥᠴᠦᠬᠡᠨ ᠪᠤᠳᠤᠯ ᠤ᠋ᠨ ᠬᠤᠪᠢ ᠳ᠋ᠤ᠌ ᠪᠠᠭᠠ ᠬᠠᠲᠤᠨ ᠢ᠋ ᠬᠦᠩ ᠨᠣᠶᠠᠨ ᠳ᠋ᠤ᠌ ᠡᠰᠡᠨ ᠮᠡᠨᠳᠦ ᠪᠠᠷᠠᠳᠠᠭᠤᠯᠬᠤ ᠨᠢ ᠮᠢᠨᠦ ᠠᠯᠪᠠ ᠡᠭᠦᠷᠭᠡ ᠪᠣᠢ ᠊ᠢᠡ᠁》 ᠭᠡᠵᠦ ᠲᠡᠷᠲᠡᠭᠡ ᠪᠠᠷᠠᠭᠤᠨ ᠬᠣᠢᠨᠠ ᠰᠦᠭᠯᠡᠢᠨ ᠰᠦᠨᠳᠡᠷᠯᠡᠭᠰᠡᠨ ᠬᠠᠨ ᠮᠤᠨᠠ ᠶ᠋ᠢᠨ ᠣᠷᠭᠢᠯ— ᠰᠢᠷᠠ ᠣᠷᠣᠢ③ ᠥᠭᠡᠳᠡ ᠬᠠᠷᠠᠨ ᠰᠡᠳᠬᠢᠯ ᠳ᠋ᠡᠭᠡᠨ ᠵᠠᠯᠪᠠᠷᠢᠨ ᠳᠠᠭᠠᠳᠬᠠᠪᠠ᠃
ᠮᠤᠨᠠ ᠶ᠋ᠢᠨ ᠰᠢᠷᠠ ᠣᠷᠣᠢ ᠶ᠋ᠢᠨ ᠱᠣᠪᠬᠣ ᠣᠷᠭᠢᠯ ᠠ᠋ᠴᠠ ᠠᠷᠭᠠᠯ ᠤ᠋ᠨ ᠤᠲᠤᠭᠠ ᠰᠢᠭ᠋ ᠴᠡᠩᠬᠡᠷ ᠴᠠᠭᠠᠨ ᠡᠭᠦᠯᠡᠰ ᠤᠷᠭᠤᠵᠤ ᠶᠠᠭᠤ ᠨᠢᠭᠡ ᠶ᠋ᠢ ᠪᠢᠴᠢᠭᠯᠡᠭᠰᠡᠨ ᠬᠠᠳᠠᠭ ᠴᠠᠭᠠᠰᠤ ᠰᠢᠭ᠋ ᠲᠡᠭᠦᠨ ᠦ᠌ ᠵᠦᠭ ᠨᠡᠭᠦᠳᠡᠯᠯᠡᠨ ᠠᠢᠰᠤᠢ ᠳ᠋ᠤ᠌ ᠳᠣᠲᠣᠷᠠ ᠪᠠᠨ ᠶᠠᠭᠤ ᠨᠢᠭᠡ ᠶ᠋ᠢ ᠪᠣᠳᠣᠭᠰᠠᠨ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ ᠣᠯᠵᠤ ᠤᠩᠰᠢᠭᠠᠳ ᠵᠣᠪᠬᠢ ᠨᠢ ᠴᠢᠭᠢᠭᠲᠦᠵᠦ ᠡᠷᠬᠡ ᠦᠭᠡᠢ ᠬᠠᠮᠠᠷ ᠨᠢ ᠱᠠᠷᠬᠢᠷᠠᠪᠠ᠃
ᠲᠡᠷᠡ ᠵᠤᠯᠠᠷᠠᠭᠰᠠᠨ ᠴᠡᠩᠬᠡᠷ ᠴᠠᠭᠠᠨ ᠡᠭᠦᠯᠡᠨ ᠡᠴᠡ ᠳᠤᠰᠤᠭᠠᠨᠠᠭᠰᠠᠨ ᠪᠣᠷᠣᠭᠠᠨ ᠤ᠋ ᠳᠤᠰᠤᠯ ᠰᠡᠷᠪᠡᠭᠡᠨᠡᠨ ᠥᠩᠭᠡᠷᠡᠬᠦ ᠳ᠋ᠦ᠍ ᠮᠢᠩᠭᠠᠨᠪᠤᠤ ᠶ᠋ᠢᠨ ᠮᠡᠯᠮᠡᠢ ᠡᠴᠡ ᠣᠨᠳᠣᠷᠣᠭᠰᠠᠨ ᠨᠢᠯᠪᠤᠰᠤ ᠶ᠋ᠢ ᠤᠬᠢᠶᠠᠭᠰᠠᠨ ᠪᠣᠯᠪᠠᠴᠤ ᠰᠡᠳᠬᠢᠯ ᠦ᠋ᠨ ᠢᠭᠲᠦᠯᠦᠯ ᠢ᠋ ᠨᠢ ᠠᠷᠢᠯᠭᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃
᠁
ᠴᠡᠩᠬᠡᠷ ᠴᠠᠭᠠᠨ ᠡᠭᠦᠯᠡ ᠨᠢ ᠭᠠᠷᠪᠠᠯ
ᠴᠢᠭᠢᠭ ᠨᠢ ᠤᠨᠠᠳᠠᠭ ᠶᠤᠮ ᠬᠦ
ᠴᠢᠩᠳᠠ ᠰᠡᠳᠬᠢᠯ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠪᠠᠯ
ᠴᠢᠭᠯᠡᠭᠡᠳ ᠢᠷᠡᠯᠭᠦᠢ ᠳᠡ᠁
ᠰᠠᠭᠠᠯᠢ ᠪᠠᠨ ᠪᠠᠷᠢᠭᠠᠳ ᠰᠠᠷᠬᠤᠳ ᠤ᠋ᠨ ᠳᠡᠭᠡᠵᠢ ᠪᠡᠷ
ᠰᠠᠭᠠᠲᠠᠭᠤᠯᠵᠤ ᠪᠠᠢᠬᠤᠯᠠᠷ
ᠰᠠᠭᠠᠳ ᠨᠢ ᠣᠷᠣᠭᠰᠠᠨ ᠰᠸᠳᠡᠩ ᠦᠵᠡᠩ ᠨᠢ
ᠰᠠᠨᠳᠤᠷᠤᠭᠤᠯᠤᠭᠠᠳ ᠭᠣᠷᠢ ᠦᠭᠡᠢ ᠳᠡ᠁ ᠭᠡᠵᠦ ᠬᠣᠪᠢᠯᠴᠡᠴᠡᠭ ᠦ᠋ᠨ ᠡᠮᠲᠡᠷᠡᠭᠰᠡᠨ ᠡᠪᠬᠡᠷᠡᠯᠲᠡᠢ ᠤᠶᠠᠷᠠᠭᠤᠨ ᠳᠠᠭᠤᠤ ᠶ᠋ᠢᠨ ᠠᠶᠠᠰ ᠲᠤ ᠬᠥᠲᠥᠯᠦᠭᠳᠡᠨ ᠰᠡᠳᠬᠢᠯ ᠨᠢ ᠠᠯᠤᠰ ᠤ᠋ᠨ ᠭᠣᠪᠢ ᠤᠷᠤᠭᠤ ᠲᠡᠮᠡᠦᠯᠪᠡ᠃
ᠲᠥᠭᠡᠨᠡᠭᠰᠡᠨ ᠨᠠᠷᠠᠨ ᠤ᠋ ᠣᠢᠯᠲᠠ ᠳ᠋ᠤ᠌ ᠵᠡᠷᠭᠡᠯᠭᠡᠨ ᠲᠣᠭᠯᠠᠭᠤᠯᠵᠤ ᠵᠡᠭᠡᠷᠡ ᠪᠡᠯᠴᠢᠭᠡᠭᠰᠡᠨ ᠲᠣᠷᠭᠠᠨ ᠡᠯᠡᠰᠦᠨ ᠳᠡᠭᠡᠷᠡ ᠥᠩᠭᠥᠷᠢᠳᠡᠨ ᠬᠠᠩᠭᠢᠨᠠᠲᠠᠯᠠ ᠬᠠᠰᠬᠢᠷᠴᠤ᠂ ᠡᠩᠰᠡᠷᠡᠲᠠᠯᠡ ᠢᠷᠬᠠᠯᠠᠨ ᠭᠢᠩᠰᠢᠭᠰᠡᠨ ᠬᠣᠪᠢᠯᠴᠡᠴᠡᠭ᠄
— ᠮᠢᠩᠭᠠᠨᠪᠤᠤ ᠠᠬᠠ ᠮᠢᠨᠢ᠂ ᠶᠠᠭᠠᠬᠢᠵᠤ ᠰᠠᠢᠬᠠᠨ ᠵᠢᠷᠭᠠᠭᠤᠯᠤᠭᠠ ᠭᠡᠭᠴᠢ ᠡᠨᠡ ᠪᠣᠢ? ᠨᠠᠮᠠᠶ᠋ᠢ ᠪᠠᠨ ᠠᠬᠢᠭᠠᠳ ᠴᠢᠩᠭᠠᠬᠠᠨ ᠲᠡᠪᠡᠷᠢᠭᠡᠴᠢ!᠁ ᠠᠶᠠ! ᠶᠠᠮᠠᠷ ᠰᠠᠢᠬᠠᠨ ᠪᠣᠢ! ᠬᠣᠷᠸᠠ ᠳᠤ ᠡᠭᠦᠨ ᠡᠴᠡ ᠰᠠᠢᠬᠠᠨ ᠵᠢᠷᠭᠠᠯ ᠪᠠᠰᠠ ᠪᠠᠢᠨᠠ ᠤᠤ? ᠬᠣᠩᠭᠣᠷ ᠠᠬᠠ ᠮᠢᠨᠢ!᠁ ᠠᠬᠠ ᠠ᠋᠂ ᠪᠢᠲᠡᠭᠡᠢ ᠨᠠᠳᠠ ᠠ᠋ᠴᠠ ᠰᠠᠯᠤᠭᠠᠴᠢ᠂ ᠮᠡᠳᠡᠪᠡ ᠤᠤ? ᠭᠡᠵᠦ ᠬᠤᠯᠤᠰᠤ ᠰᠢᠭ᠋ ᠨᠠᠷᠢᠨ ᠠᠷᠪᠠᠨ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠮᠢᠩᠭᠠᠨᠪᠤᠤ ᠶ᠋ᠢᠨ ᠰᠢᠨᠡ ᠳᠠᠭᠠᠭᠠᠳ ᠡᠷᠦ ᠤᠷᠤᠭᠤ ᠨᠢ ᠬᠤᠤᠰᠠᠷᠠᠭᠰᠠᠨ ᠰᠠᠬᠠᠯ ᠲᠠᠢ ᠬᠠᠴᠠᠷ ᠢ᠋ ᠨᠢ ᠬᠤᠮᠢᠨ ᠢᠯᠪᠢᠵᠦ《 ᠮᠢᠩᠭᠠᠨᠪᠤᠤ ᠠᠬᠠ ᠠ᠋! ᠴᠢ ᠪᠣᠯ ᠶᠣᠰᠣᠲᠠᠢ ᠡᠷᠡ ᠬᠥᠮᠦᠨ! ᠮᠢᠨᠤ ᠬᠠᠢᠷᠠ ᠶ᠋ᠢᠨ ᠴᠡᠴᠡᠭ ᠢ᠋ ᠬᠠᠨᠲᠠᠯᠠ ᠤᠮᠳᠠᠯᠠᠵᠤ ᠴᠢᠳᠠᠳᠠᠭ ᠭᠠᠭᠴᠠ ᠡᠷᠡ ᠬᠥᠮᠥᠨ ᠪᠣᠯ ᠴᠢ ᠯᠡ ᠪᠠᠢᠬᠤ ᠶᠣᠰᠣᠲᠠᠢ! ᠪᠢ ᠴᠢᠮᠠ ᠠ᠋ᠴᠠ ᠰᠠᠯᠵᠤ ᠴᠢᠳᠠᠬᠤ ᠦᠭᠡᠢ》 ᠭᠳ ᠤᠷᠤᠭᠤᠯ ᠢ᠋ᠶ᠋ᠠᠨ ᠴᠣᠷᠪᠣᠢᠯᠭᠠᠨ ᠦᠨᠦᠰᠦᠨᠡ᠃
— ᠲᠡᠢᠮᠦ ᠠ᠋ ! ᠪᠢ ᠴᠦ᠍ ᠴᠢᠮᠠ ᠠ᠋ᠴᠠ ᠰᠠᠯᠵᠤ ᠴᠢᠳᠠᠬᠤ ᠦᠭᠡᠢ᠃ ᠬᠣᠪᠢᠯ ᠮᠢᠨᠢ! ᠭᠡᠳ ᠮᠢᠩᠭᠠᠨᠪᠤᠤ ᠬᠣᠪᠢᠯᠴᠡᠴᠡᠭ ᠦ᠋ᠨ ᠬᠥᠬᠥᠨ ᠦ᠌ ᠬᠢᠨᠢ ᠶᠠᠭᠠᠪᠲᠤᠷ ᠬᠦᠷᠡᠩ ᠴᠡᠴᠡᠭ ᠢ᠋ ᠦᠬᠦᠭᠡᠷᠲᠦᠨ ᠦᠨᠦᠰᠴᠦ《 ᠪᠢ ᠴᠢᠨᠦ ᠡᠨᠡ ᠰᠡᠷᠪᠡᠩ ᠦ᠋ᠨ ᠬᠣᠶᠠᠷ ᠲᠣᠯᠣᠭᠠᠢ ᠶ᠋ᠢᠨ ᠬᠣᠭᠣᠷᠣᠨᠳᠣ ᠮᠥᠩᠬᠡ ᠨᠤᠲᠤᠭᠯᠠᠶᠠ!᠁》 ᠭᠡᠬᠦ ᠮᠡᠲᠦ ᠬᠣᠪᠢᠯᠴᠡᠴᠡᠭ᠄
— ᠲᠡᠭᠡ ᠯᠡ ᠳᠡ! ᠡᠨᠡ ᠰᠠᠢᠬᠠᠨ ᠨᠤᠲᠤᠭ ᠠ᠋ᠴᠠ ᠰᠠᠯᠪᠠᠯ ᠴᠢ ᠨᠠᠰᠤᠨ ᠲᠤᠷᠰᠢ ᠪᠡᠶᠡ ᠳ᠋ᠡᠭᠡᠨ ᠭᠣᠮᠣᠳᠠᠨᠠ ᠰᠢᠦ! ᠠᠭᠤᠯᠠ ᠲᠠᠢ ᠤᠰᠤ ᠲᠠᠢ᠂ ᠮᠣᠳᠣ ᠲᠠᠢ ᠴᠡᠴᠡᠭ ᠲᠡᠢ᠂ ᠪᠤᠯᠠᠭ ᠲᠠᠢ ᠪᠤᠲᠠ ᠲᠠᠢ ᠁ ᠰᠠᠢᠬᠠᠨ ᠨᠤᠲᠤᠭ ᠲᠤ᠌ ᠨᠤᠲᠤᠭᠯᠠᠵᠤ ᠰᠠᠭᠤᠬᠤ ᠳ᠋ᠤ᠌ ᠰᠡᠳᠬᠢᠯ ᠳᠡᠩᠰᠡᠯᠬᠦ ᠦᠭᠡᠢ ᠠ᠋! ᠲᠡᠢᠮᠦ ᠤᠤ? ᠭᠡᠯᠡ᠃
— ᠲᠡᠢᠮᠦ ᠠ᠋! ᠬᠤᠸᠠ ᠴᠠᠭᠠᠨ ᠡᠯᠡᠰᠦᠨ ᠳᠡᠭᠡᠭᠦᠷ ᠨᠢ ᠠᠯᠬᠤᠬᠤ ᠳ᠋ᠤ᠌ ᠬᠣᠲᠣᠯᠵᠠᠬᠤ ᠠ᠋ᠴᠠ ᠪᠢᠰᠢ ᠤᠷᠤᠮ ᠮᠥᠷ ᠭᠠᠷᠳᠠᠭ ᠦᠭᠡᠢ᠂ ᠬᠣᠨᠳᠣ ᠳᠡᠷᠡᠰᠦᠨ ᠳ᠋ᠦ᠍ᠨᠢ ᠨᠢᠭᠤᠯᠴᠠᠵᠤ ᠨᠠᠭᠠᠳᠬᠤ ᠳ᠋ᠤ᠌ ᠰᠡᠳᠬᠢᠯ ᠤᠢᠳᠬᠤ ᠦᠭᠡᠢ᠂ ᠬᠠᠷᠠᠵᠠ ᠪᠤᠯᠠᠭ ᠤ᠋ᠨ ᠬᠢᠨᠢ ᠤᠰᠤᠨ ᠠ᠋ᠴᠠ ᠨᠢ ᠤᠮᠳᠠᠯᠠᠬᠤ ᠳ᠋ᠤ᠌ ᠤᠤᠭᠤᠭᠠᠳ ᠬᠠᠨᠤᠰᠢ ᠦᠭᠡᠢ ᠨᠢ ᠰᠣᠨᠢᠨ ᠶᠤᠮ ᠠ᠋!
— ᠲᠡᠢᠮᠦ ᠠ᠋᠂ ᠡᠨᠡ ᠰᠠᠢᠬᠠᠨ ᠨᠤᠲᠤᠭ ᠲᠤ᠌ ᠠᠮᠢᠳᠤᠷᠠᠵᠤ᠂ ᠦᠷᠡ ᠲᠡᠢ ᠥᠪ ᠲᠡᠢ ᠪᠣᠯᠵᠤ ᠨᠠᠰᠤᠨ ᠲᠤᠷᠰᠢ ᠵᠢᠷᠭᠠᠨᠠ!
— ᠠᠬᠠ ᠠ᠋! ᠭᠠᠷ ᠢ᠋ᠶ᠋ᠠᠨ ᠨᠠᠭᠠᠰᠢ ᠪᠠᠨ! ᠭᠡᠵᠦ ᠲᠡᠭᠦᠨ ᠦ᠌ ᠪᠠᠷᠪᠠᠭᠠᠷ ᠭᠠᠷ ᠢ᠋ ᠬᠡᠪᠡᠯᠢ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠭᠠᠳ《ᠲᠠ ᠦᠵᠡ᠂ ᠡᠨᠳᠡ ᠶᠠᠭᠤ ᠬᠥᠳᠡᠯᠵᠦ ᠪᠠᠢᠨᠠ? ᠪᠢ ᠬᠡᠦᠬᠡᠳ ᠣᠯᠴᠢᠬᠠᠯᠠ᠃ ᠪᠢᠳᠡ ᠬᠣᠶᠠᠭᠤᠯᠠ ᠶ᠋ᠢᠨ ᠁ 》ᠭᠡᠳ ᠴᠢᠷᠠᠢ ᠨᠢ ᠨᠢᠯᠴᠢᠭᠢᠨᠡᠪᠡ᠃
— ᠶᠠᠭᠠᠬᠢᠭᠰᠠᠨ ᠰᠠᠢᠬᠠᠨ ᠪᠣᠢ! ᠴᠢ ᠪᠢᠳᠡ ᠬᠣᠶᠠᠷ ᠦᠷᠡ ᠲᠡᠢ ᠪᠣᠯᠬᠤ ᠨᠢ᠃
— ᠶᠠᠭ ᠳᠠ!
᠁
ᠬᠥᠪᠡᠭᠡ ᠬᠢᠵᠠᠭᠠᠷ ᠨᠢ ᠬᠠᠷᠠᠭᠳᠠᠬᠤ ᠦᠭᠡᠢ ᠠᠭᠤᠳᠠᠮ ᠭᠣᠪᠢ ᠶ᠋ᠢᠨ ᠲᠡᠷᠲᠡᠭᠡ ᠬᠡᠪᠡᠯᠢ ᠪᠡᠨ ᠴᠦᠷᠳᠡᠢᠯᠭᠡᠵᠦ ᠤᠬᠢᠯᠠᠩᠨᠠᠭᠰᠠᠨ ᠬᠤᠪᠢᠯᠴᠡᠴᠡᠭ ᠮᠢᠩᠭᠠᠨᠪᠤᠤ ᠳ᠋ᠤ᠌ ᠪᠥᠷᠲᠥᠯᠵᠡᠨ ᠬᠠᠷᠠᠭᠳᠠᠬᠤ ᠰᠢᠭ᠋ ᠪᠣᠯᠪᠠ ᠁
– – – –
① ᠤᠳᠠᠭᠠ ᠬᠠᠱᠠᠩ ᠶᠠᠪᠤᠬᠤ ᠶ᠋ᠢ ᠵᠢᠭᠠᠭᠰᠠᠨ ᠤᠳᠬᠠ ᠲᠠᠢ ᠦᠭᠡ᠃
② ᠤᠷᠠᠳ ᠨᠤᠲᠤᠭ ᠲᠤ᠌ ᠬᠢᠲᠠᠳ ᠲᠠᠷᠢᠶᠠᠴᠢᠳ ᠪᠥᠭᠡᠮᠨᠡᠷᠡᠵᠦ ᠰᠠᠭᠤᠷᠢᠰᠢᠭᠰᠠᠨ ᠲᠣᠰᠬᠣᠨ ᠢ᠋ ᠣᠲᠣᠭ ᠭᠡᠵᠦ ᠬᠡᠯᠡᠳᠡᠭ᠃
③ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠬᠠᠮᠤᠭ ᠤ᠋ᠨ ᠥᠨᠳᠥᠷ ᠰᠠᠷᠢᠳᠠᠭ ᠢ᠋ ᠨᠤᠲᠤᠭ ᠤ᠋ᠨ ᠬᠥᠮᠦᠰ ᠰᠢᠷᠠ ᠣᠷᠣᠢ ᠭᠡᠳᠡᠭ᠃ ᠥᠨᠳᠥᠷ ᠨᠢ ᠳᠠᠯᠠᠢ ᠶ᠋ᠢᠨ ᠲᠦᠪᠰᠢᠨ ᠡᠴᠡ2340 ᠮᠧᠲ᠋ᠷ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ <ᠬᠡᠯᠡ ᠪᠢᠴᠢᠭ> ᠬᠣᠯᠪᠣᠭᠠ