ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ < ᠳᠡᠭᠡᠳᠦ > – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ < ᠲᠠᠪᠤ > Хан мунын сүүрс < дээд > – Мөнх зохиоов ᠂ Тэргүүн бодь – Нэгдүгээр бүлэг <5>
506ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ < ᠲᠠᠪᠤ >
ᠲᠠᠪᠤ
ᠮᠠᠨᠴᠤᠷᠭᠠ ᠶ᠋ᠢᠨ ᠤᠳᠤᠷᠢᠳᠤᠭᠰᠠᠨ ᠴᠡᠷᠢᠭ ᠦ᠋ᠳ ᠪᠤᠭᠤᠲᠤ ᠶ᠋ᠢᠨ ᠵᠡᠭᠦᠨᠳᠡᠢᠬᠡᠨ ᠠᠳᠤᠭᠤᠨ ᠤ᠋ ᠠᠢᠯ ᠤ᠋ᠨ ᠡᠮᠦᠨᠡᠭᠦᠷ ᠤᠯᠠᠭᠠᠨ ᠬᠠᠲᠤᠨ ᠢ᠋ ᠭᠠᠲᠤᠯᠳᠠᠭ ᠰᠠᠯᠴᠢᠨ ᠣᠯᠣᠮ ᠢ᠋ ᠰᠠᠬᠢᠵᠤ ᠬᠣᠨᠣᠵᠠᠭᠠᠪᠠ᠃ ᠲᠡᠷᠡ ᠣᠷᠣᠢ ᠮᠠᠨᠴᠤᠷᠭᠠ《 ᠤᠨᠤᠭᠠ ᠮᠣᠷᠢ ᠲᠠᠢ ᠬᠥᠮᠦᠨ ᠶᠠᠭᠤ ᠭᠡᠵᠦ ᠡᠨᠡ ᠣᠯᠣᠮ ᠢ᠋ᠶ᠋ᠠᠷ ᠶᠠᠪᠤᠬᠤ ᠪᠣᠢ? ᠦᠬᠦᠯ ᠢ᠋ᠶ᠋ᠡᠨ ᠡᠷᠢᠵᠦ ᠢᠷᠡᠬᠦ ᠭᠡᠰᠡᠨ ᠯᠡ ᠪᠢᠰᠢ ᠪᠣᠯ ᠡᠴᠢᠭᠡ ᠪᠡᠨ ᠬᠢᠵᠦ ᠡᠨᠡᠭᠦᠷ ᠲᠡᠨᠦᠬᠦ ᠪᠢᠯᠡ?!》 ᠭᠡᠵᠦ ᠪᠣᠳᠤᠭᠰᠠ ᠪᠠᠨ ᠵᠥᠪᠲᠦᠭᠡᠵᠦ ᠠᠷᠪᠠᠲᠤ ᠶ᠋ᠢᠨ ᠳᠠᠷᠤᠭᠠ ᠰᠣᠣᠨᠠᠮ᠂ ᠲᠠᠪᠤᠲᠤ ᠶ᠋ᠢᠨ ᠳᠠᠷᠤᠭᠠ ᠭᠣᠢᠳᠤᠪ ᠲᠤ《 ᠢᠩᠭᠢ᠂ ᠴᠢᠩᠭᠢ》 ᠭᠡᠵᠦ ᠪᠤᠪᠡᠳᠦᠨᠡᠵᠦ ᠤᠬᠤᠨᠠᠲᠤᠴᠢᠬᠠᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠪᠤᠭᠤᠲᠤ ᠤᠷᠤᠭᠤ ᠬᠥᠳᠡᠯᠪᠡ᠃
ᠳᠡᠭᠡᠷᠡ ᠡᠴᠡ ᠨᠢ ᠡᠴᠢᠭᠡᠳᠡᠳᠡᠭ ᠨᠣᠶᠠᠨ ᠢ᠋ᠶ᠋ᠠᠨ ᠶᠠᠪᠤᠵᠤ ᠣᠳᠬᠤ ᠳ᠋ᠤ᠌ ᠳᠣᠷᠣᠭᠰᠢ ᠪᠠᠨ ᠪᠤᠰᠤᠳ ᠢ ᠡᠴᠢᠭᠡᠳᠡᠬᠦ ᠥᠴᠦᠬᠡᠨ ᠡᠷᠬᠡ ᠣᠯᠤᠭᠰᠠᠨ ᠰᠣᠳᠨᠠᠮ ᠭᠣᠢᠳᠣᠪ ᠬᠣᠶᠠᠷ ᠴᠡᠷᠢᠭ ᠲᠡᠭᠡᠨ《 ᠫᠤᠤ ᠪᠤᠭ ᠵᠠᠮᠤᠭᠯᠠᠵᠣ ᠰᠡᠷᠡᠮᠵᠢᠲᠡᠢ ᠪᠠᠢᠭᠠᠷᠠᠢ! ᠮᠣᠷᠢᠳ ᠤ᠋ᠨ ᠢ᠋ᠶ᠋ᠠᠨ ᠠᠮᠠᠭᠠᠢ ᠶ᠋ᠢ ᠰᠤᠯᠠᠯᠠᠵᠤ ᠡᠪᠡᠰᠦ ᠬᠠᠵᠠᠯᠠᠭᠤᠯᠵᠤ ᠬᠣᠨᠣ ! ᠡᠮᠡᠭᠡᠯ ᠢ ᠨᠢ ᠬᠠᠭᠤᠯᠵᠤ ᠪᠣᠯᠬᠤ ᠦᠭᠡᠢ᠂ ᠮᠡᠳᠡᠪᠡ ᠤᠤ! ᠶᠠᠭᠤ ᠨᠢᠭᠡ ᠶᠠᠭᠠᠷᠠᠯᠲᠠᠢ ᠶᠠᠪᠤᠳᠠᠯ ᠲᠣᠬᠢᠶᠠᠬᠤ ᠳ᠋ᠤ᠌ ᠴᠡᠷᠢᠭ ᠦ᠋ᠨ ᠵᠠᠷᠯᠢᠭ᠂ ᠠᠮᠠᠨ ᠳᠣᠬᠢᠶᠠ ᠪᠠᠷ ᠪᠣᠰᠢᠭᠣ ᠬᠥᠳᠡᠯᠬᠦ ᠳ᠋ᠦ᠍ ᠪᠡᠯᠡᠬᠡᠨ ᠪᠠᠢᠬᠤ ᠬᠡᠷᠡᠭᠲᠡᠢ᠃ ᠥᠨᠥ ᠰᠥᠨᠢ ᠶ᠋ᠢᠨ ᠠᠮᠠᠨ ᠳᠣᠬᠢᠶᠠ <ᠲᠠᠬᠢᠶᠠ ᠳᠤᠤᠭᠠᠷᠤᠯᠠ > ᠭᠡᠪᠡᠯ < ᠦᠦᠷ ᠴᠠᠢᠪᠠ > ᠭᠡᠰᠡᠨ ᠬᠠᠷᠢᠭᠤ ᠳᠣᠬᠢᠶᠠ ᠥᠭᠭᠦᠭᠡᠳ ᠠᠩᠬᠠ ᠲᠦᠷᠦᠭᠦᠯᠡᠭᠡᠳ ᠳᠠᠪᠬᠢᠭᠰᠠᠨ ᠮᠣᠷᠢᠨ ᠤ᠋ ᠲᠦᠪᠡᠷᠭᠡᠨ ᠦ᠌ ᠴᠢᠮᠡᠭᠡ ᠪᠡᠷ ᠠᠷᠤ ᠠ᠋ᠴᠠ ᠨᠢ ᠮᠣᠷᠳᠠ! 》ᠭᠡᠵᠦ ᠲᠤᠰᠢᠶᠠᠪᠠ᠃
ᠵᠠᠷᠯᠢᠭ ᠬᠦᠯᠢᠶᠡᠭᠰᠡᠨ ᠴᠡᠷᠢᠭ ᠦ᠋ᠳ ᠪᠦᠷᠦᠭ ᠪᠠᠷᠤᠭ ᠢ᠋ᠶ᠋ᠠᠷ ᠲᠤᠰ ᠲᠤᠰ ᠤ᠋ᠨ ᠣᠷᠣᠨ ᠪᠠᠢᠷᠢ ᠪᠠᠨ ᠡᠵᠡᠯᠡᠬᠦ ᠪᠠᠷ ᠤᠪᠤᠨ ᠴᠤᠪᠤᠨ ᠶᠠᠪᠤᠵᠤ ᠣᠴᠢᠨ᠂ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠥᠪᠡᠭᠡ ᠪᠡᠷ ᠤᠷᠭᠤᠭᠰᠠᠨ ᠵᠡᠭᠡᠰᠦ᠂ ᠬᠤᠯᠤᠰᠤ᠂ ᠰᠤᠬᠠᠢ ᠳ᠋ᠤ᠌ ᠰᠢᠷᠭᠤᠵᠤ ᠳᠠᠯᠳᠠᠷᠠᠪᠠ᠃
ᠠᠷᠪᠠ ᠲᠠᠪᠤᠬᠠᠨ ᠴᠡᠷᠢᠭ ᠡᠴᠢᠭᠡᠳᠡᠬᠦ ᠥᠴᠦᠬᠡᠨ ᠡᠷᠬᠡ ᠲᠡᠢ ᠪᠠᠢᠭᠰᠠᠨ ᠴᠤ᠌ ᠥᠨᠥᠳᠥᠷ ᠬᠠᠷᠢᠨ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠨᠣᠶᠠᠯᠠᠳᠠᠭ ᠵᠠᠩᠵᠤᠨ ᠰᠢᠬ ᠣᠭᠰᠣᠢᠭᠰᠠᠨ ᠰᠣᠳᠨᠠᠮ ᠭᠣᠢᠳᠣᠪ ᠬᠣᠶᠠᠭᠤᠯᠠ ᠳᠣᠣᠷᠠᠬᠢ ᠭᠣᠴᠢᠭᠠ ᠴᠡᠷᠢᠭ ᠢ᠋ᠶ᠋ᠡᠨ ᠪᠡᠶᠡ ᠡᠴᠡ ᠪᠡᠨ ᠵᠠᠢᠯᠠᠭᠤᠯᠵᠤ ᠬᠥᠭᠡᠭᠡᠴᠢᠭᠡᠳ ᠳᠡᠪᠡᠯ ᠢ᠋ᠶ᠋ᠡᠨ ᠳᠠᠭᠠᠭᠠᠬᠤ ᠦᠭᠡᠢ ᠳᠠᠯᠠᠨ ᠨᠠᠰᠤᠲᠠᠢ ᠶᠠᠮᠰᠢᠭᠠᠷ ᠬᠥᠭᠰᠢᠨ ᠦ᠌ ᠴᠢᠷᠠᠢ ᠰᠢᠭ᠋ ᠨᠢᠭᠡᠨ ᠬᠠᠪᠴᠢᠭ ᠭᠡᠷ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠳᠥᠭᠥᠵᠦ ᠣᠴᠢᠪᠠ᠃
ᠭᠡᠷ ᠦ᠋ᠨ ᠡᠭᠦᠳᠡᠨ ᠳᠡᠭᠡᠷᠡ ᠲᠣᠯᠣᠭᠠᠢ ᠳ᠋ᠠᠭᠠᠨ ᠬᠬᠢᠷ ᠲᠠᠭ ᠲᠠᠢ ᠭᠦᠵᠡᠭᠡᠨ ᠠᠯᠴᠢᠭᠤᠷ ᠪᠣᠭᠣᠭᠰᠠᠨ ᠲᠠᠪᠢᠭᠠᠳ ᠨᠠᠰᠤᠨ ᠤ᠋ ᠡᠪᠦᠭᠡᠵᠢᠶᠡᠷ ᠬᠥᠮᠦᠨ ᠴᠢᠭᠢᠭ ᠵᠠᠭᠤᠭᠰᠠᠨ ᠡᠪᠡᠰᠦ ᠤᠭᠤᠭᠢᠭᠤᠯᠵᠤ ᠰᠢᠮᠠᠭᠤᠯ ᠡᠦᠲᠦᠵᠦ ᠰᠠᠭᠤᠨᠠ᠃ ᠤᠯᠠᠭᠠᠨ ᠬᠠᠲᠤᠨ ᠬᠠᠪᠢ ᠶ᠋ᠢᠨ ᠨᠠᠮᠤᠷ ᠤ᠋ᠨ ᠰᠢᠮᠠᠭᠤᠯ ᠤ᠋ᠨ ᠠᠷᠪᠢᠨ ᠢ᠋ ᠬᠡᠯᠡᠨᠡ ᠤᠤ ᠂ ᠬᠥᠮᠦᠨ ᠠᠮᠢᠲᠠᠨ ᠢ᠋ ᠠᠮᠢᠳᠤ ᠪᠠᠷ ᠪᠠᠷᠢᠬᠤ ᠳ᠋ᠤ᠌ ᠣᠢᠷᠠᠬᠠᠨ᠃ ᠨᠢᠴᠦᠭᠦᠨ ᠪᠡᠶᠡ ᠱᠠᠯᠳᠠᠩ ᠮᠢᠬᠠ ᠳᠠᠭᠠᠷᠢᠯᠳᠤᠪᠠᠯ ᠨᠢᠳᠦ ᠢᠷᠮᠡᠬᠦ ᠵᠠᠭᠤᠷᠠ ᠰᠢᠯ ᠭᠡᠳᠡᠰᠦ ᠪᠡᠨ ᠴᠢᠰᠤ ᠳᠦᠭᠦᠷᠭᠡᠵᠦ ᠠᠪᠤᠭᠠᠳ《ᠢᠩ ᠁ 》ᠭᠡᠳ ᠮᠠᠩᠰᠢᠭᠤᠷᠠᠨ ᠠᠷᠢᠯᠵᠤ ᠡᠦᠲᠦᠨᠡ᠃ ᠬᠥᠮᠦᠨ ᠦ᠌ ᠬᠦᠵᠦᠭᠦᠦ ᠠᠮᠠ᠂ ᠨᠢᠭᠤᠷ ᠴᠢᠷᠠᠢ᠂ ᠭᠠᠷ ᠬᠤᠷᠤᠭᠤ᠂ ᠦᠬᠡᠷ ᠮᠠᠯ ᠤ᠋ᠨ ᠲᠣᠷᠭᠠᠨ ᠴᠠᠪᠢ᠂ ᠢᠩᠭᠡᠨ(ᠨᠢᠮᠬᠡᠨ) ᠬᠣᠩᠰᠢᠶᠠᠷ᠂ ᠨᠢᠳᠦᠨ ᠦ᠌ ᠵᠣᠪᠬᠢ ᠠᠯᠢᠨ ᠢ᠋ ᠴᠤ᠌ ᠭᠣᠯᠣᠯ ᠦᠭᠡᠢ ᠱᠣᠷᠣᠯᠠᠨ ᠰᠢᠪᠦᠭᠡᠳᠡᠵᠦ ᠬᠥᠮᠦᠨ ᠠᠮᠢᠲᠠᠨ ᠢ᠋ ᠨᠡᠭᠡᠷᠡᠨ ᠲᠡᠪᠴᠢᠶᠡᠷᠢ ᠠᠯᠳᠠᠭᠤᠯᠬᠤ ᠠᠵᠢ! ᠭᠦᠵᠡᠭᠡᠨ ᠠᠯᠴᠢᠭᠤᠷ ᠲᠠᠢ ᠲᠡᠷᠡ ᠡᠪᠦᠭᠡᠵᠢᠶᠡᠷ ᠡᠷᠡ ᠨᠢᠭᠡ ᠭᠠᠷ ᠲᠠᠭᠠᠨ ᠶᠣᠳᠠᠷ ᠠᠳᠬᠤᠨ ᠤᠭᠤᠭᠢᠭᠤᠯᠤᠭᠰᠠᠨ ᠡᠪᠡᠰᠦ ᠶ᠋ᠢ ᠭᠣᠳᠯᠠᠨ ᠰᠡᠪᠢᠵᠦ᠂ ᠨᠥᠭᠦᠭᠡ ᠭᠠᠷ ᠲᠠᠭᠠᠨ ᠣᠳᠣᠯ ᠤ᠋ᠨ ᠤᠷᠲᠤ ᠵᠠᠯᠠᠭᠠ ᠠᠳᠬᠤᠵᠤ ᠰᠢᠯᠢᠨ ᠬᠦᠵᠦᠭᠦᠦ᠂ ᠰᠢᠯᠪᠢ ᠬᠥᠯ ᠤᠷᠤᠭᠤ ᠪᠠᠨ ᠰᠢᠪᠬᠠᠷᠠᠨ ᠰᠢᠯᠪᠢᠭᠦᠷᠳᠡᠨᠡ᠃ ᠮᠠᠭᠤ ᠰᠠᠢᠨ ᠰᠢᠮᠠᠭᠤᠯ ᠤ᠋ᠳ ᠲᠡᠷᠡ ᠡᠪᠦᠭᠡᠵᠢᠶᠡᠷ ᠬᠥᠮᠦᠨ ᠢ᠋ᠶ᠋ᠡᠷ ᠵᠣᠷᠢᠭᠤᠳᠠ ᠲᠣᠭᠯᠠᠭᠠᠮ ᠬᠢᠭᠡ ᠰᠢᠭ ᠣᠳᠣᠯ ᠤ᠋ᠨ ᠵᠠᠯᠠᠭᠠ ᠪᠠᠨ ᠰᠢᠪᠬᠠᠷᠠᠬᠤ ᠪᠠᠨ ᠪᠠᠢᠬᠤ ᠵᠠᠪᠰᠢᠶᠠᠨ ᠢ᠋ ᠴᠤ᠌ ᠠᠯᠳᠠᠯ ᠦᠭᠡᠢ ᠲᠡᠷᠡᠬᠡᠨ ᠴᠢᠯᠥᠭᠡᠨ ᠳ᠋ᠦ᠍ ᠰᠢᠯᠢᠨ ᠬᠦᠵᠦᠭᠦᠦ ᠪᠤᠶᠤ ᠢᠩᠭᠡᠨ ᠴᠢᠬᠢᠯᠵᠢᠭᠦᠷ ᠤᠷᠤᠭᠤ ᠨᠢ ᠱᠤᠩᠭᠤᠭᠠᠳ ᠣᠷᠣᠨᠠ᠃ ᠨᠠᠷᠠ ᠰᠠᠯᠬᠢᠨ ᠳ᠋ᠤ᠌ ᠴᠣᠬᠢᠭᠤᠯᠤᠭᠰᠠᠭᠠᠷ ᠪᠠᠢᠵᠤ ᠬᠥᠷᠥᠰᠥᠵᠢᠨ ᠪᠣᠷᠣᠯᠠᠭᠰᠠᠨ ᠬᠦᠵᠦᠭᠦᠨ ᠳ᠋ᠤᠨᠢ ᠰᠢᠮᠠᠭᠤᠯ ᠨᠡᠯᠢᠶᠡᠳ ᠢᠳᠡᠯᠡᠬᠦ ᠦᠭᠡᠢ ᠪᠣᠯ ᠬᠥᠭᠰᠢᠨ ᠴᠢᠰᠦᠨ ᠦ ᠠᠮᠲᠠ ᠶᠢ ᠠᠮᠲᠠᠯᠠᠵᠤ ᠴᠢᠳᠠᠳᠠᠭ ᠦᠭᠡᠢ ᠪᠣᠯᠣᠯᠲᠠᠢ᠃
ᠬᠣᠶᠠᠷ ᠬᠥᠮᠥᠨ ᠳᠡᠷᠭᠡᠳᠡ ᠨᠢ ᠬᠦᠷᠴᠦ ᠢᠷᠡᠬᠦ ᠳᠦ ᠭᠠᠢᠬᠠᠰᠢ ᠠᠯᠳᠠᠨ ᠭᠠᠷ ᠲᠡᠬᠢ ᠬᠢᠳᠡᠯ ᠪᠠᠷᠢᠳᠠᠯ ᠢᠶᠠᠨ ᠠᠯᠳᠠᠭᠰᠠᠨ ᠲᠡᠷᠡ ᠡᠪᠦᠭᠡᠵᠢᠶᠡᠷ ᠡᠷᠡ ᠶᠢᠨ ᠰᠢᠯᠢᠨ ᠬᠦᠵᠦᠭᠦᠨ ᠳᠡᠭᠡᠷᠡ ᠨᠢ ᠨᠢᠭᠡ ᠰᠢᠮᠠᠭᠤᠯ ᠰᠠᠭᠤᠪᠠ ᠪᠣᠯᠣᠯᠲᠠᠢ᠃ ᠱᠣᠷᠣᠨ ᠬᠣᠰᠢᠭᠤ ᠪᠠᠨ ᠬᠤᠷᠴᠠ ᠥᠷᠥᠮᠳᠡᠭᠦᠷ ᠰᠢᠭ ᠰᠢᠭᠢᠳᠬᠡᠨ《ᠢᠩ ᠁ 》 ᠭᠡᠵᠦ ᠶᠠᠩᠬᠢᠨᠠᠨ ᠳᠠᠭᠤᠯᠠᠵᠤ ᠬᠠᠷᠠ ᠢᠳᠡ ᠪᠡᠷ ᠢᠶᠡᠨ《 ᠥᠷᠥᠮᠳᠡᠨᠡ》᠃ ᠨᠠᠷᠠ ᠰᠠᠯᠬᠢᠨ ᠳᠤ ᠪᠣᠷᠣᠯᠠᠵᠤ ᠬᠥᠷᠥᠰᠥᠵᠢᠭᠰᠡᠨ ᠳᠡᠬᠡᠨ ᠤᠤ ᠡᠰᠡᠪᠡᠯ ᠰᠢᠮᠠᠭᠤᠯ ᠳᠦ ᠬᠠᠵᠠᠭᠳᠠᠭᠰᠠᠭᠠᠷ ᠪᠠᠢᠭᠠᠳ ᠠᠷᠠᠰᠤ ᠮᠢᠬᠠ ᠨᠢ ᠲᠦᠵᠢᠷᠡᠴᠢᠭᠡᠭᠰᠡᠨ ᠴᠤ᠌ ᠶᠤᠮ ᠤᠤ ᠨᠡᠯᠢᠶᠡᠳ ᠤᠳᠠᠵᠤ ᠡᠷᠪᠡᠭᠡᠨᠡᠨ ᠵᠠᠭᠠᠲᠤᠨᠠᠬᠤᠯᠠᠷ ᠰᠢᠯᠢᠨ ᠬᠦᠵᠦᠭᠦᠦ ᠪᠡᠨ ᠫᠠᠰᠬᠢᠲᠠᠯᠠ ᠠᠯᠠᠭᠠᠳᠠᠪᠠ᠃ ᠠᠯᠠᠭᠠᠨ ᠲᠣᠲᠣᠷᠠ ᠨᠢ ᠨᠣᠢᠲᠠ ᠠᠯᠳᠠᠬᠤ ᠰᠢᠭ᠋᠃ ᠲᠡᠷᠡ ᠥᠪᠡᠷ ᠦᠨ ᠬᠢᠨᠢ ᠴᠢᠰᠤ ᠪᠠᠢᠯᠠ ᠁
ᠡᠨᠡ ᠬᠦ ᠭᠦᠵᠡᠭᠡᠨ ᠠᠯᠴᠢᠭᠤᠷ ᠲᠠᠢ ᠡᠪᠦᠭᠡᠵᠢᠶᠡᠷ ᠡᠷᠡ ᠪᠣᠯ ᠤᠯᠠᠭᠠᠨ ᠬᠠᠲᠤᠨ ᠤ ᠣᠯᠣᠮ ᠳᠡᠭᠡᠷᠡ ᠠᠷᠠᠰᠤᠨ ᠰᠡᠯ᠂ ᠮᠣᠳᠣᠨ ᠵᠡᠪᠢ ᠪᠡᠷ ᠬᠠᠲᠤᠨ ᠭᠠᠲᠤᠯᠬᠤ ᠬᠥᠮᠥᠰ ᠢ ᠨᠠᠭᠠᠰᠢ ᠴᠠᠭᠠᠰᠢ ᠵᠥᠭᠡᠭᠡᠵᠦ ᠭᠡᠳᠡᠰᠦ ᠪᠡᠨ ᠪᠣᠷᠣᠯᠠᠭᠤᠯᠳᠠᠭ ᠵᠠᠩ ᠣᠪᠣᠭ ᠲᠠᠢ ᠰᠠᠯᠴᠢᠨ ᠠᠵᠢ᠃
— ᠬᠦᠶᠢ! ᠰᠠᠯᠴᠢᠨ ᠭᠤᠸᠠᠢ᠂ ᠥᠨᠥᠳᠥᠷ ᠡᠨᠡᠭᠦᠷ ᠤᠨᠤᠭᠠ ᠲᠠᠢ ᠡᠷᠡ ᠡᠮᠡ ᠬᠣᠶᠠᠷ ᠬᠥᠮᠥᠨ ᠬᠠᠷᠠᠭᠳᠠᠪᠠ ᠤᠤ? ᠭᠡᠬᠦ ᠳᠦ ᠥᠨᠥᠬᠢ ᠡᠪᠦᠭᠡᠨ ᠬᠢᠷᠳ᠋ᠬᠢᠵᠦ ᠬᠦᠵᠦᠭᠦᠦ ᠪᠡᠨ ᠳᠠᠯᠵᠡᠢᠨ ᠰᠣᠳᠨᠠᠮ ᠭᠣᠢᠳᠣᠪ ᠬᠣᠶᠠᠷ ᠢ ᠲᠣᠭᠣᠮᠰᠠᠷ ᠦᠭᠡᠢ ᠬᠠᠷᠠᠵᠤ᠂《 ᠶᠠᠩᠵᠤ ᠢ ᠨᠢ ᠦᠵᠡᠬᠦ ᠳᠤ ᠭᠣᠣᠯ ᠭᠠᠲᠤᠯᠬᠤ ᠬᠥᠮᠥᠨ ᠦ ᠮᠠᠶᠢᠭ ᠦᠭᠡᠢ᠃ ᠭᠣᠣᠯ ᠭᠠᠲᠤᠯᠬᠤ ᠰᠠᠨ ᠪᠣᠯ ᠢᠳᠡᠵᠦ ᠤᠤᠭᠤᠬᠤ ᠳᠤ ᠴᠤ᠌ ᠨᠡᠮᠡᠷᠢᠯᠡᠮᠡᠷ ᠨᠢᠮᠬᠡᠨ ᠮᠥᠩᠭᠦ ᠭᠢᠯᠠᠢᠯᠭᠠᠳᠠᠭ ᠬᠣᠢᠨᠠ ᠳ᠋ᠠ᠃ ᠲᠡᠢᠮᠦ ᠪᠢᠰᠢ ᠪᠣᠯ ᠨᠠᠳᠠ ᠳᠠᠯᠵᠢ ᠦᠭᠡᠢ ᠶᠠᠪᠤᠳᠠᠯ ᠡ》 ᠭᠡᠵᠦ ᠪᠣᠳᠣᠭᠠᠳ
— ᠦᠭᠡᠢ! ᠭᠡᠵᠦ ᠲᠤᠷᠠᠮᠵᠢᠬᠠᠨ ᠳᠤᠤᠭᠠᠷᠤᠭᠠᠳ ᠡᠨᠳᠡ ᠲᠡᠨᠳᠡ ᠦᠭᠡᠢ ᠰᠢᠮᠠᠭᠤᠯ ᠳᠤ ᠬᠠᠵᠠᠭᠳᠠᠭᠰᠠᠨ ᠭᠠᠵᠠᠷ ᠢᠶᠠᠨ ᠬᠦᠷᠳ᠋ ᠬᠦᠷᠳ᠋ ᠮᠠᠭᠠᠵᠢᠨ ᠥᠨᠥᠬᠢ ᠭᠠᠯ ᠤᠲᠤᠭᠠ ᠪᠠᠨ ᠮᠠᠨᠠᠷᠠᠭᠤᠯᠵᠤ ᠰᠠᠭᠤᠨᠠ᠃
— ᠡᠨᠡ ᠴᠤ᠌ ᠠᠮᠠ ᠨᠢ ᠵᠠᠭᠤᠷᠠᠭᠰᠠᠨ ᠨᠣᠬᠠᠢ ᠰᠠᠭᠠᠷᠢ ᠪᠠᠢᠨᠠ ᠬᠥ᠋! ᠭᠡᠳ ᠭᠣᠢᠳᠣᠪ ᠶᠠᠮᠰᠢᠭᠠᠷ ᠭᠡᠷ ᠦᠨ ᠣᠷᠬᠢᠭᠤᠯ ᠢ ᠰᠡᠬᠦᠵᠦ ᠭᠡᠷ ᠲᠦ ᠣᠷᠣᠪᠠᠯ ᠬᠠᠨᠵᠤᠨ ᠤ ᠢᠷᠮᠡᠭ ᠲᠦ ᠱᠣᠢᠱᠣᠭ ᠬᠥᠯ ᠲᠠᠢ ᠨᠢᠭᠡ ᠵᠠᠯᠠᠭᠤᠬᠠᠨ ᠪᠦᠰᠡᠭᠦᠢ ᠶᠤᠤᠮᠠᠢ ᠢᠮᠡᠷᠴᠦ ᠪᠠᠢᠪᠠ᠃
ᠲᠡᠷᠡ ᠪᠦᠰᠡᠬᠦᠢ ᠫᠤᠤ ᠡᠭᠡᠯᠳᠦᠷᠭᠡᠯᠡᠭᠰᠡᠨ ᠤᠷᠲᠤ ᠬᠤᠪᠴᠠᠰᠤ ᠲᠠᠢ ᠥᠯᠥ᠍ ᠲᠠᠨᠢᠬᠤ ᠡᠷᠡ ᠭᠡᠷ ᠲᠦ ᠣᠷᠣᠵᠤ ᠢᠷᠡᠭᠰᠡᠨ ᠢ ᠬᠢᠯᠡᠮᠬᠢᠭᠰᠡᠨ ᠢᠶᠡᠨ ᠳᠣᠣᠷᠠ ᠨᠢ ᠢᠨᠢᠶᠡᠬᠦ ᠴᠢᠷᠠᠢ ᠦᠵᠡᠭᠦᠯᠵᠦ ᠪᠥᠭᠰᠡ ᠪᠡᠷ ᠢᠶᠡᠨ ᠲᠤᠲᠤᠭᠰᠢ ᠶᠤᠭᠤᠵᠤ᠂ ᠢᠷᠡᠭᠰᠡᠨ ᠬᠥᠮᠥᠨ ᠳᠦ ᠵᠠᠢ ᠭᠠᠷᠭᠠᠵᠤ ᠥᠭᠪᠡ᠃
ᠵᠠᠯᠠᠭᠤ ᠪᠦᠰᠡᠬᠦᠢ ᠶᠢᠨ ᠢᠨᠢᠶᠡᠬᠦ ᠴᠢᠷᠠᠢ ᠭᠣᠢᠲᠣᠪ ᠲᠤ ᠬᠡᠴᠡᠭᠦᠦ ᠬᠥᠭᠡᠷᠦᠬᠦᠨ ᠬᠠᠷᠠᠭᠳᠠᠵᠤ᠂ ᠲᠡᠭᠦᠨ ᠦ ᠠᠶᠤᠮᠠᠲᠠᠭᠠᠢ ᠲᠣᠷᠭᠠᠨ ᠭᠠᠵᠠᠷ ᠲᠤᠨᠢ ᠡᠷᠬᠡ ᠦᠭᠡᠢ ᠭᠡᠳᠡᠭᠡᠯᠡᠭᠡᠳ ᠠᠪᠤᠭᠰᠠᠨ ᠰᠢᠭ᠋ ᠬᠠᠴᠢᠨ ᠰᠠᠨᠠᠭᠳᠠᠪᠠ᠃ ᠲᠡᠭᠦᠨ ᠦ᠌ ᠲᠡᠷᠡ ᠬᠦ᠌ ᠬᠥᠭᠡᠷᠦᠬᠦᠨ ᠨᠢᠳᠦ ᠨᠢ ᠭᠣᠢᠳᠣᠪ ᠢ᠋《 ᠨᠠᠭᠠᠰᠢ ᠪᠠᠨ ᠰᠠᠭᠤ!》 ᠭᠡᠵᠦ ᠬᠡᠯᠡᠬᠦ ᠰᠢᠭ ᠰᠠᠨᠠᠭᠳᠠᠭᠠᠳ ᠪᠠᠢᠬᠤᠯᠠᠷ ᠳᠡᠷᠭᠡᠳᠡ ᠨᠢ ᠣᠴᠢᠵᠤ ᠰᠠᠭᠤᠪᠠ᠃
— ᠰᠣᠳᠨᠠᠮ ᠠ᠋! ᠴᠢ ᠣᠷᠣᠵᠤ ᠢᠷᠡ᠂ ᠡᠨᠳᠡ ᠢᠨᠵᠠᠭᠠ ᠰᠢᠭ᠋ ᠨᠢᠭᠡ ᠬᠥᠭᠡᠷᠦᠬᠦᠨ ᠠᠮᠢᠲᠠᠨ ᠪᠠᠢᠨᠠ ᠭᠡᠵᠦ ᠭᠣᠢᠳᠣᠪ ᠤ᠋ᠨ ᠪᠠᠷᠤᠭ ᠯᠠ ᠬᠠᠰᠬᠢᠷᠬᠤ ᠠᠯᠳᠠᠭᠰᠠᠨ ᠳᠠᠭᠤᠨ ᠢ᠋ᠶ᠋ᠠᠷ ᠰᠣᠳᠨᠠᠮ ᠣᠷᠣᠵᠤ ᠢᠷᠡᠪᠡ᠃ ᠬᠠᠨᠵᠤᠨ ᠳᠡᠭᠡᠷᠡ ᠪᠡᠨ ᠨᠢᠭᠡ ᠶᠠᠭᠤᠮᠠ ᠤᠷᠤᠯᠳᠤᠵᠤ ᠰᠠᠭᠤᠭᠰᠠᠨ ᠴᠢᠷᠠᠢᠯᠢᠭᠬᠠᠨ ᠪᠣᠯᠪᠠᠴᠤ ᠲᠠᠷᠴᠢᠩᠬᠠᠢ ᠪᠦᠰᠡᠭᠦᠢ ᠶ᠋ᠢ ᠬᠠᠷᠠᠭᠠᠳ ᠰᠣᠳᠨᠠᠮ᠄
— ᠭᠣᠢᠳᠣᠪ ᠴᠢ ᠮᠥᠨ ᠡᠯᠳᠡᠪ ᠦ᠋ᠨ ᠶᠠᠭᠤᠮᠠᠨ ᠳ᠋ᠤ᠌ ᠰᠠᠨᠠᠭᠠᠷᠬᠠᠳᠠᠭ ᠬᠠᠴᠢᠨ ᠠᠮᠢᠲᠠᠨ ᠶᠤᠮ ᠠ᠋! ᠭᠡᠪᠡ᠃
— ᠶᠠᠭᠠᠬᠢᠳᠠᠭ ᠶᠤᠮ ᠪᠣᠢ? ᠬᠠᠩᠭᠢ ᠶᠠᠭᠤᠮᠠ ᠬᠠᠷᠠᠭᠳᠠᠬᠤ ᠪᠠᠷ ᠨᠢ ᠁
— ᠲᠠᠨᠢᠵᠤ ᠮᠡᠳᠡᠬᠦ ᠦᠭᠡᠢ ᠭᠠᠵᠠᠷ ᠬᠡᠯᠡ ᠤᠯᠠ ᠪᠠᠨ ᠴᠤ᠌ ᠣᠯᠤᠯᠴᠠᠬᠤ ᠦᠭᠡᠢ ᠪᠠᠢᠭᠠᠳ ᠶᠠᠭᠠᠬᠢᠬᠤ ᠶᠤᠮ? ᠡᠯᠳᠡᠪ ᠦ᠋ᠨ ᠶᠠᠭᠤᠮᠠᠨ ᠳ᠋ᠤ᠌ ᠭᠣᠷᠢᠯᠠᠬᠤ ᠪᠠᠨ ᠪᠠᠢᠭ᠃
— ᠰᠣᠳᠨᠠᠮ ᠠ᠋᠂ ᠪᠢ ᠲᠠᠨ ᠢ᠋ ᠭᠤᠶᠤᠶᠠ ᠳᠠ! ᠱᠣᠢᠲᠠᠨ① ᠤ᠋ ᠠᠮᠲᠠ ᠶᠠᠮᠠᠷ ᠰᠢᠤᠬᠠᠨ ᠪᠠᠢᠳᠠᠭ ᠢ᠋ ᠪᠢ ᠨᠢᠭᠡ ᠠᠮᠲᠠᠯᠠᠬᠤ ᠶᠤᠮᠰᠠᠨ ᠭᠡᠵᠦ ᠠᠯᠢ ᠤᠵᠠᠭᠤᠷ ᠤ᠋ᠨ ᠦᠭᠡᠢ ᠰᠠᠨᠠᠭᠰᠠᠭᠠᠷ ᠢᠷᠡᠭᠰᠡᠨ ᠶᠦᠮ᠃ ᠶᠡᠷᠦ ᠳ᠋ᠡᠭᠡᠨ ᠵᠠᠪᠰᠢᠶᠠᠨ ᠲᠠᠭᠠᠷᠠᠬᠤ ᠦᠭᠡᠢ᠃ ᠥᠨᠥᠳᠥᠷ ᠬᠠᠷᠢᠨ ᠠᠵᠠ ᠪᠠᠷ ᠵᠡᠭᠡᠭᠡᠭᠰᠡᠨ ᠶᠠᠭᠤᠮᠠ ᠲᠠᠭᠠᠷᠠᠯᠠ ᠁ ᠰᠣᠳᠨᠠᠮ ᠠ᠋ ᠁ ᠭᠡᠵᠦ ᠴᠢᠷᠠᠢᠴᠢᠯᠠᠬᠤ ᠳ᠋ᠤ᠌ ᠰᠣᠳᠨᠠᠮ᠄
— ᠬᠡᠷᠡᠭ ᠢ᠋ᠶ᠋ᠡᠨ ᠪᠠᠷᠠᠭᠰᠠᠨ ᠶᠠᠭᠤᠮᠠ ᠬᠢᠬᠦ ᠪᠡᠨ ᠪᠣᠯᠢ᠃ ᠭᠠᠳᠠᠨᠠ ᠰᠠᠭᠤᠭᠠ ᠡᠪᠦᠭᠡᠵᠢᠶᠡᠷ ᠬᠥᠮᠦᠨ ᠦ᠌ ᠴᠢᠷᠠᠢ ᠠ᠋ᠴᠠ ᠶᠠᠭᠤᠮᠠ ᠣᠯᠵᠤ ᠬᠠᠷᠠᠭᠰᠠᠨ ᠦᠭᠡᠢ ᠤᠤ? ᠭᠡᠯᠡ᠃
— ᠦᠭᠡᠢ ᠠ᠋! ᠶᠠᠭᠤ ᠯᠠ ᠪᠠᠢᠬᠤ ᠪᠣᠢ ᠳᠠ᠂ ᠡᠨᠡ ᠮᠠᠭᠤ ᠵᠠᠨᠠᠭ ᠤ᠋ᠳ ᠮᠠᠨᠤᠰ ᠠ᠋ᠴᠠ ᠰᠦᠷᠳᠡᠬᠦ ᠳ᠋ᠡᠭᠡᠨ ᠳᠠᠯᠠᠨ ᠯᠠᠩ ᠢ᠋ᠶ᠋ᠠᠨ ᠠᠯᠳᠠᠭᠰᠠᠨ ᠰᠢᠭ᠋ ᠤᠷᠤᠭᠤ ᠴᠢᠷᠠᠢᠯᠠᠭᠠ ᠯᠠ ᠪᠠᠢᠯᠭᠦᠢ! ᠵᠦᠭᠡᠷ᠂ ᠵᠦᠭᠡᠷ!
— ᠡᠨᠡ ᠥᠭᠢᠷᠡ ᠲᠣᠯᠣᠭᠠᠢ ᠲᠡᠢᠮᠦ ᠬᠢᠮᠳᠠᠬᠠᠨ ᠶᠠᠭᠤᠮᠠ ᠪᠢᠰᠢ᠃ ᠣᠯᠠᠨ ᠰᠢᠭᠤᠳᠠᠢ ᠳᠠᠪᠤᠰᠤ ᠢᠳᠡᠭᠰᠡᠨ ᠬᠠᠭᠤᠴᠢᠨ ᠫᠤᠤ ᠶ᠋ᠢᠨ ᠬᠤᠭᠤᠷᠬᠠᠢ ᠪᠠᠢᠵᠤ ᠶᠠᠳᠠᠬᠤ ᠦᠭᠡᠢ᠃
— ᠬᠠᠢ᠂ ᠲᠡᠷᠡ ᠤᠮᠠᠳᠠᠭ ᠢ᠋ᠶ᠋ᠠᠨ ᠴᠢᠷᠦᠭᠰᠡᠨ ᠤᠷᠤᠭᠤ ᠴᠢᠷᠠᠢ ᠲᠠᠢ ᠡᠪᠦᠭᠡᠨ ᠡᠴᠡ ᠡᠴᠢᠭᠡ ᠳ᠋ᠡᠭᠡᠨ ᠲᠡᠭᠡᠵᠦ ᠠᠶᠤᠭᠰᠠᠨ ᠶᠤᠮ?
— ᠰᠣᠳᠨᠠᠮ ᠠᠬᠠ ᠭᠠᠳᠠᠨᠠ ᠭᠠᠷᠴᠤ ᠥᠨᠥᠬᠢ ᠡᠪᠦᠭᠡᠵᠢᠶᠡᠷ ᠡᠷᠡ ᠲᠡᠢ ᠡᠨᠡ ᠲᠡᠷᠡ ᠦᠭᠡ ᠨᠦᠳᠦᠵᠦ ᠰᠡᠳᠬᠢᠯ ᠢ᠋ ᠨᠢ ᠰᠡᠯᠳᠡᠭᠦᠯᠵᠦ ᠪᠠᠢᠭᠠᠷᠠᠢ! ᠪᠢ ᠣᠳᠣᠬᠠᠨ᠁ ᠭᠡᠲᠡᠯᠡ ᠡᠭᠦᠳᠡ ᠰᠡᠬᠦᠭᠳᠡᠵᠦ ᠲᠡᠷᠡ ᠡᠷᠡ ᠨᠠᠪᠲᠠᠰᠬᠢᠨ ᠣᠷᠣᠵᠤ ᠢᠷᠡᠭᠡᠳ ᠰᠣᠳᠨᠠᠮ ᠭᠣᠢᠳᠣᠪ ᠬᠣᠶᠠᠷ ᠢ᠋ ᠡᠭᠡᠯᠵᠢᠯᠡᠨ ᠰᠢᠷᠳᠡᠵᠦ ᠬᠠᠨᠵᠤᠨ ᠤ᠋ ᠥᠨᠴᠥᠭ ᠢ᠋ ᠪᠠᠷᠢᠵᠤ ᠮᠥᠴᠢᠳᠬᠡᠨ ᠰᠠᠭᠤᠵᠤ ᠨᠠᠪᠴᠢᠨ ᠲᠠᠮᠠᠬᠢ ᠣᠷᠢᠶᠠᠨᠠ᠃ ᠰᠠᠯᠴᠢᠨ ᠡᠪᠦᠭᠡᠨ ᠦ᠌ ᠭᠣᠢᠳᠣᠪ ᠢ᠋ ᠦᠭᠡ ᠳᠠᠭᠤ ᠦᠭᠡᠢ ᠰᠢᠷᠲᠡᠭᠰᠡᠨ ᠰᠢᠷᠦᠭᠦᠨ ᠬᠠᠷᠠᠴᠠ 《ᠲᠠ ᠬᠣᠶᠠᠷ ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠢ? ᠶᠠᠭᠠᠬᠢᠬᠤ ᠰᠠᠨᠠᠭᠠᠲᠠᠢ ᠶᠤᠮ ⁈ 》 ᠭᠡᠰᠡᠨ ᠰᠢᠭ ᠪᠠᠢᠯᠠ᠃
ᠭᠡᠷ ᠳᠣᠲᠣᠷᠠᠬᠢ ᠪᠠᠢᠳᠠᠯ ᠣᠨᠳᠣᠣᠬᠠᠨ ᠪᠣᠯᠤᠭᠰᠠᠨ ᠢ᠋ ᠠᠵᠢᠵᠤ᠄
— ᠥᠨᠥᠬᠢ ᠴᠢᠨᠢ 《ᠠᠯᠲᠠᠨᠭᠡᠷᠡᠯ》ᠳᠣᠭᠣᠯᠳᠠᠭ ᠪᠢᠰᠢ ᠪᠠᠢᠭᠠ ᠳᠠ⁈ ᠭᠡᠵᠦ ᠡᠪᠦᠭᠡᠵᠢᠶᠡᠷ ᠡᠷᠡ ᠶ᠋ᠢᠨ ᠰᠢᠷᠦᠭᠦᠨ ᠬᠠᠷᠠᠴᠠ ᠠ᠋ᠴᠠ ᠳᠠᠯᠳᠢᠷᠠᠭᠰᠠᠨ ᠭᠣᠢᠳᠣᠪ ᠤ᠋ᠨ ᠨᠢᠳᠦ ᠴᠢᠨᠣᠠ ᠡᠴᠡ ᠦᠷᠭᠦᠭᠰᠡᠨ ᠵᠡᠭᠡᠷᠡ ᠶ᠋ᠢᠨ ᠨᠢᠳᠦ ᠰᠢᠭ ᠪᠦᠯᠲᠡᠯᠵᠡᠬᠦ ᠳ᠋ᠦ᠍ ᠰᠣᠳᠨᠠᠮ ᠲᠣᠰᠴᠤ᠄
— ᠬᠡᠯᠡᠵᠦ ᠮᠡᠳᠡᠬᠦ ᠦᠭᠡᠢ ᠠ᠋᠃ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠣᠯᠣᠮ ᠤ᠋ᠨ ᠣᠭᠣᠰᠣᠷ ᠢ᠋ ᠪᠠᠷᠢᠵᠤ ᠰᠤᠷᠤᠭᠰᠠᠨ ᠬᠥᠮᠦᠨ ᠢ᠋ ᠬᠡᠴᠢᠨᠡᠭᠡᠨ ᠵᠢᠯ ᠢ᠋ᠶ᠋ᠡᠷ ᠶᠠᠮᠠᠷ ᠬᠥᠮᠦᠨ ᠬᠠᠷᠠ ᠲᠠᠢ ᠠᠭᠤᠯᠵᠠᠵᠤ ᠶᠠᠪᠤᠯᠴᠠᠬᠤ ᠶ᠋ᠢ ᠪᠠᠢᠭ ᠭᠡᠬᠦ ᠪᠣᠢ! ᠭᠡᠳ ᠡᠪᠦᠷ ᠡᠴᠡ ᠪᠡᠨ ᠵᠢᠵᠢᠭ ᠬᠠᠷᠠ ᠪᠣᠳᠣᠩ ᠲᠠᠢ ᠠᠷᠢᠬᠢ ᠭᠠᠷᠭᠠᠵᠤ ᠳᠡᠭᠡᠵᠢ ᠶ᠋ᠢ ᠨᠢ ᠰᠡᠷᠵᠢᠮᠯᠡᠴᠢᠬᠡᠭᠡᠳ ᠥᠨᠥᠬᠢ ᠡᠪᠦᠭᠡᠵᠢᠶᠡᠷ ᠡᠷᠡ ᠳ᠋ᠦ᠍ ᠥᠭᠴᠦ《ᠡᠭᠦᠨ ᠡᠴᠡ ᠣᠭᠣᠴᠢ!》ᠭᠡᠪᠡᠯ ᠡᠪᠦᠭᠡᠨ ᠣᠭᠲᠣ ᠬᠠᠯᠭᠠᠬᠤ ᠦᠭᠡᠢ ᠢᠷᠪᠠᠢᠵᠤ᠄
— ᠪᠢ ᠠᠷᠢᠬᠢ ᠤᠤᠭᠤᠳᠠᠭ ᠦᠭᠡᠢ᠃ ᠶᠡᠷᠦ ᠡᠴᠡ ᠤᠤᠭᠤᠳᠠᠭ ᠦᠭᠡᠢ ᠭᠡᠳ ᠬᠠᠷᠠ ᠪᠣᠳᠣᠩ ᠲᠠᠢ ᠠᠷᠢᠬᠢ ᠶ᠋ᠢ ᠲᠦᠯᠬᠢᠵᠦ《ᠡᠨᠡ ᠮᠠᠭᠤ ᠭᠠᠰᠢᠭᠤᠨ ᠤᠰᠤ ᠪᠠᠷ ᠢ᠋ᠶ᠋ᠠᠨ ᠨᠠᠮᠠᠶ᠋ᠢ ᠮᠢᠨᠴᠦᠭᠦᠷᠡᠭᠦᠯᠵᠦ ᠶᠠᠭᠠᠬᠢᠬᠤ ᠰᠠᠨᠠᠭᠠ ᠲᠠᠢ ᠪᠣᠢ ᠲᠠ ᠨᠠᠷ᠁》 ᠭᠡᠰᠡᠨ ᠰᠢᠭ ᠰᠣᠳᠨᠠᠮ ᠢ᠋ ᠴᠣᠭᠣᠷᠠᠲᠠᠯᠠ ᠰᠢᠷᠲᠡᠨᠡ᠃
ᠬᠠᠰᠢᠷ ᠰᠣᠳᠨᠠᠮ ᠠᠬᠠ ᠬᠥᠮᠦᠨ ᠦ᠌ ᠬᠤᠪᠢ ᠪᠠᠷ《ᠡᠨᠡ ᠵᠣᠯᠢᠭ ᠴᠢᠨᠢ < ᠠᠯᠲᠠᠨᠭᠡᠷᠡᠯ > ᠳᠣᠭᠣᠯᠳᠠᠭ ᠶᠠᠩᠵᠤᠲᠠᠢ᠃ ᠭᠣᠢᠳᠣᠪ ᠴᠢ ᠬᠡᠷᠰᠡᠦᠬᠡᠨ ᠪᠠᠢ》ᠭᠡᠰᠡᠨ ᠨᠢᠳᠦᠨ ᠦ᠌ ᠳᠣᠬᠢᠶᠠ ᠥᠭᠭᠦᠭᠰᠡᠨ ᠢ᠋ ᠭᠣᠢᠳᠣᠪ ᠣᠢᠯᠠᠭᠠᠭᠠᠳ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨ ᠰᠠᠨᠠᠭᠠ ᠠᠯᠳᠠᠨᠠ᠃
— ᠦᠭᠡᠢ ᠠ᠋᠂ ᠡᠨᠡ ᠮᠠᠭᠤ ᠵᠠᠨᠠᠭ ᠤ᠋ᠨ ᠠᠮᠠᠨ ᠬᠦᠵᠦᠭᠦᠦ ᠶ᠋ᠢ ᠨᠢ ᠮᠤᠰᠬᠢᠴᠢᠬᠠᠭᠠᠨᠳ ᠤᠯᠠᠭᠠᠨ ᠬᠠᠲᠤᠨ ᠳ᠋ᠤ᠌ ᠁ ᠭᠡᠵᠦ ᠭᠣᠢᠳᠣᠪ ᠢ᠋ ᠬᠡᠯᠡᠵᠦ ᠪᠠᠷᠠᠬᠤ ᠠ᠋ᠴᠠ ᠡᠮᠦᠨᠡ ᠡᠪᠦᠭᠡᠵᠢᠶᠡᠷ ᠡᠷᠡ ᠭᠣᠢᠳᠣᠪ ᠢ᠋ ᠭᠥᠯᠢᠢᠨ ᠬᠠᠷᠠᠵᠤ ᠶᠠᠭᠤ ᠨᠢᠭᠡ ᠶᠠᠭᠤᠮᠠ ᠬᠡᠯᠡᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠬᠠᠬᠠᠪᠠ᠃
— ᠵᠠ᠂ ᠪᠣᠯᠢ! ᠬᠦᠩ ᠨᠣᠶᠠᠨ ᠤ᠋ ᠪᠠᠭᠠ ᠬᠠᠲᠤᠨ ᠢ᠋ ᠤᠤᠯᠭᠠᠯᠠᠵᠤ ᠠᠷᠢᠯᠤᠭᠰᠠᠨ ᠬᠤᠯᠠᠭᠠᠢ ᠶ᠋ᠢ ᠨᠡᠬᠡᠮᠵᠢᠯᠡᠬᠦ ᠪᠡᠷ ᠭᠠᠷᠴᠤ ᠢᠷᠡᠭᠡᠳ ᠬᠤᠯᠠᠭᠠᠢ ᠶ᠋ᠢ ᠪᠠᠷᠢᠭᠰᠠᠨ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ ᠬᠠᠷᠢᠨ ᠳᠡᠭᠡᠷᠡ ᠡᠴᠡ ᠨᠢ ᠮᠠᠭᠤ ᠱᠣᠢᠳᠠᠨ ᠡᠮᠡ ᠳ᠋ᠦ᠍ ᠰᠢᠨᠤᠵᠤ ᠨᠡᠷᠡ ᠨᠢᠭᠤᠷ ᠢ᠋ᠶ᠋ᠠᠨ ᠭᠤᠲᠤᠭᠠᠭᠰᠠᠨ ᠶᠠᠪᠤᠳᠠᠯ ᠬᠢᠬᠦ ᠪᠡᠨ ᠪᠣᠯᠢᠶᠠ᠂ ᠭᠣᠢᠳᠣᠪ ᠮᠢᠨᠢ! ᠭᠡᠵᠦ ᠰᠣᠳᠨᠠᠮ ᠲᠡᠭᠦᠨ ᠢ᠋ ᠠᠷᠭᠠᠳᠠᠬᠤ ᠭᠤᠶᠤᠬᠤ ᠶ᠋ᠢᠨ ᠠᠶᠠᠰ ᠲᠠᠢ ᠬᠡᠯᠡᠨᠡ᠃
— ᠡᠨᠡ ᠴᠢᠷᠠᠢ ᠮᠠᠭᠤᠲᠠᠢ ᠡᠪᠦᠭᠡᠨ《 ᠠᠯᠲᠠᠨᠭᠡᠷᠡᠯ》ᠳᠣᠭᠣᠯᠳᠠᠭ ᠶᠠᠳᠠᠬᠤ ᠦᠭᠡᠢ ᠳᠡ! ᠠᠷᠢᠬᠢᠨ ᠠ᠋ᠴᠠ ᠴᠢᠨᠢ ᠭᠠᠭᠴᠠ ᠣᠭᠣᠴᠢᠬᠤ ᠦᠭᠡᠢ ᠮᠠᠰᠢ ᠬᠡᠷᠰᠡᠦ ᠪᠠᠢᠨᠠ᠃
—《ᠠᠯᠲᠠᠨᠭᠡᠷᠡᠯ》 ᠳᠤᠭᠤᠯᠤᠯᠠ ᠭᠡᠳ ᠶᠠᠭᠠᠬᠢᠨᠠ ᠪᠣᠢ! ᠬᠣᠶᠠᠷ ᠪᠣᠰᠤᠭᠠ ᠡᠷᠡ ᠡᠨᠡ ᠥᠭᠢᠷᠡ ᠲᠣᠯᠣᠭᠠᠢ ᠶ᠋ᠢ ᠲᠠᠬᠢᠶᠠ ᠨᠤᠭᠤᠰᠤᠯᠠᠬᠤ ᠰᠢᠭ᠋ ᠁
— ᠵᠠ᠂ ᠭᠤᠢᠲᠤᠪ ᠴᠢ ᠠᠮᠠ ᠪᠠᠨ ᠣᠯᠵᠤ ᠳᠣᠩᠭᠣᠰᠤᠭᠠᠴᠢ! ᠭᠡᠵᠦ ᠰᠣᠳᠨᠠᠮ ᠭᠤᠢᠳᠣᠪ ᠢ᠋ ᠭᠢᠯᠦᠢᠪᠡ᠃
ᠰᠣᠳᠨᠠᠮ ᠭᠤᠢᠳᠤᠪ ᠬᠣᠶᠠᠷ ᠢᠩᠭᠢᠵᠦ ᠬᠡᠯᠡᠯᠴᠡᠵᠦ ᠰᠠᠭᠤᠲᠠᠯᠠ ᠰᠠᠯᠴᠢᠨ ᠡᠪᠦᠭᠡᠨ ᠭᠡᠨᠡᠳᠲᠡ ᠶᠠᠭᠤ ᠪᠣᠳᠣᠭᠰᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠵᠡᠭᠦᠨ ᠲᠤᠭᠤᠷᠭᠠ ᠲᠦᠰᠢᠭᠦᠯᠵᠦ ᠡᠪᠬᠡᠭᠰᠡᠨ ᠬᠥᠨᠵᠢᠯᠡ ᠶ᠋ᠢᠨ ᠳᠣᠣᠷᠠ ᠠ᠋ᠴᠠ ᠵᠢᠵᠢᠭᠬᠡᠨ ᠪᠠᠯᠳᠠᠰᠣ ② ᠪᠣᠳᠣᠩ ᠲᠠᠢ ᠠᠷᠢᠬᠢ ᠭᠠᠷᠭᠠᠵᠤ ᠲᠡᠷᠡ ᠬᠣᠶᠠᠷ ᠲᠤ᠌᠄
— ᠲᠠ ᠬᠣᠶᠠᠷ ᠮᠣᠩᠭᠣᠯ ᠬᠥᠮᠦᠨ ᠪᠠᠢᠨᠠ᠃ ᠡᠭᠦᠨ ᠡᠴᠡ ᠤᠤᠭᠤ!ᠵᠠᠮᠠᠭ ᠤᠨ ᠬᠠᠭᠰᠠᠭᠠᠮᠠᠯ ᠪᠠ ᠵᠡᠪᠡᠷᠢ ᠲᠠᠢ ᠠᠷᠢᠬᠢ ᠶᠤᠮ᠃ ᠨᠣᠢᠲᠠᠨ ᠴᠢᠭᠢᠭ ᠢ ᠰᠡᠷᠭᠡᠢᠯᠡᠳᠡᠭ ᠡᠳ᠋ ᠶᠤᠮ ᠡ᠂ ᠲᠠ ᠨᠠᠷ ᠤᠤᠭᠤ᠂ ᠤᠤᠭᠤ! ᠭᠡᠵᠦ ᠤᠤᠯ ᠤ᠋ᠨ ᠬᠡᠦᠷᠰᠢᠭᠰᠡᠨ ᠬᠥᠲᠥᠰᠦ ᠰᠢᠭ ᠬᠡᠭᠵᠡᠢᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠢᠨᠢᠶᠡᠬᠦ ᠲᠡᠢ ᠪᠣᠯᠪᠠ᠃
ᠰᠣᠳᠨᠠᠮ ᠭᠣᠢᠳᠣᠪ ᠬᠣᠶᠠᠷ ᠨᠢᠭᠡ ᠨᠢᠭᠡᠨ ᠢ᠋ᠶ᠋ᠡᠨ ᠬᠠᠷᠠᠵᠤ ᠠᠪᠤᠭᠠᠳ ᠥᠨᠥᠬᠢ ᠪᠠᠯᠳᠠᠰᠣᠨ ᠪᠣᠳᠣᠩ ᠲᠠᠢ ᠠᠷᠢᠬᠢᠨ ᠠ᠋ᠴᠠ ᠡᠭᠡᠯᠵᠢᠯᠡᠨ ᠣᠭᠣᠴᠢᠪᠠ᠃ ᠡᠨᠡ ᠠᠷᠢᠬᠢ ᠠ᠋ᠴᠠ ᠨᠢᠭᠡ ᠯᠡ ᠰᠢᠲᠠᠭᠰᠠᠨ ᠰᠢᠷᠣᠢ ᠠᠮᠲᠠᠯᠠᠭᠳᠠᠬᠤ ᠰᠢᠭ᠋ ᠮᠥᠷᠲᠡᠭᠡᠨ ᠬᠠᠲᠠᠭᠤ ᠭᠡᠳᠡᠭ ᠨᠢ ᠵᠢᠭᠲᠡᠢ᠃ ᠭᠠᠭᠴᠠ ᠨᠢᠭᠡ ᠬᠣᠶᠠᠷ ᠣᠭᠣᠴᠢᠭᠰᠠᠨ ᠲᠡᠳᠦᠢ ᠪᠡᠷ ᠶᠠᠰᠤᠨ ᠠ᠋ᠴᠠ ᠬᠥᠯᠥᠰᠥ ᠴᠢᠬᠠᠷᠠᠬᠤ ᠰᠢᠭ᠋ ᠪᠣᠯᠪᠠ᠃ ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠭᠤᠢᠳᠣᠪ ᠰᠣᠳᠨᠠᠮ ᠠ᠋ᠴᠠ ᠢᠯᠡᠭᠦᠦ ᠬᠣᠶᠠᠷ ᠣᠭᠣᠴᠢ ᠬᠣᠪᠳᠣᠭᠯᠠᠵᠤ ᠪᠠᠯᠭᠤᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠠᠭᠤᠭᠰᠠᠨ ᠣᠷᠣᠨ ᠳ᠋ᠠᠭᠠᠨ ᠮᠣᠭᠵᠣᠢᠭᠠᠳ ᠤᠨᠲᠠᠪᠠ᠃ ᠰᠣᠳᠨᠠᠮ ᠴᠤ᠌ ᠡᠨᠡ ᠠᠯᠪᠠ ᠠ᠋ᠴᠠ ᠶᠠᠭᠠᠬᠢᠵᠤ ᠮᠤᠯᠲᠤᠷᠠᠬᠤ ᠪᠣᠢ⁈
ᠰᠠᠯᠴᠢᠨ ᠡᠪᠦᠭᠡᠨ ᠬᠣᠶᠠᠷ ᠭᠠᠩᠰᠠ ᠲᠠᠮᠠᠬᠢ ᠨᠡᠷᠡᠵᠦ ᠪᠠᠭᠠᠭᠢᠭᠤᠯᠴᠢᠬᠠᠭᠠᠳ ᠭᠤᠲᠤᠯ ᠤ᠋ᠨ ᠢ᠋ᠶ᠋ᠠᠨ ᠤᠯᠠ ᠳ᠋ᠤ᠌ ᠦᠨᠡᠰᠦ ᠶ᠋ᠢ ᠨᠢ ᠭᠦᠪᠢᠵᠦ ᠭᠠᠩᠰᠠᠨ ᠤ᠋ ᠪᠠᠨ ᠲᠣᠯᠣᠭᠠᠢ ᠶ᠋ᠢ ᠭᠣᠳᠯᠠᠭᠰᠠᠭᠠᠷ᠄
— ᠬᠦᠢ᠂ ᠲᠠ ᠬᠣᠶᠠᠷ ᠪᠣᠰ! ᠶᠠᠮᠠᠷ ᠬᠠᠰᠢ ᠪᠠᠨ ᠤᠯᠤᠰ ᠪᠣᠢ⁈ ᠬᠡᠳᠦᠬᠡᠨ ᠣᠭᠣᠴᠢ ᠠᠷᠢᠬᠢᠨ ᠳ᠋ᠤ᠌ ᠭᠤᠯᠵᠢᠢᠭᠠᠳ ᠶᠠᠪᠤᠴᠢᠬᠠᠳᠠᠭ ᠁ ᠭᠡᠵᠦ ᠨᠥᠭᠦᠭᠡ ᠬᠣᠶᠠᠷ ᠢ᠋ ᠲᠦᠯᠬᠢᠵᠦ ᠳᠠᠭᠤᠳᠠᠪᠠᠯ《 ᠡᠩ᠂ ᠡᠩ》 ᠭᠡᠵᠦ ᠨᠤᠬᠤᠭᠰᠠᠨ ᠭᠤᠯᠢᠷ ᠰᠢᠭ᠋ ᠭᠤᠯᠵᠢᠭᠠᠨᠠᠭᠠᠳ ᠪᠠᠢᠯᠠ᠃ ᠰᠠᠯᠴᠢᠨ ᠡᠪᠦᠭᠡᠨ ᠡᠳᠡ ᠬᠣᠶᠠᠷ ᠤ᠋ᠨ ᠲᠠᠮᠢᠷ ᠢ᠋ ᠨᠢ ᠮᠡᠳᠡᠴᠢᠬᠡᠭᠡᠳ ᠰᠠᠨᠠᠭᠠ ᠨᠢ ᠠᠮᠠᠷᠠᠭᠰᠠᠨ ᠪᠣᠯᠤᠯᠲᠠᠢ ᠴᠠᠭᠠᠨᠠ ᠪᠣᠯᠵᠣᠭᠰᠠᠨ ᠶᠠᠪᠤᠳᠠᠯ ᠳ᠋ᠠᠭᠠᠨ ᠣᠴᠢᠬᠤ ᠪᠠᠷ ᠶᠠᠭᠠᠷᠠᠨ ᠪᠣᠰᠪᠠ᠃
ᠰᠠᠯᠴᠢᠨ ᠡᠪᠦᠭᠡᠨ ᠱᠠᠯᠠᠪ ᠶᠠᠪᠤᠵᠤ ᠨᠢᠭᠡ ᠠᠢᠯ ᠳᠡᠭᠡᠷᠡ ᠣᠴᠢᠵᠤ ᠤᠳᠠᠭᠠᠨ ᠵᠠᠷᠤᠭᠰᠠᠨ ᠦᠭᠡᠢ ᠪᠠᠮᠪᠠᠷᠴᠠᠭ ᠬᠠᠰᠠᠭ ᠣᠯᠵᠤ ᠠᠪᠤᠭᠠᠳ ᠬᠥᠳᠡᠯᠪᠡ᠁
ᠦᠦᠷ ᠴᠠᠢᠬᠤ ᠶᠢᠨ ᠠᠯᠳᠠ ᠪᠠᠷ ᠰᠠᠯᠴᠢᠨ ᠡᠪᠦᠭᠡᠨ ᠮᠠᠭᠤ ᠬᠠᠪᠴᠢᠭ ᠭᠡᠷ ᠲᠡᠭᠡᠨ ᠬᠦᠷᠴᠦ ᠢᠷᠡᠪᠡᠯ ᠰᠣᠳᠨᠠᠮ ᠭᠣᠢᠳᠣᠪ ᠬᠣᠶᠠᠷ ᠰᠡᠷᠡᠭᠡᠳᠦᠢ ᠪᠠᠢᠯᠠ᠃
— ᠵᠠ᠂ ᠪᠣᠰ᠂ ᠪᠣᠰ! ᠲᠠᠨᠤᠰ ᠶᠠᠭᠤ ᠬᠢᠳᠡᠭ ᠪᠣᠯ ᠲᠡᠭᠦᠨ ᠢᠶᠡᠨ ᠬᠢᠬᠦ ᠪᠡᠷ ᠶᠠᠪᠤᠵᠠᠭᠠ! ᠴᠠᠭᠠᠳᠤᠬᠢ ᠴᠢᠨᠢ ᠶᠠᠭᠤᠨ ᠳᠤ ᠡᠨᠡ ᠬᠥᠮᠥᠨ ᠠᠮᠢᠲᠠᠨ ᠰᠦᠯᠵᠢᠭᠰᠡᠨ ᠭᠠᠵᠠᠷ ᠢᠷᠡᠨᠡ ᠪᠣᠢ? ᠭᠡᠵᠦ ᠲᠥᠪᠡᠭᠰᠢᠶᠡᠩᠭᠦᠢ ᠴᠢᠷᠠᠢᠯᠠᠨ ᠰᠣᠳᠨᠠᠮ ᠭᠣᠢᠳᠣᠪ ᠬᠣᠶᠠᠷ ᠢ ᠳᠠᠭᠤᠳᠠᠵᠤ ᠰᠡᠷᠡᠭᠡᠪᠡ᠃
— ᠶᠣ᠂ ᠶᠣᠬᠣ! ᠭᠡᠵᠦ ᠭᠣᠢᠳᠣᠪ ᠪᠡᠶᠡ ᠨᠢ ᠰᠦᠷᠡᠬᠡᠢ ᠲᠠᠢᠪᠤᠰᠢᠷᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠡᠪᠰᠢᠶᠡᠨ ᠰᠤᠨᠢᠶᠠᠵᠤ《 ᠶᠠᠮᠠᠷ ᠢᠳᠡᠳᠡᠢ ᠠᠷᠢᠬᠢ ᠪᠣᠢ! ᠨᠢᠭᠡ ᠯᠠ ᠤᠨᠲᠠᠯᠭᠠᠨ ᠳᠤ ᠶᠠᠰᠤ ᠠᠮᠠᠷᠠᠵᠤ᠂ ᠪᠡᠶᠡ ᠲᠠᠢᠪᠤᠰᠢᠷᠠᠬᠤ ᠨᠢ ᠭᠣᠶᠣ ᠶᠤᠮ ᠡ!》 ᠭᠡᠳ ᠥᠨᠳᠡᠢᠪᠡ᠃
ᠰᠣᠳᠨᠠᠮ᠂ ᠭᠣᠢᠳᠣᠪ ᠬᠡᠳᠦᠭᠦᠯᠡ ᠲᠡᠨᠳᠡ ᠡᠴᠡ ᠪᠠᠭᠠ ᠬᠠᠲᠤᠨ ᠢ ᠣᠯᠬᠤ ᠪᠠᠢᠲᠤᠭᠠᠢ᠂ ᠰᠤᠷᠠᠭ ᠢ ᠨᠢ ᠴᠤ᠌ ᠲᠤᠭᠤᠯᠤᠭᠰᠠᠨ ᠦᠭᠡᠢ ᠢᠷᠡᠭᠰᠡᠨ ᠵᠠᠮ ᠢᠶᠠᠷ ᠢᠶᠠᠨ ᠪᠤᠴᠠᠵᠠᠭᠠᠪᠠ᠃
ᠮᠠᠨᠴᠤᠷᠭᠠ ᠤᠯᠠᠭᠠᠨ ᠬᠠᠲᠤᠨ ᠤ ᠣᠯᠣᠮ ᠠᠴᠠ ᠨᠠᠷᠠ ᠰᠢᠩᠭᠡᠬᠦ ᠶᠢᠨ ᠠᠯᠳᠠ ᠪᠠᠷ ᠮᠣᠷᠳᠠᠵᠤ ᠰᠢᠮᠠᠭᠤᠯ ᠱᠤᠤᠬᠢᠭᠰᠠᠨ ᠭᠣᠣᠯ ᠤᠨ ᠴᠢᠭᠢᠭᠯᠢᠭ ᠳᠣᠬᠣᠢ ᠠᠴᠠ ᠲᠥᠷᠥᠭᠳᠡᠭᠰᠡᠨ ᠵᠠᠢᠳᠠᠬᠤ ᠶᠢ ᠭᠣᠷᠢᠳᠠᠨ ᠮᠣᠷᠢᠨ ᠳᠠᠭᠠᠨ ᠳᠠᠰᠢᠭᠤᠷ ᠥᠭᠭᠦ ᠳᠦ ᠢᠯᠠᠭᠠᠷᠠᠬᠠᠭᠰᠠᠨ ᠰᠢᠭᠢᠷᠡ ᠠᠯᠠᠭ ᠰᠠᠷᠠ ᠲᠠᠢ ᠬᠡᠭᠡᠷ ᠨᠢ ᠡᠵᠡᠨ ᠦ ᠪᠡᠨ ᠰᠠᠨᠠᠭᠠ ᠶᠢ ᠮᠡᠳᠡᠭᠰᠡᠨ ᠰᠢᠭ ᠢᠯᠳᠠᠮᠬᠠᠨ ᠲᠠᠪᠬᠢᠨᠠ᠃
ᠮᠠᠨᠴᠤᠷᠭᠠ ᠲᠣᠲᠣᠷᠠ ᠪᠠᠨ ᠭᠦᠩ ᠨᠣᠶᠠᠨ ᠰᠢᠷᠠᠪᠳᠣᠷᠵᠢ ᠶᠢ《 ᠶᠣᠰᠣᠲᠠᠢ ᠯᠠ ᠰᠢᠳᠦ ᠦᠭᠡᠢ ᠨᠣᠬᠠᠢ ᠶᠠᠰᠤ ᠬᠠᠷᠠᠮᠨᠠᠨᠠ ᠭᠡᠭ᠍ᠴᠢ ᠪᠡᠷ ᠣᠯᠠᠨ ᠰᠤᠪᠠᠢ ᠦᠨᠢᠶᠡ ᠴᠤᠭᠯᠠᠭᠤᠯᠵᠤ ᠬᠠᠮᠪᠠᠭᠠᠷᠬᠠᠭᠠᠳ ᠡᠴᠢᠭᠡ ᠪᠡᠨ ᠬᠢᠨᠡ ᠵᠢᠷᠭᠠᠬᠤ ᠭᠡᠳ ᠵᠠᠭᠠᠲᠤᠨᠠᠭᠠ ᠶᠢ ᠨᠢ ᠬᠥᠳᠡᠯᠭᠡᠵᠦ ᠬᠠᠶᠠᠴᠢᠬᠠᠭᠠᠳ ᠵᠣᠪᠠᠭᠠᠳᠠᠭ ᠲᠤᠨᠢ ᠲᠡᠷᠡ ᠣᠯᠠᠨ ᠰᠤᠪᠠᠢᠴᠤᠤᠯ ᠨᠢ ᠵᠢᠯᠢᠢᠬᠦ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠬᠣᠬᠢ ᠨᠢ ᠲᠡᠷᠡ ᠡ》 ᠭᠡᠵᠦ ᠭᠥᠩ ᠨᠣᠶᠠᠨ ᠢ ᠪᠢᠲᠡᠭᠦᠬᠡᠨ ᠬᠠᠷᠢᠶᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ《 ᠴᠡᠴᠡᠭ ᠬᠠᠲᠤᠨ ᠴᠤ᠌ ᠪᠣᠯ ᠶᠠᠭᠠᠮᠠᠢ᠂ ᠲᠡᠷᠡ ᠠᠯᠢᠶᠠᠷᠬᠠᠭ ᠲᠣᠭᠯᠠᠭᠰᠠᠨ ᠨᠢᠳᠦ᠂ ᠡᠷᠡ ᠭᠡᠵᠢᠭᠡᠳᠡᠮᠡ ᠬᠣᠶᠠᠷ ᠪᠣᠮᠪᠣᠭᠣᠷ ᠬᠥᠬᠥ ᠪᠠ ᠮᠤᠰᠭᠢᠯᠵᠠᠭᠤᠷ ᠭᠤᠨᠵᠢᠨ ᠳᠠᠰᠢᠶᠠ ᠨᠢ᠁ ᠠ᠂ ᠬᠠᠢᠷᠠᠨ᠂ ᠬᠠᠢᠷᠠᠨ!᠁ ᠲᠡᠷᠡ ᠮᠠᠭᠤ ᠠᠰᠠᠮᠠᠨ ᠪᠤᠬᠠᠨ ᠳᠤ ᠵᠠᠭᠤᠷᠮᠠᠭ ᠳᠠᠯᠬᠢᠭᠤᠯᠵᠤ ᠪᠠᠢᠬᠤ ᠭᠡᠵᠦ ᠁ ᠮᠥᠨ ᠴᠤ᠌ ᠬᠠᠢᠷᠠᠨ! ᠭᠡᠵᠦ ᠡᠷᠡᠦ ᠪᠡᠨ ᠪᠠᠷᠢᠨ ᠵᠠᠪᠰᠠᠷ ᠣᠯᠳᠠᠳᠠᠭ ᠯᠠ ᠶᠤᠮ ᠪᠣᠯ ᠴᠡᠴᠡᠭ ᠬᠠᠲᠤᠨ ᠢ ᠨᠤᠬᠤᠭᠠᠳ ᠤᠨᠠᠬᠤ ᠳᠤ ᠲᠡᠯᠡᠮᠡᠨ ᠵᠢᠷᠣᠭᠠ ᠮᠣᠷᠢᠨ ᠤ ᠲᠠᠰᠢᠶᠠᠨ ᠳᠤ ᠰᠠᠭᠤᠴᠢᠬᠠᠭᠰᠠᠨ ᠰᠢᠭ᠋ ᠯᠠ ᠬᠣᠨᠳᠣᠯᠠᠢ ᠨᠢ ᠪᠥᠮᠪᠥᠭᠡᠨᠡᠭᠡᠳ ᠡᠷᠡ ᠬᠥᠮᠥᠨ ᠦ ᠭᠠᠩ ᠲᠠᠢᠯᠬᠤ ᠶᠢᠨ ᠵᠢᠷᠭᠠᠯ ᠢ ᠡᠳ᠋ᠯᠡᠳᠡᠭ ᠴᠤ᠌ ᠪᠣᠯᠣᠭᠠᠰᠠᠢ》 ᠭᠡᠵᠦ ᠬᠡᠢ ᠳᠡᠮᠡᠢ ᠭᠣᠷᠢᠳᠠᠵᠤ ᠶᠠᠪᠤᠬᠤ ᠳᠤ ᠪᠡᠶᠡ ᠶᠢᠨ ᠬᠢᠨᠢ ᠭᠠᠵᠠᠷ ᠦᠲᠦ ᠠᠷᠵᠠᠭᠠᠨᠠᠨ ᠵᠠᠭᠠᠲᠤᠨᠠᠬᠤ ᠰᠢᠭ᠋ ᠪᠣᠯᠵᠤ ᠡᠮᠡᠭᠡᠯ ᠳᠣᠣᠷᠠ ᠠᠴᠠ ᠨᠢ ᠨᠤᠬᠤᠵᠤ ᠡᠪᠡᠳᠬᠡᠨᠡ᠃
ᠵᠠᠯᠠᠭᠤ ᠬᠠᠲᠤᠨ ᠵᠠᠰᠠᠭ ᠬᠦᠩ ᠨᠣᠶᠠᠨ ᠤ ᠪᠠᠨ ᠬᠠᠩᠭᠠᠯᠲᠠ ᠳᠤ ᠬᠠᠨᠤᠮᠵᠢ ᠮᠠᠭᠤ ᠪᠠᠢᠳᠠᠭ ᠴᠤ᠌ ᠶᠤᠮ ᠤᠤ ᠭᠡᠮᠡᠷ ᠴᠠᠭᠠᠳᠤᠬᠢ ᠨᠢ ᠨᠢᠳᠦᠨ ᠳᠡᠬᠡᠨ ᠭᠣᠬᠠ ᠲᠣᠭᠯᠠᠭᠤᠯᠤᠭᠠᠳ ᠪᠠᠢᠩᠭᠤ《 ᠮᠠᠨᠴᠤᠷᠭᠠ ᠡ! ᠨᠠᠭᠠᠰᠢ ᠪᠠᠨ!》 ᠭᠡᠬᠦ ᠰᠢᠭ ᠰᠠᠨᠠᠭᠳᠠᠨᠠ᠃ ᠨᠢᠭᠡ ᠤᠳᠠᠭᠠ ᠬᠣᠰᠢᠭᠤ ᠶᠠᠮᠤᠨ ᠤ ᠬᠥᠬᠡ ᠲᠣᠭᠣᠰᠬᠠᠨ ᠭᠦᠷᠢᠶᠡᠨ ᠦ ᠠᠮᠠᠨ ᠳᠤ ᠴᠡᠴᠡᠭ ᠬᠠᠲᠤᠨ ᠲᠠᠢ ᠬᠠᠯᠵᠠ ᠵᠣᠯᠭᠠᠬᠤ ᠳᠤ ᠬᠠᠲᠤᠨ ᠤ ᠴᠢᠷᠠᠢ ᠥᠯᠥ᠍ ᠮᠡᠳᠡᠭ ᠤᠯᠠᠪᠠᠯᠵᠠᠵᠤ ᠨᠢᠳᠦ ᠨᠢ ᠢᠨᠠᠭ ᠤᠨ ᠭᠠᠯ ᠳᠤ ᠳᠦᠯᠡᠭᠳᠡᠬᠦ ᠳᠡᠬᠡᠨ ᠲᠣᠭᠲᠠᠭᠤᠬᠠᠨ ᠪᠣᠯᠪᠠᠴᠤ ᠴᠣᠷᠭᠢᠮᠠ ᠬᠠᠷᠠᠴᠠ ᠪᠠᠷ ᠲᠡᠭᠦᠨ ᠢ ᠴᠣᠭᠣᠷᠠᠲᠠᠯᠠ ᠰᠢᠷᠲᠡᠭᠰᠡᠨ ᠢ ᠲᠡᠷᠡ ᠮᠠᠷᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠪᠣᠳᠣᠯ ᠳ᠋ᠤᠨᠢ ᠭᠥᠩ ᠨᠣᠶᠠᠨ ᠤ ᠬᠠᠢᠷᠠᠲᠠᠢ ᠬᠠᠲᠤᠨ ᠳ᠋ᠤᠨᠢ ᠣᠢᠷᠠᠲᠤᠵᠤ ᠦᠵᠡᠬᠦ ᠰᠠᠨᠠᠭᠠ ᠪᠠᠢᠨ ᠪᠠᠢᠨ ᠣᠷᠣᠳᠠᠭ ᠪᠣᠯᠪᠠ᠃
ᠤᠯᠠᠭᠠᠨ ᠵᠠᠭᠠᠷᠠᠭ ᠲᠠᠢ ᠨᠠᠮᠢᠯᠵᠠᠭᠤᠨ ᠨᠠᠮᠤᠭᠲᠤ ᠭᠠᠵᠠᠷ ᠢ᠋ ᠲᠦᠳᠡᠬᠡᠨ ᠲᠣᠪᠴᠢᠯᠠᠵᠤ ᠵᠣ ᠭᠠᠵᠠᠷ ᠲᠤ᠌ ᠭᠠᠷᠬᠤ ᠳ᠋ᠤ᠌ ᠤᠨᠤᠭᠰᠠᠨ ᠮᠣᠷᠢᠨ ᠤ᠋ ᠬᠢᠨᠢ ᠬᠤᠷᠳᠤ ᠨᠡᠮᠡᠭᠳᠡᠵᠦ ᠴᠢᠯᠠᠭᠤ ᠬᠠᠢᠷ᠂ ᠲᠠᠷᠭᠢᠯ ᠭᠣᠣ ᠲᠠᠢ ᠵᠠᠮ ᠢ᠋ ᠠᠵᠢᠭ ᠦᠭᠡᠢ ᠬᠣᠷᠣᠭᠠᠵᠤ ᠶᠠᠪᠤᠨᠠ᠃ ᠶᠠᠯᠢ ᠦᠭᠡᠢ ᠵᠤᠷᠠᠮᠠ ᠶ᠋ᠢᠨ ᠨᠦᠬᠡᠨ ᠳ᠋ᠦ᠍ ᠭᠡᠨᠡᠳᠲᠡ ᠪᠦᠳᠦᠷᠢᠭᠰᠡᠨ ᠮᠣᠷᠢ ᠨᠢ ᠮᠠᠨᠴᠤᠷᠭᠠ ᠶᠢ ᠵᠢᠯᠣᠭᠣ ᠠᠯᠳᠠᠭᠤᠯᠵᠤ ᠠᠷᠠᠢ ᠯᠠ ᠤᠨᠠᠭᠠᠭᠰᠠᠨ ᠦᠭᠡᠢ᠃ ᠡᠨᠡ ᠨᠢ ᠬᠠᠲᠤᠨ ᠤ ᠡᠪᠦᠷ ᠲᠦ ᠰᠢᠷᠭᠤᠬᠤ ᠭᠡᠰᠡᠨ ᠪᠣᠳᠣᠯ ᠠᠴᠠ ᠮᠠᠨᠴᠤᠷᠭᠠ ᠶᠢᠨ ᠰᠡᠳᠬᠢᠯ ᠦᠨ ᠵᠢᠯᠣᠭᠣ ᠶᠢ ᠨᠢ ᠡᠷᠭᠢᠭᠦᠯᠪᠡ᠃
ᠠ ᠴᠠᠪᠠᠰᠤ᠂ ᠡᠰᠡ ᠯᠡ ᠵᠤᠷᠠᠮᠠ ᠶ᠋ᠢᠨ ᠨᠦᠬᠡ ᠰᠠᠬᠢᠭᠤᠯᠴᠢᠬᠠᠬᠤ ᠰᠢᠬᠠᠯᠠ ᠭᠡᠳ ᠡᠪᠦᠳᠦᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠠᠪᠢᠷᠠᠵᠤ 《 ᠴᠥᠬᠥ 》 ᠭᠡᠬᠦ ᠳ᠋ᠦ᠍ ᠡᠵᠡᠨ ᠦ᠌ ᠪᠠ ᠰᠠᠨᠠᠭᠠ ᠶ᠋ᠢ ᠠᠯᠳᠠᠯ ᠦᠭᠡᠢ ᠮᠡᠳᠡᠳᠡᠭ ᠠᠷᠭᠢᠶᠠ ᠬᠡᠭᠡᠷ ᠨᠢ ᠲᠠᠰᠢᠭᠤᠷ ᠦᠭᠭᠦᠭᠰᠡᠨ ᠰᠢᠭ ᠤᠬᠤᠰᠬᠢᠪᠡ᠃
ᠪᠠᠷᠤᠭ ᠤ᠋ᠨ ᠪᠠᠷᠲᠠᠭᠠ ᠲᠠᠢ ᠵᠠᠮ ᠳ᠋ᠤ᠌ ᠪᠦᠳᠦᠷᠢᠬᠦ ᠶ᠋ᠢ ᠮᠡᠳᠡᠳᠡᠭ ᠦᠭᠡᠢ ᠠᠷᠭᠢᠶᠠ ᠬᠡᠭᠡᠷ ᠬᠥᠯ ᠠᠯᠳᠠᠬᠤ ᠳ᠋ᠤ᠌ ᠲᠡᠷᠡ ᠪᠡᠷ ᠰᠡᠵᠢᠭ ᠲᠥᠷᠥᠪᠡ᠃ 《 ᠮᠠᠨᠴᠤᠷᠭᠠ ᠴᠢ ᠭᠥᠩ ᠨᠣᠶᠠᠨ ᠤ ᠵᠠᠯᠠᠭᠤ ᠬᠠᠲᠤᠨ ᠳᠤ ᠰᠠᠨᠠᠭᠠᠷᠬᠠᠭᠰᠠᠨ ᠪᠣᠯᠴᠢᠮ ᠦᠭᠡᠢ ᠪᠣᠳᠣᠯ ᠢᠶᠠᠨ ᠲᠠᠶᠠᠭᠳᠠᠵᠤ ᠪᠡᠶᠡ ᠪᠡᠨ ᠮᠡᠳᠡᠭ᠍ᠰᠡᠨ ᠴᠢᠨᠢ ᠳᠡᠭᠡᠷᠡ ᠪᠣᠢ》ᠭᠡᠵᠦ ᠬᠡᠨ ᠨᠢᠭᠡ ᠨᠢ ᠲᠡᠭᠦᠨ ᠤ ᠴᠢᠬᠢᠨ ᠳᠦ ᠰᠢᠪᠡᠨᠡᠬᠦ ᠮᠡᠲᠦ ᠪᠣᠯᠪᠠ ᠃
ᠮᠠᠨᠴᠤᠷᠭᠠ ᠠᠷᠭᠢᠶᠠ ᠬᠡᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠦᠳᠦᠷᠢᠭᠰᠡᠨ ᠢ᠋ᠶ᠋ᠡᠷ 《 ᠵᠠ᠂ ᠪᠠᠢᠶᠠ ᠳᠠ ! ᠪᠤᠷᠬᠠᠨ ᠲᠡᠭ᠍ᠷᠢ ᠪᠤᠷᠤᠭᠤ ᠦᠵᠡᠬᠦ ᠶᠦᠮ ᠪᠠᠢᠨᠠ 》ᠭᠡᠵᠦ ᠴᠡᠴᠡᠭ ᠬᠠᠲᠤᠨ ᠢ ᠪᠣᠳᠣᠯ ᠠᠴᠠ ᠪᠠᠨ ᠵᠠᠢᠯᠠᠭᠤᠯᠪᠠᠯ ᠠᠯᠢᠶᠠ ᠷᠤᠯᠮᠠ ᠪᠣᠳᠣᠯ ᠳᠤ ᠣᠷᠣᠯᠠ᠃
ᠷᠤᠯᠮᠠ ᠣᠯᠠᠨ ᠡᠷᠡ ᠪᠡᠷ ᠵᠠᠢᠳᠠᠯᠠᠭᠤᠯᠤᠭᠰᠠᠨ ᠵᠠᠢᠳᠠᠩ ᠪᠠᠢᠳᠠᠰᠤ ᠪᠣᠯᠪᠠᠴᠤ ᠶᠠᠭᠤᠮᠠᠨ ᠤ᠋ ᠣᠩᠭᠢᠨ ᠳᠡᠭᠡᠷᠡ ᠴᠠᠭᠠᠨᠠ ᠪᠠᠨ ᠨᠢᠭᠡ ᠠ ᠥᠶᠥᠭ᠂ ᠪᠠᠷᠬᠢᠷᠠᠭᠠ ᠢᠩᠭᠡ ᠰᠢᠭ ᠲᠠᠭᠠᠲᠠᠢᠬᠠᠨ ᠪᠠᠢᠳᠠᠭ ᠢ᠋ ᠮᠠᠨᠴᠤᠷᠭᠠ ᠶᠠᠭᠤ ᠠᠨᠳᠠᠬᠤ ᠪᠣᠢ᠃
ᠲᠡᠷᠡ ᠵᠢᠯ ᠦ᠋ᠨ ᠨᠠᠮᠤᠷ ᠮᠠᠨᠴᠤᠷᠭᠠ ᠬᠡᠳᠦᠭᠦᠯᠡ ᠯᠡ ᠣᠪᠣᠭᠲᠤ ᠶ᠋ᠢᠨ ᠵᠢᠷᠭᠤᠭᠠᠨ ᠴᠦᠷᠭᠡ ᠲᠡᠮᠡᠭᠡᠨ ᠠᠴᠢᠶᠠ ᠶ᠋ᠢ ᠰᠠᠬᠢᠵᠤ ᠪᠤᠭᠤᠲᠤ ᠶ᠋ᠢᠨ ᠬᠠᠷᠠ ᠳᠠᠪᠠᠭᠠ ᠶᠢ ᠳᠠᠪᠠᠭᠤᠯᠬᠤ ᠳ᠋ᠤ᠌ ᠲᠤᠨᠤᠬᠤ ᠶ᠋ᠢ ᠵᠠᠪᠳᠤᠭᠰᠠᠨ ᠠᠷᠪᠠᠭᠠᠳ ᠳᠡᠭᠡᠷᠡᠮ ᠢ᠋ ᠲᠣᠨᠢᠯᠭᠠᠵᠤ ᠠᠮᠤᠷ ᠲᠠᠢᠪᠤᠩ ᠳᠠᠪᠠᠭᠠ ᠳᠠᠪᠠᠭᠤᠯᠤᠭᠰᠠᠨ ᠢ᠋ᠶ᠋ᠠᠷ ᠬᠠᠷᠠᠮᠴᠢ ᠮᠠ ᠣᠪᠣᠭᠲᠤ ᠶ᠋ᠢᠨ ᠭᠠᠷ ᠠ᠋ᠴᠠ ᠬᠤᠪᠢ ᠳᠠᠬᠢᠨ ᠢᠯᠡᠭᠦᠦ ᠱᠠᠩ ᠬᠦᠷᠲᠡᠵᠦ ᠪᠤᠴᠠᠯᠭᠠᠨ ᠳ᠋ᠠᠭᠠᠨ ᠪᠤᠭᠤᠲᠤ ᠳ᠋ᠤ᠌ ᠪᠠᠭᠤᠵᠠᠢ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠴᠡᠷᠢᠭ᠂ ᠰᠦᠮᠡ ᠰᠠᠩ ᠤᠨ ᠰᠠᠬᠢᠭᠤᠯ᠂ ᠨᠤᠲᠤᠭ ᠤ᠋ᠨ ᠴᠡᠷᠢᠭ ᠦ᠋ᠳ ᠴᠤ᠌ ᠭᠠᠨᠵᠤᠭᠠᠨ ᠤ᠋ ᠮᠠᠢᠮᠠᠢᠴᠢᠳ ᠤ᠋ᠨ ᠠᠴᠢᠶᠠ ᠬᠥᠰᠬᠡ ᠶ᠋ᠢ ᠳᠡᠭᠡᠷᠡᠮ ᠲᠣᠨᠣᠭᠠ ᠠ᠋ᠴᠠ ᠬᠠᠮᠠᠭᠠᠯᠠᠵᠤ ᠂ ᠠᠮᠤᠷ ᠲᠦᠪᠰᠢᠨ ᠢ᠋ ᠨᠢ ᠪᠠᠲᠤᠯᠠᠵᠤ ᠪᠠᠭᠠ ᠰᠠᠭᠠ ᠬᠠᠷᠢᠭᠤ ᠮᠥᠩᠭᠥ ᠡᠪᠦᠷᠲᠦᠯᠡᠨ ᠬᠡᠦᠬᠡᠳ ᠪᠦᠰᠡᠭᠦᠢ ᠶ᠋ᠢᠨ ᠢ᠋ᠶ᠋ᠡᠨ ᠭᠣᠣᠯ ᠢ᠋ ᠨᠢ ᠳᠡᠪᠲᠦᠭᠡᠬᠦ ᠭᠡᠵᠦ ᠠᠮᠢᠲᠠᠢᠳᠠᠭ③ ᠪᠠᠢᠪᠠ᠃ ᠮᠠᠨᠴᠤᠷᠭᠠ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠪᠣᠯ ᠡᠨᠡ ᠲᠤᠬᠠᠢ ᠰᠠᠨᠠᠬᠤ ᠶᠠᠭᠤᠮᠠ ᠪᠢᠰᠢ᠃ ᠬᠠᠷᠢᠨ ᠢᠯᠡᠭᠦᠴᠡ ᠬᠡᠳᠦᠨ ᠮᠥᠩᠭᠥ ᠲᠡᠢ ᠪᠣᠯ ᠬᠡᠳᠦᠨ ᠴᠢᠮᠬᠢ ᠬᠠᠩᠭᠢ ᠰᠢᠤᠬᠠᠨ ᠶᠠᠭᠤᠮᠠ ᠣᠯᠵᠤ ᠬᠡᠩᠰᠢᠭᠦᠦ ᠦᠨᠦᠷᠲᠦᠭᠡᠳ ᠬᠠᠮᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠭᠠᠬᠢᠭᠤᠯᠴᠢᠬᠠᠳᠠᠭ᠃ ᠡᠪ ᠲᠠᠭᠠᠷᠠᠪᠠᠯ ᠡᠮᠡ ᠶ᠋ᠢᠨ ᠲᠣᠯᠣᠭᠠᠢ ᠡᠷᠭᠢᠭᠦᠯᠦᠨ ᠢᠯᠡᠭᠦᠦ ᠬᠣᠶᠠᠷ ᠮᠥᠩᠭᠥ ᠭᠠᠷᠤᠵᠠᠳᠠᠭᠤᠯᠤᠭᠰᠠᠨ ᠴᠤ᠌ ᠶᠡᠷᠦ ᠬᠠᠢᠷᠠᠨ ᠭᠡᠵᠦ ᠰᠠᠨᠠᠳᠠᠭ ᠦᠭᠡᠢ ᠠᠵᠢ᠃ ᠡᠢᠨ ᠬᠦ ᠮᠠᠨᠴᠤᠷᠭᠠ ᠮᠠᠬᠠᠪᠣᠳ ᠢ᠋ᠶ᠋ᠠᠨ ᠵᠢᠷᠭᠠᠭᠤᠯᠤᠨ ᠮᠠᠩᠰᠢᠭᠤᠷᠠᠬᠤ ᠶ᠋ᠢ ᠶᠠᠭᠤᠨ ᠠ᠋ᠴᠠ ᠴᠤ᠌ ᠳᠡᠭᠡᠷᠡ ᠭᠡᠵᠦ ᠦᠵᠡᠨᠡ᠃
ᠲᠡᠷᠡ ᠤᠳᠠᠭᠠ ᠮᠠᠨᠴᠤᠷᠭᠠ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠰᠦᠷ ᠪᠠᠳᠠᠷᠠᠭᠤᠯᠵᠤ ᠳᠠᠭᠠᠷᠢᠯᠳᠤᠭᠰᠠᠨ ᠠᠷᠪᠠᠭᠠᠳ ᠶᠠᠪᠠᠭᠠᠨ ᠲᠣᠨᠣᠭᠠ ᠶ᠋ᠢ ᠠᠯᠠᠳᠠᠭ ᠢ᠋ ᠨᠢ ᠠᠯᠠᠵᠤ ᠳᠤᠲᠠᠭᠠᠯᠭᠠᠳᠠᠭ ᠢ᠋ ᠨᠢ ᠲᠤᠲᠠᠭᠠᠯᠭᠠᠴᠢᠬᠠᠭᠠᠳ ᠬᠠᠷᠠᠮᠴᠢ ᠮᠠ ᠣᠪᠣᠭᠲᠤ ᠶ᠋ᠢᠨ ᠰᠠᠮᠵᠠ ᠶ᠋ᠢᠨ ᠪᠤᠬᠤᠷ ᠠ᠋ᠴᠠ ᠢᠯᠡᠭᠦᠦ ᠬᠡᠳᠦᠨ 《 ᠴᠢᠪᠠᠭᠠ 》 ᠤᠨᠠᠭᠠᠭᠰᠠᠨ ᠢ᠋ᠶ᠋ᠠᠨ ᠬᠡᠷᠡᠭ ᠲᠠᠶ ᠭᠠᠵᠠᠷ ᠵᠠᠷᠤᠨᠠ ᠭᠡᠵᠦ ᠷᠤᠯᠮᠠ ᠶᠢᠨ ᠳ᠋ᠤ᠌ ᠱᠤᠯᠤᠭᠠᠳ ④ ᠪᠠᠭᠤᠵᠠᠢ᠃
ᠷᠤᠯᠮᠠ ᠳᠣᠷᠢᠭᠤᠨ ᠭᠠᠭᠴᠠᠭᠠᠷ ᠪᠠᠢᠬᠤ ᠲᠣᠬᠢᠶᠠᠪᠠ᠃
— ᠪᠤᠳ᠋ᠠᠨ ᠤ᠋ ᠪᠥᠵᠥᠩ ᠦᠷᠭᠦᠭᠡᠭᠦ᠋ᠵᠡᠢ ᠭᠡᠳ ᠠᠶᠤᠨ ᠰᠣᠴᠢᠨ ᠶᠠᠪᠤᠵᠤ ᠢᠷᠡᠯᠡ ᠷᠤᠯᠮᠠ ᠮᠢᠨᠢ !
— ᠶᠠᠭᠤᠨ ᠳ᠋ᠠᠭᠠᠨ ᠠᠶᠤᠵᠤ ᠰᠣᠴᠢᠨᠠ ᠪᠣᠢ ? ᠬᠠᠪᠬᠠᠨ ᠳ᠋ᠤ᠌ ᠭᠢᠰᠬᠢᠴᠢᠬᠡᠬᠦ ᠡᠴᠡ ᠠᠶᠤᠪᠠ ᠤᠤ? ᠴᠢᠮᠠᠶ᠋ᠢ ᠪᠢ ᠬᠠᠮᠠᠷᠴᠢ ᠮᠥᠷᠲᠡᠭᠡᠨ ᠰᠣᠨᠣᠷᠴᠢ᠂ ᠨᠡᠷᠡ ᠲᠡᠢ ᠪᠡᠨ ᠠᠳᠠᠯᠢᠬᠠᠨ ᠰᠠᠢᠨ ᠡᠷᠡ ᠶ᠋ᠢᠨ ᠨᠢᠭᠡ ᠭᠡᠵᠦ ᠰᠠᠨᠠᠭᠰᠠᠨ ᠴᠢᠨᠢ ᠡᠢᠮᠦ ᠲᠠᠤᠯᠠᠢ ᠶ᠋ᠢᠨ ᠵᠢᠷᠦᠬᠡ ᠲᠡᠢ ᠠᠮᠢᠲᠠᠨ ᠪᠠᠢᠭᠰᠠᠨ ᠶᠤᠮ ᠤᠤ ᠭᠡᠳ ᠰᠤᠭᠤ ᠤᠷᠤᠭᠤ ᠪᠠᠨ ᠭᠡᠳᠡᠭᠡᠯᠡᠭᠦᠯᠦᠭᠰᠡᠨ ᠶᠦᠮ ᠰᠢᠭ ᠬᠢᠳ ᠬᠢᠳ ᠬᠢᠨ ᠢᠨᠢᠶᠡᠨᠡ᠃
— ᠨᠠᠮᠠᠶ᠋ᠢ ᠳᠣᠭᠣᠭᠢᠯᠠᠭᠠ ᠤᠤ ᠳᠠ ᠴᠢ ?
— ᠶᠠᠭᠠᠬᠢᠯᠠ ᠭᠡᠵᠦ ᠳᠣᠭᠣᠭᠢᠯᠠᠳᠠᠭ ᠶᠤᠮ ᠪᠣᠢ ?
— ᠭᠠᠷ ᠬᠣᠭᠣᠰᠣᠨ ᠢᠷᠡᠯᠡ ᠭᠡᠵᠦ ᠳᠣᠭᠣᠭᠢᠯᠠᠭᠠ ᠪᠠᠢᠯᠭᠦᠢ!
— ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ! ᠮᠠᠨᠴᠤᠷᠭᠠ ᠭᠤᠸᠠᠢ ᠨᠡᠭᠡᠷᠡᠨ ᠨᠠᠮᠠᠶ᠋ᠢ ᠱᠣᠣᠯᠠᠬᠤ ᠨᠢ ᠤᠤ! ᠭᠡᠳ ᠬᠢᠳ ᠬᠢᠳ ᠢᠨᠢᠶᠡᠬᠦ ᠨᠢ《 ᠮᠠᠨᠴᠤᠷᠭᠠ ᠭᠤᠸᠠᠢ ᠠ᠋! ᠡᠨᠡ ᠤᠳᠠᠭᠠ ᠴᠢ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠤᠨᠵᠢᠢᠯᠭᠠᠵᠤ ᠬᠣᠭᠣᠰᠣᠨ ᠢᠷᠡᠪᠡ ᠤᠤ? ᠬᠣᠶᠠᠷ ᠮᠥᠩᠭᠥᠨ ᠵᠣᠭᠣᠰ ᠲᠠᠢ ᠪᠠᠷᠳᠠᠮ ᠢᠷᠡᠪᠡ ᠤᠤ》 ᠭᠡᠰᠡᠨ ᠰᠢᠭ ᠬᠠᠷᠠᠭᠳᠠᠨᠠ᠃
ᠮᠠᠴᠣᠷᠭᠠ ᠬᠠᠷᠢᠭᠤ ᠲᠣᠣᠭᠠᠠᠷᠣᠬᠰᠠᠠ ᠦᠭᠡᠢ ᠪᠣᠯᠪᠠᠴᠤ ᠳᠣᠲᠣᠷᠠ ᠪᠠᠨ《 ᠴᠢᠨᠦ ᠲᠡᠷᠡ＜ ᠪᠤᠷᠬᠠᠨ＞ ᠤ᠋ ᠭᠣᠣ ᠳ᠋ᠤ᠌ ᠮᠥᠷᠭᠥᠬᠦ ᠭᠡᠵᠦ ᠭᠤᠶᠤᠭᠰᠠᠨ ᠡᠷᠡᠴᠦᠦᠯ ᠮᠥᠩᠭᠥᠨ ᠵᠣᠭᠣᠰ ᠰᠢᠳᠡᠬᠦ ᠳ᠋ᠦ᠍ ᠴᠢ ᠳᠤᠷᠠᠲᠠᠢ ᠪᠣᠯ ᠬᠣᠶᠠᠷ ᠬᠤᠷᠤᠭᠤ ᠪᠠᠷ ᠢᠶᠠᠨ ᠰᠤᠷᠮᠠᠭᠠᠢ ᠬᠠᠪᠴᠢᠵᠤ ᠴᠢᠳᠠᠳᠠᠭ ᠰᠠᠨ ᠪᠣᠯ ᠪᠢ ᠬᠣᠶᠠᠷ ᠮᠥᠩᠭᠥᠨ ᠵᠣᠭᠣᠰ ᠵᠡᠷᠭᠡ ᠳ᠋ᠦ᠍ᠨᠢ ᠰᠢᠳᠡᠬᠦ ᠶᠤᠮᠰᠠᠨ ᠁》 ᠭᠡᠵᠦ ᠷᠣᠯᠮᠡ ᠶᠢ ᠳᠡᠮᠡᠢ ᠲᠣᠭᠣᠵᠤ ᠶᠠᠳᠠᠨᠠ᠃
—《 ᠡᠨᠡ ᠤᠳᠠᠭᠠ ᠭᠠᠨᠵᠤᠭᠠ ᠳᠦᠭᠦᠷᠡᠩ ᠶᠠᠪᠤᠭᠠ》 ᠭᠡᠰᠡᠨ ᠦᠰᠦᠭ ᠴᠢᠷᠠᠢ ᠳᠡᠭᠡᠷᠡ ᠴᠢᠨᠢ ᠢᠪ ᠢᠯᠡᠬᠡᠨ᠃ ᠁ ᠴᠢ ᠪᠣᠯ ᠵᠢᠩᠬᠢᠨᠢ ᠡᠷᠡ ᠬᠥᠮᠦᠨ ᠦ᠌ ᠨᠢᠭᠡ ᠮᠥᠨ᠃ ᠶᠠᠭᠠᠬᠢᠯᠠ ᠭᠡᠵᠦ ᠭᠠᠷ ᠬᠣᠭᠣᠰᠣᠨ ᠭᠠᠨᠵᠤᠭᠠ ᠰᠤᠯᠠ ᠢᠷᠡᠬᠦ ᠪᠣᠢ? ᠪᠢ ᠪᠠᠢᠲᠤᠭᠠᠢ᠂ ᠬᠡᠨ ᠴᠤ᠌ ᠢᠲᠡᠭᠡᠬᠦ ᠦᠭᠡᠢ᠃ ᠤᠪᠵᠢᠠ ᠦᠭᠡᠢ ᠮᠠᠭᠤ ᠰᠠᠢᠨ ᠡᠷᠡᠰ ᠦ᠋ᠳ ᠰᠢᠭ ᠬᠣᠶᠠᠷᠬᠠᠨ ᠮᠥᠩᠭᠥ ᠡᠪᠦᠷᠯᠡᠴᠢᠬᠡᠭᠡᠳ ᠭᠤᠷᠪᠠᠨ ᠯᠠᠩ ᠳᠡᠭᠦᠵᠢᠯᠡᠭᠦᠷ ᠲᠡᠭᠡᠨ ᠲᠠᠢᠯᠳᠠᠵᠤ ᠲᠡᠰᠳᠡᠰᠢ ᠦᠭᠡᠢ ᠬᠠᠪᠴᠢᠭᠠᠨᠠᠳᠠᠭ ᠤ᠋ᠨ ᠨᠢᠭᠡ ᠴᠢ ᠪᠢᠰᠢ ᠭᠡᠳᠡᠭ ᠢ᠋ ᠪᠢ ᠢᠲᠡᠭᠡᠨᠡ ᠭᠡᠳ ᠬᠢᠳ ᠬᠢᠳ ᠢᠨᠢᠶᠡᠭᠰᠡᠨ ᠨᠢ《 ᠮᠢᠨᠦ ᠡᠭᠦᠳᠡᠨ ᠳ᠋ᠦ᠍ ᠮᠥᠷᠭᠥᠬᠦ ᠪᠡᠷ ᠢᠷᠡᠬᠦ ᠬᠥᠮᠦᠨ ᠭᠠᠷ ᠬᠣᠭᠣᠰᠣᠨ ᠢᠷᠡᠬᠦ ᠭᠡᠵᠦ ᠬᠠᠮᠢᠭᠠ ᠪᠠᠢᠬᠤ ᠪᠣᠢ! ᠡᠭᠦᠳᠡ ᠲᠣᠭᠰᠢᠬᠤ ᠳ᠋ᠠᠭᠠᠨ ᠴᠠᠭᠠᠨ ᠵᠣᠭᠣᠰ ᠢ᠋ᠶ᠋ᠠᠷ ᠲᠣᠭᠰᠢᠳᠠᠭ ᠶᠤᠮ ᠰᠢᠦ! ᠴᠢ ᠰᠣᠨᠣᠰᠬᠤ ᠦᠭᠡᠢ ᠤᠤ ᠳᠠ᠂＜ ᠲᠤᠭ ᠲᠤᠭ＞ ᠭᠡᠵᠦ ᠶᠠᠭᠠᠬᠢᠭᠰᠠᠨ ᠴᠤ᠌ ᠰᠣᠨᠣᠰᠳᠠᠬᠤ ᠦᠭᠡᠢ᠃ ᠬᠠᠷᠢᠨ＜ ᠳ᠋ᠢᠩ ᠳ᠋ᠢᠩ＞ ᠭᠡᠵᠦ ᠮᠥᠩᠭᠥ ᠳᠢᠩᠭᠢᠨᠠᠬᠤ ᠰᠢᠭ᠋ ᠰᠣᠨᠣᠰᠳᠠᠨᠠ!》 ᠭᠡᠵᠦ ᠬᠡᠯᠡᠭᠡᠳ ᠠᠪᠬᠤ ᠰᠢᠭ᠋ ᠮᠠᠨᠴᠤᠷᠭᠠ ᠳ᠋ᠤ᠌ ᠰᠠᠨᠠᠭᠳᠠᠪᠠ᠃
ᠮᠠᠨᠴᠤᠷᠭᠠ᠂ ᠷᠤᠯᠮᠠ ᠶᠢᠨ ᠴᠠᠭᠠᠨᠠ ᠰᠠᠨᠠᠭᠠ ᠶ᠋ᠢ ᠨᠡᠪᠲᠡ ᠣᠢᠯᠠᠭᠠᠭᠠᠳ ᠬᠣᠶᠠᠷ ᠮᠥᠩᠭᠥᠨ ᠵᠣᠭᠣᠰ ᠢ᠋ ᠪᠡᠶᠡ ᠤᠷᠤᠭᠤ ᠨᠢ ᠴᠣᠴᠢᠮᠠᠭ ᠰᠢᠳᠡᠵᠦ ᠣᠷᠬᠢᠪᠠ᠃
ᠡᠨᠡ ᠦᠢᠯᠡ ᠳ᠋ᠦ᠍ ᠴᠠᠭᠠᠷᠠᠭᠰᠠᠨ ᠷᠣᠯᠮᠠ ᠶᠠᠭᠤ ᠠᠨᠳᠠᠬᠤ ᠪᠢᠯᠡ? ᠨᠢᠭᠡ ᠶ᠋ᠢ ᠨᠢ ᠡᠷᠡᠬᠡᠢ ᠳᠣᠯᠢᠶᠠᠪᠤᠷ᠂ ᠨᠥᠭᠦᠭᠡ ᠶ᠋ᠢ ᠨᠢ ᠢᠳᠠᠮ ᠰᠢᠭᠢᠵᠡᠢ ᠬᠣᠶᠠᠷ ᠢᠶᠠᠷ ᠢᠶᠠᠨ ᠲᠤᠰ ᠲᠤᠰ ᠬᠠᠪᠴᠢᠵᠤ ᠠᠪᠴᠢᠬᠠᠭᠠᠳ ᠲᠡᠷᠡ ᠵᠠᠪ ᠦᠭᠡᠢ ᠡᠷᠡᠬᠡᠢ ᠪᠣᠯᠤᠨ ᠳᠤᠮᠳᠠ ᠬᠤᠷᠤᠭᠤᠨ ᠤ᠋ ᠪᠠᠨ ᠤᠷᠲᠤ ᠬᠢᠮᠤᠰᠤ ᠪᠠᠷ ᠨᠢᠭᠡ ᠮᠥᠩᠭᠥᠨ ᠵᠣᠭᠣᠰ ᠢ᠋ ᠢᠯᠳᠠᠮᠬᠠᠨ ᠬᠠᠪᠴᠢᠭᠠᠳ ᠫᠦᠳ᠋ ᠬᠢᠨ ᠦᠯᠢᠶᠡᠬᠦ ᠳ᠋ᠦ᠍《 ᠵᠢᠩ᠁》 ᠭᠡᠵᠦ ᠪᠢᠲᠡᠭᠦᠬᠡᠨ ᠵᠢᠩᠬᠢᠨᠡᠬᠰᠠᠠ ᠳᠠᠭᠤᠨ ᠭᠠᠷᠤᠭᠰᠠᠨ ᠳ᠋ᠤ᠌ ᠷᠣᠯᠮᠠ ᠶᠢᠨ ᠴᠢᠷᠠᠢ ᠳ᠋ᠤ᠌ ᠪᠠᠶᠠᠷ ᠭᠢᠯᠠᠯᠵᠠᠵᠤ《 ᠪᠣᠯᠤᠨᠠ 》ᠭᠡᠰᠡᠨ ᠵᠥᠪᠰᠢᠶᠡᠷᠡᠯ ᠥᠭᠭᠦᠭᠰᠡᠨ ᠳᠣᠬᠢᠶᠠ ᠪᠣᠯᠵᠤ ᠮᠠᠨᠴᠤᠷᠭᠠ ᠳ᠋ᠤ᠌ ᠮᠡᠳᠡᠭᠳᠡᠨᠡ᠃ ᠬᠠᠷᠢᠨ ᠳᠤᠷᠠ ᠦᠭᠡᠢ ᠪᠣᠯ ᠷᠤᠯᠮᠡ ᠨᠥᠭᠦᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠰᠢᠳᠡᠭᠰᠡᠨ ᠵᠣᠭᠣᠰ ᠢ᠋ ᠲᠣᠰᠳᠠᠭ ᠦᠭᠡᠢ ᠪᠤᠶᠤ ᠳᠠᠬᠢᠭᠠᠳ ᠰᠢᠲᠠᠵᠤ ᠢᠷᠡᠪᠡᠯ ᠭᠠᠭᠴᠠᠬᠠᠨ ᠨᠢᠰᠠᠯᠤᠭᠠᠳ ᠴᠠᠭᠠᠨ ᠵᠣᠭᠣᠰ ᠢ᠋ ᠡᠵᠡᠨ ᠳ᠋ᠦ᠍ᠨᠢ ᠪᠤᠴᠠᠭᠠᠳᠠᠭ ᠡᠷᠳᠡᠮ ᠲᠡᠢ ᠭᠡᠵᠦ ᠬᠥᠮᠦᠰ ᠬᠡᠯᠡᠯᠴᠡᠳᠡᠭ ᠢ᠋ ᠡᠷᠲᠡ ᠰᠣᠨᠣᠰᠤᠭᠰᠠᠨ ᠶᠤᠮ᠃
ᠮᠠᠨᠴᠤᠷᠭᠠ ᠷᠤᠯᠮᠡ ᠶ᠋ᠢᠨ ᠡᠢᠮᠦ ᠬᠤᠷᠤᠭᠤᠨ ᠳ᠋ᠠᠭᠠᠨ ᠷᠢᠳᠢ ᠰᠢᠳᠢ ᠲᠡᠢ ᠶᠦᠮ ᠰᠢᠭ ᠡᠷᠳᠡᠮ ᠢ᠋ ᠨᠢ ᠪᠢᠰᠢᠷᠡᠵᠦ᠂ ᠲᠡᠪᠴᠢᠶᠡᠷᠢ ᠮᠠᠭᠤᠲᠠᠢ ᠡᠷᠡᠴᠦᠦᠯ ᠢ᠋ ᠭᠣᠪᠣᠭᠣᠨᠠᠭᠤᠯᠳᠠᠭ ᠠᠪᠢᠶᠠᠰ ᠢ᠋ ᠨᠢ ᠭᠠᠢᠬᠠᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠠᠯᠢᠶᠠᠯᠠᠨ ᠢᠨᠢᠶᠡᠭᠡᠳ ᠶᠠᠮᠠᠷ ᠰᠦᠷᠡᠬᠡᠢ ᠡᠷᠡ ᠴᠤ᠌ ᠭᠡᠳ ᠴᠥᠩᠬᠦᠨ ᠳ᠋ᠦ᠍ᠨᠢ ᠬᠣᠶᠠᠷ ᠴᠠᠭᠠᠨ ᠮᠥᠩᠭᠥ ᠪᠡᠨ ᠡᠷᠬᠡ ᠦᠭᠡᠢ ᠰᠢᠳᠡᠵᠦ ᠥᠭᠳᠡᠭ ᠲᠤᠨᠢ ᠮᠠᠨᠴᠤᠷᠭᠠ ᠲᠡᠭᠦᠨ ᠢ᠋《 ᠠᠯᠢᠶᠠ ᠷᠤᠯᠮᠡ 》 ᠭᠡᠵᠦ ᠳᠠᠭᠤᠳᠠᠭᠰᠠᠨ ᠠᠵᠢ᠃
ᠲᠡᠭᠦᠨ ᠢ᠋ ᠪᠤᠭᠤᠲᠤ ᠶ᠋ᠢᠨ ᠵᠡᠭᠦᠨᠲᠡᠢᠬᠡᠨ ᠳᠥᠭᠥᠵᠦ ᠢᠷᠡᠬᠦ ᠳ᠋ᠦ᠍ ᠪᠦᠷᠦᠢ ᠲᠠᠰᠤᠷᠠᠵᠤ ᠳ᠋ᠧᠩ ᠲᠠᠯᠪᠢᠬᠤ ᠴᠠᠭ ᠪᠣᠯᠤᠭᠰᠠᠨ ᠪᠠᠢᠪᠠ᠃ ᠬᠠᠶᠠᠭᠠ ᠬᠠᠶᠠᠭᠠ ᠪᠠᠨ ᠵᠠᠯᠭᠠᠭᠰᠠᠨ ᠰᠢᠪᠡᠷ ᠲᠣᠭᠣᠰᠬᠠᠨ ᠪᠠᠢᠰᠢᠩ ᠤ᠋ᠨ ᠮᠣᠣᠲᠤᠤ ᠴᠠᠭᠠᠰᠤᠨ ᠳ᠋ᠤ᠌ ᠭᠡᠷᠡᠯ ᠢ᠋ᠶ᠋ᠡᠨ ᠠᠯᠳᠠᠭᠰᠠᠨ ᠳ᠋ᠧᠩ ᠦ᠋ᠳ ᠰᠦᠭ ᠰᠦᠯᠳᠡ ᠦᠭᠡᠢ ᠬᠢᠯᠠᠢᠨᠠ᠃
ᠵᠠᠬᠠ ᠶ᠋ᠢᠨ ᠪᠠᠢᠰᠢᠩ ᠲᠠᠢ ᠠᠢᠯ ᠤ᠋ᠨ ᠨᠣᠬᠠᠳ ᠬᠣᠷᠭᠣᠭᠣᠬᠤ ᠳ᠋ᠤ᠌ ᠮᠠᠨᠴᠤᠷᠭᠠ ᠶ᠋ᠢᠨ ᠳᠣᠲᠣᠷᠠ ᠣᠪᠣᠭᠣᠨᠠᠵᠤ᠂ ᠥᠨᠥ ᠰᠥᠨᠢ ᠴᠤ᠌ ᠮᠠᠭᠤ ᠠᠯᠢᠶᠠ ᠷᠤᠯᠮᠡ ᠶ᠋ᠢᠨ ᠢ᠋ᠶ᠋ᠡᠨ＜ ᠬᠣᠯᠬᠢᠨᠳᠠᠭ ᠭᠤᠲᠤᠯ ＞ ᠢ᠋ᠶ᠋ᠠᠷ ᠬᠣᠯᠬᠢᠵᠤ ᠬᠣᠨᠣᠨᠠ ᠳᠠ! ᠭᠠᠴᠢᠭᠳᠠᠬᠤ ᠳ᠋ᠤ᠌ ᠮᠥᠨ ᠡᠷᠡ ᠶ᠋ᠢᠨ ᠭᠠᠩ ᠰᠠᠢᠬᠠᠨ ᠲᠠᠢᠯᠳᠠᠭ ᠯᠦᠳ᠋ ᠶᠦᠮ ᠠ᠋! ᠱᠠᠯᠠᠪᠬᠠᠨ ᠶᠠᠪᠤᠵᠤ＜ ᠵᠠᠳᠠᠭᠠᠢ ᠣᠩᠭᠣᠴᠠ＞ ᠳ᠋ᠤᠨᠢ ᠪᠣᠷᠣ ᠠᠵᠢᠷᠭᠠ ᠪᠠᠨ ᠤᠰᠤᠯᠠᠶᠠ ᠭᠡᠵᠦ ᠬᠥᠭᠰᠡᠬᠦ ᠳ᠋ᠦ᠍ ᠰᠡᠳᠬᠢᠯ ᠴᠠᠳᠬᠤᠯᠠᠩ ᠪᠠᠢᠯᠠ᠃
ᠠᠯᠢᠶᠠ ᠷᠤᠯᠮᠡ ᠲᠡᠢ ᠠᠭᠤᠯᠵᠠᠭᠰᠠᠨ ᠦᠭᠡᠢ ᠨᠡᠯᠢᠶᠡᠳ ᠤᠳᠠᠴᠢᠬᠠᠯᠠ᠃ ᠬᠥᠭᠰᠡᠵᠦ ᠬᠦᠷᠦᠭᠡᠳ ᠣᠴᠢᠬᠤ ᠳ᠋ᠤ᠌ ᠬᠥᠭᠡᠷᠦᠬᠦᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠯᠠ ᠪᠠᠢᠳᠠᠭ ᠪᠢᠯᠡ ᠤᠤ?! ᠬᠠᠷᠢᠨ ᠪᠠᠰᠠ ᠠᠯᠢ ᠨᠢᠭᠡᠨ ᠲᠡᠢ ᠨᠢ ᠵᠠᠪᠠᠭᠠᠷᠠᠵᠤ ᠪᠠᠢᠳᠠᠭ ᠪᠢᠯᠡ?! ᠥᠨᠥᠬᠢ ᠴᠢᠨᠢ ᠲᠡᠭᠡᠭᠡᠳ ᠥᠭᠴᠦ ᠠᠪᠳᠠᠭ ᠰᠢᠨᠤᠯ ᠨᠢ ᠶᠠᠩᠵᠤ ᠪᠠᠷ ᠢ᠋ᠶ᠋ᠠᠨ ᠪᠠᠢᠭᠠ ᠪᠢᠵᠡ? ᠭᠡᠵᠦ ᠮᠠᠨᠴᠤᠷᠭᠠ ᠵᠦᠢᠯ ᠦ᠋ᠨ ᠶᠠᠭᠤᠮᠠ ᠪᠣᠳᠣᠵᠤ ᠶᠠᠪᠤᠪᠠ᠃
ᠷᠤᠯᠮᠡ ᠶ᠋ᠢᠨ ᠡᠷᠡ ᠤᠭ ᠨᠢ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠰᠠᠢᠨ ᠠᠩᠴᠢᠨ ᠪᠠᠢᠭᠰᠠᠨ ᠶᠤᠮ᠃ ᠤᠷᠠᠬᠠ ᠬᠠᠪᠬᠠ ᠪᠤᠶᠤ ᠭᠠᠯ ᠫᠤᠤ ᠪᠠᠷ ᠭᠥᠷᠥᠭᠡᠰᠦ ᠠᠩᠨᠠᠵᠤ ᠣᠨᠳᠣᠷᠣᠳᠠᠭ᠃ ᠨᠢᠭᠡ ᠤᠳᠠᠭᠠ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠲᠤᠨᠠᠨ ᠬᠠᠳᠠᠨ ᠳ᠋ᠤ᠌ ᠬᠥᠬᠡ ᠢᠮᠠᠭᠠ( ᠢᠮᠠᠭᠠᠨ ᠭᠥᠷᠥᠭᠡᠰᠦ ) ᠠᠩᠨᠠᠵᠤ ᠶᠠᠪᠤᠭᠠᠳ ᠪᠣᠯᠭᠣᠮᠵᠢ ᠠᠯᠳᠠᠵᠤ ᠬᠠᠳᠠᠨ ᠠ᠋ᠴᠠ ᠨᠢᠰᠴᠦ ᠦᠬᠦᠭᠡᠳ ᠷᠤᠯᠮᠡ ᠪᠡᠯᠪᠡᠰᠦᠷᠡᠵᠡᠢ᠃ ᠰᠡᠭᠦᠯ ᠳ᠋ᠦ᠍ᠨᠢ ᠠᠮᠢᠳᠤᠷᠠᠬᠤ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠰᠦᠮᠡ ᠬᠡᠢᠳ ᠲᠤ ᠪᠤᠳᠠᠭᠠ ᠬᠠᠭᠤᠷᠬᠤ᠂ ᠦᠢᠯᠡ ᠤᠲᠠᠰᠤᠨ ᠤ᠋ ᠠᠵᠢᠯ ᠬᠢᠬᠦ ᠵᠡᠷᠭᠡ ᠪᠡᠷ ᠶᠠᠳᠠᠷᠠᠭᠤᠬᠠᠨ ᠠᠮᠢᠳᠤᠷᠠᠵᠤ ᠪᠠᠢᠪᠠ᠃ ᠲᠡᠭᠦᠨ ᠡᠴᠡ ᠬᠡᠦᠬᠡᠳ ᠦᠭᠡᠢ᠃ ᠥᠨᠳᠥᠷ ᠨᠢᠷᠤᠭᠤ ᠲᠠᠢ ᠭᠠᠩᠭᠠᠩ ᠪᠦᠰᠡᠭᠦᠢ ᠪᠣᠯᠬᠣᠷ ᠲᠠᠩᠳᠠ ᠰᠠᠬᠢᠯ ᠠᠯᠳᠠᠭᠰᠠᠨ ᠯᠠᠮᠠ ᠨᠠᠷ ᠤ᠋ᠨ ᠬᠣᠷᠣᠬᠠᠢ ᠶ᠋ᠢ ᠬᠥᠳᠡᠯᠭᠡᠵᠦ ᠲᠡᠳᠡᠨ ᠦ᠌ ᠳᠤᠮᠳᠠ ᠬᠡᠷᠡᠭᠦᠯ ᠴᠤᠤᠭᠢᠶᠠᠨ ᠡᠭᠦᠰᠬᠡᠵᠦ᠂ ᠮᠠᠭᠤ ᠰᠠᠢᠨ ᠡᠷᠡᠴᠦᠦᠯ᠂ ᠯᠠᠮᠠ ᠨᠠᠷ ᠬᠥᠭᠡᠷᠦᠬᠦᠢ ᠪᠡᠯᠪᠡᠰᠦᠨ ᠵᠠᠯᠠᠭᠤ ᠪᠦᠰᠡᠭᠦᠢ ᠶ᠋ᠢ ᠠᠮᠤᠷ ᠰᠠᠭᠤᠯᠭᠠᠬᠤ ᠦᠭᠡᠢ ᠨᠢ ᠮᠡᠳᠡᠭᠡᠵᠢ᠃ ᠡᠷᠡ ᠬᠥᠮᠦᠨ ᠭᠡᠵᠦ ᠡᠮᠡ ᠶ᠋ᠢᠨ ᠬᠡᠰᠢᠭ ᠣᠯᠬᠤ ᠳ᠋ᠠᠭᠠᠨ ᠶᠢᠰᠦᠨ ᠰᠢᠳᠢ ᠶ᠋ᠢᠨ ᠠᠷᠭᠠ ᠪᠠᠰᠢᠷ ᠲᠠᠢ ᠪᠠᠢᠳᠠᠭ᠃ ᠷᠤᠯᠮᠠ ᠶᠠᠭᠤ ᠭᠡᠵᠦ ᠠᠨᠳᠠᠬᠤ ᠪᠣᠢ! ᠵᠠᠷᠢᠮ ᠨᠢ ᠡᠯᠢᠭᠡ ᠪᠡᠨ ᠲᠡᠪᠡᠷᠢᠭᠡᠳ ᠰᠦ ᠳᠣᠯᠢᠶᠠᠭᠰᠠᠨ ᠮᠤᠤᠷ ᠰᠢᠭ᠋ ᠬᠢᠯᠠᠩ ᠬᠢᠯᠠᠩ ᠳᠣᠣᠭᠤᠷ ᠬᠠᠷᠠᠵᠤ ᠴᠢᠷᠠᠢᠳᠠᠨᠠ᠃ ᠵᠠᠷᠢᠮ ᠨᠢ ᠤᠰᠤᠨ ᠭᠤᠯᠭᠤᠭᠤᠷ ᠲᠣᠰᠣᠨ ᠵᠦᠯᠭᠦᠭᠦᠷ ᠰᠢᠭ ᠨᠢᠯᠪᠠᠭᠠᠨᠠᠨᠠ᠃ ᠵᠠᠷᠢᠮ ᠨᠢ ᠰᠣᠭᠲᠣᠭᠤ ᠪᠠᠷ ᠣᠪᠯᠠᠵᠤ ᠱᠠᠯᠢᠭ ᠢᠨᠢᠶᠡᠳᠦ ᠭᠠᠨᠵᠤᠭᠠᠯᠠᠵᠤ ᠢᠷᠡᠭᠡᠳ ᠨᠢᠳᠦ ᠮᠠᠳ ᠦᠭᠡᠢ ᠠᠭᠠᠰᠢᠯᠠᠨᠠ᠃ ᠵᠠᠷᠢᠮ ᠨᠢ ᠭᠣᠣᠯ ᠨᠢ ᠲᠠᠰᠤᠷᠠᠬᠤ ᠭᠡᠵᠦ ᠪᠠᠢᠭᠠ ᠰᠢᠭ᠋ ᠡᠪᠦᠳᠦᠭ ᠳᠣᠣᠷᠠ ᠰᠥᠭᠥᠳᠴᠦ 《 ᠠᠮᠢ ᠠᠪᠤᠷᠠᠭᠠᠴᠢ ᠳᠠ ᠂ ᠭᠤᠶᠤᠶᠠ 》 ᠭᠡᠳ ᠦᠷᠦ ᠡᠪᠡᠳᠦᠯᠲᠡᠢ ᠳᠦᠷᠢᠯᠡᠨᠡ᠃
ᠨᠡᠩ ᠵᠠᠷᠢᠮ ᠡᠷᠬᠡ ᠰᠦᠷ ᠲᠡᠢ᠂ ᠮᠥᠩᠭᠥ ᠲᠥᠭᠥᠷᠢᠭ ᠲᠡᠢ ᠪᠤᠶᠤ ᠨᠢᠭᠡᠮᠦᠰᠦᠨ ᠶᠠᠭᠤ ᠴᠤ ᠦᠭᠡᠢ ᠬᠣᠭᠣᠰᠣᠨ ᠭᠠᠷ ᠢ᠋ᠶ᠋ᠠᠨ ᠤᠨᠵᠢᠭᠤᠯᠤᠭᠰᠠᠨ ᠭᠠᠨᠵᠢᠩ ᠡᠷᠡᠰ ᠦ᠋ᠳ ᠯᠡ ᠳᠡᠭᠡᠳᠦ ᠶ᠋ᠢᠨ ᠳᠣᠯᠣᠭᠠᠨ ᠦᠶᠡ ᠶ᠋ᠢᠨ ᠢ᠋ᠶ᠋ᠡᠨ ᠥᠷᠢ ᠶ᠋ᠢ ᠨᠡᠬᠡᠬᠦ ᠪᠡᠷ ᠢᠷᠡᠭᠰᠡᠨ ᠰᠢᠭ ᠬᠥᠨᠳᠡᠯᠡᠨ ᠬᠥᠬᠡ ᠴᠢᠷᠠᠢᠯᠠᠵᠤ ᠬᠦᠴᠦᠷᠬᠡᠨᠡ᠃ ᠠᠷᠭᠠ ᠦᠭᠡᠢ ᠳ᠋ᠡᠭᠡᠨ ᠠᠮᠢᠳᠤ ᠶᠠᠪᠤᠪᠠᠯ ᠠᠯᠲᠠᠨ ᠠᠶᠠᠭᠠᠨ ᠠ᠋ᠴᠠ ᠤᠰᠤ ᠤᠤᠭᠤᠨᠠ ᠭᠡᠳᠡᠭ ᠢ᠋ ᠯᠡ ᠪᠣᠳᠣᠵᠤ ᠡᠨᠡᠷᠢᠯ ᠦᠭᠡᠢ ᠡᠨᠡ ᠬᠣᠷᠸᠠ ᠶ᠋ᠢᠨ ᠣᠷᠴᠢᠬᠤ ᠵᠢᠮᠡ ᠪᠡᠷ ᠶᠣᠯᠮᠠ ᠡᠮᠡ ᠬᠥᠮᠦᠨ ᠦ᠌ ᠨᠢᠮᠭᠡᠨ ᠵᠠᠶᠠᠭᠠ ᠪᠠᠷ ᠨᠢᠰᠦ ᠨᠢᠯᠪᠤᠰᠤᠨ ᠳ᠋ᠠᠭᠠᠨ ᠳᠡᠪᠲᠦᠵᠦ ᠶᠠᠪᠤᠵᠠᠢ᠃ ᠰᠡᠭᠦᠯ ᠳ᠋ᠦ᠍ᠨᠢ ᠰᠦᠮᠡ ᠬᠡᠢᠳ ᠪᠤᠵᠠᠷᠯᠠᠯᠠ ᠭᠡᠳ ᠯᠠᠮᠠ ᠨᠠᠷ ᠠᠳᠠ ᠦᠵᠡᠵᠦ ᠲᠡᠭᠦᠨ ᠦ᠌ ᠰᠦᠮᠡ ᠬᠡᠢᠳ ᠲᠦ᠍ ᠪᠤᠶᠠᠨ ᠣᠢᠯᠠᠴᠤ ᠥᠯ ᠵᠠᠯᠭᠠᠬᠤ ᠵᠠᠮ ᠢ᠋ ᠨᠢ ᠬᠠᠭᠠᠭᠰᠠᠨ ᠲᠤᠯᠠ ᠠᠷᠭᠠ ᠪᠤᠶᠤ ᠬᠣᠯᠠ ᠶ᠋ᠢᠨ ᠨᠢᠭᠡ ᠨᠠᠭᠠᠴᠤ ᠳ᠋ᠠᠭᠠᠨ ᠣᠢᠷᠠᠳᠴᠤ ᠪᠤᠭᠤᠲᠤ ᠳ᠋ᠤ᠌ ᠨᠢᠭᠡ ᠲᠣᠮᠣ ᠪᠠᠶᠠᠨ ᠤ᠋ ᠬᠦᠷᠢᠶᠡᠨ ᠳ᠋ᠦ᠍ ᠡᠭᠦᠳᠡ ᠬᠠᠰᠢᠶᠠ ᠴᠡᠪᠡᠷᠯᠡᠬᠦ᠂ ᠦᠢᠯᠡ ᠣᠶᠣᠳᠠᠯ ᠭᠡᠬᠦ ᠮᠡᠲᠦ ᠶ᠋ᠢᠨ ᠠᠷᠰᠠᠷ ᠠᠵᠢᠯ ᠬᠢᠵᠦ ᠠᠮᠢ ᠵᠢᠭᠤᠬᠤ ᠪᠣᠯᠤᠭᠰᠠᠨ ᠠᠵᠢ᠃ ᠲᠡᠭᠡᠪᠡᠴᠦ ᠴᠢᠨᠣᠠ ᠶ᠋ᠢᠨ ᠠᠮᠠᠨ ᠠ᠋ᠴᠠ ᠮᠤᠯᠲᠤᠷᠠᠨ ᠪᠠᠷᠰ ᠤ᠋ᠨ ᠠᠮᠠᠨ ᠳ᠋ᠤ᠌ ᠣᠷᠣᠪᠠ ᠭᠡᠭᠴᠢ ᠥᠩᠭᠡᠲᠦ ᠨᠡᠢᠭᠡᠮ ᠦ᠋ᠨ ᠤᠯᠠᠭᠠᠨ ᠲᠣᠭᠣᠰᠣ ᠲᠡᠭᠦᠨ ᠢ᠋ ᠬᠠᠶᠠᠭᠠᠨ ᠳ᠋ᠤᠨᠢ ᠬᠠᠶᠠᠵᠤ ᠮᠠᠷᠲᠠᠭᠠ ᠦᠭᠡᠢ᠃ ᠴᠡᠷᠢᠭ ᠦ᠋ᠨ ᠬᠠᠯᠠᠭᠠᠨ ᠤ᠋ ᠮᠠᠭᠤ ᠰᠠᠢᠨ ᠬᠠᠭᠰᠠᠮᠠᠯ ᠡᠷᠡᠰ ᠦ᠋ᠳ ᠲᠡᠭᠦᠨ ᠢ᠋ ᠮᠥᠨ ᠵᠦᠭᠡᠷ ᠰᠠᠭᠤᠯᠭᠠᠬᠤ ᠦᠭᠡᠢ ᠪᠠᠢᠯᠠ᠃ ᠲᠡᠭᠡ ᠲᠡᠭᠡᠭᠰᠡᠭᠡᠷ ᠷᠤᠯᠮᠠ ᠴᠤ᠌《 ᠰᠤᠪᠠᠢ ᠷᠤᠯᠮᠠ 》 ᠭᠡᠰᠡᠨ ᠬᠣᠴᠢ ᠲᠠᠢ ᠪᠣᠯᠵᠤ ᠰᠡᠭᠦᠯ ᠳ᠋ᠡᠭᠡᠨ ᠪᠦᠷ ᠬᠥᠮᠦᠨ ᠪᠣᠯᠭᠠᠨ ᠤ᠋ ᠬᠥᠯ ᠲᠥᠷᠥᠳᠡᠭ 《 ᠬᠣᠯᠬᠢᠨᠳᠠᠭ ᠭᠤᠲᠤᠯ 》 ᠭᠡᠭᠳᠡᠬᠦ ᠪᠣᠯᠪᠠ᠃ ᠡᠳᠦᠷ ᠦ᠋ᠨ ᠤᠳᠠᠭᠠᠨ ᠬᠣᠨᠣᠭ ᠤ᠋ᠨ ᠵᠤᠵᠠᠭᠠᠨ ᠳ᠋ᠤ᠌ ᠷᠤᠯᠮᠠ ᠴᠤ᠌《 ᠰᠢᠨᠡ 》ᠠᠮᠢᠳᠤᠷᠠᠯ ᠳ᠋ᠤ᠌ ᠢᠳᠡᠭᠡᠰᠢᠨ ᠳᠠᠳᠴᠤ ᠬᠠᠰᠢᠷ ᠰᠠᠭᠤᠨ ᠡᠷᠡᠰ ᠦ᠋ᠳ ᠦ᠋ᠨ ᠬᠣᠭᠣᠷᠣᠨᠳᠣᠬᠢ ᠵᠥᠷᠢᠴᠡᠯ ᠢ ᠣᠪᠵᠢᠨ ᠠᠰᠢᠭᠯᠠᠵᠤ᠂ ᠲᠡᠳᠡᠨ ᠦ᠌ ᠦᠭᠭᠦᠭᠰᠡᠨ ᠮᠥᠩᠭᠥ ᠪᠡᠷ ᠶᠠᠭ ᠦᠭᠡᠢ ᠠᠮᠢᠳᠤᠷᠠᠬᠤ ᠪᠣᠯᠵᠤ᠂ ᠰᠡᠭᠦᠯ ᠳ᠋ᠦ᠍ᠨᠢ ᠪᠦᠷ ᠬᠠᠷᠠ ᠲᠠᠮᠠᠬᠢᠨ ᠳ᠋ᠤ᠌ ᠣᠷᠣᠵᠠᠢ᠃ ᠡᠭᠦᠨ ᠡᠴᠡ ᠪᠣᠯᠵᠤ ᠨᠡᠯᠢᠶᠡᠳ ᠬᠡᠳᠦᠨ ᠡᠳᠦᠷ ᠡᠷᠡᠰ ᠦᠳ ᠡᠰᠡ ᠣᠴᠢᠪᠠᠯ ᠰᠡᠳᠬᠢᠯ ᠭᠠᠩᠰᠠᠷᠠᠨ ᠭᠠᠭᠴᠠᠭᠠᠷᠳᠠᠳᠠᠭ ᠴᠤ᠌ ᠪᠣᠯᠪᠠ᠃
ᠮᠠᠨᠴᠤᠷᠭᠠ ᠪᠦᠷᠦᠢ ᠪᠣᠯᠬᠤ ᠳ᠋ᠤ᠌ ᠪᠤᠭᠤᠲᠤ ᠶ᠋ᠢᠨ ᠬᠣᠢᠲᠤ ᠡᠩᠭᠡᠷ ᠬᠠᠪᠢᠳᠠᠭᠤ ᠨᠠᠮᠰᠠᠷᠠᠢ ᠪᠤᠷᠬᠠᠨᠲᠤ ᠰᠦᠮᠡ ᠵᠠ ᠬᠦᠷᠢᠶᠡ ᠶ᠋ᠢ ᠲᠣᠭᠣᠷᠢᠵᠤ ᠭᠠᠷᠬᠤ ᠳ᠋ᠠᠭᠠᠨ᠄
ᠢᠨᠵᠠᠭᠠᠨ ᠵᠣ ᠲᠠᠢ ᠰᠠᠭᠠᠷᠠᠯ ᠮᠣᠷᠢ ᠶ᠋ᠢ ᠪᠡᠨ ᠬᠦ
ᠢᠨᠴᠠᠭᠠᠬᠤ ᠶ᠋ᠢᠨ ᠬᠢᠨᠢ ᠴᠢᠮᠡᠭᠡ ᠪᠡᠷ ᠲᠠᠨᠢᠯᠠ ᠳᠠ ᠬᠦ
ᠢᠨᠠᠭ ᠠᠮᠠᠷᠠᠭ ᠬᠣᠩᠭᠣᠷ ᠴᠢᠮᠠ ᠪᠠᠨ ᠬᠦ
ᠢᠨᠢᠶᠡᠬᠦ ᠶ᠋ᠢᠨ ᠴᠢᠨᠢ ᠴᠢᠮᠡᠭᠡ ᠪᠡᠷ ᠲᠠᠨᠢᠯᠠ ᠳᠠ ᠬᠦ
ᠲᠠᠤᠯᠠᠢ ᠶ᠋ᠢᠨ ᠵᠣ ᠲᠡᠢ ᠰᠠᠭᠠᠷᠠᠯ ᠮᠣᠷᠢ ᠶ᠋ᠢ ᠪᠡᠨ ᠬᠦ
ᠲᠤᠷᠭᠢᠬᠤ ᠶ᠋ᠢᠨ ᠬᠢᠨᠢ ᠴᠢᠮᠡᠭᠡ ᠪᠡᠷ ᠲᠠᠨᠢᠯᠠ ᠳᠠ ᠬᠦ ᠁ ᠭᠡᠵᠦ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠭᠢᠩᠰᠢᠵᠦ ᠰᠦᠮᠡ ᠶ᠋ᠢᠨ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠪᠠᠢᠭᠠ ᠪᠠᠭᠠᠬᠠᠨ ᠳᠥᠷᠪᠡᠯᠵᠢᠨ ᠬᠦᠷᠢᠶᠡᠨ ᠦ᠌ ᠡᠭᠦᠳᠡᠨ ᠳ᠋ᠦ᠍ ᠬᠦᠷᠪᠡ᠃ ᠬᠦᠷᠢᠶᠡᠨ ᠦ᠌ ᠭᠠᠳᠠᠨᠠ ᠳ᠋ᠠᠭᠳᠠᠨ ᠳ᠋ᠠ ᠯᠠᠮᠠ ᠶ᠋ᠢᠨ ᠬᠥᠬᠡ ᠯᠠᠭᠤᠰᠠ ᠬᠠᠱᠠᠩ ᠬᠠᠷᠠ ᠬᠣᠶᠠᠷ ᠤᠶᠠᠭᠠᠲᠠᠢ᠃ ᠴᠠᠭᠠᠨᠠ ᠨᠢ ᠮᠥᠩᠭᠥᠨ ᠲᠣᠨᠣᠭ ᠲᠠᠢ ᠡᠮᠡᠭᠡᠯ ᠬᠠᠵᠠᠭᠠᠷ ᠢ᠋ᠶ᠋ᠠᠷ ᠵᠢᠮᠰᠡᠭᠯᠡᠭᠰᠡᠨ ᠭᠤᠨᠠᠯᠵᠠᠭᠰᠠᠨ ᠤᠷᠲᠤ ᠵᠣ ᠲᠠᠢ ᠥᠨᠳᠥᠷ ᠬᠠᠯᠲᠠᠷ ᠬᠡᠭᠡᠷ ᠪᠠ ᠵᠡᠭᠡᠷᠡ ᠶ᠋ᠢᠨ ᠰᠢᠯᠪᠢ ᠲᠡᠢ ᠲᠠᠢᠭᠠ ᠨᠣᠬᠠᠢ ᠰᠢᠭ᠋ ᠨᠢᠷᠤᠭᠤᠨ ᠳ᠋ᠠᠭᠠᠨ ᠨᠠᠭᠠᠯᠳᠤᠭᠰᠠᠨ ᠨᠠᠷᠢᠨ ᠭᠡᠳᠡᠰᠦ ᠲᠡᠢ ᠨᠠᠮ ᠪᠡᠶᠡ ᠲᠡᠢ ᠵᠠᠢᠳᠠᠩ ᠬᠦᠷᠡᠩ ᠮᠣᠷᠢ ᠤᠶᠠᠭᠠᠲᠠᠢ ᠪᠠᠢᠪᠠ᠃ ᠮᠥᠩᠭᠥᠨ ᠡᠮᠡᠭᠡᠯ ᠲᠣᠨᠣᠭᠯᠠᠯ ᠠ᠋ᠴᠠ ᠨᠢ ᠦᠵᠡᠪᠡᠯ ᠴᠤᠭᠪᠠᠭᠠᠲᠣᠷ ᠤ᠋ᠨ ᠬᠢ ᠪᠣᠯᠤᠯᠲᠠᠢ᠃
《 ᠠ᠂ ᠴᠠᠪᠠᠰᠤ ᠂ ᠡᠨᠡ ᠮᠠᠭᠤ ᠵᠣᠪᠠᠯᠭᠠ ᠪᠠᠨ ᠳᠠᠭᠠᠭᠠᠬᠤ ᠦᠭᠡᠢ ᠬᠠᠪᠤᠳᠠᠷ ᠲᠣᠯᠣᠭᠠᠢ ᠪᠠᠰᠠ ᠲᠡᠷᠡ ᠬᠣᠯᠠ ᠬᠦᠩ ᠦ᠋ᠨ ᠰᠦᠮᠡ ᠡᠴᠡ ᠪᠤᠭᠤᠲᠤ ᠣᠷᠣᠵᠤ ᠠᠩᠭᠠᠭᠰᠠᠨ ᠬᠠᠷᠠ ᠲᠠᠢᠯᠤᠭ ᠢ᠋ᠶ᠋ᠠᠨ ᠤᠰᠤᠯᠠᠳᠠᠭ ᠪᠠᠢᠵᠢ ᠠ᠋! ᠶᠠᠮᠠᠷ ᠡᠮᠡ ᠲᠡᠷᠡ ᠮᠤᠨᠠ ᠰᠢᠭ᠋ ᠨᠦᠳᠦᠭᠦᠷ ᠲᠦ᠍ ᠲᠡᠰᠬᠦ ᠪᠣᠢ?! ᠶᠣᠰᠣᠲᠠᠢ ᠯᠠ ᠰᠠᠢᠨ ᠶᠠᠪᠤᠳᠠᠯ ᠳ᠋ᠤ᠌ ᠰᠠᠭᠠᠳ ᠣᠯᠠᠨ ᠭᠡᠭᠴᠢ ᠪᠣᠯᠵᠠᠢ᠂ ᠮᠥᠨ ᠴᠤ᠌ ᠲᠣᠭᠠᠭᠦᠢ ᠶᠠ!》 ᠭᠡᠵᠦ ᠬᠡᠷᠡᠮ ᠳᠤᠭᠤᠢᠯᠠᠵᠤ ᠭᠠᠷᠤᠭᠠᠳ ᠮᠣᠷᠢ ᠪᠠᠨ ᠳᠠᠯᠳᠠ ᠰᠢᠭ᠋ ᠭᠠᠵᠠᠷ ᠤᠶᠠᠴᠢᠬᠠᠭᠠᠳ 《 ᠦᠭᠡᠢ᠂ ᠡᠳᠡ ᠳᠠᠩ ᠭᠠᠭᠴᠠ ᠷᠤᠯᠮᠠ ᠳ᠋ᠤ᠌ ᠰᠢᠨᠤᠵᠤ ᠢᠷᠡᠭᠰᠡᠨ ᠪᠢᠰᠢ ᠪᠣᠢ᠂ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠨᠢ ᠮᠡᠳᠡᠶᠡ ᠬᠦ 》 ᠭᠡᠬᠦ ᠪᠣᠳᠣᠯ ᠳ᠋ᠠᠭᠠᠨ ᠬᠥᠲᠥᠯᠦᠭᠳᠡᠨ ᠬᠡᠷᠡᠮ ᠬᠠᠷᠠᠢᠨ ᠬᠦᠷᠢᠶᠡᠨ ᠳ᠋ᠦ᠍ ᠣᠷᠣᠪᠠ᠃ ᠷᠤᠯᠮᠠ ᠶ᠋ᠢᠨ ᠭᠡᠷ ᠭᠡᠭᠴᠢ ᠨᠠᠷᠠ ᠪᠤᠷᠤᠭᠤ ᠬᠠᠨᠳᠤᠭᠰᠠᠨ ᠵᠢᠵᠢᠭ ᠳᠥᠷᠪᠡᠯᠵᠢᠨ ᠴᠣᠩᠬᠣ ᠲᠠᠢ᠂ ᠵᠤᠵᠠᠭᠠᠨ ᠴᠠᠮᠪᠠᠨ ᠬᠡᠷᠡᠮ ᠲᠡᠢ ᠲᠠᠩᠭᠤᠳ ᠮᠠᠶ᠋ᠢᠭ ᠤ᠋ᠨ ᠭᠡᠷ ᠪᠠᠢᠯᠠ᠃ ᠭᠡᠷ ᠦ᠋ᠨ ᠬᠠᠪᠢ ᠳ᠋ᠤ᠌ ᠳᠥᠭᠥᠵᠦ ᠣᠢᠷᠠᠳᠪᠠᠯ ᠳ᠋ᠠᠭᠳᠠᠨ ᠳ᠋ᠠ ᠯᠠᠮᠠ ᠶ᠋ᠢᠨ ᠪᠦᠳᠦᠭᠦᠨ ᠲᠣᠯᠣᠭᠠᠢ ᠶ᠋ᠢᠨ ᠳ᠋ᠧᠩ ᠬᠠᠯᠠᠭᠯᠠᠭᠰᠠᠨ ᠰᠡᠭᠦᠳᠡᠷ ᠵᠢᠵᠢᠭ ᠴᠣᠩᠬᠣᠨ ᠤ᠋ ᠭᠡᠷᠡᠯ ᠢ᠋ ᠬᠠᠯᠠᠭᠯᠠᠪᠠ᠃ ᠮᠠᠨᠴᠤᠷᠭᠠ ᠴᠣᠩᠬᠣᠨ ᠤ᠋ ᠣᠢᠷᠠᠬᠠᠨ ᠣᠴᠢᠵᠤ ᠴᠢᠩᠨᠠᠪᠠᠯ ᠳᠣᠲᠣᠷᠠᠬᠢ ᠬᠥᠮᠦᠰ ᠰᠡᠮᠡᠬᠡᠷ ᠬᠡᠯᠡᠯᠴᠡᠬᠦ ᠲᠤᠯᠠ ᠦᠭᠡ ᠨᠢ ᠲᠤᠳᠤ ᠰᠣᠨᠣᠰᠳᠠᠬᠤ ᠦᠭᠡᠢ᠃ ᠳᠣᠯᠢᠶᠠᠪᠤᠷ ᠬᠤᠷᠤᠭᠤ ᠪᠠᠨ ᠰᠢᠯᠦᠰᠦ ᠪᠡᠷ ᠢᠶᠡᠨ ᠨᠣᠷᠭᠠᠵᠤ ᠮᠣᠣᠲᠤᠤ ᠴᠠᠭᠠᠰᠤ ᠴᠣᠭᠣᠯᠣᠨ ᠲᠤᠲᠤᠭᠰᠢ ᠱᠠᠭᠠᠢᠪᠠᠯ ᠳ᠋ᠠᠭᠳᠠᠨ ᠳ᠋ᠠ ᠯᠠᠮᠠ᠂ ᠴᠣᠭᠪᠠᠭᠠᠲᠤᠷ᠂ ᠪᠠᠰᠠ ᠨᠢᠭᠡ ᠦᠯᠦ ᠲᠠᠨᠢᠬᠤ ᠬᠢᠲᠠᠳ ᠴᠢᠷᠠᠢ ᠲᠠᠢ ᠬᠠᠪᠴᠢᠢᠭᠰᠠᠨ ᠡᠷᠡᠦ ᠲᠡᠢ ᠳᠥᠴᠢ ᠡᠷᠭᠢᠮᠡ ᠨᠠᠰᠤᠨ ᠤ᠋ ᠬᠥᠮᠦᠨ ᠭᠤᠷᠪᠠᠭᠤᠯᠠ ᠰᠢᠷᠡᠭᠡ ᠬᠠᠪᠴᠢᠵᠤ ᠰᠠᠭᠤᠭᠠᠳ ᠶᠠᠮᠠᠷ ᠨᠢᠭᠡ ᠨᠢᠭᠤᠴᠠ ᠶᠠᠭᠤᠮᠠ ᠵᠦᠪᠳᠡᠵᠦ ᠪᠠᠢᠯᠠ᠃ ᠳ᠋ᠠᠭᠳᠠᠨ ᠳ᠋ᠠ ᠯᠠᠮᠠ ᠰᠢᠵᠠᠭᠣᠷ ᠵᠠᠭᠤᠨ ᠨᠢᠭᠡ ᠶᠠᠭᠤᠮᠠ ᠬᠣᠷᠣᠰᠤᠯᠲᠠᠢ ᠪᠠᠷ ᠳᠦᠳᠦᠨᠡᠵᠦ ᠰᠦᠬᠡᠨ ᠦ ᠡᠰᠢ ᠰᠢᠭ ᠲᠣᠮᠣ ᠲᠣᠮᠣ ᠬᠤᠷᠤᠭᠤ ᠲᠠᠢ ᠨᠢᠳᠤᠷᠭᠠ ᠪᠠᠨ ᠵᠠᠩᠭᠢᠳᠬᠤ ᠳ᠋ᠤ᠌ ᠳᠦᠭᠦᠷᠡᠩ ᠶᠠᠭᠤᠮᠠ ᠲᠦᠭᠳᠦᠢᠲᠡᠯᠡ ᠴᠢᠬᠢᠭᠰᠡᠨ ᠲᠤᠭᠤᠯ ᠤ᠋ᠨ ᠠᠷᠠᠰᠤᠨ ᠲᠤᠯᠤᠮ ᠰᠢᠭ᠋ ᠪᠦᠮᠪᠣᠢᠵᠤ ᠬᠠᠷᠠᠭᠳᠠᠨᠠ᠃ ᠴᠣᠬᠪᠠᠭᠠᠳᠤᠷ ᠬᠠᠵᠠᠭᠤ ᠠ᠋ᠴᠠ ᠨᠢ ᠳ᠋ᠠᠭᠲᠠᠨ ᠳᠠ ᠯᠠᠮᠠ ᠶ᠋ᠢᠨ ᠰᠠᠨᠠᠭᠠ ᠶ᠋ᠢ ᠨᠥᠭᠦᠭᠡ ᠬᠥᠮᠦᠨ ᠳ᠋ᠦ᠍ ᠣᠷᠴᠢᠭᠤᠯᠤᠨ ᠬᠡᠯᠡᠵᠦ᠂ ᠬᠦᠴᠦ ᠨᠡᠮᠡᠨ ᠰᠠᠨᠠᠭᠤᠯᠵᠤ ᠪᠠᠢᠭᠠ ᠰᠢᠨᠵᠢ ᠲᠡᠢ ᠃ ᠯᠠᠪᠯᠠᠨ ᠬᠠᠷᠠᠬᠤᠯᠠ ᠨᠥᠭᠦᠭᠡ ᠬᠠᠪᠴᠢᠭ ᠡᠷᠡᠦᠲᠦ ᠰᠢᠷᠡᠭᠡᠨ ᠦ᠌ ᠳᠣᠣᠭᠤᠷ ᠤᠯᠠᠭᠠᠨ ᠪᠠᠬᠠᠯᠠᠭᠠ ᠲᠠᠢ ᠶᠠᠭᠤᠮᠠ ᠤᠷᠤᠭᠤ ᠪᠠᠢᠨ ᠪᠠᠢᠨ ᠨᠢᠳᠦ ᠭᠦᠶᠦᠯᠭᠡᠵᠦ ᠠᠰᠬᠠᠭᠰᠠᠨ ᠰᠢᠰᠢ ᠲᠣᠩᠰᠢᠬᠤ ᠲᠠᠬᠢᠶᠠ ᠰᠢᠭ᠋ ᠲᠣᠯᠣᠭᠠᠢ ᠨᠢ ᠪᠥᠬᠥᠯᠵᠡᠵᠦ ᠯᠡ ᠪᠠᠢᠯᠠ᠃ ᠴᠠᠭᠠᠳᠤ ᠨᠠᠷᠢᠨ ᠬᠠᠨᠵᠤᠨ ᠳᠡᠭᠡᠷᠡ ᠷᠤᠯᠮᠠ ᠬᠠᠷᠠ ᠲᠠᠮᠡᠬᠢ ᠲᠠᠲᠠᠵᠤ ᠶᠡᠬᠡ ᠯᠡ ᠵᠢᠷᠭᠠᠭᠰᠠᠨ ᠶᠠᠩᠵᠤᠲᠠᠢ ᠨᠢᠳᠦ ᠪᠡᠨ ᠠᠨᠢᠨ ᠤᠲᠤᠬᠠ ᠪᠠᠭᠠᠭᠢᠭᠤᠯᠵᠤ ᠰᠠᠭᠤᠨᠠ᠃
ᠳ᠋ᠠᠭᠲᠠᠨ ᠳᠠ ᠯᠠᠮᠠ ᠰᠢᠷᠡᠭᠡᠨ ᠦ᠌ ᠳᠣᠣᠷᠠ ᠠ᠋ᠴᠠ ᠥᠨᠥᠬᠢ ᠤᠯᠠᠭᠠᠨ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠ ᠭᠠᠷᠭᠠᠵᠤ ᠬᠠᠪᠴᠢᠭᠠᠷ ᠡᠷᠡᠦᠲᠦ ᠳ᠋ᠦ᠍ ᠥᠭᠭᠦᠭᠡᠳ ᠡᠷᠭᠢᠵᠦ ᠬᠠᠨᠳᠤᠨ ᠱᠤᠤᠮᠠᠰᠠ ᠪᠠᠨ ᠲᠡᠮᠲᠡᠷᠢᠵᠦ ᠶᠠᠭᠤ ᠨᠢᠭᠡ ᠶᠠᠭᠤᠮᠠ ᠡᠷᠢᠵᠦ ᠬᠥᠨᠳᠡᠢ ᠨᠢᠭᠡ ᠬᠠᠨᠢᠶᠠᠬᠤ ᠳ᠋ᠤᠨᠢ ᠴᠣᠩᠬᠣᠨ ᠤ᠋ ᠮᠣᠣᠲᠤᠤ ᠴᠠᠭᠠᠰᠤ ᠱᠠᠷᠴᠢᠭᠢᠨᠠᠵᠤ ᠮᠠᠨᠴᠤᠷᠬᠠ ᠶ᠋ᠢ ᠰᠣᠴᠢᠭᠠᠪᠠ᠃ ᠬᠦᠷᠢᠶᠡᠨ ᠦ᠌ ᠭᠠᠳᠠᠨᠠ ᠤᠶᠠᠭᠠᠲᠠᠢ ᠮᠣᠷᠢᠳ ᠴᠤ᠌ ᠰᠣᠴᠢᠭᠰᠠᠨ ᠪᠣᠯᠤᠯᠲᠠᠢ ᠣᠷᠣᠨ ᠳ᠋ᠠᠭᠠᠨ ᠳᠡᠪᠬᠡᠴᠡᠯᠳᠦᠪᠡ ᠃ ᠮᠠᠨᠴᠤᠷᠭᠠ᠂ ᠡᠳᠡᠨᠦᠰ ᠦ᠋ᠨ ᠴᠣᠬᠣᠮ ᠶᠠᠭᠤ ᠬᠡᠯᠡᠯᠴᠡᠭᠰᠡᠨ ᠢ ᠲᠣᠳᠣᠷᠬᠠᠢ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠦᠭᠡᠢ ᠪᠣᠯᠪᠠᠴᠤ ᠳᠠᠲᠠᠨᠤᠰ ᠤᠨ ᠬᠥᠳᠡᠯᠦᠯ ᠪᠠᠷᠢᠯ᠂ ᠴᠢᠷᠠᠢ ᠶ᠋ᠢᠨ ᠲᠥᠯᠥᠪ᠂ ᠰᠣᠨᠣᠰᠤᠭᠰᠠᠨ ᠭᠠᠭᠴᠠ《ᠰᠢᠷᠠᠪᠲᠤᠷᠵᠢ》 ᠭᠡᠰᠡᠨ ᠦᠭᠡᠨ ᠡᠴᠡ ᠶᠠᠭᠤᠮᠠᠨ ᠤ᠋ ᠪᠠᠷᠤᠭ ᠲᠥᠯᠥᠪ ᠢ᠋ ᠭᠠᠳᠠᠷᠯᠠᠪᠠ᠃
ᠠᠳᠠ ᠬᠣᠨᠣᠵᠤ ᠪᠣᠯᠬᠤ ᠦᠭᠡᠢ ᠪᠡᠨ ᠮᠡᠳᠡᠭᠰᠡᠨ ᠮᠠᠨᠴᠤᠷᠭᠠ《ᠨᠢᠳᠤᠨᠤᠨ ᠤ᠋ ᠪᠠᠭᠤᠵᠤ ᠪᠠᠢᠭᠰᠠᠨ ᠪᠠᠭᠤᠳᠠᠯ ᠳ᠋ᠤ᠌ ᠣᠴᠢᠵᠤ ᠱᠦᠢᠰᠤᠭ ᠬᠡᠦᠬᠡᠨ ᠲᠡᠪᠡᠷᠢᠬᠦ ᠯᠠ ᠪᠣᠯᠵᠠᠢ᠃ ᠭᠡᠬᠦ ᠳ᠋ᠡᠭᠡᠨ ᠱᠦᠢᠰᠣᠭ ᠬᠡᠦᠬᠡᠨ ᠲᠡᠪᠡᠷᠢᠨᠡ ᠭᠡᠳᠡᠭ ᠴᠢᠨᠢ ᠬᠡᠯᠡᠬᠦ ᠳ᠋ᠦ᠍ ᠠᠮᠠᠷᠬᠠᠨ ᠬᠢᠬᠦ ᠳ᠋ᠦ᠍ ᠲᠦᠪᠡᠭᠲᠡᠢ᠃ ᠢᠷᠣᠭᠠᠷ ᠦᠭᠡᠢ ᠬᠡᠦᠳᠡᠢ ᠳ᠋ᠤᠨᠢ ᠨᠡᠯᠢᠶᠡᠳᠬᠡᠨ ᠶᠠᠭᠤᠮᠠ ᠬᠢᠬᠦ ᠦᠭᠡᠢ ᠪᠣᠯ ᠬᠠᠷᠢᠨ ᠮᠠᠭᠤ < ᠬᠣᠯᠬᠢᠨᠳᠠᠭ ᠭᠤᠲᠤᠯ > ᠡᠮᠦᠰᠬᠦ ᠲᠡᠢ ᠴᠦ᠍ ᠲᠠᠭᠠᠷᠠᠬᠤ ᠦᠭᠡᠢ ᠠ᠋ ! ᠵᠠ ᠪᠠᠢᠵᠠ ᠤᠤ᠂ ᠶᠠᠭᠠᠬᠢᠳᠠᠭ ᠪᠢᠯᠡ ?》 ᠭᠡᠵᠦ ᠡᠨᠡ ᠲᠡᠷᠡ ᠶᠢ ᠪᠣᠳᠣᠨ ᠱᠤ᠌ᠢᠰᠤᠭ ᠡᠮᠡ ᠶ᠋ᠢᠨ ᠣᠩᠭᠣᠷᠬᠠᠢ ᠬᠡᠦᠳᠡᠢ ᠳᠤ ᠬᠢᠬᠦ ᠮᠥᠩᠭᠥ ᠲᠠᠲᠠᠭᠤ ᠳᠠᠭᠠᠨ ᠤᠷᠮᠠ ᠨᠢ ᠠᠯᠳᠠᠷᠠᠵᠠᠢ᠃ 《ᠥᠨᠥᠳᠥᠷ ᠶᠠᠭᠠᠬᠢᠬᠤ ᠲᠠᠭᠠᠨ ᠢᠩᠭᠢᠵᠦ ᠬᠠᠷᠠ ᠡᠳᠦᠷ ᠲᠣᠬᠢᠶᠠᠪᠠ ?》 ᠭᠡᠵᠦ ᠪᠤᠴᠠᠵᠤ᠂ ᠬᠡᠷᠡᠮ ᠬᠠᠷᠠᠢᠲᠠᠯᠠ ᠤᠶᠠᠭᠠᠲᠠᠢ ᠮᠣᠷᠢᠨ ᠳ᠋ᠤ᠌ ᠬᠠᠷᠠᠴᠠ ᠨᠢ ᠲᠣᠰᠴᠤ 《ᠡᠨᠡ ᠬᠦᠷᠡᠩ ᠮᠣᠷᠢ ᠶ᠋ᠢ ᠤᠬᠠᠭᠠᠯᠠᠶᠠ》 ᠭᠡᠰᠡᠨ ᠪᠣᠳᠣᠯ ᠲᠠᠷᠢᠬᠢᠨ ᠳ᠋ᠤᠨᠢ ᠬᠠᠷᠪᠤᠨ ᠣᠷᠣᠭᠰᠠᠨ ᠳ᠋ᠤ᠌ ᠲᠡᠷᠡ ᠬᠦᠷᠡᠩ ᠮᠣᠷᠢᠨ ᠤ᠋ ᠴᠤᠯᠪᠤᠭᠤᠷ ᠢ᠋ ᠲᠠᠢᠯᠵᠤ ᠠᠪᠤᠭᠠᠳ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠤᠶᠠᠭᠠᠲᠠᠢ ᠮᠣᠷᠢ ᠤᠷᠤᠭᠤ ᠪᠠᠨ ᠬᠡᠰᠡᠭ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠨᠢᠭᠡ ᠶᠠᠭᠤᠮᠠ ᠰᠠᠨᠠᠵᠤ ᠭᠡᠳᠡᠷᠭᠦ ᠪᠤᠴᠠᠵᠤ ᠳ᠋ᠠᠭᠳᠠᠨ ᠳᠠ ᠯᠠᠮᠠ᠂ ᠴᠣᠬᠪᠠᠭᠠᠳᠤᠷ ᠤᠨ ᠮᠣᠷᠢᠨ ᠤ᠋ ᠡᠮᠡᠭᠡᠯ ᠤᠨ ᠪᠤᠷᠤᠭᠤ ᠲᠠᠯᠠ ᠶ᠋ᠢᠨ ᠬᠢᠨᠢ ᠮᠥᠩᠭᠥᠨ ᠳᠠᠷᠤᠭᠤᠯᠭᠠ᠂ ᠪᠠᠭᠠᠪᠤᠷ ᠢ᠋ ᠨᠢ ᠣᠭᠲᠣᠯᠵᠤ ᠠᠪᠤᠭᠠᠳ《ᠬᠦᠩ ᠨᠣᠶᠠᠨ ᠳ᠋ᠤ᠌ ᠠᠪᠠᠴᠢᠵᠤ ᠥᠭᠭᠦ ᠬᠦᠨᠳᠦ ᠪᠡᠯᠡᠭ 》 ᠭᠡᠵᠦ ᠥᠪᠡᠷ ᠲᠡᠭᠡᠨ ᠬᠡᠯᠡᠭᠡᠳ ᠪᠤᠰᠢᠭᠤᠬᠠᠨ ᠤᠶᠠᠭᠠᠲᠠᠢ ᠮᠤᠷᠢᠨ ᠳᠡᠭᠡᠷᠡ ᠪᠡᠨ ᠣᠴᠢᠪᠠ᠃
ᠮᠠᠨᠴᠤᠷᠭᠠ ᠲᠡᠨᠳᠡ ᠡᠴᠡ ᠬᠥᠲᠥᠯᠵᠦ ᠶᠠᠪᠤᠭᠰᠠᠨ ᠬᠦᠷᠡᠩ ᠮᠣᠷᠢ ᠶ᠋ᠢ ᠪᠤᠭᠤᠲᠤ ᠶ᠋ᠢᠨ ᠤᠷᠲᠤ ᠣᠲᠣᠭ ᠤᠷᠤᠭᠤ ᠠᠪᠠᠴᠢᠵᠤ ᠬᠠᠭᠤᠴᠢᠨ ᠨᠢᠭᠡ ᠲᠠᠨᠢᠯ ᠢ᠋ᠶ᠋ᠠᠷ ᠳᠡᠮᠵᠢᠵᠦ ᠮᠥᠩᠭᠥ ᠪᠣᠯᠭᠠᠨ ᠵᠠᠷᠤᠴᠢᠬᠠᠭᠠᠳ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠱᠣᠢᠱᠣᠭ ᠬᠡᠦᠬᠡᠨ ᠲᠡᠢ ᠪᠠᠷᠤᠭ ᠦᠦᠷ ᠴᠠᠢᠲᠠᠯᠠ ᠡᠯᠳᠡᠪ ᠢ᠋ᠶ᠋ᠡᠷ ᠱᠠᠯᠢᠭᠯᠠᠨ ᠨᠠᠭᠠᠳᠤᠭᠰᠠᠨ ᠢ᠋ᠶ᠋ᠠᠨ ᠰᠡᠭᠦᠯ ᠳ᠋ᠡᠭᠡᠨ ᠨᠠᠮ ᠤᠨᠲᠠᠭᠠᠳ ᠥᠭᠪᠡ᠃ ᠮᠠᠷᠭᠠᠲᠤᠷ ᠥᠷᠯᠥᠭᠡ ᠳ᠋ᠦ᠍ᠨᠢ ᠡᠷᠲᠡ ᠪᠣᠰᠴᠤ ᠨᠠᠮᠰᠠᠷᠠᠢ ᠪᠤᠷᠬᠠᠨᠲᠤ ᠰᠦᠮᠡ ᠶ᠋ᠢᠨ ᠨᠠᠭᠠᠭᠤᠷ ᠴᠠᠭᠠᠭᠤᠷ ᠬᠤᠲᠠᠴᠢ ᠨᠣᠬᠠᠢ ᠰᠢᠭ᠋ ᠬᠣᠯᠬᠢᠵᠤ ᠶᠠᠪᠤᠨ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠷᠤᠯᠮᠠ ᠶ᠋ᠢᠨ ᠬᠢ ᠡᠴᠡ ᠭᠠᠷᠴᠤ ᠶᠠᠪᠤᠬᠤ ᠶ᠋ᠢ ᠭᠡᠲᠡᠵᠦ ᠰᠠᠭᠤᠯᠠ᠃
ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢ ᠪᠤᠭᠤᠲᠤ ᠠ᠋ᠴᠠ ᠬᠥᠳᠡᠯᠵᠦ ᠪᠠᠷᠠᠭᠤᠨᠰᠢᠯᠠᠮᠠᠭᠴᠠ ᠲᠡᠷᠡ ᠷᠤᠯᠮᠠ ᠶ᠋ᠢᠨ ᠳ᠋ᠦ᠍ ᠬᠦᠨᠳᠦ ᠪᠡᠯᠡᠭ ᠲᠡᠢ ᠣᠷᠣᠵᠤ ᠰᠠᠢᠮᠰᠤᠷᠠᠵᠤ ᠭᠠᠷᠪᠠ᠃ ᠨᠢᠭᠡ ᠪᠠᠭᠯᠠᠭᠠ ᠰᠠᠢᠨ ᠭᠡᠭᠴᠢ ᠶ᠋ᠢᠨ ᠬᠠᠷᠠ ᠲᠠᠮᠠᠬᠢ᠂ ᠯᠤᠤ ᠮᠤᠰᠬᠢᠷᠠᠯᠳᠤᠭᠰᠠᠨ ᠬᠡ ᠲᠡᠢ ᠬᠣᠣᠰ ᠮᠥᠩᠭᠥᠨ ᠪᠠᠭᠤᠤ ᠪᠡᠯᠡᠭᠯᠡᠪᠡᠯ ᠷᠤᠯᠮᠠ ᠮᠠᠩᠨᠠᠢ ᠪᠠᠨ ᠬᠠᠭᠠᠷᠠᠲᠠᠯᠠ ᠪᠠᠶᠠᠷᠯᠠᠵᠤ ᠮᠠᠨᠴᠤᠷᠭᠠ ᠶ᠋ᠢ ᠬᠦᠵᠦᠭᠦᠳᠡᠨ ᠲᠡᠪᠡᠷᠢᠵᠦ 《ᠥᠴᠥᠭᠡᠳᠦᠷ ᠣᠷᠣᠢ ᠶᠠᠭᠠᠬᠢᠭᠠᠳ ᠢᠷᠡᠳᠡᠭ ᠦᠭᠡᠢ ᠪᠣᠢ?》ᠴᠤ᠌ ᠭᠡᠬᠦ ᠰᠢᠭ᠃ 《ᠡᠳᠦᠷ ᠢ᠋ᠶ᠋ᠡᠷ ᠶᠠᠭᠠᠬᠢᠯᠲᠠᠢ ᠶᠤᠮ ?》 ᠴᠤ᠌ ᠭᠡᠬᠦ ᠰᠢᠭ ᠥᠬᠥᠭᠡᠷᠳᠡᠨ ᠬᠤᠷᠠᠭᠠᠨ ᠨᠢᠳᠦ ᠨᠢ ᠬᠦᠰᠡᠯ ᠲᠠᠴᠢᠶᠠᠯ ᠤ᠋ᠨ ᠣᠴᠢ ᠪᠠᠷ ᠭᠢᠯᠠᠯᠵᠠᠬᠤ ᠳ᠋ᠤ᠌ ᠮᠠᠨᠴᠤᠷᠭᠠ ᠷᠤᠯᠮᠠ ᠶ᠋ᠢ ᠴᠢᠩᠬᠠ ᠲᠠᠪᠷᠢᠵᠦ ᠡᠩᠭᠡᠷ ᠤᠷᠤᠭᠤ ᠨᠢ ᠭᠠᠷ ᠢ᠋ᠶ᠋ᠠᠨ ᠰᠢᠷᠭᠤᠭᠤᠯᠵᠤ ᠬᠣᠷᠪᠣᠢᠨ ᠤᠨᠵᠢᠭᠢᠨᠠᠭᠰᠠᠨ ᠮᠥᠮᠥ ᠶ᠋ᠢ ᠨᠢ ᠢᠮᠡᠷᠴᠦ ᠢᠮᠡᠷᠴᠦ ᠲᠠᠯᠪᠢᠪᠠ᠃
— ᠥᠴᠥᠭᠡᠳᠦᠷ ᠣᠷᠣᠢ ᠡᠭᠦᠳᠡᠨ ᠳᠡᠭᠡᠷᠡ ᠴᠢᠨᠢ ᠢᠷᠡᠬᠦ ᠳ᠋ᠦ᠍ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠬᠥᠬᠡ ᠯᠠᠭᠤᠰᠠ ᠲᠠᠢ ᠣᠪᠣᠭᠠ ᠬᠡᠳᠦᠨ ᠮᠣᠷᠢ ᠤᠶᠠᠭᠠᠲᠠᠢ ᠶ᠋ᠢ ᠬᠠᠷᠠᠭᠠᠳ ᠲᠠᠨ ᠳ᠋ᠤ᠌ ᠣᠷᠣᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠁
— ᠲᠡᠷᠡ ᠮᠠᠭᠤ ᠳᠠᠮᠰᠢᠭ ! ᠥᠴᠥᠭᠡᠳᠦᠷ ᠣᠷᠣᠢ ᠢᠷᠡᠴᠢᠬᠡᠭᠡᠳ ᠪᠥᠭᠰᠡ ᠪᠡᠨ ᠴᠢᠷᠦᠭᠡᠳ ᠁ ᠭᠡᠳ ᠷᠤᠯᠮᠠ ᠮᠠᠨᠴᠤᠷᠭᠠ ᠶ᠋ᠢᠨ ᠭᠤᠶᠠ ᠶ᠋ᠢ ᠴᠢᠮᠬᠢᠨᠡ᠃
— ᠲᠡᠭᠡᠭᠡᠳ ᠠᠰᠢᠲᠠᠢᠬᠠᠨ ᠶᠤᠮ ᠤᠤ ᠳᠠ ?
— ᠰᠣᠯᠢᠶᠠᠷᠠ ᠲᠡᠷᠡ ᠴᠢᠨᠢ ᠲᠣᠮᠣᠭᠠᠲᠠᠢ ᠬᠥᠮᠦᠨ ᠰᠢᠦ! ᠭᠡᠳ ᠱᠠᠯ ᠣᠨᠳᠣᠣ ᠲᠡᠢᠰᠢ ᠶᠠᠷᠢᠪᠠ᠃
— ᠪᠢ ᠢᠷᠡᠭᠰᠡᠨ ᠪᠣᠯ ᠬᠣᠶᠠᠷ ᠪᠤᠬᠠ ᠬᠡᠷᠡᠵᠦ ᠬᠣᠨᠣᠭᠠᠳ ᠦᠢᠯᠡ ᠦᠵᠡᠨᠡ ᠳᠡ !
— ᠬᠣᠶᠠᠷ ᠪᠤᠬᠠ ᠭᠡᠨᠡ ? ᠁ ᠭᠡᠭ! ᠴᠢ ᠲᠡᠷᠡ ᠪᠦᠳᠦᠭᠦᠨ ᠮᠢᠬᠠᠨ ᠪᠠᠯᠢᠩ ᠢ᠋ ᠬᠡᠷᠡᠵᠦ ᠥᠷᠢᠰᠦᠨ ᠳᠡᠢᠯᠬᠦ ᠤᠤ ? ᠲᠡᠷᠡ ᠮᠢᠬᠠᠨ ᠣᠪᠣᠭᠠ ᠰᠢᠭ᠋ ᠳᠠᠮᠰᠢᠭ ᠲᠤ᠌ ᠲᠠᠢᠯᠳᠠᠨᠠ ᠳᠠ! ᠭᠡᠳ ᠷᠤᠯᠮᠠ ᠬᠠᠳᠠᠭᠠᠨᠠᠲᠠᠯᠠ ᠢᠨᠢᠶᠡᠨᠡ᠃
— ᠴᠢ ᠲᠡᠭᠡᠭᠡᠳ ᠲᠡᠷᠡ ᠠᠭᠤᠯᠠ ᠬᠠᠳᠠ ᠰᠢᠭ᠋ ᠮᠢᠬᠠᠨ ᠣᠪᠣᠭᠠᠨ ᠳ᠋ᠤ᠌ ᠶᠠᠭᠠᠬᠢᠬᠤ ᠳ᠋ᠠᠭᠠᠨ ᠨᠢᠴᠠ ᠳᠠᠷᠤᠭᠤᠯᠴᠢᠬᠠᠭᠰᠠᠨ ᠦᠭᠡᠢ ᠶᠦᠮ?
— ᠁
ᠷᠤᠯᠮᠠ ᠦᠭᠡ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠮᠠᠨᠴᠤᠷᠭᠠ ᠶ᠋ᠢᠨ ᠭᠤᠶᠠ ᠶ᠋ᠢ ᠪᠠᠰᠠ ᠨᠢᠭᠡ ᠴᠢᠮᠬᠢᠪᠡ᠃
— ᠳᠤᠷᠠ ᠳ᠋ᠤ᠌ ᠰᠢᠷᠠ ᠦᠭᠡᠢ ᠭᠡᠵᠦ ᠶᠠᠮᠠᠷ ᠮᠠᠭᠤ ᠡᠮᠡ ᠬᠥᠮᠦᠨ ᠴᠤ᠌ ᠭᠡᠰᠡᠨ ᠡᠷᠡ ᠳᠠᠭᠠᠭᠠᠳᠠᠭ ᠭᠡᠨᠡ ᠪᠢᠯᠡ ᠠ᠂ ᠮᠥᠨ ᠲᠡᠰᠪᠦᠷᠢᠲᠡᠢ ᠯᠦᠳ᠋ ᠶᠦᠮ ᠠ᠋ ᠴᠢ! ᠭᠡᠳ ᠥᠩᠭᠡᠷᠡᠭᠴᠢ ᠰᠥᠨᠢ ᠱᠣᠢᠱᠣᠭ ᠬᠡᠦᠬᠡᠨ ᠱᠣᠭᠰᠢᠭᠤᠯᠵᠤ ᠬᠣᠨᠣᠭᠰᠠᠨ ᠮᠠᠨᠴᠤᠷᠭᠠ ᠶ᠋ᠢᠨ ᠪᠡᠶᠡ ᠰᠤᠯᠳᠠᠢᠵᠤ ᠷᠣᠯᠮᠠ ᠲᠠᠢ ᠨᠣᠵᠣᠭᠣᠷᠠᠬᠤ ᠤᠷᠮᠠ ᠦᠭᠡᠢ ᠳ᠋ᠡᠭᠡᠨ 《ᠡᠨᠡ ᠠ᠋᠂ ᠲᠡᠷᠡ ᠠ᠋》 ᠭᠡᠵᠦ ᠬᠣᠷᠣ ᠰᠢᠷᠠ ᠮᠠᠯᠲᠠᠭᠰᠠᠨ ᠦᠭᠡ ᠲᠣᠭᠣᠷᠢᠭᠤᠯᠵᠤ ᠪᠠᠢᠭᠠᠳ ᠷᠤᠯᠮᠠ ᠶᠢᠨ ᠠᠮᠠᠨ ᠠ᠋ᠴᠠ ᠥᠴᠥᠭᠡᠳᠦᠷ ᠰᠥᠨᠢ ᠶ᠋ᠢᠨ ᠳ᠋ᠠᠭᠳᠠᠨ ᠳᠠ ᠯᠠᠮᠠ᠂ ᠴᠤᠭᠪᠠᠭᠠᠲᠤᠷ ᠨᠠᠷ ᠤ᠋ᠨ ᠶᠠᠭᠤ ᠬᠤᠤᠪᠢᠯᠳᠤᠭᠰᠠᠨ ᠢ᠋ ᠢᠷᠣᠭᠠᠷ ᠢ᠋ᠶ᠋ᠠᠷ ᠨᠢ ᠮᠡᠳᠡᠵᠦ ᠠᠪᠴᠠᠢ᠃
ᠮᠠᠨᠴᠤᠷᠭᠠ ᠮᠣᠷᠳᠠᠬᠤ ᠳ᠋ᠤ᠌ ᠷᠤᠯᠮᠠ ᠬᠦᠷᠭᠡᠵᠦ ᠭᠠᠷᠤᠭᠠᠳ ᠲᠡᠭᠦᠨ ᠦ᠌ ᠡᠮᠡᠭᠡᠯᠲᠡᠢ ᠮᠣᠷᠢ ᠶ᠋ᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
ᠥᠴᠥᠭᠡᠳᠦᠷ ᠰᠥᠨᠢ ᠡᠨᠡ ᠱᠣᠩ ᠳᠡᠭᠡᠷᠡ ᠡᠴᠡ ᠲᠡᠳᠡᠨᠦᠰ ᠨᠢᠭᠡ ᠮᠣᠷᠢ ᠪᠠᠨ ᠠᠯᠳᠠᠯᠠ ᠭᠡᠵᠦ ᠪᠠᠢᠭᠰᠠᠨ᠃ ᠥᠷᠯᠥᠭᠡᠭᠦᠷ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠮᠣᠷᠳᠠᠬᠤ ᠳ᠋ᠠᠭᠠᠨ ᠡᠮᠡᠭᠡᠯ ᠦ᠋ᠨ ᠬᠢᠨᠢ ᠪᠤᠷᠤᠭᠤ ᠲᠠᠯᠠ ᠶ᠋ᠢᠨ ᠮᠥᠩᠭᠥᠨ ᠳᠠᠷᠤᠭᠤᠯᠭᠠ᠂ ᠪᠠᠭᠠᠪᠤᠷ ᠢ᠋ ᠨᠢ ᠬᠥᠮᠦᠨ ᠣᠭᠳᠣᠯᠴᠢᠬᠠᠵᠠᠢ ᠭᠡᠳ ᠴᠠᠭᠠᠳᠤᠬᠢ ᠴᠢᠨᠢ ᠰᠦᠷᠡᠬᠡᠢ ᠭᠡᠮᠰᠢᠭᠦᠯᠡᠩ ᠶᠠᠪᠤᠭᠰᠠᠨ! 《ᠬᠡᠷᠡᠭ ᠯᠡᠪᠡᠷᠡᠴᠢᠭᠡᠪᠡ ᠤᠤ》 ᠴᠤ᠌ ᠭᠡᠵᠦ ᠪᠠᠢᠭᠰᠠᠨ ᠳᠠ ! ᠴᠢ ᠪᠢᠲᠡᠭᠡᠢ ᠯᠡ ᠮᠢᠨᠦ ᠬᠡᠯᠡᠭᠰᠡᠨ ᠢ᠋ ᠴᠠᠭᠠᠰᠢ ᠪᠠᠨ ᠳᠣᠷᠭᠢᠵᠤ ᠣᠷᠭᠢ ! ᠭᠡᠪᠡ᠃
ᠵᠠ᠂ ᠪᠤᠴᠠ᠂ ᠪᠤᠴᠠ᠂ ᠷᠤᠯᠮᠠ ᠠ᠋ ! ᠭᠡᠳ ᠮᠠᠨᠴᠤᠷᠭᠠ ᠵᠠᠮ ᠳ᠋ᠠᠭᠠᠨ ᠣᠷᠣᠪᠠ᠃ ᠷᠤᠯᠮᠠ ᠮᠠᠨᠴᠤᠷᠭᠠ ᠶ᠋ᠢᠨ ᠠᠷᠤ ᠠ᠋ᠴᠠ ᠤᠳᠠᠲᠠᠯᠠ ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠭᠠᠷ ᠳᠠᠬᠢ ᠯᠤᠤ ᠬᠡ ᠲᠡᠢ ᠰᠢᠨᠡ ᠮᠥᠩᠭᠥᠨ ᠪᠠᠭᠤᠤ ᠪᠠᠨ ᠮᠤᠯᠲᠤᠯᠵᠤ ᠬᠡᠰᠡᠭ ᠰᠢᠨᠵᠢᠵᠦ ᠦᠵᠡᠭᠡᠳ ᠢᠨᠢᠶᠡᠨ ᠳᠠᠯᠳᠠ ᠬᠢᠪᠡ᠃ ᠭᠡᠨᠡᠳᠲᠡ ᠨᠢᠭᠡ ᠬᠥᠮᠦᠨ ᠲᠡᠭᠦᠨ ᠦ᠌ ᠬᠥᠯ ᠳᠣᠣᠷᠠ ᠨᠢ ᠨᠢᠭᠡ ᠬᠡᠰᠡᠭ ᠸᠠᠭᠠᠷ ᠤ᠋ᠨ ᠬᠡᠯᠲᠡᠷᠬᠡᠢ ᠰᠢᠳᠡᠵᠦ ᠣᠬᠢᠭᠠᠳ ᠴᠢᠮᠡᠭᠡ ᠦᠭᠡᠢ ᠪᠣᠯᠪᠠ᠃
ᠪᠠᠭᠠ ᠬᠠᠲᠤᠨ ᠤ᠋ ᠪᠠᠷᠠ ᠶ᠋ᠢ ᠣᠯᠵᠤ ᠬᠠᠷᠠᠭᠰᠠᠨ ᠦᠭᠡᠢ ᠪᠣᠯᠪᠠᠴᠤ ᠂ ᠬᠦᠩ ᠨᠣᠶᠠᠨ ᠳ᠋ᠠᠭᠠᠨ 《ᠬᠦᠨᠳᠦ ᠪᠡᠯᠡᠭ》 ᠲᠡᠢ ᠣᠴᠢᠨᠠ ᠭᠡᠳ ᠮᠠᠨᠴᠤᠷᠭᠠ ᠮᠣᠷᠢᠨ ᠳ᠋ᠠᠭᠠᠨ ᠲᠠᠰᠢᠭᠤᠷ ᠥᠭᠴᠦ ᠬᠤᠷᠳᠤᠯᠠᠪᠠ᠃
ᠬᠠᠲᠠᠷᠢᠶᠠ ᠰᠠᠢᠲᠠᠢ ᠮᠣᠷᠢᠨ ᠤ᠋ ᠨᠢᠷᠤᠭᠤᠨ ᠳ᠋ᠤ᠌ ᠭᠡᠳᠡᠯᠵᠡᠵᠦ ᠶᠠᠪᠤᠬᠤ ᠭᠡᠭᠴᠢ ᠡᠷᠡ ᠬᠥᠮᠦᠨ ᠦ᠌ ᠵᠢᠷᠭᠠᠯ ᠤ᠋ᠨ ᠨᠢᠭᠡ ᠪᠢᠯᠡ᠃ ᠮᠠᠨᠴᠤᠷᠭᠠ ᠭᠠᠨᠵᠤᠭᠠ ᠳᠦᠭᠦᠷᠡᠩ ᠪᠤᠴᠠᠵᠤ ᠶᠠᠪᠤᠭᠠ ᠳ᠋ᠠᠭᠠᠨ ᠬᠦᠷᠢᠶᠡᠨ ᠦ᠌ ᠪᠡᠨ ᠡᠭᠦᠳᠡᠨ ᠳ᠋ᠦ᠍ ᠥᠨᠥᠴᠢᠷᠡᠨ ᠬᠣᠴᠣᠷᠤᠭᠰᠠᠨ ᠷᠤᠯᠮᠠ ᠶ᠋ᠢ ᠳᠣᠲᠣᠷᠠ ᠪᠠᠨ ᠦᠷᠦ ᠡᠪᠡᠳᠦᠨ《ᠠᠢ᠂ ᠬᠥᠭᠡᠷᠦᠬᠦᠢ ᠳᠡ ! ᠨᠢᠭᠡ ᠪᠡᠯᠪᠡᠰᠦᠨ ᠥᠷᠥᠭᠡᠰᠦᠨ ᠡᠮᠡ ᠬᠥᠮᠦᠨ ᠠᠵᠤ ᠠᠮᠢᠳᠤᠷᠠᠬᠤ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠨᠢᠭᠡ ᠨᠠᠰᠤᠨ ᠳ᠋ᠠᠭᠠᠨ ᠶᠠᠭᠠᠬᠢᠵᠤ ᠴᠤ᠌ ᠶᠠᠪᠤᠯᠠ ᠳᠠ! ᠪᠠᠰᠠ ᠨᠢᠭᠡ ᠦᠷᠦ ᠵᠥᠭᠡᠯᠡᠨ ᠨᠣᠮᠣᠢ ᠠᠮᠢᠲᠠᠨ ᠶᠤᠮ ᠠ᠋! ᠳᠤᠷᠠᠲᠠᠢ ᠬᠠᠢᠷᠠᠲᠠᠢ ᠶᠠᠭᠤᠮᠠ ᠶ᠋ᠢ ᠨᠢ ᠭᠠᠷᠳᠠᠭᠤᠯᠤᠭᠠᠳ ᠴᠣᠷᠪᠣᠭᠣᠷ ᠤᠷᠤᠭᠤᠯ ᠢ᠋ ᠨᠢ ᠦᠨᠦᠰᠬᠦ ᠳ᠋ᠦ᠍ ᠪᠠᠢᠳᠠᠭ ᠢ᠋ᠶ᠋ᠠᠨ ᠰᠡᠭᠰᠦᠷᠴᠦ ᠪᠢᠯᠳ᠋ᠠᠩ ᠢ᠋ᠶ᠋ᠡᠨ ᠴᠤ᠌ ᠭᠣᠭᠣᠵᠢᠭᠤᠯᠴᠢᠬᠠᠳᠠᠭ ᠨᠢ ᠡᠮᠡ ᠬᠥᠮᠥᠨ ᠪᠥᠬᠥᠨ ᠦ ᠠᠳᠠᠯᠢᠬᠠᠨ ᠵᠠᠩ ᠶᠤᠮ ᠤᠤ? ᠪᠢᠰᠢ ᠪᠠᠢᠬᠠ ᠡ! ᠭᠠᠭᠴᠠ ᠷᠤᠯᠮᠠ ᠯᠠ᠁ 》ᠭᠡᠵᠦ ᠰᠠᠨᠠᠭᠠᠨ ᠳ᠋ᠠᠭᠠᠨ ᠰᠦᠷᠡᠬᠡᠢ ᠥᠷᠥ᠍ ᠡᠪᠡᠳᠦᠨ ᠲᠡᠭᠦᠨ ᠢ ᠳᠤᠷᠠᠰᠤᠨ ᠶᠠᠪᠤᠨᠠ ᠁
– – – –
① ᠱᠣᠢᠱᠣᠭ ᠢ᠋ ᠤᠷᠠᠳ ᠤ᠋ᠳ ᠱᠣᠢᠳᠠᠨ ᠭᠡᠳᠡᠭ᠃
② ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠥᠪᠡᠭᠡᠨ ᠳ᠋ᠡᠬᠢ ᠨᠢᠭᠡ ᠵᠦᠢᠯ ᠦ᠋ᠨ ᠨᠠᠷᠢᠯᠢᠭ ᠰᠢᠪᠡᠷ ᠢ᠋ ᠤᠷᠠᠳ ᠤ᠋ᠳ ᠪᠠᠯᠳᠠᠨᠰᠣ ᠪᠤᠶᠤ ᠤᠯᠠᠭᠠᠨ ᠵᠠᠭᠠᠷᠠᠭ ᠭᠡᠳᠡᠭ᠃
③ ᠴᠢᠷᠮᠠᠢᠳᠠᠭ᠂ ᠬᠦᠴᠦᠯᠡᠳᠡᠭ ᠭᠡᠰᠡᠨ ᠤᠳᠬᠠ ᠲᠠᠢ᠃
④ ᠲᠠᠯᠪᠢᠭᠠᠳ ᠣᠴᠢᠯᠠ ᠭᠡᠰᠡᠨ ᠨᠤᠲᠤᠭ ᠤ᠋ᠨ ᠬᠡᠯᠡᠯᠭᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ <ᠬᠡᠯᠡ ᠪᠢᠴᠢᠭ> ᠬᠣᠯᠪᠣᠭᠠ