ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ < ᠳᠡᠭᠡᠳᠦ > – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ < ᠭᠤᠷᠪᠠ > Хан мунын сүүрс < дээд > – Мөнх зохиоов ᠂ Тэргүүн бодь – Нэгдүгээр бүлэг <3>
466ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ < ᠭᠤᠷᠪᠠ >
ᠭᠤᠷᠪᠠ
ᠢᠮᠠᠭᠠᠨ ᠳᠠᠭᠤᠲᠤ ᠦᠯᠵᠡᠢᠰᠠᠩ ᠤ᠋ᠨ ᠳᠠᠭᠤᠨ ᠳ᠋ᠤ᠌ ᠨᠣᠶᠠᠨ ᠰᠠᠩ ᠤ᠋ᠨ ᠵᠤᠰᠠᠭᠠᠯ ᠤ᠋ᠨ ᠬᠢᠨ ᠪᠥᠬᠡ ᠨᠣᠢᠷ ᠠ᠋ᠴᠠ ᠪᠠᠨ ᠰᠡᠷᠡᠵᠦ᠂ ᠬᠥᠮᠦᠨ ᠠᠮᠢᠲᠠᠨ ᠪᠤᠵᠢᠭᠢᠨᠠᠯᠳᠤᠪᠠ᠃
ᠮᠢᠩᠭᠠᠨᠪᠤᠤ ᠲᠤᠰᠠᠯᠠᠭᠴᠢ᠂ ᠠᠮᠤᠷ ᠢ᠋ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠦ᠋ᠨ ᠯᠢᠶᠡᠨᠵᠠᠩ ᠮᠠᠨᠴᠤᠷᠭᠠ ᠳ᠋ᠤ᠌ 《 ᠴᠢ ᠱᠠᠭᠢᠭᠰᠠᠨ ᠬᠡᠳᠦᠨ ᠴᠡᠷᠢᠭ ᠡᠷᠡ ᠶ᠋ᠢ ᠰᠣᠩᠭᠣᠵᠤ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠥᠪᠡᠭᠡ ᠪᠡᠷ ᠱᠦᠭᠦᠷᠳᠡᠵᠦ ᠰᠠᠭᠠᠯᠢᠴᠢᠨ ᠤ᠋ ᠣᠯᠣᠮ ᠢ᠋ᠶ᠋ᠠᠷ ᠳᠡᠯᠡᠳ ᠬᠣᠰᠢᠭᠤ ᠣᠷᠣᠬᠤ ᠠ᠋ᠴᠠ ᠰᠡᠷᠡᠮᠵᠢᠯᠡ! ᠪᠢ ᠠᠷᠤ ᠠᠮᠠ ᠪᠠᠷ ᠨᠢ ᠠᠮᠠᠳᠠᠶᠠ᠂ ᠵᠠ ᠣᠳᠣ ᠪᠠᠷ ᠢ᠋ᠶ᠋ᠠᠨ ᠮᠥᠷ ᠢ᠋ ᠨᠢ ᠮᠥᠰᠬᠢᠵᠦ ᠮᠣᠷᠳᠠ! ᠪᠤᠰᠢᠭᠤᠯᠤᠭᠠᠷᠠᠢ! 》 ᠭᠡᠵᠦ ᠵᠠᠬᠢᠪᠠ᠃
ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠰᠠᠯᠬᠢᠨ ᠵᠡᠭᠡᠷᠳᠡ ᠪᠡᠨ ᠡᠮᠡᠭᠡᠯᠯᠡᠵᠦ᠂ ᠣᠯᠣᠩ ᠢ᠋ ᠨᠢ ᠴᠢᠪᠴᠢᠷᠲᠡᠯᠡ ᠲᠠᠲᠠᠴᠢᠬᠠᠭᠠᠳ ᠭᠡᠷ ᠲᠡᠭᠡᠨ ᠣᠷᠣᠵᠤ ᠯᠤᠤ ᠮᠠᠭᠰᠢᠭᠰᠠᠨ ᠵᠢᠷᠤᠭ ᠢ᠋ ᠥᠯᠵᠡᠢ ᠵᠠᠩᠭᠢᠶᠠ ᠪᠠᠷ ᠭᠡᠭᠡᠯᠡᠨ ᠤᠷᠠᠯᠠᠵᠤ ᠮᠥᠩᠭᠥ ᠪᠡᠷ ᠪᠤᠯᠬᠠᠭᠰᠠᠨ ᠠᠷᠢᠬᠢᠨ ᠤ᠋ ᠰᠢᠮᠡᠭᠦᠷ ᠬᠣᠣ ᠪᠠᠨ ᠡᠪᠦᠷᠲᠦᠯᠡᠭᠡᠳ ᠭᠠᠷᠬᠤ ᠭᠡᠲᠡᠯᠡ ᠰᠠᠮᠠᠭᠠᠨ ᠨᠢ ᠮᠠᠨᠤᠨᠪᠠᠳᠮᠠ᠄
— ᠲᠤᠰᠠᠯᠠᠭᠴᠢ ᠲᠠ ᠵᠢᠭᠠᠬᠠᠨ ᠬᠠᠯᠠᠭᠤᠨ ᠶᠠᠭᠤᠮᠠ ᠤᠤᠭᠤᠴᠢᠬᠠᠭᠠᠳ ᠭᠠᠷᠬᠤ ᠶᠤᠮ ᠪᠢᠰᠢ ᠤᠤ? ᠥᠴᠥᠭᠡᠳᠦᠷ ᠦ᠋ᠨ ᠰᠢᠷᠠ ᠴᠢᠨᠢ ᠲᠠᠢᠯᠤᠭᠳᠠᠭᠠᠳᠤᠢ ᠪᠠᠢᠯᠭᠦᠢ᠃ ᠲᠡᠭᠡᠭᠡᠳ ᠥᠨᠥᠳᠥᠷ ᠪᠠᠰᠠ ᠤᠨᠤᠭᠠᠨ ᠤ᠋ ᠨᠢᠷᠤᠭᠤᠨ ᠳ᠋ᠤ᠌ ᠳᠣᠩᠰᠣᠯᠬᠤ ᠳ᠋ᠤ᠌ ᠪᠡᠶᠡ ᠶᠡᠬᠡ ᠴᠢᠯᠡᠨᠡ ᠰᠢᠦ ! ᠭᠡᠳ ᠠᠯᠢ ᠤᠵᠠᠭᠤᠷ ᠤ᠋ᠨ ᠬᠠᠯᠠᠭᠠᠵᠤ ᠲᠠᠯᠪᠢᠭᠰᠠᠨ ᠪᠤᠷᠠᠮ ᠲᠠᠢ ᠬᠠᠷᠠ ᠠᠷᠢᠬᠢ ᠶ᠋ᠢ ᠮᠥᠩᠭᠥᠨ ᠴᠥᠭᠥᠴᠡ ᠳ᠋ᠦ᠍ ᠮᠡᠯᠮᠡᠯᠵᠡᠭᠦᠯᠦᠭᠰᠡᠭᠡᠷ ᠡᠪᠦᠭᠡᠨ ᠳ᠋ᠡᠭᠡᠨ ᠪᠠᠷᠢᠪᠠ᠃
ᠡᠨᠡ ᠪᠣᠯ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠦ᠌ ᠠᠯᠢ ᠡᠷᠲᠡ ᠡᠴᠡ ᠵᠠᠩᠰᠢᠴᠢᠬᠠᠭᠰᠠᠨ ᠳᠠᠳᠬᠠᠯ᠃ ᠡᠪᠦᠭᠡᠨ ᠢ᠋ᠶ᠋ᠡᠨ ᠭᠠᠳᠠᠭᠰᠢ ᠶᠠᠭᠤᠮᠠᠨ ᠳᠤ ᠶᠠᠪᠤᠬᠤ ᠪᠣᠯᠭᠠᠨ ᠰᠦ ᠴᠠᠭᠠ ᠠᠮᠰᠠᠭᠤᠯᠵᠤ᠂ ᠨᠢᠭᠡ ᠭᠡᠮ ᠠᠷᠢᠬᠢ ᠪᠠᠷᠢᠵᠤ ᠠᠶᠠᠨ ᠤ᠋ ᠬᠢᠨᠢ ᠳᠥᠷᠥᠭᠡ ᠶ᠋ᠢ ᠴᠢᠩᠭᠠᠯᠠᠳᠠᠭ ᠠᠵᠤᠭᠤ᠃
ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠰᠠᠮᠠᠭᠠᠨ ᠤ᠋ ᠪᠠᠨ ᠪᠠᠷᠢᠭᠰᠠᠨ ᠠᠷᠢᠬᠢ ᠶ᠋ᠢ ᠴᠦ᠍ ᠭᠡᠰᠡᠨ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠢᠴᠢᠶᠡᠩᠭᠦᠢ ᠲᠣᠰᠴᠤ ᠠᠪᠳᠠᠭ ᠵᠠᠩᠰᠢᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠣᠰᠴᠤ ᠠᠪᠤᠭᠠᠳ ᠵᠡᠭᠦᠨ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠢᠳᠠᠮ ᠬᠤᠷᠤᠭᠤ ᠪᠠᠷ ᠲᠣᠭᠣᠨᠣ ᠠ᠋ᠴᠠ ᠪᠠᠨ ᠡᠬᠢᠯᠡᠨ ᠪᠤᠷᠬᠠᠨ ᠤ᠋ ᠭᠦᠩᠭᠠᠷᠠᠪᠠ ᠤᠷᠤᠭᠤ ᠪᠠᠨ ᠲᠥᠰᠦᠷᠭᠡᠨ ᠰᠡᠷᠵᠢᠮᠯᠡᠵᠦ ᠬᠠᠮᠤᠭ ᠰᠡᠬᠦᠯ ᠳ᠋ᠤᠨᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠮᠠᠩᠨᠠᠢ ᠪᠣᠯᠤᠨ ᠰᠠᠮᠠᠭᠠᠨ ᠤ᠋ ᠪᠠᠨ ᠮᠠᠩᠨᠠᠢ ᠳ᠋ᠤ᠌ ᠠᠳᠢᠰᠯᠠᠵᠤ ᠶᠣᠰᠣᠴᠢᠯᠠᠭᠰᠠᠨ ᠢ᠋ᠶ᠋ᠠᠨ ᠭᠠᠭᠴᠠᠬᠠᠨ ᠬᠥᠨᠲᠥᠷᠪᠡ᠃ ᠲᠡᠷᠡ ᠪᠡᠷ ᠬᠡᠳᠦᠨ ᠡᠳᠦᠷ ᠰᠤᠨᠵᠢᠷᠠᠭᠰᠠᠨ ᠭᠦᠩ ᠨᠣᠶᠠᠨ ᠤ ᠬᠤᠷᠢᠮ ᠤᠨ ᠤᠴᠢᠷ ᠲᠤ ᠪᠡᠶᠡ ᠰᠡᠳᠬᠢᠯ ᠴᠢᠯᠡᠭᠡᠵᠦ ᠠᠷᠢᠬᠢᠨ ᠳ᠋ᠤ᠌ ᠰᠦᠷᠡᠬᠡᠢ ᠰᠢᠷᠠᠲᠤᠭᠰᠠᠨ ᠲᠤᠯᠠ ᠪᠤᠴᠠᠯᠭᠠᠭᠰᠠᠨ ᠬᠠᠯᠠᠭᠤᠨ ᠠᠷᠢᠬᠢ ᠣᠭᠣᠴᠢᠬᠤ ᠳ᠋ᠤ᠌ ᠨᠢᠭᠡ ᠪᠥᠭᠡᠮ ᠭᠠᠯ ᠤ᠋ᠨ ᠴᠣᠭ ᠵᠠᠯᠭᠢᠭᠰᠠᠨ ᠮᠡᠲᠦ ᠪᠣᠯᠵᠤ ᠬᠣᠭᠣᠯᠠᠢ ᠶ᠋ᠢ ᠨᠢ ᠬᠤᠷᠴᠠ ᠮᠡᠰᠡ ᠪᠡᠷ ᠵᠦᠰᠦᠬᠦ ᠰᠢᠭ ᠪᠠᠢᠪᠠ᠃ ᠲᠦᠳᠡᠬᠡᠨ ᠵᠠᠭᠤᠷᠠ ᠲᠡᠭᠦᠨ ᠦ᠌ ᠮᠠᠩᠨᠠᠢ ᠳ᠋ᠤ᠌ ᠪᠤᠷᠴᠠᠭ ᠤ᠋ᠨ ᠴᠢᠨᠡᠭᠡ ᠬᠥᠯᠥᠰᠥ ᠪᠠᠳᠬᠤᠵᠣ᠂ ᠳᠣᠲᠣᠷᠠ ᠨᠢ ᠣᠩᠭᠣᠢᠪᠠ᠃
— ᠪᠠᠭᠠ ᠬᠠᠲᠤᠨ ᠲᠥᠷᠬᠥᠮ ᠳ᠋ᠡᠭᠡᠨ ᠪᠤᠴᠠᠵᠤ ᠲᠡᠨᠡᠭᠳᠡᠬᠦ ᠦᠭᠡᠢ ᠨᠢ ᠯᠠᠪ! ᠬᠠᠷᠢᠨ ᠬᠠᠳᠤᠮᠠᠯ ᠤ᠋ᠨ ᠠᠮᠠ ᠪᠠᠷ ᠠᠷᠤ ᠲᠠᠢᠰᠢ ᠪᠠᠨ ᠶᠠᠪᠤᠵᠤ ᠮᠡᠳᠡᠨᠡ ᠳᠠ! ᠡᠰᠡᠪᠡᠰᠦ ᠪᠠᠷᠠᠭᠤᠨᠰᠢᠯᠠᠵᠤ ᠴᠤ᠌ ᠮᠠᠭᠠᠳ ᠦᠭᠡᠢ᠃ ᠡᠳᠦᠷ ᠢ᠋ᠶ᠋ᠡᠷ ᠬᠠᠳᠤᠮᠠᠯ ᠤ᠋ᠨ ᠠᠮᠠ ᠪᠠᠷ ᠮᠣᠷᠢ ᠲᠠᠢ ᠨᠠᠭᠠᠰᠢ ᠴᠠᠭᠠᠰᠢ ᠡᠷᠭᠢᠴᠡᠵᠦ ᠪᠣᠯᠬᠤ ᠦᠭᠡᠢ᠃ ᠥᠨᠥᠬᠢ ᠴᠢᠨᠢ ᠰᠡᠪ ᠴᠣᠬᠢᠪᠠᠯ ᠵᠦᠭ ᠢ᠋ᠶ᠋ᠡᠨ ᠪᠤᠷᠤᠭᠤᠯᠠᠵᠤ ᠣᠷᠬᠢᠨᠠ ᠰᠢᠦ᠃ ᠰᠡᠷᠭᠦᠮᠡ ᠭᠡᠵᠦ ᠲᠣᠷᠭᠤᠳ ᠠᠢᠮᠠᠭ ᠤ᠋ᠨ ᠰᠤᠷᠪᠤᠯᠵᠢᠲᠤ ᠠᠢᠯ ᠤ᠋ᠨ ᠥᠬᠢᠨ᠃ ᠲᠡᠷᠡ ᠮᠥᠷᠲᠡᠭᠡᠨ ᠪᠢᠴᠢᠭ ᠰᠣᠶᠣᠯ ᠲᠠᠢ᠃ ᠣᠢᠷᠠ ᠣᠷᠴᠢᠮ ᠢ᠋ᠶ᠋ᠠᠷ ᠬᠥᠯ ᠲᠣᠭᠲᠠᠬᠤ ᠬᠥᠮᠦᠨ ᠪᠢᠰᠢ ᠠ᠋᠃ ᠶᠡᠬᠡ ᠬᠣᠯᠠᠴᠢ ᠪᠣᠳᠣᠯ ᠲᠠᠢ ᠪᠠᠢᠵᠤ ᠮᠠᠭᠠᠳ ᠦᠭᠡᠢ᠃ ᠴᠠᠭᠠᠳᠤ ᠬᠠᠮᠲᠤ ᠤᠷᠭᠤᠭᠰᠠᠨ ᠬᠥᠮᠦᠨ ᠨᠢ ᠴᠣᠬᠣᠮ ᠶᠠᠮᠠᠷ ᠰᠢᠦ ᠬᠥᠮᠦᠨ ᠶᠦᠮ ᠪᠣᠯ ᠳᠠ?
— ᠠ᠂ ᠮᠡᠳᠡᠬᠦ ᠦᠭᠡᠢ! ᠶᠠᠮᠠᠷ ᠴᠦ᠍ ᠪᠠᠢᠵᠤ ᠪᠣᠯᠤᠨᠠ᠃
— ᠴᠡᠷᠢᠭ ᠵᠡᠪᠰᠡᠭ ᠲᠡᠢ ᠬᠣᠯᠪᠣᠭᠠᠯᠠᠭᠰᠠᠨ ᠦᠭᠡᠢ ᠴᠦ᠍ ᠪᠣᠯ ᠶᠠᠭᠠᠮᠠᠢ! ᠵᠦᠭᠡᠷ ᠵᠠᠯᠠᠭᠤᠰ ᠤ᠋ᠨ ᠬᠠᠢᠷᠠ ᠲᠤᠶᠠ ᠶ᠋ᠢᠨ ᠤᠴᠢᠷ ᠴᠦ᠍ ᠪᠣᠯ ᠭᠠᠢᠭᠤᠢ ᠯᠠ ᠪᠠᠢᠨᠠ᠃ ᠲᠡᠢᠮᠦ ᠪᠣᠯ ᠴᠠᠭᠠᠳᠤᠭᠤᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠰᠦᠨᠡᠰᠦ ᠶ᠋ᠢ ᠨᠢ ᠰᠣᠴᠢᠭᠠᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢ ᠪᠣᠳᠣᠬᠤ ᠬᠡᠷᠡᠭᠲᠡᠢ᠃ ᠮᠠᠨᠤᠰ ᠤ᠋ᠨ ᠬᠡᠦᠬᠡᠳ ᠠᠴᠢᠷ ᠶᠠᠭᠤᠨ ᠤ᠋ ᠢᠯᠭᠠᠭᠠ ᠪᠣᠢ? ᠴᠣᠭᠪᠠᠭᠠᠲᠣᠷ ᠮᠢᠨᠢ ᠴᠦ᠍ ᠭᠡᠰᠡᠨ ᠪᠤᠭᠤᠲᠤ ᠳ᠋ᠤ᠌ ᠡᠨᠡᠭᠦᠷ ᠲᠡᠨᠡᠭᠦᠷ ᠲᠡᠨᠦᠭᠡᠳ ᠭᠠᠯᠵᠠᠭᠤ ᠲᠠᠩᠬᠢᠯ ᠨᠠᠰᠤᠨ ᠳ᠋ᠠᠭᠠᠨ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠮᠠ ᠦᠭᠡᠢ ᠬᠡᠷᠡᠭ ᠦᠢᠯᠡᠳᠴᠢᠬᠡᠭᠡᠳ ᠬᠥᠮᠦᠨ ᠠᠮᠢᠲᠠᠨ ᠢ᠋ ᠭᠠᠰᠠᠯᠭᠠᠵᠤ ᠮᠡᠳᠡᠨᠡ ᠰᠢᠦ ᠳᠡ! ᠪᠠᠭᠠ ᠬᠠᠲᠤᠨ ᠢ᠋ ᠲᠠ ᠮᠡᠨᠳᠦᠬᠡᠨ ᠠᠪᠤᠭᠠᠳ ᠢᠷᠡᠴᠢᠬᠡᠳᠡᠭ ᠴᠦ᠍ ᠪᠣᠯ ᠬᠦᠩ ᠨᠣᠶᠠᠨ ᠴᠢᠮᠠᠶ᠋ᠢ ᠳᠣᠣᠷᠠ ᠲᠣᠰᠣᠭᠠᠬᠣ ᠦᠭᠡᠢ ᠠ᠋᠃ ᠲᠡᠷᠡ ᠴᠢᠨᠢ ᠮᠠᠨ ᠤ᠋ ᠵᠠᠰᠠᠭ ᠬᠦᠩ ᠬᠦᠦ ᠲᠡᠢ ᠪᠣᠯᠬᠤ ᠰᠠᠨ ᠭᠡᠵᠦ ᠬᠥᠭᠰᠡᠵᠦ ᠠᠪᠤᠭᠰᠠᠨ ᠰᠢᠨᠡ ᠬᠠᠲᠤᠨ ᠰᠢᠦ! ᠬᠥᠭᠡᠷᠦᠬᠦᠢ! ᠪᠠᠭᠠ ᠬᠠᠲᠤᠨ ᠥᠨᠥ ᠬᠥᠮᠦᠨ ᠲᠡᠢ ᠪᠡᠨ ᠪᠤᠭᠤᠲᠤ ᠳ᠋ᠤ᠌ ᠤᠳᠠᠭᠠᠨ ᠬᠣᠷᠭᠣᠳᠠᠬᠤ ᠦᠭᠡᠢ ᠨᠢ ᠯᠠᠪ᠃ ᠬᠡᠯᠲᠦᠰᠬᠢᠪᠡᠯ ᠥᠨᠥ ᠰᠥᠨᠢ ᠳ᠋ᠡᠭᠡᠨ ᠬᠥᠳᠡᠯᠦᠨᠡ᠃ ᠦᠳᠡᠰᠢ ᠣᠷᠣᠢ ᠰᠡᠷᠡᠮᠵᠢᠲᠡᠢ ᠯᠡ ᠶᠠᠪᠤᠬᠤ ᠬᠡᠷᠡᠭᠲᠡᠢ᠃
ᠲᠤᠰᠠᠯᠠᠭᠴᠢ᠂ ᠰᠠᠮᠠᠭᠠᠨ ᠤ᠋ ᠪᠠᠨ ᠬᠡᠯᠡᠭᠰᠡᠨ ᠢ᠋ ᠵᠥᠪᠰᠢᠶᠡᠵᠦ ᠲᠡᠭᠦᠨ ᠢ᠋ ᠬᠡᠰᠡᠭ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠱᠠᠯᠠᠪ ᠮᠣᠷᠳᠠᠪᠠ᠃
ᠰᠢᠷᠠᠪᠳᠣᠷᠵᠢ ᠨᠣᠶᠠᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠵᠠᠰᠠᠭ ᠢ᠋ ᠪᠠᠷᠢᠭᠠᠳ ᠭᠤᠷᠪᠠᠨ ᠵᠢᠯ ᠦ᠋ᠨ ᠨᠢᠭᠤᠷ ᠦᠵᠡᠴᠢᠬᠡᠯᠡ᠃ ᠬᠣᠰᠢᠭᠤ ᠨᠡᠢᠲᠡ ᠶ᠋ᠢᠨ ᠶᠡᠬᠡ ᠤᠴᠢᠷ ᠲᠤ ᠰᠡᠳᠬᠢᠯ ᠲᠡᠳᠦᠢ ᠯᠡ ᠴᠢᠯᠡᠭᠡᠬᠦ ᠦᠭᠡᠢ᠂ ᠥᠩᠭᠡ ᠳᠠᠷᠠᠰᠤ᠂ ᠨᠠᠢᠷ ᠨᠠᠭᠠᠳᠤᠮ ᠳ᠋ᠤ᠌ ᠰᠢᠨᠤᠵᠤ ᠠᠮᠤᠷ ᠴᠡᠩᠭᠡᠯ ᠢ᠋ ᠬᠥᠭᠡᠭᠡᠴᠡᠯᠳᠦᠬᠦ ᠡᠴᠡ ᠥᠭᠡᠷᠡ ᠰᠣᠨᠢᠷᠬᠠᠯ ᠭᠡᠵᠦ ᠠᠯᠠᠭᠠ᠃ ᠡᠪᠦᠯ ᠬᠠᠪᠤᠷ ᠲᠠᠭᠠᠨ ᠪᠤᠭᠤᠲᠤ ᠳ᠋ᠤ᠌ ᠰᠠᠭᠤᠵᠤ᠂ ᠵᠤᠨ ᠨᠠᠮᠤᠷ ᠲᠠᠭᠠᠨ ᠵᠤᠰᠠᠯᠠᠩ ᠳ᠋ᠠᠭᠠᠨ ᠰᠠᠭᠠᠲᠠᠨ ᠵᠠᠪᠰᠠᠷ ᠴᠢᠯᠥᠭᠡᠨ ᠳ᠋ᠡᠭᠡᠨ《 ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠶ᠋ᠢᠨ ᠬᠤᠷᠠᠯ ᠴᠤᠭᠯᠠᠭᠠ ᠭᠡᠳ ᠡᠳᠦᠷ ᠬᠣᠨᠣᠭ ᠨᠥᠭᠴᠢᠭᠡᠨᠡ᠃ ᠡᠨᠡ ᠬᠣᠭᠣᠷᠣᠨᠳᠣ ᠰᠢᠷᠠᠪᠳᠣᠷᠵᠢ ᠨᠣᠶᠠᠨᠲᠠᠨ ᠭᠤᠷᠪᠠᠨ ᠬᠠᠲᠤᠨ ᠪᠠᠭᠤᠯᠭᠠᠭᠰᠠᠨ ᠪᠣᠯᠪᠠᠴᠤ ᠦᠷᠡ ᠶ᠋ᠢᠨ ᠬᠤᠳᠦᠭ᠋ ᠵᠠᠶᠠᠭᠠᠭᠰᠠᠨ ᠦᠭᠡᠢ᠃ ᠡᠨᠡ ᠨᠢ ᠤᠳᠠᠭᠠᠨ ᠳ᠋ᠠᠭᠠᠨ ᠰᠡᠳᠬᠢᠯ ᠦ᠋ᠨ ᠡᠪᠡᠳᠴᠢᠨ ᠪᠣᠯᠵᠤ ᠲᠠᠷᠢᠬᠢ ᠶ᠋ᠢ ᠨᠢ ᠭᠠᠰᠢᠯᠭᠠᠳᠠᠭ ᠪᠠᠢᠨᠠ᠃ ᠦᠷᠡ ᠦᠨᠳᠦᠰᠦ ᠦᠭᠡᠢ ᠪᠣᠯ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠠᠰᠠᠭ ᠤ᠋ᠨ ᠡᠷᠬᠡ ᠶ᠋ᠢ ᠬᠡᠨ ᠳ᠋ᠦ᠍ ᠵᠠᠯᠭᠠᠮᠵᠢᠯᠠᠭᠤᠯᠬᠤ ᠪᠣᠢ ? ᠪᠠᠰᠠ ᠯᠠ ᠡᠷᠬᠡ ᠪᠤᠯᠢᠶᠠᠯᠳᠤᠬᠤ ᠶ᠋ᠢᠨ ᠦᠨᠳᠦᠰᠦ ᠭᠡᠵᠦ ᠲᠡᠷᠡ ᠥᠪᠡᠷ ᠦ᠋ᠨ ᠥᠩᠭᠡᠷᠡᠯᠲᠡ ᠡᠴᠡ ᠪᠡᠨ ᠰᠠᠢᠨ ᠮᠡᠳᠡᠵᠦ ᠪᠠᠢᠯᠠ᠃
ᠬᠡᠳᠦ ᠬᠡᠳᠦᠨ ᠬᠠᠲᠤᠨ ᠲᠠᠲᠠᠪᠤᠷᠢ ᠱᠠᠯᠢᠵᠤ᠂ ᠲᠠᠴᠢᠶᠠᠯ ᠤ᠋ᠨ ᠰᠢᠨᠤᠯ ᠨᠢ ᠬᠡᠪ ᠢ᠋ᠶ᠋ᠡᠷ ᠠᠪᠠᠴᠤ ᠦᠷᠡ ᠡᠰᠡ ᠲᠣᠭᠲᠠᠬᠤ ᠶ᠋ᠢᠨ ᠪᠤᠷᠤᠭᠤ ᠪᠦᠬᠦᠨ ᠢ᠋ ᠬᠠᠲᠤᠳ ᠲᠠᠭᠠᠨ ᠲᠣᠬᠣᠵᠤ 《ᠴᠣᠭᠣᠷᠬᠠᠢ ᠪᠥᠭᠰᠡ ᠲᠡᠢ》 ᠡᠮᠡᠰ ᠭᠡᠵᠦ ᠵᠦᠬᠡᠳᠡᠭ ᠢ᠋ ᠨᠢ ᠬᠡᠨ ᠠᠶᠦᠮᠰᠢᠭ᠋ ᠦᠭᠡᠢ ᠪᠤᠷᠤᠭᠤ ᠭᠡᠬᠦ ᠪᠣᠢ! ᠲᠡᠭᠡᠭᠡᠳ ᠡᠨᠡ ᠨᠢ ᠨᠣᠶᠠᠳ ᠭᠡᠷᠭᠡᠮᠳᠡᠳ ᠦ᠋ᠨ ᠪᠣᠳᠠᠭᠠᠯᠢ ᠠᠷᠠᠨᠰᠢ ᠪᠠᠢᠵᠤ ᠴᠤ᠌ ᠲᠠᠭᠠᠷᠠᠨᠠ᠃ ᠭᠡᠪᠡᠴᠦ ᠵᠠᠷᠢᠮ ᠬᠥᠮᠦᠰ ᠳᠣᠣᠭᠤᠷ《ᠦᠭᠡᠢ ᠠ᠋᠂ ᠶᠡᠷᠦ ᠨᠢ ᠮᠠᠨ ᠤ᠋ ᠬᠦᠩ ᠨᠣᠶᠠᠨ ᠳ᠋ᠤ᠌ ᠲᠠᠩᠳᠠ ᠬᠦᠢᠲᠡᠨ ᠰᠦᠪᠡ ᠲᠡᠢ ᠰᠤᠪᠠᠢ ᠭᠤᠨᠵᠢ ᠲᠠᠭᠠᠷᠠᠯᠳᠤᠭᠠᠳ ᠪᠠᠢᠭᠰᠠᠨ ᠭᠡᠵᠢ ᠤᠤ ? ᠠᠯᠢ ᠡᠰᠡᠬᠦᠯᠡ ᠥᠪᠡᠷ ᠢ᠋ᠶ᠋ᠡᠨ ᠬᠠᠷᠢᠨ ᠦᠨᠢᠶᠡ ᠭᠤᠨᠵᠢ ᠰᠤᠪᠠᠢᠷᠠᠭᠤᠯᠬᠤ ᠠ᠋ᠴᠠ ᠴᠠᠭᠠᠰᠢ ᠦᠭᠡᠢ ᠰᠢᠩᠭᠡᠨ ᠦᠷᠡ ᠲᠡᠢ ᠠᠰᠠᠮᠠᠨ ᠪᠤᠬᠠ ᠰᠢᠭ᠋ ᠬᠥᠮᠦᠨ ᠤᠤ ? ᠁》 ᠭᠡᠵᠦ ᠰᠠᠮ ᠰᠢᠪᠡᠨᠡᠯᠴᠡᠬᠦ ᠪᠣᠯᠵᠠᠢ᠃
ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠬᠡᠳᠦᠨ ᠬᠠᠲᠤᠨ ᠤ᠋ ᠪᠠᠨ ᠳᠣᠲᠣᠷᠠ ᠴᠡᠴᠡᠭ ᠬᠠᠲᠤᠨ ᠳ᠋ᠠᠭᠠᠨ ᠢᠯᠡᠭᠦᠦ ᠬᠠᠢᠷᠠᠲᠠᠢ ᠪᠠᠢᠪᠠ᠃
ᠴᠡᠴᠡᠭ ᠬᠠᠲᠤᠨ ᠨᠥᠭᠥᠭᠡᠳᠦᠭᠦᠯᠡ ᠪᠡᠨ ᠪᠣᠳᠣᠪᠠᠯ ᠬᠦᠩ ᠨᠣᠶᠠᠨ ᠳ᠋ᠤ᠌ ᠨᠠᠭᠠᠯᠢᠩᠬᠠᠢ ᠡᠷᠬᠡᠯᠡᠵᠦ ᠴᠢᠳᠠᠳᠠᠭ ᠲᠡᠳᠦᠢ ᠦᠭᠡᠢ᠂ ᠡᠭᠦᠯᠡ ᠪᠣᠷᠣᠭᠠᠨ ᠤ᠋ ᠦᠢᠯᠡ ᠳ᠋ᠦ᠍ ᠡᠷᠡ ᠬᠥᠮᠦᠨ ᠦ᠌ ᠰᠦᠨᠡᠰᠦ ᠶ᠋ᠢ ᠵᠠᠮᠬᠠᠷᠠᠭᠤᠯᠤᠮᠠ ᠤᠪᠠᠳᠢᠰ ᠲᠠᠢ ᠬᠣᠢᠨᠠ ᠳᠠ᠃ ᠡᠮᠡ ᠬᠥᠮᠦᠨ ᠦ᠌ ᠬᠤᠪᠢ ᠳ᠋ᠤ᠌ ᠬᠠᠭᠰᠠᠭᠰᠠᠨ ᠢ᠋ ᠳᠡᠪᠲᠦᠭᠡᠵᠦ ᠬᠠᠲᠠᠭᠤᠷᠠᠭᠰᠠᠨ ᠢ᠋ ᠵᠥᠭᠡᠯᠡᠷᠡᠭᠦᠯᠬᠦ ᠳ᠋ᠦ᠍ ᠠᠪᠢᠶᠠᠰᠯᠢᠭ ᠪᠠᠢᠳᠠᠭ ᠲᠠᠢ ᠬᠣᠯᠪᠣᠭᠠ ᠲᠠᠢ ᠠᠵᠢ᠃ ᠢᠩᠭᠢᠬᠦᠯᠡᠷ ᠬᠦᠩ ᠨᠣᠶᠠᠨ ᠳᠡᠢᠯᠦᠩᠭᠢ ᠳ᠋ᠡᠭᠡᠨ ᠴᠡᠴᠡᠭ ᠬᠠᠲᠤᠨ ᠲᠠᠢ ᠪᠠᠨ ᠬᠠᠮᠲᠤ ᠪᠠᠢᠳᠠᠭ᠃
ᠪᠠᠭᠠ ᠬᠠᠲᠤᠨ ᠢ᠋ᠶ᠋ᠠᠨ ᠪᠠᠭᠤᠯᠭᠠᠭᠰᠠᠨ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠰᠢᠨᠡᠷᠬᠡᠵᠦ ᠬᠠᠪᠢᠳᠠᠬᠤᠯᠠᠷ ᠶᠣᠰᠣᠲᠠᠢ ᠯᠠ ᠴᠣᠴᠢᠭᠠ ᠨᠢ ᠭᠠᠷᠤᠭᠠ ᠦᠭᠡᠢ ᠣᠷᠣᠭᠠ ᠪᠠᠢᠳᠠᠰᠤ ᠲᠠᠭᠠᠷᠠᠯᠳᠤᠵᠠᠢ᠃
ᠥᠷᠯᠥᠭᠡ ᠶ᠋ᠢᠨ ᠴᠠᠢ ᠶ᠋ᠢᠨ ᠳᠠᠷᠠᠭᠠ ᠬᠦᠩ ᠨᠣᠶᠠᠨ ᠤ᠋ ᠪᠡᠶᠡ ᠨᠢ ᠡᠪᠡᠷᠰᠢᠶᠡᠵᠦ ᠡᠪᠰᠢᠶᠡᠯᠭᠡᠨᠡ᠃ ᠪᠠᠭᠠ ᠬᠠᠲᠤᠨ ᠤ᠋ ᠤᠴᠢᠷ ᠲᠤ᠌ ᠲᠣᠭᠲᠠᠪᠤᠷᠢ ᠠᠯᠲᠠᠨ ᠰᠠᠨᠠᠭᠠ ᠠᠯᠭᠠᠰᠠᠵᠤ ᠪᠠᠢᠭᠠ ᠳ᠋ᠤ᠌ ᠴᠡᠴᠡᠭ ᠬᠠᠲᠤᠨ《ᠥᠨᠥᠬᠢ ᠬᠠᠷᠠ ᠲᠠᠮᠠᠬᠢᠨ ᠤ᠋ ᠬᠢᠨᠢ ᠬᠣᠷᠣᠬᠠᠢ ᠨᠢ ᠬᠥᠳᠡᠯᠵᠡᠢ》ᠭᠡᠳ ᠲᠠᠮᠠᠬᠢᠨ ᠤ᠋ ᠳ᠋ᠧᠩ᠂ ᠲᠣᠭᠣᠭᠠ᠂ ᠲᠠᠯᠪᠢᠭᠤᠷ ᠣᠢᠷᠠᠲᠤᠭᠤᠯᠵᠤ ᠥᠭᠪᠡ᠃ ᠬᠦᠩ ᠨᠣᠶᠠᠨ ᠴᠡᠴᠡᠭ ᠬᠠᠲᠤᠨ ᠲᠠᠢ ᠪᠠᠨ ᠳ᠋ᠧᠩ ᠬᠠᠪᠴᠢᠵᠤ ᠬᠠᠷᠠ ᠲᠠᠮᠠᠬᠢ ᠲᠠᠲᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠭᠡᠷ ᠳᠦᠭᠦᠷᠡᠩ ᠰᠣᠨᠢᠬᠠᠨ ᠦᠨᠦᠷ ᠰᠡᠩᠭᠢᠨᠡᠪᠡ᠃ ᠬᠦᠩ ᠨᠣᠶᠠᠨ ᠭᠠᠩᠰᠠᠨ ᠤ᠋ ᠲᠣᠭᠣᠭᠠᠨ ᠳ᠋ᠤ᠌ ᠰᠢᠵᠢᠭᠢᠨᠡᠨ ᠪᠤᠴᠠᠯᠤᠭᠰᠠᠨ ᠬᠠᠷᠠ ᠲᠠᠮᠠᠬᠢᠨ ᠠ᠋ᠴᠠ ᠪᠤᠷᠭᠢᠯᠤᠭᠰᠠᠨ ᠪᠣᠷᠣ ᠤᠲᠤᠭᠠ ᠶ᠋ᠢ ᠰᠢᠨᠤᠯᠲᠠᠢᠬᠠᠨ ᠰᠣᠷᠣᠵᠤ ᠬᠡᠰᠡᠭ ᠤᠳᠠᠭᠰᠠᠨ ᠢ᠋ᠶ᠋ᠠᠨ ᠴᠠᠳᠬᠤᠯᠳᠠᠭᠰᠠᠨ ᠪᠤᠬᠠ ᠰᠢᠭ᠋ ᠭᠦᠤᠱ ᠬᠢᠨ ᠤᠷᠲᠤᠬᠠᠨ ᠭᠡᠭᠴᠢ ᠦᠯᠢᠶᠡᠨᠡ᠃ ᠳᠡᠭᠡᠷᠡ ᠡᠴᠡ ᠨᠢ ᠬᠥᠷᠥᠭᠡᠭᠰᠡᠨ ᠰᠦ ᠲᠡᠢ ᠴᠠᠢ ᠣᠭᠣᠴᠢᠵᠤ 《 ᠶᠣᠬᠣ !》ᠭᠡᠳ ᠪᠡᠶᠡ ᠨᠢ ᠲᠠᠯᠪᠢᠭᠳᠠᠨ ᠠᠷᠤᠨᠰᠢ ᠪᠠᠨ ᠭᠤᠯᠠᠰᠪᠠ᠃
ᠬᠥᠲᠥᠴᠢ ᠡᠭᠦᠳᠡ ᠲᠠᠲᠠᠵᠤ 《 ᠬᠦᠩ ᠨᠣᠶᠠᠨ ᠠ᠋ ᠂ ᠵᠡᠭᠦᠨ ᠲᠤᠰᠠᠯᠠᠭᠴᠢ ᠲᠠᠨ ᠲᠠᠢ ᠪᠠᠷᠠᠳᠠᠶᠠ ᠭᠡᠵᠦ ᠪᠠᠢᠨᠠ 》 ᠭᠡᠵᠦ ᠠᠶᠠᠯᠭᠤᠯᠠᠨ ᠮᠡᠳᠡᠭᠡᠯᠡᠬᠦ ᠳ᠋ᠦ᠍ ᠨᠣᠶᠠᠨᠲᠠᠨ ᠵᠡᠭᠦᠨ ᠲᠤᠰᠠᠯᠠᠭᠴᠢ ᠡᠯᠳᠡᠩᠭᠡ ᠬᠦᠩ ᠨᠣᠶᠠᠨ ᠳ᠋ᠤ᠌ ᠪᠠᠷᠠᠳᠠᠷᠠ ᠵᠠᠯᠠᠷᠠᠨ ᠪᠠᠭᠤᠪᠠ᠃
— ᠵᠠ᠂ ᠠᠮᠤᠷ ᠰᠠᠢᠨ ? ᠰᠠᠢᠬᠠᠨ ᠨᠣᠢᠷᠰᠤᠪᠠ ᠤᠤ ? ᠨᠣᠶᠠᠨᠲᠠᠨ ⁈
— ᠰᠠᠢᠬᠠᠨ ᠨᠣᠢᠷᠰᠤᠬᠤ ᠴᠦ᠍ ᠭᠡᠵᠢ ᠳᠡ ᠂ ᠡᠨᠡ ᠮᠠᠭᠤ ᠱᠤᠯᠤᠮ ᠨᠣᠢᠷ ᠴᠠᠯᠭᠢᠭᠤᠯᠵᠤ ᠬᠠᠷᠠ ᠡᠷᠲᠡ ᠠᠨᠢᠰᠬᠠ ᠨᠡᠭᠡᠭᠡᠯᠭᠡᠴᠢᠬᠡᠯᠡ! ᠴᠢᠰᠤ ᠶ᠋ᠢ ᠬᠦ ! ᠭᠡᠳ ᠬᠦᠩ ᠨᠣᠶᠠᠨ ᠠᠭᠤᠷᠲᠠᠢ ᠥᠭᠦᠯᠡᠨᠡ᠃
ᠵᠡᠭᠦᠨ ᠲᠤᠰᠠᠯᠠᠭᠴᠢ ᠡᠷᠲᠡ ᠶ᠋ᠢᠨ ᠮᠡᠨᠳᠦ ᠮᠡᠳᠡᠭᠰᠡᠨ ᠳ᠋ᠦ᠍ ᠬᠦᠩ ᠨᠣᠶᠠᠨ ᠵᠡᠭᠦᠨ ᠲᠤᠰᠠᠯᠠᠭᠴᠢ ᠶ᠋ᠢᠨ ᠭᠠᠷ ᠠ᠋ᠴᠠ ᠠᠯᠲᠠᠨ ᠪᠦᠰᠡᠯᠡᠭᠦᠷ᠂ ᠱᠢᠷᠤᠨ ᠲᠣᠯᠣᠭᠠᠢ ᠲᠠᠢ ᠠᠳᠬᠤ ᠳᠦᠭᠦᠷᠡᠩ ᠮᠠᠨᠤ ᠬᠥᠬᠦᠦᠷ ᠢ᠋ ᠲᠣᠰᠴᠤ ᠬᠠᠮᠠᠷ ᠲᠠᠭᠠᠨ ᠨᠠᠭᠠᠯᠳᠤᠭᠤᠯᠵᠤ ᠦᠨᠦᠰᠦᠭᠡᠳ᠄
— ᠡᠨᠡ ᠮᠠᠭᠤ ᠱᠤᠯᠤᠮ ᠶᠡᠷᠦ ᠨᠢ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠨᠡᠷᠡ ᠶ᠋ᠢ ᠭᠤᠲᠤᠭᠠᠬᠤ ᠨᠢ ᠠ᠋! ᠭᠡᠳ ᠰᠥᠨᠢ ᠡᠪᠦᠷ ᠲᠤᠨᠢ ᠣᠷᠣᠵᠤ ᠮᠥᠮᠥ ᠶ᠋ᠢᠨ ᠬᠢᠨᠢ ᠴᠡᠴᠡᠭ ᠢ᠋ ᠲᠡᠮᠲᠡᠷᠢᠬᠦ ᠭᠡᠬᠦ ᠳ᠋ᠦ᠍ ᠤᠴᠤᠭᠤᠰᠬᠢᠨ ᠳᠠᠯᠳᠢᠷᠠᠵᠤ ᠵᠢᠰ ᠵᠡᠰ ᠴᠢᠬᠠᠷᠠᠨ ᠬᠠᠪᠴᠢᠭᠠᠨᠠᠵᠤ ᠭᠡᠳᠡᠭᠡ ᠴᠣᠴᠢᠭᠠ ᠨᠢ ᠭᠠᠷᠤᠭᠠ ᠦᠭᠡᠢ ᠪᠠᠢᠭᠰᠠᠨ ᠢ᠋ ᠰᠠᠨᠠᠨ᠄
— ᠳᠠᠩᠴᠤ ᠨᠢᠭᠡ ᠤᠷᠭᠠ ᠶ᠋ᠢᠨ ᠬᠤᠢᠪᠢ ᠳ᠋ᠤ᠌ ᠰᠠᠶᠢ ᠯᠠ ᠨᠣᠮᠣᠬᠠᠷᠠᠭᠰᠠᠨ ᠣᠷᠣᠭᠠ ᠪᠠᠢᠳᠠᠰᠤ ᠰᠢᠭ᠋ ᠴᠠᠪᠢ ᠶ᠋ᠢᠨ ᠬᠢᠨᠢ ᠬᠥᠬᠡ ᠮᠢᠬᠠ ᠨᠢ ᠴᠡᠴᠡᠷᠡᠨ ᠭᠠᠷ ᠲᠠᠯᠪᠢᠭᠤᠯᠬᠤ ᠦᠭᠡᠢ ᠪᠠᠢᠭᠰᠠᠨ ᠨᠢ ᠴᠠᠭᠠᠨᠠ ᠪᠠᠨ ᠨᠢᠭᠡ ᠤᠴᠢᠷ ᠲᠠᠢ ᠪᠠᠢᠵᠢ ᠳᠠ ᠴᠢᠭᠢᠶᠡᠲᠦᠷᠦᠦ ! ᠭᠡᠪᠡ᠃
ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠦᠭᠡ ᠳᠠᠭᠤᠨ ᠦᠭᠡᠢ ᠪᠣᠳᠣᠯᠭᠠ ᠪᠣᠯᠵᠤ ᠮᠠᠨᠤ ᠬᠥᠬᠦᠦᠷ ᠦ᠋ᠨ ᠢ᠋ᠶ᠋ᠡᠨ ᠱᠢᠷᠤᠨ ᠲᠠᠭ ᠤ᠋ᠨ ᠮᠥᠩᠭᠥᠨ ᠬᠡᠯᠡ ᠪᠡᠷ ᠡᠷᠡᠬᠡᠢ ᠬᠤᠷᠤᠭᠤᠨ ᠤ᠋ ᠪᠠᠨ ᠬᠢᠮᠤᠰᠤᠨ ᠤ᠋ ᠲᠣᠯᠢᠨ ᠳ᠋ᠤ᠌ ᠴᠢᠮᠬᠢ ᠲᠠᠮᠠᠬᠢ ᠤᠨᠠᠭᠠᠵᠤ ᠬᠠᠮᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ 《 ᠡᠪᠰᠢ ᠡᠪᠰᠢ》 ᠭᠡᠵᠦ ᠰᠤᠷᠤᠭᠠᠳ ᠬᠦᠩ ᠨᠣᠶᠠᠨ ᠤ᠋ ᠴᠢᠷᠠᠢ ᠶ᠋ᠢ ᠲᠣᠭᠣᠮᠵᠢᠷ ᠦᠭᠡᠢ ᠰᠢᠷᠲᠡᠨᠡ᠃
ᠳᠣᠯᠣᠭᠠᠨ ᠬᠣᠰᠢᠭᠤ ᠳᠣᠷᠭᠢᠵᠤ᠂ ᠨᠠᠢ᠍ᠮᠠᠨ ᠬᠣᠰᠢᠭᠤ ᠨᠠᠷᠭᠢᠭᠰᠠᠨ ᠨᠢᠵᠢᠭᠡᠷ ᠬᠤᠷᠢᠮ ᠬᠢᠴᠢᠬᠡᠭᠡᠳ 《 ᠬᠠᠲᠤᠨ ᠤ᠋ ᠪᠠᠨ ᠬᠡᠦᠬᠡᠨ ᠳᠡᠭᠡᠵᠢ》 ᠶ᠋ᠢ ᠨᠢ ᠠᠮᠰᠠᠭᠠ ᠦᠭᠡᠢ ᠠᠯᠳᠠᠭᠠᠳ ᠲᠠᠭᠤᠴᠢᠬᠠᠬᠤ ᠨᠢ ᠴᠣᠬᠣᠮ ᠨᠢᠭᠤᠷ ᠲᠠᠭᠠᠨ ᠨᠣᠬᠠᠢ ᠶ᠋ᠢᠨ ᠪᠠᠭᠠᠰᠤ ᠪᠢᠯᠳᠠᠭᠰᠠᠨ ᠶᠠᠪᠤᠳᠠᠯ ᠪᠣᠯᠵᠠᠢ ᠭᠡᠵᠦ ᠬᠦᠩ ᠨᠣᠶᠠᠨ ᠪᠣᠳᠣᠨ ᠪᠣᠳᠣᠨ ᠴᠢᠬᠤᠯᠳᠠᠵᠤ ᠬᠡᠰᠡᠭ ᠬᠣᠷᠣᠨ ᠳ᠋ᠠᠭᠠᠨ ᠬᠣᠭᠣᠯᠠᠢ ᠨᠢ ᠴᠡᠴᠡᠷᠡᠨᠡ ᠁
— ᠥᠨᠥᠬᠢ ᠴᠢᠨᠢ ᠲᠡᠭᠡᠭᠡᠳ ᠥᠨᠥᠳᠥᠷ ᠰᠠᠢᠨ ᠴᠢᠮᠡᠭᠡ ᠳᠣᠭᠣᠯᠭᠠᠬᠤ ᠨᠢ ᠤᠤ? ᠬᠠᠷᠢᠨ ᠴᠢᠬᠢᠨ ᠦ᠌ ᠬᠤᠯᠤᠭᠤ ᠬᠠᠳᠬᠤᠭᠰᠠᠨ ᠶᠠᠭᠤᠮᠠ ᠰᠤᠨᠤᠰᠬᠠᠬᠤ ᠨᠢ ᠤᠤ?
— ᠭᠥᠨᠭ ᠨᠤᠶᠠᠨ ᠲᠠ ᠰᠡᠳᠬᠢᠯ ᠴᠢᠯᠡᠭᠡᠷᠬᠡᠯ ᠦᠭᠡᠢ ᠰᠠᠭᠠᠲᠠᠵᠤ ᠪᠠᠢᠭᠠᠷᠠᠢ !ᠰᠠᠢᠨ ᠴᠢᠮᠡᠭᠡ ᠳᠤᠭᠤᠯᠭᠠᠬᠤ ᠪᠠᠢᠯᠭᠦᠢ᠃
— ᠵᠠ᠂ ᠠᠮᠠᠨ ᠤ ᠪᠡᠯᠭᠡ ᠪᠡᠷ ᠪᠤᠯᠲᠤᠭᠠᠢ !
— ᠪᠠᠷᠠᠭᠤᠨ ᠳᠤᠰᠠᠯᠠᠭᠴᠢ ᠠᠷᠤ ᠠᠮᠠ ᠵᠢ ᠠᠮᠠᠳᠠᠵᠤ᠂ ᠮᠠᠨᠴᠤᠷᠭᠠ ᠤᠷᠳᠤ ᠣᠯᠣᠮ ᠢ ᠳᠤᠰᠤᠭᠰᠠᠨ ᠶᠤᠮ ᠴᠢᠨᠢ ᠬᠠᠮᠢᠭᠠ ᠲᠣᠭᠲᠠᠭᠠᠬᠤ ᠪᠣᠢ⁈
— ᠬᠠᠷᠢᠨ ᠪᠦᠷ ᠵᠡᠭᠦᠨᠰᠢᠯᠡᠴᠢᠭᠡᠬᠦ ᠶᠤᠮ ᠪᠢᠰᠢ ᠪᠢᠵᠡ ⁈
— ᠠ ᠂ ᠲᠡᠷᠡ ᠭᠠᠢᠭᠤᠢ ᠪᠣᠢ ᠂ ᠪᠤᠭᠤᠲᠤ ᠶ᠋ᠢᠨ ᠠᠲᠠᠷ ᠬᠠᠭᠠᠯᠪᠤᠷᠢᠯᠠᠬᠤ ᠲᠣᠪᠴᠢᠶᠠᠨ ᠤ᠋ ᠸᠠᠩ ᠳ᠋ᠤ᠌ ᠥᠳᠥᠲᠦ ᠪᠢᠴᠢᠭ ᠬᠢᠵᠦ ᠰᠠᠩ ᠤ᠋ᠨ ᠲᠠᠬᠠᠷ ᠢ᠋ ᠬᠠᠷᠠ ᠡᠷᠲᠡ ᠪᠡᠷ ᠶᠠᠪᠤᠭᠤᠯᠤᠭᠰᠠᠨ! ᠪᠤᠭᠤᠲᠤ ᠠ᠋ᠴᠠ ᠵᠡᠭᠦᠨᠰᠢᠯᠡᠬᠦ ᠪᠣᠭᠣᠮᠠ ᠪᠠᠭᠠᠯᠵᠠᠭᠤᠷ ᠢ᠋ ᠬᠠᠰᠢᠵᠤ ᠴᠠᠭᠠᠰᠢ ᠪᠡᠨ ᠰᠠᠭᠠᠯᠢᠴᠢᠨ ᠤ᠋ ᠭᠦᠸᠧ ᠲᠤᠸᠠᠨᠵᠠᠩ ᠳ᠋ᠤ᠌ ᠴᠦ᠍ ᠵᠠᠬᠢᠶᠠ ᠪᠢᠴᠢᠭ ᠵᠠᠯᠭᠠᠭᠤᠯᠬᠤ ᠢ ᠨᠠᠢᠢᠳᠠᠭᠰᠠᠨ ᠰᠠᠨ ᠭᠡᠬᠦ ᠳᠦ ᠭᠥᠩ ᠨᠣᠶᠠᠨ ᠤ ᠨᠢᠳᠦ ᠨᠢ ᠠᠭᠱᠠᠨᠠ ᠭᠡᠷᠡᠯᠲᠦᠵᠦ ᠄
— ᠵᠠ ᠂ ᠳᠣᠷᠢᠭᠤᠨ ᠪᠣᠯᠤᠯᠠ! ᠭᠡᠪᠡ
— ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠶᠠᠪᠤᠭᠰᠠᠨ ᠤ᠋ ᠳᠡᠭᠡᠷᠡ ᠮᠠᠨᠴᠤᠷᠭᠠ ᠶᠠᠪᠤᠯᠴᠠᠵᠤ ᠬᠣᠶᠠᠭᠤᠯᠠ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠨᠢ ᠬᠠᠪᠴᠢᠬᠤ ᠳ᠋ᠤ᠌ ᠪᠠᠲᠠᠭᠠᠨᠠ ᠰᠢᠮᠠᠭᠤᠯ ᠴᠦ᠍ ᠮᠤᠯᠲᠤᠷᠠᠬᠤ ᠦᠭᠡᠢ ᠭᠡᠵᠦ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ ᠮᠠᠨᠴᠤᠷᠭᠠ ᠬᠣᠶᠠᠷ ᠢ᠋ ᠮᠠᠭᠲᠠᠭᠰᠠᠨ ᠨᠢ ᠦᠨᠡᠨ ᠳ᠋ᠡᠭᠡᠨ 《 ᠡᠯᠳᠡᠩᠭᠡ ᠪᠢ ᠪᠠᠢᠭᠰᠠᠨ ᠴᠠᠭ ᠲᠤ᠌ ᠡᠨᠡ ᠬᠣᠷᠸᠠ ᠳ᠋ᠤ᠌ ᠮᠢᠨᠦ ᠪᠣᠳᠣᠭᠰᠠᠨ ᠠ᠋ᠴᠠ ᠭᠠᠷᠬᠤ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ 》ᠭᠡᠰᠡᠨ ᠰᠠᠨᠠᠭᠠ ᠠᠭᠤᠯᠤᠭᠰᠠᠨ ᠨᠢ ᠬᠦᠩ ᠨᠣᠶᠠᠨ ᠳ᠋ᠤ᠌ ᠢᠯᠡ ᠪᠠᠢᠪᠠ᠃
— ᠠ! ᠪᠢ ᠶᠡᠷᠦ ᠨᠢ ᠵᠡᠭᠦᠨ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠠᠷᠰᠯᠠᠨ ᠪᠠᠷᠰ ᠰᠢᠭ᠋ ᠬᠣᠶᠠᠷ ᠲᠤᠰᠠᠯᠠᠭᠴᠢ ᠲᠠᠢ ᠳ᠋ᠠᠭᠠᠨ ᠨᠢᠷᠤᠭᠤ ᠭᠡᠲᠡᠬᠡᠷ ᠯᠡ ᠳᠡ! ᠮᠠᠨᠴᠤᠷᠭᠠ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠪᠣᠯ ᠶᠠᠷᠢᠯᠲᠠ ᠦᠭᠡᠢ᠃ ᠶᠣᠰᠣᠲᠠᠢ ᠯᠠ ᠡᠴᠢᠭᠡ ᠶ᠋ᠢᠨ ᠬᠦᠦ ᠭᠡᠰᠡᠨ ᠦᠭᠡ ᠭᠡᠳ ᠬᠦᠩ ᠨᠣᠶᠠᠨ ᠬᠥᠭ ᠬᠥᠭ ᠭᠡᠵᠦ ᠬᠣᠭᠣᠯᠵᠠᠭᠤᠷ ᠳᠣᠲᠣᠷᠠ ᠪᠠᠨ ᠪᠢᠲᠡᠭᠦᠦ ᠢᠨᠢᠶᠡᠨᠡ᠃
ᠡᠯᠳᠡᠩᠭᠡ ᠵᠡᠭᠦᠨ ᠲᠤᠰᠠᠯᠠᠭᠴᠢ ᠦᠨᠡᠬᠡᠷ ᠰᠢᠷᠠᠪᠲᠤᠷᠵᠢ ᠬᠦᠩ ᠳ᠋ᠦ᠍ ᠭᠠᠪᠢᠶᠠ ᠲᠠᠢ ᠬᠥᠮᠦᠨ ᠭᠡᠭᠴᠢ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠨ ᠦᠭᠡᠢ᠃ ᠤᠷᠠᠳ ᠤᠨ ᠪᠠᠷᠠᠭᠤᠨ ᠬᠥᠭ ᠦ᠋ᠨ ᠬᠤᠰᠢᠭᠤᠨ ᠤ᠋ ᠠᠷᠪᠠᠨ ᠵᠢᠷᠭᠤᠳᠤᠭᠠᠷ ᠦᠶᠡ ᠶ᠋ᠢᠨ ᠵᠠᠰᠠᠭ ᠬᠦᠩ ᠭᠡᠰᠢᠭᠳᠡᠯᠭᠡᠷ ᠡᠵᠡ ᠬᠣᠢᠰᠢ ᠵᠠᠰᠠᠭ ᠭᠥᠩ ᠰᠠᠭᠤᠷᠢ ᠪᠤᠯᠢᠶᠠᠯᠴᠠᠬᠤ ᠲᠡᠮᠡᠴᠡᠯ ᠡᠭᠦᠰᠦᠭᠰᠡᠨ ᠪᠢᠯᠡ᠃ ᠭᠡᠰᠢᠭᠳᠡᠯᠭᠡᠷ ᠭᠥᠩ ᠨᠣᠶᠠᠨ ᠠᠴᠠ ᠬᠥᠪᠡᠭᠦᠨ ᠦᠭᠡᠢ ᠪᠣᠯᠬᠣᠷ ᠬᠠᠶᠠᠯᠢᠦᠨ ᠪᠤᠶᠤ ᠦᠶᠡᠯᠢᠦᠨ ᠬᠥᠪᠡᠭᠦᠳ ᠡᠴᠡ ᠨᠢ ᠨᠡᠷᠡ ᠰᠤᠩᠭᠤᠵᠤ ᠰᠠᠭᠤᠷᠢᠨ ᠵᠠᠯᠭᠠᠮᠵᠢᠯᠠᠭᠣᠯᠬᠤ ᠬᠡᠷᠡᠭᠲᠡᠢ ᠪᠠᠢᠯᠠ᠃ ᠡᠨᠡ ᠦᠶᠡ ᠳᠦ ᠵᠢᠯᠢᠭ᠌ᠴᠢ ᠭᠡᠰᠢᠭᠳᠡᠯᠭᠡᠷ ᠭᠥᠩ ᠨᠣᠶᠠᠨ ᠤ ᠬᠠᠶᠠᠯᠢᠦᠨ ᠳᠡᠭᠦᠦ ᠪᠣᠯᠬᠤ ᠬᠦᠩ ᠦ᠋ᠨ ᠰᠦᠮᠡ ᠶ᠋ᠢᠨ ᠳ᠋ᠠᠭᠳᠠᠨ ᠳ᠋ᠠ ᠯᠠᠮᠠ ᠥᠪᠡᠷ ᠦ᠋ᠨ ᠲᠦᠷᠦᠭᠰᠡᠨ ᠠᠴᠢ ᠬᠥᠪᠡᠭᠦᠨ ᠪᠠᠲᠤᠪᠠᠶᠠᠷ ᠢ᠋ᠶ᠋ᠠᠨ ᠵᠠᠰᠠᠭ ᠬᠦᠩ ᠦ᠋ᠨ ᠰᠠᠭᠤᠷᠢᠨ ᠳ᠋ᠤ᠌ ᠭᠠᠷᠭᠠᠬᠤ ᠭᠡᠵᠦ ᠤᠷᠳᠤᠭᠤᠷ ᠬᠣᠢᠭᠤᠷ ᠭᠦᠶᠦᠯᠳᠦᠨ ᠤᠯᠠᠭᠠᠨᠴᠠᠪ ᠤ᠋ᠨ ᠴᠢᠭᠤᠯᠭᠠᠨ ᠢ᠋ᠶ᠋ᠠᠷ ᠵᠥᠪᠰᠢᠶᠡᠷᠡᠭᠦᠯᠵᠦ ᠠᠮᠵᠢᠭᠠᠳ ᠳᠡᠭᠡᠭᠰᠢ ᠪᠡᠨ ᠵᠠᠩᠵᠤᠨ ᠶᠠᠮᠤᠨ ᠳ᠋ᠤ᠌ ᠮᠡᠳᠡᠭᠦᠯᠵᠦ ᠪᠠᠲᠤᠯᠠᠭᠤᠯᠬᠤ ᠪᠠᠷ ᠪᠣᠯᠪᠠ᠃
ᠡᠨᠡ ᠬᠣᠭᠣᠷᠣᠨᠳᠣ ᠵᠡᠭᠦᠨ ᠲᠤᠰᠠᠯᠠᠭᠴᠢ ᠡᠯᠳᠡᠩᠭᠡ ᠭᠠᠷ ᠬᠤᠮᠢᠵᠤ ᠵᠦᠭᠡᠷ ᠰᠠᠭᠤᠭᠰᠠᠨ ᠦᠭᠡᠢ ᠂ ᠰᠠᠭᠤᠷᠢᠨ ᠵᠠᠯᠭᠠᠮᠵᠢᠯᠠᠬᠤ ᠲᠡᠮᠡᠴᠡᠯ ᠳ᠋ᠦ᠍ ᠢᠳᠡᠪᠬᠢᠲᠡᠶ ᠣᠷᠣᠯᠴᠠᠵᠠᠢ᠃ ᠲᠡᠷᠡ ᠪᠡᠷ ᠵᠠᠰᠠᠭ ᠬᠦᠩ ᠦ᠋ᠨ ᠭᠡᠷ ᠦ᠋ᠨ ᠴᠠᠳᠢᠭ ᠢ᠋ ᠨᠠᠷᠢᠪᠴᠢᠯᠠᠨ ᠰᠢᠭᠦᠵᠦ ᠦᠵᠡᠭᠡᠳ ᠯᠠᠮᠠ ᠭᠠᠷᠤᠯ ᠲᠠᠢ ᠰᠢᠷᠠᠪᠲᠤᠷᠵᠢ ( ᠭᠡᠰᠢᠭᠳᠡᠯᠭᠡᠷ ᠬᠦᠩ ᠨᠣᠶᠠᠨ ᠤ᠋ ᠠᠴᠢ ᠬᠥᠪᠡᠭᠦᠨ ) ᠢ᠋ ᠰᠣᠩᠭᠣᠵᠤ ᠰᠠᠭᠤᠷᠢᠨ ᠳ᠋ᠤ᠌ ᠭᠠᠷᠭᠠᠬᠤ ᠭᠡᠵᠦ ᠰᠢᠭᠤᠷᠬᠠᠢ ᠵᠢᠳᠬᠦᠵᠦ ᠪᠠᠢᠪᠠ᠃ ᠳ᠋ᠠᠭᠳᠠᠨ ᠳ᠋ᠠ ᠯᠠᠮᠠ ᠶᠢᠨ ᠠᠴᠢ ᠭᠥᠪᠡᠬᠦᠨ ᠪᠠᠲᠤᠪᠠᠶᠠᠷ ᠵᠠᠰᠠᠭ ᠪᠠᠷᠢᠪᠠᠯ ᠥᠪᠡᠷ ᠲᠦ ᠨᠢ ᠮᠠᠰᠢ ᠠᠰᠢᠭ ᠦᠭᠡᠢ᠂ ᠠᠶᠠ ᠦᠭᠡᠢᠳᠡᠪᠡᠯ ᠳᠤᠰᠠᠯᠠᠭ᠌ᠴᠢ ᠪᠠᠨ ᠴᠤ᠌ ᠬᠤᠰᠤᠭᠤᠯᠵᠤ ᠮᠡᠳᠡᠨᠡ ᠭᠡᠳᠡᠭ ᠢ ᠲᠡᠷᠡ ᠪᠡᠷ ᠰᠠᠢᠨ ᠮᠡᠳᠡᠵᠦ ᠪᠠᠢᠪᠠ᠃
ᠵᠡᠭᠦᠨ ᠲᠤᠰᠠᠯᠠᠭᠴᠢ ᠡᠯᠳᠡᠩᠭᠡ ᠪᠣᠯ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠨᠠᠷᠢᠨ ᠲᠤᠩᠭᠠᠵᠤ ᠨᠢᠮᠪᠠᠢ ᠰᠡᠳᠬᠢᠨ ᠪᠡᠶᠡ ᠳ᠋ᠡᠭᠡᠨ ᠠᠰᠢᠭᠲᠠᠢ ᠲᠠᠯᠠ ᠶ᠋ᠢ ᠬᠠᠮᠤᠷᠳᠠᠭ ᠬᠥᠮᠦᠨ᠃ ᠰᠢᠷᠠᠪᠳᠤᠷᠵᠢ ᠪᠣᠯᠣᠨ ᠪᠠᠲᠤᠪᠠᠶᠠᠷ ᠬᠣᠶᠠᠷ ᠪᠣᠯ ᠵᠢᠯᠢᠭ᠌ᠴᠢ ᠬᠦᠩ ᠨᠣᠶᠠᠨ ᠤ᠋ ᠦᠶᠡᠯᠢᠳ ᠬᠠᠶᠠᠯᠢᠳ ᠠᠴᠢ ᠬᠥᠪᠡᠭᠦᠨ ᠪᠣᠯᠳᠠᠭ ᠢ᠋ ᠬᠥᠮᠦᠨ ᠪᠦᠭᠦᠳᠡ ᠮᠡᠳᠡᠨᠡ᠃ ᠡᠯᠳᠡᠩᠭᠡ ᠰᠢᠷᠠᠪᠳᠤᠷᠵᠢ ᠶᠢ ᠰᠤᠩᠭᠤᠵᠤ ᠪᠠᠲᠤᠪᠠᠶᠠᠷ ᠢ ᠲᠦᠯᠬᠢᠳᠡᠭ ᠨᠢ ᠭᠠᠭᠴᠠᠬᠠᠨ ᠵᠣᠷᠢᠯᠭᠠ ᠲᠠᠢ ᠂ ᠰᠢᠷᠠᠪᠲᠤᠷᠵᠢ ᠨᠣᠮᠣᠬᠠᠨ ᠳᠣᠷᠣᠢ᠂ ᠥᠪᠡᠷ ᠦ᠋ᠨ ᠵᠣᠷᠢᠯᠲᠠ ᠬᠠᠷᠠᠯᠲᠠ ᠭᠡᠵᠦ ᠪᠠᠢᠳᠠᠭ ᠦᠭᠡᠢ᠂ ᠬᠥᠮᠥᠨ ᠦ ᠦᠭᠡᠨ ᠳᠦ ᠠᠮᠠᠷᠬᠠᠨ ᠣᠷᠣᠳᠠᠭ ᠡᠮᠵᠡᠭ ᠲᠠᠯᠠ ᠲᠠᠢ ᠶᠢ ᠡᠯᠳᠡᠩᠭᠡ ᠠᠯᠢ ᠤᠵᠠᠭᠤᠷ ᠤᠨ ᠦᠭᠡᠢ ᠮᠡᠳᠡᠳᠡᠭ ᠤᠴᠢᠷ ᠠᠴᠠ ᠰᠢᠷᠠᠪᠳᠤᠷᠵᠢ ᠶ᠋ᠢ ᠭᠥᠩ ᠨᠣᠶᠠᠨ ᠤ ᠰᠠᠭᠤᠷᠢᠨ ᠳᠤ ᠭᠠᠷᠭᠠᠴᠢᠬᠠᠪᠠᠯ ᠲᠡᠭᠦᠨ ᠦ ᠲᠣᠬᠢᠯᠲᠠ ᠪᠠᠷ ᠵᠢᠷᠤᠭᠠᠯᠠᠨᠠ᠃
ᠢᠩᠬᠢᠭᠡᠳ ᠲᠡᠷᠡ᠂ ᠰᠢᠷᠠᠪᠳᠣᠷᠵᠢ ᠶᠢ ᠵᠠᠰᠠᠭ ᠭᠥᠩ ᠦᠨ ᠰᠠᠭᠤᠷᠢᠨ ᠢ ᠵᠠᠯᠭᠠᠮᠵᠢᠯᠠᠭᠤᠯᠬᠤ ᠨᠢ ᠵᠦᠢ ᠶᠣᠰᠣᠨ ᠤ ᠤᠴᠢᠷ ᠪᠣᠯᠬᠤ ᠶᠢ ᠳᠡᠭᠡᠭᠰᠢ ᠳᠣᠷᠣᠭ᠍ᠰᠢ ᠬᠥᠮᠥᠰ ᠲᠦ ᠬᠦᠯᠢᠶᠡᠯᠭᠡᠬᠦ ᠨᠠᠷᠢᠨ ᠤᠬᠠᠭᠠᠨ ᠢ ᠰᠦᠪᠡᠭᠴᠢᠯᠡᠭᠰᠡᠨ ᠪᠠᠢᠭᠠ᠃ ᠰᠦᠮᠡ ᠭᠡᠢᠳ ᠲᠦ ᠨᠠᠰᠤ ᠪᠠᠨ ᠳᠠᠭᠠᠳᠬᠠᠨ ᠬᠤᠩᠬᠤ ᠲᠠᠮᠠᠷᠤ ᠲᠠᠢ ᠬᠠᠨᠢᠯᠠᠵᠤ ᠨᠣᠮ ᠤᠨ ᠳᠠᠭᠤᠨ ᠳᠤ ᠳᠠᠰᠤᠭᠰᠠᠨ ᠳ᠋ᠠᠭᠳᠠᠨ ᠳ᠋ᠠ ᠯᠠᠮᠠ ᠬᠦᠷᠲᠡᠯᠡ ᠵᠠᠰᠠᠭ ᠲᠤ ᠭᠠᠷ ᠲᠥᠷᠥᠵᠦ᠂ ᠥᠪᠡᠷ ᠦᠨ ᠰᠠᠨᠠᠭᠰᠠᠨ ᠳ᠋ᠠᠭᠠᠨ ᠬᠦᠷᠬᠦ ᠭᠡᠵᠦ ᠥᠩᠭᠡᠯᠵᠡᠵᠦ ᠪᠠᠢᠬᠤ ᠳᠤ ᠵᠠᠰᠠᠭ ᠭᠥᠩ ᠦᠨ ᠶᠡᠬᠡ ᠲᠣᠭᠣᠭᠠ ᠰᠠᠬᠢᠭ᠍ᠰᠠᠨ᠂ ᠤᠬᠠᠭᠠᠨ ᠢᠶᠠᠷ ᠬᠡᠨ ᠡᠴᠡ ᠴᠤ᠌ ᠲᠣᠲᠠᠬᠤ ᠦᠭᠡᠢ ᠪᠢ ᠡᠨᠡ ᠬᠦ᠌ ᠵᠠᠪᠰᠠᠷ ᠤᠨ ᠳᠠᠯᠢᠮ ᠢᠶᠠᠷ ᠶᠡᠬᠡ ᠦᠢᠯᠡ ᠶᠢ ᠪᠦᠲᠦᠭᠡᠬᠦ ᠵᠣᠷᠢᠯᠭᠠ ᠳ᠋ᠠᠭᠠᠨ ᠡᠰᠡ ᠬᠥᠷᠪᠡᠯ ᠶᠣᠰᠣᠲᠠᠢ 《 ᠡᠷᠡ ᠮᠣᠷᠢ ᠬᠠᠷᠠᠢᠭᠰᠠᠨ ᠳ᠋ᠠᠭᠠᠨ ᠬᠦᠷᠴᠦ ᠴᠢᠳᠠᠬᠤ ᠦᠭᠡᠢ ᠪᠣᠯ ᠲᠤᠭᠤᠷᠠᠢ ᠨᠢ ᠬᠠᠲᠠᠵᠤ ᠦᠷᠭᠦᠳᠡᠭ᠂ ᠡᠷᠡ ᠬᠥᠮᠥᠨ ᠵᠣᠷᠢᠭ᠌ᠰᠠᠨ ᠳ᠋ᠠᠭᠠᠨ ᠬᠦᠷᠴᠦ ᠳᠡᠢᠯᠬᠦ ᠦᠭᠡᠢ ᠪᠣᠯ ᠡᠯᠢᠭᠡ ᠨᠢ ᠬᠠᠭᠰᠠᠵᠤ ᠦᠬᠦᠳᠡᠭ》 ᠭᠡᠵᠦ ᠨᠠᠮᠠᠶ᠋ᠢ ᠯᠠ ᠬᠡᠯᠡᠭᠰᠡᠨ ᠦᠭᠡ ᠪᠠᠢᠬᠤ ᠭᠡᠵᠦ ᠪᠣᠳᠣᠨᠠ᠃ ᠢᠩᠬᠢᠭᠡᠳ ᠲᠡᠷᠡ ᠪᠡᠷ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠪᠢᠴᠢᠭᠡᠴᠢ ᠶ᠋ᠢᠨ ᠠᠯᠪᠠ ᠣᠯᠠᠨ ᠵᠢᠯ ᠬᠠᠭᠠᠵᠤ ᠂ ᠠᠯᠪᠠᠨ ᠪᠢᠴᠢᠭ ᠬᠢᠬᠦ ᠂ ᠡᠪ ᠵᠢᠷᠤᠮ ᠬᠦᠷᠭᠡᠬᠦ ᠵᠠᠮ ᠮᠥᠷ ᠢ᠋ ᠰᠠᠢᠨ ᠮᠡᠳᠡᠳᠡᠭ ᠣᠴᠢᠷ ᠠ᠋ᠴᠠ ᠶᠣᠰᠣᠲᠠᠢ ᠯᠠ ᠨᠢᠭᠡ 《 ᠲᠢᠭ᠋ ᠲᠠᠭ 》 ᠭᠡᠰᠡᠨ ᠡᠷᠭᠦᠮᠵᠢᠯᠡᠬᠦ ᠪᠢᠴᠢᠭ ᠬᠢᠵᠦ ᠬᠤᠰᠢᠭᠤᠨ ᠤ᠋ ᠮᠡᠢᠷᠡᠨ᠂ ᠠᠷᠪᠠᠨ ᠬᠣᠶᠠᠷ ᠰᠣᠮᠣᠨ ᠤ᠋ ᠵᠠᠯᠠᠨ ᠵᠠᠩᠭᠢ ᠶ᠋ᠢᠨ ᠭᠠᠷ ᠤ᠋ᠨ ᠦᠰᠦᠭ ᠡᠨᠡ ᠲᠡᠷᠡ ᠶ᠋ᠢ ᠪᠦᠷᠢᠳᠦᠭᠦᠯᠦᠨ ᠬᠣᠰᠢᠭᠤ ᠠᠷᠠᠳ ᠤ᠋ᠨ ᠪᠦᠭᠦᠳᠡ ᠶ᠋ᠢᠨ ᠰᠠᠨᠠᠯ ᠢ᠋ ᠲᠥᠯᠥᠭᠡᠯᠡᠬᠦᠢᠴᠡ ᠶᠠᠭᠤᠮᠠ ᠪᠣᠯᠭᠠᠵᠤ ᠳᠡᠭᠡᠭᠰᠢ ᠡᠷᠭᠦᠪᠡ᠃ ᠲᠡᠷᠡ ᠪᠠᠰᠠ ᠠᠴᠢᠶᠠ ᠬᠡᠯᠪᠡᠢᠪᠡᠯ ᠠᠶᠠᠨ ᠤ᠋ ᠵᠣᠪᠠᠯᠠᠩ ᠭᠡᠭᠴᠢ ᠶ᠋ᠢ ᠰᠠᠢᠨ ᠮᠡᠳᠡᠳᠡᠭ ᠬᠥᠮᠦᠨ ᠪᠠᠢᠵᠠᠢ᠃ ᠲᠡᠮᠡᠭᠡᠨ ᠳ᠋ᠡᠭᠡᠨ ᠲᠡᠩᠨᠡᠭᠰᠡᠨ ᠠᠴᠢᠶᠠ ᠪᠠᠨ ᠲᠡᠩᠴᠡᠭᠦᠬᠡᠨ ᠪᠠᠢᠯᠭᠠᠶᠠ ᠭᠡᠳ ᠡᠵᠡᠨ ᠨᠣᠶᠠᠨ ᠳ᠋ᠤ᠌ ᠬᠦᠨᠳᠦ ᠪᠡᠯᠡᠭ ᠲᠡᠢ ᠣᠴᠢᠵᠤ ᠬᠦᠨᠳᠦᠳᠬᠡᠨ ᠪᠠᠷᠠᠳᠠᠬᠤ ᠳ᠋ᠠᠭᠠᠨ ᠠᠭᠲᠠ᠂ ᠱᠠᠷ᠂ ᠠᠳᠠ᠂ ᠢᠷᠭᠡ᠂ ᠰᠡᠷᠬᠡ ᠲᠠᠪᠤᠨ ᠬᠣᠰᠢᠭᠤᠲᠤ ᠶ᠋ᠢᠨ ᠬᠡᠰᠢᠭ ᠡᠴᠡ ᠶᠢᠰᠦ ᠶᠢᠰᠦ ᠨᠠᠶᠠᠨ ᠨᠢᠭᠡ ᠳᠡᠭᠡᠷᠡ ᠵᠢᠷᠭᠤᠭᠠᠨ ᠲᠠᠪᠢᠲᠤ ᠶ᠋ᠢᠨ ᠴᠣᠬᠣᠷ ᠶᠤᠸᠠᠮᠪᠤᠤ ᠵᠡᠷᠭᠡ ᠪᠠᠩ ᠰᠡᠯᠲᠡ ᠶ᠋ᠢ ᠬᠢᠲᠠᠳ ᠤ᠋ᠨ ᠲᠠᠭᠠᠯᠠᠯ ᠳ᠋ᠤ᠌ ᠵᠠᠮ ᠰᠢᠯᠤᠭᠤᠳᠬᠠᠭᠴᠢ ᠵᠢᠷᠣᠭᠠ 《 ᠵᠢᠷᠭᠤᠭᠠ 》 ᠶ᠋ᠢᠨ ᠲᠣᠭᠠᠲᠤ ᠪᠡᠯᠡᠭ ᠰᠡᠯᠲᠡ ᠡᠷᠭᠦᠭᠰᠡᠨ ᠡᠴᠡ ᠭᠠᠳᠠᠨᠠ᠂ ᠵᠠᠩᠵᠤᠨ ᠶᠠᠮᠤᠨ ᠤ᠋ ᠡᠵᠡᠨ ᠨᠣᠶᠠᠨ ᠳ᠋ᠤ᠌ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠪᠤᠭᠤ ᠶ᠋ᠢᠨ ᠬᠢᠷᠵᠠᠩ ᠬᠣᠶᠠᠷ ᠰᠢᠷᠬᠡᠭ ᠰᠡᠮᠡᠬᠡᠷ ᠰᠢᠷᠭᠤᠭᠤᠯᠵᠤ ᠴᠢᠳᠠᠭᠰᠠᠨ ᠠ᠋ᠴᠠ ᠵᠠᠩᠵᠤᠨ ᠶᠠᠮᠤᠨ ᠡᠯᠳᠡᠩᠭᠡ ᠶ᠋ᠢ ᠶᠡᠬᠡ ᠴᠢᠳᠠᠪᠤᠷᠢᠲᠠᠢ ᠬᠥᠮᠦᠨ ᠭᠡᠵᠦ ᠲᠣᠭᠣᠭᠰᠠᠨ ᠪᠠᠢᠨᠠ᠃
ᠴᠠᠭᠠᠭᠴᠢᠨ ᠬᠣᠨᠢᠨ ᠵᠢᠯ ᠦ᠋ᠨ ᠬᠠᠪᠤᠷ ᠵᠠᠩᠵᠤᠨ ᠶᠠᠮᠤᠨ ᠠ᠋ᠴᠠ ᠵᠢᠩᠬᠢᠨᠢ ᠠᠯᠪᠠᠨ ᠪᠢᠴᠢᠭ ᠪᠠᠭᠤᠯᠭᠠᠵᠤ ᠰᠢᠷᠠᠪᠲᠤᠷᠵᠢ ᠶᠢ ᠤᠯᠠᠭᠠᠨᠴᠠᠪ ᠤ᠋ᠨ ᠴᠢᠭᠤᠯᠭᠠᠨ ᠤ᠋ ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠤ᠋ ᠠᠷᠪᠠᠨ ᠳᠣᠯᠣᠳᠤᠭᠠᠷ ᠦᠶᠡ ᠶ᠋ᠢᠨ ᠵᠠᠰᠠᠭ ᠬᠦᠩ ᠨᠣᠶᠠᠨ ᠤ᠋ ᠰᠠᠭᠤᠷᠢᠨ ᠳ᠋ᠤ᠌ ᠰᠠᠭᠤᠬᠤ ᠪᠠᠢᠰᠠ ᠬᠦᠩ ᠨᠣᠶᠠᠨ ᠤ᠋ ᠵᠡᠷᠭᠡ ᠳ᠋ᠦ᠍ ᠳᠡᠪᠰᠢᠭᠦᠯᠵᠦ ᠵᠠᠩᠵᠤᠨ ᠶᠠᠮᠤᠨ ᠳ᠋ᠤ᠌ ᠳᠠᠩᠰᠠᠯᠠᠭᠤᠯᠪᠠ ᠃ ᠡᠢᠨ ᠬᠦ᠌ ᠬᠡᠴᠢᠨᠡᠭᠡᠨ ᠵᠢᠯ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠵᠠᠰᠠᠭ ᠤ᠋ᠨ ᠰᠠᠭᠤᠷᠢ ᠪᠤᠯᠢᠶᠠᠯᠳᠤᠭᠰᠠᠨ ᠬᠠᠶᠠᠯᠢᠳ ᠦᠶᠡᠯᠢᠳ ᠬᠣᠶᠠᠷ ᠠᠴᠢ ᠬᠥᠪᠡᠭᠦᠨ ᠦ᠌ ᠵᠠᠷᠭᠤ ᠰᠢᠷᠠᠪᠲᠤᠷᠵᠢ ᠬᠦᠩ ᠦ᠋ᠨ ᠰᠠᠭᠤᠷᠢᠨ ᠳ᠋ᠤ᠌ ᠰᠠᠭᠤᠭᠰᠠᠨ ᠢ᠋ᠶ᠋ᠠᠷ ᠲᠠᠰᠤᠯᠤᠭᠳᠠᠪᠠ ᠃ ᠳ᠋ᠠᠭᠳᠠᠨ ᠳ᠋ᠠ ᠯᠠᠮᠠ ᠳᠡᠪᠡᠯ ᠳ᠋ᠡᠭᠡᠨ ᠪᠠᠭᠲᠠᠨ ᠶᠠᠳᠠᠲᠠᠯᠠ ᠠᠭᠤᠷᠯᠠᠵᠤ 《 ᠰᠢᠷᠠᠪᠲᠤᠷᠵᠢ ᠰᠢᠭ᠋ ᠴᠢᠳᠠᠯ ᠦᠭᠡᠢ ᠦᠬᠦᠭᠡᠨᠴᠡ ᠠᠮᠢᠲᠠᠨ ᠶᠠᠭᠠᠬᠢᠵᠤ ᠵᠠᠰᠠᠭ ᠪᠠᠷᠢᠬᠤ ᠶ᠋ᠢ ᠨᠢ ᠨᠢᠭᠡ ᠦᠵᠡᠶᠡ ᠳᠡ ᠃ ᠶᠣᠰᠣᠲᠠᠢ ᠢᠴᠢᠭᠦᠷᠢ ᠶ᠋ᠢᠨ ᠲᠤᠢᠯ! ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠠᠨᠠᠭᠤᠯ ᠵᠠᠰᠠᠭ ᠤ᠋ᠨ ᠪᠠᠯᠢᠩ ᠁》 ᠡᠨᠡ ᠲᠡᠷᠡ ᠭᠡᠵᠦ ᠬᠠᠷᠢᠶᠠᠭᠰᠠᠨ ᠢ᠋ ᠠᠳᠠ ᠥᠭᠦᠯᠡᠪᠡᠴᠦ ᠦᠯᠦ ᠪᠠᠷᠠᠨᠠ᠃
ᠳ᠋ᠠᠭᠳᠠᠨ ᠳ᠋ᠠ ᠯᠠᠮᠠ ᠢᠯᠠᠭᠳᠠᠯ ᠳ᠋ᠠᠭᠠᠨ ᠵᠦᠭᠡᠷ ᠰᠠᠭᠤᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠨᠢᠭᠡ ᠪᠦᠯᠦᠭ ᠰᠦᠵᠢᠭᠲᠡᠨ ᠠᠷᠠᠳ ᠢ᠋ ᠥᠳᠥᠭᠡᠨ ᠰᠦᠮᠡ ᠬᠡᠢᠳ ᠱᠠᠰᠢᠨ ᠰᠤᠷᠲᠠᠬᠤᠨ ᠤ᠋ ᠡᠲᠡᠭᠡᠳ ᠦ᠋ᠨ ᠬᠢᠨ ᠢ᠋ ᠪᠡᠶᠡ ᠳ᠋ᠡᠭᠡᠨ ᠲᠠᠲᠠᠵᠤ ᠰᠢᠷᠠᠪᠲᠤᠷᠵᠢ ᠬᠦᠩ ᠨᠣᠶᠠᠨ ᠤ᠋ ᠮᠠᠨᠠᠭᠤᠯ ᠵᠠᠰᠠᠭ ᠲᠠᠢ ᠡᠰᠡᠷᠭᠦᠴᠡᠯᠳᠦᠬᠦ ᠵᠠᠪᠰᠠᠷ ᠱᠠᠭᠠᠢᠨ ᠵᠠᠪᠰᠢᠶᠠᠨ ᠬᠦᠯᠢᠶᠡᠵᠦ ᠰᠠᠭᠤᠪᠠ᠃
ᠵᠥᠪ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠵᠢᠷᠣᠭᠠ ᠮᠣᠷᠢᠨ ᠳ᠋ᠤ᠌᠂ ᠪᠤᠷᠤᠭᠤ ᠲᠠᠯᠠ ᠪᠠᠷᠠ ᠪᠠᠨ ᠪᠤᠯᠭᠢᠶᠠ ᠮᠣᠷᠢᠨ ᠳ᠋ᠤ᠌ ᠮᠣᠷᠳᠠᠵᠤ ᠴᠢᠳᠠᠬᠤ ᠡᠯᠳᠡᠩᠭᠡ ᠲᠡᠢ ᠳᠤᠭᠠᠩ ᠲᠣᠭᠣᠷᠢᠭᠰᠠ ᠳ᠋ᠠᠭᠳᠠᠨ ᠳ᠋ᠠ ᠯᠠᠮᠠ ᠶ᠋ᠢᠨ ᠬᠥᠬᠡ ᠯᠠᠭᠤᠰᠠ ᠶᠠᠭᠠᠬᠢᠵᠤ ᠭᠦᠢᠴᠡᠬᠦ ᠪᠣᠢ ᠳᠠ ! ᠲᠣᠭᠣᠰᠣᠨ ᠳ᠋ᠤᠨᠢ ᠬᠠᠬᠠᠵᠤ ᠦᠬᠦᠨᠡ ᠳᠡ ! ᠬᠥᠭᠡᠷᠦᠬᠦᠢ ᠭᠡᠵᠦ ᠨᠢᠭᠡ ᠦᠶᠡ ᠬᠥᠮᠦᠰ ᠴᠠᠢ ᠶ᠋ᠢᠨ ᠵᠣᠭᠣᠭ ᠪᠣᠯᠭᠠᠵᠤ ᠱᠤᠤᠭᠢᠭᠠᠳ ᠥᠩᠭᠡᠷᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ <ᠬᠡᠯᠡ ᠪᠢᠴᠢᠭ> ᠬᠣᠯᠪᠣᠭᠠ